𑁭. 𑀚𑀸𑀮𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑀤𑁆𑀯𑁂 𑀧𑀩𑁆𑀩𑀚𑀺𑀢𑀯𑀢𑁆𑀣𑀼𑀯𑀡𑁆𑀡𑀦𑀸

𑁩𑁭𑁮. 𑀏𑀯𑀁 𑀫𑁂 𑀲𑀼𑀢𑀁…𑀧𑁂… 𑀓𑁄𑀲𑀫𑁆𑀩𑀺𑀬𑀦𑁆𑀢𑀺 𑀚𑀸𑀮𑀺𑀬𑀲𑀼𑀢𑁆𑀢𑀁. 𑀢𑀢𑁆𑀭𑀸𑀬𑀁 𑀅𑀧𑀼𑀩𑁆𑀩𑀧𑀤𑀯𑀡𑁆𑀡𑀦𑀸. 𑀖𑁄𑀲𑀺𑀢𑀸𑀭𑀸𑀫𑁂𑀢𑀺 𑀖𑁄𑀲𑀺𑀢𑁂𑀦 𑀲𑁂𑀝𑁆𑀞𑀺𑀦𑀸 𑀓𑀢𑁂 𑀆𑀭𑀸𑀫𑁂. 𑀧𑀼𑀩𑁆𑀩𑁂 𑀓𑀺𑀭 𑀅𑀮𑁆𑀮𑀓𑀧𑁆𑀧𑀭𑀝𑁆𑀞𑀁 𑀦𑀸𑀫 𑀅𑀳𑁄𑀲𑀺. 𑀢𑀢𑁄 𑀓𑁄𑀢𑀽𑀳𑀮𑀺𑀓𑁄 𑀦𑀸𑀫 𑀤𑀮𑀺𑀤𑁆𑀤𑁄 𑀙𑀸𑀢𑀓𑀪𑀬𑁂𑀦 𑀲𑀧𑀼𑀢𑁆𑀢𑀤𑀸𑀭𑁄 𑀅𑀯𑀦𑁆𑀢𑀺𑀭𑀝𑁆𑀞𑀁 𑀕𑀘𑁆𑀙𑀦𑁆𑀢𑁄 𑀧𑀼𑀢𑁆𑀢𑀁 𑀯𑀳𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀙𑀟𑁆𑀟𑁂𑀢𑁆𑀯𑀸 𑀅𑀕𑀫𑀸𑀲𑀺, 𑀫𑀸𑀢𑀸 𑀦𑀺𑀯𑀢𑁆𑀢𑀺𑀢𑁆𑀯𑀸 𑀢𑀁 𑀕𑀳𑁂𑀢𑁆𑀯𑀸 𑀕𑀢𑀸, 𑀢𑁂 𑀏𑀓𑀁 𑀕𑁄𑀧𑀸𑀮𑀓𑀕𑀸𑀫𑀁 𑀧𑀯𑀺𑀲𑀺𑀁𑀲𑀼. 𑀕𑁄𑀧𑀸𑀮𑀓𑁂𑀦 𑀘 𑀢𑀤𑀸 𑀩𑀳𑀼𑀧𑀸𑀬𑀸𑀲𑁄 𑀧𑀝𑀺𑀬𑀢𑁆𑀢𑁄 𑀳𑁄𑀢𑀺, 𑀢𑁂 𑀢𑀢𑁄 𑀧𑀸𑀬𑀸𑀲𑀁 𑀮𑀪𑀺𑀢𑁆𑀯𑀸 𑀪𑀼𑀜𑁆𑀚𑀺𑀁𑀲𑀼. 𑀅𑀣 𑀲𑁄 𑀧𑀼𑀭𑀺𑀲𑁄 𑀩𑀮𑀯𑀧𑀸𑀬𑀸𑀲𑀁 𑀪𑀼𑀢𑁆𑀢𑁄 𑀚𑀻𑀭𑀸𑀧𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀭𑀢𑁆𑀢𑀺𑀪𑀸𑀕𑁂 𑀓𑀸𑀮𑀁 𑀓𑀢𑁆𑀯𑀸 𑀢𑀢𑁆𑀣𑁂𑀯 𑀲𑀼𑀦𑀔𑀺𑀬𑀸 𑀓𑀼𑀘𑁆𑀙𑀺𑀲𑁆𑀫𑀺𑀁 𑀧𑀝𑀺𑀲𑀦𑁆𑀥𑀺𑀁 𑀕𑀳𑁂𑀢𑁆𑀯𑀸 𑀓𑀼𑀓𑁆𑀓𑀼𑀭𑁄 𑀚𑀸𑀢𑁄, 𑀲𑁄 𑀕𑁄𑀧𑀸𑀮𑀓𑀲𑁆𑀲 𑀧𑀺𑀬𑁄 𑀅𑀳𑁄𑀲𑀺. 