𑁭. 𑀲𑀢𑁆𑀢𑀫𑀯𑀕𑁆𑀕𑁄

𑁧. 𑀲𑀗𑁆𑀕𑀳𑀺𑀢𑀓𑀣𑀸𑀯𑀡𑁆𑀡𑀦𑀸

𑁪𑁭𑁧-𑁪𑁭𑁨. 𑀇𑀤𑀸𑀦𑀺 𑀲𑀗𑁆𑀕𑀳𑀺𑀢𑀓𑀣𑀸 𑀦𑀸𑀫 𑀳𑁄𑀢𑀺. 𑀢𑀢𑁆𑀣 𑀬𑀲𑁆𑀫𑀸 𑀤𑀸𑀫𑀸𑀤𑀻𑀳𑀺 𑀩𑀮𑀺𑀩𑀤𑁆𑀤𑀸𑀤𑀬𑁄 𑀯𑀺𑀬 𑀓𑁂𑀘𑀺 𑀥𑀫𑁆𑀫𑀸 𑀓𑁂𑀳𑀺𑀘𑀺 𑀥𑀫𑁆𑀫𑁂𑀳𑀺 𑀲𑀗𑁆𑀕𑀳𑀺𑀢𑀸 𑀦𑀸𑀫 𑀦𑀢𑁆𑀣𑀺, 𑀢𑀲𑁆𑀫𑀸 ‘‘𑀦𑀢𑁆𑀣𑀺 𑀓𑁂𑀘𑀺 𑀥𑀫𑁆𑀫𑀸 𑀓𑁂𑀳𑀺𑀘𑀺 𑀥𑀫𑁆𑀫𑁂𑀳𑀺 𑀲𑀗𑁆𑀕𑀳𑀺𑀢𑀸, 𑀏𑀯𑀁 𑀲𑀦𑁆𑀢𑁂 𑀏𑀓𑀯𑀺𑀥𑁂𑀦 𑀭𑀽𑀧𑀲𑀗𑁆𑀕𑀳𑁄𑀢𑀺𑀆𑀤𑀺 𑀦𑀺𑀭𑀢𑁆𑀣𑀓’’𑀦𑁆𑀢𑀺 𑀬𑁂𑀲𑀁 𑀮𑀤𑁆𑀥𑀺, 𑀲𑁂𑀬𑁆𑀬𑀣𑀸𑀧𑀺 𑀭𑀸𑀚𑀕𑀺𑀭𑀺𑀓𑀸𑀦𑀜𑁆𑀘𑁂𑀯 𑀲𑀺𑀤𑁆𑀥𑀢𑁆𑀣𑀺𑀓𑀸𑀦𑀜𑁆𑀘; 𑀢𑁂 𑀲𑀦𑁆𑀥𑀸𑀬 𑀅𑀜𑁆𑀜𑁂𑀦𑀢𑁆𑀣𑁂𑀦 𑀲𑀗𑁆𑀕𑀳𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀅𑀢𑁆𑀢𑀦𑁄 𑀮𑀤𑁆𑀥𑀺𑀯𑀲𑁂𑀦 𑀧𑀝𑀺𑀜𑁆𑀜𑀸 𑀇𑀢𑀭𑀲𑁆𑀲. 𑀇𑀤𑀸𑀦𑀺 𑀬𑁂𑀦𑀢𑁆𑀣𑁂𑀦 𑀲𑀗𑁆𑀕𑀳𑁄 𑀮𑀩𑁆𑀪𑀢𑀺, 𑀢𑀁 𑀤𑀲𑁆𑀲𑁂𑀢𑀼𑀁 𑀦𑀦𑀼 𑀅𑀢𑁆𑀣𑀺 𑀓𑁂𑀘𑀺 𑀥𑀫𑁆𑀫𑀸𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀁 𑀲𑀩𑁆𑀩𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀢𑁆𑀢𑀸 𑀉𑀢𑁆𑀢𑀸𑀦𑀢𑁆𑀣𑀫𑁂𑀯. 𑀬𑀸 𑀧𑀦𑁂𑀲𑀸 𑀧𑀭𑀯𑀸𑀤𑀺𑀦𑀸 𑀮𑀤𑁆𑀥𑀺𑀧𑀢𑀺𑀝𑁆𑀞𑀸𑀧𑀦𑀢𑁆𑀣𑀁 𑀬𑀣𑀸 𑀤𑀸𑀫𑁂𑀦 𑀯𑀸𑀢𑀺𑀆𑀤𑀺𑀓𑀸 𑀉𑀧𑀫𑀸 𑀆𑀳𑀝𑀸, 𑀲𑀓𑀯𑀸𑀤𑀺𑀦𑀸 𑀢𑀁 𑀅𑀦𑀪𑀺𑀦𑀦𑁆𑀤𑀺𑀢𑁆𑀯𑀸 𑀅𑀧𑁆𑀧𑀝𑀺𑀓𑁆𑀓𑁄𑀲𑀺𑀢𑁆𑀯𑀸 ‘‘𑀳𑀜𑁆𑀘𑀺 𑀤𑀸𑀫𑁂𑀦 𑀯𑀸’’𑀢𑀺 𑀢𑀲𑁆𑀲 𑀮𑀤𑁆𑀥𑀺 𑀪𑀺𑀦𑁆𑀦𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀅𑀬𑀜𑁆𑀳𑁂𑀢𑁆𑀣 𑀅𑀢𑁆𑀣𑁄 𑁋 𑀬𑀤𑀺 𑀢𑁂 𑀤𑀸𑀫𑀸𑀤𑀻𑀳𑀺 𑀩𑀮𑀺𑀩𑀤𑁆𑀤𑀸𑀤𑀬𑁄 𑀲𑀗𑁆𑀕𑀳𑀺𑀢𑀸 𑀦𑀸𑀫, 𑀅𑀢𑁆𑀣𑀺 𑀓𑁂𑀘𑀺 𑀥𑀫𑁆𑀫𑀸 𑀓𑁂𑀳𑀺𑀘𑀺 𑀥𑀫𑁆𑀫𑁂𑀳𑀺 𑀲𑀗𑁆𑀕𑀳𑀺𑀢𑀸𑀢𑀺.

𑀲𑀗𑁆𑀕𑀳𑀺𑀢𑀓𑀣𑀸𑀯𑀡𑁆𑀡𑀦𑀸.

𑁨. 𑀲𑀫𑁆𑀧𑀬𑀼𑀢𑁆𑀢𑀓𑀣𑀸𑀯𑀡𑁆𑀡𑀦𑀸

𑁪𑁭𑁩-𑁪𑁭𑁪. 𑀇𑀤𑀸𑀦𑀺 𑀲𑀫𑁆𑀧𑀬𑀼𑀢𑁆𑀢𑀓𑀣𑀸 𑀦𑀸𑀫 𑀳𑁄𑀢𑀺. 𑀢𑀢𑁆𑀣 𑀬𑀲𑁆𑀫𑀸 𑀢𑀺𑀮𑀫𑁆𑀳𑀺 𑀢𑁂𑀮𑀁 𑀯𑀺𑀬 𑀦 𑀯𑁂𑀤𑀦𑀸𑀤𑀬𑁄 𑀲𑀜𑁆𑀜𑀸𑀤𑀻𑀲𑀼 𑀅𑀦𑀼𑀧𑀯𑀺𑀝𑁆𑀞𑀸, 𑀢𑀲𑁆𑀫𑀸 ‘‘𑀦𑀢𑁆𑀣𑀺 𑀓𑁂𑀘𑀺 𑀥𑀫𑁆𑀫𑀸 𑀓𑁂𑀳𑀺𑀘𑀺 𑀥𑀫𑁆𑀫𑁂𑀳𑀺 𑀲𑀫𑁆𑀧𑀬𑀼𑀢𑁆𑀢𑀸, 𑀏𑀯𑀁 𑀲𑀦𑁆𑀢𑁂 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀦𑁆𑀢𑀺𑀆𑀤𑀺 𑀦𑀺𑀭𑀢𑁆𑀣𑀓𑀁 𑀳𑁄𑀢𑀻’’𑀢𑀺 𑀬𑁂𑀲𑀁 𑀮𑀤𑁆𑀥𑀺, 𑀲𑁂𑀬𑁆𑀬𑀣𑀸𑀧𑀺 𑀭𑀸𑀚𑀕𑀺𑀭𑀺𑀓𑀲𑀺𑀤𑁆𑀥𑀢𑁆𑀣𑀺𑀓𑀸𑀦𑀜𑁆𑀜𑁂𑀯; 𑀢𑁂 𑀲𑀦𑁆𑀥𑀸𑀬 𑀅𑀜𑁆𑀜𑁂𑀦𑁂𑀯𑀢𑁆𑀣𑁂𑀦 𑀲𑀫𑁆𑀧𑀬𑀼𑀢𑁆𑀢𑀢𑀁 𑀤𑀲𑁆𑀲𑁂𑀢𑀼𑀁 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀅𑀢𑁆𑀢𑀦𑁄 𑀮𑀤𑁆𑀥𑀺𑀯𑀲𑁂𑀦 𑀧𑀝𑀺𑀜𑁆𑀜𑀸 𑀇𑀢𑀭𑀲𑁆𑀲. 𑀲𑁂𑀲𑀫𑀺𑀥𑀸𑀧𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀢𑁆𑀢𑀸 𑀉𑀢𑁆𑀢𑀸𑀦𑀢𑁆𑀣𑀫𑁂𑀯. 𑀬𑁄 𑀧𑀦𑁂𑀲 𑀧𑀭𑀯𑀸𑀤𑀺𑀦𑀸 ‘‘𑀬𑀣𑀸 𑀢𑀺𑀮𑀫𑁆𑀳𑀺 𑀢𑁂𑀮’’𑀦𑁆𑀢𑀺𑀆𑀤𑀺𑀓𑁄 𑀉𑀧𑀫𑀸𑀧𑀜𑁆𑀳𑁄 𑀆𑀳𑀝𑁄, 𑀲𑁄 𑀬𑀲𑁆𑀫𑀸 𑀯𑁂𑀤𑀦𑀸𑀲𑀜𑁆𑀜𑀸𑀦𑀁 𑀯𑀺𑀬 𑀢𑀺𑀮𑀢𑁂𑀮𑀸𑀦𑀁 𑀮𑀓𑁆𑀔𑀡𑀢𑁄 𑀦𑀸𑀦𑀢𑁆𑀢𑀯𑀯𑀢𑁆𑀣𑀸𑀦𑀁 𑀦𑀢𑁆𑀣𑀺. 𑀲𑀩𑁆𑀩𑁂𑀲𑀼𑀧𑀺 𑀳𑀺 𑀢𑀺𑀮𑀅𑀝𑁆𑀞𑀺𑀢𑀘𑁂𑀲𑀼 𑀢𑀺𑀮𑁄𑀢𑀺 𑀯𑁄𑀳𑀸𑀭𑀫𑀢𑁆𑀢𑀁, 𑀢𑁂𑀦𑁂𑀯 𑀢𑀺𑀮𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀕𑀳𑀺𑀢𑁂 𑀧𑀼𑀭𑀺𑀫𑀲𑀡𑁆𑀞𑀸𑀦𑁂𑀦 𑀢𑀺𑀮𑁄 𑀦𑀸𑀫 𑀦 𑀧𑀜𑁆𑀜𑀸𑀬𑀢𑀺, 𑀢𑀲𑁆𑀫𑀸 𑀅𑀦𑀸𑀳𑀝𑀲𑀤𑀺𑀲𑁄𑀯 𑀳𑁄𑀢𑀻𑀢𑀺.

𑀲𑀫𑁆𑀧𑀬𑀼𑀢𑁆𑀢𑀓𑀣𑀸𑀯𑀡𑁆𑀡𑀦𑀸.

