𑁫. 𑀲𑀘𑁆𑀘𑀬𑀫𑀓𑀁

𑁧. 𑀧𑀡𑁆𑀡𑀢𑁆𑀢𑀺𑀯𑀸𑀭𑀯𑀡𑁆𑀡𑀦𑀸

𑁧-𑁯. 𑀇𑀤𑀸𑀦𑀺 𑀢𑁂𑀬𑁂𑀯 𑀫𑀽𑀮𑀬𑀫𑀓𑁂 𑀤𑁂𑀲𑀺𑀢𑁂 𑀓𑀼𑀲𑀮𑀸𑀤𑀺𑀥𑀫𑁆𑀫𑁂 𑀲𑀘𑁆𑀘𑀯𑀲𑁂𑀦 𑀲𑀗𑁆𑀕𑀡𑁆𑀳𑀺𑀢𑁆𑀯𑀸 𑀥𑀸𑀢𑀼𑀬𑀫𑀓𑀸𑀦𑀦𑁆𑀢𑀭𑀁 𑀤𑁂𑀲𑀺𑀢𑀲𑁆𑀲 𑀲𑀘𑁆𑀘𑀬𑀫𑀓𑀲𑁆𑀲 𑀯𑀡𑁆𑀡𑀦𑀸 𑀳𑁄𑀢𑀺. 𑀢𑀢𑁆𑀣𑀸𑀧𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀧𑀡𑁆𑀡𑀢𑁆𑀢𑀺𑀯𑀸𑀭𑀸𑀤𑀬𑁄 𑀢𑀬𑁄 𑀫𑀳𑀸𑀯𑀸𑀭𑀸 𑀅𑀦𑁆𑀢𑀭𑀯𑀸𑀭𑀸𑀤𑀬𑁄 𑀘 𑀅𑀯𑀲𑁂𑀲𑀧𑁆𑀧𑀪𑁂𑀤𑀸 𑀯𑁂𑀤𑀺𑀢𑀩𑁆𑀩𑀸. 𑀧𑀡𑁆𑀡𑀢𑁆𑀢𑀺𑀯𑀸𑀭𑁂 𑀧𑀦𑁂𑀢𑁆𑀣 𑀘𑀢𑀼𑀦𑁆𑀦𑀁 𑀲𑀘𑁆𑀘𑀸𑀦𑀁 𑀯𑀲𑁂𑀦 𑀧𑀤𑀲𑁄𑀥𑀦𑀯𑀸𑀭𑁄, 𑀧𑀤𑀲𑁄𑀥𑀦𑀫𑀽𑀮𑀘𑀓𑁆𑀓𑀯𑀸𑀭𑁄, 𑀲𑀼𑀤𑁆𑀥𑀲𑀘𑁆𑀘𑀯𑀸𑀭𑁄, 𑀲𑀼𑀤𑁆𑀥𑀲𑀘𑁆𑀘𑀫𑀽𑀮𑀘𑀓𑁆𑀓𑀯𑀸𑀭𑁄𑀢𑀺 𑀇𑀫𑁂𑀲𑀼 𑀘𑀢𑀽𑀲𑀼 𑀯𑀸𑀭𑁂𑀲𑀼 𑀬𑀫𑀓𑀕𑀡𑀦𑀸 𑀯𑁂𑀤𑀺𑀢𑀩𑁆𑀩𑀸.

