𑁧. 𑀧𑀝𑀺𑀘𑁆𑀘𑀯𑀸𑀭𑀯𑀡𑁆𑀡𑀦𑀸

𑁧. 𑀧𑀘𑁆𑀘𑀬𑀸𑀦𑀼𑀮𑁄𑀫𑀁

(𑁧.) 𑀯𑀺𑀪𑀗𑁆𑀕𑀯𑀸𑀭𑁄

𑁫𑁩. 𑀇𑀤𑀸𑀦𑀺 𑀬𑀸 𑀏𑀢𑀸 𑀧𑀡𑁆𑀡𑀢𑁆𑀢𑀺𑀯𑀸𑀭𑁂 𑀓𑀼𑀲𑀮𑀢𑁆𑀢𑀺𑀓𑀁 𑀦𑀺𑀲𑁆𑀲𑀸𑀬 𑀳𑁂𑀢𑀼𑀧𑀘𑁆𑀘𑀬𑀸𑀤𑀺𑀯𑀲𑁂𑀦 𑀏𑀓𑀽𑀦𑀧𑀜𑁆𑀜𑀸𑀲𑀁 𑀆𑀤𑀺𑀁 𑀓𑀢𑁆𑀯𑀸 𑀦𑀬𑀫𑀢𑁆𑀢𑀁 𑀤𑀲𑁆𑀲𑁂𑀦𑁆𑀢𑁂𑀦 𑀅𑀧𑀭𑀺𑀫𑀸𑀡𑀸 𑀧𑀼𑀘𑁆𑀙𑀸 𑀤𑀲𑁆𑀲𑀺𑀢𑀸. 𑀢𑀢𑁆𑀣 𑀓𑀼𑀲𑀮𑀸𑀓𑀼𑀲𑀮𑀸𑀤𑀻𑀦𑀁 𑀲𑀳𑀼𑀧𑁆𑀧𑀢𑁆𑀢𑀺𑀬𑀸 𑀅𑀪𑀸𑀯𑀢𑁄 𑀬𑀸 𑀧𑀼𑀘𑁆𑀙𑀸 ‘‘𑀓𑀼𑀲𑀮𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀅𑀓𑀼𑀲𑀮𑁄 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑀢𑀺 𑀳𑁂𑀢𑀼𑀧𑀘𑁆𑀘𑀬𑀸’’𑀢𑀺 𑀏𑀯𑀁 𑀯𑀺𑀲𑁆𑀲𑀚𑁆𑀚𑀦𑀁 𑀦 𑀮𑀪𑀦𑁆𑀢𑀺. 𑀢𑀸 𑀧𑀳𑀸𑀬 𑀬𑀸 𑀯𑀺𑀲𑁆𑀲𑀚𑁆𑀚𑀦𑀁 𑀮𑀪𑀦𑁆𑀢𑀺, 𑀢𑀸𑀬𑁂𑀯 𑀯𑀺𑀲𑁆𑀲𑀚𑁆𑀚𑁂𑀢𑀼𑀁 𑀅𑀬𑀁 𑀓𑀼𑀲𑀮𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀓𑀼𑀲𑀮𑁄 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑀢𑀺 𑀳𑁂𑀢𑀼𑀧𑀘𑁆𑀘𑀬𑀸𑀢𑀺𑀆𑀤𑀺𑀦𑀸 𑀦𑀬𑁂𑀦 𑀧𑀝𑀺𑀘𑁆𑀘𑀯𑀸𑀭𑀲𑁆𑀲 𑀦𑀺𑀤𑁆𑀤𑁂𑀲𑀯𑀸𑀭𑁄 𑀆𑀭𑀤𑁆𑀥𑁄.

𑀢𑀢𑁆𑀣 𑀲𑀺𑀬𑀸 𑁋 𑀲𑀘𑁂 𑀇𑀫𑀸 𑀳𑁂𑀢𑀼𑀧𑀘𑁆𑀘𑀬𑀸𑀤𑀺𑀯𑀲𑁂𑀦 𑀏𑀓𑀽𑀦𑀧𑀜𑁆𑀜𑀸𑀲𑀁 𑀧𑀼𑀘𑁆𑀙𑀸 𑀲𑀩𑁆𑀩𑀲𑁄 𑀯𑀺𑀲𑁆𑀲𑀚𑁆𑀚𑀦𑀁 𑀦 𑀮𑀪𑀦𑁆𑀢𑀺, 𑀅𑀣 𑀓𑀲𑁆𑀫𑀸 𑀤𑀲𑁆𑀲𑀺𑀢𑀸? 𑀦𑀦𑀼 𑀬𑀸 𑀮𑀪𑀦𑁆𑀢𑀺, 𑀢𑀸𑀬𑁂𑀯 𑀤𑀲𑁆𑀲𑁂𑀢𑀩𑁆𑀩𑀸𑀢𑀺? 𑀆𑀫, 𑀤𑀲𑁆𑀲𑁂𑀢𑀩𑁆𑀩𑀸 𑀲𑀺𑀬𑀼𑀁. 𑀢𑀣𑀸 𑀤𑀲𑁆𑀲𑀺𑀬𑀫𑀸𑀦𑀸 𑀧𑀦 𑀲𑀩𑁆𑀩𑁂𑀲𑀼 𑀢𑀺𑀓𑀤𑀼𑀓𑀧𑀝𑁆𑀞𑀸𑀦𑀸𑀤𑀻𑀲𑀼 𑀏𑀓𑁂𑀓𑀲𑁆𑀫𑀺𑀁 𑀢𑀺𑀓𑁂, 𑀤𑀼𑀓𑁂, 𑀤𑀼𑀓𑀢𑀺𑀓𑁂, 𑀢𑀺𑀓𑀤𑀼𑀓𑁂, 𑀢𑀺𑀓𑀢𑀺𑀓𑁂, 𑀤𑀼𑀓𑀤𑀼𑀓𑁂 𑀘 𑀲𑀗𑁆𑀔𑁂𑀧𑀁 𑀅𑀓𑀢𑁆𑀯𑀸 𑀤𑀲𑁆𑀲𑁂𑀢𑀩𑁆𑀩𑀸𑀬𑁂𑀯 𑀪𑀯𑁂𑀬𑁆𑀬𑀼𑀁. 𑀓𑀲𑁆𑀫𑀸? 𑀬𑀲𑁆𑀫𑀸 𑀬𑀸 𑀓𑀼𑀲𑀮𑀢𑁆𑀢𑀺𑀓𑁂 𑀮𑀪𑀦𑁆𑀢𑀺, 𑀦 𑀢𑀸𑀬𑁂𑀯 𑀯𑁂𑀤𑀦𑀸𑀢𑁆𑀢𑀺𑀓𑀸𑀤𑀻𑀲𑀼. 𑀥𑀫𑁆𑀫𑀸𑀦𑀼𑀮𑁄𑀫𑀧𑀘𑁆𑀘𑀦𑀻𑀬𑁂 𑀘 𑀢𑀺𑀓𑀧𑀝𑁆𑀞𑀸𑀦𑁂 𑀯𑀺𑀢𑀓𑁆𑀓𑀢𑁆𑀢𑀺𑀓𑀧𑀻𑀢𑀺𑀢𑁆𑀢𑀺𑀓𑀸𑀦𑀁 𑀯𑀺𑀲𑁆𑀲𑀚𑁆𑀚𑀦𑁂 𑀲𑀩𑁆𑀩𑀸𑀧𑁂𑀢𑀸 𑀯𑀺𑀲𑁆𑀲𑀚𑁆𑀚𑀦𑀁 𑀮𑀪𑀦𑁆𑀢𑀺, 𑀢𑀲𑁆𑀫𑀸 𑀉𑀓𑁆𑀓𑀝𑁆𑀞𑀧𑀭𑀺𑀘𑁆𑀙𑁂𑀤𑁂𑀦 𑀏𑀓𑁂𑀓𑀲𑁆𑀫𑀺𑀁 𑀢𑀺𑀓𑁂 𑀬𑀢𑁆𑀢𑀓𑀸𑀳𑀺 𑀧𑀼𑀘𑁆𑀙𑀸𑀳𑀺 𑀪𑀯𑀺𑀢𑀩𑁆𑀩𑀁 𑀲𑀩𑁆𑀩𑀸 𑀓𑀼𑀲𑀮𑀢𑁆𑀢𑀺𑀓𑁂 𑀤𑀲𑁆𑀲𑀺𑀢𑀸. 𑀏𑀯𑀁 𑀤𑀲𑁆𑀲𑀺𑀢𑀸𑀲𑀼 𑀳𑀺 𑀬𑀸 𑀢𑀢𑁆𑀣 𑀯𑀺𑀲𑁆𑀲𑀚𑁆𑀚𑀦𑀁 𑀦 𑀮𑀪𑀦𑁆𑀢𑀺, 𑀢𑀸 𑀧𑀳𑀸𑀬 𑀬𑀸 𑀮𑀪𑀦𑁆𑀢𑀺, 𑀢𑀸 𑀯𑀼𑀘𑁆𑀘𑀫𑀸𑀦𑀸 𑀲𑀓𑁆𑀓𑀸 𑀲𑀼𑀔𑁂𑀦 𑀯𑀺𑀚𑀸𑀦𑀺𑀢𑀼𑀦𑁆𑀢𑀺 𑀲𑀼𑀔𑁂𑀦 𑀯𑀺𑀚𑀸𑀦𑀦𑀢𑁆𑀣𑀁 𑀲𑀩𑁆𑀩𑀸𑀧𑀺 𑀓𑀼𑀲𑀮𑀢𑁆𑀢𑀺𑀓𑁂 𑀤𑀲𑁆𑀲𑀺𑀢𑀸. 𑀬𑀸 𑀧𑀦𑁂𑀢𑁆𑀣 𑀯𑀺𑀲𑁆𑀲𑀚𑁆𑀚𑀦𑀁 𑀦 𑀮𑀪𑀦𑁆𑀢𑀺, 𑀢𑀸 𑀧𑀳𑀸𑀬 𑀬𑀸 𑀮𑀪𑀦𑁆𑀢𑀺, 𑀢𑀸𑀬𑁂𑀯 𑀯𑀺𑀲𑁆𑀲𑀚𑁆𑀚𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀢𑀢𑁆𑀣 𑀓𑀼𑀲𑀮𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘𑀸𑀢𑀺 𑀘𑀢𑀼𑀪𑀽𑀫𑀓𑀓𑀼𑀲𑀮𑀥𑀫𑁆𑀫𑁂𑀲𑀼 𑀯𑁂𑀤𑀦𑀸𑀓𑁆𑀔𑀦𑁆𑀥𑀸𑀤𑀺𑀪𑁂𑀤𑀁 𑀏𑀓𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀧𑀝𑀺𑀕𑀦𑁆𑀢𑁆𑀯𑀸 𑀲𑀳𑀼𑀧𑁆𑀧𑀢𑁆𑀢𑀺𑀲𑀗𑁆𑀔𑀸𑀢𑁂𑀦 𑀲𑀤𑀺𑀲𑀪𑀸𑀯𑁂𑀦 𑀧𑀢𑁆𑀯𑀸, 𑀢𑁂𑀦 𑀲𑀤𑁆𑀥𑀺𑀁 𑀏𑀓𑀢𑁄 𑀉𑀧𑁆𑀧𑀢𑁆𑀢𑀺𑀪𑀸𑀯𑀁 𑀉𑀧𑀕𑀦𑁆𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀓𑀼𑀲𑀮𑁄 𑀥𑀫𑁆𑀫𑁄𑀢𑀺 𑀘𑀢𑀼𑀪𑀽𑀫𑀓𑀓𑀼𑀲𑀮𑀥𑀫𑁆𑀫𑁂𑀲𑀼𑀬𑁂𑀯 𑀲𑀜𑁆𑀜𑀸𑀓𑁆𑀔𑀦𑁆𑀥𑀸𑀤𑀺𑀪𑁂𑀤𑁄 𑀏𑀓𑁄 𑀥𑀫𑁆𑀫𑁄. 𑀉𑀧𑁆𑀧𑀚𑁆𑀚𑀢𑀻𑀢𑀺 𑀉𑀧𑁆𑀧𑀸𑀤𑀢𑁄 𑀬𑀸𑀯 𑀦𑀺𑀭𑁄𑀥𑀕𑀫𑀦𑀸 𑀉𑀤𑁆𑀥𑀁 𑀧𑀚𑁆𑀚𑀢𑀺, 𑀦𑀺𑀩𑁆𑀩𑀢𑁆𑀢𑀢𑀻𑀢𑀺𑀧𑀺 𑀅𑀢𑁆𑀣𑁄. 𑀅𑀢𑁆𑀢𑀸𑀦𑀁 𑀮𑀪𑀢𑀺, 𑀉𑀧𑁆𑀧𑀸𑀤𑀸𑀤𑀬𑁄 𑀢𑀬𑁄𑀧𑀺 𑀔𑀡𑁂 𑀧𑀸𑀧𑀼𑀡𑀸𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀳𑁂𑀢𑀼𑀧𑀘𑁆𑀘𑀬𑀸𑀢𑀺 𑀓𑀼𑀲𑀮𑀳𑁂𑀢𑀼𑀦𑀸 𑀳𑁂𑀢𑀼𑀧𑀘𑁆𑀘𑀬𑀪𑀸𑀯𑀁 𑀲𑀸𑀥𑁂𑀦𑁆𑀢𑁂𑀦.

𑀏𑀯𑀁 ‘‘𑀉𑀧𑁆𑀧𑀚𑁆𑀚𑁂𑀬𑁆𑀬𑀸’’𑀢𑀺 𑀧𑀼𑀘𑁆𑀙𑀸𑀬 ‘‘𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀯𑀺𑀲𑁆𑀲𑀚𑁆𑀚𑀦𑀁 𑀯𑀢𑁆𑀯𑀸 𑀇𑀤𑀸𑀦𑀺 𑀬𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀬𑁄 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑀢𑀺, 𑀢𑀁 𑀥𑀫𑁆𑀫𑀁 𑀔𑀦𑁆𑀥𑀯𑀲𑁂𑀦 𑀤𑀲𑁆𑀲𑁂𑀢𑀼𑀁 𑀓𑀼𑀲𑀮𑀁 𑀏𑀓𑀁 𑀔𑀦𑁆𑀥𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀏𑀓𑀦𑁆𑀢𑀺 𑀯𑁂𑀤𑀦𑀸𑀤𑀻𑀲𑀼 𑀘𑀢𑀽𑀲𑀼 𑀬𑀁𑀓𑀺𑀜𑁆𑀘𑀺 𑀏𑀓𑀁. 𑀢𑀬𑁄 𑀔𑀦𑁆𑀥𑀸𑀢𑀺 𑀬𑁄 𑀬𑁄 𑀧𑀘𑁆𑀘𑀬𑀪𑀸𑀯𑁂𑀦 𑀕𑀳𑀺𑀢𑁄, 𑀢𑀁 𑀢𑀁 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑀸 𑀢𑀬𑁄 𑀔𑀦𑁆𑀥𑀸. 𑀢𑀬𑁄 𑀔𑀦𑁆𑀥𑁂𑀢𑀺 𑀯𑁂𑀤𑀦𑀸𑀤𑀻𑀲𑀼 𑀬𑁄 𑀏𑀓𑁄 𑀔𑀦𑁆𑀥𑁄 𑀉𑀧𑁆𑀧𑀚𑁆𑀚𑀢𑀻𑀢𑀺 𑀕𑀳𑀺𑀢𑁄, 𑀢𑀁 𑀞𑀧𑁂𑀢𑁆𑀯𑀸 𑀲𑁂𑀲𑁂 𑀢𑀬𑁄. 𑀤𑁆𑀯𑁂 𑀔𑀦𑁆𑀥𑁂𑀢𑀺 𑀯𑁂𑀤𑀦𑀸𑀲𑀜𑁆𑀜𑀸𑀤𑀼𑀓𑀸𑀤𑀻𑀲𑀼 𑀙𑀲𑀼 𑀤𑀼𑀓𑁂𑀲𑀼 𑀬𑁂𑀓𑁂𑀘𑀺 𑀤𑁆𑀯𑁂 𑀔𑀦𑁆𑀥𑁂 𑀧𑀝𑀺𑀘𑁆𑀘. 𑀤𑁆𑀯𑁂 𑀔𑀦𑁆𑀥𑀸𑀢𑀺 𑀬𑁂 𑀬𑁂 𑀧𑀘𑁆𑀘𑀬𑀪𑀸𑀯𑁂𑀦 𑀕𑀳𑀺𑀢𑀸, 𑀢𑁂 𑀢𑁂 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑀸 𑀤𑁆𑀯𑁂 𑀔𑀦𑁆𑀥𑀸 𑀓𑀼𑀲𑀮𑀳𑁂𑀢𑀼𑀦𑀸 𑀳𑁂𑀢𑀼𑀧𑀘𑁆𑀘𑀬𑀪𑀸𑀯𑀁 𑀲𑀸𑀥𑁂𑀦𑁆𑀢𑁂𑀦 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀅𑀢𑁆𑀣𑁄.

𑀬𑀲𑁆𑀫𑀸 𑀧𑀦 𑀏𑀓𑁄 𑀔𑀦𑁆𑀥𑁄 𑀏𑀓𑀲𑁆𑀲𑁂𑀯 𑀤𑁆𑀯𑀺𑀦𑁆𑀦𑀁𑀬𑁂𑀯 𑀯𑀸, 𑀤𑁆𑀯𑁂 𑀯𑀸 𑀧𑀦 𑀏𑀓𑀲𑁆𑀲𑁂𑀯 𑀧𑀘𑁆𑀘𑀬𑁄 𑀦𑀸𑀫 𑀦𑀢𑁆𑀣𑀺, 𑀢𑀲𑁆𑀫𑀸 ‘‘𑀏𑀓𑀁 𑀔𑀦𑁆𑀥𑀁 𑀧𑀝𑀺𑀘𑁆𑀘 𑀏𑀓𑁄 𑀔𑀦𑁆𑀥𑁄, 𑀏𑀓𑀁 𑀔𑀦𑁆𑀥𑀁 𑀧𑀝𑀺𑀘𑁆𑀘 𑀤𑁆𑀯𑁂 𑀔𑀦𑁆𑀥𑀸, 𑀤𑁆𑀯𑁂 𑀔𑀦𑁆𑀥𑁂 𑀧𑀝𑀺𑀘𑁆𑀘 𑀏𑀓𑁄 𑀔𑀦𑁆𑀥𑁄’’𑀢𑀺 𑀦 𑀯𑀼𑀢𑁆𑀢𑀁. 𑀓𑀼𑀲𑀮𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀅𑀩𑁆𑀬𑀸𑀓𑀢𑁄 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑀢𑀻𑀢𑀺𑀆𑀤𑀻𑀲𑀼𑀧𑀺 𑀯𑀼𑀢𑁆𑀢𑀦𑀬𑁂𑀦𑁂𑀯 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀁 𑀭𑀽𑀧𑀦𑁆𑀢𑀺 𑀇𑀤𑀁 𑀧𑀝𑀺𑀘𑁆𑀘𑀢𑁆𑀣𑀲𑁆𑀲 𑀲𑀳𑀚𑀸𑀢𑀢𑁆𑀣𑀢𑁆𑀢𑀸 𑀬𑀁 𑀓𑀼𑀲𑀮𑁂𑀦 𑀲𑀳𑀚𑀸𑀢𑀜𑁆𑀘𑁂𑀯 𑀳𑁂𑀢𑀼𑀧𑀘𑁆𑀘𑀬𑀜𑁆𑀘 𑀮𑀪𑀢𑀺, 𑀢𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁. 𑀧𑀭𑀢𑁄𑀧𑀺 𑀏𑀯𑀭𑀽𑀧𑁂𑀲𑀼 𑀞𑀸𑀦𑁂𑀲𑀼 𑀅𑀬𑀫𑁂𑀯 𑀦𑀬𑁄.

