𑁧𑁦. 𑀤𑀲𑀫𑀯𑀕𑁆𑀕𑁄

𑁧. 𑀦𑀺𑀭𑁄𑀥𑀓𑀣𑀸𑀯𑀡𑁆𑀡𑀦𑀸

𑁫𑁭𑁧-𑁫𑁭𑁨. 𑀇𑀤𑀸𑀦𑀺 𑀦𑀺𑀭𑁄𑀥𑀓𑀣𑀸 𑀦𑀸𑀫 𑀳𑁄𑀢𑀺. 𑀢𑀢𑁆𑀣 𑀬𑁂𑀲𑀁 ‘‘𑀉𑀧𑀧𑀢𑁆𑀢𑁂𑀲𑀺𑀬𑀦𑁆𑀢𑀺 𑀲𑀗𑁆𑀔𑀁 𑀕𑀢𑀲𑁆𑀲 𑀪𑀯𑀗𑁆𑀕𑀘𑀺𑀢𑁆𑀢𑀲𑁆𑀲 𑀪𑀗𑁆𑀕𑀓𑁆𑀔𑀡𑁂𑀦 𑀲𑀳𑁂𑀯 𑀓𑀺𑀭𑀺𑀬𑀸𑀢𑀺 𑀲𑀗𑁆𑀔𑀁 𑀕𑀢𑀸 𑀓𑀼𑀲𑀮𑀸 𑀯𑀸 𑀅𑀓𑀼𑀲𑀮𑀸 𑀯𑀸 𑀘𑀢𑁆𑀢𑀸𑀭𑁄 𑀔𑀦𑁆𑀥𑀸 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀜𑁆𑀘𑀸𑀢𑀺 𑀧𑀜𑁆𑀘𑀓𑁆𑀔𑀦𑁆𑀥𑀸 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀢𑁂𑀲𑀼 𑀳𑀺 𑀅𑀦𑀼𑀧𑁆𑀧𑀦𑁆𑀦𑁂𑀲𑀼 𑀪𑀯𑀗𑁆𑀕𑁂 𑀦𑀺𑀭𑀼𑀤𑁆𑀥𑁂 𑀲𑀦𑁆𑀢𑀢𑀺𑀯𑀺𑀘𑁆𑀙𑁂𑀤𑁄 𑀪𑀯𑁂𑀬𑁆𑀬𑀸’’𑀢𑀺 𑀮𑀤𑁆𑀥𑀺, 𑀲𑁂𑀬𑁆𑀬𑀣𑀸𑀧𑀺 𑀅𑀦𑁆𑀥𑀓𑀸𑀦𑀁; 𑀢𑁂 𑀲𑀦𑁆𑀥𑀸𑀬 𑀉𑀧𑀧𑀢𑁆𑀢𑁂𑀲𑀺𑀬𑁂𑀢𑀺 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀧𑀝𑀺𑀜𑁆𑀜𑀸 𑀇𑀢𑀭𑀲𑁆𑀲. 𑀢𑀢𑁆𑀣 𑀉𑀧𑀧𑀢𑁆𑀢𑁂𑀲𑀺𑀬𑁂𑀢𑀺 𑀘𑀢𑀽𑀲𑀼𑀧𑀺 𑀧𑀤𑁂𑀲𑀼 𑀩𑀳𑀼𑀯𑀘𑀦𑀪𑀼𑀫𑁆𑀫𑀢𑁆𑀣𑁂 𑀏𑀓𑀯𑀘𑀦𑀪𑀼𑀫𑁆𑀫𑀁. 𑀉𑀧𑀧𑀢𑁆𑀢𑁂𑀲𑀺𑀬𑁂𑀲𑀼 𑀧𑀜𑁆𑀘𑀲𑀼 𑀔𑀦𑁆𑀥𑁂𑀲𑀼 𑀅𑀦𑀺𑀭𑀼𑀤𑁆𑀥𑁂𑀲𑀽𑀢𑀺 𑀅𑀬𑀜𑁆𑀳𑁂𑀢𑁆𑀣 𑀅𑀢𑁆𑀣𑁄. 𑀤𑀲𑀦𑁆𑀦𑀦𑁆𑀢𑀺 𑀉𑀧𑀧𑀢𑁆𑀢𑁂𑀲𑀺𑀬𑀔𑀦𑁆𑀥𑀸𑀦𑀜𑁆𑀘 𑀓𑀺𑀭𑀺𑀬𑀔𑀦𑁆𑀥𑀸𑀦𑀜𑁆𑀘 𑀯𑀲𑁂𑀦 𑀯𑀼𑀢𑁆𑀢𑀁. 𑀢𑀢𑁆𑀣 𑀧𑀞𑀫𑀧𑀜𑁆𑀳𑁂 𑀔𑀦𑁆𑀥𑀮𑀓𑁆𑀔𑀡𑀯𑀲𑁂𑀦 𑀓𑀺𑀭𑀺𑀬𑀯𑀲𑁂𑀦 𑀘 𑀧𑀜𑁆𑀘𑁂𑀯 𑀦𑀸𑀫 𑀢𑁂 𑀔𑀦𑁆𑀥𑀸𑀢𑀺 𑀧𑀝𑀺𑀓𑁆𑀔𑀺𑀧𑀢𑀺. 𑀤𑀼𑀢𑀺𑀬𑀧𑀜𑁆𑀳𑁂 𑀧𑀼𑀭𑀺𑀫𑀧𑀘𑁆𑀙𑀺𑀫𑀯𑀲𑁂𑀦 𑀉𑀧𑀧𑀢𑁆𑀢𑁂𑀲𑀺𑀬𑀓𑀺𑀭𑀺𑀬𑀯𑀲𑁂𑀦 𑀘 𑀦𑀸𑀦𑀢𑁆𑀢𑀁 𑀲𑀦𑁆𑀥𑀸𑀬 𑀧𑀝𑀺𑀚𑀸𑀦𑀸𑀢𑀺. 𑀤𑁆𑀯𑀺𑀦𑁆𑀦𑀁 𑀧𑀦 𑀨𑀲𑁆𑀲𑀸𑀦𑀁 𑀘𑀺𑀢𑁆𑀢𑀸𑀦𑀜𑁆𑀘 𑀲𑀫𑁄𑀥𑀸𑀦𑀁 𑀧𑀼𑀝𑁆𑀞𑁄 𑀲𑀼𑀢𑁆𑀢𑀮𑁂𑀲𑀸𑀪𑀸𑀯𑁂𑀦 𑀧𑀝𑀺𑀓𑁆𑀔𑀺𑀧𑀢𑀺.

𑀓𑀺𑀭𑀺𑀬𑀸 𑀘𑀢𑁆𑀢𑀸𑀭𑁄𑀢𑀺 𑀭𑀽𑀧𑁂𑀦 𑀯𑀺𑀦𑀸 𑀓𑀼𑀲𑀮𑀸 𑀅𑀓𑀼𑀲𑀮𑀸 𑀯𑀸 𑀘𑀢𑁆𑀢𑀸𑀭𑁄 𑀕𑀳𑀺𑀢𑀸. 𑀓𑀺𑀭𑀺𑀬𑀸𑀜𑀸𑀡𑀦𑁆𑀢𑀺 𑀧𑀭𑀯𑀸𑀤𑀺𑀦𑀸 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑀫𑀗𑁆𑀕𑀺𑀓𑁆𑀔𑀡𑁂 𑀅𑀭𑀳𑀢𑁄 𑀅𑀦𑀼𑀜𑁆𑀜𑀸𑀢𑀁 𑀅𑀦𑀸𑀭𑀫𑁆𑀫𑀡𑀜𑀸𑀡𑀁. 𑀦𑀺𑀭𑀼𑀤𑁆𑀥𑁂 𑀫𑀕𑁆𑀕𑁄 𑀉𑀧𑁆𑀧𑀚𑁆𑀚𑀢𑀻𑀢𑀺 𑀧𑀼𑀘𑁆𑀙𑀸 𑀧𑀭𑀯𑀸𑀤𑀺𑀲𑁆𑀲, 𑀅𑀦𑀺𑀭𑀼𑀤𑁆𑀥𑁂 𑀅𑀦𑀼𑀧𑁆𑀧𑀚𑁆𑀚𑀦𑀢𑁄 𑀧𑀝𑀺𑀜𑁆𑀜𑀸 𑀲𑀓𑀯𑀸𑀤𑀺𑀲𑁆𑀲. 𑀫𑀢𑁄 𑀫𑀕𑁆𑀕𑀁 𑀪𑀸𑀯𑁂𑀢𑀻𑀢𑀺 𑀙𑀮𑁂𑀦 𑀧𑀼𑀘𑁆𑀙𑀸 𑀧𑀭𑀯𑀸𑀤𑀺𑀲𑁆𑀲. 𑀬𑀲𑁆𑀫𑀸 𑀧𑀦 𑀧𑀝𑀺𑀲𑀦𑁆𑀥𑀺𑀢𑁄 𑀬𑀸𑀯 𑀘𑀼𑀢𑀺𑀘𑀺𑀢𑁆𑀢𑀸 𑀲𑀢𑁆𑀢𑁄 𑀚𑀻𑀯𑀢𑀺𑀬𑁂𑀯 𑀦𑀸𑀫, 𑀢𑀲𑁆𑀫𑀸 𑀲𑀓𑀯𑀸𑀤𑀻 𑀦 𑀳𑁂𑀯𑀦𑁆𑀢𑀺 𑀧𑀝𑀺𑀓𑁆𑀔𑀺𑀧𑀢𑀺.

