𑁮. 𑀅𑀝𑁆𑀞𑀫𑀯𑀕𑁆𑀕𑁄

𑁧. 𑀙𑀕𑀢𑀺𑀓𑀣𑀸𑀯𑀡𑁆𑀡𑀦𑀸

𑁫𑁦𑁩-𑁫𑁦𑁪. 𑀇𑀤𑀸𑀦𑀺 𑀙𑀕𑀢𑀺𑀓𑀣𑀸 𑀦𑀸𑀫 𑀳𑁄𑀢𑀺. 𑀢𑀢𑁆𑀣 𑀅𑀲𑀼𑀭𑀓𑀸𑀬𑁂𑀦 𑀲𑀤𑁆𑀥𑀺𑀁 𑀙𑀕𑀢𑀺𑀬𑁄𑀢𑀺 𑀬𑁂𑀲𑀁 𑀮𑀤𑁆𑀥𑀺, 𑀲𑁂𑀬𑁆𑀬𑀣𑀸𑀧𑀺 𑀅𑀦𑁆𑀥𑀓𑀸𑀦𑀜𑁆𑀘𑁂𑀯 𑀉𑀢𑁆𑀢𑀭𑀸𑀧𑀣𑀓𑀸𑀦𑀜𑁆𑀘; 𑀢𑁂 𑀲𑀦𑁆𑀥𑀸𑀬 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀧𑀝𑀺𑀜𑁆𑀜𑀸 𑀇𑀢𑀭𑀲𑁆𑀲. 𑀅𑀣 𑀦𑀁 𑀲𑀓𑀯𑀸𑀤𑀻 ‘‘𑀧𑀜𑁆𑀘 𑀔𑁄 𑀧𑀦𑀺𑀫𑀸, 𑀲𑀸𑀭𑀺𑀧𑀼𑀢𑁆𑀢, 𑀕𑀢𑀺𑀬𑁄’’𑀢𑀺 (𑀫. 𑀦𑀺. 𑁧.𑁧𑁫𑁩) 𑀮𑁄𑀫𑀳𑀁𑀲𑀦𑀧𑀭𑀺𑀬𑀸𑀬𑁂 𑀧𑀭𑀺𑀘𑁆𑀙𑀺𑀦𑁆𑀦𑀸𑀦𑀁 𑀕𑀢𑀻𑀦𑀁 𑀯𑀲𑁂𑀦 𑀘𑁄𑀤𑁂𑀢𑀼𑀁 𑀦𑀦𑀼 𑀧𑀜𑁆𑀘 𑀕𑀢𑀺𑀬𑁄𑀢𑀺𑀆𑀤𑀺𑀫𑀸𑀳. 𑀇𑀢𑀭𑁄 𑀲𑀼𑀢𑁆𑀢𑀯𑀺𑀭𑁄𑀥𑀪𑀬𑁂𑀦 𑀧𑀝𑀺𑀚𑀸𑀦𑀸𑀢𑀺. 𑀓𑀲𑁆𑀫𑀸 𑀧𑀦 𑀲𑀓𑀯𑀸𑀤𑀻 𑀙 𑀕𑀢𑀺𑀬𑁄 𑀦 𑀲𑀫𑁆𑀧𑀝𑀺𑀘𑁆𑀙𑀢𑀺, 𑀦𑀦𑀼 ‘‘𑀘𑀢𑀽𑀳𑀸𑀧𑀸𑀬𑁂𑀳𑀺 𑀘 𑀯𑀺𑀧𑁆𑀧𑀫𑀼𑀢𑁆𑀢𑁄’’𑀢𑀺 𑀏𑀢𑁆𑀣 𑀅𑀲𑀼𑀭𑀓𑀸𑀬𑁄𑀧𑀺 𑀕𑀳𑀺𑀢𑁄𑀢𑀺. 𑀲𑀘𑁆𑀘𑀁 𑀕𑀳𑀺𑀢𑁄, 𑀦 𑀧𑀦𑁂𑀲𑀸 𑀕𑀢𑀺. 𑀓𑀲𑁆𑀫𑀸? 𑀯𑀺𑀲𑀼𑀁 𑀅𑀪𑀸𑀯𑀢𑁄. 𑀅𑀲𑀼𑀭𑀓𑀸𑀬𑀲𑁆𑀫𑀺𑀜𑁆𑀳𑀺 𑀓𑀸𑀮𑀓𑀜𑁆𑀘𑀺𑀓𑀸 𑀅𑀲𑀼𑀭𑀸 𑀧𑁂𑀢𑀕𑀢𑀺𑀬𑀸 𑀲𑀗𑁆𑀕𑀳𑀺𑀢𑀸, 𑀯𑁂𑀧𑀘𑀺𑀢𑁆𑀢𑀺𑀧𑀭𑀺𑀲𑀸 𑀤𑁂𑀯𑀕𑀢𑀺𑀬𑀸, 𑀅𑀲𑀼𑀭𑀓𑀸𑀬𑁄𑀢𑀺 𑀯𑀺𑀲𑀼𑀁 𑀏𑀓𑀸 𑀕𑀢𑀺 𑀦𑀸𑀫 𑀦𑀢𑁆𑀣𑀺.

𑀇𑀤𑀸𑀦𑀺 𑀏𑀢𑀫𑁂𑀯 𑀅𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 𑀦𑀦𑀼 𑀓𑀸𑀮𑀓𑀜𑁆𑀘𑀺𑀓𑀸𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀲𑀫𑀸𑀦𑀯𑀡𑁆𑀡𑀸𑀢𑀺 𑀲𑀤𑀺𑀲𑀭𑀽𑀧𑀲𑀡𑁆𑀞𑀸𑀦𑀸 𑀩𑀻𑀪𑀘𑁆𑀙𑀸 𑀯𑀺𑀭𑀽𑀧𑀸 𑀤𑀼𑀤𑁆𑀤𑀲𑁆𑀲𑀺𑀓𑀸. 𑀲𑀫𑀸𑀦𑀪𑁄𑀕𑀸𑀢𑀺 𑀲𑀤𑀺𑀲𑀫𑁂𑀣𑀼𑀦𑀲𑀫𑀸𑀘𑀸𑀭𑀸. 𑀲𑀫𑀸𑀦𑀸𑀳𑀸𑀭𑀸𑀢𑀺 𑀲𑀤𑀺𑀲𑀔𑁂𑀴𑀲𑀺𑀗𑁆𑀖𑀸𑀡𑀺𑀓𑀧𑀼𑀩𑁆𑀩𑀮𑁄𑀳𑀺𑀢𑀸𑀤𑀺𑀆𑀳𑀸𑀭𑀸. 𑀲𑀫𑀸𑀦𑀸𑀬𑀼𑀓𑀸𑀢𑀺 𑀲𑀤𑀺𑀲𑀆𑀬𑀼𑀧𑀭𑀺𑀘𑁆𑀙𑁂𑀤𑀸. 𑀆𑀯𑀸𑀳𑀯𑀺𑀯𑀸𑀳𑀦𑁆𑀢𑀺 𑀓𑀜𑁆𑀜𑀸𑀕𑀳𑀡𑀜𑁆𑀘𑁂𑀯 𑀓𑀜𑁆𑀜𑀸𑀤𑀸𑀦𑀜𑁆𑀘. 𑀲𑀼𑀓𑁆𑀓𑀧𑀓𑁆𑀔𑁂 𑀲𑀫𑀸𑀦𑀯𑀡𑁆𑀡𑀸𑀢𑀺 𑀲𑀤𑀺𑀲𑀭𑀽𑀧𑀲𑀡𑁆𑀞𑀸𑀦𑀸 𑀅𑀪𑀺𑀭𑀽𑀧𑀸 𑀧𑀸𑀲𑀸𑀤𑀺𑀓𑀸 𑀤𑀲𑁆𑀲𑀦𑀻𑀬𑀸 𑀧𑀪𑀸𑀲𑀫𑁆𑀧𑀦𑁆𑀦𑀸. 𑀲𑀫𑀸𑀦𑀪𑁄𑀕𑀸𑀢𑀺 𑀲𑀤𑀺𑀲𑀧𑀜𑁆𑀘𑀓𑀆𑀫𑀕𑀼𑀡𑀪𑁄𑀕𑀸. 𑀲𑀫𑀸𑀦𑀸𑀳𑀸𑀭𑀸𑀢𑀺 𑀲𑀤𑀺𑀲𑀲𑀼𑀥𑀸𑀪𑁄𑀚𑀦𑀸𑀤𑀺𑀆𑀳𑀸𑀭𑀸. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯. 𑀦𑀦𑀼 𑀅𑀢𑁆𑀣𑀺 𑀅𑀲𑀼𑀭𑀓𑀸𑀬𑁄𑀢𑀺 𑀇𑀤𑀁 𑀅𑀲𑀼𑀭𑀓𑀸𑀬𑀲𑁆𑀲𑁂𑀯 𑀲𑀸𑀥𑀓𑀁. 𑀢𑀲𑁆𑀲 𑀧𑀦 𑀯𑀺𑀲𑀼𑀁 𑀕𑀢𑀺𑀧𑀭𑀺𑀘𑁆𑀙𑁂𑀤𑀸𑀪𑀸𑀯𑁂𑀦 𑀦 𑀕𑀢𑀺𑀲𑀸𑀥𑀓𑀦𑁆𑀢𑀺.

