𑁪. 𑀥𑀸𑀢𑀼𑀬𑀫𑀓𑀁

𑁧-𑁧𑁯. 𑀇𑀤𑀸𑀦𑀺 𑀢𑁂𑀬𑁂𑀯 𑀫𑀽𑀮𑀬𑀫𑀓𑁂 𑀤𑁂𑀲𑀺𑀢𑁂 𑀓𑀼𑀲𑀮𑀸𑀤𑀺𑀥𑀫𑁆𑀫𑁂 𑀥𑀸𑀢𑀼𑀯𑀲𑁂𑀦 𑀲𑀗𑁆𑀕𑀡𑁆𑀳𑀺𑀢𑁆𑀯𑀸 𑀆𑀬𑀢𑀦𑀬𑀫𑀓𑀸𑀦𑀦𑁆𑀢𑀭𑀁 𑀤𑁂𑀲𑀺𑀢𑀲𑁆𑀲 𑀥𑀸𑀢𑀼𑀬𑀫𑀓𑀲𑁆𑀲 𑀯𑀡𑁆𑀡𑀦𑀸 𑀳𑁄𑀢𑀺. 𑀢𑀢𑁆𑀣 𑀆𑀬𑀢𑀦𑀬𑀫𑀓𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀧𑀸𑀴𑀺𑀯𑀯𑀢𑁆𑀣𑀸𑀦𑀁 𑀯𑁂𑀢𑀺𑀤𑀩𑁆𑀩𑀁. 𑀇𑀥𑀸𑀧𑀺 𑀳𑀺 𑀧𑀡𑁆𑀡𑀢𑁆𑀢𑀺𑀯𑀸𑀭𑀸𑀤𑀬𑁄 𑀢𑀬𑁄 𑀫𑀳𑀸𑀯𑀸𑀭𑀸, 𑀅𑀯𑀲𑁂𑀲𑀸 𑀅𑀦𑁆𑀢𑀭𑀯𑀸𑀭𑀸 𑀘 𑀲𑀤𑁆𑀥𑀺𑀁 𑀓𑀸𑀮𑀧𑁆𑀧𑀪𑁂𑀤𑀸𑀤𑀻𑀳𑀺 𑀆𑀬𑀢𑀦𑀬𑀫𑀓𑁂 𑀆𑀕𑀢𑀲𑀤𑀺𑀲𑀸𑀬𑁂𑀯. 𑀇𑀥𑀸𑀧𑀺 𑀘 𑀬𑀫𑀓𑀧𑀼𑀘𑁆𑀙𑀸𑀲𑀼𑀔𑀢𑁆𑀣𑀁 𑀧𑀝𑀺𑀧𑀸𑀝𑀺𑀬𑀸 𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑀸 𑀭𑀽𑀧𑀥𑀸𑀢𑀼𑀬𑁄𑀯 𑀯𑀢𑁆𑀯𑀸 𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑁄 𑀯𑀼𑀢𑁆𑀢𑀸. 𑀥𑀸𑀢𑀽𑀦𑀁 𑀧𑀦 𑀩𑀳𑀼𑀢𑁆𑀢𑀸 𑀇𑀥 𑀆𑀬𑀢𑀦𑀬𑀫𑀓𑀢𑁄 𑀩𑀳𑀼𑀢𑀭𑀸𑀦𑀺 𑀬𑀫𑀓𑀸𑀦𑀺, 𑀬𑀫𑀓𑀤𑀺𑀕𑀼𑀡𑀸 𑀧𑀼𑀘𑁆𑀙𑀸, 𑀧𑀼𑀘𑁆𑀙𑀸𑀤𑀺𑀕𑀼𑀡𑀸 𑀘 𑀅𑀢𑁆𑀣𑀸 𑀳𑁄𑀦𑁆𑀢𑀺. 𑀢𑀢𑁆𑀣 𑀘𑀓𑁆𑀔𑀼𑀥𑀸𑀢𑀼𑀫𑀽𑀮𑀓𑀸𑀤𑀻𑀲𑀼 𑀬𑀫𑀓𑁂𑀲𑀼 𑀮𑀩𑁆𑀪𑀫𑀸𑀦𑀸𑀦𑀁 𑀬𑀫𑀓𑀸𑀦𑀁 𑀅𑀢𑁆𑀣𑀯𑀺𑀦𑀺𑀘𑁆𑀙𑀬𑁄 𑀆𑀬𑀢𑀦𑀬𑀫𑀓𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀢𑀁𑀲𑀤𑀺𑀲𑀸𑀬𑁂𑀯 𑀳𑁂𑀢𑁆𑀣 𑀅𑀢𑁆𑀣𑀕𑀢𑀺, 𑀢𑁂𑀦𑁂𑀯 𑀘 𑀓𑀸𑀭𑀡𑁂𑀦 𑀧𑀸𑀴𑀺𑀧𑀺 𑀲𑀗𑁆𑀔𑀺𑀢𑁆𑀢𑀸. 𑀧𑀭𑀺𑀜𑁆𑀜𑀸𑀯𑀸𑀭𑁄 𑀧𑀸𑀓𑀢𑀺𑀓𑁄𑀬𑁂𑀯𑀸𑀢𑀺.

𑀥𑀸𑀢𑀼𑀬𑀫𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.