𑁩. 𑀆𑀬𑀢𑀦𑀬𑀫𑀓𑀁

𑁧. 𑀧𑀡𑁆𑀡𑀢𑁆𑀢𑀺𑀉𑀤𑁆𑀤𑁂𑀲𑀯𑀸𑀭𑀯𑀡𑁆𑀡𑀦𑀸

𑁧-𑁯. 𑀇𑀤𑀸𑀦𑀺 𑀫𑀽𑀮𑀬𑀫𑀓𑁂 𑀤𑁂𑀲𑀺𑀢𑁂𑀬𑁂𑀯 𑀓𑀼𑀲𑀮𑀸𑀤𑀺𑀥𑀫𑁆𑀫𑁂 𑀆𑀬𑀢𑀦𑀯𑀲𑁂𑀦𑀸𑀧𑀺 𑀲𑀗𑁆𑀕𑀡𑁆𑀳𑀺𑀢𑁆𑀯𑀸 𑀔𑀦𑁆𑀥𑀬𑀫𑀓𑀸𑀦𑀦𑁆𑀢𑀭𑀁 𑀤𑁂𑀲𑀺𑀢𑀲𑁆𑀲 𑀆𑀬𑀢𑀦𑀬𑀫𑀓𑀲𑁆𑀲 𑀯𑀡𑁆𑀡𑀦𑀸 𑀳𑁄𑀢𑀺. 𑀢𑀢𑁆𑀣 𑀔𑀦𑁆𑀥𑀬𑀫𑀓𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀧𑀸𑀴𑀺𑀯𑀯𑀢𑁆𑀣𑀸𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀬𑀣𑁂𑀯 𑀳𑀺 𑀢𑀢𑁆𑀣 𑀧𑀡𑁆𑀡𑀢𑁆𑀢𑀺𑀯𑀸𑀭𑁄, 𑀧𑀯𑀢𑁆𑀢𑀺𑀯𑀸𑀭𑁄, 𑀧𑀭𑀺𑀜𑁆𑀜𑀸𑀯𑀸𑀭𑁄𑀢𑀺 𑀢𑀬𑁄 𑀫𑀳𑀸𑀯𑀸𑀭𑀸 𑀳𑁄𑀦𑁆𑀢𑀺, 𑀢𑀣𑀸 𑀇𑀥𑀸𑀧𑀺. 𑀯𑀘𑀦𑀢𑁆𑀣𑁄𑀧𑀺 𑀦𑁂𑀲𑀁 𑀢𑀢𑁆𑀣 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀇𑀥𑀸𑀧𑀺 𑀘 𑀧𑀡𑁆𑀡𑀢𑁆𑀢𑀺𑀯𑀸𑀭𑁄 𑀉𑀤𑁆𑀤𑁂𑀲𑀦𑀺𑀤𑁆𑀤𑁂𑀲𑀯𑀲𑁂𑀦 𑀤𑁆𑀯𑀺𑀥𑀸 𑀯𑀯𑀢𑁆𑀣𑀺𑀢𑁄. 𑀇𑀢𑀭𑁂 𑀦𑀺𑀤𑁆𑀤𑁂𑀲𑀯𑀲𑁂𑀦𑁂𑀯. ‘𑀢𑀢𑁆𑀣 𑀤𑁆𑀯𑀸𑀤𑀲𑀸𑀬𑀢𑀦𑀸𑀦𑀻’𑀢𑀺 𑀧𑀤𑀁 𑀆𑀤𑀺𑀁 𑀓𑀢𑁆𑀯𑀸 𑀬𑀸𑀯 𑀦𑀸𑀬𑀢𑀦𑀸 𑀦 𑀫𑀦𑁄𑀢𑀺, 𑀢𑀸𑀯 𑀧𑀡𑁆𑀡𑀢𑁆𑀢𑀺𑀯𑀸𑀭𑀲𑁆𑀲 𑀉𑀤𑁆𑀤𑁂𑀲𑀯𑀸𑀭𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀢𑁆𑀣 𑀤𑁆𑀯𑀸𑀤𑀲𑀸𑀬𑀢𑀦𑀸𑀦𑀻𑀢𑀺 𑀅𑀬𑀁 𑀬𑀫𑀓𑀯𑀲𑁂𑀦 𑀧𑀼𑀘𑁆𑀙𑀺𑀢𑀩𑁆𑀩𑀸𑀦𑀁 𑀆𑀬𑀢𑀦𑀸𑀦𑀁 𑀉𑀤𑁆𑀤𑁂𑀲𑁄. 𑀘𑀓𑁆𑀔𑀸𑀬𑀢𑀦𑀁…𑀧𑁂… 𑀥𑀫𑁆𑀫𑀸𑀬𑀢𑀦𑀦𑁆𑀢𑀺 𑀢𑁂𑀲𑀜𑁆𑀜𑁂𑀯 𑀧𑀪𑁂𑀤𑀢𑁄 𑀦𑀸𑀫𑀯𑀯𑀢𑁆𑀣𑀸𑀦𑀁. 𑀬𑀫𑀓𑀯𑀲𑁂𑀦 𑀧𑀼𑀘𑁆𑀙𑀸𑀲𑀼𑀔𑀢𑁆𑀣𑀜𑁆𑀘𑁂𑀢𑁆𑀣 𑀧𑀞𑀫𑀁 𑀧𑀝𑀺𑀧𑀸𑀝𑀺𑀬𑀸 𑀅𑀚𑁆𑀛𑀢𑁆𑀢𑀭𑀽𑀧𑀸𑀬𑀢𑀦𑀸𑀦𑀺 𑀯𑀼𑀢𑁆𑀢𑀸𑀦𑀺. 𑀧𑀘𑁆𑀙𑀸 𑀩𑀸𑀳𑀺𑀭𑀭𑀽𑀧𑀸𑀬𑀢𑀦𑀸𑀦𑀺. 𑀧𑀭𑀺𑀬𑁄𑀲𑀸𑀦𑁂 𑀫𑀦𑀸𑀬𑀢𑀦𑀥𑀫𑁆𑀫𑀸𑀬𑀢𑀦𑀸𑀦𑀺.

