𑁩. 𑀯𑀺𑀧𑀸𑀓𑀢𑁆𑀢𑀺𑀓𑀯𑀡𑁆𑀡𑀦𑀸

𑁧-𑁨𑁩. 𑀯𑀺𑀧𑀸𑀓𑀢𑁆𑀢𑀺𑀓𑁂 𑀯𑀺𑀧𑀸𑀓𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀯𑀺𑀧𑀸𑀓𑁄 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑀢𑀺 𑀳𑁂𑀢𑀼𑀧𑀘𑁆𑀘𑀬𑀸𑀢𑀺 𑀬𑁂 𑀳𑁂𑀢𑀼𑀧𑀘𑁆𑀘𑀬𑁂 𑀢𑁂𑀭𑀲 𑀯𑀸𑀭𑀸 𑀯𑀼𑀢𑁆𑀢𑀸, 𑀢𑁂 𑀲𑀗𑁆𑀔𑀺𑀧𑀺𑀢𑁆𑀯𑀸 𑀕𑀡𑀦𑀸𑀬 𑀤𑀲𑁆𑀲𑁂𑀢𑀼𑀁 𑀳𑁂𑀢𑀼𑀬𑀸 𑀢𑁂𑀭𑀲𑀸𑀢𑀺 𑀯𑀼𑀢𑁆𑀢𑀁. 𑀆𑀭𑀫𑁆𑀫𑀡𑁂 𑀧𑀜𑁆𑀘𑀸𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀏𑀯𑀫𑁂𑀢𑁆𑀣 𑀢𑁂𑀭𑀲 𑀧𑀜𑁆𑀘 𑀦𑀯 𑀲𑀢𑁆𑀢 𑀢𑀻𑀡𑀺 𑀤𑁆𑀯𑁂𑀢𑀺 𑀙 𑀕𑀡𑀦𑀧𑀭𑀺𑀘𑁆𑀙𑁂𑀤𑀸, 𑀢𑁂𑀲𑀁 𑀯𑀲𑁂𑀦 𑀧𑀘𑁆𑀘𑀬𑀲𑀁𑀲𑀦𑁆𑀤𑀦𑁂 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀕𑀡𑀦𑀸 𑀯𑁂𑀤𑀺𑀢𑀩𑁆𑀩𑀸.

𑁨𑁪-𑁫𑁨. 𑀧𑀘𑁆𑀘𑀦𑀻𑀬𑁂𑀧𑀺 𑀯𑀺𑀧𑀸𑀓𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀯𑀺𑀧𑀸𑀓𑁄 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑀢𑀺 𑀦𑀳𑁂𑀢𑀼𑀧𑀘𑁆𑀘𑀬𑀸𑀢𑀺 𑀬𑁂 𑀦𑀳𑁂𑀢𑀼𑀧𑀘𑁆𑀘𑀬𑁂 𑀤𑀲 𑀯𑀸𑀭𑀸 𑀯𑀼𑀢𑁆𑀢𑀸, 𑀢𑁂 𑀲𑀗𑁆𑀔𑀺𑀧𑀺𑀢𑁆𑀯𑀸 𑀕𑀡𑀦𑀸𑀬 𑀤𑀲𑁆𑀲𑁂𑀢𑀼𑀁 𑀦𑀳𑁂𑀢𑀼𑀬𑀸 𑀤𑀲𑀸𑀢𑀺 𑀯𑀼𑀢𑁆𑀢𑀁. 𑀦 𑀆𑀭𑀫𑁆𑀫𑀡𑁂 𑀧𑀜𑁆𑀘𑀸𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀏𑀯𑀫𑁂𑀢𑁆𑀣 𑀤𑀲 𑀧𑀜𑁆𑀘 𑀢𑁂𑀭𑀲 𑀤𑁆𑀯𑀸𑀤𑀲 𑀤𑁆𑀯𑁂 𑀏𑀓𑀁 𑀦𑀯 𑀢𑀻𑀡𑀻𑀢𑀺 𑀅𑀝𑁆𑀞 𑀕𑀡𑀦𑀧𑀭𑀺𑀘𑁆𑀙𑁂𑀤𑀸, 𑀢𑁂𑀲𑀁 𑀯𑀲𑁂𑀦 𑀧𑀘𑁆𑀘𑀬𑀲𑀁𑀲𑀦𑁆𑀤𑀦𑁂 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑀺𑀢𑁆𑀣𑀸𑀭𑀢𑁄 𑀕𑀡𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀧𑀸𑀴𑀺 𑀧𑀦 𑀲𑀗𑁆𑀔𑀺𑀢𑁆𑀢𑀸, 𑀏𑀢𑁂𑀲𑀜𑁆𑀜𑁂𑀯 𑀧𑀦 𑀮𑀤𑁆𑀥𑀕𑀡𑀦𑀭𑀧𑀭𑀺𑀘𑁆𑀙𑁂𑀤𑀸𑀦𑀁 𑀯𑀸𑀭𑀸𑀦𑀁 𑀯𑀲𑁂𑀦 𑀲𑀁𑀲𑀦𑁆𑀤𑀺𑀢𑁆𑀯𑀸 𑀅𑀦𑀼𑀮𑁄𑀫𑀧𑀘𑁆𑀘𑀦𑀻𑀬𑀁 𑀧𑀘𑁆𑀘𑀦𑀻𑀬𑀸𑀦𑀼𑀮𑁄𑀫𑀜𑁆𑀘 𑀯𑁂𑀤𑀺𑀢𑀩𑁆𑀩𑀁.

