𑁬. 𑀲𑀗𑁆𑀔𑀸𑀭𑀬𑀫𑀓𑀁

𑁧. 𑀧𑀡𑁆𑀡𑀢𑁆𑀢𑀺𑀯𑀸𑀭𑀯𑀡𑁆𑀡𑀦𑀸

𑁧. 𑀇𑀤𑀸𑀦𑀺 𑀢𑁂𑀲𑀜𑁆𑀜𑁂𑀯 𑀫𑀽𑀮𑀬𑀫𑀓𑁂 𑀤𑁂𑀲𑀺𑀢𑀸𑀦𑀁 𑀓𑀼𑀲𑀮𑀸𑀤𑀺𑀥𑀫𑁆𑀫𑀸𑀦𑀁 𑀮𑀩𑁆𑀪𑀫𑀸𑀦𑀯𑀲𑁂𑀦 𑀏𑀓𑀤𑁂𑀲𑀁 𑀲𑀗𑁆𑀕𑀡𑁆𑀳𑀺𑀢𑁆𑀯𑀸 𑀲𑀘𑁆𑀘𑀬𑀫𑀓𑀸𑀦𑀦𑁆𑀢𑀭𑀁 𑀤𑁂𑀲𑀺𑀢𑀲𑁆𑀲 𑀲𑀗𑁆𑀔𑀸𑀭𑀬𑀫𑀓𑀲𑁆𑀲 𑀯𑀡𑁆𑀡𑀦𑀸 𑀳𑁄𑀢𑀺. 𑀢𑀢𑁆𑀣𑀸𑀧𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀧𑀡𑁆𑀡𑀢𑁆𑀢𑀺𑀯𑀸𑀭𑀸𑀤𑀬𑁄 𑀢𑀬𑁄 𑀫𑀳𑀸𑀯𑀸𑀭𑀸, 𑀅𑀦𑁆𑀢𑀭𑀯𑀸𑀭𑀸𑀤𑀬𑁄 𑀘 𑀅𑀯𑀲𑁂𑀲𑀧𑀪𑁂𑀤𑀸 𑀯𑁂𑀤𑀺𑀢𑀩𑁆𑀩𑀸. 𑀅𑀬𑀁 𑀧𑀦𑁂𑀢𑁆𑀣 𑀯𑀺𑀲𑁂𑀲𑁄 𑁋 𑀧𑀡𑁆𑀡𑀢𑁆𑀢𑀺𑀯𑀸𑀭𑁂 𑀢𑀸𑀯 𑀬𑀣𑀸 𑀳𑁂𑀝𑁆𑀞𑀸 𑀔𑀦𑁆𑀥𑀸𑀤𑀬𑁄 𑀥𑀫𑁆𑀫𑁂 𑀉𑀤𑁆𑀤𑀺𑀲𑀺𑀢𑁆𑀯𑀸 ‘‘𑀭𑀽𑀧𑀁 𑀭𑀽𑀧𑀓𑁆𑀔𑀦𑁆𑀥𑁄; 𑀘𑀓𑁆𑀔𑀼 𑀘𑀓𑁆𑀔𑀸𑀬𑀢𑀦𑀁; 𑀘𑀓𑁆𑀔𑀼 𑀘𑀓𑁆𑀔𑀼𑀥𑀸𑀢𑀼; 𑀤𑀼𑀓𑁆𑀔𑀁 𑀤𑀼𑀓𑁆𑀔𑀲𑀘𑁆𑀘’’𑀦𑁆𑀢𑀺 𑀧𑀤𑀲𑁄𑀥𑀦𑀯𑀸𑀭𑁄 𑀆𑀭𑀤𑁆𑀥𑁄. 𑀢𑀣𑀸 𑀅𑀦𑀸𑀭𑀪𑀺𑀢𑁆𑀯𑀸 ‘‘𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸 𑀓𑀸𑀬𑀲𑀗𑁆𑀔𑀸𑀭𑁄’’𑀢𑀺 𑀧𑀞𑀫𑀁 𑀢𑀬𑁄𑀧𑀺 𑀲𑀗𑁆𑀔𑀸𑀭𑀸 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑀺𑀢𑀸.

