𑁫. 𑀓𑀽𑀝𑀤𑀦𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁨𑁩. 𑀏𑀯𑀁 𑀫𑁂 𑀲𑀼𑀢𑀁…𑀧𑁂… 𑀫𑀕𑀥𑁂𑀲𑀽𑀢𑀺 𑀓𑀽𑀝𑀤𑀦𑁆𑀢𑀲𑀼𑀢𑁆𑀢𑀁. 𑀢𑀢𑁆𑀭𑀸𑀬𑀁 𑀅𑀧𑀼𑀩𑁆𑀩𑀧𑀤𑀯𑀡𑁆𑀡𑀦𑀸. 𑀫𑀕𑀥𑁂𑀲𑀽𑀢𑀺 𑀫𑀕𑀥𑀸 𑀦𑀸𑀫 𑀚𑀸𑀦𑀧𑀤𑀺𑀦𑁄 𑀭𑀸𑀚𑀓𑀼𑀫𑀸𑀭𑀸, 𑀢𑁂𑀲𑀁 𑀦𑀺𑀯𑀸𑀲𑁄 𑀏𑀓𑁄𑀧𑀺 𑀚𑀦𑀧𑀤𑁄 𑀭𑀽𑀴𑁆𑀳𑀻𑀲𑀤𑁆𑀤𑁂𑀦 𑀫𑀕𑀥𑀸𑀢𑀺 𑀯𑀼𑀘𑁆𑀘𑀢𑀺, 𑀢𑀲𑁆𑀫𑀺𑀁 𑀫𑀕𑀥𑁂𑀲𑀼 𑀚𑀦𑀧𑀤𑁂. 𑀇𑀢𑁄 𑀧𑀭𑀁 𑀧𑀼𑀭𑀺𑀫𑀲𑀼𑀢𑁆𑀢𑀤𑁆𑀯𑀬𑁂 𑀯𑀼𑀢𑁆𑀢𑀦𑀬𑀫𑁂𑀯. 𑀅𑀫𑁆𑀩𑀮𑀝𑁆𑀞𑀺𑀓𑀸 𑀩𑁆𑀭𑀳𑁆𑀫𑀚𑀸𑀮𑁂 𑀯𑀼𑀢𑁆𑀢𑀲𑀤𑀺𑀲𑀸𑀯. 𑀓𑀽𑀝𑀤𑀦𑁆𑀢𑁄𑀢𑀺 𑀢𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀦𑀸𑀫𑀁. 𑀉𑀧𑀓𑁆𑀔𑀝𑁄𑀢𑀺 𑀲𑀚𑁆𑀚𑀺𑀢𑁄. 𑀯𑀘𑁆𑀙𑀢𑀭𑀲𑀢𑀸𑀦𑀻𑀢𑀺 𑀯𑀘𑁆𑀙𑀲𑀢𑀸𑀦𑀺. 𑀉𑀭𑀩𑁆𑀪𑀸𑀢𑀺 𑀢𑀭𑀼𑀡𑀫𑁂𑀡𑁆𑀟𑀓𑀸 𑀯𑀼𑀘𑁆𑀘𑀦𑁆𑀢𑀺. 𑀏𑀢𑁂 𑀢𑀸𑀯 𑀧𑀸𑀴𑀺𑀬𑀁 𑀆𑀕𑀢𑀸𑀬𑁂𑀯. 𑀧𑀸𑀴𑀺𑀬𑀁 𑀧𑀦 𑀅𑀦𑀸𑀕𑀢𑀸𑀦𑀫𑁆𑀧𑀺 𑀅𑀦𑁂𑀓𑁂𑀲𑀁 𑀫𑀺𑀕𑀧𑀓𑁆𑀔𑀻𑀦𑀁 𑀲𑀢𑁆𑀢𑀲𑀢𑁆𑀢𑀲𑀢𑀸𑀦𑀺 𑀲𑀫𑁆𑀧𑀺𑀡𑁆𑀟𑀺𑀢𑀸𑀦𑁂𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀲𑀩𑁆𑀩𑀲𑀢𑁆𑀢𑀲𑀢𑀺𑀓𑀬𑀸𑀕𑀁 𑀓𑀺𑀭𑁂𑀲 𑀬𑀚𑀺𑀢𑀼𑀓𑀸𑀫𑁄 𑀳𑁄𑀢𑀺. 𑀣𑀽𑀡𑀽𑀧𑀦𑀻𑀢𑀸𑀦𑀻𑀢𑀺 𑀩𑀦𑁆𑀥𑀺𑀢𑁆𑀯𑀸 𑀞𑀧𑀦𑀢𑁆𑀣𑀸𑀬 𑀬𑀽𑀧𑀲𑀗𑁆𑀔𑀸𑀢𑀁 𑀣𑀽𑀡𑀁 𑀉𑀧𑀦𑀻𑀢𑀸𑀦𑀺.

𑁩𑁨𑁮. 𑀢𑀺𑀯𑀺𑀥𑀦𑁆𑀢𑀺 𑀏𑀢𑁆𑀣 𑀯𑀺𑀥𑀸 𑀯𑀼𑀘𑁆𑀘𑀢𑀺 𑀞𑀧𑀦𑀸, 𑀢𑀺𑀝𑁆𑀞𑀧𑀦𑀦𑁆𑀢𑀺 𑀅𑀢𑁆𑀣𑁄. 𑀲𑁄𑀴𑀲𑀧𑀭𑀺𑀓𑁆𑀔𑀸𑀭𑀦𑁆𑀢𑀺 𑀲𑁄𑀴𑀲𑀧𑀭𑀺𑀯𑀸𑀭𑀁.

𑁩𑁩𑁦-𑁩𑁩𑁬. 𑀧𑀝𑀺𑀯𑀲𑀦𑁆𑀢𑀻𑀢𑀺 𑀬𑀜𑁆𑀜𑀸𑀦𑀼𑀪𑀯𑀦𑀢𑁆𑀣𑀸𑀬 𑀧𑀝𑀺𑀯𑀲𑀦𑁆𑀢𑀺. 𑀪𑀽𑀢𑀧𑀼𑀩𑁆𑀩𑀦𑁆𑀢𑀺 𑀇𑀤𑀁 𑀪𑀕𑀯𑀸 𑀧𑀣𑀯𑀻𑀕𑀢𑀁 𑀦𑀺𑀥𑀺𑀁 𑀉𑀤𑁆𑀥𑀭𑀺𑀢𑁆𑀯𑀸 𑀧𑀼𑀭𑀢𑁄 𑀭𑀸𑀲𑀺𑀁 𑀓𑀭𑁄𑀦𑁆𑀢𑁄 𑀯𑀺𑀬 𑀪𑀯𑀧𑀝𑀺𑀘𑁆𑀙𑀦𑁆𑀦𑀁 𑀧𑀼𑀩𑁆𑀩𑀘𑀭𑀺𑀢𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳. 𑀫𑀳𑀸𑀯𑀺𑀚𑀺𑀢𑁄𑀢𑀺 𑀲𑁄 𑀓𑀺𑀭 𑀲𑀸𑀕𑀭𑀧𑀭𑀺𑀬𑀦𑁆𑀢𑀁 𑀫𑀳𑀦𑁆𑀢𑀁 𑀧𑀣𑀯𑀻𑀫𑀡𑁆𑀟𑀮𑀁 𑀯𑀺𑀚𑀺𑀦𑀺, 𑀇𑀢𑀺 𑀫𑀳𑀦𑁆𑀢𑀁 𑀯𑀺𑀚𑀺𑀢𑀫𑀲𑁆𑀲𑀸𑀢𑀺 𑀫𑀳𑀸𑀯𑀺𑀚𑀺𑀢𑁄 𑀢𑁆𑀯𑁂𑀯 𑀲𑀗𑁆𑀔𑁆𑀬𑀁 𑀅𑀕𑀫𑀸𑀲𑀺. 𑀅𑀟𑁆𑀠𑁄𑀢𑀺𑀆𑀤𑀻𑀲𑀼 𑀬𑁄 𑀓𑁄𑀘𑀺 𑀅𑀢𑁆𑀢𑀦𑁄 𑀲𑀦𑁆𑀢𑀓𑁂𑀦 𑀯𑀺𑀪𑀯𑁂𑀦 𑀅𑀟𑁆𑀠𑁄 𑀳𑁄𑀢𑀺, 𑀅𑀬𑀁 𑀧𑀦 𑀦 𑀓𑁂𑀯𑀮𑀁 𑀅𑀟𑁆𑀠𑁄𑀬𑁂𑀯, 𑀫𑀳𑀤𑁆𑀥𑀦𑁄 𑀫𑀳𑀢𑀸 𑀅𑀧𑀭𑀺𑀫𑀸𑀡𑀲𑀗𑁆𑀔𑁆𑀬𑁂𑀦 𑀥𑀦𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀧𑀜𑁆𑀘𑀓𑀸𑀫𑀕𑀼𑀡𑀯𑀲𑁂𑀦 𑀫𑀳𑀦𑁆𑀢𑀸 𑀉𑀴𑀸𑀭𑀸 𑀪𑁄𑀕𑀸 𑀅𑀲𑁆𑀲𑀸𑀢𑀺 𑀫𑀳𑀸𑀪𑁄𑀕𑁄. 𑀧𑀺𑀡𑁆𑀟𑀧𑀺𑀡𑁆𑀟𑀯𑀲𑁂𑀦 𑀘𑁂𑀯 𑀲𑀼𑀯𑀡𑁆𑀡𑀫𑀸𑀲𑀓𑀭𑀚𑀢𑀫𑀸𑀲𑀓𑀸𑀤𑀺𑀯𑀲𑁂𑀦 𑀘 𑀚𑀸𑀢𑀭𑀽𑀧𑀭𑀚𑀢𑀲𑁆𑀲 𑀧𑀳𑀽𑀢𑀢𑀸𑀬 𑀧𑀳𑀽𑀢𑀚𑀸𑀢𑀭𑀽𑀧𑀭𑀚𑀢𑁄, 𑀅𑀦𑁂𑀓𑀓𑁄𑀝𑀺𑀲𑀗𑁆𑀔𑁆𑀬𑁂𑀦 𑀚𑀸𑀢𑀭𑀽𑀧𑀭𑀚𑀢𑁂𑀦 𑀲𑀫𑀦𑁆𑀦𑀸𑀕𑀢𑁄𑀢𑀺 𑀅𑀢𑁆𑀣𑁄. 𑀯𑀺𑀢𑁆𑀢𑀻𑀢𑀺 𑀢𑀼𑀝𑁆𑀞𑀺, 𑀯𑀺𑀢𑁆𑀢𑀺𑀬𑀸 𑀉𑀧𑀓𑀭𑀡𑀁 𑀯𑀺𑀢𑁆𑀢𑀽𑀧𑀓𑀭𑀡𑀁 𑀢𑀼𑀝𑁆𑀞𑀺𑀓𑀸𑀭𑀡𑀦𑁆𑀢𑀺 𑀅𑀢𑁆𑀣𑁄. 𑀧𑀳𑀽𑀢𑀁 𑀦𑀸𑀦𑀸𑀯𑀺𑀥𑀸𑀮𑀗𑁆𑀓𑀸𑀭𑀲𑀼𑀯𑀡𑁆𑀡𑀭𑀚𑀢𑀪𑀸𑀚𑀦𑀸𑀤𑀺𑀪𑁂𑀤𑀁 𑀯𑀺𑀢𑁆𑀢𑀽𑀧𑀓𑀭𑀡𑀫𑀲𑁆𑀲𑀸𑀢𑀺 𑀧𑀳𑀽𑀢𑀯𑀺𑀢𑁆𑀢𑀽𑀧𑀓𑀭𑀡𑁄. 𑀲𑀢𑁆𑀢𑀭𑀢𑀦𑀲𑀗𑁆𑀔𑀸𑀢𑀲𑁆𑀲 𑀦𑀺𑀤𑀳𑀺𑀢𑁆𑀯𑀸 𑀞𑀧𑀺𑀢𑀥𑀦𑀲𑁆𑀲 𑀲𑀩𑁆𑀩𑀧𑀼𑀩𑁆𑀩𑀡𑁆𑀡𑀸𑀧𑀭𑀡𑁆𑀡𑀲𑀗𑁆𑀕𑀳𑀺𑀢𑀲𑁆𑀲 𑀥𑀜𑁆𑀜𑀲𑁆𑀲 𑀘 𑀧𑀳𑀽𑀢𑀢𑀸𑀬 𑀧𑀳𑀽𑀢𑀥𑀦𑀥𑀜𑁆𑀜𑁄. 𑀅𑀣𑀯𑀸 𑀇𑀤𑀫𑀲𑁆𑀲 𑀤𑁂𑀯𑀲𑀺𑀓𑀁 𑀧𑀭𑀺𑀩𑁆𑀩𑀬𑀤𑀸𑀦𑀕𑁆𑀕𑀳𑀡𑀸𑀤𑀺𑀯𑀲𑁂𑀦 𑀧𑀭𑀺𑀯𑀢𑁆𑀢𑀦𑀥𑀦𑀥𑀜𑁆𑀜𑀯𑀲𑁂𑀦 𑀯𑀼𑀢𑁆𑀢𑀁.

𑀧𑀭𑀺𑀧𑀼𑀡𑁆𑀡𑀓𑁄𑀲𑀓𑁄𑀝𑁆𑀞𑀸𑀕𑀸𑀭𑁄𑀢𑀺 𑀓𑁄𑀲𑁄 𑀯𑀼𑀘𑁆𑀘𑀢𑀺 𑀪𑀡𑁆𑀟𑀸𑀕𑀸𑀭𑀁, 𑀦𑀺𑀤𑀳𑀺𑀢𑁆𑀯𑀸 𑀞𑀧𑀺𑀢𑁂𑀦 𑀥𑀦𑁂𑀦 𑀧𑀭𑀺𑀧𑀼𑀡𑁆𑀡𑀓𑁄𑀲𑁄, 𑀥𑀜𑁆𑀜𑁂𑀦 𑀧𑀭𑀺𑀧𑀼𑀡𑁆𑀡𑀓𑁄𑀝𑁆𑀞𑀸𑀕𑀸𑀭𑁄 𑀘𑀸𑀢𑀺 𑀅𑀢𑁆𑀣𑁄. 𑀅𑀣𑀯𑀸 𑀘𑀢𑀼𑀩𑁆𑀩𑀺𑀥𑁄 𑀓𑁄𑀲𑁄 𑁋 𑀳𑀢𑁆𑀣𑀻, 𑀅𑀲𑁆𑀲𑀸, 𑀭𑀣𑀸, 𑀧𑀢𑁆𑀢𑀻𑀢𑀺. 𑀓𑁄𑀝𑁆𑀞𑀸𑀕𑀸𑀭𑀁 𑀢𑀺𑀯𑀺𑀥𑀁 𑁋 𑀥𑀦𑀓𑁄𑀝𑁆𑀞𑀸𑀕𑀸𑀭𑀁, 𑀯𑀢𑁆𑀣𑀓𑁄𑀝𑁆𑀞𑀸𑀕𑀸𑀭𑀁, 𑀥𑀜𑁆𑀜𑀓𑁄𑀝𑁆𑀞𑀸𑀕𑀸𑀭𑀦𑁆𑀢𑀺, 𑀢𑀁 𑀲𑀩𑁆𑀩𑀫𑁆𑀧𑀺 𑀧𑀭𑀺𑀧𑀼𑀡𑁆𑀡𑀫𑀲𑁆𑀲𑀸𑀢𑀺 𑀧𑀭𑀺𑀧𑀼𑀡𑁆𑀡𑀓𑁄𑀲𑀓𑁄𑀝𑁆𑀞𑀸𑀕𑀸𑀭𑁄. 𑀉𑀤𑀧𑀸𑀤𑀻𑀢𑀺 𑀉𑀧𑁆𑀧𑀚𑁆𑀚𑀺. 𑀅𑀬𑀁 𑀓𑀺𑀭 𑀭𑀸𑀚𑀸 𑀏𑀓𑀤𑀺𑀯𑀲𑀁 𑀭𑀢𑀦𑀸𑀯𑀮𑁄𑀓𑀦𑀘𑀸𑀭𑀺𑀓𑀁 𑀦𑀸𑀫 𑀦𑀺𑀓𑁆𑀔𑀦𑁆𑀢𑁄. 𑀲𑁄 𑀪𑀡𑁆𑀟𑀸𑀕𑀸𑀭𑀺𑀓𑀁 𑀧𑀼𑀘𑁆𑀙𑀺 𑁋 ‘‘𑀢𑀸𑀢, 𑀇𑀤𑀁 𑀏𑀯𑀁 𑀩𑀳𑀼𑀥𑀦𑀁 𑀓𑁂𑀦 𑀲𑀗𑁆𑀖𑀭𑀺𑀢’’𑀦𑁆𑀢𑀺? 𑀢𑀼𑀫𑁆𑀳𑀸𑀓𑀁 𑀧𑀺𑀢𑀼𑀧𑀺𑀢𑀸𑀫𑀳𑀸𑀤𑀻𑀳𑀺 𑀬𑀸𑀯 𑀲𑀢𑁆𑀢𑀫𑀸 𑀓𑀼𑀮𑀧𑀭𑀺𑀯𑀝𑁆𑀝𑀸𑀢𑀺. 𑀇𑀤𑀁 𑀧𑀦 𑀥𑀦𑀁 𑀲𑀗𑁆𑀖𑀭𑀺𑀢𑁆𑀯𑀸 𑀢𑁂 𑀓𑀼𑀳𑀺𑀁 𑀕𑀢𑀸𑀢𑀺? 𑀲𑀩𑁆𑀩𑁂𑀯 𑀢𑁂, 𑀤𑁂𑀯, 𑀫𑀭𑀡𑀯𑀲𑀁 𑀧𑀢𑁆𑀢𑀸𑀢𑀺. 𑀅𑀢𑁆𑀢𑀦𑁄 𑀥𑀦𑀁 𑀅𑀕𑀳𑁂𑀢𑁆𑀯𑀸𑀯 𑀕𑀢𑀸, 𑀢𑀸𑀢𑀸𑀢𑀺? 𑀤𑁂𑀯, 𑀓𑀺𑀁 𑀯𑀤𑁂𑀣, 𑀥𑀦𑀁 𑀦𑀸𑀫𑁂𑀢𑀁 𑀧𑀳𑀸𑀬 𑀕𑀫𑀦𑀻𑀬𑀫𑁂𑀯, 𑀦𑁄 𑀆𑀤𑀸𑀬 𑀕𑀫𑀦𑀻𑀬𑀦𑁆𑀢𑀺. 𑀅𑀣 𑀭𑀸𑀚𑀸 𑀦𑀺𑀯𑀢𑁆𑀢𑀺𑀢𑁆𑀯𑀸 𑀲𑀺𑀭𑀻𑀕𑀩𑁆𑀪𑁂 𑀦𑀺𑀲𑀺𑀦𑁆𑀦𑁄 𑁋 ‘𑀅𑀥𑀺𑀕𑀢𑀸 𑀔𑁄 𑀫𑁂’𑀢𑀺𑀆𑀤𑀻𑀦𑀺 𑀘𑀺𑀦𑁆𑀢𑁂𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀏𑀯𑀁 𑀘𑁂𑀢𑀲𑁄 𑀧𑀭𑀺𑀯𑀺𑀢𑀓𑁆𑀓𑁄 𑀉𑀤𑀧𑀸𑀤𑀻’’𑀢𑀺.