𑀯𑀺𑀧𑀸𑀓𑀸𑀩𑁆𑀬𑀸𑀓𑀢𑀁 𑀓𑀺𑀭𑀺𑀬𑀸𑀩𑁆𑀬𑀸𑀓𑀢𑀦𑁆𑀢𑀺 𑀏𑀢𑁆𑀣 𑀳𑁂𑀢𑀼𑀧𑀘𑁆𑀘𑀬𑀸𑀪𑀸𑀯𑀢𑁄 𑀅𑀳𑁂𑀢𑀼𑀓𑀁, 𑀭𑀽𑀧𑁂𑀦 𑀲𑀤𑁆𑀥𑀺𑀁 𑀅𑀦𑀼𑀧𑁆𑀧𑀢𑁆𑀢𑀺𑀢𑁄 𑀆𑀭𑀼𑀧𑁆𑀧𑀯𑀺𑀧𑀸𑀓𑀜𑁆𑀘 𑀦 𑀕𑀳𑁂𑀢𑀩𑁆𑀩𑀁. 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂𑀢𑀺 𑀓𑀝𑀢𑁆𑀢𑀸𑀭𑀽𑀧𑀲𑀗𑁆𑀔𑀸𑀢𑀲𑁆𑀲 𑀅𑀩𑁆𑀬𑀸𑀓𑀢𑀲𑁆𑀲 𑀅𑀩𑁆𑀬𑀸𑀓𑀢𑀁 𑀧𑀝𑀺𑀘𑁆𑀘 𑀉𑀧𑁆𑀧𑀢𑁆𑀢𑀺𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀯𑀺𑀧𑀸𑀓𑀸𑀩𑁆𑀬𑀸𑀓𑀢𑀦𑁆𑀢𑀺 𑀢𑀲𑁆𑀫𑀺𑀁 𑀔𑀡𑁂 𑀯𑀺𑀚𑁆𑀚𑀫𑀸𑀦𑀸𑀩𑁆𑀬𑀸𑀓𑀢𑀯𑀲𑁂𑀦 𑀯𑀼𑀢𑁆𑀢𑀁. 𑀔𑀦𑁆𑀥𑁂 𑀧𑀝𑀺𑀘𑁆𑀘 𑀯𑀢𑁆𑀣𑀼, 𑀯𑀢𑁆𑀣𑀼𑀁 𑀧𑀝𑀺𑀘𑁆𑀘 𑀔𑀦𑁆𑀥𑀸𑀢𑀺 𑀇𑀤𑀁 𑀓𑀝𑀢𑁆𑀢𑀸𑀭𑀽𑀧𑀕𑁆𑀕𑀳𑀡𑁂𑀦 𑀯𑀢𑁆𑀣𑀼𑀫𑁆𑀳𑀺 𑀕𑀳𑀺𑀢𑁂𑀧𑀺 𑀯𑀢𑁆𑀣𑀼𑀁 𑀧𑀝𑀺𑀘𑁆𑀘 𑀔𑀦𑁆𑀥𑀸𑀦𑀁 𑀉𑀧𑁆𑀧𑀢𑁆𑀢𑀺𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁.

𑀏𑀓𑀁 𑀫𑀳𑀸𑀪𑀽𑀢𑀦𑁆𑀢𑀺𑀆𑀤𑀺 𑀭𑀽𑀧𑀸𑀩𑁆𑀬𑀸𑀓𑀢𑀁 𑀧𑀝𑀺𑀘𑁆𑀘 𑀭𑀽𑀧𑀸𑀩𑁆𑀬𑀸𑀓𑀢𑀲𑁆𑀲 𑀉𑀧𑁆𑀧𑀢𑁆𑀢𑀺𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀏𑀓𑀁 𑀔𑀦𑁆𑀥𑀦𑁆𑀢𑀺𑀆𑀤𑀻𑀲𑀼 𑀯𑀼𑀢𑁆𑀢𑀦𑀬𑁂𑀦𑁂𑀯 𑀧𑀦𑁂𑀢𑁆𑀣 𑀅𑀢𑁆𑀣𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀏𑀯𑀁 𑀭𑀽𑀧𑀸𑀩𑁆𑀬𑀸𑀓𑀢𑀫𑁆𑀳𑀺 𑀪𑀽𑀢𑁂 𑀧𑀝𑀺𑀘𑁆𑀘 𑀪𑀽𑀢𑀸𑀦𑀁 𑀉𑀧𑁆𑀧𑀢𑁆𑀢𑀺𑀁 𑀯𑀢𑁆𑀯𑀸 𑀇𑀤𑀸𑀦𑀺 𑀪𑀽𑀢𑁂 𑀧𑀝𑀺𑀘𑁆𑀘 𑀉𑀧𑀸𑀤𑀸𑀭𑀽𑀧𑀸𑀦𑀁 𑀉𑀧𑁆𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑀼𑀁 𑀫𑀳𑀸𑀪𑀽𑀢𑁂 𑀧𑀝𑀺𑀘𑁆𑀘 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀏𑀯𑀁 𑀲𑀦𑁆𑀢𑁂 𑀉𑀧𑀸𑀤𑀸𑀭𑀽𑀧𑀦𑁆𑀢𑀺 𑀏𑀢𑁆𑀢𑀓𑀫𑁂𑀯 𑀯𑀢𑁆𑀢𑀩𑁆𑀩𑀁, 𑀇𑀢𑀭𑀤𑁆𑀯𑀬𑀁 𑀓𑀲𑁆𑀫𑀸 𑀯𑀼𑀢𑁆𑀢𑀦𑁆𑀢𑀺? 𑀫𑀳𑀸𑀪𑀽𑀢𑁂𑀧𑀺 𑀧𑀝𑀺𑀘𑁆𑀘 𑀉𑀧𑁆𑀧𑀢𑁆𑀢𑀺𑀤𑀲𑁆𑀲𑀦𑀢𑁆𑀣𑀁. 𑀬𑀜𑁆𑀳𑀺 𑀳𑁂𑀝𑁆𑀞𑀸 ‘‘𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀜𑁆𑀘 𑀭𑀽𑀧𑀁 𑀓𑀝𑀢𑁆𑀢𑀸 𑀘 𑀭𑀽𑀧’’𑀦𑁆𑀢𑀺 𑀤𑀲𑁆𑀲𑀺𑀢𑀁, 𑀢𑀁 𑀦 𑀓𑁂𑀯𑀮𑀁 𑀔𑀦𑁆𑀥𑁂𑀬𑁂𑀯 𑀘 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀺, 𑀫𑀳𑀸𑀪𑀽𑀢𑁂𑀧𑀺 𑀧𑀦 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀻𑀢𑀺 𑀤𑀲𑁆𑀲𑀦𑀢𑁆𑀣𑀫𑀺𑀤𑀁 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀢𑁆𑀣 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀁 𑀧𑀯𑀢𑁆𑀢𑁂𑀬𑁂𑀯, 𑀓𑀝𑀢𑁆𑀢𑀸𑀭𑀽𑀧𑀁 𑀧𑀝𑀺𑀲𑀦𑁆𑀥𑀺𑀬𑀫𑁆𑀧𑀺. 𑀉𑀧𑀸𑀤𑀸𑀭𑀽𑀧𑀦𑁆𑀢𑀺 𑀢𑀲𑁆𑀲𑁂𑀯 𑀉𑀪𑀬𑀲𑁆𑀲 𑀯𑀺𑀲𑁂𑀲𑀦𑀁.

𑀓𑀼𑀲𑀮𑁂 𑀔𑀦𑁆𑀥𑁂 𑀘 𑀫𑀳𑀸𑀪𑀽𑀢𑁂 𑀘 𑀧𑀝𑀺𑀘𑁆𑀘𑀸𑀢𑀺 𑀏𑀢𑁆𑀣 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀯 𑀫𑀳𑀸𑀪𑀽𑀢𑀸 𑀕𑀳𑀺𑀢𑀸. 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀁 𑀭𑀽𑀧𑀦𑁆𑀢𑀺 𑀏𑀢𑁆𑀣 𑀧𑀦 𑀪𑀽𑀢𑀭𑀽𑀧𑀫𑁆𑀧𑀺 𑀉𑀧𑀸𑀤𑀸𑀭𑀽𑀧𑀫𑁆𑀧𑀺 𑀕𑀳𑀺𑀢𑀁. ‘‘𑀏𑀓𑀁 𑀫𑀳𑀸𑀪𑀽𑀢𑀁 𑀧𑀝𑀺𑀘𑁆𑀘 𑀢𑀬𑁄 𑀫𑀳𑀸𑀪𑀽𑀢𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀳𑀺 𑀪𑀽𑀢𑀭𑀽𑀧𑀫𑁆𑀧𑀺 𑀔𑀦𑁆𑀥𑁂 𑀘 𑀫𑀳𑀸𑀪𑀽𑀢𑁂 𑀘 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀺. 𑀫𑀳𑀸𑀪𑀽𑀢𑁂 𑀧𑀝𑀺𑀘𑁆𑀘 𑀉𑀧𑀸𑀤𑀸𑀭𑀽𑀧𑀦𑁆𑀢𑀺 𑀯𑀼𑀢𑁆𑀢𑀦𑀬𑁂𑀦 𑀉𑀧𑀸𑀤𑀸𑀭𑀽𑀧𑀫𑁆𑀧𑀺. 𑀅𑀓𑀼𑀲𑀮𑀜𑁆𑀘 𑀅𑀩𑁆𑀬𑀸𑀓𑀢𑀜𑁆𑀘𑀸𑀢𑀺 𑀧𑀜𑁆𑀳𑀸𑀯𑀺𑀲𑁆𑀲𑀚𑁆𑀚𑀦𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀏𑀯𑀁 𑀳𑁂𑀢𑀼𑀧𑀘𑁆𑀘𑀬𑁂 𑀦𑀯 𑀧𑀼𑀘𑁆𑀙𑀸 𑀯𑀺𑀲𑁆𑀲𑀚𑁆𑀚𑀺𑀢𑀸. 𑀏𑀢𑀸𑀬𑁂𑀯 𑀳𑀺 𑀏𑀢𑁆𑀣 𑀮𑀩𑁆𑀪𑀦𑁆𑀢𑀺, 𑀲𑁂𑀲𑀸 𑀘𑀢𑁆𑀢𑀸𑀮𑀻𑀲 𑀫𑁄𑀖𑀧𑀼𑀘𑁆𑀙𑀸𑀢𑀺 𑀦 𑀯𑀺𑀲𑁆𑀲𑀚𑁆𑀚𑀺𑀢𑀸. 𑀇𑀫𑀺𑀦𑀸 𑀉𑀧𑀸𑀬𑁂𑀦 𑀆𑀭𑀫𑁆𑀫𑀡𑀧𑀘𑁆𑀘𑀬𑀸𑀤𑀻𑀲𑀼𑀧𑀺 𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑀸𑀦𑀁 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀢𑁆𑀣 𑀢𑀢𑁆𑀣 𑀧𑀦 𑀯𑀺𑀘𑀸𑀭𑁂𑀢𑀩𑁆𑀩𑀬𑀼𑀢𑁆𑀢𑀓𑀫𑁂𑀯 𑀯𑀺𑀘𑀸𑀭𑀬𑀺𑀲𑁆𑀲𑀸𑀫.

𑁫𑁪. 𑀆𑀭𑀫𑁆𑀫𑀡𑀧𑀘𑁆𑀘𑀬𑁂 𑀢𑀸𑀯 𑀭𑀽𑀧𑀲𑁆𑀲 𑀆𑀭𑀫𑁆𑀫𑀡𑀧𑀘𑁆𑀘𑀬𑀯𑀲𑁂𑀦 𑀅𑀦𑀼𑀧𑁆𑀧𑀢𑁆𑀢𑀺𑀢𑁄 𑀢𑀸𑀲𑀼 𑀦𑀯𑀲𑀼 𑀭𑀽𑀧𑀫𑀺𑀲𑁆𑀲𑀓𑀸 𑀧𑀳𑀸𑀬 𑀢𑀺𑀲𑁆𑀲𑁄𑀯 𑀧𑀼𑀘𑁆𑀙𑀸 𑀯𑀺𑀲𑁆𑀲𑀚𑁆𑀚𑀺𑀢𑀸. 𑀢𑁂𑀦𑁂𑀯 𑀘 𑀓𑀸𑀭𑀡𑁂𑀦 ‘‘𑀯𑀢𑁆𑀣𑀼𑀁 𑀧𑀝𑀺𑀘𑁆𑀘 𑀔𑀦𑁆𑀥𑀸’’𑀢𑀺 𑀯𑀢𑁆𑀯𑀸 ‘‘𑀔𑀦𑁆𑀥𑁂 𑀧𑀝𑀺𑀘𑁆𑀘 𑀯𑀢𑁆𑀣𑀽’’𑀢𑀺 𑀦 𑀯𑀼𑀢𑁆𑀢𑀁. 𑀦 𑀳𑀺 𑀢𑀁 𑀆𑀭𑀫𑁆𑀫𑀡𑀧𑀘𑁆𑀘𑀬𑁂𑀦 𑀉𑀧𑁆𑀧𑀚𑁆𑀚𑀢𑀺.

𑁫𑁫. 𑀅𑀥𑀺𑀧𑀢𑀺𑀧𑀘𑁆𑀘𑀬𑁂 𑀯𑀺𑀧𑀸𑀓𑀸𑀩𑁆𑀬𑀸𑀓𑀢𑀦𑁆𑀢𑀺 𑀮𑁄𑀓𑀼𑀢𑁆𑀢𑀭𑀫𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑁂𑀦𑁂𑀯𑁂𑀢𑁆𑀣 ‘‘𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂’’𑀢𑀺 𑀦 𑀕𑀳𑀺𑀢𑀁. 𑀲𑁂𑀲𑀁 𑀳𑁂𑀢𑀼𑀧𑀘𑁆𑀘𑀬𑀲𑀤𑀺𑀲𑀫𑁂𑀯.

𑁫𑁬. 𑀅𑀦𑀦𑁆𑀢𑀭𑀲𑀫𑀦𑁆𑀢𑀭𑁂𑀲𑀼𑀧𑀺 𑀭𑀽𑀧𑀁 𑀦 𑀮𑀩𑁆𑀪𑀢𑀻𑀢𑀺 𑀆𑀭𑀫𑁆𑀫𑀡𑀧𑀘𑁆𑀘𑀬𑁂 𑀯𑀺𑀬 𑀢𑀺𑀲𑁆𑀲𑁄𑀯 𑀧𑀼𑀘𑁆𑀙𑀸.

𑁫𑁭. 𑀲𑀳𑀚𑀸𑀢𑀧𑀘𑁆𑀘𑀬𑁂 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂𑀢𑀺 𑀧𑀜𑁆𑀘𑀯𑁄𑀓𑀸𑀭𑁂 𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀯𑀼𑀢𑁆𑀢𑀁. 𑀳𑁂𑀝𑁆𑀞𑀸 𑀧𑀦 𑀧𑀘𑁆𑀘𑀬𑀯𑀺𑀪𑀗𑁆𑀕𑁂 ‘‘𑀑𑀓𑁆𑀓𑀦𑁆𑀢𑀺𑀓𑁆𑀔𑀡𑁂’’𑀢𑀺 𑀆𑀕𑀢𑀁 𑀢𑀫𑁆𑀧𑀺 𑀇𑀫𑀺𑀦𑀸 𑀲𑀤𑁆𑀥𑀺𑀁 𑀅𑀢𑁆𑀣𑀢𑁄 𑀏𑀓𑀁, 𑀩𑁆𑀬𑀜𑁆𑀚𑀦𑀫𑀢𑁆𑀢𑀫𑁂𑀯 𑀳𑁂𑀢𑁆𑀣 𑀦𑀸𑀦𑀦𑁆𑀢𑀺. 𑀅𑀧𑀺𑀘 ‘‘𑀢𑀺𑀡𑁆𑀡𑀁 𑀲𑀦𑁆𑀦𑀺𑀧𑀸𑀢𑀸 𑀕𑀩𑁆𑀪𑀲𑁆𑀲 𑀅𑀯𑀓𑁆𑀓𑀦𑁆𑀢𑀺 𑀳𑁄𑀢𑀻’’𑀢𑀺 (𑀫. 𑀦𑀺. 𑁧.𑁪𑁦𑁮) 𑀯𑀘𑀦𑀢𑁄 𑀑𑀓𑁆𑀓𑀦𑁆𑀢𑀻𑀢𑀺 𑀧𑀜𑁆𑀘𑀯𑁄𑀓𑀸𑀭𑀧𑀝𑀺𑀲𑀦𑁆𑀥𑀺𑀬𑀸𑀯𑁂𑀢𑀁 𑀦𑀸𑀫𑀁. 𑀧𑀝𑀺𑀲𑀦𑁆𑀥𑀻𑀢𑀺 𑀲𑀩𑁆𑀩𑀪𑀯𑀲𑀸𑀥𑀸𑀭𑀡𑀁. 𑀇𑀥 𑀧𑀦 ‘‘𑀓𑀝𑀢𑁆𑀢𑀸 𑀘 𑀭𑀽𑀧’’𑀦𑁆𑀢𑀺𑀆𑀤𑀺𑀯𑀘𑀦𑀢𑁄 𑀧𑀜𑁆𑀘𑀯𑁄𑀓𑀸𑀭𑀧𑀝𑀺𑀲𑀦𑁆𑀥𑀺𑀬𑁂𑀯 𑀅𑀥𑀺𑀧𑁆𑀧𑁂𑀢𑀸. 𑀲𑀸 𑀳𑀺 𑀭𑀽𑀧𑀲𑁆𑀲𑀧𑀺 𑀅𑀭𑀽𑀧𑀲𑁆𑀲𑀧𑀺 𑀧𑀘𑁆𑀘𑀬𑀪𑀸𑀯𑀜𑁆𑀘𑁂𑀯 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀪𑀸𑀯𑀜𑁆𑀘 𑀲𑀗𑁆𑀕𑀡𑁆𑀳𑀸𑀢𑀺, 𑀢𑀲𑁆𑀫𑀸 𑀧𑀭𑀺𑀧𑀼𑀡𑁆𑀡𑀯𑀺𑀲𑁆𑀲𑀚𑁆𑀚𑀦𑀸 𑀳𑁄𑀢𑀻𑀢𑀺 𑀕𑀳𑀺𑀢𑀸. 𑀩𑀸𑀳𑀺𑀭𑀁 𑀏𑀓𑀁 𑀫𑀳𑀸𑀪𑀽𑀢𑀦𑁆𑀢𑀺 𑀅𑀦𑀺𑀦𑁆𑀤𑁆𑀭𑀺𑀬𑀩𑀤𑁆𑀥𑁂𑀲𑀼 𑀧𑀣𑀯𑀻𑀧𑀸𑀲𑀸𑀡𑀸𑀤𑀻𑀲𑀼 𑀫𑀳𑀸𑀪𑀽𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀧𑀘𑁆𑀘𑀬𑀯𑀺𑀪𑀗𑁆𑀕𑀯𑀸𑀭𑀲𑁆𑀫𑀺𑀜𑁆𑀳𑀺 𑀘𑀢𑁆𑀢𑀸𑀭𑁄 𑀫𑀳𑀸𑀪𑀽𑀢𑀸𑀢𑀺 𑀅𑀚𑁆𑀛𑀢𑁆𑀢𑀺𑀓𑀜𑁆𑀘 𑀩𑀸𑀳𑀺𑀭𑀜𑁆𑀘 𑀏𑀓𑀢𑁄 𑀓𑀢𑁆𑀯𑀸 𑀕𑀳𑀺𑀢𑀁. 𑀲𑀗𑁆𑀔𑁂𑀧𑀤𑁂𑀲𑀦𑀸 𑀳𑀺 𑀲𑀸. 𑀅𑀬𑀁 𑀧𑀦 𑀯𑀺𑀢𑁆𑀣𑀸𑀭𑀤𑁂𑀲𑀦𑀸, 𑀢𑀲𑁆𑀫𑀸 𑀲𑀩𑁆𑀩𑀁 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 ‘‘𑀩𑀸𑀳𑀺𑀭𑀁 𑀏𑀓𑀁 𑀫𑀳𑀸𑀪𑀽𑀢’’𑀦𑁆𑀢𑀺𑀆𑀤𑀺𑀫𑀸𑀳. 𑀅𑀲𑀜𑁆𑀜𑀲𑀢𑁆𑀢𑀸𑀦𑀁 𑀏𑀓𑀁 𑀫𑀳𑀸𑀪𑀽𑀢𑀁 𑀧𑀝𑀺𑀘𑁆𑀘𑀸𑀢𑀺 𑀤𑁆𑀯𑀺𑀲𑀦𑁆𑀢𑀢𑀺𑀲𑀫𑀼𑀝𑁆𑀞𑀸𑀦𑀪𑀽𑀢𑀯𑀲𑁂𑀦 𑀯𑀼𑀢𑁆𑀢𑀁. 𑀫𑀳𑀸𑀪𑀽𑀢𑁂 𑀧𑀝𑀺𑀘𑁆𑀘 𑀓𑀝𑀢𑁆𑀢𑀸𑀭𑀽𑀧𑀦𑁆𑀢𑀺 𑀇𑀤𑀁 𑀧𑀦 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀯𑀲𑁂𑀦𑁂𑀯 𑀯𑀼𑀢𑁆𑀢𑀁. 𑀉𑀧𑀸𑀤𑀸𑀭𑀽𑀧𑀦𑁆𑀢𑀺 𑀉𑀢𑀼𑀲𑀫𑀼𑀝𑁆𑀞𑀸𑀦𑀯𑀲𑁂𑀦𑁂𑀯.

𑁫𑁮. 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑁂 𑀔𑀦𑁆𑀥𑁂 𑀧𑀝𑀺𑀘𑁆𑀘 𑀯𑀢𑁆𑀣𑀼, 𑀯𑀢𑁆𑀣𑀼𑀁 𑀧𑀝𑀺𑀘𑁆𑀘 𑀔𑀦𑁆𑀥𑀸𑀢𑀺 𑀘𑀢𑀼𑀦𑁆𑀦𑀫𑁆𑀧𑀺 𑀔𑀦𑁆𑀥𑀸𑀦𑀁 𑀏𑀓𑀢𑁄 𑀯𑀢𑁆𑀣𑀼𑀦𑀸 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀢𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁.

