𑁧𑁧. 𑀓𑁂𑀯𑀝𑁆𑀝𑀲𑀼𑀢𑁆𑀢𑀯𑀡𑁆𑀡𑀦𑀸

𑀓𑁂𑀯𑀝𑁆𑀝𑀕𑀳𑀧𑀢𑀺𑀧𑀼𑀢𑁆𑀢𑀯𑀢𑁆𑀣𑀼𑀯𑀡𑁆𑀡𑀦𑀸

𑁪𑁮𑁧. 𑀏𑀯𑀁 𑀫𑁂 𑀲𑀼𑀢𑀁…𑀧𑁂… 𑀦𑀸𑀴𑀦𑁆𑀤𑀸𑀬𑀦𑁆𑀢𑀺 𑀓𑁂𑀯𑀝𑁆𑀝𑀲𑀼𑀢𑁆𑀢𑀁. 𑀢𑀢𑁆𑀭𑀸𑀬𑀁 𑀅𑀧𑀼𑀩𑁆𑀩𑀧𑀤𑀯𑀡𑁆𑀡𑀦𑀸. 𑀧𑀸𑀯𑀸𑀭𑀺𑀓𑀫𑁆𑀩𑀯𑀦𑁂𑀢𑀺 𑀧𑀸𑀯𑀸𑀭𑀺𑀓𑀲𑁆𑀲 𑀅𑀫𑁆𑀩𑀯𑀦𑁂. 𑀓𑁂𑀯𑀝𑁆𑀝𑁄𑀢𑀺 𑀇𑀤𑀁 𑀢𑀲𑁆𑀲 𑀕𑀳𑀧𑀢𑀺𑀧𑀼𑀢𑁆𑀢𑀲𑁆𑀲 𑀦𑀸𑀫𑀁. 𑀲𑁄 𑀓𑀺𑀭 𑀘𑀢𑁆𑀢𑀸𑀮𑀻𑀲𑀓𑁄𑀝𑀺𑀥𑀦𑁄 𑀕𑀳𑀧𑀢𑀺𑀫𑀳𑀸𑀲𑀸𑀮𑁄 𑀅𑀢𑀺𑀯𑀺𑀬 𑀲𑀤𑁆𑀥𑁄 𑀧𑀲𑀦𑁆𑀦𑁄 𑀅𑀳𑁄𑀲𑀺. 𑀲𑁄 𑀲𑀤𑁆𑀥𑀸𑀥𑀺𑀓𑀢𑁆𑀢𑀸𑀬𑁂𑀯 ‘‘𑀲𑀘𑁂 𑀏𑀓𑁄 𑀪𑀺𑀓𑁆𑀔𑀼 𑀅𑀟𑁆𑀠𑀫𑀸𑀲𑀦𑁆𑀢𑀭𑁂𑀦 𑀯𑀸 𑀫𑀸𑀲𑀦𑁆𑀢𑀭𑁂𑀦 𑀯𑀸 𑀲𑀁𑀯𑀘𑁆𑀙𑀭𑁂𑀦 𑀯𑀸 𑀆𑀓𑀸𑀲𑁂 𑀉𑀧𑁆𑀧𑀢𑀺𑀢𑁆𑀯𑀸 𑀯𑀺𑀯𑀺𑀥𑀸𑀦𑀺 𑀧𑀸𑀝𑀺𑀳𑀸𑀭𑀺𑀬𑀸𑀦𑀺 𑀤𑀲𑁆𑀲𑁂𑀬𑁆𑀬, 𑀲𑀩𑁆𑀩𑁄 𑀚𑀦𑁄 𑀅𑀢𑀺𑀯𑀺𑀬 𑀧𑀲𑀻𑀤𑁂𑀬𑁆𑀬. 𑀬𑀁𑀦𑀽𑀦𑀸𑀳𑀁 𑀪𑀕𑀯𑀦𑁆𑀢𑀁 𑀬𑀸𑀘𑀺𑀢𑁆𑀯𑀸 𑀧𑀸𑀝𑀺𑀳𑀸𑀭𑀺𑀬𑀓𑀭𑀡𑀢𑁆𑀣𑀸𑀬 𑀏𑀓𑀁 𑀪𑀺𑀓𑁆𑀔𑀼𑀁 𑀅𑀦𑀼𑀚𑀸𑀦𑀸𑀧𑁂𑀬𑁆𑀬’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀯𑀫𑀸𑀳.

𑀢𑀢𑁆𑀣 𑀇𑀤𑁆𑀥𑀸𑀢𑀺 𑀲𑀫𑀺𑀤𑁆𑀥𑀸 𑀨𑀻𑀢𑀸𑀢𑀺 𑀦𑀸𑀦𑀸𑀪𑀡𑁆𑀟𑀉𑀲𑁆𑀲𑀦𑁆𑀦𑀢𑀸𑀬 𑀯𑀼𑀤𑁆𑀥𑀺𑀧𑁆𑀧𑀢𑁆𑀢𑀸. 𑀆𑀓𑀺𑀡𑁆𑀡𑀫𑀦𑀼𑀲𑁆𑀲𑀸𑀢𑀺 𑀅𑀁𑀲𑀓𑀽𑀝𑁂𑀦 𑀅𑀁𑀲𑀓𑀽𑀝𑀁 𑀧𑀳𑀭𑀺𑀢𑁆𑀯𑀸 𑀯𑀺𑀬 𑀯𑀺𑀘𑀭𑀦𑁆𑀢𑁂𑀳𑀺 𑀫𑀦𑀼𑀲𑁆𑀲𑁂𑀳𑀺 𑀆𑀓𑀺𑀡𑁆𑀡𑀸. 𑀲𑀫𑀸𑀤𑀺𑀲𑀢𑀽𑀢𑀺 𑀆𑀡𑀸𑀧𑁂𑀢𑀼 𑀞𑀸𑀦𑀦𑁆𑀢𑀭𑁂 𑀞𑀧𑁂𑀢𑀼. 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀸𑀢𑀺 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀸𑀦𑀁 𑀥𑀫𑁆𑀫𑀢𑁄, 𑀤𑀲𑀓𑀼𑀲𑀮𑀲𑀗𑁆𑀔𑀸𑀢𑀢𑁄 𑀯𑀸 𑀫𑀦𑀼𑀲𑁆𑀲𑀥𑀫𑁆𑀫𑀢𑁄 𑀉𑀢𑁆𑀢𑀭𑀺. 𑀪𑀺𑀬𑁆𑀬𑁄𑀲𑁄𑀫𑀢𑁆𑀢𑀸𑀬𑀸𑀢𑀺 𑀧𑀓𑀢𑀺𑀬𑀸𑀧𑀺 𑀧𑀚𑁆𑀚𑀮𑀺𑀢𑀧𑀤𑀻𑀧𑁄 𑀢𑁂𑀮𑀲𑁆𑀦𑁂𑀳𑀁 𑀮𑀪𑀺𑀢𑁆𑀯𑀸 𑀯𑀺𑀬 𑀅𑀢𑀺𑀭𑁂𑀓𑀧𑁆𑀧𑀫𑀸𑀡𑁂𑀦 𑀅𑀪𑀺𑀧𑁆𑀧𑀲𑀻𑀤𑀺𑀲𑁆𑀲𑀢𑀺. 𑀦 𑀔𑁄 𑀅𑀳𑀦𑁆𑀢𑀺 𑀪𑀕𑀯𑀸 𑀭𑀸𑀚𑀕𑀳𑀲𑁂𑀝𑁆𑀞𑀺𑀯𑀢𑁆𑀣𑀼𑀲𑁆𑀫𑀺𑀁 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀧𑁂𑀲𑀺, 𑀢𑀲𑁆𑀫𑀸 ‘‘𑀦 𑀔𑁄 𑀅𑀳’’𑀦𑁆𑀢𑀺𑀆𑀤𑀺𑀫𑀸𑀳.

