𑀧𑀘𑁆𑀘𑀬𑀸𑀦𑀼𑀮𑁄𑀫𑀧𑀘𑁆𑀘𑀦𑀻𑀬𑀯𑀡𑁆𑀡𑀦𑀸

𑁧𑁩𑁧-𑁧𑁮𑁯. 𑀇𑀤𑀸𑀦𑀺 𑀅𑀦𑀼𑀮𑁄𑀫𑀧𑀘𑁆𑀘𑀦𑀻𑀬𑁂 𑀕𑀡𑀦𑀁 𑀤𑀲𑁆𑀲𑁂𑀢𑀼𑀁 𑀳𑁂𑀢𑀼𑀧𑀘𑁆𑀘𑀬𑀸 𑀦𑀸𑀭𑀫𑁆𑀫𑀡𑁂 𑀧𑀜𑁆𑀘𑀸𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀳𑁂𑀢𑀸𑀥𑀺𑀧𑀢𑀺𑀫𑀕𑁆𑀕𑀧𑀘𑁆𑀘𑀬𑁂𑀲𑀼 𑀅𑀦𑀼𑀮𑁄𑀫𑀢𑁄 𑀞𑀺𑀢𑁂𑀲𑀼 𑀲𑀳𑀚𑀸𑀢𑀸𑀤𑀬𑁄 𑀘𑀢𑁆𑀢𑀸𑀭𑁄 𑀲𑀩𑁆𑀩𑀝𑁆𑀞𑀸𑀦𑀺𑀓𑀧𑀘𑁆𑀘𑀬𑀸, 𑀆𑀳𑀸𑀭𑀺𑀦𑁆𑀤𑁆𑀭𑀺𑀬𑀛𑀸𑀦𑀫𑀕𑁆𑀕𑀧𑀘𑁆𑀘𑀬𑀸 𑀘𑀢𑁆𑀢𑀸𑀭𑁄𑀢𑀺 𑀇𑀫𑁂 𑀅𑀝𑁆𑀞 𑀧𑀘𑁆𑀘𑀦𑀻𑀬𑀢𑁄 𑀦 𑀮𑀩𑁆𑀪𑀦𑁆𑀢𑀺. 𑀳𑁂𑀢𑀼𑀧𑀘𑁆𑀘𑀬𑀸𑀤𑀺𑀯𑀲𑁂𑀦 𑀳𑀺 𑀉𑀧𑁆𑀧𑀚𑁆𑀚𑀫𑀸𑀦𑁄 𑀥𑀫𑁆𑀫𑁄 𑀇𑀫𑁂 𑀅𑀝𑁆𑀞 𑀧𑀘𑁆𑀘𑀬𑁂 𑀅𑀮𑀪𑀦𑁆𑀢𑁄 𑀦𑀸𑀫 𑀦𑀢𑁆𑀣𑀺. 𑀆𑀭𑀫𑁆𑀫𑀡𑀅𑀦𑀦𑁆𑀢𑀭𑀲𑀫𑀦𑀦𑁆𑀢𑀭𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀬𑀼𑀢𑁆𑀢𑀦𑀢𑁆𑀣𑀺𑀯𑀺𑀕𑀢𑀧𑀘𑁆𑀘𑀬𑁂𑀲𑀼 𑀧𑀦 𑀅𑀦𑀼𑀮𑁄𑀫𑀢𑁄 𑀞𑀺𑀢𑁂𑀲𑀼 𑀅𑀭𑀽𑀧𑀝𑁆𑀞𑀸𑀦𑀺𑀓𑀸 𑀧𑀘𑁆𑀘𑀦𑀻𑀓𑀢𑁄 𑀦 𑀮𑀩𑁆𑀪𑀦𑁆𑀢𑀺. 