𑁧𑁩. 𑀢𑁂𑀯𑀺𑀚𑁆𑀚𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁧𑁮. 𑀏𑀯𑀁 𑀫𑁂 𑀲𑀼𑀢𑀁…𑀧𑁂… 𑀓𑁄𑀲𑀮𑁂𑀲𑀽𑀢𑀺 𑀢𑁂𑀯𑀺𑀚𑁆𑀚𑀲𑀼𑀢𑁆𑀢𑀁. 𑀢𑀢𑁆𑀭𑀸𑀬𑀁 𑀅𑀦𑀼𑀢𑁆𑀢𑀸𑀦𑀧𑀤𑀯𑀡𑁆𑀡𑀦𑀸. 𑀫𑀦𑀲𑀸𑀓𑀝𑀦𑁆𑀢𑀺 𑀢𑀲𑁆𑀲 𑀕𑀸𑀫𑀲𑁆𑀲 𑀦𑀸𑀫𑀁. 𑀉𑀢𑁆𑀢𑀭𑁂𑀦 𑀫𑀦𑀲𑀸𑀓𑀝𑀲𑁆𑀲𑀸𑀢𑀺 𑀫𑀦𑀲𑀸𑀓𑀝𑀢𑁄 𑀅𑀯𑀺𑀤𑀽𑀭𑁂 𑀉𑀢𑁆𑀢𑀭𑀧𑀲𑁆𑀲𑁂. 𑀅𑀫𑁆𑀩𑀯𑀦𑁂𑀢𑀺 𑀢𑀭𑀼𑀡𑀅𑀫𑁆𑀩𑀭𑀼𑀓𑁆𑀔𑀲𑀡𑁆𑀟𑁂, 𑀭𑀫𑀡𑀻𑀬𑁄 𑀓𑀺𑀭 𑀲𑁄 𑀪𑀽𑀫𑀺𑀪𑀸𑀕𑁄, 𑀳𑁂𑀝𑁆𑀞𑀸 𑀭𑀚𑀢𑀧𑀝𑁆𑀝𑀲𑀤𑀺𑀲𑀸 𑀯𑀸𑀮𑀺𑀓𑀸 𑀯𑀺𑀧𑁆𑀧𑀓𑀺𑀡𑁆𑀡𑀸, 𑀉𑀧𑀭𑀺 𑀫𑀡𑀺𑀯𑀺𑀢𑀸𑀦𑀁 𑀯𑀺𑀬 𑀖𑀦𑀲𑀸𑀔𑀸𑀧𑀢𑁆𑀢𑀁 𑀅𑀫𑁆𑀩𑀯𑀦𑀁. 𑀢𑀲𑁆𑀫𑀺𑀁 𑀩𑀼𑀤𑁆𑀥𑀸𑀦𑀁 𑀅𑀦𑀼𑀘𑁆𑀙𑀯𑀺𑀓𑁂 𑀧𑀯𑀺𑀯𑁂𑀓𑀲𑀼𑀔𑁂 𑀅𑀫𑁆𑀩𑀯𑀦𑁂 𑀯𑀺𑀳𑀭𑀢𑀻𑀢𑀺 𑀅𑀢𑁆𑀣𑁄.

𑁫𑁧𑁯. 𑀅𑀪𑀺𑀜𑁆𑀜𑀸𑀢𑀸 𑀅𑀪𑀺𑀜𑁆𑀜𑀸𑀢𑀸𑀢𑀺 𑀓𑀼𑀮𑀘𑀸𑀭𑀺𑀢𑁆𑀢𑀸𑀤𑀺𑀲𑀫𑁆𑀧𑀢𑁆𑀢𑀺𑀬𑀸 𑀢𑀢𑁆𑀣 𑀢𑀢𑁆𑀣 𑀧𑀜𑁆𑀜𑀸𑀢𑀸. 𑀘𑀗𑁆𑀓𑀻𑀢𑀺𑀆𑀤𑀻𑀦𑀺 𑀢𑁂𑀲𑀁 𑀦𑀸𑀫𑀸𑀦𑀺. 𑀢𑀢𑁆𑀣 𑀘𑀗𑁆𑀓𑀻 𑀑𑀧𑀸𑀲𑀸𑀤𑀯𑀸𑀲𑀺𑀓𑁄. 𑀢𑀸𑀭𑀼𑀓𑁆𑀔𑁄 𑀇𑀘𑁆𑀙𑀸𑀦𑀗𑁆𑀕𑀮𑀯𑀸𑀲𑀺𑀓𑁄. 𑀧𑁄𑀓𑁆𑀔𑀭𑀲𑀸𑀢𑀻 𑀉𑀓𑁆𑀓𑀝𑁆𑀞𑀯𑀸𑀲𑀺𑀓𑁄. 𑀚𑀸𑀡𑀼𑀲𑁄𑀡𑀻 𑀲𑀸𑀯𑀢𑁆𑀣𑀺𑀯𑀸𑀲𑀺𑀓𑁄. 𑀢𑁄𑀤𑁂𑀬𑁆𑀬𑁄 𑀢𑀼𑀤𑀺𑀕𑀸𑀫𑀯𑀸𑀲𑀺𑀓𑁄. 𑀅𑀜𑁆𑀜𑁂 𑀘𑀸𑀢𑀺 𑀅𑀜𑁆𑀜𑁂 𑀘 𑀩𑀳𑀼𑀚𑀦𑀸. 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀦𑀺𑀯𑀸𑀲𑀝𑁆𑀞𑀸𑀦𑁂𑀳𑀺 𑀆𑀕𑀦𑁆𑀢𑁆𑀯𑀸 𑀫𑀦𑁆𑀢𑀲𑀚𑁆𑀛𑀸𑀬𑀓𑀭𑀡𑀢𑁆𑀣𑀁 𑀢𑀢𑁆𑀣 𑀧𑀝𑀺𑀯𑀲𑀦𑁆𑀢𑀺. 𑀫𑀦𑀲𑀸𑀓𑀝𑀲𑁆𑀲 𑀓𑀺𑀭 𑀭𑀫𑀡𑀻𑀬𑀢𑀸𑀬 𑀢𑁂 𑀩𑁆𑀭𑀸𑀳𑁆𑀫𑀡𑀸 𑀢𑀢𑁆𑀣 𑀦𑀤𑀻𑀢𑀻𑀭𑁂 𑀕𑁂𑀳𑀸𑀦𑀺 𑀓𑀸𑀭𑁂𑀢𑁆𑀯𑀸 𑀧𑀭𑀺𑀓𑁆𑀔𑀺𑀧𑀸𑀧𑁂𑀢𑁆𑀯𑀸 𑀅𑀜𑁆𑀜𑁂𑀲𑀁 𑀩𑀳𑀽𑀦𑀁 𑀧𑀯𑁂𑀲𑀦𑀁 𑀦𑀺𑀯𑀸𑀭𑁂𑀢𑁆𑀯𑀸 𑀅𑀦𑁆𑀢𑀭𑀦𑁆𑀢𑀭𑀸 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀯𑀲𑀦𑁆𑀢𑀺.

𑁫𑁨𑁦-𑁫𑁨𑁧. 𑀯𑀸𑀲𑁂𑀝𑁆𑀞𑀪𑀸𑀭𑀤𑁆𑀯𑀸𑀚𑀸𑀦𑀦𑁆𑀢𑀺 𑀯𑀸𑀲𑁂𑀝𑁆𑀞𑀲𑁆𑀲 𑀘 𑀧𑁄𑀓𑁆𑀔𑀭𑀲𑀸𑀢𑀺𑀦𑁄 𑀅𑀦𑁆𑀢𑁂𑀯𑀸𑀲𑀺𑀓𑀲𑁆𑀲, 𑀪𑀸𑀭𑀤𑁆𑀯𑀸𑀚𑀲𑁆𑀲 𑀘 𑀢𑀸𑀭𑀼𑀓𑁆𑀔𑀦𑁆𑀢𑁂𑀯𑀸𑀲𑀺𑀓𑀲𑁆𑀲. 𑀏𑀢𑁂 𑀓𑀺𑀭 𑀤𑁆𑀯𑁂 𑀚𑀸𑀢𑀺𑀲𑀫𑁆𑀧𑀦𑁆𑀦𑀸 𑀢𑀺𑀡𑁆𑀡𑀁 𑀯𑁂𑀤𑀸𑀦𑀁 𑀧𑀸𑀭𑀕𑀽 𑀅𑀳𑁂𑀲𑀼𑀁. 𑀚𑀗𑁆𑀖𑀯𑀺𑀳𑀸𑀭𑀦𑁆𑀢𑀺 𑀅𑀢𑀺𑀘𑀺𑀭𑀦𑀺𑀲𑀚𑁆𑀚𑀧𑀘𑁆𑀘𑀬𑀸 𑀓𑀺𑀮𑀫𑀣𑀯𑀺𑀦𑁄𑀤𑀦𑀢𑁆𑀣𑀸𑀬 𑀚𑀗𑁆𑀖𑀘𑀸𑀭𑀁. 𑀢𑁂 𑀓𑀺𑀭 𑀤𑀺𑀯𑀲𑀁 𑀲𑀚𑁆𑀛𑀸𑀬𑀁 𑀓𑀢𑁆𑀯𑀸 𑀲𑀸𑀬𑀦𑁆𑀳𑁂 𑀯𑀼𑀝𑁆𑀞𑀸𑀬 𑀦𑁆𑀳𑀸𑀦𑀻𑀬𑀲𑀫𑁆𑀪𑀸𑀭𑀕𑀦𑁆𑀥𑀫𑀸𑀮𑀢𑁂𑀮𑀥𑁄𑀢𑀯𑀢𑁆𑀣𑀸𑀦𑀺 𑀕𑀸𑀳𑀸𑀧𑁂𑀢𑁆𑀯𑀸 𑀅𑀢𑁆𑀢𑀦𑁄 𑀧𑀭𑀺𑀚𑀦𑀧𑀭𑀺𑀯𑀼𑀢𑀸 𑀦𑁆𑀳𑀸𑀬𑀺𑀢𑀼𑀓𑀸𑀫𑀸 𑀦𑀤𑀻𑀢𑀻𑀭𑀁 𑀕𑀦𑁆𑀢𑁆𑀯𑀸 𑀭𑀚𑀢𑀧𑀝𑁆𑀝𑀯𑀡𑁆𑀡𑁂 𑀯𑀸𑀮𑀺𑀓𑀸𑀲𑀡𑁆𑀟𑁂 𑀅𑀧𑀭𑀸𑀧𑀭𑀁 𑀘𑀗𑁆𑀓𑀫𑀺𑀁𑀲𑀼. 𑀏𑀓𑀁 𑀘𑀗𑁆𑀓𑀫𑀦𑁆𑀢𑀁 𑀇𑀢𑀭𑁄 𑀅𑀦𑀼𑀘𑀗𑁆𑀓𑀫𑀺, 𑀧𑀼𑀦 𑀇𑀢𑀭𑀁 𑀇𑀢𑀭𑁄𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀅𑀦𑀼𑀘𑀗𑁆𑀓𑀫𑀦𑁆𑀢𑀸𑀦𑀁 𑀅𑀦𑀼𑀯𑀺𑀘𑀭𑀦𑁆𑀢𑀸𑀦’’𑀦𑁆𑀢𑀺. 𑀫𑀕𑁆𑀕𑀸𑀫𑀕𑁆𑀕𑁂𑀢𑀺 𑀫𑀕𑁆𑀕𑁂 𑀘 𑀅𑀫𑀕𑁆𑀕𑁂 𑀘. 𑀓𑀢𑀫𑀁 𑀦𑀼 𑀔𑁄 𑀧𑀝𑀺𑀧𑀤𑀁 𑀧𑀽𑀭𑁂𑀢𑁆𑀯𑀸 𑀓𑀢𑀫𑁂𑀦 𑀫𑀕𑁆𑀕𑁂𑀦 𑀲𑀓𑁆𑀓𑀸 𑀲𑀼𑀔𑀁 𑀩𑁆𑀭𑀳𑁆𑀫𑀮𑁄𑀓𑀁 𑀕𑀦𑁆𑀢𑀼𑀦𑁆𑀢𑀺 𑀏𑀯𑀁 𑀫𑀕𑁆𑀕𑀸𑀫𑀕𑁆𑀕𑀁 𑀆𑀭𑀩𑁆𑀪 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀦𑁆𑀢𑀺 𑀅𑀢𑁆𑀣𑁄. 𑀅𑀜𑁆𑀚𑀲𑀸𑀬𑀦𑁄𑀢𑀺 𑀉𑀚𑀼𑀫𑀕𑁆𑀕𑀲𑁆𑀲𑁂𑀢𑀁 𑀯𑁂𑀯𑀘𑀦𑀁, 𑀅𑀜𑁆𑀚𑀲𑀸 𑀯𑀸 𑀉𑀚𑀼𑀓𑀫𑁂𑀯 𑀏𑀢𑁂𑀦 𑀆𑀬𑀦𑁆𑀢𑀺 𑀆𑀕𑀘𑁆𑀙𑀦𑁆𑀢𑀻𑀢𑀺 𑀅𑀜𑁆𑀚𑀲𑀸𑀬𑀦𑁄 𑀦𑀺𑀬𑁆𑀬𑀸𑀦𑀺𑀓𑁄 𑀦𑀺𑀬𑁆𑀬𑀸𑀢𑀻𑀢𑀺 𑀦𑀺𑀬𑁆𑀬𑀸𑀬𑀦𑁆𑀢𑁄 𑀦𑀺𑀬𑁆𑀬𑀸𑀢𑀺, 𑀕𑀘𑁆𑀙𑀦𑁆𑀢𑁄 𑀕𑀘𑁆𑀙𑀢𑀻𑀢𑀺 𑀅𑀢𑁆𑀣𑁄.

