𑁫-𑁨𑁨. 𑀲𑀗𑁆𑀓𑀺𑀮𑀺𑀝𑁆𑀞𑀢𑁆𑀢𑀺𑀓𑀸𑀤𑀺𑀯𑀡𑁆𑀡𑀦𑀸

𑀲𑀗𑁆𑀓𑀺𑀮𑀺𑀝𑁆𑀞𑀲𑀗𑁆𑀓𑀺𑀮𑁂𑀲𑀺𑀓𑀢𑁆𑀢𑀺𑀓𑁂 𑀲𑀩𑁆𑀩𑀁 𑀓𑀼𑀲𑀮𑀢𑁆𑀢𑀺𑀓𑁂 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁.

𑁭𑁯. 𑀯𑀺𑀢𑀓𑁆𑀓𑀢𑁆𑀢𑀺𑀓𑁂 𑀬𑀣𑀸𑀓𑀫𑁆𑀫𑀽𑀧𑀕𑀜𑀸𑀡𑀲𑁆𑀲 𑀧𑀭𑀺𑀓𑀫𑁆𑀫𑀦𑁆𑀢𑀺 𑀤𑀺𑀩𑁆𑀩𑀘𑀓𑁆𑀔𑀼𑀧𑀭𑀺𑀓𑀫𑁆𑀫𑀫𑁂𑀯 𑀢𑀲𑁆𑀲 𑀉𑀧𑁆𑀧𑀸𑀤𑀦𑀢𑁆𑀣𑀸𑀬 𑀧𑀭𑀺𑀓𑀫𑁆𑀫𑀁. 𑀉𑀧𑁆𑀧𑀦𑁆𑀦𑀲𑁆𑀲 𑀧𑀦 𑀯𑀴𑀜𑁆𑀚𑀦𑀓𑀸𑀮𑁂 𑀧𑀭𑀺𑀓𑀫𑁆𑀫𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁. 𑀲𑁂𑀲𑀫𑁂𑀢𑁆𑀣 𑀬𑀣𑀸𑀧𑀸𑀴𑀺𑀫𑁂𑀯 𑀦𑀺𑀬𑁆𑀬𑀸𑀢𑀺.

𑁮𑁨. 𑀢𑀺 𑀢𑀤𑀸𑀭𑀫𑁆𑀫𑀡𑀪𑀯𑀗𑁆𑀕𑀫𑀽𑀮𑀪𑀯𑀗𑁆𑀕𑀸𑀦𑀁 𑀯𑀲𑁂𑀦 𑀯𑀼𑀢𑁆𑀢𑀁. 𑀲𑁂𑀲𑀫𑁂𑀢𑁆𑀣 𑀲𑀩𑁆𑀩𑀁 𑀧𑀸𑀴𑀺𑀯𑀲𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁.

𑀤𑀲𑁆𑀲𑀦𑀢𑁆𑀢𑀺𑀓𑁂 𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑁄 𑀭𑀸𑀕𑁄 𑀉𑀧𑁆𑀧𑀚𑁆𑀚𑀢𑀻𑀢𑀺𑀆𑀤𑀻𑀲𑀼 𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑁄 𑀧𑀼𑀣𑀼𑀚𑁆𑀚𑀦𑀲𑁆𑀲 𑀉𑀧𑁆𑀧𑀚𑁆𑀚𑀢𑀺. 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑁄 𑀲𑁄𑀢𑀸𑀧𑀦𑁆𑀦𑀲𑁆𑀲𑀸𑀧𑀻𑀢𑀺 𑀏𑀯𑀁 𑀉𑀧𑀭𑀺𑀫𑀲𑁆𑀲 𑀉𑀧𑀭𑀺𑀫𑀲𑁆𑀲 𑀳𑁂𑀝𑁆𑀞𑀺𑀫𑀸 𑀳𑁂𑀝𑁆𑀞𑀺𑀫𑀸 𑀦𑀼𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑁄 𑀥𑀫𑁆𑀫𑁄 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀲𑁆𑀲 𑀥𑀫𑁆𑀫𑀲𑁆𑀲 𑀏𑀓𑁂𑀦𑀧𑀺 𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄 𑀦 𑀳𑁄𑀢𑀺. 𑀲𑁂𑀲𑀫𑁂𑀢𑁆𑀣 𑀧𑀸𑀴𑀺𑀁 𑀅𑀦𑀼𑀕𑀦𑁆𑀢𑁆𑀯𑀸 𑀓𑀼𑀲𑀮𑀢𑁆𑀢𑀺𑀓𑁂 𑀯𑀼𑀢𑁆𑀢𑀮𑀓𑁆𑀔𑀡𑀯𑀲𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁.

