𑁩. 𑀅𑀫𑁆𑀩𑀝𑁆𑀞𑀲𑀼𑀢𑁆𑀢𑀯𑀡𑁆𑀡𑀦𑀸

𑀅𑀤𑁆𑀥𑀸𑀦𑀕𑀫𑀦𑀯𑀡𑁆𑀡𑀦𑀸

𑁨𑁫𑁪. 𑀏𑀯𑀁 𑀫𑁂 𑀲𑀼𑀢𑀁…𑀧𑁂… 𑀓𑁄𑀲𑀮𑁂𑀲𑀽𑀢𑀺 𑀅𑀫𑁆𑀩𑀝𑁆𑀞𑀲𑀼𑀢𑁆𑀢𑀁. 𑀢𑀢𑁆𑀭𑀸𑀬𑀁 𑀅𑀧𑀼𑀩𑁆𑀩𑀧𑀤𑀯𑀡𑁆𑀡𑀦𑀸. 𑀓𑁄𑀲𑀮𑁂𑀲𑀽𑀢𑀺 𑀓𑁄𑀲𑀮𑀸 𑀦𑀸𑀫 𑀚𑀸𑀦𑀧𑀤𑀺𑀦𑁄 𑀭𑀸𑀚𑀓𑀼𑀫𑀸𑀭𑀸. 𑀢𑁂𑀲𑀁 𑀦𑀺𑀯𑀸𑀲𑁄 𑀏𑀓𑁄𑀧𑀺 𑀚𑀦𑀧𑀤𑁄 𑀭𑀽𑀴𑁆𑀳𑀻𑀲𑀤𑁆𑀤𑁂𑀦 𑀓𑁄𑀲𑀮𑀸𑀢𑀺 𑀯𑀼𑀘𑁆𑀘𑀢𑀺, 𑀢𑀲𑁆𑀫𑀺𑀁 𑀓𑁄𑀲𑀮𑁂𑀲𑀼 𑀚𑀦𑀧𑀤𑁂. 𑀧𑁄𑀭𑀸𑀡𑀸 𑀧𑀦𑀸𑀳𑀼 𑁋 𑀬𑀲𑁆𑀫𑀸 𑀧𑀼𑀩𑁆𑀩𑁂 𑀫𑀳𑀸𑀧𑀦𑀸𑀤𑀁 𑀭𑀸𑀚𑀓𑀼𑀫𑀸𑀭𑀁 𑀦𑀸𑀦𑀸𑀦𑀸𑀝𑀓𑀸𑀤𑀻𑀦𑀺 𑀤𑀺𑀲𑁆𑀯𑀸 𑀲𑀺𑀢𑀫𑀢𑁆𑀢𑀫𑁆𑀧𑀺 𑀅𑀓𑀭𑁄𑀦𑁆𑀢𑀁 𑀲𑀼𑀢𑁆𑀯𑀸 𑀭𑀸𑀚𑀸 𑀆𑀳 𑁋 ‘‘𑀬𑁄 𑀫𑀫 𑀧𑀼𑀢𑁆𑀢𑀁 𑀳𑀲𑀸𑀧𑁂𑀢𑀺, 𑀲𑀩𑁆𑀩𑀸𑀮𑀗𑁆𑀓𑀸𑀭𑁂𑀦 𑀦𑀁 𑀅𑀮𑀗𑁆𑀓𑀭𑁄𑀫𑀻’’𑀢𑀺. 𑀢𑀢𑁄 𑀦𑀗𑁆𑀕𑀮𑀸𑀦𑀺𑀧𑀺 𑀙𑀟𑁆𑀟𑁂𑀢𑁆𑀯𑀸 𑀫𑀳𑀸𑀚𑀦𑀓𑀸𑀬𑁂 𑀲𑀦𑁆𑀦𑀺𑀧𑀢𑀺𑀢𑁂 𑀫𑀦𑀼𑀲𑁆𑀲𑀸 𑀲𑀸𑀢𑀺𑀭𑁂𑀓𑀸𑀦𑀺 𑀲𑀢𑁆𑀢𑀯𑀲𑁆𑀲𑀸𑀦𑀺 𑀦𑀸𑀦𑀸𑀓𑀻𑀴𑀸𑀬𑁄 𑀤𑀲𑁆𑀲𑁂𑀢𑁆𑀯𑀸𑀧𑀺 𑀢𑀁 𑀳𑀲𑀸𑀧𑁂𑀢𑀼𑀁 𑀦𑀸𑀲𑀓𑁆𑀔𑀺𑀁𑀲𑀼, 𑀢𑀢𑁄 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸 𑀦𑀸𑀝𑀓𑀁 𑀧𑁂𑀲𑁂𑀲𑀺, 𑀲𑁄 𑀤𑀺𑀩𑁆𑀩𑀦𑀸𑀝𑀓𑀁 𑀤𑀲𑁆𑀲𑁂𑀢𑁆𑀯𑀸 𑀳𑀲𑀸𑀧𑁂𑀲𑀺. 𑀅𑀣 𑀢𑁂 𑀫𑀦𑀼𑀲𑁆𑀲𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀯𑀲𑀦𑁄𑀓𑀸𑀲𑀸𑀪𑀺𑀫𑀼𑀔𑀸 𑀧𑀓𑁆𑀓𑀫𑀺𑀁𑀲𑀼. 𑀢𑁂 𑀧𑀝𑀺𑀧𑀣𑁂 𑀫𑀺𑀢𑁆𑀢𑀲𑀼𑀳𑀚𑁆𑀚𑀸𑀤𑀬𑁄 𑀤𑀺𑀲𑁆𑀯𑀸 𑀧𑀝𑀺𑀲𑀦𑁆𑀣𑀸𑀭𑀁 𑀓𑀭𑁄𑀦𑁆𑀢𑀸 𑁋 ‘‘𑀓𑀘𑁆𑀘𑀺 𑀪𑁄 𑀓𑀼𑀲𑀮𑀁, 𑀓𑀘𑁆𑀘𑀺 𑀪𑁄 𑀓𑀼𑀲𑀮’’𑀦𑁆𑀢𑀺 𑀆𑀳𑀁𑀲𑀼. 𑀢𑀲𑁆𑀫𑀸 𑀢𑀁 ‘‘𑀓𑀼𑀲𑀮’’𑀦𑁆𑀢𑀺 𑀯𑀘𑀦𑀁 𑀉𑀧𑀸𑀤𑀸𑀬 𑀲𑁄 𑀧𑀤𑁂𑀲𑁄 𑀓𑁄𑀲𑀮𑀸𑀢𑀺 𑀯𑀼𑀘𑁆𑀘𑀢𑀻𑀢𑀺.

𑀘𑀸𑀭𑀺𑀓𑀁 𑀘𑀭𑀫𑀸𑀦𑁄𑀢𑀺 𑀅𑀤𑁆𑀥𑀸𑀦𑀕𑀫𑀦𑀁 𑀕𑀘𑁆𑀙𑀦𑁆𑀢𑁄. 𑀘𑀸𑀭𑀺𑀓𑀸 𑀘 𑀦𑀸𑀫𑁂𑀲𑀸 𑀪𑀕𑀯𑀢𑁄 𑀤𑀼𑀯𑀺𑀥𑀸 𑀳𑁄𑀢𑀺 𑁋 𑀢𑀼𑀭𑀺𑀢𑀘𑀸𑀭𑀺𑀓𑀸 𑀘, 𑀅𑀢𑀼𑀭𑀺𑀢𑀘𑀸𑀭𑀺𑀓𑀸 𑀘. 𑀢𑀢𑁆𑀣 𑀤𑀽𑀭𑁂𑀧𑀺 𑀩𑁄𑀥𑀦𑁂𑀬𑁆𑀬𑀧𑀼𑀕𑁆𑀕𑀮𑀁 𑀤𑀺𑀲𑁆𑀯𑀸 𑀢𑀲𑁆𑀲 𑀩𑁄𑀥𑀦𑀢𑁆𑀣𑀸𑀬 𑀲𑀳𑀲𑀸 𑀕𑀫𑀦𑀁 𑀢𑀼𑀭𑀺𑀢𑀘𑀸𑀭𑀺𑀓𑀸 𑀦𑀸𑀫, 𑀲𑀸 𑀫𑀳𑀸𑀓𑀲𑁆𑀲𑀧𑀲𑁆𑀲 𑀧𑀘𑁆𑀘𑀼𑀕𑁆𑀕𑀫𑀦𑀸𑀤𑀻𑀲𑀼 𑀤𑀝𑁆𑀞𑀩𑁆𑀩𑀸. 𑀪𑀕𑀯𑀸 𑀳𑀺 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑀁 𑀧𑀘𑁆𑀘𑀼𑀕𑁆𑀕𑀘𑁆𑀙𑀦𑁆𑀢𑁄 𑀫𑀼𑀳𑀼𑀢𑁆𑀢𑁂𑀦 𑀢𑀺𑀕𑀸𑀯𑀼𑀢𑀁 𑀫𑀕𑁆𑀕𑀁 𑀅𑀕𑀫𑀸𑀲𑀺. 𑀆𑀴𑀯𑀓𑀲𑁆𑀲𑀢𑁆𑀣𑀸𑀬 𑀢𑀺𑀁𑀲𑀬𑁄𑀚𑀦𑀁, 𑀢𑀣𑀸 𑀅𑀗𑁆𑀕𑀼𑀮𑀺𑀫𑀸𑀮𑀲𑁆𑀲. 𑀧𑀓𑁆𑀓𑀼𑀲𑀸𑀢𑀺𑀲𑁆𑀲 𑀧𑀦 𑀧𑀜𑁆𑀘𑀘𑀢𑁆𑀢𑀸𑀮𑀻𑀲𑀬𑁄𑀚𑀦𑀁. 𑀫𑀳𑀸𑀓𑀧𑁆𑀧𑀺𑀦𑀲𑁆𑀲 𑀯𑀻𑀲𑀬𑁄𑀚𑀦𑀲𑀢𑀁. 𑀥𑀦𑀺𑀬𑀲𑁆𑀲𑀢𑁆𑀣𑀸𑀬 𑀲𑀢𑁆𑀢𑀬𑁄𑀚𑀦𑀲𑀢𑀸𑀦𑀺 𑀅𑀕𑀫𑀸𑀲𑀺. 𑀥𑀫𑁆𑀫𑀲𑁂𑀦𑀸𑀧𑀢𑀺𑀦𑁄 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀲𑁆𑀲 𑀯𑀦𑀯𑀸𑀲𑀻𑀢𑀺𑀲𑁆𑀲𑀲𑀸𑀫𑀡𑁂𑀭𑀲𑁆𑀲 𑀢𑀺𑀕𑀸𑀯𑀼𑀢𑀸𑀥𑀺𑀓𑀁 𑀯𑀻𑀲𑀬𑁄𑀚𑀦𑀲𑀢𑀁.

𑀏𑀓𑀤𑀺𑀯𑀲𑀁 𑀓𑀺𑀭 𑀣𑁂𑀭𑁄 𑁋 ‘‘𑀢𑀺𑀲𑁆𑀲𑀲𑀸𑀫𑀡𑁂𑀭𑀲𑁆𑀲 𑀲𑀦𑁆𑀢𑀺𑀓𑀁, 𑀪𑀦𑁆𑀢𑁂, 𑀕𑀘𑁆𑀙𑀸𑀫𑀻’’𑀢𑀺 𑀆𑀳. 𑀪𑀕𑀯𑀸 𑁋 ‘‘𑀅𑀳𑀫𑁆𑀧𑀺 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀆𑀦𑀦𑁆𑀤, 𑀯𑀻𑀲𑀢𑀺𑀲𑀳𑀲𑁆𑀲𑀸𑀦𑀁 𑀙𑀴𑀪𑀺𑀜𑁆𑀜𑀸𑀦𑀁 𑀆𑀭𑁄𑀘𑁂𑀳𑀺, 𑀪𑀕𑀯𑀸 𑀓𑀺𑀭 𑀯𑀦𑀯𑀸𑀲𑀺𑀲𑁆𑀲 𑀢𑀺𑀲𑁆𑀲𑀲𑀸𑀫𑀡𑁂𑀭𑀲𑁆𑀲 𑀲𑀦𑁆𑀢𑀺𑀓𑀁 𑀕𑀫𑀺𑀲𑁆𑀲𑀢𑀻’’𑀢𑀺. 𑀢𑀢𑁄 𑀤𑀼𑀢𑀺𑀬𑀤𑀺𑀯𑀲𑁂 𑀯𑀻𑀲𑀢𑀺𑀲𑀳𑀲𑁆𑀲𑀔𑀻𑀡𑀸𑀲𑀯𑀧𑀭𑀺𑀯𑀸𑀭𑁄 𑀆𑀓𑀸𑀲𑁂 𑀉𑀧𑁆𑀧𑀢𑀺𑀢𑁆𑀯𑀸 𑀯𑀻𑀲𑀢𑀺𑀬𑁄𑀚𑀦𑀲𑀢𑀫𑀢𑁆𑀣𑀓𑁂 𑀢𑀲𑁆𑀲 𑀕𑁄𑀘𑀭𑀕𑀸𑀫𑀤𑁆𑀯𑀸𑀭𑁂 𑀑𑀢𑀭𑀺𑀢𑁆𑀯𑀸 𑀘𑀻𑀯𑀭𑀁 𑀧𑀸𑀭𑀼𑀧𑀺. 𑀢𑀁 𑀓𑀫𑁆𑀫𑀦𑁆𑀢𑀁 𑀕𑀘𑁆𑀙𑀫𑀸𑀦𑀸 𑀫𑀦𑀼𑀲𑁆𑀲𑀸 𑀤𑀺𑀲𑁆𑀯𑀸 𑁋 ‘‘𑀲𑀢𑁆𑀣𑀸 𑀦𑁄 𑀆𑀕𑀢𑁄, 𑀫𑀸 𑀓𑀫𑁆𑀫𑀦𑁆𑀢𑀁 𑀅𑀕𑀫𑀺𑀢𑁆𑀣𑀸’’𑀢𑀺 𑀯𑀢𑁆𑀯𑀸 𑀆𑀲𑀦𑀸𑀦𑀺 𑀧𑀜𑁆𑀜𑀧𑁂𑀢𑁆𑀯𑀸 𑀬𑀸𑀕𑀼𑀁 𑀤𑀢𑁆𑀯𑀸 𑀧𑀸𑀢𑀭𑀸𑀲𑀪𑀢𑁆𑀢𑀁 𑀓𑀭𑁄𑀦𑁆𑀢𑀸 𑁋 ‘‘𑀓𑀼𑀳𑀺𑀁, 𑀪𑀦𑁆𑀢𑁂, 𑀪𑀕𑀯𑀸 𑀕𑀘𑁆𑀙𑀢𑀻’’𑀢𑀺 𑀤𑀳𑀭𑀪𑀺𑀓𑁆𑀔𑀽 𑀧𑀼𑀘𑁆𑀙𑀺𑀁𑀲𑀼. 𑀉𑀧𑀸𑀲𑀓𑀸 𑀦 𑀪𑀕𑀯𑀸 𑀅𑀜𑁆𑀜𑀢𑁆𑀣 𑀕𑀘𑁆𑀙𑀢𑀺, 𑀇𑀥𑁂𑀯 𑀢𑀺𑀲𑁆𑀲𑀲𑀸𑀫𑀡𑁂𑀭𑀲𑁆𑀲 𑀤𑀲𑁆𑀲𑀦𑀢𑁆𑀣𑀸𑀬𑀸𑀕𑀢𑁄𑀢𑀺. 𑀢𑁂 𑁋 ‘‘𑀅𑀫𑁆𑀳𑀸𑀓𑀁 𑀓𑀼𑀮𑀽𑀧𑀓𑀲𑁆𑀲 𑀓𑀺𑀭 𑀣𑁂𑀭𑀲𑁆𑀲 𑀤𑀲𑁆𑀲𑀦𑀢𑁆𑀣𑀸𑀬 𑀲𑀢𑁆𑀣𑀸 𑀆𑀕𑀢𑁄, 𑀦𑁄 𑀯𑀢 𑀦𑁄 𑀣𑁂𑀭𑁄 𑀑𑀭𑀫𑀢𑁆𑀢𑀓𑁄’’𑀢𑀺 𑀲𑁄𑀫𑀦𑀲𑁆𑀲𑀚𑀸𑀢𑀸 𑀅𑀳𑁂𑀲𑀼𑀁.

𑀅𑀣 𑀔𑁄 𑀪𑀕𑀯𑀢𑁄 𑀪𑀢𑁆𑀢𑀓𑀺𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀲𑀸𑀫𑀡𑁂𑀭𑁄 𑀕𑀸𑀫𑁂 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑁋 ‘‘𑀉𑀧𑀸𑀲𑀓𑀸, 𑀫𑀳𑀸𑀪𑀺𑀓𑁆𑀔𑀼𑀲𑀗𑁆𑀖𑁄’’𑀢𑀺 𑀧𑀼𑀘𑁆𑀙𑀺. 𑀅𑀣𑀲𑁆𑀲 𑀢𑁂 ‘‘𑀲𑀢𑁆𑀣𑀸, 𑀪𑀦𑁆𑀢𑁂, 𑀆𑀕𑀢𑁄’’𑀢𑀺 𑀆𑀭𑁄𑀘𑁂𑀲𑀼𑀁. 𑀲𑁄 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀺𑀡𑁆𑀟𑀧𑀸𑀢𑁂𑀦 𑀆𑀧𑀼𑀘𑁆𑀙𑀺. 𑀲𑀢𑁆𑀣𑀸 𑀢𑀲𑁆𑀲 𑀧𑀢𑁆𑀢𑀁 𑀳𑀢𑁆𑀣𑁂𑀦 𑀕𑀳𑁂𑀢𑁆𑀯𑀸 𑁋 ‘‘𑀅𑀮𑀁, 𑀢𑀺𑀲𑁆𑀲, 𑀦𑀺𑀝𑁆𑀞𑀺𑀢𑀁 𑀪𑀢𑁆𑀢𑀓𑀺𑀘𑁆𑀘’’𑀦𑁆𑀢𑀺 𑀆𑀳. 𑀢𑀢𑁄 𑀉𑀧𑀚𑁆𑀛𑀸𑀬𑀁 𑀆𑀧𑀼𑀘𑁆𑀙𑀺𑀢𑁆𑀯𑀸 𑀅𑀢𑁆𑀢𑀦𑁄 𑀧𑀢𑁆𑀢𑀸𑀲𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 𑀪𑀢𑁆𑀢𑀓𑀺𑀘𑁆𑀘𑀫𑀓𑀸𑀲𑀺. 𑀅𑀣𑀲𑁆𑀲 𑀪𑀢𑁆𑀢𑀓𑀺𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀲𑀢𑁆𑀣𑀸 𑀫𑀗𑁆𑀕𑀮𑀁 𑀯𑀢𑁆𑀯𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀕𑀸𑀫𑀤𑁆𑀯𑀸𑀭𑁂 𑀞𑀢𑁆𑀯𑀸 𑁋 ‘‘𑀓𑀢𑀭𑁄 𑀢𑁂, 𑀢𑀺𑀲𑁆𑀲, 𑀯𑀲𑀦𑀝𑁆𑀞𑀸𑀦𑀁 𑀕𑀢𑀫𑀕𑁆𑀕𑁄’’𑀢𑀺 𑀆𑀳. 𑀅𑀬𑀁 𑀪𑀕𑀯𑀸𑀢𑀺. 𑀫𑀕𑁆𑀕𑀁 𑀤𑁂𑀲𑀬𑀫𑀸𑀦𑁄 𑀧𑀼𑀭𑀢𑁄 𑀬𑀸𑀳𑀺 𑀢𑀺𑀲𑁆𑀲𑀸𑀢𑀺. 𑀪𑀕𑀯𑀸 𑀓𑀺𑀭 𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲 𑀫𑀕𑁆𑀕𑀤𑁂𑀲𑀓𑁄𑀧𑀺 𑀲𑀫𑀸𑀦𑁄 𑀲𑀓𑀮𑁂 𑀢𑀺𑀕𑀸𑀯𑀼𑀢𑁂 𑀫𑀕𑁆𑀕𑁂 ‘𑀲𑀸𑀫𑀡𑁂𑀭𑀁 𑀤𑀝𑁆𑀞𑀼𑀁 𑀮𑀘𑁆𑀙𑀸𑀫𑀻’𑀢𑀺 𑀢𑀁 𑀫𑀕𑁆𑀕𑀤𑁂𑀲𑀓𑀁 𑀅𑀓𑀸𑀲𑀺.

𑀲𑁄 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀪𑀕𑀯𑀢𑁄 𑀯𑀢𑁆𑀢𑀫𑀓𑀸𑀲𑀺. 𑀅𑀣 𑀦𑀁 𑀪𑀕𑀯𑀸 𑁋 ‘‘𑀓𑀢𑀭𑁄 𑀢𑁂, 𑀢𑀺𑀲𑁆𑀲, 𑀘𑀗𑁆𑀓𑀫𑁄’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀲𑀸𑀫𑀡𑁂𑀭𑀲𑁆𑀲 𑀦𑀺𑀲𑀻𑀤𑀦𑀧𑀸𑀲𑀸𑀡𑁂 𑀦𑀺𑀲𑀻𑀤𑀺𑀢𑁆𑀯𑀸 𑁋 ‘‘𑀢𑀺𑀲𑁆𑀲, 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀲𑀼𑀔𑀁 𑀯𑀲𑀻’’𑀢𑀺 𑀧𑀼𑀘𑁆𑀙𑀺. 𑀲𑁄 𑀆𑀳 𑁋 ‘‘𑀆𑀫, 𑀪𑀦𑁆𑀢𑁂, 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀯𑀲𑀦𑁆𑀢𑀲𑁆𑀲 𑀲𑀻𑀳𑀩𑁆𑀬𑀕𑁆𑀖𑀳𑀢𑁆𑀣𑀺𑀫𑀺𑀕𑀫𑁄𑀭𑀸𑀤𑀻𑀦𑀁 𑀲𑀤𑁆𑀤𑀁 𑀲𑀼𑀡𑀢𑁄 𑀅𑀭𑀜𑁆𑀜𑀲𑀜𑁆𑀜𑀸 𑀉𑀧𑁆𑀧𑀚𑁆𑀚𑀢𑀺, 𑀢𑀸𑀬 𑀲𑀼𑀔𑀁 𑀯𑀲𑀸𑀫𑀻’’𑀢𑀺. 𑀅𑀣 𑀦𑀁 𑀪𑀕𑀯𑀸 𑁋 ‘‘𑀢𑀺𑀲𑁆𑀲, 𑀪𑀺𑀓𑁆𑀔𑀼𑀲𑀗𑁆𑀖𑀁 𑀲𑀦𑁆𑀦𑀺𑀧𑀸𑀢𑁂𑀳𑀺, 𑀩𑀼𑀤𑁆𑀥𑀤𑀸𑀬𑀚𑁆𑀚𑀁 𑀢𑁂 𑀤𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀲𑀦𑁆𑀦𑀺𑀧𑀢𑀺𑀢𑁂 𑀪𑀺𑀓𑁆𑀔𑀼𑀲𑀗𑁆𑀖𑁂 𑀉𑀧𑀲𑀫𑁆𑀧𑀸𑀤𑁂𑀢𑁆𑀯𑀸 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑀫𑁂𑀯 𑀅𑀕𑀫𑀸𑀲𑀻𑀢𑀺. 𑀅𑀬𑀁 𑀢𑀼𑀭𑀺𑀢𑀘𑀸𑀭𑀺𑀓𑀸 𑀦𑀸𑀫. 𑀬𑀁 𑀧𑀦 𑀕𑀸𑀫𑀦𑀺𑀕𑀫𑀧𑀝𑀺𑀧𑀸𑀝𑀺𑀬𑀸 𑀤𑁂𑀯𑀲𑀺𑀓𑀁 𑀬𑁄𑀚𑀦𑀤𑁆𑀯𑀺𑀬𑁄𑀚𑀦𑀯𑀲𑁂𑀦 𑀧𑀺𑀡𑁆𑀟𑀧𑀸𑀢𑀘𑀭𑀺𑀬𑀸𑀤𑀻𑀳𑀺 𑀮𑁄𑀓𑀁 𑀅𑀦𑀼𑀕𑁆𑀕𑀡𑁆𑀳𑀦𑁆𑀢𑀲𑁆𑀲 𑀕𑀫𑀦𑀁, 𑀅𑀬𑀁 𑀅𑀢𑀼𑀭𑀺𑀢𑀘𑀸𑀭𑀺𑀓𑀸 𑀦𑀸𑀫.

𑀇𑀫𑀁 𑀧𑀦 𑀘𑀸𑀭𑀺𑀓𑀁 𑀘𑀭𑀦𑁆𑀢𑁄 𑀪𑀕𑀯𑀸 𑀫𑀳𑀸𑀫𑀡𑁆𑀟𑀮𑀁, 𑀫𑀚𑁆𑀛𑀺𑀫𑀫𑀡𑁆𑀟𑀮𑀁, 𑀅𑀦𑁆𑀢𑁄𑀫𑀡𑁆𑀟𑀮𑀦𑁆𑀢𑀺 𑀇𑀫𑁂𑀲𑀁 𑀢𑀺𑀡𑁆𑀡𑀁 𑀫𑀡𑁆𑀟𑀮𑀸𑀦𑀁 𑀅𑀜𑁆𑀜𑀢𑀭𑀲𑁆𑀫𑀺𑀁 𑀘𑀭𑀢𑀺. 𑀢𑀢𑁆𑀣 𑀫𑀳𑀸𑀫𑀡𑁆𑀟𑀮𑀁 𑀦𑀯𑀬𑁄𑀚𑀦𑀲𑀢𑀺𑀓𑀁, 𑀫𑀚𑁆𑀛𑀺𑀫𑀫𑀡𑁆𑀟𑀮𑀁 𑀙𑀬𑁄𑀚𑀦𑀲𑀢𑀺𑀓𑀁, 𑀅𑀦𑁆𑀢𑁄𑀫𑀡𑁆𑀟𑀮𑀁 𑀢𑀺𑀬𑁄𑀚𑀦𑀲𑀢𑀺𑀓𑀁. 𑀬𑀤𑀸 𑀫𑀳𑀸𑀫𑀡𑁆𑀟𑀮𑁂 𑀘𑀸𑀭𑀺𑀓𑀁 𑀘𑀭𑀺𑀢𑀼𑀓𑀸𑀫𑁄 𑀳𑁄𑀢𑀺, 𑀫𑀳𑀸𑀧𑀯𑀸𑀭𑀡𑀸𑀬 𑀧𑀯𑀸𑀭𑁂𑀢𑁆𑀯𑀸 𑀧𑀸𑀝𑀺𑀧𑀤𑀤𑀺𑀯𑀲𑁂 𑀫𑀳𑀸𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀸𑀭𑁄 𑀦𑀺𑀓𑁆𑀔𑀫𑀢𑀺. 𑀲𑀫𑀦𑁆𑀢𑀸 𑀬𑁄𑀚𑀦𑀲𑀢𑀁 𑀏𑀓𑀓𑁄𑀮𑀸𑀳𑀮𑀁 𑀳𑁄𑀢𑀺. 𑀧𑀼𑀭𑀺𑀫𑀁 𑀧𑀼𑀭𑀺𑀫𑀁 𑀆𑀕𑀢𑀸 𑀦𑀺𑀫𑀦𑁆𑀢𑁂𑀢𑀼𑀁 𑀮𑀪𑀦𑁆𑀢𑀺. 𑀇𑀢𑀭𑁂𑀲𑀼 𑀤𑁆𑀯𑀻𑀲𑀼 𑀫𑀡𑁆𑀟𑀮𑁂𑀲𑀼 𑀲𑀓𑁆𑀓𑀸𑀭𑁄 𑀫𑀳𑀸𑀫𑀡𑁆𑀟𑀮𑁂 𑀑𑀲𑀭𑀢𑀺. 𑀢𑀢𑁆𑀣 𑀪𑀕𑀯𑀸 𑀢𑁂𑀲𑀼 𑀢𑁂𑀲𑀼 𑀕𑀸𑀫𑀦𑀺𑀕𑀫𑁂𑀲𑀼 𑀏𑀓𑀸𑀳𑀁 𑀤𑁆𑀯𑀻𑀳𑀁 𑀯𑀲𑀦𑁆𑀢𑁄 𑀫𑀳𑀸𑀚𑀦𑀁 𑀆𑀫𑀺𑀲𑀧𑁆𑀧𑀝𑀺𑀕𑁆𑀕𑀳𑁂𑀦 𑀅𑀦𑀼𑀕𑁆𑀕𑀡𑁆𑀳𑀦𑁆𑀢𑁄 𑀥𑀫𑁆𑀫𑀤𑀸𑀦𑁂𑀦 𑀘𑀲𑁆𑀲 𑀯𑀺𑀯𑀝𑁆𑀝𑀲𑀦𑁆𑀦𑀺𑀲𑁆𑀲𑀺𑀢𑀁 𑀓𑀼𑀲𑀮𑀁 𑀯𑀟𑁆𑀠𑁂𑀦𑁆𑀢𑁄 𑀦𑀯𑀳𑀺 𑀫𑀸𑀲𑁂𑀳𑀺 𑀘𑀸𑀭𑀺𑀓𑀁 𑀧𑀭𑀺𑀬𑁄𑀲𑀸𑀧𑁂𑀢𑀺. 𑀲𑀘𑁂 𑀧𑀦 𑀅𑀦𑁆𑀢𑁄𑀯𑀲𑁆𑀲𑁂 𑀪𑀺𑀓𑁆𑀔𑀽𑀦𑀁 𑀲𑀫𑀣𑀯𑀺𑀧𑀲𑁆𑀲𑀦𑀸 𑀢𑀭𑀼𑀡𑀸 𑀳𑁄𑀦𑁆𑀢𑀺, 𑀫𑀳𑀸𑀧𑀯𑀸𑀭𑀡𑀸𑀬 𑀅𑀧𑀯𑀸𑀭𑁂𑀢𑁆𑀯𑀸 𑀧𑀯𑀸𑀭𑀡𑀸𑀲𑀗𑁆𑀕𑀳𑀁 𑀤𑀢𑁆𑀯𑀸 𑀓𑀢𑁆𑀢𑀺𑀓𑀧𑀼𑀡𑁆𑀡𑀫𑀸𑀬𑀁 𑀧𑀯𑀸𑀭𑁂𑀢𑁆𑀯𑀸 𑀫𑀺𑀕𑀲𑀺𑀭𑀲𑁆𑀲 𑀧𑀞𑀫𑀧𑀸𑀝𑀺𑀧𑀤𑀤𑀺𑀯𑀲𑁂 𑀫𑀳𑀸𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀸𑀭𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀫𑀚𑁆𑀛𑀺𑀫𑀫𑀡𑁆𑀟𑀮𑁂 𑀑𑀲𑀭𑀢𑀺. 𑀅𑀜𑁆𑀜𑁂𑀦𑀧𑀺 𑀓𑀸𑀭𑀡𑁂𑀦 𑀫𑀚𑁆𑀛𑀺𑀫𑀫𑀡𑁆𑀟𑀮𑁂 𑀘𑀸𑀭𑀺𑀓𑀁 𑀘𑀭𑀺𑀢𑀼𑀓𑀸𑀫𑁄 𑀘𑀢𑀼𑀫𑀸𑀲𑀁 𑀯𑀲𑀺𑀢𑁆𑀯𑀸𑀯 𑀦𑀺𑀓𑁆𑀔𑀫𑀢𑀺. 𑀯𑀼𑀢𑁆𑀢𑀦𑀬𑁂𑀦𑁂𑀯 𑀇𑀢𑀭𑁂𑀲𑀼 𑀤𑁆𑀯𑀻𑀲𑀼 𑀫𑀡𑁆𑀟𑀮𑁂𑀲𑀼 𑀲𑀓𑁆𑀓𑀸𑀭𑁄 𑀫𑀚𑁆𑀛𑀺𑀫𑀫𑀡𑁆𑀟𑀮𑁂 𑀑𑀲𑀭𑀢𑀺. 𑀪𑀕𑀯𑀸 𑀧𑀼𑀭𑀺𑀫𑀦𑀬𑁂𑀦𑁂𑀯 𑀮𑁄𑀓𑀁 𑀅𑀦𑀼𑀕𑁆𑀕𑀡𑁆𑀳𑀦𑁆𑀢𑁄 𑀅𑀝𑁆𑀞𑀳𑀺 𑀫𑀸𑀲𑁂𑀳𑀺 𑀘𑀸𑀭𑀺𑀓𑀁 𑀧𑀭𑀺𑀬𑁄𑀲𑀸𑀧𑁂𑀢𑀺. 𑀲𑀘𑁂 𑀧𑀦 𑀘𑀢𑀼𑀫𑀸𑀲𑀁 𑀯𑀼𑀢𑁆𑀣𑀯𑀲𑁆𑀲𑀲𑁆𑀲𑀸𑀧𑀺 𑀪𑀕𑀯𑀢𑁄 𑀯𑁂𑀦𑁂𑀬𑁆𑀬𑀲𑀢𑁆𑀢𑀸 𑀅𑀧𑀭𑀺𑀧𑀓𑁆𑀓𑀺𑀦𑁆𑀤𑁆𑀭𑀺𑀬𑀸 𑀳𑁄𑀦𑁆𑀢𑀺, 𑀢𑁂𑀲𑀁 𑀇𑀦𑁆𑀤𑁆𑀭𑀺𑀬𑀧𑀭𑀺𑀧𑀸𑀓𑀁 𑀆𑀕𑀫𑀬𑀫𑀸𑀦𑁄 𑀅𑀧𑀭𑀫𑁆𑀧𑀺 𑀏𑀓𑀫𑀸𑀲𑀁 𑀯𑀸 𑀤𑁆𑀯𑀺𑀢𑀺𑀘𑀢𑀼𑀫𑀸𑀲𑀁 𑀯𑀸 𑀢𑀢𑁆𑀣𑁂𑀯 𑀯𑀲𑀺𑀢𑁆𑀯𑀸 𑀫𑀳𑀸𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀸𑀭𑁄 𑀦𑀺𑀓𑁆𑀔𑀫𑀢𑀺. 𑀯𑀼𑀢𑁆𑀢𑀦𑀬𑁂𑀦𑁂𑀯 𑀇𑀢𑀭𑁂𑀲𑀼 𑀤𑁆𑀯𑀻𑀲𑀼 𑀫𑀡𑁆𑀟𑀮𑁂𑀲𑀼 𑀲𑀓𑁆𑀓𑀸𑀭𑁄 𑀅𑀦𑁆𑀢𑁄𑀫𑀡𑁆𑀟𑀮𑁂 𑀑𑀲𑀭𑀢𑀺. 𑀪𑀕𑀯𑀸 𑀧𑀼𑀭𑀺𑀫𑀦𑀬𑁂𑀦𑁂𑀯 𑀮𑁄𑀓𑀁 𑀅𑀦𑀼𑀕𑁆𑀕𑀡𑁆𑀳𑀦𑁆𑀢𑁄 𑀲𑀢𑁆𑀢𑀳𑀺 𑀯𑀸 𑀙𑀳𑀺 𑀯𑀸 𑀧𑀜𑁆𑀘𑀳𑀺 𑀯𑀸 𑀘𑀢𑀽𑀳𑀺 𑀯𑀸 𑀫𑀸𑀲𑁂𑀳𑀺 𑀘𑀸𑀭𑀺𑀓𑀁 𑀧𑀭𑀺𑀬𑁄𑀲𑀸𑀧𑁂𑀢𑀺. 𑀇𑀢𑀺 𑀇𑀫𑁂𑀲𑀼 𑀢𑀻𑀲𑀼 𑀫𑀡𑁆𑀟𑀮𑁂𑀲𑀼 𑀬𑀢𑁆𑀣 𑀓𑀢𑁆𑀣𑀘𑀺 𑀘𑀸𑀭𑀺𑀓𑀁 𑀘𑀭𑀦𑁆𑀢𑁄 𑀦 𑀘𑀻𑀯𑀭𑀸𑀤𑀺𑀳𑁂𑀢𑀼 𑀘𑀭𑀢𑀺. 𑀅𑀣 𑀔𑁄 𑀬𑁂 𑀤𑀼𑀕𑁆𑀕𑀢𑀩𑀸𑀮𑀚𑀺𑀡𑁆𑀡𑀩𑁆𑀬𑀸𑀥𑀺𑀢𑀸, 𑀢𑁂 𑀓𑀤𑀸 𑀢𑀣𑀸𑀕𑀢𑀁 𑀆𑀕𑀦𑁆𑀢𑁆𑀯𑀸 𑀧𑀲𑁆𑀲𑀺𑀲𑁆𑀲𑀦𑁆𑀢𑀺. 𑀫𑀬𑀺 𑀧𑀦 𑀘𑀸𑀭𑀺𑀓𑀁 𑀘𑀭𑀦𑁆𑀢𑁂 𑀫𑀳𑀸𑀚𑀦𑁄 𑀢𑀣𑀸𑀕𑀢𑀲𑁆𑀲 𑀤𑀲𑁆𑀲𑀦𑀁 𑀮𑀪𑀺𑀲𑁆𑀲𑀢𑀺. 𑀢𑀢𑁆𑀣 𑀓𑁂𑀘𑀺 𑀘𑀺𑀢𑁆𑀢𑀸𑀦𑀺 𑀧𑀲𑀸𑀤𑁂𑀲𑁆𑀲𑀦𑁆𑀢𑀺, 𑀓𑁂𑀘𑀺 𑀫𑀸𑀮𑀸𑀤𑀻𑀳𑀺 𑀧𑀽𑀚𑁂𑀲𑁆𑀲𑀦𑁆𑀢𑀺, 𑀓𑁂𑀘𑀺 𑀓𑀝𑀘𑁆𑀙𑀼𑀪𑀺𑀓𑁆𑀔𑀁 𑀤𑀲𑁆𑀲𑀦𑁆𑀢𑀺, 𑀓𑁂𑀘𑀺 𑀫𑀺𑀘𑁆𑀙𑀸𑀤𑀲𑁆𑀲𑀦𑀁 𑀧𑀳𑀸𑀬 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑀸 𑀪𑀯𑀺𑀲𑁆𑀲𑀦𑁆𑀢𑀺. 𑀢𑀁 𑀦𑁂𑀲𑀁 𑀪𑀯𑀺𑀲𑁆𑀲𑀢𑀺 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬𑀸𑀢𑀺. 𑀏𑀯𑀁 𑀮𑁄𑀓𑀸𑀦𑀼𑀓𑀫𑁆𑀧𑀓𑀸𑀬 𑀘𑀸𑀭𑀺𑀓𑀁 𑀘𑀭𑀢𑀺.

𑀅𑀧𑀺 𑀘 𑀘𑀢𑀽𑀳𑀺 𑀓𑀸𑀭𑀡𑁂𑀳𑀺 𑀩𑀼𑀤𑁆𑀥𑀸 𑀪𑀕𑀯𑀦𑁆𑀢𑁄 𑀘𑀸𑀭𑀺𑀓𑀁 𑀘𑀭𑀦𑁆𑀢𑀺, 𑀚𑀗𑁆𑀖𑀯𑀺𑀳𑀸𑀭𑀯𑀲𑁂𑀦 𑀲𑀭𑀻𑀭𑀨𑀸𑀲𑀼𑀓𑀢𑁆𑀣𑀸𑀬, 𑀅𑀢𑁆𑀣𑀼𑀧𑁆𑀧𑀢𑁆𑀢𑀺𑀓𑀸𑀮𑀸𑀪𑀺𑀓𑀗𑁆𑀔𑀦𑀢𑁆𑀣𑀸𑀬, 𑀪𑀺𑀓𑁆𑀔𑀽𑀦𑀁 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀸𑀧𑀦𑀢𑁆𑀣𑀸𑀬, 𑀢𑀢𑁆𑀣 𑀢𑀢𑁆𑀣 𑀧𑀭𑀺𑀧𑀸𑀓𑀕𑀢𑀺𑀦𑁆𑀤𑁆𑀭𑀺𑀬𑁂 𑀩𑁄𑀥𑀦𑁂𑀬𑁆𑀬𑀲𑀢𑁆𑀢𑁂 𑀩𑁄𑀥𑀦𑀢𑁆𑀣𑀸𑀬𑀸𑀢𑀺. 𑀅𑀧𑀭𑁂𑀳𑀺𑀧𑀺 𑀘𑀢𑀽𑀳𑀺 𑀓𑀸𑀭𑀡𑁂𑀳𑀺 𑀩𑀼𑀤𑁆𑀥𑀸 𑀪𑀕𑀯𑀦𑁆𑀢𑁄 𑀘𑀸𑀭𑀺𑀓𑀁 𑀘𑀭𑀦𑁆𑀢𑀺 𑀩𑀼𑀤𑁆𑀥𑀁 𑀲𑀭𑀡𑀁 𑀕𑀘𑁆𑀙𑀺𑀲𑁆𑀲𑀦𑁆𑀢𑀻𑀢𑀺 𑀯𑀸, 𑀥𑀫𑁆𑀫𑀁, 𑀲𑀗𑁆𑀖𑀁 𑀲𑀭𑀡𑀁 𑀕𑀘𑁆𑀙𑀺𑀲𑁆𑀲𑀦𑁆𑀢𑀻𑀢𑀺 𑀯𑀸, 𑀫𑀳𑀢𑀸 𑀥𑀫𑁆𑀫𑀯𑀲𑁆𑀲𑁂𑀦 𑀘𑀢𑀲𑁆𑀲𑁄 𑀧𑀭𑀺𑀲𑀸 𑀲𑀦𑁆𑀢𑀧𑁆𑀧𑁂𑀲𑁆𑀲𑀸𑀫𑀻𑀢𑀺 𑀯𑀸. 𑀅𑀧𑀭𑁂𑀳𑀺𑀧𑀺 𑀧𑀜𑁆𑀘𑀳𑀺 𑀓𑀸𑀭𑀡𑁂𑀳𑀺 𑀩𑀼𑀤𑁆𑀥𑀸 𑀪𑀕𑀯𑀦𑁆𑀢𑁄 𑀘𑀸𑀭𑀺𑀓𑀁 𑀘𑀭𑀦𑁆𑀢𑀺 𑀧𑀸𑀡𑀸𑀢𑀺𑀧𑀸𑀢𑀸 𑀯𑀺𑀭𑀫𑀺𑀲𑁆𑀲𑀦𑁆𑀢𑀻𑀢𑀺 𑀯𑀸, 𑀅𑀤𑀺𑀦𑁆𑀦𑀸𑀤𑀸𑀦𑀸, 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀸, 𑀫𑀼𑀲𑀸𑀯𑀸𑀤𑀸, 𑀲𑀼𑀭𑀸𑀫𑁂𑀭𑀬𑀫𑀚𑁆𑀚𑀧𑀫𑀸𑀤𑀝𑁆𑀞𑀸𑀦𑀸 𑀯𑀺𑀭𑀫𑀺𑀲𑁆𑀲𑀦𑁆𑀢𑀻𑀢𑀺 𑀯𑀸. 𑀅𑀧𑀭𑁂𑀳𑀺𑀧𑀺 𑀅𑀝𑁆𑀞𑀳𑀺 𑀓𑀸𑀭𑀡𑁂𑀳𑀺 𑀩𑀼𑀤𑁆𑀥𑀸 𑀪𑀕𑀯𑀦𑁆𑀢𑁄 𑀘𑀸𑀭𑀺𑀓𑀁 𑀘𑀭𑀦𑁆𑀢𑀺 𑁋 𑀧𑀞𑀫𑀁 𑀛𑀸𑀦𑀁 𑀧𑀝𑀺𑀮𑀪𑀺𑀲𑁆𑀲𑀦𑁆𑀢𑀻𑀢𑀺 𑀯𑀸, 𑀤𑀼𑀢𑀺𑀬𑀁 𑀛𑀸𑀦𑀁…𑀧𑁂… 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀁 𑀧𑀝𑀺𑀮𑀪𑀺𑀲𑁆𑀲𑀦𑁆𑀢𑀻𑀢𑀺 𑀯𑀸. 𑀅𑀧𑀭𑁂𑀳𑀺𑀧𑀺 𑀅𑀝𑁆𑀞𑀳𑀺 𑀓𑀸𑀭𑀡𑁂𑀳𑀺 𑀩𑀼𑀤𑁆𑀥𑀸 𑀪𑀕𑀯𑀦𑁆𑀢𑁄 𑀘𑀸𑀭𑀺𑀓𑀁 𑀘𑀭𑀦𑁆𑀢𑀺 𑁋 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀁 𑀅𑀥𑀺𑀕𑀫𑀺𑀲𑁆𑀲𑀦𑁆𑀢𑀻𑀢𑀺 𑀯𑀸, 𑀲𑁄𑀢𑀸𑀧𑀢𑁆𑀢𑀺𑀨𑀮𑀁…𑀧𑁂… 𑀅𑀭𑀳𑀢𑁆𑀢𑀨𑀮𑀁 𑀲𑀘𑁆𑀙𑀺𑀓𑀭𑀺𑀲𑁆𑀲𑀦𑁆𑀢𑀻𑀢𑀺 𑀯𑀸𑀢𑀺. 𑀅𑀬𑀁 𑀅𑀢𑀼𑀭𑀺𑀢𑀘𑀸𑀭𑀺𑀓𑀸, 𑀇𑀥 𑀘𑀸𑀭𑀺𑀓𑀸𑀢𑀺 𑀅𑀥𑀺𑀧𑁆𑀧𑁂𑀢𑀸. 𑀲𑀸 𑀧𑀦𑁂𑀲𑀸 𑀤𑀼𑀯𑀺𑀥𑀸 𑀳𑁄𑀢𑀺 𑁋 𑀅𑀦𑀺𑀩𑀤𑁆𑀥𑀘𑀸𑀭𑀺𑀓𑀸 𑀘 𑀦𑀺𑀩𑀤𑁆𑀥𑀘𑀸𑀭𑀺𑀓𑀸 𑀘. 𑀢𑀢𑁆𑀣 𑀬𑀁 𑀕𑀸𑀫𑀦𑀺𑀕𑀫𑀦𑀕𑀭𑀧𑀝𑀺𑀧𑀸𑀝𑀺𑀯𑀲𑁂𑀦 𑀘𑀭𑀢𑀺, 𑀅𑀬𑀁 𑀅𑀦𑀺𑀩𑀤𑁆𑀥𑀘𑀸𑀭𑀺𑀓𑀸 𑀦𑀸𑀫. 𑀬𑀁 𑀧𑀦𑁂𑀓𑀲𑁆𑀲𑁂𑀯 𑀩𑁄𑀥𑀦𑁂𑀬𑁆𑀬𑀲𑀢𑁆𑀢𑀲𑁆𑀲𑀢𑁆𑀣𑀸𑀬 𑀕𑀘𑁆𑀙𑀢𑀺, 𑀅𑀬𑀁 𑀦𑀺𑀩𑀤𑁆𑀥𑀘𑀸𑀭𑀺𑀓𑀸 𑀦𑀸𑀫. 𑀏𑀲𑀸 𑀇𑀥 𑀅𑀥𑀺𑀧𑁆𑀧𑁂𑀢𑀸.

𑀢𑀤𑀸 𑀓𑀺𑀭 𑀪𑀕𑀯𑀢𑁄 𑀧𑀘𑁆𑀙𑀺𑀫𑀬𑀸𑀫𑀓𑀺𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀬𑀸 𑀜𑀸𑀡𑀚𑀸𑀮𑀁 𑀧𑀢𑁆𑀣𑀭𑀺𑀢𑁆𑀯𑀸 𑀩𑁄𑀥𑀦𑁂𑀬𑁆𑀬𑀩𑀦𑁆𑀥𑀯𑁂 𑀑𑀮𑁄𑀓𑁂𑀦𑁆𑀢𑀲𑁆𑀲 𑀧𑁄𑀓𑁆𑀔𑀭𑀲𑀸𑀢𑀺𑀩𑁆𑀭𑀸𑀳𑁆𑀫𑀡𑁄 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀚𑀸𑀮𑀲𑁆𑀲 𑀅𑀦𑁆𑀢𑁄 𑀧𑀯𑀺𑀝𑁆𑀞𑁄. 𑀅𑀣 𑀪𑀕𑀯𑀸 𑀅𑀬𑀁 𑀩𑁆𑀭𑀸𑀳𑁆𑀫𑀡𑁄 𑀫𑀬𑁆𑀳𑀁 𑀜𑀸𑀡𑀚𑀸𑀮𑁂 𑀧𑀜𑁆𑀜𑀸𑀬𑀢𑀺, ‘‘𑀅𑀢𑁆𑀣𑀺 𑀦𑀼 𑀔𑁆𑀯𑀲𑁆𑀲 𑀉𑀧𑀦𑀺𑀲𑁆𑀲𑀬𑁄’’𑀢𑀺 𑀯𑀻𑀫𑀁𑀲𑀦𑁆𑀢𑁄 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀲𑁆𑀲 𑀉𑀧𑀦𑀺𑀲𑁆𑀲𑀬𑀁 𑀤𑀺𑀲𑁆𑀯𑀸 𑁋 ‘‘𑀏𑀲𑁄 𑀫𑀬𑀺 𑀏𑀢𑀁 𑀚𑀦𑀧𑀤𑀁 𑀕𑀢𑁂 𑀮𑀓𑁆𑀔𑀡𑀧𑀭𑀺𑀬𑁂𑀲𑀦𑀢𑁆𑀣𑀁 𑀅𑀫𑁆𑀩𑀝𑁆𑀞𑀁 𑀅𑀦𑁆𑀢𑁂𑀯𑀸𑀲𑀺𑀁 𑀧𑀳𑀺𑀡𑀺𑀲𑁆𑀲𑀢𑀺, 𑀲𑁄 𑀫𑀬𑀸 𑀲𑀤𑁆𑀥𑀺𑀁 𑀯𑀸𑀤𑀧𑀝𑀺𑀯𑀸𑀤𑀁 𑀓𑀢𑁆𑀯𑀸 𑀦𑀸𑀦𑀧𑁆𑀧𑀓𑀸𑀭𑀁 𑀅𑀲𑀩𑁆𑀪𑀺𑀯𑀸𑀓𑁆𑀬𑀁 𑀯𑀓𑁆𑀔𑀢𑀺, 𑀢𑀫𑀳𑀁 𑀤𑀫𑁂𑀢𑁆𑀯𑀸 𑀦𑀺𑀩𑁆𑀩𑀺𑀲𑁂𑀯𑀦𑀁 𑀓𑀭𑀺𑀲𑁆𑀲𑀸𑀫𑀺. 𑀲𑁄 𑀆𑀘𑀭𑀺𑀬𑀲𑁆𑀲 𑀓𑀣𑁂𑀲𑁆𑀲𑀢𑀺, 𑀅𑀣𑀲𑁆𑀲𑀸𑀘𑀭𑀺𑀬𑁄 𑀢𑀁 𑀓𑀣𑀁 𑀲𑀼𑀢𑁆𑀯𑀸 𑀆𑀕𑀫𑁆𑀫 𑀫𑀫 𑀮𑀓𑁆𑀔𑀡𑀸𑀦𑀺 𑀧𑀭𑀺𑀬𑁂𑀲𑀺𑀲𑁆𑀲𑀢𑀺, 𑀢𑀲𑁆𑀲𑀸𑀳𑀁 𑀥𑀫𑁆𑀫𑀁 𑀤𑁂𑀲𑁂𑀲𑁆𑀲𑀸𑀫𑀺. 𑀲𑁄 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺𑀲𑁆𑀲𑀢𑀺. 𑀤𑁂𑀲𑀦𑀸 𑀫𑀳𑀸𑀚𑀦𑀲𑁆𑀲 𑀲𑀨𑀮𑀸 𑀪𑀯𑀺𑀲𑁆𑀲𑀢𑀻’’𑀢𑀺 𑀧𑀜𑁆𑀘𑀪𑀺𑀓𑁆𑀔𑀼𑀲𑀢𑀧𑀭𑀺𑀯𑀸𑀭𑁄 𑀢𑀁 𑀚𑀦𑀧𑀤𑀁 𑀧𑀝𑀺𑀧𑀦𑁆𑀦𑁄. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀓𑁄𑀲𑀮𑁂𑀲𑀼 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀫𑀳𑀢𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀤𑁆𑀥𑀺𑀁 𑀧𑀜𑁆𑀘𑀫𑀢𑁆𑀢𑁂𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀻’’𑀢𑀺.

𑀬𑁂𑀦 𑀇𑀘𑁆𑀙𑀸𑀦𑀗𑁆𑀕𑀮𑀦𑁆𑀢𑀺 𑀬𑁂𑀦 𑀤𑀺𑀲𑀸𑀪𑀸𑀕𑁂𑀦 𑀇𑀘𑁆𑀙𑀸𑀦𑀗𑁆𑀕𑀮𑀁 𑀅𑀯𑀲𑀭𑀺𑀢𑀩𑁆𑀩𑀁. 𑀬𑀲𑁆𑀫𑀺𑀁 𑀯𑀸 𑀧𑀤𑁂𑀲𑁂 𑀇𑀘𑁆𑀙𑀸𑀦𑀗𑁆𑀕𑀮𑀁. 𑀇𑀚𑁆𑀛𑀸𑀦𑀗𑁆𑀕𑀮𑀦𑁆𑀢𑀺𑀧𑀺 𑀧𑀸𑀞𑁄. 𑀢𑀤𑀯𑀲𑀭𑀻𑀢𑀺 𑀢𑁂𑀦 𑀅𑀯𑀲𑀭𑀺, 𑀢𑀁 𑀯𑀸 𑀅𑀯𑀲𑀭𑀺. 𑀢𑁂𑀦 𑀤𑀺𑀲𑀸𑀪𑀸𑀕𑁂𑀦 𑀕𑀢𑁄, 𑀢𑀁 𑀯𑀸 𑀧𑀤𑁂𑀲𑀁 𑀕𑀢𑁄𑀢𑀺 𑀅𑀢𑁆𑀣𑁄. 𑀇𑀘𑁆𑀙𑀸𑀦𑀗𑁆𑀕𑀮𑁂 𑀯𑀺𑀳𑀭𑀢𑀺 𑀇𑀘𑁆𑀙𑀸𑀦𑀗𑁆𑀕𑀮𑀯𑀦𑀲𑀡𑁆𑀟𑁂𑀢𑀺 𑀇𑀘𑁆𑀙𑀸𑀦𑀗𑁆𑀕𑀮𑀁 𑀉𑀧𑀦𑀺𑀲𑁆𑀲𑀸𑀬 𑀇𑀘𑁆𑀙𑀸𑀦𑀗𑁆𑀕𑀮𑀯𑀦𑀲𑀡𑁆𑀟𑁂 𑀲𑀻𑀮𑀔𑀦𑁆𑀥𑀸𑀯𑀸𑀭𑀁 𑀩𑀦𑁆𑀥𑀺𑀢𑁆𑀯𑀸 𑀲𑀫𑀸𑀥𑀺𑀓𑁄𑀦𑁆𑀢𑀁 𑀉𑀲𑁆𑀲𑀸𑀧𑁂𑀢𑁆𑀯𑀸 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀲𑀭𑀁 𑀧𑀭𑀺𑀯𑀢𑁆𑀢𑀬𑀫𑀸𑀦𑁄 𑀥𑀫𑁆𑀫𑀭𑀸𑀚𑀸 𑀬𑀣𑀸𑀪𑀺𑀭𑀼𑀘𑀺𑀢𑁂𑀦 𑀯𑀺𑀳𑀸𑀭𑁂𑀦 𑀯𑀺𑀳𑀭𑀢𑀺.

