𑁨. 𑀯𑁂𑀤𑀦𑀸𑀢𑁆𑀢𑀺𑀓𑀯𑀡𑁆𑀡𑀦𑀸

𑁧. 𑀯𑁂𑀤𑀦𑀸𑀢𑁆𑀢𑀺𑀓𑁂 𑀢𑀺𑀲𑁆𑀲𑁄 𑀯𑁂𑀤𑀦𑀸 𑀭𑀽𑀧𑀁 𑀦𑀺𑀩𑁆𑀩𑀸𑀦𑀦𑁆𑀢𑀺 𑀇𑀫𑁂 𑀥𑀫𑁆𑀫𑀸 𑀦 𑀮𑀩𑁆𑀪𑀦𑁆𑀢𑀺, 𑀢𑀲𑁆𑀫𑀸 𑀏𑀓𑀁 𑀔𑀦𑁆𑀥𑀁 𑀧𑀝𑀺𑀘𑁆𑀘 𑀤𑁆𑀯𑁂 𑀔𑀦𑁆𑀥𑀸𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀲𑀼𑀔𑀸𑀬 𑀯𑁂𑀤𑀦𑀸𑀬𑀸𑀢𑀺 𑀲𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀯𑀼𑀢𑁆𑀢𑀁. 𑀤𑀼𑀓𑁆𑀔𑀯𑁂𑀤𑀦𑀸 𑀧𑀝𑀺𑀲𑀦𑁆𑀥𑀺𑀬𑀁 𑀦 𑀮𑀩𑁆𑀪𑀢𑀻𑀢𑀺 𑀤𑀼𑀢𑀺𑀬𑀯𑀸𑀭𑁂 𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑀁 𑀦 𑀓𑀢𑀁. 𑀢𑀢𑀺𑀬𑀯𑀸𑀭𑁂 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂𑀢𑀺 𑀲𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀯𑀼𑀢𑁆𑀢𑀁. 𑀲𑁂𑀲𑀫𑁂𑀢𑁆𑀣 𑀇𑀢𑁄 𑀧𑀭𑁂𑀲𑀼 𑀘 𑀧𑀘𑁆𑀘𑀬𑁂𑀲𑀼 𑀬𑀣𑀸𑀧𑀸𑀴𑀺𑀫𑁂𑀯 𑀦𑀺𑀬𑁆𑀬𑀸𑀢𑀺. 𑀲𑀩𑁆𑀩𑀢𑁆𑀣 𑀢𑀬𑁄 𑀢𑀬𑁄 𑀯𑀸𑀭𑀸 𑀯𑀼𑀢𑁆𑀢𑀸. 𑀢𑁂𑀦 𑀯𑀼𑀢𑁆𑀢𑀁 𑀳𑁂𑀢𑀼𑀬𑀸 𑀢𑀻𑀡𑀺…𑀧𑁂… 𑀅𑀯𑀺𑀕𑀢𑁂 𑀢𑀻𑀡𑀻𑀢𑀺.

𑁬. 𑀧𑀘𑁆𑀘𑀬𑀲𑀁𑀲𑀦𑁆𑀤𑀦𑁂 𑀧𑀦 𑀲𑀳𑁂𑀢𑀼𑀓𑀸𑀬 𑀯𑀺𑀧𑀸𑀓𑀤𑀼𑀓𑁆𑀔𑀯𑁂𑀤𑀦𑀸𑀬 𑀅𑀪𑀸𑀯𑀢𑁄 𑀳𑁂𑀢𑀼𑀫𑀽𑀮𑀓𑀦𑀬𑁂 𑀯𑀺𑀧𑀸𑀓𑁂 𑀤𑁆𑀯𑁂𑀢𑀺 𑀯𑀼𑀢𑁆𑀢𑀁. 𑀅𑀥𑀺𑀧𑀢𑀺𑀆𑀤𑀻𑀳𑀺 𑀲𑀤𑁆𑀥𑀺𑀁 𑀲𑀁𑀲𑀦𑁆𑀤𑀦𑁂𑀲𑀼𑀧𑀺 𑀯𑀺𑀧𑀸𑀓𑁂 𑀤𑁆𑀯𑁂𑀬𑁂𑀯. 𑀓𑀲𑁆𑀫𑀸? 𑀯𑀺𑀧𑀸𑀓𑁂 𑀤𑀼𑀓𑁆𑀔𑀯𑁂𑀤𑀦𑀸𑀬 𑀅𑀥𑀺𑀧𑀢𑀺𑀛𑀸𑀦𑀫𑀕𑁆𑀕𑀸𑀦𑀁 𑀅𑀪𑀸𑀯𑀢𑁄. 𑀬𑁂𑀳𑀺 𑀘 𑀲𑀤𑁆𑀥𑀺𑀁 𑀲𑀁𑀲𑀦𑁆𑀤𑀦𑁂 𑀯𑀺𑀧𑀸𑀓𑁂 𑀤𑁆𑀯𑁂 𑀯𑀸𑀭𑀸 𑀮𑀩𑁆𑀪𑀦𑁆𑀢𑀺, 𑀯𑀺𑀧𑀸𑀓𑁂𑀦 𑀲𑀤𑁆𑀥𑀺𑀁 𑀲𑀁𑀲𑀦𑁆𑀤𑀦𑁂 𑀢𑁂𑀲𑀼𑀧𑀺 𑀤𑁆𑀯𑁂𑀬𑁂𑀯.