𑀬𑀣𑀸 𑀧𑀦 𑀳𑁂𑀝𑁆𑀞𑀸 𑀔𑀦𑁆𑀥𑀯𑀲𑁂𑀦, 𑀏𑀯𑀫𑀺𑀥 𑀇𑀫𑁂𑀲𑀁 𑀆𑀬𑀢𑀦𑀸𑀦𑀁 𑀯𑀲𑁂𑀦 𑀧𑀤𑀲𑁄𑀥𑀦𑀯𑀸𑀭𑁄, 𑀧𑀤𑀲𑁄𑀥𑀦𑀫𑀽𑀮𑀘𑀓𑁆𑀓𑀯𑀸𑀭𑁄, 𑀲𑀼𑀤𑁆𑀥𑀸𑀬𑀢𑀦𑀯𑀸𑀭𑁄, 𑀲𑀼𑀤𑁆𑀥𑀸𑀬𑀢𑀦𑀫𑀽𑀮𑀘𑀓𑁆𑀓𑀯𑀸𑀭𑁄𑀢𑀺, 𑀘𑀢𑁆𑀢𑀸𑀭𑁄𑀯 𑀦𑀬𑀯𑀸𑀭𑀸 𑀳𑁄𑀦𑁆𑀢𑀺. 𑀏𑀓𑁂𑀓𑁄 𑀘𑁂𑀢𑁆𑀣 𑀅𑀦𑀼𑀮𑁄𑀫𑀧𑀝𑀺𑀮𑁄𑀫𑀯𑀲𑁂𑀦 𑀤𑀼𑀯𑀺𑀥𑁄𑀬𑁂𑀯. 𑀢𑁂𑀲𑀫𑀢𑁆𑀣𑁄 𑀢𑀢𑁆𑀣 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀬𑀣𑀸 𑀧𑀦 𑀔𑀦𑁆𑀥𑀬𑀫𑀓𑁂 𑀧𑀤𑀲𑁄𑀥𑀦𑀯𑀸𑀭𑀲𑁆𑀲 𑀅𑀦𑀼𑀮𑁄𑀫𑀯𑀸𑀭𑁂 ‘𑀭𑀽𑀧𑀁 𑀭𑀽𑀧𑀓𑁆𑀔𑀦𑁆𑀥𑁄, 𑀭𑀽𑀧𑀓𑁆𑀔𑀦𑁆𑀥𑁄 𑀭𑀽𑀧’𑀦𑁆𑀢𑀺𑀆𑀤𑀻𑀦𑀺 𑀧𑀜𑁆𑀘 𑀬𑀫𑀓𑀸𑀦𑀺, 𑀢𑀣𑀸 𑀇𑀥 ‘𑀘𑀓𑁆𑀔𑀼, 𑀘𑀓𑁆𑀔𑀸𑀬𑀢𑀦𑀁; 𑀘𑀓𑁆𑀔𑀸𑀬𑀢𑀦𑀁; 𑀘𑀓𑁆𑀔𑀽’𑀢𑀺𑀆𑀤𑀻𑀦𑀺 𑀤𑁆𑀯𑀸𑀤𑀲. 𑀧𑀝𑀺𑀮𑁄𑀫𑀯𑀸𑀭𑁂𑀧𑀺 ‘𑀦 𑀘𑀓𑁆𑀔𑀼, 𑀦 𑀘𑀓𑁆𑀔𑀸𑀬𑀢𑀦𑀁; 𑀦 𑀘𑀓𑁆𑀔𑀸𑀬𑀢𑀦𑀁, 𑀦 𑀘𑀓𑁆𑀔𑀽’𑀢𑀺𑀆𑀤𑀻𑀦𑀺 𑀤𑁆𑀯𑀸𑀤𑀲, 𑀧𑀤𑀲𑁄𑀥𑀦𑀫𑀽𑀮𑀘𑀓𑁆𑀓𑀯𑀸𑀭𑀲𑁆𑀲 𑀧𑀦𑁂𑀢𑁆𑀣 𑀅𑀦𑀼𑀮𑁄𑀫𑀯𑀸𑀭𑁂 𑀏𑀓𑁂𑀓𑀸𑀬𑀢𑀦𑀫𑀽𑀮𑀓𑀸𑀦𑀺 𑀏𑀓𑀸𑀤𑀲 𑀏𑀓𑀸𑀤𑀲 𑀓𑀢𑁆𑀯𑀸 𑀤𑁆𑀯𑀢𑁆𑀢𑀺𑀁𑀲𑀲𑀢𑀁 𑀬𑀫𑀓𑀸𑀦𑀺. 𑀧𑀝𑀺𑀮𑁄𑀫𑀯𑀸𑀭𑁂𑀧𑀺 𑀤𑁆𑀯𑀢𑁆𑀢𑀺𑀁𑀲𑀲𑀢𑀫𑁂𑀯. 𑀲𑀼𑀤𑁆𑀥𑀸𑀬𑀢𑀦𑀯𑀸𑀭𑀲𑁆𑀲𑀸𑀧𑀺 𑀅𑀦𑀼𑀮𑁄𑀫𑀯𑀸𑀭𑁂 𑀤𑁆𑀯𑀸𑀤𑀲, 𑀧𑀝𑀺𑀮𑁄𑀫𑀯𑀸𑀭𑁂 𑀤𑁆𑀯𑀸𑀤𑀲, 𑀲𑀼𑀤𑁆𑀥𑀸𑀬𑀢𑀦𑀫𑀽𑀮𑀘𑀓𑁆𑀓𑀯𑀸𑀭𑀲𑁆𑀲𑀸𑀧𑀺 𑀅𑀦𑀼𑀮𑁄𑀫𑀯𑀸𑀭𑁂 𑀏𑀓𑁂𑀓𑀸𑀬𑀢𑀦𑀫𑀽𑀮𑀓𑀸𑀦𑀺 𑀏𑀓𑀸𑀤𑀲 𑀏𑀓𑀸𑀤𑀲 𑀓𑀢𑁆𑀯𑀸 𑀤𑁆𑀯𑀢𑁆𑀢𑀺𑀁𑀲𑀲𑀢𑀁 𑀬𑀫𑀓𑀸𑀦𑀺. 𑀧𑀝𑀺𑀮𑁄𑀫𑀯𑀸𑀭𑁂𑀧𑀺 𑀤𑁆𑀯𑀢𑁆𑀢𑀺𑀁𑀲𑀲𑀢𑀫𑁂𑀯𑀸𑀢𑀺 𑀏𑀯𑀫𑀺𑀥 𑀙𑀲𑀢𑁆𑀢𑀢𑀸𑀥𑀺𑀓𑁂𑀳𑀺 𑀧𑀜𑁆𑀘𑀳𑀺 𑀬𑀫𑀓𑀲𑀢𑁂𑀳𑀺, 𑀤𑁆𑀯𑀺𑀧𑀜𑁆𑀜𑀸𑀲𑀸𑀥𑀺𑀓𑁂𑀳𑀺 𑀏𑀓𑀸𑀤𑀲𑀳𑀺 𑀧𑀼𑀘𑁆𑀙𑀸𑀲𑀢𑁂𑀳𑀺, 𑀘𑀢𑀼𑀭𑀸𑀥𑀺𑀓𑁂𑀳𑀺 𑀢𑁂𑀯𑀻𑀲𑀸𑀬 𑀅𑀢𑁆𑀣𑀲𑀢𑁂𑀳𑀺 𑀘 𑀧𑀝𑀺𑀫𑀡𑁆𑀟𑀺𑀢𑁄 𑀧𑀡𑁆𑀡𑀢𑁆𑀢𑀺𑀯𑀸𑀭𑀲𑁆𑀲 𑀉𑀤𑁆𑀤𑁂𑀲𑀯𑀸𑀭𑁄 𑀯𑁂𑀤𑀺𑀢𑀩𑁆𑀩𑁄.

𑀧𑀡𑁆𑀡𑀢𑁆𑀢𑀺𑀉𑀤𑁆𑀤𑁂𑀲𑀯𑀸𑀭𑀯𑀡𑁆𑀡𑀦𑀸.

