𑁪. 𑀲𑁄𑀡𑀤𑀡𑁆𑀟𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁦𑁦. 𑀏𑀯𑀁 𑀫𑁂 𑀲𑀼𑀢𑀁…𑀧𑁂… 𑀅𑀗𑁆𑀕𑁂𑀲𑀽𑀢𑀺 𑀲𑁄𑀡𑀤𑀡𑁆𑀟𑀲𑀼𑀢𑁆𑀢𑀁. 𑀢𑀢𑁆𑀭𑀸𑀬𑀁 𑀅𑀧𑀼𑀩𑁆𑀩𑀧𑀤𑀯𑀡𑁆𑀡𑀦𑀸. 𑀅𑀗𑁆𑀕𑁂𑀲𑀽𑀢𑀺 𑀅𑀗𑁆𑀕𑀸 𑀦𑀸𑀫 𑀅𑀗𑁆𑀕𑀧𑀸𑀲𑀸𑀤𑀺𑀓𑀢𑀸𑀬 𑀏𑀯𑀁 𑀮𑀤𑁆𑀥𑀯𑁄𑀳𑀸𑀭𑀸 𑀚𑀸𑀦𑀧𑀤𑀺𑀦𑁄 𑀭𑀸𑀚𑀓𑀼𑀫𑀸𑀭𑀸, 𑀢𑁂𑀲𑀁 𑀦𑀺𑀯𑀸𑀲𑁄 𑀏𑀓𑁄𑀧𑀺 𑀚𑀦𑀧𑀤𑁄 𑀭𑀽𑀴𑁆𑀳𑀺𑀲𑀤𑁆𑀤𑁂𑀦 𑀅𑀗𑁆𑀕𑀸𑀢𑀺 𑀯𑀼𑀘𑁆𑀘𑀢𑀺, 𑀢𑀲𑁆𑀫𑀺𑀁 𑀅𑀗𑁆𑀕𑁂𑀲𑀼 𑀚𑀦𑀧𑀤𑁂. 𑀘𑀸𑀭𑀺𑀓𑀦𑁆𑀢𑀺 𑀇𑀥𑀸𑀧𑀺 𑀅𑀢𑀼𑀭𑀺𑀢𑀘𑀸𑀭𑀺𑀓𑀸 𑀘𑁂𑀯 𑀦𑀺𑀩𑀤𑁆𑀥𑀘𑀸𑀭𑀺𑀓𑀸 𑀘 𑀅𑀥𑀺𑀧𑁆𑀧𑁂𑀢𑀸. 𑀢𑀤𑀸 𑀓𑀺𑀭 𑀪𑀕𑀯𑀢𑁄 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀁 𑀑𑀮𑁄𑀓𑁂𑀦𑁆𑀢𑀲𑁆𑀲 𑀲𑁄𑀡𑀤𑀡𑁆𑀟𑁄 𑀩𑁆𑀭𑀸𑀳𑁆𑀫𑀡𑁄 𑀜𑀸𑀡𑀚𑀸𑀮𑀲𑁆𑀲 𑀅𑀦𑁆𑀢𑁄 𑀧𑀜𑁆𑀜𑀸𑀬𑀺𑀢𑁆𑀣. 𑀅𑀣 𑀪𑀕𑀯𑀸 𑀅𑀬𑀁 𑀩𑁆𑀭𑀸𑀳𑁆𑀫𑀡𑁄 𑀫𑀬𑁆𑀳𑀁 𑀜𑀸𑀡𑀚𑀸𑀮𑁂 𑀧𑀜𑁆𑀜𑀸𑀬𑀢𑀺. ‘𑀅𑀢𑁆𑀣𑀺 𑀦𑀼 𑀔𑁆𑀯𑀲𑁆𑀲𑀼𑀧𑀦𑀺𑀲𑁆𑀲𑀬𑁄’𑀢𑀺 𑀯𑀻𑀫𑀁𑀲𑀦𑁆𑀢𑁄 𑀅𑀤𑁆𑀤𑀲. ‘𑀫𑀬𑀺 𑀢𑀢𑁆𑀣 𑀕𑀢𑁂 𑀏𑀢𑀲𑁆𑀲 𑀅𑀦𑁆𑀢𑁂𑀯𑀸𑀲𑀺𑀦𑁄 𑀤𑁆𑀯𑀸𑀤𑀲𑀳𑀸𑀓𑀸𑀭𑁂𑀳𑀺 𑀩𑁆𑀭𑀸𑀳𑁆𑀫𑀡𑀲𑁆𑀲 𑀯𑀡𑁆𑀡𑀁 𑀪𑀸𑀲𑀺𑀢𑁆𑀯𑀸 𑀫𑀫 𑀲𑀦𑁆𑀢𑀺𑀓𑁂 𑀆𑀕𑀦𑁆𑀢𑀼𑀁 𑀦 𑀤𑀲𑁆𑀲𑀦𑁆𑀢𑀺. 𑀲𑁄 𑀧𑀦 𑀢𑁂𑀲𑀁 𑀯𑀸𑀤𑀁 𑀪𑀺𑀦𑁆𑀤𑀺𑀢𑁆𑀯𑀸 𑀏𑀓𑀽𑀦𑀢𑀺𑀁𑀲 𑀆𑀓𑀸𑀭𑁂𑀳𑀺 𑀫𑀫 𑀯𑀡𑁆𑀡𑀁 𑀪𑀸𑀲𑀺𑀢𑁆𑀯𑀸 𑀫𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀳𑀁 𑀧𑀼𑀘𑁆𑀙𑀺𑀲𑁆𑀲𑀢𑀺. 𑀲𑁄 𑀧𑀜𑁆𑀳𑀯𑀺𑀲𑁆𑀲𑀚𑁆𑀚𑀦𑀧𑀭𑀺𑀬𑁄𑀲𑀸𑀦𑁂 𑀲𑀭𑀡𑀁 𑀕𑀫𑀺𑀲𑁆𑀲𑀢𑀻’𑀢𑀺, 𑀤𑀺𑀲𑁆𑀯𑀸 𑀧𑀜𑁆𑀘𑀲𑀢𑀪𑀺𑀓𑁆𑀔𑀼𑀧𑀭𑀺𑀯𑀸𑀭𑁄 𑀢𑀁 𑀚𑀦𑀧𑀤𑀁 𑀧𑀝𑀺𑀧𑀦𑁆𑀦𑁄. 𑀢𑁂𑀦 𑀯𑀼𑀢𑁆𑀢𑀁 𑁋 𑀅𑀗𑁆𑀕𑁂𑀲𑀼 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄…𑀧𑁂… 𑀬𑁂𑀦 𑀘𑀫𑁆𑀧𑀸 𑀢𑀤𑀯𑀲𑀭𑀻𑀢𑀺.

𑀕𑀕𑁆𑀕𑀭𑀸𑀬 𑀧𑁄𑀓𑁆𑀔𑀭𑀡𑀺𑀬𑀸 𑀢𑀻𑀭𑁂𑀢𑀺 𑀢𑀲𑁆𑀲 𑀘𑀫𑁆𑀧𑀸𑀦𑀕𑀭𑀲𑁆𑀲 𑀅𑀯𑀺𑀤𑀽𑀭𑁂 𑀕𑀕𑁆𑀕𑀭𑀸𑀬 𑀦𑀸𑀫 𑀭𑀸𑀚𑀕𑁆𑀕𑀫𑀳𑁂𑀲𑀺𑀬𑀸 𑀔𑀡𑀺𑀢𑀢𑁆𑀢𑀸 𑀕𑀕𑁆𑀕𑀭𑀸𑀢𑀺 𑀮𑀤𑁆𑀥𑀯𑁄𑀳𑀸𑀭𑀸 𑀧𑁄𑀓𑁆𑀔𑀭𑀡𑀻 𑀅𑀢𑁆𑀣𑀺. 𑀢𑀲𑁆𑀲𑀸 𑀢𑀻𑀭𑁂 𑀲𑀫𑀦𑁆𑀢𑀢𑁄 𑀦𑀻𑀮𑀸𑀤𑀺𑀧𑀜𑁆𑀘𑀯𑀡𑁆𑀡𑀓𑀼𑀲𑀼𑀫𑀧𑀝𑀺𑀫𑀡𑁆𑀟𑀺𑀢𑀁 𑀫𑀳𑀦𑁆𑀢𑀁 𑀘𑀫𑁆𑀧𑀓𑀯𑀦𑀁. 𑀢𑀲𑁆𑀫𑀺𑀁 𑀪𑀕𑀯𑀸 𑀓𑀼𑀲𑀼𑀫𑀕𑀦𑁆𑀥𑀲𑀼𑀕𑀦𑁆𑀥𑁂 𑀘𑀫𑁆𑀧𑀓𑀯𑀦𑁂 𑀯𑀺𑀳𑀭𑀢𑀺. 𑀢𑀁 𑀲𑀦𑁆𑀥𑀸𑀬 𑀕𑀕𑁆𑀕𑀭𑀸𑀬 𑀧𑁄𑀓𑁆𑀔𑀭𑀡𑀺𑀬𑀸 𑀢𑀻𑀭𑁂𑀢𑀺 𑀯𑀼𑀢𑁆𑀢𑀁. 𑀫𑀸𑀕𑀥𑁂𑀦 𑀲𑁂𑀦𑀺𑀬𑁂𑀦 𑀩𑀺𑀫𑁆𑀩𑀺𑀲𑀸𑀭𑁂𑀦𑀸𑀢𑀺 𑀏𑀢𑁆𑀣 𑀲𑁄 𑀭𑀸𑀚𑀸 𑀫𑀕𑀥𑀸𑀦𑀁 𑀇𑀲𑁆𑀲𑀭𑀢𑁆𑀢𑀸 𑀫𑀸𑀕𑀥𑁄. 𑀫𑀳𑀢𑀺𑀬𑀸 𑀲𑁂𑀦𑀸𑀬 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀲𑁂𑀦𑀺𑀬𑁄. 𑀩𑀺𑀫𑁆𑀩𑀻𑀢𑀺 𑀲𑀼𑀯𑀡𑁆𑀡𑀁. 𑀢𑀲𑁆𑀫𑀸 𑀲𑀸𑀭𑀲𑀼𑀯𑀡𑁆𑀡𑀲𑀤𑀺𑀲𑀯𑀡𑁆𑀡𑀢𑀸𑀬 𑀩𑀺𑀫𑁆𑀩𑀺𑀲𑀸𑀭𑁄𑀢𑀺 𑀯𑀼𑀘𑁆𑀘𑀢𑀺.

𑁩𑁦𑁧-𑁩𑁦𑁨. 𑀩𑀳𑀽 𑀩𑀳𑀽 𑀳𑀼𑀢𑁆𑀯𑀸 𑀲𑀁𑀳𑀢𑀸𑀢𑀺 𑀲𑀗𑁆𑀖𑀸. 𑀏𑀓𑁂𑀓𑀺𑀲𑁆𑀲𑀸𑀬 𑀤𑀺𑀲𑀸𑀬 𑀲𑀗𑁆𑀖𑁄 𑀏𑀢𑁂𑀲𑀁 𑀅𑀢𑁆𑀣𑀻𑀢𑀺 𑀲𑀗𑁆𑀖𑀻. 𑀧𑀼𑀩𑁆𑀩𑁂 𑀦𑀕𑀭𑀲𑁆𑀲 𑀅𑀦𑁆𑀢𑁄 𑀅𑀕𑀡𑀸 𑀩𑀳𑀺 𑀦𑀺𑀓𑁆𑀔𑀫𑀺𑀢𑁆𑀯𑀸 𑀕𑀡𑀢𑀁 𑀧𑀢𑁆𑀢𑀸𑀢𑀺 𑀕𑀡𑀻𑀪𑀽𑀢𑀸. 𑀔𑀢𑁆𑀢𑀁 𑀆𑀫𑀦𑁆𑀢𑁂𑀲𑀻𑀢𑀺. 𑀔𑀢𑁆𑀢𑀸 𑀯𑀼𑀘𑁆𑀘𑀢𑀺 𑀧𑀼𑀘𑁆𑀙𑀺𑀢𑀧𑀜𑁆𑀳𑁂 𑀩𑁆𑀬𑀸𑀓𑀭𑀡𑀲𑀫𑀢𑁆𑀣𑁄 𑀫𑀳𑀸𑀫𑀢𑁆𑀢𑁄, 𑀢𑀁 𑀆𑀫𑀦𑁆𑀢𑁂𑀲𑀺 𑀆𑀕𑀫𑁂𑀦𑁆𑀢𑀽𑀢𑀺 𑀫𑀼𑀳𑀼𑀢𑁆𑀢𑀁 𑀧𑀝𑀺𑀫𑀸𑀦𑁂𑀦𑁆𑀢𑀼, 𑀫𑀸 𑀕𑀘𑁆𑀙𑀦𑁆𑀢𑀽𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀲𑁄𑀡𑀤𑀡𑁆𑀟𑀕𑀼𑀡𑀓𑀣𑀸

𑁩𑁦𑁩. 𑀦𑀸𑀦𑀸𑀯𑁂𑀭𑀚𑁆𑀚𑀓𑀸𑀦𑀦𑁆𑀢𑀺 𑀦𑀸𑀦𑀸𑀯𑀺𑀥𑁂𑀲𑀼 𑀭𑀚𑁆𑀚𑁂𑀲𑀼, 𑀅𑀜𑁆𑀜𑁂𑀲𑀼 𑀅𑀜𑁆𑀜𑁂𑀲𑀼 𑀓𑀸𑀲𑀺𑀓𑁄𑀲𑀮𑀸𑀤𑀻𑀲𑀼 𑀭𑀚𑁆𑀚𑁂𑀲𑀼 𑀚𑀸𑀢𑀸, 𑀢𑀸𑀦𑀺 𑀯𑀸 𑀢𑁂𑀲𑀁 𑀦𑀺𑀯𑀸𑀲𑀸, 𑀢𑀢𑁄 𑀯𑀸 𑀆𑀕𑀢𑀸𑀢𑀺 𑀦𑀸𑀦𑀸𑀯𑁂𑀭𑀚𑁆𑀚𑀓𑀸, 𑀢𑁂𑀲𑀁 𑀦𑀸𑀦𑀸𑀯𑁂𑀭𑀚𑁆𑀚𑀓𑀸𑀦𑀁. 𑀓𑁂𑀦𑀘𑀺𑀤𑁂𑀯 𑀓𑀭𑀡𑀻𑀬𑁂𑀦𑀸𑀢𑀺 𑀢𑀲𑁆𑀫𑀺𑀁 𑀓𑀺𑀭 𑀦𑀕𑀭𑁂 𑀤𑁆𑀯𑀻𑀳𑀺 𑀓𑀭𑀡𑀻𑀬𑁂𑀳𑀺 𑀩𑁆𑀭𑀸𑀳𑁆𑀫𑀡𑀸 𑀲𑀦𑁆𑀦𑀺𑀧𑀢𑀦𑁆𑀢𑀺 𑁋 𑀬𑀜𑁆𑀜𑀸𑀦𑀼𑀪𑀯𑀦𑀢𑁆𑀣𑀁 𑀯𑀸 𑀫𑀦𑁆𑀢𑀲𑀚𑁆𑀛𑀸𑀬𑀦𑀢𑁆𑀣𑀁 𑀯𑀸. 𑀢𑀤𑀸 𑀘 𑀢𑀲𑁆𑀫𑀺𑀁 𑀦𑀕𑀭𑁂 𑀬𑀫𑀜𑁆𑀜𑀸 𑀦𑀢𑁆𑀣𑀺. 𑀲𑁄𑀡𑀤𑀡𑁆𑀟𑀲𑁆𑀲 𑀧𑀦 𑀲𑀦𑁆𑀢𑀺𑀓𑁂 𑀫𑀦𑁆𑀢𑀲𑀚𑁆𑀛𑀸𑀬𑀦𑀢𑁆𑀣𑀁 𑀏𑀢𑁂 𑀲𑀦𑁆𑀦𑀺𑀧𑀢𑀺𑀢𑀸. 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑁋 ‘‘𑀓𑁂𑀦𑀘𑀺𑀤𑁂𑀯 𑀓𑀭𑀡𑀻𑀬𑁂𑀦𑀸’’𑀢𑀺. 𑀢𑁂 𑀢𑀲𑁆𑀲 𑀕𑀫𑀦𑀁 𑀲𑀼𑀢𑁆𑀯𑀸 𑀘𑀺𑀦𑁆𑀢𑁂𑀲𑀼𑀁 𑁋 ‘‘𑀅𑀬𑀁 𑀲𑁄𑀡𑀤𑀡𑁆𑀟𑁄 𑀉𑀕𑁆𑀕𑀢𑀩𑁆𑀭𑀸𑀳𑁆𑀫𑀡𑁄 𑀬𑁂𑀪𑀼𑀬𑁆𑀬𑁂𑀦 𑀘 𑀅𑀜𑁆𑀜𑁂 𑀩𑁆𑀭𑀸𑀳𑁆𑀫𑀡𑀸 𑀲𑀫𑀡𑀁 𑀕𑁄𑀢𑀫𑀁 𑀲𑀭𑀡𑀁 𑀕𑀢𑀸, 𑀅𑀬𑀫𑁂𑀯 𑀦 𑀕𑀢𑁄. 𑀲𑁆𑀯𑀸𑀬𑀁 𑀲𑀘𑁂 𑀢𑀢𑁆𑀣 𑀕𑀫𑀺𑀲𑁆𑀲𑀢𑀺, 𑀅𑀤𑁆𑀥𑀸 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀆𑀯𑀝𑁆𑀝𑀦𑀺𑀬𑀸 𑀫𑀸𑀬𑀸𑀬 𑀆𑀯𑀝𑁆𑀝𑀺𑀢𑁄, 𑀢𑀁 𑀲𑀭𑀡𑀁 𑀕𑀫𑀺𑀲𑁆𑀲𑀢𑀺. 𑀢𑀢𑁄 𑀏𑀢𑀲𑁆𑀲𑀸𑀧𑀺 𑀕𑁂𑀳𑀤𑁆𑀯𑀸𑀭𑁂 𑀩𑁆𑀭𑀸𑀳𑁆𑀫𑀡𑀸𑀦𑀁 𑀲𑀦𑁆𑀦𑀺𑀧𑀸𑀢𑁄 𑀦 𑀪𑀯𑀺𑀲𑁆𑀲𑀢𑀻’’𑀢𑀺. ‘‘𑀳𑀦𑁆𑀤𑀲𑁆𑀲 𑀕𑀫𑀦𑀦𑁆𑀢𑀭𑀸𑀬𑀁 𑀓𑀭𑁄𑀫𑀸’’𑀢𑀺 𑀲𑀫𑁆𑀫𑀦𑁆𑀢𑀬𑀺𑀢𑁆𑀯𑀸 𑀢𑀢𑁆𑀣 𑀅𑀕𑀫𑀁𑀲𑀼. 𑀢𑀁 𑀲𑀦𑁆𑀥𑀸𑀬 𑁋 𑀅𑀣 𑀔𑁄 𑀢𑁂 𑀩𑁆𑀭𑀸𑀳𑁆𑀫𑀡𑀸𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀢𑀢𑁆𑀣 𑀇𑀫𑀺𑀦𑀸𑀧𑀗𑁆𑀕𑁂𑀦𑀸𑀢𑀺 𑀇𑀫𑀺𑀦𑀸𑀧𑀺 𑀓𑀸𑀭𑀡𑁂𑀦. 𑀏𑀯𑀁 𑀏𑀢𑀁 𑀓𑀸𑀭𑀡𑀁 𑀯𑀢𑁆𑀯𑀸 𑀧𑀼𑀦 𑁋 ‘‘𑀅𑀢𑁆𑀢𑀦𑁄 𑀯𑀡𑁆𑀡𑁂 𑀪𑀜𑁆𑀜𑀫𑀸𑀦𑁂 𑀅𑀢𑀼𑀲𑁆𑀲𑀦𑀓𑀲𑀢𑁆𑀢𑁄 𑀦𑀸𑀫 𑀦𑀢𑁆𑀣𑀺. 𑀳𑀦𑁆𑀤𑀲𑁆𑀲 𑀯𑀡𑁆𑀡𑀁 𑀪𑀡𑀦𑁂𑀦 𑀕𑀫𑀦𑀁 𑀦𑀺𑀯𑀸𑀭𑁂𑀲𑁆𑀲𑀸𑀫𑀸’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀪𑀯𑀜𑁆𑀳𑀺 𑀲𑁄𑀡𑀤𑀡𑁆𑀟𑁄 𑀉𑀪𑀢𑁄 𑀲𑀼𑀚𑀸𑀢𑁄𑀢𑀺𑀆𑀤𑀻𑀦𑀺 𑀓𑀸𑀭𑀡𑀸𑀦𑀺 𑀆𑀳𑀁𑀲𑀼.