𑁧𑁦. 𑀧𑀘𑁆𑀘𑀦𑀻𑀬𑁂 𑀦𑀧𑀼𑀭𑁂𑀚𑀸𑀢𑁂 𑀆𑀭𑀼𑀧𑁆𑀧𑁂 𑀘 𑀧𑀝𑀺𑀲𑀦𑁆𑀥𑀺𑀬𑀜𑁆𑀘 𑀤𑀼𑀓𑁆𑀔𑀯𑁂𑀤𑀦𑀸𑀬 𑀅𑀪𑀸𑀯𑀢𑁄 𑀤𑁆𑀯𑁂 𑀯𑀸𑀭𑀸 𑀆𑀕𑀢𑀸. 𑀦𑀯𑀺𑀧𑁆𑀧𑀬𑀼𑀢𑁆𑀢𑁂𑀧𑀺 𑀆𑀭𑀼𑀧𑁆𑀧𑁂 𑀤𑀼𑀓𑁆𑀔𑀸𑀪𑀸𑀯𑀢𑁄 𑀤𑁆𑀯𑁂𑀬𑁂𑀯. 𑀲𑀩𑁆𑀩𑀅𑀭𑀽𑀧𑀥𑀫𑁆𑀫𑀧𑀭𑀺𑀕𑁆𑀕𑀸𑀳𑀓𑀸 𑀧𑀦 𑀲𑀳𑀚𑀸𑀢𑀸𑀤𑀬𑁄 𑀧𑀘𑁆𑀘𑀬𑀸 𑀇𑀫𑀲𑁆𑀫𑀺𑀁 𑀧𑀘𑁆𑀘𑀦𑀻𑀬𑀯𑀸𑀭𑁂 𑀧𑀭𑀺𑀳𑀸𑀬𑀦𑁆𑀢𑀺. 𑀓𑀲𑁆𑀫𑀸? 𑀯𑁂𑀤𑀦𑀸𑀲𑀫𑁆𑀧𑀬𑀼𑀢𑁆𑀢𑀲𑁆𑀲 𑀥𑀫𑁆𑀫𑀲𑁆𑀲 𑀯𑁂𑀤𑀦𑀸𑀲𑀫𑁆𑀧𑀬𑀼𑀢𑁆𑀢𑀁 𑀧𑀝𑀺𑀘𑁆𑀘 𑀲𑀳𑀚𑀸𑀢𑀸𑀤𑀻𑀳𑀺 𑀯𑀺𑀦𑀸 𑀅𑀦𑀼𑀧𑁆𑀧𑀢𑁆𑀢𑀺𑀢𑁄 𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬𑀜𑁆𑀘 𑀯𑀺𑀦𑀸𑀯 𑀉𑀧𑁆𑀧𑀢𑁆𑀢𑀺𑀢𑁄.

𑁧𑁭. 𑀧𑀘𑁆𑀘𑀬𑀲𑀁𑀲𑀦𑁆𑀤𑀦𑁂 𑀧𑀦 𑀦𑀧𑀼𑀭𑁂𑀚𑀸𑀢𑁂 𑀏𑀓𑀦𑁆𑀢𑀺 𑀆𑀭𑀼𑀧𑁆𑀧𑁂 𑀧𑀝𑀺𑀲𑀦𑁆𑀥𑀺𑀬𑀜𑁆𑀘 𑀅𑀳𑁂𑀢𑀼𑀓𑀸𑀤𑀼𑀓𑁆𑀔𑀫𑀲𑀼𑀔𑀯𑁂𑀤𑀦𑀸𑀲𑀫𑁆𑀧𑀬𑀼𑀢𑁆𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀦𑀓𑀫𑁆𑀫𑁂 𑀤𑁆𑀯𑁂𑀢𑀺 𑀅𑀳𑁂𑀢𑀼𑀓𑀓𑀺𑀭𑀺𑀬𑀲𑀫𑁆𑀧𑀬𑀼𑀢𑁆𑀢𑀘𑁂𑀢𑀦𑀸𑀯𑀲𑁂𑀦 𑀯𑀼𑀢𑁆𑀢𑀁. 𑀲𑀼𑀔𑀸𑀬 𑀳𑀺 𑀅𑀤𑀼𑀓𑁆𑀔𑀫𑀲𑀼𑀔𑀸𑀬 𑀘 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑁂 𑀥𑀫𑁆𑀫𑁂 𑀧𑀝𑀺𑀘𑁆𑀘 𑀢𑀸𑀳𑀺 𑀯𑁂𑀤𑀦𑀸𑀳𑀺 𑀲𑀫𑁆𑀧𑀬𑀼𑀢𑁆𑀢𑀸 𑀅𑀳𑁂𑀢𑀼𑀓𑀓𑀺𑀭𑀺𑀬𑀘𑁂𑀢𑀦𑀸 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀦𑀳𑁂𑀢𑀼𑀧𑀘𑁆𑀘𑀬𑀸 𑀦𑀯𑀺𑀧𑀸𑀓𑁂𑀧𑀺 𑀏𑀲𑁂𑀯 𑀦𑀬𑁄. 𑀦𑀯𑀺𑀧𑁆𑀧𑀬𑀼𑀢𑁆𑀢𑁂 𑀏𑀓𑀦𑁆𑀢𑀺 𑀆𑀭𑀼𑀧𑁆𑀧𑁂 𑀆𑀯𑀚𑁆𑀚𑀦𑀯𑀲𑁂𑀦 𑀯𑀼𑀢𑁆𑀢𑀁. 𑀇𑀫𑀺𑀦𑀸 𑀉𑀧𑀸𑀬𑁂𑀦 𑀲𑀩𑁆𑀩𑀲𑀁𑀲𑀦𑁆𑀤𑀦𑁂𑀲𑀼 𑀕𑀡𑀦𑀸 𑀯𑁂𑀤𑀺𑀢𑀩𑁆𑀩𑀸.

