𑁭. 𑀧𑀜𑁆𑀳𑀸𑀯𑀸𑀭𑀯𑀺𑀪𑀗𑁆𑀕𑀯𑀡𑁆𑀡𑀦𑀸

𑁪𑁦𑁧-𑁪𑁦𑁩. 𑀧𑀜𑁆𑀳𑀸𑀯𑀸𑀭𑁂 ‘‘𑀲𑀺𑀬𑀸 𑀓𑀼𑀲𑀮𑁄 𑀥𑀫𑁆𑀫𑁄 𑀓𑀼𑀲𑀮𑀲𑁆𑀲 𑀥𑀫𑁆𑀫𑀲𑁆𑀲 𑀳𑁂𑀢𑀼𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺𑀆𑀤𑀺𑀦𑀸 𑀓𑀼𑀲𑀮𑀢𑁆𑀢𑀺𑀓𑁂 𑀉𑀤𑁆𑀥𑀭𑀺𑀢𑀩𑁆𑀩𑀧𑀼𑀘𑁆𑀙𑀸𑀦𑀁 𑀮𑀩𑁆𑀪𑀫𑀸𑀦𑀯𑀲𑁂𑀦 𑀯𑀺𑀲𑁆𑀲𑀚𑁆𑀚𑀦𑀁 𑀤𑀲𑁆𑀲𑁂𑀢𑀼𑀁 𑀓𑀼𑀲𑀮𑁄 𑀥𑀫𑁆𑀫𑁄 𑀓𑀼𑀲𑀮𑀲𑁆𑀲 𑀥𑀫𑁆𑀫𑀲𑁆𑀲 𑀳𑁂𑀢𑀼𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀓𑀼𑀲𑀮𑁄 𑀘 𑀦𑀸𑀫𑁂𑀲 𑀲𑀬𑀁 𑀉𑀧𑁆𑀧𑀚𑁆𑀚𑀦𑁆𑀢𑁄 𑀞𑀧𑁂𑀢𑁆𑀯𑀸 𑀧𑀘𑁆𑀙𑀸𑀚𑀸𑀢𑀜𑁆𑀘 𑀯𑀺𑀧𑀸𑀓𑀜𑁆𑀘 𑀲𑁂𑀲𑁂𑀳𑀺 𑀤𑁆𑀯𑀸𑀯𑀻𑀲𑀢𑀺𑀬𑀸 𑀧𑀘𑁆𑀘𑀬𑁂𑀳𑀺 𑀉𑀧𑁆𑀧𑀚𑁆𑀚𑀢𑀺. 𑀓𑀼𑀲𑀮𑀲𑁆𑀲 𑀧𑀘𑁆𑀘𑀬𑁄 𑀳𑁄𑀦𑁆𑀢𑁄 𑀞𑀧𑁂𑀢𑁆𑀯𑀸 𑀧𑀼𑀭𑁂𑀚𑀸𑀢𑀧𑀘𑁆𑀙𑀸𑀚𑀸𑀢𑀯𑀺𑀧𑀸𑀓𑀯𑀺𑀧𑁆𑀧𑀬𑀼𑀢𑁆𑀢𑁂 𑀲𑁂𑀲𑁂𑀳𑀺 𑀯𑀻𑀲𑀢𑀺𑀬𑀸 𑀧𑀘𑁆𑀘𑀬𑁂𑀳𑀺 𑀧𑀘𑁆𑀘𑀬𑁄 𑀳𑁄𑀢𑀺. 𑀢𑀲𑁆𑀫𑀸 𑀬𑁂𑀳𑀺 𑀧𑀘𑁆𑀘𑀬𑁂𑀳𑀺 𑀓𑀼𑀲𑀮𑁄 𑀓𑀼𑀲𑀮𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀺, 𑀢𑁂 𑀧𑀘𑁆𑀘𑀬𑁂 𑀧𑀝𑀺𑀧𑀸𑀝𑀺𑀬𑀸 𑀤𑀲𑁆𑀲𑁂𑀢𑀼𑀁 𑀳𑁂𑀢𑀼𑀧𑀘𑁆𑀘𑀬𑁂𑀦𑀸𑀢𑀺𑀆𑀤𑀺 𑀆𑀭𑀤𑁆𑀥𑀁.

𑀢𑀢𑁆𑀣 𑀬𑀸 𑀏𑀲𑀸 𑀧𑀘𑁆𑀘𑀬𑀯𑀺𑀪𑀗𑁆𑀕𑀯𑀸𑀭𑁂 𑀯𑀺𑀬 ‘‘𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀁 𑀥𑀫𑁆𑀫𑀸𑀦’’𑀦𑁆𑀢𑀺 𑀅𑀓𑀢𑁆𑀯𑀸 ‘‘𑀳𑁂𑀢𑀽 𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀁 𑀔𑀦𑁆𑀥𑀸𑀦’’𑀦𑁆𑀢𑀺 𑀤𑁂𑀲𑀦𑀸 𑀓𑀢𑀸, 𑀢𑀲𑁆𑀲𑀸 𑀏𑀯 𑀓𑀭𑀡𑁂 𑀇𑀤𑀁 𑀧𑀬𑁄𑀚𑀦𑀁 𑁋 𑀢𑀢𑁆𑀣 𑀳𑀺 𑀲𑀼𑀜𑁆𑀜𑀝𑁆𑀞𑀁 𑀤𑀻𑀧𑁂𑀢𑀼𑀁 𑀥𑀫𑁆𑀫𑀸𑀦𑀦𑁆𑀢𑀺 𑀯𑀼𑀢𑁆𑀢𑀁. 𑀇𑀥 𑀧𑀘𑁆𑀘𑀬𑀢𑁄 𑀉𑀧𑁆𑀧𑀚𑁆𑀚𑀫𑀸𑀦𑀸 𑀥𑀫𑁆𑀫𑀸 𑀭𑀸𑀲𑀺𑀢𑁄 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀦 𑀏𑀓𑁂𑀓𑀢𑁄𑀢𑀺 𑀭𑀸𑀲𑀝𑁆𑀞𑀁 𑀤𑀻𑀧𑁂𑀢𑀼𑀁 𑀔𑀦𑁆𑀥𑀸𑀦𑀦𑁆𑀢𑀺 𑀯𑀼𑀢𑁆𑀢𑀁. 𑀧𑀝𑀺𑀘𑁆𑀘𑀯𑀸𑀭𑀸𑀤𑀻𑀲𑀼 𑀯𑀸 𑀔𑀦𑁆𑀥𑀯𑀲𑁂𑀦 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀤𑁂𑀲𑀦𑀸 𑀆𑀭𑀼𑀴𑁆𑀳𑀸𑀢𑀺 𑀢𑁂𑀦𑁂𑀯𑀸𑀦𑀼𑀓𑁆𑀓𑀫𑁂𑀦 𑀇𑀥𑀸𑀧𑀺 𑀆𑀭𑀼𑀴𑁆𑀳𑀸𑀢𑀺. 𑀓𑀲𑁆𑀫𑀸 𑀧𑀦𑁂𑀢𑁂𑀲𑀼 𑀏𑀯𑀁 𑀆𑀭𑀼𑀴𑁆𑀳𑀸𑀢𑀺? 𑀅𑀲𑀗𑁆𑀓𑀭𑀢𑁄 𑀯𑀺𑀪𑀸𑀕𑀤𑀲𑁆𑀲𑀦𑀢𑁆𑀣𑀁. ‘‘𑀏𑀓𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀲𑁂𑀲𑀸 𑀥𑀫𑁆𑀫𑀸’’𑀢𑀺 𑀳𑀺 𑀆𑀤𑀺𑀦𑀸 𑀦𑀬𑁂𑀦 𑀯𑀼𑀘𑁆𑀘𑀫𑀸𑀦𑁂 𑀅𑀲𑀼𑀓𑀥𑀫𑁆𑀫𑀁 𑀦𑀸𑀫 𑀦𑀺𑀲𑁆𑀲𑀸𑀬 𑀅𑀲𑀼𑀓𑀥𑀫𑁆𑀫𑀸𑀢𑀺 𑀦 𑀲𑀓𑁆𑀓𑀸 𑀅𑀲𑀗𑁆𑀓𑀭𑀢𑁄 𑀧𑀘𑁆𑀘𑀬𑁂 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑁂 𑀘 𑀚𑀸𑀦𑀺𑀢𑀼𑀁, 𑀏𑀯𑀁 𑀲𑀦𑁆𑀢𑁂 𑀉𑀤𑁆𑀤𑁂𑀲𑀦𑀺𑀤𑁆𑀤𑁂𑀲𑀸 𑀦𑀺𑀩𑁆𑀩𑀺𑀲𑁂𑀲𑀸 𑀲𑀺𑀬𑀼𑀁. 𑀢𑀲𑁆𑀫𑀸 𑀅𑀲𑀗𑁆𑀓𑀭𑀢𑁄 𑀯𑀺𑀪𑀸𑀕𑀤𑀲𑁆𑀲𑀦𑀢𑁆𑀣𑀁 𑀏𑀯𑀁 𑀆𑀭𑀼𑀴𑁆𑀳𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀦𑀦𑁆𑀢𑀺 𑀇𑀤𑀁 𑀬𑀲𑁆𑀲 𑀅𑀩𑁆𑀬𑀸𑀓𑀢𑀲𑁆𑀲 𑀓𑀼𑀲𑀮𑁄 𑀳𑁂𑀢𑀼𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄 𑀳𑁄𑀢𑀺, 𑀢𑀫𑁂𑀯 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁. 𑀧𑀘𑁆𑀘𑀬𑀯𑀺𑀪𑀗𑁆𑀕𑁂 𑀧𑀦 𑀓𑀼𑀲𑀮𑀸𑀤𑀺𑀯𑀲𑁂𑀦 𑀯𑀺𑀪𑀸𑀕𑀁 𑀅𑀓𑀢𑁆𑀯𑀸 𑀲𑀸𑀫𑀜𑁆𑀜𑀢𑁄 𑀲𑀩𑁆𑀩𑁂𑀲𑀁 𑀳𑁂𑀢𑀽𑀦𑀁 𑀯𑀲𑁂𑀦 𑀉𑀧𑁆𑀧𑀦𑁆𑀦𑀭𑀽𑀧𑀤𑀲𑁆𑀲𑀦𑀢𑁆𑀣𑀁 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀦𑀦𑁆𑀢𑀺 𑀅𑀯𑀢𑁆𑀯𑀸 𑀢𑀁𑀲𑀫𑀼𑀝𑁆𑀞𑀸𑀦𑀸𑀦𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀲𑁆𑀫𑀸 𑀢𑀢𑁆𑀣 𑀅𑀩𑁆𑀬𑀸𑀓𑀢𑀳𑁂𑀢𑀼𑀲𑀫𑀼𑀝𑁆𑀞𑀸𑀦𑀭𑀽𑀧𑀁, 𑀑𑀓𑁆𑀓𑀦𑁆𑀢𑀺𑀓𑁆𑀔𑀡𑁂 𑀓𑀝𑀢𑁆𑀢𑀸𑀭𑀽𑀧𑀫𑁆𑀧𑀺 𑀲𑀗𑁆𑀕𑀳𑀁 𑀕𑀢𑀁. 𑀇𑀫𑀺𑀦𑀸 𑀉𑀧𑀸𑀬𑁂𑀦 𑀲𑁂𑀲𑁂𑀲𑀼𑀧𑀺 𑀏𑀯𑀭𑀽𑀧𑁂𑀲𑀼 𑀯𑀺𑀲𑁆𑀲𑀚𑁆𑀚𑀦𑁂𑀲𑀼 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑁪𑁦𑁪. 𑀤𑀸𑀦𑀁 𑀤𑀢𑁆𑀯𑀸𑀢𑀺 𑀤𑁂𑀬𑁆𑀬𑀥𑀫𑁆𑀫𑀁 𑀘𑀚𑀺𑀢𑁆𑀯𑀸. 𑀬𑀸𑀬 𑀯𑀸 𑀘𑁂𑀢𑀦𑀸𑀬 𑀲𑁄 𑀤𑀺𑀬𑁆𑀬𑀢𑀺, 𑀲𑀸 𑀘𑁂𑀢𑀦𑀸 𑀤𑀸𑀦𑀁. 𑀤𑀢𑁆𑀯𑀸𑀢𑀺 𑀢𑀁 𑀘𑁂𑀢𑀦𑀁 𑀧𑀭𑀺𑀬𑁄𑀤𑀸𑀧𑁂𑀢𑁆𑀯𑀸 𑀯𑀺𑀲𑀼𑀤𑁆𑀥𑀁 𑀓𑀢𑁆𑀯𑀸. 𑀲𑀻𑀮𑀁 𑀲𑀫𑀸𑀤𑀺𑀬𑀺𑀢𑁆𑀯𑀸𑀢𑀺 𑀧𑀜𑁆𑀘𑀗𑁆𑀕𑀸𑀤𑀺𑀯𑀲𑁂𑀦 𑀦𑀺𑀘𑁆𑀘𑀲𑀻𑀮𑀁 𑀕𑀡𑁆𑀳𑀺𑀢𑁆𑀯𑀸. 𑀇𑀫𑀺𑀦𑀸 𑀲𑀫𑀸𑀤𑀸𑀦𑀯𑀺𑀭𑀢𑀺𑀬𑁂𑀯 𑀤𑀲𑁆𑀲𑀺𑀢𑀸. 𑀲𑀫𑁆𑀧𑀢𑁆𑀢𑀯𑀺𑀭𑀢𑀺𑀲𑀫𑀼𑀘𑁆𑀙𑁂𑀤𑀯𑀺𑀭𑀢𑀺𑀬𑁄 𑀧𑀦 𑀮𑁄𑀓𑁂 𑀲𑀻𑀮𑀦𑁆𑀢𑀺 𑀅𑀧𑀸𑀓𑀝𑀢𑁆𑀢𑀸 𑀦 𑀯𑀼𑀢𑁆𑀢𑀸. 𑀓𑀺𑀜𑁆𑀘𑀸𑀧𑀺 𑀦 𑀯𑀼𑀢𑁆𑀢𑀸, 𑀆𑀭𑀫𑁆𑀫𑀡𑀧𑀘𑁆𑀘𑀬𑀸 𑀧𑀦 𑀳𑁄𑀦𑁆𑀢𑀺𑀬𑁂𑀯. 𑀢𑀢𑁆𑀣 𑀲𑀫𑀼𑀘𑁆𑀙𑁂𑀤𑀯𑀺𑀭𑀢𑀺 𑀲𑁂𑀓𑁆𑀔𑀸𑀦𑀁𑀬𑁂𑀯 𑀓𑀼𑀲𑀮𑀲𑁆𑀲 𑀆𑀭𑀫𑁆𑀫𑀡𑀁 𑀳𑁄𑀢𑀺, 𑀦 𑀇𑀢𑀭𑁂𑀲𑀁. 𑀉𑀧𑁄𑀲𑀣𑀓𑀫𑁆𑀫𑀁 𑀓𑀢𑁆𑀯𑀸𑀢𑀺 ‘‘𑀧𑀸𑀡𑀁 𑀦 𑀳𑀦𑁂, 𑀦 𑀘𑀸𑀤𑀺𑀦𑁆𑀦𑀫𑀸𑀤𑀺𑀬𑁂’’𑀢𑀺 (𑀅. 𑀦𑀺. 𑁩.𑁭𑁧) 𑀏𑀯𑀁 𑀯𑀼𑀢𑁆𑀢𑀁 𑀉𑀧𑁄𑀲𑀣𑀤𑀺𑀯𑀲𑁂𑀲𑀼 𑀅𑀝𑁆𑀞𑀗𑁆𑀕𑀉𑀧𑁄𑀲𑀣𑀓𑀺𑀭𑀺𑀬𑀁 𑀓𑀢𑁆𑀯𑀸. 𑀢𑀁 𑀧𑀘𑁆𑀘𑀯𑁂𑀓𑁆𑀔𑀢𑀻𑀢𑀺 𑀢𑀁 𑀓𑀼𑀲𑀮𑀁 𑀲𑁂𑀓𑁆𑀔𑁄𑀧𑀺 𑀧𑀼𑀣𑀼𑀚𑁆𑀚𑀦𑁄𑀧𑀺 𑀧𑀘𑁆𑀘𑀯𑁂𑀓𑁆𑀔𑀢𑀺, 𑀅𑀭𑀳𑀸𑀧𑀺 𑀧𑀘𑁆𑀘𑀯𑁂𑀓𑁆𑀔𑀢𑁂𑀯. 𑀅𑀭𑀳𑀢𑁄𑀧𑀺 𑀳𑀺 𑀧𑀼𑀩𑁆𑀩𑁂 𑀓𑀢𑀁 𑀓𑀼𑀲𑀮𑀁 𑀓𑀼𑀲𑀮𑀫𑁂𑀯, 𑀬𑁂𑀦 𑀧𑀦 𑀘𑀺𑀢𑁆𑀢𑁂𑀦 𑀧𑀘𑁆𑀘𑀯𑁂𑀓𑁆𑀔𑀢𑀺, 𑀢𑀁 𑀓𑀺𑀭𑀺𑀬𑀘𑀺𑀢𑁆𑀢𑀁 𑀦𑀸𑀫 𑀳𑁄𑀢𑀺. 𑀢𑀲𑁆𑀫𑀸 ‘‘𑀏𑀢𑀁 𑀓𑀼𑀲𑀮𑁄 𑀥𑀫𑁆𑀫𑁄 𑀓𑀼𑀲𑀮𑀲𑁆𑀲 𑀥𑀫𑁆𑀫𑀲𑁆𑀲𑀸’’𑀢𑀺 𑀇𑀫𑀲𑁆𑀫𑀺𑀁 𑀅𑀥𑀺𑀓𑀸𑀭𑁂 𑀦 𑀮𑀩𑁆𑀪𑀢𑀺. 𑀧𑀼𑀩𑁆𑀩𑁂 𑀲𑀼𑀘𑀺𑀡𑁆𑀡𑀸𑀦𑀻𑀢𑀺 ‘‘𑀤𑀢𑁆𑀯𑀸 𑀲𑀫𑀸𑀤𑀺𑀬𑀺𑀢𑁆𑀯𑀸 𑀓𑀢𑁆𑀯𑀸’’𑀢𑀺 𑀳𑀺 𑀆𑀲𑀦𑁆𑀦𑁂 𑀓𑀢𑀸𑀦𑀺 𑀯𑀼𑀢𑁆𑀢𑀸𑀦𑀺, 𑀇𑀫𑀸𑀦𑀺 𑀦 𑀆𑀲𑀦𑁆𑀦𑁂 𑀓𑀢𑀸𑀦𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀤𑀸𑀦𑀸𑀤𑀻𑀳𑀺 𑀯𑀸 𑀲𑁂𑀲𑀸𑀦𑀺 𑀓𑀸𑀫𑀸𑀯𑀘𑀭𑀓𑀼𑀲𑀮𑀸𑀦𑀺 𑀤𑀲𑁆𑀲𑁂𑀢𑀼𑀁 𑀇𑀤𑀁 𑀯𑀼𑀢𑁆𑀢𑀁. 𑀛𑀸𑀦𑀸 𑀯𑀼𑀝𑁆𑀞𑀳𑀺𑀢𑁆𑀯𑀸𑀢𑀺 𑀛𑀸𑀦𑀸 𑀯𑀼𑀝𑁆𑀞𑀳𑀺𑀢𑁆𑀯𑀸. 𑀅𑀬𑀫𑁂𑀯 𑀯𑀸 𑀧𑀸𑀴𑀺. 𑀲𑁂𑀓𑁆𑀔𑀸 𑀕𑁄𑀢𑁆𑀭𑀪𑀼𑀦𑁆𑀢𑀺 𑀲𑁄𑀢𑀸𑀧𑀦𑁆𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀲𑁄 𑀳𑀺 𑀕𑁄𑀢𑁆𑀭𑀪𑀼𑀁 𑀧𑀘𑁆𑀘𑀯𑁂𑀓𑁆𑀔𑀢𑀺. 𑀯𑁄𑀤𑀸𑀦𑀦𑁆𑀢𑀺 𑀇𑀤𑀁 𑀧𑀦 𑀲𑀓𑀤𑀸𑀕𑀸𑀫𑀺𑀅𑀦𑀸𑀕𑀸𑀫𑀺𑀦𑁄 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑁂𑀲𑀜𑁆𑀳𑀺 𑀢𑀁 𑀘𑀺𑀢𑁆𑀢𑀁 𑀯𑁄𑀤𑀸𑀦𑀁 𑀦𑀸𑀫 𑀳𑁄𑀢𑀺. 𑀲𑁂𑀓𑁆𑀔𑀸𑀢𑀺 𑀲𑁄𑀢𑀸𑀧𑀦𑁆𑀦𑀲𑀓𑀤𑀸𑀕𑀸𑀫𑀺𑀅𑀦𑀸𑀕𑀸𑀫𑀺𑀦𑁄. 𑀫𑀕𑁆𑀕𑀸 𑀯𑀼𑀝𑁆𑀞𑀳𑀺𑀢𑁆𑀯𑀸𑀢𑀺 𑀫𑀕𑁆𑀕𑀨𑀮𑀪𑀯𑀗𑁆𑀕𑀸𑀢𑀺𑀓𑁆𑀓𑀫𑀯𑀲𑁂𑀦 𑀅𑀢𑁆𑀢𑀦𑀸 𑀧𑀝𑀺𑀮𑀤𑁆𑀥𑀸 𑀫𑀕𑁆𑀕𑀸 𑀯𑀼𑀝𑁆𑀞𑀳𑀺𑀢𑁆𑀯𑀸, 𑀲𑀼𑀤𑁆𑀥𑀫𑀕𑁆𑀕𑀢𑁄𑀬𑁂𑀯 𑀧𑀦 𑀯𑀼𑀝𑁆𑀞𑀸𑀬 𑀧𑀘𑁆𑀘𑀯𑁂𑀓𑁆𑀔𑀡𑀁 𑀦𑀸𑀫 𑀦𑀢𑁆𑀣𑀺.

𑀓𑀼𑀲𑀮𑀁 𑀅𑀦𑀺𑀘𑁆𑀘𑀢𑁄𑀢𑀺 𑀏𑀢𑁆𑀣 𑀯𑀺𑀧𑀲𑁆𑀲𑀦𑀽𑀧𑀕𑀁 𑀢𑁂𑀪𑀽𑀫𑀓𑀓𑀼𑀲𑀮𑀫𑁂𑀯 𑀯𑁂𑀤𑀺𑀢𑀩𑁆𑀩𑀁, 𑀯𑀺𑀧𑀲𑁆𑀲𑀦𑀸𑀓𑀼𑀲𑀮𑀁 𑀧𑀦 𑀓𑀸𑀫𑀸𑀯𑀘𑀭𑀫𑁂𑀯. 𑀘𑁂𑀢𑁄𑀧𑀭𑀺𑀬𑀜𑀸𑀡𑁂𑀦𑀸𑀢𑀺 𑀭𑀽𑀧𑀸𑀯𑀘𑀭𑀓𑀼𑀲𑀮𑀁 𑀤𑀲𑁆𑀲𑁂𑀢𑀺. 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀦𑁆𑀢𑀺𑀆𑀤𑀻𑀳𑀺 𑀅𑀭𑀽𑀧𑀸𑀯𑀘𑀭𑀓𑀼𑀲𑀮𑀸𑀭𑀫𑁆𑀫𑀡𑀯𑀲𑁂𑀦 𑀉𑀧𑁆𑀧𑀚𑁆𑀚𑀫𑀸𑀦𑀁 𑀅𑀭𑀽𑀧𑀸𑀯𑀘𑀭𑀓𑀼𑀲𑀮𑀫𑁂𑀯. 𑀓𑀼𑀲𑀮𑀸 𑀔𑀦𑁆𑀥𑀸 𑀇𑀤𑁆𑀥𑀺𑀯𑀺𑀥𑀜𑀸𑀡𑀲𑁆𑀲𑀸𑀢𑀺𑀆𑀤𑀻𑀳𑀺 𑀧𑀼𑀕𑁆𑀕𑀮𑀁 𑀅𑀦𑀸𑀫𑀲𑀺𑀢𑁆𑀯𑀸 𑀥𑀫𑁆𑀫𑀯𑀲𑁂𑀦 𑀤𑀲𑁆𑀲𑁂𑀢𑀺. 𑀢𑁂𑀦𑁂𑀯𑁂𑀢𑁆𑀣 𑀳𑁂𑀝𑁆𑀞𑀸 𑀕𑀳𑀺𑀢𑀫𑁆𑀧𑀺 𑀘𑁂𑀢𑁄𑀧𑀭𑀺𑀬𑀜𑀸𑀡𑀁 𑀧𑀼𑀦 𑀯𑀼𑀢𑁆𑀢𑀁.

𑁪𑁦𑁫. 𑀅𑀲𑁆𑀲𑀸𑀤𑁂𑀢𑀻𑀢𑀺 𑀲𑁄𑀫𑀦𑀲𑁆𑀲𑀲𑀳𑀕𑀢𑀮𑁄𑀪𑀲𑀫𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑁂𑀳𑀺 𑀅𑀦𑀼𑀪𑀯𑀢𑀺 𑀘𑁂𑀯 𑀭𑀚𑁆𑀚𑀢𑀺 𑀘. 𑀅𑀪𑀺𑀦𑀦𑁆𑀤𑀢𑀻𑀢𑀺 𑀲𑀧𑁆𑀧𑀻𑀢𑀺𑀓𑀢𑀡𑁆𑀳𑀸𑀯𑀲𑁂𑀦 𑀦𑀦𑁆𑀤𑀢𑀺 𑀳𑀝𑁆𑀞𑀧𑀳𑀝𑁆𑀞𑁄 𑀳𑁄𑀢𑀺, 𑀤𑀺𑀝𑁆𑀞𑀸𑀪𑀺𑀦𑀦𑁆𑀤𑀦𑀸𑀬 𑀯𑀸 𑀅𑀪𑀺𑀦𑀦𑁆𑀤𑀢𑀺. 𑀭𑀸𑀕𑁄 𑀉𑀧𑁆𑀧𑀚𑁆𑀚𑀢𑀻𑀢𑀺 𑀅𑀲𑁆𑀲𑀸𑀤𑁂𑀦𑁆𑀢𑀲𑁆𑀲 𑀭𑀸𑀕𑁄 𑀉𑀧𑁆𑀧𑀚𑁆𑀚𑀢𑀺 𑀦𑀸𑀫. 𑀇𑀤𑀁 𑀅𑀝𑁆𑀞𑀧𑀺 𑀮𑁄𑀪𑀲𑀳𑀕𑀢𑀸𑀦𑀺 𑀕𑀳𑁂𑀢𑁆𑀯𑀸 𑀯𑀼𑀢𑁆𑀢𑀁. 𑀤𑀺𑀝𑁆𑀞𑀺 𑀉𑀧𑁆𑀧𑀚𑁆𑀚𑀢𑀻𑀢𑀺 𑀅𑀪𑀺𑀦𑀦𑁆𑀤𑀦𑁆𑀢𑀲𑁆𑀲 𑀅𑀢𑁆𑀢𑀸 𑀅𑀢𑁆𑀢𑀦𑀺𑀬𑀦𑁆𑀢𑀺𑀆𑀤𑀺𑀯𑀲𑁂𑀦 𑀘𑀢𑀽𑀳𑀺𑀧𑀺 𑀘𑀺𑀢𑁆𑀢𑁂𑀳𑀺 𑀲𑀫𑁆𑀧𑀬𑀼𑀢𑁆𑀢𑀸 𑀤𑀺𑀝𑁆𑀞𑀺 𑀉𑀧𑁆𑀧𑀚𑁆𑀚𑀢𑀺. 𑀅𑀲𑀦𑁆𑀦𑀺𑀝𑁆𑀞𑀸𑀦𑀕𑀢𑀲𑁆𑀲 𑀧𑀦𑁂𑀢𑁆𑀣 𑀯𑀺𑀘𑀺𑀓𑀺𑀘𑁆𑀙𑀸 𑀉𑀧𑁆𑀧𑀚𑁆𑀚𑀢𑀺. 𑀯𑀺𑀓𑁆𑀔𑁂𑀧𑀕𑀢𑀲𑁆𑀲 𑀉𑀤𑁆𑀥𑀘𑁆𑀘𑀁, 𑀅𑀓𑀢𑀁 𑀯𑀢 𑀫𑁂 𑀓𑀮𑁆𑀬𑀸𑀡𑀦𑁆𑀢𑀺 𑀯𑀺𑀧𑁆𑀧𑀝𑀺𑀲𑀸𑀭𑀺𑀦𑁄 𑀤𑁄𑀫𑀦𑀲𑁆𑀲𑀁. 𑀢𑀁 𑀆𑀭𑀩𑁆𑀪𑀸𑀢𑀺 𑀢𑀸𑀦𑀺 𑀲𑀼𑀘𑀺𑀡𑁆𑀡𑀸𑀦𑀺 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀩𑀳𑀼𑀯𑀘𑀦𑀲𑁆𑀲 𑀳𑁂𑀲 𑀏𑀓𑀯𑀘𑀦𑀸𑀤𑁂𑀲𑁄, 𑀚𑀸𑀢𑀺𑀯𑀲𑁂𑀦 𑀯𑀸 𑀏𑀓𑀯𑀘𑀦𑀫𑁂𑀯𑁂𑀢𑀁.

𑁪𑁦𑁬. 𑀅𑀭𑀳𑀸 𑀫𑀕𑁆𑀕𑀸 𑀯𑀼𑀝𑁆𑀞𑀳𑀺𑀢𑁆𑀯𑀸𑀢𑀺 𑀫𑀕𑁆𑀕𑀯𑀻𑀣𑀺𑀬𑀁 𑀨𑀮𑀸𑀦𑀦𑁆𑀢𑀭𑀲𑁆𑀲 𑀪𑀯𑀗𑁆𑀕𑀲𑁆𑀲 𑀅𑀢𑀺𑀓𑁆𑀓𑀫𑀯𑀲𑁂𑀦 𑀯𑀼𑀝𑁆𑀞𑀳𑀺𑀢𑁆𑀯𑀸. 𑀧𑀘𑁆𑀘𑀯𑁂𑀓𑁆𑀔𑀡𑀘𑀺𑀢𑁆𑀢𑀸𑀦𑀺 𑀧𑀦𑀲𑁆𑀲 𑀓𑀺𑀭𑀺𑀬𑀸𑀩𑁆𑀬𑀸𑀓𑀢𑀸𑀦𑀺. 𑀏𑀯𑀁 𑀓𑀺𑀭𑀺𑀬𑀸𑀩𑁆𑀬𑀸𑀓𑀢𑀲𑁆𑀲 𑀆𑀭𑀫𑁆𑀫𑀡𑀧𑀘𑁆𑀘𑀬𑀁 𑀤𑀲𑁆𑀲𑁂𑀢𑁆𑀯𑀸 𑀧𑀼𑀦 𑀯𑀺𑀧𑀸𑀓𑀸𑀩𑁆𑀬𑀸𑀓𑀢𑀲𑁆𑀲 𑀤𑀲𑁆𑀲𑁂𑀢𑀼𑀁 𑀲𑁂𑀓𑁆𑀔𑀸 𑀯𑀸𑀢𑀺𑀆𑀤𑀺𑀫𑀸𑀳. 𑀓𑀼𑀲𑀮𑁂 𑀦𑀺𑀭𑀼𑀤𑁆𑀥𑁂𑀢𑀺 𑀯𑀺𑀧𑀲𑁆𑀲𑀦𑀸𑀚𑀯𑀦𑀯𑀻𑀣𑀺𑀬𑀸 𑀧𑀘𑁆𑀙𑀺𑀦𑁆𑀦𑀸𑀬. 𑀯𑀺𑀧𑀸𑀓𑁄𑀢𑀺 𑀓𑀸𑀫𑀸𑀯𑀘𑀭𑀯𑀺𑀧𑀸𑀓𑁄. 𑀢𑀤𑀸𑀭𑀫𑁆𑀫𑀡𑀢𑀸𑀢𑀺 𑀢𑀤𑀸𑀭𑀫𑁆𑀫𑀡𑀢𑀸𑀬, 𑀢𑀁 𑀓𑀼𑀲𑀮𑀲𑁆𑀲 𑀚𑀯𑀦𑀲𑁆𑀲 𑀆𑀭𑀫𑁆𑀫𑀡𑀪𑀽𑀢𑀁 𑀯𑀺𑀧𑀲𑁆𑀲𑀺𑀢𑀓𑀼𑀲𑀮𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀉𑀧𑁆𑀧𑀚𑁆𑀚𑀢𑀻𑀢𑀺 𑀅𑀢𑁆𑀣𑁄. 𑀦 𑀓𑁂𑀯𑀮𑀜𑁆𑀘 𑀢𑀤𑀸𑀭𑀫𑁆𑀫𑀡𑀯𑀲𑁂𑀦𑁂𑀯, 𑀧𑀝𑀺𑀲𑀦𑁆𑀥𑀺𑀪𑀯𑀗𑁆𑀕𑀘𑀼𑀢𑀺𑀯𑀲𑁂𑀦𑀸𑀧𑀺. 𑀯𑀺𑀧𑀸𑀓𑁄 𑀳𑀺 𑀓𑀫𑁆𑀫𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀕𑀳𑀺𑀢𑀧𑀝𑀺𑀲𑀦𑁆𑀥𑀺𑀓𑀲𑁆𑀲 𑀓𑀼𑀲𑀮𑀸𑀭𑀫𑁆𑀫𑀡𑁄 𑀳𑁄𑀢𑀺𑀬𑁂𑀯, 𑀲𑁄 𑀧𑀦 𑀤𑀼𑀩𑁆𑀩𑀺𑀜𑁆𑀜𑁂𑀬𑁆𑀬𑀢𑁆𑀢𑀸 𑀇𑀥 𑀦 𑀤𑀲𑁆𑀲𑀺𑀢𑁄.

𑀓𑀼𑀲𑀮𑀁 𑀅𑀲𑁆𑀲𑀸𑀤𑁂𑀢𑀻𑀢𑀺𑀆𑀤𑀺 𑀅𑀓𑀼𑀲𑀮𑀚𑀯𑀦𑀸𑀯𑀲𑀸𑀦𑁂 𑀓𑀼𑀲𑀮𑀸𑀭𑀫𑁆𑀫𑀡𑀯𑀺𑀧𑀸𑀓𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁. 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀯𑀺𑀧𑀸𑀓𑀲𑁆𑀲𑀸𑀢𑀺 𑀇𑀤𑀁 𑀤𑀼𑀩𑁆𑀩𑀺𑀜𑁆𑀜𑁂𑀬𑁆𑀬𑀫𑁆𑀧𑀺 𑀲𑀫𑀸𑀦𑀁 𑀫𑀳𑀕𑁆𑀕𑀢𑀯𑀺𑀧𑀸𑀓𑀲𑁆𑀲 𑀢𑀤𑀸𑀭𑀫𑁆𑀫𑀡𑀪𑀸𑀯𑁂𑀦 𑀅𑀦𑀼𑀧𑁆𑀧𑀢𑁆𑀢𑀺𑀢𑁄 𑀮𑀩𑁆𑀪𑀫𑀸𑀦𑀓𑀯𑀲𑁂𑀦 𑀯𑀼𑀢𑁆𑀢𑀁. 𑀓𑀺𑀭𑀺𑀬𑀲𑁆𑀲𑀸𑀢𑀺 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀅𑀲𑀫𑀸𑀧𑀦𑁆𑀦𑀧𑀼𑀩𑁆𑀩𑁂 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑁂 𑀧𑀝𑀺𑀮𑁄𑀫𑀢𑁄 𑀯𑀸 𑀏𑀓𑀦𑁆𑀢𑀭𑀺𑀓𑀯𑀲𑁂𑀦 𑀯𑀸 𑀲𑀫𑀸𑀧𑀦𑁆𑀦𑀓𑀺𑀭𑀺𑀬𑀸𑀬. 𑀘𑁂𑀢𑁄𑀧𑀭𑀺𑀬𑀜𑀸𑀡𑀲𑁆𑀲𑀸𑀢𑀺𑀆𑀤𑀻𑀦𑀺 𑀧𑀭𑀢𑁄 𑀆𑀯𑀚𑁆𑀚𑀦𑀸𑀬 𑀬𑁄𑀚𑁂𑀢𑀩𑁆𑀩𑀸𑀦𑀺. 𑀬𑀸 𑀏𑀢𑁂𑀲𑀁 𑀆𑀯𑀚𑁆𑀚𑀦𑀸, 𑀢𑀲𑁆𑀲𑀸 𑀓𑀼𑀲𑀮𑀸 𑀔𑀦𑁆𑀥𑀸 𑀆𑀭𑀫𑁆𑀫𑀡𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄𑀢𑀺 𑀅𑀬𑀜𑁆𑀳𑁂𑀢𑁆𑀣 𑀅𑀢𑁆𑀣𑁄.

𑁪𑁦𑁭-𑁪𑁦𑁯. 𑀭𑀸𑀕𑀦𑁆𑀢𑀺 𑀅𑀢𑁆𑀢𑀦𑁄 𑀯𑀸 𑀧𑀭𑀲𑁆𑀲 𑀯𑀸 𑀭𑀸𑀕𑀁. 𑀅𑀢𑁆𑀢𑀦𑁄 𑀭𑀸𑀕𑀯𑀲𑁂𑀦 𑀧𑀦𑁂𑀢𑁆𑀣 𑀯𑀡𑁆𑀡𑀦𑀸 𑀧𑀸𑀓𑀝𑀸 𑀳𑁄𑀢𑀺. 𑀅𑀲𑁆𑀲𑀸𑀤𑁂𑀢𑀻𑀢𑀺𑀆𑀤𑀻𑀦𑀺 𑀯𑀼𑀢𑁆𑀢𑀢𑁆𑀣𑀸𑀦𑁂𑀯. 𑀯𑀺𑀘𑀺𑀓𑀺𑀘𑁆𑀙𑀸𑀤𑀻𑀲𑀼 𑀧𑀦 𑀢𑀻𑀲𑀼 𑀅𑀲𑁆𑀲𑀸𑀤𑁂𑀢𑀩𑁆𑀩𑀢𑀸𑀬 𑀅𑀪𑀸𑀯𑁂𑀦 ‘‘𑀅𑀲𑁆𑀲𑀸𑀤𑁂𑀢𑀻’’𑀢𑀺 𑀦 𑀯𑀼𑀢𑁆𑀢𑀁. 𑀤𑀺𑀝𑁆𑀞𑀺 𑀧𑀦𑁂𑀢𑁆𑀣 𑀉𑀧𑁆𑀧𑀚𑁆𑀚𑀢𑀺, 𑀲𑀸 𑀅𑀲𑁆𑀲𑀸𑀤𑁂𑀢𑀻𑀢𑀺 𑀧𑀤𑀲𑁆𑀲 𑀧𑀭𑀺𑀳𑀻𑀦𑀢𑁆𑀢𑀸 𑀆𑀕𑀢𑀧𑀝𑀺𑀧𑀸𑀝𑀺𑀬𑀸 𑀧𑀞𑀫𑀁 𑀦 𑀯𑀼𑀢𑁆𑀢𑀸. 𑀯𑀺𑀘𑀺𑀓𑀺𑀘𑁆𑀙𑀸𑀤𑀻𑀲𑀼𑀬𑁂𑀯 𑀢𑀁 𑀢𑀁 𑀲𑀪𑀸𑀕𑀁 𑀧𑀞𑀫𑀁 𑀯𑀢𑁆𑀯𑀸 𑀢𑀲𑁆𑀲 𑀢𑀲𑁆𑀲 𑀅𑀦𑀦𑁆𑀢𑀭𑀸 𑀯𑀼𑀢𑁆𑀢𑀸. 𑀇𑀫𑁂𑀲𑀼 𑀘 𑀧𑀦 𑀭𑀸𑀕𑀸𑀤𑀻𑀲𑀼 ‘‘𑀓𑀺𑀁 𑀫𑁂 𑀧𑀸𑀧𑀥𑀫𑁆𑀫𑀸 𑀉𑀧𑁆𑀧𑀚𑁆𑀚𑀦𑁆𑀢𑀻’’𑀢𑀺 𑀅𑀓𑁆𑀔𑀦𑁆𑀢𑀺𑀯𑀲𑁂𑀦 𑀯𑀸, ‘‘𑀓𑀢𑀁 𑀧𑀸𑀧𑀁 𑀓𑀢𑀁 𑀮𑀼𑀤𑁆𑀥’’𑀦𑁆𑀢𑀺 𑀯𑀺𑀧𑁆𑀧𑀝𑀺𑀲𑀸𑀭𑀸𑀤𑀺𑀯𑀲𑁂𑀦 𑀯𑀸 𑀤𑁄𑀫𑀦𑀲𑁆𑀲𑀼𑀧𑁆𑀧𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸.

𑁪𑁧𑁦. 𑀘𑀓𑁆𑀔𑀼𑀁 𑀅𑀦𑀺𑀘𑁆𑀘𑀢𑁄𑀢𑀺 𑀯𑀺𑀧𑀲𑁆𑀲𑀦𑀸𑀦𑀼𑀓𑁆𑀓𑀫𑁂𑀦 𑀑𑀴𑀸𑀭𑀺𑀓𑀸𑀬𑀢𑀦𑀸𑀦𑀺 𑀯𑀢𑁆𑀣𑀼𑀭𑀽𑀧𑀜𑁆𑀘𑀸𑀢𑀺 𑀏𑀓𑀸𑀤𑀲 𑀭𑀽𑀧𑀸𑀦𑀺 𑀧𑀸𑀓𑀝𑀢𑁆𑀢𑀸 𑀕𑀳𑀺𑀢𑀸𑀦𑀺. 𑀧𑀼𑀦 𑀭𑀽𑀧𑀸𑀬𑀢𑀦𑀸𑀤𑀻𑀦𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀁 𑀆𑀭𑀫𑁆𑀫𑀡𑀢𑁆𑀢𑀸 𑀕𑀳𑀺𑀢𑀸𑀦𑀺. 𑀬𑀲𑁆𑀫𑀸 𑀧𑀦𑁂𑀲𑀸 𑀯𑀺𑀜𑁆𑀜𑀸𑀡𑀓𑀸𑀬𑀯𑀲𑁂𑀦 𑀤𑁂𑀲𑀦𑀸, 𑀦 𑀥𑀸𑀢𑀼𑀯𑀲𑁂𑀦, 𑀢𑀲𑁆𑀫𑀸 𑀫𑀦𑁄𑀥𑀸𑀢𑀼 𑀦 𑀕𑀳𑀺𑀢𑀸. 𑀏𑀯𑀁 𑀲𑀩𑁆𑀩𑀢𑁆𑀣 𑀕𑀳𑀺𑀢𑀸𑀕𑀳𑀺𑀢𑀁 𑀯𑁂𑀤𑀺𑀢𑀩𑁆𑀩𑀁.

𑁪𑁧𑁧. 𑀨𑀮𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀺 𑀦𑀺𑀩𑁆𑀩𑀸𑀦𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀻𑀢𑀺 𑀧𑀘𑁆𑀘𑀯𑁂𑀓𑁆𑀔𑀡𑀓𑀼𑀲𑀮𑀲𑁆𑀲 𑀆𑀭𑀫𑁆𑀫𑀡𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁.

𑁪𑁧𑁩-𑁪𑁧𑁬. 𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀦𑀺𑀤𑁆𑀤𑁂𑀲𑁂 𑀲𑁂𑀓𑁆𑀔𑀧𑀼𑀣𑀼𑀚𑁆𑀚𑀦𑀸𑀦𑀁 𑀯𑀲𑁂𑀦 𑀘𑀢𑀼𑀪𑀽𑀫𑀓𑀓𑀼𑀲𑀮𑀁 𑀤𑀲𑁆𑀲𑀺𑀢𑀁, 𑀢𑀣𑀸 𑀲𑀳𑀚𑀸𑀢𑀸𑀥𑀺𑀧𑀢𑀺𑀦𑀺𑀤𑁆𑀤𑁂𑀲𑁂. 𑀅𑀭𑀳𑀢𑁄 𑀉𑀢𑁆𑀢𑀫𑀥𑀫𑁆𑀫𑀁 𑀅𑀥𑀺𑀕𑀢𑀢𑁆𑀢𑀸 𑀮𑁄𑀓𑀺𑀬𑀓𑀼𑀲𑀮𑁂𑀲𑀼 𑀕𑀭𑀼𑀓𑀸𑀭𑁄 𑀦𑀢𑁆𑀣𑀻𑀢𑀺 𑀅𑀕𑁆𑀕𑀫𑀕𑁆𑀕𑁄𑀯 𑀤𑀲𑁆𑀲𑀺𑀢𑁄.

𑁪𑁧𑁭. 𑀅𑀦𑀦𑁆𑀢𑀭𑀧𑀘𑁆𑀘𑀬𑁂 𑀧𑀼𑀭𑀺𑀫𑀸 𑀧𑀼𑀭𑀺𑀫𑀸𑀢𑀺 𑀏𑀓𑀪𑀽𑀫𑀓𑀸𑀧𑀺 𑀦𑀸𑀦𑀸𑀪𑀽𑀫𑀓𑀸𑀧𑀺 𑀓𑀼𑀲𑀮𑀸 𑀏𑀓𑀢𑁄 𑀓𑀢𑁆𑀯𑀸 𑀯𑀼𑀢𑁆𑀢𑀸. 𑀅𑀦𑀼𑀮𑁄𑀫𑀁 𑀕𑁄𑀢𑁆𑀭𑀪𑀼𑀲𑁆𑀲, 𑀅𑀦𑀼𑀮𑁄𑀫𑀁 𑀯𑁄𑀤𑀸𑀦𑀲𑁆𑀲𑀸𑀢𑀺 𑀦𑀸𑀦𑀸𑀭𑀫𑁆𑀫𑀡𑀯𑀲𑁂𑀦. 𑀕𑁄𑀢𑁆𑀭𑀪𑀼 𑀫𑀕𑁆𑀕𑀲𑁆𑀲, 𑀯𑁄𑀤𑀸𑀦𑀁 𑀫𑀕𑁆𑀕𑀲𑁆𑀲𑀸𑀢𑀺 𑀦𑀸𑀦𑀸𑀪𑀽𑀫𑀺𑀯𑀲𑁂𑀦. 𑀓𑀼𑀲𑀮𑀁 𑀯𑀼𑀝𑁆𑀞𑀸𑀦𑀲𑁆𑀲𑀸𑀢𑀺 𑀏𑀢𑁆𑀣 𑀧𑀦 𑀓𑀼𑀲𑀮𑀦𑁆𑀢𑀺 𑀢𑁂𑀪𑀽𑀫𑀓𑀓𑀼𑀲𑀮𑀁. 𑀯𑀼𑀝𑁆𑀞𑀸𑀦𑀦𑁆𑀢𑀺 𑀢𑁂𑀪𑀽𑀫𑀓𑀯𑀺𑀧𑀸𑀓𑀁. 𑀢𑁂𑀳𑀺 𑀓𑀼𑀲𑀮𑀚𑀯𑀦𑀯𑀻𑀣𑀺𑀢𑁄 𑀯𑀼𑀝𑁆𑀞𑀳𑀦𑁆𑀢𑀺, 𑀢𑀲𑁆𑀫𑀸 𑀯𑀼𑀝𑁆𑀞𑀸𑀦𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀢𑀁 𑀤𑀼𑀯𑀺𑀥𑀁 𑀳𑁄𑀢𑀺 𑁋 𑀢𑀤𑀸𑀭𑀫𑁆𑀫𑀡𑀁 𑀪𑀯𑀗𑁆𑀕𑀜𑁆𑀘. 𑀢𑀢𑁆𑀣 𑀓𑀸𑀫𑀸𑀯𑀘𑀭𑀓𑀼𑀲𑀮𑀲𑁆𑀲 𑀉𑀪𑀬𑀫𑁆𑀧𑀺 𑀯𑀼𑀝𑁆𑀞𑀸𑀦𑀁 𑀳𑁄𑀢𑀺, 𑀫𑀳𑀕𑁆𑀕𑀢𑀲𑁆𑀲 𑀪𑀯𑀗𑁆𑀕𑀫𑁂𑀯. 𑀫𑀕𑁆𑀕𑁄 𑀨𑀮𑀲𑁆𑀲𑀸𑀢𑀺 𑀇𑀤𑀁 𑀬𑀲𑁆𑀫𑀸 𑀮𑁄𑀓𑀼𑀢𑁆𑀢𑀭𑀯𑀺𑀧𑀸𑀓𑀁 𑀚𑀯𑀦𑀯𑀻𑀣𑀺𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸 𑀯𑀼𑀝𑁆𑀞𑀸𑀦𑀁 𑀦𑀸𑀫 𑀦 𑀳𑁄𑀢𑀺, 𑀢𑀲𑁆𑀫𑀸 𑀯𑀺𑀲𑀼𑀁 𑀯𑀼𑀢𑁆𑀢𑀁. 𑀅𑀦𑀼𑀮𑁄𑀫𑀁 𑀲𑁂𑀓𑁆𑀔𑀸𑀬𑀸𑀢𑀺 𑀅𑀲𑁂𑀓𑁆𑀔𑀸𑀬 𑀓𑀼𑀲𑀮𑀁 𑀅𑀦𑀦𑁆𑀢𑀭𑀁 𑀦 𑀳𑁄𑀢𑀺, 𑀢𑀲𑁆𑀫𑀸 𑀯𑀺𑀪𑀸𑀕𑀁 𑀓𑀭𑁄𑀢𑀺. 𑀨𑀮𑀲𑀫𑀸𑀧𑀢𑁆𑀢𑀺𑀬𑀸𑀢𑀺 𑀲𑁄𑀢𑀸𑀧𑀢𑁆𑀢𑀺𑀨𑀮𑀲𑀓𑀤𑀸𑀕𑀸𑀫𑀺𑀨𑀮𑀅𑀦𑀸𑀕𑀸𑀫𑀺𑀨𑀮𑀲𑀫𑀸𑀧𑀢𑁆𑀢𑀺𑀬𑀸𑀧𑀺. 𑀨𑀮𑀲𑀫𑀸𑀧𑀢𑁆𑀢𑀺𑀬𑀸𑀢𑀺 𑀅𑀦𑀸𑀕𑀸𑀫𑀺𑀨𑀮𑀲𑀫𑀸𑀧𑀢𑁆𑀢𑀺𑀬𑀸. 𑀅𑀓𑀼𑀲𑀮𑁂 𑀤𑀼𑀯𑀺𑀥𑀫𑁆𑀧𑀺 𑀯𑀼𑀝𑁆𑀞𑀸𑀦𑀁 𑀮𑀩𑁆𑀪𑀢𑀺. 𑀯𑀺𑀧𑀸𑀓𑀸𑀩𑁆𑀬𑀸𑀓𑀢𑀸 𑀓𑀺𑀭𑀺𑀬𑀸𑀩𑁆𑀬𑀸𑀓𑀢𑀸𑀢𑀺 𑀏𑀢𑁆𑀣 𑀯𑀺𑀧𑀸𑀓𑀸𑀩𑁆𑀬𑀸𑀓𑀢𑀸 𑀯𑀺𑀧𑀸𑀓𑀸𑀩𑁆𑀬𑀸𑀓𑀢𑀸𑀦𑀁𑀬𑁂𑀯, 𑀓𑀺𑀭𑀺𑀬𑀸𑀩𑁆𑀬𑀸𑀓𑀢𑀸 𑀓𑀺𑀭𑀺𑀬𑀸𑀩𑁆𑀬𑀸𑀓𑀢𑀸𑀦𑀁𑀬𑁂𑀯 𑀯𑁂𑀤𑀺𑀢𑀩𑁆𑀩𑀸. 𑀪𑀯𑀗𑁆𑀕𑀁 𑀆𑀯𑀚𑁆𑀚𑀦𑀸𑀬𑀸𑀢𑀺𑀆𑀤𑀺 𑀯𑁄𑀫𑀺𑀲𑁆𑀲𑀓𑀯𑀲𑁂𑀦 𑀯𑀼𑀢𑁆𑀢𑀁. 𑀢𑀢𑁆𑀣 𑀓𑀺𑀭𑀺𑀬𑀸𑀢𑀺 𑀓𑀸𑀫𑀸𑀯𑀘𑀭𑀓𑀺𑀭𑀺𑀬𑀸. 𑀲𑀸 𑀤𑀼𑀯𑀺𑀥𑀲𑁆𑀲𑀸𑀧𑀺 𑀯𑀼𑀝𑁆𑀞𑀸𑀦𑀲𑁆𑀲 𑀅𑀦𑀦𑁆𑀢𑀭𑀧𑀘𑁆𑀘𑀬𑁄 𑀳𑁄𑀢𑀺, 𑀫𑀳𑀕𑁆𑀕𑀢𑀸 𑀪𑀯𑀗𑁆𑀕𑀲𑁆𑀲𑁂𑀯. 𑀇𑀢𑀺 𑀬𑁂 𑀳𑁂𑀝𑁆𑀞𑀸 𑀧𑀘𑁆𑀘𑀬𑀯𑀺𑀪𑀗𑁆𑀕𑀦𑀺𑀤𑁆𑀤𑁂𑀲𑁂 ‘‘𑀧𑀼𑀭𑀺𑀫𑀸 𑀧𑀼𑀭𑀺𑀫𑀸 𑀓𑀼𑀲𑀮𑀸 𑀥𑀫𑁆𑀫𑀸 𑀧𑀘𑁆𑀙𑀺𑀫𑀸𑀦𑀁 𑀧𑀘𑁆𑀙𑀺𑀫𑀸𑀦𑀁 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀅𑀦𑀦𑁆𑀢𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 𑀆𑀭𑀪𑀺𑀢𑁆𑀯𑀸 𑀓𑀼𑀲𑀮𑀁 𑀓𑀼𑀲𑀮𑀲𑁆𑀲, 𑀓𑀼𑀲𑀮𑀁 𑀅𑀩𑁆𑀬𑀸𑀓𑀢𑀲𑁆𑀲, 𑀅𑀓𑀼𑀲𑀮𑀁 𑀅𑀓𑀼𑀲𑀮𑀲𑁆𑀲, 𑀅𑀓𑀼𑀲𑀮𑀁 𑀅𑀩𑁆𑀬𑀸𑀓𑀢𑀲𑁆𑀲, 𑀅𑀩𑁆𑀬𑀸𑀓𑀢𑀁 𑀅𑀩𑁆𑀬𑀸𑀓𑀢𑀲𑁆𑀲, 𑀅𑀩𑁆𑀬𑀸𑀓𑀢𑀁 𑀓𑀼𑀲𑀮𑀲𑁆𑀲, 𑀅𑀩𑁆𑀬𑀸𑀓𑀢𑀁 𑀅𑀓𑀼𑀲𑀮𑀲𑁆𑀲𑀸𑀢𑀺 𑀲𑀢𑁆𑀢 𑀯𑀸𑀭𑀸 𑀤𑀲𑁆𑀲𑀺𑀢𑀸; 𑀢𑁂𑀲𑀁 𑀯𑀲𑁂𑀦 𑀇𑀥 𑀲𑀗𑁆𑀔𑁂𑀧𑀢𑁄 𑀅𑀦𑀦𑁆𑀢𑀭𑀧𑀘𑁆𑀘𑀬𑁄 𑀯𑀺𑀪𑀢𑁆𑀢𑁄.

𑀯𑀺𑀢𑁆𑀣𑀸𑀭𑀢𑁄 𑀧𑀦𑁂𑀢𑁆𑀣 𑁋

𑀤𑀲𑀥𑀸 𑀲𑀢𑁆𑀢𑀭𑀲𑀥𑀸, 𑀲𑀫𑀲𑀝𑁆𑀞𑀺𑀯𑀺𑀥𑁂𑀦 𑀘;

𑀩𑀳𑀼𑀥𑀸𑀧𑀺 𑀘 𑀦𑀺𑀤𑁆𑀤𑁂𑀲𑀁, 𑀲𑀸𑀥𑀼𑀓𑀁 𑀉𑀧𑀮𑀓𑁆𑀔𑀬𑁂.

𑀅𑀬𑀜𑁆𑀳𑀺 𑀅𑀦𑀦𑁆𑀢𑀭𑀧𑀘𑁆𑀘𑀬𑁄 𑀦 𑀓𑁂𑀯𑀮𑀁 𑀲𑀢𑁆𑀢𑀥𑀸𑀯 𑀦𑀺𑀤𑁆𑀤𑁂𑀲𑀁 𑀮𑀪𑀢𑀺, 𑀓𑀼𑀲𑀮𑀁 𑀧𑀦 𑀓𑀼𑀲𑀮𑀲𑁆𑀲 𑀯𑀺𑀧𑀸𑀓𑀲𑁆𑀲; 𑀅𑀓𑀼𑀲𑀮𑀁 𑀅𑀓𑀼𑀲𑀮𑀲𑁆𑀲 𑀯𑀺𑀧𑀸𑀓𑀲𑁆𑀲; 𑀯𑀺𑀧𑀸𑀓𑀁 𑀯𑀺𑀧𑀸𑀓𑀲𑁆𑀲 𑀓𑀺𑀭𑀺𑀬𑀲𑁆𑀲; 𑀓𑀺𑀭𑀺𑀬𑀁 𑀓𑀼𑀲𑀮𑀲𑁆𑀲 𑀅𑀓𑀼𑀲𑀮𑀲𑁆𑀲 𑀯𑀺𑀧𑀸𑀓𑀲𑁆𑀲 𑀓𑀺𑀭𑀺𑀬𑀲𑁆𑀲𑀸𑀢𑀺 𑀏𑀯𑀁 𑀤𑀲𑀥𑀸𑀧𑀺 𑀦𑀺𑀤𑁆𑀤𑁂𑀲𑀁 𑀮𑀪𑀢𑀺. 𑀦 𑀓𑁂𑀯𑀮𑀁 𑀤𑀲𑀥𑀸𑀬𑁂𑀯, 𑀓𑀼𑀲𑀮𑀁 𑀧𑀦 𑀓𑀼𑀲𑀮𑀲𑁆𑀲 𑀓𑀼𑀲𑀮𑀯𑀺𑀧𑀸𑀓𑀲𑁆𑀲 𑀅𑀓𑀼𑀲𑀮𑀯𑀺𑀧𑀸𑀓𑀲𑁆𑀲; 𑀅𑀓𑀼𑀲𑀮𑀁 𑀅𑀓𑀼𑀲𑀮𑀲𑁆𑀲 𑀅𑀓𑀼𑀲𑀮𑀯𑀺𑀧𑀸𑀓𑀲𑁆𑀲 𑀓𑀼𑀲𑀮𑀯𑀺𑀧𑀸𑀓𑀲𑁆𑀲; 𑀓𑀼𑀲𑀮𑀯𑀺𑀧𑀸𑀓𑀁 𑀓𑀼𑀲𑀮𑀯𑀺𑀧𑀸𑀓𑀲𑁆𑀲 𑀅𑀓𑀼𑀲𑀮𑀯𑀺𑀧𑀸𑀓𑀲𑁆𑀲 𑀓𑀺𑀭𑀺𑀬𑀲𑁆𑀲; 𑀅𑀓𑀼𑀲𑀮𑀯𑀺𑀧𑀸𑀓𑀁 𑀅𑀓𑀼𑀲𑀮𑀯𑀺𑀧𑀸𑀓𑀲𑁆𑀲 𑀓𑀼𑀲𑀮𑀯𑀺𑀧𑀸𑀓𑀲𑁆𑀲 𑀓𑀺𑀭𑀺𑀬𑀲𑁆𑀲; 𑀓𑀺𑀭𑀺𑀬𑀁 𑀓𑀺𑀭𑀺𑀬𑀲𑁆𑀲 𑀓𑀼𑀲𑀮𑀲𑁆𑀲 𑀅𑀓𑀼𑀲𑀮𑀲𑁆𑀲 𑀓𑀼𑀲𑀮𑀯𑀺𑀧𑀸𑀓𑀲𑁆𑀲 𑀅𑀓𑀼𑀲𑀮𑀯𑀺𑀧𑀸𑀓𑀲𑁆𑀲𑀸𑀢𑀺 𑀏𑀯𑀁 𑀲𑀢𑁆𑀢𑀭𑀲𑀥𑀸 𑀦𑀺𑀤𑁆𑀤𑁂𑀲𑀁 𑀮𑀪𑀢𑀺.

𑀦 𑀓𑁂𑀯𑀮𑀜𑁆𑀘 𑀲𑀢𑁆𑀢𑀭𑀲𑀥𑀸𑀯 𑀲𑀫𑀲𑀝𑁆𑀞𑀺𑀯𑀺𑀥𑁂𑀦𑀸𑀧𑀺 𑀦𑀺𑀤𑁆𑀤𑁂𑀲𑀁 𑀮𑀪𑀢𑁂𑀯. 𑀓𑀣𑀁? 𑀓𑀸𑀫𑀸𑀯𑀘𑀭𑀓𑀼𑀲𑀮𑀜𑁆𑀳𑀺 𑀪𑀽𑀫𑀺𑀪𑁂𑀤𑁂𑀦 𑀘𑀢𑀼𑀩𑁆𑀩𑀺𑀥𑀲𑁆𑀲 𑀓𑀼𑀲𑀮𑀲𑁆𑀲 𑀅𑀦𑀦𑁆𑀢𑀭𑀧𑀘𑁆𑀘𑀬𑁄 𑀳𑁄𑀢𑀺, 𑀭𑀽𑀧𑀸𑀯𑀘𑀭𑀸𑀭𑀽𑀧𑀸𑀯𑀘𑀭𑀁 𑀲𑀓𑀲𑀓𑀪𑀽𑀫𑀺𑀓𑀲𑁆𑀲𑁂𑀯𑀸𑀢𑀺 𑀓𑀼𑀲𑀮𑀁 𑀓𑀼𑀲𑀮𑀲𑁆𑀲 𑀙𑀩𑁆𑀩𑀺𑀥𑁂𑀦 𑀅𑀦𑀦𑁆𑀢𑀭𑀧𑀘𑁆𑀘𑀬𑁄. 𑀓𑀸𑀫𑀸𑀯𑀘𑀭𑀓𑀼𑀲𑀮𑀁 𑀧𑀦 𑀓𑀸𑀫𑀸𑀯𑀘𑀭𑀓𑀼𑀲𑀮𑀯𑀺𑀧𑀸𑀓𑀲𑁆𑀲 𑀅𑀓𑀼𑀲𑀮𑀯𑀺𑀧𑀸𑀓𑀲𑁆𑀲 𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑀲𑁆𑀲 𑀅𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑀲𑁆𑀲 𑀮𑁄𑀓𑀼𑀢𑁆𑀢𑀭𑀯𑀺𑀧𑀸𑀓𑀲𑁆𑀲; 𑀭𑀽𑀧𑀸𑀯𑀘𑀭𑀓𑀼𑀲𑀮𑀁 𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑀲𑁆𑀲 𑀓𑀸𑀫𑀸𑀯𑀘𑀭𑀓𑀼𑀲𑀮𑀯𑀺𑀧𑀸𑀓𑀲𑁆𑀲; 𑀅𑀭𑀽𑀧𑀸𑀯𑀘𑀭𑀓𑀼𑀲𑀮𑀁 𑀓𑀸𑀫𑀸𑀯𑀘𑀭𑀓𑀼𑀲𑀮𑀯𑀺𑀧𑀸𑀓𑀲𑁆𑀲 𑀭𑀽𑀧𑀸𑀯𑀘𑀭𑀅𑀭𑀽𑀧𑀸𑀯𑀘𑀭𑀮𑁄𑀓𑀼𑀢𑁆𑀢𑀭𑀯𑀺𑀧𑀸𑀓𑀲𑁆𑀲; 𑀮𑁄𑀓𑀼𑀢𑁆𑀢𑀭𑀓𑀼𑀲𑀮𑀁 𑀮𑁄𑀓𑀼𑀢𑁆𑀢𑀭𑀯𑀺𑀧𑀸𑀓𑀲𑁆𑀲𑀸𑀢𑀺 𑀓𑀼𑀲𑀮𑀁 𑀯𑀺𑀧𑀸𑀓𑀲𑁆𑀲 𑀤𑁆𑀯𑀸𑀤𑀲𑀯𑀺𑀥𑁂𑀦 𑀅𑀦𑀦𑁆𑀢𑀭𑀧𑀘𑁆𑀘𑀬𑁄. 𑀅𑀓𑀼𑀲𑀮𑀁 𑀅𑀓𑀼𑀲𑀮𑀲𑁆𑀲 𑀅𑀓𑀼𑀲𑀮𑀯𑀺𑀧𑀸𑀓𑀲𑁆𑀲 𑀢𑁂𑀪𑀽𑀫𑀓𑀓𑀼𑀲𑀮𑀯𑀺𑀧𑀸𑀓𑀲𑁆𑀲𑀸𑀢𑀺 𑀧𑀜𑁆𑀘𑀯𑀺𑀥𑁂𑀦 𑀅𑀦𑀦𑁆𑀢𑀭𑀧𑀘𑁆𑀘𑀬𑁄.

𑀓𑀸𑀫𑀸𑀯𑀘𑀭𑀓𑀼𑀲𑀮𑀯𑀺𑀧𑀸𑀓𑀁 𑀓𑀸𑀫𑀸𑀯𑀘𑀭𑀓𑀼𑀲𑀮𑀯𑀺𑀧𑀸𑀓𑀲𑁆𑀲 𑀅𑀓𑀼𑀲𑀮𑀯𑀺𑀧𑀸𑀓𑀲𑁆𑀲 𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑀲𑁆𑀲 𑀅𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑀲𑁆𑀲𑀸𑀢𑀺 𑀓𑀸𑀫𑀸𑀯𑀘𑀭𑀓𑀼𑀲𑀮𑀯𑀺𑀧𑀸𑀓𑀁 𑀯𑀺𑀧𑀸𑀓𑀲𑁆𑀲 𑀘𑀢𑀼𑀩𑁆𑀩𑀺𑀥𑁂𑀦 𑀅𑀦𑀦𑁆𑀢𑀭𑀧𑀘𑁆𑀘𑀬𑁄. 𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑀁 𑀢𑁂𑀪𑀽𑀫𑀓𑀓𑀼𑀲𑀮𑀯𑀺𑀧𑀸𑀓𑀲𑁆𑀲𑀸𑀢𑀺 𑀢𑀺𑀯𑀺𑀥𑁂𑀦 𑀅𑀦𑀦𑁆𑀢𑀭𑀧𑀘𑁆𑀘𑀬𑁄. 𑀅𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑀁 𑀅𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑀲𑁆𑀲 𑀓𑀸𑀫𑀸𑀯𑀘𑀭𑀓𑀼𑀲𑀮𑀯𑀺𑀧𑀸𑀓𑀲𑁆𑀲𑀸𑀢𑀺 𑀤𑀼𑀯𑀺𑀥𑁂𑀦 𑀅𑀦𑀦𑁆𑀢𑀭𑀧𑀘𑁆𑀘𑀬𑁄. 𑀮𑁄𑀓𑀼𑀢𑁆𑀢𑀭𑀯𑀺𑀧𑀸𑀓𑀁 𑀘𑀢𑀼𑀪𑀽𑀫𑀓𑀓𑀼𑀲𑀮𑀯𑀺𑀧𑀸𑀓𑀲𑁆𑀲𑀸𑀢𑀺 𑀘𑀢𑀼𑀩𑁆𑀩𑀺𑀥𑁂𑀦 𑀅𑀦𑀦𑁆𑀢𑀭𑀧𑀘𑁆𑀘𑀬𑁄. 𑀏𑀯𑀁 𑀓𑀼𑀲𑀮𑀯𑀺𑀧𑀸𑀓𑀁 𑀯𑀺𑀧𑀸𑀓𑀲𑁆𑀲 𑀢𑁂𑀭𑀲𑀥𑀸𑀧𑀺 𑀅𑀦𑀦𑁆𑀢𑀭𑀧𑀘𑁆𑀘𑀬𑁄. 𑀅𑀓𑀼𑀲𑀮𑀯𑀺𑀧𑀸𑀓𑀁 𑀅𑀓𑀼𑀲𑀮𑀯𑀺𑀧𑀸𑀓𑀲𑁆𑀲 𑀓𑀸𑀫𑀸𑀯𑀘𑀭𑀓𑀼𑀲𑀮𑀯𑀺𑀧𑀸𑀓𑀲𑁆𑀲𑀸𑀢𑀺 𑀤𑀼𑀯𑀺𑀥𑁂𑀦 𑀅𑀦𑀦𑁆𑀢𑀭𑀧𑀘𑁆𑀘𑀬𑁄. 𑀏𑀯𑀁 𑀲𑀩𑁆𑀩𑀣𑀸𑀧𑀺 𑀯𑀺𑀧𑀸𑀓𑀁 𑀯𑀺𑀧𑀸𑀓𑀲𑁆𑀲 𑀧𑀜𑁆𑀘𑀤𑀲𑀯𑀺𑀥𑁂𑀦 𑀅𑀦𑀦𑁆𑀢𑀭𑀧𑀘𑁆𑀘𑀬𑁄. 𑀓𑀸𑀫𑀸𑀯𑀘𑀭𑀓𑀼𑀲𑀮𑀯𑀺𑀧𑀸𑀓𑀁 𑀧𑀦 𑀓𑀸𑀫𑀸𑀯𑀘𑀭𑀓𑀺𑀭𑀺𑀬𑀲𑁆𑀲, 𑀢𑀣𑀸 𑀅𑀓𑀼𑀲𑀮𑀯𑀺𑀧𑀸𑀓𑀁, 𑀢𑀣𑀸 𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑀁, 𑀢𑀣𑀸 𑀅𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑀜𑁆𑀘𑀸𑀢𑀺 𑀯𑀺𑀧𑀸𑀓𑀁 𑀓𑀺𑀭𑀺𑀬𑀲𑁆𑀲 𑀘 𑀘𑀢𑀼𑀩𑁆𑀩𑀺𑀥𑁂𑀦 𑀅𑀦𑀦𑁆𑀢𑀭𑀧𑀘𑁆𑀘𑀬𑁄.

𑀓𑀸𑀫𑀸𑀯𑀘𑀭𑀓𑀺𑀭𑀺𑀬𑀁 𑀢𑁂𑀪𑀽𑀫𑀓𑀓𑀺𑀭𑀺𑀬𑀲𑁆𑀲, 𑀭𑀽𑀧𑀸𑀯𑀘𑀭𑀸𑀭𑀽𑀧𑀸𑀯𑀘𑀭𑀓𑀺𑀭𑀺𑀬𑀁 𑀭𑀽𑀧𑀸𑀯𑀘𑀭𑀸𑀭𑀽𑀧𑀸𑀯𑀘𑀭𑀸𑀦𑀜𑁆𑀜𑁂𑀯𑀸𑀢𑀺 𑀓𑀺𑀭𑀺𑀬𑀁 𑀓𑀺𑀭𑀺𑀬𑀲𑁆𑀲 𑀧𑀜𑁆𑀘𑀯𑀺𑀥𑁂𑀦 𑀅𑀦𑀦𑁆𑀢𑀭𑀧𑀘𑁆𑀘𑀬𑁄. 𑀓𑀸𑀫𑀸𑀯𑀘𑀭𑀓𑀺𑀭𑀺𑀬𑀁 𑀅𑀓𑀼𑀲𑀮𑀯𑀺𑀧𑀸𑀓𑀲𑁆𑀲 𑀘𑁂𑀯 𑀘𑀢𑀼𑀪𑀽𑀫𑀓𑀓𑀼𑀲𑀮𑀯𑀺𑀧𑀸𑀓𑀲𑁆𑀲 𑀘, 𑀭𑀽𑀧𑀸𑀯𑀘𑀭𑀓𑀺𑀭𑀺𑀬𑀁 𑀓𑀸𑀫𑀸𑀯𑀘𑀭𑀓𑀼𑀲𑀮𑀯𑀺𑀧𑀸𑀓𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑀸𑀦𑀁 𑀅𑀭𑀽𑀧𑀸𑀯𑀘𑀭𑀓𑀺𑀭𑀺𑀬𑀁 𑀘𑀢𑀼𑀪𑀽𑀫𑀓𑀓𑀼𑀲𑀮𑀯𑀺𑀧𑀸𑀓𑀲𑁆𑀲𑀸𑀧𑀻𑀢𑀺 𑀓𑀺𑀭𑀺𑀬𑀁 𑀯𑀺𑀧𑀸𑀓𑀲𑁆𑀲 𑀏𑀓𑀸𑀤𑀲𑀯𑀺𑀥𑁂𑀦 𑀅𑀦𑀦𑁆𑀢𑀭𑀧𑀘𑁆𑀘𑀬𑁄. 𑀓𑀸𑀫𑀸𑀯𑀘𑀭𑀓𑀺𑀭𑀺𑀬𑀁 𑀧𑀦 𑀓𑀸𑀫𑀸𑀯𑀘𑀭𑀓𑀼𑀲𑀮𑀲𑁆𑀲 𑀅𑀓𑀼𑀲𑀮𑀲𑁆𑀲𑀸𑀢𑀺 𑀓𑀼𑀲𑀮𑀸𑀓𑀼𑀲𑀮𑀸𑀦𑀁 𑀤𑀼𑀯𑀺𑀥𑁂𑀦 𑀅𑀦𑀦𑁆𑀢𑀭𑀧𑀘𑁆𑀘𑀬𑁄 𑀳𑁄𑀢𑀺. 𑀏𑀯𑀁 𑀲𑀫𑀲𑀝𑁆𑀞𑀺𑀯𑀺𑀥𑁂𑀦𑀸𑀧𑀺 𑀦𑀺𑀤𑁆𑀤𑁂𑀲𑀁 𑀮𑀪𑀢𑀺.