𑀧𑁄𑀓𑁆𑀔𑀭𑀲𑀸𑀢𑀺𑀯𑀢𑁆𑀣𑀼𑀯𑀡𑁆𑀡𑀦𑀸

𑁨𑁫𑁫. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦𑀸𑀢𑀺 𑀬𑁂𑀦 𑀲𑀫𑀬𑁂𑀦 𑀪𑀕𑀯𑀸 𑀢𑀢𑁆𑀣 𑀯𑀺𑀳𑀭𑀢𑀺, 𑀢𑁂𑀦 𑀲𑀫𑀬𑁂𑀦, 𑀢𑀲𑁆𑀫𑀺𑀁 𑀲𑀫𑀬𑁂𑀢𑀺 𑀅𑀬𑀫𑀢𑁆𑀣𑁄. 𑀩𑁆𑀭𑀳𑁆𑀫𑀁 𑀅𑀡𑀢𑀻𑀢𑀺 𑀩𑁆𑀭𑀸𑀳𑁆𑀫𑀡𑁄, 𑀫𑀦𑁆𑀢𑁂 𑀲𑀚𑁆𑀛𑀸𑀬𑀢𑀻𑀢𑀺 𑀅𑀢𑁆𑀣𑁄. 𑀇𑀤𑀫𑁂𑀯 𑀳𑀺 𑀚𑀸𑀢𑀺𑀩𑁆𑀭𑀸𑀳𑁆𑀫𑀡𑀸𑀦𑀁 𑀦𑀺𑀭𑀼𑀢𑁆𑀢𑀺𑀯𑀘𑀦𑀁. 𑀅𑀭𑀺𑀬𑀸 𑀧𑀦 𑀩𑀸𑀳𑀺𑀢𑀧𑀸𑀧𑀢𑁆𑀢𑀸 𑀩𑁆𑀭𑀸𑀳𑁆𑀫𑀡𑀸𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀧𑁄𑀓𑁆𑀔𑀭𑀲𑀸𑀢𑀻𑀢𑀺 𑀇𑀤𑀁 𑀢𑀲𑁆𑀲 𑀦𑀸𑀫𑀁. 𑀓𑀲𑁆𑀫𑀸 𑀧𑁄𑀓𑁆𑀔𑀭𑀲𑀸𑀢𑀻𑀢𑀺 𑀯𑀼𑀘𑁆𑀘𑀢𑀺. 𑀢𑀲𑁆𑀲 𑀓𑀺𑀭 𑀓𑀸𑀬𑁄 𑀲𑁂𑀢𑀧𑁄𑀓𑁆𑀔𑀭𑀲𑀤𑀺𑀲𑁄, 𑀤𑁂𑀯𑀦𑀕𑀭𑁂 𑀉𑀲𑁆𑀲𑀸𑀧𑀺𑀢𑀭𑀚𑀢𑀢𑁄𑀭𑀡𑀁 𑀯𑀺𑀬 𑀲𑁄𑀪𑀢𑀺. 𑀲𑀻𑀲𑀁 𑀧𑀦𑀲𑁆𑀲 𑀓𑀸𑀴𑀯𑀡𑁆𑀡𑀁 𑀇𑀦𑁆𑀤𑀦𑀻𑀮𑀫𑀡𑀺𑀫𑀬𑀁 𑀯𑀺𑀬. 𑀫𑀲𑁆𑀲𑀼𑀧𑀺 𑀘𑀦𑁆𑀤𑀫𑀡𑁆𑀟𑀮𑁂 𑀓𑀸𑀴𑀫𑁂𑀖𑀭𑀸𑀚𑀺 𑀯𑀺𑀬 𑀔𑀸𑀬𑀢𑀺. 𑀅𑀓𑁆𑀔𑀻𑀦𑀺 𑀦𑀻𑀮𑀼𑀧𑁆𑀧𑀮𑀲𑀤𑀺𑀲𑀸𑀦𑀺. 𑀦𑀸𑀲𑀸 𑀭𑀚𑀢𑀧𑀦𑀸𑀴𑀺𑀓𑀸 𑀯𑀺𑀬 𑀲𑀼𑀯𑀝𑁆𑀝𑀺𑀢𑀸 𑀲𑀼𑀧𑀭𑀺𑀲𑀼𑀤𑁆𑀥𑀸. 𑀳𑀢𑁆𑀣𑀧𑀸𑀤𑀢𑀮𑀸𑀦𑀺 𑀘𑁂𑀯 𑀫𑀼𑀔𑀤𑁆𑀯𑀸𑀭𑀜𑁆𑀘 𑀓𑀢𑀮𑀸𑀔𑀸𑀭𑀲𑀧𑀭𑀺𑀓𑀫𑁆𑀫𑀁 𑀯𑀺𑀬 𑀲𑁄𑀪𑀢𑀺, 𑀅𑀢𑀺𑀯𑀺𑀬 𑀲𑁄𑀪𑀕𑁆𑀕𑀧𑁆𑀧𑀢𑁆𑀢𑁄 𑀩𑁆𑀭𑀸𑀳𑁆𑀫𑀡𑀲𑁆𑀲 𑀅𑀢𑁆𑀢𑀪𑀸𑀯𑁄. 𑀅𑀭𑀸𑀚𑀓𑁂 𑀞𑀸𑀦𑁂 𑀭𑀸𑀚𑀸𑀦𑀁 𑀓𑀸𑀢𑀼𑀁 𑀬𑀼𑀢𑁆𑀢𑀫𑀺𑀫𑀁 𑀩𑁆𑀭𑀸𑀳𑁆𑀫𑀡𑀁. 𑀏𑀯𑀫𑁂𑀲 𑀲𑀲𑁆𑀲𑀺𑀭𑀺𑀓𑁄. 𑀇𑀢𑀺 𑀦𑀁 𑀧𑁄𑀓𑁆𑀔𑀭𑀲𑀤𑀺𑀲𑀢𑁆𑀢𑀸 𑀧𑁄𑀓𑁆𑀔𑀭𑀲𑀸𑀢𑀻𑀢𑀺 𑀲𑀜𑁆𑀚𑀸𑀦𑀦𑁆𑀢𑀺.

𑀅𑀬𑀁 𑀧𑀦 𑀓𑀲𑁆𑀲𑀧𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀓𑀸𑀮𑁂 𑀢𑀺𑀡𑁆𑀡𑀁 𑀯𑁂𑀤𑀸𑀦𑀁 𑀧𑀸𑀭𑀕𑀽 𑀤𑀲𑀩𑀮𑀲𑁆𑀲 𑀤𑀸𑀦𑀁 𑀤𑀢𑁆𑀯𑀸 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺. 𑀲𑁄 𑀢𑀢𑁄 𑀫𑀦𑀼𑀲𑁆𑀲𑀮𑁄𑀓𑀫𑀸𑀕𑀘𑁆𑀙𑀦𑁆𑀢𑁄 𑀫𑀸𑀢𑀼𑀓𑀼𑀘𑁆𑀙𑀺𑀯𑀸𑀲𑀁 𑀚𑀺𑀕𑀼𑀘𑁆𑀙𑀺𑀢𑁆𑀯𑀸 𑀳𑀺𑀫𑀯𑀦𑁆𑀢𑀧𑀤𑁂𑀲𑁂 𑀫𑀳𑀸𑀲𑀭𑁂 𑀧𑀤𑀼𑀫𑀕𑀩𑁆𑀪𑁂 𑀦𑀺𑀩𑁆𑀩𑀢𑁆𑀢𑀺. 𑀢𑀲𑁆𑀲 𑀘 𑀲𑀭𑀲𑁆𑀲 𑀅𑀯𑀺𑀤𑀽𑀭𑁂 𑀢𑀸𑀧𑀲𑁄 𑀧𑀡𑁆𑀡𑀲𑀸𑀮𑀸𑀬 𑀯𑀲𑀢𑀺. 𑀲𑁄 𑀢𑀻𑀭𑁂 𑀞𑀺𑀢𑁄 𑀢𑀁 𑀧𑀤𑀼𑀫𑀁 𑀤𑀺𑀲𑁆𑀯𑀸 𑁋 ‘‘𑀇𑀤𑀁 𑀧𑀤𑀼𑀫𑀁 𑀅𑀯𑀲𑁂𑀲𑀧𑀤𑀼𑀫𑁂𑀳𑀺 𑀫𑀳𑀦𑁆𑀢𑀢𑀭𑀁. 𑀧𑀼𑀧𑁆𑀨𑀺𑀢𑀓𑀸𑀮𑁂 𑀦𑀁 𑀕𑀳𑁂𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀲𑀺. 𑀢𑀁 𑀲𑀢𑁆𑀢𑀸𑀳𑁂𑀦𑀸𑀧𑀺 𑀦 𑀧𑀼𑀧𑁆𑀨𑀢𑀺. 𑀢𑀸𑀧𑀲𑁄 𑀓𑀲𑁆𑀫𑀸 𑀦𑀼 𑀔𑁄 𑀇𑀤𑀁 𑀲𑀢𑁆𑀢𑀸𑀳𑁂𑀦𑀸𑀧𑀺 𑀦 𑀧𑀼𑀧𑁆𑀨𑀢𑀺. 𑀳𑀦𑁆𑀤 𑀦𑀁 𑀕𑀳𑁂𑀲𑁆𑀲𑀸𑀫𑀻𑀢𑀺 𑀑𑀢𑀭𑀺𑀢𑁆𑀯𑀸 𑀕𑀡𑁆𑀳𑀺. 𑀢𑀁 𑀢𑁂𑀦 𑀦𑀸𑀴𑀢𑁄 𑀙𑀺𑀦𑁆𑀦𑀫𑀢𑁆𑀢𑀁𑀬𑁂𑀯 𑀧𑀼𑀧𑁆𑀨𑀺𑀢𑀁. 𑀅𑀣𑀲𑁆𑀲𑀩𑁆𑀪𑀦𑁆𑀢𑀭𑁂 𑀲𑀼𑀯𑀡𑁆𑀡𑀘𑀼𑀡𑁆𑀡𑀧𑀺𑀜𑁆𑀚𑀭𑀁 𑀯𑀺𑀬 𑀭𑀚𑀢𑀩𑀺𑀫𑁆𑀩𑀓𑀁 𑀧𑀤𑀼𑀫𑀭𑁂𑀡𑀼𑀧𑀺𑀜𑁆𑀚𑀭𑀁 𑀲𑁂𑀢𑀯𑀡𑁆𑀡𑀁 𑀤𑀸𑀭𑀓𑀁 𑀅𑀤𑁆𑀤𑀲. 𑀲𑁄 𑀫𑀳𑀸𑀧𑀼𑀜𑁆𑀜𑁄 𑀏𑀲 𑀪𑀯𑀺𑀲𑁆𑀲𑀢𑀺. 𑀳𑀦𑁆𑀤 𑀦𑀁 𑀧𑀝𑀺𑀚𑀕𑁆𑀕𑀸𑀫𑀻𑀢𑀺 𑀧𑀡𑁆𑀡𑀲𑀸𑀮𑀁 𑀦𑁂𑀢𑁆𑀯𑀸 𑀧𑀝𑀺𑀚𑀕𑁆𑀕𑀺𑀢𑁆𑀯𑀸 𑀲𑀢𑁆𑀢𑀯𑀲𑁆𑀲𑀓𑀸𑀮𑀢𑁄 𑀧𑀝𑁆𑀞𑀸𑀬 𑀢𑀬𑁄 𑀯𑁂𑀤𑁂 𑀉𑀕𑁆𑀕𑀡𑁆𑀳𑀸𑀧𑁂𑀲𑀺. 𑀤𑀸𑀭𑀓𑁄 𑀢𑀺𑀡𑁆𑀡𑀁 𑀯𑁂𑀤𑀸𑀦𑀁 𑀧𑀸𑀭𑀁 𑀕𑀦𑁆𑀢𑁆𑀯𑀸 𑀧𑀡𑁆𑀟𑀺𑀢𑁄 𑀩𑁆𑀬𑀢𑁆𑀢𑁄 𑀚𑀫𑁆𑀩𑀼𑀤𑀻𑀧𑁂 𑀅𑀕𑁆𑀕𑀩𑁆𑀭𑀸𑀳𑁆𑀫𑀡𑁄 𑀅𑀳𑁄𑀲𑀺. 𑀲𑁄 𑀅𑀧𑀭𑁂𑀦 𑀲𑀫𑀬𑁂𑀦 𑀭𑀜𑁆𑀜𑁄 𑀓𑁄𑀲𑀮𑀲𑁆𑀲 𑀲𑀺𑀧𑁆𑀧𑀁 𑀤𑀲𑁆𑀲𑁂𑀲𑀺. 𑀅𑀣𑀲𑁆𑀲 𑀲𑀺𑀧𑁆𑀧𑁂 𑀧𑀲𑀦𑁆𑀦𑁄 𑀭𑀸𑀚𑀸 𑀉𑀓𑁆𑀓𑀝𑁆𑀞𑀁 𑀦𑀸𑀫 𑀫𑀳𑀸𑀦𑀕𑀭𑀁 𑀩𑁆𑀭𑀳𑁆𑀫𑀤𑁂𑀬𑁆𑀬𑀁 𑀅𑀤𑀸𑀲𑀺. 𑀇𑀢𑀺 𑀦𑀁 𑀧𑁄𑀓𑁆𑀔𑀭𑁂 𑀲𑀬𑀺𑀢𑀢𑁆𑀢𑀸 𑀧𑁄𑀓𑁆𑀔𑀭𑀲𑀸𑀢𑀻𑀢𑀺 𑀲𑀜𑁆𑀚𑀸𑀦𑀦𑁆𑀢𑀺.

𑀉𑀓𑁆𑀓𑀝𑁆𑀞𑀁 𑀅𑀚𑁆𑀛𑀸𑀯𑀲𑀢𑀻𑀢𑀺 𑀉𑀓𑁆𑀓𑀝𑁆𑀞𑀦𑀸𑀫𑀓𑁂 𑀦𑀕𑀭𑁂 𑀯𑀲𑀢𑀺. 𑀅𑀪𑀺𑀪𑀯𑀺𑀢𑁆𑀯𑀸 𑀯𑀸 𑀆𑀯𑀲𑀢𑀺. 𑀢𑀲𑁆𑀲 𑀦𑀕𑀭𑀲𑁆𑀲 𑀲𑀸𑀫𑀺𑀓𑁄 𑀳𑀼𑀢𑁆𑀯𑀸 𑀬𑀸𑀬 𑀫𑀭𑀺𑀬𑀸𑀤𑀸𑀬 𑀢𑀢𑁆𑀣 𑀯𑀲𑀺𑀢𑀩𑁆𑀩𑀁, 𑀢𑀸𑀬 𑀫𑀭𑀺𑀬𑀸𑀤𑀸𑀬 𑀯𑀲𑀺. 𑀢𑀲𑁆𑀲 𑀓𑀺𑀭 𑀦𑀕𑀭𑀲𑁆𑀲 𑀯𑀢𑁆𑀣𑀼𑀁 𑀉𑀓𑁆𑀓𑀸 𑀞𑀧𑁂𑀢𑁆𑀯𑀸 𑀉𑀓𑁆𑀓𑀸𑀲𑀼 𑀚𑀮𑀫𑀸𑀦𑀸𑀲𑀼 𑀅𑀕𑁆𑀕𑀳𑁂𑀲𑀼𑀁, 𑀢𑀲𑁆𑀫𑀸 𑀢𑀁 𑀉𑀓𑁆𑀓𑀝𑁆𑀞𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀑𑀓𑁆𑀓𑀝𑁆𑀞𑀦𑁆𑀢𑀺𑀧𑀺 𑀧𑀸𑀞𑁄, 𑀲𑁄𑀬𑁂𑀯𑀢𑁆𑀣𑁄. 𑀉𑀧𑀲𑀕𑁆𑀕𑀯𑀲𑁂𑀦 𑀧𑀦𑁂𑀢𑁆𑀣 𑀪𑀼𑀫𑁆𑀫𑀢𑁆𑀣𑁂 𑀉𑀧𑀬𑁄𑀕𑀯𑀘𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀢𑀲𑁆𑀲 𑀅𑀦𑀼𑀧𑀬𑁄𑀕𑀢𑁆𑀢𑀸 𑀘 𑀲𑁂𑀲𑀧𑀤𑁂𑀲𑀼. 𑀢𑀢𑁆𑀣 𑀮𑀓𑁆𑀔𑀡𑀁 𑀲𑀤𑁆𑀤𑀲𑀢𑁆𑀣𑀢𑁄 𑀧𑀭𑀺𑀬𑁂𑀲𑀺𑀢𑀩𑁆𑀩𑀁.

𑀲𑀢𑁆𑀢𑀼𑀲𑁆𑀲𑀤𑀦𑁆𑀢𑀺 𑀲𑀢𑁆𑀢𑁂𑀳𑀺 𑀉𑀲𑁆𑀲𑀤𑀁, 𑀉𑀲𑁆𑀲𑀦𑁆𑀦𑀁 𑀩𑀳𑀼𑀚𑀦𑀁 𑀆𑀓𑀺𑀡𑁆𑀡𑀫𑀦𑀼𑀲𑁆𑀲𑀁. 𑀧𑁄𑀲𑀸𑀯𑀦𑀺𑀬𑀳𑀢𑁆𑀣𑀺𑀅𑀲𑁆𑀲𑀫𑁄𑀭𑀫𑀺𑀕𑀸𑀤𑀺𑀅𑀦𑁂𑀓𑀲𑀢𑁆𑀢𑀲𑀫𑀸𑀓𑀺𑀡𑁆𑀡𑀜𑁆𑀘𑀸𑀢𑀺 𑀅𑀢𑁆𑀣𑁄. 𑀬𑀲𑁆𑀫𑀸 𑀧𑀦𑁂𑀢𑀁 𑀦𑀕𑀭𑀁 𑀩𑀳𑀺 𑀆𑀯𑀺𑀚𑁆𑀛𑀺𑀢𑁆𑀯𑀸 𑀚𑀸𑀢𑁂𑀦 𑀳𑀢𑁆𑀣𑀺𑀅𑀲𑁆𑀲𑀸𑀤𑀻𑀦𑀁 𑀖𑀸𑀲𑀢𑀺𑀡𑁂𑀦 𑀘𑁂𑀯 𑀕𑁂𑀳𑀘𑁆𑀙𑀸𑀤𑀦𑀢𑀺𑀡𑁂𑀦 𑀘 𑀲𑀫𑁆𑀧𑀦𑁆𑀦𑀁. 𑀢𑀣𑀸 𑀤𑀸𑀭𑀼𑀓𑀝𑁆𑀞𑁂𑀳𑀺 𑀘𑁂𑀯 𑀕𑁂𑀳𑀲𑀫𑁆𑀪𑀸𑀭𑀓𑀝𑁆𑀞𑁂𑀳𑀺 𑀘. 𑀬𑀲𑁆𑀫𑀸 𑀘𑀲𑁆𑀲𑀩𑁆𑀪𑀦𑁆𑀢𑀭𑁂 𑀯𑀝𑁆𑀝𑀘𑀢𑀼𑀭𑀲𑁆𑀲𑀸𑀤𑀺𑀲𑀡𑁆𑀞𑀸𑀦𑀸 𑀩𑀳𑀽 𑀧𑁄𑀓𑁆𑀔𑀭𑀡𑀺𑀬𑁄 𑀚𑀮𑀚𑀓𑀼𑀲𑀼𑀫𑀯𑀺𑀘𑀺𑀢𑁆𑀢𑀸𑀦𑀺 𑀘 𑀩𑀳𑀽𑀦𑀺 𑀅𑀦𑁂𑀓𑀸𑀦𑀺 𑀢𑀴𑀸𑀓𑀸𑀦𑀺 𑀉𑀤𑀓𑀲𑁆𑀲 𑀦𑀺𑀘𑁆𑀘𑀪𑀭𑀺𑀢𑀸𑀦𑁂𑀯 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀲𑀢𑀺𑀡𑀓𑀝𑁆𑀞𑁄𑀤𑀓𑀦𑁆𑀢𑀺 𑀯𑀼𑀢𑁆𑀢𑀁. 𑀲𑀳 𑀥𑀜𑁆𑀜𑁂𑀦𑀸𑀢𑀺 𑀲𑀥𑀜𑁆𑀜𑀁 𑀧𑀼𑀩𑁆𑀩𑀡𑁆𑀡𑀸𑀧𑀭𑀡𑁆𑀡𑀸𑀤𑀺𑀪𑁂𑀤𑀁 𑀩𑀳𑀼𑀥𑀜𑁆𑀜𑀲𑀦𑁆𑀦𑀺𑀘𑀬𑀦𑁆𑀢𑀺 𑀅𑀢𑁆𑀣𑁄. 𑀏𑀢𑁆𑀢𑀸𑀯𑀢𑀸 𑀬𑀲𑁆𑀫𑀺𑀁 𑀦𑀕𑀭𑁂 𑀩𑁆𑀭𑀸𑀳𑁆𑀫𑀡𑁄 𑀲𑁂𑀢𑀘𑁆𑀙𑀢𑁆𑀢𑀁 𑀉𑀲𑁆𑀲𑀸𑀧𑁂𑀢𑁆𑀯𑀸 𑀭𑀸𑀚𑀮𑀻𑀮𑀸𑀬 𑀯𑀲𑀢𑀺, 𑀢𑀲𑁆𑀲 𑀲𑀫𑀺𑀤𑁆𑀥𑀺𑀲𑀫𑁆𑀧𑀢𑁆𑀢𑀺 𑀤𑀻𑀧𑀺𑀢𑀸 𑀳𑁄𑀢𑀺.

𑀭𑀸𑀚𑀢𑁄 𑀮𑀤𑁆𑀥𑀁 𑀪𑁄𑀕𑁆𑀕𑀁 𑀭𑀸𑀚𑀪𑁄𑀕𑁆𑀕𑀁. 𑀓𑁂𑀦 𑀤𑀺𑀦𑁆𑀦𑀦𑁆𑀢𑀺 𑀘𑁂? 𑀭𑀜𑁆𑀜𑀸 𑀧𑀲𑁂𑀦𑀤𑀺𑀦𑀸 𑀓𑁄𑀲𑀮𑁂𑀦 𑀤𑀺𑀦𑁆𑀦𑀁. 𑀭𑀸𑀚𑀤𑀸𑀬𑀦𑁆𑀢𑀺 𑀭𑀜𑁆𑀜𑁄 𑀤𑀸𑀬𑀪𑀽𑀢𑀁, 𑀤𑀸𑀬𑀚𑁆𑀚𑀦𑁆𑀢𑀺 𑀅𑀢𑁆𑀣𑁄. 𑀩𑁆𑀭𑀳𑁆𑀫𑀤𑁂𑀬𑁆𑀬𑀦𑁆𑀢𑀺 𑀲𑁂𑀝𑁆𑀞𑀤𑁂𑀬𑁆𑀬𑀁, 𑀙𑀢𑁆𑀢𑀁 𑀉𑀲𑁆𑀲𑀸𑀧𑁂𑀢𑁆𑀯𑀸 𑀭𑀸𑀚𑀲𑀗𑁆𑀔𑁂𑀧𑁂𑀦 𑀪𑀼𑀜𑁆𑀚𑀺𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀭𑀸𑀚𑀪𑁄𑀕𑁆𑀕𑀦𑁆𑀢𑀺 𑀲𑀩𑁆𑀩𑀁 𑀙𑁂𑀚𑁆𑀚𑀪𑁂𑀚𑁆𑀚𑀁 𑀅𑀦𑀼𑀲𑀸𑀲𑀦𑁆𑀢𑁂𑀦 𑀦𑀤𑀻𑀢𑀺𑀢𑁆𑀣𑀧𑀩𑁆𑀩𑀢𑀸𑀤𑀻𑀲𑀼 𑀲𑀼𑀗𑁆𑀓𑀁 𑀕𑀡𑁆𑀳𑀦𑁆𑀢𑁂𑀦 𑀲𑁂𑀢𑀘𑁆𑀙𑀢𑁆𑀢𑀁 𑀉𑀲𑁆𑀲𑀸𑀧𑁂𑀢𑁆𑀯𑀸 𑀭𑀜𑁆𑀜𑀸 𑀳𑀼𑀢𑁆𑀯𑀸 𑀪𑀼𑀜𑁆𑀚𑀺𑀢𑀩𑁆𑀩𑀁. 𑀭𑀜𑁆𑀜𑀸 𑀧𑀲𑁂𑀦𑀤𑀺𑀦𑀸 𑀓𑁄𑀲𑀮𑁂𑀦 𑀤𑀺𑀦𑁆𑀦𑀁 𑀭𑀸𑀚𑀤𑀸𑀬𑀦𑁆𑀢𑀺 𑀏𑀢𑁆𑀣 𑀢𑀁 𑀦𑀕𑀭𑀁 𑀭𑀜𑁆𑀜𑀸 𑀤𑀺𑀦𑁆𑀦𑀢𑁆𑀢𑀸 𑀭𑀸𑀚𑀤𑀸𑀬𑀁 𑀤𑀸𑀬𑀓𑀭𑀸𑀚𑀤𑀻𑀧𑀦𑀢𑁆𑀣𑀁 𑀧𑀦𑀲𑁆𑀲 ‘‘𑀭𑀜𑁆𑀜𑀸 𑀧𑀲𑁂𑀦𑀤𑀺𑀦𑀸 𑀓𑁄𑀲𑀮𑁂𑀦 𑀤𑀺𑀦𑁆𑀦’’𑀦𑁆𑀢𑀺 𑀇𑀤𑀁 𑀯𑀼𑀢𑁆𑀢𑀁. 𑀩𑁆𑀭𑀳𑁆𑀫𑀤𑁂𑀬𑁆𑀬𑀦𑁆𑀢𑀺 𑀲𑁂𑀝𑁆𑀞𑀤𑁂𑀬𑁆𑀬𑀁. 𑀬𑀣𑀸 𑀤𑀺𑀦𑁆𑀦𑀁 𑀦 𑀧𑀼𑀦 𑀕𑀳𑁂𑀢𑀩𑁆𑀩𑀁 𑀳𑁄𑀢𑀺, 𑀦𑀺𑀲𑁆𑀲𑀝𑁆𑀞𑀁 𑀧𑀭𑀺𑀘𑁆𑀘𑀢𑁆𑀢𑀁. 𑀏𑀯𑀁 𑀤𑀺𑀦𑁆𑀦𑀦𑁆𑀢𑀺 𑀅𑀢𑁆𑀣𑁄.

𑀅𑀲𑁆𑀲𑁄𑀲𑀻𑀢𑀺 𑀲𑀼𑀡𑀺 𑀉𑀧𑀮𑀪𑀺, 𑀲𑁄𑀢𑀤𑁆𑀯𑀸𑀭𑀲𑀫𑁆𑀧𑀢𑁆𑀢𑀯𑀘𑀦𑀦𑀺𑀕𑁆𑀖𑁄𑀲𑀸𑀦𑀼𑀲𑀸𑀭𑁂𑀦 𑀅𑀜𑁆𑀜𑀸𑀲𑀺. 𑀔𑁄𑀢𑀺 𑀅𑀯𑀥𑀸𑀭𑀡𑀢𑁆𑀣𑁂 𑀧𑀤𑀧𑀽𑀭𑀡𑀫𑀢𑁆𑀢𑁂 𑀯𑀸 𑀦𑀺𑀧𑀸𑀢𑁄. 𑀢𑀢𑁆𑀣 𑀅𑀯𑀥𑀸𑀭𑀡𑀢𑁆𑀣𑁂𑀦 𑀅𑀲𑁆𑀲𑁄𑀲𑀺 𑀏𑀯, 𑀦𑀸𑀲𑁆𑀲 𑀓𑁄𑀘𑀺 𑀲𑀯𑀦𑀦𑁆𑀢𑀭𑀸𑀬𑁄 𑀅𑀳𑁄𑀲𑀻𑀢𑀺 𑀅𑀬𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀧𑀤𑀧𑀽𑀭𑀡𑁂𑀦 𑀧𑀦 𑀧𑀤𑀩𑁆𑀬𑀜𑁆𑀚𑀦𑀲𑀺𑀮𑀺𑀝𑁆𑀞𑀢𑀸𑀫𑀢𑁆𑀢𑀫𑁂𑀯.

𑀇𑀤𑀸𑀦𑀺 𑀬𑀫𑀢𑁆𑀣𑀁 𑀩𑁆𑀭𑀸𑀳𑁆𑀫𑀡𑁄 𑀧𑁄𑀓𑁆𑀔𑀭𑀲𑀸𑀢𑀺 𑀅𑀲𑁆𑀲𑁄𑀲𑀺, 𑀢𑀁 𑀧𑀓𑀸𑀲𑁂𑀦𑁆𑀢𑁄 𑁋 ‘‘𑀲𑀫𑀡𑁄 𑀔𑀮𑀼 𑀪𑁄 𑀕𑁄𑀢𑀫𑁄’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀫𑀺𑀢𑀧𑀸𑀧𑀢𑁆𑀢𑀸 𑀲𑀫𑀡𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋 ‘‘𑀲𑀫𑀺𑀢𑀸𑀲𑁆𑀲 𑀳𑁄𑀦𑁆𑀢𑀺 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸’’𑀢𑀺𑀆𑀤𑀺 (𑀫. 𑀦𑀺. 𑁧.𑁪𑁩𑁪). 𑀪𑀕𑀯𑀸 𑀘 𑀅𑀦𑀼𑀢𑁆𑀢𑀭𑁂𑀦 𑀅𑀭𑀺𑀬𑀫𑀕𑁆𑀕𑁂𑀦 𑀲𑀫𑀺𑀢𑀧𑀸𑀧𑁄. 𑀢𑁂𑀦𑀲𑁆𑀲 𑀬𑀣𑀸𑀪𑀽𑀢𑀕𑀼𑀡𑀸𑀥𑀺𑀕𑀢𑀫𑁂𑀢𑀁 𑀦𑀸𑀫𑀁, 𑀬𑀤𑀺𑀤𑀁 𑀲𑀫𑀡𑁄𑀢𑀺. 𑀔𑀮𑀽𑀢𑀺 𑀅𑀦𑀼𑀲𑁆𑀲𑀯𑀦𑀢𑁆𑀣𑁂 𑀦𑀺𑀧𑀸𑀢𑁄. 𑀪𑁄𑀢𑀺 𑀩𑁆𑀭𑀸𑀳𑁆𑀫𑀡𑀚𑀸𑀢𑀺𑀲𑀫𑀼𑀤𑀸𑀕𑀢𑀁 𑀆𑀮𑀧𑀦𑀫𑀢𑁆𑀢𑀁. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑁋 ‘‘𑀪𑁄𑀯𑀸𑀤𑀻 𑀦𑀸𑀫 𑀲𑁄 𑀳𑁄𑀢𑀺, 𑀲𑀘𑁂 𑀳𑁄𑀢𑀺 𑀲𑀓𑀺𑀜𑁆𑀘𑀦𑁄’’𑀢𑀺 (𑀥. 𑀧. 𑁫𑁫). 𑀕𑁄𑀢𑀫𑁄𑀢𑀺 𑀪𑀕𑀯𑀦𑁆𑀢𑀁 𑀕𑁄𑀢𑁆𑀢𑀯𑀲𑁂𑀦 𑀧𑀭𑀺𑀓𑀺𑀢𑁆𑀢𑁂𑀢𑀺. 𑀢𑀲𑁆𑀫𑀸 𑀲𑀫𑀡𑁄 𑀔𑀮𑀼 𑀪𑁄 𑀕𑁄𑀢𑀫𑁄𑀢𑀺 𑀏𑀢𑁆𑀣 𑀲𑀫𑀡𑁄 𑀓𑀺𑀭 𑀪𑁄 𑀕𑁄𑀢𑀫𑀕𑁄𑀢𑁆𑀢𑁄𑀢𑀺 𑀏𑀯𑀫𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑀲𑀓𑁆𑀬𑀧𑀼𑀢𑁆𑀢𑁄𑀢𑀺 𑀇𑀤𑀁 𑀧𑀦 𑀪𑀕𑀯𑀢𑁄 𑀉𑀘𑁆𑀘𑀸𑀓𑀼𑀮𑀧𑀭𑀺𑀤𑀻𑀧𑀦𑀁. 𑀲𑀓𑁆𑀬𑀓𑀼𑀮𑀸 𑀧𑀩𑁆𑀩𑀚𑀺𑀢𑁄𑀢𑀺 𑀲𑀤𑁆𑀥𑀸𑀧𑀩𑁆𑀩𑀚𑀺𑀢𑀪𑀸𑀯𑀧𑀭𑀺𑀤𑀻𑀧𑀦𑀁. 𑀓𑁂𑀦𑀘𑀺 𑀧𑀸𑀭𑀺𑀚𑀼𑀜𑁆𑀜𑁂𑀦 𑀅𑀦𑀪𑀺𑀪𑀽𑀢𑁄 𑀅𑀧𑀭𑀺𑀓𑁆𑀔𑀻𑀡𑀁𑀬𑁂𑀯 𑀢𑀁 𑀓𑀼𑀮𑀁 𑀧𑀳𑀸𑀬 𑀲𑀤𑁆𑀥𑀸𑀬 𑀧𑀩𑁆𑀩𑀚𑀺𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀢𑁄 𑀧𑀭𑀁 𑀯𑀼𑀢𑁆𑀢𑀢𑁆𑀣𑀫𑁂𑀯. 𑀢𑀁 𑀔𑁄 𑀧𑀦𑀸𑀢𑀺𑀆𑀤𑀺 𑀲𑀸𑀫𑀜𑁆𑀜𑀨𑀮𑁂 𑀯𑀼𑀢𑁆𑀢𑀫𑁂𑀯. 𑀲𑀸𑀥𑀼 𑀔𑁄 𑀧𑀦𑀸𑀢𑀺 𑀲𑀼𑀦𑁆𑀤𑀭𑀁 𑀔𑁄 𑀧𑀦. 𑀅𑀢𑁆𑀣𑀸𑀯𑀳𑀁 𑀲𑀼𑀔𑀸𑀯𑀳𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀣𑀸𑀭𑀽𑀧𑀸𑀦𑀁 𑀅𑀭𑀳𑀢𑀦𑁆𑀢𑀺 𑀬𑀣𑀸𑀭𑀽𑀧𑁄 𑀲𑁄 𑀪𑀯𑀁 𑀕𑁄𑀢𑀫𑁄, 𑀏𑀯𑀭𑀽𑀧𑀸𑀦𑀁 𑀬𑀣𑀸𑀪𑀽𑀢𑀕𑀼𑀡𑀸𑀥𑀺𑀕𑀫𑁂𑀦 𑀮𑁄𑀓𑁂 𑀅𑀭𑀳𑀦𑁆𑀢𑁄𑀢𑀺 𑀮𑀤𑁆𑀥𑀲𑀤𑁆𑀥𑀸𑀦𑀁 𑀅𑀭𑀳𑀢𑀁. 𑀤𑀲𑁆𑀲𑀦𑀁 𑀳𑁄𑀢𑀻𑀢𑀺 𑀧𑀲𑀸𑀤𑀲𑁄𑀫𑁆𑀫𑀸𑀦𑀺 𑀅𑀓𑁆𑀔𑀻𑀦𑀺 𑀉𑀫𑁆𑀫𑀻𑀮𑁂𑀢𑁆𑀯𑀸 𑀤𑀲𑁆𑀲𑀦𑀫𑀢𑁆𑀢𑀫𑁆𑀧𑀺 𑀲𑀸𑀥𑀼 𑀳𑁄𑀢𑀻𑀢𑀺, 𑀏𑀯𑀁 𑀅𑀚𑁆𑀛𑀸𑀲𑀬𑀁 𑀓𑀢𑁆𑀯𑀸.

𑀅𑀫𑁆𑀩𑀝𑁆𑀞𑀫𑀸𑀡𑀯𑀓𑀣𑀸

𑁨𑁫𑁬. 𑀅𑀚𑁆𑀛𑀸𑀬𑀓𑁄𑀢𑀺 𑀇𑀤𑀁 𑁋 ‘‘𑀦 𑀤𑀸𑀦𑀺𑀫𑁂 𑀛𑀸𑀬𑀦𑁆𑀢𑀺, 𑀦 𑀤𑀸𑀦𑀺𑀫𑁂 𑀛𑀸𑀬𑀦𑁆𑀢𑀻𑀢𑀺 𑀔𑁄, 𑀯𑀸𑀲𑁂𑀝𑁆𑀞, 𑀅𑀚𑁆𑀛𑀸𑀬𑀓𑀸 𑀅𑀚𑁆𑀛𑀸𑀬𑀓𑀸 𑀢𑁆𑀯𑁂𑀯 𑀢𑀢𑀺𑀬𑀁 𑀅𑀓𑁆𑀔𑀭𑀁 𑀉𑀧𑀦𑀺𑀩𑁆𑀩𑀢𑁆𑀢’’𑀦𑁆𑀢𑀺, 𑀏𑀯𑀁 𑀧𑀞𑀫𑀓𑀧𑁆𑀧𑀺𑀓𑀓𑀸𑀮𑁂 𑀛𑀸𑀦𑀯𑀺𑀭𑀳𑀺𑀢𑀸𑀦𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀕𑀭𑀳𑀯𑀘𑀦𑀁. 𑀇𑀤𑀸𑀦𑀺 𑀧𑀦 𑀢𑀁 𑀅𑀚𑁆𑀛𑀸𑀬𑀢𑀻𑀢𑀺 𑀅𑀚𑁆𑀛𑀸𑀬𑀓𑁄. 𑀫𑀦𑁆𑀢𑁂 𑀧𑀭𑀺𑀯𑀢𑁆𑀢𑁂𑀢𑀻𑀢𑀺 𑀇𑀫𑀺𑀦𑀸 𑀅𑀢𑁆𑀣𑁂𑀦 𑀧𑀲𑀁𑀲𑀸𑀯𑀘𑀦𑀁 𑀓𑀢𑁆𑀯𑀸 𑀯𑁄𑀳𑀭𑀦𑁆𑀢𑀺. 𑀫𑀦𑁆𑀢𑁂 𑀥𑀸𑀭𑁂𑀢𑀻𑀢𑀺 𑀫𑀦𑁆𑀢𑀥𑀭𑁄.

𑀢𑀺𑀡𑁆𑀡𑀁 𑀯𑁂𑀤𑀸𑀦𑀦𑁆𑀢𑀺 𑀇𑀭𑀼𑀯𑁂𑀤𑀬𑀚𑀼𑀯𑁂𑀤𑀲𑀸𑀫𑀯𑁂𑀤𑀸𑀦𑀁. 𑀑𑀝𑁆𑀞𑀧𑀳𑀢𑀓𑀭𑀡𑀯𑀲𑁂𑀦 𑀧𑀸𑀭𑀁 𑀕𑀢𑁄𑀢𑀺 𑀧𑀸𑀭𑀕𑀽. 𑀲𑀳 𑀦𑀺𑀖𑀡𑁆𑀟𑀼𑀦𑀸 𑀘 𑀓𑁂𑀝𑀼𑀪𑁂𑀦 𑀘 𑀲𑀦𑀺𑀖𑀡𑁆𑀟𑀼𑀓𑁂𑀝𑀼𑀪𑀸𑀦𑀁. 𑀦𑀺𑀖𑀡𑁆𑀟𑀽𑀢𑀺 𑀦𑀺𑀖𑀡𑁆𑀟𑀼𑀭𑀼𑀓𑁆𑀔𑀸𑀤𑀻𑀦𑀁 𑀯𑁂𑀯𑀘𑀦𑀧𑀓𑀸𑀲𑀓𑀁 𑀲𑀢𑁆𑀣𑀁. 𑀓𑁂𑀝𑀼𑀪𑀦𑁆𑀢𑀺 𑀓𑀺𑀭𑀺𑀬𑀸𑀓𑀧𑁆𑀧𑀯𑀺𑀓𑀧𑁆𑀧𑁄 𑀓𑀯𑀻𑀦𑀁 𑀉𑀧𑀓𑀸𑀭𑀸𑀯𑀳𑀁 𑀲𑀢𑁆𑀣𑀁. 𑀲𑀳 𑀅𑀓𑁆𑀔𑀭𑀧𑁆𑀧𑀪𑁂𑀤𑁂𑀦 𑀲𑀸𑀓𑁆𑀔𑀭𑀧𑁆𑀧𑀪𑁂𑀤𑀸𑀦𑀁. 𑀅𑀓𑁆𑀔𑀭𑀧𑁆𑀧𑀪𑁂𑀤𑁄𑀢𑀺 𑀲𑀺𑀓𑁆𑀔𑀸 𑀘 𑀦𑀺𑀭𑀼𑀢𑁆𑀢𑀺 𑀘. 𑀇𑀢𑀺𑀳𑀸𑀲𑀧𑀜𑁆𑀘𑀫𑀸𑀦𑀦𑁆𑀢𑀺 𑀆𑀣𑀩𑁆𑀩𑀡𑀯𑁂𑀤𑀁 𑀘𑀢𑀼𑀢𑁆𑀣𑀁 𑀓𑀢𑁆𑀯𑀸 𑀇𑀢𑀺𑀳 𑀆𑀲, 𑀇𑀢𑀺𑀳 𑀆𑀲𑀸𑀢𑀺 𑀈𑀤𑀺𑀲𑀯𑀘𑀦𑀧𑀝𑀺𑀲𑀁𑀬𑀼𑀢𑁆𑀢𑁄 𑀧𑀼𑀭𑀸𑀡𑀓𑀣𑀸𑀲𑀗𑁆𑀔𑀸𑀢𑁄 𑀇𑀢𑀺𑀳𑀸𑀲𑁄 𑀧𑀜𑁆𑀘𑀫𑁄 𑀏𑀢𑁂𑀲𑀦𑁆𑀢𑀺 𑀇𑀢𑀺𑀳𑀸𑀲𑀧𑀜𑁆𑀘𑀫𑀸, 𑀢𑁂𑀲𑀁 𑀇𑀢𑀺𑀳𑀸𑀲𑀧𑀜𑁆𑀘𑀫𑀸𑀦𑀁 𑀯𑁂𑀤𑀸𑀦𑀁.

𑀧𑀤𑀁 𑀢𑀤𑀯𑀲𑁂𑀲𑀜𑁆𑀘 𑀩𑁆𑀬𑀸𑀓𑀭𑀡𑀁 𑀅𑀥𑀻𑀬𑀢𑀺 𑀯𑁂𑀤𑁂𑀢𑀺 𑀘𑀸𑀢𑀺 𑀧𑀤𑀓𑁄 𑀯𑁂𑀬𑁆𑀬𑀸𑀓𑀭𑀡𑁄. 𑀮𑁄𑀓𑀸𑀬𑀢𑀁 𑀯𑀼𑀘𑁆𑀘𑀢𑀺 𑀯𑀺𑀢𑀡𑁆𑀟𑀯𑀸𑀤𑀲𑀢𑁆𑀣𑀁. 𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀦𑁆𑀢𑀺 𑀫𑀳𑀸𑀧𑀼𑀭𑀺𑀲𑀸𑀦𑀁 𑀩𑀼𑀤𑁆𑀥𑀸𑀤𑀻𑀦𑀁 𑀮𑀓𑁆𑀔𑀡𑀤𑀻𑀧𑀓𑀁 𑀤𑁆𑀯𑀸𑀤𑀲𑀲𑀳𑀲𑁆𑀲𑀕𑀦𑁆𑀣𑀧𑀫𑀸𑀡𑀁 𑀲𑀢𑁆𑀣𑀁. 𑀬𑀢𑁆𑀣 𑀲𑁄𑀴𑀲𑀲𑀳𑀲𑁆𑀲𑀕𑀸𑀣𑀸𑀧𑀭𑀺𑀫𑀸𑀡𑀸 𑀩𑀼𑀤𑁆𑀥𑀫𑀦𑁆𑀢𑀸 𑀦𑀸𑀫 𑀅𑀳𑁂𑀲𑀼𑀁, 𑀬𑁂𑀲𑀁 𑀯𑀲𑁂𑀦 𑀇𑀫𑀺𑀦𑀸 𑀮𑀓𑁆𑀔𑀡𑁂𑀦 𑀲𑀫𑀦𑁆𑀦𑀸𑀕𑀢𑀸 𑀩𑀼𑀤𑁆𑀥𑀸 𑀦𑀸𑀫 𑀳𑁄𑀦𑁆𑀢𑀺, 𑀇𑀫𑀺𑀦𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑀸, 𑀇𑀫𑀺𑀦𑀸 𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑀸, 𑀅𑀲𑀻𑀢𑀺 𑀫𑀳𑀸𑀲𑀸𑀯𑀓𑀸, 𑀩𑀼𑀤𑁆𑀥𑀫𑀸𑀢𑀸, 𑀩𑀼𑀤𑁆𑀥𑀧𑀺𑀢𑀸, 𑀅𑀕𑁆𑀕𑀼𑀧𑀝𑁆𑀞𑀸𑀓𑁄, 𑀅𑀕𑁆𑀕𑀼𑀧𑀝𑁆𑀞𑀸𑀬𑀺𑀓𑀸, 𑀭𑀸𑀚𑀸 𑀘𑀓𑁆𑀓𑀯𑀢𑁆𑀢𑀻𑀢𑀺 𑀅𑀬𑀁 𑀯𑀺𑀲𑁂𑀲𑁄 𑀧𑀜𑁆𑀜𑀸𑀬𑀢𑀺.

𑀅𑀦𑀯𑀬𑁄𑀢𑀺 𑀇𑀫𑁂𑀲𑀼 𑀮𑁄𑀓𑀸𑀬𑀢𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑁂𑀲𑀼 𑀅𑀦𑀽𑀦𑁄 𑀧𑀭𑀺𑀧𑀽𑀭𑀓𑀸𑀭𑀻, 𑀅𑀯𑀬𑁄 𑀦 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀯𑀬𑁄 𑀦𑀸𑀫 𑀬𑁄 𑀢𑀸𑀦𑀺 𑀅𑀢𑁆𑀣𑀢𑁄 𑀘 𑀕𑀦𑁆𑀣𑀢𑁄 𑀘 𑀲𑀦𑁆𑀥𑀸𑀭𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀅𑀦𑀼𑀜𑁆𑀜𑀸𑀢𑀧𑀝𑀺𑀜𑁆𑀜𑀸𑀢𑁄𑀢𑀺 𑀅𑀦𑀼𑀜𑁆𑀜𑀸𑀢𑁄 𑀘𑁂𑀯 𑀧𑀝𑀺𑀜𑁆𑀜𑀸𑀢𑁄 𑀘. 𑀆𑀘𑀭𑀺𑀬𑁂𑀦𑀲𑁆𑀲 ‘‘𑀬𑀁 𑀅𑀳𑀁 𑀚𑀸𑀦𑀸𑀫𑀺, 𑀢𑀁 𑀢𑁆𑀯𑀁 𑀚𑀸𑀦𑀸𑀲𑀻’’𑀢𑀺𑀆𑀤𑀺𑀦𑀸 𑀅𑀦𑀼𑀜𑁆𑀜𑀸𑀢𑁄. ‘‘𑀆𑀫 𑀆𑀘𑀭𑀺𑀬𑀸’’𑀢𑀺 𑀅𑀢𑁆𑀢𑀦𑀸 𑀢𑀲𑁆𑀲 𑀧𑀝𑀺𑀯𑀘𑀦𑀤𑀸𑀦𑀧𑀝𑀺𑀜𑁆𑀜𑀸𑀬 𑀧𑀝𑀺𑀜𑁆𑀜𑀸𑀢𑁄𑀢𑀺 𑀅𑀢𑁆𑀣𑁄. 𑀓𑀢𑀭𑀲𑁆𑀫𑀺𑀁 𑀅𑀥𑀺𑀓𑀸𑀭𑁂? 𑀲𑀓𑁂 𑀆𑀘𑀭𑀺𑀬𑀓𑁂 𑀢𑁂𑀯𑀺𑀚𑁆𑀚𑀓𑁂 𑀧𑀸𑀯𑀘𑀦𑁂. 𑀏𑀲 𑀓𑀺𑀭 𑀩𑁆𑀭𑀸𑀳𑁆𑀫𑀡𑁄 𑀘𑀺𑀦𑁆𑀢𑁂𑀲𑀺 ‘‘𑀇𑀫𑀲𑁆𑀫𑀺𑀁 𑀮𑁄𑀓𑁂 ‘𑀅𑀳𑀁 𑀩𑀼𑀤𑁆𑀥𑁄, 𑀅𑀳𑀁 𑀩𑀼𑀤𑁆𑀥𑁄’𑀢𑀺 𑀉𑀕𑁆𑀕𑀢𑀲𑁆𑀲 𑀦𑀸𑀫𑀁 𑀕𑀳𑁂𑀢𑁆𑀯𑀸 𑀩𑀳𑀽 𑀚𑀦𑀸 𑀯𑀺𑀘𑀭𑀦𑁆𑀢𑀺. 𑀢𑀲𑁆𑀫𑀸 𑀦 𑀫𑁂 𑀅𑀦𑀼𑀲𑁆𑀲𑀯𑀫𑀢𑁆𑀢𑁂𑀦𑁂𑀯 𑀉𑀧𑀲𑀗𑁆𑀓𑀫𑀺𑀢𑀼𑀁 𑀬𑀼𑀢𑁆𑀢𑀁. 𑀏𑀓𑀘𑁆𑀘𑀜𑁆𑀳𑀺 𑀉𑀧𑀲𑀗𑁆𑀓𑀫𑀦𑁆𑀢𑀲𑁆𑀲 𑀅𑀧𑀓𑁆𑀓𑀫𑀦𑀫𑁆𑀧𑀺 𑀕𑀭𑀼 𑀳𑁄𑀢𑀺, 𑀅𑀦𑀢𑁆𑀣𑁄𑀧𑀺 𑀉𑀧𑁆𑀧𑀚𑁆𑀚𑀢𑀺. 𑀬𑀁𑀦𑀽𑀦𑀸𑀳𑀁 𑀫𑀫 𑀅𑀦𑁆𑀢𑁂𑀯𑀸𑀲𑀺𑀓𑀁 𑀧𑁂𑀲𑁂𑀢𑁆𑀯𑀸 𑁋 ‘𑀩𑀼𑀤𑁆𑀥𑁄 𑀯𑀸, 𑀦𑁄 𑀯𑀸’𑀢𑀺 𑀚𑀸𑀦𑀺𑀢𑁆𑀯𑀸𑀯 𑀉𑀧𑀲𑀗𑁆𑀓𑀫𑁂𑀬𑁆𑀬’’𑀦𑁆𑀢𑀺, 𑀢𑀲𑁆𑀫𑀸 𑀫𑀸𑀡𑀯𑀁 𑀆𑀫𑀦𑁆𑀢𑁂𑀢𑁆𑀯𑀸 𑀅𑀬𑀁 𑀢𑀸𑀢𑀸𑀢𑀺𑀆𑀤𑀺𑀫𑀸𑀳.

𑁨𑁫𑁭. 𑀢𑀁 𑀪𑀯𑀦𑁆𑀢𑀦𑁆𑀢𑀺 𑀢𑀲𑁆𑀲 𑀪𑁄𑀢𑁄 𑀕𑁄𑀢𑀫𑀲𑁆𑀲. 𑀢𑀣𑀸 𑀲𑀦𑁆𑀢𑀁 𑀬𑁂𑀯𑀸𑀢𑀺 𑀢𑀣𑀸 𑀲𑀢𑁄𑀬𑁂𑀯. 𑀇𑀥𑀸𑀧𑀺 𑀳𑀺 𑀇𑀢𑁆𑀣𑀫𑁆𑀪𑀽𑀢𑀸𑀔𑁆𑀬𑀸𑀦𑀢𑁆𑀣𑀯𑀲𑁂𑀦𑁂𑀯 𑀉𑀧𑀬𑁄𑀕𑀯𑀘𑀦𑀁.

𑁨𑁫𑁮. 𑀬𑀣𑀸 𑀓𑀣𑀁 𑀧𑀦𑀸𑀳𑀁, 𑀪𑁄, 𑀢𑀦𑁆𑀢𑀺 𑀏𑀢𑁆𑀣 𑀓𑀣𑀁 𑀧𑀦𑀸𑀳𑀁 𑀪𑁄 𑀢𑀁 𑀪𑀯𑀦𑁆𑀢𑀁 𑀕𑁄𑀢𑀫𑀁 𑀚𑀸𑀦𑀺𑀲𑁆𑀲𑀸𑀫𑀺, 𑀬𑀣𑀸 𑀲𑀓𑁆𑀓𑀸 𑀲𑁄 𑀜𑀸𑀢𑀼𑀁, 𑀢𑀣𑀸 𑀫𑁂 𑀆𑀘𑀺𑀓𑁆𑀔𑀸𑀳𑀻𑀢𑀺 𑀅𑀢𑁆𑀣𑁄. 𑀬𑀣𑀸𑀢𑀺 𑀯𑀸 𑀦𑀺𑀧𑀸𑀢𑀫𑀢𑁆𑀢𑀫𑁂𑀯𑁂𑀢𑀁. 𑀓𑀣𑀦𑁆𑀢𑀺 𑀅𑀬𑀁 𑀆𑀓𑀸𑀭𑀧𑀼𑀘𑁆𑀙𑀸. 𑀓𑁂𑀦𑀸𑀓𑀸𑀭𑁂𑀦𑀸𑀳𑀁 𑀢𑀁 𑀪𑀯𑀦𑁆𑀢𑀁 𑀕𑁄𑀢𑀫𑀁 𑀚𑀸𑀦𑀺𑀲𑁆𑀲𑀸𑀫𑀻𑀢𑀺 𑀅𑀢𑁆𑀣𑁄. 𑀏𑀯𑀁 𑀯𑀼𑀢𑁆𑀢𑁂 𑀓𑀺𑀭 𑀦𑀁 𑀉𑀧𑀚𑁆𑀛𑀸𑀬𑁄 ‘‘𑀓𑀺𑀁 𑀢𑁆𑀯𑀁, 𑀢𑀸𑀢, 𑀧𑀣𑀯𑀺𑀬𑀁 𑀞𑀺𑀢𑁄, 𑀧𑀣𑀯𑀺𑀁 𑀦 𑀧𑀲𑁆𑀲𑀸𑀫𑀻𑀢𑀺 𑀯𑀺𑀬; 𑀘𑀦𑁆𑀤𑀺𑀫𑀲𑀽𑀭𑀺𑀬𑀸𑀦𑀁 𑀑𑀪𑀸𑀲𑁂 𑀞𑀺𑀢𑁄, 𑀘𑀦𑁆𑀤𑀺𑀫𑀲𑀽𑀭𑀺𑀬𑁂 𑀦 𑀧𑀲𑁆𑀲𑀸𑀫𑀻𑀢𑀺 𑀯𑀺𑀬 𑀯𑀤𑀲𑀻’’𑀢𑀺𑀆𑀤𑀻𑀦𑀺 𑀯𑀢𑁆𑀯𑀸 𑀚𑀸𑀦𑀦𑀸𑀓𑀸𑀭𑀁 𑀤𑀲𑁆𑀲𑁂𑀦𑁆𑀢𑁄 𑀆𑀕𑀢𑀸𑀦𑀺 𑀔𑁄, 𑀢𑀸𑀢𑀸𑀢𑀺𑀆𑀤𑀺𑀫𑀸𑀳.

