𑁩-𑁭. 𑀇𑀲𑁆𑀲𑀭𑀺𑀬𑀓𑀸𑀫𑀓𑀸𑀭𑀺𑀓𑀸𑀓𑀣𑀸𑀯𑀡𑁆𑀡𑀦𑀸

𑁯𑁧𑁦-𑁯𑁧𑁪. 𑀇𑀤𑀸𑀦𑀺 𑀇𑀲𑁆𑀲𑀭𑀺𑀬𑀓𑀸𑀫𑀓𑀸𑀭𑀺𑀓𑀸𑀓𑀣𑀸 𑀦𑀸𑀫 𑀳𑁄𑀢𑀺. 𑀙𑀤𑁆𑀤𑀦𑁆𑀢𑀚𑀸𑀢𑀓𑀸𑀤𑀻𑀦𑀺 𑀲𑀦𑁆𑀥𑀸𑀬 ‘‘𑀩𑁄𑀥𑀺𑀲𑀢𑁆𑀢𑁄 𑀇𑀲𑁆𑀲𑀭𑀺𑀬𑀓𑀸𑀫𑀓𑀸𑀭𑀺𑀓𑀸𑀳𑁂𑀢𑀼 𑀯𑀺𑀦𑀺𑀧𑀸𑀢𑀁 𑀕𑀘𑁆𑀙𑀢𑀺, 𑀕𑀩𑁆𑀪𑀲𑁂𑀬𑁆𑀬𑀁 𑀑𑀓𑁆𑀓𑀫𑀢𑀺, 𑀤𑀼𑀓𑁆𑀓𑀭𑀓𑀸𑀭𑀺𑀓𑀁 𑀅𑀓𑀸𑀲𑀺, 𑀅𑀧𑀭𑀦𑁆𑀢𑀧𑀁 𑀅𑀓𑀸𑀲𑀺, 𑀅𑀜𑁆𑀜𑀁 𑀲𑀢𑁆𑀣𑀸𑀭𑀁 𑀉𑀤𑁆𑀤𑀺𑀲𑀻’’𑀢𑀺 𑀬𑁂𑀲𑀁 𑀮𑀤𑁆𑀥𑀺, 𑀲𑁂𑀬𑁆𑀬𑀣𑀸𑀧𑀺 𑀅𑀦𑁆𑀥𑀓𑀸𑀦𑀁, 𑀢𑁂 𑀲𑀦𑁆𑀥𑀸𑀬 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀧𑀝𑀺𑀜𑁆𑀜𑀸 𑀇𑀢𑀭𑀲𑁆𑀲. 𑀲𑁂𑀲𑀁 𑀧𑀞𑀫𑀓𑀣𑀸𑀬𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯. 𑀤𑀼𑀢𑀺𑀬𑀓𑀣𑀸𑀬𑀁 𑀇𑀤𑁆𑀥𑀺𑀫𑀸𑀢𑀺 𑀬𑀤𑀺 𑀇𑀲𑁆𑀲𑀭𑀺𑀬𑀓𑀸𑀫𑀓𑀸𑀭𑀺𑀓𑀸𑀳𑁂𑀢𑀼 𑀕𑀘𑁆𑀙𑁂𑀬𑁆𑀬, 𑀇𑀤𑁆𑀥𑀺𑀬𑀸 𑀕𑀘𑁆𑀙𑁂𑀬𑁆𑀬, 𑀦 𑀓𑀫𑁆𑀫𑀯𑀲𑁂𑀦𑀸𑀢𑀺 𑀘𑁄𑀤𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀇𑀢𑀭𑁄 𑀧𑀦 𑀧𑀞𑀫𑀧𑀜𑁆𑀳𑁂 𑀪𑀸𑀯𑀦𑀸𑀫𑀬𑀁 𑀲𑀦𑁆𑀥𑀸𑀬 𑀧𑀝𑀺𑀓𑁆𑀔𑀺𑀧𑀢𑀺. 𑀤𑀼𑀢𑀺𑀬𑀧𑀜𑁆𑀳𑁂 𑀧𑀼𑀜𑁆𑀜𑀺𑀤𑁆𑀥𑀺𑀁 𑀲𑀦𑁆𑀥𑀸𑀬 𑀧𑀝𑀺𑀚𑀸𑀦𑀸𑀢𑀺. 𑀢𑀢𑀺𑀬𑀓𑀣𑀸𑀬𑀁 𑀇𑀲𑁆𑀲𑀭𑀺𑀬𑀓𑀸𑀫𑀓𑀸𑀭𑀺𑀓𑀸𑀳𑁂𑀢𑀼 𑀦𑀸𑀫 𑀤𑀼𑀓𑁆𑀓𑀭𑀓𑀸𑀭𑀺𑀓𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀬𑀸 𑀓𑀭𑀺𑀬𑀢𑀺. 𑀬𑀤𑀺 𑀘 𑀲𑁄 𑀢𑀁 𑀓𑀭𑁂𑀬𑁆𑀬, 𑀲𑀲𑁆𑀲𑀢𑀸𑀤𑀻𑀦𑀺𑀧𑀺 𑀕𑀡𑁆𑀳𑁂𑀬𑁆𑀬𑀸𑀢𑀺 𑀘𑁄𑀤𑀦𑀢𑁆𑀣𑀁 𑀲𑀲𑁆𑀲𑀢𑁄 𑀮𑁄𑀓𑁄𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀘𑀢𑀼𑀢𑁆𑀣𑀓𑀣𑀸𑀬𑀫𑁆𑀧𑀺 𑀏𑀲𑁂𑀯 𑀦𑀬𑁄𑀢𑀺.

𑀇𑀲𑁆𑀲𑀭𑀺𑀬𑀓𑀸𑀫𑀓𑀸𑀭𑀺𑀓𑀸𑀓𑀣𑀸𑀯𑀡𑁆𑀡𑀦𑀸.