𑀕𑁄𑀧𑀸𑀮𑀓𑁄 𑀘 𑀧𑀘𑁆𑀘𑁂𑀓𑀩𑀼𑀤𑁆𑀥𑀁 𑀉𑀧𑀝𑁆𑀞𑀳𑀢𑀺. 𑀧𑀘𑁆𑀘𑁂𑀓𑀩𑀼𑀤𑁆𑀥𑁄𑀧𑀺 𑀪𑀢𑁆𑀢𑀓𑀺𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀓𑀼𑀓𑁆𑀓𑀼𑀭𑀲𑁆𑀲 𑀏𑀓𑁂𑀓𑀁 𑀧𑀺𑀡𑁆𑀟𑀁 𑀤𑁂𑀢𑀺, 𑀲𑁄 𑀧𑀘𑁆𑀘𑁂𑀓𑀩𑀼𑀤𑁆𑀥𑁂 𑀲𑀺𑀦𑁂𑀳𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀕𑁄𑀧𑀸𑀮𑀓𑁂𑀦 𑀲𑀤𑁆𑀥𑀺𑀁 𑀧𑀡𑁆𑀡𑀲𑀸𑀮𑀫𑁆𑀧𑀺 𑀕𑀘𑁆𑀙𑀢𑀺. 𑀕𑁄𑀧𑀸𑀮𑀓𑁂 𑀅𑀲𑀦𑁆𑀦𑀺𑀳𑀺𑀢𑁂 𑀪𑀢𑁆𑀢𑀯𑁂𑀮𑀸𑀬𑀁 𑀲𑀬𑀫𑁂𑀯 𑀕𑀦𑁆𑀢𑁆𑀯𑀸 𑀓𑀸𑀮𑀸𑀭𑁄𑀘𑀦𑀢𑁆𑀣𑀁 𑀧𑀡𑁆𑀡𑀲𑀸𑀮𑀤𑁆𑀯𑀸𑀭𑁂 𑀪𑀼𑀲𑁆𑀲𑀢𑀺, 𑀅𑀦𑁆𑀢𑀭𑀸𑀫𑀕𑁆𑀕𑁂𑀧𑀺 𑀘𑀡𑁆𑀟𑀫𑀺𑀕𑁂 𑀤𑀺𑀲𑁆𑀯𑀸 𑀪𑀼𑀲𑁆𑀲𑀺𑀢𑁆𑀯𑀸 𑀧𑀮𑀸𑀧𑁂𑀢𑀺. 𑀲𑁄 𑀧𑀘𑁆𑀘𑁂𑀓𑀩𑀼𑀤𑁆𑀥𑁂 𑀫𑀼𑀤𑀼𑀓𑁂𑀦 𑀘𑀺𑀢𑁆𑀢𑁂𑀦 𑀓𑀸𑀮𑀁𑀓𑀢𑁆𑀯𑀸 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺. 𑀢𑀢𑁆𑀭𑀲𑁆𑀲 𑀖𑁄𑀲𑀓𑀤𑁂𑀯𑀧𑀼𑀢𑁆𑀢𑁄 𑀢𑁆𑀯𑁂𑀯 𑀦𑀸𑀫𑀁 𑀅𑀳𑁄𑀲𑀺. 𑀲𑁄 𑀤𑁂𑀯𑀮𑁄𑀓𑀢𑁄 𑀘𑀯𑀺𑀢𑁆𑀯𑀸 𑀓𑁄𑀲𑀫𑁆𑀩𑀺𑀬𑀁 𑀏𑀓𑀲𑁆𑀲 𑀓𑀼𑀮𑀲𑁆𑀲 𑀖𑀭𑁂 𑀦𑀺𑀩𑁆𑀩𑀢𑁆𑀢𑀺. 𑀢𑀁 𑀅𑀧𑀼𑀢𑁆𑀢𑀓𑁄 𑀲𑁂𑀝𑁆𑀞𑀺 𑀢𑀲𑁆𑀲 𑀫𑀸𑀢𑀸𑀧𑀺𑀢𑀽𑀦𑀁 𑀥𑀦𑀁 𑀤𑀢𑁆𑀯𑀸 𑀧𑀼𑀢𑁆𑀢𑀁 𑀓𑀢𑁆𑀯𑀸 𑀅𑀕𑁆𑀕𑀳𑁂𑀲𑀺. 𑀅𑀣 𑀅𑀢𑁆𑀢𑀦𑁄 𑀧𑀼𑀢𑁆𑀢𑁂 𑀚𑀸𑀢𑁂 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀖𑀸𑀢𑀸𑀧𑁂𑀢𑀼𑀁 𑀉𑀧𑀓𑁆𑀓𑀫𑀺. 