𑁪𑁮𑁨. 𑀦 𑀥𑀁𑀲𑁂𑀫𑀻𑀢𑀺 𑀦 𑀕𑀼𑀡𑀯𑀺𑀦𑀸𑀲𑀦𑁂𑀦 𑀥𑀁𑀲𑁂𑀫𑀺, 𑀲𑀻𑀮𑀪𑁂𑀤𑀁 𑀧𑀸𑀧𑁂𑀢𑁆𑀯𑀸 𑀅𑀦𑀼𑀧𑀼𑀩𑁆𑀩𑁂𑀦 𑀉𑀘𑁆𑀘𑀝𑁆𑀞𑀸𑀦𑀢𑁄 𑀑𑀢𑀸𑀭𑁂𑀦𑁆𑀢𑁄 𑀦𑀻𑀘𑀝𑁆𑀞𑀸𑀦𑁂 𑀦 𑀞𑀧𑁂𑀫𑀺, 𑀅𑀣 𑀔𑁄 𑀅𑀳𑀁 𑀩𑀼𑀤𑁆𑀥𑀲𑀸𑀲𑀦𑀲𑁆𑀲 𑀯𑀼𑀤𑁆𑀥𑀺𑀁 𑀧𑀘𑁆𑀘𑀸𑀲𑀻𑀲𑀦𑁆𑀢𑁄 𑀓𑀣𑁂𑀫𑀻𑀢𑀺 𑀤𑀲𑁆𑀲𑁂𑀢𑀺. 𑀢𑀢𑀺𑀬𑀫𑁆𑀧𑀺 𑀔𑁄𑀢𑀺 𑀬𑀸𑀯𑀢𑀢𑀺𑀬𑀁 𑀩𑀼𑀤𑁆𑀥𑀸𑀦𑀁 𑀓𑀣𑀁 𑀧𑀝𑀺𑀩𑀸𑀳𑀺𑀢𑁆𑀯𑀸 𑀓𑀣𑁂𑀢𑀼𑀁 𑀯𑀺𑀲𑀳𑀦𑁆𑀢𑁄 𑀦𑀸𑀫 𑀦𑀢𑁆𑀣𑀺. 𑀅𑀬𑀁 𑀧𑀦 𑀪𑀕𑀯𑀢𑀸 𑀲𑀤𑁆𑀥𑀺𑀁 𑀯𑀺𑀲𑁆𑀲𑀸𑀲𑀺𑀓𑁄 𑀯𑀺𑀲𑁆𑀲𑀸𑀲𑀁 𑀯𑀟𑁆𑀠𑁂𑀢𑁆𑀯𑀸 𑀯𑀮𑁆𑀮𑀪𑁄 𑀳𑀼𑀢𑁆𑀯𑀸 𑀅𑀢𑁆𑀣𑀓𑀸𑀫𑁄𑀲𑁆𑀫𑀻𑀢𑀺 𑀢𑀺𑀓𑁆𑀔𑀢𑁆𑀢𑀼𑀁 𑀓𑀣𑁂𑀲𑀺.

𑀇𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬𑀯𑀡𑁆𑀡𑀦𑀸

𑁪𑁮𑁩-𑁪𑁮𑁪. 𑀅𑀣 𑀪𑀕𑀯𑀸 𑀅𑀬𑀁 𑀉𑀧𑀸𑀲𑀓𑁄 𑀫𑀬𑀺 𑀧𑀝𑀺𑀩𑀸𑀳𑀦𑁆𑀢𑁂𑀧𑀺 𑀧𑀼𑀦𑀧𑁆𑀧𑀼𑀦𑀁 𑀬𑀸𑀘𑀢𑀺𑀬𑁂𑀯. ‘‘𑀳𑀦𑁆𑀤𑀲𑁆𑀲 𑀧𑀸𑀝𑀺𑀳𑀸𑀭𑀺𑀬𑀓𑀭𑀡𑁂 𑀆𑀤𑀻𑀦𑀯𑀁 𑀤𑀲𑁆𑀲𑁂𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀢𑀻𑀡𑀺 𑀔𑁄’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀫𑀸𑀳𑀁 𑀪𑀺𑀓𑁆𑀔𑀼𑀦𑁆𑀢𑀺 𑀅𑀫𑀼𑀁 𑀅𑀳𑀁 𑀪𑀺𑀓𑁆𑀔𑀼𑀁. 𑀕𑀦𑁆𑀥𑀸𑀭𑀻𑀢𑀺 𑀕𑀦𑁆𑀥𑀸𑀭𑁂𑀦 𑀦𑀸𑀫 𑀇𑀲𑀺𑀦𑀸 𑀓𑀢𑀸, 𑀕𑀦𑁆𑀥𑀸𑀭𑀭𑀝𑁆𑀞𑁂 𑀯𑀸 𑀉𑀧𑁆𑀧𑀦𑁆𑀦𑀸 𑀯𑀺𑀚𑁆𑀚𑀸. 𑀢𑀢𑁆𑀣 𑀓𑀺𑀭 𑀩𑀳𑀽 𑀇𑀲𑀬𑁄 𑀯𑀲𑀺𑀁𑀲𑀼, 𑀢𑁂𑀲𑀼 𑀏𑀓𑁂𑀦 𑀓𑀢𑀸 𑀯𑀺𑀚𑁆𑀚𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀝𑁆𑀝𑀻𑀬𑀸𑀫𑀻𑀢𑀺 𑀅𑀝𑁆𑀝𑁄 𑀧𑀻𑀴𑀺𑀢𑁄 𑀯𑀺𑀬 𑀳𑁄𑀫𑀺. 𑀳𑀭𑀸𑀬𑀸𑀫𑀻𑀢𑀺 𑀮𑀚𑁆𑀚𑀸𑀫𑀺. 𑀚𑀺𑀕𑀼𑀘𑁆𑀙𑀸𑀫𑀻𑀢𑀺 𑀕𑀽𑀣𑀁 𑀤𑀺𑀲𑁆𑀯𑀸 𑀯𑀺𑀬 𑀚𑀺𑀕𑀼𑀘𑁆𑀙𑀁 𑀉𑀧𑁆𑀧𑀸𑀤𑁂𑀫𑀺.

𑀆𑀤𑁂𑀲𑀦𑀸𑀧𑀸𑀝𑀺𑀳𑀸𑀭𑀺𑀬𑀯𑀡𑁆𑀡𑀦𑀸

𑁪𑁮𑁫. 𑀧𑀭𑀲𑀢𑁆𑀢𑀸𑀦𑀦𑁆𑀢𑀺 𑀅𑀜𑁆𑀜𑁂𑀲𑀁 𑀲𑀢𑁆𑀢𑀸𑀦𑀁. 𑀤𑀼𑀢𑀺𑀬𑀁 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀆𑀤𑀺𑀲𑀢𑀻𑀢𑀺 𑀓𑀣𑁂𑀢𑀺. 𑀘𑁂𑀢𑀲𑀺𑀓𑀦𑁆𑀢𑀺 𑀲𑁄𑀫𑀦𑀲𑁆𑀲𑀤𑁄𑀫𑀦𑀲𑁆𑀲𑀁 𑀅𑀥𑀺𑀧𑁆𑀧𑁂𑀢𑀁. 𑀏𑀯𑀫𑁆𑀧𑀺 𑀢𑁂 𑀫𑀦𑁄𑀢𑀺 𑀏𑀯𑀁 𑀢𑀯 𑀫𑀦𑁄 𑀲𑁄𑀫𑀦𑀲𑁆𑀲𑀺𑀢𑁄 𑀯𑀸 𑀤𑁄𑀫𑀦𑀲𑁆𑀲𑀺𑀢𑁄 𑀯𑀸 𑀓𑀸𑀫𑀯𑀺𑀢𑀓𑁆𑀓𑀸𑀤𑀺𑀲𑀫𑁆𑀧𑀬𑀼𑀢𑁆𑀢𑁄 𑀯𑀸. 𑀤𑀼𑀢𑀺𑀬𑀁 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀇𑀢𑀺𑀧𑀺 𑀢𑁂 𑀘𑀺𑀢𑁆𑀢𑀦𑁆𑀢𑀺 𑀇𑀢𑀺 𑀢𑀯 𑀘𑀺𑀢𑁆𑀢𑀁, 𑀇𑀤𑀜𑁆𑀘𑀺𑀤𑀜𑁆𑀘 𑀅𑀢𑁆𑀣𑀁 𑀘𑀺𑀦𑁆𑀢𑀬𑀫𑀸𑀦𑀁 𑀧𑀯𑀢𑁆𑀢𑀢𑀻𑀢𑀺 𑀅𑀢𑁆𑀣𑁄. 𑀫𑀡𑀺𑀓𑀸 𑀦𑀸𑀫 𑀯𑀺𑀚𑁆𑀚𑀸𑀢𑀺 𑀘𑀺𑀦𑁆𑀢𑀸𑀫𑀡𑀻𑀢𑀺 𑀏𑀯𑀁 𑀮𑀤𑁆𑀥𑀦𑀸𑀫𑀸 𑀮𑁄𑀓𑁂 𑀏𑀓𑀸 𑀯𑀺𑀚𑁆𑀚𑀸 𑀅𑀢𑁆𑀣𑀺. 𑀢𑀸𑀬 𑀧𑀭𑁂𑀲𑀁 𑀘𑀺𑀢𑁆𑀢𑀁 𑀚𑀸𑀦𑀸𑀢𑀻𑀢𑀺 𑀤𑀻𑀧𑁂𑀢𑀺.