𑀦𑀺𑀭𑁄𑀥𑀓𑀣𑀸𑀯𑀡𑁆𑀡𑀦𑀸.

𑁨. 𑀭𑀽𑀧𑀁𑀫𑀕𑁆𑀕𑁄𑀢𑀺𑀓𑀣𑀸𑀯𑀡𑁆𑀡𑀦𑀸

𑁫𑁭𑁩-𑁫𑁭𑁫. 𑀇𑀤𑀸𑀦𑀺 𑀭𑀽𑀧𑀁 𑀫𑀕𑁆𑀕𑁄𑀢𑀺𑀓𑀣𑀸 𑀦𑀸𑀫 𑀳𑁄𑀢𑀺. 𑀢𑀢𑁆𑀣 𑀬𑁂𑀲𑀁 ‘‘𑀲𑀫𑁆𑀫𑀸𑀯𑀸𑀘𑀸𑀓𑀫𑁆𑀫𑀦𑁆𑀢𑀸𑀚𑀻𑀯𑀸 𑀭𑀽𑀧’’𑀦𑁆𑀢𑀺 𑀮𑀤𑁆𑀥𑀺, 𑀲𑁂𑀬𑁆𑀬𑀣𑀸𑀧𑀺 𑀫𑀳𑀺𑀲𑀸𑀲𑀓𑀲𑀫𑁆𑀫𑀺𑀢𑀺𑀬𑀫𑀳𑀸𑀲𑀁𑀖𑀺𑀓𑀸𑀦𑀁; 𑀢𑁂 𑀲𑀦𑁆𑀥𑀸𑀬 𑀫𑀕𑁆𑀕𑀲𑀫𑀗𑁆𑀕𑀺𑀲𑁆𑀲𑀸𑀢𑀺 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀧𑀝𑀺𑀜𑁆𑀜𑀸 𑀇𑀢𑀭𑀲𑁆𑀲. 𑀅𑀣 𑀦𑀁 ‘‘𑀬𑀤𑀺 𑀢𑁂 𑀲𑀫𑁆𑀫𑀸𑀯𑀸𑀘𑀸𑀤𑀬𑁄 𑀭𑀽𑀧𑀁, 𑀦 𑀯𑀺𑀭𑀢𑀺𑀬𑁄, 𑀬𑀣𑀸 𑀲𑀫𑁆𑀫𑀸𑀤𑀺𑀝𑁆𑀞𑀸𑀤𑀺𑀫𑀕𑁆𑀕𑁄 𑀲𑀸𑀭𑀫𑁆𑀫𑀡𑀸𑀤𑀺𑀲𑀪𑀸𑀯𑁄, 𑀏𑀯𑀁 𑀢𑀫𑁆𑀧𑀺 𑀭𑀽𑀧𑀁 𑀲𑀺𑀬𑀸’’𑀢𑀺 𑀘𑁄𑀤𑁂𑀢𑀼𑀁 𑀲𑀸𑀭𑀫𑁆𑀫𑀡𑁄𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀧𑀝𑀺𑀓𑁆𑀔𑁂𑀧𑁄 𑀘 𑀧𑀝𑀺𑀜𑁆𑀜𑀸 𑀘 𑀧𑀭𑀯𑀸𑀤𑀺𑀦𑁄 𑀮𑀤𑁆𑀥𑀺𑀅𑀦𑀼𑀭𑀽𑀧𑁂𑀦 𑀯𑁂𑀤𑀺𑀢𑀩𑁆𑀩𑀸. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀭𑀽𑀧𑀁 𑀫𑀕𑁆𑀕𑁄𑀢𑀺𑀓𑀣𑀸𑀯𑀡𑁆𑀡𑀦𑀸.