𑀉𑀪𑀢𑁄𑀢𑀺 𑀤𑁆𑀯𑀻𑀳𑀺 𑀧𑀓𑁆𑀔𑁂𑀳𑀺. 𑀫𑀸𑀢𑀺𑀢𑁄 𑀘 𑀧𑀺𑀢𑀺𑀢𑁄 𑀘𑀸𑀢𑀺 𑀪𑁄𑀢𑁄 𑀫𑀸𑀢𑀸 𑀩𑁆𑀭𑀸𑀳𑁆𑀫𑀡𑀻, 𑀫𑀸𑀢𑀼𑀫𑀸𑀢𑀸 𑀩𑁆𑀭𑀸𑀳𑁆𑀫𑀡𑀻, 𑀢𑀲𑁆𑀲𑀸𑀧𑀺 𑀫𑀸𑀢𑀸 𑀩𑁆𑀭𑀸𑀳𑁆𑀫𑀡𑀻; 𑀧𑀺𑀢𑀸 𑀩𑁆𑀭𑀸𑀳𑁆𑀫𑀡𑁄, 𑀧𑀺𑀢𑀼𑀧𑀺𑀢𑀸 𑀩𑁆𑀭𑀸𑀳𑁆𑀫𑀡𑁄, 𑀢𑀲𑁆𑀲𑀸𑀧𑀺 𑀧𑀺𑀢𑀸 𑀩𑁆𑀭𑀸𑀳𑁆𑀫𑀡𑁄𑀢𑀺, 𑀏𑀯𑀁 𑀪𑀯𑀁 𑀉𑀪𑀢𑁄 𑀲𑀼𑀚𑀸𑀢𑁄 𑀫𑀸𑀢𑀺𑀢𑁄 𑀘 𑀧𑀺𑀢𑀺𑀢𑁄 𑀘. 𑀲𑀁𑀲𑀼𑀤𑁆𑀥𑀕𑀳𑀡𑀺𑀓𑁄𑀢𑀺 𑀲𑀁𑀲𑀼𑀤𑁆𑀥𑀸 𑀢𑁂 𑀫𑀸𑀢𑀼𑀕𑀳𑀡𑀻 𑀓𑀼𑀘𑁆𑀙𑀻𑀢𑀺 𑀅𑀢𑁆𑀣𑁄. 𑀲𑀫𑀯𑁂𑀧𑀸𑀓𑀺𑀦𑀺𑀬𑀸 𑀕𑀳𑀡𑀺𑀬𑀸𑀢𑀺 𑀏𑀢𑁆𑀣 𑀧𑀦 𑀓𑀫𑁆𑀫𑀚𑀢𑁂𑀚𑁄𑀥𑀸𑀢𑀼 ‘‘𑀕𑀳𑀡𑀻’’𑀢𑀺 𑀯𑀼𑀘𑁆𑀘𑀢𑀺.

𑀬𑀸𑀯 𑀲𑀢𑁆𑀢𑀫𑀸 𑀧𑀺𑀢𑀸𑀫𑀳𑀬𑀼𑀕𑀸𑀢𑀺 𑀏𑀢𑁆𑀣 𑀧𑀺𑀢𑀼𑀧𑀺𑀢𑀸 𑀧𑀺𑀢𑀸𑀫𑀳𑁄, 𑀧𑀺𑀢𑀸𑀫𑀳𑀲𑁆𑀲 𑀬𑀼𑀕𑀁 𑀧𑀺𑀢𑀸𑀫𑀳𑀬𑀼𑀕𑀁. 𑀬𑀼𑀕𑀦𑁆𑀢𑀺 𑀆𑀬𑀼𑀧𑁆𑀧𑀫𑀸𑀡𑀁 𑀯𑀼𑀘𑁆𑀘𑀢𑀺. 𑀅𑀪𑀺𑀮𑀸𑀧𑀫𑀢𑁆𑀢𑀫𑁂𑀯 𑀘𑁂𑀢𑀁. 𑀅𑀢𑁆𑀣𑀢𑁄 𑀧𑀦 𑀧𑀺𑀢𑀸𑀫𑀳𑁄𑀬𑁂𑀯 𑀧𑀺𑀢𑀸𑀫𑀳𑀬𑀼𑀕𑀁. 𑀢𑀢𑁄 𑀉𑀤𑁆𑀥𑀁 𑀲𑀩𑁆𑀩𑁂𑀧𑀺 𑀧𑀼𑀩𑁆𑀩𑀧𑀼𑀭𑀺𑀲𑀸 𑀧𑀺𑀢𑀸𑀫𑀳𑀕𑁆𑀕𑀳𑀡𑁂𑀦𑁂𑀯 𑀕𑀳𑀺𑀢𑀸. 𑀏𑀯𑀁 𑀬𑀸𑀯 𑀲𑀢𑁆𑀢𑀫𑁄 𑀧𑀼𑀭𑀺𑀲𑁄, 𑀢𑀸𑀯 𑀲𑀁𑀲𑀼𑀤𑁆𑀥𑀕𑀳𑀡𑀺𑀓𑁄. 𑀅𑀣 𑀯𑀸 𑀅𑀓𑁆𑀔𑀺𑀢𑁆𑀢𑁄 𑀅𑀦𑀼𑀧𑀓𑀼𑀝𑁆𑀞𑁄 𑀚𑀸𑀢𑀺𑀯𑀸𑀤𑁂𑀦𑀸𑀢𑀺 𑀤𑀲𑁆𑀲𑁂𑀦𑁆𑀢𑀺. 𑀅𑀓𑁆𑀔𑀺𑀢𑁆𑀢𑁄𑀢𑀺 𑁋 ‘‘𑀅𑀧𑀦𑁂𑀣 𑀏𑀢𑀁, 𑀓𑀺𑀁 𑀇𑀫𑀺𑀦𑀸’’𑀢𑀺 𑀏𑀯𑀁 𑀅𑀓𑁆𑀔𑀺𑀢𑁆𑀢𑁄 𑀅𑀦𑀯𑀓𑁆𑀔𑀺𑀢𑁆𑀢𑁄. 𑀅𑀦𑀼𑀧𑀓𑀼𑀝𑁆𑀞𑁄𑀢𑀺 𑀦 𑀉𑀧𑀓𑀼𑀝𑁆𑀞𑁄, 𑀦 𑀅𑀓𑁆𑀓𑁄𑀲𑀁 𑀯𑀸 𑀦𑀺𑀦𑁆𑀤𑀁 𑀯𑀸 𑀮𑀤𑁆𑀥𑀧𑀼𑀩𑁆𑀩𑁄. 𑀓𑁂𑀦 𑀓𑀸𑀭𑀡𑁂𑀦𑀸𑀢𑀺? 𑀚𑀸𑀢𑀺𑀯𑀸𑀤𑁂𑀦. 𑀇𑀢𑀺𑀧𑀺 𑁋 ‘‘𑀳𑀻𑀦𑀚𑀸𑀢𑀺𑀓𑁄 𑀏𑀲𑁄’’𑀢𑀺 𑀏𑀯𑀭𑀽𑀧𑁂𑀦 𑀯𑀘𑀦𑁂𑀦𑀸𑀢𑀺 𑀅𑀢𑁆𑀣𑁄.

𑀅𑀟𑁆𑀠𑁄𑀢𑀺 𑀇𑀲𑁆𑀲𑀭𑁄. 𑀫𑀳𑀤𑁆𑀥𑀦𑁄𑀢𑀺 𑀫𑀳𑀢𑀸 𑀥𑀦𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀪𑀯𑀢𑁄 𑀳𑀺 𑀕𑁂𑀳𑁂 𑀧𑀣𑀯𑀺𑀬𑀁 𑀧𑀁𑀲𑀼𑀯𑀸𑀮𑀺𑀓𑀸 𑀯𑀺𑀬 𑀩𑀳𑀼𑀥𑀦𑀁, 𑀲𑀫𑀡𑁄 𑀧𑀦 𑀕𑁄𑀢𑀫𑁄 𑀅𑀥𑀦𑁄 𑀪𑀺𑀓𑁆𑀔𑀸𑀬 𑀉𑀤𑀭𑀁 𑀧𑀽𑀭𑁂𑀢𑁆𑀯𑀸 𑀬𑀸𑀧𑁂𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑀺. 𑀫𑀳𑀸𑀪𑁄𑀕𑁄𑀢𑀺 𑀧𑀜𑁆𑀘𑀓𑀸𑀫𑀕𑀼𑀡𑀯𑀲𑁂𑀦 𑀫𑀳𑀸𑀉𑀧𑀪𑁄𑀕𑁄. 𑀏𑀯𑀁 𑀬𑀁 𑀬𑀁 𑀕𑀼𑀡𑀁 𑀯𑀤𑀦𑁆𑀢𑀺, 𑀢𑀲𑁆𑀲 𑀢𑀲𑁆𑀲 𑀧𑀝𑀺𑀧𑀓𑁆𑀔𑀯𑀲𑁂𑀦 𑀪𑀕𑀯𑀢𑁄 𑀅𑀕𑀼𑀡𑀁𑀬𑁂𑀯 𑀤𑀲𑁆𑀲𑁂𑀫𑀸𑀢𑀺 𑀫𑀜𑁆𑀜𑀫𑀸𑀦𑀸 𑀯𑀤𑀦𑁆𑀢𑀺.

𑀅𑀪𑀺𑀭𑀽𑀧𑁄𑀢𑀺 𑀅𑀜𑁆𑀜𑁂𑀳𑀺 𑀫𑀦𑀼𑀲𑁆𑀲𑁂𑀳𑀺 𑀅𑀪𑀺𑀭𑀽𑀧𑁄 𑀅𑀥𑀺𑀓𑀭𑀽𑀧𑁄. 𑀤𑀲𑁆𑀲𑀦𑀻𑀬𑁄𑀢𑀺 𑀤𑀺𑀯𑀲𑀫𑁆𑀧𑀺 𑀧𑀲𑁆𑀲𑀦𑁆𑀢𑀸𑀦𑀁 𑀅𑀢𑀺𑀢𑁆𑀢𑀺𑀓𑀭𑀡𑀢𑁄 𑀤𑀲𑁆𑀲𑀦𑀬𑁄𑀕𑁆𑀕𑁄. 𑀤𑀲𑁆𑀲𑀦𑁂𑀦𑁂𑀯 𑀘𑀺𑀢𑁆𑀢𑀧𑀲𑀸𑀤𑀚𑀦𑀦𑀢𑁄 𑀧𑀸𑀲𑀸𑀤𑀺𑀓𑁄. 𑀧𑁄𑀓𑁆𑀔𑀭𑀢𑀸 𑀯𑀼𑀘𑁆𑀘𑀢𑀺 𑀲𑀼𑀦𑁆𑀤𑀭𑀪𑀸𑀯𑁄, 𑀯𑀡𑁆𑀡𑀲𑁆𑀲 𑀧𑁄𑀓𑁆𑀔𑀭𑀢𑀸 𑀯𑀡𑁆𑀡𑀧𑁄𑀓𑁆𑀔𑀭𑀢𑀸, 𑀢𑀸𑀬 𑀯𑀡𑁆𑀡𑀲𑀫𑁆𑀧𑀢𑁆𑀢𑀺𑀬𑀸 𑀬𑀼𑀢𑁆𑀢𑁄𑀢𑀺 𑀅𑀢𑁆𑀣𑁄. 𑀧𑁄𑀭𑀸𑀡𑀸 𑀧𑀦𑀸𑀳𑀼 𑁋 ‘‘𑀧𑁄𑀓𑁆𑀔𑀭𑀦𑁆𑀢𑀺 𑀲𑀭𑀻𑀭𑀁 𑀯𑀤𑀦𑁆𑀢𑀺, 𑀯𑀡𑁆𑀡𑀁 𑀯𑀡𑁆𑀡𑀫𑁂𑀯𑀸’’𑀢𑀺. 𑀢𑁂𑀲𑀁 𑀫𑀢𑁂𑀦 𑀯𑀡𑁆𑀡𑀜𑁆𑀘 𑀧𑁄𑀓𑁆𑀔𑀭𑀜𑁆𑀘 𑀯𑀡𑁆𑀡𑀧𑁄𑀓𑁆𑀔𑀭𑀸𑀦𑀺. 𑀢𑁂𑀲𑀁 𑀪𑀸𑀯𑁄 𑀯𑀡𑁆𑀡𑀧𑁄𑀓𑁆𑀔𑀭𑀢𑀸. 𑀇𑀢𑀺 𑀧𑀭𑀫𑀸𑀬 𑀯𑀡𑁆𑀡𑀧𑁄𑀓𑁆𑀔𑀭𑀢𑀸𑀬𑀸𑀢𑀺 𑀉𑀢𑁆𑀢𑀫𑁂𑀦 𑀧𑀭𑀺𑀲𑀼𑀤𑁆𑀥𑁂𑀦 𑀯𑀡𑁆𑀡𑁂𑀦 𑀘𑁂𑀯 𑀲𑀭𑀻𑀭𑀲𑀡𑁆𑀞𑀸𑀦𑀲𑀫𑁆𑀧𑀢𑁆𑀢𑀺𑀬𑀸 𑀘𑀸𑀢𑀺 𑀅𑀢𑁆𑀣𑁄. 𑀩𑁆𑀭𑀳𑁆𑀫𑀯𑀡𑁆𑀡𑀻𑀢𑀺 𑀲𑁂𑀝𑁆𑀞𑀯𑀡𑁆𑀡𑀻. 𑀧𑀭𑀺𑀲𑀼𑀤𑁆𑀥𑀯𑀡𑁆𑀡𑁂𑀲𑀼𑀧𑀺 𑀲𑁂𑀝𑁆𑀞𑁂𑀦 𑀲𑀼𑀯𑀡𑁆𑀡𑀯𑀡𑁆𑀡𑁂𑀦 𑀲𑀫𑀦𑁆𑀦𑀸𑀕𑀢𑁄𑀢𑀺 𑀅𑀢𑁆𑀣𑁄. 𑀩𑁆𑀭𑀳𑁆𑀫𑀯𑀘𑁆𑀙𑀲𑀻𑀢𑀺 𑀫𑀳𑀸𑀩𑁆𑀭𑀳𑁆𑀫𑀼𑀦𑁄 𑀲𑀭𑀻𑀭𑀲𑀤𑀺𑀲𑁂𑀦𑁂𑀯 𑀲𑀭𑀻𑀭𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀅𑀔𑀼𑀤𑁆𑀤𑀸𑀯𑀓𑀸𑀲𑁄 𑀤𑀲𑁆𑀲𑀦𑀸𑀬𑀸𑀢𑀺 ‘‘𑀪𑁄𑀢𑁄 𑀲𑀭𑀻𑀭𑁂 𑀤𑀲𑁆𑀲𑀦𑀲𑁆𑀲 𑀑𑀓𑀸𑀲𑁄 𑀦 𑀔𑀼𑀤𑁆𑀤𑀓𑁄 𑀫𑀳𑀸, 𑀲𑀩𑁆𑀩𑀸𑀦𑁂𑀯 𑀢𑁂 𑀅𑀗𑁆𑀕𑀧𑀘𑁆𑀘𑀗𑁆𑀕𑀸𑀦𑀺 𑀤𑀲𑁆𑀲𑀦𑀻𑀬𑀸𑀦𑁂𑀯, 𑀢𑀸𑀦𑀺 𑀘𑀸𑀧𑀺 𑀫𑀳𑀦𑁆𑀢𑀸𑀦𑁂𑀯𑀸’’𑀢𑀺 𑀤𑀻𑀧𑁂𑀦𑁆𑀢𑀺.

𑀲𑀻𑀮𑀫𑀲𑁆𑀲 𑀅𑀢𑁆𑀣𑀻𑀢𑀺 𑀲𑀻𑀮𑀯𑀸. 𑀯𑀼𑀤𑁆𑀥𑀁 𑀯𑀤𑁆𑀥𑀺𑀢𑀁 𑀲𑀻𑀮𑀫𑀲𑁆𑀲𑀸𑀢𑀺 𑀯𑀼𑀤𑁆𑀥𑀲𑀻𑀮𑀻. 𑀯𑀼𑀤𑁆𑀥𑀲𑀻𑀮𑁂𑀦𑀸𑀢𑀺 𑀯𑀼𑀤𑁆𑀥𑁂𑀦 𑀯𑀤𑁆𑀥𑀺𑀢𑁂𑀦 𑀲𑀻𑀮𑁂𑀦. 𑀲𑀫𑀦𑁆𑀦𑀸𑀕𑀢𑁄𑀢𑀺 𑀬𑀼𑀢𑁆𑀢𑁄. 𑀇𑀤𑀁 𑀯𑀼𑀤𑁆𑀥𑀲𑀻𑀮𑀻𑀧𑀤𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀲𑀩𑁆𑀩𑀫𑁂𑀢𑀁 𑀧𑀜𑁆𑀘𑀲𑀻𑀮𑀫𑀢𑁆𑀢𑀫𑁂𑀯 𑀲𑀦𑁆𑀥𑀸𑀬 𑀯𑀤𑀦𑁆𑀢𑀺.