𑁧. 𑀧𑀡𑁆𑀡𑀢𑁆𑀢𑀺𑀦𑀺𑀤𑁆𑀤𑁂𑀲𑀯𑀸𑀭𑀯𑀡𑁆𑀡𑀦𑀸

𑁧𑁦-𑁧𑁭. 𑀦𑀺𑀤𑁆𑀤𑁂𑀲𑀯𑀸𑀭𑁂 𑀧𑀦 𑀳𑁂𑀝𑁆𑀞𑀸 𑀔𑀦𑁆𑀥𑀬𑀫𑀓𑀲𑁆𑀲 𑀧𑀡𑁆𑀡𑀢𑁆𑀢𑀺𑀯𑀸𑀭𑀦𑀺𑀤𑁆𑀤𑁂𑀲𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀜𑁆𑀜𑀢𑁆𑀭 𑀯𑀺𑀲𑁂𑀲𑀸. 𑀢𑀢𑁆𑀭𑀸𑀬𑀁 𑀯𑀺𑀲𑁂𑀲𑁄 𑁋 𑀤𑀺𑀩𑁆𑀩𑀘𑀓𑁆𑀔𑀽𑀢𑀺 𑀤𑀼𑀢𑀺𑀬𑀯𑀺𑀚𑁆𑀚𑀸𑀜𑀸𑀡𑀁. 𑀧𑀜𑁆𑀜𑀸𑀘𑀓𑁆𑀔𑀽𑀢𑀺 𑀢𑀢𑀺𑀬𑀯𑀺𑀚𑁆𑀚𑀸𑀜𑀸𑀡𑀁. 𑀤𑀺𑀩𑁆𑀩𑀲𑁄𑀢𑀦𑁆𑀢𑀺 𑀤𑀼𑀢𑀺𑀬𑀅𑀪𑀺𑀜𑁆𑀜𑀸𑀜𑀸𑀡𑀁. 𑀢𑀡𑁆𑀳𑀸𑀲𑁄𑀢𑀦𑁆𑀢𑀺 𑀢𑀡𑁆𑀳𑀸𑀯. 𑀅𑀯𑀲𑁂𑀲𑁄 𑀓𑀸𑀬𑁄𑀢𑀺 𑀦𑀸𑀫𑀓𑀸𑀬𑁄, 𑀭𑀽𑀧𑀓𑀸𑀬𑁄, 𑀳𑀢𑁆𑀣𑀺𑀓𑀸𑀬𑁄, 𑀅𑀲𑁆𑀲𑀓𑀸𑀬𑁄𑀢𑀺 𑀏𑀯𑀫𑀸𑀤𑀺. 𑀅𑀯𑀲𑁂𑀲𑀁 𑀭𑀽𑀧𑀦𑁆𑀢𑀺 𑀭𑀽𑀧𑀸𑀬𑀢𑀦𑀢𑁄 𑀲𑁂𑀲𑀁 𑀪𑀽𑀢𑀼𑀧𑀸𑀤𑀸𑀬𑀭𑀽𑀧𑀜𑁆𑀘𑁂𑀯 𑀧𑀺𑀬𑀭𑀽𑀧𑀲𑀸𑀢𑀭𑀽𑀧𑀜𑁆𑀘. 𑀲𑀻𑀮𑀕𑀦𑁆𑀥𑁄𑀢𑀺𑀆𑀤𑀻𑀦𑀺 𑀯𑀸𑀬𑀦𑀝𑁆𑀞𑁂𑀦 𑀲𑀻𑀮𑀸𑀤𑀻𑀦𑀁𑀬𑁂𑀯 𑀦𑀸𑀫𑀸𑀦𑀺. 𑀅𑀢𑁆𑀣𑀭𑀲𑁄𑀢𑀺𑀆𑀤𑀻𑀦𑀺𑀧𑀺 𑀲𑀸𑀥𑀼𑀫𑀥𑀼𑀭𑀝𑁆𑀞𑁂𑀦 𑀅𑀢𑁆𑀣𑀸𑀤𑀻𑀦𑀜𑁆𑀜𑁂𑀯 𑀦𑀸𑀫𑀸𑀦𑀺. 𑀅𑀯𑀲𑁂𑀲𑁄 𑀥𑀫𑁆𑀫𑁄𑀢𑀺 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑀸𑀤𑀺𑀅𑀦𑁂𑀓𑀧𑁆𑀧𑀪𑁂𑀤𑁄𑀢𑀺 𑀅𑀬𑀫𑁂𑀢𑁆𑀣 𑀯𑀺𑀲𑁂𑀲𑁄.

𑀧𑀡𑁆𑀡𑀢𑁆𑀢𑀺𑀦𑀺𑀤𑁆𑀤𑁂𑀲𑀯𑀸𑀭𑀯𑀡𑁆𑀡𑀦𑀸.

𑁨. 𑀧𑀯𑀢𑁆𑀢𑀺𑀯𑀸𑀭𑀯𑀡𑁆𑀡𑀦𑀸

𑁧𑁮-𑁨𑁧. 𑀇𑀥𑀸𑀧𑀺 𑀘 𑀧𑀯𑀢𑁆𑀢𑀺𑀯𑀸𑀭𑀲𑁆𑀲 𑀉𑀧𑁆𑀧𑀸𑀤𑀯𑀸𑀭𑀸𑀤𑀻𑀲𑀼 𑀢𑀻𑀲𑀼 𑀅𑀦𑁆𑀢𑀭𑀯𑀸𑀭𑁂𑀲𑀼 𑀏𑀓𑁂𑀓𑀲𑁆𑀫𑀺𑀁 𑀙𑀴𑁂𑀯 𑀓𑀸𑀮𑀪𑁂𑀤𑀸. 𑀢𑁂𑀲𑀁 𑀏𑀓𑁂𑀓𑀲𑁆𑀫𑀺𑀁 𑀓𑀸𑀮𑁂 𑀧𑀼𑀕𑁆𑀕𑀮𑀯𑀸𑀭𑀸𑀤𑀬𑁄 𑀢𑀬𑁄 𑀯𑀸𑀭𑀸. 𑀢𑁂 𑀲𑀩𑁆𑀩𑁂𑀧𑀺 𑀅𑀦𑀼𑀮𑁄𑀫𑀧𑀝𑀺𑀮𑁄𑀫𑀦𑀬𑀯𑀲𑁂𑀦 𑀤𑀼𑀯𑀺𑀥𑀸𑀯 𑀳𑁄𑀦𑁆𑀢𑀺. 𑀢𑀢𑁆𑀣 𑀧𑀘𑁆𑀘𑀼𑀧𑁆𑀧𑀦𑁆𑀦𑀓𑀸𑀮𑁂 𑀧𑀼𑀕𑁆𑀕𑀮𑀯𑀸𑀭𑀲𑁆𑀲 𑀅𑀦𑀼𑀮𑁄𑀫𑀦𑀬𑁂 𑀬𑀣𑀸 𑀔𑀦𑁆𑀥𑀬𑀫𑀓𑁂 𑀭𑀽𑀧𑀓𑁆𑀔𑀦𑁆𑀥𑀫𑀽𑀮𑀓𑀸𑀦𑀺 𑀘𑀢𑁆𑀢𑀸𑀭𑀺, 𑀯𑁂𑀤𑀦𑀸𑀓𑁆𑀔𑀦𑁆𑀥𑀫𑀽𑀮𑀓𑀸𑀦𑀺 𑀢𑀻𑀡𑀺, 𑀲𑀜𑁆𑀜𑀸𑀓𑁆𑀔𑀦𑁆𑀥𑀫𑀽𑀮𑀓𑀸𑀦𑀺 𑀤𑁆𑀯𑁂, 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀫𑀽𑀮𑀓𑀁 𑀏𑀓𑀦𑁆𑀢𑀺 𑀅𑀕𑁆𑀕𑀳𑀺𑀢𑀕𑁆𑀕𑀳𑀡𑁂𑀦 𑀤𑀲 𑀬𑀫𑀓𑀸𑀦𑀺 𑀳𑁄𑀦𑁆𑀢𑀺. 𑀏𑀯𑀁 ‘‘𑀬𑀲𑁆𑀲 𑀘𑀓𑁆𑀔𑀸𑀬𑀢𑀦𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀲𑁄𑀢𑀸𑀬𑀢𑀦𑀁 𑀉𑀧𑁆𑀧𑀚𑁆𑀚𑀢𑀺; 𑀬𑀲𑁆𑀲 𑀯𑀸 𑀧𑀦 𑀲𑁄𑀢𑀸𑀬𑀢𑀦𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀘𑀓𑁆𑀔𑀸𑀬𑀢𑀦𑀁 𑀉𑀧𑁆𑀧𑀚𑁆𑀚𑀢𑀺; 𑀬𑀲𑁆𑀲 𑀘𑀓𑁆𑀔𑀸𑀬𑀢𑀦𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀖𑀸𑀡𑀸𑀬𑀢𑀦𑀁, 𑀚𑀺𑀯𑁆𑀳𑀸𑀬𑀢𑀦𑀁, 𑀓𑀸𑀬𑀸𑀬𑀢𑀦𑀁, 𑀭𑀽𑀧𑀸𑀬𑀢𑀦𑀁, 𑀲𑀤𑁆𑀤𑀸𑀬𑀢𑀦𑀁, 𑀕𑀦𑁆𑀥𑀸𑀬𑀢𑀦𑀁, 𑀭𑀲𑀸𑀬𑀢𑀦𑀁, 𑀨𑁄𑀝𑁆𑀞𑀩𑁆𑀩𑀸𑀬𑀢𑀦𑀁, 𑀫𑀦𑀸𑀬𑀢𑀦𑀁, 𑀥𑀫𑁆𑀫𑀸𑀬𑀢𑀦𑀁, 𑀉𑀧𑁆𑀧𑀚𑁆𑀚𑀢𑀺; 𑀬𑀲𑁆𑀲 𑀯𑀸 𑀧𑀦 𑀥𑀫𑁆𑀫𑀸𑀬𑀢𑀦𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀘𑀓𑁆𑀔𑀸𑀬𑀢𑀦𑀁 𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀏𑀯𑀁 𑀘𑀓𑁆𑀔𑀸𑀬𑀢𑀦𑀫𑀽𑀮𑀓𑀸𑀦𑀺 𑀏𑀓𑀸𑀤𑀲. ‘‘𑀬𑀲𑁆𑀲 𑀲𑁄𑀢𑀸𑀬𑀢𑀦𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀖𑀸𑀦𑀸𑀬𑀢𑀦𑀁 𑀉𑀧𑁆𑀧𑀚𑁆𑀚𑀢𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀲𑁄𑀢𑀸𑀬𑀢𑀦𑀫𑀽𑀮𑀓𑀸𑀦𑀺 𑀤𑀲; 𑀖𑀸𑀦𑀸𑀬𑀢𑀦𑀫𑀽𑀮𑀓𑀸𑀦𑀺 𑀦𑀯, 𑀚𑀺𑀯𑁆𑀳𑀸𑀬𑀢𑀦𑀫𑀽𑀮𑀓𑀸𑀦𑀺 𑀅𑀝𑁆𑀞; 𑀓𑀸𑀬𑀸𑀬𑀢𑀦𑀫𑀽𑀮𑀓𑀸𑀦𑀺 𑀲𑀢𑁆𑀢; 𑀭𑀽𑀧𑀸𑀬𑀢𑀦𑀫𑀽𑀮𑀓𑀸𑀦𑀺 𑀙; 𑀲𑀤𑁆𑀤𑀸𑀬𑀢𑀦𑀫𑀽𑀮𑀓𑀸𑀦𑀺 𑀧𑀜𑁆𑀘; 𑀕𑀦𑁆𑀥𑀸𑀬𑀢𑀦𑀫𑀽𑀮𑀓𑀸𑀦𑀺 𑀘𑀢𑁆𑀢𑀸𑀭𑀺; 𑀭𑀲𑀸𑀬𑀢𑀦𑀫𑀽𑀮𑀓𑀸𑀦𑀺 𑀢𑀻𑀡𑀺; 𑀨𑁄𑀝𑁆𑀞𑀩𑁆𑀩𑀸𑀬𑀢𑀦𑀫𑀽𑀮𑀓𑀸𑀦𑀺 𑀤𑁆𑀯𑁂; 𑀫𑀦𑀸𑀬𑀢𑀦𑀫𑀽𑀮𑀓𑀁 𑀏𑀓𑀦𑁆𑀢𑀺 𑀅𑀕𑁆𑀕𑀳𑀺𑀢𑀕𑁆𑀕𑀳𑀡𑁂𑀦 𑀙𑀲𑀝𑁆𑀞𑀺 𑀬𑀫𑀓𑀸𑀦𑀺 𑀳𑁄𑀦𑁆𑀢𑀺.