𑁧𑁦-𑁨𑁬. 𑀧𑀡𑁆𑀡𑀢𑁆𑀢𑀺𑀯𑀸𑀭𑀦𑀺𑀤𑁆𑀤𑁂𑀲𑁂 𑀧𑀦 𑀅𑀯𑀲𑁂𑀲𑀁 𑀤𑀼𑀓𑁆𑀔𑀲𑀘𑁆𑀘𑀦𑁆𑀢𑀺 𑀤𑀼𑀓𑁆𑀔𑀯𑁂𑀤𑀦𑀸𑀬 𑀘𑁂𑀯 𑀢𑀡𑁆𑀳𑀸𑀬 𑀘 𑀯𑀺𑀦𑀺𑀫𑀼𑀢𑁆𑀢𑀸 𑀢𑁂𑀪𑀽𑀫𑀓𑀥𑀫𑁆𑀫𑀸 𑀯𑁂𑀤𑀺𑀢𑀩𑁆𑀩𑀸. 𑀅𑀯𑀲𑁂𑀲𑁄 𑀲𑀫𑀼𑀤𑀬𑁄𑀢𑀺 𑀲𑀘𑁆𑀘𑀯𑀺𑀪𑀗𑁆𑀕𑁂 𑀦𑀺𑀤𑁆𑀤𑀺𑀝𑁆𑀞𑀓𑀸𑀫𑀸𑀯𑀘𑀭𑀓𑀼𑀲𑀮𑀸𑀤𑀺𑀪𑁂𑀤𑁄 𑀤𑀼𑀓𑁆𑀔𑀲𑀘𑁆𑀘𑀲𑁆𑀲 𑀧𑀘𑁆𑀘𑀬𑁄. 𑀅𑀯𑀲𑁂𑀲𑁄 𑀦𑀺𑀭𑁄𑀥𑁄𑀢𑀺 𑀢𑀤𑀗𑁆𑀕𑀯𑀺𑀓𑁆𑀔𑀫𑁆𑀪𑀦𑀲𑀫𑀼𑀘𑁆𑀙𑁂𑀤𑀧𑀝𑀺𑀧𑀲𑁆𑀲𑀤𑁆𑀥𑀺𑀦𑀺𑀭𑁄𑀥𑁄 𑀘𑁂𑀯 𑀔𑀡𑀪𑀗𑁆𑀕𑀦𑀺𑀭𑁄𑀥𑁄 𑀘. 𑀅𑀯𑀲𑁂𑀲𑁄 𑀫𑀕𑁆𑀕𑁄𑀢𑀺 ‘‘𑀢𑀲𑁆𑀫𑀺𑀁 𑀔𑁄 𑀧𑀦 𑀲𑀫𑀬𑁂 𑀧𑀜𑁆𑀘𑀗𑁆𑀕𑀺𑀓𑁄 𑀫𑀕𑁆𑀕𑁄 𑀳𑁄𑀢𑀺, 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄, 𑀫𑀺𑀘𑁆𑀙𑀸𑀫𑀕𑁆𑀕𑁄, 𑀚𑀗𑁆𑀖𑀫𑀕𑁆𑀕𑁄, 𑀲𑀓𑀝𑀫𑀕𑁆𑀕𑁄’’𑀢𑀺 𑀏𑀯𑀫𑀸𑀤𑀺𑀓𑁄.

𑀧𑀡𑁆𑀡𑀢𑁆𑀢𑀺𑀯𑀸𑀭𑀯𑀡𑁆𑀡𑀦𑀸.

