𑁧𑁧. 𑀏𑀓𑀸𑀤𑀲𑀫𑀯𑀕𑁆𑀕𑁄

𑁧-𑁩. 𑀢𑀺𑀲𑁆𑀲𑁄𑀧𑀺 𑀅𑀦𑀼𑀲𑀬𑀓𑀣𑀸𑀯𑀡𑁆𑀡𑀦𑀸

𑁬𑁦𑁫-𑁬𑁧𑁩. 𑀇𑀤𑀸𑀦𑀺 𑀅𑀦𑀼𑀲𑀬𑀸 𑀅𑀩𑁆𑀬𑀸𑀓𑀢𑀸, 𑀅𑀳𑁂𑀢𑀼𑀓𑀸, 𑀘𑀺𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑀸𑀢𑀺 𑀢𑀺𑀲𑁆𑀲𑁄𑀧𑀺 𑀅𑀦𑀼𑀲𑀬𑀓𑀣𑀸 𑀦𑀸𑀫 𑀳𑁄𑀦𑁆𑀢𑀺. 𑀢𑀢𑁆𑀣 𑀬𑀲𑁆𑀫𑀸 𑀧𑀼𑀣𑀼𑀚𑁆𑀚𑀦𑁄 𑀓𑀼𑀲𑀮𑀸𑀩𑁆𑀬𑀸𑀓𑀢𑁂 𑀘𑀺𑀢𑁆𑀢𑁂 𑀯𑀢𑁆𑀢𑀫𑀸𑀦𑁂 ‘‘𑀲𑀸𑀦𑀼𑀲𑀬𑁄’’𑀢𑀺 𑀯𑀢𑁆𑀢𑀩𑁆𑀩𑁄, 𑀬𑁄 𑀘𑀲𑁆𑀲 𑀢𑀲𑁆𑀫𑀺𑀁 𑀔𑀡𑁂 𑀳𑁂𑀢𑀼, 𑀦 𑀢𑁂𑀦 𑀳𑁂𑀢𑀼𑀦𑀸 𑀅𑀦𑀼𑀲𑀬𑀸 𑀲𑀳𑁂𑀢𑀼𑀓𑀸, 𑀦 𑀢𑁂𑀦 𑀘𑀺𑀢𑁆𑀢𑁂𑀦 𑀲𑀫𑁆𑀧𑀬𑀼𑀢𑁆𑀢𑀸, 𑀢𑀲𑁆𑀫𑀸 ‘‘𑀢𑁂 𑀅𑀩𑁆𑀬𑀸𑀓𑀢𑀸, 𑀅𑀳𑁂𑀢𑀼𑀓𑀸, 𑀘𑀺𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑀸’’𑀢𑀺 𑀬𑁂𑀲𑀁 𑀮𑀤𑁆𑀥𑀺, 𑀲𑁂𑀬𑁆𑀬𑀣𑀸𑀧𑀺 𑀫𑀳𑀸𑀲𑀁𑀖𑀺𑀓𑀸𑀦𑀜𑁆𑀘𑁂𑀯 𑀲𑀫𑁆𑀫𑀺𑀢𑀺𑀬𑀸𑀦𑀜𑁆𑀘; 𑀢𑁂 𑀲𑀦𑁆𑀥𑀸𑀬 𑀢𑀻𑀲𑀼𑀧𑀺 𑀓𑀣𑀸𑀲𑀼 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀧𑀝𑀺𑀜𑁆𑀜𑀸 𑀇𑀢𑀭𑀲𑁆𑀲. 𑀲𑁂𑀲𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀢𑁆𑀢𑀸 𑀲𑀓𑁆𑀓𑀸 𑀧𑀸𑀴𑀺𑀫𑀕𑁆𑀕𑁂𑀦𑁂𑀯 𑀚𑀸𑀦𑀺𑀢𑀼𑀦𑁆𑀢𑀺, 𑀢𑀲𑁆𑀫𑀸 𑀦 𑀯𑀺𑀢𑁆𑀣𑀸𑀭𑀺𑀢𑀦𑁆𑀢𑀺.

𑀢𑀺𑀲𑁆𑀲𑁄𑀧𑀺 𑀅𑀦𑀼𑀲𑀬𑀓𑀣𑀸𑀯𑀡𑁆𑀡𑀦𑀸.

𑁪. 𑀜𑀸𑀡𑀓𑀣𑀸𑀯𑀡𑁆𑀡𑀦𑀸

𑁬𑁧𑁪-𑁬𑁧𑁫. 𑀇𑀤𑀸𑀦𑀺 𑀜𑀸𑀡𑀓𑀣𑀸 𑀦𑀸𑀫 𑀳𑁄𑀢𑀺. 𑀢𑀢𑁆𑀣 𑀫𑀕𑁆𑀕𑀜𑀸𑀡𑁂𑀦 𑀅𑀜𑁆𑀜𑀸𑀡𑁂 𑀯𑀺𑀕𑀢𑁂𑀧𑀺 𑀧𑀼𑀦 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀺𑀯𑀲𑁂𑀦 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑁂 𑀯𑀢𑁆𑀢𑀫𑀸𑀦𑁂 𑀬𑀲𑁆𑀫𑀸 𑀢𑀁 𑀫𑀕𑁆𑀕𑀘𑀺𑀢𑁆𑀢𑀁 𑀦 𑀧𑀯𑀢𑁆𑀢𑀢𑀺, 𑀢𑀲𑁆𑀫𑀸 ‘‘𑀦 𑀯𑀢𑁆𑀢𑀩𑁆𑀩𑀁 𑀜𑀸𑀡𑀻’’𑀢𑀺 𑀬𑁂𑀲𑀁 𑀮𑀤𑁆𑀥𑀺, 𑀲𑁂𑀬𑁆𑀬𑀣𑀸𑀧𑀺 𑀫𑀳𑀸𑀲𑀁𑀖𑀺𑀓𑀸𑀦𑀁; 𑀢𑁂 𑀲𑀦𑁆𑀥𑀸𑀬 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀧𑀝𑀺𑀜𑁆𑀜𑀸 𑀇𑀢𑀭𑀲𑁆𑀲. 𑀅𑀣 𑀦𑀁 ‘‘𑀬𑀤𑀺 𑀅𑀜𑁆𑀜𑀸𑀡𑁂 𑀯𑀺𑀕𑀢𑁂 ‘𑀜𑀸𑀡𑀻’𑀢𑀺 𑀧𑀜𑁆𑀜𑀢𑁆𑀢𑀺 𑀦 𑀲𑀺𑀬𑀸, 𑀭𑀸𑀕𑀸𑀤𑀻𑀲𑀼 𑀯𑀺𑀕𑀢𑁂𑀲𑀼 𑀯𑀻𑀢𑀭𑀸𑀕𑀸𑀤𑀺𑀧𑀜𑁆𑀜𑀢𑁆𑀢𑀺𑀧𑀺 𑀦 𑀲𑀺𑀬𑀸𑀢𑀺 𑀧𑀼𑀕𑁆𑀕𑀮𑀧𑀜𑁆𑀜𑀢𑁆𑀢𑀺𑀬𑀁 𑀅𑀓𑁄𑀯𑀺𑀤𑁄𑀲𑀻’’𑀢𑀺 𑀘𑁄𑀤𑁂𑀢𑀼𑀁 𑀭𑀸𑀕𑁂 𑀯𑀺𑀕𑀢𑁂𑀢𑀺𑀆𑀤𑀺𑀫𑀸𑀳. 𑀇𑀢𑀭𑁄 𑀢𑁂𑀲𑀼 𑀯𑀺𑀕𑀢𑁂𑀲𑀼 𑀲𑀭𑀸𑀕𑀸𑀤𑀺𑀪𑀸𑀯𑁂 𑀬𑀼𑀢𑁆𑀢𑀺𑀁 𑀅𑀧𑀲𑁆𑀲𑀦𑁆𑀢𑁄 𑀧𑀝𑀺𑀓𑁆𑀔𑀺𑀧𑀢𑀺. 𑀧𑀭𑀺𑀬𑁄𑀲𑀸𑀦𑁂 𑀬𑀲𑁆𑀫𑀸 𑀜𑀸𑀡𑀧𑀝𑀺𑀮𑀸𑀪𑁂𑀦 𑀲𑁄 𑀜𑀸𑀡𑀻𑀢𑀺 𑀯𑀢𑁆𑀢𑀩𑁆𑀩𑀢𑀁 𑀅𑀭𑀳𑀢𑀺, 𑀢𑀲𑁆𑀫𑀸 𑀦 𑀳𑁂𑀯𑀦𑁆𑀢𑀺 𑀧𑀝𑀺𑀓𑁆𑀔𑁂𑀧𑁄 𑀲𑀓𑀯𑀸𑀤𑀺𑀲𑁆𑀲𑀸𑀢𑀺.