𑁩. 𑀘𑁂𑀢𑀲𑀺𑀓𑀓𑀣𑀸𑀯𑀡𑁆𑀡𑀦𑀸

𑁪𑁭𑁫-𑁪𑁭𑁭. 𑀇𑀤𑀸𑀦𑀺 𑀘𑁂𑀢𑀲𑀺𑀓𑀓𑀣𑀸 𑀦𑀸𑀫 𑀳𑁄𑀢𑀺. 𑀢𑀢𑁆𑀣 𑀬𑀲𑁆𑀫𑀸 𑀨𑀲𑁆𑀲𑀺𑀓𑀸𑀤𑀬𑁄 𑀦𑀸𑀫 𑀦𑀢𑁆𑀣𑀺, 𑀢𑀲𑁆𑀫𑀸 ‘‘𑀘𑁂𑀢𑀲𑀺𑀓𑁂𑀦𑀸𑀧𑀺 𑀦 𑀪𑀯𑀺𑀢𑀩𑁆𑀩𑀁, 𑀇𑀢𑀺 𑀦𑀢𑁆𑀣𑀺 𑀘𑁂𑀢𑀲𑀺𑀓𑁄 𑀥𑀫𑁆𑀫𑁄’’𑀢𑀺 𑀬𑁂𑀲𑀁 𑀮𑀤𑁆𑀥𑀺, 𑀲𑁂𑀬𑁆𑀬𑀣𑀸𑀧𑀺 𑀭𑀸𑀚𑀕𑀺𑀭𑀺𑀓𑀲𑀺𑀤𑁆𑀥𑀢𑁆𑀣𑀺𑀓𑀸𑀦𑀁; 𑀢𑁂 𑀲𑀦𑁆𑀥𑀸𑀬 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀧𑀝𑀺𑀜𑁆𑀜𑀸 𑀇𑀢𑀭𑀲𑁆𑀲. 𑀲𑀳𑀚𑀸𑀢𑁄𑀢𑀺 𑀲𑀫𑁆𑀧𑀬𑀼𑀢𑁆𑀢𑀲𑀳𑀚𑀸𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀨𑀲𑁆𑀲𑀺𑀓𑀸𑀢𑀺 𑀢𑀸𑀤𑀺𑀲𑀁 𑀯𑁄𑀳𑀸𑀭𑀁 𑀅𑀧𑀲𑁆𑀲𑀦𑁆𑀢𑀲𑁆𑀲 𑀧𑀼𑀘𑁆𑀙𑀸 𑀧𑀭𑀯𑀸𑀤𑀺𑀲𑁆𑀲. 𑀓𑀺𑀁 𑀯𑁄𑀳𑀸𑀭𑁂𑀦, 𑀬𑀣𑀸 𑀘𑀺𑀢𑁆𑀢𑀦𑀺𑀲𑁆𑀲𑀺𑀢𑀓𑁄𑀢𑀺 𑀘𑁂𑀢𑀲𑀺𑀓𑁄, 𑀏𑀯𑀁 𑀲𑁄𑀧𑀺 𑀨𑀲𑁆𑀲𑀦𑀺𑀲𑁆𑀲𑀺𑀢𑀢𑁆𑀢𑀸 𑀨𑀲𑁆𑀲𑀺𑀓𑁄𑀢𑀺 𑀯𑀼𑀢𑁆𑀢𑁂 𑀤𑁄𑀲𑁄 𑀦𑀢𑁆𑀣𑀻𑀢𑀺 𑀧𑀝𑀺𑀜𑁆𑀜𑀸 𑀲𑀓𑀯𑀸𑀤𑀺𑀲𑁆𑀲. 𑀲𑁂𑀲𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀘𑁂𑀢𑀲𑀺𑀓𑀓𑀣𑀸𑀯𑀡𑁆𑀡𑀦𑀸.

𑁪. 𑀤𑀸𑀦𑀓𑀣𑀸𑀯𑀡𑁆𑀡𑀦𑀸

𑁪𑁭𑁮. 𑀇𑀤𑀸𑀦𑀺 𑀤𑀸𑀦𑀓𑀣𑀸 𑀦𑀸𑀫 𑀳𑁄𑀢𑀺. 𑀢𑀢𑁆𑀣 𑀤𑀸𑀦𑀁 𑀦𑀸𑀫 𑀢𑀺𑀯𑀺𑀥𑀁 𑁋 𑀘𑀸𑀕𑀘𑁂𑀢𑀦𑀸𑀧𑀺, 𑀯𑀺𑀭𑀢𑀺𑀧𑀺, 𑀤𑁂𑀬𑁆𑀬𑀥𑀫𑁆𑀫𑁄𑀧𑀺. ‘‘𑀲𑀤𑁆𑀥𑀸 𑀳𑀺𑀭𑀺𑀬𑀁 𑀓𑀼𑀲𑀮𑀜𑁆𑀘 𑀤𑀸𑀦’’𑀦𑁆𑀢𑀺 (𑀅. 𑀦𑀺. 𑁮.𑁩𑁦) 𑀆𑀕𑀢𑀝𑁆𑀞𑀸𑀦𑁂 𑀘𑀸𑀕𑀘𑁂𑀢𑀦𑀸 𑀤𑀸𑀦𑀁. ‘‘𑀅𑀪𑀬𑀁 𑀤𑁂𑀢𑀻’’𑀢𑀺 (𑀅. 𑀦𑀺. 𑁮.𑁩𑁯) 𑀆𑀕𑀢𑀝𑁆𑀞𑀸𑀦𑁂 𑀯𑀺𑀭𑀢𑀺. ‘‘𑀤𑀸𑀦𑀁 𑀤𑁂𑀢𑀺 𑀅𑀦𑁆𑀦𑀁 𑀧𑀸𑀦’’𑀦𑁆𑀢𑀺 𑀆𑀕𑀢𑀝𑁆𑀞𑀸𑀦𑁂 𑀤𑁂𑀬𑁆𑀬𑀥𑀫𑁆𑀫𑁄. 𑀢𑀢𑁆𑀣 𑀘𑀸𑀕𑀘𑁂𑀢𑀦𑀸 ‘‘𑀤𑁂𑀢𑀺 𑀯𑀸 𑀤𑁂𑀬𑁆𑀬𑀥𑀫𑁆𑀫𑀁, 𑀤𑁂𑀦𑁆𑀢𑀺 𑀯𑀸 𑀏𑀢𑀸𑀬 𑀤𑁂𑀬𑁆𑀬𑀥𑀫𑁆𑀫’’𑀦𑁆𑀢𑀺 𑀤𑀸𑀦𑀁. 𑀯𑀺𑀭𑀢𑀺 𑀅𑀯𑀔𑀡𑁆𑀟𑀦𑀝𑁆𑀞𑁂𑀦 𑀮𑀯𑀦𑀝𑁆𑀞𑁂𑀦 𑀯𑀸 𑀤𑀸𑀦𑀁. 𑀲𑀸 𑀳𑀺 𑀉𑀧𑁆𑀧𑀚𑁆𑀚𑀫𑀸𑀦𑀸 𑀪𑀬𑀪𑁂𑀭𑀯𑀸𑀤𑀺𑀲𑀗𑁆𑀔𑀸𑀢𑀁 𑀤𑀼𑀲𑁆𑀲𑀻𑀮𑁆𑀬𑀘𑁂𑀢𑀦𑀁 𑀤𑀸𑀢𑀺 𑀔𑀡𑁆𑀟𑁂𑀢𑀺 𑀮𑀼𑀦𑀸𑀢𑀺 𑀯𑀸𑀢𑀺 𑀤𑀸𑀦𑀁. 𑀤𑁂𑀬𑁆𑀬𑀥𑀫𑁆𑀫𑁄 𑀤𑀺𑀬𑁆𑀬𑀢𑀻𑀢𑀺 𑀤𑀸𑀦𑀁. 𑀏𑀯𑀫𑁂𑀢𑀁 𑀢𑀺𑀯𑀺𑀥𑀫𑁆𑀧𑀺 𑀅𑀢𑁆𑀣𑀢𑁄 𑀘𑁂𑀢𑀲𑀺𑀓𑁄 𑀘𑁂𑀯 𑀥𑀫𑁆𑀫𑁄 𑀤𑁂𑀬𑁆𑀬𑀥𑀫𑁆𑀫𑁄 𑀘𑀸𑀢𑀺 𑀤𑀼𑀯𑀺𑀥𑀁 𑀳𑁄𑀢𑀺. 𑀢𑀢𑁆𑀣 𑀬𑁂𑀲𑀁 ‘‘𑀘𑁂𑀢𑀲𑀺𑀓𑁄𑀯 𑀥𑀫𑁆𑀫𑁄 𑀤𑀸𑀦𑀁, 𑀦 𑀤𑁂𑀬𑁆𑀬𑀥𑀫𑁆𑀫𑁄’’𑀢𑀺 𑀮𑀤𑁆𑀥𑀺, 𑀲𑁂𑀬𑁆𑀬𑀣𑀸𑀧𑀺 𑀭𑀸𑀚𑀕𑀺𑀭𑀺𑀓𑀲𑀺𑀤𑁆𑀥𑀢𑁆𑀣𑀺𑀓𑀸𑀦𑀁; 𑀢𑁂 𑀲𑀦𑁆𑀥𑀸𑀬 𑀘𑁂𑀢𑀲𑀺𑀓𑁄𑀢𑀺 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀧𑀝𑀺𑀜𑁆𑀜𑀸 𑀇𑀢𑀭𑀲𑁆𑀲. 𑀅𑀣 𑀦𑀁 𑀤𑁂𑀬𑁆𑀬𑀥𑀫𑁆𑀫𑀯𑀲𑁂𑀦 𑀘𑁄𑀤𑁂𑀢𑀼𑀁 𑀮𑀩𑁆𑀪𑀸𑀢𑀺 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀅𑀦𑁆𑀦𑀸𑀤𑀻𑀦𑀺 𑀯𑀺𑀬 𑀲𑁄 𑀦 𑀲𑀓𑁆𑀓𑀸 𑀤𑀸𑀢𑀼𑀦𑁆𑀢𑀺 𑀧𑀝𑀺𑀓𑁆𑀔𑁂𑀧𑁄 𑀇𑀢𑀭𑀲𑁆𑀲. 𑀧𑀼𑀦 𑀤𑀴𑁆𑀳𑀁 𑀓𑀢𑁆𑀯𑀸 𑀧𑀼𑀝𑁆𑀞𑁂 ‘‘𑀅𑀪𑀬𑀁 𑀤𑁂𑀢𑀻’’𑀢𑀺 𑀲𑀼𑀢𑁆𑀢𑀯𑀲𑁂𑀦 𑀧𑀝𑀺𑀜𑁆𑀜𑀸 𑀢𑀲𑁆𑀲𑁂𑀯. 𑀨𑀲𑁆𑀲𑀧𑀜𑁆𑀳𑀸𑀤𑀻𑀲𑀼 𑀧𑀦 𑀨𑀲𑁆𑀲𑀁 𑀤𑁂𑀢𑀻𑀢𑀺𑀆𑀤𑀺𑀯𑁄𑀳𑀸𑀭𑀁 𑀅𑀧𑀲𑁆𑀲𑀦𑁆𑀢𑁄 𑀧𑀝𑀺𑀓𑁆𑀔𑀺𑀧𑀢𑁂𑀯.

𑁪𑁭𑁯. 𑀅𑀦𑀺𑀝𑁆𑀞𑀨𑀮𑀦𑁆𑀢𑀺𑀆𑀤𑀺 𑀅𑀘𑁂𑀢𑀲𑀺𑀓𑀲𑁆𑀲 𑀥𑀫𑁆𑀫𑀲𑁆𑀲 𑀤𑀸𑀦𑀪𑀸𑀯𑀤𑀻𑀧𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀦 𑀳𑀺 𑀅𑀘𑁂𑀢𑀲𑀺𑀓𑁄 𑀅𑀦𑁆𑀦𑀸𑀤𑀺𑀥𑀫𑁆𑀫𑁄 𑀆𑀬𑀢𑀺𑀁 𑀯𑀺𑀧𑀸𑀓𑀁 𑀤𑁂𑀢𑀺, 𑀇𑀝𑁆𑀞𑀨𑀮𑀪𑀸𑀯𑀦𑀺𑀬𑀫𑀦𑀢𑁆𑀣𑀁 𑀧𑀦𑁂𑀢𑀁 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀬𑀫𑁆𑀧𑀺 𑀳𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 𑁋 𑀬𑀤𑀺 𑀅𑀘𑁂𑀢𑀲𑀺𑀓𑁄 𑀅𑀦𑁆𑀦𑀸𑀤𑀺𑀥𑀫𑁆𑀫𑁄 𑀤𑀸𑀦𑀁 𑀪𑀯𑁂𑀬𑁆𑀬, 𑀳𑀺𑀢𑀘𑀺𑀢𑁆𑀢𑁂𑀦 𑀅𑀦𑀺𑀝𑁆𑀞𑀁 𑀅𑀓𑀦𑁆𑀢𑀁 𑀪𑁂𑀲𑀚𑁆𑀚𑀁 𑀤𑁂𑀦𑁆𑀢𑀲𑁆𑀲 𑀦𑀺𑀫𑁆𑀩𑀩𑀻𑀚𑀸𑀤𑀻𑀳𑀺 𑀯𑀺𑀬 𑀦𑀺𑀫𑁆𑀩𑀸𑀤𑀬𑁄 𑀅𑀦𑀺𑀝𑁆𑀞𑀫𑁂𑀯 𑀨𑀮𑀁 𑀦𑀺𑀩𑁆𑀩𑀢𑁆𑀢𑁂𑀬𑁆𑀬. 𑀬𑀲𑁆𑀫𑀸 𑀧𑀦𑁂𑀢𑁆𑀣 𑀳𑀺𑀢𑀨𑀭𑀡𑀘𑀸𑀕𑀘𑁂𑀢𑀦𑀸 𑀤𑀸𑀦𑀁, 𑀢𑀲𑁆𑀫𑀸 𑀅𑀦𑀺𑀝𑁆𑀞𑁂𑀧𑀺 𑀤𑁂𑀬𑁆𑀬𑀥𑀫𑁆𑀫𑁂 𑀤𑀸𑀦𑀁 𑀇𑀝𑁆𑀞𑀨𑀮𑀫𑁂𑀯 𑀳𑁄𑀢𑀻𑀢𑀺.