𑀢𑀢𑁆𑀣 𑀫𑀦𑁆𑀢𑁂𑀲𑀽𑀢𑀺 𑀯𑁂𑀤𑁂𑀲𑀼. 𑀢𑀣𑀸𑀕𑀢𑁄 𑀓𑀺𑀭 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻𑀢𑀺 𑀧𑀝𑀺𑀓𑀘𑁆𑀘𑁂𑀯 𑀲𑀼𑀤𑁆𑀥𑀸𑀯𑀸𑀲𑀸 𑀤𑁂𑀯𑀸 𑀯𑁂𑀤𑁂𑀲𑀼 𑀮𑀓𑁆𑀔𑀡𑀸𑀦𑀺 𑀧𑀓𑁆𑀔𑀺𑀧𑀺𑀢𑁆𑀯𑀸 𑀩𑀼𑀤𑁆𑀥𑀫𑀦𑁆𑀢𑀸 𑀦𑀸𑀫𑁂𑀢𑁂𑀢𑀺 𑀩𑁆𑀭𑀸𑀳𑁆𑀫𑀡𑀯𑁂𑀲𑁂𑀦𑁂𑀯 𑀯𑁂𑀤𑁂 𑀯𑀸𑀘𑁂𑀦𑁆𑀢𑀺. 𑀢𑀤𑀦𑀼𑀲𑀸𑀭𑁂𑀦 𑀫𑀳𑁂𑀲𑀓𑁆𑀔𑀸 𑀲𑀢𑁆𑀢𑀸 𑀢𑀣𑀸𑀕𑀢𑀁 𑀚𑀸𑀦𑀺𑀲𑁆𑀲𑀦𑁆𑀢𑀻𑀢𑀺. 𑀢𑁂𑀦 𑀧𑀼𑀩𑁆𑀩𑁂 𑀯𑁂𑀤𑁂𑀲𑀼 𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀸𑀦𑀺 𑀆𑀕𑀘𑁆𑀙𑀦𑁆𑀢𑀺. 𑀧𑀭𑀺𑀦𑀺𑀩𑁆𑀩𑀼𑀢𑁂 𑀧𑀦 𑀢𑀣𑀸𑀕𑀢𑁂 𑀅𑀦𑀼𑀓𑁆𑀓𑀫𑁂𑀦 𑀅𑀦𑁆𑀢𑀭𑀥𑀸𑀬𑀦𑁆𑀢𑀺. 𑀢𑁂𑀦𑁂𑀢𑀭𑀳𑀺 𑀦𑀢𑁆𑀣𑀻𑀢𑀺. 𑀫𑀳𑀸𑀧𑀼𑀭𑀺𑀲𑀲𑁆𑀲𑀸𑀢𑀺 𑀧𑀡𑀺𑀥𑀺𑀲𑀫𑀸𑀤𑀸𑀦𑀜𑀸𑀡𑀓𑀭𑀼𑀡𑀸𑀤𑀺𑀕𑀼𑀡𑀫𑀳𑀢𑁄 𑀧𑀼𑀭𑀺𑀲𑀲𑁆𑀲. 𑀤𑁆𑀯𑁂𑀬𑁂𑀯 𑀕𑀢𑀺𑀬𑁄𑀢𑀺 𑀤𑁆𑀯𑁂𑀬𑁂𑀯 𑀦𑀺𑀝𑁆𑀞𑀸. 𑀓𑀸𑀫𑀜𑁆𑀘𑀸𑀬𑀁 𑀕𑀢𑀺𑀲𑀤𑁆𑀤𑁄 ‘‘𑀧𑀜𑁆𑀘 𑀔𑁄 𑀇𑀫𑀸, 𑀲𑀸𑀭𑀺𑀧𑀼𑀢𑁆𑀢, 𑀕𑀢𑀺𑀬𑁄’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁧𑁫𑁩) 𑀪𑀯𑀪𑁂𑀤𑁂 𑀯𑀢𑁆𑀢𑀢𑀺. ‘‘𑀕𑀢𑀺 𑀫𑀺𑀕𑀸𑀦𑀁 𑀧𑀯𑀦’’𑀦𑁆𑀢𑀺𑀆𑀤𑀻𑀲𑀼 (𑀧𑀭𑀺. 𑁩𑁯𑁯) 𑀦𑀺𑀯𑀸𑀲𑀝𑁆𑀞𑀸𑀦𑁂. ‘‘𑀏𑀯𑀁 𑀅𑀥𑀺𑀫𑀢𑁆𑀢𑀕𑀢𑀺𑀫𑀦𑁆𑀢𑁄’’𑀢𑀺𑀆𑀤𑀻𑀲𑀼 𑀧𑀜𑁆𑀜𑀸𑀬𑀁. ‘‘𑀕𑀢𑀺𑀕𑀢’’𑀦𑁆𑀢𑀺𑀆𑀤𑀻𑀲𑀼 𑀯𑀺𑀲𑀝𑀪𑀸𑀯𑁂. 𑀇𑀥 𑀧𑀦 𑀦𑀺𑀝𑁆𑀞𑀸𑀬𑀁 𑀯𑀢𑁆𑀢𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀢𑀢𑁆𑀣 𑀓𑀺𑀜𑁆𑀘𑀸𑀧𑀺 𑀬𑁂𑀳𑀺 𑀮𑀓𑁆𑀔𑀡𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀭𑀸𑀚𑀸 𑀘𑀓𑁆𑀓𑀯𑀢𑁆𑀢𑀻 𑀳𑁄𑀢𑀺, 𑀦 𑀢𑁂𑀳𑁂𑀯 𑀩𑀼𑀤𑁆𑀥𑁄 𑀳𑁄𑀢𑀺; 𑀚𑀸𑀢𑀺𑀲𑀸𑀫𑀜𑁆𑀜𑀢𑁄 𑀧𑀦 𑀢𑀸𑀦𑀺𑀬𑁂𑀯 𑀢𑀸𑀦𑀻𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀬𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲𑀸’’𑀢𑀺. 𑀲𑀘𑁂 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀢𑀻𑀢𑀺 𑀬𑀤𑀺 𑀅𑀕𑀸𑀭𑁂 𑀯𑀲𑀢𑀺. 𑀭𑀸𑀚𑀸 𑀳𑁄𑀢𑀺 𑀘𑀓𑁆𑀓𑀯𑀢𑁆𑀢𑀻𑀢𑀺 𑀘𑀢𑀽𑀳𑀺 𑀅𑀘𑁆𑀙𑀭𑀺𑀬𑀥𑀫𑁆𑀫𑁂𑀳𑀺, 𑀲𑀗𑁆𑀕𑀳𑀯𑀢𑁆𑀣𑀽𑀳𑀺 𑀘 𑀮𑁄𑀓𑀁 𑀭𑀜𑁆𑀚𑀦𑀢𑁄 𑀭𑀸𑀚𑀸, 𑀘𑀓𑁆𑀓𑀭𑀢𑀦𑀁 𑀯𑀢𑁆𑀢𑁂𑀢𑀺, 𑀘𑀢𑀽𑀳𑀺 𑀲𑀫𑁆𑀧𑀢𑁆𑀢𑀺𑀘𑀓𑁆𑀓𑁂𑀳𑀺 𑀯𑀢𑁆𑀢𑀢𑀺, 𑀢𑁂𑀳𑀺 𑀘 𑀧𑀭𑀁 𑀯𑀢𑁆𑀢𑁂𑀢𑀺, 𑀧𑀭𑀳𑀺𑀢𑀸𑀬 𑀘 𑀇𑀭𑀺𑀬𑀸𑀧𑀣𑀘𑀓𑁆𑀓𑀸𑀦𑀁 𑀯𑀢𑁆𑀢𑁄 𑀏𑀢𑀲𑁆𑀫𑀺𑀁 𑀅𑀢𑁆𑀣𑀻𑀢𑀺 𑀘𑀓𑁆𑀓𑀯𑀢𑁆𑀢𑀻. 𑀏𑀢𑁆𑀣 𑀘 𑀭𑀸𑀚𑀸𑀢𑀺 𑀲𑀸𑀫𑀜𑁆𑀜𑀁. 𑀘𑀓𑁆𑀓𑀯𑀢𑁆𑀢𑀻𑀢𑀺 𑀯𑀺𑀲𑁂𑀲𑀁. 𑀥𑀫𑁆𑀫𑁂𑀦 𑀘𑀭𑀢𑀻𑀢𑀺 𑀥𑀫𑁆𑀫𑀺𑀓𑁄. 𑀜𑀸𑀬𑁂𑀦 𑀲𑀫𑁂𑀦 𑀯𑀢𑁆𑀢𑀢𑀻𑀢𑀺 𑀅𑀢𑁆𑀣𑁄. 𑀥𑀫𑁆𑀫𑁂𑀦 𑀭𑀚𑁆𑀚𑀁 𑀮𑀪𑀺𑀢𑁆𑀯𑀸 𑀭𑀸𑀚𑀸 𑀚𑀸𑀢𑁄𑀢𑀺 𑀥𑀫𑁆𑀫𑀭𑀸𑀚𑀸. 𑀧𑀭𑀳𑀺𑀢𑀥𑀫𑁆𑀫𑀓𑀭𑀡𑁂𑀦 𑀯𑀸 𑀥𑀫𑁆𑀫𑀺𑀓𑁄. 𑀅𑀢𑁆𑀢𑀳𑀺𑀢𑀥𑀫𑁆𑀫𑀓𑀭𑀡𑁂𑀦 𑀥𑀫𑁆𑀫𑀭𑀸𑀚𑀸. 𑀘𑀢𑀼𑀭𑀦𑁆𑀢𑀸𑀬 𑀇𑀲𑁆𑀲𑀭𑁄𑀢𑀺 𑀘𑀸𑀢𑀼𑀭𑀦𑁆𑀢𑁄, 𑀘𑀢𑀼𑀲𑀫𑀼𑀤𑁆𑀤𑀅𑀦𑁆𑀢𑀸𑀬, 𑀘𑀢𑀼𑀩𑁆𑀩𑀺𑀥𑀤𑀻𑀧𑀯𑀺𑀪𑀽𑀲𑀺𑀢𑀸𑀬 𑀧𑀣𑀯𑀺𑀬𑀸 𑀇𑀲𑁆𑀲𑀭𑁄𑀢𑀺 𑀅𑀢𑁆𑀣𑁄. 𑀅𑀚𑁆𑀛𑀢𑁆𑀢𑀁 𑀓𑁄𑀧𑀸𑀤𑀺𑀧𑀘𑁆𑀘𑀢𑁆𑀣𑀺𑀓𑁂 𑀩𑀳𑀺𑀤𑁆𑀥𑀸 𑀘 𑀲𑀩𑁆𑀩𑀭𑀸𑀚𑀸𑀦𑁄 𑀯𑀺𑀚𑁂𑀢𑀻𑀢𑀺 𑀯𑀺𑀚𑀺𑀢𑀸𑀯𑀻. 𑀚𑀦𑀧𑀤𑀢𑁆𑀣𑀸𑀯𑀭𑀺𑀬𑀧𑁆𑀧𑀢𑁆𑀢𑁄𑀢𑀺 𑀚𑀦𑀧𑀤𑁂 𑀥𑀼𑀯𑀪𑀸𑀯𑀁 𑀣𑀸𑀯𑀭𑀪𑀸𑀯𑀁 𑀧𑀢𑁆𑀢𑁄, 𑀦 𑀲𑀓𑁆𑀓𑀸 𑀓𑁂𑀦𑀘𑀺 𑀘𑀸𑀮𑁂𑀢𑀼𑀁. 𑀚𑀦𑀧𑀤𑁄 𑀯𑀸 𑀢𑀫𑁆𑀳𑀺 𑀣𑀸𑀯𑀭𑀺𑀬𑀧𑁆𑀧𑀢𑁆𑀢𑁄 𑀅𑀦𑀼𑀬𑀼𑀢𑁆𑀢𑁄 𑀲𑀓𑀫𑁆𑀫𑀦𑀺𑀭𑀢𑁄 𑀅𑀘𑀮𑁄 𑀅𑀲𑀫𑁆𑀧𑀯𑁂𑀥𑀻𑀢𑀺 𑀚𑀦𑀧𑀤𑀢𑁆𑀣𑀸𑀯𑀭𑀺𑀬𑀧𑁆𑀧𑀢𑁆𑀢𑁄.

𑀲𑁂𑀬𑁆𑀬𑀣𑀺𑀤𑀦𑁆𑀢𑀺 𑀦𑀺𑀧𑀸𑀢𑁄, 𑀢𑀲𑁆𑀲 𑀘𑁂𑀢𑀸𑀦𑀺 𑀓𑀢𑀫𑀸𑀦𑀻𑀢𑀺 𑀅𑀢𑁆𑀣𑁄. 𑀘𑀓𑁆𑀓𑀭𑀢𑀦𑀦𑁆𑀢𑀺𑀆𑀤𑀻𑀲𑀼 𑀘𑀓𑁆𑀓𑀜𑁆𑀘, 𑀢𑀁 𑀭𑀢𑀺𑀚𑀦𑀦𑀝𑁆𑀞𑁂𑀦 𑀭𑀢𑀦𑀜𑁆𑀘𑀸𑀢𑀺 𑀘𑀓𑁆𑀓𑀭𑀢𑀦𑀁. 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣. 𑀇𑀫𑁂𑀲𑀼 𑀧𑀦 𑀭𑀢𑀦𑁂𑀲𑀼 𑀅𑀬𑀁 𑀘𑀓𑁆𑀓𑀯𑀢𑁆𑀢𑀺𑀭𑀸𑀚𑀸 𑀘𑀓𑁆𑀓𑀭𑀢𑀦𑁂𑀦 𑀅𑀚𑀺𑀢𑀁 𑀚𑀺𑀦𑀸𑀢𑀺, 𑀳𑀢𑁆𑀣𑀺𑀅𑀲𑁆𑀲𑀭𑀢𑀦𑁂𑀳𑀺 𑀯𑀺𑀚𑀺𑀢𑁂 𑀬𑀣𑀸𑀲𑀼𑀔𑀁 𑀅𑀦𑀼𑀘𑀭𑀢𑀺, 𑀧𑀭𑀺𑀡𑀸𑀬𑀓𑀭𑀢𑀦𑁂𑀦 𑀯𑀺𑀚𑀺𑀢𑀫𑀦𑀼𑀭𑀓𑁆𑀔𑀢𑀺, 𑀅𑀯𑀲𑁂𑀲𑁂𑀳𑀺 𑀉𑀧𑀪𑁄𑀕𑀲𑀼𑀔𑀫𑀦𑀼𑀪𑀯𑀢𑀺. 𑀧𑀞𑀫𑁂𑀦 𑀘𑀲𑁆𑀲 𑀉𑀲𑁆𑀲𑀸𑀳𑀲𑀢𑁆𑀢𑀺𑀬𑁄𑀕𑁄, 𑀧𑀘𑁆𑀙𑀺𑀫𑁂𑀦 𑀫𑀦𑁆𑀢𑀲𑀢𑁆𑀢𑀺𑀬𑁄𑀕𑁄, 𑀳𑀢𑁆𑀣𑀺𑀅𑀲𑁆𑀲𑀕𑀳𑀧𑀢𑀺𑀭𑀢𑀦𑁂𑀳𑀺 𑀧𑀪𑀼𑀲𑀢𑁆𑀢𑀺𑀬𑁄𑀕𑁄 𑀲𑀼𑀧𑀭𑀺𑀧𑀼𑀡𑁆𑀡𑁄 𑀳𑁄𑀢𑀺, 𑀇𑀢𑁆𑀣𑀺𑀫𑀡𑀺𑀭𑀢𑀦𑁂𑀳𑀺 𑀢𑀺𑀯𑀺𑀥𑀲𑀢𑁆𑀢𑀺𑀬𑁄𑀕𑀨𑀮𑀁. 𑀲𑁄 𑀇𑀢𑁆𑀣𑀺𑀫𑀡𑀺𑀭𑀢𑀦𑁂𑀳𑀺 𑀪𑁄𑀕𑀲𑀼𑀔𑀫𑀦𑀼𑀪𑀯𑀢𑀺, 𑀲𑁂𑀲𑁂𑀳𑀺 𑀇𑀲𑁆𑀲𑀭𑀺𑀬𑀲𑀼𑀔𑀁. 𑀯𑀺𑀲𑁂𑀲𑀢𑁄 𑀘𑀲𑁆𑀲 𑀧𑀼𑀭𑀺𑀫𑀸𑀦𑀺 𑀢𑀻𑀡𑀺 𑀅𑀤𑁄𑀲𑀓𑀼𑀲𑀮𑀫𑀽𑀮𑀚𑀦𑀺𑀢𑀓𑀫𑁆𑀫𑀸𑀦𑀼𑀪𑀸𑀯𑁂𑀦 𑀲𑀫𑁆𑀧𑀚𑁆𑀚𑀦𑁆𑀢𑀺, 𑀫𑀚𑁆𑀛𑀺𑀫𑀸𑀦𑀺 𑀅𑀮𑁄𑀪𑀓𑀼𑀲𑀮𑀫𑀽𑀮𑀚𑀦𑀺𑀢𑀓𑀫𑁆𑀫𑀸𑀦𑀼𑀪𑀸𑀯𑁂𑀦, 𑀧𑀘𑁆𑀙𑀺𑀫𑀫𑁂𑀓𑀁 𑀅𑀫𑁄𑀳𑀓𑀼𑀲𑀮𑀫𑀽𑀮𑀚𑀦𑀺𑀢𑀓𑀫𑁆𑀫𑀸𑀦𑀼𑀪𑀸𑀯𑁂𑀦𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄. 𑀯𑀺𑀢𑁆𑀣𑀸𑀭𑁄 𑀧𑀦 𑀩𑁄𑀚𑁆𑀛𑀗𑁆𑀕𑀲𑀁𑀬𑀼𑀢𑁆𑀢𑁂 𑀭𑀢𑀦𑀲𑀼𑀢𑁆𑀢𑀲𑁆𑀲 𑀉𑀧𑀤𑁂𑀲𑀢𑁄 𑀕𑀳𑁂𑀢𑀩𑁆𑀩𑁄.

𑀧𑀭𑁄𑀲𑀳𑀲𑁆𑀲𑀦𑁆𑀢𑀺 𑀅𑀢𑀺𑀭𑁂𑀓𑀲𑀳𑀲𑁆𑀲𑀁. 𑀲𑀽𑀭𑀸𑀢𑀺 𑀅𑀪𑀻𑀭𑀼𑀓𑀚𑀸𑀢𑀺𑀓𑀸. 𑀯𑀻𑀭𑀗𑁆𑀕𑀭𑀽𑀧𑀸𑀢𑀺 𑀤𑁂𑀯𑀧𑀼𑀢𑁆𑀢𑀲𑀤𑀺𑀲𑀓𑀸𑀬𑀸. 𑀏𑀯𑀁 𑀢𑀸𑀯 𑀏𑀓𑁂 𑀯𑀡𑁆𑀡𑀬𑀦𑁆𑀢𑀺. 𑀅𑀬𑀁 𑀧𑀦𑁂𑀢𑁆𑀣 𑀲𑀩𑁆𑀪𑀸𑀯𑁄. 𑀯𑀻𑀭𑀸𑀢𑀺 𑀉𑀢𑁆𑀢𑀫𑀲𑀽𑀭𑀸 𑀯𑀼𑀘𑁆𑀘𑀦𑁆𑀢𑀺, 𑀯𑀻𑀭𑀸𑀦𑀁 𑀅𑀗𑁆𑀕𑀁 𑀯𑀻𑀭𑀗𑁆𑀕𑀁, 𑀯𑀻𑀭𑀓𑀸𑀭𑀡𑀁 𑀯𑀻𑀭𑀺𑀬𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀯𑀻𑀭𑀗𑁆𑀕𑀭𑀽𑀧𑀁 𑀏𑀢𑁂𑀲𑀦𑁆𑀢𑀺 𑀯𑀻𑀭𑀗𑁆𑀕𑀭𑀽𑀧𑀸, 𑀯𑀻𑀭𑀺𑀬𑀫𑀬𑀲𑀭𑀻𑀭𑀸 𑀯𑀺𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀭𑀲𑁂𑀦𑀧𑁆𑀧𑀫𑀤𑁆𑀤𑀦𑀸𑀢𑀺 𑀲𑀘𑁂 𑀧𑀝𑀺𑀫𑀼𑀔𑀁 𑀢𑀺𑀝𑁆𑀞𑁂𑀬𑁆𑀬 𑀧𑀭𑀲𑁂𑀦𑀸 𑀢𑀁 𑀧𑀭𑀺𑀫𑀤𑁆𑀤𑀺𑀢𑀼𑀁 𑀲𑀫𑀢𑁆𑀣𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀥𑀫𑁆𑀫𑁂𑀦𑀸𑀢𑀺 ‘‘𑀧𑀸𑀡𑁄 𑀦 𑀳𑀦𑁆𑀢𑀩𑁆𑀩𑁄’’𑀢𑀺𑀆𑀤𑀺𑀦𑀸 𑀧𑀜𑁆𑀘𑀲𑀻𑀮𑀥𑀫𑁆𑀫𑁂𑀦. 𑀅𑀭𑀳𑀁 𑀳𑁄𑀢𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀮𑁄𑀓𑁂 𑀯𑀺𑀯𑀝𑁆𑀝𑀘𑁆𑀙𑀤𑁄𑀢𑀺 𑀏𑀢𑁆𑀣 𑀭𑀸𑀕𑀤𑁄𑀲𑀫𑁄𑀳𑀫𑀸𑀦𑀤𑀺𑀝𑁆𑀞𑀺𑀅𑀯𑀺𑀚𑁆𑀚𑀸𑀤𑀼𑀘𑁆𑀘𑀭𑀺𑀢𑀙𑀤𑀦𑁂𑀳𑀺 𑀲𑀢𑁆𑀢𑀳𑀺 𑀧𑀝𑀺𑀘𑁆𑀙𑀦𑁆𑀦𑁂 𑀓𑀺𑀮𑁂𑀲𑀦𑁆𑀥𑀓𑀸𑀭𑁂 𑀮𑁄𑀓𑁂 𑀢𑀁 𑀙𑀤𑀦𑀁 𑀯𑀺𑀯𑀝𑁆𑀝𑁂𑀢𑁆𑀯𑀸 𑀲𑀫𑀦𑁆𑀢𑀢𑁄 𑀲𑀜𑁆𑀚𑀸𑀢𑀸𑀮𑁄𑀓𑁄 𑀳𑀼𑀢𑁆𑀯𑀸 𑀞𑀺𑀢𑁄𑀢𑀺 𑀯𑀺𑀯𑀝𑁆𑀝𑀘𑁆𑀙𑀤𑁄. 𑀢𑀢𑁆𑀣 𑀧𑀞𑀫𑁂𑀦 𑀧𑀤𑁂𑀦 𑀧𑀽𑀚𑀸𑀭𑀳𑀢𑀸. 𑀤𑀼𑀢𑀺𑀬𑁂𑀦 𑀢𑀲𑁆𑀲𑀸 𑀳𑁂𑀢𑀼, 𑀬𑀲𑁆𑀫𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄𑀢𑀺, 𑀢𑀢𑀺𑀬𑁂𑀦 𑀩𑀼𑀤𑁆𑀥𑀢𑁆𑀢𑀳𑁂𑀢𑀼𑀪𑀽𑀢𑀸 𑀯𑀺𑀯𑀝𑁆𑀝𑀘𑁆𑀙𑀤𑀢𑀸 𑀯𑀼𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀅𑀣 𑀯𑀸 𑀯𑀺𑀯𑀝𑁆𑀝𑁄 𑀘 𑀯𑀺𑀘𑁆𑀙𑀤𑁄 𑀘𑀸𑀢𑀺 𑀯𑀺𑀯𑀝𑁆𑀝𑀘𑁆𑀙𑀤𑁄, 𑀯𑀝𑁆𑀝𑀭𑀳𑀺𑀢𑁄 𑀙𑀤𑀦𑀭𑀳𑀺𑀢𑁄 𑀘𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑁂𑀦 𑀅𑀭𑀳𑀁 𑀯𑀝𑁆𑀝𑀸𑀪𑀸𑀯𑁂𑀦, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀙𑀤𑀦𑀸𑀪𑀸𑀯𑁂𑀦𑀸𑀢𑀺 𑀏𑀯𑀁 𑀧𑀼𑀭𑀺𑀫𑀧𑀤𑀤𑁆𑀯𑀬𑀲𑁆𑀲𑁂𑀯 𑀳𑁂𑀢𑀼𑀤𑁆𑀯𑀬𑀁 𑀯𑀼𑀢𑁆𑀢𑀁 𑀳𑁄𑀢𑀺, 𑀤𑀼𑀢𑀺𑀬𑁂𑀦 𑀯𑁂𑀲𑀸𑀭𑀚𑁆𑀚𑁂𑀦 𑀘𑁂𑀢𑁆𑀣 𑀧𑀼𑀭𑀺𑀫𑀲𑀺𑀤𑁆𑀥𑀺, 𑀧𑀞𑀫𑁂𑀦 𑀤𑀼𑀢𑀺𑀬𑀲𑀺𑀤𑁆𑀥𑀺, 𑀢𑀢𑀺𑀬𑀘𑀢𑀼𑀢𑁆𑀣𑁂𑀳𑀺 𑀢𑀢𑀺𑀬𑀲𑀺𑀤𑁆𑀥𑀺 𑀳𑁄𑀢𑀺. 𑀧𑀼𑀭𑀺𑀫𑀜𑁆𑀘 𑀥𑀫𑁆𑀫𑀘𑀓𑁆𑀔𑀼𑀁, 𑀤𑀼𑀢𑀺𑀬𑀁 𑀩𑀼𑀤𑁆𑀥𑀘𑀓𑁆𑀔𑀼𑀁, 𑀢𑀢𑀺𑀬𑀁 𑀲𑀫𑀦𑁆𑀢𑀘𑀓𑁆𑀔𑀼𑀁 𑀲𑀸𑀥𑁂𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑁆𑀯𑀁 𑀫𑀦𑁆𑀢𑀸𑀦𑀁 𑀧𑀝𑀺𑀕𑁆𑀕𑀳𑁂𑀢𑀸𑀢𑀺 𑀇𑀫𑀺𑀦𑀸’𑀲𑁆𑀲 𑀫𑀦𑁆𑀢𑁂𑀲𑀼 𑀲𑀽𑀭𑀪𑀸𑀯𑀁 𑀚𑀦𑁂𑀢𑀺.

𑁨𑁫𑁯. 𑀲𑁄𑀧𑀺 𑀢𑀸𑀬 𑀆𑀘𑀭𑀺𑀬𑀓𑀣𑀸𑀬 𑀮𑀓𑁆𑀔𑀡𑁂𑀲𑀼 𑀯𑀺𑀕𑀢𑀲𑀫𑁆𑀫𑁄𑀳𑁄 𑀏𑀓𑁄𑀪𑀸𑀲𑀚𑀸𑀢𑁂 𑀯𑀺𑀬 𑀩𑀼𑀤𑁆𑀥𑀫𑀦𑁆𑀢𑁂 𑀲𑀫𑁆𑀧𑀲𑁆𑀲𑀫𑀸𑀦𑁄 𑀏𑀯𑀁 𑀪𑁄𑀢𑀺 𑀆𑀳. 𑀢𑀲𑁆𑀲𑀢𑁆𑀣𑁄 𑁋 ‘𑀬𑀣𑀸, 𑀪𑁄, 𑀢𑁆𑀯𑀁 𑀯𑀤𑀲𑀺, 𑀏𑀯𑀁 𑀓𑀭𑀺𑀲𑁆𑀲𑀸𑀫𑀻’𑀢𑀺. 𑀯𑀴𑀯𑀸𑀭𑀣𑀫𑀸𑀭𑀼𑀬𑁆𑀳𑀸𑀢𑀺 𑀯𑀴𑀯𑀸𑀬𑀼𑀢𑁆𑀢𑀁 𑀭𑀣𑀁 𑀅𑀪𑀺𑀭𑀽𑀳𑀺𑀢𑁆𑀯𑀸. 𑀩𑁆𑀭𑀸𑀳𑁆𑀫𑀡𑁄 𑀓𑀺𑀭 𑀬𑁂𑀦 𑀭𑀣𑁂𑀦 𑀲𑀬𑀁 𑀯𑀺𑀘𑀭𑀢𑀺, 𑀢𑀫𑁂𑀯 𑀭𑀣𑀁 𑀤𑀢𑁆𑀯𑀸 𑀫𑀸𑀡𑀯𑀁 𑀧𑁂𑀲𑁂𑀲𑀺. 𑀫𑀸𑀡𑀯𑀸𑀧𑀺 𑀧𑁄𑀓𑁆𑀔𑀭𑀲𑀸𑀢𑀺𑀲𑁆𑀲𑁂𑀯 𑀅𑀦𑁆𑀢𑁂𑀯𑀸𑀲𑀺𑀓𑀸. 𑀲𑁄 𑀓𑀺𑀭 𑀢𑁂𑀲𑀁 𑁋 ‘‘𑀅𑀫𑁆𑀩𑀝𑁆𑀞𑁂𑀦 𑀲𑀤𑁆𑀥𑀺𑀁 𑀕𑀘𑁆𑀙𑀣𑀸’’𑀢𑀺 𑀲𑀜𑁆𑀜𑀁 𑀅𑀤𑀸𑀲𑀺.

𑀬𑀸𑀯𑀢𑀺𑀓𑀸 𑀬𑀸𑀦𑀲𑁆𑀲 𑀪𑀽𑀫𑀻𑀢𑀺 𑀬𑀢𑁆𑀢𑀓𑀁 𑀲𑀓𑁆𑀓𑀸 𑀳𑁄𑀢𑀺 𑀬𑀸𑀦𑁂𑀦 𑀕𑀦𑁆𑀢𑀼𑀁, 𑀅𑀬𑀁 𑀬𑀸𑀦𑀲𑁆𑀲 𑀪𑀽𑀫𑀺 𑀦𑀸𑀫. 𑀬𑀸𑀦𑀸 𑀧𑀘𑁆𑀘𑁄𑀭𑁄𑀳𑀺𑀢𑁆𑀯𑀸𑀢𑀺 𑀅𑀬𑀸𑀦𑀪𑀽𑀫𑀺𑀁, 𑀤𑁆𑀯𑀸𑀭𑀓𑁄𑀝𑁆𑀞𑀓𑀲𑀫𑀻𑀧𑀁 𑀕𑀦𑁆𑀢𑁆𑀯𑀸 𑀬𑀸𑀦𑀢𑁄 𑀧𑀝𑀺𑀑𑀭𑁄𑀳𑀺𑀢𑁆𑀯𑀸.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦𑀸𑀢𑀺 𑀬𑀲𑁆𑀫𑀺𑀁 𑀲𑀫𑀬𑁂 𑀅𑀫𑁆𑀩𑀝𑁆𑀞𑁄 𑀆𑀭𑀸𑀫𑀁 𑀧𑀸𑀯𑀺𑀲𑀺. 𑀢𑀲𑁆𑀫𑀺𑀁 𑀧𑀦 𑀲𑀫𑀬𑁂, 𑀞𑀺𑀢𑀫𑀚𑁆𑀛𑀦𑁆𑀳𑀺𑀓𑀲𑀫𑀬𑁂. 𑀓𑀲𑁆𑀫𑀸 𑀧𑀦 𑀢𑀲𑁆𑀫𑀺𑀁 𑀲𑀫𑀬𑁂 𑀘𑀗𑁆𑀓𑀫𑀦𑁆𑀢𑀻𑀢𑀺? 𑀧𑀡𑀻𑀢𑀪𑁄𑀚𑀦𑀧𑀘𑁆𑀘𑀬𑀲𑁆𑀲 𑀣𑀺𑀦𑀫𑀺𑀤𑁆𑀥𑀲𑁆𑀲 𑀯𑀺𑀦𑁄𑀤𑀦𑀢𑁆𑀣𑀁, 𑀤𑀺𑀯𑀸𑀧𑀥𑀸𑀦𑀺𑀓𑀸 𑀯𑀸 𑀢𑁂. 𑀢𑀸𑀤𑀺𑀲𑀸𑀦𑀜𑁆𑀳𑀺 𑀧𑀘𑁆𑀙𑀸𑀪𑀢𑁆𑀢𑀁 𑀘𑀗𑁆𑀓𑀫𑀺𑀢𑁆𑀯𑀸 𑀦𑁆𑀳𑀸𑀬𑀺𑀢𑁆𑀯𑀸 𑀲𑀭𑀻𑀭𑀁 𑀉𑀢𑀼𑀁 𑀕𑀸𑀳𑀸𑀧𑁂𑀢𑁆𑀯𑀸 𑀦𑀺𑀲𑀚𑁆𑀚 𑀲𑀫𑀡𑀥𑀫𑁆𑀫𑀁 𑀓𑀭𑁄𑀦𑁆𑀢𑀸𑀦𑀁 𑀘𑀺𑀢𑁆𑀢𑀁 𑀏𑀓𑀕𑁆𑀕𑀁 𑀳𑁄𑀢𑀺. 𑀬𑁂𑀦 𑀢𑁂 𑀪𑀺𑀓𑁆𑀔𑀽𑀢𑀺 𑀲𑁄 𑀓𑀺𑀭 𑁋 ‘‘𑀓𑀼𑀳𑀺𑀁 𑀲𑀫𑀡𑁄 𑀕𑁄𑀢𑀫𑁄’’𑀢𑀺 𑀧𑀭𑀺𑀯𑁂𑀡𑀢𑁄 𑀧𑀭𑀺𑀯𑁂𑀡𑀁 𑀅𑀦𑀸𑀕𑀦𑁆𑀢𑁆𑀯𑀸 ‘‘𑀧𑀼𑀘𑁆𑀙𑀺𑀢𑁆𑀯𑀸𑀯 𑀧𑀯𑀺𑀲𑀺𑀲𑁆𑀲𑀸𑀫𑀻’’𑀢𑀺 𑀯𑀺𑀮𑁄𑀓𑁂𑀦𑁆𑀢𑁄 𑀅𑀭𑀜𑁆𑀜𑀳𑀢𑁆𑀣𑀻 𑀯𑀺𑀬 𑀫𑀳𑀸𑀘𑀗𑁆𑀓𑀫𑁂 𑀘𑀗𑁆𑀓𑀫𑀫𑀸𑀦𑁂 𑀧𑀁𑀲𑀼𑀓𑀽𑀮𑀺𑀓𑁂 𑀪𑀺𑀓𑁆𑀔𑀽 𑀤𑀺𑀲𑁆𑀯𑀸 𑀢𑁂𑀲𑀁 𑀲𑀦𑁆𑀢𑀺𑀓𑀁 𑀅𑀕𑀫𑀸𑀲𑀺. 𑀢𑀁 𑀲𑀦𑁆𑀥𑀸𑀬 𑀬𑁂𑀦 𑀢𑁂 𑀪𑀺𑀓𑁆𑀔𑀽𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀤𑀲𑁆𑀲𑀦𑀸𑀬𑀸𑀢𑀺 𑀤𑀝𑁆𑀞𑀼𑀁, 𑀧𑀲𑁆𑀲𑀺𑀢𑀼𑀓𑀸𑀫𑀸 𑀳𑀼𑀢𑁆𑀯𑀸𑀢𑀺 𑀅𑀢𑁆𑀣𑁄.

𑁨𑁬𑁦. 𑀅𑀪𑀺𑀜𑁆𑀜𑀸𑀢𑀓𑁄𑀮𑀜𑁆𑀜𑁄𑀢𑀺 𑀧𑀸𑀓𑀝𑀓𑀼𑀮𑀚𑁄. 𑀢𑀤𑀸 𑀓𑀺𑀭 𑀚𑀫𑁆𑀩𑀼𑀤𑀻𑀧𑁂 𑀅𑀫𑁆𑀩𑀝𑁆𑀞𑀓𑀼𑀮𑀁 𑀦𑀸𑀫 𑀧𑀸𑀓𑀝𑀓𑀼𑀮𑀫𑀳𑁄𑀲𑀺. 𑀅𑀪𑀺𑀜𑁆𑀜𑀸𑀢𑀲𑁆𑀲𑀸𑀢𑀺 𑀭𑀽𑀧𑀚𑀸𑀢𑀺𑀫𑀦𑁆𑀢𑀓𑀼𑀮𑀸𑀧𑀤𑁂𑀲𑁂𑀳𑀺 𑀧𑀸𑀓𑀝𑀲𑁆𑀲. 𑀅𑀕𑀭𑀽𑀢𑀺 𑀅𑀪𑀸𑀭𑀺𑀓𑁄. 𑀬𑁄 𑀳𑀺 𑀅𑀫𑁆𑀩𑀝𑁆𑀞𑀁 𑀜𑀸𑀧𑁂𑀢𑀼𑀁 𑀦 𑀲𑀓𑁆𑀓𑀼𑀡𑁂𑀬𑁆𑀬, 𑀢𑀲𑁆𑀲 𑀢𑁂𑀦 𑀲𑀤𑁆𑀥𑀺𑀁 𑀓𑀣𑀸𑀲𑀮𑁆𑀮𑀸𑀧𑁄 𑀕𑀭𑀼 𑀪𑀯𑁂𑀬𑁆𑀬. 𑀪𑀕𑀯𑀢𑁄 𑀧𑀦 𑀢𑀸𑀤𑀺𑀲𑀸𑀦𑀁 𑀫𑀸𑀡𑀯𑀸𑀦𑀁 𑀲𑀢𑁂𑀦𑀸𑀧𑀺 𑀲𑀳𑀲𑁆𑀲𑁂𑀦𑀸𑀧𑀺 𑀧𑀜𑁆𑀳𑀁 𑀧𑀼𑀝𑁆𑀞𑀲𑁆𑀲 𑀯𑀺𑀲𑁆𑀲𑀚𑁆𑀚𑀦𑁂 𑀤𑀦𑁆𑀥𑀸𑀬𑀺𑀢𑀢𑁆𑀢𑀁 𑀦𑀢𑁆𑀣𑀻𑀢𑀺 𑀫𑀜𑁆𑀜𑀫𑀸𑀦𑀸 𑁋 ‘‘𑀅𑀕𑀭𑀼 𑀔𑁄 𑀧𑀦𑀸’’𑀢𑀺 𑀘𑀺𑀦𑁆𑀢𑀬𑀺𑀁𑀲𑀼. 𑀯𑀺𑀳𑀸𑀭𑁄𑀢𑀺 𑀕𑀦𑁆𑀥𑀓𑀼𑀝𑀺𑀁 𑀲𑀦𑁆𑀥𑀸𑀬 𑀆𑀳𑀁𑀲𑀼.

𑀅𑀢𑀭𑀫𑀸𑀦𑁄𑀢𑀺 𑀅𑀢𑀼𑀭𑀺𑀢𑁄, 𑀲𑀡𑀺𑀓𑀁 𑀧𑀤𑀧𑁆𑀧𑀫𑀸𑀡𑀝𑁆𑀞𑀸𑀦𑁂 𑀧𑀤𑀁 𑀦𑀺𑀓𑁆𑀔𑀺𑀧𑀦𑁆𑀢𑁄 𑀯𑀢𑁆𑀢𑀁 𑀓𑀢𑁆𑀯𑀸 𑀲𑀼𑀲𑀫𑁆𑀫𑀝𑁆𑀞𑀁 𑀫𑀼𑀢𑁆𑀢𑀸𑀤𑀮𑀲𑀺𑀦𑁆𑀤𑀼𑀯𑀸𑀭𑀲𑀦𑁆𑀣𑀭𑀲𑀤𑀺𑀲𑀁 𑀯𑀸𑀮𑀺𑀓𑀁 𑀅𑀯𑀺𑀦𑀸𑀲𑁂𑀦𑁆𑀢𑁄𑀢𑀺 𑀅𑀢𑁆𑀣𑁄. 𑀆𑀴𑀺𑀦𑁆𑀤𑀦𑁆𑀢𑀺 𑀧𑀫𑀼𑀔𑀁. 𑀉𑀓𑁆𑀓𑀸𑀲𑀺𑀢𑁆𑀯𑀸𑀢𑀺 𑀉𑀓𑁆𑀓𑀸𑀲𑀺𑀢𑀲𑀤𑁆𑀤𑀁 𑀓𑀢𑁆𑀯𑀸. 𑀅𑀕𑁆𑀕𑀴𑀦𑁆𑀢𑀺 𑀤𑁆𑀯𑀸𑀭𑀓𑀯𑀸𑀝𑀁. 𑀆𑀓𑁄𑀝𑁂𑀳𑀻𑀢𑀺 𑀅𑀕𑁆𑀕𑀦𑀔𑁂𑀳𑀺 𑀲𑀡𑀺𑀓𑀁 𑀓𑀼𑀜𑁆𑀘𑀺𑀓𑀘𑁆𑀙𑀺𑀤𑁆𑀤𑀲𑀫𑀻𑀧𑁂 𑀆𑀓𑁄𑀝𑁂𑀳𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀤𑁆𑀯𑀸𑀭𑀁 𑀓𑀺𑀭 𑀅𑀢𑀺𑀉𑀧𑀭𑀺 𑀅𑀫𑀦𑀼𑀲𑁆𑀲𑀸, 𑀅𑀢𑀺𑀳𑁂𑀝𑁆𑀞𑀸 𑀤𑀻𑀖𑀚𑀸𑀢𑀺𑀓𑀸 𑀓𑁄𑀝𑁂𑀦𑁆𑀢𑀺. 𑀢𑀣𑀸 𑀅𑀦𑀸𑀓𑁄𑀝𑁂𑀢𑁆𑀯𑀸 𑀫𑀚𑁆𑀛𑁂 𑀙𑀺𑀤𑁆𑀤𑀲𑀫𑀻𑀧𑁂 𑀓𑁄𑀝𑁂𑀢𑀩𑁆𑀩𑀦𑁆𑀢𑀺 𑀇𑀤𑀁 𑀤𑁆𑀯𑀸𑀭𑀸𑀓𑁄𑀝𑀦𑀯𑀢𑁆𑀢𑀦𑁆𑀢𑀺 𑀤𑀻𑀧𑁂𑀦𑁆𑀢𑀸 𑀯𑀤𑀦𑁆𑀢𑀺.

𑁨𑁬𑁧. 𑀯𑀺𑀯𑀭𑀺 𑀪𑀕𑀯𑀸 𑀤𑁆𑀯𑀸𑀭𑀦𑁆𑀢𑀺 𑀦 𑀪𑀕𑀯𑀸 𑀉𑀝𑁆𑀞𑀸𑀬 𑀤𑁆𑀯𑀸𑀭𑀁 𑀯𑀺𑀯𑀭𑀺. 𑀯𑀺𑀯𑀭𑀺𑀬𑀢𑀽𑀢𑀺 𑀧𑀦 𑀳𑀢𑁆𑀣𑀁 𑀧𑀲𑀸𑀭𑁂𑀲𑀺. 𑀢𑀢𑁄 ‘‘𑀪𑀕𑀯𑀸 𑀢𑀼𑀫𑁆𑀳𑁂𑀳𑀺 𑀅𑀦𑁂𑀓𑀸𑀲𑀼 𑀓𑀧𑁆𑀧𑀓𑁄𑀝𑀻𑀲𑀼 𑀤𑀸𑀦𑀁 𑀤𑀤𑀫𑀸𑀦𑁂𑀳𑀺 𑀦 𑀲𑀳𑀢𑁆𑀣𑀸 𑀤𑁆𑀯𑀸𑀭𑀯𑀺𑀯𑀭𑀡𑀓𑀫𑁆𑀫𑀁 𑀓𑀢’’𑀦𑁆𑀢𑀺 𑀲𑀬𑀫𑁂𑀯 𑀤𑁆𑀯𑀸𑀭𑀁 𑀯𑀺𑀯𑀝𑀁. 𑀢𑀁 𑀧𑀦 𑀬𑀲𑁆𑀫𑀸 𑀪𑀕𑀯𑀢𑁄 𑀫𑀦𑁂𑀦 𑀯𑀺𑀯𑀝𑀁, 𑀢𑀲𑁆𑀫𑀸 𑀯𑀺𑀯𑀭𑀺 𑀪𑀕𑀯𑀸 𑀤𑁆𑀯𑀸𑀭𑀦𑁆𑀢𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺.

𑀪𑀕𑀯𑀢𑀸 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺𑀁𑀲𑀽𑀢𑀺 𑀬𑀣𑀸 𑀔𑀫𑀦𑀻𑀬𑀸𑀤𑀻𑀦𑀺 𑀧𑀼𑀘𑁆𑀙𑀦𑁆𑀢𑁄 𑀪𑀕𑀯𑀸 𑀢𑁂𑀳𑀺, 𑀏𑀯𑀁 𑀢𑁂𑀧𑀺 𑀪𑀕𑀯𑀢𑀸 𑀲𑀤𑁆𑀥𑀺𑀁 𑀲𑀫𑀧𑁆𑀧𑀯𑀢𑁆𑀢𑀫𑁄𑀤𑀸 𑀅𑀳𑁂𑀲𑀼𑀁. 𑀲𑀻𑀢𑁄𑀤𑀓𑀁 𑀯𑀺𑀬 𑀉𑀡𑁆𑀳𑁄𑀤𑀓𑁂𑀦 𑀲𑀫𑁆𑀫𑁄𑀤𑀺𑀢𑀁 𑀏𑀓𑀻𑀪𑀸𑀯𑀁 𑀅𑀕𑀫𑀁𑀲𑀼. 𑀬𑀸𑀬 𑀘 ‘‘𑀓𑀘𑁆𑀘𑀺, 𑀪𑁄 𑀕𑁄𑀢𑀫, 𑀔𑀫𑀦𑀻𑀬𑀁; 𑀓𑀘𑁆𑀘𑀺 𑀬𑀸𑀧𑀦𑀻𑀬𑀁, 𑀓𑀘𑁆𑀘𑀺 𑀪𑁄𑀢𑁄 𑀘 𑀕𑁄𑀢𑀫𑀲𑁆𑀲 𑀲𑀸𑀯𑀓𑀸𑀦𑀜𑁆𑀘 𑀅𑀧𑁆𑀧𑀸𑀩𑀸𑀥𑀁, 𑀅𑀧𑁆𑀧𑀸𑀢𑀗𑁆𑀓𑀁, 𑀮𑀳𑀼𑀝𑁆𑀞𑀸𑀦𑀁, 𑀩𑀮𑀁, 𑀨𑀸𑀲𑀼𑀯𑀺𑀳𑀸𑀭𑁄’’𑀢𑀺𑀆𑀤𑀺𑀓𑀸𑀬 𑀓𑀣𑀸𑀬 𑀲𑀫𑁆𑀫𑁄𑀤𑀺𑀁𑀲𑀼, 𑀢𑀁 𑀧𑀻𑀢𑀺𑀧𑀸𑀫𑁄𑀚𑁆𑀚𑀲𑀗𑁆𑀔𑀸𑀢𑀲𑀫𑁆𑀫𑁄𑀤𑀚𑀦𑀦𑀢𑁄 𑀲𑀫𑁆𑀫𑁄𑀤𑀺𑀢𑀼𑀁 𑀬𑀼𑀢𑁆𑀢𑀪𑀸𑀯𑀢𑁄 𑀘 𑀲𑀫𑁆𑀫𑁄𑀤𑀦𑀻𑀬𑀁, 𑀅𑀢𑁆𑀣𑀩𑁆𑀬𑀜𑁆𑀚𑀦𑀫𑀥𑀼𑀭𑀢𑀸𑀬 𑀲𑀼𑀘𑀺𑀭𑀫𑁆𑀧𑀺 𑀓𑀸𑀮𑀁 𑀲𑀸𑀭𑁂𑀢𑀼𑀁 𑀦𑀺𑀭𑀦𑁆𑀢𑀭𑀁 𑀧𑀯𑀢𑁆𑀢𑁂𑀢𑀼𑀁 𑀅𑀭𑀳𑀪𑀸𑀯𑀢𑁄 𑀲𑀭𑀺𑀢𑀩𑁆𑀩𑀪𑀸𑀯𑀢𑁄 𑀘 𑀲𑀸𑀭𑀡𑀻𑀬𑀁. 𑀲𑀼𑀬𑁆𑀬𑀫𑀸𑀦𑀲𑀼𑀔𑀢𑁄 𑀲𑀫𑁆𑀫𑁄𑀤𑀦𑀻𑀬𑀁, 𑀅𑀦𑀼𑀲𑁆𑀲𑀭𑀺𑀬𑀫𑀸𑀦𑀲𑀼𑀔𑀢𑁄 𑀘 𑀲𑀸𑀭𑀡𑀻𑀬𑀁. 𑀢𑀣𑀸 𑀩𑁆𑀬𑀜𑁆𑀚𑀦𑀧𑀭𑀺𑀲𑀼𑀤𑁆𑀥𑀢𑀸𑀬 𑀲𑀫𑁆𑀫𑁄𑀤𑀦𑀻𑀬𑀁, 𑀅𑀢𑁆𑀣𑀧𑀭𑀺𑀲𑀼𑀤𑁆𑀥𑀢𑀸𑀬 𑀲𑀸𑀭𑀡𑀻𑀬𑀁. 𑀏𑀯𑀁 𑀅𑀦𑁂𑀓𑁂𑀳𑀺 𑀧𑀭𑀺𑀬𑀸𑀬𑁂𑀳𑀺 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀧𑀭𑀺𑀬𑁄𑀲𑀸𑀧𑁂𑀢𑁆𑀯𑀸 𑀦𑀺𑀝𑁆𑀞𑀧𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼.

𑀅𑀫𑁆𑀩𑀝𑁆𑀞𑁄 𑀧𑀦 𑀫𑀸𑀡𑀯𑁄𑀢𑀺 𑀲𑁄 𑀓𑀺𑀭 𑀪𑀕𑀯𑀢𑁄 𑀭𑀽𑀧𑀲𑀫𑁆𑀧𑀢𑁆𑀢𑀺𑀬𑀁 𑀘𑀺𑀢𑁆𑀢𑀧𑁆𑀧𑀲𑀸𑀤𑀫𑀢𑁆𑀢𑀫𑁆𑀧𑀺 𑀅𑀓𑀢𑁆𑀯𑀸 ‘‘𑀤𑀲𑀩𑀮𑀁 𑀅𑀧𑀲𑀸𑀤𑁂𑀲𑁆𑀲𑀸𑀫𑀻’’𑀢𑀺 𑀉𑀤𑀭𑁂 𑀩𑀤𑁆𑀥𑀲𑀸𑀝𑀓𑀁 𑀫𑀼𑀜𑁆𑀘𑀺𑀢𑁆𑀯𑀸 𑀓𑀡𑁆𑀞𑁂 𑀑𑀮𑀫𑁆𑀩𑁂𑀢𑁆𑀯𑀸 𑀏𑀓𑁂𑀦 𑀳𑀢𑁆𑀣𑁂𑀦 𑀤𑀼𑀲𑁆𑀲𑀓𑀡𑁆𑀡𑀁 𑀕𑀳𑁂𑀢𑁆𑀯𑀸 𑀘𑀗𑁆𑀓𑀫𑀁 𑀅𑀪𑀺𑀭𑀽𑀳𑀺𑀢𑁆𑀯𑀸 𑀓𑀸𑀮𑁂𑀦 𑀩𑀸𑀳𑀼𑀁, 𑀓𑀸𑀮𑁂𑀦 𑀉𑀤𑀭𑀁, 𑀓𑀸𑀮𑁂𑀦 𑀧𑀺𑀝𑁆𑀞𑀺𑀁 𑀤𑀲𑁆𑀲𑁂𑀦𑁆𑀢𑁄, 𑀓𑀸𑀮𑁂𑀦 𑀳𑀢𑁆𑀣𑀯𑀺𑀓𑀸𑀭𑀁, 𑀓𑀸𑀮𑁂𑀦 𑀪𑀫𑀼𑀓𑀯𑀺𑀓𑀸𑀭𑀁 𑀓𑀭𑁄𑀦𑁆𑀢𑁄, ‘‘𑀓𑀘𑁆𑀘𑀺 𑀢𑁂 𑀪𑁄, 𑀕𑁄𑀢𑀫, 𑀥𑀸𑀢𑀼𑀲𑀫𑀢𑀸, 𑀓𑀘𑁆𑀘𑀺 𑀪𑀺𑀓𑁆𑀔𑀸𑀳𑀸𑀭𑁂𑀦 𑀦 𑀓𑀺𑀮𑀫𑀣, 𑀅𑀓𑀺𑀮𑀫𑀣𑀸𑀓𑀸𑀭𑁄𑀬𑁂𑀯 𑀧𑀦 𑀢𑁂 𑀧𑀜𑁆𑀜𑀸𑀬𑀢𑀺; 𑀣𑀽𑀮𑀸𑀦𑀺 𑀳𑀺 𑀢𑁂 𑀅𑀗𑁆𑀕𑀧𑀘𑁆𑀘𑀗𑁆𑀕𑀸𑀦𑀺, 𑀧𑀸𑀲𑀸𑀤𑀺𑀓𑀢𑁆𑀣 𑀕𑀢𑀕𑀢𑀝𑁆𑀞𑀸𑀦𑁂. ‘𑀢𑁂 𑀩𑀳𑀼𑀚𑀦𑀸 𑀭𑀸𑀚𑀧𑀩𑁆𑀩𑀚𑀺𑀢𑁄𑀢𑀺 𑀘 𑀩𑀼𑀤𑁆𑀥𑁄’𑀢𑀺 𑀘 𑀉𑀧𑁆𑀧𑀦𑁆𑀦𑀩𑀳𑀼𑀫𑀸𑀦𑀸 𑀧𑀡𑀻𑀢𑀁 𑀑𑀚𑀯𑀦𑁆𑀢𑀫𑀸𑀳𑀸𑀭𑀁 𑀤𑁂𑀦𑁆𑀢𑀺. 𑀧𑀲𑁆𑀲𑀣, 𑀪𑁄, 𑀕𑁂𑀳𑀁, 𑀘𑀺𑀢𑁆𑀢𑀲𑀸𑀮𑀸 𑀯𑀺𑀬, 𑀤𑀺𑀩𑁆𑀩𑀧𑀸𑀲𑀸𑀤𑁄 𑀯𑀺𑀬. 𑀇𑀫𑀁 𑀫𑀜𑁆𑀘𑀁 𑀧𑀲𑁆𑀲𑀣, 𑀩𑀺𑀫𑁆𑀩𑁄𑀳𑀦𑀁 𑀧𑀲𑁆𑀲𑀣, 𑀓𑀺𑀁 𑀏𑀯𑀭𑀽𑀧𑁂 𑀞𑀸𑀦𑁂 𑀯𑀲𑀦𑁆𑀢𑀲𑁆𑀲 𑀲𑀫𑀡𑀥𑀫𑁆𑀫𑀁 𑀓𑀸𑀢𑀼𑀁 𑀤𑀼𑀓𑁆𑀓𑀭’’𑀦𑁆𑀢𑀺 𑀏𑀯𑀭𑀽𑀧𑀁 𑀉𑀧𑁆𑀧𑀡𑁆𑀟𑀦𑀓𑀣𑀁 𑀅𑀦𑀸𑀘𑀸𑀭𑀪𑀸𑀯𑀲𑀸𑀭𑀡𑀻𑀬𑀁 𑀓𑀣𑁂𑀢𑀺, 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀅𑀫𑁆𑀩𑀝𑁆𑀞𑁄 𑀧𑀦 𑀫𑀸𑀡𑀯𑁄 𑀘𑀗𑁆𑀓𑀫𑀦𑁆𑀢𑁄𑀧𑀺 𑀦𑀺𑀲𑀺𑀦𑁆𑀦𑁂𑀦 𑀪𑀕𑀯𑀢𑀸 𑀓𑀺𑀜𑁆𑀘𑀺 𑀓𑀺𑀜𑁆𑀘𑀺 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑀺, 𑀞𑀺𑀢𑁄𑀧𑀺 𑀦𑀺𑀲𑀺𑀦𑁆𑀦𑁂𑀦 𑀪𑀕𑀯𑀢𑀸 𑀓𑀺𑀜𑁆𑀘𑀺 𑀓𑀺𑀜𑁆𑀘𑀺 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑀻’’𑀢𑀺.