𑀓𑀮𑁆𑀬𑀸𑀡𑀯𑀸𑀘𑁄𑀢𑀺𑀆𑀤𑀻𑀲𑀼 𑀓𑀮𑁆𑀬𑀸𑀡𑀸 𑀲𑀼𑀦𑁆𑀤𑀭𑀸 𑀧𑀭𑀺𑀫𑀡𑁆𑀟𑀮𑀧𑀤𑀩𑁆𑀬𑀜𑁆𑀚𑀦𑀸 𑀯𑀸𑀘𑀸 𑀅𑀲𑁆𑀲𑀸𑀢𑀺 𑀓𑀮𑁆𑀬𑀸𑀡𑀯𑀸𑀘𑁄. 𑀓𑀮𑁆𑀬𑀸𑀡𑀁 𑀫𑀥𑀼𑀭𑀁 𑀯𑀸𑀓𑁆𑀓𑀭𑀡𑀁 𑀅𑀲𑁆𑀲𑀸𑀢𑀺 𑀓𑀮𑁆𑀬𑀸𑀡𑀯𑀸𑀓𑁆𑀓𑀭𑀡𑁄. 𑀯𑀸𑀓𑁆𑀓𑀭𑀡𑀦𑁆𑀢𑀺 𑀉𑀤𑀸𑀳𑀭𑀡𑀖𑁄𑀲𑁄. 𑀕𑀼𑀡𑀧𑀭𑀺𑀧𑀼𑀡𑁆𑀡𑀪𑀸𑀯𑁂𑀦 𑀧𑀼𑀭𑁂 𑀪𑀯𑀸𑀢𑀺 𑀧𑁄𑀭𑀻. 𑀧𑀼𑀭𑁂 𑀯𑀸 𑀪𑀯𑀢𑁆𑀢𑀸 𑀧𑁄𑀭𑀻. 𑀧𑁄𑀭𑀺𑀬𑀸 𑀦𑀸𑀕𑀭𑀺𑀓𑀺𑀢𑁆𑀣𑀺𑀬𑀸 𑀲𑀼𑀔𑀼𑀫𑀸𑀮𑀢𑁆𑀢𑀦𑁂𑀦 𑀲𑀤𑀺𑀲𑀸𑀢𑀺 𑀧𑁄𑀭𑀻, 𑀢𑀸𑀬 𑀧𑁄𑀭𑀺𑀬𑀸. 𑀯𑀺𑀲𑁆𑀲𑀝𑁆𑀞𑀸𑀬𑀸𑀢𑀺 𑀅𑀧𑀮𑀺𑀩𑀼𑀤𑁆𑀥𑀸𑀬 𑀲𑀦𑁆𑀤𑀺𑀝𑁆𑀞𑀯𑀺𑀮𑀫𑁆𑀩𑀺𑀢𑀸𑀤𑀺𑀤𑁄𑀲𑀭𑀳𑀺𑀢𑀸𑀬. 𑀅𑀦𑁂𑀮𑀕𑀮𑀸𑀬𑀸𑀢𑀺 𑀏𑀮𑀕𑀴𑁂𑀦𑀯𑀺𑀭𑀳𑀺𑀢𑀸𑀬. 𑀬𑀲𑁆𑀲 𑀓𑀲𑁆𑀲𑀘𑀺 𑀳𑀺 𑀓𑀣𑁂𑀦𑁆𑀢𑀲𑁆𑀲 𑀏𑀮𑀸 𑀕𑀴𑀦𑁆𑀢𑀺, 𑀮𑀸𑀮𑀸 𑀯𑀸 𑀧𑀕𑁆𑀖𑀭𑀦𑁆𑀢𑀺, 𑀔𑁂𑀴𑀨𑀼𑀲𑀺𑀢𑀸𑀦𑀺 𑀯𑀸 𑀦𑀺𑀓𑁆𑀔𑀫𑀦𑁆𑀢𑀺, 𑀢𑀲𑁆𑀲 𑀯𑀸𑀘𑀸 𑀏𑀮𑀕𑀴𑀁 𑀦𑀸𑀫 𑀳𑁄𑀢𑀺, 𑀢𑀩𑁆𑀩𑀺𑀧𑀭𑀺𑀢𑀸𑀬𑀸𑀢𑀺 𑀅𑀢𑁆𑀣𑁄. 𑀅𑀢𑁆𑀣𑀲𑁆𑀲 𑀯𑀺𑀜𑁆𑀜𑀸𑀧𑀦𑀺𑀬𑀸𑀢𑀺 𑀆𑀤𑀺𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑀁 𑀧𑀸𑀓𑀝𑀁 𑀓𑀢𑁆𑀯𑀸 𑀪𑀸𑀲𑀺𑀢𑀢𑁆𑀣𑀲𑁆𑀲 𑀯𑀺𑀜𑁆𑀜𑀸𑀧𑀦𑀲𑀫𑀢𑁆𑀣𑀸𑀬.

𑀚𑀺𑀡𑁆𑀡𑁄𑀢𑀺 𑀚𑀭𑀸𑀚𑀺𑀡𑁆𑀡𑀢𑀸𑀬 𑀚𑀺𑀡𑁆𑀡𑁄. 𑀯𑀼𑀤𑁆𑀥𑁄𑀢𑀺 𑀅𑀗𑁆𑀕𑀧𑀘𑁆𑀘𑀗𑁆𑀕𑀸𑀦𑀁 𑀯𑀼𑀤𑁆𑀥𑀺𑀪𑀸𑀯𑀫𑀭𑀺𑀬𑀸𑀤𑀧𑁆𑀧𑀢𑁆𑀢𑁄. 𑀫𑀳𑀮𑁆𑀮𑀓𑁄𑀢𑀺 𑀚𑀸𑀢𑀺𑀫𑀳𑀮𑁆𑀮𑀓𑀢𑀸𑀬 𑀲𑀫𑀦𑁆𑀦𑀸𑀕𑀢𑁄. 𑀘𑀺𑀭𑀓𑀸𑀮𑀧𑁆𑀧𑀲𑀼𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀤𑁆𑀥𑀕𑀢𑁄𑀢𑀺 𑀅𑀤𑁆𑀥𑀸𑀦𑀁 𑀕𑀢𑁄, 𑀤𑁆𑀯𑁂 𑀢𑀬𑁄 𑀭𑀸𑀚𑀧𑀭𑀺𑀯𑀝𑁆𑀝𑁂 𑀅𑀢𑀻𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀯𑀬𑁄𑀅𑀦𑀼𑀧𑁆𑀧𑀢𑁆𑀢𑁄𑀢𑀺 𑀧𑀘𑁆𑀙𑀺𑀫𑀯𑀬𑀁 𑀲𑀫𑁆𑀧𑀢𑁆𑀢𑁄, 𑀧𑀘𑁆𑀙𑀺𑀫𑀯𑀬𑁄 𑀦𑀸𑀫 𑀯𑀲𑁆𑀲𑀲𑀢𑀲𑁆𑀲 𑀧𑀘𑁆𑀙𑀺𑀫𑁄 𑀢𑀢𑀺𑀬𑀪𑀸𑀕𑁄.

𑀅𑀧𑀺 𑀘 𑀚𑀺𑀡𑁆𑀡𑁄𑀢𑀺 𑀧𑁄𑀭𑀸𑀡𑁄, 𑀘𑀺𑀭𑀓𑀸𑀮𑀧𑁆𑀧𑀯𑀢𑁆𑀢𑀓𑀼𑀮𑀦𑁆𑀯𑀬𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀯𑀼𑀤𑁆𑀥𑁄𑀢𑀺 𑀲𑀻𑀮𑀸𑀘𑀸𑀭𑀸𑀤𑀺𑀕𑀼𑀡𑀯𑀼𑀤𑁆𑀥𑀺𑀬𑀸 𑀬𑀼𑀢𑁆𑀢𑁄. 𑀫𑀳𑀮𑁆𑀮𑀓𑁄𑀢𑀺 𑀯𑀺𑀪𑀯𑀫𑀳𑀦𑁆𑀢𑀸𑀬 𑀲𑀫𑀦𑁆𑀦𑀸𑀕𑀢𑁄. 𑀅𑀤𑁆𑀥𑀕𑀢𑁄𑀢𑀺 𑀫𑀕𑁆𑀕𑀧𑁆𑀧𑀝𑀺𑀧𑀦𑁆𑀦𑁄 𑀩𑁆𑀭𑀸𑀳𑁆𑀫𑀡𑀸𑀦𑀁 𑀯𑀢𑀘𑀭𑀺𑀬𑀸𑀤𑀺𑀫𑀭𑀺𑀬𑀸𑀤𑀁 𑀅𑀯𑀻𑀢𑀺𑀓𑁆𑀓𑀫𑁆𑀫 𑀘𑀭𑀡𑀲𑀻𑀮𑁄. 𑀯𑀬𑁄𑀅𑀦𑀼𑀧𑁆𑀧𑀢𑁆𑀢𑁄𑀢𑀺 𑀚𑀸𑀢𑀺𑀯𑀼𑀤𑁆𑀥𑀪𑀸𑀯𑀫𑁆𑀧𑀺 𑀅𑀦𑁆𑀢𑀺𑀫𑀯𑀬𑀁 𑀅𑀦𑀼𑀧𑁆𑀧𑀢𑁆𑀢𑁄.

𑀩𑀼𑀤𑁆𑀥𑀕𑀼𑀡𑀓𑀣𑀸

𑁩𑁦𑁪. 𑀏𑀯𑀁 𑀯𑀼𑀢𑁆𑀢𑁂𑀢𑀺 𑀏𑀯𑀁 𑀢𑁂𑀳𑀺 𑀩𑁆𑀭𑀸𑀳𑁆𑀫𑀡𑁂𑀳𑀺 𑀯𑀼𑀢𑁆𑀢𑁂. 𑀲𑁄𑀡𑀤𑀡𑁆𑀟𑁄 𑁋 ‘‘𑀇𑀫𑁂 𑀩𑁆𑀭𑀸𑀳𑁆𑀫𑀡𑀸 𑀚𑀸𑀢𑀺𑀆𑀤𑀻𑀳𑀺 𑀫𑀫 𑀯𑀡𑁆𑀡𑀁 𑀯𑀤𑀦𑁆𑀢𑀺, 𑀦 𑀔𑁄 𑀧𑀦 𑀫𑁂𑀢𑀁 𑀬𑀼𑀢𑁆𑀢𑀁 𑀅𑀢𑁆𑀢𑀦𑁄 𑀯𑀡𑁆𑀡𑁂 𑀭𑀚𑁆𑀚𑀺𑀢𑀼𑀁. 𑀳𑀦𑁆𑀤𑀸𑀳𑀁 𑀏𑀢𑁂𑀲𑀁 𑀯𑀸𑀤𑀁 𑀪𑀺𑀦𑁆𑀤𑀺𑀢𑁆𑀯𑀸 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀫𑀳𑀦𑁆𑀢𑀪𑀸𑀯𑀁 𑀜𑀸𑀧𑁂𑀢𑁆𑀯𑀸 𑀏𑀢𑁂𑀲𑀁 𑀢𑀢𑁆𑀣 𑀕𑀫𑀦𑀁 𑀓𑀭𑁄𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀢𑁂𑀦 𑀳𑀺 𑁋 𑀪𑁄 𑀫𑀫𑀧𑀺 𑀲𑀼𑀡𑀸𑀣𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀬𑁂𑀧𑀺 𑀉𑀪𑀢𑁄 𑀲𑀼𑀚𑀸𑀢𑁄𑀢𑀺 𑀆𑀤𑀬𑁄 𑀅𑀢𑁆𑀢𑀦𑁄 𑀕𑀼𑀡𑁂𑀳𑀺 𑀲𑀤𑀺𑀲𑀸 𑀕𑀼𑀡𑀸 𑀢𑁂𑀧𑀺; ‘‘𑀓𑁄 𑀘𑀸𑀳𑀁 𑀓𑁂 𑀘 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀚𑀸𑀢𑀺𑀲𑀫𑁆𑀧𑀢𑁆𑀢𑀺𑀆𑀤𑀬𑁄 𑀕𑀼𑀡𑀸’’𑀢𑀺 𑀅𑀢𑁆𑀢𑀦𑁄 𑀕𑀼𑀡𑁂𑀳𑀺 𑀉𑀢𑁆𑀢𑀭𑀺𑀢𑀭𑁂𑀬𑁂𑀯 𑀫𑀜𑁆𑀜𑀫𑀸𑀦𑁄, 𑀇𑀢𑀭𑁂 𑀧𑀦 𑀏𑀓𑀦𑁆𑀢𑁂𑀦𑁂𑀯 𑀪𑀕𑀯𑀢𑁄 𑀫𑀳𑀦𑁆𑀢𑀪𑀸𑀯𑀤𑀻𑀧𑀦𑀢𑁆𑀣𑀁 𑀧𑀓𑀸𑀲𑁂𑀢𑀺.

𑀫𑀬𑀫𑁂𑀯 𑀅𑀭𑀳𑀸𑀫𑀸𑀢𑀺 𑀏𑀯𑀁 𑀦𑀺𑀬𑀸𑀫𑁂𑀦𑁆𑀢𑁄𑀯𑁂𑀢𑁆𑀣 𑀇𑀤𑀁 𑀤𑀻𑀧𑁂𑀢𑀺 𑁋 ‘‘𑀬𑀤𑀺 𑀕𑀼𑀡𑀫𑀳𑀦𑁆𑀢𑀢𑀸𑀬 𑀉𑀧𑀲𑀗𑁆𑀓𑀫𑀺𑀢𑀩𑁆𑀩𑁄 𑀦𑀸𑀫 𑀳𑁄𑀢𑀺. 𑀬𑀣𑀸 𑀳𑀺 𑀲𑀺𑀦𑁂𑀭𑀼𑀁 𑀉𑀧𑀦𑀺𑀥𑀸𑀬 𑀲𑀸𑀲𑀧𑁄, 𑀫𑀳𑀸𑀲𑀫𑀼𑀤𑁆𑀤𑀁 𑀉𑀧𑀦𑀺𑀥𑀸𑀬 𑀕𑁄𑀧𑀤𑀓𑀁, 𑀲𑀢𑁆𑀢𑀲𑀼 𑀫𑀳𑀸𑀲𑀭𑁂𑀲𑀼 𑀉𑀤𑀓𑀁 𑀉𑀧𑀦𑀺𑀥𑀸𑀬 𑀉𑀲𑁆𑀲𑀸𑀯𑀩𑀺𑀦𑁆𑀤𑀼 𑀧𑀭𑀺𑀢𑁆𑀢𑁄 𑀮𑀸𑀫𑀓𑁄. 𑀏𑀯𑀫𑁂𑀯 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀚𑀸𑀢𑀺𑀲𑀫𑁆𑀧𑀢𑁆𑀢𑀺𑀆𑀤𑀬𑁄𑀧𑀺 𑀕𑀼𑀡𑁂 𑀉𑀧𑀦𑀺𑀥𑀸𑀬 𑀅𑀫𑁆𑀳𑀸𑀓𑀁 𑀕𑀼𑀡𑀸 𑀧𑀭𑀺𑀢𑁆𑀢𑀸 𑀮𑀸𑀫𑀓𑀸; 𑀢𑀲𑁆𑀫𑀸 𑀫𑀬𑀫𑁂𑀯 𑀅𑀭𑀳𑀸𑀫 𑀢𑀁 𑀪𑀯𑀦𑁆𑀢𑀁 𑀕𑁄𑀢𑀫𑀁 𑀤𑀲𑁆𑀲𑀦𑀸𑀬 𑀉𑀧𑀲𑀗𑁆𑀓𑀫𑀺𑀢𑀼’’𑀦𑁆𑀢𑀺.

𑀫𑀳𑀦𑁆𑀢𑀁 𑀜𑀸𑀢𑀺𑀲𑀁𑀖𑀁 𑀑𑀳𑀸𑀬𑀸𑀢𑀺 𑀫𑀸𑀢𑀺𑀧𑀓𑁆𑀔𑁂 𑀅𑀲𑀻𑀢𑀺𑀓𑀼𑀮𑀲𑀳𑀲𑁆𑀲𑀸𑀦𑀺, 𑀧𑀺𑀢𑀺𑀧𑀓𑁆𑀔𑁂 𑀅𑀲𑀻𑀢𑀺𑀓𑀼𑀮𑀲𑀳𑀲𑁆𑀲𑀸𑀦𑀻𑀢𑀺 𑀏𑀯𑀁 𑀲𑀝𑁆𑀞𑀺𑀓𑀼𑀮𑀲𑀢𑀲𑀳𑀲𑁆𑀲𑀁 𑀑𑀳𑀸𑀬 𑀧𑀩𑁆𑀩𑀚𑀺𑀢𑁄.