𑀢𑀢𑁆𑀣 𑀘𑀓𑁆𑀔𑀸𑀬𑀢𑀦𑀫𑀽𑀮𑀓𑁂𑀲𑀼 𑀏𑀓𑀸𑀤𑀲𑀲𑀼 ‘‘𑀬𑀲𑁆𑀲 𑀘𑀓𑁆𑀔𑀸𑀬𑀢𑀦𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀲𑁄𑀢𑀸𑀬𑀢𑀦𑀁, 𑀖𑀸𑀦𑀸𑀬𑀢𑀦𑀁, 𑀭𑀽𑀧𑀸𑀬𑀢𑀦𑀁, 𑀫𑀦𑀸𑀬𑀢𑀦𑀁, 𑀥𑀫𑁆𑀫𑀸𑀬𑀢𑀦𑀁 𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀇𑀫𑀸𑀦𑀺 𑀧𑀜𑁆𑀘𑁂𑀯 𑀯𑀺𑀲𑁆𑀲𑀚𑁆𑀚𑀺𑀢𑀸𑀦𑀺. 𑀢𑁂𑀲𑀼 𑀧𑀞𑀫𑀁 𑀯𑀺𑀲𑁆𑀲𑀚𑁆𑀚𑁂𑀢𑀩𑁆𑀩𑀁 𑀢𑀸𑀯 𑀯𑀺𑀲𑁆𑀲𑀚𑁆𑀚𑀺𑀢𑀁. 𑀤𑀼𑀢𑀺𑀬𑀁 𑀓𑀺𑀜𑁆𑀘𑀸𑀧𑀺 𑀧𑀞𑀫𑁂𑀦 𑀲𑀤𑀺𑀲𑀯𑀺𑀲𑁆𑀲𑀚𑁆𑀚𑀦𑀁, 𑀘𑀓𑁆𑀔𑀼𑀲𑁄𑀢𑀸𑀬𑀢𑀦𑀸𑀦𑀁 𑀧𑀯𑀢𑁆𑀢𑀺𑀝𑁆𑀞𑀸𑀦𑁂 𑀧𑀦 𑀖𑀸𑀦𑀸𑀬𑀢𑀦𑀲𑁆𑀲 𑀦 𑀏𑀓𑀦𑁆𑀢𑁂𑀦 𑀧𑀯𑀢𑁆𑀢𑀺𑀢𑁄 ‘‘𑀓𑀣𑀁 𑀦𑀼 𑀔𑁄 𑀏𑀢𑀁 𑀯𑀺𑀲𑁆𑀲𑀚𑁆𑀚𑁂𑀢𑀩𑁆𑀩’’𑀦𑁆𑀢𑀺 𑀯𑀺𑀫𑀢𑀺𑀦𑀺𑀯𑀸𑀭𑀡𑀢𑁆𑀣𑀁 𑀯𑀺𑀲𑁆𑀲𑀚𑁆𑀚𑀺𑀢𑀁. 𑀭𑀽𑀧𑀸𑀬𑀢𑀦𑀫𑀦𑀸𑀬𑀢𑀦𑀥𑀫𑁆𑀫𑀸𑀬𑀢𑀦𑁂𑀳𑀺 𑀲𑀤𑁆𑀥𑀺𑀁 𑀢𑀻𑀡𑀺 𑀬𑀫𑀓𑀸𑀦𑀺 𑀅𑀲𑀤𑀺𑀲𑀯𑀺𑀲𑁆𑀲𑀚𑁆𑀚𑀦𑀢𑁆𑀢𑀸 𑀯𑀺𑀲𑁆𑀲𑀚𑁆𑀚𑀺𑀢𑀸𑀦𑀺. 𑀲𑁂𑀲𑁂𑀲𑀼 𑀚𑀺𑀯𑁆𑀳𑀸𑀬𑀢𑀦𑀓𑀸𑀬𑀸𑀬𑀢𑀦𑁂𑀳𑀺 𑀢𑀸𑀯 𑀲𑀤𑁆𑀥𑀺𑀁 𑀤𑁆𑀯𑁂 𑀬𑀫𑀓𑀸𑀦𑀺 𑀧𑀼𑀭𑀺𑀫𑁂𑀳𑀺 𑀤𑁆𑀯𑀻𑀳𑀺 𑀲𑀤𑁆𑀥𑀺𑀁 𑀲𑀤𑀺𑀲𑀯𑀺𑀲𑁆𑀲𑀚𑁆𑀚𑀦𑀸𑀦𑀺. 𑀲𑀤𑁆𑀤𑀸𑀬𑀢𑀦𑀲𑁆𑀲 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀅𑀦𑀼𑀧𑁆𑀧𑀢𑁆𑀢𑀺𑀢𑁄 𑀢𑁂𑀦 𑀲𑀤𑁆𑀥𑀺𑀁 𑀬𑀫𑀓𑀲𑁆𑀲 𑀯𑀺𑀲𑁆𑀲𑀚𑁆𑀚𑀦𑀫𑁂𑀯 𑀦𑀢𑁆𑀣𑀺. 𑀕𑀦𑁆𑀥𑀭𑀲𑀨𑁄𑀝𑁆𑀞𑀩𑁆𑀩𑀸𑀬𑀢𑀦𑁂𑀳𑀺𑀧𑀺 𑀲𑀤𑁆𑀥𑀺𑀁 𑀢𑀻𑀡𑀺 𑀬𑀫𑀓𑀸𑀦𑀺 𑀧𑀼𑀭𑀺𑀫𑁂𑀳𑀺 𑀤𑁆𑀯𑀻𑀳𑀺 𑀲𑀤𑀺𑀲𑀯𑀺𑀲𑁆𑀲𑀚𑁆𑀚𑀦𑀸𑀦𑁂𑀯 𑀳𑁄𑀦𑁆𑀢𑀻𑀢𑀺 𑀢𑀦𑁆𑀢𑀺𑀬𑀸 𑀮𑀳𑀼𑀪𑀸𑀯𑀢𑁆𑀣𑀁 𑀲𑀗𑁆𑀔𑀺𑀢𑁆𑀢𑀸𑀦𑀺. 𑀲𑁄𑀢𑀸𑀬𑀢𑀦𑀫𑀽𑀮𑀓𑁂𑀲𑀼 𑀬𑀁 𑀮𑀩𑁆𑀪𑀢𑀺, 𑀢𑀁 𑀧𑀼𑀭𑀺𑀫𑁂𑀳𑀺 𑀲𑀤𑀺𑀲𑀯𑀺𑀲𑁆𑀲𑀚𑁆𑀚𑀦𑀫𑁂𑀯𑀸𑀢𑀺 𑀏𑀓𑀫𑁆𑀧𑀺 𑀧𑀸𑀴𑀺𑀁 𑀦𑀸𑀭𑀼𑀴𑁆𑀳𑀁. 𑀖𑀸𑀦𑀸𑀬𑀢𑀦𑀫𑀽𑀮𑀓𑁂𑀲𑀼 𑀭𑀽𑀧𑀸𑀬𑀢𑀦𑁂𑀦 𑀲𑀤𑁆𑀥𑀺𑀁 𑀏𑀓𑀁, 𑀫𑀦𑀸𑀬𑀢𑀦𑀥𑀫𑁆𑀫𑀸𑀬𑀢𑀦𑁂𑀳𑀺 𑀲𑀤𑁆𑀥𑀺𑀁 𑀤𑁆𑀯𑁂𑀢𑀺 𑀢𑀻𑀡𑀺 𑀬𑀫𑀓𑀸𑀦𑀺 𑀧𑀸𑀴𑀺𑀁 𑀆𑀭𑀼𑀴𑁆𑀳𑀸𑀦𑀺. 𑀲𑁂𑀲𑀸𑀦𑀺 𑀖𑀸𑀦𑀸𑀬𑀢𑀦𑀬𑀫𑀓𑁂𑀦 𑀲𑀤𑀺𑀲𑀯𑀺𑀲𑁆𑀲𑀚𑁆𑀚𑀦𑀢𑁆𑀢𑀸 𑀦𑀸𑀭𑀼𑀴𑁆𑀳𑀸𑀦𑀺. 𑀢𑀣𑀸 𑀚𑀺𑀯𑁆𑀳𑀸𑀬𑀢𑀦𑀓𑀸𑀬𑀸𑀬𑀢𑀦𑀫𑀽𑀮𑀓𑀸𑀦𑀺. 𑀭𑀽𑀧𑀸𑀬𑀢𑀦𑀫𑀽𑀮𑀓𑁂𑀲𑀼 𑀫𑀦𑀸𑀬𑀢𑀦𑀥𑀫𑁆𑀫𑀸𑀬𑀢𑀦𑁂𑀳𑀺 𑀲𑀤𑁆𑀥𑀺𑀁 𑀤𑁆𑀯𑁂𑀬𑁂𑀯 𑀯𑀺𑀲𑁆𑀲𑀚𑁆𑀚𑀺𑀢𑀸𑀦𑀺. 𑀕𑀦𑁆𑀥𑀭𑀲𑀨𑁄𑀝𑁆𑀞𑀩𑁆𑀩𑁂𑀳𑀺 𑀧𑀦 𑀲𑀤𑁆𑀥𑀺𑀁 𑀢𑀻𑀡𑀺 𑀭𑀽𑀧𑀸𑀬𑀢𑀦𑀫𑀦𑀸𑀬𑀢𑀦𑁂𑀳𑀺 𑀲𑀤𑁆𑀥𑀺𑀁 𑀲𑀤𑀺𑀲𑀯𑀺𑀲𑁆𑀲𑀚𑁆𑀚𑀦𑀸𑀦𑀺. 𑀬𑀣𑁂𑀯 𑀳𑁂𑀢𑁆𑀣 ‘‘𑀲𑀭𑀽𑀧𑀓𑀸𑀦𑀁 𑀅𑀘𑀺𑀢𑁆𑀢𑀓𑀸𑀦’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁, 𑀢𑀣𑀸 𑀇𑀥𑀸𑀧𑀺 ‘‘𑀲𑀭𑀽𑀧𑀓𑀸𑀦𑀁 𑀅𑀕𑀦𑁆𑀥𑀓𑀸𑀦𑀁, 𑀅𑀭𑀲𑀓𑀸𑀦𑀁 𑀅𑀨𑁄𑀝𑁆𑀞𑀩𑁆𑀩𑀓𑀸𑀦’’𑀦𑁆𑀢𑀺 𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀕𑀦𑁆𑀥𑀸𑀤𑀻𑀦𑀺 𑀘𑁂𑀢𑁆𑀣 𑀆𑀬𑀢𑀦𑀪𑀽𑀢𑀸𑀦𑁂𑀯 𑀅𑀥𑀺𑀧𑁆𑀧𑁂𑀢𑀸𑀦𑀺. 𑀢𑀲𑁆𑀫𑀸 ‘‘𑀲𑀭𑀽𑀧𑀓𑀸𑀦𑀁 𑀲𑀕𑀦𑁆𑀥𑀸𑀬𑀢𑀦𑀸𑀦’’𑀦𑁆𑀢𑀺 𑀆𑀬𑀢𑀦𑀯𑀲𑁂𑀦𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑀲𑀤𑁆𑀤𑀸𑀬𑀢𑀦𑀫𑀽𑀮𑀓𑀸𑀦𑀺 𑀅𑀢𑁆𑀣𑀸𑀪𑀸𑀯𑀢𑁄 𑀧𑀸𑀴𑀺𑀁 𑀦𑀸𑀭𑀼𑀴𑁆𑀳𑀸𑀦𑁂𑀯. 𑀕𑀦𑁆𑀥𑀭𑀲𑀨𑁄𑀝𑁆𑀞𑀩𑁆𑀩𑀫𑀽𑀮𑀓𑀸𑀦𑀺 𑀘𑀢𑁆𑀢𑀸𑀭𑀺 𑀢𑀻𑀡𑀺 𑀤𑁆𑀯𑁂 𑀘 𑀳𑁂𑀝𑁆𑀞𑀺𑀫𑁂𑀳𑀺 𑀲𑀤𑀺𑀲𑀯𑀺𑀲𑁆𑀲𑀚𑁆𑀚𑀦𑀢𑁆𑀢𑀸 𑀧𑀸𑀴𑀺𑀁 𑀦𑀸𑀭𑀼𑀴𑁆𑀳𑀸𑀦𑀺. 𑀫𑀦𑀸𑀬𑀢𑀦𑀫𑀽𑀮𑀓𑀁 𑀯𑀺𑀲𑁆𑀲𑀚𑁆𑀚𑀺𑀢𑀫𑁂𑀯𑀸𑀢𑀺 𑀏𑀯𑀫𑁂𑀢𑀸𑀦𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀓𑀸𑀮𑁂 𑀧𑀼𑀕𑁆𑀕𑀮𑀯𑀸𑀭𑀲𑁆𑀲 𑀅𑀦𑀼𑀮𑁄𑀫𑀦𑀬𑁂 𑀓𑀢𑀺𑀧𑀬𑀬𑀫𑀓𑀯𑀺𑀲𑁆𑀲𑀚𑁆𑀚𑀦𑁂𑀦𑁂𑀯 𑀙𑀲𑀝𑁆𑀞𑀺𑀬𑀫𑀓𑀸𑀦𑀺 𑀯𑀺𑀲𑁆𑀲𑀚𑁆𑀚𑀺𑀢𑀸𑀦𑀺 𑀦𑀸𑀫 𑀳𑁄𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀬𑀣𑀸 𑀘 𑀧𑀼𑀕𑁆𑀕𑀮𑀯𑀸𑀭𑁂, 𑀏𑀯𑀁 𑀑𑀓𑀸𑀲𑀯𑀸𑀭𑁂𑀧𑀺 𑀧𑀼𑀕𑁆𑀕𑀮𑁄𑀓𑀸𑀲𑀯𑀸𑀭𑁂𑀧𑀺 𑀙𑀲𑀝𑁆𑀞𑀻𑀢𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀓𑀸𑀮𑁂 𑀢𑀻𑀲𑀼 𑀯𑀸𑀭𑁂𑀲𑀼 𑀅𑀦𑀼𑀮𑁄𑀫𑀦𑀬𑁂 𑀅𑀝𑁆𑀞𑀦𑀯𑀼𑀢𑀺𑀲𑀢𑀁 𑀬𑀫𑀓𑀸𑀦𑀺 𑀳𑁄𑀦𑁆𑀢𑀺. 𑀬𑀣𑀸 𑀘 𑀅𑀦𑀼𑀮𑁄𑀫𑀦𑀬𑁂, 𑀏𑀯𑀁 𑀧𑀝𑀺𑀮𑁄𑀫𑀦𑀬𑁂𑀧𑀻𑀢𑀺 𑀲𑀩𑁆𑀩𑀸𑀦𑀺𑀧𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀓𑀸𑀮𑁂 𑀙𑀦𑁆𑀦𑀯𑀼𑀢𑀸𑀥𑀺𑀓𑀸𑀦𑀺 𑀢𑀻𑀡𑀺 𑀬𑀫𑀓𑀲𑀢𑀸𑀦𑀺 𑀳𑁄𑀦𑁆𑀢𑀺. 𑀢𑁂𑀲𑀼 𑀤𑁆𑀯𑀸𑀦𑀯𑀼𑀢𑀸𑀥𑀺𑀓𑀸𑀦𑀺 𑀲𑀢𑁆𑀢 𑀧𑀼𑀘𑁆𑀙𑀸𑀲𑀢𑀸𑀦𑀺, 𑀘𑀢𑀼𑀭𑀸𑀲𑀻𑀢𑀸𑀥𑀺𑀓𑀸𑀦𑀺 𑀘 𑀧𑀦𑁆𑀦𑀭𑀲 𑀅𑀢𑁆𑀣𑀲𑀢𑀸𑀦𑀺 𑀳𑁄𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀏𑀯𑀁 𑀲𑁂𑀲𑁂𑀲𑀼𑀧𑀺 𑀧𑀜𑁆𑀘𑀲𑀼 𑀓𑀸𑀮𑀪𑁂𑀤𑁂𑀲𑀽𑀢𑀺 𑀲𑀩𑁆𑀩𑀸𑀦𑀺𑀧𑀺 𑀙𑀲𑀢𑁆𑀢𑀢𑀸𑀥𑀺𑀓𑀸𑀦𑀺 𑀢𑁂𑀯𑀻𑀲𑀢𑀺 𑀬𑀫𑀓𑀲𑀢𑀸𑀦𑀺. 𑀢𑀢𑁄 𑀤𑀺𑀕𑀼𑀡𑀸 𑀧𑀼𑀘𑁆𑀙𑀸, 𑀢𑀢𑁄 𑀤𑀺𑀕𑀼𑀡𑀸 𑀅𑀢𑁆𑀣𑀸𑀢𑀺 𑀇𑀤𑀫𑁂𑀢𑁆𑀣 𑀉𑀧𑁆𑀧𑀸𑀤𑀯𑀸𑀭𑁂 𑀧𑀸𑀴𑀺𑀯𑀯𑀢𑁆𑀣𑀸𑀦𑀁. 𑀦𑀺𑀭𑁄𑀥𑀯𑀸𑀭𑀉𑀧𑁆𑀧𑀸𑀤𑀦𑀺𑀭𑁄𑀥𑀯𑀸𑀭𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄𑀢𑀺. 𑀲𑀩𑁆𑀩𑀲𑁆𑀫𑀺𑀫𑁆𑀧𑀺 𑀧𑀯𑀢𑁆𑀢𑀺𑀯𑀸𑀭𑁂 𑀅𑀝𑁆𑀞𑀯𑀻𑀲𑀸𑀦𑀺 𑀏𑀓𑀲𑀢𑁆𑀢𑀢𑀺 𑀬𑀫𑀓𑀲𑀢𑀸𑀦𑀺. 𑀢𑀢𑁄 𑀤𑀺𑀕𑀼𑀡𑀸 𑀧𑀼𑀘𑁆𑀙𑀸, 𑀢𑀢𑁄 𑀤𑀺𑀕𑀼𑀡𑀸 𑀅𑀢𑁆𑀣𑀸 𑀯𑁂𑀤𑀺𑀢𑀩𑁆𑀩𑀸. 𑀧𑀸𑀴𑀺 𑀧𑀦 𑀫𑀦𑀸𑀬𑀢𑀦𑀁 𑀥𑀫𑁆𑀫𑀸𑀬𑀢𑀦𑀜𑁆𑀘 𑀏𑀓𑀲𑀤𑀺𑀲𑀁, 𑀦𑀸𑀦𑀁 𑀦𑀢𑁆𑀣𑀺. 𑀉𑀧𑀭𑀺 𑀧𑀦 ‘‘𑀯𑀸𑀭𑀲𑀗𑁆𑀔𑁂𑀧𑁄 𑀳𑁄𑀢𑀻’’𑀢𑀺𑀆𑀤𑀻𑀦𑀺 𑀯𑀢𑁆𑀯𑀸 𑀢𑀢𑁆𑀣 𑀢𑀢𑁆𑀣 𑀲𑀗𑁆𑀔𑀺𑀢𑁆𑀢𑀸. 𑀢𑀲𑁆𑀫𑀸 𑀬𑀁 𑀢𑀢𑁆𑀣 𑀢𑀢𑁆𑀣 𑀲𑀗𑁆𑀔𑀺𑀢𑁆𑀢𑀁, 𑀢𑀁 𑀲𑀩𑁆𑀩𑀁 𑀅𑀲𑀫𑁆𑀫𑀼𑀬𑁆𑀳𑀦𑁆𑀢𑁂𑀳𑀺 𑀲𑀮𑁆𑀮𑀓𑁆𑀔𑁂𑀢𑀩𑁆𑀩𑀁.