𑀢𑀢𑁆𑀣 𑀓𑀸𑀬𑀲𑁆𑀲 𑀲𑀗𑁆𑀔𑀸𑀭𑁄 𑀓𑀸𑀬𑀲𑀗𑁆𑀔𑀸𑀭𑁄. ‘‘𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸 𑀓𑀸𑀬𑀺𑀓𑀸, 𑀏𑀢𑁂 𑀥𑀫𑁆𑀫𑀸 𑀓𑀸𑀬𑀧𑁆𑀧𑀝𑀺𑀩𑀤𑁆𑀥𑀸’’𑀢𑀺 (𑀫. 𑀦𑀺. 𑁧.𑁪𑁬𑁩; 𑀲𑀁. 𑀦𑀺. 𑁪.𑁩𑁪𑁮 𑀅𑀢𑁆𑀣𑀢𑁄 𑀲𑀫𑀸𑀦𑀁) 𑀳𑀺 𑀯𑀘𑀦𑀢𑁄 𑀓𑀸𑀭𑀡𑀪𑀽𑀢𑀲𑁆𑀲 𑀓𑀭𑀚𑀓𑀸𑀬𑀲𑁆𑀲 𑀨𑀮𑀪𑀽𑀢𑁄 𑀏𑀯 𑀲𑀗𑁆𑀔𑀸𑀭𑁄𑀢𑀺 𑀓𑀸𑀬𑀲𑀗𑁆𑀔𑀸𑀭𑁄. 𑀅𑀧𑀭𑁄 𑀦𑀬𑁄 𑁋 𑀲𑀗𑁆𑀔𑀭𑀺𑀬𑀢𑀻𑀢𑀺 𑀲𑀗𑁆𑀔𑀸𑀭𑁄. 𑀓𑁂𑀦 𑀲𑀗𑁆𑀔𑀭𑀺𑀬𑀢𑀻𑀢𑀺? 𑀓𑀸𑀬𑁂𑀦. 𑀅𑀬𑀜𑁆𑀳𑀺 𑀯𑀸𑀢𑁄 𑀯𑀺𑀬 𑀪𑀲𑁆𑀢𑀸𑀬 𑀓𑀭𑀚𑀓𑀸𑀬𑁂𑀦 𑀲𑀗𑁆𑀔𑀭𑀺𑀬𑀢𑀻𑀢𑀺. 𑀏𑀯𑀫𑁆𑀧𑀺 𑀓𑀸𑀬𑀲𑁆𑀲 𑀲𑀗𑁆𑀔𑀸𑀭𑁄𑀢𑀺 𑀓𑀸𑀬𑀲𑀗𑁆𑀔𑀸𑀭𑁄. 𑀓𑀸𑀬𑁂𑀦 𑀓𑀢𑁄 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀯𑀸𑀢𑁄𑀢𑀺 𑀅𑀢𑁆𑀣𑁄. ‘‘𑀧𑀼𑀩𑁆𑀩𑁂𑀯 𑀔𑁄, 𑀆𑀯𑀼𑀲𑁄 𑀯𑀺𑀲𑀸𑀔, 𑀯𑀺𑀢𑀓𑁆𑀓𑁂𑀢𑁆𑀯𑀸 𑀯𑀺𑀘𑀸𑀭𑁂𑀢𑁆𑀯𑀸 𑀧𑀘𑁆𑀙𑀸 𑀯𑀸𑀘𑀁 𑀪𑀺𑀦𑁆𑀤𑀢𑀺, 𑀢𑀲𑁆𑀫𑀸 𑀯𑀺𑀢𑀓𑁆𑀓𑀯𑀺𑀘𑀸𑀭𑀸 𑀯𑀘𑀻𑀲𑀗𑁆𑀔𑀸𑀭𑁄’’𑀢𑀺 (𑀫. 𑀦𑀺. 𑁧.𑁪𑁬𑁩; 𑀲𑀁. 𑀦𑀺. 𑁪.𑁩𑁪𑁮) 𑀯𑀘𑀦𑀢𑁄 𑀧𑀦 𑀲𑀗𑁆𑀔𑀭𑁄𑀢𑀻𑀢𑀺 𑀲𑀗𑁆𑀔𑀸𑀭𑁄. 𑀓𑀺𑀁 𑀲𑀗𑁆𑀔𑀭𑁄𑀢𑀺? 𑀯𑀘𑀺𑀁. 𑀯𑀘𑀺𑀬𑀸 𑀲𑀗𑁆𑀔𑀸𑀭𑁄𑀢𑀺 𑀯𑀘𑀻𑀲𑀗𑁆𑀔𑀸𑀭𑁄. 𑀯𑀘𑀻𑀪𑁂𑀤𑀲𑀫𑀼𑀝𑁆𑀞𑀸𑀧𑀓𑀲𑁆𑀲 𑀯𑀺𑀢𑀓𑁆𑀓𑀯𑀺𑀘𑀸𑀭𑀤𑁆𑀯𑀬𑀲𑁆𑀲𑁂𑀢𑀁 𑀦𑀸𑀫𑀁. ‘‘𑀲𑀜𑁆𑀜𑀸 𑀘 𑀯𑁂𑀤𑀦𑀸 𑀘 𑀘𑁂𑀢𑀲𑀺𑀓𑀸 𑀏𑀢𑁂 𑀥𑀫𑁆𑀫𑀸 𑀘𑀺𑀢𑁆𑀢𑀧𑀝𑀺𑀩𑀤𑁆𑀥𑀸’’𑀢𑀺 (𑀫. 𑀦𑀺. 𑁧.𑁪𑁬𑁩; 𑀲𑀁. 𑀦𑀺. 𑁪.𑁩𑁪𑁮) 𑀯𑀘𑀦𑀢𑁄𑀬𑁂𑀯 𑀧𑀦 𑀢𑀢𑀺𑀬𑀧𑀤𑁂𑀧𑀺 𑀲𑀗𑁆𑀔𑀭𑀺𑀬𑀢𑀻𑀢𑀺 𑀲𑀗𑁆𑀔𑀸𑀭𑁄. 𑀓𑁂𑀦 𑀲𑀗𑁆𑀔𑀭𑀺𑀬𑀢𑀺? 𑀘𑀺𑀢𑁆𑀢𑁂𑀦. 𑀓𑀭𑀡𑀢𑁆𑀣𑁂 𑀲𑀸𑀫𑀺𑀯𑀘𑀦𑀁 𑀓𑀢𑁆𑀯𑀸 𑀘𑀺𑀢𑁆𑀢𑀲𑁆𑀲 𑀲𑀗𑁆𑀔𑀸𑀭𑁄𑀢𑀺 𑀘𑀺𑀢𑁆𑀢𑀲𑀗𑁆𑀔𑀸𑀭𑁄. 𑀲𑀩𑁆𑀩𑁂𑀲𑀫𑁆𑀧𑀺 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀦𑀁 𑀘𑁂𑀢𑀲𑀺𑀓𑀥𑀫𑁆𑀫𑀸𑀦𑀫𑁂𑀢𑀁 𑀅𑀥𑀺𑀯𑀘𑀦𑀁. 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀁 𑀧𑀦 𑀯𑀘𑀻𑀲𑀗𑁆𑀔𑀸𑀭𑀪𑀸𑀯𑁂𑀦 𑀯𑀺𑀲𑀼𑀁 𑀕𑀳𑀺𑀢𑀢𑁆𑀢𑀸 ‘‘𑀞𑀧𑁂𑀢𑁆𑀯𑀸 𑀯𑀺𑀢𑀓𑁆𑀓𑀯𑀺𑀘𑀸𑀭𑁂’’𑀢𑀺 𑀯𑀼𑀢𑁆𑀢𑀁.