𑀪𑀽𑀫𑀺𑀕𑀢𑀜𑁆𑀘 𑀯𑁂𑀳𑀸𑀲𑀝𑁆𑀞𑀜𑁆𑀘𑀸𑀢𑀺 𑀏𑀢𑁆𑀣 𑀭𑀸𑀚𑀗𑁆𑀕𑀡𑁂 𑀘𑁂𑀯 𑀉𑀬𑁆𑀬𑀸𑀦𑁂 𑀘 𑀲𑀼𑀥𑀸𑀫𑀝𑁆𑀞𑀧𑁄𑀓𑁆𑀔𑀭𑀡𑀺𑀬𑁄 𑀲𑀢𑁆𑀢𑀭𑀢𑀦𑀸𑀦𑀁 𑀧𑀽𑀭𑁂𑀢𑁆𑀯𑀸 𑀪𑀽𑀫𑀺𑀬𑀁 𑀞𑀧𑀺𑀢𑀁 𑀥𑀦𑀁 𑀪𑀽𑀫𑀺𑀕𑀢𑀁 𑀦𑀸𑀫. 𑀧𑀸𑀲𑀸𑀤𑀦𑀺𑀬𑀽𑀳𑀸𑀤𑀬𑁄 𑀧𑀭𑀺𑀧𑀽𑀭𑁂𑀢𑁆𑀯𑀸 𑀞𑀧𑀺𑀢𑀁 𑀯𑁂𑀳𑀸𑀲𑀝𑁆𑀞𑀁 𑀦𑀸𑀫. 𑀏𑀢𑀁 𑀢𑀸𑀯 𑀓𑀼𑀮𑀧𑀭𑀺𑀬𑀸𑀬𑁂𑀦 𑀆𑀕𑀢𑀁. 𑀢𑀣𑀸𑀕𑀢𑀲𑁆𑀲 𑀧𑀦 𑀚𑀸𑀢𑀤𑀺𑀯𑀲𑁂𑀬𑁂𑀯 𑀲𑀗𑁆𑀔𑁄, 𑀏𑀮𑁄, 𑀉𑀧𑁆𑀧𑀮𑁄, 𑀧𑀼𑀡𑁆𑀟𑀭𑀻𑀓𑁄𑀢𑀺 𑀘𑀢𑁆𑀢𑀸𑀭𑁄 𑀦𑀺𑀥𑀬𑁄 𑀉𑀕𑁆𑀕𑀢𑀸. 𑀢𑁂𑀲𑀼 𑀲𑀗𑁆𑀔𑁄 𑀕𑀸𑀯𑀼𑀢𑀺𑀓𑁄, 𑀏𑀮𑁄 𑀅𑀟𑁆𑀠𑀬𑁄𑀚𑀦𑀺𑀓𑁄, 𑀉𑀧𑁆𑀧𑀮𑁄 𑀢𑀺𑀕𑀸𑀯𑀼𑀢𑀺𑀓𑁄, 𑀧𑀼𑀡𑁆𑀟𑀭𑀻𑀓𑁄 𑀬𑁄𑀚𑀦𑀺𑀓𑁄. 𑀢𑁂𑀲𑀼𑀧𑀺 𑀕𑀳𑀺𑀢𑀁 𑀕𑀳𑀺𑀢𑀁 𑀧𑀽𑀭𑀢𑀺𑀬𑁂𑀯, 𑀇𑀢𑀺 𑀪𑀕𑀯𑀸 𑀧𑀳𑀽𑀢𑀁 𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀁 𑀑𑀳𑀸𑀬 𑀧𑀩𑁆𑀩𑀚𑀺𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀤𑀳𑀭𑁄𑀯 𑀲𑀫𑀸𑀦𑁄𑀢𑀺 𑀢𑀭𑀼𑀡𑁄𑀯 𑀲𑀫𑀸𑀦𑁄. 𑀲𑀼𑀲𑀼𑀓𑀸𑀴𑀓𑁂𑀲𑁄𑀢𑀺 𑀲𑀼𑀝𑁆𑀞𑀼 𑀓𑀸𑀴𑀓𑁂𑀲𑁄, 𑀅𑀜𑁆𑀚𑀦𑀯𑀡𑁆𑀡𑀲𑀤𑀺𑀲𑀓𑁂𑀲𑁄 𑀳𑀼𑀢𑁆𑀯𑀸 𑀯𑀸𑀢𑀺 𑀅𑀢𑁆𑀣𑁄. 𑀪𑀤𑁆𑀭𑁂𑀦𑀸𑀢𑀺 𑀪𑀤𑁆𑀤𑀓𑁂𑀦. 𑀧𑀞𑀫𑁂𑀦 𑀯𑀬𑀲𑀸𑀢𑀺 𑀢𑀺𑀡𑁆𑀡𑀁 𑀯𑀬𑀸𑀦𑀁 𑀧𑀞𑀫𑀯𑀬𑁂𑀦. 𑀅𑀓𑀸𑀫𑀓𑀸𑀦𑀦𑁆𑀢𑀺 𑀅𑀦𑀺𑀘𑁆𑀙𑀫𑀸𑀦𑀸𑀦𑀁. 𑀅𑀦𑀸𑀤𑀭𑀢𑁆𑀣𑁂 𑀲𑀸𑀫𑀺𑀯𑀘𑀦𑀁. 𑀅𑀲𑁆𑀲𑀽𑀦𑀺 𑀫𑀼𑀔𑁂 𑀏𑀢𑁂𑀲𑀦𑁆𑀢𑀺 𑀅𑀲𑁆𑀲𑀼𑀫𑀼𑀔𑀸, 𑀢𑁂𑀲𑀁 𑀅𑀲𑁆𑀲𑀼𑀫𑀼𑀔𑀸𑀦𑀁, 𑀅𑀲𑁆𑀲𑀽𑀳𑀺 𑀓𑀺𑀮𑀺𑀦𑁆𑀦𑀫𑀼𑀔𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀭𑀼𑀤𑀦𑁆𑀢𑀸𑀦𑀦𑁆𑀢𑀺 𑀓𑀦𑁆𑀤𑀺𑀢𑁆𑀯𑀸 𑀭𑁄𑀤𑀫𑀸𑀦𑀸𑀦𑀁. 𑀅𑀔𑀼𑀤𑁆𑀤𑀸𑀯𑀓𑀸𑀲𑁄𑀢𑀺 𑀏𑀢𑁆𑀣 𑀪𑀕𑀯𑀢𑁄 𑀅𑀧𑀭𑀺𑀫𑀸𑀡𑁄𑀬𑁂𑀯 𑀤𑀲𑁆𑀲𑀦𑀸𑀬 𑀑𑀓𑀸𑀲𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀢𑀢𑁆𑀭𑀺𑀤𑀁 𑀯𑀢𑁆𑀣𑀼 𑁋 𑀭𑀸𑀚𑀕𑀳𑁂 𑀓𑀺𑀭 𑀅𑀜𑁆𑀜𑀢𑀭𑁄 𑀩𑁆𑀭𑀸𑀳𑁆𑀫𑀡𑁄 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀧𑀫𑀸𑀡𑀁 𑀕𑀳𑁂𑀢𑀼𑀁 𑀦 𑀲𑀓𑁆𑀓𑁄𑀢𑀻𑀢𑀺 𑀲𑀼𑀢𑁆𑀯𑀸 𑀪𑀕𑀯𑀢𑁄 𑀧𑀺𑀡𑁆𑀟𑀸𑀬 𑀧𑀯𑀺𑀲𑀦𑀓𑀸𑀮𑁂 𑀲𑀝𑁆𑀞𑀺𑀳𑀢𑁆𑀣𑀁 𑀯𑁂𑀴𑀼𑀁 𑀕𑀳𑁂𑀢𑁆𑀯𑀸 𑀦𑀕𑀭𑀤𑁆𑀯𑀸𑀭𑀲𑁆𑀲 𑀩𑀳𑀺 𑀞𑀢𑁆𑀯𑀸 𑀲𑀫𑁆𑀧𑀢𑁆𑀢𑁂 𑀪𑀕𑀯𑀢𑀺 𑀯𑁂𑀴𑀼𑀁 𑀕𑀳𑁂𑀢𑁆𑀯𑀸 𑀲𑀫𑀻𑀧𑁂 𑀅𑀝𑁆𑀞𑀸𑀲𑀺. 𑀯𑁂𑀴𑀼 𑀪𑀕𑀯𑀢𑁄 𑀚𑀸𑀡𑀼𑀓𑀫𑀢𑁆𑀢𑀁 𑀧𑀸𑀧𑀼𑀡𑀺. 𑀧𑀼𑀦 𑀤𑀺𑀯𑀲𑁂 𑀤𑁆𑀯𑁂 𑀯𑁂𑀴𑀽 𑀖𑀝𑁂𑀢𑁆𑀯𑀸 𑀲𑀫𑀻𑀧𑁂 𑀅𑀝𑁆𑀞𑀸𑀲𑀺. 𑀪𑀕𑀯𑀸𑀧𑀺 𑀤𑁆𑀯𑀺𑀦𑁆𑀦𑀁 𑀯𑁂𑀴𑀽𑀦𑀁 𑀉𑀧𑀭𑀺 𑀓𑀝𑀺𑀫𑀢𑁆𑀢𑀫𑁂𑀯 𑀧𑀜𑁆𑀜𑀸𑀬𑀫𑀸𑀦𑁄 𑁋 ‘‘𑀩𑁆𑀭𑀸𑀳𑁆𑀫𑀡, 𑀓𑀺𑀁 𑀓𑀭𑁄𑀲𑀻’’𑀢𑀺 𑀆𑀳. 𑀢𑀼𑀫𑁆𑀳𑀸𑀓𑀁 𑀧𑀫𑀸𑀡𑀁 𑀕𑀡𑁆𑀳𑀸𑀫𑀻𑀢𑀺. ‘‘𑀩𑁆𑀭𑀸𑀳𑁆𑀫𑀡, 𑀲𑀘𑁂𑀧𑀺 𑀢𑁆𑀯𑀁 𑀲𑀓𑀮𑀘𑀓𑁆𑀓𑀯𑀸𑀴𑀕𑀩𑁆𑀪𑀁 𑀧𑀽𑀭𑁂𑀢𑁆𑀯𑀸 𑀞𑀺𑀢𑁂 𑀯𑁂𑀴𑀽 𑀖𑀝𑁂𑀢𑁆𑀯𑀸 𑀆𑀕𑀫𑀺𑀲𑁆𑀲𑀲𑀺, 𑀦𑁂𑀯 𑀫𑁂 𑀧𑀫𑀸𑀡𑀁 𑀕𑀳𑁂𑀢𑀼𑀁 𑀲𑀓𑁆𑀔𑀺𑀲𑁆𑀲𑀲𑀺. 𑀦 𑀳𑀺 𑀫𑀬𑀸 𑀘𑀢𑁆𑀢𑀸𑀭𑀺 𑀅𑀲𑀗𑁆𑀔𑁆𑀬𑁂𑀬𑀸𑀦𑀺 𑀓𑀧𑁆𑀧𑀲𑀢𑀲𑀳𑀲𑁆𑀲𑀜𑁆𑀘 𑀢𑀣𑀸 𑀧𑀸𑀭𑀫𑀺𑀬𑁄 𑀧𑀽𑀭𑀺𑀢𑀸, 𑀬𑀣𑀸 𑀫𑁂 𑀧𑀭𑁄 𑀧𑀫𑀸𑀡𑀁 𑀕𑀡𑁆𑀳𑁂𑀬𑁆𑀬, 𑀅𑀢𑀼𑀮𑁄, 𑀩𑁆𑀭𑀸𑀳𑁆𑀫𑀡, 𑀢𑀣𑀸𑀕𑀢𑁄 𑀅𑀧𑁆𑀧𑀫𑁂𑀬𑁆𑀬𑁄’’𑀢𑀺 𑀯𑀢𑁆𑀯𑀸 𑀥𑀫𑁆𑀫𑀧𑀤𑁂 𑀕𑀸𑀣𑀫𑀸𑀳 𑁋

‘‘𑀢𑁂 𑀢𑀸𑀤𑀺𑀲𑁂 𑀧𑀽𑀚𑀬𑀢𑁄, 𑀦𑀺𑀩𑁆𑀩𑀼𑀢𑁂 𑀅𑀓𑀼𑀢𑁄𑀪𑀬𑁂;

𑀦 𑀲𑀓𑁆𑀓𑀸 𑀧𑀼𑀜𑁆𑀜𑀁 𑀲𑀗𑁆𑀔𑀸𑀢𑀼𑀁, 𑀇𑀫𑁂𑀢𑁆𑀢𑀫𑀧𑀺 𑀓𑁂𑀦𑀘𑀻’’𑀢𑀺. (𑀥. 𑀧. 𑁩𑁬);

𑀕𑀸𑀣𑀸𑀧𑀭𑀺𑀬𑁄𑀲𑀸𑀦𑁂 𑀘𑀢𑀼𑀭𑀸𑀲𑀻𑀢𑀺𑀧𑀸𑀡𑀲𑀳𑀲𑁆𑀲𑀸𑀦𑀺 𑀅𑀫𑀢𑀁 𑀧𑀺𑀯𑀺𑀁𑀲𑀼.

𑀅𑀧𑀭𑀫𑁆𑀧𑀺 𑀯𑀢𑁆𑀣𑀼 𑁋 𑀭𑀸𑀳𑀼 𑀓𑀺𑀭 𑀅𑀲𑀼𑀭𑀺𑀦𑁆𑀤𑁄 𑀘𑀢𑁆𑀢𑀸𑀭𑀺 𑀬𑁄𑀚𑀦𑀲𑀳𑀲𑁆𑀲𑀸𑀦𑀺 𑀅𑀝𑁆𑀞 𑀘 𑀬𑁄𑀚𑀦𑀲𑀢𑀸𑀦𑀺 𑀉𑀘𑁆𑀘𑁄. 𑀩𑀸𑀳𑀦𑁆𑀢𑀭𑀫𑀲𑁆𑀲 𑀤𑁆𑀯𑀸𑀤𑀲𑀬𑁄𑀚𑀦𑀲𑀢𑀸𑀦𑀺. 𑀩𑀳𑀮𑀦𑁆𑀢𑀭𑁂𑀦 𑀙 𑀬𑁄𑀚𑀦𑀲𑀢𑀸𑀦𑀺. 𑀳𑀢𑁆𑀣𑀢𑀮𑀧𑀸𑀤𑀢𑀮𑀸𑀦𑀁 𑀧𑀼𑀣𑀼𑀮𑀢𑁄 𑀢𑀻𑀡𑀺 𑀬𑁄𑀚𑀦𑀲𑀢𑀸𑀦𑀺. 𑀅𑀗𑁆𑀕𑀼𑀮𑀺𑀧𑀩𑁆𑀩𑀸𑀦𑀺 𑀧𑀡𑁆𑀡𑀸𑀲𑀬𑁄𑀚𑀦𑀸𑀦𑀺. 𑀪𑀫𑀼𑀓𑀦𑁆𑀢𑀭𑀁 𑀧𑀡𑁆𑀡𑀸𑀲𑀬𑁄𑀚𑀦𑀁. 𑀫𑀼𑀔𑀁 𑀤𑁆𑀯𑀺𑀬𑁄𑀚𑀦𑀲𑀢𑀁 𑀢𑀺𑀬𑁄𑀚𑀦𑀲𑀢𑀕𑀫𑁆𑀪𑀻𑀭𑀁 𑀢𑀺𑀬𑁄𑀚𑀦𑀲𑀢𑀧𑀭𑀺𑀫𑀡𑁆𑀟𑀮𑀁. 𑀕𑀻𑀯𑀸 𑀢𑀺𑀬𑁄𑀚𑀦𑀲𑀢𑀁. 𑀦𑀮𑀸𑀝𑀁 𑀢𑀺𑀬𑁄𑀚𑀦𑀲𑀢𑀁. 𑀲𑀻𑀲𑀁 𑀦𑀯𑀬𑁄𑀚𑀦𑀲𑀢𑀁. ‘‘𑀲𑁄 𑀅𑀳𑀁 𑀉𑀘𑁆𑀘𑁄𑀲𑁆𑀫𑀺, 𑀲𑀢𑁆𑀣𑀸𑀭𑀁 𑀑𑀦𑀫𑀺𑀢𑁆𑀯𑀸 𑀑𑀮𑁄𑀓𑁂𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀦𑀸𑀕𑀘𑁆𑀙𑀺. 𑀲𑁄 𑀏𑀓𑀤𑀺𑀯𑀲𑀁 𑀪𑀕𑀯𑀢𑁄 𑀯𑀡𑁆𑀡𑀁 𑀲𑀼𑀢𑁆𑀯𑀸 𑁋 ‘‘𑀬𑀣𑀸𑀓𑀣𑀜𑁆𑀘 𑀑𑀮𑁄𑀓𑁂𑀲𑁆𑀲𑀸𑀫𑀻’’𑀢𑀺 𑀆𑀕𑀢𑁄.

𑀅𑀣 𑀪𑀕𑀯𑀸 𑀢𑀲𑁆𑀲𑀚𑁆𑀛𑀸𑀲𑀬𑀁 𑀯𑀺𑀤𑀺𑀢𑁆𑀯𑀸 𑁋 ‘‘𑀘𑀢𑀽𑀲𑀼 𑀇𑀭𑀺𑀬𑀸𑀧𑀣𑁂𑀲𑀼 𑀓𑀢𑀭𑁂𑀦 𑀤𑀲𑁆𑀲𑁂𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀞𑀺𑀢𑀓𑁄 𑀦𑀸𑀫 𑀦𑀻𑀘𑁄𑀧𑀺 𑀉𑀘𑁆𑀘𑁄 𑀯𑀺𑀬 𑀧𑀜𑁆𑀜𑀸𑀬𑀢𑀺. 𑀦𑀺𑀧𑀦𑁆𑀦𑁄𑀯𑀲𑁆𑀲 𑀅𑀢𑁆𑀢𑀸𑀦𑀁 𑀤𑀲𑁆𑀲𑁂𑀲𑁆𑀲𑀸𑀫𑀻’’𑀢𑀺 ‘‘𑀆𑀦𑀦𑁆𑀤, 𑀕𑀦𑁆𑀥𑀓𑀼𑀝𑀺𑀧𑀭𑀺𑀯𑁂𑀡𑁂 𑀫𑀜𑁆𑀘𑀓𑀁 𑀧𑀜𑁆𑀜𑀸𑀧𑁂𑀳𑀻’’𑀢𑀺 𑀯𑀢𑁆𑀯𑀸 𑀢𑀢𑁆𑀣 𑀲𑀻𑀳𑀲𑁂𑀬𑁆𑀬𑀁 𑀓𑀧𑁆𑀧𑁂𑀲𑀺. 𑀭𑀸𑀳𑀼 𑀆𑀕𑀦𑁆𑀢𑁆𑀯𑀸 𑀦𑀺𑀧𑀦𑁆𑀦𑀁 𑀪𑀕𑀯𑀦𑁆𑀢𑀁 𑀕𑀻𑀯𑀁 𑀉𑀦𑁆𑀦𑀸𑀫𑁂𑀢𑁆𑀯𑀸 𑀦𑀪𑀫𑀚𑁆𑀛𑁂 𑀧𑀼𑀡𑁆𑀡𑀘𑀦𑁆𑀤𑀁 𑀯𑀺𑀬 𑀉𑀮𑁆𑀮𑁄𑀓𑁂𑀲𑀺. 𑀓𑀺𑀫𑀺𑀤𑀁 𑀅𑀲𑀼𑀭𑀺𑀦𑁆𑀤𑀸𑀢𑀺 𑀘 𑀯𑀼𑀢𑁆𑀢𑁂 𑁋 ‘‘𑀪𑀕𑀯𑀸 𑀑𑀦𑀫𑀺𑀢𑁆𑀯𑀸 𑀑𑀮𑁄𑀓𑁂𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀸𑀫𑀻’’𑀢𑀺 𑀦𑀸𑀕𑀘𑁆𑀙𑀺𑀦𑁆𑀢𑀺. 𑀦 𑀫𑀬𑀸, 𑀅𑀲𑀼𑀭𑀺𑀦𑁆𑀤, 𑀅𑀥𑁄𑀫𑀼𑀔𑁂𑀦 𑀧𑀸𑀭𑀫𑀺𑀬𑁄 𑀧𑀽𑀭𑀺𑀢𑀸. 𑀉𑀤𑁆𑀥𑀕𑁆𑀕𑀫𑁂𑀯 𑀓𑀢𑁆𑀯𑀸 𑀤𑀸𑀦𑀁 𑀤𑀺𑀦𑁆𑀦𑀦𑁆𑀢𑀺. 𑀢𑀁 𑀤𑀺𑀯𑀲𑀁 𑀭𑀸𑀳𑀼 𑀲𑀭𑀡𑀁 𑀅𑀕𑀫𑀸𑀲𑀺. 𑀏𑀯𑀁 𑀪𑀕𑀯𑀸 𑀅𑀔𑀼𑀤𑁆𑀤𑀸𑀯𑀓𑀸𑀲𑁄 𑀤𑀲𑁆𑀲𑀦𑀸𑀬.

𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑁂𑀦 𑀲𑀻𑀮𑀯𑀸, 𑀢𑀁 𑀧𑀦 𑀲𑀻𑀮𑀁 𑀅𑀭𑀺𑀬𑀁 𑀉𑀢𑁆𑀢𑀫𑀁 𑀧𑀭𑀺𑀲𑀼𑀤𑁆𑀥𑀁. 𑀢𑁂𑀦𑀸𑀳 𑁋 ‘‘𑀅𑀭𑀺𑀬𑀲𑀻𑀮𑀻’’𑀢𑀺. 𑀢𑀤𑁂𑀢𑀁 𑀅𑀦𑀯𑀚𑁆𑀚𑀝𑁆𑀞𑁂𑀦 𑀓𑀼𑀲𑀮𑀁. 𑀢𑁂𑀦𑀸𑀳 𑁋 ‘‘𑀓𑀼𑀲𑀮𑀲𑀻𑀮𑀻’’𑀢𑀺. 𑀓𑀼𑀲𑀮𑀲𑀻𑀮𑁂𑀦𑀸𑀢𑀺 𑀇𑀤𑀫𑀲𑁆𑀲 𑀯𑁂𑀯𑀘𑀦𑀁.

𑀩𑀳𑀽𑀦𑀁 𑀆𑀘𑀭𑀺𑀬𑀧𑀸𑀘𑀭𑀺𑀬𑁄𑀢𑀺 𑀪𑀕𑀯𑀢𑁄 𑀏𑀓𑁂𑀓𑀸𑀬 𑀥𑀫𑁆𑀫𑀤𑁂𑀲𑀦𑀸𑀬 𑀘𑀢𑀼𑀭𑀸𑀲𑀻𑀢𑀺𑀧𑀸𑀡𑀲𑀳𑀲𑁆𑀲𑀸𑀦𑀺 𑀅𑀧𑀭𑀺𑀫𑀸𑀡𑀸𑀧𑀺 𑀤𑁂𑀯𑀫𑀦𑀼𑀲𑁆𑀲𑀸 𑀫𑀕𑁆𑀕𑀨𑀮𑀸𑀫𑀢𑀁 𑀧𑀺𑀯𑀦𑁆𑀢𑀺, 𑀢𑀲𑁆𑀫𑀸 𑀩𑀳𑀽𑀦𑀁 𑀆𑀘𑀭𑀺𑀬𑁄. 𑀲𑀸𑀯𑀓𑀯𑁂𑀦𑁂𑀬𑁆𑀬𑀸𑀦𑀁 𑀧𑀦 𑀧𑀸𑀘𑀭𑀺𑀬𑁄𑀢𑀺.

𑀔𑀻𑀡𑀓𑀸𑀫𑀭𑀸𑀕𑁄𑀢𑀺 𑀏𑀢𑁆𑀣 𑀓𑀸𑀫𑀁 𑀪𑀕𑀯𑀢𑁄 𑀲𑀩𑁆𑀩𑁂𑀧𑀺 𑀓𑀺𑀮𑁂𑀲𑀸 𑀔𑀻𑀡𑀸. 𑀩𑁆𑀭𑀸𑀳𑁆𑀫𑀡𑁄 𑀧𑀦 𑀢𑁂 𑀦 𑀚𑀸𑀦𑀸𑀢𑀺. 𑀅𑀢𑁆𑀢𑀦𑁄 𑀚𑀸𑀦𑀦𑀝𑁆𑀞𑀸𑀦𑁂𑀬𑁂𑀯 𑀕𑀼𑀡𑀁 𑀓𑀣𑁂𑀢𑀺. 𑀯𑀺𑀕𑀢𑀘𑀸𑀧𑀮𑁆𑀮𑁄𑀢𑀺 𑁋 ‘‘𑀧𑀢𑁆𑀢𑀫𑀡𑁆𑀟𑀦𑀸 𑀘𑀻𑀯𑀭𑀫𑀡𑁆𑀟𑀦𑀸 𑀲𑁂𑀦𑀸𑀲𑀦𑀫𑀡𑁆𑀟𑀦𑀸 𑀇𑀫𑀲𑁆𑀲 𑀯𑀸 𑀧𑀽𑀢𑀺𑀓𑀸𑀬𑀲𑁆𑀲…𑀧𑁂… 𑀓𑁂𑀮𑀦𑀸 𑀧𑀝𑀺𑀓𑁂𑀮𑀦𑀸’’𑀢𑀺 (𑀯𑀺𑀪. 𑁮𑁫𑁪) 𑀏𑀯𑀁 𑀯𑀼𑀢𑁆𑀢𑀘𑀸𑀧𑀮𑁆𑀮𑀸 𑀯𑀺𑀭𑀳𑀺𑀢𑁄.

