𑁧𑁨. 𑀮𑁄𑀳𑀺𑀘𑁆𑀘𑀲𑀼𑀢𑁆𑀢𑀯𑀡𑁆𑀡𑀦𑀸

𑀮𑁄𑀳𑀺𑀘𑁆𑀘𑀩𑁆𑀭𑀸𑀳𑁆𑀫𑀡𑀯𑀢𑁆𑀣𑀼𑀯𑀡𑁆𑀡𑀦𑀸

𑁫𑁦𑁧. 𑀏𑀯𑀁 𑀫𑁂 𑀲𑀼𑀢𑀁…𑀧𑁂… 𑀓𑁄𑀲𑀮𑁂𑀲𑀽𑀢𑀺 𑀮𑁄𑀳𑀺𑀘𑁆𑀘𑀲𑀼𑀢𑁆𑀢𑀁. 𑀢𑀢𑁆𑀭𑀸𑀬𑀁 𑀅𑀦𑀼𑀢𑁆𑀢𑀸𑀦𑀧𑀤𑀯𑀡𑁆𑀡𑀦𑀸. 𑀲𑀸𑀮𑀯𑀢𑀺𑀓𑀸𑀢𑀺 𑀢𑀲𑁆𑀲 𑀕𑀸𑀫𑀲𑁆𑀲 𑀦𑀸𑀫𑀁, 𑀲𑁄 𑀓𑀺𑀭 𑀯𑀢𑀺𑀬𑀸 𑀯𑀺𑀬 𑀲𑀫𑀦𑁆𑀢𑀢𑁄 𑀲𑀸𑀮𑀧𑀦𑁆𑀢𑀺𑀬𑀸 𑀧𑀭𑀺𑀓𑁆𑀔𑀺𑀢𑁆𑀢𑁄. 𑀢𑀲𑁆𑀫𑀸 𑀲𑀸𑀮𑀯𑀢𑀺𑀓𑀸𑀢𑀺 𑀯𑀼𑀘𑁆𑀘𑀢𑀺. 𑀮𑁄𑀳𑀺𑀘𑁆𑀘𑁄𑀢𑀺 𑀢𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀦𑀸𑀫𑀁.

𑁫𑁦𑁨-𑁫𑁦𑁩. 𑀧𑀸𑀧𑀓𑀦𑁆𑀢𑀺 𑀧𑀭𑀸𑀦𑀼𑀓𑀫𑁆𑀧𑀸 𑀯𑀺𑀭𑀳𑀺𑀢𑀢𑁆𑀢𑀸 𑀮𑀸𑀫𑀓𑀁, 𑀦 𑀧𑀦 𑀉𑀘𑁆𑀙𑁂𑀤𑀲𑀲𑁆𑀲𑀢𑀸𑀦𑀁 𑀅𑀜𑁆𑀜𑀢𑀭𑀁. 𑀉𑀧𑁆𑀧𑀦𑁆𑀦𑀁 𑀳𑁄𑀢𑀻𑀢𑀺 𑀚𑀸𑀢𑀁 𑀳𑁄𑀢𑀺, 𑀦 𑀓𑁂𑀯𑀮𑀜𑁆𑀘 𑀘𑀺𑀢𑁆𑀢𑁂 𑀚𑀸𑀢𑀫𑀢𑁆𑀢𑀫𑁂𑀯. 𑀲𑁄 𑀓𑀺𑀭 𑀢𑀲𑁆𑀲 𑀯𑀲𑁂𑀦 𑀧𑀭𑀺𑀲𑀫𑀚𑁆𑀛𑁂𑀧𑀺 𑀏𑀯𑀁 𑀪𑀸𑀲𑀢𑀺𑀬𑁂𑀯. 𑀓𑀺𑀜𑁆𑀳𑀺 𑀧𑀭𑁄 𑀧𑀭𑀲𑁆𑀲𑀸𑀢𑀺 𑀧𑀭𑁄 𑀬𑁄 𑀅𑀦𑀼𑀲𑀸𑀲𑀻𑀬𑀢𑀺, 𑀲𑁄 𑀢𑀲𑁆𑀲 𑀅𑀦𑀼𑀲𑀸𑀲𑀓𑀲𑁆𑀲 𑀓𑀺𑀁 𑀓𑀭𑀺𑀲𑁆𑀲𑀢𑀺. 𑀅𑀢𑁆𑀢𑀦𑀸 𑀧𑀝𑀺𑀮𑀤𑁆𑀥𑀁 𑀓𑀼𑀲𑀮𑀁 𑀥𑀫𑁆𑀫𑀁 𑀅𑀢𑁆𑀢𑀦𑀸𑀯 𑀲𑀓𑁆𑀓𑀢𑁆𑀯𑀸 𑀕𑀭𑀼𑀁 𑀓𑀢𑁆𑀯𑀸 𑀯𑀺𑀳𑀸𑀢𑀩𑁆𑀩𑀦𑁆𑀢𑀺 𑀯𑀤𑀢𑀺.