𑁨-𑁭. 𑀇𑀤𑀸𑀦𑀺 𑀓𑀸𑀬𑁄 𑀓𑀸𑀬𑀲𑀗𑁆𑀔𑀸𑀭𑁄𑀢𑀺 𑀧𑀤𑀲𑁄𑀥𑀦𑀯𑀸𑀭𑁄 𑀆𑀭𑀤𑁆𑀥𑁄. 𑀢𑀲𑁆𑀲 𑀅𑀦𑀼𑀮𑁄𑀫𑀦𑀬𑁂 𑀢𑀻𑀡𑀺, 𑀧𑀝𑀺𑀮𑁄𑀫𑀦𑀬𑁂 𑀢𑀻𑀡𑀻𑀢𑀺 𑀙 𑀬𑀫𑀓𑀸𑀦𑀺. 𑀧𑀤𑀲𑁄𑀥𑀦𑀫𑀽𑀮𑀘𑀓𑁆𑀓𑀯𑀸𑀭𑁂 𑀏𑀓𑁂𑀓𑀲𑀗𑁆𑀔𑀸𑀭𑀫𑀽𑀮𑀓𑀸𑀦𑀺 𑀤𑁆𑀯𑁂 𑀤𑁆𑀯𑁂 𑀓𑀢𑁆𑀯𑀸 𑀅𑀦𑀼𑀮𑁄𑀫𑀦𑀬𑁂 𑀙, 𑀧𑀝𑀺𑀮𑁄𑀫𑀦𑀬𑁂 𑀙𑀸𑀢𑀺 𑀤𑁆𑀯𑀸𑀤𑀲 𑀬𑀫𑀓𑀸𑀦𑀺. 𑀲𑀼𑀤𑁆𑀥𑀲𑀗𑁆𑀔𑀸𑀭𑀯𑀸𑀭𑁂 𑀧𑀦 𑀬𑀣𑀸 𑀲𑀼𑀤𑁆𑀥𑀔𑀦𑁆𑀥𑀯𑀸𑀭𑀸𑀤𑀻𑀲𑀼 ‘‘𑀭𑀽𑀧𑀁 𑀔𑀦𑁆𑀥𑁄, 𑀔𑀦𑁆𑀥𑀸 𑀭𑀽𑀧𑀁; 𑀘𑀓𑁆𑀔𑀼 𑀆𑀬𑀢𑀦𑀁, 𑀆𑀬𑀢𑀦𑀸 𑀘𑀓𑁆𑀔𑀽’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀬𑀫𑀓𑀸𑀦𑀺 𑀯𑀼𑀢𑁆𑀢𑀸𑀦𑀺. 𑀏𑀯𑀁 ‘‘𑀓𑀸𑀬𑁄 𑀲𑀗𑁆𑀔𑀸𑀭𑁄, 𑀲𑀗𑁆𑀔𑀸𑀭𑀸 𑀓𑀸𑀬𑁄’’𑀢𑀺 𑀅𑀯𑀢𑁆𑀯𑀸 ‘‘𑀓𑀸𑀬𑀲𑀗𑁆𑀔𑀸𑀭𑁄 𑀯𑀘𑀻𑀲𑀗𑁆𑀔𑀸𑀭𑁄, 𑀯𑀘𑀻𑀲𑀗𑁆𑀔𑀸𑀭𑁄 𑀓𑀸𑀬𑀲𑀗𑁆𑀔𑀸𑀭𑁄’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀓𑀸𑀬𑀲𑀗𑁆𑀔𑀸𑀭𑀫𑀽𑀮𑀓𑀸𑀦𑀺 𑀤𑁆𑀯𑁂, 𑀯𑀘𑀻𑀲𑀗𑁆𑀔𑀸𑀭𑀫𑀽𑀮𑀓𑀁 𑀏𑀓𑀦𑁆𑀢𑀺 𑀅𑀦𑀼𑀮𑁄𑀫𑁂 𑀢𑀻𑀡𑀺, 𑀧𑀝𑀺𑀮𑁄𑀫𑁂 𑀢𑀻𑀡𑀻𑀢𑀺 𑀲𑀩𑁆𑀩𑀸𑀦𑀺𑀧𑀺 𑀲𑀼𑀤𑁆𑀥𑀺𑀓𑀯𑀸𑀭𑁂 𑀙 𑀬𑀫𑀓𑀸𑀦𑀺 𑀯𑀼𑀢𑁆𑀢𑀸𑀦𑀺. 𑀓𑀺𑀁 𑀓𑀸𑀭𑀡𑀸? 𑀲𑀼𑀤𑁆𑀥𑀺𑀓𑀏𑀓𑁂𑀓𑀧𑀤𑀯𑀲𑁂𑀦 𑀅𑀢𑁆𑀣𑀸𑀪𑀸𑀯𑀢𑁄. 𑀬𑀣𑀸 𑀳𑀺 𑀔𑀦𑁆𑀥𑀬𑀫𑀓𑀸𑀤𑀻𑀲𑀼 𑀭𑀽𑀧𑀸𑀤𑀺𑀯𑀺𑀲𑀺𑀝𑁆𑀞𑀸𑀦𑀁 𑀔𑀦𑁆𑀥𑀸𑀦𑀁 𑀘𑀓𑁆𑀔𑀸𑀤𑀺𑀯𑀺𑀲𑀺𑀝𑁆𑀞𑀸𑀦𑀜𑁆𑀘 𑀆𑀬𑀢𑀦𑀸𑀤𑀻𑀦𑀁 𑀅𑀥𑀺𑀧𑁆𑀧𑁂𑀢𑀢𑁆𑀢𑀸 ‘‘𑀭𑀽𑀧𑀁 𑀔𑀦𑁆𑀥𑁄, 𑀔𑀦𑁆𑀥𑀸 𑀭𑀽𑀧𑀁, 𑀘𑀓𑁆𑀔𑀼 𑀆𑀬𑀢𑀦𑀁, 𑀆𑀬𑀢𑀦𑀸 𑀘𑀓𑁆𑀔𑀽’’𑀢𑀺 𑀲𑀼𑀤𑁆𑀥𑀺𑀓𑀏𑀓𑁂𑀓𑀧𑀤𑀯𑀲𑁂𑀦 𑀅𑀢𑁆𑀣𑁄 𑀅𑀢𑁆𑀣𑀺. 𑀏𑀯𑀫𑀺𑀥 ‘‘𑀓𑀸𑀬𑁄 𑀲𑀗𑁆𑀔𑀸𑀭𑁄, 𑀲𑀗𑁆𑀔𑀸𑀭𑀸 𑀓𑀸𑀬𑁄’’𑀢𑀺 𑀦𑀢𑁆𑀣𑀺. 𑀓𑀸𑀬𑀲𑀗𑁆𑀔𑀸𑀭𑁄𑀢𑀺 𑀧𑀦 𑀤𑁆𑀯𑀻𑀳𑀺𑀧𑀺 𑀧𑀤𑁂𑀳𑀺 𑀏𑀓𑁄𑀯 𑀅𑀢𑁆𑀣𑁄 𑀮𑀩𑁆𑀪𑀢𑀺. 𑀅𑀲𑁆𑀲𑀸𑀲𑁄 𑀯𑀸 𑀧𑀲𑁆𑀲𑀸𑀲𑁄 𑀯𑀸𑀢𑀺 𑀲𑀼𑀤𑁆𑀥𑀺𑀓𑀏𑀓𑁂𑀓𑀧𑀤𑀯𑀲𑁂𑀦 𑀅𑀢𑁆𑀣𑀸𑀪𑀸𑀯𑀢𑁄 ‘‘𑀓𑀸𑀬𑁄 𑀲𑀗𑁆𑀔𑀸𑀭𑁄, 𑀲𑀗𑁆𑀔𑀸𑀭𑀸 𑀓𑀸𑀬𑁄’’𑀢𑀺 𑀦 𑀯𑀼𑀢𑁆𑀢𑀁. ‘‘𑀓𑀸𑀬𑁄 𑀓𑀸𑀬𑀲𑀗𑁆𑀔𑀸𑀭𑁄’’𑀢𑀺𑀆𑀤𑀺 𑀧𑀦 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸. 𑀢𑀫𑁆𑀧𑀺 𑀓𑀸𑀬𑀯𑀘𑀻𑀘𑀺𑀢𑁆𑀢𑀧𑀤𑁂𑀳𑀺 𑀇𑀥 𑀅𑀥𑀺𑀧𑁆𑀧𑁂𑀢𑀸𑀦𑀁 𑀲𑀗𑁆𑀔𑀸𑀭𑀸𑀦𑀁 𑀅𑀕𑁆𑀕𑀳𑀺𑀢𑀢𑁆𑀢𑀸 𑀦 𑀬𑀼𑀚𑁆𑀚𑀢𑀺. 𑀲𑀼𑀤𑁆𑀥𑀲𑀗𑁆𑀔𑀸𑀭𑀯𑀸𑀭𑁄 𑀳𑁂𑀲. 𑀧𑀤𑀲𑁄𑀥𑀦𑁂 𑀧𑀦 𑀯𑀺𑀦𑀸𑀧𑀺 𑀅𑀢𑁆𑀣𑁂𑀦 𑀯𑀘𑀦𑀁 𑀬𑀼𑀚𑁆𑀚𑀢𑀻𑀢𑀺 𑀢𑀢𑁆𑀣 𑀲𑁄 𑀦𑀬𑁄 𑀕𑀳𑀺𑀢𑁄𑀯. 𑀇𑀥 𑀧𑀦 𑀓𑀸𑀬𑀲𑀗𑁆𑀔𑀸𑀭𑀲𑁆𑀲 𑀯𑀘𑀻𑀲𑀗𑁆𑀔𑀸𑀭𑀸𑀤𑀻𑀳𑀺, 𑀯𑀘𑀻𑀲𑀗𑁆𑀔𑀸𑀭𑀲𑁆𑀲 𑀘 𑀘𑀺𑀢𑁆𑀢𑀲𑀗𑁆𑀔𑀸𑀭𑀸𑀤𑀻𑀳𑀺, 𑀘𑀺𑀢𑁆𑀢𑀲𑀗𑁆𑀔𑀸𑀭𑀲𑁆𑀲 𑀘 𑀓𑀸𑀬𑀲𑀗𑁆𑀔𑀸𑀭𑀸𑀤𑀻𑀳𑀺, 𑀅𑀜𑁆𑀜𑀢𑁆𑀢𑀸 ‘‘𑀓𑀸𑀬𑀲𑀗𑁆𑀔𑀸𑀭𑁄 𑀯𑀘𑀻𑀲𑀗𑁆𑀔𑀸𑀭𑁄, 𑀯𑀘𑀻𑀲𑀗𑁆𑀔𑀸𑀭𑁄, 𑀓𑀸𑀬𑀲𑀗𑁆𑀔𑀸𑀭𑁄’’𑀢𑀺 𑀏𑀓𑁂𑀓𑀲𑀗𑁆𑀔𑀸𑀭𑀫𑀽𑀮𑀓𑀸𑀦𑀺 𑀤𑁆𑀯𑁂 𑀤𑁆𑀯𑁂 𑀓𑀢𑁆𑀯𑀸 𑀙 𑀬𑀫𑀓𑀸𑀦𑀺 𑀬𑀼𑀚𑁆𑀚𑀦𑁆𑀢𑀺. 𑀢𑁂𑀲𑀼 𑀅𑀕𑁆𑀕𑀳𑀺𑀢𑀕𑁆𑀕𑀳𑀡𑁂𑀦 𑀢𑀻𑀡𑁂𑀯 𑀮𑀩𑁆𑀪𑀦𑁆𑀢𑀺. 𑀢𑀲𑁆𑀫𑀸 𑀢𑀸𑀦𑁂𑀯 𑀤𑀲𑁆𑀲𑁂𑀢𑀼𑀁 𑀅𑀦𑀼𑀮𑁄𑀫𑀦𑀬𑁂 𑀢𑀻𑀡𑀺, 𑀧𑀝𑀺𑀮𑁄𑀫𑀦𑀬𑁂 𑀢𑀻𑀡𑀻𑀢𑀺 𑀙 𑀬𑀫𑀓𑀸𑀦𑀺 𑀯𑀼𑀢𑁆𑀢𑀸𑀦𑀺. 𑀲𑀼𑀤𑁆𑀥𑀲𑀗𑁆𑀔𑀸𑀭𑀫𑀽𑀮𑀘𑀓𑁆𑀓𑀯𑀸𑀭𑁄 𑀧𑀦𑁂𑀢𑁆𑀣 𑀦 𑀕𑀳𑀺𑀢𑁄𑀢𑀺. 𑀏𑀯𑀁 𑀧𑀡𑁆𑀡𑀢𑁆𑀢𑀺𑀯𑀸𑀭𑀲𑁆𑀲 𑀉𑀤𑁆𑀤𑁂𑀲𑀯𑀸𑀭𑁄 𑀯𑁂𑀤𑀺𑀢𑀩𑁆𑀩𑁄.

