𑁯. 𑀧𑁄𑀝𑁆𑀞𑀧𑀸𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑀧𑁄𑀝𑁆𑀞𑀧𑀸𑀤𑀧𑀭𑀺𑀩𑁆𑀩𑀸𑀚𑀓𑀯𑀢𑁆𑀣𑀼𑀯𑀡𑁆𑀡𑀦𑀸

𑁪𑁦𑁬. 𑀏𑀯𑀁 𑀫𑁂 𑀲𑀼𑀢𑁆𑀢𑀁…𑀧𑁂… 𑀲𑀸𑀯𑀢𑁆𑀣𑀺𑀬𑀦𑁆𑀢𑀺 𑀧𑁄𑀝𑁆𑀞𑀧𑀸𑀤𑀲𑀼𑀢𑁆𑀢𑀁. 𑀢𑀢𑁆𑀭𑀸𑀬𑀁 𑀅𑀧𑀼𑀩𑁆𑀩𑀧𑀤𑀯𑀡𑁆𑀡𑀦𑀸. 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂𑀢𑀺 𑀲𑀸𑀯𑀢𑁆𑀣𑀺𑀁 𑀉𑀧𑀦𑀺𑀲𑁆𑀲𑀸𑀬 𑀬𑁄 𑀚𑁂𑀢𑀲𑁆𑀲 𑀓𑀼𑀫𑀸𑀭𑀲𑁆𑀲 𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑁂𑀦 𑀕𑀳𑀧𑀢𑀺𑀦𑀸 𑀆𑀭𑀸𑀫𑁄 𑀓𑀸𑀭𑀺𑀢𑁄, 𑀢𑀢𑁆𑀣 𑀯𑀺𑀳𑀭𑀢𑀺. 𑀧𑁄𑀝𑁆𑀞𑀧𑀸𑀤𑁄 𑀧𑀭𑀺𑀩𑁆𑀩𑀸𑀚𑀓𑁄𑀢𑀺 𑀦𑀸𑀫𑁂𑀦 𑀧𑁄𑀝𑁆𑀞𑀧𑀸𑀤𑁄 𑀦𑀸𑀫 𑀙𑀦𑁆𑀦𑀧𑀭𑀺𑀩𑁆𑀩𑀸𑀚𑀓𑁄. 𑀲𑁄 𑀓𑀺𑀭 𑀕𑀺𑀳𑀺𑀓𑀸𑀮𑁂 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑁄 𑀓𑀸𑀫𑁂𑀲𑀼𑀆𑀤𑀻𑀦𑀯𑀁 𑀤𑀺𑀲𑁆𑀯𑀸 𑀘𑀢𑁆𑀢𑀸𑀮𑀻𑀲𑀓𑁄𑀝𑀺𑀧𑀭𑀺𑀫𑀸𑀡𑀁 𑀪𑁄𑀕𑀓𑁆𑀔𑀦𑁆𑀥𑀁 𑀧𑀳𑀸𑀬 𑀧𑀩𑁆𑀩𑀚𑀺𑀢𑁆𑀯𑀸 𑀢𑀺𑀢𑁆𑀣𑀺𑀬𑀸𑀦𑀁 𑀕𑀡𑀸𑀘𑀭𑀺𑀬𑁄 𑀚𑀸𑀢𑁄. 𑀲𑀫𑀬𑀁 𑀧𑀯𑀤𑀦𑁆𑀢𑀺 𑀏𑀢𑁆𑀣𑀸𑀢𑀺 𑀲𑀫𑀬𑀧𑁆𑀧𑀯𑀸𑀤𑀓𑁄, 𑀢𑀲𑁆𑀫𑀺𑀁 𑀓𑀺𑀭 𑀞𑀸𑀦𑁂 𑀘𑀗𑁆𑀓𑀻𑀢𑀸𑀭𑀼𑀓𑁆𑀔𑀧𑁄𑀓𑁆𑀔𑀭𑀲𑀸𑀢𑀺𑀧𑁆𑀧𑀪𑀼𑀢𑀬𑁄 𑀩𑁆𑀭𑀸𑀳𑁆𑀫𑀡𑀸 𑀦𑀺𑀕𑀡𑁆𑀞𑀅𑀘𑁂𑀮𑀓𑀧𑀭𑀺𑀩𑁆𑀩𑀸𑀚𑀓𑀸𑀤𑀬𑁄 𑀘 𑀧𑀩𑁆𑀩𑀚𑀺𑀢𑀸 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀲𑀫𑀬𑀁 𑀯𑀤𑀦𑁆𑀢𑀺 𑀓𑀣𑁂𑀦𑁆𑀢𑀺 𑀤𑀻𑀧𑁂𑀦𑁆𑀢𑀺, 𑀢𑀲𑁆𑀫𑀸 𑀲𑁄 𑀆𑀭𑀸𑀫𑁄 𑀲𑀫𑀬𑀧𑁆𑀧𑀯𑀸𑀤𑀓𑁄𑀢𑀺 𑀯𑀼𑀘𑁆𑀘𑀢𑀺. 𑀲𑁆𑀯𑁂𑀯 𑀘 𑀢𑀺𑀦𑁆𑀤𑀼𑀓𑀸𑀘𑀻𑀭𑀲𑀗𑁆𑀔𑀸𑀢𑀸𑀬 𑀢𑀺𑀫𑁆𑀩𑀭𑀽𑀭𑀼𑀓𑁆𑀔𑀧𑀦𑁆𑀢𑀺𑀬𑀸 𑀧𑀭𑀺𑀓𑁆𑀔𑀺𑀢𑁆𑀢𑀢𑁆𑀢𑀸 𑀢𑀺𑀦𑁆𑀤𑀼𑀓𑀸𑀘𑀻𑀭𑁄. 𑀬𑀲𑁆𑀫𑀸 𑀧𑀦𑁂𑀢𑁆𑀣 𑀧𑀞𑀫𑀁 𑀏𑀓𑀸𑀯 𑀲𑀸𑀮𑀸 𑀅𑀳𑁄𑀲𑀺, 𑀧𑀘𑁆𑀙𑀸 𑀫𑀳𑀸𑀧𑀼𑀜𑁆𑀜𑀁 𑀧𑀭𑀺𑀩𑁆𑀩𑀸𑀚𑀓𑀁 𑀦𑀺𑀲𑁆𑀲𑀸𑀬 𑀩𑀳𑀽 𑀲𑀸𑀮𑀸 𑀓𑀢𑀸. 𑀢𑀲𑁆𑀫𑀸 𑀢𑀫𑁂𑀯 𑀏𑀓𑀁 𑀲𑀸𑀮𑀁 𑀉𑀧𑀸𑀤𑀸𑀬 𑀮𑀤𑁆𑀥𑀦𑀸𑀫𑀯𑀲𑁂𑀦 𑀏𑀓𑀲𑀸𑀮𑀓𑁄𑀢𑀺 𑀯𑀼𑀘𑁆𑀘𑀢𑀺. 𑀫𑀮𑁆𑀮𑀺𑀓𑀸𑀬 𑀧𑀦 𑀧𑀲𑁂𑀦𑀤𑀺𑀭𑀜𑁆𑀜𑁄 𑀤𑁂𑀯𑀺𑀬𑀸 𑀉𑀬𑁆𑀬𑀸𑀦𑀪𑀽𑀢𑁄 𑀲𑁄 𑀧𑀼𑀧𑁆𑀨𑀨𑀮𑀲𑀫𑁆𑀧𑀦𑁆𑀦𑁄 𑀆𑀭𑀸𑀫𑁄𑀢𑀺 𑀓𑀢𑁆𑀯𑀸 𑀫𑀮𑁆𑀮𑀺𑀓𑀸𑀬 𑀆𑀭𑀸𑀫𑁄𑀢𑀺 𑀲𑀗𑁆𑀔𑁆𑀬𑀁 𑀕𑀢𑁄. 𑀢𑀲𑁆𑀫𑀺𑀁 𑀲𑀫𑀬𑀧𑁆𑀧𑀯𑀸𑀤𑀓𑁂 𑀢𑀺𑀦𑁆𑀤𑀼𑀓𑀸𑀘𑀻𑀭𑁂 𑀏𑀓𑀲𑀸𑀮𑀓𑁂 𑀫𑀮𑁆𑀮𑀺𑀓𑀸𑀬 𑀆𑀭𑀸𑀫𑁂.

𑀧𑀝𑀺𑀯𑀲𑀢𑀻𑀢𑀺 𑀦𑀺𑀯𑀸𑀲𑀨𑀸𑀲𑀼𑀢𑀸𑀬 𑀯𑀲𑀢𑀺. 𑀅𑀣𑁂𑀓𑀤𑀺𑀯𑀲𑀁 𑀪𑀕𑀯𑀸 𑀧𑀘𑁆𑀘𑀽𑀲𑀲𑀫𑀬𑁂 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀧𑀢𑁆𑀣𑀭𑀺𑀢𑁆𑀯𑀸 𑀮𑁄𑀓𑀁 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑁄 𑀜𑀸𑀡𑀚𑀸𑀮𑀲𑁆𑀲 𑀅𑀦𑁆𑀢𑁄𑀕𑀢𑀁 𑀧𑀭𑀺𑀩𑁆𑀩𑀸𑀚𑀓𑀁 𑀤𑀺𑀲𑁆𑀯𑀸 𑁋 ‘‘𑀅𑀬𑀁 𑀧𑁄𑀝𑁆𑀞𑀧𑀸𑀤𑁄 𑀫𑀬𑁆𑀳𑀁 𑀜𑀸𑀡𑀚𑀸𑀮𑁂 𑀧𑀜𑁆𑀜𑀸𑀬𑀢𑀺, 𑀓𑀺𑀦𑁆𑀦𑀼 𑀔𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀉𑀧𑀧𑀭𑀺𑀓𑁆𑀔𑀦𑁆𑀢𑁄 𑀅𑀤𑁆𑀤𑀲 𑁋 ‘‘𑀅𑀳𑀁 𑀅𑀚𑁆𑀚 𑀢𑀢𑁆𑀣 𑀕𑀫𑀺𑀲𑁆𑀲𑀸𑀫𑀺, 𑀅𑀣 𑀫𑀁 𑀧𑁄𑀝𑁆𑀞𑀧𑀸𑀤𑁄 𑀦𑀺𑀭𑁄𑀥𑀜𑁆𑀘 𑀦𑀺𑀭𑁄𑀥𑀯𑀼𑀝𑁆𑀞𑀸𑀦𑀜𑁆𑀘 𑀧𑀼𑀘𑁆𑀙𑀺𑀲𑁆𑀲𑀢𑀺, 𑀢𑀲𑁆𑀲𑀸𑀳𑀁 𑀲𑀩𑁆𑀩𑀩𑀼𑀤𑁆𑀥𑀸𑀦𑀁 𑀜𑀸𑀡𑁂𑀦 𑀲𑀁𑀲𑀦𑁆𑀤𑀺𑀢𑁆𑀯𑀸 𑀢𑀤𑀼𑀪𑀬𑀁 𑀓𑀣𑁂𑀲𑁆𑀲𑀸𑀫𑀺, 𑀅𑀣 𑀲𑁄 𑀓𑀢𑀺𑀧𑀸𑀳𑀘𑁆𑀘𑀬𑁂𑀦 𑀘𑀺𑀢𑁆𑀢𑀁 𑀳𑀢𑁆𑀣𑀺𑀲𑀸𑀭𑀺𑀧𑀼𑀢𑁆𑀢𑀁 𑀕𑀳𑁂𑀢𑁆𑀯𑀸 𑀫𑀫 𑀲𑀦𑁆𑀢𑀺𑀓𑀁 𑀆𑀕𑀫𑀺𑀲𑁆𑀲𑀢𑀺, 𑀢𑁂𑀲𑀫𑀳𑀁 𑀥𑀫𑁆𑀫𑀁 𑀤𑁂𑀲𑁂𑀲𑁆𑀲𑀸𑀫𑀺, 𑀤𑁂𑀲𑀦𑀸𑀯𑀲𑀸𑀦𑁂 𑀧𑁄𑀝𑁆𑀞𑀧𑀸𑀤𑁄 𑀫𑀁 𑀲𑀭𑀡𑀁 𑀕𑀫𑀺𑀲𑁆𑀲𑀢𑀺, 𑀘𑀺𑀢𑁆𑀢𑁄 𑀳𑀢𑁆𑀣𑀺𑀲𑀸𑀭𑀺𑀧𑀼𑀢𑁆𑀢𑁄 𑀫𑀫 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀲𑁆𑀲𑀢𑀻’’𑀢𑀺. 𑀢𑀢𑁄 𑀧𑀸𑀢𑁄𑀯 𑀲𑀭𑀻𑀭𑀧𑀝𑀺𑀚𑀕𑁆𑀕𑀦𑀁 𑀓𑀢𑁆𑀯𑀸 𑀲𑀼𑀭𑀢𑁆𑀢𑀤𑀼𑀧𑀝𑁆𑀝𑀁 𑀦𑀺𑀯𑀸𑀲𑁂𑀢𑁆𑀯𑀸 𑀯𑀺𑀚𑁆𑀚𑀼𑀮𑀢𑀸𑀲𑀤𑀺𑀲𑀁 𑀓𑀸𑀬𑀩𑀦𑁆𑀥𑀦𑀁 𑀩𑀦𑁆𑀥𑀺𑀢𑁆𑀯𑀸 𑀬𑀼𑀕𑀦𑁆𑀥𑀭𑀧𑀩𑁆𑀩𑀢𑀁 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀞𑀺𑀢𑀫𑀳𑀸𑀫𑁂𑀖𑀁 𑀯𑀺𑀬 𑀫𑁂𑀖𑀯𑀡𑁆𑀡𑀁 𑀧𑀁𑀲𑀼𑀓𑀽𑀮𑀁 𑀏𑀓𑀁𑀲𑀯𑀭𑀕𑀢𑀁 𑀓𑀢𑁆𑀯𑀸 𑀧𑀘𑁆𑀘𑀕𑁆𑀖𑀁 𑀲𑁂𑀮𑀫𑀬𑀧𑀢𑁆𑀢𑀁 𑀯𑀸𑀫𑀅𑀁𑀲𑀓𑀽𑀝𑁂 𑀮𑀕𑁆𑀕𑁂𑀢𑁆𑀯𑀸 𑀲𑀸𑀯𑀢𑁆𑀣𑀺𑀁 𑀧𑀺𑀡𑁆𑀟𑀸𑀬 𑀧𑀯𑀺𑀲𑀺𑀲𑁆𑀲𑀸𑀫𑀻𑀢𑀺 𑀲𑀻𑀳𑁄 𑀯𑀺𑀬 𑀳𑀺𑀫𑀯𑀦𑁆𑀢𑀧𑀸𑀤𑀸 𑀯𑀺𑀳𑀸𑀭𑀸 𑀦𑀺𑀓𑁆𑀔𑀫𑀺. 𑀇𑀫𑀫𑀢𑁆𑀣𑀁 𑀲𑀦𑁆𑀥𑀸𑀬 𑁋 ‘‘𑀅𑀣 𑀔𑁄 𑀪𑀕𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑁪𑁦𑁭. 𑀏𑀢𑀤𑀳𑁄𑀲𑀻𑀢𑀺 𑀦𑀕𑀭𑀤𑁆𑀯𑀸𑀭𑀲𑀫𑀻𑀧𑀁 𑀕𑀦𑁆𑀢𑁆𑀯𑀸 𑀅𑀢𑁆𑀢𑀦𑁄 𑀭𑀼𑀘𑀺𑀯𑀲𑁂𑀦 𑀲𑀽𑀭𑀺𑀬𑀁 𑀑𑀮𑁄𑀓𑁂𑀢𑁆𑀯𑀸 𑀅𑀢𑀺𑀧𑁆𑀧𑀕𑀪𑀸𑀯𑀫𑁂𑀯 𑀤𑀺𑀲𑁆𑀯𑀸 𑀏𑀢𑀁 𑀅𑀳𑁄𑀲𑀺. 𑀬𑀁𑀦𑀽𑀦𑀸𑀳𑀦𑁆𑀢𑀺 𑀲𑀁𑀲𑀬𑀧𑀭𑀺𑀤𑀻𑀧𑀦𑁄 𑀯𑀺𑀬 𑀦𑀺𑀧𑀸𑀢𑁄, 𑀩𑀼𑀤𑁆𑀥𑀸𑀦𑀜𑁆𑀘 𑀲𑀁𑀲𑀬𑁄 𑀦𑀸𑀫 𑀦𑀢𑁆𑀣𑀺 𑁋 ‘‘𑀇𑀤𑀁 𑀓𑀭𑀺𑀲𑁆𑀲𑀸𑀫, 𑀇𑀤𑀁 𑀦 𑀓𑀭𑀺𑀲𑁆𑀲𑀸𑀫, 𑀇𑀫𑀲𑁆𑀲 𑀥𑀫𑁆𑀫𑀁 𑀤𑁂𑀲𑁂𑀲𑁆𑀲𑀸𑀫, 𑀇𑀫𑀲𑁆𑀲 𑀦 𑀤𑁂𑀲𑁂𑀲𑁆𑀲𑀸𑀫𑀸’’𑀢𑀺 𑀏𑀯𑀁 𑀧𑀭𑀺𑀯𑀺𑀢𑀓𑁆𑀓𑀧𑀼𑀩𑁆𑀩𑀪𑀸𑀕𑁄 𑀧𑀦𑁂𑀲 𑀲𑀩𑁆𑀩𑀩𑀼𑀤𑁆𑀥𑀸𑀦𑀁 𑀮𑀩𑁆𑀪𑀢𑀺. 𑀢𑁂𑀦𑀸𑀳 𑁋 ‘‘𑀬𑀁𑀦𑀽𑀦𑀸𑀳’’𑀦𑁆𑀢𑀺, 𑀬𑀤𑀺 𑀧𑀦𑀸𑀳𑀦𑁆𑀢𑀺 𑀅𑀢𑁆𑀣𑁄.

𑁪𑁦𑁮. 𑀉𑀦𑁆𑀦𑀸𑀤𑀺𑀦𑀺𑀬𑀸𑀢𑀺 𑀉𑀘𑁆𑀘𑀁 𑀦𑀤𑀫𑀸𑀦𑀸𑀬, 𑀏𑀯𑀁 𑀦𑀤𑀫𑀸𑀦𑀸𑀬 𑀘𑀲𑁆𑀲𑀸 𑀉𑀤𑁆𑀥𑀁 𑀕𑀫𑀦𑀯𑀲𑁂𑀦 𑀉𑀘𑁆𑀘𑁄, 𑀤𑀺𑀲𑀸𑀲𑀼 𑀧𑀢𑁆𑀣𑀝𑀯𑀲𑁂𑀦 𑀫𑀳𑀸 𑀲𑀤𑁆𑀤𑁄𑀢𑀺 𑀉𑀘𑁆𑀘𑀸𑀲𑀤𑁆𑀤𑀫𑀳𑀸𑀲𑀤𑁆𑀤𑀸𑀬, 𑀢𑁂𑀲𑀜𑁆𑀳𑀺 𑀧𑀭𑀺𑀩𑁆𑀩𑀸𑀚𑀓𑀸𑀦𑀁 𑀧𑀸𑀢𑁄𑀯 𑀯𑀼𑀝𑁆𑀞𑀸𑀬 𑀓𑀢𑁆𑀢𑀩𑁆𑀩𑀁 𑀦𑀸𑀫 𑀘𑁂𑀢𑀺𑀬𑀯𑀢𑁆𑀢𑀁 𑀯𑀸 𑀩𑁄𑀥𑀺𑀯𑀢𑁆𑀢𑀁 𑀯𑀸 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀯𑀢𑁆𑀢𑀁 𑀯𑀸 𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑁄 𑀯𑀸 𑀦𑀢𑁆𑀣𑀺. 𑀢𑁂𑀦 𑀢𑁂 𑀧𑀸𑀢𑁄𑀯 𑀯𑀼𑀝𑁆𑀞𑀸𑀬 𑀩𑀸𑀮𑀸𑀢𑀧𑁂 𑀦𑀺𑀲𑀺𑀦𑁆𑀦𑀸 𑁋 ‘‘𑀇𑀫𑀲𑁆𑀲 𑀳𑀢𑁆𑀣𑁄 𑀲𑁄𑀪𑀦𑁄, 𑀇𑀫𑀲𑁆𑀲 𑀧𑀸𑀤𑁄’’𑀢𑀺 𑀏𑀯𑀁 𑀅𑀜𑁆𑀜𑀫𑀜𑁆𑀜𑀲𑁆𑀲 𑀳𑀢𑁆𑀣𑀧𑀸𑀤𑀸𑀤𑀻𑀦𑀺 𑀯𑀸 𑀆𑀭𑀩𑁆𑀪, 𑀇𑀢𑁆𑀣𑀺𑀧𑀼𑀭𑀺𑀲𑀤𑀸𑀭𑀓𑀤𑀸𑀭𑀺𑀓𑀸𑀤𑀻𑀦𑀁 𑀯𑀡𑁆𑀡𑁂 𑀯𑀸, 𑀅𑀜𑁆𑀜𑀁 𑀯𑀸 𑀓𑀸𑀫𑀲𑁆𑀲𑀸𑀤𑀪𑀯𑀲𑁆𑀲𑀸𑀤𑀸𑀤𑀺𑀯𑀢𑁆𑀣𑀼𑀁 𑀆𑀭𑀩𑁆𑀪 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀢𑁆𑀯𑀸 𑀅𑀦𑀼𑀧𑀼𑀩𑁆𑀩𑁂𑀦 𑀭𑀸𑀚𑀓𑀣𑀸𑀤𑀺𑀅𑀦𑁂𑀓𑀯𑀺𑀥𑀁 𑀢𑀺𑀭𑀘𑁆𑀙𑀸𑀦𑀓𑀣𑀁 𑀓𑀣𑁂𑀦𑁆𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀉𑀦𑁆𑀦𑀸𑀤𑀺𑀦𑀺𑀬𑀸 𑀉𑀘𑁆𑀘𑀸𑀲𑀤𑁆𑀤𑀫𑀳𑀸𑀲𑀤𑁆𑀤𑀸𑀬 𑀅𑀦𑁂𑀓𑀯𑀺𑀳𑀺𑀢𑀁 𑀢𑀺𑀭𑀘𑁆𑀙𑀸𑀦𑀓𑀣𑀁 𑀓𑀣𑁂𑀦𑁆𑀢𑀺𑀬𑀸’’𑀢𑀺.

𑀢𑀢𑁄 𑀧𑁄𑀝𑁆𑀞𑀧𑀸𑀤𑁄 𑀧𑀭𑀺𑀩𑁆𑀩𑀸𑀚𑀓𑁄 𑀢𑁂 𑀧𑀭𑀺𑀩𑁆𑀩𑀸𑀚𑀓𑁂 𑀑𑀮𑁄𑀓𑁂𑀢𑁆𑀯𑀸 𑁋 ‘‘𑀇𑀫𑁂 𑀧𑀭𑀺𑀩𑁆𑀩𑀸𑀚𑀓𑀸 𑀅𑀢𑀺𑀯𑀺𑀬 𑀅𑀜𑁆𑀜𑀫𑀜𑁆𑀜𑀁 𑀅𑀕𑀸𑀭𑀯𑀸, 𑀫𑀬𑀜𑁆𑀘 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀧𑀸𑀢𑀼𑀪𑀸𑀯𑀢𑁄 𑀧𑀝𑁆𑀞𑀸𑀬 𑀲𑀽𑀭𑀺𑀬𑀼𑀕𑁆𑀕𑀫𑀦𑁂 𑀔𑀚𑁆𑀚𑁄𑀧𑀦𑀓𑀽𑀧𑀫𑀸 𑀚𑀸𑀢𑀸, 𑀮𑀸𑀪𑀲𑀓𑁆𑀓𑀸𑀭𑁄𑀧𑀺 𑀦𑁄 𑀧𑀭𑀺𑀳𑀻𑀦𑁄. 𑀲𑀘𑁂 𑀧𑀦𑀺𑀫𑀁 𑀞𑀸𑀦𑀁 𑀲𑀫𑀡𑁄 𑀕𑁄𑀢𑀫𑁄 𑀯𑀸 𑀕𑁄𑀢𑀫𑀲𑁆𑀲 𑀲𑀸𑀯𑀓𑁄 𑀯𑀸 𑀕𑀺𑀳𑀻 𑀉𑀧𑀝𑁆𑀞𑀸𑀓𑁄 𑀯𑀸 𑀢𑀲𑁆𑀲 𑀆𑀕𑀘𑁆𑀙𑁂𑀬𑁆𑀬, 𑀅𑀢𑀺𑀯𑀺𑀬 𑀮𑀚𑁆𑀚𑀦𑀻𑀬𑀁 𑀪𑀯𑀺𑀲𑁆𑀲𑀢𑀺, 𑀧𑀭𑀺𑀲𑀤𑁄𑀲𑁄 𑀔𑁄 𑀧𑀦 𑀧𑀭𑀺𑀲𑀚𑁂𑀝𑁆𑀞𑀓𑀲𑁆𑀲𑁂𑀯 𑀉𑀧𑀭𑀺 𑀆𑀭𑁄𑀳𑀢𑀻’’𑀢𑀺 𑀇𑀢𑁄𑀘𑀺𑀢𑁄 𑀘 𑀯𑀺𑀮𑁄𑀓𑁂𑀦𑁆𑀢𑁄 𑀪𑀕𑀯𑀦𑁆𑀢𑀁 𑀅𑀤𑁆𑀤𑀲. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀅𑀤𑁆𑀤𑀲𑀸 𑀔𑁄 𑀧𑁄𑀝𑁆𑀞𑀧𑀸𑀤𑁄 𑀧𑀭𑀺𑀩𑁆𑀩𑀸𑀚𑀓𑁄…𑀧𑁂… 𑀢𑀼𑀡𑁆𑀳𑀻 𑀅𑀳𑁂𑀲𑀼’’𑀦𑁆𑀢𑀺.