𑀤𑀲𑁆𑀲𑀦𑁂𑀦𑀧𑀳𑀸𑀢𑀩𑁆𑀩𑀳𑁂𑀢𑀼𑀓𑀢𑁆𑀢𑀺𑀓𑁂 𑀤𑀲𑁆𑀲𑀦𑁂𑀦𑀧𑀳𑀸𑀢𑀩𑁆𑀩𑀳𑁂𑀢𑀼𑀓𑀸𑀤𑀻𑀦𑀁 𑀯𑀺𑀪𑀸𑀕𑁄 𑀅𑀝𑁆𑀞𑀓𑀣𑀸𑀓𑀡𑁆𑀟𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀯𑀺𑀘𑀺𑀓𑀺𑀘𑁆𑀙𑀼𑀤𑁆𑀥𑀘𑁆𑀘𑀲𑀳𑀕𑀢𑁄 𑀫𑁄𑀳𑁄 𑀅𑀳𑁂𑀢𑀼𑀓𑀢𑁆𑀢𑀸 𑀢𑀢𑀺𑀬𑀧𑀤𑁂 𑀧𑀯𑀺𑀝𑁆𑀞𑁄. 𑀏𑀯𑀫𑁂𑀢𑁆𑀣 𑀬𑁂𑀲𑀁 𑀤𑀲𑁆𑀲𑀦𑀪𑀸𑀯𑀦𑀸𑀳𑀺 𑀧𑀳𑀸𑀢𑀩𑁆𑀩𑁄 𑀳𑁂𑀢𑀼 𑀅𑀢𑁆𑀣𑀺, 𑀢𑁂 𑀧𑀳𑀸𑀢𑀩𑁆𑀩𑀳𑁂𑀢𑀼𑀓𑀸. 𑀬𑁂𑀲𑀁 𑀲𑁄 𑀦𑀢𑁆𑀣𑀺 𑀢𑁂 𑀦𑁂𑀯𑀤𑀲𑁆𑀲𑀦𑁂𑀦 𑀦𑀪𑀸𑀯𑀦𑀸𑀬𑀧𑀳𑀸𑀢𑀩𑁆𑀩𑀳𑁂𑀢𑀼𑀓𑀸𑀢𑀺 𑀇𑀫𑀁 𑀧𑀳𑀸𑀢𑀩𑁆𑀩𑀳𑁂𑀢𑀼𑀓𑀯𑀺𑀪𑀸𑀕𑀁 𑀜𑀢𑁆𑀯𑀸 𑀲𑁂𑀲𑀁 𑀤𑀲𑁆𑀲𑀦𑁂𑀦𑀧𑀳𑀸𑀢𑀩𑁆𑀩𑀢𑁆𑀢𑀺𑀓𑁂 𑀘𑁂𑀯 𑀓𑀼𑀲𑀮𑀢𑁆𑀢𑀺𑀓𑁂 𑀘 𑀤𑀲𑁆𑀲𑀺𑀢𑀮𑀓𑁆𑀔𑀡𑀸𑀦𑀼𑀲𑀸𑀭𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁.

𑀆𑀘𑀬𑀕𑀸𑀫𑀺𑀢𑁆𑀢𑀺𑀓𑁂 𑀘 𑀧𑀝𑀺𑀘𑁆𑀘𑀯𑀸𑀭𑀲𑀁𑀲𑀝𑁆𑀞𑀯𑀸𑀭𑁂𑀲𑀼 𑀅𑀦𑀼𑀮𑁄𑀫𑀁 𑀓𑀼𑀲𑀮𑀢𑁆𑀢𑀺𑀓𑀲𑀤𑀺𑀲𑀫𑁂𑀯. 𑀲𑁂𑀲𑀁 𑀯𑀺𑀲𑁆𑀲𑀚𑁆𑀚𑀦𑀢𑁄 𑀕𑀡𑀦𑀢𑁄 𑀘 𑀬𑀣𑀸𑀧𑀸𑀴𑀺𑀫𑁂𑀯 𑀦𑀺𑀬𑁆𑀬𑀸𑀢𑀺.

