𑁨. 𑀔𑀦𑁆𑀥𑀬𑀫𑀓𑀁

𑁧. 𑀧𑀡𑁆𑀡𑀢𑁆𑀢𑀺𑀉𑀤𑁆𑀤𑁂𑀲𑀯𑀸𑀭𑀯𑀡𑁆𑀡𑀦𑀸

𑁧. 𑀇𑀤𑀸𑀦𑀺 𑀫𑀽𑀮𑀬𑀫𑀓𑁂 𑀤𑁂𑀲𑀺𑀢𑁂𑀬𑁂𑀯 𑀓𑀼𑀲𑀮𑀸𑀤𑀺𑀥𑀫𑁆𑀫𑁂 𑀔𑀦𑁆𑀥𑀯𑀲𑁂𑀦 𑀲𑀗𑁆𑀕𑀡𑁆𑀳𑀺𑀢𑁆𑀯𑀸 𑀫𑀽𑀮𑀬𑀫𑀓𑀸𑀦𑀦𑁆𑀢𑀭𑀁 𑀤𑁂𑀲𑀺𑀢𑀲𑁆𑀲 𑀔𑀦𑁆𑀥𑀬𑀫𑀓𑀲𑁆𑀲 𑀯𑀡𑁆𑀡𑀦𑀸 𑀳𑁄𑀢𑀺. 𑀢𑀢𑁆𑀣 𑀧𑀸𑀴𑀺𑀯𑀯𑀢𑁆𑀣𑀸𑀦𑀁 𑀢𑀸𑀯 𑀏𑀯𑀁 𑀯𑁂𑀤𑀺𑀢𑀩𑁆𑀩𑀁 𑁋 𑀇𑀫𑀲𑁆𑀫𑀺𑀜𑁆𑀳𑀺 𑀔𑀦𑁆𑀥𑀬𑀫𑀓𑁂 𑀢𑀬𑁄 𑀫𑀳𑀸𑀯𑀸𑀭𑀸 𑀳𑁄𑀦𑁆𑀢𑀺 𑁋 𑀧𑀡𑁆𑀡𑀢𑁆𑀢𑀺𑀯𑀸𑀭𑁄, 𑀧𑀯𑀢𑁆𑀢𑀺𑀯𑀸𑀭𑁄, 𑀧𑀭𑀺𑀜𑁆𑀜𑀸𑀯𑀸𑀭𑁄𑀢𑀺. 𑀢𑁂𑀲𑀼 𑀧𑀡𑁆𑀡𑀢𑁆𑀢𑀺𑀯𑀸𑀭𑁄 𑀔𑀦𑁆𑀥𑀸𑀦𑀁 𑀦𑀸𑀫𑀸𑀪𑀺𑀥𑀸𑀦𑀲𑁄𑀥𑀦𑀯𑀲𑁂𑀦𑁂𑀯 𑀕𑀢𑀢𑁆𑀢𑀸 𑀧𑀡𑁆𑀡𑀢𑁆𑀢𑀺𑀯𑀸𑀭𑁄𑀢𑀺 𑀯𑀼𑀘𑁆𑀘𑀢𑀺. 𑀧𑀯𑀢𑁆𑀢𑀺𑀯𑀸𑀭𑁄 𑀢𑁂𑀦 𑀲𑁄𑀥𑀺𑀢𑀦𑀸𑀫𑀸𑀪𑀺𑀥𑀸𑀦𑀸𑀦𑀁 𑀔𑀦𑁆𑀥𑀸𑀦𑀁 𑀉𑀧𑁆𑀧𑀸𑀤𑀦𑀺𑀭𑁄𑀥𑀯𑀲𑁂𑀦 𑀧𑀯𑀢𑁆𑀢𑀺𑀁 𑀲𑁄𑀥𑀬𑀫𑀸𑀦𑁄 𑀕𑀢𑁄, 𑀢𑀲𑁆𑀫𑀸 𑀧𑀯𑀢𑁆𑀢𑀺𑀯𑀸𑀭𑁄𑀢𑀺 𑀯𑀼𑀘𑁆𑀘𑀢𑀺. 𑀧𑀭𑀺𑀜𑁆𑀜𑀸𑀯𑀸𑀭𑁄 𑀇𑀫𑀺𑀦𑀸𑀦𑀼𑀓𑁆𑀓𑀫𑁂𑀦 𑀧𑀯𑀢𑁆𑀢𑀸𑀦𑀁 𑀔𑀦𑁆𑀥𑀸𑀦𑀁 𑀲𑀗𑁆𑀔𑁂𑀧𑁂𑀦𑁂𑀯 𑀢𑀺𑀲𑁆𑀲𑁄 𑀧𑀭𑀺𑀜𑁆𑀜𑀸 𑀤𑀻𑀧𑀬𑀫𑀸𑀦𑁄 𑀕𑀢𑁄, 𑀢𑀲𑁆𑀫𑀸 𑀧𑀭𑀺𑀜𑁆𑀜𑀸𑀯𑀸𑀭𑁄𑀢𑀺 𑀯𑀼𑀘𑁆𑀘𑀢𑀺. 𑀢𑀢𑁆𑀣 𑀧𑀡𑁆𑀡𑀢𑁆𑀢𑀺𑀯𑀸𑀭𑁄 𑀉𑀤𑁆𑀤𑁂𑀲𑀦𑀺𑀤𑁆𑀤𑁂𑀲𑀯𑀲𑁂𑀦 𑀤𑁆𑀯𑀻𑀳𑀸𑀓𑀸𑀭𑁂𑀳𑀺 𑀯𑀯𑀢𑁆𑀣𑀺𑀢𑁄. 𑀇𑀢𑀭𑁂𑀲𑀼 𑀯𑀺𑀲𑀼𑀁 𑀉𑀤𑁆𑀤𑁂𑀲𑀯𑀸𑀭𑁄 𑀦𑀢𑁆𑀣𑀺. 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑀯𑀲𑁂𑀦 𑀏𑀓𑀥𑀸 𑀯𑀯𑀢𑁆𑀣𑀺𑀢𑀸. 𑀢𑀢𑁆𑀣 𑀧𑀜𑁆𑀘𑀓𑁆𑀔𑀦𑁆𑀥𑀸𑀢𑀺𑀧𑀤𑀁 𑀆𑀤𑀺𑀁 𑀓𑀢𑁆𑀯𑀸 𑀬𑀸𑀯 𑀦 𑀔𑀦𑁆𑀥𑀸, 𑀦 𑀲𑀗𑁆𑀔𑀸𑀭𑀸𑀢𑀺 𑀧𑀤𑀁 𑀢𑀸𑀯 𑀧𑀡𑁆𑀡𑀢𑁆𑀢𑀺𑀯𑀸𑀭𑀲𑁆𑀲 𑀉𑀤𑁆𑀤𑁂𑀲𑀯𑀸𑀭𑁄 𑀯𑁂𑀤𑀺𑀢𑀩𑁆𑀩𑁄. 𑀧𑀼𑀘𑁆𑀙𑀸𑀯𑀸𑀭𑁄𑀢𑀺𑀧𑀺 𑀢𑀲𑁆𑀲𑁂𑀯 𑀦𑀸𑀫𑀁. 𑀢𑀢𑁆𑀣 𑀧𑀜𑁆𑀘𑀓𑁆𑀔𑀦𑁆𑀥𑀸𑀢𑀺 𑀅𑀬𑀁 𑀬𑀫𑀓𑀯𑀲𑁂𑀦 𑀧𑀼𑀘𑁆𑀙𑀺𑀢𑀩𑁆𑀩𑀸𑀦𑀁 𑀔𑀦𑁆𑀥𑀸𑀦𑀁 𑀉𑀤𑁆𑀤𑁂𑀲𑁄. 𑀭𑀽𑀧𑀓𑁆𑀔𑀦𑁆𑀥𑁄…𑀧𑁂… 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄𑀢𑀺 𑀢𑁂𑀲𑀜𑁆𑀜𑁂𑀯 𑀧𑀪𑁂𑀤𑀢𑁄 𑀦𑀸𑀫𑀯𑀯𑀢𑁆𑀣𑀸𑀦𑀁.

𑁨-𑁩. 𑀇𑀤𑀸𑀦𑀺 𑀇𑀫𑁂𑀲𑀁 𑀔𑀦𑁆𑀥𑀸𑀦𑀁 𑀯𑀲𑁂𑀦 𑀧𑀤𑀲𑁄𑀥𑀦𑀯𑀸𑀭𑁄, 𑀧𑀤𑀲𑁄𑀥𑀦𑀫𑀽𑀮𑀘𑀓𑁆𑀓𑀯𑀸𑀭𑁄, 𑀲𑀼𑀤𑁆𑀥𑀔𑀦𑁆𑀥𑀯𑀸𑀭𑁄, 𑀲𑀼𑀤𑁆𑀥𑀔𑀦𑁆𑀥𑀫𑀽𑀮𑀘𑀓𑁆𑀓𑀯𑀸𑀭𑁄𑀢𑀺 𑀘𑀢𑁆𑀢𑀸𑀭𑁄 𑀦𑀬𑀯𑀸𑀭𑀸 𑀳𑁄𑀦𑁆𑀢𑀺. 𑀢𑀢𑁆𑀣 𑀭𑀽𑀧𑀁 𑀭𑀽𑀧𑀓𑁆𑀔𑀦𑁆𑀥𑁄, 𑀭𑀽𑀧𑀓𑁆𑀔𑀦𑁆𑀥𑁄 𑀭𑀽𑀧𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀧𑀤𑀫𑁂𑀯 𑀲𑁄𑀥𑁂𑀢𑁆𑀯𑀸 𑀕𑀢𑁄 𑀧𑀤𑀲𑁄𑀥𑀦𑀯𑀸𑀭𑁄 𑀦𑀸𑀫. 𑀲𑁄 𑀅𑀦𑀼𑀮𑁄𑀫𑀧𑀝𑀺𑀮𑁄𑀫𑀯𑀲𑁂𑀦 𑀤𑀼𑀯𑀺𑀥𑁄 𑀳𑁄𑀢𑀺. 𑀢𑀢𑁆𑀣 𑀅𑀦𑀼𑀮𑁄𑀫𑀯𑀸𑀭𑁂 ‘𑀭𑀽𑀧𑀁 𑀭𑀽𑀧𑀓𑁆𑀔𑀦𑁆𑀥𑁄, 𑀭𑀽𑀧𑀓𑁆𑀔𑀦𑁆𑀥𑁄 𑀭𑀽𑀧’𑀦𑁆𑀢𑀺𑀆𑀤𑀻𑀦𑀺 𑀧𑀜𑁆𑀘 𑀬𑀫𑀓𑀸𑀦𑀺. 𑀧𑀝𑀺𑀮𑁄𑀫𑀯𑀸𑀭𑁂𑀧𑀺 ‘𑀦 𑀭𑀽𑀧𑀁, 𑀦 𑀭𑀽𑀧𑀓𑁆𑀔𑀦𑁆𑀥𑁄; 𑀦 𑀭𑀽𑀧𑀓𑁆𑀔𑀦𑁆𑀥𑁄 𑀦 𑀭𑀽𑀧’𑀦𑁆𑀢𑀺𑀆𑀤𑀻𑀦𑀺 𑀧𑀜𑁆𑀘𑁂𑀯. 𑀢𑀢𑁄 𑀧𑀭𑀁 𑀢𑁂𑀲𑀜𑁆𑀜𑁂𑀯 𑀧𑀤𑀲𑁄𑀥𑀦𑀯𑀸𑀭𑁂 𑀲𑁄𑀥𑀺𑀢𑀸𑀦𑀁 𑀔𑀦𑁆𑀥𑀸𑀦𑀁 ‘𑀭𑀽𑀧𑀁 𑀭𑀽𑀧𑀓𑁆𑀔𑀦𑁆𑀥𑁄, 𑀔𑀦𑁆𑀥𑀸 𑀯𑁂𑀤𑀦𑀸𑀓𑁆𑀔𑀦𑁆𑀥𑁄’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀏𑀓𑁂𑀓𑀔𑀦𑁆𑀥𑀫𑀽𑀮𑀓𑀸𑀦𑀺 𑀘𑀢𑁆𑀢𑀸𑀭𑀺 𑀘𑀢𑁆𑀢𑀸𑀭𑀺 𑀘𑀓𑁆𑀓𑀸𑀦𑀺 𑀩𑀦𑁆𑀥𑀺𑀢𑁆𑀯𑀸 𑀕𑀢𑁄 𑀧𑀤𑀲𑁄𑀥𑀦𑀫𑀽𑀮𑀓𑀸𑀦𑀁 𑀘𑀓𑁆𑀓𑀸𑀦𑀁 𑀅𑀢𑁆𑀣𑀺𑀢𑀸𑀬 𑀧𑀤𑀲𑁄𑀥𑀦𑀫𑀽𑀮𑀘𑀓𑁆𑀓𑀯𑀸𑀭𑁄 𑀦𑀸𑀫. 𑀲𑁄𑀧𑀺 𑀅𑀦𑀼𑀮𑁄𑀫𑀧𑀝𑀺𑀮𑁄𑀫𑀯𑀲𑁂𑀦 𑀤𑀼𑀯𑀺𑀥𑁄 𑀳𑁄𑀢𑀺. 𑀢𑀢𑁆𑀣 𑀅𑀦𑀼𑀮𑁄𑀫𑀯𑀸𑀭𑁂 ‘𑀭𑀽𑀧𑀁 𑀭𑀽𑀧𑀓𑁆𑀔𑀦𑁆𑀥𑁄, 𑀔𑀦𑁆𑀥𑀸 𑀯𑁂𑀤𑀦𑀸𑀓𑁆𑀔𑀦𑁆𑀥𑁄’𑀢𑀺𑀆𑀤𑀻𑀦𑀺 𑀏𑀓𑁂𑀓𑀔𑀦𑁆𑀥𑀫𑀽𑀮𑀓𑀸𑀦𑀺 𑀘𑀢𑁆𑀢𑀸𑀭𑀺 𑀘𑀢𑁆𑀢𑀸𑀭𑀺 𑀓𑀢𑁆𑀯𑀸 𑀯𑀻𑀲𑀢𑀺 𑀬𑀫𑀓𑀸𑀦𑀺. 𑀧𑀝𑀺𑀮𑁄𑀫𑀯𑀸𑀭𑁂𑀧𑀺 ‘𑀦 𑀭𑀽𑀧𑀁, 𑀦 𑀭𑀽𑀧𑀓𑁆𑀔𑀦𑁆𑀥𑁄; 𑀦 𑀔𑀦𑁆𑀥𑀸 𑀦 𑀯𑁂𑀤𑀦𑀸𑀓𑁆𑀔𑀦𑁆𑀥𑁄’𑀢𑀺𑀆𑀤𑀻𑀦𑀺 𑀯𑀻𑀲𑀢𑀺𑀫𑁂𑀯.

𑀢𑀢𑁄 𑀧𑀭𑀁 𑀭𑀽𑀧𑀁 𑀔𑀦𑁆𑀥𑁄 𑀔𑀦𑁆𑀥𑀸 𑀭𑀽𑀧𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀲𑀼𑀤𑁆𑀥𑀔𑀦𑁆𑀥𑀯𑀲𑁂𑀦𑁂𑀯 𑀕𑀢𑁄 𑀲𑀼𑀤𑁆𑀥𑀔𑀦𑁆𑀥𑀯𑀸𑀭𑁄 𑀦𑀸𑀫. 𑀢𑀢𑁆𑀣 𑀔𑀦𑁆𑀥𑀸 𑀭𑀽𑀧𑀦𑁆𑀢𑀺𑀆𑀤𑀻𑀲𑀼 𑀔𑀦𑁆𑀥𑀸 𑀭𑀽𑀧𑀓𑁆𑀔𑀦𑁆𑀥𑁄, 𑀔𑀦𑁆𑀥𑀸 𑀯𑁂𑀤𑀦𑀸𑀓𑁆𑀔𑀦𑁆𑀥𑁄𑀢𑀺 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄. 𑀓𑀲𑁆𑀫𑀸? 𑀦𑀺𑀤𑁆𑀤𑁂𑀲𑀯𑀸𑀭𑁂 𑀏𑀯𑀁 𑀪𑀸𑀚𑀺𑀢𑀢𑁆𑀢𑀸. 𑀢𑀢𑁆𑀣 𑀳𑀺 ‘𑀭𑀽𑀧𑀁 𑀔𑀦𑁆𑀥𑁄𑀢𑀺 𑀆𑀫𑀦𑁆𑀢𑀸. 𑀔𑀦𑁆𑀥𑀸 𑀭𑀽𑀧𑀓𑁆𑀔𑀦𑁆𑀥𑁄𑀢𑀺 𑀭𑀽𑀧𑀓𑁆𑀔𑀦𑁆𑀥𑁄 𑀔𑀦𑁆𑀥𑁄 𑀘𑁂𑀯 𑀭𑀽𑀧𑀓𑁆𑀔𑀦𑁆𑀥𑁄 𑀘, 𑀅𑀯𑀲𑁂𑀲𑀸 𑀔𑀦𑁆𑀥𑀸 𑀦 𑀭𑀽𑀧𑀓𑁆𑀔𑀦𑁆𑀥𑁄’𑀢𑀺 𑀏𑀯𑀁 ‘𑀔𑀦𑁆𑀥𑀸 𑀭𑀽𑀧’𑀦𑁆𑀢𑀺𑀆𑀤𑀻𑀦𑀁 𑀔𑀦𑁆𑀥𑀸 𑀭𑀽𑀧𑀓𑁆𑀔𑀦𑁆𑀥𑁄𑀢𑀺𑀆𑀤𑀺𑀦𑀸 𑀦𑀬𑁂𑀦 𑀧𑀤𑀁 𑀉𑀤𑁆𑀥𑀭𑀺𑀢𑁆𑀯𑀸 𑀅𑀢𑁆𑀣𑁄 𑀯𑀺𑀪𑀢𑁆𑀢𑁄. 𑀢𑁂𑀦𑁂𑀯 𑀘 𑀓𑀸𑀭𑀡𑁂𑀦𑁂𑀲𑁂 𑀲𑀼𑀤𑁆𑀥𑀔𑀦𑁆𑀥𑀯𑀸𑀭𑁄𑀢𑀺 𑀯𑀼𑀢𑁆𑀢𑁄. 𑀯𑀘𑀦𑀲𑁄𑀥𑀦𑁂 𑀯𑀺𑀬 𑀳𑀺 𑀏𑀢𑁆𑀣 𑀦 𑀯𑀘𑀦𑀁 𑀧𑀫𑀸𑀡𑀁. 𑀬𑀣𑀸 𑀬𑀣𑀸 𑀧𑀦 𑀲𑀼𑀤𑁆𑀥𑀔𑀦𑁆𑀥𑀸 𑀮𑀩𑁆𑀪𑀦𑁆𑀢𑀺, 𑀢𑀣𑀸 𑀢𑀣𑀸 𑀅𑀢𑁆𑀣𑁄𑀯 𑀧𑀫𑀸𑀡𑀁. 𑀧𑀭𑀢𑁄 𑀆𑀬𑀢𑀦𑀬𑀫𑀓𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀏𑀲𑁄𑀧𑀺 𑀘 𑀲𑀼𑀤𑁆𑀥𑀔𑀦𑁆𑀥𑀯𑀸𑀭𑁄 𑀅𑀦𑀼𑀮𑁄𑀫𑀧𑀝𑀺𑀮𑁄𑀫𑀯𑀲𑁂𑀦 𑀤𑀼𑀯𑀺𑀥𑁄 𑀳𑁄𑀢𑀺. 𑀢𑀢𑁆𑀣 𑀅𑀦𑀼𑀮𑁄𑀫𑀯𑀸𑀭𑁂 ‘𑀭𑀽𑀧𑀁 𑀔𑀦𑁆𑀥𑁄 𑀔𑀦𑁆𑀥𑀸 𑀭𑀽𑀧’𑀦𑁆𑀢𑀺𑀆𑀤𑀻𑀦𑀺 𑀧𑀜𑁆𑀘 𑀬𑀫𑀓𑀸𑀦𑀺. 𑀧𑀝𑀺𑀮𑁄𑀫𑀯𑀸𑀭𑁂𑀧𑀺 ‘𑀦 𑀭𑀽𑀧𑀁 𑀦 𑀔𑀦𑁆𑀥𑁄, 𑀦 𑀔𑀦𑁆𑀥𑀸 𑀦 𑀭𑀽𑀧’𑀦𑁆𑀢𑀺𑀆𑀤𑀻𑀦𑀺 𑀧𑀜𑁆𑀘𑁂𑀯.