𑁨𑁫-𑁩𑁭. 𑀅𑀦𑀼𑀮𑁄𑀫𑀧𑀘𑁆𑀘𑀦𑀻𑀬𑁂 𑀧𑀘𑁆𑀘𑀦𑀻𑀬𑁂 𑀮𑀤𑁆𑀥𑀧𑀘𑁆𑀘𑀬𑀸 𑀏𑀯 𑀧𑀘𑁆𑀘𑀦𑀻𑀬𑀢𑁄 𑀢𑀺𑀝𑁆𑀞𑀦𑁆𑀢𑀺. 𑀧𑀘𑁆𑀘𑀦𑀻𑀬𑀸𑀦𑀼𑀮𑁄𑀫𑁂 𑀲𑀩𑁆𑀩𑀸 𑀭𑀽𑀧𑀥𑀫𑁆𑀫𑀧𑀭𑀺𑀕𑁆𑀕𑀸𑀳𑀓𑀸 𑀲𑀳𑀚𑀸𑀢𑀸𑀤𑀬𑁄 𑀅𑀦𑀼𑀮𑁄𑀫𑀢𑁄𑀯 𑀢𑀺𑀝𑁆𑀞𑀦𑁆𑀢𑀺, 𑀦 𑀧𑀘𑁆𑀘𑀦𑀻𑀬𑀢𑁄. 𑀅𑀳𑁂𑀢𑀼𑀓𑀲𑁆𑀲 𑀧𑀦 𑀘𑀺𑀢𑁆𑀢𑀼𑀧𑁆𑀧𑀸𑀤𑀲𑁆𑀲 𑀅𑀥𑀺𑀧𑀢𑀺 𑀦𑀢𑁆𑀣𑀻𑀢𑀺 𑀅𑀥𑀺𑀧𑀢𑀺𑀧𑀘𑁆𑀘𑀬𑁄 𑀅𑀦𑀼𑀮𑁄𑀫𑀢𑁄 𑀦 𑀢𑀺𑀝𑁆𑀞𑀢𑀺. 𑀧𑀝𑀺𑀘𑁆𑀘𑀯𑀸𑀭𑀸𑀤𑀻𑀲𑀼 𑀧𑀦 𑀧𑀘𑁆𑀙𑀸𑀚𑀸𑀢𑁄 𑀅𑀦𑀼𑀮𑁄𑀫𑀢𑁄 𑀦 𑀮𑀩𑁆𑀪𑀢𑀺𑀬𑁂𑀯𑀸𑀢𑀺 𑀧𑀭𑀺𑀳𑀻𑀦𑁄. 𑀬𑁂 𑀘𑁂𑀢𑁆𑀣 𑀅𑀦𑀼𑀮𑁄𑀫𑀢𑁄 𑀮𑀩𑁆𑀪𑀦𑁆𑀢𑀺, 𑀢𑁂 𑀧𑀘𑁆𑀘𑀦𑀻𑀬𑀢𑁄 𑀮𑀩𑁆𑀪𑀫𑀸𑀦𑁂𑀳𑀺 𑀲𑀤𑁆𑀥𑀺𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸𑀧𑀺 𑀬𑁄𑀚𑀺𑀢𑀸𑀬𑁂𑀯. 𑀢𑁂𑀲𑀼 𑀢𑀻𑀡𑀺 𑀤𑁆𑀯𑁂 𑀏𑀓𑀦𑁆𑀢𑀺 𑀢𑀬𑁄𑀯 𑀯𑀸𑀭𑀧𑀭𑀺𑀘𑁆𑀙𑁂𑀤𑀸, 𑀢𑁂 𑀲𑀩𑁆𑀩𑀢𑁆𑀣 𑀬𑀣𑀸𑀦𑀼𑀭𑀽𑀧𑀁 𑀲𑀮𑁆𑀮𑀓𑁆𑀔𑁂𑀢𑀩𑁆𑀩𑀸. 𑀬𑁄 𑀘𑀸𑀬𑀁 𑀧𑀝𑀺𑀘𑁆𑀘𑀯𑀸𑀭𑁂 𑀯𑀼𑀢𑁆𑀢𑁄, 𑀲𑀳𑀚𑀸𑀢𑀯𑀸𑀭𑀸𑀤𑀻𑀲𑀼𑀧𑀺 𑀅𑀬𑀫𑁂𑀯 𑀯𑀡𑁆𑀡𑀦𑀸𑀦𑀬𑁄.

𑁩𑁮. 𑀧𑀜𑁆𑀳𑀸𑀯𑀸𑀭𑁂 𑀧𑀦 𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀁 𑀔𑀦𑁆𑀥𑀸𑀦𑀦𑁆𑀢𑀺 𑀢𑁂𑀦 𑀲𑀤𑁆𑀥𑀺𑀁 𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀁 𑀔𑀦𑁆𑀥𑀸𑀦𑀁 𑀢𑁂𑀳𑀺𑀬𑁂𑀯 𑀯𑀸 𑀳𑁂𑀢𑀽𑀳𑀺 𑀲𑀼𑀔𑀯𑁂𑀤𑀦𑀸𑀤𑀻𑀳𑀺 𑀯𑀸.

𑁩𑁯. 𑀯𑀺𑀧𑁆𑀧𑀝𑀺𑀲𑀸𑀭𑀺𑀲𑁆𑀲𑀸𑀢𑀺 𑀤𑀸𑀦𑀸𑀤𑀻𑀲𑀼 𑀢𑀸𑀯 ‘‘𑀓𑀲𑁆𑀫𑀸 𑀫𑀬𑀸 𑀇𑀤𑀁 𑀓𑀢𑀁, 𑀤𑀼𑀝𑁆𑀞𑀼 𑀫𑁂 𑀓𑀢𑀁, 𑀅𑀓𑀢𑀁 𑀲𑁂𑀬𑁆𑀬𑁄 𑀲𑀺𑀬𑀸’’𑀢𑀺 𑀏𑀯𑀁 𑀯𑀺𑀧𑁆𑀧𑀝𑀺𑀲𑀸𑀭𑀺𑀲𑁆𑀲. 𑀛𑀸𑀦𑀧𑀭𑀺𑀳𑀸𑀦𑀺𑀬𑀁 𑀧𑀦 ‘‘𑀧𑀭𑀺𑀳𑀻𑀦𑀁 𑀫𑁂 𑀛𑀸𑀦𑀁, 𑀫𑀳𑀸𑀚𑀸𑀦𑀺𑀬𑁄 𑀯𑀢𑀫𑁆𑀳𑀻’’𑀢𑀺 𑀏𑀯𑀁 𑀯𑀺𑀧𑁆𑀧𑀝𑀺𑀲𑀸𑀭𑀺𑀲𑁆𑀲. 𑀫𑁄𑀳𑁄 𑀉𑀧𑁆𑀧𑀚𑁆𑀚𑀢𑀻𑀢𑀺 𑀤𑁄𑀲𑀲𑀫𑁆𑀧𑀬𑀼𑀢𑁆𑀢𑀫𑁄𑀳𑁄. 𑀢𑀣𑀸 𑀫𑁄𑀳𑀁 𑀅𑀭𑀩𑁆𑀪𑀸𑀢𑀺 𑀤𑁄𑀲𑀲𑀫𑁆𑀧𑀬𑀼𑀢𑁆𑀢𑀫𑁄𑀳𑀫𑁂𑀯.