𑁩𑁩𑁭. 𑀩𑁆𑀭𑀸𑀳𑁆𑀫𑀡𑀁 𑀆𑀫𑀦𑁆𑀢𑁂𑀢𑁆𑀯𑀸𑀢𑀺 𑀓𑀲𑁆𑀫𑀸 𑀆𑀫𑀦𑁆𑀢𑁂𑀲𑀺? 𑀅𑀬𑀁 𑀓𑀺𑀭𑁂𑀯𑀁 𑀘𑀺𑀦𑁆𑀢𑁂𑀲𑀺 𑁋 ‘‘𑀤𑀸𑀦𑀁 𑀤𑁂𑀦𑁆𑀢𑁂𑀦 𑀦𑀸𑀫 𑀏𑀓𑁂𑀦 𑀧𑀡𑁆𑀟𑀺𑀢𑁂𑀦 𑀲𑀤𑁆𑀥𑀺𑀁 𑀫𑀦𑁆𑀢𑁂𑀢𑁆𑀯𑀸 𑀤𑀸𑀢𑀼𑀁 𑀯𑀝𑁆𑀝𑀢𑀺, 𑀅𑀦𑀸𑀫𑀦𑁆𑀢𑁂𑀢𑁆𑀯𑀸 𑀓𑀢𑀓𑀫𑁆𑀫𑀜𑁆𑀳𑀺 𑀧𑀘𑁆𑀙𑀸𑀦𑀼𑀢𑀸𑀧𑀁 𑀓𑀭𑁄𑀢𑀻’’𑀢𑀺. 𑀢𑀲𑁆𑀫𑀸 𑀆𑀫𑀦𑁆𑀢𑁂𑀲𑀺. 𑀅𑀣 𑀩𑁆𑀭𑀸𑀳𑁆𑀫𑀡𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀬𑀁 𑀭𑀸𑀚𑀸 𑀫𑀳𑀸𑀤𑀸𑀦𑀁 𑀤𑀸𑀢𑀼𑀓𑀸𑀫𑁄, 𑀚𑀦𑀧𑀤𑁂 𑀘𑀲𑁆𑀲 𑀩𑀳𑀽 𑀘𑁄𑀭𑀸, 𑀢𑁂 𑀅𑀯𑀽𑀧𑀲𑀫𑁂𑀢𑁆𑀯𑀸 𑀤𑀸𑀦𑀁 𑀤𑁂𑀦𑁆𑀢𑀲𑁆𑀲 𑀔𑀻𑀭𑀤𑀥𑀺𑀢𑀡𑁆𑀟𑀼𑀮𑀸𑀤𑀺𑀓𑁂 𑀤𑀸𑀦𑀲𑀫𑁆𑀪𑀸𑀭𑁂 𑀆𑀳𑀭𑀦𑁆𑀢𑀸𑀦𑀁 𑀦𑀺𑀧𑁆𑀧𑀼𑀭𑀺𑀲𑀸𑀦𑀺 𑀕𑁂𑀳𑀸𑀦𑀺 𑀘𑁄𑀭𑀸 𑀯𑀺𑀮𑀼𑀫𑁆𑀧𑀺𑀲𑁆𑀲𑀦𑁆𑀢𑀺 𑀚𑀦𑀧𑀤𑁄 𑀘𑁄𑀭𑀪𑀬𑁂𑀦𑁂𑀯 𑀓𑁄𑀮𑀸𑀳𑀮𑁄 𑀪𑀯𑀺𑀲𑁆𑀲𑀢𑀺, 𑀢𑀢𑁄 𑀭𑀜𑁆𑀜𑁄 𑀤𑀸𑀦𑀁 𑀦 𑀘𑀺𑀭𑀁 𑀧𑀯𑀢𑁆𑀢𑀺𑀲𑁆𑀲𑀢𑀺, 𑀘𑀺𑀢𑁆𑀢𑀫𑁆𑀧𑀺𑀲𑁆𑀲 𑀏𑀓𑀕𑁆𑀕𑀁 𑀦 𑀪𑀯𑀺𑀲𑁆𑀲𑀢𑀺, 𑀳𑀦𑁆𑀤, 𑀦𑀁 𑀏𑀢𑀫𑀢𑁆𑀣𑀁 𑀲𑀜𑁆𑀜𑀸𑀧𑁂𑀫𑀻’’𑀢𑀺 𑀢𑀢𑁄 𑀢𑀫𑀢𑁆𑀣𑀁 𑀲𑀜𑁆𑀜𑀸𑀧𑁂𑀦𑁆𑀢𑁄 ‘‘𑀪𑁄𑀢𑁄, 𑀔𑁄 𑀭𑀜𑁆𑀜𑁄’’𑀢𑀺𑀆𑀤𑀺𑀫𑀸𑀳.

𑁩𑁩𑁮. 𑀢𑀢𑁆𑀣 𑀲𑀓𑀡𑁆𑀝𑀓𑁄𑀢𑀺 𑀘𑁄𑀭𑀓𑀡𑁆𑀝𑀓𑁂𑀳𑀺 𑀲𑀓𑀡𑁆𑀝𑀓𑁄. 𑀧𑀦𑁆𑀣𑀤𑀼𑀳𑀦𑀸𑀢𑀺 𑀧𑀦𑁆𑀣𑀤𑀼𑀳𑀸, 𑀧𑀦𑁆𑀣𑀖𑀸𑀢𑀓𑀸𑀢𑀺 𑀅𑀢𑁆𑀣𑁄. 𑀅𑀓𑀺𑀘𑁆𑀘𑀓𑀸𑀭𑀻 𑀅𑀲𑁆𑀲𑀸𑀢𑀺 𑀅𑀓𑀢𑁆𑀢𑀩𑁆𑀩𑀓𑀸𑀭𑀻 𑀅𑀥𑀫𑁆𑀫𑀓𑀸𑀭𑀻 𑀪𑀯𑁂𑀬𑁆𑀬. 𑀤𑀲𑁆𑀲𑀼𑀔𑀻𑀮𑀦𑁆𑀢𑀺 𑀘𑁄𑀭𑀔𑀻𑀮𑀁. 𑀯𑀥𑁂𑀦 𑀯𑀸𑀢𑀺 𑀫𑀸𑀭𑀡𑁂𑀦 𑀯𑀸 𑀓𑁄𑀝𑁆𑀝𑀦𑁂𑀦 𑀯𑀸. 𑀩𑀦𑁆𑀥𑀦𑁂𑀦𑀸𑀢𑀺 𑀅𑀤𑁆𑀤𑀼𑀩𑀦𑁆𑀥𑀦𑀸𑀤𑀺𑀦𑀸. 𑀚𑀸𑀦𑀺𑀬𑀸𑀢𑀺 𑀳𑀸𑀦𑀺𑀬𑀸; ‘‘𑀲𑀢𑀁 𑀕𑀡𑁆𑀳𑀣, 𑀲𑀳𑀲𑁆𑀲𑀁 𑀕𑀡𑁆𑀳𑀣𑀸’’𑀢𑀺 𑀏𑀯𑀁 𑀧𑀯𑀢𑁆𑀢𑀺𑀢𑀤𑀡𑁆𑀟𑁂𑀦𑀸𑀢𑀺 𑀅𑀢𑁆𑀣𑁄. 𑀕𑀭𑀳𑀸𑀬𑀸𑀢𑀺 𑀧𑀜𑁆𑀘𑀲𑀺𑀔𑀫𑀼𑀡𑁆𑀟𑀓𑀭𑀡𑀁, 𑀕𑁄𑀫𑀬𑀲𑀺𑀜𑁆𑀘𑀦𑀁, 𑀕𑀻𑀯𑀸𑀬 𑀓𑀼𑀤𑀡𑁆𑀟𑀓𑀩𑀦𑁆𑀥𑀦𑀦𑁆𑀢𑀺 𑀏𑀯𑀫𑀸𑀤𑀻𑀦𑀺 𑀓𑀢𑁆𑀯𑀸 𑀕𑀭𑀳𑀧𑀸𑀧𑀦𑁂𑀦. 𑀧𑀩𑁆𑀩𑀸𑀚𑀦𑀸𑀬𑀸𑀢𑀺 𑀭𑀝𑁆𑀞𑀢𑁄 𑀦𑀻𑀳𑀭𑀡𑁂𑀦. 𑀲𑀫𑀽𑀳𑀦𑀺𑀲𑁆𑀲𑀸𑀫𑀻𑀢𑀺 𑀲𑀫𑁆𑀫𑀸 𑀳𑁂𑀢𑀼𑀦𑀸 𑀦𑀬𑁂𑀦 𑀓𑀸𑀭𑀡𑁂𑀦 𑀊𑀳𑀦𑀺𑀲𑁆𑀲𑀸𑀫𑀺. 𑀳𑀢𑀸𑀯𑀲𑁂𑀲𑀓𑀸𑀢𑀺 𑀫𑀢𑀸𑀯𑀲𑁂𑀲𑀓𑀸. 𑀉𑀲𑁆𑀲𑀳𑀦𑁆𑀢𑀻𑀢𑀺 𑀉𑀲𑁆𑀲𑀸𑀳𑀁 𑀓𑀭𑁄𑀦𑁆𑀢𑀺. 𑀅𑀦𑀼𑀧𑁆𑀧𑀤𑁂𑀢𑀽𑀢𑀺 𑀤𑀺𑀦𑁆𑀦𑁂 𑀅𑀧𑁆𑀧𑀳𑁄𑀦𑁆𑀢𑁂 𑀧𑀼𑀦 𑀅𑀜𑁆𑀜𑀫𑁆𑀧𑀺 𑀩𑀻𑀚𑀜𑁆𑀘 𑀪𑀢𑁆𑀢𑀜𑁆𑀘 𑀓𑀲𑀺𑀉𑀧𑀓𑀭𑀡𑀪𑀡𑁆𑀟𑀜𑁆𑀘 𑀲𑀩𑁆𑀩𑀁 𑀤𑁂𑀢𑀽𑀢𑀺 𑀅𑀢𑁆𑀣𑁄. 𑀧𑀸𑀪𑀢𑀁 𑀅𑀦𑀼𑀧𑁆𑀧𑀤𑁂𑀢𑀽𑀢𑀺 𑀲𑀓𑁆𑀔𑀺𑀁 𑀅𑀓𑀢𑁆𑀯𑀸 𑀧𑀡𑁆𑀡𑁂 𑀅𑀦𑀸𑀭𑁄𑀧𑁂𑀢𑁆𑀯𑀸 𑀫𑀽𑀮𑀘𑁆𑀙𑁂𑀚𑁆𑀚𑀯𑀲𑁂𑀦 𑀪𑀡𑁆𑀟𑀫𑀽𑀮𑀁 𑀤𑁂𑀢𑀽𑀢𑀺 𑀅𑀢𑁆𑀣𑁄. 𑀪𑀡𑁆𑀟𑀫𑀽𑀮𑀲𑁆𑀲 𑀳𑀺 𑀧𑀸𑀪𑀢𑀦𑁆𑀢𑀺 𑀦𑀸𑀫𑀁. 𑀬𑀣𑀸𑀳 𑁋

‘‘𑀅𑀧𑁆𑀧𑀓𑁂𑀦𑀧𑀺 𑀫𑁂𑀥𑀸𑀯𑀻, 𑀧𑀸𑀪𑀢𑁂𑀦 𑀯𑀺𑀘𑀓𑁆𑀔𑀡𑁄;

𑀲𑀫𑀼𑀝𑁆𑀞𑀸𑀧𑁂𑀢𑀺 𑀅𑀢𑁆𑀢𑀸𑀦𑀁, 𑀅𑀡𑀼𑀁 𑀅𑀕𑁆𑀕𑀺𑀁𑀯 𑀲𑀦𑁆𑀥𑀫’’𑀦𑁆𑀢𑀺. (𑀚𑀸. 𑁧.𑁧.𑁪);

𑀪𑀢𑁆𑀢𑀯𑁂𑀢𑀦𑀦𑁆𑀢𑀺 𑀤𑁂𑀯𑀲𑀺𑀓𑀁 𑀪𑀢𑁆𑀢𑀜𑁆𑀘𑁂𑀯 𑀫𑀸𑀲𑀺𑀓𑀸𑀤𑀺𑀧𑀭𑀺𑀩𑁆𑀩𑀬𑀜𑁆𑀘 𑀢𑀲𑁆𑀲 𑀢𑀲𑁆𑀲 𑀓𑀼𑀲𑀮𑀓𑀫𑁆𑀫𑀲𑀽𑀭𑀪𑀸𑀯𑀸𑀦𑀼𑀭𑀽𑀧𑁂𑀦 𑀞𑀸𑀦𑀦𑁆𑀢𑀭𑀕𑀸𑀫𑀦𑀺𑀕𑀫𑀸𑀤𑀺𑀤𑀸𑀦𑁂𑀦 𑀲𑀤𑁆𑀥𑀺𑀁 𑀤𑁂𑀢𑀽𑀢𑀺 𑀅𑀢𑁆𑀣𑁄. 𑀲𑀓𑀫𑁆𑀫𑀧𑀲𑀼𑀢𑀸𑀢𑀺 𑀓𑀲𑀺𑀯𑀸𑀡𑀺𑀚𑁆𑀚𑀸𑀤𑀻𑀲𑀼 𑀲𑀓𑁂𑀲𑀼 𑀓𑀫𑁆𑀫𑁂𑀲𑀼 𑀉𑀬𑁆𑀬𑀼𑀢𑁆𑀢𑀸 𑀩𑁆𑀬𑀸𑀯𑀝𑀸. 𑀭𑀸𑀲𑀺𑀓𑁄𑀢𑀺 𑀥𑀦𑀥𑀜𑁆𑀜𑀸𑀦𑀁 𑀭𑀸𑀲𑀺𑀓𑁄. 𑀔𑁂𑀫𑀝𑁆𑀞𑀺𑀢𑀸𑀢𑀺 𑀔𑁂𑀫𑁂𑀦 𑀞𑀺𑀢𑀸 𑀅𑀪𑀬𑀸. 𑀅𑀓𑀡𑁆𑀝𑀓𑀸𑀢𑀺 𑀘𑁄𑀭𑀓𑀡𑁆𑀝𑀓𑀭𑀳𑀺𑀢𑀸. 𑀫𑀼𑀤𑀸 𑀫𑁄𑀤𑀫𑀸𑀦𑀸𑀢𑀺 𑀫𑁄𑀤𑀸 𑀫𑁄𑀤𑀫𑀸𑀦𑀸. 𑀅𑀬𑀫𑁂𑀯 𑀯𑀸 𑀧𑀸𑀞𑁄, 𑀅𑀜𑁆𑀜𑀫𑀜𑁆𑀜𑀁 𑀧𑀫𑀼𑀤𑀺𑀢𑀘𑀺𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀧𑀸𑀭𑀼𑀢𑀖𑀭𑀸𑀢𑀺 𑀘𑁄𑀭𑀸𑀦𑀁 𑀅𑀪𑀸𑀯𑁂𑀦 𑀤𑁆𑀯𑀸𑀭𑀸𑀦𑀺 𑀅𑀲𑀁𑀯𑀭𑀺𑀢𑁆𑀯𑀸 𑀯𑀺𑀯𑀝𑀤𑁆𑀯𑀸𑀭𑀸𑀢𑀺 𑀅𑀢𑁆𑀣𑁄. 𑀏𑀢𑀤𑀯𑁄𑀘𑀸𑀢𑀺 𑀚𑀦𑀧𑀤𑀲𑁆𑀲 𑀲𑀩𑁆𑀩𑀸𑀓𑀸𑀭𑁂𑀦 𑀇𑀤𑁆𑀥𑀨𑀻𑀢𑀪𑀸𑀯𑀁 𑀜𑀢𑁆𑀯𑀸 𑀏𑀢𑀁 𑀅𑀯𑁄𑀘.

𑀘𑀢𑀼𑀧𑀭𑀺𑀓𑁆𑀔𑀸𑀭𑀯𑀡𑁆𑀡𑀦𑀸

𑁩𑁩𑁯. 𑀢𑁂𑀦 𑀳𑀺 𑀪𑀯𑀁 𑀭𑀸𑀚𑀸𑀢𑀺 𑀩𑁆𑀭𑀸𑀳𑁆𑀫𑀡𑁄 𑀓𑀺𑀭 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀬𑀁 𑀭𑀸𑀚𑀸 𑀫𑀳𑀸𑀤𑀸𑀦𑀁 𑀤𑀸𑀢𑀼𑀁 𑀅𑀢𑀺𑀯𑀺𑀬 𑀉𑀲𑁆𑀲𑀸𑀳𑀚𑀸𑀢𑁄. 𑀲𑀘𑁂 𑀧𑀦 𑀅𑀢𑁆𑀢𑀦𑁄 𑀅𑀦𑀼𑀬𑀦𑁆𑀢𑀸 𑀔𑀢𑁆𑀢𑀺𑀬𑀸𑀤𑀬𑁄 𑀅𑀦𑀸𑀫𑀦𑁆𑀢𑁂𑀢𑁆𑀯𑀸 𑀤𑀲𑁆𑀲𑀢𑀺. 𑀦𑀸𑀲𑁆𑀲 𑀢𑁂 𑀅𑀢𑁆𑀢𑀫𑀦𑀸 𑀪𑀯𑀺𑀲𑁆𑀲𑀦𑁆𑀢𑀺; 𑀬𑀣𑀸 𑀤𑀸𑀦𑀁 𑀢𑁂 𑀅𑀢𑁆𑀢𑀫𑀦𑀸 𑀳𑁄𑀦𑁆𑀢𑀺, 𑀢𑀣𑀸 𑀓𑀭𑀺𑀲𑁆𑀲𑀸𑀫𑀻’’𑀢𑀺. 𑀢𑀲𑁆𑀫𑀸 ‘‘𑀢𑁂𑀦 𑀳𑀺 𑀪𑀯’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀦𑁂𑀕𑀫𑀸𑀢𑀺 𑀦𑀺𑀕𑀫𑀯𑀸𑀲𑀺𑀦𑁄. 𑀚𑀸𑀦𑀧𑀤𑀸𑀢𑀺 𑀚𑀦𑀧𑀤𑀯𑀸𑀲𑀺𑀦𑁄. 𑀆𑀫𑀦𑁆𑀢𑀬𑀢𑀦𑁆𑀢𑀺 𑀆𑀫𑀦𑁆𑀢𑁂𑀢𑀼 𑀚𑀸𑀦𑀸𑀧𑁂𑀢𑀼. 𑀬𑀁 𑀫𑀫 𑀅𑀲𑁆𑀲𑀸𑀢𑀺 𑀬𑀁 𑀢𑀼𑀫𑁆𑀳𑀸𑀓𑀁 𑀅𑀦𑀼𑀚𑀸𑀦𑀦𑀁 𑀫𑀫 𑀪𑀯𑁂𑀬𑁆𑀬. 𑀅𑀫𑀘𑁆𑀘𑀸𑀢𑀺 𑀧𑀺𑀬𑀲𑀳𑀸𑀬𑀓𑀸. 𑀧𑀸𑀭𑀺𑀲𑀚𑁆𑀚𑀸𑀢𑀺 𑀲𑁂𑀲𑀸 𑀆𑀡𑀢𑁆𑀢𑀺𑀓𑀸𑀭𑀓𑀸. 𑀬𑀚𑀢𑀁 𑀪𑀯𑀁 𑀭𑀸𑀚𑀸𑀢𑀺 𑀬𑀚𑀢𑀼 𑀪𑀯𑀁, 𑀢𑁂 𑀓𑀺𑀭 𑁋 𑀅𑀬𑀁 𑀭𑀸𑀚𑀸 ‘‘𑀅𑀳𑀁 𑀇𑀲𑁆𑀲𑀭𑁄’’𑀢𑀺 𑀧𑀲𑀬𑁆𑀳 𑀤𑀸𑀦𑀁 𑀅𑀤𑀢𑁆𑀯𑀸 𑀅𑀫𑁆𑀳𑁂 𑀆𑀫𑀦𑁆𑀢𑁂𑀲𑀺, 𑀅𑀳𑁄𑀦𑁂𑀦 𑀲𑀼𑀝𑁆𑀞𑀼 𑀓𑀢’’𑀦𑁆𑀢𑀺 𑀅𑀢𑁆𑀢𑀫𑀦𑀸 𑀏𑀯𑀫𑀸𑀳𑀁𑀲𑀼. 𑀅𑀦𑀸𑀫𑀦𑁆𑀢𑀺𑀢𑁂 𑀧𑀦𑀲𑁆𑀲 𑀬𑀜𑁆𑀜𑀝𑁆𑀞𑀸𑀦𑀁 𑀤𑀲𑁆𑀲𑀦𑀸𑀬𑀧𑀺 𑀦 𑀕𑀘𑁆𑀙𑁂𑀬𑁆𑀬𑀼𑀁. 𑀬𑀜𑁆𑀜𑀓𑀸𑀮𑁄 𑀫𑀳𑀸𑀭𑀸𑀚𑀸𑀢𑀺 𑀤𑁂𑀬𑁆𑀬𑀥𑀫𑁆𑀫𑀲𑁆𑀫𑀺𑀜𑁆𑀳𑀺 𑀅𑀲𑀢𑀺 𑀫𑀳𑀮𑁆𑀮𑀓𑀓𑀸𑀮𑁂 𑀘 𑀏𑀯𑀭𑀽𑀧𑀁 𑀤𑀸𑀦𑀁 𑀤𑀸𑀢𑀼𑀁 𑀦 𑀲𑀓𑁆𑀓𑀸, 𑀢𑁆𑀯𑀁 𑀧𑀦 𑀫𑀳𑀸𑀥𑀦𑁄 𑀘𑁂𑀯 𑀢𑀭𑀼𑀡𑁄 𑀘, 𑀏𑀢𑁂𑀦 𑀢𑁂 𑀬𑀜𑁆𑀜𑀓𑀸𑀮𑁄𑀢𑀺 𑀤𑀲𑁆𑀲𑁂𑀦𑁆𑀢𑀸 𑀯𑀤𑀦𑁆𑀢𑀺. 𑀅𑀦𑀼𑀫𑀢𑀺𑀧𑀓𑁆𑀔𑀸𑀢𑀺 𑀅𑀦𑀼𑀫𑀢𑀺𑀬𑀸 𑀧𑀓𑁆𑀔𑀸, 𑀅𑀦𑀼𑀫𑀢𑀺𑀤𑀸𑀬𑀓𑀸𑀢𑀺 𑀅𑀢𑁆𑀣𑁄. 𑀧𑀭𑀺𑀓𑁆𑀔𑀸𑀭𑀸 𑀪𑀯𑀦𑁆𑀢𑀻𑀢𑀺 𑀧𑀭𑀺𑀯𑀸𑀭𑀸 𑀪𑀯𑀦𑁆𑀢𑀺. ‘‘𑀭𑀣𑁄 𑀲𑀻𑀮𑀧𑀭𑀺𑀓𑁆𑀔𑀸𑀭𑁄, 𑀛𑀸𑀦𑀓𑁆𑀔𑁄 𑀘𑀓𑁆𑀓𑀯𑀻𑀭𑀺𑀬𑁄’’𑀢𑀺 (𑀲𑀁. 𑀦𑀺. 𑁫.𑁪) 𑀏𑀢𑁆𑀣 𑀧𑀦 𑀅𑀮𑀗𑁆𑀓𑀸𑀭𑁄 𑀧𑀭𑀺𑀓𑁆𑀔𑀸𑀭𑁄𑀢𑀺 𑀯𑀼𑀢𑁆𑀢𑁄.

