𑁧. 𑀫𑀽𑀮𑀬𑀫𑀓𑀁

𑀉𑀤𑁆𑀤𑁂𑀲𑀯𑀸𑀭𑀯𑀡𑁆𑀡𑀦𑀸

𑁧. 𑀫𑀽𑀮𑀬𑀫𑀓𑀁, 𑀔𑀦𑁆𑀥𑀬𑀫𑀓𑀁, 𑀆𑀬𑀢𑀦𑀬𑀫𑀓𑀁, 𑀥𑀸𑀢𑀼𑀬𑀫𑀓𑀁, 𑀲𑀘𑁆𑀘𑀬𑀫𑀓𑀁, 𑀲𑀗𑁆𑀔𑀸𑀭𑀬𑀫𑀓𑀁, 𑀅𑀦𑀼𑀲𑀬𑀬𑀫𑀓𑀁, 𑀘𑀺𑀢𑁆𑀢𑀬𑀫𑀓𑀁, 𑀥𑀫𑁆𑀫𑀬𑀫𑀓𑀁, 𑀇𑀦𑁆𑀤𑁆𑀭𑀺𑀬𑀬𑀫𑀓𑀦𑁆𑀢𑀺 𑀇𑀫𑁂𑀲𑀁 𑀤𑀲𑀦𑁆𑀦𑀁 𑀬𑀫𑀓𑀸𑀦𑀁 𑀯𑀲𑁂𑀦 𑀇𑀤𑀁 𑀧𑀓𑀭𑀡𑀁 𑀤𑀲𑀯𑀺𑀥𑁂𑀦 𑀯𑀺𑀪𑀢𑁆𑀢𑀦𑁆𑀢𑀺 𑀳𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀬𑁂𑀲𑀁 𑀤𑀲𑀦𑁆𑀦𑀁 𑀬𑀫𑀓𑀸𑀦𑀁 𑀯𑀲𑁂𑀦 𑀇𑀤𑀁 𑀧𑀓𑀭𑀡𑀁 𑀤𑀲𑀯𑀺𑀥𑁂𑀦 𑀯𑀺𑀪𑀢𑁆𑀢𑀁, 𑀢𑁂𑀲𑀜𑁆𑀘𑁂𑀯 𑀇𑀫𑀲𑁆𑀲 𑀘 𑀧𑀓𑀭𑀡𑀲𑁆𑀲 𑀦𑀸𑀫𑀢𑁆𑀣𑁄 𑀢𑀸𑀯 𑀏𑀯𑀁 𑀯𑁂𑀤𑀺𑀢𑀩𑁆𑀩𑁄 𑁋 𑀓𑁂𑀦𑀝𑁆𑀞𑁂𑀦 𑀬𑀫𑀓𑀦𑁆𑀢𑀺? 𑀬𑀼𑀕𑀴𑀝𑁆𑀞𑁂𑀦. 𑀬𑀼𑀕𑀴𑀜𑁆𑀳𑀺 𑀬𑀫𑀓𑀦𑁆𑀢𑀺 𑀯𑀼𑀘𑁆𑀘𑀢𑀺 𑁋 ‘𑀬𑀫𑀓𑀧𑀸𑀝𑀺𑀳𑀸𑀭𑀺𑀬𑀁, 𑀬𑀫𑀓𑀲𑀸𑀮𑀸’𑀢𑀺𑀆𑀤𑀻𑀲𑀼 𑀯𑀺𑀬. 𑀇𑀢𑀺 𑀬𑀼𑀕𑀴𑀲𑀗𑁆𑀔𑀸𑀢𑀸𑀦𑀁 𑀬𑀫𑀓𑀸𑀦𑀁 𑀯𑀲𑁂𑀦 𑀤𑁂𑀲𑀺𑀢𑀢𑁆𑀢𑀸 𑀇𑀫𑁂𑀲𑀼 𑀤𑀲𑀲𑀼 𑀏𑀓𑁂𑀓𑀁 𑀬𑀫𑀓𑀁 𑀦𑀸𑀫. 𑀇𑀫𑁂𑀲𑀁 𑀧𑀦 𑀬𑀫𑀓𑀸𑀦𑀁 𑀲𑀫𑀽𑀳𑀪𑀸𑀯𑀢𑁄 𑀲𑀩𑁆𑀩𑀫𑁆𑀧𑁂𑀢𑀁 𑀧𑀓𑀭𑀡𑀁 𑀬𑀫𑀓𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀢𑀢𑁆𑀣 𑀫𑀽𑀮𑀯𑀲𑁂𑀦 𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑀁 𑀓𑀢𑁆𑀯𑀸 𑀤𑁂𑀲𑀺𑀢𑀢𑁆𑀢𑀸 𑀤𑀲𑀦𑁆𑀦𑀁 𑀢𑀸𑀯 𑀲𑀩𑁆𑀩𑀧𑀞𑀫𑀁 𑀫𑀽𑀮𑀬𑀫𑀓𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀲𑁆𑀲 𑀉𑀤𑁆𑀤𑁂𑀲𑀯𑀸𑀭𑁄, 𑀦𑀺𑀤𑁆𑀤𑁂𑀲𑀯𑀸𑀭𑁄𑀢𑀺 𑀤𑁆𑀯𑁂 𑀯𑀸𑀭𑀸 𑀳𑁄𑀦𑁆𑀢𑀺. 𑀢𑁂𑀲𑀼 𑀉𑀤𑁆𑀤𑀺𑀝𑁆𑀞𑀸𑀦𑀼𑀓𑁆𑀓𑀫𑁂𑀦 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀢𑁆𑀢𑀸 𑀉𑀤𑁆𑀤𑁂𑀲𑀯𑀸𑀭𑁄 𑀧𑀞𑀫𑁄. 𑀢𑀲𑁆𑀲 𑀬𑁂 𑀓𑁂𑀘𑀺 𑀓𑀼𑀲𑀮𑀸 𑀥𑀫𑁆𑀫𑀸, 𑀲𑀩𑁆𑀩𑁂 𑀢𑁂 𑀓𑀼𑀲𑀮𑀫𑀽𑀮𑀸; 𑀬𑁂 𑀯𑀸 𑀧𑀦 𑀓𑀼𑀲𑀮𑀫𑀽𑀮𑀸, 𑀲𑀩𑁆𑀩𑁂 𑀢𑁂 𑀥𑀫𑁆𑀫𑀸 𑀓𑀼𑀲𑀮𑀸𑀢𑀺 𑀇𑀤𑀁 𑀬𑀫𑀓𑀁 𑀆𑀤𑀺. 𑀢𑀲𑁆𑀲 𑀓𑀼𑀲𑀮𑀸𑀓𑀼𑀲𑀮𑀫𑀽𑀮𑀲𑀗𑁆𑀔𑀸𑀢𑀸𑀦𑀁 𑀤𑁆𑀯𑀺𑀦𑁆𑀦𑀁 𑀅𑀢𑁆𑀣𑀸𑀦𑀁 𑀯𑀲𑁂𑀦 𑀅𑀢𑁆𑀣𑀬𑀫𑀓𑀦𑁆𑀢𑀺 𑀯𑀸, 𑀢𑁂𑀲𑀜𑁆𑀜𑁂𑀯 𑀅𑀢𑁆𑀣𑀸𑀦𑀁 𑀯𑀲𑁂𑀦 𑀅𑀦𑀼𑀮𑁄𑀫𑀧𑀝𑀺𑀮𑁄𑀫𑀢𑁄 𑀧𑀯𑀢𑁆𑀢𑀧𑀸𑀴𑀺𑀥𑀫𑁆𑀫𑀯𑀲𑁂𑀦 𑀥𑀫𑁆𑀫𑀬𑀫𑀓𑀦𑁆𑀢𑀺 𑀯𑀸, 𑀅𑀦𑀼𑀮𑁄𑀫𑀧𑀝𑀺𑀮𑁄𑀫𑀢𑁄 𑀧𑀯𑀢𑁆𑀢𑀧𑀼𑀘𑁆𑀙𑀸𑀯𑀲𑁂𑀦 𑀧𑀼𑀘𑁆𑀙𑀸𑀬𑀫𑀓𑀦𑁆𑀢𑀺 𑀯𑀸 𑀢𑀺𑀥𑀸 𑀬𑀫𑀓𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀲𑁂𑀲𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀇𑀤𑀸𑀦𑀺 𑀇𑀫𑁂𑀲𑀁 𑀬𑀫𑀓𑀸𑀦𑀁 𑀯𑀲𑁂𑀦 𑀤𑁂𑀲𑀺𑀢𑁂 𑀇𑀫𑀲𑁆𑀫𑀺𑀁 𑀫𑀽𑀮𑀬𑀫𑀓𑁂 𑀉𑀤𑁆𑀤𑁂𑀲𑀯𑀸𑀭𑀲𑁆𑀲 𑀢𑀸𑀯 𑀦𑀬𑀬𑀫𑀓𑀧𑀼𑀘𑁆𑀙𑀸𑀅𑀢𑁆𑀣𑀯𑀸𑀭𑀧𑁆𑀧𑀪𑁂𑀤𑀯𑀲𑁂𑀦 𑀧𑀸𑀴𑀺𑀯𑀯𑀢𑁆𑀣𑀸𑀦𑀫𑁂𑀯 𑀏𑀯𑀁 𑀯𑁂𑀤𑀺𑀢𑀩𑁆𑀩𑀁 𑁋 𑀓𑀼𑀲𑀮𑀢𑁆𑀢𑀺𑀓𑀫𑀸𑀢𑀺𑀓𑀸𑀬 𑀳𑀺 ‘𑀓𑀼𑀲𑀮𑀸 𑀥𑀫𑁆𑀫𑀸’𑀢𑀺 𑀇𑀤𑀁 𑀆𑀤𑀺𑀧𑀤𑀁 𑀦𑀺𑀲𑁆𑀲𑀸𑀬 𑀫𑀽𑀮𑀦𑀬𑁄, 𑀫𑀽𑀮𑀫𑀽𑀮𑀦𑀬𑁄, 𑀫𑀽𑀮𑀓𑀦𑀬𑁄, 𑀫𑀽𑀮𑀫𑀽𑀮𑀓𑀦𑀬𑁄𑀢𑀺 𑀇𑀫𑁂 𑀘𑀢𑁆𑀢𑀸𑀭𑁄 𑀦𑀬𑀸 𑀳𑁄𑀦𑁆𑀢𑀺. 𑀢𑁂𑀲𑀁 𑀏𑀓𑁂𑀓𑀲𑁆𑀫𑀺𑀁 𑀦𑀬𑁂 𑀫𑀽𑀮𑀬𑀫𑀓𑀁, 𑀏𑀓𑀫𑀽𑀮𑀬𑀫𑀓𑀁, 𑀅𑀜𑁆𑀜𑀫𑀜𑁆𑀜𑀫𑀽𑀮𑀬𑀫𑀓𑀦𑁆𑀢𑀺 𑀢𑀻𑀡𑀺 𑀢𑀻𑀡𑀺 𑀬𑀫𑀓𑀸𑀦𑀺. 𑀏𑀯𑀁 𑀘𑀢𑀽𑀲𑀼 𑀦𑀬𑁂𑀲𑀼 𑀤𑁆𑀯𑀸𑀤𑀲 𑀬𑀫𑀓𑀸𑀦𑀺, 𑀏𑀓𑁂𑀓𑀲𑁆𑀫𑀺𑀁 𑀬𑀫𑀓𑁂 𑀅𑀦𑀼𑀮𑁄𑀫𑀧𑀝𑀺𑀮𑁄𑀫𑀯𑀲𑁂𑀦 𑀤𑁆𑀯𑁂 𑀤𑁆𑀯𑁂 𑀧𑀼𑀘𑁆𑀙𑀸𑀢𑀺 𑀘𑀢𑀼𑀯𑀻𑀲𑀢𑀺 𑀧𑀼𑀘𑁆𑀙𑀸, 𑀏𑀓𑁂𑀓𑀸𑀬 𑀧𑀼𑀘𑁆𑀙𑀸𑀬 𑀲𑀦𑁆𑀦𑀺𑀝𑁆𑀞𑀸𑀦𑀲𑀁𑀲𑀬𑀯𑀲𑁂𑀦 𑀤𑁆𑀯𑁂 𑀤𑁆𑀯𑁂 𑀅𑀢𑁆𑀣𑀸𑀢𑀺 𑀅𑀝𑁆𑀞𑀘𑀢𑁆𑀢𑀸𑀮𑀻𑀲 𑀅𑀢𑁆𑀣𑀸𑀢𑀺.

