𑁪. 𑀉𑀧𑀸𑀤𑀺𑀦𑁆𑀦𑀢𑁆𑀢𑀺𑀓𑀯𑀡𑁆𑀡𑀦𑀸

𑁫𑁧. 𑀉𑀧𑀸𑀤𑀺𑀦𑁆𑀦𑀼𑀧𑀸𑀤𑀸𑀦𑀺𑀬𑀢𑁆𑀢𑀺𑀓𑀲𑁆𑀲 𑀧𑀜𑁆𑀳𑀸𑀯𑀸𑀭𑁂 𑀯𑀢𑁆𑀣𑀼 𑀉𑀧𑀸𑀤𑀸𑀦𑀺𑀬𑀸𑀦𑀁 𑀔𑀦𑁆𑀥𑀸𑀦𑀁 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄𑀢𑀺 𑀧𑀯𑀢𑁆𑀢𑀺𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀧𑀝𑀺𑀲𑀦𑁆𑀥𑀺𑀬𑀁 𑀧𑀦 𑀢𑀁 𑀧𑀼𑀭𑁂𑀚𑀸𑀢𑀁 𑀦 𑀳𑁄𑀢𑀺.

𑁭𑁨. 𑀉𑀧𑀸𑀤𑀺𑀦𑁆𑀦𑀼𑀧𑀸𑀤𑀸𑀦𑀺𑀬𑁄 𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄 𑀉𑀧𑀸𑀤𑀺𑀦𑁆𑀦𑀼𑀧𑀸𑀤𑀸𑀦𑀺𑀬𑀲𑁆𑀲 𑀓𑀸𑀬𑀲𑁆𑀲 𑀆𑀳𑀸𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄𑀢𑀺 𑀏𑀢𑁆𑀣 𑀉𑀧𑀸𑀤𑀺𑀦𑁆𑀦𑀼𑀧𑀸𑀤𑀸𑀦𑀺𑀬𑁄 𑀓𑀩𑀴𑀻𑀓𑀸𑀭𑀸𑀳𑀸𑀭𑁄 𑀦𑀸𑀫 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀸𑀦𑀁 𑀭𑀽𑀧𑀸𑀦𑀁 𑀅𑀩𑁆𑀪𑀦𑁆𑀢𑀭𑀕𑀢𑀸 𑀑𑀚𑀸. 𑀉𑀧𑀸𑀤𑀺𑀦𑁆𑀦𑀼𑀧𑀸𑀤𑀸𑀦𑀺𑀬𑀲𑁆𑀲 𑀓𑀸𑀬𑀲𑁆𑀲𑀸𑀢𑀺 𑀢𑀲𑁆𑀲𑁂𑀯 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀭𑀽𑀧𑀓𑀸𑀬𑀲𑁆𑀲 𑀆𑀳𑀸𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. 𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀯𑀺𑀬 𑀓𑀝𑀢𑁆𑀢𑀸𑀭𑀽𑀧𑀸𑀦𑀁 𑀅𑀦𑀼𑀧𑀸𑀮𑀦𑀉𑀧𑀢𑁆𑀣𑀫𑁆𑀪𑀦𑀯𑀲𑁂𑀦 𑀧𑀘𑁆𑀘𑀬𑁄, 𑀦 𑀚𑀦𑀓𑀯𑀲𑁂𑀦. 𑀬𑀁 𑀧𑀦 𑀫𑀡𑁆𑀟𑀽𑀓𑀸𑀤𑀬𑁄 𑀕𑀺𑀮𑀺𑀢𑁆𑀯𑀸 𑀞𑀺𑀢𑀸𑀦𑀁 𑀅𑀳𑀺𑀆𑀤𑀻𑀦𑀁 𑀓𑀸𑀬𑀲𑁆𑀲 𑀚𑀻𑀯𑀫𑀸𑀦𑀓𑀫𑀡𑁆𑀟𑀽𑀓𑀸𑀤𑀺𑀲𑀭𑀻𑀭𑁂 𑀑𑀚𑀸 𑀆𑀳𑀸𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄𑀢𑀺 𑀯𑀤𑀦𑁆𑀢𑀺, 𑀢𑀁 𑀦 𑀕𑀳𑁂𑀢𑀩𑁆𑀩𑀁. 𑀦 𑀳𑀺 𑀚𑀻𑀯𑀫𑀸𑀦𑀓𑀲𑀭𑀻𑀭𑁂 𑀑𑀚𑀸 𑀅𑀜𑁆𑀜𑀲𑁆𑀲 𑀲𑀭𑀻𑀭𑀲𑁆𑀲 𑀆𑀳𑀸𑀭𑀧𑀘𑁆𑀘𑀬𑀢𑀁 𑀲𑀸𑀥𑁂𑀢𑀺. 𑀅𑀦𑀼𑀧𑀸𑀤𑀺𑀦𑁆𑀦𑀼𑀧𑀸𑀤𑀸𑀦𑀺𑀬𑀲𑁆𑀲 𑀓𑀸𑀬𑀲𑁆𑀲𑀸𑀢𑀺 𑀏𑀢𑁆𑀣 𑀧𑀦 𑀚𑀦𑀓𑀯𑀲𑁂𑀦𑀸𑀧𑀺 𑀮𑀩𑁆𑀪𑀢𑀺. 𑀉𑀧𑀸𑀤𑀺𑀦𑁆𑀦𑀼𑀧𑀸𑀤𑀸𑀦𑀺𑀬𑀲𑁆𑀲 𑀘 𑀅𑀦𑀼𑀧𑀸𑀤𑀺𑀦𑁆𑀦𑀼𑀧𑀸𑀤𑀸𑀦𑀺𑀬𑀲𑁆𑀲 𑀘𑀸𑀢𑀺 𑀏𑀢𑁆𑀣 𑀏𑀓𑀲𑁆𑀲 𑀉𑀧𑀢𑁆𑀣𑀫𑁆𑀪𑀓𑀯𑀲𑁂𑀦, 𑀏𑀓𑀲𑁆𑀲 𑀚𑀦𑀓𑀯𑀲𑁂𑀦, 𑀉𑀪𑀺𑀦𑁆𑀦𑀫𑁆𑀧𑀺 𑀯𑀸 𑀉𑀧𑀢𑁆𑀣𑀫𑁆𑀪𑀓𑀯𑀲𑁂𑀦𑁂𑀯 𑀯𑀼𑀢𑁆𑀢𑁄. 𑀤𑁆𑀯𑁂 𑀧𑀦 𑀆𑀳𑀸𑀭𑀸 𑀏𑀓𑀢𑁄 𑀧𑀘𑁆𑀘𑀬𑀸 𑀳𑁄𑀦𑁆𑀢𑀸 𑀉𑀧𑀢𑁆𑀣𑀫𑁆𑀪𑀓𑀸𑀯 𑀳𑁄𑀦𑁆𑀢𑀺, 𑀦 𑀚𑀦𑀓𑀸. 𑀲𑁂𑀲𑀫𑁂𑀢𑁆𑀣 𑀧𑀸𑀴𑀺𑀫𑁂𑀯 𑀲𑀸𑀥𑀼𑀓𑀁 𑀑𑀮𑁄𑀓𑁂𑀢𑁆𑀯𑀸 𑀯𑁂𑀤𑀺𑀢𑀩𑁆𑀩𑀁.

𑀉𑀧𑀸𑀤𑀺𑀦𑁆𑀦𑀢𑁆𑀢𑀺𑀓𑀯𑀡𑁆𑀡𑀦𑀸.