𑁫𑁯. 𑀦𑀺𑀲𑁆𑀲𑀬𑀧𑀘𑁆𑀘𑀬𑁂 𑀬𑀲𑁆𑀫𑀸 𑀧𑀝𑀺𑀘𑁆𑀘𑀢𑁆𑀣𑁄 𑀦𑀸𑀫 𑀲𑀳𑀚𑀸𑀢𑀢𑁆𑀣𑁄, 𑀢𑀲𑁆𑀫𑀸 𑀬𑀸 𑀳𑁂𑀝𑁆𑀞𑀸 𑀧𑀘𑁆𑀘𑀬𑀯𑀺𑀪𑀗𑁆𑀕𑀯𑀸𑀭𑁂 𑀘𑀓𑁆𑀔𑀸𑀬𑀢𑀦𑀸𑀤𑀻𑀦𑀁 𑀦𑀺𑀲𑁆𑀲𑀬𑀧𑀘𑁆𑀘𑀬𑀢𑀸 𑀤𑀲𑁆𑀲𑀺𑀢𑀸, 𑀦 𑀲𑀸 𑀕𑀳𑀺𑀢𑀸. 𑀘𑀓𑁆𑀔𑀸𑀬𑀢𑀦𑀸𑀤𑀻𑀦𑀺 𑀳𑀺 𑀧𑀼𑀭𑁂𑀚𑀸𑀢𑀸𑀦𑀺 𑀳𑀼𑀢𑁆𑀯𑀸 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀇𑀥 𑀲𑀳𑀚𑀸𑀢𑀫𑁂𑀯 𑀮𑀩𑁆𑀪𑀢𑀺. 𑀢𑁂𑀦𑁂𑀯 𑀯𑀼𑀢𑁆𑀢𑀁 𑁋 ‘‘𑀦𑀺𑀲𑁆𑀲𑀬𑀧𑀘𑁆𑀘𑀬𑁄 𑀲𑀳𑀚𑀸𑀢𑀧𑀘𑁆𑀘𑀬𑀲𑀤𑀺𑀲𑁄’’𑀢𑀺.

𑁬𑁦. 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂 𑀭𑀽𑀧𑀲𑁆𑀲 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑀸𑀪𑀸𑀯𑀸 𑀢𑀻𑀡𑁂𑀯 𑀯𑀺𑀲𑁆𑀲𑀚𑁆𑀚𑀦𑀸𑀦𑀺 𑀮𑀩𑁆𑀪𑀦𑁆𑀢𑀺, 𑀢𑁂𑀦 𑀯𑀼𑀢𑁆𑀢𑀁 ‘‘𑀆𑀭𑀫𑁆𑀫𑀡𑀧𑀘𑁆𑀘𑀬𑀲𑀤𑀺𑀲’’𑀦𑁆𑀢𑀺. 𑀢𑀢𑁆𑀣 𑀓𑀺𑀜𑁆𑀘𑀸𑀧𑀺 𑀦 𑀲𑀩𑁆𑀩𑁂 𑀓𑀼𑀲𑀮𑀸𑀓𑀼𑀲𑀮𑀸𑀩𑁆𑀬𑀸𑀓𑀢𑀸 𑀆𑀭𑀫𑁆𑀫𑀡𑀽𑀧𑀦𑀺𑀲𑁆𑀲𑀬𑀁 𑀮𑀪𑀦𑁆𑀢𑀺, 𑀬𑁂 𑀧𑀦 𑀮𑀪𑀦𑁆𑀢𑀺, 𑀢𑁂𑀲𑀁 𑀯𑀲𑁂𑀦𑁂𑀢𑀁 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑁬𑁧. 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑁂 𑀯𑀢𑁆𑀣𑀼𑀁 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑀸𑀢𑀺 𑀯𑀢𑁆𑀣𑀼𑀁 𑀧𑀝𑀺𑀘𑁆𑀘 𑀯𑀢𑁆𑀣𑀼𑀦𑀸 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑀢𑀁 𑀲𑀸𑀥𑁂𑀦𑁆𑀢𑁂𑀦 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀯𑀺𑀧𑀸𑀓𑀸𑀩𑁆𑀬𑀸𑀓𑀢𑀁 𑀏𑀓𑀁 𑀔𑀦𑁆𑀥𑀦𑁆𑀢𑀺 𑀏𑀢𑁆𑀣 𑀬𑀁 𑀯𑀺𑀧𑀸𑀓𑀸𑀩𑁆𑀬𑀸𑀓𑀢𑀲𑁆𑀲 𑀯𑀢𑁆𑀣𑀼 𑀑𑀓𑁆𑀓𑀦𑁆𑀢𑀺𑀓𑁆𑀔𑀡𑁂 𑀲𑀳𑀚𑀸𑀢𑀧𑀘𑁆𑀘𑀬𑁄 𑀳𑁄𑀢𑀺, 𑀢𑀁 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑀪𑀸𑀚𑀦𑀺𑀬𑀢𑁆𑀢𑀸 𑀇𑀥 𑀦 𑀕𑀳𑁂𑀢𑀩𑁆𑀩𑀁. 𑀬𑁂𑀧𑀺 𑀓𑀼𑀲𑀮𑀸𑀤𑀬𑁄 𑀆𑀭𑀼𑀧𑁆𑀧𑁂 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑀁 𑀦 𑀮𑀪𑀦𑁆𑀢𑀺, 𑀢𑁂𑀧𑀺 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑀪𑀸𑀚𑀦𑀺𑀬𑀢𑁄𑀬𑁂𑀯 𑀇𑀥 𑀦 𑀕𑀳𑁂𑀢𑀩𑁆𑀩𑀸. 𑀆𑀭𑀫𑁆𑀫𑀡𑀁 𑀧𑀦 𑀦𑀺𑀬𑀫𑀢𑁄 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑀪𑀸𑀯𑀁 𑀦 𑀮𑀪𑀢𑀺. 𑀭𑀽𑀧𑀸𑀬𑀢𑀦𑀸𑀤𑀻𑀦𑀺 𑀳𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀁𑀬𑁂𑀯 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑀢𑀁 𑀲𑀸𑀥𑁂𑀦𑁆𑀢𑀺, 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸 𑀅𑀢𑀻𑀢𑀸𑀦𑀸𑀕𑀢𑀸𑀦𑀺𑀧𑀺 𑀆𑀭𑀫𑁆𑀫𑀡𑀁 𑀳𑁄𑀦𑁆𑀢𑀺𑀬𑁂𑀯. 𑀢𑀲𑁆𑀫𑀸 𑀇𑀥 𑀦 𑀕𑀳𑀺𑀢𑀁. 𑀔𑀦𑁆𑀥𑀯𑀲𑁂𑀦 𑀳𑀺 𑀅𑀬𑀁 𑀤𑁂𑀲𑀦𑀸, 𑀦 𑀯𑀺𑀜𑁆𑀜𑀸𑀡𑀥𑀸𑀢𑀼𑀯𑀲𑁂𑀦. ‘‘𑀯𑀺𑀧𑀸𑀓𑀸𑀩𑁆𑀬𑀸𑀓𑀢𑀁 𑀏𑀓𑀁 𑀔𑀦𑁆𑀥’’𑀦𑁆𑀢𑀺 𑀤𑁂𑀲𑀦𑀸𑀬 𑀘 𑀲𑀩𑁆𑀩𑀸𑀧𑀺 𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑁄 𑀕𑀳𑀺𑀢𑀸, 𑀦 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀼𑀆𑀤𑀬𑁄 𑀏𑀯𑀸𑀢𑀺.

𑀧𑀘𑁆𑀙𑀸𑀚𑀸𑀢𑁄 𑀓𑀼𑀲𑀮𑀸𑀓𑀼𑀲𑀮𑀸𑀦𑀁 𑀧𑀘𑁆𑀘𑀬𑁄 𑀦 𑀳𑁄𑀢𑀺, 𑀅𑀩𑁆𑀬𑀸𑀓𑀢𑀲𑁆𑀲𑀧𑀺 𑀉𑀧𑀢𑁆𑀣𑀫𑁆𑀪𑀓𑁄𑀯 𑀦 𑀚𑀦𑀓𑁄, 𑀢𑀲𑁆𑀫𑀸 ‘‘𑀉𑀧𑁆𑀧𑀚𑁆𑀚𑀢𑀺 𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬𑀸’’𑀢𑀺 𑀏𑀯𑀁 𑀯𑀢𑁆𑀢𑀩𑁆𑀩𑁄 𑀏𑀓𑀥𑀫𑁆𑀫𑁄𑀧𑀺 𑀦𑀢𑁆𑀣𑀻𑀢𑀺 𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬𑀯𑀲𑁂𑀦 𑀯𑀺𑀲𑁆𑀲𑀚𑁆𑀚𑀦𑀁 𑀦 𑀓𑀢𑀁.

𑁬𑁨. 𑀆𑀲𑁂𑀯𑀦𑀧𑀘𑁆𑀘𑀬𑁂 𑀓𑀸𑀫𑀁 𑀲𑀩𑁆𑀩𑀸 𑀓𑀺𑀭𑀺𑀬𑀸 𑀆𑀲𑁂𑀯𑀦𑀧𑀘𑁆𑀘𑀬𑀁 𑀦 𑀮𑀪𑀦𑁆𑀢𑀺, 𑀮𑀩𑁆𑀪𑀫𑀸𑀦𑀯𑀲𑁂𑀦 𑀧𑀦 ‘‘𑀓𑀺𑀭𑀺𑀬𑀸𑀩𑁆𑀬𑀸𑀓𑀢’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀲𑁆𑀫𑀸 𑀚𑀯𑀦𑀓𑀺𑀭𑀺𑀬𑀸𑀯𑁂𑀢𑁆𑀣 𑀕𑀳𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑁬𑁩. 𑀓𑀫𑁆𑀫𑀧𑀘𑁆𑀘𑀬𑁂 𑀓𑀼𑀲𑀮𑀸𑀓𑀼𑀲𑀮𑁂𑀲𑀼 𑀏𑀓𑀓𑁆𑀔𑀡𑀺𑀓𑁄 𑀓𑀫𑁆𑀫𑀧𑀘𑁆𑀘𑀬𑁄 𑀯𑁂𑀤𑀺𑀢𑀩𑁆𑀩𑁄, 𑀢𑀣𑀸 𑀓𑀺𑀭𑀺𑀬𑀸𑀩𑁆𑀬𑀸𑀓𑀢𑁂. 𑀯𑀺𑀧𑀸𑀓𑀸𑀩𑁆𑀬𑀸𑀓𑀢𑁂 𑀧𑀦 𑀦𑀸𑀦𑀸𑀓𑁆𑀔𑀡𑀺𑀓𑁄𑀧𑀺, 𑀢𑀣𑀸 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀫𑀳𑀸𑀪𑀽𑀢𑀸𑀦𑀁. 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀦𑀁 𑀧𑀦 𑀏𑀓𑀓𑁆𑀔𑀡𑀺𑀓𑁄. 𑀓𑀝𑀢𑁆𑀢𑀸𑀭𑀽𑀧𑀸𑀦𑀁 𑀦𑀸𑀦𑀸𑀓𑁆𑀔𑀡𑀺𑀓𑁄𑀯 𑀢𑀣𑀸 𑀅𑀲𑀜𑁆𑀜𑀲𑀢𑁆𑀢𑀭𑀽𑀧𑀸𑀦𑀁. 𑀓𑀝𑀢𑁆𑀢𑀸𑀭𑀽𑀧𑀁 𑀧𑀦𑁂𑀢𑁆𑀣 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁. 𑀲𑁂𑀲𑀁 𑀦 𑀏𑀓𑀦𑁆𑀢𑀢𑁄 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀢𑁆𑀢𑀸 𑀉𑀧𑀸𑀤𑀸𑀭𑀽𑀧𑀦𑁆𑀢𑀺 𑀯𑀼𑀢𑁆𑀢𑀁. 𑀏𑀯𑀁 𑀲𑀦𑁆𑀢𑁂𑀧𑀺 𑀇𑀥 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀫𑁂𑀯 𑀅𑀥𑀺𑀧𑁆𑀧𑁂𑀢𑀁.

𑁬𑁪. 𑀯𑀺𑀧𑀸𑀓𑀧𑀘𑁆𑀘𑀬𑁂 𑀓𑀼𑀲𑀮𑀸𑀓𑀼𑀲𑀮𑀁 𑀓𑀺𑀭𑀺𑀬𑀜𑁆𑀘 𑀦 𑀮𑀩𑁆𑀪𑀢𑀻𑀢𑀺 𑀅𑀩𑁆𑀬𑀸𑀓𑀢𑀯𑀲𑁂𑀦𑁂𑀯 𑀯𑀺𑀲𑁆𑀲𑀚𑁆𑀚𑀦𑀁 𑀓𑀢𑀁. 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀦𑁆𑀢𑀺 𑀯𑀺𑀧𑀸𑀓𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀫𑁂𑀯. 𑀓𑀝𑀢𑁆𑀢𑀸𑀭𑀽𑀧𑀦𑁆𑀢𑀺 𑀬𑀣𑀸𑀮𑀸𑀪𑀯𑀲𑁂𑀦 𑀇𑀦𑁆𑀤𑁆𑀭𑀺𑀬𑀭𑀽𑀧𑀜𑁆𑀘 𑀯𑀢𑁆𑀣𑀼𑀭𑀽𑀧𑀜𑁆𑀘. 𑀉𑀧𑀸𑀤𑀸𑀭𑀽𑀧𑀦𑁆𑀢𑀺 𑀢𑀤𑀯𑀲𑁂𑀲𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀯𑀺𑀚𑁆𑀚𑀫𑀸𑀦𑀓𑀁 𑀉𑀧𑀸𑀤𑀸𑀭𑀽𑀧𑀁.

𑁬𑁫. 𑀆𑀳𑀸𑀭𑀧𑀘𑁆𑀘𑀬𑁂 𑀲𑀩𑁆𑀩𑁂𑀲𑀫𑁆𑀧𑀺 𑀓𑀼𑀲𑀮𑀸𑀤𑀻𑀦𑀁 𑀔𑀦𑁆𑀥𑀸𑀦𑀁 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀲𑁆𑀲 𑀘 𑀅𑀭𑀽𑀧𑀸𑀳𑀸𑀭𑀯𑀲𑁂𑀦 𑀉𑀧𑁆𑀧𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸, 𑀢𑀣𑀸 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀫𑀳𑀸𑀪𑀽𑀢𑀸𑀦𑀁. 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀦𑁆𑀢𑀺 𑀪𑀯𑀗𑁆𑀕𑀸𑀤𑀺𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀁. 𑀆𑀳𑀸𑀭𑀲𑀫𑀼𑀝𑁆𑀞𑀸𑀦𑀦𑁆𑀢𑀺 𑀓𑀩𑀴𑀻𑀓𑀸𑀭𑀸𑀳𑀸𑀭𑀲𑀫𑀼𑀝𑁆𑀞𑀸𑀦𑀁. 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀦𑁆𑀢𑀺 𑀓𑀼𑀲𑀮𑀸𑀓𑀼𑀲𑀮𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀫𑁂𑀯. 𑀧𑀘𑁆𑀘𑀬𑀯𑀺𑀪𑀗𑁆𑀕𑀯𑀸𑀭𑁂 𑀆𑀳𑀸𑀭𑀧𑀝𑀺𑀧𑀸𑀝𑀺𑀬𑀸 𑀧𑀞𑀫𑀁 𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄 𑀤𑀲𑁆𑀲𑀺𑀢𑁄, 𑀇𑀥 𑀧𑀦 𑀓𑀼𑀲𑀮𑀁 𑀥𑀫𑁆𑀫𑀦𑁆𑀢𑀺 𑀧𑀼𑀘𑁆𑀙𑀸𑀯𑀲𑁂𑀦 𑀧𑀞𑀫𑀁 𑀅𑀭𑀽𑀧𑀸𑀳𑀸𑀭𑀸 𑀤𑀲𑁆𑀲𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑁬𑁬. 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑁂 𑀧𑀘𑁆𑀘𑀬𑀯𑀺𑀪𑀗𑁆𑀕𑁂 𑀇𑀦𑁆𑀤𑁆𑀭𑀺𑀬𑀧𑀝𑀺𑀧𑀸𑀝𑀺𑀬𑀸 𑀧𑀞𑀫𑀁 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀸𑀤𑀻𑀦𑀺 𑀤𑀲𑁆𑀲𑀺𑀢𑀸𑀦𑀺, 𑀇𑀥 𑀧𑀦 𑀓𑀼𑀲𑀮𑀸𑀤𑀺𑀧𑀼𑀘𑁆𑀙𑀸𑀯𑀲𑁂𑀦 𑀧𑀞𑀫𑀁 𑀅𑀭𑀽𑀧𑀺𑀦𑁆𑀤𑁆𑀭𑀺𑀬𑀸𑀦𑀁 𑀧𑀘𑁆𑀘𑀬𑀢𑀸 𑀤𑀲𑁆𑀲𑀺𑀢𑀸. 𑀢𑀢𑁆𑀣 𑀓𑀼𑀲𑀮𑀸𑀤𑀻𑀲𑀼 𑀬𑀣𑀸𑀮𑀸𑀪𑀯𑀲𑁂𑀦 𑀅𑀭𑀽𑀧𑀺𑀦𑁆𑀤𑁆𑀭𑀺𑀬𑀸 𑀕𑀳𑁂𑀢𑀩𑁆𑀩𑀸. 𑀅𑀲𑀜𑁆𑀜𑀲𑀢𑁆𑀢𑀸𑀦𑀁 𑀪𑀽𑀢𑀭𑀽𑀧𑁂𑀲𑀼𑀧𑀺 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀦𑁆𑀢𑀺.

𑁬𑁭. 𑀛𑀸𑀦𑀫𑀕𑁆𑀕𑀧𑀘𑁆𑀘𑀬𑁂𑀲𑀼 𑀳𑁂𑀢𑀼𑀧𑀘𑁆𑀘𑀬𑀲𑀤𑀺𑀲𑀫𑁂𑀯 𑀯𑀺𑀲𑁆𑀲𑀚𑁆𑀚𑀦𑀁, 𑀢𑁂𑀦𑁂𑀯𑁂𑀢𑁆𑀣 ‘‘𑀳𑁂𑀢𑀼𑀧𑀘𑁆𑀘𑀬𑀲𑀤𑀺𑀲’’𑀦𑁆𑀢𑀺 𑀯𑀼𑀢𑁆𑀢𑀁.

𑁬𑁮. 𑀲𑀫𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑁂 𑀯𑀺𑀲𑁆𑀲𑀚𑁆𑀚𑀦𑀁 𑀆𑀭𑀫𑁆𑀫𑀡𑀧𑀘𑁆𑀘𑀬𑀕𑀢𑀺𑀓𑀁, 𑀢𑁂𑀦𑁂𑀯𑁂𑀢𑁆𑀣 ‘‘𑀆𑀭𑀫𑁆𑀫𑀡𑀧𑀘𑁆𑀘𑀬𑀲𑀤𑀺𑀲’’𑀦𑁆𑀢𑀺 𑀯𑀼𑀢𑁆𑀢𑀁.

𑁬𑁯. 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑁂 𑀯𑀢𑁆𑀣𑀼𑀁 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀸𑀢𑀺 𑀯𑀢𑁆𑀣𑀼𑀁 𑀧𑀝𑀺𑀘𑁆𑀘 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀸, 𑀯𑀢𑁆𑀣𑀼𑀦𑀸 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀢𑀁 𑀲𑀸𑀥𑁂𑀦𑁆𑀢𑁂𑀦 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀔𑀦𑁆𑀥𑁂 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀸𑀢𑀺 𑀔𑀦𑁆𑀥𑁂 𑀧𑀝𑀺𑀘𑁆𑀘 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀸, 𑀔𑀦𑁆𑀥𑁂𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀢𑀁 𑀲𑀸𑀥𑁂𑀦𑁆𑀢𑁂𑀳𑀺 𑀉𑀧𑁆𑀧𑀚𑁆𑀚𑀢𑀻𑀢𑀺 𑀅𑀢𑁆𑀣𑁄. 𑀔𑀦𑁆𑀥𑀸 𑀯𑀢𑁆𑀣𑀼𑀁 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀸𑀢𑀺 𑀯𑀢𑁆𑀣𑀼𑀁 𑀧𑀝𑀺𑀘𑁆𑀘 𑀔𑀦𑁆𑀥𑀸 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀸. 𑀯𑀢𑁆𑀣𑀼𑀦𑀸 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀢𑀁 𑀲𑀸𑀥𑁂𑀦𑁆𑀢𑁂𑀦 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀁 𑀔𑀦𑁆𑀥𑁂 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀸𑀢𑀺 𑀔𑀦𑁆𑀥𑁂 𑀧𑀝𑀺𑀘𑁆𑀘 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀸 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀁 𑀭𑀽𑀧𑀁 𑀔𑀦𑁆𑀥𑁂𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀢𑀁 𑀲𑀸𑀥𑁂𑀦𑁆𑀢𑁂𑀳𑀺 𑀉𑀧𑁆𑀧𑀚𑁆𑀚𑀢𑀻𑀢𑀺 𑀅𑀢𑁆𑀣𑁄. 𑀲𑁂𑀲𑀯𑀺𑀲𑁆𑀲𑀚𑁆𑀚𑀦𑁂𑀲𑀼𑀧𑀺 𑀯𑀢𑁆𑀣𑀼𑀁 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀸𑀢𑀺𑀆𑀤𑀻𑀲𑀼𑀧𑀺 𑀯𑀼𑀢𑁆𑀢𑀦𑀬𑁂𑀦𑁂𑀯𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀯𑀺𑀧𑀸𑀓𑀸𑀩𑁆𑀬𑀸𑀓𑀢𑁂 𑀘𑁂𑀢𑁆𑀣 𑀯𑀢𑁆𑀣𑀼𑀕𑁆𑀕𑀳𑀡𑁂𑀦 𑀘𑀓𑁆𑀔𑀸𑀤𑀻𑀦𑀺 𑀲𑀗𑁆𑀕𑀳𑀺𑀢𑀩𑁆𑀩𑀸𑀦𑀺. 𑀏𑀓𑀁 𑀫𑀳𑀸𑀪𑀽𑀢𑀦𑁆𑀢𑀺𑀆𑀤𑀺 𑀭𑀽𑀧𑀸𑀩𑁆𑀬𑀸𑀓𑀢𑀲𑁆𑀲 𑀧𑀘𑁆𑀘𑀬𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁. 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀦𑁆𑀢𑀺 𑀅𑀩𑁆𑀬𑀸𑀓𑀢𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀫𑁆𑀧𑀺 𑀓𑀼𑀲𑀮𑀸𑀓𑀼𑀲𑀮𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀫𑁆𑀧𑀺.