𑀜𑀸𑀡𑀓𑀣𑀸𑀯𑀡𑁆𑀡𑀦𑀸.

𑁫. 𑀜𑀸𑀡𑀁 𑀘𑀺𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑀦𑁆𑀢𑀺𑀓𑀣𑀸𑀯𑀡𑁆𑀡𑀦𑀸

𑁬𑁧𑁬-𑁬𑁧𑁭. 𑀇𑀤𑀸𑀦𑀺 𑀜𑀸𑀡𑀁 𑀘𑀺𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑀦𑁆𑀢𑀺𑀓𑀣𑀸 𑀦𑀸𑀫 𑀳𑁄𑀢𑀺. 𑀢𑀢𑁆𑀣 𑀬𑀲𑁆𑀫𑀸 𑀅𑀭𑀳𑀸 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀺𑀲𑀫𑀗𑁆𑀕𑀻 𑀧𑀝𑀺𑀮𑀤𑁆𑀥𑀁 𑀫𑀕𑁆𑀕𑀜𑀸𑀡𑀁 𑀲𑀦𑁆𑀥𑀸𑀬 ‘‘𑀜𑀸𑀡𑀻’’𑀢𑀺 𑀯𑀼𑀘𑁆𑀘𑀢𑀺, 𑀦 𑀘𑀲𑁆𑀲 𑀢𑀁 𑀢𑁂𑀦 𑀘𑀺𑀢𑁆𑀢𑁂𑀦 𑀲𑀫𑁆𑀧𑀬𑀼𑀢𑁆𑀢𑀁, 𑀢𑀲𑁆𑀫𑀸 ‘‘𑀜𑀸𑀡𑀁 𑀘𑀺𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢’’𑀦𑁆𑀢𑀺 𑀬𑁂𑀲𑀁 𑀮𑀤𑁆𑀥𑀺, 𑀲𑁂𑀬𑁆𑀬𑀣𑀸𑀧𑀺 𑀧𑀼𑀩𑁆𑀩𑀲𑁂𑀮𑀺𑀬𑀸𑀦𑀁; 𑀢𑁂 𑀲𑀦𑁆𑀥𑀸𑀬 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀧𑀝𑀺𑀜𑁆𑀜𑀸 𑀇𑀢𑀭𑀲𑁆𑀲. 𑀅𑀣 𑀦𑀁 ‘‘𑀬𑀤𑀺 𑀢𑁂 𑀜𑀸𑀡𑀁 𑀘𑀺𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑀁 𑀘𑀺𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑁂𑀲𑀼 𑀭𑀽𑀧𑀸𑀤𑀻𑀲𑀼 𑀅𑀜𑁆𑀜𑀢𑀭𑀁 𑀲𑀺𑀬𑀸’’𑀢𑀺 𑀘𑁄𑀤𑁂𑀢𑀼𑀁 𑀭𑀽𑀧𑀦𑁆𑀢𑀺𑀆𑀤𑀺𑀫𑀸𑀳. 𑀇𑀢𑀭𑁄 𑀧𑀝𑀺𑀓𑁆𑀔𑀺𑀧𑀢𑀺. 𑀲𑁂𑀲𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀫𑁂𑀯. 𑀧𑀭𑀺𑀬𑁄𑀲𑀸𑀦𑁂 𑀧𑀦 𑀧𑀜𑁆𑀜𑀯𑀸𑀢𑀺 𑀧𑀼𑀝𑁆𑀞𑁄 𑀧𑀝𑀺𑀮𑀸𑀪𑀯𑀲𑁂𑀦 𑀢𑀁 𑀧𑀯𑀢𑁆𑀢𑀺𑀁 𑀇𑀘𑁆𑀙𑀢𑀺, 𑀢𑀲𑁆𑀫𑀸 𑀧𑀝𑀺𑀚𑀸𑀦𑀸𑀢𑀻𑀢𑀺.

𑀜𑀸𑀡𑀁 𑀘𑀺𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑀦𑁆𑀢𑀺𑀓𑀣𑀸𑀯𑀡𑁆𑀡𑀦𑀸.