𑀦 𑀳𑀺 𑀆𑀭𑀫𑁆𑀫𑀡𑀧𑀘𑁆𑀘𑀬𑀸𑀤𑀻𑀳𑀺 𑀉𑀧𑁆𑀧𑀚𑁆𑀚𑀫𑀸𑀦𑀸 𑀅𑀦𑀦𑁆𑀢𑀭𑀲𑀫𑀦𑀦𑁆𑀢𑀭𑀧𑀘𑁆𑀘𑀬𑀸𑀤𑀬𑁄 𑀦 𑀮𑀪𑀦𑁆𑀢𑀺. 𑀲𑀳𑀚𑀸𑀢𑀅𑀜𑁆𑀜𑀫𑀜𑁆𑀜𑀦𑀺𑀲𑁆𑀲𑀬𑀓𑀫𑁆𑀫𑀸𑀳𑀸𑀭𑀺𑀦𑁆𑀤𑁆𑀭𑀺𑀬𑀅𑀢𑁆𑀣𑀺𑀅𑀯𑀺𑀕𑀢𑀧𑀘𑁆𑀘𑀬𑁂𑀲𑀼 𑀧𑀦 𑀅𑀦𑀼𑀮𑁄𑀫𑀢𑁄 𑀞𑀺𑀢𑁂𑀲𑀼 𑀘𑀢𑁆𑀢𑀸𑀭𑁄 𑀲𑀩𑁆𑀩𑀝𑁆𑀞𑀸𑀦𑀺𑀓𑀸𑀬𑁂𑀯, 𑀧𑀘𑁆𑀘𑀦𑀻𑀓𑀢𑁄 𑀦 𑀮𑀩𑁆𑀪𑀦𑁆𑀢𑀺. 𑀏𑀢𑁂𑀲𑀜𑁆𑀳𑀺 𑀧𑀘𑁆𑀘𑀬𑀸𑀦𑀁 𑀯𑀲𑁂𑀦 𑀉𑀧𑁆𑀧𑀚𑁆𑀚𑀫𑀸𑀦𑁄 𑀲𑀩𑁆𑀩𑀝𑁆𑀞𑀸𑀦𑀺𑀓𑁂 𑀅𑀮𑀪𑀦𑁆𑀢𑁄 𑀦𑀸𑀫 𑀦𑀢𑁆𑀣𑀺. 𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬𑀲𑁆𑀲 𑀅𑀦𑀼𑀮𑁄𑀫𑀢𑁄 𑀞𑀸𑀦𑀁 𑀦𑀸𑀫 𑀦𑀢𑁆𑀣𑀺. 𑀏𑀯𑀁 𑀲𑁂𑀲𑁂𑀲𑀼 𑀅𑀦𑀼𑀮𑁄𑀫𑀢𑁄 𑀞𑀺𑀢𑁂𑀲𑀼 𑀬𑁂 𑀘 𑀮𑀩𑁆𑀪𑀦𑁆𑀢𑀺, 𑀬𑁂 𑀘 𑀦 𑀮𑀩𑁆𑀪𑀦𑁆𑀢𑀺, 𑀢𑁂 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀲𑀩𑁆𑀩𑁂𑀲𑀼𑀧𑀺 𑀤𑀼𑀫𑀽𑀮𑀓𑀸𑀤𑀻𑀲𑀼 𑀦𑀬𑁂𑀲𑀼 𑀢𑁂𑀲𑀁 𑀢𑁂𑀲𑀁 𑀧𑀘𑁆𑀘𑀬𑀸𑀦𑀁 𑀲𑀁𑀲𑀦𑁆𑀤𑀦𑁂 𑀊𑀦𑀢𑀭𑀕𑀡𑀦𑀸𑀦𑀁𑀬𑁂𑀯 𑀯𑀲𑁂𑀦 𑀕𑀡𑀦𑀸 𑀯𑁂𑀤𑀺𑀢𑀩𑁆𑀩𑀸𑀢𑀺.

𑀧𑀘𑁆𑀘𑀬𑀸𑀦𑀼𑀮𑁄𑀫𑀧𑀘𑁆𑀘𑀦𑀻𑀬𑀯𑀡𑁆𑀡𑀦𑀸.