𑀅𑀢𑁆𑀣𑀯𑀺𑀦𑀺𑀘𑁆𑀙𑀬𑁂 𑀧𑀦𑁂𑀢𑁆𑀣 𑀇𑀤𑀁 𑀦𑀬𑀫𑀼𑀔𑀁. 𑀲𑀘𑀓𑁆𑀔𑀼𑀓𑀸𑀦𑀁 𑀅𑀲𑁄𑀢𑀓𑀸𑀦𑀦𑁆𑀢𑀺 𑀅𑀧𑀸𑀬𑁂 𑀚𑀸𑀢𑀺𑀩𑀥𑀺𑀭𑀑𑀧𑀧𑀸𑀢𑀺𑀓𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀲𑁄 𑀳𑀺 𑀲𑀘𑀓𑁆𑀔𑀼𑀓𑁄 𑀅𑀲𑁄𑀢𑀓𑁄 𑀳𑀼𑀢𑁆𑀯𑀸 𑀉𑀧𑀧𑀚𑁆𑀚𑀢𑀺. 𑀬𑀣𑀸𑀳 𑁋 ‘‘𑀓𑀸𑀫𑀥𑀸𑀢𑀼𑀬𑀸 𑀉𑀧𑀧𑀢𑁆𑀢𑀺𑀓𑁆𑀔𑀡𑁂 𑀓𑀲𑁆𑀲𑀘𑀺 𑀅𑀧𑀭𑀸𑀦𑀺 𑀤𑀲𑀸𑀬𑀢𑀦𑀸𑀦𑀺 𑀧𑀸𑀢𑀼𑀪𑀯𑀦𑁆𑀢𑀺. 𑀑𑀧𑀧𑀸𑀢𑀺𑀓𑀸𑀦𑀁 𑀧𑁂𑀢𑀸𑀦𑀁, 𑀑𑀧𑀧𑀸𑀢𑀺𑀓𑀸𑀦𑀁 𑀅𑀲𑀼𑀭𑀸𑀦𑀁, 𑀑𑀧𑀧𑀸𑀢𑀺𑀓𑀸𑀦𑀁 𑀢𑀺𑀭𑀘𑁆𑀙𑀸𑀦𑀕𑀢𑀸𑀦𑀁, 𑀑𑀧𑀧𑀸𑀢𑀺𑀓𑀸𑀦𑀁 𑀦𑁂𑀭𑀬𑀺𑀓𑀸𑀦𑀁; 𑀚𑀘𑁆𑀘𑀩𑀥𑀺𑀭𑀸𑀦𑀁 𑀉𑀧𑀧𑀢𑁆𑀢𑀺𑀓𑁆𑀔𑀡𑁂 𑀤𑀲𑀸𑀬𑀢𑀦𑀸𑀦𑀺 𑀧𑀸𑀢𑀼𑀪𑀯𑀦𑁆𑀢𑀺, 𑀘𑀓𑁆𑀔𑀸𑀬𑀢𑀦𑀁 𑀭𑀽𑀧𑀖𑀸𑀦𑀕𑀦𑁆𑀥𑀚𑀺𑀯𑁆𑀳𑀸𑀭𑀲𑀓𑀸𑀬𑀨𑁄𑀝𑁆𑀞𑀩𑁆𑀩𑀸𑀬𑀢𑀦𑀁 𑀫𑀦𑀸𑀬𑀢𑀦𑀁 𑀥𑀫𑁆𑀫𑀸𑀬𑀢𑀦’’𑀦𑁆𑀢𑀺. 𑀲𑀘𑀓𑁆𑀔𑀼𑀓𑀸𑀦𑀁 𑀲𑀲𑁄𑀢𑀓𑀸𑀦𑀦𑁆𑀢𑀺 𑀲𑀼𑀕𑀢𑀺𑀤𑀼𑀕𑁆𑀕𑀢𑀻𑀲𑀼 𑀧𑀭𑀺𑀧𑀼𑀡𑁆𑀡𑀸𑀬𑀢𑀦𑁂 𑀘 𑀑𑀧𑀧𑀸𑀢𑀺𑀓𑁂 𑀭𑀽𑀧𑀻𑀩𑁆𑀭𑀳𑁆𑀫𑀸𑀦𑁄 𑀘 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑁂 𑀳𑀺 𑀲𑀘𑀓𑁆𑀔𑀼𑀓𑀸 𑀲𑀲𑁄𑀢𑀓𑀸 𑀳𑀼𑀢𑁆𑀯𑀸 𑀉𑀧𑀧𑀚𑁆𑀚𑀦𑁆𑀢𑀺. 𑀬𑀣𑀸𑀳 𑁋 ‘‘𑀓𑀸𑀫𑀥𑀸𑀢𑀼𑀬𑀸 𑀉𑀧𑀧𑀢𑁆𑀢𑀺𑀓𑁆𑀔𑀡𑁂 𑀓𑀲𑁆𑀲𑀘𑀺 𑀏𑀓𑀸𑀤𑀲𑀸𑀬𑀢𑀦𑀸𑀦𑀺 𑀧𑀸𑀢𑀼𑀪𑀯𑀦𑁆𑀢𑀺; 𑀓𑀸𑀫𑀸𑀯𑀘𑀭𑀸𑀦𑀁 𑀤𑁂𑀯𑀸𑀦𑀁, 𑀧𑀞𑀫𑀓𑀧𑁆𑀧𑀺𑀓𑀸𑀦𑀁 𑀫𑀦𑀼𑀲𑁆𑀲𑀸𑀦𑀁, 𑀑𑀧𑀧𑀸𑀢𑀺𑀓𑀸𑀦𑀁 𑀧𑁂𑀢𑀸𑀦𑀁, 𑀑𑀧𑀧𑀸𑀢𑀺𑀓𑀸𑀦𑀁 𑀅𑀲𑀼𑀭𑀸𑀦𑀁, 𑀑𑀧𑀧𑀸𑀢𑀺𑀓𑀸𑀦𑀁 𑀢𑀺𑀭𑀘𑁆𑀙𑀸𑀦𑀕𑀢𑀸𑀦𑀁, 𑀑𑀧𑀧𑀸𑀢𑀺𑀓𑀸𑀦𑀁 𑀦𑁂𑀭𑀬𑀺𑀓𑀸𑀦𑀁, 𑀧𑀭𑀺𑀧𑀼𑀡𑁆𑀡𑀸𑀬𑀢𑀦𑀸𑀦𑀁. 𑀭𑀽𑀧𑀥𑀸𑀢𑀼𑀬𑀸 𑀉𑀧𑀧𑀢𑁆𑀢𑀺𑀓𑁆𑀔𑀡𑁂 𑀧𑀜𑁆𑀘𑀸𑀬𑀢𑀦𑀸𑀦𑀺 𑀧𑀸𑀢𑀼𑀪𑀯𑀦𑁆𑀢𑀺, 𑀘𑀓𑁆𑀔𑀸𑀬𑀢𑀦𑀁 𑀭𑀽𑀧𑀲𑁄𑀢𑀫𑀦𑀸𑀬𑀢𑀦𑀁 𑀥𑀫𑁆𑀫𑀸𑀬𑀢𑀦’’𑀦𑁆𑀢𑀺.

