𑁨𑁩. 𑀢𑁂𑀯𑀻𑀲𑀢𑀺𑀫𑀯𑀕𑁆𑀕𑁄

𑁧. 𑀏𑀓𑀸𑀥𑀺𑀧𑁆𑀧𑀸𑀬𑀓𑀣𑀸𑀯𑀡𑁆𑀡𑀦𑀸

𑁯𑁦𑁮. 𑀇𑀤𑀸𑀦𑀺 𑀏𑀓𑀸𑀥𑀺𑀧𑁆𑀧𑀸𑀬𑀓𑀣𑀸 𑀦𑀸𑀫 𑀳𑁄𑀢𑀺. 𑀢𑀢𑁆𑀣 𑀓𑀸𑀭𑀼𑀜𑁆𑀜𑁂𑀦 𑀯𑀸 𑀏𑀓𑁂𑀦 𑀅𑀥𑀺𑀧𑁆𑀧𑀸𑀬𑁂𑀦 𑀏𑀓𑀸𑀥𑀺𑀧𑁆𑀧𑀸𑀬𑁄, 𑀲𑀁𑀲𑀸𑀭𑁂 𑀯𑀸 𑀏𑀓𑀢𑁄 𑀪𑀯𑀺𑀲𑁆𑀲𑀸𑀫𑀸𑀢𑀺 𑀇𑀢𑁆𑀣𑀺𑀬𑀸 𑀲𑀤𑁆𑀥𑀺𑀁 𑀩𑀼𑀤𑁆𑀥𑀧𑀽𑀚𑀸𑀤𑀻𑀦𑀺 𑀓𑀢𑁆𑀯𑀸 𑀧𑀡𑀺𑀥𑀺𑀯𑀲𑁂𑀦 𑀏𑀓𑁄 𑀅𑀥𑀺𑀧𑁆𑀧𑀸𑀬𑁄 𑀅𑀲𑁆𑀲𑀸𑀢𑀺 𑀏𑀓𑀸𑀥𑀺𑀧𑁆𑀧𑀸𑀬𑁄. 𑀏𑀯𑀭𑀽𑀧𑁄 𑀤𑁆𑀯𑀺𑀦𑁆𑀦𑀫𑁆𑀧𑀺 𑀚𑀦𑀸𑀦𑀁 𑀏𑀓𑀸𑀥𑀺𑀧𑁆𑀧𑀸𑀬𑁄 𑀫𑁂𑀣𑀼𑀦𑁄 𑀥𑀫𑁆𑀫𑁄 𑀧𑀝𑀺𑀲𑁂𑀯𑀺𑀢𑀩𑁆𑀩𑁄𑀢𑀺 𑀬𑁂𑀲𑀁 𑀮𑀤𑁆𑀥𑀺, 𑀲𑁂𑀬𑁆𑀬𑀣𑀸𑀧𑀺 𑀅𑀦𑁆𑀥𑀓𑀸𑀦𑀜𑁆𑀘𑁂𑀯 𑀯𑁂𑀢𑀼𑀮𑁆𑀮𑀓𑀸𑀦𑀜𑁆𑀘; 𑀢𑁂 𑀲𑀦𑁆𑀥𑀸𑀬 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀧𑀝𑀺𑀜𑁆𑀜𑀸 𑀇𑀢𑀭𑀲𑁆𑀲. 𑀲𑁂𑀲𑀫𑁂𑀢𑁆𑀣 𑀬𑀣𑀸𑀧𑀸𑀴𑀺𑀫𑁂𑀯 𑀦𑀺𑀬𑁆𑀬𑀸𑀢𑀻𑀢𑀺.

𑀏𑀓𑀸𑀥𑀺𑀧𑁆𑀧𑀸𑀬𑀓𑀣𑀸𑀯𑀡𑁆𑀡𑀦𑀸.