𑀦 𑀓𑁂𑀯𑀮𑀜𑁆𑀘 𑀲𑀫𑀲𑀝𑁆𑀞𑀺𑀯𑀺𑀥𑁂𑀦𑁂𑀯, 𑀩𑀳𑀼𑀯𑀺𑀥𑁂𑀦𑀸𑀧𑀺 𑀮𑀪𑀢𑁂𑀯. 𑀓𑀣𑀁? 𑀓𑀸𑀫𑀸𑀯𑀘𑀭𑀧𑀞𑀫𑀫𑀳𑀸𑀓𑀼𑀲𑀮𑀘𑀺𑀢𑁆𑀢𑀁 𑀢𑀸𑀯 𑀅𑀢𑁆𑀢𑀦𑁄, 𑀘𑀢𑀼𑀦𑁆𑀦𑀜𑁆𑀘 𑀭𑀽𑀧𑀸𑀯𑀘𑀭𑀓𑀼𑀲𑀮𑀸𑀦𑀁 𑀧𑀸𑀤𑀓𑀬𑁄𑀕𑁂𑀦 𑀲𑁄𑀴𑀲𑀦𑁆𑀦𑀁 𑀲𑁄𑀫𑀦𑀲𑁆𑀲𑀮𑁄𑀓𑀼𑀢𑁆𑀢𑀭𑀸𑀦𑀦𑁆𑀢𑀺 𑀏𑀓𑀯𑀻𑀲𑀢𑀺𑀬𑀸 𑀘 𑀓𑀼𑀲𑀮𑀸𑀦𑀁, 𑀚𑀯𑀦𑀧𑀭𑀺𑀬𑁄𑀲𑀸𑀦𑁂 𑀢𑀤𑀸𑀭𑀫𑁆𑀫𑀡𑀪𑀯𑀗𑁆𑀕𑀯𑀲𑁂𑀦 𑀉𑀧𑁆𑀧𑀚𑁆𑀚𑀫𑀸𑀦𑀸𑀦𑀁 𑀏𑀓𑀸𑀤𑀲𑀦𑁆𑀦𑀁 𑀓𑀸𑀫𑀸𑀯𑀘𑀭𑀯𑀺𑀧𑀸𑀓𑀸𑀦𑀁, 𑀪𑀯𑀗𑁆𑀕𑀯𑀲𑁂𑀦𑁂𑀯 𑀧𑀯𑀢𑁆𑀢𑀸𑀦𑀁 𑀭𑀽𑀧𑀸𑀯𑀘𑀭𑀸𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑀸𑀦𑀁, 𑀨𑀮𑀲𑀫𑀸𑀧𑀢𑁆𑀢𑀺𑀯𑀲𑁂𑀦 𑀧𑀯𑀢𑁆𑀢𑀸𑀦𑀁 𑀤𑁆𑀯𑀸𑀤𑀲𑀦𑁆𑀦𑀁 𑀮𑁄𑀓𑀼𑀢𑁆𑀢𑀭𑀯𑀺𑀧𑀸𑀓𑀸𑀦𑀦𑁆𑀢𑀺 𑀏𑀯𑀁 𑀏𑀓𑀯𑀻𑀲𑀢𑀺𑀬𑀸 𑀓𑀼𑀲𑀮𑀸𑀦𑀁; 𑀤𑁆𑀯𑀢𑁆𑀢𑀺𑀁𑀲𑀸𑀬 𑀯𑀺𑀧𑀸𑀓𑀸𑀦𑀦𑁆𑀢𑀺 𑀢𑁂𑀧𑀜𑁆𑀜𑀸𑀲𑀸𑀬 𑀘𑀺𑀢𑁆𑀢𑀸𑀦𑀁 𑀅𑀦𑀦𑁆𑀢𑀭𑀧𑀘𑁆𑀘𑀬𑁄 𑀳𑁄𑀢𑀺. 𑀢𑀣𑀸 𑀤𑀼𑀢𑀺𑀬𑀓𑀼𑀲𑀮𑀘𑀺𑀢𑁆𑀢𑀁. 𑀢𑀢𑀺𑀬𑀘𑀢𑀼𑀢𑁆𑀣𑀸𑀦𑀺 𑀧𑀦 𑀞𑀧𑁂𑀢𑁆𑀯𑀸 𑀉𑀧𑀭𑀺𑀪𑀽𑀫𑀓𑀓𑀼𑀲𑀮𑀸𑀦𑀺 𑀘 𑀮𑁄𑀓𑀼𑀢𑁆𑀢𑀭𑀯𑀺𑀧𑀸𑀓𑀸𑀦𑀺 𑀘 𑀲𑁂𑀲𑀏𑀓𑀯𑀻𑀲𑀢𑀺𑀘𑀺𑀢𑁆𑀢𑀸𑀦𑀁. 𑀧𑀜𑁆𑀘𑀫𑀙𑀝𑁆𑀞𑀸𑀦𑀺 𑀅𑀢𑁆𑀢𑀦𑁄 𑀘, 𑀦𑀯𑀦𑁆𑀦𑀜𑁆𑀘 𑀉𑀧𑀭𑀺𑀪𑀽𑀫𑀓𑀉𑀧𑁂𑀓𑁆𑀔𑀸𑀓𑀼𑀲𑀮𑀸𑀦𑀁, 𑀢𑁂𑀯𑀻𑀲𑀢𑀺𑀬𑀸 𑀘 𑀯𑀺𑀧𑀸𑀓𑀸𑀦𑀦𑁆𑀢𑀺 𑀢𑁂𑀢𑁆𑀢𑀺𑀁𑀲𑀸𑀬. 𑀲𑀢𑁆𑀢𑀫𑀅𑀝𑁆𑀞𑀫𑀸𑀦𑀺 𑀏𑀓𑀯𑀻𑀲𑀢𑀺𑀬𑀸𑀯.

𑀧𑀜𑁆𑀘 𑀭𑀽𑀧𑀸𑀯𑀘𑀭𑀓𑀼𑀲𑀮𑀸𑀦𑀺 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀧𑀘𑁆𑀙𑀺𑀫𑀸𑀦𑀁 𑀭𑀽𑀧𑀸𑀯𑀘𑀭𑀓𑀼𑀲𑀮𑀸𑀦𑀁, 𑀘𑀢𑀼𑀦𑁆𑀦𑀫𑁆𑀧𑀺 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀫𑀳𑀸𑀯𑀺𑀧𑀸𑀓𑀸𑀦𑀁, 𑀧𑀜𑁆𑀘𑀦𑁆𑀦𑀁 𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑀸𑀦𑀜𑁆𑀘𑀸𑀢𑀺 𑀤𑀲𑀦𑁆𑀦𑀁. 𑀏𑀢𑁂𑀦𑁂𑀯 𑀘 𑀦𑀬𑁂𑀦 𑀅𑀭𑀽𑀧𑀸𑀯𑀘𑀭𑀓𑀼𑀲𑀮𑁂𑀲𑀼 𑀧𑀞𑀫𑀁 𑀅𑀢𑁆𑀢𑀦𑁄 𑀯𑀺𑀧𑀸𑀓𑁂𑀦 𑀲𑀤𑁆𑀥𑀺𑀁 𑀏𑀓𑀸𑀤𑀲𑀦𑁆𑀦𑀁, 𑀤𑀼𑀢𑀺𑀬𑀁 𑀤𑁆𑀯𑀸𑀤𑀲𑀦𑁆𑀦𑀁, 𑀢𑀢𑀺𑀬𑀁 𑀢𑁂𑀭𑀲𑀦𑁆𑀦𑀁, 𑀘𑀢𑀼𑀢𑁆𑀣𑀁 𑀘𑀼𑀤𑁆𑀤𑀲𑀦𑁆𑀦𑀁 𑀨𑀮𑀲𑀫𑀸𑀧𑀢𑁆𑀢𑀺𑀬𑀸 𑀘𑀸𑀢𑀺 𑀧𑀦𑁆𑀦𑀭𑀲𑀦𑁆𑀦𑀁 𑀮𑁄𑀓𑀼𑀢𑁆𑀢𑀭𑀓𑀼𑀲𑀮𑀁 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀯𑀺𑀧𑀸𑀓𑀲𑁆𑀲𑁂𑀯. 𑀅𑀝𑁆𑀞𑀲𑀼 𑀮𑁄𑀪𑀲𑀳𑀕𑀢𑁂𑀲𑀼 𑀏𑀓𑁂𑀓𑀁 𑀅𑀓𑀼𑀲𑀮𑀁 𑀏𑀓𑀸𑀤𑀲𑀦𑁆𑀦𑀁 𑀓𑀸𑀫𑀸𑀯𑀘𑀭𑀯𑀺𑀧𑀸𑀓𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀽𑀦𑀁 𑀦𑀯𑀦𑁆𑀦𑀁, 𑀫𑀳𑀕𑁆𑀕𑀢𑀯𑀺𑀧𑀸𑀓𑀸𑀦𑀁 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀧𑀘𑁆𑀙𑀺𑀫𑀲𑁆𑀲 𑀘𑀸𑀢𑀺 𑀏𑀓𑀯𑀻𑀲𑀢𑀺𑀬𑀸. 𑀤𑁆𑀯𑁂 𑀤𑁄𑀫𑀦𑀲𑁆𑀲𑀲𑀳𑀕𑀢𑀸𑀦𑀺 𑀉𑀧𑁂𑀓𑁆𑀔𑀸𑀲𑀳𑀕𑀢𑀸𑀦𑀁 𑀙𑀦𑁆𑀦𑀁 𑀓𑀸𑀫𑀸𑀯𑀘𑀭𑀯𑀺𑀧𑀸𑀓𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀽𑀦𑀁 𑀅𑀢𑁆𑀢𑀦𑁄 𑀧𑀘𑁆𑀙𑀺𑀫𑀲𑁆𑀲 𑀘𑀸𑀢𑀺 𑀲𑀢𑁆𑀢𑀦𑁆𑀦𑀁. 𑀯𑀺𑀘𑀺𑀓𑀺𑀘𑁆𑀙𑀼𑀤𑁆𑀥𑀘𑁆𑀘𑀲𑀳𑀕𑀢𑀤𑁆𑀯𑀬𑀁 𑀲𑁄𑀫𑀦𑀲𑁆𑀲𑀲𑀳𑀕𑀢𑀸𑀳𑁂𑀢𑀼𑀓𑀯𑀺𑀧𑀸𑀓𑁂𑀦 𑀲𑀤𑁆𑀥𑀺𑀁 𑀏𑀓𑀸𑀤𑀲𑀦𑁆𑀦𑀁 𑀓𑀸𑀫𑀸𑀯𑀘𑀭𑀯𑀺𑀧𑀸𑀓𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀽𑀦𑀁 𑀦𑀯𑀦𑁆𑀦𑀁 𑀭𑀽𑀧𑀸𑀯𑀘𑀭𑀸𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑀸𑀦𑀁 𑀅𑀢𑁆𑀢𑀦𑁄 𑀧𑀘𑁆𑀙𑀺𑀫𑀲𑁆𑀲 𑀘𑀸𑀢𑀺 𑀏𑀓𑀯𑀻𑀲𑀢𑀺𑀬𑀸.

𑀓𑀼𑀲𑀮𑀯𑀺𑀧𑀸𑀓𑀧𑀜𑁆𑀘𑀯𑀺𑀜𑁆𑀜𑀸𑀡𑀸 𑀓𑀼𑀲𑀮𑀯𑀺𑀧𑀸𑀓𑀫𑀦𑁄𑀥𑀸𑀢𑀼𑀬𑀸, 𑀫𑀦𑁄𑀥𑀸𑀢𑀼 𑀤𑁆𑀯𑀺𑀦𑁆𑀦𑀁 𑀯𑀺𑀧𑀸𑀓𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀽𑀦𑀁. 𑀢𑀸𑀲𑀼 𑀤𑁆𑀯𑀻𑀲𑀼 𑀲𑁄𑀫𑀦𑀲𑁆𑀲𑀲𑀳𑀕𑀢𑀸 𑀤𑀲𑀦𑁆𑀦𑀁 𑀯𑀺𑀧𑀸𑀓𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀽𑀦𑀁 𑀪𑀯𑀗𑁆𑀕𑀪𑀽𑀢𑀸𑀦𑀁 𑀢𑀤𑀸𑀭𑀫𑁆𑀫𑀡𑀓𑀸𑀮𑁂 𑀅𑀢𑁆𑀢𑀦𑁄 𑀧𑀘𑁆𑀙𑀺𑀫𑀲𑁆𑀲 𑀯𑁄𑀝𑁆𑀞𑀩𑁆𑀩𑀦𑀓𑀺𑀭𑀺𑀬𑀲𑁆𑀲 𑀘𑀸𑀢𑀺 𑀤𑁆𑀯𑀸𑀤𑀲𑀦𑁆𑀦𑀁. 𑀉𑀧𑁂𑀓𑁆𑀔𑀸𑀲𑀳𑀕𑀢𑀸𑀳𑁂𑀢𑀼𑀓𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀧𑀦 𑀆𑀯𑀚𑁆𑀚𑀦𑀫𑀦𑁄𑀥𑀸𑀢𑀼𑀬𑀸 𑀤𑁆𑀯𑀺𑀝𑁆𑀞𑀸𑀦𑀺𑀓𑀸𑀬 𑀆𑀯𑀚𑁆𑀚𑀦𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸 𑀤𑀲𑀦𑁆𑀦𑀜𑁆𑀘 𑀯𑀺𑀧𑀸𑀓𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀽𑀦𑀦𑁆𑀢𑀺 𑀤𑁆𑀯𑀸𑀤𑀲𑀦𑁆𑀦𑀫𑁂𑀯. 𑀢𑀺𑀳𑁂𑀢𑀼𑀓𑀫𑀳𑀸𑀯𑀺𑀧𑀸𑀓𑀸 𑀲𑁄𑀫𑀦𑀲𑁆𑀲𑀲𑀳𑀕𑀢𑀸𑀳𑁂𑀢𑀼𑀓𑀯𑀚𑁆𑀚𑀸𑀦𑀁 𑀤𑀲𑀦𑁆𑀦𑀫𑁆𑀧𑀺 𑀓𑀸𑀫𑀸𑀯𑀘𑀭𑀯𑀺𑀧𑀸𑀓𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀽𑀦𑀁 𑀭𑀽𑀧𑀸𑀯𑀘𑀭𑀸𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑀸𑀦𑀁 𑀆𑀯𑀚𑁆𑀚𑀦𑀤𑁆𑀯𑀬𑀲𑁆𑀲 𑀘𑀸𑀢𑀺 𑀏𑀓𑀯𑀻𑀲𑀢𑀺𑀬𑀸, 𑀤𑀼𑀳𑁂𑀢𑀼𑀓𑀯𑀺𑀧𑀸𑀓𑀸 𑀞𑀧𑁂𑀢𑁆𑀯𑀸 𑀫𑀳𑀕𑁆𑀕𑀢𑀯𑀺𑀧𑀸𑀓𑁂 𑀲𑁂𑀲𑀸𑀦𑀁 𑀤𑁆𑀯𑀸𑀤𑀲𑀦𑁆𑀦𑀁. 𑀧𑀜𑁆𑀘 𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑀸 𑀢𑁂𑀪𑀽𑀫𑀓𑀓𑀼𑀲𑀮𑀯𑀺𑀧𑀸𑀓𑀲𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀸𑀦𑀁 𑀲𑀢𑁆𑀢𑀭𑀲𑀦𑁆𑀦𑀁 𑀆𑀯𑀚𑁆𑀚𑀦𑀤𑁆𑀯𑀬𑀲𑁆𑀲 𑀘𑀸𑀢𑀺 𑀏𑀓𑀽𑀦𑀯𑀻𑀲𑀢𑀺𑀬𑀸. 𑀅𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑁂𑀲𑀼 𑀧𑀞𑀫𑀁 𑀓𑀸𑀫𑀸𑀯𑀘𑀭𑀓𑀼𑀲𑀮𑀯𑀺𑀧𑀸𑀓𑀢𑀺𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀸𑀦𑀁, 𑀘𑀢𑀼𑀦𑁆𑀦𑀁 𑀅𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑀘𑀺𑀢𑁆𑀢𑀸𑀦𑀁 𑀘𑀢𑀼𑀦𑁆𑀦𑀁 𑀫𑀦𑁄𑀤𑁆𑀯𑀸𑀭𑀸𑀯𑀚𑁆𑀚𑀦𑀲𑁆𑀲 𑀘𑀸𑀢𑀺 𑀦𑀯𑀦𑁆𑀦𑀁. 𑀤𑀼𑀢𑀺𑀬𑀁 𑀳𑁂𑀝𑁆𑀞𑀺𑀫𑀯𑀺𑀧𑀸𑀓𑀁 𑀯𑀚𑁆𑀚𑁂𑀢𑁆𑀯𑀸 𑀅𑀝𑁆𑀞𑀦𑁆𑀦𑀁, 𑀢𑀢𑀺𑀬𑀁 𑀤𑁆𑀯𑁂 𑀳𑁂𑀝𑁆𑀞𑀺𑀫𑀸𑀦𑀺 𑀯𑀚𑁆𑀚𑁂𑀢𑁆𑀯𑀸 𑀲𑀢𑁆𑀢𑀦𑁆𑀦𑀁, 𑀘𑀢𑀼𑀢𑁆𑀣𑀁 𑀢𑀻𑀡𑀺 𑀳𑁂𑀝𑁆𑀞𑀺𑀫𑀸𑀦𑀺 𑀯𑀚𑁆𑀚𑁂𑀢𑁆𑀯𑀸 𑀙𑀦𑁆𑀦𑀁 𑀘𑀢𑁆𑀢𑀸𑀭𑀺 𑀮𑁄𑀓𑀼𑀢𑁆𑀢𑀭𑀯𑀺𑀧𑀸𑀓𑀸𑀦𑀺 𑀢𑀺𑀳𑁂𑀢𑀼𑀓𑀯𑀺𑀧𑀸𑀓𑀸𑀦𑀁 𑀢𑁂𑀭𑀲𑀦𑁆𑀦𑀁 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀧𑀘𑁆𑀙𑀺𑀫𑀲𑁆𑀲 𑀘𑀸𑀢𑀺 𑀘𑀼𑀤𑁆𑀤𑀲𑀦𑁆𑀦𑀁.

𑀅𑀓𑀼𑀲𑀮𑀯𑀺𑀧𑀸𑀓𑀧𑀜𑁆𑀘𑀯𑀺𑀜𑁆𑀜𑀸𑀡𑀸 𑀅𑀓𑀼𑀲𑀮𑀯𑀺𑀧𑀸𑀓𑀫𑀦𑁄𑀥𑀸𑀢𑀼𑀬𑀸, 𑀫𑀦𑁄𑀥𑀸𑀢𑀼 𑀅𑀓𑀼𑀲𑀮𑀯𑀺𑀧𑀸𑀓𑀸𑀳𑁂𑀢𑀼𑀓𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸. 𑀲𑀸 𑀢𑀤𑀸𑀭𑀫𑁆𑀫𑀡𑀓𑀸𑀮𑁂 𑀅𑀢𑁆𑀢𑀦𑁄 𑀧𑀘𑁆𑀙𑀺𑀫𑀲𑁆𑀲 𑀘𑀼𑀢𑀺𑀓𑀸𑀮𑁂 𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀪𑀯𑀗𑁆𑀕𑀯𑀲𑁂𑀦 𑀘 𑀧𑀯𑀢𑁆𑀢𑀸𑀦𑀁 𑀇𑀢𑀭𑁂𑀲𑀫𑁆𑀧𑀺 𑀦𑀯𑀦𑁆𑀦𑀁 𑀓𑀸𑀫𑀸𑀯𑀘𑀭𑀯𑀺𑀧𑀸𑀓𑀸𑀦𑀁 𑀉𑀧𑁂𑀓𑁆𑀔𑀸𑀲𑀳𑀕𑀢𑀸𑀦𑀁 𑀤𑁆𑀯𑀺𑀦𑁆𑀦𑀁 𑀧𑀭𑀺𑀢𑁆𑀢𑀓𑀺𑀭𑀺𑀬𑀸𑀦𑀜𑁆𑀘𑀸𑀢𑀺 𑀤𑁆𑀯𑀸𑀤𑀲𑀦𑁆𑀦𑀁. 𑀓𑀺𑀭𑀺𑀬𑀫𑀦𑁄𑀥𑀸𑀢𑀼 𑀤𑀲𑀦𑁆𑀦𑀁 𑀯𑀺𑀜𑁆𑀜𑀸𑀡𑀸𑀦𑀁 𑀳𑀲𑀺𑀢𑀼𑀧𑁆𑀧𑀸𑀤𑀓𑀺𑀭𑀺𑀬𑀸 𑀧𑀜𑁆𑀘𑀯𑁄𑀓𑀸𑀭𑁂 𑀪𑀯𑀗𑁆𑀕𑀯𑀲𑁂𑀦 𑀧𑀯𑀢𑁆𑀢𑀸𑀦𑀁 𑀦𑀯𑀦𑁆𑀦𑀁 𑀢𑀺𑀳𑁂𑀢𑀼𑀓𑀯𑀺𑀧𑀸𑀓𑀸𑀦𑀁, 𑀢𑀤𑀸𑀭𑀫𑁆𑀫𑀡𑀯𑀲𑁂𑀦 𑀧𑀯𑀢𑁆𑀢𑀸𑀦𑀁 𑀧𑀜𑁆𑀘𑀦𑁆𑀦𑀁 𑀲𑁄𑀫𑀦𑀲𑁆𑀲𑀲𑀳𑀕𑀢𑀯𑀺𑀧𑀸𑀓𑀸𑀦𑀁 𑀅𑀢𑁆𑀢𑀦𑁄 𑀧𑀘𑁆𑀙𑀺𑀫𑀲𑁆𑀲 𑀘𑀸𑀢𑀺 𑀅𑀕𑁆𑀕𑀳𑀺𑀢𑀕𑁆𑀕𑀳𑀡𑁂𑀦 𑀢𑁂𑀭𑀲𑀦𑁆𑀦𑀁. 𑀯𑁄𑀝𑁆𑀞𑀩𑁆𑀩𑀦𑀓𑀺𑀭𑀺𑀬𑀸 𑀞𑀧𑁂𑀢𑁆𑀯𑀸 𑀓𑀺𑀭𑀺𑀬𑀫𑀦𑁄𑀥𑀸𑀢𑀼𑀁 𑀤𑀲𑀦𑁆𑀦𑀁 𑀓𑀸𑀫𑀸𑀯𑀘𑀭𑀓𑀺𑀭𑀺𑀬𑀸𑀦𑀁, 𑀓𑀸𑀫𑀸𑀯𑀘𑀭𑀓𑀼𑀲𑀮𑀸𑀓𑀼𑀲𑀮𑀸𑀦𑀁 𑀧𑀜𑁆𑀘𑀯𑁄𑀓𑀸𑀭𑁂 𑀪𑀯𑀗𑁆𑀕𑀯𑀲𑁂𑀦 𑀧𑀯𑀢𑁆𑀢𑀸𑀦𑀁 𑀧𑀦𑁆𑀦𑀭𑀲𑀦𑁆𑀦𑀁 𑀯𑀺𑀧𑀸𑀓𑀘𑀺𑀢𑁆𑀢𑀸𑀦𑀜𑁆𑀘𑀸𑀢𑀺 𑀧𑀜𑁆𑀘𑀘𑀢𑁆𑀢𑀸𑀮𑀻𑀲𑀸𑀬.

𑀓𑀸𑀫𑀸𑀯𑀘𑀭𑀢𑀺𑀳𑁂𑀢𑀼𑀓𑀲𑁄𑀫𑀦𑀲𑁆𑀲𑀲𑀳𑀕𑀢𑀓𑀺𑀭𑀺𑀬𑀤𑁆𑀯𑀬𑀁 𑀪𑀯𑀗𑁆𑀕𑀯𑀲𑁂𑀦 𑀧𑀯𑀢𑁆𑀢𑀸𑀦𑀁 𑀢𑁂𑀭𑀲𑀦𑁆𑀦𑀁 𑀢𑀺𑀳𑁂𑀢𑀼𑀓𑀯𑀺𑀧𑀸𑀓𑀸𑀦𑀁 𑀢𑀤𑀸𑀭𑀫𑁆𑀫𑀡𑀯𑀲𑁂𑀦 𑀧𑀜𑁆𑀘𑀦𑁆𑀦𑀁 𑀲𑁄𑀫𑀦𑀲𑁆𑀲𑀲𑀳𑀕𑀢𑀯𑀺𑀧𑀸𑀓𑀸𑀦𑀁 𑀧𑀭𑀺𑀓𑀫𑁆𑀫𑀯𑀲𑁂𑀦 𑀧𑀯𑀢𑁆𑀢𑀫𑀸𑀦𑀸𑀦𑀁 𑀘𑀢𑀼𑀦𑁆𑀦𑀁 𑀭𑀽𑀧𑀸𑀯𑀘𑀭𑀓𑀺𑀭𑀺𑀬𑀸𑀦𑀁 𑀅𑀭𑀳𑀢𑁆𑀢𑀨𑀮𑀲𑀫𑀸𑀧𑀢𑁆𑀢𑀺𑀬𑀸 𑀅𑀢𑁆𑀢𑀦𑁄 𑀧𑀘𑁆𑀙𑀺𑀫𑀲𑁆𑀲 𑀘𑀸𑀢𑀺 𑀅𑀕𑁆𑀕𑀳𑀺𑀢𑀕𑁆𑀕𑀳𑀡𑁂𑀦 𑀤𑁆𑀯𑀸𑀯𑀻𑀲𑀢𑀺𑀬𑀸 𑀤𑀼𑀳𑁂𑀢𑀼𑀓𑀲𑁄𑀫𑀦𑀲𑁆𑀲𑀲𑀳𑀕𑀢𑀓𑀺𑀭𑀺𑀬𑀤𑁆𑀯𑀬𑀁 𑀬𑀣𑀸𑀯𑀼𑀢𑁆𑀢𑀸𑀦𑀁 𑀢𑁂𑀭𑀲𑀦𑁆𑀦𑀁 𑀪𑀯𑀗𑁆𑀕𑀘𑀺𑀢𑁆𑀢𑀸𑀦𑀁 𑀧𑀜𑁆𑀘𑀦𑁆𑀦𑀁 𑀢𑀤𑀸𑀭𑀫𑁆𑀫𑀡𑀸𑀦𑀁 𑀅𑀢𑁆𑀢𑀦𑁄 𑀧𑀘𑁆𑀙𑀺𑀫𑀲𑁆𑀲 𑀘𑀸𑀢𑀺 𑀅𑀕𑁆𑀕𑀳𑀺𑀢𑀕𑁆𑀕𑀳𑀡𑁂𑀦 𑀲𑀢𑁆𑀢𑀭𑀲𑀦𑁆𑀦𑀁. 𑀓𑀸𑀫𑀸𑀯𑀘𑀭𑀢𑀺𑀳𑁂𑀢𑀼𑀓𑀉𑀧𑁂𑀓𑁆𑀔𑀸𑀲𑀳𑀕𑀢𑀓𑀺𑀭𑀺𑀬𑀤𑁆𑀯𑀬𑀁 𑀢𑁂𑀲𑀁𑀬𑁂𑀯 𑀢𑁂𑀭𑀲𑀦𑁆𑀦𑀁 𑀪𑀯𑀗𑁆𑀕𑀸𑀦𑀁, 𑀢𑀤𑀸𑀭𑀫𑁆𑀫𑀡𑀯𑀲𑁂𑀦 𑀧𑀯𑀢𑁆𑀢𑀸𑀦𑀁 𑀙𑀦𑁆𑀦𑀁 𑀉𑀧𑁂𑀓𑁆𑀔𑀸𑀲𑀳𑀕𑀢𑀯𑀺𑀧𑀸𑀓𑀸𑀦𑀁, 𑀧𑀭𑀺𑀓𑀫𑁆𑀫𑀯𑀲𑁂𑀦 𑀧𑀯𑀢𑁆𑀢𑀸𑀦𑀁 𑀏𑀓𑀺𑀲𑁆𑀲𑀸 𑀭𑀽𑀧𑀸𑀯𑀘𑀭𑀓𑀺𑀭𑀺𑀬𑀸𑀬 𑀘𑀢𑀼𑀦𑁆𑀦𑀁 𑀅𑀭𑀽𑀧𑀸𑀯𑀘𑀭𑀓𑀺𑀭𑀺𑀬𑀸𑀦𑀁 𑀅𑀭𑀳𑀢𑁆𑀢𑀨𑀮𑀲𑀫𑀸𑀧𑀢𑁆𑀢𑀺𑀬𑀸 𑀅𑀢𑁆𑀢𑀦𑁄 𑀧𑀘𑁆𑀙𑀺𑀫𑀲𑁆𑀲 𑀘𑀸𑀢𑀺 𑀅𑀕𑁆𑀕𑀳𑀺𑀢𑀕𑁆𑀕𑀳𑀡𑁂𑀦 𑀘𑀢𑀼𑀯𑀻𑀲𑀢𑀺𑀬𑀸. 𑀤𑀼𑀳𑁂𑀢𑀼𑀓𑀉𑀧𑁂𑀓𑁆𑀔𑀸𑀲𑀳𑀕𑀢𑀓𑀺𑀭𑀺𑀬𑀤𑁆𑀯𑀬𑀁 𑀢𑁂𑀲𑀁𑀬𑁂𑀯 𑀢𑁂𑀭𑀲𑀦𑁆𑀦𑀁 𑀪𑀯𑀗𑁆𑀕𑀸𑀦𑀁 𑀙𑀦𑁆𑀦𑀁 𑀢𑀤𑀸𑀭𑀫𑁆𑀫𑀡𑀸𑀦𑀁 𑀅𑀢𑁆𑀢𑀦𑁄 𑀧𑀘𑁆𑀙𑀺𑀫𑀲𑁆𑀲 𑀘𑀸𑀢𑀺 𑀅𑀕𑁆𑀕𑀳𑀺𑀢𑀕𑁆𑀕𑀳𑀡𑁂𑀦 𑀅𑀝𑁆𑀞𑀸𑀭𑀲𑀦𑁆𑀦𑀁. 𑀭𑀽𑀧𑀸𑀯𑀘𑀭𑀓𑀺𑀭𑀺𑀬𑁂𑀲𑀼 𑀏𑀓𑁂𑀓𑀁 𑀦𑀯𑀦𑁆𑀦𑀁 𑀧𑀜𑁆𑀘𑀯𑁄𑀓𑀸𑀭𑁂 𑀢𑀺𑀳𑁂𑀢𑀼𑀓𑀪𑀯𑀗𑁆𑀕𑀸𑀦𑀁 𑀅𑀢𑁆𑀢𑀦𑁄 𑀧𑀘𑁆𑀙𑀺𑀫𑀲𑁆𑀲 𑀘𑀸𑀢𑀺 𑀤𑀲𑀦𑁆𑀦𑀁. 𑀅𑀭𑀽𑀧𑀸𑀯𑀘𑀭𑀓𑀺𑀭𑀺𑀬𑁂𑀲𑀼 𑀧𑀞𑀫𑀁 𑀧𑀜𑁆𑀘𑀯𑁄𑀓𑀸𑀭𑁂 𑀦𑀯𑀦𑁆𑀦𑀁 𑀪𑀯𑀗𑁆𑀕𑀸𑀦𑀁, 𑀘𑀢𑀼𑀯𑁄𑀓𑀸𑀭𑁂 𑀏𑀓𑀲𑁆𑀲 𑀅𑀢𑁆𑀢𑀦𑁄 𑀧𑀘𑁆𑀙𑀺𑀫𑀲𑁆𑀲 𑀘𑀸𑀢𑀺 𑀏𑀓𑀸𑀤𑀲𑀦𑁆𑀦𑀁. 𑀤𑀼𑀢𑀺𑀬𑀁 𑀘𑀢𑀼𑀯𑁄𑀓𑀸𑀭𑁂 𑀤𑁆𑀯𑁂 𑀪𑀯𑀗𑁆𑀕𑀸𑀦𑀺 𑀮𑀪𑀢𑀺. 𑀢𑀢𑀺𑀬𑀁 𑀢𑀻𑀡𑀺, 𑀘𑀢𑀼𑀢𑁆𑀣𑀁 𑀘𑀢𑁆𑀢𑀸𑀭𑀺 𑀨𑀮𑀲𑀫𑀸𑀧𑀢𑁆𑀢𑀺𑀜𑁆𑀘𑀸𑀢𑀺 𑀢𑁂𑀲𑀼 𑀏𑀓𑁂𑀓𑀁 𑀬𑀣𑀸𑀧𑀝𑀺𑀧𑀸𑀝𑀺𑀬𑀸 𑀏𑀓𑀸𑀤𑀲𑀦𑁆𑀦𑀁 𑀤𑁆𑀯𑀸𑀤𑀲𑀦𑁆𑀦𑀁 𑀢𑁂𑀭𑀲𑀦𑁆𑀦𑀁 𑀧𑀜𑁆𑀘𑀤𑀲𑀦𑁆𑀦𑀜𑁆𑀘 𑀅𑀦𑀦𑁆𑀢𑀭𑀧𑀘𑁆𑀘𑀬𑁄 𑀳𑁄𑀢𑀺. 𑀏𑀯𑀁 𑀩𑀳𑀼𑀯𑀺𑀥𑁂𑀦𑀸𑀧𑀺 𑀦𑀺𑀤𑁆𑀤𑁂𑀲𑀁 𑀮𑀪𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋

‘‘𑀤𑀲𑀥𑀸 𑀲𑀢𑁆𑀢𑀭𑀲𑀥𑀸, 𑀲𑀫𑀲𑀝𑁆𑀞𑀺𑀯𑀺𑀥𑁂𑀦 𑀘;

𑀩𑀳𑀼𑀥𑀸𑀧𑀺 𑀘 𑀦𑀺𑀤𑁆𑀤𑁂𑀲𑀁, 𑀲𑀸𑀥𑀼𑀓𑀁 𑀉𑀧𑀮𑀓𑁆𑀔𑀬𑁂’’𑀢𑀺.

𑀲𑀫𑀦𑀦𑁆𑀢𑀭𑀧𑀘𑁆𑀘𑀬𑀸𑀤𑀬𑁄 𑀉𑀢𑁆𑀢𑀸𑀦𑀢𑁆𑀣𑀸𑀬𑁂𑀯.

𑁪𑁨𑁩. 𑀉𑀧𑀦𑀺𑀲𑁆𑀲𑀬𑁂 𑀲𑀤𑁆𑀥𑀁 𑀉𑀧𑀦𑀺𑀲𑁆𑀲𑀸𑀬𑀸𑀢𑀺 𑀓𑀫𑁆𑀫𑀓𑀫𑁆𑀫𑀨𑀮𑀇𑀥𑀮𑁄𑀓𑀧𑀭𑀮𑁄𑀓𑀸𑀤𑀻𑀲𑀼 𑀲𑀤𑁆𑀥𑀁 𑀉𑀧𑀦𑀺𑀲𑁆𑀲𑀬𑀁 𑀓𑀢𑁆𑀯𑀸. 𑀬𑀣𑀸 𑀳𑀺 𑀧𑀼𑀭𑀺𑀲𑁄 𑀳𑁂𑀝𑁆𑀞𑀸𑀧𑀣𑀯𑀺𑀬𑀁 𑀉𑀤𑀓𑀁 𑀅𑀢𑁆𑀣𑀻𑀢𑀺 𑀲𑀤𑁆𑀤𑀳𑀺𑀢𑁆𑀯𑀸 𑀧𑀣𑀯𑀺𑀁 𑀔𑀦𑀢𑀺, 𑀏𑀯𑀁 𑀲𑀤𑁆𑀥𑁄 𑀓𑀼𑀮𑀧𑀼𑀢𑁆𑀢𑁄 𑀤𑀸𑀦𑀸𑀤𑀻𑀦𑀁 𑀨𑀮𑀜𑁆𑀘 𑀆𑀦𑀺𑀲𑀁𑀲𑀜𑁆𑀘 𑀲𑀤𑁆𑀤𑀳𑀺𑀢𑁆𑀯𑀸 𑀤𑀸𑀦𑀸𑀤𑀻𑀦𑀺 𑀧𑀯𑀢𑁆𑀢𑁂𑀢𑀺. 𑀢𑀲𑁆𑀫𑀸 ‘‘𑀲𑀤𑁆𑀥𑀁 𑀉𑀧𑀦𑀺𑀲𑁆𑀲𑀸𑀬𑀸’’𑀢𑀺 𑀯𑀼𑀢𑁆𑀢𑀁.

𑀲𑀻𑀮𑀁 𑀉𑀧𑀦𑀺𑀲𑁆𑀲𑀸𑀬𑀸𑀢𑀺𑀆𑀤𑀻𑀲𑀼𑀧𑀺 𑀇𑀫𑁂 𑀲𑀻𑀮𑀸𑀤𑀬𑁄 𑀥𑀫𑁆𑀫𑁂 𑀉𑀧𑀦𑀺𑀲𑁆𑀲𑀬𑀁 𑀓𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀲𑀻𑀮𑀯𑀸 𑀳𑀺 𑀲𑀻𑀮𑀸𑀦𑀼𑀪𑀸𑀯𑁂𑀲𑀼 𑀲𑀻𑀮𑀸𑀦𑀺𑀲𑀁𑀲𑁂𑀲𑀼 𑀘 𑀓𑀼𑀲𑀮𑁄 𑀲𑀻𑀮𑀁 𑀉𑀧𑀦𑀺𑀲𑁆𑀲𑀸𑀬 𑀲𑀻𑀮𑀯𑀦𑁆𑀢𑀸𑀦𑀁 𑀤𑀸𑀦𑀁 𑀤𑁂𑀢𑀺, 𑀉𑀧𑀭𑀽𑀧𑀭𑀺 𑀲𑀻𑀮𑀁 𑀲𑀫𑀸𑀤𑀺𑀬𑀢𑀺 𑀲𑀼𑀧𑀭𑀺𑀲𑀼𑀤𑁆𑀥𑀁 𑀅𑀔𑀡𑁆𑀟𑀁, 𑀘𑀸𑀢𑀼𑀤𑁆𑀤𑀲𑀻𑀆𑀤𑀻𑀲𑀼 𑀧𑀓𑁆𑀔𑀤𑀺𑀯𑀲𑁂𑀲𑀼 𑀉𑀧𑁄𑀲𑀣𑀓𑀫𑁆𑀫𑀁 𑀓𑀭𑁄𑀢𑀺, 𑀲𑀻𑀮𑀲𑀫𑁆𑀧𑀤𑀁 𑀦𑀺𑀲𑁆𑀲𑀸𑀬 𑀛𑀸𑀦𑀸𑀤𑀻𑀦𑀺 𑀉𑀧𑁆𑀧𑀸𑀤𑁂𑀢𑀺. 𑀩𑀳𑀼𑀲𑁆𑀲𑀼𑀢𑁄𑀧𑀺 𑀤𑀸𑀦𑀸𑀤𑀺𑀧𑀼𑀜𑁆𑀜𑀓𑀺𑀭𑀺𑀬𑀸𑀬𑀢𑁆𑀢𑀸 𑀲𑀩𑁆𑀩𑀲𑀫𑁆𑀧𑀢𑁆𑀢𑀺𑀬𑁄 𑀤𑀸𑀦𑀸𑀤𑀻𑀦𑀜𑁆𑀘 𑀲𑀗𑁆𑀓𑀺𑀮𑁂𑀲𑀯𑁄𑀤𑀸𑀦𑀸𑀤𑀺𑀪𑁂𑀤𑀁 𑀲𑀼𑀢𑀫𑀬𑀸𑀬 𑀧𑀜𑁆𑀜𑀸𑀬 𑀧𑀝𑀺𑀯𑀺𑀚𑁆𑀛𑀺𑀢𑁆𑀯𑀸 𑀞𑀺𑀢𑁄 𑀲𑀼𑀢𑀁 𑀉𑀧𑀦𑀺𑀲𑁆𑀲𑀸𑀬 𑀤𑀸𑀦𑀸𑀤𑀻𑀦𑀺 𑀧𑀯𑀢𑁆𑀢𑁂𑀢𑀺. 𑀘𑀸𑀕𑀯𑀸𑀧𑀺 𑀘𑀸𑀕𑀸𑀥𑀺𑀫𑀼𑀢𑁆𑀢𑁄 𑀅𑀢𑁆𑀢𑀦𑁄 𑀘𑀸𑀕𑀲𑀫𑁆𑀧𑀤𑀁 𑀉𑀧𑀦𑀺𑀲𑁆𑀲𑀸𑀬 𑀤𑀸𑀦𑀁 𑀤𑁂𑀢𑀺, 𑀲𑀻𑀮𑀯𑀦𑁆𑀢𑁄 𑀳𑀼𑀢𑁆𑀯𑀸 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮𑀦𑁆𑀢𑀺 𑀲𑀻𑀮𑀁 𑀲𑀫𑀸𑀤𑀺𑀬𑀢𑀺, 𑀉𑀧𑁄𑀲𑀣𑀓𑀫𑁆𑀫𑀁 𑀓𑀭𑁄𑀢𑀺, 𑀢𑀸𑀬 𑀧𑀝𑀺𑀧𑀢𑁆𑀢𑀺𑀬𑀸 𑀧𑀭𑀺𑀲𑀼𑀤𑁆𑀥𑀘𑀺𑀢𑁆𑀢𑁄 𑀛𑀸𑀦𑀸𑀤𑀻𑀦𑀺 𑀉𑀧𑁆𑀧𑀸𑀤𑁂𑀢𑀺. 𑀧𑀜𑁆𑀜𑀯𑀸𑀧𑀺 𑀇𑀥𑀮𑁄𑀓𑀧𑀭𑀮𑁄𑀓𑀳𑀺𑀢𑀜𑁆𑀘𑁂𑀯 𑀮𑁄𑀓𑀲𑀫𑀢𑀺𑀓𑁆𑀓𑀫𑀦𑀼𑀧𑀸𑀬𑀜𑁆𑀘 𑀉𑀧𑀧𑀭𑀺𑀓𑁆𑀔𑀦𑁆𑀢𑁄 ‘‘𑀲𑀓𑁆𑀓𑀸 𑀇𑀫𑀸𑀬 𑀧𑀝𑀺𑀧𑀢𑁆𑀢𑀺𑀬𑀸 𑀇𑀥𑀮𑁄𑀓𑀳𑀺𑀢𑀫𑁆𑀧𑀺 𑀧𑀭𑀮𑁄𑀓𑀳𑀺𑀢𑀫𑁆𑀧𑀺 𑀮𑁄𑀓𑀲𑀫𑀢𑀺𑀓𑁆𑀓𑀫𑀦𑀽𑀧𑀸𑀬𑀜𑁆𑀘 𑀲𑀫𑁆𑀧𑀸𑀤𑁂𑀢𑀼’’𑀦𑁆𑀢𑀺 𑀧𑀜𑁆𑀜𑀁 𑀉𑀧𑀦𑀺𑀲𑁆𑀲𑀸𑀬 𑀤𑀸𑀦𑀸𑀤𑀻𑀦𑀺 𑀧𑀯𑀢𑁆𑀢𑁂𑀢𑀺. 𑀬𑀲𑁆𑀫𑀸 𑀧𑀦 𑀦 𑀓𑁂𑀯𑀮𑀁 𑀲𑀤𑁆𑀥𑀸𑀤𑀬𑁄 𑀤𑀸𑀦𑀸𑀤𑀻𑀦𑀁𑀬𑁂𑀯 𑀉𑀧𑀦𑀺𑀲𑁆𑀲𑀬𑀸, 𑀅𑀢𑁆𑀢𑀦𑁄 𑀅𑀧𑀭𑀪𑀸𑀕𑁂 𑀉𑀧𑁆𑀧𑀚𑁆𑀚𑀫𑀸𑀦𑀸𑀦𑀁 𑀲𑀤𑁆𑀥𑀸𑀤𑀻𑀦𑀫𑁆𑀧𑀺 𑀉𑀧𑀦𑀺𑀲𑁆𑀲𑀬𑀸 𑀏𑀯, 𑀢𑀲𑁆𑀫𑀸 𑀲𑀤𑁆𑀥𑀸 𑀲𑀻𑀮𑀁 𑀲𑀼𑀢𑀁 𑀘𑀸𑀕𑁄 𑀧𑀜𑁆𑀜𑀸 𑀲𑀤𑁆𑀥𑀸𑀬 𑀲𑀻𑀮𑀲𑁆𑀲 𑀲𑀼𑀢𑀲𑁆𑀲 𑀘𑀸𑀕𑀲𑁆𑀲 𑀧𑀜𑁆𑀜𑀸𑀬𑀸𑀢𑀺 𑀯𑀼𑀢𑁆𑀢𑀁.

𑀧𑀭𑀺𑀓𑀫𑁆𑀫𑀦𑁆𑀢𑀺 𑀅𑀦𑀦𑁆𑀢𑀭𑀁 𑀅𑀕𑁆𑀕𑀳𑁂𑀢𑁆𑀯𑀸 𑀧𑀼𑀩𑁆𑀩𑀪𑀸𑀕𑁂 𑀧𑀭𑀺𑀓𑀫𑁆𑀫𑀁 𑀕𑀳𑁂𑀢𑀩𑁆𑀩𑀁. 𑀬𑀣𑀸𑀓𑀫𑁆𑀫𑀽𑀧𑀕𑀜𑀸𑀡𑀲𑁆𑀲 𑀅𑀦𑀸𑀕𑀢𑀁𑀲𑀜𑀸𑀡𑀲𑁆𑀲𑀸𑀢𑀺 𑀇𑀫𑁂𑀲𑀁 𑀤𑁆𑀯𑀺𑀦𑁆𑀦𑀁 𑀤𑀺𑀩𑁆𑀩𑀘𑀓𑁆𑀔𑀼𑀧𑀭𑀺𑀓𑀫𑁆𑀫𑀫𑁂𑀯, 𑀧𑀭𑀺𑀓𑀫𑁆𑀫𑀁 𑀯𑀺𑀲𑀼𑀁 𑀦𑀢𑁆𑀣𑀺. 𑀤𑀺𑀩𑁆𑀩𑀘𑀓𑁆𑀔𑀼𑀲𑁆𑀲𑁂𑀯 𑀧𑀭𑀺𑀪𑀡𑁆𑀟𑀜𑀸𑀡𑀸𑀦𑀺 𑀏𑀢𑀸𑀦𑀺, 𑀢𑀲𑁆𑀫𑀺𑀁 𑀇𑀚𑁆𑀛𑀫𑀸𑀦𑁂 𑀇𑀚𑁆𑀛𑀦𑁆𑀢𑀺 𑀏𑀯𑀁 𑀲𑀦𑁆𑀢𑁂𑀧𑀺 𑀢𑀤𑀥𑀺𑀫𑀼𑀢𑁆𑀢𑀢𑀸𑀬 𑀲𑀳𑀺𑀢𑀁 𑀤𑀺𑀩𑁆𑀩𑀘𑀓𑁆𑀔𑀼𑀧𑀭𑀺𑀓𑀫𑁆𑀫𑀁 𑀢𑁂𑀲𑀁 𑀧𑀭𑀺𑀓𑀫𑁆𑀫𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀦 𑀳𑀺 𑀏𑀢𑀸𑀦𑀺 𑀲𑀩𑁆𑀩𑁂𑀲𑀁 𑀤𑀺𑀩𑁆𑀩𑀘𑀓𑁆𑀔𑀼𑀓𑀸𑀦𑀁 𑀲𑀫𑀕𑀢𑀺𑀓𑀸𑀦𑀺 𑀳𑁄𑀦𑁆𑀢𑀺. 𑀢𑀲𑁆𑀫𑀸 𑀪𑀯𑀺𑀢𑀩𑁆𑀩𑀫𑁂𑀢𑁆𑀣 𑀧𑀭𑀺𑀓𑀫𑁆𑀫𑀯𑀺𑀲𑁂𑀲𑁂𑀦𑀸𑀢𑀺. 𑀤𑀺𑀩𑁆𑀩𑀘𑀓𑁆𑀔𑀼 𑀤𑀺𑀩𑁆𑀩𑀸𑀬 𑀲𑁄𑀢𑀥𑀸𑀢𑀼𑀬𑀸𑀢𑀺 𑀤𑀽𑀭𑁂 𑀭𑀽𑀧𑀸𑀦𑀺 𑀤𑀺𑀲𑁆𑀯𑀸 𑀢𑁂𑀲𑀁 𑀲𑀤𑁆𑀤𑀁 𑀲𑁄𑀢𑀼𑀓𑀸𑀫𑀲𑁆𑀲 𑀤𑀺𑀩𑁆𑀩𑀘𑀓𑁆𑀔𑀼 𑀲𑁄𑀢𑀥𑀸𑀢𑀼𑀯𑀺𑀲𑀼𑀤𑁆𑀥𑀺𑀬𑀸 𑀉𑀧𑀦𑀺𑀲𑁆𑀲𑀬𑁄 𑀳𑁄𑀢𑀺. 𑀢𑁂𑀲𑀁 𑀧𑀦 𑀲𑀤𑁆𑀤𑀁 𑀲𑀼𑀢𑁆𑀯𑀸 𑀢𑀢𑁆𑀣 𑀕𑀦𑁆𑀢𑀼𑀓𑀸𑀫𑀢𑀸𑀤𑀺𑀯𑀲𑁂𑀦 𑀤𑀺𑀩𑁆𑀩𑀲𑁄𑀢𑀥𑀸𑀢𑀼 𑀇𑀤𑁆𑀥𑀺𑀯𑀺𑀥𑀜𑀸𑀡𑀲𑁆𑀲 𑀉𑀧𑀦𑀺𑀲𑁆𑀲𑀬𑁄 𑀳𑁄𑀢𑀺. 𑀏𑀯𑀁 𑀲𑀩𑁆𑀩𑀢𑁆𑀣 𑀢𑀲𑁆𑀲 𑀢𑀲𑁆𑀲 𑀉𑀧𑀓𑀸𑀭𑀓𑀪𑀸𑀯𑀯𑀲𑁂𑀦 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑀢𑀸 𑀯𑁂𑀤𑀺𑀢𑀩𑁆𑀩𑀸.

𑀫𑀕𑁆𑀕𑀁 𑀉𑀧𑀦𑀺𑀲𑁆𑀲𑀸𑀬 𑀅𑀦𑀼𑀧𑁆𑀧𑀦𑁆𑀦𑀁 𑀲𑀫𑀸𑀧𑀢𑁆𑀢𑀺𑀦𑁆𑀢𑀺 𑀢𑁂𑀦 𑀢𑁂𑀦 𑀫𑀕𑁆𑀕𑁂𑀦 𑀲𑀺𑀣𑀺𑀮𑀻𑀓𑀢𑀧𑀸𑀭𑀺𑀧𑀦𑁆𑀣𑀓𑀢𑁆𑀢𑀸 𑀧𑀳𑀻𑀦𑀧𑀸𑀭𑀺𑀧𑀦𑁆𑀣𑀓𑀢𑁆𑀢𑀸 𑀘 𑀢𑀁 𑀢𑀁 𑀲𑀫𑀸𑀧𑀢𑁆𑀢𑀺𑀁 𑀉𑀧𑁆𑀧𑀸𑀤𑁂𑀦𑁆𑀢𑀻𑀢𑀺 𑀢𑁂𑀲𑀁 𑀫𑀕𑁆𑀕𑁄 𑀲𑀫𑀸𑀧𑀢𑁆𑀢𑀺𑀬𑀸 𑀉𑀧𑀦𑀺𑀲𑁆𑀲𑀬𑁄 𑀳𑁄𑀢𑀺. 𑀯𑀺𑀧𑀲𑁆𑀲𑀦𑁆𑀢𑀻𑀢𑀺 𑀉𑀧𑀭𑀽𑀧𑀭𑀺𑀫𑀕𑁆𑀕𑀢𑁆𑀣𑀸𑀬 𑀯𑀺𑀧𑀲𑁆𑀲𑀦𑁆𑀢𑀺. 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸𑀬𑀸𑀢𑀺𑀆𑀤𑀺 𑀧𑀝𑀺𑀲𑀫𑁆𑀪𑀺𑀤𑀸𑀦𑀁 𑀫𑀕𑁆𑀕𑀧𑀝𑀺𑀮𑀸𑀪𑁂𑀦𑁂𑀯 𑀇𑀚𑁆𑀛𑀦𑀢𑁄 𑀯𑀼𑀢𑁆𑀢𑀁. 𑀏𑀯𑀁𑀇𑀤𑁆𑀥𑀸𑀦𑀜𑁆𑀘 𑀧𑀦𑁂𑀢𑀸𑀲𑀁 𑀧𑀘𑁆𑀙𑀸 𑀢𑁂𑀲𑀼 𑀢𑁂𑀲𑀼 𑀆𑀭𑀫𑁆𑀫𑀡𑁂𑀲𑀼 𑀧𑀯𑀢𑁆𑀢𑀺𑀬𑀸 𑀫𑀕𑁆𑀕𑁄𑀯 𑀉𑀧𑀦𑀺𑀲𑁆𑀲𑀬𑁄 𑀦𑀸𑀫 𑀳𑁄𑀢𑀺.

𑀲𑀤𑁆𑀥𑀁 𑀉𑀧𑀦𑀺𑀲𑁆𑀲𑀸𑀬 𑀫𑀸𑀦𑀁 𑀚𑀧𑁆𑀧𑁂𑀢𑀻𑀢𑀺 𑀅𑀳𑀫𑀲𑁆𑀫𑀺 𑀲𑀤𑁆𑀥𑁄 𑀧𑀲𑀦𑁆𑀦𑁄𑀢𑀺 𑀫𑀸𑀦𑀁 𑀧𑀯𑀢𑁆𑀢𑁂𑀢𑀺. 𑀤𑀺𑀝𑁆𑀞𑀺𑀁 𑀕𑀡𑁆𑀳𑀸𑀢𑀻𑀢𑀺 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀯𑀘𑀦𑁂 𑀲𑀤𑁆𑀥𑀸𑀯𑀲𑁂𑀦𑁂𑀯 𑀕𑀦𑁆𑀢𑁆𑀯𑀸 𑀧𑀜𑁆𑀜𑀸𑀬 𑀅𑀢𑁆𑀣𑀁 𑀅𑀦𑀼𑀧𑀧𑀭𑀺𑀓𑁆𑀔𑀦𑁆𑀢𑁄 ‘‘𑀅𑀢𑁆𑀣𑀺 𑀧𑀼𑀕𑁆𑀕𑀮𑁄’’𑀢𑀺𑀆𑀤𑀺𑀯𑀲𑁂𑀦 𑀤𑀺𑀝𑁆𑀞𑀺𑀁 𑀕𑀡𑁆𑀳𑀸𑀢𑀺. 𑀲𑀻𑀮𑀁 𑀲𑀼𑀢𑀁 𑀘𑀸𑀕𑀁 𑀧𑀜𑁆𑀜𑀦𑁆𑀢𑀺 𑀅𑀳𑀫𑀲𑁆𑀫𑀺 𑀲𑀻𑀮𑀯𑀸 𑀲𑀼𑀢𑀯𑀸 𑀘𑀸𑀕𑀻 𑀧𑀜𑁆𑀜𑀸𑀲𑀫𑁆𑀧𑀦𑁆𑀦𑁄𑀢𑀺 𑀫𑀸𑀦𑀁 𑀚𑀧𑁆𑀧𑁂𑀢𑀺. 𑀲𑀻𑀮𑀲𑀼𑀢𑀘𑀸𑀕𑀧𑀜𑁆𑀜𑀸𑀲𑀼 𑀧𑀦 𑀫𑀸𑀦𑀫𑀜𑁆𑀜𑀦𑀁 𑀯𑀺𑀬 𑀤𑀺𑀝𑁆𑀞𑀺𑀫𑀜𑁆𑀜𑀦𑀁 𑀉𑀧𑁆𑀧𑀸𑀤𑁂𑀦𑁆𑀢𑁄 𑀤𑀺𑀝𑁆𑀞𑀺𑀁 𑀕𑀡𑁆𑀳𑀸𑀢𑀺. 𑀭𑀸𑀕𑀲𑁆𑀲𑀸𑀢𑀺𑀆𑀤𑀻𑀲𑀼 𑀲𑀤𑁆𑀥𑀸𑀤𑀺𑀲𑀫𑁆𑀧𑀤𑀁 𑀉𑀧𑀦𑀺𑀲𑁆𑀲𑀸𑀬 𑀅𑀢𑁆𑀢𑀼𑀓𑁆𑀓𑀁𑀲𑀦𑀓𑀸𑀮𑁂 𑀢𑁂𑀲𑀼 𑀏𑀓𑁂𑀓𑁄 𑀥𑀫𑁆𑀫𑁄 𑀭𑀸𑀕𑀲𑁆𑀲, 𑀧𑀭𑀯𑀫𑁆𑀪𑀦𑀓𑀸𑀮𑁂 𑀤𑁄𑀲𑀲𑁆𑀲, 𑀉𑀪𑀬𑁂𑀦 𑀲𑀫𑁆𑀧𑀬𑀼𑀢𑁆𑀢𑀲𑁆𑀲 𑀫𑁄𑀳𑀲𑁆𑀲, 𑀯𑀼𑀢𑁆𑀢𑀧𑁆𑀧𑀓𑀸𑀭𑀸𑀦𑀁 𑀫𑀸𑀦𑀤𑀺𑀝𑁆𑀞𑀻𑀦𑀁, 𑀲𑀤𑁆𑀥𑀸𑀤𑀺𑀲𑀫𑁆𑀧𑀤𑀁 𑀉𑀧𑀦𑀺𑀲𑁆𑀲𑀸𑀬 𑀪𑀯𑀪𑁄𑀕𑀲𑀫𑁆𑀧𑀢𑁆𑀢𑀺𑀧𑀢𑁆𑀣𑀦𑀸𑀬 𑀉𑀧𑀦𑀺𑀲𑁆𑀲𑀬𑁄 𑀳𑁄𑀢𑀺. 𑀏𑀯𑀫𑁂𑀢𑁆𑀣 𑀮𑁄𑀓𑀺𑀬𑀓𑀼𑀲𑀮𑀜𑁆𑀜𑁂𑀯 𑀤𑀲𑁆𑀲𑀺𑀢𑀁. 𑀮𑁄𑀓𑀼𑀢𑁆𑀢𑀭𑀁 𑀧𑀦 𑀲𑀦𑁆𑀢𑀁 𑀧𑀡𑀻𑀢𑀁 𑀉𑀢𑁆𑀢𑀫𑀁 𑀅𑀓𑀼𑀲𑀮𑀯𑀺𑀤𑁆𑀥𑀁𑀲𑀦𑀁. 𑀢𑀲𑁆𑀫𑀸 𑀘𑀦𑁆𑀤𑁄 𑀯𑀺𑀬 𑀅𑀦𑁆𑀥𑀓𑀸𑀭𑀢𑀫𑀸𑀦𑀁 𑀦 𑀅𑀓𑀼𑀲𑀮𑀲𑁆𑀲 𑀉𑀧𑀦𑀺𑀲𑁆𑀲𑀬𑁄 𑀳𑁄𑀢𑀻𑀢𑀺 𑀦 𑀕𑀳𑀺𑀢𑀁.

𑀆𑀢𑀸𑀧𑁂𑀢𑀻𑀢𑀺𑀆𑀤𑀺 𑀓𑀸𑀬𑀺𑀓𑀤𑀼𑀓𑁆𑀔𑀯𑀲𑁂𑀦 𑀅𑀩𑁆𑀬𑀸𑀓𑀢𑀥𑀫𑁆𑀫𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀲𑀤𑁆𑀥𑁄 𑀳𑀺 𑀲𑀤𑁆𑀥𑀁 𑀦𑀺𑀲𑁆𑀲𑀸𑀬 𑀅𑀢𑀺𑀲𑀻𑀢𑀁 𑀅𑀢𑀺𑀉𑀡𑁆𑀳𑀦𑁆𑀢𑀺 𑀅𑀦𑁄𑀲𑀓𑁆𑀓𑀺𑀢𑁆𑀯𑀸 𑀦𑀸𑀦𑀧𑁆𑀧𑀓𑀸𑀭𑀸𑀦𑀺 𑀦𑀯𑀓𑀫𑁆𑀫𑀯𑁂𑀬𑁆𑀬𑀸𑀯𑀘𑁆𑀘𑀸𑀤𑀻𑀦𑀺 𑀓𑀭𑁄𑀦𑁆𑀢𑁄 𑀅𑀢𑁆𑀢𑀸𑀦𑀁 𑀆𑀢𑀸𑀧𑁂𑀢𑀺 𑀧𑀭𑀺𑀢𑀸𑀧𑁂𑀢𑀺, 𑀪𑁄𑀕𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀧𑀼𑀜𑁆𑀜𑀸𑀦𑀺 𑀓𑀭𑀺𑀲𑁆𑀲𑀸𑀫𑀻𑀢𑀺 𑀧𑀭𑀺𑀬𑁂𑀝𑁆𑀞𑀺𑀫𑀽𑀮𑀓𑀁 𑀤𑀼𑀓𑁆𑀔𑀁 𑀧𑀘𑁆𑀘𑀦𑀼𑀪𑁄𑀢𑀺. 𑀲𑀻𑀮𑀯𑀸𑀧𑀺 𑀲𑀻𑀮𑀸𑀦𑀼𑀭𑀓𑁆𑀔𑀡𑀢𑁆𑀣𑀁 𑀅𑀩𑁆𑀪𑁄𑀓𑀸𑀲𑀺𑀓𑀢𑁆𑀢𑀸𑀤𑀺𑀯𑀲𑁂𑀦 𑀅𑀢𑁆𑀢𑀸𑀦𑀁 𑀆𑀢𑀸𑀧𑁂𑀢𑀺 𑀧𑀭𑀺𑀢𑀸𑀧𑁂𑀢𑀺, 𑀧𑀺𑀡𑁆𑀟𑀘𑀸𑀭𑀺𑀓𑀢𑁆𑀢𑀸𑀤𑀺𑀯𑀲𑁂𑀦 𑀧𑀭𑀺𑀬𑁂𑀝𑁆𑀞𑀺𑀫𑀽𑀮𑀓𑀁 𑀤𑀼𑀓𑁆𑀔𑀁 𑀧𑀘𑁆𑀘𑀦𑀼𑀪𑁄𑀢𑀺. 𑀲𑀼𑀢𑀯𑀸𑀧𑀺 𑀩𑀸𑀳𑀼𑀲𑁆𑀲𑀘𑁆𑀘𑀸𑀦𑀼𑀭𑀽𑀧𑀁 𑀧𑀝𑀺𑀧𑀢𑁆𑀢𑀺𑀁 𑀧𑀝𑀺𑀧𑀚𑁆𑀚𑀺𑀲𑁆𑀲𑀸𑀫𑀻𑀢𑀺 𑀯𑀼𑀢𑁆𑀢𑀦𑀬𑁂𑀦𑁂𑀯 𑀧𑀝𑀺𑀧𑀚𑁆𑀚𑀦𑁆𑀢𑁄 𑀅𑀢𑁆𑀢𑀸𑀦𑀁 𑀆𑀢𑀸𑀧𑁂𑀢𑀺 𑀧𑀭𑀺𑀢𑀸𑀧𑁂𑀢𑀺, 𑀧𑀭𑀺𑀬𑁂𑀝𑁆𑀞𑀺𑀫𑀽𑀮𑀓𑀁 𑀤𑀼𑀓𑁆𑀔𑀁 𑀧𑀘𑁆𑀘𑀦𑀼𑀪𑁄𑀢𑀺. 𑀘𑀸𑀕𑀯𑀸𑀧𑀺 𑀘𑀸𑀕𑀸𑀥𑀺𑀫𑀼𑀢𑁆𑀢𑀢𑀸𑀬 𑀅𑀢𑁆𑀢𑀦𑁄 𑀬𑀸𑀧𑀦𑀫𑀢𑁆𑀢𑁂𑀧𑀺 𑀧𑀘𑁆𑀘𑀬𑁂 𑀅𑀦𑀯𑀲𑁂𑀲𑁂𑀢𑁆𑀯𑀸 𑀧𑀭𑀺𑀘𑁆𑀘𑀚𑀦𑁆𑀢𑁄, 𑀅𑀗𑁆𑀕𑀸𑀤𑀺𑀧𑀭𑀺𑀘𑁆𑀘𑀸𑀕𑀁 𑀯𑀸 𑀧𑀦 𑀓𑀭𑁄𑀦𑁆𑀢𑁄 𑀅𑀢𑁆𑀢𑀸𑀦𑀁 𑀆𑀢𑀸𑀧𑁂𑀢𑀺 𑀧𑀭𑀺𑀢𑀸𑀧𑁂𑀢𑀺, 𑀧𑀭𑀺𑀘𑁆𑀘𑀚𑀺𑀢𑀩𑁆𑀩𑀲𑁆𑀲 𑀯𑀢𑁆𑀣𑀼𑀦𑁄 𑀉𑀧𑁆𑀧𑀸𑀤𑀦𑀢𑁆𑀣𑀁 𑀧𑀭𑀺𑀬𑁂𑀝𑁆𑀞𑀺𑀫𑀽𑀮𑀓𑀁 𑀤𑀼𑀓𑁆𑀔𑀁 𑀧𑀘𑁆𑀘𑀦𑀼𑀪𑁄𑀢𑀺. 𑀧𑀜𑁆𑀜𑀯𑀸𑀧𑀺 𑀉𑀧𑀭𑀽𑀧𑀭𑀺 𑀧𑀜𑁆𑀜𑀁 𑀯𑀟𑁆𑀠𑁂𑀲𑁆𑀲𑀸𑀫𑀻𑀢𑀺 𑀲𑀧𑁆𑀧𑀜𑁆𑀜𑀢𑀁 𑀦𑀺𑀲𑁆𑀲𑀸𑀬 𑀲𑀻𑀢𑀼𑀡𑁆𑀳𑀸𑀤𑀻𑀦𑀺 𑀅𑀕𑀡𑁂𑀢𑁆𑀯𑀸 𑀲𑀚𑁆𑀛𑀸𑀬𑀫𑀦𑀲𑀺𑀓𑀸𑀭𑁂𑀲𑀼 𑀬𑁄𑀕𑀁 𑀓𑀭𑁄𑀦𑁆𑀢𑁄 𑀅𑀢𑁆𑀢𑀸𑀦𑀁 𑀆𑀢𑀸𑀧𑁂𑀢𑀺 𑀧𑀭𑀺𑀢𑀸𑀧𑁂𑀢𑀺, 𑀫𑀺𑀘𑁆𑀙𑀸𑀚𑀻𑀯𑁂 𑀆𑀤𑀻𑀦𑀯𑀁 𑀲𑀫𑁆𑀫𑀸𑀚𑀻𑀯𑁂 𑀘 𑀆𑀦𑀺𑀲𑀁𑀲𑀁 𑀤𑀺𑀲𑁆𑀯𑀸 𑀫𑀺𑀘𑁆𑀙𑀸𑀚𑀻𑀯𑀁 𑀧𑀳𑀸𑀬 𑀧𑀭𑀺𑀲𑀼𑀤𑁆𑀥𑁂𑀦 𑀆𑀚𑀻𑀯𑁂𑀦 𑀚𑀻𑀯𑀺𑀢𑀯𑀼𑀢𑁆𑀢𑀺𑀁 𑀧𑀭𑀺𑀬𑁂𑀲𑀦𑁆𑀢𑁄 𑀧𑀭𑀺𑀬𑁂𑀝𑁆𑀞𑀺𑀫𑀽𑀮𑀓𑀁 𑀤𑀼𑀓𑁆𑀔𑀁 𑀧𑀘𑁆𑀘𑀦𑀼𑀪𑁄𑀢𑀺.

𑀓𑀸𑀬𑀺𑀓𑀲𑁆𑀲 𑀲𑀼𑀔𑀲𑁆𑀲𑀸𑀢𑀺 𑀲𑀤𑁆𑀥𑀸𑀤𑀺𑀲𑀫𑁆𑀧𑀢𑁆𑀢𑀺𑀁 𑀉𑀧𑀦𑀺𑀲𑁆𑀲𑀸𑀬 𑀉𑀧𑁆𑀧𑀦𑁆𑀦𑀸𑀦𑀺 𑀲𑀼𑀔𑁄𑀧𑀓𑀭𑀡𑀸𑀦𑀺 𑀧𑀭𑀺𑀪𑀼𑀜𑁆𑀚𑀦𑀓𑀸𑀮𑁂 𑀲𑀤𑁆𑀥𑀸𑀤𑀺𑀲𑀫𑀼𑀝𑁆𑀞𑀸𑀦𑀧𑀡𑀻𑀢𑀭𑀽𑀧𑀨𑀼𑀝𑀓𑀸𑀬𑀲𑁆𑀲 𑀘 𑀢𑁂𑀲𑀁 𑀯𑀲𑁂𑀦 𑀅𑀯𑀺𑀧𑁆𑀧𑀝𑀺𑀲𑀸𑀭𑀫𑀽𑀮𑀓𑀧𑀸𑀫𑁄𑀚𑁆𑀚𑀧𑀻𑀢𑀺𑀲𑀫𑀼𑀝𑁆𑀞𑀸𑀦𑀭𑀽𑀧𑀨𑀼𑀝𑀓𑀸𑀬𑀲𑁆𑀲 𑀘 𑀲𑀼𑀔𑀼𑀧𑁆𑀧𑀢𑁆𑀢𑀺𑀓𑀸𑀮𑁂 𑀢𑁂𑀲𑀁 𑀓𑀝𑀢𑁆𑀢𑀸 𑀉𑀧𑁆𑀧𑀦𑁆𑀦𑀯𑀺𑀧𑀸𑀓𑀲𑀼𑀔𑀓𑀸𑀮𑁂 𑀘 𑀓𑀸𑀬𑀺𑀓𑀲𑁆𑀲 𑀲𑀼𑀔𑀲𑁆𑀲, 𑀯𑀼𑀢𑁆𑀢𑀦𑀬𑁂𑀦𑁂𑀯 𑀤𑀼𑀓𑁆𑀔𑀼𑀧𑁆𑀧𑀢𑁆𑀢𑀺𑀓𑀸𑀮𑁂 𑀲𑀤𑁆𑀥𑀸𑀤𑀺𑀕𑀼𑀡𑀲𑀫𑁆𑀧𑀢𑁆𑀢𑀺𑀁 𑀅𑀲𑀳𑀫𑀸𑀦𑁂𑀳𑀺 𑀧𑀬𑀼𑀢𑁆𑀢𑀯𑀥𑀩𑀦𑁆𑀥𑀦𑀸𑀤𑀺𑀓𑀸𑀮𑁂 𑀘 𑀓𑀸𑀬𑀺𑀓𑀲𑁆𑀲 𑀤𑀼𑀓𑁆𑀔𑀲𑁆𑀲, 𑀲𑀤𑁆𑀥𑀸𑀤𑀬𑁄 𑀉𑀧𑀦𑀺𑀲𑁆𑀲𑀸𑀬 𑀧𑀯𑀢𑁆𑀢𑀺𑀢𑀨𑀮𑀲𑀫𑀸𑀧𑀢𑁆𑀢𑀺𑀓𑀸𑀮𑁂 𑀧𑀦 𑀨𑀮𑀲𑀫𑀸𑀧𑀢𑁆𑀢𑀺𑀬𑀸 𑀏𑀢𑁂𑀲𑀼 𑀏𑀓𑁂𑀓𑁄 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀓𑀼𑀲𑀮𑀁 𑀓𑀫𑁆𑀫𑀦𑁆𑀢𑀺 𑀓𑀼𑀲𑀮𑀘𑁂𑀢𑀦𑀸 𑀅𑀢𑁆𑀢𑀦𑁄 𑀯𑀺𑀧𑀸𑀓𑀲𑁆𑀲 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁄, 𑀲𑀸 𑀧𑀦 𑀩𑀮𑀯𑀘𑁂𑀢𑀦𑀸𑀯 𑀮𑀩𑁆𑀪𑀢𑀺, 𑀦 𑀤𑀼𑀩𑁆𑀩𑀮𑀸. 𑀢𑀢𑁆𑀭𑀺𑀤𑀁 𑀯𑀢𑁆𑀣𑀼 𑁋 𑀏𑀓𑀸 𑀓𑀺𑀭 𑀇𑀢𑁆𑀣𑀻 𑀉𑀩𑁆𑀩𑀦𑁆𑀥𑀺𑀢𑀼𑀓𑀸𑀫𑀸 𑀭𑀼𑀓𑁆𑀔𑁂 𑀭𑀚𑁆𑀚𑀼𑀁 𑀮𑀕𑁆𑀕𑁂𑀢𑁆𑀯𑀸 𑀲𑀁𑀯𑀺𑀥𑀸𑀢𑀩𑁆𑀩𑀁 𑀲𑀁𑀯𑀺𑀤𑀳𑀢𑀺. 𑀅𑀣𑁂𑀓𑁄 𑀘𑁄𑀭𑁄 𑀭𑀢𑁆𑀢𑀺𑀪𑀸𑀕𑁂 𑀢𑀁 𑀕𑁂𑀳𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀇𑀫𑀸𑀬 𑀭𑀚𑁆𑀚𑀼𑀬𑀸 𑀓𑀺𑀜𑁆𑀘𑀺𑀤𑁂𑀯 𑀩𑀦𑁆𑀥𑀺𑀢𑁆𑀯𑀸 𑀳𑀭𑀺𑀲𑁆𑀲𑀸𑀫𑀻’’𑀢𑀺 𑀲𑀢𑁆𑀣𑁂𑀦 𑀙𑀺𑀦𑁆𑀤𑀺𑀢𑀼𑀁 𑀉𑀧𑀕𑀢𑁄. 𑀅𑀣 𑀲𑀸 𑀭𑀚𑁆𑀚𑀼 𑀆𑀲𑀻𑀯𑀺𑀲𑁄 𑀳𑀼𑀢𑁆𑀯𑀸 𑀲𑀼𑀲𑀽𑀢𑀺 𑀅𑀓𑀸𑀲𑀺. 𑀘𑁄𑀭𑁄 𑀪𑀻𑀢𑁄 𑀅𑀧𑀲𑀓𑁆𑀓𑀺. 𑀇𑀢𑁆𑀣𑀻 𑀅𑀢𑁆𑀢𑀦𑁄 𑀦𑀺𑀯𑁂𑀲𑀦𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀭𑀚𑁆𑀚𑀼𑀧𑀸𑀲𑁂 𑀕𑀻𑀯𑀁 𑀧𑀝𑀺𑀫𑀼𑀜𑁆𑀘𑀺𑀢𑁆𑀯𑀸 𑀉𑀩𑁆𑀩𑀦𑁆𑀥𑀸 𑀓𑀸𑀮𑀫𑀓𑀸𑀲𑀺. 𑀏𑀯𑀁 𑀩𑀮𑀯𑀘𑁂𑀢𑀦𑀸 𑀅𑀦𑁆𑀢𑀭𑀸𑀬𑁂 𑀦𑀺𑀯𑀸𑀭𑁂𑀢𑁆𑀯𑀸 𑀅𑀢𑁆𑀢𑀦𑁄 𑀯𑀺𑀧𑀸𑀓𑀲𑁆𑀲 𑀉𑀧𑀦𑀺𑀲𑁆𑀲𑀬𑁄 𑀳𑁄𑀢𑀺. 𑀦 𑀧𑀦𑁂𑀢𑀁 𑀏𑀓𑀦𑁆𑀢𑀢𑁄 𑀕𑀳𑁂𑀢𑀩𑁆𑀩𑀁. 𑀓𑀢𑁄𑀓𑀸𑀲𑀜𑁆𑀳𑀺 𑀓𑀫𑁆𑀫𑀁 𑀏𑀯 𑀯𑀺𑀧𑀸𑀓𑀲𑁆𑀲 𑀅𑀦𑁆𑀢𑀭𑀸𑀬𑀁 𑀧𑀝𑀺𑀩𑀸𑀳𑀺𑀢𑁆𑀯𑀸 𑀯𑀺𑀧𑀘𑁆𑀘𑀢𑀺, 𑀯𑀺𑀧𑀸𑀓𑀚𑀦𑀓𑀁 𑀧𑀦 𑀓𑀫𑁆𑀫𑀁 𑀯𑀺𑀧𑀸𑀓𑀲𑁆𑀲 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁄 𑀦 𑀳𑁄𑀢𑀻𑀢𑀺 𑀦 𑀯𑀢𑁆𑀢𑀩𑁆𑀩𑀁. 𑀓𑀫𑁆𑀫𑀦𑁆𑀢𑀺 𑀏𑀢𑁆𑀣 𑀘𑀢𑀼𑀪𑀽𑀫𑀓𑀫𑁆𑀧𑀺 𑀯𑁂𑀤𑀺𑀢𑀩𑁆𑀩𑀁. 𑀬𑀁 𑀧𑀦 𑀧𑀭𑀢𑁄 ‘‘𑀫𑀕𑁆𑀕𑁄 𑀨𑀮𑀲𑀫𑀸𑀧𑀢𑁆𑀢𑀺𑀬𑀸’’𑀢𑀺 𑀯𑀼𑀢𑁆𑀢𑀁, 𑀢𑀁 𑀅𑀘𑁂𑀢𑀦𑀸𑀯𑀲𑁂𑀦. 𑀢𑁂𑀦𑁂𑀢𑀁 𑀤𑀻𑀧𑁂𑀢𑀺 𑁋 𑀬𑁄 𑀓𑁄𑀘𑀺 𑀯𑀺𑀧𑀸𑀓𑀚𑀦𑀓𑁄 𑀥𑀫𑁆𑀫𑁄, 𑀲𑁄 𑀅𑀢𑁆𑀢𑀦𑁄 𑀯𑀺𑀧𑀸𑀓𑀲𑁆𑀲 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁄 𑀳𑁄𑀢𑀻𑀢𑀺.