𑁪𑁦𑁯. 𑀢𑀢𑁆𑀣 𑀲𑀡𑁆𑀞𑀧𑁂𑀲𑀻𑀢𑀺 𑀲𑀺𑀓𑁆𑀔𑀸𑀧𑁂𑀲𑀺, 𑀯𑀚𑁆𑀚𑀫𑀲𑁆𑀲𑀸 𑀧𑀝𑀺𑀘𑁆𑀙𑀸𑀤𑁂𑀲𑀺. 𑀬𑀣𑀸 𑀲𑀼𑀲𑀡𑁆𑀞𑀺𑀢𑀸 𑀳𑁄𑀢𑀺, 𑀢𑀣𑀸 𑀦𑀁 𑀞𑀧𑁂𑀲𑀺. 𑀬𑀣𑀸 𑀦𑀸𑀫 𑀧𑀭𑀺𑀲𑀫𑀚𑁆𑀛𑀁 𑀧𑀯𑀺𑀲𑀦𑁆𑀢𑁄 𑀧𑀼𑀭𑀺𑀲𑁄 𑀯𑀚𑁆𑀚𑀧𑀝𑀺𑀘𑁆𑀙𑀸𑀤𑀦𑀢𑁆𑀣𑀁 𑀦𑀺𑀯𑀸𑀲𑀦𑀁 𑀲𑀡𑁆𑀞𑀧𑁂𑀢𑀺, 𑀧𑀸𑀭𑀼𑀧𑀦𑀁 𑀲𑀡𑁆𑀞𑀧𑁂𑀢𑀺, 𑀭𑀚𑁄𑀓𑀺𑀡𑁆𑀡𑀝𑁆𑀞𑀸𑀦𑀁 𑀧𑀼𑀜𑁆𑀙𑀢𑀺; 𑀏𑀯𑀫𑀲𑁆𑀲𑀸 𑀯𑀚𑁆𑀚𑀧𑀝𑀺𑀘𑁆𑀙𑀸𑀤𑀦𑀢𑁆𑀣𑀁 𑁋 ‘‘𑀅𑀧𑁆𑀧𑀲𑀤𑁆𑀤𑀸 𑀪𑁄𑀦𑁆𑀢𑁄’’𑀢𑀺 𑀲𑀺𑀓𑁆𑀔𑀸𑀧𑁂𑀦𑁆𑀢𑁄 𑀬𑀣𑀸 𑀲𑀼𑀲𑀡𑁆𑀞𑀺𑀢𑀸 𑀳𑁄𑀢𑀺, 𑀢𑀣𑀸 𑀦𑀁 𑀞𑀧𑁂𑀲𑀻𑀢𑀺 𑀅𑀢𑁆𑀣𑁄. 𑀅𑀧𑁆𑀧𑀲𑀤𑁆𑀤𑀓𑀸𑀫𑁄𑀢𑀺 𑀅𑀧𑁆𑀧𑀲𑀤𑁆𑀤𑀁 𑀇𑀘𑁆𑀙𑀢𑀺, 𑀏𑀓𑁄 𑀦𑀺𑀲𑀻𑀤𑀢𑀺, 𑀏𑀓𑁄 𑀢𑀺𑀝𑁆𑀞𑀢𑀺, 𑀦 𑀕𑀡𑀲𑀗𑁆𑀕𑀡𑀺𑀓𑀸𑀬 𑀬𑀸𑀧𑁂𑀢𑀺. 𑀉𑀧𑀲𑀗𑁆𑀓𑀫𑀺𑀢𑀩𑁆𑀩𑀁 𑀫𑀜𑁆𑀜𑁂𑀬𑁆𑀬𑀸𑀢𑀺 𑀇𑀥𑀸𑀕𑀦𑁆𑀢𑀩𑁆𑀩𑀁 𑀫𑀜𑁆𑀜𑁂𑀬𑁆𑀬. 𑀓𑀲𑁆𑀫𑀸 𑀧𑀦𑁂𑀲 𑀪𑀕𑀯𑀢𑁄 𑀉𑀧𑀲𑀗𑁆𑀓𑀫𑀦𑀁 𑀧𑀘𑁆𑀘𑀸𑀲𑀻𑀲𑀢𑀻𑀢𑀺? 𑀅𑀢𑁆𑀢𑀦𑁄 𑀯𑀼𑀤𑁆𑀥𑀺𑀁 𑀧𑀢𑁆𑀣𑀬𑀫𑀸𑀦𑁄. 𑀧𑀭𑀺𑀩𑁆𑀩𑀸𑀚𑀓𑀸 𑀓𑀺𑀭 𑀩𑀼𑀤𑁆𑀥𑁂𑀲𑀼 𑀯𑀸 𑀩𑀼𑀤𑁆𑀥𑀲𑀸𑀯𑀓𑁂𑀲𑀼 𑀯𑀸 𑀅𑀢𑁆𑀢𑀦𑁄 𑀲𑀦𑁆𑀢𑀺𑀓𑀁 𑀆𑀕𑀢𑁂𑀲𑀼 𑁋 ‘‘𑀅𑀚𑁆𑀚 𑀅𑀫𑁆𑀳𑀸𑀓𑀁 𑀲𑀦𑁆𑀢𑀺𑀓𑀁 𑀲𑀫𑀡𑁄 𑀕𑁄𑀢𑀫𑁄 𑀆𑀕𑀢𑁄, 𑀲𑀸𑀭𑀺𑀧𑀼𑀢𑁆𑀢𑁄 𑀆𑀕𑀢𑁄, 𑀦 𑀔𑁄 𑀧𑀦 𑀢𑁂 𑀬𑀲𑁆𑀲 𑀯𑀸 𑀢𑀲𑁆𑀲 𑀯𑀸 𑀲𑀦𑁆𑀢𑀺𑀓𑀁 𑀕𑀘𑁆𑀙𑀦𑁆𑀢𑀺, 𑀧𑀲𑁆𑀲𑀣 𑀅𑀫𑁆𑀳𑀸𑀓𑀁 𑀉𑀢𑁆𑀢𑀫𑀪𑀸𑀯’’𑀦𑁆𑀢𑀺 𑀅𑀢𑁆𑀢𑀦𑁄 𑀉𑀧𑀝𑁆𑀞𑀸𑀓𑀸𑀦𑀁 𑀲𑀦𑁆𑀢𑀺𑀓𑁂 𑀅𑀢𑁆𑀢𑀸𑀦𑀁 𑀉𑀓𑁆𑀔𑀺𑀧𑀦𑁆𑀢𑀺, 𑀉𑀘𑁆𑀘𑁂 𑀞𑀸𑀦𑁂 𑀞𑀧𑁂𑀦𑁆𑀢𑀺, 𑀪𑀕𑀯𑀢𑁄𑀧𑀺 𑀉𑀧𑀝𑁆𑀞𑀸𑀓𑁂 𑀕𑀡𑁆𑀳𑀺𑀢𑀼𑀁 𑀯𑀸𑀬𑀫𑀦𑁆𑀢𑀺. 𑀢𑁂 𑀓𑀺𑀭 𑀪𑀕𑀯𑀢𑁄 𑀉𑀧𑀝𑁆𑀞𑀸𑀓𑁂 𑀤𑀺𑀲𑁆𑀯𑀸 𑀏𑀯𑀁 𑀯𑀤𑀦𑁆𑀢𑀺 𑁋 ‘‘𑀢𑀼𑀫𑁆𑀳𑀸𑀓𑀁 𑀲𑀢𑁆𑀣𑀸 𑀪𑀯𑀁 𑀕𑁄𑀢𑀫𑁄𑀧𑀺 𑀕𑁄𑀢𑀫𑀲𑀸𑀯𑀓𑀸𑀧𑀺 𑀅𑀫𑁆𑀳𑀸𑀓𑀁 𑀲𑀦𑁆𑀢𑀺𑀓𑀁 𑀆𑀕𑀘𑁆𑀙𑀦𑁆𑀢𑀺, 𑀫𑀬𑀁 𑀅𑀜𑁆𑀜𑀫𑀜𑁆𑀜𑀁 𑀲𑀫𑀕𑁆𑀕𑀸. 𑀢𑀼𑀫𑁆𑀳𑁂 𑀧𑀦 𑀅𑀫𑁆𑀳𑁂 𑀅𑀓𑁆𑀔𑀻𑀳𑀺𑀧𑀺 𑀧𑀲𑁆𑀲𑀺𑀢𑀼𑀁 𑀦 𑀇𑀘𑁆𑀙𑀣, 𑀲𑀸𑀫𑀻𑀘𑀺𑀓𑀫𑁆𑀫𑀁 𑀦 𑀓𑀭𑁄𑀣, 𑀓𑀺𑀁 𑀯𑁄 𑀅𑀫𑁆𑀳𑁂𑀳𑀺 𑀅𑀧𑀭𑀤𑁆𑀥’’𑀦𑁆𑀢𑀺. 𑀅𑀣𑁂𑀓𑀘𑁆𑀘𑁂 𑀫𑀦𑀼𑀲𑁆𑀲𑀸 𑁋 ‘‘𑀩𑀼𑀤𑁆𑀥𑀸𑀧𑀺 𑀏𑀢𑁂𑀲𑀁 𑀲𑀦𑁆𑀢𑀺𑀓𑀁 𑀕𑀘𑁆𑀙𑀦𑁆𑀢𑀺 𑀓𑀺𑀁 𑀅𑀫𑁆𑀳𑀸𑀓’’𑀦𑁆𑀢𑀺 𑀢𑀢𑁄 𑀧𑀝𑁆𑀞𑀸𑀬 𑀢𑁂 𑀤𑀺𑀲𑁆𑀯𑀸 𑀦𑀧𑁆𑀧𑀫𑀚𑁆𑀚𑀦𑁆𑀢𑀺. 𑀢𑀼𑀡𑁆𑀳𑀻 𑀅𑀳𑁂𑀲𑀼𑀦𑁆𑀢𑀺 𑀧𑁄𑀝𑁆𑀞𑀧𑀸𑀤𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀦𑀺𑀲𑁆𑀲𑀤𑁆𑀤𑀸 𑀦𑀺𑀲𑀻𑀤𑀺𑀁𑀲𑀼.

𑁪𑁧𑁦. 𑀲𑁆𑀯𑀸𑀕𑀢𑀁, 𑀪𑀦𑁆𑀢𑁂𑀢𑀺 𑀲𑀼𑀝𑁆𑀞𑀼 𑀆𑀕𑀫𑀦𑀁, 𑀪𑀦𑁆𑀢𑁂, 𑀪𑀕𑀯𑀢𑁄; 𑀪𑀕𑀯𑀢𑀺 𑀳𑀺 𑀦𑁄 𑀆𑀕𑀢𑁂 𑀆𑀦𑀦𑁆𑀤𑁄 𑀳𑁄𑀢𑀺, 𑀕𑀢𑁂 𑀲𑁄𑀓𑁄𑀢𑀺 𑀤𑀻𑀧𑁂𑀢𑀺. 𑀘𑀺𑀭𑀲𑁆𑀲𑀁 𑀔𑁄, 𑀪𑀦𑁆𑀢𑁂𑀢𑀺 𑀓𑀲𑁆𑀫𑀸 𑀆𑀳? 𑀓𑀺𑀁 𑀪𑀕𑀯𑀸 𑀧𑀼𑀩𑁆𑀩𑁂𑀧𑀺 𑀢𑀢𑁆𑀣 𑀕𑀢𑀧𑀼𑀩𑁆𑀩𑁄𑀢𑀺, 𑀦 𑀕𑀢𑀧𑀼𑀩𑁆𑀩𑁄. 𑀫𑀦𑀼𑀲𑁆𑀲𑀸𑀦𑀁 𑀧𑀦 𑁋 ‘‘𑀓𑀼𑀳𑀺𑀁 𑀕𑀘𑁆𑀙𑀦𑁆𑀢𑀸, 𑀓𑀼𑀢𑁄 𑀆𑀕𑀢𑀢𑁆𑀣, 𑀓𑀺𑀁 𑀫𑀕𑁆𑀕𑀫𑀽𑀴𑁆𑀳𑀢𑁆𑀣, 𑀘𑀺𑀭𑀲𑁆𑀲𑀁 𑀆𑀕𑀢𑀢𑁆𑀣𑀸’’𑀢𑀺 𑀏𑀯𑀫𑀸𑀤𑀬𑁄 𑀧𑀺𑀬𑀲𑀫𑀼𑀤𑀸𑀘𑀸𑀭𑀸 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀏𑀯𑀫𑀸𑀳. 𑀏𑀯𑀜𑁆𑀘 𑀧𑀦 𑀯𑀢𑁆𑀯𑀸 𑀦 𑀫𑀸𑀦𑀣𑀤𑁆𑀥𑁄 𑀳𑀼𑀢𑁆𑀯𑀸 𑀦𑀺𑀲𑀻𑀤𑀺, 𑀉𑀝𑁆𑀞𑀸𑀬𑀸𑀲𑀦𑀸 𑀪𑀕𑀯𑀢𑁄 𑀧𑀘𑁆𑀘𑀼𑀕𑁆𑀕𑀫𑀦𑀫𑀓𑀸𑀲𑀺. 𑀪𑀕𑀯𑀦𑁆𑀢𑀜𑁆𑀳𑀺 𑀉𑀧𑀕𑀢𑀁 𑀤𑀺𑀲𑁆𑀯𑀸 𑀆𑀲𑀦𑁂𑀦 𑀅𑀦𑀺𑀫𑀦𑁆𑀢𑁂𑀦𑁆𑀢𑁄 𑀯𑀸 𑀅𑀧𑀘𑀺𑀢𑀺𑀁 𑀅𑀓𑀭𑁄𑀦𑁆𑀢𑁄 𑀯𑀸 𑀤𑀼𑀮𑁆𑀮𑀪𑁄. 𑀓𑀲𑁆𑀫𑀸? 𑀉𑀘𑁆𑀘𑀸𑀓𑀼𑀮𑀻𑀦𑀢𑀸𑀬. 𑀅𑀬𑀫𑁆𑀧𑀺 𑀧𑀭𑀺𑀩𑁆𑀩𑀸𑀚𑀓𑁄 𑀅𑀢𑁆𑀢𑀦𑁄 𑀦𑀺𑀲𑀺𑀦𑁆𑀦𑀸𑀲𑀦𑀁 𑀧𑀧𑁆𑀨𑁄𑀝𑁂𑀢𑁆𑀯𑀸 𑀪𑀕𑀯𑀦𑁆𑀢𑀁 𑀆𑀲𑀦𑁂𑀦 𑀦𑀺𑀫𑀦𑁆𑀢𑁂𑀦𑁆𑀢𑁄 𑁋 ‘‘𑀦𑀺𑀲𑀻𑀤𑀢𑀼, 𑀪𑀦𑁆𑀢𑁂, 𑀪𑀕𑀯𑀸 𑀇𑀤𑀫𑀸𑀲𑀦𑀁 𑀧𑀜𑁆𑀜𑀢𑁆𑀢’’𑀦𑁆𑀢𑀺 𑀆𑀳. 𑀅𑀦𑁆𑀢𑀭𑀸𑀓𑀣𑀸 𑀯𑀺𑀧𑁆𑀧𑀓𑀢𑀸𑀢𑀺 𑀦𑀺𑀲𑀺𑀦𑁆𑀦𑀸𑀦𑀁 𑀯𑁄 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀫𑀫𑀸𑀕𑀫𑀦𑀁, 𑀏𑀢𑀲𑁆𑀫𑀺𑀁 𑀅𑀦𑁆𑀢𑀭𑁂 𑀓𑀸 𑀦𑀸𑀫 𑀓𑀣𑀸 𑀯𑀺𑀧𑁆𑀧𑀓𑀢𑀸, 𑀫𑀫𑀸𑀕𑀫𑀦𑀧𑀘𑁆𑀘𑀬𑀸 𑀓𑀢𑀫𑀸 𑀓𑀣𑀸 𑀧𑀭𑀺𑀬𑀦𑁆𑀢𑀁 𑀦 𑀕𑀢𑀸, 𑀯𑀤𑀣, 𑀬𑀸𑀯 𑀦𑀁 𑀧𑀭𑀺𑀬𑀦𑁆𑀢𑀁 𑀦𑁂𑀢𑁆𑀯𑀸 𑀤𑁂𑀫𑀻𑀢𑀺 𑀲𑀩𑁆𑀩𑀜𑁆𑀜𑀼𑀧𑀯𑀸𑀭𑀡𑀁 𑀧𑀯𑀸𑀭𑁂𑀲𑀺. 𑀅𑀣 𑀧𑀭𑀺𑀩𑁆𑀩𑀸𑀚𑀓𑁄 𑁋 ‘‘𑀦𑀺𑀭𑀢𑁆𑀣𑀓𑀓𑀣𑀸 𑀏𑀲𑀸 𑀦𑀺𑀲𑁆𑀲𑀸𑀭𑀸 𑀯𑀝𑁆𑀝𑀲𑀦𑁆𑀦𑀺𑀲𑁆𑀲𑀺𑀢𑀸, 𑀦 𑀢𑀼𑀫𑁆𑀳𑀸𑀓𑀁 𑀧𑀼𑀭𑀢𑁄 𑀯𑀢𑁆𑀢𑀩𑁆𑀩𑀢𑀁 𑀅𑀭𑀳𑀢𑀻’’𑀢𑀺 𑀤𑀻𑀧𑁂𑀦𑁆𑀢𑁄 ‘‘𑀢𑀺𑀝𑁆𑀞𑀢𑁂𑀲𑀸, 𑀪𑀦𑁆𑀢𑁂’’𑀢𑀺𑀆𑀤𑀺𑀫𑀸𑀳.

𑀅𑀪𑀺𑀲𑀜𑁆𑀜𑀸𑀦𑀺𑀭𑁄𑀥𑀓𑀣𑀸𑀯𑀡𑁆𑀡𑀦𑀸

𑁪𑁧𑁧. 𑀢𑀺𑀝𑁆𑀞𑀢𑁂𑀲𑀸, 𑀪𑀦𑁆𑀢𑁂𑀢𑀺 𑀲𑀘𑁂 𑀪𑀕𑀯𑀸 𑀲𑁄𑀢𑀼𑀓𑀸𑀫𑁄 𑀪𑀯𑀺𑀲𑁆𑀲𑀢𑀺, 𑀧𑀘𑁆𑀙𑀸𑀧𑁂𑀲𑀸 𑀓𑀣𑀸 𑀦 𑀤𑀼𑀮𑁆𑀮𑀪𑀸 𑀪𑀯𑀺𑀲𑁆𑀲𑀢𑀺, 𑀅𑀫𑁆𑀳𑀸𑀓𑀁 𑀧𑀦𑀺𑀫𑀸𑀬 𑀓𑀣𑀸𑀬 𑀅𑀢𑁆𑀣𑁄 𑀦𑀢𑁆𑀣𑀺. 𑀪𑀕𑀯𑀢𑁄 𑀧𑀦𑀸𑀕𑀫𑀦𑀁 𑀮𑀪𑀺𑀢𑁆𑀯𑀸 𑀫𑀬𑀁 𑀅𑀜𑁆𑀜𑀤𑁂𑀯 𑀲𑀼𑀓𑀸𑀭𑀡𑀁 𑀧𑀼𑀘𑁆𑀙𑀸𑀫𑀸𑀢𑀺 𑀤𑀻𑀧𑁂𑀢𑀺. 𑀢𑀢𑁄 𑀢𑀁 𑀧𑀼𑀘𑁆𑀙𑀦𑁆𑀢𑁄 𑁋 ‘‘𑀧𑀼𑀭𑀺𑀫𑀸𑀦𑀺, 𑀪𑀦𑁆𑀢𑁂’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀓𑁄𑀢𑀽𑀳𑀮𑀲𑀸𑀮𑀸𑀬𑀦𑁆𑀢𑀺 𑀓𑁄𑀢𑀽𑀳𑀮𑀲𑀸𑀮𑀸 𑀦𑀸𑀫 𑀧𑀘𑁆𑀘𑁂𑀓𑀲𑀸𑀮𑀸 𑀦𑀢𑁆𑀣𑀺. 𑀬𑀢𑁆𑀣 𑀧𑀦 𑀦𑀸𑀦𑀸𑀢𑀺𑀢𑁆𑀣𑀺𑀬𑀸 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀦𑀸𑀦𑀸𑀯𑀺𑀥𑀁 𑀓𑀣𑀁 𑀧𑀯𑀢𑁆𑀢𑁂𑀦𑁆𑀢𑀺, 𑀲𑀸 𑀩𑀳𑀽𑀦𑀁 𑁋 ‘‘𑀅𑀬𑀁 𑀓𑀺𑀁 𑀯𑀤𑀢𑀺, 𑀅𑀬𑀁 𑀓𑀺𑀁 𑀯𑀤𑀢𑀻’’𑀢𑀺 𑀓𑁄𑀢𑀽𑀳𑀮𑀼𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀢𑁄 𑀓𑁄𑀢𑀽𑀳𑀮𑀲𑀸𑀮𑀸𑀢𑀺 𑀯𑀼𑀘𑁆𑀘𑀢𑀺. 𑀅𑀪𑀺𑀲𑀜𑁆𑀜𑀸𑀦𑀺𑀭𑁄𑀥𑁂𑀢𑀺 𑀏𑀢𑁆𑀣 𑀅𑀪𑀻𑀢𑀺 𑀉𑀧𑀲𑀕𑁆𑀕𑀫𑀢𑁆𑀢𑀁. 𑀲𑀜𑁆𑀜𑀸𑀦𑀺𑀭𑁄𑀥𑁂𑀢𑀺 𑀘𑀺𑀢𑁆𑀢𑀦𑀺𑀭𑁄𑀥𑁂, 𑀔𑀡𑀺𑀓𑀦𑀺𑀭𑁄𑀥𑁂 𑀓𑀣𑀸 𑀉𑀧𑁆𑀧𑀦𑁆𑀦𑀸𑀢𑀺 𑀅𑀢𑁆𑀣𑁄. 𑀇𑀤𑀁 𑀧𑀦 𑀢𑀲𑁆𑀲𑀸 𑀉𑀧𑁆𑀧𑀢𑁆𑀢𑀺𑀓𑀸𑀭𑀡𑀁. 𑀬𑀤𑀸 𑀓𑀺𑀭 𑀪𑀕𑀯𑀸 𑀚𑀸𑀢𑀓𑀁 𑀯𑀸 𑀓𑀣𑁂𑀢𑀺, 𑀲𑀺𑀓𑁆𑀔𑀸𑀧𑀤𑀁 𑀯𑀸 𑀧𑀜𑁆𑀜𑀧𑁂𑀢𑀺 𑀢𑀤𑀸 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀪𑀕𑀯𑀢𑁄 𑀓𑀺𑀢𑁆𑀢𑀺𑀖𑁄𑀲𑁄 𑀧𑀢𑁆𑀣𑀭𑀢𑀺, 𑀢𑀺𑀢𑁆𑀣𑀺𑀬𑀸 𑀢𑀁 𑀲𑀼𑀢𑁆𑀯𑀸 𑁋 ‘‘𑀪𑀯𑀁 𑀓𑀺𑀭 𑀕𑁄𑀢𑀫𑁄 𑀧𑀼𑀩𑁆𑀩𑀘𑀭𑀺𑀬𑀁 𑀓𑀣𑁂𑀲𑀺, 𑀫𑀬𑀁 𑀓𑀺𑀁 𑀦 𑀲𑀓𑁆𑀓𑁄𑀫 𑀢𑀸𑀤𑀺𑀲𑀁 𑀓𑀺𑀜𑁆𑀘𑀺 𑀓𑀣𑁂𑀢𑀼’’𑀦𑁆𑀢𑀺 𑀪𑀕𑀯𑀢𑁄 𑀧𑀝𑀺𑀪𑀸𑀕𑀓𑀺𑀭𑀺𑀬𑀁 𑀓𑀭𑁄𑀦𑁆𑀢𑀸 𑀏𑀓𑀁 𑀪𑀯𑀦𑁆𑀢𑀭𑀲𑀫𑀬𑀁 𑀓𑀣𑁂𑀦𑁆𑀢𑀺 𑁋 ‘‘𑀪𑀯𑀁 𑀕𑁄𑀢𑀫𑁄 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀧𑁂𑀲𑀺, 𑀫𑀬𑀁 𑀓𑀺𑀁 𑀦 𑀲𑀓𑁆𑀓𑁄𑀫 𑀧𑀜𑁆𑀜𑀧𑁂𑀢𑀼’’𑀦𑁆𑀢𑀺 𑀅𑀢𑁆𑀢𑀦𑁄 𑀲𑀸𑀯𑀓𑀸𑀦𑀁 𑀓𑀺𑀜𑁆𑀘𑀺𑀤𑁂𑀯 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀧𑁂𑀦𑁆𑀢𑀺. 𑀢𑀤𑀸 𑀧𑀦 𑀪𑀕𑀯𑀸 𑀅𑀝𑁆𑀞𑀯𑀺𑀥𑀧𑀭𑀺𑀲𑀫𑀚𑁆𑀛𑁂 𑀦𑀺𑀲𑀻𑀤𑀺𑀢𑁆𑀯𑀸 𑀦𑀺𑀭𑁄𑀥𑀓𑀣𑀁 𑀓𑀣𑁂𑀲𑀺. 𑀢𑀺𑀢𑁆𑀣𑀺𑀬𑀸 𑀢𑀁 𑀲𑀼𑀢𑁆𑀯𑀸 𑁋 ‘‘𑀪𑀯𑀁 𑀓𑀺𑀭 𑀕𑁄𑀢𑀫𑁄 𑀦𑀺𑀭𑁄𑀥𑀁 𑀦𑀸𑀫 𑀓𑀣𑁂𑀲𑀺, 𑀫𑀬𑀫𑁆𑀧𑀺 𑀢𑀁 𑀓𑀣𑁂𑀲𑁆𑀲𑀸𑀫𑀸’’𑀢𑀺 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀓𑀣𑀬𑀺𑀁𑀲𑀼. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀅𑀪𑀺𑀲𑀜𑁆𑀜𑀸𑀦𑀺𑀭𑁄𑀥𑁂 𑀓𑀣𑀸 𑀉𑀤𑀧𑀸𑀤𑀻’’𑀢𑀺.