𑀏𑀯𑀁 𑀧𑀭𑀯𑀸𑀤𑀺𑀦𑀸 𑀘𑁂𑀢𑀲𑀺𑀓𑀥𑀫𑁆𑀫𑀲𑁆𑀲 𑀤𑀸𑀦𑀪𑀸𑀯𑁂 𑀧𑀢𑀺𑀝𑁆𑀞𑀸𑀧𑀺𑀢𑁂 𑀲𑀓𑀯𑀸𑀤𑀻 𑀇𑀢𑀭𑁂𑀦 𑀧𑀭𑀺𑀬𑀸𑀬𑁂𑀦 𑀤𑁂𑀬𑁆𑀬𑀥𑀫𑁆𑀫𑀲𑁆𑀲 𑀤𑀸𑀦𑀪𑀸𑀯𑀁 𑀲𑀸𑀥𑁂𑀢𑀼𑀁 𑀤𑀸𑀦𑀁 𑀇𑀝𑁆𑀞𑀨𑀮𑀁 𑀯𑀼𑀢𑁆𑀢𑀁 𑀪𑀕𑀯𑀢𑀸𑀢𑀺𑀆𑀤𑀺𑀫𑀸𑀳. 𑀧𑀭𑀯𑀸𑀤𑀻 𑀧𑀦 𑀘𑀻𑀯𑀭𑀸𑀤𑀻𑀦𑀁 𑀇𑀝𑁆𑀞𑀯𑀺𑀧𑀸𑀓𑀢𑀁 𑀅𑀧𑀲𑁆𑀲𑀦𑁆𑀢𑁄 𑀧𑀝𑀺𑀓𑁆𑀔𑀺𑀧𑀢𑀺. 𑀲𑀼𑀢𑁆𑀢𑀲𑀸𑀥𑀦𑀁 𑀧𑀭𑀯𑀸𑀤𑀻𑀯𑀸𑀤𑁂𑀧𑀺 𑀬𑀼𑀚𑁆𑀚𑀢𑀺 𑀲𑀓𑀯𑀸𑀤𑀻𑀯𑀸𑀤𑁂𑀧𑀺, 𑀦 𑀧𑀦 𑀏𑀓𑁂𑀦𑀢𑁆𑀣𑁂𑀦. 𑀤𑁂𑀬𑁆𑀬𑀥𑀫𑁆𑀫𑁄 𑀇𑀝𑁆𑀞𑀨𑀮𑁄𑀢𑀺 𑀇𑀝𑁆𑀞𑀨𑀮𑀪𑀸𑀯𑀫𑀢𑁆𑀢𑀫𑁂𑀯 𑀧𑀝𑀺𑀓𑁆𑀔𑀺𑀢𑁆𑀢𑀁. 𑀢𑀲𑁆𑀫𑀸 𑀢𑁂𑀦 𑀳𑀺 𑀦 𑀯𑀢𑁆𑀢𑀩𑁆𑀩𑀦𑁆𑀢𑀺 𑀇𑀝𑁆𑀞𑀨𑀮𑀪𑀸𑀯𑁂𑀦𑁂𑀯 𑀦 𑀯𑀢𑁆𑀢𑀩𑁆𑀩𑀢𑀸 𑀬𑀼𑀚𑁆𑀚𑀢𑀺. 𑀤𑀸𑀢𑀩𑁆𑀩𑀝𑁆𑀞𑁂𑀦 𑀧𑀦 𑀤𑁂𑀬𑁆𑀬𑀥𑀫𑁆𑀫𑁄 𑀤𑀸𑀦𑀫𑁂𑀯. 𑀤𑀺𑀦𑁆𑀦𑀜𑁆𑀳𑀺 𑀤𑀸𑀦𑀸𑀦𑀁 𑀲𑀗𑁆𑀓𑀭𑀪𑀸𑀯𑀫𑁄𑀘𑀦𑀢𑁆𑀣𑀫𑁂𑀯 𑀅𑀬𑀁 𑀓𑀣𑀸𑀢𑀺.

𑀤𑀸𑀦𑀓𑀣𑀸𑀯𑀡𑁆𑀡𑀦𑀸.

𑁫. 𑀧𑀭𑀺𑀪𑁄𑀕𑀫𑀬𑀧𑀼𑀜𑁆𑀜𑀓𑀣𑀸𑀯𑀡𑁆𑀡𑀦𑀸

𑁪𑁮𑁩. 𑀇𑀤𑀸𑀦𑀺 𑀧𑀭𑀺𑀪𑁄𑀕𑀫𑀬𑀧𑀼𑀜𑁆𑀜𑀓𑀣𑀸 𑀦𑀸𑀫 𑀳𑁄𑀢𑀺. 𑀢𑀢𑁆𑀣 ‘‘𑀢𑁂𑀲𑀁 𑀤𑀺𑀯𑀸 𑀘 𑀭𑀢𑁆𑀢𑁄 𑀘, 𑀲𑀤𑀸 𑀧𑀼𑀜𑁆𑀜𑀁 𑀧𑀯𑀟𑁆𑀠𑀢𑀻’’𑀢𑀺 (𑀲𑀁. 𑀦𑀺. 𑁧.𑁪𑁭) 𑀘 ‘‘𑀬𑀲𑁆𑀲 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀘𑀻𑀯𑀭𑀁 𑀧𑀭𑀺𑀪𑀼𑀜𑁆𑀚𑀫𑀸𑀦𑁄’’𑀢𑀺 (𑀅. 𑀦𑀺. 𑁪.𑁫𑁧) 𑀘 𑀏𑀯𑀫𑀸𑀤𑀻𑀦𑀺 𑀲𑀼𑀢𑁆𑀢𑀸𑀦𑀺 𑀅𑀬𑁄𑀦𑀺𑀲𑁄 𑀕𑀳𑁂𑀢𑁆𑀯𑀸 𑀬𑁂𑀲𑀁 𑀧𑀭𑀺𑀪𑁄𑀕𑀫𑀬𑀁 𑀦𑀸𑀫 𑀧𑀼𑀜𑁆𑀜𑀁 𑀅𑀢𑁆𑀣𑀻’’𑀢𑀺 𑀮𑀤𑁆𑀥𑀺, 𑀲𑁂𑀬𑁆𑀬𑀣𑀸𑀧𑀺 𑀭𑀸𑀚𑀕𑀺𑀭𑀺𑀓𑀲𑀺𑀤𑁆𑀥𑀢𑁆𑀣𑀺𑀓𑀲𑀫𑁆𑀫𑀺𑀢𑀺𑀬𑀸𑀦𑀁; 𑀢𑁂 𑀲𑀦𑁆𑀥𑀸𑀬 𑀧𑀭𑀺𑀪𑁄𑀕𑀫𑀬𑀦𑁆𑀢𑀺 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀧𑀝𑀺𑀜𑁆𑀜𑀸 𑀇𑀢𑀭𑀲𑁆𑀲. 𑀅𑀣 𑀦𑀁 ‘‘𑀧𑀼𑀜𑁆𑀜𑀁 𑀦𑀸𑀫 𑀨𑀲𑁆𑀲𑀸𑀤𑀬𑁄 𑀓𑀼𑀲𑀮𑀸 𑀥𑀫𑁆𑀫𑀸, 𑀦 𑀢𑀢𑁄 𑀧𑀭𑀁, 𑀢𑀲𑁆𑀫𑀸 𑀨𑀲𑁆𑀲𑀸𑀤𑀻𑀳𑀺 𑀢𑁂 𑀯𑀟𑁆𑀠𑀺𑀢𑀩𑁆𑀩’’𑀦𑁆𑀢𑀺 𑀘𑁄𑀤𑁂𑀢𑀼𑀁 𑀧𑀭𑀺𑀪𑁄𑀕𑀫𑀬𑁄 𑀨𑀲𑁆𑀲𑁄𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀁 𑀲𑀩𑁆𑀩𑀁 𑀇𑀢𑀭𑁂𑀦 𑀢𑁂𑀲𑀁 𑀅𑀯𑀟𑁆𑀠𑀦𑀢𑁄 𑀧𑀝𑀺𑀓𑁆𑀔𑀺𑀢𑁆𑀢𑀁. 𑀮𑀢𑀸𑀯𑀺𑀬𑀸𑀢𑀺𑀆𑀤𑀻𑀦𑀺 ‘‘𑀓𑀺𑀭𑀺𑀬𑀸𑀬 𑀯𑀸 𑀪𑀸𑀯𑀦𑀸𑀬 𑀯𑀸 𑀯𑀺𑀦𑀸𑀧𑀺 𑀬𑀣𑀸 𑀮𑀢𑀸𑀤𑀻𑀦𑀺 𑀲𑀬𑀫𑁂𑀯 𑀯𑀟𑁆𑀠𑀦𑁆𑀢𑀺, 𑀓𑀺𑀁 𑀢𑁂 𑀏𑀯𑀁 𑀯𑀟𑁆𑀠𑀦𑁆𑀢𑀻’’𑀢𑀺 𑀘𑁄𑀤𑀦𑀢𑁆𑀣𑀁 𑀯𑀼𑀢𑁆𑀢𑀸𑀦𑀺. 𑀢𑀣𑀸 𑀧𑀦𑀲𑁆𑀲 𑀅𑀯𑀟𑁆𑀠𑀦𑀢𑁄 𑀦 𑀳𑁂𑀯𑀸𑀢𑀺 𑀧𑀝𑀺𑀓𑁆𑀔𑀺𑀢𑁆𑀢𑀁.