𑁬. 𑀇𑀤𑀁 𑀤𑀼𑀓𑁆𑀔𑀦𑁆𑀢𑀺𑀓𑀣𑀸𑀯𑀡𑁆𑀡𑀦𑀸

𑁬𑁧𑁮-𑁮𑁨𑁦. 𑀇𑀤𑀸𑀦𑀺 𑀇𑀤𑀁 𑀤𑀼𑀓𑁆𑀔𑀦𑁆𑀢𑀺𑀓𑀣𑀸 𑀦𑀸𑀫 𑀳𑁄𑀢𑀺. 𑀢𑀢𑁆𑀣 𑀬𑁂𑀲𑀁 ‘‘𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑀓𑁆𑀔𑀡𑁂 𑀬𑁄𑀕𑀸𑀯𑀘𑀭𑁄 𑀇𑀤𑀁 𑀤𑀼𑀓𑁆𑀔𑀦𑁆𑀢𑀺 𑀯𑀸𑀘𑀁 𑀪𑀸𑀲𑀢𑀺, 𑀏𑀯𑀫𑀲𑁆𑀲 𑀇𑀤𑀁 𑀤𑀼𑀓𑁆𑀔𑀦𑁆𑀢𑀺 𑀯𑀸𑀘𑀁 𑀪𑀸𑀲𑀢𑁄 𑀘 𑀇𑀤𑀁 𑀤𑀼𑀓𑁆𑀔𑀦𑁆𑀢𑀺 𑀜𑀸𑀡𑀁 𑀧𑀯𑀢𑁆𑀢𑀢𑀻’’𑀢𑀺 𑀮𑀤𑁆𑀥𑀺, 𑀲𑁂𑀬𑁆𑀬𑀣𑀸𑀧𑀺 𑀅𑀦𑁆𑀥𑀓𑀸𑀦𑀁; 𑀢𑁂 𑀲𑀦𑁆𑀥𑀸𑀬 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀫𑀕𑁆𑀕𑀓𑁆𑀔𑀡𑁂 𑀢𑀣𑀸 𑀯𑀸𑀘𑀸𑀪𑀸𑀲𑀦𑀁 𑀜𑀸𑀡𑀧𑁆𑀧𑀯𑀢𑁆𑀢𑀺𑀜𑁆𑀘 𑀲𑀦𑁆𑀥𑀸𑀬 𑀧𑀝𑀺𑀜𑁆𑀜𑀸 𑀇𑀢𑀭𑀲𑁆𑀲. 𑀬𑀲𑁆𑀫𑀸 𑀧𑀦 𑀲𑁄 𑀲𑁂𑀲𑀲𑀘𑁆𑀘𑀧𑀝𑀺𑀲𑀁𑀬𑀼𑀢𑁆𑀢𑀁 𑀯𑀸𑀘𑀁 𑀧𑀼𑀣𑀼𑀚𑁆𑀚𑀦𑁄𑀯 𑀪𑀸𑀲𑀢𑀺, 𑀦 𑀘 𑀢𑀲𑁆𑀲 𑀢𑀣𑀸 𑀜𑀸𑀡𑀧𑁆𑀧𑀯𑀢𑁆𑀢𑀻𑀢𑀺 𑀇𑀘𑁆𑀙𑀢𑀺, 𑀢𑀲𑁆𑀫𑀸 𑀲𑀫𑀼𑀤𑀬𑀸𑀤𑀺𑀧𑀜𑁆𑀳𑁂𑀲𑀼 𑀧𑀝𑀺𑀓𑁆𑀔𑀺𑀧𑀢𑀺. 𑀭𑀽𑀧𑀁 𑀅𑀦𑀺𑀘𑁆𑀘𑀦𑁆𑀢𑀺𑀆𑀤𑀺 𑀤𑀼𑀓𑁆𑀔𑀧𑀭𑀺𑀬𑀸𑀬𑀤𑀲𑁆𑀲𑀦𑀯𑀲𑁂𑀦 𑀯𑀼𑀢𑁆𑀢𑀁. 𑀇𑀢𑀭𑁄 𑀧𑀦 𑀲𑀓𑀲𑀫𑀬𑁂 𑀢𑀸𑀤𑀺𑀲𑀁 𑀯𑁄𑀳𑀸𑀭𑀁 𑀅𑀧𑀲𑁆𑀲𑀦𑁆𑀢𑁄 𑀧𑀝𑀺𑀓𑁆𑀔𑀺𑀧𑀢𑀺. 𑀇𑀢𑀺 𑀘 𑀤𑀦𑁆𑀢𑀺 𑀘𑀸𑀢𑀺𑀆𑀤𑀺 𑀬𑀤𑀺 𑀢𑀲𑁆𑀲 𑀤𑀼𑀓𑁆𑀔𑁂 𑀜𑀸𑀡𑀁 𑀧𑀯𑀢𑁆𑀢𑀢𑀺, 𑀇-𑀓𑀸𑀭 𑀤𑀁-𑀓𑀸𑀭 𑀤𑀼-𑀓𑀸𑀭 𑀔-𑀓𑀸𑀭𑁂𑀲𑀼 𑀧𑀝𑀺𑀧𑀸𑀝𑀺𑀬𑀸 𑀘𑀢𑀽𑀳𑀺 𑀜𑀸𑀡𑁂𑀳𑀺 𑀧𑀯𑀢𑁆𑀢𑀺𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁. 𑀇𑀢𑀭𑁄 𑀧𑀦 𑀢𑀣𑀸 𑀦 𑀇𑀘𑁆𑀙𑀢𑀺, 𑀢𑀲𑁆𑀫𑀸 𑀧𑀝𑀺𑀓𑁆𑀔𑀺𑀧𑀢𑀺.

𑀇𑀤𑀁 𑀤𑀼𑀓𑁆𑀔𑀦𑁆𑀢𑀺𑀓𑀣𑀸𑀯𑀡𑁆𑀡𑀦𑀸.