𑀅𑀧𑀸𑀧𑀧𑀼𑀭𑁂𑀓𑁆𑀔𑀸𑀭𑁄𑀢𑀺 𑀅𑀧𑀸𑀧𑁂 𑀦𑀯 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁂 𑀧𑀼𑀭𑀢𑁄 𑀓𑀢𑁆𑀯𑀸 𑀯𑀺𑀘𑀭𑀢𑀺. 𑀩𑁆𑀭𑀳𑁆𑀫𑀜𑁆𑀜𑀸𑀬 𑀧𑀚𑀸𑀬𑀸𑀢𑀺 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑀫𑀳𑀸𑀓𑀲𑁆𑀲𑀧𑀸𑀤𑀺𑀪𑁂𑀤𑀸𑀬 𑀩𑁆𑀭𑀸𑀳𑁆𑀫𑀡𑀧𑀚𑀸𑀬, 𑀏𑀢𑀺𑀲𑁆𑀲𑀸𑀬 𑀘 𑀧𑀚𑀸𑀬 𑀧𑀼𑀭𑁂𑀓𑁆𑀔𑀸𑀭𑁄. 𑀅𑀬𑀜𑁆𑀳𑀺 𑀧𑀚𑀸 𑀲𑀫𑀡𑀁 𑀕𑁄𑀢𑀫𑀁 𑀧𑀼𑀭𑀓𑁆𑀔𑀢𑁆𑀯𑀸 𑀘𑀭𑀢𑀻𑀢𑀺 𑀅𑀢𑁆𑀣𑁄. 𑀅𑀧𑀺 𑀘 𑀅𑀧𑀸𑀧𑀧𑀼𑀭𑁂𑀓𑁆𑀔𑀸𑀭𑁄𑀢𑀺 𑀦 𑀧𑀸𑀧𑀁 𑀧𑀼𑀭𑁂𑀓𑁆𑀔𑀸𑀭𑁄 𑀦 𑀧𑀸𑀧𑀁 𑀧𑀼𑀭𑀢𑁄 𑀓𑀢𑁆𑀯𑀸 𑀘𑀭𑀢𑀺, 𑀦 𑀧𑀸𑀧𑀁 𑀇𑀘𑁆𑀙𑀢𑀻𑀢𑀺 𑀅𑀢𑁆𑀣𑁄. 𑀓𑀲𑁆𑀲? 𑀩𑁆𑀭𑀳𑁆𑀫𑀜𑁆𑀜𑀸𑀬 𑀧𑀚𑀸𑀬. 𑀅𑀢𑁆𑀢𑀦𑀸 𑀲𑀤𑁆𑀥𑀺𑀁 𑀧𑀝𑀺𑀯𑀺𑀭𑀼𑀤𑁆𑀥𑀸𑀬𑀧𑀺 𑀩𑁆𑀭𑀸𑀳𑁆𑀫𑀡𑀧𑀚𑀸𑀬 𑀅𑀯𑀺𑀭𑀼𑀤𑁆𑀥𑁄 𑀳𑀺𑀢𑀲𑀼𑀔𑀢𑁆𑀣𑀺𑀓𑁄 𑀬𑁂𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀢𑀺𑀭𑁄𑀭𑀝𑁆𑀞𑀸𑀢𑀺 𑀧𑀭𑀭𑀝𑁆𑀞𑀢𑁄. 𑀢𑀺𑀭𑁄𑀚𑀦𑀧𑀤𑀸𑀢𑀺 𑀧𑀭𑀚𑀦𑀧𑀤𑀢𑁄. 𑀧𑀜𑁆𑀳𑀁 𑀧𑀼𑀘𑁆𑀙𑀺𑀢𑀼𑀁 𑀆𑀕𑀘𑁆𑀙𑀦𑁆𑀢𑀻𑀢𑀺 𑀔𑀢𑁆𑀢𑀺𑀬𑀧𑀡𑁆𑀟𑀺𑀢𑀸𑀤𑀬𑁄 𑀘𑁂𑀯 𑀤𑁂𑀯𑀩𑁆𑀭𑀳𑁆𑀫𑀦𑀸𑀕𑀕𑀦𑁆𑀥𑀩𑁆𑀩𑀸𑀤𑀬𑁄 𑀘 𑁋 ‘‘𑀧𑀜𑁆𑀳𑁂 𑀅𑀪𑀺𑀲𑀗𑁆𑀔𑀭𑀺𑀢𑁆𑀯𑀸 𑀧𑀼𑀘𑁆𑀙𑀺𑀲𑁆𑀲𑀸𑀫𑀸’’𑀢𑀺 𑀆𑀕𑀘𑁆𑀙𑀦𑁆𑀢𑀺. 𑀢𑀢𑁆𑀣 𑀓𑁂𑀘𑀺 𑀧𑀼𑀘𑁆𑀙𑀸𑀬 𑀯𑀸 𑀤𑁄𑀲𑀁 𑀯𑀺𑀲𑁆𑀲𑀚𑁆𑀚𑀦𑀲𑀫𑁆𑀧𑀝𑀺𑀘𑁆𑀙𑀦𑁂 𑀯𑀸 𑀅𑀲𑀫𑀢𑁆𑀣𑀢𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀅𑀧𑀼𑀘𑁆𑀙𑀺𑀢𑁆𑀯𑀸𑀯 𑀢𑀼𑀡𑁆𑀳𑀻 𑀦𑀺𑀲𑀻𑀤𑀦𑁆𑀢𑀺. 𑀓𑁂𑀘𑀺 𑀧𑀼𑀘𑁆𑀙𑀦𑁆𑀢𑀺. 𑀓𑁂𑀲𑀜𑁆𑀘𑀺 𑀪𑀕𑀯𑀸 𑀧𑀼𑀘𑁆𑀙𑀸𑀬 𑀉𑀲𑁆𑀲𑀸𑀳𑀁 𑀚𑀦𑁂𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑁂𑀢𑀺. 𑀏𑀯𑀁 𑀲𑀩𑁆𑀩𑁂𑀲𑀫𑁆𑀧𑀺 𑀢𑁂𑀲𑀁 𑀯𑀺𑀫𑀢𑀺𑀬𑁄 𑀢𑀻𑀭𑀁 𑀧𑀢𑁆𑀯𑀸 𑀫𑀳𑀸𑀲𑀫𑀼𑀤𑁆𑀤𑀲𑁆𑀲 𑀊𑀫𑀺𑀬𑁄 𑀯𑀺𑀬 𑀪𑀕𑀯𑀦𑁆𑀢𑀁 𑀧𑀢𑁆𑀯𑀸 𑀪𑀺𑀚𑁆𑀚𑀦𑁆𑀢𑀺.

𑀏𑀳𑀺 𑀲𑁆𑀯𑀸𑀕𑀢𑀯𑀸𑀤𑀻𑀢𑀺 𑀤𑁂𑀯𑀫𑀦𑀼𑀲𑁆𑀲𑀧𑀩𑁆𑀩𑀚𑀺𑀢𑀕𑀳𑀝𑁆𑀞𑁂𑀲𑀼 𑀢𑀁 𑀢𑀁 𑀅𑀢𑁆𑀢𑀦𑁄 𑀲𑀦𑁆𑀢𑀺𑀓𑀁 𑀆𑀕𑀢𑀁 𑁋 ‘‘𑀏𑀳𑀺 𑀲𑁆𑀯𑀸𑀕𑀢’’𑀦𑁆𑀢𑀺 𑀏𑀯𑀁 𑀯𑀤𑀢𑀻𑀢𑀺 𑀅𑀢𑁆𑀣𑁄. 𑀲𑀔𑀺𑀮𑁄𑀢𑀺 𑀢𑀢𑁆𑀣 𑀓𑀢𑀫𑀁 𑀲𑀸𑀔𑀮𑁆𑀬𑀁? ‘‘𑀬𑀸 𑀲𑀸 𑀯𑀸𑀘𑀸 𑀦𑁂𑀮𑀸 𑀓𑀡𑁆𑀡𑀲𑀼𑀔𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀼𑀢𑁆𑀢𑀲𑀸𑀔𑀮𑁆𑀬𑁂𑀦 𑀲𑀫𑀦𑁆𑀦𑀸𑀕𑀢𑁄, 𑀫𑀼𑀤𑀼𑀯𑀘𑀦𑁄𑀢𑀺 𑀅𑀢𑁆𑀣𑁄. 𑀲𑀫𑁆𑀫𑁄𑀤𑀓𑁄𑀢𑀺 𑀧𑀝𑀺𑀲𑀦𑁆𑀣𑀸𑀭𑀓𑀼𑀲𑀮𑁄, 𑀆𑀕𑀢𑀸𑀕𑀢𑀸𑀦𑀁 𑀘𑀢𑀼𑀦𑁆𑀦𑀁 𑀧𑀭𑀺𑀲𑀸𑀦𑀁 𑁋 ‘‘𑀓𑀘𑁆𑀘𑀺, 𑀪𑀺𑀓𑁆𑀔𑀯𑁂, 𑀔𑀫𑀦𑀻𑀬𑀁, 𑀓𑀘𑁆𑀘𑀺 𑀬𑀸𑀧𑀦𑀻𑀬’’𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀲𑀩𑁆𑀩𑀁 𑀅𑀤𑁆𑀥𑀸𑀦𑀤𑀭𑀣𑀁 𑀯𑀽𑀧𑀲𑀫𑁂𑀦𑁆𑀢𑁄 𑀯𑀺𑀬 𑀧𑀞𑀫𑀢𑀭𑀁 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀓𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀅𑀩𑁆𑀪𑀸𑀓𑀼𑀝𑀺𑀓𑁄𑀢𑀺 𑀬𑀣𑀸 𑀏𑀓𑀘𑁆𑀘𑁂 𑀧𑀭𑀺𑀲𑀁 𑀧𑀢𑁆𑀯𑀸 𑀣𑀤𑁆𑀥𑀫𑀼𑀔𑀸 𑀲𑀗𑁆𑀓𑀼𑀝𑀺𑀢𑀫𑀼𑀔𑀸 𑀳𑁄𑀦𑁆𑀢𑀺, 𑀦 𑀏𑀤𑀺𑀲𑁄, 𑀧𑀭𑀺𑀲𑀤𑀲𑁆𑀲𑀦𑁂𑀦 𑀧𑀦𑀲𑁆𑀲 𑀩𑀸𑀮𑀸𑀢𑀧𑀲𑀫𑁆𑀨𑀲𑁆𑀲𑁂𑀦 𑀯𑀺𑀬 𑀧𑀤𑀼𑀫𑀁 𑀫𑀼𑀔𑀧𑀤𑀼𑀫𑀁 𑀯𑀺𑀓𑀲𑀢𑀺 𑀧𑀼𑀡𑁆𑀡𑀘𑀦𑁆𑀤𑀲𑀲𑁆𑀲𑀺𑀭𑀺𑀓𑀁 𑀳𑁄𑀢𑀺. 𑀉𑀢𑁆𑀢𑀸𑀦𑀫𑀼𑀔𑁄𑀢𑀺 𑀬𑀣𑀸 𑀏𑀓𑀘𑁆𑀘𑁂 𑀦𑀺𑀓𑀼𑀚𑁆𑀚𑀺𑀢𑀫𑀼𑀔𑀸 𑀯𑀺𑀬 𑀲𑀫𑁆𑀧𑀢𑁆𑀢𑀸𑀬 𑀧𑀭𑀺𑀲𑀸𑀬 𑀦 𑀓𑀺𑀜𑁆𑀘𑀺 𑀓𑀣𑁂𑀦𑁆𑀢𑀺, 𑀅𑀢𑀺𑀤𑀼𑀮𑁆𑀮𑀪𑀓𑀣𑀸 𑀳𑁄𑀦𑁆𑀢𑀺, 𑀦 𑀏𑀯𑀭𑀽𑀧𑁄. 𑀲𑀫𑀡𑁄 𑀧𑀦 𑀕𑁄𑀢𑀫𑁄 𑀲𑀼𑀮𑀪𑀓𑀣𑁄. 𑀦 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀆𑀕𑀢𑀸𑀕𑀢𑀸𑀦𑀁 𑁋 ‘‘𑀓𑀲𑁆𑀫𑀸 𑀫𑀬𑀁 𑀇𑀥𑀸𑀕𑀢𑀸’’𑀢𑀺 𑀯𑀺𑀧𑁆𑀧𑀝𑀺𑀲𑀸𑀭𑁄 𑀉𑀧𑁆𑀧𑀚𑁆𑀚𑀢𑀺 𑀥𑀫𑁆𑀫𑀁 𑀧𑀦 𑀲𑀼𑀢𑁆𑀯𑀸 𑀅𑀢𑁆𑀢𑀫𑀦𑀸𑀯 𑀳𑁄𑀦𑁆𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀧𑀼𑀩𑁆𑀩𑀪𑀸𑀲𑀻𑀢𑀺 𑀪𑀸𑀲𑀦𑁆𑀢𑁄 𑀘 𑀧𑀞𑀫𑀢𑀭𑀁 𑀪𑀸𑀲𑀢𑀺, 𑀢𑀜𑁆𑀘 𑀔𑁄 𑀓𑀸𑀮𑀬𑀼𑀢𑁆𑀢𑀁 𑀧𑀫𑀸𑀡𑀬𑀼𑀢𑁆𑀢𑀁 𑀅𑀢𑁆𑀣𑀦𑀺𑀲𑁆𑀲𑀺𑀢𑀫𑁂𑀯 𑀪𑀸𑀲𑀢𑀺, 𑀦 𑀦𑀺𑀭𑀢𑁆𑀣𑀓𑀓𑀣𑀁.

𑀦 𑀢𑀲𑁆𑀫𑀺𑀁 𑀕𑀸𑀫𑁂 𑀯𑀸𑀢𑀺 𑀬𑀢𑁆𑀣 𑀓𑀺𑀭 𑀪𑀕𑀯𑀸 𑀧𑀝𑀺𑀯𑀲𑀢𑀺, 𑀢𑀢𑁆𑀣 𑀫𑀳𑁂𑀲𑀓𑁆𑀔𑀸 𑀤𑁂𑀯𑀢𑀸 𑀆𑀭𑀓𑁆𑀔𑀁 𑀕𑀡𑁆𑀳𑀦𑁆𑀢𑀺, 𑀢𑀁 𑀦𑀺𑀲𑁆𑀲𑀸𑀬 𑀫𑀦𑀼𑀲𑁆𑀲𑀸𑀦𑀁 𑀉𑀧𑀤𑁆𑀤𑀯𑁄 𑀦 𑀳𑁄𑀢𑀺, 𑀧𑀁𑀲𑀼𑀧𑀺𑀲𑀸𑀘𑀓𑀸𑀤𑀬𑁄𑀬𑁂𑀯 𑀳𑀺 𑀫𑀦𑀼𑀲𑁆𑀲𑁂 𑀯𑀺𑀳𑁂𑀞𑁂𑀦𑁆𑀢𑀺, 𑀢𑁂 𑀢𑀸𑀲𑀁 𑀆𑀦𑀼𑀪𑀸𑀯𑁂𑀦 𑀤𑀽𑀭𑀁 𑀅𑀧𑀓𑁆𑀓𑀫𑀦𑁆𑀢𑀺. 𑀅𑀧𑀺 𑀘 𑀪𑀕𑀯𑀢𑁄 𑀫𑁂𑀢𑁆𑀢𑀸𑀩𑀮𑁂𑀦𑀧𑀺 𑀦 𑀅𑀫𑀦𑀼𑀲𑁆𑀲𑀸 𑀫𑀦𑀼𑀲𑁆𑀲𑁂 𑀯𑀺𑀳𑁂𑀞𑁂𑀦𑁆𑀢𑀺.

𑀲𑀗𑁆𑀖𑀻𑀢𑀺𑀆𑀤𑀻𑀲𑀼 𑀅𑀦𑀼𑀲𑀸𑀲𑀺𑀢𑀩𑁆𑀩𑁄 𑀲𑀬𑀁 𑀯𑀸 𑀉𑀧𑁆𑀧𑀸𑀤𑀺𑀢𑁄 𑀲𑀗𑁆𑀖𑁄 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀲𑀗𑁆𑀖𑀻. 𑀢𑀸𑀤𑀺𑀲𑁄 𑀘𑀲𑁆𑀲 𑀕𑀡𑁄 𑀅𑀢𑁆𑀣𑀻𑀢𑀺 𑀕𑀡𑀻. 𑀧𑀼𑀭𑀺𑀫𑀧𑀤𑀲𑁆𑀲𑁂𑀯 𑀯𑀸 𑀯𑁂𑀯𑀘𑀦𑀫𑁂𑀢𑀁. 𑀆𑀘𑀸𑀭𑀲𑀺𑀓𑁆𑀔𑀸𑀧𑀦𑀯𑀲𑁂𑀦 𑀕𑀡𑀲𑁆𑀲 𑀆𑀘𑀭𑀺𑀬𑁄𑀢𑀺 𑀕𑀡𑀸𑀘𑀭𑀺𑀬𑁄. 𑀧𑀼𑀣𑀼𑀢𑀺𑀢𑁆𑀣𑀓𑀭𑀸𑀦𑀦𑁆𑀢𑀺 𑀩𑀳𑀽𑀦𑀁 𑀢𑀺𑀢𑁆𑀣𑀓𑀭𑀸𑀦𑀁. 𑀬𑀣𑀸 𑀯𑀸 𑀢𑀣𑀸 𑀯𑀸𑀢𑀺 𑀬𑁂𑀦 𑀯𑀸 𑀢𑁂𑀦 𑀯𑀸 𑀅𑀘𑁂𑀮𑀓𑀸𑀤𑀺𑀫𑀢𑁆𑀢𑀓𑁂𑀦𑀸𑀧𑀺 𑀓𑀸𑀭𑀡𑁂𑀦. 𑀲𑀫𑀼𑀤𑀸𑀕𑀘𑁆𑀙𑀢𑀻𑀢𑀺 𑀲𑀫𑀦𑁆𑀢𑀢𑁄 𑀉𑀧𑀕𑀘𑁆𑀙𑀢𑀺 𑀅𑀪𑀺𑀯𑀟𑁆𑀠𑀢𑀺.

𑀅𑀢𑀺𑀣𑀺 𑀦𑁄 𑀢𑁂 𑀳𑁄𑀦𑁆𑀢𑀻𑀢𑀺 𑀢𑁂 𑀅𑀫𑁆𑀳𑀸𑀓𑀁 𑀆𑀕𑀦𑁆𑀢𑀼𑀓𑀸, 𑀦𑀯𑀓𑀸 𑀧𑀸𑀳𑀼𑀦𑀓𑀸 𑀳𑁄𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀧𑀭𑀺𑀬𑀸𑀧𑀼𑀡𑀸𑀫𑀻𑀢𑀺 𑀚𑀸𑀦𑀸𑀫𑀺. 𑀅𑀧𑀭𑀺𑀫𑀸𑀡𑀯𑀡𑁆𑀡𑁄𑀢𑀺 𑀢𑀣𑀸𑀭𑀽𑀧𑁂𑀦𑁂𑀯 𑀲𑀩𑁆𑀩𑀜𑁆𑀜𑀼𑀦𑀸𑀧𑀺 𑀅𑀧𑁆𑀧𑀫𑁂𑀬𑁆𑀬𑀯𑀡𑁆𑀡𑁄 𑁋 ‘‘𑀧𑀕𑁂𑀯 𑀫𑀸𑀤𑀺𑀲𑁂𑀦𑀸’’𑀢𑀺 𑀤𑀲𑁆𑀲𑁂𑀢𑀺. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑁆𑀢𑀁 𑁋

‘‘𑀩𑀼𑀤𑁆𑀥𑁄𑀧𑀺 𑀩𑀼𑀤𑁆𑀥𑀲𑁆𑀲 𑀪𑀡𑁂𑀬𑁆𑀬 𑀯𑀡𑁆𑀡𑀁,

𑀓𑀧𑁆𑀧𑀫𑁆𑀧𑀺 𑀘𑁂 𑀅𑀜𑁆𑀜𑀫𑀪𑀸𑀲𑀫𑀸𑀦𑁄;

𑀔𑀻𑀬𑁂𑀣 𑀓𑀧𑁆𑀧𑁄 𑀘𑀺𑀭𑀤𑀻𑀖𑀫𑀦𑁆𑀢𑀭𑁂,

𑀯𑀡𑁆𑀡𑁄 𑀦 𑀔𑀻𑀬𑁂𑀣 𑀢𑀣𑀸𑀕𑀢𑀲𑁆𑀲𑀸’’𑀢𑀺.