𑀭𑀸𑀕𑀁 𑀉𑀧𑀦𑀺𑀲𑁆𑀲𑀸𑀬 𑀧𑀸𑀡𑀁 𑀳𑀦𑀢𑀻𑀢𑀺 𑀬𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀲𑀸𑀭𑀢𑁆𑀢𑁄 𑀳𑁄𑀢𑀺, 𑀢𑀲𑁆𑀫𑀺𑀁 𑀯𑀸 𑀯𑀺𑀭𑀼𑀤𑁆𑀥𑀁, 𑀢𑀲𑁆𑀲 𑀯𑀸 𑀅𑀢𑁆𑀣𑀸𑀬 𑀧𑀸𑀡𑀁 𑀳𑀦𑀢𑀺. 𑀅𑀤𑀺𑀦𑁆𑀦𑀸𑀤𑀸𑀦𑀸𑀤𑀻𑀲𑀼𑀧𑀺 𑀏𑀢𑁂𑀦𑁂𑀯𑀼𑀧𑀸𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀲𑀦𑁆𑀥𑀺𑀁 𑀙𑀺𑀦𑁆𑀤𑀢𑀻𑀢𑀺 𑀅𑀤𑀺𑀦𑁆𑀦𑀸𑀤𑀸𑀦𑀯𑀲𑁂𑀦 𑀯𑀼𑀢𑁆𑀢𑀁. 𑀢𑀢𑁆𑀣 𑀲𑀦𑁆𑀥𑀺𑀦𑁆𑀢𑀺 𑀕𑁂𑀳𑀲𑀦𑁆𑀥𑀺𑀁. 𑀦𑀺𑀮𑁆𑀮𑁄𑀧𑀁 𑀳𑀭𑀢𑀻𑀢𑀺 𑀦𑀺𑀮𑀻𑀬𑀺𑀢𑁆𑀯𑀸 𑀳𑀭𑀢𑀺. 𑀏𑀓𑀸𑀕𑀸𑀭𑀺𑀓𑀁 𑀓𑀭𑁄𑀢𑀻𑀢𑀺 𑀩𑀳𑀽𑀳𑀺 𑀲𑀤𑁆𑀥𑀺𑀁 𑀏𑀓𑀫𑁂𑀯 𑀕𑁂𑀳𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀯𑀺𑀮𑀼𑀫𑁆𑀧𑀢𑀺. 𑀧𑀭𑀺𑀧𑀦𑁆𑀣𑁂 𑀢𑀺𑀝𑁆𑀞𑀢𑀻𑀢𑀺 𑀧𑀦𑁆𑀣𑀤𑀽𑀳𑀦𑀓𑀫𑁆𑀫𑀁 𑀓𑀭𑁄𑀢𑀺. 𑀤𑁄𑀲𑀁 𑀉𑀧𑀦𑀺𑀲𑁆𑀲𑀸𑀬𑀸𑀢𑀺𑀆𑀤𑀻𑀲𑀼 ‘‘𑀅𑀦𑀢𑁆𑀣𑀁 𑀫𑁂 𑀅𑀘𑀭𑀻’’𑀢𑀺𑀆𑀤𑀺𑀯𑀲𑁂𑀦 𑀉𑀧𑁆𑀧𑀦𑁆𑀦𑀁 𑀤𑁄𑀲𑀁 𑀉𑀧𑀦𑀺𑀲𑁆𑀲𑀬𑀁 𑀓𑀢𑁆𑀯𑀸. 𑀫𑁄𑀳𑀁 𑀉𑀧𑀦𑀺𑀲𑁆𑀲𑀸𑀬𑀸𑀢𑀺 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀲𑀼 𑀆𑀤𑀻𑀦𑀯𑀧𑀝𑀺𑀘𑁆𑀙𑀸𑀤𑀓𑀁 𑀫𑁄𑀳𑀁 𑀉𑀧𑀦𑀺𑀲𑁆𑀲𑀬𑀁 𑀓𑀢𑁆𑀯𑀸. 𑀫𑀸𑀦𑀁 𑀉𑀧𑀦𑀺𑀲𑁆𑀲𑀸𑀬𑀸𑀢𑀺 𑀅𑀳𑀁 𑀓𑀺𑀁 𑀳𑀦𑀺𑀢𑀼𑀁 𑀦 𑀲𑀓𑁆𑀓𑁄𑀫𑀺, 𑀆𑀤𑀸𑀢𑀼𑀁 𑀦 𑀲𑀓𑁆𑀓𑁄𑀫𑀻𑀢𑀺 𑀫𑀸𑀦𑀁 𑀉𑀧𑀦𑀺𑀲𑁆𑀲𑀬𑀁 𑀓𑀢𑁆𑀯𑀸. 𑀓𑁂𑀦𑀘𑀺 𑀯𑀸 𑀧𑀦 𑀅𑀯𑀜𑁆𑀜𑀸𑀢𑁄 𑀳𑁄𑀢𑀺 𑀧𑀭𑀺𑀪𑀽𑀢𑁄 𑀳𑀻𑀴𑀺𑀢𑁄, 𑀢𑀁 𑀑𑀫𑀸𑀦𑀁 𑀉𑀧𑀦𑀺𑀲𑁆𑀲𑀬𑀁 𑀓𑀢𑁆𑀯𑀸𑀢𑀺𑀧𑀺 𑀅𑀢𑁆𑀣𑁄. 𑀤𑀺𑀝𑁆𑀞𑀺𑀁 𑀉𑀧𑀦𑀺𑀲𑁆𑀲𑀸𑀬𑀸𑀢𑀺 𑀬𑀜𑁆𑀜𑀸𑀤𑀻𑀲𑀼 𑀩𑁆𑀭𑀸𑀳𑁆𑀫𑀡𑀸𑀤𑀬𑁄 𑀯𑀺𑀬 𑀧𑀸𑀤𑀲𑀺𑀓𑀫𑀺𑀮𑀓𑁆𑀔𑀼𑀆𑀤𑀬𑁄 𑀯𑀺𑀬 𑀘 𑀤𑀺𑀝𑁆𑀞𑀺𑀁 𑀉𑀧𑀦𑀺𑀲𑁆𑀲𑀬𑀁 𑀓𑀢𑁆𑀯𑀸. 𑀧𑀢𑁆𑀣𑀦𑀁 𑀉𑀧𑀦𑀺𑀲𑁆𑀲𑀸𑀬𑀸𑀢𑀺 ‘‘𑀲𑀘𑁂 𑀫𑁂 𑀇𑀤𑀁 𑀦𑀸𑀫 𑀇𑀚𑁆𑀛𑀺𑀲𑁆𑀲𑀢𑀺, 𑀏𑀯𑀭𑀽𑀧𑀁 𑀢𑁂 𑀩𑀮𑀺𑀓𑀫𑁆𑀫𑀁 𑀓𑀭𑀺𑀲𑁆𑀲𑀸𑀫𑀻𑀢𑀺 𑀏𑀯𑀁 𑀤𑁂𑀯𑀢𑀸𑀬𑀸𑀘𑀦𑀲𑀗𑁆𑀔𑀢𑀁 𑀯𑀸, 𑀅𑀲𑀼𑀓𑀁 𑀦𑀸𑀫 𑀫𑁂 𑀖𑀸𑀢𑁂𑀢𑁆𑀯𑀸 𑀤𑁂𑀳𑀺, 𑀅𑀲𑀼𑀓𑀲𑁆𑀲 𑀲𑀦𑁆𑀢𑀓𑀁 𑀆𑀳𑀭, 𑀏𑀳𑀺 𑀯𑀸 𑀫𑁂 𑀏𑀢𑀸𑀦𑀺 𑀓𑀫𑁆𑀫𑀸𑀦𑀺 𑀓𑀭𑁄𑀦𑁆𑀢𑀲𑁆𑀲 𑀲𑀳𑀸𑀬𑁄 𑀳𑁄𑀳𑀻’’𑀢𑀺 𑀏𑀯𑀫𑀸𑀤𑀺𑀁 𑀯𑀸 𑀧𑀢𑁆𑀣𑀦𑀁 𑀉𑀧𑀦𑀺𑀲𑁆𑀲𑀬𑀁 𑀓𑀢𑁆𑀯𑀸. 𑀭𑀸𑀕𑁄 𑀤𑁄𑀲𑁄 𑀫𑁄𑀳𑁄 𑀫𑀸𑀦𑁄 𑀤𑀺𑀝𑁆𑀞𑀺 𑀧𑀢𑁆𑀣𑀦𑀸 𑀭𑀸𑀕𑀲𑁆𑀲𑀸𑀢𑀺. 𑀏𑀢𑁆𑀣 𑀭𑀸𑀕𑁄 𑀭𑀸𑀕𑀲𑁆𑀲𑀸𑀧𑀺 𑀉𑀧𑀦𑀺𑀲𑁆𑀲𑀬𑁄 𑀳𑁄𑀢𑀺 𑀤𑁄𑀲𑀸𑀤𑀻𑀦𑀫𑁆𑀧𑀺. 𑀤𑁄𑀲𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀧𑀸𑀡𑀸𑀢𑀺𑀧𑀸𑀢𑁄 𑀧𑀸𑀡𑀸𑀢𑀺𑀧𑀸𑀢𑀲𑁆𑀲𑀸𑀢𑀺 𑀧𑀸𑀡𑀸𑀢𑀺𑀧𑀸𑀢𑀻 𑀅𑀲𑀁𑀯𑀭𑁂 𑀞𑀺𑀢𑀢𑁆𑀢𑀸 𑀅𑀜𑁆𑀜𑀫𑁆𑀧𑀺 𑀧𑀸𑀡𑀁 𑀳𑀦𑀢𑀺. 𑀬𑁄 𑀯𑀸 𑀏𑀢𑁂𑀦 𑀳𑀢𑁄, 𑀢𑀲𑁆𑀲 𑀜𑀸𑀢𑀺𑀫𑀺𑀢𑁆𑀢𑁂𑀳𑀺 𑀉𑀧𑀤𑁆𑀤𑀼𑀢𑁄 𑀢𑁂𑀲𑀼 𑀅𑀜𑁆𑀜𑀫𑁆𑀧𑀺 𑀳𑀦𑀢𑀺. 𑀏𑀯𑀁 𑀧𑀸𑀡𑀸𑀢𑀺𑀧𑀸𑀢𑁄 𑀧𑀸𑀡𑀸𑀢𑀺𑀧𑀸𑀢𑀲𑁆𑀲 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. 𑀪𑀡𑁆𑀟𑀲𑀸𑀫𑀺𑀓𑀁 𑀧𑀦 𑀕𑁄𑀧𑀓𑀁 𑀯𑀸 𑀖𑀸𑀢𑁂𑀢𑁆𑀯𑀸 𑀧𑀭𑀪𑀡𑁆𑀟𑀳𑀭𑀡𑁂, 𑀲𑀸𑀫𑀺𑀓𑀁 𑀖𑀸𑀢𑁂𑀢𑁆𑀯𑀸 𑀢𑀲𑁆𑀲 𑀤𑀸𑀭𑀸𑀢𑀺𑀓𑁆𑀓𑀫𑁂, 𑀦𑀸𑀳𑀁 𑀳𑀦𑀸𑀫𑀻𑀢𑀺 𑀫𑀼𑀲𑀸𑀪𑀡𑀦𑁂, 𑀓𑀢𑀲𑁆𑀲 𑀧𑀝𑀺𑀘𑁆𑀙𑀸𑀤𑀦𑀢𑁆𑀣𑀸𑀬 𑀅𑀓𑀢𑀲𑁆𑀲 𑀯𑀸 𑀓𑀭𑀡𑀢𑁆𑀣𑀸𑀬 𑀧𑁂𑀲𑀼𑀜𑁆𑀜𑀁 𑀉𑀧𑀲𑀁𑀳𑀸𑀭𑁂, 𑀢𑁂𑀦𑁂𑀯 𑀦𑀬𑁂𑀦 𑀨𑀭𑀼𑀲𑀯𑀸𑀘𑀸𑀦𑀺𑀘𑁆𑀙𑀸𑀭𑀡𑁂, 𑀲𑀫𑁆𑀨𑀧𑁆𑀧𑀮𑀸𑀧𑀪𑀡𑀦𑁂, 𑀧𑀭𑀁 𑀳𑀦𑀺𑀢𑁆𑀯𑀸 𑀅𑀪𑀺𑀚𑁆𑀛𑀸𑀬𑀺𑀢𑀩𑁆𑀩𑀧𑀭𑀯𑀺𑀢𑁆𑀢𑀽𑀧𑀓𑀭𑀡𑀸𑀪𑀺𑀚𑁆𑀛𑀸𑀬𑀦𑁂, 𑀬𑁄 𑀢𑁂𑀦 𑀖𑀸𑀢𑀺𑀢𑁄 𑀳𑁄𑀢𑀺; 𑀢𑀲𑁆𑀲 𑀫𑀺𑀢𑁆𑀢𑀸𑀫𑀘𑁆𑀘𑀸 𑀉𑀘𑁆𑀙𑀺𑀚𑁆𑀚𑀦𑁆𑀢𑀽𑀢𑀺𑀆𑀤𑀺𑀘𑀺𑀦𑁆𑀢𑀦𑁂 ‘‘𑀏𑀯𑀁 𑀫𑁂 𑀧𑀸𑀡𑀸𑀢𑀺𑀧𑀸𑀢𑁄 𑀦𑀺𑀚𑁆𑀚𑀺𑀡𑁆𑀡𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀤𑀼𑀓𑁆𑀓𑀭𑀓𑀸𑀭𑀺𑀓𑀸𑀤𑀺𑀯𑀲𑁂𑀦 𑀤𑀺𑀝𑁆𑀞𑀺𑀕𑁆𑀕𑀳𑀡𑀓𑀸𑀮𑁂 𑀧𑀸𑀡𑀸𑀢𑀺𑀧𑀸𑀢𑁄 𑀅𑀤𑀺𑀦𑁆𑀦𑀸𑀤𑀸𑀦𑀸𑀤𑀻𑀦𑀫𑁆𑀧𑀺 𑀉𑀧𑀦𑀺𑀲𑁆𑀲𑀬𑁄 𑀳𑁄𑀢𑀺. 𑀇𑀫𑀺𑀦𑀸 𑀉𑀧𑀸𑀬𑁂𑀦 𑀅𑀤𑀺𑀦𑁆𑀦𑀸𑀤𑀸𑀦𑀸𑀤𑀺𑀫𑀽𑀮𑀓𑁂𑀲𑀼𑀧𑀺 𑀘𑀓𑁆𑀓𑁂𑀲𑀼 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀫𑀸𑀢𑀼𑀖𑀸𑀢𑀺𑀓𑀫𑁆𑀫𑀁 𑀫𑀸𑀢𑀼𑀖𑀸𑀢𑀺𑀓𑀫𑁆𑀫𑀲𑁆𑀲𑀸𑀢𑀺 𑀅𑀜𑁆𑀜𑀁 𑀫𑀸𑀢𑀭𑀁 𑀳𑀦𑀦𑁆𑀢𑀁 𑀤𑀺𑀲𑁆𑀯𑀸 ‘‘𑀯𑀝𑁆𑀝𑀢𑀺 𑀏𑀯𑀁 𑀓𑀸𑀢𑀼’’𑀦𑁆𑀢𑀺 𑀅𑀢𑁆𑀢𑀦𑁄 𑀫𑀸𑀢𑀭𑀁 𑀳𑀦𑀦𑁆𑀢𑀲𑁆𑀲 𑀯𑀸, 𑀏𑀓𑀲𑁆𑀫𑀺𑀁 𑀪𑀯𑁂 𑀳𑀦𑁆𑀢𑁆𑀯𑀸 𑀅𑀧𑀭𑀲𑁆𑀫𑀺𑀫𑁆𑀧𑀺 𑀳𑀦𑀦𑀯𑀲𑁂𑀦 𑀯𑀸, 𑀏𑀓𑀲𑁆𑀫𑀺𑀁𑀬𑁂𑀯 𑀪𑀯𑁂 ‘‘𑀕𑀘𑁆𑀙, 𑀫𑁂 𑀫𑀸𑀢𑀭𑀁 𑀳𑀦𑀸𑀳𑀻’’𑀢𑀺 𑀧𑀼𑀦𑀧𑁆𑀧𑀼𑀦𑀁 𑀆𑀡𑀸𑀧𑀦𑀯𑀲𑁂𑀦 𑀯𑀸, 𑀤𑁆𑀯𑀻𑀳𑀺 𑀧𑀳𑀸𑀭𑁂𑀳𑀺 𑀦𑀺𑀬𑀢𑀫𑀭𑀡𑀸𑀬 𑀤𑀼𑀢𑀺𑀬𑀧𑀳𑀸𑀭𑀤𑀸𑀦𑀯𑀲𑁂𑀦 𑀯𑀸 𑀫𑀸𑀢𑀼𑀖𑀸𑀢𑀺𑀓𑀫𑁆𑀫𑀁 𑀫𑀸𑀢𑀼𑀖𑀸𑀢𑀺𑀓𑀫𑁆𑀫𑀲𑁆𑀲 𑀉𑀧𑀦𑀺𑀲𑁆𑀲𑀬𑁄 𑀳𑁄𑀢𑀺. 𑀲𑁂𑀲𑀸𑀦𑀺𑀧𑀺 𑀬𑀣𑀸𑀬𑁄𑀕𑀁 𑀇𑀫𑀺𑀦𑀸𑀯 𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀬𑀲𑁆𑀫𑀸 𑀧𑀦 𑀩𑀮𑀯𑀸𑀓𑀼𑀲𑀮𑀁 𑀤𑀼𑀩𑁆𑀩𑀮𑀸𑀓𑀼𑀲𑀮𑀲𑁆𑀲 𑀉𑀧𑀦𑀺𑀲𑁆𑀲𑀬𑁄 𑀦 𑀳𑁄𑀢𑀺, 𑀢𑀲𑁆𑀫𑀸 𑀓𑀫𑁆𑀫𑀧𑀣𑀸𑀦𑀦𑁆𑀢𑀭𑀺𑀬𑀓𑀫𑁆𑀫𑀯𑀲𑁂𑀦𑁂𑀯 𑀤𑁂𑀲𑀦𑀸 𑀓𑀢𑀸𑀢𑀺 𑀯𑀤𑀦𑁆𑀢𑀺. 𑀢𑀁 𑀦 𑀏𑀓𑀦𑁆𑀢𑀢𑁄 𑀕𑀳𑁂𑀢𑀩𑁆𑀩𑀁. 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀦𑀺 𑀳𑀺 𑀓𑀢𑁆𑀯𑀸 ‘‘𑀓𑀲𑁆𑀫𑀸 𑀏𑀯𑀫𑀓𑀸𑀲𑀻’’𑀢𑀺 𑀘𑁄𑀤𑀺𑀬𑀫𑀸𑀦𑁄 𑀓𑁄𑀧𑀫𑀢𑁆𑀢𑀓𑀫𑁆𑀧𑀺 𑀓𑀭𑁄𑀢𑀺. 𑀯𑀺𑀧𑁆𑀧𑀝𑀺𑀲𑀸𑀭𑀻𑀧𑀺 𑀳𑁄𑀢𑀺. 𑀅𑀧𑁆𑀧𑀫𑀢𑁆𑀢𑀓𑁂𑀧𑀺 𑀘 𑀓𑀺𑀮𑁂𑀲𑁂 𑀉𑀧𑁆𑀧𑀦𑁆𑀦𑁂 𑀢𑀁 𑀯𑀟𑁆𑀠𑁂𑀢𑁆𑀯𑀸 𑀯𑀻𑀢𑀺𑀓𑁆𑀓𑀫𑀁 𑀓𑀭𑁄𑀢𑀺. 𑀢𑀲𑁆𑀫𑀸 𑀩𑀮𑀯𑀁 𑀤𑀼𑀩𑁆𑀩𑀮𑀲𑁆𑀲 𑀤𑀼𑀩𑁆𑀩𑀮𑀜𑁆𑀘 𑀩𑀮𑀯𑀲𑁆𑀲𑀸𑀧𑀺 𑀉𑀧𑀦𑀺𑀲𑁆𑀲𑀬𑁄 𑀳𑁄𑀢𑀺𑀬𑁂𑀯. 𑀬𑀁 𑀧𑀦 𑀧𑀘𑁆𑀘𑀬𑀯𑀺𑀪𑀗𑁆𑀕𑀲𑁆𑀲 𑀉𑀤𑁆𑀤𑁂𑀲𑀯𑀡𑁆𑀡𑀦𑀸𑀬𑀁 𑀯𑀼𑀢𑁆𑀢𑀁 ‘‘𑀩𑀮𑀯𑀓𑀸𑀭𑀡𑀝𑁆𑀞𑁂𑀦 𑀉𑀧𑀦𑀺𑀲𑁆𑀲𑀬𑁄 𑀳𑁄𑀢𑀻’’𑀢𑀺, 𑀢𑀁 𑀓𑀸𑀭𑀡𑀪𑀸𑀯𑀲𑁆𑀲𑁂𑀯 𑀩𑀮𑀯𑀢𑀸𑀬 𑀯𑀼𑀢𑁆𑀢𑀁, 𑀦 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑀥𑀫𑁆𑀫𑀸𑀦𑀁. 𑀓𑀫𑁆𑀫𑀓𑀺𑀮𑁂𑀲𑀸 𑀳𑀺 𑀩𑀮𑀯𑀦𑁆𑀢𑁄𑀧𑀺 𑀤𑀼𑀩𑁆𑀩𑀮𑀸𑀧𑀺 𑀩𑀮𑀯𑀓𑀸𑀭𑀡𑀁 𑀳𑁄𑀦𑁆𑀢𑀺𑀬𑁂𑀯.

𑀭𑀸𑀕𑀁 𑀉𑀧𑀦𑀺𑀲𑁆𑀲𑀸𑀬 𑀤𑀸𑀦𑀁 𑀤𑁂𑀢𑀻𑀢𑀺𑀆𑀤𑀻𑀲𑀼 𑀅𑀳𑁄 𑀯𑀢𑀸𑀳𑀁 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸𑀦𑀁 𑀤𑁂𑀯𑀸𑀦𑀁 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑁂𑀬𑁆𑀬𑀦𑁆𑀢𑀺 𑀉𑀧𑀧𑀢𑁆𑀢𑀺𑀪𑀯𑁂 𑀯𑀸 𑀪𑁄𑀕𑁂𑀲𑀼 𑀯𑀸 𑀭𑀸𑀕𑀁 𑀉𑀧𑀦𑀺𑀲𑁆𑀲𑀸𑀬 𑀤𑀸𑀦𑀁 𑀤𑁂𑀢𑀺. 𑀲𑀻𑀮𑀲𑀫𑀸𑀤𑀸𑀦𑀉𑀧𑁄𑀲𑀣𑀓𑀫𑁆𑀫𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀛𑀸𑀦𑀁 𑀧𑀦 𑀭𑀸𑀕𑀯𑀺𑀓𑁆𑀔𑀫𑁆𑀪𑀦𑀢𑁆𑀣𑀸𑀬, 𑀯𑀺𑀧𑀲𑁆𑀲𑀦𑀁 𑀭𑀸𑀕𑀲𑁆𑀲 𑀧𑀳𑀸𑀦𑀢𑁆𑀣𑀸𑀬, 𑀫𑀕𑁆𑀕𑀁 𑀲𑀫𑀼𑀘𑁆𑀙𑁂𑀤𑀦𑀢𑁆𑀣𑀸𑀬 𑀉𑀧𑁆𑀧𑀸𑀤𑁂𑀦𑁆𑀢𑁄 𑀭𑀸𑀕𑀁 𑀉𑀧𑀦𑀺𑀲𑁆𑀲𑀸𑀬 𑀉𑀧𑁆𑀧𑀸𑀤𑁂𑀢𑀺 𑀦𑀸𑀫. 𑀯𑀻𑀢𑀭𑀸𑀕𑀪𑀸𑀯𑀢𑁆𑀣𑀸𑀬 𑀧𑀦 𑀅𑀪𑀺𑀜𑁆𑀜𑀁 𑀲𑀫𑀸𑀧𑀢𑁆𑀢𑀺𑀜𑁆𑀘 𑀉𑀧𑁆𑀧𑀸𑀤𑁂𑀦𑁆𑀢𑁄 𑀭𑀸𑀕𑀁 𑀉𑀧𑀦𑀺𑀲𑁆𑀲𑀸𑀬 𑀉𑀧𑁆𑀧𑀸𑀤𑁂𑀢𑀺 𑀦𑀸𑀫. 𑀏𑀢𑁆𑀢𑀸𑀯𑀢𑀸 𑀳𑀺 𑀯𑀻𑀢𑀭𑀸𑀕𑁄 𑀦𑀸𑀫 𑀳𑁄𑀢𑀺.

𑀲𑀤𑁆𑀥𑀸𑀬𑀸𑀢𑀺 𑀤𑀸𑀦𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑀲𑀤𑁆𑀥𑀸𑀬 𑀲𑀻𑀮𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀬𑀣𑁂𑀯 𑀳𑀺 𑀤𑀸𑀦𑀸𑀤𑀺𑀯𑀲𑁂𑀦 𑀲𑀤𑁆𑀥𑀸𑀤𑀬𑁄 𑀉𑀧𑁆𑀧𑀸𑀤𑁂𑀦𑁆𑀢𑁄 𑀭𑀸𑀕𑀁 𑀉𑀧𑀦𑀺𑀲𑁆𑀲𑀸𑀬 𑀉𑀧𑁆𑀧𑀸𑀤𑁂𑀢𑀺 𑀦𑀸𑀫, 𑀏𑀯𑀁 𑀭𑀸𑀕𑀸𑀤𑀬𑁄𑀧𑀺 𑀲𑀤𑁆𑀥𑀸𑀤𑀻𑀦𑀁 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑀸 𑀦𑀸𑀫 𑀳𑁄𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀢𑀲𑁆𑀲 𑀧𑀝𑀺𑀖𑀸𑀢𑀢𑁆𑀣𑀸𑀬𑀸𑀢𑀺 𑀢𑀲𑁆𑀲 𑀧𑀝𑀺𑀩𑀸𑀳𑀦𑀢𑁆𑀣𑀸𑀬, 𑀯𑀺𑀧𑀸𑀓𑁄𑀓𑀸𑀲𑀲𑁆𑀲 𑀅𑀦𑀼𑀧𑁆𑀧𑀤𑀸𑀦𑀢𑁆𑀣𑀸𑀬𑀸𑀢𑀺 𑀅𑀢𑁆𑀣𑁄. 𑀲𑀧𑁆𑀧𑀝𑀺𑀖𑀸𑀢𑁂𑀲𑀼 𑀢𑀸𑀯 𑀏𑀯𑀁 𑀳𑁄𑀢𑀼, 𑀬𑀸𑀦𑀺 𑀧𑀦 𑀅𑀧𑁆𑀧𑀝𑀺𑀖𑀸𑀢𑀸𑀦𑀺 𑀆𑀦𑀦𑁆𑀢𑀭𑀺𑀬𑀓𑀫𑁆𑀫𑀸𑀦𑀺, 𑀢𑁂𑀲𑀼 ‘‘𑀢𑀲𑁆𑀲 𑀧𑀝𑀺𑀖𑀸𑀢𑀢𑁆𑀣𑀸𑀬𑀸’’𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀦𑁆𑀢𑀺? 𑀢𑀲𑁆𑀲 𑀅𑀚𑁆𑀛𑀸𑀲𑀬𑀯𑀲𑁂𑀦. 𑀢𑀧𑁆𑀧𑀝𑀺𑀖𑀸𑀢𑀢𑁆𑀣𑀸𑀬 𑀧𑀯𑀢𑁆𑀢𑁂𑀫𑀻𑀢𑀺 𑀳𑀺𑀲𑁆𑀲 𑀅𑀚𑁆𑀛𑀸𑀲𑀬𑁄, 𑀢𑀁 𑀕𑀳𑁂𑀢𑁆𑀯𑀸 𑀏𑀯𑀁 𑀯𑀼𑀢𑁆𑀢𑀁.

𑀭𑀸𑀕𑀁 𑀉𑀧𑀦𑀺𑀲𑁆𑀲𑀸𑀬 𑀅𑀢𑁆𑀢𑀸𑀦𑀁 𑀆𑀢𑀸𑀧𑁂𑀢𑀻𑀢𑀺 𑀬𑀢𑁆𑀣 𑀭𑀢𑁆𑀢𑁄, 𑀢𑀲𑁆𑀲 𑀤𑀼𑀓𑁆𑀓𑀭𑁂𑀦 𑀧𑀢𑁆𑀢𑀺𑀁 𑀲𑀫𑁆𑀧𑀲𑁆𑀲𑀦𑁆𑀢𑁄 𑀏𑀯𑀁 𑀓𑀭𑁄𑀢𑀻𑀢𑀺 𑀲𑀩𑁆𑀩𑀁 𑀧𑀼𑀭𑀺𑀫𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀓𑀸𑀬𑀺𑀓𑀲𑁆𑀲 𑀲𑀼𑀔𑀲𑁆𑀲𑀸𑀢𑀺 𑀭𑀸𑀕𑀸𑀤𑀺𑀲𑀫𑀢𑀺𑀓𑁆𑀓𑀫𑀯𑀲𑁂𑀦 𑀓𑀼𑀲𑀮𑀁 𑀓𑀢𑁆𑀯𑀸 𑀧𑀝𑀺𑀮𑀤𑁆𑀥𑀲𑀼𑀔𑀲𑁆𑀲 𑀯𑀸 𑀭𑀸𑀕𑀸𑀤𑀺𑀯𑀲𑁂𑀦 𑀅𑀦𑀸𑀤𑀻𑀦𑀯𑀤𑀲𑁆𑀲𑀸𑀯𑀺𑀦𑁄 𑀓𑀸𑀫𑁂 𑀧𑀭𑀺𑀪𑀼𑀜𑁆𑀚𑀦𑀯𑀲𑁂𑀦 𑀉𑀧𑁆𑀧𑀦𑁆𑀦𑀲𑀼𑀔𑀲𑁆𑀲 𑀯𑀸. 𑀤𑀼𑀓𑁆𑀔𑀲𑁆𑀲𑀸𑀢𑀺 𑀆𑀢𑀸𑀧𑀦𑀸𑀤𑀺𑀯𑀲𑁂𑀦 𑀉𑀧𑁆𑀧𑀦𑁆𑀦𑀲𑀼𑀔𑀲𑁆𑀲 𑀯𑀸 𑀭𑀸𑀕𑀸𑀤𑀺𑀳𑁂𑀢𑀼 𑀧𑀯𑀢𑁆𑀢𑀯𑀥𑀩𑀦𑁆𑀥𑀦𑀸𑀤𑀺𑀯𑀲𑁂𑀦 𑀉𑀧𑁆𑀧𑀦𑁆𑀦𑀤𑀼𑀓𑁆𑀔𑀲𑁆𑀲 𑀯𑀸. 𑀨𑀮𑀲𑀫𑀸𑀧𑀢𑁆𑀢𑀺𑀬𑀸𑀢𑀺 𑀭𑀸𑀕𑀸𑀤𑀬𑁄 𑀲𑀫𑀼𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀯𑀸 𑀉𑀧𑁆𑀧𑀸𑀤𑀺𑀢𑀸𑀬 𑀢𑁂𑀳𑀺 𑀯𑀸 𑀅𑀝𑁆𑀝𑀻𑀬𑀫𑀸𑀦𑁂𑀦 𑀲𑀫𑀸𑀧𑀦𑁆𑀦𑀸𑀬.

𑀓𑀸𑀬𑀺𑀓𑀁 𑀲𑀼𑀔𑀦𑁆𑀢𑀺𑀆𑀤𑀻𑀲𑀼 𑀲𑀼𑀔𑁂 𑀉𑀧𑁆𑀧𑀦𑁆𑀦𑁂 𑀢𑀁 𑀅𑀲𑁆𑀲𑀸𑀤𑁂𑀢𑁆𑀯𑀸 𑀧𑀼𑀦𑀧𑁆𑀧𑀼𑀦𑀁 𑀢𑀣𑀸𑀭𑀽𑀧𑁂𑀳𑁂𑀯 𑀧𑀘𑁆𑀘𑀬𑁂𑀳𑀺 𑀢𑀁 𑀉𑀧𑁆𑀧𑀸𑀤𑁂𑀦𑁆𑀢𑀲𑁆𑀲 𑀧𑀼𑀭𑀺𑀫𑀁 𑀧𑀘𑁆𑀙𑀺𑀫𑀲𑁆𑀲 𑀉𑀧𑀦𑀺𑀲𑁆𑀲𑀬𑁄 𑀳𑁄𑀢𑀺. 𑀲𑀻𑀢𑀸𑀤𑀻𑀲𑀼 𑀧𑀦 𑀅𑀕𑁆𑀕𑀺𑀲𑀦𑁆𑀢𑀸𑀧𑀦𑀸𑀤𑀻𑀦𑀺 𑀅𑀢𑀺𑀲𑁂𑀯𑀦𑁆𑀢𑀲𑁆𑀲 𑀧𑀼𑀩𑁆𑀩𑀪𑀸𑀕𑁂 𑀲𑀼𑀔𑀁 𑀅𑀧𑀭𑀪𑀸𑀕𑁂 𑀤𑀼𑀓𑁆𑀔𑀲𑁆𑀲, ‘‘𑀲𑀼𑀔𑁄 𑀯𑀢𑀺 𑀫𑀺𑀲𑁆𑀲𑀸 𑀧𑀭𑀺𑀩𑁆𑀩𑀸𑀚𑀺𑀓𑀸𑀬 𑀢𑀭𑀼𑀡𑀸𑀬 𑀮𑁄𑀫𑀲𑀸𑀬 𑀩𑀸𑀳𑀸𑀬 𑀲𑀫𑁆𑀨𑀲𑁆𑀲𑁄’’𑀢𑀺 𑀓𑀸𑀫𑁂𑀲𑀼 𑀧𑀸𑀢𑀩𑁆𑀬𑀢𑀁 𑀆𑀧𑀚𑁆𑀚𑀦𑁆𑀢𑀲𑁆𑀲 𑀇𑀥 𑀓𑀸𑀬𑀺𑀓𑀁 𑀲𑀼𑀔𑀁 𑀦𑁂𑀭𑀬𑀺𑀓𑀲𑁆𑀲 𑀓𑀸𑀬𑀺𑀓𑀤𑀼𑀓𑁆𑀔𑀲𑁆𑀲, 𑀅𑀭𑁄𑀕𑀪𑀸𑀯𑁂𑀦 𑀧𑀦 𑀲𑀼𑀔𑀺𑀦𑁄 𑀨𑀮𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀦𑁆𑀢𑀲𑁆𑀲 𑀓𑀸𑀬𑀺𑀓𑀁 𑀲𑀼𑀔𑀁 𑀨𑀮𑀲𑀫𑀸𑀧𑀢𑁆𑀢𑀺𑀬𑀸 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁄 𑀳𑁄𑀢𑀺. 𑀤𑀼𑀓𑁆𑀔𑀧𑀝𑀺𑀖𑀸𑀢𑀸𑀬 𑀧𑀦 𑀲𑀼𑀔𑀁 𑀲𑁂𑀯𑀦𑁆𑀢𑀲𑁆𑀲 𑀤𑀼𑀓𑁆𑀔𑀧𑀝𑀺𑀖𑀸𑀢𑀸𑀬 𑀘 𑀪𑀕𑀯𑀢𑁄 𑀯𑀺𑀬 𑀆𑀩𑀸𑀥𑀁 𑀯𑀺𑀓𑁆𑀔𑀫𑁆𑀪𑁂𑀢𑁆𑀯𑀸 𑀨𑀮𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀦𑁆𑀢𑀲𑁆𑀲 𑀓𑀸𑀬𑀺𑀓𑀤𑀼𑀓𑁆𑀔𑀁 𑀓𑀸𑀬𑀺𑀓𑀲𑀼𑀔𑀲𑁆𑀲 𑀘𑁂𑀯 𑀨𑀮𑀲𑀫𑀸𑀧𑀢𑁆𑀢𑀺𑀬𑀸 𑀘, 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁄 𑀳𑁄𑀢𑀺. 𑀉𑀢𑀼𑀲𑀧𑁆𑀧𑀸𑀬𑁄 𑀲𑀼𑀔𑀲𑁆𑀲 𑀘𑁂𑀯 𑀨𑀮𑀲𑀫𑀸𑀧𑀢𑁆𑀢𑀺𑀬𑀸 𑀘, 𑀅𑀲𑀧𑁆𑀧𑀸𑀬𑁄 𑀤𑀼𑀓𑁆𑀔𑀲𑁆𑀲. 𑀉𑀢𑀼𑀅𑀲𑀧𑁆𑀧𑀸𑀬𑀁 𑀯𑀸 𑀅𑀪𑀺𑀪𑀯𑀺𑀢𑁆𑀯𑀸 𑀲𑀫𑀸𑀧𑀢𑁆𑀢𑀺𑀲𑀫𑀼𑀝𑁆𑀞𑀺𑀢𑀭𑀽𑀧𑀯𑀲𑁂𑀦 𑀉𑀧𑁆𑀧𑀦𑁆𑀦𑀁 𑀲𑀼𑀔𑀁 𑀅𑀦𑀼𑀪𑀯𑀺𑀢𑀼𑀓𑀸𑀫𑀲𑁆𑀲 𑀅𑀲𑀧𑁆𑀧𑀸𑀬𑁄𑀧𑀺 𑀉𑀢𑀼 𑀨𑀮𑀲𑀫𑀸𑀧𑀢𑁆𑀢𑀺𑀬𑀸 𑀧𑀘𑁆𑀘𑀬𑁄𑀯. 𑀪𑁄𑀚𑀦𑀲𑁂𑀦𑀸𑀲𑀦𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀧𑀼𑀦 𑀓𑀸𑀬𑀺𑀓𑀁 𑀲𑀼𑀔𑀦𑁆𑀢𑀺𑀆𑀤𑀻𑀦𑀺 𑀓𑁂𑀯𑀮𑀁 𑀏𑀓𑀢𑁄 𑀤𑀲𑁆𑀲𑀺𑀢𑀸𑀦𑀺. 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀧𑀦𑁂𑀲𑀁 𑀧𑀘𑁆𑀘𑀬𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀨𑀮𑀲𑀫𑀸𑀧𑀢𑁆𑀢𑀺 𑀓𑀸𑀬𑀺𑀓𑀲𑁆𑀲 𑀲𑀼𑀔𑀲𑁆𑀲𑀸𑀢𑀺 𑀲𑀫𑀸𑀧𑀢𑁆𑀢𑀺𑀲𑀫𑀼𑀝𑁆𑀞𑀸𑀦𑀭𑀽𑀧𑀯𑀲𑁂𑀦 𑀉𑀧𑁆𑀧𑀦𑁆𑀦𑀲𑁆𑀲 𑀲𑀼𑀔𑀲𑁆𑀲. 𑀢𑀁 𑀳𑁂𑀲 𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀸𑀬 𑀅𑀦𑀼𑀪𑀯𑀢𑀺.

𑀓𑀸𑀬𑀺𑀓𑀁 𑀲𑀼𑀔𑀁 𑀉𑀧𑀦𑀺𑀲𑁆𑀲𑀸𑀬 𑀤𑀸𑀦𑀦𑁆𑀢𑀺𑀆𑀤𑀻𑀲𑀼 ‘‘𑀅𑀳𑁄 𑀯𑀢 𑀫𑁂 𑀇𑀤𑀁 𑀲𑀼𑀔𑀁 𑀦 𑀧𑀭𑀺𑀳𑀸𑀬𑁂𑀬𑁆𑀬𑀸’’𑀢𑀺 𑀧𑀢𑁆𑀢𑀲𑁆𑀲 𑀯𑀸 𑀅𑀧𑀭𑀺𑀳𑀸𑀬𑀦𑀯𑀲𑁂𑀦; ‘‘𑀅𑀳𑁄 𑀯𑀢𑀸𑀳𑀁 𑀆𑀬𑀢𑀺𑀁 𑀏𑀯𑀭𑀽𑀧𑀁 𑀲𑀼𑀔𑀁 𑀧𑀸𑀧𑀼𑀡𑁂𑀬𑁆𑀬’’𑀦𑁆𑀢𑀺 𑀅𑀧𑁆𑀧𑀢𑁆𑀢𑀲𑁆𑀲 𑀯𑀸 𑀧𑀢𑁆𑀢𑀺𑀯𑀲𑁂𑀦; 𑀤𑀼𑀓𑁆𑀔𑁂𑀧𑀺 ‘‘𑀅𑀳𑁄 𑀯𑀢 𑀫𑁂 𑀤𑀼𑀓𑁆𑀔𑀁 𑀧𑀭𑀺𑀳𑀸𑀬𑁂𑀬𑁆𑀬𑀸’’𑀢𑀺 𑀧𑀢𑁆𑀢𑀲𑁆𑀲 𑀧𑀭𑀺𑀳𑀸𑀬𑀦𑀯𑀲𑁂𑀦 𑀯𑀸; ‘‘𑀆𑀬𑀢𑀺𑀁 𑀏𑀯𑀭𑀽𑀧𑀁 𑀦𑀼𑀧𑁆𑀧𑀚𑁆𑀚𑁂𑀬𑁆𑀬𑀸’’𑀢𑀺 𑀅𑀦𑀼𑀧𑁆𑀧𑀸𑀤𑀧𑀢𑁆𑀣𑀦𑀸𑀯𑀲𑁂𑀦 𑀯𑀸 𑀲𑀼𑀔𑀤𑀼𑀓𑁆𑀔𑀸𑀦𑀁 𑀉𑀧𑀦𑀺𑀲𑁆𑀲𑀬𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀉𑀢𑀼𑀪𑁄𑀚𑀦𑀲𑁂𑀦𑀸𑀲𑀦𑀸𑀦𑀺 𑀯𑀼𑀢𑁆𑀢𑀦𑀬𑀸𑀦𑁂𑀯. 𑀧𑀼𑀦 𑀓𑀸𑀬𑀺𑀓𑀁 𑀲𑀼𑀔𑀦𑁆𑀢𑀺𑀆𑀤𑀻𑀲𑀼 𑀬𑀲𑁆𑀫𑀸 ‘‘𑀲𑀸𑀥𑀼 𑀔𑁄, 𑀫𑀸𑀭𑀺𑀲, 𑀫𑁄𑀕𑁆𑀕𑀮𑁆𑀮𑀸𑀦, 𑀩𑀼𑀤𑁆𑀥𑀲𑀭𑀡𑀕𑀫𑀦𑀁 𑀳𑁄𑀢𑀻’’𑀢𑀺 𑀲𑀼𑀔𑀧𑁆𑀧𑀢𑁆𑀢𑀸𑀦𑀫𑁆𑀧𑀺, ‘‘𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀯𑀢, 𑀲𑁄 𑀪𑀕𑀯𑀸, 𑀬𑁄 𑀏𑀯𑀭𑀽𑀧𑀲𑁆𑀲 𑀤𑀼𑀓𑁆𑀔𑀲𑁆𑀲 𑀧𑀭𑀺𑀜𑁆𑀜𑀸𑀬 𑀥𑀫𑁆𑀫𑀁 𑀤𑁂𑀲𑁂𑀢𑀻’’𑀢𑀺 (𑀉𑀤𑀸. 𑁧𑁮) 𑀤𑀼𑀓𑁆𑀔𑀧𑁆𑀧𑀢𑁆𑀢𑀸𑀦𑀫𑁆𑀧𑀺 𑀲𑀤𑁆𑀥𑀸 𑀉𑀧𑁆𑀧𑀚𑁆𑀚𑀢𑀺. 𑀲𑀼𑀔𑀤𑀼𑀓𑁆𑀔𑁂𑀳𑀺 𑀘 𑀲𑀁𑀬𑁄𑀕𑀯𑀺𑀬𑁄𑀕𑀢𑁆𑀣𑀸𑀬 𑀲𑀻𑀮𑀸𑀤𑀺𑀧𑀭𑀺𑀧𑀽𑀭𑀡𑀁 𑀓𑀭𑁂𑀬𑁆𑀬, 𑀢𑀲𑁆𑀫𑀸 𑀲𑀼𑀔𑀤𑀼𑀓𑁆𑀔𑀸𑀦𑀺 𑀲𑀤𑁆𑀥𑀸𑀤𑀻𑀦𑀁 𑀉𑀧𑀦𑀺𑀲𑁆𑀲𑀬𑀪𑀸𑀯𑁂𑀦 𑀤𑀲𑁆𑀲𑀺𑀢𑀸𑀦𑀺. 𑀉𑀢𑀼𑀆𑀤𑀻𑀦𑀺𑀧𑀺 𑀬𑀣𑀸𑀬𑁄𑀕𑀁 𑀬𑁄𑀚𑁂𑀢𑀩𑁆𑀩𑀸𑀦𑀺. 𑀓𑀸𑀬𑀺𑀓𑀁 𑀲𑀼𑀔𑀁 𑀉𑀧𑀦𑀺𑀲𑁆𑀲𑀸𑀬 𑀧𑀸𑀡𑀁 𑀳𑀦𑀢𑀻𑀢𑀺𑀆𑀤𑀻𑀲𑀼𑀧𑀺 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦𑁂𑀯 𑀲𑀼𑀔𑀸𑀤𑀻𑀦𑀁 𑀉𑀧𑀦𑀺𑀲𑁆𑀲𑀬𑀢𑀸 𑀯𑁂𑀤𑀺𑀢𑀩𑁆𑀩𑀸.

𑀇𑀫𑀲𑁆𑀫𑀺𑀁 𑀧𑀦 𑀉𑀧𑀦𑀺𑀲𑁆𑀲𑀬𑀪𑀸𑀚𑀦𑀻𑀬𑁂 𑀓𑀼𑀲𑀮𑁄 𑀓𑀼𑀲𑀮𑀲𑁆𑀲 𑀢𑀺𑀯𑀺𑀥𑁂𑀦𑀸𑀧𑀺 𑀉𑀧𑀦𑀺𑀲𑁆𑀲𑀬𑁄, 𑀅𑀓𑀼𑀲𑀮𑀲𑁆𑀲 𑀤𑀼𑀯𑀺𑀥𑁂𑀦, 𑀅𑀩𑁆𑀬𑀸𑀓𑀢𑀲𑁆𑀲 𑀢𑀺𑀯𑀺𑀥𑁂𑀦. 𑀅𑀓𑀼𑀲𑀮𑁄 𑀅𑀓𑀼𑀲𑀮𑀲𑁆𑀲 𑀢𑀺𑀯𑀺𑀥𑁂𑀦, 𑀓𑀼𑀲𑀮𑀲𑁆𑀲 𑀏𑀓𑀯𑀺𑀥𑁂𑀦, 𑀅𑀩𑁆𑀬𑀸𑀓𑀢𑀲𑁆𑀲 𑀤𑀼𑀯𑀺𑀥𑁂𑀦. 𑀅𑀩𑁆𑀬𑀸𑀓𑀢𑁄𑀧𑀺 𑀅𑀩𑁆𑀬𑀸𑀓𑀢𑀲𑁆𑀲 𑀢𑀺𑀯𑀺𑀥𑁂𑀦, 𑀢𑀣𑀸 𑀓𑀼𑀲𑀮𑀲𑁆𑀲, 𑀢𑀣𑀸 𑀅𑀓𑀼𑀲𑀮𑀲𑁆𑀲𑀸𑀢𑀺. 𑀏𑀯𑀁 𑀓𑀼𑀲𑀮𑁄 𑀅𑀝𑁆𑀞𑀯𑀺𑀥𑁂𑀦, 𑀅𑀓𑀼𑀲𑀮𑁄 𑀙𑀩𑁆𑀩𑀺𑀥𑁂𑀦, 𑀅𑀩𑁆𑀬𑀸𑀓𑀢𑁄 𑀦𑀯𑀯𑀺𑀥𑁂𑀦𑀸𑀢𑀺 𑀢𑁂𑀯𑀻𑀲𑀢𑀺𑀯𑀺𑀥𑁂𑀦 𑀉𑀧𑀦𑀺𑀲𑁆𑀲𑀬𑁄 𑀪𑀸𑀚𑀺𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑁪𑁨𑁪. 𑀧𑀼𑀭𑁂𑀚𑀸𑀢𑁂 𑀘𑀓𑁆𑀔𑀸𑀤𑀻𑀦𑀺 𑀑𑀴𑀸𑀭𑀺𑀓𑀯𑀲𑁂𑀦 𑀯𑀼𑀢𑁆𑀢𑀸𑀦𑀺. 𑀆𑀧𑁄𑀥𑀸𑀢𑀼𑀆𑀤𑀻𑀦𑀺𑀧𑀺 𑀧𑀦 𑀧𑀼𑀭𑁂𑀚𑀸𑀢𑀸𑀭𑀫𑁆𑀫𑀡𑀸𑀦𑀺 𑀳𑁄𑀦𑁆𑀢𑀺𑀬𑁂𑀯. 𑀯𑀢𑁆𑀣𑀼 𑀧𑀼𑀭𑁂𑀚𑀸𑀢𑀁 𑀘𑀓𑁆𑀔𑀸𑀬𑀢𑀦𑀦𑁆𑀢𑀺𑀆𑀤𑀺 𑀬𑀁 𑀯𑀢𑁆𑀣𑀼 𑀳𑀼𑀢𑁆𑀯𑀸 𑀧𑀼𑀭𑁂𑀚𑀸𑀢𑀁 𑀳𑁄𑀢𑀺, 𑀢𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁. 𑀯𑀢𑁆𑀣𑀼 𑀯𑀺𑀧𑀸𑀓𑀸𑀩𑁆𑀬𑀸𑀓𑀢𑀸𑀦𑀦𑁆𑀢𑀺 𑀧𑀯𑀢𑁆𑀢𑀺𑀬𑀁 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁.

𑁪𑁨𑁫. 𑀧𑀘𑁆𑀙𑀸𑀚𑀸𑀢𑁂 𑀇𑀫𑀲𑁆𑀲 𑀓𑀸𑀬𑀲𑁆𑀲𑀸𑀢𑀺 𑀘𑀸𑀢𑀼𑀫𑀳𑀸𑀪𑀽𑀢𑀺𑀓𑀓𑀸𑀬𑀲𑁆𑀲. 𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄𑀢𑀺 𑀉𑀧𑀢𑁆𑀣𑀫𑁆𑀪𑀦𑀯𑀲𑁂𑀦 𑀧𑀘𑁆𑀙𑀸𑀚𑀸𑀢𑁄 𑀳𑀼𑀢𑁆𑀯𑀸 𑀧𑀘𑁆𑀘𑀬𑁄. 𑀉𑀧𑀢𑁆𑀣𑀫𑁆𑀪𑀓𑀝𑁆𑀞𑁂𑀦 𑀧𑀘𑁆𑀘𑀬𑀢𑁆𑀢𑀸𑀬𑁂𑀯 𑀳𑁂𑀲 𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬𑁄𑀢𑀺 𑀇𑀫𑀲𑁆𑀫𑀺𑀁 𑀧𑀜𑁆𑀳𑀸𑀯𑀸𑀭𑁂 𑀅𑀦𑀼𑀮𑁄𑀫𑀢𑁄 𑀆𑀕𑀢𑁄.

𑁪𑁨𑁬. 𑀆𑀲𑁂𑀯𑀦𑀧𑀘𑁆𑀘𑀬𑁂 𑀅𑀦𑀼𑀮𑁄𑀫𑀁 𑀕𑁄𑀢𑁆𑀭𑀪𑀼𑀲𑁆𑀲𑀸𑀢𑀺𑀆𑀤𑀻𑀦𑀁 𑀯𑀺𑀲𑀼𑀁 𑀕𑀳𑀡𑁂 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀓𑀸𑀭𑀡𑀁 𑀯𑁂𑀤𑀺𑀢𑀩𑁆𑀩𑀁.

𑁪𑁨𑁭. 𑀓𑀫𑁆𑀫𑀧𑀘𑁆𑀘𑀬𑁂 𑀓𑀼𑀲𑀮𑀸 𑀘𑁂𑀢𑀦𑀸 𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀦𑁆𑀢𑀺 𑀏𑀢𑁆𑀣 𑀲𑀳𑀚𑀸𑀢𑀦𑀸𑀦𑀸𑀓𑁆𑀔𑀡𑀺𑀓𑀯𑀺𑀪𑀸𑀕𑀲𑁆𑀲 𑀅𑀪𑀸𑀯𑀢𑁄 𑀲𑀳𑀚𑀸𑀢𑀸𑀢𑀺 𑀦 𑀯𑀼𑀢𑁆𑀢𑀸. 𑀅𑀩𑁆𑀬𑀸𑀓𑀢𑀯𑀺𑀲𑁆𑀲𑀚𑁆𑀚𑀦𑁂 𑀧𑀦 𑀲𑁄 𑀯𑀺𑀪𑀸𑀕𑁄 𑀅𑀢𑁆𑀣𑀺, 𑀢𑀲𑁆𑀫𑀸 𑀢𑀢𑁆𑀣 𑀯𑀼𑀢𑁆𑀢𑀸. 𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑀁 𑀓𑀝𑀢𑁆𑀢𑀸𑀭𑀽𑀧𑀸𑀦𑀁 𑀯𑀲𑁂𑀦 𑀓𑀢𑀁. 𑀘𑁂𑀢𑀦𑀸 𑀯𑀢𑁆𑀣𑀼𑀲𑁆𑀲𑀸𑀢𑀺 𑀓𑀺𑀜𑁆𑀘𑀸𑀧𑀺 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀯𑀢𑁆𑀣𑀼𑀧𑀢𑀺𑀝𑁆𑀞𑀺𑀢𑀸 𑀅𑀭𑀽𑀧𑀥𑀫𑁆𑀫𑀸 𑀯𑀢𑁆𑀣𑀼𑀧𑀘𑁆𑀘𑀬𑀸 𑀯𑀢𑁆𑀢𑀦𑁆𑀢𑀺, 𑀘𑁂𑀢𑀦𑀸 𑀧𑀦 𑀯𑀢𑁆𑀣𑀼𑀲𑁆𑀲𑀸𑀧𑀺 𑀧𑀘𑁆𑀘𑀬𑁄𑀢𑀺 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁.

𑁪𑁨𑁮. 𑀯𑀺𑀧𑀸𑀓𑀧𑀘𑁆𑀘𑀬𑁂 𑀧𑀝𑀺𑀲𑀦𑁆𑀥𑀺𑀯𑀸𑀭𑁂 𑀇𑀫𑀺𑀦𑀸𑀯 𑀦𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑁪𑁨𑁯-𑁪𑁩𑁮. 𑀆𑀳𑀸𑀭𑀧𑀘𑁆𑀘𑀬𑁂 𑀇𑀫𑀲𑁆𑀲 𑀓𑀸𑀬𑀲𑁆𑀲𑀸𑀢𑀺 𑀇𑀫𑀲𑁆𑀫𑀺𑀁 𑀘𑀢𑀼𑀲𑀦𑁆𑀢𑀢𑀺𑀯𑀲𑁂𑀦 𑀧𑀯𑀢𑁆𑀢𑁂 𑀘𑀸𑀢𑀼𑀫𑀳𑀸𑀪𑀽𑀢𑀺𑀓𑀓𑀸𑀬𑁂 𑀆𑀳𑀸𑀭𑀲𑀫𑀼𑀝𑁆𑀞𑀸𑀦𑀲𑁆𑀲 𑀚𑀦𑀓𑀯𑀲𑁂𑀦, 𑀲𑁂𑀲𑀲𑁆𑀲 𑀉𑀧𑀢𑁆𑀣𑀫𑁆𑀪𑀓𑀯𑀲𑁂𑀦 𑀆𑀳𑀸𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑀸𑀤𑀻𑀲𑀼𑀧𑀺 𑀧𑀝𑀺𑀲𑀦𑁆𑀥𑀺𑀯𑀸𑀭𑁄 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀧𑀜𑁆𑀳𑀸𑀯𑀸𑀭𑀯𑀺𑀪𑀗𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀜𑁆𑀳𑀸𑀯𑀸𑀭𑀲𑁆𑀲 𑀖𑀝𑀦𑁂 𑀅𑀦𑀼𑀮𑁄𑀫𑀕𑀡𑀦𑀸

𑁪𑁩𑁯. 𑀇𑀤𑀸𑀦𑁂𑀢𑁆𑀣 𑀬𑀣𑀸𑀮𑀤𑁆𑀥𑀸𑀦𑀺 𑀯𑀺𑀲𑁆𑀲𑀚𑁆𑀚𑀦𑀸𑀦𑀺 𑀕𑀡𑀦𑀸𑀯𑀲𑁂𑀦 𑀤𑀲𑁆𑀲𑁂𑀢𑀼𑀁 𑀳𑁂𑀢𑀼𑀬𑀸 𑀲𑀢𑁆𑀢𑀸𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀲𑀢𑁆𑀢𑀸𑀢𑀺 𑀓𑀼𑀲𑀮𑁂𑀦 𑀓𑀼𑀲𑀮𑀁, 𑀅𑀩𑁆𑀬𑀸𑀓𑀢𑀁, 𑀓𑀼𑀲𑀮𑀸𑀩𑁆𑀬𑀸𑀓𑀢𑀦𑁆𑀢𑀺 𑀢𑀻𑀡𑀺. 𑀢𑀣𑀸 𑀅𑀓𑀼𑀲𑀮𑁂𑀦; 𑀅𑀩𑁆𑀬𑀸𑀓𑀢𑁂𑀦 𑀅𑀩𑁆𑀬𑀸𑀓𑀢𑀫𑁂𑀯𑀸𑀢𑀺 𑀏𑀯𑀁 𑀲𑀢𑁆𑀢. 𑀆𑀭𑀫𑁆𑀫𑀡𑁂 𑀦𑀯𑀸𑀢𑀺 𑀏𑀓𑀫𑀽𑀮𑀓𑀏𑀓𑀸𑀯𑀲𑀸𑀦𑀸𑀦𑀺 𑀦𑀯. 𑀅𑀥𑀺𑀧𑀢𑀺𑀬𑀸 𑀤𑀲𑀸𑀢𑀺 𑀓𑀼𑀲𑀮𑀁 𑀓𑀼𑀲𑀮𑀲𑁆𑀲 𑀲𑀳𑀚𑀸𑀢𑀢𑁄 𑀘𑁂𑀯 𑀆𑀭𑀫𑁆𑀫𑀡𑀢𑁄 𑀘; 𑀅𑀓𑀼𑀲𑀮𑀲𑁆𑀲 𑀆𑀭𑀫𑁆𑀫𑀡𑀢𑁄𑀯 𑀅𑀩𑁆𑀬𑀸𑀓𑀢𑀲𑁆𑀲 𑀲𑀳𑀚𑀸𑀢𑀢𑁄 𑀘𑁂𑀯 𑀆𑀭𑀫𑁆𑀫𑀡𑀢𑁄 𑀘; 𑀓𑀼𑀲𑀮𑀸𑀩𑁆𑀬𑀸𑀓𑀢𑀲𑁆𑀲 𑀲𑀳𑀚𑀸𑀢𑀢𑁄𑀯𑀸𑀢𑀺 𑀓𑀼𑀲𑀮𑀫𑀽𑀮𑀓𑀸𑀦𑀺 𑀘𑀢𑁆𑀢𑀸𑀭𑀺. 𑀅𑀓𑀼𑀲𑀮𑀁 𑀅𑀓𑀼𑀲𑀮𑀲𑁆𑀲 𑀲𑀳𑀚𑀸𑀢𑀢𑁄 𑀘𑁂𑀯 𑀆𑀭𑀫𑁆𑀫𑀡𑀢𑁄 𑀘; 𑀅𑀩𑁆𑀬𑀸𑀓𑀢𑀲𑁆𑀲 𑀲𑀳𑀚𑀸𑀢𑀢𑁄𑀯 𑀢𑀣𑀸 𑀅𑀓𑀼𑀲𑀮𑀸𑀩𑁆𑀬𑀸𑀓𑀢𑀲𑁆𑀲𑀸𑀢𑀺 𑀅𑀓𑀼𑀲𑀮𑀫𑀽𑀮𑀓𑀸𑀦𑀺 𑀢𑀻𑀡𑀺. 𑀅𑀩𑁆𑀬𑀸𑀓𑀢𑁄 𑀅𑀩𑁆𑀬𑀸𑀓𑀢𑀲𑁆𑀲 𑀲𑀳𑀚𑀸𑀢𑀢𑁄 𑀘𑁂𑀯 𑀆𑀭𑀫𑁆𑀫𑀡𑀢𑁄 𑀘; 𑀓𑀼𑀲𑀮𑀲𑁆𑀲 𑀆𑀭𑀫𑁆𑀫𑀡𑀢𑁄𑀯 𑀢𑀣𑀸 𑀅𑀓𑀼𑀲𑀮𑀲𑁆𑀲𑀸𑀢𑀺 𑀅𑀩𑁆𑀬𑀸𑀓𑀢𑀫𑀽𑀮𑀓𑀸𑀦𑀺 𑀢𑀻𑀡𑀻𑀢𑀺 𑀏𑀯𑀁 𑀤𑀲. 𑀏𑀢𑁆𑀣 𑀧𑀦 𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀧𑀺 𑀲𑀢𑁆𑀢𑀥𑀸, 𑀲𑀳𑀚𑀸𑀢𑀸𑀥𑀺𑀧𑀢𑀺𑀧𑀺 𑀲𑀢𑁆𑀢𑀥𑀸𑀯 𑀮𑀩𑁆𑀪𑀢𑀺.

𑀅𑀦𑀦𑁆𑀢𑀭𑁂 𑀲𑀢𑁆𑀢𑀸𑀢𑀺 𑀓𑀼𑀲𑀮𑀫𑀽𑀮𑀓𑀸𑀦𑀺 𑀤𑁆𑀯𑁂, 𑀢𑀣𑀸 𑀅𑀓𑀼𑀲𑀮𑀫𑀽𑀮𑀓𑀸𑀦𑀺, 𑀅𑀩𑁆𑀬𑀸𑀓𑀢𑀫𑀽𑀮𑀓𑀸𑀦𑀺 𑀢𑀻𑀡𑀻𑀢𑀺 𑀏𑀯𑀁 𑀲𑀢𑁆𑀢. 𑀲𑀫𑀦𑀦𑁆𑀢𑀭𑁂𑀧𑀺 𑀏𑀢𑀸𑀦𑁂𑀯. 𑀲𑀳𑀚𑀸𑀢𑁂 𑀦𑀯𑀸𑀢𑀺 𑀓𑀼𑀲𑀮𑀫𑀽𑀮𑀓𑀸𑀦𑀺 𑀢𑀻𑀡𑀺, 𑀅𑀓𑀼𑀲𑀮𑀫𑀽𑀮𑀓𑀸𑀦𑀺 𑀢𑀻𑀡𑀺, 𑀅𑀩𑁆𑀬𑀸𑀓𑀢𑀫𑀽𑀮𑀓𑀁 𑀏𑀓𑀁, 𑀢𑀣𑀸 𑀓𑀼𑀲𑀮𑀸𑀩𑁆𑀬𑀸𑀓𑀢𑀫𑀽𑀮𑀓𑀁, 𑀅𑀓𑀼𑀲𑀮𑀸𑀩𑁆𑀬𑀸𑀓𑀢𑀫𑀽𑀮𑀓𑀜𑁆𑀘𑀸𑀢𑀺 𑀏𑀯𑀁 𑀦𑀯. 𑀅𑀜𑁆𑀜𑀫𑀜𑁆𑀜𑁂 𑀢𑀻𑀡𑀻𑀢𑀺 𑀓𑀼𑀲𑀮𑁂𑀦 𑀓𑀼𑀲𑀮𑀁, 𑀅𑀓𑀼𑀲𑀮𑁂𑀦 𑀅𑀓𑀼𑀲𑀮𑀁, 𑀅𑀩𑁆𑀬𑀸𑀓𑀢𑁂𑀦 𑀅𑀩𑁆𑀬𑀸𑀓𑀢𑀦𑁆𑀢𑀺 𑀏𑀯𑀁 𑀢𑀻𑀡𑀺. 𑀦𑀺𑀲𑁆𑀲𑀬𑁂 𑀢𑁂𑀭𑀲𑀸𑀢𑀺 𑀲𑀳𑀚𑀸𑀢𑀢𑁄𑀯 𑀓𑀼𑀲𑀮𑀫𑀽𑀮𑀓𑀸𑀦𑀺 𑀢𑀻𑀡𑀺, 𑀢𑀣𑀸 𑀅𑀓𑀼𑀲𑀮𑀫𑀽𑀮𑀓𑀸𑀦𑀺, 𑀢𑀣𑀸 𑀅𑀩𑁆𑀬𑀸𑀓𑀢𑀫𑀽𑀮𑀓𑀸𑀦𑀺. 𑀏𑀢𑁆𑀣 𑀧𑀦 𑀧𑀼𑀭𑁂𑀚𑀸𑀢𑀫𑁆𑀧𑀺 𑀮𑀩𑁆𑀪𑀢𑀺. 𑀅𑀩𑁆𑀬𑀸𑀓𑀢𑀜𑁆𑀳𑀺 𑀅𑀩𑁆𑀬𑀸𑀓𑀢𑀲𑁆𑀲 𑀲𑀳𑀚𑀸𑀢𑀫𑁆𑀧𑀺 𑀳𑁄𑀢𑀺 𑀧𑀼𑀭𑁂𑀚𑀸𑀢𑀫𑁆𑀧𑀺; 𑀓𑀼𑀲𑀮𑀲𑁆𑀲 𑀧𑀼𑀭𑁂𑀚𑀸𑀢𑀫𑁂𑀯 𑀢𑀣𑀸 𑀅𑀓𑀼𑀲𑀮𑀲𑁆𑀲. 𑀧𑀼𑀦 𑀓𑀼𑀲𑀮𑀸𑀩𑁆𑀬𑀸𑀓𑀢𑁄 𑀲𑀳𑀚𑀸𑀢𑀧𑀼𑀭𑁂𑀚𑀸𑀢𑀢𑁄 𑀓𑀼𑀲𑀮𑀲𑁆𑀲, 𑀲𑀳𑀚𑀸𑀢𑀢𑁄𑀯 𑀅𑀩𑁆𑀬𑀸𑀓𑀢𑀲𑁆𑀲, 𑀢𑀣𑀸 𑀅𑀓𑀼𑀲𑀮𑀸𑀩𑁆𑀬𑀸𑀓𑀢𑁄𑀢𑀺 𑀏𑀯𑀁 𑀢𑁂𑀭𑀲. 𑀉𑀧𑀦𑀺𑀲𑁆𑀲𑀬𑁂 𑀦𑀯𑀸𑀢𑀺 𑀏𑀓𑀫𑀽𑀮𑀓𑁂𑀓𑀸𑀯𑀲𑀸𑀦𑀸 𑀦𑀯. 𑀢𑁂𑀲𑀁 𑀯𑀺𑀪𑀗𑁆𑀕𑁂 𑀢𑁂𑀯𑀻𑀲𑀢𑀺 𑀪𑁂𑀤𑀸 𑀤𑀲𑁆𑀲𑀺𑀢𑀸. 𑀢𑁂𑀲𑀼 𑀆𑀭𑀫𑁆𑀫𑀡𑀽𑀧𑀦𑀺𑀲𑁆𑀲𑀬𑁂 𑀲𑀢𑁆𑀢, 𑀅𑀦𑀦𑁆𑀢𑀭𑀽𑀧𑀦𑀺𑀲𑁆𑀲𑀬𑁂 𑀲𑀢𑁆𑀢, 𑀧𑀓𑀢𑀽𑀧𑀦𑀺𑀲𑁆𑀲𑀬𑁂 𑀦𑀯 𑀳𑁄𑀦𑁆𑀢𑀺. 𑀧𑀼𑀭𑁂𑀚𑀸𑀢𑁂 𑀢𑀻𑀡𑀻𑀢𑀺 𑀅𑀩𑁆𑀬𑀸𑀓𑀢𑁄 𑀅𑀩𑁆𑀬𑀸𑀓𑀢𑀲𑁆𑀲, 𑀓𑀼𑀲𑀮𑀲𑁆𑀲, 𑀅𑀓𑀼𑀲𑀮𑀲𑁆𑀲𑀸𑀢𑀺 𑀏𑀯𑀁 𑀢𑀻𑀡𑀺.

𑀧𑀘𑁆𑀙𑀸𑀚𑀸𑀢𑁂 𑀢𑀻𑀡𑀻𑀢𑀺 𑀓𑀼𑀲𑀮𑁄 𑀅𑀩𑁆𑀬𑀸𑀓𑀢𑀲𑁆𑀲, 𑀅𑀓𑀼𑀲𑀮𑁄 𑀅𑀩𑁆𑀬𑀸𑀓𑀢𑀲𑁆𑀲, 𑀅𑀩𑁆𑀬𑀸𑀓𑀢𑁄 𑀅𑀩𑁆𑀬𑀸𑀓𑀢𑀲𑁆𑀲𑀸𑀢𑀺 𑀏𑀯𑀁 𑀢𑀻𑀡𑀺. 𑀆𑀲𑁂𑀯𑀦𑁂 𑀢𑀻𑀡𑀺 𑀅𑀜𑁆𑀜𑀫𑀜𑁆𑀜𑀲𑀤𑀺𑀲𑀸𑀦𑀺. 𑀓𑀫𑁆𑀫𑁂 𑀲𑀢𑁆𑀢 𑀳𑁂𑀢𑀼𑀲𑀤𑀺𑀲𑀸𑀦𑀺. 𑀢𑀢𑁆𑀣 𑀤𑁆𑀯𑀻𑀲𑀼 𑀯𑀺𑀲𑁆𑀲𑀚𑁆𑀚𑀦𑁂𑀲𑀼 𑀦𑀸𑀦𑀸𑀓𑁆𑀔𑀡𑀺𑀓𑀓𑀫𑁆𑀫𑀫𑁆𑀧𑀺 𑀆𑀕𑀢𑀁, 𑀧𑀜𑁆𑀘𑀲𑀼 𑀲𑀳𑀚𑀸𑀢𑀫𑁂𑀯. 𑀯𑀺𑀧𑀸𑀓𑁂 𑀏𑀓𑀁 𑀅𑀩𑁆𑀬𑀸𑀓𑀢𑁂𑀦 𑀅𑀩𑁆𑀬𑀸𑀓𑀢𑀁. 𑀆𑀳𑀸𑀭𑀇𑀦𑁆𑀤𑁆𑀭𑀺𑀬𑀛𑀸𑀦𑀫𑀕𑁆𑀕𑁂𑀲𑀼 𑀲𑀢𑁆𑀢 𑀳𑁂𑀢𑀼𑀲𑀤𑀺𑀲𑀸𑀦𑁂𑀯. 𑀇𑀦𑁆𑀤𑁆𑀭𑀺𑀬𑀁 𑀧𑀦𑁂𑀢𑁆𑀣 𑀲𑀳𑀚𑀸𑀢𑀧𑀼𑀭𑁂𑀚𑀸𑀢𑀯𑀲𑁂𑀦 𑀆𑀕𑀢𑀁. 𑀲𑀫𑁆𑀧𑀬𑀼𑀢𑁆𑀢𑁂 𑀢𑀻𑀡𑀺 𑀅𑀜𑁆𑀜𑀫𑀜𑁆𑀜𑀲𑀤𑀺𑀲𑀸𑀦𑀺. 𑀯𑀺𑀧𑁆𑀧𑀬𑀼𑀢𑁆𑀢𑁂 𑀧𑀜𑁆𑀘𑀸𑀢𑀺 𑀲𑀳𑀚𑀸𑀢𑀧𑀘𑁆𑀙𑀸𑀚𑀸𑀢𑀢𑁄 𑀓𑀼𑀲𑀮𑁂𑀦 𑀅𑀩𑁆𑀬𑀸𑀓𑀢𑀁, 𑀅𑀓𑀼𑀲𑀮𑁂𑀦 𑀅𑀩𑁆𑀬𑀸𑀓𑀢𑀁, 𑀲𑀳𑀚𑀸𑀢𑀧𑀼𑀭𑁂𑀚𑀸𑀢𑀧𑀘𑁆𑀙𑀸𑀚𑀸𑀢𑀢𑁄 𑀅𑀩𑁆𑀬𑀸𑀓𑀢𑁂𑀦 𑀅𑀩𑁆𑀬𑀸𑀓𑀢𑀁, 𑀯𑀢𑁆𑀣𑀼𑀧𑀼𑀭𑁂𑀚𑀸𑀢𑀢𑁄 𑀅𑀩𑁆𑀬𑀸𑀓𑀢𑁂𑀦 𑀓𑀼𑀲𑀮𑀁, 𑀢𑀣𑀸 𑀅𑀓𑀼𑀲𑀮𑀦𑁆𑀢𑀺 𑀏𑀓𑀁 𑀓𑀼𑀲𑀮𑀫𑀽𑀮𑀁, 𑀏𑀓𑀁 𑀅𑀓𑀼𑀲𑀮𑀫𑀽𑀮𑀁, 𑀢𑀻𑀡𑀺 𑀅𑀩𑁆𑀬𑀸𑀓𑀢𑀫𑀽𑀮𑀸𑀦𑀻𑀢𑀺 𑀏𑀯𑀁 𑀧𑀜𑁆𑀘.