𑁮-𑁧𑁮. 𑀦𑀺𑀤𑁆𑀤𑁂𑀲𑀯𑀸𑀭𑁂 𑀧𑀦𑀲𑁆𑀲 𑀅𑀦𑀼𑀮𑁄𑀫𑁂 𑀢𑀸𑀯 𑀬𑀲𑁆𑀫𑀸 𑀦 𑀓𑀸𑀬𑀸𑀤𑀬𑁄𑀯 𑀓𑀸𑀬𑀲𑀗𑁆𑀔𑀸𑀭𑀸𑀤𑀻𑀦𑀁 𑀦𑀸𑀫𑀁, 𑀢𑀲𑁆𑀫𑀸 𑀦𑁄𑀢𑀺 𑀧𑀝𑀺𑀲𑁂𑀥𑁄 𑀓𑀢𑁄. 𑀧𑀝𑀺𑀮𑁄𑀫𑁂 𑀦 𑀓𑀸𑀬𑁄 𑀦 𑀓𑀸𑀬𑀲𑀗𑁆𑀔𑀸𑀭𑁄𑀢𑀺 𑀬𑁄 𑀦 𑀓𑀸𑀬𑁄 𑀲𑁄 𑀓𑀸𑀬𑀲𑀗𑁆𑀔𑀸𑀭𑁄𑀧𑀺 𑀦 𑀳𑁄𑀢𑀻𑀢𑀺 𑀧𑀼𑀘𑁆𑀙𑀢𑀺. 𑀓𑀸𑀬𑀲𑀗𑁆𑀔𑀸𑀭𑁄 𑀦 𑀓𑀸𑀬𑁄 𑀓𑀸𑀬𑀲𑀗𑁆𑀔𑀸𑀭𑁄𑀢𑀺 𑀓𑀸𑀬𑀲𑀗𑁆𑀔𑀸𑀭𑁄 𑀓𑀸𑀬𑁄 𑀦 𑀳𑁄𑀢𑀺, 𑀓𑀸𑀬𑀲𑀗𑁆𑀔𑀸𑀭𑁄𑀬𑁂𑀯 𑀧𑀦𑁂𑀲𑁄𑀢𑀺 𑀅𑀢𑁆𑀣𑁄. 𑀅𑀯𑀲𑁂𑀲𑀦𑁆𑀢𑀺 𑀦 𑀓𑁂𑀯𑀮𑀁 𑀲𑁂𑀲𑀲𑀗𑁆𑀔𑀸𑀭𑀤𑁆𑀯𑀬𑀫𑁂𑀯. 𑀓𑀸𑀬𑀲𑀗𑁆𑀔𑀸𑀭𑀯𑀺𑀦𑀺𑀫𑀼𑀢𑁆𑀢𑀁 𑀧𑀦 𑀲𑁂𑀲𑀁 𑀲𑀩𑁆𑀩𑀫𑁆𑀧𑀺 𑀲𑀗𑁆𑀔𑀢𑀸𑀲𑀗𑁆𑀔𑀢𑀧𑀡𑁆𑀡𑀢𑁆𑀢𑀺𑀪𑁂𑀤𑀁 𑀥𑀫𑁆𑀫𑀚𑀸𑀢𑀁 𑀦𑁂𑀯 𑀓𑀸𑀬𑁄, 𑀦 𑀓𑀸𑀬𑀲𑀗𑁆𑀔𑀸𑀭𑁄𑀢𑀺 𑀇𑀫𑀺𑀦𑀸 𑀉𑀧𑀸𑀬𑁂𑀦 𑀲𑀩𑁆𑀩𑀯𑀺𑀲𑁆𑀲𑀚𑁆𑀚𑀦𑁂𑀲𑀼 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄𑀢𑀺.