𑀢𑀢𑁆𑀭𑁂𑀓𑀘𑁆𑀘𑁂𑀢𑀺 𑀢𑁂𑀲𑀼 𑀏𑀓𑀘𑁆𑀘𑁂. 𑀧𑀼𑀭𑀺𑀫𑁄 𑀘𑁂𑀢𑁆𑀣 𑀬𑁆𑀯𑀸𑀬𑀁 𑀩𑀸𑀳𑀺𑀭𑁂 𑀢𑀺𑀢𑁆𑀣𑀸𑀬𑀢𑀦𑁂 𑀧𑀩𑁆𑀩𑀚𑀺𑀢𑁄 𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺𑀬𑀁 𑀤𑁄𑀲𑀁 𑀤𑀺𑀲𑁆𑀯𑀸 𑀅𑀘𑀺𑀢𑁆𑀢𑀓𑀪𑀸𑀯𑁄 𑀲𑀦𑁆𑀢𑁄𑀢𑀺 𑀲𑀫𑀸𑀧𑀢𑁆𑀢𑀺𑀁 𑀪𑀸𑀯𑁂𑀢𑁆𑀯𑀸 𑀇𑀢𑁄 𑀘𑀼𑀢𑁄 𑀧𑀜𑁆𑀘 𑀓𑀧𑁆𑀧𑀲𑀢𑀸𑀦𑀺 𑀅𑀲𑀜𑁆𑀜𑀻𑀪𑀯𑁂 𑀞𑀢𑁆𑀯𑀸 𑀧𑀼𑀦 𑀇𑀥 𑀉𑀧𑁆𑀧𑀚𑁆𑀚𑀢𑀺. 𑀢𑀲𑁆𑀲 𑀲𑀜𑁆𑀜𑀼𑀧𑁆𑀧𑀸𑀤𑁂 𑀘 𑀦𑀺𑀭𑁄𑀥𑁂 𑀘 𑀳𑁂𑀢𑀼𑀁 𑀅𑀧𑀲𑁆𑀲𑀦𑁆𑀢𑁄 𑁋 𑀅𑀳𑁂𑀢𑀽 𑀅𑀧𑁆𑀧𑀘𑁆𑀘𑀬𑀸𑀢𑀺 𑀆𑀳.

𑀤𑀼𑀢𑀺𑀬𑁄 𑀦𑀁 𑀦𑀺𑀲𑁂𑀥𑁂𑀢𑁆𑀯𑀸 𑀫𑀺𑀕𑀲𑀺𑀗𑁆𑀕𑀢𑀸𑀧𑀲𑀲𑁆𑀲 𑀅𑀲𑀜𑁆𑀜𑀓𑀪𑀸𑀯𑀁 𑀕𑀳𑁂𑀢𑁆𑀯𑀸 𑁋 ‘‘𑀉𑀧𑁂𑀢𑀺𑀧𑀺 𑀅𑀧𑁂𑀢𑀺𑀧𑀻’’𑀢𑀺 𑀆𑀳. 𑀫𑀺𑀕𑀲𑀺𑀗𑁆𑀕𑀢𑀸𑀧𑀲𑁄 𑀓𑀺𑀭 𑀅𑀢𑁆𑀢𑀦𑁆𑀢𑀧𑁄 𑀖𑁄𑀭𑀢𑀧𑁄 𑀧𑀭𑀫𑀥𑀺𑀢𑀺𑀦𑁆𑀤𑁆𑀭𑀺𑀬𑁄 𑀅𑀳𑁄𑀲𑀺. 𑀢𑀲𑁆𑀲 𑀲𑀻𑀮𑀢𑁂𑀚𑁂𑀦 𑀲𑀓𑁆𑀓𑀯𑀺𑀫𑀸𑀦𑀁 𑀉𑀡𑁆𑀳𑀁 𑀅𑀳𑁄𑀲𑀺. 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸 ‘‘𑀲𑀓𑁆𑀓𑀝𑁆𑀞𑀸𑀦𑀁 𑀦𑀼 𑀔𑁄 𑀢𑀸𑀧𑀲𑁄 𑀧𑀢𑁆𑀣𑁂𑀢𑀻’’𑀢𑀺 𑀅𑀮𑀫𑁆𑀩𑀼𑀲𑀁 𑀦𑀸𑀫 𑀤𑁂𑀯𑀓𑀜𑁆𑀜𑀁 𑁋 ‘𑀢𑀸𑀧𑀲𑀲𑁆𑀲 𑀢𑀧𑀁 𑀪𑀺𑀦𑁆𑀤𑀺𑀢𑁆𑀯𑀸 𑀏𑀳𑀻’𑀢𑀺 𑀧𑁂𑀲𑁂𑀲𑀺. 𑀲𑀸 𑀢𑀢𑁆𑀣 𑀕𑀢𑀸. 𑀢𑀸𑀧𑀲𑁄 𑀧𑀞𑀫𑀤𑀺𑀯𑀲𑁂 𑀢𑀁 𑀤𑀺𑀲𑁆𑀯𑀸𑀯 𑀧𑀮𑀸𑀬𑀺𑀢𑁆𑀯𑀸 𑀧𑀡𑁆𑀡𑀲𑀸𑀮𑀁 𑀧𑀸𑀯𑀺𑀲𑀺. 𑀤𑀼𑀢𑀺𑀬𑀤𑀺𑀯𑀲𑁂 𑀓𑀸𑀫𑀘𑁆𑀙𑀦𑁆𑀤𑀦𑀻𑀯𑀭𑀡𑁂𑀦 𑀪𑀕𑁆𑀕𑁄 𑀢𑀁 𑀳𑀢𑁆𑀣𑁂 𑀅𑀕𑁆𑀕𑀳𑁂𑀲𑀺, 𑀲𑁄 𑀢𑁂𑀦 𑀤𑀺𑀩𑁆𑀩𑀨𑀲𑁆𑀲𑁂𑀦 𑀨𑀼𑀝𑁆𑀞𑁄 𑀯𑀺𑀲𑀜𑁆𑀜𑀻 𑀳𑀼𑀢𑁆𑀯𑀸 𑀢𑀺𑀡𑁆𑀡𑀁 𑀲𑀁𑀯𑀘𑁆𑀙𑀭𑀸𑀦𑀁 𑀅𑀘𑁆𑀘𑀬𑁂𑀦 𑀲𑀜𑁆𑀜𑀁 𑀧𑀝𑀺𑀮𑀪𑀺. 𑀢𑀁 𑀲𑁄 𑀤𑀺𑀝𑁆𑀞𑀺𑀕𑀢𑀺𑀓𑁄 𑁋 ‘‘𑀢𑀺𑀡𑁆𑀡𑀁 𑀲𑀁𑀯𑀘𑁆𑀙𑀭𑀸𑀦𑀁 𑀅𑀘𑁆𑀘𑀬𑁂𑀦 𑀦𑀺𑀭𑁄𑀥𑀸 𑀯𑀼𑀝𑁆𑀞𑀺𑀢𑁄’’𑀢𑀺 𑀫𑀜𑁆𑀜𑀫𑀸𑀦𑁄 𑀏𑀯𑀫𑀸𑀳.

𑀢𑀢𑀺𑀬𑁄 𑀦𑀁 𑀦𑀺𑀲𑁂𑀥𑁂𑀢𑁆𑀯𑀸 𑀆𑀣𑀩𑁆𑀩𑀡𑀧𑀬𑁄𑀕𑀁 𑀲𑀦𑁆𑀥𑀸𑀬 ‘‘𑀉𑀧𑀓𑀟𑁆𑀠𑀦𑁆𑀢𑀺𑀧𑀺 𑀅𑀧𑀓𑀟𑁆𑀠𑀦𑁆𑀢𑀺𑀧𑀻’’𑀢𑀺 𑀆𑀳. 𑀆𑀣𑀩𑁆𑀩𑀡𑀺𑀓𑀸 𑀓𑀺𑀭 𑀆𑀣𑀩𑁆𑀩𑀡𑀁 𑀧𑀬𑁄𑀚𑁂𑀢𑁆𑀯𑀸 𑀲𑀢𑁆𑀢𑀁 𑀲𑀻𑀲𑀘𑁆𑀙𑀺𑀦𑁆𑀦𑀁 𑀯𑀺𑀬 𑀳𑀢𑁆𑀣𑀘𑁆𑀙𑀺𑀦𑁆𑀦𑀁 𑀯𑀺𑀬 𑀫𑀢𑀁 𑀯𑀺𑀬 𑀘 𑀓𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑀺. 𑀢𑀲𑁆𑀲 𑀧𑀼𑀦 𑀧𑀸𑀓𑀢𑀺𑀓𑀪𑀸𑀯𑀁 𑀤𑀺𑀲𑁆𑀯𑀸 𑀲𑁄 𑀤𑀺𑀝𑁆𑀞𑀺𑀕𑀢𑀺𑀓𑁄 𑁋 ‘‘𑀦𑀺𑀭𑁄𑀥𑀸 𑀯𑀼𑀝𑁆𑀞𑀺𑀢𑁄 𑀅𑀬’’𑀦𑁆𑀢𑀺 𑀫𑀜𑁆𑀜𑀫𑀸𑀦𑁄 𑀏𑀯𑀫𑀸𑀳.

𑀘𑀢𑀼𑀢𑁆𑀣𑁄 𑀦𑀁 𑀦𑀺𑀲𑁂𑀥𑁂𑀢𑁆𑀯𑀸 𑀬𑀓𑁆𑀔𑀤𑀸𑀲𑀻𑀦𑀁 𑀫𑀤𑀦𑀺𑀤𑁆𑀤𑀁 𑀲𑀦𑁆𑀥𑀸𑀬 ‘‘𑀲𑀦𑁆𑀢𑀺 𑀳𑀺 𑀪𑁄 𑀤𑁂𑀯𑀢𑀸’’𑀢𑀺𑀆𑀤𑀺𑀫𑀸𑀳. 𑀬𑀓𑁆𑀔𑀤𑀸𑀲𑀺𑀬𑁄 𑀓𑀺𑀭 𑀲𑀩𑁆𑀩𑀭𑀢𑁆𑀢𑀺𑀁 𑀤𑁂𑀯𑀢𑀽𑀧𑀳𑀸𑀭𑀁 𑀓𑀼𑀭𑀼𑀫𑀸𑀦𑀸 𑀦𑀘𑁆𑀘𑀺𑀢𑁆𑀯𑀸 𑀕𑀸𑀬𑀺𑀢𑁆𑀯𑀸 𑀅𑀭𑀼𑀡𑁄𑀤𑀬𑁂 𑀏𑀓𑀁 𑀲𑀼𑀭𑀸𑀧𑀸𑀢𑀺𑀁 𑀧𑀺𑀯𑀺𑀢𑁆𑀯𑀸 𑀧𑀭𑀺𑀯𑀢𑁆𑀢𑀺𑀢𑁆𑀯𑀸 𑀲𑀼𑀧𑀺𑀢𑁆𑀯𑀸 𑀤𑀺𑀯𑀸 𑀯𑀼𑀝𑁆𑀞𑀳𑀦𑁆𑀢𑀺. 𑀢𑀁 𑀤𑀺𑀲𑁆𑀯𑀸 𑀲𑁄 𑀤𑀺𑀝𑁆𑀞𑀺𑀕𑀢𑀺𑀓𑁄 𑁋 ‘‘𑀲𑀼𑀢𑁆𑀢𑀓𑀸𑀮𑁂 𑀦𑀺𑀭𑁄𑀥𑀁 𑀲𑀫𑀸𑀧𑀦𑁆𑀦𑀸, 𑀧𑀩𑀼𑀤𑁆𑀥𑀓𑀸𑀮𑁂 𑀦𑀺𑀭𑁄𑀥𑀸 𑀯𑀼𑀝𑁆𑀞𑀺𑀢𑀸’’𑀢𑀺 𑀫𑀜𑁆𑀜𑀫𑀸𑀦𑁄 𑀏𑀯𑀫𑀸𑀳.

𑀅𑀬𑀁 𑀧𑀦 𑀧𑁄𑀝𑁆𑀞𑀧𑀸𑀤𑁄 𑀧𑀭𑀺𑀩𑁆𑀩𑀸𑀚𑀓𑁄 𑀧𑀡𑁆𑀟𑀺𑀢𑀚𑀸𑀢𑀺𑀓𑁄. 𑀢𑁂𑀦𑀲𑁆𑀲 𑀢𑀁 𑀓𑀣𑀁 𑀲𑀼𑀢𑁆𑀯𑀸 𑀯𑀺𑀧𑁆𑀧𑀝𑀺𑀲𑀸𑀭𑁄 𑀉𑀧𑁆𑀧𑀚𑁆𑀚𑀺. ‘‘𑀇𑀫𑁂𑀲𑀁 𑀓𑀣𑀸 𑀏𑀴𑀫𑀽𑀕𑀓𑀣𑀸 𑀯𑀺𑀬 𑀘𑀢𑁆𑀢𑀸𑀭𑁄 𑀳𑀺 𑀦𑀺𑀭𑁄𑀥𑁂 𑀏𑀢𑁂 𑀧𑀜𑁆𑀜𑀧𑁂𑀦𑁆𑀢𑀺, 𑀇𑀫𑀺𑀦𑀸 𑀘 𑀦𑀺𑀭𑁄𑀥𑁂𑀦 𑀦𑀸𑀫 𑀏𑀓𑁂𑀦 𑀪𑀯𑀺𑀢𑀩𑁆𑀩𑀁, 𑀦 𑀩𑀳𑀼𑀦𑀸. 𑀢𑁂𑀦𑀸𑀧𑀺 𑀏𑀓𑁂𑀦 𑀅𑀜𑁆𑀜𑁂𑀦𑁂𑀯 𑀪𑀯𑀺𑀢𑀩𑁆𑀩𑀁, 𑀲𑁄 𑀧𑀦 𑀅𑀜𑁆𑀜𑁂𑀦 𑀜𑀸𑀢𑀼𑀁 𑀦 𑀲𑀓𑁆𑀓𑀸 𑀅𑀜𑁆𑀜𑀢𑁆𑀭 𑀲𑀩𑁆𑀩𑀜𑁆𑀜𑀼𑀦𑀸. 𑀲𑀘𑁂 𑀪𑀕𑀯𑀸 𑀇𑀥 𑀅𑀪𑀯𑀺𑀲𑁆𑀲 ‘𑀅𑀬𑀁 𑀦𑀺𑀭𑁄𑀥𑁄 𑀅𑀬𑀁 𑀦 𑀦𑀺𑀭𑁄𑀥𑁄’𑀢𑀺 𑀤𑀻𑀧𑀲𑀳𑀲𑁆𑀲𑀁 𑀯𑀺𑀬 𑀉𑀚𑁆𑀚𑀸𑀮𑁂𑀢𑁆𑀯𑀸 𑀅𑀚𑁆𑀚𑀫𑁂𑀯 𑀧𑀸𑀓𑀝𑀁 𑀅𑀓𑀭𑀺𑀲𑁆𑀲𑀸’’𑀢𑀺 𑀤𑀲𑀩𑀮𑀜𑁆𑀜𑁂𑀯 𑀅𑀦𑀼𑀲𑁆𑀲𑀭𑀺. 𑀢𑀲𑁆𑀫𑀸 ‘‘𑀢𑀲𑁆𑀲 𑀫𑀬𑁆𑀳𑀁 𑀪𑀦𑁆𑀢𑁂’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀳𑁄 𑀦𑀽𑀦𑀸𑀢𑀺 𑀅𑀦𑀼𑀲𑁆𑀲𑀭𑀡𑀢𑁆𑀣𑁂 𑀦𑀺𑀧𑀸𑀢𑀤𑁆𑀯𑀬𑀁, 𑀢𑁂𑀦 𑀢𑀲𑁆𑀲 𑀪𑀕𑀯𑀦𑁆𑀢𑀁 𑀅𑀦𑀼𑀲𑁆𑀲𑀭𑀦𑁆𑀢𑀲𑁆𑀲 𑀏𑀢𑀤𑀳𑁄𑀲𑀺 ‘‘𑀅𑀳𑁄 𑀦𑀽𑀦 𑀪𑀕𑀯𑀸 𑀅𑀳𑁄 𑀦𑀽𑀦 𑀲𑀼𑀕𑀢𑁄’’𑀢𑀺. 𑀬𑁄 𑀇𑀫𑁂𑀲𑀦𑁆𑀢𑀺 𑀬𑁄 𑀏𑀢𑁂𑀲𑀁 𑀦𑀺𑀭𑁄𑀥𑀥𑀫𑁆𑀫𑀸𑀦𑀁 𑀲𑀼𑀓𑀼𑀲𑀮𑁄 𑀦𑀺𑀧𑀼𑀡𑁄 𑀙𑁂𑀓𑁄, 𑀲𑁄 𑀪𑀕𑀯𑀸 𑀅𑀳𑁄 𑀦𑀽𑀦 𑀓𑀣𑁂𑀬𑁆𑀬, 𑀲𑀼𑀕𑀢𑁄 𑀅𑀳𑁄 𑀦𑀽𑀦 𑀓𑀣𑁂𑀬𑁆𑀬𑀸𑀢𑀺 𑀅𑀬𑀫𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄. 𑀧𑀓𑀢𑀜𑁆𑀜𑀽𑀢𑀺 𑀘𑀺𑀡𑁆𑀡𑀯𑀲𑀺𑀢𑀸𑀬 𑀧𑀓𑀢𑀺𑀁 𑀲𑀪𑀸𑀯𑀁 𑀚𑀸𑀦𑀸𑀢𑀻𑀢𑀺 𑀧𑀓𑀢𑀜𑁆𑀜𑀽. 𑀓𑀣𑀁 𑀦𑀼 𑀔𑁄𑀢𑀺 𑀇𑀤𑀁 𑀧𑀭𑀺𑀩𑁆𑀩𑀸𑀚𑀓𑁄 ‘‘𑀫𑀬𑀁 𑀪𑀕𑀯𑀸 𑀦 𑀚𑀸𑀦𑀸𑀫, 𑀢𑀼𑀫𑁆𑀳𑁂 𑀚𑀸𑀦𑀸𑀣, 𑀓𑀣𑁂𑀣 𑀦𑁄’’𑀢𑀺 𑀆𑀬𑀸𑀘𑀦𑁆𑀢𑁄 𑀯𑀤𑀢𑀺. 𑀅𑀣 𑀪𑀕𑀯𑀸 𑀓𑀣𑁂𑀦𑁆𑀢𑁄 ‘‘𑀢𑀢𑁆𑀭 𑀧𑁄𑀝𑁆𑀞𑀧𑀸𑀤𑀸’’𑀢𑀺𑀆𑀤𑀺𑀫𑀸𑀳.

𑀅𑀳𑁂𑀢𑀼𑀓𑀲𑀜𑁆𑀜𑀼𑀧𑁆𑀧𑀸𑀤𑀦𑀺𑀭𑁄𑀥𑀓𑀣𑀸𑀯𑀡𑁆𑀡𑀦𑀸

𑁪𑁧𑁨. 𑀢𑀢𑁆𑀣 𑀢𑀢𑁆𑀭𑀸𑀢𑀺 𑀢𑁂𑀲𑀼 𑀲𑀫𑀡𑀩𑁆𑀭𑀸𑀳𑁆𑀫𑀡𑁂𑀲𑀼. 𑀆𑀤𑀺𑀢𑁄𑀯 𑀢𑁂𑀲𑀁 𑀅𑀧𑀭𑀤𑁆𑀥𑀦𑁆𑀢𑀺 𑀢𑁂𑀲𑀁 𑀆𑀤𑀺𑀫𑁆𑀳𑀺𑀬𑁂𑀯 𑀯𑀺𑀭𑀤𑁆𑀥𑀁, 𑀖𑀭𑀫𑀚𑁆𑀛𑁂𑀬𑁂𑀯 𑀧𑀓𑁆𑀔𑀮𑀺𑀢𑀸𑀢𑀺 𑀤𑀻𑀧𑁂𑀢𑀺. 𑀲𑀳𑁂𑀢𑀽 𑀲𑀧𑁆𑀧𑀘𑁆𑀘𑀬𑀸𑀢𑀺 𑀏𑀢𑁆𑀣 𑀳𑁂𑀢𑀼𑀧𑀺 𑀧𑀘𑁆𑀘𑀬𑁄𑀧𑀺 𑀓𑀸𑀭𑀡𑀲𑁆𑀲𑁂𑀯 𑀦𑀸𑀫𑀁, 𑀲𑀓𑀸𑀭𑀡𑀸𑀢𑀺 𑀅𑀢𑁆𑀣𑁄. 𑀢𑀁 𑀧𑀦 𑀓𑀸𑀭𑀡𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀺𑀓𑁆𑀔𑀸 𑀏𑀓𑀸’’𑀢𑀺 𑀆𑀳. 𑀢𑀢𑁆𑀣 𑀲𑀺𑀓𑁆𑀔𑀸 𑀏𑀓𑀸 𑀲𑀜𑁆𑀜𑀸 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀲𑀺𑀓𑁆𑀔𑀸𑀬 𑀏𑀓𑀘𑁆𑀘𑀸 𑀲𑀜𑁆𑀜𑀸 𑀚𑀸𑀬𑀦𑁆𑀢𑀻𑀢𑀺 𑀅𑀢𑁆𑀣𑁄.

𑁪𑁧𑁩. 𑀓𑀸 𑀘 𑀲𑀺𑀓𑁆𑀔𑀸𑀢𑀺 𑀪𑀕𑀯𑀸 𑀅𑀯𑁄𑀘𑀸𑀢𑀺 𑀓𑀢𑀫𑀸 𑀘 𑀲𑀸 𑀲𑀺𑀓𑁆𑀔𑀸𑀢𑀺 𑀪𑀕𑀯𑀸 𑀯𑀺𑀢𑁆𑀣𑀸𑀭𑁂𑀢𑀼𑀓𑀫𑁆𑀬𑀢𑀸𑀧𑀼𑀘𑁆𑀙𑀸𑀯𑀲𑁂𑀦 𑀅𑀯𑁄𑀘. 𑀅𑀣 𑀬𑀲𑁆𑀫𑀸 𑀅𑀥𑀺𑀲𑀻𑀮𑀲𑀺𑀓𑁆𑀔𑀸 𑀅𑀥𑀺𑀘𑀺𑀢𑁆𑀢𑀲𑀺𑀓𑁆𑀔𑀸 𑀅𑀥𑀺𑀧𑀜𑁆𑀜𑀸𑀲𑀺𑀓𑁆𑀔𑀸𑀢𑀺 𑀢𑀺𑀲𑁆𑀲𑁄 𑀲𑀺𑀓𑁆𑀔𑀸 𑀳𑁄𑀦𑁆𑀢𑀺. 𑀢𑀲𑁆𑀫𑀸 𑀢𑀸 𑀤𑀲𑁆𑀲𑁂𑀦𑁆𑀢𑁄 𑀪𑀕𑀯𑀸 𑀲𑀜𑁆𑀜𑀸𑀬 𑀲𑀳𑁂𑀢𑀼𑀓𑀁 𑀉𑀧𑁆𑀧𑀸𑀤𑀦𑀺𑀭𑁄𑀥𑀁 𑀤𑀻𑀧𑁂𑀢𑀼𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑀢𑁄 𑀧𑀪𑀼𑀢𑀺 𑀢𑀦𑁆𑀢𑀺𑀥𑀫𑁆𑀫𑀁 𑀞𑀧𑁂𑀦𑁆𑀢𑁄 ‘‘𑀇𑀥 𑀧𑁄𑀝𑁆𑀞𑀧𑀸𑀤, 𑀢𑀣𑀸𑀕𑀢𑁄 𑀮𑁄𑀓𑁂’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀥𑀺𑀲𑀻𑀮𑀲𑀺𑀓𑁆𑀔𑀸 𑀅𑀥𑀺𑀘𑀺𑀢𑁆𑀢𑀲𑀺𑀓𑁆𑀔𑀸𑀢𑀺 𑀤𑁆𑀯𑁂 𑀏𑀯 𑀲𑀺𑀓𑁆𑀔𑀸 𑀲𑀭𑀽𑀧𑁂𑀦 𑀆𑀕𑀢𑀸, 𑀢𑀢𑀺𑀬𑀸 𑀧𑀦 ‘‘𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸𑀢𑀺 𑀔𑁄 𑀧𑁄𑀝𑁆𑀞𑀧𑀸𑀤 𑀫𑀬𑀸 𑀏𑀓𑀁𑀲𑀺𑀓𑁄 𑀥𑀫𑁆𑀫𑁄 𑀤𑁂𑀲𑀺𑀢𑁄’’𑀢𑀺 𑀏𑀢𑁆𑀣 𑀲𑀫𑁆𑀫𑀸𑀤𑀺𑀝𑁆𑀞𑀺𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀯𑀲𑁂𑀦 𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸 𑀆𑀕𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀓𑀸𑀫𑀲𑀜𑁆𑀜𑀸𑀢𑀺 𑀧𑀜𑁆𑀘𑀓𑀸𑀫𑀕𑀼𑀡𑀺𑀓𑀭𑀸𑀕𑁄𑀧𑀺 𑀅𑀲𑀫𑀼𑀧𑁆𑀧𑀦𑁆𑀦𑀓𑀸𑀫𑀘𑀸𑀭𑁄𑀧𑀺. 𑀢𑀢𑁆𑀣 𑀧𑀜𑁆𑀘𑀓𑀸𑀫𑀕𑀼𑀡𑀺𑀓𑀭𑀸𑀕𑁄 𑀅𑀦𑀸𑀕𑀸𑀫𑀺𑀫𑀕𑁆𑀕𑁂𑀦 𑀲𑀫𑀼𑀕𑁆𑀖𑀸𑀢𑀁 𑀕𑀘𑁆𑀙𑀢𑀺, 𑀅𑀲𑀫𑀼𑀧𑁆𑀧𑀦𑁆𑀦𑀓𑀸𑀫𑀘𑀸𑀭𑁄 𑀧𑀦 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀯𑀝𑁆𑀝𑀢𑀺. 𑀢𑀲𑁆𑀫𑀸 𑀢𑀲𑁆𑀲 𑀬𑀸 𑀧𑀼𑀭𑀺𑀫𑀸 𑀓𑀸𑀫𑀲𑀜𑁆𑀜𑀸𑀢𑀺 𑀢𑀲𑁆𑀲 𑀧𑀞𑀫𑀚𑁆𑀛𑀸𑀦𑀲𑀫𑀗𑁆𑀕𑀺𑀦𑁄 𑀬𑀸 𑀧𑀼𑀩𑁆𑀩𑁂 𑀉𑀧𑁆𑀧𑀦𑁆𑀦𑀧𑀼𑀩𑁆𑀩𑀸𑀬 𑀓𑀸𑀫𑀲𑀜𑁆𑀜𑀸𑀬 𑀲𑀤𑀺𑀲𑀢𑁆𑀢𑀸 𑀧𑀼𑀭𑀺𑀫𑀸 𑀓𑀸𑀫𑀲𑀜𑁆𑀜𑀸𑀢𑀺 𑀯𑀼𑀘𑁆𑀘𑁂𑀬𑁆𑀬, 𑀲𑀸 𑀦𑀺𑀭𑀼𑀚𑁆𑀛𑀢𑀺, 𑀅𑀦𑀼𑀧𑁆𑀧𑀦𑁆𑀦𑀸𑀯 𑀦𑀼𑀧𑁆𑀧𑀚𑁆𑀚𑀢𑀻𑀢𑀺 𑀅𑀢𑁆𑀣𑁄.