𑀅𑀢𑁆𑀣𑀺𑀬𑀸 𑀢𑁂𑀭𑀲𑀸𑀢𑀺 𑀲𑀳𑀚𑀸𑀢𑀢𑁄 𑀓𑀼𑀲𑀮𑁂𑀦 𑀓𑀼𑀲𑀮𑀁, 𑀲𑀳𑀚𑀸𑀢𑀧𑀘𑁆𑀙𑀸𑀚𑀸𑀢𑀢𑁄 𑀓𑀼𑀲𑀮𑁂𑀦 𑀅𑀩𑁆𑀬𑀸𑀓𑀢𑀁, 𑀲𑀳𑀚𑀸𑀢𑀢𑁄𑀯 𑀓𑀼𑀲𑀮𑁂𑀦 𑀓𑀼𑀲𑀮𑀸𑀩𑁆𑀬𑀸𑀓𑀢𑀦𑁆𑀢𑀺 𑀓𑀼𑀲𑀮𑀫𑀽𑀮𑀸𑀦𑀺 𑀢𑀻𑀡𑀺, 𑀢𑀣𑀸 𑀅𑀓𑀼𑀲𑀮𑀫𑀽𑀮𑀸𑀦𑀺, 𑀲𑀳𑀚𑀸𑀢𑀧𑀼𑀭𑁂𑀚𑀸𑀢𑀧𑀘𑁆𑀙𑀸𑀚𑀸𑀢𑀸𑀳𑀸𑀭𑀺𑀦𑁆𑀤𑁆𑀭𑀺𑀬𑀢𑁄 𑀧𑀦 𑀅𑀩𑁆𑀬𑀸𑀓𑀢𑁂𑀦 𑀅𑀩𑁆𑀬𑀸𑀓𑀢𑀁, 𑀯𑀢𑁆𑀣𑀸𑀭𑀫𑁆𑀫𑀡𑀧𑀼𑀭𑁂𑀚𑀸𑀢𑀢𑁄 𑀅𑀩𑁆𑀬𑀸𑀓𑀢𑁂𑀦 𑀓𑀼𑀲𑀮𑀁, 𑀢𑀣𑀸 𑀅𑀓𑀼𑀲𑀮𑀁, 𑀲𑀳𑀚𑀸𑀢𑀧𑀼𑀭𑁂𑀚𑀸𑀢𑀢𑁄 𑀓𑀼𑀲𑀮𑁄 𑀘 𑀅𑀩𑁆𑀬𑀸𑀓𑀢𑁄 𑀘 𑀅𑀓𑀼𑀲𑀮𑀲𑁆𑀲; 𑀲𑁆𑀯𑁂𑀯 𑀅𑀩𑁆𑀬𑀸𑀓𑀢𑀲𑁆𑀲 𑀲𑀳𑀚𑀸𑀢𑀧𑀘𑁆𑀙𑀸𑀚𑀸𑀢𑀆𑀳𑀸𑀭𑀺𑀦𑁆𑀤𑁆𑀭𑀺𑀬𑀢𑁄 𑀲𑀳𑀚𑀸𑀢𑀧𑀼𑀭𑁂𑀚𑀸𑀢𑀢𑁄 𑀘 𑀓𑀼𑀲𑀮𑁄 𑀘 𑀅𑀩𑁆𑀬𑀸𑀓𑀢𑁄 𑀘 𑀓𑀼𑀲𑀮𑀲𑁆𑀲; 𑀲𑁆𑀯𑁂𑀯 𑀅𑀩𑁆𑀬𑀸𑀓𑀢𑀲𑁆𑀲 𑀲𑀳𑀚𑀸𑀢𑀧𑀘𑁆𑀙𑀸𑀚𑀸𑀢𑀆𑀳𑀸𑀭𑀺𑀦𑁆𑀤𑁆𑀭𑀺𑀬𑀢𑁄𑀢𑀺 𑀏𑀯𑀁 𑀢𑁂𑀭𑀲. 𑀦𑀢𑁆𑀣𑀺𑀯𑀺𑀕𑀢𑁂𑀲𑀼 𑀲𑀢𑁆𑀢 𑀅𑀦𑀦𑁆𑀢𑀭𑀲𑀤𑀺𑀲𑀸𑀦𑀺. 𑀅𑀯𑀺𑀕𑀢𑁂 𑀢𑁂𑀭𑀲 𑀅𑀢𑁆𑀣𑀺𑀲𑀤𑀺𑀲𑀸𑀦𑀻𑀢𑀺. 𑀏𑀯𑀫𑁂𑀢𑁆𑀣 𑀲𑀢𑁆𑀢 𑀕𑀡𑀦𑀧𑀭𑀺𑀘𑁆𑀙𑁂𑀤𑀸 𑀏𑀓𑀁 𑀢𑀻𑀡𑀺 𑀧𑀜𑁆𑀘 𑀲𑀢𑁆𑀢 𑀦𑀯 𑀤𑀲 𑀢𑁂𑀭𑀲𑀸𑀢𑀺. 𑀢𑁂𑀲𑀼 𑀯𑀺𑀧𑀸𑀓𑀯𑀲𑁂𑀦 𑀏𑀓𑀫𑁂𑀯 𑀏𑀓𑀓𑀁, 𑀅𑀜𑁆𑀜𑀫𑀜𑁆𑀜𑀧𑀼𑀭𑁂𑀚𑀸𑀢𑀧𑀘𑁆𑀙𑀸𑀚𑀸𑀢𑀸𑀲𑁂𑀯𑀦𑀲𑀫𑁆𑀧𑀬𑀼𑀢𑁆𑀢𑀯𑀲𑁂𑀦 𑀧𑀜𑁆𑀘 𑀢𑀺𑀓𑀸, 𑀯𑀺𑀧𑁆𑀧𑀬𑀼𑀢𑁆𑀢𑀯𑀲𑁂𑀦 𑀏𑀓𑀫𑁂𑀯 𑀧𑀜𑁆𑀘𑀓𑀁, 𑀳𑁂𑀢𑀼𑀅𑀦𑀦𑁆𑀢𑀭𑀲𑀫𑀦𑀦𑁆𑀢𑀭𑀓𑀫𑁆𑀫𑀆𑀳𑀸𑀭𑀺𑀦𑁆𑀤𑁆𑀭𑀺𑀬𑀛𑀸𑀦𑀫𑀕𑁆𑀕𑀦𑀢𑁆𑀣𑀺𑀯𑀺𑀕𑀢𑀯𑀲𑁂𑀦 𑀤𑀲 𑀲𑀢𑁆𑀢𑀓𑀸, 𑀆𑀭𑀫𑁆𑀫𑀡𑀲𑀳𑀚𑀸𑀢𑀉𑀧𑀦𑀺𑀲𑁆𑀲𑀬𑀯𑀲𑁂𑀦 𑀢𑀬𑁄 𑀦𑀯𑀓𑀸, 𑀅𑀥𑀺𑀧𑀢𑀺𑀯𑀲𑁂𑀦 𑀏𑀓𑀁 𑀤𑀲𑀓𑀁, 𑀦𑀺𑀲𑁆𑀲𑀬𑀅𑀢𑁆𑀣𑀺𑀅𑀯𑀺𑀕𑀢𑀯𑀲𑁂𑀦 𑀢𑀬𑁄 𑀢𑁂𑀭𑀲𑀓𑀸𑀢𑀺 𑀏𑀯𑀁 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀧𑀘𑁆𑀘𑀬𑁂 𑀦𑀺𑀤𑁆𑀤𑀺𑀝𑁆𑀞𑀯𑀸𑀭𑁂 𑀕𑀡𑀦𑀯𑀲𑁂𑀦 𑀲𑀸𑀥𑀼𑀓𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀢𑁂𑀲𑀁 𑀯𑀲𑁂𑀦 𑀤𑀼𑀓𑀢𑀺𑀓𑀸𑀤𑀻𑀲𑀼 𑀧𑀘𑁆𑀘𑀬𑀲𑀁𑀲𑀦𑁆𑀤𑀦𑁂 𑀕𑀡𑀦𑀸 𑀯𑁂𑀤𑀺𑀢𑀩𑁆𑀩𑀸.

𑁪𑁪𑁦. 𑀬𑁂 𑀧𑀦 𑀧𑀘𑁆𑀘𑀬𑀸 𑀬𑁂𑀲𑀁 𑀧𑀘𑁆𑀘𑀬𑀸𑀦𑀁 𑀯𑀺𑀲𑀪𑀸𑀕𑀸 𑀯𑀸 𑀯𑀺𑀭𑀼𑀤𑁆𑀥𑀸 𑀯𑀸 𑀳𑁄𑀦𑁆𑀢𑀺, 𑀢𑁂 𑀢𑁂𑀳𑀺 𑀲𑀤𑁆𑀥𑀺𑀁 𑀦 𑀬𑁄𑀚𑁂𑀢𑀩𑁆𑀩𑀸. 𑀲𑁂𑀬𑁆𑀬𑀣𑀺𑀤𑀁 𑁋 𑀳𑁂𑀢𑀼𑀧𑀘𑁆𑀘𑀬𑀲𑁆𑀲 𑀢𑀸𑀯 𑀆𑀭𑀫𑁆𑀫𑀡𑀸𑀦𑀦𑁆𑀢𑀭𑀲𑀫𑀦𑀦𑁆𑀢𑀭𑀽𑀧𑀦𑀺𑀲𑁆𑀲𑀬𑀧𑀼𑀭𑁂𑀚𑀸𑀢𑀧𑀘𑁆𑀙𑀸𑀚𑀸𑀢𑀓𑀫𑁆𑀫𑀸𑀲𑁂𑀯𑀦𑀸𑀳𑀸𑀭𑀛𑀸𑀦𑀦𑀢𑁆𑀣𑀺𑀯𑀺𑀕𑀢𑀸 𑀅𑀥𑀺𑀧𑀢𑀺𑀧𑀘𑁆𑀘𑀬𑁂 𑀘 𑀞𑀧𑁂𑀢𑁆𑀯𑀸 𑀯𑀻𑀫𑀁𑀲𑀁 𑀲𑁂𑀲𑀸𑀥𑀺𑀧𑀢𑀺𑀦𑁄 𑀯𑀺𑀲𑀪𑀸𑀕𑀸, 𑀲𑀳𑀚𑀸𑀢𑀸𑀤𑀬𑁄 𑀲𑀪𑀸𑀕𑀸. 𑀓𑀲𑁆𑀫𑀸? 𑀢𑀣𑀸 𑀪𑀸𑀯𑀸𑀪𑀸𑀯𑀢𑁄. 𑀳𑁂𑀢𑀼𑀧𑀘𑁆𑀘𑀬𑁄 𑀳𑀺 𑀬𑁂𑀲𑀁 𑀳𑁂𑀢𑀼𑀧𑀘𑁆𑀘𑀬𑁄 𑀳𑁄𑀢𑀺, 𑀢𑁂𑀲𑀁 𑀲𑀳𑀚𑀸𑀢𑀸𑀤𑀺𑀧𑀘𑁆𑀘𑀬𑁄𑀧𑀺 𑀳𑁄𑀢𑀺, 𑀆𑀭𑀫𑁆𑀫𑀡𑀸𑀤𑀺𑀧𑀘𑁆𑀘𑀬𑁄 𑀧𑀦 𑀦 𑀳𑁄𑀢𑀻𑀢𑀺 𑀆𑀭𑀫𑁆𑀫𑀡𑀸𑀤𑀬𑁄 𑀢𑀲𑁆𑀲 𑀯𑀺𑀲𑀪𑀸𑀕𑀸 𑀦𑀸𑀫. 𑀢𑀲𑁆𑀫𑀸 𑀲𑁄 𑀢𑁂𑀳𑀺, 𑀢𑁂 𑀯𑀸 𑀢𑁂𑀦 𑀲𑀤𑁆𑀥𑀺𑀁, 𑀦 𑀬𑁄𑀚𑁂𑀢𑀩𑁆𑀩𑀸. 𑀧𑀼𑀭𑁂𑀚𑀸𑀢𑀧𑀘𑁆𑀙𑀸𑀚𑀸𑀢𑀲𑀫𑁆𑀧𑀬𑀼𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑀅𑀢𑁆𑀣𑀺𑀦𑀢𑁆𑀣𑀺𑀯𑀺𑀕𑀢𑀸𑀯𑀺𑀕𑀢𑀸 𑀘 𑀅𑀜𑁆𑀜𑀫𑀜𑁆𑀜𑀯𑀺𑀭𑀼𑀤𑁆𑀥𑀸, 𑀢𑁂𑀧𑀺 𑀅𑀜𑁆𑀜𑀫𑀜𑁆𑀜𑀁 𑀦 𑀬𑁄𑀚𑁂𑀢𑀩𑁆𑀩𑀸. 𑀢𑀢𑁆𑀣 𑀅𑀬𑁄𑀚𑀦𑀻𑀬𑁂 𑀯𑀚𑁆𑀚𑁂𑀢𑁆𑀯𑀸 𑀬𑁄𑀚𑀦𑀻𑀬𑁂𑀳𑀺 𑀬𑁄𑀕𑁂 𑀬𑁂 𑀯𑀸𑀭𑀸 𑀮𑀩𑁆𑀪𑀦𑁆𑀢𑀺, 𑀢𑁂 𑀲𑀗𑁆𑀔𑁂𑀧𑀢𑁄 𑀤𑀲𑁆𑀲𑁂𑀢𑀼𑀁 𑀳𑁂𑀢𑀼𑀧𑀘𑁆𑀘𑀬𑀸 𑀅𑀥𑀺𑀧𑀢𑀺𑀬𑀸 𑀘𑀢𑁆𑀢𑀸𑀭𑀻𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀢𑀢𑁆𑀣 𑀓𑀺𑀜𑁆𑀘𑀸𑀧𑀺 𑀳𑁂𑀢𑀼𑀧𑀘𑁆𑀘𑀬𑀲𑁆𑀲 𑀅𑀥𑀺𑀧𑀢𑀺𑀦𑀸 𑀲𑀁𑀲𑀦𑁆𑀤𑀦𑁂 𑀊𑀦𑀢𑀭𑀕𑀡𑀦𑀯𑀲𑁂𑀦 𑀲𑀢𑁆𑀢𑀳𑀺 𑀯𑀸𑀭𑁂𑀳𑀺 𑀪𑀯𑀺𑀢𑀩𑁆𑀩𑀁, 𑀬𑀲𑁆𑀫𑀸 𑀧𑀦 𑀅𑀥𑀺𑀧𑀢𑀻𑀲𑀼 𑀯𑀻𑀫𑀁𑀲𑀸𑀯 𑀳𑁂𑀢𑀼𑀧𑀘𑁆𑀘𑀬𑁄, 𑀦 𑀇𑀢𑀭𑁂, 𑀢𑀲𑁆𑀫𑀸 𑀯𑀺𑀲𑀪𑀸𑀕𑁂 𑀯𑀚𑁆𑀚𑁂𑀢𑁆𑀯𑀸 𑀲𑀪𑀸𑀕𑀯𑀲𑁂𑀦 ‘‘𑀘𑀢𑁆𑀢𑀸𑀭𑀻’’𑀢𑀺 𑀯𑀼𑀢𑁆𑀢𑀁. 𑀢𑀸𑀦𑀺 𑀏𑀯𑀁 𑀯𑁂𑀤𑀺𑀢𑀩𑁆𑀩𑀸𑀦𑀺 𑁋 𑀓𑀼𑀲𑀮𑁄 𑀥𑀫𑁆𑀫𑁄 𑀓𑀼𑀲𑀮𑀲𑁆𑀲 𑀥𑀫𑁆𑀫𑀲𑁆𑀲 𑀳𑁂𑀢𑀼𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄 𑀅𑀥𑀺𑀧𑀢𑀺𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄; 𑀓𑀼𑀲𑀮𑀸 𑀯𑀻𑀫𑀁𑀲𑀸 𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀁 𑀔𑀦𑁆𑀥𑀸𑀦𑀁, 𑀓𑀼𑀲𑀮𑁄 𑀥𑀫𑁆𑀫𑁄 𑀅𑀩𑁆𑀬𑀸𑀓𑀢𑀲𑁆𑀲 𑀥𑀫𑁆𑀫𑀲𑁆𑀲 𑀳𑁂𑀢𑀼𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄 𑀅𑀥𑀺𑀧𑀢𑀺𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄; 𑀓𑀼𑀲𑀮𑀸 𑀯𑀻𑀫𑀁𑀲𑀸 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀦𑀁 𑀭𑀽𑀧𑀸𑀦𑀁, 𑀓𑀼𑀲𑀮𑁄 𑀥𑀫𑁆𑀫𑁄 𑀓𑀼𑀲𑀮𑀲𑁆𑀲 𑀘 𑀅𑀩𑁆𑀬𑀸𑀓𑀢𑀲𑁆𑀲 𑀘 𑀥𑀫𑁆𑀫𑀲𑁆𑀲 𑀳𑁂𑀢𑀼𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄 𑀅𑀥𑀺𑀧𑀢𑀺𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄; 𑀓𑀼𑀲𑀮𑀸 𑀯𑀻𑀫𑀁𑀲𑀸 𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀁 𑀔𑀦𑁆𑀥𑀸𑀦𑀁 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀦𑀜𑁆𑀘 𑀭𑀽𑀧𑀸𑀦𑀁, 𑀅𑀩𑁆𑀬𑀸𑀓𑀢𑁄 𑀥𑀫𑁆𑀫𑁄 𑀅𑀩𑁆𑀬𑀸𑀓𑀢𑀲𑁆𑀲 𑀥𑀫𑁆𑀫𑀲𑁆𑀲 𑀳𑁂𑀢𑀼𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄 𑀅𑀥𑀺𑀧𑀢𑀺𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄; 𑀯𑀺𑀧𑀸𑀓𑀸𑀩𑁆𑀬𑀸𑀓𑀢𑀸 𑀓𑀺𑀭𑀺𑀬𑀸𑀩𑁆𑀬𑀸𑀓𑀢𑀸 𑀯𑀻𑀫𑀁𑀲𑀸 𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀁 𑀔𑀦𑁆𑀥𑀸𑀦𑀁 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀦𑀜𑁆𑀘 𑀭𑀽𑀧𑀸𑀦𑀦𑁆𑀢𑀺. 𑀏𑀢𑁆𑀣 𑀘 𑀯𑀺𑀧𑀸𑀓𑀸𑀩𑁆𑀬𑀸𑀓𑀢𑀸 𑀮𑁄𑀓𑀼𑀢𑁆𑀢𑀭𑀢𑁄𑀯 𑀕𑀳𑁂𑀢𑀩𑁆𑀩𑀸. 𑀆𑀭𑀫𑁆𑀫𑀡𑀧𑀘𑁆𑀘𑀬𑀅𑀦𑀦𑁆𑀢𑀭𑀧𑀘𑁆𑀘𑀬𑀸𑀤𑀬𑁄 𑀧𑀦 𑀯𑀺𑀲𑀪𑀸𑀕𑀢𑁆𑀢𑀸 𑀦 𑀬𑁄𑀚𑀺𑀢𑀸. 𑀇𑀫𑀺𑀦𑀸 𑀉𑀧𑀸𑀬𑁂𑀦 𑀲𑀩𑁆𑀩𑀢𑁆𑀣 𑀮𑀩𑁆𑀪𑀫𑀸𑀦𑀜𑁆𑀘 𑀅𑀮𑀩𑁆𑀪𑀫𑀸𑀦𑀜𑁆𑀘 𑀜𑀢𑁆𑀯𑀸 𑀮𑀩𑁆𑀪𑀫𑀸𑀦𑀯𑀲𑁂𑀦 𑀯𑀸𑀭𑀸 𑀉𑀤𑁆𑀥𑀭𑀺𑀢𑀩𑁆𑀩𑀸.

𑀲𑀳𑀚𑀸𑀢𑁂 𑀲𑀢𑁆𑀢𑀸𑀢𑀺 𑀳𑁂𑀢𑀼𑀬𑀸 𑀮𑀤𑁆𑀥𑀸𑀦𑁂𑀯. 𑀅𑀜𑁆𑀜𑀫𑀜𑁆𑀜𑁂 𑀢𑀻𑀡𑀻𑀢𑀺 𑀲𑀼𑀤𑁆𑀥𑀺𑀓𑀅𑀜𑁆𑀜𑀫𑀜𑁆𑀜𑁂 𑀮𑀤𑁆𑀥𑀸𑀦𑁂𑀯. 𑀦𑀺𑀲𑁆𑀲𑀬𑁂 𑀲𑀢𑁆𑀢𑀸𑀢𑀺 𑀳𑁂𑀢𑀼𑀬𑀸 𑀮𑀤𑁆𑀥𑀸𑀦𑁂𑀯. 𑀯𑀺𑀧𑀸𑀓𑁂 𑀏𑀓𑀦𑁆𑀢𑀺 𑀲𑀼𑀤𑁆𑀥𑀺𑀓𑀯𑀺𑀧𑀸𑀓𑁂 𑀮𑀤𑁆𑀥𑀫𑁂𑀯. 𑀇𑀦𑁆𑀤𑁆𑀭𑀺𑀬𑀫𑀕𑁆𑀕𑁂𑀲𑀼 𑀘𑀢𑁆𑀢𑀸𑀭𑀻𑀢𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀸𑀦𑁂𑀯. 𑀲𑀫𑁆𑀧𑀬𑀼𑀢𑁆𑀢𑁂 𑀢𑀻𑀡𑀻𑀢𑀺 𑀲𑀼𑀤𑁆𑀥𑀺𑀓𑀲𑀫𑁆𑀧𑀬𑀼𑀢𑁆𑀢𑁂 𑀮𑀤𑁆𑀥𑀸𑀦𑁂𑀯. 𑀯𑀺𑀧𑁆𑀧𑀬𑀼𑀢𑁆𑀢𑁂 𑀢𑀻𑀡𑀻𑀢𑀺 𑀓𑀼𑀲𑀮𑀸𑀤𑀺𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀁 𑀭𑀽𑀧𑀁 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀁 𑀓𑀢𑁆𑀯𑀸 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀅𑀢𑁆𑀣𑀺𑀅𑀯𑀺𑀕𑀢𑁂𑀲𑀼 𑀲𑀢𑁆𑀢𑀸𑀢𑀺 𑀳𑁂𑀢𑀼𑀬𑀸 𑀮𑀤𑁆𑀥𑀸𑀦𑁂𑀯.

𑁪𑁪𑁧-𑁪𑁪𑁩. 𑀏𑀯𑀁 𑀬𑁂𑀳𑀺 𑀅𑀥𑀺𑀧𑀢𑀺𑀧𑀘𑁆𑀘𑀬𑀸𑀤𑀻𑀳𑀺 𑀏𑀓𑀸𑀤𑀲𑀳𑀺 𑀧𑀘𑁆𑀘𑀬𑁂𑀳𑀺 𑀲𑀤𑁆𑀥𑀺𑀁 𑀳𑁂𑀢𑀼𑀧𑀘𑁆𑀘𑀬𑁄 𑀬𑁄𑀚𑀦𑀁 𑀮𑀪𑀢𑀺, 𑀢𑁂𑀲𑀁 𑀯𑀲𑁂𑀦 𑀤𑀼𑀫𑀽𑀮𑀓𑀦𑀬𑁂 𑀕𑀡𑀦𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀢𑀺𑀫𑀽𑀮𑀓𑀸𑀤𑀻𑀲𑀼 𑀢𑀲𑁆𑀲 𑀤𑀲𑁆𑀲𑀦𑀢𑁆𑀣𑀁 𑀮𑀓𑁆𑀔𑀡𑀁 𑀞𑀧𑁂𑀦𑁆𑀢𑁄 𑀳𑁂𑀢𑀼𑀲𑀳𑀚𑀸𑀢𑀦𑀺𑀲𑁆𑀲𑀬𑀅𑀢𑁆𑀣𑀺𑀅𑀯𑀺𑀕𑀢𑀦𑁆𑀢𑀺 𑀲𑀢𑁆𑀢𑀸𑀢𑀺𑀆𑀤𑀺𑀫𑀸𑀳. 𑀧𑁄𑀢𑁆𑀣𑀓𑁂𑀲𑀼 𑀧𑀦 𑀦𑀺𑀲𑁆𑀲𑀉𑀧𑀦𑀺𑀲𑁆𑀲𑀅𑀥𑀺𑀧𑀸𑀢𑀺 𑀏𑀯𑀁 𑀧𑀭𑀺𑀳𑀻𑀦𑀓𑁆𑀔𑀭𑀸𑀦𑀺 𑀧𑀘𑁆𑀘𑀬𑀦𑀸𑀫𑀸𑀦𑀺 𑀮𑀺𑀔𑀦𑁆𑀢𑀺, 𑀢𑀁 𑀲𑀜𑁆𑀜𑀸𑀓𑀭𑀡𑀫𑀢𑁆𑀢𑀯𑀲𑁂𑀦 𑀮𑀺𑀔𑀺𑀢𑀁. 𑀢𑀲𑁆𑀫𑀸 𑀢𑀸𑀤𑀺𑀲𑁂𑀲𑀼 𑀞𑀸𑀦𑁂𑀲𑀼 𑀧𑀭𑀺𑀧𑀼𑀡𑁆𑀡𑀸 𑀧𑀸𑀴𑀺 𑀓𑀸𑀢𑀩𑁆𑀩𑀸. 𑀬𑀁 𑀧𑀦𑀺𑀤𑀁 𑀮𑀓𑁆𑀔𑀡𑀁 𑀞𑀧𑀺𑀢𑀁, 𑀢𑁂𑀦 𑀇𑀤𑀁 𑀤𑀻𑀧𑁂𑀢𑀺 𑁋 𑀅𑀬𑀁 𑀳𑁂𑀢𑀼𑀧𑀘𑁆𑀘𑀬𑁄 𑀲𑀳𑀚𑀸𑀢𑀸𑀤𑀻𑀳𑀺 𑀘𑀢𑀽𑀳𑀺 𑀲𑀤𑁆𑀥𑀺𑀁 𑀲𑀁𑀲𑀦𑁆𑀤𑀦𑁂 𑀅𑀢𑁆𑀢𑀦𑁄 𑀯𑀺𑀪𑀗𑁆𑀕𑁂 𑀮𑀤𑁆𑀥𑀸𑀦𑀺 𑀲𑀢𑁆𑀢𑁂𑀯 𑀯𑀺𑀲𑁆𑀲𑀚𑁆𑀚𑀦𑀸𑀦𑀺 𑀮𑀪𑀢𑀺. 𑀲𑀘𑁂 𑀧𑀦𑁂𑀢𑁆𑀣 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑁄 𑀧𑀯𑀺𑀲𑀢𑀺, 𑀅𑀜𑁆𑀜𑀫𑀜𑁆𑀜𑁂 𑀮𑀤𑁆𑀥𑀸𑀦𑀺 𑀢𑀻𑀡𑀺 𑀮𑀪𑀢𑀺. 𑀲𑀘𑁂 𑀲𑀫𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑁄 𑀧𑀯𑀺𑀲𑀢𑀺, 𑀢𑀸𑀦𑁂𑀯 𑀢𑀻𑀡𑀺 𑀮𑀪𑀢𑀺. 𑀲𑀘𑁂 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑁄 𑀧𑀯𑀺𑀲𑀢𑀺, 𑀳𑁂𑀢𑀼𑀯𑀺𑀧𑁆𑀧𑀬𑀼𑀢𑁆𑀢𑀤𑀼𑀓𑁂 𑀮𑀤𑁆𑀥𑀸𑀦𑀺 𑀢𑀻𑀡𑀺 𑀮𑀪𑀢𑀺. 𑀲𑀘𑁂 𑀯𑀺𑀧𑀸𑀓𑀧𑀘𑁆𑀘𑀬𑁄 𑀧𑀯𑀺𑀲𑀢𑀺, 𑀲𑀩𑁆𑀩𑁂𑀳𑀺 𑀯𑀺𑀧𑀸𑀓𑀲𑀪𑀸𑀕𑁂𑀳𑀺 𑀲𑀤𑁆𑀥𑀺𑀁 𑀲𑀁𑀲𑀦𑁆𑀤𑀦𑁂 𑀏𑀯𑀫𑁂𑀯 𑀯𑀺𑀲𑁆𑀲𑀚𑁆𑀚𑀦𑀁 𑀮𑀪𑀢𑀺. 𑀲𑀘𑁂 𑀧𑀦𑁂𑀢𑁆𑀣 𑀇𑀦𑁆𑀤𑁆𑀭𑀺𑀬𑀫𑀕𑁆𑀕𑀧𑀘𑁆𑀘𑀬𑀸 𑀧𑀯𑀺𑀲𑀦𑁆𑀢𑀺, 𑀢𑁂𑀳𑀺 𑀲𑀤𑁆𑀥𑀺𑀁 𑀤𑀼𑀫𑀽𑀮𑀓𑁂 𑀮𑀤𑁆𑀥𑀸𑀦𑀺 𑀘𑀢𑁆𑀢𑀸𑀭𑀺𑀬𑁂𑀯 𑀮𑀪𑀢𑀺. 𑀲𑀘𑁂 𑀢𑁂𑀳𑀺 𑀲𑀤𑁆𑀥𑀺𑀁 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑁄 𑀧𑀯𑀺𑀲𑀢𑀺, 𑀳𑁂𑀢𑀸𑀥𑀺𑀧𑀢𑀺𑀤𑀼𑀓𑁂 𑀤𑀲𑁆𑀲𑀺𑀢𑁂𑀲𑀼 𑀘𑀢𑀽𑀲𑀼 𑀯𑀺𑀲𑁆𑀲𑀚𑁆𑀚𑀦𑁂𑀲𑀼 ‘‘𑀓𑀼𑀲𑀮𑁄 𑀥𑀫𑁆𑀫𑁄 𑀅𑀩𑁆𑀬𑀸𑀓𑀢𑀲𑁆𑀲, 𑀓𑀼𑀲𑀮𑁄 𑀥𑀫𑁆𑀫𑁄 𑀓𑀼𑀲𑀮𑀲𑁆𑀲 𑀘 𑀅𑀩𑁆𑀬𑀸𑀓𑀢𑀲𑁆𑀲 𑀘𑀸’’𑀢𑀺 𑀤𑁆𑀯𑁂 𑀅𑀧𑀦𑁂𑀢𑁆𑀯𑀸 𑀲𑁂𑀲𑀸𑀦𑀺 𑀤𑁆𑀯𑁂 𑀮𑀪𑀢𑀺. 𑀲𑀘𑁂𑀧𑀺 𑀢𑀢𑁆𑀣 𑀲𑀫𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑁄 𑀧𑀯𑀺𑀲𑀢𑀺, 𑀢𑀸𑀦𑁂𑀯 𑀤𑁆𑀯𑁂 𑀮𑀪𑀢𑀺. 𑀲𑀘𑁂 𑀧𑀦 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑁄 𑀧𑀯𑀺𑀲𑀢𑀺, 𑀇𑀢𑀭𑀸𑀦𑀺 𑀤𑁆𑀯𑁂 𑀮𑀪𑀢𑀺. 𑀲𑀘𑁂 𑀧𑀦 𑀢𑁂𑀲𑀼 𑀯𑀺𑀧𑀸𑀓𑀧𑀘𑁆𑀘𑀬𑁄 𑀧𑀯𑀺𑀲𑀢𑀺, 𑀲𑀩𑁆𑀩𑀢𑁆𑀣 𑀏𑀓𑀫𑁂𑀯 𑀮𑀪𑀢𑀺. 𑀅𑀥𑀺𑀧𑀢𑀺𑀦𑀸 𑀧𑀦 𑀲𑀤𑁆𑀥𑀺𑀁 𑀳𑁂𑀢𑀸𑀥𑀺𑀧𑀢𑀺𑀤𑀼𑀓𑀢𑁄 𑀊𑀦𑀢𑀭𑀕𑀡𑀦𑁂𑀲𑀼 𑀅𑀧𑁆𑀧𑀯𑀺𑀲𑀦𑁆𑀢𑁂𑀲𑀼 𑀘𑀢𑁆𑀢𑀸𑀭𑀺𑀬𑁂𑀯 𑀮𑀪𑀢𑀺. 𑀊𑀦𑀢𑀭𑀕𑀡𑀦𑁂𑀲𑀼 𑀧𑀯𑀺𑀲𑀦𑁆𑀢𑁂𑀲𑀼 𑀢𑁂𑀲𑀁 𑀯𑀲𑁂𑀦 𑀤𑁆𑀯𑁂 𑀏𑀓𑀦𑁆𑀢𑀺 𑀮𑀪𑀢𑀺. 𑀏𑀯𑀁 𑀢𑁂𑀲𑀁 𑀢𑁂𑀲𑀁 𑀧𑀘𑁆𑀘𑀬𑀸𑀦𑀁 𑀲𑀫𑀸𑀬𑁄𑀕𑁂 𑀮𑀩𑁆𑀪𑀫𑀸𑀦𑀁 𑀕𑀡𑀦𑀁 𑀯𑀺𑀤𑀺𑀢𑁆𑀯𑀸 𑀢𑀺𑀫𑀽𑀮𑀓𑀸𑀤𑀻𑀲𑀼 𑀕𑀡𑀦𑀸 𑀉𑀤𑁆𑀥𑀭𑀺𑀢𑀩𑁆𑀩𑀸𑀢𑀺.

𑀏𑀢𑁂𑀲𑀼 𑀧𑀦 𑀖𑀝𑀦𑁂𑀲𑀼 𑀲𑀩𑁆𑀩𑀧𑀞𑀫𑀸𑀦𑀺 𑀘𑀢𑁆𑀢𑀸𑀭𑀺 𑀖𑀝𑀦𑀸𑀦𑀺 𑀲𑀸𑀫𑀜𑁆𑀜𑀢𑁄 𑀦𑀯𑀦𑁆𑀦𑀫𑁆𑀧𑀺 𑀳𑁂𑀢𑀽𑀦𑀁 𑀯𑀲𑁂𑀦 𑀯𑀼𑀢𑁆𑀢𑀸𑀦𑀺 𑀅𑀯𑀺𑀧𑀸𑀓𑀸𑀦𑀺. 𑀅𑀩𑁆𑀬𑀸𑀓𑀢𑁂𑀦 𑀅𑀩𑁆𑀬𑀸𑀓𑀢𑀯𑀺𑀲𑁆𑀲𑀚𑁆𑀚𑀦𑁂 𑀧𑀦𑁂𑀢𑁆𑀣 𑀯𑀺𑀧𑀸𑀓𑀳𑁂𑀢𑀼𑀧𑀺 𑀮𑀩𑁆𑀪𑀢𑀺.

𑀢𑀢𑁄 𑀧𑀭𑀸𑀦𑀺 𑀧𑀜𑁆𑀘 𑀖𑀝𑀦𑀸𑀦𑀺 𑀯𑀺𑀧𑀸𑀓𑀳𑁂𑀢𑀼𑀯𑀲𑁂𑀦 𑀯𑀼𑀢𑁆𑀢𑀸𑀦𑀺. 𑀢𑀢𑁆𑀣 𑀲𑀩𑁆𑀩𑁂𑀧𑀺 𑀲𑀳𑀚𑀸𑀢𑀯𑀺𑀧𑀸𑀓𑀸 𑀘𑁂𑀯 𑀯𑀺𑀧𑀸𑀓𑀲𑀳𑀚𑀸𑀢𑀭𑀽𑀧𑀸 𑀘. 𑀢𑁂𑀲𑀼 𑀧𑀞𑀫𑁂 𑀖𑀝𑀦𑁂 𑀯𑀺𑀧𑀸𑀓𑀸 𑀘𑁂𑀯 𑀢𑀁𑀲𑀫𑀼𑀝𑁆𑀞𑀸𑀦𑀭𑀽𑀧𑀸 𑀘 𑀮𑀩𑁆𑀪𑀦𑁆𑀢𑀺, 𑀤𑀼𑀢𑀺𑀬𑁂 𑀯𑀺𑀧𑀸𑀓𑀸 𑀘𑁂𑀯 𑀧𑀝𑀺𑀲𑀦𑁆𑀥𑀺𑀬𑀜𑁆𑀘 𑀯𑀢𑁆𑀣𑀼𑀭𑀽𑀧𑀁. 𑀢𑀢𑀺𑀬𑁂 𑀅𑀭𑀽𑀧𑀥𑀫𑁆𑀫𑀸𑀯. 𑀘𑀢𑀼𑀢𑁆𑀣𑁂 𑀯𑀺𑀧𑀸𑀓𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀫𑁂𑀯 𑀮𑀩𑁆𑀪𑀢𑀺. 𑀧𑀜𑁆𑀘𑀫𑁂 𑀯𑀢𑁆𑀣𑀼𑀭𑀽𑀧𑀫𑁂𑀯.

𑀢𑀢𑁄 𑀧𑀭𑀸𑀦𑀺 𑀧𑀜𑁆𑀘𑀤𑀲 𑀖𑀝𑀦𑀸𑀦𑀺 𑀇𑀦𑁆𑀤𑁆𑀭𑀺𑀬𑀫𑀕𑁆𑀕𑀬𑀼𑀢𑁆𑀢𑀸𑀦𑀺 𑀅𑀫𑁄𑀳𑀳𑁂𑀢𑀼𑀯𑀲𑁂𑀦 𑀯𑀼𑀢𑁆𑀢𑀸𑀦𑀺. 𑀢𑀢𑁆𑀣 𑀧𑀞𑀫𑀸𑀦𑀺 𑀦𑀯 𑀦𑀺𑀭𑀸𑀥𑀺𑀧𑀢𑀻𑀦𑀺, 𑀧𑀘𑁆𑀙𑀺𑀫𑀸𑀦𑀺 𑀙 𑀲𑀸𑀥𑀺𑀧𑀢𑀻𑀦𑀺. 𑀦𑀺𑀭𑀸𑀥𑀺𑀧𑀢𑀺𑀓𑁂𑀲𑀼𑀧𑀺 𑀧𑀞𑀫𑀸𑀦𑀺 𑀘𑀢𑁆𑀢𑀸𑀭𑀺 𑀲𑀸𑀫𑀜𑁆𑀜𑀢𑁄 𑀲𑀩𑁆𑀩𑀢𑁆𑀣 𑀅𑀫𑁄𑀳𑀯𑀲𑁂𑀦 𑀯𑀼𑀢𑁆𑀢𑀸𑀦𑀺, 𑀧𑀘𑁆𑀙𑀺𑀫𑀸𑀦𑀺 𑀧𑀜𑁆𑀘 𑀯𑀺𑀧𑀸𑀓𑀸𑀫𑁄𑀳𑀯𑀲𑁂𑀦. 𑀢𑀢𑁆𑀣 𑀦𑀺𑀭𑀸𑀥𑀺𑀧𑀢𑀺𑀓𑁂𑀲𑀼 𑀧𑀞𑀫𑁂 𑀘𑀢𑁆𑀢𑀸𑀭𑀻𑀢𑀺 𑀳𑁂𑀝𑁆𑀞𑀸 𑀳𑁂𑀢𑀸𑀥𑀺𑀧𑀢𑀺𑀤𑀼𑀓𑁂 𑀤𑀲𑁆𑀲𑀺𑀢𑀸𑀦𑁂𑀯. 𑀤𑀼𑀢𑀺𑀬𑁂 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀁 𑀧𑀭𑀺𑀳𑀸𑀬𑀢𑀺. 𑀢𑀢𑀺𑀬𑁂 𑀯𑀢𑁆𑀣𑀼𑀭𑀽𑀧𑀁 𑀧𑀭𑀺𑀳𑀸𑀬𑀢𑀺. 𑀘𑀢𑀼𑀢𑁆𑀣𑁂 𑀓𑀼𑀲𑀮𑁄 𑀥𑀫𑁆𑀫𑁄 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀦𑀁, 𑀅𑀩𑁆𑀬𑀸𑀓𑀢𑁄 𑀢𑀁𑀲𑀫𑀼𑀝𑁆𑀞𑀸𑀦𑀸𑀦𑀦𑁆𑀢𑀺 𑀭𑀽𑀧𑀫𑁂𑀯 𑀮𑀩𑁆𑀪𑀢𑀺. 𑀢𑀢𑁄 𑀧𑀭𑀸𑀦𑀺 𑀯𑀺𑀧𑀸𑀓𑀬𑀼𑀢𑁆𑀢𑀸𑀦𑀺 𑀧𑀜𑁆𑀘 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀸𑀦𑁂𑀯. 𑀲𑀸𑀥𑀺𑀧𑀢𑀺𑀓𑁂𑀲𑀼 𑀧𑀞𑀫𑀸𑀦𑀺 𑀢𑀻𑀡𑀺 𑀖𑀝𑀦𑀸𑀦𑀺 𑀲𑀸𑀫𑀜𑁆𑀜𑀢𑁄 𑀯𑀺𑀧𑀸𑀓𑀸𑀯𑀺𑀧𑀸𑀓𑀳𑁂𑀢𑀼𑀯𑀲𑁂𑀦 𑀯𑀼𑀢𑁆𑀢𑀸𑀦𑀺. 𑀢𑁂𑀲𑀼 𑀧𑀞𑀫𑁂 𑀘𑀢𑁆𑀢𑀸𑀭𑀺 𑀯𑀼𑀢𑁆𑀢𑀦𑀬𑀸𑀦𑁂𑀯. 𑀤𑀼𑀢𑀺𑀬𑁂 𑀭𑀽𑀧𑀁 𑀧𑀭𑀺𑀳𑀸𑀬𑀢𑀺, 𑀢𑀢𑀺𑀬𑁂 𑀅𑀭𑀽𑀧𑀁 𑀧𑀭𑀺𑀳𑀸𑀬𑀢𑀺. 𑀢𑀢𑁄 𑀧𑀭𑀸𑀦𑀺 𑀢𑀻𑀡𑀺 𑀯𑀺𑀧𑀸𑀓𑀳𑁂𑀢𑀼𑀯𑀲𑁂𑀦 𑀯𑀼𑀢𑁆𑀢𑀸𑀦𑀺. 𑀢𑁂𑀲𑀼 𑀧𑀞𑀫𑁂 𑀭𑀽𑀧𑀸𑀭𑀽𑀧𑀁 𑀮𑀩𑁆𑀪𑀢𑀺, 𑀤𑀼𑀢𑀺𑀬𑁂 𑀅𑀭𑀽𑀧𑀫𑁂𑀯, 𑀢𑀢𑀺𑀬𑁂 𑀭𑀽𑀧𑀫𑁂𑀯. 𑀏𑀯𑀫𑁆𑀧𑀺 𑀢𑁂𑀲𑀁 𑀢𑁂𑀲𑀁 𑀧𑀘𑁆𑀘𑀬𑀸𑀦𑀁 𑀲𑀫𑀸𑀬𑁄𑀕𑁂 𑀮𑀩𑁆𑀪𑀫𑀸𑀦𑀁 𑀕𑀡𑀦𑀁 𑀯𑀺𑀤𑀺𑀢𑁆𑀯𑀸 𑀢𑀺𑀫𑀽𑀮𑀓𑀸𑀤𑀻𑀲𑀼 𑀕𑀡𑀦𑀸 𑀉𑀤𑁆𑀥𑀭𑀺𑀢𑀩𑁆𑀩𑀸𑀢𑀺.

𑀳𑁂𑀢𑀼𑀫𑀽𑀮𑀓𑀁 𑀦𑀺𑀝𑁆𑀞𑀺𑀢𑀁.

𑁪𑁪𑁪. 𑀆𑀭𑀫𑁆𑀫𑀡𑀫𑀽𑀮𑀓𑁂𑀧𑀺 𑀅𑀥𑀺𑀧𑀢𑀺𑀧𑀘𑁆𑀘𑀬𑀸𑀤𑀬𑁄 𑀲𑀢𑁆𑀢 𑀆𑀭𑀫𑁆𑀫𑀡𑁂𑀦 𑀲𑀪𑀸𑀕𑀸, 𑀲𑁂𑀲𑀸 𑀲𑁄𑀴𑀲 𑀯𑀺𑀲𑀪𑀸𑀕𑀸𑀢𑀺 𑀢𑁂 𑀅𑀬𑁄𑀚𑁂𑀢𑁆𑀯𑀸 𑀲𑀢𑁆𑀢𑁂𑀯 𑀬𑁄𑀚𑀺𑀢𑀸. 𑀢𑁂𑀲𑀼 𑀅𑀥𑀺𑀧𑀢𑀺𑀬𑀸 𑀲𑀢𑁆𑀢𑀸𑀢𑀺 𑀓𑀼𑀲𑀮𑁄 𑀥𑀫𑁆𑀫𑁄 𑀓𑀼𑀲𑀮𑀲𑁆𑀲 𑀥𑀫𑁆𑀫𑀲𑁆𑀲, 𑀅𑀓𑀼𑀲𑀮𑀲𑁆𑀲 𑀥𑀫𑁆𑀫𑀲𑁆𑀲, 𑀅𑀩𑁆𑀬𑀸𑀓𑀢𑀲𑁆𑀲𑀸𑀢𑀺 𑀏𑀯𑀁 𑀓𑀼𑀲𑀮𑀫𑀽𑀮𑀸𑀦𑀺 𑀢𑀻𑀡𑀺, 𑀅𑀓𑀼𑀲𑀮𑀫𑀽𑀮𑀁 𑀏𑀓𑀁, 𑀅𑀩𑁆𑀬𑀸𑀓𑀢𑀫𑀽𑀮𑀸𑀦𑀺 𑀢𑀻𑀡𑀻𑀢𑀺 𑀲𑀢𑁆𑀢. 𑀦𑀺𑀲𑁆𑀲𑀬𑁂 𑀢𑀻𑀡𑀻𑀢𑀺 𑀯𑀢𑁆𑀣𑀼𑀯𑀲𑁂𑀦 𑀅𑀩𑁆𑀬𑀸𑀓𑀢𑀫𑀽𑀮𑀸𑀦𑁂𑀯. 𑀉𑀧𑀦𑀺𑀲𑁆𑀲𑀬𑁂 𑀲𑀢𑁆𑀢 𑀳𑁂𑀝𑁆𑀞𑀺𑀫𑀸𑀦𑀺 𑀏𑀯. 𑀧𑀼𑀭𑁂𑀚𑀸𑀢𑁂 𑀢𑀻𑀡𑀻𑀢𑀺 𑀯𑀢𑁆𑀣𑀸𑀭𑀫𑁆𑀫𑀡𑀯𑀲𑁂𑀦 𑀅𑀩𑁆𑀬𑀸𑀓𑀢𑀫𑀽𑀮𑀸𑀦𑀺. 𑀯𑀺𑀧𑁆𑀧𑀬𑀼𑀢𑁆𑀢𑁂 𑀢𑀻𑀡𑀻𑀢𑀺 𑀯𑀢𑁆𑀣𑀼𑀯𑀲𑁂𑀦𑁂𑀯. 𑀅𑀢𑁆𑀣𑀺𑀅𑀯𑀺𑀕𑀢𑁂𑀲𑀼 𑀢𑀻𑀡𑀻𑀢𑀺 𑀯𑀢𑁆𑀣𑀸𑀭𑀫𑁆𑀫𑀡𑀯𑀲𑁂𑀦. 𑀬𑀣𑀸 𑀧𑀦 𑀳𑁂𑀢𑀼𑀫𑀽𑀮𑀓𑁂 𑀮𑀓𑁆𑀔𑀡𑀤𑀲𑁆𑀲𑀦𑀢𑁆𑀣𑀁 𑀖𑀝𑀦𑀸𑀦𑀺 𑀞𑀧𑀺𑀢𑀸𑀦𑀺, 𑀢𑀣𑀸 𑀆𑀭𑀫𑁆𑀫𑀡𑀫𑀽𑀮𑀓𑀸𑀤𑀻𑀲𑀼𑀧𑀺.

𑁪𑁪𑁫. 𑀢𑀢𑁆𑀣 𑀬𑀸𑀦𑀺 𑀢𑀸𑀯 𑀇𑀫𑀲𑁆𑀫𑀺𑀁 𑀆𑀭𑀫𑁆𑀫𑀡𑀫𑀽𑀮𑀓𑁂 𑀧𑀜𑁆𑀘 𑀖𑀝𑀦𑀸𑀦𑀺 𑀞𑀧𑀺𑀢𑀸𑀦𑀺. 𑀢𑀢𑁆𑀣 𑀧𑀞𑀫𑀁 𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀯𑀲𑁂𑀦 𑀲𑀸𑀥𑀺𑀧𑀢𑀺𑀓𑀁. 𑀢𑀢𑁆𑀣 𑀲𑀢𑁆𑀢𑀸𑀢𑀺 𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀤𑀼𑀓𑁂 𑀮𑀤𑁆𑀥𑀯𑀺𑀲𑁆𑀲𑀚𑁆𑀚𑀦𑀸𑀦𑁂𑀯. 𑀤𑀼𑀢𑀺𑀬𑀁 𑀦𑀺𑀭𑀸𑀥𑀺𑀧𑀢𑀺𑀓𑀁. 𑀢𑀢𑁆𑀣 𑀢𑀻𑀡𑀻𑀢𑀺 𑀯𑀢𑁆𑀣𑀸𑀭𑀫𑁆𑀫𑀡𑀯𑀲𑁂𑀦 𑀆𑀭𑀫𑁆𑀫𑀡𑀯𑀲𑁂𑀦𑁂𑀯 𑀯𑀸 𑀅𑀩𑁆𑀬𑀸𑀓𑀢𑀫𑀽𑀮𑀸𑀦𑀺. 𑀢𑀢𑀺𑀬𑀁 𑀦𑀺𑀲𑁆𑀲𑀬𑁂𑀦 𑀯𑀼𑀢𑁆𑀢𑀁. 𑀢𑀢𑁆𑀣 𑀢𑀻𑀡𑀻𑀢𑀺 𑀯𑀢𑁆𑀣𑀼𑀯𑀲𑁂𑀦 𑀅𑀩𑁆𑀬𑀸𑀓𑀢𑀫𑀽𑀮𑀸𑀦𑀺. 𑀘𑀢𑀼𑀢𑁆𑀣𑀧𑀜𑁆𑀘𑀫𑀸𑀦𑀺 𑀲𑀸𑀥𑀺𑀧𑀢𑀺𑀓𑀸𑀦𑀺. 𑀢𑁂𑀲𑀼 𑀘𑀢𑀼𑀢𑁆𑀣𑁂 𑀏𑀓𑀦𑁆𑀢𑀺 𑀯𑀢𑁆𑀣𑀸𑀭𑀫𑁆𑀫𑀡𑀯𑀲𑁂𑀦 𑀆𑀭𑀫𑁆𑀫𑀡𑀯𑀲𑁂𑀦𑁂𑀯 𑀯𑀸 𑀅𑀩𑁆𑀬𑀸𑀓𑀢𑀫𑀽𑀮𑀁 𑀅𑀓𑀼𑀲𑀮𑀁. 𑀧𑀜𑁆𑀘𑀫𑁂 𑀏𑀓𑀦𑁆𑀢𑀺 𑀦𑀺𑀲𑁆𑀲𑀬𑀢𑁄 𑀅𑀩𑁆𑀬𑀸𑀓𑀢𑀫𑀽𑀮𑀓𑀁 𑀅𑀓𑀼𑀲𑀮𑀁. 𑀏𑀯𑀫𑀺𑀥𑀸𑀧𑀺 𑀮𑀩𑁆𑀪𑀫𑀸𑀦𑀯𑀲𑁂𑀦 𑀢𑀺𑀓𑀸𑀤𑀻𑀲𑀼 𑀕𑀡𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀢𑀣𑀸 𑀅𑀥𑀺𑀧𑀢𑀺𑀫𑀽𑀮𑀓𑀸𑀤𑀻𑀲𑀼. 𑀆𑀭𑀫𑁆𑀫𑀡𑀇𑀦𑁆𑀤𑁆𑀭𑀺𑀬𑀯𑀺𑀧𑀸𑀓𑀯𑀲𑁂𑀦 𑀯𑀺𑀢𑁆𑀣𑀸𑀭𑀬𑁄𑀚𑀦𑀁 𑀧𑀦 𑀅𑀯𑀢𑁆𑀯𑀸 𑀢𑀢𑁆𑀣 𑀢𑀢𑁆𑀣 𑀯𑀢𑁆𑀢𑀩𑁆𑀩𑀬𑀼𑀢𑁆𑀢𑀓𑀫𑁂𑀯 𑀯𑀤𑀸𑀫𑀸𑀢𑀺.

𑁪𑁪𑁬. 𑀅𑀥𑀺𑀧𑀢𑀺𑀫𑀽𑀮𑀓𑁂 𑀲𑀳𑀚𑀸𑀢𑁂 𑀲𑀢𑁆𑀢𑀸𑀢𑀺 𑀲𑀳𑀚𑀸𑀢𑀸𑀥𑀺𑀧𑀢𑀺𑀯𑀲𑁂𑀦 𑀓𑀼𑀲𑀮𑀫𑀽𑀮𑀸𑀦𑀺 𑀢𑀻𑀡𑀺, 𑀅𑀓𑀼𑀲𑀮𑀫𑀽𑀮𑀸𑀦𑀺 𑀢𑀻𑀡𑀺, 𑀅𑀩𑁆𑀬𑀸𑀓𑀢𑀫𑀽𑀮𑀁 𑀏𑀓𑀁. 𑀲𑀳𑀚𑀸𑀢𑁂𑀦 𑀧𑀦 𑀲𑀤𑁆𑀥𑀺𑀁 𑀆𑀭𑀫𑁆𑀫𑀡𑀸𑀥𑀺𑀧𑀢𑀺, 𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀦𑀸 𑀘 𑀲𑀤𑁆𑀥𑀺𑀁 𑀲𑀳𑀚𑀸𑀢𑀁 𑀦 𑀮𑀩𑁆𑀪𑀢𑀺. 𑀅𑀜𑁆𑀜𑀫𑀜𑁆𑀜𑁂 𑀢𑀻𑀡𑀻𑀢𑀺 𑀲𑀳𑀚𑀸𑀢𑀸𑀥𑀺𑀧𑀢𑀺𑀯𑀲𑁂𑀦𑁂𑀯. 𑀦𑀺𑀲𑁆𑀲𑀬𑁂 𑀅𑀝𑁆𑀞𑀸𑀢𑀺 𑀓𑀼𑀲𑀮𑀫𑀽𑀮𑀸𑀦𑀺 𑀢𑀻𑀡𑀺, 𑀅𑀓𑀼𑀲𑀮𑀫𑀽𑀮𑀸𑀦𑀺 𑀢𑀻𑀡𑀺, 𑀅𑀩𑁆𑀬𑀸𑀓𑀢𑀫𑀽𑀮𑀸𑀦𑀺 𑀤𑁆𑀯𑁂. 𑀅𑀩𑁆𑀬𑀸𑀓𑀢𑁄 𑀳𑀺 𑀅𑀥𑀺𑀧𑀢𑀺 𑀅𑀩𑁆𑀬𑀸𑀓𑀢𑀲𑁆𑀲 𑀲𑀳𑀚𑀸𑀢𑀢𑁄 𑀘𑁂𑀯 𑀆𑀭𑀫𑁆𑀫𑀡𑀢𑁄 𑀘 𑀦𑀺𑀲𑁆𑀲𑀬𑁄 𑀳𑁄𑀢𑀺, 𑀅𑀓𑀼𑀲𑀮𑀲𑁆𑀲 𑀆𑀭𑀫𑁆𑀫𑀡𑀢𑁄𑀯. 𑀓𑀼𑀲𑀮𑀲𑁆𑀲 𑀧𑀦 𑀉𑀪𑀬𑀣𑀸𑀧𑀺 𑀦 𑀳𑁄𑀢𑀻𑀢𑀺 𑀅𑀩𑁆𑀬𑀸𑀓𑀢𑀫𑀽𑀮𑀸𑀦𑀺 𑀤𑁆𑀯𑁂𑀬𑁂𑀯𑀸𑀢𑀺 𑀏𑀯𑀁 𑀅𑀝𑁆𑀞. 𑀉𑀧𑀦𑀺𑀲𑁆𑀲𑀬𑁂 𑀲𑀢𑁆𑀢 𑀆𑀭𑀫𑁆𑀫𑀡𑀲𑀤𑀺𑀲𑀸𑀦𑁂𑀯. 𑀧𑀼𑀭𑁂𑀚𑀸𑀢𑁂 𑀏𑀓𑀦𑁆𑀢𑀺 𑀅𑀩𑁆𑀬𑀸𑀓𑀢𑀸𑀥𑀺𑀧𑀢𑀺 𑀆𑀭𑀫𑁆𑀫𑀡𑀯𑀲𑁂𑀦 𑀅𑀓𑀼𑀲𑀮𑀲𑁆𑀲. 𑀯𑀺𑀧𑀸𑀓𑁂 𑀏𑀓𑀁 𑀅𑀩𑁆𑀬𑀸𑀓𑀢𑁂𑀦 𑀅𑀩𑁆𑀬𑀸𑀓𑀢𑀁 𑀮𑁄𑀓𑀼𑀢𑁆𑀢𑀭𑀁. 𑀆𑀳𑀸𑀭𑀸𑀤𑀻𑀲𑀼 𑀲𑀢𑁆𑀢 𑀳𑁂𑀝𑁆𑀞𑀸 𑀏𑀓𑀫𑀽𑀮𑀓𑁂 𑀮𑀤𑁆𑀥𑀸𑀦𑁂𑀯. 𑀯𑀺𑀧𑁆𑀧𑀬𑀼𑀢𑁆𑀢𑁂 𑀘𑀢𑁆𑀢𑀸𑀭𑀻𑀢𑀺 𑀓𑀼𑀲𑀮𑁂𑀦 𑀅𑀩𑁆𑀬𑀸𑀓𑀢𑀁, 𑀢𑀣𑀸 𑀅𑀓𑀼𑀲𑀮𑁂𑀦, 𑀅𑀩𑁆𑀬𑀸𑀓𑀢𑁂𑀦 𑀅𑀩𑁆𑀬𑀸𑀓𑀢𑀜𑁆𑀘 𑀓𑀼𑀲𑀮𑀜𑁆𑀘. 𑀅𑀢𑁆𑀣𑀺𑀅𑀯𑀺𑀕𑀢𑁂𑀲𑀼 𑀅𑀝𑁆𑀞 𑀦𑀺𑀲𑁆𑀲𑀬𑀲𑀤𑀺𑀲𑀸𑀦𑁂𑀯.

𑁪𑁪𑁭-𑁪𑁫𑁨. 𑀖𑀝𑀦𑀸𑀦𑀺 𑀧𑀦𑁂𑀢𑁆𑀣 𑀧𑀝𑀺𑀧𑀸𑀝𑀺𑀬𑀸 𑀆𑀭𑀫𑁆𑀫𑀡𑀸𑀤𑀻𑀳𑀺 𑀅𑀬𑁄𑀚𑁂𑀢𑁆𑀯𑀸 𑀧𑀞𑀫𑀁 𑀅𑀢𑁆𑀣𑀺𑀅𑀯𑀺𑀕𑀢𑁂𑀳𑀺 𑀬𑁄𑀚𑀺𑀢𑀸𑀦𑀺. 𑀓𑀺𑀁 𑀓𑀸𑀭𑀡𑀸𑀢𑀺? 𑀉𑀪𑀬𑀸𑀥𑀺𑀧𑀢𑀺𑀫𑀺𑀲𑁆𑀲𑀓𑀢𑁆𑀢𑀸. 𑀢𑀢𑁆𑀣 𑀧𑀞𑀫𑁂 𑀖𑀝𑀦𑁂 𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀯𑀲𑁂𑀦 𑀯𑀢𑁆𑀣𑀸𑀭𑀫𑁆𑀫𑀡𑀁 𑀮𑀩𑁆𑀪𑀢𑀺, 𑀤𑀼𑀢𑀺𑀬𑁂 𑀦𑀺𑀲𑁆𑀲𑀬𑀯𑀲𑁂𑀦 𑀕𑀭𑀼𑀁 𑀓𑀢𑁆𑀯𑀸 𑀅𑀲𑁆𑀲𑀸𑀤𑁂𑀦𑁆𑀢𑀲𑁆𑀲 𑀯𑀢𑁆𑀣𑀼𑀫𑁂𑀯, 𑀢𑀢𑀺𑀬𑁂 𑀲𑀳𑀚𑀸𑀢𑀸𑀥𑀺𑀧𑀢𑀺𑀯𑀲𑁂𑀦 𑀓𑀼𑀲𑀮𑀸𑀤𑀬𑁄 𑀭𑀽𑀧𑀸𑀦𑀁, 𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀯𑀲𑁂𑀦 𑀯𑀢𑁆𑀣𑀼 𑀅𑀓𑀼𑀲𑀮𑀲𑁆𑀲. 𑀢𑀢𑁄 𑀧𑀭𑀸𑀦𑀺 𑀢𑀻𑀡𑀺 𑀖𑀝𑀦𑀸𑀦𑀺 𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀯𑀲𑁂𑀦 𑀯𑀼𑀢𑁆𑀢𑀸𑀦𑀺. 𑀢𑀢𑁆𑀣 𑀧𑀞𑀫𑁂 𑀲𑀢𑁆𑀢𑀸𑀢𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀸𑀦𑁂𑀯. 𑀤𑀼𑀢𑀺𑀬𑁂 𑀏𑀓𑀦𑁆𑀢𑀺 𑀧𑀼𑀭𑁂𑀚𑀸𑀢𑀸𑀦𑀺 𑀯𑀢𑁆𑀣𑀸𑀭𑀫𑁆𑀫𑀡𑀸𑀦𑀺 𑀅𑀓𑀼𑀲𑀮𑀲𑁆𑀲. 𑀢𑀢𑀺𑀬𑁂 𑀯𑀢𑁆𑀣𑀼𑀫𑁂𑀯 𑀅𑀓𑀼𑀲𑀮𑀲𑁆𑀲. 𑀢𑀢𑁄 𑀧𑀭𑀸𑀦𑀺 𑀢𑀻𑀡𑀺 𑀖𑀝𑀦𑀸𑀦𑀺 𑀯𑀺𑀧𑀸𑀓𑀸𑀯𑀺𑀧𑀸𑀓𑀲𑀸𑀥𑀸𑀭𑀡𑀸𑀦𑀺 𑀲𑀳𑀚𑀸𑀢𑀸𑀥𑀺𑀧𑀢𑀺𑀯𑀲𑁂𑀦 𑀯𑀼𑀢𑁆𑀢𑀸𑀦𑀺. 𑀢𑀢𑁆𑀣 𑀧𑀞𑀫𑁂 𑀭𑀽𑀧𑀸𑀭𑀽𑀧𑀁 𑀮𑀩𑁆𑀪𑀢𑀺, 𑀤𑀼𑀢𑀺𑀬𑁂 𑀅𑀭𑀽𑀧𑀫𑁂𑀯, 𑀢𑀢𑀺𑀬𑁂 𑀭𑀽𑀧𑀫𑁂𑀯. 𑀢𑀢𑁄 𑀧𑀭𑀸𑀦𑀺 𑀢𑀻𑀡𑀺 𑀯𑀺𑀧𑀸𑀓𑀸𑀥𑀺𑀧𑀢𑀺𑀯𑀲𑁂𑀦 𑀯𑀼𑀢𑁆𑀢𑀸𑀦𑀺. 𑀢𑁂𑀲𑀼𑀧𑀺 𑀧𑀞𑀫𑁂 𑀭𑀽𑀧𑀸𑀭𑀽𑀧𑀁 𑀮𑀩𑁆𑀪𑀢𑀺, 𑀤𑀼𑀢𑀺𑀬𑁂 𑀅𑀭𑀽𑀧𑀁, 𑀢𑀢𑀺𑀬𑁂 𑀭𑀽𑀧𑀫𑁂𑀯. 𑀢𑀢𑁄 𑀧𑀭𑀸𑀦𑀺 𑀙 𑀖𑀝𑀦𑀸𑀦𑀺 𑀆𑀳𑀸𑀭𑀺𑀦𑁆𑀤𑁆𑀭𑀺𑀬𑀬𑀼𑀢𑁆𑀢𑀸𑀦𑀺 𑀘𑀺𑀢𑁆𑀢𑀸𑀥𑀺𑀧𑀢𑀺𑀯𑀲𑁂𑀦 𑀯𑀼𑀢𑁆𑀢𑀸𑀦𑀺. 𑀢𑀢𑁆𑀣 𑀢𑀻𑀡𑀺 𑀅𑀯𑀺𑀧𑀸𑀓𑀸𑀦𑀺, 𑀢𑀻𑀡𑀺 𑀲𑀯𑀺𑀧𑀸𑀓𑀸𑀦𑀺. 𑀢𑁂𑀲𑀼 𑀕𑀡𑀦𑀸 𑀧𑀸𑀓𑀝𑀸𑀬𑁂𑀯. 𑀢𑀢𑁄 𑀧𑀭𑀸𑀦𑀺 𑀙 𑀖𑀝𑀦𑀸𑀦𑀺 𑀢𑀣𑁂𑀯 𑀯𑀺𑀭𑀺𑀬𑀸𑀥𑀺𑀧𑀢𑀺𑀯𑀲𑁂𑀦 𑀯𑀼𑀢𑁆𑀢𑀸𑀦𑀺. 𑀦𑀦𑀼 𑀘 𑀅𑀥𑀺𑀧𑀢𑀺𑀧𑀝𑀺𑀧𑀸𑀝𑀺𑀬𑀸 𑀧𑀞𑀫𑀁 𑀯𑀺𑀭𑀺𑀬𑀸𑀥𑀺𑀧𑀢𑀺𑀯𑀲𑁂𑀦 𑀯𑀢𑁆𑀢𑀩𑁆𑀩𑀸𑀦𑀺 𑀲𑀺𑀬𑀼𑀁, 𑀓𑀲𑁆𑀫𑀸 𑀢𑀣𑀸 𑀦 𑀯𑀼𑀢𑁆𑀢𑀸𑀦𑀻𑀢𑀺? 𑀧𑀭𑀢𑁄 𑀳𑁂𑀢𑀼𑀯𑀲𑁂𑀦 𑀯𑀼𑀢𑁆𑀢𑀖𑀝𑀦𑁂𑀳𑀺 𑀲𑀤𑀺𑀲𑀢𑁆𑀢𑀸. 𑀧𑀭𑀢𑁄 𑀳𑀺 𑀳𑁂𑀢𑀼𑀯𑀲𑁂𑀦 𑀖𑀝𑀦𑀸𑀦𑀺 𑀅𑀫𑁄𑀳𑀲𑁆𑀲 𑀯𑀻𑀫𑀁𑀲𑀸𑀥𑀺𑀧𑀢𑀺𑀢𑁆𑀢𑀸 𑀯𑀻𑀫𑀁𑀲𑀸𑀬 𑀘 𑀲𑀫𑁆𑀫𑀸𑀤𑀺𑀝𑁆𑀞𑀺𑀪𑀸𑀯𑀢𑁄 𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀸𑀦𑀺. 𑀯𑀺𑀭𑀺𑀬𑀫𑁆𑀧𑀺 𑀘 𑀲𑀫𑁆𑀫𑀸𑀯𑀸𑀬𑀸𑀫𑀫𑀺𑀘𑁆𑀙𑀸𑀯𑀸𑀬𑀸𑀫𑀪𑀸𑀯𑁂𑀦 𑀫𑀕𑁆𑀕𑁄𑀢𑀺 𑀢𑁂𑀦 𑀲𑀤𑁆𑀥𑀺𑀁 𑀖𑀝𑀦𑀸𑀦𑀺 𑀧𑀭𑀢𑁄 𑀳𑁂𑀢𑀼𑀯𑀲𑁂𑀦 𑀯𑀼𑀢𑁆𑀢𑀖𑀝𑀦𑁂𑀳𑀺 𑀲𑀤𑀺𑀲𑀸𑀦𑀻𑀢𑀺 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀯𑀼𑀢𑁆𑀢𑀸𑀦𑀺. 𑀢𑁂𑀲𑀼𑀧𑀺 𑀕𑀡𑀦𑀸 𑀧𑀸𑀓𑀝𑀸𑀬𑁂𑀯.

𑁪𑁫𑁩-𑁪𑁫𑁬. 𑀅𑀦𑀦𑁆𑀢𑀭𑀲𑀫𑀦𑀦𑁆𑀢𑀭𑀫𑀽𑀮𑀓𑁂𑀲𑀼 𑀲𑀢𑁆𑀢𑀸𑀢𑀺 𑀓𑀼𑀲𑀮𑁄 𑀓𑀼𑀲𑀮𑀲𑁆𑀲 𑀅𑀩𑁆𑀬𑀸𑀓𑀢𑀲𑁆𑀲 𑀘, 𑀢𑀣𑀸 𑀅𑀓𑀼𑀲𑀮𑁄, 𑀅𑀩𑁆𑀬𑀸𑀓𑀢𑁄 𑀢𑀺𑀡𑁆𑀡𑀦𑁆𑀦𑀫𑁆𑀧𑀻𑀢𑀺 𑀏𑀯𑀁 𑀲𑀢𑁆𑀢. 𑀓𑀫𑁆𑀫𑁂 𑀏𑀓𑀦𑁆𑀢𑀺 𑀓𑀼𑀲𑀮𑀸 𑀫𑀕𑁆𑀕𑀘𑁂𑀢𑀦𑀸 𑀅𑀢𑁆𑀢𑀦𑁄 𑀯𑀺𑀧𑀸𑀓𑀸𑀩𑁆𑀬𑀸𑀓𑀢𑀲𑁆𑀲. 𑀖𑀝𑀦𑀸𑀦𑀺 𑀧𑀦𑁂𑀢𑁂𑀲𑀼 𑀢𑀻𑀡𑀺 𑀢𑀻𑀡𑀺𑀬𑁂𑀯. 𑀢𑀸𑀦𑀺 𑀩𑀳𑀼𑀢𑀭𑀧𑀝𑀺𑀧𑀸𑀝𑀺𑀬𑀸 𑀯𑀼𑀢𑁆𑀢𑀸𑀦𑀺.

𑁪𑁫𑁭-𑁪𑁬𑁦. 𑀲𑀳𑀚𑀸𑀢𑀅𑀜𑁆𑀜𑀫𑀜𑁆𑀜𑀦𑀺𑀲𑁆𑀲𑀬𑀫𑀽𑀮𑀓𑁂𑀲𑀼 𑀬𑁂 𑀬𑁂 𑀤𑀼𑀓𑀫𑀽𑀮𑀓𑁂 𑀧𑀘𑁆𑀘𑀬𑀸 𑀯𑀼𑀢𑁆𑀢𑀸 𑀢𑁂 𑀢𑁂𑀬𑁂𑀯 𑀆𑀤𑀺𑀢𑁄 𑀞𑀺𑀢𑁂𑀦 𑀲𑀪𑀸𑀕𑀸. 𑀢𑀲𑁆𑀫𑀸 𑀤𑀼𑀓𑀫𑀽𑀮𑀓𑁂 𑀕𑀡𑀦𑀁 𑀜𑀢𑁆𑀯𑀸 𑀬𑁂 𑀉𑀧𑀭𑀺 𑀧𑀘𑁆𑀘𑀬𑀸 𑀖𑀝𑀺𑀢𑀸, 𑀢𑁂𑀲𑀼 𑀊𑀦𑀢𑀭𑀕𑀡𑀦𑀲𑁆𑀲 𑀯𑀲𑁂𑀦 𑀲𑀩𑁆𑀩𑀖𑀝𑀦𑁂𑀲𑀼 𑀕𑀡𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀢𑀢𑁆𑀣 𑀲𑀳𑀚𑀸𑀢𑀫𑀽𑀮𑀓𑁂 𑀤𑀲 𑀖𑀝𑀦𑀸𑀦𑀺. 𑀢𑁂𑀲𑀼 𑀧𑀜𑁆𑀘 𑀅𑀯𑀺𑀧𑀸𑀓𑀸𑀦𑀺, 𑀧𑀜𑁆𑀘 𑀲𑀯𑀺𑀧𑀸𑀓𑀸𑀦𑀺. 𑀢𑀢𑁆𑀣 𑀅𑀯𑀺𑀧𑀸𑀓𑁂𑀲𑀼 𑀢𑀸𑀯 𑀧𑀞𑀫𑁂 𑀓𑀼𑀲𑀮𑁄 𑀓𑀼𑀲𑀮𑀲𑁆𑀲 𑀅𑀩𑁆𑀬𑀸𑀓𑀢𑀲𑁆𑀲, 𑀓𑀼𑀲𑀮𑀸𑀩𑁆𑀬𑀸𑀓𑀢𑀲𑁆𑀲, 𑀓𑀼𑀲𑀮𑀸𑀩𑁆𑀬𑀸𑀓𑀢𑁄 𑀅𑀩𑁆𑀬𑀸𑀓𑀢𑀲𑁆𑀲𑀸𑀢𑀺 𑀘𑀢𑁆𑀢𑀸𑀭𑀺, 𑀢𑀣𑀸 𑀅𑀓𑀼𑀲𑀮𑁄, 𑀅𑀩𑁆𑀬𑀸𑀓𑀢𑁄 𑀅𑀩𑁆𑀬𑀸𑀓𑀢𑀲𑁆𑀲𑁂𑀯𑀸𑀢𑀺 𑀏𑀯𑀁 𑀦𑀯. 𑀢𑀢𑁆𑀣 𑀓𑀼𑀲𑀮𑀸𑀓𑀼𑀲𑀮𑀸𑀤𑀺𑀓𑁂𑀲𑀼 𑀅𑀝𑁆𑀞𑀲𑀼 𑀯𑀺𑀲𑁆𑀲𑀚𑁆𑀚𑀦𑁂𑀲𑀼 𑀅𑀭𑀽𑀧𑀜𑁆𑀘𑁂𑀯 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀜𑁆𑀘 𑀮𑀩𑁆𑀪𑀢𑀺. 𑀅𑀩𑁆𑀬𑀸𑀓𑀢𑁂 𑀯𑀢𑁆𑀣𑀼𑀭𑀽𑀧𑀫𑁆𑀧𑀺. 𑀤𑀼𑀢𑀺𑀬𑁂 𑀖𑀝𑀦𑁂 𑀅𑀩𑁆𑀬𑀸𑀓𑀢𑀯𑀺𑀲𑁆𑀲𑀚𑁆𑀚𑀦𑁂 𑀭𑀽𑀧𑁂𑀲𑀼 𑀯𑀢𑁆𑀣𑀼𑀫𑁂𑀯 𑀮𑀩𑁆𑀪𑀢𑀺, 𑀢𑀢𑀺𑀬𑁂 𑀢𑀻𑀲𑀼𑀧𑀺 𑀅𑀭𑀽𑀧𑀫𑁂𑀯, 𑀘𑀢𑀼𑀢𑁆𑀣𑁂 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀫𑁂𑀯, 𑀧𑀜𑁆𑀘𑀫𑁂 𑀧𑀝𑀺𑀲𑀦𑁆𑀥𑀺𑀬𑀁 𑀯𑀢𑁆𑀣𑀼𑀦𑀸 𑀲𑀤𑁆𑀥𑀺𑀁 𑀅𑀭𑀽𑀧𑀥𑀫𑁆𑀫𑀸. 𑀲𑀯𑀺𑀧𑀸𑀓𑁂𑀲𑀼 𑀧𑀞𑀫𑁂 𑀯𑀺𑀧𑀸𑀓𑀸 𑀘𑁂𑀯 𑀯𑀺𑀧𑀸𑀓𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀜𑁆𑀘, 𑀤𑀼𑀢𑀺𑀬𑁂 𑀯𑀺𑀧𑀸𑀓𑀸 𑀘𑁂𑀯 𑀯𑀢𑁆𑀣𑀼𑀭𑀽𑀧𑀜𑁆𑀘, 𑀢𑀢𑀺𑀬𑁂 𑀯𑀺𑀧𑀸𑀓𑀫𑁂𑀯, 𑀘𑀢𑀼𑀢𑁆𑀣𑁂 𑀯𑀺𑀧𑀸𑀓𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀫𑁂𑀯, 𑀧𑀜𑁆𑀘𑀫𑁂 𑀯𑀢𑁆𑀣𑀼𑀭𑀽𑀧𑀫𑁂𑀯 𑀮𑀩𑁆𑀪𑀢𑀺.