𑀧𑀡𑁆𑀡𑀢𑁆𑀢𑀺𑀯𑀸𑀭𑀯𑀡𑁆𑀡𑀦𑀸.

𑁨. 𑀧𑀯𑀢𑁆𑀢𑀺𑀯𑀸𑀭𑀯𑀡𑁆𑀡𑀦𑀸

𑁧𑁯. 𑀧𑀯𑀢𑁆𑀢𑀺𑀯𑀸𑀭𑁂 𑀧𑀦𑁂𑀢𑁆𑀣 𑀧𑀘𑁆𑀘𑀼𑀧𑁆𑀧𑀦𑁆𑀦𑀓𑀸𑀮𑁂 𑀧𑀼𑀕𑁆𑀕𑀮𑀯𑀸𑀭𑀲𑁆𑀲 𑀅𑀦𑀼𑀮𑁄𑀫𑀦𑀬𑁂 ‘‘𑀬𑀲𑁆𑀲 𑀓𑀸𑀬𑀲𑀗𑁆𑀔𑀸𑀭𑁄 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀯𑀘𑀻𑀲𑀗𑁆𑀔𑀸𑀭𑁄 𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀓𑀸𑀬𑀲𑀗𑁆𑀔𑀸𑀭𑀫𑀽𑀮𑀓𑀸𑀦𑀺 𑀤𑁆𑀯𑁂, 𑀯𑀘𑀻𑀲𑀗𑁆𑀔𑀸𑀭𑀫𑀽𑀮𑀓𑀁 𑀏𑀓𑀦𑁆𑀢𑀺 𑀢𑀻𑀡𑁂𑀯 𑀬𑀫𑀓𑀸𑀦𑀺 𑀮𑀩𑁆𑀪𑀦𑁆𑀢𑀺; 𑀢𑀸𑀦𑀺 𑀕𑀳𑀺𑀢𑀸𑀦𑁂𑀯. 𑀢𑀲𑁆𑀲 𑀧𑀝𑀺𑀮𑁄𑀫𑀦𑀬𑁂𑀧𑀺 𑀑𑀓𑀸𑀲𑀯𑀸𑀭𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀏𑀯𑀫𑁂𑀢𑁆𑀣 𑀲𑀩𑁆𑀩𑀯𑀸𑀭𑁂𑀲𑀼 𑀢𑀺𑀡𑁆𑀡𑀁 𑀢𑀺𑀡𑁆𑀡𑀁 𑀬𑀫𑀓𑀸𑀦𑀁 𑀯𑀲𑁂𑀦 𑀬𑀫𑀓𑀕𑀡𑀦𑀸 𑀯𑁂𑀤𑀺𑀢𑀩𑁆𑀩𑀸.

𑀅𑀢𑁆𑀣𑀯𑀺𑀦𑀺𑀘𑁆𑀙𑀬𑁂 𑀧𑀦𑁂𑀢𑁆𑀣 𑀇𑀤𑀁 𑀮𑀓𑁆𑀔𑀡𑀁 𑁋 𑀇𑀫𑀲𑁆𑀫𑀺𑀜𑁆𑀳𑀺 𑀲𑀗𑁆𑀔𑀸𑀭𑀬𑀫𑀓𑁂 ‘‘𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸𑀦𑀁 𑀉𑀧𑁆𑀧𑀸𑀤𑀓𑁆𑀔𑀡𑁂 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀁 𑀉𑀧𑁆𑀧𑀸𑀤𑀓𑁆𑀔𑀡𑁂’’𑀢𑀺𑀆𑀤𑀺𑀯𑀘𑀦𑀢𑁄 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀤𑀺𑀓𑀸𑀮𑀪𑁂𑀤𑁄 𑀧𑀯𑀢𑁆𑀢𑀺𑀯𑀲𑁂𑀦𑀸𑀧𑀺 𑀕𑀳𑁂𑀢𑀩𑁆𑀩𑁄, 𑀦 𑀘𑀼𑀢𑀺𑀧𑀝𑀺𑀲𑀦𑁆𑀥𑀺𑀯𑀲𑁂𑀦𑁂𑀯. ‘‘𑀤𑀼𑀢𑀺𑀬𑀚𑁆𑀛𑀸𑀦𑁂 𑀢𑀢𑀺𑀬𑀚𑁆𑀛𑀸𑀦𑁂 𑀢𑀢𑁆𑀣 𑀓𑀸𑀬𑀲𑀗𑁆𑀔𑀸𑀭𑁄 𑀉𑀧𑁆𑀧𑀚𑁆𑀚𑀢𑀻’’𑀢𑀺𑀆𑀤𑀺𑀯𑀘𑀦𑀢𑁄 𑀘 𑀛𑀸𑀦𑀫𑁆𑀧𑀺 𑀑𑀓𑀸𑀲𑀯𑀲𑁂𑀦 𑀕𑀳𑀺𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀏𑀯𑀫𑁂𑀢𑁆𑀣 𑀬𑀁 𑀬𑀁 𑀮𑀩𑁆𑀪𑀢𑀺, 𑀢𑀲𑁆𑀲 𑀢𑀲𑁆𑀲 𑀯𑀲𑁂𑀦 𑀅𑀢𑁆𑀣𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄.