𑀲𑁂𑀓𑁆𑀔𑀢𑁆𑀢𑀺𑀓𑁂 𑀅𑀲𑁂𑀓𑁆𑀔𑁄 𑀥𑀫𑁆𑀫𑁄 𑀲𑁂𑀓𑁆𑀔𑀲𑁆𑀲 𑀥𑀫𑁆𑀫𑀲𑁆𑀲 𑀦 𑀓𑁂𑀦𑀘𑀺 𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. 𑀲𑁂𑀓𑁆𑀔𑁄 𑀅𑀲𑁂𑀓𑁆𑀔𑀲𑁆𑀲 𑀅𑀦𑀦𑁆𑀢𑀭𑀧𑀓𑀢𑀽𑀧𑀦𑀺𑀲𑁆𑀲𑀬𑁄 𑀧𑀦 𑀳𑁄𑀢𑀺. 𑀲𑁂𑀲𑀫𑁂𑀢𑁆𑀣 𑀬𑀣𑀸𑀧𑀸𑀴𑀺𑀫𑁂𑀯 𑀦𑀺𑀬𑁆𑀬𑀸𑀢𑀺, 𑀢𑀣𑀸 𑀧𑀭𑀺𑀢𑁆𑀢𑀢𑁆𑀢𑀺𑀓𑁂.

𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀢𑁆𑀢𑀺𑀓𑁂 𑀅𑀧𑁆𑀧𑀫𑀸𑀡𑀸𑀭𑀫𑁆𑀫𑀡𑀸𑀘𑁂𑀢𑀦𑀸𑀢𑀺 𑀲𑁂𑀓𑁆𑀔𑀸𑀦𑀁 𑀕𑁄𑀢𑁆𑀭𑀪𑀼𑀘𑁂𑀢𑀦𑀸, 𑀧𑀘𑁆𑀘𑀯𑁂𑀓𑁆𑀔𑀡𑀘𑁂𑀢𑀦𑀸𑀢𑀺𑀧𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺. 𑀯𑀺𑀧𑀸𑀓𑀸𑀦𑀁 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀸𑀦𑀦𑁆𑀢𑀺 𑀧𑀝𑀺𑀲𑀦𑁆𑀥𑀺𑀬𑀁 𑀓𑀫𑁆𑀫𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸, 𑀧𑀯𑀢𑁆𑀢𑁂 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀺𑀯𑀲𑁂𑀦𑀭𑀽𑀧𑀸𑀤𑀺𑀆𑀭𑀫𑁆𑀫𑀡𑀁, 𑀢𑀤𑀸𑀭𑀫𑁆𑀫𑀡𑀯𑀲𑁂𑀦 𑀚𑀯𑀦𑁂𑀦 𑀕𑀳𑀺𑀢𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀜𑁆𑀘 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀉𑀧𑁆𑀧𑀦𑁆𑀦𑀸𑀦𑀁. 𑀬𑁂 𑀧𑀦 ‘‘𑀕𑁄𑀢𑁆𑀭𑀪𑀼𑀘𑀺𑀢𑁆𑀢𑁂𑀦 𑀦𑀢𑁆𑀣𑀺 𑀧𑀝𑀺𑀲𑀦𑁆𑀥𑀻’’𑀢𑀺 𑀯𑀤𑀦𑁆𑀢𑀺, 𑀢𑁂 𑀇𑀫𑀺𑀦𑀸 𑀲𑀼𑀢𑁆𑀢𑁂𑀦 𑀧𑀝𑀺𑀲𑁂𑀥𑁂𑀢𑀩𑁆𑀩𑀸. 𑀲𑁂𑀲𑀫𑁂𑀢𑁆𑀣 𑀧𑀸𑀴𑀺𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀳𑀻𑀦𑀢𑁆𑀢𑀺𑀓𑁄 𑀲𑀗𑁆𑀓𑀺𑀮𑀺𑀝𑁆𑀞𑀢𑁆𑀢𑀺𑀓𑀲𑀤𑀺𑀲𑁄.