𑁫𑁦𑁪-𑁪𑁦𑁭. 𑀭𑁄𑀲𑀺𑀓𑀁 𑀦𑁆𑀳𑀸𑀧𑀺𑀢𑀁 𑀆𑀫𑀦𑁆𑀢𑁂𑀲𑀻𑀢𑀺 𑀭𑁄𑀲𑀺𑀓𑀸𑀢𑀺 𑀏𑀯𑀁 𑀇𑀢𑁆𑀣𑀺𑀮𑀺𑀗𑁆𑀕𑀯𑀲𑁂𑀦 𑀮𑀤𑁆𑀥𑀦𑀸𑀫𑀁 𑀦𑁆𑀳𑀸𑀧𑀺𑀢𑀁 𑀆𑀫𑀦𑁆𑀢𑁂𑀲𑀺. 𑀲𑁄 𑀓𑀺𑀭 𑀪𑀕𑀯𑀢𑁄 𑀆𑀕𑀫𑀦𑀁 𑀲𑀼𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀤𑀺𑀝𑁆𑀞𑀁 𑀦𑀸𑀫𑀁 𑀪𑀸𑀭𑁄, 𑀕𑁂𑀳𑀁 𑀧𑀦 𑀆𑀡𑀸𑀧𑁂𑀢𑁆𑀯𑀸 𑀧𑀲𑁆𑀲𑀺𑀲𑁆𑀲𑀸𑀫𑀺 𑀘𑁂𑀯 𑀬𑀣𑀸𑀲𑀢𑁆𑀢𑀺 𑀘 𑀆𑀕𑀦𑁆𑀢𑀼𑀓𑀪𑀺𑀓𑁆𑀔𑀁 𑀤𑀲𑁆𑀲𑀸𑀫𑀻’’𑀢𑀺, 𑀢𑀲𑁆𑀫𑀸 𑀏𑀯𑀁 𑀦𑁆𑀳𑀸𑀧𑀺𑀢𑀁 𑀆𑀫𑀦𑁆𑀢𑁂𑀲𑀺.