𑁭𑁦. 𑀅𑀢𑁆𑀣𑀺𑀧𑀘𑁆𑀘𑀬𑁂 𑀲𑀩𑁆𑀩𑀁 𑀲𑀳𑀚𑀸𑀢𑀧𑀘𑁆𑀘𑀬𑀕𑀢𑀺𑀓𑀁. 𑀢𑁂𑀦𑁂𑀯𑁂𑀢𑁆𑀣 ‘‘𑀲𑀳𑀚𑀸𑀢𑀧𑀘𑁆𑀘𑀬𑀲𑀤𑀺𑀲’’𑀦𑁆𑀢𑀺 𑀯𑀼𑀢𑁆𑀢𑀁.

𑁭𑁧-𑁭𑁨. 𑀦𑀢𑁆𑀣𑀺𑀯𑀺𑀕𑀢𑀸 𑀆𑀭𑀫𑁆𑀫𑀡𑀧𑀘𑁆𑀘𑀬𑀕𑀢𑀺𑀓𑀸, 𑀅𑀯𑀺𑀕𑀢𑀁 𑀲𑀳𑀚𑀸𑀢𑀕𑀢𑀺𑀓𑀁. 𑀢𑁂𑀦𑁂𑀯𑁂𑀢𑁆𑀣 ‘‘𑀆𑀭𑀫𑁆𑀫𑀡𑀧𑀘𑁆𑀘𑀬𑀲𑀤𑀺𑀲𑀁, 𑀲𑀳𑀚𑀸𑀢𑀧𑀘𑁆𑀘𑀬𑀲𑀤𑀺𑀲’’𑀦𑁆𑀢𑀺 𑀯𑀼𑀢𑁆𑀢𑀁. 𑀇𑀫𑁂 𑀢𑁂𑀯𑀻𑀲𑀢𑀺 𑀧𑀘𑁆𑀘𑀬𑀸𑀢𑀺 𑀲𑀗𑁆𑀔𑀺𑀧𑀺𑀢𑁆𑀯𑀸 𑀤𑀲𑁆𑀲𑀺𑀢𑀸𑀦𑀁 𑀯𑀲𑁂𑀦𑁂𑀢𑀁 𑀯𑀼𑀢𑁆𑀢𑀁. 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀸𑀢𑀺 𑀬𑀸 𑀧𑀼𑀘𑁆𑀙𑀸 𑀯𑀺𑀲𑁆𑀲𑀚𑁆𑀚𑀦𑀁 𑀮𑀪𑀦𑁆𑀢𑀺, 𑀢𑀸𑀲𑀁 𑀯𑀲𑁂𑀦 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀸. 𑀅𑀬𑀁 𑀳𑁂𑀢𑀼𑀧𑀘𑁆𑀘𑀬𑀁 𑀆𑀤𑀺𑀁 𑀓𑀢𑁆𑀯𑀸 𑀏𑀓𑀫𑀽𑀮𑀓𑁂 𑀧𑀘𑁆𑀘𑀬𑀸𑀦𑀼𑀮𑁄𑀫𑁂 𑀧𑀝𑀺𑀘𑁆𑀘𑀯𑀸𑀭𑀲𑁆𑀲 𑀓𑀼𑀲𑀮𑀢𑁆𑀢𑀺𑀓𑀯𑀺𑀲𑁆𑀲𑀚𑁆𑀚𑀦𑁂 𑀅𑀢𑁆𑀣𑀯𑀡𑁆𑀡𑀦𑀸.

(𑁨.) 𑀲𑀗𑁆𑀔𑁆𑀬𑀸𑀯𑀸𑀭𑁄

𑁭𑁩. 𑀇𑀤𑀸𑀦𑀺 𑀬𑁂 𑀏𑀢𑁆𑀣 𑀳𑁂𑀢𑀼𑀧𑀘𑁆𑀘𑀬𑀸𑀤𑀻𑀲𑀼 𑀏𑀓𑁂𑀓𑀲𑁆𑀫𑀺𑀁 𑀧𑀘𑁆𑀘𑀬𑁂 𑀯𑀺𑀲𑁆𑀲𑀚𑁆𑀚𑀦𑀯𑀸𑀭𑀸 𑀮𑀤𑁆𑀥𑀸, 𑀢𑁂 𑀕𑀡𑀦𑀯𑀲𑁂𑀦 𑀤𑀲𑁆𑀲𑁂𑀢𑀼𑀁 𑀳𑁂𑀢𑀼𑀬𑀸 𑀦𑀯𑀸𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀳𑁂𑀢𑀼𑀬𑀸 𑀦𑀯𑀸𑀢𑀺 𑀳𑁂𑀢𑀼𑀧𑀘𑁆𑀘𑀬𑁂 𑀦𑀯 𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑀯𑀸𑀭𑀸 𑀳𑁄𑀦𑁆𑀢𑀺. 𑀲𑁂𑀬𑁆𑀬𑀣𑀺𑀤𑀁 𑁋 𑀓𑀼𑀲𑀮𑁂𑀦 𑀓𑀼𑀲𑀮𑀁, 𑀓𑀼𑀲𑀮𑁂𑀦 𑀅𑀩𑁆𑀬𑀸𑀓𑀢𑀁, 𑀓𑀼𑀲𑀮𑁂𑀦 𑀓𑀼𑀲𑀮𑀸𑀩𑁆𑀬𑀸𑀓𑀢𑀁; 𑀅𑀓𑀼𑀲𑀮𑁂𑀦 𑀅𑀓𑀼𑀲𑀮𑀁, 𑀅𑀓𑀼𑀲𑀮𑁂𑀦 𑀅𑀩𑁆𑀬𑀸𑀓𑀢𑀁, 𑀅𑀓𑀼𑀲𑀮𑁂𑀦 𑀅𑀓𑀼𑀲𑀮𑀸𑀩𑁆𑀬𑀸𑀓𑀢𑀁, 𑀅𑀩𑁆𑀬𑀸𑀓𑀢𑁂𑀦 𑀅𑀩𑁆𑀬𑀸𑀓𑀢𑀁, 𑀓𑀼𑀲𑀮𑀸𑀩𑁆𑀬𑀸𑀓𑀢𑁂𑀦 𑀅𑀩𑁆𑀬𑀸𑀓𑀢𑀁, 𑀅𑀓𑀼𑀲𑀮𑀸𑀩𑁆𑀬𑀸𑀓𑀢𑁂𑀦 𑀅𑀩𑁆𑀬𑀸𑀓𑀢𑀦𑁆𑀢𑀺.

𑀆𑀭𑀫𑁆𑀫𑀡𑁂 𑀢𑀻𑀡𑀻𑀢𑀺 𑀓𑀼𑀲𑀮𑁂𑀦 𑀓𑀼𑀲𑀮𑀁, 𑀅𑀓𑀼𑀲𑀮𑁂𑀦 𑀅𑀓𑀼𑀲𑀮𑀁, 𑀅𑀩𑁆𑀬𑀸𑀓𑀢𑁂𑀦 𑀅𑀩𑁆𑀬𑀸𑀓𑀢𑀁. 𑀅𑀥𑀺𑀧𑀢𑀺𑀬𑀸 𑀦𑀯𑀸𑀢𑀺 𑀳𑁂𑀢𑀼𑀬𑀸 𑀯𑀼𑀢𑁆𑀢𑀲𑀤𑀺𑀲𑀸𑀯. 𑀤𑁆𑀯𑀸𑀤𑀲𑀲𑀼 𑀳𑀺 𑀧𑀘𑁆𑀘𑀬𑁂𑀲𑀼 𑀦𑀯 𑀦𑀯𑀸𑀢𑀺 𑀯𑀼𑀢𑁆𑀢𑀁. 𑀲𑀩𑁆𑀩𑁂𑀲𑀼𑀧𑀺 𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑀸𑀦𑀺 𑀳𑁂𑀢𑀼𑀧𑀘𑁆𑀘𑀬𑀲𑀤𑀺𑀲𑀸𑀦𑁂𑀯. 𑀯𑀺𑀪𑀗𑁆𑀕𑁂 𑀧𑀦 𑀅𑀢𑁆𑀣𑀺 𑀯𑀺𑀲𑁂𑀲𑁄. 𑀤𑀲𑀲𑀼 𑀧𑀘𑁆𑀘𑀬𑁂𑀲𑀼 𑀢𑀻𑀡𑀺 𑀢𑀻𑀡𑀻𑀢𑀺 𑀯𑀼𑀢𑁆𑀢𑀁. 𑀲𑀩𑁆𑀩𑁂𑀲𑀼𑀧𑀺 𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑀸𑀦𑀺 𑀆𑀭𑀫𑁆𑀫𑀡𑀲𑀤𑀺𑀲𑀸𑀦𑁂𑀯. 𑀯𑀺𑀪𑀗𑁆𑀕𑁂 𑀧𑀦 𑀅𑀢𑁆𑀣𑀺 𑀯𑀺𑀲𑁂𑀲𑁄. 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀲𑁆𑀫𑀺𑀜𑁆𑀳𑀺 𑀅𑀩𑁆𑀬𑀸𑀓𑀢𑀧𑀤𑀲𑁆𑀲 𑀯𑀺𑀲𑁆𑀲𑀚𑁆𑀚𑀦𑁂 𑀭𑀽𑀧𑀫𑁆𑀧𑀺 𑀮𑀩𑁆𑀪𑀢𑀺, 𑀢𑀣𑀸 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑁂. 𑀆𑀲𑁂𑀯𑀦𑀧𑀘𑁆𑀘𑀬𑁂 𑀯𑀺𑀧𑀸𑀓𑀸𑀦𑀺 𑀘𑁂𑀯 𑀯𑀻𑀣𑀺𑀘𑀺𑀢𑁆𑀢𑀸𑀦𑀺 𑀘 𑀦 𑀮𑀩𑁆𑀪𑀦𑁆𑀢𑀺. 𑀯𑀺𑀧𑀸𑀓𑁂 𑀏𑀓𑀦𑁆𑀢𑀺 𑀅𑀩𑁆𑀬𑀸𑀓𑀢𑀫𑁂𑀯. 𑀏𑀯𑀫𑁂𑀢𑁆𑀣 𑀲𑀗𑁆𑀔𑁂𑀧𑀢𑁄 𑀦𑀯 𑀢𑀻𑀡𑀺 𑀏𑀓𑀦𑁆𑀢𑀺, 𑀢𑀺𑀯𑀺𑀥𑁄𑀯 𑀯𑀸𑀭𑀧𑀭𑀺𑀘𑁆𑀙𑁂𑀤𑁄. 𑀯𑀺𑀢𑁆𑀣𑀸𑀭𑀢𑁄 𑀤𑁆𑀯𑀸𑀤𑀲 𑀦𑀯𑀓𑀸, 𑀤𑀲 𑀢𑀺𑀓𑀸, 𑀏𑀓𑀁 𑀏𑀓𑀓𑀦𑁆𑀢𑀺 𑀲𑀩𑁆𑀩𑁂𑀲𑀼𑀧𑀺 𑀢𑁂𑀯𑀻𑀲𑀢𑀺𑀬𑀸 𑀧𑀘𑁆𑀘𑀬𑁂𑀲𑀼 𑀏𑀓𑀽𑀦𑀘𑀢𑁆𑀢𑀸𑀮𑀻𑀲𑀸𑀥𑀺𑀓𑀁 𑀯𑀸𑀭𑀲𑀢𑀁 𑀳𑁄𑀢𑀺, 𑀏𑀓𑀽𑀦𑀘𑀢𑁆𑀢𑀸𑀮𑀻𑀲𑀸𑀥𑀺𑀓𑀜𑁆𑀘 𑀧𑀼𑀘𑁆𑀙𑀸𑀲𑀢𑀁. 𑀏𑀓𑀽𑀦𑀘𑀢𑁆𑀢𑀸𑀮𑀻𑀲𑀸𑀥𑀺𑀓𑀁 𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑀲𑀢𑀦𑁆𑀢𑀺𑀧𑀺 𑀢𑀲𑁆𑀲𑁂𑀯 𑀦𑀸𑀫𑀁.

𑁭𑁪. 𑀏𑀯𑀁 𑀳𑁂𑀢𑀼𑀧𑀘𑁆𑀘𑀬𑀸𑀤𑀺𑀓𑁂 𑀏𑀓𑀫𑀽𑀮𑀓𑁂 𑀕𑀡𑀦𑀁 𑀤𑀲𑁆𑀲𑁂𑀢𑁆𑀯𑀸 𑀇𑀢𑁄 𑀧𑀭𑁂𑀲𑀼 𑀤𑀼𑀫𑀽𑀮𑀓𑀸𑀤𑀻𑀲𑀼 𑀯𑀺𑀢𑁆𑀣𑀸𑀭𑀤𑁂𑀲𑀦𑀁 𑀲𑀗𑁆𑀔𑀺𑀧𑀺𑀢𑁆𑀯𑀸 𑀏𑀓𑀫𑀽𑀮𑀓𑁂 𑀤𑀲𑁆𑀲𑀺𑀢𑀸𑀬 𑀤𑁂𑀲𑀦𑀸𑀬 𑀮𑀩𑁆𑀪𑀫𑀸𑀦𑀕𑀡𑀦𑀜𑁆𑀜𑁂𑀯 𑀆𑀤𑀸𑀬 𑀯𑀸𑀭𑀧𑀭𑀺𑀘𑁆𑀙𑁂𑀤𑀁 𑀤𑀲𑁆𑀲𑁂𑀢𑀼𑀁 𑀤𑀼𑀫𑀽𑀮𑀓𑁂 𑀢𑀸𑀯 𑀳𑁂𑀢𑀼𑀧𑀘𑁆𑀘𑀬𑀸 𑀆𑀭𑀫𑁆𑀫𑀡𑁂 𑀢𑀻𑀡𑀻𑀢𑀺𑀆𑀤𑀺𑀫𑀸𑀳. 𑀢𑀢𑁆𑀭𑀺𑀤𑀁 𑀮𑀓𑁆𑀔𑀡𑀁 𑁋 𑀩𑀳𑀼𑀕𑀡𑀦𑁄𑀧𑀺 𑀧𑀘𑁆𑀘𑀬𑁄 𑀅𑀩𑀳𑀼𑀕𑀡𑀦𑁂𑀦 𑀲𑀤𑁆𑀥𑀺𑀁 𑀬𑀼𑀢𑁆𑀢𑁄 𑀢𑁂𑀦 𑀲𑀫𑀸𑀦𑀕𑀡𑀦𑁄𑀯 𑀳𑁄𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀳𑁂𑀢𑀼𑀧𑀘𑁆𑀘𑀬𑀸 𑀆𑀭𑀫𑁆𑀫𑀡𑁂 𑀢𑀻𑀡𑀻’’𑀢𑀺. 𑀳𑁂𑀢𑀼𑀆𑀭𑀫𑁆𑀫𑀡𑀤𑀼𑀓𑁂 𑀆𑀭𑀫𑁆𑀫𑀡𑁂 𑀯𑀼𑀢𑁆𑀢𑀸𑀦𑀺 𑀢𑀻𑀡𑁂𑀯 𑀯𑀺𑀲𑁆𑀲𑀚𑁆𑀚𑀦𑀸𑀦𑀺 𑀮𑀩𑁆𑀪𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀲𑀫𑀸𑀦𑀕𑀡𑀦𑁄 𑀧𑀦 𑀲𑀫𑀸𑀦𑀕𑀡𑀦𑁂𑀦 𑀲𑀤𑁆𑀥𑀺𑀁 𑀬𑀼𑀢𑁆𑀢𑁄 𑀅𑀧𑀭𑀺𑀳𑀻𑀦𑀕𑀡𑀦𑁄𑀯 𑀳𑁄𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀳𑁂𑀢𑀼𑀧𑀘𑁆𑀘𑀬𑀸 𑀅𑀥𑀺𑀧𑀢𑀺𑀬𑀸 𑀦𑀯𑀸’’𑀢𑀺. 𑀳𑁂𑀢𑀸𑀥𑀺𑀧𑀢𑀺𑀤𑀼𑀓𑁂 𑀦𑀯𑁂𑀯 𑀯𑀺𑀲𑁆𑀲𑀚𑁆𑀚𑀦𑀸𑀦𑀺 𑀮𑀩𑁆𑀪𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀯𑀺𑀧𑀸𑀓𑁂 𑀏𑀓𑀦𑁆𑀢𑀺 𑀳𑁂𑀢𑀼𑀯𑀺𑀧𑀸𑀓𑀤𑀼𑀓𑁂 𑀯𑀺𑀧𑀸𑀓𑁂 𑀯𑀼𑀢𑁆𑀢𑀁 𑀏𑀓𑀫𑁂𑀯 𑀯𑀺𑀲𑁆𑀲𑀚𑁆𑀚𑀦𑀁 𑀮𑀩𑁆𑀪𑀢𑀻𑀢𑀺 𑀏𑀯𑀁 𑀢𑀸𑀯 𑀤𑀼𑀫𑀽𑀮𑀓𑁂 𑀯𑀸𑀭𑀧𑀭𑀺𑀘𑁆𑀙𑁂𑀤𑁄 𑀯𑁂𑀤𑀺𑀢𑀩𑁆𑀩𑁄.

𑁭𑁫. 𑀢𑀺𑀫𑀽𑀮𑀓𑀸𑀤𑀻𑀲𑀼𑀧𑀺 𑀇𑀤𑀫𑁂𑀯 𑀮𑀓𑁆𑀔𑀡𑀁. 𑀢𑁂𑀦𑁂𑀯𑀸𑀳 𑁋 𑀳𑁂𑀢𑀼𑀧𑀘𑁆𑀘𑀬𑀸 𑀆𑀭𑀫𑁆𑀫𑀡𑀧𑀘𑁆𑀘𑀬𑀸 𑀅𑀥𑀺𑀧𑀢𑀺𑀬𑀸 𑀢𑀻𑀡𑀻𑀢𑀺. 𑀳𑁂𑀢𑀸𑀭𑀫𑁆𑀫𑀡𑀸𑀥𑀺𑀧𑀢𑀺 𑀢𑀺𑀓𑁂 𑀆𑀭𑀫𑁆𑀫𑀡𑁂 𑀯𑀼𑀢𑁆𑀢𑀸𑀦𑀺 𑀢𑀻𑀡𑁂𑀯 𑀯𑀺𑀲𑁆𑀲𑀚𑁆𑀚𑀦𑀸𑀦𑀺 𑀮𑀩𑁆𑀪𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀏𑀯𑀁 𑀲𑀩𑁆𑀩𑀢𑁆𑀣 𑀦𑀬𑁄 𑀦𑁂𑀢𑀩𑁆𑀩𑁄.