𑁪𑁫. 𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀁 𑀪𑀯𑀗𑁆𑀕𑀁 𑀅𑀤𑀼𑀓𑁆𑀔𑀫𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀲𑁆𑀲 𑀪𑀯𑀗𑁆𑀕𑀲𑁆𑀲𑀸𑀢𑀺 𑀢𑀤𑀸𑀭𑀫𑁆𑀫𑀡𑀲𑀗𑁆𑀔𑀸𑀢𑀁 𑀧𑀺𑀝𑁆𑀞𑀺𑀪𑀯𑀗𑁆𑀕𑀁 𑀫𑀽𑀮𑀪𑀯𑀗𑁆𑀕𑀲𑁆𑀲. 𑀯𑀼𑀝𑁆𑀞𑀸𑀦𑀲𑁆𑀲𑀸𑀢𑀺 𑀢𑀤𑀸𑀭𑀫𑁆𑀫𑀡𑀲𑁆𑀲 𑀪𑀯𑀗𑁆𑀕𑀲𑁆𑀲 𑀯𑀸. 𑀉𑀪𑀬𑀫𑁆𑀧𑀺 𑀳𑁂𑀢𑀁 𑀓𑀼𑀲𑀮𑀸𑀓𑀼𑀲𑀮𑀚𑀯𑀦𑀢𑁄 𑀯𑀼𑀝𑁆𑀞𑀺𑀢𑀢𑁆𑀢𑀸 𑀯𑀼𑀝𑁆𑀞𑀸𑀦𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀓𑀺𑀭𑀺𑀬𑀁 𑀯𑀼𑀝𑁆𑀞𑀸𑀦𑀲𑁆𑀲𑀸𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀨𑀮𑀁 𑀯𑀼𑀝𑁆𑀞𑀸𑀦𑀲𑁆𑀲𑀸𑀢𑀺 𑀨𑀮𑀘𑀺𑀢𑁆𑀢𑀁 𑀪𑀯𑀗𑁆𑀕𑀲𑁆𑀲. 𑀪𑀯𑀗𑁆𑀕𑁂𑀦 𑀳𑀺 𑀨𑀮𑀢𑁄 𑀯𑀼𑀝𑁆𑀞𑀺𑀢𑁄 𑀦𑀸𑀫 𑀳𑁄𑀢𑀺. 𑀧𑀭𑀢𑁄 ‘‘𑀯𑀼𑀝𑁆𑀞𑀸𑀦’’𑀦𑁆𑀢𑀺 𑀆𑀕𑀢𑀝𑁆𑀞𑀸𑀦𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑁪𑁬. 𑀤𑀼𑀓𑁆𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀸 𑀔𑀦𑁆𑀥𑀸𑀢𑀺 𑀤𑁄𑀫𑀦𑀲𑁆𑀲𑀲𑀫𑁆𑀧𑀬𑀼𑀢𑁆𑀢𑀸 𑀅𑀓𑀼𑀲𑀮𑀸 𑀔𑀦𑁆𑀥𑀸. 𑀅𑀤𑀼𑀓𑁆𑀔𑀫𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀲𑁆𑀲 𑀯𑀼𑀝𑁆𑀞𑀸𑀦𑀲𑁆𑀲𑀸𑀢𑀺 𑀢𑀤𑀸𑀭𑀫𑁆𑀫𑀡𑀲𑀗𑁆𑀔𑀸𑀢𑀲𑁆𑀲 𑀆𑀕𑀦𑁆𑀢𑀼𑀓𑀪𑀯𑀗𑁆𑀕𑀲𑁆𑀲 𑀯𑀸 𑀉𑀧𑁂𑀓𑁆𑀔𑀸𑀲𑀫𑁆𑀧𑀬𑀼𑀢𑁆𑀢𑀫𑀽𑀮𑀪𑀯𑀗𑁆𑀕𑀲𑁆𑀲 𑀯𑀸. 𑀲𑀘𑁂 𑀧𑀦 𑀲𑁄𑀫𑀦𑀲𑁆𑀲𑀲𑀳𑀕𑀢𑀁 𑀫𑀽𑀮𑀪𑀯𑀗𑁆𑀕𑀁 𑀳𑁄𑀢𑀺, 𑀢𑀤𑀸𑀭𑀫𑁆𑀫𑀡𑀲𑁆𑀲 𑀘 𑀉𑀧𑁆𑀧𑀢𑁆𑀢𑀺𑀓𑀸𑀭𑀡𑀁 𑀦 𑀳𑁄𑀢𑀺, 𑀚𑀯𑀦𑀲𑁆𑀲 𑀆𑀭𑀫𑁆𑀫𑀡𑀢𑁄 𑀅𑀜𑁆𑀜𑀲𑁆𑀫𑀺𑀫𑁆𑀧𑀺 𑀆𑀭𑀫𑁆𑀫𑀡𑁂 𑀅𑀤𑀼𑀓𑁆𑀔𑀫𑀲𑀼𑀔𑀯𑁂𑀤𑀦𑀁 𑀅𑀓𑀼𑀲𑀮𑀯𑀺𑀧𑀸𑀓𑀁 𑀉𑀧𑁆𑀧𑀚𑁆𑀚𑀢𑁂𑀯. 𑀢𑀫𑁆𑀧𑀺 𑀳𑀺 𑀚𑀯𑀦𑀢𑁄 𑀯𑀼𑀝𑁆𑀞𑀺𑀢𑀢𑁆𑀢𑀸 𑀯𑀼𑀝𑁆𑀞𑀸𑀦𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀲𑀳𑀚𑀸𑀢𑀧𑀘𑁆𑀘𑀬𑀸𑀤𑀺𑀦𑀺𑀤𑁆𑀤𑁂𑀲𑀸 𑀉𑀢𑁆𑀢𑀸𑀦𑀢𑁆𑀣𑀸𑀬𑁂𑀯. 𑀦𑀳𑁂𑀢𑁆𑀣 𑀓𑀺𑀜𑁆𑀘𑀺 𑀅𑀢𑁆𑀣𑀺, 𑀬𑀁 𑀦 𑀲𑀓𑁆𑀓𑀸 𑀲𑀺𑀬𑀸 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑁂𑀢𑀼𑀁, 𑀢𑀲𑁆𑀫𑀸 𑀲𑀸𑀥𑀼𑀓𑀁 𑀉𑀧𑀮𑀓𑁆𑀔𑁂𑀢𑀩𑁆𑀩𑀁.