𑀯𑀺𑀯𑁂𑀓𑀚𑀧𑀻𑀢𑀺𑀲𑀼𑀔𑀲𑀼𑀔𑀼𑀫𑀲𑀘𑁆𑀘𑀲𑀜𑁆𑀜𑀻𑀬𑁂𑀯 𑀢𑀲𑁆𑀫𑀺𑀁 𑀲𑀫𑀬𑁂 𑀳𑁄𑀢𑀻𑀢𑀺 𑀢𑀲𑁆𑀫𑀺𑀁 𑀧𑀞𑀫𑀚𑁆𑀛𑀸𑀦𑀲𑀫𑀬𑁂 𑀯𑀺𑀯𑁂𑀓𑀚𑀧𑀻𑀢𑀺𑀲𑀼𑀔𑀲𑀗𑁆𑀔𑀸𑀢𑀸 𑀲𑀼𑀔𑀼𑀫𑀲𑀜𑁆𑀜𑀸 𑀲𑀘𑁆𑀘𑀸 𑀳𑁄𑀢𑀺, 𑀪𑀽𑀢𑀸 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀓𑀸𑀫𑀘𑁆𑀙𑀦𑁆𑀤𑀸𑀤𑀺𑀑𑀴𑀸𑀭𑀺𑀓𑀗𑁆𑀕𑀧𑁆𑀧𑀳𑀸𑀦𑀯𑀲𑁂𑀦 𑀲𑀼𑀔𑀼𑀫𑀸 𑀘 𑀲𑀸 𑀪𑀽𑀢𑀢𑀸𑀬 𑀲𑀘𑁆𑀘𑀸 𑀘 𑀲𑀜𑁆𑀜𑀸𑀢𑀺 𑀲𑀼𑀔𑀼𑀫𑀲𑀘𑁆𑀘𑀲𑀜𑁆𑀜𑀸, 𑀯𑀺𑀯𑁂𑀓𑀚𑁂𑀳𑀺 𑀧𑀻𑀢𑀺𑀲𑀼𑀔𑁂𑀳𑀺 𑀲𑀫𑁆𑀧𑀬𑀼𑀢𑁆𑀢𑀸 𑀲𑀼𑀔𑀼𑀫𑀲𑀘𑁆𑀘𑀲𑀜𑁆𑀜𑀸𑀢𑀺 𑀯𑀺𑀯𑁂𑀓𑀚𑀧𑀻𑀢𑀺𑀲𑀼𑀔𑀲𑀼𑀔𑀼𑀫𑀲𑀘𑁆𑀘𑀲𑀜𑁆𑀜𑀸 𑀲𑀸 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀯𑀺𑀯𑁂𑀓𑀚𑀧𑀻𑀢𑀺𑀲𑀼𑀔𑀲𑀼𑀔𑀼𑀫𑀲𑀘𑁆𑀘𑀲𑀜𑁆𑀜𑀻𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣. 𑀏𑀯𑀫𑁆𑀧𑀺 𑀲𑀺𑀓𑁆𑀔𑀸𑀢𑀺 𑀏𑀢𑁆𑀣 𑀬𑀲𑁆𑀫𑀸 𑀧𑀞𑀫𑀚𑁆𑀛𑀸𑀦𑀁 𑀲𑀫𑀸𑀧𑀚𑁆𑀚𑀦𑁆𑀢𑁄 𑀅𑀥𑀺𑀝𑁆𑀞𑀳𑀦𑁆𑀢𑁄, 𑀯𑀼𑀝𑁆𑀞𑀳𑀦𑁆𑀢𑁄 𑀘 𑀲𑀺𑀓𑁆𑀔𑀢𑀺, 𑀢𑀲𑁆𑀫𑀸 𑀢𑀁 𑀏𑀯𑀁 𑀲𑀺𑀓𑁆𑀔𑀺𑀢𑀩𑁆𑀩𑀢𑁄 𑀲𑀺𑀓𑁆𑀔𑀸𑀢𑀺 𑀯𑀼𑀘𑁆𑀘𑀢𑀺. 𑀢𑁂𑀦𑀧𑀺 𑀲𑀺𑀓𑁆𑀔𑀸𑀲𑀗𑁆𑀔𑀸𑀢𑁂𑀦 𑀧𑀞𑀫𑀚𑁆𑀛𑀸𑀦𑁂𑀦 𑀏𑀯𑀁 𑀏𑀓𑀸 𑀯𑀺𑀯𑁂𑀓𑀚𑀧𑀻𑀢𑀺𑀲𑀼𑀔𑀲𑀼𑀔𑀼𑀫𑀲𑀘𑁆𑀘𑀲𑀜𑁆𑀜𑀸 𑀉𑀧𑁆𑀧𑀚𑁆𑀚𑀢𑀺. 𑀏𑀯𑀁 𑀏𑀓𑀸 𑀓𑀸𑀫𑀲𑀜𑁆𑀜𑀸 𑀦𑀺𑀭𑀼𑀚𑁆𑀛𑀢𑀻𑀢𑀺 𑀅𑀢𑁆𑀣𑁄. 𑀅𑀬𑀁 𑀲𑀺𑀓𑁆𑀔𑀸𑀢𑀺 𑀪𑀕𑀯𑀸 𑀅𑀯𑁄𑀘𑀸𑀢𑀺 𑀅𑀬𑀁 𑀧𑀞𑀫𑀚𑁆𑀛𑀸𑀦𑀲𑀗𑁆𑀔𑀸𑀢𑀸 𑀏𑀓𑀸 𑀲𑀺𑀓𑁆𑀔𑀸𑀢𑀺, 𑀪𑀕𑀯𑀸 𑀆𑀳. 𑀏𑀢𑁂𑀦𑀼𑀧𑀸𑀬𑁂𑀦 𑀲𑀩𑁆𑀩𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑀬𑀲𑁆𑀫𑀸 𑀧𑀦 𑀅𑀝𑁆𑀞𑀫𑀲𑀫𑀸𑀧𑀢𑁆𑀢𑀺𑀬𑀸 𑀅𑀗𑁆𑀕𑀢𑁄 𑀲𑀫𑁆𑀫𑀲𑀦𑀁 𑀩𑀼𑀤𑁆𑀥𑀸𑀦𑀁𑀬𑁂𑀯 𑀳𑁄𑀢𑀺, 𑀲𑀸𑀯𑀓𑁂𑀲𑀼 𑀲𑀸𑀭𑀺𑀧𑀼𑀢𑁆𑀢𑀲𑀤𑀺𑀲𑀸𑀦𑀫𑁆𑀧𑀺 𑀦𑀢𑁆𑀣𑀺, 𑀓𑀮𑀸𑀧𑀢𑁄 𑀲𑀫𑁆𑀫𑀲𑀦𑀁𑀬𑁂𑀯 𑀧𑀦 𑀲𑀸𑀯𑀓𑀸𑀦𑀁 𑀳𑁄𑀢𑀺, 𑀇𑀤𑀜𑁆𑀘 ‘‘𑀲𑀜𑁆𑀜𑀸 𑀲𑀜𑁆𑀜𑀸’’𑀢𑀺, 𑀏𑀯𑀁 𑀅𑀗𑁆𑀕𑀢𑁄 𑀲𑀫𑁆𑀫𑀲𑀦𑀁 𑀉𑀤𑁆𑀥𑀝𑀁. 𑀢𑀲𑁆𑀫𑀸 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀧𑀭𑀫𑀁𑀬𑁂𑀯 𑀲𑀜𑁆𑀜𑀁 𑀤𑀲𑁆𑀲𑁂𑀢𑁆𑀯𑀸 𑀧𑀼𑀦 𑀢𑀤𑁂𑀯 𑀲𑀜𑁆𑀜𑀕𑁆𑀕𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀬𑀢𑁄 𑀔𑁄 𑀧𑁄𑀝𑁆𑀞𑀧𑀸𑀤…𑀧𑁂… 𑀲𑀜𑁆𑀜𑀕𑁆𑀕𑀁 𑀨𑀼𑀲𑀢𑀻’’𑀢𑀺 𑀆𑀳.

𑁪𑁧𑁪. 𑀢𑀢𑁆𑀣 𑀬𑀢𑁄 𑀔𑁄 𑀧𑁄𑀝𑁆𑀞𑀧𑀸𑀤 𑀪𑀺𑀓𑁆𑀔𑀽𑀢𑀺 𑀬𑁄 𑀦𑀸𑀫 𑀧𑁄𑀝𑁆𑀞𑀧𑀸𑀤 𑀪𑀺𑀓𑁆𑀔𑀼. 𑀇𑀥 𑀲𑀓𑀲𑀜𑁆𑀜𑀻 𑀳𑁄𑀢𑀻𑀢𑀺 𑀇𑀥 𑀲𑀸𑀲𑀦𑁂 𑀲𑀓𑀲𑀜𑁆𑀜𑀻 𑀳𑁄𑀢𑀺, 𑀅𑀬𑀫𑁂𑀯 𑀯𑀸 𑀧𑀸𑀞𑁄, 𑀅𑀢𑁆𑀢𑀦𑁄 𑀧𑀞𑀫𑀚𑁆𑀛𑀸𑀦𑀲𑀜𑁆𑀜𑀸𑀬 𑀲𑀜𑁆𑀜𑀯𑀸 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀲𑁄 𑀢𑀢𑁄 𑀅𑀫𑀼𑀢𑁆𑀭 𑀢𑀢𑁄 𑀅𑀫𑀼𑀢𑁆𑀭𑀸𑀢𑀺 𑀲𑁄 𑀪𑀺𑀓𑁆𑀔𑀼 𑀢𑀢𑁄 𑀧𑀞𑀫𑀚𑁆𑀛𑀸𑀦𑀢𑁄 𑀅𑀫𑀼𑀢𑁆𑀭 𑀤𑀼𑀢𑀺𑀬𑀚𑁆𑀛𑀸𑀦𑁂, 𑀢𑀢𑁄𑀧𑀺 𑀅𑀫𑀼𑀢𑁆𑀭 𑀢𑀢𑀺𑀬𑀚𑁆𑀛𑀸𑀦𑁂𑀢𑀺 𑀏𑀯𑀁 𑀢𑀸𑀬 𑀢𑀸𑀬 𑀛𑀸𑀦𑀲𑀜𑁆𑀜𑀸𑀬 𑀲𑀓𑀲𑀜𑁆𑀜𑀻 𑀲𑀓𑀲𑀜𑁆𑀜𑀻 𑀳𑀼𑀢𑁆𑀯𑀸 𑀅𑀦𑀼𑀧𑀼𑀩𑁆𑀩𑁂𑀦 𑀲𑀜𑁆𑀜𑀕𑁆𑀕𑀁 𑀨𑀼𑀲𑀢𑀺. 𑀲𑀜𑁆𑀜𑀕𑁆𑀕𑀦𑁆𑀢𑀺 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 𑀯𑀼𑀘𑁆𑀘𑀢𑀺. 𑀓𑀲𑁆𑀫𑀸? 𑀮𑁄𑀓𑀺𑀬𑀸𑀦𑀁 𑀓𑀺𑀘𑁆𑀘𑀓𑀸𑀭𑀓𑀲𑀫𑀸𑀧𑀢𑁆𑀢𑀻𑀦𑀁 𑀅𑀕𑁆𑀕𑀢𑁆𑀢𑀸. 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀬𑀜𑁆𑀳𑀺 𑀞𑀢𑁆𑀯𑀸 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀫𑁆𑀧𑀺 𑀦𑀺𑀭𑁄𑀥𑀫𑁆𑀧𑀺 𑀲𑀫𑀸𑀧𑀚𑁆𑀚𑀦𑁆𑀢𑀺. 𑀇𑀢𑀺 𑀲𑀸 𑀮𑁄𑀓𑀺𑀬𑀸𑀦𑀁 𑀓𑀺𑀘𑁆𑀘𑀓𑀸𑀭𑀓𑀲𑀫𑀸𑀧𑀢𑁆𑀢𑀻𑀦𑀁 𑀅𑀕𑁆𑀕𑀢𑁆𑀢𑀸 𑀲𑀜𑁆𑀜𑀕𑁆𑀕𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀢𑀁 𑀨𑀼𑀲𑀢𑀺 𑀧𑀸𑀧𑀼𑀡𑀸𑀢𑀻𑀢𑀺 𑀅𑀢𑁆𑀣𑁄.

𑀇𑀤𑀸𑀦𑀺 𑀅𑀪𑀺𑀲𑀜𑁆𑀜𑀸𑀦𑀺𑀭𑁄𑀥𑀁 𑀤𑀲𑁆𑀲𑁂𑀢𑀼𑀁 ‘‘𑀢𑀲𑁆𑀲 𑀲𑀜𑁆𑀜𑀕𑁆𑀕𑁂 𑀞𑀺𑀢𑀲𑁆𑀲𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀘𑁂𑀢𑁂𑀬𑁆𑀬𑀁, 𑀅𑀪𑀺𑀲𑀗𑁆𑀔𑀭𑁂𑀬𑁆𑀬𑀦𑁆𑀢𑀺 𑀧𑀤𑀤𑁆𑀯𑀬𑁂 𑀘 𑀛𑀸𑀦𑀁 𑀲𑀫𑀸𑀧𑀚𑁆𑀚𑀦𑁆𑀢𑁄 𑀘𑁂𑀢𑁂𑀢𑀺 𑀦𑀸𑀫, 𑀧𑀼𑀦𑀧𑁆𑀧𑀼𑀦𑀁 𑀓𑀧𑁆𑀧𑁂𑀢𑀻𑀢𑀺 𑀅𑀢𑁆𑀣𑁄. 𑀉𑀧𑀭𑀺𑀲𑀫𑀸𑀧𑀢𑁆𑀢𑀺𑀅𑀢𑁆𑀣𑀸𑀬 𑀦𑀺𑀓𑀦𑁆𑀢𑀺𑀁 𑀓𑀼𑀭𑀼𑀫𑀸𑀦𑁄 𑀅𑀪𑀺𑀲𑀗𑁆𑀔𑀭𑁄𑀢𑀺 𑀦𑀸𑀫. 𑀇𑀫𑀸 𑀘 𑀫𑁂 𑀲𑀜𑁆𑀜𑀸 𑀦𑀺𑀭𑀼𑀚𑁆𑀛𑁂𑀬𑁆𑀬𑀼𑀦𑁆𑀢𑀺 𑀇𑀫𑀸 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀲𑀜𑁆𑀜𑀸 𑀦𑀺𑀭𑀼𑀚𑁆𑀛𑁂𑀬𑁆𑀬𑀼𑀁. 𑀅𑀜𑁆𑀜𑀸 𑀘 𑀑𑀴𑀸𑀭𑀺𑀓𑀸𑀢𑀺 𑀅𑀜𑁆𑀜𑀸 𑀘 𑀑𑀴𑀸𑀭𑀺𑀓𑀸 𑀪𑀯𑀗𑁆𑀕𑀲𑀜𑁆𑀜𑀸 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁. 𑀲𑁄 𑀦 𑀘𑁂𑀯 𑀘𑁂𑀢𑁂𑀢𑀺 𑀦 𑀅𑀪𑀺𑀲𑀗𑁆𑀔𑀭𑁄𑀢𑀻𑀢𑀺 𑀏𑀢𑁆𑀣 𑀓𑀸𑀫𑀁 𑀘𑁂𑀲 𑀘𑁂𑀢𑁂𑀦𑁆𑀢𑁄𑀯 𑀦 𑀘𑁂𑀢𑁂𑀢𑀺, 𑀅𑀪𑀺𑀲𑀗𑁆𑀔𑀭𑁄𑀦𑁆𑀢𑁄𑀯 𑀦𑀸𑀪𑀺𑀲𑀗𑁆𑀔𑀭𑁄𑀢𑀺. 𑀇𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀢𑁄 𑀯𑀼𑀝𑁆𑀞𑀸𑀬 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 ‘‘𑀏𑀓𑀁 𑀤𑁆𑀯𑁂 𑀘𑀺𑀢𑁆𑀢𑀯𑀸𑀭𑁂 𑀞𑀲𑁆𑀲𑀸𑀫𑀻’’𑀢𑀺 𑀆𑀪𑁄𑀕𑀲𑀫𑀦𑁆𑀦𑀸𑀳𑀸𑀭𑁄 𑀦𑀢𑁆𑀣𑀺. 𑀉𑀧𑀭𑀺𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀢𑁆𑀣𑀸𑀬 𑀏𑀯 𑀧𑀦 𑀆𑀪𑁄𑀕𑀲𑀫𑀦𑁆𑀦𑀸𑀳𑀸𑀭𑁄 𑀅𑀢𑁆𑀣𑀺, 𑀲𑁆𑀯𑀸𑀬𑀫𑀢𑁆𑀣𑁄 𑀧𑀼𑀢𑁆𑀢𑀖𑀭𑀸𑀘𑀺𑀓𑁆𑀔𑀡𑁂𑀦 𑀤𑀻𑀧𑁂𑀢𑀩𑁆𑀩𑁄.

𑀧𑀺𑀢𑀼𑀖𑀭𑀫𑀚𑁆𑀛𑁂𑀦 𑀓𑀺𑀭 𑀕𑀦𑁆𑀢𑁆𑀯𑀸 𑀧𑀘𑁆𑀙𑀸𑀪𑀸𑀕𑁂 𑀧𑀼𑀢𑁆𑀢𑀲𑁆𑀲 𑀖𑀭𑀁 𑀳𑁄𑀢𑀺, 𑀢𑀢𑁄 𑀧𑀡𑀻𑀢𑀁 𑀪𑁄𑀚𑀦𑀁 𑀆𑀤𑀸𑀬 𑀆𑀲𑀦𑀲𑀸𑀮𑀁 𑀆𑀕𑀢𑀁 𑀤𑀳𑀭𑀁 𑀣𑁂𑀭𑁄 𑁋 ‘‘𑀫𑀦𑀸𑀧𑁄 𑀧𑀺𑀡𑁆𑀟𑀧𑀸𑀢𑁄 𑀓𑀼𑀢𑁄 𑀆𑀪𑀢𑁄’’𑀢𑀺 𑀧𑀼𑀘𑁆𑀙𑀺. 𑀲𑁄 ‘‘𑀅𑀲𑀼𑀓𑀲𑁆𑀲 𑀖𑀭𑀢𑁄’’𑀢𑀺 𑀮𑀤𑁆𑀥𑀖𑀭𑀫𑁂𑀯 𑀆𑀘𑀺𑀓𑁆𑀔𑀺. 𑀬𑁂𑀦 𑀧𑀦𑀲𑁆𑀲 𑀧𑀺𑀢𑀼𑀖𑀭𑀫𑀚𑁆𑀛𑁂𑀦 𑀕𑀢𑁄𑀧𑀺 𑀆𑀕𑀢𑁄𑀧𑀺 𑀢𑀢𑁆𑀣 𑀆𑀪𑁄𑀕𑁄𑀧𑀺 𑀦𑀢𑁆𑀣𑀺. 𑀢𑀢𑁆𑀣 𑀆𑀲𑀦𑀲𑀸𑀮𑀸 𑀯𑀺𑀬 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺 𑀤𑀝𑁆𑀞𑀩𑁆𑀩𑀸, 𑀧𑀺𑀢𑀼𑀕𑁂𑀳𑀁 𑀯𑀺𑀬 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺, 𑀧𑀼𑀢𑁆𑀢𑀕𑁂𑀳𑀁 𑀯𑀺𑀬 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺, 𑀆𑀲𑀦𑀲𑀸𑀮𑀸𑀬 𑀞𑀢𑁆𑀯𑀸 𑀧𑀺𑀢𑀼𑀖𑀭𑀁 𑀅𑀫𑀦𑀲𑀺𑀓𑀭𑀺𑀢𑁆𑀯𑀸 𑀧𑀼𑀢𑁆𑀢𑀖𑀭𑀸𑀘𑀺𑀓𑁆𑀔𑀡𑀁 𑀯𑀺𑀬 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀢𑁄 𑀯𑀼𑀝𑁆𑀞𑀸𑀬 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 ‘‘𑀏𑀓𑀁 𑀤𑁆𑀯𑁂 𑀘𑀺𑀢𑁆𑀢𑀯𑀸𑀭𑁂 𑀞𑀲𑁆𑀲𑀸𑀫𑀻’’𑀢𑀺 𑀧𑀺𑀢𑀼𑀖𑀭𑀁 𑀅𑀫𑀦𑀲𑀺𑀓𑀭𑀺𑀢𑁆𑀯𑀸𑀯 𑀉𑀧𑀭𑀺𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀢𑁆𑀣𑀸𑀬 𑀫𑀦𑀲𑀺𑀓𑀸𑀭𑁄, 𑀏𑀯𑀫𑁂𑀲 𑀘𑁂𑀢𑁂𑀦𑁆𑀢𑁄𑀯 𑀦 𑀘𑁂𑀢𑁂𑀢𑀺, 𑀅𑀪𑀺𑀲𑀗𑁆𑀔𑀭𑁄𑀦𑁆𑀢𑁄𑀯 𑀦𑀸𑀪𑀺𑀲𑀗𑁆𑀔𑀭𑁄𑀢𑀺. 𑀢𑀸 𑀘𑁂𑀯 𑀲𑀜𑁆𑀜𑀸𑀢𑀺 𑀢𑀸 𑀛𑀸𑀦𑀲𑀜𑁆𑀜𑀸 𑀦𑀺𑀭𑀼𑀚𑁆𑀛𑀦𑁆𑀢𑀺. 𑀅𑀜𑁆𑀜𑀸 𑀘𑀸𑀢𑀺 𑀅𑀜𑁆𑀜𑀸 𑀘 𑀑𑀴𑀸𑀭𑀺𑀓𑀸 𑀪𑀯𑀗𑁆𑀕𑀲𑀜𑁆𑀜𑀸 𑀦𑀼𑀧𑁆𑀧𑀚𑁆𑀚𑀦𑁆𑀢𑀺. 𑀲𑁄 𑀦𑀺𑀭𑁄𑀥𑀁 𑀨𑀼𑀲𑀢𑀻𑀢𑀺 𑀲𑁄 𑀏𑀯𑀁 𑀧𑀝𑀺𑀧𑀦𑁆𑀦𑁄 𑀪𑀺𑀓𑁆𑀔𑀼 𑀲𑀜𑁆𑀜𑀸𑀯𑁂𑀤𑀬𑀺𑀢𑀦𑀺𑀭𑁄𑀥𑀁 𑀨𑀼𑀲𑀢𑀺 𑀯𑀺𑀦𑁆𑀤𑀢𑀺 𑀧𑀝𑀺𑀮𑀪𑀢𑀺.

𑀅𑀦𑀼𑀧𑀼𑀩𑁆𑀩𑀸𑀪𑀺𑀲𑀜𑁆𑀜𑀸𑀦𑀺𑀭𑁄𑀥𑀲𑀫𑁆𑀧𑀚𑀸𑀦𑀲𑀫𑀸𑀧𑀢𑁆𑀢𑀺𑀦𑁆𑀢𑀺 𑀏𑀢𑁆𑀣 𑀅𑀪𑀻𑀢𑀺 𑀉𑀧𑀲𑀕𑁆𑀕𑀫𑀢𑁆𑀢𑀁, 𑀲𑀫𑁆𑀧𑀚𑀸𑀦𑀧𑀤𑀁 𑀦𑀺𑀭𑁄𑀥𑀧𑀤𑁂𑀦 𑀅𑀦𑁆𑀢𑀭𑀺𑀓𑀁 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀅𑀦𑀼𑀧𑀝𑀺𑀧𑀸𑀝𑀺𑀬𑀸 𑀲𑀫𑁆𑀧𑀚𑀸𑀦𑀲𑀜𑁆𑀜𑀸𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀻𑀢𑀺 𑀅𑀬𑀁 𑀧𑀦𑁂𑀢𑁆𑀣𑀢𑁆𑀣𑁄. 𑀢𑀢𑁆𑀭𑀸𑀧𑀺 𑀲𑀫𑁆𑀧𑀚𑀸𑀦𑀲𑀜𑁆𑀜𑀸𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀻𑀢𑀺 𑀲𑀫𑁆𑀧𑀚𑀸𑀦𑀦𑁆𑀢𑀲𑁆𑀲 𑀅𑀦𑁆𑀢𑁂 𑀲𑀜𑁆𑀜𑀸 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺 𑀲𑀫𑁆𑀧𑀚𑀸𑀦𑀦𑁆𑀢𑀲𑁆𑀲 𑀯𑀸 𑀧𑀡𑁆𑀟𑀺𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑀜𑁆𑀜𑀸𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀻𑀢𑀺 𑀅𑀬𑀁 𑀯𑀺𑀲𑁂𑀲𑀢𑁆𑀣𑁄.