𑀢𑀢𑁄 𑀧𑀭𑀁 𑀢𑁂𑀲𑀜𑁆𑀜𑁂𑀯 𑀲𑀼𑀤𑁆𑀥𑀔𑀦𑁆𑀥𑀸𑀦𑀁 𑀭𑀽𑀧𑀁 𑀔𑀦𑁆𑀥𑁄, 𑀔𑀦𑁆𑀥𑀸 𑀯𑁂𑀤𑀦𑀸𑀢𑀺𑀆𑀤𑀺𑀦𑀸 𑀦𑀬𑁂𑀦 𑀏𑀓𑁂𑀓𑀔𑀦𑁆𑀥𑀫𑀽𑀮𑀓𑀸𑀦𑀺 𑀘𑀢𑁆𑀢𑀸𑀭𑀺 𑀘𑀢𑁆𑀢𑀸𑀭𑀺 𑀘𑀓𑁆𑀓𑀸𑀦𑀺 𑀩𑀦𑁆𑀥𑀺𑀢𑁆𑀯𑀸 𑀕𑀢𑁄 𑀲𑀼𑀤𑁆𑀥𑀔𑀦𑁆𑀥𑀫𑀽𑀮𑀓𑀸𑀦𑀁 𑀘𑀓𑁆𑀓𑀸𑀦𑀁 𑀅𑀢𑁆𑀣𑀺𑀢𑀸𑀬 𑀲𑀼𑀤𑁆𑀥𑀔𑀦𑁆𑀥𑀫𑀽𑀮𑀘𑀓𑁆𑀓𑀯𑀸𑀭𑁄 𑀦𑀸𑀫. 𑀢𑀢𑁆𑀣 𑀔𑀦𑁆𑀥𑀸 𑀯𑁂𑀤𑀦𑀸𑀢𑀺𑀆𑀤𑀻𑀲𑀼 𑀔𑀦𑁆𑀥𑀸 𑀯𑁂𑀤𑀦𑀸𑀓𑁆𑀔𑀦𑁆𑀥𑁄𑀢𑀺𑀆𑀤𑀺𑀦𑀸 𑀦𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀇𑀢𑀭𑀣𑀸 𑀦𑀺𑀤𑁆𑀤𑁂𑀲𑀯𑀸𑀭𑁂𑀦 𑀲𑀤𑁆𑀥𑀺𑀁 𑀯𑀺𑀭𑁄𑀥𑁄 𑀳𑁄𑀢𑀺. 𑀲𑁄𑀧𑀺 𑀅𑀦𑀼𑀮𑁄𑀫𑀧𑀝𑀺𑀮𑁄𑀫𑀯𑀲𑁂𑀦 𑀤𑀼𑀯𑀺𑀥𑁄 𑀳𑁄𑀢𑀺. 𑀢𑀢𑁆𑀣 𑀅𑀦𑀼𑀮𑁄𑀫𑀯𑀸𑀭𑁂 ‘𑀭𑀽𑀧𑀁 𑀔𑀦𑁆𑀥𑁄, 𑀔𑀦𑁆𑀥𑀸 𑀯𑁂𑀤𑀦𑀸’𑀢𑀺𑀆𑀤𑀻𑀦𑀺 𑀏𑀓𑁂𑀓𑀔𑀦𑁆𑀥𑀫𑀽𑀮𑀓𑀸𑀦𑀺 𑀘𑀢𑁆𑀢𑀸𑀭𑀺 𑀘𑀢𑁆𑀢𑀸𑀭𑀺 𑀓𑀢𑁆𑀯𑀸 𑀯𑀻𑀲𑀢𑀺 𑀬𑀫𑀓𑀸𑀦𑀺. 𑀧𑀝𑀺𑀮𑁄𑀫𑀯𑀸𑀭𑁂𑀧𑀺 ‘𑀦 𑀭𑀽𑀧𑀁, 𑀦 𑀔𑀦𑁆𑀥𑁄, 𑀦 𑀔𑀦𑁆𑀥𑀸 𑀦 𑀯𑁂𑀤𑀦𑀸’𑀢𑀺𑀆𑀤𑀻𑀦𑀺 𑀯𑀻𑀲𑀢𑀺𑀫𑁂𑀯. 𑀏𑀯𑀁 𑀢𑀸𑀯 𑀏𑀓𑁂𑀦 𑀬𑀫𑀓𑀲𑀢𑁂𑀦 𑀤𑁆𑀯𑀻𑀳𑀺 𑀧𑀼𑀘𑁆𑀙𑀸𑀲𑀢𑁂𑀳𑀺 𑀏𑀓𑁂𑀓𑀧𑀼𑀘𑁆𑀙𑀸𑀬 𑀲𑀦𑁆𑀦𑀺𑀝𑁆𑀞𑀸𑀦𑀲𑀁𑀲𑀬𑀯𑀲𑁂𑀦 𑀤𑁆𑀯𑁂 𑀤𑁆𑀯𑁂 𑀅𑀢𑁆𑀣𑁂 𑀓𑀢𑁆𑀯𑀸 𑀘𑀢𑀽𑀳𑀺 𑀘 𑀅𑀢𑁆𑀣𑀲𑀢𑁂𑀳𑀺 𑀧𑀝𑀺𑀫𑀡𑁆𑀟𑀺𑀢𑁄 𑀧𑀡𑁆𑀡𑀢𑁆𑀢𑀺𑀯𑀸𑀭𑀲𑁆𑀲 𑀉𑀤𑁆𑀤𑁂𑀲𑀯𑀸𑀭𑁄 𑀯𑁂𑀤𑀺𑀢𑀩𑁆𑀩𑁄𑀢𑀺.

𑀧𑀡𑁆𑀡𑀢𑁆𑀢𑀺𑀉𑀤𑁆𑀤𑁂𑀲𑀯𑀸𑀭𑀯𑀡𑁆𑀡𑀦𑀸.

𑁧. 𑀧𑀡𑁆𑀡𑀢𑁆𑀢𑀺𑀦𑀺𑀤𑁆𑀤𑁂𑀲𑀯𑀸𑀭𑀯𑀡𑁆𑀡𑀦𑀸

𑁨𑁬. 𑀇𑀤𑀸𑀦𑀺 𑀭𑀽𑀧𑀁 𑀭𑀽𑀧𑀓𑁆𑀔𑀦𑁆𑀥𑁄𑀢𑀺𑀆𑀤𑀺𑀦𑀸 𑀦𑀬𑁂𑀦 𑀦𑀺𑀤𑁆𑀤𑁂𑀲𑀯𑀸𑀭𑁄 𑀆𑀭𑀤𑁆𑀥𑁄. 𑀢𑀢𑁆𑀣 𑀭𑀽𑀧𑀁 𑀭𑀽𑀧𑀓𑁆𑀔𑀦𑁆𑀥𑁄𑀢𑀺 𑀬𑀁𑀓𑀺𑀜𑁆𑀘𑀺 𑀭𑀽𑀧𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀲𑀩𑁆𑀩𑀁 𑀢𑀁 𑀭𑀽𑀧𑀁 𑀭𑀽𑀧𑀓𑁆𑀔𑀦𑁆𑀥𑁄𑀢𑀺 𑀯𑀘𑀦𑀲𑁄𑀥𑀦𑀢𑁆𑀣𑀁 𑀧𑀼𑀘𑁆𑀙𑀢𑀺. 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁, 𑀭𑀽𑀧𑀁, 𑀦 𑀭𑀽𑀧𑀓𑁆𑀔𑀦𑁆𑀥𑁄𑀢𑀺 𑀬𑀁 ‘𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧’𑀦𑁆𑀢𑀺 𑀏𑀢𑁆𑀣 𑀭𑀽𑀧𑀦𑁆𑀢𑀺 𑀯𑀼𑀢𑁆𑀢𑀁, 𑀢𑀁 𑀭𑀽𑀧𑀫𑁂𑀯, 𑀦 𑀭𑀽𑀧𑀓𑁆𑀔𑀦𑁆𑀥𑁄𑀢𑀺 𑀅𑀢𑁆𑀣𑁄. 𑀭𑀽𑀧𑀓𑁆𑀔𑀦𑁆𑀥𑁄 𑀭𑀽𑀧𑀜𑁆𑀘𑁂𑀯 𑀭𑀽𑀧𑀓𑁆𑀔𑀦𑁆𑀥𑁄 𑀘𑀸𑀢𑀺 𑀬𑁄 𑀧𑀦 𑀭𑀽𑀧𑀓𑁆𑀔𑀦𑁆𑀥𑁄, 𑀲𑁄 𑀭𑀽𑀧𑀦𑁆𑀢𑀺𑀧𑀺 𑀭𑀽𑀧𑀓𑁆𑀔𑀦𑁆𑀥𑁄𑀢𑀺𑀧𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀻𑀢𑀺 𑀅𑀢𑁆𑀣𑁄. 𑀭𑀽𑀧𑀓𑁆𑀔𑀦𑁆𑀥𑁄 𑀭𑀽𑀧𑀦𑁆𑀢𑀺 𑀏𑀢𑁆𑀣 𑀧𑀦 𑀬𑀲𑁆𑀫𑀸 𑀭𑀽𑀧𑀓𑁆𑀔𑀦𑁆𑀥𑁄 𑀦𑀺𑀬𑀫𑁂𑀦𑁂𑀯 𑀭𑀽𑀧𑀦𑁆𑀢𑀺 𑀯𑀢𑁆𑀢𑀩𑁆𑀩𑁄. 𑀢𑀲𑁆𑀫𑀸 𑀆𑀫𑀦𑁆𑀢𑀸𑀢𑀺 𑀆𑀳. 𑀇𑀫𑀺𑀦𑀸 𑀉𑀧𑀸𑀬𑁂𑀦 𑀲𑀩𑁆𑀩𑀯𑀺𑀲𑁆𑀲𑀚𑁆𑀚𑀦𑁂𑀲𑀼 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀬𑁄 𑀧𑀦 𑀬𑀢𑁆𑀣 𑀯𑀺𑀲𑁂𑀲𑁄 𑀪𑀯𑀺𑀲𑁆𑀲𑀢𑀺, 𑀢𑀣𑁂𑀯 𑀢𑀁 𑀯𑀡𑁆𑀡𑀬𑀺𑀲𑁆𑀲𑀸𑀫. 𑀲𑀜𑁆𑀜𑀸𑀬𑀫𑀓𑁂 𑀢𑀸𑀯 𑀤𑀺𑀝𑁆𑀞𑀺𑀲𑀜𑁆𑀜𑀸𑀢𑀺 ‘𑀧𑀧𑀜𑁆𑀘𑀲𑀜𑁆𑀜𑀸’𑀢𑀺𑀆𑀤𑀻𑀲𑀼 𑀆𑀕𑀢𑀸 𑀤𑀺𑀝𑁆𑀞𑀺𑀲𑀜𑁆𑀜𑀸. 𑀲𑀗𑁆𑀔𑀸𑀭𑀬𑀫𑀓𑁂 𑀅𑀯𑀲𑁂𑀲𑀸 𑀲𑀗𑁆𑀔𑀸𑀭𑀸𑀢𑀺 ‘𑀅𑀦𑀺𑀘𑁆𑀘𑀸 𑀯𑀢 𑀲𑀗𑁆𑀔𑀸𑀭𑀸’𑀢𑀺𑀆𑀤𑀻𑀲𑀼 𑀆𑀕𑀢𑀸 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀢𑁄 𑀅𑀯𑀲𑁂𑀲𑀸 𑀲𑀗𑁆𑀔𑀢𑀥𑀫𑁆𑀫𑀸. 𑀧𑀝𑀺𑀮𑁄𑀫𑀯𑀸𑀭𑁂𑀧𑀺 𑀏𑀲𑁂𑀯 𑀦𑀬𑁄𑀢𑀺.

𑀧𑀤𑀲𑁄𑀥𑀦𑀯𑀸𑀭𑁄 𑀦𑀺𑀝𑁆𑀞𑀺𑀢𑁄.

𑁨𑁮. 𑀧𑀤𑀲𑁄𑀥𑀦𑀫𑀽𑀮𑀘𑀓𑁆𑀓𑀯𑀸𑀭𑁂 𑀔𑀦𑁆𑀥𑀸 𑀯𑁂𑀤𑀦𑀸𑀓𑁆𑀔𑀦𑁆𑀥𑁄𑀢𑀺 𑀬𑁂𑀓𑁂𑀘𑀺 𑀔𑀦𑁆𑀥𑀸, 𑀲𑀩𑁆𑀩𑁂 𑀢𑁂 𑀯𑁂𑀤𑀦𑀸𑀓𑁆𑀔𑀦𑁆𑀥𑁄𑀢𑀺 𑀧𑀼𑀘𑁆𑀙𑀢𑀺. 𑀲𑁂𑀲𑀧𑀼𑀘𑁆𑀙𑀸𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀧𑀝𑀺𑀮𑁄𑀫𑁂 𑀦 𑀔𑀦𑁆𑀥𑀸 𑀦 𑀯𑁂𑀤𑀦𑀸𑀓𑁆𑀔𑀦𑁆𑀥𑁄𑀢𑀺 𑀏𑀢𑁆𑀣 𑀬𑁂 𑀧𑀜𑁆𑀜𑀢𑁆𑀢𑀺𑀦𑀺𑀩𑁆𑀩𑀸𑀦𑀲𑀗𑁆𑀔𑀸𑀢𑀸 𑀥𑀫𑁆𑀫𑀸 𑀔𑀦𑁆𑀥𑀸 𑀦 𑀳𑁄𑀦𑁆𑀢𑀺, 𑀢𑁂 𑀬𑀲𑁆𑀫𑀸 𑀯𑁂𑀤𑀦𑀸𑀓𑁆𑀔𑀦𑁆𑀥𑁄𑀧𑀺 𑀦 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀆𑀫𑀦𑁆𑀢𑀸𑀢𑀺 𑀆𑀳. 𑀲𑁂𑀲𑀯𑀺𑀲𑁆𑀲𑀚𑁆𑀚𑀦𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄𑀢𑀺.

𑀧𑀤𑀲𑁄𑀥𑀦𑀫𑀽𑀮𑀘𑀓𑁆𑀓𑀯𑀸𑀭𑁄 𑀦𑀺𑀝𑁆𑀞𑀺𑀢𑁄.

𑁩𑁮. 𑀲𑀼𑀤𑁆𑀥𑀔𑀦𑁆𑀥𑀯𑀸𑀭𑁂 𑀭𑀽𑀧𑀁 𑀔𑀦𑁆𑀥𑁄𑀢𑀺 𑀬𑀁𑀓𑀺𑀜𑁆𑀘𑀺 𑀭𑀽𑀧𑀦𑁆𑀢𑀺 𑀯𑀼𑀢𑁆𑀢𑀁, 𑀲𑀩𑁆𑀩𑀁 𑀢𑀁 𑀔𑀦𑁆𑀥𑁄𑀢𑀺 𑀧𑀼𑀘𑁆𑀙𑀢𑀺. 𑀢𑀢𑁆𑀣 𑀬𑀲𑁆𑀫𑀸 𑀧𑀺𑀬𑀭𑀽𑀧𑀲𑀸𑀢𑀭𑀽𑀧𑀲𑀗𑁆𑀔𑀸𑀢𑀁 𑀯𑀸 𑀭𑀽𑀧𑀁 𑀳𑁄𑀢𑀼, 𑀪𑀽𑀢𑀼𑀧𑀸𑀤𑀸𑀭𑀽𑀧𑀁 𑀯𑀸, 𑀲𑀩𑁆𑀩𑀁 𑀧𑀜𑁆𑀘𑀲𑀼 𑀔𑀦𑁆𑀥𑁂𑀲𑀼 𑀲𑀗𑁆𑀕𑀳𑀁 𑀕𑀘𑁆𑀙𑀢𑁂𑀯. 𑀢𑀲𑁆𑀫𑀸 𑀆𑀫𑀦𑁆𑀢𑀸𑀢𑀺 𑀧𑀝𑀺𑀚𑀸𑀦𑀸𑀢𑀺. 𑀤𑀼𑀢𑀺𑀬𑀧𑀤𑁂 ‘𑀔𑀦𑁆𑀥𑀸 𑀭𑀽𑀧’𑀦𑁆𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑁂 𑀬𑀲𑁆𑀫𑀸 𑀭𑀽𑀧𑀦𑁆𑀢𑀺𑀯𑀘𑀦𑁂𑀦 𑀭𑀽𑀧𑀓𑁆𑀔𑀦𑁆𑀥𑁄𑀯 𑀅𑀥𑀺𑀧𑁆𑀧𑁂𑀢𑁄, 𑀢𑀲𑁆𑀫𑀸 𑀯𑀘𑀦𑀁 𑀅𑀦𑀸𑀤𑀺𑀬𑀺𑀢𑁆𑀯𑀸 𑀅𑀢𑁆𑀣𑀯𑀲𑁂𑀦 𑀧𑀼𑀘𑁆𑀙𑀦𑁆𑀢𑁄 𑀔𑀦𑁆𑀥𑀸 𑀭𑀽𑀧𑀓𑁆𑀔𑀦𑁆𑀥𑁄𑀢𑀺 𑀆𑀳. 𑀇𑀫𑀺𑀦𑀸 𑀦𑀬𑁂𑀦 𑀲𑀩𑁆𑀩𑀧𑀤𑁂𑀲𑀼 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀧𑀭𑀢𑁄 𑀆𑀬𑀢𑀦𑀬𑀫𑀓𑀸𑀤𑀻𑀦𑀁 𑀦𑀺𑀤𑁆𑀤𑁂𑀲𑀯𑀸𑀭𑁂𑀧𑀺 𑀏𑀲𑁂𑀯 𑀦𑀬𑁄. 𑀲𑀜𑁆𑀜𑀸 𑀔𑀦𑁆𑀥𑁄𑀢𑀺 𑀏𑀢𑁆𑀣𑀸𑀧𑀺 𑀤𑀺𑀝𑁆𑀞𑀺𑀲𑀜𑁆𑀜𑀸 𑀯𑀸 𑀳𑁄𑀢𑀼, 𑀲𑀜𑁆𑀜𑀸 𑀏𑀯 𑀯𑀸, 𑀲𑀩𑁆𑀩𑀸𑀬𑀧𑀺 𑀔𑀦𑁆𑀥𑀪𑀸𑀯𑀢𑁄 𑀆𑀫𑀦𑁆𑀢𑀸𑀢𑀺 𑀯𑀼𑀢𑁆𑀢𑀁. 𑀲𑀗𑁆𑀔𑀸𑀭𑀸 𑀔𑀦𑁆𑀥𑁄𑀢𑀺 𑀧𑀤𑁂𑀧𑀺 𑀏𑀲𑁂𑀯 𑀦𑀬𑁄. 𑀔𑀦𑁆𑀥𑀯𑀺𑀦𑀺𑀫𑀼𑀢𑁆𑀢𑀓𑁄 𑀳𑀺 𑀲𑀗𑁆𑀔𑀸𑀭𑁄 𑀦𑀸𑀫 𑀦𑀢𑁆𑀣𑀺.

𑁩𑁯. 𑀧𑀝𑀺𑀮𑁄𑀫𑁂 𑀦 𑀭𑀽𑀧𑀁 𑀦 𑀔𑀦𑁆𑀥𑁄𑀢𑀺 𑀬𑀁 𑀥𑀫𑁆𑀫𑀚𑀸𑀢𑀁 𑀭𑀽𑀧𑀁 𑀦 𑀳𑁄𑀢𑀺, 𑀢𑀁 𑀔𑀦𑁆𑀥𑁄𑀧𑀺 𑀦 𑀳𑁄𑀢𑀻𑀢𑀺 𑀧𑀼𑀘𑁆𑀙𑀢𑀺. 𑀯𑀺𑀲𑁆𑀲𑀚𑁆𑀚𑀦𑁂 𑀧𑀦𑀲𑁆𑀲 𑀭𑀽𑀧𑀁 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑀸 𑀔𑀦𑁆𑀥𑀸 𑀦 𑀭𑀽𑀧𑀁, 𑀔𑀦𑁆𑀥𑀸𑀢𑀺 𑀭𑀽𑀧𑀢𑁄 𑀅𑀜𑁆𑀜𑁂 𑀯𑁂𑀤𑀦𑀸𑀤𑀬𑁄 𑀔𑀦𑁆𑀥𑀸 𑀭𑀽𑀧𑀫𑁂𑀯 𑀦 𑀳𑁄𑀦𑁆𑀢𑀺, 𑀔𑀦𑁆𑀥𑀸 𑀧𑀦 𑀳𑁄𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀭𑀽𑀧𑀜𑁆𑀘 𑀔𑀦𑁆𑀥𑁂 𑀘 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑀸𑀢𑀺 𑀧𑀜𑁆𑀘𑀓𑁆𑀔𑀦𑁆𑀥𑀯𑀺𑀦𑀺𑀫𑀼𑀢𑁆𑀢𑀁 𑀦𑀺𑀩𑁆𑀩𑀸𑀦𑀜𑁆𑀘𑁂𑀯 𑀧𑀜𑁆𑀜𑀢𑁆𑀢𑀺 𑀘. 𑀇𑀢𑁄 𑀧𑀭𑁂𑀲𑀼𑀧𑀺 ‘𑀅𑀯𑀲𑁂𑀲𑀸’𑀢𑀺 𑀧𑀤𑁂𑀲𑀼 𑀏𑀲𑁂𑀯 𑀦𑀬𑁄𑀢𑀺.

𑀲𑀼𑀤𑁆𑀥𑀔𑀦𑁆𑀥𑀯𑀸𑀭𑁄 𑀦𑀺𑀝𑁆𑀞𑀺𑀢𑁄.

𑁪𑁦-𑁪𑁪. 𑀲𑀼𑀤𑁆𑀥𑀔𑀦𑁆𑀥𑀫𑀽𑀮𑀘𑀓𑁆𑀓𑀯𑀸𑀭𑁂 𑀭𑀽𑀧𑀁 𑀔𑀦𑁆𑀥𑁄𑀢𑀺𑀆𑀤𑀻𑀦𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄𑀢𑀺.

