𑁧𑁯. 𑀏𑀓𑀽𑀦𑀯𑀻𑀲𑀢𑀺𑀫𑀯𑀕𑁆𑀕𑁄

𑁧. 𑀓𑀺𑀮𑁂𑀲𑀧𑀚𑀳𑀦𑀓𑀣𑀸𑀯𑀡𑁆𑀡𑀦𑀸

𑁮𑁨𑁮-𑁮𑁩𑁧. 𑀇𑀤𑀸𑀦𑀺 𑀓𑀺𑀮𑁂𑀲𑀧𑀚𑀳𑀦𑀓𑀣𑀸 𑀦𑀸𑀫 𑀳𑁄𑀢𑀺. 𑀢𑀢𑁆𑀣 ‘‘𑀬𑀲𑁆𑀫𑀸 𑀓𑀺𑀮𑁂𑀲𑀧𑀳𑀸𑀦𑀁 𑀦𑀸𑀫 𑀅𑀢𑁆𑀣𑀺, 𑀧𑀳𑀻𑀦𑀓𑀺𑀮𑁂𑀲𑀲𑁆𑀲 𑀘 𑀅𑀢𑀻𑀢𑀸𑀧𑀺 𑀓𑀺𑀮𑁂𑀲𑀸 𑀧𑀳𑀻𑀦𑀸𑀯 𑀳𑁄𑀦𑁆𑀢𑀺, 𑀅𑀦𑀸𑀕𑀢𑀸𑀧𑀺, 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀧𑀺, 𑀢𑀲𑁆𑀫𑀸 𑀅𑀢𑀻𑀢𑁂𑀧𑀺 𑀓𑀺𑀮𑁂𑀲𑁂 𑀧𑀚𑀳𑀢𑀺, 𑀅𑀦𑀸𑀕𑀢𑁂𑀧𑀺, 𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀧𑀻’’𑀢𑀺 𑀬𑁂𑀲𑀁 𑀮𑀤𑁆𑀥𑀺, 𑀲𑁂𑀬𑁆𑀬𑀣𑀸𑀧𑀺 𑀏𑀓𑀘𑁆𑀘𑀸𑀦𑀁 𑀉𑀢𑁆𑀢𑀭𑀸𑀧𑀣𑀓𑀸𑀦𑀁; 𑀢𑁂 𑀲𑀦𑁆𑀥𑀸𑀬 𑀅𑀢𑀻𑀢𑁂𑀢𑀺𑀆𑀤𑀺𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀧𑀝𑀺𑀜𑁆𑀜𑀸 𑀇𑀢𑀭𑀲𑁆𑀲. 𑀲𑁂𑀲𑀁 𑀬𑀣𑀸𑀧𑀸𑀴𑀺𑀫𑁂𑀯 𑀦𑀺𑀬𑁆𑀬𑀸𑀢𑀺. 𑀦𑀢𑁆𑀣𑀺 𑀓𑀺𑀮𑁂𑀲𑁂 𑀚𑀳𑀢𑀻𑀢𑀺 𑀇𑀫𑀲𑁆𑀫𑀺𑀁 𑀧𑀦 𑀧𑀭𑀯𑀸𑀤𑀺𑀲𑁆𑀲 𑀧𑀜𑁆𑀳𑁂 𑀬𑀲𑁆𑀫𑀸 𑀓𑀘𑀯𑀭𑀁 𑀧𑀚𑀳𑀦𑁆𑀢𑀲𑁆𑀲 𑀓𑀘𑀯𑀭𑁂 𑀙𑀟𑁆𑀟𑀦𑀯𑀸𑀬𑀸𑀫𑁄 𑀯𑀺𑀬 𑀓𑀺𑀮𑁂𑀲𑁂 𑀧𑀚𑀳𑀦𑁆𑀢𑀲𑁆𑀲 𑀦 𑀅𑀢𑀻𑀢𑀸𑀤𑀺𑀪𑁂𑀤𑁂𑀲𑀼 𑀓𑀺𑀮𑁂𑀲𑁂𑀲𑀼 𑀯𑀸𑀬𑀸𑀫𑁄 𑀅𑀢𑁆𑀣𑀺, 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑁂 𑀧𑀦 𑀅𑀭𑀺𑀬𑀫𑀕𑁆𑀕𑁂 𑀧𑀯𑀢𑁆𑀢𑀺𑀢𑁂 𑀓𑀺𑀮𑁂𑀲𑀸 𑀅𑀦𑀼𑀧𑁆𑀧𑀦𑁆𑀦𑀸𑀬𑁂𑀯 𑀦𑀼𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀧𑀳𑀻𑀦𑀸 𑀦𑀸𑀫 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀦 𑀳𑁂𑀯𑀦𑁆𑀢𑀺 𑀧𑀝𑀺𑀓𑁆𑀔𑀺𑀧𑀢𑀺. 𑀢𑁂𑀦 𑀳𑀺 𑀅𑀢𑀻𑀢𑁂 𑀓𑀺𑀮𑁂𑀲𑁂 𑀧𑀚𑀳𑀢𑀻𑀢𑀺𑀆𑀤𑀺 𑀧𑀦 𑀬𑀲𑁆𑀫𑀸 ‘‘𑀦𑀢𑁆𑀣𑀺 𑀓𑀺𑀮𑁂𑀲𑀧𑀚𑀳𑀦𑀸’’𑀢𑀺 𑀦 𑀯𑀢𑁆𑀢𑀩𑁆𑀩𑀁, 𑀢𑀲𑁆𑀫𑀸 𑀅𑀢𑀻𑀢𑀸𑀤𑀺𑀪𑁂𑀤𑁂 𑀧𑀚𑀳𑀢𑀻𑀢𑀺 𑀙𑀮𑁂𑀦 𑀯𑀼𑀢𑁆𑀢𑀁.

𑀓𑀺𑀮𑁂𑀲𑀧𑀚𑀳𑀦𑀓𑀣𑀸𑀯𑀡𑁆𑀡𑀦𑀸.