𑁭𑁬-𑁭𑁯. 𑀤𑁆𑀯𑀸𑀤𑀲𑀫𑀽𑀮𑀓𑁂 𑀧𑀦 𑀯𑀺𑀧𑀸𑀓𑀧𑀘𑁆𑀘𑀬𑁄 𑀦 𑀮𑀩𑁆𑀪𑀢𑀺, 𑀢𑀲𑁆𑀫𑀸 𑀆𑀲𑁂𑀯𑀦𑀧𑀘𑁆𑀘𑀬𑀸 𑀓𑀫𑁆𑀫𑁂 𑀢𑀻𑀡𑀻𑀢𑀺 𑀯𑀢𑁆𑀯𑀸 𑀯𑀺𑀧𑀸𑀓𑀁 𑀅𑀧𑀭𑀸𑀫𑀲𑀺𑀢𑁆𑀯𑀸 𑀆𑀳𑀸𑀭𑁂 𑀢𑀻𑀡𑀻𑀢𑀺 𑀯𑀼𑀢𑁆𑀢𑀁. 𑀢𑁂𑀭𑀲𑀫𑀽𑀮𑀓𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀢𑁂 𑀧𑀦 𑀲𑀗𑁆𑀔𑀺𑀧𑀺𑀢𑁆𑀯𑀸 𑀢𑁂𑀯𑀻𑀲𑀢𑀺𑀫𑀽𑀮𑀓𑁄𑀯𑁂𑀢𑁆𑀣 𑀤𑀲𑁆𑀲𑀺𑀢𑁄. 𑀲𑁄 𑀤𑀼𑀯𑀺𑀥𑁄 𑀳𑁄𑀢𑀺 𑁋 𑀲𑀸𑀲𑁂𑀯𑀦𑁄 𑀯𑀸 𑀲𑀯𑀺𑀧𑀸𑀓𑁄 𑀯𑀸. 𑀢𑀢𑁆𑀣 𑀧𑀞𑀫𑀁 𑀲𑀸𑀲𑁂𑀯𑀦𑁄 𑀤𑀲𑁆𑀲𑀺𑀢𑁄, 𑀲𑁄 𑀢𑀻𑀡𑁂𑀯 𑀯𑀺𑀲𑁆𑀲𑀚𑁆𑀚𑀦𑀸𑀦𑀺 𑀮𑀪𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀆𑀲𑁂𑀯𑀦𑀧𑀘𑁆𑀘𑀬𑀸 𑀅𑀯𑀺𑀕𑀢𑁂 𑀢𑀻𑀡𑀻’’𑀢𑀺. 𑀲𑀯𑀺𑀧𑀸𑀓𑁄 𑀧𑀦 𑀆𑀲𑁂𑀯𑀦𑀁 𑀦 𑀮𑀪𑀢𑀺, 𑀢𑀲𑁆𑀫𑀸 𑀢𑀁 𑀧𑀳𑀸𑀬 𑀯𑀺𑀧𑀸𑀓𑀯𑀲𑁂𑀦 𑀕𑀡𑀦𑀸𑀬 𑀤𑀲𑁆𑀲𑀦𑀢𑁆𑀣𑀁 𑀅𑀦𑀦𑁆𑀢𑀭𑀸𑀬𑁂𑀯 ‘‘𑀳𑁂𑀢𑀼𑀧𑀘𑁆𑀘𑀬𑀸…𑀧𑁂… 𑀯𑀺𑀧𑀸𑀓𑀧𑀘𑁆𑀘𑀬𑀸 𑀆𑀳𑀸𑀭𑁂 𑀏𑀓’’𑀦𑁆𑀢𑀺 𑀏𑀓𑀁 𑀦𑀬𑀁 𑀤𑀲𑁆𑀲𑁂𑀢𑁆𑀯𑀸 𑀧𑀘𑁆𑀙𑀸 𑀢𑁂𑀯𑀻𑀲𑀢𑀺𑀫𑀽𑀮𑀓𑁄𑀯 𑀤𑀲𑁆𑀲𑀺𑀢𑁄. 𑀏𑀢𑁂𑀲𑀼 𑀧𑀦 𑀤𑁆𑀯𑀻𑀲𑀼 𑀢𑁂𑀯𑀻𑀲𑀢𑀺𑀫𑀽𑀮𑀓𑁂𑀲𑀼 𑀓𑀺𑀜𑁆𑀘𑀸𑀧𑀺 𑀏𑀓𑀲𑁆𑀫𑀺𑀁 𑀯𑀺𑀧𑀸𑀓𑀧𑀘𑁆𑀘𑀬𑁄 𑀦𑀢𑁆𑀣𑀺, 𑀏𑀓𑀲𑁆𑀫𑀺𑀁 𑀆𑀲𑁂𑀯𑀦𑀧𑀘𑁆𑀘𑀬𑁄, 𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬𑁄 𑀧𑀦 𑀉𑀪𑀬𑀢𑁆𑀣𑀸𑀧𑀺. 𑀭𑀼𑀴𑁆𑀳𑀻𑀲𑀤𑁆𑀤𑁂𑀦 𑀧𑀦𑁂𑀢𑁂 𑀢𑁂𑀯𑀻𑀲𑀢𑀺𑀫𑀽𑀮𑀓𑀸𑀢𑁆𑀯𑁂𑀯 𑀯𑁂𑀤𑀺𑀢𑀩𑁆𑀩𑀸. 𑀢𑁂𑀲𑀼 𑀲𑀸𑀲𑁂𑀯𑀦𑁂 𑀆𑀲𑁂𑀯𑀦𑀲𑁆𑀲 𑀯𑀲𑁂𑀦 𑀲𑀩𑁆𑀩𑀢𑁆𑀣 𑀢𑀻𑀡𑁂𑀯 𑀯𑀺𑀲𑁆𑀲𑀚𑁆𑀚𑀦𑀸𑀦𑀺, 𑀲𑀯𑀺𑀧𑀸𑀓𑁂 𑀯𑀺𑀧𑀸𑀓𑀧𑀘𑁆𑀘𑀬𑀲𑁆𑀲 𑀯𑀲𑁂𑀦 𑀏𑀓𑀫𑁂𑀯𑀸𑀢𑀺 𑀅𑀬𑀁 𑀳𑁂𑀢𑀼𑀧𑀘𑁆𑀘𑀬𑀁 𑀆𑀤𑀺𑀁 𑀓𑀢𑁆𑀯𑀸 𑀏𑀓𑀫𑀽𑀮𑀓𑀸𑀤𑀻𑀲𑀼 𑀕𑀡𑀦𑀸.

𑀬𑀁 𑀧𑀦𑁂𑀢𑀁 𑀳𑁂𑀢𑀼𑀫𑀽𑀮𑀓𑀸𑀦𑀦𑁆𑀢𑀭𑀁 ‘‘𑀆𑀭𑀫𑁆𑀫𑀡𑁂 𑀞𑀺𑀢𑁂𑀦 𑀲𑀩𑁆𑀩𑀢𑁆𑀣 𑀢𑀻𑀡𑁂𑀯 𑀧𑀜𑁆𑀳𑀸’’𑀢𑀺 𑀯𑀼𑀢𑁆𑀢𑀁, 𑀢𑀁 𑀆𑀭𑀫𑁆𑀫𑀡𑀧𑀘𑁆𑀘𑀬𑀁 𑀆𑀤𑀺𑀁 𑀓𑀢𑁆𑀯𑀸 𑀏𑀓𑀫𑀽𑀮𑀓𑁂𑀧𑀺 𑀤𑀼𑀫𑀽𑀮𑀓𑀸𑀤𑀻𑀲𑀼𑀧𑀺 𑀲𑀩𑁆𑀩𑀢𑁆𑀣 𑀆𑀭𑀫𑁆𑀫𑀡𑀧𑀤𑁂 𑀘𑁂𑀯 𑀆𑀭𑀫𑁆𑀫𑀡𑁂𑀦 𑀲𑀤𑁆𑀥𑀺𑀁 𑀲𑁂𑀲𑀧𑀘𑁆𑀘𑀬𑀬𑁄𑀚𑀦𑀸𑀲𑀼 𑀘 𑀬𑀢𑁆𑀣 𑀦𑀯𑀳𑀺 𑀪𑀯𑀺𑀢𑀩𑁆𑀩𑀁, 𑀢𑀢𑁆𑀣 𑀢𑀬𑁄𑀯 𑀧𑀜𑁆𑀳𑀸 𑀳𑁄𑀦𑁆𑀢𑀻𑀢𑀺 𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀯𑀺𑀧𑀸𑀓𑀧𑀤𑁂 𑀧𑀦 𑀯𑀺𑀧𑀸𑀓𑀧𑀤𑁂𑀦 𑀲𑀤𑁆𑀥𑀺𑀁 𑀲𑁂𑀲𑀧𑀘𑁆𑀘𑀬𑀬𑁄𑀚𑀦𑀸𑀲𑀼 𑀘 𑀏𑀓𑁄𑀯 𑀧𑀜𑁆𑀳𑁄 𑀳𑁄𑀢𑀻𑀢𑀺. 𑀇𑀢𑀺 𑀬𑀁 𑀳𑁂𑀝𑁆𑀞𑀸 𑀅𑀯𑁄𑀘𑀼𑀫𑁆𑀳 ‘‘𑀩𑀳𑀼𑀕𑀡𑀦𑁄𑀧𑀺 𑀧𑀘𑁆𑀘𑀬𑁄 𑀅𑀩𑀳𑀼𑀕𑀡𑀦𑁂𑀦 𑀲𑀤𑁆𑀥𑀺𑀁 𑀬𑀼𑀢𑁆𑀢𑁄 𑀢𑁂𑀦 𑀲𑀫𑀸𑀦𑀕𑀡𑀦𑁄 𑀳𑁄𑀢𑀻’’𑀢𑀺, 𑀢𑀁 𑀲𑀼𑀯𑀼𑀢𑁆𑀢𑀫𑁂𑀯.

𑁮𑁦-𑁮𑁫. 𑀇𑀤𑀸𑀦𑀺 𑀬𑁂 𑀆𑀭𑀫𑁆𑀫𑀡𑀸𑀤𑀻𑀦𑀁 𑀧𑀘𑁆𑀘𑀬𑀸𑀦𑀁 𑀯𑀲𑁂𑀦 𑀏𑀓𑀫𑀽𑀮𑀓𑀸𑀤𑀬𑁄 𑀤𑀲𑁆𑀲𑁂𑀢𑀩𑁆𑀩𑀸, 𑀢𑁂𑀲𑀼 𑀏𑀓𑀫𑀽𑀮𑀓𑁄 𑀢𑀸𑀯 𑀳𑁂𑀢𑀼𑀏𑀓𑀫𑀽𑀮𑀓𑁂𑀦𑁂𑀯 𑀲𑀤𑀺𑀲𑁄𑀢𑀺 𑀏𑀓𑀲𑁆𑀫𑀺𑀫𑁆𑀧𑀺 𑀧𑀘𑁆𑀘𑀬𑁂 𑀦 𑀤𑀲𑁆𑀲𑀺𑀢𑁄. 𑀆𑀭𑀫𑁆𑀫𑀡𑀧𑀘𑁆𑀘𑀬𑀯𑀲𑁂𑀦 𑀧𑀦 𑀤𑀼𑀫𑀽𑀮𑀓𑁂 𑀕𑀡𑀦𑀁 𑀤𑀲𑁆𑀲𑁂𑀢𑀼𑀁 𑀆𑀭𑀫𑁆𑀫𑀡𑀧𑀘𑁆𑀘𑀬𑀸 𑀳𑁂𑀢𑀼𑀬𑀸 𑀢𑀻𑀡𑀺, 𑀅𑀥𑀺𑀧𑀢𑀺𑀬𑀸 𑀢𑀻𑀡𑀺…𑀧𑁂… 𑀅𑀯𑀺𑀕𑀢𑁂 𑀢𑀻𑀡𑀻𑀢𑀺 𑀯𑀼𑀢𑁆𑀢𑀁. 𑀏𑀢𑁆𑀣 𑀘 ‘‘𑀆𑀭𑀫𑁆𑀫𑀡𑀧𑀘𑁆𑀘𑀬𑀸 𑀅𑀥𑀺𑀧𑀢𑀺𑀬𑀸 𑀢𑀻𑀡𑀺…𑀧𑁂… 𑀅𑀯𑀺𑀕𑀢𑁂 𑀢𑀻𑀡𑀻’’𑀢𑀺 𑀯𑀢𑁆𑀢𑀩𑁆𑀩𑁂 𑀬𑁂 𑀳𑁂𑀢𑀼𑀧𑀘𑁆𑀘𑀬𑀸𑀤𑀬𑁄 𑀧𑀘𑁆𑀘𑀬𑀸 𑀩𑀳𑀼𑀕𑀡𑀦𑀸, 𑀢𑁂𑀲𑀁 𑀊𑀦𑀢𑀭𑀕𑀡𑀦𑁂𑀳𑀺 𑀘 𑀲𑀫𑀸𑀦𑀕𑀡𑀦𑁂𑀳𑀺 𑀘 𑀲𑀤𑁆𑀥𑀺𑀁 𑀲𑀁𑀲𑀦𑁆𑀤𑀦𑁂 𑀬𑀸 𑀕𑀡𑀦𑀸 𑀮𑀩𑁆𑀪𑀢𑀺, 𑀢𑀁 𑀤𑀲𑁆𑀲𑁂𑀢𑀼𑀁 𑀆𑀭𑀫𑁆𑀫𑀡𑀧𑀘𑁆𑀘𑀬𑀲𑁆𑀲 𑀧𑀼𑀭𑀺𑀫𑀪𑀸𑀕𑁂 𑀞𑀺𑀢𑀫𑁆𑀧𑀺 𑀳𑁂𑀢𑀼𑀧𑀘𑁆𑀘𑀬𑀁 𑀧𑀘𑁆𑀙𑀺𑀫𑀪𑀸𑀕𑁂𑀯 𑀞𑀧𑁂𑀢𑁆𑀯𑀸 ‘‘𑀆𑀭𑀫𑁆𑀫𑀡𑀧𑀘𑁆𑀘𑀬𑀸 𑀳𑁂𑀢𑀼𑀬𑀸 𑀢𑀻𑀡𑀻’’𑀢𑀺 𑀯𑀼𑀢𑁆𑀢𑀁. 𑀢𑁂𑀦𑁂𑀢𑀁 𑀆𑀯𑀺 𑀓𑀭𑁄𑀢𑀺 𑁋 𑀆𑀭𑀫𑁆𑀫𑀡𑀧𑀘𑁆𑀘𑀬𑁄 𑀬𑁂𑀦 𑀬𑁂𑀦 𑀩𑀳𑀼𑀢𑀭𑀕𑀡𑀦𑁂𑀦 𑀯𑀸 𑀲𑀫𑀸𑀦𑀕𑀡𑀦𑁂𑀦 𑀯𑀸 𑀧𑀘𑁆𑀘𑀬𑁂𑀦 𑀲𑀤𑁆𑀥𑀺𑀁 𑀤𑀼𑀓𑀢𑀺𑀓𑀸𑀤𑀺𑀪𑁂𑀤𑀁 𑀕𑀘𑁆𑀙𑀢𑀺, 𑀲𑀩𑁆𑀩𑀢𑁆𑀣 𑀢𑀻𑀡𑁂𑀯 𑀧𑀜𑁆𑀳𑀸𑀯𑀺𑀲𑁆𑀲𑀚𑁆𑀚𑀦𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀯𑀺𑀧𑀸𑀓𑀧𑀘𑁆𑀘𑀬𑁂𑀦 𑀧𑀦 𑀲𑀤𑁆𑀥𑀺𑀁 𑀲𑀁𑀲𑀦𑁆𑀤𑀦𑁂 𑀏𑀓𑀫𑁂𑀯 𑀮𑀩𑁆𑀪𑀢𑀺, 𑀢𑀁 𑀯𑀺𑀧𑀸𑀓𑀧𑀘𑁆𑀘𑀬𑀸𑀤𑀺𑀓𑀸𑀬 𑀕𑀡𑀦𑀸𑀬 𑀆𑀯𑀺 𑀪𑀯𑀺𑀲𑁆𑀲𑀢𑀻𑀢𑀺 𑀇𑀥 𑀦 𑀤𑀲𑁆𑀲𑀺𑀢𑀁. 𑀬𑀸 𑀘𑁂𑀲𑀸 𑀤𑀼𑀫𑀽𑀮𑀓𑁂 𑀕𑀡𑀦𑀸 𑀤𑀲𑁆𑀲𑀺𑀢𑀸, 𑀢𑀺𑀫𑀽𑀮𑀓𑀸𑀤𑀻𑀲𑀼𑀧𑀺 𑀏𑀲𑀸𑀯 𑀕𑀡𑀦𑀸𑀢𑀺 𑀆𑀭𑀫𑁆𑀫𑀡𑀧𑀘𑁆𑀘𑀬𑀯𑀲𑁂𑀦 𑀢𑀺𑀫𑀽𑀮𑀓𑀸𑀤𑀬𑁄 𑀦 𑀯𑀺𑀢𑁆𑀣𑀸𑀭𑀺𑀢𑀸.

𑀇𑀤𑀸𑀦𑀺 𑀅𑀥𑀺𑀧𑀢𑀺𑀧𑀘𑁆𑀘𑀬𑀸𑀤𑀺𑀯𑀲𑁂𑀦 𑀤𑀼𑀫𑀽𑀮𑀓𑀸𑀤𑀻𑀲𑀼 𑀕𑀡𑀦𑀁 𑀤𑀲𑁆𑀲𑁂𑀢𑀼𑀁 𑀅𑀥𑀺𑀧𑀢𑀺𑀧𑀘𑁆𑀘𑀬𑀸 𑀳𑁂𑀢𑀼𑀬𑀸 𑀦𑀯𑀸𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣𑀸𑀧𑀺 𑀯𑀼𑀢𑁆𑀢𑀦𑀬𑁂𑀦𑁂𑀯 𑀧𑀘𑁆𑀘𑀬𑀲𑀦𑁆𑀦𑀺𑀯𑁂𑀲𑁄 𑀯𑁂𑀤𑀺𑀢𑀩𑁆𑀩𑁄. 𑀬𑀣𑀸 𑀘 𑀅𑀥𑀺𑀧𑀢𑀺𑀧𑀘𑁆𑀘𑀬𑀸 𑀳𑁂𑀢𑀼𑀬𑀸 𑀦𑀯, 𑀏𑀯𑀁 𑀲𑁂𑀲𑁂𑀲𑀼𑀧𑀺 𑀳𑁂𑀢𑀼𑀦𑀸 𑀲𑀫𑀸𑀦𑀕𑀡𑀦𑀸𑀲𑀼 𑀦𑀯𑁂𑀯. 𑀇𑀢𑀺 𑀬𑁄 𑀬𑁄 𑀧𑀘𑁆𑀘𑀬𑁄 𑀆𑀤𑀺𑀫𑁆𑀳𑀺 𑀢𑀺𑀝𑁆𑀞𑀢𑀺, 𑀢𑁂𑀦 𑀢𑁂𑀦 𑀲𑀤𑁆𑀥𑀺𑀁 𑀲𑀫𑀸𑀦𑀕𑀡𑀦𑀸𑀦𑀁 𑀲𑀁𑀲𑀦𑁆𑀤𑀦𑁂 𑀆𑀤𑀺𑀫𑁆𑀳𑀺 𑀞𑀺𑀢𑀲𑁆𑀲 𑀯𑀲𑁂𑀦 𑀕𑀡𑀦𑀸 𑀳𑁄𑀢𑀺. 𑀢𑁂𑀦 𑀧𑀦 𑀲𑀤𑁆𑀥𑀺𑀁 𑀊𑀦𑀢𑀭𑀕𑀡𑀦𑀸𑀦𑀁 𑀲𑀁𑀲𑀦𑁆𑀤𑀦𑁂 𑀊𑀦𑀢𑀭𑀕𑀡𑀦𑀸𑀦𑀁𑀬𑁂𑀯 𑀯𑀲𑁂𑀦 𑀕𑀡𑀦𑀸 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀬𑀣𑀸 𑀘 𑀆𑀭𑀫𑁆𑀫𑀡𑀧𑀘𑁆𑀘𑀬𑀯𑀲𑁂𑀦 𑀏𑀯𑀁 𑀅𑀥𑀺𑀧𑀢𑀺𑀧𑀘𑁆𑀘𑀬𑀯𑀲𑁂𑀦𑀸𑀧𑀺 𑀢𑀢𑁄 𑀧𑀭𑁂𑀲𑀁 𑀅𑀦𑀦𑁆𑀢𑀭𑀸𑀤𑀻𑀦𑀁 𑀯𑀲𑁂𑀦𑀸𑀧𑀺 𑀢𑀺𑀫𑀽𑀮𑀓𑀸𑀤𑀬𑁄 𑀦 𑀯𑀺𑀢𑁆𑀣𑀸𑀭𑀺𑀢𑀸. 𑀢𑀲𑁆𑀫𑀸 𑀤𑀼𑀫𑀽𑀮𑀓𑁂 𑀤𑀲𑁆𑀲𑀺𑀢𑀕𑀡𑀦𑀸𑀯𑀲𑁂𑀦𑁂𑀯 𑀲𑀩𑁆𑀩𑀢𑁆𑀣 𑀲𑀸𑀥𑁂𑀢𑀩𑁆𑀩𑀸. 𑀢𑁂𑀦𑁂𑀯 𑀯𑀼𑀢𑁆𑀢𑀁 ‘‘𑀏𑀓𑁂𑀓𑀁 𑀧𑀘𑁆𑀘𑀬𑀁 𑀫𑀽𑀮𑀓𑀁 𑀓𑀸𑀢𑀼𑀦 𑀲𑀚𑁆𑀛𑀸𑀬𑀫𑀕𑁆𑀕𑁂𑀦 𑀕𑀡𑁂𑀢𑀩𑁆𑀩𑀸’’𑀢𑀺.

𑀧𑀘𑁆𑀘𑀬𑀸𑀦𑀼𑀮𑁄𑀫𑀯𑀡𑁆𑀡𑀦𑀸.