𑀇𑀤𑀸𑀦𑀺 𑀇𑀥 𑀞𑀢𑁆𑀯𑀸 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀓𑀣𑀸 𑀓𑀣𑁂𑀢𑀩𑁆𑀩𑀸. 𑀲𑀸 𑀧𑀦𑁂𑀲𑀸 𑀲𑀩𑁆𑀩𑀸𑀓𑀸𑀭𑁂𑀦 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀧𑀜𑁆𑀜𑀸𑀪𑀸𑀯𑀦𑀸𑀦𑀺𑀲𑀁𑀲𑀸𑀥𑀺𑀓𑀸𑀭𑁂 𑀓𑀣𑀺𑀢𑀸, 𑀢𑀲𑁆𑀫𑀸 𑀢𑀢𑁆𑀣 𑀓𑀣𑀺𑀢𑀢𑁄𑀯 𑀕𑀳𑁂𑀢𑀩𑁆𑀩𑀸.

𑀏𑀯𑀁 𑀪𑀕𑀯𑀸 𑀧𑁄𑀝𑁆𑀞𑀧𑀸𑀤𑀲𑁆𑀲 𑀧𑀭𑀺𑀩𑁆𑀩𑀸𑀚𑀓𑀲𑁆𑀲 𑀦𑀺𑀭𑁄𑀥𑀓𑀣𑀁 𑀓𑀣𑁂𑀢𑁆𑀯𑀸 𑁋 𑀅𑀣 𑀦𑀁 𑀢𑀸𑀤𑀺𑀲𑀸𑀬 𑀓𑀣𑀸𑀬 𑀅𑀜𑁆𑀜𑀢𑁆𑀣 𑀅𑀪𑀸𑀯𑀁 𑀧𑀝𑀺𑀚𑀸𑀦𑀸𑀧𑁂𑀢𑀼𑀁 ‘‘𑀢𑀁 𑀓𑀺𑀁 𑀫𑀜𑁆𑀜𑀲𑀻’’𑀢𑀺𑀆𑀤𑀺𑀫𑀸𑀳. 𑀧𑀭𑀺𑀩𑁆𑀩𑀸𑀚𑀓𑁄𑀧𑀺 ‘‘𑀪𑀕𑀯𑀸 𑀅𑀚𑁆𑀚 𑀢𑀼𑀫𑁆𑀳𑀸𑀓𑀁 𑀓𑀣𑀁 𑀞𑀧𑁂𑀢𑁆𑀯𑀸 𑀦 𑀫𑀬𑀸 𑀏𑀯𑀭𑀽𑀧𑀸 𑀓𑀣𑀸 𑀲𑀼𑀢𑀧𑀼𑀩𑁆𑀩𑀸’’𑀢𑀺 𑀧𑀝𑀺𑀚𑀸𑀦𑀦𑁆𑀢𑁄, ‘‘𑀦𑁄 𑀳𑁂𑀢𑀁 𑀪𑀦𑁆𑀢𑁂’’𑀢𑀺 𑀯𑀢𑁆𑀯𑀸 𑀧𑀼𑀦 𑀲𑀓𑁆𑀓𑀘𑁆𑀘𑀁 𑀪𑀕𑀯𑀢𑁄 𑀓𑀣𑀸𑀬 𑀉𑀕𑁆𑀕𑀳𑀺𑀢𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀏𑀯𑀁 𑀔𑁄 𑀅𑀳𑀁 𑀪𑀦𑁆𑀢𑁂’’𑀢𑀺𑀆𑀤𑀺𑀫𑀸𑀳. 𑀅𑀣𑀲𑁆𑀲 𑀪𑀕𑀯𑀸 ‘‘𑀲𑀼𑀉𑀕𑁆𑀕𑀳𑀺𑀢𑀁 𑀢𑀬𑀸’’𑀢𑀺 𑀅𑀦𑀼𑀚𑀸𑀦𑀦𑁆𑀢𑁄 ‘‘𑀏𑀯𑀁 𑀧𑁄𑀝𑁆𑀞𑀧𑀸𑀤𑀸’’𑀢𑀺 𑀆𑀳.

𑁪𑁧𑁫. 𑀅𑀣 𑀧𑀭𑀺𑀩𑁆𑀩𑀸𑀚𑀓𑁄 ‘‘𑀪𑀕𑀯𑀢𑀸 ‘𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 𑀲𑀜𑁆𑀜𑀕𑁆𑀕’𑀦𑁆𑀢𑀺 𑀯𑀼𑀢𑁆𑀢𑀁. 𑀏𑀢𑀤𑁂𑀯 𑀦𑀼 𑀔𑁄 𑀲𑀜𑁆𑀜𑀕𑁆𑀕𑀁, 𑀉𑀤𑀸𑀳𑀼 𑀅𑀯𑀲𑁂𑀲𑀲𑀫𑀸𑀧𑀢𑁆𑀢𑀻𑀲𑀼𑀧𑀺 𑀲𑀜𑁆𑀜𑀕𑁆𑀕𑀁 𑀅𑀢𑁆𑀣𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀢𑀫𑀢𑁆𑀣𑀁 𑀧𑀼𑀘𑁆𑀙𑀦𑁆𑀢𑁄 ‘‘𑀏𑀓𑀜𑁆𑀜𑁂𑀯 𑀦𑀼 𑀔𑁄’’𑀢𑀺𑀆𑀤𑀺𑀫𑀸𑀳. 𑀪𑀕𑀯𑀸𑀧𑀺𑀲𑁆𑀲 𑀯𑀺𑀲𑁆𑀲𑀚𑁆𑀚𑁂𑀲𑀺. 𑀢𑀢𑁆𑀣 𑀧𑀼𑀣𑀽𑀧𑀻𑀢𑀺 𑀩𑀳𑀽𑀦𑀺𑀧𑀺. 𑀬𑀣𑀸 𑀬𑀣𑀸 𑀔𑁄, 𑀧𑁄𑀝𑁆𑀞𑀧𑀸𑀤, 𑀦𑀺𑀭𑁄𑀥𑀁 𑀨𑀼𑀲𑀢𑀻𑀢𑀺 𑀧𑀣𑀯𑀻𑀓𑀲𑀺𑀡𑀸𑀤𑀻𑀲𑀼 𑀬𑁂𑀦 𑀬𑁂𑀦 𑀓𑀲𑀺𑀡𑁂𑀦, 𑀧𑀞𑀫𑀚𑁆𑀛𑀸𑀦𑀸𑀤𑀻𑀦𑀁 𑀯𑀸 𑀬𑁂𑀦 𑀬𑁂𑀦 𑀛𑀸𑀦𑁂𑀦. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀲𑀘𑁂 𑀳𑀺 𑀧𑀣𑀯𑀻𑀓𑀲𑀺𑀡𑁂𑀦 𑀓𑀭𑀡𑀪𑀽𑀢𑁂𑀦 𑀧𑀣𑀯𑀻𑀓𑀲𑀺𑀡𑀲𑀫𑀸𑀧𑀢𑁆𑀢𑀺𑀁 𑀏𑀓𑀯𑀸𑀭𑀁 𑀲𑀫𑀸𑀧𑀚𑁆𑀚𑀦𑁆𑀢𑁄 𑀧𑀼𑀭𑀺𑀫𑀲𑀜𑁆𑀜𑀸𑀦𑀺𑀭𑁄𑀥𑀁 𑀨𑀼𑀲𑀢𑀺 𑀏𑀓𑀁 𑀲𑀜𑁆𑀜𑀕𑁆𑀕𑀁, 𑀅𑀣 𑀤𑁆𑀯𑁂 𑀯𑀸𑀭𑁂, 𑀢𑀬𑁄 𑀯𑀸𑀭𑁂, 𑀯𑀸𑀭𑀲𑀢𑀁, 𑀯𑀸𑀭𑀲𑀳𑀲𑁆𑀲𑀁, 𑀯𑀸𑀭𑀲𑀢𑀲𑀳𑀲𑁆𑀲𑀁 𑀯𑀸 𑀲𑀫𑀸𑀧𑀚𑁆𑀚𑀦𑁆𑀢𑁄 𑀧𑀼𑀭𑀺𑀫𑀲𑀜𑁆𑀜𑀸𑀦𑀺𑀭𑁄𑀥𑀁 𑀨𑀼𑀲𑀢𑀺, 𑀲𑀢𑀲𑀳𑀲𑁆𑀲𑀁, 𑀲𑀜𑁆𑀜𑀕𑁆𑀕𑀸𑀦𑀺. 𑀏𑀲 𑀦𑀬𑁄 𑀲𑁂𑀲𑀓𑀲𑀺𑀡𑁂𑀲𑀼. 𑀛𑀸𑀦𑁂𑀲𑀼𑀧𑀺 𑀲𑀘𑁂 𑀧𑀞𑀫𑀚𑁆𑀛𑀸𑀦𑁂𑀦 𑀓𑀭𑀡𑀪𑀽𑀢𑁂𑀦 𑀏𑀓𑀯𑀸𑀭𑀁 𑀧𑀼𑀭𑀺𑀫𑀲𑀜𑁆𑀜𑀸𑀦𑀺𑀭𑁄𑀥𑀁 𑀨𑀼𑀲𑀢𑀺 𑀏𑀓𑀁 𑀲𑀜𑁆𑀜𑀕𑁆𑀕𑀁. 𑀅𑀣 𑀤𑁆𑀯𑁂 𑀯𑀸𑀭𑁂, 𑀢𑀬𑁄 𑀯𑀸𑀭𑁂, 𑀯𑀸𑀭𑀲𑀢𑀁, 𑀯𑀸𑀭𑀲𑀳𑀲𑁆𑀲𑀁, 𑀯𑀸𑀭𑀲𑀢𑀲𑀳𑀲𑁆𑀲𑀁 𑀯𑀸 𑀧𑀼𑀭𑀺𑀫𑀲𑀜𑁆𑀜𑀸𑀦𑀺𑀭𑁄𑀥𑀁 𑀨𑀼𑀲𑀢𑀺, 𑀲𑀢𑀲𑀳𑀲𑁆𑀲𑀁 𑀲𑀜𑁆𑀜𑀕𑁆𑀕𑀸𑀦𑀺. 𑀏𑀲 𑀦𑀬𑁄 𑀲𑁂𑀲𑀚𑁆𑀛𑀸𑀦𑀲𑀫𑀸𑀧𑀢𑁆𑀢𑀻𑀲𑀼𑀧𑀺. 𑀇𑀢𑀺 𑀏𑀓𑀯𑀸𑀭𑀁 𑀲𑀫𑀸𑀧𑀚𑁆𑀚𑀦𑀯𑀲𑁂𑀦 𑀯𑀸 𑀲𑀩𑁆𑀩𑀫𑁆𑀧𑀺 𑀲𑀜𑁆𑀚𑀸𑀦𑀦𑀮𑀓𑁆𑀔𑀡𑁂𑀦 𑀲𑀗𑁆𑀕𑀳𑁂𑀢𑁆𑀯𑀸 𑀯𑀸 𑀏𑀓𑀁 𑀲𑀜𑁆𑀜𑀕𑁆𑀕𑀁 𑀳𑁄𑀢𑀺, 𑀅𑀧𑀭𑀸𑀧𑀭𑀁 𑀲𑀫𑀸𑀧𑀚𑁆𑀚𑀦𑀯𑀲𑁂𑀦 𑀩𑀳𑀽𑀦𑀺.

𑁪𑁧𑁬. 𑀲𑀜𑁆𑀜𑀸 𑀦𑀼 𑀔𑁄, 𑀪𑀦𑁆𑀢𑁂𑀢𑀺 𑀪𑀦𑁆𑀢𑁂 𑀦𑀺𑀭𑁄𑀥𑀲𑀫𑀸𑀧𑀚𑁆𑀚𑀦𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 ‘‘𑀲𑀜𑁆𑀜𑀸 𑀦𑀼 𑀔𑁄 𑀧𑀞𑀫𑀁 𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀧𑀼𑀘𑁆𑀙𑀢𑀺. 𑀢𑀲𑁆𑀲 𑀪𑀕𑀯𑀸 ‘‘𑀲𑀜𑁆𑀜𑀸 𑀔𑁄, 𑀧𑁄𑀝𑁆𑀞𑀧𑀸𑀤𑀸’’𑀢𑀺 𑀩𑁆𑀬𑀸𑀓𑀸𑀲𑀺. 𑀢𑀢𑁆𑀣 𑀲𑀜𑁆𑀜𑀸𑀢𑀺 𑀛𑀸𑀦𑀲𑀜𑁆𑀜𑀸. 𑀜𑀸𑀡𑀦𑁆𑀢𑀺 𑀯𑀺𑀧𑀲𑁆𑀲𑀦𑀸𑀜𑀸𑀡𑀁. 𑀅𑀧𑀭𑁄 𑀦𑀬𑁄, 𑀲𑀜𑁆𑀜𑀸𑀢𑀺 𑀯𑀺𑀧𑀲𑁆𑀲𑀦𑀸 𑀲𑀜𑁆𑀜𑀸. 𑀜𑀸𑀡𑀦𑁆𑀢𑀺 𑀫𑀕𑁆𑀕𑀜𑀸𑀡𑀁. 𑀅𑀧𑀭𑁄 𑀦𑀬𑁄, 𑀲𑀜𑁆𑀜𑀸𑀢𑀺 𑀫𑀕𑁆𑀕𑀲𑀜𑁆𑀜𑀸. 𑀜𑀸𑀡𑀦𑁆𑀢𑀺 𑀨𑀮𑀜𑀸𑀡𑀁. 𑀢𑀺𑀧𑀺𑀝𑀓𑀫𑀳𑀸𑀲𑀺𑀯𑀢𑁆𑀣𑁂𑀭𑁄 𑀧𑀦𑀸𑀳 𑁋

𑀓𑀺𑀁 𑀇𑀫𑁂 𑀪𑀺𑀓𑁆𑀔𑀽 𑀪𑀡𑀦𑁆𑀢𑀺, 𑀧𑁄𑀝𑁆𑀞𑀧𑀸𑀤𑁄 𑀳𑁂𑀝𑁆𑀞𑀸 𑀪𑀕𑀯𑀦𑁆𑀢𑀁 𑀦𑀺𑀭𑁄𑀥𑀁 𑀧𑀼𑀘𑁆𑀙𑀺. 𑀇𑀤𑀸𑀦𑀺 𑀦𑀺𑀭𑁄𑀥𑀸 𑀯𑀼𑀝𑁆𑀞𑀸𑀦𑀁 𑀧𑀼𑀘𑁆𑀙𑀦𑁆𑀢𑁄 ‘‘𑀪𑀕𑀯𑀸 𑀦𑀺𑀭𑁄𑀥𑀸 𑀯𑀼𑀝𑁆𑀞𑀳𑀦𑁆𑀢𑀲𑁆𑀲 𑀓𑀺𑀁 𑀧𑀞𑀫𑀁 𑀅𑀭𑀳𑀢𑁆𑀢𑀨𑀮𑀲𑀜𑁆𑀜𑀸 𑀉𑀧𑁆𑀧𑀚𑁆𑀚𑀢𑀺, 𑀉𑀤𑀸𑀳𑀼 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡’’𑀦𑁆𑀢𑀺 𑀯𑀤𑀢𑀺. 𑀅𑀣𑀲𑁆𑀲 𑀪𑀕𑀯𑀸 𑀬𑀲𑁆𑀫𑀸 𑀨𑀮𑀲𑀜𑁆𑀜𑀸 𑀧𑀞𑀫𑀁 𑀉𑀧𑁆𑀧𑀚𑁆𑀚𑀢𑀺, 𑀧𑀘𑁆𑀙𑀸 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀁. 𑀢𑀲𑁆𑀫𑀸 ‘‘𑀲𑀜𑁆𑀜𑀸 𑀔𑁄 𑀧𑁄𑀝𑁆𑀞𑀧𑀸𑀤𑀸’’𑀢𑀺 𑀆𑀳. 𑀢𑀢𑁆𑀣 𑀲𑀜𑁆𑀜𑀼𑀧𑁆𑀧𑀸𑀤𑀸𑀢𑀺 𑀅𑀭𑀳𑀢𑁆𑀢𑀨𑀮𑀲𑀜𑁆𑀜𑀸𑀬 𑀉𑀧𑁆𑀧𑀸𑀤𑀸, 𑀧𑀘𑁆𑀙𑀸 ‘‘𑀇𑀤𑀁 𑀅𑀭𑀳𑀢𑁆𑀢𑀨𑀮’’𑀦𑁆𑀢𑀺 𑀏𑀯𑀁 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀼𑀧𑁆𑀧𑀸𑀤𑁄 𑀳𑁄𑀢𑀺. 𑀇𑀤𑀧𑁆𑀧𑀘𑁆𑀘𑀬𑀸 𑀓𑀺𑀭 𑀫𑁂𑀢𑀺 𑀨𑀮𑀲𑀫𑀸𑀥𑀺𑀲𑀜𑁆𑀜𑀸𑀧𑀘𑁆𑀘𑀬𑀸 𑀓𑀺𑀭 𑀫𑀬𑁆𑀳𑀁 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀁 𑀉𑀧𑁆𑀧𑀦𑁆𑀦𑀦𑁆𑀢𑀺.

𑀲𑀜𑁆𑀜𑀸𑀅𑀢𑁆𑀢𑀓𑀣𑀸𑀯𑀡𑁆𑀡𑀦𑀸

𑁪𑁧𑁭. 𑀇𑀤𑀸𑀦𑀺 𑀧𑀭𑀺𑀩𑁆𑀩𑀸𑀚𑀓𑁄 𑀬𑀣𑀸 𑀦𑀸𑀫 𑀕𑀸𑀫𑀲𑀽𑀓𑀭𑁄 𑀕𑀦𑁆𑀥𑁄𑀤𑀓𑁂𑀦 𑀦𑁆𑀳𑀸𑀧𑁂𑀢𑁆𑀯𑀸 𑀕𑀦𑁆𑀥𑁂𑀳𑀺 𑀅𑀦𑀼𑀮𑀺𑀫𑁆𑀧𑀺𑀢𑁆𑀯𑀸 𑀫𑀸𑀮𑀸𑀤𑀸𑀫𑀁 𑀧𑀺𑀴𑀦𑁆𑀥𑀺𑀢𑁆𑀯𑀸 𑀲𑀺𑀭𑀺𑀲𑀬𑀦𑁂 𑀆𑀭𑁄𑀧𑀺𑀢𑁄𑀧𑀺 𑀲𑀼𑀔𑀁 𑀦 𑀯𑀺𑀦𑁆𑀤𑀢𑀺, 𑀯𑁂𑀕𑁂𑀦 𑀕𑀽𑀣𑀝𑁆𑀞𑀸𑀦𑀫𑁂𑀯 𑀕𑀦𑁆𑀢𑁆𑀯𑀸 𑀲𑀼𑀔𑀁 𑀯𑀺𑀦𑁆𑀤𑀢𑀺. 𑀏𑀯𑀫𑁂𑀯 𑀪𑀕𑀯𑀢𑀸 𑀲𑀡𑁆𑀳𑀲𑀼𑀔𑀼𑀫𑀢𑀺𑀮𑀓𑁆𑀔𑀡𑀩𑁆𑀪𑀸𑀳𑀢𑀸𑀬 𑀤𑁂𑀲𑀦𑀸𑀬 𑀦𑁆𑀳𑀸𑀧𑀺𑀢𑀯𑀺𑀮𑀺𑀢𑁆𑀢𑀫𑀡𑁆𑀟𑀺𑀢𑁄𑀧𑀺 𑀦𑀺𑀭𑁄𑀥𑀓𑀣𑀸𑀲𑀺𑀭𑀺𑀲𑀬𑀦𑀁 𑀆𑀭𑁄𑀧𑀺𑀢𑁄𑀧𑀺 𑀢𑀢𑁆𑀣 𑀲𑀼𑀔𑀁 𑀦 𑀯𑀺𑀦𑁆𑀤𑀦𑁆𑀢𑁄 𑀕𑀽𑀣𑀝𑁆𑀞𑀸𑀦𑀲𑀤𑀺𑀲𑀁 𑀅𑀢𑁆𑀢𑀦𑁄 𑀮𑀤𑁆𑀥𑀺𑀁 𑀕𑀳𑁂𑀢𑁆𑀯𑀸 𑀢𑀫𑁂𑀯 𑀧𑀼𑀘𑁆𑀙𑀦𑁆𑀢𑁄 ‘‘𑀲𑀜𑁆𑀜𑀸 𑀦𑀼 𑀔𑁄, 𑀪𑀦𑁆𑀢𑁂, 𑀧𑀼𑀭𑀺𑀲𑀲𑁆𑀲 𑀅𑀢𑁆𑀢𑀸’’𑀢𑀺𑀆𑀤𑀺𑀫𑀸𑀳. 𑀅𑀣𑀲𑁆𑀲𑀸𑀦𑀼𑀫𑀢𑀺𑀁 𑀕𑀳𑁂𑀢𑁆𑀯𑀸 𑀩𑁆𑀬𑀸𑀓𑀸𑀢𑀼𑀓𑀸𑀫𑁄 𑀪𑀕𑀯𑀸 𑁋 ‘‘𑀓𑀁 𑀧𑀦 𑀢𑁆𑀯’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁄 𑀲𑁄 ‘‘𑀅𑀭𑀽𑀧𑀻 𑀅𑀢𑁆𑀢𑀸’’𑀢𑀺 𑀏𑀯𑀁 𑀮𑀤𑁆𑀥𑀺𑀓𑁄 𑀲𑀫𑀸𑀦𑁄𑀧𑀺 ‘‘𑀪𑀕𑀯𑀸 𑀤𑁂𑀲𑀦𑀸𑀬 𑀲𑀼𑀓𑀼𑀲𑀮𑁄, 𑀲𑁄 𑀫𑁂 𑀆𑀤𑀺𑀢𑁄𑀯 𑀮𑀤𑁆𑀥𑀺𑀁 𑀫𑀸 𑀯𑀺𑀤𑁆𑀥𑀁𑀲𑁂𑀢𑀽’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀅𑀢𑁆𑀢𑀦𑁄 𑀮𑀤𑁆𑀥𑀺𑀁 𑀧𑀭𑀺𑀳𑀭𑀦𑁆𑀢𑁄 ‘‘𑀑𑀴𑀸𑀭𑀺𑀓𑀁 𑀔𑁄’’𑀢𑀺𑀆𑀤𑀺𑀫𑀸𑀳. 𑀅𑀣𑀲𑁆𑀲 𑀪𑀕𑀯𑀸 𑀢𑀢𑁆𑀣 𑀤𑁄𑀲𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀑𑀴𑀸𑀭𑀺𑀓𑁄 𑀘 𑀳𑀺 𑀢𑁂’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀏𑀯𑀁 𑀲𑀦𑁆𑀢𑀦𑁆𑀢𑀺 𑀏𑀯𑀁 𑀲𑀦𑁆𑀢𑁂. 𑀪𑀼𑀫𑁆𑀫𑀢𑁆𑀣𑁂 𑀳𑀺 𑀏𑀢𑀁 𑀉𑀧𑀬𑁄𑀕𑀯𑀘𑀦𑀁. 𑀏𑀯𑀁 𑀲𑀦𑁆𑀢𑀁 𑀅𑀢𑁆𑀢𑀸𑀦𑀁 𑀧𑀘𑁆𑀘𑀸𑀕𑀘𑁆𑀙𑀢𑁄 𑀢𑀯𑀸𑀢𑀺 𑀅𑀬𑀁 𑀯𑀸 𑀏𑀢𑁆𑀣 𑀅𑀢𑁆𑀣𑁄. 𑀘𑀢𑀼𑀦𑁆𑀦𑀁 𑀔𑀦𑁆𑀥𑀸𑀦𑀁 𑀏𑀓𑀼𑀧𑁆𑀧𑀸𑀤𑁂𑀓𑀦𑀺𑀭𑁄𑀥𑀢𑁆𑀢𑀸 𑀓𑀺𑀜𑁆𑀘𑀸𑀧𑀺 𑀬𑀸 𑀲𑀜𑁆𑀜𑀸 𑀉𑀧𑁆𑀧𑀚𑁆𑀚𑀢𑀺, 𑀲𑀸𑀯 𑀦𑀺𑀭𑀼𑀚𑁆𑀛𑀢𑀺. 𑀅𑀧𑀭𑀸𑀧𑀭𑀁 𑀉𑀧𑀸𑀤𑀸𑀬 𑀧𑀦 ‘‘𑀅𑀜𑁆𑀜𑀸 𑀘 𑀲𑀜𑁆𑀜𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀅𑀜𑁆𑀜𑀸 𑀘 𑀲𑀜𑁆𑀜𑀸 𑀦𑀺𑀭𑀼𑀚𑁆𑀛𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁.