𑁨. 𑀲𑀼𑀜𑁆𑀜𑀢𑀓𑀣𑀸𑀯𑀡𑁆𑀡𑀦𑀸

𑁮𑁩𑁨. 𑀇𑀤𑀸𑀦𑀺 𑀲𑀼𑀜𑁆𑀜𑀢𑀓𑀣𑀸 𑀦𑀸𑀫 𑀳𑁄𑀢𑀺. 𑀢𑀢𑁆𑀣 𑀲𑀼𑀜𑁆𑀜𑀢𑀸𑀢𑀺 𑀤𑁆𑀯𑁂 𑀲𑀼𑀜𑁆𑀜𑀢𑀸 𑀔𑀦𑁆𑀥𑀸𑀦𑀜𑁆𑀘 𑀅𑀦𑀢𑁆𑀢𑀮𑀓𑁆𑀔𑀡𑀁 𑀦𑀺𑀩𑁆𑀩𑀸𑀦𑀜𑁆𑀘. 𑀢𑁂𑀲𑀼 𑀅𑀦𑀢𑁆𑀢𑀮𑀓𑁆𑀔𑀡𑀁 𑀢𑀸𑀯 𑀏𑀓𑀘𑁆𑀘𑀁 𑀏𑀓𑁂𑀦 𑀧𑀭𑀺𑀬𑀸𑀬𑁂𑀦 𑀲𑀺𑀬𑀸 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀧𑀭𑀺𑀬𑀸𑀧𑀦𑁆𑀦𑀁, 𑀦𑀺𑀩𑁆𑀩𑀸𑀦𑀁, 𑀅𑀧𑀭𑀺𑀬𑀸𑀧𑀦𑁆𑀦𑀫𑁂𑀯. 𑀇𑀫𑀁 𑀧𑀦 𑀯𑀺𑀪𑀸𑀕𑀁 𑀅𑀕𑁆𑀕𑀳𑁂𑀢𑁆𑀯𑀸 ‘‘𑀲𑀼𑀜𑁆𑀜𑀢𑀸 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀧𑀭𑀺𑀬𑀸𑀧𑀦𑁆𑀦𑀸’’𑀢𑀺 𑀬𑁂𑀲𑀁 𑀮𑀤𑁆𑀥𑀺, 𑀲𑁂𑀬𑁆𑀬𑀣𑀸𑀧𑀺 𑀅𑀦𑁆𑀥𑀓𑀸𑀦𑀁, 𑀢𑁂 𑀲𑀦𑁆𑀥𑀸𑀬 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀧𑀝𑀺𑀜𑁆𑀜𑀸 𑀇𑀢𑀭𑀲𑁆𑀲. 𑀅𑀦𑀺𑀫𑀺𑀢𑁆𑀢𑀦𑁆𑀢𑀺 𑀲𑀩𑁆𑀩𑀦𑀺𑀫𑀺𑀢𑁆𑀢𑀭𑀳𑀺𑀢𑀁 𑀦𑀺𑀩𑁆𑀩𑀸𑀦𑀁. ‘‘𑀅𑀧𑁆𑀧𑀡𑀺𑀳𑀺𑀢𑁄’’𑀢𑀺𑀧𑀺 𑀢𑀲𑁆𑀲𑁂𑀯 𑀦𑀸𑀫𑀁. 𑀓𑀲𑁆𑀫𑀸 𑀧𑀦𑁂𑀢𑀁 𑀆𑀪𑀢𑀦𑁆𑀢𑀺? 𑀅𑀯𑀺𑀪𑀚𑁆𑀚𑀯𑀸𑀤𑀻𑀯𑀸𑀤𑁂 𑀤𑁄𑀲𑀸𑀭𑁄𑀧𑀦𑀢𑁆𑀣𑀁. 𑀬𑀲𑁆𑀲 𑀳𑀺 𑀅𑀯𑀺𑀪𑀚𑀺𑀢𑁆𑀯𑀸 ‘‘𑀏𑀓𑀤𑁂𑀲𑁂𑀦𑁂𑀯 𑀲𑀼𑀜𑁆𑀜𑀢𑀸 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀧𑀭𑀺𑀬𑀸𑀧𑀦𑁆𑀦𑀸’’𑀢𑀺 𑀮𑀤𑁆𑀥𑀺, 𑀢𑀲𑁆𑀲 𑀦𑀺𑀩𑁆𑀩𑀸𑀦𑀫𑁆𑀧𑀺 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀧𑀭𑀺𑀬𑀸𑀧𑀦𑁆𑀦𑀦𑁆𑀢𑀺 𑀆𑀧𑀚𑁆𑀚𑀢𑀺. 𑀇𑀫𑀲𑁆𑀲 𑀤𑁄𑀲𑀲𑁆𑀲𑀸𑀭𑁄𑀧𑀦𑀢𑁆𑀣𑀁 ‘‘𑀅𑀦𑀺𑀫𑀺𑀢𑁆𑀢𑀁 𑀅𑀧𑁆𑀧𑀡𑀺𑀳𑀺𑀢’’𑀦𑁆𑀢𑀺 𑀆𑀪𑀢𑀁. 𑀇𑀢𑀭𑁄 𑀢𑀲𑁆𑀲 𑀧𑀭𑀺𑀬𑀸𑀧𑀦𑁆𑀦𑀪𑀸𑀯𑀁 𑀅𑀦𑀺𑀘𑁆𑀙𑀦𑁆𑀢𑁄 𑀧𑀝𑀺𑀓𑁆𑀔𑀺𑀧𑀢𑀺. 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄 𑀦 𑀅𑀦𑀺𑀘𑁆𑀘𑁄𑀢𑀺𑀆𑀤𑀺 𑀦𑀺𑀩𑁆𑀩𑀸𑀦𑀲𑀗𑁆𑀔𑀸𑀢𑀸𑀬 𑀲𑀼𑀜𑁆𑀜𑀢𑀸𑀬 𑀅𑀦𑀺𑀘𑁆𑀘𑀪𑀸𑀯𑀸𑀧𑀢𑁆𑀢𑀺𑀤𑁄𑀲𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁.