𑁩. 𑀧𑀜𑁆𑀘𑀯𑀺𑀜𑁆𑀜𑀸𑀡𑀲𑀫𑀗𑁆𑀕𑀺𑀲𑁆𑀲 𑀫𑀕𑁆𑀕𑀓𑀣𑀸𑀯𑀡𑁆𑀡𑀦𑀸

𑁫𑁭𑁬. 𑀇𑀤𑀸𑀦𑀺 𑀧𑀜𑁆𑀘𑀯𑀺𑀜𑁆𑀜𑀸𑀡𑀲𑀫𑀗𑁆𑀕𑀺𑀲𑁆𑀲 𑀫𑀕𑁆𑀕𑀓𑀣𑀸 𑀦𑀸𑀫 𑀳𑁄𑀢𑀺. 𑀢𑀢𑁆𑀣 𑀬𑁂𑀲𑀁 ‘‘𑀘𑀓𑁆𑀔𑀼𑀦𑀸 𑀭𑀽𑀧𑀁 𑀤𑀺𑀲𑁆𑀯𑀸 𑀦 𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑀻 𑀳𑁄𑀢𑀻’’𑀢𑀺 𑀲𑀼𑀢𑁆𑀢𑀁 𑀦𑀺𑀲𑁆𑀲𑀸𑀬 ‘‘𑀧𑀜𑁆𑀘𑀯𑀺𑀜𑁆𑀜𑀸𑀡𑀲𑀫𑀗𑁆𑀕𑀺𑀲𑁆𑀲 𑀅𑀢𑁆𑀣𑀺 𑀫𑀕𑁆𑀕𑀪𑀸𑀯𑀦𑀸’’𑀢𑀺 𑀮𑀤𑁆𑀥𑀺, 𑀲𑁂𑀬𑁆𑀬𑀣𑀸𑀧𑀺 𑀫𑀳𑀸𑀲𑀁𑀖𑀺𑀓𑀸𑀦𑀁, 𑀢𑁂 𑀲𑀦𑁆𑀥𑀸𑀬 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀧𑀝𑀺𑀜𑁆𑀜𑀸 𑀇𑀢𑀭𑀲𑁆𑀲. 𑀅𑀣 𑀦𑀁 ‘‘𑀲𑀘𑁂 𑀢𑀲𑁆𑀲 𑀫𑀕𑁆𑀕𑀪𑀸𑀯𑀦𑀸 𑀅𑀢𑁆𑀣𑀺, 𑀧𑀜𑁆𑀘𑀯𑀺𑀜𑁆𑀜𑀸𑀡𑀕𑀢𑀺𑀓𑁂𑀦 𑀯𑀸 𑀫𑀕𑁆𑀕𑁂𑀦, 𑀫𑀕𑁆𑀕𑀕𑀢𑀺𑀓𑁂𑀳𑀺 𑀯𑀸 𑀧𑀜𑁆𑀘𑀯𑀺𑀜𑁆𑀜𑀸𑀡𑁂𑀳𑀺 𑀪𑀯𑀺𑀢𑀩𑁆𑀩𑀁, 𑀦 𑀘 𑀢𑀸𑀦𑀺 𑀫𑀕𑁆𑀕𑀕𑀢𑀺𑀓𑀸𑀦𑀺 𑀅𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀢𑁆𑀢𑀸 𑀅𑀮𑁄𑀓𑀼𑀢𑁆𑀢𑀭𑀢𑁆𑀢𑀸 𑀘, 𑀦 𑀫𑀕𑁆𑀕𑁄 𑀧𑀜𑁆𑀘𑀯𑀺𑀜𑁆𑀜𑀸𑀡𑀕𑀢𑀺𑀓𑁄 𑀢𑁂𑀲𑀁 𑀮𑀓𑁆𑀔𑀡𑁂𑀦 𑀅𑀲𑀗𑁆𑀕𑀳𑀺𑀢𑀢𑁆𑀢𑀸’’𑀢𑀺 𑀘𑁄𑀤𑁂𑀢𑀼𑀁 𑀦𑀦𑀼 𑀧𑀜𑁆𑀘𑀯𑀺𑀜𑁆𑀜𑀸𑀡𑀸 𑀉𑀧𑁆𑀧𑀦𑁆𑀦𑀯𑀢𑁆𑀣𑀼𑀓𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀭𑀸𑀬𑀁 𑀅𑀥𑀺𑀧𑁆𑀧𑀸𑀬𑁄 𑁋 𑀬𑀤𑀺 𑀧𑀜𑁆𑀘𑀯𑀺𑀜𑁆𑀜𑀸𑀡𑀲𑀫𑀗𑁆𑀕𑀺𑀲𑁆𑀲 𑀫𑀕𑁆𑀕𑀪𑀸𑀯𑀦𑀸 𑀲𑀺𑀬𑀸, 𑀬𑁂𑀦 𑀫𑀦𑁄𑀯𑀺𑀜𑁆𑀜𑀸𑀡𑁂𑀦 𑀫𑀕𑁆𑀕𑁄 𑀲𑀫𑁆𑀧𑀬𑀼𑀢𑁆𑀢𑁄, 𑀢𑀫𑁆𑀧𑀺 𑀧𑀜𑁆𑀘𑀯𑀺𑀜𑁆𑀜𑀸𑀡𑀲𑀫𑀗𑁆𑀕𑀺𑀲𑁆𑀲 𑀲𑀺𑀬𑀸. 𑀏𑀯𑀁 𑀲𑀦𑁆𑀢𑁂 𑀬𑀤𑀺𑀤𑀁 ‘‘𑀧𑀜𑁆𑀘𑀯𑀺𑀜𑁆𑀜𑀸𑀡𑀸 𑀉𑀧𑁆𑀧𑀦𑁆𑀦𑀯𑀢𑁆𑀣𑀼𑀓𑀸’’𑀢𑀺𑀆𑀤𑀺 𑀮𑀓𑁆𑀔𑀡𑀁 𑀯𑀼𑀢𑁆𑀢𑀁, 𑀢𑀁 𑀏𑀯𑀁 𑀅𑀯𑀢𑁆𑀯𑀸 ‘‘𑀙 𑀯𑀺𑀜𑁆𑀜𑀸𑀡𑀸’’𑀢𑀺 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸. 𑀢𑀣𑀸 𑀧𑀦 𑀅𑀯𑀢𑁆𑀯𑀸 ‘‘𑀧𑀜𑁆𑀘𑀯𑀺𑀜𑁆𑀜𑀸𑀡𑀸’’𑀢𑁆𑀯𑁂𑀯 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀦 𑀯𑀢𑀩𑁆𑀩𑀁 ‘‘𑀧𑀜𑁆𑀘𑀯𑀺𑀜𑁆𑀜𑀸𑀡𑀲𑀫𑀗𑁆𑀕𑀺𑀲𑁆𑀲 𑀅𑀢𑁆𑀣𑀺 𑀫𑀕𑁆𑀕𑀪𑀸𑀯𑀦𑀸’’𑀢𑀺. 𑀬𑀲𑁆𑀫𑀸 𑀘𑁂𑀢𑁆𑀣 𑀅𑀬𑀫𑁂𑀯 𑀅𑀥𑀺𑀧𑁆𑀧𑀸𑀬𑁄, 𑀢𑀲𑁆𑀫𑀸 𑀲𑀓𑀯𑀸𑀤𑀻 𑀢𑀁 𑀮𑀓𑁆𑀔𑀡𑀁 𑀧𑀭𑀯𑀸𑀤𑀺𑀁 𑀲𑀫𑁆𑀧𑀝𑀺𑀘𑁆𑀙𑀸𑀧𑁂𑀢𑁆𑀯𑀸 𑀦𑁄 𑀘 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑀧𑀜𑁆𑀘𑀯𑀺𑀜𑁆𑀜𑀸𑀡𑀲𑀫𑀗𑁆𑀕𑀺𑀲𑁆𑀲 𑀅𑀢𑁆𑀣𑀺 𑀫𑀕𑁆𑀕𑀪𑀸𑀯𑀦𑀸𑀢𑀺 𑀆𑀳.