𑀅𑀜𑁆𑀜𑀫𑀜𑁆𑀜𑀫𑀽𑀮𑀓𑁂 𑀙 𑀖𑀝𑀦𑀸𑀦𑀺. 𑀢𑁂𑀲𑀼 𑀧𑀞𑀫𑀸𑀦𑀺 𑀢𑀻𑀡𑀺 𑀅𑀯𑀺𑀧𑀸𑀓𑀸𑀦𑀺, 𑀧𑀘𑁆𑀙𑀺𑀫𑀸𑀦𑀺 𑀢𑀻𑀡𑀺 𑀲𑀯𑀺𑀧𑀸𑀓𑀸𑀦𑀺. 𑀢𑁂𑀲𑀼 𑀕𑀡𑀦𑀸 𑀧𑀸𑀓𑀝𑀸𑀬𑁂𑀯.

𑁪𑁬𑁧. 𑀦𑀺𑀲𑁆𑀲𑀬𑀫𑀽𑀮𑀓𑁂 𑀦𑀺𑀲𑁆𑀲𑀬𑀧𑀘𑁆𑀘𑀬𑀸 𑀆𑀭𑀫𑁆𑀫𑀡𑁂 𑀢𑀻𑀡𑀻𑀢𑀺 𑀯𑀢𑁆𑀣𑀼𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀧𑀯𑀢𑁆𑀢𑀓𑀼𑀲𑀮𑀸𑀤𑀺𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀉𑀧𑀦𑀺𑀲𑁆𑀲𑀬𑁂 𑀏𑀓𑀦𑁆𑀢𑀺 𑀯𑀢𑁆𑀣𑀼𑀁 𑀆𑀭𑀫𑁆𑀫𑀡𑀽𑀧𑀦𑀺𑀲𑁆𑀲𑀬𑀁 𑀓𑀢𑁆𑀯𑀸 𑀉𑀧𑁆𑀧𑀦𑁆𑀦𑀸𑀓𑀼𑀲𑀮𑀁. 𑀲𑁂𑀲𑀁 𑀤𑀼𑀫𑀽𑀮𑀓𑁂 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁.

𑁪𑁬𑁨-𑁪𑁬𑁪. 𑀇𑀫𑀲𑁆𑀫𑀺𑀁 𑀧𑀦 𑀦𑀺𑀲𑁆𑀲𑀬𑀧𑀘𑁆𑀘𑀬𑁂 𑀯𑀻𑀲𑀢𑀺 𑀖𑀝𑀦𑀸𑀦𑀺. 𑀢𑁂𑀲𑀼 𑀧𑀼𑀭𑀺𑀫𑀸𑀦𑀺 𑀙 𑀖𑀝𑀦𑀸𑀦𑀺 𑀧𑀼𑀭𑁂𑀚𑀸𑀢𑀲𑀳𑀚𑀸𑀢𑀯𑀲𑁂𑀦 𑀯𑀼𑀢𑁆𑀢𑀸𑀦𑀺, 𑀢𑀢𑁄 𑀘𑀢𑁆𑀢𑀸𑀭𑀺 𑀧𑀼𑀭𑁂𑀚𑀸𑀢𑀯𑀲𑁂𑀦𑁂𑀯, 𑀢𑀢𑁄 𑀤𑀲 𑀲𑀳𑀚𑀸𑀢𑀯𑀲𑁂𑀦𑁂𑀯. 𑀢𑀢𑁆𑀣 𑀧𑀞𑀫𑁂 𑀖𑀝𑀦𑁂 𑀢𑁂𑀭𑀲𑀸𑀢𑀺 𑀦𑀺𑀲𑁆𑀲𑀬𑀧𑀘𑁆𑀘𑀬𑀯𑀺𑀪𑀗𑁆𑀕𑁂 𑀯𑀼𑀢𑁆𑀢𑀸𑀦𑁂𑀯. 𑀤𑀼𑀢𑀺𑀬𑁂 𑀅𑀝𑁆𑀞𑀸𑀢𑀺 𑀲𑀳𑀚𑀸𑀢𑀸𑀥𑀺𑀧𑀢𑀺𑀯𑀲𑁂𑀦 𑀲𑀢𑁆𑀢, 𑀯𑀢𑁆𑀣𑀼𑀁 𑀕𑀭𑀼𑀁 𑀓𑀢𑁆𑀯𑀸 𑀅𑀓𑀼𑀲𑀮𑀜𑁆𑀘𑀸𑀢𑀺 𑀅𑀝𑁆𑀞. 𑀢𑀢𑀺𑀬𑁂 𑀲𑀢𑁆𑀢 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑁂 𑀮𑀤𑁆𑀥𑀸𑀦𑁂𑀯. 𑀘𑀢𑀼𑀢𑁆𑀣𑁂 𑀧𑀜𑁆𑀘 𑀯𑀺𑀧𑁆𑀧𑀬𑀼𑀢𑁆𑀢𑁂 𑀮𑀤𑁆𑀥𑀸𑀦𑀺. 𑀧𑀜𑁆𑀘𑀫𑁂 𑀘𑀢𑁆𑀢𑀸𑀭𑀻𑀢𑀺 𑀓𑀼𑀲𑀮𑀸𑀤𑀻𑀦𑀺 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀦𑀁, 𑀯𑀢𑁆𑀣𑀼 𑀘 𑀅𑀓𑀼𑀲𑀮𑀲𑁆𑀲. 𑀙𑀝𑁆𑀞𑁂 𑀢𑀻𑀡𑀻𑀢𑀺 𑀓𑀼𑀲𑀮𑀸𑀤𑀻𑀦𑀺 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀲𑁆𑀲. 𑀧𑀼𑀭𑁂𑀚𑀸𑀢𑀯𑀲𑁂𑀦 𑀘𑀢𑀽𑀲𑀼 𑀧𑀞𑀫𑁂 𑀢𑀻𑀡𑀻𑀢𑀺 𑀯𑀢𑁆𑀣𑀼 𑀓𑀼𑀲𑀮𑀸𑀤𑀻𑀦𑀁, 𑀘𑀓𑁆𑀔𑀸𑀤𑀻𑀦𑀺 𑀘 𑀅𑀩𑁆𑀬𑀸𑀓𑀢𑀲𑁆𑀲. 𑀤𑀼𑀢𑀺𑀬𑁂 𑀯𑀢𑁆𑀣𑀼𑀫𑁂𑀯 𑀓𑀼𑀲𑀮𑀸𑀤𑀻𑀦𑀁. 𑀢𑀢𑀺𑀬𑁂 𑀏𑀓𑀦𑁆𑀢𑀺 𑀯𑀢𑁆𑀣𑀼 𑀅𑀓𑀼𑀲𑀮𑀲𑁆𑀲. 𑀘𑀢𑀼𑀢𑁆𑀣𑁂 𑀘𑀓𑁆𑀔𑀸𑀤𑀻𑀦𑀺 𑀯𑀺𑀜𑁆𑀜𑀸𑀡𑀧𑀜𑁆𑀘𑀓𑀲𑁆𑀲. 𑀲𑀳𑀚𑀸𑀢𑀯𑀲𑁂𑀦 𑀤𑀲 𑀲𑀯𑀺𑀧𑀸𑀓𑀸𑀯𑀺𑀧𑀸𑀓𑀯𑀲𑁂𑀦 𑀤𑁆𑀯𑀺𑀥𑀸 𑀪𑀺𑀦𑁆𑀤𑀺𑀢𑁆𑀯𑀸 𑀲𑀳𑀚𑀸𑀢𑀫𑀽𑀮𑀓𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸𑀦𑀺.

𑁪𑁬𑁫. 𑀉𑀧𑀦𑀺𑀲𑁆𑀲𑀬𑀫𑀽𑀮𑀓𑁂 𑀆𑀭𑀫𑁆𑀫𑀡𑁂 𑀲𑀢𑁆𑀢𑀸𑀢𑀺 𑀆𑀭𑀫𑁆𑀫𑀡𑀽𑀧𑀦𑀺𑀲𑁆𑀲𑀬𑁂 𑀮𑀤𑁆𑀥𑀸𑀦𑁂𑀯. 𑀅𑀥𑀺𑀧𑀢𑀺𑀬𑀸 𑀲𑀢𑁆𑀢𑀸𑀢𑀺 𑀢𑀸𑀦𑁂𑀯. 𑀅𑀦𑀦𑁆𑀢𑀭𑀲𑀫𑀦𑀦𑁆𑀢𑀭𑁂𑀲𑀼 𑀅𑀦𑀦𑁆𑀢𑀭𑀽𑀧𑀦𑀺𑀲𑁆𑀲𑀬𑁂 𑀮𑀤𑁆𑀥𑀸𑀦𑁂𑀯. 𑀦𑀺𑀲𑁆𑀲𑀬𑁂 𑀏𑀓𑀦𑁆𑀢𑀺 𑀯𑀢𑁆𑀣𑀼 𑀅𑀓𑀼𑀲𑀮𑀲𑁆𑀲. 𑀧𑀼𑀭𑁂𑀚𑀸𑀢𑁂 𑀏𑀓𑀦𑁆𑀢𑀺 𑀢𑀲𑁆𑀲𑁂𑀯 𑀯𑀢𑁆𑀣𑀼𑀁 𑀯𑀸 𑀆𑀭𑀫𑁆𑀫𑀡𑀁 𑀯𑀸. 𑀆𑀲𑁂𑀯𑀦𑁂 𑀢𑀻𑀡𑀺 𑀅𑀦𑀦𑁆𑀢𑀭𑀽𑀧𑀦𑀺𑀲𑁆𑀲𑀬𑀯𑀲𑁂𑀦. 𑀓𑀫𑁆𑀫𑁂 𑀤𑁆𑀯𑁂 𑀧𑀓𑀢𑀽𑀧𑀦𑀺𑀲𑁆𑀲𑀬𑀯𑀲𑁂𑀦. 𑀮𑁄𑀓𑀼𑀢𑁆𑀢𑀭𑀓𑀼𑀲𑀮𑀘𑁂𑀢𑀦𑀸 𑀧𑀦 𑀅𑀦𑀦𑁆𑀢𑀭𑀽𑀧𑀦𑀺𑀲𑁆𑀲𑀬𑁄𑀧𑀺 𑀳𑁄𑀢𑀺. 𑀯𑀺𑀧𑁆𑀧𑀬𑀼𑀢𑁆𑀢𑁂 𑀏𑀓𑀁 𑀆𑀭𑀫𑁆𑀫𑀡𑀽𑀧𑀦𑀺𑀲𑁆𑀲𑀬𑀯𑀲𑁂𑀦, 𑀢𑀣𑀸 𑀅𑀢𑁆𑀣𑀺𑀅𑀯𑀺𑀕𑀢𑁂𑀲𑀼. 𑀦𑀢𑁆𑀣𑀺𑀯𑀺𑀕𑀢𑁂𑀲𑀼 𑀲𑀢𑁆𑀢 𑀅𑀦𑀦𑁆𑀢𑀭𑀲𑀫𑀸𑀦𑁂𑀯.

𑁪𑁬𑁬. 𑀉𑀧𑀦𑀺𑀲𑁆𑀲𑀬𑀫𑀽𑀮𑀓𑀸𑀦𑀺 𑀧𑀦 𑀲𑀢𑁆𑀢 𑀖𑀝𑀦𑀸𑀦𑀺 𑀳𑁄𑀦𑁆𑀢𑀺. 𑀢𑀢𑁆𑀣 𑀧𑀼𑀭𑀺𑀫𑀸𑀦𑀺 𑀢𑀻𑀡𑀺 𑀆𑀭𑀫𑁆𑀫𑀡𑀽𑀧𑀦𑀺𑀲𑁆𑀲𑀬𑀯𑀲𑁂𑀦 𑀯𑀼𑀢𑁆𑀢𑀸𑀦𑀺. 𑀢𑀢𑁆𑀣 𑀧𑀞𑀫𑁂 𑀲𑀢𑁆𑀢𑀸𑀢𑀺 𑀓𑀼𑀲𑀮𑁄 𑀓𑀼𑀲𑀮𑀸𑀤𑀻𑀦𑀁, 𑀢𑀣𑀸 𑀅𑀩𑁆𑀬𑀸𑀓𑀢𑁄, 𑀅𑀓𑀼𑀲𑀮𑁄 𑀅𑀓𑀼𑀲𑀮𑀲𑁆𑀲𑁂𑀯𑀸𑀢𑀺 𑀏𑀯𑀁 𑀲𑀢𑁆𑀢. 𑀤𑀼𑀢𑀺𑀬𑁂 𑀏𑀓𑀦𑁆𑀢𑀺 𑀘𑀓𑁆𑀔𑀸𑀤𑀺𑀅𑀩𑁆𑀬𑀸𑀓𑀢𑀁 𑀅𑀓𑀼𑀲𑀮𑀲𑁆𑀲. 𑀢𑀢𑀺𑀬𑁂 𑀯𑀢𑁆𑀣𑀼 𑀅𑀓𑀼𑀲𑀮𑀲𑁆𑀲. 𑀢𑀢𑁄 𑀧𑀭𑀸𑀦𑀺 𑀤𑁆𑀯𑁂 𑀅𑀦𑀦𑁆𑀢𑀭𑀽𑀧𑀦𑀺𑀲𑁆𑀲𑀬𑀯𑀲𑁂𑀦 𑀯𑀼𑀢𑁆𑀢𑀸𑀦𑀺. 𑀢𑁂𑀲𑀼 𑀕𑀡𑀦𑀸 𑀧𑀸𑀓𑀝𑀸𑀬𑁂𑀯. 𑀢𑀢𑁄 𑀤𑁆𑀯𑁂 𑀅𑀦𑀦𑁆𑀢𑀭𑀧𑀓𑀢𑀽𑀧𑀦𑀺𑀲𑁆𑀲𑀬𑀯𑀲𑁂𑀦 𑀯𑀼𑀢𑁆𑀢𑀸𑀦𑀺. 𑀢𑀢𑁆𑀣 𑀧𑀞𑀫𑁂 𑀮𑁄𑀓𑀺𑀬𑀓𑀼𑀲𑀮𑀸𑀓𑀼𑀲𑀮𑀘𑁂𑀢𑀦𑀸𑀧𑀘𑁆𑀘𑀬𑀪𑀸𑀯𑀢𑁄 𑀕𑀳𑁂𑀢𑀩𑁆𑀩𑀸, 𑀤𑀼𑀢𑀺𑀬𑁂 𑀮𑁄𑀓𑀼𑀢𑁆𑀢𑀭𑀓𑀼𑀲𑀮𑀸𑀯.

𑁪𑁬𑁭-𑁪𑁬𑁮. 𑀧𑀼𑀭𑁂𑀚𑀸𑀢𑀫𑀽𑀮𑀓𑁂 𑀆𑀭𑀫𑁆𑀫𑀡𑁂 𑀢𑀻𑀡𑀻𑀢𑀺 𑀅𑀩𑁆𑀬𑀸𑀓𑀢𑁄 𑀓𑀼𑀲𑀮𑀸𑀤𑀻𑀦𑀁. 𑀅𑀥𑀺𑀧𑀢𑀺𑀬𑀸 𑀏𑀓𑀦𑁆𑀢𑀺 𑀅𑀩𑁆𑀬𑀸𑀓𑀢𑁄 𑀅𑀓𑀼𑀲𑀮𑀲𑁆𑀲. 𑀲𑁂𑀲𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀏𑀢𑁆𑀣 𑀧𑀦 𑀲𑀢𑁆𑀢 𑀖𑀝𑀦𑀸𑀦𑀺. 𑀢𑁂𑀲𑀼 𑀧𑀞𑀫𑀁 𑀯𑀢𑁆𑀣𑀸𑀭𑀫𑁆𑀫𑀡𑀯𑀲𑁂𑀦 𑀯𑀼𑀢𑁆𑀢𑀁, 𑀤𑀼𑀢𑀺𑀬𑀁 𑀯𑀢𑁆𑀣𑀼𑀯𑀲𑁂𑀦𑁂𑀯, 𑀢𑀢𑀺𑀬𑀁 𑀆𑀭𑀫𑁆𑀫𑀡𑀯𑀲𑁂𑀦, 𑀘𑀢𑀼𑀢𑁆𑀣𑀁 𑀯𑀢𑁆𑀣𑀼𑀲𑁆𑀲 𑀆𑀭𑀫𑁆𑀫𑀡𑀓𑀸𑀮𑀯𑀲𑁂𑀦, 𑀧𑀜𑁆𑀘𑀫𑀁 𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀯𑀲𑁂𑀦, 𑀙𑀝𑁆𑀞𑀁 𑀯𑀢𑁆𑀣𑀼𑀦𑁄 𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀓𑀸𑀮𑀯𑀲𑁂𑀦, 𑀲𑀢𑁆𑀢𑀫𑀁 𑀘𑀓𑁆𑀔𑀸𑀤𑀺𑀯𑀲𑁂𑀦.

𑁪𑁬𑁯-𑁪𑁭𑁨. 𑀧𑀘𑁆𑀙𑀸𑀚𑀸𑀢𑀫𑀽𑀮𑀓𑁂 𑀯𑀻𑀲𑀢𑀺 𑀧𑀘𑁆𑀘𑀬𑀸 𑀦 𑀬𑀼𑀚𑁆𑀚𑀦𑁆𑀢𑀺, 𑀢𑀬𑁄𑀯 𑀬𑁄𑀚𑀦𑀁 𑀮𑀪𑀦𑁆𑀢𑀺. 𑀏𑀓𑀫𑁂𑀯𑁂𑀢𑁆𑀣 𑀖𑀝𑀦𑀁, 𑀢𑀁 𑀓𑀸𑀬𑀲𑁆𑀲 𑀓𑀼𑀲𑀮𑀸𑀤𑀻𑀦𑀁 𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀆𑀲𑁂𑀯𑀦𑀫𑀽𑀮𑀓𑁂𑀧𑀺 𑀏𑀓𑀫𑁂𑀯 𑀖𑀝𑀦𑀁.

𑁪𑁭𑁩-𑁪𑁭𑁭. 𑀓𑀫𑁆𑀫𑀫𑀽𑀮𑀓𑁂 𑀅𑀦𑀦𑁆𑀢𑀭𑁂 𑀏𑀓𑀦𑁆𑀢𑀺 𑀫𑀕𑁆𑀕𑀘𑁂𑀢𑀦𑀸𑀯𑀲𑁂𑀦 𑀯𑀼𑀢𑁆𑀢𑀁. 𑀅𑀜𑁆𑀜𑀫𑀜𑁆𑀜𑁂 𑀢𑀻𑀡𑀻𑀢𑀺 𑀏𑀢𑁆𑀣 𑀧𑀝𑀺𑀲𑀦𑁆𑀥𑀺𑀬𑀁 𑀯𑀢𑁆𑀣𑀼𑀧𑀺 𑀕𑀳𑁂𑀢𑀩𑁆𑀩𑀁. 𑀉𑀧𑀦𑀺𑀲𑁆𑀲𑀬𑁂 𑀤𑁆𑀯𑁂𑀢𑀺 𑀅𑀦𑀦𑁆𑀢𑀭𑀧𑀓𑀢𑀽𑀧𑀦𑀺𑀲𑁆𑀲𑀬𑀯𑀲𑁂𑀦 𑀳𑁂𑀝𑁆𑀞𑀸 𑀯𑀼𑀢𑁆𑀢𑀸𑀦𑁂𑀯. 𑀏𑀯𑀁 𑀲𑁂𑀲𑀸𑀦𑀺𑀧𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀏𑀢𑁆𑀣 𑀧𑀦 𑀏𑀓𑀸𑀤𑀲 𑀖𑀝𑀦𑀸𑀦𑀺. 𑀢𑀢𑁆𑀣 𑀧𑀞𑀫𑀸𑀦𑀺 𑀤𑁆𑀯𑁂 𑀧𑀓𑀢𑀽𑀧𑀦𑀺𑀲𑁆𑀲𑀬𑀸𑀦𑀦𑁆𑀢𑀭𑀽𑀧𑀦𑀺𑀲𑁆𑀲𑀬𑀯𑀺𑀪𑀸𑀕𑀢𑁄 𑀦𑀸𑀦𑀸𑀓𑁆𑀔𑀡𑀺𑀓𑀓𑀫𑁆𑀫𑀯𑀲𑁂𑀦 𑀯𑀼𑀢𑁆𑀢𑀸𑀦𑀺. 𑀢𑀢𑁄 𑀧𑀭𑀸𑀦𑀺 𑀘𑀢𑁆𑀢𑀸𑀭𑀺 𑀯𑀺𑀧𑀸𑀓𑀸𑀯𑀺𑀧𑀸𑀓𑀢𑁄 𑀏𑀓𑀓𑁆𑀔𑀡𑀺𑀓𑀓𑀫𑁆𑀫𑀯𑀲𑁂𑀦 𑀯𑀼𑀢𑁆𑀢𑀸𑀦𑀺. 𑀢𑀢𑁆𑀣 𑀧𑀞𑀫𑁂 𑀅𑀭𑀽𑀧𑁂𑀦 𑀲𑀤𑁆𑀥𑀺𑀁 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀁 𑀮𑀩𑁆𑀪𑀢𑀺, 𑀤𑀼𑀢𑀺𑀬𑁂 𑀅𑀭𑀽𑀧𑁂𑀦 𑀲𑀤𑁆𑀥𑀺𑀁 𑀯𑀢𑁆𑀣𑀼, 𑀢𑀢𑀺𑀬𑁂 𑀅𑀭𑀽𑀧𑀫𑁂𑀯, 𑀘𑀢𑀼𑀢𑁆𑀣𑁂 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀫𑁂𑀯. 𑀧𑀝𑀺𑀲𑀦𑁆𑀥𑀺𑀬𑀁 𑀧𑀦 𑀓𑀝𑀢𑁆𑀢𑀸𑀭𑀽𑀧𑀫𑁆𑀧𑀺 𑀮𑀩𑁆𑀪𑀢𑀺. 𑀢𑀢𑁄 𑀧𑀭𑀸𑀦𑀺 𑀧𑀜𑁆𑀘 𑀲𑀯𑀺𑀧𑀸𑀓𑀸𑀦𑀺, 𑀢𑀸𑀦𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀸𑀦𑁂𑀯. 𑀯𑀺𑀧𑀸𑀓𑀫𑀽𑀮𑀓𑁂 𑀧𑀜𑁆𑀘 𑀖𑀝𑀸𑀦𑀸𑀦𑀺 𑀉𑀢𑁆𑀢𑀸𑀦𑀢𑁆𑀣𑀸𑀦𑁂𑀯.

𑁪𑁭𑁮-𑁪𑁮𑁩. 𑀆𑀳𑀸𑀭𑀫𑀽𑀮𑀓𑁂 𑀲𑀢𑁆𑀢𑀸𑀢𑀺𑀆𑀤𑀻𑀦𑀺 𑀯𑀼𑀢𑁆𑀢𑀦𑀬𑀸𑀦𑁂𑀯. 𑀖𑀝𑀦𑀸𑀦𑀺 𑀧𑀦𑁂𑀢𑁆𑀣 𑀘𑀢𑀼𑀢𑁆𑀢𑀺𑀁𑀲. 𑀢𑁂𑀲𑀼 𑀧𑀞𑀫𑀸𑀦𑀺 𑀧𑀜𑁆𑀘 𑀯𑀺𑀧𑀸𑀓𑀸𑀯𑀺𑀧𑀸𑀓𑀲𑀸𑀫𑀜𑁆𑀜𑀢𑁄 𑀯𑀼𑀢𑁆𑀢𑀸𑀦𑀺. 𑀢𑀢𑁆𑀣 𑀧𑀞𑀫𑁂 𑀘𑀢𑁆𑀢𑀸𑀭𑁄𑀧𑀺 𑀆𑀳𑀸𑀭𑀸 𑀮𑀩𑁆𑀪𑀦𑁆𑀢𑀺; 𑀤𑀼𑀢𑀺𑀬𑁂 𑀢𑀬𑁄 𑀅𑀭𑀽𑀧𑀸𑀳𑀸𑀭𑀸𑀯. 𑀢𑀢𑀺𑀬𑁂 𑀯𑀢𑁆𑀣𑀼𑀧𑀺 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀁 𑀳𑁄𑀢𑀺, 𑀘𑀢𑀼𑀢𑁆𑀣𑁂 𑀢𑀁 𑀧𑀭𑀺𑀳𑀸𑀬𑀢𑀺. 𑀧𑀜𑁆𑀘𑀫𑁂 𑀭𑀽𑀧𑀫𑁂𑀯 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀁. 𑀢𑀢𑁄 𑀧𑀭𑀸𑀦𑀺 𑀧𑀜𑁆𑀘 𑀲𑀯𑀺𑀧𑀸𑀓𑀖𑀝𑀦𑀸𑀦𑀺, 𑀢𑀸𑀦𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀸𑀦𑁂𑀯. 𑀢𑀢𑁄 𑀧𑀭𑀸𑀦𑀺 𑀦𑀯 𑀖𑀝𑀦𑀸𑀦𑀺 𑀘𑁂𑀢𑀦𑀸𑀳𑀸𑀭𑀯𑀲𑁂𑀦 𑀯𑀼𑀢𑁆𑀢𑀸𑀦𑀺. 𑀢𑀢𑁄 𑀧𑀭𑀸𑀦𑀺 𑀦𑀯 𑀦𑀺𑀭𑀸𑀥𑀺𑀧𑀢𑀺𑀯𑀺𑀜𑁆𑀜𑀸𑀡𑀸𑀳𑀸𑀭𑀯𑀲𑁂𑀦. 𑀢𑀢𑁄 𑀧𑀭𑀸𑀦𑀺 𑀲𑀸𑀥𑀺𑀧𑀢𑀺𑀯𑀺𑀜𑁆𑀜𑀸𑀡𑀸𑀳𑀸𑀭𑀯𑀲𑁂𑀦 𑀙 𑀖𑀝𑀦𑀸𑀦𑀺 𑀯𑀼𑀢𑁆𑀢𑀸𑀦𑀺. 𑀢𑀢𑁆𑀣 𑀢𑀻𑀡𑀺 𑀯𑀺𑀧𑀸𑀓𑀸𑀯𑀺𑀧𑀸𑀓𑀲𑀸𑀫𑀜𑁆𑀜𑀯𑀲𑁂𑀦 𑀯𑀼𑀢𑁆𑀢𑀸𑀦𑀺. 𑀢𑀻𑀡𑀺 𑀯𑀺𑀧𑀸𑀓𑀯𑀲𑁂𑀦𑁂𑀯. 𑀢𑀢𑁆𑀣 𑀮𑁄𑀓𑀺𑀬𑀸𑀦𑀁 𑀯𑀺𑀧𑀸𑀓𑀸𑀦𑀁 𑀅𑀪𑀸𑀯𑀢𑁄 𑀯𑀢𑁆𑀣𑀼 𑀧𑀭𑀺𑀳𑀸𑀬𑀢𑀺.

𑁪𑁮𑁪-𑁪𑁯𑁫. 𑀇𑀦𑁆𑀤𑁆𑀭𑀺𑀬𑀫𑀽𑀮𑀓𑁂 𑀧𑀼𑀭𑁂𑀚𑀸𑀢𑁂 𑀏𑀓𑀦𑁆𑀢𑀺 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀸𑀤𑀻𑀦𑀁 𑀯𑀲𑁂𑀦 𑀅𑀩𑁆𑀬𑀸𑀓𑀢𑁂𑀦 𑀅𑀩𑁆𑀬𑀸𑀓𑀢𑀁. 𑀲𑁂𑀲𑀁 𑀤𑀼𑀫𑀽𑀮𑀓𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀖𑀝𑀦𑀸𑀦𑀺 𑀧𑀦𑁂𑀢𑁆𑀣 𑀙 𑀲𑀢𑁆𑀢𑀢𑀺. 𑀢𑀢𑁆𑀣 𑀧𑀞𑀫𑁂 𑀲𑀩𑁆𑀩𑀸𑀦𑀺𑀧𑀺 𑀇𑀦𑁆𑀤𑁆𑀭𑀺𑀬𑀸𑀦𑀺 𑀧𑀘𑁆𑀘𑀬𑀝𑁆𑀞𑁂𑀦 𑀮𑀩𑁆𑀪𑀦𑁆𑀢𑀺. 𑀤𑀼𑀢𑀺𑀬𑁂 𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀳𑀸𑀬𑀢𑀺. 𑀦 𑀳𑀺 𑀢𑀁 𑀦𑀺𑀲𑁆𑀲𑀬𑁄 𑀳𑁄𑀢𑀺. 𑀢𑀢𑀺𑀬𑁂 𑀅𑀭𑀽𑀧𑀺𑀦𑁆𑀤𑁆𑀭𑀺𑀬𑀸𑀦𑀺 𑀭𑀽𑀧𑀸𑀦𑀁. 𑀘𑀢𑀼𑀢𑁆𑀣𑁂 𑀘𑀓𑁆𑀔𑀸𑀤𑀻𑀦𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀁. 𑀢𑀢𑁄 𑀧𑀭𑀸𑀦𑀺 𑀦𑀯 𑀖𑀝𑀦𑀸𑀦𑀺 𑀲𑀳𑀚𑀸𑀢𑀅𑀭𑀽𑀧𑀺𑀦𑁆𑀤𑁆𑀭𑀺𑀬𑀯𑀲𑁂𑀦 𑀯𑀼𑀢𑁆𑀢𑀸𑀦𑀺, 𑀢𑀢𑁄 𑀦𑀯 𑀫𑀕𑁆𑀕𑀪𑀽𑀢𑀸𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀯𑀲𑁂𑀦, 𑀢𑀢𑁄 𑀦𑀯 𑀛𑀸𑀦𑀗𑁆𑀕𑀪𑀽𑀢𑀸𑀦𑀁, 𑀢𑀢𑁄 𑀦𑀯 𑀛𑀸𑀦𑀫𑀕𑁆𑀕𑀪𑀽𑀢𑀸𑀦𑀁, 𑀢𑀢𑁄 𑀦𑀯 𑀫𑀦𑀺𑀦𑁆𑀤𑁆𑀭𑀺𑀬𑀯𑀲𑁂𑀦𑁂𑀯, 𑀢𑀢𑁄 𑀲𑀸𑀥𑀺𑀧𑀢𑀻𑀦𑀺 𑀙, 𑀢𑀢𑁄 𑀯𑀻𑀭𑀺𑀬𑀯𑀲𑁂𑀦 𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀸𑀦𑀺 𑀙, 𑀢𑀢𑁄 𑀅𑀫𑁄𑀳𑀳𑁂𑀢𑀼𑀯𑀲𑁂𑀦 𑀦𑀺𑀭𑀸𑀥𑀺𑀧𑀢𑀻𑀦𑀺 𑀦𑀯, 𑀲𑀸𑀥𑀺𑀧𑀢𑀻𑀦𑀺 𑀙. 𑀢𑁂𑀲𑀼 𑀲𑀩𑁆𑀩𑁂𑀲𑀼 𑀯𑀺𑀧𑀸𑀓𑀧𑀘𑁆𑀘𑀬𑁂𑀦 𑀅𑀬𑀼𑀢𑁆𑀢𑀸𑀦𑀺 𑀘 𑀬𑀼𑀢𑁆𑀢𑀸𑀦𑀺 𑀘 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸𑀦𑀺.

𑁪𑁯𑁬-𑁫𑁦𑁦. 𑀛𑀸𑀦𑀫𑀽𑀮𑀓𑁂𑀧𑀺 𑀤𑀼𑀫𑀽𑀮𑀓𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀖𑀝𑀦𑀸𑀦𑀺 𑀧𑀦𑁂𑀢𑁆𑀣 𑀙𑀢𑁆𑀢𑀺𑀁𑀲. 𑀢𑁂𑀲𑀼 𑀧𑀞𑀫𑀸𑀦𑀺 𑀦𑀯 𑀇𑀦𑁆𑀤𑁆𑀭𑀺𑀬𑀫𑀕𑁆𑀕𑀪𑀸𑀯𑀁 𑀅𑀦𑀸𑀫𑀲𑀺𑀢𑁆𑀯𑀸 𑀲𑀸𑀥𑀸𑀭𑀡𑀛𑀸𑀦𑀗𑁆𑀕𑀯𑀲𑁂𑀦𑁂𑀯 𑀯𑀼𑀢𑁆𑀢𑀸𑀦𑀺. 𑀢𑀢𑁄 𑀧𑀭𑀸𑀦𑀺 𑀦𑀯 𑀇𑀦𑁆𑀤𑁆𑀭𑀺𑀬𑀪𑀽𑀢𑀛𑀸𑀦𑀗𑁆𑀕𑀯𑀲𑁂𑀦, 𑀢𑀢𑁄 𑀦𑀯 𑀫𑀕𑁆𑀕𑀪𑀽𑀢𑀛𑀸𑀦𑀗𑁆𑀕𑀯𑀲𑁂𑀦, 𑀢𑀢𑁄 𑀦𑀯 𑀇𑀦𑁆𑀤𑁆𑀭𑀺𑀬𑀫𑀕𑁆𑀕𑀪𑀽𑀢𑀛𑀸𑀦𑀗𑁆𑀕𑀯𑀲𑁂𑀦. 𑀘𑀢𑀽𑀲𑀼𑀧𑀺 𑀘𑁂𑀢𑁂𑀲𑀼 𑀦𑀯𑀓𑁂𑀲𑀼 𑀆𑀤𑀺𑀢𑁄 𑀘𑀢𑁆𑀢𑀸𑀭𑀺 𑀘𑀢𑁆𑀢𑀸𑀭𑀺 𑀯𑀺𑀧𑀸𑀓𑀸𑀯𑀺𑀧𑀸𑀓𑀲𑀸𑀥𑀸𑀭𑀡𑀸𑀦𑀺. 𑀅𑀯𑀲𑀸𑀦𑁂 𑀧𑀜𑁆𑀘 𑀧𑀜𑁆𑀘 𑀯𑀺𑀧𑀸𑀓𑀸𑀦𑁂𑀯, 𑀢𑀸𑀦𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀸𑀦𑁂𑀯.

𑁫𑁦𑁧-𑁫𑁦𑁮. 𑀫𑀕𑁆𑀕𑀫𑀽𑀮𑀓𑁂𑀧𑀺 𑀤𑀼𑀫𑀽𑀮𑀓𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀖𑀝𑀦𑀸𑀦𑀺 𑀧𑀦𑁂𑀢𑁆𑀣 𑀲𑀢𑁆𑀢𑀧𑀜𑁆𑀜𑀸𑀲. 𑀢𑁂𑀲𑀼 𑀧𑀞𑀫𑀸𑀦𑀺 𑀦𑀯 𑀇𑀦𑁆𑀤𑁆𑀭𑀺𑀬𑀛𑀸𑀦𑀪𑀸𑀯𑀁 𑀅𑀦𑀸𑀫𑀲𑀺𑀢𑁆𑀯𑀸 𑀲𑀼𑀤𑁆𑀥𑀺𑀓𑀫𑀕𑁆𑀕𑀯𑀲𑁂𑀦𑁂𑀯 𑀯𑀼𑀢𑁆𑀢𑀸𑀦𑀺. 𑀢𑀢𑁄 𑀦𑀯 𑀇𑀦𑁆𑀤𑁆𑀭𑀺𑀬𑀪𑀽𑀢𑀫𑀕𑁆𑀕𑀯𑀲𑁂𑀦, 𑀢𑀢𑁄 𑀦𑀯 𑀛𑀸𑀦𑀪𑀽𑀢𑀫𑀕𑁆𑀕𑀯𑀲𑁂𑀦, 𑀢𑀢𑁄 𑀦𑀯 𑀇𑀦𑁆𑀤𑁆𑀭𑀺𑀬𑀛𑀸𑀦𑀪𑀽𑀢𑀫𑀕𑁆𑀕𑀯𑀲𑁂𑀦, 𑀢𑀢𑁄 𑀙 𑀅𑀥𑀺𑀧𑀢𑀺𑀪𑀽𑀢𑀫𑀕𑁆𑀕𑀯𑀲𑁂𑀦, 𑀢𑀢𑁄 𑀦𑀯 𑀦𑀺𑀭𑀸𑀥𑀺𑀧𑀢𑀺𑀫𑀕𑁆𑀕𑀳𑁂𑀢𑀼𑀯𑀲𑁂𑀦, 𑀢𑀢𑁄 𑀙 𑀲𑀸𑀥𑀺𑀧𑀢𑀺𑀫𑀕𑁆𑀕𑀳𑁂𑀢𑀼𑀯𑀲𑁂𑀦, 𑀢𑀢𑁆𑀣 𑀦𑀯𑀓𑁂𑀲𑀼 𑀧𑀜𑁆𑀘 𑀧𑀜𑁆𑀘 𑀙𑀓𑁆𑀓𑁂𑀲𑀼 𑀢𑀻𑀡𑀺 𑀢𑀻𑀡𑀺 𑀯𑀺𑀧𑀸𑀓𑀸𑀦𑀺. 𑀲𑁂𑀲𑀸𑀦𑀺 𑀲𑀸𑀥𑀸𑀭𑀡𑀸𑀦𑀺, 𑀢𑀸𑀦𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀸𑀦𑁂𑀯.

𑁫𑁦𑁯-𑁫𑁧𑁦. 𑀲𑀫𑁆𑀧𑀬𑀼𑀢𑁆𑀢𑀫𑀽𑀮𑀓𑁂 𑀤𑀼𑀫𑀽𑀮𑀓𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯. 𑀏𑀢𑁆𑀣 𑀧𑀦 𑀤𑁆𑀯𑁂𑀬𑁂𑀯 𑀖𑀝𑀦𑀸𑀦𑀺. 𑀢𑀢𑁆𑀣 𑀏𑀓𑀁 𑀲𑀸𑀥𑀸𑀭𑀡𑀯𑀲𑁂𑀦, 𑀏𑀓𑀁 𑀯𑀺𑀧𑀸𑀓𑀯𑀲𑁂𑀦 𑀯𑀼𑀢𑁆𑀢𑀁.

𑁫𑁧𑁧-𑁫𑁧𑁪. 𑀯𑀺𑀧𑁆𑀧𑀬𑀼𑀢𑁆𑀢𑀫𑀽𑀮𑀓𑁂𑀧𑀺 𑀤𑀼𑀫𑀽𑀮𑀓𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯. 𑀖𑀝𑀦𑀸𑀦𑀺 𑀧𑀦𑁂𑀢𑁆𑀣 𑀢𑁂𑀭𑀲. 𑀢𑀢𑁆𑀣 𑀧𑀞𑀫𑁂 𑀧𑀜𑁆𑀘𑀸𑀢𑀺 𑀓𑀼𑀲𑀮𑁄 𑀅𑀩𑁆𑀬𑀸𑀓𑀢𑀲𑁆𑀲, 𑀢𑀣𑀸 𑀅𑀓𑀼𑀲𑀮𑁄, 𑀅𑀩𑁆𑀬𑀸𑀓𑀢𑁄 𑀢𑀺𑀡𑁆𑀡𑀦𑁆𑀦𑀫𑁆𑀧𑀺. 𑀏𑀢𑁆𑀣 𑀘 𑀇𑀫𑁂 𑀯𑀺𑀧𑁆𑀧𑀬𑀼𑀢𑁆𑀢𑀸𑀤𑀬𑁄 𑀲𑀳𑀚𑀸𑀢𑀸𑀧𑀺 𑀳𑁄𑀦𑁆𑀢𑀺, 𑀧𑀘𑁆𑀙𑀸𑀚𑀸𑀢𑀧𑀼𑀭𑁂𑀚𑀸𑀢𑀸𑀧𑀺. 𑀤𑀼𑀢𑀺𑀬𑁂 𑀧𑀼𑀭𑁂𑀚𑀸𑀢𑀲𑀳𑀚𑀸𑀢𑀸𑀯 𑀢𑀢𑀺𑀬𑁂 𑀢𑁂𑀬𑁂𑀯 𑀅𑀥𑀺𑀧𑀢𑀺𑀯𑀲𑁂𑀦. 𑀢𑀢𑁆𑀣 𑀓𑀼𑀲𑀮𑁄 𑀅𑀩𑁆𑀬𑀸𑀓𑀢𑀲𑁆𑀲 𑀢𑀣𑀸 𑀅𑀓𑀼𑀲𑀮𑁄, 𑀅𑀩𑁆𑀬𑀸𑀓𑀢𑁄 𑀧𑀦 𑀅𑀩𑁆𑀬𑀸𑀓𑀢𑀲𑁆𑀲 𑀘 𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀯𑀲𑁂𑀦 𑀅𑀓𑀼𑀲𑀮𑀲𑁆𑀲 𑀘𑀸𑀢𑀺 𑀏𑀯𑀁 𑀘𑀢𑁆𑀢𑀸𑀭𑀺. 𑀘𑀢𑀼𑀢𑁆𑀣𑁂 𑀢𑀻𑀡𑀻𑀢𑀺 𑀓𑀼𑀲𑀮𑀸𑀤𑀻𑀦𑀺 𑀅𑀩𑁆𑀬𑀸𑀓𑀢𑀲𑁆𑀲. 𑀇𑀦𑁆𑀤𑁆𑀭𑀺𑀬𑀸𑀦𑀺 𑀧𑀦𑁂𑀢𑁆𑀣 𑀭𑀽𑀧𑀸𑀦𑀺𑀧𑀺 𑀅𑀭𑀽𑀧𑀸𑀦𑀺𑀧𑀺. 𑀧𑀜𑁆𑀘𑀫𑁂 𑀧𑀘𑁆𑀘𑀬𑀸 𑀅𑀭𑀽𑀧𑀸𑀯 𑀙𑀝𑁆𑀞𑁂 𑀯𑀢𑁆𑀣𑀼𑀯𑀲𑁂𑀦 𑀭𑀽𑀧𑀸𑀯 𑀲𑀢𑁆𑀢𑀫𑁂 𑀓𑀼𑀲𑀮𑀸𑀩𑁆𑀬𑀸𑀓𑀢𑀸𑀦𑀁 𑀯𑀺𑀧𑀲𑁆𑀲𑀦𑀸𑀯𑀲𑁂𑀦, 𑀅𑀓𑀼𑀲𑀮𑀲𑁆𑀲 𑀅𑀲𑁆𑀲𑀸𑀤𑀦𑀯𑀲𑁂𑀦 𑀯𑀢𑁆𑀣𑀼𑀫𑁂𑀯. 𑀅𑀝𑁆𑀞𑀫𑁂 𑀢𑀤𑁂𑀯𑀸𑀓𑀼𑀲𑀮𑀲𑁆𑀲, 𑀦𑀯𑀫𑁂 𑀘𑀓𑁆𑀔𑀸𑀤𑀻𑀦𑀺 𑀅𑀩𑁆𑀬𑀸𑀓𑀢𑀲𑁆𑀲, 𑀤𑀲𑀫𑁂 𑀓𑀼𑀲𑀮𑀸𑀤𑀬𑁄 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀦𑀁, 𑀏𑀓𑀸𑀤𑀲𑀫𑁂 𑀧𑀝𑀺𑀲𑀦𑁆𑀥𑀺𑀬𑀁 𑀯𑀢𑁆𑀣𑀼 𑀔𑀦𑁆𑀥𑀸𑀦𑀁, 𑀤𑁆𑀯𑀸𑀤𑀲𑀫𑁂 𑀧𑀝𑀺𑀲𑀦𑁆𑀥𑀺𑀬𑀁 𑀔𑀦𑁆𑀥𑀸 𑀓𑀝𑀢𑁆𑀢𑀸𑀭𑀽𑀧𑀸𑀦𑀁, 𑀢𑁂𑀭𑀲𑀫𑁂 𑀧𑀝𑀺𑀲𑀦𑁆𑀥𑀺𑀬𑀁 𑀔𑀦𑁆𑀥𑀸 𑀯𑀢𑁆𑀣𑀼𑀲𑁆𑀲.

𑁫𑁧𑁫-𑁫𑁧𑁮. 𑀅𑀢𑁆𑀣𑀺𑀧𑀘𑁆𑀘𑀬𑀫𑀽𑀮𑀓𑁂 𑀉𑀧𑀦𑀺𑀲𑁆𑀲𑀬𑁂 𑀏𑀓𑀦𑁆𑀢𑀺 𑀆𑀭𑀫𑁆𑀫𑀡𑀽𑀧𑀦𑀺𑀲𑁆𑀲𑀬𑀯𑀲𑁂𑀦 𑀅𑀩𑁆𑀬𑀸𑀓𑀢𑀁 𑀅𑀓𑀼𑀲𑀮𑀲𑁆𑀲. 𑀲𑁂𑀲𑀁 𑀤𑀼𑀫𑀽𑀮𑀓𑁂 𑀉𑀢𑁆𑀢𑀸𑀦𑀫𑁂𑀯. 𑀖𑀝𑀦𑀸𑀦𑀺 𑀧𑀦𑁂𑀢𑁆𑀣 𑀏𑀓𑀽𑀦𑀢𑀺𑀁𑀲. 𑀢𑁂𑀲𑀼 𑀧𑀞𑀫𑁂 𑀅𑀭𑀽𑀧𑀯𑀢𑁆𑀣𑀸𑀭𑀫𑁆𑀫𑀡𑀫𑀳𑀸𑀪𑀽𑀢𑀇𑀦𑁆𑀤𑁆𑀭𑀺𑀬𑀸𑀳𑀸𑀭𑀸𑀦𑀁 𑀯𑀲𑁂𑀦 𑀲𑀳𑀚𑀸𑀢𑀧𑀼𑀭𑁂𑀚𑀸𑀢𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬𑀸 𑀮𑀩𑁆𑀪𑀦𑁆𑀢𑀺. 𑀤𑀼𑀢𑀺𑀬𑁂 𑀧𑀘𑁆𑀙𑀸𑀚𑀸𑀢𑀓𑀩𑀴𑀻𑀓𑀸𑀭𑀸𑀳𑀸𑀭𑀸 𑀦 𑀮𑀩𑁆𑀪𑀦𑁆𑀢𑀺. 𑀧𑀞𑀫𑀤𑀼𑀢𑀺𑀬𑀖𑀝𑀦𑀸𑀦𑁂𑀯 𑀅𑀥𑀺𑀧𑀢𑀺𑀦𑀸 𑀲𑀤𑁆𑀥𑀺𑀁 𑀉𑀧𑀭𑀺 𑀢𑀢𑀺𑀬𑀘𑀢𑀼𑀢𑁆𑀣𑀸𑀦𑀺 𑀓𑀢𑀸𑀦𑀺. 𑀧𑀼𑀦 𑀧𑀞𑀫𑀫𑁂𑀯 𑀘𑀢𑀽𑀳𑀺 𑀆𑀳𑀸𑀭𑁂𑀳𑀺 𑀲𑀤𑁆𑀥𑀺𑀁 𑀧𑀜𑁆𑀘𑀫𑀁, 𑀭𑀽𑀧𑀺𑀦𑁆𑀤𑁆𑀭𑀺𑀬𑁂𑀳𑀺 𑀲𑀤𑁆𑀥𑀺𑀁 𑀙𑀝𑁆𑀞𑀁, 𑀭𑀽𑀧𑀸𑀭𑀽𑀧𑀺𑀦𑁆𑀤𑁆𑀭𑀺𑀬𑁂𑀳𑀺 𑀲𑀤𑁆𑀥𑀺𑀁 𑀲𑀢𑁆𑀢𑀫𑀁 𑀓𑀢𑀁. 𑀤𑀼𑀢𑀺𑀬𑀫𑁂𑀯 𑀯𑀸 𑀧𑀦 𑀇𑀦𑁆𑀤𑁆𑀭𑀺𑀬𑁂𑀳𑀺 𑀲𑀤𑁆𑀥𑀺𑀁 𑀲𑀢𑁆𑀢𑀫𑀁 𑀓𑀢𑀁. 𑀧𑀞𑀫𑀤𑀼𑀢𑀺𑀬𑀸𑀦𑁂𑀯 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑁂𑀦 𑀲𑀤𑁆𑀥𑀺𑀁 𑀅𑀝𑁆𑀞𑀫𑀦𑀯𑀫𑀸𑀦𑀺. 𑀢𑁂𑀲𑀼 𑀦𑀯𑀫𑀁 𑀅𑀥𑀺𑀧𑀢𑀺𑀦𑀸 𑀲𑀤𑁆𑀥𑀺𑀁 𑀤𑀲𑀫𑀁 𑀓𑀢𑀁. 𑀢𑀢𑁄 𑀏𑀓𑀸𑀤𑀲𑀫𑁂 𑀧𑀘𑁆𑀘𑀬𑀯𑀲𑁂𑀦 𑀯𑀢𑁆𑀣𑀼 𑀳𑀸𑀬𑀢𑀺. 𑀤𑁆𑀯𑀸𑀤𑀲𑀫𑁂 𑀅𑀭𑀽𑀧𑀥𑀫𑁆𑀫𑀸𑀬𑁂𑀯 𑀧𑀘𑁆𑀘𑀬𑀸, 𑀢𑁂𑀭𑀲𑀫𑁂 𑀯𑀢𑁆𑀣𑀸𑀭𑀫𑁆𑀫𑀡𑀸, 𑀘𑀼𑀤𑁆𑀤𑀲𑀫𑁂 𑀯𑀢𑁆𑀣𑀼𑀫𑁂𑀯, 𑀧𑀦𑁆𑀦𑀭𑀲𑀫𑁂 𑀆𑀭𑀫𑁆𑀫𑀡𑀫𑁂𑀯, 𑀲𑁄𑀴𑀲𑀫𑁂 𑀯𑀢𑁆𑀣𑀼𑀫𑁂𑀯 𑀆𑀭𑀫𑁆𑀫𑀡𑀁, 𑀲𑀢𑁆𑀢𑀭𑀲𑀫𑁂 𑀧𑀦 𑀢𑀤𑁂𑀯 𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀪𑀸𑀯𑁂𑀦, 𑀅𑀝𑁆𑀞𑀸𑀭𑀲𑀫𑁂𑀧𑀺 𑀢𑀤𑁂𑀯 𑀆𑀭𑀫𑁆𑀫𑀡𑀽𑀧𑀦𑀺𑀲𑁆𑀲𑀬𑀯𑀲𑁂𑀦, 𑀏𑀓𑀽𑀦𑀯𑀻𑀲𑀢𑀺𑀫𑁂 𑀘𑀓𑁆𑀔𑀸𑀤𑀬𑁄𑀯 𑀧𑀘𑁆𑀘𑀬𑀸. 𑀇𑀫𑀸𑀦𑀺 𑀏𑀓𑀽𑀦𑀯𑀻𑀲𑀢𑀺 𑀧𑀓𑀺𑀡𑁆𑀡𑀓𑀖𑀝𑀦𑀸𑀦𑀺 𑀦𑀸𑀫 𑀲𑀳𑀚𑀸𑀢𑀁 𑀅𑀕𑁆𑀕𑀳𑁂𑀢𑁆𑀯𑀸 𑀯𑀼𑀢𑁆𑀢𑀸𑀦𑀺. 𑀢𑀢𑁄 𑀧𑀭𑀸𑀦𑀺 𑀤𑀲 𑀲𑀳𑀚𑀸𑀢𑀯𑀲𑁂𑀦 𑀯𑀼𑀢𑁆𑀢𑀸𑀦𑀺.

𑁫𑁧𑁯. 𑀦𑀢𑁆𑀣𑀺𑀯𑀺𑀕𑀢𑀫𑀽𑀮𑀓𑁂𑀲𑀼 𑀅𑀦𑀦𑁆𑀢𑀭𑀲𑀫𑀦𑀦𑁆𑀢𑀭𑀫𑀽𑀮𑀓𑁂𑀲𑀼 𑀯𑀺𑀬 𑀉𑀧𑀦𑀺𑀲𑁆𑀲𑀬𑀸𑀲𑁂𑀯𑀦𑀓𑀫𑁆𑀫𑀯𑀲𑁂𑀦 𑀢𑀻𑀡𑀺𑀬𑁂𑀯 𑀖𑀝𑀦𑀸𑀦𑀺, 𑀅𑀯𑀺𑀕𑀢𑀫𑀽𑀮𑀓𑀁 𑀅𑀢𑁆𑀣𑀺𑀫𑀽𑀮𑀓𑀲𑀤𑀺𑀲𑀫𑁂𑀯𑀸𑀢𑀺.

𑀬𑀸𑀦𑀺 𑀧𑀦𑁂𑀢𑀸𑀦𑀺 𑀇𑀫𑀲𑁆𑀫𑀺𑀁 𑀧𑀜𑁆𑀳𑀸𑀯𑀸𑀭𑁂 𑀖𑀝𑀦𑀸𑀦𑀺 𑀯𑀼𑀢𑁆𑀢𑀸𑀦𑀺, 𑀢𑀸𑀦𑀺 𑀲𑀩𑁆𑀩𑀸𑀦𑀺𑀧𑀺 𑀤𑀼𑀯𑀺𑀥𑀸𑀦𑀺𑀬𑁂𑀯 𑁋 𑀧𑀓𑀺𑀡𑁆𑀡𑀓𑀢𑁄 𑀲𑀳𑀚𑀸𑀢𑀢𑁄 𑀘. 𑀢𑀢𑁆𑀣 𑀲𑀩𑁆𑀩𑁂𑀲𑀫𑁆𑀧𑀺 𑀆𑀭𑀫𑁆𑀫𑀡𑀫𑀽𑀮𑀓𑀸𑀤𑀻𑀦𑀁 𑀆𑀤𑀺𑀢𑁄 𑀲𑀳𑀚𑀸𑀢𑀁 𑀅𑀕𑁆𑀕𑀳𑁂𑀢𑁆𑀯𑀸 𑀯𑀼𑀢𑁆𑀢𑀸𑀦𑀺 𑀧𑀓𑀺𑀡𑁆𑀡𑀓𑀸𑀦𑀺 𑀦𑀸𑀫. 𑀢𑀸𑀦𑀺 𑀆𑀭𑀫𑁆𑀫𑀡𑀫𑀽𑀮𑀓𑁂 𑀧𑀜𑁆𑀘𑀧𑀺, 𑀅𑀥𑀺𑀧𑀢𑀺𑀫𑀽𑀮𑀓𑁂 𑀙, 𑀅𑀦𑀦𑁆𑀢𑀭𑀫𑀽𑀮𑀓𑁂 𑀢𑀻𑀡𑀺𑀧𑀺, 𑀢𑀣𑀸 𑀲𑀫𑀦𑀦𑁆𑀢𑀭𑀫𑀽𑀮𑀓𑁂, 𑀦𑀺𑀲𑁆𑀲𑀬𑀫𑀽𑀮𑀓𑁂 𑀤𑀲, 𑀉𑀧𑀦𑀺𑀲𑁆𑀲𑀬𑀫𑀽𑀮𑀓𑁂 𑀲𑀢𑁆𑀢, 𑀧𑀼𑀭𑁂𑀚𑀸𑀢𑀫𑀽𑀮𑀓𑁂 𑀲𑀢𑁆𑀢, 𑀧𑀘𑁆𑀙𑀸𑀚𑀸𑀢𑀫𑀽𑀮𑀓𑁂 𑀏𑀓𑀫𑁂𑀯, 𑀢𑀣𑀸 𑀆𑀲𑁂𑀯𑀦𑀫𑀽𑀮𑀓𑁂, 𑀓𑀫𑁆𑀫𑀫𑀽𑀮𑀓𑁂 𑀤𑁆𑀯𑁂, 𑀆𑀳𑀸𑀭𑀫𑀽𑀮𑀓𑁂 𑀏𑀓𑀁, 𑀇𑀦𑁆𑀤𑁆𑀭𑀺𑀬𑀫𑀽𑀮𑀓𑁂 𑀘𑀢𑁆𑀢𑀸𑀭𑀺, 𑀯𑀺𑀧𑁆𑀧𑀬𑀼𑀢𑁆𑀢𑀫𑀽𑀮𑀓𑁂 𑀦𑀯, 𑀅𑀢𑁆𑀣𑀺𑀫𑀽𑀮𑀓𑁂 𑀏𑀓𑀽𑀦𑀯𑀻𑀲𑀢𑀺, 𑀦𑀢𑁆𑀣𑀺𑀫𑀽𑀮𑀓𑁂 𑀢𑀻𑀡𑀺𑀧𑀺, 𑀢𑀣𑀸𑀯𑀺𑀕𑀢𑀫𑀽𑀮𑀓𑁂. 𑀅𑀯𑀺𑀕𑀢𑀫𑀽𑀮𑀓𑁂 𑀏𑀓𑀽𑀦𑀯𑀻𑀲𑀢𑀻𑀢𑀺 𑀲𑀩𑁆𑀩𑀸𑀦𑀺𑀧𑀺 𑀲𑀢𑀜𑁆𑀘𑁂𑀯 𑀢𑀻𑀡𑀺 𑀘 𑀳𑁄𑀦𑁆𑀢𑀺. 𑀲𑀳𑀚𑀸𑀢𑀦𑀺𑀲𑁆𑀲𑀬𑀪𑀸𑀯𑁂𑀦 𑀧𑀦𑁂𑀢𑀸𑀦𑀺 𑀧𑀓𑀺𑀡𑁆𑀡𑀓𑀸𑀦𑀻𑀢𑀺 𑀯𑀼𑀢𑁆𑀢𑀸𑀦𑀺.

𑀬𑀸𑀦𑀺 𑀧𑀦 𑀲𑀳𑀚𑀸𑀢𑀁 𑀮𑀩𑁆𑀪𑀦𑁆𑀢𑀺, 𑀢𑀸𑀦𑀺 𑀲𑀳𑀚𑀸𑀢𑀖𑀝𑀦𑀸𑀦𑀺 𑀦𑀸𑀫𑀸𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀢𑀸𑀦𑀺 𑀆𑀭𑀫𑁆𑀫𑀡𑀫𑀽𑀮𑀓𑁂 𑀅𑀦𑀦𑁆𑀢𑀭𑀲𑀫𑀦𑀦𑁆𑀢𑀭𑀧𑀼𑀭𑁂𑀚𑀸𑀢𑀧𑀘𑁆𑀙𑀸𑀚𑀸𑀢𑀆𑀲𑁂𑀯𑀦𑀦𑀢𑁆𑀣𑀺𑀯𑀺𑀕𑀢𑀫𑀽𑀮𑀓𑁂𑀲𑀼 𑀦 𑀮𑀩𑁆𑀪𑀦𑁆𑀢𑀺. 𑀦 𑀳𑀺 𑀢𑁂 𑀧𑀘𑁆𑀘𑀬𑀸 𑀲𑀳𑀚𑀸𑀢𑀸𑀦𑀁 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺. 𑀬𑀣𑀸 𑀘 𑀲𑀳𑀚𑀸𑀢𑀸𑀦𑀁 𑀦 𑀳𑁄𑀦𑁆𑀢𑀺, 𑀢𑀣𑀸 𑀳𑁂𑀢𑀼𑀲𑀳𑀚𑀸𑀢𑀅𑀜𑁆𑀜𑀫𑀜𑁆𑀜𑀯𑀺𑀧𑀸𑀓𑀛𑀸𑀦𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀸. 𑀅𑀲𑀳𑀚𑀸𑀢𑀸𑀦𑀦𑁆𑀢𑀺 𑀳𑁂𑀢𑀼𑀫𑀽𑀮𑀓𑁂 𑀲𑀩𑁆𑀩𑀸𑀦𑀺 𑀘𑀢𑀼𑀯𑀻𑀲𑀢𑀺𑀧𑀺 𑀖𑀝𑀦𑀸𑀦𑀺 𑀲𑀳𑀚𑀸𑀢𑀖𑀝𑀦𑀸𑀦𑁂𑀯. 𑀢𑀣𑀸 𑀅𑀥𑀺𑀧𑀢𑀺𑀫𑀽𑀮𑀓𑁂 𑀘𑀢𑀼𑀯𑀻𑀲𑀢𑀺, 𑀲𑀳𑀚𑀸𑀢𑀫𑀽𑀮𑀓𑁂 𑀤𑀲𑀧𑀺, 𑀅𑀜𑁆𑀜𑀫𑀜𑁆𑀜𑀫𑀽𑀮𑀓𑁂 𑀙𑀧𑀺, 𑀦𑀺𑀲𑁆𑀲𑀬𑀫𑀽𑀮𑀓𑁂 𑀤𑀲, 𑀓𑀫𑁆𑀫𑀫𑀽𑀮𑀓𑁂 𑀦𑀯, 𑀯𑀺𑀧𑀸𑀓𑀫𑀽𑀮𑀓𑁂 𑀧𑀜𑁆𑀘𑀧𑀺, 𑀆𑀳𑀸𑀭𑀫𑀽𑀮𑀓𑁂 𑀢𑁂𑀢𑁆𑀢𑀺𑀁𑀲, 𑀇𑀦𑁆𑀤𑁆𑀭𑀺𑀬𑀫𑀽𑀮𑀓𑁂 𑀤𑁆𑀯𑀸𑀲𑀢𑁆𑀢𑀢𑀺 𑀛𑀸𑀦𑀫𑀽𑀮𑀓𑁂 𑀙𑀢𑁆𑀢𑀺𑀁𑀲𑀸𑀧𑀺, 𑀫𑀕𑁆𑀕𑀫𑀽𑀮𑀓𑁂 𑀲𑀢𑁆𑀢𑀧𑀜𑁆𑀜𑀸𑀲𑀫𑁆𑀧𑀺, 𑀲𑀫𑁆𑀧𑀬𑀼𑀢𑁆𑀢𑀫𑀽𑀮𑀓𑁂 𑀤𑁆𑀯𑁂𑀧𑀺, 𑀯𑀺𑀧𑁆𑀧𑀬𑀼𑀢𑁆𑀢𑀫𑀽𑀮𑀓𑁂 𑀘𑀢𑁆𑀢𑀸𑀭𑀺, 𑀅𑀢𑁆𑀣𑀺𑀫𑀽𑀮𑀓𑁂 𑀤𑀲, 𑀅𑀯𑀺𑀕𑀢𑀫𑀽𑀮𑀓𑁂 𑀤𑀲𑀸𑀢𑀺 𑀲𑀩𑁆𑀩𑀸𑀦𑀺𑀧𑀺 𑀢𑀻𑀡𑀺 𑀲𑀢𑀸𑀦𑀺 𑀤𑁆𑀯𑀸𑀤𑀲 𑀘 𑀳𑁄𑀦𑁆𑀢𑀺. 𑀇𑀢𑀺 𑀧𑀼𑀭𑀺𑀫𑀸𑀦𑀺 𑀲𑀢𑀁 𑀢𑀻𑀡𑀺 𑀘 𑀇𑀫𑀸𑀦𑀺 𑀘 𑀤𑁆𑀯𑀸𑀤𑀲𑀼𑀢𑁆𑀢𑀭𑀸𑀦𑀺 𑀢𑀻𑀡𑀺 𑀲𑀢𑀸𑀦𑀻𑀢𑀺 𑀲𑀩𑁆𑀩𑀸𑀦𑀺𑀧𑀺 𑀧𑀜𑁆𑀘𑀤𑀲𑀸𑀥𑀺𑀓𑀸𑀦𑀺 𑀘𑀢𑁆𑀢𑀸𑀭𑀺 𑀖𑀝𑀦𑀲𑀢𑀸𑀦𑀺 𑀧𑀜𑁆𑀳𑀸𑀯𑀸𑀭𑁂 𑀆𑀕𑀢𑀸𑀦𑀺. 𑀢𑁂𑀲𑀼 𑀬𑁂 𑀬𑁂 𑀧𑀘𑁆𑀘𑀬𑀥𑀫𑁆𑀫𑀸 𑀦𑀸𑀫𑀯𑀲𑁂𑀦 𑀦 𑀧𑀸𑀓𑀝𑀸 𑀳𑀼𑀢𑁆𑀯𑀸 𑀧𑀜𑁆𑀜𑀸𑀬𑀦𑁆𑀢𑀺, 𑀢𑁂𑀧𑀺 𑀳𑁂𑀢𑀼𑀫𑀽𑀮𑀓𑀸𑀤𑀻𑀦𑀁 𑀦𑀬𑀸𑀦𑀁 𑀆𑀤𑀺𑀢𑁄 𑀯𑀺𑀧𑀸𑀓𑀸𑀯𑀺𑀧𑀸𑀓𑀲𑀸𑀫𑀜𑁆𑀜𑀢𑁄 𑀯𑀼𑀢𑁆𑀢𑁂𑀲𑀼 𑀖𑀝𑀦𑁂𑀲𑀼 𑀤𑀲𑁆𑀲𑁂𑀢𑀩𑁆𑀩𑀸. 𑀤𑁆𑀯𑀸𑀤𑀲𑁂𑀯 𑀳𑀺 𑀳𑁂𑀢𑀽 𑀙 𑀆𑀭𑀫𑁆𑀫𑀡𑀸 𑀘𑀢𑁆𑀢𑀸𑀭𑁄 𑀅𑀥𑀺𑀧𑀢𑀬𑁄 𑀘𑀢𑁆𑀢𑀸𑀭𑁄 𑀆𑀳𑀸𑀭𑀸 𑀯𑀻𑀲𑀢𑀺 𑀇𑀦𑁆𑀤𑁆𑀭𑀺𑀬𑀸𑀦𑀺 𑀲𑀢𑁆𑀢 𑀛𑀸𑀦𑀗𑁆𑀕𑀸𑀦𑀺 𑀤𑁆𑀯𑀸𑀤𑀲 𑀫𑀕𑁆𑀕𑀗𑁆𑀕𑀸𑀦𑀻𑀢𑀺 𑀏𑀢𑁂 𑀧𑀘𑁆𑀘𑀬𑀥𑀫𑁆𑀫𑀸 𑀦𑀸𑀫. 𑀢𑁂𑀲𑀼 𑀬𑁂 𑀬𑁂 𑀥𑀫𑁆𑀫𑀸 𑀏𑀓𑀦𑁆𑀢𑁂𑀦 𑀓𑀼𑀲𑀮𑀸, 𑀏𑀓𑀦𑁆𑀢𑁂𑀦𑁂𑀯 𑀅𑀓𑀼𑀲𑀮𑀸, 𑀏𑀓𑀦𑁆𑀢𑁂𑀦 𑀓𑀼𑀲𑀮𑀯𑀺𑀧𑀸𑀓𑀸, 𑀏𑀓𑀦𑁆𑀢𑁂𑀦𑁂𑀯𑀸𑀓𑀼𑀲𑀮𑀯𑀺𑀧𑀸𑀓𑀸, 𑀏𑀓𑀦𑁆𑀢𑁂𑀦𑁂𑀯 𑀯𑀺𑀧𑀸𑀓𑀸, 𑀏𑀓𑀦𑁆𑀢𑁂𑀦𑁂𑀯 𑀅𑀯𑀺𑀧𑀸𑀓𑀸 𑀢𑁂 𑀢𑁂 𑀲𑀸𑀥𑀼𑀓𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀬𑁂 𑀢𑀢𑁆𑀣 𑀯𑀺𑀧𑀸𑀓𑀸, 𑀢𑁂 𑀯𑀺𑀧𑀸𑀓𑀖𑀝𑀦𑁂𑀲𑀼, 𑀬𑁂 𑀅𑀯𑀺𑀧𑀸𑀓𑀸, 𑀢𑁂 𑀅𑀯𑀺𑀧𑀸𑀓𑀖𑀝𑀦𑁂𑀲𑀼 𑀬𑀣𑀸𑀬𑁄𑀕𑀁 𑀬𑁄𑀚𑁂𑀢𑀩𑁆𑀩𑀸𑀢𑀺.

𑀧𑀜𑁆𑀳𑀸𑀯𑀸𑀭𑀲𑁆𑀲 𑀖𑀝𑀦𑁂 𑀅𑀦𑀼𑀮𑁄𑀫𑀕𑀡𑀦𑀸.

𑀧𑀘𑁆𑀘𑀦𑀻𑀬𑀼𑀤𑁆𑀥𑀸𑀭𑀯𑀡𑁆𑀡𑀦𑀸

𑁫𑁨𑁭. 𑀇𑀤𑀸𑀦𑀺 𑀧𑀘𑁆𑀘𑀦𑀻𑀬𑀁 𑀳𑁄𑀢𑀺. 𑀢𑀢𑁆𑀣 𑀬𑀣𑀸 𑀧𑀝𑀺𑀘𑁆𑀘 𑀯𑀸𑀭𑀸𑀤𑀻𑀲𑀼 ‘‘𑀅𑀓𑀼𑀲𑀮𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀅𑀓𑀼𑀲𑀮𑁄 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑀢𑀺 𑀦𑀳𑁂𑀢𑀼𑀧𑀘𑁆𑀘𑀬𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀮𑀩𑁆𑀪𑀫𑀸𑀦𑀸 𑀧𑀜𑁆𑀳𑀸 𑀮𑀩𑁆𑀪𑀫𑀸𑀦𑀸𑀦𑀁 𑀧𑀘𑁆𑀘𑀬𑀸𑀦𑀁 𑀯𑀲𑁂𑀦 𑀲𑀭𑀽𑀧𑀢𑁄𑀯 𑀯𑀺𑀢𑁆𑀣𑀸𑀭𑀺𑀢𑀸. 𑀏𑀯𑀁 𑀅𑀯𑀺𑀢𑁆𑀣𑀸𑀭𑁂𑀢𑁆𑀯𑀸 𑀏𑀓𑁂𑀦 𑀮𑀓𑁆𑀔𑀡𑁂𑀦 𑀲𑀗𑁆𑀔𑁂𑀧𑀢𑁄 𑀧𑀘𑁆𑀘𑀦𑀻𑀬𑀁 𑀤𑀲𑁆𑀲𑁂𑀢𑀼𑀁 𑀥𑀫𑁆𑀫𑀲𑀗𑁆𑀕𑀸𑀳𑀓𑁂𑀳𑀺 𑀓𑀼𑀲𑀮𑁄 𑀥𑀫𑁆𑀫𑁄 𑀓𑀼𑀲𑀮𑀲𑁆𑀲 𑀥𑀫𑁆𑀫𑀲𑁆𑀲 𑀆𑀭𑀫𑁆𑀫𑀡𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄𑀢𑀺𑀆𑀤𑀺𑀦𑀸 𑀦𑀬𑁂𑀦 𑀅𑀦𑀼𑀮𑁄𑀫𑀢𑁄 𑀓𑀼𑀲𑀮𑀸𑀤𑀻𑀦𑀁 𑀧𑀘𑁆𑀘𑀬𑀸 𑀉𑀤𑁆𑀥𑀝𑀸. 𑀢𑁂 𑀘 𑀔𑁄 𑀧𑀘𑁆𑀘𑀬𑀸 𑀲𑀫𑀽𑀳𑀯𑀲𑁂𑀦, 𑀦𑁄 𑀏𑀓𑁂𑀓𑀧𑀘𑁆𑀘𑀬𑀯𑀲𑁂𑀦𑁂𑀯; 𑀢𑀲𑁆𑀫𑀸 𑀬𑁂 𑀬𑀢𑁆𑀣 𑀲𑀫𑀽𑀳𑀢𑁄 𑀤𑀲𑁆𑀲𑀺𑀢𑀸, 𑀢𑁂 𑀯𑀺𑀪𑀚𑀺𑀢𑁆𑀯𑀸 𑀯𑁂𑀤𑀺𑀢𑀩𑁆𑀩𑀸. 𑀲𑀩𑁆𑀩𑁂𑀧𑀺 𑀳𑀺 𑀇𑀫𑁂 𑀘𑀢𑀼𑀯𑀻𑀲𑀢𑀺 𑀧𑀘𑁆𑀘𑀬𑀸 𑀅𑀝𑁆𑀞𑀲𑀼 𑀧𑀘𑁆𑀘𑀬𑁂𑀲𑀼 𑀲𑀗𑁆𑀕𑀳𑀁 𑀕𑀘𑁆𑀙𑀦𑁆𑀢𑀺. 𑀓𑀢𑀭𑁂𑀲𑀼 𑀅𑀝𑁆𑀞𑀲𑀼? 𑀆𑀭𑀫𑁆𑀫𑀡𑁂, 𑀲𑀳𑀚𑀸𑀢𑁂, 𑀉𑀧𑀦𑀺𑀲𑁆𑀲𑀬𑁂, 𑀧𑀼𑀭𑁂𑀚𑀸𑀢𑁂, 𑀧𑀘𑁆𑀙𑀸𑀚𑀸𑀢𑁂, 𑀓𑀫𑁆𑀫𑁂, 𑀆𑀳𑀸𑀭𑁂, 𑀇𑀦𑁆𑀤𑁆𑀭𑀺𑀬𑁂𑀢𑀺. 𑀓𑀣𑀁? 𑀞𑀧𑁂𑀢𑁆𑀯𑀸 𑀳𑀺 𑀇𑀫𑁂 𑀅𑀝𑁆𑀞 𑀧𑀘𑁆𑀘𑀬𑁂 𑀲𑁂𑀲𑁂𑀲𑀼 𑀲𑁄𑀴𑀲𑀲𑀼 𑀳𑁂𑀢𑀼𑀧𑀘𑁆𑀘𑀬𑁄 𑀅𑀜𑁆𑀜𑀫𑀜𑁆𑀜𑀯𑀺𑀧𑀸𑀓𑀛𑀸𑀦𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑁄𑀢𑀺 𑀇𑀫𑁂 𑀙 𑀧𑀘𑁆𑀘𑀬𑀸 𑀏𑀓𑀦𑁆𑀢𑁂𑀦 𑀲𑀳𑀚𑀸𑀢𑀸 𑀳𑀼𑀢𑁆𑀯𑀸 𑀲𑀳𑀚𑀸𑀢𑀸𑀦𑀜𑁆𑀜𑁂𑀯 𑀧𑀘𑁆𑀘𑀬𑀪𑀸𑀯𑀢𑁄 𑀲𑀳𑀚𑀸𑀢𑀧𑀘𑁆𑀘𑀬𑁂 𑀲𑀗𑁆𑀕𑀳𑀁 𑀕𑀘𑁆𑀙𑀦𑁆𑀢𑀺. 𑀅𑀦𑀦𑁆𑀢𑀭𑀧𑀘𑁆𑀘𑀬𑁄 𑀲𑀫𑀦𑀦𑁆𑀢𑀭𑀆𑀲𑁂𑀯𑀦𑀦𑀢𑁆𑀣𑀺𑀯𑀺𑀕𑀢𑀧𑀘𑁆𑀘𑀬𑁄𑀢𑀺 𑀇𑀫𑁂 𑀧𑀦 𑀧𑀜𑁆𑀘 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀦𑀺𑀭𑀼𑀤𑁆𑀥𑀸 𑀅𑀢𑁆𑀢𑀦𑁄 𑀅𑀦𑀦𑁆𑀢𑀭𑀁 𑀉𑀧𑁆𑀧𑀚𑁆𑀚𑀫𑀸𑀦𑀸𑀦𑀜𑁆𑀜𑁂𑀯 𑀧𑀘𑁆𑀘𑀬𑀪𑀸𑀯𑀢𑁄 𑀅𑀦𑀦𑁆𑀢𑀭𑀽𑀧𑀦𑀺𑀲𑁆𑀲𑀬𑀮𑀓𑁆𑀔𑀡𑁂𑀦 𑀉𑀧𑀦𑀺𑀲𑁆𑀲𑀬𑁂 𑀲𑀗𑁆𑀕𑀳𑀁 𑀕𑀘𑁆𑀙𑀦𑁆𑀢𑀺. 𑀦𑀺𑀲𑁆𑀲𑀬𑀧𑀘𑁆𑀘𑀬𑁄 𑀲𑀳𑀚𑀸𑀢𑀧𑀼𑀭𑁂𑀚𑀸𑀢𑀪𑁂𑀤𑀢𑁄 𑀤𑀼𑀯𑀺𑀥𑁄. 𑀢𑀢𑁆𑀣 𑀲𑀳𑀚𑀸𑀢𑀦𑀺𑀲𑁆𑀲𑀬𑁄 𑀲𑀳𑀚𑀸𑀢𑀸𑀦𑀜𑁆𑀜𑁂𑀯 𑀦𑀺𑀲𑁆𑀲𑀬𑀧𑀘𑁆𑀘𑀬𑀪𑀸𑀯𑀢𑁄 𑀲𑀳𑀚𑀸𑀢𑀧𑀘𑁆𑀘𑀬𑁂 𑀲𑀗𑁆𑀕𑀳𑀁 𑀕𑀘𑁆𑀙𑀢𑀺, 𑀧𑀼𑀭𑁂𑀚𑀸𑀢𑀦𑀺𑀲𑁆𑀲𑀬𑁄 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑁂 𑀲𑀗𑁆𑀕𑀳𑀁 𑀕𑀘𑁆𑀙𑀢𑀺.