𑁮𑁩𑁩. 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀲𑁆𑀲 𑀲𑀼𑀜𑁆𑀜𑀢𑀸𑀢𑀺 ‘‘𑀬𑀤𑀺 𑀅𑀜𑁆𑀜𑀲𑁆𑀲 𑀔𑀦𑁆𑀥𑀲𑁆𑀲 𑀲𑀼𑀜𑁆𑀜𑀢𑀸 𑀅𑀜𑁆𑀜𑀓𑁆𑀔𑀦𑁆𑀥𑀧𑀭𑀺𑀬𑀸𑀧𑀦𑁆𑀦𑀸, 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀲𑀼𑀜𑁆𑀜𑀢𑀸𑀬𑀧𑀺 𑀲𑁂𑀲𑀓𑁆𑀔𑀦𑁆𑀥𑀧𑀭𑀺𑀬𑀸𑀧𑀦𑁆𑀦𑀸𑀬 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀘𑁄𑀤𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀲𑁆𑀲 𑀲𑀼𑀜𑁆𑀜𑀢𑀸 𑀦 𑀯𑀢𑁆𑀢𑀩𑁆𑀩𑀸𑀢𑀺𑀆𑀤𑀺 ‘‘𑀬𑀤𑀺 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀲𑀼𑀜𑁆𑀜𑀢𑀸 𑀲𑁂𑀲𑀓𑁆𑀔𑀦𑁆𑀥𑀧𑀭𑀺𑀬𑀸𑀧𑀦𑁆𑀦𑀸 𑀦 𑀳𑁄𑀢𑀺, 𑀲𑁂𑀲𑀓𑁆𑀔𑀦𑁆𑀥𑀲𑀼𑀜𑁆𑀜𑀢𑀸𑀧𑀺 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀧𑀭𑀺𑀬𑀸𑀧𑀦𑁆𑀦𑀸 𑀦 𑀳𑁄𑀢𑀻’’𑀢𑀺 𑀧𑀝𑀺𑀮𑁄𑀫𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁.

𑁮𑁩𑁪. 𑀲𑀼𑀜𑁆𑀜𑀫𑀺𑀤𑀁, 𑀪𑀺𑀓𑁆𑀔𑀯𑁂, 𑀲𑀗𑁆𑀔𑀸𑀭𑀸𑀢𑀺 𑀲𑀼𑀢𑁆𑀢𑀁 𑀧𑀭𑀲𑀫𑀬𑀢𑁄 𑀆𑀪𑀢𑀁. 𑀢𑀢𑁆𑀣 𑀲𑀗𑁆𑀔𑀸𑀭𑀸𑀢𑀺 ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀅𑀦𑀺𑀘𑁆𑀘𑀸’’𑀢𑀺 𑀆𑀕𑀢𑀝𑁆𑀞𑀸𑀦𑁂 𑀯𑀺𑀬 𑀧𑀜𑁆𑀘𑀓𑁆𑀔𑀦𑁆𑀥𑀸, 𑀢𑁂 𑀘 𑀅𑀢𑁆𑀢𑀢𑁆𑀢𑀦𑀺𑀬𑀲𑀼𑀜𑁆𑀜𑀢𑁆𑀢𑀸 𑀲𑀼𑀜𑁆𑀜𑀢𑀸𑀢𑀺 𑀲𑀸𑀲𑀦𑀸𑀯𑀘𑀭𑀁 𑀳𑁄𑀢𑀺, 𑀦 𑀯𑀺𑀭𑀼𑀚𑁆𑀛𑀢𑀺, 𑀢𑀲𑁆𑀫𑀸 𑀅𑀦𑀼𑀜𑁆𑀜𑀸𑀢𑀁. 𑀬𑀲𑁆𑀫𑀸 𑀧𑀦𑁂𑀢𑀁 𑀦 𑀲𑀼𑀜𑁆𑀜𑀢𑀸𑀬 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀧𑀭𑀺𑀬𑀸𑀧𑀦𑁆𑀦𑀪𑀸𑀯𑀁 𑀤𑀻𑀧𑁂𑀢𑀺, 𑀢𑀲𑁆𑀫𑀸 𑀅𑀲𑀸𑀥𑀓𑀦𑁆𑀢𑀺.

𑀲𑀼𑀜𑁆𑀜𑀢𑀓𑀣𑀸𑀯𑀡𑁆𑀡𑀦𑀸.

𑁩. 𑀲𑀸𑀫𑀜𑁆𑀜𑀨𑀮𑀓𑀣𑀸𑀯𑀡𑁆𑀡𑀦𑀸

𑁮𑁩𑁫-𑁮𑁩𑁬. 𑀇𑀤𑀸𑀦𑀺 𑀲𑀸𑀫𑀜𑁆𑀜𑀨𑀮𑀓𑀣𑀸 𑀦𑀸𑀫 𑀳𑁄𑀢𑀺. 𑀢𑀢𑁆𑀣 𑀫𑀕𑁆𑀕𑀯𑀻𑀣𑀺𑀬𑀫𑁆𑀧𑀺 𑀨𑀮𑀲𑀫𑀸𑀧𑀢𑁆𑀢𑀺𑀯𑀻𑀣𑀺𑀬𑀫𑁆𑀧𑀺 𑀅𑀭𑀺𑀬𑀫𑀕𑁆𑀕𑀲𑁆𑀲 𑀯𑀺𑀧𑀸𑀓𑀘𑀺𑀢𑁆𑀢𑀁 𑀲𑀸𑀫𑀜𑁆𑀜𑀨𑀮𑀁 𑀦𑀸𑀫𑀸𑀢𑀺 𑀲𑀓𑀲𑀫𑀬𑁂 𑀲𑀦𑁆𑀦𑀺𑀝𑁆𑀞𑀸𑀦𑀁. 𑀬𑁂𑀲𑀁 𑀧𑀦 𑀢𑀣𑀸 𑀅𑀕𑁆𑀕𑀳𑁂𑀢𑁆𑀯𑀸 ‘‘𑀓𑀺𑀮𑁂𑀲𑀧𑀳𑀸𑀦𑀜𑁆𑀘𑁂𑀯 𑀨𑀮𑀼𑀧𑁆𑀧𑀢𑁆𑀢𑀺 𑀘 𑀲𑀸𑀫𑀜𑁆𑀜𑀨𑀮𑀁, 𑀢𑀲𑁆𑀫𑀸 𑀅𑀲𑀗𑁆𑀔𑀢’’𑀦𑁆𑀢𑀺 𑀮𑀤𑁆𑀥𑀺, 𑀲𑁂𑀬𑁆𑀬𑀣𑀸𑀧𑀺 𑀧𑀼𑀩𑁆𑀩𑀲𑁂𑀮𑀺𑀬𑀸𑀦𑀁; 𑀢𑁂 𑀲𑀦𑁆𑀥𑀸𑀬 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀧𑀝𑀺𑀜𑁆𑀜𑀸 𑀇𑀢𑀭𑀲𑁆𑀲. 𑀲𑁂𑀲𑀫𑁂𑀢𑁆𑀣 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀢𑁆𑀢𑀸 𑀬𑀣𑀸 𑀧𑀸𑀴𑀺𑀫𑁂𑀯 𑀦𑀺𑀬𑁆𑀬𑀸𑀢𑀻𑀢𑀺.