𑁫𑁦𑁮. 𑀧𑀺𑀝𑁆𑀞𑀺𑀢𑁄 𑀧𑀺𑀝𑁆𑀞𑀺𑀢𑁄𑀢𑀺 𑀓𑀣𑀸𑀨𑀸𑀲𑀼𑀓𑀢𑁆𑀣𑀁 𑀧𑀘𑁆𑀙𑀢𑁄 𑀧𑀘𑁆𑀙𑀢𑁄 𑀅𑀦𑀼𑀩𑀦𑁆𑀥𑁄 𑀳𑁄𑀢𑀺. 𑀯𑀺𑀯𑁂𑀘𑁂𑀢𑀽𑀢𑀺 𑀯𑀺𑀫𑁄𑀘𑁂𑀢𑀼, 𑀢𑀁 𑀤𑀺𑀝𑁆𑀞𑀺𑀕𑀢𑀁 𑀯𑀺𑀦𑁄𑀤𑁂𑀢𑀽𑀢𑀺 𑀯𑀤𑀢𑀺. 𑀅𑀬𑀁 𑀓𑀺𑀭 𑀉𑀧𑀸𑀲𑀓𑁄 𑀮𑁄𑀳𑀺𑀘𑁆𑀘𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀧𑀺𑀬𑀲𑀳𑀸𑀬𑀓𑁄. 𑀢𑀲𑁆𑀫𑀸 𑀢𑀲𑁆𑀲 𑀅𑀢𑁆𑀣𑀓𑀸𑀫𑀢𑀸𑀬 𑀏𑀯𑀫𑀸𑀳. 𑀅𑀧𑁆𑀧𑁂𑀯 𑀦𑀸𑀫 𑀲𑀺𑀬𑀸𑀢𑀺 𑀏𑀢𑁆𑀣 𑀧𑀞𑀫𑀯𑀘𑀦𑁂𑀦 𑀪𑀕𑀯𑀸 𑀕𑀚𑁆𑀚𑀢𑀺, 𑀤𑀼𑀢𑀺𑀬𑀯𑀘𑀦𑁂𑀦 𑀅𑀦𑀼𑀕𑀚𑁆𑀚𑀢𑀺. 𑀅𑀬𑀁 𑀓𑀺𑀭𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 𑁋 𑀭𑁄𑀲𑀺𑀓𑁂 𑀏𑀢𑀤𑀢𑁆𑀣𑀫𑁂𑀯 𑀫𑀬𑀸 𑀘𑀢𑁆𑀢𑀸𑀭𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺. 𑀓𑀧𑁆𑀧𑀲𑀢𑀲𑀳𑀲𑁆𑀲𑀜𑁆𑀘 𑀯𑀺𑀯𑀺𑀥𑀸𑀦𑀺 𑀤𑀼𑀓𑁆𑀓𑀭𑀸𑀦𑀺 𑀓𑀭𑁄𑀦𑁆𑀢𑁂𑀦 𑀧𑀸𑀭𑀫𑀺𑀬𑁄 𑀧𑀽𑀭𑀺𑀢𑀸, 𑀏𑀢𑀤𑀢𑁆𑀣𑀫𑁂𑀯 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀧𑀝𑀺𑀯𑀺𑀤𑁆𑀥𑀁, 𑀦 𑀫𑁂 𑀮𑁄𑀳𑀺𑀘𑁆𑀘𑀲𑁆𑀲 𑀤𑀺𑀝𑁆𑀞𑀺𑀕𑀢𑀁 𑀪𑀺𑀦𑁆𑀤𑀺𑀢𑀼𑀁 𑀪𑀸𑀭𑁄𑀢𑀺, 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀧𑀞𑀫𑀯𑀘𑀦𑁂𑀦 𑀪𑀕𑀯𑀸 𑀕𑀚𑁆𑀚𑀢𑀺. 𑀓𑁂𑀯𑀮𑀁 𑀭𑁄𑀲𑀺𑀓𑁂 𑀮𑁄𑀳𑀺𑀘𑁆𑀘𑀲𑁆𑀲 𑀫𑀫 𑀲𑀦𑁆𑀢𑀺𑀓𑁂 𑀆𑀕𑀫𑀦𑀁 𑀯𑀸 𑀦𑀺𑀲𑀚𑁆𑀚𑀸 𑀯𑀸 𑀅𑀮𑁆𑀮𑀸𑀧𑀲𑀮𑁆𑀮𑀸𑀧𑁄 𑀯𑀸 𑀳𑁄𑀢𑀼, 𑀲𑀘𑁂𑀧𑀺 𑀮𑁄𑀳𑀺𑀘𑁆𑀘𑀲𑀤𑀺𑀲𑀸𑀦𑀁 𑀲𑀢𑀲𑀳𑀲𑁆𑀲𑀲𑁆𑀲 𑀓𑀗𑁆𑀔𑀸 𑀳𑁄𑀢𑀺, 𑀧𑀝𑀺𑀩𑀮𑁄 𑀅𑀳𑀁 𑀯𑀺𑀦𑁄𑀤𑁂𑀢𑀼𑀁 𑀮𑁄𑀳𑀺𑀘𑁆𑀘𑀲𑁆𑀲 𑀧𑀦 𑀏𑀓𑀲𑁆𑀲 𑀤𑀺𑀝𑁆𑀞𑀺𑀯𑀺𑀦𑁄𑀤𑀦𑁂 𑀫𑀬𑁆𑀳𑀁 𑀓𑁄 𑀪𑀸𑀭𑁄𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀤𑀼𑀢𑀺𑀬𑀯𑀘𑀦𑁂𑀦 𑀪𑀕𑀯𑀸 𑀅𑀦𑀼𑀕𑀚𑁆𑀚𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀮𑁄𑀳𑀺𑀘𑁆𑀘𑀩𑁆𑀭𑀸𑀳𑁆𑀫𑀡𑀸𑀦𑀼𑀬𑁄𑀕𑀯𑀡𑁆𑀡𑀦𑀸