𑁬𑁨. 𑀇𑀤𑀸𑀦𑀺 𑀬𑀲𑁆𑀫𑀺𑀁 𑀬𑀲𑁆𑀫𑀺𑀁 𑀧𑀘𑁆𑀘𑀬𑁂 𑀬𑁂 𑀬𑁂 𑀯𑀸𑀭𑀸 𑀮𑀤𑁆𑀥𑀸, 𑀲𑀩𑁆𑀩𑁂 𑀢𑁂 𑀲𑀗𑁆𑀔𑀺𑀧𑀺𑀢𑁆𑀯𑀸 𑀕𑀡𑀦𑀸𑀬 𑀤𑀲𑁆𑀲𑁂𑀢𑀼𑀁 𑀳𑁂𑀢𑀼𑀬𑀸 𑀢𑀻𑀡𑀻𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀲𑀩𑁆𑀩𑀸𑀦𑀺 𑀢𑀻𑀡𑀺 𑀲𑀼𑀤𑁆𑀥𑀸𑀦𑀁 𑀢𑀺𑀡𑁆𑀡𑀁 𑀧𑀤𑀸𑀦𑀁 𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀆𑀭𑀫𑁆𑀫𑀡𑁂 𑀦𑀯 𑀏𑀓𑀫𑀽𑀮𑀓𑁂𑀓𑀸𑀯𑀲𑀸𑀦𑀸𑀦𑀺. 𑀅𑀥𑀺𑀧𑀢𑀺𑀬𑀸 𑀧𑀜𑁆𑀘 𑀲𑀳𑀚𑀸𑀢𑀸𑀥𑀺𑀧𑀢𑀺𑀯𑀲𑁂𑀦 𑀅𑀫𑀺𑀲𑁆𑀲𑀸𑀦𑀺 𑀢𑀻𑀡𑀺, 𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀯𑀲𑁂𑀦 𑀘 ‘‘𑀲𑀼𑀔𑀸𑀬 𑀲𑀫𑁆𑀧𑀬𑀼𑀢𑁆𑀢𑁄 𑀲𑀼𑀔𑀸𑀬 𑀲𑀫𑁆𑀧𑀬𑀼𑀢𑁆𑀢𑀲𑁆𑀲, 𑀅𑀤𑀼𑀓𑁆𑀔𑀫𑀲𑀼𑀔𑀸𑀬 𑀲𑀫𑁆𑀧𑀬𑀼𑀢𑁆𑀢𑁄 𑀅𑀤𑀼𑀓𑁆𑀔𑀫𑀲𑀼𑀔𑀸𑀬 𑀲𑀫𑁆𑀧𑀬𑀼𑀢𑁆𑀢𑀲𑁆𑀲𑀸’’𑀢𑀺 𑀤𑁆𑀯𑁂, 𑀢𑀸𑀦𑀺 𑀦 𑀕𑀡𑁂𑀢𑀩𑁆𑀩𑀸𑀦𑀺. 𑀲𑀼𑀔𑀸𑀬 𑀧𑀦 𑀲𑀫𑁆𑀧𑀬𑀼𑀢𑁆𑀢𑁄 𑀅𑀤𑀼𑀓𑁆𑀔𑀫𑀲𑀼𑀔𑀸𑀬, 𑀅𑀤𑀼𑀓𑁆𑀔𑀫𑀲𑀼𑀔𑀸𑀬 𑀲𑀫𑁆𑀧𑀬𑀼𑀢𑁆𑀢𑁄 𑀲𑀼𑀔𑀸𑀬𑀸𑀢𑀺 𑀇𑀫𑀸𑀦𑀺 𑀤𑁆𑀯𑁂 𑀕𑀡𑁂𑀢𑀩𑁆𑀩𑀸𑀦𑀻𑀢𑀺 𑀏𑀯𑀁 𑀧𑀜𑁆𑀘. 𑀅𑀦𑀦𑁆𑀢𑀭𑀲𑀫𑀦𑀦𑁆𑀢𑀭𑁂𑀲𑀼 𑀲𑀢𑁆𑀢𑀸𑀢𑀺 𑀲𑀼𑀔𑀸 𑀤𑁆𑀯𑀺𑀦𑁆𑀦𑀁, 𑀢𑀣𑀸 𑀤𑀼𑀓𑁆𑀔𑀸, 𑀅𑀤𑀼𑀓𑁆𑀔𑀫𑀲𑀼𑀔𑀸 𑀢𑀺𑀡𑁆𑀡𑀫𑁆𑀧𑀻𑀢𑀺 𑀏𑀯𑀁 𑀲𑀢𑁆𑀢. 𑀉𑀧𑀦𑀺𑀲𑁆𑀲𑀬𑁂 𑀦𑀯𑀸𑀢𑀺 𑀲𑀼𑀔𑀲𑀫𑁆𑀧𑀬𑀼𑀢𑁆𑀢𑁄 𑀲𑀼𑀔𑀲𑀫𑁆𑀧𑀬𑀼𑀢𑁆𑀢𑀲𑁆𑀲 𑀢𑀻𑀳𑀺𑀧𑀺 𑀉𑀧𑀦𑀺𑀲𑁆𑀲𑀬𑁂𑀳𑀺, 𑀤𑀼𑀓𑁆𑀔𑀲𑀫𑁆𑀧𑀬𑀼𑀢𑁆𑀢𑀲𑁆𑀲 𑀧𑀓𑀢𑀽𑀧𑀦𑀺𑀲𑁆𑀲𑀬𑁂𑀦𑁂𑀯, 𑀉𑀧𑁂𑀓𑁆𑀔𑀸𑀲𑀫𑁆𑀧𑀬𑀼𑀢𑁆𑀢𑀲𑁆𑀲 𑀢𑀻𑀳𑀺𑀧𑀺, 𑀤𑀼𑀓𑁆𑀔𑀲𑀫𑁆𑀧𑀬𑀼𑀢𑁆𑀢𑁄 𑀤𑀼𑀓𑁆𑀔𑀲𑀫𑁆𑀧𑀬𑀼𑀢𑁆𑀢𑀲𑁆𑀲 𑀅𑀦𑀦𑁆𑀢𑀭𑀧𑀓𑀢𑀽𑀧𑀦𑀺𑀲𑁆𑀲𑀬𑁂𑀳𑀺, 𑀲𑀼𑀔𑀲𑀫𑁆𑀧𑀬𑀼𑀢𑁆𑀢𑀲𑁆𑀲 𑀧𑀓𑀢𑀽𑀧𑀦𑀺𑀲𑁆𑀲𑀬𑁂𑀦, 𑀅𑀤𑀼𑀓𑁆𑀔𑀫𑀲𑀼𑀔𑀲𑀫𑁆𑀧𑀬𑀼𑀢𑁆𑀢𑀲𑁆𑀲 𑀤𑁆𑀯𑀺𑀥𑀸, 𑀅𑀤𑀼𑀓𑁆𑀔𑀫𑀲𑀼𑀔𑀲𑀫𑁆𑀧𑀬𑀼𑀢𑁆𑀢𑁄 𑀅𑀤𑀼𑀓𑁆𑀔𑀫𑀲𑀼𑀔𑀲𑀫𑁆𑀧𑀬𑀼𑀢𑁆𑀢𑀲𑁆𑀲 𑀢𑀺𑀥𑀸𑀧𑀺, 𑀢𑀣𑀸 𑀲𑀼𑀔𑀲𑀫𑁆𑀧𑀬𑀼𑀢𑁆𑀢𑀲𑁆𑀲, 𑀤𑀼𑀓𑁆𑀔𑀲𑀫𑁆𑀧𑀬𑀼𑀢𑁆𑀢𑀲𑁆𑀲 𑀅𑀦𑀦𑁆𑀢𑀭𑀧𑀓𑀢𑀽𑀧𑀦𑀺𑀲𑁆𑀲𑀬𑁂𑀳𑀻𑀢𑀺 𑀏𑀯𑀁 𑀦𑀯. 𑀧𑀘𑁆𑀘𑀬𑀪𑁂𑀤𑀢𑁄 𑀧𑀦𑁂𑀢𑁆𑀣 𑀧𑀓𑀢𑀽𑀧𑀦𑀺𑀲𑁆𑀲𑀬𑀸 𑀦𑀯, 𑀅𑀦𑀦𑁆𑀢𑀭𑀽𑀧𑀦𑀺𑀲𑁆𑀲𑀬𑀸 𑀲𑀢𑁆𑀢, 𑀆𑀭𑀫𑁆𑀫𑀡𑀽𑀧𑀦𑀺𑀲𑁆𑀲𑀬𑀸 𑀘𑀢𑁆𑀢𑀸𑀭𑁄𑀢𑀺 𑀯𑀻𑀲𑀢𑀺 𑀉𑀧𑀦𑀺𑀲𑁆𑀲𑀬𑀸. 𑀧𑀼𑀭𑁂𑀚𑀸𑀢𑀧𑀘𑁆𑀙𑀸𑀚𑀸𑀢𑀸 𑀧𑀦𑁂𑀢𑁆𑀣 𑀙𑀺𑀚𑁆𑀚𑀦𑁆𑀢𑀺. 𑀦 𑀳𑀺 𑀧𑀼𑀭𑁂𑀚𑀸𑀢𑀸 𑀧𑀘𑁆𑀙𑀸𑀚𑀸𑀢𑀸 𑀯𑀸 𑀅𑀭𑀽𑀧𑀥𑀫𑁆𑀫𑀸 𑀅𑀭𑀽𑀧𑀥𑀫𑁆𑀫𑀸𑀦𑀁 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺.