𑁭. 𑀇𑀤𑁆𑀥𑀺𑀩𑀮𑀓𑀣𑀸𑀯𑀡𑁆𑀡𑀦𑀸

𑁬𑁨𑁧-𑁬𑁨𑁪. 𑀇𑀤𑀸𑀦𑀺 𑀇𑀤𑁆𑀥𑀺𑀩𑀮𑀓𑀣𑀸 𑀦𑀸𑀫 𑀳𑁄𑀢𑀺. 𑀢𑀢𑁆𑀣 𑀇𑀤𑁆𑀥𑀺𑀧𑀸𑀤𑀪𑀸𑀯𑀦𑀸𑀦𑀺𑀲𑀁𑀲𑀲𑁆𑀲 𑀅𑀢𑁆𑀣𑀁 𑀅𑀬𑁄𑀦𑀺𑀲𑁄 𑀕𑀳𑁂𑀢𑁆𑀯𑀸 ‘‘𑀇𑀤𑁆𑀥𑀺𑀩𑀮𑁂𑀦 𑀲𑀫𑀦𑁆𑀦𑀸𑀕𑀢𑁄 𑀓𑀧𑁆𑀧𑀁 𑀢𑀺𑀝𑁆𑀞𑁂𑀬𑁆𑀬𑀸’’𑀢𑀺 𑀬𑁂𑀲𑀁 𑀮𑀤𑁆𑀥𑀺, 𑀲𑁂𑀬𑁆𑀬𑀣𑀸𑀧𑀺 𑀫𑀳𑀸𑀲𑀁𑀖𑀺𑀓𑀸𑀦𑀁; 𑀢𑁂 𑀲𑀦𑁆𑀥𑀸𑀬 𑀇𑀤𑁆𑀥𑀺𑀩𑀮𑁂𑀦 𑀲𑀫𑀦𑁆𑀦𑀸𑀕𑀢𑁄 𑀓𑀧𑁆𑀧𑀁 𑀢𑀺𑀝𑁆𑀞𑁂𑀬𑁆𑀬𑀸𑀢𑀺 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲. 𑀢𑀢𑁆𑀣 𑀓𑀧𑁆𑀧𑁄 𑀦𑀸𑀫 𑀫𑀳𑀸𑀓𑀧𑁆𑀧𑁄, 𑀓𑀧𑁆𑀧𑁂𑀓𑀤𑁂𑀲𑁄, 𑀆𑀬𑀼𑀓𑀧𑁆𑀧𑁄𑀢𑀺 𑀢𑀺𑀯𑀺𑀥𑁄. ‘‘𑀘𑀢𑁆𑀢𑀸𑀭𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀓𑀧𑁆𑀧𑀲𑁆𑀲 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀻’’𑀢𑀺 (𑀅. 𑀦𑀺. 𑁪.𑁧𑁫𑁬) 𑀏𑀢𑁆𑀣 𑀳𑀺 𑀫𑀳𑀸𑀓𑀧𑁆𑀧𑁄𑀯 𑀓𑀧𑁆𑀧𑁄𑀢𑀺 𑀯𑀼𑀢𑁆𑀢𑁄. ‘‘𑀩𑁆𑀭𑀳𑁆𑀫𑀓𑀸𑀬𑀺𑀓𑀸𑀦𑀁 𑀤𑁂𑀯𑀸𑀦𑀁 𑀓𑀧𑁆𑀧𑁄 𑀆𑀬𑀼𑀧𑁆𑀧𑀫𑀸𑀡’’𑀦𑁆𑀢𑀺 (𑀅. 𑀦𑀺. 𑁪.𑁧𑁨𑁩) 𑀏𑀢𑁆𑀣 𑀓𑀧𑁆𑀧𑁂𑀓𑀤𑁂𑀲𑀸. ‘‘𑀓𑀧𑁆𑀧𑀁 𑀦𑀺𑀭𑀬𑀫𑁆𑀳𑀺 𑀧𑀘𑁆𑀘𑀢𑀺, 𑀓𑀧𑁆𑀧𑀁 𑀲𑀕𑁆𑀕𑀫𑁆𑀳𑀺 𑀫𑁄𑀤𑀢𑀻’’𑀢𑀺 (𑀘𑀽𑀴𑀯. 𑁩𑁫𑁪) 𑀏𑀢𑁆𑀣 𑀆𑀬𑀼𑀓𑀧𑁆𑀧𑁄. 𑀆𑀬𑀼𑀓𑀧𑁆𑀧𑀦𑀁 𑀆𑀬𑀼𑀯𑀺𑀥𑀸𑀦𑀁 𑀓𑀫𑁆𑀫𑀲𑁆𑀲 𑀯𑀺𑀧𑀸𑀓𑀯𑀲𑁂𑀦 𑀯𑀸 𑀯𑀲𑁆𑀲𑀕𑀡𑀦𑀸𑀬 𑀯𑀸 𑀆𑀬𑀼𑀧𑀭𑀺𑀘𑁆𑀙𑁂𑀤𑁄𑀢𑀺 𑀅𑀢𑁆𑀣𑁄. 𑀢𑁂𑀲𑀼 𑀫𑀳𑀸𑀓𑀧𑁆𑀧𑀁 𑀲𑀦𑁆𑀥𑀸𑀬 𑀧𑀼𑀘𑁆𑀙𑀢𑀺, 𑀇𑀢𑀭𑁄 𑀧𑀝𑀺𑀚𑀸𑀦𑀸𑀢𑀺.

𑀅𑀣 𑀦𑀁 𑀲𑀓𑀯𑀸𑀤𑀻 ‘‘𑀲𑀘𑁂 𑀢𑁂 𑀇𑀤𑁆𑀥𑀺𑀩𑀮𑁂𑀦 𑀲𑀫𑀦𑁆𑀦𑀸𑀕𑀢𑁄, ‘𑀬𑁄 𑀘𑀺𑀭𑀁 𑀚𑀻𑀯𑀢𑀺, 𑀲𑁄 𑀯𑀲𑁆𑀲𑀲𑀢𑀁 𑀅𑀧𑁆𑀧𑀁 𑀯𑀸 𑀪𑀺𑀬𑁆𑀬𑁄’𑀢𑀺 (𑀲𑀁. 𑀦𑀺. 𑁨.𑁧𑁪𑁩) 𑀏𑀯𑀁 𑀧𑀭𑀺𑀘𑁆𑀙𑀺𑀦𑁆𑀦𑀸 𑀆𑀬𑀼𑀓𑀧𑁆𑀧𑀸 𑀉𑀤𑁆𑀥𑀁 𑀫𑀳𑀸𑀓𑀧𑁆𑀧𑀁 𑀯𑀸 𑀫𑀳𑀸𑀓𑀧𑁆𑀧𑁂𑀓𑀤𑁂𑀲𑀁 𑀯𑀸 𑀚𑀻𑀯𑁂𑀬𑁆𑀬 𑀇𑀤𑁆𑀥𑀺𑀫𑀬𑀺𑀓𑁂𑀦𑀲𑁆𑀲 𑀆𑀬𑀼𑀦𑀸 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀘𑁄𑀤𑁂𑀢𑀼𑀁 𑀇𑀤𑁆𑀥𑀺𑀫𑀬𑀺𑀓𑁄 𑀲𑁄 𑀆𑀬𑀽𑀢𑀺𑀆𑀤𑀺𑀫𑀸𑀳. 𑀇𑀢𑀭𑁄 ‘‘𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀦𑀸𑀫 𑀇𑀤𑁆𑀥𑀺𑀫𑀬𑀺𑀓𑀁 𑀦𑀢𑁆𑀣𑀺, 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀫𑁂𑀯𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀧𑀝𑀺𑀓𑁆𑀔𑀺𑀧𑀢𑀺. 𑀓𑁄 𑀧𑀦𑁂𑀢𑁆𑀣 𑀇𑀤𑁆𑀥𑀺𑀫𑀢𑁄 𑀯𑀺𑀲𑁂𑀲𑁄, 𑀦𑀦𑀼 𑀅𑀦𑀺𑀤𑁆𑀥𑀺𑀫𑀸𑀧𑀺 𑀆𑀬𑀼𑀓𑀧𑁆𑀧𑀁 𑀢𑀺𑀝𑁆𑀞𑁂𑀬𑁆𑀬𑀸𑀢𑀺? 𑀅𑀬𑀁 𑀯𑀺𑀲𑁂𑀲𑁄 𑁋 𑀇𑀤𑁆𑀥𑀺𑀫𑀸 𑀳𑀺 𑀬𑀸𑀯𑀢𑀸𑀬𑀼𑀓𑀁 𑀚𑀻𑀯𑀺𑀢𑀧𑁆𑀧𑀯𑀢𑁆𑀢𑀺𑀬𑀸 𑀅𑀦𑁆𑀢𑀭𑀸𑀬𑀓𑀭𑁂 𑀥𑀫𑁆𑀫𑁂 𑀇𑀤𑁆𑀥𑀺𑀩𑀮𑁂𑀦 𑀧𑀝𑀺𑀩𑀸𑀳𑀺𑀢𑁆𑀯𑀸 𑀅𑀦𑁆𑀢𑀭𑀸 𑀅𑀓𑀸𑀮𑀫𑀭𑀡𑀁 𑀦𑀺𑀯𑀸𑀭𑁂𑀢𑀼𑀁 𑀲𑀓𑁆𑀓𑁄𑀢𑀺, 𑀅𑀦𑀺𑀤𑁆𑀥𑀺𑀫𑀢𑁄 𑀏𑀢𑀁 𑀩𑀮𑀁 𑀦𑀢𑁆𑀣𑀺. 𑀅𑀬𑀫𑁂𑀢𑁂𑀲𑀁 𑀯𑀺𑀲𑁂𑀲𑁄.

