𑁨. 𑀤𑀼𑀓𑀧𑀝𑁆𑀞𑀸𑀦𑀯𑀡𑁆𑀡𑀦𑀸

𑀤𑀼𑀓𑀧𑀝𑁆𑀞𑀸𑀦𑁂𑀧𑀺 𑀲𑀩𑁆𑀩𑀤𑀼𑀓𑁂𑀲𑀼 𑀧𑀜𑁆𑀳𑀸𑀯𑀺𑀲𑁆𑀲𑀚𑁆𑀚𑀦𑀸𑀦𑀺 𑀘𑁂𑀯 𑀕𑀡𑀦𑀸 𑀘 𑀧𑀸𑀴𑀺𑀬𑀁 𑀆𑀕𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸. 𑀅𑀧𑀺𑀘𑁂𑀢𑁆𑀣 𑀲𑀳𑁂𑀢𑀼𑀓𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀤𑀼𑀓𑀸𑀦𑀁 𑀯𑀺𑀲𑁆𑀲𑀚𑁆𑀚𑀦𑀁 𑀳𑁂𑀢𑀼𑀤𑀼𑀓𑀯𑀺𑀲𑁆𑀲𑀚𑁆𑀚𑀦𑀲𑀤𑀺𑀲𑀁; 𑀢𑀣𑀸 𑀳𑁂𑀢𑀽𑀘𑁂𑀯𑀲𑀳𑁂𑀢𑀼𑀓𑀳𑁂𑀢𑀽𑀘𑁂𑀯𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀤𑀼𑀓𑀸𑀦𑀁, 𑀢𑀣𑀸 𑀲𑀧𑁆𑀧𑀘𑁆𑀘𑀬𑀲𑀗𑁆𑀔𑀢𑀤𑀼𑀓𑀸𑀦𑀁. 𑀇𑀤𑀁 𑀤𑀼𑀓𑀁 𑀬𑀣𑀸 𑀲𑀧𑁆𑀧𑀘𑁆𑀘𑀬𑀤𑀼𑀓𑀁, 𑀏𑀯𑀁 𑀓𑀸𑀢𑀩𑁆𑀩𑀦𑁆𑀢𑀺 𑀇𑀤𑀁 𑀬𑀲𑁆𑀫𑀸 𑀲𑀧𑁆𑀧𑀘𑁆𑀘𑀬𑁄 𑀯𑀺𑀬 𑀅𑀧𑁆𑀧𑀘𑁆𑀘𑀬𑁂𑀦 𑀲𑀗𑁆𑀔𑀢𑁄𑀧𑀺, 𑀅𑀲𑀗𑁆𑀔𑀢𑁂𑀦 𑀲𑀤𑁆𑀥𑀺𑀁 𑀬𑁄𑀚𑀦𑀁 𑀦 𑀮𑀩𑁆𑀪𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁. 𑀲𑀸𑀭𑀫𑁆𑀫𑀡𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀲𑀁𑀲𑀝𑁆𑀞𑀤𑀼𑀓𑀸𑀧𑀺 𑀲𑀤𑀺𑀲𑀯𑀺𑀲𑁆𑀲𑀚𑁆𑀚𑀦𑀸𑀬𑁂𑀯; 𑀢𑀣𑀸 𑀆𑀲𑀯𑀑𑀖𑀬𑁄𑀕𑀕𑁄𑀘𑁆𑀙𑀓𑀸. 𑀏𑀢𑁂 𑀳𑀺 𑀢𑀬𑁄 𑀅𑀜𑁆𑀜𑀫𑀜𑁆𑀜𑀁 𑀲𑀤𑀺𑀲𑀯𑀺𑀲𑁆𑀲𑀚𑁆𑀚𑀦𑀸𑀬𑁂𑀯. 𑀅𑀧𑀺𑀘 𑀮𑁄𑀓𑀺𑀬𑀲𑀸𑀲𑀯𑀲𑀁𑀬𑁄𑀚𑀦𑀺𑀬𑀕𑀦𑁆𑀣𑀦𑀺𑀬𑀦𑀻𑀯𑀭𑀡𑀺𑀬𑀧𑀭𑀸𑀫𑀝𑁆𑀞𑀲𑀗𑁆𑀓𑀺𑀮𑁂𑀲𑀺𑀓𑀤𑀼𑀓𑀸 𑀆𑀲𑀯𑀯𑀺𑀧𑁆𑀧𑀬𑀼𑀢𑁆𑀢𑀲𑀸𑀲𑀯𑀲𑀁𑀬𑁄𑀚𑀦𑀯𑀺𑀧𑁆𑀧𑀬𑀼𑀢𑁆𑀢𑀲𑀁𑀬𑁄𑀚𑀦𑀺𑀬𑀕𑀦𑁆𑀣𑀯𑀺𑀧𑁆𑀧𑀬𑀼𑀢𑁆𑀢𑀕𑀦𑁆𑀣𑀦𑀺𑀬𑀦𑀻𑀯𑀭𑀡𑀯𑀺𑀧𑁆𑀧𑀬𑀼𑀢𑁆𑀢𑀦𑀻𑀯𑀭𑀡𑀺𑀬𑀧𑀭𑀸𑀫𑀸𑀲𑀯𑀺𑀧𑁆𑀧𑀬𑀼𑀢𑁆𑀢𑀧𑀭𑀸𑀫𑀝𑁆𑀞𑀓𑀺𑀮𑁂𑀲𑀯𑀺𑀧𑁆𑀧𑀬𑀼𑀢𑁆𑀢𑀲𑀗𑁆𑀓𑀺𑀮𑁂𑀲𑀺𑀓𑀧𑀭𑀺𑀬𑀸𑀧𑀦𑁆𑀦𑀲𑀉𑀢𑁆𑀢𑀭𑀤𑀼𑀓𑀸𑀢 𑀇𑀫𑁂𑀧𑀺 𑀤𑀼𑀓𑀸 𑀲𑀫𑀸𑀦𑀸.