𑁨𑁬𑁨. 𑀅𑀣 𑀔𑁄 𑀪𑀕𑀯𑀸𑀢𑀺 𑀅𑀣 𑀪𑀕𑀯𑀸 𑁋 ‘‘𑀅𑀬𑀁 𑀫𑀸𑀡𑀯𑁄 𑀳𑀢𑁆𑀣𑀁 𑀧𑀲𑀸𑀭𑁂𑀢𑁆𑀯𑀸 𑀪𑀯𑀕𑁆𑀕𑀁 𑀕𑀳𑁂𑀢𑀼𑀓𑀸𑀫𑁄 𑀯𑀺𑀬, 𑀧𑀸𑀤𑀁 𑀧𑀲𑀸𑀭𑁂𑀢𑁆𑀯𑀸 𑀅𑀯𑀻𑀘𑀺𑀁 𑀯𑀺𑀘𑀭𑀺𑀢𑀼𑀓𑀸𑀫𑁄 𑀯𑀺𑀬, 𑀫𑀳𑀸𑀲𑀫𑀼𑀤𑁆𑀤𑀁 𑀢𑀭𑀺𑀢𑀼𑀓𑀸𑀫𑁄 𑀯𑀺𑀬, 𑀲𑀺𑀦𑁂𑀭𑀼𑀁 𑀆𑀭𑁄𑀳𑀺𑀢𑀼𑀓𑀸𑀫𑁄 𑀯𑀺𑀬 𑀘 𑀅𑀝𑁆𑀞𑀸𑀦𑁂 𑀯𑀸𑀬𑀫𑀢𑀺, 𑀳𑀦𑁆𑀤, 𑀢𑁂𑀦 𑀲𑀤𑁆𑀥𑀺𑀁 𑀫𑀦𑁆𑀢𑁂𑀫𑀻’’𑀢𑀺 𑀅𑀫𑁆𑀩𑀝𑁆𑀞𑀁 𑀫𑀸𑀡𑀯𑀁 𑀏𑀢𑀤𑀯𑁄𑀘. 𑀆𑀘𑀭𑀺𑀬𑀧𑀸𑀘𑀭𑀺𑀬𑁂𑀳𑀻𑀢𑀺 𑀆𑀘𑀭𑀺𑀬𑁂𑀳𑀺 𑀘 𑀢𑁂𑀲𑀁 𑀆𑀘𑀭𑀺𑀬𑁂𑀳𑀺 𑀘.

𑀧𑀞𑀫𑀇𑀩𑁆𑀪𑀯𑀸𑀤𑀯𑀡𑁆𑀡𑀦𑀸

𑁨𑁬𑁩. 𑀕𑀘𑁆𑀙𑀦𑁆𑀢𑁄 𑀯𑀸𑀢𑀺 𑀏𑀢𑁆𑀣 𑀓𑀸𑀫𑀁 𑀢𑀻𑀲𑀼 𑀇𑀭𑀺𑀬𑀸𑀧𑀣𑁂𑀲𑀼 𑀩𑁆𑀭𑀸𑀳𑁆𑀫𑀡𑁄 𑀆𑀘𑀭𑀺𑀬𑀩𑁆𑀭𑀸𑀳𑁆𑀫𑀡𑁂𑀦 𑀲𑀤𑁆𑀥𑀺𑀁 𑀲𑀮𑁆𑀮𑀧𑀺𑀢𑀼𑀫𑀭𑀳𑀢𑀺. 𑀅𑀬𑀁 𑀧𑀦 𑀫𑀸𑀡𑀯𑁄 𑀫𑀸𑀦𑀣𑀤𑁆𑀥𑀢𑀸𑀬 𑀓𑀣𑀸𑀲𑀮𑁆𑀮𑀸𑀧𑀁 𑀓𑀭𑁄𑀦𑁆𑀢𑁄 𑀘𑀢𑁆𑀢𑀸𑀭𑁄𑀧𑀺 𑀇𑀭𑀺𑀬𑀸𑀧𑀣𑁂 𑀬𑁄𑀚𑁂𑀲𑁆𑀲𑀸𑀫𑀻𑀢𑀺 ‘‘𑀲𑀬𑀸𑀦𑁄 𑀯𑀸 𑀳𑀺, 𑀪𑁄 𑀕𑁄𑀢𑀫, 𑀲𑀬𑀸𑀦𑁂𑀦𑀸’’𑀢𑀺 𑀆𑀳.

𑀢𑀢𑁄 𑀓𑀺𑀭 𑀢𑀁 𑀪𑀕𑀯𑀸 𑁋 ‘‘𑀅𑀫𑁆𑀩𑀝𑁆𑀞, 𑀕𑀘𑁆𑀙𑀦𑁆𑀢𑀲𑁆𑀲 𑀯𑀸 𑀕𑀘𑁆𑀙𑀦𑁆𑀢𑁂𑀦, 𑀞𑀺𑀢𑀲𑁆𑀲 𑀯𑀸 𑀞𑀺𑀢𑁂𑀦, 𑀦𑀺𑀲𑀺𑀦𑁆𑀦𑀲𑁆𑀲 𑀯𑀸 𑀦𑀺𑀲𑀺𑀦𑁆𑀦𑁂𑀦𑀸𑀘𑀭𑀺𑀬𑁂𑀦 𑀲𑀤𑁆𑀥𑀺𑀁 𑀓𑀣𑀸 𑀦𑀸𑀫 𑀲𑀩𑁆𑀩𑀸𑀘𑀭𑀺𑀬𑁂𑀲𑀼 𑀮𑀩𑁆𑀪𑀢𑀺. 𑀢𑁆𑀯𑀁 𑀧𑀦 𑀲𑀬𑀸𑀦𑁄 𑀲𑀬𑀸𑀦𑁂𑀦𑀸𑀘𑀭𑀺𑀬𑁂𑀦 𑀲𑀤𑁆𑀥𑀺𑀁 𑀓𑀣𑁂𑀲𑀺, 𑀓𑀺𑀁 𑀢𑁂 𑀆𑀘𑀭𑀺𑀬𑁄 𑀕𑁄𑀭𑀽𑀧𑀁, 𑀉𑀤𑀸𑀳𑀼 𑀢𑁆𑀯’’𑀦𑁆𑀢𑀺 𑀆𑀳. 𑀲𑁄 𑀓𑀼𑀚𑁆𑀛𑀺𑀢𑁆𑀯𑀸 𑁋 ‘‘𑀬𑁂 𑀘 𑀔𑁄 𑀢𑁂, 𑀪𑁄 𑀕𑁄𑀢𑀫, 𑀫𑀼𑀡𑁆𑀟𑀓𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀫𑀼𑀡𑁆𑀟𑁂 𑀫𑀼𑀡𑁆𑀟𑀸𑀢𑀺 𑀲𑀫𑀡𑁂 𑀘 𑀲𑀫𑀡𑀸𑀢𑀺 𑀯𑀢𑁆𑀢𑀼𑀁 𑀯𑀝𑁆𑀝𑁂𑀬𑁆𑀬. 𑀅𑀬𑀁 𑀧𑀦 𑀳𑀻𑀴𑁂𑀦𑁆𑀢𑁄 𑀫𑀼𑀡𑁆𑀟𑀓𑀸 𑀲𑀫𑀡𑀓𑀸𑀢𑀺 𑀆𑀳. 𑀇𑀩𑁆𑀪𑀸𑀢𑀺 𑀕𑀳𑀧𑀢𑀺𑀓𑀸. 𑀓𑀡𑁆𑀳𑀸𑀢𑀺 𑀓𑀡𑁆𑀳𑀸, 𑀓𑀸𑀴𑀓𑀸𑀢𑀺 𑀅𑀢𑁆𑀣𑁄. 𑀩𑀦𑁆𑀥𑀼𑀧𑀸𑀤𑀸𑀧𑀘𑁆𑀘𑀸𑀢𑀺 𑀏𑀢𑁆𑀣 𑀩𑀦𑁆𑀥𑀽𑀢𑀺 𑀩𑁆𑀭𑀳𑁆𑀫𑀸 𑀅𑀥𑀺𑀧𑁆𑀧𑁂𑀢𑁄. 𑀢𑀜𑁆𑀳𑀺 𑀩𑁆𑀭𑀸𑀳𑁆𑀫𑀡𑀸 𑀧𑀺𑀢𑀸𑀫𑀳𑁄𑀢𑀺 𑀯𑁄𑀳𑀭𑀦𑁆𑀢𑀺. 𑀧𑀸𑀤𑀸𑀦𑀁 𑀅𑀧𑀘𑁆𑀘𑀸 𑀧𑀸𑀤𑀸𑀧𑀘𑁆𑀘𑀸, 𑀩𑁆𑀭𑀳𑁆𑀫𑀼𑀦𑁄 𑀧𑀺𑀝𑁆𑀞𑀺𑀧𑀸𑀤𑀢𑁄 𑀚𑀸𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀲𑁆𑀲 𑀓𑀺𑀭 𑀅𑀬𑀁 𑀮𑀤𑁆𑀥𑀺 𑁋 𑀩𑁆𑀭𑀸𑀳𑁆𑀫𑀡𑀸 𑀩𑁆𑀭𑀳𑁆𑀫𑀼𑀦𑁄 𑀫𑀼𑀔𑀢𑁄 𑀦𑀺𑀓𑁆𑀔𑀦𑁆𑀢𑀸, 𑀔𑀢𑁆𑀢𑀺𑀬𑀸 𑀉𑀭𑀢𑁄, 𑀯𑁂𑀲𑁆𑀲𑀸 𑀦𑀸𑀪𑀺𑀢𑁄, 𑀲𑀼𑀤𑁆𑀤𑀸 𑀚𑀸𑀡𑀼𑀢𑁄, 𑀲𑀫𑀡𑀸 𑀧𑀺𑀝𑁆𑀞𑀺𑀧𑀸𑀤𑀢𑁄𑀢𑀺. 𑀏𑀯𑀁 𑀓𑀣𑁂𑀦𑁆𑀢𑁄 𑀘 𑀧𑀦𑁂𑀲 𑀓𑀺𑀜𑁆𑀘𑀸𑀧𑀺 𑀅𑀦𑀺𑀬𑀫𑁂𑀢𑁆𑀯𑀸 𑀓𑀣𑁂𑀢𑀺. 𑀅𑀣 𑀔𑁄 𑀪𑀕𑀯𑀦𑁆𑀢𑀫𑁂𑀯 𑀯𑀤𑀸𑀫𑀻𑀢𑀺 𑀓𑀣𑁂𑀢𑀺.

𑀅𑀣 𑀔𑁄 𑀪𑀕𑀯𑀸 𑁋 ‘‘𑀅𑀬𑀁 𑀅𑀫𑁆𑀩𑀝𑁆𑀞𑁄 𑀆𑀕𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀫𑀬𑀸 𑀲𑀤𑁆𑀥𑀺𑀁 𑀓𑀣𑀬𑀫𑀸𑀦𑁄 𑀫𑀸𑀦𑀫𑁂𑀯 𑀦𑀺𑀲𑁆𑀲𑀸𑀬 𑀓𑀣𑁂𑀲𑀺, 𑀆𑀲𑀻𑀯𑀺𑀲𑀁 𑀕𑀻𑀯𑀸𑀬𑀁 𑀕𑀡𑁆𑀳𑀦𑁆𑀢𑁄 𑀯𑀺𑀬, 𑀅𑀕𑁆𑀕𑀺𑀓𑁆𑀔𑀦𑁆𑀥𑀁 𑀆𑀮𑀺𑀗𑁆𑀕𑀦𑁆𑀢𑁄 𑀯𑀺𑀬, 𑀫𑀢𑁆𑀢𑀯𑀸𑀭𑀡𑀁 𑀲𑁄𑀡𑁆𑀟𑀸𑀬 𑀧𑀭𑀸𑀫𑀲𑀦𑁆𑀢𑁄 𑀯𑀺𑀬, 𑀅𑀢𑁆𑀢𑀦𑁄 𑀧𑀫𑀸𑀡𑀁 𑀦 𑀚𑀸𑀦𑀸𑀢𑀺. 𑀳𑀦𑁆𑀤 𑀦𑀁 𑀚𑀸𑀦𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀅𑀢𑁆𑀣𑀺𑀓𑀯𑀢𑁄 𑀔𑁄 𑀧𑀦 𑀢𑁂, 𑀅𑀫𑁆𑀩𑀝𑁆𑀞𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀆𑀕𑀦𑁆𑀢𑁆𑀯𑀸 𑀓𑀢𑁆𑀢𑀩𑁆𑀩𑀓𑀺𑀘𑁆𑀘𑀲𑀗𑁆𑀔𑀸𑀢𑁄 𑀅𑀢𑁆𑀣𑁄, 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀅𑀢𑁆𑀣𑀺𑀓𑀁, 𑀢𑀲𑁆𑀲 𑀫𑀸𑀡𑀯𑀲𑁆𑀲 𑀘𑀺𑀢𑁆𑀢𑀁. 𑀅𑀢𑁆𑀣𑀺𑀓𑀫𑀲𑁆𑀲 𑀅𑀢𑁆𑀣𑀻𑀢𑀺 𑀅𑀢𑁆𑀣𑀺𑀓𑀯𑀸, 𑀢𑀲𑁆𑀲 𑀅𑀢𑁆𑀣𑀺𑀓𑀯𑀢𑁄 𑀢𑀯 𑀇𑀥𑀸𑀕𑀫𑀦𑀁 𑀅𑀳𑁄𑀲𑀻𑀢𑀺 𑀅𑀢𑁆𑀣𑁄.

𑀔𑁄 𑀧𑀦𑀸𑀢𑀺 𑀦𑀺𑀧𑀸𑀢𑀫𑀢𑁆𑀢𑀁. 𑀬𑀸𑀬𑁂𑀯 𑀔𑁄 𑀧𑀦𑀢𑁆𑀣𑀸𑀬𑀸𑀢𑀺 𑀬𑁂𑀦𑁂𑀯 𑀔𑁄 𑀧𑀦𑀢𑁆𑀣𑁂𑀦. 𑀆𑀕𑀘𑁆𑀙𑁂𑀬𑁆𑀬𑀸𑀣𑀸𑀢𑀺 𑀫𑀫 𑀯𑀸 𑀅𑀜𑁆𑀜𑁂𑀲𑀁 𑀯𑀸 𑀲𑀦𑁆𑀢𑀺𑀓𑀁 𑀬𑀤𑀸 𑀓𑀤𑀸𑀘𑀺 𑀆𑀕𑀘𑁆𑀙𑁂𑀬𑁆𑀬𑀸𑀣. 𑀢𑀫𑁂𑀯 𑀅𑀢𑁆𑀣𑀦𑁆𑀢𑀺 𑀇𑀤𑀁 𑀧𑀼𑀭𑀺𑀲𑀮𑀺𑀗𑁆𑀕𑀯𑀲𑁂𑀦𑁂𑀯 𑀯𑀼𑀢𑁆𑀢𑀁. 𑀫𑀦𑀲𑀺 𑀓𑀭𑁂𑀬𑁆𑀬𑀸𑀣𑀸𑀢𑀺 𑀘𑀺𑀢𑁆𑀢𑁂 𑀓𑀭𑁂𑀬𑁆𑀬𑀸𑀣. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀢𑁆𑀯𑀁 𑀆𑀘𑀭𑀺𑀬𑁂𑀦 𑀅𑀢𑁆𑀢𑀦𑁄 𑀓𑀭𑀡𑀻𑀬𑁂𑀦 𑀧𑁂𑀲𑀺𑀢𑁄, 𑀦 𑀅𑀫𑁆𑀳𑀸𑀓𑀁 𑀧𑀭𑀺𑀪𑀯𑀦𑀢𑁆𑀣𑀸𑀬, 𑀢𑀲𑁆𑀫𑀸 𑀢𑀫𑁂𑀯 𑀓𑀺𑀘𑁆𑀘𑀁 𑀫𑀦𑀲𑀺 𑀓𑀭𑁄𑀳𑀻𑀢𑀺. 𑀏𑀯𑀫𑀲𑁆𑀲 𑀅𑀜𑁆𑀜𑁂𑀲𑀁 𑀲𑀦𑁆𑀢𑀺𑀓𑀁 𑀆𑀕𑀢𑀸𑀦𑀁 𑀯𑀢𑁆𑀢𑀁 𑀤𑀲𑁆𑀲𑁂𑀢𑁆𑀯𑀸 𑀫𑀸𑀦𑀦𑀺𑀕𑁆𑀕𑀡𑁆𑀳𑀦𑀢𑁆𑀣𑀁 ‘‘𑀅𑀯𑀼𑀲𑀺𑀢𑀯𑀸𑀬𑁂𑀯 𑀔𑁄 𑀧𑀦𑀸’’𑀢𑀺𑀆𑀤𑀺𑀫𑀸𑀳. 𑀢𑀲𑁆𑀲𑀢𑁆𑀣𑁄 𑀧𑀲𑁆𑀲𑀣 𑀪𑁄 𑀅𑀬𑀁 𑀅𑀫𑁆𑀩𑀝𑁆𑀞𑁄 𑀫𑀸𑀡𑀯𑁄 𑀆𑀘𑀭𑀺𑀬𑀓𑀼𑀮𑁂 𑀅𑀯𑀼𑀲𑀺𑀢𑀯𑀸 𑀅𑀲𑀺𑀓𑁆𑀔𑀺𑀢𑁄 𑀅𑀧𑁆𑀧𑀲𑁆𑀲𑀼𑀢𑁄𑀯 𑀲𑀫𑀸𑀦𑁄. 𑀯𑀼𑀲𑀺𑀢𑀫𑀸𑀦𑀻𑀢𑀺 ‘‘𑀅𑀳𑀁 𑀯𑀼𑀲𑀺𑀢𑀯𑀸 𑀲𑀺𑀓𑁆𑀔𑀺𑀢𑁄 𑀩𑀳𑀼𑀲𑁆𑀲𑀼𑀢𑁄’’𑀢𑀺 𑀅𑀢𑁆𑀢𑀸𑀦𑀁 𑀫𑀜𑁆𑀜𑀢𑀺. 𑀏𑀢𑀲𑁆𑀲 𑀳𑀺 𑀏𑀯𑀁 𑀨𑀭𑀼𑀲𑀯𑀘𑀦𑀲𑀫𑀼𑀤𑀸𑀘𑀸𑀭𑁂 𑀓𑀸𑀭𑀡𑀁 𑀓𑀺𑀫𑀜𑁆𑀜𑀢𑁆𑀭 𑀅𑀯𑀼𑀲𑀺𑀢𑀢𑁆𑀢𑀸𑀢𑀺 𑀆𑀘𑀭𑀺𑀬𑀓𑀼𑀮𑁂 𑀅𑀲𑀁𑀯𑀼𑀤𑁆𑀥𑀸 𑀅𑀲𑀺𑀓𑁆𑀔𑀺𑀢𑀸 𑀅𑀧𑁆𑀧𑀲𑁆𑀲𑀼𑀢𑀸𑀬𑁂𑀯 𑀳𑀺 𑀏𑀯𑀁 𑀯𑀤𑀦𑁆𑀢𑀻𑀢𑀺.

𑁨𑁬𑁪. 𑀓𑀼𑀧𑀺𑀢𑁄𑀢𑀺 𑀓𑀼𑀤𑁆𑀥𑁄. 𑀅𑀦𑀢𑁆𑀢𑀫𑀦𑁄𑀢𑀺 𑀅𑀲𑀓𑀫𑀦𑁄, 𑀓𑀺𑀁 𑀧𑀦 𑀪𑀕𑀯𑀸 𑀢𑀲𑁆𑀲 𑀓𑀼𑀚𑁆𑀛𑀦𑀪𑀸𑀯𑀁 𑀜𑀢𑁆𑀯𑀸 𑀏𑀯𑀫𑀸𑀳 𑀉𑀤𑀸𑀳𑀼 𑀅𑀜𑀢𑁆𑀯𑀸𑀢𑀺? 𑀜𑀢𑁆𑀯𑀸 𑀆𑀳𑀸𑀢𑀺. 𑀓𑀲𑁆𑀫𑀸 𑀜𑀢𑁆𑀯𑀸 𑀆𑀳𑀸𑀢𑀺? 𑀢𑀲𑁆𑀲 𑀫𑀸𑀦𑀦𑀺𑀫𑁆𑀫𑀤𑀦𑀢𑁆𑀣𑀁. 𑀪𑀕𑀯𑀸 𑀳𑀺 𑀅𑀜𑁆𑀜𑀸𑀲𑀺 𑁋 ‘‘𑀅𑀬𑀁 𑀫𑀬𑀸 𑀏𑀯𑀁 𑀯𑀼𑀢𑁆𑀢𑁂 𑀓𑀼𑀚𑁆𑀛𑀺𑀢𑁆𑀯𑀸 𑀫𑀫 𑀜𑀸𑀢𑀓𑁂 𑀅𑀓𑁆𑀓𑁄𑀲𑀺𑀲𑁆𑀲𑀢𑀺. 𑀅𑀣𑀲𑁆𑀲𑀸𑀳𑀁 𑀬𑀣𑀸 𑀦𑀸𑀫 𑀓𑀼𑀲𑀮𑁄 𑀪𑀺𑀲𑀓𑁆𑀓𑁄 𑀤𑁄𑀲𑀁 𑀉𑀕𑁆𑀕𑀺𑀮𑁂𑀢𑁆𑀯𑀸 𑀦𑀻𑀳𑀭𑀢𑀺, 𑀏𑀯𑀫𑁂𑀯 𑀕𑁄𑀢𑁆𑀢𑁂𑀦 𑀕𑁄𑀢𑁆𑀢𑀁, 𑀓𑀼𑀮𑀸𑀧𑀤𑁂𑀲𑁂𑀦 𑀓𑀼𑀮𑀸𑀧𑀤𑁂𑀲𑀁, 𑀉𑀝𑁆𑀞𑀸𑀧𑁂𑀢𑁆𑀯𑀸 𑀪𑀯𑀕𑁆𑀕𑀧𑁆𑀧𑀫𑀸𑀡𑁂𑀦 𑀯𑀺𑀬 𑀉𑀝𑁆𑀞𑀺𑀢𑀁 𑀫𑀸𑀦𑀤𑁆𑀥𑀚𑀁 𑀫𑀽𑀮𑁂 𑀙𑁂𑀢𑁆𑀯𑀸 𑀦𑀺𑀧𑀸𑀢𑁂𑀲𑁆𑀲𑀸𑀫𑀻’’𑀢𑀺. 𑀔𑀼𑀁𑀲𑁂𑀦𑁆𑀢𑁄𑀢𑀺 𑀖𑀝𑁆𑀝𑁂𑀦𑁆𑀢𑁄. 𑀯𑀫𑁆𑀪𑁂𑀦𑁆𑀢𑁄𑀢𑀺 𑀳𑀻𑀴𑁂𑀦𑁆𑀢𑁄. 𑀧𑀸𑀧𑀺𑀢𑁄 𑀪𑀯𑀺𑀲𑁆𑀲𑀢𑀻𑀢𑀺 𑀘𑀡𑁆𑀟𑀪𑀸𑀯𑀸𑀤𑀺𑀤𑁄𑀲𑀁 𑀧𑀸𑀧𑀺𑀢𑁄 𑀪𑀯𑀺𑀲𑁆𑀲𑀢𑀺.

𑀘𑀡𑁆𑀟𑀸𑀢𑀺 𑀫𑀸𑀦𑀦𑀺𑀲𑁆𑀲𑀺𑀢𑀓𑁄𑀥𑀬𑀼𑀢𑁆𑀢𑀸. 𑀨𑀭𑀼𑀲𑀸𑀢𑀺 𑀔𑀭𑀸. 𑀮𑀳𑀼𑀲𑀸𑀢𑀺 𑀮𑀳𑀼𑀓𑀸. 𑀅𑀧𑁆𑀧𑀓𑁂𑀦𑁂𑀯 𑀢𑀼𑀲𑁆𑀲𑀦𑁆𑀢𑀺 𑀯𑀸 𑀤𑀼𑀲𑁆𑀲𑀦𑁆𑀢𑀺 𑀯𑀸 𑀉𑀤𑀓𑀧𑀺𑀝𑁆𑀞𑁂 𑀅𑀮𑀸𑀩𑀼𑀓𑀝𑀸𑀳𑀁 𑀯𑀺𑀬 𑀅𑀧𑁆𑀧𑀓𑁂𑀦𑁂𑀯 𑀉𑀧𑁆𑀮𑀯𑀦𑁆𑀢𑀺. 𑀪𑀲𑁆𑀲𑀸𑀢𑀺 𑀩𑀳𑀼𑀪𑀸𑀡𑀺𑀦𑁄. 𑀲𑀓𑁆𑀬𑀸𑀦𑀁 𑀫𑀼𑀔𑁂 𑀯𑀺𑀯𑀝𑁂 𑀅𑀜𑁆𑀜𑀲𑁆𑀲 𑀯𑀘𑀦𑁄𑀓𑀸𑀲𑁄 𑀦𑀢𑁆𑀣𑀻𑀢𑀺 𑀅𑀥𑀺𑀧𑁆𑀧𑀸𑀬𑁂𑀦𑁂𑀯 𑀯𑀤𑀢𑀺. 𑀲𑀫𑀸𑀦𑀸𑀢𑀺 𑀇𑀤𑀁 𑀲𑀦𑁆𑀢𑀸𑀢𑀺 𑀧𑀼𑀭𑀺𑀫𑀧𑀤𑀲𑁆𑀲 𑀯𑁂𑀯𑀘𑀦𑀁. 𑀦 𑀲𑀓𑁆𑀓𑀭𑁄𑀦𑁆𑀢𑀻𑀢𑀺 𑀦 𑀩𑁆𑀭𑀸𑀳𑁆𑀫𑀡𑀸𑀦𑀁 𑀲𑀼𑀦𑁆𑀤𑀭𑁂𑀦𑀸𑀓𑀸𑀭𑁂𑀦 𑀓𑀭𑁄𑀦𑁆𑀢𑀺. 𑀦 𑀕𑀭𑀼𑀁 𑀓𑀭𑁄𑀦𑁆𑀢𑀻𑀢𑀺 𑀩𑁆𑀭𑀸𑀳𑁆𑀫𑀡𑁂𑀲𑀼 𑀕𑀸𑀭𑀯𑀁 𑀦 𑀓𑀭𑁄𑀦𑁆𑀢𑀺. 𑀦 𑀫𑀸𑀦𑁂𑀦𑁆𑀢𑀻𑀢𑀺 𑀦 𑀫𑀦𑁂𑀦 𑀧𑀺𑀬𑀸𑀬𑀦𑁆𑀢𑀺. 𑀦 𑀧𑀽𑀚𑁂𑀦𑁆𑀢𑀻𑀢𑀺 𑀫𑀸𑀮𑀸𑀤𑀻𑀳𑀺 𑀦𑁂𑀲𑀁 𑀧𑀽𑀚𑀁 𑀦 𑀓𑀭𑁄𑀦𑁆𑀢𑀺. 𑀦 𑀅𑀧𑀘𑀸𑀬𑀦𑁆𑀢𑀻𑀢𑀺 𑀅𑀪𑀺𑀯𑀸𑀤𑀦𑀸𑀤𑀻𑀳𑀺 𑀦𑁂𑀲𑀁 𑀅𑀧𑀘𑀺𑀢𑀺𑀓𑀫𑁆𑀫𑀁 𑀦𑀻𑀘𑀯𑀼𑀢𑁆𑀢𑀺𑀁 𑀦 𑀤𑀲𑁆𑀲𑁂𑀦𑁆𑀢𑀺 𑀢𑀬𑀺𑀤𑀦𑁆𑀢𑀺 𑀢𑀁 𑀇𑀤𑀁. 𑀬𑀤𑀺𑀫𑁂 𑀲𑀓𑁆𑀬𑀸𑀢𑀺 𑀬𑀁 𑀇𑀫𑁂 𑀲𑀓𑁆𑀬𑀸 𑀦 𑀩𑁆𑀭𑀸𑀳𑁆𑀫𑀡𑁂 𑀲𑀓𑁆𑀓𑀭𑁄𑀦𑁆𑀢𑀺…𑀧𑁂… 𑀦 𑀅𑀧𑀘𑀸𑀬𑀦𑁆𑀢𑀺, 𑀢𑀁 𑀢𑁂𑀲𑀁 𑀅𑀲𑀓𑁆𑀓𑀸𑀭𑀓𑀭𑀡𑀸𑀤𑀺 𑀲𑀩𑁆𑀩𑀁 𑀦 𑀬𑀼𑀢𑁆𑀢𑀁, 𑀦𑀸𑀦𑀼𑀮𑁄𑀫𑀦𑁆𑀢𑀺 𑀅𑀢𑁆𑀣𑁄.

𑀤𑀼𑀢𑀺𑀬𑀇𑀩𑁆𑀪𑀯𑀸𑀤𑀯𑀡𑁆𑀡𑀦𑀸

𑁨𑁬𑁫. 𑀅𑀧𑀭𑀤𑁆𑀥𑀼𑀦𑁆𑀢𑀺 𑀅𑀧𑀭𑀚𑁆𑀛𑀺𑀁𑀲𑀼. 𑀏𑀓𑀫𑀺𑀤𑀸𑀳𑀦𑁆𑀢𑀺 𑀏𑀢𑁆𑀣 𑀇𑀤𑀦𑁆𑀢𑀺 𑀦𑀺𑀧𑀸𑀢𑀫𑀢𑁆𑀢𑀁. 𑀏𑀓𑀁 𑀅𑀳𑀦𑁆𑀢𑀺 𑀅𑀢𑁆𑀣𑁄. 𑀲𑀦𑁆𑀥𑀸𑀕𑀸𑀭𑀦𑁆𑀢𑀺 𑀭𑀚𑁆𑀚𑀅𑀦𑀼𑀲𑀸𑀲𑀦𑀲𑀸𑀮𑀸. 𑀲𑀓𑁆𑀬𑀸𑀢𑀺 𑀅𑀪𑀺𑀲𑀺𑀢𑁆𑀢𑀭𑀸𑀚𑀸𑀦𑁄. 𑀲𑀓𑁆𑀬𑀓𑀼𑀫𑀸𑀭𑀸𑀢𑀺 𑀅𑀦𑀪𑀺𑀲𑀺𑀢𑁆𑀢𑀸. 𑀉𑀘𑁆𑀘𑁂𑀲𑀽𑀢𑀺 𑀬𑀣𑀸𑀦𑀼𑀭𑀽𑀧𑁂𑀲𑀼 𑀧𑀮𑁆𑀮𑀗𑁆𑀓𑀧𑀻𑀞𑀓𑀯𑁂𑀢𑁆𑀢𑀸𑀲𑀦𑀨𑀮𑀓𑀘𑀺𑀢𑁆𑀢𑀢𑁆𑀣𑀭𑀡𑀸𑀤𑀺𑀪𑁂𑀤𑁂𑀲𑀼. 𑀲𑀜𑁆𑀚𑀕𑁆𑀖𑀦𑁆𑀢𑀸𑀢𑀺 𑀉𑀧𑁆𑀧𑀡𑁆𑀟𑀦𑀯𑀲𑁂𑀦 𑀫𑀳𑀸𑀳𑀲𑀺𑀢𑀁 𑀳𑀲𑀦𑁆𑀢𑀸. 𑀲𑀁𑀓𑀻𑀴𑀦𑁆𑀢𑀸𑀢𑀺 𑀳𑀲𑀺𑀢𑀫𑀢𑁆𑀢 𑀓𑀭𑀡𑀅𑀗𑁆𑀕𑀼𑀮𑀺𑀲𑀗𑁆𑀖𑀝𑁆𑀝𑀦𑀧𑀸𑀡𑀺𑀧𑁆𑀧𑀳𑀸𑀭𑀤𑀸𑀦𑀸𑀤𑀻𑀦𑀺 𑀓𑀭𑁄𑀦𑁆𑀢𑀸. 𑀫𑀫𑀜𑁆𑀜𑁂𑀯 𑀫𑀜𑁆𑀜𑁂𑀢𑀺 𑀏𑀯𑀫𑀳𑀁 𑀫𑀜𑁆𑀜𑀸𑀫𑀺, 𑀫𑀫𑀜𑁆𑀜𑁂𑀯 𑀅𑀦𑀼𑀳𑀲𑀦𑁆𑀢𑀺, 𑀦 𑀅𑀜𑁆𑀜𑀦𑁆𑀢𑀺.

𑀓𑀲𑁆𑀫𑀸 𑀧𑀦 𑀢𑁂 𑀏𑀯𑀫𑀓𑀁𑀲𑀽𑀢𑀺? 𑀢𑁂 𑀓𑀺𑀭 𑀅𑀫𑁆𑀩𑀝𑁆𑀞𑀲𑁆𑀲 𑀓𑀼𑀮𑀯𑀁𑀲𑀁 𑀚𑀸𑀦𑀦𑁆𑀢𑀺. 𑀅𑀬𑀜𑁆𑀘 𑀢𑀲𑁆𑀫𑀺𑀁 𑀲𑀫𑀬𑁂 𑀬𑀸𑀯 𑀧𑀸𑀤𑀦𑁆𑀢𑀸 𑀑𑀮𑀫𑁆𑀩𑁂𑀢𑁆𑀯𑀸 𑀦𑀺𑀯𑀢𑁆𑀣𑀲𑀸𑀝𑀓𑀲𑁆𑀲 𑀏𑀓𑁂𑀦 𑀳𑀢𑁆𑀣𑁂𑀦 𑀤𑀼𑀲𑁆𑀲𑀓𑀡𑁆𑀡𑀁 𑀕𑀳𑁂𑀢𑁆𑀯𑀸 𑀔𑀦𑁆𑀥𑀝𑁆𑀞𑀺𑀓𑀁 𑀦𑀸𑀫𑁂𑀢𑁆𑀯𑀸 𑀫𑀸𑀦𑀫𑀤𑁂𑀦 𑀫𑀢𑁆𑀢𑁄 𑀯𑀺𑀬 𑀆𑀕𑀘𑁆𑀙𑀢𑀺. 𑀢𑀢𑁄 𑁋 ‘‘𑀧𑀲𑁆𑀲𑀣 𑀪𑁄 𑀅𑀫𑁆𑀳𑀸𑀓𑀁 𑀤𑀸𑀲𑀲𑁆𑀲 𑀓𑀡𑁆𑀳𑀸𑀬𑀦𑀕𑁄𑀢𑁆𑀢𑀲𑁆𑀲 𑀅𑀫𑁆𑀩𑀝𑁆𑀞𑀲𑁆𑀲 𑀆𑀕𑀫𑀦𑀓𑀸𑀭𑀡’’𑀦𑁆𑀢𑀺 𑀯𑀤𑀦𑁆𑀢𑀸 𑀏𑀯𑀫𑀓𑀁𑀲𑀼. 𑀲𑁄𑀧𑀺 𑀅𑀢𑁆𑀢𑀦𑁄 𑀓𑀼𑀮𑀯𑀁𑀲𑀁 𑀚𑀸𑀦𑀸𑀢𑀺. 𑀢𑀲𑁆𑀫𑀸 ‘‘𑀫𑀫𑀜𑁆𑀜𑁂𑀯 𑀫𑀜𑁆𑀜𑁂’’𑀢𑀺 𑀢𑀓𑁆𑀓𑀬𑀺𑀢𑁆𑀣.

𑀆𑀲𑀦𑁂𑀦𑀸𑀢𑀺 ‘‘𑀇𑀤𑀫𑀸𑀲𑀦𑀁, 𑀏𑀢𑁆𑀣 𑀦𑀺𑀲𑀻𑀤𑀸𑀳𑀻’’𑀢𑀺 𑀏𑀯𑀁 𑀆𑀲𑀦𑁂𑀦 𑀦𑀺𑀫𑀦𑁆𑀢𑀦𑀁 𑀦𑀸𑀫 𑀳𑁄𑀢𑀺, 𑀢𑀣𑀸 𑀦 𑀓𑁄𑀘𑀺 𑀅𑀓𑀸𑀲𑀺.

𑀢𑀢𑀺𑀬𑀇𑀩𑁆𑀪𑀯𑀸𑀤𑀯𑀡𑁆𑀡𑀦𑀸

𑁨𑁬𑁬. 𑀮𑀝𑀼𑀓𑀺𑀓𑀸𑀢𑀺 𑀔𑁂𑀢𑁆𑀢𑀮𑁂𑀟𑁆𑀟𑀽𑀦𑀁 𑀅𑀦𑁆𑀢𑀭𑁂𑀦𑀺𑀯𑀸𑀲𑀺𑀦𑀻 𑀔𑀼𑀤𑁆𑀤𑀓𑀲𑀓𑀼𑀡𑀺𑀓𑀸. 𑀓𑀼𑀮𑀸𑀯𑀓𑁂𑀢𑀺 𑀦𑀺𑀯𑀸𑀲𑀦𑀝𑁆𑀞𑀸𑀦𑁂. 𑀓𑀸𑀫𑀮𑀸𑀧𑀺𑀦𑀻𑀢𑀺 𑀬𑀤𑀺𑀘𑁆𑀙𑀓𑀪𑀸𑀡𑀺𑀦𑀻, 𑀬𑀁 𑀬𑀁 𑀇𑀘𑁆𑀙𑀢𑀺 𑀢𑀁 𑀢𑀁 𑀮𑀧𑀢𑀺, 𑀦 𑀢𑀁 𑀓𑁄𑀘𑀺 𑀳𑀁𑀲𑁄 𑀯𑀸 𑀓𑁄𑀜𑁆𑀘𑁄 𑀯𑀸 𑀫𑁄𑀭𑁄 𑀯𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀺𑀁 𑀢𑁆𑀯𑀁 𑀮𑀧𑀲𑀻’𑀢𑀺 𑀦𑀺𑀲𑁂𑀥𑁂𑀢𑀺. 𑀅𑀪𑀺𑀲𑀚𑁆𑀚𑀺𑀢𑀼𑀦𑁆𑀢𑀺 𑀓𑁄𑀥𑀯𑀲𑁂𑀦 𑀮𑀕𑁆𑀕𑀺𑀢𑀼𑀁.

𑀏𑀯𑀁 𑀯𑀼𑀢𑁆𑀢𑁂 𑀫𑀸𑀡𑀯𑁄 𑁋 ‘‘𑀅𑀬𑀁 𑀲𑀫𑀡𑁄 𑀕𑁄𑀢𑀫𑁄 𑀅𑀢𑁆𑀢𑀦𑁄 𑀜𑀸𑀢𑀓𑁂 𑀮𑀝𑀼𑀓𑀺𑀓𑀲𑀤𑀺𑀲𑁂 𑀓𑀢𑁆𑀯𑀸 𑀅𑀫𑁆𑀳𑁂 𑀳𑀁𑀲𑀓𑁄𑀜𑁆𑀘𑀫𑁄𑀭𑀲𑀤𑀺𑀲𑁂 𑀓𑀭𑁄𑀢𑀺, 𑀦𑀺𑀫𑁆𑀫𑀸𑀦𑁄 𑀤𑀸𑀦𑀺 𑀚𑀸𑀢𑁄’’𑀢𑀺 𑀫𑀜𑁆𑀜𑀫𑀸𑀦𑁄 𑀉𑀢𑁆𑀢𑀭𑀺 𑀘𑀢𑁆𑀢𑀸𑀭𑁄 𑀯𑀡𑁆𑀡𑁂 𑀤𑀲𑁆𑀲𑁂𑀢𑀺.

𑀤𑀸𑀲𑀺𑀧𑀼𑀢𑁆𑀢𑀯𑀸𑀤𑀯𑀡𑁆𑀡𑀦𑀸

𑁨𑁬𑁭. 𑀦𑀺𑀫𑁆𑀫𑀸𑀤𑁂𑀢𑀻𑀢𑀺 𑀦𑀺𑀫𑁆𑀫𑀤𑁂𑀢𑀺 𑀦𑀺𑀫𑁆𑀫𑀸𑀦𑁂 𑀓𑀭𑁄𑀢𑀺. 𑀬𑀁𑀦𑀽𑀦𑀸𑀳𑀦𑁆𑀢𑀺 𑀬𑀤𑀺 𑀧𑀦𑀸𑀳𑀁. ‘‘𑀓𑀡𑁆𑀳𑀸𑀬𑀦𑁄𑀳𑀫𑀲𑁆𑀫𑀺, 𑀪𑁄 𑀕𑁄𑀢𑀫𑀸’’𑀢𑀺 𑀇𑀤𑀁 𑀓𑀺𑀭 𑀯𑀘𑀦𑀁 𑀅𑀫𑁆𑀩𑀝𑁆𑀞𑁄 𑀢𑀺𑀓𑁆𑀔𑀢𑁆𑀢𑀼𑀁 𑀫𑀳𑀸𑀲𑀤𑁆𑀤𑁂𑀦 𑀅𑀯𑁄𑀘. 𑀓𑀲𑁆𑀫𑀸 𑀅𑀯𑁄𑀘? 𑀓𑀺𑀁 𑀅𑀲𑀼𑀤𑁆𑀥𑀪𑀸𑀯𑀁 𑀦 𑀚𑀸𑀦𑀸𑀢𑀻𑀢𑀺? 𑀆𑀫 𑀚𑀸𑀦𑀸𑀢𑀺. 𑀚𑀸𑀦𑀦𑁆𑀢𑁄𑀧𑀺 𑀪𑀯𑀧𑀝𑀺𑀘𑁆𑀙𑀦𑁆𑀦𑀫𑁂𑀢𑀁 𑀓𑀸𑀭𑀡𑀁, 𑀢𑀁 𑀅𑀦𑁂𑀦 𑀦 𑀤𑀺𑀝𑁆𑀞𑀁. 𑀅𑀧𑀲𑁆𑀲𑀦𑁆𑀢𑁄 𑀫𑀳𑀸𑀲𑀫𑀡𑁄 𑀓𑀺𑀁 𑀯𑀓𑁆𑀔𑀢𑀻𑀢𑀺 𑀫𑀜𑁆𑀜𑀫𑀸𑀦𑁄 𑀫𑀸𑀦𑀣𑀤𑁆𑀥𑀢𑀸𑀬 𑀅𑀯𑁄𑀘. 𑀫𑀸𑀢𑀸𑀧𑁂𑀢𑁆𑀢𑀺𑀓𑀦𑁆𑀢𑀺 𑀫𑀸𑀢𑀸𑀧𑀺𑀢𑀽𑀦𑀁 𑀲𑀦𑁆𑀢𑀓𑀁. 𑀦𑀸𑀫𑀕𑁄𑀢𑁆𑀢𑀦𑁆𑀢𑀺 𑀧𑀡𑁆𑀡𑀢𑁆𑀢𑀺𑀯𑀲𑁂𑀦 𑀦𑀸𑀫𑀁, 𑀧𑀯𑁂𑀡𑀻𑀯𑀲𑁂𑀦 𑀕𑁄𑀢𑁆𑀢𑀁. 𑀅𑀦𑀼𑀲𑁆𑀲𑀭𑀢𑁄𑀢𑀺 𑀅𑀦𑀼𑀲𑁆𑀲𑀭𑀦𑁆𑀢𑀲𑁆𑀲 𑀓𑀼𑀮𑀓𑁄𑀝𑀺𑀁 𑀲𑁄𑀥𑁂𑀦𑁆𑀢𑀲𑁆𑀲. 𑀅𑀬𑁆𑀬𑀧𑀼𑀢𑁆𑀢𑀸𑀢𑀺 𑀲𑀸𑀫𑀺𑀦𑁄 𑀧𑀼𑀢𑁆𑀢𑀸. 𑀤𑀸𑀲𑀺𑀧𑀼𑀢𑁆𑀢𑁄𑀢𑀺 𑀖𑀭𑀤𑀸𑀲𑀺𑀬𑀸𑀯 𑀧𑀼𑀢𑁆𑀢𑁄. 𑀢𑀲𑁆𑀫𑀸 𑀬𑀣𑀸 𑀤𑀸𑀲𑁂𑀦 𑀲𑀸𑀫𑀺𑀦𑁄 𑀉𑀧𑀲𑀗𑁆𑀓𑀫𑀺𑀢𑀩𑁆𑀩𑀸, 𑀏𑀯𑀁 𑀅𑀦𑀼𑀧𑀲𑀗𑁆𑀓𑀫𑀦𑁆𑀢𑀁 𑀢𑀁 𑀤𑀺𑀲𑁆𑀯𑀸 𑀲𑀓𑁆𑀬𑀸 𑀅𑀦𑀼𑀚𑀕𑁆𑀖𑀺𑀁𑀲𑀽𑀢𑀺 𑀤𑀲𑁆𑀲𑁂𑀢𑀺.

𑀇𑀢𑁄 𑀧𑀭𑀁 𑀢𑀲𑁆𑀲 𑀤𑀸𑀲𑀪𑀸𑀯𑀁 𑀲𑀓𑁆𑀬𑀸𑀦𑀜𑁆𑀘 𑀲𑀸𑀫𑀺𑀪𑀸𑀯𑀁 𑀧𑀓𑀸𑀲𑁂𑀢𑁆𑀯𑀸 𑀅𑀢𑁆𑀢𑀦𑁄 𑀘 𑀅𑀫𑁆𑀩𑀝𑁆𑀞𑀲𑁆𑀲 𑀘 𑀓𑀼𑀮𑀯𑀁𑀲𑀁 𑀆𑀳𑀭𑀦𑁆𑀢𑁄 𑀲𑀓𑁆𑀬𑀸 𑀔𑁄 𑀧𑀦𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀤𑀳𑀦𑁆𑀢𑀻𑀢𑀺 𑀞𑀧𑁂𑀦𑁆𑀢𑀺, 𑀑𑀓𑁆𑀓𑀸𑀓𑁄 𑀦𑁄 𑀧𑀼𑀩𑁆𑀩𑀧𑀼𑀭𑀺𑀲𑁄𑀢𑀺, 𑀏𑀯𑀁 𑀓𑀭𑁄𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀢𑀲𑁆𑀲 𑀓𑀺𑀭 𑀭𑀜𑁆𑀜𑁄 𑀓𑀣𑀦𑀓𑀸𑀮𑁂 𑀉𑀓𑁆𑀓𑀸 𑀯𑀺𑀬 𑀫𑀼𑀔𑀢𑁄 𑀧𑀪𑀸 𑀦𑀺𑀘𑁆𑀙𑀭𑀢𑀺, 𑀢𑀲𑁆𑀫𑀸 𑀢𑀁 ‘‘𑀑𑀓𑁆𑀓𑀸𑀓𑁄’’𑀢𑀺 𑀲𑀜𑁆𑀚𑀸𑀦𑀺𑀁𑀲𑀽𑀢𑀺. 𑀧𑀩𑁆𑀩𑀸𑀚𑁂𑀲𑀻𑀢𑀺 𑀦𑀻𑀳𑀭𑀺.

𑀇𑀤𑀸𑀦𑀺 𑀢𑁂 𑀦𑀸𑀫𑀯𑀲𑁂𑀦 𑀤𑀲𑁆𑀲𑁂𑀦𑁆𑀢𑁄 𑁋 ‘‘𑀑𑀓𑁆𑀓𑀸𑀫𑀼𑀔’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀭𑀸𑀬𑀁 𑀅𑀦𑀼𑀧𑀼𑀩𑁆𑀩𑀻 𑀓𑀣𑀸 𑁋 𑀧𑀞𑀫𑀓𑀧𑁆𑀧𑀺𑀓𑀸𑀦𑀁 𑀓𑀺𑀭 𑀭𑀜𑁆𑀜𑁄 𑀫𑀳𑀸𑀲𑀫𑁆𑀫𑀢𑀲𑁆𑀲 𑀭𑁄𑀚𑁄 𑀦𑀸𑀫 𑀧𑀼𑀢𑁆𑀢𑁄 𑀅𑀳𑁄𑀲𑀺. 𑀭𑁄𑀚𑀲𑁆𑀲 𑀯𑀭𑀭𑁄𑀚𑁄, 𑀯𑀭𑀭𑁄𑀚𑀲𑁆𑀲 𑀓𑀮𑁆𑀬𑀸𑀡𑁄, 𑀓𑀮𑁆𑀬𑀸𑀡𑀲𑁆𑀲 𑀯𑀭𑀓𑀮𑁆𑀬𑀸𑀡𑁄, 𑀯𑀭𑀓𑀮𑁆𑀬𑀸𑀡𑀲𑁆𑀲 𑀫𑀦𑁆𑀥𑀸𑀢𑀸, 𑀫𑀦𑁆𑀥𑀸𑀢𑀼𑀲𑁆𑀲 𑀯𑀭𑀫𑀦𑁆𑀥𑀸𑀢𑀸, 𑀯𑀭𑀫𑀦𑁆𑀥𑀸𑀢𑀼𑀲𑁆𑀲 𑀉𑀧𑁄𑀲𑀣𑁄, 𑀉𑀧𑁄𑀲𑀣𑀲𑁆𑀲 𑀯𑀭𑁄, 𑀯𑀭𑀲𑁆𑀲 𑀉𑀧𑀯𑀭𑁄, 𑀉𑀧𑀯𑀭𑀲𑁆𑀲 𑀫𑀖𑀤𑁂𑀯𑁄, 𑀫𑀖𑀤𑁂𑀯𑀲𑁆𑀲 𑀧𑀭𑀫𑁆𑀧𑀭𑀸𑀬 𑀘𑀢𑀼𑀭𑀸𑀲𑀻𑀢𑀺𑀔𑀢𑁆𑀢𑀺𑀬𑀲𑀳𑀲𑁆𑀲𑀸𑀦𑀺 𑀅𑀳𑁂𑀲𑀼𑀁. 𑀢𑁂𑀲𑀁 𑀧𑀘𑁆𑀙𑀢𑁄 𑀢𑀬𑁄 𑀑𑀓𑁆𑀓𑀸𑀓𑀯𑀁𑀲𑀸 𑀅𑀳𑁂𑀲𑀼𑀁. 𑀢𑁂𑀲𑀼 𑀢𑀢𑀺𑀬𑀑𑀓𑁆𑀓𑀸𑀓𑀲𑁆𑀲 𑀧𑀜𑁆𑀘 𑀫𑀳𑁂𑀲𑀺𑀬𑁄 𑀅𑀳𑁂𑀲𑀼𑀁 𑁋 𑀳𑀢𑁆𑀣𑀸, 𑀘𑀺𑀢𑁆𑀢𑀸, 𑀚𑀦𑁆𑀢𑀼, 𑀚𑀸𑀮𑀺𑀦𑀻, 𑀯𑀺𑀲𑀸𑀔𑀸𑀢𑀺. 𑀏𑀓𑁂𑀓𑀺𑀲𑁆𑀲𑀸 𑀧𑀜𑁆𑀘𑀧𑀜𑁆𑀘𑀇𑀢𑁆𑀣𑀺𑀲𑀢𑀧𑀭𑀺𑀯𑀸𑀭𑀸. 𑀲𑀩𑁆𑀩𑀚𑁂𑀝𑁆𑀞𑀸𑀬 𑀘𑀢𑁆𑀢𑀸𑀭𑁄 𑀧𑀼𑀢𑁆𑀢𑀸 𑁋 𑀑𑀓𑁆𑀓𑀸𑀫𑀼𑀔𑁄, 𑀓𑀭𑀓𑀡𑁆𑀟𑀼, 𑀳𑀢𑁆𑀣𑀺𑀦𑀺𑀓𑁄, 𑀲𑀺𑀦𑀺𑀲𑀽𑀭𑁄𑀢𑀺. 𑀧𑀜𑁆𑀘 𑀥𑀻𑀢𑀭𑁄 𑁋 𑀧𑀺𑀬𑀸, 𑀲𑀼𑀧𑁆𑀧𑀺𑀬𑀸, 𑀆𑀦𑀦𑁆𑀤𑀸, 𑀯𑀺𑀚𑀺𑀢𑀸, 𑀯𑀺𑀚𑀺𑀢𑀲𑁂𑀦𑀸𑀢𑀺. 𑀇𑀢𑀺 𑀲𑀸 𑀦𑀯 𑀧𑀼𑀢𑁆𑀢𑁂 𑀯𑀺𑀚𑀸𑀬𑀺𑀢𑁆𑀯𑀸 𑀓𑀸𑀮𑀫𑀓𑀸𑀲𑀺.