𑁪𑁧𑁮-𑁪𑁨𑁦. 𑀇𑀤𑀸𑀦𑀺 𑀅𑀜𑁆𑀜𑀁 𑀮𑀤𑁆𑀥𑀺𑀁 𑀤𑀲𑁆𑀲𑁂𑀦𑁆𑀢𑁄 𑁋 ‘‘𑀫𑀦𑁄𑀫𑀬𑀁 𑀔𑁄 𑀅𑀳𑀁, 𑀪𑀦𑁆𑀢𑁂’’𑀢𑀺𑀆𑀤𑀺𑀁 𑀯𑀢𑁆𑀯𑀸 𑀢𑀢𑁆𑀭𑀸𑀧𑀺 𑀤𑁄𑀲𑁂 𑀤𑀺𑀦𑁆𑀦𑁂 𑀬𑀣𑀸 𑀦𑀸𑀫 𑀉𑀫𑁆𑀫𑀢𑁆𑀢𑀓𑁄 𑀬𑀸𑀯𑀲𑁆𑀲 𑀲𑀜𑁆𑀜𑀸 𑀦𑀧𑁆𑀧𑀢𑀺𑀝𑁆𑀞𑀸𑀢𑀺, 𑀢𑀸𑀯 𑀅𑀜𑁆𑀜𑀁 𑀕𑀳𑁂𑀢𑁆𑀯𑀸 𑀅𑀜𑁆𑀜𑀁 𑀯𑀺𑀲𑁆𑀲𑀚𑁆𑀚𑁂𑀢𑀺, 𑀲𑀜𑁆𑀜𑀸𑀧𑀢𑀺𑀝𑁆𑀞𑀸𑀦𑀓𑀸𑀮𑁂 𑀧𑀦 𑀯𑀢𑁆𑀢𑀩𑁆𑀩𑀫𑁂𑀯 𑀯𑀤𑀢𑀺, 𑀏𑀯𑀫𑁂𑀯 𑀅𑀜𑁆𑀜𑀁 𑀕𑀳𑁂𑀢𑁆𑀯𑀸 𑀅𑀜𑁆𑀜𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀇𑀤𑀸𑀦𑀺 𑀅𑀢𑁆𑀢𑀦𑁄 𑀮𑀤𑁆𑀥𑀺𑀁𑀬𑁂𑀯 𑀯𑀤𑀦𑁆𑀢𑁄 ‘‘𑀅𑀭𑀽𑀧𑀻 𑀔𑁄’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀭𑀸𑀧𑀺 𑀬𑀲𑁆𑀫𑀸 𑀲𑁄 𑀲𑀜𑁆𑀜𑀸𑀬 𑀉𑀧𑁆𑀧𑀸𑀤𑀦𑀺𑀭𑁄𑀥𑀁 𑀇𑀘𑁆𑀙𑀢𑀺, 𑀅𑀢𑁆𑀢𑀸𑀦𑀁 𑀧𑀦 𑀲𑀲𑁆𑀲𑀢𑀁 𑀫𑀜𑁆𑀜𑀢𑀺. 𑀢𑀲𑁆𑀫𑀸 𑀢𑀣𑁂𑀯𑀲𑁆𑀲 𑀤𑁄𑀲𑀁 𑀤𑀲𑁆𑀲𑁂𑀦𑁆𑀢𑁄 𑀪𑀕𑀯𑀸 ‘‘𑀏𑀯𑀁 𑀲𑀦𑁆𑀢𑀫𑁆𑀧𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁄 𑀧𑀭𑀺𑀩𑁆𑀩𑀸𑀚𑀓𑁄 𑀫𑀺𑀘𑁆𑀙𑀸𑀤𑀲𑁆𑀲𑀦𑁂𑀦 𑀅𑀪𑀺𑀪𑀽𑀢𑀢𑁆𑀢𑀸 𑀪𑀕𑀯𑀢𑀸 𑀯𑀼𑀘𑁆𑀘𑀫𑀸𑀦𑀫𑁆𑀧𑀺 𑀢𑀁 𑀦𑀸𑀦𑀢𑁆𑀢𑀁 𑀅𑀚𑀸𑀦𑀦𑁆𑀢𑁄 ‘‘𑀲𑀓𑁆𑀓𑀸 𑀧𑀦𑁂𑀢𑀁, 𑀪𑀦𑁆𑀢𑁂, 𑀫𑀬𑀸’’𑀢𑀺𑀆𑀤𑀺𑀫𑀸𑀳. 𑀅𑀣𑀲𑁆𑀲 𑀪𑀕𑀯𑀸 𑀬𑀲𑁆𑀫𑀸 𑀲𑁄 𑀲𑀜𑁆𑀜𑀸𑀬 𑀉𑀧𑁆𑀧𑀸𑀤𑀦𑀺𑀭𑁄𑀥𑀁 𑀧𑀲𑁆𑀲𑀦𑁆𑀢𑁄𑀧𑀺 𑀲𑀜𑁆𑀜𑀸𑀫𑀬𑀁 𑀅𑀢𑁆𑀢𑀸𑀦𑀁 𑀦𑀺𑀘𑁆𑀘𑀫𑁂𑀯 𑀫𑀜𑁆𑀜𑀢𑀺. 𑀢𑀲𑁆𑀫𑀸 ‘‘𑀤𑀼𑀚𑁆𑀚𑀸𑀦𑀁 𑀔𑁄’’𑀢𑀺𑀆𑀤𑀺𑀫𑀸𑀳.

𑀢𑀢𑁆𑀣𑀸𑀬𑀁 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀢𑀯 𑀅𑀜𑁆𑀜𑀸 𑀤𑀺𑀝𑁆𑀞𑀺, 𑀅𑀜𑁆𑀜𑀸 𑀔𑀦𑁆𑀢𑀺, 𑀅𑀜𑁆𑀜𑀸 𑀭𑀼𑀘𑀺, 𑀅𑀜𑁆𑀜𑀣𑀸𑀬𑁂𑀯 𑀢𑁂 𑀤𑀲𑁆𑀲𑀦𑀁 𑀧𑀯𑀢𑁆𑀢𑀁, 𑀅𑀜𑁆𑀜𑀤𑁂𑀯 𑀘 𑀢𑁂 𑀔𑀫𑀢𑀺 𑀘𑁂𑀯 𑀭𑀼𑀘𑁆𑀘𑀢𑀺 𑀘, 𑀅𑀜𑁆𑀜𑀢𑁆𑀭 𑀘 𑀢𑁂 𑀆𑀬𑁄𑀕𑁄, 𑀅𑀜𑁆𑀜𑀺𑀲𑁆𑀲𑀸𑀬𑁂𑀯 𑀧𑀝𑀺𑀧𑀢𑁆𑀢𑀺𑀬𑀸 𑀬𑀼𑀢𑁆𑀢𑀧𑀬𑀼𑀢𑁆𑀢𑀢𑀸, 𑀅𑀜𑁆𑀜𑀢𑁆𑀣 𑀘 𑀢𑁂 𑀆𑀘𑀭𑀺𑀬𑀓𑀁, 𑀅𑀜𑁆𑀜𑀲𑁆𑀫𑀺𑀁 𑀢𑀺𑀢𑁆𑀣𑀸𑀬𑀢𑀦𑁂 𑀆𑀘𑀭𑀺𑀬𑀪𑀸𑀯𑁄. 𑀢𑁂𑀦 𑀢𑀬𑀸 𑀏𑀯𑀁 𑀅𑀜𑁆𑀜𑀤𑀺𑀝𑁆𑀞𑀺𑀓𑁂𑀦 𑀅𑀜𑁆𑀜𑀔𑀦𑁆𑀢𑀺𑀓𑁂𑀦 𑀅𑀜𑁆𑀜𑀭𑀼𑀘𑀺𑀓𑁂𑀦 𑀅𑀜𑁆𑀜𑀢𑁆𑀭𑀸𑀬𑁄𑀕𑁂𑀦 𑀅𑀜𑁆𑀜𑀢𑁆𑀭𑀸𑀘𑀭𑀺𑀬𑀓𑁂𑀦 𑀤𑀼𑀚𑁆𑀚𑀸𑀦𑀁 𑀏𑀢𑀦𑁆𑀢𑀺. 𑀅𑀣 𑀧𑀭𑀺𑀩𑁆𑀩𑀸𑀚𑀓𑁄 𑁋 ‘‘𑀲𑀜𑁆𑀜𑀸 𑀯𑀸 𑀧𑀼𑀭𑀺𑀲𑀲𑁆𑀲 𑀅𑀢𑁆𑀢𑀸 𑀳𑁄𑀢𑀼, 𑀅𑀜𑁆𑀜𑀸 𑀯𑀸 𑀲𑀜𑁆𑀜𑀸, 𑀢𑀁 𑀲𑀲𑁆𑀲𑀢𑀸𑀤𑀺 𑀪𑀸𑀯𑀫𑀲𑁆𑀲 𑀧𑀼𑀘𑁆𑀙𑀺𑀲𑁆𑀲’’𑀦𑁆𑀢𑀺 𑀧𑀼𑀦 ‘‘𑀓𑀺𑀁 𑀧𑀦 𑀪𑀦𑁆𑀢𑁂’’𑀢𑀺𑀆𑀤𑀺𑀫𑀸𑀳.

𑀢𑀢𑁆𑀣 𑀮𑁄𑀓𑁄𑀢𑀺 𑀅𑀢𑁆𑀢𑀸𑀦𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀦 𑀳𑁂𑀢𑀁 𑀧𑁄𑀝𑁆𑀞𑀧𑀸𑀤 𑀅𑀢𑁆𑀣𑀲𑀜𑁆𑀳𑀺𑀢𑀦𑁆𑀢𑀺 𑀧𑁄𑀝𑁆𑀞𑀧𑀸𑀤 𑀏𑀢𑀁 𑀤𑀺𑀝𑁆𑀞𑀺𑀕𑀢𑀁 𑀦 𑀇𑀥𑀮𑁄𑀓𑀧𑀭𑀮𑁄𑀓𑀅𑀢𑁆𑀣𑀦𑀺𑀲𑁆𑀲𑀺𑀢𑀁, 𑀦 𑀅𑀢𑁆𑀢𑀢𑁆𑀣𑀧𑀭𑀢𑁆𑀣𑀦𑀺𑀲𑁆𑀲𑀺𑀢𑀁. 𑀦 𑀥𑀫𑁆𑀫𑀲𑀁𑀳𑀺𑀢𑀦𑁆𑀢𑀺 𑀦 𑀦𑀯𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀦𑀺𑀲𑁆𑀲𑀺𑀢𑀁. 𑀦𑀸𑀤𑀺𑀩𑁆𑀭𑀳𑁆𑀫𑀘𑀭𑀺𑀬𑀓𑀦𑁆𑀢𑀺 𑀲𑀺𑀓𑁆𑀔𑀢𑁆𑀢𑀬𑀲𑀗𑁆𑀔𑀸𑀢𑀲𑁆𑀲 𑀲𑀸𑀲𑀦𑀩𑁆𑀭𑀳𑁆𑀫𑀘𑀭𑀺𑀬𑀓𑀲𑁆𑀲 𑀦 𑀆𑀤𑀺𑀫𑀢𑁆𑀢𑀁, 𑀅𑀥𑀺𑀲𑀻𑀮𑀲𑀺𑀓𑁆𑀔𑀸𑀫𑀢𑁆𑀢𑀫𑁆𑀧𑀺 𑀦 𑀳𑁄𑀢𑀺. 𑀦 𑀦𑀺𑀩𑁆𑀩𑀺𑀤𑀸𑀬𑀸𑀢𑀺 𑀲𑀁𑀲𑀸𑀭𑀯𑀝𑁆𑀝𑁂 𑀦𑀺𑀩𑁆𑀩𑀺𑀦𑁆𑀤𑀦𑀢𑁆𑀣𑀸𑀬 𑀦 𑀲𑀁𑀯𑀢𑁆𑀢𑀢𑀺. 𑀦 𑀯𑀺𑀭𑀸𑀕𑀸𑀬𑀸𑀢𑀺 𑀯𑀝𑁆𑀝𑀯𑀺𑀭𑀸𑀕𑀢𑁆𑀣𑀸𑀬 𑀦 𑀲𑀁𑀯𑀢𑁆𑀢𑀢𑀺. 𑀦 𑀦𑀺𑀭𑁄𑀥𑀸𑀬𑀸𑀢𑀺 𑀯𑀝𑁆𑀝𑀲𑁆𑀲 𑀦𑀺𑀭𑁄𑀥𑀓𑀭𑀡𑀢𑁆𑀣𑀸𑀬 𑀦 𑀲𑀁𑀯𑀢𑁆𑀢𑀢𑀺. 𑀦 𑀉𑀧𑀲𑀫𑀸𑀬𑀸𑀢𑀺 𑀯𑀝𑁆𑀝𑀲𑁆𑀲 𑀯𑀽𑀧𑀲𑀫𑀦𑀢𑁆𑀣𑀸𑀬 𑀦 𑀲𑀁𑀯𑀢𑁆𑀢𑀢𑀺. 𑀦 𑀅𑀪𑀺𑀜𑁆𑀜𑀸𑀬𑀸𑀢𑀺 𑀯𑀝𑁆𑀝𑀸𑀪𑀺𑀚𑀸𑀦𑀦𑀸𑀬 𑀧𑀘𑁆𑀘𑀓𑁆𑀔𑀓𑀺𑀭𑀺𑀬𑀸𑀬 𑀦 𑀲𑀁𑀯𑀢𑁆𑀢𑀢𑀺. 𑀦 𑀲𑀫𑁆𑀩𑁄𑀥𑀸𑀬𑀸𑀢𑀺 𑀯𑀝𑁆𑀝𑀲𑀫𑁆𑀩𑀼𑀚𑁆𑀛𑀦𑀢𑁆𑀣𑀸𑀬 𑀦 𑀲𑀁𑀯𑀢𑁆𑀢𑀢𑀺. 𑀦 𑀦𑀺𑀩𑁆𑀩𑀸𑀦𑀸𑀬𑀸𑀢𑀺 𑀅𑀫𑀢𑀫𑀳𑀸𑀦𑀺𑀩𑁆𑀩𑀸𑀦𑀲𑁆𑀲 𑀧𑀘𑁆𑀘𑀓𑁆𑀔𑀓𑀺𑀭𑀺𑀬𑀸𑀬 𑀦 𑀲𑀁𑀯𑀢𑁆𑀢𑀢𑀺.

𑀇𑀤𑀁 𑀤𑀼𑀓𑁆𑀔𑀦𑁆𑀢𑀺𑀆𑀤𑀻𑀲𑀼 𑀢𑀡𑁆𑀳𑀁 𑀞𑀧𑁂𑀢𑁆𑀯𑀸 𑀢𑁂𑀪𑀽𑀫𑀓𑀸 𑀧𑀜𑁆𑀘𑀓𑁆𑀔𑀦𑁆𑀥𑀸 𑀤𑀼𑀓𑁆𑀔𑀦𑁆𑀢𑀺, 𑀢𑀲𑁆𑀲𑁂𑀯 𑀤𑀼𑀓𑁆𑀔𑀲𑁆𑀲 𑀧𑀪𑀸𑀯𑀦𑀢𑁄 𑀲𑀧𑁆𑀧𑀘𑁆𑀘𑀬𑀸 𑀢𑀡𑁆𑀳𑀸 𑀤𑀼𑀓𑁆𑀔𑀲𑀫𑀼𑀤𑀬𑁄𑀢𑀺. 𑀉𑀪𑀺𑀦𑁆𑀦𑀁 𑀅𑀧𑁆𑀧𑀯𑀢𑁆𑀢𑀺 𑀤𑀼𑀓𑁆𑀔𑀦𑀺𑀭𑁄𑀥𑁄𑀢𑀺, 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸𑀢𑀺 𑀫𑀬𑀸 𑀩𑁆𑀬𑀸𑀓𑀢𑀦𑁆𑀢𑀺 𑀅𑀢𑁆𑀣𑁄. 𑀏𑀯𑀜𑁆𑀘 𑀧𑀦 𑀯𑀢𑁆𑀯𑀸 𑀪𑀕𑀯𑀸 ‘‘𑀇𑀫𑀲𑁆𑀲 𑀧𑀭𑀺𑀩𑁆𑀩𑀸𑀚𑀓𑀲𑁆𑀲 𑀫𑀕𑁆𑀕𑀧𑀸𑀢𑀼𑀪𑀸𑀯𑁄 𑀯𑀸 𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸 𑀯𑀸 𑀦𑀢𑁆𑀣𑀺, 𑀫𑀬𑁆𑀳𑀜𑁆𑀘 𑀪𑀺𑀓𑁆𑀔𑀸𑀘𑀸𑀭𑀯𑁂𑀮𑀸’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀢𑀼𑀡𑁆𑀳𑀻 𑀅𑀳𑁄𑀲𑀺. 𑀧𑀭𑀺𑀩𑁆𑀩𑀸𑀚𑀓𑁄𑀧𑀺 𑀢𑀁 𑀆𑀓𑀸𑀭𑀁 𑀜𑀢𑁆𑀯𑀸 𑀪𑀕𑀯𑀢𑁄 𑀕𑀫𑀦𑀓𑀸𑀮𑀁 𑀆𑀭𑁄𑀘𑁂𑀦𑁆𑀢𑁄 𑀯𑀺𑀬 ‘‘𑀏𑀯𑀫𑁂𑀢’’𑀦𑁆𑀢𑀺𑀆𑀤𑀺𑀫𑀸𑀳.

𑁪𑁨𑁧. 𑀯𑀸𑀘𑀸𑀲𑀦𑁆𑀦𑀺𑀢𑁄𑀤𑀓𑁂𑀦𑀸𑀢𑀺 𑀯𑀘𑀦𑀧𑀢𑁄𑀤𑁂𑀦. 𑀲𑀜𑁆𑀛𑀩𑁆𑀪𑀭𑀺𑀫𑀓𑀁𑀲𑀽𑀢𑀺 𑀲𑀜𑁆𑀛𑀩𑁆𑀪𑀭𑀺𑀢𑀁 𑀦𑀺𑀭𑀦𑁆𑀢𑀭𑀁 𑀨𑀼𑀝𑁆𑀞𑀁 𑀅𑀓𑀁𑀲𑀼, 𑀉𑀧𑀭𑀺 𑀯𑀺𑀚𑁆𑀛𑀺𑀁𑀲𑀽𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀪𑀽𑀢𑀦𑁆𑀢𑀺 𑀲𑀪𑀸𑀯𑀢𑁄 𑀯𑀺𑀚𑁆𑀚𑀫𑀸𑀦𑀁. 𑀢𑀘𑁆𑀙𑀁, 𑀢𑀣𑀦𑁆𑀢𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀥𑀫𑁆𑀫𑀝𑁆𑀞𑀺𑀢𑀢𑀦𑁆𑀢𑀺 𑀦𑀯𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁂𑀲𑀼 𑀞𑀺𑀢𑀲𑀪𑀸𑀯𑀁. 𑀥𑀫𑁆𑀫𑀦𑀺𑀬𑀸𑀫𑀢𑀦𑁆𑀢𑀺 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀦𑀺𑀬𑀸𑀫𑀢𑀁. 𑀩𑀼𑀤𑁆𑀥𑀸𑀦𑀜𑁆𑀳𑀺 𑀘𑀢𑀼𑀲𑀘𑁆𑀘𑀯𑀺𑀦𑀺𑀫𑀼𑀢𑁆𑀢𑀸 𑀓𑀣𑀸 𑀦𑀸𑀫 𑀦𑀢𑁆𑀣𑀺. 𑀢𑀲𑁆𑀫𑀸 𑀲𑀸 𑀏𑀤𑀺𑀲𑀸 𑀳𑁄𑀢𑀺.

𑀘𑀺𑀢𑁆𑀢𑀳𑀢𑁆𑀣𑀺𑀲𑀸𑀭𑀺𑀧𑀼𑀢𑁆𑀢𑀧𑁄𑀝𑁆𑀞𑀧𑀸𑀤𑀯𑀢𑁆𑀣𑀼𑀯𑀡𑁆𑀡𑀦𑀸

𑁪𑁨𑁨. 𑀘𑀺𑀢𑁆𑀢𑁄 𑀘 𑀳𑀢𑁆𑀣𑀺𑀲𑀸𑀭𑀺𑀧𑀼𑀢𑁆𑀢𑁄𑀢𑀺 𑀲𑁄 𑀓𑀺𑀭 𑀲𑀸𑀯𑀢𑁆𑀣𑀺𑀬𑀁 𑀳𑀢𑁆𑀣𑀺𑀆𑀘𑀭𑀺𑀬𑀲𑁆𑀲 𑀧𑀼𑀢𑁆𑀢𑁄 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀢𑁆𑀯𑀸 𑀢𑀻𑀡𑀺 𑀧𑀺𑀝𑀓𑀸𑀦𑀺 𑀉𑀕𑁆𑀕𑀳𑁂𑀢𑁆𑀯𑀸 𑀲𑀼𑀔𑀼𑀫𑁂𑀲𑀼 𑀅𑀢𑁆𑀣𑀦𑁆𑀢𑀭𑁂𑀲𑀼 𑀓𑀼𑀲𑀮𑁄 𑀅𑀳𑁄𑀲𑀺, 𑀧𑀼𑀩𑁆𑀩𑁂 𑀓𑀢𑀧𑀸𑀧𑀓𑀫𑁆𑀫𑀯𑀲𑁂𑀦 𑀧𑀦 𑀲𑀢𑁆𑀢𑀯𑀸𑀭𑁂 𑀯𑀺𑀩𑁆𑀪𑀫𑀺𑀢𑁆𑀯𑀸 𑀕𑀺𑀳𑀺 𑀚𑀸𑀢𑁄. 𑀓𑀲𑁆𑀲𑀧𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀓𑀺𑀭 𑀲𑀸𑀲𑀦𑁂 𑀤𑁆𑀯𑁂 𑀲𑀳𑀸𑀬𑀓𑀸 𑀅𑀳𑁂𑀲𑀼𑀁, 𑀅𑀜𑁆𑀜𑀫𑀜𑁆𑀜𑀁 𑀲𑀫𑀕𑁆𑀕𑀸 𑀏𑀓𑀢𑁄𑀯 𑀲𑀚𑁆𑀛𑀸𑀬𑀦𑁆𑀢𑀺. 𑀢𑁂𑀲𑀼 𑀏𑀓𑁄 𑀅𑀦𑀪𑀺𑀭𑀢𑁄 𑀕𑀺𑀳𑀺𑀪𑀸𑀯𑁂 𑀘𑀺𑀢𑁆𑀢𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀇𑀢𑀭𑀲𑁆𑀲 𑀆𑀭𑁄𑀘𑁂𑀲𑀺. 𑀲𑁄 𑀕𑀺𑀳𑀺𑀪𑀸𑀯𑁂 𑀆𑀤𑀻𑀦𑀯𑀁 𑀧𑀩𑁆𑀩𑀚𑁆𑀚𑀸𑀬 𑀆𑀦𑀺𑀲𑀁𑀲𑀁 𑀤𑀲𑁆𑀲𑁂𑀢𑁆𑀯𑀸 𑀢𑀁 𑀑𑀯𑀤𑀺. 𑀲𑁄 𑀢𑀁 𑀲𑀼𑀢𑁆𑀯𑀸 𑀅𑀪𑀺𑀭𑀫𑀺𑀢𑁆𑀯𑀸 𑀧𑀼𑀦𑁂𑀓𑀤𑀺𑀯𑀲𑀁 𑀢𑀸𑀤𑀺𑀲𑁂 𑀘𑀺𑀢𑁆𑀢𑁂 𑀉𑀧𑁆𑀧𑀦𑁆𑀦𑁂 𑀢𑀁 𑀏𑀢𑀤𑀯𑁄𑀘 ‘‘𑀫𑀬𑁆𑀳𑀁 𑀆𑀯𑀼𑀲𑁄 𑀏𑀯𑀭𑀽𑀧𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺 𑁋 ‘𑀇𑀫𑀸𑀳𑀁 𑀧𑀢𑁆𑀢𑀘𑀻𑀯𑀭𑀁 𑀢𑀼𑀬𑁆𑀳𑀁 𑀤𑀲𑁆𑀲𑀸𑀫𑀻’𑀢𑀺’’. 𑀲𑁄 𑀧𑀢𑁆𑀢𑀘𑀻𑀯𑀭𑀮𑁄𑀪𑁂𑀦 𑀢𑀲𑁆𑀲 𑀕𑀺𑀳𑀺𑀪𑀸𑀯𑁂 𑀆𑀦𑀺𑀲𑀁𑀲𑀁 𑀤𑀲𑁆𑀲𑁂𑀢𑁆𑀯𑀸 𑀧𑀩𑁆𑀩𑀚𑁆𑀚𑀸𑀬 𑀆𑀤𑀻𑀦𑀯𑀁 𑀓𑀣𑁂𑀲𑀺. 𑀅𑀣𑀲𑁆𑀲 𑀢𑀁 𑀲𑀼𑀢𑁆𑀯𑀸𑀯 𑀕𑀺𑀳𑀺𑀪𑀸𑀯𑀢𑁄 𑀘𑀺𑀢𑁆𑀢𑀁 𑀯𑀺𑀭𑀚𑁆𑀚𑀺𑀢𑁆𑀯𑀸 𑀧𑀩𑁆𑀩𑀚𑁆𑀚𑀸𑀬𑀫𑁂𑀯 𑀅𑀪𑀺𑀭𑀫𑀺. 𑀏𑀯𑀫𑁂𑀲 𑀢𑀤𑀸 𑀲𑀻𑀮𑀯𑀦𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀕𑀺𑀳𑀺𑀪𑀸𑀯𑁂 𑀆𑀦𑀺𑀲𑀁𑀲𑀓𑀣𑀸𑀬 𑀓𑀣𑀺𑀢𑀢𑁆𑀢𑀸 𑀇𑀤𑀸𑀦𑀺 𑀙 𑀯𑀸𑀭𑁂 𑀯𑀺𑀩𑁆𑀪𑀫𑀺𑀢𑁆𑀯𑀸 𑀲𑀢𑁆𑀢𑀫𑁂 𑀯𑀸𑀭𑁂 𑀧𑀩𑁆𑀩𑀚𑀺𑀢𑁄. 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀲𑁆𑀲, 𑀫𑀳𑀸𑀓𑁄𑀝𑁆𑀞𑀺𑀓𑀢𑁆𑀣𑁂𑀭𑀲𑁆𑀲 𑀘 𑀅𑀪𑀺𑀥𑀫𑁆𑀫𑀓𑀣𑀁 𑀓𑀣𑁂𑀦𑁆𑀢𑀸𑀦𑀁 𑀅𑀦𑁆𑀢𑀭𑀦𑁆𑀢𑀭𑀸 𑀓𑀣𑀁 𑀑𑀧𑀸𑀢𑁂𑀢𑀺. 𑀅𑀣 𑀦𑀁 𑀫𑀳𑀸𑀓𑁄𑀝𑁆𑀞𑀺𑀓𑀢𑁆𑀣𑁂𑀭𑁄 𑀅𑀧𑀲𑀸𑀤𑁂𑀢𑀺. 𑀲𑁄 𑀫𑀳𑀸𑀲𑀸𑀯𑀓𑀲𑁆𑀲 𑀓𑀣𑀺𑀢𑁂 𑀧𑀢𑀺𑀝𑁆𑀞𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀯𑀺𑀩𑁆𑀪𑀫𑀺𑀢𑁆𑀯𑀸 𑀕𑀺𑀳𑀺 𑀚𑀸𑀢𑁄. 𑀧𑁄𑀝𑁆𑀞𑀧𑀸𑀤𑀲𑁆𑀲 𑀧𑀦𑀸𑀬𑀁 𑀕𑀺𑀳𑀺𑀲𑀳𑀸𑀬𑀓𑁄 𑀳𑁄𑀢𑀺. 𑀢𑀲𑁆𑀫𑀸 𑀯𑀺𑀩𑁆𑀪𑀫𑀺𑀢𑁆𑀯𑀸 𑀤𑁆𑀯𑀻𑀳𑀢𑀻𑀳𑀘𑁆𑀘𑀬𑁂𑀦 𑀧𑁄𑀝𑁆𑀞𑀧𑀸𑀤𑀲𑁆𑀲 𑀲𑀦𑁆𑀢𑀺𑀓𑀁 𑀕𑀢𑁄. 𑀅𑀣 𑀦𑀁 𑀲𑁄 𑀤𑀺𑀲𑁆𑀯𑀸 ‘‘𑀲𑀫𑁆𑀫 𑀓𑀺𑀁 𑀢𑀬𑀸 𑀓𑀢𑀁, 𑀏𑀯𑀭𑀽𑀧𑀲𑁆𑀲 𑀦𑀸𑀫 𑀲𑀢𑁆𑀣𑀼 𑀲𑀸𑀲𑀦𑀸 𑀅𑀧𑀲𑀓𑁆𑀓𑀦𑁆𑀢𑁄𑀲𑀺, 𑀏𑀳𑀺 𑀧𑀩𑁆𑀩𑀚𑀺𑀢𑀼𑀁 𑀇𑀤𑀸𑀦𑀺 𑀢𑁂 𑀯𑀝𑁆𑀝𑀢𑀻’’𑀢𑀺 𑀢𑀁 𑀕𑀳𑁂𑀢𑁆𑀯𑀸 𑀪𑀕𑀯𑀢𑁄 𑀲𑀦𑁆𑀢𑀺𑀓𑀁 𑀅𑀕𑀫𑀸𑀲𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀘𑀺𑀢𑁆𑀢𑁄 𑀘 𑀳𑀢𑁆𑀣𑀺𑀲𑀸𑀭𑀺𑀧𑀼𑀢𑁆𑀢𑁄 𑀧𑁄𑀝𑁆𑀞𑀧𑀸𑀤𑁄 𑀘 𑀧𑀭𑀺𑀩𑁆𑀩𑀸𑀚𑀓𑁄’’𑀢𑀺.