𑀢𑀢𑁆𑀣 𑀬𑁂 𑀓𑁂𑀘𑀺 𑀓𑀼𑀲𑀮𑀸 𑀥𑀫𑁆𑀫𑀸𑀢𑀺 𑀓𑀼𑀲𑀮𑁂𑀲𑀼 ‘‘𑀓𑀼𑀲𑀮𑀸 𑀦𑀼 𑀔𑁄, 𑀦 𑀓𑀼𑀲𑀮𑀸 𑀦𑀼 𑀔𑁄’’𑀢𑀺 𑀲𑀦𑁆𑀤𑁂𑀳𑀸𑀪𑀸𑀯𑀢𑁄 𑀇𑀫𑀲𑁆𑀫𑀺𑀁 𑀧𑀤𑁂 𑀲𑀦𑁆𑀦𑀺𑀝𑁆𑀞𑀸𑀦𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀲𑀩𑁆𑀩𑁂 𑀢𑁂 𑀓𑀼𑀲𑀮𑀫𑀽𑀮𑀸𑀢𑀺 ‘‘𑀲𑀩𑁆𑀩𑁂 𑀢𑁂 𑀓𑀼𑀲𑀮𑀸 𑀥𑀫𑁆𑀫𑀸 𑀓𑀼𑀲𑀮𑀫𑀽𑀮𑀸 𑀦𑀼 𑀔𑁄, 𑀦𑀦𑀼 𑀔𑁄’’𑀢𑀺 𑀏𑀯𑀁 𑀯𑀺𑀫𑀢𑀺𑀯𑀲𑁂𑀦 𑀧𑀼𑀘𑁆𑀙𑀺𑀢𑀢𑁆𑀢𑀸 𑀇𑀫𑀲𑁆𑀫𑀺𑀁 𑀧𑀤𑁂 𑀲𑀁𑀲𑀬𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀲𑁄 𑀘 𑀔𑁄 𑀯𑁂𑀦𑁂𑀬𑁆𑀬𑀸𑀦𑀁 𑀲𑀁𑀲𑀬𑀝𑁆𑀞𑀸𑀦𑁂 𑀲𑀁𑀲𑀬𑀤𑀻𑀧𑀦𑀢𑁆𑀣𑀁 𑀯𑀼𑀢𑁆𑀢𑁄, 𑀢𑀣𑀸𑀕𑀢𑀲𑁆𑀲 𑀧𑀦 𑀲𑀁𑀲𑀬𑁄 𑀦𑀸𑀫 𑀦𑀢𑁆𑀣𑀺. 𑀇𑀢𑁄 𑀧𑀭𑁂𑀲𑀼𑀧𑀺 𑀧𑀼𑀘𑁆𑀙𑀸𑀧𑀤𑁂𑀲𑀼 𑀏𑀲𑁂𑀯 𑀦𑀬𑁄.