𑁩𑁦𑁫. 𑀇𑀫𑀁 𑀧𑀦 𑀲𑀢𑁆𑀣𑀼 𑀕𑀼𑀡𑀓𑀣𑀁 𑀲𑀼𑀢𑁆𑀯𑀸 𑀢𑁂 𑀩𑁆𑀭𑀸𑀳𑁆𑀫𑀡𑀸 𑀘𑀺𑀦𑁆𑀢𑀬𑀺𑀁𑀲𑀼 𑁋 𑀬𑀣𑀸 𑀲𑁄𑀡𑀤𑀡𑁆𑀟𑁄 𑀩𑁆𑀭𑀸𑀳𑁆𑀫𑀡𑁄 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀯𑀡𑁆𑀡𑁂 𑀪𑀡𑀢𑀺, 𑀅𑀦𑁄𑀫𑀕𑀼𑀡𑁄 𑀲𑁄 𑀪𑀯𑀁 𑀕𑁄𑀢𑀫𑁄; 𑀏𑀯𑀁 𑀢𑀲𑁆𑀲 𑀕𑀼𑀡𑁂 𑀚𑀸𑀦𑀫𑀸𑀦𑁂𑀦 𑀔𑁄 𑀧𑀦 𑀆𑀘𑀭𑀺𑀬𑁂𑀦 𑀅𑀢𑀺𑀘𑀺𑀭𑀁 𑀅𑀥𑀺𑀯𑀸𑀲𑀺𑀢𑀁, 𑀳𑀦𑁆𑀤 𑀦𑀁 𑀅𑀦𑀼𑀯𑀢𑁆𑀢𑀸𑀫𑀸𑀢𑀺 𑀅𑀦𑀼𑀯𑀢𑁆𑀢𑀺𑀁𑀲𑀼. 𑀢𑀲𑁆𑀫𑀸 𑀏𑀯𑀁 𑀯𑀼𑀢𑁆𑀢𑁂 ‘‘𑀢𑁂 𑀩𑁆𑀭𑀸𑀳𑁆𑀫𑀡𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀅𑀮𑀫𑁂𑀯𑀸𑀢𑀺 𑀬𑀼𑀢𑁆𑀢𑀫𑁂𑀯. 𑀅𑀧𑀺 𑀧𑀼𑀝𑁄𑀲𑁂𑀦𑀸𑀢𑀺 𑀧𑀼𑀝𑁄𑀲𑀁 𑀯𑀼𑀘𑁆𑀘𑀢𑀺 𑀧𑀸𑀣𑁂𑀬𑁆𑀬𑀁, 𑀢𑀁 𑀕𑀳𑁂𑀢𑁆𑀯𑀸𑀧𑀺 𑀉𑀧𑀲𑀗𑁆𑀓𑀫𑀺𑀢𑀼𑀁 𑀬𑀼𑀢𑁆𑀢𑀫𑁂𑀯𑀸𑀢𑀺 𑀅𑀢𑁆𑀣𑁄. 𑀧𑀼𑀝𑀁𑀲𑁂𑀦𑀸𑀢𑀺𑀧𑀺 𑀧𑀸𑀞𑁄, 𑀢𑀲𑁆𑀲𑀢𑁆𑀣𑁄, 𑀧𑀼𑀝𑁄 𑀅𑀁𑀲𑁂 𑀅𑀲𑁆𑀲𑀸𑀢𑀺 𑀧𑀼𑀝𑀁𑀲𑁄, 𑀢𑁂𑀦 𑀧𑀼𑀝𑀁𑀲𑁂𑀦. 𑀅𑀁𑀲𑁂𑀦 𑀳𑀺 𑀧𑀸𑀣𑁂𑀬𑁆𑀬𑀧𑀼𑀝𑀁 𑀯𑀳𑀦𑁆𑀢𑁂𑀦𑀸𑀧𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀲𑁄𑀡𑀤𑀡𑁆𑀟𑀧𑀭𑀺𑀯𑀺𑀢𑀓𑁆𑀓𑀯𑀡𑁆𑀡𑀦𑀸

𑁩𑁦𑁬-𑁩𑁦𑁮. 𑀢𑀺𑀭𑁄𑀯𑀦𑀲𑀡𑁆𑀟𑀕𑀢𑀲𑁆𑀲𑀸𑀢𑀺 𑀅𑀦𑁆𑀢𑁄𑀯𑀦𑀲𑀡𑁆𑀟𑁂 𑀕𑀢𑀲𑁆𑀲, 𑀯𑀺𑀳𑀸𑀭𑀩𑁆𑀪𑀦𑁆𑀢𑀭𑀁 𑀧𑀯𑀺𑀝𑁆𑀞𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀅𑀜𑁆𑀚𑀮𑀺𑀁 𑀧𑀡𑀸𑀫𑁂𑀢𑁆𑀯𑀸𑀢𑀺 𑀏𑀢𑁂 𑀉𑀪𑀢𑁄𑀧𑀓𑁆𑀔𑀺𑀓𑀸, 𑀢𑁂 𑀏𑀯𑀁 𑀘𑀺𑀦𑁆𑀢𑀬𑀺𑀁𑀲𑀼 𑁋 ‘‘𑀲𑀘𑁂 𑀦𑁄 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀸 𑀘𑁄𑀤𑁂𑀲𑁆𑀲𑀦𑁆𑀢𑀺 𑁋 ‘𑀓𑀲𑁆𑀫𑀸 𑀢𑀼𑀫𑁆𑀳𑁂 𑀲𑀫𑀡𑀁 𑀕𑁄𑀢𑀫𑀁 𑀯𑀦𑁆𑀤𑀺𑀢𑁆𑀣𑀸’𑀢𑀺? 𑀢𑁂𑀲𑀁 𑁋 ‘𑀓𑀺𑀁 𑀅𑀜𑁆𑀚𑀮𑀺𑀫𑀢𑁆𑀢𑀓𑀭𑀡𑁂𑀦𑀸𑀧𑀺 𑀯𑀦𑁆𑀤𑀦𑀁 𑀦𑀸𑀫 𑀳𑁄𑀢𑀻’𑀢𑀺 𑀯𑀓𑁆𑀔𑀸𑀫. 𑀲𑀘𑁂 𑀦𑁄 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑀸 𑀘𑁄𑀤𑁂𑀲𑁆𑀲𑀦𑁆𑀢𑀺 𑁋 ‘𑀓𑀲𑁆𑀫𑀸 𑀢𑀼𑀫𑁆𑀳𑁂 𑀪𑀕𑀯𑀦𑁆𑀢𑀁 𑀦 𑀯𑀦𑁆𑀤𑀺𑀢𑁆𑀣𑀸’𑀢𑀺. ‘𑀓𑀺𑀁 𑀲𑀻𑀲𑁂𑀦 𑀪𑀽𑀫𑀺𑀬𑀁 𑀧𑀳𑀭𑀦𑁆𑀢𑁂𑀦𑁂𑀯 𑀯𑀦𑁆𑀤𑀦𑀁 𑀦𑀸𑀫 𑀳𑁄𑀢𑀺, 𑀦𑀦𑀼 𑀅𑀜𑁆𑀚𑀮𑀺𑀓𑀫𑁆𑀫𑀫𑁆𑀧𑀺 𑀯𑀦𑁆𑀤𑀦𑀁 𑀏𑀯𑀸’𑀢𑀺 𑀯𑀓𑁆𑀔𑀸𑀫𑀸’’𑀢𑀺. 𑀦𑀸𑀫𑀕𑁄𑀢𑁆𑀢𑀦𑁆𑀢𑀺 ‘‘𑀪𑁄, 𑀕𑁄𑀢𑀫, 𑀅𑀳𑀁 𑀅𑀲𑀼𑀓𑀲𑁆𑀲 𑀧𑀼𑀢𑁆𑀢𑁄 𑀤𑀢𑁆𑀢𑁄 𑀦𑀸𑀫, 𑀫𑀺𑀢𑁆𑀢𑁄 𑀦𑀸𑀫, 𑀇𑀥𑀸𑀕𑀢𑁄’’𑀢𑀺 𑀯𑀤𑀦𑁆𑀢𑀸 𑀦𑀸𑀫𑀁 𑀲𑀸𑀯𑁂𑀦𑁆𑀢𑀺 𑀦𑀸𑀫. ‘‘𑀪𑁄, 𑀕𑁄𑀢𑀫, 𑀅𑀳𑀁 𑀯𑀸𑀲𑁂𑀝𑁆𑀞𑁄 𑀦𑀸𑀫, 𑀓𑀘𑁆𑀘𑀸𑀦𑁄 𑀦𑀸𑀫, 𑀇𑀥𑀸𑀕𑀢𑁄’’𑀢𑀺 𑀯𑀤𑀦𑁆𑀢𑀸 𑀕𑁄𑀢𑁆𑀢𑀁 𑀲𑀸𑀯𑁂𑀦𑁆𑀢𑀺 𑀦𑀸𑀫. 𑀏𑀢𑁂 𑀓𑀺𑀭 𑀤𑀮𑀺𑀤𑁆𑀤𑀸 𑀚𑀺𑀡𑁆𑀡𑀸 𑀓𑀼𑀮𑀧𑀼𑀢𑁆𑀢𑀸 ‘‘𑀧𑀭𑀺𑀲𑀫𑀚𑁆𑀛𑁂 𑀦𑀸𑀫𑀕𑁄𑀢𑁆𑀢𑀯𑀲𑁂𑀦 𑀧𑀸𑀓𑀝𑀸 𑀪𑀯𑀺𑀲𑁆𑀲𑀸𑀫𑀸’’𑀢𑀺 𑀏𑀯𑀫𑀓𑀁𑀲𑀼. 𑀬𑁂 𑀧𑀦 𑀢𑀼𑀡𑁆𑀳𑀻𑀪𑀽𑀢𑀸 𑀦𑀺𑀲𑀻𑀤𑀺𑀁𑀲𑀼, 𑀢𑁂 𑀓𑁂𑀭𑀸𑀝𑀺𑀓𑀸 𑀘𑁂𑀯 𑀅𑀦𑁆𑀥𑀩𑀸𑀮𑀸 𑀘. 𑀢𑀢𑁆𑀣 𑀓𑁂𑀭𑀸𑀝𑀺𑀓𑀸 𑁋 ‘‘𑀏𑀓𑀁 𑀤𑁆𑀯𑁂 𑀓𑀣𑀸𑀲𑀮𑁆𑀮𑀸𑀧𑁂𑀧𑀺 𑀓𑀭𑁄𑀦𑁆𑀢𑁄 𑀯𑀺𑀲𑁆𑀲𑀸𑀲𑀺𑀓𑁄 𑀳𑁄𑀢𑀺, 𑀅𑀣 𑀯𑀺𑀲𑁆𑀲𑀸𑀲𑁂 𑀲𑀢𑀺 𑀏𑀓𑀁 𑀤𑁆𑀯𑁂 𑀪𑀺𑀓𑁆𑀔𑀸 𑀅𑀤𑀸𑀢𑀼𑀁 𑀦 𑀬𑀼𑀢𑁆𑀢’’𑀦𑁆𑀢𑀺 𑀢𑀢𑁄 𑀅𑀢𑁆𑀢𑀸𑀦𑀁 𑀫𑁄𑀘𑁂𑀢𑁆𑀯𑀸 𑀢𑀼𑀡𑁆𑀳𑀻 𑀦𑀺𑀲𑀻𑀤𑀦𑁆𑀢𑀺. 𑀅𑀦𑁆𑀥𑀩𑀸𑀮𑀸 𑀅𑀜𑁆𑀜𑀸𑀡𑀢𑀸𑀬𑁂𑀯 𑀅𑀯𑀓𑁆𑀔𑀺𑀢𑁆𑀢𑀫𑀢𑁆𑀢𑀺𑀓𑀸𑀧𑀺𑀡𑁆𑀟𑁄 𑀯𑀺𑀬 𑀬𑀢𑁆𑀣 𑀓𑀢𑁆𑀣𑀘𑀺 𑀢𑀼𑀡𑁆𑀳𑀻𑀪𑀽𑀢𑀸 𑀦𑀺𑀲𑀻𑀤𑀦𑁆𑀢𑀺.

𑀩𑁆𑀭𑀸𑀳𑁆𑀫𑀡𑀧𑀜𑁆𑀜𑀢𑁆𑀢𑀺𑀯𑀡𑁆𑀡𑀦𑀸

𑁩𑁦𑁯-𑁩𑁧𑁦. 𑀘𑁂𑀢𑀲𑀸 𑀘𑁂𑀢𑁄𑀧𑀭𑀺𑀯𑀺𑀢𑀓𑁆𑀓𑀦𑁆𑀢𑀺 𑀪𑀕𑀯𑀸 𑁋 ‘‘𑀅𑀬𑀁 𑀩𑁆𑀭𑀸𑀳𑁆𑀫𑀡𑁄 𑀆𑀕𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀅𑀥𑁄𑀫𑀼𑀔𑁄 𑀣𑀤𑁆𑀥𑀕𑀢𑁆𑀢𑁄 𑀓𑀺𑀁 𑀘𑀺𑀦𑁆𑀢𑀬𑀫𑀸𑀦𑁄 𑀦𑀺𑀲𑀺𑀦𑁆𑀦𑁄, 𑀓𑀺𑀁 𑀦𑀼 𑀔𑁄 𑀘𑀺𑀦𑁆𑀢𑁂𑀢𑀻’’𑀢𑀺 𑀆𑀯𑀚𑁆𑀚𑀦𑁆𑀢𑁄 𑀅𑀢𑁆𑀢𑀦𑁄 𑀘𑁂𑀢𑀲𑀸 𑀢𑀲𑁆𑀲 𑀘𑀺𑀢𑁆𑀢𑀁 𑀅𑀜𑁆𑀜𑀸𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀘𑁂𑀢𑀲𑀸 𑀘𑁂𑀢𑁄𑀧𑀭𑀺𑀯𑀺𑀢𑀓𑁆𑀓𑀫𑀜𑁆𑀜𑀸𑀬𑀸’’𑀢𑀺. 𑀯𑀺𑀳𑀜𑁆𑀜𑀢𑀻𑀢𑀺 𑀯𑀺𑀖𑀸𑀢𑀁 𑀆𑀧𑀚𑁆𑀚𑀢𑀺. 𑀅𑀦𑀼𑀯𑀺𑀮𑁄𑀓𑁂𑀢𑁆𑀯𑀸 𑀧𑀭𑀺𑀲𑀦𑁆𑀢𑀺 𑀪𑀕𑀯𑀢𑁄 𑀲𑀓𑀲𑀫𑀬𑁂 𑀧𑀜𑁆𑀳𑀧𑀼𑀘𑁆𑀙𑀦𑁂𑀦 𑀉𑀤𑀓𑁂 𑀫𑀺𑀬𑀫𑀸𑀦𑁄 𑀉𑀓𑁆𑀔𑀺𑀧𑀺𑀢𑁆𑀯𑀸 𑀣𑀮𑁂 𑀞𑀧𑀺𑀢𑁄 𑀯𑀺𑀬 𑀲𑀫𑀧𑀲𑁆𑀲𑀤𑁆𑀥𑀓𑀸𑀬𑀘𑀺𑀢𑁆𑀢𑁄 𑀳𑀼𑀢𑁆𑀯𑀸 𑀧𑀭𑀺𑀲𑀁 𑀲𑀗𑁆𑀕𑀡𑁆𑀳𑀦𑀢𑁆𑀣𑀁 𑀤𑀺𑀝𑁆𑀞𑀺𑀲𑀜𑁆𑀚𑀸𑀦𑁂𑀦𑁂𑀯 ‘‘𑀉𑀧𑀥𑀸𑀭𑁂𑀦𑁆𑀢𑀼 𑀫𑁂 𑀪𑁄𑀦𑁆𑀢𑁄 𑀯𑀘𑀦’’𑀦𑁆𑀢𑀺 𑀯𑀤𑀦𑁆𑀢𑁄 𑀯𑀺𑀬 𑀅𑀦𑀼𑀯𑀺𑀮𑁄𑀓𑁂𑀢𑁆𑀯𑀸 𑀧𑀭𑀺𑀲𑀁 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘.

𑁩𑁧𑁧-𑁩𑁧𑁩. 𑀲𑀼𑀚𑀁 𑀧𑀕𑁆𑀕𑀡𑁆𑀳𑀦𑁆𑀢𑀸𑀦𑀦𑁆𑀢𑀺 𑀬𑀜𑁆𑀜𑀬𑀚𑀦𑀢𑁆𑀣𑀸𑀬 𑀲𑀼𑀚𑀁 𑀕𑀡𑁆𑀳𑀦𑁆𑀢𑁂𑀲𑀼 𑀩𑁆𑀭𑀸𑀳𑁆𑀫𑀡𑁂𑀲𑀼 𑀧𑀞𑀫𑁄 𑀯𑀸 𑀤𑀼𑀢𑀺𑀬𑁄 𑀯𑀸𑀢𑀺 𑀅𑀢𑁆𑀣𑁄. 𑀲𑀼𑀚𑀸𑀬 𑀤𑀺𑀬𑁆𑀬𑀫𑀸𑀦𑀁 𑀫𑀳𑀸𑀬𑀸𑀕𑀁 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑀸𑀦𑀦𑁆𑀢𑀺 𑀧𑁄𑀭𑀸𑀡𑀸. 𑀇𑀢𑀺 𑀩𑁆𑀭𑀸𑀳𑁆𑀫𑀡𑁄 𑀲𑀓𑀲𑀫𑀬𑀯𑀲𑁂𑀦 𑀲𑀫𑁆𑀫𑀤𑁂𑀯 𑀧𑀜𑁆𑀳𑀁 𑀯𑀺𑀲𑁆𑀲𑀚𑁆𑀚𑁂𑀲𑀺. 𑀪𑀕𑀯𑀸 𑀧𑀦 𑀯𑀺𑀲𑁂𑀲𑀢𑁄 𑀉𑀢𑁆𑀢𑀫𑀩𑁆𑀭𑀸𑀳𑁆𑀫𑀡𑀲𑁆𑀲 𑀤𑀲𑁆𑀲𑀦𑀢𑁆𑀣𑀁 𑁋 ‘‘𑀇𑀫𑁂𑀲𑀁 𑀧𑀦𑀸’’𑀢𑀺𑀆𑀤𑀺𑀫𑀸𑀳. 𑀏𑀢𑀤𑀯𑁄𑀘𑀼𑀦𑁆𑀢𑀺 𑀲𑀘𑁂 𑀚𑀸𑀢𑀺𑀯𑀡𑁆𑀡𑀫𑀦𑁆𑀢𑀲𑀫𑁆𑀧𑀦𑁆𑀦𑁄 𑀩𑁆𑀭𑀸𑀳𑁆𑀫𑀡𑁄 𑀦 𑀳𑁄𑀢𑀺, 𑀅𑀣 𑀓𑁄 𑀘𑀭𑀳𑀺 𑀮𑁄𑀓𑁂 𑀩𑁆𑀭𑀸𑀳𑁆𑀫𑀡𑁄 𑀪𑀯𑀺𑀲𑁆𑀲𑀢𑀺? 𑀦𑀸𑀲𑁂𑀢𑀺 𑀦𑁄 𑀅𑀬𑀁 𑀲𑁄𑀡𑀤𑀡𑁆𑀟𑁄, 𑀳𑀦𑁆𑀤𑀲𑁆𑀲 𑀯𑀸𑀤𑀁 𑀧𑀝𑀺𑀓𑁆𑀔𑀺𑀧𑀺𑀲𑁆𑀲𑀸𑀫𑀸𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀏𑀢𑀤𑀯𑁄𑀘𑀼𑀁. 𑀅𑀧𑀯𑀤𑀢𑀻𑀢𑀺 𑀧𑀝𑀺𑀓𑁆𑀔𑀺𑀧𑀢𑀺. 𑀅𑀦𑀼𑀧𑀓𑁆𑀔𑀦𑁆𑀤𑀢𑀻𑀢𑀺 𑀅𑀦𑀼𑀧𑀯𑀺𑀲𑀢𑀺. 𑀇𑀤𑀁 𑁋 ‘‘𑀲𑀘𑁂 𑀢𑁆𑀯𑀁 𑀧𑀲𑀸𑀤𑀯𑀲𑁂𑀦 𑀲𑀫𑀡𑀁 𑀕𑁄𑀢𑀫𑀁 𑀲𑀭𑀡𑀁 𑀕𑀦𑁆𑀢𑀼𑀓𑀸𑀫𑁄, 𑀕𑀘𑁆𑀙; 𑀫𑀸 𑀩𑁆𑀭𑀸𑀳𑁆𑀫𑀡𑀲𑁆𑀲 𑀲𑀫𑀬𑀁 𑀪𑀺𑀦𑁆𑀤𑀻’’𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀆𑀳𑀁𑀲𑀼.