𑀅𑀖𑀸𑀦𑀓𑀸𑀦𑀦𑁆𑀢𑀺 𑀩𑁆𑀭𑀳𑁆𑀫𑀧𑀸𑀭𑀺𑀲𑀚𑁆𑀚𑀸𑀤𑀬𑁄 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑁂 𑀳𑀺 𑀲𑀘𑀓𑁆𑀔𑀼𑀓𑀸 𑀅𑀖𑀸𑀦𑀓𑀸 𑀳𑀼𑀢𑁆𑀯𑀸 𑀉𑀧𑀧𑀚𑁆𑀚𑀦𑁆𑀢𑀺. 𑀓𑀸𑀫𑀥𑀸𑀢𑀼𑀬𑀁 𑀧𑀦 𑀅𑀖𑀸𑀦𑀓𑁄 𑀑𑀧𑀧𑀸𑀢𑀺𑀓𑁄 𑀦𑀢𑁆𑀣𑀺. 𑀬𑀤𑀺 𑀪𑀯𑁂𑀬𑁆𑀬 ‘‘𑀓𑀲𑁆𑀲𑀘𑀺 𑀅𑀝𑁆𑀞𑀸𑀬𑀢𑀦𑀸𑀦𑀺 𑀧𑀸𑀢𑀼𑀪𑀯𑀦𑁆𑀢𑀻’’𑀢𑀺 𑀯𑁂𑀤𑀬𑁆𑀬. 𑀬𑁄 𑀕𑀩𑁆𑀪𑀲𑁂𑀬𑁆𑀬𑀓𑁄 𑀧𑀦 𑀅𑀖𑀸𑀦𑀓𑁄 𑀲𑀺𑀬𑀸, 𑀲𑁄 ‘‘𑀲𑀘𑀓𑁆𑀔𑀼𑀓𑀸𑀦’’𑀦𑁆𑀢𑀺 𑀯𑀘𑀦𑀢𑁄 𑀇𑀥 𑀅𑀦𑀥𑀺𑀧𑁆𑀧𑁂𑀢𑁄. 𑀲𑀘𑀓𑁆𑀔𑀼𑀓𑀸𑀦𑀁 𑀲𑀖𑀸𑀦𑀓𑀸𑀦𑀦𑁆𑀢𑀺 𑀚𑀘𑁆𑀘𑀩𑀥𑀺𑀭𑀫𑁆𑀧𑀺 𑀧𑀭𑀺𑀧𑀼𑀡𑁆𑀡𑀸𑀬𑀢𑀦𑀫𑁆𑀧𑀺 𑀑𑀧𑀧𑀸𑀢𑀺𑀓𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀲𑀖𑀸𑀦𑀓𑀸𑀦𑀁 𑀅𑀘𑀓𑁆𑀔𑀼𑀓𑀸𑀦𑀦𑁆𑀢𑀺 𑀚𑀘𑁆𑀘𑀦𑁆𑀥𑀫𑁆𑀧𑀺 𑀚𑀘𑁆𑀘𑀩𑀥𑀺𑀭𑀫𑁆𑀧𑀺 𑀑𑀧𑀧𑀸𑀢𑀺𑀓𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀫𑁂𑀯. 𑀲𑀖𑀸𑀦𑀓𑀸𑀦𑀁 𑀲𑀘𑀓𑁆𑀔𑀼𑀓𑀸𑀦𑀦𑁆𑀢𑀺 𑀧𑀭𑀺𑀧𑀼𑀡𑁆𑀡𑀸𑀬𑀢𑀦𑀫𑁂𑀯 𑀑𑀧𑀧𑀸𑀢𑀺𑀓𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁.