𑀧𑀝𑀺𑀘𑁆𑀘𑀯𑀸𑀭𑁄

𑀧𑀘𑁆𑀘𑀬𑀧𑀘𑁆𑀘𑀦𑀻𑀬𑀯𑀡𑁆𑀡𑀦𑀸

𑁮𑁬-𑁮𑁭. 𑀧𑀘𑁆𑀘𑀬𑀧𑀘𑁆𑀘𑀦𑀻𑀬𑀁 𑀧𑀦 𑀬𑀲𑁆𑀫𑀸 𑀓𑀼𑀲𑀮𑀧𑀤𑁂 𑀦 𑀮𑀩𑁆𑀪𑀢𑀺 𑀓𑀼𑀲𑀮𑀥𑀫𑁆𑀫𑀲𑁆𑀲 𑀳𑁂𑀢𑀼𑀧𑀘𑁆𑀘𑀬𑁂𑀦 𑀯𑀺𑀦𑀸 𑀅𑀦𑀼𑀧𑁆𑀧𑀢𑁆𑀢𑀺𑀢𑁄, 𑀢𑀲𑁆𑀫𑀸 𑀅𑀓𑀼𑀲𑀮𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘𑀸𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀦𑀳𑁂𑀢𑀼𑀧𑀘𑁆𑀘𑀬𑀸𑀢𑀺 𑀳𑁂𑀢𑀼𑀧𑀘𑁆𑀘𑀬𑀧𑀝𑀺𑀓𑁆𑀔𑁂𑀧𑁄 𑀳𑁂𑀢𑀼𑀧𑀘𑁆𑀘𑀬𑀁 𑀯𑀺𑀦𑀸 𑀅𑀜𑁆𑀜𑁂𑀦 𑀧𑀘𑁆𑀘𑀬𑁂𑀦 𑀉𑀧𑁆𑀧𑀚𑁆𑀚𑀢𑀻𑀢𑀺 𑀅𑀢𑁆𑀣𑁄. 𑀯𑀺𑀘𑀺𑀓𑀺𑀘𑁆𑀙𑀸𑀲𑀳𑀕𑀢𑁄 𑀉𑀤𑁆𑀥𑀘𑁆𑀘𑀲𑀳𑀕𑀢𑁄 𑀫𑁄𑀳𑁄𑀢𑀺 𑀅𑀬𑀜𑁆𑀳𑀺 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀜𑁆𑀘𑁂𑀯 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀲𑁆𑀲 𑀘 𑀲𑀬𑀁 𑀳𑁂𑀢𑀼𑀧𑀘𑁆𑀘𑀬𑁄 𑀳𑁄𑀢𑀺, 𑀅𑀜𑁆𑀜𑀲𑁆𑀲 𑀧𑀦 𑀲𑀫𑁆𑀧𑀬𑀼𑀢𑁆𑀢𑀳𑁂𑀢𑀼𑀦𑁄 𑀅𑀪𑀸𑀯𑀸 𑀦 𑀳𑁂𑀢𑀼𑀧𑀘𑁆𑀘𑀬𑀸 𑀉𑀧𑁆𑀧𑀚𑁆𑀚𑀢𑀻𑀢𑀺 𑀞𑀧𑁂𑀢𑁆𑀯𑀸 𑀳𑁂𑀢𑀼𑀧𑀘𑁆𑀘𑀬𑀁 𑀲𑁂𑀲𑁂𑀳𑀺 𑀅𑀢𑁆𑀢𑀦𑁄 𑀅𑀦𑀼𑀭𑀽𑀧𑀧𑀘𑁆𑀘𑀬𑁂𑀳𑀺 𑀉𑀧𑁆𑀧𑀚𑁆𑀚𑀢𑀺. 𑀇𑀫𑀺𑀦𑀸 𑀦𑀬𑁂𑀦 𑀲𑀩𑁆𑀩𑀧𑀘𑁆𑀘𑀬𑀧𑀝𑀺𑀓𑁆𑀔𑁂𑀧𑁂𑀲𑀼 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀳𑁂𑀢𑀼𑀓𑀁 𑀯𑀺𑀧𑀸𑀓𑀸𑀩𑁆𑀬𑀸𑀓𑀢𑀦𑁆𑀢𑀺 𑀇𑀤𑀁 𑀭𑀽𑀧𑀲𑀫𑀼𑀝𑁆𑀞𑀸𑀧𑀓𑀯𑀲𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀅𑀜𑁆𑀜𑁂𑀲𑀼𑀧𑀺 𑀏𑀯𑀭𑀽𑀧𑁂𑀲𑀼 𑀏𑀲𑁂𑀯 𑀦𑀬𑁄.

𑁮𑁮. 𑀦𑀅𑀥𑀺𑀧𑀢𑀺𑀧𑀘𑁆𑀘𑀬𑁂 𑀓𑀸𑀫𑀁 𑀅𑀥𑀺𑀧𑀢𑀺𑀧𑀺 𑀅𑀢𑁆𑀢𑀦𑀸 𑀲𑀤𑁆𑀥𑀺𑀁 𑀤𑀼𑀢𑀺𑀬𑀲𑁆𑀲 𑀅𑀥𑀺𑀧𑀢𑀺𑀦𑁄 𑀅𑀪𑀸𑀯𑀸 𑀦𑀅𑀥𑀺𑀧𑀢𑀺𑀧𑀘𑁆𑀘𑀬𑀁 𑀮𑀪𑀢𑀺, 𑀬𑀣𑀸 𑀧𑀦 𑀯𑀺𑀘𑀺𑀓𑀺𑀘𑁆𑀙𑀼𑀤𑁆𑀥𑀘𑁆𑀘𑀲𑀳𑀕𑀢𑁄 𑀫𑁄𑀳𑁄 𑀅𑀳𑁂𑀢𑀼𑀓𑁄, 𑀦 𑀢𑀣𑀸 𑀅𑀥𑀺𑀧𑀢𑀬𑁄 𑀏𑀯 𑀦𑀺𑀭𑀸𑀥𑀺𑀧𑀢𑀺. 𑀙𑀦𑁆𑀤𑀸𑀤𑀻𑀲𑀼 𑀧𑀦 𑀅𑀜𑁆𑀜𑀢𑀭𑀁 𑀅𑀥𑀺𑀧𑀢𑀺𑀁 𑀅𑀓𑀢𑁆𑀯𑀸 𑀓𑀼𑀲𑀮𑀸𑀤𑀻𑀦𑀁 𑀉𑀧𑁆𑀧𑀢𑁆𑀢𑀺𑀓𑀸𑀮𑁂 𑀲𑀩𑁆𑀩𑁂𑀧𑀺 𑀓𑀼𑀲𑀮𑀸𑀤𑀬𑁄 𑀦𑀺𑀭𑀸𑀥𑀺𑀧𑀢𑀺𑀦𑁄. 𑀢𑀲𑁆𑀫𑀸 𑀫𑁄𑀳𑀁 𑀯𑀺𑀬 𑀯𑀺𑀲𑀼𑀁 𑀅𑀥𑀺𑀧𑀢𑀺𑀫𑀢𑁆𑀢𑀫𑁂𑀯 𑀅𑀦𑀼𑀤𑁆𑀥𑀭𑀺𑀢𑁆𑀯𑀸 𑀲𑀩𑁆𑀩𑀲𑀗𑁆𑀕𑀸𑀳𑀺𑀓𑀯𑀲𑁂𑀦 𑀏𑀲𑀸 ‘‘𑀏𑀓𑀁 𑀔𑀦𑁆𑀥𑀁 𑀧𑀝𑀺𑀘𑁆𑀘 𑀢𑀬𑁄 𑀔𑀦𑁆𑀥𑀸’’𑀢𑀺𑀆𑀤𑀺𑀓𑀸 𑀤𑁂𑀲𑀦𑀸 𑀓𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑁮𑁯. 𑀦𑀸𑀦𑀦𑁆𑀢𑀭𑀦𑀲𑀫𑀦𑀦𑁆𑀢𑀭𑁂𑀲𑀼 𑀦𑀸𑀭𑀫𑁆𑀫𑀡𑁂 𑀯𑀺𑀬 𑀭𑀽𑀧𑀫𑁂𑀯 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀁. 𑀢𑁂𑀦 𑀯𑀼𑀢𑁆𑀢𑀁 ‘‘𑀦𑀸𑀭𑀫𑁆𑀫𑀡𑀧𑀘𑁆𑀘𑀬𑀲𑀤𑀺𑀲’’𑀦𑁆𑀢𑀺. 𑀲𑀳𑀚𑀸𑀢𑀧𑀘𑁆𑀘𑀬𑁄 𑀧𑀭𑀺𑀳𑀻𑀦𑁄. 𑀬𑀣𑀸 𑀘𑁂𑀲, 𑀢𑀣𑀸 𑀦𑀺𑀲𑁆𑀲𑀬𑀅𑀢𑁆𑀣𑀺𑀅𑀯𑀺𑀕𑀢𑀧𑀘𑁆𑀘𑀬𑀸𑀧𑀺. 𑀓𑀺𑀁 𑀓𑀸𑀭𑀡𑀸? 𑀏𑀢𑁂𑀳𑀺 𑀯𑀺𑀦𑀸 𑀓𑀲𑁆𑀲𑀘𑀺 𑀅𑀦𑀼𑀧𑁆𑀧𑀢𑁆𑀢𑀺𑀢𑁄. 𑀲𑀳𑀚𑀸𑀢𑀦𑀺𑀲𑁆𑀲𑀬𑀅𑀢𑁆𑀣𑀺𑀅𑀯𑀺𑀕𑀢𑀧𑀘𑁆𑀘𑀬𑁂𑀧𑀺 𑀳𑀺 𑀧𑀘𑁆𑀘𑀓𑁆𑀔𑀸𑀬 𑀏𑀓𑁄𑀧𑀺 𑀭𑀽𑀧𑀸𑀭𑀽𑀧𑀥𑀫𑁆𑀫𑁄 𑀦𑀼𑀧𑁆𑀧𑀚𑁆𑀚𑀢𑀺, 𑀢𑀲𑁆𑀫𑀸 𑀢𑁂 𑀧𑀭𑀺𑀳𑀻𑀦𑀸.

𑁯𑁦. 𑀦𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀯𑀺𑀪𑀗𑁆𑀕𑁂 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀯𑀺𑀧𑀸𑀓𑀸𑀩𑁆𑀬𑀸𑀓𑀢𑁂 𑀔𑀦𑁆𑀥𑁂 𑀧𑀝𑀺𑀘𑁆𑀘 𑀓𑀝𑀢𑁆𑀢𑀸𑀭𑀽𑀧𑀦𑁆𑀢𑀺 𑀳𑀤𑀬𑀯𑀢𑁆𑀣𑀼𑀯𑀚𑁆𑀚𑀁 𑀯𑁂𑀤𑀺𑀢𑀩𑁆𑀩𑀁.

𑁯𑁧. 𑀦𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑀯𑀺𑀪𑀗𑁆𑀕𑁂 𑀭𑀽𑀧𑀫𑁂𑀯 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀁, 𑀢𑀜𑁆𑀳𑀺 𑀉𑀧𑀦𑀺𑀲𑁆𑀲𑀬𑀁 𑀦 𑀮𑀪𑀢𑀺. 𑀅𑀭𑀽𑀧𑀁 𑀧𑀦 𑀓𑀺𑀜𑁆𑀘𑀸𑀧𑀺 𑀆𑀭𑀫𑁆𑀫𑀡𑀽𑀧𑀦𑀺𑀲𑁆𑀲𑀬𑀧𑀓𑀢𑀽𑀧𑀦𑀺𑀲𑁆𑀲𑀬𑁂 𑀦 𑀮𑀪𑁂𑀬𑁆𑀬, 𑀅𑀦𑀦𑁆𑀢𑀭𑀽𑀧𑀦𑀺𑀲𑁆𑀲𑀬𑀫𑀼𑀢𑁆𑀢𑀓𑀁 𑀧𑀦 𑀦𑀢𑁆𑀣𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀦𑀸𑀭𑀫𑁆𑀫𑀡𑀧𑀘𑁆𑀘𑀬𑀲𑀤𑀺𑀲’’𑀦𑁆𑀢𑀺.

𑁯𑁨. 𑀦𑀧𑀼𑀭𑁂𑀚𑀸𑀢𑁂 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀦𑁆𑀢𑀺 𑀧𑀜𑁆𑀘𑀯𑁄𑀓𑀸𑀭𑀯𑀲𑁂𑀦 𑀯𑀼𑀢𑁆𑀢𑀁.

𑁯𑁩. 𑀦𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬𑀸𑀢𑀺 𑀏𑀢𑁆𑀣 𑀲𑀳𑀚𑀸𑀢𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑀸 𑀲𑀗𑁆𑀕𑀳𑀁 𑀕𑀘𑁆𑀙𑀦𑁆𑀢𑀺. 𑀢𑀲𑁆𑀫𑀸 𑀲𑀳𑀚𑀸𑀢𑀧𑀘𑁆𑀘𑀬𑀲𑀤𑀺𑀲𑀸 𑀏𑀢𑁆𑀣 𑀧𑀸𑀴𑀺, 𑀲𑀸 𑀦𑀅𑀥𑀺𑀧𑀢𑀺𑀧𑀘𑁆𑀘𑀬𑁂 𑀯𑀺𑀢𑁆𑀣𑀸𑀭𑀺𑀢𑀸𑀢𑀺 𑀇𑀥 𑀲𑀗𑁆𑀔𑀺𑀢𑁆𑀢𑀸. 𑀦𑀸𑀲𑁂𑀯𑀦𑀧𑀘𑁆𑀘𑀬𑁂 𑀓𑀼𑀲𑀮𑀸𑀓𑀼𑀲𑀮𑀸 𑀧𑀞𑀫𑀚𑀯𑀦𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀸, 𑀢𑀣𑀸 𑀓𑀺𑀭𑀺𑀬𑀸𑀩𑁆𑀬𑀸𑀓𑀢𑀁. 𑀧𑀸𑀴𑀺 𑀧𑀦 𑀇𑀥𑀸𑀧𑀺 𑀦𑀅𑀥𑀺𑀧𑀢𑀺𑀧𑀘𑁆𑀘𑀬𑁂 𑀯𑀺𑀢𑁆𑀣𑀸𑀭𑀺𑀢𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀸. 𑀢𑁂𑀦𑁂𑀯𑀸𑀳 𑁋 ‘‘𑀦𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬𑀫𑁆𑀧𑀺 𑀦𑀸𑀲𑁂𑀯𑀦𑀧𑀘𑁆𑀘𑀬𑀫𑁆𑀧𑀺 𑀦𑀸𑀥𑀺𑀧𑀢𑀺𑀧𑀘𑁆𑀘𑀬𑀲𑀤𑀺𑀲’’𑀦𑁆𑀢𑀺.

𑁯𑁪-𑁯𑁭. 𑀦𑀓𑀫𑁆𑀫𑀧𑀘𑁆𑀘𑀬𑁂 𑀯𑀺𑀧𑀸𑀓𑀘𑁂𑀢𑀦𑀸 𑀦𑀸𑀦𑀸𑀓𑁆𑀔𑀡𑀺𑀓𑀓𑀫𑁆𑀫𑀧𑀘𑁆𑀘𑀬𑀁 𑀮𑀪𑀢𑀻𑀢𑀺 𑀦 𑀕𑀳𑀺𑀢𑀸. 𑀦𑀸𑀳𑀸𑀭𑀧𑀘𑁆𑀘𑀬𑁂 𑀏𑀓𑀘𑁆𑀘𑀁 𑀭𑀽𑀧𑀫𑁂𑀯 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀁, 𑀢𑀣𑀸 𑀦𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑁂.

𑁯𑁮. 𑀦𑀛𑀸𑀦𑀧𑀘𑁆𑀘𑀬𑁂 𑀧𑀜𑁆𑀘𑀯𑀺𑀜𑁆𑀜𑀸𑀡𑀥𑀫𑁆𑀫𑀸 𑀘𑁂𑀯 𑀏𑀓𑀘𑁆𑀘𑀜𑁆𑀘 𑀭𑀽𑀧𑀁 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀁. 𑀧𑀜𑁆𑀘𑀯𑀺𑀜𑁆𑀜𑀸𑀡𑀲𑁆𑀫𑀺𑀜𑁆𑀳𑀺 𑀯𑁂𑀤𑀦𑀸 𑀘 𑀘𑀺𑀢𑁆𑀢𑁂𑀓𑀕𑁆𑀕𑀢𑀸 𑀘 𑀤𑀼𑀩𑁆𑀩𑀮𑀢𑁆𑀢𑀸 𑀉𑀧𑀦𑀺𑀚𑁆𑀛𑀸𑀦𑀮𑀓𑁆𑀔𑀡𑀁 𑀦 𑀧𑀸𑀧𑀼𑀡𑀦𑁆𑀢𑀻𑀢𑀺 𑀛𑀸𑀦𑀧𑀘𑁆𑀘𑀬𑁂 𑀦 𑀕𑀳𑀺𑀢𑀸.

𑁯𑁯-𑁧𑁦𑁨. 𑀦𑀫𑀕𑁆𑀕𑀧𑀘𑁆𑀘𑀬𑁂 𑀅𑀳𑁂𑀢𑀼𑀓𑀯𑀺𑀧𑀸𑀓𑀓𑀺𑀭𑀺𑀬𑀜𑁆𑀘𑁂𑀯 𑀏𑀓𑀘𑁆𑀘𑀜𑁆𑀘 𑀭𑀽𑀧𑀁 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀁. 𑀦𑀲𑀫𑁆𑀧𑀬𑀼𑀢𑁆𑀢𑀦𑁄𑀦𑀢𑁆𑀣𑀺𑀦𑁄𑀯𑀺𑀕𑀢𑁂𑀲𑀼 𑀭𑀽𑀧𑀫𑁂𑀯 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀁. 𑀢𑁂𑀦 𑀯𑀼𑀢𑁆𑀢𑀁 ‘‘𑀦𑀸𑀭𑀫𑁆𑀫𑀡𑀧𑀘𑁆𑀘𑀬𑀲𑀤𑀺𑀲’’𑀦𑁆𑀢𑀺.

𑁧𑁦𑁩. 𑀦𑀳𑁂𑀢𑀼𑀬𑀸 𑀤𑁆𑀯𑁂𑀢𑀺 𑀏𑀓𑀫𑀽𑀮𑀓𑀕𑀡𑀦𑀸𑀬 𑀬𑀣𑀸𑀧𑀸𑀴𑀺𑀫𑁂𑀯 𑀦𑀺𑀬𑁆𑀬𑀸𑀢𑀺.

𑁧𑁦𑁪. 𑀤𑀼𑀫𑀽𑀮𑀓𑁂 𑀦𑀳𑁂𑀢𑀼𑀧𑀘𑁆𑀘𑀬𑀸 𑀦𑀸𑀭𑀫𑁆𑀫𑀡𑁂 𑀏𑀓𑀦𑁆𑀢𑀺 𑀏𑀢𑁆𑀣 𑀓𑀺𑀜𑁆𑀘𑀸𑀧𑀺 𑀩𑀳𑀼𑀕𑀡𑀦𑁂𑀦 𑀲𑀤𑁆𑀥𑀺𑀁 𑀊𑀦𑀢𑀭𑀕𑀡𑀦𑀲𑁆𑀲 𑀲𑀁𑀲𑀦𑁆𑀤𑀦𑁂 𑀊𑀦𑀢𑀭𑀕𑀡𑀦𑀯𑀲𑁂𑀦 𑀦𑀳𑁂𑀢𑀼𑀬𑀸 𑀯𑀺𑀬 𑀤𑁆𑀯𑀻𑀳𑀺 𑀪𑀯𑀺𑀢𑀩𑁆𑀩𑀁. 𑀦𑀸𑀭𑀫𑁆𑀫𑀡𑀯𑀲𑁂𑀦 𑀧𑀦 𑀅𑀭𑀽𑀧𑀥𑀫𑁆𑀫𑀸𑀦𑀁 𑀧𑀭𑀺𑀳𑀻𑀦𑀢𑁆𑀢𑀸 𑀅𑀩𑁆𑀬𑀸𑀓𑀢𑀁 𑀧𑀝𑀺𑀘𑁆𑀘 𑀭𑀽𑀧𑀸𑀩𑁆𑀬𑀸𑀓𑀢𑀲𑁆𑀲 𑀉𑀧𑁆𑀧𑀢𑁆𑀢𑀺𑀁 𑀲𑀦𑁆𑀥𑀸𑀬 ‘‘𑀏𑀓’’𑀦𑁆𑀢𑀺 𑀯𑀼𑀢𑁆𑀢𑀁. 𑀲𑀩𑁆𑀩𑁂𑀲𑀼 𑀏𑀓𑀓𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀤𑁆𑀯𑁂𑀢𑀺 𑀯𑀼𑀢𑁆𑀢𑀝𑁆𑀞𑀸𑀦𑁂 𑀧𑀦 𑀦𑀳𑁂𑀢𑀼𑀬𑀸 𑀮𑀤𑁆𑀥𑀯𑀲𑁂𑀦 𑀯𑀸𑀭𑀤𑁆𑀯𑀬𑀁 𑀯𑁂𑀤𑀺𑀢𑀩𑁆𑀩𑀁.

𑁧𑁦𑁫-𑁧𑁦𑁬. 𑀢𑀺𑀫𑀽𑀮𑀓𑀸𑀤𑀻𑀲𑀼 𑀧𑀦 𑀲𑀩𑁆𑀩𑁂𑀲𑀼 𑀦𑀸𑀭𑀫𑁆𑀫𑀡𑀧𑀘𑁆𑀘𑀬𑀲𑁆𑀲 𑀅𑀧𑀭𑀺𑀳𑀻𑀦𑀢𑁆𑀢𑀸 𑀏𑀓𑀫𑁂𑀯 𑀯𑀺𑀲𑁆𑀲𑀚𑁆𑀚𑀦𑀦𑁆𑀢𑀺 𑀅𑀬𑀁 𑀧𑀘𑁆𑀘𑀦𑀻𑀬𑁂 𑀦𑀳𑁂𑀢𑀼𑀧𑀘𑁆𑀘𑀬𑀁 𑀆𑀤𑀺𑀁 𑀓𑀢𑁆𑀯𑀸 𑀏𑀓𑀫𑀽𑀮𑀓𑀸𑀤𑀻𑀲𑀼 𑀕𑀡𑀦𑀸.