𑀅𑀢𑀻𑀢𑀁 𑀅𑀦𑀸𑀕𑀢𑀦𑁆𑀢𑀺 𑀇𑀤𑀁 𑀅𑀯𑀺𑀲𑁂𑀲𑁂𑀦 𑀓𑀧𑁆𑀧𑀁 𑀢𑀺𑀝𑁆𑀞𑁂𑀬𑁆𑀬𑀸𑀢𑀺 𑀧𑀝𑀺𑀜𑁆𑀜𑀸𑀢𑀢𑁆𑀢𑀸 𑀘𑁄𑀤𑁂𑀢𑀺. 𑀤𑁆𑀯𑁂 𑀓𑀧𑁆𑀧𑁂𑀢𑀺𑀆𑀤𑀺 ‘‘𑀬𑀤𑀺 𑀇𑀤𑁆𑀥𑀺𑀫𑀸 𑀚𑀻𑀯𑀺𑀢𑀧𑀭𑀺𑀘𑁆𑀙𑁂𑀤𑀁 𑀅𑀢𑀺𑀓𑁆𑀓𑀫𑀺𑀢𑀼𑀁 𑀲𑀓𑁆𑀓𑁄𑀢𑀺, 𑀦 𑀓𑁂𑀯𑀮𑀁 𑀏𑀓𑀁 𑀅𑀦𑁂𑀓𑁂𑀧𑀺 𑀓𑀧𑁆𑀧𑁂 𑀢𑀺𑀝𑁆𑀞𑁂𑀬𑁆𑀬𑀸’’𑀢𑀺 𑀘𑁄𑀤𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀉𑀧𑁆𑀧𑀦𑁆𑀦𑁄 𑀨𑀲𑁆𑀲𑁄𑀢𑀺𑀆𑀤𑀺 𑀦 𑀲𑀩𑁆𑀩𑀁 𑀇𑀤𑁆𑀥𑀺𑀬𑀸 𑀮𑀩𑁆𑀪𑀢𑀺, 𑀇𑀤𑁆𑀥𑀺𑀬𑀸 𑀅𑀯𑀺𑀲𑀬𑁄𑀧𑀺 𑀅𑀢𑁆𑀣𑀻𑀢𑀺 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀇𑀤𑁆𑀥𑀺𑀩𑀮𑀓𑀣𑀸𑀯𑀡𑁆𑀡𑀦𑀸.