𑀅𑀧𑀭𑁄 𑀦𑀬𑁄 𑁋 𑀧𑀜𑁆𑀘𑀯𑀺𑀜𑁆𑀜𑀸𑀡𑀸 𑀉𑀧𑁆𑀧𑀦𑁆𑀦𑀯𑀢𑁆𑀣𑀼𑀓𑀸, 𑀫𑀕𑁆𑀕𑁄 𑀅𑀯𑀢𑁆𑀣𑀼𑀓𑁄𑀧𑀺 𑀳𑁄𑀢𑀺. 𑀢𑁂 𑀘 𑀉𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀸, 𑀫𑀕𑁆𑀕𑁄 𑀦𑀯𑀢𑁆𑀢𑀩𑁆𑀩𑀸𑀭𑀫𑁆𑀫𑀡𑁄. 𑀢𑁂 𑀧𑀼𑀭𑁂𑀚𑀸𑀢𑀯𑀢𑁆𑀣𑀼𑀓𑀸𑀯 𑀫𑀕𑁆𑀕𑁄 𑀅𑀯𑀢𑁆𑀣𑀼𑀓𑁄𑀧𑀺. 𑀢𑁂 𑀧𑀼𑀭𑁂𑀚𑀸𑀢𑀸𑀭𑀫𑁆𑀫𑀡𑀸, 𑀫𑀕𑁆𑀕𑁄 𑀅𑀧𑀼𑀭𑁂𑀚𑀸𑀢𑀸𑀭𑀫𑁆𑀫𑀡𑁄. 𑀢𑁂 𑀅𑀚𑁆𑀛𑀢𑁆𑀢𑀺𑀓𑀯𑀢𑁆𑀣𑀼𑀓𑀸𑀯 𑀫𑀕𑁆𑀕𑁄 𑀅𑀯𑀢𑁆𑀣𑀼𑀓𑁄𑀧𑀺 𑀳𑁄𑀢𑀺. 𑀢𑁂 𑀘 𑀭𑀽𑀧𑀸𑀤𑀺𑀯𑀲𑁂𑀦 𑀩𑀸𑀳𑀺𑀭𑀸𑀭𑀫𑁆𑀫𑀡𑀸, 𑀫𑀕𑁆𑀕𑁄 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑁄. 𑀢𑁂 𑀅𑀦𑀺𑀭𑀼𑀤𑁆𑀥𑀁 𑀯𑀢𑁆𑀣𑀼𑀁 𑀦𑀺𑀲𑁆𑀲𑀬𑀁 𑀓𑀢𑁆𑀯𑀸 𑀧𑀯𑀢𑁆𑀢𑀦𑀢𑁄 𑀅𑀲𑀫𑁆𑀪𑀺𑀦𑁆𑀦𑀯𑀢𑁆𑀣𑀼𑀓𑀸, 𑀫𑀕𑁆𑀕𑁄 𑀅𑀯𑀢𑁆𑀣𑀼𑀓𑁄𑀧𑀺. 𑀢𑁂 𑀅𑀦𑀺𑀭𑀼𑀤𑁆𑀥𑀸𑀦𑁂𑀯 𑀭𑀽𑀧𑀸𑀤𑀻𑀦𑀺 𑀆𑀭𑀩𑁆𑀪 𑀧𑀯𑀢𑁆𑀢𑀦𑀢𑁄 𑀅𑀲𑀫𑁆𑀪𑀺𑀦𑁆𑀦𑀸𑀭𑀫𑁆𑀫𑀡𑀸, 𑀫𑀕𑁆𑀕𑁄 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑁄. 𑀢𑁂 𑀦𑀸𑀦𑀸𑀯𑀢𑁆𑀣𑀼𑀓𑀸, 𑀫𑀕𑁆𑀕𑁄 𑀅𑀯𑀢𑁆𑀣𑀼𑀓𑁄 𑀯𑀸 𑀏𑀓𑀯𑀢𑁆𑀣𑀼𑀓𑁄 𑀯𑀸. 𑀢𑁂 𑀦𑀸𑀦𑀸𑀭𑀫𑁆𑀫𑀡𑀸 𑀫𑀕𑁆𑀕𑁄 𑀏𑀓𑀸𑀭𑀫𑁆𑀫𑀡𑁄. 𑀢𑁂 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄𑀯 𑀭𑀽𑀧𑀸𑀤𑀺𑀕𑁄𑀘𑀭𑁂 𑀧𑀯𑀢𑁆𑀢𑀦𑀢𑁄 𑀦 𑀅𑀜𑁆𑀜𑀫𑀜𑁆𑀜𑀲𑁆𑀲 𑀕𑁄𑀘𑀭𑀯𑀺𑀲𑀬𑀁 𑀧𑀘𑁆𑀘𑀦𑀼𑀪𑁄𑀦𑁆𑀢𑀺, 𑀫𑀕𑁆𑀕𑁄 𑀭𑀽𑀧𑀸𑀤𑀻𑀲𑀼 𑀏𑀓𑀫𑁆𑀧𑀺 𑀕𑁄𑀘𑀭𑀁 𑀦 𑀓𑀭𑁄𑀢𑀺. 𑀢𑁂 𑀓𑀺𑀭𑀺𑀬𑀫𑀦𑁄𑀥𑀸𑀢𑀼𑀁 𑀧𑀼𑀭𑁂𑀘𑀸𑀭𑀺𑀓𑀁 𑀓𑀢𑁆𑀯𑀸 𑀉𑀧𑁆𑀧𑀚𑁆𑀚𑀦𑀢𑁄 𑀦 𑀅𑀲𑀫𑀦𑁆𑀦𑀸𑀳𑀸𑀭𑀸 𑀦 𑀅𑀫𑀦𑀲𑀺𑀓𑀸𑀭𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀫𑀕𑁆𑀕𑁄 𑀦𑀺𑀭𑀸𑀯𑀚𑁆𑀚𑀦𑁄𑀯. 𑀢𑁂 𑀲𑀫𑁆𑀧𑀝𑀺𑀘𑁆𑀙𑀦𑀸𑀤𑀻𑀳𑀺 𑀯𑁄𑀓𑀺𑀡𑁆𑀡𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀫𑀕𑁆𑀕𑀲𑁆𑀲 𑀯𑁄𑀓𑀸𑀭𑁄𑀬𑁂𑀯 𑀦𑀢𑁆𑀣𑀺. 𑀢𑁂 𑀅𑀜𑁆𑀜𑀫𑀜𑁆𑀜𑀁 𑀧𑀼𑀩𑁆𑀩𑀘𑀭𑀺𑀫𑀪𑀸𑀯𑁂𑀦 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀫𑀕𑁆𑀕𑀲𑁆𑀲 𑀢𑁂𑀳𑀺 𑀲𑀤𑁆𑀥𑀺𑀁 𑀧𑀼𑀭𑀺𑀫𑀧𑀘𑁆𑀙𑀺𑀫𑀢𑀸𑀯 𑀦𑀢𑁆𑀣𑀺, 𑀢𑁂𑀲𑀁 𑀅𑀦𑀼𑀧𑁆𑀧𑀢𑁆𑀢𑀺𑀓𑀸𑀮𑁂 𑀢𑀺𑀓𑁆𑀔𑀯𑀺𑀧𑀲𑁆𑀲𑀦𑀸𑀲𑀫𑀬𑁂, 𑀢𑁂𑀲𑀁 𑀅𑀦𑀼𑀧𑁆𑀧𑀢𑁆𑀢𑀺𑀤𑁂𑀲𑁂 𑀆𑀭𑀼𑀧𑁆𑀧𑁂𑀧𑀺 𑀘 𑀉𑀧𑁆𑀧𑀚𑁆𑀚𑀦𑀢𑁄. 𑀢𑁂 𑀲𑀫𑁆𑀧𑀝𑀺𑀘𑁆𑀙𑀦𑀸𑀤𑀻𑀳𑀺 𑀅𑀦𑁆𑀢𑀭𑀺𑀢𑀢𑁆𑀢𑀸 𑀦 𑀅𑀜𑁆𑀜𑀫𑀜𑁆𑀜𑀲𑁆𑀲 𑀲𑀫𑀦𑀦𑁆𑀢𑀭𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀫𑀕𑁆𑀕𑀲𑁆𑀲 𑀲𑀫𑁆𑀧𑀝𑀺𑀘𑁆𑀙𑀦𑀸𑀤𑀻𑀳𑀺 𑀅𑀦𑁆𑀢𑀭𑀺𑀢𑀪𑀸𑀯𑁄𑀯 𑀦𑀢𑁆𑀣𑀺. 𑀢𑁂𑀲𑀁 𑀅𑀜𑁆𑀜𑀢𑁆𑀭 𑀅𑀪𑀺𑀦𑀺𑀧𑀸𑀢𑀸 𑀆𑀪𑁄𑀕𑀫𑀢𑁆𑀢𑀫𑁆𑀧𑀺 𑀓𑀺𑀘𑁆𑀘𑀁 𑀦𑀢𑁆𑀣𑀺, 𑀫𑀕𑁆𑀕𑀲𑁆𑀲 𑀓𑀺𑀮𑁂𑀲𑀲𑀫𑀼𑀕𑁆𑀖𑀸𑀢𑀦𑀁 𑀓𑀺𑀘𑁆𑀘𑀦𑁆𑀢𑀺. 𑀬𑀲𑁆𑀫𑀸 𑀘𑁂𑀢𑁆𑀣 𑀅𑀬𑀫𑁆𑀧𑀺 𑀅𑀥𑀺𑀧𑁆𑀧𑀸𑀬𑁄, 𑀢𑀲𑁆𑀫𑀸 𑀲𑀓𑀯𑀸𑀤𑀻 𑀇𑀫𑁂𑀳𑀸𑀓𑀸𑀭𑁂𑀳𑀺 𑀧𑀭𑀯𑀸𑀤𑀺𑀁 𑀫𑀕𑁆𑀕𑀲𑁆𑀲 𑀅𑀧𑀜𑁆𑀘𑀯𑀺𑀜𑁆𑀜𑀸𑀡𑀕𑀢𑀺𑀓𑀪𑀸𑀯𑀁 𑀲𑀫𑁆𑀧𑀝𑀺𑀘𑁆𑀙𑀸𑀧𑁂𑀢𑁆𑀯𑀸 𑀦𑁄 𑀘 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑀧𑀜𑁆𑀘𑀯𑀺𑀜𑁆𑀜𑀸𑀡𑀲𑀫𑀗𑁆𑀕𑀺𑀲𑁆𑀲 𑀅𑀢𑁆𑀣𑀺 𑀫𑀕𑁆𑀕𑀪𑀸𑀯𑀦𑀸𑀢𑀺 𑀆𑀳.

𑁫𑁭𑁭. 𑀲𑀼𑀜𑁆𑀜𑀢𑀁 𑀆𑀭𑀩𑁆𑀪𑀸𑀢𑀺 ‘‘𑀬𑀣𑀸 𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑁄 𑀲𑀼𑀜𑁆𑀜𑀢𑀁 𑀦𑀺𑀩𑁆𑀩𑀸𑀦𑀁 𑀆𑀭𑀩𑁆𑀪, 𑀮𑁄𑀓𑀺𑀬𑁄 𑀲𑀼𑀤𑁆𑀥𑀲𑀗𑁆𑀔𑀸𑀭𑀧𑀼𑀜𑁆𑀚𑀁 𑀆𑀭𑀩𑁆𑀪 𑀉𑀧𑁆𑀧𑀚𑁆𑀚𑀢𑀺, 𑀓𑀺𑀁 𑀢𑁂 𑀏𑀯𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡’’𑀦𑁆𑀢𑀺 𑀧𑀼𑀘𑁆𑀙𑀢𑀺. 𑀇𑀢𑀭𑁄 ‘‘𑀘𑀓𑁆𑀔𑀼𑀜𑁆𑀘 𑀧𑀝𑀺𑀘𑁆𑀘 𑀭𑀽𑀧𑁂 𑀘𑀸’’𑀢𑀺 𑀯𑀘𑀦𑀢𑁄 𑀧𑀝𑀺𑀓𑁆𑀔𑀺𑀧𑀢𑀺. 𑀤𑀼𑀢𑀺𑀬𑀁 𑀧𑀼𑀝𑁆𑀞𑁄 ‘‘𑀦 𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑀻’’𑀢𑀺 𑀯𑀘𑀦𑀢𑁄 𑀬𑀁 𑀢𑀢𑁆𑀣 𑀅𑀦𑀺𑀫𑀺𑀢𑁆𑀢𑀁, 𑀢𑀤𑁂𑀯 𑀲𑀼𑀜𑁆𑀜𑀢𑀦𑁆𑀢𑀺 𑀲𑀦𑁆𑀥𑀸𑀬 𑀧𑀝𑀺𑀚𑀸𑀦𑀸𑀢𑀺. 𑀘𑀓𑁆𑀔𑀼𑀜𑁆𑀘 𑀧𑀝𑀺𑀘𑁆𑀘𑀸𑀢𑀺 𑀧𑀜𑁆𑀳𑀤𑁆𑀯𑀬𑁂𑀧𑀺 𑀏𑀲𑁂𑀯 𑀦𑀬𑁄.

