𑁫. 𑀜𑀸𑀡𑀁 𑀘𑀺𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑀦𑁆𑀢𑀺𑀓𑀣𑀸𑀯𑀡𑁆𑀡𑀦𑀸

𑁬𑁧𑁬-𑁬𑁧𑁭. 𑀇𑀤𑀸𑀦𑀺 𑀜𑀸𑀡𑀁 𑀘𑀺𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑀦𑁆𑀢𑀺𑀓𑀣𑀸 𑀦𑀸𑀫 𑀳𑁄𑀢𑀺. 𑀢𑀢𑁆𑀣 𑀬𑀲𑁆𑀫𑀸 𑀅𑀭𑀳𑀸 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀺𑀲𑀫𑀗𑁆𑀕𑀻 𑀧𑀝𑀺𑀮𑀤𑁆𑀥𑀁 𑀫𑀕𑁆𑀕𑀜𑀸𑀡𑀁 𑀲𑀦𑁆𑀥𑀸𑀬 ‘‘𑀜𑀸𑀡𑀻’’𑀢𑀺 𑀯𑀼𑀘𑁆𑀘𑀢𑀺, 𑀦 𑀘𑀲𑁆𑀲 𑀢𑀁 𑀢𑁂𑀦 𑀘𑀺𑀢𑁆𑀢𑁂𑀦 𑀲𑀫𑁆𑀧𑀬𑀼𑀢𑁆𑀢𑀁, 𑀢𑀲𑁆𑀫𑀸 ‘‘𑀜𑀸𑀡𑀁 𑀘𑀺𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢’’𑀦𑁆𑀢𑀺 𑀬𑁂𑀲𑀁 𑀮𑀤𑁆𑀥𑀺, 𑀲𑁂𑀬𑁆𑀬𑀣𑀸𑀧𑀺 𑀧𑀼𑀩𑁆𑀩𑀲𑁂𑀮𑀺𑀬𑀸𑀦𑀁; 𑀢𑁂 𑀲𑀦𑁆𑀥𑀸𑀬 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀧𑀝𑀺𑀜𑁆𑀜𑀸 𑀇𑀢𑀭𑀲𑁆𑀲. 𑀅𑀣 𑀦𑀁 ‘‘𑀬𑀤𑀺 𑀢𑁂 𑀜𑀸𑀡𑀁 𑀘𑀺𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑀁 𑀘𑀺𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑁂𑀲𑀼 𑀭𑀽𑀧𑀸𑀤𑀻𑀲𑀼 𑀅𑀜𑁆𑀜𑀢𑀭𑀁 𑀲𑀺𑀬𑀸’’𑀢𑀺 𑀘𑁄𑀤𑁂𑀢𑀼𑀁 𑀭𑀽𑀧𑀦𑁆𑀢𑀺𑀆𑀤𑀺𑀫𑀸𑀳. 𑀇𑀢𑀭𑁄 𑀧𑀝𑀺𑀓𑁆𑀔𑀺𑀧𑀢𑀺. 𑀲𑁂𑀲𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀫𑁂𑀯. 𑀧𑀭𑀺𑀬𑁄𑀲𑀸𑀦𑁂 𑀧𑀦 𑀧𑀜𑁆𑀜𑀯𑀸𑀢𑀺 𑀧𑀼𑀝𑁆𑀞𑁄 𑀧𑀝𑀺𑀮𑀸𑀪𑀯𑀲𑁂𑀦 𑀢𑀁 𑀧𑀯𑀢𑁆𑀢𑀺𑀁 𑀇𑀘𑁆𑀙𑀢𑀺, 𑀢𑀲𑁆𑀫𑀸 𑀧𑀝𑀺𑀚𑀸𑀦𑀸𑀢𑀻𑀢𑀺.

𑀜𑀸𑀡𑀁 𑀘𑀺𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑀦𑁆𑀢𑀺𑀓𑀣𑀸𑀯𑀡𑁆𑀡𑀦𑀸.