𑀢𑀓𑁆𑀓𑀭𑀲𑁆𑀲 𑀩𑁆𑀭𑀳𑁆𑀫𑀲𑀳𑀩𑁆𑀬𑀢𑀸𑀬𑀸𑀢𑀺 𑀬𑁄 𑀢𑀁 𑀫𑀕𑁆𑀕𑀁 𑀓𑀭𑁄𑀢𑀺 𑀧𑀝𑀺𑀧𑀚𑁆𑀚𑀢𑀺, 𑀢𑀲𑁆𑀲 𑀩𑁆𑀭𑀳𑁆𑀫𑀼𑀦𑀸 𑀲𑀤𑁆𑀥𑀺𑀁 𑀲𑀳𑀪𑀸𑀯𑀸𑀬, 𑀏𑀓𑀝𑁆𑀞𑀸𑀦𑁂 𑀧𑀸𑀢𑀼𑀪𑀸𑀯𑀸𑀬 𑀕𑀘𑁆𑀙𑀢𑀻𑀢𑀺 𑀅𑀢𑁆𑀣𑁄. 𑀬𑁆𑀯𑀸𑀬𑀦𑁆𑀢𑀺 𑀬𑁄 𑀅𑀬𑀁. 𑀅𑀓𑁆𑀔𑀸𑀢𑁄𑀢𑀺 𑀓𑀣𑀺𑀢𑁄 𑀤𑀻𑀧𑀺𑀢𑁄. 𑀩𑁆𑀭𑀸𑀳𑁆𑀫𑀡𑁂𑀦 𑀧𑁄𑀓𑁆𑀔𑀭𑀲𑀸𑀢𑀺𑀦𑀸𑀢𑀺 𑀅𑀢𑁆𑀢𑀦𑁄 𑀆𑀘𑀭𑀺𑀬𑀁 𑀅𑀧𑀤𑀺𑀲𑀢𑀺. 𑀇𑀢𑀺 𑀯𑀸𑀲𑁂𑀝𑁆𑀞𑁄 𑀲𑀓𑀫𑁂𑀯 𑀆𑀘𑀭𑀺𑀬𑀯𑀸𑀤𑀁 𑀣𑁄𑀫𑁂𑀢𑁆𑀯𑀸 𑀧𑀕𑁆𑀕𑀡𑁆𑀳𑀺𑀢𑁆𑀯𑀸 𑀯𑀺𑀘𑀭𑀢𑀺. 𑀪𑀸𑀭𑀤𑁆𑀯𑀸𑀚𑁄𑀧𑀺 𑀲𑀓𑀫𑁂𑀯𑀸𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀦𑁂𑀯 𑀔𑁄 𑀅𑀲𑀓𑁆𑀔𑀺 𑀯𑀸𑀲𑁂𑀝𑁆𑀞𑁄’’𑀢𑀺𑀆𑀤𑀺.

𑀢𑀢𑁄 𑀯𑀸𑀲𑁂𑀝𑁆𑀞𑁄 ‘‘𑀉𑀪𑀺𑀦𑁆𑀦𑀫𑁆𑀧𑀺 𑀅𑀫𑁆𑀳𑀸𑀓𑀁 𑀓𑀣𑀸 𑀅𑀦𑀺𑀬𑁆𑀬𑀸𑀦𑀺𑀓𑀸𑀯, 𑀇𑀫𑀲𑁆𑀫𑀺𑀜𑁆𑀘 𑀮𑁄𑀓𑁂 𑀫𑀕𑁆𑀕𑀓𑀼𑀲𑀮𑁄 𑀦𑀸𑀫 𑀪𑁄𑀢𑀸 𑀕𑁄𑀢𑀫𑁂𑀦 𑀲𑀤𑀺𑀲𑁄 𑀦𑀢𑁆𑀣𑀺, 𑀪𑀯𑀜𑁆𑀘 𑀕𑁄𑀢𑀫𑁄 𑀅𑀯𑀺𑀤𑀽𑀭𑁂 𑀯𑀲𑀢𑀺, 𑀲𑁄 𑀦𑁄 𑀢𑀼𑀮𑀁 𑀕𑀳𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑀯𑀸𑀡𑀺𑀚𑁄 𑀯𑀺𑀬 𑀓𑀗𑁆𑀔𑀁 𑀙𑀺𑀦𑁆𑀤𑀺𑀲𑁆𑀲𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀢𑀫𑀢𑁆𑀣𑀁 𑀪𑀸𑀭𑀤𑁆𑀯𑀸𑀚𑀲𑁆𑀲 𑀆𑀭𑁄𑀘𑁂𑀢𑁆𑀯𑀸 𑀉𑀪𑁄𑀧𑀺 𑀕𑀦𑁆𑀢𑁆𑀯𑀸 𑀅𑀢𑁆𑀢𑀦𑁄 𑀓𑀣𑀁 𑀪𑀕𑀯𑀢𑁄 𑀆𑀭𑁄𑀘𑁂𑀲𑀼𑀁. 𑀢𑁂𑀦 𑀯𑀼𑀢𑁆𑀢𑀁 ‘‘𑀅𑀣 𑀔𑁄 𑀯𑀸𑀲𑁂𑀝𑁆𑀞𑁄…𑀧𑁂… 𑀬𑁆𑀯𑀸𑀬𑀁 𑀅𑀓𑁆𑀔𑀸𑀢𑁄 𑀩𑁆𑀭𑀸𑀳𑁆𑀫𑀡𑁂𑀦 𑀢𑀸𑀭𑀼𑀓𑁆𑀔𑁂𑀦𑀸’’𑀢𑀺.

𑁫𑁨𑁨. 𑀏𑀢𑁆𑀣 𑀪𑁄 𑀕𑁄𑀢𑀫𑀸𑀢𑀺 𑀏𑀢𑀲𑁆𑀫𑀺𑀁 𑀫𑀕𑁆𑀕𑀸𑀫𑀕𑁆𑀕𑁂. 𑀯𑀺𑀕𑁆𑀕𑀳𑁄 𑀯𑀺𑀯𑀸𑀤𑁄𑀢𑀺𑀆𑀤𑀻𑀲𑀼 𑀧𑀼𑀩𑁆𑀩𑀼𑀧𑁆𑀧𑀢𑁆𑀢𑀺𑀓𑁄 𑀯𑀺𑀕𑁆𑀕𑀳𑁄. 𑀅𑀧𑀭𑀪𑀸𑀕𑁂 𑀯𑀺𑀯𑀸𑀤𑁄. 𑀤𑀼𑀯𑀺𑀥𑁄𑀧𑀺 𑀏𑀲𑁄 𑀦𑀸𑀦𑀸𑀆𑀘𑀭𑀺𑀬𑀸𑀦𑀁 𑀯𑀸𑀤𑀢𑁄 𑀦𑀸𑀦𑀸𑀯𑀸𑀤𑁄.

𑁫𑁨𑁩. 𑀅𑀣 𑀓𑀺𑀲𑁆𑀫𑀺𑀁 𑀧𑀦 𑀯𑁄𑀢𑀺 𑀢𑁆𑀯𑀫𑁆𑀧𑀺 𑀅𑀬𑀫𑁂𑀯 𑀫𑀕𑁆𑀕𑁄𑀢𑀺 𑀅𑀢𑁆𑀢𑀦𑁄 𑀆𑀘𑀭𑀺𑀬𑀯𑀸𑀤𑀫𑁂𑀯 𑀧𑀕𑁆𑀕𑀬𑁆𑀳 𑀢𑀺𑀝𑁆𑀞𑀲𑀺, 𑀪𑀸𑀭𑀤𑁆𑀯𑀸𑀚𑁄𑀧𑀺 𑀅𑀢𑁆𑀢𑀦𑁄 𑀆𑀘𑀭𑀺𑀬𑀯𑀸𑀤𑀫𑁂𑀯, 𑀏𑀓𑀲𑁆𑀲𑀸𑀧𑀺 𑀏𑀓𑀲𑁆𑀫𑀺𑀁 𑀲𑀁𑀲𑀬𑁄 𑀦𑀢𑁆𑀣𑀺. 𑀏𑀯𑀁 𑀲𑀢𑀺 𑀓𑀺𑀲𑁆𑀫𑀺𑀁 𑀯𑁄 𑀯𑀺𑀕𑁆𑀕𑀳𑁄𑀢𑀺 𑀧𑀼𑀘𑁆𑀙𑀢𑀺.