𑀲𑁄 𑀧𑀼𑀜𑁆𑀜𑀯𑀦𑁆𑀢𑀢𑀸𑀬 𑀲𑀢𑁆𑀢𑀲𑀼𑀧𑀺 𑀞𑀸𑀦𑁂𑀲𑀼 𑀫𑀭𑀡𑀁 𑀅𑀧𑁆𑀧𑀢𑁆𑀯𑀸 𑀅𑀯𑀲𑀸𑀦𑁂 𑀏𑀓𑀸𑀬 𑀲𑁂𑀝𑁆𑀞𑀺𑀥𑀻𑀢𑀸𑀬 𑀯𑁂𑀬𑁆𑀬𑀢𑁆𑀢𑀺𑀬𑁂𑀦 𑀮𑀤𑁆𑀥𑀚𑀻𑀯𑀺𑀢𑁄 𑀅𑀧𑀭𑀪𑀸𑀕𑁂 𑀧𑀺𑀢𑀼𑀅𑀘𑁆𑀘𑀬𑁂𑀦 𑀲𑁂𑀝𑁆𑀞𑀺𑀝𑁆𑀞𑀸𑀦𑀁 𑀧𑀢𑁆𑀯𑀸 𑀖𑁄𑀲𑀓𑀲𑁂𑀝𑁆𑀞𑀺 𑀦𑀸𑀫 𑀚𑀸𑀢𑁄. 𑀅𑀜𑁆𑀜𑁂𑀧𑀺 𑀓𑁄𑀲𑀫𑁆𑀩𑀺𑀬𑀁 𑀓𑀼𑀓𑁆𑀓𑀼𑀝𑀲𑁂𑀝𑁆𑀞𑀺, 𑀧𑀸𑀯𑀸𑀭𑀺𑀬𑀲𑁂𑀝𑁆𑀞𑀻𑀢𑀺 𑀤𑁆𑀯𑁂 𑀲𑁂𑀝𑁆𑀞𑀺𑀦𑁄 𑀅𑀢𑁆𑀣𑀺, 𑀇𑀫𑀺𑀦𑀸 𑀲𑀤𑁆𑀥𑀺𑀁 𑀢𑀬𑁄 𑀅𑀳𑁂𑀲𑀼𑀁.

𑀢𑁂𑀦 𑀘 𑀲𑀫𑀬𑁂𑀦 𑀳𑀺𑀫𑀯𑀦𑁆𑀢𑀢𑁄 𑀧𑀜𑁆𑀘𑀲𑀢𑀢𑀸𑀧𑀲𑀸 𑀲𑀭𑀻𑀭𑀲𑀦𑁆𑀢𑀧𑁆𑀧𑀦𑀢𑁆𑀣𑀁 𑀅𑀦𑁆𑀢𑀭𑀦𑁆𑀢𑀭𑀸𑀓𑁄𑀲𑀫𑁆𑀩𑀺𑀁 𑀆𑀕𑀘𑁆𑀙𑀦𑁆𑀢𑀺, 𑀢𑁂𑀲𑀁 𑀏𑀢𑁂 𑀢𑀬𑁄 𑀲𑁂𑀝𑁆𑀞𑀻 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀉𑀬𑁆𑀬𑀸𑀦𑁂𑀲𑀼 𑀧𑀡𑁆𑀡𑀓𑀼𑀝𑀺𑀬𑁄 𑀓𑀢𑁆𑀯𑀸 𑀉𑀧𑀝𑁆𑀞𑀸𑀦𑀁 𑀓𑀭𑁄𑀦𑁆𑀢𑀺. 𑀅𑀣𑁂𑀓𑀤𑀺𑀯𑀲𑀁 𑀢𑁂 𑀢𑀸𑀧𑀲𑀸 𑀳𑀺𑀫𑀯𑀦𑁆𑀢𑀢𑁄 𑀆𑀕𑀘𑁆𑀙𑀦𑁆𑀢𑀸 𑀫𑀳𑀸𑀓𑀦𑁆𑀢𑀸𑀭𑁂 𑀢𑀲𑀺𑀢𑀸 𑀓𑀺𑀮𑀦𑁆𑀢𑀸 𑀏𑀓𑀁 𑀫𑀳𑀦𑁆𑀢𑀁 𑀯𑀝𑀭𑀼𑀓𑁆𑀔𑀁 𑀧𑀢𑁆𑀯𑀸 𑀢𑀢𑁆𑀣 𑀅𑀥𑀺𑀯𑀢𑁆𑀣𑀸𑀬 𑀤𑁂𑀯𑀢𑀸𑀬 𑀲𑀦𑁆𑀢𑀺𑀓𑀸 𑀲𑀗𑁆𑀕𑀳𑀁 𑀧𑀘𑁆𑀘𑀸𑀲𑀺𑀲𑀦𑁆𑀢𑀸 𑀦𑀺𑀲𑀻𑀤𑀺𑀁𑀲𑀼. 