𑁮. 𑀫𑀳𑀸𑀲𑀻𑀳𑀦𑀸𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑀅𑀘𑁂𑀮𑀓𑀲𑁆𑀲𑀧𑀯𑀢𑁆𑀣𑀼𑀯𑀡𑁆𑀡𑀦𑀸

𑁩𑁮𑁧. 𑀏𑀯𑀁 𑀫𑁂 𑀲𑀼𑀢𑀁…𑀧𑁂… 𑀉𑀭𑀼𑀜𑁆𑀜𑀸𑀬𑀁 𑀯𑀺𑀳𑀭𑀢𑀻𑀢𑀺 𑀫𑀳𑀸𑀲𑀻𑀳𑀦𑀸𑀤𑀲𑀼𑀢𑁆𑀢𑀁. 𑀢𑀢𑁆𑀭𑀸𑀬𑀁 𑀅𑀧𑀼𑀩𑁆𑀩𑀧𑀤𑀯𑀡𑁆𑀡𑀦𑀸. 𑀉𑀭𑀼𑀜𑁆𑀜𑀸𑀬𑀦𑁆𑀢𑀺 𑀉𑀭𑀼𑀜𑁆𑀜𑀸𑀢𑀺 𑀢𑀲𑁆𑀲 𑀭𑀝𑁆𑀞𑀲𑁆𑀲𑀧𑀺 𑀦𑀕𑀭𑀲𑁆𑀲𑀧𑀺 𑀏𑀢𑀤𑁂𑀯 𑀦𑀸𑀫𑀁, 𑀪𑀕𑀯𑀸 𑀉𑀭𑀼𑀜𑁆𑀜𑀸𑀦𑀕𑀭𑀁 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑀢𑀺. 𑀓𑀡𑁆𑀡𑀓𑀢𑁆𑀣𑀮𑁂 𑀫𑀺𑀕𑀤𑀸𑀬𑁂𑀢𑀺 𑀢𑀲𑁆𑀲 𑀦𑀕𑀭𑀲𑁆𑀲 𑀅𑀯𑀺𑀤𑀽𑀭𑁂 𑀓𑀡𑁆𑀡𑀓𑀢𑁆𑀣𑀮𑀁 𑀦𑀸𑀫 𑀏𑀓𑁄 𑀭𑀫𑀡𑀻𑀬𑁄 𑀪𑀽𑀫𑀺𑀪𑀸𑀕𑁄 𑀅𑀢𑁆𑀣𑀺. 𑀲𑁄 𑀫𑀺𑀕𑀸𑀦𑀁 𑀅𑀪𑀬𑀢𑁆𑀣𑀸𑀬 𑀤𑀺𑀦𑁆𑀦𑀢𑁆𑀢𑀸 ‘‘𑀫𑀺𑀕𑀤𑀸𑀬𑁄’’𑀢𑀺 𑀯𑀼𑀘𑁆𑀘𑀢𑀺, 𑀢𑀲𑁆𑀫𑀺𑀁 𑀓𑀡𑁆𑀡𑀓𑀢𑁆𑀣𑀮𑁂 𑀫𑀺𑀕𑀤𑀸𑀬𑁂. 𑀅𑀘𑁂𑀮𑁄𑀢𑀺 𑀦𑀕𑁆𑀕𑀧𑀭𑀺𑀩𑁆𑀩𑀸𑀚𑀓𑁄. 𑀓𑀲𑁆𑀲𑀧𑁄𑀢𑀺 𑀢𑀲𑁆𑀲 𑀦𑀸𑀫𑀁. 𑀢𑀧𑀲𑁆𑀲𑀺𑀦𑁆𑀢𑀺 𑀢𑀧𑀦𑀺𑀲𑁆𑀲𑀺𑀢𑀓𑀁. 𑀮𑀽𑀔𑀸𑀚𑀻𑀯𑀺𑀦𑁆𑀢𑀺 𑀅𑀘𑁂𑀮𑀓𑀫𑀼𑀢𑁆𑀢𑀸𑀘𑀸𑀭𑀸𑀤𑀺𑀯𑀲𑁂𑀦 𑀮𑀽𑀔𑁄 𑀆𑀚𑀻𑀯𑁄 𑀅𑀲𑁆𑀲𑀸𑀢𑀺 𑀮𑀽𑀔𑀸𑀚𑀻𑀯𑀻, 𑀢𑀁 𑀮𑀽𑀔𑀸𑀚𑀻𑀯𑀺𑀁. 𑀉𑀧𑀓𑁆𑀓𑁄𑀲𑀢𑀻𑀢𑀺 𑀉𑀧𑀡𑁆𑀟𑁂𑀢𑀺. 𑀉𑀧𑀯𑀤𑀢𑀻𑀢𑀺 𑀳𑀻𑀴𑁂𑀢𑀺 𑀯𑀫𑁆𑀪𑁂𑀢𑀺. 𑀥𑀫𑁆𑀫𑀲𑁆𑀲 𑀘 𑀅𑀦𑀼𑀥𑀫𑁆𑀫𑀁 𑀩𑁆𑀬𑀸𑀓𑀭𑁄𑀦𑁆𑀢𑀻𑀢𑀺 𑀪𑁄𑀢𑀸 𑀕𑁄𑀢𑀫𑁂𑀦 𑀯𑀼𑀢𑁆𑀢𑀓𑀸𑀭𑀡𑀲𑁆𑀲 𑀅𑀦𑀼𑀓𑀸𑀭𑀡𑀁 𑀓𑀣𑁂𑀦𑁆𑀢𑀺. 𑀲𑀳𑀥𑀫𑁆𑀫𑀺𑀓𑁄 𑀯𑀸𑀤𑀸𑀦𑀼𑀯𑀸𑀤𑁄𑀢𑀺 𑀧𑀭𑁂𑀳𑀺 𑀯𑀼𑀢𑁆𑀢𑀓𑀸𑀭𑀡𑁂𑀦 𑀲𑀓𑀸𑀭𑀡𑁄 𑀳𑀼𑀢𑁆𑀯𑀸 𑀢𑀼𑀫𑁆𑀳𑀸𑀓𑀁 𑀯𑀸𑀤𑁄 𑀯𑀸 𑀅𑀦𑀼𑀯𑀸𑀤𑁄 𑀯𑀸 𑀯𑀺𑀜𑁆𑀜𑀽𑀳𑀺 𑀕𑀭𑀳𑀺𑀢𑀩𑁆𑀩𑀁, 𑀓𑀸𑀭𑀡𑀁 𑀓𑁄𑀘𑀺 𑀅𑀧𑁆𑀧𑀫𑀢𑁆𑀢𑀓𑁄𑀧𑀺 𑀓𑀺𑀁 𑀦 𑀆𑀕𑀘𑁆𑀙𑀢𑀺. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺, ‘‘𑀓𑀺𑀁 𑀲𑀩𑁆𑀩𑀸𑀓𑀸𑀭𑁂𑀦𑀧𑀺 𑀢𑀯 𑀯𑀸𑀤𑁂 𑀕𑀸𑀭𑀬𑁆𑀳𑀁 𑀓𑀸𑀭𑀡𑀁 𑀦𑀢𑁆𑀣𑀻’’𑀢𑀺. 𑀅𑀦𑀩𑁆𑀪𑀓𑁆𑀔𑀸𑀢𑀼𑀓𑀸𑀫𑀸𑀢𑀺 𑀦 𑀅𑀪𑀽𑀢𑁂𑀦 𑀯𑀢𑁆𑀢𑀼𑀓𑀸𑀫𑀸.

𑁩𑁮𑁨. 𑀏𑀓𑀘𑁆𑀘𑀁 𑀢𑀧𑀲𑁆𑀲𑀺𑀁 𑀮𑀽𑀔𑀸𑀚𑀻𑀯𑀺𑀦𑁆𑀢𑀺𑀆𑀤𑀻𑀲𑀼 𑀇𑀥𑁂𑀓𑀘𑁆𑀘𑁄 𑀅𑀘𑁂𑀮𑀓𑀧𑀩𑁆𑀩𑀚𑁆𑀚𑀸𑀤𑀺𑀢𑀧𑀦𑀺𑀲𑁆𑀲𑀺𑀢𑀢𑁆𑀢𑀸 𑀢𑀧𑀲𑁆𑀲𑀻 ‘‘𑀮𑀽𑀔𑁂𑀦 𑀚𑀻𑀯𑀺𑀢𑀁 𑀓𑀧𑁆𑀧𑁂𑀲𑁆𑀲𑀸𑀫𑀻’’𑀢𑀺 𑀢𑀺𑀡𑀕𑁄𑀫𑀬𑀸𑀤𑀺𑀪𑀓𑁆𑀔𑀦𑀸𑀤𑀻𑀳𑀺 𑀦𑀸𑀦𑀧𑁆𑀧𑀓𑀸𑀭𑁂𑀳𑀺 𑀅𑀢𑁆𑀢𑀸𑀦𑀁 𑀓𑀺𑀮𑀫𑁂𑀢𑀺, 𑀅𑀧𑁆𑀧𑀧𑀼𑀜𑁆𑀜𑀢𑀸𑀬 𑀘 𑀲𑀼𑀔𑁂𑀦 𑀚𑀻𑀯𑀺𑀢𑀯𑀼𑀢𑁆𑀢𑀺𑀫𑁂𑀯 𑀦 𑀮𑀪𑀢𑀺, 𑀲𑁄 𑀢𑀻𑀡𑀺 𑀤𑀼𑀘𑁆𑀘𑀭𑀺𑀢𑀸𑀦𑀺 𑀧𑀽𑀭𑁂𑀢𑁆𑀯𑀸 𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀢𑀺.

𑀅𑀧𑀭𑁄 𑀢𑀸𑀤𑀺𑀲𑀁 𑀢𑀧𑀦𑀺𑀲𑁆𑀲𑀺𑀢𑁄𑀧𑀺 𑀧𑀼𑀜𑁆𑀜𑀯𑀸 𑀳𑁄𑀢𑀺, 𑀮𑀪𑀢𑀺 𑀮𑀸𑀪𑀲𑀓𑁆𑀓𑀸𑀭𑀁. 𑀲𑁄 ‘‘𑀦 𑀤𑀸𑀦𑀺 𑀫𑀬𑀸 𑀲𑀤𑀺𑀲𑁄 𑀅𑀢𑁆𑀣𑀻’’𑀢𑀺 𑀅𑀢𑁆𑀢𑀸𑀦𑀁 𑀉𑀘𑁆𑀘𑁂 𑀞𑀸𑀦𑁂 𑀲𑀫𑁆𑀪𑀸𑀯𑁂𑀢𑁆𑀯𑀸 ‘‘𑀪𑀺𑀬𑁆𑀬𑁄𑀲𑁄𑀫𑀢𑁆𑀢𑀸𑀬 𑀮𑀸𑀪𑀁 𑀉𑀧𑁆𑀧𑀸𑀤𑁂𑀲𑁆𑀲𑀸𑀫𑀻’’𑀢𑀺 𑀅𑀦𑁂𑀲𑀦𑀯𑀲𑁂𑀦 𑀢𑀻𑀡𑀺 𑀤𑀼𑀘𑁆𑀘𑀭𑀺𑀢𑀸𑀦𑀺 𑀧𑀽𑀭𑁂𑀢𑁆𑀯𑀸 𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀢𑀺. 𑀇𑀫𑁂 𑀤𑁆𑀯𑁂 𑀲𑀦𑁆𑀥𑀸𑀬 𑀧𑀞𑀫𑀦𑀬𑁄 𑀯𑀼𑀢𑁆𑀢𑁄.

𑀅𑀧𑀭𑁄 𑀢𑀧𑀦𑀺𑀲𑁆𑀲𑀺𑀢𑀓𑁄 𑀮𑀽𑀔𑀸𑀚𑀻𑀯𑀻 𑀅𑀧𑁆𑀧𑀧𑀼𑀜𑁆𑀜𑁄 𑀳𑁄𑀢𑀺, 𑀦 𑀮𑀪𑀢𑀺 𑀲𑀼𑀔𑁂𑀦 𑀚𑀻𑀯𑀺𑀢𑀯𑀼𑀢𑁆𑀢𑀺𑀁. 𑀲𑁄 ‘‘𑀫𑀬𑁆𑀳𑀁 𑀧𑀼𑀩𑁆𑀩𑁂𑀧𑀺 𑀅𑀓𑀢𑀧𑀼𑀜𑁆𑀜𑀢𑀸𑀬 𑀲𑀼𑀔𑀚𑀻𑀯𑀺𑀓𑀸 𑀦𑀼𑀧𑁆𑀧𑀚𑁆𑀚𑀢𑀺, 𑀳𑀦𑁆𑀤𑀤𑀸𑀦𑀺 𑀧𑀼𑀜𑁆𑀜𑀸𑀦𑀺 𑀓𑀭𑁄𑀫𑀻’’𑀢𑀺 𑀢𑀻𑀡𑀺 𑀲𑀼𑀘𑀭𑀺𑀢𑀸𑀦𑀺 𑀧𑀽𑀭𑁂𑀢𑁆𑀯𑀸 𑀲𑀕𑁆𑀕𑁂 𑀦𑀺𑀩𑁆𑀩𑀢𑁆𑀢𑀢𑀺.

𑀅𑀧𑀭𑁄 𑀮𑀽𑀔𑀸𑀚𑀻𑀯𑀻 𑀧𑀼𑀜𑁆𑀜𑀯𑀸 𑀳𑁄𑀢𑀺, 𑀮𑀪𑀢𑀺 𑀲𑀼𑀔𑁂𑀦 𑀚𑀻𑀯𑀺𑀢𑀯𑀼𑀢𑁆𑀢𑀺𑀁. 𑀲𑁄 𑁋 ‘‘𑀫𑀬𑁆𑀳𑀁 𑀧𑀼𑀩𑁆𑀩𑁂𑀧𑀺 𑀓𑀢𑀧𑀼𑀜𑁆𑀜𑀢𑀸𑀬 𑀲𑀼𑀔𑀚𑀻𑀯𑀺𑀓𑀸 𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀅𑀦𑁂𑀲𑀦𑀁 𑀧𑀳𑀸𑀬 𑀢𑀻𑀡𑀺 𑀲𑀼𑀘𑀭𑀺𑀢𑀸𑀦𑀺 𑀧𑀽𑀭𑁂𑀢𑁆𑀯𑀸 𑀲𑀕𑁆𑀕𑁂 𑀦𑀺𑀩𑁆𑀩𑀢𑁆𑀢𑀢𑀺. 𑀇𑀫𑁂 𑀤𑁆𑀯𑁂 𑀲𑀦𑁆𑀥𑀸𑀬 𑀤𑀼𑀢𑀺𑀬𑀦𑀬𑁄 𑀯𑀼𑀢𑁆𑀢𑁄.

𑀏𑀓𑁄 𑀧𑀦 𑀢𑀧𑀲𑁆𑀲𑀻 𑀅𑀧𑁆𑀧𑀤𑀼𑀓𑁆𑀔𑀯𑀺𑀳𑀸𑀭𑀻 𑀳𑁄𑀢𑀺 𑀩𑀸𑀳𑀺𑀭𑀓𑀸𑀘𑀸𑀭𑀬𑀼𑀢𑁆𑀢𑁄 𑀢𑀸𑀧𑀲𑁄 𑀯𑀸 𑀙𑀦𑁆𑀦𑀧𑀭𑀺𑀩𑁆𑀩𑀸𑀚𑀓𑁄 𑀯𑀸, 𑀅𑀧𑁆𑀧𑀧𑀼𑀜𑁆𑀜𑀢𑀸𑀬 𑀘 𑀫𑀦𑀸𑀧𑁂 𑀧𑀘𑁆𑀘𑀬𑁂 𑀦 𑀮𑀪𑀢𑀺. 𑀲𑁄 𑀅𑀦𑁂𑀲𑀦𑀯𑀲𑁂𑀦 𑀢𑀻𑀡𑀺 𑀤𑀼𑀘𑁆𑀘𑀭𑀺𑀢𑀸𑀦𑀺 𑀧𑀽𑀭𑁂𑀢𑁆𑀯𑀸 𑀅𑀢𑁆𑀢𑀸𑀦𑀁 𑀲𑀼𑀔𑁂 𑀞𑀧𑁂𑀢𑁆𑀯𑀸 𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀢𑀺.

𑀅𑀧𑀭𑁄 𑀧𑀼𑀜𑁆𑀜𑀯𑀸 𑀳𑁄𑀢𑀺, 𑀲𑁄 𑁋 ‘‘𑀦 𑀤𑀸𑀦𑀺 𑀫𑀬𑀸 𑀲𑀤𑀺𑀲𑁄 𑀅𑀢𑁆𑀣𑀻’’𑀢𑀺 𑀫𑀸𑀦𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀅𑀦𑁂𑀲𑀦𑀯𑀲𑁂𑀦 𑀮𑀸𑀪𑀲𑀓𑁆𑀓𑀸𑀭𑀁 𑀯𑀸 𑀉𑀧𑁆𑀧𑀸𑀤𑁂𑀦𑁆𑀢𑁄 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀯𑀲𑁂𑀦 𑁋 ‘‘𑀲𑀼𑀔𑁄 𑀇𑀫𑀺𑀲𑁆𑀲𑀸 𑀧𑀭𑀺𑀩𑁆𑀩𑀸𑀚𑀺𑀓𑀸𑀬 𑀤𑀳𑀭𑀸𑀬 𑀫𑀼𑀤𑀼𑀓𑀸𑀬 𑀮𑁄𑀫𑀲𑀸𑀬 𑀲𑀫𑁆𑀨𑀲𑁆𑀲𑁄’’𑀢𑀺𑀆𑀤𑀻𑀦𑀺 𑀘𑀺𑀦𑁆𑀢𑁂𑀢𑁆𑀯𑀸 𑀓𑀸𑀫𑁂𑀲𑀼 𑀧𑀸𑀢𑀩𑁆𑀬𑀢𑀁 𑀯𑀸 𑀆𑀧𑀚𑁆𑀚𑀦𑁆𑀢𑁄 𑀢𑀻𑀡𑀺 𑀤𑀼𑀘𑁆𑀘𑀭𑀺𑀢𑀸𑀦𑀺 𑀧𑀽𑀭𑁂𑀢𑁆𑀯𑀸 𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀢𑀺. 𑀇𑀫𑁂 𑀤𑁆𑀯𑁂 𑀲𑀦𑁆𑀥𑀸𑀬 𑀢𑀢𑀺𑀬𑀦𑀬𑁄 𑀯𑀼𑀢𑁆𑀢𑁄.

𑀅𑀧𑀭𑁄 𑀧𑀦 𑀅𑀧𑁆𑀧𑀤𑀼𑀓𑁆𑀔𑀯𑀺𑀳𑀸𑀭𑀻 𑀅𑀧𑁆𑀧𑀧𑀼𑀜𑁆𑀜𑁄 𑀳𑁄𑀢𑀺, 𑀲𑁄 𑁋 ‘‘𑀅𑀳𑀁 𑀧𑀼𑀩𑁆𑀩𑁂𑀧𑀺 𑀅𑀓𑀢𑀧𑀼𑀜𑁆𑀜𑀢𑀸𑀬 𑀲𑀼𑀔𑁂𑀦 𑀚𑀻𑀯𑀺𑀓𑀁 𑀦 𑀮𑀪𑀸𑀫𑀻’’𑀢𑀺 𑀢𑀻𑀡𑀺 𑀲𑀼𑀘𑀭𑀺𑀢𑀸𑀦𑀺 𑀧𑀽𑀭𑁂𑀢𑁆𑀯𑀸 𑀲𑀕𑁆𑀕𑁂 𑀦𑀺𑀩𑁆𑀩𑀢𑁆𑀢𑀢𑀺.