𑀬𑀣𑀸 𑀘 𑀓𑀼𑀲𑀮𑀧𑀤𑀁 𑀦𑀺𑀲𑁆𑀲𑀸𑀬 𑀇𑀫𑁂 𑀘𑀢𑁆𑀢𑀸𑀭𑁄 𑀦𑀬𑀸, 𑀏𑀓𑁂𑀓𑀲𑁆𑀫𑀺𑀁 𑀦𑀬𑁂 𑀢𑀺𑀡𑁆𑀡𑀁 𑀢𑀺𑀡𑁆𑀡𑀁 𑀬𑀫𑀓𑀸𑀦𑀁 𑀯𑀲𑁂𑀦 𑀤𑁆𑀯𑀸𑀤𑀲 𑀬𑀫𑀓𑀸𑀦𑀺, 𑀏𑀓𑁂𑀓𑀲𑁆𑀫𑀺𑀁 𑀬𑀫𑀓𑁂 𑀤𑁆𑀯𑀺𑀦𑁆𑀦𑀁 𑀤𑁆𑀯𑀺𑀦𑁆𑀦𑀁 𑀧𑀼𑀘𑁆𑀙𑀸𑀦𑀁 𑀯𑀲𑁂𑀦 𑀘𑀢𑀼𑀯𑀻𑀲𑀢𑀺 𑀧𑀼𑀘𑁆𑀙𑀸; 𑀏𑀓𑁂𑀓𑀸𑀬 𑀧𑀼𑀘𑁆𑀙𑀸𑀬 𑀤𑁆𑀯𑀺𑀦𑁆𑀦𑀁 𑀤𑁆𑀯𑀺𑀦𑁆𑀦𑀁 𑀅𑀢𑁆𑀣𑀸𑀦𑀁 𑀯𑀲𑁂𑀦 𑀅𑀝𑁆𑀞𑀘𑀢𑁆𑀢𑀸𑀮𑀻𑀲 𑀅𑀢𑁆𑀣𑀸 𑀘 𑀳𑁄𑀦𑁆𑀢𑀺. 𑀅𑀓𑀼𑀲𑀮𑀧𑀤𑀁 𑀦𑀺𑀲𑁆𑀲𑀸𑀬𑀧𑀺 𑀢𑀣𑁂𑀯. 𑀅𑀩𑁆𑀬𑀸𑀓𑀢𑀧𑀤𑀁 𑀦𑀺𑀲𑁆𑀲𑀸𑀬𑀧𑀺 𑀢𑀣𑁂𑀯. 𑀢𑀻𑀡𑀺𑀧𑀺 𑀧𑀤𑀸𑀦𑀺 𑀏𑀓𑀢𑁄 𑀓𑀢𑁆𑀯𑀸 𑀦𑀺𑀤𑁆𑀤𑀺𑀝𑁆𑀞𑀁 𑀦𑀸𑀫𑀧𑀤𑀁 𑀦𑀺𑀲𑁆𑀲𑀸𑀬𑀧𑀺 𑀢𑀣𑁂𑀯𑀸𑀢𑀺 𑀓𑀼𑀲𑀮𑀢𑁆𑀢𑀺𑀓𑀫𑀸𑀢𑀺𑀓𑀸𑀬 𑀘𑀢𑀽𑀲𑀼 𑀧𑀤𑁂𑀲𑀼 𑀲𑀩𑁆𑀩𑁂𑀧𑀺 𑀲𑁄𑀴𑀲 𑀦𑀬𑀸, 𑀅𑀝𑁆𑀞𑀘𑀢𑁆𑀢𑀸𑀮𑀻𑀲 𑀬𑀫𑀓𑀸𑀦𑀺, 𑀙𑀦𑁆𑀦𑀯𑀼𑀢𑀺 𑀧𑀼𑀘𑁆𑀙𑀸, 𑀤𑁆𑀯𑁂𑀦𑀯𑀼𑀢𑀺𑀲𑀢𑀁 𑀅𑀢𑁆𑀣𑀸 𑀘 𑀉𑀤𑁆𑀤𑁂𑀲𑀯𑀲𑁂𑀦 𑀯𑀼𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀏𑀢𑁆𑀢𑀸𑀯𑀢𑀸 𑀫𑀽𑀮𑀯𑀸𑀭𑁄 𑀦𑀸𑀫 𑀧𑀞𑀫𑀁 𑀉𑀤𑁆𑀤𑀺𑀝𑁆𑀞𑁄 𑀳𑁄𑀢𑀺.