𑁨. 𑀅𑀭𑀳𑀦𑁆𑀢𑀯𑀡𑁆𑀡𑀓𑀣𑀸𑀯𑀡𑁆𑀡𑀦𑀸

𑁯𑁦𑁯. 𑀇𑀤𑀸𑀦𑀺 𑀅𑀭𑀳𑀦𑁆𑀢𑀯𑀡𑁆𑀡𑀓𑀣𑀸 𑀦𑀸𑀫 𑀳𑁄𑀢𑀺. 𑀢𑀢𑁆𑀣 𑀇𑀭𑀺𑀬𑀸𑀧𑀣𑀲𑀫𑁆𑀧𑀦𑁆𑀦𑁂 𑀆𑀓𑀧𑁆𑀧𑀲𑀫𑁆𑀧𑀦𑁆𑀦𑁂 𑀧𑀸𑀧𑀪𑀺𑀓𑁆𑀔𑀽 𑀤𑀺𑀲𑁆𑀯𑀸 ‘‘𑀅𑀭𑀳𑀦𑁆𑀢𑀸𑀦𑀁 𑀯𑀡𑁆𑀡𑁂𑀦 𑀅𑀫𑀦𑀼𑀲𑁆𑀲𑀸 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀦𑁆𑀢𑀻’’𑀢𑀺 𑀬𑁂𑀲𑀁 𑀮𑀤𑁆𑀥𑀺, 𑀲𑁂𑀬𑁆𑀬𑀣𑀸𑀧𑀺 𑀏𑀓𑀘𑁆𑀘𑀸𑀦𑀁 𑀉𑀢𑁆𑀢𑀭𑀸𑀧𑀣𑀓𑀸𑀦𑀁; 𑀢𑁂 𑀲𑀦𑁆𑀥𑀸𑀬 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀧𑀝𑀺𑀜𑁆𑀜𑀸 𑀇𑀢𑀭𑀲𑁆𑀲. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀅𑀭𑀳𑀦𑁆𑀢𑀯𑀡𑁆𑀡𑀓𑀣𑀸𑀯𑀡𑁆𑀡𑀦𑀸.