𑀓𑀺𑀮𑁂𑀲𑀤𑀼𑀓𑀁 𑀲𑀁𑀬𑁄𑀚𑀦𑀤𑀼𑀓𑀲𑀤𑀺𑀲𑀁. 𑀲𑀗𑁆𑀓𑀺𑀮𑀺𑀝𑁆𑀞𑀓𑀺𑀮𑁂𑀲𑀲𑀫𑁆𑀧𑀬𑀼𑀢𑁆𑀢𑀦𑀻𑀯𑀭𑀡𑀲𑀫𑁆𑀧𑀬𑀼𑀢𑁆𑀢𑀤𑀲𑁆𑀲𑀦𑁂𑀦𑀧𑀳𑀸𑀢𑀩𑁆𑀩𑀲𑀭𑀡𑀤𑀼𑀓𑀸𑀧𑀺 𑀲𑀫𑀸𑀦𑀸. 𑀢𑀣𑀸𑀓𑀺𑀮𑁂𑀲𑀸 𑀘𑁂𑀯 𑀲𑀗𑁆𑀓𑀺𑀮𑀺𑀝𑁆𑀞𑀦𑀻𑀯𑀭𑀡𑀸 𑀘𑁂𑀯 𑀦𑀻𑀯𑀭𑀡𑀲𑀫𑁆𑀧𑀬𑀼𑀢𑁆𑀢𑀓𑀺𑀮𑁂𑀲𑀸 𑀘𑁂𑀯 𑀓𑀺𑀮𑁂𑀲𑀲𑀫𑁆𑀧𑀬𑀼𑀢𑁆𑀢𑀤𑀼𑀓𑀸. 𑀇𑀫𑀺𑀦𑀸 𑀦𑀬𑁂𑀦 𑀲𑀩𑁆𑀩𑁂𑀲𑀁 𑀅𑀢𑁆𑀣𑀢𑁄 𑀲𑀤𑀺𑀲𑀸𑀦𑀁 𑀤𑀼𑀓𑀸𑀦𑀁 𑀯𑀺𑀲𑁆𑀲𑀚𑁆𑀚𑀦𑀸𑀦𑀺 𑀲𑀤𑀺𑀲𑀸𑀦𑁂𑀯 𑀳𑁄𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀲𑀩𑁆𑀩𑀲𑁆𑀫𑀺𑀫𑁆𑀧𑀺 𑀧𑀦 𑀧𑀝𑁆𑀞𑀸𑀦𑁂 𑀓𑁂𑀦𑀘𑀺𑀯𑀺𑀜𑁆𑀜𑁂𑀬𑁆𑀬𑀤𑀼𑀓𑀁 𑀦 𑀮𑀩𑁆𑀪𑀢𑀺. 𑀆𑀲𑀯𑀸 𑀘𑁂𑀯 𑀆𑀲𑀯𑀲𑀫𑁆𑀧𑀬𑀼𑀢𑁆𑀢𑀸 𑀘, 𑀲𑀁𑀬𑁄𑀚𑀦𑀸 𑀘𑁂𑀯 𑀲𑀁𑀬𑁄𑀚𑀦𑀲𑀫𑁆𑀧𑀬𑀼𑀢𑁆𑀢𑀸 𑀘, 𑀕𑀦𑁆𑀣𑀸 𑀘𑁂𑀯 𑀕𑀦𑁆𑀣𑀲𑀫𑁆𑀧𑀬𑀼𑀢𑁆𑀢𑀸 𑀘, 𑀦𑀻𑀯𑀭𑀡𑀸 𑀘𑁂𑀯 𑀦𑀻𑀯𑀭𑀡𑀲𑀫𑁆𑀧𑀬𑀼𑀢𑁆𑀢𑀸 𑀘, 𑀓𑀺𑀮𑁂𑀲𑀸 𑀘𑁂𑀯 𑀲𑀗𑁆𑀓𑀺𑀮𑀺𑀝𑁆𑀞𑀸 𑀘𑀸𑀢𑀺 𑀏𑀯𑀭𑀽𑀧𑁂𑀲𑀼 𑀤𑀼𑀓𑁂𑀲𑀼 𑀯𑀺𑀧𑀸𑀓𑀧𑀘𑁆𑀘𑀬𑁄 𑀘𑁂𑀯 𑀦𑀸𑀦𑀸𑀓𑁆𑀔𑀡𑀺𑀓𑀓𑀫𑁆𑀫𑀧𑀘𑁆𑀘𑀬𑁄 𑀘 𑀦 𑀮𑀩𑁆𑀪𑀢𑀺. 