𑀅𑀝𑁆𑀞𑀧𑀭𑀺𑀓𑁆𑀔𑀸𑀭𑀯𑀡𑁆𑀡𑀦𑀸

𑁩𑁪𑁦. 𑀅𑀝𑁆𑀞𑀳𑀗𑁆𑀕𑁂𑀳𑀻𑀢𑀺 𑀉𑀪𑀢𑁄 𑀲𑀼𑀚𑀸𑀢𑀸𑀤𑀻𑀳𑀺 𑀅𑀝𑁆𑀞𑀳𑀺 𑀅𑀗𑁆𑀕𑁂𑀳𑀺. 𑀬𑀲𑀲𑀸𑀢𑀺 𑀆𑀡𑀸𑀞𑀧𑀦𑀲𑀫𑀢𑁆𑀣𑀢𑀸𑀬. 𑀲𑀤𑁆𑀥𑁄𑀢𑀺 𑀤𑀸𑀦𑀲𑁆𑀲 𑀨𑀮𑀁 𑀅𑀢𑁆𑀣𑀻𑀢𑀺 𑀲𑀤𑁆𑀤𑀳𑀢𑀺. 𑀤𑀸𑀬𑀓𑁄𑀢𑀺 𑀤𑀸𑀦𑀲𑀽𑀭𑁄. 𑀦 𑀲𑀤𑁆𑀥𑀸𑀫𑀢𑁆𑀢𑀓𑁂𑀦𑁂𑀯 𑀢𑀺𑀝𑁆𑀞𑀢𑀺, 𑀧𑀭𑀺𑀘𑁆𑀘𑀚𑀺𑀢𑀼𑀫𑁆𑀧𑀺 𑀲𑀓𑁆𑀓𑁄𑀢𑀻𑀢𑀺 𑀅𑀢𑁆𑀣𑁄. 𑀤𑀸𑀦𑀧𑀢𑀻𑀢𑀺 𑀬𑀁 𑀤𑀸𑀦𑀁 𑀤𑁂𑀢𑀺, 𑀢𑀲𑁆𑀲 𑀧𑀢𑀺 𑀳𑀼𑀢𑁆𑀯𑀸 𑀤𑁂𑀢𑀺, 𑀦 𑀤𑀸𑀲𑁄, 𑀦 𑀲𑀳𑀸𑀬𑁄. 𑀬𑁄 𑀳𑀺 𑀅𑀢𑁆𑀢𑀦𑀸 𑀫𑀥𑀼𑀭𑀁 𑀪𑀼𑀜𑁆𑀚𑀢𑀺, 𑀧𑀭𑁂𑀲𑀁 𑀅𑀫𑀥𑀼𑀭𑀁 𑀤𑁂𑀢𑀺, 𑀲𑁄 𑀤𑀸𑀦𑀲𑀗𑁆𑀔𑀸𑀢𑀲𑁆𑀲 𑀤𑁂𑀬𑁆𑀬𑀥𑀫𑁆𑀫𑀲𑁆𑀲 𑀤𑀸𑀲𑁄 𑀳𑀼𑀢𑁆𑀯𑀸 𑀤𑁂𑀢𑀺. 𑀬𑁄 𑀬𑀁 𑀅𑀢𑁆𑀢𑀦𑀸 𑀪𑀼𑀜𑁆𑀚𑀢𑀺, 𑀢𑀤𑁂𑀯 𑀤𑁂𑀢𑀺, 𑀲𑁄 𑀲𑀳𑀸𑀬𑁄 𑀳𑀼𑀢𑁆𑀯𑀸 𑀤𑁂𑀢𑀺. 𑀬𑁄 𑀧𑀦 𑀅𑀢𑁆𑀢𑀦𑀸 𑀬𑁂𑀦 𑀓𑁂𑀦𑀘𑀺 𑀬𑀸𑀧𑁂𑀢𑀺, 𑀧𑀭𑁂𑀲𑀁 𑀫𑀥𑀼𑀭𑀁 𑀤𑁂𑀢𑀺, 𑀲𑁄 𑀧𑀢𑀺 𑀚𑁂𑀝𑁆𑀞𑀓𑁄 𑀲𑀸𑀫𑀻 𑀳𑀼𑀢𑁆𑀯𑀸 𑀤𑁂𑀢𑀺, 𑀅𑀬𑀁 𑀢𑀸𑀤𑀺𑀲𑁄𑀢𑀺 𑀅𑀢𑁆𑀣𑁄. 𑀲𑀫𑀡𑀩𑁆𑀭𑀸𑀳𑁆𑀫𑀡𑀓𑀧𑀡𑀤𑁆𑀥𑀺𑀓𑀯𑀡𑀺𑀩𑁆𑀩𑀓𑀬𑀸𑀘𑀓𑀸𑀦𑀦𑁆𑀢𑀺 𑀏𑀢𑁆𑀣 𑀲𑀫𑀺𑀢𑀧𑀸𑀧𑀸 𑀲𑀫𑀡𑀸, 𑀩𑀸𑀳𑀺𑀢𑀧𑀸𑀧𑀸 𑀩𑁆𑀭𑀸𑀳𑁆𑀫𑀡𑀸. 𑀓𑀧𑀡𑀸𑀢𑀺 𑀤𑀼𑀕𑁆𑀕𑀢𑀸 𑀤𑀮𑀺𑀤𑁆𑀤𑀫𑀦𑀼𑀲𑁆𑀲𑀸. 𑀅𑀤𑁆𑀥𑀺𑀓𑀸𑀢𑀺 𑀧𑀣𑀸𑀯𑀺𑀦𑁄. 𑀯𑀡𑀺𑀩𑁆𑀩𑀓𑀸𑀢𑀺 𑀬𑁂 𑁋 ‘‘𑀇𑀝𑁆𑀞𑀁 𑀤𑀺𑀦𑁆𑀦𑀁, 𑀓𑀦𑁆𑀢𑀁, 𑀫𑀦𑀸𑀧𑀁, 𑀓𑀸𑀮𑁂𑀦 𑀅𑀦𑀯𑀚𑁆𑀚𑀁 𑀤𑀺𑀦𑁆𑀦𑀁, 𑀤𑀤𑀁 𑀘𑀺𑀢𑁆𑀢𑀁 𑀧𑀲𑀸𑀤𑁂𑀬𑁆𑀬, 𑀕𑀘𑁆𑀙𑀢𑀼 𑀪𑀯𑀁 𑀩𑁆𑀭𑀳𑁆𑀫𑀮𑁄𑀓’’𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀤𑀸𑀦𑀲𑁆𑀲 𑀯𑀡𑁆𑀡𑀁 𑀣𑁄𑀫𑀬𑀫𑀸𑀦𑀸 𑀯𑀺𑀘𑀭𑀦𑁆𑀢𑀺. 𑀬𑀸𑀘𑀓𑀸𑀢𑀺 𑀬𑁂 𑁋 ‘‘𑀧𑀲𑀢𑀫𑀢𑁆𑀢𑀁 𑀤𑁂𑀣, 𑀲𑀭𑀸𑀯𑀫𑀢𑁆𑀢𑀁 𑀤𑁂𑀣𑀸’’𑀢𑀺𑀆𑀤𑀻𑀦𑀺 𑀯𑀢𑁆𑀯𑀸 𑀬𑀸𑀘𑀫𑀸𑀦𑀸 𑀯𑀺𑀘𑀭𑀦𑁆𑀢𑀺. 𑀑𑀧𑀸𑀦𑀪𑀽𑀢𑁄𑀢𑀺 𑀉𑀤𑀧𑀸𑀦𑀪𑀽𑀢𑁄. 𑀲𑀩𑁆𑀩𑁂𑀲𑀁 𑀲𑀸𑀥𑀸𑀭𑀡𑀧𑀭𑀺𑀪𑁄𑀕𑁄, 𑀘𑀢𑀼𑀫𑀳𑀸𑀧𑀣𑁂 𑀔𑀢𑀧𑁄𑀓𑁆𑀔𑀭𑀡𑀻 𑀯𑀺𑀬 𑀳𑀼𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀲𑀼𑀢𑀚𑀸𑀢𑀲𑁆𑀲𑀸𑀢𑀺 𑀏𑀢𑁆𑀣 𑀲𑀼𑀢𑀫𑁂𑀯 𑀲𑀼𑀢𑀚𑀸𑀢𑀁. 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀅𑀢𑁆𑀣𑁂 𑀘𑀺𑀦𑁆𑀢𑁂𑀢𑀼𑀦𑁆𑀢𑀺 𑀏𑀢𑁆𑀣 𑁋 ‘‘𑀅𑀢𑀻𑀢𑁂 𑀧𑀼𑀜𑁆𑀜𑀲𑁆𑀲 𑀓𑀢𑀢𑁆𑀢𑀸𑀬𑁂𑀯 𑀫𑁂 𑀅𑀬𑀁 𑀲𑀫𑁆𑀧𑀢𑁆𑀢𑀻’’𑀢𑀺, 𑀏𑀯𑀁 𑀘𑀺𑀦𑁆𑀢𑁂𑀦𑁆𑀢𑁄 𑀅𑀢𑀻𑀢𑀫𑀢𑁆𑀣𑀁 𑀘𑀺𑀦𑁆𑀢𑁂𑀢𑀼𑀁 𑀧𑀝𑀺𑀩𑀮𑁄 𑀦𑀸𑀫 𑀳𑁄𑀢𑀺. ‘‘𑀇𑀤𑀸𑀦𑀺 𑀧𑀼𑀜𑁆𑀜𑀁 𑀓𑀢𑁆𑀯𑀸𑀯 𑀅𑀦𑀸𑀕𑀢𑁂 𑀲𑀓𑁆𑀓𑀸 𑀲𑀫𑁆𑀧𑀢𑁆𑀢𑀺𑀁 𑀧𑀸𑀧𑀼𑀡𑀺𑀢𑀼’’𑀦𑁆𑀢𑀺 𑀘𑀺𑀦𑁆𑀢𑁂𑀦𑁆𑀢𑁄 𑀅𑀦𑀸𑀕𑀢𑀫𑀢𑁆𑀣𑀁 𑀘𑀺𑀦𑁆𑀢𑁂𑀢𑀼𑀁 𑀧𑀝𑀺𑀩𑀮𑁄 𑀦𑀸𑀫 𑀳𑁄𑀢𑀺. ‘‘𑀇𑀤𑀁 𑀧𑀼𑀜𑁆𑀜𑀓𑀫𑁆𑀫𑀁 𑀦𑀸𑀫 𑀲𑀧𑁆𑀧𑀼𑀭𑀺𑀲𑀸𑀦𑀁 𑀆𑀘𑀺𑀡𑁆𑀡𑀁, 𑀫𑀬𑁆𑀳𑀜𑁆𑀘 𑀪𑁄𑀕𑀸𑀧𑀺 𑀲𑀁𑀯𑀺𑀚𑁆𑀚𑀦𑁆𑀢𑀺, 𑀤𑀸𑀬𑀓𑀘𑀺𑀢𑁆𑀢𑀫𑁆𑀧𑀺 𑀅𑀢𑁆𑀣𑀺; 𑀳𑀦𑁆𑀤𑀸𑀳𑀁 𑀧𑀼𑀜𑁆𑀜𑀸𑀦𑀺 𑀓𑀭𑁄𑀫𑀻’’𑀢𑀺 𑀘𑀺𑀦𑁆𑀢𑁂𑀦𑁆𑀢𑁄 𑀧𑀘𑁆𑀘𑀼𑀧𑁆𑀧𑀦𑁆𑀦𑀫𑀢𑁆𑀣𑀁 𑀘𑀺𑀦𑁆𑀢𑁂𑀢𑀼𑀁 𑀧𑀝𑀺𑀩𑀮𑁄 𑀦𑀸𑀫 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀇𑀢𑀺 𑀇𑀫𑀸𑀦𑀻𑀢𑀺 𑀏𑀯𑀁 𑀬𑀣𑀸 𑀯𑀼𑀢𑁆𑀢𑀸𑀦𑀺 𑀏𑀢𑀸𑀦𑀺. 𑀏𑀢𑁂𑀳𑀺 𑀓𑀺𑀭 𑀅𑀝𑁆𑀞𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀤𑀸𑀦𑀁 𑀲𑀩𑁆𑀩𑀤𑀺𑀲𑀸𑀳𑀺 𑀫𑀳𑀸𑀚𑀦𑁄 𑀉𑀧𑀲𑀗𑁆𑀓𑀫𑀢𑀺. ‘‘𑀅𑀬𑀁 𑀤𑀼𑀚𑁆𑀚𑀸𑀢𑁄 𑀓𑀺𑀢𑁆𑀢𑀓𑀁 𑀓𑀸𑀮𑀁 𑀤𑀲𑁆𑀲𑀢𑀺, 𑀇𑀤𑀸𑀦𑀺 𑀯𑀺𑀧𑁆𑀧𑀝𑀺𑀲𑀸𑀭𑀻 𑀳𑀼𑀢𑁆𑀯𑀸 𑀉𑀧𑀘𑁆𑀙𑀺𑀦𑁆𑀤𑀺𑀲𑁆𑀲𑀢𑀻’’𑀢𑀺 𑀏𑀯𑀫𑀸𑀤𑀻𑀦𑀺 𑀘𑀺𑀦𑁆𑀢𑁂𑀢𑁆𑀯𑀸 𑀦 𑀓𑁄𑀘𑀺 𑀉𑀧𑀲𑀗𑁆𑀓𑀫𑀺𑀢𑀩𑁆𑀩𑀁 𑀫𑀜𑁆𑀜𑀢𑀺. 𑀢𑀲𑁆𑀫𑀸 𑀏𑀢𑀸𑀦𑀺 𑀅𑀝𑁆𑀞𑀗𑁆𑀕𑀸𑀦𑀺 𑀧𑀭𑀺𑀓𑁆𑀔𑀸𑀭𑀸 𑀪𑀯𑀦𑁆𑀢𑀻𑀢𑀺 𑀯𑀼𑀢𑁆𑀢𑀸𑀦𑀺.

𑀘𑀢𑀼𑀧𑀭𑀺𑀓𑁆𑀔𑀸𑀭𑀸𑀤𑀺𑀯𑀡𑁆𑀡𑀦𑀸

𑁩𑁪𑁧. 𑀲𑀼𑀚𑀁 𑀧𑀕𑁆𑀕𑀡𑁆𑀳𑀦𑁆𑀢𑀸𑀦𑀦𑁆𑀢𑀺 𑀫𑀳𑀸𑀬𑀸𑀕𑀧𑀝𑀺𑀕𑁆𑀕𑀡𑁆𑀳𑀦𑀝𑁆𑀞𑀸𑀦𑁂 𑀤𑀸𑀦𑀓𑀝𑀘𑁆𑀙𑀼𑀁 𑀧𑀕𑁆𑀕𑀡𑁆𑀳𑀦𑁆𑀢𑀸𑀦𑀁. 𑀇𑀫𑁂𑀳𑀺 𑀘𑀢𑀽𑀳𑀻𑀢𑀺 𑀏𑀢𑁂𑀳𑀺 𑀲𑀼𑀚𑀸𑀢𑀸𑀤𑀻𑀳𑀺. 𑀏𑀢𑁂𑀲𑀼 𑀳𑀺 𑀅𑀲𑀢𑀺 𑁋 ‘‘𑀏𑀯𑀁 𑀤𑀼𑀚𑁆𑀚𑀸𑀢𑀲𑁆𑀲 𑀲𑀁𑀯𑀺𑀥𑀸𑀦𑁂𑀦 𑀧𑀯𑀢𑁆𑀢𑀤𑀸𑀦𑀁 𑀓𑀺𑀢𑁆𑀢𑀓𑀁 𑀓𑀸𑀮𑀁 𑀧𑀯𑀢𑁆𑀢𑀺𑀲𑁆𑀲𑀢𑀻’’𑀢𑀺𑀆𑀤𑀻𑀦𑀺 𑀯𑀢𑁆𑀯𑀸 𑀉𑀧𑀲𑀗𑁆𑀓𑀫𑀺𑀢𑀸𑀭𑁄 𑀦 𑀳𑁄𑀦𑁆𑀢𑀺. 𑀕𑀭𑀳𑀺𑀢𑀩𑁆𑀩𑀸𑀪𑀸𑀯𑀢𑁄 𑀧𑀦 𑀉𑀧𑀲𑀗𑁆𑀓𑀫𑀦𑁆𑀢𑀺𑀬𑁂𑀯. 𑀢𑀲𑁆𑀫𑀸 𑀇𑀫𑀸𑀦𑀺𑀧𑀺 𑀧𑀭𑀺𑀓𑁆𑀔𑀸𑀭𑀸 𑀪𑀯𑀦𑁆𑀢𑀻𑀢𑀺 𑀯𑀼𑀢𑁆𑀢𑀸𑀦𑀺.