𑁩-𑁭. 𑀇𑀲𑁆𑀲𑀭𑀺𑀬𑀓𑀸𑀫𑀓𑀸𑀭𑀺𑀓𑀸𑀓𑀣𑀸𑀯𑀡𑁆𑀡𑀦𑀸

𑁯𑁧𑁦-𑁯𑁧𑁪. 𑀇𑀤𑀸𑀦𑀺 𑀇𑀲𑁆𑀲𑀭𑀺𑀬𑀓𑀸𑀫𑀓𑀸𑀭𑀺𑀓𑀸𑀓𑀣𑀸 𑀦𑀸𑀫 𑀳𑁄𑀢𑀺. 𑀙𑀤𑁆𑀤𑀦𑁆𑀢𑀚𑀸𑀢𑀓𑀸𑀤𑀻𑀦𑀺 𑀲𑀦𑁆𑀥𑀸𑀬 ‘‘𑀩𑁄𑀥𑀺𑀲𑀢𑁆𑀢𑁄 𑀇𑀲𑁆𑀲𑀭𑀺𑀬𑀓𑀸𑀫𑀓𑀸𑀭𑀺𑀓𑀸𑀳𑁂𑀢𑀼 𑀯𑀺𑀦𑀺𑀧𑀸𑀢𑀁 𑀕𑀘𑁆𑀙𑀢𑀺, 𑀕𑀩𑁆𑀪𑀲𑁂𑀬𑁆𑀬𑀁 𑀑𑀓𑁆𑀓𑀫𑀢𑀺, 𑀤𑀼𑀓𑁆𑀓𑀭𑀓𑀸𑀭𑀺𑀓𑀁 𑀅𑀓𑀸𑀲𑀺, 𑀅𑀧𑀭𑀦𑁆𑀢𑀧𑀁 𑀅𑀓𑀸𑀲𑀺, 𑀅𑀜𑁆𑀜𑀁 𑀲𑀢𑁆𑀣𑀸𑀭𑀁 𑀉𑀤𑁆𑀤𑀺𑀲𑀻’’𑀢𑀺 𑀬𑁂𑀲𑀁 𑀮𑀤𑁆𑀥𑀺, 𑀲𑁂𑀬𑁆𑀬𑀣𑀸𑀧𑀺 𑀅𑀦𑁆𑀥𑀓𑀸𑀦𑀁, 𑀢𑁂 𑀲𑀦𑁆𑀥𑀸𑀬 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀧𑀝𑀺𑀜𑁆𑀜𑀸 𑀇𑀢𑀭𑀲𑁆𑀲. 𑀲𑁂𑀲𑀁 𑀧𑀞𑀫𑀓𑀣𑀸𑀬𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯. 𑀤𑀼𑀢𑀺𑀬𑀓𑀣𑀸𑀬𑀁 𑀇𑀤𑁆𑀥𑀺𑀫𑀸𑀢𑀺 𑀬𑀤𑀺 𑀇𑀲𑁆𑀲𑀭𑀺𑀬𑀓𑀸𑀫𑀓𑀸𑀭𑀺𑀓𑀸𑀳𑁂𑀢𑀼 𑀕𑀘𑁆𑀙𑁂𑀬𑁆𑀬, 𑀇𑀤𑁆𑀥𑀺𑀬𑀸 𑀕𑀘𑁆𑀙𑁂𑀬𑁆𑀬, 𑀦 𑀓𑀫𑁆𑀫𑀯𑀲𑁂𑀦𑀸𑀢𑀺 𑀘𑁄𑀤𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀇𑀢𑀭𑁄 𑀧𑀦 𑀧𑀞𑀫𑀧𑀜𑁆𑀳𑁂 𑀪𑀸𑀯𑀦𑀸𑀫𑀬𑀁 𑀲𑀦𑁆𑀥𑀸𑀬 𑀧𑀝𑀺𑀓𑁆𑀔𑀺𑀧𑀢𑀺. 𑀤𑀼𑀢𑀺𑀬𑀧𑀜𑁆𑀳𑁂 𑀧𑀼𑀜𑁆𑀜𑀺𑀤𑁆𑀥𑀺𑀁 𑀲𑀦𑁆𑀥𑀸𑀬 𑀧𑀝𑀺𑀚𑀸𑀦𑀸𑀢𑀺. 𑀢𑀢𑀺𑀬𑀓𑀣𑀸𑀬𑀁 𑀇𑀲𑁆𑀲𑀭𑀺𑀬𑀓𑀸𑀫𑀓𑀸𑀭𑀺𑀓𑀸𑀳𑁂𑀢𑀼 𑀦𑀸𑀫 𑀤𑀼𑀓𑁆𑀓𑀭𑀓𑀸𑀭𑀺𑀓𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀬𑀸 𑀓𑀭𑀺𑀬𑀢𑀺. 𑀬𑀤𑀺 𑀘 𑀲𑁄 𑀢𑀁 𑀓𑀭𑁂𑀬𑁆𑀬, 𑀲𑀲𑁆𑀲𑀢𑀸𑀤𑀻𑀦𑀺𑀧𑀺 𑀕𑀡𑁆𑀳𑁂𑀬𑁆𑀬𑀸𑀢𑀺 𑀘𑁄𑀤𑀦𑀢𑁆𑀣𑀁 𑀲𑀲𑁆𑀲𑀢𑁄 𑀮𑁄𑀓𑁄𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀘𑀢𑀼𑀢𑁆𑀣𑀓𑀣𑀸𑀬𑀫𑁆𑀧𑀺 𑀏𑀲𑁂𑀯 𑀦𑀬𑁄𑀢𑀺.

𑀇𑀲𑁆𑀲𑀭𑀺𑀬𑀓𑀸𑀫𑀓𑀸𑀭𑀺𑀓𑀸𑀓𑀣𑀸𑀯𑀡𑁆𑀡𑀦𑀸.