𑀲𑀸𑀫𑀜𑁆𑀜𑀨𑀮𑀓𑀣𑀸𑀯𑀡𑁆𑀡𑀦𑀸.

𑁪. 𑀧𑀢𑁆𑀢𑀺𑀓𑀣𑀸𑀯𑀡𑁆𑀡𑀦𑀸

𑁮𑁩𑁭-𑁮𑁪𑁦. 𑀇𑀤𑀸𑀦𑀺 𑀧𑀢𑁆𑀢𑀺𑀓𑀣𑀸 𑀦𑀸𑀫 𑀳𑁄𑀢𑀺. 𑀢𑀢𑁆𑀣 ‘‘𑀬𑀁 𑀬𑀁 𑀧𑀝𑀺𑀮𑀩𑁆𑀪𑀢𑀺, 𑀢𑀲𑁆𑀲 𑀢𑀲𑁆𑀲 𑀧𑀝𑀺𑀮𑀸𑀪𑁄 𑀧𑀢𑁆𑀢𑀺 𑀦𑀸𑀫. 𑀲𑀸 𑀘 𑀅𑀲𑀗𑁆𑀔𑀢𑀸’’𑀢𑀺 𑀬𑁂𑀲𑀁 𑀮𑀤𑁆𑀥𑀺, 𑀲𑁂𑀬𑁆𑀬𑀣𑀸𑀧𑀺 𑀧𑀼𑀩𑁆𑀩𑀲𑁂𑀮𑀺𑀬𑀸𑀦𑀜𑁆𑀜𑁂𑀯; 𑀢𑁂 𑀲𑀦𑁆𑀥𑀸𑀬 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀧𑀝𑀺𑀜𑁆𑀜𑀸 𑀇𑀢𑀭𑀲𑁆𑀲. 𑀲𑁂𑀲𑀫𑀺𑀥𑀸𑀧𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀢𑁆𑀢𑀸 𑀬𑀣𑀸𑀧𑀸𑀴𑀺𑀫𑁂𑀯 𑀦𑀺𑀬𑁆𑀬𑀸𑀢𑀻𑀢𑀺. 𑀦 𑀯𑀢𑁆𑀢𑀩𑁆𑀩𑀦𑁆𑀢𑀺𑀆𑀤𑀺 𑀬𑀸𑀬 𑀮𑀤𑁆𑀥𑀺𑀬𑀸 𑀧𑀢𑁆𑀢𑀺 𑀅𑀲𑀗𑁆𑀔𑀢𑀸𑀢𑀺 𑀫𑀜𑁆𑀜𑀢𑀺, 𑀢𑀁 𑀧𑀓𑀸𑀲𑁂𑀢𑀼𑀁 𑀯𑀼𑀢𑁆𑀢𑀁. 𑀢𑀢𑁆𑀣 𑀲𑀓𑀯𑀸𑀤𑀻 ‘‘𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂’’𑀢𑀺 𑀧𑀝𑀺𑀓𑁆𑀔𑀺𑀧𑀦𑁆𑀢𑁄 𑀓𑁂𑀯𑀮𑀁 𑀧𑀢𑁆𑀢𑀺𑀬𑀸 𑀭𑀽𑀧𑀸𑀤𑀺𑀪𑀸𑀯𑀁 𑀦 𑀲𑀫𑁆𑀧𑀝𑀺𑀘𑁆𑀙𑀢𑀺. 𑀦 𑀳𑀺 𑀧𑀢𑁆𑀢𑀺 𑀦𑀸𑀫 𑀓𑁄𑀘𑀺 𑀥𑀫𑁆𑀫𑁄 𑀅𑀢𑁆𑀣𑀺, 𑀦 𑀧𑀦 𑀅𑀲𑀗𑁆𑀔𑀢𑀪𑀸𑀯𑀁 𑀅𑀦𑀼𑀚𑀸𑀦𑀸𑀢𑀺. 𑀇𑀢𑀭𑁄 𑀧𑀦 𑀧𑀝𑀺𑀓𑁆𑀔𑁂𑀧𑀫𑀢𑁆𑀢𑁂𑀦𑁂𑀯 𑀅𑀲𑀗𑁆𑀔𑀢𑀸𑀢𑀺 𑀮𑀤𑁆𑀥𑀺𑀁 𑀧𑀢𑀺𑀝𑁆𑀞𑀧𑁂𑀢𑀺, 𑀲𑀸 𑀅𑀬𑁄𑀦𑀺𑀲𑁄 𑀧𑀢𑀺𑀝𑁆𑀞𑀸𑀧𑀺𑀢𑀢𑁆𑀢𑀸 𑀅𑀧𑁆𑀧𑀢𑀺𑀝𑁆𑀞𑀺𑀢𑀸𑀬𑁂𑀯𑀸𑀢𑀺.

𑀧𑀢𑁆𑀢𑀺𑀓𑀣𑀸𑀯𑀡𑁆𑀡𑀦𑀸.

𑁫. 𑀢𑀣𑀢𑀸𑀓𑀣𑀸𑀯𑀡𑁆𑀡𑀦𑀸

𑁮𑁪𑁧-𑁮𑁪𑁩. 𑀇𑀤𑀸𑀦𑀺 𑀢𑀣𑀢𑀸𑀓𑀣𑀸 𑀦𑀸𑀫 𑀳𑁄𑀢𑀺. 𑀢𑀢𑁆𑀣 𑀬𑁂𑀲𑀁 ‘‘𑀭𑀽𑀧𑀸𑀤𑀻𑀦𑀁 𑀲𑀩𑁆𑀩𑀥𑀫𑁆𑀫𑀸𑀦𑀁 𑀭𑀽𑀧𑀸𑀤𑀺𑀲𑀪𑀸𑀯𑀢𑀸𑀲𑀗𑁆𑀔𑀸𑀢𑀸 𑀢𑀣𑀢𑀸 𑀦𑀸𑀫 𑀅𑀢𑁆𑀣𑀺, 𑀲𑀸 𑀘 𑀲𑀗𑁆𑀔𑀢𑁂𑀲𑀼 𑀭𑀽𑀧𑀸𑀤𑀻𑀲𑀼 𑀅𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸 𑀅𑀲𑀗𑁆𑀔𑀢𑀸’’𑀢𑀺 𑀮𑀤𑁆𑀥𑀺, 𑀲𑁂𑀬𑁆𑀬𑀣𑀸𑀧𑀺 𑀏𑀓𑀘𑁆𑀘𑀸𑀦𑀁 𑀉𑀢𑁆𑀢𑀭𑀸𑀧𑀣𑀓𑀸𑀦𑀁, 𑀢𑁂 𑀲𑀦𑁆𑀥𑀸𑀬 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀧𑀝𑀺𑀜𑁆𑀜𑀸 𑀇𑀢𑀭𑀲𑁆𑀲. 𑀲𑁂𑀲𑀫𑀺𑀥𑀸𑀧𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀢𑁆𑀢𑀸 𑀧𑀸𑀓𑀝𑀫𑁂𑀯𑀸𑀢𑀺.