𑀲𑀭𑀽𑀧𑀓𑀸𑀦𑀁 𑀅𑀘𑀓𑁆𑀔𑀼𑀓𑀸𑀦𑀦𑁆𑀢𑀺 𑀏𑀢𑁆𑀣 𑀚𑀘𑁆𑀘𑀦𑁆𑀥𑀚𑀘𑁆𑀘𑀩𑀥𑀺𑀭𑀑𑀧𑀧𑀸𑀢𑀺𑀓𑁂𑀲𑀼 𑀅𑀜𑁆𑀜𑀢𑀭𑁄𑀧𑀺 𑀕𑀩𑁆𑀪𑀲𑁂𑀬𑁆𑀬𑀓𑁄𑀧𑀺 𑀮𑀩𑁆𑀪𑀢𑀺𑀬𑁂𑀯. 𑀲𑀘𑀺𑀢𑁆𑀢𑀓𑀸𑀦𑀁 𑀅𑀘𑀓𑁆𑀔𑀼𑀓𑀸𑀦𑀦𑁆𑀢𑀺 𑀏𑀢𑁆𑀣 𑀳𑁂𑀝𑁆𑀞𑀸 𑀯𑀼𑀢𑁆𑀢𑁂𑀳𑀺 𑀚𑀘𑁆𑀘𑀦𑁆𑀥𑀸𑀤𑀻𑀳𑀺 𑀢𑀻𑀳𑀺 𑀲𑀤𑁆𑀥𑀺𑀁 𑀅𑀭𑀽𑀧𑀺𑀦𑁄𑀧𑀺 𑀮𑀩𑁆𑀪𑀦𑁆𑀢𑀺. 𑀅𑀘𑀓𑁆𑀔𑀼𑀓𑀸𑀦𑀦𑁆𑀢𑀺 𑀏𑀢𑁆𑀣 𑀧𑀼𑀭𑀺𑀫𑀧𑀤𑁂 𑀯𑀼𑀢𑁆𑀢𑁂𑀳𑀺 𑀘𑀢𑀽𑀳𑀺 𑀲𑀤𑁆𑀥𑀺𑀁 𑀅𑀲𑀜𑁆𑀜𑀲𑀢𑁆𑀢𑀸𑀧𑀺 𑀮𑀩𑁆𑀪𑀦𑁆𑀢𑀺. 𑀲𑀭𑀽𑀧𑀓𑀸𑀦𑀁 𑀅𑀖𑀸𑀦𑀓𑀸𑀦𑀦𑁆𑀢𑀺 𑀏𑀢𑁆𑀣 𑀕𑀩𑁆𑀪𑀲𑁂𑀬𑁆𑀬𑀓𑀸 𑀘 𑀅𑀲𑀜𑁆𑀜𑀲𑀢𑁆𑀢𑀸 𑀘 𑀲𑁂𑀲𑀭𑀽𑀧𑀻𑀩𑁆𑀭𑀳𑁆𑀫𑀸𑀦𑁄 𑀘 𑀮𑀩𑁆𑀪𑀦𑁆𑀢𑀺. 𑀲𑀘𑀺𑀢𑁆𑀢𑀓𑀸𑀦𑀁 𑀅𑀖𑀸𑀦𑀓𑀸𑀦𑀦𑁆𑀢𑀺 𑀏𑀢𑁆𑀣 𑀕𑀩𑁆𑀪𑀲𑁂𑀬𑁆𑀬𑀓𑀸 𑀘 𑀭𑀽𑀧𑀸𑀭𑀽𑀧𑀩𑁆𑀭𑀳𑁆𑀫𑀸𑀦𑁄 𑀘 𑀮𑀩𑁆𑀪𑀦𑁆𑀢𑀺. 𑀅𑀘𑀺𑀢𑁆𑀢𑀓𑀸𑀦𑀁 𑀅𑀭𑀽𑀧𑀓𑀸𑀦𑀦𑁆𑀢𑀺𑀧𑀤𑁂𑀲𑀼 𑀧𑀦 𑀏𑀓𑀯𑁄𑀓𑀸𑀭𑀘𑀢𑀼𑀯𑁄𑀓𑀸𑀭𑀲𑀢𑁆𑀢𑀸𑀯 𑀮𑀩𑁆𑀪𑀦𑁆𑀢𑀻𑀢𑀺 𑀇𑀫𑀺𑀦𑀸 𑀦𑀬𑁂𑀦 𑀲𑀩𑁆𑀩𑁂𑀲𑀼 𑀧𑀼𑀕𑁆𑀕𑀮𑀯𑀸𑀭𑁂𑀲𑀼 𑀧𑀼𑀕𑁆𑀕𑀮𑀯𑀺𑀪𑀸𑀕𑁄 𑀯𑁂𑀤𑀺𑀢𑀩𑁆𑀩𑁄.