𑁫𑁭𑁮-𑁫𑁭𑁯. 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀅𑀢𑀻𑀢𑀸𑀦𑀸𑀕𑀢𑀁 𑀆𑀭𑀩𑁆𑀪𑀸𑀢𑀺 𑀏𑀢𑁆𑀣 𑀅𑀬𑀫𑀥𑀺𑀧𑁆𑀧𑀸𑀬𑁄 𑁋 𑀫𑀦𑁄𑀯𑀺𑀜𑁆𑀜𑀸𑀡𑀲𑀫𑀗𑁆𑀕𑀺𑀲𑁆𑀲 𑀅𑀢𑁆𑀣𑀺 𑀫𑀕𑁆𑀕𑀪𑀸𑀯𑀦𑀸, 𑀫𑀦𑁄𑀯𑀺𑀜𑁆𑀜𑀸𑀡𑀜𑁆𑀘 𑀅𑀢𑀻𑀢𑀸𑀦𑀸𑀕𑀢𑀫𑁆𑀧𑀺 𑀆𑀭𑀩𑁆𑀪 𑀉𑀧𑁆𑀧𑀚𑁆𑀚𑀢𑀺, 𑀓𑀺𑀁 𑀢𑁂 𑀏𑀯𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀫𑁆𑀧𑀻𑀢𑀺. 𑀨𑀲𑁆𑀲𑀁 𑀆𑀭𑀩𑁆𑀪𑀸𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀘𑀓𑁆𑀔𑀼𑀦𑀸 𑀭𑀽𑀧𑀁 𑀤𑀺𑀲𑁆𑀯𑀸 𑀦 𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑀻𑀢𑀺 𑀏𑀢𑁆𑀣 𑀚𑀯𑀦𑀓𑁆𑀔𑀡𑁂 𑀦 𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑀺𑀢𑀸 𑀯𑀼𑀢𑁆𑀢𑀸, 𑀦 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀓𑁆𑀔𑀡𑁂. 𑀢𑀲𑁆𑀫𑀸 𑀮𑁄𑀓𑀺𑀬𑀫𑀕𑁆𑀕𑀫𑁆𑀧𑀺 𑀲𑀦𑁆𑀥𑀸𑀬𑁂𑀢𑀁 𑀅𑀲𑀸𑀥𑀓𑀦𑁆𑀢𑀺.

𑀧𑀜𑁆𑀘𑀯𑀺𑀜𑁆𑀜𑀸𑀡𑀲𑀫𑀗𑁆𑀕𑀺𑀲𑁆𑀲 𑀫𑀕𑁆𑀕𑀓𑀣𑀸𑀯𑀡𑁆𑀡𑀦𑀸.

𑁪. 𑀧𑀜𑁆𑀘𑀯𑀺𑀜𑁆𑀜𑀸𑀡𑀸 𑀓𑀼𑀲𑀮𑀸𑀧𑀻𑀢𑀺𑀓𑀣𑀸𑀯𑀡𑁆𑀡𑀦𑀸

𑁫𑁮𑁦-𑁫𑁮𑁩. 𑀇𑀤𑀸𑀦𑀺 𑀧𑀜𑁆𑀘𑀯𑀺𑀜𑁆𑀜𑀸𑀡𑀸 𑀓𑀼𑀲𑀮𑀸𑀧𑀻𑀢𑀺𑀓𑀣𑀸 𑀦𑀸𑀫 𑀳𑁄𑀢𑀺. 𑀲𑀸 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀅𑀢𑁆𑀣𑀢𑁄 𑀯𑁂𑀤𑀺𑀢𑀩𑁆𑀩𑀸𑀢𑀺.

𑀧𑀜𑁆𑀘𑀯𑀺𑀜𑁆𑀜𑀸𑀡𑀸 𑀓𑀼𑀲𑀮𑀸𑀧𑀻𑀢𑀺𑀓𑀣𑀸𑀯𑀡𑁆𑀡𑀦𑀸.

𑁫. 𑀧𑀜𑁆𑀘𑀯𑀺𑀜𑁆𑀜𑀸𑀡𑀸 𑀲𑀸𑀪𑁄𑀕𑀸𑀢𑀺𑀓𑀣𑀸𑀯𑀡𑁆𑀡𑀦𑀸

𑁫𑁮𑁪-𑁫𑁮𑁬. 𑀇𑀤𑀸𑀦𑀺 𑀧𑀜𑁆𑀘𑀯𑀺𑀜𑁆𑀜𑀸𑀡𑀸 𑀲𑀸𑀪𑁄𑀕𑀸𑀢𑀺𑀓𑀣𑀸 𑀦𑀸𑀫 𑀳𑁄𑀢𑀺. 𑀢𑀢𑁆𑀣 𑀆𑀪𑁄𑀕𑁄 𑀦𑀸𑀫 𑀓𑀼𑀲𑀮𑀸𑀓𑀼𑀲𑀮𑀯𑀲𑁂𑀦 𑀳𑁄𑀢𑀺 𑀲𑀢𑁆𑀣𑀸𑀭𑀸 𑀘 ‘‘𑀘𑀓𑁆𑀔𑀼𑀦𑀸 𑀭𑀽𑀧𑀁 𑀤𑀺𑀲𑁆𑀯𑀸 𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑀻 𑀳𑁄𑀢𑀺, 𑀦 𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑀻 𑀳𑁄𑀢𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁, 𑀢𑀁 𑀅𑀬𑁄𑀦𑀺𑀲𑁄 𑀕𑀳𑁂𑀢𑁆𑀯𑀸 ‘‘𑀧𑀜𑁆𑀘𑀯𑀺𑀜𑁆𑀜𑀸𑀡𑀸 𑀲𑀸𑀪𑁄𑀕𑀸’’𑀢𑀺 𑀬𑁂𑀲𑀁 𑀮𑀤𑁆𑀥𑀺, 𑀲𑁂𑀬𑁆𑀬𑀣𑀸𑀧𑀺 𑀫𑀳𑀸𑀲𑀁𑀖𑀺𑀓𑀸𑀦𑀁, 𑀢𑁂 𑀲𑀦𑁆𑀥𑀸𑀬 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀧𑀝𑀺𑀜𑁆𑀜𑀸 𑀇𑀢𑀭𑀲𑁆𑀲. 𑀲𑁂𑀲𑀫𑁂𑀢𑁆𑀣 𑀧𑀼𑀭𑀺𑀫𑀓𑀣𑀸𑀲𑀤𑀺𑀲𑀫𑁂𑀯𑀸𑀢𑀺.

𑀧𑀜𑁆𑀘𑀯𑀺𑀜𑁆𑀜𑀸𑀡𑀸 𑀲𑀸𑀪𑁄𑀕𑀸𑀢𑀺𑀓𑀣𑀸𑀯𑀡𑁆𑀡𑀦𑀸.