𑀲𑀼𑀤𑁆𑀥𑀔𑀦𑁆𑀥𑀫𑀽𑀮𑀘𑀓𑁆𑀓𑀯𑀸𑀭𑁄 𑀦𑀺𑀝𑁆𑀞𑀺𑀢𑁄.

𑀧𑀡𑁆𑀡𑀢𑁆𑀢𑀺𑀦𑀺𑀤𑁆𑀤𑁂𑀲𑀯𑀸𑀭𑀯𑀡𑁆𑀡𑀦𑀸.

𑁨. 𑀧𑀯𑀢𑁆𑀢𑀺𑀯𑀸𑀭𑀯𑀡𑁆𑀡𑀦𑀸

𑁫𑁦-𑁨𑁦𑁫. 𑀇𑀤𑀸𑀦𑀺 𑀬𑀲𑁆𑀲 𑀭𑀽𑀧𑀓𑁆𑀔𑀦𑁆𑀥𑁄𑀢𑀺𑀆𑀤𑀺𑀦𑀸 𑀦𑀬𑁂𑀦 𑀧𑀯𑀢𑁆𑀢𑀺𑀯𑀸𑀭𑁄 𑀆𑀭𑀤𑁆𑀥𑁄. 𑀓𑀲𑁆𑀫𑀸 𑀧𑀦𑁂𑀢𑁆𑀣 𑀉𑀤𑁆𑀤𑁂𑀲𑀯𑀸𑀭𑁄 𑀦 𑀯𑀼𑀢𑁆𑀢𑁄𑀢𑀺? 𑀳𑁂𑀝𑁆𑀞𑀸 𑀤𑀲𑁆𑀲𑀺𑀢𑀦𑀬𑀢𑁆𑀢𑀸. 𑀧𑀡𑁆𑀡𑀢𑁆𑀢𑀺𑀯𑀸𑀭𑀲𑁆𑀫𑀺𑀜𑁆𑀳𑀺 𑀉𑀤𑁆𑀤𑁂𑀲𑀯𑀸𑀭𑁂 𑀦𑀬𑁄 𑀤𑀲𑁆𑀲𑀺𑀢𑁄. 𑀢𑁂𑀦 𑀧𑀦 𑀦𑀬𑁂𑀦 𑀲𑀓𑁆𑀓𑀸 𑀲𑁄 𑀇𑀥 𑀅𑀯𑀼𑀢𑁆𑀢𑁄𑀧𑀺 𑀚𑀸𑀦𑀺𑀢𑀼𑀦𑁆𑀢𑀺 𑀢𑀁 𑀅𑀯𑀢𑁆𑀯𑀸 𑀦𑀺𑀤𑁆𑀤𑁂𑀲𑀯𑀸𑀭𑁄𑀯 𑀆𑀭𑀤𑁆𑀥𑁄. 𑀇𑀫𑀲𑁆𑀫𑀺𑀁 𑀧𑀦 𑀧𑀯𑀢𑁆𑀢𑀺𑀯𑀸𑀭𑀲𑀗𑁆𑀔𑀸𑀢𑁂 𑀫𑀳𑀸𑀯𑀸𑀭𑁂 𑀉𑀧𑁆𑀧𑀸𑀤𑀯𑀸𑀭𑁄, 𑀦𑀺𑀭𑁄𑀥𑀯𑀸𑀭𑁄, 𑀉𑀧𑁆𑀧𑀸𑀤𑀦𑀺𑀭𑁄𑀥𑀯𑀸𑀭𑁄𑀢𑀺 𑀢𑀬𑁄 𑀅𑀦𑁆𑀢𑀭𑀯𑀸𑀭𑀸 𑀳𑁄𑀦𑁆𑀢𑀺. 𑀢𑁂𑀲𑀼 𑀧𑀞𑀫𑁄 𑀥𑀫𑁆𑀫𑀸𑀦𑀁 𑀉𑀧𑁆𑀧𑀸𑀤𑀮𑀓𑁆𑀔𑀡𑀲𑁆𑀲 𑀤𑀻𑀧𑀺𑀢𑀢𑁆𑀢𑀸 𑀉𑀧𑁆𑀧𑀸𑀤𑀯𑀸𑀭𑁄𑀢𑀺 𑀯𑀼𑀘𑁆𑀘𑀢𑀺. 𑀤𑀼𑀢𑀺𑀬𑁄 𑀢𑁂𑀲𑀜𑁆𑀜𑁂𑀯 𑀦𑀺𑀭𑁄𑀥𑀮𑀓𑁆𑀔𑀡𑀲𑁆𑀲 𑀤𑀻𑀧𑀺𑀢𑀢𑁆𑀢𑀸 𑀦𑀺𑀭𑁄𑀥𑀯𑀸𑀭𑁄𑀢𑀺 𑀯𑀼𑀘𑁆𑀘𑀢𑀺. 𑀢𑀢𑀺𑀬𑁄 𑀉𑀪𑀺𑀦𑁆𑀦𑀫𑁆𑀧𑀺 𑀮𑀓𑁆𑀔𑀡𑀸𑀦𑀁 𑀤𑀻𑀧𑀺𑀢𑀢𑁆𑀢𑀸 𑀉𑀧𑁆𑀧𑀸𑀤𑀦𑀺𑀭𑁄𑀥𑀯𑀸𑀭𑁄𑀢𑀺 𑀯𑀼𑀘𑁆𑀘𑀢𑀺. 𑀉𑀧𑁆𑀧𑀸𑀤𑀯𑀸𑀭𑁂𑀦 𑀘𑁂𑀢𑁆𑀣 𑀥𑀫𑁆𑀫𑀸𑀦𑀁 𑀉𑀧𑁆𑀧𑀚𑁆𑀚𑀦𑀸𑀓𑀸𑀭𑁄𑀯 𑀤𑀻𑀧𑀺𑀢𑁄. 𑀦𑀺𑀭𑁄𑀥𑀯𑀸𑀭𑁂𑀦 ‘𑀉𑀧𑁆𑀧𑀦𑁆𑀦𑀁 𑀦𑀸𑀫 𑀦𑀺𑀘𑁆𑀘𑀁 𑀦𑀢𑁆𑀣𑀻’𑀢𑀺 𑀢𑁂𑀲𑀜𑁆𑀜𑁂𑀯 𑀅𑀦𑀺𑀘𑁆𑀘𑀢𑀸 𑀤𑀻𑀧𑀺𑀢𑀸. 𑀉𑀧𑁆𑀧𑀸𑀤𑀦𑀺𑀭𑁄𑀥𑀯𑀸𑀭𑁂𑀦 𑀢𑀤𑀼𑀪𑀬𑀁.

𑀢𑀢𑁆𑀣 𑀉𑀧𑁆𑀧𑀸𑀤𑀯𑀸𑀭𑁂 𑀢𑀸𑀯 𑀢𑀺𑀡𑁆𑀡𑀁 𑀅𑀤𑁆𑀥𑀸𑀦𑀁 𑀯𑀲𑁂𑀦 𑀙 𑀓𑀸𑀮𑀪𑁂𑀤𑀸 𑀳𑁄𑀦𑁆𑀢𑀺 𑁋 𑀧𑀘𑁆𑀘𑀼𑀧𑁆𑀧𑀦𑁆𑀦𑁄, 𑀅𑀢𑀻𑀢𑁄, 𑀅𑀦𑀸𑀕𑀢𑁄, 𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀦𑀸𑀢𑀻𑀢𑁄, 𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀦𑀸𑀦𑀸𑀕𑀢𑁄, 𑀅𑀢𑀻𑀢𑁂𑀦𑀸𑀦𑀸𑀕𑀢𑁄𑀢𑀺. 𑀢𑁂𑀲𑀼 ‘𑀬𑀲𑁆𑀲 𑀭𑀽𑀧𑀓𑁆𑀔𑀦𑁆𑀥𑁄 𑀉𑀧𑁆𑀧𑀚𑁆𑀚𑀢𑀻’𑀢𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀪𑀺𑀥𑀸𑀦𑀯𑀲𑁂𑀦 𑀧𑀘𑁆𑀘𑀼𑀧𑁆𑀧𑀦𑁆𑀦𑁄 𑀯𑁂𑀤𑀺𑀢𑀩𑁆𑀩𑁄. 𑀲𑁄 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀁 𑀥𑀫𑁆𑀫𑀸𑀦𑀁 𑀧𑀘𑁆𑀘𑀓𑁆𑀔𑀢𑁄 𑀕𑀳𑁂𑀢𑀩𑁆𑀩𑀢𑁆𑀢𑀸 𑀅𑀢𑀺𑀯𑀺𑀬 𑀲𑀼𑀯𑀺𑀜𑁆𑀜𑁂𑀬𑁆𑀬𑁄𑀢𑀺 𑀧𑀞𑀫𑀁 𑀯𑀼𑀢𑁆𑀢𑁄. 𑀬𑀲𑁆𑀲 𑀭𑀽𑀧𑀓𑁆𑀔𑀦𑁆𑀥𑁄 𑀉𑀧𑁆𑀧𑀚𑁆𑀚𑀺𑀢𑁆𑀣𑀸𑀢𑀺 𑀅𑀢𑀻𑀢𑀸𑀪𑀺𑀥𑀸𑀦𑀯𑀲𑁂𑀦 𑀅𑀢𑀻𑀢𑁄 𑀯𑁂𑀤𑀺𑀢𑀩𑁆𑀩𑁄. 𑀲𑁄 𑀧𑀘𑁆𑀘𑀓𑁆𑀔𑀢𑁄 𑀅𑀦𑀼𑀪𑀽𑀢𑀧𑀼𑀩𑁆𑀩𑀸𑀦𑀁 𑀅𑀢𑀻𑀢𑀥𑀫𑁆𑀫𑀸𑀦𑀁 𑀅𑀦𑀼𑀫𑀸𑀦𑁂𑀦 𑀅𑀦𑀸𑀕𑀢𑁂𑀳𑀺 𑀲𑀼𑀯𑀺𑀜𑁆𑀜𑁂𑀬𑁆𑀬𑀢𑀭𑀢𑁆𑀢𑀸 𑀤𑀼𑀢𑀺𑀬𑀁 𑀯𑀼𑀢𑁆𑀢𑁄. 𑀬𑀲𑁆𑀲 𑀭𑀽𑀧𑀓𑁆𑀔𑀦𑁆𑀥𑁄 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻𑀢𑀺 𑀅𑀦𑀸𑀕𑀢𑀸𑀪𑀺𑀥𑀸𑀦𑀯𑀲𑁂𑀦 𑀅𑀦𑀸𑀕𑀢𑁄 𑀯𑁂𑀤𑀺𑀢𑀩𑁆𑀩𑁄. 𑀲𑁄 𑀧𑀘𑁆𑀘𑀓𑁆𑀔𑀢𑁄 𑀘 𑀅𑀦𑀼𑀪𑀽𑀢𑀧𑀼𑀩𑁆𑀩𑀯𑀲𑁂𑀦 𑀘 𑀕𑀳𑀺𑀢𑀥𑀫𑁆𑀫𑀸𑀦𑀼𑀫𑀸𑀦𑁂𑀦 ‘𑀅𑀦𑀸𑀕𑀢𑁂𑀧𑀺 𑀏𑀯𑀭𑀽𑀧𑀸 𑀥𑀫𑁆𑀫𑀸 𑀉𑀧𑁆𑀧𑀚𑁆𑀚𑀺𑀲𑁆𑀲𑀦𑁆𑀢𑀻’𑀢𑀺 𑀕𑀳𑁂𑀢𑀩𑁆𑀩𑀢𑁄 𑀢𑀢𑀺𑀬𑀁 𑀯𑀼𑀢𑁆𑀢𑁄.

𑀬𑀲𑁆𑀲 𑀭𑀽𑀧𑀓𑁆𑀔𑀦𑁆𑀥𑁄 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀉𑀧𑁆𑀧𑀚𑁆𑀚𑀺𑀢𑁆𑀣𑀸𑀢𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀦 𑀲𑀤𑁆𑀥𑀺𑀁 𑀅𑀢𑀻𑀢𑀸𑀪𑀺𑀥𑀸𑀦𑀯𑀲𑁂𑀦 𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀦𑀸𑀢𑀻𑀢𑁄 𑀯𑁂𑀤𑀺𑀢𑀩𑁆𑀩𑁄. 𑀲𑁄 𑀫𑀺𑀲𑁆𑀲𑀓𑁂𑀲𑀼 𑀢𑀻𑀲𑀼 𑀲𑀼𑀯𑀺𑀜𑁆𑀜𑁂𑀬𑁆𑀬𑀢𑀭𑀢𑁆𑀢𑀸 𑀘𑀢𑀼𑀢𑁆𑀣𑀁 𑀯𑀼𑀢𑁆𑀢𑁄. 𑀬𑀲𑁆𑀲 𑀭𑀽𑀧𑀓𑁆𑀔𑀦𑁆𑀥𑁄 𑀉𑀧𑁆𑀧𑀚𑁆𑀚𑀢𑀺 𑀢𑀲𑁆𑀲 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻𑀢𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀦 𑀲𑀤𑁆𑀥𑀺𑀁 𑀅𑀦𑀸𑀕𑀢𑀸𑀪𑀺𑀥𑀸𑀦𑀯𑀲𑁂𑀦 𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀦𑀸𑀦𑀸𑀕𑀢𑁄 𑀯𑁂𑀤𑀺𑀢𑀩𑁆𑀩𑁄. 𑀲𑁄 𑀧𑀘𑁆𑀘𑀓𑁆𑀔𑀢𑁄 𑀕𑀳𑁂𑀢𑀩𑁆𑀩𑀸𑀦𑀁 𑀥𑀫𑁆𑀫𑀸𑀦𑀁 𑀅𑀢𑁆𑀣𑀺𑀢𑀸𑀬 𑀅𑀢𑁆𑀣𑀢𑁄 𑀲𑀼𑀯𑀺𑀜𑁆𑀜𑁂𑀬𑁆𑀬𑀢𑀭𑁄𑀢𑀺 𑀧𑀜𑁆𑀘𑀫𑀁 𑀯𑀼𑀢𑁆𑀢𑁄. 𑀬𑀲𑁆𑀲 𑀭𑀽𑀧𑀓𑁆𑀔𑀦𑁆𑀥𑁄 𑀉𑀧𑁆𑀧𑀚𑁆𑀚𑀺𑀢𑁆𑀣, 𑀢𑀲𑁆𑀲 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻𑀢𑀺 𑀅𑀢𑀻𑀢𑁂𑀦 𑀲𑀤𑁆𑀥𑀺𑀁 𑀅𑀦𑀸𑀕𑀢𑀸𑀪𑀺𑀥𑀸𑀦𑀯𑀲𑁂𑀦 𑀅𑀢𑀻𑀢𑁂𑀦𑀸𑀦𑀸𑀕𑀢𑁄 𑀯𑁂𑀤𑀺𑀢𑀩𑁆𑀩𑁄. 𑀲𑁄 𑀧𑀼𑀭𑀺𑀫𑁂𑀳𑀺 𑀤𑀼𑀯𑀺𑀜𑁆𑀜𑁂𑀬𑁆𑀬𑁄𑀢𑀺 𑀙𑀝𑁆𑀞𑀁 𑀯𑀼𑀢𑁆𑀢𑁄.

𑀏𑀯𑀫𑁂𑀢𑁂𑀲𑀼 𑀙𑀲𑀼 𑀓𑀸𑀮𑀪𑁂𑀤𑁂𑀲𑀼 𑀬𑁆𑀯𑀸𑀬𑀁 𑀧𑀞𑀫𑁄 𑀧𑀘𑁆𑀘𑀼𑀧𑁆𑀧𑀦𑁆𑀦𑁄, 𑀢𑀢𑁆𑀣 𑀧𑀼𑀕𑁆𑀕𑀮𑀢𑁄, 𑀑𑀓𑀸𑀲𑀢𑁄, 𑀧𑀼𑀕𑁆𑀕𑀮𑁄𑀓𑀸𑀲𑀢𑁄𑀢𑀺 𑀢𑀬𑁄 𑀯𑀸𑀭𑀸 𑀳𑁄𑀦𑁆𑀢𑀺. 𑀢𑁂𑀲𑀼 𑀬𑀲𑁆𑀲𑀸𑀢𑀺 𑀧𑀼𑀕𑁆𑀕𑀮𑀯𑀲𑁂𑀦 𑀔𑀦𑁆𑀥𑀸𑀦𑀁 𑀉𑀧𑁆𑀧𑀢𑁆𑀢𑀺𑀤𑀻𑀧𑀦𑁄 𑀧𑀼𑀕𑁆𑀕𑀮𑀯𑀸𑀭𑁄. 𑀬𑀢𑁆𑀣𑀸𑀢𑀺 𑀑𑀓𑀸𑀲𑀯𑀲𑁂𑀦 𑀔𑀦𑁆𑀥𑀸𑀦𑀁 𑀉𑀧𑁆𑀧𑀢𑁆𑀢𑀺𑀤𑀻𑀧𑀦𑁄 𑀑𑀓𑀸𑀲𑀯𑀸𑀭𑁄. 𑀬𑀲𑁆𑀲 𑀬𑀢𑁆𑀣𑀸𑀢𑀺 𑀧𑀼𑀕𑁆𑀕𑀮𑁄𑀓𑀸𑀲𑀯𑀲𑁂𑀦 𑀔𑀦𑁆𑀥𑀸𑀦𑀁 𑀉𑀧𑁆𑀧𑀢𑁆𑀢𑀺𑀤𑀻𑀧𑀦𑁄 𑀧𑀼𑀕𑁆𑀕𑀮𑁄𑀓𑀸𑀲𑀯𑀸𑀭𑁄. 𑀇𑀫𑁂 𑀧𑀦 𑀢𑀬𑁄𑀧𑀺 𑀯𑀸𑀭𑀸 𑀧𑀞𑀫𑀁 𑀅𑀦𑀼𑀮𑁄𑀫𑀦𑀬𑁂𑀦 𑀦𑀺𑀤𑁆𑀤𑀺𑀲𑀺𑀢𑁆𑀯𑀸 𑀧𑀘𑁆𑀙𑀸 𑀧𑀝𑀺𑀮𑁄𑀫𑀦𑀬𑁂𑀦 𑀦𑀺𑀤𑁆𑀤𑀺𑀝𑁆𑀞𑀸. 𑀢𑁂𑀲𑀼 ‘𑀉𑀧𑁆𑀧𑀚𑁆𑀚𑀢𑀺’ ‘𑀉𑀧𑁆𑀧𑀚𑁆𑀚𑀺𑀢𑁆𑀣,’ ‘𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻’𑀢𑀺 𑀯𑀘𑀦𑀢𑁄 𑀉𑀧𑁆𑀧𑀢𑁆𑀢𑀺𑀤𑀻𑀧𑀦𑁄 𑀅𑀦𑀼𑀮𑁄𑀫𑀦𑀬𑁄. ‘𑀦𑀼𑀧𑁆𑀧𑀚𑁆𑀚𑀢𑀺’, ‘𑀦𑀼𑀧𑁆𑀧𑀚𑁆𑀚𑀺𑀢𑁆𑀣,’ ‘𑀦𑀼𑀧𑁆𑀧𑀚𑁆𑀚𑀺𑀲𑁆𑀲𑀢𑀻’𑀢𑀺 𑀯𑀘𑀦𑀢𑁄 𑀅𑀦𑀼𑀧𑁆𑀧𑀢𑁆𑀢𑀺𑀤𑀻𑀧𑀦𑁄 𑀧𑀝𑀺𑀮𑁄𑀫𑀦𑀬𑁄.

𑀢𑀢𑁆𑀣 𑀧𑀘𑁆𑀘𑀼𑀧𑁆𑀧𑀦𑁆𑀦𑀓𑀸𑀮𑁂 𑀢𑀸𑀯 𑀧𑀼𑀕𑁆𑀕𑀮𑀯𑀸𑀭𑀲𑁆𑀲 𑀅𑀦𑀼𑀮𑁄𑀫𑀦𑀬𑁂 ‘‘𑀬𑀲𑁆𑀲 𑀭𑀽𑀧𑀓𑁆𑀔𑀦𑁆𑀥𑁄 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀉𑀧𑁆𑀧𑀚𑁆𑀚𑀢𑀺. 𑀬𑀲𑁆𑀲 𑀯𑀸 𑀧𑀦 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀭𑀽𑀧𑀓𑁆𑀔𑀦𑁆𑀥𑁄 𑀉𑀧𑁆𑀧𑀚𑁆𑀚𑀢𑀺. 𑀬𑀲𑁆𑀲 𑀭𑀽𑀧𑀓𑁆𑀔𑀦𑁆𑀥𑁄 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀲𑀜𑁆𑀜𑀸𑀓𑁆𑀔𑀦𑁆𑀥𑁄 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄, 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄, 𑀉𑀧𑁆𑀧𑀚𑁆𑀚𑀢𑀺. 𑀬𑀲𑁆𑀲 𑀯𑀸 𑀧𑀦 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀭𑀽𑀧𑀓𑁆𑀔𑀦𑁆𑀥𑁄 𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀏𑀯𑀁 𑀭𑀽𑀧𑀓𑁆𑀔𑀦𑁆𑀥𑀫𑀽𑀮𑀓𑀸𑀦𑀺 𑀘𑀢𑁆𑀢𑀸𑀭𑀺 𑀬𑀫𑀓𑀸𑀦𑀺; ‘‘𑀬𑀲𑁆𑀲 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀲𑀜𑁆𑀜𑀸𑀓𑁆𑀔𑀦𑁆𑀥𑁄 𑀉𑀧𑁆𑀧𑀚𑁆𑀚𑀢𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑁂𑀤𑀦𑀸𑀓𑁆𑀔𑀦𑁆𑀥𑀫𑀽𑀮𑀓𑀸𑀦𑀺 𑀢𑀻𑀡𑀺; 𑀲𑀜𑁆𑀜𑀸𑀓𑁆𑀔𑀦𑁆𑀥𑀫𑀽𑀮𑀓𑀸𑀦𑀺 𑀤𑁆𑀯𑁂; 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀫𑀽𑀮𑀓𑀁 𑀏𑀓𑀦𑁆𑀢𑀺 𑀅𑀕𑁆𑀕𑀳𑀺𑀢𑀕𑁆𑀕𑀳𑀡𑁂𑀦 𑀤𑀲 𑀬𑀫𑀓𑀸𑀦𑀺 𑀳𑁄𑀦𑁆𑀢𑀺.