𑀢𑀢𑁄 𑀧𑀭𑀁 𑀬𑁂 𑀓𑁂𑀘𑀺 𑀓𑀼𑀲𑀮𑀸 𑀥𑀫𑁆𑀫𑀸, 𑀲𑀩𑁆𑀩𑁂 𑀢𑁂 𑀓𑀼𑀲𑀮𑀳𑁂𑀢𑀽𑀢𑀺𑀆𑀤𑀬𑁄 𑀢𑀲𑁆𑀲𑁂𑀯 𑀫𑀽𑀮𑀯𑀸𑀭𑀲𑁆𑀲 𑀯𑁂𑀯𑀘𑀦𑀯𑀲𑁂𑀦 𑀦𑀯 𑀯𑀸𑀭𑀸 𑀉𑀤𑁆𑀤𑀺𑀝𑁆𑀞𑀸. 𑀇𑀢𑀺 𑀫𑀽𑀮𑀯𑀸𑀭𑁄, 𑀳𑁂𑀢𑀼𑀯𑀸𑀭𑁄, 𑀦𑀺𑀤𑀸𑀦𑀯𑀸𑀭𑁄, 𑀲𑀫𑁆𑀪𑀯𑀯𑀸𑀭𑁄, 𑀧𑀪𑀯𑀯𑀸𑀭𑁄, 𑀲𑀫𑀼𑀝𑁆𑀞𑀸𑀦𑀯𑀸𑀭𑁄, 𑀆𑀳𑀸𑀭𑀯𑀸𑀭𑁄, 𑀆𑀭𑀫𑁆𑀫𑀡𑀯𑀸𑀭𑁄, 𑀧𑀘𑁆𑀘𑀬𑀯𑀸𑀭𑁄, 𑀲𑀫𑀼𑀤𑀬𑀯𑀸𑀭𑁄𑀢𑀺 𑀲𑀩𑁆𑀩𑁂𑀧𑀺 𑀤𑀲 𑀯𑀸𑀭𑀸 𑀳𑁄𑀦𑁆𑀢𑀺. 𑀢𑀢𑁆𑀣 𑀫𑀽𑀮𑀯𑀸𑀭𑁂 𑀆𑀕𑀢𑀧𑀭𑀺𑀘𑁆𑀙𑁂𑀤𑁂𑀦𑁂𑀯 𑀲𑁂𑀲𑁂𑀲𑀼𑀧𑀺 𑀦𑀬𑀸𑀤𑀬𑁄 𑀯𑁂𑀤𑀺𑀢𑀩𑁆𑀩𑀸𑀢𑀺 𑀲𑀩𑁆𑀩𑁂𑀲𑀼𑀧𑀺 𑀤𑀲𑀲𑀼 𑀯𑀸𑀭𑁂𑀲𑀼 𑀲𑀝𑁆𑀞𑀺𑀲𑀢𑀦𑀬𑀸, 𑀅𑀲𑀻𑀢𑀺𑀅𑀥𑀺𑀓𑀸𑀦𑀺 𑀘𑀢𑁆𑀢𑀸𑀭𑀺 𑀬𑀫𑀓𑀲𑀢𑀸𑀦𑀺, 𑀲𑀝𑁆𑀞𑀺𑀅𑀥𑀺𑀓𑀸𑀦𑀺 𑀦𑀯𑀧𑀼𑀘𑁆𑀙𑀸𑀲𑀢𑀸𑀦𑀺, 𑀯𑀻𑀲𑀸𑀥𑀺𑀓𑀸𑀦𑀺 𑀏𑀓𑀽𑀦𑀯𑀻𑀲𑀢𑀺 𑀅𑀢𑁆𑀣𑀲𑀢𑀸𑀦𑀺 𑀘 𑀉𑀤𑁆𑀤𑀺𑀝𑁆𑀞𑀸𑀦𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀏𑀯𑀁 𑀢𑀸𑀯 𑀉𑀤𑁆𑀤𑁂𑀲𑀯𑀸𑀭𑁂 𑀦𑀬𑀬𑀫𑀓𑀧𑀼𑀘𑁆𑀙𑀸𑀅𑀢𑁆𑀣𑀯𑀸𑀭𑀧𑁆𑀧𑀪𑁂𑀤𑀯𑀲𑁂𑀦 𑀧𑀸𑀴𑀺𑀯𑀯𑀢𑁆𑀣𑀸𑀦𑀫𑁂𑀯 𑀯𑁂𑀤𑀺𑀢𑀩𑁆𑀩𑀁.

𑀫𑀽𑀮𑀁 𑀳𑁂𑀢𑀼 𑀦𑀺𑀤𑀸𑀦𑀜𑁆𑀘𑀸𑀢𑀺 𑀕𑀸𑀣𑀸 𑀤𑀲𑀦𑁆𑀦𑀫𑁆𑀧𑀺 𑀯𑀸𑀭𑀸𑀦𑀁 𑀉𑀤𑁆𑀤𑀸𑀦𑀕𑀸𑀣𑀸 𑀦𑀸𑀫. 𑀢𑀢𑁆𑀣 𑀫𑀽𑀮𑀸𑀤𑀻𑀦𑀺 𑀲𑀩𑁆𑀩𑀸𑀦𑀺𑀧𑀺 𑀓𑀸𑀭𑀡𑀯𑁂𑀯𑀘𑀦𑀸𑀦𑁂𑀯. 𑀓𑀸𑀭𑀡𑀜𑁆𑀳𑀺 𑀧𑀢𑀺𑀝𑁆𑀞𑀸𑀦𑀝𑁆𑀞𑁂𑀦 𑀫𑀽𑀮𑀁. 𑀅𑀢𑁆𑀢𑀦𑁄 𑀨𑀮𑀦𑀺𑀧𑁆𑀨𑀸𑀤𑀦𑀢𑁆𑀣𑀁 𑀳𑀺𑀦𑁄𑀢𑀺 𑀧𑀯𑀢𑁆𑀢𑀢𑀻𑀢𑀺 𑀳𑁂𑀢𑀼. ‘𑀳𑀦𑁆𑀤, 𑀦𑀁 𑀕𑀡𑁆𑀳𑀸𑀣𑀸’𑀢𑀺 𑀤𑀲𑁆𑀲𑁂𑀦𑁆𑀢𑀁 𑀯𑀺𑀬 𑀅𑀢𑁆𑀢𑀦𑁄 𑀨𑀮𑀁 𑀦𑀺𑀤𑁂𑀢𑀻𑀢𑀺 𑀦𑀺𑀤𑀸𑀦𑀁. 𑀏𑀢𑀲𑁆𑀫𑀸 𑀨𑀮𑀁 𑀲𑀫𑁆𑀪𑁄𑀢𑀻𑀢𑀺 𑀲𑀫𑁆𑀪𑀯𑁄. 𑀧𑀪𑀯𑀢𑀻𑀢𑀺 𑀧𑀪𑀯𑁄. 𑀲𑀫𑀼𑀝𑁆𑀞𑀸𑀢𑀺 𑀏𑀢𑁆𑀣 𑀨𑀮𑀁, 𑀏𑀢𑁂𑀦 𑀯𑀸 𑀲𑀫𑀼𑀝𑁆𑀞𑀸𑀢𑀻𑀢𑀺 𑀲𑀫𑀼𑀝𑁆𑀞𑀸𑀦𑀁. 𑀅𑀢𑁆𑀢𑀦𑁄 𑀨𑀮𑀁 𑀆𑀳𑀭𑀢𑀻𑀢𑀺 𑀆𑀳𑀸𑀭𑁄. 𑀅𑀧𑁆𑀧𑀝𑀺𑀓𑁆𑀔𑀺𑀧𑀺𑀢𑀩𑁆𑀩𑁂𑀦 𑀅𑀢𑁆𑀢𑀦𑁄 𑀨𑀮𑁂𑀦 𑀆𑀮𑀫𑁆𑀩𑀺𑀬𑀢𑀻𑀢𑀺 𑀆𑀮𑀫𑁆𑀩𑀡𑀁. 𑀏𑀢𑀁 𑀧𑀝𑀺𑀘𑁆𑀘 𑀅𑀧𑁆𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀨𑀮𑀁 𑀏𑀢𑀺 𑀧𑀯𑀢𑁆𑀢𑀢𑀻𑀢𑀺 𑀧𑀘𑁆𑀘𑀬𑁄. 𑀏𑀢𑀲𑁆𑀫𑀸 𑀨𑀮𑀁 𑀲𑀫𑀼𑀤𑁂𑀢𑀻𑀢𑀺 𑀲𑀫𑀼𑀤𑀬𑁄. 𑀏𑀯𑀫𑁂𑀢𑁂𑀲𑀁 𑀧𑀤𑀸𑀦𑀁 𑀯𑀘𑀦𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀉𑀤𑁆𑀤𑁂𑀲𑀯𑀸𑀭𑀯𑀡𑁆𑀡𑀦𑀸.