𑀤𑁂𑀯𑀢𑀸 𑀲𑀩𑁆𑀩𑀸𑀮𑀗𑁆𑀓𑀸𑀭𑀯𑀺𑀪𑀽𑀲𑀺𑀢𑀁 𑀳𑀢𑁆𑀣𑀁 𑀧𑀲𑀸𑀭𑁂𑀢𑁆𑀯𑀸 𑀢𑁂𑀲𑀁 𑀧𑀸𑀦𑀻𑀬𑀧𑀸𑀦𑀓𑀸𑀤𑀻𑀦𑀺 𑀤𑀢𑁆𑀯𑀸 𑀓𑀺𑀮𑀫𑀣𑀁 𑀧𑀝𑀺𑀯𑀺𑀦𑁄𑀤𑁂𑀲𑀺, 𑀏𑀢𑁂 𑀤𑁂𑀯𑀢𑀸𑀬𑀸𑀦𑀼𑀪𑀸𑀯𑁂𑀦 𑀯𑀺𑀫𑁆𑀳𑀺𑀢𑀸 𑀧𑀼𑀘𑁆𑀙𑀺𑀁𑀲𑀼 𑁋 ‘‘𑀓𑀺𑀁 𑀦𑀼 𑀔𑁄, 𑀤𑁂𑀯𑀢𑁂, 𑀓𑀫𑁆𑀫𑀁 𑀓𑀢𑁆𑀯𑀸 𑀢𑀬𑀸 𑀅𑀬𑀁 𑀲𑀫𑁆𑀧𑀢𑁆𑀢𑀺 𑀮𑀤𑁆𑀥𑀸’’𑀢𑀺? 𑀤𑁂𑀯𑀢𑀸 𑀆𑀳 𑁋 ‘‘𑀮𑁄𑀓𑁂 𑀩𑀼𑀤𑁆𑀥𑁄 𑀦𑀸𑀫 𑀪𑀕𑀯𑀸 𑀉𑀧𑁆𑀧𑀦𑁆𑀦𑁄, 𑀲𑁄 𑀏𑀢𑀭𑀳𑀺 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺, 𑀅𑀦𑀸𑀣𑀧𑀺𑀡𑁆𑀟𑀺𑀓𑁄 𑀕𑀳𑀧𑀢𑀺 𑀢𑀁 𑀉𑀧𑀝𑁆𑀞𑀳𑀢𑀺. 𑀲𑁄 𑀉𑀧𑁄𑀲𑀣𑀤𑀺𑀯𑀲𑁂𑀲𑀼 𑀅𑀢𑁆𑀢𑀦𑁄 𑀪𑀢𑀓𑀸𑀦𑀁 𑀧𑀓𑀢𑀺𑀪𑀢𑁆𑀢𑀯𑁂𑀢𑀦𑀫𑁂𑀯 𑀤𑀢𑁆𑀯𑀸 𑀉𑀧𑁄𑀲𑀣𑀁 𑀓𑀸𑀭𑀸𑀧𑁂𑀲𑀺. 𑀅𑀣𑀸𑀳𑀁 𑀏𑀓𑀤𑀺𑀯𑀲𑀁 𑀫𑀚𑁆𑀛𑀦𑁆𑀳𑀺𑀓𑁂 𑀧𑀸𑀢𑀭𑀸𑀲𑀢𑁆𑀣𑀸𑀬 𑀆𑀕𑀢𑁄 𑀓𑀜𑁆𑀘𑀺 𑀪𑀢𑀓𑀓𑀫𑁆𑀫𑀁 𑀅𑀓𑀭𑁄𑀦𑁆𑀢𑀁 𑀤𑀺𑀲𑁆𑀯𑀸 𑁋 ‘𑀅𑀚𑁆𑀚 𑀫𑀦𑀼𑀲𑁆𑀲𑀸 𑀓𑀲𑁆𑀫𑀸 𑀓𑀫𑁆𑀫𑀁 𑀦 𑀓𑀭𑁄𑀦𑁆𑀢𑀻’𑀢𑀺 𑀧𑀼𑀘𑁆𑀙𑀺𑀁. 𑀢𑀲𑁆𑀲 𑀫𑁂 𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀣𑀸𑀳𑀁 𑀏𑀢𑀤𑀯𑁄𑀘𑀁 𑁋 ‘𑀇𑀤𑀸𑀦𑀺 𑀉𑀧𑀟𑁆𑀠𑀤𑀺𑀯𑀲𑁄 𑀕𑀢𑁄, 𑀲𑀓𑁆𑀓𑀸 𑀦𑀼 𑀔𑁄 𑀉𑀧𑀟𑁆𑀠𑀼𑀧𑁄𑀲𑀣𑀁 𑀓𑀸𑀢𑀼’𑀦𑁆𑀢𑀺. 𑀢𑀢𑁄 𑀲𑁂𑀝𑁆𑀞𑀺𑀲𑁆𑀲 𑀧𑀝𑀺𑀯𑁂𑀤𑁂𑀢𑁆𑀯𑀸 ‘‘𑀲𑀓𑁆𑀓𑀸 𑀓𑀸𑀢𑀼’’𑀦𑁆𑀢𑀺 𑀆𑀳. 𑀲𑁆𑀯𑀸𑀳𑀁 𑀉𑀧𑀟𑁆𑀠𑀤𑀺𑀯𑀲𑀁 𑀉𑀧𑀟𑁆𑀠𑀼𑀧𑁄𑀲𑀣𑀁 𑀲𑀫𑀸𑀤𑀺𑀬𑀺𑀢𑁆𑀯𑀸 𑀢𑀤𑀳𑁂𑀯 𑀓𑀸𑀮𑀁 𑀓𑀢𑁆𑀯𑀸 𑀇𑀫𑀁 𑀲𑀫𑁆𑀧𑀢𑁆𑀢𑀺𑀁 𑀧𑀝𑀺𑀮𑀪𑀺’’𑀦𑁆𑀢𑀺.