𑁮. 𑀲𑀫𑀸𑀥𑀺𑀓𑀣𑀸𑀯𑀡𑁆𑀡𑀦𑀸

𑁬𑁨𑁫-𑁬𑁨𑁬. 𑀇𑀤𑀸𑀦𑀺 𑀲𑀫𑀸𑀥𑀺𑀓𑀣𑀸 𑀦𑀸𑀫 𑀳𑁄𑀢𑀺. 𑀢𑀢𑁆𑀣 𑀬𑁂𑀲𑀁 𑀏𑀓𑀘𑀺𑀢𑁆𑀢𑀓𑁆𑀔𑀡𑁂 𑀉𑀧𑁆𑀧𑀦𑁆𑀦𑀸𑀧𑀺 𑀏𑀓𑀕𑁆𑀕𑀢𑀸 𑀲𑀫𑀸𑀥𑀸𑀦𑀝𑁆𑀞𑁂𑀦 𑀲𑀫𑀸𑀥𑀻𑀢𑀺 𑀅𑀕𑁆𑀕𑀳𑁂𑀢𑁆𑀯𑀸 ‘‘𑀲𑀢𑁆𑀢 𑀭𑀢𑁆𑀢𑀺𑀦𑁆𑀤𑀺𑀯𑀸𑀦𑀺 𑀏𑀓𑀦𑁆𑀢𑀲𑀼𑀔𑀧𑀝𑀺𑀲𑀁𑀯𑁂𑀤𑀻 𑀯𑀺𑀳𑀭𑀺𑀢𑀼’’𑀦𑁆𑀢𑀺𑀆𑀤𑀺𑀯𑀘𑀦𑀁 (𑀫. 𑀦𑀺. 𑁧.𑁧𑁮𑁦) 𑀦𑀺𑀲𑁆𑀲𑀸𑀬 ‘‘𑀘𑀺𑀢𑁆𑀢𑀲𑀦𑁆𑀢𑀢𑀺 𑀲𑀫𑀸𑀥𑀻’’𑀢𑀺 𑀮𑀤𑁆𑀥𑀺, 𑀲𑁂𑀬𑁆𑀬𑀣𑀸𑀧𑀺 𑀲𑀩𑁆𑀩𑀢𑁆𑀣𑀺𑀯𑀸𑀤𑀸𑀦𑀜𑁆𑀘𑁂𑀯 𑀉𑀢𑁆𑀢𑀭𑀸𑀧𑀣𑀓𑀸𑀦𑀜𑁆𑀘; 𑀢𑁂 𑀲𑀦𑁆𑀥𑀸𑀬 𑀘𑀺𑀢𑁆𑀢𑀲𑀦𑁆𑀢𑀢𑀻𑀢𑀺 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀧𑀝𑀺𑀜𑁆𑀜𑀸 𑀇𑀢𑀭𑀲𑁆𑀲. 𑀅𑀣 𑀦𑀁 ‘‘𑀬𑀤𑀺 𑀘𑀺𑀢𑁆𑀢𑀲𑀦𑁆𑀢𑀢𑀺 𑀲𑀫𑀸𑀥𑀺, 𑀘𑀺𑀢𑁆𑀢𑀲𑀦𑁆𑀢𑀢𑀺 𑀦𑀸𑀫 𑀅𑀢𑀻𑀢𑀸𑀧𑀺 𑀅𑀢𑁆𑀣𑀺, 𑀅𑀦𑀸𑀕𑀢𑀸𑀧𑀺 𑀅𑀢𑁆𑀣𑀺. 𑀦 𑀳𑀺 𑀏𑀓𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀘𑀺𑀢𑁆𑀢𑀫𑁂𑀯 𑀘𑀺𑀢𑁆𑀢𑀲𑀦𑁆𑀢𑀢𑀺 𑀦𑀸𑀫 𑀳𑁄𑀢𑀺, 𑀓𑀺𑀁 𑀢𑁂 𑀲𑀩𑁆𑀩𑀸𑀧𑀺 𑀲𑀸 𑀲𑀫𑀸𑀥𑀻’’𑀢𑀺 𑀘𑁄𑀤𑁂𑀢𑀼𑀁 𑀅𑀢𑀻𑀢𑀸𑀢𑀺𑀆𑀤𑀺𑀫𑀸𑀳, 𑀇𑀢𑀭𑁄 𑀢𑀣𑀸 𑀅𑀦𑀺𑀘𑁆𑀙𑀦𑁆𑀢𑁄 𑀧𑀝𑀺𑀓𑁆𑀔𑀺𑀧𑀢𑀺.

𑀦𑀦𑀼 𑀅𑀢𑀻𑀢𑀁 𑀦𑀺𑀭𑀼𑀤𑁆𑀥𑀦𑁆𑀢𑀺𑀆𑀤𑀺 ‘‘𑀘𑀺𑀢𑁆𑀢𑀲𑀦𑁆𑀢𑀢𑀺𑀬𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀫𑁂𑀯 𑀘𑀺𑀢𑁆𑀢𑀁 𑀓𑀺𑀘𑁆𑀘𑀓𑀭𑀁, 𑀅𑀢𑀻𑀢𑀸𑀦𑀸𑀕𑀢𑀁 𑀦𑀺𑀭𑀼𑀤𑁆𑀥𑀢𑁆𑀢𑀸 𑀅𑀦𑀼𑀧𑁆𑀧𑀦𑁆𑀦𑀢𑁆𑀢𑀸 𑀘 𑀦𑀢𑁆𑀣𑀺, 𑀓𑀣𑀁 𑀢𑀁 𑀲𑀫𑀸𑀥𑀺 𑀦𑀸𑀫 𑀳𑁄𑀢𑀻’’𑀢𑀺 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁. 𑀏𑀓𑀘𑀺𑀢𑁆𑀢𑀓𑁆𑀔𑀡𑀺𑀓𑁄𑀢𑀺 𑀧𑀼𑀘𑁆𑀙𑀸 𑀧𑀭𑀯𑀸𑀤𑀺𑀲𑁆𑀲. 𑀢𑀢𑁄 𑀬𑀸 𑀲𑀓𑀲𑀫𑀬𑁂 ‘‘𑀲𑀫𑀸𑀥𑀺𑀁, 𑀪𑀺𑀓𑁆𑀔𑀯𑁂, 𑀪𑀸𑀯𑁂𑀣𑀸’’𑀢𑀺𑀆𑀤𑀻𑀲𑀼 𑀧𑀘𑁆𑀘𑀼𑀧𑁆𑀧𑀦𑁆𑀦𑀓𑀼𑀲𑀮𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀸 𑀏𑀓𑀕𑁆𑀕𑀢𑀸 𑀲𑀫𑀸𑀥𑀻𑀢𑀺 𑀯𑀼𑀢𑁆𑀢𑀸, 𑀢𑀁 𑀲𑀦𑁆𑀥𑀸𑀬 𑀧𑀝𑀺𑀜𑁆𑀜𑀸 𑀲𑀓𑀯𑀸𑀤𑀺𑀲𑁆𑀲. 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑀫𑀗𑁆𑀕𑀻𑀢𑀺𑀆𑀤𑀺 ‘‘𑀏𑀓𑀘𑀺𑀢𑁆𑀢𑀓𑁆𑀔𑀡𑀺𑀓𑁄’’𑀢𑀺 𑀯𑀘𑀦𑀫𑀢𑁆𑀢𑀁 𑀕𑀳𑁂𑀢𑁆𑀯𑀸 𑀙𑀮𑁂𑀦 𑀯𑀼𑀢𑁆𑀢𑀁, 𑀢𑁂𑀦𑁂𑀯 𑀲𑀓𑀯𑀸𑀤𑀺𑀦𑀸 𑀧𑀝𑀺𑀓𑁆𑀔𑀺𑀢𑁆𑀢𑀁. 𑀦𑀦𑀼 𑀯𑀼𑀢𑁆𑀢𑀁 𑀪𑀕𑀯𑀢𑀸𑀢𑀺 𑀲𑀼𑀢𑁆𑀢𑀁 𑀧𑀼𑀭𑀺𑀫𑀧𑀘𑁆𑀙𑀺𑀫𑀯𑀲𑁂𑀦 𑀧𑀯𑀢𑁆𑀢𑀫𑀸𑀦𑀲𑁆𑀲 𑀲𑀫𑀸𑀥𑀺𑀲𑁆𑀲 𑀅𑀩𑁆𑀩𑁄𑀓𑀺𑀡𑁆𑀡𑀢𑀁 𑀲𑀸𑀥𑁂𑀢𑀺, 𑀦 𑀲𑀦𑁆𑀢𑀢𑀺𑀬𑀸 𑀲𑀫𑀸𑀥𑀺𑀪𑀸𑀯𑀁, 𑀢𑀲𑁆𑀫𑀸 𑀅𑀲𑀸𑀥𑀓𑀦𑁆𑀢𑀺.