𑀅𑀣 𑀭𑀸𑀚𑀸 𑀅𑀜𑁆𑀜𑀁 𑀤𑀳𑀭𑀺𑀁 𑀅𑀪𑀺𑀭𑀽𑀧𑀁 𑀭𑀸𑀚𑀥𑀻𑀢𑀭𑀁 𑀆𑀦𑁂𑀢𑁆𑀯𑀸 𑀅𑀕𑁆𑀕𑀫𑀳𑁂𑀲𑀺𑀝𑁆𑀞𑀸𑀦𑁂 𑀞𑀧𑁂𑀲𑀺. 𑀲𑀸 𑀚𑀦𑁆𑀢𑀼𑀁 𑀦𑀸𑀫 𑀧𑀼𑀢𑁆𑀢𑀁 𑀯𑀺𑀚𑀸𑀬𑀺. 𑀅𑀣 𑀦𑀁 𑀧𑀜𑁆𑀘𑀫𑀤𑀺𑀯𑀲𑁂 𑀅𑀮𑀗𑁆𑀓𑀭𑀺𑀢𑁆𑀯𑀸 𑀭𑀜𑁆𑀜𑁄 𑀤𑀲𑁆𑀲𑁂𑀲𑀺. 𑀭𑀸𑀚𑀸 𑀢𑀼𑀝𑁆𑀞𑁄 𑀢𑀲𑁆𑀲𑀸 𑀯𑀭𑀁 𑀅𑀤𑀸𑀲𑀺. 𑀲𑀸 𑀜𑀸𑀢𑀓𑁂𑀳𑀺 𑀲𑀤𑁆𑀥𑀺𑀁 𑀫𑀦𑁆𑀢𑁂𑀢𑁆𑀯𑀸 𑀧𑀼𑀢𑁆𑀢𑀲𑁆𑀲 𑀭𑀚𑁆𑀚𑀁 𑀬𑀸𑀘𑀺. 𑀭𑀸𑀚𑀸 𑁋 ‘‘𑀦𑀲𑁆𑀲, 𑀯𑀲𑀮𑀺, 𑀫𑀫 𑀧𑀼𑀢𑁆𑀢𑀸𑀦𑀁 𑀅𑀦𑁆𑀢𑀭𑀸𑀬𑀁 𑀇𑀘𑁆𑀙𑀲𑀻’’𑀢𑀺 𑀢𑀚𑁆𑀚𑁂𑀲𑀺. 𑀲𑀸 𑀧𑀼𑀦𑀧𑁆𑀧𑀼𑀦𑀁 𑀭𑀳𑁄 𑀭𑀸𑀚𑀸𑀦𑀁 𑀧𑀭𑀺𑀢𑁄𑀲𑁂𑀢𑁆𑀯𑀸 𑁋 ‘‘𑀫𑀳𑀸𑀭𑀸𑀚, 𑀫𑀼𑀲𑀸𑀯𑀸𑀤𑁄 𑀦𑀸𑀫 𑀦 𑀯𑀝𑁆𑀝𑀢𑀻’’𑀢𑀺𑀆𑀤𑀻𑀦𑀺 𑀯𑀢𑁆𑀯𑀸 𑀬𑀸𑀘𑀢𑀺𑀬𑁂𑀯. 𑀅𑀣 𑀭𑀸𑀚𑀸 𑀧𑀼𑀢𑁆𑀢𑁂 𑀆𑀫𑀦𑁆𑀢𑁂𑀲𑀺 𑁋 ‘‘𑀅𑀳𑀁 𑀢𑀸𑀢𑀸, 𑀢𑀼𑀫𑁆𑀳𑀸𑀓𑀁 𑀓𑀦𑀺𑀝𑁆𑀞𑀁 𑀚𑀦𑁆𑀢𑀼𑀓𑀼𑀫𑀸𑀭𑀁 𑀤𑀺𑀲𑁆𑀯𑀸 𑀢𑀲𑁆𑀲 𑀫𑀸𑀢𑀼𑀬𑀸 𑀲𑀳𑀲𑀸 𑀯𑀭𑀁 𑀅𑀤𑀸𑀲𑀺𑀁, 𑀲𑀸 𑀧𑀼𑀢𑁆𑀢𑀲𑁆𑀲 𑀭𑀚𑁆𑀚𑀁 𑀧𑀭𑀺𑀡𑀸𑀫𑁂𑀢𑀼𑀁 𑀇𑀘𑁆𑀙𑀢𑀺. 𑀢𑀼𑀫𑁆𑀳𑁂 𑀞𑀧𑁂𑀢𑁆𑀯𑀸 𑀫𑀗𑁆𑀕𑀮𑀳𑀢𑁆𑀣𑀺𑀁 𑀫𑀗𑁆𑀕𑀮𑀅𑀲𑁆𑀲𑀁 𑀫𑀗𑁆𑀕𑀮𑀭𑀣𑀜𑁆𑀘 𑀬𑀢𑁆𑀢𑀓𑁂 𑀇𑀘𑁆𑀙𑀣, 𑀢𑀢𑁆𑀢𑀓𑁂 𑀳𑀢𑁆𑀣𑀺𑀅𑀲𑁆𑀲𑀭𑀣𑁂 𑀕𑀳𑁂𑀢𑁆𑀯𑀸 𑀕𑀘𑁆𑀙𑀣. 𑀫𑀫𑀘𑁆𑀘𑀬𑁂𑀦 𑀆𑀕𑀦𑁆𑀢𑁆𑀯𑀸 𑀭𑀚𑁆𑀚𑀁 𑀓𑀭𑁂𑀬𑁆𑀬𑀸𑀣𑀸’’𑀢𑀺, 𑀅𑀝𑁆𑀞𑀳𑀺 𑀅𑀫𑀘𑁆𑀘𑁂𑀳𑀺 𑀲𑀤𑁆𑀥𑀺𑀁 𑀉𑀬𑁆𑀬𑁄𑀚𑁂𑀲𑀺.

𑀢𑁂 𑀦𑀸𑀦𑀧𑁆𑀧𑀓𑀸𑀭𑀁 𑀭𑁄𑀤𑀺𑀢𑁆𑀯𑀸 𑀓𑀦𑁆𑀤𑀺𑀢𑁆𑀯𑀸 𑁋 ‘‘𑀢𑀸𑀢, 𑀅𑀫𑁆𑀳𑀸𑀓𑀁 𑀤𑁄𑀲𑀁 𑀔𑀫𑀣𑀸’’𑀢𑀺 𑀭𑀸𑀚𑀸𑀦𑀜𑁆𑀘𑁂𑀯 𑀭𑀸𑀚𑁄𑀭𑁄𑀥𑁂 𑀘 𑀔𑀫𑀸𑀧𑁂𑀢𑁆𑀯𑀸, ‘‘𑀫𑀬𑀫𑁆𑀧𑀺 𑀪𑀸𑀢𑀽𑀳𑀺 𑀲𑀤𑁆𑀥𑀺𑀁 𑀕𑀘𑁆𑀙𑀸𑀫𑀸’’𑀢𑀺 𑀭𑀸𑀚𑀸𑀦𑀁 𑀆𑀧𑀼𑀘𑁆𑀙𑀺𑀢𑁆𑀯𑀸 𑀦𑀕𑀭𑀸 𑀦𑀺𑀓𑁆𑀔𑀦𑁆𑀢𑀸 𑀪𑀕𑀺𑀦𑀺𑀬𑁄 𑀆𑀤𑀸𑀬 𑀘𑀢𑀼𑀭𑀗𑁆𑀕𑀺𑀦𑀺𑀬𑀸 𑀲𑁂𑀦𑀸𑀬 𑀧𑀭𑀺𑀯𑀼𑀢𑀸 𑀦𑀕𑀭𑀸 𑀦𑀺𑀓𑁆𑀔𑀫𑀺𑀁𑀲𑀼. ‘‘𑀓𑀼𑀫𑀸𑀭𑀸 𑀧𑀺𑀢𑀼𑀅𑀘𑁆𑀘𑀬𑁂𑀦 𑀆𑀕𑀦𑁆𑀢𑁆𑀯𑀸 𑀭𑀚𑁆𑀚𑀁 𑀓𑀸𑀭𑁂𑀲𑁆𑀲𑀦𑁆𑀢𑀺, 𑀕𑀘𑁆𑀙𑀸𑀫 𑀦𑁂 𑀉𑀧𑀝𑁆𑀞𑀳𑀸𑀫𑀸’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀩𑀳𑀽 𑀫𑀦𑀼𑀲𑁆𑀲𑀸 𑀅𑀦𑀼𑀩𑀦𑁆𑀥𑀺𑀁𑀲𑀼. 𑀧𑀞𑀫𑀤𑀺𑀯𑀲𑁂 𑀬𑁄𑀚𑀦𑀫𑀢𑁆𑀢𑀸 𑀲𑁂𑀦𑀸 𑀅𑀳𑁄𑀲𑀺, 𑀤𑀼𑀢𑀺𑀬𑁂 𑀤𑁆𑀯𑀺𑀬𑁄𑀚𑀦𑀫𑀢𑁆𑀢𑀸, 𑀢𑀢𑀺𑀬𑁂 𑀢𑀺𑀬𑁄𑀚𑀦𑀫𑀢𑁆𑀢𑀸. 𑀓𑀼𑀫𑀸𑀭𑀸 𑀫𑀦𑁆𑀢𑀬𑀺𑀁𑀲𑀼 𑁋 ‘‘𑀫𑀳𑀸 𑀩𑀮𑀓𑀸𑀬𑁄, 𑀲𑀘𑁂 𑀫𑀬𑀁 𑀓𑀜𑁆𑀘𑀺 𑀲𑀸𑀫𑀦𑁆𑀢𑀭𑀸𑀚𑀸𑀦𑀁 𑀫𑀤𑁆𑀤𑀺𑀢𑁆𑀯𑀸 𑀚𑀦𑀧𑀤𑀁 𑀕𑀡𑁆𑀳𑁂𑀬𑁆𑀬𑀸𑀫, 𑀲𑁄𑀧𑀺 𑀦𑁄 𑀦𑀧𑁆𑀧𑀲𑀳𑁂𑀬𑁆𑀬. 𑀓𑀺𑀁 𑀧𑀭𑁂𑀲𑀁 𑀧𑀻𑀴𑀸𑀬 𑀓𑀢𑀸𑀬, 𑀫𑀳𑀸 𑀅𑀬𑀁 𑀚𑀫𑁆𑀩𑀼𑀤𑀻𑀧𑁄, 𑀅𑀭𑀜𑁆𑀜𑁂 𑀦𑀕𑀭𑀁 𑀫𑀸𑀧𑁂𑀲𑁆𑀲𑀸𑀫𑀸’’𑀢𑀺 𑀳𑀺𑀫𑀯𑀦𑁆𑀢𑀸𑀪𑀺𑀫𑀼𑀔𑀸 𑀕𑀦𑁆𑀢𑁆𑀯𑀸 𑀦𑀕𑀭𑀯𑀢𑁆𑀣𑀼𑀁 𑀧𑀭𑀺𑀬𑁂𑀲𑀺𑀁𑀲𑀼.

𑀢𑀲𑁆𑀫𑀺𑀜𑁆𑀘 𑀲𑀫𑀬𑁂 𑀅𑀫𑁆𑀳𑀸𑀓𑀁 𑀩𑁄𑀥𑀺𑀲𑀢𑁆𑀢𑁄 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀓𑀧𑀺𑀮𑀩𑁆𑀭𑀸𑀳𑁆𑀫𑀡𑁄 𑀦𑀸𑀫 𑀳𑀼𑀢𑁆𑀯𑀸 𑀦𑀺𑀓𑁆𑀔𑀫𑁆𑀫 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀳𑀺𑀫𑀯𑀦𑁆𑀢𑀧𑀲𑁆𑀲𑁂 𑀧𑁄𑀓𑁆𑀔𑀭𑀡𑀺𑀬𑀸 𑀢𑀻𑀭𑁂 𑀲𑀸𑀓𑀯𑀦𑀲𑀡𑁆𑀟𑁂 𑀧𑀡𑁆𑀡𑀲𑀸𑀮𑀁 𑀫𑀸𑀧𑁂𑀢𑁆𑀯𑀸 𑀯𑀲𑀢𑀺. 𑀲𑁄 𑀓𑀺𑀭 𑀪𑀼𑀫𑁆𑀫𑀚𑀸𑀮𑀁 𑀦𑀸𑀫 𑀯𑀺𑀚𑁆𑀚𑀁 𑀚𑀸𑀦𑀸𑀢𑀺, 𑀬𑀸𑀬 𑀉𑀤𑁆𑀥𑀁 𑀅𑀲𑀻𑀢𑀺𑀳𑀢𑁆𑀣𑁂 𑀆𑀓𑀸𑀲𑁂, 𑀳𑁂𑀝𑁆𑀞𑀸 𑀘 𑀪𑀽𑀫𑀺𑀬𑀫𑁆𑀧𑀺 𑀕𑀼𑀡𑀤𑁄𑀲𑀁 𑀧𑀲𑁆𑀲𑀢𑀺. 𑀏𑀢𑀲𑁆𑀫𑀺𑀁 𑀧𑀤𑁂𑀲𑁂 𑀢𑀺𑀡𑀕𑀼𑀫𑁆𑀩𑀮𑀢𑀸 𑀤𑀓𑁆𑀔𑀺𑀡𑀸𑀯𑀝𑁆𑀝𑀸 𑀧𑀸𑀘𑀻𑀦𑀸𑀪𑀺𑀫𑀼𑀔𑀸 𑀚𑀸𑀬𑀦𑁆𑀢𑀺. 𑀲𑀻𑀳𑀩𑁆𑀬𑀕𑁆𑀖𑀸𑀤𑀬𑁄 𑀫𑀺𑀕𑀲𑀽𑀓𑀭𑁂 𑀲𑀧𑁆𑀧𑀩𑀺𑀴𑀸𑀭𑀸 𑀘 𑀫𑀡𑁆𑀟𑀽𑀓𑀫𑀽𑀲𑀺𑀓𑁂 𑀅𑀦𑀼𑀩𑀦𑁆𑀥𑀫𑀸𑀦𑀸 𑀢𑀁 𑀧𑀤𑁂𑀲𑀁 𑀧𑀢𑁆𑀯𑀸 𑀦 𑀲𑀓𑁆𑀓𑁄𑀦𑁆𑀢𑀺 𑀢𑁂 𑀅𑀦𑀼𑀩𑀦𑁆𑀥𑀺𑀢𑀼𑀁. 𑀢𑁂𑀳𑀺 𑀢𑁂 𑀅𑀜𑁆𑀜𑀤𑀢𑁆𑀣𑀼 𑀲𑀦𑁆𑀢𑀚𑁆𑀚𑀺𑀢𑀸 𑀦𑀺𑀯𑀢𑁆𑀢𑀦𑁆𑀢𑀺𑀬𑁂𑀯. 𑀲𑁄 𑁋 ‘‘𑀅𑀬𑀁 𑀧𑀣𑀯𑀺𑀬𑀸 𑀅𑀕𑁆𑀕𑀧𑀤𑁂𑀲𑁄’’𑀢𑀺 𑀜𑀢𑁆𑀯𑀸 𑀢𑀢𑁆𑀣 𑀅𑀢𑁆𑀢𑀦𑁄 𑀧𑀡𑁆𑀡𑀲𑀸𑀮𑀁 𑀫𑀸𑀧𑁂𑀲𑀺.

𑀅𑀣 𑀢𑁂 𑀓𑀼𑀫𑀸𑀭𑁂 𑀦𑀕𑀭𑀯𑀢𑁆𑀣𑀼𑀁 𑀧𑀭𑀺𑀬𑁂𑀲𑀫𑀸𑀦𑁂 𑀅𑀢𑁆𑀢𑀦𑁄 𑀯𑀲𑀦𑁄𑀓𑀸𑀲𑀁 𑀆𑀕𑀢𑁂 𑀤𑀺𑀲𑁆𑀯𑀸 𑀧𑀼𑀘𑁆𑀙𑀺𑀢𑁆𑀯𑀸 𑀢𑀁 𑀧𑀯𑀢𑁆𑀢𑀺𑀁 𑀜𑀢𑁆𑀯𑀸 𑀢𑁂𑀲𑀼 𑀅𑀦𑀼𑀓𑀫𑁆𑀧𑀁 𑀚𑀦𑁂𑀢𑁆𑀯𑀸 𑀅𑀯𑁄𑀘 𑁋 ‘‘𑀇𑀫𑀲𑁆𑀫𑀺𑀁 𑀧𑀡𑁆𑀡𑀲𑀸𑀮𑀝𑁆𑀞𑀸𑀦𑁂 𑀫𑀸𑀧𑀺𑀢𑀁 𑀦𑀕𑀭𑀁 𑀚𑀫𑁆𑀩𑀼𑀤𑀻𑀧𑁂 𑀅𑀕𑁆𑀕𑀦𑀕𑀭𑀁 𑀪𑀯𑀺𑀲𑁆𑀲𑀢𑀺. 𑀏𑀢𑁆𑀣 𑀚𑀸𑀢𑀧𑀼𑀭𑀺𑀲𑁂𑀲𑀼 𑀏𑀓𑁂𑀓𑁄 𑀧𑀼𑀭𑀺𑀲𑀲𑀢𑀫𑁆𑀧𑀺 𑀧𑀼𑀭𑀺𑀲𑀲𑀳𑀲𑁆𑀲𑀫𑁆𑀧𑀺 𑀅𑀪𑀺𑀪𑀯𑀺𑀢𑀼𑀁 𑀲𑀓𑁆𑀔𑀺𑀲𑁆𑀲𑀢𑀺. 𑀏𑀢𑁆𑀣 𑀦𑀕𑀭𑀁 𑀫𑀸𑀧𑁂𑀣, 𑀧𑀡𑁆𑀡𑀲𑀸𑀮𑀝𑁆𑀞𑀸𑀦𑁂 𑀭𑀜𑁆𑀜𑁄 𑀖𑀭𑀁 𑀓𑀭𑁄𑀣. 𑀇𑀫𑀲𑁆𑀫𑀺𑀜𑁆𑀳𑀺 𑀑𑀓𑀸𑀲𑁂 𑀞𑀢𑁆𑀯𑀸 𑀘𑀡𑁆𑀟𑀸𑀮𑀧𑀼𑀢𑁆𑀢𑁄𑀧𑀺 𑀘𑀓𑁆𑀓𑀯𑀢𑁆𑀢𑀺𑀩𑀮𑁂𑀦 𑀅𑀢𑀺𑀲𑁂𑀬𑁆𑀬𑁄’’𑀢𑀺. 𑀦𑀦𑀼, 𑀪𑀦𑁆𑀢𑁂, 𑀅𑀬𑁆𑀬𑀲𑁆𑀲 𑀯𑀲𑀦𑁄𑀓𑀸𑀲𑁄𑀢𑀺? ‘‘𑀫𑀫 𑀯𑀲𑀦𑁄𑀓𑀸𑀲𑁄’’𑀢𑀺 𑀫𑀸 𑀘𑀺𑀦𑁆𑀢𑀬𑀺𑀢𑁆𑀣. 𑀫𑀬𑁆𑀳𑀁 𑀏𑀓𑀧𑀲𑁆𑀲𑁂 𑀧𑀡𑁆𑀡𑀲𑀸𑀮𑀁 𑀓𑀢𑁆𑀯𑀸 𑀦𑀕𑀭𑀁 𑀫𑀸𑀧𑁂𑀢𑁆𑀯𑀸 𑀓𑀧𑀺𑀮𑀯𑀢𑁆𑀣𑀼𑀦𑁆𑀢𑀺 𑀦𑀸𑀫𑀁 𑀓𑀭𑁄𑀣𑀸’’𑀢𑀺. 𑀢𑁂 𑀢𑀣𑀸 𑀓𑀢𑁆𑀯𑀸 𑀢𑀢𑁆𑀣 𑀦𑀺𑀯𑀸𑀲𑀁 𑀓𑀧𑁆𑀧𑁂𑀲𑀼𑀁.

𑀅𑀣𑀸𑀫𑀘𑁆𑀘𑀸 𑁋 ‘‘𑀇𑀫𑁂 𑀤𑀸𑀭𑀓𑀸 𑀯𑀬𑀧𑁆𑀧𑀢𑁆𑀢𑀸, 𑀲𑀘𑁂 𑀦𑁂𑀲𑀁 𑀧𑀺𑀢𑀸 𑀲𑀦𑁆𑀢𑀺𑀓𑁂 𑀪𑀯𑁂𑀬𑁆𑀬, 𑀲𑁄 𑀆𑀯𑀸𑀳𑀯𑀺𑀯𑀸𑀳𑀁 𑀓𑀭𑁂𑀬𑁆𑀬. 𑀇𑀤𑀸𑀦𑀺 𑀧𑀦 𑀅𑀫𑁆𑀳𑀸𑀓𑀁 𑀪𑀸𑀭𑁄’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀓𑀼𑀫𑀸𑀭𑁂𑀳𑀺 𑀲𑀤𑁆𑀥𑀺𑀁 𑀫𑀦𑁆𑀢𑀬𑀺𑀁𑀲𑀼. 𑀓𑀼𑀫𑀸𑀭𑀸 𑀅𑀫𑁆𑀳𑀸𑀓𑀁 𑀲𑀤𑀺𑀲𑀸 𑀔𑀢𑁆𑀢𑀺𑀬𑀥𑀻𑀢𑀭𑁄 𑀦𑀸𑀫 𑀦 𑀧𑀲𑁆𑀲𑀸𑀫, 𑀦𑀸𑀧𑀺 𑀪𑀕𑀺𑀦𑀻𑀦𑀁 𑀲𑀤𑀺𑀲𑁂 𑀔𑀢𑁆𑀢𑀺𑀬𑀓𑀼𑀫𑀸𑀭𑀓𑁂, 𑀅𑀲𑀤𑀺𑀲𑀲𑀁𑀬𑁄𑀕𑁂 𑀘 𑀦𑁄 𑀉𑀧𑁆𑀧𑀦𑁆𑀦𑀸 𑀧𑀼𑀢𑁆𑀢𑀸 𑀫𑀸𑀢𑀺𑀢𑁄 𑀯𑀸 𑀧𑀺𑀢𑀺𑀢𑁄 𑀯𑀸 𑀅𑀧𑀭𑀺𑀲𑀼𑀤𑁆𑀥𑀸 𑀚𑀸𑀢𑀺𑀲𑀫𑁆𑀪𑁂𑀤𑀁 𑀧𑀸𑀧𑀼𑀡𑀺𑀲𑁆𑀲𑀦𑁆𑀢𑀺. 𑀢𑀲𑁆𑀫𑀸 𑀫𑀬𑀁 𑀪𑀕𑀺𑀦𑀻𑀳𑀺𑀬𑁂𑀯 𑀲𑀤𑁆𑀥𑀺𑀁 𑀲𑀁𑀯𑀸𑀲𑀁 𑀭𑁄𑀘𑁂𑀫𑀸𑀢𑀺. 𑀢𑁂 𑀚𑀸𑀢𑀺𑀲𑀫𑁆𑀪𑁂𑀤𑀪𑀬𑁂𑀦 𑀚𑁂𑀝𑁆𑀞𑀓𑀪𑀕𑀺𑀦𑀺𑀁 𑀫𑀸𑀢𑀼𑀝𑁆𑀞𑀸𑀦𑁂 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑀸𑀳𑀺 𑀲𑀁𑀯𑀸𑀲𑀁 𑀓𑀧𑁆𑀧𑁂𑀲𑀼𑀁.

𑀢𑁂𑀲𑀁 𑀧𑀼𑀢𑁆𑀢𑁂𑀳𑀺 𑀘 𑀥𑀻𑀢𑀸𑀳𑀺 𑀘 𑀯𑀟𑁆𑀠𑀫𑀸𑀦𑀸𑀦𑀁 𑀅𑀧𑀭𑁂𑀦 𑀲𑀫𑀬𑁂𑀦 𑀚𑁂𑀝𑁆𑀞𑀓𑀪𑀕𑀺𑀦𑀺𑀬𑀸 𑀓𑀼𑀝𑁆𑀞𑀭𑁄𑀕𑁄 𑀉𑀤𑀧𑀸𑀤𑀺, 𑀓𑁄𑀯𑀺𑀴𑀸𑀭𑀧𑀼𑀧𑁆𑀨𑀲𑀤𑀺𑀲𑀸𑀦𑀺 𑀕𑀢𑁆𑀢𑀸𑀦𑀺 𑀅𑀳𑁂𑀲𑀼𑀁. 𑀭𑀸𑀚𑀓𑀼𑀫𑀸𑀭𑀸 𑀇𑀫𑀸𑀬 𑀲𑀤𑁆𑀥𑀺𑀁 𑀏𑀓𑀢𑁄 𑀦𑀺𑀲𑀚𑁆𑀚𑀝𑁆𑀞𑀸𑀦𑀪𑁄𑀚𑀦𑀸𑀤𑀻𑀦𑀺 𑀓𑀭𑁄𑀦𑁆𑀢𑀸𑀦𑀫𑁆𑀧𑀺 𑀉𑀧𑀭𑀺 𑀅𑀬𑀁 𑀭𑁄𑀕𑁄 𑀲𑀗𑁆𑀓𑀫𑀢𑀻𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀏𑀓𑀤𑀺𑀯𑀲𑀁 𑀉𑀬𑁆𑀬𑀸𑀦𑀓𑀻𑀴𑀁 𑀕𑀘𑁆𑀙𑀦𑁆𑀢𑀸 𑀯𑀺𑀬 𑀢𑀁 𑀬𑀸𑀦𑁂 𑀆𑀭𑁄𑀧𑁂𑀢𑁆𑀯𑀸 𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸 𑀪𑀽𑀫𑀺𑀬𑀁 𑀧𑁄𑀓𑁆𑀔𑀭𑀡𑀺𑀁 𑀔𑀡𑀸𑀧𑁂𑀢𑁆𑀯𑀸 𑀢𑀢𑁆𑀣 𑀔𑀸𑀤𑀦𑀻𑀬𑀪𑁄𑀚𑀦𑀻𑀬𑁂𑀦 𑀲𑀤𑁆𑀥𑀺𑀁 𑀢𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀖𑀭𑀲𑀗𑁆𑀔𑁂𑀧𑁂𑀦 𑀉𑀧𑀭𑀺 𑀧𑀤𑀭𑀁 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀧𑀁𑀲𑀼𑀁 𑀤𑀢𑁆𑀯𑀸 𑀧𑀓𑁆𑀓𑀫𑀺𑀁𑀲𑀼.

𑀢𑁂𑀦 𑀘 𑀲𑀫𑀬𑁂𑀦 𑀭𑀸𑀫𑁄 𑀦𑀸𑀫 𑀩𑀸𑀭𑀸𑀡𑀲𑀺𑀭𑀸𑀚𑀸 𑀓𑀼𑀝𑁆𑀞𑀭𑁄𑀕𑁄 𑀦𑀸𑀝𑀓𑀺𑀢𑁆𑀣𑀻𑀳𑀺 𑀘 𑀑𑀭𑁄𑀥𑁂𑀳𑀺 𑀘 𑀚𑀺𑀕𑀼𑀘𑁆𑀙𑀺𑀬𑀫𑀸𑀦𑁄 𑀢𑁂𑀦 𑀲𑀁𑀯𑁂𑀕𑁂𑀦 𑀚𑁂𑀝𑁆𑀞𑀧𑀼𑀢𑁆𑀢𑀲𑁆𑀲 𑀭𑀚𑁆𑀚𑀁 𑀤𑀢𑁆𑀯𑀸 𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸 𑀢𑀢𑁆𑀣 𑀧𑀡𑁆𑀡𑀲𑀸𑀮𑀁 𑀫𑀸𑀧𑁂𑀢𑁆𑀯𑀸 𑀫𑀽𑀮𑀨𑀮𑀸𑀦𑀺 𑀧𑀭𑀺𑀪𑀼𑀜𑁆𑀚𑀦𑁆𑀢𑁄 𑀦𑀘𑀺𑀭𑀲𑁆𑀲𑁂𑀯 𑀅𑀭𑁄𑀕𑁄 𑀲𑀼𑀯𑀡𑁆𑀡𑀯𑀡𑁆𑀡𑁄 𑀳𑀼𑀢𑁆𑀯𑀸 𑀇𑀢𑁄 𑀘𑀺𑀢𑁄 𑀘 𑀯𑀺𑀘𑀭𑀦𑁆𑀢𑁄 𑀫𑀳𑀦𑁆𑀢𑀁 𑀲𑀼𑀲𑀺𑀭𑀭𑀼𑀓𑁆𑀔𑀁 𑀤𑀺𑀲𑁆𑀯𑀸 𑀢𑀲𑁆𑀲𑀩𑁆𑀪𑀦𑁆𑀢𑀭𑁂 𑀲𑁄𑀴𑀲𑀳𑀢𑁆𑀣𑀧𑁆𑀧𑀫𑀸𑀡𑀁 𑀑𑀓𑀸𑀲𑀁 𑀲𑁄𑀥𑁂𑀢𑁆𑀯𑀸 𑀤𑁆𑀯𑀸𑀭𑀜𑁆𑀘 𑀯𑀸𑀢𑀧𑀸𑀦𑀜𑁆𑀘 𑀬𑁄𑀚𑁂𑀢𑁆𑀯𑀸 𑀦𑀺𑀲𑁆𑀲𑁂𑀡𑀺𑀁 𑀩𑀦𑁆𑀥𑀺𑀢𑁆𑀯𑀸 𑀢𑀢𑁆𑀣 𑀯𑀸𑀲𑀁 𑀓𑀧𑁆𑀧𑁂𑀲𑀺. 𑀲𑁄 𑀅𑀗𑁆𑀕𑀸𑀭𑀓𑀝𑀸𑀳𑁂 𑀅𑀕𑁆𑀕𑀺𑀁 𑀓𑀢𑁆𑀯𑀸 𑀭𑀢𑁆𑀢𑀺𑀁 𑀫𑀺𑀕𑀲𑀽𑀓𑀭𑀸𑀤𑀻𑀦𑀁 𑀲𑀤𑁆𑀤𑁂 𑀲𑀼𑀡𑀦𑁆𑀢𑁄 𑀲𑀬𑀢𑀺. 𑀲𑁄 𑁋 ‘‘𑀅𑀲𑀼𑀓𑀲𑁆𑀫𑀺𑀁 𑀧𑀤𑁂𑀲𑁂 𑀲𑀻𑀳𑁄 𑀲𑀤𑁆𑀤𑀫𑀓𑀸𑀲𑀺, 𑀅𑀲𑀼𑀓𑀲𑁆𑀫𑀺𑀁 𑀩𑁆𑀬𑀕𑁆𑀖𑁄’’𑀢𑀺 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀧𑀪𑀸𑀢𑁂 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀯𑀺𑀖𑀸𑀲𑀫𑀁𑀲𑀁 𑀆𑀤𑀸𑀬 𑀧𑀘𑀺𑀢𑁆𑀯𑀸 𑀔𑀸𑀤𑀢𑀺.

𑀅𑀣𑁂𑀓𑀤𑀺𑀯𑀲𑀁 𑀢𑀲𑁆𑀫𑀺𑀁 𑀧𑀘𑁆𑀘𑀽𑀲𑀲𑀫𑀬𑁂 𑀅𑀕𑁆𑀕𑀺𑀁 𑀚𑀸𑀮𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑁂 𑀭𑀸𑀚𑀥𑀻𑀢𑀸𑀬 𑀲𑀭𑀻𑀭𑀕𑀦𑁆𑀥𑁂𑀦 𑀆𑀕𑀦𑁆𑀢𑁆𑀯𑀸 𑀩𑁆𑀬𑀕𑁆𑀖𑁄 𑀢𑀲𑁆𑀫𑀺𑀁 𑀧𑀤𑁂𑀲𑁂 𑀧𑀁𑀲𑀼𑀁 𑀯𑀺𑀬𑀽𑀳𑀦𑁆𑀢𑁄 𑀧𑀤𑀭𑁂 𑀯𑀺𑀯𑀭𑀫𑀓𑀸𑀲𑀺, 𑀢𑁂𑀦 𑀘 𑀯𑀺𑀯𑀭𑁂𑀦 𑀲𑀸 𑀩𑁆𑀬𑀕𑁆𑀖𑀁 𑀤𑀺𑀲𑁆𑀯𑀸 𑀪𑀻𑀢𑀸 𑀯𑀺𑀲𑁆𑀲𑀭𑀫𑀓𑀸𑀲𑀺. 𑀲𑁄 𑀢𑀁 𑀲𑀤𑁆𑀤𑀁 𑀲𑀼𑀢𑁆𑀯𑀸 𑁋 ‘‘𑀇𑀢𑁆𑀣𑀺𑀲𑀤𑁆𑀤𑁄 𑀏𑀲𑁄’’𑀢𑀺 𑀘 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀧𑀸𑀢𑁄𑀯 𑀢𑀢𑁆𑀣 𑀕𑀦𑁆𑀢𑁆𑀯𑀸 𑁋 ‘‘𑀓𑁄 𑀏𑀢𑁆𑀣𑀸’’𑀢𑀺 𑀆𑀳. 𑀫𑀸𑀢𑀼𑀕𑀸𑀫𑁄 𑀲𑀸𑀫𑀻𑀢𑀺. 𑀓𑀺𑀁 𑀚𑀸𑀢𑀺𑀓𑀸𑀲𑀻𑀢𑀺? 𑀑𑀓𑁆𑀓𑀸𑀓𑀫𑀳𑀸𑀭𑀸𑀚𑀲𑁆𑀲 𑀥𑀻𑀢𑀸 𑀲𑀸𑀫𑀻𑀢𑀺. 𑀦𑀺𑀓𑁆𑀔𑀫𑀸𑀢𑀺? 𑀦 𑀲𑀓𑁆𑀓𑀸 𑀲𑀸𑀫𑀻𑀢𑀺. 𑀓𑀺𑀁 𑀓𑀸𑀭𑀡𑀸𑀢𑀺? 𑀙𑀯𑀺𑀭𑁄𑀕𑁄 𑀫𑁂 𑀅𑀢𑁆𑀣𑀻𑀢𑀺. 𑀲𑁄 𑀲𑀩𑁆𑀩𑀁 𑀧𑀯𑀢𑁆𑀢𑀺𑀁 𑀧𑀼𑀘𑁆𑀙𑀺𑀢𑁆𑀯𑀸 𑀔𑀢𑁆𑀢𑀺𑀬𑀫𑀸𑀦𑁂𑀦 𑀅𑀦𑀺𑀓𑁆𑀔𑀫𑀦𑁆𑀢𑀺𑀁 𑁋 ‘‘𑀅𑀳𑀫𑁆𑀧𑀺 𑀔𑀢𑁆𑀢𑀺𑀬𑁄’’𑀢𑀺 𑀅𑀢𑁆𑀢𑀦𑁄 𑀔𑀢𑁆𑀢𑀺𑀬𑀪𑀸𑀯𑀁 𑀚𑀸𑀦𑀸𑀧𑁂𑀢𑁆𑀯𑀸 𑀦𑀺𑀲𑁆𑀲𑁂𑀡𑀺𑀁 𑀤𑀢𑁆𑀯𑀸 𑀉𑀤𑁆𑀥𑀭𑀺𑀢𑁆𑀯𑀸 𑀅𑀢𑁆𑀢𑀦𑁄 𑀯𑀲𑀦𑁄𑀓𑀸𑀲𑀁 𑀦𑁂𑀢𑁆𑀯𑀸 𑀲𑀬𑀁 𑀧𑀭𑀺𑀪𑀼𑀢𑁆𑀢𑀪𑁂𑀲𑀚𑁆𑀚𑀸𑀦𑀺𑀬𑁂𑀯 𑀤𑀢𑁆𑀯𑀸 𑀦𑀘𑀺𑀭𑀲𑁆𑀲𑁂𑀯 𑀅𑀭𑁄𑀕𑀁 𑀲𑀼𑀯𑀡𑁆𑀡𑀯𑀡𑁆𑀡𑀁 𑀓𑀢𑁆𑀯𑀸 𑀢𑀸𑀬 𑀲𑀤𑁆𑀥𑀺𑀁 𑀲𑀁𑀯𑀸𑀲𑀁 𑀓𑀧𑁆𑀧𑁂𑀲𑀺. 𑀲𑀸 𑀧𑀞𑀫𑀲𑀁𑀯𑀸𑀲𑁂𑀦𑁂𑀯 𑀕𑀩𑁆𑀪𑀁 𑀕𑀡𑁆𑀳𑀺𑀢𑁆𑀯𑀸 𑀤𑁆𑀯𑁂 𑀧𑀼𑀢𑁆𑀢𑁂 𑀯𑀺𑀚𑀸𑀬𑀺, 𑀧𑀼𑀦𑀧𑀺 𑀤𑁆𑀯𑁂𑀢𑀺, 𑀏𑀯𑀁 𑀲𑁄𑀴𑀲𑀓𑁆𑀔𑀢𑁆𑀢𑀼𑀫𑁆𑀧𑀺 𑀯𑀺𑀚𑀸𑀬𑀺. 𑀏𑀯𑀁 𑀤𑁆𑀯𑀢𑁆𑀢𑀺𑀁𑀲 𑀪𑀸𑀢𑀭𑁄 𑀅𑀳𑁂𑀲𑀼𑀁. 𑀢𑁂 𑀅𑀦𑀼𑀧𑀼𑀩𑁆𑀩𑁂𑀦 𑀯𑀼𑀟𑁆𑀠𑀺𑀧𑁆𑀧𑀢𑁆𑀢𑁂 𑀧𑀺𑀢𑀸 𑀲𑀩𑁆𑀩𑀲𑀺𑀧𑁆𑀧𑀸𑀦𑀺 𑀲𑀺𑀓𑁆𑀔𑀸𑀧𑁂𑀲𑀺.

𑀅𑀣𑁂𑀓𑀤𑀺𑀯𑀲𑀁 𑀏𑀓𑁄 𑀭𑀸𑀫𑀭𑀜𑁆𑀜𑁄 𑀦𑀕𑀭𑀯𑀸𑀲𑀻 𑀯𑀦𑀘𑀭𑀓𑁄 𑀧𑀩𑁆𑀩𑀢𑁂 𑀭𑀢𑀦𑀸𑀦𑀺 𑀕𑀯𑁂𑀲𑀦𑁆𑀢𑁄 𑀭𑀸𑀚𑀸𑀦𑀁 𑀤𑀺𑀲𑁆𑀯𑀸 𑀲𑀜𑁆𑀚𑀸𑀦𑀺𑀢𑁆𑀯𑀸 𑀆𑀳 𑁋 ‘‘𑀚𑀸𑀦𑀸𑀫𑀳𑀁, 𑀤𑁂𑀯, 𑀢𑀼𑀫𑁆𑀳𑁂’’𑀢𑀺. 𑀢𑀢𑁄 𑀦𑀁 𑀭𑀸𑀚𑀸 𑀲𑀩𑁆𑀩𑀁 𑀧𑀯𑀢𑁆𑀢𑀺𑀁 𑀧𑀼𑀘𑁆𑀙𑀺. 𑀢𑀲𑁆𑀫𑀺𑀁𑀬𑁂𑀯 𑀘 𑀔𑀡𑁂 𑀢𑁂 𑀤𑀸𑀭𑀓𑀸 𑀆𑀕𑀫𑀺𑀁𑀲𑀼. 𑀲𑁄 𑀢𑁂 𑀤𑀺𑀲𑁆𑀯𑀸 𑁋 ‘‘𑀓𑁂 𑀇𑀫𑁂’’𑀢𑀺 𑀆𑀳. ‘‘𑀧𑀼𑀢𑁆𑀢𑀸 𑀫𑁂’’𑀢𑀺 𑀘 𑀯𑀼𑀢𑁆𑀢𑁂 𑀢𑁂𑀲𑀁 𑀫𑀸𑀢𑀺𑀓𑀯𑀁𑀲𑀁 𑀧𑀼𑀘𑁆𑀙𑀺𑀢𑁆𑀯𑀸 𑁋 ‘‘𑀮𑀤𑁆𑀥𑀁 𑀤𑀸𑀦𑀺 𑀫𑁂 𑀧𑀸𑀪𑀢’’𑀦𑁆𑀢𑀺 𑀦𑀕𑀭𑀁 𑀕𑀦𑁆𑀢𑁆𑀯𑀸 𑀭𑀜𑁆𑀜𑁄 𑀆𑀭𑁄𑀘𑁂𑀲𑀺. 𑀲𑁄 ‘𑀧𑀺𑀢𑀭𑀁 𑀆𑀦𑀬𑀺𑀲𑁆𑀲𑀸𑀫𑀻’𑀢𑀺 𑀘𑀢𑀼𑀭𑀗𑁆𑀕𑀺𑀦𑀺𑀬𑀸 𑀲𑁂𑀦𑀸𑀬 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀧𑀺𑀢𑀭𑀁 𑀯𑀦𑁆𑀤𑀺𑀢𑁆𑀯𑀸 𑁋 ‘‘𑀭𑀚𑁆𑀚𑀁, 𑀤𑁂𑀯, 𑀲𑀫𑁆𑀧𑀝𑀺𑀘𑁆𑀙𑀸’’𑀢𑀺 𑀬𑀸𑀘𑀺. 𑀲𑁄 𑁋 ‘‘𑀅𑀮𑀁, 𑀢𑀸𑀢, 𑀦 𑀢𑀢𑁆𑀣 𑀕𑀘𑁆𑀙𑀸𑀫𑀺, 𑀇𑀥𑁂𑀯 𑀫𑁂 𑀇𑀫𑀁 𑀭𑀼𑀓𑁆𑀔𑀁 𑀅𑀧𑀦𑁂𑀢𑁆𑀯𑀸 𑀦𑀕𑀭𑀁 𑀫𑀸𑀧𑁂𑀳𑀻’’𑀢𑀺 𑀆𑀳. 𑀲𑁄 𑀢𑀣𑀸 𑀓𑀢𑁆𑀯𑀸 𑀢𑀲𑁆𑀲 𑀦𑀕𑀭𑀲𑁆𑀲 𑀓𑁄𑀮𑀭𑀼𑀓𑁆𑀔𑀁 𑀅𑀧𑀦𑁂𑀢𑁆𑀯𑀸 𑀓𑀢𑀢𑁆𑀢𑀸 𑀓𑁄𑀮𑀦𑀕𑀭𑀦𑁆𑀢𑀺 𑀘 𑀩𑁆𑀬𑀕𑁆𑀖𑀧𑀣𑁂 𑀓𑀢𑀢𑁆𑀢𑀸 𑀩𑁆𑀬𑀕𑁆𑀖𑀧𑀣𑀦𑁆𑀢𑀺 𑀘𑀸𑀢𑀺 𑀤𑁆𑀯𑁂 𑀦𑀸𑀫𑀸𑀦𑀺 𑀆𑀭𑁄𑀧𑁂𑀢𑁆𑀯𑀸 𑀧𑀺𑀢𑀭𑀁 𑀯𑀦𑁆𑀤𑀺𑀢𑁆𑀯𑀸 𑀅𑀢𑁆𑀢𑀦𑁄 𑀦𑀕𑀭𑀁 𑀅𑀕𑀫𑀸𑀲𑀺.

𑀢𑀢𑁄 𑀯𑀬𑀧𑁆𑀧𑀢𑁆𑀢𑁂 𑀓𑀼𑀫𑀸𑀭𑁂 𑀫𑀸𑀢𑀸 𑀆𑀳 𑁋 ‘‘𑀢𑀸𑀢𑀸, 𑀢𑀼𑀫𑁆𑀳𑀸𑀓𑀁 𑀓𑀧𑀺𑀮𑀯𑀢𑁆𑀣𑀼𑀯𑀸𑀲𑀺𑀦𑁄 𑀲𑀓𑁆𑀬𑀸 𑀫𑀸𑀢𑀼𑀮𑀸 𑀲𑀦𑁆𑀢𑀺. 𑀫𑀸𑀢𑀼𑀮𑀥𑀻𑀢𑀸𑀦𑀁 𑀧𑀦 𑀯𑁄 𑀏𑀯𑀭𑀽𑀧𑀁 𑀦𑀸𑀫 𑀓𑁂𑀲𑀕𑁆𑀕𑀳𑀡𑀁 𑀳𑁄𑀢𑀺, 𑀏𑀯𑀭𑀽𑀧𑀁 𑀤𑀼𑀲𑁆𑀲𑀕𑀳𑀡𑀁. 𑀬𑀤𑀸 𑀢𑀸 𑀦𑁆𑀳𑀸𑀦𑀢𑀺𑀢𑁆𑀣𑀁 𑀆𑀕𑀘𑁆𑀙𑀦𑁆𑀢𑀺, 𑀢𑀤𑀸 𑀕𑀦𑁆𑀢𑁆𑀯𑀸 𑀬𑀲𑁆𑀲 𑀬𑀸 𑀭𑀼𑀘𑁆𑀘𑀢𑀺, 𑀲𑁄 𑀢𑀁 𑀕𑀡𑁆𑀳𑀢𑀽’’𑀢𑀺. 𑀢𑁂 𑀢𑀣𑁂𑀯 𑀕𑀦𑁆𑀢𑁆𑀯𑀸 𑀢𑀸𑀲𑀼 𑀦𑁆𑀳𑀢𑁆𑀯𑀸 𑀲𑀻𑀲𑀁 𑀲𑀼𑀓𑁆𑀔𑀸𑀧𑀬𑀫𑀸𑀦𑀸𑀲𑀼 𑀬𑀁 𑀬𑀁 𑀇𑀘𑁆𑀙𑀺𑀁𑀲𑀼, 𑀢𑀁 𑀢𑀁 𑀕𑀳𑁂𑀢𑁆𑀯𑀸 𑀦𑀸𑀫𑀁 𑀲𑀸𑀯𑁂𑀢𑁆𑀯𑀸 𑀅𑀕𑀫𑀺𑀁𑀲𑀼. 𑀲𑀓𑁆𑀬𑀭𑀸𑀚𑀸𑀦𑁄 𑀲𑀼𑀢𑁆𑀯𑀸 ‘‘𑀳𑁄𑀢𑀼, 𑀪𑀡𑁂, 𑀅𑀫𑁆𑀳𑀸𑀓𑀁 𑀜𑀸𑀢𑀓𑀸 𑀏𑀯 𑀢𑁂’’𑀢𑀺 𑀢𑀼𑀡𑁆𑀳𑀻 𑀅𑀳𑁂𑀲𑀼𑀁. 𑀅𑀬𑀁 𑀲𑀓𑁆𑀬𑀓𑁄𑀮𑀺𑀬𑀸𑀦𑀁 𑀉𑀧𑁆𑀧𑀢𑁆𑀢𑀺. 𑀏𑀯𑀁 𑀢𑁂𑀲𑀁 𑀲𑀓𑁆𑀬𑀓𑁄𑀮𑀺𑀬𑀸𑀦𑀁 𑀅𑀜𑁆𑀜𑀫𑀜𑁆𑀜𑀁 𑀆𑀯𑀸𑀳𑀯𑀺𑀯𑀸𑀳𑀁 𑀓𑀭𑁄𑀦𑁆𑀢𑀸𑀦𑀁 𑀬𑀸𑀯 𑀩𑀼𑀤𑁆𑀥𑀓𑀸𑀮𑀸 𑀅𑀦𑀼𑀧𑀘𑁆𑀙𑀺𑀦𑁆𑀦𑁄𑀯 𑀯𑀁𑀲𑁄 𑀆𑀕𑀢𑁄. 𑀢𑀢𑁆𑀣 𑀪𑀕𑀯𑀸 𑀲𑀓𑁆𑀬𑀯𑀁𑀲𑀁 𑀤𑀲𑁆𑀲𑁂𑀢𑀼𑀁 𑁋 ‘‘𑀢𑁂 𑀭𑀝𑁆𑀞𑀲𑁆𑀫𑀸 𑀧𑀩𑁆𑀩𑀸𑀚𑀺𑀢𑀸 𑀳𑀺𑀫𑀯𑀦𑁆𑀢𑀧𑀲𑁆𑀲𑁂 𑀧𑁄𑀓𑁆𑀔𑀭𑀡𑀺𑀬𑀸 𑀢𑀻𑀭𑁂’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀫𑁆𑀫𑀦𑁆𑀢𑀻𑀢𑀺 𑀯𑀲𑀦𑁆𑀢𑀺. 𑀲𑀓𑁆𑀬𑀸 𑀯𑀢 𑀪𑁄𑀢𑀺 𑀭𑀝𑁆𑀞𑀲𑁆𑀫𑀸 𑀧𑀩𑁆𑀩𑀸𑀚𑀺𑀢𑀸 𑀅𑀭𑀜𑁆𑀜𑁂 𑀯𑀲𑀦𑁆𑀢𑀸𑀧𑀺 𑀚𑀸𑀢𑀺𑀲𑀫𑁆𑀪𑁂𑀤𑀫𑀓𑀢𑁆𑀯𑀸 𑀓𑀼𑀮𑀯𑀁𑀲𑀁 𑀅𑀦𑀼𑀭𑀓𑁆𑀔𑀺𑀢𑀼𑀁 𑀲𑀓𑁆𑀬𑀸, 𑀲𑀫𑀢𑁆𑀣𑀸, 𑀧𑀝𑀺𑀩𑀮𑀸𑀢𑀺 𑀅𑀢𑁆𑀣𑁄. 𑀢𑀤𑀕𑁆𑀕𑁂𑀢𑀺 𑀢𑀁 𑀅𑀕𑁆𑀕𑀁 𑀓𑀢𑁆𑀯𑀸, 𑀢𑀢𑁄 𑀧𑀝𑁆𑀞𑀸𑀬𑀸𑀢𑀺 𑀅𑀢𑁆𑀣𑁄. 𑀲𑁄 𑀘 𑀦𑁂𑀲𑀁 𑀧𑀼𑀩𑁆𑀩𑀧𑀼𑀭𑀺𑀲𑁄𑀢𑀺 𑀲𑁄 𑀑𑀓𑁆𑀓𑀸𑀓𑁄 𑀭𑀸𑀚𑀸 𑀏𑀢𑁂𑀲𑀁 𑀧𑀼𑀩𑁆𑀩𑀧𑀼𑀭𑀺𑀲𑁄. 𑀦𑀢𑁆𑀣𑀺 𑀏𑀢𑁂𑀲𑀁 𑀕𑀳𑀧𑀢𑀺𑀯𑀁𑀲𑁂𑀦 𑀲𑀫𑁆𑀪𑁂𑀤𑀫𑀢𑁆𑀢𑀫𑁆𑀧𑀻𑀢𑀺.

𑀏𑀯𑀁 𑀲𑀓𑁆𑀬𑀯𑀁𑀲𑀁 𑀧𑀓𑀸𑀲𑁂𑀢𑁆𑀯𑀸 𑀇𑀤𑀸𑀦𑀺 𑀅𑀫𑁆𑀩𑀝𑁆𑀞𑀯𑀁𑀲𑀁 𑀧𑀓𑀸𑀲𑁂𑀦𑁆𑀢𑁄 𑁋 ‘‘𑀭𑀜𑁆𑀜𑁄 𑀔𑁄 𑀧𑀦𑀸’’𑀢𑀺𑀆𑀤𑀺𑀫𑀸𑀳. 𑀓𑀡𑁆𑀳𑀁 𑀦𑀸𑀫 𑀚𑀦𑁂𑀲𑀻𑀢𑀺 𑀓𑀸𑀴𑀯𑀡𑁆𑀡𑀁 𑀅𑀦𑁆𑀢𑁄𑀓𑀼𑀘𑁆𑀙𑀺𑀬𑀁𑀬𑁂𑀯 𑀲𑀜𑁆𑀚𑀸𑀢𑀤𑀦𑁆𑀢𑀁 𑀧𑀭𑀽𑀴𑁆𑀳𑀫𑀲𑁆𑀲𑀼𑀤𑀸𑀞𑀺𑀓𑀁 𑀧𑀼𑀢𑁆𑀢𑀁 𑀯𑀺𑀚𑀸𑀬𑀺. 𑀧𑀩𑁆𑀬𑀸𑀳𑀸𑀲𑀻𑀢𑀺 𑀬𑀓𑁆𑀔𑁄 𑀚𑀸𑀢𑁄𑀢𑀺 𑀪𑀬𑁂𑀦 𑀧𑀮𑀸𑀬𑀺𑀢𑁆𑀯𑀸 𑀤𑁆𑀯𑀸𑀭𑀁 𑀧𑀺𑀥𑀸𑀬 𑀞𑀺𑀢𑁂𑀲𑀼 𑀖𑀭𑀫𑀸𑀦𑀼𑀲𑀓𑁂𑀲𑀼 𑀇𑀢𑁄 𑀘𑀺𑀢𑁄 𑀘 𑀯𑀺𑀘𑀭𑀦𑁆𑀢𑁄 𑀥𑁄𑀯𑀣 𑀫𑀦𑁆𑀢𑀺𑀆𑀤𑀻𑀦𑀺 𑀯𑀤𑀦𑁆𑀢𑁄 𑀉𑀘𑁆𑀘𑀸𑀲𑀤𑁆𑀤𑀫𑀓𑀸𑀲𑀺.

𑁨𑁬𑁮. 𑀢𑁂 𑀫𑀸𑀡𑀯𑀓𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘𑀼𑀦𑁆𑀢𑀺 𑀅𑀢𑁆𑀢𑀦𑁄 𑀉𑀧𑀸𑀭𑀫𑁆𑀪𑀫𑁄𑀘𑀦𑀢𑁆𑀣𑀸𑀬 𑁋 ‘‘𑀏𑀢𑀁 𑀫𑀸 𑀪𑀯’’𑀦𑁆𑀢𑀺𑀆𑀤𑀺𑀯𑀘𑀦𑀁 𑀅𑀯𑁄𑀘𑀼𑀁. 𑀢𑁂𑀲𑀁 𑀓𑀺𑀭 𑀏𑀢𑀤𑀳𑁄𑀲𑀺 𑁋 ‘‘𑀅𑀫𑁆𑀩𑀝𑁆𑀞𑁄 𑀅𑀫𑁆𑀳𑀸𑀓𑀁 𑀆𑀘𑀭𑀺𑀬𑀲𑁆𑀲 𑀚𑁂𑀝𑁆𑀞𑀦𑁆𑀢𑁂𑀯𑀸𑀲𑀻, 𑀲𑀘𑁂 𑀫𑀬𑀁 𑀏𑀯𑀭𑀽𑀧𑁂 𑀞𑀸𑀦𑁂 𑀏𑀓𑀤𑁆𑀯𑁂𑀯𑀘𑀦𑀫𑀢𑁆𑀢𑀫𑁆𑀧𑀺 𑀦 𑀯𑀓𑁆𑀔𑀸𑀫, 𑀅𑀬𑀁 𑀦𑁄 𑀆𑀘𑀭𑀺𑀬𑀲𑁆𑀲 𑀲𑀦𑁆𑀢𑀺𑀓𑁂 𑀅𑀫𑁆𑀳𑁂 𑀧𑀭𑀺𑀪𑀺𑀦𑁆𑀤𑀺𑀲𑁆𑀲𑀢𑀻’’𑀢𑀺 𑀉𑀧𑀸𑀭𑀫𑁆𑀪𑀫𑁄𑀘𑀦𑀢𑁆𑀣𑀁 𑀏𑀯𑀁 𑀅𑀯𑁄𑀘𑀼𑀁. 𑀘𑀺𑀢𑁆𑀢𑁂𑀦 𑀧𑀦𑀲𑁆𑀲 𑀦𑀺𑀫𑁆𑀫𑀤𑀪𑀸𑀯𑀁 𑀆𑀓𑀗𑁆𑀔𑀦𑁆𑀢𑀺. 𑀅𑀬𑀁 𑀓𑀺𑀭 𑀫𑀸𑀦𑀦𑀺𑀲𑁆𑀲𑀺𑀢𑀢𑁆𑀢𑀸 𑀢𑁂𑀲𑀫𑁆𑀧𑀺 𑀅𑀧𑁆𑀧𑀺𑀬𑁄𑀯. 𑀓𑀮𑁆𑀬𑀸𑀡𑀯𑀸𑀓𑁆𑀓𑀭𑀡𑁄𑀢𑀺 𑀫𑀥𑀼𑀭𑀯𑀘𑀦𑁄. 𑀅𑀲𑁆𑀫𑀺𑀁 𑀯𑀘𑀦𑁂𑀢𑀺 𑀅𑀢𑁆𑀢𑀦𑀸 𑀉𑀕𑁆𑀕𑀳𑀺𑀢𑁂 𑀯𑁂𑀤𑀢𑁆𑀢𑀬𑀯𑀘𑀦𑁂. 𑀧𑀝𑀺𑀫𑀦𑁆𑀢𑁂𑀢𑀼𑀦𑁆𑀢𑀺 𑀧𑀼𑀘𑁆𑀙𑀺𑀢𑀁 𑀧𑀜𑁆𑀳𑀁 𑀧𑀝𑀺𑀓𑀣𑁂𑀢𑀼𑀁, 𑀯𑀺𑀲𑁆𑀲𑀚𑁆𑀚𑁂𑀢𑀼𑀦𑁆𑀢𑀺 𑀅𑀢𑁆𑀣𑁄. 𑀏𑀢𑀲𑁆𑀫𑀺𑀁 𑀯𑀸 𑀤𑀸𑀲𑀺𑀧𑀼𑀢𑁆𑀢𑀯𑀘𑀦𑁂. 𑀧𑀝𑀺𑀫𑀦𑁆𑀢𑁂𑀢𑀼𑀦𑁆𑀢𑀺 𑀉𑀢𑁆𑀢𑀭𑀁 𑀓𑀣𑁂𑀢𑀼𑀁.