𑁫𑁦𑁯. 𑀲𑀫𑀼𑀤𑀬𑀲𑀜𑁆𑀚𑀸𑀢𑀻𑀢𑀺 𑀲𑀫𑀼𑀤𑀬𑀲𑁆𑀲 𑀲𑀜𑁆𑀚𑀸𑀢𑀺 𑀪𑁄𑀕𑀼𑀧𑁆𑀧𑀸𑀤𑁄, 𑀢𑀢𑁄 𑀉𑀝𑁆𑀞𑀺𑀢𑀁 𑀥𑀦𑀥𑀜𑁆𑀜𑀦𑁆𑀢𑀺 𑀅𑀢𑁆𑀣𑁄. 𑀬𑁂 𑀢𑀁 𑀉𑀧𑀚𑀻𑀯𑀦𑁆𑀢𑀻𑀢𑀺 𑀬𑁂 𑀜𑀸𑀢𑀺𑀧𑀭𑀺𑀚𑀦𑀤𑀸𑀲𑀓𑀫𑁆𑀫𑀓𑀭𑀸𑀤𑀬𑁄 𑀚𑀦𑀸 𑀢𑀁 𑀦𑀺𑀲𑁆𑀲𑀸𑀬 𑀚𑀻𑀯𑀦𑁆𑀢𑀺. 𑀅𑀦𑁆𑀢𑀭𑀸𑀬𑀓𑀭𑁄𑀢𑀺 𑀮𑀸𑀪𑀦𑁆𑀢𑀭𑀸𑀬𑀓𑀭𑁄. 𑀳𑀺𑀢𑀸𑀦𑀼𑀓𑀫𑁆𑀧𑀻𑀢𑀺 𑀏𑀢𑁆𑀣 𑀳𑀺𑀢𑀦𑁆𑀢𑀺 𑀯𑀼𑀟𑁆𑀠𑀺. 𑀅𑀦𑀼𑀓𑀫𑁆𑀧𑀢𑀻𑀢𑀺 𑀅𑀦𑀼𑀓𑀫𑁆𑀧𑀻, 𑀇𑀘𑁆𑀙𑀢𑀻𑀢𑀺 𑀅𑀢𑁆𑀣𑁄, 𑀯𑀼𑀟𑁆𑀠𑀺𑀁 𑀇𑀘𑁆𑀙𑀢𑀺 𑀯𑀸 𑀦𑁄 𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀦𑀺𑀭𑀬𑀁 𑀯𑀸 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀁 𑀯𑀸𑀢𑀺 𑀲𑀘𑁂 𑀲𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀲𑀫𑁆𑀧𑀚𑁆𑀚𑀢𑀺, 𑀦𑀺𑀬𑀢𑀸 𑀳𑁄𑀢𑀺, 𑀏𑀓𑀁𑀲𑁂𑀦 𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀢𑀺, 𑀦𑁄 𑀘𑁂, 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑀢𑀻𑀢𑀺 𑀅𑀢𑁆𑀣𑁄.