𑁨. 𑀧𑀯𑀢𑁆𑀢𑀺𑀯𑀸𑀭𑀯𑀡𑁆𑀡𑀦𑀸

𑁨𑁭-𑁧𑁬𑁪. 𑀧𑀯𑀢𑁆𑀢𑀺𑀯𑀸𑀭𑁂 𑀧𑀦𑁂𑀢𑁆𑀣 𑀧𑀘𑁆𑀘𑀼𑀧𑁆𑀧𑀦𑁆𑀦𑀓𑀸𑀮𑁂 𑀧𑀼𑀕𑁆𑀕𑀮𑀯𑀸𑀭𑀲𑁆𑀲 𑀅𑀦𑀼𑀮𑁄𑀫𑀦𑀬𑁂 ‘‘𑀬𑀲𑁆𑀲 𑀤𑀼𑀓𑁆𑀔𑀲𑀘𑁆𑀘𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀲𑀫𑀼𑀤𑀬𑀲𑀘𑁆𑀘𑀁 𑀉𑀧𑁆𑀧𑀚𑁆𑀚𑀢𑀺; 𑀬𑀲𑁆𑀲 𑀯𑀸 𑀧𑀦 𑀲𑀫𑀼𑀤𑀬𑀲𑀘𑁆𑀘𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀤𑀼𑀓𑁆𑀔𑀲𑀘𑁆𑀘𑀁 𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀤𑀼𑀓𑁆𑀔𑀲𑀘𑁆𑀘𑀫𑀽𑀮𑀓𑁂𑀳𑀺 𑀢𑀻𑀳𑀺, 𑀲𑀫𑀼𑀤𑀬𑀲𑀘𑁆𑀘𑀫𑀽𑀮𑀓𑁂𑀳𑀺 𑀤𑁆𑀯𑀻𑀳𑀺, 𑀦𑀺𑀭𑁄𑀥𑀲𑀘𑁆𑀘𑀫𑀽𑀮𑀓𑁂𑀦 𑀏𑀓𑁂𑀦𑀸𑀢𑀺 𑀮𑀩𑁆𑀪𑀫𑀸𑀦𑀜𑁆𑀘 𑀅𑀮𑀩𑁆𑀪𑀫𑀸𑀦𑀜𑁆𑀘 𑀕𑀳𑁂𑀢𑁆𑀯𑀸 𑀧𑀸𑀴𑀺𑀯𑀲𑁂𑀦 𑀙𑀳𑀺 𑀬𑀫𑀓𑁂𑀳𑀺 𑀪𑀯𑀺𑀢𑀩𑁆𑀩𑀁. 𑀢𑁂𑀲𑀼 𑀬𑀲𑁆𑀫𑀸 𑀦𑀺𑀭𑁄𑀥𑀲𑁆𑀲 𑀦𑁂𑀯 𑀉𑀧𑁆𑀧𑀸𑀤𑁄, 𑀦 𑀦𑀺𑀭𑁄𑀥𑁄 𑀬𑀼𑀚𑁆𑀚𑀢𑀺, 𑀢𑀲𑁆𑀫𑀸 𑀤𑀼𑀓𑁆𑀔𑀲𑀘𑁆𑀘𑀫𑀽𑀮𑀓𑀸𑀦𑀺 𑀲𑀫𑀼𑀤𑀬𑀲𑀘𑁆𑀘𑀫𑀕𑁆𑀕𑀲𑀘𑁆𑀘𑁂𑀳𑀺 𑀲𑀤𑁆𑀥𑀺𑀁 𑀤𑁆𑀯𑁂, 𑀲𑀫𑀼𑀤𑀬𑀲𑀘𑁆𑀘𑀫𑀽𑀮𑀓𑀁 𑀫𑀕𑁆𑀕𑀲𑀘𑁆𑀘𑁂𑀦 𑀲𑀤𑁆𑀥𑀺𑀁 𑀏𑀓𑀦𑁆𑀢𑀺 𑀢𑀻𑀡𑀺 𑀬𑀫𑀓𑀸𑀦𑀺 𑀆𑀕𑀢𑀸𑀦𑀺. 