𑁩. 𑀲𑀜𑁆𑀜𑁄𑀚𑀦𑀓𑀣𑀸𑀯𑀡𑁆𑀡𑀦𑀸

𑁮𑁮𑁧-𑁮𑁮𑁨. 𑀇𑀤𑀸𑀦𑀺 𑀲𑀜𑁆𑀜𑁄𑀚𑀦𑀓𑀣𑀸 𑀦𑀸𑀫 𑀳𑁄𑀢𑀺. 𑀢𑀢𑁆𑀣 𑀬𑀲𑁆𑀫𑀸 𑀅𑀭𑀳𑀸 𑀲𑀩𑁆𑀩𑀁 𑀩𑀼𑀤𑁆𑀥𑀯𑀺𑀲𑀬𑀁 𑀦 𑀚𑀸𑀦𑀸𑀢𑀺, 𑀢𑀲𑁆𑀫𑀸 𑀢𑀲𑁆𑀲 𑀢𑀢𑁆𑀣 𑀅𑀯𑀺𑀚𑁆𑀚𑀸𑀯𑀺𑀘𑀺𑀓𑀺𑀘𑁆𑀙𑀸𑀳𑀺 𑀅𑀧𑁆𑀧𑀳𑀻𑀦𑀸𑀳𑀺 𑀪𑀯𑀺𑀢𑀩𑁆𑀩𑀦𑁆𑀢𑀺 𑀲𑀜𑁆𑀜𑀸𑀬 ‘‘𑀅𑀢𑁆𑀣𑀺 𑀓𑀺𑀜𑁆𑀘𑀺 𑀲𑀜𑁆𑀜𑁄𑀚𑀦𑀁 𑀅𑀧𑁆𑀧𑀳𑀸𑀬 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀻’’𑀢𑀺 𑀬𑁂𑀲𑀁 𑀮𑀤𑁆𑀥𑀺, 𑀲𑁂𑀬𑁆𑀬𑀣𑀸𑀧𑀺 𑀫𑀳𑀸𑀲𑀗𑁆𑀖𑀺𑀓𑀸𑀦𑀁, 𑀢𑁂 𑀲𑀦𑁆𑀥𑀸𑀬 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀧𑀝𑀺𑀜𑁆𑀜𑀸 𑀇𑀢𑀭𑀲𑁆𑀲. 𑀅𑀢𑁆𑀣𑀺 𑀓𑀺𑀜𑁆𑀘𑀺 𑀲𑀓𑁆𑀓𑀸𑀬𑀤𑀺𑀝𑁆𑀞𑀻𑀢𑀺𑀆𑀤𑀺 𑀅𑀭𑀳𑀢𑁄 𑀲𑀩𑁆𑀩𑀲𑀁𑀬𑁄𑀚𑀦𑀧𑁆𑀧𑀳𑀸𑀦𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀲𑀩𑁆𑀩𑀁 𑀩𑀼𑀤𑁆𑀥𑀯𑀺𑀲𑀬𑀦𑁆𑀢𑀺 𑀧𑀜𑁆𑀳𑀤𑁆𑀯𑀬𑁂 𑀅𑀭𑀳𑀢𑁄 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀸𑀪𑀸𑀯𑁂𑀦 𑀧𑀝𑀺𑀲𑁂𑀥𑁄 𑀓𑀢𑁄, 𑀦 𑀅𑀯𑀺𑀚𑁆𑀚𑀸𑀯𑀺𑀘𑀺𑀓𑀺𑀘𑁆𑀙𑀸𑀦𑀁 𑀅𑀧𑁆𑀧𑀳𑀸𑀦𑁂𑀦. 𑀇𑀢𑀭𑁄 𑀧𑀦 𑀢𑁂𑀲𑀁 𑀅𑀧𑁆𑀧𑀳𑀻𑀦𑀢𑀁 𑀲𑀦𑁆𑀥𑀸𑀬 𑀢𑁂𑀦 𑀳𑀻𑀢𑀺 𑀮𑀤𑁆𑀥𑀺𑀁 𑀧𑀢𑀺𑀝𑁆𑀞𑀧𑁂𑀢𑀺. 𑀲𑀸 𑀅𑀬𑁄𑀦𑀺𑀲𑁄 𑀧𑀢𑀺𑀝𑁆𑀞𑀸𑀧𑀺𑀢𑀢𑁆𑀢𑀸 𑀅𑀧𑁆𑀧𑀢𑀺𑀝𑁆𑀞𑀺𑀢𑀸𑀯 𑀳𑁄𑀢𑀻𑀢𑀺.

𑀲𑀜𑁆𑀜𑁄𑀚𑀦𑀓𑀣𑀸𑀯𑀡𑁆𑀡𑀦𑀸.