𑁮. 𑀧𑀢𑀺𑀭𑀽𑀧𑀓𑀣𑀸𑀯𑀡𑁆𑀡𑀦𑀸

𑁯𑁧𑁫-𑁯𑁧𑁬. 𑀇𑀤𑀸𑀦𑀺 𑀭𑀸𑀕𑀧𑀢𑀺𑀭𑀽𑀧𑀓𑀣𑀸 𑀦𑀸𑀫 𑀳𑁄𑀢𑀺. 𑀢𑀢𑁆𑀣 𑀫𑁂𑀢𑁆𑀢𑀸𑀓𑀭𑀼𑀡𑀸𑀫𑀼𑀤𑀺𑀢𑀸𑀬𑁄 𑀲𑀦𑁆𑀥𑀸𑀬 ‘‘𑀦 𑀭𑀸𑀕𑁄 𑀭𑀸𑀕𑀧𑀢𑀺𑀭𑀽𑀧𑀓𑁄’’𑀢𑀺 𑀘 𑀇𑀲𑁆𑀲𑀸𑀫𑀘𑁆𑀙𑀭𑀺𑀬𑀓𑀼𑀓𑁆𑀓𑀼𑀘𑁆𑀘𑀸𑀦𑀺 𑀲𑀦𑁆𑀥𑀸𑀬 ‘‘𑀦 𑀤𑁄𑀲𑁄 𑀤𑁄𑀲𑀧𑀢𑀺𑀭𑀽𑀧𑀓𑁄’’𑀢𑀺 𑀘 𑀳𑀲𑀺𑀢𑀼𑀧𑁆𑀧𑀸𑀤𑀁 𑀲𑀦𑁆𑀥𑀸𑀬 ‘‘𑀦 𑀫𑁄𑀳𑁄 𑀫𑁄𑀳𑀧𑀢𑀺𑀭𑀽𑀧𑀓𑁄’’𑀢𑀺 𑀘 𑀤𑀼𑀫𑁆𑀫𑀗𑁆𑀓𑀽𑀦𑀁 𑀧𑀼𑀕𑁆𑀕𑀮𑀸𑀦𑀁 𑀦𑀺𑀕𑁆𑀕𑀳𑀁 𑀧𑁂𑀲𑀮𑀸𑀦𑀁 𑀪𑀺𑀓𑁆𑀔𑀽𑀦𑀁 𑀅𑀦𑀼𑀕𑁆𑀕𑀳𑀁 𑀧𑀸𑀧𑀕𑀭𑀳𑀺𑀢𑀁 𑀓𑀮𑁆𑀬𑀸𑀡𑀧𑀲𑀁𑀲𑀁 𑀆𑀬𑀲𑁆𑀫𑀢𑁄 𑀧𑀺𑀮𑀺𑀦𑁆𑀤𑀯𑀘𑁆𑀙𑀲𑁆𑀲 𑀯𑀲𑀮𑀯𑀸𑀤𑀁 𑀪𑀕𑀯𑀢𑁄 𑀔𑁂𑀴𑀸𑀲𑀓𑀯𑀸𑀤𑀁 𑀫𑁄𑀖𑀧𑀼𑀭𑀺𑀲𑀯𑀸𑀤𑀜𑁆𑀘 𑀲𑀦𑁆𑀥𑀸𑀬 ‘‘𑀦 𑀓𑀺𑀮𑁂𑀲𑁄 𑀓𑀺𑀮𑁂𑀲𑀧𑀢𑀺𑀭𑀽𑀧𑀓𑁄’’𑀢𑀺 𑀘 𑀬𑁂𑀲𑀁 𑀮𑀤𑁆𑀥𑀺, 𑀲𑁂𑀬𑁆𑀬𑀣𑀸𑀧𑀺 𑀅𑀦𑁆𑀥𑀓𑀸𑀦𑀁; 𑀢𑁂 𑀲𑀦𑁆𑀥𑀸𑀬 𑀲𑀩𑁆𑀩𑀓𑀣𑀸𑀲𑀼 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀧𑀝𑀺𑀜𑁆𑀜𑀸 𑀇𑀢𑀭𑀲𑁆𑀲. 𑀅𑀣 𑀦𑀁 𑀬𑀲𑁆𑀫𑀸 𑀨𑀲𑁆𑀲𑀸𑀤𑀺𑀧𑀢𑀺𑀭𑀽𑀧𑀓𑀸 𑀦𑀨𑀲𑁆𑀲𑀸𑀤𑀬𑁄 𑀦𑀸𑀫 𑀦𑀢𑁆𑀣𑀺, 𑀢𑀲𑁆𑀫𑀸 𑀭𑀸𑀕𑀸𑀤𑀺𑀧𑀢𑀺𑀭𑀽𑀧𑀓𑀸 𑀦𑀭𑀸𑀕𑀸𑀤𑀬𑁄𑀧𑀺 𑀦𑀢𑁆𑀣𑀻𑀢𑀺 𑀘𑁄𑀤𑁂𑀢𑀼𑀁 𑀅𑀢𑁆𑀣𑀺 𑀦 𑀨𑀲𑁆𑀲𑁄𑀢𑀺𑀆𑀤𑀺𑀫𑀸𑀳. 𑀇𑀢𑀭𑁄 𑀢𑁂𑀲𑀁 𑀅𑀪𑀸𑀯𑀸 𑀧𑀝𑀺𑀓𑁆𑀔𑀺𑀧𑀢𑀺. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀧𑀢𑀺𑀭𑀽𑀧𑀓𑀣𑀸𑀯𑀡𑁆𑀡𑀦𑀸.