𑀙𑀕𑀢𑀺𑀓𑀣𑀸𑀯𑀡𑁆𑀡𑀦𑀸.

𑁨. 𑀅𑀦𑁆𑀢𑀭𑀸𑀪𑀯𑀓𑀣𑀸𑀯𑀡𑁆𑀡𑀦𑀸

𑁫𑁦𑁫. 𑀇𑀤𑀸𑀦𑀺 𑀅𑀦𑁆𑀢𑀭𑀸𑀪𑀯𑀓𑀣𑀸 𑀦𑀸𑀫 𑀳𑁄𑀢𑀺. 𑀢𑀢𑁆𑀣 𑀬𑁂𑀲𑀁 ‘‘𑀅𑀦𑁆𑀢𑀭𑀸 𑀧𑀭𑀺𑀦𑀺𑀩𑁆𑀩𑀸𑀬𑀻’’𑀢𑀺 𑀲𑀼𑀢𑁆𑀢𑀧𑀤𑀁 𑀅𑀬𑁄𑀦𑀺𑀲𑁄 𑀕𑀳𑁂𑀢𑁆𑀯𑀸 ‘‘𑀅𑀦𑁆𑀢𑀭𑀸𑀪𑀯𑁄 𑀦𑀸𑀫 𑀅𑀢𑁆𑀣𑀺, 𑀬𑀢𑁆𑀣 𑀲𑀢𑁆𑀢𑁄 𑀤𑀺𑀩𑁆𑀩𑀘𑀓𑁆𑀔𑀼𑀓𑁄 𑀯𑀺𑀬 𑀅𑀤𑀺𑀩𑁆𑀩𑀘𑀓𑁆𑀔𑀼𑀓𑁄, 𑀇𑀤𑁆𑀥𑀺𑀫𑀸 𑀯𑀺𑀬 𑀅𑀦𑀺𑀤𑁆𑀥𑀺𑀫𑀸 𑀫𑀸𑀢𑀸𑀧𑀺𑀢𑀺𑀲𑀫𑀸𑀕𑀫𑀜𑁆𑀘𑁂𑀯 𑀉𑀢𑀼𑀲𑀫𑀬𑀜𑁆𑀘 𑀑𑀮𑁄𑀓𑀬𑀫𑀸𑀦𑁄 𑀲𑀢𑁆𑀢𑀸𑀳𑀁 𑀯𑀸 𑀅𑀢𑀺𑀭𑁂𑀓𑀲𑀢𑁆𑀢𑀸𑀳𑀁 𑀯𑀸 𑀢𑀺𑀝𑁆𑀞𑀢𑀻’’𑀢𑀺 𑀮𑀤𑁆𑀥𑀺, 𑀲𑁂𑀬𑁆𑀬𑀣𑀸𑀧𑀺 𑀧𑀼𑀩𑁆𑀩𑀲𑁂𑀮𑀺𑀬𑀸𑀦𑀜𑁆𑀘𑁂𑀯 𑀲𑀫𑁆𑀫𑀺𑀢𑀺𑀬𑀸𑀦𑀜𑁆𑀘; 𑀢𑁂 𑀲𑀦𑁆𑀥𑀸𑀬 𑀅𑀢𑁆𑀣𑀻𑀢𑀺 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀮𑀤𑁆𑀥𑀺𑀬𑀁 𑀞𑀢𑁆𑀯𑀸 𑀧𑀝𑀺𑀜𑁆𑀜𑀸 𑀇𑀢𑀭𑀲𑁆𑀲. 𑀅𑀣 𑀦𑀁 𑀬𑁂 𑀘 𑀪𑀕𑀯𑀢𑀸 𑀢𑀬𑁄 𑀪𑀯𑀸 𑀯𑀼𑀢𑁆𑀢𑀸, 𑀢𑁂𑀲𑀁 𑀯𑀲𑁂𑀦 𑀘𑁄𑀤𑁂𑀢𑀼𑀁 𑀓𑀸𑀫𑀪𑀯𑁄𑀢𑀺𑀆𑀤𑀺𑀫𑀸𑀳. 𑀢𑀢𑁆𑀭𑀸𑀬𑀁 𑀅𑀥𑀺𑀧𑁆𑀧𑀸𑀬𑁄 𑁋 𑀬𑀤𑀺 𑀢𑁂 𑀅𑀦𑁆𑀢𑀭𑀸𑀪𑀯𑁄 𑀦𑀸𑀫 𑀓𑁄𑀘𑀺 𑀪𑀯𑁄 𑀅𑀢𑁆𑀣𑀺, 𑀢𑁂𑀦 𑀓𑀸𑀫𑀪𑀯𑀸𑀤𑀻𑀦𑀁𑀬𑁂𑀯 𑀅𑀜𑁆𑀜𑀢𑀭𑁂𑀦 𑀪𑀯𑀺𑀢𑀩𑁆𑀩𑀁 𑀧𑀜𑁆𑀘𑀯𑁄𑀓𑀸𑀭𑀪𑀯𑀸𑀤𑀺𑀦𑀸 𑀯𑀺𑀬, 𑀢𑁂𑀦 𑀢𑀁 𑀧𑀼𑀘𑁆𑀙𑀸𑀫𑀺 𑁋 ‘‘𑀓𑀺𑀁 𑀢𑁂 𑀅𑀬𑀁 𑀅𑀦𑁆𑀢𑀭𑀸𑀪𑀯𑁄 𑀦𑀸𑀫 𑀓𑀸𑀫𑀪𑀯𑁄, 𑀉𑀤𑀸𑀳𑀼 𑀭𑀽𑀧𑀪𑀯𑁄 𑀅𑀭𑀽𑀧𑀪𑀯𑁄 𑀯𑀸’’𑀢𑀺? 𑀇𑀢𑀭𑁄 𑀢𑀣𑀸 𑀅𑀦𑀺𑀘𑁆𑀙𑀦𑁆𑀢𑁄 𑀲𑀩𑁆𑀩𑀁 𑀧𑀝𑀺𑀓𑁆𑀔𑀺𑀧𑀢𑀺. 𑀓𑀸𑀫𑀪𑀯𑀲𑁆𑀲 𑀘𑀸𑀢𑀺𑀆𑀤𑀺 𑀬𑀤𑀺 𑀅𑀦𑁆𑀢𑀭𑀸𑀪𑀯𑁄 𑀦𑀸𑀫 𑀅𑀢𑁆𑀣𑀺, 𑀇𑀫𑁂𑀲𑀁 𑀪𑀯𑀸𑀦𑀁 𑀅𑀦𑁆𑀢𑀭𑀸 𑀤𑁆𑀯𑀺𑀦𑁆𑀦𑀁 𑀲𑀻𑀫𑀸𑀦𑀁 𑀲𑀻𑀫𑀦𑁆𑀢𑀭𑀺𑀓𑀸 𑀯𑀺𑀬 𑀪𑀯𑁂𑀬𑁆𑀬𑀸𑀢𑀺 𑀘𑁄𑀤𑁂𑀢𑀼𑀁 𑀆𑀭𑀤𑁆𑀥𑀁. 𑀧𑀭𑀯𑀸𑀤𑀻 𑀧𑀦 𑀢𑀣𑀸 𑀅𑀦𑀺𑀘𑁆𑀙𑀦𑁆𑀢𑁄 𑀲𑀩𑁆𑀩𑀧𑀜𑁆𑀳𑁂 𑀧𑀝𑀺𑀓𑁆𑀔𑀺𑀧𑀢𑀺 𑀓𑁂𑀯𑀮𑀁 𑀮𑀤𑁆𑀥𑀺𑀬𑀸, 𑀦 𑀲𑀳𑀥𑀫𑁆𑀫𑁂𑀦. 𑀢𑁂𑀦𑁂𑀯 𑀦𑀁 𑀲𑀓𑀯𑀸𑀤𑀻 ‘𑀦𑁄 𑀯𑀢 𑀭𑁂’𑀢𑀺 𑀧𑀝𑀺𑀲𑁂𑀥𑁂𑀢𑀺.