𑁬. 𑀤𑁆𑀯𑀻𑀳𑀺 𑀲𑀻𑀮𑁂𑀳𑀻𑀢𑀺𑀓𑀣𑀸𑀯𑀡𑁆𑀡𑀦𑀸

𑁫𑁮𑁭-𑁫𑁮𑁯. 𑀇𑀤𑀸𑀦𑀺 𑀤𑁆𑀯𑀻𑀳𑀺 𑀲𑀻𑀮𑁂𑀳𑀻𑀢𑀺𑀓𑀣𑀸 𑀦𑀸𑀫 𑀳𑁄𑀢𑀺. 𑀢𑀢𑁆𑀣 ‘‘𑀲𑀻𑀮𑁂 𑀧𑀢𑀺𑀝𑁆𑀞𑀸𑀬 𑀦𑀭𑁄 𑀲𑀧𑀜𑁆𑀜𑁄’’𑀢𑀺𑀆𑀤𑀺𑀯𑀘𑀦𑀢𑁄 (𑀲𑀁. 𑀦𑀺. 𑁧.𑁨𑁩) 𑀬𑀲𑁆𑀫𑀸 𑀮𑁄𑀓𑀺𑀬𑁂𑀦 𑀲𑀻𑀮𑁂𑀦 𑀲𑀻𑀮𑀯𑀸 𑀮𑁄𑀓𑀼𑀢𑁆𑀢𑀭𑀁 𑀫𑀕𑁆𑀕𑀁 𑀪𑀸𑀯𑁂𑀢𑀺, 𑀢𑀲𑁆𑀫𑀸 ‘‘𑀧𑀼𑀭𑀺𑀫𑁂𑀦 𑀘 𑀮𑁄𑀓𑀺𑀬𑁂𑀦 𑀫𑀕𑁆𑀕𑀓𑁆𑀔𑀡𑁂 𑀮𑁄𑀓𑀼𑀢𑁆𑀢𑀭𑁂𑀦 𑀘𑀸𑀢𑀺 𑀤𑁆𑀯𑀻𑀳𑀺 𑀲𑀻𑀮𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀦𑀸𑀫 𑀳𑁄𑀢𑀻’’𑀢𑀺 𑀬𑁂𑀲𑀁 𑀮𑀤𑁆𑀥𑀺, 𑀲𑁂𑀬𑁆𑀬𑀣𑀸𑀧𑀺 𑀫𑀳𑀸𑀲𑀁𑀖𑀺𑀓𑀸𑀦𑀁𑀬𑁂𑀯, 𑀢𑁂 𑀲𑀦𑁆𑀥𑀸𑀬 𑀫𑀕𑁆𑀕𑀲𑀫𑀗𑁆𑀕𑀻𑀢𑀺 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀧𑀝𑀺𑀜𑁆𑀜𑀸 𑀇𑀢𑀭𑀲𑁆𑀲. 𑀅𑀣 𑀦𑀁 ‘‘𑀬𑀤𑀺 𑀲𑁄 𑀏𑀓𑀓𑁆𑀔𑀡𑁂 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑁂𑀳𑀺 𑀤𑁆𑀯𑀻𑀳𑀺 𑀲𑀻𑀮𑁂𑀳𑀺 𑀲𑀫𑀦𑁆𑀦𑀸𑀕𑀢𑁄, 𑀤𑁆𑀯𑀻𑀳𑀺 𑀨𑀲𑁆𑀲𑀸𑀤𑀻𑀳𑀺𑀧𑀺 𑀢𑁂𑀦 𑀲𑀫𑀦𑁆𑀦𑀸𑀕𑀢𑁂𑀦 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀘𑁄𑀤𑁂𑀢𑀼𑀁 𑀤𑁆𑀯𑀻𑀳𑀺 𑀨𑀲𑁆𑀲𑁂𑀳𑀻𑀢𑀺𑀆𑀤𑀺𑀫𑀸𑀳. 𑀇𑀢𑀭𑁄 𑀢𑀣𑀸𑀭𑀽𑀧𑀁 𑀦𑀬𑀁 𑀅𑀧𑀲𑁆𑀲𑀦𑁆𑀢𑁄 𑀧𑀝𑀺𑀓𑁆𑀔𑀺𑀧𑀢𑀺. 𑀮𑁄𑀓𑀺𑀬𑁂𑀦 𑀘 𑀮𑁄𑀓𑀼𑀢𑁆𑀢𑀭𑁂𑀦 𑀘𑀸𑀢𑀺 𑀧𑀜𑁆𑀳𑁂 𑀧𑀼𑀩𑁆𑀩𑁂 𑀲𑀫𑀸𑀤𑀺𑀦𑁆𑀦𑀜𑁆𑀘 𑀫𑀕𑁆𑀕𑀓𑁆𑀔𑀡𑁂 𑀉𑀧𑁆𑀧𑀦𑁆𑀦𑀲𑀫𑁆𑀫𑀸𑀯𑀸𑀘𑀸𑀤𑀻𑀦𑀺 𑀘 𑀲𑀦𑁆𑀥𑀸𑀬 𑀧𑀝𑀺𑀚𑀸𑀦𑀸𑀢𑀺.

𑀮𑁄𑀓𑀺𑀬𑁂 𑀲𑀻𑀮𑁂 𑀦𑀺𑀭𑀼𑀤𑁆𑀥𑁂𑀢𑀺 𑀧𑀼𑀘𑁆𑀙𑀸 𑀧𑀭𑀯𑀸𑀤𑀺𑀲𑁆𑀲, 𑀔𑀡𑀪𑀗𑁆𑀕𑀦𑀺𑀭𑁄𑀥𑀁 𑀲𑀦𑁆𑀥𑀸𑀬 𑀧𑀝𑀺𑀜𑁆𑀜𑀸 𑀲𑀓𑀯𑀸𑀤𑀺𑀲𑁆𑀲. 𑀇𑀢𑀭𑁄 𑀧𑀦 𑀢𑀁 𑀯𑀻𑀢𑀺𑀓𑁆𑀓𑀫𑀁 𑀯𑀺𑀬 𑀲𑀮𑁆𑀮𑀓𑁆𑀔𑁂𑀦𑁆𑀢𑁄 𑀤𑀼𑀲𑁆𑀲𑀻𑀮𑁄𑀢𑀺𑀆𑀤𑀺𑀫𑀸𑀳. 𑀮𑀤𑁆𑀥𑀺𑀧𑀢𑀺𑀝𑁆𑀞𑀸𑀧𑀦𑀁 𑀧𑀦𑀲𑁆𑀲 𑀧𑀼𑀩𑁆𑀩𑁂 𑀅𑀪𑀺𑀦𑁆𑀦𑀲𑀻𑀮𑀢𑀁𑀬𑁂𑀯 𑀤𑀻𑀧𑁂𑀢𑀺, 𑀦 𑀤𑁆𑀯𑀻𑀳𑀺 𑀲𑀫𑀦𑁆𑀦𑀸𑀕𑀢𑀢𑀁. 𑀢𑀲𑁆𑀫𑀸 𑀅𑀧𑁆𑀧𑀢𑀺𑀝𑁆𑀞𑀺𑀢𑀸𑀯 𑀮𑀤𑁆𑀥𑀻𑀢𑀺.

𑀤𑁆𑀯𑀻𑀳𑀺 𑀲𑀻𑀮𑁂𑀳𑀻𑀢𑀺𑀓𑀣𑀸𑀯𑀡𑁆𑀡𑀦𑀸.

𑁭. 𑀲𑀻𑀮𑀁 𑀅𑀘𑁂𑀢𑀲𑀺𑀓𑀦𑁆𑀢𑀺𑀓𑀣𑀸𑀯𑀡𑁆𑀡𑀦𑀸

𑁫𑁯𑁦-𑁫𑁯𑁪. 𑀇𑀤𑀸𑀦𑀺 𑀲𑀻𑀮𑀁 𑀅𑀘𑁂𑀢𑀲𑀺𑀓𑀦𑁆𑀢𑀺𑀓𑀣𑀸 𑀦𑀸𑀫 𑀳𑁄𑀢𑀺. 𑀢𑀢𑁆𑀣 𑀬𑀲𑁆𑀫𑀸 𑀲𑀻𑀮𑁂 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀦𑀺𑀭𑀼𑀤𑁆𑀥𑁂𑀧𑀺 𑀲𑀫𑀸𑀤𑀸𑀦𑀳𑁂𑀢𑀼𑀓𑁄 𑀲𑀻𑀮𑁄𑀧𑀘𑀬𑁄 𑀦𑀸𑀫 𑀅𑀢𑁆𑀣𑀺, 𑀬𑁂𑀦 𑀲𑁄 𑀲𑀻𑀮𑀯𑀸𑀬𑁂𑀯 𑀦𑀸𑀫 𑀳𑁄𑀢𑀺, 𑀢𑀲𑁆𑀫𑀸 ‘‘𑀲𑀻𑀮𑀁 𑀅𑀘𑁂𑀢𑀲𑀺𑀓’’𑀦𑁆𑀢𑀺 𑀬𑁂𑀲𑀁 𑀮𑀤𑁆𑀥𑀺, 𑀲𑁂𑀬𑁆𑀬𑀣𑀸𑀧𑀺 𑀫𑀳𑀸𑀲𑀁𑀖𑀺𑀓𑀸𑀦𑀁, 𑀢𑁂 𑀲𑀦𑁆𑀥𑀸𑀬 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀧𑀝𑀺𑀜𑁆𑀜𑀸 𑀇𑀢𑀭𑀲𑁆𑀲. 𑀲𑁂𑀲𑀫𑁂𑀢𑁆𑀣 ‘‘𑀤𑀸𑀦𑀁 𑀅𑀘𑁂𑀢𑀲𑀺𑀓’’𑀦𑁆𑀢𑀺𑀓𑀣𑀸𑀬𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀮𑀤𑁆𑀥𑀺𑀧𑀢𑀺𑀝𑁆𑀞𑀸𑀧𑀦𑀫𑁆𑀧𑀺 𑀅𑀬𑁄𑀦𑀺𑀲𑁄 𑀕𑀳𑀺𑀢𑀢𑁆𑀢𑀸 𑀅𑀧𑁆𑀧𑀢𑀺𑀝𑁆𑀞𑀸𑀧𑀦𑀫𑁂𑀯𑀸𑀢𑀺.