𑀢𑀲𑁆𑀲 𑀧𑀝𑀺𑀮𑁄𑀫𑀦𑀬𑁂𑀧𑀺 𑀑𑀓𑀸𑀲𑀯𑀸𑀭𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀏𑀯𑀫𑁂𑀢𑁆𑀣 𑀲𑀩𑁆𑀩𑀯𑀸𑀭𑁂𑀲𑀼 𑀢𑀺𑀡𑁆𑀡𑀁 𑀢𑀺𑀡𑁆𑀡𑀁 𑀬𑀫𑀓𑀸𑀦𑀁 𑀯𑀲𑁂𑀦 𑀬𑀫𑀓𑀕𑀡𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀅𑀢𑁆𑀣𑀯𑀺𑀦𑀺𑀘𑁆𑀙𑀬𑁂 𑀧𑀦𑁂𑀢𑁆𑀣 𑀇𑀤𑀁 𑀮𑀓𑁆𑀔𑀡𑀁 𑁋 𑀇𑀫𑀲𑁆𑀲 𑀳𑀺 𑀲𑀘𑁆𑀘𑀬𑀫𑀓𑀲𑁆𑀲 𑀧𑀯𑀢𑁆𑀢𑀺𑀯𑀸𑀭𑁂 𑀦𑀺𑀭𑁄𑀥𑀲𑀘𑁆𑀘𑀁 𑀢𑀸𑀯 𑀦 𑀮𑀩𑁆𑀪𑀢𑁂𑀯. 𑀲𑁂𑀲𑁂𑀲𑀼 𑀧𑀦 𑀢𑀻𑀲𑀼 𑀲𑀫𑀼𑀤𑀬𑀲𑀘𑁆𑀘𑀫𑀕𑁆𑀕𑀲𑀘𑁆𑀘𑀸𑀦𑀺 𑀏𑀓𑀦𑁆𑀢𑁂𑀦 𑀧𑀯𑀢𑁆𑀢𑀺𑀬𑀁𑀬𑁂𑀯 𑀮𑀩𑁆𑀪𑀦𑁆𑀢𑀺. 𑀤𑀼𑀓𑁆𑀔𑀲𑀘𑁆𑀘𑀁 𑀘𑀼𑀢𑀺𑀧𑀝𑀺𑀲𑀦𑁆𑀥𑀻𑀲𑀼𑀧𑀺 𑀧𑀯𑀢𑁆𑀢𑁂𑀧𑀺 𑀮𑀩𑁆𑀪𑀢𑀺. 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀤𑀬𑁄 𑀧𑀦 𑀢𑀬𑁄 𑀓𑀸𑀮𑀸 𑀘𑀼𑀢𑀺𑀧𑀝𑀺𑀲𑀦𑁆𑀥𑀻𑀦𑀫𑁆𑀧𑀺 𑀧𑀯𑀢𑁆𑀢𑀺𑀬𑀸𑀧𑀺 𑀯𑀲𑁂𑀦 𑀮𑀩𑁆𑀪𑀦𑁆𑀢𑀺. 𑀏𑀯𑀫𑁂𑀢𑁆𑀣 𑀬𑀁 𑀬𑀁 𑀮𑀩𑁆𑀪𑀢𑀺, 𑀢𑀲𑁆𑀲 𑀢𑀲𑁆𑀲 𑀯𑀲𑁂𑀦 𑀅𑀢𑁆𑀣𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄.