𑁯. 𑀅𑀧𑀭𑀺𑀦𑀺𑀧𑁆𑀨𑀦𑁆𑀦𑀓𑀣𑀸𑀯𑀡𑁆𑀡𑀦𑀸

𑁯𑁧𑁭-𑁯𑁧𑁮. 𑀇𑀤𑀸𑀦𑀺 𑀅𑀧𑀭𑀺𑀦𑀺𑀧𑁆𑀨𑀦𑁆𑀦𑀓𑀣𑀸 𑀦𑀸𑀫 𑀳𑁄𑀢𑀺. 𑀢𑀢𑁆𑀣 𑁋

‘‘𑀤𑀼𑀓𑁆𑀔𑀫𑁂𑀯 𑀳𑀺 𑀲𑀫𑁆𑀪𑁄𑀢𑀺, 𑀤𑀼𑀓𑁆𑀔𑀁 𑀢𑀺𑀝𑁆𑀞𑀢𑀺 𑀯𑁂𑀢𑀺 𑀘;

𑀦𑀸𑀜𑁆𑀜𑀢𑁆𑀭 𑀤𑀼𑀓𑁆𑀔𑀸 𑀲𑀫𑁆𑀪𑁄𑀢𑀺, 𑀦𑀸𑀜𑁆𑀜𑀁 𑀤𑀼𑀓𑁆𑀔𑀸 𑀦𑀺𑀭𑀼𑀚𑁆𑀛𑀢𑀻’’𑀢𑀺. (𑀲𑀁. 𑀦𑀺. 𑁧.𑁧𑁭𑁧) 𑁋

𑀯𑀘𑀦𑀁 𑀦𑀺𑀲𑁆𑀲𑀸𑀬 𑀤𑀼𑀓𑁆𑀔𑀜𑁆𑀜𑁂𑀯 𑀧𑀭𑀺𑀦𑀺𑀧𑁆𑀨𑀦𑁆𑀦𑀁, 𑀲𑁂𑀲𑀸 𑀔𑀦𑁆𑀥𑀸𑀬𑀢𑀦𑀥𑀸𑀢𑀼𑀇𑀦𑁆𑀤𑁆𑀭𑀺𑀬𑀥𑀫𑁆𑀫𑀸 𑀅𑀧𑀭𑀺𑀦𑀺𑀧𑁆𑀨𑀦𑁆𑀦𑀸𑀢𑀺 𑀬𑁂𑀲𑀁 𑀮𑀤𑁆𑀥𑀺, 𑀲𑁂𑀬𑁆𑀬𑀣𑀸𑀧𑀺 𑀏𑀓𑀘𑁆𑀘𑀸𑀦𑀁 𑀉𑀢𑁆𑀢𑀭𑀧𑀣𑀓𑀸𑀦𑀜𑁆𑀘𑁂𑀯 𑀳𑁂𑀢𑀼𑀯𑀸𑀤𑀸𑀦𑀜𑁆𑀘; 𑀢𑁂 𑀲𑀦𑁆𑀥𑀸𑀬 𑀭𑀽𑀧𑀁 𑀅𑀧𑀭𑀺𑀦𑀺𑀧𑁆𑀨𑀦𑁆𑀦𑀦𑁆𑀢𑀺 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀧𑀝𑀺𑀜𑁆𑀜𑀸 𑀇𑀢𑀭𑀲𑁆𑀲. 𑀅𑀣 𑀦𑀁 ‘‘𑀲𑀘𑁂 𑀭𑀽𑀧𑀁 𑀅𑀧𑀭𑀺𑀦𑀺𑀧𑁆𑀨𑀦𑁆𑀦𑀁, 𑀦 𑀅𑀦𑀺𑀘𑁆𑀘𑀸𑀤𑀺𑀲𑀪𑀸𑀯𑀁 𑀲𑀺𑀬𑀸’’𑀢𑀺 𑀘𑁄𑀤𑁂𑀢𑀼𑀁 𑀭𑀽𑀧𑀁 𑀦 𑀅𑀦𑀺𑀘𑁆𑀘𑀦𑁆𑀢𑀺𑀆𑀤𑀺𑀫𑀸𑀳. 𑀇𑀢𑀭𑁄 𑀢𑀣𑀸𑀭𑀽𑀧𑀁 𑀭𑀽𑀧𑀁 𑀅𑀧𑀲𑁆𑀲𑀦𑁆𑀢𑁄 𑀧𑀝𑀺𑀓𑁆𑀔𑀺𑀧𑀢𑀺. 