𑁪. 𑀧𑀢𑁆𑀢𑀺𑀓𑀣𑀸𑀯𑀡𑁆𑀡𑀦𑀸

𑁮𑁩𑁭-𑁮𑁪𑁦. 𑀇𑀤𑀸𑀦𑀺 𑀧𑀢𑁆𑀢𑀺𑀓𑀣𑀸 𑀦𑀸𑀫 𑀳𑁄𑀢𑀺. 𑀢𑀢𑁆𑀣 ‘‘𑀬𑀁 𑀬𑀁 𑀧𑀝𑀺𑀮𑀩𑁆𑀪𑀢𑀺, 𑀢𑀲𑁆𑀲 𑀢𑀲𑁆𑀲 𑀧𑀝𑀺𑀮𑀸𑀪𑁄 𑀧𑀢𑁆𑀢𑀺 𑀦𑀸𑀫. 𑀲𑀸 𑀘 𑀅𑀲𑀗𑁆𑀔𑀢𑀸’’𑀢𑀺 𑀬𑁂𑀲𑀁 𑀮𑀤𑁆𑀥𑀺, 𑀲𑁂𑀬𑁆𑀬𑀣𑀸𑀧𑀺 𑀧𑀼𑀩𑁆𑀩𑀲𑁂𑀮𑀺𑀬𑀸𑀦𑀜𑁆𑀜𑁂𑀯; 𑀢𑁂 𑀲𑀦𑁆𑀥𑀸𑀬 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀧𑀝𑀺𑀜𑁆𑀜𑀸 𑀇𑀢𑀭𑀲𑁆𑀲. 𑀲𑁂𑀲𑀫𑀺𑀥𑀸𑀧𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀢𑁆𑀢𑀸 𑀬𑀣𑀸𑀧𑀸𑀴𑀺𑀫𑁂𑀯 𑀦𑀺𑀬𑁆𑀬𑀸𑀢𑀻𑀢𑀺. 𑀦 𑀯𑀢𑁆𑀢𑀩𑁆𑀩𑀦𑁆𑀢𑀺𑀆𑀤𑀺 𑀬𑀸𑀬 𑀮𑀤𑁆𑀥𑀺𑀬𑀸 𑀧𑀢𑁆𑀢𑀺 𑀅𑀲𑀗𑁆𑀔𑀢𑀸𑀢𑀺 𑀫𑀜𑁆𑀜𑀢𑀺, 𑀢𑀁 𑀧𑀓𑀸𑀲𑁂𑀢𑀼𑀁 𑀯𑀼𑀢𑁆𑀢𑀁. 𑀢𑀢𑁆𑀣 𑀲𑀓𑀯𑀸𑀤𑀻 ‘‘𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂’’𑀢𑀺 𑀧𑀝𑀺𑀓𑁆𑀔𑀺𑀧𑀦𑁆𑀢𑁄 𑀓𑁂𑀯𑀮𑀁 𑀧𑀢𑁆𑀢𑀺𑀬𑀸 𑀭𑀽𑀧𑀸𑀤𑀺𑀪𑀸𑀯𑀁 𑀦 𑀲𑀫𑁆𑀧𑀝𑀺𑀘𑁆𑀙𑀢𑀺. 𑀦 𑀳𑀺 𑀧𑀢𑁆𑀢𑀺 𑀦𑀸𑀫 𑀓𑁄𑀘𑀺 𑀥𑀫𑁆𑀫𑁄 𑀅𑀢𑁆𑀣𑀺, 𑀦 𑀧𑀦 𑀅𑀲𑀗𑁆𑀔𑀢𑀪𑀸𑀯𑀁 𑀅𑀦𑀼𑀚𑀸𑀦𑀸𑀢𑀺. 𑀇𑀢𑀭𑁄 𑀧𑀦 𑀧𑀝𑀺𑀓𑁆𑀔𑁂𑀧𑀫𑀢𑁆𑀢𑁂𑀦𑁂𑀯 𑀅𑀲𑀗𑁆𑀔𑀢𑀸𑀢𑀺 𑀮𑀤𑁆𑀥𑀺𑀁 𑀧𑀢𑀺𑀝𑁆𑀞𑀧𑁂𑀢𑀺, 𑀲𑀸 𑀅𑀬𑁄𑀦𑀺𑀲𑁄 𑀧𑀢𑀺𑀝𑁆𑀞𑀸𑀧𑀺𑀢𑀢𑁆𑀢𑀸 𑀅𑀧𑁆𑀧𑀢𑀺𑀝𑁆𑀞𑀺𑀢𑀸𑀬𑁂𑀯𑀸𑀢𑀺.

𑀧𑀢𑁆𑀢𑀺𑀓𑀣𑀸𑀯𑀡𑁆𑀡𑀦𑀸.