𑀢𑀢𑁆𑀣 𑀭𑀽𑀧𑀓𑁆𑀔𑀦𑁆𑀥𑀫𑀽𑀮𑀓𑁂𑀲𑀼 𑀘𑀢𑀽𑀲𑀼 𑀆𑀤𑀺𑀢𑁄 𑀏𑀓𑀫𑁂𑀯 𑀯𑀺𑀲𑁆𑀲𑀚𑁆𑀚𑀺𑀢𑀁. 𑀲𑁂𑀲𑀸𑀦𑀺 𑀢𑁂𑀦 𑀲𑀤𑀺𑀲𑀯𑀺𑀲𑁆𑀲𑀚𑁆𑀚𑀦𑀸𑀦𑀻𑀢𑀺 𑀢𑀦𑁆𑀢𑀺𑀬𑀸 𑀮𑀳𑀼𑀪𑀸𑀯𑀢𑁆𑀣𑀁 𑀲𑀗𑁆𑀔𑀺𑀢𑁆𑀢𑀸𑀦𑀺. 𑀯𑁂𑀤𑀦𑀸𑀓𑁆𑀔𑀦𑁆𑀥𑀸𑀤𑀺𑀫𑀽𑀮𑀓𑁂𑀲𑀼𑀧𑀺 ‘𑀆𑀫𑀦𑁆𑀢𑀸’𑀢𑀺 𑀏𑀓𑀲𑀤𑀺𑀲𑀫𑁂𑀯 𑀯𑀺𑀲𑁆𑀲𑀚𑁆𑀚𑀦𑀁. 𑀢𑀲𑁆𑀫𑀸 𑀢𑀸𑀦𑀺𑀧𑀺 𑀢𑀦𑁆𑀢𑀺𑀬𑀸 𑀮𑀳𑀼𑀪𑀸𑀯𑀢𑁆𑀣𑀁 𑀲𑀗𑁆𑀔𑀺𑀢𑁆𑀢𑀸𑀦𑁂𑀯𑀸𑀢𑀺 𑀏𑀯𑀫𑁂𑀢𑀸𑀦𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀓𑀸𑀮𑁂 𑀧𑀼𑀕𑁆𑀕𑀮𑀯𑀸𑀭𑁂 𑀅𑀦𑀼𑀮𑁄𑀫𑀦𑀬𑁂 𑀏𑀓𑀬𑀫𑀓𑀯𑀺𑀲𑁆𑀲𑀚𑁆𑀚𑀦𑁂𑀦𑁂𑀯 𑀤𑀲 𑀬𑀫𑀓𑀸𑀦𑀺 𑀯𑀺𑀲𑁆𑀲𑀚𑁆𑀚𑀺𑀢𑀸𑀦𑀺 𑀦𑀸𑀫 𑀳𑁄𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀬𑀣𑀸 𑀘 𑀧𑀼𑀕𑁆𑀕𑀮𑀯𑀸𑀭𑁂 𑀤𑀲, 𑀏𑀯𑀁 𑀑𑀓𑀸𑀲𑀯𑀸𑀭𑁂 𑀤𑀲, 𑀧𑀼𑀕𑁆𑀕𑀮𑁄𑀓𑀸𑀲𑀯𑀸𑀭𑁂 𑀤𑀲𑀸𑀢𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀓𑀸𑀮𑁂 𑀢𑀻𑀲𑀼 𑀯𑀸𑀭𑁂𑀲𑀼 𑀅𑀦𑀼𑀮𑁄𑀫𑀦𑀬𑁂 𑀢𑀺𑀁𑀲 𑀬𑀫𑀓𑀸𑀦𑀺 𑀳𑁄𑀦𑁆𑀢𑀺. 𑀬𑀣𑀸 𑀘 𑀅𑀦𑀼𑀮𑁄𑀫𑀦𑀬𑁂, 𑀏𑀯𑀁 𑀧𑀝𑀺𑀮𑁄𑀫𑀦𑀬𑁂𑀧𑀻𑀢𑀺 𑀲𑀩𑁆𑀩𑀸𑀦𑀺𑀧𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀓𑀸𑀮𑁂 𑀲𑀝𑁆𑀞𑀺 𑀬𑀫𑀓𑀸𑀦𑀺 𑀳𑁄𑀦𑁆𑀢𑀺. 𑀢𑁂𑀲𑀼 𑀯𑀻𑀲𑀧𑀼𑀘𑁆𑀙𑀸𑀲𑀢𑀁, 𑀘𑀢𑁆𑀢𑀸𑀭𑀻𑀲𑀸𑀦𑀺 𑀘 𑀤𑁆𑀯𑁂 𑀅𑀢𑁆𑀣𑀲𑀢𑀸𑀦𑀺 𑀳𑁄𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀏𑀯𑀁 𑀲𑁂𑀲𑁂𑀲𑀼𑀧𑀺 𑀧𑀜𑁆𑀘𑀲𑀼 𑀓𑀸𑀮𑀪𑁂𑀤𑁂𑀲𑀼 𑀧𑀼𑀕𑁆𑀕𑀮𑀸𑀤𑀺𑀪𑁂𑀤𑀢𑁄 𑀅𑀦𑀼𑀮𑁄𑀫𑀧𑀝𑀺𑀮𑁄𑀫𑀦𑀬𑀯𑀲𑁂𑀦 𑀙 𑀙 𑀯𑀸𑀭𑀸. 𑀏𑀓𑁂𑀓𑀲𑁆𑀫𑀺𑀁 𑀯𑀸𑀭𑁂 𑀤𑀲 𑀤𑀲 𑀓𑀢𑁆𑀯𑀸 𑀲𑀝𑁆𑀞𑀺 𑀲𑀝𑁆𑀞𑀺 𑀬𑀫𑀓𑀸𑀦𑀻𑀢𑀺 𑀢𑀻𑀡𑀺 𑀬𑀫𑀓𑀲𑀢𑀸𑀦𑀺. 𑀢𑀸𑀦𑀺 𑀧𑀼𑀭𑀺𑀫𑁂𑀳𑀺 𑀲𑀤𑁆𑀥𑀺𑀁 𑀲𑀝𑁆𑀞𑀸𑀥𑀺𑀓𑀸𑀦𑀺 𑀢𑀻𑀡𑀺 𑀬𑀫𑀓𑀲𑀢𑀸𑀦𑀺, 𑀯𑀻𑀲𑀸𑀥𑀺𑀓𑀸𑀦𑀺 𑀲𑀢𑁆𑀢𑀧𑀼𑀘𑁆𑀙𑀸𑀲𑀢𑀸𑀦𑀺, 𑀘𑀢𑁆𑀢𑀸𑀭𑀻𑀲𑀸𑀦𑀺 𑀘 𑀘𑀼𑀤𑁆𑀤𑀲 𑀅𑀢𑁆𑀣𑀲𑀢𑀸𑀦𑀺 𑀳𑁄𑀦𑁆𑀢𑀺. 𑀇𑀤𑀁 𑀢𑀸𑀯 𑀉𑀧𑁆𑀧𑀸𑀤𑀯𑀸𑀭𑁂 𑀧𑀸𑀴𑀺𑀯𑀯𑀢𑁆𑀣𑀸𑀦𑀁. 𑀬𑀣𑀸 𑀘 𑀉𑀧𑁆𑀧𑀸𑀤𑀯𑀸𑀭𑁂, 𑀢𑀣𑀸 𑀦𑀺𑀭𑁄𑀥𑀯𑀸𑀭𑁂𑀧𑀺, 𑀉𑀧𑁆𑀧𑀸𑀤𑀦𑀺𑀭𑁄𑀥𑀯𑀸𑀭𑁂𑀧𑀻𑀢𑀺 𑀲𑀩𑁆𑀩𑀲𑁆𑀫𑀺𑀫𑁆𑀧𑀺 𑀧𑀯𑀢𑁆𑀢𑀺𑀫𑀳𑀸𑀯𑀸𑀭𑁂 𑀅𑀲𑀻𑀢𑀺 𑀬𑀫𑀓𑀲𑀳𑀲𑁆𑀲𑀁, 𑀲𑀝𑁆𑀞𑀺𑀲𑀢𑀸𑀥𑀺𑀓𑀸𑀦𑀺 𑀤𑁆𑀯𑁂 𑀧𑀼𑀘𑁆𑀙𑀸𑀲𑀳𑀲𑁆𑀲𑀸𑀦𑀺, 𑀯𑀻𑀲𑀁 𑀢𑀺𑀲𑀢𑀸𑀥𑀺𑀓𑀸𑀦𑀺 𑀘 𑀘𑀢𑁆𑀢𑀸𑀭𑀺 𑀅𑀢𑁆𑀣𑀲𑀳𑀲𑁆𑀲𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺.

𑀧𑀸𑀴𑀺 𑀧𑀦 𑀉𑀧𑁆𑀧𑀸𑀤𑀯𑀸𑀭𑁂 𑀦𑀺𑀭𑁄𑀥𑀯𑀸𑀭𑁂 𑀘 𑀢𑀻𑀲𑀼 𑀅𑀲𑀫𑁆𑀫𑀺𑀲𑁆𑀲𑀓𑀓𑀸𑀮𑀪𑁂𑀤𑁂𑀲𑀼 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀯𑀸𑀭𑁂 𑀏𑀓𑁂𑀓𑀫𑁂𑀯 𑀬𑀫𑀓𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀲𑀗𑁆𑀔𑀺𑀢𑁆𑀢𑀸. 𑀢𑀻𑀲𑀼 𑀫𑀺𑀲𑁆𑀲𑀓𑀓𑀸𑀮𑀪𑁂𑀤𑁂𑀲𑀼 ‘𑀬𑀲𑁆𑀲 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀲𑀜𑁆𑀜𑀸𑀓𑁆𑀔𑀦𑁆𑀥𑁄 𑀉𑀧𑁆𑀧𑀚𑁆𑀚𑀺𑀢𑁆𑀣𑀸’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑁂𑀤𑀦𑀸𑀓𑁆𑀔𑀦𑁆𑀥𑀸𑀤𑀺𑀫𑀽𑀮𑀓𑁂𑀲𑀼𑀧𑀺 𑀏𑀓𑀁 𑀬𑀫𑀓𑀁 𑀯𑀺𑀲𑁆𑀲𑀚𑁆𑀚𑀺𑀢𑀁. 𑀉𑀧𑁆𑀧𑀸𑀤𑀦𑀺𑀭𑁄𑀥𑀯𑀸𑀭𑁂 𑀧𑀦 𑀙𑀲𑀼𑀧𑀺 𑀓𑀸𑀮𑀪𑁂𑀤𑁂𑀲𑀼 𑀢𑀁 𑀯𑀺𑀲𑁆𑀲𑀚𑁆𑀚𑀺𑀢𑀫𑁂𑀯. 𑀲𑁂𑀲𑀸𑀦𑀺 𑀢𑁂𑀦 𑀲𑀫𑀸𑀦𑀯𑀺𑀲𑁆𑀲𑀚𑁆𑀚𑀦𑀢𑁆𑀢𑀸 𑀲𑀗𑁆𑀔𑀺𑀢𑁆𑀢𑀸𑀦𑀻𑀢𑀺. 𑀇𑀤𑀁 𑀲𑀓𑀮𑁂𑀧𑀺 𑀧𑀯𑀢𑁆𑀢𑀺𑀫𑀳𑀸𑀯𑀸𑀭𑁂 𑀧𑀸𑀴𑀺𑀯𑀯𑀢𑁆𑀣𑀸𑀦𑀁.

𑀅𑀢𑁆𑀣𑀯𑀺𑀦𑀺𑀘𑁆𑀙𑀬𑀢𑁆𑀣𑀁 𑀧𑀦𑀲𑁆𑀲 𑀇𑀤𑀁 𑀮𑀓𑁆𑀔𑀡𑀁 𑀯𑁂𑀤𑀺𑀢𑀩𑁆𑀩𑀁 𑁋 𑀇𑀫𑀲𑁆𑀫𑀺𑀜𑁆𑀳𑀺 𑀧𑀯𑀢𑁆𑀢𑀺𑀫𑀳𑀸𑀯𑀸𑀭𑁂 𑀘𑀢𑀼𑀦𑁆𑀦𑀁 𑀧𑀜𑁆𑀳𑀸𑀦𑀁 𑀧𑀜𑁆𑀘 𑀯𑀺𑀲𑁆𑀲𑀚𑁆𑀚𑀦𑀸𑀦𑀺 𑀲𑀢𑁆𑀢𑀯𑀻𑀲𑀢𑀺𑀬𑀸 𑀞𑀸𑀦𑁂𑀲𑀼 𑀧𑀓𑁆𑀔𑀺𑀧𑀺𑀢𑁆𑀯𑀸 𑀅𑀢𑁆𑀣𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀢𑁆𑀣 𑀧𑀼𑀭𑁂𑀧𑀜𑁆𑀳𑁄, 𑀧𑀘𑁆𑀙𑀸𑀧𑀜𑁆𑀳𑁄, 𑀧𑀭𑀺𑀧𑀼𑀡𑁆𑀡𑀧𑀜𑁆𑀳𑁄, 𑀫𑁄𑀖𑀧𑀜𑁆𑀳𑁄𑀢𑀺 𑀇𑀫𑁂 𑀘𑀢𑁆𑀢𑀸𑀭𑁄 𑀧𑀜𑁆𑀳𑀸 𑀦𑀸𑀫. 𑀏𑀓𑁂𑀓𑀲𑁆𑀫𑀺𑀜𑁆𑀳𑀺 𑀬𑀫𑀓𑁂 𑀤𑁆𑀯𑁂 𑀤𑁆𑀯𑁂 𑀧𑀼𑀘𑁆𑀙𑀸. 𑀏𑀓𑁂𑀓𑀧𑀼𑀘𑁆𑀙𑀸𑀬𑀧𑀺 𑀤𑁆𑀯𑁂 𑀤𑁆𑀯𑁂 𑀧𑀤𑀸𑀦𑀺. 𑀢𑀢𑁆𑀣 𑀬𑀸𑀬 𑀧𑀼𑀘𑁆𑀙𑀸𑀬 𑀯𑀺𑀲𑁆𑀲𑀚𑁆𑀚𑀦𑁂 𑀏𑀓𑁂𑀦𑁂𑀯 𑀧𑀤𑁂𑀦 𑀕𑀳𑀺𑀢𑀓𑁆𑀔𑀦𑁆𑀥𑀲𑁆𑀲 𑀉𑀧𑁆𑀧𑀸𑀤𑁄 𑀯𑀸 𑀦𑀺𑀭𑁄𑀥𑁄 𑀯𑀸 𑀮𑀩𑁆𑀪𑀢𑀺, 𑀅𑀬𑀁 𑀧𑀼𑀭𑁂𑀧𑀜𑁆𑀳𑁄 𑀦𑀸𑀫. 𑀬𑀸𑀬 𑀧𑀦 𑀧𑀼𑀘𑁆𑀙𑀸𑀬 𑀯𑀺𑀲𑁆𑀲𑀚𑁆𑀚𑀦𑁂 𑀤𑁆𑀯𑀻𑀳𑀺𑀧𑀺 𑀧𑀤𑁂𑀳𑀺 𑀕𑀳𑀺𑀢𑀓𑁆𑀔𑀦𑁆𑀥𑀸𑀦𑀁 𑀉𑀧𑁆𑀧𑀸𑀤𑁄 𑀯𑀸 𑀦𑀺𑀭𑁄𑀥𑁄 𑀯𑀸 𑀮𑀩𑁆𑀪𑀢𑀺, 𑀅𑀬𑀁 𑀧𑀘𑁆𑀙𑀸𑀧𑀜𑁆𑀳𑁄 𑀦𑀸𑀫. 𑀬𑀸𑀬 𑀧𑀦 𑀧𑀼𑀘𑁆𑀙𑀸𑀬 𑀯𑀺𑀲𑁆𑀲𑀚𑁆𑀚𑀦𑁂 𑀏𑀓𑁂𑀦𑀧𑀺 𑀧𑀤𑁂𑀦 𑀕𑀳𑀺𑀢𑀓𑁆𑀔𑀦𑁆𑀥𑀲𑁆𑀲 𑀤𑁆𑀯𑀻𑀳𑀺𑀧𑀺 𑀧𑀤𑁂𑀳𑀺 𑀕𑀳𑀺𑀢𑀓𑁆𑀔𑀦𑁆𑀥𑀸𑀦𑀁 𑀉𑀧𑁆𑀧𑀸𑀤𑁄 𑀯𑀸, 𑀦𑀺𑀭𑁄𑀥𑁄 𑀯𑀸 𑀮𑀩𑁆𑀪𑀢𑀺, 𑀅𑀬𑀁 𑀧𑀭𑀺𑀧𑀼𑀡𑁆𑀡𑀧𑀜𑁆𑀳𑁄 𑀦𑀸𑀫. 𑀬𑀸𑀬 𑀧𑀦 𑀧𑀼𑀘𑁆𑀙𑀸𑀬 𑀯𑀺𑀲𑁆𑀲𑀚𑁆𑀚𑀦𑁂 𑀧𑀝𑀺𑀓𑁆𑀔𑁂𑀧𑁄 𑀯𑀸, 𑀧𑀝𑀺𑀲𑁂𑀥𑁄 𑀯𑀸 𑀮𑀩𑁆𑀪𑀢𑀺, 𑀅𑀬𑀁 𑀫𑁄𑀖𑀧𑀜𑁆𑀳𑁄 𑀦𑀸𑀫. 𑀬𑀲𑁆𑀫𑀸 𑀧𑀦𑁂𑀲 𑀅𑀤𑀲𑁆𑀲𑀺𑀬𑀫𑀸𑀦𑁄 𑀦 𑀲𑀓𑁆𑀓𑀸 𑀚𑀸𑀦𑀺𑀢𑀼𑀁, 𑀢𑀲𑁆𑀫𑀸 𑀦𑀁 𑀤𑀲𑁆𑀲𑀬𑀺𑀲𑁆𑀲𑀸𑀫.