𑁫𑁨𑁪. 𑀫𑀕𑁆𑀕𑀸𑀫𑀕𑁆𑀕𑁂, 𑀪𑁄 𑀕𑁄𑀢𑀫𑀸𑀢𑀺 𑀫𑀕𑁆𑀕𑁂 𑀪𑁄 𑀕𑁄𑀢𑀫 𑀅𑀫𑀕𑁆𑀕𑁂 𑀘, 𑀉𑀚𑀼𑀫𑀕𑁆𑀕𑁂 𑀘 𑀅𑀦𑀼𑀚𑀼𑀫𑀕𑁆𑀕𑁂 𑀘𑀸𑀢𑀺 𑀅𑀢𑁆𑀣𑁄. 𑀏𑀲 𑀓𑀺𑀭 𑀏𑀓𑀩𑁆𑀭𑀸𑀳𑁆𑀫𑀡𑀲𑁆𑀲𑀸𑀧𑀺 𑀫𑀕𑁆𑀕𑀁 ‘‘𑀦 𑀫𑀕𑁆𑀕𑁄’’𑀢𑀺 𑀦 𑀯𑀤𑀢𑀺. 𑀬𑀣𑀸 𑀧𑀦 𑀅𑀢𑁆𑀢𑀦𑁄 𑀆𑀘𑀭𑀺𑀬𑀲𑁆𑀲 𑀫𑀕𑁆𑀕𑁄 𑀉𑀚𑀼𑀫𑀕𑁆𑀕𑁄, 𑀦 𑀏𑀯𑀁 𑀅𑀜𑁆𑀜𑁂𑀲𑀁 𑀅𑀦𑀼𑀚𑀸𑀦𑀸𑀢𑀺, 𑀢𑀲𑁆𑀫𑀸 𑀢𑀫𑁂𑀯𑀢𑁆𑀣𑀁 𑀤𑀻𑀧𑁂𑀦𑁆𑀢𑁄 ‘‘𑀓𑀺𑀜𑁆𑀘𑀸𑀧𑀺 𑀪𑁄 𑀕𑁄𑀢𑀫𑀸’’𑀢𑀺𑀆𑀤𑀺𑀫𑀸𑀳.

𑀲𑀩𑁆𑀩𑀸𑀦𑀺 𑀢𑀸𑀦𑀻𑀢𑀺 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑁂𑀦 𑀯𑀤𑀢𑀺, 𑀲𑀩𑁆𑀩𑁂 𑀢𑁂𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀩𑀳𑀽𑀦𑀻𑀢𑀺 𑀅𑀝𑁆𑀞 𑀯𑀸 𑀤𑀲 𑀯𑀸. 𑀦𑀸𑀦𑀸𑀫𑀕𑁆𑀕𑀸𑀦𑀻𑀢𑀺 𑀫𑀳𑀦𑁆𑀢𑀸𑀫𑀳𑀦𑁆𑀢𑀚𑀗𑁆𑀖𑀫𑀕𑁆𑀕𑀲𑀓𑀝𑀫𑀕𑁆𑀕𑀸𑀤𑀺𑀯𑀲𑁂𑀦 𑀦𑀸𑀦𑀸𑀯𑀺𑀥𑀸𑀦𑀺 𑀲𑀸𑀫𑀦𑁆𑀢𑀸 𑀕𑀸𑀫𑀦𑀤𑀻𑀢𑀴𑀸𑀓𑀔𑁂𑀢𑁆𑀢𑀸𑀤𑀻𑀳𑀺 𑀆𑀕𑀦𑁆𑀢𑁆𑀯𑀸 𑀕𑀸𑀫𑀁 𑀧𑀯𑀺𑀲𑀦𑀫𑀕𑁆𑀕𑀸𑀦𑀺.

𑁫𑁨𑁫-𑁫𑁨𑁬. ‘‘𑀦𑀺𑀬𑁆𑀬𑀦𑁆𑀢𑀻𑀢𑀺 𑀯𑀸𑀲𑁂𑀝𑁆𑀞 𑀯𑀤𑁂𑀲𑀻’’𑀢𑀺 𑀪𑀕𑀯𑀸 𑀢𑀺𑀓𑁆𑀔𑀢𑁆𑀢𑀼𑀁 𑀯𑀘𑀻𑀪𑁂𑀤𑀁 𑀓𑀢𑁆𑀯𑀸 𑀧𑀝𑀺𑀜𑁆𑀜𑀁 𑀓𑀸𑀭𑀸𑀧𑁂𑀲𑀺. 𑀓𑀲𑁆𑀫𑀸? 𑀢𑀺𑀢𑁆𑀣𑀺𑀬𑀸 𑀳𑀺 𑀧𑀝𑀺𑀚𑀸𑀦𑀺𑀢𑁆𑀯𑀸 𑀧𑀘𑁆𑀙𑀸 𑀦𑀺𑀕𑁆𑀕𑀬𑁆𑀳𑀫𑀸𑀦𑀸 𑀅𑀯𑀚𑀸𑀦𑀦𑁆𑀢𑀺. 𑀲𑁄 𑀢𑀣𑀸 𑀓𑀸𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀢𑀻𑀢𑀺.

𑁫𑁨𑁭-𑁫𑁨𑁯. 𑀢𑁂𑀯 𑀢𑁂𑀯𑀺𑀚𑁆𑀚𑀸𑀢𑀺 𑀢𑁂 𑀢𑁂𑀯𑀺𑀚𑁆𑀚𑀸. 𑀯𑀓𑀸𑀭𑁄 𑀆𑀕𑀫𑀲𑀦𑁆𑀥𑀺𑀫𑀢𑁆𑀢𑀁. 𑀅𑀦𑁆𑀥𑀯𑁂𑀡𑀻𑀢𑀺 𑀅𑀦𑁆𑀥𑀧𑀯𑁂𑀡𑀻, 𑀏𑀓𑁂𑀦 𑀘𑀓𑁆𑀔𑀼𑀫𑀢𑀸 𑀕𑀳𑀺𑀢𑀬𑀝𑁆𑀞𑀺𑀬𑀸 𑀓𑁄𑀝𑀺𑀁 𑀏𑀓𑁄 𑀅𑀦𑁆𑀥𑁄 𑀕𑀡𑁆𑀳𑀢𑀺, 𑀢𑀁 𑀅𑀦𑁆𑀥𑀁 𑀅𑀜𑁆𑀜𑁄 𑀢𑀁 𑀅𑀜𑁆𑀜𑁄𑀢𑀺 𑀏𑀯𑀁 𑀧𑀡𑁆𑀡𑀸𑀲𑀲𑀝𑁆𑀞𑀺 𑀅𑀦𑁆𑀥𑀸 𑀧𑀝𑀺𑀧𑀸𑀝𑀺𑀬𑀸 𑀖𑀝𑀺𑀢𑀸 𑀅𑀦𑁆𑀥𑀯𑁂𑀡𑀻𑀢𑀺 𑀯𑀼𑀘𑁆𑀘𑀢𑀺. 𑀧𑀭𑀫𑁆𑀧𑀭𑀲𑀁𑀲𑀢𑁆𑀢𑀸𑀢𑀺 𑀅𑀜𑁆𑀜𑀫𑀜𑁆𑀜𑀁 𑀮𑀕𑁆𑀕𑀸, 𑀬𑀝𑁆𑀞𑀺𑀕𑀸𑀳𑀓𑁂𑀦𑀧𑀺 𑀘𑀓𑁆𑀔𑀼𑀫𑀢𑀸 𑀯𑀺𑀭𑀳𑀺𑀢𑀸𑀢𑀺 𑀅𑀢𑁆𑀣𑁄. 𑀏𑀓𑁄 𑀓𑀺𑀭 𑀥𑀼𑀢𑁆𑀢𑁄 𑀅𑀦𑁆𑀥𑀕𑀡𑀁 𑀤𑀺𑀲𑁆𑀯𑀸 ‘‘𑀅𑀲𑀼𑀓𑀲𑁆𑀫𑀺𑀁 𑀦𑀸𑀫 𑀕𑀸𑀫𑁂 𑀔𑀚𑁆𑀚𑀪𑁄𑀚𑁆𑀚𑀁 𑀲𑀼𑀮𑀪’’𑀦𑁆𑀢𑀺 𑀉𑀲𑁆𑀲𑀸𑀳𑁂𑀢𑁆𑀯𑀸 ‘‘𑀢𑁂𑀦 𑀳𑀺 𑀢𑀢𑁆𑀣 𑀦𑁄 𑀲𑀸𑀫𑀺 𑀦𑁂𑀳𑀺, 𑀇𑀤𑀁 𑀦𑀸𑀫 𑀢𑁂 𑀤𑁂𑀫𑀸’’𑀢𑀺 𑀯𑀼𑀢𑁆𑀢𑁂, 𑀮𑀜𑁆𑀚𑀁 𑀕𑀳𑁂𑀢𑁆𑀯𑀸 𑀅𑀦𑁆𑀢𑀭𑀸𑀫𑀕𑁆𑀕𑁂 𑀫𑀕𑁆𑀕𑀸 𑀑𑀓𑁆𑀓𑀫𑁆𑀫 𑀫𑀳𑀦𑁆𑀢𑀁 𑀕𑀘𑁆𑀙𑀁 𑀅𑀦𑀼𑀧𑀭𑀺𑀕𑀦𑁆𑀢𑁆𑀯𑀸 𑀧𑀼𑀭𑀺𑀫𑀲𑁆𑀲 𑀳𑀢𑁆𑀣𑁂𑀦 𑀧𑀘𑁆𑀙𑀺𑀫𑀲𑁆𑀲 𑀓𑀘𑁆𑀙𑀁 𑀕𑀡𑁆𑀳𑀸𑀧𑁂𑀢𑁆𑀯𑀸 ‘‘𑀓𑀺𑀜𑁆𑀘𑀺 𑀓𑀫𑁆𑀫𑀁 𑀅𑀢𑁆𑀣𑀺, 𑀕𑀘𑁆𑀙𑀣 𑀢𑀸𑀯 𑀢𑀼𑀫𑁆𑀳𑁂’’𑀢𑀺 𑀯𑀢𑁆𑀯𑀸 𑀧𑀮𑀸𑀬𑀺, 𑀢𑁂 𑀤𑀺𑀯𑀲𑀫𑁆𑀧𑀺 𑀕𑀦𑁆𑀢𑁆𑀯𑀸 𑀫𑀕𑁆𑀕𑀁 𑀅𑀯𑀺𑀦𑁆𑀤𑀫𑀸𑀦𑀸 ‘‘𑀓𑀼𑀳𑀺𑀁 𑀦𑁄 𑀘𑀓𑁆𑀔𑀼𑀫𑀸, 𑀓𑀼𑀳𑀺𑀁 𑀫𑀕𑁆𑀕𑁄’’𑀢𑀺 𑀧𑀭𑀺𑀤𑁂𑀯𑀺𑀢𑁆𑀯𑀸 𑀫𑀕𑁆𑀕𑀁 𑀅𑀯𑀺𑀦𑁆𑀤𑀫𑀸𑀦𑀸 𑀢𑀢𑁆𑀣𑁂𑀯 𑀫𑀭𑀺𑀁𑀲𑀼. 𑀢𑁂 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀧𑀭𑀫𑁆𑀧𑀭𑀲𑀁𑀲𑀢𑁆𑀢𑀸’’𑀢𑀺. 𑀧𑀼𑀭𑀺𑀫𑁄𑀧𑀻𑀢𑀺 𑀧𑀼𑀭𑀺𑀫𑁂𑀲𑀼 𑀤𑀲𑀲𑀼 𑀩𑁆𑀭𑀸𑀳𑁆𑀫𑀡𑁂𑀲𑀼 𑀏𑀓𑁄𑀧𑀺. 𑀫𑀚𑁆𑀛𑀺𑀫𑁄𑀧𑀻𑀢𑀺 𑀫𑀚𑁆𑀛𑀺𑀫𑁂𑀲𑀼 𑀆𑀘𑀭𑀺𑀬𑀧𑀸𑀘𑀭𑀺𑀬𑁂𑀲𑀼 𑀏𑀓𑁄𑀧𑀺. 𑀧𑀘𑁆𑀙𑀺𑀫𑁄𑀧𑀻𑀢𑀺 𑀇𑀤𑀸𑀦𑀺 𑀢𑁂𑀯𑀺𑀚𑁆𑀚𑁂𑀲𑀼 𑀩𑁆𑀭𑀸𑀳𑁆𑀫𑀡𑁂𑀲𑀼 𑀏𑀓𑁄𑀧𑀺. 𑀳𑀲𑁆𑀲𑀓𑀜𑁆𑀜𑁂𑀯𑀸𑀢𑀺 𑀳𑀲𑀺𑀢𑀩𑁆𑀩𑀫𑁂𑀯. 𑀦𑀸𑀫𑀓𑀜𑁆𑀜𑁂𑀯𑀸𑀢𑀺 𑀮𑀸𑀫𑀓𑀁𑀬𑁂𑀯. 𑀢𑀤𑁂𑀢𑀁 𑀅𑀢𑁆𑀣𑀸𑀪𑀸𑀯𑁂𑀦 𑀭𑀺𑀢𑁆𑀢𑀓𑀁, 𑀭𑀺𑀢𑁆𑀢𑀓𑀢𑁆𑀢𑀸𑀬𑁂𑀯 𑀢𑀼𑀘𑁆𑀙𑀓𑀁. 𑀇𑀤𑀸𑀦𑀺 𑀩𑁆𑀭𑀳𑁆𑀫𑀮𑁄𑀓𑁄 𑀢𑀸𑀯 𑀢𑀺𑀝𑁆𑀞𑀢𑀼, 𑀬𑁄 𑀢𑁂𑀯𑀺𑀚𑁆𑀚𑁂𑀳𑀺 𑀦 𑀤𑀺𑀝𑁆𑀞𑀧𑀼𑀩𑁆𑀩𑁄𑀯. 𑀬𑁂𑀧𑀺 𑀘𑀦𑁆𑀤𑀺𑀫𑀲𑀽𑀭𑀺𑀬𑁂 𑀢𑁂𑀯𑀺𑀚𑁆𑀚𑀸 𑀧𑀲𑁆𑀲𑀦𑁆𑀢𑀺, 𑀢𑁂𑀲𑀫𑁆𑀧𑀺 𑀲𑀳𑀩𑁆𑀬𑀢𑀸𑀬 𑀫𑀕𑁆𑀕𑀁 𑀤𑁂𑀲𑁂𑀢𑀼𑀁 𑀦𑀧𑁆𑀧𑀳𑁄𑀦𑁆𑀢𑀻𑀢𑀺 𑀤𑀲𑁆𑀲𑀦𑀢𑁆𑀣𑀁 ‘‘𑀢𑀁 𑀓𑀺𑀁 𑀫𑀜𑁆𑀜𑀲𑀻’’𑀢𑀺𑀆𑀤𑀺𑀫𑀸𑀳.