𑀅𑀣 𑀢𑁂 𑀢𑀸𑀧𑀲𑀸 ‘‘𑀩𑀼𑀤𑁆𑀥𑁄 𑀓𑀺𑀭 𑀉𑀧𑁆𑀧𑀦𑁆𑀦𑁄’’𑀢𑀺 𑀲𑀜𑁆𑀚𑀸𑀢𑀧𑀻𑀢𑀺𑀧𑀸𑀫𑁄𑀚𑁆𑀚𑀸 𑀢𑀢𑁄𑀯 𑀲𑀸𑀯𑀢𑁆𑀣𑀺𑀁 𑀕𑀦𑁆𑀢𑀼𑀓𑀸𑀫𑀸 𑀳𑀼𑀢𑁆𑀯𑀸𑀧𑀺 𑁋 ‘‘𑀩𑀳𑀼𑀓𑀸𑀭𑀸 𑀦𑁄 𑀉𑀧𑀝𑁆𑀞𑀸𑀓𑀲𑁂𑀝𑁆𑀞𑀺𑀦𑁄 𑀢𑁂𑀲𑀫𑁆𑀧𑀺 𑀇𑀫𑀫𑀢𑁆𑀣𑀫𑀸𑀭𑁄𑀘𑁂𑀲𑁆𑀲𑀸𑀫𑀸’’𑀢𑀺 𑀓𑁄𑀲𑀫𑁆𑀩𑀺𑀁 𑀕𑀦𑁆𑀢𑁆𑀯𑀸 𑀲𑁂𑀝𑁆𑀞𑀻𑀳𑀺 𑀓𑀢𑀲𑀓𑁆𑀓𑀸𑀭𑀩𑀳𑀼𑀫𑀸𑀦𑀸 ‘‘𑀢𑀤𑀳𑁂𑀯 𑀫𑀬𑀁 𑀕𑀘𑁆𑀙𑀸𑀫𑀸’’𑀢𑀺 𑀆𑀳𑀁𑀲𑀼. ‘‘𑀓𑀺𑀁, 𑀪𑀦𑁆𑀢𑁂, 𑀢𑀼𑀭𑀺𑀢𑀸𑀢𑁆𑀣, 𑀦𑀦𑀼 𑀢𑀼𑀫𑁆𑀳𑁂 𑀧𑀼𑀩𑁆𑀩𑁂 𑀘𑀢𑁆𑀢𑀸𑀭𑁄 𑀧𑀜𑁆𑀘 𑀫𑀸𑀲𑁂 𑀯𑀲𑀺𑀢𑁆𑀯𑀸 𑀕𑀘𑁆𑀙𑀣𑀸’’𑀢𑀺 𑀘 𑀯𑀼𑀢𑁆𑀢𑁂 𑀢𑀁 𑀧𑀯𑀢𑁆𑀢𑀺𑀁 𑀆𑀭𑁄𑀘𑁂𑀲𑀼𑀁. ‘‘𑀢𑁂𑀦 𑀳𑀺, 𑀪𑀦𑁆𑀢𑁂, 𑀲𑀳𑁂𑀯 𑀕𑀘𑁆𑀙𑀸𑀫𑀸’’𑀢𑀺 𑀘 𑀯𑀼𑀢𑁆𑀢𑁂 ‘‘𑀕𑀘𑁆𑀙𑀸𑀫 𑀫𑀬𑀁, 𑀢𑀼𑀫𑁆𑀳𑁂 𑀲𑀡𑀺𑀓𑀁 𑀆𑀕𑀘𑁆𑀙𑀣𑀸’’𑀢𑀺 𑀲𑀸𑀯𑀢𑁆𑀣𑀺𑀁 𑀕𑀦𑁆𑀢𑁆𑀯𑀸 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀁𑀲𑀼. 𑀢𑁂𑀧𑀺 𑀲𑁂𑀝𑁆𑀞𑀺𑀦𑁄 𑀧𑀜𑁆𑀘𑀲𑀢𑀧𑀜𑁆𑀘𑀲𑀢𑀲𑀓𑀝𑀧𑀭𑀺𑀯𑀸𑀭𑀸 𑀲𑀸𑀯𑀢𑁆𑀣𑀺𑀁 𑀕𑀦𑁆𑀢𑁆𑀯𑀸 𑀤𑀸𑀦𑀸𑀤𑀻𑀦𑀺 𑀤𑀢𑁆𑀯𑀸 𑀓𑁄𑀲𑀫𑁆𑀩𑀺𑀁 𑀆𑀕𑀫𑀦𑀢𑁆𑀣𑀸𑀬 𑀪𑀕𑀯𑀦𑁆𑀢𑀁 𑀬𑀸𑀘𑀺𑀢𑁆𑀯𑀸 𑀧𑀘𑁆𑀘𑀸𑀕𑀫𑁆𑀫 𑀢𑀬𑁄 𑀯𑀺𑀳𑀸𑀭𑁂 𑀓𑀸𑀭𑁂𑀲𑀼𑀁. 