𑀦𑀺𑀤𑁆𑀤𑁂𑀲𑀯𑀸𑀭𑀯𑀡𑁆𑀡𑀦𑀸

𑁫𑁦. 𑀇𑀤𑀸𑀦𑀺 𑀬𑁂𑀓𑁂𑀘𑀺 𑀓𑀼𑀲𑀮𑀸 𑀥𑀫𑁆𑀫𑀸𑀢𑀺𑀆𑀤𑀺𑀦𑀸 𑀦𑀬𑁂𑀦 𑀦𑀺𑀤𑁆𑀤𑁂𑀲𑀯𑀸𑀭𑁄 𑀆𑀭𑀤𑁆𑀥𑁄. 𑀢𑀢𑁆𑀣 𑀬𑁂 𑀓𑁂𑀘𑀻𑀢𑀺 𑀅𑀦𑀯𑀲𑁂𑀲𑀯𑀘𑀦𑀁. 𑀓𑀼𑀲𑀮𑀸 𑀥𑀫𑁆𑀫𑀸𑀢𑀺 𑀓𑀼𑀲𑀮𑀢𑁆𑀢𑀺𑀓𑀲𑁆𑀲 𑀧𑀤𑀪𑀸𑀚𑀦𑁂 𑀯𑀼𑀢𑁆𑀢𑀮𑀓𑁆𑀔𑀡𑀸 𑀅𑀦𑀯𑀚𑁆𑀚𑀲𑀼𑀔𑀯𑀺𑀧𑀸𑀓𑀸 𑀓𑀼𑀲𑀮𑀲𑀪𑀸𑀯𑀸. 𑀲𑀩𑁆𑀩𑁂 𑀢𑁂 𑀓𑀼𑀲𑀮𑀫𑀽𑀮𑀸𑀢𑀺 𑀓𑀺𑀁 𑀢𑁂 𑀲𑀩𑁆𑀩𑁂𑀬𑁂𑀯 𑀓𑀼𑀲𑀮𑀫𑀽𑀮𑀸𑀢𑀺 𑀧𑀼𑀘𑁆𑀙𑀢𑀺. 𑀢𑀻𑀡𑁂𑀯 𑀓𑀼𑀲𑀮𑀫𑀽𑀮𑀸𑀦𑀻𑀢𑀺 𑀦 𑀢𑁂 𑀲𑀩𑁆𑀩𑁂 𑀓𑀼𑀲𑀮𑀫𑀽𑀮𑀸𑀦𑀺, 𑀅𑀮𑁄𑀪𑀸𑀤𑀻𑀦𑀺 𑀧𑀦 𑀢𑀻𑀡𑀺 𑀏𑀯 𑀓𑀼𑀲𑀮𑀫𑀽𑀮𑀸𑀦𑀻𑀢𑀺 𑀅𑀢𑁆𑀣𑁄. 𑀅𑀯𑀲𑁂𑀲𑀸 𑀓𑀼𑀲𑀮𑀸 𑀥𑀫𑁆𑀫𑀸 𑀦 𑀓𑀼𑀲𑀮𑀫𑀽𑀮𑀸𑀢𑀺 𑀅𑀯𑀲𑁂𑀲𑀸 𑀨𑀲𑁆𑀲𑀸𑀤𑀬𑁄 𑀓𑀼𑀲𑀮𑀸 𑀥𑀫𑁆𑀫𑀸 𑀓𑀼𑀲𑀮𑀫𑀽𑀮𑀸𑀦𑀺 𑀦𑀸𑀫 𑀦 𑀳𑁄𑀦𑁆𑀢𑀺. 𑀅𑀣 𑀯𑀸 𑀅𑀯𑀲𑁂𑀲𑀸 𑀨𑀲𑁆𑀲𑀸𑀤𑀬𑁄 𑀓𑀼𑀲𑀮𑀸 𑀥𑀫𑁆𑀫𑀸𑀬𑁂𑀯 𑀦𑀸𑀫, 𑀦 𑀓𑀼𑀲𑀮𑀫𑀽𑀮𑀸𑀦𑀻𑀢𑀺𑀧𑀺 𑀅𑀢𑁆𑀣𑁄. 𑀬𑁂 𑀯𑀸 𑀧𑀦 𑀓𑀼𑀲𑀮𑀫𑀽𑀮𑀸𑀢𑀺 𑀬𑁂 𑀯𑀸 𑀧𑀦 𑀧𑀞𑀫𑀧𑀼𑀘𑁆𑀙𑀸𑀬 𑀤𑀼𑀢𑀺𑀬𑀧𑀤𑁂𑀦 𑀓𑀼𑀲𑀮𑀫𑀽𑀮𑀸𑀢𑀺 𑀢𑀬𑁄 𑀅𑀮𑁄𑀪𑀸𑀤𑀬𑁄 𑀕𑀳𑀺𑀢𑀸. 𑀲𑀩𑁆𑀩𑁂 𑀢𑁂 𑀥𑀫𑁆𑀫𑀸 𑀓𑀼𑀲𑀮𑀸𑀢𑀺 𑀓𑀺𑀁 𑀢𑁂 𑀲𑀩𑁆𑀩𑁂 𑀢𑀬𑁄𑀧𑀺 𑀥𑀫𑁆𑀫𑀸 𑀓𑀼𑀲𑀮𑀸𑀢𑀺 𑀧𑀼𑀘𑁆𑀙𑀢𑀺. 𑀆𑀫𑀦𑁆𑀢𑀸𑀢𑀺 𑀲𑀩𑁆𑀩𑁂𑀲𑀫𑁆𑀧𑀺 𑀓𑀼𑀲𑀮𑀫𑀽𑀮𑀸𑀦𑀁 𑀓𑀼𑀲𑀮𑀪𑀸𑀯𑀁 𑀲𑀫𑁆𑀧𑀝𑀺𑀘𑁆𑀙𑀦𑁆𑀢𑁄 𑀆𑀳. 𑀅𑀬𑀁 𑀢𑀸𑀯 𑀫𑀽𑀮𑀦𑀬𑁂 𑀫𑀽𑀮𑀬𑀫𑀓𑀲𑁆𑀲 𑀅𑀢𑁆𑀣𑁄. 𑀇𑀫𑀺𑀦𑀸 𑀉𑀧𑀸𑀬𑁂𑀦 𑀲𑀩𑁆𑀩𑀧𑀼𑀘𑁆𑀙𑀸𑀲𑀼 𑀯𑀺𑀲𑁆𑀲𑀚𑁆𑀚𑀦𑀦𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀬𑀁 𑀧𑀦 𑀬𑀢𑁆𑀣 𑀯𑀺𑀲𑁂𑀲𑀫𑀢𑁆𑀢𑀁 𑀅𑀢𑁆𑀣𑀺, 𑀢𑀤𑁂𑀯 𑀯𑀡𑁆𑀡𑀬𑀺𑀲𑁆𑀲𑀸𑀫.