𑀢𑀣𑀢𑀸𑀓𑀣𑀸𑀯𑀡𑁆𑀡𑀦𑀸.

𑁬. 𑀓𑀼𑀲𑀮𑀓𑀣𑀸𑀯𑀡𑁆𑀡𑀦𑀸

𑁮𑁪𑁪-𑁮𑁪𑁬. 𑀇𑀤𑀸𑀦𑀺 𑀓𑀼𑀲𑀮𑀓𑀣𑀸 𑀦𑀸𑀫 𑀳𑁄𑀢𑀺. 𑀢𑀢𑁆𑀣 𑀅𑀦𑀯𑀚𑁆𑀚𑀫𑁆𑀧𑀺 𑀓𑀼𑀲𑀮𑀁 𑀇𑀝𑁆𑀞𑀧𑀸𑀓𑀫𑁆𑀧𑀺. 𑀅𑀦𑀯𑀚𑁆𑀚𑀁 𑀦𑀸𑀫 𑀓𑀺𑀮𑁂𑀲𑀯𑀺𑀧𑁆𑀧𑀬𑀼𑀢𑁆𑀢𑀁. 𑀅𑀬𑀁 𑀦𑀬𑁄 𑀞𑀧𑁂𑀢𑁆𑀯𑀸 𑀅𑀓𑀼𑀲𑀮𑀁 𑀲𑀩𑁆𑀩𑀥𑀫𑁆𑀫𑁂 𑀪𑀚𑀢𑀺. 𑀇𑀝𑁆𑀞𑀯𑀺𑀧𑀸𑀓𑀁 𑀦𑀸𑀫 𑀆𑀬𑀢𑀺𑀁 𑀉𑀧𑀧𑀢𑁆𑀢𑀺𑀧𑀯𑀢𑁆𑀢𑁂𑀲𑀼 𑀇𑀝𑁆𑀞𑀨𑀮𑀦𑀺𑀧𑁆𑀨𑀸𑀤𑀓𑀁 𑀧𑀼𑀜𑁆𑀜𑀁. 𑀅𑀬𑀁 𑀦𑀬𑁄 𑀓𑀼𑀲𑀮𑀢𑁆𑀢𑀺𑀓𑁂 𑀆𑀤𑀺𑀧𑀤𑀫𑁂𑀯 𑀪𑀚𑀢𑀺. 𑀬𑁂𑀲𑀁 𑀧𑀦 𑀇𑀫𑀁 𑀯𑀺𑀪𑀸𑀕𑀁 𑀅𑀕𑁆𑀕𑀳𑁂𑀢𑁆𑀯𑀸 𑀅𑀦𑀯𑀚𑁆𑀚𑀪𑀸𑀯𑀫𑀢𑁆𑀢𑁂𑀦𑁂𑀯 𑀦𑀺𑀩𑁆𑀩𑀸𑀦𑀁 𑀓𑀼𑀲𑀮𑀦𑁆𑀢𑀺 𑀮𑀤𑁆𑀥𑀺, 𑀲𑁂𑀬𑁆𑀬𑀣𑀸𑀧𑀺 𑀅𑀦𑁆𑀥𑀓𑀸𑀦𑀁, 𑀢𑁂𑀲𑀁 𑀇𑀝𑁆𑀞𑀯𑀺𑀧𑀸𑀓𑀝𑁆𑀞𑁂𑀦 𑀦𑀺𑀩𑁆𑀩𑀸𑀦𑀲𑁆𑀲 𑀓𑀼𑀲𑀮𑀢𑀸𑀪𑀸𑀯𑀁 𑀤𑀻𑀧𑁂𑀢𑀼𑀁 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀅𑀢𑁆𑀢𑀦𑁄 𑀮𑀤𑁆𑀥𑀺𑀯𑀲𑁂𑀦 𑀧𑀝𑀺𑀜𑁆𑀜𑀸 𑀇𑀢𑀭𑀲𑁆𑀲. 𑀲𑁂𑀲𑀫𑀺𑀥𑀸𑀧𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀢𑁆𑀢𑀸 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀓𑀼𑀲𑀮𑀓𑀣𑀸𑀯𑀡𑁆𑀡𑀦𑀸.