𑀢𑁂𑀲𑀼 𑀓𑀼𑀓𑁆𑀓𑀼𑀝𑀲𑁂𑀝𑁆𑀞𑀺𑀦𑀸 𑀓𑀢𑁄 𑀓𑀼𑀓𑁆𑀓𑀼𑀝𑀸𑀭𑀸𑀫𑁄 𑀦𑀸𑀫, 𑀧𑀸𑀯𑀸𑀭𑀺𑀬𑀲𑁂𑀝𑁆𑀞𑀺𑀦𑀸 𑀓𑀢𑁄 𑀧𑀸𑀯𑀸𑀭𑀺𑀓𑀫𑁆𑀩𑀯𑀦𑀁 𑀦𑀸𑀫, 𑀖𑁄𑀲𑀺𑀢𑀲𑁂𑀝𑁆𑀞𑀺𑀦𑀸 𑀓𑀢𑁄 𑀖𑁄𑀲𑀺𑀢𑀸𑀭𑀸𑀫𑁄 𑀦𑀸𑀫 𑀅𑀳𑁄𑀲𑀺. 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑁋 ‘‘𑀓𑁄𑀲𑀫𑁆𑀩𑀺𑀬𑀁 𑀯𑀺𑀳𑀭𑀢𑀺 𑀖𑁄𑀲𑀺𑀢𑀸𑀭𑀸𑀫𑁂’’𑀢𑀺.

𑀫𑀼𑀡𑁆𑀟𑀺𑀬𑁄𑀢𑀺 𑀇𑀤𑀁 𑀢𑀲𑁆𑀲 𑀦𑀸𑀫𑀁. 𑀚𑀸𑀮𑀺𑀬𑁄𑀢𑀺 𑀇𑀤𑀫𑁆𑀧𑀺 𑀇𑀢𑀭𑀲𑁆𑀲 𑀦𑀸𑀫𑀫𑁂𑀯. 𑀬𑀲𑁆𑀫𑀸 𑀧𑀦𑀲𑁆𑀲 𑀉𑀧𑀚𑁆𑀛𑀸𑀬𑁄 𑀤𑀸𑀭𑀼𑀫𑀬𑁂𑀦 𑀧𑀢𑁆𑀢𑁂𑀦 𑀧𑀺𑀡𑁆𑀟𑀸𑀬 𑀘𑀭𑀢𑀺, 𑀢𑀲𑁆𑀫𑀸 𑀤𑀸𑀭𑀼𑀧𑀢𑁆𑀢𑀺𑀓𑀦𑁆𑀢𑁂𑀯𑀸𑀲𑀻𑀢𑀺 𑀯𑀼𑀘𑁆𑀘𑀢𑀺. 𑀏𑀢𑀤𑀯𑁄𑀘𑀼𑀦𑁆𑀢𑀺 𑀉𑀧𑀸𑀭𑀫𑁆𑀪𑀸𑀥𑀺𑀧𑁆𑀧𑀸𑀬𑁂𑀦 𑀯𑀸𑀤𑀁 𑀆𑀭𑁄𑀧𑁂𑀢𑀼𑀓𑀸𑀫𑀸 𑀳𑀼𑀢𑁆𑀯𑀸 𑀏𑀢𑀤𑀯𑁄𑀘𑀼𑀁. 