𑀲𑀻𑀮𑀁 𑀅𑀘𑁂𑀢𑀲𑀺𑀓𑀦𑁆𑀢𑀺𑀓𑀣𑀸𑀯𑀡𑁆𑀡𑀦𑀸.

𑁮. 𑀲𑀻𑀮𑀁 𑀦 𑀘𑀺𑀢𑁆𑀢𑀸𑀦𑀼𑀧𑀭𑀺𑀯𑀢𑁆𑀢𑀻𑀢𑀺𑀓𑀣𑀸𑀯𑀡𑁆𑀡𑀦𑀸

𑁫𑁯𑁫-𑁫𑁯𑁭. 𑀇𑀤𑀸𑀦𑀺 𑀲𑀻𑀮𑀁 𑀦 𑀘𑀺𑀢𑁆𑀢𑀸𑀦𑀼𑀧𑀭𑀺𑀯𑀢𑁆𑀢𑀻𑀢𑀺𑀓𑀣𑀸 𑀦𑀸𑀫 𑀳𑁄𑀢𑀺. 𑀢𑀢𑁆𑀣 𑀦 𑀘𑀺𑀢𑁆𑀢𑀸𑀦𑀼𑀧𑀭𑀺𑀯𑀢𑁆𑀢𑀻𑀢𑀺 𑀪𑀸𑀲𑀦𑁆𑀢𑀭𑀫𑁂𑀯 𑀦𑀸𑀦𑀁, 𑀲𑁂𑀲𑀁 𑀧𑀼𑀭𑀺𑀫𑀓𑀣𑀸𑀲𑀤𑀺𑀲𑀫𑁂𑀯𑀸𑀢𑀺.

𑀲𑀻𑀮𑀁 𑀦 𑀘𑀺𑀢𑁆𑀢𑀸𑀦𑀼𑀧𑀭𑀺𑀯𑀢𑁆𑀢𑀻𑀢𑀺𑀓𑀣𑀸𑀯𑀡𑁆𑀡𑀦𑀸.

𑁯. 𑀲𑀫𑀸𑀤𑀸𑀦𑀳𑁂𑀢𑀼𑀓𑀣𑀸𑀯𑀡𑁆𑀡𑀦𑀸

𑁫𑁯𑁮-𑁬𑁦𑁦. 𑀇𑀤𑀸𑀦𑀺 𑀲𑀫𑀸𑀤𑀸𑀦𑀳𑁂𑀢𑀼𑀓𑀣𑀸 𑀦𑀸𑀫 𑀳𑁄𑀢𑀺. 𑀢𑀢𑁆𑀣 ‘‘𑀆𑀭𑀸𑀫𑀭𑁄𑀧𑀸’’𑀢𑀺 𑀕𑀸𑀣𑀸𑀬 𑀅𑀢𑁆𑀣𑀁 𑀅𑀬𑁄𑀦𑀺𑀲𑁄 𑀕𑀳𑁂𑀢𑁆𑀯𑀸 ‘‘𑀲𑀤𑀸 𑀧𑀼𑀜𑁆𑀜𑀁 𑀧𑀯𑀟𑁆𑀠𑀢𑀻’’𑀢𑀺 𑀯𑀘𑀦𑀢𑁄 ‘‘𑀲𑀫𑀸𑀤𑀸𑀦𑀳𑁂𑀢𑀼𑀓𑀁 𑀲𑀻𑀮𑀁 𑀯𑀟𑁆𑀠𑀢𑀻’’𑀢𑀺 𑀬𑁂𑀲𑀁 𑀮𑀤𑁆𑀥𑀺, 𑀲𑁂𑀬𑁆𑀬𑀣𑀸𑀧𑀺 𑀫𑀳𑀸𑀲𑀁𑀖𑀺𑀓𑀸𑀦𑀜𑁆𑀜𑁂𑀯, 𑀢𑁂 𑀲𑀦𑁆𑀥𑀸𑀬 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀘𑀺𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑀁 𑀲𑀻𑀮𑁄𑀧𑀘𑀬𑀁 𑀲𑀦𑁆𑀥𑀸𑀬 𑀧𑀝𑀺𑀜𑁆𑀜𑀸 𑀧𑀭𑀯𑀸𑀤𑀺𑀲𑁆𑀲. 𑀲𑁂𑀲𑀁 𑀧𑀼𑀭𑀺𑀫𑀓𑀣𑀸𑀲𑀤𑀺𑀲𑀫𑁂𑀯𑀸𑀢𑀺.

𑀲𑀫𑀸𑀤𑀸𑀦𑀳𑁂𑀢𑀼𑀓𑀣𑀸𑀯𑀡𑁆𑀡𑀦𑀸.

𑁧𑁦. 𑀯𑀺𑀜𑁆𑀜𑀢𑁆𑀢𑀺 𑀲𑀻𑀮𑀦𑁆𑀢𑀺𑀓𑀣𑀸𑀯𑀡𑁆𑀡𑀦𑀸

𑁬𑁦𑁧-𑁬𑁦𑁨. 𑀇𑀤𑀸𑀦𑀺 𑀯𑀺𑀜𑁆𑀜𑀢𑁆𑀢𑀺 𑀲𑀻𑀮𑀦𑁆𑀢𑀺𑀓𑀣𑀸 𑀦𑀸𑀫 𑀳𑁄𑀢𑀺. 𑀢𑀢𑁆𑀣 𑀓𑀸𑀬𑀯𑀺𑀜𑁆𑀜𑀢𑁆𑀢𑀺 𑀓𑀸𑀬𑀓𑀫𑁆𑀫𑀁, 𑀯𑀘𑀻𑀯𑀺𑀜𑁆𑀜𑀢𑁆𑀢𑀺 𑀯𑀘𑀻𑀓𑀫𑁆𑀫𑀦𑁆𑀢𑀺 𑀕𑀳𑀺𑀢𑀢𑁆𑀢𑀸 ‘‘𑀯𑀺𑀜𑁆𑀜𑀢𑁆𑀢𑀺 𑀲𑀻𑀮’’𑀦𑁆𑀢𑀺 𑀬𑁂𑀲𑀁 𑀮𑀤𑁆𑀥𑀺, 𑀲𑁂𑀬𑁆𑀬𑀣𑀸𑀧𑀺 𑀫𑀳𑀸𑀲𑀁𑀖𑀺𑀓𑀸𑀦𑀜𑁆𑀘𑁂𑀯 𑀲𑀫𑁆𑀫𑀺𑀢𑀺𑀬𑀸𑀦𑀜𑁆𑀘; 𑀢𑁂 𑀲𑀦𑁆𑀥𑀸𑀬 𑀯𑀺𑀜𑁆𑀜𑀢𑁆𑀢𑀻𑀢𑀺 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀧𑀝𑀺𑀜𑁆𑀜𑀸 𑀇𑀢𑀭𑀲𑁆𑀲. 𑀅𑀣 𑀦𑀁 𑀬𑀲𑁆𑀫𑀸 𑀲𑀻𑀮𑀁 𑀦𑀸𑀫 𑀯𑀺𑀭𑀢𑀺, 𑀦 𑀭𑀽𑀧𑀥𑀫𑁆𑀫𑁄, 𑀢𑀲𑁆𑀫𑀸 𑀢𑁂𑀦𑀢𑁆𑀣𑁂𑀦 𑀘𑁄𑀤𑁂𑀢𑀼𑀁 𑀧𑀸𑀡𑀸𑀢𑀺𑀧𑀸𑀢𑀸 𑀯𑁂𑀭𑀫𑀡𑀻𑀢𑀺𑀆𑀤𑀺𑀫𑀸𑀳. 𑀅𑀪𑀺𑀯𑀸𑀤𑀦𑀁 𑀲𑀻𑀮𑀦𑁆𑀢𑀺𑀆𑀤𑀺 𑀬𑀣𑀸𑀭𑀽𑀧𑀁 𑀯𑀺𑀜𑁆𑀜𑀢𑁆𑀢𑀺𑀁 𑀲𑁄 ‘‘𑀲𑀻𑀮’’𑀦𑁆𑀢𑀺 𑀫𑀜𑁆𑀜𑀢𑀺 𑀢𑀁 𑀉𑀤𑁆𑀥𑀭𑀺𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁. 𑀬𑀲𑁆𑀫𑀸 𑀧𑀦 𑀲𑀸 𑀯𑀺𑀭𑀢𑀺 𑀦 𑀳𑁄𑀢𑀺, 𑀢𑀲𑁆𑀫𑀸 𑀧𑀼𑀦 𑀧𑀸𑀡𑀸𑀢𑀺𑀧𑀸𑀢𑀸𑀢𑀺𑀆𑀤𑀺𑀫𑀸𑀳. 𑀮𑀤𑁆𑀥𑀺 𑀧𑀦𑀲𑁆𑀲 𑀙𑀮𑁂𑀦 𑀧𑀢𑀺𑀝𑁆𑀞𑀺𑀢𑀢𑁆𑀢𑀸 𑀅𑀧𑁆𑀧𑀢𑀺𑀝𑁆𑀞𑀺𑀢𑀸𑀬𑁂𑀯𑀸𑀢𑀺.