𑁫𑁦𑁬. 𑀧𑀜𑁆𑀘𑀫𑀻 𑀲𑀸 𑀬𑁄𑀦𑀻𑀢𑀺𑀆𑀤𑀻𑀦𑀺𑀧𑀺 𑀬𑀣𑀸𑀧𑀭𑀺𑀘𑁆𑀙𑀺𑀦𑁆𑀦𑀬𑁄𑀦𑀺𑀆𑀤𑀻𑀲𑀼 𑀲𑁄 𑀲𑀫𑁄𑀥𑀸𑀦𑀁 𑀦 𑀕𑀘𑁆𑀙𑀢𑀺, 𑀅𑀣 𑀢𑁂𑀦 𑀢𑀢𑁄 𑀢𑀢𑁄 𑀅𑀢𑀺𑀭𑁂𑀓𑁂𑀦 𑀪𑀯𑀺𑀢𑀩𑁆𑀩𑀦𑁆𑀢𑀺 𑀘𑁄𑀤𑁂𑀢𑀼𑀁 𑀯𑀼𑀢𑁆𑀢𑀸𑀦𑀺. 𑀅𑀦𑁆𑀢𑀭𑀸𑀪𑀯𑀽𑀧𑀕𑀁 𑀓𑀫𑁆𑀫𑀦𑁆𑀢𑀺 𑀬𑀤𑀺 𑀲𑁄𑀧𑀺 𑀏𑀓𑁄 𑀪𑀯𑁄, 𑀬𑀣𑀸 𑀓𑀸𑀫𑀪𑀯𑀽𑀧𑀕𑀸𑀤𑀻𑀦𑀺 𑀓𑀫𑁆𑀫𑀸𑀦𑀺 𑀅𑀢𑁆𑀣𑀻𑀢𑀺 𑀲𑀢𑁆𑀣𑀸𑀭𑀸 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑀺𑀢𑀸𑀦𑀺, 𑀏𑀯𑀁 𑀢𑀤𑀼𑀧𑀕𑁂𑀦𑀸𑀧𑀺 𑀓𑀫𑁆𑀫𑁂𑀦 𑀪𑀯𑀺𑀢𑀩𑁆𑀩𑀦𑁆𑀢𑀺 𑀘𑁄𑀤𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀬𑀲𑁆𑀫𑀸 𑀧𑀦 𑀧𑀭𑀲𑀫𑀬𑁂 𑀅𑀦𑁆𑀢𑀭𑀸𑀪𑀯𑀽𑀧𑀕𑀁 𑀦𑀸𑀫 𑀧𑀸𑀝𑀺𑀬𑁂𑀓𑁆𑀓𑀁 𑀓𑀫𑁆𑀫𑀁 𑀦𑀢𑁆𑀣𑀺, 𑀬𑀁 𑀬𑀁 𑀪𑀯𑀁 𑀉𑀧𑀧𑀚𑁆𑀚𑀺𑀲𑁆𑀲𑀢𑀺, 𑀢𑀤𑀼𑀧𑀕𑁂𑀦𑁂𑀯 𑀓𑀫𑁆𑀫𑁂𑀦 𑀅𑀦𑁆𑀢𑀭𑀸𑀪𑀯𑁂 𑀦𑀺𑀩𑁆𑀩𑀢𑁆𑀢𑀢𑀻𑀢𑀺 𑀢𑁂𑀲𑀁 𑀮𑀤𑁆𑀥𑀺, 𑀢𑀲𑁆𑀫𑀸 ‘𑀦𑀳𑁂𑀯’𑀦𑁆𑀢𑀺 𑀧𑀝𑀺𑀓𑁆𑀔𑀺𑀢𑁆𑀢𑀁. 𑀅𑀢𑁆𑀣𑀺 𑀅𑀦𑁆𑀢𑀭𑀸𑀪𑀯𑀽𑀧𑀕𑀸 𑀲𑀢𑁆𑀢𑀸𑀢𑀺 𑀧𑀼𑀝𑁆𑀞𑁄𑀧𑀺 𑀓𑀸𑀫𑀪𑀯𑀽𑀧𑀕𑀸𑀬𑁂𑀯 𑀦𑀸𑀫 𑀢𑁂𑀢𑀺 𑀮𑀤𑁆𑀥𑀺𑀬𑀸 𑀧𑀝𑀺𑀓𑁆𑀔𑀺𑀧𑀢𑀺. 𑀚𑀸𑀬𑀦𑁆𑀢𑀻𑀢𑀺𑀆𑀤𑀻𑀦𑀺 𑀧𑀼𑀝𑁆𑀞𑁄𑀧𑀺 𑀢𑀢𑁆𑀣 𑀚𑀸𑀢𑀺𑀚𑀭𑀸𑀫𑀭𑀡𑀸𑀦𑀺 𑀘𑁂𑀯 𑀘𑀼𑀢𑀺𑀧𑀝𑀺𑀲𑀦𑁆𑀥𑀺𑀧𑀭𑀫𑁆𑀧𑀭𑀜𑁆𑀘 𑀅𑀦𑀺𑀘𑁆𑀙𑀦𑁆𑀢𑁄 𑀧𑀝𑀺𑀓𑁆𑀔𑀺𑀧𑀢𑀺. 𑀭𑀽𑀧𑀸𑀤𑀺𑀯𑀲𑁂𑀦 𑀧𑀼𑀝𑁆𑀞𑁄𑀧𑀺 𑀬𑀲𑁆𑀫𑀸 𑀅𑀦𑁆𑀢𑀭𑀸𑀪𑀯𑀲𑀢𑁆𑀢𑀲𑁆𑀲 𑀅𑀦𑀺𑀤𑀲𑁆𑀲𑀦𑀁 𑀭𑀽𑀧𑀁, 𑀯𑁂𑀤𑀦𑀸𑀤𑀬𑁄𑀧𑀺 𑀅𑀜𑁆𑀜𑁂𑀲𑀁 𑀯𑀺𑀬 𑀦 𑀑𑀴𑀸𑀭𑀺𑀓𑀸𑀢𑀺 𑀢𑀲𑁆𑀲 𑀮𑀤𑁆𑀥𑀺, 𑀢𑀲𑁆𑀫𑀸 𑀧𑀝𑀺𑀓𑁆𑀔𑀺𑀧𑀢𑀺. 𑀇𑀫𑀺𑀦𑀸𑀯 𑀓𑀸𑀭𑀡𑁂𑀦 𑀧𑀜𑁆𑀘𑀯𑁄𑀓𑀸𑀭𑀪𑀯𑀪𑀸𑀯𑁂𑀧𑀺 𑀧𑀝𑀺𑀓𑁆𑀔𑁂𑀧𑁄 𑀯𑁂𑀤𑀺𑀢𑀩𑁆𑀩𑁄.