𑀢𑀢𑁆𑀭𑀺𑀤𑀁 𑀦𑀬𑀫𑀼𑀔𑀁 𑁋 𑀲𑀩𑁆𑀩𑁂𑀲𑀁 𑀉𑀧𑀧𑀚𑁆𑀚𑀦𑁆𑀢𑀸𑀦𑀦𑁆𑀢𑀺 𑀅𑀦𑁆𑀢𑀫𑀲𑁄 𑀲𑀼𑀤𑁆𑀥𑀸𑀯𑀸𑀲𑀸𑀦𑀫𑁆𑀧𑀺. 𑀢𑁂𑀧𑀺 𑀳𑀺 𑀤𑀼𑀓𑁆𑀔𑀲𑀘𑁆𑀘𑁂𑀦𑁂𑀯 𑀉𑀧𑀧𑀚𑁆𑀚𑀦𑁆𑀢𑀺. 𑀢𑀡𑁆𑀳𑀸𑀯𑀺𑀧𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑀲𑁆𑀲𑀸𑀢𑀺 𑀇𑀤𑀁 𑀤𑀼𑀓𑁆𑀔𑀲𑀘𑁆𑀘𑀲𑀫𑀼𑀤𑀬𑀲𑀘𑁆𑀘𑁂𑀲𑀼 𑀏𑀓𑀓𑁄𑀝𑁆𑀞𑀸𑀲𑀲𑁆𑀲 𑀉𑀧𑁆𑀧𑀢𑁆𑀢𑀺𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀢𑀲𑁆𑀫𑀸 𑀧𑀜𑁆𑀘𑀯𑁄𑀓𑀸𑀭𑀯𑀲𑁂𑀦𑁂𑀯 𑀕𑀳𑁂𑀢𑀩𑁆𑀩𑀁. 𑀘𑀢𑀼𑀯𑁄𑀓𑀸𑀭𑁂 𑀧𑀦 𑀢𑀡𑁆𑀳𑀸𑀯𑀺𑀧𑁆𑀧𑀬𑀼𑀢𑁆𑀢𑀲𑁆𑀲 𑀨𑀮𑀲𑀫𑀸𑀧𑀢𑁆𑀢𑀺𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑁂 𑀏𑀓𑀫𑁆𑀧𑀺 𑀲𑀘𑁆𑀘𑀁 𑀦𑀼𑀧𑁆𑀧𑀚𑁆𑀚𑀢𑀺. 𑀇𑀤𑀁 𑀇𑀥 𑀦 𑀕𑀳𑁂𑀢𑀩𑁆𑀩𑀁. 𑀢𑁂𑀲𑀁 𑀤𑀼𑀓𑁆𑀔𑀲𑀘𑁆𑀘𑀜𑁆𑀘𑀸𑀢𑀺 𑀢𑀲𑁆𑀫𑀺𑀜𑁆𑀳𑀺 𑀔𑀡𑁂 𑀢𑀡𑁆𑀳𑀁 𑀞𑀧𑁂𑀢𑁆𑀯𑀸 𑀲𑁂𑀲𑀁 𑀤𑀼𑀓𑁆𑀔𑀲𑀘𑁆𑀘𑀁 𑀦𑀸𑀫 𑀳𑁄𑀢𑀻𑀢𑀺 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁. 𑀫𑀕𑁆𑀕𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑁂𑀧𑀺 𑀏𑀲𑁂𑀯 𑀦𑀬𑁄. 𑀢𑀢𑁆𑀣 𑀧𑀦 𑀭𑀽𑀧𑀫𑁂𑀯 𑀤𑀼𑀓𑁆𑀔𑀲𑀘𑁆𑀘𑀁 𑀦𑀸𑀫. 𑀲𑁂𑀲𑀸 𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀓𑀸 𑀥𑀫𑁆𑀫𑀸 𑀲𑀘𑁆𑀘𑀯𑀺𑀦𑀺𑀫𑀼𑀢𑁆𑀢𑀸. 𑀢𑁂𑀦𑁂𑀯 𑀓𑀸𑀭𑀡𑁂𑀦 ‘‘𑀅𑀭𑀽𑀧𑁂 𑀫𑀕𑁆𑀕𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑁂 𑀢𑁂𑀲𑀁 𑀫𑀕𑁆𑀕𑀲𑀘𑁆𑀘𑀁 𑀉𑀧𑁆𑀧𑀚𑁆𑀚𑀢𑀺, 𑀦𑁄 𑀘 𑀢𑁂𑀲𑀁 𑀤𑀼𑀓𑁆𑀔𑀲𑀘𑁆𑀘𑀁 𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀯𑀼𑀢𑁆𑀢𑀁. 𑀲𑀩𑁆𑀩𑁂𑀲𑀁 𑀉𑀧𑀧𑀚𑁆𑀚𑀦𑁆𑀢𑀸𑀦𑀁 𑀧𑀯𑀢𑁆𑀢𑁂 𑀢𑀡𑁆𑀳𑀸𑀯𑀺𑀧𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑁂 𑀢𑁂𑀲𑀁 𑀢𑀢𑁆𑀣𑀸𑀢𑀺 𑀢𑁂𑀲𑀁 𑀢𑀲𑁆𑀫𑀺𑀁 𑀉𑀧𑀧𑀢𑁆𑀢𑀺𑀓𑁆𑀔𑀡𑁂 𑀢𑀡𑁆𑀳𑀸𑀯𑀺𑀧𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑀼𑀧𑁆𑀧𑀢𑁆𑀢𑀺𑀓𑁆𑀔𑀡𑁂 𑀘𑀸𑀢𑀺 𑀏𑀯𑀫𑁂𑀢𑁆𑀣 𑀔𑀡𑀯𑀲𑁂𑀦 𑀑𑀓𑀸𑀲𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀜𑁆𑀜𑁂𑀲𑀼𑀧𑀺 𑀏𑀯𑀭𑀽𑀧𑁂𑀲𑀼 𑀏𑀲𑁂𑀯 𑀦𑀬𑁄. 𑀅𑀦𑀪𑀺𑀲𑀫𑁂𑀢𑀸𑀯𑀻𑀦𑀦𑁆𑀢𑀺 𑀘𑀢𑀼𑀲𑀘𑁆𑀘𑀧𑀝𑀺𑀯𑁂𑀥𑀲𑀗𑁆𑀔𑀸𑀢𑀁 𑀅𑀪𑀺𑀲𑀫𑀬𑀁 𑀅𑀧𑁆𑀧𑀢𑁆𑀢𑀲𑀢𑁆𑀢𑀸𑀦𑀁. 𑀅𑀪𑀺𑀲𑀫𑁂𑀢𑀸𑀯𑀻𑀦𑀦𑁆𑀢𑀺 𑀅𑀪𑀺𑀲𑀫𑀺𑀢𑀲𑀘𑁆𑀘𑀸𑀦𑀦𑁆𑀢𑀺. 𑀇𑀫𑀺𑀦𑀸 𑀦𑀬𑀫𑀼𑀔𑁂𑀦 𑀲𑀩𑁆𑀩𑀢𑁆𑀣 𑀅𑀢𑁆𑀣𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄.