𑀲𑀓𑀯𑀸𑀤𑀻 𑀦𑀦𑀼 𑀭𑀽𑀧𑀁 𑀅𑀦𑀺𑀘𑁆𑀘𑀦𑁆𑀢𑀺𑀆𑀤𑀺 𑀯𑀘𑀦𑁂𑀦 𑀢𑀲𑁆𑀲 𑀏𑀓𑀁 𑀮𑀤𑁆𑀥𑀺𑀁 𑀧𑀝𑀺𑀲𑁂𑀥𑁂𑀢𑁆𑀯𑀸 𑀤𑀼𑀢𑀺𑀬𑀁 𑀧𑀼𑀘𑁆𑀙𑀦𑁆𑀢𑁄 𑀤𑀼𑀓𑁆𑀔𑀜𑁆𑀜𑁂𑀯 𑀧𑀭𑀺𑀦𑀺𑀧𑁆𑀨𑀦𑁆𑀦𑀦𑁆𑀢𑀺𑀆𑀤𑀺𑀫𑀸𑀳. 𑀅𑀣𑀲𑁆𑀲 𑀢𑀫𑁆𑀧𑀺 𑀮𑀤𑁆𑀥𑀺𑀁 𑀧𑀝𑀺𑀲𑁂𑀥𑁂𑀢𑀼𑀁 𑀦 𑀬𑀤𑀦𑀺𑀘𑁆𑀘𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀭𑀸𑀬𑀁 𑀅𑀥𑀺𑀧𑁆𑀧𑀸𑀬𑁄 𑁋 𑀦 𑀓𑁂𑀯𑀮𑀜𑁆𑀳𑀺 𑀧𑀞𑀫𑀲𑀘𑁆𑀘𑀫𑁂𑀯 𑀤𑀼𑀓𑁆𑀔𑀁. 𑀬𑀁 𑀧𑀦 𑀓𑀺𑀜𑁆𑀘𑀺 𑀅𑀦𑀺𑀘𑁆𑀘𑀁, 𑀢𑀁 𑀤𑀼𑀓𑁆𑀔𑀫𑁂𑀯. 𑀭𑀽𑀧𑀜𑁆𑀘 𑀅𑀦𑀺𑀘𑁆𑀘𑀁, 𑀢𑀲𑁆𑀫𑀸 𑀢𑀫𑁆𑀧𑀺 𑀧𑀭𑀺𑀦𑀺𑀧𑁆𑀨𑀦𑁆𑀦𑀁. 𑀇𑀢𑀺 𑀬𑀁 𑀢𑁆𑀯𑀁 𑀯𑀤𑁂𑀲𑀺 ‘‘𑀭𑀽𑀧𑀁 𑀅𑀧𑀭𑀺𑀦𑀺𑀧𑁆𑀨𑀦𑁆𑀦𑀁, 𑀤𑀼𑀓𑁆𑀔𑀜𑁆𑀜𑁂𑀯 𑀧𑀭𑀺𑀦𑀺𑀧𑁆𑀨𑀦𑁆𑀦’’𑀦𑁆𑀢𑀺, 𑀢𑀁 𑀦𑁄 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 ‘‘𑀤𑀼𑀓𑁆𑀔𑀜𑁆𑀜𑁂𑀯 𑀧𑀭𑀺𑀦𑀺𑀧𑁆𑀨𑀦𑁆𑀦’’𑀦𑁆𑀢𑀺. 𑀯𑁂𑀤𑀦𑀸𑀤𑀺𑀫𑀽𑀮𑀺𑀓𑀸𑀤𑀻𑀲𑀼𑀧𑀺 𑀬𑁄𑀚𑀦𑀸𑀲𑀼 𑀏𑀲𑁂𑀯 𑀦𑀬𑁄. 𑀥𑀫𑁆𑀫𑀸𑀬𑀢𑀦𑀥𑀫𑁆𑀫𑀥𑀸𑀢𑀽𑀲𑀼 𑀧𑀦 𑀞𑀧𑁂𑀢𑁆𑀯𑀸 𑀦𑀺𑀩𑁆𑀩𑀸𑀦𑀁 𑀲𑁂𑀲𑀥𑀫𑁆𑀫𑀸𑀦𑀁 𑀯𑀲𑁂𑀦 𑀅𑀦𑀺𑀘𑁆𑀘𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀇𑀦𑁆𑀤𑁆𑀭𑀺𑀬𑀸𑀦𑀺 𑀅𑀦𑀺𑀘𑁆𑀘𑀸𑀦𑁂𑀯𑀸𑀢𑀺.