𑁧𑁦𑁭-𑁧𑁩𑁦. 𑀦𑀸𑀭𑀫𑁆𑀫𑀡𑀧𑀘𑁆𑀘𑀬𑀸𑀤𑀬𑁄 𑀧𑀦 𑀏𑀓𑀫𑀽𑀮𑀓𑁂 𑀢𑀸𑀯 𑀧𑀼𑀭𑀺𑀫𑁂𑀦 𑀲𑀤𑀺𑀲𑀢𑁆𑀢𑀸 𑀇𑀥𑀸𑀧𑀺 𑀦 𑀤𑀲𑁆𑀲𑀺𑀢𑀸𑀬𑁂𑀯. 𑀦𑀸𑀭𑀫𑁆𑀫𑀡𑀧𑀘𑁆𑀘𑀬𑀯𑀲𑁂𑀦 𑀤𑀼𑀫𑀽𑀮𑀓𑁂 𑀦𑀸𑀭𑀫𑁆𑀫𑀡𑀧𑀘𑁆𑀘𑀬𑀸, 𑀦𑀳𑁂𑀢𑀼𑀬𑀸 𑀏𑀓𑀦𑁆𑀢𑀺 𑀦𑀳𑁂𑀢𑀼𑀤𑀼𑀫𑀽𑀮𑀓𑁂 𑀯𑀼𑀢𑁆𑀢𑀫𑁂𑀯. 𑀦𑀸𑀥𑀺𑀧𑀢𑀺𑀬𑀸 𑀧𑀜𑁆𑀘𑀸𑀢𑀺 𑀦𑀸𑀭𑀫𑁆𑀫𑀡𑀧𑀘𑁆𑀘𑀬𑁂 𑀮𑀤𑁆𑀥𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀸𑀢𑀺 𑀏𑀯𑀁 𑀲𑀩𑁆𑀩𑀲𑀁𑀲𑀦𑁆𑀤𑀦𑁂𑀲𑀼 𑀊𑀦𑀢𑀭𑀕𑀡𑀦𑀲𑁆𑀲𑁂𑀯 𑀧𑀘𑁆𑀘𑀬𑀲𑁆𑀲 𑀯𑀲𑁂𑀦 𑀕𑀡𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀬𑀢𑁆𑀣 𑀬𑀢𑁆𑀣 𑀘 𑀦𑀸𑀭𑀫𑁆𑀫𑀡𑀧𑀘𑁆𑀘𑀬𑁄 𑀧𑀯𑀺𑀲𑀢𑀺, 𑀢𑀢𑁆𑀣 𑀢𑀢𑁆𑀣 𑀭𑀽𑀧𑀫𑁂𑀯 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀁. 𑀦𑀸𑀦𑀦𑁆𑀢𑀭𑀦𑀲𑀫𑀦𑀦𑁆𑀢𑀭𑀦𑀅𑀜𑁆𑀜𑀫𑀜𑁆𑀜𑀦𑀉𑀧𑀦𑀺𑀲𑁆𑀲𑀬𑀦𑀸𑀳𑀸𑀭𑀦𑀇𑀦𑁆𑀤𑁆𑀭𑀺𑀬𑀦𑀲𑀫𑁆𑀧𑀬𑀼𑀢𑁆𑀢𑀦𑁄𑀦𑀢𑁆𑀣𑀺𑀦𑁄𑀯𑀺𑀕𑀢𑀧𑀘𑁆𑀘𑀬𑀸𑀦𑀁 𑀧𑀯𑀺𑀝𑁆𑀞𑀝𑁆𑀞𑀸𑀦𑁂𑀧𑀺 𑀏𑀲𑁂𑀯 𑀦𑀬𑁄. 𑀦𑀸𑀳𑀸𑀭𑀦𑀇𑀦𑁆𑀤𑁆𑀭𑀺𑀬𑀦𑀛𑀸𑀦𑀦𑀫𑀕𑁆𑀕𑀧𑀘𑁆𑀘𑀬𑀸 𑀲𑀩𑁆𑀩𑀢𑁆𑀣 𑀲𑀤𑀺𑀲𑀯𑀺𑀲𑁆𑀲𑀚𑁆𑀚𑀦𑀸. 𑀦𑀲𑀳𑀚𑀸𑀢𑀸𑀤𑀺𑀘𑀢𑀼𑀓𑁆𑀓𑀁 𑀇𑀥𑀸𑀧𑀺 𑀧𑀭𑀺𑀳𑀻𑀦𑀫𑁂𑀯𑀸𑀢𑀺 𑀇𑀤𑀫𑁂𑀢𑁆𑀣 𑀮𑀓𑁆𑀔𑀡𑀁. 𑀇𑀫𑀺𑀦𑀸 𑀧𑀦 𑀮𑀓𑁆𑀔𑀡𑁂𑀦 𑀲𑀩𑁆𑀩𑁂𑀲𑀼 𑀤𑀼𑀫𑀽𑀮𑀓𑀸𑀤𑀻𑀲𑀼 ‘‘𑀅𑀬𑀁 𑀧𑀘𑁆𑀘𑀬𑁄 𑀫𑀽𑀮𑀁, 𑀅𑀬𑀫𑁂𑀢𑁆𑀣 𑀤𑀼𑀫𑀽𑀮𑀓𑁄, 𑀅𑀬𑀁 𑀢𑀺𑀫𑀽𑀮𑀓𑁄, 𑀅𑀬𑀁 𑀲𑀩𑁆𑀩𑀫𑀽𑀮𑀓𑁄’’𑀢𑀺 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀊𑀦𑀢𑀭𑀕𑀡𑀦𑀲𑁆𑀲 𑀧𑀘𑁆𑀘𑀬𑀲𑁆𑀲 𑀯𑀲𑁂𑀦 𑀕𑀡𑀦𑀸 𑀯𑁂𑀤𑀺𑀢𑀩𑁆𑀩𑀸𑀢𑀺.

𑀧𑀘𑁆𑀘𑀬𑀧𑀘𑁆𑀘𑀦𑀻𑀬𑀯𑀡𑁆𑀡𑀦𑀸.

𑀧𑀘𑁆𑀘𑀬𑀸𑀦𑀼𑀮𑁄𑀫𑀧𑀘𑁆𑀘𑀦𑀻𑀬𑀯𑀡𑁆𑀡𑀦𑀸

𑁧𑁩𑁧-𑁧𑁮𑁯. 𑀇𑀤𑀸𑀦𑀺 𑀅𑀦𑀼𑀮𑁄𑀫𑀧𑀘𑁆𑀘𑀦𑀻𑀬𑁂 𑀕𑀡𑀦𑀁 𑀤𑀲𑁆𑀲𑁂𑀢𑀼𑀁 𑀳𑁂𑀢𑀼𑀧𑀘𑁆𑀘𑀬𑀸 𑀦𑀸𑀭𑀫𑁆𑀫𑀡𑁂 𑀧𑀜𑁆𑀘𑀸𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀳𑁂𑀢𑀸𑀥𑀺𑀧𑀢𑀺𑀫𑀕𑁆𑀕𑀧𑀘𑁆𑀘𑀬𑁂𑀲𑀼 𑀅𑀦𑀼𑀮𑁄𑀫𑀢𑁄 𑀞𑀺𑀢𑁂𑀲𑀼 𑀲𑀳𑀚𑀸𑀢𑀸𑀤𑀬𑁄 𑀘𑀢𑁆𑀢𑀸𑀭𑁄 𑀲𑀩𑁆𑀩𑀝𑁆𑀞𑀸𑀦𑀺𑀓𑀧𑀘𑁆𑀘𑀬𑀸, 𑀆𑀳𑀸𑀭𑀺𑀦𑁆𑀤𑁆𑀭𑀺𑀬𑀛𑀸𑀦𑀫𑀕𑁆𑀕𑀧𑀘𑁆𑀘𑀬𑀸 𑀘𑀢𑁆𑀢𑀸𑀭𑁄𑀢𑀺 𑀇𑀫𑁂 𑀅𑀝𑁆𑀞 𑀧𑀘𑁆𑀘𑀦𑀻𑀬𑀢𑁄 𑀦 𑀮𑀩𑁆𑀪𑀦𑁆𑀢𑀺. 𑀳𑁂𑀢𑀼𑀧𑀘𑁆𑀘𑀬𑀸𑀤𑀺𑀯𑀲𑁂𑀦 𑀳𑀺 𑀉𑀧𑁆𑀧𑀚𑁆𑀚𑀫𑀸𑀦𑁄 𑀥𑀫𑁆𑀫𑁄 𑀇𑀫𑁂 𑀅𑀝𑁆𑀞 𑀧𑀘𑁆𑀘𑀬𑁂 𑀅𑀮𑀪𑀦𑁆𑀢𑁄 𑀦𑀸𑀫 𑀦𑀢𑁆𑀣𑀺. 𑀆𑀭𑀫𑁆𑀫𑀡𑀅𑀦𑀦𑁆𑀢𑀭𑀲𑀫𑀦𑀦𑁆𑀢𑀭𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀬𑀼𑀢𑁆𑀢𑀦𑀢𑁆𑀣𑀺𑀯𑀺𑀕𑀢𑀧𑀘𑁆𑀘𑀬𑁂𑀲𑀼 𑀧𑀦 𑀅𑀦𑀼𑀮𑁄𑀫𑀢𑁄 𑀞𑀺𑀢𑁂𑀲𑀼 𑀅𑀭𑀽𑀧𑀝𑁆𑀞𑀸𑀦𑀺𑀓𑀸 𑀧𑀘𑁆𑀘𑀦𑀻𑀓𑀢𑁄 𑀦 𑀮𑀩𑁆𑀪𑀦𑁆𑀢𑀺. 𑀦 𑀳𑀺 𑀆𑀭𑀫𑁆𑀫𑀡𑀧𑀘𑁆𑀘𑀬𑀸𑀤𑀻𑀳𑀺 𑀉𑀧𑁆𑀧𑀚𑁆𑀚𑀫𑀸𑀦𑀸 𑀅𑀦𑀦𑁆𑀢𑀭𑀲𑀫𑀦𑀦𑁆𑀢𑀭𑀧𑀘𑁆𑀘𑀬𑀸𑀤𑀬𑁄 𑀦 𑀮𑀪𑀦𑁆𑀢𑀺. 𑀲𑀳𑀚𑀸𑀢𑀅𑀜𑁆𑀜𑀫𑀜𑁆𑀜𑀦𑀺𑀲𑁆𑀲𑀬𑀓𑀫𑁆𑀫𑀸𑀳𑀸𑀭𑀺𑀦𑁆𑀤𑁆𑀭𑀺𑀬𑀅𑀢𑁆𑀣𑀺𑀅𑀯𑀺𑀕𑀢𑀧𑀘𑁆𑀘𑀬𑁂𑀲𑀼 𑀧𑀦 𑀅𑀦𑀼𑀮𑁄𑀫𑀢𑁄 𑀞𑀺𑀢𑁂𑀲𑀼 𑀘𑀢𑁆𑀢𑀸𑀭𑁄 𑀲𑀩𑁆𑀩𑀝𑁆𑀞𑀸𑀦𑀺𑀓𑀸𑀬𑁂𑀯, 𑀧𑀘𑁆𑀘𑀦𑀻𑀓𑀢𑁄 𑀦 𑀮𑀩𑁆𑀪𑀦𑁆𑀢𑀺. 𑀏𑀢𑁂𑀲𑀜𑁆𑀳𑀺 𑀧𑀘𑁆𑀘𑀬𑀸𑀦𑀁 𑀯𑀲𑁂𑀦 𑀉𑀧𑁆𑀧𑀚𑁆𑀚𑀫𑀸𑀦𑁄 𑀲𑀩𑁆𑀩𑀝𑁆𑀞𑀸𑀦𑀺𑀓𑁂 𑀅𑀮𑀪𑀦𑁆𑀢𑁄 𑀦𑀸𑀫 𑀦𑀢𑁆𑀣𑀺. 𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬𑀲𑁆𑀲 𑀅𑀦𑀼𑀮𑁄𑀫𑀢𑁄 𑀞𑀸𑀦𑀁 𑀦𑀸𑀫 𑀦𑀢𑁆𑀣𑀺. 𑀏𑀯𑀁 𑀲𑁂𑀲𑁂𑀲𑀼 𑀅𑀦𑀼𑀮𑁄𑀫𑀢𑁄 𑀞𑀺𑀢𑁂𑀲𑀼 𑀬𑁂 𑀘 𑀮𑀩𑁆𑀪𑀦𑁆𑀢𑀺, 𑀬𑁂 𑀘 𑀦 𑀮𑀩𑁆𑀪𑀦𑁆𑀢𑀺, 𑀢𑁂 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀲𑀩𑁆𑀩𑁂𑀲𑀼𑀧𑀺 𑀤𑀼𑀫𑀽𑀮𑀓𑀸𑀤𑀻𑀲𑀼 𑀦𑀬𑁂𑀲𑀼 𑀢𑁂𑀲𑀁 𑀢𑁂𑀲𑀁 𑀧𑀘𑁆𑀘𑀬𑀸𑀦𑀁 𑀲𑀁𑀲𑀦𑁆𑀤𑀦𑁂 𑀊𑀦𑀢𑀭𑀕𑀡𑀦𑀸𑀦𑀁𑀬𑁂𑀯 𑀯𑀲𑁂𑀦 𑀕𑀡𑀦𑀸 𑀯𑁂𑀤𑀺𑀢𑀩𑁆𑀩𑀸𑀢𑀺.

𑀧𑀘𑁆𑀘𑀬𑀸𑀦𑀼𑀮𑁄𑀫𑀧𑀘𑁆𑀘𑀦𑀻𑀬𑀯𑀡𑁆𑀡𑀦𑀸.

𑀧𑀘𑁆𑀘𑀬𑀧𑀘𑁆𑀘𑀦𑀻𑀬𑀸𑀦𑀼𑀮𑁄𑀫𑀯𑀡𑁆𑀡𑀦𑀸

𑁧𑁯𑁦. 𑀇𑀤𑀸𑀦𑀺 𑀧𑀘𑁆𑀘𑀦𑀻𑀬𑀸𑀦𑀼𑀮𑁄𑀫𑁂 𑀕𑀡𑀦𑀁 𑀤𑀲𑁆𑀲𑁂𑀢𑀼𑀁 𑀦𑀳𑁂𑀢𑀼𑀧𑀘𑁆𑀘𑀬𑀸 𑀆𑀭𑀫𑁆𑀫𑀡𑁂 𑀤𑁆𑀯𑁂𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀳𑁂𑀢𑀼𑀫𑁆𑀳𑀺 𑀧𑀘𑁆𑀘𑀦𑀻𑀓𑀢𑁄 𑀞𑀺𑀢𑁂 𑀞𑀧𑁂𑀢𑁆𑀯𑀸 𑀅𑀥𑀺𑀧𑀢𑀺𑀁 𑀅𑀯𑀲𑁂𑀲𑀸 𑀅𑀦𑀼𑀮𑁄𑀫𑀢𑁄 𑀮𑀩𑁆𑀪𑀦𑁆𑀢𑀺. 𑀧𑀘𑁆𑀙𑀸𑀚𑀸𑀢𑁄 𑀧𑀦 𑀅𑀦𑀼𑀮𑁄𑀫𑀢𑁄 𑀲𑀩𑁆𑀩𑀢𑁆𑀣𑁂𑀯 𑀦 𑀮𑀩𑁆𑀪𑀢𑀺, 𑀬𑁂 𑀦𑀯 𑀧𑀘𑁆𑀘𑀬𑀸 ‘‘𑀅𑀭𑀽𑀧𑀸𑀦𑀜𑁆𑀜𑁂𑀯𑀸’’𑀢𑀺 𑀯𑀼𑀢𑁆𑀢𑀸, 𑀢𑁂𑀲𑀼 𑀧𑀼𑀭𑁂𑀚𑀸𑀢𑀜𑁆𑀘 𑀆𑀲𑁂𑀯𑀦𑀜𑁆𑀘 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑁂𑀲𑀼 𑀲𑀢𑁆𑀢𑀲𑀼 𑀧𑀘𑁆𑀘𑀦𑀻𑀓𑀢𑁄 𑀞𑀺𑀢𑁂𑀲𑀼 𑀲𑁂𑀲𑀸 𑀅𑀭𑀽𑀧𑀝𑁆𑀞𑀸𑀦𑀺𑀓𑀸 𑀅𑀦𑀼𑀮𑁄𑀫𑀢𑁄 𑀦 𑀮𑀩𑁆𑀪𑀦𑁆𑀢𑀺. 𑀬𑁄 𑀳𑀺 𑀆𑀭𑀫𑁆𑀫𑀡𑀸𑀤𑀻𑀳𑀺 𑀦𑀼𑀧𑁆𑀧𑀚𑁆𑀚𑀢𑀺, 𑀦 𑀲𑁄 𑀅𑀦𑀦𑁆𑀢𑀭𑀸𑀤𑀬𑁄 𑀮𑀪𑀢𑀺. 𑀧𑀝𑀺𑀲𑀦𑁆𑀥𑀺𑀯𑀺𑀧𑀸𑀓𑁄 𑀧𑀦 𑀧𑀼𑀭𑁂𑀚𑀸𑀢𑀢𑁄, 𑀲𑀩𑁆𑀩𑀯𑀺𑀧𑀸𑀓𑁄 𑀘 𑀲𑀤𑁆𑀥𑀺𑀁 𑀓𑀺𑀭𑀺𑀬𑀫𑀦𑁄𑀥𑀸𑀢𑀼𑀬𑀸 𑀆𑀲𑁂𑀯𑀦𑀢𑁄 𑀅𑀦𑀼𑀧𑁆𑀧𑀚𑁆𑀚𑀫𑀸𑀦𑁄𑀧𑀺 𑀅𑀦𑀦𑁆𑀢𑀭𑀸𑀤𑀬𑁄 𑀮𑀪𑀢𑀺, 𑀢𑀲𑁆𑀫𑀸 ‘‘𑀧𑀼𑀭𑁂𑀚𑀸𑀢𑀜𑁆𑀘 𑀆𑀲𑁂𑀯𑀦𑀜𑁆𑀘 𑀞𑀧𑁂𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀁.

𑀧𑀼𑀭𑁂𑀚𑀸𑀢𑀧𑀘𑁆𑀙𑀸𑀚𑀸𑀢𑀆𑀲𑁂𑀯𑀦𑀯𑀺𑀧𑀸𑀓𑀯𑀺𑀧𑁆𑀧𑀬𑀼𑀢𑁆𑀢𑁂𑀲𑀼 𑀧𑀘𑁆𑀘𑀦𑀻𑀓𑀢𑁄 𑀞𑀺𑀢𑁂𑀲𑀼 𑀏𑀓𑀁 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑀸 𑀅𑀦𑀼𑀮𑁄𑀫𑀢𑁄 𑀮𑀩𑁆𑀪𑀦𑁆𑀢𑀺. 𑀓𑀫𑁆𑀫𑀧𑀘𑁆𑀘𑀬𑁂 𑀧𑀘𑁆𑀘𑀦𑀻𑀓𑀢𑁄 𑀞𑀺𑀢𑁂 𑀞𑀧𑁂𑀢𑁆𑀯𑀸 𑀯𑀺𑀧𑀸𑀓𑀧𑀘𑁆𑀘𑀬𑀁 𑀅𑀯𑀲𑁂𑀲𑀸 𑀅𑀦𑀼𑀮𑁄𑀫𑀢𑁄 𑀮𑀩𑁆𑀪𑀦𑁆𑀢𑀺. 𑀆𑀳𑀸𑀭𑀺𑀦𑁆𑀤𑁆𑀭𑀺𑀬𑁂𑀲𑀼 𑀧𑀘𑁆𑀘𑀦𑀻𑀓𑀢𑁄 𑀞𑀺𑀢𑁂𑀲𑀼 𑀞𑀧𑁂𑀢𑁆𑀯𑀸 𑀲𑀩𑁆𑀩𑀝𑁆𑀞𑀸𑀦𑀺𑀓𑁂 𑀘𑁂𑀯 𑀅𑀜𑁆𑀜𑀫𑀜𑁆𑀜𑀓𑀫𑁆𑀫𑀸𑀳𑀸𑀭𑀺𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑁂 𑀘 𑀅𑀯𑀲𑁂𑀲𑀸 𑀅𑀦𑀼𑀮𑁄𑀫𑀢𑁄 𑀦 𑀮𑀩𑁆𑀪𑀦𑁆𑀢𑀺, 𑀇𑀢𑀭𑁂 𑀬𑀼𑀚𑁆𑀚𑀫𑀸𑀦𑀓𑀯𑀲𑁂𑀦 𑀮𑀩𑁆𑀪𑀦𑁆𑀢𑀺. 𑀛𑀸𑀦𑀧𑀘𑁆𑀘𑀬𑁂 𑀧𑀘𑁆𑀘𑀦𑀻𑀓𑀢𑁄 𑀞𑀺𑀢𑁂. 𑀳𑁂𑀢𑀸𑀥𑀺𑀧𑀢𑀺𑀆𑀲𑁂𑀯𑀦𑀫𑀕𑁆𑀕𑀧𑀘𑁆𑀘𑀬𑀸 𑀅𑀦𑀼𑀮𑁄𑀫𑀢𑁄 𑀦 𑀮𑀩𑁆𑀪𑀦𑁆𑀢𑀺. 𑀫𑀕𑁆𑀕𑀧𑀘𑁆𑀘𑀬𑁂 𑀧𑀘𑁆𑀘𑀦𑀻𑀓𑀢𑁄 𑀞𑀺𑀢𑁂 𑀳𑁂𑀢𑀸𑀥𑀺𑀧𑀢𑀺𑀧𑀘𑁆𑀘𑀬𑀸 𑀅𑀦𑀼𑀮𑁄𑀫𑀢𑁄 𑀦 𑀮𑀩𑁆𑀪𑀦𑁆𑀢𑀺. 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑁂 𑀧𑀘𑁆𑀘𑀦𑀻𑀓𑀢𑁄 𑀞𑀺𑀢𑁂 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑀁 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑀸 𑀅𑀦𑀼𑀮𑁄𑀫𑀢𑁄 𑀮𑀩𑁆𑀪𑀦𑁆𑀢𑀺. 𑀏𑀯𑀁 𑀢𑁂𑀲𑀼 𑀢𑁂𑀲𑀼 𑀧𑀘𑁆𑀘𑀬𑁂𑀲𑀼 𑀧𑀘𑁆𑀘𑀦𑀻𑀓𑀢𑁄 𑀞𑀺𑀢𑁂𑀲𑀼 𑀬𑁂 𑀬𑁂 𑀅𑀦𑀼𑀮𑁄𑀫𑀢𑁄 𑀦 𑀮𑀩𑁆𑀪𑀦𑁆𑀢𑀺, 𑀢𑁂 𑀢𑁂 𑀜𑀢𑁆𑀯𑀸 𑀢𑁂𑀲𑀁 𑀢𑁂𑀲𑀁 𑀧𑀘𑁆𑀘𑀬𑀸𑀦𑀁 𑀲𑀁𑀲𑀦𑁆𑀤𑀦𑁂 𑀊𑀦𑀢𑀭𑀕𑀡𑀦𑀸𑀦𑀁 𑀯𑀲𑁂𑀦 𑀕𑀡𑀦𑀸 𑀯𑁂𑀤𑀺𑀢𑀩𑁆𑀩𑀸.