𑀅𑀧𑀭𑁄 𑀧𑀼𑀜𑁆𑀜𑀯𑀸 𑀳𑁄𑀢𑀺, 𑀲𑁄 𑁋 ‘‘𑀧𑀼𑀩𑁆𑀩𑁂𑀧𑀸𑀳𑀁 𑀓𑀢𑀧𑀼𑀜𑁆𑀜𑀢𑀸𑀬 𑀲𑀼𑀔𑀁 𑀮𑀪𑀸𑀫𑀺, 𑀇𑀤𑀸𑀦𑀺 𑀧𑀼𑀜𑁆𑀜𑀸𑀦𑀺 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀢𑀻𑀡𑀺 𑀲𑀼𑀘𑀭𑀺𑀢𑀸𑀦𑀺 𑀧𑀽𑀭𑁂𑀢𑁆𑀯𑀸 𑀲𑀕𑁆𑀕𑁂 𑀦𑀺𑀩𑁆𑀩𑀢𑁆𑀢𑀢𑀺. 𑀇𑀫𑁂 𑀤𑁆𑀯𑁂 𑀲𑀦𑁆𑀥𑀸𑀬 𑀘𑀢𑀼𑀢𑁆𑀣𑀦𑀬𑁄 𑀯𑀼𑀢𑁆𑀢𑁄. 𑀇𑀤𑀁 𑀢𑀺𑀢𑁆𑀣𑀺𑀬𑀯𑀲𑁂𑀦 𑀆𑀕𑀢𑀁, 𑀲𑀸𑀲𑀦𑁂𑀧𑀺 𑀧𑀦 𑀮𑀩𑁆𑀪𑀢𑀺.

𑀏𑀓𑀘𑁆𑀘𑁄 𑀳𑀺 𑀥𑀼𑀢𑀗𑁆𑀕𑀲𑀫𑀸𑀤𑀸𑀦𑀯𑀲𑁂𑀦 𑀮𑀽𑀔𑀸𑀚𑀻𑀯𑀻 𑀳𑁄𑀢𑀺, 𑀅𑀧𑁆𑀧𑀧𑀼𑀜𑁆𑀜𑀢𑀸𑀬 𑀯𑀸 𑀲𑀓𑀮𑀫𑁆𑀧𑀺 𑀕𑀸𑀫𑀁 𑀯𑀺𑀘𑀭𑀺𑀢𑁆𑀯𑀸 𑀉𑀤𑀭𑀧𑀽𑀭𑀁 𑀦 𑀮𑀪𑀢𑀺. 𑀲𑁄 𑁋 ‘‘𑀧𑀘𑁆𑀘𑀬𑁂 𑀉𑀧𑁆𑀧𑀸𑀤𑁂𑀲𑁆𑀲𑀸𑀫𑀻’’𑀢𑀺 𑀯𑁂𑀚𑁆𑀚𑀓𑀫𑁆𑀫𑀸𑀤𑀺𑀯𑀲𑁂𑀦 𑀯𑀸 𑀅𑀦𑁂𑀲𑀦𑀁 𑀓𑀢𑁆𑀯𑀸, 𑀅𑀭𑀳𑀢𑁆𑀢𑀁 𑀯𑀸 𑀧𑀝𑀺𑀚𑀸𑀦𑀺𑀢𑁆𑀯𑀸, 𑀢𑀻𑀡𑀺 𑀯𑀸 𑀓𑀼𑀳𑀦𑀯𑀢𑁆𑀣𑀽𑀦𑀺 𑀧𑀝𑀺𑀲𑁂𑀯𑀺𑀢𑁆𑀯𑀸 𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀢𑀺.

𑀅𑀧𑀭𑁄 𑀘 𑀢𑀸𑀤𑀺𑀲𑁄𑀯 𑀧𑀼𑀜𑁆𑀜𑀯𑀸 𑀳𑁄𑀢𑀺. 𑀲𑁄 𑀢𑀸𑀬 𑀧𑀼𑀜𑁆𑀜𑀲𑀫𑁆𑀧𑀢𑁆𑀢𑀺𑀬𑀸 𑀫𑀸𑀦𑀁 𑀚𑀦𑀬𑀺𑀢𑁆𑀯𑀸 𑀉𑀧𑁆𑀧𑀦𑁆𑀦𑀁 𑀮𑀸𑀪𑀁 𑀣𑀸𑀯𑀭𑀁 𑀓𑀢𑁆𑀢𑀼𑀓𑀸𑀫𑁄 𑀅𑀦𑁂𑀲𑀦𑀯𑀲𑁂𑀦 𑀢𑀻𑀡𑀺 𑀤𑀼𑀘𑁆𑀘𑀭𑀺𑀢𑀸𑀦𑀺 𑀧𑀽𑀭𑁂𑀢𑁆𑀯𑀸 𑀦𑀺𑀭𑀬𑁂 𑀉𑀧𑁆𑀧𑀚𑁆𑀚𑀢𑀺.

𑀅𑀧𑀭𑁄 𑀲𑀫𑀸𑀤𑀺𑀦𑁆𑀦𑀥𑀼𑀢𑀗𑁆𑀕𑁄 𑀅𑀧𑁆𑀧𑀧𑀼𑀜𑁆𑀜𑁄𑀯 𑀳𑁄𑀢𑀺, 𑀦 𑀮𑀪𑀢𑀺 𑀲𑀼𑀔𑁂𑀦 𑀚𑀻𑀯𑀺𑀢𑀯𑀼𑀢𑁆𑀢𑀺𑀁. 𑀲𑁄 𑁋 ‘‘𑀧𑀼𑀩𑁆𑀩𑁂𑀧𑀸𑀳𑀁 𑀅𑀓𑀢𑀧𑀼𑀜𑁆𑀜𑀢𑀸𑀬 𑀓𑀺𑀜𑁆𑀘𑀺 𑀦 𑀮𑀪𑀸𑀫𑀺, 𑀲𑀘𑁂 𑀇𑀤𑀸𑀦𑀺 𑀅𑀦𑁂𑀲𑀦𑀁 𑀓𑀭𑀺𑀲𑁆𑀲𑀁, 𑀆𑀬𑀢𑀺𑀫𑁆𑀧𑀺 𑀤𑀼𑀮𑁆𑀮𑀪𑀲𑀼𑀔𑁄 𑀪𑀯𑀺𑀲𑁆𑀲𑀸𑀫𑀻’’𑀢𑀺 𑀢𑀻𑀡𑀺 𑀲𑀼𑀘𑀭𑀺𑀢𑀸𑀦𑀺 𑀧𑀽𑀭𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀢𑁆𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀲𑀕𑁆𑀕𑁂 𑀦𑀺𑀩𑁆𑀩𑀢𑁆𑀢𑀢𑀺.

𑀅𑀧𑀭𑁄 𑀧𑀼𑀜𑁆𑀜𑀯𑀸 𑀳𑁄𑀢𑀺, 𑀲𑁄 𑁋 ‘‘𑀧𑀼𑀩𑁆𑀩𑁂𑀧𑀸𑀳𑀁 𑀓𑀢𑀧𑀼𑀜𑁆𑀜𑀢𑀸𑀬 𑀏𑀢𑀭𑀳𑀺 𑀲𑀼𑀔𑀺𑀢𑁄, 𑀇𑀤𑀸𑀦𑀺𑀧𑀺 𑀧𑀼𑀜𑁆𑀜𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀅𑀦𑁂𑀲𑀦𑀁 𑀧𑀳𑀸𑀬 𑀢𑀻𑀡𑀺 𑀲𑀼𑀘𑀭𑀺𑀢𑀸𑀦𑀺 𑀧𑀽𑀭𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀢𑁆𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀲𑀕𑁆𑀕𑁂 𑀦𑀺𑀩𑁆𑀩𑀢𑁆𑀢𑀢𑀺.

𑁩𑁮𑁩. 𑀆𑀕𑀢𑀺𑀜𑁆𑀘𑀸𑀢𑀺 𑁋 ‘‘𑀅𑀲𑀼𑀓𑀝𑁆𑀞𑀸𑀦𑀢𑁄 𑀦𑀸𑀫 𑀇𑀫𑁂 𑀆𑀕𑀢𑀸’’𑀢𑀺 𑀏𑀯𑀁 𑀆𑀕𑀢𑀺𑀜𑁆𑀘. 𑀕𑀢𑀺𑀜𑁆𑀘𑀸𑀢𑀺 𑀇𑀤𑀸𑀦𑀺 𑀕𑀦𑁆𑀢𑀩𑁆𑀩𑀝𑁆𑀞𑀸𑀦𑀜𑁆𑀘. 𑀘𑀼𑀢𑀺𑀜𑁆𑀘𑀸𑀢𑀺 𑀢𑀢𑁄 𑀘𑀯𑀦𑀜𑁆𑀘. 𑀉𑀧𑀧𑀢𑁆𑀢𑀺𑀜𑁆𑀘𑀸𑀢𑀺 𑀢𑀢𑁄 𑀘𑀼𑀢𑀸𑀦𑀁 𑀧𑀼𑀦 𑀉𑀧𑀧𑀢𑁆𑀢𑀺𑀜𑁆𑀘. 𑀓𑀺𑀁 𑀲𑀩𑁆𑀩𑀁 𑀢𑀧𑀁 𑀕𑀭𑀳𑀺𑀲𑁆𑀲𑀸𑀫𑀻𑀢𑀺 𑁋 ‘‘𑀓𑁂𑀦 𑀓𑀸𑀭𑀡𑁂𑀦 𑀕𑀭𑀳𑀺𑀲𑁆𑀲𑀸𑀫𑀺, 𑀕𑀭𑀳𑀺𑀢𑀩𑁆𑀩𑀫𑁂𑀯 𑀳𑀺 𑀫𑀬𑀁 𑀕𑀭𑀳𑀸𑀫, 𑀧𑀲𑀁𑀲𑀺𑀢𑀩𑁆𑀩𑀁 𑀧𑀲𑀁𑀲𑀸𑀫, 𑀦 𑀪𑀡𑁆𑀟𑀺𑀓𑀁 𑀓𑀭𑁄𑀦𑁆𑀢𑁄 𑀫𑀳𑀸𑀭𑀚𑀓𑁄 𑀯𑀺𑀬 𑀥𑁄𑀢𑀜𑁆𑀘 𑀅𑀥𑁄𑀢𑀜𑁆𑀘 𑀏𑀓𑀢𑁄 𑀓𑀭𑁄𑀫𑀸’’𑀢𑀺 𑀤𑀲𑁆𑀲𑁂𑀢𑀺. 𑀇𑀤𑀸𑀦𑀺 𑀢𑀫𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑁄 𑁋 ‘‘𑀲𑀦𑁆𑀢𑀺 𑀓𑀲𑁆𑀲𑀧 𑀏𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸’’𑀢𑀺𑀆𑀤𑀺𑀫𑀸𑀳.

𑁩𑁮𑁪. 𑀬𑀁 𑀢𑁂 𑀏𑀓𑀘𑁆𑀘𑀦𑁆𑀢𑀺 𑀧𑀜𑁆𑀘𑀯𑀺𑀥𑀁 𑀲𑀻𑀮𑀁, 𑀢𑀜𑁆𑀳𑀺 𑀮𑁄𑀓𑁂 𑀦 𑀓𑁄𑀘𑀺 ‘‘𑀦 𑀲𑀸𑀥𑀽’’𑀢𑀺 𑀯𑀤𑀢𑀺. 𑀧𑀼𑀦 𑀬𑀁 𑀢𑁂 𑀏𑀓𑀘𑁆𑀘𑀦𑁆𑀢𑀺 𑀧𑀜𑁆𑀘𑀯𑀺𑀥𑀁 𑀯𑁂𑀭𑀁, 𑀢𑀁 𑀦 𑀓𑁄𑀘𑀺 ‘‘𑀲𑀸𑀥𑀽’’𑀢𑀺 𑀯𑀤𑀢𑀺. 𑀧𑀼𑀦 𑀬𑀁 𑀢𑁂 𑀏𑀓𑀘𑁆𑀘𑀦𑁆𑀢𑀺 𑀧𑀜𑁆𑀘𑀤𑁆𑀯𑀸𑀭𑁂 𑀅𑀲𑀁𑀯𑀭𑀁, 𑀢𑁂 𑀓𑀺𑀭 𑁋 ‘‘𑀘𑀓𑁆𑀔𑀼 𑀦𑀸𑀫 𑀦 𑀦𑀺𑀭𑀼𑀦𑁆𑀥𑀺𑀢𑀩𑁆𑀩𑀁, 𑀘𑀓𑁆𑀔𑀼𑀦𑀸 𑀫𑀦𑀸𑀧𑀁 𑀭𑀽𑀧𑀁 𑀤𑀝𑁆𑀞𑀩𑁆𑀩’’𑀦𑁆𑀢𑀺 𑀯𑀤𑀦𑁆𑀢𑀺, 𑀏𑀲 𑀦𑀬𑁄 𑀲𑁄𑀢𑀸𑀤𑀻𑀲𑀼. 𑀧𑀼𑀦 𑀬𑀁 𑀢𑁂 𑀏𑀓𑀘𑁆𑀘𑀦𑁆𑀢𑀺 𑀧𑀜𑁆𑀘𑀤𑁆𑀯𑀸𑀭𑁂 𑀲𑀁𑀯𑀭𑀁.

𑀏𑀯𑀁 𑀧𑀭𑁂𑀲𑀁 𑀯𑀸𑀤𑁂𑀦 𑀲𑀳 𑀅𑀢𑁆𑀢𑀦𑁄 𑀯𑀸𑀤𑀲𑁆𑀲 𑀲𑀫𑀸𑀦𑀸𑀲𑀫𑀸𑀦𑀢𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀅𑀢𑁆𑀢𑀦𑁄 𑀯𑀸𑀤𑁂𑀦 𑀲𑀳 𑀧𑀭𑁂𑀲𑀁 𑀯𑀸𑀤𑀲𑁆𑀲 𑀲𑀫𑀸𑀦𑀸𑀲𑀫𑀸𑀦𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀬𑀁 𑀫𑀬’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀭𑀸𑀧𑀺 𑀧𑀜𑁆𑀘𑀲𑀻𑀮𑀸𑀤𑀺𑀯𑀲𑁂𑀦𑁂𑀯 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀲𑀫𑀦𑀼𑀬𑀼𑀜𑁆𑀚𑀸𑀧𑀦𑀓𑀣𑀸𑀯𑀡𑁆𑀡𑀦𑀸

𑁩𑁮𑁫. 𑀲𑀫𑀦𑀼𑀬𑀼𑀜𑁆𑀚𑀦𑁆𑀢𑀦𑁆𑀢𑀺 𑀲𑀫𑀦𑀼𑀬𑀼𑀜𑁆𑀚𑀦𑁆𑀢𑀼, 𑀏𑀢𑁆𑀣 𑀘 𑀮𑀤𑁆𑀥𑀺𑀁 𑀧𑀼𑀘𑁆𑀙𑀦𑁆𑀢𑁄 𑀲𑀫𑀦𑀼𑀬𑀼𑀜𑁆𑀚𑀢𑀺 𑀦𑀸𑀫, 𑀓𑀸𑀭𑀡𑀁 𑀧𑀼𑀘𑁆𑀙𑀦𑁆𑀢𑁄 𑀲𑀫𑀦𑀼𑀕𑀸𑀳𑀢𑀺 𑀦𑀸𑀫, 𑀉𑀪𑀬𑀁 𑀧𑀼𑀘𑁆𑀙𑀦𑁆𑀢𑁄 𑀲𑀫𑀦𑀼𑀪𑀸𑀲𑀢𑀺 𑀦𑀸𑀫. 𑀲𑀢𑁆𑀣𑀸𑀭𑀸 𑀯𑀸 𑀲𑀢𑁆𑀣𑀸𑀭𑀦𑁆𑀢𑀺 𑀲𑀢𑁆𑀣𑀸𑀭𑀸 𑀯𑀸 𑀲𑀤𑁆𑀥𑀺𑀁 𑀲𑀢𑁆𑀣𑀸𑀭𑀁 𑀉𑀧𑀲𑀁𑀳𑀭𑀺𑀢𑁆𑀯𑀸 𑁋 ‘‘𑀓𑀺𑀁 𑀢𑁂 𑀲𑀢𑁆𑀣𑀸 𑀢𑁂 𑀥𑀫𑁆𑀫𑁂 𑀲𑀩𑁆𑀩𑀲𑁄 𑀧𑀳𑀸𑀬 𑀯𑀢𑁆𑀢𑀢𑀺, 𑀉𑀤𑀸𑀳𑀼 𑀲𑀫𑀡𑁄 𑀕𑁄𑀢𑀫𑁄’’𑀢𑀺. 𑀤𑀼𑀢𑀺𑀬𑀧𑀤𑁂𑀧𑀺 𑀏𑀲𑁂𑀯 𑀦𑀬𑁄.

𑀇𑀤𑀸𑀦𑀺 𑀢𑀫𑀢𑁆𑀣𑀁 𑀬𑁄𑀚𑁂𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 𑁋 ‘‘𑀬𑁂 𑀇𑀫𑁂𑀲𑀁 𑀪𑀯𑀢’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀓𑀼𑀲𑀮𑀸 𑀅𑀓𑀼𑀲𑀮𑀲𑀗𑁆𑀔𑀸𑀢𑀸𑀢𑀺 𑀅𑀓𑀼𑀲𑀮𑀸 𑀘𑁂𑀯 ‘‘𑀅𑀓𑀼𑀲𑀮𑀸’’𑀢𑀺 𑀘 𑀲𑀗𑁆𑀔𑀸𑀢𑀸 𑀜𑀸𑀢𑀸 𑀓𑁄𑀝𑁆𑀞𑀸𑀲𑀁 𑀯𑀸 𑀓𑀢𑁆𑀯𑀸 𑀞𑀧𑀺𑀢𑀸𑀢𑀺 𑀅𑀢𑁆𑀣𑁄. 𑀏𑀲 𑀦𑀬𑁄 𑀲𑀩𑁆𑀩𑀧𑀤𑁂𑀲𑀼. 𑀅𑀧𑀺 𑀘𑁂𑀢𑁆𑀣 𑀲𑀸𑀯𑀚𑁆𑀚𑀸𑀢𑀺 𑀲𑀤𑁄𑀲𑀸. 𑀦 𑀅𑀮𑀫𑀭𑀺𑀬𑀸𑀢𑀺 𑀦𑀺𑀤𑁆𑀤𑁄𑀲𑀝𑁆𑀞𑁂𑀦 𑀅𑀭𑀺𑀬𑀸 𑀪𑀯𑀺𑀢𑀼𑀁 𑀦𑀸𑀮𑀁 𑀅𑀲𑀫𑀢𑁆𑀣𑀸.