𑀅𑀦𑀼𑀲𑀸𑀲𑀦𑀻𑀧𑀸𑀝𑀺𑀳𑀸𑀭𑀺𑀬𑀯𑀡𑁆𑀡𑀦𑀸

𑁪𑁮𑁬. 𑀏𑀯𑀁 𑀯𑀺𑀢𑀓𑁆𑀓𑁂𑀣𑀸𑀢𑀺 𑀦𑁂𑀓𑁆𑀔𑀫𑁆𑀫𑀯𑀺𑀢𑀓𑁆𑀓𑀸𑀤𑀬𑁄 𑀏𑀯𑀁 𑀧𑀯𑀢𑁆𑀢𑁂𑀦𑁆𑀢𑀸 𑀯𑀺𑀢𑀓𑁆𑀓𑁂𑀣. 𑀫𑀸 𑀏𑀯𑀁 𑀯𑀺𑀢𑀓𑁆𑀓𑀬𑀺𑀢𑁆𑀣𑀸𑀢𑀺 𑀏𑀯𑀁 𑀓𑀸𑀫𑀯𑀺𑀢𑀓𑁆𑀓𑀸𑀤𑀬𑁄 𑀧𑀯𑀢𑁆𑀢𑁂𑀦𑁆𑀢𑀸 𑀫𑀸 𑀯𑀺𑀢𑀓𑁆𑀓𑀬𑀺𑀢𑁆𑀣. 𑀏𑀯𑀁 𑀫𑀦𑀲𑀺 𑀓𑀭𑁄𑀣𑀸𑀢𑀺 𑀏𑀯𑀁 𑀅𑀦𑀺𑀘𑁆𑀘𑀲𑀜𑁆𑀜𑀫𑁂𑀯, 𑀤𑀼𑀓𑁆𑀔𑀲𑀜𑁆𑀜𑀸𑀤𑀻𑀲𑀼 𑀯𑀸 𑀅𑀜𑁆𑀜𑀢𑀭𑀁 𑀫𑀦𑀲𑀺 𑀓𑀭𑁄𑀣. 𑀫𑀸 𑀏𑀯𑀦𑁆𑀢𑀺 ‘‘𑀦𑀺𑀘𑁆𑀘’’𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀫𑀸 𑀫𑀦𑀲𑀺 𑀓𑀭𑀺𑀢𑁆𑀣. 𑀇𑀤𑀦𑁆𑀢𑀺 𑀇𑀤𑀁 𑀧𑀜𑁆𑀘𑀓𑀸𑀫𑀕𑀼𑀡𑀺𑀓𑀭𑀸𑀕𑀁 𑀧𑀚𑀳𑀣. 𑀇𑀤𑀁 𑀉𑀧𑀲𑀫𑁆𑀧𑀚𑁆𑀚𑀸𑀢𑀺 𑀇𑀤𑀁 𑀘𑀢𑀼𑀫𑀕𑁆𑀕𑀨𑀮𑀧𑁆𑀧𑀪𑁂𑀤𑀁 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀫𑁂𑀯 𑀉𑀧𑀲𑀫𑁆𑀧𑀚𑁆𑀚 𑀧𑀸𑀧𑀼𑀡𑀺𑀢𑁆𑀯𑀸 𑀦𑀺𑀧𑁆𑀨𑀸𑀤𑁂𑀢𑁆𑀯𑀸 𑀯𑀺𑀳𑀭𑀣. 𑀇𑀢𑀺 𑀪𑀕𑀯𑀸 𑀇𑀤𑁆𑀥𑀺𑀯𑀺𑀥𑀁 𑀇𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬𑀦𑁆𑀢𑀺 𑀤𑀲𑁆𑀲𑁂𑀢𑀺, 𑀧𑀭𑀲𑁆𑀲 𑀘𑀺𑀢𑁆𑀢𑀁 𑀜𑀢𑁆𑀯𑀸 𑀓𑀣𑀦𑀁 𑀆𑀤𑁂𑀲𑀦𑀸𑀧𑀸𑀝𑀺𑀳𑀸𑀭𑀺𑀬𑀦𑁆𑀢𑀺. 𑀲𑀸𑀯𑀓𑀸𑀦𑀜𑁆𑀘 𑀩𑀼𑀤𑁆𑀥𑀸𑀦𑀜𑁆𑀘 𑀲𑀢𑀢𑀁 𑀥𑀫𑁆𑀫𑀤𑁂𑀲𑀦𑀸 𑀅𑀦𑀼𑀲𑀸𑀲𑀦𑀻𑀧𑀸𑀝𑀺𑀳𑀸𑀭𑀺𑀬𑀦𑁆𑀢𑀺.

𑀢𑀢𑁆𑀣 𑀇𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬𑁂𑀦 𑀅𑀦𑀼𑀲𑀸𑀲𑀦𑀻𑀧𑀸𑀝𑀺𑀳𑀸𑀭𑀺𑀬𑀁 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀲𑁆𑀲 𑀆𑀘𑀺𑀡𑁆𑀡𑀁, 𑀆𑀤𑁂𑀲𑀦𑀸𑀧𑀸𑀝𑀺𑀳𑀸𑀭𑀺𑀬𑁂𑀦 𑀅𑀦𑀼𑀲𑀸𑀲𑀦𑀻𑀧𑀸𑀝𑀺𑀳𑀸𑀭𑀺𑀬𑀁 𑀥𑀫𑁆𑀫𑀲𑁂𑀦𑀸𑀧𑀢𑀺𑀲𑁆𑀲. 𑀤𑁂𑀯𑀤𑀢𑁆𑀢𑁂 𑀲𑀁𑀖𑀁 𑀪𑀺𑀦𑁆𑀤𑀺𑀢𑁆𑀯𑀸 𑀧𑀜𑁆𑀘 𑀪𑀺𑀓𑁆𑀔𑀼𑀲𑀢𑀸𑀦𑀺 𑀕𑀳𑁂𑀢𑁆𑀯𑀸 𑀕𑀬𑀸𑀲𑀻𑀲𑁂 𑀩𑀼𑀤𑁆𑀥𑀮𑀻𑀴𑀸𑀬 𑀢𑁂𑀲𑀁 𑀥𑀫𑁆𑀫𑀁 𑀤𑁂𑀲𑀦𑁆𑀢𑁂 𑀳𑀺 𑀪𑀕𑀯𑀢𑀸 𑀧𑁂𑀲𑀺𑀢𑁂𑀲𑀼 𑀤𑁆𑀯𑀻𑀲𑀼 𑀅𑀕𑁆𑀕𑀲𑀸𑀯𑀓𑁂𑀲𑀼 𑀥𑀫𑁆𑀫𑀲𑁂𑀦𑀸𑀧𑀢𑀺 𑀢𑁂𑀲𑀁 𑀘𑀺𑀢𑁆𑀢𑀸𑀘𑀸𑀭𑀁 𑀜𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀲𑀺, 𑀣𑁂𑀭𑀲𑁆𑀲 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀧𑀜𑁆𑀘𑀲𑀢𑀸 𑀪𑀺𑀓𑁆𑀔𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺𑀁𑀲𑀼. 𑀅𑀣 𑀦𑁂𑀲𑀁 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀯𑀺𑀓𑀼𑀩𑁆𑀩𑀦𑀁 𑀤𑀲𑁆𑀲𑁂𑀢𑁆𑀯𑀸 𑀤𑀲𑁆𑀲𑁂𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀲𑀺, 𑀢𑀁 𑀲𑀼𑀢𑁆𑀯𑀸 𑀲𑀩𑁆𑀩𑁂 𑀅𑀭𑀳𑀢𑁆𑀢𑀨𑀮𑁂 𑀧𑀢𑀺𑀝𑁆𑀞𑀳𑀺𑀁𑀲𑀼. 𑀅𑀣 𑀤𑁆𑀯𑁂𑀧𑀺 𑀫𑀳𑀸𑀦𑀸𑀕𑀸 𑀧𑀜𑁆𑀘 𑀪𑀺𑀓𑁆𑀔𑀼𑀲𑀢𑀸𑀦𑀺 𑀕𑀳𑁂𑀢𑁆𑀯𑀸 𑀯𑁂𑀳𑀸𑀲𑀁 𑀅𑀩𑁆𑀪𑀼𑀕𑁆𑀕𑀦𑁆𑀢𑁆𑀯𑀸 𑀯𑁂𑀴𑀼𑀯𑀦𑀫𑁂𑀯𑀸𑀕𑀫𑀺𑀁𑀲𑀼. 𑀅𑀦𑀼𑀲𑀸𑀲𑀦𑀻𑀧𑀸𑀝𑀺𑀳𑀸𑀭𑀺𑀬𑀁 𑀧𑀦 𑀩𑀼𑀤𑁆𑀥𑀸𑀦𑀁 𑀲𑀢𑀢𑀁 𑀥𑀫𑁆𑀫𑀤𑁂𑀲𑀦𑀸, 𑀢𑁂𑀲𑀼 𑀇𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬𑀆𑀤𑁂𑀲𑀦𑀸𑀧𑀸𑀝𑀺𑀳𑀸𑀭𑀺𑀬𑀸𑀦𑀺 𑀲𑀉𑀧𑀸𑀭𑀫𑁆𑀪𑀸𑀦𑀺 𑀲𑀤𑁄𑀲𑀸𑀦𑀺, 𑀅𑀤𑁆𑀥𑀸𑀦𑀁 𑀦 𑀢𑀺𑀝𑁆𑀞𑀦𑁆𑀢𑀺, 𑀅𑀤𑁆𑀥𑀸𑀦𑀁 𑀅𑀢𑀺𑀝𑁆𑀞𑀦𑀢𑁄 𑀦 𑀦𑀺𑀬𑁆𑀬𑀦𑁆𑀢𑀺. 𑀅𑀦𑀼𑀲𑀸𑀲𑀦𑀻𑀧𑀸𑀝𑀺𑀳𑀸𑀭𑀺𑀬𑀁 𑀅𑀦𑀼𑀧𑀸𑀭𑀫𑁆𑀪𑀁 𑀦𑀺𑀤𑁆𑀤𑁄𑀲𑀁, 𑀅𑀤𑁆𑀥𑀸𑀦𑀁 𑀢𑀺𑀝𑁆𑀞𑀢𑀺, 𑀅𑀤𑁆𑀥𑀸𑀦𑀁 𑀢𑀺𑀝𑁆𑀞𑀦𑀢𑁄 𑀦𑀺𑀬𑁆𑀬𑀸𑀢𑀺. 𑀢𑀲𑁆𑀫𑀸 𑀪𑀕𑀯𑀸 𑀇𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬𑀜𑁆𑀘 𑀆𑀤𑁂𑀲𑀦𑀸𑀧𑀸𑀝𑀺𑀳𑀸𑀭𑀺𑀬𑀜𑁆𑀘 𑀕𑀭𑀳𑀢𑀺, 𑀅𑀦𑀼𑀲𑀸𑀲𑀦𑀻𑀧𑀸𑀝𑀺𑀳𑀸𑀭𑀺𑀬𑀁𑀬𑁂𑀯 𑀧𑀲𑀁𑀲𑀢𑀺.