𑁫𑁧. 𑀏𑀓𑀫𑀽𑀮𑀬𑀫𑀓𑁂 𑀢𑀸𑀯 𑀲𑀩𑁆𑀩𑁂 𑀢𑁂 𑀓𑀼𑀲𑀮𑀫𑀽𑀮𑁂𑀦 𑀏𑀓𑀫𑀽𑀮𑀸𑀢𑀺 𑀕𑀡𑀦𑀝𑁆𑀞𑁂𑀦 𑀏𑀓𑀫𑀽𑀮𑀓𑀁 𑀅𑀕𑁆𑀕𑀳𑁂𑀢𑁆𑀯𑀸 𑀲𑀫𑀸𑀦𑀝𑁆𑀞𑁂𑀦 𑀕𑀳𑁂𑀢𑀩𑁆𑀩𑀸. 𑀅𑀬𑀜𑁆𑀳𑁂𑀢𑁆𑀣 𑀅𑀢𑁆𑀣𑁄 𑁋 𑀲𑀩𑁆𑀩𑁂 𑀢𑁂 𑀓𑀼𑀲𑀮𑀫𑀽𑀮𑁂𑀦 𑀲𑀫𑀸𑀦𑀫𑀽𑀮𑀸. 𑀬𑀁 𑀨𑀲𑁆𑀲𑀲𑁆𑀲 𑀫𑀽𑀮𑀁, 𑀢𑀤𑁂𑀯 𑀯𑁂𑀤𑀦𑀸𑀤𑀻𑀦𑀦𑁆𑀢𑀺. 𑀅𑀣 𑀦𑁂𑀲𑀁 𑀢𑀣𑀸𑀪𑀸𑀯𑀁 𑀲𑀫𑁆𑀧𑀝𑀺𑀘𑁆𑀙𑀦𑁆𑀢𑁄 𑀆𑀫𑀦𑁆𑀢𑀸𑀢𑀺 𑀆𑀳. 𑀓𑀼𑀲𑀮𑀲𑀫𑀼𑀝𑁆𑀞𑀸𑀦𑀦𑁆𑀢𑀺 𑀓𑀼𑀲𑀮𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀁 𑀤𑀲𑁆𑀲𑀺𑀢𑀁. 𑀏𑀓𑀫𑀽𑀮𑀦𑁆𑀢𑀺 𑀅𑀮𑁄𑀪𑀸𑀤𑀺𑀦𑀸 𑀓𑀼𑀲𑀮𑀫𑀽𑀮𑁂𑀦 𑀲𑀫𑀸𑀦𑀫𑀽𑀮𑀁. 𑀬𑀣𑁂𑀯 𑀳𑀺 𑀨𑀲𑁆𑀲𑀸𑀤𑀻𑀦𑀁 𑀅𑀮𑁄𑀪𑀸𑀤𑀬𑁄 𑀳𑁂𑀢𑀼𑀧𑀘𑁆𑀘𑀬𑀢𑁆𑀢𑀸 𑀫𑀽𑀮𑀁, 𑀢𑀣𑀸 𑀢𑀁 𑀲𑀫𑀼𑀝𑁆𑀞𑀸𑀦𑀭𑀽𑀧𑀲𑁆𑀲𑀸𑀧𑀺, 𑀓𑀼𑀲𑀮𑀮𑀓𑁆𑀔𑀡𑀸𑀪𑀸𑀯𑁂𑀦 𑀧𑀦 𑀢𑀁 𑀦 𑀓𑀼𑀲𑀮𑀁.

𑁫𑁨. 𑀅𑀜𑁆𑀜𑀫𑀜𑁆𑀜𑀬𑀫𑀓𑁂 ‘𑀬𑁂𑀓𑁂𑀘𑀺 𑀓𑀼𑀲𑀮𑀸’𑀢𑀺 𑀅𑀧𑀼𑀘𑁆𑀙𑀺𑀢𑁆𑀯𑀸 𑀬𑁂𑀓𑁂𑀘𑀺 𑀓𑀼𑀲𑀮𑀫𑀽𑀮𑁂𑀦 𑀏𑀓𑀫𑀽𑀮𑀸𑀢𑀺 𑀧𑀼𑀘𑁆𑀙𑀸 𑀓𑀢𑀸. 𑀓𑀲𑁆𑀫𑀸? 𑀇𑀫𑀺𑀦𑀸𑀧𑀺 𑀩𑁆𑀬𑀜𑁆𑀚𑀦𑁂𑀦 𑀢𑀲𑁆𑀲𑁂𑀯𑀢𑁆𑀣𑀲𑁆𑀲 𑀲𑀫𑁆𑀪𑀯𑀢𑁄. 𑀓𑀼𑀲𑀮𑀫𑀽𑀮𑀸𑀦𑀻𑀢𑀺 𑀇𑀤𑀁 𑀧𑀼𑀭𑀺𑀫𑀲𑁆𑀲 𑀯𑀺𑀲𑁂𑀲𑀦𑀁. ‘𑀫𑀽𑀮𑀸𑀦𑀺 𑀬𑀸𑀦𑀺 𑀏𑀓𑀢𑁄 𑀉𑀧𑁆𑀧𑀚𑁆𑀚𑀦𑁆𑀢𑀻’𑀢𑀺 𑀳𑀺 𑀯𑀼𑀢𑁆𑀢𑀁, 𑀢𑀸𑀦𑀺 𑀧𑀦 𑀓𑀼𑀲𑀮𑀫𑀽𑀮𑀸𑀦𑀺𑀧𑀺 𑀳𑁄𑀦𑁆𑀢𑀺 𑀅𑀓𑀼𑀲𑀮𑀅𑀩𑁆𑀬𑀸𑀓𑀢𑀫𑀽𑀮𑀸𑀦𑀺𑀧𑀺, 𑀇𑀥 𑀓𑀼𑀲𑀮𑀫𑀽𑀮𑀸𑀦𑀻𑀢𑀺 𑀯𑀺𑀲𑁂𑀲𑀤𑀲𑁆𑀲𑀦𑀢𑁆𑀣𑀫𑀺𑀤𑀁 𑀯𑀼𑀢𑁆𑀢𑀁. 𑀅𑀜𑁆𑀜𑀫𑀜𑁆𑀜𑀫𑀽𑀮𑀸𑀦𑀺 𑀘𑀸𑀢𑀺 𑀅𑀜𑁆𑀜𑀫𑀜𑁆𑀜𑀁 𑀳𑁂𑀢𑀼𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑀸 𑀳𑁄𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀢𑀲𑁆𑀲𑁂𑀯 𑀧𑀝𑀺𑀮𑁄𑀫𑀧𑀼𑀘𑁆𑀙𑀸𑀬 ‘𑀲𑀩𑁆𑀩𑁂 𑀢𑁂 𑀥𑀫𑁆𑀫𑀸 𑀓𑀼𑀲𑀮𑀫𑀽𑀮𑁂𑀦 𑀏𑀓𑀫𑀽𑀮𑀸’𑀢𑀺 𑀅𑀯𑀢𑁆𑀯𑀸 𑀲𑀩𑁆𑀩𑁂 𑀢𑁂 𑀥𑀫𑁆𑀫𑀸 𑀓𑀼𑀲𑀮𑀸𑀢𑀺 𑀯𑀼𑀢𑁆𑀢𑀁. 𑀓𑀲𑁆𑀫𑀸? 𑀅𑀢𑁆𑀣𑀯𑀺𑀲𑁂𑀲𑀸𑀪𑀸𑀯𑀢𑁄. 𑀓𑀼𑀲𑀮𑀫𑀽𑀮𑁂𑀦 𑀏𑀓𑀫𑀽𑀮𑀸𑀢𑀺 𑀳𑀺 𑀧𑀼𑀘𑁆𑀙𑀸𑀬 𑀓𑀢𑀸𑀬 ‘𑀫𑀽𑀮𑀸𑀦𑀺 𑀬𑀸𑀦𑀺 𑀏𑀓𑀢𑁄 𑀉𑀧𑁆𑀧𑀚𑁆𑀚𑀦𑁆𑀢𑀻’𑀢𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑀺𑀲𑁆𑀲𑀚𑁆𑀚𑀦𑀁 𑀓𑀸𑀢𑀩𑁆𑀩𑀁 𑀪𑀯𑁂𑀬𑁆𑀬, 𑀏𑀯𑀜𑁆𑀘 𑀲𑀢𑀺 𑀅𑀢𑁆𑀣𑀯𑀺𑀲𑁂𑀲𑀸𑀪𑀸𑀯𑁄 𑀳𑁄𑀢𑀺. 𑀢𑀲𑁆𑀫𑀸 𑀢𑀣𑀸 𑀅𑀓𑀢𑁆𑀯𑀸 𑀏𑀯𑀁 𑀧𑀼𑀘𑁆𑀙𑀸 𑀓𑀢𑀸. 𑀇𑀫𑀺𑀦𑀸 𑀉𑀧𑀸𑀬𑁂𑀦 𑀫𑀽𑀮𑀫𑀽𑀮𑀦𑀬𑀸𑀤𑀻𑀲𑀼𑀧𑀺 𑀅𑀜𑁆𑀜𑀫𑀜𑁆𑀜𑀫𑀽𑀮𑀬𑀫𑀓𑁂 𑀧𑀼𑀘𑁆𑀙𑀸𑀯𑀺𑀲𑁂𑀲𑁄 𑀯𑁂𑀤𑀺𑀢𑀩𑁆𑀩𑁄.