𑁨𑁬𑁯. 𑀅𑀣 𑀔𑁄 𑀪𑀕𑀯𑀸𑀢𑀺 𑀅𑀣 𑀔𑁄 𑀪𑀕𑀯𑀸 𑁋 ‘‘𑀲𑀘𑁂 𑀇𑀫𑁂 𑀫𑀸𑀡𑀯𑀓𑀸 𑀏𑀢𑁆𑀣 𑀦𑀺𑀲𑀺𑀦𑁆𑀦𑀸 𑀏𑀯𑀁 𑀉𑀘𑁆𑀘𑀸𑀲𑀤𑁆𑀤𑀁 𑀓𑀭𑀺𑀲𑁆𑀲𑀦𑁆𑀢𑀺, 𑀅𑀬𑀁 𑀓𑀣𑀸 𑀧𑀭𑀺𑀬𑁄𑀲𑀸𑀦𑀁 𑀦 𑀕𑀫𑀺𑀲𑁆𑀲𑀢𑀺. 𑀳𑀦𑁆𑀤, 𑀦𑁂 𑀦𑀺𑀲𑁆𑀲𑀤𑁆𑀤𑁂 𑀓𑀢𑁆𑀯𑀸 𑀅𑀫𑁆𑀩𑀝𑁆𑀞𑁂𑀦𑁂𑀯 𑀲𑀤𑁆𑀥𑀺𑀁 𑀓𑀣𑁂𑀫𑀻’’𑀢𑀺 𑀢𑁂 𑀫𑀸𑀡𑀯𑀓𑁂 𑀏𑀢𑀤𑀯𑁄𑀘. 𑀢𑀢𑁆𑀣 𑀫𑀦𑁆𑀢𑀯𑁆𑀳𑁄𑀢𑀺 𑀫𑀦𑁆𑀢𑀬𑀣. 𑀫𑀬𑀸 𑀲𑀤𑁆𑀥𑀺𑀁 𑀧𑀝𑀺𑀫𑀦𑁆𑀢𑁂𑀢𑀽𑀢𑀺 𑀫𑀬𑀸 𑀲𑀳 𑀓𑀣𑁂𑀢𑀼. 𑀏𑀯𑀁 𑀯𑀼𑀢𑁆𑀢𑁂 𑀫𑀸𑀡𑀯𑀓𑀸 𑀘𑀺𑀦𑁆𑀢𑀬𑀺𑀁𑀲𑀼 𑁋 ‘‘𑀅𑀫𑁆𑀩𑀝𑁆𑀞𑁄 𑀢𑀸𑀯 𑀤𑀸𑀲𑀺𑀧𑀼𑀢𑁆𑀢𑁄𑀲𑀻𑀢𑀺 𑀯𑀼𑀢𑁆𑀢𑁂 𑀧𑀼𑀦 𑀲𑀻𑀲𑀁 𑀉𑀓𑁆𑀔𑀺𑀧𑀺𑀢𑀼𑀁 𑀦𑀸𑀲𑀓𑁆𑀔𑀺. 𑀅𑀬𑀁 𑀔𑁄 𑀚𑀸𑀢𑀺 𑀦𑀸𑀫 𑀤𑀼𑀚𑁆𑀚𑀸𑀦𑀸, 𑀲𑀘𑁂 𑀅𑀜𑁆𑀜𑀫𑁆𑀧𑀺 𑀓𑀺𑀜𑁆𑀘𑀺 𑀲𑀫𑀡𑁄 𑀕𑁄𑀢𑀫𑁄 ‘𑀢𑁆𑀯𑀁 𑀤𑀸𑀲𑁄’𑀢𑀺 𑀯𑀓𑁆𑀔𑀢𑀺, 𑀓𑁄 𑀢𑁂𑀦 𑀲𑀤𑁆𑀥𑀺𑀁 𑀅𑀟𑁆𑀟𑀁 𑀓𑀭𑀺𑀲𑁆𑀲𑀢𑀺. 𑀅𑀫𑁆𑀩𑀝𑁆𑀞𑁄 𑀅𑀢𑁆𑀢𑀦𑀸 𑀩𑀤𑁆𑀥𑀁 𑀧𑀼𑀝𑀓𑀁 𑀅𑀢𑁆𑀢𑀦𑀸𑀯 𑀫𑁄𑀘𑁂𑀢𑀽’’𑀢𑀺 𑀅𑀢𑁆𑀢𑀸𑀦𑀁 𑀧𑀭𑀺𑀫𑁄𑀘𑁂𑀢𑁆𑀯𑀸 𑀢𑀲𑁆𑀲𑁂𑀯 𑀉𑀧𑀭𑀺 𑀔𑀺𑀧𑀦𑁆𑀢𑀸 𑁋 ‘‘𑀲𑀼𑀚𑀸𑀢𑁄 𑀘 𑀪𑁄 𑀕𑁄𑀢𑀫𑀸’’𑀢𑀺𑀆𑀤𑀺𑀫𑀸𑀳𑀁𑀲𑀼.

𑁨𑁭𑁦. 𑀲𑀳𑀥𑀫𑁆𑀫𑀺𑀓𑁄𑀢𑀺 𑀲𑀳𑁂𑀢𑀼𑀓𑁄 𑀲𑀓𑀸𑀭𑀡𑁄. 𑀅𑀓𑀸𑀫𑀸 𑀩𑁆𑀬𑀸𑀓𑀸𑀢𑀩𑁆𑀩𑁄𑀢𑀺 𑀅𑀢𑁆𑀢𑀦𑀸 𑀅𑀦𑀺𑀘𑁆𑀙𑀦𑁆𑀢𑁂𑀦𑀧𑀺 𑀩𑁆𑀬𑀸𑀓𑀭𑀺𑀢𑀩𑁆𑀩𑁄, 𑀅𑀯𑀲𑁆𑀲𑀁 𑀯𑀺𑀲𑁆𑀲𑀚𑁆𑀚𑁂𑀢𑀩𑁆𑀩𑁄𑀢𑀺 𑀅𑀢𑁆𑀣𑁄. 𑀅𑀜𑁆𑀜𑁂𑀦 𑀯𑀸 𑀅𑀜𑁆𑀜𑀁 𑀧𑀝𑀺𑀘𑀭𑀺𑀲𑁆𑀲𑀲𑀻𑀢𑀺 𑀅𑀜𑁆𑀜𑁂𑀦 𑀯𑀘𑀦𑁂𑀦 𑀅𑀜𑁆𑀜𑀁 𑀯𑀘𑀦𑀁 𑀧𑀝𑀺𑀘𑀭𑀺𑀲𑁆𑀲𑀲𑀺 𑀅𑀚𑁆𑀛𑁄𑀢𑁆𑀣𑀭𑀺𑀲𑁆𑀲𑀲𑀺, 𑀧𑀝𑀺𑀘𑁆𑀙𑀸𑀤𑁂𑀲𑁆𑀲𑀲𑀻𑀢𑀺 𑀅𑀢𑁆𑀣𑁄. 𑀬𑁄 𑀳𑀺 ‘‘𑀓𑀺𑀁 𑀕𑁄𑀢𑁆𑀢𑁄 𑀢𑁆𑀯’’𑀦𑁆𑀢𑀺 𑀏𑀯𑀁 𑀧𑀼𑀝𑁆𑀞𑁄 𑁋 ‘‘𑀅𑀳𑀁 𑀢𑀬𑁄 𑀯𑁂𑀤𑁂 𑀚𑀸𑀦𑀸𑀫𑀻’’𑀢𑀺𑀆𑀤𑀻𑀦𑀺 𑀯𑀤𑀢𑀺, 𑀅𑀬𑀁 𑀅𑀜𑁆𑀜𑁂𑀦 𑀅𑀜𑁆𑀜𑀁 𑀧𑀝𑀺𑀘𑀭𑀢𑀺 𑀦𑀸𑀫. 𑀧𑀓𑁆𑀓𑀫𑀺𑀲𑁆𑀲𑀲𑀺 𑀯𑀸𑀢𑀺 𑀧𑀼𑀘𑁆𑀙𑀺𑀢𑀁 𑀧𑀜𑁆𑀳𑀁 𑀚𑀸𑀦𑀦𑁆𑀢𑁄𑀯 𑀅𑀓𑀣𑁂𑀢𑀼𑀓𑀸𑀫𑀢𑀸𑀬 𑀉𑀝𑁆𑀞𑀸𑀬𑀸𑀲𑀦𑀸 𑀧𑀓𑁆𑀓𑀫𑀺𑀲𑁆𑀲𑀲𑀺 𑀯𑀸.

𑀢𑀼𑀡𑁆𑀳𑀻 𑀅𑀳𑁄𑀲𑀻𑀢𑀺 𑀲𑀫𑀡𑁄 𑀕𑁄𑀢𑀫𑁄 𑀫𑀁 𑀲𑀸𑀫𑀁𑀬𑁂𑀯 𑀤𑀸𑀲𑀺𑀧𑀼𑀢𑁆𑀢𑀪𑀸𑀯𑀁 𑀓𑀣𑀸𑀧𑁂𑀢𑀼𑀓𑀸𑀫𑁄, 𑀲𑀸𑀫𑀁 𑀓𑀣𑀺𑀢𑁂 𑀘 𑀤𑀸𑀲𑁄 𑀦𑀸𑀫 𑀚𑀸𑀢𑁄𑀬𑁂𑀯 𑀳𑁄𑀢𑀺. 𑀅𑀬𑀁 𑀧𑀦 𑀤𑁆𑀯𑀢𑀺𑀓𑁆𑀔𑀢𑁆𑀢𑀼𑀁 𑀘𑁄𑀤𑁂𑀢𑁆𑀯𑀸 𑀢𑀼𑀡𑁆𑀳𑀻 𑀪𑀯𑀺𑀲𑁆𑀲𑀢𑀺, 𑀢𑀢𑁄 𑀅𑀳𑀁 𑀧𑀭𑀺𑀯𑀢𑁆𑀢𑀺𑀢𑁆𑀯𑀸 𑀧𑀓𑁆𑀓𑀫𑀺𑀲𑁆𑀲𑀸𑀫𑀻𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀢𑀼𑀡𑁆𑀳𑀻 𑀅𑀳𑁄𑀲𑀺.

𑁨𑁭𑁧. 𑀯𑀚𑀺𑀭𑀁 𑀧𑀸𑀡𑀺𑀫𑁆𑀳𑀺 𑀅𑀲𑁆𑀲𑀸𑀢𑀺 𑀯𑀚𑀺𑀭𑀧𑀸𑀡𑀺. 𑀬𑀓𑁆𑀔𑁄𑀢𑀺 𑀦 𑀬𑁄 𑀯𑀸 𑀲𑁄 𑀯𑀸 𑀬𑀓𑁆𑀔𑁄, 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀆𑀤𑀺𑀢𑁆𑀢𑀦𑁆𑀢𑀺 𑀅𑀕𑁆𑀕𑀺𑀯𑀡𑁆𑀡𑀁. 𑀲𑀫𑁆𑀧𑀚𑁆𑀚𑀮𑀺𑀢𑀦𑁆𑀢𑀺 𑀲𑀼𑀝𑁆𑀞𑀼 𑀧𑀚𑁆𑀚𑀮𑀺𑀢𑀁. 𑀲𑀚𑁄𑀢𑀺𑀪𑀽𑀢𑀦𑁆𑀢𑀺 𑀲𑀫𑀦𑁆𑀢𑀢𑁄 𑀚𑁄𑀢𑀺𑀪𑀽𑀢𑀁, 𑀏𑀓𑀕𑁆𑀕𑀺𑀚𑀸𑀮𑀪𑀽𑀢𑀦𑁆𑀢𑀺 𑀅𑀢𑁆𑀣𑁄. 𑀞𑀺𑀢𑁄 𑀳𑁄𑀢𑀻𑀢𑀺 𑀫𑀳𑀦𑁆𑀢𑀁 𑀲𑀻𑀲𑀁, 𑀓𑀦𑁆𑀤𑀮𑀫𑀓𑀼𑀴𑀲𑀤𑀺𑀲𑀸 𑀤𑀸𑀞𑀸 𑀪𑀬𑀸𑀦𑀓𑀸𑀦𑀺 𑀅𑀓𑁆𑀔𑀺𑀦𑀸𑀲𑀸𑀤𑀻𑀦𑀺 𑀏𑀯𑀁 𑀯𑀺𑀭𑀽𑀧𑀭𑀽𑀧𑀁 𑀫𑀸𑀧𑁂𑀢𑁆𑀯𑀸 𑀞𑀺𑀢𑁄.

𑀓𑀲𑁆𑀫𑀸 𑀧𑀦𑁂𑀲 𑀆𑀕𑀢𑁄𑀢𑀺? 𑀤𑀺𑀝𑁆𑀞𑀺𑀯𑀺𑀲𑁆𑀲𑀚𑁆𑀚𑀸𑀧𑀦𑀢𑁆𑀣𑀁. 𑀅𑀧𑀺 𑀘 𑁋 ‘‘𑀅𑀳𑀜𑁆𑀘𑁂𑀯 𑀔𑁄 𑀧𑀦 𑀥𑀫𑁆𑀫𑀁 𑀤𑁂𑀲𑁂𑀬𑁆𑀬𑀁, 𑀧𑀭𑁂 𑀘 𑀫𑁂 𑀦 𑀆𑀚𑀸𑀦𑁂𑀬𑁆𑀬𑀼’’𑀦𑁆𑀢𑀺 𑀏𑀯𑀁 𑀥𑀫𑁆𑀫𑀤𑁂𑀲𑀦𑀸𑀬 𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑀪𑀸𑀯𑀁 𑀆𑀧𑀦𑁆𑀦𑁂 𑀪𑀕𑀯𑀢𑀺 𑀲𑀓𑁆𑀓𑁄 𑀫𑀳𑀸𑀩𑁆𑀭𑀳𑁆𑀫𑀼𑀦𑀸 𑀲𑀤𑁆𑀥𑀺𑀁 𑀆𑀕𑀦𑁆𑀢𑁆𑀯𑀸 𑁋 ‘‘𑀪𑀕𑀯𑀸 𑀥𑀫𑁆𑀫𑀁 𑀤𑁂𑀲𑁂𑀣, 𑀢𑀼𑀫𑁆𑀳𑀸𑀓𑀁 𑀆𑀡𑀸𑀬 𑀅𑀯𑀢𑁆𑀢𑀫𑀸𑀦𑁂 𑀫𑀬𑀁 𑀯𑀢𑁆𑀢𑀸𑀧𑁂𑀲𑁆𑀲𑀸𑀫, 𑀢𑀼𑀫𑁆𑀳𑀸𑀓𑀁 𑀥𑀫𑁆𑀫𑀘𑀓𑁆𑀓𑀁 𑀳𑁄𑀢𑀼, 𑀅𑀫𑁆𑀳𑀸𑀓𑀁 𑀆𑀡𑀸𑀘𑀓𑁆𑀓’’𑀦𑁆𑀢𑀺 𑀧𑀝𑀺𑀜𑁆𑀜𑀁 𑀅𑀓𑀸𑀲𑀺. 𑀢𑀲𑁆𑀫𑀸 𑁋 ‘‘𑀅𑀚𑁆𑀚 𑀅𑀫𑁆𑀩𑀝𑁆𑀞𑀁 𑀢𑀸𑀲𑁂𑀢𑁆𑀯𑀸 𑀧𑀜𑁆𑀳𑀁 𑀯𑀺𑀲𑁆𑀲𑀚𑁆𑀚𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀆𑀕𑀢𑁄.

𑀪𑀕𑀯𑀸 𑀘𑁂𑀯 𑀧𑀲𑁆𑀲𑀢𑀺 𑀅𑀫𑁆𑀩𑀝𑁆𑀞𑁄 𑀘𑀸𑀢𑀺 𑀬𑀤𑀺 𑀳𑀺 𑀢𑀁 𑀅𑀜𑁆𑀜𑁂𑀧𑀺 𑀧𑀲𑁆𑀲𑁂𑀬𑁆𑀬𑀼𑀁, 𑀢𑀁 𑀓𑀸𑀭𑀡𑀁 𑀅𑀕𑀭𑀼 𑀅𑀲𑁆𑀲, ‘‘𑀅𑀬𑀁 𑀲𑀫𑀡𑁄 𑀕𑁄𑀢𑀫𑁄 𑀅𑀫𑁆𑀩𑀝𑁆𑀞𑀁 𑀅𑀢𑁆𑀢𑀦𑁄 𑀯𑀸𑀤𑁂 𑀅𑀦𑁄𑀢𑀭𑀦𑁆𑀢𑀁 𑀜𑀢𑁆𑀯𑀸 𑀬𑀓𑁆𑀔𑀁 𑀆𑀯𑀸𑀳𑁂𑀢𑁆𑀯𑀸 𑀤𑀲𑁆𑀲𑁂𑀲𑀺, 𑀢𑀢𑁄 𑀅𑀫𑁆𑀩𑀝𑁆𑀞𑁄 𑀪𑀬𑁂𑀦 𑀓𑀣𑁂𑀲𑀻’’𑀢𑀺 𑀯𑀤𑁂𑀬𑁆𑀬𑀼𑀁. 𑀢𑀲𑁆𑀫𑀸 𑀪𑀕𑀯𑀸 𑀘𑁂𑀯 𑀧𑀲𑁆𑀲𑀢𑀺 𑀅𑀫𑁆𑀩𑀝𑁆𑀞𑁄 𑀘. 𑀢𑀲𑁆𑀲 𑀢𑀁 𑀤𑀺𑀲𑁆𑀯𑀸𑀯 𑀲𑀓𑀮𑀲𑀭𑀻𑀭𑀢𑁄 𑀲𑁂𑀤𑀸 𑀫𑀼𑀘𑁆𑀘𑀺𑀁𑀲𑀼. 𑀅𑀦𑁆𑀢𑁄𑀓𑀼𑀘𑁆𑀙𑀺 𑀯𑀺𑀧𑀭𑀺𑀯𑀢𑁆𑀢𑀫𑀸𑀦𑀸 𑀫𑀳𑀸𑀭𑀯𑀁 𑀯𑀺𑀭𑀯𑀺. 𑀲𑁄 ‘‘𑀅𑀜𑁆𑀜𑁂𑀧𑀺 𑀦𑀼 𑀔𑁄 𑀧𑀲𑁆𑀲𑀦𑁆𑀢𑀻’’𑀢𑀺 𑀑𑀮𑁄𑀓𑁂𑀦𑁆𑀢𑁄 𑀓𑀲𑁆𑀲𑀘𑀺 𑀮𑁄𑀫𑀳𑀁𑀲𑀫𑀢𑁆𑀢𑀫𑁆𑀧𑀺 𑀦𑀸𑀤𑁆𑀤𑀲. 𑀢𑀢𑁄 𑁋 ‘‘𑀇𑀤𑀁 𑀪𑀬𑀁 𑀫𑀫𑁂𑀯 𑀉𑀧𑁆𑀧𑀦𑁆𑀦𑀁, 𑀲𑀘𑀸𑀳𑀁 𑀬𑀓𑁆𑀔𑁄𑀢𑀺 𑀯𑀓𑁆𑀔𑀸𑀫𑀺, ‘𑀓𑀺𑀁 𑀢𑀯𑀫𑁂𑀯 𑀅𑀓𑁆𑀔𑀻𑀦𑀺 𑀅𑀢𑁆𑀣𑀺, 𑀢𑁆𑀯𑀫𑁂𑀯 𑀬𑀓𑁆𑀔𑀁 𑀧𑀲𑁆𑀲𑀲𑀺, 𑀧𑀞𑀫𑀁 𑀬𑀓𑁆𑀔𑀁 𑀅𑀤𑀺𑀲𑁆𑀯𑀸 𑀲𑀫𑀡𑁂𑀦 𑀕𑁄𑀢𑀫𑁂𑀦 𑀯𑀸𑀤𑀲𑀗𑁆𑀖𑀝𑁆𑀝𑁂 𑀧𑀓𑁆𑀔𑀺𑀢𑁆𑀢𑁄𑀯 𑀬𑀓𑁆𑀔𑀁 𑀧𑀲𑁆𑀲𑀲𑀻’𑀢𑀺 𑀯𑀤𑁂𑀬𑁆𑀬𑀼’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀦 𑀤𑀸𑀦𑀺 𑀫𑁂 𑀇𑀥 𑀅𑀜𑁆𑀜𑀁 𑀧𑀝𑀺𑀲𑀭𑀡𑀁 𑀅𑀢𑁆𑀣𑀺, 𑀅𑀜𑁆𑀜𑀢𑁆𑀭 𑀲𑀫𑀡𑀸 𑀕𑁄𑀢𑀫𑀸’’𑀢𑀺 𑀫𑀜𑁆𑀜𑀫𑀸𑀦𑁄 𑀅𑀣 𑀔𑁄 𑀅𑀫𑁆𑀩𑀝𑁆𑀞𑁄 𑀫𑀸𑀡𑀯𑁄…𑀧𑁂… 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘.

𑁨𑁭𑁨. 𑀢𑀸𑀡𑀁 𑀕𑀯𑁂𑀲𑀻𑀢𑀺 𑀢𑀸𑀡𑀁 𑀕𑀯𑁂𑀲𑀫𑀸𑀦𑁄. 𑀮𑁂𑀡𑀁 𑀕𑀯𑁂𑀲𑀻𑀢𑀺 𑀮𑁂𑀡𑀁 𑀕𑀯𑁂𑀲𑀫𑀸𑀦𑁄. 𑀲𑀭𑀡𑀁 𑀕𑀯𑁂𑀲𑀻𑀢𑀺 𑀲𑀭𑀡𑀁 𑀕𑀯𑁂𑀲𑀫𑀸𑀦𑁄. 𑀏𑀢𑁆𑀣 𑀘 𑀢𑀸𑀬𑀢𑀺 𑀭𑀓𑁆𑀔𑀢𑀻𑀢𑀺 𑀢𑀸𑀡𑀁. 𑀦𑀺𑀮𑀻𑀬𑀦𑁆𑀢𑀺 𑀏𑀢𑁆𑀣𑀸𑀢𑀺 𑀮𑁂𑀡𑀁. 𑀲𑀭𑀢𑀻𑀢𑀺 𑀲𑀭𑀡𑀁, 𑀪𑀬𑀁 𑀳𑀺𑀁𑀲𑀢𑀺, 𑀯𑀺𑀤𑁆𑀥𑀁𑀲𑁂𑀢𑀻𑀢𑀺 𑀅𑀢𑁆𑀣𑁄. 𑀉𑀧𑀦𑀺𑀲𑀻𑀤𑀺𑀢𑁆𑀯𑀸𑀢𑀺 𑀉𑀧𑀕𑀫𑁆𑀫 𑀳𑁂𑀝𑁆𑀞𑀸𑀲𑀦𑁂 𑀦𑀺𑀲𑀻𑀤𑀺𑀢𑁆𑀯𑀸. 𑀩𑁆𑀭𑀯𑀺𑀢𑀽𑀢𑀺 𑀯𑀤𑀢𑀼.

𑀅𑀫𑁆𑀩𑀝𑁆𑀞𑀯𑀁𑀲𑀓𑀣𑀸

𑁨𑁭𑁩-𑁨𑁭𑁪. 𑀤𑀓𑁆𑀔𑀺𑀡𑀚𑀦𑀧𑀤𑀦𑁆𑀢𑀺 𑀤𑀓𑁆𑀔𑀺𑀡𑀸𑀧𑀣𑁄𑀢𑀺 𑀧𑀸𑀓𑀝𑀁. 𑀕𑀗𑁆𑀕𑀸𑀬 𑀤𑀓𑁆𑀔𑀺𑀡𑀢𑁄 𑀧𑀸𑀓𑀝𑀚𑀦𑀧𑀤𑀁. 𑀢𑀤𑀸 𑀓𑀺𑀭 𑀤𑀓𑁆𑀔𑀺𑀡𑀸𑀧𑀣𑁂 𑀩𑀳𑀽 𑀩𑁆𑀭𑀸𑀳𑁆𑀫𑀡𑀢𑀸𑀧𑀲𑀸 𑀳𑁄𑀦𑁆𑀢𑀺, 𑀲𑁄 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀏𑀓𑀁 𑀢𑀸𑀧𑀲𑀁 𑀯𑀢𑁆𑀢𑀧𑀝𑀺𑀧𑀢𑁆𑀢𑀺𑀬𑀸 𑀆𑀭𑀸𑀥𑁂𑀲𑀺. 𑀲𑁄 𑀢𑀲𑁆𑀲 𑀉𑀧𑀓𑀸𑀭𑀁 𑀤𑀺𑀲𑁆𑀯𑀸 𑀆𑀳 𑁋 ‘‘𑀅𑀫𑁆𑀪𑁄, 𑀧𑀼𑀭𑀺𑀲, 𑀫𑀦𑁆𑀢𑀁 𑀢𑁂 𑀤𑁂𑀫𑀺, 𑀬𑀁 𑀇𑀘𑁆𑀙𑀲𑀺, 𑀢𑀁 𑀫𑀦𑁆𑀢𑀁 𑀕𑀡𑁆𑀳𑀸𑀳𑀻’’𑀢𑀺. 𑀲𑁄 𑀆𑀳 𑁋 ‘‘𑀦 𑀫𑁂 𑀆𑀘𑀭𑀺𑀬, 𑀅𑀜𑁆𑀜𑁂𑀦 𑀫𑀦𑁆𑀢𑁂𑀦, 𑀓𑀺𑀘𑁆𑀘𑀁 𑀅𑀢𑁆𑀣𑀺, 𑀬𑀲𑁆𑀲𑀸𑀦𑀼𑀪𑀸𑀯𑁂𑀦 𑀆𑀯𑀼𑀥𑀁 𑀦 𑀧𑀭𑀺𑀯𑀢𑁆𑀢𑀢𑀺, 𑀢𑀁 𑀫𑁂 𑀫𑀦𑁆𑀢𑀁 𑀤𑁂𑀳𑀻’’𑀢𑀺. 𑀲𑁄 𑁋 ‘‘𑀪𑀤𑁆𑀭𑀁, 𑀪𑁄’’𑀢𑀺 𑀢𑀲𑁆𑀲 𑀥𑀦𑀼𑀅𑀕𑀫𑀦𑀻𑀬𑀁 𑀅𑀫𑁆𑀩𑀝𑁆𑀞𑀁 𑀦𑀸𑀫 𑀯𑀺𑀚𑁆𑀚𑀁 𑀅𑀤𑀸𑀲𑀺, 𑀲𑁄 𑀢𑀁 𑀯𑀺𑀚𑁆𑀚𑀁 𑀕𑀳𑁂𑀢𑁆𑀯𑀸 𑀢𑀢𑁆𑀣𑁂𑀯 𑀯𑀻𑀫𑀁𑀲𑀺𑀢𑁆𑀯𑀸 𑁋 ‘‘𑀇𑀤𑀸𑀦𑀺 𑀫𑁂 𑀫𑀦𑁄𑀭𑀣𑀁 𑀧𑀽𑀭𑁂𑀲𑁆𑀲𑀸𑀫𑀻’’𑀢𑀺 𑀇𑀲𑀺𑀯𑁂𑀲𑀁 𑀕𑀳𑁂𑀢𑁆𑀯𑀸 𑀑𑀓𑁆𑀓𑀸𑀓𑀲𑁆𑀲 𑀲𑀦𑁆𑀢𑀺𑀓𑀁 𑀕𑀢𑁄. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀤𑀓𑁆𑀔𑀺𑀡𑀚𑀦𑀧𑀤𑀁 𑀕𑀦𑁆𑀢𑁆𑀯𑀸 𑀩𑁆𑀭𑀳𑁆𑀫𑀫𑀦𑁆𑀢𑁂 𑀅𑀥𑀻𑀬𑀺𑀢𑁆𑀯𑀸 𑀭𑀸𑀚𑀸𑀦𑀁 𑀑𑀓𑁆𑀓𑀸𑀓𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸’’𑀢𑀺.

𑀏𑀢𑁆𑀣 𑀩𑁆𑀭𑀳𑁆𑀫𑀫𑀦𑁆𑀢𑁂𑀢𑀺 𑀆𑀦𑀼𑀪𑀸𑀯𑀲𑀫𑁆𑀧𑀦𑁆𑀦𑀢𑀸𑀬 𑀲𑁂𑀝𑁆𑀞𑀫𑀦𑁆𑀢𑁂. 𑀓𑁄 𑀦𑁂𑀯𑀁’𑀭𑁂 𑀅𑀬𑀁 𑀫𑀬𑁆𑀳𑀁 𑀤𑀸𑀲𑀺𑀧𑀼𑀢𑁆𑀢𑁄𑀢𑀺 𑀓𑁄 𑀦𑀼 𑀏𑀯𑀁 𑀅𑀭𑁂 𑀅𑀬𑀁 𑀫𑀫 𑀤𑀸𑀲𑀺𑀧𑀼𑀢𑁆𑀢𑁄. 𑀲𑁄 𑀢𑀁 𑀔𑀼𑀭𑀧𑁆𑀧𑀦𑁆𑀢𑀺 𑀲𑁄 𑀭𑀸𑀚𑀸 𑀢𑀁 𑀫𑀸𑀭𑁂𑀢𑀼𑀓𑀸𑀫𑀢𑀸𑀬 𑀲𑀦𑁆𑀦𑀳𑀺𑀢𑀁 𑀲𑀭𑀁 𑀢𑀲𑁆𑀲 𑀫𑀦𑁆𑀢𑀸𑀦𑀼𑀪𑀸𑀯𑁂𑀦 𑀦𑁂𑀯 𑀔𑀺𑀧𑀺𑀢𑀼𑀁 𑀦 𑀅𑀧𑀦𑁂𑀢𑀼𑀁 𑀲𑀓𑁆𑀔𑀺, 𑀢𑀸𑀯𑀤𑁂𑀯 𑀲𑀓𑀮𑀲𑀭𑀻𑀭𑁂 𑀲𑀜𑁆𑀚𑀸𑀢𑀲𑁂𑀤𑁄 𑀪𑀬𑁂𑀦 𑀯𑁂𑀥𑀫𑀸𑀦𑁄 𑀅𑀝𑁆𑀞𑀸𑀲𑀺.

𑀅𑀫𑀘𑁆𑀘𑀸𑀢𑀺 𑀫𑀳𑀸𑀫𑀘𑁆𑀘𑀸. 𑀧𑀸𑀭𑀺𑀲𑀚𑁆𑀚𑀸𑀢𑀺 𑀇𑀢𑀭𑁂 𑀧𑀭𑀺𑀲𑀸𑀯𑀘𑀭𑀸. 𑀏𑀢𑀤𑀯𑁄𑀘𑀼𑀦𑁆𑀢𑀺 𑁋 ‘‘𑀤𑀡𑁆𑀟𑀓𑀻𑀭𑀜𑁆𑀜𑁄 𑀓𑀺𑀲𑀯𑀘𑁆𑀙𑀢𑀸𑀧𑀲𑁂 𑀅𑀧𑀭𑀤𑁆𑀥𑀲𑁆𑀲 𑀆𑀯𑀼𑀥𑀯𑀼𑀝𑁆𑀞𑀺𑀬𑀸 𑀲𑀓𑀮𑀭𑀝𑁆𑀞𑀁 𑀯𑀺𑀦𑀝𑁆𑀞𑀁. 𑀦𑀸𑀴𑀺𑀓𑁂𑀭𑁄 𑀧𑀜𑁆𑀘𑀲𑀼 𑀢𑀸𑀧𑀲𑀲𑀢𑁂𑀲𑀼 𑀅𑀚𑁆𑀚𑀼𑀦𑁄 𑀘 𑀅𑀗𑁆𑀕𑀻𑀭𑀲𑁂 𑀅𑀧𑀭𑀤𑁆𑀥𑁄 𑀧𑀣𑀯𑀺𑀁 𑀪𑀺𑀦𑁆𑀤𑀺𑀢𑁆𑀯𑀸 𑀦𑀺𑀭𑀬𑀁 𑀧𑀯𑀺𑀝𑁆𑀞𑁄’’𑀢𑀺 𑀘𑀺𑀦𑁆𑀢𑀬𑀦𑁆𑀢𑀸 𑀪𑀬𑁂𑀦 𑀏𑀢𑀁 𑀲𑁄𑀢𑁆𑀣𑀺, 𑀪𑀤𑁆𑀤𑀦𑁆𑀢𑁂𑀢𑀺𑀆𑀤𑀺𑀯𑀘𑀦𑀁 𑀅𑀯𑁄𑀘𑀼𑀁.

𑀲𑁄𑀢𑁆𑀣𑀺 𑀪𑀯𑀺𑀲𑁆𑀲𑀢𑀺 𑀭𑀜𑁆𑀜𑁄𑀢𑀺 𑀇𑀤𑀁 𑀯𑀘𑀦𑀁 𑀓𑀡𑁆𑀳𑁄 𑀘𑀺𑀭𑀁 𑀢𑀼𑀡𑁆𑀳𑀻 𑀳𑀼𑀢𑁆𑀯𑀸 𑀢𑀢𑁄 𑀅𑀦𑁂𑀓𑀧𑁆𑀧𑀓𑀸𑀭𑀁 𑀬𑀸𑀘𑀻𑀬𑀫𑀸𑀦𑁄 𑁋 ‘‘𑀢𑀼𑀫𑁆𑀳𑀸𑀓𑀁 𑀭𑀜𑁆𑀜𑀸 𑀫𑀸𑀤𑀺𑀲𑀲𑁆𑀲 𑀇𑀲𑀺𑀦𑁄 𑀔𑀼𑀭𑀧𑁆𑀧𑀁 𑀲𑀦𑁆𑀦𑀬𑁆𑀳𑀦𑁆𑀢𑁂𑀦 𑀪𑀸𑀭𑀺𑀬𑀁 𑀓𑀫𑁆𑀫𑀁 𑀓𑀢’’𑀦𑁆𑀢𑀺𑀆𑀤𑀻𑀦𑀺 𑀘 𑀯𑀢𑁆𑀯𑀸 𑀧𑀘𑁆𑀙𑀸 𑀅𑀪𑀸𑀲𑀺. 𑀉𑀦𑁆𑀤𑁆𑀭𑀺𑀬𑀺𑀲𑁆𑀲𑀢𑀻𑀢𑀺 𑀪𑀺𑀚𑁆𑀚𑀺𑀲𑁆𑀲𑀢𑀺, 𑀣𑀼𑀲𑀫𑀼𑀝𑁆𑀞𑀺 𑀯𑀺𑀬 𑀯𑀺𑀧𑁆𑀧𑀓𑀺𑀭𑀺𑀬𑀺𑀲𑁆𑀲𑀢𑀻𑀢𑀺. 𑀇𑀤𑀁 𑀲𑁄 ‘‘𑀚𑀦𑀁 𑀢𑀸𑀲𑁂𑀲𑁆𑀲𑀸𑀫𑀻’’𑀢𑀺 𑀫𑀼𑀲𑀸 𑀪𑀡𑀢𑀺. 𑀲𑀭𑀲𑀦𑁆𑀣𑀫𑁆𑀪𑀦𑀫𑀢𑁆𑀢𑁂𑀬𑁂𑀯 𑀳𑀺𑀲𑁆𑀲 𑀯𑀺𑀚𑁆𑀚𑀸𑀬 𑀆𑀦𑀼𑀪𑀸𑀯𑁄, 𑀦 𑀅𑀜𑁆𑀜𑀢𑁆𑀭. 𑀇𑀢𑁄 𑀧𑀭𑁂𑀲𑀼𑀧𑀺 𑀯𑀘𑀦𑁂𑀲𑀼 𑀏𑀲𑁂𑀯 𑀦𑀬𑁄.

𑀧𑀮𑁆𑀮𑁄𑀫𑁄𑀢𑀺 𑀧𑀦𑁆𑀦𑀮𑁄𑀫𑁄. 𑀮𑁄𑀫𑀳𑀁𑀲𑀦𑀫𑀢𑁆𑀢𑀫𑁆𑀧𑀺𑀲𑁆𑀲 𑀦 𑀪𑀯𑀺𑀲𑁆𑀲𑀢𑀺. 𑀇𑀤𑀁 𑀓𑀺𑀭 𑀲𑁄 ‘‘𑀲𑀘𑁂 𑀫𑁂 𑀭𑀸𑀚𑀸 𑀢𑀁 𑀤𑀸𑀭𑀺𑀓𑀁 𑀤𑀲𑁆𑀲𑀢𑀻’’𑀢𑀺 𑀧𑀝𑀺𑀜𑁆𑀜𑀁 𑀓𑀸𑀭𑁂𑀢𑁆𑀯𑀸 𑀅𑀯𑀘. 𑀓𑀼𑀫𑀸𑀭𑁂 𑀔𑀼𑀭𑀧𑁆𑀧𑀁 𑀧𑀢𑀺𑀝𑁆𑀞𑀧𑁂𑀲𑀻𑀢𑀺 𑀢𑁂𑀦 ‘‘𑀲𑀭𑁄 𑀑𑀢𑀭𑀢𑀽’’𑀢𑀺 𑀫𑀦𑁆𑀢𑁂 𑀧𑀭𑀺𑀯𑀢𑁆𑀢𑀺, 𑀢𑁂 𑀓𑀼𑀫𑀸𑀭𑀲𑁆𑀲 𑀦𑀸𑀪𑀺𑀬𑀁 𑀧𑀢𑀺𑀝𑁆𑀞𑀧𑁂𑀲𑀺. 𑀥𑀻𑀢𑀭𑀁 𑀅𑀤𑀸𑀲𑀻𑀢𑀺 𑀲𑀻𑀲𑀁 𑀥𑁄𑀯𑀺𑀢𑁆𑀯𑀸 𑀅𑀤𑀸𑀲𑀁 𑀪𑀼𑀚𑀺𑀲𑁆𑀲𑀁 𑀓𑀢𑁆𑀯𑀸 𑀥𑀻𑀢𑀭𑀁 𑀅𑀤𑀸𑀲𑀺, 𑀉𑀴𑀸𑀭𑁂 𑀘 𑀢𑀁 𑀞𑀸𑀦𑁂 𑀞𑀧𑁂𑀲𑀺. 𑀫𑀸 𑀔𑁄 𑀢𑀼𑀫𑁆𑀳𑁂 𑀫𑀸𑀡𑀯𑀓𑀸𑀢𑀺 𑀇𑀤𑀁 𑀧𑀦 𑀪𑀕𑀯𑀸 𑁋 ‘‘𑀏𑀓𑁂𑀦 𑀧𑀓𑁆𑀔𑁂𑀦 𑀅𑀫𑁆𑀩𑀝𑁆𑀞𑁄 𑀲𑀓𑁆𑀬𑀸𑀦𑀁 𑀜𑀸𑀢𑀺 𑀳𑁄𑀢𑀻’’𑀢𑀺 𑀧𑀓𑀸𑀲𑁂𑀦𑁆𑀢𑁄 𑀢𑀲𑁆𑀲 𑀲𑀫𑀲𑁆𑀲𑀸𑀲𑀦𑀢𑁆𑀣𑀁 𑀆𑀳. 𑀢𑀢𑁄 𑀅𑀫𑁆𑀩𑀝𑁆𑀞𑁄 𑀖𑀝𑀲𑀢𑁂𑀦 𑀅𑀪𑀺𑀲𑀺𑀢𑁆𑀢𑁄 𑀯𑀺𑀬 𑀧𑀲𑁆𑀲𑀤𑁆𑀥𑀤𑀭𑀣𑁄 𑀳𑀼𑀢𑁆𑀯𑀸 𑀲𑀫𑀲𑁆𑀲𑀸𑀲𑁂𑀢𑁆𑀯𑀸 𑀲𑀫𑀡𑁄 𑀕𑁄𑀢𑀫𑁄 𑀫𑀁 ‘‘𑀢𑁄𑀲𑁂𑀲𑁆𑀲𑀸𑀫𑀻’’𑀢𑀺 𑀏𑀓𑁂𑀦 𑀧𑀓𑁆𑀔𑁂𑀦 𑀜𑀸𑀢𑀺𑀁 𑀓𑀭𑁄𑀢𑀺, 𑀔𑀢𑁆𑀢𑀺𑀬𑁄 𑀓𑀺𑀭𑀸𑀳𑀫𑀲𑁆𑀫𑀻’’𑀢𑀺 𑀘𑀺𑀦𑁆𑀢𑁂𑀲𑀺.

𑀔𑀢𑁆𑀢𑀺𑀬𑀲𑁂𑀝𑁆𑀞𑀪𑀸𑀯𑀯𑀡𑁆𑀡𑀦𑀸

𑁨𑁭𑁫. 𑀅𑀣 𑀔𑁄 𑀪𑀕𑀯𑀸 𑁋 ‘‘𑀅𑀬𑀁 𑀅𑀫𑁆𑀩𑀝𑁆𑀞𑁄 𑀔𑀢𑁆𑀢𑀺𑀬𑁄𑀲𑁆𑀫𑀻’’𑀢𑀺 𑀲𑀜𑁆𑀜𑀁 𑀓𑀭𑁄𑀢𑀺, 𑀅𑀢𑁆𑀢𑀦𑁄 𑀅𑀔𑀢𑁆𑀢𑀺𑀬𑀪𑀸𑀯𑀁 𑀦 𑀚𑀸𑀦𑀸𑀢𑀺, 𑀳𑀦𑁆𑀤 𑀦𑀁 𑀚𑀸𑀦𑀸𑀧𑁂𑀲𑁆𑀲𑀸𑀫𑀻𑀢𑀺 𑀔𑀢𑁆𑀢𑀺𑀬𑀯𑀁𑀲𑀁 𑀤𑀲𑁆𑀲𑁂𑀢𑀼𑀁 𑀉𑀢𑁆𑀢𑀭𑀺𑀤𑁂𑀲𑀦𑀁 𑀯𑀟𑁆𑀠𑁂𑀦𑁆𑀢𑁄 𑁋 ‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺 𑀅𑀫𑁆𑀩𑀝𑁆𑀞𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀮𑁄𑀓𑁂. 𑀩𑁆𑀭𑀸𑀳𑁆𑀫𑀡𑁂𑀲𑀽𑀢𑀺 𑀩𑁆𑀭𑀸𑀳𑁆𑀫𑀡𑀸𑀦𑀁 𑀅𑀦𑁆𑀢𑀭𑁂. 𑀆𑀲𑀦𑀁 𑀯𑀸 𑀉𑀤𑀓𑀁 𑀯𑀸𑀢𑀺 𑀅𑀕𑁆𑀕𑀸𑀲𑀦𑀁 𑀯𑀸 𑀅𑀕𑁆𑀕𑁄𑀤𑀓𑀁 𑀯𑀸. 𑀲𑀤𑁆𑀥𑁂𑀢𑀺 𑀫𑀢𑀓𑁂 𑀉𑀤𑁆𑀤𑀺𑀲𑁆𑀲 𑀓𑀢𑀪𑀢𑁆𑀢𑁂. 𑀣𑀸𑀮𑀺𑀧𑀸𑀓𑁂𑀢𑀺 𑀫𑀗𑁆𑀕𑀮𑀸𑀤𑀺𑀪𑀢𑁆𑀢𑁂. 𑀬𑀜𑁆𑀜𑁂𑀢𑀺 𑀬𑀜𑁆𑀜𑀪𑀢𑁆𑀢𑁂. 𑀧𑀸𑀳𑀼𑀦𑁂𑀢𑀺 𑀧𑀸𑀳𑀼𑀦𑀓𑀸𑀦𑀁 𑀓𑀢𑀪𑀢𑁆𑀢𑁂 𑀧𑀡𑁆𑀡𑀸𑀓𑀸𑀭𑀪𑀢𑁆𑀢𑁂 𑀯𑀸. 𑀅𑀧𑀺 𑀦𑀼𑀲𑁆𑀲𑀸𑀢𑀺 𑀅𑀧𑀺 𑀦𑀼 𑀅𑀲𑁆𑀲 𑀔𑀢𑁆𑀢𑀺𑀬𑀧𑀼𑀢𑁆𑀢𑀲𑁆𑀲. 𑀆𑀯𑀝𑀁 𑀯𑀸 𑀅𑀲𑁆𑀲 𑀅𑀦𑀸𑀯𑀝𑀁 𑀯𑀸𑀢𑀺, 𑀩𑁆𑀭𑀸𑀳𑁆𑀫𑀡𑀓𑀜𑁆𑀜𑀸𑀲𑀼 𑀦𑀺𑀯𑀸𑀭𑀡𑀁 𑀪𑀯𑁂𑀬𑁆𑀬 𑀯𑀸 𑀦𑁄 𑀯𑀸, 𑀩𑁆𑀭𑀸𑀳𑁆𑀫𑀡𑀤𑀸𑀭𑀺𑀓𑀁 𑀮𑀪𑁂𑀬𑁆𑀬 𑀯𑀸 𑀦 𑀯𑀸 𑀮𑀪𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀅𑀦𑀼𑀧𑀧𑀦𑁆𑀦𑁄𑀢𑀺 𑀔𑀢𑁆𑀢𑀺𑀬𑀪𑀸𑀯𑀁 𑀅𑀧𑀢𑁆𑀢𑁄, 𑀅𑀧𑀭𑀺𑀲𑀼𑀤𑁆𑀥𑁄𑀢𑀺 𑀅𑀢𑁆𑀣𑁄.

𑁨𑁭𑁬. 𑀇𑀢𑁆𑀣𑀺𑀬𑀸 𑀯𑀸 𑀇𑀢𑁆𑀣𑀺𑀁 𑀓𑀭𑀺𑀢𑁆𑀯𑀸𑀢𑀺 𑀇𑀢𑁆𑀣𑀺𑀬𑀸 𑀯𑀸 𑀇𑀢𑁆𑀣𑀺𑀁 𑀧𑀭𑀺𑀬𑁂𑀲𑀺𑀢𑁆𑀯𑀸. 𑀓𑀺𑀲𑁆𑀫𑀺𑀜𑁆𑀘𑀺𑀤𑁂𑀯 𑀧𑀓𑀭𑀡𑁂𑀢𑀺 𑀓𑀺𑀲𑁆𑀫𑀺𑀜𑁆𑀘𑀺𑀤𑁂𑀯 𑀤𑁄𑀲𑁂 𑀩𑁆𑀭𑀸𑀳𑁆𑀫𑀡𑀸𑀦𑀁 𑀅𑀬𑀼𑀢𑁆𑀢𑁂 𑀅𑀓𑀢𑁆𑀢𑀩𑁆𑀩𑀓𑀭𑀡𑁂. 𑀪𑀲𑁆𑀲𑀧𑀼𑀝𑁂𑀦𑀸𑀢𑀺 𑀪𑀲𑁆𑀫𑀧𑀼𑀝𑁂𑀦, 𑀲𑀻𑀲𑁂 𑀙𑀸𑀭𑀺𑀓𑀁 𑀑𑀓𑀺𑀭𑀺𑀢𑁆𑀯𑀸𑀢𑀺 𑀅𑀢𑁆𑀣𑁄.

𑁨𑁭𑁭. 𑀚𑀦𑁂𑀢𑀲𑁆𑀫𑀺𑀦𑁆𑀢𑀺 𑀚𑀦𑀺𑀢𑀲𑁆𑀫𑀺𑀁, 𑀧𑀚𑀸𑀬𑀸𑀢𑀺 𑀅𑀢𑁆𑀣𑁄. 𑀬𑁂 𑀕𑁄𑀢𑁆𑀢𑀧𑀝𑀺𑀲𑀸𑀭𑀺𑀦𑁄𑀢𑀺 𑀬𑁂 𑀚𑀦𑁂𑀢𑀲𑁆𑀫𑀺𑀁 𑀕𑁄𑀢𑁆𑀢𑀁 𑀧𑀝𑀺𑀲𑀭𑀦𑁆𑀢𑀺 𑁋 ‘‘𑀅𑀳𑀁 𑀕𑁄𑀢𑀫𑁄, 𑀅𑀳𑀁 𑀓𑀲𑁆𑀲𑀧𑁄’’𑀢𑀺, 𑀢𑁂𑀲𑀼 𑀮𑁄𑀓𑁂 𑀕𑁄𑀢𑁆𑀢𑀧𑀝𑀺𑀲𑀸𑀭𑀻𑀲𑀼 𑀔𑀢𑁆𑀢𑀺𑀬𑁄 𑀲𑁂𑀝𑁆𑀞𑁄. 𑀅𑀦𑀼𑀫𑀢𑀸 𑀫𑀬𑀸𑀢𑀺 𑀫𑀫 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑁂𑀦 𑀲𑀤𑁆𑀥𑀺𑀁 𑀲𑀁𑀲𑀦𑁆𑀤𑀺𑀢𑁆𑀯𑀸 𑀤𑁂𑀲𑀺𑀢𑀸 𑀫𑀬𑀸 𑀅𑀦𑀼𑀜𑁆𑀜𑀸𑀢𑀸.

𑀧𑀞𑀫𑀪𑀸𑀡𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀯𑀺𑀚𑁆𑀚𑀸𑀘𑀭𑀡𑀓𑀣𑀸𑀯𑀡𑁆𑀡𑀦𑀸

𑁨𑁭𑁮. 𑀇𑀫𑀸𑀬 𑀧𑀦 𑀕𑀸𑀣𑀸𑀬 𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀦𑁆𑀦𑁄𑀢𑀺 𑀇𑀤𑀁 𑀧𑀤𑀁 𑀲𑀼𑀢𑁆𑀯𑀸 𑀅𑀫𑁆𑀩𑀝𑁆𑀞𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀯𑀺𑀚𑁆𑀚𑀸 𑀦𑀸𑀫 𑀢𑀬𑁄 𑀯𑁂𑀤𑀸, 𑀘𑀭𑀡𑀁 𑀧𑀜𑁆𑀘 𑀲𑀻𑀮𑀸𑀦𑀺, 𑀢𑀬𑀺𑀤𑀁 𑀅𑀫𑁆𑀳𑀸𑀓𑀁𑀬𑁂𑀯 𑀅𑀢𑁆𑀣𑀺, 𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀦𑁆𑀦𑁄 𑀘𑁂 𑀲𑁂𑀝𑁆𑀞𑁄, 𑀫𑀬𑀫𑁂𑀯 𑀲𑁂𑀝𑁆𑀞𑀸’’𑀢𑀺 𑀦𑀺𑀝𑁆𑀞𑀁 𑀕𑀦𑁆𑀢𑁆𑀯𑀸 𑀯𑀺𑀚𑁆𑀚𑀸𑀘𑀭𑀡𑀁 𑀧𑀼𑀘𑁆𑀙𑀦𑁆𑀢𑁄 𑁋 ‘‘𑀓𑀢𑀫𑀁 𑀧𑀦 𑀢𑀁, 𑀪𑁄 𑀕𑁄𑀢𑀫, 𑀘𑀭𑀡𑀁, 𑀓𑀢𑀫𑀸 𑀘 𑀧𑀦 𑀲𑀸 𑀯𑀺𑀚𑁆𑀚𑀸’’𑀢𑀺 𑀆𑀳. 𑀅𑀣𑀲𑁆𑀲 𑀪𑀕𑀯𑀸 𑀢𑀁 𑀩𑁆𑀭𑀸𑀳𑁆𑀫𑀡𑀲𑀫𑀬𑁂 𑀲𑀺𑀤𑁆𑀥𑀁 𑀚𑀸𑀢𑀺𑀯𑀸𑀤𑀸𑀤𑀺𑀧𑀝𑀺𑀲𑀁𑀬𑀼𑀢𑁆𑀢𑀁 𑀯𑀺𑀚𑁆𑀚𑀸𑀘𑀭𑀡𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀅𑀦𑀼𑀢𑁆𑀢𑀭𑀁 𑀯𑀺𑀚𑁆𑀚𑀸𑀘𑀭𑀡𑀁 𑀤𑀲𑁆𑀲𑁂𑀢𑀼𑀓𑀸𑀫𑁄 𑁋 ‘‘𑀦 𑀔𑁄 𑀅𑀫𑁆𑀩𑀝𑁆𑀞𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀚𑀸𑀢𑀺𑀯𑀸𑀤𑁄𑀢𑀺 𑀚𑀸𑀢𑀺𑀁 𑀆𑀭𑀩𑁆𑀪 𑀯𑀸𑀤𑁄, 𑀩𑁆𑀭𑀸𑀳𑁆𑀫𑀡𑀲𑁆𑀲𑁂𑀯𑀺𑀤𑀁 𑀯𑀝𑁆𑀝𑀢𑀺, 𑀦 𑀲𑀼𑀤𑁆𑀤𑀲𑁆𑀲𑀸𑀢𑀺𑀆𑀤𑀺 𑀯𑀘𑀦𑀦𑁆𑀢𑀺 𑀅𑀢𑁆𑀣𑁄. 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣. 𑀚𑀸𑀢𑀺𑀯𑀸𑀤𑀯𑀺𑀦𑀺𑀩𑀤𑁆𑀥𑀸𑀢𑀺 𑀚𑀸𑀢𑀺𑀯𑀸𑀤𑁂 𑀯𑀺𑀦𑀺𑀩𑀤𑁆𑀥𑀸. 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣.

𑀢𑀢𑁄 𑀅𑀫𑁆𑀩𑀝𑁆𑀞𑁄 𑁋 ‘‘𑀬𑀢𑁆𑀣 𑀤𑀸𑀦𑀺 𑀫𑀬𑀁 𑀮𑀕𑁆𑀕𑀺𑀲𑁆𑀲𑀸𑀫𑀸𑀢𑀺 𑀘𑀺𑀦𑁆𑀢𑀬𑀺𑀫𑁆𑀳, 𑀢𑀢𑁄 𑀦𑁄 𑀲𑀫𑀡𑁄 𑀕𑁄𑀢𑀫𑁄 𑀫𑀳𑀸𑀯𑀸𑀢𑁂 𑀣𑀼𑀲𑀁 𑀥𑀼𑀦𑀦𑁆𑀢𑁄 𑀯𑀺𑀬 𑀤𑀽𑀭𑀫𑁂𑀯 𑀅𑀯𑀓𑁆𑀔𑀺𑀧𑀺. 𑀬𑀢𑁆𑀣 𑀧𑀦 𑀫𑀬𑀁 𑀦 𑀮𑀕𑁆𑀕𑀸𑀫, 𑀢𑀢𑁆𑀣 𑀦𑁄 𑀦𑀺𑀬𑁄𑀚𑁂𑀲𑀺. 𑀅𑀬𑀁 𑀦𑁄 𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀤𑀸 𑀜𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀧𑀼𑀦 𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀤𑀁 𑀧𑀼𑀘𑁆𑀙𑀺. 𑀅𑀣𑀲𑁆𑀲 𑀪𑀕𑀯𑀸 𑀲𑀫𑀼𑀤𑀸𑀕𑀫𑀢𑁄 𑀧𑀪𑀼𑀢𑀺 𑀯𑀺𑀚𑁆𑀚𑀸𑀘𑀭𑀡𑀁 𑀤𑀲𑁆𑀲𑁂𑀢𑀼𑀁 𑁋 ‘‘𑀇𑀥 𑀅𑀫𑁆𑀩𑀝𑁆𑀞 𑀢𑀣𑀸𑀕𑀢𑁄’’𑀢𑀺𑀆𑀤𑀺𑀫𑀸𑀳.