𑀪𑀽𑀢𑀦𑀺𑀭𑁄𑀥𑁂𑀲𑀓𑀯𑀢𑁆𑀣𑀼𑀯𑀡𑁆𑀡𑀦𑀸

𑁪𑁮𑁭. 𑀪𑀽𑀢𑀧𑀼𑀩𑁆𑀩𑀦𑁆𑀢𑀺 𑀇𑀤𑀁 𑀓𑀲𑁆𑀫𑀸 𑀪𑀕𑀯𑀢𑀸 𑀆𑀭𑀤𑁆𑀥𑀁. 𑀇𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬𑀆𑀤𑁂𑀲𑀦𑀸𑀧𑀸𑀝𑀺𑀳𑀸𑀭𑀺𑀬𑀸𑀦𑀁 𑀅𑀦𑀺𑀬𑁆𑀬𑀸𑀦𑀺𑀓𑀪𑀸𑀯𑀤𑀲𑁆𑀲𑀦𑀢𑁆𑀣𑀁, 𑀅𑀦𑀼𑀲𑀸𑀲𑀦𑀻𑀧𑀸𑀝𑀺𑀳𑀸𑀭𑀺𑀬𑀲𑁆𑀲𑁂𑀯 𑀦𑀺𑀬𑁆𑀬𑀸𑀦𑀺𑀓𑀪𑀸𑀯𑀤𑀲𑁆𑀲𑀦𑀢𑁆𑀣𑀁. 𑀅𑀧𑀺 𑀘 𑀲𑀩𑁆𑀩𑀩𑀼𑀤𑁆𑀥𑀸𑀦𑀁 𑀫𑀳𑀸𑀪𑀽𑀢𑀧𑀭𑀺𑀬𑁂𑀲𑀓𑁄 𑀦𑀸𑀫𑁂𑀓𑁄 𑀪𑀺𑀓𑁆𑀔𑀼 𑀳𑁄𑀢𑀺𑀬𑁂𑀯. 𑀬𑁄 𑀫𑀳𑀸𑀪𑀽𑀢𑁂 𑀧𑀭𑀺𑀬𑁂𑀲𑀦𑁆𑀢𑁄 𑀬𑀸𑀯 𑀩𑁆𑀭𑀳𑁆𑀫𑀮𑁄𑀓𑀸 𑀯𑀺𑀘𑀭𑀺𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑁂𑀢𑀸𑀭𑀁 𑀅𑀮𑀪𑀺𑀢𑁆𑀯𑀸 𑀆𑀕𑀫𑁆𑀫 𑀩𑀼𑀤𑁆𑀥𑀫𑁂𑀯 𑀧𑀼𑀘𑁆𑀙𑀺𑀢𑁆𑀯𑀸 𑀦𑀺𑀓𑁆𑀓𑀗𑁆𑀔𑁄 𑀳𑁄𑀢𑀺. 𑀢𑀲𑁆𑀫𑀸 𑀩𑀼𑀤𑁆𑀥𑀸𑀦𑀁 𑀫𑀳𑀦𑁆𑀢𑀪𑀸𑀯𑀧𑁆𑀧𑀓𑀸𑀲𑀦𑀢𑁆𑀣𑀁, 𑀇𑀤𑀜𑁆𑀘 𑀓𑀸𑀭𑀡𑀁 𑀧𑀝𑀺𑀘𑁆𑀙𑀦𑁆𑀦𑀁, 𑀅𑀣 𑀦𑀁 𑀯𑀺𑀯𑀝𑀁 𑀓𑀢𑁆𑀯𑀸 𑀤𑁂𑀲𑁂𑀦𑁆𑀢𑁄𑀧𑀺 𑀪𑀕𑀯𑀸 ‘‘𑀪𑀽𑀢𑀧𑀼𑀩𑁆𑀩’’𑀦𑁆𑀢𑀺𑀆𑀤𑀺𑀫𑀸𑀳.

𑀢𑀢𑁆𑀣 𑀓𑀢𑁆𑀣 𑀦𑀼 𑀔𑁄𑀢𑀺 𑀓𑀺𑀲𑁆𑀫𑀺𑀁 𑀞𑀸𑀦𑁂 𑀓𑀺𑀁 𑀆𑀕𑀫𑁆𑀫 𑀓𑀺𑀁 𑀧𑀢𑁆𑀢𑀲𑁆𑀲 𑀢𑁂 𑀅𑀦𑀯𑀲𑁂𑀲𑀸 𑀅𑀧𑁆𑀧𑀯𑀢𑁆𑀢𑀺𑀯𑀲𑁂𑀦 𑀦𑀺𑀭𑀼𑀚𑁆𑀛𑀦𑁆𑀢𑀺. 𑀫𑀳𑀸𑀪𑀽𑀢𑀓𑀣𑀸 𑀧𑀦𑁂𑀲𑀸 𑀲𑀩𑁆𑀩𑀸𑀓𑀸𑀭𑁂𑀦 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀯𑀼𑀢𑁆𑀢𑀸, 𑀢𑀲𑁆𑀫𑀸 𑀲𑀸 𑀢𑀢𑁄𑀯 𑀕𑀳𑁂𑀢𑀩𑁆𑀩𑀸.

