𑁪. 𑀢𑀺𑀓𑀤𑀼𑀓𑀧𑀝𑁆𑀞𑀸𑀦𑀯𑀡𑁆𑀡𑀦𑀸

𑀢𑀺𑀓𑀤𑀼𑀓𑀧𑀝𑁆𑀞𑀸𑀦𑁂𑀧𑀺 𑀓𑀼𑀲𑀮𑀁 𑀳𑁂𑀢𑀼𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀓𑀼𑀲𑀮𑁄 𑀳𑁂𑀢𑀼 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑀢𑀺 𑀳𑁂𑀢𑀼𑀧𑀘𑁆𑀘𑀬𑀸𑀢𑀺 𑀧𑀜𑁆𑀳𑀸𑀫𑀢𑁆𑀢𑀼𑀤𑁆𑀥𑀸𑀭𑀯𑀲𑁂𑀦𑁂𑀯 𑀤𑁂𑀲𑀦𑀸 𑀓𑀢𑀸. 𑀢𑀢𑁆𑀣 𑀬𑀣𑀸 𑀳𑁂𑀝𑁆𑀞𑀸 𑀳𑁂𑀢𑀼𑀤𑀼𑀓𑁂𑀦 𑀲𑀤𑁆𑀥𑀺𑀁 𑀓𑀼𑀲𑀮𑀧𑀤𑀁 𑀬𑁄𑀚𑁂𑀢𑁆𑀯𑀸 𑀲𑀩𑁆𑀩𑀧𑀘𑁆𑀘𑀬𑀯𑀲𑁂𑀦 𑀲𑀩𑁆𑀩𑀯𑀸𑀭𑁂𑀲𑀼 𑀲𑀗𑁆𑀔𑁂𑀧𑀢𑁄 𑀤𑁂𑀲𑀦𑀸 𑀓𑀢𑀸, 𑀏𑀯𑀫𑀺𑀥 𑀓𑀼𑀲𑀮𑀢𑁆𑀢𑀺𑀓𑁂𑀦 𑀲𑀤𑁆𑀥𑀺𑀁 𑀳𑁂𑀢𑀼𑀧𑀤𑀁 𑀬𑁄𑀚𑁂𑀢𑁆𑀯𑀸 𑀲𑀩𑁆𑀩𑀧𑀘𑁆𑀘𑀬𑀯𑀲𑁂𑀦 𑀲𑀩𑁆𑀩𑀯𑀸𑀭𑁂𑀲𑀼 𑀲𑀗𑁆𑀔𑁂𑀧𑀢𑁄 𑀤𑁂𑀲𑀦𑀸 𑀓𑀢𑀸. 𑀬𑀣𑀸 𑀘 𑀳𑁂𑀢𑀼𑀧𑀤𑀁, 𑀏𑀯𑀁 𑀦𑀳𑁂𑀢𑀼𑀧𑀤𑀫𑁆𑀧𑀺 𑀓𑀼𑀲𑀮𑀢𑁆𑀢𑀺𑀓𑁂𑀦 𑀲𑀤𑁆𑀥𑀺𑀁 𑀬𑁄𑀚𑁂𑀢𑁆𑀯𑀸 𑀓𑀼𑀲𑀮𑀢𑁆𑀢𑀺𑀓𑀳𑁂𑀢𑀼𑀤𑀼𑀓𑀁 𑀦𑀺𑀝𑁆𑀞𑀸𑀧𑀺𑀢𑀁. 𑀢𑀢𑁄 𑀧𑀭𑀁 𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀁 𑀳𑁂𑀢𑀼𑀁 𑀥𑀫𑁆𑀫𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑁂𑀤𑀦𑀸𑀢𑁆𑀢𑀺𑀓𑀳𑁂𑀢𑀼𑀤𑀼𑀓𑀸𑀤𑀻𑀦𑀺 𑀏𑀓𑀯𑀻𑀲𑀢𑀺 𑀢𑀺𑀓𑀤𑀼𑀓𑀸𑀦𑀺 𑀤𑀲𑁆𑀲𑀺𑀢𑀸𑀦𑀺.

𑀏𑀯𑀁 𑀩𑀸𑀯𑀻𑀲𑀢𑀺𑀬𑀸 𑀢𑀺𑀓𑁂𑀳𑀺 𑀲𑀤𑁆𑀥𑀺𑀁 𑀳𑁂𑀢𑀼𑀤𑀼𑀓𑀁 𑀬𑁄𑀚𑁂𑀢𑁆𑀯𑀸 𑀧𑀼𑀦 𑀢𑁂𑀳𑀺𑀬𑁂𑀯 𑀲𑀤𑁆𑀥𑀺𑀁 𑀲𑀳𑁂𑀢𑀼𑀓𑀤𑀼𑀓𑀸𑀤𑀬𑁄 𑀲𑀭𑀡𑀤𑀼𑀓𑀧𑀭𑀺𑀬𑁄𑀲𑀸𑀦𑀸 𑀮𑀩𑁆𑀪𑀫𑀸𑀦𑀯𑀲𑁂𑀦 𑀲𑀩𑁆𑀩𑀤𑀼𑀓𑀸 𑀬𑁄𑀚𑀺𑀢𑀸. 𑀇𑀥𑀸𑀧𑀺 𑀬𑀁 𑀬𑀁 𑀧𑀤𑀁 𑀬𑁄𑀚𑀦𑀁 𑀦 𑀕𑀘𑁆𑀙𑀢𑀺, 𑀢𑀁 𑀢𑀁 𑀧𑀸𑀴𑀺𑀬𑀁𑀬𑁂𑀯 𑀧𑀝𑀺𑀓𑁆𑀔𑀺𑀢𑁆𑀢𑀁. 𑀏𑀯𑀁 𑀤𑀼𑀓𑀲𑀢𑀁 𑀕𑀳𑁂𑀢𑁆𑀯𑀸 𑀤𑁆𑀯𑀸𑀯𑀻𑀲𑀢𑀺𑀬𑀸 𑀢𑀺𑀓𑁂𑀲𑀼 𑀧𑀓𑁆𑀔𑀺𑀧𑀺𑀢𑁆𑀯𑀸 𑀢𑀺𑀓𑀤𑀼𑀓𑀧𑀝𑁆𑀞𑀸𑀦𑀁 𑀦𑀸𑀫 𑀤𑁂𑀲𑀺𑀢𑀁. 𑀢𑀢𑁆𑀭𑀸𑀧𑀺 𑀬𑁂𑀦 𑀬𑁂𑀦 𑀦𑀬𑁂𑀦 𑀧𑀸𑀴𑀺 𑀲𑀗𑁆𑀔𑀺𑀢𑁆𑀢𑀸, 𑀲𑁄 𑀲𑁄 𑀦𑀬𑁄 𑀯𑀺𑀢𑁆𑀣𑀸𑀭𑀢𑁄 𑀯𑁂𑀤𑀺𑀢𑀩𑁆𑀩𑁄.

𑀢𑀺𑀓𑀤𑀼𑀓𑀧𑀝𑁆𑀞𑀸𑀦𑀯𑀡𑁆𑀡𑀦𑀸.