𑁩𑁮𑁬-𑁩𑁯𑁨. 𑀬𑀁 𑀯𑀺𑀜𑁆𑀜𑀽 𑀲𑀫𑀦𑀼𑀬𑀼𑀜𑁆𑀚𑀦𑁆𑀢𑀸𑀢𑀺 𑀬𑁂𑀦 𑀯𑀺𑀜𑁆𑀜𑀽 𑀅𑀫𑁆𑀳𑁂 𑀘 𑀅𑀜𑁆𑀜𑁂 𑀘 𑀧𑀼𑀘𑁆𑀙𑀦𑁆𑀢𑀸 𑀏𑀯𑀁 𑀯𑀤𑁂𑀬𑁆𑀬𑀼𑀁, 𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺, 𑀅𑀢𑁆𑀣𑀺 𑀢𑀁 𑀓𑀸𑀭𑀡𑀦𑁆𑀢𑀺 𑀅𑀢𑁆𑀣𑁄. 𑀬𑀁 𑀯𑀸 𑀧𑀦 𑀪𑁄𑀦𑁆𑀢𑁄 𑀧𑀭𑁂 𑀕𑀡𑀸𑀘𑀭𑀺𑀬𑀸𑀢𑀺 𑀧𑀭𑁂 𑀧𑀦 𑀪𑁄𑀦𑁆𑀢𑁄 𑀕𑀡𑀸𑀘𑀭𑀺𑀬𑀸 𑀬𑀁 𑀯𑀸 𑀢𑀁 𑀯𑀸 𑀅𑀧𑁆𑀧𑀫𑀢𑁆𑀢𑀓𑀁 𑀧𑀳𑀸𑀬 𑀯𑀢𑁆𑀢𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀅𑀫𑁆𑀳𑁂𑀯 𑀢𑀢𑁆𑀣 𑀬𑁂𑀪𑀼𑀬𑁆𑀬𑁂𑀦 𑀧𑀲𑀁𑀲𑁂𑀬𑁆𑀬𑀼𑀦𑁆𑀢𑀺 𑀇𑀤𑀁 𑀪𑀕𑀯𑀸 𑀲𑀢𑁆𑀣𑀸𑀭𑀸 𑀲𑀢𑁆𑀣𑀸𑀭𑀁 𑀲𑀫𑀦𑀼𑀬𑀼𑀜𑁆𑀚𑀦𑁂𑀧𑀺 𑀆𑀳 𑁋 𑀲𑀗𑁆𑀖𑁂𑀦 𑀲𑀁𑀖𑀁 𑀲𑀫𑀦𑀼𑀬𑀼𑀜𑁆𑀚𑀦𑁂𑀧𑀺. 𑀓𑀲𑁆𑀫𑀸? 𑀲𑀗𑁆𑀖𑀧𑀲𑀁𑀲𑀸𑀬𑀧𑀺 𑀲𑀢𑁆𑀣𑀼𑀬𑁂𑀯 𑀧𑀲𑀁𑀲𑀸𑀲𑀺𑀤𑁆𑀥𑀺𑀢𑁄. 𑀧𑀲𑀻𑀤𑀫𑀸𑀦𑀸𑀧𑀺 𑀳𑀺 𑀩𑀼𑀤𑁆𑀥𑀲𑀫𑁆𑀧𑀢𑁆𑀢𑀺𑀬𑀸 𑀲𑀗𑁆𑀖𑁂, 𑀲𑀗𑁆𑀖𑀲𑀫𑁆𑀧𑀢𑁆𑀢𑀺𑀬𑀸 𑀘 𑀩𑀼𑀤𑁆𑀥𑁂 𑀧𑀲𑀻𑀤𑀦𑁆𑀢𑀺, 𑀢𑀣𑀸 𑀳𑀺 𑀪𑀕𑀯𑀢𑁄 𑀲𑀭𑀻𑀭𑀲𑀫𑁆𑀧𑀢𑁆𑀢𑀺𑀁 𑀤𑀺𑀲𑁆𑀯𑀸, 𑀥𑀫𑁆𑀫𑀤𑁂𑀲𑀦𑀁 𑀯𑀸 𑀲𑀼𑀢𑁆𑀯𑀸 𑀪𑀯𑀦𑁆𑀢𑀺 𑀯𑀢𑁆𑀢𑀸𑀭𑁄 𑁋 ‘‘𑀮𑀸𑀪𑀸 𑀯𑀢 𑀪𑁄 𑀲𑀸𑀯𑀓𑀸𑀦𑀁 𑀬𑁂 𑀏𑀯𑀭𑀽𑀧𑀲𑁆𑀲 𑀲𑀢𑁆𑀣𑀼 𑀲𑀦𑁆𑀢𑀺𑀓𑀸𑀯𑀘𑀭𑀸’’𑀢𑀺, 𑀏𑀯𑀁 𑀩𑀼𑀤𑁆𑀥𑀲𑀫𑁆𑀧𑀢𑁆𑀢𑀺𑀬𑀸 𑀲𑀗𑁆𑀖𑁂 𑀧𑀲𑀻𑀤𑀦𑁆𑀢𑀺. 𑀪𑀺𑀓𑁆𑀔𑀽𑀦𑀁 𑀧𑀦𑀸𑀘𑀸𑀭𑀕𑁄𑀘𑀭𑀁 𑀅𑀪𑀺𑀓𑁆𑀓𑀫𑀧𑀝𑀺𑀓𑁆𑀓𑀫𑀸𑀤𑀻𑀦𑀺 𑀘 𑀤𑀺𑀲𑁆𑀯𑀸 𑀪𑀯𑀦𑁆𑀢𑀺 𑀯𑀢𑁆𑀢𑀸𑀭𑁄 𑁋 ‘‘𑀲𑀦𑁆𑀢𑀺𑀓𑀸𑀯𑀘𑀭𑀸𑀦𑀁 𑀯𑀢 𑀪𑁄 𑀲𑀸𑀯𑀓𑀸𑀦𑀁 𑀅𑀬𑀜𑁆𑀘 𑀉𑀧𑀲𑀫𑀕𑀼𑀡𑁄 𑀲𑀢𑁆𑀣𑀼 𑀓𑀻𑀯 𑀭𑀽𑀧𑁄 𑀪𑀯𑀺𑀲𑁆𑀲𑀢𑀻’’𑀢𑀺, 𑀏𑀯𑀁 𑀲𑀗𑁆𑀖𑀲𑀫𑁆𑀧𑀢𑁆𑀢𑀺𑀬𑀸 𑀩𑀼𑀤𑁆𑀥𑁂 𑀧𑀲𑀻𑀤𑀦𑁆𑀢𑀺. 𑀇𑀢𑀺 𑀬𑀸 𑀲𑀢𑁆𑀣𑀼𑀧𑀲𑀁𑀲𑀸, 𑀲𑀸 𑀲𑀗𑁆𑀖𑀲𑁆𑀲. 𑀬𑀸 𑀲𑀗𑁆𑀖𑀲𑁆𑀲 𑀧𑀲𑀁𑀲𑀸, 𑀲𑀸 𑀲𑀢𑁆𑀣𑀽𑀢𑀺 𑀲𑀗𑁆𑀖𑀧𑀲𑀁𑀲𑀸𑀬𑀧𑀺 𑀲𑀢𑁆𑀣𑀼𑀬𑁂𑀯 𑀧𑀲𑀁𑀲𑀸𑀲𑀺𑀤𑁆𑀥𑀺𑀢𑁄 𑀪𑀕𑀯𑀸 𑀤𑁆𑀯𑀻𑀲𑀼𑀧𑀺 𑀦𑀬𑁂𑀲𑀼 𑁋 ‘‘𑀅𑀫𑁆𑀳𑁂𑀯 𑀢𑀢𑁆𑀣 𑀬𑁂𑀪𑀼𑀬𑁆𑀬𑁂𑀦 𑀧𑀲𑀁𑀲𑁂𑀬𑁆𑀬𑀼’’𑀦𑁆𑀢𑀺 𑀆𑀳. 𑀲𑀫𑀡𑁄 𑀕𑁄𑀢𑀫𑁄 𑀇𑀫𑁂 𑀥𑀫𑁆𑀫𑁂 𑀅𑀦𑀯𑀲𑁂𑀲𑀁 𑀧𑀳𑀸𑀬 𑀯𑀢𑁆𑀢𑀢𑀺, 𑀬𑀁 𑀯𑀸 𑀧𑀦 𑀪𑁄𑀦𑁆𑀢𑁄 𑀧𑀭𑁂 𑀕𑀡𑀸𑀘𑀭𑀺𑀬𑀸𑀢𑀺𑀆𑀤𑀻𑀲𑀼𑀧𑀺 𑀧𑀦𑁂𑀢𑁆𑀣 𑀅𑀬𑀫𑀥𑀺𑀧𑁆𑀧𑀸𑀬𑁄 𑁋 𑀲𑀫𑁆𑀧𑀢𑁆𑀢𑀲𑀫𑀸𑀤𑀸𑀦𑀲𑁂𑀢𑀼𑀖𑀸𑀢𑀯𑀲𑁂𑀦 𑀳𑀺 𑀢𑀺𑀲𑁆𑀲𑁄 𑀯𑀺𑀭𑀢𑀺𑀬𑁄. 𑀢𑀸𑀲𑀼 𑀲𑀫𑁆𑀧𑀢𑁆𑀢𑀲𑀫𑀸𑀤𑀸𑀦 𑀯𑀺𑀭𑀢𑀺𑀫𑀢𑁆𑀢𑀫𑁂𑀯 𑀅𑀜𑁆𑀜𑁂𑀲𑀁 𑀳𑁄𑀢𑀺, 𑀲𑁂𑀢𑀼𑀖𑀸𑀢𑀯𑀺𑀭𑀢𑀺 𑀧𑀦 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀦𑀢𑁆𑀣𑀺. 𑀧𑀜𑁆𑀘𑀲𑀼 𑀧𑀦 𑀢𑀤𑀗𑁆𑀕𑀯𑀺𑀓𑁆𑀔𑀫𑁆𑀪𑀦𑀲𑀫𑀼𑀘𑁆𑀙𑁂𑀤𑀧𑀝𑀺𑀧𑀲𑁆𑀲𑀤𑁆𑀥𑀺𑀦𑀺𑀲𑁆𑀲𑀭𑀡𑀧𑁆𑀧𑀳𑀸𑀦𑁂𑀲𑀼 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀯𑀲𑁂𑀦 𑀘𑁂𑀯 𑀯𑀺𑀧𑀲𑁆𑀲𑀦𑀸𑀫𑀢𑁆𑀢𑀯𑀲𑁂𑀦 𑀘 𑀢𑀤𑀗𑁆𑀕𑀯𑀺𑀓𑁆𑀔𑀫𑁆𑀪𑀦𑀧𑁆𑀧𑀳𑀸𑀦𑀫𑀢𑁆𑀢𑀫𑁂𑀯 𑀅𑀜𑁆𑀜𑁂𑀲𑀁 𑀳𑁄𑀢𑀺. 𑀇𑀢𑀭𑀸𑀦𑀺 𑀢𑀻𑀡𑀺 𑀧𑀳𑀸𑀦𑀸𑀦𑀺 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀦𑀢𑁆𑀣𑀺. 𑀢𑀣𑀸 𑀲𑀻𑀮𑀲𑀁𑀯𑀭𑁄, 𑀔𑀦𑁆𑀢𑀺𑀲𑀁𑀯𑀭𑁄, 𑀜𑀸𑀡𑀲𑀁𑀯𑀭𑁄, 𑀲𑀢𑀺𑀲𑀁𑀯𑀭𑁄, 𑀯𑀻𑀭𑀺𑀬𑀲𑀁𑀯𑀭𑁄𑀢𑀺 𑀧𑀜𑁆𑀘 𑀲𑀁𑀯𑀭𑀸, 𑀢𑁂𑀲𑀼 𑀧𑀜𑁆𑀘𑀲𑀻𑀮𑀫𑀢𑁆𑀢𑀫𑁂𑀯 𑀅𑀥𑀺𑀯𑀸𑀲𑀦𑀔𑀦𑁆𑀢𑀺𑀫𑀢𑁆𑀢𑀫𑁂𑀯 𑀘 𑀅𑀜𑁆𑀜𑁂𑀲𑀁 𑀳𑁄𑀢𑀺, 𑀲𑁂𑀲𑀁 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀦𑀢𑁆𑀣𑀺.

𑀧𑀜𑁆𑀘 𑀔𑁄 𑀧𑀦𑀺𑀫𑁂 𑀉𑀧𑁄𑀲𑀣𑀼𑀤𑁆𑀤𑁂𑀲𑀸, 𑀢𑁂𑀲𑀼 𑀧𑀜𑁆𑀘𑀲𑀻𑀮𑀫𑀢𑁆𑀢𑀫𑁂𑀯 𑀅𑀜𑁆𑀜𑁂𑀲𑀁 𑀳𑁄𑀢𑀺. 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀻𑀮𑀁 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀦𑀢𑁆𑀣𑀺. 𑀇𑀢𑀺 𑀅𑀓𑀼𑀲𑀮𑀧𑁆𑀧𑀳𑀸𑀦𑁂 𑀘 𑀓𑀼𑀲𑀮𑀲𑀫𑀸𑀤𑀸𑀦𑁂 𑀘, 𑀢𑀻𑀲𑀼 𑀯𑀺𑀭𑀢𑀻𑀲𑀼, 𑀧𑀜𑁆𑀘𑀲𑀼 𑀧𑀳𑀸𑀦𑁂𑀲𑀼, 𑀧𑀜𑁆𑀘𑀲𑀼 𑀲𑀁𑀯𑀭𑁂𑀲𑀼, 𑀧𑀜𑁆𑀘𑀲𑀼 𑀉𑀤𑁆𑀤𑁂𑀲𑁂𑀲𑀼, 𑁋 ‘‘𑀅𑀳𑀫𑁂𑀯 𑀘 𑀫𑀬𑁆𑀳𑀜𑁆𑀘 𑀲𑀸𑀯𑀓𑀲𑀗𑁆𑀖𑁄 𑀮𑁄𑀓𑁂 𑀧𑀜𑁆𑀜𑀸𑀬𑀢𑀺, 𑀫𑀬𑀸 𑀳𑀺 𑀲𑀤𑀺𑀲𑁄 𑀲𑀢𑁆𑀣𑀸 𑀦𑀸𑀫, 𑀫𑀬𑁆𑀳𑀁 𑀲𑀸𑀯𑀓𑀲𑀗𑁆𑀖𑁂𑀦 𑀲𑀤𑀺𑀲𑁄 𑀲𑀗𑁆𑀖𑁄 𑀦𑀸𑀫 𑀦𑀢𑁆𑀣𑀻’’𑀢𑀺 𑀪𑀕𑀯𑀸 𑀲𑀻𑀳𑀦𑀸𑀤𑀁 𑀦𑀤𑀢𑀺.

𑀅𑀭𑀺𑀬𑀅𑀝𑁆𑀞𑀗𑁆𑀕𑀺𑀓𑀫𑀕𑁆𑀕𑀯𑀡𑁆𑀡𑀦𑀸

𑁩𑁯𑁩. 𑀏𑀯𑀁 𑀲𑀻𑀳𑀦𑀸𑀤𑀁 𑀦𑀤𑀺𑀢𑁆𑀯𑀸 𑀢𑀲𑁆𑀲 𑀲𑀻𑀳𑀦𑀸𑀤𑀲𑁆𑀲 𑀅𑀯𑀺𑀧𑀭𑀻𑀢𑀪𑀸𑀯𑀸𑀯𑀩𑁄𑀥𑀦𑀢𑁆𑀣𑀁 𑁋 ‘‘𑀅𑀢𑁆𑀣𑀺, 𑀓𑀲𑁆𑀲𑀧, 𑀫𑀕𑁆𑀕𑁄’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀫𑀕𑁆𑀕𑁄𑀢𑀺 𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑁄. 𑀧𑀝𑀺𑀧𑀤𑀸𑀢𑀺 𑀧𑀼𑀩𑁆𑀩𑀪𑀸𑀕𑀧𑀝𑀺𑀧𑀤𑀸. 𑀓𑀸𑀮𑀯𑀸𑀤𑀻𑀢𑀺𑀆𑀤𑀻𑀦𑀺 𑀩𑁆𑀭𑀳𑁆𑀫𑀚𑀸𑀮𑁂 𑀯𑀡𑁆𑀡𑀺𑀢𑀸𑀦𑀺. 𑀇𑀤𑀸𑀦𑀺 𑀢𑀁 𑀤𑀼𑀯𑀺𑀥𑀁 𑀫𑀕𑁆𑀕𑀜𑁆𑀘 𑀧𑀝𑀺𑀧𑀤𑀜𑁆𑀘 𑀏𑀓𑀢𑁄 𑀓𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 𑁋 ‘‘𑀅𑀬𑀫𑁂𑀯 𑀅𑀭𑀺𑀬𑁄’’𑀢𑀺𑀆𑀤𑀺𑀫𑀸𑀳. 𑀇𑀤𑀁 𑀧𑀦 𑀲𑀼𑀢𑁆𑀯𑀸 𑀅𑀘𑁂𑀮𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀲𑀫𑀡𑁄 𑀕𑁄𑀢𑀫𑁄 𑀫𑀬𑁆𑀳𑀁𑀬𑁂𑀯 𑀫𑀕𑁆𑀕𑁄 𑀘 𑀧𑀝𑀺𑀧𑀤𑀸 𑀘 𑀅𑀢𑁆𑀣𑀺, 𑀅𑀜𑁆𑀜𑁂𑀲𑀁 𑀦𑀢𑁆𑀣𑀻𑀢𑀺 𑀫𑀜𑁆𑀜𑀢𑀺, 𑀳𑀦𑁆𑀤𑀲𑁆𑀲𑀸𑀳𑀁 𑀅𑀫𑁆𑀳𑀸𑀓𑀫𑁆𑀧𑀺 𑀫𑀕𑁆𑀕𑀁 𑀓𑀣𑁂𑀫𑀻’’𑀢𑀺. 𑀢𑀢𑁄 𑀅𑀘𑁂𑀮𑀓𑀧𑀝𑀺𑀧𑀤𑀁 𑀓𑀣𑁂𑀲𑀺. 𑀢𑁂𑀦𑀸𑀳 𑁋 ‘‘𑀏𑀯𑀁 𑀯𑀼𑀢𑁆𑀢𑁂 𑀅𑀘𑁂𑀮𑁄 𑀓𑀲𑁆𑀲𑀧𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘…𑀧𑁂… 𑀉𑀤𑀓𑁄𑀭𑁄𑀳𑀦𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑁄 𑀯𑀺𑀳𑀭𑀢𑀻’’𑀢𑀺.