𑁫𑁧𑁦-𑁫𑁧𑁨. 𑀇𑀤𑀸𑀦𑀺 𑀬𑀲𑁆𑀫𑀸 𑀬𑀣𑀸 𑀅𑀢𑁆𑀢𑀦𑁄 𑀮𑀸𑀪𑀦𑁆𑀢𑀭𑀸𑀬𑁂𑀦 𑀲𑀢𑁆𑀢𑀸 𑀲𑀁𑀯𑀺𑀚𑁆𑀚𑀦𑁆𑀢𑀺 𑀦 𑀢𑀣𑀸 𑀧𑀭𑁂𑀲𑀁, 𑀢𑀲𑁆𑀫𑀸 𑀲𑀼𑀝𑁆𑀞𑀼𑀢𑀭𑀁 𑀩𑁆𑀭𑀸𑀳𑁆𑀫𑀡𑀁 𑀧𑀯𑁂𑀘𑁂𑀢𑀼𑀓𑀸𑀫𑁄 ‘‘𑀢𑀁 𑀓𑀺𑀁 𑀫𑀜𑁆𑀜𑀲𑀻’’𑀢𑀺 𑀤𑀼𑀢𑀺𑀬𑀁 𑀉𑀧𑀧𑀢𑁆𑀢𑀺𑀫𑀸𑀳. 𑀬𑁂 𑀘𑀺𑀫𑁂𑀢𑀺 𑀬𑁂 𑀘 𑀇𑀫𑁂 𑀢𑀣𑀸𑀕𑀢𑀲𑁆𑀲 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀅𑀭𑀺𑀬𑀪𑀽𑀫𑀺𑀁 𑀑𑀓𑁆𑀓𑀫𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 𑀓𑀼𑀮𑀧𑀼𑀢𑁆𑀢𑀸 𑀤𑀺𑀩𑁆𑀩𑀸 𑀕𑀩𑁆𑀪𑀸𑀢𑀺 𑀉𑀧𑀬𑁄𑀕𑀢𑁆𑀣𑁂 𑀧𑀘𑁆𑀘𑀢𑁆𑀢𑀯𑀘𑀦𑀁, 𑀤𑀺𑀩𑁆𑀩𑁂 𑀕𑀩𑁆𑀪𑁂𑀢𑀺 𑀅𑀢𑁆𑀣𑁄. 𑀤𑀺𑀩𑁆𑀩𑀸, 𑀕𑀩𑁆𑀪𑀸𑀢𑀺 𑀘 𑀙𑀦𑁆𑀦𑀁 𑀤𑁂𑀯𑀮𑁄𑀓𑀸𑀦𑀫𑁂𑀢𑀁 𑀅𑀥𑀺𑀯𑀘𑀦𑀁. 𑀧𑀭𑀺𑀧𑀸𑀘𑁂𑀦𑁆𑀢𑀻𑀢𑀺 𑀤𑁂𑀯𑀮𑁄𑀓𑀕𑀸𑀫𑀺𑀦𑀺𑀁 𑀧𑀝𑀺𑀧𑀤𑀁 𑀧𑀽𑀭𑀬𑀫𑀸𑀦𑀸 𑀤𑀸𑀦𑀁, 𑀤𑀤𑀫𑀸𑀦𑀸, 𑀲𑀻𑀮𑀁 𑀭𑀓𑁆𑀔𑀫𑀸𑀦𑀸, 𑀕𑀦𑁆𑀥𑀫𑀸𑀮𑀸𑀤𑀻𑀳𑀺, 𑀧𑀽𑀚𑀁 𑀓𑀼𑀭𑀼𑀫𑀸𑀦𑀸 𑀪𑀸𑀯𑀦𑀁 𑀪𑀸𑀯𑀬𑀫𑀸𑀦𑀸 𑀧𑀸𑀘𑁂𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑀧𑀭𑀺𑀧𑀸𑀘𑁂𑀦𑁆𑀢𑀺 𑀧𑀭𑀺𑀡𑀸𑀫𑀁 𑀕𑀫𑁂𑀦𑁆𑀢𑀺. 𑀤𑀺𑀩𑁆𑀩𑀸𑀦𑀁 𑀪𑀯𑀸𑀦𑀁 𑀅𑀪𑀺𑀦𑀺𑀩𑁆𑀩𑀢𑁆𑀢𑀺𑀬𑀸𑀢𑀺 𑀤𑀺𑀩𑁆𑀩𑀪𑀯𑀸 𑀦𑀸𑀫 𑀤𑁂𑀯𑀸𑀦𑀁 𑀯𑀺𑀫𑀸𑀦𑀸𑀦𑀺, 𑀢𑁂𑀲𑀁 𑀦𑀺𑀩𑁆𑀩𑀢𑁆𑀢𑀦𑀢𑁆𑀣𑀸𑀬𑀸𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀤𑀺𑀩𑁆𑀩𑀸 𑀕𑀩𑁆𑀪𑀸𑀢𑀺 𑀤𑀸𑀦𑀸𑀤𑀬𑁄 𑀧𑀼𑀜𑁆𑀜𑀯𑀺𑀲𑁂𑀲𑀸. 𑀤𑀺𑀩𑁆𑀩𑀸 𑀪𑀯𑀸𑀢𑀺 𑀤𑁂𑀯𑀮𑁄𑀓𑁂 𑀯𑀺𑀧𑀸𑀓𑀓𑁆𑀔𑀦𑁆𑀥𑀸, 𑀢𑁂𑀲𑀁 𑀦𑀺𑀩𑁆𑀩𑀢𑁆𑀢𑀦𑀢𑁆𑀣𑀸𑀬 𑀢𑀸𑀦𑀺 𑀧𑀼𑀜𑁆𑀜𑀸𑀦𑀺 𑀓𑀭𑁄𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀢𑁂𑀲𑀁 𑀅𑀦𑁆𑀢𑀭𑀸𑀬𑀓𑀭𑁄𑀢𑀺 𑀢𑁂𑀲𑀁 𑀫𑀕𑁆𑀕𑀲𑀫𑁆𑀧𑀢𑁆𑀢𑀺𑀨𑀮𑀲𑀫𑁆𑀧𑀢𑁆𑀢𑀺𑀤𑀺𑀩𑁆𑀩𑀪𑀯𑀯𑀺𑀲𑁂𑀲𑀸𑀦𑀁 𑀅𑀦𑁆𑀢𑀭𑀸𑀬𑀓𑀭𑁄. 𑀇𑀢𑀺 𑀪𑀕𑀯𑀸 𑀏𑀢𑁆𑀢𑀸𑀯𑀢𑀸 𑀅𑀦𑀺𑀬𑀫𑀺𑀢𑁂𑀦𑁂𑀯 𑀑𑀧𑀫𑁆𑀫𑀯𑀺𑀥𑀺𑀦𑀸 𑀬𑀸𑀯 𑀪𑀯𑀕𑁆𑀕𑀸 𑀉𑀕𑁆𑀕𑀢𑀁 𑀩𑁆𑀭𑀸𑀳𑁆𑀫𑀡𑀲𑁆𑀲 𑀫𑀸𑀦𑀁 𑀪𑀺𑀦𑁆𑀤𑀺𑀢𑁆𑀯𑀸 𑀇𑀤𑀸𑀦𑀺 𑀘𑁄𑀤𑀦𑀸𑀭𑀳𑁂 𑀢𑀬𑁄 𑀲𑀢𑁆𑀣𑀸𑀭𑁂 𑀤𑀲𑁆𑀲𑁂𑀢𑀼𑀁 ‘‘𑀢𑀬𑁄 𑀔𑁄 𑀫𑁂, 𑀮𑁄𑀳𑀺𑀘𑁆𑀘𑀸’’𑀢𑀺𑀆𑀤𑀺𑀫𑀸𑀳.