𑀅𑀧𑀭𑀺𑀦𑀺𑀧𑁆𑀨𑀦𑁆𑀦𑀓𑀣𑀸𑀯𑀡𑁆𑀡𑀦𑀸.

𑀢𑁂𑀯𑀻𑀲𑀢𑀺𑀫𑁄 𑀯𑀕𑁆𑀕𑁄.

𑀦𑀺𑀕𑀫𑀦𑀓𑀣𑀸

𑀏𑀢𑁆𑀢𑀸𑀯𑀢𑀸 𑀘 𑁋

𑀧𑀡𑁆𑀡𑀸𑀲𑀓𑁂𑀳𑀺 𑀘𑀢𑀽𑀳𑀺, 𑀢𑀻𑀳𑀺 𑀯𑀕𑁆𑀕𑁂𑀳𑀺 𑀘𑁂𑀯 𑀘;

𑀲𑀗𑁆𑀕𑀳𑁂𑀢𑁆𑀯𑀸 𑀓𑀣𑀸 𑀲𑀩𑁆𑀩𑀸, 𑀊𑀦𑀢𑀺𑀲𑀢𑀪𑁂𑀤𑀦𑀸.

𑀓𑀣𑀸𑀯𑀢𑁆𑀣𑀼𑀧𑁆𑀧𑀓𑀭𑀡𑀁, 𑀓𑀣𑀸𑀫𑀕𑁆𑀕𑁂𑀲𑀼 𑀓𑁄𑀯𑀺𑀤𑁄;

𑀬𑀁 𑀚𑀺𑀦𑁄 𑀤𑁂𑀲𑀬𑀺 𑀢𑀲𑁆𑀲, 𑀦𑀺𑀝𑁆𑀞𑀺𑀢𑀸 𑀅𑀢𑁆𑀣𑀯𑀡𑁆𑀡𑀦𑀸.