𑀢𑀧𑁄𑀧𑀓𑁆𑀓𑀫𑀓𑀣𑀸𑀯𑀡𑁆𑀡𑀦𑀸

𑁩𑁯𑁪. 𑀢𑀢𑁆𑀣 𑀢𑀧𑁄𑀧𑀓𑁆𑀓𑀫𑀸𑀢𑀺 𑀢𑀧𑀸𑀭𑀫𑁆𑀪𑀸, 𑀢𑀧𑀓𑀫𑁆𑀫𑀸𑀦𑀻𑀢𑀺 𑀅𑀢𑁆𑀣𑁄. 𑀲𑀸𑀫𑀜𑁆𑀜𑀲𑀗𑁆𑀔𑀸𑀢𑀸𑀢𑀺 𑀲𑀫𑀡𑀓𑀫𑁆𑀫𑀲𑀗𑁆𑀔𑀸𑀢𑀸. 𑀩𑁆𑀭𑀳𑁆𑀫𑀜𑁆𑀜𑀲𑀗𑁆𑀔𑀸𑀢𑀸𑀢𑀺 𑀩𑁆𑀭𑀸𑀳𑁆𑀫𑀡𑀓𑀫𑁆𑀫𑀲𑀗𑁆𑀔𑀸𑀢𑀸. 𑀅𑀘𑁂𑀮𑀓𑁄𑀢𑀺 𑀦𑀺𑀘𑁆𑀘𑁄𑀮𑁄, 𑀦𑀕𑁆𑀕𑁄𑀢𑀺 𑀅𑀢𑁆𑀣𑁄. 𑀫𑀼𑀢𑁆𑀢𑀸𑀘𑀸𑀭𑁄𑀢𑀺 𑀯𑀺𑀲𑀝𑁆𑀞𑀸𑀘𑀸𑀭𑁄, 𑀉𑀘𑁆𑀘𑀸𑀭𑀓𑀫𑁆𑀫𑀸𑀤𑀻𑀲𑀼 𑀮𑁄𑀓𑀺𑀬𑀓𑀼𑀮𑀧𑀼𑀢𑁆𑀢𑀸𑀘𑀸𑀭𑁂𑀦 𑀯𑀺𑀭𑀳𑀺𑀢𑁄 𑀞𑀺𑀢𑀓𑁄𑀯 𑀉𑀘𑁆𑀘𑀸𑀭𑀁 𑀓𑀭𑁄𑀢𑀺, 𑀧𑀲𑁆𑀲𑀸𑀯𑀁 𑀓𑀭𑁄𑀢𑀺, 𑀔𑀸𑀤𑀢𑀺, 𑀪𑀼𑀜𑁆𑀚𑀢𑀺 𑀘. 𑀳𑀢𑁆𑀣𑀸𑀧𑀮𑁂𑀔𑀦𑁄𑀢𑀺 𑀳𑀢𑁆𑀣𑁂 𑀧𑀺𑀡𑁆𑀟𑀫𑁆𑀳𑀺 𑀞𑀺𑀢𑁂 𑀚𑀺𑀯𑁆𑀳𑀸𑀬 𑀳𑀢𑁆𑀣𑀁 𑀅𑀧𑀮𑀺𑀔𑀢𑀺, 𑀉𑀘𑁆𑀘𑀸𑀭𑀁 𑀯𑀸 𑀓𑀢𑁆𑀯𑀸 𑀳𑀢𑁆𑀣𑀲𑁆𑀫𑀺𑀜𑁆𑀜𑁂𑀯 𑀤𑀡𑁆𑀟𑀓𑀲𑀜𑁆𑀜𑀻 𑀳𑀼𑀢𑁆𑀯𑀸 𑀳𑀢𑁆𑀣𑁂𑀦 𑀅𑀧𑀮𑀺𑀔𑀢𑀺. ‘‘𑀪𑀺𑀓𑁆𑀔𑀸𑀕𑀳𑀡𑀢𑁆𑀣𑀁 𑀏𑀳𑀺, 𑀪𑀦𑁆𑀢𑁂’’𑀢𑀺 𑀯𑀼𑀢𑁆𑀢𑁄 𑀦 𑀏𑀢𑀻𑀢𑀺 𑀦 𑀏𑀳𑀺𑀪𑀤𑁆𑀤𑀦𑁆𑀢𑀺𑀓𑁄. ‘‘𑀢𑁂𑀦 𑀳𑀺 𑀢𑀺𑀝𑁆𑀞, 𑀪𑀦𑁆𑀢𑁂’’𑀢𑀺 𑀯𑀼𑀢𑁆𑀢𑁄𑀧𑀺 𑀦 𑀢𑀺𑀝𑁆𑀞𑀢𑀻𑀢𑀺 𑀦𑀢𑀺𑀝𑁆𑀞𑀪𑀤𑁆𑀤𑀦𑁆𑀢𑀺𑀓𑁄. 𑀢𑀤𑀼𑀪𑀬𑀫𑁆𑀧𑀺 𑀓𑀺𑀭 𑀲𑁄 𑁋 ‘‘𑀏𑀢𑀲𑁆𑀲 𑀯𑀘𑀦𑀁 𑀓𑀢𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀦 𑀓𑀭𑁄𑀢𑀺. 𑀅𑀪𑀺𑀳𑀝𑀦𑁆𑀢𑀺 𑀧𑀼𑀭𑁂𑀢𑀭𑀁 𑀕𑀳𑁂𑀢𑁆𑀯𑀸 𑀆𑀳𑀝𑀁 𑀪𑀺𑀓𑁆𑀔𑀁, 𑀉𑀤𑁆𑀤𑀺𑀲𑁆𑀲𑀓𑀢𑀦𑁆𑀢𑀺 ‘‘𑀇𑀫𑀁 𑀢𑀼𑀫𑁆𑀳𑁂 𑀉𑀤𑁆𑀤𑀺𑀲𑁆𑀲 𑀓𑀢’’𑀦𑁆𑀢𑀺 𑀏𑀯𑀁 𑀆𑀭𑁄𑀘𑀺𑀢𑀁 𑀪𑀺𑀓𑁆𑀔𑀁. 𑀦 𑀦𑀺𑀫𑀦𑁆𑀢𑀦𑀦𑁆𑀢𑀺 ‘‘𑀅𑀲𑀼𑀓𑀁 𑀦𑀸𑀫 𑀓𑀼𑀮𑀁 𑀯𑀸 𑀯𑀻𑀣𑀺𑀁 𑀯𑀸 𑀕𑀸𑀫𑀁 𑀯𑀸 𑀧𑀯𑀺𑀲𑁂𑀬𑁆𑀬𑀸𑀣𑀸’’𑀢𑀺 𑀏𑀯𑀁 𑀦𑀺𑀫𑀦𑁆𑀢𑀺𑀢𑀪𑀺𑀓𑁆𑀔𑀫𑁆𑀧𑀺 𑀦 𑀲𑀸𑀤𑀺𑀬𑀢𑀺, 𑀦 𑀕𑀡𑁆𑀳𑀢𑀺. 𑀦 𑀓𑀼𑀫𑁆𑀪𑀺𑀫𑀼𑀔𑀸𑀢𑀺 𑀓𑀼𑀫𑁆𑀪𑀺𑀢𑁄 𑀉𑀤𑁆𑀥𑀭𑀺𑀢𑁆𑀯𑀸 𑀤𑀺𑀬𑁆𑀬𑀫𑀸𑀦𑀁 𑀪𑀺𑀓𑁆𑀔𑀁 𑀦 𑀕𑀡𑁆𑀳𑀢𑀺. 𑀦 𑀓𑀴𑁄𑀧𑀺𑀫𑀼𑀔𑀸𑀢𑀺 𑀓𑀴𑁄𑀧𑀻𑀢𑀺 𑀉𑀓𑁆𑀔𑀮𑀺 𑀯𑀸 𑀧𑀘𑁆𑀙𑀺 𑀯𑀸, 𑀢𑀢𑁄𑀧𑀺 𑀦 𑀕𑀡𑁆𑀳𑀢𑀺. 𑀓𑀲𑁆𑀫𑀸? 𑀓𑀼𑀫𑁆𑀪𑀺𑀓𑀴𑁄𑀧𑀺𑀬𑁄 𑀫𑀁 𑀦𑀺𑀲𑁆𑀲𑀸𑀬 𑀓𑀝𑀘𑁆𑀙𑀼𑀦𑀸 𑀧𑀳𑀸𑀭𑀁 𑀮𑀪𑀦𑁆𑀢𑀻𑀢𑀺. 𑀦 𑀏𑀴𑀓𑀫𑀦𑁆𑀢𑀭𑀦𑁆𑀢𑀺 𑀉𑀫𑁆𑀫𑀸𑀭𑀁 𑀅𑀦𑁆𑀢𑀭𑀁 𑀓𑀢𑁆𑀯𑀸 𑀤𑀺𑀬𑁆𑀬𑀫𑀸𑀦𑀁 𑀦 𑀕𑀡𑁆𑀳𑀢𑀺. 𑀓𑀲𑁆𑀫𑀸? ‘‘𑀅𑀬𑀁 𑀫𑀁 𑀦𑀺𑀲𑁆𑀲𑀸𑀬 𑀅𑀦𑁆𑀢𑀭𑀓𑀭𑀡𑀁 𑀮𑀪𑀢𑀻’’𑀢𑀺. 𑀤𑀡𑁆𑀟𑀫𑀼𑀲𑀮𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀤𑁆𑀯𑀺𑀦𑁆𑀦𑀦𑁆𑀢𑀺 𑀤𑁆𑀯𑀻𑀲𑀼 𑀪𑀼𑀜𑁆𑀚𑀫𑀸𑀦𑁂𑀲𑀼 𑀏𑀓𑀲𑁆𑀫𑀺𑀁 𑀉𑀝𑁆𑀞𑀸𑀬 𑀤𑁂𑀦𑁆𑀢𑁂 𑀦 𑀕𑀡𑁆𑀳𑀢𑀺. 𑀓𑀲𑁆𑀫𑀸? ‘‘𑀏𑀓𑀲𑁆𑀲 𑀓𑀩𑀴𑀦𑁆𑀢𑀭𑀸𑀬𑁄 𑀳𑁄𑀢𑀻’’𑀢𑀺. 𑀦 𑀕𑀩𑁆𑀪𑀺𑀦𑀺𑀬𑀸𑀢𑀺𑀆𑀤𑀻𑀲𑀼 𑀧𑀦 ‘‘𑀕𑀩𑁆𑀪𑀺𑀦𑀺𑀬𑀸 𑀓𑀼𑀘𑁆𑀙𑀺𑀬𑀁 𑀤𑀸𑀭𑀓𑁄 𑀓𑀺𑀮𑀫𑀢𑀺. 𑀧𑀸𑀬𑀦𑁆𑀢𑀺𑀬𑀸 𑀤𑀸𑀭𑀓𑀲𑁆𑀲 𑀔𑀻𑀭𑀦𑁆𑀢𑀭𑀸𑀬𑁄 𑀳𑁄𑀢𑀺, 𑀧𑀼𑀭𑀺𑀲𑀦𑁆𑀢𑀭𑀕𑀢𑀸𑀬 𑀭𑀢𑀺𑀅𑀦𑁆𑀢𑀭𑀸𑀬𑁄 𑀳𑁄𑀢𑀻’’𑀢𑀺 𑀦 𑀕𑀡𑁆𑀳𑀢𑀺. 𑀲𑀁𑀓𑀺𑀢𑁆𑀢𑀻𑀲𑀽𑀢𑀺 𑀲𑀁𑀓𑀺𑀢𑁆𑀢𑁂𑀢𑁆𑀯𑀸 𑀓𑀢𑀪𑀢𑁆𑀢𑁂𑀲𑀼, 𑀤𑀼𑀩𑁆𑀪𑀺𑀓𑁆𑀔𑀲𑀫𑀬𑁂 𑀓𑀺𑀭 𑀅𑀘𑁂𑀮𑀓𑀲𑀸𑀯𑀓𑀸 𑀅𑀘𑁂𑀮𑀓𑀸𑀦𑀁 𑀅𑀢𑁆𑀣𑀸𑀬 𑀢𑀢𑁄 𑀢𑀢𑁄 𑀢𑀡𑁆𑀟𑀼𑀮𑀸𑀤𑀻𑀦𑀺 𑀲𑀫𑀸𑀤𑀧𑁂𑀢𑁆𑀯𑀸 𑀪𑀢𑁆𑀢𑀁 𑀧𑀘𑀦𑁆𑀢𑀺. 𑀉𑀓𑁆𑀓𑀝𑁆𑀞𑁄 𑀅𑀘𑁂𑀮𑀓𑁄 𑀢𑀢𑁄𑀧𑀺 𑀦 𑀧𑀝𑀺𑀕𑁆𑀕𑀡𑁆𑀳𑀢𑀺. 𑀦 𑀬𑀢𑁆𑀣 𑀲𑀸𑀢𑀺 𑀬𑀢𑁆𑀣 𑀲𑀼𑀦𑀔𑁄 𑁋 ‘‘𑀧𑀺𑀡𑁆𑀟𑀁 𑀮𑀪𑀺𑀲𑁆𑀲𑀸𑀫𑀻’’𑀢𑀺 𑀉𑀧𑀝𑁆𑀞𑀺𑀢𑁄 𑀳𑁄𑀢𑀺, 𑀢𑀢𑁆𑀣 𑀢𑀲𑁆𑀲 𑀅𑀤𑀢𑁆𑀯𑀸 𑀆𑀳𑀝𑀁 𑀦 𑀕𑀡𑁆𑀳𑀢𑀺. 𑀓𑀲𑁆𑀫𑀸? 𑀏𑀢𑀲𑁆𑀲 𑀧𑀺𑀡𑁆𑀟𑀦𑁆𑀢𑀭𑀸𑀬𑁄 𑀳𑁄𑀢𑀻𑀢𑀺. 𑀲𑀡𑁆𑀟𑀲𑀡𑁆𑀟𑀘𑀸𑀭𑀺𑀦𑀻𑀢𑀺 𑀲𑀫𑀽𑀳𑀲𑀫𑀽𑀳𑀘𑀸𑀭𑀺𑀦𑀻, 𑀲𑀘𑁂 𑀳𑀺 𑀅𑀘𑁂𑀮𑀓𑀁 𑀤𑀺𑀲𑁆𑀯𑀸 𑁋 ‘‘𑀇𑀫𑀲𑁆𑀲 𑀪𑀺𑀓𑁆𑀔𑀁 𑀤𑀲𑁆𑀲𑀸𑀫𑀸’’𑀢𑀺 𑀫𑀦𑀼𑀲𑁆𑀲𑀸 𑀪𑀢𑁆𑀢𑀕𑁂𑀳𑀁 𑀧𑀯𑀺𑀲𑀦𑁆𑀢𑀺, 𑀢𑁂𑀲𑀼 𑀘 𑀧𑀯𑀺𑀲𑀦𑁆𑀢𑁂𑀲𑀼 𑀓𑀴𑁄𑀧𑀺𑀫𑀼𑀔𑀸𑀤𑀻𑀲𑀼 𑀦𑀺𑀮𑀻𑀦𑀸 𑀫𑀓𑁆𑀔𑀺𑀓𑀸 𑀉𑀧𑁆𑀧𑀢𑀺𑀢𑁆𑀯𑀸 𑀲𑀡𑁆𑀟𑀲𑀡𑁆𑀟𑀸 𑀘𑀭𑀦𑁆𑀢𑀺, 𑀢𑀢𑁄 𑀆𑀳𑀝𑀁 𑀪𑀺𑀓𑁆𑀔𑀁 𑀦 𑀕𑀡𑁆𑀳𑀢𑀺. 𑀓𑀲𑁆𑀫𑀸? 𑀫𑀁 𑀦𑀺𑀲𑁆𑀲𑀸𑀬 𑀫𑀓𑁆𑀔𑀺𑀓𑀸𑀦𑀁 𑀕𑁄𑀘𑀭𑀦𑁆𑀢𑀭𑀸𑀬𑁄 𑀚𑀸𑀢𑁄𑀢𑀺.

𑀣𑀼𑀲𑁄𑀤𑀓𑀦𑁆𑀢𑀺 𑀲𑀩𑁆𑀩𑀲𑀲𑁆𑀲𑀲𑀫𑁆𑀪𑀸𑀭𑁂𑀳𑀺 𑀓𑀢𑀁 𑀲𑁄𑀯𑀻𑀭𑀓𑀁. 𑀏𑀢𑁆𑀣 𑀘 𑀲𑀼𑀭𑀸𑀧𑀸𑀦𑀫𑁂𑀯 𑀲𑀸𑀯𑀚𑁆𑀚𑀁, 𑀅𑀬𑀁 𑀧𑀦 𑀲𑀩𑁆𑀩𑁂𑀲𑀼𑀧𑀺 𑀲𑀸𑀯𑀚𑁆𑀚𑀲𑀜𑁆𑀜𑀻. 𑀏𑀓𑀸𑀕𑀸𑀭𑀺𑀓𑁄𑀢𑀺 𑀬𑁄 𑀏𑀓𑀲𑁆𑀫𑀺𑀁𑀬𑁂𑀯 𑀕𑁂𑀳𑁂 𑀪𑀺𑀓𑁆𑀔𑀁 𑀮𑀪𑀺𑀢𑁆𑀯𑀸 𑀦𑀺𑀯𑀢𑁆𑀢𑀢𑀺. 𑀏𑀓𑀸𑀮𑁄𑀧𑀺𑀓𑁄𑀢𑀺 𑀬𑁄 𑀏𑀓𑁂𑀦𑁂𑀯 𑀆𑀮𑁄𑀧𑁂𑀦 𑀬𑀸𑀧𑁂𑀢𑀺. 𑀤𑁆𑀯𑀸𑀕𑀸𑀭𑀺𑀓𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀏𑀓𑀺𑀲𑁆𑀲𑀸𑀧𑀺 𑀤𑀢𑁆𑀢𑀺𑀬𑀸𑀢𑀺 𑀏𑀓𑀸𑀬 𑀤𑀢𑁆𑀢𑀺𑀬𑀸. 𑀤𑀢𑁆𑀢𑀺 𑀦𑀸𑀫 𑀏𑀓𑀸 𑀔𑀼𑀤𑁆𑀤𑀓𑀧𑀸𑀢𑀺 𑀳𑁄𑀢𑀺, 𑀬𑀢𑁆𑀣 𑀅𑀕𑁆𑀕𑀪𑀺𑀓𑁆𑀔𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀞𑀧𑁂𑀦𑁆𑀢𑀺. 𑀏𑀓𑀸𑀳𑀺𑀓𑀦𑁆𑀢𑀺 𑀏𑀓𑀤𑀺𑀯𑀲𑀦𑁆𑀢𑀭𑀺𑀓𑀁. 𑀅𑀤𑁆𑀥𑀫𑀸𑀲𑀺𑀓𑀦𑁆𑀢𑀺 𑀅𑀤𑁆𑀥𑀫𑀸𑀲𑀦𑁆𑀢𑀭𑀺𑀓𑀁. 𑀧𑀭𑀺𑀬𑀸𑀬𑀪𑀢𑁆𑀢𑀪𑁄𑀚𑀦𑀦𑁆𑀢𑀺 𑀯𑀸𑀭𑀪𑀢𑁆𑀢𑀪𑁄𑀚𑀦𑀁, 𑀏𑀓𑀸𑀳𑀯𑀸𑀭𑁂𑀦 𑀤𑁆𑀯𑀻𑀳𑀯𑀸𑀭𑁂𑀦 𑀲𑀢𑁆𑀢𑀸𑀳𑀯𑀸𑀭𑁂𑀦 𑀅𑀟𑁆𑀠𑀫𑀸𑀲𑀯𑀸𑀭𑁂𑀦𑀸𑀢𑀺 𑀏𑀯𑀁 𑀤𑀺𑀯𑀲𑀯𑀸𑀭𑁂𑀦 𑀆𑀕𑀢𑀪𑀢𑁆𑀢𑀪𑁄𑀚𑀦𑀁.

𑁩𑁯𑁫. 𑀲𑀸𑀓𑀪𑀓𑁆𑀔𑁄𑀢𑀺 𑀅𑀮𑁆𑀮𑀲𑀸𑀓𑀪𑀓𑁆𑀔𑁄. 𑀲𑀸𑀫𑀸𑀓𑀪𑀓𑁆𑀔𑁄𑀢𑀺 𑀲𑀸𑀫𑀸𑀓𑀢𑀡𑁆𑀟𑀼𑀮𑀪𑀓𑁆𑀔𑁄. 𑀦𑀻𑀯𑀸𑀭𑀸𑀤𑀻𑀲𑀼 𑀦𑀻𑀯𑀸𑀭𑁄 𑀦𑀸𑀫 𑀅𑀭𑀜𑁆𑀜𑁂 𑀲𑀬𑀁𑀚𑀸𑀢𑀸 𑀯𑀻𑀳𑀺𑀚𑀸𑀢𑀺. 𑀤𑀤𑁆𑀤𑀼𑀮𑀦𑁆𑀢𑀺 𑀘𑀫𑁆𑀫𑀓𑀸𑀭𑁂𑀳𑀺 𑀘𑀫𑁆𑀫𑀁 𑀮𑀺𑀔𑀺𑀢𑁆𑀯𑀸 𑀙𑀟𑁆𑀟𑀺𑀢𑀓𑀲𑀝𑀁. 𑀳𑀝𑀁 𑀯𑀼𑀘𑁆𑀘𑀢𑀺 𑀲𑀺𑀮𑁂𑀲𑁄𑀧𑀺 𑀲𑁂𑀯𑀸𑀮𑁄𑀧𑀺. 𑀓𑀡𑀦𑁆𑀢𑀺 𑀓𑀼𑀡𑁆𑀟𑀓𑀁. 𑀆𑀘𑀸𑀫𑁄𑀢𑀺 𑀪𑀢𑁆𑀢𑀉𑀓𑁆𑀔𑀮𑀺𑀓𑀸𑀬 𑀮𑀕𑁆𑀕𑁄 𑀛𑀸𑀫𑀓𑀑𑀤𑀦𑁄, 𑀢𑀁 𑀙𑀟𑁆𑀟𑀺𑀢𑀝𑁆𑀞𑀸𑀦𑀢𑁄𑀯 𑀕𑀳𑁂𑀢𑁆𑀯𑀸 𑀔𑀸𑀤𑀢𑀺, ‘‘𑀑𑀤𑀦𑀓𑀜𑁆𑀚𑀺𑀬’’𑀦𑁆𑀢𑀺𑀧𑀺 𑀯𑀤𑀦𑁆𑀢𑀺. 𑀧𑀺𑀜𑁆𑀜𑀸𑀓𑀸𑀤𑀬𑁄 𑀧𑀸𑀓𑀝𑀸 𑀏𑀯. 𑀧𑀯𑀢𑁆𑀢𑀨𑀮𑀪𑁄𑀚𑀻𑀢𑀺 𑀧𑀢𑀺𑀢𑀨𑀮𑀪𑁄𑀚𑀻.