𑀧𑀯𑀢𑁆𑀢𑀺𑀯𑀸𑀭𑀯𑀡𑁆𑀡𑀦𑀸.

𑁩. 𑀧𑀭𑀺𑀜𑁆𑀜𑀸𑀯𑀸𑀭𑀯𑀡𑁆𑀡𑀦𑀸

𑁧𑁬𑁫-𑁧𑁭𑁦. 𑀧𑀭𑀺𑀜𑁆𑀜𑀸𑀯𑀸𑀭𑁂 𑀧𑀦 𑀜𑀸𑀢𑀧𑀭𑀺𑀜𑁆𑀜𑀸, 𑀢𑀻𑀭𑀡𑀧𑀭𑀺𑀜𑁆𑀜𑀸, 𑀧𑀳𑀸𑀦𑀧𑀭𑀺𑀜𑁆𑀜𑀸𑀢𑀺 𑀢𑀺𑀲𑁆𑀲𑁄𑀧𑁂𑀢𑁆𑀣 𑀧𑀭𑀺𑀜𑁆𑀜𑀸𑀬𑁄 𑀮𑀩𑁆𑀪𑀦𑁆𑀢𑀺. 𑀬𑀲𑁆𑀫𑀸 𑀘 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁂𑀲𑀼 𑀧𑀭𑀺𑀜𑁆𑀜𑀸 𑀦𑀸𑀫 𑀦𑀢𑁆𑀣𑀺; 𑀢𑀲𑁆𑀫𑀸 𑀇𑀥 𑀤𑁆𑀯𑁂 𑀲𑀘𑁆𑀘𑀸𑀦𑀺 𑀕𑀳𑀺𑀢𑀸𑀦𑀺. 𑀢𑀢𑁆𑀣 𑀤𑀼𑀓𑁆𑀔𑀲𑀘𑁆𑀘𑀁 𑀧𑀭𑀺𑀚𑀸𑀦𑀸𑀢𑀻𑀢𑀺 𑀜𑀸𑀢𑀢𑀻𑀭𑀡𑀧𑀭𑀺𑀜𑁆𑀜𑀸𑀯𑀲𑁂𑀦𑁂𑀯 𑀯𑀼𑀢𑁆𑀢𑀁. 𑀲𑀫𑀼𑀤𑀬𑀲𑀘𑁆𑀘𑀁 𑀧𑀚𑀳𑀢𑀻𑀢𑀺 𑀜𑀸𑀢𑀧𑀳𑀸𑀦𑀧𑀭𑀺𑀜𑁆𑀜𑀸𑀯𑀲𑁂𑀦. 𑀇𑀢𑀺 𑀇𑀫𑀸𑀲𑀁 𑀧𑀭𑀺𑀜𑁆𑀜𑀸𑀦𑀁 𑀯𑀲𑁂𑀦 𑀲𑀩𑁆𑀩𑀧𑀤𑁂𑀲𑀼 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄𑀢𑀺.

𑀧𑀭𑀺𑀜𑁆𑀜𑀸𑀯𑀸𑀭𑀯𑀡𑁆𑀡𑀦𑀸.

𑀲𑀘𑁆𑀘𑀬𑀫𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.