𑁫𑁩-𑁫𑁫. 𑀫𑀽𑀮𑀫𑀽𑀮𑀦𑀬𑁂 𑀲𑀩𑁆𑀩𑁂 𑀢𑁂 𑀓𑀼𑀲𑀮𑀫𑀽𑀮𑀫𑀽𑀮𑀸𑀢𑀺 𑀲𑀩𑁆𑀩𑁂 𑀢𑁂 𑀓𑀼𑀲𑀮𑀫𑀽𑀮𑀲𑀗𑁆𑀔𑀸𑀢𑀸 𑀫𑀽𑀮𑀸𑀢𑀺 𑀧𑀼𑀘𑁆𑀙𑀢𑀺. 𑀏𑀓𑀫𑀽𑀮𑀫𑀽𑀮𑀸𑀢𑀺 𑀲𑀫𑀸𑀦𑀝𑁆𑀞𑁂𑀦 𑀏𑀓𑀫𑁂𑀯 𑀫𑀽𑀮𑀫𑀽𑀮𑀁 𑀏𑀢𑁂𑀲𑀦𑁆𑀢𑀺 𑀏𑀓𑀫𑀽𑀮𑀫𑀽𑀮𑀸. 𑀅𑀜𑁆𑀜𑀫𑀜𑁆𑀜𑀫𑀽𑀮𑀫𑀽𑀮𑀸𑀢𑀺 𑀅𑀜𑁆𑀜𑀫𑀜𑁆𑀜𑀲𑁆𑀲 𑀫𑀽𑀮𑀁 𑀅𑀜𑁆𑀜𑀫𑀜𑁆𑀜𑀫𑀽𑀮𑀁, 𑀅𑀜𑁆𑀜𑀫𑀜𑁆𑀜𑀫𑀽𑀮𑀁 𑀳𑁂𑀢𑀼𑀧𑀘𑁆𑀘𑀬𑀝𑁆𑀞𑁂𑀦 𑀫𑀽𑀮𑀁 𑀏𑀢𑁂𑀲𑀦𑁆𑀢𑀺 𑀅𑀜𑁆𑀜𑀫𑀜𑁆𑀜𑀫𑀽𑀮𑀫𑀽𑀮𑀸.

𑁫𑁬. 𑀫𑀽𑀮𑀓𑀦𑀬𑁂 𑀓𑀼𑀲𑀮𑀫𑀽𑀮𑀓𑀸𑀢𑀺 𑀳𑁂𑀢𑀼𑀧𑀘𑁆𑀘𑀬𑀝𑁆𑀞𑁂𑀦 𑀓𑀼𑀲𑀮𑀁 𑀫𑀽𑀮𑀁 𑀏𑀢𑁂𑀲𑀦𑁆𑀢𑀺 𑀓𑀼𑀲𑀮𑀫𑀽𑀮𑀓𑀸.

𑁫𑁭-𑁬𑁧. 𑀫𑀽𑀮𑀫𑀽𑀮𑀓𑀦𑀬𑁂 𑀓𑀼𑀲𑀮𑀫𑀽𑀮𑀫𑀽𑀮𑀓𑀸𑀢𑀺 𑀓𑀼𑀲𑀮𑀸𑀦𑀁 𑀫𑀽𑀮𑀁 𑀓𑀼𑀲𑀮𑀫𑀽𑀮𑀁. 𑀳𑁂𑀢𑀼𑀧𑀘𑁆𑀘𑀬𑀝𑁆𑀞𑁂𑀦𑁂𑀯 𑀓𑀼𑀲𑀮𑀫𑀽𑀮𑀁 𑀫𑀽𑀮𑀁 𑀏𑀢𑁂𑀲𑀦𑁆𑀢𑀺 𑀓𑀼𑀲𑀮𑀫𑀽𑀮𑀫𑀽𑀮𑀓𑀸𑀢𑀺. 𑀅𑀬𑀁 𑀢𑀸𑀯 𑀓𑀼𑀲𑀮𑀧𑀤𑀁 𑀦𑀺𑀲𑁆𑀲𑀸𑀬 𑀦𑀬𑀬𑀫𑀓𑀧𑀼𑀘𑁆𑀙𑀸𑀲𑀼 𑀯𑀺𑀲𑁂𑀲𑀢𑁆𑀣𑁄.

𑁬𑁨-𑁭𑁩. 𑀅𑀓𑀼𑀲𑀮𑀧𑀤𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀅𑀬𑀁 𑀧𑀦 𑀯𑀺𑀲𑁂𑀲𑁄, 𑀅𑀳𑁂𑀢𑀼𑀓𑀁 𑀅𑀓𑀼𑀲𑀮𑀦𑁆𑀢𑀺 𑀯𑀺𑀘𑀺𑀓𑀺𑀘𑁆𑀙𑀸𑀬 𑀘𑁂𑀯 𑀉𑀤𑁆𑀥𑀘𑁆𑀘𑁂𑀦 𑀘 𑀲𑀫𑁆𑀧𑀬𑀼𑀢𑁆𑀢𑀁 𑀫𑁄𑀳𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁.