𑁪𑁮𑁪. 𑀦 𑀲𑀫𑀦𑁆𑀦𑀸𑀳𑀭𑀢𑀻𑀢𑀺 𑀧𑀜𑁆𑀳𑁂 𑀧𑀝𑀺𑀕𑁆𑀕𑀸𑀳𑀓𑀸𑀦𑀁 𑀧𑀭𑀺𑀪𑁄𑀕𑁂𑀦 𑀧𑀼𑀭𑀺𑀫𑀘𑁂𑀢𑀦𑀸 𑀯𑀟𑁆𑀠𑀢𑀺, 𑀏𑀯𑀁 𑀢𑀁 𑀳𑁄𑀢𑀺 𑀧𑀼𑀜𑁆𑀜𑀦𑁆𑀢𑀺 𑀮𑀤𑁆𑀥𑀺𑀯𑀲𑁂𑀦 𑀧𑀝𑀺𑀚𑀸𑀦𑀸𑀢𑀺. 𑀢𑀢𑁄 𑀅𑀦𑀸𑀯𑀝𑁆𑀝𑁂𑀦𑁆𑀢𑀲𑁆𑀲𑀸𑀢𑀺𑀆𑀤𑀻𑀳𑀺 𑀧𑀼𑀝𑁆𑀞𑁄 𑀤𑀸𑀬𑀓𑀲𑁆𑀲 𑀘𑀸𑀕𑀘𑁂𑀢𑀦𑀁 𑀲𑀦𑁆𑀥𑀸𑀬 𑀧𑀝𑀺𑀓𑁆𑀔𑀺𑀧𑀢𑀺. 𑀢𑀢𑁆𑀣 𑀅𑀦𑀸𑀯𑀝𑁆𑀝𑁂𑀦𑁆𑀢𑀲𑁆𑀲𑀸𑀢𑀺 𑀤𑀸𑀦𑀘𑁂𑀢𑀦𑀸𑀬 𑀧𑀼𑀭𑁂𑀘𑀸𑀭𑀺𑀓𑁂𑀦 𑀆𑀯𑀚𑁆𑀚𑀦𑁂𑀦 𑀪𑀯𑀗𑁆𑀕𑀁 𑀅𑀦𑀸𑀯𑀝𑁆𑀝𑁂𑀦𑁆𑀢𑀲𑁆𑀲 𑀅𑀧𑀭𑀺𑀯𑀝𑁆𑀝𑁂𑀦𑁆𑀢𑀲𑁆𑀲. 𑀅𑀦𑀸𑀪𑁄𑀕𑀲𑁆𑀲𑀸𑀢𑀺 𑀦𑀺𑀭𑀸𑀪𑁄𑀕𑀲𑁆𑀲. 𑀅𑀲𑀫𑀦𑁆𑀦𑀸𑀳𑀭𑀦𑁆𑀢𑀲𑁆𑀲𑀸𑀢𑀺 𑀦 𑀲𑀫𑀦𑁆𑀦𑀸𑀳𑀭𑀦𑁆𑀢𑀲𑁆𑀲. 𑀆𑀯𑀚𑁆𑀚𑀦𑀜𑁆𑀳𑀺 𑀪𑀯𑀗𑁆𑀕𑀁 𑀯𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀅𑀢𑁆𑀢𑀦𑁄 𑀕𑀢𑀫𑀕𑁆𑀕𑁂 𑀉𑀧𑁆𑀧𑀚𑁆𑀚𑀫𑀸𑀦𑀁 𑀤𑀸𑀦𑀘𑁂𑀢𑀦𑀁 𑀲𑀫𑀦𑁆𑀦𑀸𑀳𑀭𑀢𑀺 𑀦𑀸𑀫. 𑀏𑀯𑀁𑀓𑀺𑀘𑁆𑀘𑁂𑀦 𑀇𑀫𑀺𑀦𑀸 𑀘𑀺𑀢𑁆𑀢𑁂𑀦 𑀅𑀲𑀫𑀦𑁆𑀦𑀸𑀳𑀭𑀦𑁆𑀢𑀲𑁆𑀲 𑀧𑀼𑀜𑁆𑀜𑀁 𑀳𑁄𑀢𑀻𑀢𑀺 𑀧𑀼𑀘𑁆𑀙𑀢𑀺. 𑀅𑀫𑀦𑀲𑀺𑀓𑀭𑁄𑀦𑁆𑀢𑀲𑁆𑀲𑀸𑀢𑀺 𑀫𑀦𑀁 𑀅𑀓𑀭𑁄𑀦𑁆𑀢𑀲𑁆𑀲. 𑀆𑀯𑀚𑁆𑀚𑀦𑁂𑀦 𑀳𑀺 𑀢𑀤𑀦𑀦𑁆𑀢𑀭𑀁 𑀉𑀧𑁆𑀧𑀚𑁆𑀚𑀫𑀸𑀦𑀁 𑀫𑀦𑀁 𑀓𑀭𑁄𑀢𑀺 𑀦𑀸𑀫. 𑀏𑀯𑀁 𑀅𑀓𑀭𑁄𑀦𑁆𑀢𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀉𑀧𑀬𑁄𑀕𑀯𑀘𑀦𑀲𑁆𑀫𑀺𑀜𑁆𑀳𑀺 𑀏𑀢𑀁 𑀪𑀼𑀫𑁆𑀫𑀁. 𑀅𑀘𑁂𑀢𑀬𑀦𑁆𑀢𑀲𑁆𑀲𑀸𑀢𑀺 𑀘𑁂𑀢𑀦𑀁 𑀅𑀦𑀼𑀧𑁆𑀧𑀸𑀤𑁂𑀦𑁆𑀢𑀲𑁆𑀲. 𑀅𑀧𑀢𑁆𑀣𑁂𑀦𑁆𑀢𑀲𑁆𑀲𑀸𑀢𑀺 𑀧𑀢𑁆𑀣𑀦𑀸𑀲𑀗𑁆𑀔𑀸𑀢𑀁 𑀓𑀼𑀲𑀮𑀘𑁆𑀙𑀦𑁆𑀤𑀁 𑀅𑀓𑀭𑁄𑀦𑁆𑀢𑀲𑁆𑀲. 𑀅𑀧𑁆𑀧𑀡𑀺𑀤𑀳𑀦𑁆𑀢𑀲𑁆𑀲𑀸𑀢𑀺 𑀤𑀸𑀦𑀘𑁂𑀢𑀦𑀸𑀯𑀲𑁂𑀦 𑀘𑀺𑀢𑁆𑀢𑀁 𑀅𑀝𑁆𑀞𑀧𑁂𑀦𑁆𑀢𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀦𑀦𑀼 𑀆𑀯𑀝𑁆𑀝𑁂𑀦𑁆𑀢𑀲𑁆𑀲𑀸𑀢𑀺 𑀯𑀸𑀭𑁂 𑀆𑀪𑁄𑀕𑀲𑁆𑀲𑀸𑀢𑀺 𑀆𑀪𑁄𑀕𑀯𑀢𑁄. 𑀅𑀣 𑀯𑀸 𑀆𑀪𑁄𑀕𑀸 𑀅𑀲𑁆𑀲, 𑀆𑀪𑁄𑀕𑀲𑁆𑀲 𑀯𑀸 𑀅𑀦𑀦𑁆𑀢𑀭𑀁 𑀢𑀁 𑀧𑀼𑀜𑁆𑀜𑀁 𑀳𑁄𑀢𑀻𑀢𑀺 𑀅𑀢𑁆𑀣𑁄.

𑁪𑁮𑁫. 𑀤𑁆𑀯𑀺𑀦𑁆𑀦𑀁 𑀨𑀲𑁆𑀲𑀸𑀦𑀦𑁆𑀢𑀺𑀆𑀤𑀻𑀲𑀼𑀧𑀺 𑀏𑀓𑀓𑁆𑀔𑀡𑁂 𑀤𑀸𑀬𑀓𑀲𑁆𑀲 𑀤𑁆𑀯𑀺𑀦𑁆𑀦𑀁 𑀨𑀲𑁆𑀲𑀸𑀤𑀻𑀦𑀁 𑀅𑀪𑀸𑀯𑀸 𑀧𑀝𑀺𑀓𑁆𑀔𑀺𑀧𑀢𑀺, 𑀤𑀸𑀬𑀓𑀲𑁆𑀲 𑀘 𑀧𑀭𑀺𑀪𑀼𑀜𑁆𑀚𑀦𑁆𑀢𑀲𑁆𑀲 𑀘𑀸𑀢𑀺 𑀉𑀪𑀺𑀦𑁆𑀦𑀁 𑀨𑀲𑁆𑀲𑀸𑀤𑀬𑁄 𑀲𑀦𑁆𑀥𑀸𑀬 𑀧𑀝𑀺𑀚𑀸𑀦𑀸𑀢𑀺. 𑀅𑀧𑀺𑀘𑀲𑁆𑀲 𑀧𑀜𑁆𑀘𑀦𑁆𑀦𑀁 𑀯𑀺𑀜𑁆𑀜𑀸𑀡𑀸𑀦𑀁 𑀲𑀫𑁄𑀥𑀸𑀦𑀁 𑀳𑁄𑀢𑀻𑀢𑀺 𑀮𑀤𑁆𑀥𑀺, 𑀢𑀲𑁆𑀲𑀸𑀧𑀺 𑀯𑀲𑁂𑀦 𑀧𑀝𑀺𑀚𑀸𑀦𑀸𑀢𑀺. 𑀅𑀣 𑀦𑀁 𑀲𑀓𑀯𑀸𑀤𑀻 𑀧𑀭𑀺𑀬𑀸𑀬𑀲𑁆𑀲 𑀤𑁆𑀯𑀸𑀭𑀁𑀧𑀺𑀤𑀳𑀺𑀢𑁆𑀯𑀸 𑀉𑀚𑀼𑀯𑀺𑀧𑀘𑁆𑀘𑀦𑀻𑀓𑀯𑀲𑁂𑀦 𑀘𑁄𑀤𑁂𑀢𑀼𑀁 𑀓𑀼𑀲𑀮𑀸𑀤𑀺𑀧𑀜𑁆𑀳𑀁 𑀧𑀼𑀘𑁆𑀙𑀢𑀺. 𑀢𑀢𑁆𑀭𑀸𑀧𑀺 𑀓𑀼𑀲𑀮𑀸𑀓𑀼𑀲𑀮𑀸𑀦𑀁 𑀏𑀓𑀲𑁆𑀲𑁂𑀓𑀓𑁆𑀔𑀡𑁂 𑀲𑀫𑁆𑀧𑀬𑁄𑀕𑀸𑀪𑀸𑀯𑀁 𑀲𑀦𑁆𑀥𑀸𑀬 𑀧𑀝𑀺𑀓𑁆𑀔𑀺𑀧𑀢𑀺. 𑀧𑀭𑀺𑀪𑁄𑀕𑀫𑀬𑀁 𑀧𑀦 𑀘𑀺𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀻𑀢𑀺 𑀮𑀤𑁆𑀥𑀺𑀬𑀸 𑀧𑀝𑀺𑀚𑀸𑀦𑀸𑀢𑀺. 𑀅𑀣 𑀦𑀁 𑀲𑀓𑀯𑀸𑀤𑀻 𑀲𑀼𑀢𑁆𑀢𑁂𑀦 𑀦𑀺𑀕𑁆𑀕𑀡𑁆𑀳𑀸𑀢𑀺.

𑁪𑁮𑁬. 𑀲𑀼𑀢𑁆𑀢𑀲𑀸𑀥𑀦𑁂 𑀆𑀭𑀸𑀫𑀭𑁄𑀧𑀓𑀸𑀤𑀻𑀦𑀁 𑀅𑀦𑀼𑀲𑁆𑀲𑀭𑀡𑀧𑀝𑀺𑀲𑀗𑁆𑀔𑀭𑀡𑀸𑀤𑀺𑀯𑀲𑁂𑀦 𑀅𑀦𑁆𑀢𑀭𑀦𑁆𑀢𑀭𑀸 𑀉𑀧𑁆𑀧𑀚𑁆𑀚𑀫𑀸𑀦𑀁 𑀧𑀼𑀜𑁆𑀜𑀁 𑀲𑀦𑁆𑀥𑀸𑀬 𑀲𑀤𑀸 𑀧𑀼𑀜𑁆𑀜𑀁 𑀧𑀯𑀟𑁆𑀠𑀢𑀻𑀢𑀺 𑀯𑀼𑀢𑁆𑀢𑀁. 𑀅𑀧𑁆𑀧𑀫𑀸𑀡𑁄 𑀢𑀲𑁆𑀲 𑀧𑀼𑀜𑁆𑀜𑀸𑀪𑀺𑀲𑀦𑁆𑀤𑁄𑀢𑀺 𑀇𑀤𑀁 𑀅𑀧𑁆𑀧𑀫𑀸𑀡𑀯𑀺𑀳𑀸𑀭𑀺𑀦𑁄 𑀤𑀺𑀦𑁆𑀦𑀧𑀘𑁆𑀘𑀬𑀢𑁆𑀢𑀸 𑀘 ‘‘𑀏𑀯𑀭𑀽𑀧𑁄 𑀫𑁂 𑀘𑀻𑀯𑀭𑀁 𑀧𑀭𑀺𑀪𑀼𑀜𑁆𑀚𑀢𑀻’’𑀢𑀺 𑀅𑀦𑀼𑀫𑁄𑀤𑀦𑀯𑀲𑁂𑀦 𑀘 𑀯𑀼𑀢𑁆𑀢𑀁. 𑀢𑀁 𑀲𑁄 𑀧𑀭𑀺𑀪𑁄𑀕𑀫𑀬𑀦𑁆𑀢𑀺 𑀲𑀮𑁆𑀮𑀓𑁆𑀔𑁂𑀢𑀺. 𑀬𑀲𑁆𑀫𑀸 𑀧𑀦 𑀧𑀝𑀺𑀕𑁆𑀕𑀸𑀳𑀓𑁂𑀦 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀅𑀧𑀭𑀺𑀪𑀼𑀢𑁆𑀢𑁂𑀧𑀺 𑀤𑁂𑀬𑁆𑀬𑀥𑀫𑁆𑀫𑁂 𑀧𑀼𑀜𑁆𑀜𑀁 𑀳𑁄𑀢𑀺𑀬𑁂𑀯, 𑀢𑀲𑁆𑀫𑀸 𑀲𑀓𑀯𑀸𑀤𑀻𑀯𑀸𑀤𑁄𑀯 𑀩𑀮𑀯𑀸, 𑀢𑀢𑁆𑀣 𑀧𑀝𑀺𑀕𑁆𑀕𑀸𑀳𑀓𑁂𑀦 𑀧𑀝𑀺𑀕𑁆𑀕𑀳𑀺𑀢𑁂𑀢𑀺 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀲𑁂𑀲𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀧𑀭𑀺𑀪𑁄𑀕𑀫𑀬𑀧𑀼𑀜𑁆𑀜𑀓𑀣𑀸𑀯𑀡𑁆𑀡𑀦𑀸.