𑁫𑁦𑁭. 𑀇𑀤𑀸𑀦𑀺 𑀓𑀸𑀫𑀪𑀯𑁄 𑀪𑀯𑁄 𑀕𑀢𑀻𑀢𑀺𑀆𑀤𑀺 𑀪𑀯𑀲𑀁𑀲𑀦𑁆𑀤𑀦𑀁 𑀦𑀸𑀫 𑀳𑁄𑀢𑀺. 𑀢𑀢𑁆𑀭𑀸𑀬𑀁 𑀅𑀥𑀺𑀧𑁆𑀧𑀸𑀬𑁄 𑁋 𑀬𑀤𑀺 𑀢𑁂 𑀅𑀦𑁆𑀢𑀭𑀸𑀪𑀯𑁄 𑀦𑀸𑀫 𑀓𑁄𑀘𑀺 𑀪𑀯𑁄 𑀪𑀯𑁂𑀬𑁆𑀬, 𑀬𑀣𑀸 𑀓𑀸𑀫𑀪𑀯𑀸𑀤𑀻𑀲𑀼 𑀪𑀯𑀕𑀢𑀺𑀆𑀤𑀺𑀪𑁂𑀤𑁄 𑀮𑀩𑁆𑀪𑀢𑀺, 𑀢𑀣𑀸 𑀢𑀢𑁆𑀭𑀸𑀧𑀺 𑀮𑀩𑁆𑀪𑁂𑀣. 𑀬𑀣𑀸 𑀯𑀸 𑀢𑀢𑁆𑀣 𑀦 𑀮𑀩𑁆𑀪𑀢𑀺, 𑀢𑀣𑀸 𑀇𑀫𑁂𑀲𑀼𑀧𑀺 𑀦 𑀮𑀩𑁆𑀪𑁂𑀣. 𑀲𑀫𑀸𑀦𑀲𑁆𑀫𑀺𑀜𑁆𑀳𑀺 𑀪𑀯𑀪𑀸𑀯𑁂 𑀏𑀢𑁂𑀲𑁆𑀯𑁂𑀯𑁂𑀲 𑀯𑀺𑀪𑀸𑀕𑁄 𑀅𑀢𑁆𑀣𑀺, 𑀦 𑀇𑀢𑀭𑀲𑁆𑀫𑀺𑀦𑁆𑀢𑀺 𑀓𑁄 𑀏𑀢𑁆𑀣 𑀯𑀺𑀲𑁂𑀲𑀳𑁂𑀢𑀽𑀢𑀺. 𑀇𑀢𑀭𑁄 𑀧𑀼𑀦 𑀮𑀤𑁆𑀥𑀺𑀫𑀢𑁆𑀢𑀯𑀲𑁂𑀦 𑀢𑀁 𑀢𑀁 𑀧𑀝𑀺𑀚𑀸𑀦𑀸𑀢𑀺 𑀘𑁂𑀯 𑀧𑀝𑀺𑀓𑁆𑀔𑀺𑀧𑀢𑀺 𑀘.

𑁫𑁦𑁮. 𑀲𑀩𑁆𑀩𑁂𑀲𑀜𑁆𑀜𑁂𑀯 𑀲𑀢𑁆𑀢𑀸𑀦𑀁 𑀅𑀢𑁆𑀣𑀺 𑀅𑀦𑁆𑀢𑀭𑀸𑀪𑀯𑁄𑀢𑀺 𑀧𑀼𑀝𑁆𑀞𑁄 𑀬𑀲𑁆𑀫𑀸 𑀦𑀺𑀭𑀬𑀽𑀧𑀕𑀅𑀲𑀜𑁆𑀜𑀲𑀢𑁆𑀢𑀽𑀧𑀕𑀅𑀭𑀽𑀧𑀽𑀧𑀕𑀸𑀦𑀁 𑀅𑀦𑁆𑀢𑀭𑀸𑀪𑀯𑀁 𑀦 𑀇𑀘𑁆𑀙𑀢𑀺, 𑀢𑀲𑁆𑀫𑀸 𑀧𑀝𑀺𑀓𑁆𑀔𑀺𑀧𑀢𑀺. 𑀢𑁂𑀦𑁂𑀯 𑀓𑀸𑀭𑀡𑁂𑀦 𑀧𑀝𑀺𑀮𑁄𑀫𑁂 𑀧𑀝𑀺𑀚𑀸𑀦𑀸𑀢𑀺. 𑀆𑀦𑀦𑁆𑀢𑀭𑀺𑀬𑀲𑁆𑀲𑀸𑀢𑀺𑀆𑀤𑀺 𑀬𑁂𑀲𑀁 𑀲𑁄 𑀅𑀦𑁆𑀢𑀭𑀸𑀪𑀯𑀁 𑀦 𑀇𑀘𑁆𑀙𑀢𑀺, 𑀢𑁂 𑀢𑀸𑀯 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁. 𑀢𑀁 𑀲𑀩𑁆𑀩𑀁 𑀧𑀸𑀴𑀺𑀅𑀦𑀼𑀲𑀸𑀭𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁 𑀲𑀤𑁆𑀥𑀺𑀁 𑀲𑀼𑀢𑁆𑀢𑀲𑀸𑀥𑀦𑁂𑀦𑀸𑀢𑀺.

𑀅𑀦𑁆𑀢𑀭𑀸𑀪𑀯𑀓𑀣𑀸𑀯𑀡𑁆𑀡𑀦𑀸.