𑁩𑁪𑁨. 𑀢𑀺𑀲𑁆𑀲𑁄 𑀯𑀺𑀥𑀸 𑀤𑁂𑀲𑁂𑀲𑀻𑀢𑀺 𑀢𑀻𑀡𑀺 𑀞𑀧𑀦𑀸𑀦𑀺 𑀤𑁂𑀲𑁂𑀲𑀺. 𑀲𑁄 𑀓𑀺𑀭 𑀘𑀺𑀦𑁆𑀢𑁂𑀲𑀺 𑁋 ‘‘𑀤𑀸𑀦𑀁 𑀤𑀤𑀫𑀸𑀦𑀸 𑀦𑀸𑀫 𑀢𑀺𑀡𑁆𑀡𑀁 𑀞𑀸𑀦𑀸𑀦𑀁 𑀅𑀜𑁆𑀜𑀢𑀭𑀲𑁆𑀫𑀺𑀁 𑀘𑀮𑀦𑁆𑀢𑀺 𑀳𑀦𑁆𑀤𑀸𑀳𑀁 𑀇𑀫𑀁 𑀭𑀸𑀚𑀸𑀦𑀁 𑀢𑁂𑀲𑀼 𑀞𑀸𑀦𑁂𑀲𑀼 𑀧𑀞𑀫𑀢𑀭𑀜𑁆𑀜𑁂𑀯 𑀦𑀺𑀘𑁆𑀘𑀮𑀁 𑀓𑀭𑁄𑀫𑀻’’𑀢𑀺. 𑀢𑁂𑀦𑀲𑁆𑀲 𑀢𑀺𑀲𑁆𑀲𑁄 𑀯𑀺𑀥𑀸 𑀤𑁂𑀲𑁂𑀲𑀻𑀢𑀺. 𑀲𑁄 𑀪𑁄𑀢𑁄 𑀭𑀜𑁆𑀜𑁄𑀢𑀺 𑀇𑀤𑀁 𑀓𑀭𑀡𑀢𑁆𑀣𑁂 𑀲𑀸𑀫𑀺𑀯𑀘𑀦𑀁. 𑀪𑁄𑀢𑀸 𑀭𑀜𑁆𑀜𑀸𑀢𑀺 𑀯𑀸 𑀧𑀸𑀞𑁄. 𑀯𑀺𑀧𑁆𑀧𑀝𑀺𑀲𑀸𑀭𑁄 𑀦 𑀓𑀭𑀡𑀻𑀬𑁄𑀢𑀺 ‘‘𑀪𑁄𑀕𑀸𑀦𑀁 𑀯𑀺𑀕𑀫𑀳𑁂𑀢𑀼𑀓𑁄 𑀧𑀘𑁆𑀙𑀸𑀦𑀼𑀢𑀸𑀧𑁄 𑀦 𑀓𑀢𑁆𑀢𑀩𑁆𑀩𑁄, 𑀧𑀼𑀩𑁆𑀩𑀘𑁂𑀢𑀦𑀸 𑀧𑀦 𑀅𑀘𑀮𑀸 𑀧𑀢𑀺𑀝𑁆𑀞𑀧𑁂𑀢𑀩𑁆𑀩𑀸, 𑀏𑀯𑀜𑁆𑀳𑀺 𑀤𑀸𑀦𑀁 𑀫𑀳𑀧𑁆𑀨𑀮𑀁 𑀳𑁄𑀢𑀻’’𑀢𑀺 𑀤𑀲𑁆𑀲𑁂𑀢𑀺. 𑀇𑀢𑀭𑁂𑀲𑀼𑀧𑀺 𑀤𑁆𑀯𑀻𑀲𑀼 𑀞𑀸𑀦𑁂𑀲𑀼 𑀏𑀲𑁂𑀯 𑀦𑀬𑁄. 𑀫𑀼𑀜𑁆𑀘𑀘𑁂𑀢𑀦𑀸𑀧𑀺 𑀳𑀺 𑀧𑀘𑁆𑀙𑀸𑀲𑀫𑀦𑀼𑀲𑁆𑀲𑀭𑀡𑀘𑁂𑀢𑀦𑀸 𑀘 𑀦𑀺𑀘𑁆𑀘𑀮𑀸𑀯 𑀓𑀸𑀢𑀩𑁆𑀩𑀸. 𑀢𑀣𑀸 𑀅𑀓𑀭𑁄𑀦𑁆𑀢𑀲𑁆𑀲 𑀤𑀸𑀦𑀁 𑀦 𑀫𑀳𑀧𑁆𑀨𑀮𑀁 𑀳𑁄𑀢𑀺, 𑀦𑀸𑀧𑀺 𑀉𑀴𑀸𑀭𑁂𑀲𑀼 𑀪𑁄𑀕𑁂𑀲𑀼 𑀘𑀺𑀢𑁆𑀢𑀁 𑀦𑀫𑀢𑀺, 𑀫𑀳𑀸𑀭𑁄𑀭𑀼𑀯𑀁 𑀉𑀧𑀧𑀦𑁆𑀦𑀲𑁆𑀲 𑀲𑁂𑀝𑁆𑀞𑀺𑀕𑀳𑀧𑀢𑀺𑀦𑁄 𑀯𑀺𑀬.

𑁩𑁪𑁩. 𑀤𑀲𑀳𑀸𑀓𑀸𑀭𑁂𑀳𑀻𑀢𑀺 𑀤𑀲𑀳𑀺 𑀓𑀸𑀭𑀡𑁂𑀳𑀺. 𑀢𑀲𑁆𑀲 𑀓𑀺𑀭 𑀏𑀯𑀁 𑀅𑀳𑁄𑀲𑀺 𑁋 𑀲𑀘𑀸𑀬𑀁 𑀭𑀸𑀚𑀸 𑀤𑀼𑀲𑁆𑀲𑀻𑀮𑁂 𑀤𑀺𑀲𑁆𑀯𑀸 𑁋 ‘‘𑀦𑀲𑁆𑀲𑀢𑀺 𑀯𑀢 𑀫𑁂 𑀤𑀸𑀦𑀁, 𑀬𑀲𑁆𑀲 𑀫𑁂 𑀏𑀯𑀭𑀽𑀧𑀸 𑀤𑀼𑀲𑁆𑀲𑀻𑀮𑀸 𑀪𑀼𑀜𑁆𑀚𑀦𑁆𑀢𑀻’’𑀢𑀺 𑀲𑀻𑀮𑀯𑀦𑁆𑀢𑁂𑀲𑀼𑀧𑀺 𑀯𑀺𑀧𑁆𑀧𑀝𑀺𑀲𑀸𑀭𑀁 𑀉𑀧𑁆𑀧𑀸𑀤𑁂𑀲𑁆𑀲𑀢𑀺, 𑀤𑀸𑀦𑀁 𑀦 𑀫𑀳𑀧𑁆𑀨𑀮𑀁 𑀪𑀯𑀺𑀲𑁆𑀲𑀢𑀺. 𑀯𑀺𑀧𑁆𑀧𑀝𑀺𑀲𑀸𑀭𑁄 𑀘 𑀦𑀸𑀫 𑀤𑀸𑀬𑀓𑀸𑀦𑀁 𑀧𑀝𑀺𑀕𑁆𑀕𑀸𑀳𑀓𑀢𑁄𑀯 𑀉𑀧𑁆𑀧𑀚𑁆𑀚𑀢𑀺, 𑀳𑀦𑁆𑀤𑀲𑁆𑀲 𑀧𑀞𑀫𑀫𑁂𑀯 𑀢𑀁 𑀯𑀺𑀧𑁆𑀧𑀝𑀺𑀲𑀸𑀭𑀁 𑀯𑀺𑀦𑁄𑀤𑁂𑀫𑀻𑀢𑀺. 𑀢𑀲𑁆𑀫𑀸 𑀤𑀲𑀳𑀸𑀓𑀸𑀭𑁂𑀳𑀺 𑀉𑀧𑀘𑁆𑀙𑀺𑀚𑁆𑀚𑀺𑀢𑀼𑀁 𑀬𑀼𑀢𑁆𑀢𑀁 𑀧𑀝𑀺𑀕𑁆𑀕𑀸𑀳𑀓𑁂𑀲𑀼𑀧𑀺 𑀯𑀺𑀧𑁆𑀧𑀝𑀺𑀲𑀸𑀭𑀁 𑀯𑀺𑀦𑁄𑀤𑁂𑀲𑀻𑀢𑀺. 𑀢𑁂𑀲𑀜𑁆𑀜𑁂𑀯 𑀢𑁂𑀦𑀸𑀢𑀺 𑀢𑁂𑀲𑀜𑁆𑀜𑁂𑀯 𑀢𑁂𑀦 𑀧𑀸𑀧𑁂𑀦 𑀅𑀦𑀺𑀝𑁆𑀞𑁄 𑀯𑀺𑀧𑀸𑀓𑁄 𑀪𑀯𑀺𑀲𑁆𑀲𑀢𑀺, 𑀦 𑀅𑀜𑁆𑀜𑁂𑀲𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀬𑀚𑀢𑀁 𑀪𑀯𑀦𑁆𑀢𑀺 𑀤𑁂𑀢𑀼 𑀪𑀯𑀁. 𑀲𑀚𑁆𑀚𑀢𑀦𑁆𑀢𑀺 𑀯𑀺𑀲𑁆𑀲𑀚𑁆𑀚𑀢𑀼. 𑀅𑀦𑁆𑀢𑀭𑀦𑁆𑀢𑀺 𑀅𑀩𑁆𑀪𑀦𑁆𑀢𑀭𑀁.

𑁩𑁪𑁪. 𑀲𑁄𑀴𑀲𑀳𑀺 𑀆𑀓𑀸𑀭𑁂𑀳𑀺 𑀘𑀺𑀢𑁆𑀢𑀁 𑀲𑀦𑁆𑀤𑀲𑁆𑀲𑁂𑀲𑀻𑀢𑀺 𑀇𑀥 𑀩𑁆𑀭𑀸𑀳𑁆𑀫𑀡𑁄 𑀭𑀜𑁆𑀜𑁄 𑀫𑀳𑀸𑀤𑀸𑀦𑀸𑀦𑀼𑀫𑁄𑀤𑀦𑀁 𑀦𑀸𑀫 𑀆𑀭𑀤𑁆𑀥𑁄. 𑀢𑀢𑁆𑀣 𑀲𑀦𑁆𑀤𑀲𑁆𑀲𑁂𑀲𑀻𑀢𑀺 𑁋 ‘𑀇𑀤𑀁 𑀤𑀸𑀦𑀁 𑀤𑀸𑀢𑀸 𑀏𑀯𑀭𑀽𑀧𑀁 𑀲𑀫𑁆𑀧𑀢𑁆𑀢𑀺𑀁 𑀮𑀪𑀢𑀻’𑀢𑀺 𑀤𑀲𑁆𑀲𑁂𑀢𑁆𑀯𑀸 𑀤𑀲𑁆𑀲𑁂𑀢𑁆𑀯𑀸 𑀓𑀣𑁂𑀲𑀺. 𑀲𑀫𑀸𑀤𑀧𑁂𑀲𑀻𑀢𑀺 𑀢𑀤𑀢𑁆𑀣𑀁 𑀲𑀫𑀸𑀤𑀧𑁂𑀢𑁆𑀯𑀸 𑀓𑀣𑁂𑀲𑀺. 𑀲𑀫𑀼𑀢𑁆𑀢𑁂𑀚𑁂𑀲𑀻𑀢𑀺 𑀯𑀺𑀧𑁆𑀧𑀝𑀺𑀲𑀸𑀭𑀯𑀺𑀦𑁄𑀤𑀦𑁂𑀦𑀲𑁆𑀲 𑀘𑀺𑀢𑁆𑀢𑀁 𑀯𑁄𑀤𑀸𑀧𑁂𑀲𑀺. 𑀲𑀫𑁆𑀧𑀳𑀁𑀲𑁂𑀲𑀻𑀢𑀺 ‘𑀲𑀼𑀦𑁆𑀤𑀭𑀁 𑀢𑁂 𑀓𑀢𑀁, 𑀫𑀳𑀸𑀭𑀸𑀚, 𑀤𑀸𑀦𑀁 𑀤𑀤𑀫𑀸𑀦𑁂𑀦𑀸’𑀢𑀺 𑀣𑀼𑀢𑀺𑀁 𑀓𑀢𑁆𑀯𑀸 𑀓𑀣𑁂𑀲𑀺. 𑀯𑀢𑁆𑀢𑀸 𑀥𑀫𑁆𑀫𑀢𑁄 𑀦𑀢𑁆𑀣𑀻𑀢𑀺 𑀥𑀫𑁆𑀫𑁂𑀦 𑀲𑀫𑁂𑀦 𑀓𑀸𑀭𑀡𑁂𑀦 𑀯𑀢𑁆𑀢𑀸 𑀦𑀢𑁆𑀣𑀺.

𑁩𑁪𑁫. 𑀦 𑀭𑀼𑀓𑁆𑀔𑀸 𑀙𑀺𑀚𑁆𑀚𑀺𑀁𑀲𑀼 𑀬𑀽𑀧𑀢𑁆𑀣𑀸𑀬 𑀦 𑀤𑀩𑁆𑀪𑀸 𑀮𑀽𑀬𑀺𑀁𑀲𑀼 𑀩𑀭𑀺𑀳𑀺𑀲𑀢𑁆𑀣𑀸𑀬𑀸𑀢𑀺 𑀬𑁂 𑀬𑀽𑀧𑀦𑀸𑀫𑀓𑁂 𑀫𑀳𑀸𑀣𑀫𑁆𑀪𑁂 𑀉𑀲𑁆𑀲𑀸𑀧𑁂𑀢𑁆𑀯𑀸 𑁋 ‘‘𑀅𑀲𑀼𑀓𑀭𑀸𑀚𑀸 𑀅𑀲𑀼𑀓𑀸𑀫𑀘𑁆𑀘𑁄 𑀅𑀲𑀼𑀓𑀩𑁆𑀭𑀸𑀳𑁆𑀫𑀡𑁄 𑀏𑀯𑀭𑀽𑀧𑀁 𑀦𑀸𑀫 𑀫𑀳𑀸𑀬𑀸𑀕𑀁 𑀬𑀚𑀢𑀻’’𑀢𑀺 𑀦𑀸𑀫𑀁 𑀮𑀺𑀔𑀺𑀢𑁆𑀯𑀸 𑀞𑀧𑁂𑀦𑁆𑀢𑀺. 𑀬𑀸𑀦𑀺 𑀘 𑀤𑀩𑁆𑀪𑀢𑀺𑀡𑀸𑀦𑀺 𑀮𑀸𑀬𑀺𑀢𑁆𑀯𑀸 𑀯𑀦𑀫𑀸𑀮𑀸𑀲𑀗𑁆𑀔𑁂𑀧𑁂𑀦 𑀬𑀜𑁆𑀜𑀲𑀸𑀮𑀁 𑀧𑀭𑀺𑀓𑁆𑀔𑀺𑀧𑀦𑁆𑀢𑀺, 𑀪𑀽𑀫𑀺𑀬𑀁 𑀯𑀸 𑀧𑀢𑁆𑀣𑀭𑀦𑁆𑀢𑀺, 𑀢𑁂𑀧𑀺 𑀦 𑀭𑀼𑀓𑁆𑀔𑀸 𑀙𑀺𑀚𑁆𑀚𑀺𑀁𑀲𑀼, 𑀦 𑀤𑀩𑁆𑀪𑀸 𑀮𑀽𑀬𑀺𑀁𑀲𑀼. 𑀓𑀺𑀁 𑀧𑀦 𑀕𑀸𑀯𑁄 𑀯𑀸 𑀅𑀚𑀸𑀤𑀬𑁄 𑀯𑀸 𑀳𑀜𑁆𑀜𑀺𑀲𑁆𑀲𑀦𑁆𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀤𑀸𑀲𑀸𑀢𑀺 𑀅𑀦𑁆𑀢𑁄𑀕𑁂𑀳𑀤𑀸𑀲𑀸𑀤𑀬𑁄. 𑀧𑁂𑀲𑁆𑀲𑀸𑀢𑀺 𑀬𑁂 𑀧𑀼𑀩𑁆𑀩𑀫𑁂𑀯 𑀥𑀦𑀁 𑀕𑀳𑁂𑀢𑁆𑀯𑀸 𑀓𑀫𑁆𑀫𑀁 𑀓𑀭𑁄𑀦𑁆𑀢𑀺. 𑀓𑀫𑁆𑀫𑀓𑀭𑀸𑀢𑀺 𑀬𑁂 𑀪𑀢𑁆𑀢𑀯𑁂𑀢𑀦𑀁 𑀕𑀳𑁂𑀢𑁆𑀯𑀸 𑀓𑀭𑁄𑀦𑁆𑀢𑀺. 𑀤𑀡𑁆𑀟𑀢𑀚𑁆𑀚𑀺𑀢𑀸 𑀦𑀸𑀫 𑀤𑀡𑁆𑀟𑀬𑀝𑁆𑀞𑀺𑀫𑀼𑀕𑁆𑀕𑀭𑀸𑀤𑀻𑀦𑀺 𑀕𑀳𑁂𑀢𑁆𑀯𑀸 𑁋 ‘‘𑀓𑀫𑁆𑀫𑀁 𑀓𑀭𑁄𑀣 𑀓𑀭𑁄𑀣𑀸’’𑀢𑀺 𑀏𑀯𑀁 𑀢𑀚𑁆𑀚𑀺𑀢𑀸. 𑀪𑀬𑀢𑀚𑁆𑀚𑀺𑀢𑀸 𑀦𑀸𑀫 𑁋 𑀲𑀘𑁂 𑀓𑀫𑁆𑀫𑀁 𑀓𑀭𑁄𑀲𑀺, 𑀓𑀼𑀲𑀮𑀁. 𑀦𑁄 𑀘𑁂 𑀓𑀭𑁄𑀲𑀺, 𑀙𑀺𑀦𑁆𑀤𑀺𑀲𑁆𑀲𑀸𑀫 𑀯𑀸 𑀩𑀦𑁆𑀥𑀺𑀲𑁆𑀲𑀸𑀫 𑀯𑀸 𑀫𑀸𑀭𑁂𑀲𑁆𑀲𑀸𑀫 𑀯𑀸𑀢𑀺 𑀏𑀯𑀁 𑀪𑀬𑁂𑀦 𑀢𑀚𑁆𑀚𑀺𑀢𑀸. 𑀏𑀢𑁂 𑀧𑀦 𑀦 𑀤𑀡𑁆𑀟𑀢𑀚𑁆𑀚𑀺𑀢𑀸, 𑀦 𑀪𑀬𑀢𑀚𑁆𑀚𑀺𑀢𑀸, 𑀦 𑀅𑀲𑁆𑀲𑀼𑀫𑀼𑀔𑀸 𑀭𑁄𑀤𑀫𑀸𑀦𑀸 𑀧𑀭𑀺𑀓𑀫𑁆𑀫𑀸𑀦𑀺 𑀅𑀓𑀁𑀲𑀼. 𑀅𑀣 𑀔𑁄 𑀧𑀺𑀬𑀲𑀫𑀼𑀤𑀸𑀘𑀸𑀭𑁂𑀦𑁂𑀯 𑀲𑀫𑀼𑀤𑀸𑀘𑀭𑀺𑀬𑀫𑀸𑀦𑀸 𑀅𑀓𑀁𑀲𑀼. 𑀦 𑀳𑀺 𑀢𑀢𑁆𑀣 𑀤𑀸𑀲𑀁 𑀯𑀸 𑀤𑀸𑀲𑀸𑀢𑀺, 𑀧𑁂𑀲𑁆𑀲𑀁 𑀯𑀸 𑀧𑁂𑀲𑁆𑀲𑀸𑀢𑀺, 𑀓𑀫𑁆𑀫𑀓𑀭𑀁 𑀯𑀸 𑀓𑀫𑁆𑀫𑀓𑀭𑀸𑀢𑀺 𑀆𑀮𑀧𑀦𑁆𑀢𑀺. 𑀬𑀣𑀸𑀦𑀸𑀫𑀯𑀲𑁂𑀦𑁂𑀯 𑀧𑀦 𑀧𑀺𑀬𑀲𑀫𑀼𑀤𑀸𑀘𑀸𑀭𑁂𑀦 𑀆𑀮𑀧𑀺𑀢𑁆𑀯𑀸 𑀇𑀢𑁆𑀣𑀺𑀧𑀼𑀭𑀺𑀲𑀩𑀮𑀯𑀦𑁆𑀢𑀤𑀼𑀩𑁆𑀩𑀮𑀸𑀦𑀁 𑀅𑀦𑀼𑀭𑀽𑀧𑀫𑁂𑀯 𑀓𑀫𑁆𑀫𑀁 𑀤𑀲𑁆𑀲𑁂𑀢𑁆𑀯𑀸 𑁋 ‘‘𑀇𑀤𑀜𑁆𑀘𑀺𑀤𑀜𑁆𑀘 𑀓𑀭𑁄𑀣𑀸’’𑀢𑀺 𑀯𑀤𑀦𑁆𑀢𑀺. 𑀢𑁂𑀧𑀺 𑀅𑀢𑁆𑀢𑀦𑁄 𑀭𑀼𑀘𑀺𑀯𑀲𑁂𑀦𑁂𑀯 𑀓𑀭𑁄𑀦𑁆𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀬𑁂 𑀇𑀘𑁆𑀙𑀺𑀁𑀲𑀼, 𑀢𑁂 𑀅𑀓𑀁𑀲𑀼; 𑀬𑁂 𑀦 𑀇𑀘𑁆𑀙𑀺𑀁𑀲𑀼, 𑀦 𑀢𑁂 𑀅𑀓𑀁𑀲𑀼. 𑀬𑀁 𑀇𑀘𑁆𑀙𑀺𑀁𑀲𑀼, 𑀢𑀁 𑀅𑀓𑀁𑀲𑀼; 𑀬𑀁 𑀦 𑀇𑀘𑁆𑀙𑀺𑀁𑀲𑀼, 𑀦 𑀢𑀁 𑀅𑀓𑀁𑀲𑀽’’𑀢𑀺. 𑀲𑀧𑁆𑀧𑀺𑀢𑁂𑀮𑀦𑀯𑀦𑀻𑀢𑀤𑀥𑀺𑀫𑀥𑀼𑀨𑀸𑀡𑀺𑀢𑁂𑀦 𑀘𑁂𑀯 𑀲𑁄 𑀬𑀜𑁆𑀜𑁄 𑀦𑀺𑀝𑁆𑀞𑀸𑀦𑀫𑀕𑀫𑀸𑀲𑀻𑀢𑀺 𑀭𑀸𑀚𑀸 𑀓𑀺𑀭 𑀩𑀳𑀺𑀦𑀕𑀭𑀲𑁆𑀲 𑀘𑀢𑀽𑀲𑀼 𑀤𑁆𑀯𑀸𑀭𑁂𑀲𑀼 𑀅𑀦𑁆𑀢𑁄𑀦𑀕𑀭𑀲𑁆𑀲 𑀘 𑀫𑀚𑁆𑀛𑁂𑀢𑀺 𑀧𑀜𑁆𑀘𑀲𑀼 𑀞𑀸𑀦𑁂𑀲𑀼 𑀫𑀳𑀸𑀤𑀸𑀦𑀲𑀸𑀮𑀸𑀬𑁄 𑀓𑀸𑀭𑀸𑀧𑁂𑀢𑁆𑀯𑀸 𑀏𑀓𑁂𑀓𑀺𑀲𑁆𑀲𑀸𑀬 𑀲𑀸𑀮𑀸𑀬 𑀲𑀢𑀲𑀳𑀲𑁆𑀲𑀁 𑀲𑀢𑀲𑀳𑀲𑁆𑀲𑀁 𑀓𑀢𑁆𑀯𑀸 𑀤𑀺𑀯𑀲𑁂 𑀤𑀺𑀯𑀲𑁂 𑀧𑀜𑁆𑀘𑀲𑀢𑀲𑀳𑀲𑁆𑀲𑀸𑀦𑀺 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀲𑀽𑀭𑀺𑀬𑀼𑀕𑁆𑀕𑀫𑀦𑀢𑁄 𑀧𑀝𑁆𑀞𑀸𑀬 𑀢𑀲𑁆𑀲 𑀢𑀲𑁆𑀲 𑀓𑀸𑀮𑀲𑁆𑀲 𑀅𑀦𑀼𑀭𑀽𑀧𑁂𑀳𑀺 𑀲𑀳𑀢𑁆𑀣𑁂𑀦 𑀲𑀼𑀯𑀡𑁆𑀡𑀓𑀝𑀘𑁆𑀙𑀼𑀁 𑀕𑀳𑁂𑀢𑁆𑀯𑀸 𑀧𑀡𑀻𑀢𑁂𑀳𑀺 𑀲𑀧𑁆𑀧𑀺𑀢𑁂𑀮𑀸𑀤𑀺𑀲𑀫𑁆𑀫𑀺𑀲𑁆𑀲𑁂𑀳𑁂𑀯 𑀬𑀸𑀕𑀼𑀔𑀚𑁆𑀚𑀓𑀪𑀢𑁆𑀢𑀩𑁆𑀬𑀜𑁆𑀚𑀦𑀧𑀸𑀦𑀓𑀸𑀤𑀻𑀳𑀺 𑀫𑀳𑀸𑀚𑀦𑀁 𑀲𑀦𑁆𑀢𑀧𑁆𑀧𑁂𑀲𑀺. 𑀪𑀸𑀚𑀦𑀸𑀦𑀺 𑀧𑀽𑀭𑁂𑀢𑁆𑀯𑀸 𑀕𑀡𑁆𑀳𑀺𑀢𑀼𑀓𑀸𑀫𑀸𑀦𑀁 𑀢𑀣𑁂𑀯 𑀤𑀸𑀧𑁂𑀲𑀺. 𑀲𑀸𑀬𑀡𑁆𑀳𑀲𑀫𑀬𑁂 𑀧𑀦 𑀯𑀢𑁆𑀣𑀕𑀦𑁆𑀥𑀫𑀸𑀮𑀸𑀤𑀻𑀳𑀺 𑀲𑀫𑁆𑀧𑀽𑀚𑁂𑀲𑀺. 𑀲𑀧𑁆𑀧𑀺𑀆𑀤𑀻𑀦𑀁 𑀧𑀦 𑀫𑀳𑀸𑀘𑀸𑀝𑀺𑀬𑁄 𑀧𑀽𑀭𑀸𑀧𑁂𑀢𑁆𑀯𑀸 𑁋 ‘‘𑀬𑁄 𑀬𑀁 𑀧𑀭𑀺𑀪𑀼𑀜𑁆𑀚𑀺𑀢𑀼𑀓𑀸𑀫𑁄, 𑀲𑁄 𑀢𑀁 𑀧𑀭𑀺𑀪𑀼𑀜𑁆𑀚𑀢𑀽’’𑀢𑀺 𑀅𑀦𑁂𑀓𑀲𑀢𑁂𑀲𑀼 𑀞𑀸𑀦𑁂𑀲𑀼 𑀞𑀧𑀸𑀧𑁂𑀲𑀺. 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑁋 ‘‘𑀲𑀧𑁆𑀧𑀺𑀢𑁂𑀮𑀦𑀯𑀦𑀻𑀢𑀤𑀥𑀺𑀫𑀥𑀼𑀨𑀸𑀡𑀺𑀢𑁂𑀦 𑀘𑁂𑀯 𑀲𑁄 𑀬𑀜𑁆𑀜𑁄 𑀦𑀺𑀝𑁆𑀞𑀸𑀦𑀫𑀕𑀫𑀸𑀲𑀻’’𑀢𑀺.