𑁨𑁨-𑁨𑁫𑁪. 𑀑𑀓𑀸𑀲𑀯𑀸𑀭𑁂 𑀬𑀢𑁆𑀣 𑀘𑀓𑁆𑀔𑀸𑀬𑀢𑀦𑀦𑁆𑀢𑀺 𑀭𑀽𑀧𑀻𑀩𑁆𑀭𑀳𑁆𑀫𑀮𑁄𑀓𑀁 𑀧𑀼𑀘𑁆𑀙𑀢𑀺. 𑀢𑁂𑀦𑁂𑀯 𑀆𑀫𑀦𑁆𑀢𑀸𑀢𑀺 𑀯𑀼𑀢𑁆𑀢𑀁. 𑀢𑀲𑁆𑀫𑀺𑀜𑁆𑀳𑀺 𑀢𑀮𑁂 𑀦𑀺𑀬𑀫𑀢𑁄 𑀢𑀸𑀦𑀺 𑀆𑀬𑀢𑀦𑀸𑀦𑀺 𑀧𑀝𑀺𑀲𑀦𑁆𑀥𑀺𑀬𑀁 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀇𑀤𑀫𑁂𑀢𑁆𑀣 𑀦𑀬𑀫𑀼𑀔𑀁. 𑀇𑀫𑀺𑀦𑀸 𑀦𑀬𑀫𑀼𑀔𑁂𑀦 𑀲𑀓𑀮𑁂𑀧𑀺 𑀧𑀯𑀢𑁆𑀢𑀺𑀯𑀸𑀭𑁂 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀧𑀭𑀺𑀜𑁆𑀜𑀸𑀯𑀸𑀭𑁄 𑀔𑀦𑁆𑀥𑀬𑀫𑀓𑁂 𑀯𑀼𑀢𑁆𑀢𑀦𑀬𑁄𑀬𑁂𑀯𑀸𑀢𑀺.

𑀧𑀯𑀢𑁆𑀢𑀺𑀯𑀸𑀭𑀯𑀡𑁆𑀡𑀦𑀸.

𑀆𑀬𑀢𑀦𑀬𑀫𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.