𑁬. 𑀇𑀢𑁄𑀤𑀺𑀦𑁆𑀦𑀓𑀣𑀸𑀯𑀡𑁆𑀡𑀦𑀸

𑁪𑁮𑁮-𑁪𑁯𑁧. 𑀇𑀤𑀸𑀦𑀺 𑀇𑀢𑁄 𑀤𑀺𑀦𑁆𑀦𑀓𑀣𑀸 𑀦𑀸𑀫 𑀳𑁄𑀢𑀺. 𑀢𑀢𑁆𑀣 𑀬𑁂𑀲𑀁 ‘‘𑀇𑀢𑁄 𑀤𑀺𑀦𑁆𑀦𑁂𑀦 𑀬𑀸𑀧𑁂𑀦𑁆𑀢𑀺, 𑀧𑁂𑀢𑀸 𑀓𑀸𑀮𑀗𑁆𑀓𑀢𑀸 𑀢𑀳𑀺’’𑀦𑁆𑀢𑀺 (𑀧𑁂. 𑀯. 𑁧𑁯) 𑀯𑀘𑀦𑀁 𑀦𑀺𑀲𑁆𑀲𑀸𑀬 ‘‘𑀬𑀁 𑀇𑀢𑁄 𑀘𑀻𑀯𑀭𑀸𑀤𑀺 𑀤𑀺𑀦𑁆𑀦𑀁 𑀢𑁂𑀦𑁂𑀯 𑀬𑀸𑀧𑁂𑀦𑁆𑀢𑀻’’𑀢𑀺 𑀮𑀤𑁆𑀥𑀺, 𑀲𑁂𑀬𑁆𑀬𑀣𑀸𑀧𑀺 𑀭𑀸𑀚𑀕𑀺𑀭𑀺𑀓𑀲𑀺𑀤𑁆𑀥𑀢𑁆𑀣𑀺𑀓𑀸𑀦𑀁; 𑀢𑁂 𑀲𑀦𑁆𑀥𑀸𑀬 𑀇𑀢𑁄 𑀤𑀺𑀦𑁆𑀦𑁂𑀦𑀸𑀢𑀺 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀧𑀝𑀺𑀜𑁆𑀜𑀸 𑀇𑀢𑀭𑀲𑁆𑀲. 𑀧𑀼𑀦 𑀘𑀻𑀯𑀭𑀸𑀤𑀺𑀯𑀲𑁂𑀦 𑀅𑀦𑀼𑀬𑀼𑀢𑁆𑀢𑁄 𑀧𑀝𑀺𑀓𑁆𑀔𑀺𑀧𑀢𑀺. 𑀅𑀜𑁆𑀜𑁄 𑀅𑀜𑁆𑀜𑀲𑁆𑀲 𑀓𑀸𑀭𑀓𑁄𑀢𑀺 𑀅𑀜𑁆𑀜𑀲𑁆𑀲 𑀯𑀺𑀧𑀸𑀓𑀤𑀸𑀬𑀓𑀸𑀦𑀁 𑀓𑀫𑁆𑀫𑀸𑀦𑀁 𑀅𑀜𑁆𑀜𑁄 𑀓𑀸𑀭𑀓𑁄, 𑀦 𑀅𑀢𑁆𑀢𑀦𑀸𑀯 𑀅𑀢𑁆𑀢𑀦𑁄 𑀓𑀫𑁆𑀫𑀁 𑀓𑀭𑁄𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀯𑀁 𑀧𑀼𑀝𑁆𑀞𑁄 𑀧𑀦 𑀇𑀢𑀭𑁄 𑀲𑀼𑀢𑁆𑀢𑀯𑀺𑀭𑁄𑀥𑀪𑀬𑁂𑀦 𑀧𑀝𑀺𑀓𑁆𑀔𑀺𑀧𑀢𑀺. 𑀤𑀸𑀦𑀁 𑀤𑁂𑀦𑁆𑀢𑀦𑁆𑀢𑀺 𑀤𑀸𑀦𑀁 𑀤𑀤𑀫𑀸𑀦𑀁 𑀤𑀺𑀲𑁆𑀯𑀸𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀬𑀲𑁆𑀫𑀸 𑀅𑀢𑁆𑀢𑀦𑁄 𑀅𑀦𑀼𑀫𑁄𑀤𑀺𑀢𑀢𑁆𑀢𑀸 𑀘 𑀢𑁂𑀲𑀁 𑀢𑀢𑁆𑀣 𑀪𑁄𑀕𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀢𑀲𑁆𑀫𑀸𑀲𑁆𑀲 𑀇𑀫𑀺𑀦𑀸 𑀓𑀸𑀭𑀡𑁂𑀦 𑀮𑀤𑁆𑀥𑀺𑀁 𑀧𑀢𑀺𑀝𑁆𑀞𑀧𑁂𑀦𑁆𑀢𑀲𑁆𑀲𑀸𑀧𑀺 𑀅𑀧𑁆𑀧𑀢𑀺𑀝𑁆𑀞𑀺𑀢𑀸𑀯 𑀳𑁄𑀢𑀺. 𑀦 𑀳𑀺 𑀢𑁂 𑀇𑀢𑁄 𑀤𑀺𑀦𑁆𑀦𑁂𑀦𑁂𑀯 𑀯𑀢𑁆𑀣𑀼𑀦𑀸 𑀬𑀸𑀧𑁂𑀦𑁆𑀢𑀺. 𑀲𑁂𑀲𑁂𑀲𑀼𑀧𑀺 𑀲𑀼𑀢𑁆𑀢𑀲𑀸𑀥𑀦𑁂𑀲𑀼 𑀏𑀲𑁂𑀯 𑀦𑀬𑁄𑀢𑀺.

𑀇𑀢𑁄 𑀤𑀺𑀦𑁆𑀦𑀓𑀣𑀸𑀯𑀡𑁆𑀡𑀦𑀸.

𑁭. 𑀧𑀣𑀯𑀻𑀓𑀫𑁆𑀫𑀯𑀺𑀧𑀸𑀓𑁄𑀢𑀺𑀓𑀣𑀸𑀯𑀡𑁆𑀡𑀦𑀸

𑁪𑁯𑁨. 𑀇𑀤𑀸𑀦𑀺 𑀧𑀣𑀯𑀻 𑀓𑀫𑁆𑀫𑀯𑀺𑀧𑀸𑀓𑁄𑀢𑀺𑀓𑀣𑀸 𑀦𑀸𑀫 𑀳𑁄𑀢𑀺. 𑀢𑀢𑁆𑀣 𑀬𑀲𑁆𑀫𑀸 ‘‘𑀅𑀢𑁆𑀣𑀺 𑀇𑀲𑁆𑀲𑀭𑀺𑀬𑀲𑀁𑀯𑀢𑁆𑀢𑀦𑀺𑀬𑀁 𑀓𑀫𑁆𑀫𑀁, 𑀆𑀥𑀺𑀧𑀘𑁆𑀘𑀲𑀁𑀯𑀢𑁆𑀢𑀦𑀺𑀬𑀁 𑀓𑀫𑁆𑀫’’𑀦𑁆𑀢𑀺 𑀏𑀢𑁆𑀣 𑀇𑀲𑁆𑀲𑀭𑀸𑀦𑀁 𑀪𑀸𑀯𑁄 𑀇𑀲𑁆𑀲𑀭𑀺𑀬𑀁 𑀦𑀸𑀫, 𑀅𑀥𑀺𑀧𑀢𑀻𑀦𑀜𑁆𑀘 𑀪𑀸𑀯𑁄 𑀆𑀥𑀺𑀧𑀘𑁆𑀘𑀁 𑀦𑀸𑀫, 𑀧𑀣𑀯𑀺𑀲𑁆𑀲𑀭𑀺𑀬𑀆𑀥𑀺𑀧𑀘𑁆𑀘𑀲𑀁𑀯𑀢𑁆𑀢𑀦𑀺𑀓𑀜𑁆𑀘 𑀓𑀫𑁆𑀫𑀁 𑀅𑀢𑁆𑀣𑀻𑀢𑀺 𑀯𑀼𑀢𑁆𑀢𑀁. 𑀢𑀲𑁆𑀫𑀸 𑀬𑁂𑀲𑀁 ‘‘𑀧𑀣𑀯𑀻 𑀓𑀫𑁆𑀫𑀯𑀺𑀧𑀸𑀓𑁄’’𑀢𑀺 𑀮𑀤𑁆𑀥𑀺, 𑀲𑁂𑀬𑁆𑀬𑀣𑀸𑀧𑀺 𑀅𑀦𑁆𑀥𑀓𑀸𑀦𑀁; 𑀢𑁂 𑀲𑀦𑁆𑀥𑀸𑀬 𑀧𑀣𑀯𑀻𑀢𑀺 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀧𑀝𑀺𑀜𑁆𑀜𑀸 𑀇𑀢𑀭𑀲𑁆𑀲. 𑀲𑀼𑀔𑀯𑁂𑀤𑀦𑀻𑀬𑀸𑀢𑀺𑀆𑀤𑀺 𑀓𑀫𑁆𑀫𑀯𑀺𑀧𑀸𑀓𑀲𑀪𑀸𑀯𑀤𑀲𑁆𑀲𑀦𑀯𑀲𑁂𑀦 𑀯𑀼𑀢𑁆𑀢𑀁. ‘‘𑀨𑀲𑁆𑀲𑁄 𑀳𑁄𑀢𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀦𑀺𑀤𑁆𑀤𑀺𑀝𑁆𑀞𑁂𑀲𑀼 𑀯𑀺𑀧𑀸𑀓𑁂𑀲𑀼 𑀨𑀲𑁆𑀲𑁄 𑀲𑀼𑀔𑀯𑁂𑀤𑀦𑀻𑀬𑀸𑀤𑀺𑀪𑁂𑀤𑁄 𑀳𑁄𑀢𑀺. 𑀲𑁄 𑀘 𑀲𑀜𑁆𑀜𑀸𑀤𑀬𑁄 𑀘 𑀲𑀼𑀔𑀯𑁂𑀤𑀦𑀸𑀤𑀻𑀳𑀺 𑀲𑀫𑁆𑀧𑀬𑀼𑀢𑁆𑀢𑀸, 𑀯𑁂𑀤𑀦𑀸𑀤𑀬𑁄 𑀲𑀜𑁆𑀜𑀸𑀤𑀻𑀳𑀺, 𑀲𑀩𑁆𑀩𑁂𑀧𑀺 𑀲𑀸𑀭𑀫𑁆𑀫𑀡𑀸, 𑀅𑀢𑁆𑀣𑀺 𑀘 𑀦𑁂𑀲𑀁 𑀧𑀼𑀭𑁂𑀘𑀸𑀭𑀺𑀓𑀆𑀯𑀝𑁆𑀝𑀦𑀸𑀤𑀺𑀲𑀗𑁆𑀔𑀸𑀢𑀁 𑀆𑀯𑀚𑁆𑀚𑀦𑀁, 𑀓𑀫𑁆𑀫𑀧𑀘𑁆𑀘𑀬𑀪𑀽𑀢𑀸 𑀘𑁂𑀢𑀦𑀸, 𑀬𑁄 𑀢𑀢𑁆𑀣 𑀇𑀝𑁆𑀞𑀯𑀺𑀧𑀸𑀓𑁄, 𑀢𑀲𑁆𑀲 𑀧𑀢𑁆𑀣𑀦𑀸, 𑀧𑀡𑀺𑀥𑀸𑀦𑀯𑀲𑁂𑀦 𑀧𑀯𑀢𑁆𑀢𑀸 𑀫𑀽𑀮𑀢𑀡𑁆𑀳𑀸, 𑀓𑀺𑀁 𑀢𑁂 𑀏𑀯𑀭𑀽𑀧𑀸 𑀧𑀣𑀯𑀻𑀢𑀺 𑀧𑀼𑀘𑁆𑀙𑀢𑀺. 𑀇𑀢𑀭𑁄 𑀧𑀝𑀺𑀓𑁆𑀔𑀺𑀧𑀢𑀺. 𑀧𑀝𑀺𑀮𑁄𑀫𑀧𑀼𑀘𑁆𑀙𑀸𑀤𑀻𑀦𑀺 𑀉𑀢𑁆𑀢𑀸𑀦𑀢𑁆𑀣𑀸𑀦𑁂𑀯.