𑁩𑁪𑁬. 𑀧𑀳𑀽𑀢𑀁 𑀲𑀸𑀧𑀢𑁂𑀬𑁆𑀬𑀁 𑀆𑀤𑀸𑀬𑀸𑀢𑀺 𑀩𑀳𑀼𑀁 𑀥𑀦𑀁 𑀕𑀳𑁂𑀢𑁆𑀯𑀸. 𑀢𑁂 𑀓𑀺𑀭 𑀘𑀺𑀦𑁆𑀢𑁂𑀲𑀼𑀁 𑁋 ‘‘𑀅𑀬𑀁 𑀭𑀸𑀚𑀸 𑀲𑀧𑁆𑀧𑀺𑀢𑁂𑀮𑀸𑀤𑀻𑀦𑀺 𑀚𑀦𑀧𑀤𑀢𑁄 𑀅𑀦𑀸𑀳𑀭𑀸𑀧𑁂𑀢𑁆𑀯𑀸 𑀅𑀢𑁆𑀢𑀦𑁄 𑀲𑀦𑁆𑀢𑀓𑀫𑁂𑀯 𑀦𑀻𑀳𑀭𑀺𑀢𑁆𑀯𑀸 𑀫𑀳𑀸𑀤𑀸𑀦𑀁 𑀤𑁂𑀢𑀺. 𑀅𑀫𑁆𑀳𑁂𑀳𑀺 𑀧𑀦 ‘𑀭𑀸𑀚𑀸 𑀦 𑀓𑀺𑀜𑁆𑀘𑀺 𑀆𑀳𑀭𑀸𑀧𑁂𑀢𑀻’𑀢𑀺 𑀦 𑀬𑀼𑀢𑁆𑀢𑀁 𑀢𑀼𑀡𑁆𑀳𑀻 𑀪𑀯𑀺𑀢𑀼𑀁. 𑀦 𑀳𑀺 𑀭𑀜𑁆𑀜𑁄 𑀖𑀭𑁂 𑀥𑀦𑀁 𑀅𑀓𑁆𑀔𑀬𑀥𑀫𑁆𑀫𑀫𑁂𑀯, 𑀅𑀫𑁆𑀳𑁂𑀲𑀼 𑀘 𑀅𑀤𑁂𑀦𑁆𑀢𑁂𑀲𑀼 𑀓𑁄 𑀅𑀜𑁆𑀜𑁄 𑀭𑀜𑁆𑀜𑁄 𑀤𑀲𑁆𑀲𑀢𑀺, 𑀳𑀦𑁆𑀤𑀲𑁆𑀲 𑀥𑀦𑀁 𑀉𑀧𑀲𑀁𑀳𑀭𑀸𑀫𑀸’’𑀢𑀺 𑀢𑁂 𑀕𑀸𑀫𑀪𑀸𑀕𑁂𑀦 𑀘 𑀦𑀺𑀕𑀫𑀪𑀸𑀕𑁂𑀦 𑀘 𑀦𑀕𑀭𑀪𑀸𑀕𑁂𑀦 𑀘 𑀲𑀸𑀧𑀢𑁂𑀬𑁆𑀬𑀁 𑀲𑀁𑀳𑀭𑀺𑀢𑁆𑀯𑀸 𑀲𑀓𑀝𑀸𑀦𑀺 𑀧𑀽𑀭𑁂𑀢𑁆𑀯𑀸 𑀭𑀜𑁆𑀜𑁄 𑀉𑀧𑀳𑀭𑀺𑀁𑀲𑀼. 𑀢𑀁 𑀲𑀦𑁆𑀥𑀸𑀬 𑁋 ‘‘𑀧𑀳𑀽𑀢𑀁 𑀲𑀸𑀧𑀢𑁂𑀬𑁆𑀬’’𑀦𑁆𑀢𑀺𑀆𑀤𑀺𑀫𑀸𑀳.

𑁩𑁪𑁭. 𑀧𑀼𑀭𑀢𑁆𑀣𑀺𑀫𑁂𑀦 𑀬𑀜𑁆𑀜𑀯𑀸𑀝𑀲𑁆𑀲𑀸𑀢𑀺 𑀧𑀼𑀭𑀢𑁆𑀣𑀺𑀫𑀢𑁄 𑀦𑀕𑀭𑀤𑁆𑀯𑀸𑀭𑁂 𑀤𑀸𑀦𑀲𑀸𑀮𑀸𑀬 𑀧𑀼𑀭𑀢𑁆𑀣𑀺𑀫𑀪𑀸𑀕𑁂. 𑀬𑀣𑀸 𑀧𑀼𑀭𑀢𑁆𑀣𑀺𑀫𑀤𑀺𑀲𑀢𑁄 𑀆𑀕𑀘𑁆𑀙𑀦𑁆𑀢𑀸 𑀔𑀢𑁆𑀢𑀺𑀬𑀸𑀦𑀁 𑀤𑀸𑀦𑀲𑀸𑀮𑀸𑀬 𑀬𑀸𑀕𑀼𑀁 𑀧𑀺𑀯𑀺𑀢𑁆𑀯𑀸 𑀭𑀜𑁆𑀜𑁄 𑀤𑀸𑀦𑀲𑀸𑀮𑀸𑀬 𑀪𑀼𑀜𑁆𑀚𑀺𑀢𑁆𑀯𑀸 𑀦𑀕𑀭𑀁 𑀧𑀯𑀺𑀲𑀦𑁆𑀢𑀺. 𑀏𑀯𑀭𑀽𑀧𑁂 𑀞𑀸𑀦𑁂 𑀧𑀝𑁆𑀞𑀧𑁂𑀲𑀼𑀁. 𑀤𑀓𑁆𑀔𑀺𑀡𑁂𑀦 𑀬𑀜𑁆𑀜𑀯𑀸𑀝𑀲𑁆𑀲𑀸𑀢𑀺 𑀤𑀓𑁆𑀔𑀺𑀡𑀢𑁄 𑀦𑀕𑀭𑀤𑁆𑀯𑀸𑀭𑁂 𑀤𑀸𑀦𑀲𑀸𑀮𑀸𑀬 𑀯𑀼𑀢𑁆𑀢𑀦𑀬𑁂𑀦𑁂𑀯 𑀤𑀓𑁆𑀔𑀺𑀡𑀪𑀸𑀕𑁂 𑀧𑀝𑁆𑀞𑀧𑁂𑀲𑀼𑀁. 𑀧𑀘𑁆𑀙𑀺𑀫𑀼𑀢𑁆𑀢𑀭𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑁩𑁪𑁮. 𑀅𑀳𑁄 𑀬𑀜𑁆𑀜𑁄, 𑀅𑀳𑁄 𑀬𑀜𑁆𑀜𑀲𑀫𑁆𑀧𑀤𑀸𑀢𑀺 𑀩𑁆𑀭𑀸𑀳𑁆𑀫𑀡𑀸 𑀲𑀧𑁆𑀧𑀺𑀆𑀤𑀻𑀳𑀺 𑀦𑀺𑀝𑁆𑀞𑀸𑀦𑀕𑀫𑀦𑀁 𑀲𑀼𑀢𑁆𑀯𑀸 𑁋 ‘‘𑀬𑀁 𑀮𑁄𑀓𑁂 𑀫𑀥𑀼𑀭𑀁, 𑀢𑀤𑁂𑀯 𑀲𑀫𑀡𑁄 𑀕𑁄𑀢𑀫𑁄 𑀓𑀣𑁂𑀢𑀺, 𑀳𑀦𑁆𑀤𑀲𑁆𑀲 𑀬𑀜𑁆𑀜𑀁 𑀧𑀲𑀁𑀲𑀸𑀫𑀸’’𑀢𑀺 𑀢𑀼𑀝𑁆𑀞𑀘𑀺𑀢𑁆𑀢𑀸 𑀧𑀲𑀁𑀲𑀫𑀸𑀦𑀸 𑀏𑀯𑀫𑀸𑀳𑀁𑀲𑀼. 𑀢𑀼𑀡𑁆𑀳𑀻𑀪𑀽𑀢𑁄𑀯 𑀦𑀺𑀲𑀺𑀦𑁆𑀦𑁄 𑀳𑁄𑀢𑀻𑀢𑀺 𑀉𑀧𑀭𑀺 𑀯𑀢𑁆𑀢𑀩𑁆𑀩𑀫𑀢𑁆𑀣𑀁 𑀘𑀺𑀦𑁆𑀢𑀬𑀫𑀸𑀦𑁄 𑀦𑀺𑀲𑁆𑀲𑀤𑁆𑀤𑁄𑀯 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺. 𑀅𑀪𑀺𑀚𑀸𑀦𑀸𑀢𑀺 𑀧𑀦 𑀪𑀯𑀁 𑀕𑁄𑀢𑀫𑁄𑀢𑀺 𑀇𑀤𑀁 𑀩𑁆𑀭𑀸𑀳𑁆𑀫𑀡𑁄 𑀧𑀭𑀺𑀳𑀸𑀭𑁂𑀦 𑀧𑀼𑀘𑁆𑀙𑀦𑁆𑀢𑁄 𑀆𑀳. 𑀇𑀢𑀭𑀣𑀸 𑀳𑀺 𑁋 ‘‘𑀓𑀺𑀁 𑀧𑀦 𑀢𑁆𑀯𑀁, 𑀪𑁄 𑀕𑁄𑀢𑀫, 𑀢𑀤𑀸 𑀭𑀸𑀚𑀸 𑀅𑀳𑁄𑀲𑀺, 𑀉𑀤𑀸𑀳𑀼 𑀧𑀼𑀭𑁄𑀳𑀺𑀢𑁄 𑀩𑁆𑀭𑀸𑀳𑁆𑀫𑀡𑁄’’𑀢𑀺 𑀏𑀯𑀁 𑀉𑀚𑀼𑀓𑀫𑁂𑀯 𑀧𑀼𑀘𑁆𑀙𑀬𑀫𑀸𑀦𑁄 𑀅𑀕𑀸𑀭𑀯𑁄 𑀯𑀺𑀬 𑀳𑁄𑀢𑀺.

𑀦𑀺𑀘𑁆𑀘𑀤𑀸𑀦𑀅𑀦𑀼𑀓𑀼𑀮𑀬𑀜𑁆𑀜𑀯𑀡𑁆𑀡𑀦𑀸

𑁩𑁪𑁯. 𑀅𑀢𑁆𑀣𑀺 𑀧𑀦, 𑀪𑁄 𑀕𑁄𑀢𑀫𑀸𑀢𑀺 𑁋 𑀇𑀤𑀁 𑀩𑁆𑀭𑀸𑀳𑁆𑀫𑀡𑁄 ‘‘𑀲𑀓𑀮𑀚𑀫𑁆𑀩𑀼𑀤𑀻𑀧𑀯𑀸𑀲𑀻𑀦𑀁 𑀉𑀝𑁆𑀞𑀸𑀬 𑀲𑀫𑀼𑀝𑁆𑀞𑀸𑀬 𑀤𑀸𑀦𑀁 𑀦𑀸𑀫 𑀤𑀸𑀢𑀼𑀁 𑀕𑀭𑀼𑀓𑀁 𑀲𑀓𑀮𑀚𑀦𑀧𑀤𑁄 𑀘 𑀅𑀢𑁆𑀢𑀦𑁄 𑀓𑀫𑁆𑀫𑀸𑀦𑀺 𑀅𑀓𑀭𑁄𑀦𑁆𑀢𑁄 𑀦𑀲𑁆𑀲𑀺𑀲𑁆𑀲𑀢𑀺, 𑀅𑀢𑁆𑀣𑀺 𑀦𑀼 𑀔𑁄 𑀅𑀫𑁆𑀳𑀸𑀓𑀫𑁆𑀧𑀺 𑀇𑀫𑀫𑁆𑀳𑀸 𑀬𑀜𑁆𑀜𑀸 𑀅𑀜𑁆𑀜𑁄 𑀬𑀜𑁆𑀜𑁄 𑀅𑀧𑁆𑀧𑀲𑀫𑀸𑀭𑀫𑁆𑀪𑀢𑀭𑁄 𑀘𑁂𑀯 𑀫𑀳𑀧𑁆𑀨𑀮𑀢𑀭𑁄 𑀘𑀸’’𑀢𑀺 𑀏𑀢𑀫𑀢𑁆𑀣𑀁 𑀧𑀼𑀘𑁆𑀙𑀦𑁆𑀢𑁄 𑀆𑀳. 𑀦𑀺𑀘𑁆𑀘𑀤𑀸𑀦𑀸𑀦𑀻𑀢𑀺 𑀥𑀼𑀯𑀤𑀸𑀦𑀸𑀦𑀺 𑀦𑀺𑀘𑁆𑀘𑀪𑀢𑁆𑀢𑀸𑀦𑀺. 𑀅𑀦𑀼𑀓𑀼𑀮𑀬𑀜𑁆𑀜𑀸𑀦𑀻𑀢𑀺 𑁋 ‘‘𑀅𑀫𑁆𑀳𑀸𑀓𑀁 𑀧𑀺𑀢𑀼𑀧𑀺𑀢𑀸𑀫𑀳𑀸𑀤𑀻𑀳𑀺 𑀧𑀯𑀢𑁆𑀢𑀺𑀢𑀸𑀦𑀻’’𑀢𑀺 𑀓𑀢𑁆𑀯𑀸 𑀧𑀘𑁆𑀙𑀸 𑀤𑀼𑀕𑁆𑀕𑀢𑀧𑀼𑀭𑀺𑀲𑁂𑀳𑀺𑀧𑀺 𑀯𑀁𑀲𑀧𑀭𑀫𑁆𑀧𑀭𑀸𑀬 𑀧𑀯𑀢𑁆𑀢𑁂𑀢𑀩𑁆𑀩𑀸𑀦𑀺 𑀬𑀸𑀕𑀸𑀦𑀺, 𑀏𑀯𑀭𑀽𑀧𑀸𑀦𑀺 𑀓𑀺𑀭 𑀲𑀻𑀮𑀯𑀦𑁆𑀢𑁂 𑀉𑀤𑁆𑀤𑀺𑀲𑁆𑀲 𑀦𑀺𑀩𑀤𑁆𑀥𑀤𑀸𑀦𑀸𑀦𑀺 𑀢𑀲𑁆𑀫𑀺𑀁 𑀓𑀼𑀮𑁂 𑀤𑀮𑀺𑀤𑁆𑀤𑀸𑀧𑀺 𑀦 𑀉𑀧𑀘𑁆𑀙𑀺𑀦𑁆𑀤𑀦𑁆𑀢𑀺.