𑀓𑀫𑁆𑀫𑁂 𑀅𑀝𑁆𑀞𑀸𑀢𑀺 𑀲𑀼𑀔𑀲𑀫𑁆𑀧𑀬𑀼𑀢𑁆𑀢𑁄 𑀲𑀼𑀔𑀲𑀫𑁆𑀧𑀬𑀼𑀢𑁆𑀢𑀲𑁆𑀲 𑀤𑁆𑀯𑀺𑀥𑀸𑀧𑀺, 𑀤𑀼𑀓𑁆𑀔𑀲𑀫𑁆𑀧𑀬𑀼𑀢𑁆𑀢𑀲𑁆𑀲 𑀦𑀸𑀦𑀸𑀓𑁆𑀔𑀡𑀺𑀓𑀢𑁄𑀯 𑀢𑀣𑀸 𑀇𑀢𑀭𑀲𑁆𑀲. 𑀤𑀼𑀓𑁆𑀔𑀲𑀫𑁆𑀧𑀬𑀼𑀢𑁆𑀢𑁄 𑀤𑀼𑀓𑁆𑀔𑀲𑀫𑁆𑀧𑀬𑀼𑀢𑁆𑀢𑀲𑁆𑀲 𑀤𑁆𑀯𑀺𑀥𑀸𑀧𑀺, 𑀲𑀼𑀔𑀲𑀫𑁆𑀧𑀬𑀼𑀢𑁆𑀢𑀲𑁆𑀲 𑀦𑀢𑁆𑀣𑀺, 𑀇𑀢𑀭𑀲𑁆𑀲 𑀦𑀸𑀦𑀸𑀓𑁆𑀔𑀡𑀺𑀓𑀢𑁄𑀯 𑀅𑀤𑀼𑀓𑁆𑀔𑀫𑀲𑀼𑀔𑀲𑀫𑁆𑀧𑀬𑀼𑀢𑁆𑀢𑁄 𑀅𑀤𑀼𑀓𑁆𑀔𑀫𑀲𑀼𑀔𑀲𑀫𑁆𑀧𑀬𑀼𑀢𑁆𑀢𑀲𑁆𑀲 𑀤𑁆𑀯𑀺𑀥𑀸𑀧𑀺, 𑀇𑀢𑀭𑁂𑀲𑀁 𑀦𑀸𑀦𑀸𑀓𑁆𑀔𑀡𑀺𑀓𑀢𑁄𑀢𑀺 𑀏𑀯𑀁 𑀅𑀝𑁆𑀞. 𑀧𑀘𑁆𑀘𑀬𑀪𑁂𑀤𑀢𑁄 𑀧𑀦𑁂𑀢𑁆𑀣 𑀦𑀸𑀦𑀸𑀓𑁆𑀔𑀡𑀺𑀓𑀸 𑀅𑀝𑁆𑀞, 𑀲𑀳𑀚𑀸𑀢𑀸 𑀢𑀻𑀡𑀻𑀢𑀺 𑀏𑀓𑀸𑀤𑀲 𑀓𑀫𑁆𑀫𑀧𑀘𑁆𑀘𑀬𑀸. 𑀬𑀣𑀸 𑀘 𑀧𑀼𑀭𑁂𑀚𑀸𑀢𑀧𑀘𑁆𑀙𑀸𑀚𑀸𑀢𑀸, 𑀏𑀯𑀁 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑁄𑀧𑁂𑀢𑁆𑀣 𑀙𑀺𑀚𑁆𑀚𑀢𑀺. 𑀅𑀭𑀽𑀧𑀥𑀫𑁆𑀫𑀸 𑀳𑀺 𑀅𑀭𑀽𑀧𑀥𑀫𑁆𑀫𑀸𑀦𑀁 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑁄 𑀦 𑀳𑁄𑀦𑁆𑀢𑀺. 𑀦𑀢𑁆𑀣𑀺𑀯𑀺𑀕𑀢𑁂𑀲𑀼 𑀲𑀢𑁆𑀢 𑀅𑀦𑀦𑁆𑀢𑀭𑀲𑀤𑀺𑀲𑀸𑀯. 𑀏𑀯𑀫𑁂𑀢𑁆𑀣 𑀢𑀻𑀡𑀺 𑀧𑀜𑁆𑀘 𑀲𑀢𑁆𑀢 𑀅𑀝𑁆𑀞 𑀦𑀯𑀸𑀢𑀺 𑀧𑀜𑁆𑀘 𑀕𑀡𑀦𑀧𑀭𑀺𑀘𑁆𑀙𑁂𑀤𑀸. 𑀢𑁂𑀲𑀁 𑀯𑀲𑁂𑀦 𑀧𑀘𑁆𑀘𑀬𑀲𑀁𑀲𑀦𑁆𑀤𑀦𑁂 𑀊𑀦𑀢𑀭𑀕𑀡𑀦𑁂𑀦 𑀲𑀤𑁆𑀥𑀺𑀁 𑀲𑀁𑀲𑀦𑁆𑀤𑀦𑁂𑀲𑀼 𑀅𑀢𑀺𑀭𑁂𑀓𑀜𑁆𑀘 𑀅𑀮𑀩𑁆𑀪𑀫𑀸𑀦𑀜𑁆𑀘 𑀅𑀧𑀦𑁂𑀢𑁆𑀯𑀸 𑀕𑀡𑀦𑀸 𑀯𑁂𑀤𑀺𑀢𑀩𑁆𑀩𑀸.