‘𑀬𑀢𑁆𑀣 𑀭𑀽𑀧𑀓𑁆𑀔𑀦𑁆𑀥𑁄 𑀦𑀼𑀧𑁆𑀧𑀚𑁆𑀚𑀢𑀺, 𑀢𑀢𑁆𑀣 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀦𑀼𑀧𑁆𑀧𑀚𑁆𑀚𑀢𑀻’𑀢𑀺 𑀧𑀼𑀘𑁆𑀙𑀸𑀬 𑀢𑀸𑀯 𑀉𑀧𑁆𑀧𑀚𑁆𑀚𑀢𑀻𑀢𑀺 𑀇𑀫𑀲𑁆𑀫𑀺𑀁 𑀯𑀺𑀲𑁆𑀲𑀚𑁆𑀚𑀦𑁂 𑀏𑀓𑁂𑀦𑁂𑀯 𑀧𑀤𑁂𑀦 𑀕𑀳𑀺𑀢𑀲𑁆𑀲 𑀯𑁂𑀤𑀦𑀸𑀓𑁆𑀔𑀦𑁆𑀥𑀲𑁆𑀲 𑀉𑀧𑁆𑀧𑀸𑀤𑁄 𑀮𑀩𑁆𑀪𑀢𑀺, 𑀇𑀢𑀺 𑀅𑀬𑀜𑁆𑀘𑁂𑀯 𑀅𑀜𑁆𑀜𑁄 𑀘 𑀏𑀯𑀭𑀽𑀧𑁄 𑀧𑀜𑁆𑀳𑁄 𑀧𑀼𑀭𑁂𑀧𑀜𑁆𑀳𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. ‘𑀬𑀲𑁆𑀲 𑀭𑀽𑀧𑀓𑁆𑀔𑀦𑁆𑀥𑁄 𑀉𑀧𑁆𑀧𑀚𑁆𑀚𑀺𑀢𑁆𑀣, 𑀢𑀲𑁆𑀲 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀉𑀧𑁆𑀧𑀚𑁆𑀚𑀺𑀢𑁆𑀣𑀸’𑀢𑀺 𑀧𑀼𑀘𑁆𑀙𑀸𑀬 𑀧𑀦 ‘𑀆𑀫𑀦𑁆𑀢𑀸’𑀢𑀺 𑀇𑀫𑀲𑁆𑀫𑀺𑀁 𑀯𑀺𑀲𑁆𑀲𑀚𑁆𑀚𑀦𑁂 𑀤𑁆𑀯𑀻𑀳𑀺 𑀧𑀤𑁂𑀳𑀺 𑀕𑀳𑀺𑀢𑀸𑀦𑀁 𑀭𑀽𑀧𑀯𑁂𑀤𑀦𑀸𑀓𑁆𑀔𑀦𑁆𑀥𑀸𑀦𑀁 𑀬𑀲𑁆𑀲 𑀓𑀲𑁆𑀲𑀘𑀺 𑀲𑀢𑁆𑀢𑀲𑁆𑀲 𑀅𑀢𑀻𑀢𑁂 𑀉𑀧𑁆𑀧𑀸𑀤𑁄 𑀮𑀩𑁆𑀪𑀢𑀺. 𑀇𑀢𑀺 𑀅𑀬𑀜𑁆𑀘𑁂𑀯 𑀅𑀜𑁆𑀜𑁄 𑀘 𑀏𑀯𑀭𑀽𑀧𑁄 𑀧𑀜𑁆𑀳𑁄 𑀧𑀘𑁆𑀙𑀸𑀧𑀜𑁆𑀳𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

‘𑀬𑀲𑁆𑀲 𑀭𑀽𑀧𑀓𑁆𑀔𑀦𑁆𑀥𑁄 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀉𑀧𑁆𑀧𑀚𑁆𑀚𑀢𑀻’𑀢𑀺 𑀇𑀫𑀸𑀬 𑀧𑀦 𑀧𑀞𑀫𑀧𑀼𑀘𑁆𑀙𑀸𑀬 ‘𑀅𑀲𑀜𑁆𑀜𑀲𑀢𑁆𑀢𑀁 𑀉𑀧𑀧𑀚𑁆𑀚𑀦𑁆𑀢𑀸𑀦’𑀦𑁆𑀢𑀺𑀆𑀤𑀺𑀓𑁂 𑀇𑀫𑀲𑁆𑀫𑀺𑀁 𑀯𑀺𑀲𑁆𑀲𑀚𑁆𑀚𑀦𑁂 ‘𑀅𑀲𑀜𑁆𑀜𑀲𑀢𑁆𑀢𑀁 𑀉𑀧𑀧𑀚𑁆𑀚𑀦𑁆𑀢𑀸𑀦𑀁 𑀢𑁂𑀲𑀁 𑀭𑀽𑀧𑀓𑁆𑀔𑀦𑁆𑀥𑁄 𑀉𑀧𑁆𑀧𑀚𑁆𑀚𑀢𑀺, 𑀦𑁄 𑀘 𑀢𑁂𑀲𑀁 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀉𑀧𑁆𑀧𑀚𑁆𑀚𑀢𑀻’𑀢𑀺 𑀇𑀫𑀲𑁆𑀫𑀺𑀁 𑀓𑁄𑀝𑁆𑀞𑀸𑀲𑁂 𑀏𑀓𑁂𑀦𑁂𑀯 𑀧𑀤𑁂𑀦 𑀕𑀳𑀺𑀢𑀲𑁆𑀲 𑀭𑀽𑀧𑀓𑁆𑀔𑀦𑁆𑀥𑀲𑁆𑀲𑀧𑀺 𑀉𑀧𑁆𑀧𑀸𑀤𑁄 𑀮𑀩𑁆𑀪𑀢𑀺. ‘𑀧𑀜𑁆𑀘𑀯𑁄𑀓𑀸𑀭𑀁 𑀉𑀧𑀧𑀚𑁆𑀚𑀦𑁆𑀢𑀸𑀦𑀁 𑀢𑁂𑀲𑀁 𑀭𑀽𑀧𑀓𑁆𑀔𑀦𑁆𑀥𑁄 𑀘 𑀉𑀧𑁆𑀧𑀚𑁆𑀚𑀢𑀺 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀘 𑀉𑀧𑁆𑀧𑀚𑁆𑀚𑀢𑀻’𑀢𑀺 𑀇𑀫𑀲𑁆𑀫𑀺𑀁 𑀓𑁄𑀝𑁆𑀞𑀸𑀲𑁂 𑀤𑁆𑀯𑀻𑀳𑀺𑀧𑀺 𑀧𑀤𑁂𑀳𑀺 𑀲𑀗𑁆𑀕𑀳𑀺𑀢𑀸𑀦𑀁 𑀭𑀽𑀧𑀯𑁂𑀤𑀦𑀸𑀓𑁆𑀔𑀦𑁆𑀥𑀸𑀦𑀫𑁆𑀧𑀺 𑀉𑀧𑁆𑀧𑀸𑀤𑁄 𑀮𑀩𑁆𑀪𑀢𑀺. 𑀇𑀢𑀺 𑀅𑀬𑀜𑁆𑀘𑁂𑀯 𑀅𑀜𑁆𑀜𑁄 𑀘 𑀏𑀯𑀭𑀽𑀧𑁄 𑀧𑀜𑁆𑀳𑁄 𑀧𑀭𑀺𑀧𑀼𑀡𑁆𑀡𑀧𑀜𑁆𑀳𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀧𑀼𑀭𑁂𑀧𑀘𑁆𑀙𑀸𑀧𑀜𑁆𑀳𑁄𑀢𑀺𑀧𑀺 𑀏𑀢𑀲𑁆𑀲𑁂𑀯 𑀦𑀸𑀫𑀁. 𑀏𑀢𑀲𑁆𑀲 𑀳𑀺 𑀯𑀺𑀲𑁆𑀲𑀚𑁆𑀚𑀦𑁂 𑀧𑀼𑀭𑀺𑀫𑀓𑁄𑀝𑁆𑀞𑀸𑀲𑁂 𑀏𑀓𑁂𑀦 𑀧𑀤𑁂𑀦 𑀲𑀗𑁆𑀕𑀳𑀺𑀢𑀲𑁆𑀲 𑀭𑀽𑀧𑀓𑁆𑀔𑀦𑁆𑀥𑀲𑁆𑀲𑁂𑀯 𑀉𑀧𑁆𑀧𑀸𑀤𑁄 𑀤𑀲𑁆𑀲𑀺𑀢𑁄. 𑀤𑀼𑀢𑀺𑀬𑀓𑁄𑀝𑁆𑀞𑀸𑀲𑁂 𑀤𑁆𑀯𑀻𑀳𑀺 𑀧𑀤𑁂𑀳𑀺 𑀲𑀗𑁆𑀕𑀳𑀺𑀢𑀸𑀦𑀁 𑀭𑀽𑀧𑀯𑁂𑀤𑀦𑀸𑀓𑁆𑀔𑀦𑁆𑀥𑀸𑀦𑀁. 𑀇𑀫𑀺𑀦𑀸𑀬𑁂𑀯 𑀘 𑀮𑀓𑁆𑀔𑀡𑁂𑀦 𑀬𑀢𑁆𑀣 𑀏𑀓𑁂𑀦 𑀧𑀤𑁂𑀦 𑀲𑀗𑁆𑀕𑀳𑀺𑀢𑀲𑁆𑀲 𑀔𑀦𑁆𑀥𑀲𑁆𑀲 𑀉𑀧𑁆𑀧𑀸𑀤𑁄 𑀯𑀸 𑀦𑀺𑀭𑁄𑀥𑁄 𑀯𑀸 𑀮𑀩𑁆𑀪𑀢𑀺, 𑀲𑁄 𑀧𑀼𑀭𑁂𑀧𑀜𑁆𑀳𑁄𑀢𑀺 𑀯𑀼𑀢𑁆𑀢𑁄. 𑀬𑀢𑁆𑀣 𑀤𑁆𑀯𑀻𑀳𑀺𑀧𑀺 𑀧𑀤𑁂𑀳𑀺 𑀲𑀗𑁆𑀕𑀳𑀺𑀢𑀸𑀦𑀁 𑀔𑀦𑁆𑀥𑀸𑀦𑀁 𑀉𑀧𑁆𑀧𑀸𑀤𑁄 𑀯𑀸 𑀦𑀺𑀭𑁄𑀥𑁄 𑀯𑀸 𑀮𑀩𑁆𑀪𑀢𑀺, 𑀲𑁄 𑀧𑀘𑁆𑀙𑀸𑀧𑀜𑁆𑀳𑁄𑀢𑀺 𑀯𑀼𑀢𑁆𑀢𑁄.

‘𑀬𑀲𑁆𑀲 𑀭𑀽𑀧𑀓𑁆𑀔𑀦𑁆𑀥𑁄 𑀦𑀼𑀧𑁆𑀧𑀚𑁆𑀚𑀺𑀢𑁆𑀣, 𑀢𑀲𑁆𑀲 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀦𑀼𑀧𑁆𑀧𑀚𑁆𑀚𑀺𑀢𑁆𑀣𑀸’𑀢𑀺 𑀇𑀫𑀸𑀬 𑀧𑀦 𑀧𑀼𑀘𑁆𑀙𑀸𑀬 ‘𑀦𑀢𑁆𑀣𑀻’𑀢𑀺 𑀇𑀫𑀲𑁆𑀫𑀺𑀁 𑀯𑀺𑀲𑁆𑀲𑀚𑁆𑀚𑀦𑁂 𑀧𑀝𑀺𑀓𑁆𑀔𑁂𑀧𑁄 𑀮𑀩𑁆𑀪𑀢𑀺. ‘𑀬𑀲𑁆𑀲 𑀭𑀽𑀧𑀓𑁆𑀔𑀦𑁆𑀥𑁄 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀦𑀺𑀭𑀼𑀚𑁆𑀛𑀢𑀻’𑀢𑀺 𑀧𑀼𑀘𑁆𑀙𑀸𑀬 ‘𑀦𑁄’𑀢𑀺 𑀇𑀫𑀲𑁆𑀫𑀺𑀁 𑀯𑀺𑀲𑁆𑀲𑀚𑁆𑀚𑀦𑁂 𑀧𑀝𑀺𑀲𑁂𑀥𑁄 𑀮𑀩𑁆𑀪𑀢𑀺. 𑀢𑀲𑁆𑀫𑀸 𑀅𑀬𑀜𑁆𑀘𑁂𑀯 𑀤𑀼𑀯𑀺𑀥𑁄 𑀅𑀜𑁆𑀜𑁄 𑀘 𑀏𑀯𑀭𑀽𑀧𑁄 𑀧𑀜𑁆𑀳𑁄 𑀫𑁄𑀖𑀧𑀜𑁆𑀳𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀢𑀼𑀘𑁆𑀙𑀧𑀜𑁆𑀳𑁄𑀢𑀺𑀧𑀺 𑀯𑀼𑀘𑁆𑀘𑀢𑀺. 𑀏𑀯𑀁 𑀢𑀸𑀯 𑀘𑀢𑁆𑀢𑀸𑀭𑁄 𑀧𑀜𑁆𑀳𑀸 𑀯𑁂𑀤𑀺𑀢𑀩𑁆𑀩𑀸.

𑀧𑀸𑀴𑀺𑀕𑀢𑀺𑀬𑀸 𑀯𑀺𑀲𑁆𑀲𑀚𑁆𑀚𑀦𑀁, 𑀧𑀝𑀺𑀯𑀘𑀦𑀯𑀺𑀲𑁆𑀲𑀚𑁆𑀚𑀦𑀁, 𑀲𑀭𑀽𑀧𑀤𑀲𑁆𑀲𑀦𑁂𑀦 𑀯𑀺𑀲𑁆𑀲𑀚𑁆𑀚𑀦𑀁, 𑀧𑀝𑀺𑀓𑁆𑀔𑁂𑀧𑁂𑀦 𑀯𑀺𑀲𑁆𑀲𑀚𑁆𑀚𑀦𑀁, 𑀧𑀝𑀺𑀲𑁂𑀥𑁂𑀦 𑀯𑀺𑀲𑁆𑀲𑀚𑁆𑀚𑀦𑀦𑁆𑀢𑀺 𑀇𑀫𑀸𑀦𑀺 𑀧𑀦 𑀧𑀜𑁆𑀘 𑀯𑀺𑀲𑁆𑀲𑀚𑁆𑀚𑀦𑀸𑀦𑀺 𑀦𑀸𑀫. 𑀢𑀢𑁆𑀣 𑀬𑀁 𑀯𑀺𑀲𑁆𑀲𑀚𑁆𑀚𑀦𑀁 𑀧𑀸𑀴𑀺𑀧𑀤𑀫𑁂𑀯 𑀳𑀼𑀢𑁆𑀯𑀸 𑀅𑀢𑁆𑀣𑀁 𑀯𑀺𑀲𑁆𑀲𑀚𑁆𑀚𑁂𑀢𑀺, 𑀇𑀤𑀁 𑀧𑀸𑀴𑀺𑀕𑀢𑀺𑀬𑀸 𑀯𑀺𑀲𑁆𑀲𑀚𑁆𑀚𑀦𑀁 𑀦𑀸𑀫. 𑀢𑀁 𑀧𑀼𑀭𑁂𑀧𑀜𑁆𑀳𑁂 𑀮𑀩𑁆𑀪𑀢𑀺. ‘𑀬𑀢𑁆𑀣 𑀭𑀽𑀧𑀓𑁆𑀔𑀦𑁆𑀥𑁄 𑀦𑀼𑀧𑁆𑀧𑀚𑁆𑀚𑀢𑀺 𑀢𑀢𑁆𑀣 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀦𑀼𑀧𑁆𑀧𑀚𑁆𑀚𑀢𑀻’𑀢𑀺 𑀳𑀺 𑀧𑀜𑁆𑀳𑁂 ‘𑀉𑀧𑁆𑀧𑀚𑁆𑀚𑀢𑀻’𑀢𑀺 𑀇𑀤𑀁 𑀯𑀺𑀲𑁆𑀲𑀚𑁆𑀚𑀦𑀁 𑀧𑀸𑀴𑀺𑀧𑀤𑀫𑁂𑀯 𑀳𑀼𑀢𑁆𑀯𑀸 𑀅𑀢𑁆𑀣𑀁 𑀯𑀺𑀲𑁆𑀲𑀚𑁆𑀚𑀬𑀫𑀸𑀦𑀁 𑀕𑀢𑀁, 𑀢𑀲𑁆𑀫𑀸 𑀏𑀯𑀭𑀽𑀧𑁂𑀲𑀼 𑀞𑀸𑀦𑁂𑀲𑀼 𑀧𑀸𑀴𑀺𑀕𑀢𑀺𑀬𑀸 𑀯𑀺𑀲𑁆𑀲𑀚𑁆𑀚𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀬𑀁 𑀧𑀦 𑀯𑀺𑀲𑁆𑀲𑀚𑁆𑀚𑀦𑀁 𑀧𑀝𑀺𑀯𑀘𑀦𑀪𑀸𑀯𑁂𑀦 𑀅𑀢𑁆𑀣𑀁 𑀯𑀺𑀲𑁆𑀲𑀚𑁆𑀚𑁂𑀢𑀺, 𑀇𑀤𑀁 𑀧𑀝𑀺𑀯𑀘𑀦𑀯𑀺𑀲𑁆𑀲𑀚𑁆𑀚𑀦𑀁 𑀦𑀸𑀫. 𑀢𑀁 𑀧𑀘𑁆𑀙𑀸𑀧𑀜𑁆𑀳𑁂 𑀮𑀩𑁆𑀪𑀢𑀺. ‘𑀬𑀲𑁆𑀲 𑀭𑀽𑀧𑀓𑁆𑀔𑀦𑁆𑀥𑁄 𑀉𑀧𑁆𑀧𑀚𑁆𑀚𑀺𑀢𑁆𑀣, 𑀢𑀲𑁆𑀲 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀉𑀧𑁆𑀧𑀚𑁆𑀚𑀺𑀢𑁆𑀣𑀸’𑀢𑀺 𑀳𑀺 𑀧𑀜𑁆𑀳𑁂 ‘𑀆𑀫𑀦𑁆𑀢𑀸’𑀢𑀺 𑀇𑀤𑀁 𑀯𑀺𑀲𑁆𑀲𑀚𑁆𑀚𑀦𑀁 𑀧𑀝𑀺𑀯𑀘𑀦𑀯𑀲𑁂𑀦𑁂𑀯 𑀅𑀢𑁆𑀣𑀁 𑀯𑀺𑀲𑁆𑀲𑀚𑁆𑀚𑀬𑀫𑀸𑀦𑀁 𑀕𑀢𑀁, 𑀢𑀲𑁆𑀫𑀸 𑀏𑀯𑀭𑀽𑀧𑁂𑀲𑀼 𑀞𑀸𑀦𑁂𑀲𑀼 𑀧𑀝𑀺𑀯𑀘𑀦𑀯𑀺𑀲𑁆𑀲𑀚𑁆𑀚𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀬𑀁 𑀯𑀺𑀲𑁆𑀲𑀚𑁆𑀚𑀦𑀁 𑀲𑀭𑀽𑀧𑁂𑀦 𑀤𑀲𑁆𑀲𑁂𑀢𑁆𑀯𑀸 𑀅𑀢𑁆𑀣𑀁 𑀯𑀺𑀲𑁆𑀲𑀚𑁆𑀚𑁂𑀢𑀺; 𑀇𑀤𑀁 𑀲𑀭𑀽𑀧𑀤𑀲𑁆𑀲𑀦𑁂𑀦 𑀯𑀺𑀲𑁆𑀲𑀚𑁆𑀚𑀦𑀁 𑀦𑀸𑀫. 𑀢𑀁 𑀧𑀭𑀺𑀧𑀼𑀡𑁆𑀡𑀧𑀜𑁆𑀳𑁂 𑀮𑀩𑁆𑀪𑀢𑀺. ‘𑀬𑀲𑁆𑀲 𑀭𑀽𑀧𑀓𑁆𑀔𑀦𑁆𑀥𑁄 𑀉𑀧𑁆𑀧𑀚𑁆𑀚𑀢𑀺; 𑀢𑀲𑁆𑀲 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀉𑀧𑁆𑀧𑀚𑁆𑀚𑀢𑀻’𑀢𑀺 𑀳𑀺 𑀧𑀜𑁆𑀳𑁂 ‘𑀅𑀲𑀜𑁆𑀜𑀲𑀢𑁆𑀢𑀁 𑀉𑀧𑀧𑀚𑁆𑀚𑀦𑁆𑀢𑀸𑀦’𑀦𑁆𑀢𑀺 𑀇𑀤𑀁 𑀯𑀺𑀲𑁆𑀲𑀚𑁆𑀚𑀦𑀁 ‘𑀇𑀫𑁂𑀲𑀁 𑀭𑀽𑀧𑀓𑁆𑀔𑀦𑁆𑀥𑁄 𑀉𑀧𑁆𑀧𑀚𑁆𑀚𑀢𑀺, 𑀦𑁄 𑀘 𑀯𑁂𑀤𑀦𑀸𑀓𑁆𑀔𑀦𑁆𑀥𑁄, 𑀇𑀫𑁂𑀲𑀁 𑀭𑀽𑀧𑀓𑁆𑀔𑀦𑁆𑀥𑁄 𑀘 𑀉𑀧𑁆𑀧𑀚𑁆𑀚𑀢𑀺, 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀘𑀸’𑀢𑀺 𑀲𑀭𑀽𑀧𑀤𑀲𑁆𑀲𑀦𑁂𑀦𑁂𑀯 𑀅𑀢𑁆𑀣𑀁 𑀯𑀺𑀲𑁆𑀲𑀚𑁆𑀚𑀬𑀫𑀸𑀦𑀁 𑀕𑀢𑀁. 𑀢𑀲𑁆𑀫𑀸 𑀏𑀯𑀭𑀽𑀧𑁂𑀲𑀼 𑀞𑀸𑀦𑁂𑀲𑀼 𑀲𑀭𑀽𑀧𑀤𑀲𑁆𑀲𑀦𑁂𑀦 𑀯𑀺𑀲𑁆𑀲𑀚𑁆𑀚𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀬𑀁 𑀧𑀦 𑀯𑀺𑀲𑁆𑀲𑀚𑁆𑀚𑀦𑀁 𑀢𑀣𑀸𑀭𑀽𑀧𑀲𑁆𑀲 𑀅𑀢𑁆𑀣𑀲𑁆𑀲𑀸𑀪𑀸𑀯𑀢𑁄 𑀅𑀢𑁆𑀣𑀧𑀝𑀺𑀓𑁆𑀔𑁂𑀧𑁂𑀦 𑀧𑀜𑁆𑀳𑀁 𑀯𑀺𑀲𑁆𑀲𑀚𑁆𑀚𑁂𑀢𑀺, 𑀇𑀤𑀁 𑀧𑀝𑀺𑀓𑁆𑀔𑁂𑀧𑁂𑀦 𑀯𑀺𑀲𑁆𑀲𑀚𑁆𑀚𑀦𑀁 𑀦𑀸𑀫. 𑀬𑀁 𑀢𑀣𑀸𑀭𑀽𑀧𑀲𑁆𑀲 𑀅𑀢𑁆𑀣𑀲𑁆𑀲 𑀏𑀓𑀓𑁆𑀔𑀡𑁂 𑀅𑀮𑀸𑀪𑀢𑁄 𑀅𑀢𑁆𑀣𑀧𑀝𑀺𑀲𑁂𑀥𑀦𑁂𑀦 𑀧𑀜𑁆𑀳𑀁 𑀯𑀺𑀲𑁆𑀲𑀚𑁆𑀚𑁂𑀢𑀺, 𑀇𑀤𑀁 𑀧𑀝𑀺𑀲𑁂𑀥𑁂𑀦 𑀯𑀺𑀲𑁆𑀲𑀚𑁆𑀚𑀦𑀁 𑀦𑀸𑀫. 𑀢𑀁 𑀫𑁄𑀖𑀧𑀜𑁆𑀳𑁂 𑀮𑀩𑁆𑀪𑀢𑀺. ‘𑀬𑀲𑁆𑀲 𑀭𑀽𑀧𑀓𑁆𑀔𑀦𑁆𑀥𑁄 𑀦𑀼𑀧𑁆𑀧𑀚𑁆𑀚𑀺𑀢𑁆𑀣, 𑀢𑀲𑁆𑀲 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀦𑀼𑀧𑁆𑀧𑀚𑁆𑀚𑀺𑀢𑁆𑀣𑀸’𑀢𑀺 𑀳𑀺 𑀧𑀜𑁆𑀳𑁂 ‘𑀦𑀢𑁆𑀣𑀻’𑀢𑀺 𑀇𑀤𑀁 𑀯𑀺𑀲𑁆𑀲𑀚𑁆𑀚𑀦𑀁; 𑀏𑀯𑀭𑀽𑀧𑁄 𑀦𑀸𑀫 𑀲𑀢𑁆𑀢𑁄 𑀦𑀢𑁆𑀣𑀻𑀢𑀺 𑀅𑀢𑁆𑀣𑀧𑀝𑀺𑀓𑁆𑀔𑁂𑀧𑁂𑀦 𑀧𑀜𑁆𑀳𑀁 𑀯𑀺𑀲𑁆𑀲𑀚𑁆𑀚𑀬𑀫𑀸𑀦𑀁 𑀕𑀢𑀁; 𑀢𑀲𑁆𑀫𑀸 𑀏𑀯𑀭𑀽𑀧𑁂𑀲𑀼 𑀞𑀸𑀦𑁂𑀲𑀼 𑀧𑀝𑀺𑀓𑁆𑀔𑁂𑀧𑁂𑀦 𑀯𑀺𑀲𑁆𑀲𑀚𑁆𑀚𑀦𑀁 𑀯𑁂𑀤𑀺𑀢𑀩𑁆𑀩𑀁. ‘𑀬𑀲𑁆𑀲 𑀭𑀽𑀧𑀓𑁆𑀔𑀦𑁆𑀥𑁄 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀦𑀺𑀭𑀼𑀚𑁆𑀛𑀢𑀻’𑀢𑀺 𑀧𑀜𑁆𑀳𑁂 𑀧𑀦 ‘𑀦𑁄’𑀢𑀺 𑀇𑀤𑀁 𑀯𑀺𑀲𑁆𑀲𑀚𑁆𑀚𑀦𑀁 𑀏𑀓𑀲𑁆𑀫𑀺𑀁 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀉𑀧𑁆𑀧𑀸𑀤𑁂𑀦 𑀲𑀤𑁆𑀥𑀺𑀁 𑀦𑀺𑀭𑁄𑀥𑁄 𑀦𑀸𑀫 𑀦 𑀮𑀩𑁆𑀪𑀢𑀻𑀢𑀺 𑀅𑀢𑁆𑀣𑀧𑀝𑀺𑀲𑁂𑀥𑀦𑁂𑀦 𑀧𑀜𑁆𑀳𑀁 𑀯𑀺𑀲𑁆𑀲𑀚𑁆𑀚𑀬𑀫𑀸𑀦𑀁 𑀕𑀢𑀁, 𑀢𑀲𑁆𑀫𑀸 𑀏𑀯𑀭𑀽𑀧𑁂𑀲𑀼 𑀞𑀸𑀦𑁂𑀲𑀼 𑀧𑀝𑀺𑀲𑁂𑀥𑁂𑀦 𑀯𑀺𑀲𑁆𑀲𑀚𑁆𑀚𑀦𑀁 𑀯𑁂𑀤𑀺𑀢𑀩𑁆𑀩𑀁.