𑀇𑀫𑀁 𑀢𑁂𑀭𑀲𑀫𑀢𑁆𑀢𑁂𑀳𑀺, 𑀪𑀸𑀡𑀯𑀸𑀭𑁂𑀳𑀺 𑀢𑀦𑁆𑀢𑀺𑀬𑀸;

𑀘𑀺𑀭𑀝𑁆𑀞𑀺𑀢𑀢𑁆𑀣𑀁 𑀥𑀫𑁆𑀫𑀲𑁆𑀲, 𑀲𑀗𑁆𑀔𑀭𑁄𑀦𑁆𑀢𑁂𑀦 𑀬𑀁 𑀫𑀬𑀸.

𑀬𑀁 𑀧𑀢𑁆𑀢𑀁 𑀓𑀼𑀲𑀮𑀁 𑀢𑁂𑀦, 𑀮𑁄𑀓𑁄𑀬𑀁 𑀲𑀦𑀭𑀸𑀫𑀭𑁄;

𑀥𑀫𑁆𑀫𑀭𑀸𑀚𑀲𑁆𑀲 𑀲𑀤𑁆𑀥𑀫𑁆𑀫-𑀭𑀲𑀫𑁂𑀯𑀸𑀥𑀺𑀕𑀘𑁆𑀙𑀢𑀽𑀢𑀺.

𑀓𑀣𑀸𑀯𑀢𑁆𑀣𑀼-𑀅𑀝𑁆𑀞𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲

𑀅𑀪𑀺𑀥𑀫𑁆𑀫𑀧𑀺𑀝𑀓𑁂

𑀬𑀫𑀓𑀧𑁆𑀧𑀓𑀭𑀡-𑀅𑀝𑁆𑀞𑀓𑀣𑀸

𑀲𑀗𑁆𑀔𑁂𑀧𑁂𑀦𑁂𑀯 𑀤𑁂𑀯𑀸𑀦𑀁, 𑀤𑁂𑀯𑀤𑁂𑀯𑁄 𑀲𑀼𑀭𑀸𑀮𑀬𑁂;

𑀓𑀣𑀸𑀯𑀢𑁆𑀣𑀼𑀧𑁆𑀧𑀓𑀭𑀡𑀁, 𑀤𑁂𑀲𑀬𑀺𑀢𑁆𑀯𑀸 𑀭𑀡𑀜𑁆𑀚𑀳𑁄.

𑀬𑀫𑀲𑁆𑀲 𑀯𑀺𑀲𑀬𑀸𑀢𑀻𑀢𑁄, 𑀦𑀸𑀦𑀸𑀬𑀫𑀓𑀫𑀡𑁆𑀟𑀺𑀢𑀁;

𑀅𑀪𑀺𑀥𑀫𑁆𑀫𑀧𑁆𑀧𑀓𑀭𑀡𑀁, 𑀙𑀝𑁆𑀞𑀁 𑀙𑀝𑁆𑀞𑀸𑀦 𑀤𑁂𑀲𑀓𑁄.

𑀬𑀫𑀓𑀁 𑀅𑀬𑀫𑀸𑀯𑀢𑁆𑀢-𑀦𑀻𑀮𑀸𑀫𑀮𑀢𑀦𑀽𑀭𑀼𑀳𑁄;

𑀬𑀁 𑀤𑁂𑀲𑀬𑀺 𑀅𑀦𑀼𑀧𑁆𑀧𑀢𑁆𑀢𑁄, 𑀢𑀲𑁆𑀲 𑀲𑀁𑀯𑀡𑁆𑀡𑀦𑀸𑀓𑁆𑀓𑀫𑁄;

𑀇𑀤𑀸𑀦𑀺 𑀬𑀲𑁆𑀫𑀸 𑀢𑀲𑁆𑀫𑀸𑀲𑁆𑀲, 𑀳𑁄𑀢𑀺 𑀲𑀁𑀯𑀡𑁆𑀡𑀦𑀸 𑀅𑀬𑀦𑁆𑀢𑀺.