𑁪𑁮𑁮. 𑀤𑁂𑀯𑀬𑀸𑀦𑀺𑀬𑁄 𑀫𑀕𑁆𑀕𑁄𑀢𑀺 𑀧𑀸𑀝𑀺𑀬𑁂𑀓𑁆𑀓𑁄 𑀤𑁂𑀯𑀮𑁄𑀓𑀕𑀫𑀦𑀫𑀕𑁆𑀕𑁄 𑀦𑀸𑀫 𑀦𑀢𑁆𑀣𑀺, 𑀇𑀤𑁆𑀥𑀺𑀯𑀺𑀥𑀜𑀸𑀡𑀲𑁆𑀲𑁂𑀯 𑀧𑀦𑁂𑀢𑀁 𑀅𑀥𑀺𑀯𑀘𑀦𑀁. 𑀢𑁂𑀦 𑀳𑁂𑀲 𑀬𑀸𑀯 𑀩𑁆𑀭𑀳𑁆𑀫𑀮𑁄𑀓𑀸𑀧𑀺 𑀓𑀸𑀬𑁂𑀦 𑀯𑀲𑀁 𑀯𑀢𑁆𑀢𑁂𑀦𑁆𑀢𑁄 𑀤𑁂𑀯𑀮𑁄𑀓𑀁 𑀬𑀸𑀢𑀺. 𑀢𑀲𑁆𑀫𑀸 ‘‘𑀢𑀁 𑀤𑁂𑀯𑀬𑀸𑀦𑀺𑀬𑁄 𑀫𑀕𑁆𑀕𑁄’’𑀢𑀺 𑀯𑀼𑀢𑁆𑀢𑀁. 𑀬𑁂𑀦 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸𑀢𑀺 𑀲𑀫𑀻𑀧𑁂 𑀞𑀺𑀢𑀫𑁆𑀧𑀺 𑀪𑀕𑀯𑀦𑁆𑀢𑀁 𑀅𑀧𑀼𑀘𑁆𑀙𑀺𑀢𑁆𑀯𑀸 𑀥𑀫𑁆𑀫𑀢𑀸𑀬 𑀘𑁄𑀤𑀺𑀢𑁄 𑀤𑁂𑀯𑀢𑀸 𑀫𑀳𑀸𑀦𑀼𑀪𑀸𑀯𑀸𑀢𑀺 𑀫𑀜𑁆𑀜𑀫𑀸𑀦𑁄 𑀉𑀧𑀲𑀗𑁆𑀓𑀫𑀺. 𑀫𑀬𑀫𑁆𑀧𑀺 𑀔𑁄, 𑀪𑀺𑀓𑁆𑀔𑀼, 𑀦 𑀚𑀸𑀦𑀸𑀫𑀸𑀢𑀺 𑀩𑀼𑀤𑁆𑀥𑀯𑀺𑀲𑀬𑁂 𑀧𑀜𑁆𑀳𑀁 𑀧𑀼𑀘𑁆𑀙𑀺𑀢𑀸 𑀤𑁂𑀯𑀢𑀸 𑀦 𑀚𑀸𑀦𑀦𑁆𑀢𑀺, 𑀢𑁂𑀦𑁂𑀯𑀫𑀸𑀳𑀁𑀲𑀼. 𑀅𑀣 𑀔𑁄 𑀲𑁄 𑀪𑀺𑀓𑁆𑀔𑀼 ‘‘𑀫𑀫 𑀇𑀫𑀁 𑀧𑀜𑁆𑀳𑀁 𑀦 𑀓𑀣𑁂𑀢𑀼𑀁 𑀦 𑀮𑀩𑁆𑀪𑀸, 𑀲𑀻𑀖𑀁 𑀓𑀣𑁂𑀣𑀸’’𑀢𑀺 𑀢𑀸 𑀤𑁂𑀯𑀢𑀸 𑀅𑀚𑁆𑀛𑁄𑀢𑁆𑀣𑀭𑀢𑀺, 𑀧𑀼𑀦𑀧𑁆𑀧𑀼𑀦𑀁 𑀧𑀼𑀘𑁆𑀙𑀢𑀺, 𑀢𑀸 ‘‘𑀅𑀚𑁆𑀛𑁄𑀢𑁆𑀣𑀭𑀢𑀺 𑀦𑁄 𑀅𑀬𑀁 𑀪𑀺𑀓𑁆𑀔𑀼, 𑀳𑀦𑁆𑀤 𑀦𑀁 𑀳𑀢𑁆𑀣𑀢𑁄 𑀫𑁄𑀘𑁂𑀲𑁆𑀲𑀸𑀫𑀸’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀅𑀢𑁆𑀣𑀺 𑀔𑁄 𑀪𑀺𑀓𑁆𑀔𑀼 𑀘𑀢𑁆𑀢𑀸𑀭𑁄 𑀫𑀳𑀸𑀭𑀸𑀚𑀸𑀦𑁄’’𑀢𑀺𑀆𑀤𑀺𑀫𑀸𑀳𑀁𑀲𑀼. 𑀢𑀢𑁆𑀣 𑀅𑀪𑀺𑀓𑁆𑀓𑀦𑁆𑀢𑀢𑀭𑀸𑀢𑀺 𑀅𑀢𑀺𑀓𑁆𑀓𑀫𑁆𑀫 𑀓𑀦𑁆𑀢𑀢𑀭𑀸. 𑀧𑀡𑀻𑀢𑀢𑀭𑀸𑀢𑀺 𑀯𑀡𑁆𑀡𑀬𑀲𑀇𑀲𑁆𑀲𑀭𑀺𑀬𑀸𑀤𑀻𑀳𑀺 𑀉𑀢𑁆𑀢𑀫𑀢𑀭𑀸 𑀏𑀢𑁂𑀦 𑀦𑀬𑁂𑀦 𑀲𑀩𑁆𑀩𑀯𑀸𑀭𑁂𑀲𑀼 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑁪𑁯𑁧-𑁪𑁯𑁩. 𑀅𑀬𑀁 𑀧𑀦 𑀯𑀺𑀲𑁂𑀲𑁄 𑁋 𑀲𑀓𑁆𑀓𑁄 𑀓𑀺𑀭 𑀤𑁂𑀯𑀭𑀸𑀚𑀸 𑀘𑀺𑀦𑁆𑀢𑁂𑀲𑀺 ‘‘𑀅𑀬𑀁 𑀧𑀜𑁆𑀳𑁄 𑀩𑀼𑀤𑁆𑀥𑀯𑀺𑀲𑀬𑁄, 𑀦 𑀲𑀓𑁆𑀓𑀸 𑀅𑀜𑁆𑀜𑁂𑀦 𑀯𑀺𑀲𑁆𑀲𑀚𑁆𑀚𑀺𑀢𑀼𑀁, 𑀅𑀬𑀜𑁆𑀘 𑀪𑀺𑀓𑁆𑀔𑀼 𑀅𑀕𑁆𑀕𑀺𑀁 𑀧𑀳𑀸𑀬 𑀔𑀚𑁆𑀚𑁄𑀧𑀦𑀓𑀁 𑀥𑀫𑀦𑁆𑀢𑁄 𑀯𑀺𑀬, 𑀪𑁂𑀭𑀺𑀁 𑀧𑀳𑀸𑀬 𑀉𑀤𑀭𑀁 𑀯𑀸𑀤𑁂𑀦𑁆𑀢𑁄 𑀯𑀺𑀬 𑀘, 𑀮𑁄𑀓𑁂 𑀅𑀕𑁆𑀕𑀧𑀼𑀕𑁆𑀕𑀮𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁 𑀧𑀳𑀸𑀬 𑀤𑁂𑀯𑀢𑀸 𑀧𑀼𑀘𑁆𑀙𑀦𑁆𑀢𑁄 𑀯𑀺𑀘𑀭𑀢𑀺, 𑀧𑁂𑀲𑁂𑀫𑀺 𑀦𑀁 𑀲𑀢𑁆𑀣𑀼𑀲𑀦𑁆𑀢𑀺𑀓’’𑀦𑁆𑀢𑀺. 𑀢𑀢𑁄 𑀧𑀼𑀦𑀤𑁂𑀯 𑀲𑁄 𑀘𑀺𑀦𑁆𑀢𑁂𑀲𑀺 ‘‘𑀲𑀼𑀤𑀽𑀭𑀫𑁆𑀧𑀺 𑀕𑀦𑁆𑀢𑁆𑀯𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂𑀯 𑀦𑀺𑀓𑁆𑀓𑀗𑁆𑀔𑁄 𑀪𑀯𑀺𑀲𑁆𑀲𑀢𑀺. 𑀅𑀢𑁆𑀣𑀺 𑀘𑁂𑀯 𑀧𑀼𑀕𑁆𑀕𑀮𑁄 𑀦𑀸𑀫𑁂𑀲, 𑀣𑁄𑀓𑀁 𑀢𑀸𑀯 𑀆𑀳𑀺𑀡𑁆𑀟𑀦𑁆𑀢𑁄 𑀓𑀺𑀮𑀫𑀢𑀼 𑀧𑀘𑁆𑀙𑀸 𑀚𑀸𑀦𑀺𑀲𑁆𑀲𑀢𑀻’’𑀢𑀺. 𑀢𑀢𑁄 𑀢𑀁 ‘‘𑀅𑀳𑀫𑁆𑀧𑀺 𑀔𑁄’’𑀢𑀺𑀆𑀤𑀺𑀫𑀸𑀳. 𑀩𑁆𑀭𑀳𑁆𑀫𑀬𑀸𑀦𑀺𑀬𑁄𑀧𑀺 𑀤𑁂𑀯𑀬𑀸𑀦𑀺𑀬𑀲𑀤𑀺𑀲𑁄𑀯. 𑀤𑁂𑀯𑀬𑀸𑀦𑀺𑀬𑀫𑀕𑁆𑀕𑁄𑀢𑀺 𑀯𑀸 𑀩𑁆𑀭𑀳𑁆𑀫𑀬𑀸𑀦𑀺𑀬𑀫𑀕𑁆𑀕𑁄𑀢𑀺 𑀯𑀸 𑀥𑀫𑁆𑀫𑀲𑁂𑀢𑀽𑀢𑀺 𑀯𑀸 𑀏𑀓𑀘𑀺𑀢𑁆𑀢𑀓𑁆𑀔𑀡𑀺𑀓𑀅𑀧𑁆𑀧𑀦𑀸𑀢𑀺 𑀯𑀸 𑀲𑀦𑁆𑀦𑀺𑀝𑁆𑀞𑀸𑀦𑀺𑀓𑀘𑁂𑀢𑀦𑀸𑀢𑀺 𑀯𑀸 𑀫𑀳𑀕𑁆𑀕𑀢𑀘𑀺𑀢𑁆𑀢𑀦𑁆𑀢𑀺 𑀯𑀸 𑀅𑀪𑀺𑀜𑁆𑀜𑀸𑀜𑀸𑀡𑀦𑁆𑀢𑀺 𑀯𑀸 𑀲𑀩𑁆𑀩𑀫𑁂𑀢𑀁 𑀇𑀤𑁆𑀥𑀺𑀯𑀺𑀥𑀜𑀸𑀡𑀲𑁆𑀲𑁂𑀯 𑀦𑀸𑀫𑀁.