𑀇𑀢𑀺 𑀓𑀺𑀭 𑀦𑁂𑀲𑀁 𑀅𑀳𑁄𑀲𑀺, 𑀲𑀘𑁂 𑀲𑀫𑀡𑁄 𑀕𑁄𑀢𑀫𑁄 ‘‘𑀢𑀁 𑀚𑀻𑀯𑀁 𑀢𑀁 𑀲𑀭𑀻𑀭’’𑀦𑁆𑀢𑀺 𑀯𑀓𑁆𑀔𑀢𑀺, 𑀅𑀣𑀲𑁆𑀲 𑀫𑀬𑀁 𑀏𑀢𑀁 𑀯𑀸𑀤𑀁 𑀆𑀭𑁄𑀧𑁂𑀲𑁆𑀲𑀸𑀫 𑁋 ‘‘𑀪𑁄 𑀕𑁄𑀢𑀫, 𑀢𑀼𑀫𑁆𑀳𑀸𑀓𑀁 𑀮𑀤𑁆𑀥𑀺𑀬𑀸 𑀇𑀥𑁂𑀯 𑀲𑀢𑁆𑀢𑁄 𑀪𑀺𑀚𑁆𑀚𑀢𑀺, 𑀢𑁂𑀦 𑀯𑁄 𑀯𑀸𑀤𑁄 𑀉𑀘𑁆𑀙𑁂𑀤𑀯𑀸𑀤𑁄 𑀳𑁄𑀢𑀻’’𑀢𑀺. 𑀲𑀘𑁂 𑀧𑀦 ‘‘𑀅𑀜𑁆𑀜𑀁 𑀚𑀻𑀯𑀁 𑀅𑀜𑁆𑀜𑀁 𑀲𑀭𑀻𑀭’’𑀦𑁆𑀢𑀺 𑀯𑀓𑁆𑀔𑀢𑀺, 𑀅𑀣𑀲𑁆𑀲𑁂𑀢𑀁 𑀯𑀸𑀤𑀁 𑀆𑀭𑁄𑀧𑁂𑀲𑁆𑀲𑀸𑀫 ‘‘𑀢𑀼𑀫𑁆𑀳𑀸𑀓𑀁 𑀯𑀸𑀤𑁂 𑀭𑀽𑀧𑀁 𑀪𑀺𑀚𑁆𑀚𑀢𑀺, 𑀦 𑀲𑀢𑁆𑀢𑁄 𑀪𑀺𑀚𑁆𑀚𑀢𑀺. 𑀢𑁂𑀦 𑀯𑁄 𑀯𑀸𑀤𑁂 𑀲𑀢𑁆𑀢𑁄 𑀲𑀲𑁆𑀲𑀢𑁄 𑀆𑀧𑀚𑁆𑀚𑀢𑀻’’𑀢𑀺. 𑀅𑀣 𑀪𑀕𑀯𑀸 ‘‘𑀇𑀫𑁂 𑀯𑀸𑀤𑀸𑀭𑁄𑀧𑀦𑀢𑁆𑀣𑀸𑀬 𑀧𑀜𑁆𑀳𑀁 𑀧𑀼𑀘𑁆𑀙𑀦𑁆𑀢𑀺, 𑀫𑀫 𑀲𑀸𑀲𑀦𑁂 𑀇𑀫𑁂 𑀤𑁆𑀯𑁂 𑀅𑀦𑁆𑀢𑁂 𑀅𑀦𑀼𑀧𑀕𑀫𑁆𑀫 𑀫𑀚𑁆𑀛𑀺𑀫𑀸 𑀧𑀝𑀺𑀧𑀤𑀸 𑀅𑀢𑁆𑀣𑀻𑀢𑀺 𑀦 𑀚𑀸𑀦𑀦𑁆𑀢𑀺, 𑀳𑀦𑁆𑀤 𑀦𑁂𑀲𑀁 𑀧𑀜𑁆𑀳𑀁 𑀅𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀢𑀲𑁆𑀲𑀸𑀬𑁂𑀯 𑀧𑀝𑀺𑀧𑀤𑀸𑀬 𑀆𑀯𑀺𑀪𑀸𑀯𑀢𑁆𑀣𑀁 𑀥𑀫𑁆𑀫𑀁 𑀤𑁂𑀲𑁂𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀢𑁂𑀦 𑀳𑀸𑀯𑀼𑀲𑁄’’𑀢𑀺𑀆𑀤𑀺𑀫𑀸𑀳.