𑁩. 𑀓𑀸𑀫𑀕𑀼𑀡𑀓𑀣𑀸𑀯𑀡𑁆𑀡𑀦𑀸

𑁫𑁧𑁦. 𑀇𑀤𑀸𑀦𑀺 𑀓𑀸𑀫𑀕𑀼𑀡𑀓𑀣𑀸 𑀦𑀸𑀫 𑀳𑁄𑀢𑀺. 𑀢𑀢𑁆𑀣 𑀲𑀓𑀲𑀫𑀬𑁂 𑀢𑀸𑀯 𑀓𑀸𑀫𑀥𑀸𑀢𑀽𑀢𑀺 𑀯𑀢𑁆𑀣𑀼𑀓𑀸𑀫𑀸𑀧𑀺 𑀯𑀼𑀘𑁆𑀘𑀦𑁆𑀢𑀺 𑁋 𑀓𑀺𑀮𑁂𑀲𑀓𑀸𑀫𑀸𑀧𑀺 𑀓𑀸𑀫𑀪𑀯𑁄𑀧𑀺. 𑀏𑀢𑁂𑀲𑀼 𑀳𑀺 𑀯𑀢𑁆𑀣𑀼𑀓𑀸𑀫𑀸 𑀓𑀫𑀦𑀻𑀬𑀝𑁆𑀞𑁂𑀦 𑀓𑀸𑀫𑀸, 𑀲𑀪𑀸𑀯𑀦𑀺𑀲𑁆𑀲𑀢𑁆𑀢𑀲𑀼𑀜𑁆𑀜𑀢𑀝𑁆𑀞𑁂𑀦 𑀥𑀸𑀢𑀽𑀢𑀺 𑀓𑀸𑀫𑀥𑀸𑀢𑀼. 𑀓𑀺𑀮𑁂𑀲𑀓𑀸𑀫𑀸 𑀓𑀫𑀦𑀻𑀬𑀝𑁆𑀞𑁂𑀦 𑀘𑁂𑀯 𑀓𑀫𑀦𑀝𑁆𑀞𑁂𑀦 𑀘 𑀓𑀸𑀫𑀸, 𑀬𑀣𑀸𑀯𑀼𑀢𑁆𑀢𑁂𑀦𑁂𑀯𑀢𑁆𑀣𑁂𑀦 𑀥𑀸𑀢𑀽𑀢𑀺 𑀓𑀸𑀫𑀥𑀸𑀢𑀼. 𑀓𑀸𑀫𑀪𑀯𑁄 𑀓𑀫𑀦𑀻𑀬𑀝𑁆𑀞𑁂𑀦 𑀓𑀫𑀦𑀝𑁆𑀞𑁂𑀦 𑀯𑀢𑁆𑀣𑀼𑀓𑀸𑀫𑀧𑀯𑀢𑁆𑀢𑀺𑀤𑁂𑀲𑀝𑁆𑀞𑁂𑀦𑀸𑀢𑀺 𑀢𑀻𑀳𑀺 𑀓𑀸𑀭𑀡𑁂𑀳𑀺 𑀓𑀸𑀫𑁄, 𑀬𑀣𑀸𑀯𑀼𑀢𑁆𑀢𑁂𑀦𑁂𑀯𑀢𑁆𑀣𑁂𑀦 𑀥𑀸𑀢𑀽𑀢𑀺 𑀓𑀸𑀫𑀥𑀸𑀢𑀼. 𑀧𑀭𑀲𑀫𑀬𑁂 𑀧𑀦 𑁋 ‘‘𑀧𑀜𑁆𑀘𑀺𑀫𑁂, 𑀪𑀺𑀓𑁆𑀔𑀯𑁂, 𑀓𑀸𑀫𑀕𑀼𑀡𑀸’’𑀢𑀺 𑀯𑀘𑀦𑀫𑀢𑁆𑀢𑀁 𑀦𑀺𑀲𑁆𑀲𑀸𑀬 𑀧𑀜𑁆𑀘𑁂𑀯 𑀓𑀸𑀫𑀕𑀼𑀡𑀸 𑀓𑀸𑀫𑀥𑀸𑀢𑀽𑀢𑀺 𑀕𑀳𑀺𑀢𑀁. 𑀢𑀲𑁆𑀫𑀸 𑀬𑁂𑀲𑀁 𑀅𑀬𑀁 𑀮𑀤𑁆𑀥𑀺, 𑀲𑁂𑀬𑁆𑀬𑀣𑀸𑀧𑀺 𑀏𑀢𑀭𑀳𑀺 𑀧𑀼𑀩𑁆𑀩𑀲𑁂𑀮𑀺𑀬𑀸𑀦𑀁; 𑀢𑁂 𑀲𑀦𑁆𑀥𑀸𑀬 𑀓𑀸𑀫𑀥𑀸𑀢𑀼𑀦𑀸𑀦𑀢𑁆𑀢𑀁 𑀩𑁄𑀥𑁂𑀢𑀼𑀁 𑀧𑀜𑁆𑀘𑁂𑀯𑀸𑀢𑀺 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀮𑀤𑁆𑀥𑀺𑀯𑀲𑁂𑀦 𑀧𑀝𑀺𑀜𑁆𑀜𑀸 𑀇𑀢𑀭𑀲𑁆𑀲. 𑀦𑀦𑀼 𑀅𑀢𑁆𑀣𑀻𑀢𑀺𑀆𑀤𑀺 𑀓𑀺𑀮𑁂𑀲𑀓𑀸𑀫𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀢𑀢𑁆𑀣 𑀢𑀧𑁆𑀧𑀝𑀺𑀲𑀁𑀬𑀼𑀢𑁆𑀢𑁄𑀢𑀺 𑀓𑀸𑀫𑀕𑀼𑀡𑀧𑀝𑀺𑀲𑀁𑀬𑀼𑀢𑁆𑀢𑁄, 𑀓𑀸𑀫𑀕𑀼𑀡𑀸𑀭𑀫𑁆𑀫𑀡𑁄𑀢𑀺 𑀅𑀢𑁆𑀣𑁄. 𑀦𑁄 𑀘 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑀧𑀜𑁆𑀘𑁂𑀯𑀸𑀢𑀺 𑀇𑀫𑁂𑀲𑀼 𑀢𑀧𑁆𑀧𑀝𑀺𑀲𑀁𑀬𑀼𑀢𑁆𑀢𑀙𑀦𑁆𑀤𑀸𑀤𑀻𑀲𑀼 𑀲𑀢𑀺 𑀧𑀜𑁆𑀘𑁂𑀯 𑀓𑀸𑀫𑀕𑀼𑀡𑀸 𑀓𑀸𑀫𑀥𑀸𑀢𑀽𑀢𑀺 𑀦 𑀯𑀢𑁆𑀢𑀩𑁆𑀩𑀁. 𑀏𑀢𑁂𑀧𑀺 𑀳𑀺 𑀙𑀦𑁆𑀤𑀸𑀤𑀬𑁄 𑀓𑀫𑀦𑀻𑀬𑀝𑁆𑀞𑁂𑀦 𑀓𑀸𑀫𑀸 𑀘 𑀥𑀸𑀢𑀼 𑀘𑀸𑀢𑀺𑀧𑀺 𑀓𑀸𑀫𑀥𑀸𑀢𑀼. 𑀓𑀫𑀦𑀝𑁆𑀞𑁂𑀦 𑀓𑀸𑀫𑀲𑀗𑁆𑀔𑀸𑀢𑀸 𑀥𑀸𑀢𑀽𑀢𑀺𑀧𑀺 𑀓𑀸𑀫𑀥𑀸𑀢𑀽𑀢𑀺 𑀅𑀢𑁆𑀣𑁄.

𑀫𑀦𑀼𑀲𑁆𑀲𑀸𑀦𑀁 𑀘𑀓𑁆𑀔𑀼𑀦𑁆𑀢𑀺𑀆𑀤𑀺 𑀯𑀢𑁆𑀣𑀼𑀓𑀸𑀫𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀢𑀢𑁆𑀣 𑀧𑀭𑀯𑀸𑀤𑀻 𑀙𑀦𑁆𑀦𑀫𑁆𑀧𑀺 𑀆𑀬𑀢𑀦𑀸𑀦𑀁 𑀯𑀢𑁆𑀣𑀼𑀓𑀸𑀫𑀪𑀸𑀯𑁂𑀦 𑀦𑀓𑀸𑀫𑀥𑀸𑀢𑀼𑀪𑀸𑀯𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀧𑀼𑀦 𑀫𑀦𑁄𑀢𑀺 𑀧𑀼𑀝𑁆𑀞𑁄 𑀫𑀳𑀕𑁆𑀕𑀢𑀮𑁄𑀓𑀼𑀢𑁆𑀢𑀭𑀁 𑀲𑀦𑁆𑀥𑀸𑀬 𑀦𑀓𑀸𑀫𑀥𑀸𑀢𑀼𑀪𑀸𑀯𑀁 𑀧𑀝𑀺𑀚𑀸𑀦𑀸𑀢𑀺. 𑀬𑀲𑁆𑀫𑀸 𑀧𑀦 𑀲𑀩𑁆𑀩𑁄𑀧𑀺 𑀢𑁂𑀪𑀽𑀫𑀓𑀫𑀦𑁄 𑀓𑀸𑀫𑀥𑀸𑀢𑀼𑀬𑁂𑀯, 𑀢𑀲𑁆𑀫𑀸 𑀦𑀁 𑀲𑀓𑀯𑀸𑀤𑀻 𑀲𑀼𑀢𑁆𑀢𑁂𑀦 𑀦𑀺𑀕𑁆𑀕𑀡𑁆𑀳𑀸𑀢𑀺.

𑁫𑁧𑁧. 𑀓𑀸𑀫𑀕𑀼𑀡𑀸 𑀪𑀯𑁄𑀢𑀺𑀆𑀤𑀺 𑀪𑀯𑀲𑁆𑀲 𑀓𑀸𑀫𑀥𑀸𑀢𑀼𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀬𑀲𑁆𑀫𑀸 𑀧𑀦 𑀓𑀸𑀫𑀕𑀼𑀡𑀫𑀢𑁆𑀢𑁂 𑀪𑀯𑁄𑀢𑀺 𑀯𑁄𑀳𑀸𑀭𑁄 𑀦𑀢𑁆𑀣𑀺, 𑀢𑀲𑁆𑀫𑀸 𑀧𑀭𑀯𑀸𑀤𑀻 𑀦𑀳𑁂𑀯𑀸𑀢𑀺 𑀧𑀝𑀺𑀓𑁆𑀔𑀺𑀧𑀢𑀺. 𑀓𑀸𑀫𑀕𑀼𑀡𑀽𑀧𑀕𑀁 𑀓𑀫𑁆𑀫𑀦𑁆𑀢𑀺𑀆𑀤𑀺 𑀲𑀩𑁆𑀩𑀁 𑀓𑀸𑀫𑀕𑀼𑀡𑀫𑀢𑁆𑀢𑀲𑁆𑀲 𑀦𑀓𑀸𑀫𑀥𑀸𑀢𑀼𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀓𑀸𑀫𑀥𑀸𑀢𑀼𑀲𑀗𑁆𑀔𑀸𑀢𑀓𑀸𑀫𑀪𑀯𑀽𑀧𑀕𑀫𑁂𑀯 𑀳𑀺 𑀓𑀫𑁆𑀫𑀁 𑀅𑀢𑁆𑀣𑀺, 𑀓𑀸𑀫𑀪𑀯𑀽𑀧𑀕𑀸 𑀏𑀯 𑀘 𑀲𑀢𑁆𑀢𑀸 𑀳𑁄𑀦𑁆𑀢𑀺. 𑀢𑀢𑁆𑀣 𑀚𑀸𑀬𑀦𑁆𑀢𑀺 𑀚𑀺𑀬𑀦𑁆𑀢𑀺 𑀫𑀺𑀬𑀦𑁆𑀢𑀺 𑀘𑀯𑀦𑁆𑀢𑀺 𑀉𑀧𑀧𑀚𑁆𑀚𑀦𑁆𑀢𑀺, 𑀦 𑀓𑀸𑀫𑀕𑀼𑀡𑁂𑀲𑀽𑀢𑀺 𑀇𑀫𑀺𑀦𑀸 𑀉𑀧𑀸𑀬𑁂𑀦 𑀲𑀩𑁆𑀩𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄𑀢𑀺.