𑁪𑁯𑁪. 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀦𑁆𑀢𑀺 𑀆𑀕𑀫𑀦𑀧𑀼𑀩𑁆𑀩𑀪𑀸𑀕𑁂 𑀦𑀺𑀫𑀺𑀢𑁆𑀢𑀁 𑀲𑀽𑀭𑀺𑀬𑀲𑁆𑀲 𑀉𑀤𑀬𑀢𑁄 𑀅𑀭𑀼𑀡𑀼𑀕𑁆𑀕𑀁 𑀯𑀺𑀬. 𑀢𑀲𑁆𑀫𑀸 𑀇𑀤𑀸𑀦𑁂𑀯 𑀩𑁆𑀭𑀳𑁆𑀫𑀸 𑀆𑀕𑀫𑀺𑀲𑁆𑀲𑀢𑀺, 𑀏𑀯𑀁 𑀫𑀬𑀁 𑀚𑀸𑀦𑀸𑀫𑀸𑀢𑀺 𑀤𑀻𑀧𑀬𑀺𑀁𑀲𑀼. 𑀧𑀸𑀢𑀼𑀭𑀳𑁄𑀲𑀻𑀢𑀺 𑀧𑀸𑀓𑀝𑁄 𑀅𑀳𑁄𑀲𑀺. 𑀅𑀣 𑀔𑁄 𑀲𑁄 𑀩𑁆𑀭𑀳𑁆𑀫𑀸 𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀼𑀝𑁆𑀞𑁄 𑀅𑀢𑁆𑀢𑀦𑁄 𑀅𑀯𑀺𑀲𑀬𑀪𑀸𑀯𑀁 𑀜𑀢𑁆𑀯𑀸 𑀲𑀘𑀸𑀳𑀁 ‘‘𑀦 𑀚𑀸𑀦𑀸𑀫𑀻’’𑀢𑀺 𑀯𑀓𑁆𑀔𑀸𑀫𑀺, 𑀇𑀫𑁂 𑀫𑀁 𑀧𑀭𑀺𑀪𑀯𑀺𑀲𑁆𑀲𑀦𑁆𑀢𑀺, 𑀅𑀣 𑀚𑀸𑀦𑀦𑁆𑀢𑁄 𑀯𑀺𑀬 𑀬𑀁 𑀓𑀺𑀜𑁆𑀘𑀺 𑀓𑀣𑁂𑀲𑁆𑀲𑀸𑀫𑀺, 𑀅𑀬𑀁 𑀫𑁂 𑀪𑀺𑀓𑁆𑀔𑀼 𑀯𑁂𑀬𑁆𑀬𑀸𑀓𑀭𑀡𑁂𑀦 𑀅𑀦𑀸𑀭𑀤𑁆𑀥𑀘𑀺𑀢𑁆𑀢𑁄 𑀯𑀸𑀤𑀁 𑀆𑀭𑁄𑀧𑁂𑀲𑁆𑀲𑀢𑀺. ‘‘𑀅𑀳𑀫𑀲𑁆𑀫𑀺 𑀪𑀺𑀓𑁆𑀔𑀼 𑀩𑁆𑀭𑀳𑁆𑀫𑀸’’𑀢𑀺𑀆𑀤𑀻𑀦𑀺 𑀧𑀦 𑀫𑁂 𑀪𑀡𑀦𑁆𑀢𑀲𑁆𑀲 𑀦 𑀓𑁄𑀘𑀺 𑀯𑀘𑀦𑀁 𑀲𑀤𑁆𑀤𑀳𑀺𑀲𑁆𑀲𑀢𑀺. 𑀬𑀁𑀦𑀽𑀦𑀸𑀳𑀁 𑀯𑀺𑀓𑁆𑀔𑁂𑀧𑀁 𑀓𑀢𑁆𑀯𑀸 𑀇𑀫𑀁 𑀪𑀺𑀓𑁆𑀔𑀼𑀁 𑀲𑀢𑁆𑀣𑀼𑀲𑀦𑁆𑀢𑀺𑀓𑀁𑀬𑁂𑀯 𑀧𑁂𑀲𑁂𑀬𑁆𑀬𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀅𑀳𑀫𑀲𑁆𑀫𑀺 𑀪𑀺𑀓𑁆𑀔𑀼 𑀩𑁆𑀭𑀳𑁆𑀫𑀸’’𑀢𑀺𑀆𑀤𑀺𑀫𑀸𑀳.

𑁪𑁯𑁫-𑁪𑁯𑁬. 𑀏𑀓𑀫𑀦𑁆𑀢𑀁 𑀅𑀧𑀦𑁂𑀢𑁆𑀯𑀸𑀢𑀺 𑀓𑀲𑁆𑀫𑀸 𑀏𑀯𑀫𑀓𑀸𑀲𑀺? 𑀓𑀼𑀳𑀓𑀢𑁆𑀢𑀸. 𑀩𑀳𑀺𑀤𑁆𑀥𑀸 𑀧𑀭𑀺𑀬𑁂𑀝𑁆𑀞𑀺𑀦𑁆𑀢𑀺 𑀢𑁂𑀮𑀢𑁆𑀣𑀺𑀓𑁄 𑀯𑀸𑀮𑀺𑀓𑀁 𑀦𑀺𑀧𑁆𑀧𑀻𑀴𑀺𑀬𑀫𑀸𑀦𑁄 𑀯𑀺𑀬 𑀬𑀸𑀯 𑀩𑁆𑀭𑀳𑁆𑀫𑀮𑁄𑀓𑀸 𑀩𑀳𑀺𑀤𑁆𑀥𑀸 𑀧𑀭𑀺𑀬𑁂𑀲𑀦𑀁 𑀆𑀧𑀚𑁆𑀚𑀢𑀺.