𑀲𑀳𑀚𑀸𑀢𑀯𑀸𑀭𑁄 𑀇𑀫𑀺𑀦𑀸𑀯 𑀏𑀓𑀕𑀢𑀺𑀓𑁄. 𑀧𑀘𑁆𑀘𑀬𑀦𑀺𑀲𑁆𑀲𑀬𑀲𑀁𑀲𑀝𑁆𑀞𑀲𑀫𑁆𑀧𑀬𑀼𑀢𑁆𑀢𑀯𑀸𑀭𑀸 𑀬𑀣𑀸𑀧𑀸𑀴𑀺𑀫𑁂𑀯 𑀦𑀺𑀬𑁆𑀬𑀦𑁆𑀢𑀺.

𑁯𑁨. 𑀧𑀜𑁆𑀳𑀸𑀯𑀸𑀭𑁂 𑀓𑀼𑀲𑀮𑀸𑀓𑀼𑀲𑀮𑁂 𑀦𑀺𑀭𑀼𑀤𑁆𑀥𑁂𑀢𑀺 𑀏𑀢𑀲𑁆𑀫𑀺𑀁 𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀧𑀯𑀢𑁆𑀢𑁂 𑀓𑀼𑀲𑀮𑁂 𑀲𑀸𑀭𑀚𑁆𑀚𑀦𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑁂 𑀅𑀓𑀼𑀲𑀮𑁂 𑀘 𑀦𑀺𑀭𑀼𑀤𑁆𑀥𑁂. 𑀯𑀺𑀧𑀸𑀓𑁄 𑀢𑀤𑀸𑀭𑀫𑁆𑀫𑀡𑀢𑀸 𑀉𑀧𑁆𑀧𑀚𑁆𑀚𑀢𑀻𑀢𑀺 𑀓𑀸𑀫𑀸𑀯𑀘𑀭𑀯𑀺𑀧𑀸𑀓𑁄 𑀢𑀤𑀸𑀭𑀫𑁆𑀫𑀡𑀢𑀸𑀬 𑀉𑀧𑁆𑀧𑀚𑁆𑀚𑀢𑀺. 𑀬𑁂 𑀧𑀦 ‘‘𑀯𑀺𑀧𑀲𑁆𑀲𑀦𑀸𑀚𑀯𑀦𑀸𑀦𑀁 𑀯𑀺𑀘𑀺𑀓𑀺𑀘𑁆𑀙𑀼𑀤𑁆𑀥𑀘𑁆𑀘𑀸𑀦𑀜𑁆𑀘 𑀧𑀭𑀺𑀬𑁄𑀲𑀸𑀦𑁂 𑀢𑀤𑀸𑀭𑀫𑁆𑀫𑀡𑀁 𑀦𑀢𑁆𑀣𑀻’’𑀢𑀺 𑀯𑀤𑀦𑁆𑀢𑀺, 𑀢𑁂 𑀇𑀫𑀸𑀬 𑀢𑀦𑁆𑀢𑀺𑀬𑀸 𑀧𑀝𑀺𑀲𑁂𑀥𑁂𑀢𑀩𑁆𑀩𑀸. 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀓𑀼𑀲𑀮𑀁 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀲𑁆𑀲 𑀓𑀺𑀭𑀺𑀬𑀲𑁆𑀲 𑀆𑀭𑀫𑁆𑀫𑀡𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄𑀢𑀺 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀅𑀲𑀫𑀸𑀧𑀦𑁆𑀦𑀧𑀼𑀩𑁆𑀩𑀸 𑀲𑀫𑀸𑀧𑀢𑁆𑀢𑀺𑀬𑁄 𑀧𑀝𑀺𑀮𑁄𑀫𑀢𑁄 𑀲𑀫𑀸𑀧𑀚𑁆𑀚𑀦𑁆𑀢𑀲𑁆𑀲 𑀯𑀲𑁂𑀦𑁂𑀢𑀁 𑀯𑀼𑀢𑁆𑀢𑀁. 