𑀢𑀬𑁄 𑀘𑁄𑀤𑀦𑀸𑀭𑀳𑀯𑀡𑁆𑀡𑀦𑀸

𑁫𑁧𑁩. 𑀢𑀢𑁆𑀣 𑀲𑀸 𑀘𑁄𑀤𑀦𑀸𑀢𑀺 𑀢𑀬𑁄 𑀲𑀢𑁆𑀣𑀸𑀭𑁂 𑀘𑁄𑀤𑁂𑀦𑁆𑀢𑀲𑁆𑀲 𑀘𑁄𑀤𑀦𑀸. 𑀦 𑀅𑀜𑁆𑀜𑀸 𑀘𑀺𑀢𑁆𑀢𑀁 𑀉𑀧𑀝𑁆𑀞𑀧𑁂𑀦𑁆𑀢𑀻𑀢𑀺 𑀅𑀜𑁆𑀜𑀸𑀬 𑀆𑀚𑀸𑀦𑀦𑀢𑁆𑀣𑀸𑀬 𑀘𑀺𑀢𑁆𑀢𑀁 𑀦 𑀉𑀧𑀝𑁆𑀞𑀧𑁂𑀦𑁆𑀢𑀺. 𑀯𑁄𑀓𑁆𑀓𑀫𑁆𑀫𑀸𑀢𑀺 𑀦𑀺𑀭𑀦𑁆𑀢𑀭𑀁 𑀢𑀲𑁆𑀲 𑀲𑀸𑀲𑀦𑀁 𑀅𑀓𑀢𑁆𑀯𑀸 𑀢𑀢𑁄 𑀉𑀓𑁆𑀓𑀫𑀺𑀢𑁆𑀯𑀸 𑀯𑀢𑁆𑀢𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀑𑀲𑀓𑁆𑀓𑀦𑁆𑀢𑀺𑀬𑀸 𑀯𑀸 𑀉𑀲𑁆𑀲𑀓𑁆𑀓𑁂𑀬𑁆𑀬𑀸𑀢𑀺 𑀧𑀝𑀺𑀓𑁆𑀓𑀫𑀦𑁆𑀢𑀺𑀬𑀸 𑀉𑀧𑀕𑀘𑁆𑀙𑁂𑀬𑁆𑀬, 𑀅𑀦𑀺𑀘𑁆𑀙𑀦𑁆𑀢𑀺𑀬𑀸 𑀇𑀘𑁆𑀙𑁂𑀬𑁆𑀬, 𑀏𑀓𑀸𑀬 𑀲𑀫𑁆𑀧𑀬𑁄𑀕𑀁 𑀅𑀦𑀺𑀘𑁆𑀙𑀦𑁆𑀢𑀺𑀬𑀸 𑀏𑀓𑁄 𑀇𑀘𑁆𑀙𑁂𑀬𑁆𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀭𑀫𑁆𑀫𑀼𑀔𑀺𑀁 𑀯𑀸 𑀆𑀮𑀺𑀗𑁆𑀕𑁂𑀬𑁆𑀬𑀸𑀢𑀺 𑀤𑀝𑁆𑀞𑀼𑀫𑁆𑀧𑀺 𑀅𑀦𑀺𑀘𑁆𑀙𑀫𑀸𑀦𑀁 𑀧𑀭𑀫𑁆𑀫𑀼𑀔𑀺𑀁 𑀞𑀺𑀢𑀁 𑀧𑀘𑁆𑀙𑀢𑁄 𑀕𑀦𑁆𑀢𑁆𑀯𑀸 𑀆𑀮𑀺𑀗𑁆𑀕𑁂𑀬𑁆𑀬. 𑀏𑀯𑀁𑀲𑀫𑁆𑀧𑀤𑀫𑀺𑀤𑀦𑁆𑀢𑀺 𑀇𑀫𑀲𑁆𑀲𑀸𑀧𑀺 𑀲𑀢𑁆𑀣𑀼𑀦𑁄 ‘‘𑀫𑀫 𑀇𑀫𑁂 𑀲𑀸𑀯𑀓𑀸’’𑀢𑀺 𑀲𑀸𑀲𑀦𑀸 𑀯𑁄𑀓𑁆𑀓𑀫𑁆𑀫 𑀯𑀢𑁆𑀢𑀫𑀸𑀦𑁂𑀧𑀺 𑀢𑁂 𑀮𑁄𑀪𑁂𑀦 𑀅𑀦𑀼𑀲𑀸𑀲𑀢𑁄 𑀇𑀫𑀁 𑀮𑁄𑀪𑀥𑀫𑁆𑀫𑀁 𑀏𑀯𑀁𑀲𑀫𑁆𑀧𑀤𑀫𑁂𑀯 𑀈𑀤𑀺𑀲𑀫𑁂𑀯 𑀯𑀤𑀸𑀫𑀺. 𑀇𑀢𑀺 𑀲𑁄 𑀏𑀯𑀭𑀽𑀧𑁄 𑀢𑀯 𑀮𑁄𑀪𑀥𑀫𑁆𑀫𑁄 𑀬𑁂𑀦 𑀢𑁆𑀯𑀁 𑀑𑀲𑀓𑁆𑀓𑀦𑁆𑀢𑀺𑀬𑀸 𑀉𑀲𑁆𑀲𑀓𑁆𑀓𑀦𑁆𑀢𑁄 𑀯𑀺𑀬 𑀧𑀭𑀫𑁆𑀫𑀼𑀔𑀺𑀁 𑀆𑀮𑀺𑀗𑁆𑀕𑀦𑁆𑀢𑁄 𑀯𑀺𑀬 𑀅𑀳𑁄𑀲𑀻𑀢𑀺𑀧𑀺 𑀢𑀁 𑀘𑁄𑀤𑀦𑀁 𑀅𑀭𑀳𑀢𑀺. 𑀓𑀺𑀜𑁆𑀳𑀺 𑀧𑀭𑁄 𑀧𑀭𑀲𑁆𑀲 𑀓𑀭𑀺𑀲𑁆𑀲𑀢𑀻𑀢𑀺 𑀬𑁂𑀦 𑀥𑀫𑁆𑀫𑁂𑀦 𑀧𑀭𑁂 𑀅𑀦𑀼𑀲𑀸𑀲𑀺, 𑀅𑀢𑁆𑀢𑀸𑀦𑀫𑁂𑀯 𑀢𑀸𑀯 𑀢𑀢𑁆𑀣 𑀲𑀫𑁆𑀧𑀸𑀤𑁂𑀳𑀺, 𑀉𑀚𑀼𑀁 𑀓𑀭𑁄𑀳𑀺. 𑀓𑀺𑀜𑁆𑀳𑀺 𑀧𑀭𑁄 𑀧𑀭𑀲𑁆𑀲 𑀓𑀭𑀺𑀲𑁆𑀲𑀢𑀻𑀢𑀺 𑀘𑁄𑀤𑀦𑀁 𑀅𑀭𑀳𑀢𑀺.