𑀫𑀺𑀘𑁆𑀙𑀢𑁆𑀢𑀢𑁆𑀢𑀺𑀓𑁂 𑀫𑀺𑀘𑁆𑀙𑀢𑁆𑀢𑀦𑀺𑀬𑀢𑁄 𑀲𑀫𑁆𑀫𑀢𑁆𑀢𑀦𑀺𑀬𑀢𑀲𑁆𑀲, 𑀲𑀫𑁆𑀫𑀢𑁆𑀢𑀦𑀺𑀬𑀢𑁄 𑀯𑀸 𑀫𑀺𑀘𑁆𑀙𑀢𑁆𑀢𑀦𑀺𑀬𑀢𑀲𑁆𑀲 𑀓𑁂𑀦𑀘𑀺 𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄 𑀦 𑀳𑁄𑀢𑀺. 𑀫𑀺𑀘𑁆𑀙𑀢𑁆𑀢𑀦𑀺𑀬𑀢𑁄 𑀯𑀸 𑀲𑀫𑁆𑀫𑀢𑁆𑀢𑀦𑀺𑀬𑀢𑁄 𑀯𑀸 𑀲𑀳𑀚𑀸𑀢𑀸𑀥𑀺𑀧𑀢𑀺𑀭𑀳𑀺𑀢𑁄 𑀦𑀸𑀫 𑀦𑀢𑁆𑀣𑀺. 𑀲𑀫𑁆𑀫𑀢𑁆𑀢𑀦𑀺𑀬𑀢𑁂 𑀏𑀓𑀦𑁆𑀢𑀢𑁄 𑀆𑀭𑀫𑁆𑀫𑀡𑀧𑀼𑀭𑁂𑀚𑀸𑀢𑀁 𑀦𑀢𑁆𑀣𑀺, 𑀫𑀺𑀘𑁆𑀙𑀢𑁆𑀢𑀦𑀺𑀬𑀢𑁂 𑀲𑀺𑀬𑀸 𑀆𑀭𑀫𑁆𑀫𑀡𑀧𑀼𑀭𑁂𑀚𑀸𑀢𑀁. 𑀅𑀦𑀺𑀬𑀢𑀁 𑀘𑀺𑀢𑁆𑀢𑀁 𑀆𑀭𑀩𑁆𑀪 𑀦𑀺𑀬𑀢𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀉𑀧𑁆𑀧𑀚𑁆𑀚𑁂𑀬𑁆𑀬. 𑀲𑁂𑀲𑀸 𑀦𑀺𑀬𑀢𑀁 𑀆𑀭𑀩𑁆𑀪 𑀦𑀺𑀬𑀢𑀁 𑀦𑀼𑀧𑁆𑀧𑀚𑁆𑀚𑀢𑀺, 𑀫𑀺𑀘𑁆𑀙𑀢𑁆𑀢𑀦𑀺𑀬𑀢𑀁 𑀕𑀭𑀼𑀁 𑀓𑀢𑁆𑀯𑀸 𑀦 𑀓𑁄𑀘𑀺 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑀢𑀺. 𑀓𑀼𑀲𑀮𑁄 𑀫𑀺𑀘𑁆𑀙𑀢𑁆𑀢𑀲𑁆𑀲 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁄 𑀦 𑀳𑁄𑀢𑀺. 𑀲𑁂𑀲𑀫𑁂𑀢𑁆𑀣 𑀧𑀸𑀴𑀺𑀬𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁.

𑀫𑀕𑁆𑀕𑀸𑀭𑀫𑁆𑀫𑀡𑀢𑁆𑀢𑀺𑀓𑁂 𑀧𑀝𑀺𑀘𑁆𑀘𑀯𑀸𑀭𑀲𑁆𑀲 𑀅𑀦𑀼𑀮𑁄𑀫𑁂 𑀯𑀺𑀧𑀸𑀓𑀧𑀘𑁆𑀘𑀬𑁄 𑀦𑀢𑁆𑀣𑀺. 𑀓𑀫𑁆𑀫𑀧𑀘𑁆𑀘𑀬𑁂𑀧𑀺 𑀇𑀫𑀲𑁆𑀫𑀺𑀁 𑀢𑀺𑀓𑁂 𑀦𑀸𑀦𑀸𑀓𑁆𑀔𑀡𑀺𑀓𑀁 𑀦 𑀮𑀩𑁆𑀪𑀢𑀺, 𑀢𑀣𑀸 𑀉𑀧𑁆𑀧𑀦𑁆𑀦𑀢𑁆𑀢𑀺𑀓𑀅𑀢𑀻𑀢𑀢𑁆𑀢𑀺𑀓𑁂𑀲𑀼. 𑀧𑀘𑁆𑀘𑀦𑀻𑀬𑁂 𑀅𑀳𑁂𑀢𑀼𑀓𑀁 𑀫𑀕𑁆𑀕𑀸𑀭𑀫𑁆𑀫𑀡𑀦𑁆𑀢𑀺 𑀅𑀳𑁂𑀢𑀼𑀓𑀁 𑀫𑀕𑁆𑀕𑀸𑀭𑀫𑁆𑀫𑀡𑀁, 𑀆𑀯𑀚𑁆𑀚𑀦𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁. 𑀲𑁂𑀲𑀫𑁂𑀢𑁆𑀣 𑀧𑀸𑀴𑀺𑀅𑀦𑀼𑀲𑀸𑀭𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁.