𑁪𑁯𑁭. 𑀲𑀓𑀼𑀡𑀦𑁆𑀢𑀺 𑀓𑀸𑀓𑀁 𑀯𑀸 𑀓𑀼𑀮𑀮𑀁 𑀯𑀸. 𑀦 𑀔𑁄 𑀏𑀲𑁄, 𑀪𑀺𑀓𑁆𑀔𑀼, 𑀧𑀜𑁆𑀳𑁄 𑀏𑀯𑀁 𑀧𑀼𑀘𑁆𑀙𑀺𑀢𑀩𑁆𑀩𑁄𑀢𑀺 𑀇𑀤𑀁 𑀪𑀕𑀯𑀸 𑀬𑀲𑁆𑀫𑀸 𑀧𑀤𑁂𑀲𑁂𑀦𑁂𑀲 𑀧𑀜𑁆𑀳𑁄 𑀧𑀼𑀘𑁆𑀙𑀺𑀢𑀩𑁆𑀩𑁄, 𑀅𑀬𑀜𑁆𑀘 𑀔𑁄 𑀪𑀺𑀓𑁆𑀔𑀼 𑀅𑀦𑀼𑀧𑀸𑀤𑀺𑀦𑁆𑀦𑀓𑁂𑀧𑀺 𑀕𑀳𑁂𑀢𑁆𑀯𑀸 𑀦𑀺𑀧𑁆𑀧𑀤𑁂𑀲𑀢𑁄 𑀧𑀼𑀘𑁆𑀙𑀢𑀺, 𑀢𑀲𑁆𑀫𑀸 𑀧𑀝𑀺𑀲𑁂𑀥𑁂𑀢𑀺. 𑀆𑀘𑀺𑀡𑁆𑀡𑀁 𑀓𑀺𑀭𑁂𑀢𑀁 𑀩𑀼𑀤𑁆𑀥𑀸𑀦𑀁, 𑀧𑀼𑀘𑁆𑀙𑀸𑀫𑀽𑀴𑁆𑀳𑀲𑁆𑀲 𑀚𑀦𑀲𑁆𑀲 𑀧𑀼𑀘𑁆𑀙𑀸𑀬 𑀤𑁄𑀲𑀁 𑀤𑀲𑁆𑀲𑁂𑀢𑁆𑀯𑀸 𑀧𑀼𑀘𑁆𑀙𑀁 𑀲𑀺𑀓𑁆𑀔𑀸𑀧𑁂𑀢𑁆𑀯𑀸 𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑀁. 𑀓𑀲𑁆𑀫𑀸? 𑀧𑀼𑀘𑁆𑀙𑀺𑀢𑀼𑀁 𑀅𑀚𑀸𑀦𑀺𑀢𑁆𑀯𑀸 𑀧𑀭𑀺𑀧𑀼𑀘𑁆𑀙𑀦𑁆𑀢𑁄 𑀤𑀼𑀯𑀺𑀜𑁆𑀜𑀸𑀧𑀬𑁄 𑀳𑁄𑀢𑀺. 𑀧𑀜𑁆𑀳𑀁 𑀲𑀺𑀓𑁆𑀔𑀸𑀧𑁂𑀦𑁆𑀢𑁄 𑀧𑀦 ‘‘𑀓𑀢𑁆𑀣 𑀆𑀧𑁄 𑀘𑀸’’𑀢𑀺𑀆𑀤𑀺𑀫𑀸𑀳.

𑁪𑁯𑁮. 𑀢𑀢𑁆𑀣 𑀦 𑀕𑀸𑀥𑀢𑀻𑀢𑀺 𑀦 𑀧𑀢𑀺𑀝𑁆𑀞𑀸𑀢𑀺, 𑀇𑀫𑁂 𑀘𑀢𑁆𑀢𑀸𑀭𑁄 𑀫𑀳𑀸𑀪𑀽𑀢𑀸 𑀓𑀺𑀁 𑀆𑀕𑀫𑁆𑀫 𑀅𑀧𑁆𑀧𑀢𑀺𑀝𑁆𑀞𑀸 𑀪𑀯𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀉𑀧𑀸𑀤𑀺𑀦𑁆𑀦𑀁𑀬𑁂𑀯 𑀲𑀦𑁆𑀥𑀸𑀬 𑀧𑀼𑀘𑁆𑀙𑀢𑀺. 𑀤𑀻𑀖𑀜𑁆𑀘 𑀭𑀲𑁆𑀲𑀜𑁆𑀘𑀸𑀢𑀺 𑀲𑀡𑁆𑀞𑀸𑀦𑀯𑀲𑁂𑀦 𑀉𑀧𑀸𑀤𑀸𑀭𑀽𑀧𑀁 𑀯𑀼𑀢𑁆𑀢𑀁. 𑀅𑀡𑀼𑀁 𑀣𑀽𑀮𑀦𑁆𑀢𑀺 𑀔𑀼𑀤𑁆𑀤𑀓𑀁 𑀯𑀸 𑀫𑀳𑀦𑁆𑀢𑀁 𑀯𑀸, 𑀇𑀫𑀺𑀦𑀸𑀧𑀺 𑀉𑀧𑀸𑀤𑀸𑀭𑀽𑀧𑁂 𑀯𑀡𑁆𑀡𑀫𑀢𑁆𑀢𑀫𑁂𑀯 𑀓𑀣𑀺𑀢𑀁. 𑀲𑀼𑀪𑀸𑀲𑀼𑀪𑀦𑁆𑀢𑀺 𑀲𑀼𑀪𑀜𑁆𑀘 𑀅𑀲𑀼𑀪𑀜𑁆𑀘 𑀉𑀧𑀸𑀤𑀸𑀭𑀽𑀧𑀫𑁂𑀯 𑀓𑀣𑀺𑀢𑀁. 𑀓𑀺𑀁 𑀧𑀦 𑀉𑀧𑀸𑀤𑀸𑀭𑀽𑀧𑀁 𑀲𑀼𑀪𑀦𑁆𑀢𑀺 𑀅𑀲𑀼𑀪𑀦𑁆𑀢𑀺 𑀅𑀢𑁆𑀣𑀺? 𑀦𑀢𑁆𑀣𑀺. 𑀇𑀝𑁆𑀞𑀸𑀦𑀺𑀝𑁆𑀞𑀸𑀭𑀫𑁆𑀫𑀡𑀁 𑀧𑀦𑁂𑀯 𑀓𑀣𑀺𑀢𑀁. 𑀦𑀸𑀫𑀜𑁆𑀘 𑀭𑀽𑀧𑀜𑁆𑀘𑀸𑀢𑀺 𑀦𑀸𑀫𑀜𑁆𑀘 𑀤𑀻𑀖𑀸𑀤𑀺𑀪𑁂𑀤𑀁 𑀭𑀽𑀧𑀜𑁆𑀘. 𑀉𑀧𑀭𑀼𑀚𑁆𑀛𑀢𑀻𑀢𑀺 𑀦𑀺𑀭𑀼𑀚𑁆𑀛𑀢𑀺, 𑀓𑀺𑀁 𑀆𑀕𑀫𑁆𑀫 𑀅𑀲𑁂𑀲𑀫𑁂𑀢𑀁 𑀦𑀧𑁆𑀧𑀯𑀢𑁆𑀢𑀢𑀻𑀢𑀺.

𑀏𑀯𑀁 𑀧𑀼𑀘𑁆𑀙𑀺𑀢𑀩𑁆𑀩𑀁 𑀲𑀺𑀬𑀸𑀢𑀺 𑀧𑀼𑀘𑁆𑀙𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀯𑀺𑀲𑁆𑀲𑀚𑁆𑀚𑀦𑀁 𑀤𑀲𑁆𑀲𑁂𑀦𑁆𑀢𑁄 𑀢𑀢𑁆𑀭 𑀯𑁂𑀬𑁆𑀬𑀸𑀓𑀭𑀡𑀁 𑀪𑀯𑀢𑀻𑀢𑀺 𑀯𑀢𑁆𑀯𑀸 𑁋 ‘‘𑀯𑀺𑀜𑁆𑀜𑀸𑀡’’𑀦𑁆𑀢𑀺𑀆𑀤𑀺𑀫𑀸𑀳.