𑀇𑀫𑀺𑀦𑀸 𑀉𑀧𑀸𑀬𑁂𑀦 𑀲𑀩𑁆𑀩𑀯𑀺𑀲𑁆𑀲𑀚𑁆𑀚𑀦𑁂𑀲𑀼 𑀲𑀸𑀥𑀼𑀓𑀁 𑀧𑀸𑀴𑀺𑀁 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑁧𑁨𑁦. 𑀳𑁂𑀢𑀼𑀬𑀸 𑀲𑀢𑁆𑀢, 𑀆𑀭𑀫𑁆𑀫𑀡𑁂 𑀦𑀯, 𑀅𑀥𑀺𑀧𑀢𑀺𑀬𑀸 𑀤𑀲𑀸𑀢𑀺𑀆𑀤𑀻𑀲𑀼𑀧𑀺 𑀲𑀳𑀚𑀸𑀢𑀸𑀥𑀺𑀧𑀢𑀺𑀯𑀲𑁂𑀦 𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀯𑀲𑁂𑀦 𑀲𑀳𑀚𑀸𑀢𑀦𑀺𑀲𑁆𑀲𑀬𑀯𑀲𑁂𑀦 𑀧𑀼𑀭𑁂𑀚𑀸𑀢𑀦𑀺𑀲𑁆𑀲𑀬𑀯𑀲𑁂𑀦 𑀅𑀦𑀦𑁆𑀢𑀭𑀽𑀧𑀦𑀺𑀲𑁆𑀲𑀬𑀯𑀲𑁂𑀦 𑀆𑀭𑀫𑁆𑀫𑀡𑀽𑀧𑀦𑀺𑀲𑁆𑀲𑀬𑀯𑀲𑁂𑀦 𑀧𑀓𑀢𑀽𑀧𑀦𑀺𑀲𑁆𑀲𑀬𑀯𑀲𑁂𑀦 𑀲𑀳𑀚𑀸𑀢𑀯𑀺𑀧𑁆𑀧𑀬𑀼𑀢𑁆𑀢𑀯𑀲𑁂𑀦 𑀧𑀼𑀭𑁂𑀚𑀸𑀢𑀧𑀘𑁆𑀙𑀸𑀚𑀸𑀢𑀯𑀺𑀧𑁆𑀧𑀬𑀼𑀢𑁆𑀢𑀯𑀲𑁂𑀦𑀸𑀢𑀺 𑀬𑀢𑁆𑀣 𑀬𑀢𑁆𑀣 𑀬𑀣𑀸 𑀬𑀣𑀸 𑀬𑀢𑁆𑀢𑀓𑀸𑀦𑀺 𑀯𑀺𑀲𑁆𑀲𑀚𑁆𑀚𑀦𑀸𑀦𑀺 𑀮𑀩𑁆𑀪𑀦𑁆𑀢𑀺, 𑀢𑀢𑁆𑀣 𑀢𑀢𑁆𑀣 𑀢𑀣𑀸 𑀢𑀣𑀸 𑀢𑀸𑀦𑀺 𑀲𑀩𑁆𑀩𑀸𑀦𑀺 𑀲𑀮𑁆𑀮𑀓𑁆𑀔𑁂𑀢𑀩𑁆𑀩𑀸𑀦𑀺. 𑀢𑀣𑀸 𑀧𑀘𑁆𑀘𑀦𑀻𑀬𑀸𑀤𑀻𑀲𑀼 𑀅𑀦𑀼𑀮𑁄𑀫𑀯𑀲𑁂𑀦 𑀯𑀸𑀭𑀼𑀤𑁆𑀥𑀭𑀡𑀁, 𑀅𑀦𑀼𑀮𑁄𑀫𑀢𑁄 𑀮𑀤𑁆𑀥𑀯𑀸𑀭𑀸𑀦𑀁 𑀧𑀘𑁆𑀘𑀦𑀻𑀬𑀢𑁄 𑀕𑀡𑀦𑀸, 𑀧𑀘𑁆𑀘𑀬𑀲𑀁𑀲𑀦𑁆𑀤𑀦𑀁, 𑀅𑀦𑀼𑀮𑁄𑀫𑀧𑀘𑁆𑀘𑀦𑀻𑀬𑁂 𑀧𑀘𑁆𑀘𑀦𑀻𑀬𑀸𑀦𑀼𑀮𑁄𑀫𑁂 𑀘 𑀲𑀼𑀤𑁆𑀥𑀺𑀓𑁂𑀲𑀼 𑀘𑁂𑀯 𑀲𑀁𑀲𑀦𑁆𑀤𑀦𑀯𑀲𑁂𑀦 𑀘 𑀧𑀯𑀢𑁆𑀢𑁂𑀲𑀼 𑀳𑁂𑀢𑀼𑀫𑀽𑀮𑀓𑀸𑀤𑀻𑀲𑀼 𑀮𑀩𑁆𑀪𑀫𑀸𑀦𑀯𑀸𑀭𑀕𑀡𑀦𑀸, 𑀅𑀮𑀩𑁆𑀪𑀫𑀸𑀦𑀸𑀦𑀁 𑀅𑀮𑀩𑁆𑀪𑀫𑀸𑀦𑀢𑀸𑀢𑀺 𑀲𑀩𑁆𑀩𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁.