𑀦𑀳𑁂𑀢𑀼𑀲𑀳𑁂𑀢𑀼𑀓𑀦𑀳𑁂𑀢𑀼𑀅𑀳𑁂𑀢𑀼𑀓𑁂𑀲𑀼 𑀳𑁂𑀢𑀼𑀧𑀘𑁆𑀘𑀬𑁄 𑀦𑀢𑁆𑀣𑀺. 𑀳𑁂𑀢𑀽 𑀘𑁂𑀯 𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀸 𑀘, 𑀆𑀲𑀯𑀸 𑀘𑁂𑀯 𑀆𑀲𑀯𑀲𑀫𑁆𑀧𑀬𑀼𑀢𑁆𑀢𑀸 𑀘, 𑀕𑀦𑁆𑀣𑀸 𑀘𑁂𑀯 𑀕𑀦𑁆𑀣𑀲𑀫𑁆𑀧𑀬𑀼𑀢𑁆𑀢𑀸 𑀘𑀸𑀢𑀺 𑀇𑀫𑁂𑀲𑀼 𑀤𑀼𑀓𑁂𑀲𑀼 𑀦𑀳𑁂𑀢𑀼𑀦𑀛𑀸𑀦𑀦𑀫𑀕𑁆𑀕𑀸 𑀦 𑀮𑀩𑁆𑀪𑀦𑁆𑀢𑀺. 𑀲𑀁𑀬𑁄𑀚𑀦𑀸 𑀘𑁂𑀯 𑀲𑀁𑀬𑁄𑀚𑀦𑀲𑀫𑁆𑀧𑀬𑀼𑀢𑁆𑀢𑀸 𑀘, 𑀦𑀻𑀯𑀭𑀡𑀸 𑀘𑁂𑀯 𑀦𑀻𑀯𑀭𑀡𑀲𑀫𑁆𑀧𑀬𑀼𑀢𑁆𑀢𑀸 𑀘, 𑀓𑀺𑀮𑁂𑀲𑀸 𑀘𑁂𑀯 𑀓𑀺𑀮𑁂𑀲𑀲𑀫𑁆𑀧𑀬𑀼𑀢𑁆𑀢𑀸 𑀘, 𑀓𑀺𑀮𑁂𑀲𑀸 𑀘𑁂𑀯 𑀲𑀗𑁆𑀓𑀺𑀮𑀺𑀝𑁆𑀞𑀸 𑀘𑀸𑀢𑀺 𑀇𑀫𑁂𑀲𑀼 𑀧𑀦 𑀯𑀺𑀘𑀺𑀓𑀺𑀘𑁆𑀙𑀼𑀤𑁆𑀥𑀘𑁆𑀘𑀲𑀳𑀕𑀢𑀲𑁆𑀲 𑀫𑁄𑀳𑀲𑁆𑀲 𑀯𑀲𑁂𑀦 𑀦𑀳𑁂𑀢𑀼𑀧𑀘𑁆𑀘𑀬𑁄 𑀮𑀩𑁆𑀪𑀢𑀺; 𑀦𑀛𑀸𑀦𑀦𑀫𑀕𑁆𑀕𑀧𑀘𑁆𑀘𑀬𑀸 𑀦 𑀮𑀩𑁆𑀪𑀦𑁆𑀢𑀻𑀢𑀺 𑀏𑀯𑀁 𑀲𑀩𑁆𑀩𑀤𑀼𑀓𑁂𑀲𑀼 𑀮𑀩𑁆𑀪𑀫𑀸𑀦𑀸𑀮𑀩𑁆𑀪𑀫𑀸𑀦𑀁 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸 𑀧𑀸𑀴𑀺𑀯𑀲𑁂𑀦𑁂𑀯 𑀯𑀸𑀭𑀕𑀡𑀦𑀸 𑀯𑁂𑀤𑀺𑀢𑀩𑁆𑀩𑀸𑀢𑀺.

𑀤𑀼𑀓𑀧𑀝𑁆𑀞𑀸𑀦𑀯𑀡𑁆𑀡𑀦𑀸.