𑁪𑁨𑁩. 𑀅𑀦𑁆𑀥𑀸𑀢𑀺 𑀧𑀜𑁆𑀜𑀸𑀘𑀓𑁆𑀔𑀼𑀦𑁄 𑀦𑀢𑁆𑀣𑀺𑀢𑀸𑀬 𑀅𑀦𑁆𑀥𑀸, 𑀢𑀲𑁆𑀲𑁂𑀯 𑀅𑀪𑀸𑀯𑁂𑀦 𑀅𑀘𑀓𑁆𑀔𑀼𑀓𑀸. 𑀢𑁆𑀯𑀁𑀬𑁂𑀯 𑀦𑁂𑀲𑀁 𑀏𑀓𑁄 𑀘𑀓𑁆𑀔𑀼𑀫𑀸𑀢𑀺 𑀲𑀼𑀪𑀸𑀲𑀺𑀢𑀤𑀼𑀩𑁆𑀪𑀸𑀲𑀺𑀢𑀚𑀸𑀦𑀦𑀪𑀸𑀯𑀫𑀢𑁆𑀢𑁂𑀦 𑀧𑀜𑁆𑀜𑀸𑀘𑀓𑁆𑀔𑀼𑀦𑀸 𑀘𑀓𑁆𑀔𑀼𑀫𑀸. 𑀏𑀓𑀁𑀲𑀺𑀓𑀸𑀢𑀺 𑀏𑀓𑀓𑁄𑀝𑁆𑀞𑀸𑀲𑀸. 𑀧𑀜𑁆𑀜𑀢𑁆𑀢𑀸𑀢𑀺 𑀞𑀧𑀺𑀢𑀸. 𑀅𑀦𑁂𑀓𑀁𑀲𑀺𑀓𑀸𑀢𑀺 𑀦 𑀏𑀓𑀓𑁄𑀝𑁆𑀞𑀸𑀲𑀸 𑀏𑀓𑁂𑀦𑁂𑀯 𑀓𑁄𑀝𑁆𑀞𑀸𑀲𑁂𑀦 𑀲𑀲𑁆𑀲𑀢𑀸𑀢𑀺 𑀯𑀸 𑀅𑀲𑀲𑁆𑀲𑀢𑀸𑀢𑀺 𑀯𑀸 𑀦 𑀯𑀼𑀢𑁆𑀢𑀸𑀢𑀺 𑀅𑀢𑁆𑀣𑁄.

𑀏𑀓𑀁𑀲𑀺𑀓𑀥𑀫𑁆𑀫𑀯𑀡𑁆𑀡𑀦𑀸

𑁪𑁨𑁪-𑁪𑁨𑁫. 𑀲𑀦𑁆𑀢𑀺 𑀧𑁄𑀝𑁆𑀞𑀧𑀸𑀤𑀸𑀢𑀺 𑀇𑀤𑀁 𑀪𑀕𑀯𑀸 𑀓𑀲𑁆𑀫𑀸 𑀆𑀭𑀪𑀺? 𑀩𑀸𑀳𑀺𑀭𑀓𑁂𑀳𑀺 𑀧𑀜𑁆𑀜𑀸𑀧𑀺𑀢𑀦𑀺𑀝𑁆𑀞𑀸𑀬 𑀅𑀦𑀺𑀬𑁆𑀬𑀸𑀦𑀺𑀓𑀪𑀸𑀯𑀤𑀲𑁆𑀲𑀦𑀢𑁆𑀣𑀁. 𑀲𑀩𑁆𑀩𑁂 𑀳𑀺 𑀢𑀺𑀢𑁆𑀣𑀺𑀬𑀸 𑀬𑀣𑀸 𑀪𑀕𑀯𑀸 𑀅𑀫𑀢𑀁 𑀦𑀺𑀩𑁆𑀩𑀸𑀦𑀁, 𑀏𑀯𑀁 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀲𑀫𑀬𑁂 𑀮𑁄𑀓𑀣𑀼𑀧𑀺𑀓𑀸𑀤𑀺𑀯𑀲𑁂𑀦 𑀦𑀺𑀝𑁆𑀞𑀁 𑀧𑀜𑁆𑀜𑀧𑁂𑀦𑁆𑀢𑀺, 𑀲𑀸 𑀘 𑀦 𑀦𑀺𑀬𑁆𑀬𑀸𑀦𑀺𑀓𑀸. 𑀬𑀣𑀸 𑀧𑀜𑁆𑀜𑀢𑁆𑀢𑀸 𑀳𑀼𑀢𑁆𑀯𑀸 𑀦 𑀦𑀺𑀬𑁆𑀬𑀸𑀢𑀺 𑀦 𑀕𑀘𑁆𑀙𑀢𑀺, 𑀅𑀜𑁆𑀜𑀤𑀢𑁆𑀣𑀼 𑀧𑀡𑁆𑀟𑀺𑀢𑁂𑀳𑀺 𑀧𑀝𑀺𑀓𑁆𑀔𑀺𑀢𑁆𑀢𑀸 𑀦𑀺𑀯𑀢𑁆𑀢𑀢𑀺, 𑀢𑀁 𑀤𑀲𑁆𑀲𑁂𑀢𑀼𑀁 𑀪𑀕𑀯𑀸 𑀏𑀯𑀫𑀸𑀳. 𑀢𑀢𑁆𑀣 𑀏𑀓𑀦𑁆𑀢𑀲𑀼𑀔𑀁 𑀮𑁄𑀓𑀁 𑀚𑀸𑀦𑀁 𑀧𑀲𑁆𑀲𑀦𑁆𑀢𑀺 𑀧𑀼𑀭𑀢𑁆𑀣𑀺𑀫𑀸𑀬 𑀤𑀺𑀲𑀸𑀬 𑀏𑀓𑀦𑁆𑀢𑀲𑀼𑀔𑁄 𑀮𑁄𑀓𑁄 𑀧𑀘𑁆𑀙𑀺𑀫𑀸𑀤𑀻𑀦𑀁 𑀯𑀸 𑀅𑀜𑁆𑀜𑀢𑀭𑀸𑀬𑀸𑀢𑀺 𑀏𑀯𑀁 𑀚𑀸𑀦𑀦𑁆𑀢𑀸 𑀏𑀯𑀁 𑀧𑀲𑁆𑀲𑀦𑁆𑀢𑀸 𑀯𑀺𑀳𑀭𑀣. 𑀤𑀺𑀝𑁆𑀞𑀧𑀼𑀩𑁆𑀩𑀸𑀦𑀺 𑀔𑁄 𑀢𑀲𑁆𑀫𑀺𑀁 𑀮𑁄𑀓𑁂 𑀫𑀦𑀼𑀲𑁆𑀲𑀸𑀦𑀁 𑀲𑀭𑀻𑀭𑀲𑀡𑁆𑀞𑀸𑀦𑀸𑀤𑀻𑀦𑀻𑀢𑀺. 𑀅𑀧𑁆𑀧𑀸𑀝𑀺𑀳𑀻𑀭𑀓𑀢𑀦𑁆𑀢𑀺 𑀅𑀧𑁆𑀧𑀸𑀝𑀺𑀳𑀻𑀭𑀓𑀢𑀁 𑀧𑀝𑀺𑀳𑀭𑀡𑀯𑀺𑀭𑀳𑀺𑀢𑀁, 𑀅𑀦𑀺𑀬𑁆𑀬𑀸𑀦𑀺𑀓𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁪𑁨𑁬-𑁪𑁨𑁭. 𑀚𑀦𑀧𑀤𑀓𑀮𑁆𑀬𑀸𑀡𑀻𑀢𑀺 𑀚𑀦𑀧𑀤𑁂 𑀅𑀜𑁆𑀜𑀸𑀳𑀺 𑀇𑀢𑁆𑀣𑀻𑀳𑀺 𑀯𑀡𑁆𑀡𑀲𑀡𑁆𑀞𑀸𑀦𑀯𑀺𑀮𑀸𑀲𑀸𑀓𑀧𑁆𑀧𑀸𑀤𑀻𑀳𑀺 𑀅𑀲𑀤𑀺𑀲𑀸.

𑀢𑀬𑁄𑀅𑀢𑁆𑀢𑀧𑀝𑀺𑀮𑀸𑀪𑀯𑀡𑁆𑀡𑀦𑀸

𑁪𑁨𑁮. 𑀏𑀯𑀁 𑀪𑀕𑀯𑀸 𑀧𑀭𑁂𑀲𑀁 𑀦𑀺𑀝𑁆𑀞𑀸𑀬 𑀅𑀦𑀺𑀬𑁆𑀬𑀸𑀦𑀺𑀓𑀢𑁆𑀢𑀁 𑀤𑀲𑁆𑀲𑁂𑀢𑁆𑀯𑀸 𑀅𑀢𑁆𑀢𑀦𑁄 𑀦𑀺𑀝𑁆𑀞𑀸𑀬 𑀦𑀺𑀬𑁆𑀬𑀸𑀦𑀺𑀓𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 ‘‘𑀢𑀬𑁄 𑀔𑁄 𑀫𑁂 𑀧𑁄𑀝𑁆𑀞𑀧𑀸𑀤𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀢𑁆𑀢𑀧𑀝𑀺𑀮𑀸𑀪𑁄𑀢𑀺 𑀅𑀢𑁆𑀢𑀪𑀸𑀯𑀧𑀝𑀺𑀮𑀸𑀪𑁄, 𑀏𑀢𑁆𑀣 𑀘 𑀪𑀕𑀯𑀸 𑀢𑀻𑀳𑀺 𑀅𑀢𑁆𑀢𑀪𑀸𑀯𑀧𑀝𑀺𑀮𑀸𑀪𑁂𑀳𑀺 𑀢𑀬𑁄 𑀪𑀯𑁂 𑀤𑀲𑁆𑀲𑁂𑀲𑀺. 𑀑𑀴𑀸𑀭𑀺𑀓𑀢𑁆𑀢𑀪𑀸𑀯𑀧𑀝𑀺𑀮𑀸𑀪𑁂𑀦 𑀅𑀯𑀻𑀘𑀺𑀢𑁄 𑀧𑀝𑁆𑀞𑀸𑀬 𑀧𑀭𑀦𑀺𑀫𑁆𑀫𑀺𑀢𑀯𑀲𑀯𑀢𑁆𑀢𑀺𑀧𑀭𑀺𑀬𑁄𑀲𑀸𑀦𑀁 𑀓𑀸𑀫𑀪𑀯𑀁 𑀤𑀲𑁆𑀲𑁂𑀲𑀺. 𑀫𑀦𑁄𑀫𑀬𑀅𑀢𑁆𑀢𑀪𑀸𑀯𑀧𑀝𑀺𑀮𑀸𑀪𑁂𑀦 𑀧𑀞𑀫𑀚𑁆𑀛𑀸𑀦𑀪𑀽𑀫𑀺𑀢𑁄 𑀧𑀝𑁆𑀞𑀸𑀬 𑀅𑀓𑀦𑀺𑀝𑁆𑀞𑀩𑁆𑀭𑀳𑁆𑀫𑀮𑁄𑀓𑀧𑀭𑀺𑀬𑁄𑀲𑀸𑀦𑀁 𑀭𑀽𑀧𑀪𑀯𑀁 𑀤𑀲𑁆𑀲𑁂𑀲𑀺. 𑀅𑀭𑀽𑀧𑀅𑀢𑁆𑀢𑀪𑀸𑀯𑀧𑀝𑀺𑀮𑀸𑀪𑁂𑀦 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀩𑁆𑀭𑀳𑁆𑀫𑀮𑁄𑀓𑀢𑁄 𑀧𑀝𑁆𑀞𑀸𑀬 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀩𑁆𑀭𑀳𑁆𑀫𑀮𑁄𑀓𑀧𑀭𑀺𑀬𑁄𑀲𑀸𑀦𑀁 𑀅𑀭𑀽𑀧𑀪𑀯𑀁 𑀤𑀲𑁆𑀲𑁂𑀲𑀺. 𑀲𑀁𑀓𑀺𑀮𑁂𑀲𑀺𑀓𑀸 𑀥𑀫𑁆𑀫𑀸 𑀦𑀸𑀫 𑀤𑁆𑀯𑀸𑀤𑀲 𑀅𑀓𑀼𑀲𑀮𑀘𑀺𑀢𑁆𑀢𑀼𑀧𑁆𑀧𑀸𑀤𑀸. 𑀯𑁄𑀤𑀸𑀦𑀺𑀬𑀸 𑀥𑀫𑁆𑀫𑀸 𑀦𑀸𑀫 𑀲𑀫𑀣𑀯𑀺𑀧𑀲𑁆𑀲𑀦𑀸.

𑁪𑁨𑁯. 𑀧𑀜𑁆𑀜𑀸𑀧𑀸𑀭𑀺𑀧𑀽𑀭𑀺𑀁 𑀯𑁂𑀧𑀼𑀮𑁆𑀮𑀢𑁆𑀢𑀦𑁆𑀢𑀺 𑀫𑀕𑁆𑀕𑀧𑀜𑁆𑀜𑀸𑀨𑀮𑀧𑀜𑁆𑀜𑀸𑀦𑀁 𑀧𑀸𑀭𑀺𑀧𑀽𑀭𑀺𑀜𑁆𑀘𑁂𑀯 𑀯𑀺𑀧𑀼𑀮𑀪𑀸𑀯𑀜𑁆𑀘. 𑀧𑀸𑀫𑀼𑀚𑁆𑀚𑀦𑁆𑀢𑀺 𑀢𑀭𑀼𑀡𑀧𑀻𑀢𑀺. 𑀧𑀻𑀢𑀻𑀢𑀺 𑀩𑀮𑀯𑀢𑀼𑀝𑁆𑀞𑀺. 𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀺? 𑀬𑀁 𑀅𑀯𑁄𑀘𑀼𑀫𑁆𑀳 ‘‘𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀺𑀭𑀢𑀻’’𑀢𑀺, 𑀢𑀢𑁆𑀣 𑀢𑀲𑁆𑀲 𑀏𑀯𑀁 𑀯𑀺𑀳𑀭𑀢𑁄 𑀢𑀁 𑀧𑀸𑀫𑁄𑀚𑁆𑀚𑀜𑁆𑀘𑁂𑀯 𑀪𑀯𑀺𑀲𑁆𑀲𑀢𑀺, 𑀧𑀻𑀢𑀺 𑀘 𑀦𑀸𑀫𑀓𑀸𑀬𑀧𑀲𑁆𑀲𑀤𑁆𑀥𑀺 𑀘 𑀲𑀢𑀺 𑀘 𑀲𑀽𑀧𑀝𑁆𑀞𑀺𑀢𑀸 𑀉𑀢𑁆𑀢𑀫𑀜𑀸𑀡𑀜𑁆𑀘 𑀲𑀼𑀔𑁄 𑀘 𑀯𑀺𑀳𑀸𑀭𑁄. 𑀲𑀩𑁆𑀩𑀯𑀺𑀳𑀸𑀭𑁂𑀲𑀼 𑀘 𑀅𑀬𑀫𑁂𑀯 𑀯𑀺𑀳𑀸𑀭𑁄 ‘‘𑀲𑀼𑀔𑁄’’𑀢𑀺 𑀯𑀢𑁆𑀢𑀼𑀁 𑀬𑀼𑀢𑁆𑀢𑁄 ‘‘𑀉𑀧𑀲𑀦𑁆𑀢𑁄 𑀧𑀭𑀫𑀫𑀥𑀼𑀭𑁄’’𑀢𑀺. 𑀢𑀢𑁆𑀣 𑀧𑀞𑀫𑀚𑁆𑀛𑀸𑀦𑁂 𑀧𑀸𑀫𑁄𑀚𑁆𑀚𑀸𑀤𑀬𑁄 𑀙𑀧𑀺 𑀥𑀫𑁆𑀫𑀸 𑀮𑀩𑁆𑀪𑀦𑁆𑀢𑀺, 𑀤𑀼𑀢𑀺𑀬𑀚𑁆𑀛𑀸𑀦𑁂 𑀤𑀼𑀩𑁆𑀩𑀮𑀧𑀻𑀢𑀺𑀲𑀗𑁆𑀔𑀸𑀢𑀁 𑀧𑀸𑀫𑁄𑀚𑁆𑀚𑀁 𑀦𑀺𑀯𑀢𑁆𑀢𑀢𑀺, 𑀲𑁂𑀲𑀸 𑀧𑀜𑁆𑀘 𑀮𑀩𑁆𑀪𑀦𑁆𑀢𑀺. 𑀢𑀢𑀺𑀬𑁂 𑀧𑀻𑀢𑀺 𑀦𑀺𑀯𑀢𑁆𑀢𑀢𑀺, 𑀲𑁂𑀲𑀸 𑀘𑀢𑁆𑀢𑀸𑀭𑁄 𑀮𑀩𑁆𑀪𑀦𑁆𑀢𑀺. 𑀢𑀣𑀸 𑀘𑀢𑀼𑀢𑁆𑀣𑁂. 𑀇𑀫𑁂𑀲𑀼 𑀘𑀢𑀽𑀲𑀼 𑀛𑀸𑀦𑁂𑀲𑀼 𑀲𑀫𑁆𑀧𑀲𑀸𑀤𑀦𑀲𑀼𑀢𑁆𑀢𑁂 𑀲𑀼𑀤𑁆𑀥𑀯𑀺𑀧𑀲𑁆𑀲𑀦𑀸 𑀧𑀸𑀤𑀓𑀚𑁆𑀛𑀸𑀦𑀫𑁂𑀯 𑀓𑀣𑀺𑀢𑀁. 𑀧𑀸𑀲𑀸𑀤𑀺𑀓𑀲𑀼𑀢𑁆𑀢𑁂 𑀘𑀢𑀽𑀳𑀺 𑀫𑀕𑁆𑀕𑁂𑀳𑀺 𑀲𑀤𑁆𑀥𑀺𑀁 𑀯𑀺𑀧𑀲𑁆𑀲𑀦𑀸 𑀓𑀣𑀺𑀢𑀸. 𑀤𑀲𑀼𑀢𑁆𑀢𑀭𑀲𑀼𑀢𑁆𑀢𑁂 𑀘𑀢𑀼𑀢𑁆𑀣𑀚𑁆𑀛𑀸𑀦𑀺𑀓𑀨𑀮𑀲𑀫𑀸𑀧𑀢𑁆𑀢𑀺 𑀓𑀣𑀺𑀢𑀸. 𑀇𑀫𑀲𑁆𑀫𑀺𑀁 𑀧𑁄𑀝𑁆𑀞𑀧𑀸𑀤𑀲𑀼𑀢𑁆𑀢𑁂 𑀧𑀸𑀫𑁄𑀚𑁆𑀚𑀁 𑀧𑀻𑀢𑀺𑀯𑁂𑀯𑀘𑀦𑀫𑁂𑀯 𑀓𑀢𑁆𑀯𑀸 𑀤𑀼𑀢𑀺𑀬𑀚𑁆𑀛𑀸𑀦𑀺𑀓𑀨𑀮𑀲𑀫𑀸𑀧𑀢𑁆𑀢𑀺𑀦𑀸𑀫 𑀓𑀣𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑁪𑁩𑁨-𑁪𑁩𑁭. 𑀅𑀬𑀁 𑀯𑀸 𑀲𑁄𑀢𑀺 𑀏𑀢𑁆𑀣 𑀯𑀸 𑀲𑀤𑁆𑀤𑁄 𑀯𑀺𑀪𑀸𑀯𑀦𑀢𑁆𑀣𑁄 𑀳𑁄𑀢𑀺. 𑀅𑀬𑀁 𑀲𑁄𑀢𑀺 𑀏𑀯𑀁 𑀯𑀺𑀪𑀸𑀯𑁂𑀢𑁆𑀯𑀸 𑀧𑀓𑀸𑀲𑁂𑀢𑁆𑀯𑀸 𑀩𑁆𑀬𑀸𑀓𑀭𑁂𑀬𑁆𑀬𑀸𑀫. 𑀬𑀣𑀸𑀧𑀭𑁂 ‘‘𑀏𑀓𑀦𑁆𑀢𑀲𑀼𑀔𑀁 𑀅𑀢𑁆𑀢𑀸𑀦𑀁 𑀲𑀜𑁆𑀚𑀸𑀦𑀸𑀣𑀸’’𑀢𑀺 𑀧𑀼𑀝𑁆𑀞𑀸 ‘‘𑀦𑁄’’𑀢𑀺 𑀯𑀤𑀦𑁆𑀢𑀺, 𑀦 𑀏𑀯𑀁 𑀯𑀤𑀸𑀫𑀸𑀢𑀺 𑀅𑀢𑁆𑀣𑁄. 𑀲𑀧𑁆𑀧𑀸𑀝𑀺𑀳𑀻𑀭𑀓𑀢𑀦𑁆𑀢𑀺 𑀲𑀧𑁆𑀧𑀸𑀝𑀺𑀳𑀭𑀡𑀁, 𑀦𑀺𑀬𑁆𑀬𑀸𑀦𑀺𑀓𑀦𑁆𑀢𑀺 𑀅𑀢𑁆𑀣𑁄. 𑀫𑁄𑀖𑁄 𑀳𑁄𑀢𑀻𑀢𑀺 𑀢𑀼𑀘𑁆𑀙𑁄 𑀳𑁄𑀢𑀺, 𑀦𑀢𑁆𑀣𑀺 𑀲𑁄 𑀢𑀲𑁆𑀫𑀺𑀁 𑀲𑀫𑀬𑁂𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑀘𑁆𑀘𑁄 𑀳𑁄𑀢𑀻𑀢𑀺 𑀪𑀽𑀢𑁄 𑀳𑁄𑀢𑀺, 𑀲𑁆𑀯𑁂𑀯 𑀢𑀲𑁆𑀫𑀺𑀁 𑀲𑀫𑀬𑁂 𑀲𑀘𑁆𑀘𑁄 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀏𑀢𑁆𑀣 𑀧𑀦𑀸𑀬𑀁 𑀘𑀺𑀢𑁆𑀢𑁄 𑀅𑀢𑁆𑀢𑀦𑁄 𑀅𑀲𑀩𑁆𑀩𑀜𑁆𑀜𑀼𑀢𑀸𑀬 𑀢𑀬𑁄 𑀅𑀢𑁆𑀢𑀧𑀝𑀺𑀮𑀸𑀪𑁂 𑀓𑀣𑁂𑀢𑁆𑀯𑀸 𑀅𑀢𑁆𑀢𑀧𑀝𑀺𑀮𑀸𑀪𑁄 𑀦𑀸𑀫 𑀧𑀜𑁆𑀜𑀢𑁆𑀢𑀺𑀫𑀢𑁆𑀢𑀁 𑀏𑀢𑀦𑁆𑀢𑀺 𑀉𑀤𑁆𑀥𑀭𑀺𑀢𑀼𑀁 𑀦𑀸𑀲𑀓𑁆𑀔𑀺, 𑀅𑀢𑁆𑀢𑀧𑀝𑀺𑀮𑀸𑀪𑁄 𑀢𑁆𑀯𑁂𑀯 𑀦𑀺𑀬𑁆𑀬𑀸𑀢𑁂𑀲𑀺. 𑀅𑀣𑀲𑁆𑀲 𑀪𑀕𑀯𑀸 𑀭𑀽𑀧𑀸𑀤𑀬𑁄 𑀘𑁂𑀢𑁆𑀣 𑀥𑀫𑁆𑀫𑀸, 𑀅𑀢𑁆𑀢𑀧𑀝𑀺𑀮𑀸𑀪𑁄𑀢𑀺 𑀧𑀦 𑀦𑀸𑀫𑀫𑀢𑁆𑀢𑀫𑁂𑀢𑀁, 𑀢𑁂𑀲𑀼 𑀢𑁂𑀲𑀼 𑀭𑀽𑀧𑀸𑀤𑀻𑀲𑀼 𑀲𑀢𑀺 𑀏𑀯𑀭𑀽𑀧𑀸 𑀯𑁄𑀳𑀸𑀭𑀸 𑀳𑁄𑀦𑁆𑀢𑀻𑀢𑀺 𑀤𑀲𑁆𑀲𑁂𑀢𑀼𑀓𑀸𑀫𑁄 𑀢𑀲𑁆𑀲𑁂𑀯 𑀓𑀣𑀁 𑀕𑀳𑁂𑀢𑁆𑀯𑀸 𑀦𑀸𑀫𑀧𑀜𑁆𑀜𑀢𑁆𑀢𑀺𑀯𑀲𑁂𑀦 𑀦𑀺𑀬𑁆𑀬𑀸𑀢𑀦𑀢𑁆𑀣𑀁 ‘‘𑀬𑀲𑁆𑀫𑀺𑀁 𑀘𑀺𑀢𑁆𑀢 𑀲𑀫𑀬𑁂’’𑀢𑀺𑀆𑀤𑀺𑀫𑀸𑀳.