𑁫𑁩𑁦. 𑀢𑀢𑁆𑀣 𑀬𑀢𑁄 𑀘𑀦𑁆𑀤𑀺𑀫𑀲𑀽𑀭𑀺𑀬𑀸 𑀉𑀕𑁆𑀕𑀘𑁆𑀙𑀦𑁆𑀢𑀻𑀢𑀺 𑀬𑀲𑁆𑀫𑀺𑀁 𑀓𑀸𑀮𑁂 𑀉𑀕𑁆𑀕𑀘𑁆𑀙𑀦𑁆𑀢𑀺. 𑀬𑀢𑁆𑀣 𑀘 𑀑𑀕𑁆𑀕𑀘𑁆𑀙𑀦𑁆𑀢𑀻𑀢𑀺 𑀬𑀲𑁆𑀫𑀺𑀁 𑀓𑀸𑀮𑁂 𑀅𑀢𑁆𑀣𑀫𑁂𑀦𑁆𑀢𑀺, 𑀉𑀕𑁆𑀕𑀫𑀦𑀓𑀸𑀮𑁂 𑀘 𑀅𑀢𑁆𑀣𑀗𑁆𑀕𑀫𑀦𑀓𑀸𑀮𑁂 𑀘 𑀧𑀲𑁆𑀲𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀆𑀬𑀸𑀘𑀦𑁆𑀢𑀻𑀢𑀺 ‘‘𑀉𑀤𑁂𑀳𑀺 𑀪𑀯𑀁 𑀘𑀦𑁆𑀤, 𑀉𑀤𑁂𑀳𑀺 𑀪𑀯𑀁 𑀲𑀽𑀭𑀺𑀬𑀸’’𑀢𑀺 𑀏𑀯𑀁 𑀆𑀬𑀸𑀘𑀦𑁆𑀢𑀺. 𑀣𑁄𑀫𑀬𑀦𑁆𑀢𑀻𑀢𑀺 ‘‘𑀲𑁄𑀫𑁆𑀫𑁄 𑀘𑀦𑁆𑀤𑁄, 𑀧𑀭𑀺𑀫𑀡𑁆𑀟𑀮𑁄 𑀘𑀦𑁆𑀤𑁄, 𑀲𑀧𑁆𑀧𑀪𑁄 𑀘𑀦𑁆𑀤𑁄’’𑀢𑀺𑀆𑀤𑀻𑀦𑀺 𑀯𑀤𑀦𑁆𑀢𑀸 𑀧𑀲𑀁𑀲𑀦𑁆𑀢𑀺. 𑀧𑀜𑁆𑀚𑀮𑀺𑀓𑀸𑀢𑀺 𑀧𑀕𑁆𑀕𑀳𑀺𑀢𑀅𑀜𑁆𑀚𑀮𑀺𑀓𑀸. 𑀦𑀫𑀲𑁆𑀲𑀫𑀸𑀦𑀸𑀢𑀺 ‘‘𑀦𑀫𑁄 𑀦𑀫𑁄’’𑀢𑀺 𑀯𑀤𑀫𑀸𑀦𑀸.

𑁫𑁩𑁧-𑁫𑁩𑁨. 𑀬𑀁 𑀧𑀲𑁆𑀲𑀦𑁆𑀢𑀻𑀢𑀺 𑀏𑀢𑁆𑀣 𑀬𑀦𑁆𑀢𑀺 𑀦𑀺𑀧𑀸𑀢𑀫𑀢𑁆𑀢𑀁. 𑀓𑀺𑀁 𑀧𑀦 𑀦 𑀓𑀺𑀭𑀸𑀢𑀺 𑀏𑀢𑁆𑀣 𑀇𑀥 𑀧𑀦 𑀓𑀺𑀁 𑀯𑀢𑁆𑀢𑀩𑁆𑀩𑀁. 𑀬𑀢𑁆𑀣 𑀓𑀺𑀭 𑀢𑁂𑀯𑀺𑀚𑁆𑀚𑁂𑀳𑀺 𑀩𑁆𑀭𑀸𑀳𑁆𑀫𑀡𑁂𑀳𑀺 𑀦 𑀩𑁆𑀭𑀳𑁆𑀫𑀸 𑀲𑀓𑁆𑀔𑀺𑀤𑀺𑀝𑁆𑀞𑁄𑀢𑀺 𑀏𑀯𑀫𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑀅𑀘𑀺𑀭𑀯𑀢𑀻𑀦𑀤𑀻𑀉𑀧𑀫𑀸𑀓𑀣𑀸

𑁫𑁪𑁨. 𑀲𑀫𑀢𑀺𑀢𑁆𑀢𑀺𑀓𑀸𑀢𑀺 𑀲𑀫𑀪𑀭𑀺𑀢𑀸. 𑀓𑀸𑀓𑀧𑁂𑀬𑁆𑀬𑀸𑀢𑀺 𑀬𑀢𑁆𑀣 𑀓𑀢𑁆𑀣𑀘𑀺 𑀢𑀻𑀭𑁂 𑀞𑀺𑀢𑁂𑀦 𑀓𑀸𑀓𑁂𑀦 𑀲𑀓𑁆𑀓𑀸 𑀧𑀸𑀢𑀼𑀦𑁆𑀢𑀺 𑀓𑀸𑀓𑀧𑁂𑀬𑁆𑀬𑀸. 𑀧𑀸𑀭𑀁 𑀢𑀭𑀺𑀢𑀼𑀓𑀸𑀫𑁄𑀢𑀺 𑀦𑀤𑀺𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀧𑀭𑀢𑀻𑀭𑀁 𑀕𑀦𑁆𑀢𑀼𑀓𑀸𑀫𑁄. 𑀅𑀯𑁆𑀳𑁂𑀬𑁆𑀬𑀸𑀢𑀺 𑀧𑀓𑁆𑀓𑁄𑀲𑁂𑀬𑁆𑀬. 𑀏𑀳𑀺 𑀧𑀸𑀭𑀸𑀧𑀸𑀭𑀦𑁆𑀢𑀺 𑀅𑀫𑁆𑀪𑁄 𑀧𑀸𑀭 𑀅𑀧𑀸𑀭𑀁 𑀏𑀳𑀺, 𑀅𑀣 𑀫𑀁 𑀲𑀳𑀲𑀸𑀯 𑀕𑀳𑁂𑀢𑁆𑀯𑀸 𑀕𑀫𑀺𑀲𑁆𑀲𑀲𑀺, 𑀅𑀢𑁆𑀣𑀺 𑀫𑁂 𑀅𑀘𑁆𑀘𑀸𑀬𑀺𑀓𑀓𑀫𑁆𑀫𑀦𑁆𑀢𑀺 𑀅𑀢𑁆𑀣𑁄.