𑁩𑁧𑁪. 𑀏𑀢𑀤𑀯𑁄𑀘𑀸𑀢𑀺 𑀇𑀫𑁂𑀲𑀼 𑀩𑁆𑀭𑀸𑀳𑁆𑀫𑀡𑁂𑀲𑀼 𑀏𑀯𑀁 𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀯𑀺𑀭𑀯𑀦𑁆𑀢𑁂𑀲𑀼 ‘‘𑀅𑀬𑀁 𑀓𑀣𑀸 𑀧𑀭𑀺𑀬𑁄𑀲𑀸𑀦𑀁 𑀦 𑀕𑀫𑀺𑀲𑁆𑀲𑀢𑀺, 𑀳𑀦𑁆𑀤 𑀦𑁂 𑀦𑀺𑀲𑁆𑀲𑀤𑁆𑀤𑁂 𑀓𑀢𑁆𑀯𑀸 𑀲𑁄𑀡𑀤𑀡𑁆𑀟𑁂𑀦𑁂𑀯 𑀲𑀤𑁆𑀥𑀺𑀁 𑀓𑀣𑁂𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑁋 ‘‘𑀏𑀢𑀁 𑀲𑀘𑁂 𑀔𑁄 𑀢𑀼𑀫𑁆𑀳𑀸𑀓’’𑀦𑁆𑀢𑀺𑀆𑀤𑀺𑀓𑀁 𑀯𑀘𑀦𑀁 𑀅𑀯𑁄𑀘.

𑁩𑁧𑁫-𑁩𑁧𑁬. 𑀲𑀳𑀥𑀫𑁆𑀫𑁂𑀦𑀸𑀢𑀺 𑀲𑀓𑀸𑀭𑀡𑁂𑀦. 𑀲𑀫𑀲𑀫𑁄𑀢𑀺 𑀞𑀧𑁂𑀢𑁆𑀯𑀸 𑀏𑀓𑀤𑁂𑀲𑀲𑀫𑀢𑁆𑀢𑀁 𑀲𑀫𑀪𑀸𑀯𑁂𑀦 𑀲𑀫𑁄, 𑀲𑀩𑁆𑀩𑀸𑀓𑀸𑀭𑁂𑀦 𑀲𑀫𑁄𑀢𑀺 𑀅𑀢𑁆𑀣𑁄. 𑀅𑀳𑀫𑀲𑁆𑀲 𑀫𑀸𑀢𑀸𑀧𑀺𑀢𑀭𑁄 𑀚𑀸𑀦𑀸𑀫𑀻𑀢𑀺 𑀪𑀕𑀺𑀦𑀺𑀬𑀸 𑀧𑀼𑀢𑁆𑀢𑀲𑁆𑀲 𑀫𑀸𑀢𑀸𑀧𑀺𑀢𑀭𑁄 𑀓𑀺𑀁 𑀦 𑀚𑀸𑀦𑀺𑀲𑁆𑀲𑀢𑀺, 𑀓𑀼𑀮𑀓𑁄𑀝𑀺𑀧𑀭𑀺𑀤𑀻𑀧𑀦𑀁 𑀲𑀦𑁆𑀥𑀸𑀬𑁂𑀯 𑀯𑀤𑀢𑀺. 𑀫𑀼𑀲𑀸𑀯𑀸𑀤𑀫𑁆𑀧𑀺 𑀪𑀡𑁂𑀬𑁆𑀬𑀸𑀢𑀺 𑀅𑀢𑁆𑀣𑀪𑀜𑁆𑀚𑀦𑀓𑀁 𑀫𑀼𑀲𑀸𑀯𑀸𑀤𑀁 𑀓𑀣𑁂𑀬𑁆𑀬. 𑀓𑀺𑀁 𑀯𑀡𑁆𑀡𑁄 𑀓𑀭𑀺𑀲𑁆𑀲𑀢𑀻𑀢𑀺 𑀅𑀩𑁆𑀪𑀦𑁆𑀢𑀭𑁂 𑀕𑀼𑀡𑁂 𑀅𑀲𑀢𑀺 𑀓𑀺𑀁 𑀓𑀭𑀺𑀲𑁆𑀲𑀢𑀺? 𑀓𑀺𑀫𑀲𑁆𑀲 𑀩𑁆𑀭𑀸𑀳𑁆𑀫𑀡𑀪𑀸𑀯𑀁 𑀭𑀓𑁆𑀔𑀺𑀢𑀼𑀁 𑀲𑀓𑁆𑀔𑀺𑀲𑁆𑀲𑀢𑀻𑀢𑀺 𑀅𑀢𑁆𑀣𑁄. 𑀅𑀣𑀸𑀧𑀺 𑀲𑀺𑀬𑀸 𑀧𑀼𑀦 𑁋 ‘‘𑀧𑀓𑀢𑀺𑀲𑀻𑀮𑁂 𑀞𑀺𑀢𑀲𑁆𑀲 𑀩𑁆𑀭𑀸𑀳𑁆𑀫𑀡𑀪𑀸𑀯𑀁 𑀲𑀸𑀥𑁂𑀦𑁆𑀢𑀻’’𑀢𑀺 𑀏𑀯𑀫𑁆𑀧𑀺 𑀲𑀻𑀮𑀫𑁂𑀯 𑀲𑀸𑀥𑁂𑀲𑁆𑀲𑀢𑀺, 𑀢𑀲𑁆𑀫𑀺𑀁 𑀳𑀺𑀲𑁆𑀲 𑀅𑀲𑀢𑀺 𑀩𑁆𑀭𑀸𑀳𑁆𑀫𑀡𑀪𑀸𑀯𑁄 𑀦𑀸𑀳𑁄𑀲𑀻𑀢𑀺 𑀲𑀫𑁆𑀫𑁄𑀳𑀫𑀢𑁆𑀢𑀁 𑀯𑀡𑁆𑀡𑀸𑀤𑀬𑁄. 𑀇𑀤𑀁 𑀧𑀦 𑀲𑀼𑀢𑁆𑀯𑀸 𑀢𑁂 𑀩𑁆𑀭𑀸𑀳𑁆𑀫𑀡𑀸 𑁋 ‘‘𑀲𑀪𑀸𑀯𑀁 𑀆𑀘𑀭𑀺𑀬𑁄 𑀆𑀳, 𑀅𑀓𑀸𑀭𑀡𑀸𑀯 𑀫𑀬𑀁 𑀉𑀚𑁆𑀛𑀸𑀬𑀺𑀫𑁆𑀳𑀸’’𑀢𑀺 𑀢𑀼𑀡𑁆𑀳𑀻 𑀅𑀳𑁂𑀲𑀼𑀁.

𑀲𑀻𑀮𑀧𑀜𑁆𑀜𑀸𑀓𑀣𑀸𑀯𑀡𑁆𑀡𑀦𑀸

𑁩𑁧𑁭. 𑀢𑀢𑁄 𑀪𑀕𑀯𑀸 ‘𑀓𑀣𑀺𑀢𑁄 𑀩𑁆𑀭𑀸𑀳𑁆𑀫𑀡𑁂𑀦 𑀧𑀜𑁆𑀳𑁄, 𑀓𑀺𑀁 𑀧𑀦𑁂𑀢𑁆𑀣 𑀧𑀢𑀺𑀝𑁆𑀞𑀸𑀢𑀼𑀁 𑀲𑀓𑁆𑀔𑀺𑀲𑁆𑀲𑀢𑀺, 𑀦 𑀲𑀓𑁆𑀔𑀺𑀲𑁆𑀲𑀢𑀻’𑀢𑀺? 𑀢𑀲𑁆𑀲 𑀯𑀻𑀫𑀁𑀲𑀦𑀢𑁆𑀣𑀁 𑁋 ‘‘𑀇𑀫𑁂𑀲𑀁 𑀧𑀦 𑀩𑁆𑀭𑀸𑀳𑁆𑀫𑀡𑀸’’𑀢𑀺𑀆𑀤𑀺𑀫𑀸𑀳. 𑀲𑀻𑀮𑀧𑀭𑀺𑀥𑁄𑀢𑀸𑀢𑀺 𑀲𑀻𑀮𑀧𑀭𑀺𑀲𑀼𑀤𑁆𑀥𑀸. 𑀬𑀢𑁆𑀣 𑀲𑀻𑀮𑀁 𑀢𑀢𑁆𑀣 𑀧𑀜𑁆𑀜𑀸𑀢𑀺 𑀬𑀲𑁆𑀫𑀺𑀁 𑀧𑀼𑀕𑁆𑀕𑀮𑁂 𑀲𑀻𑀮𑀁, 𑀢𑀢𑁆𑀣𑁂𑀯 𑀧𑀜𑁆𑀜𑀸, 𑀓𑀼𑀢𑁄 𑀤𑀼𑀲𑁆𑀲𑀻𑀮𑁂 𑀧𑀜𑁆𑀜𑀸? 𑀧𑀜𑁆𑀜𑀸𑀭𑀳𑀺𑀢𑁂 𑀯𑀸 𑀚𑀴𑁂 𑀏𑀴𑀫𑀽𑀕𑁂 𑀓𑀼𑀢𑁄 𑀲𑀻𑀮𑀦𑁆𑀢𑀺? 𑀲𑀻𑀮𑀧𑀜𑁆𑀜𑀸𑀡𑀦𑁆𑀢𑀺 𑀲𑀻𑀮𑀜𑁆𑀘 𑀧𑀜𑁆𑀜𑀸𑀡𑀜𑁆𑀘 𑀲𑀻𑀮𑀧𑀜𑁆𑀜𑀸𑀡𑀁. 𑀧𑀜𑁆𑀜𑀸𑀡𑀦𑁆𑀢𑀺 𑀧𑀜𑁆𑀜𑀸𑀬𑁂𑀯. 𑀏𑀯𑀫𑁂𑀢𑀁 𑀩𑁆𑀭𑀸𑀳𑁆𑀫𑀡𑀸𑀢𑀺 𑀪𑀕𑀯𑀸 𑀩𑁆𑀭𑀸𑀳𑁆𑀫𑀡𑀲𑁆𑀲 𑀯𑀘𑀦𑀁 𑀅𑀦𑀼𑀚𑀸𑀦𑀦𑁆𑀢𑁄 𑀆𑀳. 𑀢𑀢𑁆𑀣 𑀲𑀻𑀮𑀧𑀭𑀺𑀥𑁄𑀢𑀸 𑀧𑀜𑁆𑀜𑀸𑀢𑀺 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑁂𑀦 𑀥𑁄𑀢𑀸. 𑀓𑀣𑀁 𑀧𑀦 𑀲𑀻𑀮𑁂𑀦 𑀧𑀜𑁆𑀜𑀁 𑀥𑁄𑀯𑀢𑀻𑀢𑀺? 𑀬𑀲𑁆𑀲 𑀧𑀼𑀣𑀼𑀚𑁆𑀚𑀦𑀲𑁆𑀲 𑀲𑀻𑀮𑀁 𑀲𑀝𑁆𑀞𑀺𑀅𑀲𑀻𑀢𑀺𑀯𑀲𑁆𑀲𑀸𑀦𑀺 𑀅𑀔𑀡𑁆𑀟𑀁 𑀳𑁄𑀢𑀺, 𑀲𑁄 𑀫𑀭𑀡𑀓𑀸𑀮𑁂𑀧𑀺 𑀲𑀩𑁆𑀩𑀓𑀺𑀮𑁂𑀲𑁂 𑀖𑀸𑀢𑁂𑀢𑁆𑀯𑀸 𑀲𑀻𑀮𑁂𑀦 𑀧𑀜𑁆𑀜𑀁 𑀥𑁄𑀯𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀕𑀡𑁆𑀳𑀸𑀢𑀺. 𑀓𑀦𑁆𑀤𑀭𑀲𑀸𑀮𑀧𑀭𑀺𑀯𑁂𑀡𑁂 𑀫𑀳𑀸𑀲𑀝𑁆𑀞𑀺𑀯𑀲𑁆𑀲𑀢𑁆𑀣𑁂𑀭𑁄 𑀯𑀺𑀬. 𑀣𑁂𑀭𑁂 𑀓𑀺𑀭 𑀫𑀭𑀡𑀫𑀜𑁆𑀘𑁂 𑀦𑀺𑀧𑀚𑁆𑀚𑀺𑀢𑁆𑀯𑀸 𑀩𑀮𑀯𑀯𑁂𑀤𑀦𑀸𑀬 𑀦𑀺𑀢𑁆𑀣𑀼𑀦𑀦𑁆𑀢𑁂, 𑀢𑀺𑀲𑁆𑀲𑀫𑀳𑀸𑀭𑀸𑀚𑀸 ‘‘𑀣𑁂𑀭𑀁 𑀧𑀲𑁆𑀲𑀺𑀲𑁆𑀲𑀸𑀫𑀻’’𑀢𑀺 𑀕𑀦𑁆𑀢𑁆𑀯𑀸 𑀧𑀭𑀺𑀯𑁂𑀡𑀤𑁆𑀯𑀸𑀭𑁂 𑀞𑀺𑀢𑁄 𑀢𑀁 𑀲𑀤𑁆𑀤𑀁 𑀲𑀼𑀢𑁆𑀯𑀸 𑀧𑀼𑀘𑁆𑀙𑀺 𑁋 ‘‘𑀓𑀲𑁆𑀲 𑀲𑀤𑁆𑀤𑁄 𑀅𑀬’’𑀦𑁆𑀢𑀺? 𑀣𑁂𑀭𑀲𑁆𑀲 𑀦𑀺𑀢𑁆𑀣𑀼𑀦𑀦𑀲𑀤𑁆𑀤𑁄𑀢𑀺. ‘‘𑀧𑀩𑁆𑀩𑀚𑁆𑀚𑀸𑀬 𑀲𑀝𑁆𑀞𑀺𑀯𑀲𑁆𑀲𑁂𑀦 𑀯𑁂𑀤𑀦𑀸𑀧𑀭𑀺𑀕𑁆𑀕𑀳𑀫𑀢𑁆𑀢𑀫𑁆𑀧𑀺 𑀦 𑀓𑀢𑀁, 𑀦 𑀤𑀸𑀦𑀺 𑀦𑀁 𑀯𑀦𑁆𑀤𑀺𑀲𑁆𑀲𑀸𑀫𑀻’’𑀢𑀺 𑀦𑀺𑀯𑀢𑁆𑀢𑀺𑀢𑁆𑀯𑀸 𑀫𑀳𑀸𑀩𑁄𑀥𑀺𑀁 𑀯𑀦𑁆𑀤𑀺𑀢𑀼𑀁 𑀕𑀢𑁄. 𑀢𑀢𑁄 𑀉𑀧𑀝𑁆𑀞𑀸𑀓𑀤𑀳𑀭𑁄 𑀣𑁂𑀭𑀁 𑀆𑀳 𑁋 ‘‘𑀓𑀺𑀁 𑀦𑁄, 𑀪𑀦𑁆𑀢𑁂, 𑀮𑀚𑁆𑀚𑀸𑀧𑁂𑀣, 𑀲𑀤𑁆𑀥𑁄𑀧𑀺 𑀭𑀸𑀚𑀸 𑀯𑀺𑀧𑁆𑀧𑀝𑀺𑀲𑀸𑀭𑀻 𑀳𑀼𑀢𑁆𑀯𑀸 𑀦 𑀯𑀦𑁆𑀤𑀺𑀲𑁆𑀲𑀸𑀫𑀻’’𑀢𑀺 𑀕𑀢𑁄𑀢𑀺. 𑀓𑀲𑁆𑀫𑀸 𑀆𑀯𑀼𑀲𑁄𑀢𑀺? 𑀢𑀼𑀫𑁆𑀳𑀸𑀓𑀁 𑀦𑀺𑀢𑁆𑀣𑀼𑀦𑀦𑀲𑀤𑁆𑀤𑀁 𑀲𑀼𑀢𑁆𑀯𑀸𑀢𑀺. ‘‘𑀢𑁂𑀦 𑀳𑀺 𑀫𑁂 𑀑𑀓𑀸𑀲𑀁 𑀓𑀭𑁄𑀣𑀸’’𑀢𑀺 𑀯𑀢𑁆𑀯𑀸 𑀯𑁂𑀤𑀦𑀁 𑀯𑀺𑀓𑁆𑀔𑀫𑁆𑀪𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀤𑀳𑀭𑀲𑁆𑀲 𑀲𑀜𑁆𑀜𑀁 𑀅𑀤𑀸𑀲𑀺 𑁋 ‘‘𑀕𑀘𑁆𑀙𑀸𑀯𑀼𑀲𑁄, 𑀇𑀤𑀸𑀦𑀺 𑀭𑀸𑀚𑀸𑀦𑀁 𑀅𑀫𑁆𑀳𑁂 𑀯𑀦𑁆𑀤𑀸𑀧𑁂𑀳𑀻’’𑀢𑀺. 𑀤𑀳𑀭𑁄 𑀕𑀦𑁆𑀢𑁆𑀯𑀸 𑁋 ‘‘𑀇𑀤𑀸𑀦𑀺 𑀓𑀺𑀭 𑀣𑁂𑀭𑀁, 𑀯𑀦𑁆𑀤𑀣𑀸’’𑀢𑀺 𑀆𑀳. 𑀭𑀸𑀚𑀸 𑀲𑀁𑀲𑀼𑀫𑀸𑀭𑀧𑀢𑀺𑀢𑁂𑀦 𑀣𑁂𑀭𑀁 𑀯𑀦𑁆𑀤𑀦𑁆𑀢𑁄 𑁋 ‘‘𑀦𑀸𑀳𑀁 𑀅𑀬𑁆𑀬𑀲𑁆𑀲 𑀅𑀭𑀳𑀢𑁆𑀢𑀁 𑀯𑀦𑁆𑀤𑀸𑀫𑀺, 𑀧𑀼𑀣𑀼𑀚𑁆𑀚𑀦𑀪𑀽𑀫𑀺𑀬𑀁 𑀧𑀦 𑀞𑀢𑁆𑀯𑀸 𑀭𑀓𑁆𑀔𑀺𑀢𑀲𑀻𑀮𑀫𑁂𑀯 𑀯𑀦𑁆𑀤𑀸𑀫𑀻’’𑀢𑀺 𑀆𑀳, 𑀏𑀯𑀁 𑀲𑀻𑀮𑁂𑀦 𑀧𑀜𑁆𑀜𑀁 𑀥𑁄𑀯𑀢𑀺 𑀦𑀸𑀫. 𑀬𑀲𑁆𑀲 𑀧𑀦 𑀅𑀩𑁆𑀪𑀦𑁆𑀢𑀭𑁂 𑀲𑀻𑀮𑀲𑀁𑀯𑀭𑁄 𑀦𑀢𑁆𑀣𑀺, 𑀉𑀕𑁆𑀖𑀸𑀝𑀺𑀢𑀜𑁆𑀜𑀼𑀢𑀸𑀬 𑀧𑀦 𑀘𑀢𑀼𑀧𑁆𑀧𑀤𑀺𑀓𑀕𑀸𑀣𑀸𑀧𑀭𑀺𑀬𑁄𑀲𑀸𑀦𑁂 𑀧𑀜𑁆𑀜𑀸𑀬 𑀲𑀻𑀮𑀁 𑀥𑁄𑀯𑀺𑀢𑁆𑀯𑀸 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀸𑀢𑀺. 𑀅𑀬𑀁 𑀧𑀜𑁆𑀜𑀸𑀬 𑀲𑀻𑀮𑀁 𑀥𑁄𑀯𑀢𑀺 𑀦𑀸𑀫. 𑀲𑁂𑀬𑁆𑀬𑀣𑀸𑀧𑀺 𑀲𑀦𑁆𑀢𑀢𑀺𑀫𑀳𑀸𑀫𑀢𑁆𑀢𑁄.