𑀢𑀢𑁆𑀭𑀺𑀤𑀁 𑀯𑀢𑁆𑀣𑀼 𑁋 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀓𑀺𑀭 𑀖𑀭𑁂 𑀧𑀜𑁆𑀘 𑀦𑀺𑀘𑁆𑀘𑀪𑀢𑁆𑀢𑀲𑀢𑀸𑀦𑀺 𑀤𑀻𑀬𑀺𑀁𑀲𑀼. 𑀤𑀦𑁆𑀢𑀫𑀬𑀲𑀮𑀸𑀓𑀸𑀦𑀺 𑀧𑀜𑁆𑀘𑀲𑀢𑀸𑀦𑀺 𑀅𑀳𑁂𑀲𑀼𑀁. 𑀅𑀣 𑀢𑀁 𑀓𑀼𑀮𑀁 𑀅𑀦𑀼𑀓𑁆𑀓𑀫𑁂𑀦 𑀤𑀸𑀮𑀺𑀤𑁆𑀤𑀺𑀬𑁂𑀦 𑀅𑀪𑀺𑀪𑀽𑀢𑀁, 𑀏𑀓𑀸 𑀢𑀲𑁆𑀫𑀺𑀁 𑀓𑀼𑀮𑁂 𑀤𑀸𑀭𑀺𑀓𑀸 𑀏𑀓𑀲𑀮𑀸𑀓𑀢𑁄 𑀉𑀤𑁆𑀥𑀁 𑀤𑀸𑀢𑀼𑀁 𑀦𑀸𑀲𑀓𑁆𑀔𑀺. 𑀲𑀸𑀧𑀺 𑀧𑀘𑁆𑀙𑀸 𑀲𑁂𑀢𑀯𑀸𑀳𑀦𑀭𑀚𑁆𑀚𑀁 𑀕𑀦𑁆𑀢𑁆𑀯𑀸 𑀔𑀮𑀁 𑀲𑁄𑀥𑁂𑀢𑁆𑀯𑀸 𑀮𑀤𑁆𑀥𑀥𑀜𑁆𑀜𑁂𑀦 𑀢𑀁 𑀲𑀮𑀸𑀓𑀁 𑀅𑀤𑀸𑀲𑀺. 𑀏𑀓𑁄 𑀣𑁂𑀭𑁄 𑀭𑀜𑁆𑀜𑁄 𑀆𑀭𑁄𑀘𑁂𑀲𑀺. 𑀭𑀸𑀚𑀸 𑀢𑀁 𑀆𑀦𑁂𑀢𑁆𑀯𑀸 𑀅𑀕𑁆𑀕𑀫𑀳𑁂𑀲𑀺𑀝𑁆𑀞𑀸𑀦𑁂 𑀞𑀧𑁂𑀲𑀺. 𑀲𑀸 𑀢𑀢𑁄 𑀧𑀝𑁆𑀞𑀸𑀬 𑀧𑀼𑀦 𑀧𑀜𑁆𑀘𑀧𑀺 𑀲𑀮𑀸𑀓𑀪𑀢𑁆𑀢𑀲𑀢𑀸𑀦𑀺 𑀧𑀯𑀢𑁆𑀢𑁂𑀲𑀺.

𑀤𑀡𑁆𑀟𑀧𑁆𑀧𑀳𑀸𑀭𑀸𑀢𑀺 𑁋 ‘‘𑀧𑀝𑀺𑀧𑀸𑀝𑀺𑀬𑀸 𑀢𑀺𑀝𑁆𑀞𑀣 𑀢𑀺𑀝𑁆𑀞𑀣𑀸’’𑀢𑀺 𑀉𑀚𑀼𑀁 𑀕𑀦𑁆𑀢𑁆𑀯𑀸 𑀕𑀡𑁆𑀳𑀣 𑀕𑀡𑁆𑀳𑀣𑀸𑀢𑀺 𑀘 𑀆𑀤𑀻𑀦𑀺 𑀯𑀢𑁆𑀯𑀸 𑀤𑀻𑀬𑀫𑀸𑀦𑀸 𑀤𑀡𑁆𑀟𑀧𑁆𑀧𑀳𑀸𑀭𑀸𑀧𑀺 𑀕𑀮𑀕𑁆𑀕𑀸𑀳𑀸𑀧𑀺 𑀤𑀺𑀲𑁆𑀲𑀦𑁆𑀢𑀺. 𑀅𑀬𑀁 𑀔𑁄, 𑀩𑁆𑀭𑀸𑀳𑁆𑀫𑀡, 𑀳𑁂𑀢𑀼…𑀧𑁂… 𑀫𑀳𑀸𑀦𑀺𑀲𑀁𑀲𑀢𑀭𑀜𑁆𑀘𑀸𑀢𑀺. 𑀏𑀢𑁆𑀣 𑀬𑀲𑁆𑀫𑀸 𑀫𑀳𑀸𑀬𑀜𑁆𑀜𑁂 𑀯𑀺𑀬 𑀇𑀫𑀲𑁆𑀫𑀺𑀁 𑀲𑀮𑀸𑀓𑀪𑀢𑁆𑀢𑁂 𑀦 𑀩𑀳𑀽𑀳𑀺 𑀯𑁂𑀬𑁆𑀬𑀸𑀯𑀘𑁆𑀘𑀓𑀭𑁂𑀳𑀺 𑀯𑀸 𑀉𑀧𑀓𑀭𑀡𑁂𑀳𑀺 𑀯𑀸 𑀅𑀢𑁆𑀣𑁄 𑀅𑀢𑁆𑀣𑀺, 𑀢𑀲𑁆𑀫𑀸 𑀏𑀢𑀁 𑀅𑀧𑁆𑀧𑀝𑁆𑀞𑀢𑀭𑀁. 𑀬𑀲𑁆𑀫𑀸 𑀘𑁂𑀢𑁆𑀣 𑀦 𑀩𑀳𑀽𑀦𑀁 𑀓𑀫𑁆𑀫𑀘𑁆𑀙𑁂𑀤𑀯𑀲𑁂𑀦 𑀧𑀻𑀴𑀸𑀲𑀗𑁆𑀔𑀸𑀢𑁄 𑀲𑀫𑀸𑀭𑀫𑁆𑀪𑁄 𑀅𑀢𑁆𑀣𑀺, 𑀢𑀲𑁆𑀫𑀸 𑀅𑀧𑁆𑀧𑀲𑀫𑀸𑀭𑀫𑁆𑀪𑀢𑀭𑀁. 𑀬𑀲𑁆𑀫𑀸 𑀘𑁂𑀢𑀁 𑀲𑀗𑁆𑀖𑀲𑁆𑀲 𑀬𑀺𑀝𑁆𑀞𑀁 𑀧𑀭𑀺𑀘𑁆𑀘𑀢𑁆𑀢𑀁, 𑀢𑀲𑁆𑀫𑀸 𑀬𑀜𑁆𑀜𑀦𑁆𑀢𑀺 𑀯𑀼𑀢𑁆𑀢𑀁, 𑀬𑀲𑁆𑀫𑀸 𑀧𑀦 𑀙𑀴𑀗𑁆𑀕𑀲𑀫𑀦𑁆𑀦𑀸𑀕𑀢𑀸𑀬 𑀤𑀓𑁆𑀔𑀺𑀡𑀸𑀬 𑀫𑀳𑀸𑀲𑀫𑀼𑀤𑁆𑀤𑁂 𑀉𑀤𑀓𑀲𑁆𑀲𑁂𑀯 𑀦 𑀲𑀼𑀓𑀭𑀁 𑀧𑀼𑀜𑁆𑀜𑀸𑀪𑀺𑀲𑀦𑁆𑀤𑀲𑁆𑀲 𑀧𑀫𑀸𑀡𑀁 𑀓𑀸𑀢𑀼𑀁, 𑀇𑀤𑀜𑁆𑀘 𑀢𑀣𑀸𑀯𑀺𑀥𑀁. 𑀢𑀲𑁆𑀫𑀸 𑀢𑀁 𑀫𑀳𑀧𑁆𑀨𑀮𑀢𑀭𑀜𑁆𑀘 𑀫𑀳𑀸𑀦𑀺𑀲𑀁𑀲𑀢𑀭𑀜𑁆𑀘𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀇𑀤𑀁 𑀲𑀼𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑁄 𑀘𑀺𑀦𑁆𑀢𑁂𑀲𑀺 𑁋 𑀇𑀤𑀫𑁆𑀧𑀺 𑀦𑀺𑀘𑁆𑀘𑀪𑀢𑁆𑀢𑀁 𑀉𑀝𑁆𑀞𑀸𑀬 𑀲𑀫𑀼𑀝𑁆𑀞𑀸𑀬 𑀤𑀤𑀢𑁄 𑀤𑀺𑀯𑀲𑁂 𑀤𑀺𑀯𑀲𑁂 𑀏𑀓𑀲𑁆𑀲 𑀓𑀫𑁆𑀫𑀁 𑀦𑀲𑁆𑀲𑀢𑀺. 𑀦𑀯𑀦𑀯𑁄 𑀉𑀲𑁆𑀲𑀸𑀳𑁄 𑀘 𑀚𑀦𑁂𑀢𑀩𑁆𑀩𑁄 𑀳𑁄𑀢𑀺, 𑀅𑀢𑁆𑀣𑀺 𑀦𑀼 𑀔𑁄 𑀇𑀢𑁄𑀧𑀺 𑀅𑀜𑁆𑀜𑁄 𑀬𑀜𑁆𑀜𑁄 𑀅𑀧𑁆𑀧𑀝𑁆𑀞𑀢𑀭𑁄 𑀘 𑀅𑀧𑁆𑀧𑀲𑀫𑀸𑀭𑀫𑁆𑀪𑀢𑀭𑁄 𑀘𑀸𑀢𑀺. 𑀢𑀲𑁆𑀫𑀸 ‘‘𑀅𑀢𑁆𑀣𑀺 𑀧𑀦, 𑀪𑁄 𑀕𑁄𑀢𑀫𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀬𑀲𑁆𑀫𑀸 𑀲𑀮𑀸𑀓𑀪𑀢𑁆𑀢𑁂 𑀓𑀺𑀘𑁆𑀘𑀧𑀭𑀺𑀬𑁄𑀲𑀸𑀦𑀁 𑀦𑀢𑁆𑀣𑀺, 𑀏𑀓𑁂𑀦 𑀉𑀝𑁆𑀞𑀸𑀬 𑀲𑀫𑀼𑀝𑁆𑀞𑀸𑀬 𑀅𑀜𑁆𑀜𑀁 𑀓𑀫𑁆𑀫𑀁 𑀅𑀓𑀢𑁆𑀯𑀸 𑀲𑀁𑀯𑀺𑀥𑀸𑀢𑀩𑁆𑀩𑀫𑁂𑀯. 𑀯𑀺𑀳𑀸𑀭𑀤𑀸𑀦𑁂 𑀧𑀦 𑀓𑀺𑀘𑁆𑀘𑀧𑀭𑀺𑀬𑁄𑀲𑀸𑀦𑀁 𑀅𑀢𑁆𑀣𑀺. 𑀧𑀡𑁆𑀡𑀲𑀸𑀮𑀁 𑀯𑀸 𑀳𑀺 𑀓𑀸𑀭𑁂𑀢𑀼𑀁 𑀓𑁄𑀝𑀺𑀥𑀦𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀫𑀳𑀸𑀯𑀺𑀳𑀸𑀭𑀁 𑀯𑀸, 𑀏𑀓𑀯𑀸𑀭𑀁 𑀥𑀦𑀧𑀭𑀺𑀘𑁆𑀘𑀸𑀕𑀁 𑀓𑀢𑁆𑀯𑀸 𑀓𑀸𑀭𑀺𑀢𑀁 𑀲𑀢𑁆𑀢𑀝𑁆𑀞𑀯𑀲𑁆𑀲𑀸𑀦𑀺𑀧𑀺 𑀯𑀲𑁆𑀲𑀲𑀢𑀫𑁆𑀧𑀺 𑀯𑀲𑁆𑀲𑀲𑀳𑀲𑁆𑀲𑀫𑁆𑀧𑀺 𑀕𑀘𑁆𑀙𑀢𑀺𑀬𑁂𑀯. 𑀓𑁂𑀯𑀮𑀁 𑀚𑀺𑀡𑁆𑀡𑀧𑀢𑀺𑀢𑀝𑁆𑀞𑀸𑀦𑁂 𑀧𑀝𑀺𑀲𑀗𑁆𑀔𑀭𑀡𑀫𑀢𑁆𑀢𑀫𑁂𑀯 𑀓𑀸𑀢𑀩𑁆𑀩𑀁 𑀳𑁄𑀢𑀺. 𑀢𑀲𑁆𑀫𑀸 𑀇𑀤𑀁 𑀯𑀺𑀳𑀸𑀭𑀤𑀸𑀦𑀁 𑀲𑀮𑀸𑀓𑀪𑀢𑁆𑀢𑀢𑁄 𑀅𑀧𑁆𑀧𑀝𑁆𑀞𑀢𑀭𑀁 𑀅𑀧𑁆𑀧𑀲𑀫𑀸𑀭𑀫𑁆𑀪𑀢𑀭𑀜𑁆𑀘 𑀳𑁄𑀢𑀺. 𑀬𑀲𑁆𑀫𑀸 𑀧𑀦𑁂𑀢𑁆𑀣 𑀲𑀼𑀢𑁆𑀢𑀦𑁆𑀢𑀧𑀭𑀺𑀬𑀸𑀬𑁂𑀦 𑀬𑀸𑀯𑀤𑁂𑀯 𑀲𑀻𑀢𑀲𑁆𑀲 𑀧𑀝𑀺𑀖𑀸𑀢𑀸𑀬𑀸𑀢𑀺 𑀆𑀤𑀬𑁄 𑀦𑀯𑀸𑀦𑀺𑀲𑀁𑀲𑀸 𑀯𑀼𑀢𑁆𑀢𑀸, 𑀔𑀦𑁆𑀥𑀓𑀧𑀭𑀺𑀬𑀸𑀬𑁂𑀦.

‘‘𑀲𑀻𑀢𑀁 𑀉𑀡𑁆𑀳𑀁 𑀧𑀝𑀺𑀳𑀦𑁆𑀢𑀺, 𑀢𑀢𑁄 𑀯𑀸𑀴𑀫𑀺𑀕𑀸𑀦𑀺 𑀘;

𑀲𑀺𑀭𑀺𑀁𑀲𑀧𑁂 𑀘 𑀫𑀓𑀲𑁂 𑀘, 𑀲𑀺𑀲𑀺𑀭𑁂 𑀘𑀸𑀧𑀺 𑀯𑀼𑀝𑁆𑀞𑀺𑀬𑁄.

𑀢𑀢𑁄 𑀯𑀸𑀢𑀸𑀢𑀧𑁄 𑀖𑁄𑀭𑁄, 𑀲𑀜𑁆𑀚𑀸𑀢𑁄 𑀧𑀝𑀺𑀳𑀜𑁆𑀜𑀢𑀺;

𑀮𑁂𑀡𑀢𑁆𑀣𑀜𑁆𑀘 𑀲𑀼𑀔𑀢𑁆𑀣𑀜𑁆𑀘, 𑀛𑀸𑀬𑀺𑀢𑀼𑀜𑁆𑀘 𑀯𑀺𑀧𑀲𑁆𑀲𑀺𑀢𑀼𑀁.

𑀯𑀺𑀳𑀸𑀭𑀤𑀸𑀦𑀁 𑀲𑀗𑁆𑀖𑀲𑁆𑀲, 𑀅𑀕𑁆𑀕𑀁 𑀩𑀼𑀤𑁆𑀥𑁂𑀦 𑀯𑀡𑁆𑀡𑀺𑀢𑀁;

𑀢𑀲𑁆𑀫𑀸 𑀳𑀺 𑀧𑀡𑁆𑀟𑀺𑀢𑁄 𑀧𑁄𑀲𑁄, 𑀲𑀫𑁆𑀧𑀲𑁆𑀲𑀁 𑀅𑀢𑁆𑀣𑀫𑀢𑁆𑀢𑀦𑁄;

𑀯𑀺𑀳𑀸𑀭𑁂 𑀓𑀸𑀭𑀬𑁂 𑀭𑀫𑁆𑀫𑁂, 𑀯𑀸𑀲𑀬𑁂𑀢𑁆𑀣 𑀩𑀳𑀼𑀲𑁆𑀲𑀼𑀢𑁂.

𑀢𑀲𑁆𑀫𑀸 𑀅𑀦𑁆𑀦𑀜𑁆𑀘 𑀧𑀸𑀦𑀜𑁆𑀘, 𑀯𑀢𑁆𑀣𑀲𑁂𑀦𑀸𑀲𑀦𑀸𑀦𑀺 𑀘;

𑀤𑀤𑁂𑀬 𑀉𑀚𑀼𑀪𑀽𑀢𑁂𑀲𑀼, 𑀯𑀺𑀧𑁆𑀧𑀲𑀦𑁆𑀦𑁂𑀦 𑀘𑁂𑀢𑀲𑀸.

𑀢𑁂 𑀢𑀲𑁆𑀲 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀺, 𑀲𑀩𑁆𑀩𑀤𑀼𑀓𑁆𑀔𑀸𑀧𑀦𑀽𑀤𑀦𑀁;

𑀬𑀁 𑀲𑁄 𑀥𑀫𑁆𑀫𑀁 𑀇𑀥𑀜𑁆𑀜𑀸𑀬, 𑀧𑀭𑀺𑀦𑀺𑀩𑁆𑀩𑀸𑀢𑀺 𑀅𑀦𑀸𑀲𑀯𑁄’’𑀢𑀺. (𑀘𑀽𑀴𑀯. 𑁨𑁯𑁫);

𑀲𑀢𑁆𑀢𑀭𑀲𑀸𑀦𑀺𑀲𑀁𑀲𑀸 𑀯𑀼𑀢𑁆𑀢𑀸. 𑀢𑀲𑁆𑀫𑀸 𑀏𑀢𑀁 𑀲𑀮𑀸𑀓𑀪𑀢𑁆𑀢𑀢𑁄 𑀫𑀳𑀧𑁆𑀨𑀮𑀢𑀭𑀜𑁆𑀘 𑀫𑀳𑀸𑀦𑀺𑀲𑀁𑀲𑀢𑀭𑀜𑁆𑀘𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀲𑀗𑁆𑀖𑀲𑁆𑀲 𑀧𑀦 𑀧𑀭𑀺𑀘𑁆𑀘𑀢𑁆𑀢𑀢𑁆𑀢𑀸𑀯 𑀬𑀜𑁆𑀜𑁄𑀢𑀺 𑀯𑀼𑀘𑁆𑀘𑀢𑀺. 𑀇𑀤𑀫𑁆𑀧𑀺 𑀲𑀼𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀥𑀦𑀧𑀭𑀺𑀘𑁆𑀘𑀸𑀕𑀁 𑀓𑀢𑁆𑀯𑀸 𑀯𑀺𑀳𑀸𑀭𑀤𑀸𑀦𑀁 𑀦𑀸𑀫 𑀤𑀼𑀓𑁆𑀓𑀭𑀁, 𑀅𑀢𑁆𑀢𑀦𑁄 𑀲𑀦𑁆𑀢𑀓𑀸 𑀳𑀺 𑀓𑀸𑀓𑀡𑀺𑀓𑀸𑀧𑀺 𑀧𑀭𑀲𑁆𑀲 𑀤𑀼𑀧𑁆𑀧𑀭𑀺𑀘𑁆𑀘𑀚𑀸, 𑀳𑀦𑁆𑀤𑀸𑀳𑀁 𑀇𑀢𑁄𑀧𑀺 𑀅𑀧𑁆𑀧𑀝𑁆𑀞𑀢𑀭𑀜𑁆𑀘 𑀅𑀧𑁆𑀧𑀲𑀫𑀸𑀭𑀫𑁆𑀪𑀢𑀭𑀜𑁆𑀘 𑀬𑀜𑁆𑀜𑀁 𑀧𑀼𑀘𑁆𑀙𑀸𑀫𑀻’’𑀢𑀺. 𑀢𑀢𑁄 𑀢𑀁 𑀧𑀼𑀘𑁆𑀙𑀦𑁆𑀢𑁄 𑁋 ‘‘𑀅𑀢𑁆𑀣𑀺 𑀧𑀦 𑀪𑁄’’𑀢𑀺𑀆𑀤𑀺𑀫𑀸𑀳.