𑁧𑁯𑁧-𑁧𑁯𑁫. 𑀤𑀼𑀫𑀽𑀮𑀓𑀸𑀤𑀻𑀲𑀼 𑀘 𑀦𑀬𑁂𑀲𑀼 𑀬𑀁 𑀬𑀁 𑀧𑀘𑁆𑀘𑀬𑀁 𑀆𑀤𑀺𑀁 𑀓𑀢𑁆𑀯𑀸 𑀬𑁂 𑀬𑁂 𑀤𑀼𑀓𑀸𑀤𑀬𑁄 𑀤𑀲𑁆𑀲𑀺𑀢𑀸, 𑀢𑁂 𑀢𑁂 𑀮𑀩𑁆𑀪𑀫𑀸𑀦𑀸𑀮𑀩𑁆𑀪𑀫𑀸𑀦𑀧𑀘𑁆𑀘𑀬𑀯𑀲𑁂𑀦 𑀬𑀣𑀸 𑀬𑀣𑀸 𑀤𑀲𑁆𑀲𑀺𑀢𑀸, 𑀢𑀣𑀸 𑀢𑀣𑀸 𑀲𑀸𑀥𑀼𑀓𑀁 𑀲𑀮𑁆𑀮𑀓𑁆𑀔𑁂𑀢𑀩𑁆𑀩𑀸. 𑀢𑀢𑁆𑀣 𑀬𑀁 𑀦𑀳𑁂𑀢𑀼𑀯𑀲𑁂𑀦 𑀤𑀼𑀫𑀽𑀮𑀓𑀸𑀤𑀬𑁄 𑀦𑀬𑁂 𑀤𑀲𑁆𑀲𑁂𑀦𑁆𑀢𑁂𑀦 𑀦𑀳𑁂𑀢𑀼𑀧𑀘𑁆𑀘𑀬𑀸 𑀦𑀸𑀭𑀫𑁆𑀫𑀡𑀧𑀘𑁆𑀘𑀬𑀸…𑀧𑁂… 𑀦𑀸𑀲𑁂𑀯𑀦𑀧𑀘𑁆𑀘𑀬𑀸𑀢𑀺 𑀯𑀢𑁆𑀯𑀸 ‘‘𑀬𑀸𑀯 𑀆𑀲𑁂𑀯𑀦𑀸 𑀲𑀩𑁆𑀩𑀁 𑀲𑀤𑀺𑀲’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀲𑁆𑀲, ‘‘𑀦𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀸 𑀲𑀳𑀚𑀸𑀢𑁂 𑀏𑀓’’𑀦𑁆𑀢𑀺𑀆𑀤𑀻𑀳𑀺 𑀲𑀤𑀺𑀲𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀬𑀁 𑀧𑀦 ‘‘𑀦𑀓𑀫𑁆𑀫𑁂 𑀕𑀡𑀺𑀢𑁂 𑀧𑀜𑁆𑀘 𑀕𑀡𑁆𑀳𑀸𑀢𑀻’’𑀢𑀺 𑀲𑀻𑀳𑀴𑀪𑀸𑀲𑀸𑀬 𑀮𑀺𑀔𑀺𑀢𑀁, 𑀢𑀲𑁆𑀲𑀢𑁆𑀣𑁄 𑁋 𑀦𑀳𑁂𑀢𑀼𑀧𑀘𑁆𑀘𑀬𑀁 𑀆𑀤𑀺𑀁 𑀓𑀢𑁆𑀯𑀸 𑀦𑀓𑀫𑁆𑀫𑀧𑀘𑁆𑀘𑀬𑀸𑀢𑀺 𑀏𑀯𑀁 𑀦𑀓𑀫𑁆𑀫𑀧𑀘𑁆𑀘𑀬𑁂𑀦 𑀖𑀝𑀺𑀢𑁂 𑀲𑀳𑀚𑀸𑀢𑁂 𑀏𑀓𑀦𑁆𑀢𑀺 𑀏𑀯𑀁 𑀤𑀲𑁆𑀲𑀺𑀢𑀸 𑀧𑀜𑁆𑀘𑁂𑀯 𑀧𑀘𑁆𑀘𑀬𑀸 𑀅𑀦𑀼𑀮𑁄𑀫𑀢𑁄 𑀮𑀩𑁆𑀪𑀦𑁆𑀢𑀺, 𑀦 𑀅𑀜𑁆𑀜𑁂𑀢𑀺. 𑀏𑀯𑀁 𑀅𑀜𑁆𑀜𑁂𑀲𑀼𑀧𑀺 𑀏𑀯𑀭𑀽𑀧𑁂𑀲𑀼 𑀞𑀸𑀦𑁂𑀲𑀼 𑀩𑁆𑀬𑀜𑁆𑀚𑀦𑀁 𑀅𑀦𑀸𑀤𑀺𑀬𑀺𑀢𑁆𑀯𑀸 𑀅𑀥𑀺𑀧𑁆𑀧𑁂𑀢𑀢𑁆𑀣𑁄𑀬𑁂𑀯 𑀕𑀳𑁂𑀢𑀩𑁆𑀩𑁄. 𑀏𑀯𑀭𑀽𑀧𑀜𑁆𑀳𑀺 𑀩𑁆𑀬𑀜𑁆𑀚𑀦𑀁 𑀅𑀢𑁆𑀢𑀦𑁄 𑀲𑀜𑁆𑀜𑀸𑀦𑀺𑀩𑀦𑁆𑀥𑀦𑀢𑁆𑀣𑀁 𑀧𑁄𑀭𑀸𑀡𑁂𑀳𑀺 𑀲𑀓𑀲𑀓𑀪𑀸𑀲𑀸𑀬 𑀮𑀺𑀔𑀺𑀢𑀁.

𑀅𑀧𑀺𑀘 𑀇𑀫𑀲𑁆𑀫𑀺𑀁 𑀧𑀘𑁆𑀘𑀦𑀻𑀬𑀸𑀦𑀼𑀮𑁄𑀫𑁂 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀥𑀫𑁆𑀫𑁂𑀲𑀼𑀧𑀺 𑀅𑀢𑁆𑀣𑀺 𑀥𑀫𑁆𑀫𑁄 𑀓𑀫𑁆𑀫𑀧𑀘𑁆𑀘𑀬𑀁 𑀮𑀪𑀢𑀺, 𑀦 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑀁. 𑀲𑁄 𑀅𑀲𑀜𑁆𑀜𑁂𑀲𑀼 𑀘𑁂𑀯 𑀧𑀜𑁆𑀘𑀯𑁄𑀓𑀸𑀭𑁂 𑀧𑀯𑀢𑁆𑀢𑁂 𑀘 𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀅𑀢𑁆𑀣𑀺 𑀥𑀫𑁆𑀫𑁄 𑀫𑀕𑁆𑀕𑀧𑀘𑁆𑀘𑀬𑀁 𑀮𑀪𑀢𑀺, 𑀦𑀳𑁂𑀢𑀼𑀧𑀘𑁆𑀘𑀬𑀁. 𑀲𑁄 𑀯𑀺𑀘𑀺𑀓𑀺𑀘𑁆𑀙𑀼𑀤𑁆𑀥𑀘𑁆𑀘𑀲𑀳𑀚𑀸𑀢𑀫𑁄𑀳𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀅𑀢𑁆𑀣𑀺 𑀥𑀫𑁆𑀫𑁄 𑀛𑀸𑀦𑀧𑀘𑁆𑀘𑀬𑀁 𑀮𑀪𑀢𑀺, 𑀦𑀫𑀕𑁆𑀕𑀧𑀘𑁆𑀘𑀬𑀁. 𑀲𑁄 𑀫𑀦𑁄𑀥𑀸𑀢𑀼𑀅𑀳𑁂𑀢𑀼𑀓𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀬𑀢𑁆𑀣 𑀓𑀝𑀢𑁆𑀢𑀸𑀭𑀽𑀧𑀸𑀦𑀺 𑀦𑀸𑀦𑀸𑀓𑁆𑀔𑀡𑀺𑀓𑀓𑀫𑁆𑀫𑀯𑀲𑁂𑀦𑁂𑀯 𑀓𑀫𑁆𑀫𑀧𑀘𑁆𑀘𑀬𑀁 𑀮𑀪𑀦𑁆𑀢𑀺, 𑀢𑀢𑁆𑀣 𑀭𑀽𑀧𑀥𑀫𑁆𑀫𑀸 𑀳𑁂𑀢𑀸𑀥𑀺𑀧𑀢𑀺𑀯𑀺𑀧𑀸𑀓𑀺𑀦𑁆𑀤𑁆𑀭𑀺𑀬𑀛𑀸𑀦𑀫𑀕𑁆𑀕𑀧𑀘𑁆𑀘𑀬𑁂 𑀦 𑀮𑀪𑀦𑁆𑀢𑀺, 𑀲𑀩𑁆𑀩𑀝𑁆𑀞𑀸𑀦𑀺𑀓𑀸 𑀧𑀘𑁆𑀘𑀦𑀻𑀬𑀸 𑀦 𑀳𑁄𑀦𑁆𑀢𑀺. 𑀅𑀳𑁂𑀢𑀼𑀓𑁂 𑀅𑀥𑀺𑀧𑀢𑀺𑀧𑀘𑁆𑀘𑀬𑁄 𑀦𑀢𑁆𑀣𑀻𑀢𑀺 𑀇𑀫𑁂𑀲𑀫𑁆𑀧𑀺 𑀧𑀓𑀺𑀡𑁆𑀡𑀓𑀸𑀦𑀁 𑀯𑀲𑁂𑀦𑁂𑀢𑁆𑀣 𑀕𑀡𑀦𑀯𑀸𑀭𑁄 𑀅𑀲𑀫𑁆𑀫𑁄𑀳𑀢𑁄 𑀯𑁂𑀤𑀺𑀢𑀩𑁆𑀩𑁄.

𑀢𑀢𑁆𑀭𑀸𑀬𑀁 𑀦𑀬𑁄 𑁋 𑀦𑀳𑁂𑀢𑀼𑀧𑀘𑁆𑀘𑀬𑀸 𑀆𑀭𑀫𑁆𑀫𑀡𑁂 𑀤𑁆𑀯𑁂𑀢𑀺 𑀏𑀢𑁆𑀣 𑀢𑀸𑀯 𑀅𑀳𑁂𑀢𑀼𑀓𑀫𑁄𑀳𑁄 𑀘𑁂𑀯 𑀅𑀳𑁂𑀢𑀼𑀓𑀯𑀺𑀧𑀸𑀓𑀓𑀺𑀭𑀺𑀬𑀸 𑀘 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀁, 𑀢𑀲𑁆𑀫𑀸 𑀅𑀓𑀼𑀲𑀮𑁂𑀦𑀸𑀓𑀼𑀲𑀮𑀁, 𑀅𑀩𑁆𑀬𑀸𑀓𑀢𑁂𑀦 𑀅𑀩𑁆𑀬𑀸𑀓𑀢𑀁 𑀲𑀦𑁆𑀥𑀸𑀬𑁂𑀢𑁆𑀣 𑀤𑁆𑀯𑁂𑀢𑀺 𑀯𑀼𑀢𑁆𑀢𑀁. 𑀲𑁂𑀲𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀆𑀲𑁂𑀯𑀦𑁂 𑀧𑀦 𑀯𑀺𑀧𑀸𑀓𑀁 𑀦 𑀮𑀩𑁆𑀪𑀢𑀺, 𑀢𑀣𑀸 𑀓𑀺𑀭𑀺𑀬𑀫𑀦𑁄𑀥𑀸𑀢𑀼. 𑀢𑀲𑁆𑀫𑀸 𑀓𑀺𑀭𑀺𑀬𑀸𑀳𑁂𑀢𑀼𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀯𑀲𑁂𑀦𑁂𑀢𑁆𑀣 𑀅𑀩𑁆𑀬𑀸𑀓𑀢𑁂𑀦 𑀅𑀩𑁆𑀬𑀸𑀓𑀢𑀁 𑀯𑁂𑀤𑀺𑀢𑀩𑁆𑀩𑀁. 𑀯𑀺𑀧𑀸𑀓𑁂 𑀏𑀓𑀦𑁆𑀢𑀺 𑀅𑀩𑁆𑀬𑀸𑀓𑀢𑁂𑀦 𑀅𑀩𑁆𑀬𑀸𑀓𑀢𑀫𑁂𑀯. 𑀫𑀕𑁆𑀕𑁂 𑀏𑀓𑀦𑁆𑀢𑀺 𑀅𑀓𑀼𑀲𑀮𑁂𑀦 𑀅𑀓𑀼𑀲𑀮𑀫𑁂𑀯.

𑁧𑁯𑁬-𑁧𑁯𑁭. 𑀦𑀸𑀭𑀫𑁆𑀫𑀡𑀫𑀽𑀮𑀓𑁂 𑀳𑁂𑀢𑀼𑀬𑀸 𑀧𑀜𑁆𑀘𑀸𑀢𑀺 𑀭𑀽𑀧𑀫𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑀜𑁆𑀳𑀺 𑀓𑀼𑀲𑀮𑀁 𑀅𑀓𑀼𑀲𑀮𑀁 𑀅𑀩𑁆𑀬𑀸𑀓𑀢𑀁 𑀓𑀼𑀲𑀮𑀸𑀩𑁆𑀬𑀸𑀓𑀢𑀁 𑀅𑀓𑀼𑀲𑀮𑀸𑀩𑁆𑀬𑀸𑀓𑀢𑀜𑁆𑀘𑀸𑀢𑀺 𑀧𑀜𑁆𑀘 𑀓𑁄𑀝𑁆𑀞𑀸𑀲𑁂 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀺. 𑀲𑀩𑁆𑀩𑀧𑀜𑁆𑀘𑀓𑁂𑀲𑀼 𑀏𑀲𑁂𑀯 𑀦𑀬𑁄. 𑀅𑀜𑁆𑀜𑀫𑀜𑁆𑀜𑁂 𑀏𑀓𑀦𑁆𑀢𑀺 𑀪𑀽𑀢𑀭𑀽𑀧𑀸𑀦𑀺 𑀘𑁂𑀯 𑀯𑀢𑁆𑀣𑀼𑀜𑁆𑀘 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑀸𑀦𑀺 𑀳𑀺 𑀦𑀸𑀭𑀫𑁆𑀫𑀡𑀧𑀘𑁆𑀘𑀬𑀸 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀸 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀢𑀺𑀫𑀽𑀮𑀓𑁂𑀧𑀺 𑀏𑀲𑁂𑀯 𑀦𑀬𑁄.

𑁧𑁯𑁮-𑁨𑁦𑁨. 𑀦𑀸𑀥𑀺𑀧𑀢𑀺𑀫𑀽𑀮𑀓𑁂 𑀳𑁂𑀢𑀼𑀬𑀸 𑀦𑀯𑀸𑀢𑀺 𑀅𑀦𑀼𑀮𑁄𑀫𑁂 𑀳𑁂𑀢𑀼𑀫𑁆𑀳𑀺 𑀯𑀼𑀢𑁆𑀢𑀸𑀦𑁂𑀯. 𑀢𑀻𑀡𑀻𑀢𑀺𑀆𑀤𑀻𑀦𑀺𑀧𑀺 𑀳𑁂𑀝𑁆𑀞𑀸 𑀅𑀦𑀼𑀮𑁄𑀫𑁂 𑀯𑀼𑀢𑁆𑀢𑀲𑀤𑀺𑀲𑀸𑀦𑁂𑀯. 𑀢𑀺𑀫𑀽𑀮𑀓𑁂 𑀤𑁆𑀯𑁂𑀢𑀺 𑀳𑁂𑀝𑁆𑀞𑀸 𑀦𑀳𑁂𑀢𑀼𑀧𑀘𑁆𑀘𑀬𑀸 𑀆𑀭𑀫𑁆𑀫𑀡𑁂 𑀯𑀼𑀢𑁆𑀢𑀲𑀤𑀺𑀲𑀸𑀦𑁂𑀯.

𑁨𑁦𑁩-𑁨𑁩𑁩. 𑀦𑀧𑀼𑀭𑁂𑀚𑀸𑀢𑀫𑀽𑀮𑀓𑁂 𑀳𑁂𑀢𑀼𑀬𑀸 𑀲𑀢𑁆𑀢𑀸𑀢𑀺 𑀳𑁂𑀝𑁆𑀞𑀸 ‘‘𑀆𑀭𑀼𑀧𑁆𑀧𑁂 𑀓𑀼𑀲𑀮𑀁 𑀏𑀓𑀁 𑀔𑀦𑁆𑀥𑀁 𑀧𑀝𑀺𑀘𑁆𑀘𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀧𑀼𑀭𑁂𑀚𑀸𑀢𑁂 𑀤𑀲𑁆𑀲𑀺𑀢𑀸𑀦𑁂𑀯. 𑀲𑀩𑁆𑀩𑀲𑀢𑁆𑀢𑀓𑁂𑀲𑀼 𑀏𑀲𑁂𑀯 𑀦𑀬𑁄. 𑀦𑀓𑀫𑁆𑀫𑀫𑀽𑀮𑀓𑁂 𑀳𑁂𑀢𑀼𑀬𑀸 𑀢𑀻𑀡𑀻𑀢𑀺𑀆𑀤𑀻𑀲𑀼 𑀘𑁂𑀢𑀦𑀸𑀯 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀸. 𑀢𑀲𑁆𑀫𑀸 𑀓𑀼𑀲𑀮𑀁 𑀅𑀓𑀼𑀲𑀮𑀁 𑀅𑀩𑁆𑀬𑀸𑀓𑀢𑀜𑁆𑀘 𑀧𑀝𑀺𑀘𑁆𑀘 𑀉𑀧𑁆𑀧𑀢𑁆𑀢𑀺𑀁 𑀲𑀦𑁆𑀥𑀸𑀬 𑀢𑀻𑀡𑀻𑀢𑀺 𑀯𑀼𑀢𑁆𑀢𑀁. 𑀇𑀫𑀺𑀦𑀸 𑀦𑀬𑁂𑀦 ‘‘𑀏𑀓𑀁 𑀤𑁆𑀯𑁂 𑀢𑀻𑀡𑀺 𑀧𑀜𑁆𑀘 𑀲𑀢𑁆𑀢 𑀦𑀯𑀸’’𑀢𑀺 𑀆𑀕𑀢𑀝𑁆𑀞𑀸𑀦𑁂𑀲𑀼 𑀕𑀡𑀦𑀸 𑀯𑁂𑀤𑀺𑀢𑀩𑁆𑀩𑀸. ‘‘𑀘𑀢𑁆𑀢𑀸𑀭𑀺 𑀙 𑀅𑀝𑁆𑀞𑀸’’𑀢𑀺 𑀇𑀫𑀸 𑀧𑀦 𑀢𑀺𑀲𑁆𑀲𑁄 𑀕𑀡𑀦𑀸 𑀦𑀢𑁆𑀣𑁂𑀯𑀸𑀢𑀺.

𑀧𑀘𑁆𑀘𑀬𑀧𑀘𑁆𑀘𑀦𑀻𑀬𑀸𑀦𑀼𑀮𑁄𑀫𑀯𑀡𑁆𑀡𑀦𑀸.

𑀦𑀺𑀝𑁆𑀞𑀺𑀢𑀸 𑀘 𑀧𑀝𑀺𑀘𑁆𑀘𑀯𑀸𑀭𑀲𑁆𑀲 𑀅𑀢𑁆𑀣𑀯𑀡𑁆𑀡𑀦𑀸.