𑁭. 𑀅𑀘𑁆𑀘𑀦𑁆𑀢𑀦𑀺𑀬𑀸𑀫𑀓𑀣𑀸𑀯𑀡𑁆𑀡𑀦𑀸

𑁮𑁪𑁭. 𑀇𑀤𑀸𑀦𑀺 𑀅𑀘𑁆𑀘𑀦𑁆𑀢𑀦𑀺𑀬𑀸𑀫𑀓𑀣𑀸 𑀦𑀸𑀫 𑀳𑁄𑀢𑀺. 𑀢𑀢𑁆𑀣 𑀬𑁂𑀲𑀁 ‘‘𑀲𑀓𑀺𑀁 𑀦𑀺𑀫𑀼𑀕𑁆𑀕𑁄 𑀦𑀺𑀫𑀼𑀕𑁆𑀕𑁄𑀯 𑀳𑁄𑀢𑀻’’𑀢𑀺 (𑀅. 𑀦𑀺. 𑁭.𑁧𑁫) 𑀲𑀼𑀢𑁆𑀢𑀁 𑀦𑀺𑀲𑁆𑀲𑀸𑀬 ‘‘𑀅𑀢𑁆𑀣𑀺 𑀧𑀼𑀣𑀼𑀚𑁆𑀚𑀦𑀲𑁆𑀲 𑀅𑀘𑁆𑀘𑀦𑁆𑀢𑀦𑀺𑀬𑀸𑀫𑀢𑀸’’𑀢𑀺 𑀮𑀤𑁆𑀥𑀺, 𑀲𑁂𑀬𑁆𑀬𑀣𑀸𑀧𑀺 𑀏𑀓𑀘𑁆𑀘𑀸𑀦𑀁 𑀉𑀢𑁆𑀢𑀭𑀸𑀧𑀣𑀓𑀸𑀦𑀁, 𑀢𑁂 𑀲𑀦𑁆𑀥𑀸𑀬 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀧𑀝𑀺𑀜𑁆𑀜𑀸 𑀇𑀢𑀭𑀲𑁆𑀲. 𑀫𑀸𑀢𑀼𑀖𑀸𑀢𑀓𑁄𑀢𑀺𑀆𑀤𑀺 ‘‘𑀦𑀺𑀬𑀢𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀲𑁆𑀲 𑀘 𑀫𑀸𑀢𑀼𑀖𑀸𑀢𑀓𑀸𑀤𑀻𑀦𑀜𑁆𑀘 𑀲𑀫𑀸𑀦𑁂 𑀫𑀺𑀘𑁆𑀙𑀢𑁆𑀢𑀦𑀺𑀬𑀸𑀫𑁂 𑀫𑀸𑀢𑀼𑀖𑀸𑀢𑀓𑀸𑀤𑀻𑀳𑀺𑀧𑀺 𑀢𑁂 𑀅𑀘𑁆𑀘𑀦𑁆𑀢𑀦𑀺𑀬𑀢𑁂𑀳𑀺 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀘𑁄𑀤𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀇𑀢𑀭𑁄 ‘‘𑀦𑀺𑀬𑀢𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑁄 𑀲𑀁𑀲𑀸𑀭𑀔𑀸𑀡𑀼𑀓𑁄 𑀪𑀯𑀦𑁆𑀢𑀭𑁂𑀧𑀺 𑀦𑀺𑀬𑀢𑁄𑀯 𑀇𑀫𑁂 𑀧𑀦 𑀏𑀓𑀲𑁆𑀫𑀺𑀜𑁆𑀜𑁂𑀯 𑀅𑀢𑁆𑀢𑀪𑀸𑀯𑁂’’𑀢𑀺 𑀮𑀤𑁆𑀥𑀺𑀬𑀸 𑀦 𑀳𑁂𑀯𑀦𑁆𑀢𑀺 𑀧𑀝𑀺𑀓𑁆𑀔𑀺𑀧𑀢𑀺.

𑁮𑁪𑁮. 𑀯𑀺𑀘𑀺𑀓𑀺𑀘𑁆𑀙𑀸 𑀉𑀧𑁆𑀧𑀚𑁆𑀚𑁂𑀬𑁆𑀬𑀸𑀢𑀺 ‘‘𑀅𑀬𑀁 𑀦𑀺𑀬𑀢𑁄 𑀯𑀸 𑀦𑁄 𑀯𑀸’’𑀢𑀺 𑀏𑀯𑀁 𑀉𑀧𑁆𑀧𑀚𑁆𑀚𑁂𑀬𑁆𑀬𑀸𑀢𑀺 𑀧𑀼𑀘𑁆𑀙𑀢𑀺. 𑀇𑀢𑀭𑁄 𑀅𑀦𑀼𑀧𑁆𑀧𑀢𑁆𑀢𑀺𑀓𑀸𑀭𑀡𑀁 𑀅𑀧𑀲𑁆𑀲𑀦𑁆𑀢𑁄 𑀧𑀝𑀺𑀚𑀸𑀦𑀸𑀢𑀺. 𑀦𑀼𑀧𑁆𑀧𑀚𑁆𑀚𑁂𑀬𑁆𑀬𑀸𑀢𑀺 𑀧𑀼𑀝𑁆𑀞𑁄 𑀧𑀦 𑀬𑀁 𑀤𑀺𑀝𑁆𑀞𑀺𑀁 𑀆𑀲𑁂𑀯𑀦𑁆𑀢𑁄 𑀦𑀺𑀬𑀸𑀫𑀁 𑀑𑀓𑁆𑀓𑀦𑁆𑀢𑁄, 𑀢𑀢𑁆𑀣 𑀅𑀦𑀼𑀧𑁆𑀧𑀢𑁆𑀢𑀺𑀁 𑀲𑀦𑁆𑀥𑀸𑀬 𑀧𑀝𑀺𑀚𑀸𑀦𑀸𑀢𑀺. 𑀢𑀢𑁄 𑀧𑀳𑀻𑀦𑀸𑀢𑀺 𑀧𑀼𑀝𑁆𑀞𑁄 𑀫𑀕𑁆𑀕𑁂𑀦 𑀅𑀧𑁆𑀧𑀳𑀻𑀦𑀢𑁆𑀢𑀸 𑀧𑀝𑀺𑀓𑁆𑀔𑀺𑀧𑀢𑀺, 𑀢𑀁 𑀤𑀺𑀝𑁆𑀞𑀺𑀁 𑀆𑀭𑀩𑁆𑀪 𑀅𑀲𑀫𑀼𑀤𑀸𑀘𑀸𑀭𑀢𑁄 𑀧𑀝𑀺𑀚𑀸𑀦𑀸𑀢𑀺. 𑀅𑀣 𑀦𑀁 𑀬𑀲𑁆𑀫𑀸 𑀧𑀳𑀸𑀦𑀁 𑀦𑀸𑀫 𑀯𑀺𑀦𑀸 𑀅𑀭𑀺𑀬𑀫𑀕𑁆𑀕𑁂𑀦 𑀦𑀢𑁆𑀣𑀺, 𑀢𑀲𑁆𑀫𑀸 𑀢𑀲𑁆𑀲 𑀯𑀲𑁂𑀦 𑀘𑁄𑀤𑁂𑀢𑀼𑀁 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁂𑀦𑀸𑀢𑀺𑀆𑀤𑀺𑀫𑀸𑀳. 𑀲𑁄 𑀏𑀓𑀫𑀕𑁆𑀕𑁂𑀦𑀸𑀧𑀺 𑀅𑀧𑁆𑀧𑀳𑀻𑀦𑀢𑁆𑀢𑀸 𑀧𑀝𑀺𑀓𑁆𑀔𑀺𑀧𑀢𑀺. 𑀧𑀼𑀦 𑀓𑀢𑀫𑁂𑀦𑀸𑀢𑀺 𑀧𑀼𑀝𑁆𑀞𑁄 𑀫𑀺𑀘𑁆𑀙𑀸𑀫𑀕𑁆𑀕𑀁 𑀲𑀦𑁆𑀥𑀸𑀬 𑀅𑀓𑀼𑀲𑀮𑁂𑀦𑀸𑀢𑀺𑀆𑀤𑀺𑀫𑀸𑀳.