𑀓𑀸𑀫𑀕𑀼𑀡𑀓𑀣𑀸𑀯𑀡𑁆𑀡𑀦𑀸.

𑁪. 𑀓𑀸𑀫𑀓𑀣𑀸𑀯𑀡𑁆𑀡𑀦𑀸

𑁫𑁧𑁩-𑁫𑁧𑁪. 𑀇𑀤𑀸𑀦𑀺 𑀓𑀸𑀫𑀓𑀣𑀸 𑀦𑀸𑀫 𑀳𑁄𑀢𑀺. 𑀢𑀢𑁆𑀣 𑀬𑁂𑀲𑀁 ‘‘𑀧𑀜𑁆𑀘𑀺𑀫𑁂, 𑀪𑀺𑀓𑁆𑀔𑀯𑁂, 𑀓𑀸𑀫𑀕𑀼𑀡𑀸’’𑀢𑀺 𑀯𑀘𑀦𑀫𑀢𑁆𑀢𑀁 𑀦𑀺𑀲𑁆𑀲𑀸𑀬 𑀭𑀽𑀧𑀸𑀬𑀢𑀦𑀸𑀤𑀻𑀦𑀺 𑀧𑀜𑁆𑀘𑁂𑀯𑀸𑀬𑀢𑀦𑀸𑀦𑀺 𑀓𑀸𑀫𑀸𑀢𑀺 𑀮𑀤𑁆𑀥𑀺, 𑀲𑁂𑀬𑁆𑀬𑀣𑀸𑀧𑀺 𑀧𑀼𑀩𑁆𑀩𑀲𑁂𑀮𑀺𑀬𑀸𑀦𑀁; 𑀢𑁂𑀲𑀁 𑀓𑀺𑀮𑁂𑀲𑀓𑀸𑀫𑀲𑁆𑀲𑁂𑀯 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀓𑀸𑀫𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 𑀧𑀜𑁆𑀘𑁂𑀯𑀸𑀢𑀺 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀧𑀝𑀺𑀜𑁆𑀜𑀸 𑀇𑀢𑀭𑀲𑁆𑀲. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀓𑀸𑀫𑀓𑀣𑀸𑀯𑀡𑁆𑀡𑀦𑀸.

𑁫. 𑀭𑀽𑀧𑀥𑀸𑀢𑀼𑀓𑀣𑀸𑀯𑀡𑁆𑀡𑀦𑀸

𑁫𑁧𑁫-𑁫𑁧𑁬. 𑀇𑀤𑀸𑀦𑀺 𑀭𑀽𑀧𑀥𑀸𑀢𑀼𑀓𑀣𑀸 𑀦𑀸𑀫 𑀳𑁄𑀢𑀺. 𑀢𑀢𑁆𑀣 ‘‘𑀭𑀽𑀧𑀺𑀦𑁄 𑀥𑀫𑁆𑀫𑀸 𑀭𑀽𑀧𑀥𑀸𑀢𑀼 𑀦𑀸𑀫𑀸’’𑀢𑀺 𑀬𑁂𑀲𑀁 𑀮𑀤𑁆𑀥𑀺, 𑀲𑁂𑀬𑁆𑀬𑀣𑀸𑀧𑀺 𑀅𑀦𑁆𑀥𑀓𑀸𑀦𑀁; 𑀢𑁂 𑀲𑀦𑁆𑀥𑀸𑀬 𑀭𑀽𑀧𑀺𑀦𑁄𑀢𑀺 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀧𑀝𑀺𑀜𑁆𑀜𑀸 𑀇𑀢𑀭𑀲𑁆𑀲. 𑀅𑀣 𑀦𑀁 𑀲𑀓𑀯𑀸𑀤𑀻 𑀬𑀲𑁆𑀫𑀸 𑀭𑀽𑀧𑀥𑀸𑀢𑀼 𑀦𑀸𑀫 𑀭𑀽𑀧𑀪𑀯𑁄, 𑀦 𑀭𑀽𑀧𑀫𑀢𑁆𑀢𑀫𑁂𑀯, 𑀢𑀲𑁆𑀫𑀸 𑀢𑁂𑀦𑀢𑁆𑀣𑁂𑀦 𑀘𑁄𑀤𑁂𑀢𑀼𑀁 𑀭𑀽𑀧𑀥𑀸𑀢𑀽𑀢𑀺𑀆𑀤𑀺𑀫𑀸𑀳. 𑀢𑀁 𑀲𑀩𑁆𑀩𑀁 𑀓𑀸𑀫𑀕𑀼𑀡𑀓𑀣𑀸𑀬𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀲𑀸𑀯 𑀓𑀸𑀫𑀥𑀸𑀢𑀽𑀢𑀺 𑀧𑀼𑀝𑁆𑀞𑁄 𑀪𑀽𑀫𑀺𑀧𑀭𑀺𑀘𑁆𑀙𑁂𑀤𑁂𑀦 𑀯𑀺𑀭𑁄𑀥𑀁 𑀧𑀲𑁆𑀲𑀫𑀸𑀦𑁄 𑀧𑀝𑀺𑀓𑁆𑀔𑀺𑀧𑀢𑀺. 𑀧𑀼𑀦 𑀤𑀴𑁆𑀳𑀁 𑀓𑀢𑁆𑀯𑀸 𑀧𑀼𑀝𑁆𑀞𑁄 𑀅𑀢𑁆𑀢𑀦𑁄 𑀮𑀤𑁆𑀥𑀺𑀯𑀲𑁂𑀦 𑀧𑀝𑀺𑀚𑀸𑀦𑀸𑀢𑀺. 𑀏𑀯𑀁 𑀲𑀦𑁆𑀢𑁂 𑀧𑀦 𑀤𑁆𑀯𑀻𑀳𑀺 𑀪𑀯𑁂𑀳𑀺 𑀲𑀫𑀦𑁆𑀦𑀸𑀕𑀢𑀢𑀸 𑀆𑀧𑀚𑁆𑀚𑀢𑀺, 𑀢𑁂𑀦 𑀢𑀁 𑀲𑀓𑀯𑀸𑀤𑀻 𑀓𑀸𑀫𑀪𑀯𑁂𑀦 𑀘𑀸𑀢𑀺 𑀆𑀤𑀺𑀫𑀸𑀳. 𑀇𑀢𑀭𑁄 𑀏𑀓𑀲𑁆𑀲 𑀤𑁆𑀯𑀻𑀳𑀺 𑀲𑀫𑀦𑁆𑀦𑀸𑀕𑀢𑀸𑀪𑀸𑀯𑀢𑁄 𑀧𑀝𑀺𑀓𑁆𑀔𑀺𑀧𑀢𑀻𑀢𑀺.

𑀭𑀽𑀧𑀥𑀸𑀢𑀼𑀓𑀣𑀸𑀯𑀡𑁆𑀡𑀦𑀸.