𑁫𑁪𑁪. 𑀬𑁂 𑀥𑀫𑁆𑀫𑀸 𑀩𑁆𑀭𑀸𑀳𑁆𑀫𑀡𑀓𑀸𑀭𑀓𑀸𑀢𑀺 𑀏𑀢𑁆𑀣 𑀧𑀜𑁆𑀘𑀲𑀻𑀮𑀤𑀲𑀓𑀼𑀲𑀮𑀓𑀫𑁆𑀫𑀧𑀣𑀪𑁂𑀤𑀸 𑀥𑀫𑁆𑀫𑀸 𑀩𑁆𑀭𑀸𑀳𑁆𑀫𑀡𑀓𑀸𑀭𑀓𑀸𑀢𑀺 𑀯𑁂𑀤𑀺𑀢𑀩𑁆𑀩𑀸, 𑀢𑀩𑁆𑀩𑀺𑀧𑀭𑀻𑀢𑀸 𑀅𑀩𑁆𑀭𑀸𑀳𑁆𑀫𑀡𑀓𑀸𑀭𑀓𑀸. 𑀇𑀦𑁆𑀤𑀫𑀯𑁆𑀳𑀸𑀬𑀸𑀫𑀸𑀢𑀺 𑀇𑀦𑁆𑀤𑀁 𑀅𑀯𑁆𑀳𑀸𑀬𑀸𑀫 𑀧𑀓𑁆𑀓𑁄𑀲𑀸𑀫. 𑀏𑀯𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀅𑀯𑁆𑀳𑀸𑀬𑀦𑀲𑁆𑀲 𑀦𑀺𑀭𑀢𑁆𑀣𑀓𑀢𑀁 𑀤𑀲𑁆𑀲𑁂𑀢𑁆𑀯𑀸 𑀧𑀼𑀦𑀧𑀺 𑀪𑀕𑀯𑀸 𑀅𑀡𑁆𑀡𑀯𑀓𑀼𑀘𑁆𑀙𑀺𑀬𑀁 𑀲𑀽𑀭𑀺𑀬𑁄 𑀯𑀺𑀬 𑀚𑀮𑀫𑀸𑀦𑁄 𑀧𑀜𑁆𑀘𑀲𑀢𑀪𑀺𑀓𑁆𑀔𑀼𑀧𑀭𑀺𑀯𑀼𑀢𑁄 𑀅𑀘𑀺𑀭𑀯𑀢𑀺𑀬𑀸 𑀢𑀻𑀭𑁂 𑀦𑀺𑀲𑀺𑀦𑁆𑀦𑁄 𑀅𑀧𑀭𑀫𑁆𑀧𑀺 𑀦𑀤𑀻𑀉𑀧𑀫𑀁𑀬𑁂𑀯 𑀆𑀳𑀭𑀦𑁆𑀢𑁄 ‘‘𑀲𑁂𑀬𑁆𑀬𑀣𑀸𑀧𑀻’’𑀢𑀺𑀆𑀤𑀺𑀫𑀸𑀳.

𑁫𑁪𑁬. 𑀓𑀸𑀫𑀕𑀼𑀡𑀸𑀢𑀺 𑀓𑀸𑀫𑀬𑀺𑀢𑀩𑁆𑀩𑀝𑁆𑀞𑁂𑀦 𑀓𑀸𑀫𑀸, 𑀩𑀦𑁆𑀥𑀦𑀝𑁆𑀞𑁂𑀦 𑀕𑀼𑀡𑀸. ‘‘𑀅𑀦𑀼𑀚𑀸𑀦𑀸𑀫𑀺 𑀪𑀺𑀓𑁆𑀔𑀯𑁂, 𑀅𑀳𑀢𑀸𑀦𑀁 𑀯𑀢𑁆𑀣𑀸𑀦𑀁 𑀤𑀺𑀕𑀼𑀡𑀁 𑀲𑀗𑁆𑀖𑀸𑀝𑀺’’𑀦𑁆𑀢𑀺 (𑀫𑀳𑀸𑀯. 𑁩𑁪𑁮) 𑀏𑀢𑁆𑀣 𑀳𑀺 𑀧𑀝𑀮𑀝𑁆𑀞𑁄 𑀕𑀼𑀡𑀝𑁆𑀞𑁄. ‘‘𑀅𑀘𑁆𑀘𑁂𑀦𑁆𑀢𑀺 𑀓𑀸𑀮𑀸 𑀢𑀭𑀬𑀦𑁆𑀢𑀺 𑀭𑀢𑁆𑀢𑀺𑀬𑁄, 𑀯𑀬𑁄𑀕𑀼𑀡𑀸 𑀅𑀦𑀼𑀧𑀼𑀩𑁆𑀩𑀁 𑀚𑀳𑀦𑁆𑀢𑀻’’𑀢𑀺 𑀏𑀢𑁆𑀣 𑀭𑀸𑀲𑀝𑁆𑀞𑁄 𑀕𑀼𑀡𑀝𑁆𑀞𑁄. ‘‘𑀲𑀢𑀕𑀼𑀡𑀸 𑀤𑀓𑁆𑀔𑀺𑀡𑀸 𑀧𑀸𑀝𑀺𑀓𑀗𑁆𑀔𑀺𑀢𑀩𑁆𑀩𑀸’’𑀢𑀺 (𑀫. 𑀦𑀺. 𑁩.𑁩𑁭𑁯) 𑀏𑀢𑁆𑀣 𑀆𑀦𑀺𑀲𑀁𑀲𑀝𑁆𑀞𑁄 𑀕𑀼𑀡𑀝𑁆𑀞𑁄. ‘‘𑀅𑀦𑁆𑀢𑀁 𑀅𑀦𑁆𑀢𑀕𑀼𑀡𑀁 (𑀔𑀼. 𑀧𑀸. 𑁩.𑁧) 𑀓𑀬𑀺𑀭𑀸 𑀫𑀸𑀮𑀸𑀕𑀼𑀡𑁂 𑀩𑀳𑀽’’𑀢𑀺 (𑀥. 𑀧. 𑁫𑁩) 𑀘 𑀏𑀢𑁆𑀣 𑀩𑀦𑁆𑀥𑀦𑀝𑁆𑀞𑁄 𑀕𑀼𑀡𑀝𑁆𑀞𑁄. 𑀇𑀥𑀸𑀧𑀺 𑀏𑀲𑁂𑀯 𑀅𑀥𑀺𑀧𑁆𑀧𑁂𑀢𑁄. 𑀢𑁂𑀦 𑀯𑀼𑀢𑁆𑀢𑀁 ‘‘𑀩𑀦𑁆𑀥𑀦𑀝𑁆𑀞𑁂𑀦 𑀕𑀼𑀡𑀸’’𑀢𑀺. 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀸𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑁂𑀦 𑀧𑀲𑁆𑀲𑀺𑀢𑀩𑁆𑀩𑀸. 𑀏𑀢𑁂𑀦𑀼𑀧𑀸𑀬𑁂𑀦 𑀲𑁄𑀢𑀯𑀺𑀜𑁆𑀜𑁂𑀬𑁆𑀬𑀸𑀤𑀻𑀲𑀼𑀧𑀺 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀇𑀝𑁆𑀞𑀸𑀢𑀺 𑀧𑀭𑀺𑀬𑀺𑀝𑁆𑀞𑀸 𑀯𑀸 𑀳𑁄𑀦𑁆𑀢𑀼, 𑀫𑀸 𑀯𑀸, 𑀇𑀝𑁆𑀞𑀸𑀭𑀫𑁆𑀫𑀡𑀪𑀽𑀢𑀸𑀢𑀺 𑀅𑀢𑁆𑀣𑁄. 𑀓𑀦𑁆𑀢𑀸𑀢𑀺 𑀓𑀸𑀫𑀦𑀻𑀬𑀸. 𑀫𑀦𑀸𑀧𑀸𑀢𑀺 𑀫𑀦𑀯𑀟𑁆𑀠𑀦𑀓𑀸. 𑀧𑀺𑀬𑀭𑀽𑀧𑀸𑀢𑀺 𑀧𑀺𑀬𑀚𑀸𑀢𑀺𑀓𑀸. 𑀓𑀸𑀫𑀽𑀧𑀲𑀜𑁆𑀳𑀺𑀢𑀸𑀢𑀺 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀉𑀧𑁆𑀧𑀚𑁆𑀚𑀫𑀸𑀦𑁂𑀦 𑀓𑀸𑀫𑁂𑀦 𑀉𑀧𑀲𑀜𑁆𑀳𑀺𑀢𑀸. 𑀭𑀚𑀦𑀻𑀬𑀸𑀢𑀺 𑀭𑀜𑁆𑀚𑀦𑀻𑀬𑀸, 𑀭𑀸𑀕𑀼𑀧𑁆𑀧𑀢𑁆𑀢𑀺𑀓𑀸𑀭𑀡𑀪𑀽𑀢𑀸𑀢𑀺 𑀅𑀢𑁆𑀣𑁄.

𑀕𑀥𑀺𑀢𑀸𑀢𑀺 𑀕𑁂𑀥𑁂𑀦 𑀅𑀪𑀺𑀪𑀽𑀢𑀸 𑀳𑀼𑀢𑁆𑀯𑀸. 𑀫𑀼𑀘𑁆𑀙𑀺𑀢𑀸𑀢𑀺 𑀫𑀼𑀘𑁆𑀙𑀸𑀓𑀸𑀭𑀧𑁆𑀧𑀢𑁆𑀢𑀸𑀬 𑀅𑀥𑀺𑀫𑀢𑁆𑀢𑀓𑀸𑀬 𑀢𑀡𑁆𑀳𑀸𑀬 𑀅𑀪𑀺𑀪𑀽𑀢𑀸. 𑀅𑀚𑁆𑀛𑁄𑀧𑀦𑁆𑀦𑀸𑀢𑀺 𑀅𑀥𑀺𑀑𑀧𑀦𑁆𑀦𑀸 𑀑𑀕𑀸𑀴𑁆𑀳𑀸 ‘‘𑀇𑀤𑀁 𑀲𑀸𑀭’’𑀦𑁆𑀢𑀺 𑀧𑀭𑀺𑀦𑀺𑀝𑁆𑀞𑀸𑀦𑀧𑁆𑀧𑀢𑁆𑀢𑀸 𑀳𑀼𑀢𑁆𑀯𑀸. 𑀅𑀦𑀸𑀤𑀻𑀦𑀯𑀤𑀲𑁆𑀲𑀸𑀯𑀺𑀦𑁄𑀢𑀺 𑀆𑀤𑀻𑀦𑀯𑀁 𑀅𑀧𑀲𑁆𑀲𑀦𑁆𑀢𑀸. 𑀅𑀦𑀺𑀲𑁆𑀲𑀭𑀡𑀧𑀜𑁆𑀜𑀸𑀢𑀺 𑀇𑀤𑀫𑁂𑀢𑁆𑀣 𑀦𑀺𑀲𑁆𑀲𑀭𑀡𑀦𑁆𑀢𑀺, 𑀏𑀯𑀁 𑀧𑀭𑀺𑀚𑀸𑀦𑀦𑀧𑀜𑁆𑀜𑀸𑀯𑀺𑀭𑀳𑀺𑀢𑀸, 𑀧𑀘𑁆𑀘𑀯𑁂𑀓𑁆𑀔𑀡𑀧𑀭𑀺𑀪𑁄𑀕𑀯𑀺𑀭𑀳𑀺𑀢𑀸𑀢𑀺 𑀅𑀢𑁆𑀣𑁄.