𑁮𑁪𑁯. 𑀉𑀘𑁆𑀙𑁂𑀤𑀤𑀺𑀝𑁆𑀞𑀺 𑀉𑀧𑁆𑀧𑀚𑁆𑀚𑁂𑀬𑁆𑀬𑀸𑀢𑀺 𑀤𑀼𑀢𑀺𑀬𑀦𑀺𑀬𑀸𑀫𑀼𑀧𑁆𑀧𑀢𑁆𑀢𑀺𑀁 𑀧𑀼𑀘𑁆𑀙𑀢𑀺. 𑀇𑀢𑀭𑁄 𑀬𑀲𑁆𑀫𑀸 ‘‘𑀬𑁂𑀧𑀺 𑀢𑁂 𑀑𑀓𑁆𑀓𑀮𑀸 𑀯𑀬𑀪𑀺𑀜𑁆𑀜𑀸 𑀦𑀢𑁆𑀣𑀺𑀓𑀯𑀸𑀤𑀸 𑀅𑀓𑀺𑀭𑀺𑀬𑀯𑀸𑀤𑀸 𑀅𑀳𑁂𑀢𑀼𑀓𑀯𑀸𑀤𑀸’’𑀢𑀺 (𑀫. 𑀦𑀺. 𑁩.𑁧𑁪𑁩) 𑀯𑀘𑀦𑀢𑁄 𑀢𑀺𑀲𑁆𑀲𑁄𑀧𑀺 𑀦𑀺𑀬𑀢𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀬𑁄 𑀏𑀓𑀲𑁆𑀲 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀢𑀲𑁆𑀫𑀸 𑀧𑀝𑀺𑀚𑀸𑀦𑀸𑀢𑀺.

𑁮𑁫𑁦. 𑀅𑀣 𑀦𑀁 ‘‘𑀦 𑀘 𑀦𑀸𑀫 𑀲𑁄 𑀅𑀘𑁆𑀘𑀦𑁆𑀢𑀦𑀺𑀬𑀸𑀫𑁄’’𑀢𑀺 𑀘𑁄𑀤𑁂𑀢𑀼𑀁 𑀳𑀜𑁆𑀘𑀻𑀢𑀺𑀆𑀤𑀺𑀫𑀸𑀳. 𑀅𑀘𑁆𑀘𑀦𑁆𑀢𑀦𑀺𑀬𑀢𑀲𑁆𑀲 𑀳𑀺 𑀤𑀼𑀢𑀺𑀬𑀦𑀺𑀬𑀸𑀫𑁄 𑀦𑀺𑀭𑀢𑁆𑀣𑀓𑁄. 𑀦𑀼𑀧𑁆𑀧𑀚𑁆𑀚𑁂𑀬𑁆𑀬𑀸𑀢𑀺 𑀧𑀜𑁆𑀳𑁂 𑀬𑀁 𑀲𑀲𑁆𑀲𑀢𑀤𑀺𑀝𑁆𑀞𑀺𑀬𑀸 𑀲𑀲𑁆𑀲𑀢𑀦𑁆𑀢𑀺 𑀕𑀳𑀺𑀢𑀁, 𑀢𑀤𑁂𑀯 𑀉𑀘𑁆𑀙𑀺𑀚𑁆𑀚𑀺𑀲𑁆𑀲𑀢𑀻𑀢𑀺 𑀕𑀳𑁂𑀢𑁆𑀯𑀸 𑀅𑀦𑀼𑀧𑁆𑀧𑀢𑁆𑀢𑀺𑀁 𑀲𑀦𑁆𑀥𑀸𑀬 𑀧𑀝𑀺𑀚𑀸𑀦𑀸𑀢𑀺. 𑀧𑀳𑀻𑀦𑀸𑀢𑀺 𑀧𑀼𑀝𑁆𑀞𑁄 𑀫𑀕𑁆𑀕𑁂𑀦 𑀅𑀧𑁆𑀧𑀳𑀻𑀦𑀢𑁆𑀢𑀸 𑀧𑀝𑀺𑀓𑁆𑀔𑀺𑀧𑀢𑀺, 𑀯𑀼𑀢𑁆𑀢𑀦𑀬𑁂𑀦 𑀅𑀦𑀼𑀧𑁆𑀧𑀚𑁆𑀚𑀦𑀢𑁄 𑀧𑀝𑀺𑀚𑀸𑀦𑀸𑀢𑀺. 𑀲𑀲𑁆𑀲𑀢𑀤𑀺𑀝𑁆𑀞𑀺 𑀉𑀧𑁆𑀧𑀚𑁆𑀚𑁂𑀬𑁆𑀬𑀸𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀲𑁂𑀲𑀁 𑀯𑀺𑀘𑀺𑀓𑀺𑀘𑁆𑀙𑀸𑀯𑀸𑀭𑁂 𑀯𑀼𑀢𑁆𑀢𑀦𑀬𑀫𑁂𑀯.