𑁩𑁫𑁦-𑁩𑁫𑁧. 𑀢𑀢𑁆𑀣 𑀬𑀲𑁆𑀫𑀸 𑀲𑀓𑀺𑀁 𑀧𑀭𑀺𑀘𑁆𑀘𑀢𑁆𑀢𑁂𑀧𑀺 𑀯𑀺𑀳𑀸𑀭𑁂 𑀧𑀼𑀦𑀧𑁆𑀧𑀼𑀦𑀁 𑀙𑀸𑀤𑀦𑀔𑀡𑁆𑀟𑀨𑀼𑀮𑁆𑀮𑀧𑁆𑀧𑀝𑀺𑀲𑀗𑁆𑀔𑀭𑀡𑀸𑀤𑀺𑀯𑀲𑁂𑀦 𑀓𑀺𑀘𑁆𑀘𑀁 𑀅𑀢𑁆𑀣𑀺𑀬𑁂𑀯, 𑀲𑀭𑀡𑀁 𑀧𑀦 𑀏𑀓𑀪𑀺𑀓𑁆𑀔𑀼𑀲𑁆𑀲 𑀯𑀸 𑀲𑀦𑁆𑀢𑀺𑀓𑁂 𑀲𑀗𑁆𑀖𑀲𑁆𑀲 𑀯𑀸 𑀕𑀡𑀲𑁆𑀲 𑀯𑀸 𑀲𑀓𑀺𑀁 𑀕𑀳𑀺𑀢𑀁 𑀕𑀳𑀺𑀢𑀫𑁂𑀯 𑀳𑁄𑀢𑀺, 𑀦𑀢𑁆𑀣𑀺 𑀢𑀲𑁆𑀲 𑀧𑀼𑀦𑀧𑁆𑀧𑀼𑀦𑀁 𑀓𑀢𑁆𑀢𑀩𑁆𑀩𑀢𑀸, 𑀢𑀲𑁆𑀫𑀸 𑀢𑀁 𑀯𑀺𑀳𑀸𑀭𑀤𑀸𑀦𑀢𑁄 𑀅𑀧𑁆𑀧𑀝𑁆𑀞𑀢𑀭𑀜𑁆𑀘 𑀅𑀧𑁆𑀧𑀲𑀫𑀸𑀭𑀫𑁆𑀪𑀢𑀭𑀜𑁆𑀘 𑀳𑁄𑀢𑀺. 𑀬𑀲𑁆𑀫𑀸 𑀘 𑀲𑀭𑀡𑀕𑀫𑀦𑀁 𑀦𑀸𑀫 𑀢𑀺𑀡𑁆𑀡𑀁 𑀭𑀢𑀦𑀸𑀦𑀁 𑀚𑀻𑀯𑀺𑀢𑀧𑀭𑀺𑀘𑁆𑀘𑀸𑀕𑀫𑀬𑀁 𑀧𑀼𑀜𑁆𑀜𑀓𑀫𑁆𑀫𑀁 𑀲𑀕𑁆𑀕𑀲𑀫𑁆𑀧𑀢𑁆𑀢𑀺𑀁 𑀤𑁂𑀢𑀺, 𑀢𑀲𑁆𑀫𑀸 𑀫𑀳𑀧𑁆𑀨𑀮𑀢𑀭𑀜𑁆𑀘 𑀫𑀳𑀸𑀦𑀺𑀲𑀁𑀲𑀢𑀭𑀜𑁆𑀘𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀺𑀡𑁆𑀡𑀁 𑀧𑀦 𑀭𑀢𑀦𑀸𑀦𑀁 𑀚𑀻𑀯𑀺𑀢𑀧𑀭𑀺𑀘𑁆𑀘𑀸𑀕𑀯𑀲𑁂𑀦 𑀬𑀜𑁆𑀜𑁄𑀢𑀺 𑀯𑀼𑀘𑁆𑀘𑀢𑀺.

𑁩𑁫𑁨. 𑀇𑀤𑀁 𑀲𑀼𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀢𑁆𑀢𑀦𑁄 𑀚𑀻𑀯𑀺𑀢𑀁 𑀦𑀸𑀫 𑀧𑀭𑀲𑁆𑀲 𑀧𑀭𑀺𑀘𑁆𑀘𑀚𑀺𑀢𑀼𑀁 𑀤𑀼𑀓𑁆𑀓𑀭𑀁, 𑀅𑀢𑁆𑀣𑀺 𑀦𑀼 𑀔𑁄 𑀇𑀢𑁄𑀧𑀺 𑀅𑀧𑁆𑀧𑀝𑁆𑀞𑀢𑀭𑁄 𑀬𑀜𑁆𑀜𑁄’’𑀢𑀺 𑀢𑀢𑁄 𑀢𑀁 𑀧𑀼𑀘𑁆𑀙𑀦𑁆𑀢𑁄 𑀧𑀼𑀦 ‘‘𑀅𑀢𑁆𑀣𑀺 𑀧𑀦, 𑀪𑁄 𑀕𑁄𑀢𑀫𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀧𑀸𑀡𑀸𑀢𑀺𑀧𑀸𑀢𑀸 𑀯𑁂𑀭𑀫𑀡𑀻𑀢𑀺𑀆𑀤𑀻𑀲𑀼 𑀯𑁂𑀭𑀫𑀡𑀻 𑀦𑀸𑀫 𑀯𑀺𑀭𑀢𑀺. 𑀲𑀸 𑀢𑀺𑀯𑀺𑀥𑀸 𑀳𑁄𑀢𑀺 𑁋 𑀲𑀫𑁆𑀧𑀢𑁆𑀢𑀯𑀺𑀭𑀢𑀺, 𑀲𑀫𑀸𑀤𑀸𑀦𑀯𑀺𑀭𑀢𑀺 𑀲𑁂𑀢𑀼𑀖𑀸𑀢𑀯𑀺𑀭𑀢𑀻𑀢𑀺. 𑀢𑀢𑁆𑀣 𑀬𑁄 𑀲𑀺𑀓𑁆𑀔𑀸𑀧𑀤𑀸𑀦𑀺 𑀅𑀕𑀳𑁂𑀢𑁆𑀯𑀸𑀧𑀺 𑀓𑁂𑀯𑀮𑀁 𑀅𑀢𑁆𑀢𑀦𑁄 𑀚𑀸𑀢𑀺𑀕𑁄𑀢𑁆𑀢𑀓𑀼𑀮𑀸𑀧𑀤𑁂𑀲𑀸𑀤𑀻𑀦𑀺 𑀅𑀦𑀼𑀲𑁆𑀲𑀭𑀺𑀢𑁆𑀯𑀸 𑁋 ‘‘𑀦 𑀫𑁂 𑀇𑀤𑀁 𑀧𑀢𑀺𑀭𑀽𑀧’’𑀦𑁆𑀢𑀺 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀦𑀺 𑀦 𑀓𑀭𑁄𑀢𑀺, 𑀲𑀫𑁆𑀧𑀢𑁆𑀢𑀯𑀢𑁆𑀣𑀼𑀁 𑀧𑀭𑀺𑀳𑀭𑀢𑀺. 𑀢𑀢𑁄 𑀆𑀭𑀓𑀸 𑀯𑀺𑀭𑀫𑀢𑀺. 𑀢𑀲𑁆𑀲 𑀲𑀸 𑀯𑀺𑀭𑀢𑀺 𑀲𑀫𑁆𑀧𑀢𑁆𑀢𑀯𑀺𑀭𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸.

‘‘𑀅𑀚𑁆𑀚𑀢𑀕𑁆𑀕𑁂 𑀚𑀻𑀯𑀺𑀢𑀳𑁂𑀢𑀼𑀧𑀺 𑀧𑀸𑀡𑀁 𑀦 𑀳𑀦𑀸𑀫𑀻’’𑀢𑀺 𑀯𑀸 ‘‘𑀧𑀸𑀡𑀸𑀢𑀺𑀧𑀸𑀢𑀸 𑀯𑀺𑀭𑀫𑀸𑀫𑀻’’𑀢𑀺 𑀯𑀸 ‘‘𑀯𑁂𑀭𑀫𑀡𑀺𑀁 𑀲𑀫𑀸𑀤𑀺𑀬𑀸𑀫𑀻’’𑀢𑀺 𑀯𑀸 𑀏𑀯𑀁 𑀲𑀺𑀓𑁆𑀔𑀸𑀧𑀤𑀸𑀦𑀺 𑀕𑀡𑁆𑀳𑀦𑁆𑀢𑀲𑁆𑀲 𑀧𑀦 𑀯𑀺𑀭𑀢𑀺 𑀲𑀫𑀸𑀤𑀸𑀦𑀯𑀺𑀭𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀅𑀭𑀺𑀬𑀲𑀸𑀯𑀓𑀸𑀦𑀁 𑀧𑀦 𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀸 𑀯𑀺𑀭𑀢𑀺 𑀲𑁂𑀢𑀼𑀖𑀸𑀢𑀯𑀺𑀭𑀢𑀺 𑀦𑀸𑀫. 𑀢𑀢𑁆𑀣 𑀧𑀼𑀭𑀺𑀫𑀸 𑀤𑁆𑀯𑁂 𑀯𑀺𑀭𑀢𑀺𑀬𑁄 𑀬𑀁 𑀯𑁄𑀭𑁄𑀧𑀦𑀸𑀤𑀺𑀯𑀲𑁂𑀦 𑀯𑀻𑀢𑀺𑀓𑁆𑀓𑀫𑀺𑀢𑀩𑁆𑀩𑀁 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀸𑀤𑀺𑀯𑀢𑁆𑀣𑀼, 𑀢𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀧𑀯𑀢𑁆𑀢𑀦𑁆𑀢𑀺. 𑀧𑀘𑁆𑀙𑀺𑀫𑀸 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀸𑀯. 𑀏𑀢𑁆𑀣 𑀘 𑀬𑁄 𑀧𑀜𑁆𑀘 𑀲𑀺𑀓𑁆𑀔𑀸𑀧𑀤𑀸𑀦𑀺 𑀏𑀓𑀢𑁄 𑀕𑀡𑁆𑀳𑀢𑀺, 𑀢𑀲𑁆𑀲 𑀏𑀓𑀲𑁆𑀫𑀺𑀁 𑀪𑀺𑀦𑁆𑀦𑁂 𑀲𑀩𑁆𑀩𑀸𑀦𑀺 𑀪𑀺𑀦𑁆𑀦𑀸𑀦𑀺 𑀳𑁄𑀦𑁆𑀢𑀺. 𑀬𑁄 𑀏𑀓𑁂𑀓𑀁 𑀕𑀡𑁆𑀳𑀢𑀺, 𑀲𑁄 𑀬𑀁 𑀯𑀻𑀢𑀺𑀓𑁆𑀓𑀫𑀢𑀺, 𑀢𑀤𑁂𑀯 𑀪𑀺𑀚𑁆𑀚𑀢𑀺. 𑀲𑁂𑀢𑀼𑀖𑀸𑀢𑀯𑀺𑀭𑀢𑀺𑀬𑀸 𑀧𑀦 𑀪𑁂𑀤𑁄 𑀦𑀸𑀫 𑀦𑀢𑁆𑀣𑀺, 𑀪𑀯𑀦𑁆𑀢𑀭𑁂𑀧𑀺 𑀳𑀺 𑀅𑀭𑀺𑀬𑀲𑀸𑀯𑀓𑁄 𑀚𑀻𑀯𑀺𑀢𑀳𑁂𑀢𑀼𑀧𑀺 𑀦𑁂𑀯 𑀧𑀸𑀡𑀁 𑀳𑀦𑀢𑀺 𑀦 𑀲𑀼𑀭𑀁 𑀧𑀺𑀯𑀢𑀺. 𑀲𑀘𑁂𑀧𑀺𑀲𑁆𑀲 𑀲𑀼𑀭𑀜𑁆𑀘 𑀔𑀻𑀭𑀜𑁆𑀘 𑀫𑀺𑀲𑁆𑀲𑁂𑀢𑁆𑀯𑀸 𑀫𑀼𑀔𑁂 𑀧𑀓𑁆𑀔𑀺𑀧𑀦𑁆𑀢𑀺, 𑀔𑀻𑀭𑀫𑁂𑀯 𑀧𑀯𑀺𑀲𑀢𑀺, 𑀦 𑀲𑀼𑀭𑀸. 𑀬𑀣𑀸 𑀓𑀺𑀁? 𑀓𑁄𑀜𑁆𑀘𑀲𑀓𑀼𑀡𑀸𑀦𑀁 𑀔𑀻𑀭𑀫𑀺𑀲𑁆𑀲𑀓𑁂 𑀉𑀤𑀓𑁂 𑀔𑀻𑀭𑀫𑁂𑀯 𑀧𑀯𑀺𑀲𑀢𑀺? 𑀦 𑀉𑀤𑀓𑀁. 𑀇𑀤𑀁 𑀬𑁄𑀦𑀺𑀲𑀺𑀤𑁆𑀥𑀦𑁆𑀢𑀺 𑀘𑁂, 𑀇𑀤𑀁 𑀥𑀫𑁆𑀫𑀢𑀸𑀲𑀺𑀤𑁆𑀥𑀦𑁆𑀢𑀺 𑀘 𑀯𑁂𑀤𑀺𑀢𑀩𑁆𑀩𑀁. 𑀬𑀲𑁆𑀫𑀸 𑀧𑀦 𑀲𑀭𑀡𑀕𑀫𑀦𑁂 𑀤𑀺𑀝𑁆𑀞𑀺𑀉𑀚𑀼𑀓𑀓𑀭𑀡𑀁 𑀦𑀸𑀫 𑀪𑀸𑀭𑀺𑀬𑀁. 𑀲𑀺𑀓𑁆𑀔𑀸𑀧𑀤𑀲𑀫𑀸𑀤𑀸𑀦𑁂 𑀧𑀦 𑀯𑀺𑀭𑀢𑀺𑀫𑀢𑁆𑀢𑀓𑀫𑁂𑀯. 𑀢𑀲𑁆𑀫𑀸 𑀏𑀢𑀁 𑀬𑀣𑀸 𑀯𑀸 𑀢𑀣𑀸 𑀯𑀸 𑀕𑀡𑁆𑀳𑀦𑁆𑀢𑀲𑁆𑀲𑀸𑀧𑀺 𑀲𑀸𑀥𑀼𑀓𑀁 𑀕𑀡𑁆𑀳𑀦𑁆𑀢𑀲𑁆𑀲𑀸𑀧𑀺 𑀅𑀧𑁆𑀧𑀝𑁆𑀞𑀢𑀭𑀜𑁆𑀘 𑀅𑀧𑁆𑀧𑀲𑀫𑀸𑀭𑀫𑁆𑀪𑀢𑀭𑀜𑁆𑀘. 𑀧𑀜𑁆𑀘𑀲𑀻𑀮𑀲𑀤𑀺𑀲𑀲𑁆𑀲 𑀧𑀦 𑀤𑀸𑀦𑀲𑁆𑀲 𑀅𑀪𑀸𑀯𑀢𑁄 𑀏𑀢𑁆𑀣 𑀫𑀳𑀧𑁆𑀨𑀮𑀢𑀸 𑀫𑀳𑀸𑀦𑀺𑀲𑀁𑀲𑀢𑀸 𑀘 𑀯𑁂𑀤𑀺𑀢𑀩𑁆𑀩𑀸. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀧𑀜𑁆𑀘𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀤𑀸𑀦𑀸𑀦𑀺 𑀫𑀳𑀸𑀤𑀸𑀦𑀸𑀦𑀺 𑀅𑀕𑁆𑀕𑀜𑁆𑀜𑀸𑀦𑀺 𑀭𑀢𑁆𑀢𑀜𑁆𑀜𑀸𑀦𑀺 𑀯𑀁𑀲𑀜𑁆𑀜𑀸𑀦𑀺 𑀧𑁄𑀭𑀸𑀡𑀸𑀦𑀺 𑀅𑀲𑀁𑀓𑀺𑀡𑁆𑀡𑀸𑀦𑀺 𑀅𑀲𑀁𑀓𑀺𑀡𑁆𑀡𑀧𑀼𑀩𑁆𑀩𑀸𑀦𑀺 𑀦 𑀲𑀗𑁆𑀓𑀺𑀬𑀦𑁆𑀢𑀺 𑀦 𑀲𑀗𑁆𑀓𑀺𑀬𑀺𑀲𑁆𑀲𑀦𑁆𑀢𑀺 𑀅𑀧𑁆𑀧𑀝𑀺𑀓𑀼𑀝𑁆𑀞𑀸𑀦𑀺 𑀲𑀫𑀡𑁂𑀳𑀺 𑀩𑁆𑀭𑀸𑀳𑁆𑀫𑀡𑁂𑀳𑀺 𑀯𑀺𑀜𑁆𑀜𑀽𑀳𑀺. 𑀓𑀢𑀫𑀸𑀦𑀺 𑀧𑀜𑁆𑀘? 𑀇𑀥, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑀸𑀯𑀓𑁄 𑀧𑀸𑀡𑀸𑀢𑀺𑀧𑀸𑀢𑀁 𑀧𑀳𑀸𑀬 𑀧𑀸𑀡𑀸𑀢𑀺𑀧𑀸𑀢𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺. 𑀧𑀸𑀡𑀸𑀢𑀺𑀧𑀸𑀢𑀸 𑀧𑀝𑀺𑀯𑀺𑀭𑀢𑁄, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑀸𑀯𑀓𑁄 𑀅𑀧𑀭𑀺𑀫𑀸𑀡𑀸𑀦𑀁 𑀲𑀢𑁆𑀢𑀸𑀦𑀁 𑀅𑀪𑀬𑀁 𑀤𑁂𑀢𑀺, 𑀅𑀯𑁂𑀭𑀁 𑀤𑁂𑀢𑀺 𑀅𑀩𑁆𑀬𑀸𑀧𑀚𑁆𑀛𑀁 𑀤𑁂𑀢𑀺. 𑀅𑀧𑀭𑀺𑀫𑀸𑀡𑀸𑀦𑀁 𑀲𑀢𑁆𑀢𑀸𑀦𑀁 𑀅𑀪𑀬𑀁 𑀤𑀢𑁆𑀯𑀸 𑀅𑀯𑁂𑀭𑀁 𑀤𑀢𑁆𑀯𑀸 𑀅𑀩𑁆𑀬𑀸𑀧𑀚𑁆𑀛𑀁 𑀤𑀢𑁆𑀯𑀸 𑀅𑀧𑀭𑀺𑀫𑀸𑀡𑀲𑁆𑀲 𑀅𑀪𑀬𑀲𑁆𑀲 𑀅𑀯𑁂𑀭𑀲𑁆𑀲 𑀅𑀩𑁆𑀬𑀸𑀧𑀚𑁆𑀛𑀲𑁆𑀲 𑀪𑀸𑀕𑀻 𑀳𑁄𑀢𑀺. 𑀇𑀤𑀁, 𑀪𑀺𑀓𑁆𑀔𑀯𑁂, 𑀧𑀞𑀫𑀁 𑀤𑀸𑀦𑀁 𑀫𑀳𑀸𑀤𑀸𑀦𑀁…𑀧𑁂… 𑀯𑀺𑀜𑁆𑀜𑀽𑀳𑀻𑀢𑀺.

𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑀸𑀯𑀓𑁄 𑀅𑀤𑀺𑀦𑁆𑀦𑀸𑀤𑀸𑀦𑀁 𑀧𑀳𑀸𑀬…𑀧𑁂… 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀁 𑀧𑀳𑀸𑀬…𑀧𑁂… 𑀫𑀼𑀲𑀸𑀯𑀸𑀤𑀁 𑀧𑀳𑀸𑀬…𑀧𑁂… 𑀲𑀼𑀭𑀸𑀫𑁂𑀭𑀬𑀫𑀚𑁆𑀚𑀧𑀫𑀸𑀤𑀝𑁆𑀞𑀸𑀦𑀁 𑀧𑀳𑀸𑀬…𑀧𑁂… 𑀇𑀫𑀸𑀦𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘 𑀤𑀸𑀦𑀸𑀦𑀺 𑀫𑀳𑀸𑀤𑀸𑀦𑀸𑀦𑀺 𑀅𑀕𑁆𑀕𑀜𑁆𑀜𑀸𑀦𑀺…𑀧𑁂… 𑀯𑀺𑀜𑁆𑀜𑀽𑀳𑀻’’𑀢𑀺 (𑀅. 𑀦𑀺. 𑁮.𑁩𑁯).