𑁫𑁪𑁮. 𑀆𑀯𑀭𑀡𑀸𑀢𑀺𑀆𑀤𑀻𑀲𑀼 𑀆𑀯𑀭𑀦𑁆𑀢𑀻𑀢𑀺 𑀆𑀯𑀭𑀡𑀸. 𑀦𑀺𑀯𑀸𑀭𑁂𑀦𑁆𑀢𑀻𑀢𑀺 𑀦𑀻𑀯𑀭𑀡𑀸. 𑀑𑀦𑀦𑁆𑀥𑀦𑁆𑀢𑀻𑀢𑀺 𑀑𑀦𑀸𑀳𑀦𑀸. 𑀧𑀭𑀺𑀬𑁄𑀦𑀦𑁆𑀥𑀦𑁆𑀢𑀻𑀢𑀺 𑀧𑀭𑀺𑀬𑁄𑀦𑀸𑀳𑀦𑀸. 𑀓𑀸𑀫𑀘𑁆𑀙𑀦𑁆𑀤𑀸𑀤𑀻𑀦𑀁 𑀯𑀺𑀢𑁆𑀣𑀸𑀭𑀓𑀣𑀸 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀢𑁄 𑀕𑀳𑁂𑀢𑀩𑁆𑀩𑀸.

𑁫𑁪𑁯-𑁫𑁫𑁦. 𑀆𑀯𑀼𑀢𑀸 𑀦𑀺𑀯𑀼𑀢𑀸 𑀑𑀦𑀤𑁆𑀥𑀸 𑀧𑀭𑀺𑀬𑁄𑀦𑀤𑁆𑀥𑀸𑀢𑀺 𑀧𑀤𑀸𑀦𑀺 𑀆𑀯𑀭𑀡𑀸𑀤𑀻𑀦𑀁 𑀯𑀲𑁂𑀦 𑀯𑀼𑀢𑁆𑀢𑀸𑀦𑀺. 𑀲𑀧𑀭𑀺𑀕𑁆𑀕𑀳𑁄𑀢𑀺 𑀇𑀢𑁆𑀣𑀺𑀧𑀭𑀺𑀕𑁆𑀕𑀳𑁂𑀦 𑀲𑀧𑀭𑀺𑀕𑁆𑀕𑀳𑁄𑀢𑀺 𑀧𑀼𑀘𑁆𑀙𑀢𑀺. 𑀅𑀧𑀭𑀺𑀕𑁆𑀕𑀳𑁄 𑀪𑁄 𑀕𑁄𑀢𑀫𑀸𑀢𑀺𑀆𑀤𑀻𑀲𑀼𑀧𑀺 𑀓𑀸𑀫𑀘𑁆𑀙𑀦𑁆𑀤𑀲𑁆𑀲 𑀅𑀪𑀸𑀯𑀢𑁄 𑀇𑀢𑁆𑀣𑀺𑀧𑀭𑀺𑀕𑁆𑀕𑀳𑁂𑀦 𑀅𑀧𑀭𑀺𑀕𑁆𑀕𑀳𑁄. 𑀩𑁆𑀬𑀸𑀧𑀸𑀤𑀲𑁆𑀲 𑀅𑀪𑀸𑀯𑀢𑁄 𑀓𑁂𑀦𑀘𑀺 𑀲𑀤𑁆𑀥𑀺𑀁 𑀯𑁂𑀭𑀘𑀺𑀢𑁆𑀢𑁂𑀦 𑀅𑀯𑁂𑀭𑁄. 𑀣𑀺𑀦𑀫𑀺𑀤𑁆𑀥𑀲𑁆𑀲 𑀅𑀪𑀸𑀯𑀢𑁄 𑀘𑀺𑀢𑁆𑀢𑀕𑁂𑀮𑀜𑁆𑀜𑀲𑀗𑁆𑀔𑀸𑀢𑁂𑀦 𑀩𑁆𑀬𑀸𑀧𑀚𑁆𑀚𑁂𑀦 𑀅𑀩𑁆𑀬𑀸𑀧𑀚𑁆𑀚𑁄. 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀸𑀪𑀸𑀯𑀢𑁄 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀸𑀤𑀻𑀳𑀺 𑀲𑀁𑀓𑀺𑀮𑁂𑀲𑁂𑀳𑀺 𑀅𑀲𑀁𑀓𑀺𑀮𑀺𑀝𑁆𑀞𑀘𑀺𑀢𑁆𑀢𑁄 𑀲𑀼𑀧𑀭𑀺𑀲𑀼𑀤𑁆𑀥𑀫𑀸𑀦𑀲𑁄. 𑀯𑀺𑀘𑀺𑀓𑀺𑀘𑁆𑀙𑀸𑀬 𑀅𑀪𑀸𑀯𑀢𑁄 𑀘𑀺𑀢𑁆𑀢𑀁 𑀯𑀲𑁂 𑀯𑀢𑁆𑀢𑁂𑀢𑀺. 𑀬𑀣𑀸 𑀘 𑀩𑁆𑀭𑀸𑀳𑁆𑀫𑀡𑀸 𑀘𑀺𑀢𑁆𑀢𑀕𑀢𑀺𑀓𑀸 𑀳𑁄𑀦𑁆𑀢𑀻𑀢𑀺, 𑀘𑀺𑀢𑁆𑀢𑀲𑁆𑀲 𑀯𑀲𑁂𑀦 𑀯𑀢𑁆𑀢𑀦𑁆𑀢𑀺, 𑀦 𑀢𑀸𑀤𑀺𑀲𑁄𑀢𑀺 𑀯𑀲𑀯𑀢𑁆𑀢𑀻.

𑁫𑁫𑁨. 𑀇𑀥 𑀔𑁄 𑀧𑀦𑀸𑀢𑀺 𑀇𑀥 𑀩𑁆𑀭𑀳𑁆𑀫𑀮𑁄𑀓𑀫𑀕𑁆𑀕𑁂. 𑀆𑀲𑀻𑀤𑀺𑀢𑁆𑀯𑀸𑀢𑀺 𑀅𑀫𑀕𑁆𑀕𑀫𑁂𑀯 ‘‘𑀫𑀕𑁆𑀕𑁄’’𑀢𑀺 𑀉𑀧𑀕𑀦𑁆𑀢𑁆𑀯𑀸. 𑀲𑀁𑀲𑀻𑀤𑀦𑁆𑀢𑀻𑀢𑀺 ‘‘𑀲𑀫𑀢𑀮’’𑀦𑁆𑀢𑀺 𑀲𑀜𑁆𑀜𑀸𑀬 𑀧𑀗𑁆𑀓𑀁 𑀑𑀢𑀺𑀡𑁆𑀡𑀸 𑀯𑀺𑀬 𑀅𑀦𑀼𑀧𑁆𑀧𑀯𑀺𑀲𑀦𑁆𑀢𑀺. 𑀲𑀁𑀲𑀻𑀤𑀺𑀢𑁆𑀯𑀸 𑀯𑀺𑀲𑀸𑀭𑀁 𑀧𑀸𑀧𑀼𑀡𑀦𑁆𑀢𑀻𑀢𑀺 𑀏𑀯𑀁 𑀧𑀗𑁆𑀓𑁂 𑀯𑀺𑀬 𑀲𑀁𑀲𑀻𑀤𑀺𑀢𑁆𑀯𑀸 𑀯𑀺𑀲𑀸𑀭𑀁 𑀅𑀗𑁆𑀕𑀫𑀗𑁆𑀕𑀲𑀁𑀪𑀜𑁆𑀚𑀦𑀁 𑀧𑀸𑀧𑀼𑀡𑀦𑁆𑀢𑀺. 𑀲𑀼𑀓𑁆𑀔𑀢𑀭𑀁 𑀫𑀜𑁆𑀜𑁂 𑀢𑀭𑀦𑁆𑀢𑀻𑀢𑀺 𑀫𑀭𑀻𑀘𑀺𑀓𑀸𑀬 𑀯𑀜𑁆𑀘𑁂𑀢𑁆𑀯𑀸 ‘‘𑀓𑀸𑀓𑀧𑁂𑀬𑁆𑀬𑀸 𑀦𑀤𑀻’’𑀢𑀺 𑀲𑀜𑁆𑀜𑀸𑀬 ‘‘𑀢𑀭𑀺𑀲𑁆𑀲𑀸𑀫𑀸’’𑀢𑀺 𑀳𑀢𑁆𑀣𑁂𑀳𑀺 𑀘 𑀧𑀸𑀤𑁂𑀳𑀺 𑀘 𑀯𑀸𑀬𑀫𑀫𑀸𑀦𑀸 𑀲𑀼𑀓𑁆𑀔𑀢𑀭𑀡𑀁 𑀫𑀜𑁆𑀜𑁂 𑀢𑀭𑀦𑁆𑀢𑀺. 𑀢𑀲𑁆𑀫𑀸 𑀬𑀣𑀸 𑀳𑀢𑁆𑀣𑀧𑀸𑀤𑀸𑀤𑀻𑀦𑀁 𑀲𑀁𑀪𑀜𑁆𑀚𑀦𑀁 𑀧𑀭𑀺𑀪𑀜𑁆𑀚𑀦𑀁, 𑀏𑀯𑀁 𑀅𑀧𑀸𑀬𑁂𑀲𑀼 𑀲𑀁𑀪𑀜𑁆𑀚𑀦𑀁 𑀧𑀭𑀺𑀪𑀜𑁆𑀚𑀦𑀁 𑀧𑀸𑀧𑀼𑀡𑀦𑁆𑀢𑀺. 𑀇𑀥𑁂𑀯 𑀘 𑀲𑀼𑀔𑀁 𑀯𑀸 𑀲𑀸𑀢𑀁 𑀯𑀸 𑀦 𑀮𑀪𑀦𑁆𑀢𑀺. 𑀢𑀲𑁆𑀫𑀸 𑀇𑀤𑀁 𑀢𑁂𑀯𑀺𑀚𑁆𑀚𑀸𑀦𑀁 𑀩𑁆𑀭𑀸𑀳𑁆𑀫𑀡𑀸𑀦𑀦𑁆𑀢𑀺 𑀢𑀲𑁆𑀫𑀸 𑀇𑀤𑀁 𑀩𑁆𑀭𑀳𑁆𑀫𑀲𑀳𑀩𑁆𑀬𑀢𑀸𑀬 𑀫𑀕𑁆𑀕𑀤𑀻𑀧𑀓𑀁 𑀢𑁂𑀯𑀺𑀚𑁆𑀚𑀓𑀁 𑀧𑀸𑀯𑀘𑀦𑀁 𑀢𑁂𑀯𑀺𑀚𑁆𑀚𑀸𑀦𑀁 𑀩𑁆𑀭𑀸𑀳𑁆𑀫𑀡𑀸𑀦𑀁. 𑀢𑁂𑀯𑀺𑀚𑁆𑀚𑀸𑀇𑀭𑀺𑀡𑀦𑁆𑀢𑀺 𑀢𑁂𑀯𑀺𑀚𑁆𑀚𑀸𑀅𑀭𑀜𑁆𑀜𑀁 𑀇𑀭𑀺𑀡𑀦𑁆𑀢𑀺 𑀳𑀺 𑀅𑀕𑀸𑀫𑀓𑀁 𑀫𑀳𑀸𑀅𑀭𑀜𑁆𑀜𑀁 𑀯𑀼𑀘𑁆𑀘𑀢𑀺. 𑀢𑁂𑀯𑀺𑀚𑁆𑀚𑀸𑀯𑀺𑀯𑀦𑀦𑁆𑀢𑀺 𑀧𑀼𑀧𑁆𑀨𑀨𑀮𑁂𑀳𑀺 𑀅𑀧𑀭𑀺𑀪𑁄𑀕𑀭𑀼𑀓𑁆𑀔𑁂𑀳𑀺 𑀲𑀜𑁆𑀙𑀦𑁆𑀦𑀁 𑀦𑀺𑀭𑀼𑀤𑀓𑀁 𑀅𑀭𑀜𑁆𑀜𑀁. 𑀬𑀢𑁆𑀣 𑀫𑀕𑁆𑀕𑀢𑁄 𑀉𑀓𑁆𑀓𑀫𑀺𑀢𑁆𑀯𑀸 𑀧𑀭𑀺𑀯𑀢𑁆𑀢𑀺𑀢𑀼𑀫𑁆𑀧𑀺 𑀦 𑀲𑀓𑁆𑀓𑀸 𑀳𑁄𑀦𑁆𑀢𑀺, 𑀢𑀁 𑀲𑀦𑁆𑀥𑀸𑀬𑀸𑀳 ‘‘𑀢𑁂𑀯𑀺𑀚𑁆𑀚𑀸𑀯𑀺𑀯𑀦𑀦𑁆𑀢𑀺𑀧𑀺 𑀯𑀼𑀘𑁆𑀘𑀢𑀻’’𑀢𑀺. 𑀢𑁂𑀯𑀺𑀚𑁆𑀚𑀸𑀩𑁆𑀬𑀲𑀦𑀦𑁆𑀢𑀺 𑀢𑁂𑀯𑀺𑀚𑁆𑀚𑀸𑀦𑀁 𑀧𑀜𑁆𑀘𑀯𑀺𑀥𑀩𑁆𑀬𑀲𑀦𑀲𑀤𑀺𑀲𑀫𑁂𑀢𑀁. 𑀬𑀣𑀸 𑀳𑀺 𑀜𑀸𑀢𑀺𑀭𑁄𑀕𑀪𑁄𑀕 𑀤𑀺𑀝𑁆𑀞𑀺 𑀲𑀻𑀮𑀩𑁆𑀬𑀲𑀦𑀧𑁆𑀧𑀢𑁆𑀢𑀲𑁆𑀲 𑀲𑀼𑀔𑀁 𑀦𑀸𑀫 𑀦𑀢𑁆𑀣𑀺, 𑀏𑀯𑀁 𑀢𑁂𑀯𑀺𑀚𑁆𑀚𑀸𑀦𑀁 𑀢𑁂𑀯𑀺𑀚𑁆𑀚𑀓𑀁 𑀧𑀸𑀯𑀘𑀦𑀁 𑀆𑀕𑀫𑁆𑀫 𑀲𑀼𑀔𑀁 𑀦𑀸𑀫 𑀦𑀢𑁆𑀣𑀻𑀢𑀺 𑀤𑀲𑁆𑀲𑁂𑀢𑀺.