𑁩𑁭𑁯-𑁩𑁮𑁦. 𑀢𑀢𑁆𑀣 𑀓𑀮𑁆𑀮𑀁 𑀦𑀼 𑀔𑁄 𑀢𑀲𑁆𑀲𑁂𑀢𑀁 𑀯𑀘𑀦𑀸𑀬𑀸𑀢𑀺 𑀢𑀲𑁆𑀲𑁂𑀢𑀁 𑀲𑀤𑁆𑀥𑀸𑀧𑀩𑁆𑀩𑀚𑀺𑀢𑀲𑁆𑀲 𑀢𑀺𑀯𑀺𑀥𑀁 𑀲𑀻𑀮𑀁 𑀧𑀭𑀺𑀧𑀽𑀭𑁂𑀢𑁆𑀯𑀸 𑀧𑀞𑀫𑀚𑁆𑀛𑀸𑀦𑀁 𑀧𑀢𑁆𑀢𑀲𑁆𑀲 𑀬𑀼𑀢𑁆𑀢𑀁 𑀦𑀼 𑀔𑁄 𑀏𑀢𑀁 𑀯𑀢𑁆𑀢𑀼𑀦𑁆𑀢𑀺 𑀅𑀢𑁆𑀣𑁄. 𑀢𑀁 𑀲𑀼𑀢𑁆𑀯𑀸 𑀧𑀭𑀺𑀩𑁆𑀩𑀸𑀚𑀓𑀸 𑀧𑀼𑀣𑀼𑀚𑁆𑀚𑀦𑁄 𑀦𑀸𑀫 𑀬𑀲𑁆𑀫𑀸 𑀦𑀺𑀩𑁆𑀩𑀺𑀘𑀺𑀓𑀺𑀘𑁆𑀙𑁄 𑀦 𑀳𑁄𑀢𑀺, 𑀢𑀲𑁆𑀫𑀸 𑀓𑀤𑀸𑀘𑀺 𑀏𑀯𑀁 𑀯𑀤𑁂𑀬𑁆𑀬𑀸𑀢𑀺 𑀫𑀜𑁆𑀜𑀫𑀸𑀦𑀸 𑁋 ‘‘𑀓𑀮𑁆𑀮𑀁 𑀢𑀲𑁆𑀲𑁂𑀢𑀁 𑀯𑀘𑀦𑀸𑀬𑀸’’𑀢𑀺 𑀆𑀳𑀁𑀲𑀼. 𑀅𑀣 𑀘 𑀧𑀦𑀸𑀳𑀁 𑀦 𑀯𑀤𑀸𑀫𑀻𑀢𑀺 𑀅𑀳𑀁 𑀏𑀢𑀫𑁂𑀯𑀁 𑀚𑀸𑀦𑀸𑀫𑀺, 𑀦𑁄 𑀘 𑀏𑀯𑀁 𑀯𑀤𑀸𑀫𑀺, 𑀅𑀣 𑀔𑁄 𑀓𑀲𑀺𑀡𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸 𑀪𑀸𑀯𑁂𑀦𑁆𑀢𑀲𑁆𑀲 𑀧𑀜𑁆𑀜𑀸𑀩𑀮𑁂𑀦 𑀉𑀧𑁆𑀧𑀦𑁆𑀦𑀁 𑀫𑀳𑀕𑁆𑀕𑀢𑀘𑀺𑀢𑁆𑀢𑀫𑁂𑀢𑀦𑁆𑀢𑀺 𑀲𑀜𑁆𑀜𑀁 𑀞𑀧𑁂𑀲𑀺𑀁. 𑀦 𑀓𑀮𑁆𑀮𑀁 𑀢𑀲𑁆𑀲𑁂𑀢𑀦𑁆𑀢𑀺 𑀇𑀤𑀁 𑀢𑁂 𑀧𑀭𑀺𑀩𑁆𑀩𑀸𑀚𑀓𑀸 𑁋 ‘‘𑀬𑀲𑁆𑀫𑀸 𑀔𑀻𑀡𑀸𑀲𑀯𑁄 𑀯𑀺𑀕𑀢𑀲𑀫𑁆𑀫𑁄𑀳𑁄 𑀢𑀺𑀡𑁆𑀡𑀯𑀺𑀘𑀺𑀓𑀺𑀘𑁆𑀙𑁄, 𑀢𑀲𑁆𑀫𑀸 𑀦 𑀬𑀼𑀢𑁆𑀢𑀁 𑀢𑀲𑁆𑀲𑁂𑀢𑀁 𑀯𑀢𑁆𑀢𑀼’’𑀦𑁆𑀢𑀺 𑀫𑀜𑁆𑀜𑀫𑀸𑀦𑀸 𑀯𑀤𑀦𑁆𑀢𑀺. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀇𑀢𑀺 𑀲𑀼𑀫𑀗𑁆𑀕𑀮𑀯𑀺𑀮𑀸𑀲𑀺𑀦𑀺𑀬𑀸 𑀤𑀻𑀖𑀦𑀺𑀓𑀸𑀬𑀝𑁆𑀞𑀓𑀣𑀸𑀬𑀁

𑀚𑀸𑀮𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.