𑁮𑁫𑁧-𑁮𑁫𑁨. 𑀦 𑀯𑀢𑁆𑀢𑀩𑁆𑀩𑀦𑁆𑀢𑀺 𑀧𑀼𑀘𑁆𑀙𑀸 𑀧𑀭𑀯𑀸𑀤𑀺𑀲𑁆𑀲, 𑀲𑀼𑀢𑁆𑀢𑀲𑁆𑀲 𑀅𑀢𑁆𑀣𑀺𑀢𑀸𑀬 𑀧𑀝𑀺𑀜𑁆𑀜𑀸 𑀲𑀓𑀯𑀸𑀤𑀺𑀲𑁆𑀲. 𑀦 𑀧𑀦 𑀲𑁄 𑀪𑀯𑀦𑁆𑀢𑀭𑁂𑀧𑀺 𑀦𑀺𑀫𑀼𑀕𑁆𑀕𑁄𑀯. 𑀇𑀫𑀲𑁆𑀫𑀺𑀜𑁆𑀜𑁂𑀯 𑀳𑀺 𑀪𑀯𑁂 𑀅𑀪𑀩𑁆𑀩𑁄 𑀲𑁄 𑀢𑀁 𑀤𑀺𑀝𑁆𑀞𑀺𑀁 𑀧𑀚𑀳𑀺𑀢𑀼𑀦𑁆𑀢𑀺 𑀅𑀬𑀫𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄, 𑀢𑀲𑁆𑀫𑀸 𑀅𑀲𑀸𑀥𑀓𑀫𑁂𑀢𑀦𑁆𑀢𑀺. 𑀲𑀩𑁆𑀩𑀓𑀸𑀮𑀁 𑀉𑀫𑁆𑀫𑀼𑀚𑁆𑀚𑀺𑀢𑁆𑀯𑀸 𑀦𑀺𑀫𑀼𑀚𑁆𑀚𑀢𑀻𑀢𑀺𑀆𑀤𑀺 𑀯𑀘𑀦𑀫𑀢𑁆𑀢𑁂 𑀅𑀪𑀺𑀦𑀺𑀯𑁂𑀲𑀁 𑀅𑀓𑀢𑁆𑀯𑀸 𑀅𑀢𑁆𑀣𑁄 𑀧𑀭𑀺𑀬𑁂𑀲𑀺𑀢𑀩𑁆𑀩𑁄𑀢𑀺 𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀦𑁆𑀢𑀺.

𑀅𑀘𑁆𑀘𑀦𑁆𑀢𑀦𑀺𑀬𑀸𑀫𑀓𑀣𑀸𑀯𑀡𑁆𑀡𑀦𑀸.

𑁮. 𑀇𑀦𑁆𑀤𑁆𑀭𑀺𑀬𑀓𑀣𑀸𑀯𑀡𑁆𑀡𑀦𑀸

𑁮𑁫𑁩-𑁮𑁫𑁬. 𑀇𑀤𑀸𑀦𑀺 𑀇𑀦𑁆𑀤𑁆𑀭𑀺𑀬𑀓𑀣𑀸 𑀦𑀸𑀫 𑀳𑁄𑀢𑀺. 𑀢𑀢𑁆𑀣 𑀮𑁄𑀓𑀺𑀬𑀸 𑀲𑀤𑁆𑀥𑀸 𑀲𑀤𑁆𑀥𑀸 𑀏𑀯 𑀦𑀸𑀫, 𑀦 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁. 𑀢𑀣𑀸 𑀮𑁄𑀓𑀺𑀬𑀁 𑀯𑀻𑀭𑀺𑀬𑀁…𑀧𑁂… 𑀲𑀢𑀺… 𑀲𑀫𑀸𑀥𑀺… 𑀧𑀜𑁆𑀜𑀸 𑀧𑀜𑁆𑀜𑀸𑀬𑁂𑀯 𑀦𑀸𑀫, 𑀦 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀦𑁆𑀢𑀺 𑀬𑁂𑀲𑀁 𑀮𑀤𑁆𑀥𑀺, 𑀲𑁂𑀬𑁆𑀬𑀣𑀸𑀧𑀺 𑀳𑁂𑀢𑀼𑀯𑀸𑀤𑀸𑀦𑀜𑁆𑀘𑁂𑀯 𑀫𑀳𑀺𑀲𑀸𑀲𑀓𑀸𑀦𑀜𑁆𑀘; 𑀢𑁂 𑀲𑀦𑁆𑀥𑀸𑀬 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀧𑀝𑀺𑀜𑁆𑀜𑀸 𑀇𑀢𑀭𑀲𑁆𑀲. 𑀦𑀢𑁆𑀣𑀺 𑀮𑁄𑀓𑀺𑀬𑀸 𑀲𑀤𑁆𑀥𑀸𑀢𑀺𑀆𑀤𑀺 𑀬𑀲𑁆𑀫𑀸 𑀮𑁄𑀓𑀺𑀬𑀸𑀧𑀺 𑀲𑀤𑁆𑀥𑀸𑀤𑀬𑁄𑀯 𑀥𑀫𑁆𑀫𑀸 𑀅𑀥𑀺𑀧𑀢𑀺𑀬𑀝𑁆𑀞𑁂𑀦 𑀇𑀦𑁆𑀤𑁆𑀭𑀺𑀬𑀁, 𑀦 𑀲𑀤𑁆𑀥𑀸𑀤𑀻𑀳𑀺 𑀅𑀜𑁆𑀜𑀁 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀸𑀤𑀺 𑀦𑀸𑀫 𑀅𑀢𑁆𑀣𑀺, 𑀢𑀲𑁆𑀫𑀸 𑀮𑁄𑀓𑀺𑀬𑀸𑀦𑀫𑁆𑀧𑀺 𑀲𑀤𑁆𑀥𑀸𑀤𑀻𑀦𑀜𑁆𑀜𑁂𑀯 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀸𑀤𑀺𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀅𑀢𑁆𑀣𑀺 𑀮𑁄𑀓𑀺𑀬𑁄 𑀫𑀦𑁄𑀢𑀺𑀆𑀤𑀺 𑀬𑀣𑀸 𑀢𑁂 𑀮𑁄𑀓𑀺𑀬𑀸𑀧𑀺 𑀫𑀦𑀸𑀤𑀬𑁄 𑀥𑀫𑁆𑀫𑀸 𑀫𑀦𑀺𑀦𑁆𑀤𑁆𑀭𑀺𑀬𑀸𑀤𑀻𑀦𑀺, 𑀏𑀯𑀁 𑀮𑁄𑀓𑀺𑀬𑀸 𑀲𑀤𑁆𑀥𑀸𑀤𑀬𑁄𑀧𑀺 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀸𑀦𑀻𑀢𑀺 𑀉𑀧𑀫𑀸𑀬 𑀢𑀲𑁆𑀲𑀢𑁆𑀣𑀲𑁆𑀲 𑀯𑀺𑀪𑀸𑀯𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀲𑁂𑀲𑀫𑁂𑀢𑁆𑀣 𑀬𑀣𑀸𑀧𑀸𑀴𑀺𑀫𑁂𑀯 𑀦𑀺𑀬𑁆𑀬𑀸𑀢𑀻𑀢𑀺.

𑀇𑀦𑁆𑀤𑁆𑀭𑀺𑀬𑀓𑀣𑀸𑀯𑀡𑁆𑀡𑀦𑀸.

𑀏𑀓𑀽𑀦𑀯𑀻𑀲𑀢𑀺𑀫𑁄 𑀯𑀕𑁆𑀕𑁄.