𑁩𑁯𑁬. 𑀲𑀸𑀡𑀸𑀦𑀻𑀢𑀺 𑀲𑀸𑀡𑀯𑀸𑀓𑀘𑁄𑀴𑀸𑀦𑀺. 𑀫𑀲𑀸𑀡𑀸𑀦𑀻𑀢𑀺 𑀫𑀺𑀲𑁆𑀲𑀓𑀘𑁄𑀴𑀸𑀦𑀺. 𑀙𑀯𑀤𑀼𑀲𑁆𑀲𑀸𑀦𑀻𑀢𑀺 𑀫𑀢𑀲𑀭𑀻𑀭𑀢𑁄 𑀙𑀟𑁆𑀟𑀺𑀢𑀯𑀢𑁆𑀣𑀸𑀦𑀺, 𑀏𑀭𑀓𑀢𑀺𑀡𑀸𑀤𑀻𑀦𑀺 𑀯𑀸 𑀕𑀦𑁆𑀣𑁂𑀢𑁆𑀯𑀸 𑀓𑀢𑀦𑀺𑀯𑀸𑀲𑀦𑀸𑀦𑀺. 𑀧𑀁𑀲𑀼𑀓𑀽𑀮𑀸𑀦𑀻𑀢𑀺 𑀧𑀣𑀯𑀺𑀬𑀁 𑀙𑀟𑁆𑀟𑀺𑀢𑀦𑀦𑁆𑀢𑀓𑀸𑀦𑀺. 𑀢𑀺𑀭𑀻𑀝𑀸𑀦𑀻𑀢𑀺 𑀭𑀼𑀓𑁆𑀔𑀢𑀘𑀯𑀢𑁆𑀣𑀸𑀦𑀺. 𑀅𑀚𑀺𑀦𑀦𑁆𑀢𑀺 𑀅𑀚𑀺𑀦𑀫𑀺𑀕𑀘𑀫𑁆𑀫𑀁. 𑀅𑀚𑀺𑀦𑀓𑁆𑀔𑀺𑀧𑀦𑁆𑀢𑀺 𑀢𑀤𑁂𑀯 𑀫𑀚𑁆𑀛𑁂 𑀨𑀸𑀮𑀺𑀢𑀓𑀁. 𑀓𑀼𑀲𑀘𑀻𑀭𑀦𑁆𑀢𑀺 𑀓𑀼𑀲𑀢𑀺𑀡𑀸𑀦𑀺 𑀕𑀦𑁆𑀣𑁂𑀢𑁆𑀯𑀸 𑀓𑀢𑀘𑀻𑀭𑀁. 𑀯𑀸𑀓𑀘𑀻𑀭𑀨𑀮𑀓𑀘𑀻𑀭𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀓𑁂𑀲𑀓𑀫𑁆𑀩𑀮𑀦𑁆𑀢𑀺 𑀫𑀦𑀼𑀲𑁆𑀲𑀓𑁂𑀲𑁂𑀳𑀺 𑀓𑀢𑀓𑀫𑁆𑀩𑀮𑀁. 𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑁋

‘‘𑀲𑁂𑀬𑁆𑀬𑀣𑀸𑀧𑀺 𑀪𑀺𑀓𑁆𑀔𑀯𑁂, 𑀬𑀸𑀦𑀺 𑀓𑀸𑀦𑀺𑀘𑀺 𑀢𑀦𑁆𑀢𑀸𑀯𑀼𑀢𑀸𑀦𑀺 𑀯𑀢𑁆𑀣𑀸𑀦𑀺, 𑀓𑁂𑀲𑀓𑀫𑁆𑀩𑀮𑁄 𑀢𑁂𑀲𑀁 𑀧𑀝𑀺𑀓𑀺𑀝𑁆𑀞𑁄 𑀅𑀓𑁆𑀔𑀸𑀬𑀢𑀺. 𑀓𑁂𑀲𑀓𑀫𑁆𑀩𑀮𑁄, 𑀪𑀺𑀓𑁆𑀔𑀯𑁂, 𑀲𑀻𑀢𑁂 𑀲𑀻𑀢𑁄, 𑀉𑀡𑁆𑀳𑁂 𑀉𑀡𑁆𑀳𑁄 𑀅𑀧𑁆𑀧𑀕𑁆𑀖𑁄 𑀘 𑀤𑀼𑀩𑁆𑀩𑀡𑁆𑀡𑁄 𑀘 𑀤𑀼𑀕𑁆𑀕𑀦𑁆𑀥𑁄 𑀤𑀼𑀓𑁆𑀔𑀲𑀫𑁆𑀨𑀲𑁆𑀲𑁄’’𑀢𑀺.

𑀯𑀸𑀴𑀓𑀫𑁆𑀩𑀮𑀦𑁆𑀢𑀺 𑀅𑀲𑁆𑀲𑀯𑀸𑀮𑁂𑀳𑀺 𑀓𑀢𑀓𑀫𑁆𑀩𑀮𑀁. 𑀉𑀮𑀽𑀓𑀧𑀓𑁆𑀔𑀺𑀓𑀦𑁆𑀢𑀺 𑀉𑀮𑀽𑀓𑀧𑀓𑁆𑀔𑀸𑀦𑀺 𑀕𑀦𑁆𑀣𑁂𑀢𑁆𑀯𑀸 𑀓𑀢𑀦𑀺𑀯𑀸𑀲𑀦𑀁. 𑀉𑀓𑁆𑀓𑀼𑀝𑀺𑀓𑀧𑁆𑀧𑀥𑀸𑀦𑀫𑀦𑀼𑀬𑀼𑀢𑁆𑀢𑁄𑀢𑀺 𑀉𑀓𑁆𑀓𑀼𑀝𑀺𑀓𑀯𑀻𑀭𑀺𑀬𑀁 𑀅𑀦𑀼𑀬𑀼𑀢𑁆𑀢𑁄, 𑀕𑀘𑁆𑀙𑀦𑁆𑀢𑁄𑀧𑀺 𑀉𑀓𑁆𑀓𑀼𑀝𑀺𑀓𑁄𑀯 𑀳𑀼𑀢𑁆𑀯𑀸 𑀉𑀧𑁆𑀧𑀢𑀺𑀢𑁆𑀯𑀸 𑀉𑀧𑁆𑀧𑀢𑀺𑀢𑁆𑀯𑀸 𑀕𑀘𑁆𑀙𑀢𑀺. 𑀓𑀡𑁆𑀝𑀓𑀸𑀧𑀲𑁆𑀲𑀬𑀺𑀓𑁄𑀢𑀺 𑀅𑀬𑀓𑀡𑁆𑀝𑀓𑁂 𑀯𑀸 𑀧𑀓𑀢𑀺𑀓𑀡𑁆𑀝𑀓𑁂 𑀯𑀸 𑀪𑀽𑀫𑀺𑀬𑀁 𑀓𑁄𑀝𑁆𑀝𑁂𑀢𑁆𑀯𑀸 𑀢𑀢𑁆𑀣 𑀘𑀫𑁆𑀫𑀁 𑀅𑀢𑁆𑀣𑀭𑀺𑀢𑁆𑀯𑀸 𑀞𑀸𑀦𑀘𑀗𑁆𑀓𑀫𑀸𑀤𑀻𑀦𑀺 𑀓𑀭𑁄𑀢𑀺. 𑀲𑁂𑀬𑁆𑀬𑀦𑁆𑀢𑀺 𑀲𑀬𑀦𑁆𑀢𑁄𑀧𑀺 𑀢𑀢𑁆𑀣𑁂𑀯 𑀲𑁂𑀬𑁆𑀬𑀁 𑀓𑀧𑁆𑀧𑁂𑀢𑀺. 𑀨𑀮𑀓𑀲𑁂𑀬𑁆𑀬𑀦𑁆𑀢𑀺 𑀭𑀼𑀓𑁆𑀔𑀨𑀮𑀓𑁂 𑀲𑁂𑀬𑁆𑀬𑀁. 𑀣𑀡𑁆𑀟𑀺𑀮𑀲𑁂𑀬𑁆𑀬𑀦𑁆𑀢𑀺 𑀣𑀡𑁆𑀟𑀺𑀮𑁂 𑀉𑀘𑁆𑀘𑁂 𑀪𑀽𑀫𑀺𑀞𑀸𑀦𑁂 𑀲𑁂𑀬𑁆𑀬𑀁. 𑀏𑀓𑀧𑀲𑁆𑀲𑀬𑀺𑀓𑁄𑀢𑀺 𑀏𑀓𑀧𑀲𑁆𑀲𑁂𑀦𑁂𑀯 𑀲𑀬𑀢𑀺. 𑀭𑀚𑁄𑀚𑀮𑁆𑀮𑀥𑀭𑁄𑀢𑀺 𑀲𑀭𑀻𑀭𑀁 𑀢𑁂𑀮𑁂𑀦 𑀫𑀓𑁆𑀔𑀺𑀢𑁆𑀯𑀸 𑀭𑀚𑀼𑀝𑁆𑀞𑀸𑀦𑀝𑁆𑀞𑀸𑀦𑁂 𑀢𑀺𑀝𑁆𑀞𑀢𑀺, 𑀅𑀣𑀲𑁆𑀲 𑀲𑀭𑀻𑀭𑁂 𑀭𑀚𑁄𑀚𑀮𑁆𑀮𑀁 𑀮𑀕𑁆𑀕𑀢𑀺, 𑀢𑀁 𑀥𑀸𑀭𑁂𑀢𑀺. 𑀬𑀣𑀸𑀲𑀦𑁆𑀣𑀢𑀺𑀓𑁄𑀢𑀺 𑀮𑀤𑁆𑀥𑀁 𑀆𑀲𑀦𑀁 𑀅𑀓𑁄𑀧𑁂𑀢𑁆𑀯𑀸 𑀬𑀤𑁂𑀯 𑀮𑀪𑀢𑀺, 𑀢𑀢𑁆𑀣𑁂𑀯 𑀦𑀺𑀲𑀻𑀤𑀦𑀲𑀻𑀮𑁄. 𑀯𑁂𑀓𑀝𑀺𑀓𑁄𑀢𑀺 𑀯𑀺𑀓𑀝𑀔𑀸𑀤𑀦𑀲𑀻𑀮𑁄. 𑀯𑀺𑀓𑀝𑀦𑁆𑀢𑀺 𑀕𑀽𑀣𑀁 𑀯𑀼𑀘𑁆𑀘𑀢𑀺. 𑀅𑀧𑀸𑀦𑀓𑁄𑀢𑀺 𑀧𑀝𑀺𑀓𑁆𑀔𑀺𑀢𑁆𑀢𑀲𑀻𑀢𑀼𑀤𑀓𑀧𑀸𑀦𑁄. 𑀲𑀸𑀬𑀁 𑀢𑀢𑀺𑀬𑀫𑀲𑁆𑀲𑀸𑀢𑀺 𑀲𑀸𑀬𑀢𑀢𑀺𑀬𑀓𑀁. 𑀧𑀸𑀢𑁄, 𑀫𑀚𑁆𑀛𑀦𑁆𑀳𑀺𑀓𑁂, 𑀲𑀸𑀬𑀦𑁆𑀢𑀺 𑀤𑀺𑀯𑀲𑀲𑁆𑀲 𑀢𑀺𑀓𑁆𑀔𑀢𑁆𑀢𑀼𑀁 𑀧𑀸𑀧𑀁 𑀧𑀯𑀸𑀳𑁂𑀲𑁆𑀲𑀸𑀫𑀻𑀢𑀺 𑀉𑀤𑀓𑁄𑀭𑁄𑀳𑀦𑀸𑀦𑀼𑀬𑁄𑀕𑀁 𑀅𑀦𑀼𑀬𑀼𑀢𑁆𑀢𑁄 𑀯𑀺𑀳𑀭𑀢𑀻𑀢𑀺.

𑀢𑀧𑁄𑀧𑀓𑁆𑀓𑀫𑀦𑀺𑀭𑀢𑁆𑀣𑀓𑀢𑀸𑀯𑀡𑁆𑀡𑀦𑀸

𑁩𑁯𑁭. 𑀅𑀣 𑀪𑀕𑀯𑀸 𑀲𑀻𑀮𑀲𑀫𑁆𑀧𑀤𑀸𑀤𑀻𑀳𑀺 𑀯𑀺𑀦𑀸 𑀢𑁂𑀲𑀁 𑀢𑀧𑁄𑀧𑀓𑁆𑀓𑀫𑀸𑀦𑀁 𑀦𑀺𑀭𑀢𑁆𑀣𑀓𑀢𑀁 𑀤𑀲𑁆𑀲𑁂𑀦𑁆𑀢𑁄 𑁋 ‘‘𑀅𑀘𑁂𑀮𑀓𑁄 𑀘𑁂𑀧𑀺 𑀓𑀲𑁆𑀲𑀧 𑀳𑁄𑀢𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀆𑀭𑀓𑀸 𑀯𑀸𑀢𑀺 𑀤𑀽𑀭𑁂𑀬𑁂𑀯. 𑀅𑀯𑁂𑀭𑀦𑁆𑀢𑀺 𑀤𑁄𑀲𑀯𑁂𑀭𑀯𑀺𑀭𑀳𑀺𑀢𑀁. 𑀅𑀩𑁆𑀬𑀸𑀧𑀚𑁆𑀚𑀦𑁆𑀢𑀺 𑀤𑁄𑀫𑀦𑀲𑁆𑀲𑀩𑁆𑀬𑀸𑀧𑀚𑁆𑀚𑀭𑀳𑀺𑀢𑀁.

𑁩𑁯𑁮. 𑀤𑀼𑀓𑁆𑀓𑀭𑀁, 𑀪𑁄 𑀕𑁄𑀢𑀫𑀸𑀢𑀺 𑀇𑀤𑀁 𑀓𑀲𑁆𑀲𑀧𑁄 ‘‘𑀫𑀬𑀁 𑀧𑀼𑀩𑁆𑀩𑁂 𑀏𑀢𑁆𑀢𑀓𑀫𑀢𑁆𑀢𑀁 𑀲𑀸𑀫𑀜𑁆𑀜𑀜𑁆𑀘 𑀩𑁆𑀭𑀳𑁆𑀫𑀜𑁆𑀜𑀜𑁆𑀘𑀸𑀢𑀺 𑀯𑀺𑀘𑀭𑀸𑀫, 𑀢𑀼𑀫𑁆𑀳𑁂 𑀧𑀦 𑀅𑀜𑁆𑀜𑀁𑀬𑁂𑀯 𑀲𑀸𑀫𑀜𑁆𑀜𑀜𑁆𑀘 𑀩𑁆𑀭𑀳𑁆𑀫𑀜𑁆𑀜𑀜𑁆𑀘 𑀯𑀤𑀣𑀸’’𑀢𑀺 𑀤𑀻𑀧𑁂𑀦𑁆𑀢𑁄 𑀆𑀳. 𑀧𑀓𑀢𑀺 𑀔𑁄 𑀏𑀲𑀸𑀢𑀺 𑀧𑀓𑀢𑀺𑀓𑀣𑀸 𑀏𑀲𑀸. 𑀇𑀫𑀸𑀬 𑀘, 𑀓𑀲𑁆𑀲𑀧, 𑀫𑀢𑁆𑀢𑀸𑀬𑀸𑀢𑀺 ‘‘𑀓𑀲𑁆𑀲𑀧 𑀬𑀤𑀺 𑀇𑀫𑀺𑀦𑀸 𑀧𑀫𑀸𑀡𑁂𑀦 𑀏𑀯𑀁 𑀧𑀭𑀺𑀢𑁆𑀢𑀓𑁂𑀦 𑀧𑀝𑀺𑀧𑀢𑁆𑀢𑀺𑀓𑁆𑀓𑀫𑁂𑀦 𑀲𑀸𑀫𑀜𑁆𑀜𑀁 𑀯𑀸 𑀩𑁆𑀭𑀳𑁆𑀫𑀜𑁆𑀜𑀁 𑀯𑀸 𑀤𑀼𑀓𑁆𑀓𑀭𑀁 𑀲𑀼𑀤𑀼𑀓𑁆𑀓𑀭𑀁 𑀦𑀸𑀫 𑀅𑀪𑀯𑀺𑀲𑁆𑀲, 𑀢𑀢𑁄 𑀦𑁂𑀢𑀁 𑀅𑀪𑀯𑀺𑀲𑁆𑀲 𑀓𑀮𑁆𑀮𑀁 𑀯𑀘𑀦𑀸𑀬 𑀤𑀼𑀓𑁆𑀓𑀭𑀁 𑀲𑀸𑀫𑀜𑁆𑀜’’𑀦𑁆𑀢𑀺 𑀅𑀬𑀫𑁂𑀢𑁆𑀣 𑀧𑀤𑀲𑀫𑁆𑀩𑀦𑁆𑀥𑁂𑀦 𑀲𑀤𑁆𑀥𑀺𑀁 𑀅𑀢𑁆𑀣𑁄. 𑀏𑀢𑁂𑀦 𑀦𑀬𑁂𑀦 𑀲𑀩𑁆𑀩𑀢𑁆𑀣 𑀧𑀤𑀲𑀫𑁆𑀩𑀦𑁆𑀥𑁄 𑀯𑁂𑀤𑀺𑀢𑀩𑁆𑀩𑁄.