𑀢𑀢𑁆𑀭𑀺𑀤𑀁 𑀦𑀬𑀫𑀼𑀔𑀁 𑁋 𑀯𑀺𑀦𑀸 𑀯𑀺𑀢𑀓𑁆𑀓𑀯𑀺𑀘𑀸𑀭𑁂𑀳𑀻𑀢𑀺 𑀤𑀼𑀢𑀺𑀬𑀢𑀢𑀺𑀬𑀚𑁆𑀛𑀸𑀦𑀯𑀲𑁂𑀦 𑀯𑀼𑀢𑁆𑀢𑀁. 𑀢𑁂𑀲𑀦𑁆𑀢𑀺 𑀢𑁂𑀲𑀁 𑀤𑀼𑀢𑀺𑀬𑀢𑀢𑀺𑀬𑀚𑁆𑀛𑀸𑀦𑀲𑀫𑀗𑁆𑀕𑀻𑀦𑀁. 𑀓𑀸𑀫𑀸𑀯𑀘𑀭𑀸𑀦𑀦𑁆𑀢𑀺 𑀓𑀸𑀫𑀸𑀯𑀘𑀭𑁂 𑀉𑀧𑁆𑀧𑀦𑁆𑀦𑀲𑀢𑁆𑀢𑀸𑀦𑀁. 𑀭𑀽𑀧𑀸𑀯𑀘𑀭𑀤𑁂𑀯𑀸𑀦𑀁 𑀧𑀦 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸 𑀦𑀢𑁆𑀣𑀺. 𑀅𑀭𑀽𑀧𑀸𑀯𑀘𑀭𑀸𑀦𑀁 𑀭𑀽𑀧𑀫𑁂𑀯 𑀦𑀢𑁆𑀣𑀺. 𑀯𑀺𑀦𑀸 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑁂𑀳𑀻𑀢𑀺 𑀭𑀽𑀧𑀸𑀭𑀽𑀧𑀪𑀯𑁂𑀲𑀼 𑀦𑀺𑀩𑁆𑀩𑀢𑁆𑀢𑀲𑀢𑁆𑀢𑀸𑀦𑀁 𑀯𑀺𑀢𑀓𑁆𑀓𑀯𑀺𑀘𑀸𑀭𑀼𑀧𑁆𑀧𑀢𑁆𑀢𑀺𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁.

𑁨𑁧. 𑀧𑀞𑀫𑀚𑁆𑀛𑀸𑀦𑁂 𑀓𑀸𑀫𑀸𑀯𑀘𑀭𑁂𑀢𑀺 𑀓𑀸𑀫𑀸𑀯𑀘𑀭𑀪𑀽𑀫𑀺𑀬𑀁 𑀉𑀧𑁆𑀧𑀦𑁆𑀦𑁂 𑀧𑀞𑀫𑀚𑁆𑀛𑀸𑀦𑁂. 𑀅𑀗𑁆𑀕𑀫𑀢𑁆𑀢𑀯𑀲𑁂𑀦 𑀘𑁂𑀢𑁆𑀣 𑀧𑀞𑀫𑀚𑁆𑀛𑀸𑀦𑀁 𑀕𑀳𑁂𑀢𑀩𑁆𑀩𑀁, 𑀦 𑀅𑀧𑁆𑀧𑀦𑀸𑀯𑀲𑁂𑀦𑁂𑀯. 𑀅𑀦𑀧𑁆𑀧𑀦𑀸𑀧𑀢𑁆𑀢𑁂𑀧𑀺 𑀳𑀺 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑀘𑀺𑀢𑁆𑀢𑁂 𑀇𑀤𑀁 𑀲𑀗𑁆𑀔𑀸𑀭𑀤𑁆𑀯𑀬𑀁 𑀉𑀧𑁆𑀧𑀚𑁆𑀚𑀢𑁂𑀯.

𑁨𑁪. 𑀘𑀺𑀢𑁆𑀢𑀲𑁆𑀲 𑀪𑀗𑁆𑀕𑀓𑁆𑀔𑀡𑁂𑀢𑀺 𑀇𑀤𑀁 𑀓𑀸𑀬𑀲𑀗𑁆𑀔𑀸𑀭𑀲𑁆𑀲 𑀏𑀓𑀦𑁆𑀢𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀢𑁆𑀢𑀸 𑀯𑀼𑀢𑁆𑀢𑀁. 𑀉𑀧𑁆𑀧𑀚𑁆𑀚𑀫𑀸𑀦𑀫𑁂𑀯 𑀳𑀺 𑀘𑀺𑀢𑁆𑀢𑀁 𑀭𑀽𑀧𑀁 𑀯𑀸 𑀅𑀭𑀽𑀧𑀁 𑀯𑀸 𑀲𑀫𑀼𑀝𑁆𑀞𑀸𑀧𑁂𑀢𑀺, 𑀦 𑀪𑀺𑀚𑁆𑀚𑀫𑀸𑀦𑀁.