𑁨𑁭𑁯. 𑀏𑀢𑁆𑀣 𑀘 𑀪𑀕𑀯𑀸 𑀘𑀭𑀡𑀧𑀭𑀺𑀬𑀸𑀧𑀦𑁆𑀦𑀫𑁆𑀧𑀺 𑀢𑀺𑀯𑀺𑀥𑀁 𑀲𑀻𑀮𑀁 𑀯𑀺𑀪𑀚𑀦𑁆𑀢𑁄 ‘‘𑀇𑀤𑀫𑀲𑁆𑀲 𑀳𑁄𑀢𑀺 𑀘𑀭𑀡𑀲𑁆𑀫𑀺’’𑀦𑁆𑀢𑀺 𑀅𑀦𑀺𑀬𑁆𑀬𑀸𑀢𑁂𑀢𑁆𑀯𑀸 ‘‘𑀇𑀤𑀫𑁆𑀧𑀺𑀲𑁆𑀲 𑀳𑁄𑀢𑀺 𑀲𑀻𑀮𑀲𑁆𑀫𑀺’’𑀦𑁆𑀢𑀺 𑀲𑀻𑀮𑀯𑀲𑁂𑀦𑁂𑀯 𑀦𑀺𑀬𑁆𑀬𑀸𑀢𑁂𑀲𑀺. 𑀓𑀲𑁆𑀫𑀸? 𑀢𑀲𑁆𑀲𑀧𑀺 𑀳𑀺 𑀓𑀺𑀜𑁆𑀘𑀺 𑀓𑀺𑀜𑁆𑀘𑀺 𑀲𑀻𑀮𑀁 𑀅𑀢𑁆𑀣𑀺, 𑀢𑀲𑁆𑀫𑀸 𑀘𑀭𑀡𑀯𑀲𑁂𑀦 𑀦𑀺𑀬𑁆𑀬𑀸𑀢𑀺𑀬𑀫𑀸𑀦𑁂 ‘‘𑀫𑀬𑀫𑁆𑀧𑀺 𑀘𑀭𑀡𑀲𑀫𑁆𑀧𑀦𑁆𑀦𑀸’’𑀢𑀺 𑀢𑀢𑁆𑀣 𑀢𑀢𑁆𑀣𑁂𑀯 𑀮𑀕𑁆𑀕𑁂𑀬𑁆𑀬. 𑀬𑀁 𑀧𑀦 𑀢𑁂𑀦 𑀲𑀼𑀧𑀺𑀦𑁂𑀧𑀺 𑀦 𑀤𑀺𑀝𑁆𑀞𑀧𑀼𑀩𑁆𑀩𑀁, 𑀢𑀲𑁆𑀲𑁂𑀯 𑀯𑀲𑁂𑀦 𑀦𑀺𑀬𑁆𑀬𑀸𑀢𑁂𑀦𑁆𑀢𑁄 𑀧𑀞𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀇𑀤𑀫𑁆𑀧𑀺𑀲𑁆𑀲 𑀳𑁄𑀢𑀺 𑀘𑀭𑀡𑀲𑁆𑀫𑀺𑀁…𑀧𑁂… 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺, 𑀇𑀤𑀫𑁆𑀧𑀺𑀲𑁆𑀲 𑀳𑁄𑀢𑀺 𑀘𑀭𑀡𑀲𑁆𑀫𑀺𑀦𑁆𑀢𑀺𑀆𑀤𑀺𑀫𑀸𑀳. 𑀏𑀢𑁆𑀢𑀸𑀯𑀢𑀸 𑀅𑀝𑁆𑀞𑀧𑀺 𑀲𑀫𑀸𑀧𑀢𑁆𑀢𑀺𑀬𑁄 𑀘𑀭𑀡𑀦𑁆𑀢𑀺 𑀦𑀺𑀬𑁆𑀬𑀸𑀢𑀺𑀢𑀸 𑀳𑁄𑀦𑁆𑀢𑀺, 𑀯𑀺𑀧𑀲𑁆𑀲𑀦𑀸 𑀜𑀸𑀡𑀢𑁄 𑀧𑀦 𑀧𑀝𑁆𑀞𑀸𑀬 𑀅𑀝𑁆𑀞𑀯𑀺𑀥𑀸𑀧𑀺 𑀧𑀜𑁆𑀜𑀸 𑀯𑀺𑀚𑁆𑀚𑀸𑀢𑀺 𑀦𑀺𑀬𑁆𑀬𑀸𑀢𑀺𑀢𑀸.

𑀘𑀢𑀼𑀅𑀧𑀸𑀬𑀫𑀼𑀔𑀓𑀣𑀸𑀯𑀡𑁆𑀡𑀦𑀸

𑁨𑁮𑁦. 𑀅𑀧𑀸𑀬𑀫𑀼𑀔𑀸𑀦𑀻𑀢𑀺 𑀯𑀺𑀦𑀸𑀲𑀫𑀼𑀔𑀸𑀦𑀺. 𑀅𑀦𑀪𑀺𑀲𑀫𑁆𑀪𑀼𑀡𑀫𑀸𑀦𑁄𑀢𑀺 𑀅𑀲𑀫𑁆𑀧𑀸𑀧𑀼𑀡𑀦𑁆𑀢𑁄, 𑀅𑀯𑀺𑀲𑀳𑀫𑀸𑀦𑁄 𑀯𑀸. 𑀔𑀸𑀭𑀺𑀯𑀺𑀥𑀫𑀸𑀤𑀸𑀬𑀸𑀢𑀺 𑀏𑀢𑁆𑀣 𑀔𑀸𑀭𑀻𑀢𑀺 𑀅𑀭𑀡𑀻 𑀓𑀫𑀡𑁆𑀟𑀮𑀼 𑀲𑀼𑀚𑀸𑀤𑀬𑁄 𑀢𑀸𑀧𑀲𑀧𑀭𑀺𑀓𑁆𑀔𑀸𑀭𑀸. 𑀯𑀺𑀥𑁄𑀢𑀺 𑀓𑀸𑀚𑁄. 𑀢𑀲𑁆𑀫𑀸 𑀔𑀸𑀭𑀺𑀪𑀭𑀺𑀢𑀁 𑀓𑀸𑀚𑀫𑀸𑀤𑀸𑀬𑀸𑀢𑀺 𑀅𑀢𑁆𑀣𑁄. 𑀬𑁂 𑀧𑀦 𑀔𑀸𑀭𑀺𑀯𑀺𑀯𑀺𑀥𑀦𑁆𑀢𑀺 𑀧𑀞𑀦𑁆𑀢𑀺, 𑀢𑁂 ‘‘𑀔𑀸𑀭𑀻𑀢𑀺 𑀓𑀸𑀚𑀲𑁆𑀲 𑀦𑀸𑀫𑀁, 𑀯𑀺𑀯𑀺𑀥𑀦𑁆𑀢𑀺 𑀩𑀳𑀼𑀓𑀫𑀡𑁆𑀟𑀮𑀼𑀆𑀤𑀺𑀧𑀭𑀺𑀓𑁆𑀔𑀸𑀭’’𑀦𑁆𑀢𑀺 𑀯𑀡𑁆𑀡𑀬𑀦𑁆𑀢𑀺. 𑀧𑀯𑀢𑁆𑀢𑀨𑀮𑀪𑁄𑀚𑀦𑁄𑀢𑀺 𑀧𑀢𑀺𑀢𑀨𑀮𑀪𑁄𑀚𑀦𑁄. 𑀧𑀭𑀺𑀘𑀸𑀭𑀓𑁄𑀢𑀺 𑀓𑀧𑁆𑀧𑀺𑀬𑀓𑀭𑀡𑀧𑀢𑁆𑀢𑀧𑀝𑀺𑀕𑁆𑀕𑀳𑀡𑀧𑀸𑀤𑀥𑁄𑀯𑀦𑀸𑀤𑀺𑀯𑀢𑁆𑀢𑀓𑀭𑀡𑀯𑀲𑁂𑀦 𑀧𑀭𑀺𑀘𑀸𑀭𑀓𑁄. 𑀓𑀸𑀫𑀜𑁆𑀘 𑀕𑀼𑀡𑀸𑀥𑀺𑀓𑁄𑀧𑀺 𑀔𑀻𑀡𑀸𑀲𑀯𑀲𑀸𑀫𑀡𑁂𑀭𑁄 𑀧𑀼𑀣𑀼𑀚𑁆𑀚𑀦𑀪𑀺𑀓𑁆𑀔𑀼𑀦𑁄 𑀯𑀼𑀢𑁆𑀢𑀦𑀬𑁂𑀦 𑀧𑀭𑀺𑀘𑀸𑀭𑀓𑁄 𑀳𑁄𑀢𑀺, 𑀅𑀬𑀁 𑀧𑀦 𑀦 𑀢𑀸𑀤𑀺𑀲𑁄 𑀕𑀼𑀡𑀯𑀲𑁂𑀦𑀧𑀺 𑀯𑁂𑀬𑁆𑀬𑀸𑀯𑀘𑁆𑀘𑀓𑀭𑀡𑀯𑀲𑁂𑀦𑀧𑀺 𑀮𑀸𑀫𑀓𑁄𑀬𑁂𑀯.

𑀓𑀲𑁆𑀫𑀸 𑀧𑀦 𑀢𑀸𑀧𑀲𑀧𑀩𑁆𑀩𑀚𑁆𑀚𑀸 𑀲𑀸𑀲𑀦𑀲𑁆𑀲 𑀯𑀺𑀦𑀸𑀲𑀫𑀼𑀔𑀦𑁆𑀢𑀺 𑀯𑀼𑀢𑁆𑀢𑀸𑀢𑀺? 𑀬𑀲𑁆𑀫𑀸 𑀕𑀘𑁆𑀙𑀦𑁆𑀢𑀁 𑀕𑀘𑁆𑀙𑀦𑁆𑀢𑀁 𑀲𑀸𑀲𑀦𑀁 𑀢𑀸𑀧𑀲𑀧𑀩𑁆𑀩𑀚𑁆𑀚𑀸𑀯𑀲𑁂𑀦 𑀑𑀲𑀓𑁆𑀓𑀺𑀲𑁆𑀲𑀢𑀺. 𑀇𑀫𑀲𑁆𑀫𑀺𑀜𑁆𑀳𑀺 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀢𑀺𑀲𑁆𑀲𑁄 𑀲𑀺𑀓𑁆𑀔𑀸 𑀧𑀽𑀭𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀁 𑀮𑀚𑁆𑀚𑀺𑀦𑁄 𑀲𑀺𑀓𑁆𑀔𑀸𑀓𑀸𑀫𑀸 𑁋 ‘‘𑀦𑀢𑁆𑀣𑀺 𑀢𑀬𑀸 𑀲𑀤𑁆𑀥𑀺𑀁 𑀉𑀧𑁄𑀲𑀣𑁄 𑀯𑀸 𑀧𑀯𑀸𑀭𑀡𑀸 𑀯𑀸 𑀲𑀗𑁆𑀖𑀓𑀫𑁆𑀫𑀁 𑀯𑀸’’𑀢𑀺 𑀚𑀺𑀕𑀼𑀘𑁆𑀙𑀺𑀢𑁆𑀯𑀸 𑀧𑀭𑀺𑀯𑀚𑁆𑀚𑁂𑀦𑁆𑀢𑀺. 𑀲𑁄 ‘‘𑀤𑀼𑀓𑁆𑀓𑀭𑀁 𑀔𑀼𑀭𑀥𑀸𑀭𑀽𑀧𑀫𑀁 𑀲𑀸𑀲𑀦𑁂 𑀧𑀝𑀺𑀧𑀢𑁆𑀢𑀺𑀧𑀽𑀭𑀡𑀁 𑀤𑀼𑀓𑁆𑀔𑀁, 𑀢𑀸𑀧𑀲𑀧𑀩𑁆𑀩𑀚𑁆𑀚𑀸 𑀧𑀦 𑀲𑀼𑀓𑀭𑀸 𑀘𑁂𑀯 𑀩𑀳𑀼𑀚𑀦𑀲𑀫𑁆𑀫𑀢𑀸 𑀘𑀸’’𑀢𑀺 𑀯𑀺𑀩𑁆𑀪𑀫𑀺𑀢𑁆𑀯𑀸 𑀢𑀸𑀧𑀲𑁄 𑀳𑁄𑀢𑀺. 𑀅𑀜𑁆𑀜𑁂 𑀢𑀁 𑀤𑀺𑀲𑁆𑀯𑀸 𑁋 ‘‘𑀓𑀺𑀁 𑀢𑀬𑀸 𑀓𑀢’’𑀦𑁆𑀢𑀺 𑀧𑀼𑀘𑁆𑀙𑀦𑁆𑀢𑀺. 𑀲𑁄 𑁋 ‘‘𑀪𑀸𑀭𑀺𑀬𑀁 𑀢𑀼𑀫𑁆𑀳𑀸𑀓𑀁 𑀲𑀸𑀲𑀦𑁂 𑀓𑀫𑁆𑀫𑀁, 𑀇𑀥 𑀧𑀦 𑀲𑀙𑀦𑁆𑀤𑀘𑀸𑀭𑀺𑀦𑁄 𑀫𑀬’’𑀦𑁆𑀢𑀺 𑀯𑀤𑀢𑀺. 𑀲𑁄𑀧𑀺, 𑀬𑀤𑀺 𑀏𑀯𑀁 𑀅𑀳𑀫𑁆𑀧𑀺 𑀏𑀢𑁆𑀣𑁂𑀯 𑀧𑀩𑁆𑀩𑀚𑀸𑀫𑀻𑀢𑀺 𑀢𑀲𑁆𑀲 𑀅𑀦𑀼𑀲𑀺𑀓𑁆𑀔𑀦𑁆𑀢𑁄 𑀢𑀸𑀧𑀲𑁄 𑀳𑁄𑀢𑀺. 𑀏𑀯𑀫𑀜𑁆𑀜𑁂𑀧𑀺 𑀅𑀜𑁆𑀜𑁂𑀧𑀻𑀢𑀺 𑀓𑀫𑁂𑀦 𑀢𑀸𑀧𑀲𑀸𑀯 𑀩𑀳𑀼𑀓𑀸 𑀳𑁄𑀦𑁆𑀢𑀺. 𑀢𑁂𑀲𑀁 𑀉𑀧𑁆𑀧𑀦𑁆𑀦𑀓𑀸𑀮𑁂 𑀲𑀸𑀲𑀦𑀁 𑀑𑀲𑀓𑁆𑀓𑀺𑀢𑀁 𑀦𑀸𑀫 𑀪𑀯𑀺𑀲𑁆𑀲𑀢𑀺. 𑀮𑁄𑀓𑁂 𑀏𑀯𑀭𑀽𑀧𑁄 𑀩𑀼𑀤𑁆𑀥𑁄 𑀦𑀸𑀫 𑀉𑀧𑁆𑀧𑀚𑁆𑀚𑀺, 𑀢𑀲𑁆𑀲 𑀈𑀤𑀺𑀲𑀁 𑀦𑀸𑀫 𑀲𑀸𑀲𑀦𑀁 𑀅𑀳𑁄𑀲𑀻𑀢𑀺 𑀲𑀼𑀢𑀫𑀢𑁆𑀢𑀫𑁂𑀯 𑀪𑀯𑀺𑀲𑁆𑀲𑀢𑀺. 𑀇𑀤𑀁 𑀲𑀦𑁆𑀥𑀸𑀬 𑀪𑀕𑀯𑀸 𑀢𑀸𑀧𑀲𑀧𑀩𑁆𑀩𑀚𑁆𑀚𑀁 𑀲𑀸𑀲𑀦𑀲𑁆𑀲 𑀯𑀺𑀦𑀸𑀲𑀫𑀼𑀔𑀦𑁆𑀢𑀺 𑀆𑀳.

𑀓𑀼𑀤𑀸𑀮𑀧𑀺𑀝𑀓𑀦𑁆𑀢𑀺 𑀓𑀦𑁆𑀤𑀫𑀽𑀮𑀨𑀮𑀕𑁆𑀕𑀳𑀡𑀢𑁆𑀣𑀁 𑀓𑀼𑀤𑀸𑀮𑀜𑁆𑀘𑁂𑀯 𑀧𑀺𑀝𑀓𑀜𑁆𑀘. 𑀕𑀸𑀫𑀲𑀸𑀫𑀦𑁆𑀢𑀁 𑀯𑀸𑀢𑀺 𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀤𑀸𑀤𑀻𑀦𑀺 𑀅𑀦𑀪𑀺𑀲𑀫𑁆𑀪𑀼𑀡𑀦𑁆𑀢𑁄, 𑀓𑀲𑀺𑀓𑀫𑁆𑀫𑀸𑀤𑀻𑀳𑀺 𑀘 𑀚𑀻𑀯𑀺𑀢𑀁 𑀦𑀺𑀧𑁆𑀨𑀸𑀤𑁂𑀢𑀼𑀁 𑀤𑀼𑀓𑁆𑀔𑀦𑁆𑀢𑀺 𑀫𑀜𑁆𑀜𑀫𑀸𑀦𑁄 𑀩𑀳𑀼𑀚𑀦𑀓𑀼𑀳𑀸𑀧𑀦𑀢𑁆𑀣𑀁 𑀕𑀸𑀫𑀲𑀸𑀫𑀦𑁆𑀢𑁂 𑀯𑀸 𑀦𑀺𑀕𑀫𑀲𑀸𑀫𑀦𑁆𑀢𑁂 𑀯𑀸 𑀅𑀕𑁆𑀕𑀺𑀲𑀸𑀮𑀁 𑀓𑀢𑁆𑀯𑀸 𑀲𑀧𑁆𑀧𑀺𑀢𑁂𑀮𑀤𑀥𑀺𑀫𑀥𑀼𑀨𑀸𑀡𑀺𑀢𑀢𑀺𑀮𑀢𑀡𑁆𑀟𑀼𑀮𑀸𑀤𑀻𑀳𑀺 𑀘𑁂𑀯 𑀦𑀸𑀦𑀸𑀤𑀸𑀭𑀽𑀳𑀺 𑀘 𑀳𑁄𑀫𑀓𑀭𑀡𑀯𑀲𑁂𑀦 𑀅𑀕𑁆𑀕𑀺𑀁 𑀧𑀭𑀺𑀘𑀭𑀦𑁆𑀢𑁄 𑀅𑀘𑁆𑀙𑀢𑀺.

𑀘𑀢𑀼𑀤𑁆𑀯𑀸𑀭𑀁 𑀅𑀕𑀸𑀭𑀁 𑀓𑀭𑀺𑀢𑁆𑀯𑀸𑀢𑀺 𑀘𑀢𑀼𑀫𑀼𑀔𑀁 𑀧𑀸𑀦𑀸𑀕𑀸𑀭𑀁 𑀓𑀢𑁆𑀯𑀸 𑀢𑀲𑁆𑀲 𑀤𑁆𑀯𑀸𑀭𑁂 𑀫𑀡𑁆𑀟𑀧𑀁 𑀓𑀢𑁆𑀯𑀸 𑀢𑀢𑁆𑀣 𑀧𑀸𑀦𑀻𑀬𑀁 𑀉𑀧𑀝𑁆𑀞𑀧𑁂𑀢𑁆𑀯𑀸 𑀆𑀕𑀢𑀸𑀕𑀢𑁂 𑀧𑀸𑀦𑀻𑀬𑁂𑀦 𑀆𑀧𑀼𑀘𑁆𑀙𑀢𑀺. 𑀬𑀫𑁆𑀧𑀺𑀲𑁆𑀲 𑀅𑀤𑁆𑀥𑀺𑀓𑀸 𑀓𑀺𑀮𑀦𑁆𑀢𑀸 𑀧𑀸𑀦𑀻𑀬𑀁 𑀧𑀺𑀯𑀺𑀢𑁆𑀯𑀸 𑀧𑀭𑀺𑀢𑀼𑀝𑁆𑀞𑀸 𑀪𑀢𑁆𑀢𑀧𑀼𑀝𑀁 𑀯𑀸 𑀢𑀡𑁆𑀟𑀼𑀮𑀸𑀤𑀻𑀦𑀺 𑀯𑀸 𑀤𑁂𑀦𑁆𑀢𑀺, 𑀢𑀁 𑀲𑀩𑁆𑀩𑀁 𑀕𑀳𑁂𑀢𑁆𑀯𑀸 𑀅𑀫𑁆𑀩𑀺𑀮𑀬𑀸𑀕𑀼𑀆𑀤𑀻𑀦𑀺 𑀓𑀢𑁆𑀯𑀸 𑀩𑀳𑀼𑀢𑀭𑀁 𑀆𑀫𑀺𑀲𑀕𑀳𑀡𑀢𑁆𑀣𑀁 𑀓𑁂𑀲𑀜𑁆𑀘𑀺 𑀅𑀦𑁆𑀦𑀁 𑀤𑁂𑀢𑀺, 𑀓𑁂𑀲𑀜𑁆𑀘𑀺 𑀪𑀢𑁆𑀢𑀧𑀘𑀦𑀪𑀸𑀚𑀦𑀸𑀤𑀻𑀦𑀺. 𑀢𑁂𑀳𑀺𑀧𑀺 𑀤𑀺𑀦𑁆𑀦𑀁 𑀆𑀫𑀺𑀲𑀁 𑀯𑀸 𑀧𑀼𑀩𑁆𑀩𑀡𑁆𑀡𑀸𑀤𑀻𑀦𑀺 𑀯𑀸 𑀕𑀡𑁆𑀳𑀢𑀺, 𑀢𑀸𑀦𑀺 𑀯𑀟𑁆𑀠𑀺𑀬𑀸 𑀧𑀬𑁄𑀚𑁂𑀢𑀺. 𑀏𑀯𑀁 𑀯𑀟𑁆𑀠𑀫𑀸𑀦𑀯𑀺𑀪𑀯𑁄 𑀕𑁄𑀫𑀳𑀺𑀁𑀲𑀤𑀸𑀲𑀻𑀤𑀸𑀲𑀧𑀭𑀺𑀕𑁆𑀕𑀳𑀁 𑀓𑀭𑁄𑀢𑀺, 𑀫𑀳𑀦𑁆𑀢𑀁 𑀓𑀼𑀝𑀼𑀫𑁆𑀩𑀁 𑀲𑀡𑁆𑀞𑀧𑁂𑀢𑀺. 𑀇𑀫𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁 𑁋 ‘‘𑀘𑀢𑀼𑀤𑁆𑀯𑀸𑀭𑀁 𑀅𑀕𑀸𑀭𑀁 𑀓𑀭𑀺𑀢𑁆𑀯𑀸 𑀅𑀘𑁆𑀙𑀢𑀻’’𑀢𑀺. ‘‘𑀢𑀫𑀳𑀁 𑀬𑀣𑀸𑀲𑀢𑁆𑀢𑀺 𑀬𑀣𑀸𑀩𑀮𑀁 𑀧𑀝𑀺𑀧𑀽𑀚𑁂𑀲𑁆𑀲𑀸𑀫𑀻’’𑀢𑀺 𑀇𑀤𑀁 𑀧𑀦𑀲𑁆𑀲 𑀧𑀝𑀺𑀧𑀢𑁆𑀢𑀺𑀫𑀼𑀔𑀁. 𑀇𑀫𑀺𑀦𑀸 𑀳𑀺 𑀫𑀼𑀔𑁂𑀦 𑀲𑁄 𑀏𑀯𑀁 𑀧𑀝𑀺𑀧𑀚𑁆𑀚𑀢𑀻𑀢𑀺. 𑀏𑀢𑁆𑀢𑀸𑀯𑀢𑀸 𑀘 𑀪𑀕𑀯𑀢𑀸 𑀲𑀩𑁆𑀩𑀸𑀧𑀺 𑀢𑀸𑀧𑀲𑀧𑀩𑁆𑀩𑀚𑁆𑀚𑀸 𑀦𑀺𑀤𑁆𑀤𑀺𑀝𑁆𑀞𑀸 𑀳𑁄𑀦𑁆𑀢𑀺.

𑀓𑀣𑀁? 𑀅𑀝𑁆𑀞𑀯𑀺𑀥𑀸 𑀳𑀺 𑀢𑀸𑀧𑀲𑀸 𑁋 𑀲𑀧𑀼𑀢𑁆𑀢𑀪𑀭𑀺𑀬𑀸, 𑀉𑀜𑁆𑀙𑀸𑀘𑀭𑀺𑀬𑀸, 𑀅𑀦𑀕𑁆𑀕𑀺𑀧𑀓𑁆𑀓𑀺𑀓𑀸, 𑀅𑀲𑀸𑀫𑀧𑀸𑀓𑀸, 𑀅𑀲𑁆𑀫𑀫𑀼𑀝𑁆𑀞𑀺𑀓𑀸, 𑀤𑀦𑁆𑀢𑀯𑀓𑁆𑀓𑀮𑀺𑀓𑀸, 𑀧𑀯𑀢𑁆𑀢𑀨𑀮𑀪𑁄𑀚𑀦𑀸, 𑀧𑀡𑁆𑀟𑀼𑀧𑀮𑀸𑀲𑀺𑀓𑀸𑀢𑀺. 𑀢𑀢𑁆𑀣 𑀬𑁂 𑀓𑁂𑀡𑀺𑀬𑀚𑀝𑀺𑀮𑁄 𑀯𑀺𑀬 𑀓𑀼𑀝𑀼𑀫𑁆𑀩𑀁 𑀲𑀡𑁆𑀞𑀧𑁂𑀢𑁆𑀯𑀸 𑀯𑀲𑀦𑁆𑀢𑀺, 𑀢𑁂 𑀲𑀧𑀼𑀢𑁆𑀢𑀪𑀭𑀺𑀬𑀸 𑀦𑀸𑀫.

𑀬𑁂 𑀧𑀦 ‘‘𑀲𑀧𑀼𑀢𑁆𑀢𑀤𑀸𑀭𑀪𑀸𑀯𑁄 𑀦𑀸𑀫 𑀧𑀩𑁆𑀩𑀚𑀺𑀢𑀲𑁆𑀲 𑀅𑀬𑀼𑀢𑁆𑀢𑁄’’𑀢𑀺 𑀮𑀸𑀬𑀦𑀫𑀤𑁆𑀤𑀦𑀝𑁆𑀞𑀸𑀦𑁂𑀲𑀼 𑀯𑀻𑀳𑀺𑀫𑀼𑀕𑁆𑀕𑀫𑀸𑀲𑀢𑀺𑀮𑀸𑀤𑀻𑀦𑀺 𑀲𑀗𑁆𑀓𑀟𑁆𑀠𑀺𑀢𑁆𑀯𑀸 𑀧𑀘𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀦𑁆𑀢𑀺, 𑀢𑁂 𑀉𑀜𑁆𑀙𑀸𑀘𑀭𑀺𑀬𑀸 𑀦𑀸𑀫.

𑀬𑁂 ‘‘𑀔𑀮𑁂𑀦 𑀔𑀮𑀁 𑀯𑀺𑀘𑀭𑀺𑀢𑁆𑀯𑀸 𑀯𑀻𑀳𑀺𑀁 𑀆𑀳𑀭𑀺𑀢𑁆𑀯𑀸 𑀓𑁄𑀝𑁆𑀝𑁂𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀦𑀁 𑀦𑀸𑀫 𑀅𑀬𑀼𑀢𑁆𑀢’’𑀦𑁆𑀢𑀺 𑀕𑀸𑀫𑀦𑀺𑀕𑀫𑁂𑀲𑀼 𑀢𑀡𑁆𑀟𑀼𑀮𑀪𑀺𑀓𑁆𑀔𑀁 𑀕𑀳𑁂𑀢𑁆𑀯𑀸 𑀧𑀘𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀦𑁆𑀢𑀺, 𑀢𑁂 𑀅𑀦𑀕𑁆𑀕𑀺𑀧𑀓𑁆𑀓𑀺𑀓𑀸 𑀦𑀸𑀫.

𑀬𑁂 𑀧𑀦 ‘‘𑀓𑀺𑀁 𑀧𑀩𑁆𑀩𑀚𑀺𑀢𑀲𑁆𑀲 𑀲𑀸𑀫𑀧𑀸𑀓𑁂𑀦𑀸’’𑀢𑀺 𑀕𑀸𑀫𑀁 𑀧𑀯𑀺𑀲𑀺𑀢𑁆𑀯𑀸 𑀧𑀓𑁆𑀓𑀪𑀺𑀓𑁆𑀔𑀫𑁂𑀯 𑀕𑀡𑁆𑀳𑀦𑁆𑀢𑀺, 𑀢𑁂 𑀅𑀲𑀸𑀫𑀧𑀸𑀓𑀸 𑀦𑀸𑀫.

𑀬𑁂 ‘‘𑀤𑀺𑀯𑀲𑁂 𑀤𑀺𑀯𑀲𑁂 𑀪𑀺𑀓𑁆𑀔𑀸𑀧𑀭𑀺𑀬𑁂𑀝𑁆𑀞𑀺 𑀦𑀸𑀫 𑀤𑀼𑀓𑁆𑀔𑀸 𑀧𑀩𑁆𑀩𑀚𑀺𑀢𑀲𑁆𑀲𑀸’’𑀢𑀺 𑀫𑀼𑀝𑁆𑀞𑀺𑀧𑀸𑀲𑀸𑀡𑁂𑀦 𑀅𑀫𑁆𑀩𑀸𑀝𑀓𑀸𑀤𑀻𑀦𑀁 𑀭𑀼𑀓𑁆𑀔𑀸𑀦𑀁 𑀢𑀘𑀁 𑀓𑁄𑀝𑁆𑀝𑁂𑀢𑁆𑀯𑀸 𑀔𑀸𑀤𑀦𑁆𑀢𑀺, 𑀢𑁂 𑀅𑀲𑁆𑀫𑀫𑀼𑀝𑁆𑀞𑀺𑀓𑀸 𑀦𑀸𑀫.

𑀬𑁂 𑀧𑀦 ‘‘𑀧𑀸𑀲𑀸𑀡𑁂𑀦 𑀢𑀘𑀁 𑀓𑁄𑀝𑁆𑀝𑁂𑀢𑁆𑀯𑀸 𑀯𑀺𑀘𑀭𑀡𑀁 𑀦𑀸𑀫 𑀤𑀼𑀓𑁆𑀔’’𑀦𑁆𑀢𑀺 𑀤𑀦𑁆𑀢𑁂𑀳𑁂𑀯 𑀉𑀩𑁆𑀩𑀸𑀝𑁂𑀢𑁆𑀯𑀸 𑀔𑀸𑀤𑀦𑁆𑀢𑀺, 𑀢𑁂 𑀤𑀦𑁆𑀢𑀯𑀓𑁆𑀓𑀮𑀺𑀓𑀸 𑀦𑀸𑀫.

𑀬𑁂 ‘‘𑀤𑀦𑁆𑀢𑁂𑀳𑀺 𑀉𑀩𑁆𑀩𑀸𑀝𑁂𑀢𑁆𑀯𑀸 𑀔𑀸𑀤𑀦𑀁 𑀦𑀸𑀫 𑀤𑀼𑀓𑁆𑀔𑀁 𑀧𑀩𑁆𑀩𑀚𑀺𑀢𑀲𑁆𑀲𑀸’’𑀢𑀺 𑀮𑁂𑀟𑁆𑀟𑀼𑀤𑀡𑁆𑀟𑀸𑀤𑀻𑀳𑀺 𑀧𑀳𑀭𑀺𑀢𑁆𑀯𑀸 𑀧𑀢𑀺𑀢𑀸𑀦𑀺 𑀨𑀮𑀸𑀦𑀺 𑀧𑀭𑀺𑀪𑀼𑀜𑁆𑀚𑀦𑁆𑀢𑀺, 𑀢𑁂 𑀧𑀯𑀢𑁆𑀢𑀨𑀮𑀪𑁄𑀚𑀦𑀸 𑀦𑀸𑀫.

𑀬𑁂 𑀧𑀦 ‘‘𑀮𑁂𑀟𑁆𑀟𑀼𑀤𑀡𑁆𑀟𑀸𑀤𑀻𑀳𑀺 𑀧𑀸𑀢𑁂𑀢𑁆𑀯𑀸 𑀧𑀭𑀺𑀪𑁄𑀕𑁄 𑀦𑀸𑀫 𑀅𑀲𑀸𑀭𑀼𑀧𑁆𑀧𑁄 𑀧𑀩𑁆𑀩𑀚𑀺𑀢𑀲𑁆𑀲𑀸’’𑀢𑀺 𑀲𑀬𑀁 𑀧𑀢𑀺𑀢𑀸𑀦𑁂𑀯 𑀧𑀼𑀧𑁆𑀨𑀨𑀮𑀧𑀡𑁆𑀟𑀼𑀧𑀮𑀸𑀲𑀸𑀤𑀻𑀦𑀺 𑀔𑀸𑀤𑀦𑁆𑀢𑀸 𑀬𑀸𑀧𑁂𑀦𑁆𑀢𑀺, 𑀢𑁂 𑀧𑀡𑁆𑀟𑀼𑀧𑀮𑀸𑀲𑀺𑀓𑀸 𑀦𑀸𑀫.

𑀢𑁂 𑀢𑀺𑀯𑀺𑀥𑀸 𑁋 𑀉𑀓𑁆𑀓𑀝𑁆𑀞𑀫𑀚𑁆𑀛𑀺𑀫𑀫𑀼𑀤𑀼𑀓𑀯𑀲𑁂𑀦. 𑀢𑀢𑁆𑀣 𑀬𑁂 𑀦𑀺𑀲𑀺𑀦𑁆𑀦𑀝𑁆𑀞𑀸𑀦𑀢𑁄 𑀅𑀦𑀼𑀝𑁆𑀞𑀸𑀬 𑀳𑀢𑁆𑀣𑁂𑀦 𑀧𑀸𑀧𑀼𑀡𑀦𑀝𑁆𑀞𑀸𑀦𑁂𑀯 𑀧𑀢𑀺𑀢𑀁 𑀕𑀳𑁂𑀢𑁆𑀯𑀸 𑀔𑀸𑀤𑀦𑁆𑀢𑀺, 𑀢𑁂 𑀉𑀓𑁆𑀓𑀝𑁆𑀞𑀸. 𑀬𑁂 𑀏𑀓𑀭𑀼𑀓𑁆𑀔𑀢𑁄 𑀅𑀜𑁆𑀜𑀁 𑀭𑀼𑀓𑁆𑀔𑀁 𑀦 𑀕𑀘𑁆𑀙𑀦𑁆𑀢𑀺, 𑀢𑁂 𑀫𑀚𑁆𑀛𑀺𑀫𑀸. 𑀬𑁂 𑀢𑀁 𑀢𑀁 𑀭𑀼𑀓𑁆𑀔𑀫𑀽𑀮𑀁 𑀕𑀦𑁆𑀢𑁆𑀯𑀸 𑀧𑀭𑀺𑀬𑁂𑀲𑀺𑀢𑁆𑀯𑀸 𑀔𑀸𑀤𑀦𑁆𑀢𑀺, 𑀢𑁂 𑀫𑀼𑀤𑀼𑀓𑀸.

𑀇𑀫𑀸 𑀧𑀦 𑀅𑀝𑁆𑀞𑀧𑀺 𑀢𑀸𑀧𑀲𑀧𑀩𑁆𑀩𑀚𑁆𑀚𑀸 𑀇𑀫𑀸𑀳𑀺 𑀘𑀢𑀽𑀳𑀺𑀬𑁂𑀯 𑀲𑀗𑁆𑀕𑀳𑀁 𑀕𑀘𑁆𑀙𑀦𑁆𑀢𑀺. 𑀓𑀣𑀁? 𑀏𑀢𑀸𑀲𑀼 𑀳𑀺 𑀲𑀧𑀼𑀢𑁆𑀢𑀪𑀭𑀺𑀬𑀸 𑀘 𑀉𑀜𑁆𑀙𑀸𑀘𑀭𑀺𑀬𑀸 𑀘 𑀅𑀕𑀸𑀭𑀁 𑀪𑀚𑀦𑁆𑀢𑀺. 𑀅𑀦𑀕𑁆𑀕𑀺𑀧𑀓𑁆𑀓𑀺𑀓𑀸 𑀘 𑀅𑀲𑀸𑀫𑀧𑀸𑀓𑀸 𑀘 𑀅𑀕𑁆𑀬𑀸𑀕𑀸𑀭𑀁 𑀪𑀚𑀦𑁆𑀢𑀺. 𑀅𑀲𑁆𑀫𑀫𑀼𑀝𑁆𑀞𑀺𑀓𑀸 𑀘 𑀤𑀦𑁆𑀢𑀯𑀓𑁆𑀓𑀮𑀺𑀓𑀸 𑀘 𑀓𑀦𑁆𑀤𑀫𑀽𑀮𑀨𑀮𑀪𑁄𑀚𑀦𑀁 𑀪𑀚𑀦𑁆𑀢𑀺. 𑀧𑀯𑀢𑁆𑀢𑀨𑀮𑀪𑁄𑀚𑀦𑀸 𑀘 𑀧𑀡𑁆𑀟𑀼𑀧𑀮𑀸𑀲𑀺𑀓𑀸 𑀘 𑀧𑀯𑀢𑁆𑀢𑀨𑀮𑀪𑁄𑀚𑀦𑀁 𑀪𑀚𑀦𑁆𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀏𑀢𑁆𑀢𑀸𑀯𑀢𑀸 𑀘 𑀪𑀕𑀯𑀢𑀸 𑀲𑀩𑁆𑀩𑀸𑀧𑀺 𑀢𑀸𑀧𑀲𑀧𑀩𑁆𑀩𑀚𑁆𑀚𑀸 𑀦𑀺𑀤𑁆𑀤𑀺𑀝𑁆𑀞𑀸 𑀳𑁄𑀦𑁆𑀢𑀻’’𑀢𑀺.

𑁨𑁮𑁧-𑁨𑁮𑁨. 𑀇𑀤𑀸𑀦𑀺 𑀪𑀕𑀯𑀸 𑀲𑀸𑀘𑀭𑀺𑀬𑀓𑀲𑁆𑀲 𑀅𑀫𑁆𑀩𑀝𑁆𑀞𑀲𑁆𑀲 𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀤𑀸𑀬 𑀅𑀧𑀸𑀬𑀫𑀼𑀔𑀫𑁆𑀧𑀺 𑀅𑀧𑁆𑀧𑀢𑁆𑀢𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 𑀢𑀁 𑀓𑀺𑀁 𑀫𑀜𑁆𑀜𑀲𑀺 𑀅𑀫𑁆𑀩𑀝𑁆𑀞𑀸𑀢𑀺𑀆𑀤𑀺𑀫𑀸𑀳. 𑀢𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯. 𑀅𑀢𑁆𑀢𑀦𑀸 𑀆𑀧𑀸𑀬𑀺𑀓𑁄𑀧𑀺 𑀅𑀧𑀭𑀺𑀧𑀽𑀭𑀫𑀸𑀦𑁄𑀢𑀺 𑀅𑀢𑁆𑀢𑀦𑀸 𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀤𑀸𑀬 𑀆𑀧𑀸𑀬𑀺𑀓𑁂𑀦𑀸𑀧𑀺 𑀅𑀧𑀭𑀺𑀧𑀽𑀭𑀫𑀸𑀦𑁂𑀦.

𑀧𑀼𑀩𑁆𑀩𑀓𑀇𑀲𑀺𑀪𑀸𑀯𑀸𑀦𑀼𑀬𑁄𑀕𑀯𑀡𑁆𑀡𑀦𑀸

𑁨𑁮𑁩. 𑀤𑀢𑁆𑀢𑀺𑀓𑀦𑁆𑀢𑀺 𑀤𑀺𑀦𑁆𑀦𑀓𑀁. 𑀲𑀫𑁆𑀫𑀼𑀔𑀻𑀪𑀸𑀯𑀫𑁆𑀧𑀺 𑀦 𑀤𑀤𑀸𑀢𑀻𑀢𑀺 𑀓𑀲𑁆𑀫𑀸 𑀦 𑀤𑀤𑀸𑀢𑀺? 𑀲𑁄 𑀓𑀺𑀭 𑀲𑀫𑁆𑀫𑀼𑀔𑀸 𑀆𑀯𑀝𑁆𑀝𑀦𑀺𑀁 𑀦𑀸𑀫 𑀯𑀺𑀚𑁆𑀚𑀁 𑀚𑀸𑀦𑀸𑀢𑀺. 𑀬𑀤𑀸 𑀭𑀸𑀚𑀸 𑀫𑀳𑀸𑀭𑀳𑁂𑀦 𑀅𑀮𑀗𑁆𑀓𑀸𑀭𑁂𑀦 𑀅𑀮𑀗𑁆𑀓𑀢𑁄 𑀳𑁄𑀢𑀺, 𑀢𑀤𑀸 𑀭𑀜𑁆𑀜𑁄 𑀲𑀫𑀻𑀧𑁂 𑀞𑀢𑁆𑀯𑀸 𑀢𑀲𑁆𑀲 𑀅𑀮𑀗𑁆𑀓𑀸𑀭𑀲𑁆𑀲 𑀦𑀸𑀫𑀁 𑀕𑀡𑁆𑀳𑀢𑀺. 𑀢𑀲𑁆𑀲 𑀭𑀸𑀚𑀸 𑀦𑀸𑀫𑁂 𑀕𑀳𑀺𑀢𑁂 𑀦 𑀤𑁂𑀫𑀻𑀢𑀺 𑀯𑀢𑁆𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀤𑀢𑁆𑀯𑀸 𑀧𑀼𑀦 𑀙𑀡𑀤𑀺𑀯𑀲𑁂 𑀅𑀮𑀗𑁆𑀓𑀸𑀭𑀁 𑀆𑀳𑀭𑀣𑀸𑀢𑀺 𑀯𑀢𑁆𑀯𑀸, 𑀦𑀢𑁆𑀣𑀺, 𑀤𑁂𑀯, 𑀢𑀼𑀫𑁆𑀳𑁂𑀳𑀺 𑀩𑁆𑀭𑀸𑀳𑁆𑀫𑀡𑀲𑁆𑀲 𑀤𑀺𑀦𑁆𑀦𑁄𑀢𑀺 𑀯𑀼𑀢𑁆𑀢𑁄, ‘‘𑀓𑀲𑁆𑀫𑀸 𑀫𑁂 𑀤𑀺𑀦𑁆𑀦𑁄’’𑀢𑀺 𑀧𑀼𑀘𑁆𑀙𑀺. 𑀢𑁂 𑀅𑀫𑀘𑁆𑀘𑀸 ‘𑀲𑁄 𑀩𑁆𑀭𑀸𑀳𑁆𑀫𑀡𑁄 𑀲𑀫𑁆𑀫𑀼𑀔𑀸 𑀆𑀯𑀝𑁆𑀝𑀦𑀺𑀫𑀸𑀬𑀁 𑀚𑀸𑀦𑀸𑀢𑀺. 𑀢𑀸𑀬 𑀢𑀼𑀫𑁆𑀳𑁂 𑀆𑀯𑀝𑁆𑀝𑁂𑀢𑁆𑀯𑀸 𑀕𑀳𑁂𑀢𑁆𑀯𑀸 𑀕𑀘𑁆𑀙𑀢𑀻’𑀢𑀺 𑀆𑀳𑀁𑀲𑀼. 𑀅𑀧𑀭𑁂 𑀭𑀜𑁆𑀜𑀸 𑀲𑀳 𑀢𑀲𑁆𑀲 𑀅𑀢𑀺𑀲𑀳𑀸𑀬𑀪𑀸𑀯𑀁 𑀅𑀲𑀳𑀦𑁆𑀢𑀸 𑀆𑀳𑀁𑀲𑀼 𑁋 ‘‘𑀤𑁂𑀯, 𑀏𑀢𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀲𑀭𑀻𑀭𑁂 𑀲𑀗𑁆𑀔𑀨𑀮𑀺𑀢𑀓𑀼𑀝𑁆𑀞𑀁 𑀦𑀸𑀫 𑀅𑀢𑁆𑀣𑀺. 𑀢𑀼𑀫𑁆𑀳𑁂 𑀏𑀢𑀁 𑀤𑀺𑀲𑁆𑀯𑀸𑀯 𑀆𑀮𑀺𑀗𑁆𑀕𑀣 𑀧𑀭𑀸𑀫𑀲𑀣, 𑀇𑀤𑀜𑁆𑀘 𑀓𑀼𑀝𑁆𑀞𑀁 𑀦𑀸𑀫 𑀓𑀸𑀬𑀲𑀁𑀲𑀕𑁆𑀕𑀯𑀲𑁂𑀦 𑀅𑀦𑀼𑀕𑀘𑁆𑀙𑀢𑀺, 𑀫𑀸 𑀏𑀯𑀁 𑀓𑀭𑁄𑀣𑀸’’𑀢𑀺. 𑀢𑀢𑁄 𑀧𑀝𑁆𑀞𑀸𑀬 𑀢𑀲𑁆𑀲 𑀭𑀸𑀚𑀸 𑀲𑀫𑁆𑀫𑀼𑀔𑀻𑀪𑀸𑀯𑀁 𑀦 𑀤𑁂𑀢𑀺.

𑀬𑀲𑁆𑀫𑀸 𑀧𑀦 𑀲𑁄 𑀩𑁆𑀭𑀸𑀳𑁆𑀫𑀡𑁄 𑀧𑀡𑁆𑀟𑀺𑀢𑁄 𑀔𑀢𑁆𑀢𑀯𑀺𑀚𑁆𑀚𑀸𑀬 𑀓𑀼𑀲𑀮𑁄, 𑀢𑁂𑀦 𑀲𑀳 𑀫𑀦𑁆𑀢𑁂𑀢𑁆𑀯𑀸 𑀓𑀢𑀓𑀫𑁆𑀫𑀁 𑀦𑀸𑀫 𑀦 𑀯𑀺𑀭𑀼𑀚𑁆𑀛𑀢𑀺, 𑀢𑀲𑁆𑀫𑀸 𑀲𑀸𑀡𑀺𑀧𑀸𑀓𑀸𑀭𑀲𑁆𑀲 𑀅𑀦𑁆𑀢𑁄 𑀞𑀢𑁆𑀯𑀸 𑀩𑀳𑀺 𑀞𑀺𑀢𑁂𑀦 𑀢𑁂𑀦 𑀲𑀤𑁆𑀥𑀺𑀁 𑀫𑀦𑁆𑀢𑁂𑀢𑀺. 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀢𑀺𑀭𑁄 𑀤𑀼𑀲𑁆𑀲𑀦𑁆𑀢𑁂𑀦 𑀫𑀦𑁆𑀢𑁂𑀢𑀻’’𑀢𑀺. 𑀢𑀢𑁆𑀣 𑀢𑀺𑀭𑁄𑀤𑀼𑀲𑁆𑀲𑀦𑁆𑀢𑁂𑀦𑀸𑀢𑀺 𑀢𑀺𑀭𑁄𑀤𑀼𑀲𑁆𑀲𑁂𑀦. 𑀅𑀬𑀫𑁂𑀯 𑀯𑀸 𑀧𑀸𑀞𑁄. 𑀥𑀫𑁆𑀫𑀺𑀓𑀦𑁆𑀢𑀺 𑀅𑀦𑀯𑀚𑁆𑀚𑀁. 𑀧𑀬𑀸𑀢𑀦𑁆𑀢𑀺 𑀅𑀪𑀺𑀳𑀭𑀺𑀢𑁆𑀯𑀸 𑀤𑀺𑀦𑁆𑀦𑀁. 𑀓𑀣𑀁 𑀢𑀲𑁆𑀲 𑀭𑀸𑀚𑀸𑀢𑀺 𑀬𑀲𑁆𑀲 𑀭𑀜𑁆𑀜𑁄 𑀩𑁆𑀭𑀸𑀳𑁆𑀫𑀡𑁄 𑀈𑀤𑀺𑀲𑀁 𑀪𑀺𑀓𑁆𑀔𑀁 𑀧𑀝𑀺𑀕𑁆𑀕𑀡𑁆𑀳𑁂𑀬𑁆𑀬, 𑀓𑀣𑀁 𑀢𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀲𑁄 𑀭𑀸𑀚𑀸 𑀲𑀫𑁆𑀫𑀼𑀔𑀻𑀪𑀸𑀯𑀫𑁆𑀧𑀺 𑀦 𑀤𑀤𑁂𑀬𑁆𑀬. 𑀅𑀬𑀁 𑀧𑀦 𑀅𑀤𑀺𑀦𑁆𑀦𑀓𑀁 𑀫𑀸𑀬𑀸𑀬 𑀕𑀡𑁆𑀳𑀢𑀺, 𑀢𑁂𑀦𑀲𑁆𑀲 𑀲𑀫𑁆𑀫𑀼𑀔𑀻𑀪𑀸𑀯𑀁 𑀭𑀸𑀚𑀸 𑀦 𑀤𑁂𑀢𑀻𑀢𑀺 𑀦𑀺𑀝𑁆𑀞𑀫𑁂𑀢𑁆𑀣 𑀕𑀦𑁆𑀢𑀩𑁆𑀩𑀦𑁆𑀢𑀺 𑀅𑀬𑀫𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄. ‘‘𑀇𑀤𑀁 𑀧𑀦 𑀓𑀸𑀭𑀡𑀁 𑀞𑀧𑁂𑀢𑁆𑀯𑀸 𑀭𑀸𑀚𑀸𑀦𑀜𑁆𑀘𑁂𑀯 𑀩𑁆𑀭𑀸𑀳𑁆𑀫𑀡𑀜𑁆𑀘 𑀦 𑀅𑀜𑁆𑀜𑁄 𑀓𑁄𑀘𑀺 𑀚𑀸𑀦𑀸𑀢𑀺. 𑀢𑀤𑁂𑀢𑀁 𑀏𑀯𑀁 𑀭𑀳𑀲𑁆𑀲𑀫𑁆𑀧𑀺 𑀧𑀝𑀺𑀘𑁆𑀙𑀦𑁆𑀦𑀫𑁆𑀧𑀺 𑀅𑀤𑁆𑀥𑀸 𑀲𑀩𑁆𑀩𑀜𑁆𑀜𑀽 𑀲𑀫𑀡𑁄 𑀕𑁄𑀢𑀫𑁄𑀢𑀺 𑀦𑀺𑀝𑁆𑀞𑀁 𑀕𑀫𑀺𑀲𑁆𑀲𑀢𑀻’’𑀢𑀺 𑀪𑀕𑀯𑀸 𑀧𑀓𑀸𑀲𑁂𑀲𑀺.

𑁨𑁮𑁪. 𑀇𑀤𑀸𑀦𑀺 𑀅𑀬𑀜𑁆𑀘 𑀅𑀫𑁆𑀩𑀝𑁆𑀞𑁄, 𑀆𑀘𑀭𑀺𑀬𑁄 𑀘𑀲𑁆𑀲 𑀫𑀦𑁆𑀢𑁂 𑀦𑀺𑀲𑁆𑀲𑀸𑀬 𑀅𑀢𑀺𑀫𑀸𑀦𑀺𑀦𑁄. 𑀢𑁂𑀦 𑀢𑁂𑀲𑀁 𑀫𑀦𑁆𑀢𑀦𑀺𑀲𑁆𑀲𑀺𑀢𑀫𑀸𑀦𑀦𑀺𑀫𑁆𑀫𑀤𑀦𑀢𑁆𑀣𑀁 𑀉𑀢𑁆𑀢𑀭𑀺 𑀤𑁂𑀲𑀦𑀁 𑀯𑀟𑁆𑀠𑁂𑀦𑁆𑀢𑁄 𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀅𑀫𑁆𑀩𑀝𑁆𑀞, 𑀇𑀥 𑀭𑀸𑀚𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀭𑀣𑀽𑀧𑀢𑁆𑀣𑀭𑁂𑀢𑀺 𑀭𑀣𑀫𑁆𑀳𑀺 𑀭𑀜𑁆𑀜𑁄 𑀞𑀸𑀦𑀢𑁆𑀣𑀁 𑀅𑀢𑁆𑀣𑀭𑀺𑀢𑁆𑀯𑀸 𑀲𑀚𑁆𑀚𑀺𑀢𑀧𑀤𑁂𑀲𑁂. 𑀉𑀕𑁆𑀕𑁂𑀳𑀺 𑀯𑀸𑀢𑀺 𑀉𑀕𑁆𑀕𑀢𑀼𑀕𑁆𑀕𑀢𑁂𑀳𑀺 𑀯𑀸 𑀅𑀫𑀘𑁆𑀘𑁂𑀳𑀺. 𑀭𑀸𑀚𑀜𑁆𑀜𑁂𑀳𑀻𑀢𑀺 𑀅𑀦𑀪𑀺𑀲𑀺𑀢𑁆𑀢𑀓𑀼𑀫𑀸𑀭𑁂𑀳𑀺. 𑀓𑀺𑀜𑁆𑀘𑀺𑀤𑁂𑀯 𑀫𑀦𑁆𑀢𑀦𑀦𑁆𑀢𑀺 𑀅𑀲𑀼𑀓𑀲𑁆𑀫𑀺𑀁 𑀤𑁂𑀲𑁂 𑀢𑀴𑀸𑀓𑀁 𑀯𑀸 𑀫𑀸𑀢𑀺𑀓𑀁 𑀯𑀸 𑀓𑀸𑀢𑀼𑀁 𑀯𑀝𑁆𑀝𑀢𑀺, 𑀅𑀲𑀼𑀓𑀲𑁆𑀫𑀺𑀁 𑀕𑀸𑀫𑀁 𑀯𑀸 𑀦𑀺𑀕𑀫𑀁 𑀯𑀸 𑀦𑀕𑀭𑀁 𑀯𑀸 𑀦𑀺𑀯𑁂𑀲𑁂𑀢𑀼𑀦𑁆𑀢𑀺 𑀏𑀯𑀭𑀽𑀧𑀁 𑀧𑀸𑀓𑀝𑀫𑀦𑁆𑀢𑀦𑀁. 𑀢𑀤𑁂𑀯 𑀫𑀦𑁆𑀢𑀦𑀦𑁆𑀢𑀺 𑀬𑀁 𑀭𑀜𑁆𑀜𑀸 𑀫𑀦𑁆𑀢𑀺𑀢𑀁 𑀢𑀤𑁂𑀯. 𑀢𑀸𑀤𑀺𑀲𑁂𑀳𑀺𑀬𑁂𑀯 𑀲𑀻𑀲𑀼𑀓𑁆𑀔𑁂𑀧𑀪𑀫𑀼𑀓𑁆𑀔𑁂𑀧𑀸𑀤𑀻𑀳𑀺 𑀆𑀓𑀸𑀭𑁂𑀳𑀺 𑀫𑀦𑁆𑀢𑁂𑀬𑁆𑀬. 𑀭𑀸𑀚𑀪𑀡𑀺𑀢𑀦𑁆𑀢𑀺 𑀬𑀣𑀸 𑀭𑀜𑁆𑀜𑀸 𑀪𑀡𑀺𑀢𑀁, 𑀢𑀲𑁆𑀲𑀢𑁆𑀣𑀲𑁆𑀲 𑀲𑀸𑀥𑀦𑀲𑀫𑀢𑁆𑀣𑀁. 𑀲𑁄𑀧𑀺 𑀢𑀲𑁆𑀲𑀢𑁆𑀣𑀲𑁆𑀲 𑀲𑀸𑀥𑀦𑀲𑀫𑀢𑁆𑀣𑀫𑁂𑀯 𑀪𑀡𑀺𑀢𑀁 𑀪𑀡𑀢𑀻𑀢𑀺 𑀅𑀢𑁆𑀣𑁄.