𑀬𑀣𑀸 𑀘𑁂𑀢𑁆𑀣, 𑀏𑀯𑀁 𑀇𑀢𑁄 𑀧𑀭𑁂𑀲𑀼𑀧𑀺 𑀢𑀺𑀓𑀤𑀼𑀓𑁂𑀲𑀼. 𑀧𑀝𑁆𑀞𑀸𑀦𑀧𑀓𑀭𑀡𑀜𑁆𑀳𑀺 𑀧𑀸𑀴𑀺𑀢𑁄𑀯 𑀅𑀦𑀦𑁆𑀢𑀁 𑀅𑀧𑀭𑀺𑀫𑀸𑀡𑀁. 𑀢𑀲𑁆𑀲 𑀧𑀤𑀧𑀝𑀺𑀧𑀸𑀝𑀺𑀬𑀸 𑀅𑀢𑁆𑀣𑀁 𑀯𑀡𑁆𑀡𑀬𑀺𑀲𑁆𑀲𑀸𑀫𑀻𑀢𑀺 𑀧𑀝𑀺𑀧𑀦𑁆𑀦𑀲𑁆𑀲 𑀅𑀢𑀺𑀤𑀻𑀖𑀸𑀬𑀼𑀓𑀲𑁆𑀲𑀸𑀧𑀺 𑀆𑀬𑀼 𑀦𑀧𑁆𑀧𑀳𑁄𑀢𑀺. 𑀦 𑀘𑀲𑁆𑀲 𑀏𑀓𑀤𑁂𑀲𑀁 𑀯𑀡𑁆𑀡𑁂𑀢𑁆𑀯𑀸 𑀲𑁂𑀲𑀫𑁆𑀳𑀺 𑀦𑀬𑀢𑁄 𑀤𑀲𑁆𑀲𑀺𑀬𑀫𑀸𑀦𑁂 𑀦 𑀲𑀓𑁆𑀓𑀸 𑀅𑀢𑁆𑀣𑁄 𑀚𑀸𑀦𑀺𑀢𑀼𑀁, 𑀢𑀲𑁆𑀫𑀸 𑀇𑀢𑁄 𑀧𑀭𑀁 𑀏𑀢𑁆𑀢𑀓𑀫𑁆𑀧𑀺 𑀅𑀯𑀢𑁆𑀯𑀸 𑀲𑁂𑀲𑁂𑀲𑀼 𑀢𑀺𑀓𑀤𑀼𑀓𑁂𑀲𑀼 𑀳𑁂𑀝𑁆𑀞𑀸 𑀅𑀯𑀼𑀢𑁆𑀢𑀧𑁆𑀧𑀓𑀸𑀭𑀢𑁆𑀢𑀸 𑀬𑀁 𑀬𑀁 𑀅𑀯𑀲𑁆𑀲𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀢𑀤𑁂𑀯 𑀯𑀓𑁆𑀔𑀸𑀫. 𑀬𑀁 𑀧𑀦 𑀅𑀯𑀢𑁆𑀯𑀸 𑀕𑀫𑀺𑀲𑁆𑀲𑀸𑀫, 𑀢𑀁 𑀧𑀸𑀴𑀺𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀦𑁆𑀢𑀺.

𑀯𑀺𑀧𑀸𑀓𑀢𑁆𑀢𑀺𑀓𑀯𑀡𑁆𑀡𑀦𑀸.