𑁩𑁭. 𑀲𑀼𑀤𑁆𑀥𑀸𑀯𑀸𑀲𑀸𑀦𑀁 𑀤𑀼𑀢𑀺𑀬𑁂 𑀘𑀺𑀢𑁆𑀢𑁂 𑀯𑀢𑁆𑀢𑀫𑀸𑀦𑁂𑀢𑀺 𑀧𑀝𑀺𑀲𑀦𑁆𑀥𑀺𑀢𑁄 𑀤𑀼𑀢𑀺𑀬𑁂 𑀪𑀯𑀗𑁆𑀕𑀘𑀺𑀢𑁆𑀢𑁂. 𑀓𑀸𑀫𑀜𑁆𑀘𑁂𑀢𑀁 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑁂𑀧𑀺 𑀯𑀢𑁆𑀢𑀫𑀸𑀦𑁂 𑀢𑁂𑀲𑀁 𑀢𑀢𑁆𑀣 𑀦𑀼𑀧𑁆𑀧𑀚𑁆𑀚𑀺𑀢𑁆𑀣𑁂𑀯. 𑀬𑀸𑀯 𑀧𑀦 𑀅𑀩𑁆𑀩𑁄𑀓𑀺𑀡𑁆𑀡𑀁 𑀯𑀺𑀧𑀸𑀓𑀘𑀺𑀢𑁆𑀢𑀁 𑀯𑀢𑁆𑀢𑀢𑀺, 𑀢𑀸𑀯 𑀦𑀼𑀧𑁆𑀧𑀚𑁆𑀚𑀺𑀢𑁆𑀣𑁂𑀯 𑀦𑀸𑀫𑀸𑀢𑀺 𑀤𑀲𑁆𑀲𑀦𑀢𑁆𑀣𑀫𑁂𑀢𑀁 𑀯𑀼𑀢𑁆𑀢𑀁. 𑀬𑀲𑁆𑀲 𑀯𑀸 𑀛𑀸𑀦𑀲𑁆𑀲 𑀯𑀺𑀧𑀸𑀓𑀘𑀺𑀢𑁆𑀢𑁂𑀦 𑀢𑁂 𑀦𑀺𑀩𑁆𑀩𑀢𑁆𑀢𑀸, 𑀢𑀁 𑀲𑀢𑀲𑁄𑀧𑀺 𑀲𑀳𑀲𑁆𑀲𑀲𑁄𑀧𑀺 𑀉𑀧𑁆𑀧𑀚𑁆𑀚𑀫𑀸𑀦𑀁 𑀧𑀞𑀫𑀘𑀺𑀢𑁆𑀢𑀫𑁂𑀯. 𑀯𑀺𑀧𑀸𑀓𑀘𑀺𑀢𑁆𑀢𑁂𑀦 𑀧𑀦 𑀯𑀺𑀲𑀤𑀺𑀲𑀁 𑀪𑀯𑀦𑀺𑀓𑀦𑁆𑀢𑀺𑀬𑀸 𑀆𑀯𑀚𑁆𑀚𑀦𑀘𑀺𑀢𑁆𑀢𑀁 𑀤𑀼𑀢𑀺𑀬𑀘𑀺𑀢𑁆𑀢𑀁 𑀦𑀸𑀫. 𑀢𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑁪𑁪. 𑀧𑀘𑁆𑀙𑀺𑀫𑀘𑀺𑀢𑁆𑀢𑀲𑀫𑀗𑁆𑀕𑀻𑀦𑀦𑁆𑀢𑀺 𑀲𑀩𑁆𑀩𑀧𑀘𑁆𑀙𑀺𑀫𑁂𑀦 𑀅𑀧𑁆𑀧𑀝𑀺𑀲𑀦𑁆𑀥𑀺𑀓𑀘𑀺𑀢𑁆𑀢𑁂𑀦 𑀲𑀫𑀗𑁆𑀕𑀻𑀪𑀽𑀢𑀸𑀦𑀁 𑀔𑀻𑀡𑀸𑀲𑀯𑀸𑀦𑀁. 𑀅𑀯𑀺𑀢𑀓𑁆𑀓𑀅𑀯𑀺𑀘𑀸𑀭𑀁 𑀧𑀘𑁆𑀙𑀺𑀫𑀘𑀺𑀢𑁆𑀢𑀦𑁆𑀢𑀺 𑀭𑀽𑀧𑀸𑀯𑀘𑀭𑀸𑀦𑀁 𑀤𑀼𑀢𑀺𑀬𑀚𑁆𑀛𑀸𑀦𑀺𑀓𑀸𑀤𑀺𑀘𑀼𑀢𑀺𑀘𑀺𑀢𑁆𑀢𑀯𑀲𑁂𑀦, 𑀅𑀭𑀽𑀧𑀸𑀯𑀘𑀭𑀸𑀦𑀜𑁆𑀘 𑀘𑀢𑀼𑀢𑁆𑀣𑀚𑁆𑀛𑀸𑀦𑀺𑀓𑀘𑀼𑀢𑀺𑀘𑀺𑀢𑁆𑀢𑀯𑀲𑁂𑀦𑁂𑀢𑀁 𑀯𑀼𑀢𑁆𑀢𑀁. 𑀢𑁂𑀲𑀦𑁆𑀢𑀺 𑀢𑁂𑀲𑀁 𑀧𑀘𑁆𑀙𑀺𑀫𑀘𑀺𑀢𑁆𑀢𑀲𑀫𑀗𑁆𑀕𑀻𑀆𑀤𑀻𑀦𑀁.