𑁩𑁧𑁮. 𑀓𑀢𑀫𑀁 𑀧𑀦 𑀢𑀁 𑀩𑁆𑀭𑀸𑀳𑁆𑀫𑀡𑀸𑀢𑀺 𑀓𑀲𑁆𑀫𑀸 𑀆𑀳? 𑀪𑀕𑀯𑀸 𑀓𑀺𑀭 𑀘𑀺𑀦𑁆𑀢𑁂𑀲𑀺 𑁋 ‘‘𑀩𑁆𑀭𑀸𑀳𑁆𑀫𑀡𑀸 𑀩𑁆𑀭𑀸𑀳𑁆𑀫𑀡𑀲𑀫𑀬𑁂 𑀧𑀜𑁆𑀘𑀲𑀻𑀮𑀸𑀦𑀺 ‘𑀲𑀻𑀮’𑀦𑁆𑀢𑀺 𑀧𑀜𑁆𑀜𑀸𑀧𑁂𑀦𑁆𑀢𑀺, 𑀯𑁂𑀤𑀢𑁆𑀢𑀬𑀉𑀕𑁆𑀕𑀳𑀡𑀧𑀜𑁆𑀜𑀸 𑀧𑀜𑁆𑀜𑀸𑀢𑀺. 𑀉𑀧𑀭𑀺𑀯𑀺𑀲𑁂𑀲𑀁 𑀦 𑀚𑀸𑀦𑀦𑁆𑀢𑀺. 𑀬𑀁𑀦𑀽𑀦𑀸𑀳𑀁 𑀩𑁆𑀭𑀸𑀳𑁆𑀫𑀡𑀲𑁆𑀲 𑀉𑀢𑁆𑀢𑀭𑀺𑀯𑀺𑀲𑁂𑀲𑀪𑀽𑀢𑀁 𑀫𑀕𑁆𑀕𑀲𑀻𑀮𑀁, 𑀨𑀮𑀲𑀻𑀮𑀁, 𑀫𑀕𑁆𑀕𑀧𑀜𑁆𑀜𑀁, 𑀨𑀮𑀧𑀜𑁆𑀜𑀜𑁆𑀘 𑀤𑀲𑁆𑀲𑁂𑀢𑁆𑀯𑀸 𑀅𑀭𑀳𑀢𑁆𑀢𑀦𑀺𑀓𑀽𑀝𑁂𑀦 𑀤𑁂𑀲𑀦𑀁 𑀦𑀺𑀝𑁆𑀞𑀧𑁂𑀬𑁆𑀬’’𑀦𑁆𑀢𑀺. 𑀅𑀣 𑀦𑀁 𑀓𑀣𑁂𑀢𑀼𑀓𑀫𑁆𑀬𑀢𑀸𑀬 𑀧𑀼𑀘𑁆𑀙𑀦𑁆𑀢𑁄 𑁋 ‘‘𑀓𑀢𑀫𑀁 𑀧𑀦 𑀢𑀁, 𑀩𑁆𑀭𑀸𑀳𑁆𑀫𑀡, 𑀲𑀻𑀮𑀁 𑀓𑀢𑀫𑀸 𑀲𑀸 𑀧𑀜𑁆𑀜𑀸’’𑀢𑀺 𑀆𑀳. 𑀅𑀣 𑀩𑁆𑀭𑀸𑀳𑁆𑀫𑀡𑁄 𑁋 ‘‘𑀫𑀬𑀸 𑀲𑀓𑀲𑀫𑀬𑀯𑀲𑁂𑀦 𑀧𑀜𑁆𑀳𑁄 𑀯𑀺𑀲𑁆𑀲𑀚𑁆𑀚𑀺𑀢𑁄. 𑀲𑀫𑀡𑁄 𑀧𑀦 𑀫𑀁 𑀕𑁄𑀢𑀫𑁄 𑀧𑀼𑀦 𑀦𑀺𑀯𑀢𑁆𑀢𑀺𑀢𑁆𑀯𑀸 𑀧𑀼𑀘𑁆𑀙𑀢𑀺, 𑀇𑀤𑀸𑀦𑀺𑀲𑁆𑀲𑀸𑀳𑀁 𑀘𑀺𑀢𑁆𑀢𑀁 𑀧𑀭𑀺𑀢𑁄𑀲𑁂𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑀺𑀢𑀼𑀁 𑀲𑀓𑁆𑀓𑀼𑀡𑁂𑀬𑁆𑀬𑀁 𑀯𑀸 𑀦 𑀯𑀸? 𑀲𑀘𑁂 𑀦 𑀲𑀓𑁆𑀔𑀺𑀲𑁆𑀲𑀁 𑀧𑀞𑀫𑀁 𑀉𑀧𑁆𑀧𑀦𑁆𑀦𑀸𑀧𑀺 𑀫𑁂 𑀮𑀚𑁆𑀚𑀸 𑀪𑀺𑀚𑁆𑀚𑀺𑀲𑁆𑀲𑀢𑀺. 𑀅𑀲𑀓𑁆𑀓𑁄𑀦𑁆𑀢𑀲𑁆𑀲 𑀧𑀦 𑀦 𑀲𑀓𑁆𑀓𑁄𑀫𑀻𑀢𑀺 𑀯𑀘𑀦𑁂 𑀤𑁄𑀲𑁄 𑀦𑀢𑁆𑀣𑀻’’𑀢𑀺 𑀧𑀼𑀦 𑀦𑀺𑀯𑀢𑁆𑀢𑀺𑀢𑁆𑀯𑀸 𑀪𑀕𑀯𑀢𑁄𑀬𑁂𑀯 𑀪𑀸𑀭𑀁 𑀓𑀭𑁄𑀦𑁆𑀢𑁄 ‘‘𑀏𑀢𑁆𑀢𑀓𑀧𑀭𑀫𑀸𑀯 𑀫𑀬’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀏𑀢𑁆𑀢𑀓𑀧𑀭𑀫𑀸𑀢𑀺 𑀏𑀢𑁆𑀢𑀓𑀁 𑀲𑀻𑀮𑀧𑀜𑁆𑀜𑀸𑀡𑀦𑁆𑀢𑀺 𑀯𑀘𑀦𑀫𑁂𑀯 𑀧𑀭𑀫𑀁 𑀅𑀫𑁆𑀳𑀸𑀓𑀁, 𑀢𑁂 𑀫𑀬𑀁 𑀏𑀢𑁆𑀢𑀓𑀧𑀭𑀫𑀸, 𑀇𑀢𑁄 𑀧𑀭𑀁 𑀏𑀢𑀲𑁆𑀲 𑀪𑀸𑀲𑀺𑀢𑀲𑁆𑀲 𑀅𑀢𑁆𑀣𑀁 𑀦 𑀚𑀸𑀦𑀸𑀫𑀸𑀢𑀺 𑀅𑀢𑁆𑀣𑁄.

𑀅𑀣𑀲𑁆𑀲 𑀪𑀕𑀯𑀸 𑀲𑀻𑀮𑀧𑀜𑁆𑀜𑀸𑀬 𑀫𑀽𑀮𑀪𑀽𑀢𑀲𑁆𑀲 𑀢𑀣𑀸𑀕𑀢𑀲𑁆𑀲 𑀉𑀧𑁆𑀧𑀸𑀤𑀢𑁄 𑀧𑀪𑀼𑀢𑀺 𑀲𑀻𑀮𑀧𑀜𑁆𑀜𑀸𑀡𑀁 𑀤𑀲𑁆𑀲𑁂𑀢𑀼𑀁 𑁋 ‘‘𑀇𑀥 𑀩𑁆𑀭𑀸𑀳𑁆𑀫𑀡, 𑀢𑀣𑀸𑀕𑀢𑁄’’𑀢𑀺𑀆𑀤𑀺𑀫𑀸𑀳. 𑀢𑀲𑁆𑀲𑀢𑁆𑀣𑁄 𑀲𑀸𑀫𑀜𑁆𑀜𑀨𑀮𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄, 𑀅𑀬𑀁 𑀧𑀦 𑀯𑀺𑀲𑁂𑀲𑁄, 𑀇𑀥 𑀢𑀺𑀯𑀺𑀥𑀫𑁆𑀧𑀺 𑀲𑀻𑀮𑀁 𑁋 ‘‘𑀇𑀤𑀫𑁆𑀧𑀺𑀲𑁆𑀲 𑀳𑁄𑀢𑀺 𑀲𑀻𑀮𑀲𑁆𑀫𑀺’’𑀦𑁆𑀢𑀺 𑀏𑀯𑀁 𑀲𑀻𑀮𑀫𑀺𑀘𑁆𑀘𑁂𑀯 𑀦𑀺𑀬𑁆𑀬𑀸𑀢𑀺𑀢𑀁 𑀧𑀞𑀫𑀚𑁆𑀛𑀸𑀦𑀸𑀤𑀻𑀦𑀺 𑀘𑀢𑁆𑀢𑀸𑀭𑀺 𑀛𑀸𑀦𑀸𑀦𑀺 𑀅𑀢𑁆𑀣𑀢𑁄 𑀧𑀜𑁆𑀜𑀸𑀲𑀫𑁆𑀧𑀤𑀸. 𑀏𑀯𑀁 𑀧𑀜𑁆𑀜𑀸𑀯𑀲𑁂𑀦 𑀧𑀦 𑀅𑀦𑀺𑀬𑁆𑀬𑀸𑀢𑁂𑀢𑁆𑀯𑀸 𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸𑀬 𑀧𑀤𑀝𑁆𑀞𑀸𑀦𑀪𑀸𑀯𑀫𑀢𑁆𑀢𑁂𑀦 𑀤𑀲𑁆𑀲𑁂𑀢𑁆𑀯𑀸 𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸𑀢𑁄 𑀧𑀝𑁆𑀞𑀸𑀬 𑀧𑀜𑁆𑀜𑀸 𑀦𑀺𑀬𑁆𑀬𑀸𑀢𑀺𑀢𑀸𑀢𑀺.

𑀲𑁄𑀡𑀤𑀡𑁆𑀟𑀉𑀧𑀸𑀲𑀓𑀢𑁆𑀢𑀧𑀝𑀺𑀯𑁂𑀤𑀦𑀸𑀓𑀣𑀸

𑁩𑁧𑁯-𑁩𑁨𑁨. 𑀲𑁆𑀯𑀸𑀢𑀦𑀸𑀬𑀸𑀢𑀺 𑀧𑀤𑀲𑁆𑀲 𑀅𑀢𑁆𑀣𑁄 𑀅𑀚𑁆𑀚𑀢𑀦𑀸𑀬𑀸𑀢𑀺 𑀏𑀢𑁆𑀣 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀢𑁂𑀦 𑀫𑀁 𑀲𑀸 𑀧𑀭𑀺𑀲𑀸 𑀧𑀭𑀺𑀪𑀯𑁂𑀬𑁆𑀬𑀸𑀢𑀺 𑀢𑁂𑀦 𑀢𑀼𑀫𑁆𑀳𑁂 𑀤𑀽𑀭𑀢𑁄𑀯 𑀤𑀺𑀲𑁆𑀯𑀸 𑀆𑀲𑀦𑀸 𑀯𑀼𑀝𑁆𑀞𑀺𑀢𑀓𑀸𑀭𑀡𑁂𑀦 𑀫𑀁 𑀲𑀸 𑀧𑀭𑀺𑀲𑀸 𑁋 ‘‘𑀅𑀬𑀁 𑀲𑁄𑀡𑀤𑀡𑁆𑀟𑁄 𑀧𑀘𑁆𑀙𑀺𑀫𑀯𑀬𑁂 𑀞𑀺𑀢𑁄 𑀫𑀳𑀮𑁆𑀮𑀓𑁄, 𑀕𑁄𑀢𑀫𑁄 𑀧𑀦 𑀤𑀳𑀭𑁄 𑀬𑀼𑀯𑀸 𑀦𑀢𑁆𑀢𑀸𑀧𑀺𑀲𑁆𑀲 𑀦𑀧𑁆𑀧𑀳𑁄𑀢𑀺, 𑀲𑁄 𑀦𑀸𑀫 𑀅𑀢𑁆𑀢𑀦𑁄 𑀦𑀢𑁆𑀢𑀼𑀫𑀢𑁆𑀢𑀪𑀸𑀯𑀫𑁆𑀧𑀺 𑀅𑀧𑁆𑀧𑀢𑁆𑀢𑀲𑁆𑀲 𑀆𑀲𑀦𑀸 𑀯𑀼𑀝𑁆𑀞𑀸𑀢𑀻’’𑀢𑀺 𑀧𑀭𑀺𑀪𑀯𑁂𑀬𑁆𑀬. 𑀆𑀲𑀦𑀸 𑀫𑁂 𑀢𑀁 𑀪𑀯𑀁 𑀕𑁄𑀢𑀫𑁄 𑀧𑀘𑁆𑀘𑀼𑀝𑁆𑀞𑀸𑀦𑀦𑁆𑀢𑀺 𑀫𑀫 𑀅𑀕𑀸𑀭𑀯𑁂𑀦 𑀅𑀯𑀼𑀝𑁆𑀞𑀸𑀦𑀁 𑀦𑀸𑀫 𑀦𑀢𑁆𑀣𑀺, 𑀪𑁄𑀕𑀦𑀸𑀲𑀦𑀪𑀬𑁂𑀦 𑀧𑀦 𑀦 𑀯𑀼𑀝𑁆𑀞𑀳𑀺𑀲𑁆𑀲𑀸𑀫𑀺, 𑀢𑀁 𑀢𑀼𑀫𑁆𑀳𑁂 𑀳𑀺 𑀘𑁂𑀯 𑀫𑀬𑀸 𑀘 𑀜𑀸𑀢𑀼𑀁 𑀯𑀝𑁆𑀝𑀢𑀺. 𑀢𑀲𑁆𑀫𑀸 𑀆𑀲𑀦𑀸 𑀫𑁂 𑀏𑀢𑀁 𑀪𑀯𑀁 𑀕𑁄𑀢𑀫𑁄 𑀧𑀘𑁆𑀘𑀼𑀝𑁆𑀞𑀸𑀦𑀁 𑀥𑀸𑀭𑁂𑀢𑀽𑀢𑀺, 𑀇𑀫𑀺𑀦𑀸 𑀓𑀺𑀭 𑀲𑀤𑀺𑀲𑁄 𑀓𑀼𑀳𑀓𑁄 𑀤𑀼𑀮𑁆𑀮𑀪𑁄, 𑀪𑀕𑀯𑀢𑀺 𑀧𑀦𑀲𑁆𑀲 𑀅𑀕𑀸𑀭𑀯𑀁 𑀦𑀸𑀫 𑀦𑀢𑁆𑀣𑀺, 𑀢𑀲𑁆𑀫𑀸 𑀪𑁄𑀕𑀦𑀸𑀲𑀦𑀪𑀬𑀸 𑀓𑀼𑀳𑀦𑀯𑀲𑁂𑀦 𑀏𑀯𑀁 𑀯𑀤𑀢𑀺. 𑀧𑀭𑀧𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀥𑀫𑁆𑀫𑀺𑀬𑀸 𑀓𑀣𑀸𑀬𑀸𑀢𑀺𑀆𑀤𑀻𑀲𑀼 𑀢𑀗𑁆𑀔𑀡𑀸𑀦𑀼𑀭𑀽𑀧𑀸𑀬 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀁 𑀅𑀢𑁆𑀣𑀁 𑀲𑀦𑁆𑀤𑀲𑁆𑀲𑁂𑀢𑁆𑀯𑀸 𑀓𑀼𑀲𑀮𑁂 𑀥𑀫𑁆𑀫𑁂 𑀲𑀫𑀸𑀤𑀧𑁂𑀢𑁆𑀯𑀸 𑀕𑀡𑁆𑀳𑀸𑀧𑁂𑀢𑁆𑀯𑀸. 𑀢𑀢𑁆𑀣 𑀦𑀁 𑀲𑀫𑀼𑀢𑁆𑀢𑁂𑀚𑁂𑀢𑁆𑀯𑀸 𑀲𑀉𑀲𑁆𑀲𑀸𑀳𑀁 𑀓𑀢𑁆𑀯𑀸 𑀢𑀸𑀬 𑀘 𑀲𑀉𑀲𑁆𑀲𑀸𑀳𑀢𑀸𑀬 𑀅𑀜𑁆𑀜𑁂𑀳𑀺 𑀘 𑀯𑀺𑀚𑁆𑀚𑀫𑀸𑀦𑀕𑀼𑀡𑁂𑀳𑀺 𑀲𑀫𑁆𑀧𑀳𑀁𑀲𑁂𑀢𑁆𑀯𑀸 𑀥𑀫𑁆𑀫𑀭𑀢𑀦𑀯𑀲𑁆𑀲𑀁 𑀯𑀲𑁆𑀲𑀺𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀧𑀓𑁆𑀓𑀸𑀫𑀺. 𑀩𑁆𑀭𑀸𑀳𑁆𑀫𑀡𑁄 𑀧𑀦 𑀅𑀢𑁆𑀢𑀦𑁄 𑀓𑀼𑀳𑀓𑀢𑀸𑀬 𑀏𑀯𑀫𑁆𑀧𑀺 𑀪𑀕𑀯𑀢𑀺 𑀥𑀫𑁆𑀫𑀯𑀲𑁆𑀲𑀁 𑀯𑀲𑁆𑀲𑀺𑀢𑁂 𑀯𑀺𑀲𑁂𑀲𑀁 𑀦𑀺𑀩𑁆𑀩𑀢𑁆𑀢𑁂𑀢𑀼𑀁 𑀦𑀸𑀲𑀓𑁆𑀔𑀺. 𑀓𑁂𑀯𑀮𑀫𑀲𑁆𑀲 𑀆𑀬𑀢𑀺𑀁 𑀦𑀺𑀩𑁆𑀩𑀸𑀦𑀢𑁆𑀣𑀸𑀬 𑀯𑀸𑀲𑀦𑀸𑀪𑀸𑀕𑀺𑀬𑀸𑀬 𑀘 𑀲𑀩𑁆𑀩𑀸 𑀧𑀼𑀭𑀺𑀫𑀧𑀘𑁆𑀙𑀺𑀫𑀓𑀣𑀸 𑀅𑀳𑁄𑀲𑀻𑀢𑀺.

𑀇𑀢𑀺 𑀲𑀼𑀫𑀗𑁆𑀕𑀮𑀯𑀺𑀮𑀸𑀲𑀺𑀦𑀺𑀬𑀸 𑀤𑀻𑀖𑀦𑀺𑀓𑀸𑀬𑀝𑁆𑀞𑀓𑀣𑀸𑀬𑀁

𑀲𑁄𑀡𑀤𑀡𑁆𑀟𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.