𑁫𑁫𑁪. 𑀚𑀸𑀢𑀲𑀁𑀯𑀟𑁆𑀠𑁄𑀢𑀺 𑀚𑀸𑀢𑁄 𑀘 𑀯𑀟𑁆𑀠𑀺𑀢𑁄 𑀘, 𑀬𑁄 𑀳𑀺 𑀓𑁂𑀯𑀮𑀁 𑀢𑀢𑁆𑀣 𑀚𑀸𑀢𑁄𑀯 𑀳𑁄𑀢𑀺, 𑀅𑀜𑁆𑀜𑀢𑁆𑀣 𑀯𑀟𑁆𑀠𑀺𑀢𑁄, 𑀢𑀲𑁆𑀲 𑀲𑀫𑀦𑁆𑀢𑀸 𑀕𑀸𑀫𑀫𑀕𑁆𑀕𑀸 𑀦 𑀲𑀩𑁆𑀩𑀲𑁄 𑀧𑀘𑁆𑀘𑀓𑁆𑀔𑀸 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀚𑀸𑀢𑀲𑀁𑀯𑀟𑁆𑀠𑁄𑀢𑀺 𑀆𑀳. 𑀚𑀸𑀢𑀲𑀁𑀯𑀟𑁆𑀠𑁄𑀧𑀺 𑀬𑁄 𑀘𑀺𑀭𑀦𑀺𑀓𑁆𑀔𑀦𑁆𑀢𑁄, 𑀢𑀲𑁆𑀲 𑀦 𑀲𑀩𑁆𑀩𑀲𑁄 𑀧𑀘𑁆𑀘𑀓𑁆𑀔𑀸 𑀳𑁄𑀦𑁆𑀢𑀺. 𑀢𑀲𑁆𑀫𑀸 ‘‘𑀢𑀸𑀯𑀤𑁂𑀯 𑀅𑀯𑀲𑀝’’𑀦𑁆𑀢𑀺 𑀆𑀳, 𑀢𑀗𑁆𑀔𑀡𑀫𑁂𑀯 𑀦𑀺𑀓𑁆𑀔𑀦𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀤𑀦𑁆𑀥𑀸𑀬𑀺𑀢𑀢𑁆𑀢𑀦𑁆𑀢𑀺 𑀅𑀬𑀁 𑀦𑀼 𑀔𑁄 𑀫𑀕𑁆𑀕𑁄, 𑀅𑀬𑀁 𑀦 𑀦𑀼𑀔𑁄𑀢𑀺 𑀓𑀗𑁆𑀔𑀸𑀯𑀲𑁂𑀦 𑀘𑀺𑀭𑀸𑀬𑀺𑀢𑀢𑁆𑀢𑀁. 𑀯𑀺𑀢𑁆𑀣𑀸𑀬𑀺𑀢𑀢𑁆𑀢𑀦𑁆𑀢𑀺 𑀬𑀣𑀸 𑀲𑀼𑀔𑀼𑀫𑀁 𑀅𑀢𑁆𑀣𑀚𑀸𑀢𑀁 𑀲𑀳𑀲𑀸 𑀧𑀼𑀘𑁆𑀙𑀺𑀢𑀲𑁆𑀲 𑀓𑀲𑁆𑀲𑀘𑀺 𑀲𑀭𑀻𑀭𑀁 𑀣𑀤𑁆𑀥𑀪𑀸𑀯𑀁 𑀕𑀡𑁆𑀳𑀸𑀢𑀺, 𑀏𑀯𑀁 𑀣𑀤𑁆𑀥𑀪𑀸𑀯𑀕𑁆𑀕𑀳𑀡𑀁. 𑀦 𑀢𑁆𑀯𑁂𑀯𑀸𑀢𑀺 𑀇𑀫𑀺𑀦𑀸 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀲𑁆𑀲 𑀅𑀧𑁆𑀧𑀝𑀺𑀳𑀢𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀢𑀲𑁆𑀲 𑀳𑀺 𑀧𑀼𑀭𑀺𑀲𑀲𑁆𑀲 𑀫𑀸𑀭𑀸𑀯𑀝𑁆𑀝𑀦𑀸𑀤𑀺𑀯𑀲𑁂𑀦 𑀲𑀺𑀬𑀸 𑀜𑀸𑀡𑀲𑁆𑀲 𑀧𑀝𑀺𑀖𑀸𑀢𑁄. 𑀢𑁂𑀦 𑀲𑁄 𑀤𑀦𑁆𑀥𑀸𑀬𑁂𑀬𑁆𑀬 𑀯𑀸 𑀯𑀺𑀢𑁆𑀣𑀸𑀬𑁂𑀬𑁆𑀬 𑀯𑀸. 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀧𑀦 𑀅𑀧𑁆𑀧𑀝𑀺𑀳𑀢𑀁, 𑀦 𑀲𑀓𑁆𑀓𑀸 𑀢𑀲𑁆𑀲 𑀓𑁂𑀦𑀘𑀺 𑀅𑀦𑁆𑀢𑀭𑀸𑀬𑁄 𑀓𑀸𑀢𑀼𑀦𑁆𑀢𑀺 𑀤𑀻𑀧𑁂𑀢𑀺.