𑁩𑁯𑁯. 𑀤𑀼𑀚𑁆𑀚𑀸𑀦𑁄𑀢𑀺 𑀇𑀤𑀫𑁆𑀧𑀺 𑀲𑁄 ‘‘𑀫𑀬𑀁 𑀧𑀼𑀩𑁆𑀩𑁂 𑀏𑀢𑁆𑀢𑀓𑁂𑀦 𑀲𑀫𑀡𑁄 𑀯𑀸 𑀩𑁆𑀭𑀸𑀳𑁆𑀫𑀡𑁄 𑀯𑀸 𑀳𑁄𑀢𑀻𑀢𑀺 𑀯𑀺𑀘𑀭𑀸𑀫, 𑀢𑀼𑀫𑁆𑀳𑁂 𑀧𑀦 𑀅𑀜𑁆𑀜𑀣𑀸 𑀯𑀤𑀣𑀸’’𑀢𑀺 𑀇𑀤𑀁 𑀲𑀦𑁆𑀥𑀸𑀬𑀸𑀳. 𑀅𑀣𑀲𑁆𑀲 𑀪𑀕𑀯𑀸 𑀢𑀁 𑀧𑀓𑀢𑀺𑀯𑀸𑀤𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀲𑀪𑀸𑀯𑀢𑁄𑀯 𑀤𑀼𑀚𑁆𑀚𑀸𑀦𑀪𑀸𑀯𑀁 𑀆𑀯𑀺𑀓𑀭𑁄𑀦𑁆𑀢𑁄 𑀧𑀼𑀦𑀧𑀺 𑁋 ‘‘𑀧𑀓𑀢𑀺 𑀔𑁄’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀭𑀸𑀧𑀺 𑀯𑀼𑀢𑁆𑀢𑀦𑀬𑁂𑀦𑁂𑀯 𑀧𑀤𑀲𑀫𑁆𑀩𑀦𑁆𑀥𑀁 𑀓𑀢𑁆𑀯𑀸 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀲𑀻𑀮𑀲𑀫𑀸𑀥𑀺𑀧𑀜𑁆𑀜𑀸𑀲𑀫𑁆𑀧𑀤𑀸𑀯𑀡𑁆𑀡𑀦𑀸

𑁪𑁦𑁦-𑁪𑁦𑁧. 𑀓𑀢𑀫𑀸 𑀧𑀦 𑀲𑀸, 𑀪𑁄 𑀕𑁄𑀢𑀫𑀸𑀢𑀺 𑀓𑀲𑁆𑀫𑀸 𑀧𑀼𑀘𑁆𑀙𑀢𑀺. 𑀅𑀬𑀁 𑀓𑀺𑀭 𑀧𑀡𑁆𑀟𑀺𑀢𑁄 𑀪𑀕𑀯𑀢𑁄 𑀓𑀣𑁂𑀦𑁆𑀢𑀲𑁆𑀲𑁂𑀯 𑀓𑀣𑀁 𑀉𑀕𑁆𑀕𑀳𑁂𑀲𑀺, 𑀅𑀣 𑀅𑀢𑁆𑀢𑀦𑁄 𑀧𑀝𑀺𑀧𑀢𑁆𑀢𑀺𑀬𑀸 𑀦𑀺𑀭𑀢𑁆𑀣𑀓𑀢𑀁 𑀯𑀺𑀤𑀺𑀢𑁆𑀯𑀸 𑀲𑀫𑀡𑁄 𑀕𑁄𑀢𑀫𑁄 𑁋 ‘‘𑀢𑀲𑁆𑀲 ‘𑀘𑀸𑀬𑀁 𑀲𑀻𑀮𑀲𑀫𑁆𑀧𑀤𑀸, 𑀘𑀺𑀢𑁆𑀢𑀲𑀫𑁆𑀧𑀤𑀸, 𑀧𑀜𑁆𑀜𑀸𑀲𑀫𑁆𑀧𑀤𑀸 𑀅𑀪𑀸𑀯𑀺𑀢𑀸 𑀳𑁄𑀢𑀺 𑀅𑀲𑀘𑁆𑀙𑀺𑀓𑀢𑀸, 𑀅𑀣 𑀔𑁄 𑀲𑁄 𑀆𑀭𑀓𑀸𑀯 𑀲𑀸𑀫𑀜𑁆𑀜𑀸’𑀢𑀺𑀆𑀤𑀺𑀫𑀸𑀳. 𑀳𑀦𑁆𑀤 𑀤𑀸𑀦𑀺 𑀦𑀁 𑀢𑀸 𑀲𑀫𑁆𑀧𑀢𑁆𑀢𑀺𑀬𑁄 𑀧𑀼𑀘𑁆𑀙𑀸𑀫𑀻’’𑀢𑀺 𑀲𑀻𑀮𑀲𑀫𑁆𑀧𑀤𑀸𑀤𑀺𑀯𑀺𑀚𑀸𑀦𑀦𑀢𑁆𑀣𑀁 𑀧𑀼𑀘𑁆𑀙𑀢𑀺. 𑀅𑀣𑀲𑁆𑀲 𑀪𑀕𑀯𑀸 𑀩𑀼𑀤𑁆𑀥𑀼𑀧𑁆𑀧𑀸𑀤𑀁 𑀤𑀲𑁆𑀲𑁂𑀢𑁆𑀯𑀸 𑀢𑀦𑁆𑀢𑀺𑀥𑀫𑁆𑀫𑀁 𑀓𑀣𑁂𑀦𑁆𑀢𑁄 𑀢𑀸 𑀲𑀫𑁆𑀧𑀢𑁆𑀢𑀺𑀬𑁄 𑀤𑀲𑁆𑀲𑁂𑀢𑀼𑀁 𑁋 ‘‘𑀇𑀥 𑀓𑀲𑁆𑀲𑀧𑀸’’𑀢𑀺𑀆𑀤𑀺𑀫𑀸𑀳. 𑀇𑀫𑀸𑀬 𑀘 𑀓𑀲𑁆𑀲𑀧 𑀲𑀻𑀮𑀲𑀫𑁆𑀧𑀤𑀸𑀬𑀸𑀢𑀺 𑀇𑀤𑀁 𑀅𑀭𑀳𑀢𑁆𑀢𑀨𑀮𑀫𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀅𑀭𑀳𑀢𑁆𑀢𑀨𑀮𑀧𑀭𑀺𑀬𑁄𑀲𑀸𑀦𑀜𑁆𑀳𑀺 𑀪𑀕𑀯𑀢𑁄 𑀲𑀸𑀲𑀦𑀁. 𑀢𑀲𑁆𑀫𑀸 𑀅𑀭𑀳𑀢𑁆𑀢𑀨𑀮𑀲𑀫𑁆𑀧𑀬𑀼𑀢𑁆𑀢𑀸𑀳𑀺 𑀲𑀻𑀮𑀘𑀺𑀢𑁆𑀢𑀧𑀜𑁆𑀜𑀸𑀲𑀫𑁆𑀧𑀤𑀸𑀳𑀺 𑀅𑀜𑁆𑀜𑀸 𑀉𑀢𑁆𑀢𑀭𑀺𑀢𑀭𑀸 𑀯𑀸 𑀧𑀡𑀻𑀢𑀢𑀭𑀸 𑀯𑀸 𑀲𑀻𑀮𑀸𑀤𑀺𑀲𑀫𑁆𑀧𑀤𑀸 𑀦𑀢𑁆𑀣𑀻𑀢𑀺 𑀆𑀳.

𑀲𑀻𑀳𑀦𑀸𑀤𑀓𑀣𑀸𑀯𑀡𑁆𑀡𑀦𑀸

𑁪𑁦𑁨. 𑀏𑀯𑀜𑁆𑀘 𑀧𑀦 𑀯𑀢𑁆𑀯𑀸 𑀇𑀤𑀸𑀦𑀺 𑀅𑀦𑀼𑀢𑁆𑀢𑀭𑀁 𑀫𑀳𑀸𑀲𑀻𑀳𑀦𑀸𑀤𑀁 𑀦𑀤𑀦𑁆𑀢𑁄 𑁋 ‘‘𑀲𑀦𑁆𑀢𑀺 𑀓𑀲𑁆𑀲𑀧 𑀏𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀭𑀺𑀬𑀦𑁆𑀢𑀺 𑀦𑀺𑀭𑀼𑀧𑀓𑁆𑀓𑀺𑀮𑁂𑀲𑀁 𑀧𑀭𑀫𑀯𑀺𑀲𑀼𑀤𑁆𑀥𑀁. 𑀧𑀭𑀫𑀦𑁆𑀢𑀺 𑀉𑀢𑁆𑀢𑀫𑀁, 𑀧𑀜𑁆𑀘𑀲𑀻𑀮𑀸𑀦𑀺 𑀳𑀺𑀆𑀤𑀺𑀁 𑀓𑀢𑁆𑀯𑀸 𑀬𑀸𑀯 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀻𑀮𑀸 𑀲𑀻𑀮𑀫𑁂𑀯, 𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑀨𑀮𑀲𑀫𑁆𑀧𑀬𑀼𑀢𑁆𑀢𑀁 𑀧𑀦 𑀧𑀭𑀫𑀲𑀻𑀮𑀁 𑀦𑀸𑀫. 𑀦𑀸𑀳𑀁 𑀢𑀢𑁆𑀣𑀸𑀢𑀺 𑀢𑀢𑁆𑀣 𑀲𑀻𑀮𑁂𑀧𑀺 𑀧𑀭𑀫𑀲𑀻𑀮𑁂𑀧𑀺 𑀅𑀳𑀁 𑀅𑀢𑁆𑀢𑀦𑁄 𑀲𑀫𑀲𑀫𑀁 𑀫𑀫 𑀲𑀻𑀮𑀲𑀫𑁂𑀦 𑀲𑀻𑀮𑁂𑀦 𑀫𑀬𑀸 𑀲𑀫𑀁 𑀧𑀼𑀕𑁆𑀕𑀮𑀁 𑀦 𑀧𑀲𑁆𑀲𑀸𑀫𑀻𑀢𑀺 𑀅𑀢𑁆𑀣𑁄. 𑀅𑀳𑀫𑁂𑀯 𑀢𑀢𑁆𑀣 𑀪𑀺𑀬𑁆𑀬𑁄𑀢𑀺 𑀅𑀳𑀫𑁂𑀯 𑀢𑀲𑁆𑀫𑀺𑀁 𑀲𑀻𑀮𑁂 𑀉𑀢𑁆𑀢𑀫𑁄. 𑀓𑀢𑀫𑀲𑁆𑀫𑀺𑀁? 𑀬𑀤𑀺𑀤𑀁 𑀅𑀥𑀺𑀲𑀻𑀮𑀦𑁆𑀢𑀺 𑀬𑀁 𑀏𑀢𑀁 𑀉𑀢𑁆𑀢𑀫𑀁 𑀲𑀻𑀮𑀦𑁆𑀢𑀺 𑀅𑀢𑁆𑀣𑁄. 𑀇𑀢𑀺 𑀇𑀫𑀁 𑀧𑀞𑀫𑀁 𑀲𑀻𑀳𑀦𑀸𑀤𑀁 𑀦𑀤𑀢𑀺.

𑀢𑀧𑁄𑀚𑀺𑀕𑀼𑀘𑁆𑀙𑀯𑀸𑀤𑀸𑀢𑀺 𑀬𑁂 𑀢𑀧𑁄𑀚𑀺𑀕𑀼𑀘𑁆𑀙𑀁 𑀯𑀤𑀦𑁆𑀢𑀺. 𑀢𑀢𑁆𑀣 𑀢𑀧𑀢𑀻𑀢𑀺 𑀢𑀧𑁄, 𑀓𑀺𑀮𑁂𑀲𑀲𑀦𑁆𑀢𑀸𑀧𑀓𑀯𑀻𑀭𑀺𑀬𑀲𑁆𑀲𑁂𑀢𑀁 𑀦𑀸𑀫𑀁, 𑀢𑀤𑁂𑀯 𑀢𑁂 𑀓𑀺𑀮𑁂𑀲𑁂 𑀚𑀺𑀕𑀼𑀘𑁆𑀙𑀢𑀻𑀢𑀺 𑀚𑀺𑀕𑀼𑀘𑁆𑀙𑀸. 𑀅𑀭𑀺𑀬𑀸 𑀧𑀭𑀫𑀸𑀢𑀺 𑀏𑀢𑁆𑀣 𑀦𑀺𑀤𑁆𑀤𑁄𑀲𑀢𑁆𑀢𑀸 𑀅𑀭𑀺𑀬𑀸, 𑀅𑀝𑁆𑀞𑀆𑀭𑀫𑁆𑀪𑀯𑀢𑁆𑀣𑀼𑀯𑀲𑁂𑀦𑀧𑀺 𑀉𑀧𑁆𑀧𑀦𑁆𑀦𑀸 𑀯𑀺𑀧𑀲𑁆𑀲𑀦𑀸𑀯𑀻𑀭𑀺𑀬𑀲𑀗𑁆𑀔𑀸𑀢𑀸 𑀢𑀧𑁄𑀚𑀺𑀕𑀼𑀘𑁆𑀙𑀸 𑀢𑀧𑁄𑀚𑀺𑀕𑀼𑀘𑁆𑀙𑀸𑀯, 𑀫𑀕𑁆𑀕𑀨𑀮𑀲𑀫𑁆𑀧𑀬𑀼𑀢𑁆𑀢𑀸 𑀧𑀭𑀫𑀸 𑀦𑀸𑀫. 𑀅𑀥𑀺𑀚𑁂𑀕𑀼𑀘𑁆𑀙𑀦𑁆𑀢𑀺 𑀇𑀥 𑀚𑀺𑀕𑀼𑀘𑁆𑀙𑀪𑀸𑀯𑁄 𑀚𑁂𑀕𑀼𑀘𑁆𑀙𑀁, 𑀉𑀢𑁆𑀢𑀫𑀁 𑀚𑁂𑀕𑀼𑀘𑁆𑀙𑀁 𑀅𑀥𑀺𑀚𑁂𑀕𑀼𑀘𑁆𑀙𑀁, 𑀢𑀲𑁆𑀫𑀸 𑀬𑀤𑀺𑀤𑀁 𑀅𑀥𑀺𑀚𑁂𑀕𑀼𑀘𑁆𑀙𑀁, 𑀢𑀢𑁆𑀣 𑀅𑀳𑀫𑁂𑀯 𑀪𑀺𑀬𑁆𑀬𑁄𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀧𑀜𑁆𑀜𑀸𑀥𑀺𑀓𑀸𑀭𑁂𑀧𑀺 𑀓𑀫𑁆𑀫𑀲𑁆𑀲𑀓𑀢𑀸𑀧𑀜𑁆𑀜𑀸 𑀘 𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸 𑀘 𑀧𑀜𑁆𑀜𑀸 𑀦𑀸𑀫, 𑀫𑀕𑁆𑀕𑀨𑀮𑀲𑀫𑁆𑀧𑀬𑀼𑀢𑁆𑀢𑀸 𑀧𑀭𑀫𑀸 𑀧𑀜𑁆𑀜𑀸 𑀦𑀸𑀫. 𑀅𑀥𑀺𑀧𑀜𑁆𑀜𑀦𑁆𑀢𑀺 𑀏𑀢𑁆𑀣 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑁄 𑀯𑁂𑀤𑀺𑀢𑀩𑁆𑀩𑁄, 𑀅𑀬𑀁 𑀧𑀦𑁂𑀢𑁆𑀣𑀢𑁆𑀣𑁄 𑁋 𑀬𑀸𑀬𑀁 𑀅𑀥𑀺𑀧𑀜𑁆𑀜𑀸 𑀦𑀸𑀫 𑀅𑀳𑀫𑁂𑀯 𑀢𑀢𑁆𑀣 𑀪𑀺𑀬𑁆𑀬𑁄𑀢𑀺 𑀯𑀺𑀫𑀼𑀢𑁆𑀢𑀸𑀥𑀺𑀓𑀸𑀭𑁂 𑀢𑀤𑀗𑁆𑀕𑀯𑀺𑀓𑁆𑀔𑀫𑁆𑀪𑀦𑀯𑀺𑀫𑀼𑀢𑁆𑀢𑀺𑀬𑁄 𑀯𑀺𑀫𑀼𑀢𑁆𑀢𑀺 𑀦𑀸𑀫, 𑀲𑀫𑀼𑀘𑁆𑀙𑁂𑀤𑀧𑀝𑀺𑀧𑀲𑁆𑀲𑀤𑁆𑀥𑀺𑀦𑀺𑀲𑁆𑀲𑀭𑀡𑀯𑀺𑀫𑀼𑀢𑁆𑀢𑀺𑀬𑁄 𑀧𑀦 𑀧𑀭𑀫𑀸 𑀯𑀺𑀫𑀼𑀢𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀇𑀥𑀸𑀧𑀺 𑀘 𑀬𑀤𑀺𑀤𑀁 𑀅𑀥𑀺𑀯𑀺𑀫𑀼𑀢𑁆𑀢𑀻𑀢𑀺 𑀬𑀸 𑀅𑀬𑀁 𑀅𑀥𑀺𑀯𑀺𑀫𑀼𑀢𑁆𑀢𑀺, 𑀅𑀳𑀫𑁂𑀯 𑀢𑀢𑁆𑀣 𑀪𑀺𑀬𑁆𑀬𑁄𑀢𑀺 𑀅𑀢𑁆𑀣𑁄.

𑁪𑁦𑁩. 𑀲𑀼𑀜𑁆𑀜𑀸𑀕𑀸𑀭𑁂𑀢𑀺 𑀲𑀼𑀜𑁆𑀜𑁂 𑀖𑀭𑁂, 𑀏𑀓𑀓𑁄𑀯 𑀦𑀺𑀲𑀻𑀤𑀺𑀢𑁆𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀧𑀭𑀺𑀲𑀸𑀲𑀼 𑀘𑀸𑀢𑀺 𑀅𑀝𑁆𑀞𑀲𑀼 𑀧𑀭𑀺𑀲𑀸𑀲𑀼. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑁋

‘‘𑀘𑀢𑁆𑀢𑀸𑀭𑀺𑀫𑀸𑀦𑀺, 𑀲𑀸𑀭𑀺𑀧𑀼𑀢𑁆𑀢, 𑀢𑀣𑀸𑀕𑀢𑀲𑁆𑀲 𑀯𑁂𑀲𑀸𑀭𑀚𑁆𑀚𑀸𑀦𑀺. 𑀬𑁂𑀳𑀺 𑀯𑁂𑀲𑀸𑀭𑀚𑁆𑀚𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀢𑀣𑀸𑀕𑀢𑁄 𑀆𑀲𑀪𑀁 𑀞𑀸𑀦𑀁 𑀧𑀝𑀺𑀚𑀸𑀦𑀸𑀢𑀺, 𑀧𑀭𑀺𑀲𑀸𑀲𑀼 𑀲𑀻𑀳𑀦𑀸𑀤𑀁 𑀦𑀤𑀢𑀻’’𑀢𑀺 (𑀫. 𑀦𑀺. 𑁧.𑁧𑁫𑁦) 𑀲𑀼𑀢𑁆𑀢𑀁 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁.