𑁪𑁯𑁩. 𑀓𑀫𑁆𑀫𑀯𑀺𑀧𑀸𑀓𑁄 𑀧𑀭𑁂𑀲𑀁 𑀲𑀸𑀥𑀸𑀭𑀡𑁄𑀢𑀺 𑀧𑀜𑁆𑀳𑁂 𑀨𑀲𑁆𑀲𑀸𑀤𑀬𑁄 𑀲𑀦𑁆𑀥𑀸𑀬 𑀧𑀝𑀺𑀓𑁆𑀔𑀺𑀧𑀢𑀺, 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀁 𑀭𑀽𑀧𑀜𑁆𑀘 𑀧𑀣𑀯𑀻𑀆𑀤𑀻𑀦𑀁𑀬𑁂𑀯 𑀘 𑀲𑀸𑀥𑀸𑀭𑀡𑀪𑀸𑀯𑀁 𑀲𑀦𑁆𑀥𑀸𑀬 𑀧𑀝𑀺𑀚𑀸𑀦𑀸𑀢𑀺. 𑀅𑀲𑀸𑀥𑀸𑀭𑀡𑀫𑀜𑁆𑀜𑁂𑀲𑀦𑁆𑀢𑀺 𑀲𑀼𑀢𑁆𑀢𑀁 𑀧𑀭𑀲𑀫𑀬𑀢𑁄 𑀆𑀳𑀭𑀺𑀢𑁆𑀯𑀸 𑀤𑀲𑁆𑀲𑀺𑀢𑀁. 𑀲𑀩𑁆𑀩𑁂 𑀲𑀢𑁆𑀢𑀸 𑀧𑀣𑀯𑀺𑀁 𑀧𑀭𑀺𑀪𑀼𑀜𑁆𑀚𑀦𑁆𑀢𑀻𑀢𑀺 𑀧𑀜𑁆𑀳𑁂 𑀧𑀣𑀯𑀺𑀁 𑀅𑀦𑀺𑀲𑁆𑀲𑀺𑀢𑁂 𑀲𑀦𑁆𑀥𑀸𑀬 𑀧𑀝𑀺𑀓𑁆𑀔𑀺𑀧𑀢𑀺, 𑀦𑀺𑀲𑁆𑀲𑀺𑀢𑁂 𑀲𑀦𑁆𑀥𑀸𑀬 𑀧𑀝𑀺𑀚𑀸𑀦𑀸𑀢𑀺. 𑀧𑀣𑀯𑀺𑀁 𑀅𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀦𑁆𑀢𑀻𑀢𑀺 𑀧𑀜𑁆𑀳𑁂 𑀆𑀭𑀼𑀧𑁆𑀧𑁂 𑀧𑀭𑀺𑀦𑀺𑀩𑁆𑀩𑀸𑀬𑀦𑁆𑀢𑀸𑀦𑀁 𑀯𑀲𑁂𑀦 𑀧𑀝𑀺𑀚𑀸𑀦𑀸𑀢𑀺. 𑀓𑀫𑁆𑀫𑀯𑀺𑀧𑀸𑀓𑀁 𑀅𑀔𑁂𑀧𑁂𑀢𑁆𑀯𑀸𑀢𑀺 𑀇𑀤𑀁 𑀧𑀭𑀲𑀫𑀬𑀯𑀲𑁂𑀦 𑀯𑀼𑀢𑁆𑀢𑀁. 𑀓𑀫𑁆𑀫𑀯𑀺𑀧𑀸𑀓𑀜𑁆𑀳𑀺 𑀔𑁂𑀧𑁂𑀢𑁆𑀯𑀸𑀯 𑀧𑀭𑀺𑀦𑀺𑀩𑁆𑀩𑀸𑀬𑀦𑁆𑀢𑀻𑀢𑀺 𑀢𑁂𑀲𑀁 𑀮𑀤𑁆𑀥𑀺. 𑀲𑀓𑀲𑀫𑀬𑁂 𑀧𑀦 𑀓𑀢𑁄𑀓𑀸𑀲𑀲𑁆𑀲 𑀓𑀫𑁆𑀫𑀲𑁆𑀲 𑀉𑀧𑁆𑀧𑀦𑁆𑀦𑀁 𑀯𑀺𑀧𑀸𑀓𑀁 𑀅𑀔𑁂𑀧𑁂𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀦𑀁 𑀦𑀢𑁆𑀣𑀺. 𑀢𑁂𑀲𑀜𑁆𑀘 𑀮𑀤𑁆𑀥𑀺𑀬𑀸 𑀧𑀣𑀯𑀻 𑀲𑀸𑀥𑀸𑀭𑀡𑀯𑀺𑀧𑀸𑀓𑀢𑁆𑀢𑀸 𑀉𑀧𑁆𑀧𑀦𑁆𑀦𑀯𑀺𑀧𑀸𑀓𑁄𑀬𑁂𑀯 𑀳𑁄𑀢𑀺. 𑀢𑀁 𑀯𑀺𑀧𑀸𑀓𑀪𑀸𑀯𑁂𑀦 𑀞𑀺𑀢𑀁 𑀅𑀔𑁂𑀧𑁂𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀦𑀁 𑀦 𑀬𑀼𑀚𑁆𑀚𑀢𑀻𑀢𑀺 𑀘𑁄𑀤𑁂𑀢𑀼𑀁 𑀯𑀝𑁆𑀝𑀢𑀺. 𑀇𑀢𑀭𑁄 𑀮𑀤𑁆𑀥𑀺𑀯𑀲𑁂𑀦 𑀧𑀝𑀺𑀓𑁆𑀔𑀺𑀧𑀢𑀺. 𑀘𑀓𑁆𑀓𑀯𑀢𑁆𑀢𑀺𑀲𑀢𑁆𑀢𑀲𑁆𑀲 𑀓𑀫𑁆𑀫𑀯𑀺𑀧𑀸𑀓𑀦𑁆𑀢𑀺 𑀧𑀜𑁆𑀳𑁂 𑀅𑀲𑀸𑀥𑀸𑀭𑀡𑀁 𑀨𑀲𑁆𑀲𑀸𑀤𑀺𑀁 𑀲𑀦𑁆𑀥𑀸𑀬 𑀧𑀝𑀺𑀓𑁆𑀔𑀺𑀧𑀢𑀺, 𑀲𑀸𑀥𑀸𑀭𑀡𑀁 𑀲𑀦𑁆𑀥𑀸𑀬 𑀧𑀝𑀺𑀚𑀸𑀦𑀸𑀢𑀺. 𑀧𑀣𑀯𑀻𑀲𑀫𑀼𑀤𑁆𑀤𑀲𑀽𑀭𑀺𑀬𑀘𑀦𑁆𑀤𑀺𑀫𑀸𑀤𑀬𑁄 𑀳𑀺 𑀲𑀩𑁆𑀩𑁂𑀲𑀁 𑀲𑀸𑀥𑀸𑀭𑀡𑀓𑀫𑁆𑀫𑀯𑀺𑀧𑀸𑀓𑁄𑀢𑀺 𑀢𑁂𑀲𑀁 𑀮𑀤𑁆𑀥𑀺.

𑁪𑁯𑁪. 𑀇𑀲𑁆𑀲𑀭𑀺𑀬𑀲𑀁𑀯𑀢𑁆𑀢𑀦𑀺𑀬𑀦𑁆𑀢𑀺 𑀏𑀢𑁆𑀣 𑀇𑀲𑁆𑀲𑀭𑀺𑀬𑀁 𑀦𑀸𑀫 𑀩𑀳𑀼𑀥𑀦𑀢𑀸. 𑀆𑀥𑀺𑀧𑀘𑁆𑀘𑀁 𑀦𑀸𑀫 𑀲𑁂𑀲𑀚𑀦𑁂 𑀅𑀢𑁆𑀢𑀦𑁄 𑀯𑀲𑁂 𑀯𑀢𑁆𑀢𑁂𑀢𑁆𑀯𑀸 𑀢𑁂𑀳𑀺 𑀕𑀭𑀼𑀓𑀸𑀢𑀩𑁆𑀩𑀝𑁆𑀞𑁂𑀦 𑀅𑀥𑀺𑀧𑀢𑀺𑀪𑀸𑀯𑁄. 𑀢𑀢𑁆𑀣 𑀓𑀫𑁆𑀫𑀁 𑀧𑀝𑀺𑀮𑀸𑀪𑀯𑀲𑁂𑀦 𑀢𑀁𑀲𑀁𑀯𑀢𑁆𑀢𑀦𑀺𑀓𑀁 𑀦𑀸𑀫 𑀳𑁄𑀢𑀺, 𑀦 𑀚𑀦𑀓𑀯𑀲𑁂𑀦. 𑀢𑀲𑁆𑀫𑀸 𑀯𑀺𑀧𑀸𑀓𑀪𑀸𑀯𑁂 𑀅𑀲𑀸𑀥𑀓𑀫𑁂𑀢𑀦𑁆𑀢𑀺.

𑀧𑀣𑀯𑀻 𑀓𑀫𑁆𑀫𑀯𑀺𑀧𑀸𑀓𑁄𑀢𑀺𑀓𑀣𑀸𑀯𑀡𑁆𑀡𑀦𑀸.

𑁮. 𑀚𑀭𑀸𑀫𑀭𑀡𑀁 𑀯𑀺𑀧𑀸𑀓𑁄𑀢𑀺𑀓𑀣𑀸𑀯𑀡𑁆𑀡𑀦𑀸

𑁪𑁯𑁫. 𑀇𑀤𑀸𑀦𑀺 𑀚𑀭𑀸𑀫𑀭𑀡𑀁 𑀯𑀺𑀧𑀸𑀓𑁄𑀢𑀺𑀓𑀣𑀸 𑀦𑀸𑀫 𑀳𑁄𑀢𑀺. 𑀢𑀢𑁆𑀣 𑀬𑁂𑀲𑀁 ‘‘𑀅𑀢𑁆𑀣𑀺 𑀤𑀼𑀩𑁆𑀩𑀡𑁆𑀡𑀲𑀁𑀯𑀢𑁆𑀢𑀦𑀺𑀬𑀁 𑀓𑀫𑁆𑀫𑀁 𑀅𑀧𑁆𑀧𑀸𑀬𑀼𑀓𑀲𑀁𑀯𑀢𑁆𑀢𑀦𑀺𑀬𑀁 𑀓𑀫𑁆𑀫’’𑀦𑁆𑀢𑀺 𑀏𑀢𑁆𑀣 𑀤𑀼𑀩𑁆𑀩𑀡𑁆𑀡𑀢𑀸 𑀦𑀸𑀫 𑀚𑀭𑀸. 𑀅𑀧𑁆𑀧𑀸𑀬𑀼𑀓𑀢𑀸 𑀦𑀸𑀫 𑀫𑀭𑀡𑀁. 𑀢𑀁𑀲𑀁𑀯𑀢𑁆𑀢𑀦𑀺𑀬𑀜𑁆𑀘 𑀓𑀫𑁆𑀫𑀁 𑀅𑀢𑁆𑀣𑀺. 𑀢𑀲𑁆𑀫𑀸 𑀚𑀭𑀸𑀫𑀭𑀡𑀁 𑀯𑀺𑀧𑀸𑀓𑁄𑀢𑀺 𑀮𑀤𑁆𑀥𑀺, 𑀲𑁂𑀬𑁆𑀬𑀣𑀸𑀧𑀺 𑀅𑀦𑁆𑀥𑀓𑀸𑀦𑀁; 𑀢𑁂 𑀲𑀦𑁆𑀥𑀸𑀬 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀧𑀝𑀺𑀜𑁆𑀜𑀸 𑀇𑀢𑀭𑀲𑁆𑀲. 𑀧𑀝𑀺𑀮𑁄𑀫𑀧𑀜𑁆𑀳𑁂 𑀅𑀦𑀸𑀭𑀫𑁆𑀫𑀡𑀦𑁆𑀢𑀺 𑀭𑀽𑀧𑀥𑀫𑁆𑀫𑀸𑀦𑀁 𑀢𑀸𑀯 𑀅𑀦𑀸𑀭𑀫𑁆𑀫𑀡𑀫𑁂𑀯, 𑀅𑀭𑀽𑀧𑀸𑀦𑀁 𑀧𑀦 𑀚𑀭𑀸𑀫𑀭𑀡𑀁 𑀲𑀫𑁆𑀧𑀬𑁄𑀕𑀮𑀓𑁆𑀔𑀡𑀸𑀪𑀸𑀯𑀸 𑀅𑀦𑀸𑀭𑀫𑁆𑀫𑀡𑀫𑁂𑀯.