𑀇𑀤𑀸𑀦𑀺 𑀇𑀫𑁂 𑀘𑀢𑁆𑀢𑀸𑀭𑁄 𑀧𑀜𑁆𑀳𑀸, 𑀇𑀫𑀸𑀦𑀺 𑀘 𑀧𑀜𑁆𑀘 𑀯𑀺𑀲𑁆𑀲𑀚𑁆𑀚𑀦𑀸𑀦𑀺, 𑀬𑁂𑀲𑀼 𑀲𑀢𑁆𑀢𑀯𑀻𑀲𑀢𑀺𑀬𑀸 𑀞𑀸𑀦𑁂𑀲𑀼 𑀧𑀓𑁆𑀔𑀺𑀧𑀺𑀢𑀩𑁆𑀩𑀸𑀦𑀺, 𑀢𑀸𑀦𑀺 𑀏𑀯𑀁 𑀯𑁂𑀤𑀺𑀢𑀩𑁆𑀩𑀸𑀦𑀺 𑁋 𑀅𑀲𑀜𑁆𑀜𑀲𑀢𑁆𑀢𑀁 𑀉𑀧𑀧𑀚𑁆𑀚𑀦𑁆𑀢𑀸𑀦𑀦𑁆𑀢𑀺 𑀏𑀓𑀁 𑀞𑀸𑀦𑀁, 𑀅𑀲𑀜𑁆𑀜𑀲𑀢𑁆𑀢𑁂 𑀢𑀢𑁆𑀣𑀸𑀢𑀺 𑀏𑀓𑀁, 𑀅𑀲𑀜𑁆𑀜𑀲𑀢𑁆𑀢𑀸𑀦𑀦𑁆𑀢𑀺 𑀏𑀓𑀁; 𑀅𑀲𑀜𑁆𑀜𑀲𑀢𑁆𑀢𑀸 𑀘𑀯𑀦𑁆𑀢𑀸𑀦𑀦𑁆𑀢𑀺 𑀏𑀓𑀁; 𑀅𑀭𑀽𑀧𑀁 𑀉𑀧𑀧𑀚𑁆𑀚𑀦𑁆𑀢𑀸𑀦𑀦𑁆𑀢𑀺 𑀏𑀓𑀁, 𑀅𑀭𑀽𑀧𑁂 𑀢𑀢𑁆𑀣𑀸𑀢𑀺 𑀏𑀓𑀁, 𑀅𑀭𑀽𑀧𑀸𑀦𑀦𑁆𑀢𑀺 𑀏𑀓𑀁, 𑀅𑀭𑀽𑀧𑀸 𑀘𑀯𑀦𑁆𑀢𑀸𑀦𑀦𑁆𑀢𑀺 𑀏𑀓𑀁, 𑀅𑀭𑀽𑀧𑁂 𑀧𑀘𑁆𑀙𑀺𑀫𑀪𑀯𑀺𑀓𑀸𑀦𑀦𑁆𑀢𑀺 𑀏𑀓𑀁, 𑀅𑀭𑀽𑀧𑁂 𑀧𑀭𑀺𑀦𑀺𑀩𑁆𑀩𑀦𑁆𑀢𑀸𑀦𑀦𑁆𑀢𑀺 𑀏𑀓𑀁; 𑀬𑁂 𑀘 𑀅𑀭𑀽𑀧𑀁 𑀉𑀧𑀧𑀚𑁆𑀚𑀺𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀦𑁆𑀢𑀻𑀢𑀺 𑀏𑀓𑀁; 𑀧𑀜𑁆𑀘𑀯𑁄𑀓𑀸𑀭𑀁 𑀉𑀧𑀧𑀚𑁆𑀚𑀦𑁆𑀢𑀸𑀦𑀦𑁆𑀢𑀺 𑀏𑀓𑀁, 𑀧𑀜𑁆𑀘𑀯𑁄𑀓𑀸𑀭𑁂 𑀢𑀢𑁆𑀣𑀸𑀢𑀺 𑀏𑀓𑀁, 𑀧𑀜𑁆𑀘𑀯𑁄𑀓𑀸𑀭𑀸𑀦𑀦𑁆𑀢𑀺 𑀏𑀓𑀁 𑀧𑀜𑁆𑀘𑀯𑁄𑀓𑀸𑀭𑀸 𑀘𑀯𑀦𑁆𑀢𑀸𑀦𑀦𑁆𑀢𑀺 𑀏𑀓𑀁, 𑀧𑀜𑁆𑀘𑀯𑁄𑀓𑀸𑀭𑁂 𑀧𑀘𑁆𑀙𑀺𑀫𑀪𑀯𑀺𑀓𑀸𑀦𑀦𑁆𑀢𑀺 𑀏𑀓𑀁, 𑀧𑀜𑁆𑀘𑀯𑁄𑀓𑀸𑀭𑁂 𑀧𑀭𑀺𑀦𑀺𑀩𑁆𑀩𑀦𑁆𑀢𑀸𑀦𑀦𑁆𑀢𑀺 𑀏𑀓𑀁; 𑀲𑀼𑀤𑁆𑀥𑀸𑀯𑀸𑀲𑀁 𑀉𑀧𑀧𑀚𑁆𑀚𑀦𑁆𑀢𑀸𑀦𑀦𑁆𑀢𑀺 𑀏𑀓𑀁, 𑀲𑀼𑀤𑁆𑀥𑀸𑀯𑀸𑀲𑁂 𑀢𑀢𑁆𑀣𑀸𑀢𑀺 𑀏𑀓𑀁, 𑀲𑀼𑀤𑁆𑀥𑀸𑀯𑀸𑀲𑀸𑀦𑀦𑁆𑀢𑀺 𑀏𑀓𑀁, 𑀲𑀼𑀤𑁆𑀥𑀸𑀯𑀸𑀲𑁂 𑀧𑀭𑀺𑀦𑀺𑀩𑁆𑀩𑀦𑁆𑀢𑀸𑀦𑀦𑁆𑀢𑀺 𑀏𑀓𑀁; 𑀲𑀩𑁆𑀩𑁂𑀲𑀁 𑀉𑀧𑀧𑀚𑁆𑀚𑀦𑁆𑀢𑀸𑀦𑀦𑁆𑀢𑀺 𑀏𑀓𑀁, 𑀲𑀩𑁆𑀩𑁂𑀲𑀁 𑀘𑀯𑀦𑁆𑀢𑀸𑀦𑀦𑁆𑀢𑀺 𑀏𑀓𑀁; 𑀲𑀩𑁆𑀩𑀲𑀸𑀥𑀸𑀭𑀡𑀯𑀲𑁂𑀦 𑀧𑀘𑁆𑀙𑀺𑀫𑀪𑀯𑀺𑀓𑀸𑀦𑀦𑁆𑀢𑀺 𑀏𑀓𑀁, 𑀧𑀭𑀺𑀦𑀺𑀩𑁆𑀩𑀦𑁆𑀢𑀸𑀦𑀦𑁆𑀢𑀺 𑀏𑀓𑀁, 𑀘𑀢𑀼𑀯𑁄𑀓𑀸𑀭𑀁 𑀧𑀜𑁆𑀘𑀯𑁄𑀓𑀸𑀭𑀁 𑀉𑀧𑀧𑀚𑁆𑀚𑀦𑁆𑀢𑀸𑀦𑀦𑁆𑀢𑀺 𑀏𑀓𑀁, 𑀘𑀯𑀦𑁆𑀢𑀸𑀦𑀦𑁆𑀢𑀺 𑀏𑀓𑀁. 𑀏𑀯𑀁 𑀇𑀫𑁂𑀲𑀁 𑀘𑀢𑀼𑀦𑁆𑀦𑀁 𑀧𑀜𑁆𑀳𑀸𑀦𑀁 𑀇𑀫𑀸𑀦𑀺 𑀧𑀜𑁆𑀘 𑀯𑀺𑀲𑁆𑀲𑀚𑁆𑀚𑀦𑀸𑀦𑀺 𑀇𑀫𑁂𑀲𑀼 𑀲𑀢𑁆𑀢𑀯𑀻𑀲𑀢𑀺𑀬𑀸 𑀞𑀸𑀦𑁂𑀲𑀼 𑀧𑀓𑁆𑀔𑀺𑀧𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀧𑀯𑀢𑁆𑀢𑀺𑀫𑀳𑀸𑀯𑀸𑀭𑁂 𑀅𑀢𑁆𑀣𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀏𑀯𑀁 𑀯𑀺𑀤𑀺𑀢𑁆𑀯𑀸 𑀳𑀺 𑀧𑀜𑁆𑀳𑀁 𑀯𑀺𑀲𑁆𑀲𑀚𑁆𑀚𑀦𑁆𑀢𑁂𑀦 𑀲𑀼𑀯𑀺𑀲𑁆𑀲𑀚𑁆𑀚𑀺𑀢𑁄 𑀳𑁄𑀢𑀺, 𑀅𑀢𑁆𑀣𑀜𑁆𑀘 𑀯𑀺𑀦𑀺𑀘𑁆𑀙𑀬𑀦𑁆𑀢𑁂𑀦 𑀲𑀼𑀯𑀺𑀦𑀺𑀘𑁆𑀙𑀺𑀢𑁄 𑀳𑁄𑀢𑀺.

𑀢𑀢𑁆𑀣𑀸𑀬𑀁 𑀦𑀬𑁄 𑁋 𑀬𑀲𑁆𑀲 𑀭𑀽𑀧𑀓𑁆𑀔𑀦𑁆𑀥𑁄 𑀉𑀧𑁆𑀧𑀚𑁆𑀚𑀢𑀻𑀢𑀺 𑀬𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑀲𑀫𑀗𑁆𑀕𑀺𑀢𑀸𑀬 𑀭𑀽𑀧𑀓𑁆𑀔𑀦𑁆𑀥𑁄 𑀉𑀧𑁆𑀧𑀚𑁆𑀚𑀢𑀺. 𑀢𑀲𑁆𑀲 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀉𑀧𑁆𑀧𑀚𑁆𑀚𑀢𑀻𑀢𑀺 𑀯𑁂𑀤𑀦𑀸𑀓𑁆𑀔𑀦𑁆𑀥𑁄𑀧𑀺 𑀢𑀲𑁆𑀲 𑀢𑀲𑁆𑀫𑀺𑀜𑁆𑀜𑁂𑀯 𑀔𑀡𑁂 𑀉𑀧𑁆𑀧𑀚𑁆𑀚𑀢𑀻𑀢𑀺 𑀧𑀼𑀘𑁆𑀙𑀢𑀺. 𑀅𑀲𑀜𑁆𑀜𑀲𑀢𑁆𑀢𑀁 𑀉𑀧𑀧𑀚𑁆𑀚𑀦𑁆𑀢𑀸𑀦𑀦𑁆𑀢𑀺 𑀅𑀘𑀺𑀢𑁆𑀢𑀓𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀅𑀲𑀜𑁆𑀜𑀲𑀢𑁆𑀢𑀪𑀯𑀁 𑀉𑀧𑀧𑀚𑁆𑀚𑀦𑁆𑀢𑀸𑀦𑀁. 𑀢𑁂𑀲𑀁 𑀭𑀽𑀧𑀓𑁆𑀔𑀦𑁆𑀥𑁄 𑀉𑀧𑁆𑀧𑀚𑁆𑀚𑀢𑀻𑀢𑀺 𑀢𑁂𑀲𑀁 𑀏𑀓𑀦𑁆𑀢𑁂𑀦 𑀭𑀽𑀧𑀓𑁆𑀔𑀦𑁆𑀥𑁄 𑀉𑀧𑁆𑀧𑀚𑁆𑀚𑀢𑀺𑀬𑁂𑀯. 𑀧𑀯𑀢𑁆𑀢𑁂 𑀉𑀧𑁆𑀧𑀦𑁆𑀦𑀸𑀦𑀁 𑀭𑀽𑀧𑀓𑁆𑀔𑀦𑁆𑀥𑁄 𑀉𑀧𑁆𑀧𑀚𑁆𑀚𑀢𑀺𑀧𑀺 𑀦𑀺𑀭𑀼𑀚𑁆𑀛𑀢𑀺𑀧𑀺, 𑀢𑀲𑁆𑀫𑀸 ‘𑀅𑀲𑀜𑁆𑀜𑀲𑀢𑁆𑀢𑀸𑀦’𑀦𑁆𑀢𑀺 𑀅𑀯𑀢𑁆𑀯𑀸’𑀅𑀲𑀜𑁆𑀜𑀲𑀢𑁆𑀢𑀁 𑀉𑀧𑀧𑀚𑁆𑀚𑀦𑁆𑀢𑀸𑀦’𑀦𑁆𑀢𑀺 𑀯𑀼𑀢𑁆𑀢𑀁. 𑀦𑁄 𑀘 𑀢𑁂𑀲𑀁 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀉𑀧𑁆𑀧𑀚𑁆𑀚𑀢𑀻𑀢𑀺 𑀅𑀘𑀺𑀢𑁆𑀢𑀓𑀢𑁆𑀢𑀸 𑀧𑀦 𑀢𑁂𑀲𑀁 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀦𑀼𑀧𑁆𑀧𑀚𑁆𑀚𑀢𑁂𑀯. 𑀇𑀤𑀁 𑀲𑀢𑁆𑀢𑀯𑀻𑀲𑀢𑀺𑀬𑀸 𑀞𑀸𑀦𑁂𑀲𑀼 𑀧𑀞𑀫𑁂 𑀞𑀸𑀦𑁂 𑀧𑀭𑀺𑀧𑀼𑀡𑁆𑀡𑀧𑀜𑁆𑀳𑀲𑁆𑀲 𑀧𑀼𑀭𑀺𑀫𑀓𑁄𑀝𑁆𑀞𑀸𑀲𑁂 𑀲𑀭𑀽𑀧𑀤𑀲𑁆𑀲𑀦𑁂𑀦 𑀯𑀺𑀲𑁆𑀲𑀚𑁆𑀚𑀦𑀁. 𑀧𑀜𑁆𑀘𑀯𑁄𑀓𑀸𑀭𑀁 𑀉𑀧𑀧𑀚𑁆𑀚𑀦𑁆𑀢𑀸𑀦𑀦𑁆𑀢𑀺 𑀭𑀽𑀧𑀸𑀭𑀽𑀧𑀫𑀺𑀲𑁆𑀲𑀓𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀧𑀜𑁆𑀘𑀯𑁄𑀓𑀸𑀭𑀪𑀯𑀁 𑀉𑀧𑀧𑀚𑁆𑀚𑀦𑁆𑀢𑀸𑀦𑀁. 𑀢𑁂𑀲𑀁 𑀭𑀽𑀧𑀓𑁆𑀔𑀦𑁆𑀥𑁄 𑀘 𑀉𑀧𑁆𑀧𑀚𑁆𑀚𑀢𑀺, 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀘𑀸𑀢𑀺 𑀢𑁂𑀲𑀁 𑀏𑀓𑀦𑁆𑀢𑁂𑀦 𑀭𑀽𑀧𑀯𑁂𑀤𑀦𑀸𑀓𑁆𑀔𑀦𑁆𑀥𑀲𑀗𑁆𑀔𑀸𑀢𑀸 𑀤𑁆𑀯𑁂𑀧𑀺 𑀔𑀦𑁆𑀥𑀸 𑀉𑀧𑁆𑀧𑀚𑁆𑀚𑀦𑁆𑀢𑀺𑀬𑁂𑀯. 𑀧𑀯𑀢𑁆𑀢𑁂 𑀧𑀦 𑀢𑀢𑁆𑀣 𑀉𑀧𑁆𑀧𑀦𑁆𑀦𑀸𑀦𑀁 𑀢𑁂 𑀔𑀦𑁆𑀥𑀸 𑀉𑀧𑁆𑀧𑀚𑁆𑀚𑀦𑁆𑀢𑀺𑀧𑀺 𑀦𑀺𑀭𑀼𑀚𑁆𑀛𑀦𑁆𑀢𑀺𑀧𑀺, 𑀢𑀲𑁆𑀫𑀸 ‘𑀧𑀜𑁆𑀘𑀯𑁄𑀓𑀸𑀭𑀸𑀦’𑀦𑁆𑀢𑀺 𑀅𑀯𑀢𑁆𑀯𑀸 ‘𑀧𑀜𑁆𑀘𑀯𑁄𑀓𑀸𑀭𑀁 𑀉𑀧𑀧𑀚𑁆𑀚𑀦𑁆𑀢𑀸𑀦’𑀦𑁆𑀢𑀺 𑀯𑀼𑀢𑁆𑀢𑀁. 𑀇𑀤𑀁 𑀧𑀜𑁆𑀘𑀯𑁄𑀓𑀸𑀭𑀁 𑀉𑀧𑀧𑀚𑁆𑀚𑀦𑁆𑀢𑀸𑀦𑀦𑁆𑀢𑀺 𑀞𑀸𑀦𑁂 𑀧𑀭𑀺𑀧𑀼𑀡𑁆𑀡𑀧𑀜𑁆𑀳𑀲𑁆𑀲 𑀧𑀘𑁆𑀙𑀺𑀫𑀓𑁄𑀝𑁆𑀞𑀸𑀲𑁂 𑀲𑀭𑀽𑀧𑀤𑀲𑁆𑀲𑀦𑁂𑀦 𑀯𑀺𑀲𑁆𑀲𑀚𑁆𑀚𑀦𑀁. 𑀇𑀫𑀺𑀦𑀸 𑀉𑀧𑀸𑀬𑁂𑀦 𑀲𑀩𑁆𑀩𑀸𑀦𑀺 𑀯𑀺𑀲𑁆𑀲𑀚𑁆𑀚𑀦𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺.