𑁫𑁫𑁫. 𑀉𑀮𑁆𑀮𑀼𑀫𑁆𑀧𑀢𑀼 𑀪𑀯𑀁 𑀕𑁄𑀢𑀫𑁄𑀢𑀺 𑀉𑀤𑁆𑀥𑀭𑀢𑀼 𑀪𑀯𑀁 𑀕𑁄𑀢𑀫𑁄. 𑀩𑁆𑀭𑀸𑀳𑁆𑀫𑀡𑀺𑀁 𑀧𑀚𑀦𑁆𑀢𑀺 𑀩𑁆𑀭𑀸𑀳𑁆𑀫𑀡𑀤𑀸𑀭𑀓𑀁, 𑀪𑀯𑀁 𑀕𑁄𑀢𑀫𑁄 𑀫𑀫 𑀩𑁆𑀭𑀸𑀳𑁆𑀫𑀡𑀧𑀼𑀢𑁆𑀢𑀁 𑀅𑀧𑀸𑀬𑀫𑀕𑁆𑀕𑀢𑁄 𑀉𑀤𑁆𑀥𑀭𑀺𑀢𑁆𑀯𑀸 𑀩𑁆𑀭𑀳𑁆𑀫𑀮𑁄𑀓𑀫𑀕𑁆𑀕𑁂 𑀧𑀢𑀺𑀝𑁆𑀞𑀧𑁂𑀢𑀽𑀢𑀺 𑀅𑀢𑁆𑀣𑁄. 𑀅𑀣𑀲𑁆𑀲 𑀪𑀕𑀯𑀸 𑀩𑀼𑀤𑁆𑀥𑀼𑀧𑁆𑀧𑀸𑀤𑀁 𑀤𑀲𑁆𑀲𑁂𑀢𑁆𑀯𑀸 𑀲𑀤𑁆𑀥𑀺𑀁 𑀧𑀼𑀩𑁆𑀩𑀪𑀸𑀕𑀧𑀝𑀺𑀧𑀤𑀸𑀬 𑀫𑁂𑀢𑁆𑀢𑀸𑀯𑀺𑀳𑀸𑀭𑀸𑀤𑀺𑀩𑁆𑀭𑀳𑁆𑀫𑀮𑁄𑀓𑀕𑀸𑀫𑀺𑀫𑀕𑁆𑀕𑀁 𑀤𑁂𑀲𑁂𑀢𑀼𑀓𑀸𑀫𑁄 ‘‘𑀢𑁂𑀦 𑀳𑀺 𑀯𑀸𑀲𑁂𑀝𑁆𑀞𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 ‘‘𑀇𑀥 𑀢𑀣𑀸𑀕𑀢𑁄’’𑀢𑀺𑀆𑀤𑀺 𑀲𑀸𑀫𑀜𑁆𑀜𑀨𑀮𑁂 𑀯𑀺𑀢𑁆𑀣𑀸𑀭𑀺𑀢𑀁. 𑀫𑁂𑀢𑁆𑀢𑀸𑀲𑀳𑀕𑀢𑁂𑀦𑀸𑀢𑀺𑀆𑀤𑀻𑀲𑀼 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀲𑀩𑁆𑀩𑀁 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀩𑁆𑀭𑀳𑁆𑀫𑀯𑀺𑀳𑀸𑀭𑀓𑀫𑁆𑀫𑀝𑁆𑀞𑀸𑀦𑀓𑀣𑀸𑀬𑀁 𑀯𑀼𑀢𑁆𑀢𑀁. 𑀲𑁂𑀬𑁆𑀬𑀣𑀸𑀧𑀺 𑀯𑀸𑀲𑁂𑀝𑁆𑀞 𑀩𑀮𑀯𑀸 𑀲𑀗𑁆𑀔𑀥𑀫𑁄𑀢𑀺𑀆𑀤𑀺 𑀧𑀦 𑀇𑀥 𑀅𑀧𑀼𑀩𑁆𑀩𑀁. 𑀢𑀢𑁆𑀣 𑀩𑀮𑀯𑀸𑀢𑀺 𑀩𑀮𑀲𑀫𑁆𑀧𑀦𑁆𑀦𑁄. 𑀲𑀗𑁆𑀔𑀥𑀫𑁄𑀢𑀺 𑀲𑀗𑁆𑀔𑀥𑀫𑀓𑁄. 𑀅𑀧𑁆𑀧𑀓𑀲𑀺𑀭𑁂𑀦𑀸𑀢𑀺 𑀅𑀓𑀺𑀘𑁆𑀙𑁂𑀦 𑀅𑀤𑀼𑀓𑁆𑀔𑁂𑀦. 𑀤𑀼𑀩𑁆𑀩𑀮𑁄 𑀳𑀺 𑀲𑀗𑁆𑀔𑀥𑀫𑁄 𑀲𑀗𑁆𑀔𑀁 𑀥𑀫𑀦𑁆𑀢𑁄𑀧𑀺 𑀦 𑀲𑀓𑁆𑀓𑁄𑀢𑀺 𑀘𑀢𑀲𑁆𑀲𑁄 𑀤𑀺𑀲𑀸 𑀲𑀭𑁂𑀦 𑀯𑀺𑀜𑁆𑀜𑀸𑀧𑁂𑀢𑀼𑀁, 𑀦𑀸𑀲𑁆𑀲 𑀲𑀗𑁆𑀔𑀲𑀤𑁆𑀤𑁄 𑀲𑀩𑁆𑀩𑀢𑁄 𑀨𑀭𑀢𑀺. 𑀩𑀮𑀯𑀢𑁄 𑀧𑀦 𑀯𑀺𑀧𑁆𑀨𑀸𑀭𑀺𑀓𑁄 𑀳𑁄𑀢𑀺, 𑀢𑀲𑁆𑀫𑀸 ‘‘𑀩𑀮𑀯𑀸’’𑀢𑀺𑀆𑀤𑀺𑀫𑀸𑀳. 𑀫𑁂𑀢𑁆𑀢𑀸𑀬 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀬𑀸𑀢𑀺 𑀏𑀢𑁆𑀣 𑀫𑁂𑀢𑁆𑀢𑀸𑀢𑀺 𑀯𑀼𑀢𑁆𑀢𑁂 𑀉𑀧𑀘𑀸𑀭𑁄𑀧𑀺 𑀅𑀧𑁆𑀧𑀦𑀸𑀧𑀺 𑀯𑀝𑁆𑀝𑀢𑀺, ‘‘𑀘𑁂𑀢𑁆𑀢𑁄𑀯𑀺𑀫𑀼𑀢𑁆𑀢𑀻’’𑀢𑀺 𑀯𑀼𑀢𑁆𑀢𑁂 𑀧𑀦 𑀅𑀧𑁆𑀧𑀦𑀸𑀯 𑀯𑀝𑁆𑀝𑀢𑀺. 𑀬𑀁 𑀧𑀫𑀸𑀡𑀓𑀢𑀁 𑀓𑀫𑁆𑀫𑀦𑁆𑀢𑀺 𑀧𑀫𑀸𑀡𑀓𑀢𑀁 𑀓𑀫𑁆𑀫𑀁 𑀦𑀸𑀫 𑀓𑀸𑀫𑀸𑀯𑀘𑀭𑀁 𑀯𑀼𑀘𑁆𑀘𑀢𑀺. 𑀅𑀧𑁆𑀧𑀫𑀸𑀡𑀓𑀢𑀁 𑀓𑀫𑁆𑀫𑀁 𑀦𑀸𑀫 𑀭𑀽𑀧𑀸𑀭𑀽𑀧𑀸𑀯𑀘𑀭𑀁. 𑀢𑀜𑁆𑀳𑀺 𑀧𑀫𑀸𑀡𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀑𑀤𑀺𑀲𑁆𑀲𑀓𑀅𑀦𑁄𑀤𑀺𑀲𑁆𑀲𑀓𑀤𑀺𑀲𑀸𑀨𑀭𑀡𑀯𑀲𑁂𑀦 𑀯𑀟𑁆𑀠𑁂𑀢𑁆𑀯𑀸 𑀓𑀢𑀢𑁆𑀢𑀸 𑀅𑀧𑁆𑀧𑀫𑀸𑀡𑀓𑀢𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀦 𑀢𑀁 𑀢𑀢𑁆𑀭𑀸𑀯𑀲𑀺𑀲𑁆𑀲𑀢𑀺 𑀦 𑀢𑀁 𑀢𑀢𑁆𑀭𑀸𑀯𑀢𑀺𑀝𑁆𑀞𑀢𑀻𑀢𑀺 𑀢𑀁 𑀓𑀸𑀫𑀸𑀯𑀘𑀭𑀓𑀫𑁆𑀫𑀁 𑀢𑀲𑁆𑀫𑀺𑀁 𑀭𑀽𑀧𑀸𑀯𑀘𑀭𑀸𑀭𑀽𑀧𑀸𑀯𑀘𑀭𑀓𑀫𑁆𑀫𑁂 𑀦 𑀑𑀳𑀻𑀬𑀢𑀺, 𑀦 𑀢𑀺𑀝𑁆𑀞𑀢𑀺. 𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀢𑀁 𑀓𑀸𑀫𑀸𑀯𑀘𑀭𑀓𑀫𑁆𑀫𑀁 𑀢𑀲𑁆𑀲 𑀭𑀽𑀧𑀸𑀭𑀽𑀧𑀸𑀯𑀘𑀭𑀓𑀫𑁆𑀫𑀲𑁆𑀲 𑀅𑀦𑁆𑀢𑀭𑀸 𑀮𑀕𑁆𑀕𑀺𑀢𑀼𑀁 𑀯𑀸 𑀞𑀸𑀢𑀼𑀁 𑀯𑀸 𑀭𑀽𑀧𑀸𑀭𑀽𑀧𑀸𑀯𑀘𑀭𑀓𑀫𑁆𑀫𑀁 𑀨𑀭𑀺𑀢𑁆𑀯𑀸 𑀧𑀭𑀺𑀬𑀸𑀤𑀺𑀬𑀺𑀢𑁆𑀯𑀸 𑀅𑀢𑁆𑀢𑀦𑁄 𑀑𑀓𑀸𑀲𑀁 𑀕𑀳𑁂𑀢𑁆𑀯𑀸 𑀧𑀢𑀺𑀝𑁆𑀞𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀅𑀣 𑀔𑁄 𑀭𑀽𑀧𑀸𑀯𑀘𑀭𑀸𑀭𑀽𑀧𑀸𑀯𑀘𑀭𑀓𑀫𑁆𑀫𑀫𑁂𑀯 𑀓𑀸𑀫𑀸𑀯𑀘𑀭𑀁 𑀫𑀳𑁄𑀖𑁄 𑀯𑀺𑀬 𑀧𑀭𑀺𑀢𑁆𑀢𑀁 𑀉𑀤𑀓𑀁 𑀨𑀭𑀺𑀢𑁆𑀯𑀸 𑀧𑀭𑀺𑀬𑀸𑀤𑀺𑀬𑀺𑀢𑁆𑀯𑀸 𑀅𑀢𑁆𑀢𑀦𑁄 𑀑𑀓𑀸𑀲𑀁 𑀕𑀳𑁂𑀢𑁆𑀯𑀸 𑀢𑀺𑀝𑁆𑀞𑀢𑀺. 𑀢𑀲𑁆𑀲 𑀯𑀺𑀧𑀸𑀓𑀁 𑀧𑀝𑀺𑀩𑀸𑀳𑀺𑀢𑁆𑀯𑀸 𑀲𑀬𑀫𑁂𑀯 𑀩𑁆𑀭𑀳𑁆𑀫𑀲𑀳𑀩𑁆𑀬𑀢𑀁 𑀉𑀧𑀦𑁂𑀢𑀻𑀢𑀺. 𑀏𑀯𑀁𑀯𑀺𑀳𑀸𑀭𑀻𑀢𑀺 𑀏𑀯𑀁 𑀫𑁂𑀢𑁆𑀢𑀸𑀤𑀺𑀯𑀺𑀳𑀸𑀭𑀻.

𑁫𑁫𑁯. 𑀏𑀢𑁂 𑀫𑀬𑀁 𑀪𑀯𑀦𑁆𑀢𑀁 𑀕𑁄𑀢𑀫𑀦𑁆𑀢𑀺 𑀇𑀤𑀁 𑀢𑁂𑀲𑀁 𑀤𑀼𑀢𑀺𑀬𑀁 𑀲𑀭𑀡𑀕𑀫𑀦𑀁. 𑀧𑀞𑀫𑀫𑁂𑀯 𑀳𑁂𑀢𑁂 𑀫𑀚𑁆𑀛𑀺𑀫𑀧𑀡𑁆𑀡𑀸𑀲𑀓𑁂 𑀯𑀸𑀲𑁂𑀝𑁆𑀞𑀲𑀼𑀢𑁆𑀢𑀁 𑀲𑀼𑀢𑁆𑀯𑀸 𑀲𑀭𑀡𑀁 𑀕𑀢𑀸, 𑀇𑀫𑀁 𑀧𑀦 𑀢𑁂𑀯𑀺𑀚𑁆𑀚𑀲𑀼𑀢𑁆𑀢𑀁 𑀲𑀼𑀢𑁆𑀯𑀸 𑀤𑀼𑀢𑀺𑀬𑀫𑁆𑀧𑀺 𑀲𑀭𑀡𑀁 𑀕𑀢𑀸. 𑀓𑀢𑀺𑀧𑀸𑀳𑀘𑁆𑀘𑀬𑁂𑀦 𑀧𑀩𑁆𑀩𑀚𑀺𑀢𑁆𑀯𑀸 𑀅𑀕𑁆𑀕𑀜𑁆𑀜𑀲𑀼𑀢𑁆𑀢𑁂 𑀉𑀧𑀲𑀫𑁆𑀧𑀤𑀜𑁆𑀘𑁂𑀯 𑀅𑀭𑀳𑀢𑁆𑀢𑀜𑁆𑀘 𑀅𑀮𑀢𑁆𑀣𑀼𑀁. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀇𑀢𑀺 𑀲𑀼𑀫𑀗𑁆𑀕𑀮𑀯𑀺𑀮𑀸𑀲𑀺𑀦𑀺𑀬𑀸 𑀤𑀻𑀖𑀦𑀺𑀓𑀸𑀬𑀝𑁆𑀞𑀓𑀣𑀸𑀬𑀁

𑀢𑁂𑀯𑀺𑀚𑁆𑀚𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.