𑀇𑀤𑀜𑁆𑀘 𑀧𑀦 𑀲𑀻𑀮𑀧𑀜𑁆𑀘𑀓𑀁 𑁋 ‘‘𑀅𑀢𑁆𑀢𑀲𑀺𑀦𑁂𑀳𑀜𑁆𑀘 𑀚𑀻𑀯𑀺𑀢𑀲𑀺𑀦𑁂𑀳𑀜𑁆𑀘 𑀧𑀭𑀺𑀘𑁆𑀘𑀚𑀺𑀢𑁆𑀯𑀸 𑀭𑀓𑁆𑀔𑀺𑀲𑁆𑀲𑀸𑀫𑀻’’𑀢𑀺 𑀲𑀫𑀸𑀤𑀺𑀦𑁆𑀦𑀢𑀸𑀬 𑀬𑀜𑁆𑀜𑁄𑀢𑀺 𑀯𑀼𑀘𑁆𑀘𑀢𑀺. 𑀢𑀢𑁆𑀣 𑀓𑀺𑀜𑁆𑀘𑀸𑀧𑀺 𑀧𑀜𑁆𑀘𑀲𑀻𑀮𑀢𑁄 𑀲𑀭𑀡𑀕𑀫𑀦𑀫𑁂𑀯 𑀚𑁂𑀝𑁆𑀞𑀓𑀁, 𑀇𑀤𑀁 𑀧𑀦 𑀲𑀭𑀡𑀕𑀫𑀦𑁂𑀬𑁂𑀯 𑀧𑀢𑀺𑀝𑁆𑀞𑀸𑀬 𑀭𑀓𑁆𑀔𑀺𑀢𑀲𑀻𑀮𑀯𑀲𑁂𑀦 𑀫𑀳𑀧𑁆𑀨𑀮𑀦𑁆𑀢𑀺 𑀯𑀼𑀢𑁆𑀢𑀁.

𑁩𑁫𑁩. 𑀇𑀤𑀫𑁆𑀧𑀺 𑀲𑀼𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀧𑀜𑁆𑀘𑀲𑀻𑀮𑀁 𑀦𑀸𑀫 𑀭𑀓𑁆𑀔𑀺𑀢𑀼𑀁 𑀕𑀭𑀼𑀓𑀁, 𑀅𑀢𑁆𑀣𑀺 𑀦𑀼 𑀔𑁄 𑀅𑀜𑁆𑀜𑀁 𑀓𑀺𑀜𑁆𑀘𑀺 𑀈𑀤𑀺𑀲𑀫𑁂𑀯 𑀳𑀼𑀢𑁆𑀯𑀸 𑀇𑀢𑁄 𑀅𑀧𑁆𑀧𑀝𑁆𑀞𑀢𑀭𑀜𑁆𑀘 𑀫𑀳𑀧𑁆𑀨𑀮𑀢𑀭𑀜𑁆𑀘𑀸’’𑀢𑀺. 𑀢𑀢𑁄 𑀢𑀁 𑀧𑀼𑀘𑁆𑀙𑀦𑁆𑀢𑁄 𑀧𑀼𑀦𑀧𑀺 𑁋 ‘‘𑀅𑀢𑁆𑀣𑀺 𑀧𑀦, 𑀪𑁄 𑀕𑁄𑀢𑀫𑀸’’𑀢𑀺𑀆𑀤𑀺𑀫𑀸𑀳. 𑀅𑀣𑀲𑁆𑀲 𑀪𑀕𑀯𑀸 𑀢𑀺𑀯𑀺𑀥𑀲𑀻𑀮𑀧𑀸𑀭𑀺𑀧𑀽𑀭𑀺𑀬𑀁 𑀞𑀺𑀢𑀲𑁆𑀲 𑀧𑀞𑀫𑀚𑁆𑀛𑀸𑀦𑀸𑀤𑀻𑀦𑀁 𑀬𑀜𑁆𑀜𑀸𑀦𑀁 𑀅𑀧𑁆𑀧𑀝𑁆𑀞𑀢𑀭𑀜𑁆𑀘 𑀫𑀳𑀧𑁆𑀨𑀮𑀢𑀭𑀜𑁆𑀘 𑀤𑀲𑁆𑀲𑁂𑀢𑀼𑀓𑀸𑀫𑁄 𑀩𑀼𑀤𑁆𑀥𑀼𑀧𑁆𑀧𑀸𑀤𑀢𑁄 𑀧𑀝𑁆𑀞𑀸𑀬 𑀤𑁂𑀲𑀦𑀁 𑀆𑀭𑀪𑀦𑁆𑀢𑁄 ‘‘𑀇𑀥 𑀩𑁆𑀭𑀸𑀳𑁆𑀫𑀡𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀬𑀲𑁆𑀫𑀸 𑀳𑁂𑀝𑁆𑀞𑀸 𑀯𑀼𑀢𑁆𑀢𑁂𑀳𑀺 𑀕𑀼𑀡𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀧𑀞𑀫𑀁 𑀛𑀸𑀦𑀁, 𑀧𑀞𑀫𑀚𑁆𑀛𑀸𑀦𑀸𑀤𑀻𑀲𑀼 𑀞𑀺𑀢𑁄 𑀤𑀼𑀢𑀺𑀬𑀚𑁆𑀛𑀸𑀦𑀸𑀤𑀻𑀦𑀺 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑁄 𑀦 𑀓𑀺𑀮𑀫𑀢𑀺, 𑀢𑀲𑁆𑀫𑀸 𑀢𑀸𑀦𑀺 𑀅𑀧𑁆𑀧𑀝𑁆𑀞𑀸𑀦𑀺 𑀅𑀧𑁆𑀧𑀲𑀫𑀸𑀭𑀫𑁆𑀪𑀸𑀦𑀺. 𑀬𑀲𑁆𑀫𑀸 𑀧𑀦𑁂𑀢𑁆𑀣 𑀧𑀞𑀫𑀚𑁆𑀛𑀸𑀦𑀁 𑀏𑀓𑀁 𑀓𑀧𑁆𑀧𑀁 𑀩𑁆𑀭𑀳𑁆𑀫𑀮𑁄𑀓𑁂 𑀆𑀬𑀼𑀁 𑀤𑁂𑀢𑀺. 𑀤𑀼𑀢𑀺𑀬𑀁 𑀅𑀝𑁆𑀞𑀓𑀧𑁆𑀧𑁂. 𑀢𑀢𑀺𑀬𑀁 𑀘𑀢𑀼𑀲𑀝𑁆𑀞𑀺𑀓𑀧𑁆𑀧𑁂. 𑀘𑀢𑀼𑀢𑁆𑀣𑀁 𑀧𑀜𑁆𑀘𑀓𑀧𑁆𑀧𑀲𑀢𑀸𑀦𑀺. 𑀢𑀤𑁂𑀯 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀸𑀤𑀺𑀲𑀫𑀸𑀧𑀢𑁆𑀢𑀺𑀯𑀲𑁂𑀦 𑀪𑀸𑀯𑀺𑀢𑀁 𑀯𑀻𑀲𑀢𑀺, 𑀘𑀢𑁆𑀢𑀸𑀮𑀻𑀲𑀁, 𑀲𑀝𑁆𑀞𑀺, 𑀘𑀢𑀼𑀭𑀸𑀲𑀻𑀢𑀺 𑀘 𑀓𑀧𑁆𑀧𑀲𑀳𑀲𑁆𑀲𑀸𑀦𑀺 𑀆𑀬𑀼𑀁 𑀤𑁂𑀢𑀺; 𑀢𑀲𑁆𑀫𑀸 𑀫𑀳𑀧𑁆𑀨𑀮𑀢𑀭𑀜𑁆𑀘 𑀫𑀳𑀸𑀦𑀺𑀲𑀁𑀲𑀢𑀭𑀜𑁆𑀘. 𑀦𑀻𑀯𑀭𑀡𑀸𑀤𑀻𑀦𑀁 𑀧𑀦 𑀧𑀘𑁆𑀘𑀦𑀻𑀓𑀸𑀦𑀁 𑀥𑀫𑁆𑀫𑀸𑀦𑀁 𑀧𑀭𑀺𑀘𑁆𑀘𑀢𑁆𑀢𑀢𑁆𑀢𑀸 𑀢𑀁 𑀬𑀜𑁆𑀜𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀯𑀺𑀧𑀲𑁆𑀲𑀦𑀸𑀜𑀸𑀡𑀫𑁆𑀧𑀺 𑀬𑀲𑁆𑀫𑀸 𑀘𑀢𑀼𑀢𑁆𑀣𑀚𑁆𑀛𑀸𑀦𑀧𑀭𑀺𑀬𑁄𑀲𑀸𑀦𑁂𑀲𑀼 𑀕𑀼𑀡𑁂𑀲𑀼 𑀧𑀢𑀺𑀝𑁆𑀞𑀸𑀬 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑁄 𑀦 𑀓𑀺𑀮𑀫𑀢𑀺, 𑀢𑀲𑁆𑀫𑀸 𑀅𑀧𑁆𑀧𑀝𑁆𑀞𑀁 𑀅𑀧𑁆𑀧𑀲𑀫𑀸𑀭𑀫𑁆𑀪𑀁; 𑀯𑀺𑀧𑀲𑁆𑀲𑀦𑀸𑀲𑀼𑀔𑀲𑀤𑀺𑀲𑀲𑁆𑀲 𑀧𑀦 𑀲𑀼𑀔𑀲𑁆𑀲 𑀅𑀪𑀸𑀯𑀸 𑀫𑀳𑀧𑁆𑀨𑀮𑀁. 𑀧𑀘𑁆𑀘𑀦𑀻𑀓𑀓𑀺𑀮𑁂𑀲𑀧𑀭𑀺𑀘𑁆𑀘𑀸𑀕𑀢𑁄 𑀬𑀜𑁆𑀜𑁄𑀢𑀺. 𑀫𑀦𑁄𑀫𑀬𑀺𑀤𑁆𑀥𑀺𑀧𑀺 𑀬𑀲𑁆𑀫𑀸 𑀯𑀺𑀧𑀲𑁆𑀲𑀦𑀸𑀜𑀸𑀡𑁂 𑀧𑀢𑀺𑀝𑁆𑀞𑀸𑀬 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑁄 𑀦 𑀓𑀺𑀮𑀫𑀢𑀺, 𑀢𑀲𑁆𑀫𑀸 𑀅𑀧𑁆𑀧𑀝𑁆𑀞𑀸 𑀅𑀧𑁆𑀧𑀲𑀫𑀸𑀭𑀫𑁆𑀪𑀸; 𑀅𑀢𑁆𑀢𑀦𑁄 𑀲𑀤𑀺𑀲𑀭𑀽𑀧𑀦𑀺𑀫𑁆𑀫𑀸𑀦𑀲𑀫𑀢𑁆𑀣𑀢𑀸𑀬 𑀫𑀳𑀧𑁆𑀨𑀮𑀸. 𑀅𑀢𑁆𑀢𑀦𑁄 𑀧𑀘𑁆𑀘𑀦𑀻𑀓𑀓𑀺𑀮𑁂𑀲𑀧𑀭𑀺𑀘𑁆𑀘𑀸𑀕𑀢𑁄 𑀬𑀜𑁆𑀜𑁄. 𑀇𑀤𑁆𑀥𑀺𑀯𑀺𑀥𑀜𑀸𑀡𑀸𑀤𑀻𑀦𑀺𑀧𑀺 𑀬𑀲𑁆𑀫𑀸 𑀫𑀦𑁄𑀫𑀬𑀜𑀸𑀡𑀸𑀤𑀻𑀲𑀼 𑀧𑀢𑀺𑀝𑁆𑀞𑀸𑀬 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑁄 𑀦 𑀓𑀺𑀮𑀫𑀢𑀺, 𑀢𑀲𑁆𑀫𑀸 𑀅𑀧𑁆𑀧𑀝𑁆𑀞𑀸𑀦𑀺 𑀅𑀧𑁆𑀧𑀲𑀫𑀸𑀭𑀫𑁆𑀪𑀸𑀦𑀺, 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀧𑀘𑁆𑀘𑀦𑀻𑀓𑀓𑀺𑀮𑁂𑀲𑀧𑁆𑀧𑀳𑀸𑀦𑀢𑁄 𑀬𑀜𑁆𑀜𑁄. 𑀇𑀤𑁆𑀥𑀺𑀯𑀺𑀥𑀁 𑀧𑀦𑁂𑀢𑁆𑀣 𑀦𑀸𑀦𑀸𑀯𑀺𑀥𑀯𑀺𑀓𑀼𑀩𑁆𑀩𑀦𑀤𑀲𑁆𑀲𑀦𑀲𑀫𑀢𑁆𑀣𑀢𑀸𑀬. 𑀤𑀺𑀩𑁆𑀩𑀲𑁄𑀢𑀁 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀲𑀤𑁆𑀤𑀲𑀯𑀦𑀲𑀫𑀢𑁆𑀣𑀢𑀸𑀬; 𑀘𑁂𑀢𑁄𑀧𑀭𑀺𑀬𑀜𑀸𑀡𑀁 𑀧𑀭𑁂𑀲𑀁 𑀲𑁄𑀴𑀲𑀯𑀺𑀥𑀘𑀺𑀢𑁆𑀢𑀚𑀸𑀦𑀦𑀲𑀫𑀢𑁆𑀣𑀢𑀸𑀬; 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀜𑀸𑀡𑀁 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀝𑁆𑀞𑀸𑀦𑀲𑀫𑀦𑀼𑀲𑁆𑀲𑀭𑀡𑀲𑀫𑀢𑁆𑀣𑀢𑀸𑀬; 𑀤𑀺𑀩𑁆𑀩𑀘𑀓𑁆𑀔𑀼 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀭𑀽𑀧𑀤𑀲𑁆𑀲𑀦𑀲𑀫𑀢𑁆𑀣𑀢𑀸𑀬; 𑀆𑀲𑀯𑀓𑁆𑀔𑀬𑀜𑀸𑀡𑀁 𑀅𑀢𑀺𑀧𑀡𑀻𑀢𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑀲𑀼𑀔𑀦𑀺𑀧𑁆𑀨𑀸𑀤𑀦𑀲𑀫𑀢𑁆𑀣𑀢𑀸𑀬 𑀫𑀳𑀧𑁆𑀨𑀮𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀬𑀲𑁆𑀫𑀸 𑀧𑀦 𑀅𑀭𑀳𑀢𑁆𑀢𑀢𑁄 𑀯𑀺𑀲𑀺𑀝𑁆𑀞𑀢𑀭𑁄 𑀅𑀜𑁆𑀜𑁄 𑀬𑀜𑁆𑀜𑁄 𑀦𑀸𑀫 𑀦𑀢𑁆𑀣𑀺, 𑀢𑀲𑁆𑀫𑀸 𑀅𑀭𑀳𑀢𑁆𑀢𑀦𑀺𑀓𑀽𑀝𑁂𑀦𑁂𑀯 𑀤𑁂𑀲𑀦𑀁 𑀲𑀫𑀸𑀧𑁂𑀦𑁆𑀢𑁄 𑁋 ‘‘𑀅𑀬𑀫𑁆𑀧𑀺 𑀔𑁄, 𑀩𑁆𑀭𑀸𑀳𑁆𑀫𑀡𑀸’’𑀢𑀺𑀆𑀤𑀺𑀫𑀸𑀳.

𑀓𑀽𑀝𑀤𑀦𑁆𑀢𑀉𑀧𑀸𑀲𑀓𑀢𑁆𑀢𑀧𑀝𑀺𑀯𑁂𑀤𑀦𑀸𑀯𑀡𑁆𑀡𑀦𑀸

𑁩𑁫𑁪-𑁩𑁫𑁮. 𑀏𑀯𑀁 𑀯𑀼𑀢𑁆𑀢𑁂𑀢𑀺 𑀏𑀯𑀁 𑀪𑀕𑀯𑀢𑀸 𑀯𑀼𑀢𑁆𑀢𑁂 𑀤𑁂𑀲𑀦𑀸𑀬 𑀧𑀲𑀻𑀤𑀺𑀢𑁆𑀯𑀸 𑀲𑀭𑀡𑀁 𑀕𑀦𑁆𑀢𑀼𑀓𑀸𑀫𑁄 𑀓𑀽𑀝𑀤𑀦𑁆𑀢𑁄 𑀩𑁆𑀭𑀸𑀳𑁆𑀫𑀡𑁄 𑁋 ‘𑀏𑀢𑀁 𑀅𑀪𑀺𑀓𑁆𑀓𑀦𑁆𑀢𑀁 𑀪𑁄, 𑀕𑁄𑀢𑀫𑀸’𑀢𑀺𑀆𑀤𑀺𑀓𑀁 𑀯𑀘𑀦𑀁 𑀅𑀯𑁄𑀘. 𑀉𑀧𑀯𑀸𑀬𑀢𑀽𑀢𑀺 𑀉𑀧𑀕𑀦𑁆𑀢𑁆𑀯𑀸 𑀲𑀭𑀻𑀭𑀤𑀭𑀣𑀁 𑀦𑀺𑀩𑁆𑀩𑀸𑀧𑁂𑀦𑁆𑀢𑁄 𑀢𑀦𑀼𑀲𑀻𑀢𑀮𑁄 𑀯𑀸𑀢𑁄 𑀯𑀸𑀬𑀢𑀽𑀢𑀺. 𑀇𑀤𑀜𑁆𑀘 𑀧𑀦 𑀯𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑁄 𑀧𑀼𑀭𑀺𑀲𑀁 𑀧𑁂𑀲𑁂𑀲𑀺 𑁋 ‘‘𑀕𑀘𑁆𑀙, 𑀢𑀸𑀢, 𑀬𑀜𑁆𑀜𑀯𑀸𑀝𑀁 𑀧𑀯𑀺𑀲𑀺𑀢𑁆𑀯𑀸 𑀲𑀩𑁆𑀩𑁂 𑀢𑁂 𑀧𑀸𑀡𑀬𑁄 𑀩𑀦𑁆𑀥𑀦𑀸 𑀫𑁄𑀘𑁂𑀳𑀻’’𑀢𑀺. 𑀲𑁄 ‘‘𑀲𑀸𑀥𑀽’’𑀢𑀺 𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸 𑀢𑀣𑀸 𑀓𑀢𑁆𑀯𑀸 𑀆𑀕𑀦𑁆𑀢𑁆𑀯𑀸 ‘‘𑀫𑀼𑀢𑁆𑀢𑀸 𑀪𑁄, 𑀢𑁂 𑀧𑀸𑀡𑀬𑁄’’𑀢𑀺 𑀆𑀭𑁄𑀘𑁂𑀲𑀺. 𑀬𑀸𑀯 𑀩𑁆𑀭𑀸𑀳𑁆𑀫𑀡𑁄 𑀢𑀁 𑀧𑀯𑀢𑁆𑀢𑀺𑀁 𑀦 𑀲𑀼𑀡𑀺, 𑀦 𑀢𑀸𑀯 𑀪𑀕𑀯𑀸 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀓𑀲𑁆𑀫𑀸? ‘‘𑀩𑁆𑀭𑀸𑀳𑁆𑀫𑀡𑀲𑁆𑀲 𑀘𑀺𑀢𑁆𑀢𑁂 𑀆𑀓𑀼𑀮𑀪𑀸𑀯𑁄 𑀅𑀢𑁆𑀣𑀻’’𑀢𑀺. 𑀲𑀼𑀢𑁆𑀯𑀸 𑀧𑀦𑀲𑁆𑀲 ‘‘𑀩𑀳𑀽 𑀯𑀢 𑀫𑁂 𑀧𑀸𑀡𑀸 𑀫𑁄𑀘𑀺𑀢𑀸’’𑀢𑀺 𑀘𑀺𑀢𑁆𑀢𑀘𑀸𑀭𑁄 𑀯𑀺𑀧𑁆𑀧𑀲𑀻𑀤𑀢𑀺. 𑀪𑀕𑀯𑀸 𑀢𑀲𑁆𑀲 𑀯𑀺𑀧𑁆𑀧𑀲𑀦𑁆𑀦𑀫𑀦𑀢𑀁 𑀜𑀢𑁆𑀯𑀸 𑀥𑀫𑁆𑀫𑀤𑁂𑀲𑀦𑀁 𑀆𑀭𑀪𑀺. 𑀢𑀁 𑀲𑀦𑁆𑀥𑀸𑀬 𑁋 ‘‘𑀅𑀣 𑀔𑁄 𑀪𑀕𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀧𑀼𑀦 ‘𑀓𑀮𑁆𑀮𑀘𑀺𑀢𑁆𑀢’𑀦𑁆𑀢𑀺𑀆𑀤𑀺 𑀆𑀦𑀼𑀧𑀼𑀩𑁆𑀩𑀺𑀓𑀣𑀸𑀦𑀼𑀪𑀸𑀯𑁂𑀦 𑀯𑀺𑀓𑁆𑀔𑀫𑁆𑀪𑀺𑀢𑀦𑀻𑀯𑀭𑀡𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀲𑁂𑀲𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀇𑀢𑀺 𑀲𑀼𑀫𑀗𑁆𑀕𑀮𑀯𑀺𑀮𑀸𑀲𑀺𑀦𑀺𑀬𑀸 𑀤𑀻𑀖𑀦𑀺𑀓𑀸𑀬𑀝𑁆𑀞𑀓𑀣𑀸𑀬𑀁

𑀓𑀽𑀝𑀤𑀦𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.