𑀇𑀤𑀁 𑀧𑀦𑁂𑀢𑁆𑀣 𑀉𑀧𑁆𑀧𑀸𑀤𑀦𑀺𑀭𑁄𑀥𑁂𑀲𑀼 𑀦𑀺𑀬𑀫𑀮𑀓𑁆𑀔𑀡𑀁 𑁋 𑀲𑀓𑀮𑁂𑀧𑀺 𑀳𑀺 𑀇𑀫𑀲𑁆𑀫𑀺𑀁 𑀔𑀦𑁆𑀥𑀬𑀫𑀓𑁂 𑀢𑀢𑁆𑀣 𑀢𑀢𑁆𑀣 𑀉𑀧𑁆𑀧𑀦𑁆𑀦𑀸𑀦𑀁 𑀧𑀯𑀢𑁆𑀢𑁂 𑀬𑀸𑀯 𑀫𑀭𑀡𑀸 𑀔𑀦𑁆𑀥𑀸𑀦𑀁 𑀅𑀧𑀭𑀺𑀬𑀦𑁆𑀢𑁂𑀲𑀼 𑀉𑀧𑁆𑀧𑀸𑀤𑀦𑀺𑀭𑁄𑀥𑁂𑀲𑀼 𑀯𑀺𑀚𑁆𑀚𑀫𑀸𑀦𑁂𑀲𑀼𑀧𑀺 𑀮𑀳𑀼𑀧𑀭𑀺𑀯𑀢𑁆𑀢𑀸𑀦𑀁 𑀥𑀫𑁆𑀫𑀸𑀦𑀁 𑀯𑀺𑀦𑀺𑀩𑁆𑀪𑁄𑀕𑀁 𑀓𑀢𑁆𑀯𑀸 𑀉𑀧𑁆𑀧𑀸𑀤𑀦𑀺𑀭𑁄𑀥𑁂 𑀤𑀲𑁆𑀲𑁂𑀢𑀼𑀁 𑀦 𑀲𑀼𑀓𑀭𑀦𑁆𑀢𑀺 𑀧𑀯𑀢𑁆𑀢𑀺𑀬𑀁 𑀉𑀧𑁆𑀧𑀸𑀤𑀦𑀺𑀭𑁄𑀥𑁂 𑀅𑀦𑀸𑀫𑀲𑀺𑀢𑁆𑀯𑀸 𑀅𑀪𑀺𑀦𑀯𑀁 𑀯𑀺𑀧𑀸𑀓𑀯𑀝𑁆𑀝𑀁 𑀦𑀺𑀧𑁆𑀨𑀸𑀤𑀬𑀫𑀸𑀦𑁂𑀦 𑀦𑀸𑀦𑀸𑀓𑀫𑁆𑀫𑁂𑀦 𑀦𑀺𑀩𑁆𑀩𑀢𑁆𑀢𑀸𑀦𑀁 𑀧𑀝𑀺𑀲𑀦𑁆𑀥𑀺𑀔𑀦𑁆𑀥𑀸𑀦𑀁 𑀉𑀧𑁆𑀧𑀸𑀤𑀁 𑀤𑀲𑁆𑀲𑁂𑀢𑀼𑀁 𑀲𑀼𑀔𑀦𑁆𑀢𑀺 𑀧𑀝𑀺𑀲𑀦𑁆𑀥𑀺𑀓𑀸𑀮𑁂 𑀉𑀧𑁆𑀧𑀸𑀤𑀯𑀲𑁂𑀦𑁂𑀯 𑀉𑀧𑁆𑀧𑀸𑀤𑀯𑀸𑀭𑁄 𑀓𑀣𑀺𑀢𑁄. 𑀉𑀧𑁆𑀧𑀦𑁆𑀦𑀲𑁆𑀲 𑀧𑀦 𑀯𑀺𑀧𑀸𑀓𑀯𑀝𑁆𑀝𑀲𑁆𑀲 𑀧𑀭𑀺𑀬𑁄𑀲𑀸𑀦𑁂𑀦 𑀦𑀺𑀭𑁄𑀥𑀁 𑀤𑀲𑁆𑀲𑁂𑀢𑀼𑀁 𑀲𑀼𑀔𑀦𑁆𑀢𑀺 𑀫𑀭𑀡𑀓𑀸𑀮𑁂 𑀦𑀺𑀭𑁄𑀥𑀯𑀲𑁂𑀦 𑀦𑀺𑀭𑁄𑀥𑀯𑀸𑀭𑁄 𑀓𑀣𑀺𑀢𑁄.

𑀓𑀺𑀁 𑀧𑀦𑁂𑀢𑁆𑀣 𑀧𑀯𑀢𑁆𑀢𑀺𑀬𑀁 𑀉𑀧𑁆𑀧𑀸𑀤𑀦𑀺𑀭𑁄𑀥𑀸𑀦𑀁 𑀅𑀦𑀸𑀫𑀝𑁆𑀞𑀪𑀸𑀯𑁂 𑀧𑀫𑀸𑀡𑀦𑁆𑀢𑀺? 𑀧𑀸𑀴𑀺𑀬𑁂𑀯. 𑀧𑀸𑀴𑀺𑀬𑀜𑁆𑀳𑀺 𑀯𑀺𑀲𑁂𑀲𑁂𑀦 𑀉𑀧𑁆𑀧𑀸𑀤𑀯𑀸𑀭𑀲𑁆𑀲 𑀅𑀦𑀸𑀕𑀢𑀓𑀸𑀮𑀯𑀸𑀭𑁂 ‘𑀧𑀘𑁆𑀙𑀺𑀫𑀪𑀯𑀺𑀓𑀸𑀦𑀁 𑀢𑁂𑀲𑀁 𑀭𑀽𑀧𑀓𑁆𑀔𑀦𑁆𑀥𑁄 𑀘 𑀦𑀼𑀧𑁆𑀧𑀚𑁆𑀚𑀺𑀲𑁆𑀲𑀢𑀺, 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀘 𑀦𑀼𑀧𑁆𑀧𑀚𑁆𑀚𑀺𑀲𑁆𑀲𑀢𑀻’𑀢𑀺 𑀅𑀬𑀁 𑀧𑀸𑀴𑀺 𑀅𑀢𑀺𑀧𑀫𑀸𑀡𑀫𑁂𑀯. 𑀧𑀘𑁆𑀙𑀺𑀫𑀪𑀯𑀺𑀓𑀸𑀦𑀜𑁆𑀳𑀺 𑀧𑀯𑀢𑁆𑀢𑁂 𑀭𑀽𑀧𑀸𑀭𑀽𑀧𑀥𑀫𑁆𑀫𑀸𑀦𑀁 𑀉𑀧𑁆𑀧𑀚𑁆𑀚𑀺𑀢𑀼𑀁 𑀬𑀼𑀢𑁆𑀢𑀪𑀸𑀯𑁂 𑀲𑀢𑀺𑀧𑀺 ‘𑀭𑀽𑀧𑀓𑁆𑀔𑀦𑁆𑀥𑁄 𑀘 𑀦𑀼𑀧𑁆𑀧𑀚𑁆𑀚𑀺𑀲𑁆𑀲𑀢𑀺, 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀘 𑀦𑀼𑀧𑁆𑀧𑀚𑁆𑀚𑀺𑀲𑁆𑀲𑀢𑀻’𑀢𑀺 𑀲𑀦𑁆𑀦𑀺𑀝𑁆𑀞𑀸𑀦𑀁 𑀓𑀢𑁆𑀯𑀸 𑀯𑀼𑀢𑁆𑀢𑀪𑀸𑀯𑁂𑀦 𑀧𑀯𑀢𑁆𑀢𑁂 𑀉𑀧𑁆𑀧𑀸𑀤𑁄 𑀦 𑀕𑀳𑀺𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. ‘𑀲𑀼𑀤𑁆𑀥𑀸𑀯𑀸𑀲𑁂 𑀧𑀭𑀺𑀦𑀺𑀩𑁆𑀩𑀦𑁆𑀢𑀸𑀦𑀁 𑀢𑁂𑀲𑀁 𑀢𑀢𑁆𑀣 𑀲𑀜𑁆𑀜𑀸𑀓𑁆𑀔𑀦𑁆𑀥𑁄 𑀦 𑀦𑀺𑀭𑀼𑀚𑁆𑀛𑀺𑀢𑁆𑀣, 𑀦𑁄 𑀘 𑀢𑁂𑀲𑀁 𑀢𑀢𑁆𑀣 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀦 𑀦𑀺𑀭𑀼𑀚𑁆𑀛𑀢𑀻’𑀢𑀺 𑀅𑀬𑀁 𑀧𑀦 𑀧𑀸𑀴𑀺 𑀧𑀯𑀢𑁆𑀢𑁂 𑀦𑀺𑀭𑁄𑀥𑀲𑁆𑀲 𑀅𑀦𑀸𑀫𑀝𑁆𑀞𑀪𑀸𑀯𑁂 𑀅𑀢𑀺𑀯𑀺𑀬 𑀧𑀫𑀸𑀡𑀁. 𑀲𑀼𑀤𑁆𑀥𑀸𑀯𑀸𑀲𑁂 𑀧𑀭𑀺𑀦𑀺𑀩𑁆𑀩𑀦𑁆𑀢𑀸𑀦𑀜𑁆𑀳𑀺 𑀘𑀼𑀢𑀺𑀘𑀺𑀢𑁆𑀢𑀲𑁆𑀲 𑀪𑀗𑁆𑀕𑀓𑁆𑀔𑀡𑁂 𑀞𑀺𑀢𑀸𑀦𑀁 𑀧𑀝𑀺𑀲𑀦𑁆𑀥𑀺𑀢𑁄 𑀧𑀝𑁆𑀞𑀸𑀬 𑀧𑀯𑀢𑁆𑀢𑁂 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀦𑀺𑀭𑀼𑀤𑁆𑀥𑀲𑀜𑁆𑀜𑀸𑀓𑁆𑀔𑀦𑁆𑀥𑀸𑀦𑀁 𑀕𑀡𑀦𑀧𑀣𑁄 𑀦𑀢𑁆𑀣𑀺. ‘𑀏𑀯𑀁 𑀲𑀦𑁆𑀢𑁂𑀧𑀺 𑀢𑁂𑀲𑀁 𑀢𑀢𑁆𑀣 𑀲𑀜𑁆𑀜𑀸𑀓𑁆𑀔𑀦𑁆𑀥𑁄 𑀦 𑀦𑀺𑀭𑀼𑀚𑁆𑀛𑀺𑀢𑁆𑀣𑀸’𑀢𑀺 𑀲𑀦𑁆𑀦𑀺𑀝𑁆𑀞𑀸𑀦𑀁 𑀓𑀢𑁆𑀯𑀸 𑀯𑀼𑀢𑁆𑀢𑀪𑀸𑀯𑁂𑀦 𑀧𑀯𑀢𑁆𑀢𑁂 𑀦𑀺𑀭𑁄𑀥𑁄 𑀦 𑀕𑀳𑀺𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀏𑀯𑀫𑁂𑀢𑁆𑀣 𑀉𑀧𑁆𑀧𑀸𑀤𑀦𑀺𑀭𑁄𑀥𑁂𑀲𑀼 𑀦𑀺𑀬𑀫𑀮𑀓𑁆𑀔𑀡𑀁 𑀯𑀺𑀤𑀺𑀢𑁆𑀯𑀸 𑀧𑀝𑀺𑀲𑀦𑁆𑀥𑀺𑀉𑀧𑁆𑀧𑀸𑀤𑀫𑁂𑀯 𑀘𑀼𑀢𑀺𑀦𑀺𑀭𑁄𑀥𑀫𑁂𑀯 𑀘 𑀕𑀳𑁂𑀢𑁆𑀯𑀸 𑀢𑁂𑀲𑀼 𑀢𑁂𑀲𑀼 𑀞𑀸𑀦𑁂𑀲𑀼 𑀆𑀕𑀢𑀸𑀦𑀁 𑀯𑀺𑀲𑁆𑀲𑀚𑁆𑀚𑀦𑀸𑀦𑀁 𑀅𑀢𑁆𑀣𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀲𑁄 𑀧𑀦 𑀲𑀓𑁆𑀓𑀸 𑀆𑀤𑀺𑀯𑀺𑀲𑁆𑀲𑀚𑁆𑀚𑀦𑁂 𑀯𑀼𑀢𑁆𑀢𑀦𑀬𑁂𑀦 𑀲𑀩𑁆𑀩𑀢𑁆𑀣 𑀯𑀺𑀤𑀺𑀢𑀼𑀦𑁆𑀢𑀺 𑀯𑀺𑀲𑁆𑀲𑀚𑁆𑀚𑀦𑀧𑀝𑀺𑀧𑀸𑀝𑀺𑀬𑀸 𑀦 𑀯𑀺𑀢𑁆𑀣𑀸𑀭𑀺𑀢𑁄. 𑀇𑀫𑀺𑀦𑀸 𑀧𑀦 𑀏𑀯𑀁 𑀤𑀺𑀦𑁆𑀦𑁂𑀦𑀧𑀺 𑀦𑀬𑁂𑀦 𑀬𑁄 𑀏𑀢𑁂𑀲𑀁 𑀅𑀢𑁆𑀣𑀯𑀺𑀦𑀺𑀘𑁆𑀙𑀬𑀁 𑀚𑀸𑀦𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀢𑁂𑀦 𑀆𑀘𑀭𑀺𑀬𑁂 𑀧𑀬𑀺𑀭𑀼𑀧𑀸𑀲𑀺𑀢𑁆𑀯𑀸 𑀲𑀸𑀥𑀼𑀓𑀁 𑀲𑀼𑀢𑁆𑀯𑀸𑀧𑀺 𑀚𑀸𑀦𑀺𑀢𑀩𑁆𑀩𑁄.

𑀉𑀧𑁆𑀧𑀸𑀤𑀲𑁆𑀲 𑀦𑀺𑀭𑁄𑀥𑀲𑁆𑀲, 𑀉𑀧𑁆𑀧𑀦𑁆𑀦𑀜𑁆𑀘𑀸𑀧𑀺 𑀏𑀓𑀢𑁄;

𑀦𑀬𑀲𑁆𑀲 𑀅𑀦𑀼𑀮𑁄𑀫𑀲𑁆𑀲, 𑀧𑀝𑀺𑀮𑁄𑀫𑀦𑀬𑀲𑁆𑀲 𑀘.

𑀯𑀲𑁂𑀦 𑀬𑀸𑀦𑀺 𑀔𑀦𑁆𑀥𑁂𑀲𑀼, 𑀬𑀫𑀓𑀸𑀦𑀺 𑀘 𑀧𑀜𑁆𑀘𑀲𑀼;

𑀧𑀼𑀕𑁆𑀕𑀮𑀁 𑀅𑀣 𑀑𑀓𑀸𑀲𑀁, 𑀧𑀼𑀕𑁆𑀕𑀮𑁄𑀓𑀸𑀲𑀫𑁂𑀯 𑀘.

𑀆𑀫𑀲𑀺𑀢𑁆𑀯𑀸 𑀧𑀯𑀢𑁆𑀢𑁂𑀲𑀼, 𑀞𑀸𑀦𑁂𑀲𑀼 𑀓𑀣𑀬𑀻 𑀚𑀺𑀦𑁄;

𑀢𑁂𑀲𑀁 𑀧𑀸𑀴𑀺𑀯𑀯𑀢𑁆𑀣𑀸𑀦𑀁, 𑀤𑀲𑁆𑀲𑀺𑀢𑀁 𑀅𑀦𑀼𑀧𑀼𑀩𑁆𑀩𑀢𑁄.

𑀯𑀺𑀦𑀺𑀘𑁆𑀙𑀬𑀢𑁆𑀣𑀁 𑀅𑀢𑁆𑀣𑀲𑁆𑀲, 𑀧𑀜𑁆𑀳𑀸𑀯𑀺𑀲𑁆𑀲𑀚𑁆𑀚𑀦𑀸𑀦𑀺 𑀘;

𑀯𑀺𑀲𑁆𑀲𑀚𑁆𑀚𑀦𑀸𑀦𑀁 𑀞𑀸𑀦𑀸𑀦𑀺, 𑀬𑀸𑀦𑀺 𑀢𑀸𑀦𑀺 𑀘 𑀲𑀩𑁆𑀩𑀲𑁄.

𑀤𑀲𑁆𑀲𑁂𑀢𑁆𑀯𑀸 𑀏𑀓𑀧𑀜𑁆𑀳𑀲𑁆𑀫𑀺𑀁, 𑀬𑁄𑀚𑀦𑀸𑀧𑀺 𑀧𑀓𑀸𑀲𑀺𑀢𑀸;

𑀯𑀺𑀢𑁆𑀣𑀸𑀭𑁂𑀦 𑀕𑀢𑁂 𑀏𑀢𑁆𑀣, 𑀧𑀜𑁆𑀳𑀸𑀯𑀺𑀲𑁆𑀲𑀚𑁆𑀚𑀦𑀓𑁆𑀓𑀫𑁂.

𑀅𑀢𑁆𑀣𑀁 𑀯𑀡𑁆𑀡𑀬𑀢𑀸 𑀓𑀸𑀢𑀼𑀁, 𑀓𑀺𑀁 𑀦𑀼 𑀲𑀓𑁆𑀓𑀸 𑀇𑀢𑁄 𑀧𑀭𑀁;

𑀦𑀬𑁂𑀦 𑀇𑀫𑀺𑀦𑀸 𑀢𑀲𑁆𑀫𑀸, 𑀅𑀢𑁆𑀣𑀁 𑀚𑀸𑀦𑀦𑁆𑀢𑀼 𑀧𑀡𑁆𑀟𑀺𑀢𑀸𑀢𑀺.

𑀧𑀯𑀢𑁆𑀢𑀺𑀫𑀳𑀸𑀯𑀸𑀭𑀯𑀡𑁆𑀡𑀦𑀸.