𑀧𑀜𑁆𑀳𑀜𑁆𑀘 𑀦𑀁 𑀧𑀼𑀘𑁆𑀙𑀦𑁆𑀢𑀻𑀢𑀺 𑀧𑀡𑁆𑀟𑀺𑀢𑀸 𑀤𑁂𑀯𑀫𑀦𑀼𑀲𑁆𑀲𑀸 𑀦𑀁 𑀧𑀜𑁆𑀳𑀁 𑀅𑀪𑀺𑀲𑀗𑁆𑀔𑀭𑀺𑀢𑁆𑀯𑀸 𑀧𑀼𑀘𑁆𑀙𑀦𑁆𑀢𑀺. 𑀩𑁆𑀬𑀸𑀓𑀭𑁄𑀢𑀻𑀢𑀺 𑀢𑀗𑁆𑀔𑀡𑀜𑁆𑀜𑁂𑀯 𑀯𑀺𑀲𑁆𑀲𑀚𑁆𑀚𑁂𑀲𑀺. 𑀘𑀺𑀢𑁆𑀢𑀁 𑀆𑀭𑀸𑀥𑁂𑀢𑀻𑀢𑀺 𑀧𑀜𑁆𑀳𑀸𑀯𑀺𑀲𑁆𑀲𑀚𑁆𑀚𑀦𑁂𑀦 𑀫𑀳𑀸𑀚𑀦𑀲𑁆𑀲 𑀘𑀺𑀢𑁆𑀢𑀁 𑀧𑀭𑀺𑀢𑁄𑀲𑁂𑀢𑀺𑀬𑁂𑀯. 𑀦𑁄 𑀘 𑀔𑁄 𑀲𑁄𑀢𑀩𑁆𑀩𑀁 𑀫𑀜𑁆𑀜𑀦𑁆𑀢𑀻𑀢𑀺 𑀘𑀺𑀢𑁆𑀢𑀁 𑀆𑀭𑀸𑀥𑁂𑀢𑁆𑀯𑀸 𑀓𑀣𑁂𑀦𑁆𑀢𑀲𑁆𑀲𑀧𑀺𑀲𑁆𑀲 𑀯𑀘𑀦𑀁 𑀧𑀭𑁂 𑀲𑁄𑀢𑀩𑁆𑀩𑀁 𑀦 𑀫𑀜𑁆𑀜𑀦𑁆𑀢𑀻𑀢𑀺, 𑀏𑀯𑀜𑁆𑀘 𑀯𑀤𑁂𑀬𑁆𑀬𑀼𑀦𑁆𑀢𑀺 𑀅𑀢𑁆𑀣𑁄. 𑀲𑁄𑀢𑀩𑁆𑀩𑀜𑁆𑀘𑀲𑁆𑀲 𑀫𑀜𑁆𑀜𑀦𑁆𑀢𑀻𑀢𑀺 𑀤𑁂𑀯𑀸𑀧𑀺 𑀫𑀦𑀼𑀲𑁆𑀲𑀸𑀧𑀺 𑀫𑀳𑀦𑁆𑀢𑁂𑀦𑁂𑀯 𑀉𑀲𑁆𑀲𑀸𑀳𑁂𑀦 𑀲𑁄𑀢𑀩𑁆𑀩𑀁 𑀫𑀜𑁆𑀜𑀦𑁆𑀢𑀺. 𑀧𑀲𑀻𑀤𑀦𑁆𑀢𑀻𑀢𑀺 𑀲𑀼𑀧𑀲𑀦𑁆𑀦𑀸 𑀓𑀮𑁆𑀮𑀘𑀺𑀢𑁆𑀢𑀸 𑀫𑀼𑀤𑀼𑀘𑀺𑀢𑁆𑀢𑀸 𑀳𑁄𑀦𑁆𑀢𑀺. 𑀧𑀲𑀦𑁆𑀦𑀸𑀓𑀸𑀭𑀁 𑀓𑀭𑁄𑀦𑁆𑀢𑀻𑀢𑀺 𑀦 𑀫𑀼𑀤𑁆𑀥𑀧𑁆𑀧𑀲𑀦𑁆𑀦𑀸𑀯 𑀳𑁄𑀦𑁆𑀢𑀺, 𑀧𑀡𑀻𑀢𑀸𑀦𑀺 𑀘𑀻𑀯𑀭𑀸𑀤𑀻𑀦𑀺 𑀯𑁂𑀴𑀼𑀯𑀦𑀯𑀺𑀳𑀸𑀭𑀸𑀤𑀬𑁄 𑀘 𑀫𑀳𑀸𑀯𑀺𑀳𑀸𑀭𑁂 𑀧𑀭𑀺𑀘𑁆𑀘𑀚𑀦𑁆𑀢𑀸 𑀧𑀲𑀦𑁆𑀦𑀸𑀓𑀸𑀭𑀁 𑀓𑀭𑁄𑀦𑁆𑀢𑀺. 𑀢𑀣𑀢𑁆𑀢𑀸𑀬𑀸𑀢𑀺 𑀬𑀁 𑀲𑁄 𑀥𑀫𑁆𑀫𑀁 𑀤𑁂𑀲𑁂𑀢𑀺 𑀢𑀣𑀸 𑀪𑀸𑀯𑀸𑀬, 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑀝𑀺𑀧𑀢𑁆𑀢𑀺𑀧𑀽𑀭𑀡𑀢𑁆𑀣𑀸𑀬 𑀧𑀝𑀺𑀧𑀚𑁆𑀚𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀢𑀣𑀢𑁆𑀢𑀸𑀬 𑀘 𑀧𑀝𑀺𑀧𑀚𑁆𑀚𑀦𑁆𑀢𑀻𑀢𑀺 𑀢𑀣𑀪𑀸𑀯𑀸𑀬 𑀧𑀝𑀺𑀧𑀚𑁆𑀚𑀦𑁆𑀢𑀺, 𑀢𑀲𑁆𑀲 𑀳𑀺 𑀪𑀕𑀯𑀢𑁄 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀓𑁂𑀘𑀺 𑀲𑀭𑀡𑁂𑀲𑀼 𑀓𑁂𑀘𑀺 𑀧𑀜𑁆𑀘𑀲𑀼 𑀲𑀻𑀮𑁂𑀲𑀼 𑀧𑀢𑀺𑀝𑁆𑀞𑀳𑀦𑁆𑀢𑀺, 𑀅𑀧𑀭𑁂 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀩𑁆𑀩𑀚𑀦𑁆𑀢𑀺. 𑀧𑀝𑀺𑀧𑀦𑁆𑀦𑀸 𑀘 𑀆𑀭𑀸𑀥𑁂𑀦𑁆𑀢𑀻𑀢𑀺 𑀢𑀜𑁆𑀘 𑀧𑀦 𑀧𑀝𑀺𑀧𑀤𑀁 𑀧𑀝𑀺𑀧𑀦𑁆𑀦𑀸 𑀧𑀽𑀭𑁂𑀢𑀼𑀁 𑀲𑀓𑁆𑀓𑁄𑀦𑁆𑀢𑀺, 𑀲𑀩𑁆𑀩𑀸𑀓𑀸𑀭𑁂𑀦 𑀧𑀦 𑀧𑀽𑀭𑁂𑀦𑁆𑀢𑀺, 𑀧𑀝𑀺𑀧𑀢𑁆𑀢𑀺𑀧𑀽𑀭𑀡𑁂𑀦 𑀢𑀲𑁆𑀲 𑀪𑁄𑀢𑁄 𑀕𑁄𑀢𑀫𑀲𑁆𑀲 𑀘𑀺𑀢𑁆𑀢𑀁 𑀆𑀭𑀸𑀥𑁂𑀦𑁆𑀢𑀻𑀢𑀺 𑀯𑀢𑁆𑀢𑀩𑁆𑀩𑀸.

𑀇𑀫𑀲𑁆𑀫𑀺𑀁 𑀧𑀦𑁄𑀓𑀸𑀲𑁂 𑀞𑀢𑁆𑀯𑀸 𑀲𑀻𑀳𑀦𑀸𑀤𑀸 𑀲𑀫𑁄𑀥𑀸𑀦𑁂𑀢𑀩𑁆𑀩𑀸. 𑀏𑀓𑀘𑁆𑀘𑀁 𑀢𑀧𑀲𑁆𑀲𑀺𑀁 𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀁 𑀧𑀲𑁆𑀲𑀸𑀫𑀻𑀢𑀺 𑀳𑀺 𑀪𑀕𑀯𑀢𑁄 𑀏𑀓𑁄 𑀲𑀻𑀳𑀦𑀸𑀤𑁄. 𑀅𑀧𑀭𑀁 𑀲𑀕𑁆𑀕𑁂 𑀦𑀺𑀩𑁆𑀩𑀢𑁆𑀢𑀁 𑀧𑀲𑁆𑀲𑀸𑀫𑀻𑀢𑀺 𑀏𑀓𑁄. 𑀅𑀓𑀼𑀲𑀮𑀥𑀫𑁆𑀫𑀧𑁆𑀧𑀳𑀸𑀦𑁂 𑀅𑀳𑀫𑁂𑀯 𑀲𑁂𑀝𑁆𑀞𑁄𑀢𑀺 𑀏𑀓𑁄. 𑀓𑀼𑀲𑀮𑀥𑀫𑁆𑀫𑀲𑀫𑀸𑀤𑀸𑀦𑁂𑀧𑀺 𑀅𑀳𑀫𑁂𑀯 𑀲𑁂𑀝𑁆𑀞𑁄𑀢𑀺 𑀏𑀓𑁄. 𑀅𑀓𑀼𑀲𑀮𑀥𑀫𑁆𑀫𑀧𑁆𑀧𑀳𑀸𑀦𑁂 𑀫𑀬𑁆𑀳𑀫𑁂𑀯 𑀲𑀸𑀯𑀓𑀲𑀗𑁆𑀖𑁄 𑀲𑁂𑀝𑁆𑀞𑁄𑀢𑀺 𑀏𑀓𑁄. 𑀓𑀼𑀲𑀮𑀥𑀫𑁆𑀫𑀲𑀫𑀸𑀤𑀸𑀦𑁂𑀧𑀺 𑀫𑀬𑁆𑀳𑀁𑀬𑁂𑀯 𑀲𑀸𑀯𑀓𑀲𑀗𑁆𑀖𑁄 𑀲𑁂𑀝𑁆𑀞𑁄𑀢𑀺 𑀏𑀓𑁄. 𑀲𑀻𑀮𑁂𑀦 𑀫𑀬𑁆𑀳𑀁 𑀲𑀤𑀺𑀲𑁄 𑀦𑀢𑁆𑀣𑀻𑀢𑀺 𑀏𑀓𑁄. 𑀯𑀻𑀭𑀺𑀬𑁂𑀦 𑀫𑀬𑁆𑀳𑀁 𑀲𑀤𑀺𑀲𑁄 𑀦𑀢𑁆𑀣𑀻𑀢𑀺 𑀏𑀓𑁄. 𑀧𑀜𑁆𑀜𑀸𑀬…𑀧𑁂… 𑀯𑀺𑀫𑀼𑀢𑁆𑀢𑀺𑀬𑀸…𑀧𑁂… 𑀲𑀻𑀳𑀦𑀸𑀤𑀁 𑀦𑀤𑀦𑁆𑀢𑁄 𑀧𑀭𑀺𑀲𑀫𑀚𑁆𑀛𑁂 𑀦𑀺𑀲𑀻𑀤𑀺𑀢𑁆𑀯𑀸 𑀦𑀤𑀸𑀫𑀻𑀢𑀺 𑀏𑀓𑁄. 𑀯𑀺𑀲𑀸𑀭𑀤𑁄 𑀳𑀼𑀢𑁆𑀯𑀸 𑀦𑀤𑀸𑀫𑀻𑀢𑀺 𑀏𑀓𑁄. 𑀧𑀜𑁆𑀳𑀁 𑀫𑀁 𑀧𑀼𑀘𑁆𑀙𑀦𑁆𑀢𑀻𑀢𑀺 𑀏𑀓𑁄. 𑀧𑀜𑁆𑀳𑀁 𑀧𑀼𑀝𑁆𑀞𑁄 𑀯𑀺𑀲𑁆𑀲𑀚𑁆𑀚𑁂𑀫𑀻𑀢𑀺 𑀏𑀓𑁄. 𑀯𑀺𑀲𑁆𑀲𑀚𑁆𑀚𑀦𑁂𑀦 𑀧𑀭𑀲𑁆𑀲 𑀘𑀺𑀢𑁆𑀢𑀁 𑀆𑀭𑀸𑀥𑁂𑀫𑀻𑀢𑀺 𑀏𑀓𑁄. 𑀲𑀼𑀢𑁆𑀯𑀸 𑀲𑁄𑀢𑀩𑁆𑀩𑀁 𑀫𑀜𑁆𑀜𑀦𑁆𑀢𑀻𑀢𑀺 𑀏𑀓𑁄. 𑀲𑀼𑀢𑁆𑀯𑀸 𑀫𑁂 𑀧𑀲𑀻𑀤𑀦𑁆𑀢𑀻𑀢𑀺 𑀏𑀓𑁄. 𑀧𑀲𑀦𑁆𑀦𑀸𑀓𑀸𑀭𑀁 𑀓𑀭𑁄𑀦𑁆𑀢𑀻𑀢𑀺 𑀏𑀓𑁄. 𑀬𑀁 𑀧𑀝𑀺𑀧𑀢𑁆𑀢𑀺𑀁 𑀤𑁂𑀲𑁂𑀫𑀺, 𑀢𑀣𑀢𑁆𑀢𑀸𑀬 𑀧𑀝𑀺𑀧𑀚𑁆𑀚𑀦𑁆𑀢𑀻𑀢𑀺 𑀏𑀓𑁄. 𑀧𑀝𑀺𑀧𑀦𑁆𑀦𑀸 𑀘 𑀫𑀁 𑀆𑀭𑀸𑀥𑁂𑀦𑁆𑀢𑀻𑀢𑀺 𑀏𑀓𑁄. 𑀇𑀢𑀺 𑀧𑀼𑀭𑀺𑀫𑀸𑀦𑀁 𑀤𑀲𑀦𑁆𑀦𑀁 𑀏𑀓𑁂𑀓𑀲𑁆𑀲 𑁋 ‘‘𑀧𑀭𑀺𑀲𑀸𑀲𑀼 𑀘 𑀦𑀤𑀢𑀻’’𑀢𑀺 𑀆𑀤𑀬𑁄 𑀤𑀲 𑀤𑀲 𑀧𑀭𑀺𑀯𑀸𑀭𑀸. 𑀏𑀯𑀁 𑀢𑁂 𑀤𑀲 𑀧𑀼𑀭𑀺𑀫𑀸𑀦𑀁 𑀤𑀲𑀦𑁆𑀦𑀁 𑀧𑀭𑀺𑀯𑀸𑀭𑀯𑀲𑁂𑀦 𑀲𑀢𑀁 𑀧𑀼𑀭𑀺𑀫𑀸 𑀘 𑀤𑀲𑀸𑀢𑀺 𑀤𑀲𑀸𑀥𑀺𑀓𑀁 𑀲𑀻𑀳𑀦𑀸𑀤𑀲𑀢𑀁 𑀳𑁄𑀢𑀺. 𑀇𑀢𑁄 𑀅𑀜𑁆𑀜𑀲𑁆𑀫𑀺𑀁 𑀧𑀦 𑀲𑀼𑀢𑁆𑀢𑁂 𑀏𑀢𑁆𑀢𑀓𑀸 𑀲𑀻𑀳𑀦𑀸𑀤𑀸 𑀤𑀼𑀮𑁆𑀮𑀪𑀸, 𑀢𑁂𑀦𑀺𑀤𑀁 𑀲𑀼𑀢𑁆𑀢𑀁 𑀫𑀳𑀸𑀲𑀻𑀳𑀦𑀸𑀤𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀇𑀢𑀺 𑀪𑀕𑀯𑀸 ‘‘𑀲𑀻𑀳𑀦𑀸𑀤𑀁 𑀔𑁄 𑀲𑀫𑀡𑁄 𑀕𑁄𑀢𑀫𑁄 𑀦𑀤𑀢𑀺, 𑀢𑀜𑁆𑀘 𑀔𑁄 𑀲𑀼𑀜𑁆𑀜𑀸𑀕𑀸𑀭𑁂 𑀦𑀤𑀢𑀻’’𑀢𑀺 𑀏𑀯𑀁 𑀯𑀸𑀤𑀸𑀦𑀼 𑀯𑀸𑀤𑀁 𑀧𑀝𑀺𑀲𑁂𑀥𑁂𑀢𑁆𑀯𑀸 𑀇𑀤𑀸𑀦𑀺 𑀧𑀭𑀺𑀲𑀢𑀺 𑀦𑀤𑀺𑀢𑀧𑀼𑀩𑁆𑀩𑀁 𑀲𑀻𑀳𑀦𑀸𑀤𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀏𑀓𑀫𑀺𑀤𑀸𑀳’’𑀦𑁆𑀢𑀺𑀆𑀤𑀺𑀫𑀸𑀳.

𑀢𑀺𑀢𑁆𑀣𑀺𑀬𑀧𑀭𑀺𑀯𑀸𑀲𑀓𑀣𑀸𑀯𑀡𑁆𑀡𑀦𑀸

𑁪𑁦𑁪. 𑀢𑀢𑁆𑀣 𑀢𑀢𑁆𑀭 𑀫𑀁 𑀅𑀜𑁆𑀜𑀢𑀭𑁄 𑀢𑀧𑀩𑁆𑀭𑀳𑁆𑀫𑀘𑀸𑀭𑀻𑀢𑀺 𑀢𑀢𑁆𑀭 𑀭𑀸𑀚𑀕𑀳𑁂 𑀕𑀺𑀚𑁆𑀛𑀓𑀽𑀝𑁂 𑀧𑀩𑁆𑀩𑀢𑁂 𑀯𑀺𑀳𑀭𑀦𑁆𑀢𑀁 𑀫𑀁 𑀅𑀜𑁆𑀜𑀢𑀭𑁄 𑀢𑀧𑀩𑁆𑀭𑀳𑁆𑀫𑀘𑀸𑀭𑀻 𑀦𑀺𑀕𑁆𑀭𑁄𑀥𑁄 𑀦𑀸𑀫 𑀧𑀭𑀺𑀩𑁆𑀩𑀸𑀚𑀓𑁄. 𑀅𑀥𑀺𑀚𑁂𑀕𑀼𑀘𑁆𑀙𑁂𑀢𑀺 𑀯𑀻𑀭𑀺𑀬𑁂𑀦 𑀧𑀸𑀧𑀚𑀺𑀕𑀼𑀘𑁆𑀙𑀦𑀸𑀥𑀺𑀓𑀸𑀭𑁂 𑀧𑀜𑁆𑀳𑀁 𑀧𑀼𑀘𑁆𑀙𑀺. 𑀇𑀤𑀁 𑀬𑀁 𑀢𑀁 𑀪𑀕𑀯𑀸 𑀕𑀺𑀚𑁆𑀛𑀓𑀽𑀝𑁂 𑀫𑀳𑀸𑀯𑀺𑀳𑀸𑀭𑁂 𑀦𑀺𑀲𑀺𑀦𑁆𑀦𑁄 𑀉𑀤𑀼𑀫𑁆𑀩𑀭𑀺𑀓𑀸𑀬 𑀤𑁂𑀯𑀺𑀬𑀸 𑀉𑀬𑁆𑀬𑀸𑀦𑁂 𑀦𑀺𑀲𑀺𑀦𑁆𑀦𑀲𑁆𑀲 𑀦𑀺𑀕𑁆𑀭𑁄𑀥𑀲𑁆𑀲 𑀘 𑀧𑀭𑀺𑀩𑁆𑀩𑀸𑀚𑀓𑀲𑁆𑀲 𑀲𑀦𑁆𑀥𑀸𑀦𑀲𑁆𑀲 𑀘 𑀉𑀧𑀸𑀲𑀓𑀲𑁆𑀲 𑀤𑀺𑀩𑁆𑀩𑀸𑀬 𑀲𑁄𑀢𑀥𑀸𑀢𑀼𑀬𑀸 𑀓𑀣𑀸𑀲𑀮𑁆𑀮𑀸𑀧𑀁 𑀲𑀼𑀢𑁆𑀯𑀸 𑀆𑀓𑀸𑀲𑁂𑀦𑀸𑀕𑀦𑁆𑀢𑁆𑀯𑀸 𑀢𑁂𑀲𑀁 𑀲𑀦𑁆𑀢𑀺𑀓𑁂 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 𑀦𑀺𑀕𑁆𑀭𑁄𑀥𑁂𑀦 𑀅𑀥𑀺𑀚𑁂𑀕𑀼𑀘𑁆𑀙𑁂 𑀧𑀼𑀝𑁆𑀞𑀧𑀜𑁆𑀳𑀁 𑀯𑀺𑀲𑁆𑀲𑀚𑁆𑀚𑁂𑀲𑀺, 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀧𑀭𑀁 𑀯𑀺𑀬 𑀫𑀢𑁆𑀢𑀸𑀬𑀸𑀢𑀺 𑀧𑀭𑀫𑀸𑀬 𑀫𑀢𑁆𑀢𑀸𑀬, 𑀅𑀢𑀺𑀫𑀳𑀦𑁆𑀢𑁂𑀦𑁂𑀯 𑀧𑀫𑀸𑀡𑁂𑀦𑀸𑀢𑀺 𑀅𑀢𑁆𑀣𑁄. 𑀓𑁄 𑀳𑀺, 𑀪𑀦𑁆𑀢𑁂𑀢𑀺 𑀞𑀧𑁂𑀢𑁆𑀯𑀸 𑀅𑀦𑁆𑀥𑀩𑀸𑀮𑀁 𑀤𑀺𑀝𑁆𑀞𑀺𑀕𑀢𑀺𑀓𑀁 𑀅𑀜𑁆𑀜𑁄 𑀧𑀡𑁆𑀟𑀺𑀢𑀚𑀸𑀢𑀺𑀓𑁄 ‘‘𑀓𑁄 𑀦𑀸𑀫 𑀪𑀕𑀯𑀢𑁄 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀦 𑀅𑀢𑁆𑀢𑀫𑀦𑁄 𑀅𑀲𑁆𑀲𑀸’’𑀢𑀺 𑀯𑀤𑀢𑀺. 𑀮𑀪𑁂𑀬𑁆𑀬𑀸𑀳𑀦𑁆𑀢𑀺 𑀇𑀤𑀁 𑀲𑁄 𑁋 ‘‘𑀘𑀺𑀭𑀁 𑀯𑀢 𑀫𑁂 𑀅𑀦𑀺𑀬𑁆𑀬𑀸𑀦𑀺𑀓𑀧𑀓𑁆𑀔𑁂 𑀬𑁄𑀚𑁂𑀢𑁆𑀯𑀸 𑀅𑀢𑁆𑀢𑀸 𑀓𑀺𑀮𑀫𑀺𑀢𑁄, ‘𑀲𑀼𑀓𑁆𑀔𑀦𑀤𑀻𑀢𑀻𑀭𑁂 𑀦𑁆𑀳𑀸𑀬𑀺𑀲𑁆𑀲𑀸𑀫𑀻’𑀢𑀺 𑀲𑀫𑁆𑀧𑀭𑀺𑀯𑀢𑁆𑀢𑁂𑀦𑁆𑀢𑁂𑀦 𑀯𑀺𑀬 𑀣𑀼𑀲𑁂 𑀓𑁄𑀝𑁆𑀝𑁂𑀦𑁆𑀢𑁂𑀦 𑀯𑀺𑀬 𑀦 𑀓𑁄𑀘𑀺 𑀅𑀢𑁆𑀣𑁄 𑀦𑀺𑀧𑁆𑀨𑀸𑀤𑀺𑀢𑁄. 𑀳𑀦𑁆𑀤𑀸𑀳𑀁 𑀅𑀢𑁆𑀢𑀸𑀦𑀁 𑀬𑁄𑀕𑁂 𑀬𑁄𑀚𑁂𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀆𑀳. 𑀅𑀣 𑀪𑀕𑀯𑀸 𑀬𑁄 𑀅𑀦𑁂𑀦 𑀔𑀦𑁆𑀥𑀓𑁂 𑀢𑀺𑀢𑁆𑀣𑀺𑀬𑀧𑀭𑀺𑀯𑀸𑀲𑁄 𑀧𑀜𑁆𑀜𑀢𑁆𑀢𑁄, 𑀬𑁄 𑀅𑀜𑁆𑀜𑀢𑀺𑀢𑁆𑀣𑀺𑀬𑀧𑀼𑀩𑁆𑀩𑁄 𑀲𑀸𑀫𑀡𑁂𑀭𑀪𑀽𑀫𑀺𑀬𑀁 𑀞𑀺𑀢𑁄 𑁋 ‘‘𑀅𑀳𑀁 𑀪𑀦𑁆𑀢𑁂, 𑀇𑀢𑁆𑀣𑀦𑁆𑀦𑀸𑀫𑁄 𑀅𑀜𑁆𑀜𑀢𑀺𑀢𑁆𑀣𑀺𑀬𑀧𑀼𑀩𑁆𑀩𑁄 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀆𑀓𑀗𑁆𑀔𑀸𑀫𑀺 𑀉𑀧𑀲𑀫𑁆𑀧𑀤𑀁, 𑀲𑁆𑀯𑀸𑀳𑀁, 𑀪𑀦𑁆𑀢𑁂, 𑀲𑀁𑀖𑀁 𑀘𑀢𑁆𑀢𑀸𑀭𑁄 𑀫𑀸𑀲𑁂 𑀧𑀭𑀺𑀯𑀸𑀲𑀁 𑀬𑀸𑀘𑀸𑀫𑀻’’𑀢𑀺𑀆𑀤𑀺𑀦𑀸 (𑀫𑀳𑀸𑀯. 𑁮𑁬) 𑀦𑀬𑁂𑀦 𑀲𑀫𑀸𑀤𑀺𑀬𑀺𑀢𑁆𑀯𑀸 𑀧𑀭𑀺𑀯𑀲𑀢𑀺, 𑀢𑀁 𑀲𑀦𑁆𑀥𑀸𑀬 𑁋 ‘‘𑀬𑁄 𑀔𑁄, 𑀓𑀲𑁆𑀲𑀧, 𑀅𑀜𑁆𑀜𑀢𑀺𑀢𑁆𑀣𑀺𑀬𑀧𑀼𑀩𑁆𑀩𑁄’’𑀢𑀺𑀆𑀤𑀺𑀫𑀸𑀳.