𑀉𑀧𑁆𑀧𑀦𑁆𑀦𑀢𑁆𑀢𑀺𑀓𑁂 𑀘 𑀅𑀢𑀻𑀢𑀢𑁆𑀢𑀺𑀓𑁂 𑀘 𑀧𑀝𑀺𑀘𑁆𑀘𑀯𑀸𑀭𑀸𑀤𑀬𑁄 𑀦𑀢𑁆𑀣𑀺, 𑀧𑀜𑁆𑀳𑀸𑀯𑀸𑀭𑀫𑀢𑁆𑀢𑀫𑁂𑀯 𑀮𑀩𑁆𑀪𑀢𑀺. 𑀓𑀲𑁆𑀫𑀸? 𑀧𑀝𑀺𑀘𑁆𑀘𑀯𑀸𑀭𑀸𑀤𑀬𑁄 𑀳𑀺 𑀲𑀳𑀚𑀸𑀢𑀧𑀼𑀭𑁂𑀚𑀸𑀢𑀸𑀦𑀜𑁆𑀜𑁂𑀯 𑀳𑁄𑀦𑁆𑀢𑀺. 𑀇𑀫𑁂 𑀘 𑀢𑀺𑀓𑀸 𑀅𑀢𑀻𑀢𑀸𑀦𑀸𑀕𑀢𑀫𑀺𑀲𑁆𑀲𑀓𑀸. 𑀉𑀧𑁆𑀧𑀦𑁆𑀦𑀢𑁆𑀢𑀺𑀓𑁂 𑀘𑁂𑀢𑁆𑀣 𑀅𑀦𑀦𑁆𑀢𑀭𑀪𑀸𑀕𑀺𑀬𑀸𑀧𑀺 𑀧𑀘𑁆𑀘𑀬𑀸 𑀦 𑀮𑀩𑁆𑀪𑀦𑁆𑀢𑀺. 𑀓𑀲𑁆𑀫𑀸? 𑀉𑀧𑁆𑀧𑀦𑁆𑀦𑀢𑁆𑀢𑀺𑀓𑁂 𑀅𑀢𑀻𑀢𑀲𑁆𑀲 𑀅𑀪𑀸𑀯𑀢𑁄. 𑀉𑀧𑁆𑀧𑀦𑁆𑀦𑁄 𑀘 𑀅𑀦𑀼𑀧𑁆𑀧𑀦𑁆𑀦𑁄 𑀘𑀸𑀢𑀺 𑀇𑀫𑁂 𑀘𑁂𑀢𑁆𑀣 𑀤𑁆𑀯𑁂 𑀥𑀫𑁆𑀫𑀸 𑀉𑀧𑁆𑀧𑀦𑁆𑀦𑀲𑁆𑀲 𑀘 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀘𑀸𑀢𑀺 𑀇𑀫𑁂𑀲𑀁 𑀤𑁆𑀯𑀺𑀦𑁆𑀦𑀁 𑀦 𑀓𑁂𑀦𑀘𑀺 𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. 𑀅𑀦𑀼𑀧𑁆𑀧𑀦𑁆𑀦𑁄 𑀘 𑀉𑀧𑁆𑀧𑀸𑀤𑀻 𑀘𑀸𑀢𑀺 𑀇𑀫𑁂 𑀧𑀦 𑀤𑁆𑀯𑁂 𑀉𑀧𑁆𑀧𑀦𑁆𑀦𑀲𑁆𑀲 𑀆𑀭𑀫𑁆𑀫𑀡𑀽𑀧𑀦𑀺𑀲𑁆𑀲𑀬𑀯𑀲𑁂𑀦 𑀤𑁆𑀯𑀻𑀳𑀺 𑀧𑀘𑁆𑀘𑀬𑁂𑀳𑀺 𑀧𑀘𑁆𑀘𑀬𑁄. 𑀲𑁂𑀲𑀫𑁂𑀢𑁆𑀣 𑀧𑀸𑀴𑀺𑀬𑀁 𑀆𑀕𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁.