𑀅𑀥𑀺𑀧𑀢𑀺𑀧𑀘𑁆𑀘𑀬𑁄𑀧𑀺 𑀲𑀳𑀚𑀸𑀢𑀸𑀥𑀺𑀧𑀢𑀺𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀯𑀲𑁂𑀦 𑀤𑀼𑀯𑀺𑀥𑁄. 𑀢𑀢𑁆𑀣 𑀲𑀳𑀚𑀸𑀢𑀸𑀥𑀺𑀧𑀢𑀺 𑀲𑀳𑀚𑀸𑀢𑀸𑀦𑀁𑀬𑁂𑀯 𑀅𑀥𑀺𑀧𑀢𑀺𑀧𑀘𑁆𑀘𑀬𑀪𑀸𑀯𑀢𑁄 𑀲𑀳𑀚𑀸𑀢𑀧𑀘𑁆𑀘𑀬𑁂 𑀲𑀗𑁆𑀕𑀳𑀁 𑀕𑀘𑁆𑀙𑀢𑀺. 𑀆𑀭𑀫𑁆𑀫𑀡𑀸𑀥𑀺𑀧𑀢𑀺 𑀆𑀭𑀫𑁆𑀫𑀡𑀽𑀧𑀦𑀺𑀲𑁆𑀲𑀬𑁄 𑀳𑁄𑀢𑀺𑀬𑁂𑀯𑀸𑀢𑀺 𑀆𑀭𑀫𑁆𑀫𑀡𑀽𑀧𑀦𑀺𑀲𑁆𑀲𑀬𑀮𑀓𑁆𑀔𑀡𑁂𑀦 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂 𑀲𑀗𑁆𑀕𑀳𑀁 𑀕𑀘𑁆𑀙𑀢𑀺. 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑁄 𑀲𑀳𑀚𑀸𑀢𑀧𑀼𑀭𑁂𑀚𑀸𑀢𑀧𑀘𑁆𑀙𑀸𑀚𑀸𑀢𑀪𑁂𑀤𑀢𑁄 𑀢𑀺𑀯𑀺𑀥𑁄. 𑀢𑀢𑁆𑀣 𑀲𑀳𑀚𑀸𑀢𑀯𑀺𑀧𑁆𑀧𑀬𑀼𑀢𑁆𑀢𑁄 𑀲𑀳𑀚𑀸𑀢𑀸𑀦𑀜𑁆𑀜𑁂𑀯 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀪𑀸𑀯𑀢𑁄 𑀲𑀳𑀚𑀸𑀢𑀧𑀘𑁆𑀘𑀬𑁂 𑀲𑀗𑁆𑀕𑀳𑀁 𑀕𑀘𑁆𑀙𑀢𑀺. 𑀧𑀼𑀭𑁂𑀚𑀸𑀢𑀯𑀺𑀧𑁆𑀧𑀬𑀼𑀢𑁆𑀢𑁄 𑀧𑀼𑀭𑁂 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀧𑀘𑁆𑀙𑀸 𑀉𑀧𑁆𑀧𑀚𑁆𑀚𑀫𑀸𑀦𑀸𑀦𑀁 𑀧𑀘𑁆𑀘𑀬𑀪𑀸𑀯𑀢𑁄 𑀧𑀼𑀭𑁂𑀚𑀸𑀢𑁂 𑀲𑀗𑁆𑀕𑀳𑀺𑀢𑁄. 𑀧𑀘𑁆𑀙𑀸𑀚𑀸𑀢𑀯𑀺𑀧𑁆𑀧𑀬𑀼𑀢𑁆𑀢𑁄 𑀧𑀘𑁆𑀙𑀸 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀧𑀼𑀭𑁂 𑀉𑀧𑁆𑀧𑀦𑁆𑀦𑀸𑀦𑀁 𑀉𑀧𑀢𑁆𑀣𑀫𑁆𑀪𑀦𑀯𑀲𑁂𑀦 𑀧𑀘𑁆𑀘𑀬𑀪𑀸𑀯𑀢𑁄 𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬𑁂 𑀲𑀗𑁆𑀕𑀳𑀁 𑀕𑀘𑁆𑀙𑀢𑀺. 𑀅𑀢𑁆𑀣𑀺𑀧𑀘𑁆𑀘𑀬𑀅𑀯𑀺𑀕𑀢𑀧𑀘𑁆𑀘𑀬𑀸 𑀲𑀳𑀚𑀸𑀢𑀧𑀼𑀭𑁂𑀚𑀸𑀢𑀧𑀘𑁆𑀙𑀸𑀚𑀸𑀢𑀆𑀳𑀸𑀭𑀺𑀦𑁆𑀤𑁆𑀭𑀺𑀬𑀸𑀦𑀜𑁆𑀘𑁂𑀯 𑀅𑀢𑁆𑀣𑀺𑀅𑀯𑀺𑀕𑀢𑁂𑀲𑀼 𑀘 𑀏𑀓𑁂𑀓𑀲𑁆𑀲 𑀯𑀲𑁂𑀦 𑀙𑀳𑀺 𑀪𑁂𑀤𑁂𑀳𑀺 𑀞𑀺𑀢𑀸. 𑀢𑀢𑁆𑀣 𑀲𑀳𑀚𑀸𑀢𑀅𑀢𑁆𑀣𑀺𑀅𑀯𑀺𑀕𑀢𑀸 𑀲𑀳𑀚𑀸𑀢𑀸𑀦𑀜𑁆𑀜𑁂𑀯 𑀅𑀢𑁆𑀣𑀺𑀅𑀯𑀺𑀕𑀢𑀧𑀘𑁆𑀘𑀬𑀪𑀸𑀯𑀢𑁄. 𑀲𑀳𑀚𑀸𑀢𑀧𑀘𑁆𑀘𑀬𑁂 𑀲𑀗𑁆𑀕𑀳𑀁 𑀕𑀘𑁆𑀙𑀦𑁆𑀢𑀺. 𑀧𑀼𑀭𑁂𑀚𑀸𑀢𑀸 𑀧𑀼𑀭𑁂 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀧𑀘𑁆𑀙𑀸 𑀉𑀧𑁆𑀧𑀚𑁆𑀚𑀫𑀸𑀦𑀸𑀦𑀁 𑀧𑀘𑁆𑀘𑀬𑀪𑀸𑀯𑀢𑁄 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑁂 𑀲𑀗𑁆𑀕𑀳𑀁 𑀕𑀘𑁆𑀙𑀦𑁆𑀢𑀺. 𑀧𑀘𑁆𑀙𑀸𑀚𑀸𑀢𑀸 𑀧𑀘𑁆𑀙𑀸 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀧𑀼𑀭𑁂 𑀉𑀧𑁆𑀧𑀦𑁆𑀦𑀸𑀦𑀁 𑀉𑀧𑀢𑁆𑀣𑀫𑁆𑀪𑀦𑀯𑀲𑁂𑀦 𑀧𑀘𑁆𑀘𑀬𑀪𑀸𑀯𑀢𑁄 𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬𑁂 𑀲𑀗𑁆𑀕𑀳𑀁 𑀕𑀘𑁆𑀙𑀦𑁆𑀢𑀺. 𑀆𑀳𑀸𑀭𑀪𑀽𑀢𑀸 𑀓𑀩𑀴𑀻𑀓𑀸𑀭𑀸𑀳𑀸𑀭𑀧𑀘𑁆𑀘𑀬𑁂 𑀲𑀗𑁆𑀕𑀳𑀁 𑀕𑀘𑁆𑀙𑀦𑁆𑀢𑀺. 𑀇𑀦𑁆𑀤𑁆𑀭𑀺𑀬𑀪𑀽𑀢𑀸 𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑁂 𑀲𑀗𑁆𑀕𑀳𑀁 𑀕𑀘𑁆𑀙𑀦𑁆𑀢𑀻𑀢𑀺 𑀏𑀯𑀁 𑀇𑀫𑁂 𑀲𑁄𑀴𑀲 𑀧𑀘𑁆𑀘𑀬𑀸 𑀇𑀫𑁂𑀲𑀼 𑀅𑀝𑁆𑀞𑀲𑀼 𑀧𑀘𑁆𑀘𑀬𑁂𑀲𑀼 𑀲𑀗𑁆𑀕𑀳𑀁 𑀕𑀘𑁆𑀙𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀇𑀫𑁂𑀲𑀫𑁆𑀧𑀺 𑀧𑀦 𑀅𑀝𑁆𑀞𑀦𑁆𑀦𑀁 𑀧𑀘𑁆𑀘𑀬𑀸𑀦𑀁 𑀅𑀜𑁆𑀜𑀫𑀜𑁆𑀜𑀁 𑀲𑀗𑁆𑀕𑀳𑁄 𑀅𑀢𑁆𑀣𑀺𑀬𑁂𑀯. 𑀆𑀤𑀺𑀢𑁄 𑀦𑀺𑀤𑁆𑀤𑀺𑀝𑁆𑀞𑁄 𑀳𑀺 𑀆𑀭𑀫𑁆𑀫𑀡𑀧𑀘𑁆𑀘𑀬𑁄 𑀅𑀥𑀺𑀧𑀢𑀺𑀅𑀦𑀥𑀺𑀧𑀢𑀺𑀪𑁂𑀤𑁂𑀦 𑀤𑀼𑀯𑀺𑀥𑁄. 𑀢𑀢𑁆𑀣 𑀅𑀥𑀺𑀧𑀢𑀺𑀪𑀽𑀢𑁄 𑀆𑀭𑀫𑁆𑀫𑀡𑀽𑀧𑀦𑀺𑀲𑁆𑀲𑀬𑀮𑀓𑁆𑀔𑀡𑁂𑀦 𑀉𑀧𑀦𑀺𑀲𑁆𑀲𑀬𑁂 𑀲𑀗𑁆𑀕𑀳𑀁 𑀕𑀘𑁆𑀙𑀢𑀺. 𑀅𑀦𑀥𑀺𑀧𑀢𑀺𑀪𑀽𑀢𑁄 𑀲𑀼𑀤𑁆𑀥𑁄 𑀆𑀭𑀫𑁆𑀫𑀡𑀧𑀘𑁆𑀘𑀬𑁄𑀯. 𑀓𑀫𑁆𑀫𑀧𑀘𑁆𑀘𑀬𑁄𑀧𑀺 𑀲𑀳𑀚𑀸𑀢𑀦𑀸𑀦𑀸𑀓𑁆𑀔𑀡𑀺𑀓𑀯𑀲𑁂𑀦 𑀤𑀼𑀯𑀺𑀥𑁄. 𑀢𑀢𑁆𑀣 𑀲𑀳𑀚𑀸𑀢𑀓𑀫𑁆𑀫𑀁 𑀅𑀢𑁆𑀢𑀦𑀸 𑀲𑀳𑀚𑀸𑀢𑀸𑀦𑀜𑁆𑀜𑁂𑀯 𑀓𑀫𑁆𑀫𑀧𑀘𑁆𑀘𑀬𑀪𑀸𑀯𑀢𑁄 𑀲𑀳𑀚𑀸𑀢𑁂𑀬𑁂𑀯 𑀲𑀗𑁆𑀕𑀳𑀁 𑀕𑀘𑁆𑀙𑀢𑀺. 𑀦𑀸𑀦𑀸𑀓𑁆𑀔𑀡𑀺𑀓𑀓𑀫𑁆𑀫𑀁 𑀩𑀮𑀯𑀤𑀼𑀩𑁆𑀩𑀮𑀯𑀲𑁂𑀦 𑀤𑀼𑀯𑀺𑀥𑀁. 𑀢𑀢𑁆𑀣 𑀩𑀮𑀯𑀓𑀫𑁆𑀫𑀁 𑀯𑀺𑀧𑀸𑀓𑀥𑀫𑁆𑀫𑀸𑀦𑀁 𑀉𑀧𑀦𑀺𑀲𑁆𑀲𑀬𑁄𑀯 𑀳𑀼𑀢𑁆𑀯𑀸 𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀉𑀧𑀦𑀺𑀲𑁆𑀲𑀬𑁂 𑀲𑀗𑁆𑀕𑀳𑀁 𑀕𑀘𑁆𑀙𑀢𑀺. 𑀩𑀮𑀯𑀫𑁆𑀧𑀺 𑀧𑀦 𑀭𑀽𑀧𑀸𑀦𑀁 𑀤𑀼𑀩𑁆𑀩𑀮𑀜𑁆𑀘 𑀅𑀭𑀽𑀧𑀸𑀦𑀁 𑀦𑀸𑀦𑀸𑀓𑁆𑀔𑀡𑀺𑀓𑀓𑀫𑁆𑀫𑀧𑀘𑁆𑀘𑀬𑁂𑀦𑁂𑀯 𑀧𑀘𑁆𑀘𑀬𑁄. 𑀆𑀳𑀸𑀭𑀧𑀘𑁆𑀘𑀬𑁄𑀧𑀺 𑀭𑀽𑀧𑀸𑀭𑀽𑀧𑀢𑁄 𑀤𑀼𑀯𑀺𑀥𑁄. 𑀢𑀢𑁆𑀣 𑀅𑀭𑀽𑀧𑀸𑀳𑀸𑀭𑁄 𑀅𑀢𑁆𑀢𑀦𑀸 𑀲𑀳𑀚𑀸𑀢𑀸𑀦𑀜𑁆𑀜𑁂𑀯 𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀲𑀳𑀚𑀸𑀢𑀧𑀘𑁆𑀘𑀬𑁂 𑀲𑀗𑁆𑀕𑀳𑀁 𑀕𑀘𑁆𑀙𑀢𑀺. 𑀭𑀽𑀧𑀸𑀳𑀸𑀭𑁄 𑀲𑀳𑀚𑀸𑀢𑀧𑀼𑀭𑁂𑀚𑀸𑀢𑀧𑀘𑁆𑀙𑀸𑀚𑀸𑀢𑀸𑀦𑀁 𑀧𑀘𑁆𑀘𑀬𑁄 𑀦 𑀳𑁄𑀢𑀺. 𑀅𑀢𑁆𑀢𑀦𑁄 𑀧𑀦 𑀉𑀧𑁆𑀧𑀸𑀤𑀓𑁆𑀔𑀡𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀞𑀺𑀢𑀺𑀧𑁆𑀧𑀢𑁆𑀢𑁄 𑀆𑀳𑀸𑀭𑀧𑀘𑁆𑀘𑀬𑀢𑀁 𑀲𑀸𑀥𑁂𑀢𑀻𑀢𑀺 𑀆𑀳𑀸𑀭𑀧𑀘𑁆𑀘𑀬𑁄𑀯 𑀳𑁄𑀢𑀺. 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑁄𑀧𑀺 𑀭𑀽𑀧𑀸𑀭𑀽𑀧𑀢𑁄 𑀤𑀼𑀯𑀺𑀥𑁄. 𑀢𑀢𑁆𑀣 𑀅𑀭𑀽𑀧𑀺𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑁄 𑀅𑀢𑁆𑀢𑀦𑀸 𑀲𑀳𑀚𑀸𑀢𑀸𑀦𑀜𑁆𑀜𑁂𑀯 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑀢𑀁 𑀲𑀸𑀥𑁂𑀢𑀻𑀢𑀺 𑀲𑀳𑀚𑀸𑀢𑁂𑀬𑁂𑀯 𑀲𑀗𑁆𑀕𑀳𑀁 𑀕𑀘𑁆𑀙𑀢𑀺. 𑀭𑀽𑀧𑀺𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑁄 𑀧𑀦 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸𑀪𑁂𑀤𑀢𑁄 𑀤𑀼𑀯𑀺𑀥𑁄. 𑀢𑀢𑁆𑀣 𑀅𑀚𑁆𑀛𑀢𑁆𑀢𑀁 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑁄 𑀧𑀼𑀭𑁂 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀧𑀘𑁆𑀙𑀸 𑀉𑀧𑁆𑀧𑀚𑁆𑀚𑀫𑀸𑀦𑀸𑀦𑀁 𑀲𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀁 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀧𑀼𑀭𑁂𑀚𑀸𑀢𑁂𑀬𑁂𑀯 𑀲𑀗𑁆𑀕𑀳𑀁 𑀕𑀘𑁆𑀙𑀢𑀺. 𑀩𑀸𑀳𑀺𑀭𑁄 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑁄 𑀦𑀸𑀫 𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁, 𑀢𑀁 𑀲𑀳𑀚𑀸𑀢𑀸𑀦𑀁 𑀧𑀘𑁆𑀘𑀬𑁄 𑀳𑁄𑀦𑁆𑀢𑀫𑁆𑀧𑀺 𑀅𑀦𑀼𑀧𑀸𑀮𑀦𑀫𑀢𑁆𑀢𑀯𑀲𑁂𑀦𑁂𑀯 𑀳𑁄𑀢𑀺, 𑀦 𑀚𑀦𑀓𑀯𑀲𑁂𑀦𑀸𑀢𑀺 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑁄𑀯 𑀳𑁄𑀢𑀺. 𑀏𑀯𑀁 𑀇𑀫𑁂 𑀅𑀝𑁆𑀞 𑀧𑀘𑁆𑀘𑀬𑀸 𑀅𑀜𑁆𑀜𑀫𑀜𑁆𑀜𑀫𑁆𑀧𑀺 𑀲𑀗𑁆𑀕𑀳𑀁 𑀕𑀘𑁆𑀙𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀅𑀬𑀁 𑀢𑀸𑀯 𑀅𑀝𑁆𑀞𑀲𑀼 𑀧𑀘𑁆𑀘𑀬𑁂𑀲𑀼 𑀅𑀯𑀲𑁂𑀲𑀸𑀦𑀁 𑀲𑁄𑀴𑀲𑀦𑁆𑀦𑀜𑁆𑀘𑁂𑀯 𑀢𑁂𑀲𑀁𑀬𑁂𑀯 𑀘 𑀅𑀝𑁆𑀞𑀦𑁆𑀦𑀁 𑀅𑀜𑁆𑀜𑀫𑀜𑁆𑀜𑀯𑀲𑁂𑀦 𑀲𑀗𑁆𑀕𑀳𑀦𑀬𑁄.

𑀇𑀤𑀸𑀦𑀺 𑀇𑀫𑁂𑀲𑀁 𑀅𑀝𑁆𑀞𑀦𑁆𑀦𑀁 𑀧𑀘𑁆𑀘𑀬𑀸𑀦𑀁 𑀏𑀓𑁂𑀓𑀲𑁆𑀫𑀺𑀁 𑀘𑀢𑀼𑀯𑀻𑀲𑀢𑀺𑀬𑀸𑀧𑀺 𑀧𑀘𑁆𑀘𑀬𑁂𑀲𑀼 𑀬𑁂 𑀬𑁂 𑀲𑀗𑁆𑀕𑀳𑀁 𑀕𑀘𑁆𑀙𑀦𑁆𑀢𑀺, 𑀢𑁂 𑀢𑁂 𑀯𑁂𑀤𑀺𑀢𑀩𑁆𑀩𑀸. 𑀢𑀢𑁆𑀣 𑀅𑀝𑁆𑀞𑀦𑁆𑀦𑀁 𑀢𑀸𑀯 𑀲𑀩𑁆𑀩𑀧𑀞𑀫𑁂 𑀆𑀭𑀫𑁆𑀫𑀡𑀧𑀘𑁆𑀘𑀬𑁂 𑀆𑀭𑀫𑁆𑀫𑀡𑀧𑀘𑁆𑀘𑀬𑁄𑀯 𑀲𑀗𑁆𑀕𑀳𑀁 𑀕𑀘𑁆𑀙𑀢𑀺, 𑀦 𑀲𑁂𑀲𑀸 𑀢𑁂𑀯𑀻𑀲𑀢𑀺. 𑀤𑀼𑀢𑀺𑀬𑁂 𑀲𑀳𑀚𑀸𑀢𑀧𑀘𑁆𑀘𑀬𑁂 𑀳𑁂𑀢𑀼𑀧𑀘𑁆𑀘𑀬𑁄 𑀲𑀳𑀚𑀸𑀢𑀸𑀥𑀺𑀧𑀢𑀺𑀧𑀘𑁆𑀘𑀬𑁄 𑀲𑀳𑀚𑀸𑀢𑀧𑀘𑁆𑀘𑀬𑁄 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑁄 𑀲𑀳𑀚𑀸𑀢𑀦𑀺𑀲𑁆𑀲𑀬𑀧𑀘𑁆𑀘𑀬𑁄 𑀲𑀳𑀚𑀸𑀢𑀓𑀫𑁆𑀫𑀧𑀘𑁆𑀘𑀬𑁄 𑀯𑀺𑀧𑀸𑀓𑀧𑀘𑁆𑀘𑀬𑁄 𑀲𑀳𑀚𑀸𑀢𑀆𑀳𑀸𑀭𑀧𑀘𑁆𑀘𑀬𑁄 𑀲𑀳𑀚𑀸𑀢𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑁄 𑀛𑀸𑀦𑀧𑀘𑁆𑀘𑀬𑁄 𑀫𑀕𑁆𑀕𑀧𑀘𑁆𑀘𑀬𑁄 𑀲𑀫𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑁄 𑀲𑀳𑀚𑀸𑀢𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑁄 𑀲𑀳𑀚𑀸𑀢𑀢𑁆𑀣𑀺𑀧𑀘𑁆𑀘𑀬𑁄 𑀲𑀳𑀚𑀸𑀢𑀸𑀯𑀺𑀕𑀢𑀧𑀘𑁆𑀘𑀬𑁄𑀢𑀺 𑀇𑀫𑁂 𑀧𑀦𑁆𑀦𑀭𑀲 𑀧𑀘𑁆𑀘𑀬𑀸 𑀲𑀗𑁆𑀕𑀳𑀁 𑀕𑀘𑁆𑀙𑀦𑁆𑀢𑀺. 𑀢𑀢𑀺𑀬𑁂 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂 𑀅𑀥𑀺𑀧𑀢𑀺𑀪𑀽𑀢𑁄 𑀆𑀭𑀫𑁆𑀫𑀡𑀧𑀘𑁆𑀘𑀬𑁄 𑀆𑀭𑀫𑁆𑀫𑀡𑀪𑀽𑀢𑁄 𑀅𑀥𑀺𑀧𑀢𑀺𑀧𑀘𑁆𑀘𑀬𑁄 𑀅𑀦𑀦𑁆𑀢𑀭𑀲𑀫𑀦𑀦𑁆𑀢𑀭𑀉𑀧𑀦𑀺𑀲𑁆𑀲𑀬𑀆𑀲𑁂𑀯𑀦𑀧𑀘𑁆𑀘𑀬𑀸 𑀦𑀸𑀦𑀸𑀓𑁆𑀔𑀡𑀺𑀓𑁄 𑀩𑀮𑀯𑀓𑀫𑁆𑀫𑀧𑀘𑁆𑀘𑀬𑁄 𑀦𑀢𑁆𑀣𑀺𑀧𑀘𑁆𑀘𑀬𑁄 𑀯𑀺𑀕𑀢𑀧𑀘𑁆𑀘𑀬𑁄𑀢𑀺 𑀇𑀫𑁂 𑀦𑀯 𑀧𑀘𑁆𑀘𑀬𑀸 𑀲𑀗𑁆𑀕𑀳𑀁 𑀕𑀘𑁆𑀙𑀦𑁆𑀢𑀺. 𑀘𑀢𑀼𑀢𑁆𑀣𑁂 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑁂 𑀧𑀼𑀭𑁂𑀚𑀸𑀢𑀦𑀺𑀲𑁆𑀲𑀬𑀧𑀘𑁆𑀘𑀬𑁄 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑁄 𑀧𑀼𑀭𑁂𑀚𑀸𑀢𑀺𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑁄 𑀧𑀼𑀭𑁂𑀚𑀸𑀢𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑁄 𑀧𑀼𑀭𑁂𑀚𑀸𑀢𑀢𑁆𑀣𑀺𑀧𑀘𑁆𑀘𑀬𑁄 𑀧𑀼𑀭𑁂𑀚𑀸𑀢𑀸𑀯𑀺𑀕𑀢𑀧𑀘𑁆𑀘𑀬𑁄𑀢𑀺 𑀇𑀫𑁂 𑀙 𑀧𑀘𑁆𑀘𑀬𑀸 𑀲𑀗𑁆𑀕𑀳𑀁 𑀕𑀘𑁆𑀙𑀦𑁆𑀢𑀺. 𑀧𑀜𑁆𑀘𑀫𑁂 𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬𑁂 𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬𑁄 𑀧𑀘𑁆𑀙𑀸𑀚𑀸𑀢𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑁄 𑀧𑀘𑁆𑀙𑀸𑀚𑀸𑀢𑀢𑁆𑀣𑀺𑀧𑀘𑁆𑀘𑀬𑁄 𑀧𑀘𑁆𑀙𑀸𑀚𑀸𑀢𑀸𑀯𑀺𑀕𑀢𑀧𑀘𑁆𑀘𑀬𑁄𑀢𑀺 𑀇𑀫𑁂 𑀘𑀢𑁆𑀢𑀸𑀭𑁄 𑀧𑀘𑁆𑀘𑀬𑀸 𑀲𑀗𑁆𑀕𑀳𑀁 𑀕𑀘𑁆𑀙𑀦𑁆𑀢𑀺. 𑀙𑀝𑁆𑀞𑁂 𑀓𑀫𑁆𑀫𑀧𑀘𑁆𑀘𑀬𑁂 𑀦𑀸𑀦𑀸𑀓𑁆𑀔𑀡𑀺𑀓𑀓𑀫𑁆𑀫𑀧𑀘𑁆𑀘𑀬𑁄𑀯 𑀲𑀗𑁆𑀕𑀳𑀺𑀢𑁄. 𑀲𑀢𑁆𑀢𑀫𑁂 𑀆𑀳𑀸𑀭𑀧𑀘𑁆𑀘𑀬𑁂 𑀓𑀩𑀴𑀻𑀓𑀸𑀭𑀸𑀳𑀸𑀭𑀯𑀲𑁂𑀦𑁂𑀯 𑀆𑀳𑀸𑀭𑀧𑀘𑁆𑀘𑀬𑁄 𑀆𑀳𑀸𑀭𑀢𑁆𑀣𑀺𑀧𑀘𑁆𑀘𑀬𑁄 𑀆𑀳𑀸𑀭𑀸𑀯𑀺𑀕𑀢𑀧𑀘𑁆𑀘𑀬𑁄𑀢𑀺 𑀇𑀫𑁂 𑀢𑀬𑁄 𑀧𑀘𑁆𑀘𑀬𑀸 𑀲𑀗𑁆𑀕𑀳𑀺𑀢𑀸. 𑀅𑀝𑁆𑀞𑀫𑁂 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑁂 𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑁄 𑀇𑀦𑁆𑀤𑁆𑀭𑀺𑀬𑀢𑁆𑀣𑀺𑀧𑀘𑁆𑀘𑀬𑁄 𑀇𑀦𑁆𑀤𑁆𑀭𑀺𑀬𑀸𑀯𑀺𑀕𑀢𑀧𑀘𑁆𑀘𑀬𑁄𑀢𑀺 𑀇𑀫𑁂 𑀢𑀬𑁄 𑀧𑀘𑁆𑀘𑀬𑀸 𑀲𑀗𑁆𑀕𑀳𑀁 𑀕𑀘𑁆𑀙𑀦𑁆𑀢𑀺. 𑀏𑀯𑀁 𑀇𑀫𑁂𑀲𑀁 𑀅𑀝𑁆𑀞𑀦𑁆𑀦𑀁 𑀧𑀘𑁆𑀘𑀬𑀸𑀦𑀁 𑀏𑀓𑁂𑀓𑀲𑁆𑀫𑀺𑀁 𑀇𑀫𑁂 𑀘𑀺𑀫𑁂 𑀘 𑀧𑀘𑁆𑀘𑀬𑀸 𑀲𑀗𑁆𑀕𑀳𑀁 𑀕𑀢𑀸𑀢𑀺 𑀜𑀢𑁆𑀯𑀸 𑀬𑁂 𑀬𑀢𑁆𑀣 𑀲𑀗𑁆𑀕𑀳𑀁 𑀕𑀢𑀸, 𑀢𑁂 𑀢𑀲𑁆𑀲 𑀕𑀡𑀦𑁂𑀦 𑀕𑀳𑀺𑀢𑀸𑀯 𑀳𑁄𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀏𑀯𑀁 𑀲𑀩𑁆𑀩𑀧𑀘𑁆𑀘𑀬𑀲𑀗𑁆𑀕𑀸𑀳𑀓𑀸𑀦𑀁 𑀇𑀫𑁂𑀲𑀁 𑀅𑀝𑁆𑀞𑀦𑁆𑀦𑀁 𑀧𑀘𑁆𑀘𑀬𑀸𑀦𑀁 𑀯𑀲𑁂𑀦 𑀏𑀓𑀽𑀦𑀧𑀜𑁆𑀜𑀸𑀲𑀸𑀬 𑀧𑀜𑁆𑀳𑁂𑀲𑀼 𑀇𑀫𑀲𑁆𑀫𑀺𑀁 𑀧𑀘𑁆𑀘𑀦𑀻𑀬𑁂 ‘‘𑀓𑀼𑀲𑀮𑁄 𑀥𑀫𑁆𑀫𑁄 𑀓𑀼𑀲𑀮𑀲𑁆𑀲 𑀥𑀫𑁆𑀫𑀲𑁆𑀲 𑀆𑀭𑀫𑁆𑀫𑀡𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺𑀆𑀤𑀬𑁄 𑀇𑀫𑁂 𑀧𑀦𑁆𑀦𑀭𑀲 𑀧𑀜𑁆𑀳𑀸 𑀉𑀤𑁆𑀥𑀭𑀺𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑀺𑀢𑀸. 𑀢𑀢𑁆𑀣 𑀓𑀼𑀲𑀮𑁄 𑀓𑀼𑀲𑀮𑀲𑁆𑀲, 𑀓𑀼𑀲𑀮𑁄 𑀅𑀓𑀼𑀲𑀮𑀲𑁆𑀲, 𑀓𑀼𑀲𑀮𑁄 𑀅𑀩𑁆𑀬𑀸𑀓𑀢𑀲𑁆𑀲, 𑀓𑀼𑀲𑀮𑁄 𑀓𑀼𑀲𑀮𑀸𑀩𑁆𑀬𑀸𑀓𑀢𑀲𑁆𑀲𑀸𑀢𑀺 𑀓𑀼𑀲𑀮𑀸𑀤𑀺𑀓𑀸 𑀘𑀢𑁆𑀢𑀸𑀭𑁄 𑀧𑀜𑁆𑀳𑀸; 𑀢𑀣𑀸 𑀅𑀓𑀼𑀲𑀮𑀸𑀤𑀺𑀓𑀸; 𑀅𑀩𑁆𑀬𑀸𑀓𑀢𑁄 𑀧𑀦 𑀅𑀩𑁆𑀬𑀸𑀓𑀢𑀲𑁆𑀲, 𑀅𑀩𑁆𑀬𑀸𑀓𑀢𑁄 𑀓𑀼𑀲𑀮𑀲𑁆𑀲, 𑀅𑀩𑁆𑀬𑀸𑀓𑀢𑁄 𑀅𑀓𑀼𑀲𑀮𑀲𑁆𑀲𑀸𑀢𑀺 𑀅𑀩𑁆𑀬𑀸𑀓𑀢𑀸𑀤𑀺𑀓𑀸 𑀢𑀬𑁄; 𑀓𑀼𑀲𑀮𑁄 𑀘 𑀅𑀩𑁆𑀬𑀸𑀓𑀢𑁄 𑀘 𑀓𑀼𑀲𑀮𑀲𑁆𑀲; 𑀢𑀣𑀸 𑀅𑀩𑁆𑀬𑀸𑀓𑀢𑀲𑁆𑀲; 𑀅𑀓𑀼𑀲𑀮𑁄 𑀘 𑀅𑀩𑁆𑀬𑀸𑀓𑀢𑁄 𑀘 𑀅𑀓𑀼𑀲𑀮𑀲𑁆𑀲; 𑀢𑀣𑀸 𑀅𑀩𑁆𑀬𑀸𑀓𑀢𑀲𑁆𑀲𑀸𑀢𑀺 𑀤𑀼𑀫𑀽𑀮𑀓𑁂𑀓𑀸𑀯𑀲𑀸𑀦𑀸 𑀘𑀢𑁆𑀢𑀸𑀭𑁄 𑀳𑁄𑀦𑁆𑀢𑀺. 𑀢𑁂𑀲𑀼 𑀧𑀞𑀫𑁂 𑀧𑀜𑁆𑀳𑁂 𑀬𑁂𑀳𑀺 𑀪𑀯𑀺𑀢𑀩𑁆𑀩𑀁, 𑀢𑁂 𑀲𑀩𑁆𑀩𑁂 𑀲𑀗𑁆𑀕𑀳𑁂𑀢𑁆𑀯𑀸 𑀢𑀬𑁄 𑀧𑀘𑁆𑀘𑀬𑀸 𑀯𑀼𑀢𑁆𑀢𑀸. 𑀤𑀼𑀢𑀺𑀬𑁂 𑀤𑁆𑀯𑁂, 𑀢𑀢𑀺𑀬𑁂 𑀧𑀜𑁆𑀘, 𑀘𑀢𑀼𑀢𑁆𑀣𑁂 𑀏𑀓𑁄𑀯 𑀧𑀜𑁆𑀘𑀫𑁂 𑀢𑀬𑁄, 𑀙𑀝𑁆𑀞𑁂 𑀤𑁆𑀯𑁂, 𑀲𑀢𑁆𑀢𑀫𑁂 𑀧𑀜𑁆𑀘, 𑀅𑀝𑁆𑀞𑀫𑁂 𑀏𑀓𑁄𑀯 𑀦𑀯𑀫𑁂 𑀲𑀢𑁆𑀢, 𑀤𑀲𑀫𑁂 𑀢𑀬𑁄, 𑀏𑀓𑀸𑀤𑀲𑀫𑁂 𑀢𑀬𑁄, 𑀤𑁆𑀯𑀸𑀤𑀲𑀫𑁂 𑀤𑁆𑀯𑁂, 𑀢𑁂𑀭𑀲𑀫𑁂 𑀘𑀢𑁆𑀢𑀸𑀭𑁄, 𑀘𑀼𑀤𑁆𑀤𑀲𑀫𑁂 𑀤𑁆𑀯𑁂, 𑀧𑀦𑁆𑀦𑀭𑀲𑀫𑁂𑀧𑀺 𑀘𑀢𑁆𑀢𑀸𑀭𑁄𑀯. 𑀢𑁂 ‘‘𑀲𑀳𑀚𑀸𑀢𑀧𑀘𑁆𑀘𑀬𑁂𑀦𑀸’’𑀢𑀺 𑀅𑀯𑀢𑁆𑀯𑀸 ‘‘𑀲𑀳𑀚𑀸𑀢𑀁 𑀧𑀘𑁆𑀙𑀸𑀚𑀸𑀢’’𑀦𑁆𑀢𑀺 𑀯𑀼𑀢𑁆𑀢𑀸. 𑀢𑀢𑁆𑀣 𑀓𑀸𑀭𑀡𑀁 𑀧𑀭𑀢𑁄 𑀯𑀓𑁆𑀔𑀸𑀫.

𑀲𑀫𑀸𑀲𑀢𑁄 𑀧𑀦𑁂𑀢𑁆𑀣 𑀏𑀓𑁄 𑀤𑁆𑀯𑁂 𑀢𑀬𑁄 𑀘𑀢𑁆𑀢𑀸𑀭𑁄 𑀧𑀜𑁆𑀘 𑀲𑀢𑁆𑀢𑀸𑀢𑀺 𑀙𑀴𑁂𑀯 𑀧𑀘𑁆𑀘𑀬𑀧𑀭𑀺𑀘𑁆𑀙𑁂𑀤𑀸 𑀳𑁄𑀦𑁆𑀢𑀺. 𑀅𑀬𑀁 𑀧𑀜𑁆𑀳𑀸𑀯𑀸𑀭𑀲𑁆𑀲 𑀧𑀘𑁆𑀘𑀦𑀻𑀬𑁂 𑀉𑀓𑁆𑀓𑀝𑁆𑀞𑀯𑀲𑁂𑀦 𑀧𑀜𑁆𑀳𑀸𑀧𑀭𑀺𑀘𑁆𑀙𑁂𑀤𑁄 𑀘𑁂𑀯 𑀢𑁂 𑀢𑁂 𑀧𑀘𑁆𑀘𑀬𑁂 𑀲𑀗𑁆𑀕𑀳𑁂𑀢𑁆𑀯𑀸 𑀤𑀲𑁆𑀲𑀺𑀢𑀧𑀘𑁆𑀘𑀬𑀧𑀭𑀺𑀘𑁆𑀙𑁂𑀤𑁄 𑀘. ‘‘𑀦 𑀳𑁂𑀢𑀼𑀧𑀘𑁆𑀘𑀬𑁄’’𑀢𑀺𑀆𑀤𑀻𑀲𑀼 𑀳𑀺 𑀘𑀢𑀼𑀯𑀻𑀲𑀢𑀺𑀬𑀸𑀧𑀺 𑀧𑀘𑁆𑀘𑀬𑀧𑀘𑁆𑀘𑀦𑀻𑀬𑁂𑀲𑀼 𑀏𑀓𑀧𑀘𑁆𑀘𑀦𑀻𑀬𑁂𑀧𑀺 𑀇𑀢𑁄 𑀉𑀤𑁆𑀥𑀁 𑀧𑀜𑁆𑀳𑀸 𑀯𑀸 𑀧𑀘𑁆𑀘𑀬𑀸 𑀯𑀸 𑀦 𑀮𑀩𑁆𑀪𑀦𑁆𑀢𑀺, 𑀳𑁂𑀝𑁆𑀞𑀸 𑀮𑀩𑁆𑀪𑀦𑁆𑀢𑀺. 𑀢𑀲𑁆𑀫𑀸 𑀬𑁂𑀲𑀼 𑀧𑀜𑁆𑀳𑁂𑀲𑀼 ‘‘𑀓𑀼𑀲𑀮𑁄 𑀥𑀫𑁆𑀫𑁄 𑀓𑀼𑀲𑀮𑀲𑁆𑀲 𑀘 𑀅𑀩𑁆𑀬𑀸𑀓𑀢𑀲𑁆𑀲 𑀘 𑀥𑀫𑁆𑀫𑀲𑁆𑀲 𑀲𑀳𑀚𑀸𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 𑀏𑀯𑀁 𑀏𑀓𑁄𑀯 𑀧𑀘𑁆𑀘𑀬𑁄 𑀆𑀕𑀢𑁄, 𑀢𑀲𑁆𑀫𑀺𑀁 𑀧𑀘𑁆𑀘𑀬𑁂 𑀧𑀝𑀺𑀓𑁆𑀔𑀺𑀢𑁆𑀢𑁂 𑀢𑁂 𑀧𑀜𑁆𑀳𑀸 𑀧𑀭𑀺𑀳𑀸𑀬𑀦𑁆𑀢𑀺. 𑀬𑀲𑁆𑀫𑀺𑀁 𑀧𑀦 𑀧𑀜𑁆𑀳𑁂 ‘‘𑀓𑀼𑀲𑀮𑁄 𑀥𑀫𑁆𑀫𑁄 𑀅𑀓𑀼𑀲𑀮𑀲𑁆𑀲 𑀥𑀫𑁆𑀫𑀲𑁆𑀲 𑀆𑀭𑀫𑁆𑀫𑀡𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 𑀏𑀯𑀁 𑀤𑁆𑀯𑁂 𑀧𑀘𑁆𑀘𑀬𑀸 𑀆𑀕𑀢𑀸. 𑀢𑀢𑁆𑀣 𑀦𑀸𑀭𑀫𑁆𑀫𑀡𑀧𑀘𑁆𑀘𑀬𑀸𑀢𑀺 𑀏𑀯𑀁 𑀏𑀓𑀲𑁆𑀫𑀺𑀁 𑀧𑀘𑁆𑀘𑀬𑁂 𑀧𑀝𑀺𑀓𑁆𑀔𑀺𑀢𑁆𑀢𑁂𑀧𑀺 𑀇𑀢𑀭𑀲𑁆𑀲 𑀧𑀘𑁆𑀘𑀬𑀲𑁆𑀲 𑀯𑀲𑁂𑀦 𑀲𑁄 𑀧𑀜𑁆𑀳𑁄 𑀮𑀩𑁆𑀪𑀢𑁂𑀯. 𑀢𑁂𑀲𑀼 𑀧𑀦 𑀤𑁆𑀯𑀻𑀲𑀼𑀧𑀺 𑀧𑀘𑁆𑀘𑀬𑁂𑀲𑀼 𑀧𑀝𑀺𑀓𑁆𑀔𑀺𑀢𑁆𑀢𑁂𑀲𑀼 𑀲𑁄 𑀯𑀸𑀭𑁄 𑀧𑀘𑁆𑀙𑀺𑀚𑁆𑀚𑀢𑀺. 𑀏𑀯𑀫𑁂𑀯 𑀬𑁂𑀲𑀼 𑀧𑀜𑁆𑀳𑁂𑀲𑀼 𑀢𑀬𑁄 𑀘𑀢𑁆𑀢𑀸𑀭𑁄 𑀧𑀜𑁆𑀘 𑀲𑀢𑁆𑀢 𑀯𑀸 𑀮𑀩𑁆𑀪𑀦𑁆𑀢𑀺, 𑀢𑁂𑀲𑀼 𑀞𑀧𑁂𑀢𑁆𑀯𑀸 𑀧𑀝𑀺𑀓𑁆𑀔𑀺𑀢𑁆𑀢𑁂 𑀧𑀘𑁆𑀘𑀬𑁂 𑀅𑀯𑀲𑁂𑀲𑀸𑀦𑀁 𑀯𑀲𑁂𑀦 𑀢𑁂 𑀧𑀜𑁆𑀳𑀸 𑀮𑀩𑁆𑀪𑀦𑁆𑀢𑀺𑀬𑁂𑀯. 𑀲𑀩𑁆𑀩𑁂𑀲𑀼 𑀧𑀦 𑀧𑀘𑁆𑀘𑀬𑁂𑀲𑀼 𑀧𑀝𑀺𑀓𑁆𑀔𑀺𑀢𑁆𑀢𑁂𑀲𑀼 𑀲𑀩𑁆𑀩𑁂𑀧𑀺 𑀢𑁂 𑀯𑀸𑀭𑀸 𑀧𑀘𑁆𑀙𑀺𑀚𑁆𑀚𑀦𑁆𑀢𑀻𑀢𑀺 𑀇𑀤𑀫𑁂𑀯 𑀘𑁂𑀢𑁆𑀣 𑀮𑀓𑁆𑀔𑀡𑀁. 𑀇𑀫𑀺𑀦𑀸 𑀮𑀓𑁆𑀔𑀡𑁂𑀦 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀢𑁂𑀲𑀼 𑀢𑁂𑀲𑀼 𑀧𑀜𑁆𑀳𑁂𑀲𑀼 𑀲𑀗𑁆𑀔𑀺𑀧𑀺𑀢𑁆𑀯𑀸 𑀯𑀼𑀢𑁆𑀢𑀧𑀘𑁆𑀘𑀬𑀸𑀦𑀁 𑀧𑀪𑁂𑀤𑁄 𑀘 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀧𑀘𑁆𑀘𑀦𑀻𑀬𑁂 𑀢𑁂𑀲𑀁 𑀢𑁂𑀲𑀁 𑀧𑀜𑁆𑀳𑀸𑀦𑀁 𑀧𑀭𑀺𑀳𑀸𑀦𑀺 𑀘 𑀯𑁂𑀤𑀺𑀢𑀩𑁆𑀩𑀸.

𑀢𑀢𑁆𑀭𑀸𑀬𑀁 𑀯𑀺𑀢𑁆𑀣𑀸𑀭𑀓𑀣𑀸 𑁋 𑀧𑀞𑀫𑀧𑀜𑁆𑀳𑁂 𑀢𑀸𑀯 𑀢𑀻𑀳𑀺 𑀧𑀘𑁆𑀘𑀬𑁂𑀳𑀺 𑀏𑀓𑀽𑀦𑀯𑀻𑀲𑀢𑀺 𑀧𑀘𑁆𑀘𑀬𑀸 𑀤𑀲𑁆𑀲𑀺𑀢𑀸. 𑀓𑀣𑀁? 𑀓𑀼𑀲𑀮𑁄 𑀳𑀺 𑀓𑀼𑀲𑀮𑀲𑁆𑀲 𑀧𑀼𑀭𑁂𑀚𑀸𑀢𑀧𑀘𑁆𑀙𑀸𑀚𑀸𑀢𑀯𑀺𑀧𑀸𑀓𑀯𑀺𑀧𑁆𑀧𑀬𑀼𑀢𑁆𑀢𑁂𑀳𑁂𑀯 𑀧𑀘𑁆𑀘𑀬𑁄 𑀦 𑀳𑁄𑀢𑀺, 𑀲𑁂𑀲𑁂𑀳𑀺 𑀯𑀻𑀲𑀢𑀺𑀬𑀸 𑀳𑁄𑀢𑀺, 𑀢𑁂𑀲𑀼 𑀆𑀭𑀫𑁆𑀫𑀡𑀧𑀘𑁆𑀘𑀬𑁄 𑀏𑀓𑁄𑀯 𑀲𑀳𑀚𑀸𑀢𑁂 𑀧𑀦 𑀲𑀩𑁆𑀩𑀲𑀗𑁆𑀕𑀸𑀳𑀺𑀓𑀯𑀲𑁂𑀦 𑀧𑀦𑁆𑀦𑀭𑀲 𑀧𑀘𑁆𑀘𑀬𑀸 𑀲𑀗𑁆𑀕𑀳𑀁 𑀕𑀘𑁆𑀙𑀦𑁆𑀢𑀻𑀢𑀺 𑀯𑀼𑀢𑁆𑀢𑀸. 𑀢𑁂𑀲𑀼 𑀳𑁂𑀢𑀼𑀧𑀘𑁆𑀘𑀬𑁂 𑀧𑀝𑀺𑀓𑁆𑀔𑀺𑀢𑁆𑀢𑁂 𑀘𑀼𑀤𑁆𑀤𑀲 𑀳𑁄𑀦𑁆𑀢𑀺. 𑀓𑀼𑀲𑀮𑁄 𑀧𑀦 𑀓𑀼𑀲𑀮𑀲𑁆𑀲 𑀦𑁂𑀯 𑀯𑀺𑀧𑀸𑀓𑀧𑀘𑁆𑀘𑀬𑁄 𑀦, 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑁄𑀢𑀺 𑀢𑁂 𑀤𑁆𑀯𑁂 𑀅𑀧𑀦𑁂𑀢𑁆𑀯𑀸 𑀲𑁂𑀲𑁂 𑀤𑁆𑀯𑀸𑀤𑀲 𑀲𑀦𑁆𑀥𑀸𑀬 𑀲𑀳𑀚𑀸𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄𑀢𑀺 𑀯𑀼𑀢𑁆𑀢𑀁. 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀧𑀺 𑀲𑀩𑁆𑀩𑀲𑀗𑁆𑀕𑀸𑀳𑀺𑀓𑀯𑀲𑁂𑀦 𑀦𑀯 𑀧𑀘𑁆𑀘𑀬𑀸 𑀲𑀗𑁆𑀕𑀳𑀁 𑀕𑀘𑁆𑀙𑀦𑁆𑀢𑀻𑀢𑀺 𑀯𑀼𑀢𑁆𑀢𑀸. 𑀢𑁂𑀲𑀼 𑀅𑀥𑀺𑀧𑀢𑀺𑀪𑀽𑀢𑁄 𑀆𑀭𑀫𑁆𑀫𑀡𑀧𑀘𑁆𑀘𑀬𑁄 𑀆𑀭𑀫𑁆𑀫𑀡𑀪𑀽𑀢𑁄 𑀘 𑀅𑀥𑀺𑀧𑀢𑀺𑀧𑀘𑁆𑀘𑀬𑁄 𑀆𑀭𑀫𑁆𑀫𑀡𑀽𑀧𑀦𑀺𑀲𑁆𑀲𑀬𑀯𑀲𑁂𑀦 𑀉𑀧𑀦𑀺𑀲𑁆𑀲𑀬𑀫𑁂𑀯 𑀅𑀦𑀼𑀧𑀯𑀺𑀝𑁆𑀞𑁄. 𑀓𑀼𑀲𑀮𑁄 𑀧𑀦 𑀓𑀼𑀲𑀮𑀲𑁆𑀲 𑀦𑀸𑀦𑀸𑀓𑁆𑀔𑀡𑀺𑀓𑀓𑀫𑁆𑀫𑀧𑀘𑁆𑀘𑀬𑁄 𑀦 𑀳𑁄𑀢𑀻𑀢𑀺 𑀢𑀁 𑀅𑀧𑀦𑁂𑀢𑁆𑀯𑀸 𑀲𑁂𑀲𑁂 𑀙 𑀲𑀦𑁆𑀥𑀸𑀬 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄𑀢𑀺 𑀯𑀼𑀢𑁆𑀢𑀁. 𑀏𑀯𑀁 𑀧𑀞𑀫𑀧𑀜𑁆𑀳𑁂 𑀢𑀻𑀳𑀺 𑀧𑀘𑁆𑀘𑀬𑁂𑀳𑀺 𑀏𑀓𑀽𑀦𑀯𑀻𑀲𑀢𑀺𑀧𑀘𑁆𑀘𑀬𑀸 𑀤𑀲𑁆𑀲𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀢𑁂𑀲𑀼 𑀇𑀫𑀲𑁆𑀫𑀺𑀁 𑀳𑁂𑀢𑀼𑀧𑀘𑁆𑀘𑀦𑀻𑀬𑁂 ‘‘𑀓𑀼𑀲𑀮𑁄 𑀥𑀫𑁆𑀫𑁄 𑀓𑀼𑀲𑀮𑀲𑁆𑀲 𑀥𑀫𑁆𑀫𑀲𑁆𑀲 𑀦𑀳𑁂𑀢𑀼𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄𑀢𑀺 𑀤𑀸𑀦𑀁 𑀤𑀢𑁆𑀯𑀸 𑀲𑀻𑀮𑀁 𑀲𑀫𑀸𑀤𑀺𑀬𑀺𑀢𑁆𑀯𑀸 𑀉𑀧𑁄𑀲𑀣𑀓𑀫𑁆𑀫𑀁 𑀓𑀢𑁆𑀯𑀸 𑀢𑀁 𑀧𑀘𑁆𑀘𑀯𑁂𑀓𑁆𑀔𑀢𑀺, 𑀧𑀼𑀩𑁆𑀩𑁂 𑀲𑀼𑀘𑀺𑀡𑁆𑀡𑀸𑀦𑀺 𑀧𑀘𑁆𑀘𑀯𑁂𑀓𑁆𑀔𑀢𑀻’’𑀢𑀺 𑀏𑀯𑀫𑀸𑀤𑀺𑀦𑀸 𑀆𑀭𑀫𑁆𑀫𑀡𑀧𑀘𑁆𑀘𑀬𑀸𑀤𑀻𑀲𑀼 𑀯𑀼𑀢𑁆𑀢𑀦𑀬𑁂𑀦𑁂𑀯 𑀉𑀤𑁆𑀥𑀭𑀺𑀢𑁆𑀯𑀸 𑀧𑀸𑀴𑀺 𑀤𑀲𑁆𑀲𑁂𑀢𑀩𑁆𑀩𑀸.

𑀆𑀭𑀫𑁆𑀫𑀡𑀧𑀘𑁆𑀘𑀬𑁂 𑀧𑀦 𑀧𑀝𑀺𑀓𑁆𑀔𑀺𑀢𑁆𑀢𑁂 𑀢𑀲𑁆𑀲 𑀯𑀺𑀢𑁆𑀣𑀸𑀭𑀁 𑀅𑀧𑀦𑁂𑀢𑁆𑀯𑀸 𑀳𑁂𑀢𑀼𑀧𑀘𑁆𑀘𑀬𑀯𑀺𑀢𑁆𑀣𑀸𑀭𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀲𑀸𑀬𑁂𑀯 𑀧𑀸𑀴𑀺 𑀤𑀲𑁆𑀲𑁂𑀢𑀩𑁆𑀩𑀸, 𑀲𑁂𑀲𑀧𑀘𑁆𑀘𑀬𑀧𑀝𑀺𑀓𑁆𑀔𑁂𑀧𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀢𑀲𑁆𑀫𑀺𑀁 𑀧𑀦 𑀧𑀘𑁆𑀘𑀬𑁂 𑀧𑀝𑀺𑀓𑁆𑀔𑀺𑀢𑁆𑀢𑁂 𑀬𑁂 𑀯𑀸𑀭𑀸 𑀧𑀭𑀺𑀳𑀸𑀬𑀦𑁆𑀢𑀺, 𑀢𑁂 𑀧𑀭𑀢𑁄 𑀯𑀓𑁆𑀔𑀸𑀫.

𑀤𑀼𑀢𑀺𑀬𑀧𑀜𑁆𑀳𑁂 𑀧𑀦 𑀤𑁆𑀯𑀻𑀳𑀺 𑀧𑀘𑁆𑀘𑀬𑁂𑀳𑀺 𑀢𑀬𑁄 𑀧𑀘𑁆𑀘𑀬𑀸 𑀤𑀲𑁆𑀲𑀺𑀢𑀸. 𑀓𑀣𑀁? 𑀓𑀼𑀲𑀮𑁄 𑀳𑀺 𑀅𑀓𑀼𑀲𑀮𑀲𑁆𑀲 𑀅𑀦𑀦𑁆𑀢𑀭𑀸𑀤𑀺𑀯𑀲𑁂𑀦 𑀧𑀘𑁆𑀘𑀬𑁄 𑀦 𑀳𑁄𑀢𑀺. 𑀢𑀲𑁆𑀫𑀸 𑀢𑁂 𑀅𑀧𑀦𑁂𑀢𑁆𑀯𑀸 𑀆𑀭𑀫𑁆𑀫𑀡𑀽𑀧𑀦𑀺𑀲𑁆𑀲𑀬𑀯𑀲𑁂𑀦 𑀲𑀗𑁆𑀕𑀳𑀺𑀢𑀁 𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀜𑁆𑀘𑁂𑀯 𑀧𑀓𑀢𑀽𑀧𑀦𑀺𑀲𑁆𑀲𑀬𑀜𑁆𑀘 𑀲𑀦𑁆𑀥𑀸𑀬 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄𑀢𑀺 𑀯𑀼𑀢𑁆𑀢𑀁. 𑀢𑀲𑁆𑀫𑀸 𑀲𑀼𑀤𑁆𑀥𑁄 𑀆𑀭𑀫𑁆𑀫𑀡𑀧𑀘𑁆𑀘𑀬𑁄 𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀯𑀲𑁂𑀦 𑀅𑀥𑀺𑀧𑀢𑀺𑀧𑀘𑁆𑀘𑀬𑁄 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁄𑀢𑀺 𑀤𑀼𑀢𑀺𑀬𑀧𑀜𑁆𑀳𑁂 𑀤𑁆𑀯𑀻𑀳𑀺 𑀧𑀘𑁆𑀘𑀬𑁂𑀳𑀺 𑀇𑀫𑁂 𑀢𑀬𑁄 𑀧𑀘𑁆𑀘𑀬𑀸 𑀤𑀲𑁆𑀲𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀢𑀢𑀺𑀬𑀧𑀜𑁆𑀳𑁂 𑀧𑀦 𑀧𑀜𑁆𑀘𑀳𑀺 𑀧𑀘𑁆𑀘𑀬𑁂𑀳𑀺 𑀅𑀝𑁆𑀞𑀸𑀭𑀲 𑀧𑀘𑁆𑀘𑀬𑀸 𑀤𑀲𑁆𑀲𑀺𑀢𑀸. 𑀓𑀣𑀁? 𑀓𑀼𑀲𑀮𑁄 𑀳𑀺 𑀅𑀩𑁆𑀬𑀸𑀓𑀢𑀲𑁆𑀲 𑀅𑀜𑁆𑀜𑀫𑀜𑁆𑀜𑀧𑀼𑀭𑁂𑀚𑀸𑀢𑀸𑀲𑁂𑀯𑀦𑀯𑀺𑀧𑀸𑀓𑀲𑀫𑁆𑀧𑀬𑀼𑀢𑁆𑀢𑁂𑀳𑀺𑀬𑁂𑀯 𑀧𑀘𑁆𑀘𑀬𑁄 𑀦 𑀳𑁄𑀢𑀺, 𑀲𑁂𑀲𑁂𑀳𑀺 𑀏𑀓𑀽𑀦𑀯𑀻𑀲𑀢𑀺𑀬𑀸 𑀳𑁄𑀢𑀺. 𑀢𑁂𑀲𑀼 𑀆𑀭𑀫𑁆𑀫𑀡𑀧𑀘𑁆𑀘𑀬𑁄 𑀏𑀓𑁄. 𑀬𑀲𑁆𑀫𑀸 𑀧𑀦 𑀓𑀼𑀲𑀮𑁄 𑀅𑀩𑁆𑀬𑀸𑀓𑀢𑀲𑁆𑀲 𑀅𑀜𑁆𑀜𑀫𑀜𑁆𑀜𑀯𑀺𑀧𑀸𑀓𑀲𑀫𑁆𑀧𑀬𑀼𑀢𑁆𑀢𑀯𑀲𑁂𑀦 𑀧𑀘𑁆𑀘𑀬𑁄 𑀦 𑀳𑁄𑀢𑀺, 𑀳𑁂𑀢𑀼𑀧𑀘𑁆𑀘𑀬𑁄 𑀧𑀝𑀺𑀓𑁆𑀔𑀺𑀢𑁆𑀢𑁄, 𑀓𑀫𑁆𑀫𑀧𑀘𑁆𑀘𑀬𑁄 𑀯𑀺𑀲𑀼𑀁 𑀕𑀳𑀺𑀢𑁄, 𑀢𑀲𑁆𑀫𑀸 𑀇𑀫𑁂 𑀧𑀜𑁆𑀘 𑀅𑀧𑀦𑁂𑀢𑁆𑀯𑀸 𑀲𑀳𑀚𑀸𑀢𑁂𑀦 𑀤𑀲 𑀧𑀘𑁆𑀘𑀬𑀸 𑀤𑀲𑁆𑀲𑀺𑀢𑀸. 𑀉𑀧𑀦𑀺𑀲𑁆𑀲𑀬𑁂𑀦 𑀳𑁂𑀝𑁆𑀞𑀸 𑀯𑀼𑀢𑁆𑀢𑁂𑀲𑀼 𑀙𑀲𑀼 𑀞𑀧𑁂𑀢𑁆𑀯𑀸 𑀆𑀲𑁂𑀯𑀦𑀁 𑀲𑁂𑀲𑀸 𑀧𑀜𑁆𑀘. 𑀧𑀘𑁆𑀙𑀸𑀚𑀸𑀢𑁄 𑀏𑀓𑁄𑀯 𑀢𑀣𑀸 𑀲𑀳𑀚𑀸𑀢𑀦𑀸𑀦𑀸𑀓𑁆𑀔𑀡𑀺𑀓𑀯𑀲𑁂𑀦 𑀤𑀼𑀯𑀺𑀥𑁄𑀧𑀺 𑀓𑀫𑁆𑀫𑀧𑀘𑁆𑀘𑀬𑁄𑀢𑀺 𑀏𑀯𑀁 𑀢𑀢𑀺𑀬𑀧𑀜𑁆𑀳𑁂 𑀧𑀜𑁆𑀘𑀳𑀺 𑀧𑀘𑁆𑀘𑀬𑁂𑀳𑀺 𑀇𑀫𑁂 𑀅𑀝𑁆𑀞𑀸𑀭𑀲 𑀧𑀘𑁆𑀘𑀬𑀸 𑀤𑀲𑁆𑀲𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀘𑀢𑀼𑀢𑁆𑀣𑀧𑀜𑁆𑀳𑁂 𑀧𑀦 𑀏𑀓𑁂𑀦 𑀧𑀘𑁆𑀘𑀬𑁂𑀦 𑀤𑀲. 𑀓𑀣𑀁? 𑀓𑀼𑀲𑀮𑁄 𑀳𑀺 𑀓𑀼𑀲𑀮𑀸𑀩𑁆𑀬𑀸𑀓𑀢𑀲𑁆𑀲 𑀲𑀳𑀚𑀸𑀢𑁂 𑀯𑀼𑀢𑁆𑀢𑁂𑀲𑀼 𑀧𑀦𑁆𑀦𑀭𑀲𑀲𑀼 𑀅𑀜𑁆𑀜𑀫𑀜𑁆𑀜𑀯𑀺𑀧𑀸𑀓𑀲𑀫𑁆𑀧𑀬𑀼𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑁂𑀳𑀺 𑀧𑀘𑁆𑀘𑀬𑁄 𑀦 𑀳𑁄𑀢𑀺, 𑀳𑁂𑀢𑀼𑀧𑀘𑁆𑀘𑀬𑁄 𑀧𑀝𑀺𑀓𑁆𑀔𑀺𑀢𑁆𑀢𑁄. 𑀇𑀢𑀺 𑀇𑀫𑁂 𑀧𑀜𑁆𑀘 𑀅𑀧𑀦𑁂𑀢𑁆𑀯𑀸 𑀲𑁂𑀲𑀸 𑀤𑀲 𑀧𑀘𑁆𑀘𑀬𑀸 𑀏𑀢𑁆𑀣 𑀏𑀓𑁂𑀦 𑀧𑀘𑁆𑀘𑀬𑁂𑀦 𑀤𑀲𑁆𑀲𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑁫𑁨𑁮. 𑀬𑀣𑀸 𑀘 𑀇𑀫𑁂𑀲𑀼 𑀓𑀼𑀲𑀮𑀸𑀤𑀺𑀓𑁂𑀲𑀼 𑀘𑀢𑀽𑀲𑀼, 𑀢𑀣𑀸 𑀅𑀓𑀼𑀲𑀮𑀸𑀤𑀺𑀓𑁂𑀲𑀼𑀧𑀺 𑀘𑀢𑀽𑀲𑀼 𑀧𑀜𑁆𑀳𑁂𑀲𑀼 𑀢𑁂𑀳𑀺 𑀢𑁂𑀳𑀺 𑀧𑀘𑁆𑀘𑀬𑁂𑀳𑀺 𑀢𑁂 𑀢𑁂𑀬𑁂𑀯 𑀧𑀘𑁆𑀘𑀬𑀸 𑀤𑀲𑁆𑀲𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑁫𑁨𑁯. 𑀢𑀢𑁄 𑀧𑀭𑀸𑀦𑀁 𑀅𑀩𑁆𑀬𑀸𑀓𑀢𑀸𑀤𑀻𑀦𑀁 𑀢𑀺𑀡𑁆𑀡𑀁 𑀧𑀜𑁆𑀳𑀸𑀦𑀁 𑀧𑀞𑀫𑀧𑀜𑁆𑀳𑁂 𑀲𑀢𑁆𑀢𑀳𑀺 𑀧𑀘𑁆𑀘𑀬𑁂𑀳𑀺 𑀢𑁂𑀯𑀻𑀲𑀢𑀺 𑀧𑀘𑁆𑀘𑀬𑀸 𑀤𑀲𑁆𑀲𑀺𑀢𑀸. 𑀓𑀣𑀁? 𑀅𑀩𑁆𑀬𑀸𑀓𑀢𑁄 𑀳𑀺 𑀅𑀩𑁆𑀬𑀸𑀓𑀢𑀲𑁆𑀲 𑀘𑀢𑀼𑀯𑀻𑀲𑀢𑀺𑀬𑀸𑀧𑀺 𑀧𑀘𑁆𑀘𑀬𑁂𑀳𑀺 𑀧𑀘𑁆𑀘𑀬𑁄 𑀳𑁄𑀢𑀺. 𑀳𑁂𑀢𑀼𑀧𑀘𑁆𑀘𑀬𑁂 𑀧𑀦 𑀧𑀝𑀺𑀓𑁆𑀔𑀺𑀢𑁆𑀢𑁂 𑀢𑁂𑀯𑀻𑀲𑀢𑀺 𑀳𑁄𑀦𑁆𑀢𑀺. 𑀢𑁂𑀲𑀼 𑀆𑀭𑀫𑁆𑀫𑀡𑀧𑀘𑁆𑀘𑀬𑁄 𑀏𑀓𑁄𑀯. 𑀬𑀲𑁆𑀫𑀸 𑀧𑀦𑁂𑀢𑁆𑀣 𑀅𑀲𑀳𑀚𑀸𑀢𑀸𑀦𑀫𑁆𑀧𑀺 𑀲𑀗𑁆𑀕𑀳𑀡𑀢𑁆𑀣𑀁 𑀆𑀳𑀸𑀭𑀺𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑀸 𑀯𑀺𑀲𑀼𑀁 𑀕𑀳𑀺𑀢𑀸. 𑀢𑀲𑁆𑀫𑀸 𑀇𑀫𑁂 𑀢𑀬𑁄 𑀅𑀧𑀦𑁂𑀢𑁆𑀯𑀸 𑀲𑀳𑀚𑀸𑀢𑁂𑀦 𑀤𑁆𑀯𑀸𑀤𑀲 𑀧𑀘𑁆𑀘𑀬𑀸 𑀤𑀲𑁆𑀲𑀺𑀢𑀸. 𑀉𑀧𑀦𑀺𑀲𑁆𑀲𑀬𑁂𑀦 𑀳𑁂𑀝𑁆𑀞𑀸 𑀯𑀼𑀢𑁆𑀢𑀸 𑀙, 𑀧𑀼𑀭𑁂𑀚𑀸𑀢𑁄 𑀏𑀓𑁄𑀯 𑀢𑀣𑀸 𑀧𑀘𑁆𑀙𑀸𑀚𑀸𑀢𑀆𑀳𑀸𑀭𑀺𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑀸𑀢𑀺 𑀏𑀯𑀫𑁂𑀢𑁆𑀣 𑀲𑀢𑁆𑀢𑀳𑀺 𑀧𑀘𑁆𑀘𑀬𑁂𑀳𑀺 𑀇𑀫𑁂 𑀢𑁂𑀯𑀻𑀲𑀢𑀺 𑀧𑀘𑁆𑀘𑀬𑀸 𑀤𑀲𑁆𑀲𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀤𑀼𑀢𑀺𑀬𑁂 𑀢𑀻𑀳𑀺 𑀧𑀘𑁆𑀘𑀬𑁂𑀳𑀺 𑀤𑁆𑀯𑀸𑀤𑀲 𑀤𑀲𑁆𑀲𑀺𑀢𑀸. 𑀓𑀣𑀁? 𑀆𑀭𑀫𑁆𑀫𑀡𑀧𑀘𑁆𑀘𑀬𑁄 𑀏𑀓𑁄, 𑀉𑀧𑀦𑀺𑀲𑁆𑀲𑀬𑁂𑀦 𑀧𑀦 𑀆𑀭𑀫𑁆𑀫𑀡𑀽𑀧𑀦𑀺𑀲𑁆𑀲𑀬𑀯𑀲𑁂𑀦 𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀅𑀦𑀦𑁆𑀢𑀭𑀲𑀫𑀦𑀦𑁆𑀢𑀭𑀦𑀢𑁆𑀣𑀺𑀯𑀺𑀕𑀢𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁄𑀢𑀺 𑀙 𑀤𑀲𑁆𑀲𑀺𑀢𑀸. 𑀧𑀼𑀭𑁂𑀚𑀸𑀢𑁂𑀦 𑀧𑀼𑀭𑁂𑀚𑀸𑀢𑀦𑀺𑀲𑁆𑀲𑀬𑀯𑀺𑀧𑁆𑀧𑀬𑀼𑀢𑁆𑀢𑀅𑀢𑁆𑀣𑀺𑀅𑀯𑀺𑀕𑀢𑀸 𑀧𑀜𑁆𑀘𑀸𑀢𑀺 𑀏𑀯𑀫𑁂𑀢𑁆𑀣 𑀢𑀻𑀳𑀺 𑀧𑀘𑁆𑀘𑀬𑁂𑀳𑀺 𑀇𑀫𑁂 𑀤𑁆𑀯𑀸𑀤𑀲 𑀧𑀘𑁆𑀘𑀬𑀸 𑀤𑀲𑁆𑀲𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀢𑀢𑀺𑀬𑁂𑀧𑀺 𑀏𑀲𑁂𑀯 𑀦𑀬𑁄.

𑁫𑁩𑁦. 𑀢𑀢𑁄 𑀧𑀭𑀸𑀦𑀁 𑀤𑀼𑀓𑀫𑀽𑀮𑀓𑀸𑀦𑀁 𑀘𑀢𑀼𑀦𑁆𑀦𑀁 𑀧𑀜𑁆𑀳𑀸𑀦𑀁 𑀧𑀞𑀫𑀧𑀜𑁆𑀳𑁂 ‘‘𑀲𑀳𑀚𑀸𑀢𑀧𑀘𑁆𑀘𑀬𑁂𑀦 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑁂𑀦𑀸’’𑀢𑀺 𑀅𑀯𑀢𑁆𑀯𑀸 ‘‘𑀲𑀳𑀚𑀸𑀢𑀁 𑀧𑀼𑀭𑁂𑀚𑀸𑀢’’𑀦𑁆𑀢𑀺 𑀯𑀼𑀢𑁆𑀢𑁂𑀳𑀺 𑀤𑁆𑀯𑀻𑀳𑀺 𑀦𑀺𑀲𑁆𑀲𑀬𑀅𑀢𑁆𑀣𑀺𑀅𑀯𑀺𑀕𑀢𑀯𑀲𑁂𑀦 𑀢𑀬𑁄 𑀧𑀘𑁆𑀘𑀬𑀸 𑀤𑀲𑁆𑀲𑀺𑀢𑀸. 𑀓𑀼𑀲𑀮𑀸 𑀳𑀺 𑀔𑀦𑁆𑀥𑀸 𑀯𑀢𑁆𑀣𑀼𑀦𑀸 𑀲𑀤𑁆𑀥𑀺𑀁 𑀏𑀓𑀢𑁄 𑀓𑀼𑀲𑀮𑀲𑁆𑀲 𑀧𑀘𑁆𑀘𑀬𑀪𑀸𑀯𑀁 𑀲𑀸𑀥𑀬𑀫𑀸𑀦𑀸 𑀓𑀺𑀜𑁆𑀘𑀸𑀧𑀺 𑀲𑀳𑀚𑀸𑀢𑀸, 𑀲𑀳𑀚𑀸𑀢𑀧𑀘𑁆𑀘𑀬𑀸 𑀧𑀦 𑀦 𑀳𑁄𑀦𑁆𑀢𑀺 𑀯𑀢𑁆𑀣𑀼𑀫𑀺𑀲𑁆𑀲𑀓𑀢𑁆𑀢𑀸. 𑀢𑀲𑁆𑀫𑀸 𑀢𑁂𑀲𑀁 𑀲𑀳𑀚𑀸𑀢𑀸𑀦𑀁 𑀦𑀺𑀲𑁆𑀲𑀬𑀅𑀢𑁆𑀣𑀺𑀅𑀯𑀺𑀕𑀢𑀸𑀦𑀁 𑀯𑀲𑁂𑀦 𑀲𑀳𑀚𑀸𑀢𑀦𑁆𑀢𑀺 𑀯𑀼𑀢𑁆𑀢𑀁. 𑀯𑀢𑁆𑀣𑀼𑀫𑁆𑀳𑀺𑀧𑀺 𑀏𑀲𑁂𑀯 𑀦𑀬𑁄. 𑀢𑀫𑁆𑀧𑀺 𑀳𑀺 𑀓𑀺𑀜𑁆𑀘𑀸𑀧𑀺 𑀧𑀼𑀭𑁂𑀚𑀸𑀢𑀁, 𑀔𑀦𑁆𑀥𑀫𑀺𑀲𑁆𑀲𑀓𑀢𑁆𑀢𑀸 𑀧𑀦 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑁄 𑀦 𑀳𑁄𑀢𑀺. 𑀓𑁂𑀯𑀮𑀁 𑀧𑀼𑀭𑁂𑀚𑀸𑀢𑀸𑀦𑀁 𑀦𑀺𑀲𑁆𑀲𑀬𑀸𑀤𑀻𑀦𑀁 𑀯𑀲𑁂𑀦 𑀧𑀼𑀭𑁂𑀚𑀸𑀢𑀦𑁆𑀢𑀺 𑀯𑀼𑀢𑁆𑀢𑀁.