𑁬𑁩-𑁬𑁪. 𑀳𑁂𑀢𑀼𑀬𑀸 𑀲𑀤𑁆𑀥𑀺𑀁 𑀆𑀭𑀫𑁆𑀫𑀡𑀁 𑀦 𑀮𑀩𑁆𑀪𑀢𑀺, 𑀢𑀣𑀸 𑀅𑀦𑀦𑁆𑀢𑀭𑀸𑀤𑀬𑁄. 𑀅𑀥𑀺𑀧𑀢𑀺𑀬𑀸 𑀤𑁆𑀯𑁂𑀢𑀺 𑀤𑀼𑀓𑁆𑀔𑀧𑀤𑀁 𑀞𑀧𑁂𑀢𑁆𑀯𑀸 𑀲𑁂𑀲𑀸𑀦𑀺 𑀤𑁆𑀯𑁂. 𑀤𑀼𑀓𑁆𑀔𑀲𑀫𑁆𑀧𑀬𑀼𑀢𑁆𑀢𑁄 𑀳𑀺 𑀳𑁂𑀢𑀼 𑀅𑀥𑀺𑀧𑀢𑀺 𑀦𑀸𑀫 𑀦𑀢𑁆𑀣𑀺, 𑀢𑀲𑁆𑀫𑀸 𑀲𑁄 𑀦 𑀮𑀩𑁆𑀪𑀢𑀻𑀢𑀺 𑀅𑀧𑀦𑀻𑀢𑁄. 𑀲𑁂𑀲𑀤𑁆𑀯𑀬𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀇𑀢𑀺 𑀳𑁂𑀢𑀼𑀫𑀽𑀮𑀓𑁂 𑀤𑁆𑀯𑁂𑀬𑁂𑀯 𑀕𑀡𑀦𑀧𑀭𑀺𑀘𑁆𑀙𑁂𑀤𑀸, 𑀢𑁂𑀲𑀁 𑀯𑀲𑁂𑀦 𑀙 𑀖𑀝𑀦𑀸𑀦𑀺 𑀯𑀼𑀢𑁆𑀢𑀸𑀦𑀺. 𑀢𑁂𑀲𑀼 𑀧𑀞𑀫𑀁 𑀅𑀯𑀺𑀧𑀸𑀓𑀪𑀽𑀢𑀸𑀦𑀁 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀦𑀺𑀭𑀸𑀥𑀺𑀧𑀢𑀺𑀥𑀫𑁆𑀫𑀸𑀦𑀁 𑀯𑀲𑁂𑀦 𑀯𑀼𑀢𑁆𑀢𑀁, 𑀤𑀼𑀢𑀺𑀬𑀁 𑀢𑁂𑀲𑀜𑁆𑀜𑁂𑀯 𑀯𑀺𑀧𑀸𑀓𑀪𑀽𑀢𑀸𑀦𑀁, 𑀢𑀢𑀺𑀬𑀘𑀢𑀼𑀢𑁆𑀣𑀸𑀦𑀺 𑀢𑁂𑀲𑀜𑁆𑀜𑁂𑀯 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀸𑀦𑀁, 𑀧𑀜𑁆𑀘𑀫𑀁 𑀅𑀯𑀺𑀧𑀸𑀓𑀪𑀽𑀢𑀲𑀸𑀥𑀺𑀧𑀢𑀺𑀅𑀫𑁄𑀳𑀯𑀲𑁂𑀦, 𑀙𑀝𑁆𑀞𑀁 𑀯𑀺𑀧𑀸𑀓𑀪𑀽𑀢𑀲𑀸𑀥𑀺𑀧𑀢𑀺𑀅𑀫𑁄𑀳𑀯𑀲𑁂𑀦. 𑀧𑀞𑀫𑀁 𑀯𑀸 𑀲𑀩𑁆𑀩𑀳𑁂𑀢𑀼𑀯𑀲𑁂𑀦, 𑀤𑀼𑀢𑀺𑀬𑀁 𑀲𑀩𑁆𑀩𑀯𑀺𑀧𑀸𑀓𑀳𑁂𑀢𑀼𑀯𑀲𑁂𑀦, 𑀢𑀢𑀺𑀬𑀁 𑀲𑀩𑁆𑀩𑀸𑀫𑁄𑀳𑀳𑁂𑀢𑀼𑀯𑀲𑁂𑀦, 𑀘𑀢𑀼𑀢𑁆𑀣𑀁 𑀲𑀩𑁆𑀩𑀯𑀺𑀧𑀸𑀓𑀸𑀫𑁄𑀳𑀳𑁂𑀢𑀼𑀯𑀲𑁂𑀦. 𑀧𑀜𑁆𑀘𑀫𑀁 𑀲𑀩𑁆𑀩𑀲𑀸𑀥𑀺𑀧𑀢𑀺𑀅𑀫𑁄𑀳𑀯𑀲𑁂𑀦, 𑀙𑀝𑁆𑀞𑀁 𑀲𑀩𑁆𑀩𑀲𑀸𑀥𑀺𑀧𑀢𑀺𑀯𑀺𑀧𑀸𑀓𑀸𑀫𑁄𑀳𑀯𑀲𑁂𑀦.