𑁫𑁧𑁪. 𑀦𑀺𑀤𑁆𑀤𑀸𑀬𑀺𑀢𑀩𑁆𑀩𑀦𑁆𑀢𑀺 𑀲𑀲𑁆𑀲𑀭𑀽𑀧𑀓𑀸𑀦𑀺 𑀢𑀺𑀡𑀸𑀦𑀺 𑀉𑀧𑁆𑀧𑀸𑀝𑁂𑀢𑁆𑀯𑀸 𑀧𑀭𑀺𑀲𑀼𑀤𑁆𑀥𑀁 𑀓𑀸𑀢𑀩𑁆𑀩𑀁.

𑁫𑁧𑁫. 𑀢𑀢𑀺𑀬𑀘𑁄𑀤𑀦𑀸𑀬 𑀓𑀺𑀜𑁆𑀳𑀺 𑀧𑀭𑁄 𑀧𑀭𑀲𑁆𑀲𑀸𑀢𑀺 𑀅𑀦𑀼𑀲𑀸𑀲𑀦𑀁 𑀅𑀲𑀫𑁆𑀧𑀝𑀺𑀘𑁆𑀙𑀦𑀓𑀸𑀮𑀢𑁄 𑀧𑀝𑁆𑀞𑀸𑀬 𑀧𑀭𑁄 𑀅𑀦𑀼𑀲𑀸𑀲𑀺𑀢𑀩𑁆𑀩𑁄, 𑀧𑀭𑀲𑁆𑀲 𑀅𑀦𑀼𑀲𑀸𑀲𑀓𑀲𑁆𑀲 𑀓𑀺𑀁 𑀓𑀭𑀺𑀲𑁆𑀲𑀢𑀻𑀢𑀺 𑀦𑀦𑀼 𑀢𑀢𑁆𑀣 𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑀢𑀁 𑀆𑀧𑀚𑁆𑀚𑀺𑀢𑁆𑀯𑀸 𑀅𑀢𑁆𑀢𑀦𑀸 𑀧𑀝𑀺𑀯𑀺𑀤𑁆𑀥𑀥𑀫𑁆𑀫𑀁 𑀅𑀢𑁆𑀢𑀦𑀸𑀯 𑀫𑀸𑀦𑁂𑀢𑁆𑀯𑀸 𑀧𑀽𑀚𑁂𑀢𑁆𑀯𑀸 𑀯𑀺𑀳𑀸𑀢𑀩𑁆𑀩𑀦𑁆𑀢𑀺 𑀏𑀯𑀁 𑀘𑁄𑀤𑀦𑀁 𑀅𑀭𑀳𑀢𑀻𑀢𑀺 𑀅𑀢𑁆𑀣𑁄.