𑁪𑁯𑁬. 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀚𑀭𑀸𑀫𑀭𑀡𑀁 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀯𑀺𑀧𑀸𑀓𑁄𑀢𑀺 𑀧𑀜𑁆𑀳𑁂 𑀚𑀭𑀸𑀫𑀭𑀡𑁂𑀦 𑀦𑀸𑀫 𑀅𑀦𑀺𑀝𑁆𑀞𑀯𑀺𑀧𑀸𑀓𑁂𑀦 𑀪𑀯𑀺𑀢𑀩𑁆𑀩𑀦𑁆𑀢𑀺 𑀮𑀤𑁆𑀥𑀺𑀬𑀸 𑀧𑀝𑀺𑀚𑀸𑀦𑀸𑀢𑀺. 𑀢𑁂𑀦𑁂𑀯 𑀓𑀸𑀭𑀡𑁂𑀦 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀚𑀭𑀸𑀫𑀭𑀡𑀲𑁆𑀲 𑀓𑀼𑀲𑀮𑀯𑀺𑀧𑀸𑀓𑀢𑀁 𑀧𑀝𑀺𑀓𑁆𑀔𑀺𑀧𑀢𑀺. 𑀧𑀭𑀢𑁄 𑀘𑀲𑁆𑀲 𑀅𑀓𑀼𑀲𑀮𑀯𑀺𑀧𑀸𑀓𑀢𑀜𑁆𑀜𑁂𑀯 𑀧𑀝𑀺𑀚𑀸𑀦𑀸𑀢𑀺.

𑀓𑀼𑀲𑀮𑀸𑀦𑀜𑁆𑀘 𑀅𑀓𑀼𑀲𑀮𑀸𑀦𑀜𑁆𑀘𑀸𑀢𑀺 𑀧𑀼𑀘𑁆𑀙𑀸𑀯𑀲𑁂𑀦 𑀏𑀓𑀢𑁄 𑀓𑀢𑀁, 𑀏𑀓𑀓𑁆𑀔𑀡𑁂 𑀧𑀦 𑀢𑀁 𑀦𑀢𑁆𑀣𑀺. 𑀅𑀩𑁆𑀬𑀸𑀓𑀢𑀸𑀦𑀁 𑀅𑀯𑀺𑀧𑀸𑀓𑀸𑀦𑀁 𑀚𑀭𑀸𑀫𑀭𑀡𑀁 𑀯𑀺𑀧𑀸𑀓𑁄𑀢𑀺 𑀯𑀢𑁆𑀢𑀩𑁆𑀩𑀢𑀸𑀬 𑀧𑀭𑀺𑀬𑀸𑀬𑁄 𑀦𑀢𑁆𑀣𑀺, 𑀢𑀲𑁆𑀫𑀸 𑀅𑀩𑁆𑀬𑀸𑀓𑀢𑀯𑀲𑁂𑀦 𑀧𑀼𑀘𑁆𑀙𑀸 𑀦 𑀓𑀢𑀸.

𑁪𑁯𑁭. 𑀤𑀼𑀩𑁆𑀩𑀡𑁆𑀡𑀲𑀁𑀯𑀢𑁆𑀢𑀦𑀺𑀬𑀦𑁆𑀢𑀺 𑀏𑀢𑁆𑀣 𑀤𑀼𑀩𑁆𑀩𑀡𑁆𑀡𑀺𑀬𑀁 𑀦𑀸𑀫 𑀅𑀧𑀭𑀺𑀲𑀼𑀤𑁆𑀥𑀯𑀡𑁆𑀡𑀢𑀸. 𑀅𑀧𑁆𑀧𑀸𑀬𑀼𑀓𑀢𑀸 𑀦𑀸𑀫 𑀆𑀬𑀼𑀦𑁄 𑀘𑀺𑀭𑀁 𑀧𑀯𑀢𑁆𑀢𑀺𑀢𑀼𑀁 𑀅𑀲𑀫𑀢𑁆𑀣𑀢𑀸. 𑀢𑀢𑁆𑀣 𑀅𑀓𑀼𑀲𑀮𑀓𑀫𑁆𑀫𑀁 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀲𑁆𑀲 𑀤𑀼𑀩𑁆𑀩𑀡𑁆𑀡𑀭𑀽𑀧𑀲𑁆𑀲 𑀓𑀫𑁆𑀫𑀧𑀘𑁆𑀘𑀬𑁄 𑀳𑁄𑀢𑀺, 𑀅𑀲𑀤𑀺𑀲𑀢𑁆𑀢𑀸 𑀧𑀦𑀲𑁆𑀲 𑀢𑀁𑀯𑀺𑀧𑀸𑀓𑁄 𑀦 𑀳𑁄𑀢𑀺. 𑀉𑀢𑀼𑀲𑀫𑀼𑀝𑁆𑀞𑀸𑀦𑀸𑀤𑀺𑀦𑁄 𑀧𑀦 𑀢𑀁𑀧𑀝𑀺𑀮𑀸𑀪𑀯𑀲𑁂𑀦 𑀆𑀬𑀼𑀦𑁄 𑀘 𑀉𑀧𑀘𑁆𑀙𑁂𑀤𑀓𑀯𑀲𑁂𑀦 𑀧𑀘𑁆𑀘𑀬𑁄 𑀳𑁄𑀢𑀺. 𑀏𑀯𑀫𑁂𑀢𑀁 𑀧𑀭𑀺𑀬𑀸𑀬𑁂𑀦 𑀢𑀁𑀲𑀁𑀯𑀢𑁆𑀢𑀦𑀺𑀓𑀁 𑀦𑀸𑀫 𑀳𑁄𑀢𑀺, 𑀦 𑀯𑀺𑀧𑀸𑀓𑀨𑀲𑁆𑀲𑀸𑀤𑀻𑀦𑀁 𑀯𑀺𑀬 𑀚𑀦𑀓𑀯𑀲𑁂𑀦, 𑀢𑀲𑁆𑀫𑀸 𑀯𑀺𑀧𑀸𑀓𑀪𑀸𑀯𑁂 𑀅𑀲𑀸𑀥𑀓𑀁. 𑀲𑁂𑀲𑀫𑁂𑀢𑁆𑀣 𑀳𑁂𑀝𑁆𑀞𑀸 𑀯𑀼𑀢𑁆𑀢𑀲𑀤𑀺𑀲𑀫𑁂𑀯𑀸𑀢𑀺.

𑀚𑀭𑀸𑀫𑀭𑀡𑀁 𑀯𑀺𑀧𑀸𑀓𑁄𑀢𑀺𑀓𑀣𑀸𑀯𑀡𑁆𑀡𑀦𑀸.

𑁯. 𑀅𑀭𑀺𑀬𑀥𑀫𑁆𑀫𑀯𑀺𑀧𑀸𑀓𑀓𑀣𑀸𑀯𑀡𑁆𑀡𑀦𑀸

𑁪𑁯𑁮. 𑀇𑀤𑀸𑀦𑀺 𑀅𑀭𑀺𑀬𑀥𑀫𑁆𑀫𑀯𑀺𑀧𑀸𑀓𑀓𑀣𑀸 𑀦𑀸𑀫 𑀳𑁄𑀢𑀺. 𑀢𑀢𑁆𑀣 𑀬𑁂𑀲𑀁 𑀓𑀺𑀮𑁂𑀲𑀧𑁆𑀧𑀳𑀸𑀦𑀫𑀢𑁆𑀢𑀫𑁂𑀯 𑀲𑀸𑀫𑀜𑁆𑀜𑀨𑀮𑀁, 𑀦 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀥𑀫𑁆𑀫𑀸𑀢𑀺 𑀮𑀤𑁆𑀥𑀺, 𑀲𑁂𑀬𑁆𑀬𑀣𑀸𑀧𑀺 𑀅𑀦𑁆𑀥𑀓𑀸𑀦𑀁; 𑀢𑁂 𑀲𑀦𑁆𑀥𑀸𑀬 𑀦𑀢𑁆𑀣𑀺 𑀅𑀭𑀺𑀬𑀥𑀫𑁆𑀫𑀯𑀺𑀧𑀸𑀓𑁄𑀢𑀺 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲. 𑀢𑀢𑁆𑀣 𑀅𑀭𑀺𑀬𑀥𑀫𑁆𑀫𑀯𑀺𑀧𑀸𑀓𑁄𑀢𑀺 𑀫𑀕𑁆𑀕𑀲𑀗𑁆𑀔𑀸𑀢𑀲𑁆𑀲 𑀅𑀭𑀺𑀬𑀥𑀫𑁆𑀫𑀲𑁆𑀲 𑀯𑀺𑀧𑀸𑀓𑁄. 𑀓𑀺𑀮𑁂𑀲𑀓𑁆𑀔𑀬𑀫𑀢𑁆𑀢𑀁 𑀅𑀭𑀺𑀬𑀨𑀮𑀦𑁆𑀢𑀺 𑀮𑀤𑁆𑀥𑀺𑀬𑀸 𑀧𑀝𑀺𑀜𑁆𑀜𑀸 𑀇𑀢𑀭𑀲𑁆𑀲. 𑀲𑀸𑀫𑀜𑁆𑀜𑀦𑁆𑀢𑀺 𑀲𑀫𑀡𑀪𑀸𑀯𑁄, 𑀫𑀕𑁆𑀕𑀲𑁆𑀲𑁂𑀢𑀁 𑀦𑀸𑀫𑀁. ‘‘𑀲𑀸𑀫𑀜𑁆𑀜𑀜𑁆𑀘 𑀯𑁄, 𑀪𑀺𑀓𑁆𑀔𑀯𑁂, 𑀤𑁂𑀲𑁂𑀲𑁆𑀲𑀸𑀫𑀺 𑀲𑀸𑀫𑀜𑁆𑀜𑀨𑀮𑀜𑁆𑀘𑀸’’𑀢𑀺 𑀳𑀺 𑀯𑀼𑀢𑁆𑀢𑀁. 𑀩𑁆𑀭𑀳𑁆𑀫𑀜𑁆𑀜𑁂𑀧𑀺 𑀏𑀲𑁂𑀯 𑀦𑀬𑁄.

𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀦 𑀯𑀺𑀧𑀸𑀓𑁄𑀢𑀺𑀆𑀤𑀻𑀲𑀼 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀸𑀤𑀻𑀦𑀁 𑀅𑀧𑀘𑀬𑀕𑀸𑀫𑀺𑀢𑀁 𑀲𑀦𑁆𑀥𑀸𑀬 𑀅𑀭𑀺𑀬𑀨𑀮𑀸𑀦𑀁 𑀦𑀯𑀺𑀧𑀸𑀓𑀪𑀸𑀯𑀁 𑀧𑀝𑀺𑀚𑀸𑀦𑀸𑀢𑀺, 𑀤𑀸𑀦𑀨𑀮𑀸𑀤𑀻𑀦𑀁 𑀧𑀝𑀺𑀓𑁆𑀔𑀺𑀧𑀢𑀺. 𑀲𑁄 𑀳𑀺 𑀆𑀘𑀬𑀕𑀸𑀫𑀺𑀢𑁆𑀢𑀺𑀓𑀲𑁆𑀲 𑀏𑀯𑀁 𑀅𑀢𑁆𑀣𑀁 𑀥𑀸𑀭𑁂𑀢𑀺 𑁋 𑀯𑀺𑀧𑀸𑀓𑀲𑀗𑁆𑀔𑀸𑀢𑀁 𑀆𑀘𑀬𑀁 𑀕𑀘𑁆𑀙𑀦𑁆𑀢𑀺, 𑀢𑀁 𑀯𑀸 𑀆𑀘𑀺𑀦𑀦𑁆𑀢𑀸 𑀕𑀘𑁆𑀙𑀦𑁆𑀢𑀻𑀢𑀺 𑀆𑀘𑀬𑀕𑀸𑀫𑀺𑀦𑁄, 𑀯𑀺𑀧𑀸𑀓𑀁 𑀅𑀧𑀘𑀺𑀦𑀦𑁆𑀢𑀸 𑀕𑀘𑁆𑀙𑀦𑁆𑀢𑀻𑀢𑀺 𑀅𑀧𑀘𑀬𑀕𑀸𑀫𑀺𑀦𑁄𑀢𑀺. 𑀢𑀲𑁆𑀫𑀸 𑀏𑀯𑀁 𑀧𑀝𑀺𑀚𑀸𑀦𑀸𑀢𑀺 𑀘 𑀧𑀝𑀺𑀓𑁆𑀔𑀺𑀧𑀢𑀺 𑀘.