𑀯𑀺𑀜𑁆𑀜𑀢𑁆𑀢𑀺 𑀲𑀻𑀮𑀦𑁆𑀢𑀺𑀓𑀣𑀸𑀯𑀡𑁆𑀡𑀦𑀸.

𑁧𑁧. 𑀅𑀯𑀺𑀜𑁆𑀜𑀢𑁆𑀢𑀺 𑀤𑀼𑀲𑁆𑀲𑀻𑀮𑁆𑀬𑀦𑁆𑀢𑀺𑀓𑀣𑀸𑀯𑀡𑁆𑀡𑀦𑀸

𑁬𑁦𑁩-𑁬𑁦𑁪. 𑀇𑀤𑀸𑀦𑀺 𑀅𑀯𑀺𑀜𑁆𑀜𑀢𑁆𑀢𑀺 𑀤𑀼𑀲𑁆𑀲𑀻𑀮𑁆𑀬𑀦𑁆𑀢𑀺𑀓𑀣𑀸 𑀦𑀸𑀫 𑀳𑁄𑀢𑀺. 𑀢𑀢𑁆𑀣 𑀘𑀺𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑀁 𑀅𑀧𑀼𑀜𑁆𑀜𑀽𑀧𑀘𑀬𑀜𑁆𑀘𑁂𑀯 𑀆𑀡𑀢𑁆𑀢𑀺𑀬𑀸 𑀘 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀲𑀼 𑀅𑀗𑁆𑀕𑀧𑀸𑀭𑀺𑀧𑀽𑀭𑀺𑀁 𑀲𑀦𑁆𑀥𑀸𑀬 ‘‘𑀅𑀯𑀺𑀜𑁆𑀜𑀢𑁆𑀢𑀺 𑀤𑀼𑀲𑁆𑀲𑀻𑀮𑁆𑀬’’𑀦𑁆𑀢𑀺 𑀬𑁂𑀲𑀁 𑀮𑀤𑁆𑀥𑀺, 𑀲𑁂𑀬𑁆𑀬𑀣𑀸𑀧𑀺 𑀫𑀳𑀸𑀲𑀁𑀖𑀺𑀓𑀸𑀦𑀁, 𑀢𑁂 𑀲𑀦𑁆𑀥𑀸𑀬 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀧𑀝𑀺𑀜𑁆𑀜𑀸 𑀇𑀢𑀭𑀲𑁆𑀲. 𑀅𑀣 𑀦𑀁 ‘‘𑀲𑀘𑁂 𑀲𑀸 𑀤𑀼𑀲𑁆𑀲𑀻𑀮𑁆𑀬𑀁, 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀲𑀼 𑀅𑀜𑁆𑀜𑀢𑀭𑀸 𑀲𑀺𑀬𑀸’’𑀢𑀺 𑀘𑁄𑀤𑁂𑀢𑀼𑀁 𑀧𑀸𑀡𑀸𑀢𑀺𑀧𑀸𑀢𑁄𑀢𑀺𑀆𑀤𑀺𑀫𑀸𑀳. 𑀧𑀸𑀧𑀓𑀫𑁆𑀫𑀁 𑀲𑀫𑀸𑀤𑀺𑀬𑀺𑀢𑁆𑀯𑀸𑀢𑀺 ‘‘𑀅𑀲𑀼𑀓𑀁 𑀦𑀸𑀫 𑀖𑀸𑀢𑁂𑀲𑁆𑀲𑀸𑀫𑀺, 𑀅𑀲𑀼𑀓𑀁 𑀪𑀡𑁆𑀟𑀁 𑀅𑀯𑀳𑀭𑀺𑀲𑁆𑀲𑀸𑀫𑀻’’𑀢𑀺 𑀏𑀯𑀁 𑀧𑀸𑀧𑀲𑀫𑀸𑀤𑀸𑀦𑀁 𑀓𑀢𑁆𑀯𑀸. 𑀉𑀪𑁄 𑀯𑀟𑁆𑀠𑀦𑁆𑀢𑀻𑀢𑀺 𑀧𑀼𑀝𑁆𑀞𑁄 𑀤𑀸𑀦𑀓𑁆𑀔𑀡𑁂 𑀧𑀸𑀧𑀲𑁆𑀲 𑀅𑀦𑀼𑀧𑁆𑀧𑀢𑁆𑀢𑀺𑀁 𑀲𑀦𑁆𑀥𑀸𑀬 𑀧𑀝𑀺𑀓𑁆𑀔𑀺𑀧𑀢𑀺. 𑀤𑀼𑀢𑀺𑀬𑀁 𑀧𑀼𑀝𑁆𑀞𑁄 𑀘𑀺𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑀁 𑀧𑀸𑀧𑀽𑀧𑀘𑀬𑀁 𑀲𑀦𑁆𑀥𑀸𑀬 𑀧𑀝𑀺𑀚𑀸𑀦𑀸𑀢𑀺. 𑀲𑁂𑀲𑀫𑁂𑀢𑁆𑀣 𑀧𑀭𑀺𑀪𑁄𑀕𑀫𑀬𑀓𑀣𑀸𑀬𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀮𑀤𑁆𑀥𑀺𑀧𑀢𑀺𑀝𑁆𑀞𑀸𑀧𑀦𑀫𑁆𑀧𑀺𑀲𑁆𑀲 𑀧𑀸𑀧𑀲𑀫𑀸𑀤𑀺𑀦𑁆𑀦𑀧𑀼𑀩𑁆𑀩𑀪𑀸𑀕𑀫𑁂𑀯 𑀲𑀸𑀥𑁂𑀢𑀺; 𑀦 𑀅𑀯𑀺𑀜𑁆𑀜𑀢𑁆𑀢𑀺𑀬𑀸 𑀤𑀼𑀲𑁆𑀲𑀻𑀮𑀪𑀸𑀯𑀦𑁆𑀢𑀺.

𑀅𑀯𑀺𑀜𑁆𑀜𑀢𑁆𑀢𑀺 𑀤𑀼𑀲𑁆𑀲𑀻𑀮𑁆𑀬𑀦𑁆𑀢𑀺𑀓𑀣𑀸𑀯𑀡𑁆𑀡𑀦𑀸.

𑀤𑀲𑀫𑁄 𑀯𑀕𑁆𑀕𑁄.

𑀤𑀼𑀢𑀺𑀬𑀧𑀡𑁆𑀡𑀸𑀲𑀓𑁄 𑀲𑀫𑀢𑁆𑀢𑁄.