𑀦 𑀘𑁄𑀤𑀦𑀸𑀭𑀳𑀲𑀢𑁆𑀣𑀼𑀯𑀡𑁆𑀡𑀦𑀸

𑁫𑁧𑁬. 𑀦 𑀘𑁄𑀤𑀦𑀸𑀭𑀳𑁄𑀢𑀺 𑀅𑀬𑀜𑁆𑀳𑀺 𑀬𑀲𑁆𑀫𑀸 𑀧𑀞𑀫𑀫𑁂𑀯 𑀅𑀢𑁆𑀢𑀸𑀦𑀁 𑀧𑀢𑀺𑀭𑀽𑀧𑁂 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀲𑀸𑀯𑀓𑀸𑀦𑀁 𑀥𑀫𑁆𑀫𑀁 𑀤𑁂𑀲𑁂𑀢𑀺. 𑀲𑀸𑀯𑀓𑀸 𑀘𑀲𑁆𑀲 𑀅𑀲𑁆𑀲𑀯𑀸 𑀳𑀼𑀢𑁆𑀯𑀸 𑀬𑀣𑀸𑀦𑀼𑀲𑀺𑀝𑁆𑀞𑀁 𑀧𑀝𑀺𑀧𑀚𑁆𑀚𑀦𑁆𑀢𑀺, 𑀢𑀸𑀬 𑀘 𑀧𑀝𑀺𑀧𑀢𑁆𑀢𑀺𑀬𑀸 𑀫𑀳𑀦𑁆𑀢𑀁 𑀯𑀺𑀲𑁂𑀲𑀫𑀥𑀺𑀕𑀘𑁆𑀙𑀦𑁆𑀢𑀺. 𑀢𑀲𑁆𑀫𑀸 𑀦 𑀘𑁄𑀤𑀦𑀸𑀭𑀳𑁄𑀢𑀺.

𑁫𑁧𑁭. 𑀦𑀭𑀓𑀧𑀧𑀸𑀢𑀁 𑀧𑀧𑀢𑀦𑁆𑀢𑁄𑀢𑀺 𑀫𑀬𑀸 𑀕𑀳𑀺𑀢𑀸𑀬 𑀤𑀺𑀝𑁆𑀞𑀺𑀬𑀸 𑀅𑀳𑀁 𑀦𑀭𑀓𑀧𑀧𑀸𑀢𑀁 𑀧𑀧𑀢𑀦𑁆𑀢𑁄. 𑀉𑀤𑁆𑀥𑀭𑀺𑀢𑁆𑀯𑀸 𑀣𑀮𑁂 𑀧𑀢𑀺𑀝𑁆𑀞𑀸𑀧𑀺𑀢𑁄𑀢𑀺 𑀢𑀁 𑀤𑀺𑀝𑁆𑀞𑀺𑀁 𑀪𑀺𑀦𑁆𑀤𑀺𑀢𑁆𑀯𑀸 𑀥𑀫𑁆𑀫𑀤𑁂𑀲𑀦𑀸𑀳𑀢𑁆𑀣𑁂𑀦 𑀅𑀧𑀸𑀬𑀧𑀢𑀦𑀢𑁄 𑀉𑀤𑁆𑀥𑀭𑀺𑀢𑁆𑀯𑀸 𑀲𑀕𑁆𑀕𑀫𑀕𑁆𑀕𑀣𑀮𑁂 𑀞𑀧𑀺𑀢𑁄𑀫𑁆𑀳𑀻𑀢𑀺 𑀯𑀤𑀢𑀺. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀇𑀢𑀺 𑀲𑀼𑀫𑀗𑁆𑀕𑀮𑀯𑀺𑀮𑀸𑀲𑀺𑀦𑀺𑀬𑀸 𑀤𑀻𑀖𑀦𑀺𑀓𑀸𑀬𑀝𑁆𑀞𑀓𑀣𑀸𑀬𑀁

𑀮𑁄𑀳𑀺𑀘𑁆𑀘𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.