𑁧. 𑀅𑀢𑁆𑀣𑀺 𑀅𑀭𑀳𑀢𑁄 𑀧𑀼𑀜𑁆𑀜𑀽𑀧𑀘𑀬𑀓𑀣𑀸𑀯𑀡𑁆𑀡𑀦𑀸

𑁭𑁭𑁬-𑁭𑁭𑁯. 𑀇𑀤𑀸𑀦𑀺 𑀅𑀢𑁆𑀣𑀺 𑀅𑀭𑀳𑀢𑁄 𑀧𑀼𑀜𑁆𑀜𑀽𑀧𑀘𑀬𑁄𑀢𑀺𑀓𑀣𑀸 𑀦𑀸𑀫 𑀳𑁄𑀢𑀺. 𑀢𑀢𑁆𑀣 𑀬𑁂𑀲𑀁 𑀅𑀭𑀳𑀢𑁄 𑀤𑀸𑀦𑀲𑀁𑀯𑀺𑀪𑀸𑀕𑀘𑁂𑀢𑀺𑀬𑀯𑀦𑁆𑀤𑀦𑀸𑀤𑀻𑀦𑀺 𑀓𑀫𑁆𑀫𑀸𑀦𑀺 𑀤𑀺𑀲𑁆𑀯𑀸 𑀅𑀢𑁆𑀣𑀺 𑀅𑀭𑀳𑀢𑁄 𑀧𑀼𑀜𑁆𑀜𑀽𑀧𑀘𑀬𑁄𑀢𑀺 𑀮𑀤𑁆𑀥𑀺, 𑀲𑁂𑀬𑁆𑀬𑀣𑀸𑀧𑀺 𑀅𑀦𑁆𑀥𑀓𑀸𑀦𑀁; 𑀢𑁂 𑀲𑀦𑁆𑀥𑀸𑀬 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀧𑀝𑀺𑀜𑁆𑀜𑀸 𑀇𑀢𑀭𑀲𑁆𑀲. 𑀅𑀣 𑀦𑀁 ‘‘𑀅𑀭𑀳𑀸 𑀦𑀸𑀫 𑀧𑀳𑀻𑀦𑀧𑀼𑀜𑁆𑀜𑀧𑀸𑀧𑁄, 𑀲𑁄 𑀬𑀤𑀺 𑀧𑀼𑀜𑁆𑀜𑀁 𑀓𑀭𑁂𑀬𑁆𑀬, 𑀧𑀸𑀧𑀫𑁆𑀧𑀺 𑀓𑀭𑁂𑀬𑁆𑀬𑀸’’𑀢𑀺 𑀘𑁄𑀤𑁂𑀢𑀼𑀁 𑀅𑀧𑀼𑀜𑁆𑀜𑀽𑀧𑀘𑀬𑁄𑀢𑀺 𑀆𑀳. 𑀇𑀢𑀭𑁄 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀓𑀺𑀭𑀺𑀬𑀁 𑀅𑀧𑀲𑁆𑀲𑀦𑁆𑀢𑁄 𑀧𑀝𑀺𑀓𑁆𑀔𑀺𑀧𑀢𑀺. 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀦𑁆𑀢𑀺𑀆𑀤𑀻𑀲𑀼 𑀪𑀯𑀕𑀸𑀫𑀺𑀓𑀫𑁆𑀫𑀁 𑀅𑀭𑀳𑀢𑁄 𑀦𑀢𑁆𑀣𑀻𑀢𑀺 𑀧𑀝𑀺𑀓𑁆𑀔𑀺𑀧𑀢𑀺. 𑀤𑀸𑀦𑀁 𑀤𑀤𑁂𑀬𑁆𑀬𑀸𑀢𑀺𑀆𑀤𑀻𑀲𑀼 𑀓𑀺𑀭𑀺𑀬𑀘𑀺𑀢𑁆𑀢𑁂𑀦 𑀤𑀸𑀦𑀸𑀤𑀺𑀧𑀯𑀢𑁆𑀢𑀺𑀲𑀩𑁆𑀪𑀸𑀯𑀢𑁄 𑀲𑀓𑀯𑀸𑀤𑀻 𑀧𑀝𑀺𑀚𑀸𑀦𑀸𑀢𑀺. 𑀇𑀢𑀭𑁄 𑀘𑀺𑀢𑁆𑀢𑀁 𑀅𑀦𑀸𑀤𑀺𑀬𑀺𑀢𑁆𑀯𑀸 𑀓𑀺𑀭𑀺𑀬𑀸𑀧𑀯𑀢𑁆𑀢𑀺𑀫𑀢𑁆𑀢𑀤𑀲𑁆𑀲𑀦𑁂𑀦𑁂𑀯 𑀮𑀤𑁆𑀥𑀺𑀁 𑀧𑀢𑀺𑀝𑁆𑀞𑀧𑁂𑀢𑀺. 𑀲𑀸 𑀧𑀦 𑀅𑀬𑁄𑀦𑀺𑀲𑁄 𑀧𑀢𑀺𑀝𑁆𑀞𑀸𑀧𑀺𑀢𑀢𑁆𑀢𑀸 𑀅𑀧𑁆𑀧𑀢𑀺𑀝𑁆𑀞𑀸𑀧𑀺𑀢𑀸 𑀳𑁄𑀢𑀻𑀢𑀺.

𑀅𑀢𑁆𑀣𑀺 𑀅𑀭𑀳𑀢𑁄 𑀧𑀼𑀜𑁆𑀜𑀽𑀧𑀘𑀬𑁄𑀢𑀺𑀓𑀣𑀸𑀯𑀡𑁆𑀡𑀦𑀸.