𑁪𑁦𑁫. 𑀢𑀢𑁆𑀣 𑀧𑀩𑁆𑀩𑀚𑁆𑀚𑀦𑁆𑀢𑀺 𑀯𑀘𑀦𑀲𑀺𑀮𑀺𑀝𑁆𑀞𑀢𑀸𑀯𑀲𑁂𑀦𑁂𑀯 𑀯𑀼𑀢𑁆𑀢𑀁, 𑀅𑀧𑀭𑀺𑀯𑀲𑀺𑀢𑁆𑀯𑀸𑀬𑁂𑀯 𑀳𑀺 𑀧𑀩𑁆𑀩𑀚𑁆𑀚𑀁 𑀮𑀪𑀢𑀺. 𑀉𑀧𑀲𑀫𑁆𑀧𑀤𑀢𑁆𑀣𑀺𑀓𑁂𑀦 𑀧𑀦 𑀦𑀸𑀢𑀺𑀓𑀸𑀮𑁂𑀦 𑀕𑀸𑀫𑀧𑁆𑀧𑀯𑁂𑀲𑀦𑀸𑀤𑀻𑀦𑀺 𑀅𑀝𑁆𑀞 𑀯𑀢𑁆𑀢𑀸𑀦𑀺 𑀧𑀽𑀭𑁂𑀦𑁆𑀢𑁂𑀦 𑀧𑀭𑀺𑀯𑀲𑀺𑀢𑀩𑁆𑀩𑀁. 𑀆𑀭𑀤𑁆𑀥𑀘𑀺𑀢𑁆𑀢𑀸𑀢𑀺 𑀅𑀝𑁆𑀞𑀯𑀢𑁆𑀢𑀧𑀽𑀭𑀡𑁂𑀦 𑀢𑀼𑀝𑁆𑀞𑀘𑀺𑀢𑁆𑀢𑀸, 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑀢𑁆𑀣𑁄. 𑀯𑀺𑀢𑁆𑀣𑀸𑀭𑀢𑁄 𑀧𑀦𑁂𑀲 𑀢𑀺𑀢𑁆𑀣𑀺𑀬𑀧𑀭𑀺𑀯𑀸𑀲𑁄 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬 𑀯𑀺𑀦𑀬𑀝𑁆𑀞𑀓𑀣𑀸𑀬𑀁 𑀧𑀩𑁆𑀩𑀚𑁆𑀚𑀔𑀦𑁆𑀥𑀓𑀯𑀡𑁆𑀡𑀦𑀸𑀬 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀅𑀧𑀺 𑀘 𑀫𑁂𑀢𑁆𑀣𑀸𑀢𑀺 𑀅𑀧𑀺 𑀘 𑀫𑁂 𑀏𑀢𑁆𑀣. 𑀧𑀼𑀕𑁆𑀕𑀮𑀯𑁂𑀫𑀢𑁆𑀢𑀢𑀸 𑀯𑀺𑀤𑀺𑀢𑀸𑀢𑀺 𑀧𑀼𑀕𑁆𑀕𑀮𑀦𑀸𑀦𑀢𑁆𑀢𑀁 𑀯𑀺𑀤𑀺𑀢𑀁. ‘‘𑀅𑀬𑀁 𑀧𑀼𑀕𑁆𑀕𑀮𑁄 𑀧𑀭𑀺𑀯𑀸𑀲𑀸𑀭𑀳𑁄, 𑀅𑀬𑀁 𑀦 𑀧𑀭𑀺𑀯𑀸𑀲𑀸𑀭𑀳𑁄’’𑀢𑀺 𑀇𑀤𑀁 𑀫𑀬𑁆𑀳𑀁 𑀧𑀸𑀓𑀝𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀢𑀢𑁄 𑀓𑀲𑁆𑀲𑀧𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀳𑁄 𑀅𑀘𑁆𑀙𑀭𑀺𑀬𑀁 𑀩𑀼𑀤𑁆𑀥𑀲𑀸𑀲𑀦𑀁, 𑀬𑀢𑁆𑀣 𑀏𑀯𑀁 𑀖𑀁𑀲𑀺𑀢𑁆𑀯𑀸 𑀓𑁄𑀝𑁆𑀝𑁂𑀢𑁆𑀯𑀸 𑀬𑀼𑀢𑁆𑀢𑀫𑁂𑀯 𑀕𑀡𑁆𑀳𑀦𑁆𑀢𑀺, 𑀅𑀬𑀼𑀢𑁆𑀢𑀁 𑀙𑀟𑁆𑀟𑁂𑀦𑁆𑀢𑀻’’𑀢𑀺, 𑀢𑀢𑁄 𑀲𑀼𑀝𑁆𑀞𑀼𑀢𑀭𑀁 𑀧𑀩𑁆𑀩𑀚𑁆𑀚𑀸𑀬 𑀲𑀜𑁆𑀚𑀸𑀢𑀼𑀲𑁆𑀲𑀸𑀳𑁄 𑁋 ‘‘𑀲𑀘𑁂 𑀪𑀦𑁆𑀢𑁂’’𑀢𑀺𑀆𑀤𑀺𑀫𑀸𑀳.

𑀅𑀣 𑀔𑁄 𑀪𑀕𑀯𑀸 𑀢𑀲𑁆𑀲 𑀢𑀺𑀩𑁆𑀩𑀘𑁆𑀙𑀦𑁆𑀤𑀢𑀁 𑀯𑀺𑀤𑀺𑀢𑁆𑀯𑀸 𑁋 ‘‘𑀦 𑀓𑀲𑁆𑀲𑀧𑁄 𑀧𑀭𑀺𑀯𑀸𑀲𑀁 𑀅𑀭𑀳𑀢𑀻’’𑀢𑀺 𑀅𑀜𑁆𑀜𑀢𑀭𑀁 𑀪𑀺𑀓𑁆𑀔𑀼𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀕𑀘𑁆𑀙 𑀪𑀺𑀓𑁆𑀔𑀼 𑀓𑀲𑁆𑀲𑀧𑀁 𑀦𑁆𑀳𑀸𑀧𑁂𑀢𑁆𑀯𑀸 𑀧𑀩𑁆𑀩𑀸𑀚𑁂𑀢𑁆𑀯𑀸 𑀆𑀦𑁂𑀳𑀻’’𑀢𑀺. 𑀲𑁄 𑀢𑀣𑀸 𑀓𑀢𑁆𑀯𑀸 𑀢𑀁 𑀧𑀩𑁆𑀩𑀸𑀚𑁂𑀢𑁆𑀯𑀸 𑀪𑀕𑀯𑀢𑁄 𑀲𑀦𑁆𑀢𑀺𑀓𑀁 𑀆𑀕𑀫𑀸𑀲𑀺. 𑀪𑀕𑀯𑀸 𑀢𑀁 𑀕𑀡𑀫𑀚𑁆𑀛𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀉𑀧𑀲𑀫𑁆𑀧𑀸𑀤𑁂𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀅𑀮𑀢𑁆𑀣 𑀔𑁄 𑀅𑀘𑁂𑀮𑁄 𑀓𑀲𑁆𑀲𑀧𑁄 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑁆𑀚𑀁, 𑀅𑀮𑀢𑁆𑀣 𑀉𑀧𑀲𑀫𑁆𑀧𑀤’’𑀦𑁆𑀢𑀺. 𑀅𑀘𑀺𑀭𑀽𑀧𑀲𑀫𑁆𑀧𑀦𑁆𑀦𑁄𑀢𑀺 𑀉𑀧𑀲𑀫𑁆𑀧𑀦𑁆𑀦𑁄 𑀳𑀼𑀢𑁆𑀯𑀸 𑀦𑀘𑀺𑀭𑀫𑁂𑀯. 𑀯𑀽𑀧𑀓𑀝𑁆𑀞𑁄𑀢𑀺 𑀯𑀢𑁆𑀣𑀼𑀓𑀸𑀫𑀓𑀺𑀮𑁂𑀲𑀓𑀸𑀫𑁂𑀳𑀺 𑀓𑀸𑀬𑁂𑀦 𑀘𑁂𑀯 𑀘𑀺𑀢𑁆𑀢𑁂𑀦 𑀘 𑀯𑀽𑀧𑀓𑀝𑁆𑀞𑁄. 𑀅𑀧𑁆𑀧𑀫𑀢𑁆𑀢𑁄𑀢𑀺 𑀓𑀫𑁆𑀫𑀝𑁆𑀞𑀸𑀦𑁂 𑀲𑀢𑀺𑀁 𑀅𑀯𑀺𑀚𑀳𑀦𑁆𑀢𑁄. 𑀆𑀢𑀸𑀧𑀻𑀢𑀺 𑀓𑀸𑀬𑀺𑀓𑀘𑁂𑀢𑀲𑀺𑀓𑀲𑀗𑁆𑀔𑀸𑀢𑁂𑀦 𑀯𑀻𑀭𑀺𑀬𑀸𑀢𑀸𑀧𑁂𑀦 𑀆𑀢𑀸𑀧𑀻. 𑀧𑀳𑀺𑀢𑀢𑁆𑀢𑁄𑀢𑀺 𑀓𑀸𑀬𑁂 𑀘 𑀚𑀻𑀯𑀺𑀢𑁂 𑀘 𑀅𑀦𑀧𑁂𑀓𑁆𑀔𑀢𑀸𑀬 𑀧𑁂𑀲𑀺𑀢𑀘𑀺𑀢𑁆𑀢𑁄 𑀯𑀺𑀲𑁆𑀲𑀝𑁆𑀞𑀅𑀢𑁆𑀢𑀪𑀸𑀯𑁄. 𑀬𑀲𑁆𑀲𑀢𑁆𑀣𑀸𑀬𑀸𑀢𑀺 𑀬𑀲𑁆𑀲 𑀅𑀢𑁆𑀣𑀸𑀬. 𑀓𑀼𑀮𑀧𑀼𑀢𑁆𑀢𑀸𑀢𑀺 𑀆𑀘𑀸𑀭𑀓𑀼𑀮𑀧𑀼𑀢𑁆𑀢𑀸. 𑀲𑀫𑁆𑀫𑀤𑁂𑀯𑀸𑀢𑀺 𑀳𑁂𑀢𑀼𑀦𑀸𑀯 𑀓𑀸𑀭𑀡𑁂𑀦𑁂𑀯. 𑀢𑀤𑀦𑀼𑀢𑁆𑀢𑀭𑀦𑁆𑀢𑀺 𑀢𑀁 𑀅𑀦𑀼𑀢𑁆𑀢𑀭𑀁. 𑀩𑁆𑀭𑀳𑁆𑀫𑀘𑀭𑀺𑀬𑀧𑀭𑀺𑀬𑁄𑀲𑀸𑀦𑀦𑁆𑀢𑀺 𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀧𑀭𑀺𑀬𑁄𑀲𑀸𑀦𑀪𑀽𑀢𑀁 𑀅𑀭𑀳𑀢𑁆𑀢𑀨𑀮𑀁. 𑀢𑀲𑁆𑀲 𑀳𑀺 𑀅𑀢𑁆𑀣𑀸𑀬 𑀓𑀼𑀮𑀧𑀼𑀢𑁆𑀢𑀸 𑀧𑀩𑁆𑀩𑀚𑀦𑁆𑀢𑀺. 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂𑀢𑀺 𑀇𑀫𑀲𑁆𑀫𑀺𑀁𑀬𑁂𑀯 𑀅𑀢𑁆𑀢𑀪𑀸𑀯𑁂. 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸𑀢𑀺 𑀅𑀢𑁆𑀢𑀦𑀸𑀬𑁂𑀯 𑀧𑀜𑁆𑀜𑀸𑀬 𑀧𑀘𑁆𑀘𑀓𑁆𑀔𑀁 𑀓𑀢𑁆𑀯𑀸, 𑀅𑀧𑀭𑀧𑁆𑀧𑀘𑁆𑀘𑀬𑀁 𑀓𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀸𑀲𑀻𑀢𑀺 𑀧𑀸𑀧𑀼𑀡𑀺𑀢𑁆𑀯𑀸 𑀲𑀫𑁆𑀧𑀸𑀤𑁂𑀢𑁆𑀯𑀸 𑀯𑀺𑀳𑀸𑀲𑀺, 𑀏𑀯𑀁 𑀯𑀺𑀳𑀭𑀦𑁆𑀢𑁄 𑀘 𑀔𑀻𑀡𑀸 𑀚𑀸𑀢𑀺…𑀧𑁂… 𑀅𑀩𑁆𑀪𑀜𑁆𑀜𑀸𑀲𑀻𑀢𑀺.

𑀏𑀯𑀫𑀲𑁆𑀲 𑀧𑀘𑁆𑀘𑀯𑁂𑀓𑁆𑀔𑀡𑀪𑀽𑀫𑀺𑀁 𑀤𑀲𑁆𑀲𑁂𑀢𑁆𑀯𑀸 𑀅𑀭𑀳𑀢𑁆𑀢𑀦𑀺𑀓𑀽𑀝𑁂𑀦 𑀤𑁂𑀲𑀦𑀁 𑀦𑀺𑀝𑁆𑀞𑀸𑀧𑁂𑀢𑀼𑀁 ‘‘𑀅𑀜𑁆𑀜𑀢𑀭𑁄 𑀔𑁄 𑀧𑀦𑀸𑀬𑀲𑁆𑀫𑀸 𑀓𑀲𑁆𑀲𑀧𑁄 𑀅𑀭𑀳𑀢𑀁 𑀅𑀳𑁄𑀲𑀻’’𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀅𑀜𑁆𑀜𑀢𑀭𑁄𑀢𑀺 𑀏𑀓𑁄. 𑀅𑀭𑀳𑀢𑀦𑁆𑀢𑀺 𑀅𑀭𑀳𑀦𑁆𑀢𑀸𑀦𑀁, 𑀪𑀕𑀯𑀢𑁄 𑀲𑀸𑀯𑀓𑀸𑀦𑀁 𑀅𑀭𑀳𑀦𑁆𑀢𑀸𑀦𑀁 𑀅𑀩𑁆𑀪𑀦𑁆𑀢𑀭𑁄 𑀅𑀳𑁄𑀲𑀻𑀢𑀺 𑀅𑀬𑀫𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄. 𑀬𑀁 𑀬𑀁 𑀧𑀦 𑀅𑀦𑁆𑀢𑀭𑀦𑁆𑀢𑀭𑀸 𑀦 𑀯𑀼𑀢𑁆𑀢𑀁, 𑀢𑀁 𑀢𑀁 𑀢𑀢𑁆𑀣 𑀢𑀢𑁆𑀣 𑀯𑀼𑀢𑁆𑀢𑀢𑁆𑀢𑀸 𑀧𑀸𑀓𑀝𑀫𑁂𑀯𑀸𑀢𑀺.

𑀇𑀢𑀺 𑀲𑀼𑀫𑀗𑁆𑀕𑀮𑀯𑀺𑀮𑀸𑀲𑀺𑀦𑀺𑀬𑀸 𑀤𑀻𑀖𑀦𑀺𑀓𑀸𑀬𑀝𑁆𑀞𑀓𑀣𑀸𑀬𑀁

𑀫𑀳𑀸𑀲𑀻𑀳𑀦𑀸𑀤𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.