𑀲𑀫𑀸𑀥𑀺𑀓𑀣𑀸𑀯𑀡𑁆𑀡𑀦𑀸.

𑁯. 𑀥𑀫𑁆𑀫𑀝𑁆𑀞𑀺𑀢𑀢𑀸𑀓𑀣𑀸𑀯𑀡𑁆𑀡𑀦𑀸

𑁬𑁨𑁭. 𑀇𑀤𑀸𑀦𑀺 𑀥𑀫𑁆𑀫𑀝𑁆𑀞𑀺𑀢𑀢𑀸𑀓𑀣𑀸 𑀦𑀸𑀫 𑀳𑁄𑀢𑀺. 𑀢𑀢𑁆𑀣 ‘‘𑀞𑀺𑀢𑀸𑀯 𑀲𑀸 𑀥𑀸𑀢𑀽’’𑀢𑀺 𑀯𑀘𑀦𑀁 𑀦𑀺𑀲𑁆𑀲𑀸𑀬 ‘‘𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀲𑀗𑁆𑀔𑀸𑀢𑀸 𑀥𑀫𑁆𑀫𑀝𑁆𑀞𑀺𑀢𑀢𑀸 𑀦𑀸𑀫 𑀏𑀓𑀸 𑀅𑀢𑁆𑀣𑀺, 𑀲𑀸 𑀘 𑀧𑀭𑀺𑀦𑀺𑀧𑁆𑀨𑀦𑁆𑀦𑀸’’𑀢𑀺 𑀬𑁂𑀲𑀁 𑀮𑀤𑁆𑀥𑀺, 𑀲𑁂𑀬𑁆𑀬𑀣𑀸𑀧𑀺 𑀅𑀦𑁆𑀥𑀓𑀸𑀦𑀁; 𑀢𑁂 𑀲𑀦𑁆𑀥𑀸𑀬 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀧𑀝𑀺𑀜𑁆𑀜𑀸 𑀇𑀢𑀭𑀲𑁆𑀲. 𑀅𑀣 𑀦𑀁 ‘‘𑀬𑀤𑀺 𑀧𑀭𑀺𑀦𑀺𑀧𑁆𑀨𑀦𑁆𑀦𑀸𑀦𑀁 𑀅𑀯𑀺𑀚𑁆𑀚𑀸𑀤𑀻𑀦𑀁 𑀅𑀜𑁆𑀜𑀸 𑀥𑀫𑁆𑀫𑀝𑁆𑀞𑀺𑀢𑀢𑀸 𑀦𑀸𑀫 𑀧𑀭𑀺𑀦𑀺𑀧𑁆𑀨𑀦𑁆𑀦𑀸 𑀅𑀢𑁆𑀣𑀺, 𑀢𑀸𑀬𑀧𑀺 𑀘 𑀢𑁂 𑀥𑀫𑁆𑀫𑀝𑁆𑀞𑀺𑀢𑀢𑀸𑀬 𑀅𑀜𑁆𑀜𑀸 𑀞𑀺𑀢𑀢𑀸 𑀧𑀭𑀺𑀦𑀺𑀧𑁆𑀨𑀦𑁆𑀦𑀸 𑀆𑀧𑀚𑁆𑀚𑀢𑀻’’𑀢𑀺 𑀘𑁄𑀤𑁂𑀢𑀼𑀁 𑀢𑀸𑀬 𑀞𑀺𑀢𑀢𑀸𑀢𑀺𑀆𑀤𑀺𑀫𑀸𑀳. 𑀧𑀭𑀯𑀸𑀤𑀻 𑀏𑀯𑀭𑀽𑀧𑀸𑀬 𑀮𑀤𑁆𑀥𑀺𑀬𑀸 𑀅𑀪𑀸𑀯𑁂𑀦 𑀧𑀝𑀺𑀓𑁆𑀔𑀺𑀧𑀢𑀺. 𑀤𑀼𑀢𑀺𑀬𑀁 𑀧𑀼𑀝𑁆𑀞𑁄 𑀅𑀦𑀦𑁆𑀢𑀭𑀧𑀘𑁆𑀘𑀬𑀢𑀜𑁆𑀘𑁂𑀯 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀢𑀜𑁆𑀘 𑀲𑀦𑁆𑀥𑀸𑀬 𑀧𑀝𑀺𑀚𑀸𑀦𑀸𑀢𑀺. 𑀲𑁂𑀲𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀢𑁆𑀢𑀸 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀥𑀫𑁆𑀫𑀝𑁆𑀞𑀺𑀢𑀢𑀸𑀓𑀣𑀸𑀯𑀡𑁆𑀡𑀦𑀸.