𑀅𑀢𑀻𑀢𑀢𑁆𑀢𑀺𑀓𑁂 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀅𑀢𑀻𑀢𑀸𑀦𑀸𑀕𑀢𑀲𑁆𑀲, 𑀅𑀢𑀻𑀢𑀸𑀦𑀸𑀕𑀢𑀜𑁆𑀘 𑀅𑀢𑀻𑀢𑀸𑀦𑀸𑀕𑀢𑀲𑁆𑀲 𑀦 𑀓𑁂𑀦𑀘𑀺 𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. 𑀦𑀺𑀩𑁆𑀩𑀸𑀦𑀁 𑀧𑀦 𑀤𑁆𑀯𑀻𑀲𑀼𑀧𑀺 𑀇𑀫𑁂𑀲𑀼 𑀢𑀺𑀓𑁂𑀲𑀼 𑀦𑁂𑀯 𑀧𑀘𑁆𑀘𑀬𑀢𑁄 𑀦 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀢𑁄 𑀮𑀩𑁆𑀪𑀢𑀺. 𑀲𑁂𑀲𑀫𑀺𑀥𑀸𑀧𑀺 𑀧𑀸𑀴𑀺𑀬𑀁 𑀆𑀕𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁.

𑀅𑀚𑁆𑀛𑀢𑁆𑀢𑀢𑁆𑀢𑀺𑀓𑁂 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸𑀧𑀤𑀁 𑀦 𑀕𑀳𑀺𑀢𑀁. 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸𑀲𑀗𑁆𑀔𑀸𑀢𑀸 𑀳𑀺 𑀉𑀪𑁄 𑀭𑀸𑀲𑀬𑁄 𑀦𑁂𑀯 𑀏𑀓𑀢𑁄 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀦 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀸; 𑀢𑀲𑁆𑀫𑀸 𑀳𑀢𑁆𑀣𑀢𑀮𑁂 𑀞𑀧𑀺𑀢𑀲𑁆𑀲 𑀲𑀸𑀲𑀧𑀲𑁆𑀲 𑀯𑀡𑁆𑀡𑁄𑀧𑀺 𑀳𑀢𑁆𑀣𑀢𑀮𑀯𑀡𑁆𑀡𑁂𑀦 𑀲𑀤𑁆𑀥𑀺𑀁 𑀏𑀓𑀢𑁄 𑀆𑀭𑀫𑁆𑀫𑀡𑀁 𑀦 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀬𑀣𑀸 𑀘 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸𑀧𑀤𑀁, 𑀏𑀯𑀫𑁂𑀢𑁆𑀣 𑀅𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑀢𑁆𑀢𑀺𑀓𑁂𑀧𑀺 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀧𑀤𑀁 𑀦 𑀮𑀩𑁆𑀪𑀢𑀺. 𑀲𑁂𑀲𑀁 𑀬𑀣𑀸𑀧𑀸𑀴𑀺𑀫𑁂𑀯 𑀦𑀺𑀬𑁆𑀬𑀸𑀢𑀺.

𑀲𑀦𑀺𑀤𑀲𑁆𑀲𑀦𑀢𑁆𑀢𑀺𑀓𑁂𑀧𑀺 𑀧𑀸𑀴𑀺𑀯𑀲𑁂𑀦𑁂𑀯 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄. 𑀕𑀡𑀦𑀸𑀧𑁂𑀢𑁆𑀣 𑀧𑀸𑀴𑀺𑀬𑀁 𑀆𑀕𑀢𑀯𑀸𑀭𑁂 𑀲𑀗𑁆𑀔𑀺𑀧𑀺𑀢𑁆𑀯𑀸 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀲𑀁𑀲𑀦𑁆𑀤𑀦𑁂𑀲𑀼 𑀲𑀁𑀲𑀦𑁆𑀤𑀺𑀢𑁆𑀯𑀸 𑀯𑁂𑀤𑀺𑀢𑀩𑁆𑀩𑀸𑀢𑀺.

𑀥𑀫𑁆𑀫𑀸𑀦𑀼𑀮𑁄𑀫𑁂 𑀢𑀺𑀓𑀧𑀝𑁆𑀞𑀸𑀦𑀯𑀡𑁆𑀡𑀦𑀸.