𑁭𑁪-𑁮𑁫. 𑀅𑀳𑁂𑀢𑀼𑀓𑀁 𑀅𑀩𑁆𑀬𑀸𑀓𑀢𑀦𑁆𑀢𑀺 𑀅𑀝𑁆𑀞𑀸𑀭𑀲 𑀘𑀺𑀢𑁆𑀢𑀼𑀧𑁆𑀧𑀸𑀤𑀸 𑀭𑀽𑀧𑀁, 𑀦𑀺𑀩𑁆𑀩𑀸𑀦𑀜𑁆𑀘. 𑀅𑀩𑁆𑀬𑀸𑀓𑀢𑀫𑀽𑀮𑁂𑀦 𑀦 𑀏𑀓𑀫𑀽𑀮𑀦𑁆𑀢𑀺 𑀇𑀥 𑀧𑀦 𑀞𑀧𑁂𑀢𑁆𑀯𑀸 𑀲𑀳𑁂𑀢𑀼𑀓𑀅𑀩𑁆𑀬𑀸𑀓𑀢𑀲𑀫𑀼𑀝𑁆𑀞𑀸𑀦𑀁 𑀭𑀽𑀧𑀁, 𑀲𑁂𑀲𑀁 𑀮𑀩𑁆𑀪𑀢𑀺. 𑀲𑀳𑁂𑀢𑀼𑀓𑀅𑀩𑁆𑀬𑀸𑀓𑀢𑀲𑀫𑀼𑀝𑁆𑀞𑀸𑀦𑀁 𑀭𑀽𑀧𑀁 𑀅𑀩𑁆𑀬𑀸𑀓𑀢𑀫𑀽𑀮𑁂𑀦 𑀏𑀓𑀫𑀽𑀮𑀁 𑀳𑁄𑀢𑀺, 𑀢𑀁 𑀅𑀩𑁆𑀩𑁄𑀳𑀸𑀭𑀺𑀓𑀁 𑀓𑀢𑁆𑀯𑀸 𑀏𑀓𑀢𑁄 𑀮𑀩𑁆𑀪𑀫𑀸𑀦𑀓𑀯𑀲𑁂𑀦𑁂𑀯 𑀘𑁂𑀢𑀁 𑀯𑀺𑀲𑁆𑀲𑀚𑁆𑀚𑀦𑀁 𑀓𑀢𑀁.

𑁮𑁬-𑁯𑁭. 𑀦𑀸𑀫𑀸 𑀥𑀫𑁆𑀫𑀸𑀢𑀺 𑀦𑀸𑀫𑀲𑀗𑁆𑀔𑀸𑀢𑀸 𑀥𑀫𑁆𑀫𑀸. 𑀢𑁂 𑀅𑀢𑁆𑀣𑀢𑁄 𑀘𑀢𑁆𑀢𑀸𑀭𑁄 𑀅𑀭𑀽𑀧𑀺𑀦𑁄 𑀔𑀦𑁆𑀥𑀸, 𑀦𑀺𑀩𑁆𑀩𑀸𑀦𑀜𑁆𑀘. 𑀦𑀯𑁂𑀯 𑀦𑀸𑀫𑀫𑀽𑀮𑀸𑀦𑀻𑀢𑀺 𑀓𑀼𑀲𑀮𑀸𑀓𑀼𑀲𑀮𑀅𑀩𑁆𑀬𑀸𑀓𑀢𑀫𑀽𑀮𑀯𑀲𑁂𑀦 𑀦𑀯 𑀫𑀽𑀮𑀸𑀦𑀺. 𑀅𑀳𑁂𑀢𑀼𑀓𑀁 𑀦𑀸𑀫𑀁 𑀦𑀸𑀫𑀫𑀽𑀮𑁂𑀦 𑀦 𑀏𑀓𑀫𑀽𑀮𑀦𑁆𑀢𑀺 𑀅𑀳𑁂𑀢𑀼𑀓𑀁 𑀲𑀩𑁆𑀩𑀫𑁆𑀧𑀺 𑀅𑀝𑁆𑀞𑀸𑀭𑀲 𑀘𑀺𑀢𑁆𑀢𑀼𑀧𑁆𑀧𑀸𑀤𑀯𑀺𑀘𑀺𑀓𑀺𑀘𑁆𑀙𑀼𑀤𑁆𑀥𑀘𑁆𑀘𑀲𑀫𑁆𑀧𑀬𑀼𑀢𑁆𑀢𑀫𑁄𑀳𑀦𑀺𑀩𑁆𑀩𑀸𑀦𑀲𑀗𑁆𑀔𑀸𑀢𑀁 𑀦𑀸𑀫𑀁 𑀦𑀸𑀫𑀫𑀽𑀮𑁂𑀦 𑀦 𑀏𑀓𑀫𑀽𑀮𑀁. 𑀦 𑀳𑀺 𑀢𑀁 𑀢𑁂𑀦 𑀲𑀤𑁆𑀥𑀺𑀁 𑀉𑀧𑁆𑀧𑀚𑁆𑀚𑀢𑀺. 𑀲𑀳𑁂𑀢𑀼𑀓𑀁 𑀦𑀸𑀫𑀁 𑀦𑀸𑀫𑀫𑀽𑀮𑁂𑀦𑀸𑀢𑀺 𑀧𑀤𑁂𑀧𑀺 𑀲𑀳𑁂𑀢𑀼𑀓𑀁 𑀦𑀸𑀫𑀁 𑀦𑀸𑀫𑀫𑀽𑀮𑁂𑀦𑀸𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀫𑀽𑀮𑀯𑀸𑀭𑀯𑀡𑁆𑀡𑀦𑀸.

𑁯𑁮-𑁯𑁯. 𑀳𑁂𑀢𑀼𑀯𑀸𑀭𑀸𑀤𑀻𑀲𑀼𑀧𑀺 𑀇𑀫𑀺𑀦𑀸𑀯𑀼𑀧𑀸𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀫𑀽𑀮𑀁 𑀳𑁂𑀢𑀼 𑀦𑀺𑀤𑀸𑀦𑀜𑁆𑀘𑀸𑀢𑀺𑀕𑀸𑀣𑀸 𑀬𑀣𑀸𑀦𑀺𑀤𑁆𑀤𑀺𑀝𑁆𑀞𑀸𑀦𑀁 𑀤𑀲𑀦𑁆𑀦𑀫𑁆𑀧𑀺 𑀯𑀸𑀭𑀸𑀦𑀁 𑀧𑀼𑀦 𑀉𑀤𑁆𑀤𑀸𑀦𑀯𑀲𑁂𑀦𑁂𑀯 𑀯𑀼𑀢𑁆𑀢𑀸𑀢𑀺.

𑀫𑀽𑀮𑀬𑀫𑀓𑀯𑀡𑁆𑀡𑀦𑀸.