𑁪𑁯𑁯. 𑀢𑀢𑁆𑀣 𑀯𑀺𑀜𑁆𑀜𑀸𑀢𑀩𑁆𑀩𑀦𑁆𑀢𑀺 𑀯𑀺𑀜𑁆𑀜𑀸𑀡𑀁 𑀦𑀺𑀩𑁆𑀩𑀸𑀦𑀲𑁆𑀲𑁂𑀢𑀁 𑀦𑀸𑀫𑀁, 𑀢𑀤𑁂𑀢𑀁 𑀦𑀺𑀤𑀲𑁆𑀲𑀦𑀸𑀪𑀸𑀯𑀢𑁄 𑀅𑀦𑀺𑀤𑀲𑁆𑀲𑀦𑀁. 𑀉𑀧𑁆𑀧𑀸𑀤𑀦𑁆𑀢𑁄 𑀯𑀸 𑀯𑀬𑀦𑁆𑀢𑁄 𑀯𑀸 𑀞𑀺𑀢𑀲𑁆𑀲 𑀅𑀜𑁆𑀜𑀣𑀢𑁆𑀢𑀦𑁆𑀢𑁄 𑀯𑀸 𑀏𑀢𑀲𑁆𑀲 𑀦𑀢𑁆𑀣𑀻𑀢𑀺 𑀅𑀦𑀦𑁆𑀢𑀁. 𑀧𑀪𑀦𑁆𑀢𑀺 𑀧𑀦𑁂𑀢𑀁 𑀓𑀺𑀭 𑀢𑀺𑀢𑁆𑀣𑀲𑁆𑀲 𑀦𑀸𑀫𑀁, 𑀢𑀜𑁆𑀳𑀺 𑀧𑀧𑀦𑁆𑀢𑀺 𑀏𑀢𑁆𑀣𑀸𑀢𑀺 𑀧𑀧𑀁, 𑀧𑀓𑀸𑀭𑀲𑁆𑀲 𑀧𑀦 𑀪𑀓𑀸𑀭𑁄 𑀓𑀢𑁄. 𑀲𑀩𑁆𑀩𑀢𑁄 𑀧𑀪𑀫𑀲𑁆𑀲𑀸𑀢𑀺 𑀲𑀩𑁆𑀩𑀢𑁄𑀧𑀪𑀁. 𑀦𑀺𑀩𑁆𑀩𑀸𑀦𑀲𑁆𑀲 𑀓𑀺𑀭 𑀬𑀣𑀸 𑀫𑀳𑀸𑀲𑀫𑀼𑀤𑁆𑀤𑀲𑁆𑀲 𑀬𑀢𑁄 𑀬𑀢𑁄 𑀑𑀢𑀭𑀺𑀢𑀼𑀓𑀸𑀫𑀸 𑀳𑁄𑀦𑁆𑀢𑀺, 𑀢𑀁 𑀢𑀤𑁂𑀯 𑀢𑀺𑀢𑁆𑀣𑀁, 𑀅𑀢𑀺𑀢𑁆𑀣𑀁 𑀦𑀸𑀫 𑀦𑀢𑁆𑀣𑀺. 𑀏𑀯𑀫𑁂𑀯 𑀅𑀝𑁆𑀞𑀢𑀺𑀁𑀲𑀸𑀬 𑀓𑀫𑁆𑀫𑀝𑁆𑀞𑀸𑀦𑁂𑀲𑀼 𑀬𑁂𑀦 𑀬𑁂𑀦 𑀫𑀼𑀔𑁂𑀦 𑀦𑀺𑀩𑁆𑀩𑀸𑀦𑀁 𑀑𑀢𑀭𑀺𑀢𑀼𑀓𑀸𑀫𑀸 𑀳𑁄𑀦𑁆𑀢𑀺, 𑀢𑀁 𑀢𑀤𑁂𑀯 𑀢𑀺𑀢𑁆𑀣𑀁, 𑀦𑀺𑀩𑁆𑀩𑀸𑀦𑀲𑁆𑀲 𑀅𑀢𑀺𑀢𑁆𑀣𑀁 𑀦𑀸𑀫 𑀦𑀢𑁆𑀣𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀲𑀩𑁆𑀩𑀢𑁄𑀧𑀪’’𑀦𑁆𑀢𑀺. 𑀏𑀢𑁆𑀣 𑀆𑀧𑁄 𑀘𑀸𑀢𑀺 𑀏𑀢𑁆𑀣 𑀦𑀺𑀩𑁆𑀩𑀸𑀦𑁂 𑀇𑀤𑀁 𑀦𑀺𑀩𑁆𑀩𑀸𑀦𑀁 𑀆𑀕𑀫𑁆𑀫 𑀲𑀩𑁆𑀩𑀫𑁂𑀢𑀁 𑀆𑀧𑁄𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀼𑀢𑁆𑀢𑀁 𑀉𑀧𑀸𑀤𑀺𑀦𑁆𑀦𑀓 𑀥𑀫𑁆𑀫𑀚𑀸𑀢𑀁 𑀦𑀺𑀭𑀼𑀚𑁆𑀛𑀢𑀺, 𑀅𑀧𑁆𑀧𑀯𑀢𑁆𑀢𑀁 𑀳𑁄𑀢𑀻𑀢𑀺.

𑀇𑀤𑀸𑀦𑀺𑀲𑁆𑀲 𑀦𑀺𑀭𑀼𑀚𑁆𑀛𑀦𑀽𑀧𑀸𑀬𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀯𑀺𑀜𑁆𑀜𑀸𑀡𑀲𑁆𑀲 𑀦𑀺𑀭𑁄𑀥𑁂𑀦 𑀏𑀢𑁆𑀣𑁂𑀢𑀁 𑀉𑀧𑀭𑀼𑀚𑁆𑀛𑀢𑀻’’𑀢𑀺 𑀆𑀳. 𑀢𑀢𑁆𑀣 𑀯𑀺𑀜𑁆𑀜𑀸𑀡𑀦𑁆𑀢𑀺 𑀘𑀭𑀺𑀫𑀓𑀯𑀺𑀜𑁆𑀜𑀸𑀡𑀫𑁆𑀧𑀺 𑀅𑀪𑀺𑀲𑀗𑁆𑀔𑀸𑀭𑀯𑀺𑀜𑁆𑀜𑀸𑀡𑀫𑁆𑀧𑀺, 𑀘𑀭𑀺𑀫𑀓𑀯𑀺𑀜𑁆𑀜𑀸𑀡𑀲𑁆𑀲𑀸𑀧𑀺 𑀳𑀺 𑀦𑀺𑀭𑁄𑀥𑁂𑀦 𑀏𑀢𑁆𑀣𑁂𑀢𑀁 𑀉𑀧𑀭𑀼𑀚𑁆𑀛𑀢𑀺. 𑀯𑀺𑀚𑁆𑀛𑀸𑀢𑀤𑀻𑀧𑀲𑀺𑀔𑀸 𑀯𑀺𑀬 𑀅𑀧𑀡𑁆𑀡𑀢𑁆𑀢𑀺𑀓𑀪𑀸𑀯𑀁 𑀬𑀸𑀢𑀺. 𑀅𑀪𑀺𑀲𑀗𑁆𑀔𑀸𑀭𑀯𑀺𑀜𑁆𑀜𑀸𑀡𑀲𑁆𑀲𑀸𑀧𑀺 𑀅𑀦𑀼𑀧𑁆𑀧𑀸𑀤𑀦𑀺𑀭𑁄𑀥𑁂𑀦 𑀅𑀦𑀼𑀧𑁆𑀧𑀸𑀤𑀯𑀲𑁂𑀦 𑀉𑀧𑀭𑀼𑀚𑁆𑀛𑀢𑀺. 𑀬𑀣𑀸𑀳 ‘‘𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀜𑀸𑀡𑁂𑀦 𑀅𑀪𑀺𑀲𑀗𑁆𑀔𑀸𑀭𑀯𑀺𑀜𑁆𑀜𑀸𑀡𑀲𑁆𑀲 𑀦𑀺𑀭𑁄𑀥𑁂𑀦 𑀞𑀧𑁂𑀢𑁆𑀯𑀸 𑀲𑀢𑁆𑀢𑀪𑀯𑁂 𑀅𑀦𑀫𑀢𑀕𑁆𑀕𑁂 𑀲𑀁𑀲𑀸𑀭𑁂 𑀬𑁂 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁 𑀦𑀸𑀫𑀜𑁆𑀘 𑀭𑀽𑀧𑀜𑁆𑀘 𑀏𑀢𑁆𑀣𑁂𑀢𑁂 𑀦𑀺𑀭𑀼𑀚𑁆𑀛𑀦𑁆𑀢𑀻’’𑀢𑀺 𑀲𑀩𑁆𑀩𑀁 𑀘𑀽𑀴𑀦𑀺𑀤𑁆𑀤𑁂𑀲𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀇𑀢𑀺 𑀲𑀼𑀫𑀗𑁆𑀕𑀮𑀯𑀺𑀮𑀸𑀲𑀺𑀦𑀺𑀬𑀸 𑀤𑀻𑀖𑀦𑀺𑀓𑀸𑀬𑀝𑁆𑀞𑀓𑀣𑀸𑀬𑀁

𑀓𑁂𑀯𑀝𑁆𑀝𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.