𑁬. 𑀅𑀭𑀽𑀧𑀥𑀸𑀢𑀼𑀓𑀣𑀸𑀯𑀡𑁆𑀡𑀦𑀸

𑁫𑁧𑁭-𑁫𑁧𑁮. 𑀅𑀭𑀽𑀧𑀥𑀸𑀢𑀼𑀓𑀣𑀸𑀬𑀧𑀺 𑀇𑀫𑀺𑀦𑀸𑀯𑀼𑀧𑀸𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀭𑀽𑀧𑀥𑀫𑁆𑀫𑁂𑀲𑀼 𑀧𑀦 𑀯𑁂𑀤𑀦𑀸𑀓𑁆𑀔𑀦𑁆𑀥𑀫𑁂𑀯 𑀕𑀳𑁂𑀢𑁆𑀯𑀸 𑀯𑁂𑀤𑀦𑀸 𑀪𑀯𑁄𑀢𑀺𑀆𑀤𑀺𑀦𑀸 𑀦𑀬𑁂𑀦𑁂𑀢𑁆𑀣 𑀤𑁂𑀲𑀦𑀸 𑀓𑀢𑀸. 𑀢𑀢𑁆𑀣 𑀓𑀺𑀁 𑀢𑁂 𑀅𑀭𑀽𑀧𑀺𑀦𑁄 𑀥𑀫𑁆𑀫𑀸𑀢𑀺 𑀲𑀗𑁆𑀔𑀁 𑀕𑀢𑀸 𑀯𑁂𑀤𑀦𑀸𑀤𑀻𑀲𑀼 𑀅𑀜𑁆𑀜𑀢𑀭𑀸 𑀳𑁄𑀢𑀻𑀢𑀺 𑀏𑀯𑀫𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀲𑁂𑀲𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀦𑁆𑀢𑀺.

𑀅𑀭𑀽𑀧𑀥𑀸𑀢𑀼𑀓𑀣𑀸𑀯𑀡𑁆𑀡𑀦𑀸.

𑁭. 𑀭𑀽𑀧𑀥𑀸𑀢𑀼𑀬𑀸 𑀆𑀬𑀢𑀦𑀓𑀣𑀸𑀯𑀡𑁆𑀡𑀦𑀸

𑁫𑁧𑁯. 𑀇𑀤𑀸𑀦𑀺 𑀭𑀽𑀧𑀥𑀸𑀢𑀼𑀬𑀸 𑀆𑀬𑀢𑀦𑀓𑀣𑀸 𑀦𑀸𑀫 𑀳𑁄𑀢𑀺. 𑀢𑀢𑁆𑀣 𑀬𑁂𑀲𑀁 ‘‘𑀭𑀽𑀧𑀻 𑀫𑀦𑁄𑀫𑀬𑁄 𑀲𑀩𑁆𑀩𑀗𑁆𑀕𑀧𑀘𑁆𑀘𑀗𑁆𑀕𑀻 𑀅𑀳𑀻𑀦𑀺𑀦𑁆𑀤𑁆𑀭𑀺𑀬𑁄’’𑀢𑀺 (𑀤𑀻. 𑀦𑀺. 𑁧.𑁮𑁭) 𑀲𑀼𑀢𑁆𑀢𑀁 𑀦𑀺𑀲𑁆𑀲𑀸𑀬 𑀩𑁆𑀭𑀳𑁆𑀫𑀓𑀸𑀬𑀺𑀓𑀸𑀦𑀁 𑀖𑀸𑀦𑀸𑀤𑀺𑀦𑀺𑀫𑀺𑀢𑁆𑀢𑀸𑀦𑀺𑀧𑀺 𑀆𑀬𑀢𑀦𑀸𑀦𑁂𑀯𑀸𑀢𑀺 𑀓𑀧𑁆𑀧𑁂𑀢𑁆𑀯𑀸 𑀲𑀴𑀸𑀬𑀢𑀦𑀺𑀓𑁄 𑀢𑁂𑀲𑀁 𑀅𑀢𑁆𑀢𑀪𑀸𑀯𑁄𑀢𑀺 𑀮𑀤𑁆𑀥𑀺, 𑀲𑁂𑀬𑁆𑀬𑀣𑀸𑀧𑀺 𑀅𑀦𑁆𑀥𑀓𑀸𑀦𑀜𑁆𑀘𑁂𑀯 𑀲𑀫𑁆𑀫𑀺𑀢𑀺𑀬𑀸𑀦𑀜𑁆𑀘; 𑀢𑁂 𑀲𑀦𑁆𑀥𑀸𑀬 𑀲𑀴𑀸𑀬𑀢𑀦𑀺𑀓𑁄𑀢𑀺 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀮𑀤𑁆𑀥𑀺𑀯𑀲𑁂𑀦 𑀧𑀝𑀺𑀜𑁆𑀜𑀸 𑀇𑀢𑀭𑀲𑁆𑀲. 𑀅𑀣 𑀦𑀁 𑀬𑀁 𑀢𑀢𑁆𑀣 𑀆𑀬𑀢𑀦𑀁 𑀦𑀢𑁆𑀣𑀺, 𑀢𑀲𑁆𑀲 𑀯𑀲𑁂𑀦 𑀘𑁄𑀤𑁂𑀢𑀼𑀁 𑀅𑀢𑁆𑀣𑀺 𑀢𑀢𑁆𑀣 𑀖𑀸𑀦𑀸𑀬𑀢𑀦𑀦𑁆𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁄 𑀧𑀭𑀯𑀸𑀤𑀻 𑀬𑀁 𑀢𑀢𑁆𑀣 𑀅𑀚𑁆𑀛𑀢𑁆𑀢𑀺𑀓𑀸𑀦𑀁 𑀢𑀺𑀡𑁆𑀡𑀁 𑀆𑀬𑀢𑀦𑀸𑀦𑀁 𑀖𑀸𑀦𑀸𑀤𑀺𑀓𑀁 𑀲𑀡𑁆𑀞𑀸𑀦𑀦𑀺𑀫𑀺𑀢𑁆𑀢𑀁 𑀢𑀤𑁂𑀯 𑀆𑀬𑀢𑀦𑀦𑁆𑀢𑀺 𑀮𑀤𑁆𑀥𑀺𑀬𑀸 𑀧𑀝𑀺𑀚𑀸𑀦𑀸𑀢𑀺. 𑀩𑀸𑀳𑀺𑀭𑀸𑀦𑀁 𑀕𑀦𑁆𑀥𑀸𑀬𑀢𑀦𑀸𑀤𑀻𑀦𑀁 𑀯𑀲𑁂𑀦 𑀧𑀼𑀝𑁆𑀞𑁄 𑀖𑀸𑀦𑀧𑁆𑀧𑀲𑀸𑀤𑀸𑀤𑀬𑁄 𑀢𑀢𑁆𑀣 𑀦 𑀇𑀘𑁆𑀙𑀢𑀺, 𑀢𑀲𑁆𑀫𑀸 𑀢𑁂𑀲𑀁 𑀕𑁄𑀘𑀭𑀁 𑀧𑀝𑀺𑀲𑁂𑀥𑁂𑀦𑁆𑀢𑁄 𑀧𑀝𑀺𑀓𑁆𑀔𑀺𑀧𑀢𑀺. 𑀧𑀝𑀺𑀮𑁄𑀫𑀧𑀜𑁆𑀳𑀲𑀁𑀲𑀦𑁆𑀤𑀦𑀧𑀜𑁆𑀳𑁂𑀲𑀼𑀧𑀺 𑀇𑀫𑀺𑀦𑀸𑀯𑀼𑀧𑀸𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑁫𑁨𑁧. 𑀅𑀢𑁆𑀣𑀺 𑀢𑀢𑁆𑀣 𑀖𑀸𑀦𑀸𑀬𑀢𑀦𑀁 𑀅𑀢𑁆𑀣𑀺 𑀕𑀦𑁆𑀥𑀸𑀬𑀢𑀦𑀁 𑀢𑁂𑀦 𑀖𑀸𑀦𑁂𑀦 𑀢𑀁 𑀕𑀦𑁆𑀥𑀁 𑀖𑀸𑀬𑀢𑀻𑀢𑀺 𑀢𑀲𑁆𑀫𑀺𑀁𑀬𑁂𑀯 𑀧𑀭𑀲𑀫𑀬𑁂 𑀏𑀓𑀘𑁆𑀘𑁂 𑀆𑀘𑀭𑀺𑀬𑁂 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑁂 𑀓𑀺𑀭 𑀢𑀢𑁆𑀣 𑀙 𑀅𑀚𑁆𑀛𑀢𑁆𑀢𑀺𑀓𑀸𑀦𑀺 𑀆𑀬𑀢𑀦𑀸𑀦𑀺 𑀧𑀭𑀺𑀧𑀼𑀡𑁆𑀡𑀸𑀦𑀺 𑀇𑀘𑁆𑀙𑀦𑁆𑀢𑀺, 𑀆𑀬𑀢𑀦𑁂𑀦 𑀘 𑀦𑀸𑀫 𑀲𑀓𑀺𑀘𑁆𑀘𑀓𑁂𑀦 𑀪𑀯𑀺𑀢𑀩𑁆𑀩𑀦𑁆𑀢𑀺 𑀢𑁂𑀳𑀺 𑀖𑀸𑀦𑀸𑀤𑀻𑀳𑀺 𑀢𑁂 𑀕𑀦𑁆𑀥𑀸𑀤𑀬𑁄 𑀖𑀸𑀬𑀦𑁆𑀢𑀺 𑀲𑀸𑀬𑀦𑁆𑀢𑀺 𑀨𑀼𑀲𑀦𑁆𑀢𑀻𑀢𑀺𑀧𑀺 𑀇𑀘𑁆𑀙𑀦𑁆𑀢𑀺. 𑀢𑀁 𑀮𑀤𑁆𑀥𑀺𑀁 𑀲𑀦𑁆𑀥𑀸𑀬 𑀧𑀭𑀯𑀸𑀤𑀻 𑀆𑀫𑀦𑁆𑀢𑀸𑀢𑀺 𑀧𑀝𑀺𑀚𑀸𑀦𑀸𑀢𑀺.