𑁧𑁦. 𑀅𑀦𑀺𑀘𑁆𑀘𑀢𑀸𑀓𑀣𑀸𑀯𑀡𑁆𑀡𑀦𑀸

𑁬𑁨𑁮. 𑀇𑀤𑀸𑀦𑀺 𑀅𑀦𑀺𑀘𑁆𑀘𑀢𑀸𑀓𑀣𑀸 𑀦𑀸𑀫 𑀳𑁄𑀢𑀺. 𑀢𑀢𑁆𑀣 ‘‘𑀅𑀦𑀺𑀘𑁆𑀘𑀸𑀦𑀁 𑀭𑀽𑀧𑀸𑀤𑀻𑀦𑀁 𑀅𑀦𑀺𑀘𑁆𑀘𑀢𑀸𑀧𑀺 𑀭𑀽𑀧𑀸𑀤𑀬𑁄 𑀯𑀺𑀬 𑀧𑀭𑀺𑀦𑀺𑀧𑁆𑀨𑀦𑁆𑀦𑀸’’𑀢𑀺 𑀬𑁂𑀲𑀁 𑀮𑀤𑁆𑀥𑀺, 𑀲𑁂𑀬𑁆𑀬𑀣𑀸𑀧𑀺 𑀅𑀦𑁆𑀥𑀓𑀸𑀦𑀁; 𑀢𑁂 𑀲𑀦𑁆𑀥𑀸𑀬 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀧𑀝𑀺𑀜𑁆𑀜𑀸 𑀇𑀢𑀭𑀲𑁆𑀲. 𑀅𑀣 𑀦𑀁 ‘‘𑀬𑀤𑀺 𑀢𑁂 𑀭𑀽𑀧𑀸𑀤𑀬𑁄 𑀯𑀺𑀬 𑀅𑀦𑀺𑀘𑁆𑀘𑀢𑀸 𑀧𑀭𑀺𑀦𑀺𑀧𑁆𑀨𑀦𑁆𑀦𑀸, 𑀢𑀲𑁆𑀲𑀸𑀧𑀺 𑀅𑀜𑁆𑀜𑀸𑀬 𑀧𑀭𑀺𑀦𑀺𑀧𑁆𑀨𑀦𑁆𑀦𑀸𑀬 𑀅𑀦𑀺𑀘𑁆𑀘𑀢𑀸𑀬 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀘𑁄𑀤𑁂𑀢𑀼𑀁 𑀢𑀸𑀬 𑀅𑀦𑀺𑀘𑁆𑀘𑀢𑀸𑀬𑀸𑀢𑀺𑀆𑀤𑀺𑀫𑀸𑀳. 𑀇𑀢𑀭𑁄 𑀤𑁆𑀯𑀺𑀦𑁆𑀦𑀁 𑀅𑀦𑀺𑀘𑁆𑀘𑀢𑀸𑀬 𑀏𑀓𑀢𑁄 𑀅𑀪𑀸𑀯𑁂𑀦 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀧𑀼𑀦 𑀬𑀲𑁆𑀫𑀸 𑀲𑀸 𑀅𑀦𑀺𑀘𑁆𑀘𑀢𑀸 𑀦𑀺𑀘𑁆𑀘𑀸 𑀦 𑀳𑁄𑀢𑀺, 𑀢𑁂𑀦𑁂𑀯 𑀅𑀦𑀺𑀘𑁆𑀘𑁂𑀦 𑀲𑀤𑁆𑀥𑀺𑀁 𑀅𑀦𑁆𑀢𑀭𑀥𑀸𑀬𑀢𑀺, 𑀢𑀲𑁆𑀫𑀸 𑀧𑀝𑀺𑀚𑀸𑀦𑀸𑀢𑀺. 𑀅𑀣𑀲𑁆𑀲 𑀲𑀓𑀯𑀸𑀤𑀻 𑀮𑁂𑀲𑁄𑀓𑀸𑀲𑀁 𑀅𑀤𑀢𑁆𑀯𑀸 𑀬𑀸 𑀢𑁂𑀦 𑀤𑀼𑀢𑀺𑀬𑀸 𑀅𑀦𑀺𑀘𑁆𑀘𑀢𑀸 𑀧𑀝𑀺𑀜𑁆𑀜𑀸𑀢𑀸, 𑀢𑀸𑀬𑀧𑀺 𑀢𑀢𑁄 𑀧𑀭𑀸𑀬𑀧𑀻𑀢𑀺 𑀧𑀭𑀫𑁆𑀧𑀭𑀯𑀲𑁂𑀦 𑀅𑀦𑀼𑀧𑀘𑁆𑀙𑁂𑀤𑀤𑁄𑀲𑀁 𑀆𑀭𑁄𑀧𑁂𑀦𑁆𑀢𑁄 𑀢𑀸𑀬 𑀢𑀸𑀬𑁂𑀯𑀸𑀢𑀺𑀆𑀤𑀺𑀫𑀸𑀳. 𑀚𑀭𑀸 𑀧𑀭𑀺𑀦𑀺𑀧𑁆𑀨𑀦𑁆𑀦𑀸𑀢𑀺𑀆𑀤𑀺 𑀬𑀲𑁆𑀫𑀸 𑀉𑀧𑁆𑀧𑀦𑁆𑀦𑀲𑁆𑀲 𑀚𑀭𑀸𑀫𑀭𑀡𑀢𑁄 𑀅𑀜𑁆𑀜𑀸 𑀅𑀦𑀺𑀘𑁆𑀘𑀢𑀸 𑀦𑀸𑀫 𑀦𑀢𑁆𑀣𑀺, 𑀢𑀲𑁆𑀫𑀸 𑀅𑀦𑀺𑀘𑁆𑀘𑀢𑀸𑀯𑀺𑀪𑀸𑀕𑀸𑀦𑀼𑀬𑀼𑀜𑁆𑀚𑀦𑀯𑀲𑁂𑀦 𑀯𑀼𑀢𑁆𑀢𑀁. 𑀢𑀢𑁆𑀭𑀸𑀧𑀺 𑀧𑀭𑀯𑀸𑀤𑀺𑀦𑁄 𑀧𑀼𑀭𑀺𑀫𑀦𑀬𑁂𑀦𑁂𑀯 𑀧𑀝𑀺𑀜𑁆𑀜𑀸 𑀘 𑀧𑀝𑀺𑀓𑁆𑀔𑁂𑀧𑁄 𑀘 𑀯𑁂𑀤𑀺𑀢𑀩𑁆𑀩𑁄.

𑁬𑁨𑁯. 𑀭𑀽𑀧𑀁 𑀧𑀭𑀺𑀦𑀺𑀧𑁆𑀨𑀦𑁆𑀦𑀦𑁆𑀢𑀺𑀆𑀤𑀺 𑀬𑁂𑀲𑀁 𑀲𑀸 𑀅𑀦𑀺𑀘𑁆𑀘𑀢𑀸, 𑀢𑁂𑀳𑀺 𑀲𑀤𑁆𑀥𑀺𑀁 𑀲𑀁𑀲𑀦𑁆𑀤𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀢𑀢𑁆𑀣 ‘‘𑀬𑀣𑀸 𑀧𑀭𑀺𑀦𑀺𑀧𑁆𑀨𑀦𑁆𑀦𑀸𑀦𑀁 𑀭𑀽𑀧𑀸𑀤𑀻𑀦𑀁 𑀅𑀦𑀺𑀘𑁆𑀘𑀢𑀸𑀚𑀭𑀸𑀫𑀭𑀡𑀸𑀦𑀺 𑀅𑀢𑁆𑀣𑀺, 𑀏𑀯𑀁 𑀧𑀭𑀺𑀦𑀺𑀧𑁆𑀨𑀦𑁆𑀦𑀸𑀦𑀁 𑀅𑀦𑀺𑀘𑁆𑀘𑀢𑀸𑀤𑀻𑀦𑀁 𑀢𑀸𑀦𑀺 𑀦𑀢𑁆𑀣𑀻’’𑀢𑀺 𑀫𑀜𑁆𑀜𑀫𑀸𑀦𑁄 𑀏𑀓𑀦𑁆𑀢𑁂𑀦 𑀧𑀝𑀺𑀓𑁆𑀔𑀺𑀧𑀢𑀺𑀬𑁂𑀯𑀸𑀢𑀺.

𑀅𑀦𑀺𑀘𑁆𑀘𑀢𑀸𑀓𑀣𑀸𑀯𑀡𑁆𑀡𑀦𑀸.

𑀏𑀓𑀸𑀤𑀲𑀫𑁄 𑀯𑀕𑁆𑀕𑁄.