𑀤𑀼𑀢𑀺𑀬𑀧𑀜𑁆𑀳𑁂 ‘‘𑀲𑀳𑀚𑀸𑀢𑀁 𑀧𑀘𑁆𑀙𑀸𑀚𑀸𑀢𑀁 𑀆𑀳𑀸𑀭𑀁 𑀇𑀦𑁆𑀤𑁆𑀭𑀺𑀬’’𑀦𑁆𑀢𑀺 𑀯𑀼𑀢𑁆𑀢𑁂𑀳𑀺 𑀘𑀢𑀽𑀳𑀺𑀧𑀺 𑀲𑀳𑀚𑀸𑀢𑀦𑀺𑀲𑁆𑀲𑀬𑀅𑀢𑁆𑀣𑀺𑀅𑀯𑀺𑀕𑀢𑀯𑀲𑁂𑀦 𑀘𑀢𑁆𑀢𑀸𑀭𑁄 𑀧𑀘𑁆𑀘𑀬𑀸 𑀤𑀲𑁆𑀲𑀺𑀢𑀸. 𑀇𑀫𑀲𑁆𑀫𑀺𑀜𑁆𑀳𑀺 𑀯𑀸𑀭𑁂 𑀲𑀳𑀚𑀸𑀢𑀧𑀘𑁆𑀘𑀬𑁄 𑀮𑀩𑁆𑀪𑀢𑀺, 𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬𑀸𑀤𑀬𑁄 𑀦 𑀮𑀩𑁆𑀪𑀦𑁆𑀢𑀺. 𑀧𑀘𑁆𑀙𑀸𑀚𑀸𑀢𑀸𑀦𑀁 𑀧𑀦 𑀆𑀳𑀸𑀭𑀺𑀦𑁆𑀤𑁆𑀭𑀺𑀬𑀲𑀗𑁆𑀔𑀸𑀢𑀸𑀦𑀜𑁆𑀘 𑀅𑀢𑁆𑀣𑀺𑀅𑀯𑀺𑀕𑀢𑀸𑀦𑀁 𑀯𑀲𑁂𑀦𑁂𑀢𑀁 𑀯𑀼𑀢𑁆𑀢𑀁. 𑀓𑀼𑀲𑀮𑀸 𑀳𑀺 𑀔𑀦𑁆𑀥𑀸 𑀅𑀩𑁆𑀬𑀸𑀓𑀢𑀸 𑀘 𑀫𑀳𑀸𑀪𑀽𑀢𑀸 𑀉𑀧𑀸𑀤𑀸𑀭𑀽𑀧𑀸𑀦𑀁 𑀲𑀳𑀚𑀸𑀢𑀧𑀘𑁆𑀘𑀬𑁂𑀦 𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦 𑀅𑀢𑁆𑀣𑀺𑀅𑀯𑀺𑀕𑀢𑀧𑀘𑁆𑀘𑀬𑁂𑀳𑀻𑀢𑀺 𑀘𑀢𑀼𑀥𑀸 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺. 𑀧𑀘𑁆𑀙𑀸𑀚𑀸𑀢𑀸 𑀧𑀦 𑀓𑀼𑀲𑀮𑀸 𑀢𑁂𑀳𑀺𑀬𑁂𑀯 𑀪𑀽𑀢𑁂𑀳𑀺 𑀲𑀤𑁆𑀥𑀺𑀁 𑀢𑁂𑀲𑀜𑁆𑀜𑁂𑀯 𑀉𑀧𑀸𑀤𑀸𑀭𑀽𑀧𑀸𑀦𑀁 𑀅𑀢𑁆𑀣𑀺𑀅𑀯𑀺𑀕𑀢𑀯𑀲𑁂𑀦 𑀧𑀘𑁆𑀘𑀬𑁄. 𑀓𑀩𑀴𑀻𑀓𑀸𑀭𑀸𑀳𑀸𑀭𑁄𑀧𑀺 𑀧𑀘𑁆𑀙𑀸𑀚𑀸𑀢𑁂𑀳𑀺 𑀓𑀼𑀲𑀮𑁂𑀳𑀺 𑀲𑀤𑁆𑀥𑀺𑀁 𑀧𑀼𑀭𑁂𑀚𑀸𑀢𑀲𑁆𑀲 𑀓𑀸𑀬𑀲𑁆𑀲 𑀅𑀢𑁆𑀣𑀺𑀅𑀯𑀺𑀕𑀢𑀯𑀲𑁂𑀦𑁂𑀯 𑀧𑀘𑁆𑀘𑀬𑁄. 𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀫𑁆𑀧𑀺 𑀧𑀘𑁆𑀙𑀸𑀚𑀸𑀢𑁂𑀳𑀺 𑀓𑀼𑀲𑀮𑁂𑀳𑀺 𑀲𑀤𑁆𑀥𑀺𑀁 𑀓𑀝𑀢𑁆𑀢𑀸𑀭𑀽𑀧𑀸𑀦𑀁 𑀅𑀢𑁆𑀣𑀺𑀅𑀯𑀺𑀕𑀢𑀧𑀘𑁆𑀘𑀬𑁂𑀦𑁂𑀯 𑀧𑀘𑁆𑀘𑀬𑁄. 𑀇𑀢𑀺 𑀇𑀫𑀁 𑀘𑀢𑀼𑀥𑀸 𑀧𑀘𑁆𑀘𑀬𑀪𑀸𑀯𑀁 𑀲𑀦𑁆𑀥𑀸𑀬 ‘‘𑀲𑀳𑀚𑀸𑀢𑀁 𑀧𑀘𑁆𑀙𑀸𑀚𑀸𑀢𑀁, 𑀆𑀳𑀸𑀭𑀁 𑀇𑀦𑁆𑀤𑁆𑀭𑀺𑀬’’𑀦𑁆𑀢𑀺 𑀇𑀤𑀁 𑀯𑀼𑀢𑁆𑀢𑀁. 𑀧𑀘𑁆𑀙𑀸𑀚𑀸𑀢𑀸𑀳𑀸𑀭𑀺𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑀸 𑀧𑀦𑁂𑀢𑁆𑀣 𑀦 𑀮𑀩𑁆𑀪𑀦𑁆𑀢𑀺𑀬𑁂𑀯. 𑀧𑀭𑀢𑁄 𑀅𑀓𑀼𑀲𑀮𑀫𑀺𑀲𑁆𑀲𑀓𑀧𑀜𑁆𑀳𑀸𑀤𑁆𑀯𑀬𑁂𑀧𑀺 𑀏𑀲𑁂𑀯 𑀦𑀬𑁄𑀢𑀺. 𑀏𑀯𑀫𑁂𑀢𑁆𑀣 𑀢𑁂𑀲𑀼 𑀢𑁂𑀲𑀼 𑀧𑀜𑁆𑀳𑁂𑀲𑀼 𑀲𑀗𑁆𑀔𑀺𑀧𑀺𑀢𑁆𑀯𑀸 𑀯𑀼𑀢𑁆𑀢𑀧𑀘𑁆𑀘𑀬𑀸𑀦𑀁 𑀧𑀪𑁂𑀤𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀧𑀦 𑀧𑀘𑁆𑀘𑀬𑁂 𑀢𑁂𑀲𑀁 𑀢𑁂𑀲𑀁 𑀧𑀜𑁆𑀳𑀸𑀦𑀁 𑀧𑀭𑀺𑀳𑀸𑀦𑀸𑀧𑀭𑀺𑀳𑀸𑀦𑀺𑀁 𑀧𑀭𑀢𑁄 𑀆𑀯𑀺𑀓𑀭𑀺𑀲𑁆𑀲𑀸𑀫𑀸𑀢𑀺.

𑀧𑀘𑁆𑀘𑀦𑀻𑀬𑀼𑀤𑁆𑀥𑀸𑀭𑀲𑁆𑀲 𑀅𑀢𑁆𑀣𑀯𑀡𑁆𑀡𑀦𑀸.

𑀧𑀘𑁆𑀘𑀦𑀻𑀬𑀕𑀡𑀦𑀯𑀡𑁆𑀡𑀦𑀸

𑁫𑁩𑁨. 𑀇𑀤𑀸𑀦𑀺 𑀏𑀢𑁂 ‘‘𑀓𑀼𑀲𑀮𑁄 𑀥𑀫𑁆𑀫𑁄 𑀓𑀼𑀲𑀮𑀲𑁆𑀲 𑀥𑀫𑁆𑀫𑀲𑁆𑀲𑀸’’𑀢𑀺𑀆𑀤𑀬𑁄 𑀅𑀦𑀼𑀮𑁄𑀫𑀯𑀲𑁂𑀦 𑀧𑀦𑁆𑀦𑀭𑀲 𑀯𑀸𑀭𑀸 𑀤𑀲𑁆𑀲𑀺𑀢𑀸. 𑀬𑀲𑁆𑀫𑀸 𑀧𑀘𑁆𑀘𑀦𑀻𑀬𑁂𑀧𑀺 𑀏𑀢𑁂𑀬𑁂𑀯, 𑀦 𑀇𑀢𑁄 𑀉𑀤𑁆𑀥𑀁; 𑀳𑁂𑀝𑁆𑀞𑀸 𑀧𑀦 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀬𑀲𑁆𑀲 𑀬𑀲𑁆𑀲 𑀧𑀘𑁆𑀘𑀬𑀲𑁆𑀲 𑀧𑀘𑁆𑀘𑀦𑀻𑀬𑁂 𑀬𑁂 𑀬𑁂 𑀯𑀸𑀭𑀸 𑀮𑀩𑁆𑀪𑀦𑁆𑀢𑀺, 𑀢𑁂 𑀢𑁂 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀕𑀡𑀦𑀯𑀲𑁂𑀦 𑀤𑀲𑁆𑀲𑁂𑀢𑀼𑀁 𑀦𑀳𑁂𑀢𑀼𑀬𑀸 𑀧𑀦𑁆𑀦𑀭𑀲𑀸𑀢𑀺𑀆𑀤𑀺 𑀆𑀭𑀤𑁆𑀥𑀁.

𑀢𑀢𑁆𑀣 𑀦𑀳𑁂𑀢𑀼𑀬𑀸 𑀲𑀩𑁆𑀩𑁂𑀲𑀫𑁆𑀧𑀺 𑀬𑀣𑀸𑀤𑀲𑁆𑀲𑀺𑀢𑀸𑀦𑀁 𑀧𑀘𑁆𑀘𑀬𑀸𑀦𑀁 𑀯𑀲𑁂𑀦 𑀧𑀦𑁆𑀦𑀭𑀲 𑀮𑀩𑁆𑀪𑀦𑁆𑀢𑀺. 𑀦𑀸𑀭𑀫𑁆𑀫𑀡𑁂 𑀲𑀳𑀚𑀸𑀢𑁂 𑀳𑁂𑀢𑀼𑀧𑀘𑁆𑀘𑀬𑁄 𑀧𑀯𑀺𑀲𑀢𑀺. 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀯𑀸𑀭𑁂 𑀲𑀼𑀤𑁆𑀥𑁄 𑀆𑀭𑀫𑁆𑀫𑀡𑀧𑀘𑁆𑀘𑀬𑁄 𑀧𑀭𑀺𑀳𑀸𑀬𑀢𑀺, 𑀲𑁂𑀲𑀧𑀘𑁆𑀘𑀬𑀯𑀲𑁂𑀦 𑀢𑁂 𑀯𑀸𑀭𑀸 𑀯𑀺𑀲𑁆𑀲𑀚𑁆𑀚𑀦𑀁 𑀮𑀪𑀦𑁆𑀢𑀺. 𑀬𑀣𑀸 𑀘 𑀦𑀸𑀭𑀫𑁆𑀫𑀡𑁂, 𑀏𑀯𑀁 𑀲𑁂𑀲𑁂𑀲𑀼𑀧𑀺. 𑀲𑀳𑀚𑀸𑀢𑁂 𑀳𑁂𑀢𑀼𑀧𑀘𑁆𑀘𑀬𑁄 𑀧𑀯𑀺𑀲𑀢𑀺. 𑀢𑀲𑁆𑀫𑀺𑀁 𑀢𑀲𑁆𑀫𑀺𑀜𑁆𑀘 𑀯𑀸𑀭𑁂 𑀦𑀉𑀧𑀦𑀺𑀲𑁆𑀲𑀬𑁂 𑀦𑀅𑀦𑀦𑁆𑀢𑀭𑁂𑀢𑀺 𑀏𑀯𑀁 𑀧𑀘𑁆𑀘𑀦𑀻𑀬𑀢𑁄 𑀞𑀺𑀢𑀸 𑀧𑀘𑁆𑀘𑀬𑀸 𑀧𑀭𑀺𑀳𑀸𑀬𑀦𑁆𑀢𑀺, 𑀅𑀯𑀲𑁂𑀲𑀧𑀘𑁆𑀘𑀬𑀯𑀲𑁂𑀦 𑀢𑁂 𑀢𑁂 𑀯𑀸𑀭𑀸 𑀯𑀺𑀲𑁆𑀲𑀚𑁆𑀚𑀦𑀁 𑀮𑀪𑀦𑁆𑀢𑀺. 𑀦𑀲𑀳𑀚𑀸𑀢𑁂 𑀧𑀦 ‘‘𑀓𑀼𑀲𑀮𑁄 𑀥𑀫𑁆𑀫𑁄 𑀓𑀼𑀲𑀮𑀲𑁆𑀲 𑀘 𑀅𑀩𑁆𑀬𑀸𑀓𑀢𑀲𑁆𑀲 𑀘, 𑀅𑀓𑀼𑀲𑀮𑁄 𑀥𑀫𑁆𑀫𑁄 𑀅𑀓𑀼𑀲𑀮𑀲𑁆𑀲 𑀘 𑀅𑀩𑁆𑀬𑀸𑀓𑀢𑀲𑁆𑀲 𑀘, 𑀓𑀼𑀲𑀮𑁄 𑀘 𑀅𑀩𑁆𑀬𑀸𑀓𑀢𑁄 𑀘 𑀥𑀫𑁆𑀫𑀸 𑀓𑀼𑀲𑀮𑀲𑁆𑀲, 𑀅𑀓𑀼𑀲𑀮𑁄 𑀘 𑀅𑀩𑁆𑀬𑀸𑀓𑀢𑁄 𑀘 𑀥𑀫𑁆𑀫𑀸 𑀅𑀓𑀼𑀲𑀮𑀲𑁆𑀲𑀸𑀢𑀺 𑀇𑀫𑁂 𑀘𑀢𑁆𑀢𑀸𑀭𑁄 𑀯𑀸𑀭𑀸 𑀧𑀭𑀺𑀳𑀸𑀬𑀦𑁆𑀢𑀺. 𑀏𑀢𑁂𑀲𑀜𑁆𑀳𑀺 𑀘𑀢𑀼𑀦𑁆𑀦𑀁 𑀧𑀼𑀭𑀺𑀫𑁂𑀲𑀼 𑀤𑁆𑀯𑀻𑀲𑀼 𑀲𑀳𑀚𑀸𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄𑀢𑀺 𑀏𑀓𑀸𑀤𑀲𑀦𑁆𑀦𑀁 𑀧𑀘𑁆𑀘𑀬𑀸𑀦𑀁 𑀯𑀲𑁂𑀦 𑀏𑀓𑁄𑀯 𑀧𑀘𑁆𑀘𑀬𑀲𑀗𑁆𑀕𑀳𑁄 𑀯𑀼𑀢𑁆𑀢𑁄. 𑀢𑁂 𑀢𑀲𑁆𑀫𑀺𑀁 𑀧𑀝𑀺𑀓𑁆𑀔𑀺𑀢𑁆𑀢𑁂 𑀅𑀜𑁆𑀜𑁂𑀦𑀸𑀓𑀸𑀭𑁂𑀦 𑀯𑀺𑀲𑁆𑀲𑀚𑁆𑀚𑀦𑀁 𑀦 𑀮𑀪𑀦𑁆𑀢𑀺. 𑀧𑀘𑁆𑀙𑀺𑀫𑁂𑀲𑀼 𑀤𑁆𑀯𑀻𑀲𑀼 𑀦𑀺𑀲𑁆𑀲𑀬𑀅𑀢𑁆𑀣𑀺𑀅𑀯𑀺𑀕𑀢𑀧𑀘𑁆𑀘𑀬𑁂 𑀲𑀦𑁆𑀥𑀸𑀬 ‘‘𑀲𑀳𑀚𑀸𑀢𑀁 𑀧𑀼𑀭𑁂𑀚𑀸𑀢’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑁂 𑀲𑀳𑀚𑀸𑀢𑁂 𑀧𑀝𑀺𑀓𑁆𑀔𑀺𑀢𑁆𑀢𑁂 𑀅𑀯𑀲𑁂𑀲𑀸𑀦𑀁 𑀳𑁂𑀢𑀼𑀆𑀤𑀻𑀦𑀜𑁆𑀘 𑀧𑀼𑀭𑁂𑀚𑀸𑀢𑀸𑀦𑀜𑁆𑀘𑁂𑀯 𑀦𑀺𑀲𑁆𑀲𑀬𑀅𑀢𑁆𑀣𑀺𑀅𑀯𑀺𑀕𑀢𑀸𑀦𑀁 𑀯𑀲𑁂𑀦 𑀯𑀺𑀲𑁆𑀲𑀚𑁆𑀚𑀦𑀁 𑀦 𑀮𑀪𑀦𑁆𑀢𑀺, 𑀢𑀲𑁆𑀫𑀸 𑀇𑀫𑁂 𑀘𑀢𑁆𑀢𑀸𑀭𑁄𑀧𑀺 𑀯𑀸𑀭𑀸 𑀧𑀭𑀺𑀳𑀸𑀬𑀦𑁆𑀢𑀺. 𑀅𑀯𑀲𑁂𑀲𑀸𑀦𑀁 𑀯𑀲𑁂𑀦 ‘‘𑀏𑀓𑀸𑀤𑀲𑀸’’𑀢𑀺 𑀯𑀼𑀢𑁆𑀢𑀁.

𑀢𑀢𑁆𑀣 𑀲𑀺𑀬𑀸 𑁋 𑀬𑀣𑀸 𑀳𑁂𑀢𑀼𑀫𑁆𑀳𑀺 𑀧𑀝𑀺𑀓𑁆𑀔𑀺𑀢𑁆𑀢𑁂 𑀲𑁂𑀲𑀸𑀦𑀁 𑀅𑀥𑀺𑀧𑀢𑀺𑀆𑀤𑀻𑀦𑀁 𑀯𑀲𑁂𑀦 𑀢𑁂 𑀯𑀸𑀭𑀸 𑀮𑀤𑁆𑀥𑀸, 𑀏𑀯𑀁 𑀲𑀳𑀚𑀸𑀢𑁂 𑀧𑀝𑀺𑀓𑁆𑀔𑀺𑀢𑁆𑀢𑁂 𑀅𑀯𑀲𑁂𑀲𑀸𑀦𑀁 𑀳𑁂𑀢𑀼𑀆𑀤𑀻𑀦𑀁 𑀯𑀲𑁂𑀦 𑀓𑀲𑁆𑀫𑀸 𑀦 𑀮𑀩𑁆𑀪𑀦𑁆𑀢𑀻𑀢𑀺? 𑀦𑀺𑀧𑁆𑀧𑀤𑁂𑀲𑀢𑁆𑀢𑀸. 𑀳𑁂𑀢𑀼𑀆𑀤𑀬𑁄 𑀳𑀺 𑀲𑀳𑀚𑀸𑀢𑀸𑀦𑀁 𑀏𑀓𑀤𑁂𑀲𑀫𑀢𑁆𑀢𑀢𑁄 𑀲𑀧𑁆𑀧𑀤𑁂𑀲𑀸, 𑀢𑀲𑁆𑀫𑀸 𑀢𑁂𑀲𑀼 𑀧𑀝𑀺𑀓𑁆𑀔𑀺𑀢𑁆𑀢𑁂𑀲𑀼 𑀅𑀜𑁆𑀜𑁂𑀲𑀁 𑀯𑀲𑁂𑀦 𑀢𑁂 𑀯𑀸𑀭𑀸 𑀮𑀩𑁆𑀪𑀦𑁆𑀢𑀺. 𑀲𑀳𑀚𑀸𑀢𑁄 𑀧𑀦 𑀦𑀺𑀧𑁆𑀧𑀤𑁂𑀲𑁄 𑀲𑀩𑁆𑀩𑁂𑀧𑀺 𑀳𑁂𑀢𑀼𑀆𑀤𑀬𑁄 𑀕𑀡𑁆𑀳𑀸𑀢𑀺, 𑀢𑀲𑁆𑀫𑀸 𑀢𑀲𑁆𑀫𑀺𑀁 𑀧𑀝𑀺𑀓𑁆𑀔𑀺𑀢𑁆𑀢𑁂 𑀲𑀩𑁆𑀩𑁂𑀧𑀺 𑀢𑁂 𑀧𑀝𑀺𑀓𑁆𑀔𑀺𑀢𑁆𑀢𑀸 𑀳𑁄𑀦𑁆𑀢𑀺. 𑀦 𑀳𑀺 𑀅𑀲𑀳𑀚𑀸𑀢𑀸 𑀳𑁂𑀢𑀼𑀧𑀘𑁆𑀘𑀬𑀸𑀤𑀬𑁄 𑀦𑀸𑀫 𑀅𑀢𑁆𑀣𑀺. 𑀇𑀢𑀺 𑀲𑀳𑀚𑀸𑀢𑀲𑁆𑀲 𑀦𑀺𑀧𑁆𑀧𑀤𑁂𑀲𑀢𑁆𑀢𑀸 𑀢𑀲𑁆𑀫𑀺𑀁 𑀧𑀝𑀺𑀓𑁆𑀔𑀺𑀢𑁆𑀢𑁂 𑀲𑀩𑁆𑀩𑁂𑀧𑀺 𑀢𑁂 𑀉𑀪𑁄𑀧𑀺 𑀯𑀸𑀭𑀸 𑀦 𑀮𑀩𑁆𑀪𑀦𑁆𑀢𑀺. ‘‘𑀲𑀳𑀚𑀸𑀢𑀁 𑀧𑀼𑀭𑁂𑀚𑀸𑀢’’𑀦𑁆𑀢𑀺 𑀯𑀺𑀲𑁆𑀲𑀚𑁆𑀚𑀺𑀢𑀯𑀸𑀭𑁂𑀲𑀼 𑀧𑀦 𑀓𑀺𑀜𑁆𑀘𑀸𑀧𑀺 𑀲𑀳𑀚𑀸𑀢𑀧𑀘𑁆𑀘𑀬𑁄𑀬𑁂𑀯 𑀦𑀢𑁆𑀣𑀺, 𑀬𑀲𑁆𑀫𑀸 𑀧𑀦𑁂𑀢𑁆𑀣 𑀲𑀳𑀚𑀸𑀢𑀸𑀯 𑀅𑀭𑀽𑀧𑀓𑁆𑀔𑀦𑁆𑀥𑀸 𑀦𑀺𑀲𑁆𑀲𑀬𑀅𑀢𑁆𑀣𑀺𑀅𑀯𑀺𑀕𑀢𑀯𑀲𑁂𑀦 𑀧𑀘𑁆𑀘𑀬𑀸, 𑀲𑀳𑀚𑀸𑀢𑁂 𑀘 𑀧𑀝𑀺𑀓𑁆𑀔𑀺𑀢𑁆𑀢𑁂 𑀏𑀓𑀦𑁆𑀢𑁂𑀦 𑀲𑀳𑀚𑀸𑀢𑀦𑀺𑀲𑁆𑀲𑀬𑀅𑀢𑁆𑀣𑀺𑀅𑀯𑀺𑀕𑀢𑀸 𑀧𑀝𑀺𑀓𑁆𑀔𑀺𑀢𑁆𑀢𑀸 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀢𑀲𑁆𑀲 𑀧𑀝𑀺𑀓𑁆𑀔𑀺𑀢𑁆𑀢𑀢𑁆𑀢𑀸 𑀢𑁂𑀧𑀺 𑀯𑀸𑀭𑀸 𑀦 𑀮𑀩𑁆𑀪𑀦𑁆𑀢𑀻𑀢𑀺 𑀏𑀯𑀁 𑀲𑀩𑁆𑀩𑀣𑀸𑀧𑁂𑀢𑁆𑀣 𑀇𑀫𑁂 𑀘𑀢𑁆𑀢𑀸𑀭𑁄 𑀯𑀸𑀭𑀸 𑀧𑀭𑀺𑀳𑀸𑀬𑀦𑁆𑀢𑀺. 𑀅𑀯𑀲𑁂𑀲𑀸𑀦𑀜𑁆𑀜𑁂𑀯 𑀯𑀲𑁂𑀦 𑀏𑀓𑀸𑀤𑀲𑀸𑀢𑀺 𑀯𑀼𑀢𑁆𑀢𑀁.

𑀦𑀅𑀜𑁆𑀜𑀫𑀜𑁆𑀜𑀦𑀦𑀺𑀲𑁆𑀲𑀬𑀦𑀲𑀫𑁆𑀧𑀬𑀼𑀢𑁆𑀢𑁂𑀧𑀺 𑀢𑁂𑀬𑁂𑀯 𑀯𑀸𑀭𑀸 𑀧𑀭𑀺𑀳𑀸𑀬𑀦𑁆𑀢𑀺. 𑀓𑀲𑁆𑀫𑀸? 𑀲𑀳𑀚𑀸𑀢𑀕𑀢𑀺𑀓𑀢𑁆𑀢𑀸. 𑀬𑀣𑁂𑀯 𑀳𑀺 𑀅𑀭𑀽𑀧𑀥𑀫𑁆𑀫𑀪𑀽𑀢𑁄 𑀲𑀳𑀚𑀸𑀢𑀧𑀘𑁆𑀘𑀬𑁄 𑀦𑀺𑀧𑁆𑀧𑀤𑁂𑀲𑁂𑀦 𑀘𑀢𑁆𑀢𑀸𑀭𑁄 𑀅𑀭𑀽𑀧𑀓𑁆𑀔𑀦𑁆𑀥𑁂 𑀕𑀡𑁆𑀳𑀸𑀢𑀺, 𑀢𑀣𑀸 𑀅𑀜𑁆𑀜𑀫𑀜𑁆𑀜𑀦𑀺𑀲𑁆𑀲𑀬𑀲𑀫𑁆𑀧𑀬𑀼𑀢𑁆𑀢𑀸𑀧𑀻𑀢𑀺 𑀲𑀳𑀚𑀸𑀢𑀕𑀢𑀺𑀓𑀢𑁆𑀢𑀸 𑀏𑀢𑁂𑀲𑀼𑀧𑀺 𑀧𑀝𑀺𑀓𑁆𑀔𑀺𑀢𑁆𑀢𑁂𑀲𑀼 𑀢𑁂 𑀯𑀸𑀭𑀸 𑀦 𑀮𑀩𑁆𑀪𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀢𑁂𑀦 𑀯𑀼𑀢𑁆𑀢𑀁 𑀦𑀅𑀜𑁆𑀜𑀫𑀜𑁆𑀜𑁂 𑀏𑀓𑀸𑀤𑀲, 𑀦𑀦𑀺𑀲𑁆𑀲𑀬𑁂 𑀏𑀓𑀸𑀤𑀲, 𑀦𑀲𑀫𑁆𑀧𑀬𑀼𑀢𑁆𑀢𑁂 𑀏𑀓𑀸𑀤𑀲𑀸𑀢𑀺.

𑀢𑀢𑁆𑀣 𑀲𑀺𑀬𑀸 𑁋 𑀓𑀺𑀜𑁆𑀘𑀸𑀧𑀺 𑀇𑀫𑁂 𑀅𑀯𑀺𑀲𑁂𑀲𑁂𑀦 𑀓𑀼𑀲𑀮𑀸𑀤𑀺𑀪𑁂𑀤𑀸𑀦𑀁 𑀘𑀢𑀼𑀦𑁆𑀦𑀁 𑀔𑀦𑁆𑀥𑀸𑀦𑀁 𑀲𑀗𑁆𑀕𑀸𑀳𑀓𑀢𑁆𑀢𑀸 𑀲𑀳𑀚𑀸𑀢𑀕𑀢𑀺𑀓𑀸, 𑀓𑀼𑀲𑀮𑁄 𑀧𑀦 𑀓𑀼𑀲𑀮𑀸𑀩𑁆𑀬𑀸𑀓𑀢𑀲𑁆𑀲 𑀞𑀧𑁂𑀢𑁆𑀯𑀸 𑀲𑀳𑀚𑀸𑀢𑀧𑀘𑁆𑀘𑀬𑀁 𑀅𑀜𑁆𑀜𑀣𑀸 𑀧𑀘𑁆𑀘𑀬𑁄𑀯 𑀦 𑀳𑁄𑀢𑀺, 𑀢𑀲𑁆𑀫𑀸 𑀢𑀲𑁆𑀫𑀺𑀁 𑀧𑀝𑀺𑀓𑁆𑀔𑀺𑀢𑁆𑀢𑁂 𑀲𑁄 𑀯𑀸𑀭𑁄 𑀧𑀭𑀺𑀳𑀸𑀬𑀢𑀼. 𑀓𑀼𑀲𑀮𑁄 𑀧𑀦 𑀓𑀼𑀲𑀮𑀸𑀩𑁆𑀬𑀸𑀓𑀢𑀸𑀦𑀁 𑀦𑁂𑀯 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑁄 𑀳𑁄𑀢𑀺, 𑀢𑀲𑁆𑀫𑀺𑀁 𑀧𑀝𑀺𑀓𑁆𑀔𑀺𑀢𑁆𑀢𑁂 𑀲𑁄 𑀯𑀸𑀭𑁄 𑀓𑀲𑁆𑀫𑀸 𑀧𑀭𑀺𑀳𑀸𑀬𑀢𑀻𑀢𑀺? 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀥𑀫𑁆𑀫𑀯𑀲𑁂𑀦 𑀧𑀯𑀢𑁆𑀢𑀺𑀲𑀩𑁆𑀪𑀸𑀯𑀢𑁄. 𑀬𑀣𑁂𑀯 𑀳𑀺 𑀓𑀼𑀲𑀮𑀸𑀩𑁆𑀬𑀸𑀓𑀢𑀸 𑀓𑀼𑀲𑀮𑀲𑁆𑀲 𑀲𑀳𑀚𑀸𑀢𑀧𑀘𑁆𑀘𑀬𑁄𑀯 𑀦 𑀳𑁄𑀦𑁆𑀢𑀺. 𑀲𑀳𑀚𑀸𑀢𑀥𑀫𑁆𑀫𑀯𑀲𑁂𑀦 𑀧𑀦 𑀦𑀺𑀲𑁆𑀲𑀬𑀧𑀘𑁆𑀘𑀬𑀸𑀤𑀻𑀳𑀺 𑀧𑀯𑀢𑁆𑀢𑀺𑀲𑀩𑁆𑀪𑀸𑀯𑀢𑁄 𑀢𑀲𑁆𑀫𑀺𑀁 𑀧𑀝𑀺𑀓𑁆𑀔𑀺𑀢𑁆𑀢𑁂 𑀲𑁄 𑀯𑀸𑀭𑁄 𑀧𑀭𑀺𑀳𑀸𑀬𑀢𑀺, 𑀏𑀯𑀫𑀺𑀥𑀸𑀧𑀺 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀥𑀫𑁆𑀫𑀯𑀲𑁂𑀦 𑀲𑀳𑀚𑀸𑀢𑀸𑀤𑀻𑀳𑀺 𑀧𑀯𑀢𑁆𑀢𑀺𑀲𑀩𑁆𑀪𑀸𑀯𑀢𑁄 𑀢𑀲𑁆𑀫𑀺𑀁 𑀧𑀝𑀺𑀓𑁆𑀔𑀺𑀢𑁆𑀢𑁂 𑀲𑁄 𑀯𑀸𑀭𑁄 𑀧𑀭𑀺𑀳𑀸𑀬𑀢𑀺. 𑀦𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄𑀢𑀺 𑀧𑀤𑀲𑁆𑀲 𑀳𑀺 𑀅𑀬𑀫𑀢𑁆𑀣𑁄 𑁋 𑀬𑁂 𑀥𑀫𑁆𑀫𑀸 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀲𑀗𑁆𑀕𑀳𑀁 𑀕𑀢𑀸, 𑀦 𑀢𑁂𑀳𑀺 𑀧𑀘𑁆𑀘𑀬𑁄. 𑀓𑀼𑀲𑀮𑁄 𑀘 𑀓𑀼𑀲𑀮𑀸𑀩𑁆𑀬𑀸𑀓𑀢𑀸𑀦𑀁 𑀲𑀳𑀚𑀸𑀢𑀸𑀤𑀺𑀯𑀲𑁂𑀦 𑀧𑀘𑁆𑀘𑀬𑁄 𑀳𑁄𑀦𑁆𑀢𑁄 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀥𑀫𑁆𑀫𑁂𑀳𑁂𑀯 𑀧𑀘𑁆𑀘𑀬𑁄 𑀳𑁄𑀢𑀺, 𑀢𑀲𑁆𑀫𑀸 𑀢𑀲𑁆𑀫𑀺𑀁 𑀧𑀝𑀺𑀓𑁆𑀔𑀺𑀢𑁆𑀢𑁂 𑀲𑁄 𑀯𑀸𑀭𑁄 𑀧𑀭𑀺𑀳𑀸𑀬𑀢𑀺. 𑀬𑀣𑀸 𑀘 𑀲𑁄 𑀯𑀸𑀭𑁄, 𑀢𑀣𑀸 𑀲𑁂𑀲𑀸𑀧𑀺 𑀢𑀬𑁄𑀢𑀺 𑀘𑀢𑁆𑀢𑀸𑀭𑁄𑀧𑀺 𑀢𑁂 𑀯𑀸𑀭𑀸 𑀧𑀭𑀺𑀳𑀸𑀬𑀦𑁆𑀢𑀺.

𑀦𑀦𑀺𑀲𑁆𑀲𑀬𑁂 𑀏𑀓𑀸𑀤𑀲𑀸𑀢𑀺 𑀏𑀢𑁆𑀣𑀸𑀧𑀺 𑀬𑀲𑁆𑀫𑀸 𑀢𑁂𑀲𑀁 𑀯𑀸𑀭𑀸𑀦𑀁 𑀏𑀓𑁂𑀦𑁆𑀢𑁂𑀦 𑀲𑀳𑀚𑀸𑀢𑀧𑀘𑁆𑀘𑀬𑀥𑀫𑁆𑀫𑀸𑀯 𑀦𑀺𑀲𑁆𑀲𑀬𑀪𑀽𑀢𑀸, 𑀢𑀲𑁆𑀫𑀸 𑀦𑀺𑀲𑁆𑀲𑀬𑁂 𑀧𑀝𑀺𑀓𑁆𑀔𑀺𑀢𑁆𑀢𑁂 𑀧𑀭𑀺𑀳𑀸𑀬𑀦𑁆𑀢𑀺. 𑀦𑀧𑀼𑀭𑁂𑀚𑀸𑀢𑁂 𑀢𑁂𑀭𑀲𑀸𑀢𑀺 𑀲𑀳𑀚𑀸𑀢𑀁 𑀧𑀼𑀭𑁂𑀚𑀸𑀢𑀦𑁆𑀢𑀺 𑀯𑀼𑀢𑁆𑀢𑀯𑀺𑀲𑁆𑀲𑀚𑁆𑀚𑀦𑁂 𑀤𑁆𑀯𑀺𑀫𑀽𑀮𑀓𑁂 𑀤𑁆𑀯𑁂 𑀅𑀧𑀦𑁂𑀢𑁆𑀯𑀸 𑀢𑁂𑀭𑀲. 𑀬𑀣𑀸 𑀳𑀺 𑀢𑁂 𑀲𑀳𑀚𑀸𑀢𑁂 𑀧𑀝𑀺𑀓𑁆𑀔𑀺𑀢𑁆𑀢𑁂 𑀧𑀼𑀭𑁂𑀚𑀸𑀢𑀸𑀦𑀜𑁆𑀜𑁂𑀯 𑀦𑀺𑀲𑁆𑀲𑀬𑀅𑀢𑁆𑀣𑀺𑀅𑀯𑀺𑀕𑀢𑀸𑀦𑀁 𑀯𑀲𑁂𑀦 𑀯𑀺𑀲𑁆𑀲𑀚𑁆𑀚𑀦𑀁 𑀦 𑀮𑀪𑀦𑁆𑀢𑀺, 𑀢𑀣𑀸 𑀧𑀼𑀭𑁂𑀚𑀸𑀢𑁂𑀧𑀺 𑀧𑀝𑀺𑀓𑁆𑀔𑀺𑀢𑁆𑀢𑁂 𑀲𑀳𑀚𑀸𑀢𑀸𑀦𑀜𑁆𑀜𑁂𑀯 𑀦𑀺𑀲𑁆𑀲𑀬𑀅𑀢𑁆𑀣𑀺𑀅𑀯𑀺𑀕𑀢𑀸𑀦𑀁 𑀯𑀲𑁂𑀦 𑀯𑀺𑀲𑁆𑀲𑀚𑁆𑀚𑀦𑀁 𑀦 𑀮𑀪𑀦𑁆𑀢𑀺, 𑀢𑀲𑁆𑀫𑀸 𑀢𑁂 𑀅𑀧𑀦𑁂𑀢𑁆𑀯𑀸 𑀢𑁂𑀭𑀲𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀦𑀧𑀘𑁆𑀙𑀸𑀚𑀸𑀢𑁂 𑀧𑀦𑁆𑀦𑀭𑀲𑀸𑀢𑀺 𑀏𑀢𑁆𑀣 ‘‘𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 𑀯𑀸 ‘‘𑀲𑀳𑀚𑀸𑀢𑀁 𑀧𑀘𑁆𑀙𑀸𑀚𑀸𑀢𑀁 𑀆𑀳𑀸𑀭𑀁 𑀇𑀦𑁆𑀤𑁆𑀭𑀺𑀬’’𑀦𑁆𑀢𑀺 𑀯𑀸 𑀆𑀕𑀢𑀝𑁆𑀞𑀸𑀦𑁂𑀲𑀼 𑀞𑀧𑁂𑀢𑁆𑀯𑀸 𑀧𑀘𑁆𑀙𑀸𑀚𑀸𑀢𑀁 𑀅𑀯𑀲𑁂𑀲𑀯𑀲𑁂𑀦𑀧𑀺 𑀢𑁂 𑀧𑀜𑁆𑀳𑀸 𑀮𑀩𑁆𑀪𑀦𑁆𑀢𑀺, 𑀢𑀲𑁆𑀫𑀸 𑀧𑀦𑁆𑀦𑀭𑀲𑁂𑀯 𑀯𑀼𑀢𑁆𑀢𑀸. 𑀦𑀓𑀫𑁆𑀫𑁂𑀢𑀺𑀆𑀤𑀻𑀲𑀼 𑀬𑀲𑁆𑀫𑀸 𑀓𑀫𑁆𑀫𑀯𑀺𑀧𑀸𑀓𑀸𑀳𑀸𑀭𑀺𑀦𑁆𑀤𑁆𑀭𑀺𑀬𑀛𑀸𑀦𑀫𑀕𑁆𑀕𑀸𑀧𑀺 𑀓𑀼𑀲𑀮𑀸𑀤𑀺𑀪𑁂𑀤𑀸𑀦𑀁 𑀘𑀢𑀼𑀦𑁆𑀦𑀁 𑀔𑀦𑁆𑀥𑀸𑀦𑀁 𑀏𑀓𑀤𑁂𑀲𑁄𑀯 𑀢𑀲𑁆𑀫𑀸 𑀞𑀧𑁂𑀢𑁆𑀯𑀸 𑀢𑁂 𑀥𑀫𑁆𑀫𑁂 𑀅𑀯𑀲𑁂𑀲𑀥𑀫𑁆𑀫𑀯𑀲𑁂𑀦 𑀲𑀳𑀚𑀸𑀢𑀥𑀫𑁆𑀫𑀸 𑀧𑀘𑁆𑀘𑀬𑀸 𑀳𑁄𑀦𑁆𑀢𑀻𑀢𑀺 𑀏𑀓𑀫𑁆𑀧𑀺 𑀧𑀜𑁆𑀳𑀸𑀯𑀺𑀲𑁆𑀲𑀚𑁆𑀚𑀦𑀁 𑀦 𑀧𑀭𑀺𑀳𑀻𑀦𑀁. 𑀦𑀲𑀫𑁆𑀧𑀬𑀼𑀢𑁆𑀢𑁂 𑀏𑀓𑀸𑀤𑀲𑀸𑀢𑀺 𑀬𑀲𑁆𑀫𑀸 𑀢𑁂𑀲𑀼 𑀘𑀢𑀽𑀲𑀼 𑀯𑀸𑀭𑁂𑀲𑀼 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸 𑀲𑀳𑀚𑀸𑀢𑀸𑀤𑀺𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀲𑀫𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀧𑀝𑀺𑀓𑁆𑀔𑁂𑀧𑁂𑀦 𑀢𑁂𑀬𑁂𑀯 𑀯𑀸𑀭𑀸 𑀧𑀭𑀺𑀳𑀸𑀬𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀦𑀯𑀺𑀧𑁆𑀧𑀬𑀼𑀢𑁆𑀢𑁂 𑀦𑀯𑀸𑀢𑀺 𑀤𑀼𑀫𑀽𑀮𑀓𑀏𑀓𑀸𑀯𑀲𑀸𑀦𑀸 𑀘𑀢𑁆𑀢𑀸𑀭𑁄 𑀏𑀓𑀫𑀽𑀮𑀓𑀤𑀼𑀓𑀸𑀯𑀲𑀸𑀦𑀸 𑀤𑁆𑀯𑁂 𑀘𑀸𑀢𑀺 𑀇𑀫𑁂 𑀙 𑀯𑀸𑀭𑀸 𑀏𑀓𑀦𑁆𑀢𑁂𑀦 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀥𑀫𑁆𑀫𑁂𑀳𑀺 𑀬𑀼𑀢𑁆𑀢𑀸. 𑀢𑁂𑀳𑀺 𑀲𑀳𑀚𑀸𑀢𑀸𑀤𑀺𑀯𑀲𑁂𑀦 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀯𑀺𑀧𑁆𑀧𑀬𑀼𑀢𑁆𑀢𑁂 𑀧𑀝𑀺𑀓𑁆𑀔𑀺𑀢𑁆𑀢𑁂 𑀲𑀩𑁆𑀩𑁂𑀧𑀺 𑀢𑁂 𑀧𑀭𑀺𑀳𑀸𑀬𑀦𑁆𑀢𑀻𑀢𑀺 𑀦𑀯𑁂𑀯 𑀮𑀩𑁆𑀪𑀦𑁆𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀦𑀯𑀺𑀧𑁆𑀧𑀬𑀼𑀢𑁆𑀢𑁂 𑀦𑀯𑀸’’𑀢𑀺. 𑀦𑁄𑀅𑀢𑁆𑀣𑀺𑀦𑁄𑀅𑀯𑀺𑀕𑀢𑁂𑀲𑀼𑀧𑀺 𑀢𑁂𑀬𑁂𑀯 𑀯𑁂𑀤𑀺𑀢𑀩𑁆𑀩𑀸. 𑀏𑀓𑀦𑁆𑀢𑁂𑀦 𑀳𑀺 𑀢𑁂 𑀯𑀸𑀭𑀸 𑀅𑀢𑁆𑀣𑀺𑀅𑀯𑀺𑀕𑀢𑀧𑀘𑁆𑀘𑀬𑀥𑀫𑁆𑀫𑀬𑀼𑀢𑁆𑀢𑀸, 𑀢𑀲𑁆𑀫𑀸 𑀢𑁂 𑀢𑁂𑀲𑀁 𑀧𑀝𑀺𑀓𑁆𑀔𑁂𑀧𑁂 𑀧𑀭𑀺𑀳𑀸𑀬𑀦𑁆𑀢𑀺. 𑀬𑁂𑀧𑀺 𑀮𑀩𑁆𑀪𑀦𑁆𑀢𑀺, 𑀢𑁂𑀲𑀼 𑀆𑀭𑀫𑁆𑀫𑀡𑀯𑀲𑁂𑀦 𑀅𑀦𑀦𑁆𑀢𑀭𑀸𑀤𑀺𑀯𑀲𑁂𑀦 𑀯𑀸 𑀯𑀺𑀲𑁆𑀲𑀚𑁆𑀚𑀦𑀸𑀦𑀺 𑀓𑀸𑀢𑀩𑁆𑀩𑀸𑀦𑀺. 𑀲𑀳𑀚𑀸𑀢𑀧𑀼𑀭𑁂𑀚𑀸𑀢𑀧𑀘𑁆𑀙𑀸𑀚𑀸𑀢𑀆𑀳𑀸𑀭𑀺𑀦𑁆𑀤𑁆𑀭𑀺𑀬𑀪𑁂𑀤𑀢𑁄 𑀧𑀜𑁆𑀘𑀦𑁆𑀦𑀁 𑀅𑀢𑁆𑀣𑀺𑀅𑀯𑀺𑀕𑀢𑀸𑀦𑀁 𑀯𑀺𑀧𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀁 𑀯𑀸 𑀯𑀲𑁂𑀦 𑀦 𑀓𑀸𑀢𑀩𑁆𑀩𑀸𑀦𑀻𑀢𑀺.

𑁫𑁩𑁩. 𑀏𑀯𑀁 𑀧𑀘𑁆𑀘𑀦𑀻𑀬𑁂 𑀮𑀤𑁆𑀥𑀯𑀸𑀭𑁂 𑀕𑀡𑀦𑀢𑁄 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀤𑀼𑀫𑀽𑀮𑀓𑀸𑀤𑀺𑀯𑀲𑁂𑀦 𑀧𑀘𑁆𑀘𑀬𑀕𑀡𑀦𑀁 𑀤𑀲𑁆𑀲𑁂𑀢𑀼𑀁 𑀦𑀳𑁂𑀢𑀼𑀧𑀘𑁆𑀘𑀬𑀸 𑀦𑀸𑀭𑀫𑁆𑀫𑀡𑁂 𑀧𑀦𑁆𑀦𑀭𑀲𑀸𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀦𑀳𑁂𑀢𑀼𑀫𑀽𑀮𑀓𑀤𑀼𑀓𑁂𑀲𑀼 𑀅𑀢𑀺𑀭𑁂𑀓𑀕𑀡𑀦𑁄 𑀊𑀦𑀢𑀭𑀕𑀡𑀦𑁂𑀦 𑀲𑀤𑁆𑀥𑀺𑀁 𑀬𑁄𑀚𑀺𑀢𑁄 𑀊𑀦𑀢𑀭𑀕𑀡𑀦𑁄𑀯 𑀳𑁄𑀢𑀺.

𑀢𑀺𑀫𑀽𑀮𑀓𑁂 𑀦𑀉𑀧𑀦𑀺𑀲𑁆𑀲𑀬𑁂 𑀢𑁂𑀭𑀲𑀸𑀢𑀺 𑀓𑀼𑀲𑀮𑁄 𑀅𑀓𑀼𑀲𑀮𑀲𑁆𑀲, 𑀅𑀓𑀼𑀲𑀮𑁄 𑀓𑀼𑀲𑀮𑀲𑁆𑀲𑀸𑀢𑀺 𑀤𑁆𑀯𑁂 𑀯𑀸𑀭𑀸 𑀧𑀭𑀺𑀳𑀸𑀬𑀦𑁆𑀢𑀺. 𑀓𑀲𑁆𑀫𑀸? 𑀦𑀸𑀭𑀫𑁆𑀫𑀡𑁂𑀦 𑀲𑀤𑁆𑀥𑀺𑀁 𑀦𑀉𑀧𑀦𑀺𑀲𑁆𑀲𑀬𑀲𑁆𑀲 𑀖𑀝𑀺𑀢𑀢𑁆𑀢𑀸. 𑀆𑀭𑀫𑁆𑀫𑀡𑀯𑀲𑁂𑀦 𑀳𑀺 𑀉𑀧𑀦𑀺𑀲𑁆𑀲𑀬𑀯𑀲𑁂𑀦 𑀘 𑀇𑀫𑁂𑀲𑀁 𑀧𑀯𑀢𑁆𑀢𑀺. 𑀢𑀜𑁆𑀘 𑀉𑀪𑀬𑀁 𑀧𑀝𑀺𑀓𑁆𑀔𑀺𑀢𑁆𑀢𑀁. 𑀆𑀭𑀫𑁆𑀫𑀡𑀸𑀥𑀺𑀧𑀢𑀺 𑀘 𑀆𑀭𑀫𑁆𑀫𑀡𑀽𑀧𑀦𑀺𑀲𑁆𑀲𑀬𑀕𑁆𑀕𑀳𑀡𑁂𑀦 𑀕𑀳𑀺𑀢𑁄 𑀳𑁄𑀢𑀺𑀬𑁂𑀯.

𑀙𑀫𑀽𑀮𑀓𑁂𑀧𑀺 𑀦𑀉𑀧𑀦𑀺𑀲𑁆𑀲𑀬𑁂 𑀢𑁂𑀭𑀲𑀸𑀢𑀺 𑀢𑁂𑀬𑁂𑀯 𑀢𑁂𑀭𑀲. 𑀲𑀢𑁆𑀢𑀫𑀽𑀮𑀓𑁂 𑀧𑀦 𑀦𑀉𑀧𑀦𑀺𑀲𑁆𑀲𑀬𑁂 𑀲𑀢𑁆𑀢𑀸𑀢𑀺 𑀦𑀲𑀳𑀚𑀸𑀢𑁂𑀦 𑀲𑀤𑁆𑀥𑀺𑀁 𑀖𑀝𑀺𑀢𑀢𑁆𑀢𑀸 𑀢𑀢𑁆𑀣 𑀧𑀭𑀺𑀳𑀻𑀦𑁂𑀳𑀺 𑀘𑀢𑀽𑀳𑀺 𑀲𑀤𑁆𑀥𑀺𑀁 ‘‘𑀓𑀼𑀲𑀮𑁄 𑀓𑀼𑀲𑀮𑀲𑁆𑀲, 𑀓𑀼𑀲𑀮𑁄 𑀅𑀓𑀼𑀲𑀮𑀲𑁆𑀲, 𑀅𑀓𑀼𑀲𑀮𑁄 𑀅𑀓𑀼𑀲𑀮𑀲𑁆𑀲, 𑀅𑀓𑀼𑀲𑀮𑁄 𑀓𑀼𑀲𑀮𑀲𑁆𑀲𑀸’’𑀢𑀺 𑀇𑀫𑁂 𑀅𑀦𑀦𑁆𑀢𑀭𑀽𑀧𑀦𑀺𑀲𑁆𑀲𑀬𑀧𑀓𑀢𑀽𑀧𑀦𑀺𑀲𑁆𑀲𑀬𑀯𑀲𑁂𑀦 𑀧𑀯𑀢𑁆𑀢𑀫𑀸𑀦𑀸 𑀘𑀢𑁆𑀢𑀸𑀭𑁄𑀢𑀺 𑀅𑀝𑁆𑀞 𑀧𑀭𑀺𑀳𑀸𑀬𑀦𑁆𑀢𑀺, 𑀢𑀲𑁆𑀫𑀸 𑀅𑀯𑀲𑁂𑀲𑀸𑀦𑀁 𑀯𑀲𑁂𑀦 𑀲𑀢𑁆𑀢𑀸𑀢𑀺 𑀯𑀼𑀢𑁆𑀢𑀁. 𑀦𑀧𑀼𑀭𑁂𑀚𑀸𑀢𑁂 𑀏𑀓𑀸𑀤𑀲𑀸𑀢𑀺 𑀦𑀲𑀳𑀚𑀸𑀢𑁂𑀦 𑀲𑀤𑁆𑀥𑀺𑀁 𑀖𑀝𑀺𑀢𑀢𑁆𑀢𑀸 𑀏𑀓𑀸𑀤𑀲. 𑀦𑀧𑀘𑁆𑀙𑀸𑀚𑀸𑀢𑁂 𑀦𑀯𑀸𑀢𑀺 𑀢𑁂𑀲𑀼 𑀏𑀓𑀸𑀤𑀲𑀲𑀼 𑀲𑀳𑀚𑀸𑀢𑀁 𑀧𑀘𑁆𑀙𑀸𑀚𑀸𑀢𑀁 𑀆𑀳𑀸𑀭𑀁 𑀇𑀦𑁆𑀤𑁆𑀭𑀺𑀬𑀦𑁆𑀢𑀺 𑀮𑀤𑁆𑀥𑀯𑀺𑀲𑁆𑀲𑀚𑁆𑀚𑀦𑁂𑀲𑀼 𑀤𑀼𑀫𑀽𑀮𑀓𑁂 𑀅𑀩𑁆𑀬𑀸𑀓𑀢𑀦𑁆𑀢𑁂 𑀤𑁆𑀯𑁂 𑀯𑀸𑀭𑁂 𑀅𑀧𑀦𑁂𑀢𑁆𑀯𑀸. 𑀢𑁂 𑀳𑀺 𑀲𑀳𑀚𑀸𑀢𑁂 𑀧𑀝𑀺𑀓𑁆𑀔𑀺𑀢𑁆𑀢𑁂𑀧𑀺 𑀧𑀘𑁆𑀙𑀸𑀚𑀸𑀢𑀯𑀲𑁂𑀦 𑀅𑀧𑀭𑀺𑀳𑀻𑀦𑀸. 𑀲𑀳𑀚𑀸𑀢𑁂𑀦 𑀧𑀦 𑀲𑀤𑁆𑀥𑀺𑀁 𑀧𑀘𑁆𑀙𑀸𑀚𑀸𑀢𑁂 𑀧𑀝𑀺𑀓𑁆𑀔𑀺𑀢𑁆𑀢𑁂 𑀧𑀭𑀺𑀳𑀸𑀬𑀦𑁆𑀢𑀻𑀢𑀺 𑀲𑁂𑀲𑀸𑀦𑀁 𑀯𑀲𑁂𑀦 𑀦𑀯𑀸𑀢𑀺 𑀯𑀼𑀢𑁆𑀢𑀁. 𑀅𑀝𑁆𑀞𑀫𑀽𑀮𑀓𑁂 𑀦𑀦𑀺𑀲𑁆𑀲𑀬𑁂 𑀏𑀓𑀸𑀤𑀲𑀸𑀢𑀺 𑀲𑀩𑁆𑀩𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀲𑀤𑀺𑀲𑀫𑁂𑀯. 𑀦𑀯𑀫𑀽𑀮𑀓𑁂 𑀦𑀉𑀧𑀦𑀺𑀲𑁆𑀲𑀬𑁂 𑀧𑀜𑁆𑀘𑀸𑀢𑀺 𑀓𑀼𑀲𑀮𑀸𑀤𑀬𑁄 𑀅𑀩𑁆𑀬𑀸𑀓𑀢𑀦𑁆𑀢𑀸 𑀢𑀬𑁄 𑀤𑀼𑀫𑀽𑀮𑀓𑀸 𑀅𑀩𑁆𑀬𑀸𑀓𑀢𑀦𑁆𑀢𑀸 𑀤𑁆𑀯𑁂 𑀘𑀸𑀢𑀺 𑀧𑀜𑁆𑀘. 𑀢𑁂𑀲𑀼 𑀦𑀸𑀦𑀸𑀓𑁆𑀔𑀡𑀺𑀓𑀓𑀫𑁆𑀫𑀓𑀩𑀴𑀻𑀓𑀸𑀭𑀸𑀳𑀸𑀭𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀧𑀘𑁆𑀙𑀸𑀚𑀸𑀢𑀥𑀫𑁆𑀫𑀯𑀲𑁂𑀦 𑀯𑀺𑀲𑁆𑀲𑀚𑁆𑀚𑀦𑀁 𑀯𑁂𑀤𑀺𑀢𑀩𑁆𑀩𑀁.

𑀤𑀲𑀫𑀽𑀮𑀓𑁂 𑀦𑀧𑀼𑀭𑁂𑀚𑀸𑀢𑁂 𑀧𑀜𑁆𑀘𑀸𑀢𑀺𑀆𑀤𑀻𑀲𑀼𑀧𑀺 𑀢𑁂𑀬𑁂𑀯. 𑀦𑀧𑀘𑁆𑀙𑀸𑀚𑀸𑀢𑁂 𑀢𑀻𑀡𑀻𑀢𑀺 𑀧𑀘𑁆𑀙𑀸𑀚𑀸𑀢𑀯𑀲𑁂𑀦 𑀮𑀩𑁆𑀪𑀫𑀸𑀦𑁂 𑀤𑀼𑀫𑀽𑀮𑀓𑁂 𑀅𑀩𑁆𑀬𑀸𑀓𑀢𑀦𑁆𑀢𑁂 𑀤𑁆𑀯𑁂 𑀅𑀧𑀦𑁂𑀢𑁆𑀯𑀸 𑀅𑀯𑀲𑁂𑀲𑀸. 𑀦𑀯𑀺𑀧𑁆𑀧𑀬𑀼𑀢𑁆𑀢𑁂𑀧𑀺 𑀢𑁂𑀬𑁂𑀯 𑀢𑀬𑁄. 𑀦𑁄𑀅𑀢𑁆𑀣𑀺𑀬𑀸 𑀤𑁆𑀯𑁂𑀢𑀺 𑀦𑀸𑀦𑀸𑀓𑁆𑀔𑀡𑀺𑀓𑀓𑀫𑁆𑀫𑀯𑀲𑁂𑀦 𑀓𑀼𑀲𑀮𑀜𑁆𑀘 𑀅𑀓𑀼𑀲𑀮𑀜𑁆𑀘 𑀓𑀝𑀢𑁆𑀢𑀸𑀭𑀽𑀧𑀲𑁆𑀲. 𑀯𑀺𑀧𑀸𑀓𑀁 𑀧𑀦𑁂𑀢𑁆𑀣 𑀦𑀉𑀧𑀦𑀺𑀲𑁆𑀲𑀬𑁂𑀦 𑀲𑀤𑁆𑀥𑀺𑀁 𑀖𑀝𑀺𑀢𑀢𑁆𑀢𑀸 𑀦 𑀮𑀩𑁆𑀪𑀢𑀺. 𑀏𑀓𑀸𑀤𑀲𑀫𑀽𑀮𑀓𑁂 𑀳𑁂𑀝𑁆𑀞𑀸 𑀯𑀼𑀢𑁆𑀢𑀲𑀤𑀺𑀲𑀸𑀯 𑀕𑀡𑀦𑀸. 𑀤𑁆𑀯𑀸𑀤𑀲𑀫𑀽𑀮𑀓𑁂 𑀦𑀓𑀫𑁆𑀫𑁂 𑀏𑀓𑀦𑁆𑀢𑀺 𑀅𑀩𑁆𑀬𑀸𑀓𑀢𑁂𑀦 𑀅𑀩𑁆𑀬𑀸𑀓𑀢𑀁. 𑀢𑀢𑁆𑀣 𑀘 𑀆𑀳𑀸𑀭𑀺𑀦𑁆𑀤𑁆𑀭𑀺𑀬𑀯𑀲𑁂𑀦 𑀯𑀺𑀲𑁆𑀲𑀚𑁆𑀚𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀢𑁂𑀭𑀲𑀫𑀽𑀮𑀓𑀸𑀤𑀻𑀲𑀼𑀧𑀺 𑀲𑀩𑁆𑀩𑀢𑁆𑀣 𑀏𑀓𑀦𑁆𑀢𑀺 𑀆𑀕𑀢𑀝𑁆𑀞𑀸𑀦𑁂 𑀇𑀤𑀫𑁂𑀯 𑀕𑀳𑁂𑀢𑀩𑁆𑀩𑀁. 𑀦𑀸𑀳𑀸𑀭𑁂 𑀧𑀦 𑀇𑀦𑁆𑀤𑁆𑀭𑀺𑀬𑀯𑀲𑁂𑀦 𑀯𑀺𑀲𑁆𑀲𑀚𑁆𑀚𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀦𑀇𑀦𑁆𑀤𑁆𑀭𑀺𑀬𑁂 𑀆𑀳𑀸𑀭𑀯𑀲𑁂𑀦. 𑀘𑀼𑀤𑁆𑀤𑀲𑀫𑀽𑀮𑀓𑀸𑀤𑀻𑀲𑀼 𑀦𑀓𑀫𑁆𑀫𑁂𑀦 𑀲𑀤𑁆𑀥𑀺𑀁 𑀖𑀝𑀺𑀢𑀢𑁆𑀢𑀸 𑀦𑁄𑀅𑀢𑁆𑀣𑀺𑀦𑁄𑀅𑀯𑀺𑀕𑀢𑀸 𑀦 𑀮𑀩𑁆𑀪𑀦𑁆𑀢𑀻𑀢𑀺 𑀦 𑀯𑀼𑀢𑁆𑀢𑀸. 𑀦𑀸𑀳𑀸𑀭𑀧𑀘𑁆𑀘𑀬𑀸 𑀦𑀛𑀸𑀦𑀧𑀘𑁆𑀘𑀬𑀸𑀢𑀺 𑀦𑀇𑀦𑁆𑀤𑁆𑀭𑀺𑀬𑀁 𑀅𑀧𑀦𑁂𑀢𑁆𑀯𑀸 𑀯𑀼𑀢𑁆𑀢𑀁. 𑀢𑀲𑁆𑀫𑀸 𑀢𑀢𑁆𑀣 𑀇𑀦𑁆𑀤𑁆𑀭𑀺𑀬𑀯𑀲𑁂𑀦 𑀏𑀓𑀁 𑀯𑁂𑀤𑀺𑀢𑀩𑁆𑀩𑀁. 𑀦𑀯𑀺𑀧𑀸𑀓𑀧𑀘𑁆𑀘𑀬𑀸 𑀦𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑀸𑀢𑀺 𑀦𑀸𑀳𑀸𑀭𑀁 𑀅𑀧𑀦𑁂𑀢𑁆𑀯𑀸 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀢𑀢𑁆𑀣 𑀆𑀳𑀸𑀭𑀯𑀲𑁂𑀦 𑀏𑀓𑀁 𑀯𑁂𑀤𑀺𑀢𑀩𑁆𑀩𑀁. 𑀇𑀫𑁂𑀲𑀼 𑀧𑀦 𑀤𑁆𑀯𑀻𑀲𑀼 𑀧𑀘𑁆𑀘𑀦𑀻𑀬𑀢𑁄 𑀞𑀺𑀢𑁂𑀲𑀼 𑀕𑀡𑀦𑀸 𑀦𑀸𑀫 𑀦𑀢𑁆𑀣𑀺, 𑀢𑀲𑁆𑀫𑀸 𑀏𑀓𑀢𑁄 𑀦 𑀤𑀲𑁆𑀲𑀺𑀢𑀸𑀢𑀺.

𑀦𑀳𑁂𑀢𑀼𑀫𑀽𑀮𑀓𑀁.

𑁫𑁩𑁪. 𑀦𑀸𑀭𑀫𑁆𑀫𑀡𑀫𑀽𑀮𑀓𑀸𑀤𑀻𑀲𑀼𑀧𑀺 𑀧𑀦𑁆𑀦𑀭𑀲𑀢𑁂𑀭𑀲𑀏𑀓𑀸𑀤𑀲𑀦𑀯𑀸𑀢𑀺 𑀲𑀩𑁆𑀩𑀤𑀼𑀓𑁂𑀲𑀼 𑀘𑀢𑁆𑀢𑀸𑀭𑁄𑀯 𑀫𑀽𑀮𑀕𑀡𑀦𑀧𑀭𑀺𑀘𑁆𑀙𑁂𑀤𑀸. 𑀢𑀺𑀓𑀸𑀤𑀻𑀲𑀼 𑀧𑀦 𑀩𑀳𑀼𑀧𑀘𑁆𑀘𑀬𑀲𑀫𑀸𑀬𑁄𑀕𑁂 𑀇𑀢𑀭𑀸𑀦𑀺𑀧𑀺 𑀲𑀢𑁆𑀢 𑀧𑀜𑁆𑀘 𑀢𑀻𑀡𑀺 𑀤𑁆𑀯𑁂 𑀏𑀓𑀦𑁆𑀢𑀺 𑀧𑀭𑀺𑀘𑁆𑀙𑀺𑀦𑁆𑀦𑀕𑀡𑀦𑀸𑀦𑀺 𑀯𑀺𑀲𑁆𑀲𑀚𑁆𑀚𑀦𑀸𑀦𑀺 𑀮𑀩𑁆𑀪𑀦𑁆𑀢𑀺𑀬𑁂𑀯. 𑀢𑁂𑀲𑀼 𑀬𑁂𑀲𑀁 𑀧𑀘𑁆𑀘𑀬𑀸𑀦𑀁 𑀲𑀫𑀸𑀬𑁄𑀕𑁂 𑀬𑀁 𑀬𑀁 𑀮𑀩𑁆𑀪𑀢𑀺, 𑀢𑀁 𑀢𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦 𑀲𑀸𑀥𑀼𑀓𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀉𑀤𑁆𑀥𑀭𑀺𑀢𑀩𑁆𑀩𑀁. 𑀲𑀩𑁆𑀩𑁂𑀲𑀼 𑀘𑁂𑀢𑁂𑀲𑀼 𑀦𑀸𑀭𑀫𑁆𑀫𑀡𑀫𑀽𑀮𑀓𑀸𑀤𑀻𑀲𑀼 𑀦𑀸𑀭𑀫𑁆𑀫𑀡𑀸𑀤𑀻𑀦𑀺 𑀧𑀤𑀸𑀦𑀺 𑀅𑀢𑀺𑀓𑁆𑀓𑀦𑁆𑀢𑁂𑀦 𑀳𑁂𑀢𑀼𑀧𑀤𑁂𑀦 𑀲𑀤𑁆𑀥𑀺𑀁 𑀧𑀞𑀫𑀁 𑀩𑀦𑁆𑀥𑀺𑀢𑁆𑀯𑀸𑀯 𑀘𑀓𑁆𑀓𑀸𑀦𑀺 𑀓𑀢𑀸𑀦𑀺. 𑀬𑀲𑁆𑀫𑀸 𑀧𑀦 𑀢𑀸𑀦𑀺 𑀦𑀳𑁂𑀢𑀼𑀫𑀽𑀮𑀓𑁂 𑀯𑀼𑀢𑁆𑀢𑀲𑀤𑀺𑀲𑀸𑀦𑁂𑀯 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀯𑀺𑀢𑁆𑀣𑀸𑀭𑁂𑀦 𑀅𑀤𑀲𑁆𑀲𑁂𑀢𑁆𑀯𑀸 𑀲𑀗𑁆𑀔𑁂𑀧𑀁 𑀓𑀢𑁆𑀯𑀸 𑀤𑀲𑁆𑀲𑀺𑀢𑀸𑀦𑀺. 𑀢𑀢𑁆𑀣 𑀬𑀣𑀸 𑀦𑀳𑁂𑀢𑀼𑀫𑀽𑀮𑀓𑁂 𑀦𑀸𑀭𑀫𑁆𑀫𑀡𑀦𑀉𑀧𑀦𑀺𑀲𑁆𑀲𑀬𑀸 𑀯𑀺𑀲𑀼𑀁 𑀯𑀺𑀲𑀼𑀁 𑀧𑀦𑁆𑀦𑀭𑀲 𑀯𑀸𑀭𑁂 𑀮𑀪𑀦𑁆𑀢𑀸𑀧𑀺 𑀲𑀫𑀸𑀬𑁄𑀕𑁂 𑀢𑁂𑀭𑀲 𑀮𑀪𑀺𑀁𑀲𑀼, 𑀏𑀯𑀁 𑀲𑀩𑁆𑀩𑀢𑁆𑀣 𑀢𑁂𑀭𑀲𑁂𑀯 𑀮𑀪𑀦𑁆𑀢𑀺. 𑀬𑀣𑀸 𑀘 𑀦𑀸𑀭𑀫𑁆𑀫𑀡𑀦𑀲𑀳𑀚𑀸𑀢𑁂𑀳𑀺 𑀲𑀤𑁆𑀥𑀺𑀁 𑀦𑀉𑀧𑀦𑀺𑀲𑁆𑀲𑀬𑁂 𑀲𑀢𑁆𑀢 𑀯𑀸𑀭𑀸 𑀳𑁄𑀦𑁆𑀢𑀺, 𑀏𑀯𑀁 𑀦𑀉𑀧𑀦𑀺𑀲𑁆𑀲𑀬𑀦𑀸𑀭𑀫𑁆𑀫𑀡𑁂𑀳𑀺 𑀲𑀤𑁆𑀥𑀺𑀁 𑀦𑀲𑀳𑀚𑀸𑀢𑁂𑀧𑀺 𑀲𑀢𑁆𑀢.

𑁫𑁩𑁮. 𑀦𑀦𑀺𑀲𑁆𑀲𑀬𑀧𑀘𑁆𑀘𑀬𑀸 𑀦𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑀸 𑀦𑀧𑀘𑁆𑀙𑀸𑀚𑀸𑀢𑁂 𑀢𑀻𑀡𑀻𑀢𑀺 𑀓𑀼𑀲𑀮𑀸𑀤𑀻𑀦𑀺 𑀅𑀩𑁆𑀬𑀸𑀓𑀢𑀦𑁆𑀢𑀸𑀦𑀺. 𑀢𑁂𑀲𑀼 𑀓𑀝𑀢𑁆𑀢𑀸𑀭𑀽𑀧𑀜𑁆𑀘 𑀆𑀳𑀸𑀭𑀲𑀫𑀼𑀝𑁆𑀞𑀸𑀦𑀜𑁆𑀘 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀁.

𑁫𑁪𑁩-𑁫𑁪𑁪. 𑀦𑀸𑀳𑀸𑀭𑀦𑀇𑀦𑁆𑀤𑁆𑀭𑀺𑀬𑀫𑀽𑀮𑀓𑁂𑀲𑀼 𑀘𑀢𑀼𑀓𑁆𑀓𑁂𑀲𑀼 𑀦𑀓𑀫𑁆𑀫𑁂𑀦 𑀲𑀤𑁆𑀥𑀺𑀁 𑀅𑀖𑀝𑀺𑀢𑀢𑁆𑀢𑀸 𑀦𑀳𑁂𑀢𑀼𑀫𑀽𑀮𑀓𑁂 𑀯𑀺𑀬 𑀏𑀓𑁂𑀦𑁆𑀢𑁂𑀦 𑀮𑀩𑁆𑀪𑀦𑁆𑀢𑀺. 𑀦𑀇𑀦𑁆𑀤𑁆𑀭𑀺𑀬𑀫𑀽𑀮𑀓𑁂 𑀦𑀉𑀧𑀦𑀺𑀲𑁆𑀲𑀬𑁂 𑀘 𑀦𑀧𑀼𑀭𑁂𑀚𑀸𑀢𑁂 𑀘 𑀞𑀧𑁂𑀢𑁆𑀯𑀸 𑀦𑀸𑀳𑀸𑀭𑁂 𑀢𑀻𑀡𑀻𑀢𑀺 𑀓𑀸𑀢𑀩𑁆𑀩𑀦𑁆𑀢𑀺 𑀦𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑀢𑁄 𑀧𑀝𑁆𑀞𑀸𑀬 𑀇𑀫𑁂 𑀤𑁆𑀯𑁂 𑀧𑀘𑁆𑀘𑀬𑁂 𑀖𑀝𑁂𑀢𑁆𑀯𑀸 𑀦𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑀸…𑀧𑁂… 𑀦𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑀸 𑀦𑀸𑀳𑀸𑀭𑁂 𑀢𑀻𑀡𑀻. 𑀦𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑀸…𑀧𑁂… 𑀦𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑀸 𑀦𑀸𑀳𑀸𑀭𑁂 𑀢𑀻𑀡𑀻𑀢𑀺 𑀏𑀯𑀁 𑀇𑀫𑁂𑀳𑀺 𑀧𑀘𑁆𑀘𑀬𑁂𑀳𑀺 𑀲𑀤𑁆𑀥𑀺𑀁 𑀦𑀸𑀳𑀸𑀭𑀧𑀘𑁆𑀘𑀬𑁂 𑀘 𑀕𑀡𑀦𑀸 𑀓𑀸𑀢𑀩𑁆𑀩𑀸𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀢𑀻𑀡𑀻𑀢𑀺 𑀓𑀼𑀲𑀮𑀸𑀤𑀻𑀦𑁂𑀯 𑀅𑀩𑁆𑀬𑀸𑀓𑀢𑀲𑁆𑀲. 𑀢𑀢𑁆𑀣 𑀓𑀼𑀲𑀮𑀸𑀓𑀼𑀲𑀮𑀸 𑀓𑀝𑀢𑁆𑀢𑀸𑀭𑀽𑀧𑀸𑀦𑀁 𑀧𑀼𑀭𑁂𑀚𑀸𑀢𑀲𑁆𑀲 𑀘 𑀓𑀸𑀬𑀲𑁆𑀲 𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬𑁂𑀦, 𑀅𑀩𑁆𑀬𑀸𑀓𑀢𑀸 𑀧𑀦 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬𑁂𑀦𑁂𑀯𑀸𑀢𑀺 𑀇𑀫𑁂𑀲𑀁 𑀯𑀲𑁂𑀦 𑀢𑀻𑀡𑀺 𑀯𑀺𑀲𑁆𑀲𑀚𑁆𑀚𑀦𑀸𑀦𑀺 𑀓𑀸𑀢𑀩𑁆𑀩𑀸𑀦𑀺. 𑀧𑀭𑀢𑁄 𑀧𑀦 𑀦𑀧𑀘𑁆𑀙𑀸𑀚𑀸𑀢𑁂𑀦 𑀲𑀤𑁆𑀥𑀺𑀁 𑀖𑀝𑀺𑀢𑀢𑁆𑀢𑀸 𑀦𑀸𑀳𑀸𑀭𑁂 𑀤𑁆𑀯𑁂𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀓𑀝𑀢𑁆𑀢𑀸𑀭𑀽𑀧𑀯𑀲𑁂𑀦 𑀓𑀼𑀲𑀮𑀁 𑀅𑀩𑁆𑀬𑀸𑀓𑀢𑀲𑁆𑀲, 𑀢𑀣𑀸 𑀅𑀓𑀼𑀲𑀮𑀦𑁆𑀢𑀺 𑀏𑀢𑁆𑀢𑀓𑀫𑁂𑀯 𑀮𑀩𑁆𑀪𑀢𑀺. 𑀆𑀳𑀸𑀭𑀲𑁆𑀲 𑀧𑀦 𑀧𑀝𑀺𑀓𑁆𑀔𑀺𑀢𑁆𑀢𑀢𑁆𑀢𑀸 𑀓𑀩𑀴𑀻𑀓𑀸𑀭𑀸𑀳𑀸𑀭𑁄 𑀅𑀢𑁆𑀣𑀺𑀅𑀯𑀺𑀕𑀢𑀯𑀲𑁂𑀦𑀸𑀧𑀺 𑀧𑀘𑁆𑀘𑀬𑀪𑀸𑀯𑀁 𑀦 𑀮𑀪𑀢𑀺.

𑁫𑁪𑁫. 𑀦𑀯𑀺𑀧𑁆𑀧𑀬𑀼𑀢𑁆𑀢𑀫𑀽𑀮𑀓𑀲𑁆𑀲 𑀘𑀢𑀼𑀫𑀽𑀮𑀓𑁂 𑀦𑀉𑀧𑀦𑀺𑀲𑁆𑀲𑀬𑁂 𑀧𑀜𑁆𑀘𑀸𑀢𑀺 𑀓𑀼𑀲𑀮𑁄 𑀲𑀳𑀚𑀸𑀢𑀓𑀼𑀲𑀮𑀲𑁆𑀲, 𑀓𑀼𑀲𑀮𑁄 𑀓𑀝𑀢𑁆𑀢𑀸𑀭𑀽𑀧𑀲𑀗𑁆𑀔𑀸𑀢𑀲𑁆𑀲 𑀅𑀩𑁆𑀬𑀸𑀓𑀢𑀲𑁆𑀲, 𑀅𑀓𑀼𑀲𑀮𑁄 𑀲𑀳𑀚𑀸𑀢𑀅𑀓𑀼𑀲𑀮𑀲𑁆𑀲, 𑀢𑀣𑀸 𑀓𑀝𑀢𑁆𑀢𑀸𑀭𑀽𑀧𑀲𑀗𑁆𑀔𑀸𑀢𑀲𑁆𑀲 𑀅𑀩𑁆𑀬𑀸𑀓𑀢𑀲𑁆𑀲, 𑀅𑀩𑁆𑀬𑀸𑀓𑀢𑁄 𑀲𑀳𑀚𑀸𑀢𑀅𑀩𑁆𑀬𑀸𑀓𑀢𑀲𑁆𑀲𑀸𑀢𑀺 𑀏𑀯𑀁 𑀧𑀜𑁆𑀘. 𑀦𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀸…𑀧𑁂… 𑀦𑀉𑀧𑀦𑀺𑀲𑁆𑀲𑀬𑁂 𑀢𑀻𑀡𑀻𑀢𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀓𑀼𑀲𑀮𑀸𑀤𑀬𑁄 𑀢𑀬𑁄 𑀅𑀩𑁆𑀬𑀸𑀓𑀢𑀲𑁆𑀲.