𑁬𑁬. 𑀆𑀭𑀫𑁆𑀫𑀡𑀫𑀽𑀮𑀓𑁂 𑀅𑀥𑀺𑀧𑀢𑀺𑀬𑀸 𑀘𑀢𑁆𑀢𑀸𑀭𑀻𑀢𑀺 𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀯𑀲𑁂𑀦 𑀲𑀼𑀔𑀁 𑀲𑀼𑀔𑀲𑁆𑀲, 𑀅𑀤𑀼𑀓𑁆𑀔𑀫𑀲𑀼𑀔𑀲𑁆𑀲, 𑀅𑀤𑀼𑀓𑁆𑀔𑀫𑀲𑀼𑀔𑀁 𑀅𑀤𑀼𑀓𑁆𑀔𑀫𑀲𑀼𑀔𑀲𑁆𑀲, 𑀲𑀼𑀔𑀲𑁆𑀲𑀸𑀢𑀺 𑀏𑀯𑀁 𑀘𑀢𑁆𑀢𑀸𑀭𑀺. 𑀉𑀧𑀦𑀺𑀲𑁆𑀲𑀬𑁂𑀧𑀺 𑀆𑀭𑀫𑁆𑀫𑀡𑀽𑀧𑀦𑀺𑀲𑁆𑀲𑀬𑀯𑀲𑁂𑀦 𑀘𑀢𑁆𑀢𑀸𑀭𑁄 𑀯𑀼𑀢𑁆𑀢𑀸. 𑀖𑀝𑀦𑀸𑀦𑀺 𑀧𑀦𑁂𑀢𑁆𑀣 𑀏𑀓𑀫𑁂𑀯. 𑀅𑀥𑀺𑀧𑀢𑀺𑀫𑀽𑀮𑀓𑀸𑀤𑀻𑀲𑀼𑀧𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀬𑀁 𑀮𑀩𑁆𑀪𑀢𑀺 𑀬𑀜𑁆𑀘 𑀦 𑀮𑀩𑁆𑀪𑀢𑀺, 𑀢𑀁 𑀲𑀩𑁆𑀩𑀁 𑀲𑀸𑀥𑀼𑀓𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀲𑀁𑀲𑀦𑁆𑀤𑀦𑀖𑀝𑀦𑀕𑀡𑀦𑀸 𑀯𑁂𑀤𑀺𑀢𑀩𑁆𑀩𑀸.

𑁮𑁩-𑁮𑁭. 𑀧𑀘𑁆𑀘𑀦𑀻𑀬𑀫𑁆𑀳𑀺 𑀓𑀼𑀲𑀮𑀢𑁆𑀢𑀺𑀓𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀅𑀦𑀼𑀮𑁄𑀫𑀢𑁄 𑀧𑀘𑁆𑀘𑀬𑁂 𑀉𑀤𑁆𑀥𑀭𑀺𑀢𑁆𑀯𑀸 𑀢𑀢𑁆𑀣 𑀮𑀤𑁆𑀥𑀸𑀦𑀁 𑀯𑀸𑀭𑀸𑀦𑀁 𑀯𑀲𑁂𑀦 𑀧𑀘𑁆𑀘𑀦𑀻𑀬𑀢𑁄 𑀕𑀡𑀦𑀯𑀲𑁂𑀦 𑀦𑀳𑁂𑀢𑀼𑀬𑀸 𑀦𑀯𑀸𑀢𑀺 𑀲𑀩𑁆𑀩𑀧𑀘𑁆𑀘𑀬𑁂𑀲𑀼 𑀦𑀯 𑀯𑀸𑀭𑀸 𑀤𑀲𑁆𑀲𑀺𑀢𑀸. 𑀢𑁂 𑀏𑀓𑀫𑀽𑀮𑀓𑁂𑀓𑀸𑀯𑀲𑀸𑀦𑀸𑀦𑀁 𑀦𑀯𑀦𑁆𑀦𑀁 𑀯𑀺𑀲𑁆𑀲𑀚𑁆𑀚𑀦𑀸𑀦𑀁 𑀯𑀲𑁂𑀦 ‘‘𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑁄 𑀥𑀫𑁆𑀫𑁄 𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀲𑁆𑀲 𑀥𑀫𑁆𑀫𑀲𑁆𑀲 𑀦𑀳𑁂𑀢𑀼𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄, 𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑁂𑀦 𑀘𑀺𑀢𑁆𑀢𑁂𑀦 𑀤𑀸𑀦𑀁 𑀤𑀢𑁆𑀯𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀧𑀸𑀴𑀺𑀁 𑀉𑀤𑁆𑀥𑀭𑀺𑀢𑁆𑀯𑀸 𑀤𑀲𑁆𑀲𑁂𑀢𑀩𑁆𑀩𑀸. 𑀧𑀘𑁆𑀘𑀬𑀲𑀁𑀲𑀦𑁆𑀤𑀦𑁂 𑀧𑀦𑁂𑀢𑁆𑀣 𑀦𑀳𑁂𑀢𑀼𑀧𑀘𑁆𑀘𑀬𑀸…𑀧𑁂… 𑀦𑀉𑀧𑀦𑀺𑀲𑁆𑀲𑀬𑁂 𑀅𑀝𑁆𑀞𑀸𑀢𑀺 𑀦𑀸𑀦𑀸𑀓𑁆𑀔𑀡𑀺𑀓𑀓𑀫𑁆𑀫𑀧𑀘𑁆𑀘𑀬𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀸. 𑀤𑀼𑀩𑁆𑀩𑀮𑀓𑀫𑁆𑀫𑀜𑁆𑀳𑀺 𑀯𑀺𑀧𑀸𑀓𑀲𑁆𑀲 𑀦 𑀉𑀧𑀦𑀺𑀲𑁆𑀲𑀬𑁄 𑀳𑁄𑀢𑀺. 𑀓𑁂𑀯𑀮𑀁 𑀧𑀦 𑀦𑀸𑀦𑀸𑀓𑁆𑀔𑀡𑀺𑀓𑀓𑀫𑁆𑀫𑀧𑀘𑁆𑀘𑀬𑁂𑀦𑁂𑀯 𑀧𑀘𑁆𑀘𑀬𑁄 𑀳𑁄𑀢𑀺. 𑀲𑁂𑀲𑀫𑁂𑀢𑁆𑀣 𑀅𑀦𑀼𑀮𑁄𑀫𑀧𑀘𑁆𑀘𑀦𑀻𑀬𑀧𑀘𑁆𑀘𑀦𑀻𑀬𑀸𑀦𑀼𑀮𑁄𑀫𑁂𑀲𑀼 𑀘 𑀢𑁂𑀲𑀁 𑀢𑁂𑀲𑀁 𑀧𑀘𑁆𑀘𑀬𑀸𑀦𑀁 𑀬𑁄𑀕𑁂 𑀮𑀤𑁆𑀥𑀯𑀸𑀭𑀯𑀲𑁂𑀦 𑀲𑀓𑁆𑀓𑀸 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀕𑀡𑁂𑀢𑀼𑀁, 𑀢𑀲𑁆𑀫𑀸 𑀦 𑀯𑀺𑀢𑁆𑀣𑀸𑀭𑀺𑀢𑀦𑁆𑀢𑀺.

𑀯𑁂𑀤𑀦𑀸𑀢𑁆𑀢𑀺𑀓𑀯𑀡𑁆𑀡𑀦𑀸.