𑁭𑁯. 𑀬𑀲𑁆𑀲 𑀓𑀸𑀬𑀲𑀗𑁆𑀔𑀸𑀭𑁄 𑀦𑀺𑀭𑀼𑀚𑁆𑀛𑀢𑀺, 𑀢𑀲𑁆𑀲 𑀘𑀺𑀢𑁆𑀢𑀲𑀗𑁆𑀔𑀸𑀭𑁄 𑀦𑀺𑀭𑀼𑀚𑁆𑀛𑀢𑀻𑀢𑀺 𑀏𑀢𑁆𑀣 𑀦𑀺𑀬𑀫𑀢𑁄 𑀓𑀸𑀬𑀲𑀗𑁆𑀔𑀸𑀭𑀲𑁆𑀲 𑀘𑀺𑀢𑁆𑀢𑀲𑀗𑁆𑀔𑀸𑀭𑁂𑀦 𑀲𑀤𑁆𑀥𑀺𑀁 𑀏𑀓𑀓𑁆𑀔𑀡𑁂 𑀦𑀺𑀭𑀼𑀚𑁆𑀛𑀦𑀢𑁄 𑀆𑀫𑀦𑁆𑀢𑀸𑀢𑀺 𑀧𑀝𑀺𑀯𑀘𑀦𑀁 𑀤𑀺𑀦𑁆𑀦𑀁. 𑀦 𑀘𑀺𑀢𑁆𑀢𑀲𑀗𑁆𑀔𑀸𑀭𑀲𑁆𑀲 𑀓𑀸𑀬𑀲𑀗𑁆𑀔𑀸𑀭𑁂𑀦 𑀲𑀤𑁆𑀥𑀺𑀁. 𑀓𑀺𑀁 𑀓𑀸𑀭𑀡𑀸? 𑀘𑀺𑀢𑁆𑀢𑀲𑀗𑁆𑀔𑀸𑀭𑁄 𑀳𑀺 𑀓𑀸𑀬𑀲𑀗𑁆𑀔𑀸𑀭𑁂𑀦 𑀯𑀺𑀦𑀸𑀧𑀺 𑀉𑀧𑁆𑀧𑀚𑁆𑀚𑀢𑀺 𑀘 𑀦𑀺𑀭𑀼𑀚𑁆𑀛𑀢𑀺 𑀘. 𑀓𑀸𑀬𑀲𑀗𑁆𑀔𑀸𑀭𑁄 𑀧𑀦 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑁄 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀯𑀸𑀢𑁄. 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀜𑁆𑀘 𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑁂 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀬𑀸𑀯 𑀅𑀜𑁆𑀜𑀸𑀦𑀺 𑀲𑁄𑀴𑀲𑀘𑀺𑀢𑁆𑀢𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀢𑀸𑀯 𑀢𑀺𑀝𑁆𑀞𑀢𑀺. 𑀢𑁂𑀲𑀁 𑀲𑁄𑀴𑀲𑀦𑁆𑀦𑀁 𑀲𑀩𑁆𑀩𑀧𑀘𑁆𑀙𑀺𑀫𑁂𑀦 𑀲𑀤𑁆𑀥𑀺𑀁 𑀦𑀺𑀭𑀼𑀚𑁆𑀛𑀢𑀻𑀢𑀺 𑀬𑁂𑀦 𑀘𑀺𑀢𑁆𑀢𑁂𑀦 𑀲𑀤𑁆𑀥𑀺𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀢𑁄 𑀧𑀝𑁆𑀞𑀸𑀬 𑀲𑀢𑁆𑀢𑀭𑀲𑀫𑁂𑀦 𑀲𑀤𑁆𑀥𑀺𑀁 𑀦𑀺𑀭𑀼𑀚𑁆𑀛𑀢𑀺. 𑀦 𑀓𑀲𑁆𑀲𑀘𑀺 𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑁂 𑀯𑀸 𑀞𑀺𑀢𑀺𑀓𑁆𑀔𑀡𑁂 𑀯𑀸 𑀦𑀺𑀭𑀼𑀚𑁆𑀛𑀢𑀺, 𑀦𑀸𑀧𑀺 𑀞𑀺𑀢𑀺𑀓𑁆𑀔𑀡𑁂 𑀯𑀸 𑀪𑀗𑁆𑀕𑀓𑁆𑀔𑀡𑁂 𑀯𑀸 𑀉𑀧𑁆𑀧𑀚𑁆𑀚𑀢𑀺. 𑀏𑀲𑀸 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀲𑁆𑀲 𑀥𑀫𑁆𑀫𑀢𑀸𑀢𑀺 𑀦𑀺𑀬𑀫𑀢𑁄 𑀘𑀺𑀢𑁆𑀢𑀲𑀗𑁆𑀔𑀸𑀭𑁂𑀦 𑀲𑀤𑁆𑀥𑀺𑀁 𑀏𑀓𑀓𑁆𑀔𑀡𑁂 𑀦𑀺𑀭𑀼𑀚𑁆𑀛𑀦𑀢𑁄 𑀆𑀫𑀦𑁆𑀢𑀸𑀢𑀺 𑀯𑀼𑀢𑁆𑀢𑀁. 𑀬𑀁 𑀧𑀦 𑀯𑀺𑀪𑀗𑁆𑀕𑀧𑁆𑀧𑀓𑀭𑀡𑀲𑁆𑀲 𑀲𑀻𑀳𑀴𑀝𑁆𑀞𑀓𑀣𑀸𑀬𑀁 ‘‘𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀁 𑀭𑀽𑀧𑀁 𑀲𑀢𑁆𑀢𑀭𑀲𑀫𑀲𑁆𑀲 𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑁂 𑀦𑀺𑀭𑀼𑀚𑁆𑀛𑀢𑀻’’𑀢𑀺 𑀯𑀼𑀢𑁆𑀢𑀁, 𑀢𑀁 𑀇𑀫𑀸𑀬 𑀧𑀸𑀴𑀺𑀬𑀸 𑀯𑀺𑀭𑀽𑀚𑁆𑀛𑀢𑀺. 𑀅𑀝𑁆𑀞𑀓𑀣𑀸𑀢𑁄 𑀘 𑀧𑀸𑀴𑀺𑀬𑁂𑀯 𑀩𑀮𑀯𑀢𑀭𑀸𑀢𑀺 𑀧𑀸𑀴𑀺𑀬𑀁 𑀯𑀼𑀢𑁆𑀢𑀫𑁂𑀯 𑀧𑀫𑀸𑀡𑀁.

𑁧𑁨𑁮. 𑀬𑀲𑁆𑀲 𑀓𑀸𑀬𑀲𑀗𑁆𑀔𑀸𑀭𑁄 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀯𑀘𑀻𑀲𑀗𑁆𑀔𑀸𑀭𑁄 𑀦𑀺𑀭𑀼𑀚𑁆𑀛𑀢𑀻𑀢𑀺 𑀏𑀢𑁆𑀣 𑀬𑀲𑁆𑀫𑀸 𑀓𑀸𑀬𑀲𑀗𑁆𑀔𑀸𑀭𑁄 𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑁂 𑀉𑀧𑁆𑀧𑀚𑁆𑀚𑀢𑀺, 𑀦 𑀘 𑀢𑀲𑁆𑀫𑀺𑀁 𑀔𑀡𑁂 𑀯𑀺𑀢𑀓𑁆𑀓𑀯𑀺𑀘𑀸𑀭𑀸 𑀦𑀺𑀭𑀼𑀚𑁆𑀛𑀦𑁆𑀢𑀺, 𑀢𑀲𑁆𑀫𑀸 𑀦𑁄𑀢𑀺 𑀧𑀝𑀺𑀲𑁂𑀥𑁄 𑀓𑀢𑁄𑀢𑀺. 𑀇𑀫𑀺𑀦𑀸 𑀦𑀬𑀫𑀼𑀔𑁂𑀦 𑀲𑀩𑁆𑀩𑀢𑁆𑀣 𑀅𑀢𑁆𑀣𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀧𑀭𑀺𑀜𑁆𑀜𑀸𑀯𑀸𑀭𑁄 𑀧𑀸𑀓𑀢𑀺𑀓𑁄𑀬𑁂𑀯𑀸𑀢𑀺.

𑀧𑀯𑀢𑁆𑀢𑀺𑀯𑀸𑀭𑀯𑀡𑁆𑀡𑀦𑀸.

𑀲𑀗𑁆𑀔𑀸𑀭𑀬𑀫𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.