𑁫𑁦𑁦. 𑀓𑀸𑀫𑀸𑀯𑀘𑀭𑀁 𑀓𑀼𑀲𑀮𑀁 𑀲𑀯𑀺𑀧𑀸𑀓𑀁 𑀆𑀘𑀬𑀕𑀸𑀫𑀻𑀢𑀺𑀆𑀤𑀺𑀓𑀸 𑀧𑀼𑀘𑁆𑀙𑀸 𑀧𑀭𑀯𑀸𑀤𑀺𑀲𑁆𑀲, 𑀧𑀝𑀺𑀜𑁆𑀜𑀸 𑀘 𑀧𑀝𑀺𑀓𑁆𑀔𑁂𑀧𑁄 𑀘 𑀲𑀓𑀯𑀸𑀤𑀺𑀲𑁆𑀲. 𑀮𑁄𑀓𑀺𑀬𑀜𑁆𑀳𑀺 𑀓𑀼𑀲𑀮𑀁 𑀯𑀺𑀧𑀸𑀓𑀘𑀼𑀢𑀺𑀧𑀝𑀺𑀲𑀦𑁆𑀥𑀺𑀬𑁄 𑀘𑁂𑀯 𑀯𑀝𑁆𑀝𑀜𑁆𑀘 𑀆𑀘𑀺𑀦𑀦𑁆𑀢𑀁 𑀕𑀘𑁆𑀙𑀢𑀻𑀢𑀺 𑀆𑀘𑀬𑀕𑀸𑀫𑀺. 𑀮𑁄𑀓𑀼𑀢𑁆𑀢𑀭𑀓𑀼𑀲𑀮𑀁 𑀘𑀼𑀢𑀺𑀧𑀝𑀺𑀲𑀦𑁆𑀥𑀺𑀬𑁄 𑀘𑁂𑀯 𑀯𑀝𑁆𑀝𑀜𑁆𑀘 𑀅𑀧𑀘𑀺𑀦𑀦𑁆𑀢𑀁 𑀕𑀘𑁆𑀙𑀢𑀻𑀢𑀺 𑀅𑀧𑀘𑀬𑀕𑀸𑀫𑀺. 𑀏𑀯𑀫𑁂𑀢𑀁 𑀲𑀯𑀺𑀧𑀸𑀓𑀫𑁂𑀯 𑀳𑁄𑀢𑀺, 𑀦 𑀅𑀧𑀘𑀬𑀕𑀸𑀫𑀺𑀯𑀘𑀦𑀫𑀢𑁆𑀢𑁂𑀦 𑀅𑀯𑀺𑀧𑀸𑀓𑀁. 𑀇𑀫𑀫𑀢𑁆𑀣𑀁 𑀲𑀦𑁆𑀥𑀸𑀬𑁂𑀢𑁆𑀣 𑀲𑀓𑀯𑀸𑀤𑀺𑀦𑁄 𑀧𑀝𑀺𑀜𑁆𑀜𑀸 𑀘 𑀧𑀝𑀺𑀓𑁆𑀔𑁂𑀧𑁄 𑀘 𑀯𑁂𑀤𑀺𑀢𑀩𑁆𑀩𑀸𑀢𑀺.

𑀅𑀭𑀺𑀬𑀥𑀫𑁆𑀫𑀯𑀺𑀧𑀸𑀓𑀓𑀣𑀸𑀯𑀡𑁆𑀡𑀦𑀸.

𑁧𑁦. 𑀯𑀺𑀧𑀸𑀓𑁄 𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑁄𑀢𑀺𑀓𑀣𑀸𑀯𑀡𑁆𑀡𑀦𑀸

𑁫𑁦𑁧. 𑀇𑀤𑀸𑀦𑀺 𑀯𑀺𑀧𑀸𑀓𑁄 𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑁄𑀢𑀺𑀓𑀣𑀸 𑀦𑀸𑀫 𑀳𑁄𑀢𑀺. 𑀢𑀢𑁆𑀣 𑀬𑀲𑁆𑀫𑀸 𑀯𑀺𑀧𑀸𑀓𑁄 𑀯𑀺𑀧𑀸𑀓𑀲𑁆𑀲 𑀅𑀜𑁆𑀜𑀫𑀜𑁆𑀜𑀸𑀤𑀺𑀧𑀘𑁆𑀘𑀬𑀯𑀲𑁂𑀦 𑀧𑀘𑁆𑀘𑀬𑁄 𑀳𑁄𑀢𑀺, 𑀢𑀲𑁆𑀫𑀸 𑀯𑀺𑀧𑀸𑀓𑁄𑀧𑀺 𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑁄𑀢𑀺 𑀬𑁂𑀲𑀁 𑀮𑀤𑁆𑀥𑀺, 𑀲𑁂𑀬𑁆𑀬𑀣𑀸𑀧𑀺 𑀅𑀦𑁆𑀥𑀓𑀸𑀦𑀁; 𑀢𑁂 𑀲𑀦𑁆𑀥𑀸𑀬 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀧𑀝𑀺𑀜𑁆𑀜𑀸 𑀇𑀢𑀭𑀲𑁆𑀲. 𑀢𑀲𑁆𑀲 𑀯𑀺𑀧𑀸𑀓𑁄𑀢𑀺 𑀢𑀲𑁆𑀲 𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑀲𑁆𑀲 𑀯𑀺𑀧𑀸𑀓𑀲𑁆𑀲 𑀬𑁄 𑀯𑀺𑀧𑀸𑀓𑁄, 𑀲𑁄𑀧𑀺 𑀢𑁂 𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑁄 𑀳𑁄𑀢𑀻𑀢𑀺 𑀧𑀼𑀘𑁆𑀙𑀢𑀺. 𑀇𑀢𑀭𑁄 𑀆𑀬𑀢𑀺𑀁 𑀯𑀺𑀧𑀸𑀓𑀤𑀸𑀦𑀸𑀪𑀸𑀯𑀁 𑀲𑀦𑁆𑀥𑀸𑀬 𑀧𑀝𑀺𑀓𑁆𑀔𑀺𑀧𑀢𑀺. 𑀤𑀼𑀢𑀺𑀬𑀁 𑀧𑀼𑀝𑁆𑀞𑁄 𑀢𑀧𑁆𑀧𑀘𑁆𑀘𑀬𑀸𑀧𑀺 𑀅𑀜𑁆𑀜𑀲𑁆𑀲 𑀯𑀺𑀧𑀸𑀓𑀲𑁆𑀲 𑀉𑀧𑁆𑀧𑀢𑁆𑀢𑀺𑀁 𑀲𑀦𑁆𑀥𑀸𑀬 𑀧𑀝𑀺𑀚𑀸𑀦𑀸𑀢𑀺. 𑀏𑀯𑀁 𑀲𑀦𑁆𑀢𑁂 𑀧𑀦𑀲𑁆𑀲 𑀓𑀼𑀲𑀮𑀸𑀓𑀼𑀲𑀮𑀲𑁆𑀲 𑀯𑀺𑀬 𑀢𑀲𑁆𑀲𑀸𑀧𑀺 𑀯𑀺𑀧𑀸𑀓𑀲𑁆𑀲 𑀯𑀺𑀧𑀸𑀓𑁄, 𑀢𑀲𑁆𑀲𑀸𑀧𑀺 𑀯𑀺𑀧𑀸𑀓𑁄𑀢𑀺 𑀯𑀝𑁆𑀝𑀸𑀦𑀼𑀧𑀘𑁆𑀙𑁂𑀤𑁄 𑀆𑀧𑀚𑁆𑀚𑀢𑀻𑀢𑀺 𑀧𑀼𑀝𑁆𑀞𑁄 𑀲𑀫𑀬𑀯𑀺𑀭𑁄𑀥𑀪𑀬𑁂𑀦 𑀧𑀝𑀺𑀓𑁆𑀔𑀺𑀧𑀢𑀺.

𑀯𑀺𑀧𑀸𑀓𑁄𑀢𑀺 𑀯𑀸𑀢𑀺𑀆𑀤𑀺𑀫𑁆𑀳𑀺 𑀯𑀘𑀦𑀲𑀸𑀥𑀦𑁂 𑀧𑀦 𑀬𑀤𑀺 𑀯𑀺𑀧𑀸𑀓𑀲𑁆𑀲 𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑁂𑀦 𑀏𑀓𑀢𑁆𑀣𑀢𑀸 𑀪𑀯𑁂𑀬𑁆𑀬, 𑀓𑀼𑀲𑀮𑀸𑀓𑀼𑀲𑀮𑀩𑁆𑀬𑀸𑀓𑀢𑀸𑀦𑀁 𑀏𑀓𑀢𑁆𑀣𑀢𑀁 𑀆𑀧𑀚𑁆𑀚𑁂𑀬𑁆𑀬𑀸𑀢𑀺 𑀧𑀝𑀺𑀓𑁆𑀔𑀺𑀧𑀢𑀺. 𑀯𑀺𑀧𑀸𑀓𑁄 𑀘 𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑁄 𑀘𑀸𑀢𑀺 𑀏𑀢𑁆𑀣 𑀅𑀬𑀁 𑀅𑀥𑀺𑀧𑁆𑀧𑀸𑀬𑁄 𑁋 𑀲𑁄 𑀳𑀺 𑀘𑀢𑀽𑀲𑀼 𑀯𑀺𑀧𑀸𑀓𑀓𑁆𑀔𑀦𑁆𑀥𑁂𑀲𑀼 𑀏𑀓𑁂𑀓𑀁 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀸𑀤𑀻𑀲𑀼 𑀧𑀘𑁆𑀘𑀬𑀝𑁆𑀞𑁂𑀦 𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑀢𑀁 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀝𑁆𑀞𑁂𑀦 𑀘 𑀯𑀺𑀧𑀸𑀓𑀁 𑀫𑀜𑁆𑀜𑀫𑀸𑀦𑁄 ‘‘𑀯𑀺𑀧𑀸𑀓𑁄 𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑁄’’𑀢𑀺 𑀧𑀼𑀝𑁆𑀞𑁄 𑀆𑀫𑀦𑁆𑀢𑀸𑀢𑀺 𑀧𑀝𑀺𑀚𑀸𑀦𑀸𑀢𑀺. 𑀅𑀣 𑀦𑀁 𑀲𑀓𑀯𑀸𑀤𑀻 ‘‘𑀬𑀲𑁆𑀫𑀸 𑀢𑀬𑀸 𑀏𑀓𑀓𑁆𑀔𑀡𑁂 𑀘𑀢𑀽𑀲𑀼 𑀔𑀦𑁆𑀥𑁂𑀲𑀼 𑀯𑀺𑀧𑀸𑀓𑁄 𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑁄𑀧𑀺 𑀅𑀦𑀼𑀜𑁆𑀜𑀸𑀢𑁄, 𑀢𑀲𑁆𑀫𑀸 𑀢𑁂𑀲𑀁 𑀲𑀳𑀕𑀢𑀸𑀤𑀺𑀪𑀸𑀯𑁄 𑀆𑀧𑀚𑁆𑀚𑀢𑀻’’𑀢𑀺 𑀘𑁄𑀤𑁂𑀢𑀼𑀁 𑀏𑀯𑀫𑀸𑀳. 𑀇𑀢𑀭𑁄 𑀓𑀼𑀲𑀮𑀸𑀓𑀼𑀲𑀮𑀲𑀗𑁆𑀔𑀸𑀢𑀁 𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑀁 𑀲𑀦𑁆𑀥𑀸𑀬 𑀧𑀝𑀺𑀓𑁆𑀔𑀺𑀧𑀢𑀺. 𑀢𑀜𑁆𑀜𑁂𑀯 𑀅𑀓𑀼𑀲𑀮𑀦𑁆𑀢𑀺 𑀬𑀤𑀺 𑀢𑁂 𑀯𑀺𑀧𑀸𑀓𑁄 𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑁄, 𑀬𑁄 𑀅𑀓𑀼𑀲𑀮𑀯𑀺𑀧𑀸𑀓𑁄, 𑀲𑁄 𑀅𑀓𑀼𑀲𑀮𑀁 𑀆𑀧𑀚𑁆𑀚𑀢𑀺. 𑀓𑀲𑁆𑀫𑀸? 𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑁂𑀦 𑀏𑀓𑀢𑁆𑀢𑀸. 𑀢𑀜𑁆𑀜𑁂𑀯 𑀓𑀼𑀲𑀮𑀦𑁆𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑁫𑁦𑁨. 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀸𑀢𑀺 𑀇𑀤𑀁 𑀲𑀳𑀚𑀸𑀢𑀸𑀦𑀁 𑀧𑀘𑁆𑀘𑀬𑀫𑀢𑁆𑀢𑀯𑀲𑁂𑀦 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀅𑀲𑀸𑀥𑀓𑀁. 𑀫𑀳𑀸𑀪𑀽𑀢𑀸𑀦𑀫𑁆𑀧𑀺 𑀘 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀢𑀸 𑀯𑀼𑀢𑁆𑀢𑀸, 𑀦 𑀘 𑀢𑀸𑀦𑀺 𑀯𑀺𑀧𑀸𑀓𑀸𑀦𑀺, 𑀦 𑀘 𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑀸𑀦𑀻𑀢𑀺.

𑀯𑀺𑀧𑀸𑀓𑁄 𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑁄𑀢𑀺𑀓𑀣𑀸𑀯𑀡𑁆𑀡𑀦𑀸.

𑀲𑀢𑁆𑀢𑀫𑁄 𑀯𑀕𑁆𑀕𑁄.