𑁩. 𑀧𑀭𑀺𑀜𑁆𑀜𑀸𑀯𑀸𑀭𑀯𑀡𑁆𑀡𑀦𑀸

𑁨𑁦𑁬-𑁨𑁦𑁮. 𑀢𑀤𑀦𑀦𑁆𑀢𑀭𑁂 𑀧𑀭𑀺𑀜𑁆𑀜𑀸𑀯𑀸𑀭𑁂𑀧𑀺 𑀙𑀴𑁂𑀯 𑀓𑀸𑀮𑀪𑁂𑀤𑀸. 𑀅𑀦𑀼𑀮𑁄𑀫𑀧𑀝𑀺𑀮𑁄𑀫𑀢𑁄 𑀤𑁆𑀯𑁂𑀬𑁂𑀯 𑀦𑀬𑀸. 𑀧𑀼𑀕𑁆𑀕𑀮𑀯𑀸𑀭𑁄, 𑀑𑀓𑀸𑀲𑀯𑀸𑀭𑁄, 𑀧𑀼𑀕𑁆𑀕𑀮𑁄𑀓𑀸𑀲𑀯𑀸𑀭𑁄𑀢𑀺 𑀇𑀫𑁂𑀲𑀼 𑀧𑀦 𑀢𑀻𑀲𑀼 𑀧𑀼𑀕𑁆𑀕𑀮𑀯𑀸𑀭𑁄𑀯 𑀮𑀩𑁆𑀪𑀢𑀺, 𑀦 𑀇𑀢𑀭𑁂 𑀤𑁆𑀯𑁂. 𑀓𑀺𑀁 𑀓𑀸𑀭𑀡𑀸? 𑀲𑀤𑀺𑀲𑀯𑀺𑀲𑁆𑀲𑀚𑁆𑀚𑀦𑀢𑀸𑀬. 𑀬𑁄 𑀳𑀺 𑀓𑁄𑀘𑀺 𑀧𑀼𑀕𑁆𑀕𑀮𑁄 𑀬𑀢𑁆𑀣 𑀓𑀢𑁆𑀣𑀘𑀺 𑀞𑀸𑀦𑁂 𑀭𑀽𑀧𑀓𑁆𑀔𑀦𑁆𑀥𑀁 𑀘𑁂 𑀧𑀭𑀺𑀚𑀸𑀦𑀸𑀢𑀺, 𑀯𑁂𑀤𑀦𑀸𑀓𑁆𑀔𑀦𑁆𑀥𑀫𑁆𑀧𑀺 𑀧𑀭𑀺𑀚𑀸𑀦𑀸𑀢𑀺𑀬𑁂𑀯. 𑀯𑁂𑀤𑀦𑀸𑀓𑁆𑀔𑀦𑁆𑀥𑀁 𑀘𑁂 𑀧𑀭𑀺𑀚𑀸𑀦𑀸𑀢𑀺, 𑀭𑀽𑀧𑀓𑁆𑀔𑀦𑁆𑀥𑀫𑁆𑀧𑀺 𑀧𑀭𑀺𑀚𑀸𑀦𑀸𑀢𑀺𑀬𑁂𑀯. 𑀭𑀽𑀧𑀓𑁆𑀔𑀦𑁆𑀥𑀁 𑀘𑁂 𑀦 𑀧𑀭𑀺𑀚𑀸𑀦𑀸𑀢𑀺, 𑀯𑁂𑀤𑀦𑀸𑀓𑁆𑀔𑀦𑁆𑀥𑀫𑁆𑀧𑀺 𑀦 𑀧𑀭𑀺𑀚𑀸𑀦𑀸𑀢𑀺𑀬𑁂𑀯. 𑀯𑁂𑀤𑀦𑀸𑀓𑁆𑀔𑀦𑁆𑀥𑀁 𑀘𑁂 𑀦 𑀧𑀭𑀺𑀚𑀸𑀦𑀸𑀢𑀺, 𑀭𑀽𑀧𑀓𑁆𑀔𑀦𑁆𑀥𑀫𑁆𑀧𑀺 𑀦 𑀧𑀭𑀺𑀚𑀸𑀦𑀸𑀢𑀺𑀬𑁂𑀯. 𑀢𑀲𑁆𑀫𑀸 𑀢𑁂𑀲𑀼𑀧𑀺 ‘𑀬𑀢𑁆𑀣 𑀭𑀽𑀧𑀓𑁆𑀔𑀦𑁆𑀥𑀁 𑀧𑀭𑀺𑀚𑀸𑀦𑀸𑀢𑀺, 𑀢𑀢𑁆𑀣 𑀯𑁂𑀤𑀦𑀸𑀓𑁆𑀔𑀦𑁆𑀥𑀁 𑀧𑀭𑀺𑀚𑀸𑀦𑀸𑀢𑀻’𑀢𑀺 𑀆𑀤𑀺𑀯𑀲𑁂𑀦 𑀧𑀼𑀘𑁆𑀙𑀁 𑀓𑀢𑁆𑀯𑀸 ‘𑀆𑀫𑀦𑁆𑀢𑀸’𑀢𑁆𑀯𑁂𑀯 𑀯𑀺𑀲𑁆𑀲𑀚𑁆𑀚𑀦𑀁 𑀓𑀸𑀢𑀩𑁆𑀩𑀁. 𑀲𑀺𑀬𑀸𑀢𑀺 𑀲𑀤𑀺𑀲𑀯𑀺𑀲𑁆𑀲𑀚𑁆𑀚𑀦𑀢𑀸𑀬 𑀢𑁂 𑀇𑀥 𑀦 𑀮𑀩𑁆𑀪𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀅𑀣 𑀯𑀸 𑀧𑀭𑀺𑀜𑁆𑀜𑀸𑀓𑀺𑀘𑁆𑀘𑀁 𑀦𑀸𑀫 𑀧𑀼𑀕𑁆𑀕𑀮𑀲𑁆𑀲𑁂𑀯 𑀳𑁄𑀢𑀺, 𑀦𑁄 𑀑𑀓𑀸𑀲𑀲𑁆𑀲, 𑀧𑀼𑀕𑁆𑀕𑀮𑁄𑀯 𑀧𑀭𑀺𑀚𑀸𑀦𑀺𑀢𑀼𑀁 𑀲𑀫𑀢𑁆𑀣𑁄, 𑀦𑁄 𑀑𑀓𑀸𑀲𑁄𑀢𑀺 𑀧𑀼𑀕𑁆𑀕𑀮𑀯𑀸𑀭𑁄𑀯𑁂𑀢𑁆𑀣 𑀕𑀳𑀺𑀢𑁄, 𑀦 𑀑𑀓𑀸𑀲𑀯𑀸𑀭𑁄. 𑀢𑀲𑁆𑀲 𑀧𑀦 𑀅𑀕𑁆𑀕𑀳𑀺𑀢𑀢𑁆𑀢𑀸 𑀢𑀤𑀦𑀦𑁆𑀢𑀭𑁄 𑀧𑀼𑀕𑁆𑀕𑀮𑁄𑀓𑀸𑀲𑀯𑀸𑀭𑁄 𑀮𑀩𑁆𑀪𑀫𑀸𑀦𑁄𑀧𑀺 𑀦 𑀕𑀳𑀺𑀢𑁄. 𑀬𑁄 𑀧𑀦𑁂𑀲 𑀧𑀼𑀕𑁆𑀕𑀮𑀯𑀸𑀭𑁄 𑀕𑀳𑀺𑀢𑁄, 𑀢𑀢𑁆𑀣 𑀧𑀘𑁆𑀘𑀼𑀧𑁆𑀧𑀦𑁆𑀦𑀓𑀸𑀮𑁂 𑀭𑀽𑀧𑀓𑁆𑀔𑀦𑁆𑀥𑀫𑀽𑀮𑀓𑀸𑀦𑀺 𑀘𑀢𑁆𑀢𑀸𑀭𑀺, 𑀯𑁂𑀤𑀦𑀸𑀓𑁆𑀔𑀦𑁆𑀥𑀫𑀽𑀮𑀓𑀸𑀦𑀺 𑀢𑀻𑀡𑀺, 𑀲𑀜𑁆𑀜𑀸𑀓𑁆𑀔𑀦𑁆𑀥𑀫𑀽𑀮𑀓𑀸𑀦𑀺 𑀤𑁆𑀯𑁂, 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀫𑀽𑀮𑀓𑀁 𑀏𑀓𑀦𑁆𑀢𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀅𑀦𑀼𑀮𑁄𑀫𑀦𑀬𑁂 𑀅𑀕𑁆𑀕𑀳𑀺𑀢𑀕𑁆𑀕𑀳𑀡𑁂𑀦 𑀤𑀲 𑀬𑀫𑀓𑀸𑀦𑀺. 𑀧𑀝𑀺𑀮𑁄𑀫𑀦𑀬𑁂 𑀤𑀲𑀸𑀢𑀺 𑀯𑀻𑀲𑀢𑀺. 𑀢𑀣𑀸 𑀲𑁂𑀲𑁂𑀲𑀼𑀧𑀻𑀢𑀺 𑀏𑀓𑁂𑀓𑀲𑁆𑀫𑀺𑀁 𑀓𑀸𑀮𑁂 𑀯𑀻𑀲𑀢𑀺 𑀯𑀻𑀲𑀢𑀺 𑀓𑀢𑁆𑀯𑀸 𑀙𑀲𑀼 𑀓𑀸𑀮𑁂𑀲𑀼 𑀯𑀻𑀲𑀁 𑀬𑀫𑀓𑀲𑀢𑀁, 𑀘𑀢𑁆𑀢𑀸𑀭𑀻𑀲𑀸𑀦𑀺 𑀤𑁆𑀯𑁂 𑀧𑀼𑀘𑁆𑀙𑀸𑀲𑀢𑀸𑀦𑀺, 𑀅𑀲𑀻𑀢𑁆𑀬𑀸𑀥𑀺𑀓𑀸𑀦𑀺 𑀘𑀢𑁆𑀢𑀸𑀭𑀺 𑀅𑀢𑁆𑀣𑀲𑀢𑀸𑀦𑀺 𑀘 𑀳𑁄𑀦𑁆𑀢𑀻𑀢𑀺 𑀇𑀤𑀫𑁂𑀢𑁆𑀣 𑀧𑀸𑀴𑀺𑀯𑀯𑀢𑁆𑀣𑀸𑀦𑀁.

𑀅𑀢𑁆𑀣𑀯𑀺𑀦𑀺𑀘𑁆𑀙𑀬𑁂 𑀧𑀦𑁂𑀢𑁆𑀣 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑀗𑁆𑀔𑀸𑀢𑀸 𑀢𑀬𑁄 𑀅𑀤𑁆𑀥𑀸 𑀧𑀯𑀢𑁆𑀢𑀺𑀯𑀸𑀭𑁂 𑀯𑀺𑀬 𑀘𑀼𑀢𑀺𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀦 𑀮𑀩𑁆𑀪𑀦𑁆𑀢𑀺. 𑀧𑀯𑀢𑁆𑀢𑁂 𑀘𑀺𑀢𑁆𑀢𑀓𑁆𑀔𑀡𑀯𑀲𑁂𑀦𑁂𑀯 𑀮𑀩𑁆𑀪𑀦𑁆𑀢𑀺. 𑀢𑁂𑀦𑁂𑀯𑁂𑀢𑁆𑀣 ‘𑀬𑁄 𑀭𑀽𑀧𑀓𑁆𑀔𑀦𑁆𑀥𑀁 𑀧𑀭𑀺𑀚𑀸𑀦𑀸𑀢𑀺, 𑀲𑁄 𑀯𑁂𑀤𑀦𑀸𑀓𑁆𑀔𑀦𑁆𑀥𑀁 𑀧𑀭𑀺𑀚𑀸𑀦𑀸𑀢𑀻’𑀢𑀺𑀆𑀤𑀻𑀲𑀼 𑀧𑀼𑀘𑁆𑀙𑀸𑀲𑀼 ‘𑀆𑀫𑀦𑁆𑀢𑀸’𑀢𑀺 𑀯𑀺𑀲𑁆𑀲𑀚𑁆𑀚𑀦𑀁 𑀓𑀢𑀁. 𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑀓𑁆𑀔𑀡𑀲𑁆𑀫𑀺𑀜𑁆𑀳𑀺 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑁂𑀦 𑀘𑀺𑀢𑁆𑀢𑁂𑀦 𑀧𑀜𑁆𑀘𑀲𑀼 𑀔𑀦𑁆𑀥𑁂𑀲𑀼 𑀧𑀭𑀺𑀜𑁆𑀜𑀸𑀓𑀺𑀘𑁆𑀘𑀦𑀺𑀩𑁆𑀩𑀢𑁆𑀢𑀺𑀬𑀸 𑀬𑀁 𑀓𑀺𑀜𑁆𑀘𑀺 𑀏𑀓𑀁 𑀔𑀦𑁆𑀥𑀁 𑀧𑀭𑀺𑀚𑀸𑀦𑀦𑁆𑀢𑁄 𑀇𑀢𑀭𑀫𑁆𑀧𑀺 𑀧𑀭𑀺𑀚𑀸𑀦𑀸𑀢𑀻𑀢𑀺 𑀯𑀼𑀘𑁆𑀘𑀢𑀺. 𑀏𑀯𑀫𑁂𑀢𑁆𑀣 ‘𑀧𑀭𑀺𑀚𑀸𑀦𑀸𑀢𑀻’𑀢𑀺 𑀧𑀜𑁆𑀳𑁂𑀲𑀼 𑀅𑀦𑀼𑀮𑁄𑀫𑀦𑀬𑁂 𑀧𑀭𑀺𑀜𑁆𑀜𑀸𑀓𑀺𑀘𑁆𑀘𑀲𑁆𑀲 𑀫𑀢𑁆𑀣𑀓𑀧𑁆𑀧𑀢𑁆𑀢𑀁 𑀅𑀕𑁆𑀕𑀫𑀕𑁆𑀕𑀲𑀫𑀗𑁆𑀕𑀺𑀁 𑀲𑀦𑁆𑀥𑀸𑀬 ‘𑀆𑀫𑀦𑁆𑀢𑀸’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀧𑀝𑀺𑀮𑁄𑀫𑀦𑀬𑁂 𑀧𑀦 ‘𑀦 𑀧𑀭𑀺𑀚𑀸𑀦𑀸𑀢𑀻’𑀢𑀺 𑀧𑀜𑁆𑀳𑁂𑀲𑀼 𑀧𑀼𑀣𑀼𑀚𑁆𑀚𑀦𑀸𑀤𑀬𑁄 𑀲𑀦𑁆𑀥𑀸𑀬 ‘𑀆𑀫𑀦𑁆𑀢𑀸’𑀢𑀺 𑀯𑀼𑀢𑁆𑀢𑀁. ‘𑀧𑀭𑀺𑀚𑀸𑀦𑀺𑀢𑁆𑀣𑀸’𑀢𑀺 𑀇𑀫𑀲𑁆𑀫𑀺𑀁 𑀧𑀦 𑀅𑀢𑀻𑀢𑀓𑀸𑀮𑀯𑀸𑀭𑁂 𑀫𑀕𑁆𑀕𑀸𑀦𑀦𑁆𑀢𑀭𑀅𑀕𑁆𑀕𑀨𑀮𑁂 𑀞𑀺𑀢𑁄𑀧𑀺 𑀧𑀭𑀺𑀜𑁆𑀜𑀸𑀓𑀺𑀘𑁆𑀘𑀲𑁆𑀲 𑀦𑀺𑀝𑁆𑀞𑀺𑀢𑀢𑁆𑀢𑀸 𑀧𑀭𑀺𑀚𑀸𑀦𑀺𑀢𑁆𑀣𑀬𑁂𑀯 𑀦𑀸𑀫.

𑁨𑁦𑁯. 𑀬𑁄 𑀭𑀽𑀧𑀓𑁆𑀔𑀦𑁆𑀥𑀁 𑀧𑀭𑀺𑀚𑀸𑀦𑀸𑀢𑀺, 𑀲𑁄 𑀯𑁂𑀤𑀦𑀸𑀓𑁆𑀔𑀦𑁆𑀥𑀁 𑀧𑀭𑀺𑀚𑀸𑀦𑀺𑀢𑁆𑀣𑀸𑀢𑀺 𑀧𑀜𑁆𑀳𑁂𑀦 𑀅𑀕𑁆𑀕𑀫𑀕𑁆𑀕𑀲𑀫𑀗𑁆𑀕𑀺𑀁 𑀧𑀼𑀘𑁆𑀙𑀢𑀺. 𑀬𑀲𑁆𑀫𑀸 𑀧𑀦𑁂𑀲 𑀔𑀦𑁆𑀥𑀧𑀜𑁆𑀘𑀓𑀁 𑀧𑀭𑀺𑀚𑀸𑀦𑀸𑀢𑀺𑀬𑁂𑀯 𑀦𑀸𑀫, 𑀦 𑀢𑀸𑀯 𑀦𑀺𑀝𑁆𑀞𑀺𑀢𑀧𑀭𑀺𑀜𑁆𑀜𑀸𑀓𑀺𑀘𑁆𑀘𑁄; 𑀢𑀲𑁆𑀫𑀸 ‘𑀦𑁄’𑀢𑀺 𑀧𑀝𑀺𑀲𑁂𑀥𑁄 𑀓𑀢𑁄. 𑀤𑀼𑀢𑀺𑀬𑀧𑀜𑁆𑀳𑁂 𑀧𑀦 𑀧𑀭𑀺𑀚𑀸𑀦𑀺𑀢𑁆𑀣𑀸𑀢𑀺 𑀅𑀭𑀳𑀦𑁆𑀢𑀁 𑀧𑀼𑀘𑁆𑀙𑀢𑀺. 𑀬𑀲𑁆𑀫𑀸 𑀧𑀦𑁂𑀲𑁄 𑀦𑀺𑀝𑁆𑀞𑀺𑀢𑀧𑀭𑀺𑀜𑁆𑀜𑀸𑀓𑀺𑀘𑁆𑀘𑁄. 𑀦𑀢𑁆𑀣𑀺 𑀢𑀲𑁆𑀲 𑀧𑀭𑀺𑀜𑁆𑀜𑁂𑀬𑁆𑀬𑀁 𑀦𑀸𑀫; 𑀢𑀲𑁆𑀫𑀸 ‘𑀦𑁄’𑀢𑀺 𑀧𑀝𑀺𑀲𑁂𑀥𑁄 𑀓𑀢𑁄. 𑀧𑀝𑀺𑀮𑁄𑀫𑀦𑀬𑀯𑀺𑀲𑁆𑀲𑀚𑁆𑀚𑀦𑁂 𑀧𑀦𑁂𑀢𑁆𑀣 𑀅𑀭𑀳𑀸 𑀭𑀽𑀧𑀓𑁆𑀔𑀦𑁆𑀥𑀁 𑀦 𑀧𑀭𑀺𑀚𑀸𑀦𑀸𑀢𑀻𑀢𑀺 𑀅𑀭𑀳𑀢𑁄 𑀧𑀭𑀺𑀜𑁆𑀜𑀸𑀬 𑀅𑀪𑀸𑀯𑁂𑀦 𑀯𑀼𑀢𑁆𑀢𑀁. 𑀅𑀕𑁆𑀕𑀫𑀕𑁆𑀕𑀲𑀫𑀗𑁆𑀕𑀻 𑀯𑁂𑀤𑀦𑀸𑀓𑁆𑀔𑀦𑁆𑀥𑀁 𑀦 𑀧𑀭𑀺𑀚𑀸𑀦𑀺𑀢𑁆𑀣𑀸𑀢𑀺 𑀅𑀭𑀳𑀢𑁆𑀢𑀫𑀕𑁆𑀕𑀝𑁆𑀞𑀲𑁆𑀲 𑀅𑀦𑀺𑀝𑁆𑀞𑀺𑀢𑀧𑀭𑀺𑀜𑁆𑀜𑀸𑀓𑀺𑀘𑁆𑀘𑀢𑀸𑀬 𑀯𑀼𑀢𑁆𑀢𑀁. 𑀦 𑀓𑁂𑀯𑀮𑀜𑁆𑀘 𑀯𑁂𑀤𑀦𑀸𑀓𑁆𑀔𑀦𑁆𑀥𑀫𑁂𑀯, 𑀏𑀓𑀥𑀫𑁆𑀫𑀫𑁆𑀧𑀺 𑀲𑁄 𑀦 𑀧𑀭𑀺𑀚𑀸𑀦𑀺𑀢𑁆𑀣𑁂𑀯. 𑀇𑀤𑀁 𑀧𑀦 𑀧𑀼𑀘𑁆𑀙𑀸𑀯𑀲𑁂𑀦 𑀯𑀼𑀢𑁆𑀢𑀁. 𑀦𑁄 𑀘 𑀭𑀽𑀧𑀓𑁆𑀔𑀦𑁆𑀥𑀦𑁆𑀢𑀺 𑀇𑀤𑀫𑁆𑀧𑀺 𑀧𑀼𑀘𑁆𑀙𑀸𑀯𑀲𑁂𑀦𑁂𑀯 𑀯𑀼𑀢𑁆𑀢𑀁. 𑀅𑀜𑁆𑀜𑀫𑁆𑀧𑀺 𑀧𑀦 𑀲𑁄 𑀔𑀦𑁆𑀥𑀁 𑀧𑀭𑀺𑀚𑀸𑀦𑀸𑀢𑀺.

𑁨𑁧𑁦-𑁨𑁧𑁧. 𑀬𑁄 𑀭𑀽𑀧𑀓𑁆𑀔𑀦𑁆𑀥𑀁 𑀧𑀭𑀺𑀚𑀸𑀦𑀸𑀢𑀺, 𑀲𑁄 𑀯𑁂𑀤𑀦𑀸𑀓𑁆𑀔𑀦𑁆𑀥𑀁 𑀧𑀭𑀺𑀚𑀸𑀦𑀺𑀲𑁆𑀲𑀢𑀻𑀢𑀺 𑀏𑀢𑁆𑀣 𑀬𑀲𑁆𑀫𑀸 𑀫𑀕𑁆𑀕𑀝𑁆𑀞𑀧𑀼𑀕𑁆𑀕𑀮𑁄 𑀏𑀓𑀘𑀺𑀢𑁆𑀢𑀓𑁆𑀔𑀡𑀺𑀓𑁄, 𑀢𑀲𑁆𑀫𑀸 𑀲𑁄 𑀧𑀭𑀺𑀚𑀸𑀦𑀺𑀲𑁆𑀲𑀢𑀻𑀢𑀺 𑀲𑀗𑁆𑀔𑀁 𑀦 𑀕𑀘𑁆𑀙𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘𑀦𑁄’𑀢𑀺. 𑀢𑁂 𑀭𑀽𑀧𑀓𑁆𑀔𑀦𑁆𑀥𑀜𑁆𑀘 𑀦 𑀧𑀭𑀺𑀚𑀸𑀦𑀺𑀢𑁆𑀣𑀸𑀢𑀺 𑀧𑀼𑀘𑁆𑀙𑀸𑀲𑀪𑀸𑀕𑁂𑀦 𑀯𑀼𑀢𑁆𑀢𑀁, 𑀦 𑀧𑀭𑀺𑀚𑀸𑀦𑀺𑀁𑀲𑀽𑀢𑀺 𑀧𑀦𑁂𑀢𑁆𑀣 𑀅𑀢𑁆𑀣𑁄. 𑀇𑀫𑀺𑀦𑀸 𑀉𑀧𑀸𑀬𑁂𑀦 𑀲𑀩𑁆𑀩𑀢𑁆𑀣 𑀅𑀢𑁆𑀣𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄𑀢𑀺.

𑀧𑀭𑀺𑀜𑁆𑀜𑀸𑀯𑀸𑀭𑀯𑀡𑁆𑀡𑀦𑀸.

𑀔𑀦𑁆𑀥𑀬𑀫𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.