𑁪𑁩𑁮. 𑀏𑀯𑀜𑁆𑀘 𑀧𑀦 𑀯𑀢𑁆𑀯𑀸 𑀧𑀝𑀺𑀧𑀼𑀘𑁆𑀙𑀺𑀢𑁆𑀯𑀸 𑀯𑀺𑀦𑀬𑀦𑀢𑁆𑀣𑀁 𑀧𑀼𑀦 ‘‘𑀲𑀘𑁂 𑀢𑀁, 𑀘𑀺𑀢𑁆𑀢, 𑀏𑀯𑀁 𑀧𑀼𑀘𑁆𑀙𑁂𑀬𑁆𑀬𑀼’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀬𑁄 𑀫𑁂 𑀅𑀳𑁄𑀲𑀺 𑀅𑀢𑀻𑀢𑁄 𑀅𑀢𑁆𑀢𑀧𑀝𑀺𑀮𑀸𑀪𑁄, 𑀲𑁆𑀯𑁂𑀯 𑀫𑁂 𑀅𑀢𑁆𑀢𑀧𑀝𑀺𑀮𑀸𑀪𑁄, 𑀢𑀲𑁆𑀫𑀺𑀁 𑀲𑀫𑀬𑁂 𑀲𑀘𑁆𑀘𑁄 𑀅𑀳𑁄𑀲𑀺, 𑀫𑁄𑀖𑁄 𑀅𑀦𑀸𑀕𑀢𑁄 𑀫𑁄𑀖𑁄 𑀧𑀘𑁆𑀘𑀼𑀧𑁆𑀧𑀦𑁆𑀦𑁄𑀢𑀺 𑀏𑀢𑁆𑀣 𑀢𑀸𑀯 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀺 𑁋 𑀬𑀲𑁆𑀫𑀸 𑀬𑁂 𑀢𑁂 𑀅𑀢𑀻𑀢𑀸 𑀥𑀫𑁆𑀫𑀸, 𑀢𑁂 𑀏𑀢𑀭𑀳𑀺 𑀦𑀢𑁆𑀣𑀺, 𑀅𑀳𑁂𑀲𑀼𑀦𑁆𑀢𑀺 𑀧𑀦 𑀲𑀗𑁆𑀔𑁆𑀬𑀁 𑀕𑀢𑀸, 𑀢𑀲𑁆𑀫𑀸 𑀲𑁄𑀧𑀺 𑀫𑁂 𑀅𑀢𑁆𑀢𑀧𑀝𑀺𑀮𑀸𑀪𑁄 𑀢𑀲𑁆𑀫𑀺𑀁𑀬𑁂𑀯 𑀲𑀫𑀬𑁂 𑀲𑀘𑁆𑀘𑁄 𑀅𑀳𑁄𑀲𑀺. 𑀅𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀁 𑀧𑀦 𑀥𑀫𑁆𑀫𑀸𑀦𑀁 𑀢𑀤𑀸 𑀅𑀪𑀸𑀯𑀸 𑀢𑀲𑁆𑀫𑀺𑀁 𑀲𑀫𑀬𑁂 ‘‘𑀫𑁄𑀖𑁄 𑀅𑀦𑀸𑀕𑀢𑁄, 𑀫𑁄𑀖𑁄 𑀧𑀘𑁆𑀘𑀼𑀧𑁆𑀧𑀦𑁆𑀦𑁄’’𑀢𑀺, 𑀏𑀯𑀁 𑀅𑀢𑁆𑀣𑀢𑁄 𑀦𑀸𑀫𑀫𑀢𑁆𑀢𑀫𑁂𑀯 𑀅𑀢𑁆𑀢𑀧𑀝𑀺𑀮𑀸𑀪𑀁 𑀧𑀝𑀺𑀚𑀸𑀦𑀸𑀢𑀺. 𑀅𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑁪𑁩𑁯-𑁪𑁪𑁩. 𑀅𑀣 𑀪𑀕𑀯𑀸 𑀢𑀲𑁆𑀲 𑀩𑁆𑀬𑀸𑀓𑀭𑀡𑁂𑀦 𑀲𑀤𑁆𑀥𑀺𑀁 𑀅𑀢𑁆𑀢𑀦𑁄 𑀩𑁆𑀬𑀸𑀓𑀭𑀡𑀁 𑀲𑀁𑀲𑀦𑁆𑀤𑀺𑀢𑀼𑀁 ‘‘𑀏𑀯𑀫𑁂𑀯 𑀔𑁄 𑀘𑀺𑀢𑁆𑀢𑀸’’𑀢𑀺𑀆𑀤𑀻𑀦𑀺 𑀯𑀢𑁆𑀯𑀸 𑀧𑀼𑀦 𑀑𑀧𑀫𑁆𑀫𑀢𑁄 𑀢𑀫𑀢𑁆𑀣𑀁 𑀲𑀸𑀥𑁂𑀦𑁆𑀢𑁄 ‘‘𑀲𑁂𑀬𑁆𑀬𑀣𑀸𑀧𑀺 𑀘𑀺𑀢𑁆𑀢 𑀕𑀯𑀸 𑀔𑀻𑀭’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀭𑀸𑀬𑀁 𑀲𑀗𑁆𑀔𑁂𑀧𑀢𑁆𑀣𑁄, 𑀬𑀣𑀸 𑀕𑀯𑀸 𑀔𑀻𑀭𑀁, 𑀔𑀻𑀭𑀸𑀤𑀻𑀳𑀺 𑀘 𑀤𑀥𑀺𑀆𑀤𑀻𑀦𑀺 𑀪𑀯𑀦𑁆𑀢𑀺, 𑀢𑀢𑁆𑀣 𑀬𑀲𑁆𑀫𑀺𑀁 𑀲𑀫𑀬𑁂 𑀔𑀻𑀭𑀁 𑀳𑁄𑀢𑀺, 𑀦 𑀢𑀲𑁆𑀫𑀺𑀁 𑀲𑀫𑀬𑁂 𑀤𑀥𑀻𑀢𑀺 𑀯𑀸 𑀦𑀯𑀦𑀻𑀢𑀸𑀤𑀻𑀲𑀼 𑀯𑀸 𑀅𑀜𑁆𑀜𑀢𑀭𑀦𑁆𑀢𑀺 𑀲𑀗𑁆𑀔𑁆𑀬𑀁 𑀦𑀺𑀭𑀼𑀢𑁆𑀢𑀺𑀁 𑀦𑀸𑀫𑀁 𑀯𑁄𑀳𑀸𑀭𑀁 𑀕𑀘𑁆𑀙𑀢𑀺. 𑀓𑀲𑁆𑀫𑀸? 𑀬𑁂 𑀥𑀫𑁆𑀫𑁂 𑀉𑀧𑀸𑀤𑀸𑀬 𑀤𑀥𑀻𑀢𑀺𑀆𑀤𑀺 𑀯𑁄𑀳𑀸𑀭𑀸 𑀳𑁄𑀦𑁆𑀢𑀺, 𑀢𑁂𑀲𑀁 𑀅𑀪𑀸𑀯𑀸. 𑀅𑀣 𑀔𑁄 𑀔𑀻𑀭𑀁 𑀢𑁆𑀯𑁂𑀯 𑀢𑀲𑁆𑀫𑀺𑀁 𑀲𑀫𑀬𑁂 𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀺. 𑀓𑀲𑁆𑀫𑀸? 𑀬𑁂 𑀥𑀫𑁆𑀫𑁂 𑀉𑀧𑀸𑀤𑀸𑀬 𑀔𑀻𑀭𑀦𑁆𑀢𑀺 𑀲𑀗𑁆𑀔𑁆𑀬𑀸 𑀦𑀺𑀭𑀼𑀢𑁆𑀢𑀺 𑀦𑀸𑀫𑀁 𑀯𑁄𑀳𑀸𑀭𑁄 𑀳𑁄𑀢𑀺, 𑀢𑁂𑀲𑀁 𑀪𑀸𑀯𑀸𑀢𑀺. 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣. 𑀇𑀫𑀸 𑀔𑁄 𑀘𑀺𑀢𑁆𑀢𑀸𑀢𑀺 𑀑𑀴𑀸𑀭𑀺𑀓𑁄 𑀅𑀢𑁆𑀢𑀧𑀝𑀺𑀮𑀸𑀪𑁄 𑀇𑀢𑀺 𑀘 𑀫𑀦𑁄𑀫𑀬𑁄 𑀅𑀢𑁆𑀢𑀧𑀝𑀺𑀮𑀸𑀪𑁄 𑀇𑀢𑀺 𑀘 𑀅𑀭𑀽𑀧𑁄 𑀅𑀢𑁆𑀢𑀧𑀝𑀺𑀮𑀸𑀪𑁄 𑀇𑀢𑀺 𑀘 𑀇𑀫𑀸 𑀔𑁄 𑀘𑀺𑀢𑁆𑀢 𑀮𑁄𑀓𑀲𑀫𑀜𑁆𑀜𑀸 𑀮𑁄𑀓𑁂 𑀲𑀫𑀜𑁆𑀜𑀸𑀫𑀢𑁆𑀢𑀓𑀸𑀦𑀺 𑀲𑀫𑀦𑀼𑀚𑀸𑀦𑀦𑀫𑀢𑁆𑀢𑀓𑀸𑀦𑀺 𑀏𑀢𑀸𑀦𑀺. 𑀢𑀣𑀸 𑀮𑁄𑀓𑀦𑀺𑀭𑀼𑀢𑁆𑀢𑀺𑀫𑀢𑁆𑀢𑀓𑀸𑀦𑀺 𑀯𑀘𑀦𑀧𑀣𑀫𑀢𑁆𑀢𑀓𑀸𑀦𑀺 𑀯𑁄𑀳𑀸𑀭𑀫𑀢𑁆𑀢𑀓𑀸𑀦𑀺 𑀦𑀸𑀫𑀧𑀡𑁆𑀡𑀢𑁆𑀢𑀺𑀫𑀢𑁆𑀢𑀓𑀸𑀦𑀺 𑀏𑀢𑀸𑀦𑀻𑀢𑀺. 𑀏𑀯𑀁 𑀪𑀕𑀯𑀸 𑀳𑁂𑀝𑁆𑀞𑀸 𑀢𑀬𑁄 𑀅𑀢𑁆𑀢𑀧𑀝𑀺𑀮𑀸𑀪𑁂 𑀓𑀣𑁂𑀢𑁆𑀯𑀸 𑀇𑀤𑀸𑀦𑀺 𑀲𑀩𑁆𑀩𑀫𑁂𑀢𑀁 𑀯𑁄𑀳𑀸𑀭𑀫𑀢𑁆𑀢𑀓𑀦𑁆𑀢𑀺 𑀯𑀤𑀢𑀺. 𑀓𑀲𑁆𑀫𑀸? 𑀬𑀲𑁆𑀫𑀸 𑀧𑀭𑀫𑀢𑁆𑀣𑀢𑁄 𑀲𑀢𑁆𑀢𑁄 𑀦𑀸𑀫 𑀦𑀢𑁆𑀣𑀺, 𑀲𑀼𑀜𑁆𑀜𑁄 𑀢𑀼𑀘𑁆𑀙𑁄 𑀏𑀲 𑀮𑁄𑀓𑁄.

𑀩𑀼𑀤𑁆𑀥𑀸𑀦𑀁 𑀧𑀦 𑀤𑁆𑀯𑁂 𑀓𑀣𑀸 𑀲𑀫𑁆𑀫𑀼𑀢𑀺𑀓𑀣𑀸 𑀘 𑀧𑀭𑀫𑀢𑁆𑀣𑀓𑀣𑀸 𑀘. 𑀢𑀢𑁆𑀣 ‘‘𑀲𑀢𑁆𑀢𑁄 𑀧𑁄𑀲𑁄 𑀤𑁂𑀯𑁄 𑀩𑁆𑀭𑀳𑁆𑀫𑀸’’𑀢𑀺𑀆𑀤𑀺𑀓𑀸 ‘‘𑀲𑀫𑁆𑀫𑀼𑀢𑀺𑀓𑀣𑀸’’ 𑀦𑀸𑀫. ‘‘𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀫𑀦𑀢𑁆𑀢𑀸 𑀔𑀦𑁆𑀥𑀸 𑀥𑀸𑀢𑀼𑀬𑁄 𑀆𑀬𑀢𑀦𑀸𑀦𑀺 𑀲𑀢𑀺𑀧𑀝𑁆𑀞𑀸𑀦𑀸 𑀲𑀫𑁆𑀫𑀧𑁆𑀧𑀥𑀸𑀦𑀸’’𑀢𑀺𑀆𑀤𑀺𑀓𑀸 𑀧𑀭𑀫𑀢𑁆𑀣𑀓𑀣𑀸 𑀦𑀸𑀫. 𑀢𑀢𑁆𑀣 𑀬𑁄 𑀲𑀫𑁆𑀫𑀼𑀢𑀺𑀤𑁂𑀲𑀦𑀸𑀬 ‘‘𑀲𑀢𑁆𑀢𑁄’’𑀢𑀺 𑀯𑀸 ‘‘𑀧𑁄𑀲𑁄’’𑀢𑀺 𑀯𑀸 ‘‘𑀤𑁂𑀯𑁄’’𑀢𑀺 𑀯𑀸 ‘‘𑀩𑁆𑀭𑀳𑁆𑀫𑀸’’𑀢𑀺 𑀯𑀸 𑀯𑀼𑀢𑁆𑀢𑁂 𑀯𑀺𑀚𑀸𑀦𑀺𑀢𑀼𑀁 𑀧𑀝𑀺𑀯𑀺𑀚𑁆𑀛𑀺𑀢𑀼𑀁 𑀦𑀺𑀬𑁆𑀬𑀸𑀢𑀼𑀁 𑀅𑀭𑀳𑀢𑁆𑀢𑀚𑀬𑀕𑁆𑀕𑀸𑀳𑀁 𑀕𑀳𑁂𑀢𑀼𑀁 𑀲𑀓𑁆𑀓𑁄𑀢𑀺, 𑀢𑀲𑁆𑀲 𑀪𑀕𑀯𑀸 𑀆𑀤𑀺𑀢𑁄𑀯 ‘‘𑀲𑀢𑁆𑀢𑁄’’𑀢𑀺 𑀯𑀸 ‘‘𑀧𑁄𑀲𑁄’’𑀢𑀺 𑀯𑀸 ‘‘𑀤𑁂𑀯𑁄’’𑀢𑀺 𑀯𑀸 ‘‘𑀩𑁆𑀭𑀳𑁆𑀫𑀸’’𑀢𑀺 𑀯𑀸 𑀓𑀣𑁂𑀢𑀺, 𑀬𑁄 𑀧𑀭𑀫𑀢𑁆𑀣𑀤𑁂𑀲𑀦𑀸𑀬 ‘‘𑀅𑀦𑀺𑀘𑁆𑀘’’𑀦𑁆𑀢𑀺 𑀯𑀸 ‘‘𑀤𑀼𑀓𑁆𑀔’’𑀦𑁆𑀢𑀺 𑀯𑀸𑀢𑀺𑀆𑀤𑀻𑀲𑀼 𑀅𑀜𑁆𑀜𑀢𑀭𑀁 𑀲𑀼𑀢𑁆𑀯𑀸 𑀯𑀺𑀚𑀸𑀦𑀺𑀢𑀼𑀁 𑀧𑀝𑀺𑀯𑀺𑀚𑁆𑀛𑀺𑀢𑀼𑀁 𑀦𑀺𑀬𑁆𑀬𑀸𑀢𑀼𑀁 𑀅𑀭𑀳𑀢𑁆𑀢𑀚𑀬𑀕𑁆𑀕𑀸𑀳𑀁 𑀕𑀳𑁂𑀢𑀼𑀁 𑀲𑀓𑁆𑀓𑁄𑀢𑀺, 𑀢𑀲𑁆𑀲 ‘‘𑀅𑀦𑀺𑀘𑁆𑀘’’𑀦𑁆𑀢𑀺 𑀯𑀸 ‘‘𑀤𑀼𑀓𑁆𑀔’’𑀦𑁆𑀢𑀺 𑀯𑀸𑀢𑀺𑀆𑀤𑀻𑀲𑀼 𑀅𑀜𑁆𑀜𑀢𑀭𑀫𑁂𑀯 𑀓𑀣𑁂𑀢𑀺. 𑀢𑀣𑀸 𑀲𑀫𑁆𑀫𑀼𑀢𑀺𑀓𑀣𑀸𑀬 𑀩𑀼𑀚𑁆𑀛𑀦𑀓𑀲𑀢𑁆𑀢𑀲𑁆𑀲𑀸𑀧𑀺 𑀦 𑀧𑀞𑀫𑀁 𑀧𑀭𑀫𑀢𑁆𑀣𑀓𑀣𑀁 𑀓𑀣𑁂𑀢𑀺. 𑀲𑀫𑁆𑀫𑀼𑀢𑀺𑀓𑀣𑀸𑀬 𑀧𑀦 𑀩𑁄𑀥𑁂𑀢𑁆𑀯𑀸 𑀧𑀘𑁆𑀙𑀸 𑀧𑀭𑀫𑀢𑁆𑀣𑀓𑀣𑀁 𑀓𑀣𑁂𑀢𑀺. 𑀧𑀭𑀫𑀢𑁆𑀣𑀓𑀣𑀸𑀬 𑀩𑀼𑀚𑁆𑀛𑀦𑀓𑀲𑀢𑁆𑀢𑀲𑁆𑀲𑀸𑀧𑀺 𑀦 𑀧𑀞𑀫𑀁 𑀲𑀫𑁆𑀫𑀼𑀢𑀺𑀓𑀣𑀁 𑀓𑀣𑁂𑀢𑀺. 𑀧𑀭𑀫𑀢𑁆𑀣𑀓𑀣𑀸𑀬 𑀧𑀦 𑀩𑁄𑀥𑁂𑀢𑁆𑀯𑀸 𑀧𑀘𑁆𑀙𑀸 𑀲𑀫𑁆𑀫𑀼𑀢𑀺𑀓𑀣𑀁 𑀓𑀣𑁂𑀢𑀺. 𑀧𑀓𑀢𑀺𑀬𑀸 𑀧𑀦 𑀧𑀞𑀫𑀫𑁂𑀯 𑀧𑀭𑀫𑀢𑁆𑀣𑀓𑀣𑀁 𑀓𑀣𑁂𑀦𑁆𑀢𑀲𑁆𑀲 𑀤𑁂𑀲𑀦𑀸 𑀮𑀽𑀔𑀸𑀓𑀸𑀭𑀸 𑀳𑁄𑀢𑀺, 𑀢𑀲𑁆𑀫𑀸 𑀩𑀼𑀤𑁆𑀥𑀸 𑀧𑀞𑀫𑀁 𑀲𑀫𑁆𑀫𑀼𑀢𑀺𑀓𑀣𑀁 𑀓𑀣𑁂𑀢𑁆𑀯𑀸 𑀧𑀘𑁆𑀙𑀸 𑀧𑀭𑀫𑀢𑁆𑀣𑀓𑀣𑀁 𑀓𑀣𑁂𑀦𑁆𑀢𑀺. 𑀲𑀫𑁆𑀫𑀼𑀢𑀺𑀓𑀣𑀁 𑀓𑀣𑁂𑀦𑁆𑀢𑀸𑀧𑀺 𑀲𑀘𑁆𑀘𑀫𑁂𑀯 𑀲𑀪𑀸𑀯𑀫𑁂𑀯 𑀅𑀫𑀼𑀲𑀸𑀯 𑀓𑀣𑁂𑀦𑁆𑀢𑀺. 𑀧𑀭𑀫𑀢𑁆𑀣𑀓𑀣𑀁 𑀓𑀣𑁂𑀦𑁆𑀢𑀸𑀧𑀺 𑀲𑀘𑁆𑀘𑀫𑁂𑀯 𑀲𑀪𑀸𑀯𑀫𑁂𑀯 𑀅𑀫𑀼𑀲𑀸𑀯 𑀓𑀣𑁂𑀦𑁆𑀢𑀺.

𑀤𑀼𑀯𑁂 𑀲𑀘𑁆𑀘𑀸𑀦𑀺 𑀅𑀓𑁆𑀔𑀸𑀲𑀺, 𑀲𑀫𑁆𑀩𑀼𑀤𑁆𑀥𑁄 𑀯𑀤𑀢𑀁 𑀯𑀭𑁄;

𑀲𑀫𑁆𑀫𑀼𑀢𑀺𑀁 𑀧𑀭𑀫𑀢𑁆𑀣𑀜𑁆𑀘, 𑀢𑀢𑀺𑀬𑀁 𑀦𑀽𑀧𑀮𑀩𑁆𑀪𑀢𑀺.

𑀲𑀗𑁆𑀓𑁂𑀢𑀯𑀘𑀦𑀁 𑀲𑀘𑁆𑀘𑀁, 𑀮𑁄𑀓𑀲𑀫𑁆𑀫𑀼𑀢𑀺𑀓𑀸𑀭𑀡𑀁;

𑀧𑀭𑀫𑀢𑁆𑀣𑀯𑀘𑀦𑀁 𑀲𑀘𑁆𑀘𑀁, 𑀥𑀫𑁆𑀫𑀸𑀦𑀁 𑀪𑀽𑀢𑀮𑀓𑁆𑀔𑀡𑀦𑁆𑀢𑀺.

𑀬𑀸𑀳𑀺 𑀢𑀣𑀸𑀕𑀢𑁄 𑀯𑁄𑀳𑀭𑀢𑀺 𑀅𑀧𑀭𑀸𑀫𑀲𑀦𑁆𑀢𑀺 𑀬𑀸𑀳𑀺 𑀮𑁄𑀓𑀲𑀫𑀜𑁆𑀜𑀸𑀳𑀺 𑀮𑁄𑀓𑀦𑀺𑀭𑀼𑀢𑁆𑀢𑀻𑀳𑀺 𑀢𑀣𑀸𑀕𑀢𑁄 𑀢𑀡𑁆𑀳𑀸𑀫𑀸𑀦𑀤𑀺𑀝𑁆𑀞𑀺𑀧𑀭𑀸𑀫𑀸𑀲𑀸𑀦𑀁 𑀅𑀪𑀸𑀯𑀸 𑀅𑀧𑀭𑀸𑀫𑀲𑀦𑁆𑀢𑁄 𑀯𑁄𑀳𑀭𑀢𑀻𑀢𑀺 𑀤𑁂𑀲𑀦𑀁 𑀯𑀺𑀦𑀺𑀯𑀝𑁆𑀝𑁂𑀢𑁆𑀯𑀸 𑀅𑀭𑀳𑀢𑁆𑀢𑀦𑀺𑀓𑀽𑀝𑁂𑀦 𑀦𑀺𑀝𑁆𑀞𑀸𑀧𑁂𑀲𑀺. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀇𑀢𑀺 𑀲𑀼𑀫𑀗𑁆𑀕𑀮𑀯𑀺𑀮𑀸𑀲𑀺𑀦𑀺𑀬𑀸 𑀤𑀻𑀖𑀦𑀺𑀓𑀸𑀬𑀝𑁆𑀞𑀓𑀣𑀸𑀬𑀁

𑀧𑁄𑀝𑁆𑀞𑀧𑀸𑀤𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.