𑁨𑁮𑁫. 𑀧𑀯𑀢𑁆𑀢𑀸𑀭𑁄𑀢𑀺 𑀧𑀯𑀢𑁆𑀢𑀬𑀺𑀢𑀸𑀭𑁄. 𑀬𑁂𑀲𑀦𑁆𑀢𑀺 𑀬𑁂𑀲𑀁 𑀲𑀦𑁆𑀢𑀓𑀁. 𑀫𑀦𑁆𑀢𑀧𑀤𑀦𑁆𑀢𑀺 𑀯𑁂𑀤𑀲𑀗𑁆𑀔𑀸𑀢𑀁 𑀫𑀦𑁆𑀢𑀫𑁂𑀯. 𑀕𑀻𑀢𑀦𑁆𑀢𑀺 𑀅𑀝𑁆𑀞𑀓𑀸𑀤𑀻𑀳𑀺 𑀤𑀲𑀳𑀺 𑀧𑁄𑀭𑀸𑀡𑀓𑀩𑁆𑀭𑀸𑀳𑁆𑀫𑀡𑁂𑀳𑀺 𑀲𑀭𑀲𑀫𑁆𑀧𑀢𑁆𑀢𑀺𑀯𑀲𑁂𑀦 𑀲𑀚𑁆𑀛𑀸𑀬𑀺𑀢𑀁. 𑀧𑀯𑀼𑀢𑁆𑀢𑀦𑁆𑀢𑀺 𑀅𑀜𑁆𑀜𑁂𑀲𑀁 𑀯𑀼𑀢𑁆𑀢𑀁, 𑀯𑀸𑀘𑀺𑀢𑀦𑁆𑀢𑀺 𑀅𑀢𑁆𑀣𑁄. 𑀲𑀫𑀺𑀳𑀺𑀢𑀦𑁆𑀢𑀺 𑀲𑀫𑀼𑀧𑀩𑁆𑀬𑀽𑀴𑁆𑀳𑀁 𑀭𑀸𑀲𑀺𑀓𑀢𑀁, 𑀧𑀺𑀡𑁆𑀟𑀁 𑀓𑀢𑁆𑀯𑀸 𑀞𑀧𑀺𑀢𑀦𑁆𑀢𑀺 𑀅𑀢𑁆𑀣𑁄. 𑀢𑀤𑀦𑀼𑀕𑀸𑀬𑀦𑁆𑀢𑀻𑀢𑀺 𑀏𑀢𑀭𑀳𑀺 𑀩𑁆𑀭𑀸𑀳𑁆𑀫𑀡𑀸 𑀢𑀁 𑀢𑁂𑀳𑀺 𑀧𑀼𑀩𑁆𑀩𑁂 𑀕𑀻𑀢𑀁 𑀅𑀦𑀼𑀕𑀸𑀬𑀦𑁆𑀢𑀺 𑀅𑀦𑀼𑀲𑀚𑁆𑀛𑀸𑀬𑀦𑁆𑀢𑀺. 𑀢𑀤𑀦𑀼𑀪𑀸𑀲𑀦𑁆𑀢𑀻𑀢𑀺 𑀢𑀁 𑀅𑀦𑀼𑀪𑀸𑀲𑀦𑁆𑀢𑀺, 𑀇𑀤𑀁 𑀧𑀼𑀭𑀺𑀫𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀪𑀸𑀲𑀺𑀢𑀫𑀦𑀼𑀪𑀸𑀲𑀦𑁆𑀢𑀻𑀢𑀺 𑀢𑁂𑀳𑀺 𑀪𑀸𑀲𑀺𑀢𑀁 𑀲𑀚𑁆𑀛𑀸𑀬𑀺𑀢𑀁 𑀅𑀦𑀼𑀲𑀚𑁆𑀛𑀸𑀬𑀦𑁆𑀢𑀺. 𑀯𑀸𑀘𑀺𑀢𑀫𑀦𑀼𑀯𑀸𑀘𑁂𑀦𑁆𑀢𑀻𑀢𑀺 𑀢𑁂𑀳𑀺 𑀅𑀜𑁆𑀜𑁂𑀲𑀁 𑀯𑀸𑀘𑀺𑀢𑀁 𑀅𑀦𑀼𑀯𑀸𑀘𑁂𑀦𑁆𑀢𑀺.

𑀲𑁂𑀬𑁆𑀬𑀣𑀺𑀤𑀦𑁆𑀢𑀺 𑀢𑁂 𑀓𑀢𑀫𑁂𑀳𑀺 𑀅𑀢𑁆𑀣𑁄. 𑀅𑀝𑁆𑀞𑀓𑁄𑀢𑀺𑀆𑀤𑀻𑀦𑀺 𑀢𑁂𑀲𑀁 𑀦𑀸𑀫𑀸𑀦𑀺. 𑀢𑁂 𑀓𑀺𑀭 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀑𑀮𑁄𑀓𑁂𑀢𑁆𑀯𑀸 𑀧𑀭𑀽𑀧𑀖𑀸𑀢𑀁 𑀅𑀓𑀢𑁆𑀯𑀸 𑀓𑀲𑁆𑀲𑀧𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀧𑀸𑀯𑀘𑀦𑁂𑀦 𑀲𑀳 𑀲𑀁𑀲𑀦𑁆𑀤𑀺𑀢𑁆𑀯𑀸 𑀫𑀦𑁆𑀢𑁂 𑀕𑀦𑁆𑀣𑀺𑀁𑀲𑀼. 𑀅𑀧𑀭𑀸𑀧𑀭𑁂 𑀧𑀦 𑀩𑁆𑀭𑀸𑀳𑁆𑀫𑀡𑀸 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀦𑀺 𑀧𑀓𑁆𑀔𑀺𑀧𑀺𑀢𑁆𑀯𑀸 𑀢𑀬𑁄 𑀯𑁂𑀤𑁂 𑀪𑀺𑀦𑁆𑀤𑀺𑀢𑁆𑀯𑀸 𑀩𑀼𑀤𑁆𑀥𑀯𑀘𑀦𑁂𑀦 𑀲𑀤𑁆𑀥𑀺𑀁 𑀯𑀺𑀭𑀼𑀤𑁆𑀥𑁂 𑀅𑀓𑀁𑀲𑀼. 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀻𑀢𑀺 𑀬𑁂𑀦 𑀢𑁆𑀯𑀁 𑀇𑀲𑀺 𑀪𑀯𑁂𑀬𑁆𑀬𑀸𑀲𑀺, 𑀏𑀢𑀁 𑀓𑀸𑀭𑀡𑀁 𑀦 𑀯𑀺𑀚𑁆𑀚𑀢𑀺. 𑀇𑀥 𑀪𑀕𑀯𑀸 𑀬𑀲𑁆𑀫𑀸 𑁋 ‘‘𑀏𑀲 𑀧𑀼𑀘𑁆𑀙𑀺𑀬𑀫𑀸𑀦𑁄𑀧𑀺, 𑀅𑀢𑁆𑀢𑀦𑁄 𑀅𑀯𑀢𑁆𑀣𑀭𑀡𑀪𑀸𑀯𑀁 𑀜𑀢𑁆𑀯𑀸 𑀧𑀝𑀺𑀯𑀘𑀦𑀁 𑀦 𑀤𑀲𑁆𑀲𑀢𑀻’’𑀢𑀺 𑀚𑀸𑀦𑀸𑀢𑀺, 𑀢𑀲𑁆𑀫𑀸 𑀧𑀝𑀺𑀜𑁆𑀜𑀁 𑀅𑀕𑀳𑁂𑀢𑁆𑀯𑀸𑀯 𑀢𑀁 𑀇𑀲𑀺𑀪𑀸𑀯𑀁 𑀧𑀝𑀺𑀓𑁆𑀔𑀺𑀧𑀺.

𑁨𑁮𑁬. 𑀇𑀤𑀸𑀦𑀺 𑀬𑀲𑁆𑀫𑀸 𑀢𑁂 𑀧𑁄𑀭𑀸𑀡𑀸 𑀤𑀲 𑀩𑁆𑀭𑀸𑀳𑁆𑀫𑀡𑀸 𑀦𑀺𑀭𑀸𑀫𑀕𑀦𑁆𑀥𑀸 𑀅𑀦𑀺𑀢𑁆𑀣𑀺𑀕𑀦𑁆𑀥𑀸 𑀭𑀚𑁄𑀚𑀮𑁆𑀮𑀥𑀭𑀸 𑀩𑁆𑀭𑀳𑁆𑀫𑀘𑀸𑀭𑀺𑀦𑁄 𑀅𑀭𑀜𑁆𑀜𑀸𑀬𑀢𑀦𑁂 𑀧𑀩𑁆𑀩𑀢𑀧𑀸𑀤𑁂𑀲𑀼 𑀯𑀦𑀫𑀽𑀮𑀨𑀮𑀸𑀳𑀸𑀭𑀸 𑀯𑀲𑀺𑀁𑀲𑀼. 𑀬𑀤𑀸 𑀓𑀢𑁆𑀣𑀘𑀺 𑀕𑀦𑁆𑀢𑀼𑀓𑀸𑀫𑀸 𑀳𑁄𑀦𑁆𑀢𑀺, 𑀇𑀤𑁆𑀥𑀺𑀬𑀸 𑀆𑀓𑀸𑀲𑁂𑀦𑁂𑀯 𑀕𑀘𑁆𑀙𑀦𑁆𑀢𑀺, 𑀦𑀢𑁆𑀣𑀺 𑀢𑁂𑀲𑀁 𑀬𑀸𑀦𑁂𑀦 𑀓𑀺𑀘𑁆𑀘𑀁. 𑀲𑀩𑁆𑀩𑀤𑀺𑀲𑀸𑀲𑀼 𑀘 𑀦𑁂𑀲𑀁 𑀫𑁂𑀢𑁆𑀢𑀸𑀤𑀺𑀩𑁆𑀭𑀳𑁆𑀫𑀯𑀺𑀳𑀸𑀭𑀪𑀸𑀯𑀦𑀸𑀯 𑀆𑀭𑀓𑁆𑀔𑀸 𑀳𑁄𑀢𑀺, 𑀦𑀢𑁆𑀣𑀺 𑀢𑁂𑀲𑀁 𑀧𑀸𑀓𑀸𑀭𑀧𑀼𑀭𑀺𑀲𑀕𑀼𑀢𑁆𑀢𑀻𑀳𑀺 𑀅𑀢𑁆𑀣𑁄. 𑀇𑀫𑀺𑀦𑀸 𑀘 𑀅𑀫𑁆𑀩𑀝𑁆𑀞𑁂𑀦 𑀲𑀼𑀢𑀧𑀼𑀩𑁆𑀩𑀸 𑀢𑁂𑀲𑀁 𑀧𑀝𑀺𑀧𑀢𑁆𑀢𑀺; 𑀢𑀲𑁆𑀫𑀸 𑀇𑀫𑀲𑁆𑀲 𑀲𑀸𑀘𑀭𑀺𑀬𑀓𑀲𑁆𑀲 𑀢𑁂𑀲𑀁 𑀧𑀝𑀺𑀧𑀢𑁆𑀢𑀺𑀢𑁄 𑀆𑀭𑀓𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 𑁋 ‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀅𑀫𑁆𑀩𑀝𑁆𑀞𑀸’’𑀢𑀺𑀆𑀤𑀺𑀫𑀸𑀳.

𑀢𑀢𑁆𑀣 𑀯𑀺𑀘𑀺𑀢𑀓𑀸𑀴𑀓𑀦𑁆𑀢𑀺 𑀯𑀺𑀘𑀺𑀦𑀺𑀢𑁆𑀯𑀸 𑀅𑀧𑀦𑀻𑀢𑀓𑀸𑀴𑀓𑀁. 𑀯𑁂𑀞𑀓𑀦𑀢𑀧𑀲𑁆𑀲𑀸𑀳𑀻𑀢𑀺 𑀤𑀼𑀲𑁆𑀲𑀧𑀝𑁆𑀝𑀤𑀼𑀲𑁆𑀲𑀯𑁂𑀡𑀺 𑀆𑀤𑀻𑀳𑀺 𑀯𑁂𑀞𑀓𑁂𑀳𑀺 𑀦𑀫𑀺𑀢𑀨𑀸𑀲𑀼𑀓𑀸𑀳𑀺. 𑀓𑀼𑀢𑁆𑀢𑀯𑀸𑀮𑁂𑀳𑀻𑀢𑀺 𑀲𑁄𑀪𑀸𑀓𑀭𑀡𑀢𑁆𑀣𑀁 𑀓𑀧𑁆𑀧𑁂𑀢𑀼𑀁, 𑀬𑀼𑀢𑁆𑀢𑀝𑁆𑀞𑀸𑀦𑁂𑀲𑀼 𑀓𑀧𑁆𑀧𑀺𑀢𑀯𑀸𑀮𑁂𑀳𑀺. 𑀏𑀢𑁆𑀣 𑀘 𑀯𑀴𑀯𑀸𑀦𑀁𑀬𑁂𑀯 𑀯𑀸𑀮𑀸 𑀓𑀧𑁆𑀧𑀺𑀢𑀸, 𑀦 𑀭𑀣𑀸𑀦𑀁, 𑀯𑀴𑀯𑀧𑀬𑀼𑀢𑁆𑀢𑀢𑁆𑀢𑀸 𑀧𑀦 𑀭𑀣𑀸𑀧𑀺 ‘‘𑀓𑀼𑀢𑁆𑀢𑀯𑀸𑀮𑀸’’𑀢𑀺 𑀯𑀼𑀢𑁆𑀢𑀸. 𑀉𑀓𑁆𑀓𑀺𑀡𑁆𑀡𑀧𑀭𑀺𑀔𑀸𑀲𑀽𑀢𑀺 𑀔𑀢𑀧𑀭𑀺𑀔𑀸𑀲𑀼. 𑀑𑀓𑁆𑀔𑀺𑀢𑁆𑀢𑀧𑀮𑀺𑀖𑀸𑀲𑀽𑀢𑀺 𑀞𑀧𑀺𑀢𑀧𑀮𑀺𑀖𑀸𑀲𑀼. 𑀦𑀕𑀭𑀽𑀧𑀓𑀸𑀭𑀺𑀓𑀸𑀲𑀽𑀢𑀺 𑀏𑀢𑁆𑀣 𑀉𑀧𑀓𑀸𑀭𑀺𑀓𑀸𑀢𑀺 𑀧𑀭𑁂𑀲𑀁 𑀆𑀭𑁄𑀳𑀦𑀺𑀯𑀸𑀭𑀡𑀢𑁆𑀣𑀁 𑀲𑀫𑀦𑁆𑀢𑀸 𑀦𑀕𑀭𑀁 𑀧𑀸𑀓𑀸𑀭𑀲𑁆𑀲 𑀅𑀥𑁄𑀪𑀸𑀕𑁂 𑀓𑀢𑀲𑀼𑀥𑀸𑀓𑀫𑁆𑀫𑀁 𑀯𑀼𑀘𑁆𑀘𑀢𑀺. 𑀇𑀥 𑀧𑀦 𑀢𑀸𑀳𑀺 𑀉𑀧𑀓𑀸𑀭𑀺𑀓𑀸𑀳𑀺 𑀬𑀼𑀢𑁆𑀢𑀸𑀦𑀺 𑀦𑀕𑀭𑀸𑀦𑁂𑀯 ‘‘𑀦𑀕𑀭𑀽𑀧𑀓𑀸𑀭𑀺𑀓𑀸𑀬𑁄’’𑀢𑀺 𑀅𑀥𑀺𑀧𑁆𑀧𑁂𑀢𑀸𑀦𑀺. 𑀭𑀓𑁆𑀔𑀸𑀧𑁂𑀦𑁆𑀢𑀻𑀢𑀺 𑀢𑀸𑀤𑀺𑀲𑁂𑀲𑀼 𑀦𑀕𑀭𑁂𑀲𑀼 𑀯𑀲𑀦𑁆𑀢𑀸𑀧𑀺 𑀅𑀢𑁆𑀢𑀸𑀦𑀁 𑀭𑀓𑁆𑀔𑀸𑀧𑁂𑀦𑁆𑀢𑀺. 𑀓𑀗𑁆𑀔𑀸𑀢𑀺 ‘‘𑀲𑀩𑁆𑀩𑀜𑁆𑀜𑀽, 𑀦 𑀲𑀩𑁆𑀩𑀜𑁆𑀜𑀽’’𑀢𑀺 𑀏𑀯𑀁 𑀲𑀁𑀲𑀬𑁄. 𑀯𑀺𑀫𑀢𑀻𑀢𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁, 𑀯𑀺𑀭𑀽𑀧𑀸 𑀫𑀢𑀺, 𑀯𑀺𑀦𑀺𑀘𑁆𑀙𑀺𑀦𑀺𑀢𑀼𑀁 𑀅𑀲𑀫𑀢𑁆𑀣𑀸𑀢𑀺 𑀅𑀢𑁆𑀣𑁄. 𑀇𑀤𑀁 𑀪𑀕𑀯𑀸 ‘‘𑀅𑀫𑁆𑀩𑀝𑁆𑀞𑀲𑁆𑀲 𑀇𑀫𑀺𑀦𑀸 𑀅𑀢𑁆𑀢𑀪𑀸𑀯𑁂𑀦 𑀫𑀕𑁆𑀕𑀧𑀸𑀢𑀼𑀪𑀸𑀯𑁄 𑀦𑀢𑁆𑀣𑀺, 𑀓𑁂𑀯𑀮𑀁 𑀤𑀺𑀯𑀲𑁄 𑀯𑀻𑀢𑀺𑀯𑀢𑁆𑀢𑀢𑀺, 𑀅𑀬𑀁 𑀔𑁄 𑀧𑀦 𑀮𑀓𑁆𑀔𑀡𑀧𑀭𑀺𑀬𑁂𑀲𑀦𑀢𑁆𑀣𑀁 𑀆𑀕𑀢𑁄, 𑀢𑀫𑁆𑀧𑀺 𑀓𑀺𑀘𑁆𑀘𑀁 𑀦𑀲𑁆𑀲𑀭𑀢𑀺. 𑀳𑀦𑁆𑀤𑀲𑁆𑀲 𑀲𑀢𑀺𑀚𑀦𑀦𑀢𑁆𑀣𑀁 𑀦𑀬𑀁 𑀤𑁂𑀫𑀻’’𑀢𑀺 𑀆𑀳.

𑀤𑁆𑀯𑁂𑀮𑀓𑁆𑀔𑀡𑀤𑀲𑁆𑀲𑀦𑀯𑀡𑁆𑀡𑀦𑀸

𑁨𑁮𑁭. 𑀏𑀯𑀁 𑀯𑀢𑁆𑀯𑀸 𑀧𑀦 𑀬𑀲𑁆𑀫𑀸 𑀩𑀼𑀤𑁆𑀥𑀸𑀦𑀁 𑀦𑀺𑀲𑀺𑀦𑁆𑀦𑀸𑀦𑀁 𑀯𑀸 𑀦𑀺𑀧𑀦𑁆𑀦𑀸𑀦𑀁 𑀯𑀸 𑀓𑁄𑀘𑀺 𑀮𑀓𑁆𑀔𑀡𑀁 𑀧𑀭𑀺𑀬𑁂𑀲𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀞𑀺𑀢𑀸𑀦𑀁 𑀧𑀦 𑀘𑀗𑁆𑀓𑀫𑀦𑁆𑀢𑀸𑀦𑀁 𑀯𑀸 𑀲𑀓𑁆𑀓𑁄𑀢𑀺. 𑀆𑀘𑀺𑀡𑁆𑀡𑀜𑁆𑀘𑁂𑀢𑀁 𑀩𑀼𑀤𑁆𑀥𑀸𑀦𑀁 𑀮𑀓𑁆𑀔𑀡𑀧𑀭𑀺𑀬𑁂𑀲𑀦𑀢𑁆𑀣𑀁 𑀆𑀕𑀢𑀪𑀸𑀯𑀁 𑀜𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀘𑀗𑁆𑀓𑀫𑀸𑀥𑀺𑀝𑁆𑀞𑀸𑀦𑀁 𑀦𑀸𑀫, 𑀢𑁂𑀦 𑀪𑀕𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀩𑀳𑀺 𑀦𑀺𑀓𑁆𑀔𑀦𑁆𑀢𑁄. 𑀢𑀲𑁆𑀫𑀸 𑀅𑀣 𑀔𑁄 𑀪𑀕𑀯𑀸𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀲𑀫𑀦𑁆𑀦𑁂𑀲𑀻𑀢𑀺 𑀕𑀯𑁂𑀲𑀺, 𑀏𑀓𑀁 𑀤𑁆𑀯𑁂𑀢𑀺 𑀯𑀸 𑀕𑀡𑀬𑀦𑁆𑀢𑁄 𑀲𑀫𑀸𑀦𑀬𑀺. 𑀬𑁂𑀪𑀼𑀬𑁆𑀬𑁂𑀦𑀸𑀢𑀺 𑀧𑀸𑀬𑁂𑀦, 𑀩𑀳𑀼𑀓𑀸𑀦𑀺 𑀅𑀤𑁆𑀤𑀲, 𑀅𑀧𑁆𑀧𑀸𑀦𑀺 𑀦 𑀅𑀤𑁆𑀤𑀲𑀸𑀢𑀺 𑀅𑀢𑁆𑀣𑁄. 𑀢𑀢𑁄 𑀬𑀸𑀦𑀺 𑀦 𑀅𑀤𑁆𑀤𑀲 𑀢𑁂𑀲𑀁 𑀤𑀻𑀧𑀦𑀢𑁆𑀣𑀁 𑀯𑀼𑀢𑁆𑀢𑀁 𑁋 ‘‘𑀞𑀧𑁂𑀢𑁆𑀯𑀸 𑀤𑁆𑀯𑁂’’𑀢𑀺. 𑀓𑀗𑁆𑀔𑀢𑀻𑀢𑀺 ‘‘𑀅𑀳𑁄 𑀯𑀢 𑀧𑀲𑁆𑀲𑁂𑀬𑁆𑀬’’𑀦𑁆𑀢𑀺 𑀧𑀢𑁆𑀣𑀦𑀁 𑀉𑀧𑁆𑀧𑀸𑀤𑁂𑀢𑀺. 𑀯𑀺𑀘𑀺𑀓𑀺𑀘𑁆𑀙𑀢𑀻𑀢𑀺 𑀢𑀢𑁄 𑀢𑀢𑁄 𑀢𑀸𑀦𑀺 𑀯𑀺𑀘𑀺𑀦𑀦𑁆𑀢𑁄 𑀓𑀺𑀘𑁆𑀙𑀢𑀺 𑀦 𑀲𑀓𑁆𑀓𑁄𑀢𑀺 𑀤𑀝𑁆𑀞𑀼𑀁. 𑀦𑀸𑀥𑀺𑀫𑀼𑀘𑁆𑀘𑀢𑀻𑀢𑀺 𑀢𑀸𑀬 𑀯𑀺𑀘𑀺𑀓𑀺𑀘𑁆𑀙𑀸𑀬 𑀲𑀦𑁆𑀦𑀺𑀝𑁆𑀞𑀸𑀦𑀁 𑀦 𑀕𑀘𑁆𑀙𑀢𑀺. 𑀦 𑀲𑀫𑁆𑀧𑀲𑀻𑀤𑀢𑀻𑀢𑀺 𑀢𑀢𑁄 𑁋 ‘‘𑀧𑀭𑀺𑀧𑀼𑀡𑁆𑀡𑀮𑀓𑁆𑀔𑀡𑁄 𑀅𑀬’’𑀦𑁆𑀢𑀺 𑀪𑀕𑀯𑀢𑀺 𑀧𑀲𑀸𑀤𑀁 𑀦𑀸𑀧𑀚𑁆𑀚𑀢𑀺. 𑀓𑀗𑁆𑀔𑀸𑀬 𑀯𑀸 𑀤𑀼𑀩𑁆𑀩𑀮𑀸 𑀯𑀺𑀫𑀢𑀺 𑀯𑀼𑀢𑁆𑀢𑀸, 𑀯𑀺𑀘𑀺𑀓𑀺𑀘𑁆𑀙𑀸𑀬 𑀫𑀚𑁆𑀛𑀺𑀫𑀸, 𑀅𑀦𑀥𑀺𑀫𑀼𑀘𑁆𑀘𑀦𑀢𑀸𑀬 𑀩𑀮𑀯𑀢𑀻, 𑀅𑀲𑀫𑁆𑀧𑀲𑀸𑀤𑁂𑀦 𑀢𑁂𑀳𑀺 𑀢𑀻𑀳𑀺 𑀥𑀫𑁆𑀫𑁂𑀳𑀺 𑀘𑀺𑀢𑁆𑀢𑀲𑁆𑀲 𑀓𑀸𑀮𑀼𑀲𑀺𑀬𑀪𑀸𑀯𑁄. 𑀓𑁄𑀲𑁄𑀳𑀺𑀢𑁂𑀢𑀺 𑀯𑀢𑁆𑀣𑀺𑀓𑁄𑀲𑁂𑀦 𑀧𑀝𑀺𑀘𑁆𑀙𑀦𑁆𑀦𑁂. 𑀯𑀢𑁆𑀣𑀕𑀼𑀬𑁆𑀳𑁂𑀢𑀺 𑀅𑀗𑁆𑀕𑀚𑀸𑀢𑁂 𑀪𑀕𑀯𑀢𑁄 𑀳𑀺 𑀯𑀭𑀯𑀸𑀭𑀡𑀲𑁆𑀲𑁂𑀯 𑀓𑁄𑀲𑁄𑀳𑀺𑀢𑀁 𑀯𑀢𑁆𑀣𑀕𑀼𑀬𑁆𑀳𑀁 𑀲𑀼𑀯𑀡𑁆𑀡𑀯𑀡𑁆𑀡𑀁 𑀧𑀤𑀼𑀫𑀕𑀩𑁆𑀪𑀲𑀫𑀸𑀦𑀁. 𑀢𑀁 𑀲𑁄 𑀯𑀢𑁆𑀣𑀧𑀝𑀺𑀘𑁆𑀙𑀦𑁆𑀦𑀢𑁆𑀢𑀸 𑀅𑀧𑀲𑁆𑀲𑀦𑁆𑀢𑁄, 𑀅𑀦𑁆𑀢𑁄𑀫𑀼𑀔𑀕𑀢𑀸𑀬 𑀘 𑀚𑀺𑀯𑁆𑀳𑀸𑀬 𑀧𑀳𑀽𑀢𑀪𑀸𑀯𑀁 𑀅𑀲𑀮𑁆𑀮𑀓𑁆𑀔𑁂𑀦𑁆𑀢𑁄 𑀢𑁂𑀲𑀼 𑀤𑁆𑀯𑀻𑀲𑀼 𑀮𑀓𑁆𑀔𑀡𑁂𑀲𑀼 𑀓𑀗𑁆𑀔𑀻 𑀅𑀳𑁄𑀲𑀺 𑀯𑀺𑀘𑀺𑀓𑀺𑀘𑁆𑀙𑀻.

𑁨𑁮𑁮. 𑀢𑀣𑀸𑀭𑀽𑀧𑀦𑁆𑀢𑀺 𑀢𑀁 𑀭𑀽𑀧𑀁. 𑀓𑀺𑀫𑁂𑀢𑁆𑀣 𑀅𑀜𑁆𑀜𑁂𑀦 𑀯𑀢𑁆𑀢𑀩𑁆𑀩𑀁? 𑀯𑀼𑀢𑁆𑀢𑀫𑁂𑀢𑀁 𑀦𑀸𑀕𑀲𑁂𑀦𑀢𑁆𑀣𑁂𑀭𑁂𑀦𑁂𑀯 𑀫𑀺𑀮𑀺𑀦𑁆𑀤𑀭𑀜𑁆𑀜𑀸 𑀧𑀼𑀝𑁆𑀞𑁂𑀦 𑁋 ‘‘𑀤𑀼𑀓𑁆𑀓𑀭𑀁, 𑀪𑀦𑁆𑀢𑁂, 𑀦𑀸𑀕𑀲𑁂𑀦, 𑀪𑀕𑀯𑀢𑀸 𑀓𑀢𑀦𑁆𑀢𑀺. 𑀓𑀺𑀁 𑀫𑀳𑀸𑀭𑀸𑀚𑀸𑀢𑀺? 𑀫𑀳𑀸𑀚𑀦𑁂𑀦 𑀳𑀺𑀭𑀺𑀓𑀭𑀡𑁄𑀓𑀸𑀲𑀁 𑀩𑁆𑀭𑀳𑁆𑀫𑀸𑀬𑀼 𑀩𑁆𑀭𑀸𑀳𑁆𑀫𑀡𑀲𑁆𑀲 𑀘 𑀅𑀦𑁆𑀢𑁂𑀯𑀸𑀲𑀺 𑀉𑀢𑁆𑀢𑀭𑀲𑁆𑀲 𑀘, 𑀩𑀸𑀯𑀭𑀺𑀲𑁆𑀲 𑀅𑀦𑁆𑀢𑁂𑀯𑀸𑀲𑀻𑀦𑀁 𑀲𑁄𑀴𑀲𑀩𑁆𑀭𑀸𑀳𑁆𑀫𑀡𑀸𑀦𑀜𑁆𑀘, 𑀲𑁂𑀮𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀘 𑀅𑀦𑁆𑀢𑁂𑀯𑀸𑀲𑀻𑀦𑀁 𑀢𑀺𑀲𑀢𑀫𑀸𑀡𑀯𑀸𑀦𑀜𑁆𑀘 𑀤𑀲𑁆𑀲𑁂𑀲𑀺, 𑀪𑀦𑁆𑀢𑁂𑀢𑀺. 𑀦, 𑀫𑀳𑀸𑀭𑀸𑀚, 𑀪𑀕𑀯𑀸 𑀕𑀼𑀬𑁆𑀳𑀁 𑀤𑀲𑁆𑀲𑁂𑀲𑀺. 𑀙𑀸𑀬𑀁 𑀪𑀕𑀯𑀸 𑀤𑀲𑁆𑀲𑁂𑀲𑀺. 𑀇𑀤𑁆𑀥𑀺𑀬𑀸 𑀅𑀪𑀺𑀲𑀗𑁆𑀔𑀭𑀺𑀢𑁆𑀯𑀸 𑀦𑀺𑀯𑀸𑀲𑀦𑀦𑀺𑀯𑀢𑁆𑀣𑀁 𑀓𑀸𑀬𑀩𑀦𑁆𑀥𑀦𑀩𑀤𑁆𑀥𑀁 𑀘𑀻𑀯𑀭𑀧𑀸𑀭𑀼𑀢𑀁 𑀙𑀸𑀬𑀸𑀭𑀽𑀧𑀓𑀫𑀢𑁆𑀢𑀁 𑀤𑀲𑁆𑀲𑁂𑀲𑀺 𑀫𑀳𑀸𑀭𑀸𑀚𑀸𑀢𑀺. 𑀙𑀸𑀬𑀁 𑀤𑀺𑀝𑁆𑀞𑁂 𑀲𑀢𑀺 𑀤𑀺𑀝𑁆𑀞𑀁𑀬𑁂𑀯 𑀦𑀦𑀼, 𑀪𑀦𑁆𑀢𑁂𑀢𑀺? 𑀢𑀺𑀝𑁆𑀞𑀢𑁂𑀢𑀁, 𑀫𑀳𑀸𑀭𑀸𑀚, 𑀳𑀤𑀬𑀭𑀽𑀧𑀁 𑀤𑀺𑀲𑁆𑀯𑀸 𑀩𑀼𑀚𑁆𑀛𑀦𑀓𑀲𑀢𑁆𑀢𑁄 𑀪𑀯𑁂𑀬𑁆𑀬, 𑀳𑀤𑀬𑀫𑀁𑀲𑀁 𑀦𑀻𑀳𑀭𑀺𑀢𑁆𑀯𑀸 𑀤𑀲𑁆𑀲𑁂𑀬𑁆𑀬 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄𑀢𑀺. 𑀓𑀮𑁆𑀮𑁄𑀲𑀺, 𑀪𑀦𑁆𑀢𑁂, 𑀦𑀸𑀕𑀲𑁂𑀦𑀸’’𑀢𑀺.

𑀦𑀺𑀦𑁆𑀦𑀸𑀫𑁂𑀢𑁆𑀯𑀸𑀢𑀺 𑀦𑀻𑀳𑀭𑀺𑀢𑁆𑀯𑀸. 𑀅𑀦𑀼𑀫𑀲𑀻𑀢𑀺 𑀓𑀣𑀺𑀦𑀲𑀽𑀘𑀺𑀁 𑀯𑀺𑀬 𑀓𑀢𑁆𑀯𑀸 𑀅𑀦𑀼𑀫𑀚𑁆𑀚𑀺, 𑀢𑀣𑀸𑀓𑀭𑀡𑁂𑀦 𑀘𑁂𑀢𑁆𑀣 𑀫𑀼𑀤𑀼𑀪𑀸𑀯𑁄, 𑀓𑀡𑁆𑀡𑀲𑁄𑀢𑀸𑀦𑀼𑀫𑀲𑀦𑁂𑀦 𑀤𑀻𑀖𑀪𑀸𑀯𑁄, 𑀦𑀸𑀲𑀺𑀓𑀲𑁄𑀢𑀸𑀦𑀼𑀫𑀲𑀦𑁂𑀦 𑀢𑀦𑀼𑀪𑀸𑀯𑁄, 𑀦𑀮𑀸𑀝𑀘𑁆𑀙𑀸𑀤𑀦𑁂𑀦 𑀧𑀼𑀣𑀼𑀮𑀪𑀸𑀯𑁄 𑀧𑀓𑀸𑀲𑀺𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑁨𑁮𑁯. 𑀧𑀝𑀺𑀫𑀸𑀦𑁂𑀦𑁆𑀢𑁄𑀢𑀺 𑀆𑀕𑀫𑁂𑀦𑁆𑀢𑁄, 𑀆𑀕𑀫𑀦𑀫𑀲𑁆𑀲 𑀧𑀢𑁆𑀣𑁂𑀦𑁆𑀢𑁄 𑀉𑀤𑀺𑀓𑁆𑀔𑀦𑁆𑀢𑁄𑀢𑀺 𑀅𑀢𑁆𑀣𑁄.

𑁨𑁯𑁦. 𑀓𑀣𑀸𑀲𑀮𑁆𑀮𑀸𑀧𑁄𑀢𑀺 𑀓𑀣𑀸 𑀘 𑀲𑀮𑁆𑀮𑀸𑀧𑁄 𑀘, 𑀓𑀣𑀦𑀁 𑀧𑀝𑀺𑀓𑀣𑀦𑀦𑁆𑀢𑀺 𑀅𑀢𑁆𑀣𑁄.

𑁨𑁯𑁧. 𑀅𑀳𑁄 𑀯𑀢𑀸𑀢𑀺 𑀕𑀭𑀳𑀯𑀘𑀦𑀫𑁂𑀢𑀁. 𑀭𑁂𑀢𑀺 𑀇𑀤𑀁 𑀳𑀻𑀴𑀦𑀯𑀲𑁂𑀦 𑀆𑀫𑀦𑁆𑀢𑀦𑀁. 𑀧𑀡𑁆𑀟𑀺𑀢𑀓𑀸𑀢𑀺 𑀢𑀫𑁂𑀯 𑀚𑀺𑀕𑀼𑀘𑁆𑀙𑀦𑁆𑀢𑁄 𑀆𑀳. 𑀲𑁂𑀲𑀧𑀤𑀤𑁆𑀯𑀬𑁂𑀧𑀺 𑀏𑀲𑁂𑀯 𑀦𑀬𑁄. 𑀏𑀯𑀭𑀽𑀧𑁂𑀦 𑀓𑀺𑀭 𑀪𑁄 𑀧𑀼𑀭𑀺𑀲𑁄 𑀅𑀢𑁆𑀣𑀘𑀭𑀓𑁂𑀦𑀸𑀢𑀺 𑀇𑀤𑀁 𑀬𑀸𑀤𑀺𑀲𑁄 𑀢𑁆𑀯𑀁, 𑀏𑀤𑀺𑀲𑁂 𑀅𑀢𑁆𑀣𑀘𑀭𑀓𑁂 𑀳𑀺𑀢𑀓𑀸𑀭𑀓𑁂 𑀲𑀢𑀺 𑀧𑀼𑀭𑀺𑀲𑁄 𑀦𑀺𑀭𑀬𑀁𑀬𑁂𑀯 𑀕𑀘𑁆𑀙𑁂𑀬𑁆𑀬, 𑀦 𑀅𑀜𑁆𑀜𑀢𑁆𑀭𑀸𑀢𑀺 𑀇𑀫𑀫𑀢𑁆𑀣𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀆𑀲𑀚𑁆𑀚 𑀆𑀲𑀚𑁆𑀚𑀸𑀢𑀺 𑀖𑀝𑁆𑀝𑁂𑀢𑁆𑀯𑀸 𑀖𑀝𑁆𑀝𑁂𑀢𑁆𑀯𑀸. 𑀅𑀫𑁆𑀳𑁂𑀧𑀺 𑀏𑀯𑀁 𑀉𑀧𑀦𑁂𑀬𑁆𑀬 𑀉𑀧𑀦𑁂𑀬𑁆𑀬𑀸𑀢𑀺 𑀩𑁆𑀭𑀸𑀳𑁆𑀫𑀡𑁄 𑀔𑁄 𑀧𑀦 𑀅𑀫𑁆𑀩𑀝𑁆𑀞 𑀧𑁄𑀓𑁆𑀔𑀭𑀲𑀸𑀢𑀻𑀢𑀺𑀆𑀤𑀻𑀦𑀺 𑀯𑀢𑁆𑀯𑀸 𑀏𑀯𑀁 𑀉𑀧𑀦𑁂𑀢𑁆𑀯𑀸 𑀉𑀧𑀦𑁂𑀢𑁆𑀯𑀸 𑀧𑀝𑀺𑀘𑁆𑀙𑀦𑁆𑀦𑀁 𑀓𑀸𑀭𑀡𑀁 𑀆𑀯𑀺𑀓𑀭𑀺𑀢𑁆𑀯𑀸 𑀲𑀼𑀝𑁆𑀞𑀼 𑀤𑀸𑀲𑀸𑀤𑀺𑀪𑀸𑀯𑀁 𑀆𑀭𑁄𑀧𑁂𑀢𑁆𑀯𑀸 𑀅𑀯𑀘, 𑀢𑀬𑀸 𑀅𑀫𑁆𑀳𑁂 𑀅𑀓𑁆𑀓𑁄𑀲𑀸𑀧𑀺𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀧𑀤𑀲𑀸𑀬𑁂𑀯 𑀧𑀯𑀢𑁆𑀢𑁂𑀲𑀻𑀢𑀺 𑀧𑀸𑀤𑁂𑀦 𑀧𑀳𑀭𑀺𑀢𑁆𑀯𑀸 𑀪𑀽𑀫𑀺𑀬𑀁 𑀧𑀸𑀢𑁂𑀲𑀺. 𑀬𑀜𑁆𑀘 𑀲𑁄 𑀧𑀼𑀩𑁆𑀩𑁂 𑀆𑀘𑀭𑀺𑀬𑁂𑀦 𑀲𑀤𑁆𑀥𑀺𑀁 𑀭𑀣𑀁 𑀆𑀭𑀼𑀳𑀺𑀢𑁆𑀯𑀸 𑀲𑀸𑀭𑀣𑀺 𑀳𑀼𑀢𑁆𑀯𑀸 𑀅𑀕𑀫𑀸𑀲𑀺, 𑀢𑀫𑁆𑀧𑀺𑀲𑁆𑀲 𑀞𑀸𑀦𑀁 𑀅𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀭𑀣𑀲𑁆𑀲 𑀧𑀼𑀭𑀢𑁄 𑀧𑀤𑀲𑀸 𑀬𑁂𑀯𑀲𑁆𑀲 𑀕𑀫𑀦𑀁 𑀅𑀓𑀸𑀲𑀺.

𑀧𑁄𑀓𑁆𑀔𑀭𑀲𑀸𑀢𑀺𑀩𑀼𑀤𑁆𑀥𑀽𑀧𑀲𑀗𑁆𑀓𑀫𑀦𑀯𑀡𑁆𑀡𑀦𑀸

𑁨𑁯𑁨-𑁨𑁯𑁬. 𑀅𑀢𑀺𑀯𑀺𑀓𑀸𑀮𑁄𑀢𑀺 𑀲𑀼𑀝𑁆𑀞𑀼 𑀯𑀺𑀓𑀸𑀮𑁄, 𑀲𑀫𑁆𑀫𑁄𑀤𑀦𑀻𑀬𑀓𑀣𑀸𑀬𑀧𑀺 𑀓𑀸𑀮𑁄 𑀦𑀢𑁆𑀣𑀺. 𑀆𑀕𑀫𑀸 𑀦𑀼 𑀔𑁆𑀯𑀺𑀥 𑀪𑁄𑀢𑀺 𑀆𑀕𑀫𑀸 𑀦𑀼 𑀔𑁄 𑀇𑀥 𑀪𑁄. 𑀅𑀥𑀺𑀯𑀸𑀲𑁂𑀢𑀽𑀢𑀺 𑀲𑀫𑁆𑀧𑀝𑀺𑀘𑁆𑀙𑀢𑀼. 𑀅𑀚𑁆𑀚𑀢𑀦𑀸𑀬𑀸𑀢𑀺 𑀬𑀁 𑀫𑁂 𑀢𑀼𑀫𑁆𑀳𑁂𑀲𑀼 𑀓𑀸𑀭𑀁 𑀓𑀭𑁄𑀢𑁄 𑀅𑀚𑁆𑀚 𑀪𑀯𑀺𑀲𑁆𑀲𑀢𑀺 𑀧𑀼𑀜𑁆𑀜𑀜𑁆𑀘 𑀧𑀻𑀢𑀺𑀧𑀸𑀫𑁄𑀚𑁆𑀚𑀜𑁆𑀘 𑀢𑀤𑀢𑁆𑀣𑀸𑀬. 𑀅𑀥𑀺𑀯𑀸𑀲𑁂𑀲𑀺 𑀪𑀕𑀯𑀸 𑀢𑀼𑀡𑁆𑀳𑀻𑀪𑀸𑀯𑁂𑀦𑀸𑀢𑀺 𑀪𑀕𑀯𑀸 𑀓𑀸𑀬𑀗𑁆𑀕𑀁 𑀯𑀸 𑀯𑀸𑀘𑀗𑁆𑀕𑀁 𑀯𑀸 𑀅𑀘𑁄𑀧𑁂𑀢𑁆𑀯𑀸 𑀅𑀩𑁆𑀪𑀦𑁆𑀢𑀭𑁂𑀬𑁂𑀯 𑀔𑀦𑁆𑀢𑀺𑀁 𑀥𑀸𑀭𑁂𑀦𑁆𑀢𑁄 𑀢𑀼𑀡𑁆𑀳𑀻𑀪𑀸𑀯𑁂𑀦 𑀅𑀥𑀺𑀯𑀸𑀲𑁂𑀲𑀺. 𑀩𑁆𑀭𑀸𑀳𑁆𑀫𑀡𑀲𑁆𑀲 𑀅𑀦𑀼𑀕𑁆𑀕𑀳𑀡𑀢𑁆𑀣𑀁 𑀫𑀦𑀲𑀸𑀯 𑀲𑀫𑁆𑀧𑀝𑀺𑀘𑁆𑀙𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁨𑁯𑁭. 𑀧𑀡𑀻𑀢𑁂𑀦𑀸𑀢𑀺 𑀉𑀢𑁆𑀢𑀫𑁂𑀦. 𑀲𑀳𑀢𑁆𑀣𑀸𑀢𑀺 𑀲𑀳𑀢𑁆𑀣𑁂𑀦. 𑀲𑀦𑁆𑀢𑀧𑁆𑀧𑁂𑀲𑀻𑀢𑀺 𑀲𑀼𑀝𑁆𑀞𑀼 𑀢𑀧𑁆𑀧𑁂𑀲𑀺 𑀧𑀭𑀺𑀧𑀼𑀡𑁆𑀡𑀁 𑀲𑀼𑀳𑀺𑀢𑀁 𑀬𑀸𑀯𑀤𑀢𑁆𑀣𑀁 𑀅𑀓𑀸𑀲𑀺. 𑀲𑀫𑁆𑀧𑀯𑀸𑀭𑁂𑀲𑀻𑀢𑀺 𑀲𑀼𑀝𑁆𑀞𑀼 𑀧𑀯𑀸𑀭𑁂𑀲𑀺, 𑀅𑀮𑀁 𑀅𑀮𑀦𑁆𑀢𑀺 𑀳𑀢𑁆𑀣𑀲𑀜𑁆𑀜𑀸𑀬 𑀧𑀝𑀺𑀓𑁆𑀔𑀺𑀧𑀸𑀧𑁂𑀲𑀺. 𑀪𑀼𑀢𑁆𑀢𑀸𑀯𑀺𑀦𑁆𑀢𑀺 𑀪𑀼𑀢𑁆𑀢𑀯𑀦𑁆𑀢𑀁. 𑀑𑀦𑀻𑀢𑀧𑀢𑁆𑀢𑀧𑀸𑀡𑀺𑀦𑁆𑀢𑀺 𑀧𑀢𑁆𑀢𑀢𑁄 𑀑𑀦𑀻𑀢𑀧𑀸𑀡𑀺𑀁, 𑀅𑀧𑀦𑀻𑀢𑀳𑀢𑁆𑀣𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀑𑀦𑀺𑀢𑁆𑀢𑀧𑀢𑁆𑀢𑀧𑀸𑀡𑀺𑀦𑁆𑀢𑀺𑀧𑀺 𑀧𑀸𑀞𑁄. 𑀢𑀲𑁆𑀲𑀢𑁆𑀣𑁄 𑁋 𑀑𑀦𑀺𑀢𑁆𑀢𑀁 𑀦𑀸𑀦𑀸𑀪𑀽𑀢𑀁 𑀯𑀺𑀦𑀸𑀪𑀽𑀢𑀁 𑀧𑀢𑁆𑀢𑀁 𑀧𑀸𑀡𑀺𑀢𑁄 𑀅𑀲𑁆𑀲𑀸𑀢𑀺 𑀑𑀦𑀺𑀢𑁆𑀢𑀧𑀢𑁆𑀢𑀧𑀸𑀡𑀺, 𑀢𑀁 𑀑𑀦𑀺𑀢𑁆𑀢𑀧𑀢𑁆𑀢𑀧𑀸𑀡𑀺𑀁. 𑀳𑀢𑁆𑀣𑁂 𑀘 𑀧𑀢𑁆𑀢𑀜𑁆𑀘 𑀥𑁄𑀯𑀺𑀢𑁆𑀯𑀸 𑀏𑀓𑀫𑀦𑁆𑀢𑁂 𑀧𑀢𑁆𑀢𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑀦𑁆𑀢𑀺 𑀅𑀢𑁆𑀣𑁄. 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀻𑀢𑀺 𑀪𑀕𑀯𑀦𑁆𑀢𑀁 𑀏𑀯𑀁 𑀪𑀽𑀢𑀁 𑀜𑀢𑁆𑀯𑀸 𑀏𑀓𑀲𑁆𑀫𑀺𑀁 𑀑𑀓𑀸𑀲𑁂 𑀦𑀺𑀲𑀻𑀤𑀻𑀢𑀺 𑀅𑀢𑁆𑀣𑁄.

𑁨𑁯𑁮. 𑀅𑀦𑀼𑀧𑀼𑀩𑁆𑀩𑀺𑀁 𑀓𑀣𑀦𑁆𑀢𑀺 𑀅𑀦𑀼𑀧𑀝𑀺𑀧𑀸𑀝𑀺𑀓𑀣𑀁. 𑀆𑀦𑀼𑀧𑀼𑀩𑁆𑀩𑀺𑀓𑀣𑀸 𑀦𑀸𑀫 𑀤𑀸𑀦𑀸𑀦𑀦𑁆𑀢𑀭𑀁 𑀲𑀻𑀮𑀁, 𑀲𑀻𑀮𑀸𑀦𑀦𑁆𑀢𑀭𑀁 𑀲𑀕𑁆𑀕𑁄, 𑀲𑀕𑁆𑀕𑀸𑀦𑀦𑁆𑀢𑀭𑀁 𑀫𑀕𑁆𑀕𑁄𑀢𑀺 𑀏𑀢𑁂𑀲𑀁 𑀅𑀢𑁆𑀣𑀸𑀦𑀁 𑀤𑀻𑀧𑀦𑀓𑀣𑀸. 𑀢𑁂𑀦𑁂𑀯 𑁋 ‘‘𑀲𑁂𑀬𑁆𑀬𑀣𑀺𑀤𑀁 𑀤𑀸𑀦𑀓𑀣’’𑀦𑁆𑀢𑀺𑀆𑀤𑀺𑀫𑀸𑀳. 𑀑𑀓𑀸𑀭𑀦𑁆𑀢𑀺 𑀅𑀯𑀓𑀸𑀭𑀁 𑀮𑀸𑀫𑀓𑀪𑀸𑀯𑀁. 𑀲𑀸𑀫𑀼𑀓𑁆𑀓𑀁𑀲𑀺𑀓𑀸𑀢𑀺 𑀲𑀸𑀫𑀁 𑀉𑀓𑁆𑀓𑀁𑀲𑀺𑀓𑀸, 𑀅𑀢𑁆𑀢𑀦𑀸𑀬𑁂𑀯 𑀉𑀤𑁆𑀥𑀭𑀺𑀢𑁆𑀯𑀸 𑀕𑀳𑀺𑀢𑀸, 𑀲𑀬𑀫𑁆𑀪𑀽𑀜𑀸𑀡𑁂𑀦 𑀤𑀺𑀝𑁆𑀞𑀸, 𑀅𑀲𑀸𑀥𑀸𑀭𑀡𑀸 𑀅𑀜𑁆𑀜𑁂𑀲𑀦𑁆𑀢𑀺 𑀅𑀢𑁆𑀣𑁄. 𑀓𑀸 𑀧𑀦 𑀲𑀸𑀢𑀺? 𑀅𑀭𑀺𑀬𑀲𑀘𑁆𑀘𑀤𑁂𑀲𑀦𑀸. 𑀢𑁂𑀦𑁂𑀯𑀸𑀳 𑁋 ‘‘𑀤𑀼𑀓𑁆𑀔𑀁, 𑀲𑀫𑀼𑀤𑀬𑀁, 𑀦𑀺𑀭𑁄𑀥𑀁, 𑀫𑀕𑁆𑀕’’𑀦𑁆𑀢𑀺. 𑀥𑀫𑁆𑀫𑀘𑀓𑁆𑀔𑀼𑀦𑁆𑀢𑀺 𑀏𑀢𑁆𑀣 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁄 𑀅𑀥𑀺𑀧𑁆𑀧𑁂𑀢𑁄. 𑀢𑀲𑁆𑀲 𑀉𑀧𑁆𑀧𑀢𑁆𑀢𑀺𑀆𑀓𑀸𑀭𑀤𑀲𑁆𑀲𑀦𑀢𑁆𑀣𑀁 𑁋 ‘‘𑀬𑀁 𑀓𑀺𑀜𑁆𑀘𑀺 𑀲𑀫𑀼𑀤𑀬𑀥𑀫𑁆𑀫𑀁, 𑀲𑀩𑁆𑀩𑀁 𑀢𑀁 𑀦𑀺𑀭𑁄𑀥𑀥𑀫𑁆𑀫’’𑀦𑁆𑀢𑀺 𑀆𑀳. 𑀢𑀜𑁆𑀳𑀺 𑀦𑀺𑀭𑁄𑀥𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀓𑀺𑀘𑁆𑀘𑀯𑀲𑁂𑀦 𑀏𑀯𑀁 𑀲𑀩𑁆𑀩𑀲𑀗𑁆𑀔𑀢𑀁 𑀧𑀝𑀺𑀯𑀺𑀚𑁆𑀛𑀦𑁆𑀢𑀁 𑀉𑀧𑁆𑀧𑀚𑁆𑀚𑀢𑀺.

𑀧𑁄𑀓𑁆𑀔𑀭𑀲𑀸𑀢𑀺𑀉𑀧𑀸𑀲𑀓𑀢𑁆𑀢𑀧𑀝𑀺𑀯𑁂𑀤𑀦𑀸𑀯𑀡𑁆𑀡𑀦𑀸

𑁨𑁯𑁯. 𑀤𑀺𑀝𑁆𑀞𑁄 𑀅𑀭𑀺𑀬𑀲𑀘𑁆𑀘𑀥𑀫𑁆𑀫𑁄 𑀏𑀢𑁂𑀦𑀸𑀢𑀺 𑀤𑀺𑀝𑁆𑀞𑀥𑀫𑁆𑀫𑁄. 𑀏𑀲 𑀦𑀬𑁄 𑀲𑁂𑀲𑀧𑀤𑁂𑀲𑀼𑀧𑀺. 𑀢𑀺𑀡𑁆𑀡𑀸 𑀯𑀺𑀘𑀺𑀓𑀺𑀘𑁆𑀙𑀸 𑀅𑀦𑁂𑀦𑀸𑀢𑀺 𑀢𑀺𑀡𑁆𑀡𑀯𑀺𑀘𑀺𑀓𑀺𑀘𑁆𑀙𑁄. 𑀯𑀺𑀕𑀢𑀸 𑀓𑀣𑀁𑀓𑀣𑀸 𑀅𑀲𑁆𑀲𑀸𑀢𑀺 𑀯𑀺𑀕𑀢𑀓𑀣𑀁𑀓𑀣𑁄. 𑀯𑁂𑀲𑀸𑀭𑀚𑁆𑀚𑀧𑁆𑀧𑀢𑁆𑀢𑁄𑀢𑀺 𑀯𑀺𑀲𑀸𑀭𑀤𑀪𑀸𑀯𑀁 𑀧𑀢𑁆𑀢𑁄. 𑀓𑀢𑁆𑀣? 𑀲𑀢𑁆𑀣𑀼𑀲𑀸𑀲𑀦𑁂. 𑀦𑀸𑀲𑁆𑀲 𑀧𑀭𑁄 𑀧𑀘𑁆𑀘𑀬𑁄, 𑀦 𑀧𑀭𑀲𑁆𑀲 𑀲𑀤𑁆𑀥𑀸𑀬 𑀏𑀢𑁆𑀣 𑀯𑀢𑁆𑀢𑀢𑀻𑀢𑀺 𑀅𑀧𑀭𑀧𑁆𑀧𑀘𑁆𑀘𑀬𑁄. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀯𑀼𑀢𑁆𑀢𑀦𑀬𑀢𑁆𑀢𑀸 𑀉𑀢𑁆𑀢𑀸𑀦𑀢𑁆𑀣𑀢𑁆𑀢𑀸 𑀘 𑀧𑀸𑀓𑀝𑀫𑁂𑀯𑀸𑀢𑀺.

𑀇𑀢𑀺 𑀲𑀼𑀫𑀗𑁆𑀕𑀮𑀯𑀺𑀮𑀸𑀲𑀺𑀦𑀺𑀬𑀸 𑀤𑀻𑀖𑀦𑀺𑀓𑀸𑀬𑀝𑁆𑀞𑀓𑀣𑀸𑀬𑀁

𑀅𑀫𑁆𑀩𑀝𑁆𑀞𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.