𑁫𑁪𑁬. 𑀦𑁄𑀅𑀢𑁆𑀣𑀺𑀧𑀘𑁆𑀘𑀬𑀸 𑀦𑀳𑁂𑀢𑀼𑀬𑀸 𑀦𑀯𑀸𑀢𑀺 𑀦𑀳𑁂𑀢𑀼𑀧𑀘𑁆𑀘𑀬𑀸 𑀦𑁄𑀅𑀢𑁆𑀣𑀺𑀬𑀸 𑀯𑀼𑀢𑁆𑀢𑀸 𑀦𑀯𑁂𑀯. 𑀲𑀩𑁆𑀩𑁂𑀧𑀺 𑀳𑀺 𑀢𑁂 𑀏𑀓𑀫𑀽𑀮𑀓𑁂𑀓𑀸𑀯𑀲𑀸𑀦𑀸 𑀅𑀦𑀦𑁆𑀢𑀭𑀧𑀓𑀢𑀽𑀧𑀦𑀺𑀲𑁆𑀲𑀬𑀯𑀲𑁂𑀦 𑀮𑀩𑁆𑀪𑀦𑁆𑀢𑀺. 𑀦𑀸𑀭𑀫𑁆𑀫𑀡𑁂 𑀦𑀯𑀸𑀢𑀺𑀧𑀺 𑀢𑁂𑀬𑁂𑀯 𑀦𑀸𑀭𑀫𑁆𑀫𑀡𑁂 𑀞𑀢𑁆𑀯𑀸 𑀦𑀉𑀧𑀦𑀺𑀲𑁆𑀲𑀬𑁂 𑀤𑁆𑀯𑁂 𑀓𑀸𑀢𑀩𑁆𑀩𑀸. 𑀬𑀸𑀯 𑀦𑀺𑀲𑁆𑀲𑀬𑀫𑁆𑀧𑀻𑀢𑀺 𑀦𑁄𑀅𑀢𑁆𑀣𑀺𑀫𑀽𑀮𑀓𑁂 𑀦𑀬𑁂 ‘‘𑀦𑁄𑀅𑀢𑁆𑀣𑀺𑀧𑀘𑁆𑀘𑀬𑀸 𑀦𑀳𑁂𑀢𑀼𑀧𑀘𑁆𑀘𑀬𑀸 𑀦𑀸𑀭𑀫𑁆𑀫𑀡𑀧𑀘𑁆𑀘𑀬𑀸’’𑀢𑀺 𑀏𑀯𑀁 𑀘𑀓𑁆𑀓𑀩𑀦𑁆𑀥𑀕𑀫𑀦𑁂𑀦 𑀦𑀸𑀭𑀫𑁆𑀫𑀡𑀧𑀘𑁆𑀘𑀬𑁂 𑀞𑀢𑁆𑀯𑀸 𑀇𑀫𑁂𑀳𑀺 𑀯𑀸 𑀢𑀻𑀳𑀺, 𑀇𑀢𑁄 𑀧𑀭𑁂𑀲𑀼 𑀦𑀸𑀥𑀺𑀧𑀢𑀺𑀆𑀤𑀻𑀲𑀼 𑀅𑀜𑁆𑀜𑀢𑀭𑀜𑁆𑀜𑀢𑀭𑁂𑀦 𑀯𑀸 𑀲𑀤𑁆𑀥𑀺𑀁 𑀬𑀸𑀯 𑀦𑀺𑀲𑁆𑀲𑀬𑀧𑀘𑁆𑀘𑀬𑀁 𑀧𑀸𑀧𑀼𑀡𑀸𑀢𑀺, 𑀢𑀸𑀯 𑀕𑀦𑁆𑀢𑁆𑀯𑀸 𑀦𑀉𑀧𑀦𑀺𑀲𑁆𑀲𑀬𑁂 𑀤𑁆𑀯𑁂 𑀯𑀺𑀲𑁆𑀲𑀚𑁆𑀚𑀦𑀸𑀦𑀺 𑀓𑀸𑀢𑀩𑁆𑀩𑀸𑀦𑀻𑀢𑀺 𑀅𑀢𑁆𑀣𑁄.

𑀏𑀯𑀁 𑀮𑀓𑁆𑀔𑀡𑀁 𑀞𑀧𑁂𑀢𑁆𑀯𑀸 𑀧𑀼𑀦 𑀦𑀸𑀭𑀫𑁆𑀫𑀡𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀦𑀺𑀲𑁆𑀲𑀬𑀸 𑀲𑀢𑁆𑀢 𑀧𑀘𑁆𑀘𑀬𑁂 𑀕𑀳𑁂𑀢𑁆𑀯𑀸 𑀦𑀉𑀧𑀦𑀺𑀲𑁆𑀲𑀬𑁂 𑀤𑁆𑀯𑁂𑀢𑀺 𑀆𑀳. 𑀢𑀢𑁆𑀣 𑀦𑁄𑀅𑀢𑁆𑀣𑀺𑀧𑀘𑁆𑀘𑀬𑀸 𑀦𑀳𑁂𑀢𑀼𑀧𑀘𑁆𑀘𑀬𑀸 𑀦𑀸𑀭𑀫𑁆𑀫𑀡𑀧𑀘𑁆𑀘𑀬𑀸 𑀦𑀉𑀧𑀦𑀺𑀲𑁆𑀲𑀬𑁂 𑀤𑁆𑀯𑁂, 𑀦𑁄𑀅𑀢𑁆𑀣𑀺𑀧𑀘𑁆𑀘𑀬𑀸 𑀦𑀳𑁂𑀢𑀼𑀦𑀸𑀭𑀫𑁆𑀫𑀡𑀦𑀸𑀥𑀺𑀧𑀢𑀺𑀧𑀘𑁆𑀘𑀬𑀸 𑀦𑀉𑀧𑀦𑀺𑀲𑁆𑀲𑀬𑁂 𑀤𑁆𑀯𑁂𑀢𑀺 𑀏𑀯𑀁 𑀦𑀸𑀭𑀫𑁆𑀫𑀡𑀢𑁄 𑀧𑀼𑀭𑀺𑀫𑀧𑀘𑁆𑀙𑀺𑀫𑁂𑀳𑀺 𑀦𑀺𑀲𑁆𑀲𑀬𑀧𑀭𑀺𑀬𑁄𑀲𑀸𑀦𑁂𑀳𑀺 𑀲𑀩𑁆𑀩𑀧𑀤𑁂𑀳𑀺 𑀲𑀤𑁆𑀥𑀺𑀁 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸. 𑀤𑁆𑀯𑁂𑀢𑀺 𑀧𑀦𑁂𑀢𑁆𑀣 𑀓𑀼𑀲𑀮𑁄 𑀅𑀩𑁆𑀬𑀸𑀓𑀢𑀲𑁆𑀲, 𑀅𑀓𑀼𑀲𑀮𑁄 𑀅𑀩𑁆𑀬𑀸𑀓𑀢𑀲𑁆𑀲𑀸𑀢𑀺 𑀦𑀸𑀦𑀸𑀓𑁆𑀔𑀡𑀺𑀓𑀓𑀫𑁆𑀫𑀯𑀲𑁂𑀦 𑀓𑀝𑀢𑁆𑀢𑀸𑀭𑀽𑀧𑀲𑁆𑀲 𑀧𑀘𑁆𑀘𑀬𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀦𑀉𑀧𑀦𑀺𑀲𑁆𑀲𑀬𑀧𑀤𑁂𑀦 𑀲𑀤𑁆𑀥𑀺𑀁 𑀦𑀧𑀼𑀭𑁂𑀚𑀸𑀢𑀸𑀤𑀻𑀲𑀼 𑀲𑀩𑁆𑀩𑀢𑁆𑀣 𑀤𑁆𑀯𑁂. 𑀓𑀫𑁆𑀫𑀧𑀘𑁆𑀘𑀬𑁄 𑀧𑀦𑁂𑀢𑁆𑀣 𑀦 𑀕𑀳𑀺𑀢𑁄. 𑀢𑀲𑁆𑀫𑀺𑀜𑁆𑀳𑀺 𑀕𑀳𑀺𑀢𑁂 𑀢𑁂𑀧𑀺 𑀤𑁆𑀯𑁂 𑀯𑀸𑀭𑀸 𑀙𑀺𑀚𑁆𑀚𑀦𑁆𑀢𑀺, 𑀯𑀺𑀲𑁆𑀲𑀚𑁆𑀚𑀦𑀫𑁂𑀯 𑀦 𑀮𑀩𑁆𑀪𑀢𑀺. 𑀏𑀯𑀁 𑀬𑁂𑀦 𑀬𑁂𑀦 𑀲𑀤𑁆𑀥𑀺𑀁 𑀬𑀲𑁆𑀲 𑀬𑀲𑁆𑀲 𑀲𑀁𑀲𑀦𑁆𑀤𑀦𑁂. 𑀬𑀁 𑀮𑀩𑁆𑀪𑀢𑀺, 𑀬𑀜𑁆𑀘 𑀧𑀭𑀺𑀳𑀸𑀬𑀢𑀺, 𑀢𑀁 𑀲𑀩𑁆𑀩𑀁 𑀲𑀸𑀥𑀼𑀓𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀲𑀩𑁆𑀩𑀧𑀘𑁆𑀘𑀦𑀻𑀬𑁂𑀲𑀼 𑀕𑀡𑀦𑀸 𑀉𑀤𑁆𑀥𑀭𑀺𑀢𑀩𑁆𑀩𑀸𑀢𑀺.

𑀧𑀘𑁆𑀘𑀦𑀻𑀬𑀕𑀡𑀦𑀯𑀡𑁆𑀡𑀦𑀸.

𑀅𑀦𑀼𑀮𑁄𑀫𑀧𑀘𑁆𑀘𑀦𑀻𑀬𑀯𑀡𑁆𑀡𑀦𑀸

𑁫𑁫𑁦. 𑀅𑀦𑀼𑀮𑁄𑀫𑀧𑀘𑁆𑀘𑀦𑀻𑀬𑁂 ‘‘𑀳𑁂𑀢𑀼𑀬𑀸 𑀲𑀢𑁆𑀢, 𑀆𑀭𑀫𑁆𑀫𑀡𑁂 𑀦𑀯𑀸’’𑀢𑀺 𑀏𑀯𑀁 𑀅𑀦𑀼𑀮𑁄𑀫𑁂 ‘‘𑀦𑀳𑁂𑀢𑀼𑀬𑀸 𑀧𑀦𑁆𑀦𑀭𑀲, 𑀦𑀸𑀭𑀫𑁆𑀫𑀡𑁂 𑀧𑀦𑁆𑀦𑀭𑀲𑀸’’𑀢𑀺 𑀏𑀯𑀁 𑀧𑀘𑁆𑀘𑀦𑀻𑀬𑁂 𑀘 𑀮𑀤𑁆𑀥𑀕𑀡𑀦𑁂𑀲𑀼 𑀧𑀘𑁆𑀘𑀬𑁂𑀲𑀼 𑀬𑁄 𑀧𑀘𑁆𑀘𑀬𑁄 𑀅𑀦𑀼𑀮𑁄𑀫𑀢𑁄 𑀞𑀺𑀢𑁄, 𑀢𑀲𑁆𑀲 𑀅𑀦𑀼𑀮𑁄𑀫𑁂 𑀮𑀤𑁆𑀥𑀯𑀸𑀭𑁂𑀳𑀺 𑀲𑀤𑁆𑀥𑀺𑀁 𑀬𑁂 𑀧𑀘𑁆𑀘𑀦𑀻𑀬𑀢𑁄 𑀞𑀺𑀢𑀲𑁆𑀲 𑀧𑀘𑁆𑀘𑀦𑀻𑀬𑁂 𑀮𑀤𑁆𑀥𑀯𑀸𑀭𑁂𑀲𑀼 𑀲𑀤𑀺𑀲𑀯𑀸𑀭𑀸, 𑀢𑁂𑀲𑀁 𑀯𑀲𑁂𑀦 𑀕𑀡𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀅𑀦𑀼𑀮𑁄𑀫𑀲𑁆𑀫𑀺𑀜𑁆𑀳𑀺 𑀳𑁂𑀢𑀼𑀧𑀘𑁆𑀘𑀬𑁂 ‘‘𑀳𑁂𑀢𑀼𑀬𑀸 𑀲𑀢𑁆𑀢𑀸’’𑀢𑀺 𑀲𑀢𑁆𑀢 𑀯𑀸𑀭𑀸 𑀮𑀤𑁆𑀥𑀸, 𑀧𑀘𑁆𑀘𑀦𑀻𑀬𑁂 𑀦𑀸𑀭𑀫𑁆𑀫𑀡𑀧𑀘𑁆𑀘𑀬𑁂 ‘‘𑀦𑀸𑀭𑀫𑁆𑀫𑀡𑁂 𑀧𑀦𑁆𑀦𑀭𑀲𑀸’’𑀢𑀺 𑀧𑀦𑁆𑀦𑀭𑀲 𑀮𑀤𑁆𑀥𑀸. 𑀢𑁂𑀲𑀼 𑀬𑁂 𑀳𑁂𑀢𑀼𑀬𑀸 𑀲𑀢𑁆𑀢 𑀯𑀼𑀢𑁆𑀢𑀸, 𑀢𑁂𑀳𑀺 𑀲𑀤𑁆𑀥𑀺𑀁 𑀦𑀸𑀭𑀫𑁆𑀫𑀡𑁂 𑀯𑀼𑀢𑁆𑀢𑁂𑀲𑀼 𑀧𑀦𑁆𑀦𑀭𑀲𑀲𑀼 ‘‘𑀓𑀼𑀲𑀮𑁄 𑀓𑀼𑀲𑀮𑀲𑁆𑀲, 𑀅𑀩𑁆𑀬𑀸𑀓𑀢𑀲𑁆𑀲, 𑀓𑀼𑀲𑀮𑀸𑀩𑁆𑀬𑀸𑀓𑀢𑀲𑁆𑀲, 𑀅𑀓𑀼𑀲𑀮𑁄 𑀅𑀓𑀼𑀲𑀮𑀲𑁆𑀲, 𑀅𑀩𑁆𑀬𑀸𑀓𑀢𑀲𑁆𑀲, 𑀅𑀓𑀼𑀲𑀮𑀸𑀩𑁆𑀬𑀸𑀓𑀢𑀲𑁆𑀲, 𑀅𑀩𑁆𑀬𑀸𑀓𑀢𑁄 𑀅𑀩𑁆𑀬𑀸𑀓𑀢𑀲𑁆𑀲𑀸’’𑀢𑀺 𑀇𑀫𑁂 𑀲𑀢𑁆𑀢 𑀲𑀤𑀺𑀲𑀸. 𑀢𑁂 𑀲𑀦𑁆𑀥𑀸𑀬 𑀳𑁂𑀢𑀼𑀧𑀘𑁆𑀘𑀬𑀸 𑀦𑀆𑀭𑀫𑁆𑀫𑀡𑁂 𑀲𑀢𑁆𑀢𑀸𑀢𑀺 𑀯𑀼𑀢𑁆𑀢𑀁. 𑀦𑀅𑀥𑀺𑀧𑀢𑀺𑀬𑀸 𑀲𑀢𑁆𑀢𑀸𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀦𑀲𑀳𑀚𑀸𑀢𑀲𑁆𑀲 𑀧𑀦 𑀳𑁂𑀢𑀼𑀧𑀘𑁆𑀘𑀬𑀲𑁆𑀲 𑀅𑀪𑀸𑀯𑀸 𑀦𑀲𑀳𑀚𑀸𑀢𑁂 𑀏𑀓𑁄𑀧𑀺 𑀦 𑀮𑀩𑁆𑀪𑀢𑀺, 𑀢𑀲𑁆𑀫𑀸 𑀢𑁂𑀦 𑀲𑀤𑁆𑀥𑀺𑀁 𑀬𑁄𑀚𑀦𑀸 𑀦 𑀓𑀢𑀸. 𑀦𑀅𑀜𑁆𑀜𑀫𑀜𑁆𑀜𑁂 𑀓𑀼𑀲𑀮𑀸𑀤𑀬𑁄 𑀢𑀬𑁄 𑀭𑀽𑀧𑀸𑀩𑁆𑀬𑀸𑀓𑀢𑀲𑁆𑀲 𑀮𑀩𑁆𑀪𑀦𑁆𑀢𑀺, 𑀢𑁂 𑀲𑀦𑁆𑀥𑀸𑀬 𑀢𑀻𑀡𑀻𑀢𑀺 𑀯𑀼𑀢𑁆𑀢𑀁. 𑀢𑀣𑀸 𑀦𑀲𑀫𑁆𑀧𑀬𑀼𑀢𑁆𑀢𑁂. 𑀦𑀯𑀺𑀧𑁆𑀧𑀬𑀼𑀢𑁆𑀢𑁂 𑀧𑀦 𑀓𑀼𑀲𑀮𑀁 𑀓𑀼𑀲𑀮𑀲𑁆𑀲, 𑀅𑀓𑀼𑀲𑀮𑀁 𑀅𑀓𑀼𑀲𑀮𑀲𑁆𑀲, 𑀅𑀩𑁆𑀬𑀸𑀓𑀢𑀁 𑀅𑀩𑁆𑀬𑀸𑀓𑀢𑀲𑁆𑀲𑀸𑀢𑀺 𑀅𑀭𑀽𑀧𑀥𑀫𑁆𑀫𑀯𑀲𑁂𑀦 𑀢𑀻𑀡𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀦𑀦𑀺𑀲𑁆𑀲𑀬𑀦𑁄𑀅𑀢𑁆𑀣𑀺𑀦𑁄𑀅𑀯𑀺𑀕𑀢𑀸 𑀦𑀲𑀳𑀚𑀸𑀢𑁄 𑀯𑀺𑀬 𑀦 𑀮𑀩𑁆𑀪𑀦𑁆𑀢𑀺𑀬𑁂𑀯𑀸𑀢𑀺 𑀢𑁂𑀳𑀺𑀧𑀺 𑀲𑀤𑁆𑀥𑀺𑀁 𑀬𑁄𑀚𑀦𑀸 𑀦 𑀓𑀢𑀸. 𑀏𑀯𑀫𑁂𑀢𑁆𑀣 𑀲𑀢𑁆𑀢 𑀢𑀻𑀡𑀻𑀢𑀺 𑀤𑁆𑀯𑁂𑀬𑁂𑀯 𑀕𑀡𑀦𑀧𑀭𑀺𑀘𑁆𑀙𑁂𑀤𑀸, 𑀢𑁂𑀲𑀁 𑀯𑀲𑁂𑀦 𑀊𑀦𑀢𑀭𑀕𑀡𑀦𑁂𑀦 𑀲𑀤𑁆𑀥𑀺𑀁 𑀅𑀢𑀺𑀭𑁂𑀓𑀕𑀡𑀦𑀲𑁆𑀲𑀧𑀺 𑀕𑀡𑀦𑀁 𑀧𑀭𑀺𑀳𑀸𑀧𑁂𑀢𑁆𑀯𑀸 𑀧𑀘𑁆𑀘𑀬𑀖𑀝𑀦𑁂𑀲𑀼 𑀕𑀡𑀦𑀸 𑀯𑁂𑀤𑀺𑀢𑀩𑁆𑀩𑀸.

𑁫𑁫𑁧. 𑀢𑀢𑁆𑀣 𑀳𑁂𑀢𑀼𑀲𑀳𑀚𑀸𑀢𑀦𑀺𑀲𑁆𑀲𑀬𑀅𑀢𑁆𑀣𑀺𑀅𑀯𑀺𑀕𑀢𑀦𑁆𑀢𑀺 𑀦𑀸𑀭𑀫𑁆𑀫𑀡𑁂 𑀲𑀢𑁆𑀢𑀸𑀢𑀺 𑀓𑀼𑀲𑀮𑁄 𑀥𑀫𑁆𑀫𑁄 𑀓𑀼𑀲𑀮𑀲𑁆𑀲 𑀥𑀫𑁆𑀫𑀲𑁆𑀲 𑀳𑁂𑀢𑀼𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄, 𑀲𑀳𑀚𑀸𑀢𑀦𑀺𑀲𑁆𑀲𑀬𑀅𑀢𑁆𑀣𑀺𑀅𑀯𑀺𑀕𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄, 𑀦𑀸𑀭𑀫𑁆𑀫𑀡𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. 𑀓𑀼𑀲𑀮𑀸 𑀳𑁂𑀢𑀽 𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀁 𑀔𑀦𑁆𑀥𑀸𑀦𑀁 𑀳𑁂𑀢𑀼𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄, 𑀲𑀳𑀚𑀸𑀢𑀦𑀺𑀲𑁆𑀲𑀬𑀅𑀢𑁆𑀣𑀺𑀅𑀯𑀺𑀕𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄, 𑀦𑀸𑀭𑀫𑁆𑀫𑀡𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄𑀢𑀺 𑀇𑀫𑀺𑀦𑀸 𑀦𑀬𑁂𑀦 𑀲𑀢𑁆𑀢 𑀯𑀸𑀭𑀸 𑀉𑀤𑁆𑀥𑀭𑀺𑀢𑀩𑁆𑀩𑀸. 𑀦𑀸𑀥𑀺𑀧𑀢𑀺𑀬𑀸 𑀲𑀢𑁆𑀢𑀸𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀤𑀼𑀢𑀺𑀬𑁂 𑀖𑀝𑀦𑁂 𑀅𑀜𑁆𑀜𑀫𑀜𑁆𑀜𑀲𑁆𑀲 𑀧𑀯𑀺𑀝𑁆𑀞𑀢𑁆𑀢𑀸 𑀞𑀧𑁂𑀢𑁆𑀯𑀸 𑀦𑀲𑀫𑁆𑀧𑀬𑀼𑀢𑁆𑀢𑀁 𑀲𑁂𑀲𑁂𑀲𑀼 𑀢𑀻𑀡𑀻𑀢𑀺 𑀯𑀼𑀢𑁆𑀢𑀁. 𑀦𑀲𑀫𑁆𑀧𑀬𑀼𑀢𑁆𑀢𑁂 𑀧𑀦 𑀅𑀜𑁆𑀜𑀫𑀜𑁆𑀜𑀯𑀺𑀧𑁆𑀧𑀬𑀼𑀢𑁆𑀢𑀁 𑀧𑀝𑀺𑀲𑀦𑁆𑀥𑀺𑀦𑀸𑀫𑀭𑀽𑀧𑀁 𑀲𑀦𑁆𑀥𑀸𑀬 𑀏𑀓𑀦𑁆𑀢𑀺 𑀯𑀼𑀢𑁆𑀢𑀁. 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑁄 𑀘𑁂𑀢𑁆𑀣 𑀅𑀦𑀼𑀮𑁄𑀫𑀖𑀝𑀦𑁂 𑀧𑀯𑀺𑀝𑁆𑀞𑀢𑁆𑀢𑀸 𑀧𑀘𑁆𑀘𑀦𑀻𑀬𑀢𑁄 𑀦 𑀮𑀩𑁆𑀪𑀢𑀺, 𑀢𑀲𑁆𑀫𑀸 ‘‘𑀦𑀅𑀜𑁆𑀜𑀫𑀜𑁆𑀜𑁂’’𑀢𑀺 𑀦 𑀯𑀼𑀢𑁆𑀢𑀁. 𑀬𑀣𑀸 𑀘𑁂𑀢𑁆𑀣, 𑀏𑀯𑀁 𑀲𑁂𑀲𑀖𑀝𑀦𑁂𑀲𑀼𑀧𑀺 𑀧𑀯𑀺𑀝𑁆𑀞𑀧𑀘𑁆𑀘𑀬𑀸 𑀧𑀘𑁆𑀘𑀦𑀻𑀬𑀢𑁄 𑀦 𑀮𑀩𑁆𑀪𑀦𑁆𑀢𑀻𑀢𑀺 𑀦 𑀯𑀼𑀢𑁆𑀢𑀸. 𑀢𑀢𑀺𑀬𑀖𑀝𑀦𑁂 𑀲𑀫𑁆𑀧𑀬𑀼𑀢𑁆𑀢𑀲𑁆𑀲 𑀧𑀯𑀺𑀝𑁆𑀞𑀢𑁆𑀢𑀸 𑀲𑀩𑁆𑀩𑀢𑁆𑀣 𑀢𑀻𑀡𑀺𑀬𑁂𑀯. 𑀘𑀢𑀼𑀢𑁆𑀣𑀖𑀝𑀦𑁂 𑀯𑀺𑀧𑁆𑀧𑀬𑀼𑀢𑁆𑀢𑀲𑁆𑀲 𑀧𑀯𑀺𑀝𑁆𑀞𑀢𑁆𑀢𑀸 𑀢𑀻𑀡𑀺 𑀓𑀼𑀲𑀮𑀸𑀤𑀻𑀦𑀺 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀲𑁆𑀲. 𑀧𑀜𑁆𑀘𑀫𑁂 𑀯𑀺𑀧𑀸𑀓𑀲𑁆𑀲 𑀧𑀯𑀺𑀝𑁆𑀞𑀢𑁆𑀢𑀸 𑀲𑀩𑁆𑀩𑀢𑁆𑀣 𑀏𑀓𑀁 𑀅𑀩𑁆𑀬𑀸𑀓𑀢𑁂𑀦 𑀅𑀩𑁆𑀬𑀸𑀓𑀢𑀁. 𑀇𑀢𑁄 𑀧𑀭𑁂𑀲𑀼𑀧𑀺 𑀯𑀺𑀧𑀸𑀓𑀲𑀫𑁆𑀧𑀬𑀼𑀢𑁆𑀢𑁂𑀲𑀼 𑀏𑀲𑁂𑀯 𑀦𑀬𑁄.

𑁫𑁫𑁨. 𑀳𑁂𑀢𑀼𑀲𑀳𑀚𑀸𑀢𑀦𑀺𑀲𑁆𑀲𑀬𑀇𑀦𑁆𑀤𑁆𑀭𑀺𑀬𑀫𑀕𑁆𑀕𑀅𑀢𑁆𑀣𑀺𑀅𑀯𑀺𑀕𑀢𑀦𑁆𑀢𑀺 𑀦𑀸𑀭𑀫𑁆𑀫𑀡𑁂 𑀘𑀢𑁆𑀢𑀸𑀭𑀻𑀢𑀺 𑀓𑀼𑀲𑀮𑁄 𑀓𑀼𑀲𑀮𑀲𑁆𑀲, 𑀅𑀩𑁆𑀬𑀸𑀓𑀢𑀲𑁆𑀲, 𑀓𑀼𑀲𑀮𑀸𑀩𑁆𑀬𑀸𑀓𑀢𑀲𑁆𑀲; 𑀅𑀩𑁆𑀬𑀸𑀓𑀢𑁄 𑀅𑀩𑁆𑀬𑀸𑀓𑀢𑀲𑁆𑀲𑀸𑀢𑀺 𑀇𑀫𑁂𑀲𑀁 𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀲𑁂𑀲𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀦𑀅𑀜𑁆𑀜𑀫𑀜𑁆𑀜𑁂 𑀤𑁆𑀯𑁂𑀢𑀺 𑀓𑀼𑀲𑀮𑁄 𑀅𑀩𑁆𑀬𑀸𑀓𑀢𑀲𑁆𑀲, 𑀢𑀣𑀸 𑀅𑀩𑁆𑀬𑀸𑀓𑀢𑁄. 𑀧𑀭𑀢𑁄𑀧𑀺 𑀤𑁆𑀯𑀻𑀲𑀼 𑀏𑀲𑁂𑀯 𑀦𑀬𑁄. 𑀇𑀫𑀺𑀦𑀸 𑀉𑀧𑀸𑀬𑁂𑀦 𑀲𑀩𑁆𑀩𑀖𑀝𑀦𑁂𑀲𑀼 𑀮𑀩𑁆𑀪𑀫𑀸𑀦𑀯𑀲𑁂𑀦 𑀕𑀡𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀲𑀩𑁆𑀩𑀸𑀦𑀺𑀧𑀺 𑀘𑁂𑀢𑀸𑀦𑀺 𑀇𑀫𑀲𑁆𑀫𑀺𑀁 𑀅𑀦𑀼𑀮𑁄𑀫𑀧𑀘𑁆𑀘𑀦𑀻𑀬𑁂 𑀲𑀳𑀚𑀸𑀢𑀯𑀲𑁂𑀦 𑀘𑁂𑀯 𑀧𑀓𑀺𑀡𑁆𑀡𑀓𑀯𑀲𑁂𑀦 𑀘 𑀧𑀦𑁆𑀦𑀭𑀲𑀸𑀥𑀺𑀓𑀸𑀦𑀺 𑀘𑀢𑁆𑀢𑀸𑀭𑀺 𑀖𑀝𑀦𑀲𑀢𑀸𑀦𑀺 𑀯𑀼𑀢𑁆𑀢𑀸𑀦𑀺. 𑀢𑁂𑀲𑀼 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀖𑀝𑀦𑁂 𑀬𑁂 𑀅𑀦𑀼𑀮𑁄𑀫𑀢𑁄 𑀞𑀺𑀢𑀸 𑀧𑀘𑁆𑀘𑀬𑀸, 𑀢𑁂𑀲𑀁 𑀏𑀓𑁄𑀧𑀺 𑀧𑀘𑁆𑀘𑀦𑀻𑀬𑀢𑁄 𑀦 𑀮𑀩𑁆𑀪𑀢𑀺. 𑀳𑁂𑀢𑀼𑀫𑀽𑀮𑀓𑁂 𑀘𑁂𑀢𑁆𑀣 𑀧𑀞𑀫𑁂 𑀖𑀝𑀦𑁂 𑀅𑀦𑀼𑀮𑁄𑀫𑀢𑁄 𑀧𑀜𑁆𑀘𑀦𑁆𑀦𑀁 𑀧𑀘𑁆𑀘𑀬𑀸𑀦𑀁 𑀞𑀺𑀢𑀢𑁆𑀢𑀸 𑀧𑀘𑁆𑀘𑀦𑀻𑀬𑀢𑁄 𑀏𑀓𑀽𑀦𑀯𑀻𑀲𑀢𑀺 𑀧𑀘𑁆𑀘𑀬𑀸 𑀆𑀕𑀢𑀸. 𑀏𑀯𑀁 𑀲𑁂𑀲𑁂𑀲𑀼𑀧𑀺 𑀅𑀦𑀼𑀮𑁄𑀫𑀢𑁄 𑀞𑀺𑀢𑀸𑀯𑀲𑁂𑀲𑀸 𑀧𑀘𑁆𑀘𑀦𑀻𑀬𑀢𑁄 𑀆𑀕𑀢𑀸. 𑀅𑀦𑀼𑀮𑁄𑀫𑀢𑁄 𑀘𑁂𑀢𑁆𑀣 𑀩𑀳𑀽𑀲𑀼𑀧𑀺 𑀞𑀺𑀢𑁂𑀲𑀼 𑀧𑀘𑁆𑀘𑀦𑀻𑀬𑀢𑁄 𑀏𑀓𑁂𑀓𑁄𑀯 𑀆𑀕𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀬𑀣𑀸 𑀘 𑀳𑁂𑀢𑀼𑀫𑀽𑀮𑀓𑁂, 𑀏𑀯𑀁 𑀆𑀭𑀫𑁆𑀫𑀡𑀸𑀤𑀺𑀫𑀽𑀮𑀓𑁂𑀲𑀼𑀧𑀺 𑀲𑀩𑁆𑀩𑀫𑁂𑀢𑀁 𑀯𑀺𑀥𑀸𑀦𑀁 𑀬𑀣𑀸𑀦𑀼𑀭𑀽𑀧𑀢𑁄 𑀯𑁂𑀤𑀺𑀢𑀩𑁆𑀩𑀦𑁆𑀢𑀺.

𑀅𑀦𑀼𑀮𑁄𑀫𑀧𑀘𑁆𑀘𑀦𑀻𑀬𑀯𑀡𑁆𑀡𑀦𑀸.

𑀧𑀘𑁆𑀘𑀦𑀻𑀬𑀸𑀦𑀼𑀮𑁄𑀫𑀯𑀡𑁆𑀡𑀦𑀸

𑁬𑁩𑁧. 𑀧𑀘𑁆𑀘𑀦𑀻𑀬𑀸𑀦𑀼𑀮𑁄𑀫𑁂𑀧𑀺 ‘‘𑀳𑁂𑀢𑀼𑀬𑀸 𑀲𑀢𑁆𑀢, 𑀆𑀭𑀫𑁆𑀫𑀡𑁂 𑀦𑀯𑀸’’𑀢𑀺 𑀏𑀯𑀁 𑀅𑀦𑀼𑀮𑁄𑀫𑁂 ‘‘𑀦𑀳𑁂𑀢𑀼𑀬𑀸 𑀧𑀦𑁆𑀦𑀭𑀲, 𑀦𑀸𑀭𑀫𑁆𑀫𑀡𑁂 𑀧𑀦𑁆𑀦𑀭𑀲𑀸’’𑀢𑀺 𑀏𑀯𑀁 𑀧𑀘𑁆𑀘𑀦𑀻𑀬𑁂 𑀘 𑀮𑀤𑁆𑀥𑀕𑀡𑀦𑁂𑀲𑀼 𑀧𑀘𑁆𑀘𑀬𑁂𑀲𑀼 𑀬𑁄 𑀧𑀘𑁆𑀘𑀦𑀻𑀬𑀢𑁄 𑀞𑀺𑀢𑁄, 𑀢𑀲𑁆𑀲 𑀧𑀘𑁆𑀘𑀦𑀻𑀬𑀢𑁄 𑀮𑀤𑁆𑀥𑀯𑀸𑀭𑁂𑀲𑀼 𑀬𑁂 𑀅𑀦𑀼𑀮𑁄𑀫𑀢𑁄 𑀞𑀺𑀢𑀲𑁆𑀲 𑀅𑀦𑀼𑀮𑁄𑀫𑀢𑁄 𑀮𑀤𑁆𑀥𑀯𑀸𑀭𑁂𑀳𑀺 𑀲𑀤𑀺𑀲𑀸 𑀯𑀸𑀭𑀸, 𑀢𑁂𑀲𑀁 𑀯𑀲𑁂𑀦 𑀕𑀡𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀧𑀘𑁆𑀘𑀦𑀻𑀬𑀲𑁆𑀫𑀺𑀜𑁆𑀳𑀺 𑀦𑀳𑁂𑀢𑀼𑀧𑀘𑁆𑀘𑀬𑁂 ‘‘𑀦𑀳𑁂𑀢𑀼𑀬𑀸 𑀧𑀦𑁆𑀦𑀭𑀲𑀸’’𑀢𑀺 𑀧𑀦𑁆𑀦𑀭𑀲 𑀯𑀸𑀭𑀸 𑀮𑀤𑁆𑀥𑀸, 𑀅𑀦𑀼𑀮𑁄𑀫𑁂 𑀆𑀭𑀫𑁆𑀫𑀡𑀧𑀘𑁆𑀘𑀬𑁂 ‘‘𑀆𑀭𑀫𑁆𑀫𑀡𑁂 𑀦𑀯𑀸’’𑀢𑀺 𑀦𑀯 𑀯𑀸𑀭𑀸 𑀮𑀤𑁆𑀥𑀸. 𑀢𑀢𑁆𑀣 𑀬𑁂 𑀦𑀳𑁂𑀢𑀼𑀬𑀸 𑀧𑀦𑁆𑀦𑀭𑀲 𑀯𑀼𑀢𑁆𑀢𑀸, 𑀢𑁂𑀲𑀼 𑀬𑁂 𑀯𑀸𑀭𑀸 𑀆𑀭𑀫𑁆𑀫𑀡𑁂 𑀯𑀼𑀢𑁆𑀢𑁂𑀳𑀺 𑀦𑀯𑀳𑀺 𑀲𑀤𑀺𑀲𑀸, 𑀢𑁂𑀲𑀁 𑀯𑀲𑁂𑀦 𑀕𑀡𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀢𑀢𑁆𑀣 𑀬𑁂 𑀆𑀭𑀫𑁆𑀫𑀡𑁂 𑀦𑀯 𑀯𑀼𑀢𑁆𑀢𑀸, 𑀢𑁂 𑀦𑀳𑁂𑀢𑀼𑀬𑀸 𑀯𑀼𑀢𑁆𑀢𑁂𑀲𑀼 𑀧𑀦𑁆𑀦𑀭𑀲𑀲𑀼 𑀓𑀼𑀲𑀮𑁄 ‘‘𑀓𑀼𑀲𑀮𑀸𑀓𑀼𑀲𑀮𑀸𑀩𑁆𑀬𑀸𑀓𑀢𑀸𑀦𑀁, 𑀅𑀓𑀼𑀲𑀮𑁄 𑀅𑀓𑀼𑀲𑀮𑀓𑀼𑀲𑀮𑀸𑀩𑁆𑀬𑀸𑀓𑀢𑀸𑀦𑀁, 𑀅𑀩𑁆𑀬𑀸𑀓𑀢𑁄 𑀅𑀩𑁆𑀬𑀸𑀓𑀢𑀓𑀼𑀲𑀮𑀸𑀓𑀼𑀲𑀮𑀸𑀦’’𑀦𑁆𑀢𑀺 𑀇𑀫𑁂𑀳𑀺 𑀦𑀯𑀳𑀺 𑀲𑀤𑀺𑀲𑀸, 𑀢𑁂 𑀲𑀦𑁆𑀥𑀸𑀬 𑀦𑀳𑁂𑀢𑀼𑀬𑀸 𑀆𑀭𑀫𑁆𑀫𑀡𑁂 𑀦𑀯𑀸𑀢𑀺 𑀯𑀼𑀢𑁆𑀢𑀁. 𑀅𑀥𑀺𑀧𑀢𑀺𑀬𑀸 𑀤𑀲𑀸𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀆𑀭𑀫𑁆𑀫𑀡𑀸𑀤𑀻𑀦𑀜𑁆𑀳𑀺 𑀅𑀦𑀼𑀮𑁄𑀫𑀕𑀡𑀦𑀸𑀬 𑀬𑁂 𑀯𑀸𑀭𑀸 𑀯𑀼𑀢𑁆𑀢𑀸 𑀦𑀳𑁂𑀢𑀼𑀧𑀘𑁆𑀘𑀬𑁂𑀦 𑀲𑀤𑁆𑀥𑀺𑀁 𑀲𑀁𑀲𑀦𑁆𑀤𑀦𑁂𑀧𑀺 𑀢𑁂 𑀲𑀩𑁆𑀩𑁂 𑀮𑀩𑁆𑀪𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸. ‘‘𑀓𑀼𑀲𑀮𑁄 𑀥𑀫𑁆𑀫𑁄 𑀓𑀼𑀲𑀮𑀲𑁆𑀲 𑀥𑀫𑁆𑀫𑀲𑁆𑀲 𑀦𑀳𑁂𑀢𑀼𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄 𑀆𑀭𑀫𑁆𑀫𑀡𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄, 𑀤𑀸𑀦𑀁 𑀤𑀢𑁆𑀯𑀸 𑀲𑀻𑀮𑀁 𑀲𑀫𑀸𑀤𑀺𑀬𑀺𑀢𑁆𑀯𑀸 𑀉𑀧𑁄𑀲𑀣𑀓𑀫𑁆𑀫𑀁 𑀓𑀢𑁆𑀯𑀸 𑀢𑀁 𑀧𑀘𑁆𑀘𑀯𑁂𑀓𑁆𑀔𑀢𑀺, 𑀧𑀼𑀩𑁆𑀩𑁂 𑀲𑀼𑀘𑀺𑀡𑁆𑀡𑀸𑀦𑀺 𑀧𑀘𑁆𑀘𑀯𑁂𑀓𑁆𑀔𑀢𑀻’’𑀢𑀺 𑀇𑀫𑀺𑀦𑀸 𑀉𑀧𑀸𑀬𑁂𑀦 𑀢𑁂𑀲𑀁 𑀧𑀸𑀴𑀺 𑀉𑀤𑁆𑀥𑀭𑀺𑀢𑀩𑁆𑀩𑀸.

𑀦𑀳𑁂𑀢𑀼𑀧𑀘𑁆𑀘𑀬𑀸 𑀅𑀥𑀺𑀧𑀢𑀺𑀬𑀸 𑀤𑀲𑀸𑀢𑀺 𑀏𑀢𑁆𑀣 𑀞𑀧𑁂𑀢𑁆𑀯𑀸 𑀯𑀻𑀫𑀁𑀲𑀸𑀥𑀺𑀧𑀢𑀺𑀁 𑀲𑁂𑀲𑀸𑀥𑀺𑀧𑀢𑀺𑀯𑀲𑁂𑀦 𑀅𑀦𑀼𑀮𑁄𑀫𑀯𑀺𑀪𑀗𑁆𑀕𑁂 𑀆𑀕𑀢𑀯𑀸𑀭𑀸 𑀉𑀤𑁆𑀥𑀭𑀺𑀢𑀩𑁆𑀩𑀸. 𑀏𑀯𑀫𑁂𑀢𑁆𑀣 𑀦𑀯 𑀤𑀲𑀲𑀢𑁆𑀢𑀢𑀻𑀡𑀺𑀢𑁂𑀭𑀲𑀏𑀓𑀦𑁆𑀢𑀺 𑀙 𑀕𑀡𑀦𑀧𑀭𑀺𑀘𑁆𑀙𑁂𑀤𑀸, 𑀢𑁂𑀲𑀁 𑀯𑀲𑁂𑀦 𑀊𑀦𑀢𑀭𑀕𑀡𑀦𑁂𑀦 𑀲𑀤𑁆𑀥𑀺𑀁 𑀅𑀢𑀺𑀭𑁂𑀓𑀕𑀡𑀦𑀲𑁆𑀲𑀸𑀧𑀺 𑀕𑀡𑀦𑀁 𑀧𑀭𑀺𑀳𑀸𑀧𑁂𑀢𑁆𑀯𑀸 𑀦𑀳𑁂𑀢𑀼𑀫𑀽𑀮𑀓𑀸𑀤𑀻𑀦𑀁 𑀦𑀬𑀸𑀦𑀁 𑀢𑀺𑀫𑀽𑀮𑀓𑀸𑀤𑀻𑀲𑀼 𑀲𑀩𑁆𑀩𑀲𑀁𑀲𑀦𑁆𑀤𑀦𑁂𑀲𑀼 𑀕𑀡𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀇𑀤𑀁 𑀢𑀸𑀯 𑀲𑀸𑀥𑀸𑀭𑀡𑀮𑀓𑁆𑀔𑀡𑀁. 𑀦 𑀧𑀦𑁂𑀢𑀁 𑀲𑀩𑁆𑀩𑀲𑀁𑀲𑀦𑁆𑀤𑀦𑁂𑀲𑀼 𑀕𑀘𑁆𑀙𑀢𑀺, 𑀬𑁂𑀳𑀺 𑀧𑀦 𑀧𑀘𑁆𑀘𑀬𑁂𑀳𑀺 𑀲𑀤𑁆𑀥𑀺𑀁 𑀬𑁂𑀲𑀁 𑀧𑀘𑁆𑀘𑀬𑀸𑀦𑀁 𑀲𑀁𑀲𑀦𑁆𑀤𑀦𑁂 𑀬𑁂 𑀯𑀸𑀭𑀸 𑀯𑀺𑀭𑀼𑀚𑁆𑀛𑀦𑁆𑀢𑀺, 𑀢𑁂 𑀅𑀧𑀦𑁂𑀢𑁆𑀯𑀸 𑀅𑀯𑀲𑁂𑀲𑀸𑀦𑀁 𑀯𑀲𑁂𑀦𑀧𑁂𑀢𑁆𑀣 𑀕𑀡𑀦𑀸 𑀯𑁂𑀤𑀺𑀢𑀩𑁆𑀩𑀸.

𑀦𑀳𑁂𑀢𑀼𑀧𑀘𑁆𑀘𑀬𑀸 𑀦𑀆𑀭𑀫𑁆𑀫𑀡𑀧𑀘𑁆𑀘𑀬𑀸 𑀅𑀥𑀺𑀧𑀢𑀺𑀬𑀸 𑀲𑀢𑁆𑀢𑀸𑀢𑀺 𑀏𑀢𑁆𑀣 𑀳𑀺 𑀓𑀼𑀲𑀮𑁄 𑀅𑀓𑀼𑀲𑀮𑀲𑁆𑀲; 𑀅𑀩𑁆𑀬𑀸𑀓𑀢𑁄 𑀓𑀼𑀲𑀮𑀲𑁆𑀲, 𑀅𑀓𑀼𑀲𑀮𑀲𑁆𑀲𑀸𑀢𑀺 𑀇𑀫𑁂 𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀯𑀲𑁂𑀦 𑀮𑀩𑁆𑀪𑀫𑀸𑀦𑀸 𑀢𑀬𑁄 𑀯𑀸𑀭𑀸 𑀯𑀺𑀭𑀼𑀚𑁆𑀛𑀦𑁆𑀢𑀺. 𑀓𑀲𑁆𑀫𑀸? 𑀦𑀆𑀭𑀫𑁆𑀫𑀡𑀧𑀘𑁆𑀘𑀬𑀸𑀢𑀺 𑀯𑀼𑀢𑁆𑀢𑀢𑁆𑀢𑀸. 𑀢𑀲𑁆𑀫𑀸 𑀢𑁂 𑀅𑀧𑀦𑁂𑀢𑁆𑀯𑀸 𑀲𑀳𑀚𑀸𑀢𑀸𑀥𑀺𑀧𑀢𑀺𑀦𑀬𑁂𑀦𑁂𑀯𑁂𑀢𑁆𑀣 ‘‘𑀓𑀼𑀲𑀮𑁄 𑀓𑀼𑀲𑀮𑀲𑁆𑀲, 𑀅𑀩𑁆𑀬𑀸𑀓𑀢𑀲𑁆𑀲, 𑀓𑀼𑀲𑀮𑀸𑀩𑁆𑀬𑀸𑀓𑀢𑀲𑁆𑀲; 𑀅𑀓𑀼𑀲𑀮𑁄 𑀅𑀓𑀼𑀲𑀮𑀲𑁆𑀲, 𑀅𑀩𑁆𑀬𑀸𑀓𑀢𑀲𑁆𑀲, 𑀅𑀓𑀼𑀲𑀮𑀸𑀩𑁆𑀬𑀸𑀓𑀢𑀲𑁆𑀲; 𑀅𑀩𑁆𑀬𑀸𑀓𑀢𑁄 𑀅𑀩𑁆𑀬𑀸𑀓𑀢𑀲𑁆𑀲𑀸’’𑀢𑀺 𑀲𑀢𑁆𑀢 𑀯𑀸𑀭𑀸 𑀯𑁂𑀤𑀺𑀢𑀩𑁆𑀩𑀸. 𑀢𑁂𑀧𑀺 𑀦𑀳𑁂𑀢𑀼𑀧𑀘𑁆𑀘𑀬𑀸𑀢𑀺 𑀯𑀘𑀦𑀢𑁄 𑀞𑀧𑁂𑀢𑁆𑀯𑀸 𑀯𑀻𑀫𑀁𑀲𑀸𑀥𑀺𑀧𑀢𑀺𑀁 𑀲𑁂𑀲𑀸𑀥𑀺𑀧𑀢𑀻𑀦𑀁 𑀯𑀲𑁂𑀦. 𑀏𑀯𑀁 𑀲𑀩𑁆𑀩𑀢𑁆𑀣 𑀊𑀦𑀢𑀭𑀕𑀡𑀦𑀧𑀘𑁆𑀘𑀬𑀯𑀲𑁂𑀦 𑀅𑀯𑀺𑀭𑀼𑀚𑁆𑀛𑀫𑀸𑀦𑀕𑀡𑀦𑀯𑀲𑁂𑀦 𑀘 𑀕𑀡𑀦𑀸 𑀯𑁂𑀤𑀺𑀢𑀩𑁆𑀩𑀸.

𑀬𑁂𑀲𑀼 𑀘 𑀧𑀘𑁆𑀘𑀬𑁂𑀲𑀼 𑀧𑀘𑁆𑀘𑀦𑀻𑀬𑀢𑁄 𑀞𑀺𑀢𑁂𑀲𑀼 𑀬𑁂 𑀅𑀦𑀼𑀮𑁄𑀫𑀢𑁄 𑀦 𑀢𑀺𑀝𑁆𑀞𑀦𑁆𑀢𑀺, 𑀢𑁂𑀧𑀺 𑀯𑁂𑀤𑀺𑀢𑀩𑁆𑀩𑀸. 𑀲𑁂𑀬𑁆𑀬𑀣𑀺𑀤𑀁 𑁋 𑀅𑀦𑀦𑁆𑀢𑀭𑁂 𑀧𑀘𑁆𑀘𑀦𑀻𑀬𑀢𑁄 𑀞𑀺𑀢𑁂 𑀲𑀫𑀦𑀦𑁆𑀢𑀭𑀸𑀲𑁂𑀯𑀦𑀦𑀢𑁆𑀣𑀺𑀯𑀺𑀕𑀢𑀸 𑀅𑀦𑀼𑀮𑁄𑀫𑀢𑁄 𑀦 𑀢𑀺𑀝𑁆𑀞𑀦𑁆𑀢𑀺, 𑀲𑀳𑀚𑀸𑀢𑁂 𑀧𑀘𑁆𑀘𑀦𑀻𑀬𑀢𑁄 𑀞𑀺𑀢𑁂 𑀳𑁂𑀢𑀼𑀅𑀜𑁆𑀜𑀫𑀜𑁆𑀜𑀯𑀺𑀧𑀸𑀓𑀛𑀸𑀦𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀸 𑀅𑀦𑀼𑀮𑁄𑀫𑀢𑁄 𑀦 𑀢𑀺𑀝𑁆𑀞𑀦𑁆𑀢𑀺, 𑀦𑀺𑀲𑁆𑀲𑀬𑁂 𑀧𑀘𑁆𑀘𑀦𑀻𑀬𑀢𑁄 𑀞𑀺𑀢𑁂 𑀯𑀢𑁆𑀣𑀼𑀧𑀼𑀭𑁂𑀚𑀸𑀢𑁄 𑀅𑀦𑀼𑀮𑁄𑀫𑀢𑁄 𑀦 𑀢𑀺𑀝𑁆𑀞𑀢𑀺. 𑀆𑀳𑀸𑀭𑁂 𑀯𑀸 𑀇𑀦𑁆𑀤𑁆𑀭𑀺𑀬𑁂 𑀯𑀸 𑀧𑀘𑁆𑀘𑀦𑀻𑀬𑀢𑁄 𑀞𑀺𑀢𑁂 𑀳𑁂𑀢𑀼𑀅𑀜𑁆𑀜𑀫𑀜𑁆𑀜𑀯𑀺𑀧𑀸𑀓𑀛𑀸𑀦𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀸 𑀅𑀦𑀼𑀮𑁄𑀫𑀢𑁄 𑀦 𑀢𑀺𑀝𑁆𑀞𑀦𑁆𑀢𑀺. 𑀆𑀭𑀫𑁆𑀫𑀡𑁂 𑀧𑀦 𑀧𑀘𑁆𑀘𑀦𑀻𑀬𑀢𑁄 𑀞𑀺𑀢𑁂 𑀅𑀥𑀺𑀧𑀢𑀺𑀉𑀧𑀦𑀺𑀲𑁆𑀲𑀬𑀸 𑀅𑀦𑀼𑀮𑁄𑀫𑀢𑁄 𑀦 𑀢𑀺𑀝𑁆𑀞𑀦𑁆𑀢𑀺, 𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀆𑀭𑀫𑁆𑀫𑀡𑀽𑀧𑀦𑀺𑀲𑁆𑀲𑀬𑀸 𑀧𑀦 𑀦 𑀮𑀩𑁆𑀪𑀦𑁆𑀢𑀺. 𑀇𑀫𑀺𑀦𑀸 𑀉𑀧𑀸𑀬𑁂𑀦 𑀲𑀩𑁆𑀩𑀢𑁆𑀣 𑀬𑀁 𑀮𑀩𑁆𑀪𑀢𑀺, 𑀬𑀜𑁆𑀘 𑀦 𑀮𑀩𑁆𑀪𑀢𑀺, 𑀢𑀁 𑀚𑀸𑀦𑀺𑀢𑁆𑀯𑀸 𑀮𑀩𑁆𑀪𑀫𑀸𑀦𑀯𑀲𑁂𑀦 𑀯𑀸𑀭𑀸 𑀉𑀤𑁆𑀥𑀭𑀺𑀢𑀩𑁆𑀩𑀸.

𑀢𑀢𑁆𑀣 𑀲𑀩𑁆𑀩𑁂𑀲𑀼𑀧𑀺 𑀢𑀺𑀫𑀽𑀮𑀓𑀸𑀤𑀻𑀲𑀼 𑀅𑀦𑀦𑁆𑀢𑀭𑁂 𑀲𑀢𑁆𑀢𑀸𑀢𑀺𑀆𑀤𑀬𑁄 𑀤𑀼𑀫𑀽𑀮𑀓𑁂 𑀮𑀤𑁆𑀥𑀯𑀸𑀭𑀸𑀬𑁂𑀯 𑀲𑀢𑁆𑀢𑀫𑀽𑀮𑀓𑀸𑀤𑀻𑀲𑀼 𑀧𑀦 𑀦𑀲𑀳𑀚𑀸𑀢𑀧𑀘𑁆𑀘𑀬𑀸 𑀦𑀺𑀲𑁆𑀲𑀬𑁂 𑀢𑀻𑀡𑀻𑀢𑀺 𑀧𑀼𑀭𑁂𑀚𑀸𑀢𑀯𑀲𑁂𑀦 𑀯𑀢𑁆𑀣𑀼𑀦𑀺𑀲𑁆𑀲𑀬𑁂 𑀢𑀻𑀡𑀺. 𑀓𑀫𑁆𑀫𑁂 𑀤𑁆𑀯𑁂 𑀦𑀸𑀦𑀸𑀓𑁆𑀔𑀡𑀺𑀓𑀯𑀲𑁂𑀦𑁂𑀯. 𑀆𑀳𑀸𑀭𑁂 𑀏𑀓𑀁 𑀓𑀩𑀴𑀻𑀓𑀸𑀭𑀸𑀳𑀸𑀭𑀯𑀲𑁂𑀦. 𑀇𑀦𑁆𑀤𑁆𑀭𑀺𑀬𑁂 𑀏𑀓𑀁 𑀭𑀽𑀧𑀺𑀦𑁆𑀤𑁆𑀭𑀺𑀬𑀯𑀲𑁂𑀦. 𑀓𑀫𑁂𑀦 𑀕𑀦𑁆𑀢𑁆𑀯𑀸 𑀯𑀺𑀧𑁆𑀧𑀬𑀼𑀢𑁆𑀢𑁂 𑀢𑀻𑀡𑀻𑀢𑀺 𑀓𑀼𑀲𑀮𑀸𑀤𑀻𑀦𑀁 𑀅𑀩𑁆𑀬𑀸𑀓𑀢𑀦𑁆𑀢𑀸𑀦𑀺 𑀧𑀘𑁆𑀙𑀸𑀚𑀸𑀢𑀯𑀲𑁂𑀦. 𑀅𑀢𑁆𑀣𑀺𑀅𑀯𑀺𑀕𑀢𑁂𑀲𑀼 𑀧𑀜𑁆𑀘𑀸𑀢𑀺 𑀢𑀸𑀦𑀺 𑀘𑁂𑀯 𑀢𑀻𑀡𑀺, 𑀓𑀼𑀲𑀮𑀸𑀩𑁆𑀬𑀸𑀓𑀢𑀸 𑀅𑀩𑁆𑀬𑀸𑀓𑀢𑀲𑁆𑀲, 𑀅𑀓𑀼𑀲𑀮𑀸𑀩𑁆𑀬𑀸𑀓𑀢𑀸 𑀅𑀩𑁆𑀬𑀸𑀓𑀢𑀲𑁆𑀲𑀸𑀢𑀺 𑀇𑀫𑀸𑀦𑀺 𑀘 𑀤𑁆𑀯𑁂 𑀧𑀘𑁆𑀙𑀸𑀚𑀸𑀢𑀸𑀳𑀸𑀭𑀺𑀦𑁆𑀤𑁆𑀭𑀺𑀬𑀯𑀲𑁂𑀦𑀸𑀢𑀺. 𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬𑀲𑁆𑀲 𑀧𑀘𑁆𑀘𑀦𑀻𑀓𑀪𑀸𑀯𑀢𑁄 𑀧𑀝𑁆𑀞𑀸𑀬 𑀧𑀦 𑀅𑀢𑁆𑀣𑀺𑀅𑀯𑀺𑀕𑀢𑁂𑀲𑀼 𑀏𑀓𑀦𑁆𑀢𑀺 𑀅𑀩𑁆𑀬𑀸𑀓𑀢𑁄 𑀅𑀩𑁆𑀬𑀸𑀓𑀢𑀲𑁆𑀲 𑀆𑀳𑀸𑀭𑀺𑀦𑁆𑀤𑁆𑀭𑀺𑀬𑀯𑀲𑁂𑀦. 𑀦𑀸𑀳𑀸𑀭𑁂 𑀕𑀳𑀺𑀢𑁂 𑀦𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑀸𑀢𑀺 𑀦 𑀕𑀳𑁂𑀢𑀩𑁆𑀩𑀁. 𑀢𑀣𑀸 𑀦𑀇𑀦𑁆𑀤𑁆𑀭𑀺𑀬𑁂 𑀕𑀳𑀺𑀢𑁂 𑀦𑀸𑀳𑀸𑀭𑀧𑀘𑁆𑀘𑀬𑀸𑀢𑀺. 𑀓𑀲𑁆𑀫𑀸? 𑀤𑁆𑀯𑀻𑀲𑀼 𑀏𑀓𑀢𑁄 𑀕𑀳𑀺𑀢𑁂𑀲𑀼 𑀕𑀡𑁂𑀢𑀩𑁆𑀩𑀯𑀸𑀭𑀲𑁆𑀲 𑀅𑀪𑀸𑀯𑀢𑁄. 𑀛𑀸𑀦𑀫𑀕𑁆𑀕𑀸𑀤𑀻𑀲𑀼𑀧𑀺 𑀧𑀘𑁆𑀘𑀦𑀻𑀓𑀢𑁄 𑀞𑀺𑀢𑁂𑀲𑀼 𑀆𑀳𑀸𑀭𑀢𑁄 𑀯𑀸 𑀇𑀦𑁆𑀤𑁆𑀭𑀺𑀬𑀢𑁄 𑀯𑀸 𑀏𑀓𑀁 𑀅𑀦𑀼𑀮𑁄𑀫𑀁 𑀅𑀓𑀢𑁆𑀯𑀸𑀯 𑀅𑀯𑀲𑀸𑀦𑁂 𑀇𑀦𑁆𑀤𑁆𑀭𑀺𑀬𑁂 𑀏𑀓𑀁, 𑀅𑀢𑁆𑀣𑀺𑀬𑀸 𑀏𑀓𑀁, 𑀅𑀯𑀺𑀕𑀢𑁂 𑀏𑀓𑀁, 𑀆𑀳𑀸𑀭𑁂 𑀏𑀓𑀁, 𑀅𑀢𑁆𑀣𑀺𑀬𑀸 𑀏𑀓𑀁, 𑀅𑀯𑀺𑀕𑀢𑁂 𑀏𑀓𑀦𑁆𑀢𑀺 𑀯𑀼𑀢𑁆𑀢𑀁. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀦𑀳𑁂𑀢𑀼𑀫𑀽𑀮𑀓𑀁.

𑁬𑁩𑁬. 𑀦𑀸𑀭𑀫𑁆𑀫𑀡𑀫𑀽𑀮𑀓𑀸𑀤𑀻𑀲𑀼 𑀦𑀅𑀜𑁆𑀜𑀫𑀜𑁆𑀜𑀫𑀽𑀮𑀓𑁂 𑀦𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀸 𑀳𑁂𑀢𑀼𑀬𑀸 𑀢𑀻𑀡𑀻𑀢𑀺 𑀓𑀼𑀲𑀮𑀸𑀤𑀻𑀦𑀺 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀦𑀁. 𑀅𑀥𑀺𑀧𑀢𑀺𑀬𑀸 𑀅𑀝𑁆𑀞𑀸𑀢𑀺 𑀅𑀥𑀺𑀧𑀢𑀺𑀬𑀸 𑀯𑀼𑀢𑁆𑀢𑁂𑀲𑀼 𑀤𑀲𑀲𑀼 ‘‘𑀓𑀼𑀲𑀮𑁄 𑀓𑀼𑀲𑀮𑀸𑀩𑁆𑀬𑀸𑀓𑀢𑀲𑁆𑀲, 𑀅𑀓𑀼𑀲𑀮𑁄 𑀅𑀓𑀼𑀲𑀮𑀸𑀩𑁆𑀬𑀸𑀓𑀢𑀲𑁆𑀲𑀸’’𑀢𑀺 𑀤𑁆𑀯𑁂 𑀅𑀧𑀦𑁂𑀢𑁆𑀯𑀸 𑀲𑁂𑀲𑀸𑀦𑀺 𑀅𑀝𑁆𑀞. 𑀲𑀳𑀚𑀸𑀢𑁂 𑀧𑀜𑁆𑀘𑀸𑀢𑀺 𑀳𑁂𑀢𑀼𑀬𑀸 𑀯𑀼𑀢𑁆𑀢𑁂𑀳𑀺 𑀢𑀻𑀳𑀺 𑀲𑀤𑁆𑀥𑀺𑀁 ‘‘𑀓𑀼𑀲𑀮𑁄 𑀘 𑀅𑀩𑁆𑀬𑀸𑀓𑀢𑁄 𑀘 𑀅𑀩𑁆𑀬𑀸𑀓𑀢𑀲𑁆𑀲, 𑀅𑀓𑀼𑀲𑀮𑁄 𑀘 𑀅𑀩𑁆𑀬𑀸𑀓𑀢𑁄 𑀘 𑀅𑀩𑁆𑀬𑀸𑀓𑀢𑀲𑁆𑀲𑀸’’𑀢𑀺 𑀇𑀫𑁂 𑀤𑁆𑀯𑁂. 𑀦𑀺𑀲𑁆𑀲𑀬𑁂 𑀲𑀢𑁆𑀢𑀸𑀢𑀺 𑀢𑁂𑀳𑀺 𑀧𑀜𑁆𑀘𑀳𑀺 𑀲𑀤𑁆𑀥𑀺𑀁 ‘‘𑀅𑀩𑁆𑀬𑀸𑀓𑀢𑁄 𑀓𑀼𑀲𑀮𑀲𑁆𑀲, 𑀅𑀩𑁆𑀬𑀸𑀓𑀢𑁄 𑀅𑀓𑀼𑀲𑀮𑀲𑁆𑀲𑀸’’𑀢𑀺 𑀇𑀫𑁂 𑀤𑁆𑀯𑁂 𑀯𑀢𑁆𑀣𑀼𑀯𑀲𑁂𑀦. 𑀓𑀫𑁆𑀫𑁂 𑀢𑀻𑀡𑀻𑀢𑀺 𑀳𑁂𑀢𑀼𑀬𑀸 𑀯𑀼𑀢𑁆𑀢𑀸𑀦𑁂𑀯. 𑀲𑁂𑀲𑀢𑀺𑀓𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀅𑀥𑀺𑀧𑀢𑀺𑀬𑀸 𑀢𑀻𑀡𑀻𑀢𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀸𑀦𑁂𑀯.

𑁬𑁪𑁪. 𑀦𑀸𑀳𑀸𑀭𑀫𑀽𑀮𑀓𑁂 𑀅𑀜𑁆𑀜𑀫𑀜𑁆𑀜𑁂 𑀢𑀻𑀡𑀻𑀢𑀺 𑀞𑀧𑁂𑀢𑁆𑀯𑀸 𑀆𑀳𑀸𑀭𑁂 𑀲𑁂𑀲𑀘𑁂𑀢𑀲𑀺𑀓𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀬𑀣𑀸 𑀘 𑀳𑁂𑀝𑁆𑀞𑀸, 𑀢𑀣𑀸 𑀇𑀥𑀸𑀧𑀺 𑀦𑀸𑀳𑀸𑀭𑀦𑀇𑀦𑁆𑀤𑁆𑀭𑀺𑀬𑁂𑀲𑀼 𑀏𑀓𑁂𑀓𑀫𑁂𑀯 𑀕𑀳𑀺𑀢𑀁, 𑀦 𑀤𑁆𑀯𑁂 𑀏𑀓𑀢𑁄.

𑁬𑁪𑁮. 𑀦𑀲𑀫𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀸 𑀳𑁂𑀢𑀼𑀬𑀸 𑀢𑀻𑀡𑀻𑀢𑀺 𑀳𑁂𑀝𑁆𑀞𑀸 𑀦𑀅𑀜𑁆𑀜𑀫𑀜𑁆𑀜𑁂 𑀯𑀼𑀢𑁆𑀢𑀸𑀦𑁂𑀯. 𑀅𑀥𑀺𑀧𑀢𑀺𑀬𑀸 𑀅𑀝𑁆𑀞𑀸𑀢𑀺 𑀯𑀼𑀢𑁆𑀢𑀸𑀦𑁂𑀯. 𑀦𑀯𑀺𑀧𑁆𑀧𑀬𑀼𑀢𑁆𑀢𑀫𑀽𑀮𑀓𑁂 𑀓𑀫𑁆𑀫𑁂 𑀧𑀜𑁆𑀘𑀸𑀢𑀺 𑀓𑀼𑀲𑀮𑀸𑀤𑀺𑀘𑁂𑀢𑀦𑀸 𑀲𑀳𑀚𑀸𑀢𑀓𑀼𑀲𑀮𑀸𑀤𑀻𑀦𑀁, 𑀦𑀸𑀦𑀸𑀓𑁆𑀔𑀡𑀺𑀓𑀸 𑀓𑀼𑀲𑀮𑀸𑀓𑀼𑀲𑀮𑀘𑁂𑀢𑀦𑀸 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀭𑀽𑀧𑀲𑁆𑀲𑀸𑀢𑀺 𑀏𑀯𑀁 𑀧𑀜𑁆𑀘. 𑀆𑀳𑀸𑀭𑀺𑀦𑁆𑀤𑁆𑀭𑀺𑀬𑁂𑀲𑀼 𑀢𑀻𑀡𑀺 𑀲𑀳𑀚𑀸𑀢𑀲𑀤𑀺𑀲𑀸𑀦𑀺. 𑀛𑀸𑀦𑀫𑀕𑁆𑀕𑀸𑀤𑀻𑀲𑀼 𑀢𑀻𑀡𑀺 𑀳𑁂𑀢𑀼𑀲𑀤𑀺𑀲𑀸𑀦𑀺.

𑁬𑁫𑁦. 𑀦𑁄𑀅𑀢𑁆𑀣𑀺𑀫𑀽𑀮𑀓𑁂 𑀬𑀲𑁆𑀫𑀸 𑀳𑁂𑀢𑀼 𑀦𑁄𑀅𑀢𑁆𑀣𑀺 𑀦𑀸𑀫 𑀦 𑀳𑁄𑀢𑀺, 𑀦𑀺𑀬𑀫𑀢𑁄 𑀅𑀢𑁆𑀣𑀺𑀬𑁂𑀯, 𑀢𑀲𑁆𑀫𑀸 𑀢𑀁 𑀅𑀕𑁆𑀕𑀳𑁂𑀢𑁆𑀯𑀸 𑀦𑀸𑀭𑀫𑁆𑀫𑀡𑁂 𑀦𑀯𑀸𑀢𑀺 𑀯𑀼𑀢𑁆𑀢𑀁. 𑀬𑀣𑀸 𑀘 𑀳𑁂𑀢𑀼, 𑀢𑀣𑀸 𑀅𑀜𑁆𑀜𑁂𑀧𑀺 𑀅𑀢𑁆𑀣𑀺𑀧𑀘𑁆𑀘𑀬𑀮𑀓𑁆𑀔𑀡𑀬𑀼𑀢𑁆𑀢𑀸 𑀏𑀢𑁆𑀣 𑀅𑀦𑀼𑀮𑁄𑀫𑀢𑁄 𑀦 𑀢𑀺𑀝𑁆𑀞𑀦𑁆𑀢𑀺. 𑀓𑀫𑁆𑀫𑁂 𑀤𑁆𑀯𑁂𑀢𑀺 𑀇𑀤𑀁 𑀧𑀦 𑀦𑀸𑀦𑀸𑀓𑁆𑀔𑀡𑀺𑀓𑀓𑀫𑁆𑀫𑀯𑀲𑁂𑀦 𑀯𑀼𑀢𑁆𑀢𑀁. 𑀧𑀘𑁆𑀘𑀦𑀻𑀬𑀢𑁄 𑀲𑀩𑁆𑀩𑁂 𑀮𑀩𑁆𑀪𑀦𑁆𑀢𑀺. 𑀬𑀁 𑀧𑀦 𑀅𑀦𑀼𑀮𑁄𑀫𑀢𑁄 𑀮𑀩𑁆𑀪𑀫𑀸𑀦𑀫𑁆𑀧𑀺 𑀅𑀕𑁆𑀕𑀳𑁂𑀢𑁆𑀯𑀸 𑀢𑀢𑁄 𑀧𑀼𑀭𑁂𑀢𑀭𑀸 𑀧𑀘𑁆𑀘𑀬𑀸 𑀧𑀘𑁆𑀘𑀦𑀻𑀬𑀢𑁄 𑀕𑀬𑁆𑀳𑀦𑁆𑀢𑀺, 𑀲𑁄 𑀧𑀘𑁆𑀙𑀸 𑀬𑁄𑀚𑀦𑀁 𑀮𑀪𑀢𑀺. 𑀢𑁂𑀦𑁂𑀯𑁂𑀢𑁆𑀣 ‘‘𑀦𑁄𑀅𑀢𑁆𑀣𑀺𑀧𑀘𑁆𑀘𑀬𑀸 𑀦𑀳𑁂𑀢𑀼𑀧𑀘𑁆𑀘𑀬𑀸…𑀧𑁂… 𑀦𑁄𑀅𑀯𑀺𑀕𑀢𑀧𑀘𑁆𑀘𑀬𑀸 𑀓𑀫𑁆𑀫𑁂 𑀤𑁆𑀯𑁂’’𑀢𑀺 𑀯𑀼𑀢𑁆𑀢𑀁. 𑀓𑀲𑁆𑀫𑀸 𑀧𑀦𑁂𑀲 𑀲𑀓𑀝𑁆𑀞𑀸𑀦𑁂𑀬𑁂𑀯 𑀦 𑀕𑀳𑀺𑀢𑁄𑀢𑀺? 𑀬𑀲𑁆𑀫𑀸 𑀅𑀯𑀲𑁂𑀲𑁂𑀲𑀼𑀧𑀺 𑀧𑀘𑁆𑀘𑀦𑀻𑀬𑀢𑁄 𑀞𑀺𑀢𑁂𑀲𑀼 𑀏𑀓𑁄𑀯 𑀅𑀦𑀼𑀮𑁄𑀫𑀢𑁄 𑀮𑀩𑁆𑀪𑀢𑀺. 𑀇𑀤𑀜𑁆𑀳𑀺 𑀇𑀫𑀲𑁆𑀫𑀺𑀁 𑀧𑀘𑁆𑀘𑀬𑀸𑀦𑀼𑀮𑁄𑀫𑁂 𑀮𑀓𑁆𑀔𑀡𑀁 𑁋 𑀬𑁄 𑀲𑀩𑁆𑀩𑁂𑀲𑀼 𑀧𑀘𑁆𑀘𑀦𑀻𑀬𑀢𑁄 𑀞𑀺𑀢𑁂𑀲𑀼 𑀏𑀓𑁄𑀯 𑀅𑀦𑀼𑀮𑁄𑀫𑀢𑁄 𑀮𑀩𑁆𑀪𑀢𑀺, 𑀲𑁄 𑀧𑀘𑁆𑀙𑀸 𑀯𑀼𑀘𑁆𑀘𑀢𑀻𑀢𑀺. 𑀦𑁄𑀅𑀢𑁆𑀣𑀺𑀧𑀘𑁆𑀘𑀬𑀸 𑀦𑁄𑀳𑁂𑀢𑀼𑀧𑀘𑁆𑀘𑀬𑀸…𑀧𑁂… 𑀦𑁄𑀅𑀯𑀺𑀕𑀢𑀧𑀘𑁆𑀘𑀬𑀸 𑀉𑀧𑀦𑀺𑀲𑁆𑀲𑀬𑁂 𑀦𑀯𑀸𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀇𑀤𑀁 𑀧𑀦 𑀧𑀓𑀢𑀽𑀧𑀦𑀺𑀲𑁆𑀲𑀬𑀯𑀲𑁂𑀦 𑀯𑀼𑀢𑁆𑀢𑀁. 𑀇𑀫𑀺𑀦𑀸 𑀉𑀧𑀸𑀬𑁂𑀦 𑀲𑀩𑁆𑀩𑀢𑁆𑀣 𑀮𑀩𑁆𑀪𑀫𑀸𑀦𑀁 𑀅𑀮𑀩𑁆𑀪𑀫𑀸𑀦𑀁 𑀧𑀼𑀭𑁂𑀯𑀼𑀢𑁆𑀢𑀁 𑀧𑀘𑁆𑀙𑀸𑀯𑀼𑀢𑁆𑀢𑀜𑁆𑀘 𑀯𑁂𑀤𑀺𑀢𑀩𑁆𑀩𑀦𑁆𑀢𑀺.

𑀧𑀜𑁆𑀳𑀸𑀯𑀸𑀭𑀲𑁆𑀲 𑀧𑀘𑁆𑀘𑀦𑀻𑀬𑀸𑀦𑀼𑀮𑁄𑀫𑀯𑀡𑁆𑀡𑀦𑀸.

𑀦𑀺𑀝𑁆𑀞𑀺𑀢𑀸 𑀘 𑀓𑀼𑀲𑀮𑀢𑁆𑀢𑀺𑀓𑀧𑀝𑁆𑀞𑀸𑀦𑀲𑁆𑀲 𑀯𑀡𑁆𑀡𑀦𑀸𑀢𑀺.