𑁫𑁨𑁨. 𑀅𑀢𑁆𑀣𑀺 𑀢𑀢𑁆𑀣 𑀫𑀽𑀮𑀕𑀦𑁆𑀥𑁄𑀢𑀺𑀆𑀤𑀻𑀦𑀺 𑀧𑀦 𑀧𑀼𑀝𑁆𑀞𑁄 𑀅𑀢𑁆𑀣𑀺𑀪𑀸𑀯𑀁 𑀲𑀸𑀥𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀧𑀝𑀺𑀓𑁆𑀔𑀺𑀧𑀢𑀺. 𑀦𑀦𑀼 𑀅𑀢𑁆𑀣𑀺 𑀢𑀢𑁆𑀣 𑀖𑀸𑀦𑀦𑀺𑀫𑀺𑀢𑁆𑀢𑀦𑁆𑀢𑀺𑀆𑀤𑀺 𑀲𑀡𑁆𑀞𑀸𑀦𑀫𑀢𑁆𑀢𑀲𑁆𑀲𑁂𑀯 𑀲𑀸𑀥𑀓𑀁, 𑀦 𑀆𑀬𑀢𑀦𑀲𑁆𑀲, 𑀢𑀲𑁆𑀫𑀸 𑀉𑀤𑀸𑀳𑀝𑀫𑁆𑀧𑀺 𑀅𑀦𑀼𑀤𑀸𑀳𑀝𑀲𑀤𑀺𑀲𑀫𑁂𑀯𑀸𑀢𑀺.

𑀭𑀽𑀧𑀥𑀸𑀢𑀼𑀬𑀸 𑀆𑀬𑀢𑀦𑀓𑀣𑀸𑀯𑀡𑁆𑀡𑀦𑀸.

𑁮. 𑀅𑀭𑀽𑀧𑁂 𑀭𑀽𑀧𑀓𑀣𑀸𑀯𑀡𑁆𑀡𑀦𑀸

𑁫𑁨𑁪-𑁫𑁨𑁬. 𑀇𑀤𑀸𑀦𑀺 𑀅𑀭𑀽𑀧𑁂 𑀭𑀽𑀧𑀓𑀣𑀸 𑀦𑀸𑀫 𑀳𑁄𑀢𑀺. 𑀢𑀢𑁆𑀣 𑀬𑁂𑀲𑀁 ‘‘𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀦𑀸𑀫𑀭𑀽𑀧’’𑀦𑁆𑀢𑀺 𑀯𑀘𑀦𑀢𑁄 𑀆𑀭𑀼𑀧𑁆𑀧𑀪𑀯𑁂𑀧𑀺 𑀑𑀴𑀸𑀭𑀺𑀓𑀭𑀽𑀧𑀸 𑀦𑀺𑀲𑁆𑀲𑀝𑀁 𑀲𑀼𑀔𑀼𑀫𑀭𑀽𑀧𑀁 𑀅𑀢𑁆𑀣𑀻𑀢𑀺 𑀮𑀤𑁆𑀥𑀺, 𑀲𑁂𑀬𑁆𑀬𑀣𑀸𑀧𑀺 𑀅𑀦𑁆𑀥𑀓𑀸𑀦𑀁; 𑀢𑁂 𑀲𑀦𑁆𑀥𑀸𑀬 𑀅𑀢𑁆𑀣𑀺 𑀭𑀽𑀧𑀦𑁆𑀢𑀺 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀧𑀝𑀺𑀜𑁆𑀜𑀸 𑀇𑀢𑀭𑀲𑁆𑀲. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀅𑀭𑀽𑀧𑁂 𑀭𑀽𑀧𑀓𑀣𑀸𑀯𑀡𑁆𑀡𑀦𑀸.

𑁯. 𑀭𑀽𑀧𑀁 𑀓𑀫𑁆𑀫𑀦𑁆𑀢𑀺𑀓𑀣𑀸𑀯𑀡𑁆𑀡𑀦𑀸

𑁫𑁨𑁭-𑁫𑁩𑁭. 𑀇𑀤𑀸𑀦𑀺 𑀭𑀽𑀧𑀁 𑀓𑀫𑁆𑀫𑀦𑁆𑀢𑀺𑀓𑀣𑀸 𑀦𑀸𑀫 𑀳𑁄𑀢𑀺. 𑀢𑀢𑁆𑀣 𑀬𑁂𑀲𑀁 𑀓𑀸𑀬𑀯𑀘𑀻𑀯𑀺𑀜𑁆𑀜𑀢𑁆𑀢𑀺𑀲𑀗𑁆𑀔𑀸𑀢𑀁 𑀭𑀽𑀧𑀫𑁂𑀯 𑀓𑀸𑀬𑀓𑀫𑁆𑀫𑀁 𑀯𑀘𑀻𑀓𑀫𑁆𑀫𑀁 𑀦𑀸𑀫, 𑀢𑀜𑁆𑀘 𑀓𑀼𑀲𑀮𑀲𑀫𑀼𑀝𑁆𑀞𑀸𑀦𑀁 𑀓𑀼𑀲𑀮𑀁, 𑀅𑀓𑀼𑀲𑀮𑀲𑀫𑀼𑀝𑁆𑀞𑀸𑀦𑀁 𑀅𑀓𑀼𑀲𑀮𑀦𑁆𑀢𑀺 𑀮𑀤𑁆𑀥𑀺, 𑀲𑁂𑀬𑁆𑀬𑀣𑀸𑀧𑀺 𑀫𑀳𑀺𑀲𑀸𑀲𑀓𑀸𑀦𑀜𑁆𑀘𑁂𑀯 𑀲𑀫𑁆𑀫𑀺𑀢𑀺𑀬𑀸𑀦𑀜𑁆𑀘; 𑀢𑁂 𑀲𑀦𑁆𑀥𑀸𑀬 𑀓𑀼𑀲𑀮𑁂𑀦 𑀘𑀺𑀢𑁆𑀢𑁂𑀦 𑀲𑀫𑀼𑀝𑁆𑀞𑀺𑀢𑀦𑁆𑀢𑀺 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀧𑀝𑀺𑀜𑁆𑀜𑀸 𑀇𑀢𑀭𑀲𑁆𑀲. 𑀅𑀣 𑀦𑀁 𑀲𑀘𑁂 𑀢𑀁 𑀓𑀼𑀲𑀮𑀁, 𑀬𑁆𑀯𑀸𑀬𑀁 𑀲𑀸𑀭𑀫𑁆𑀫𑀡𑀸𑀤𑀺𑀪𑁂𑀤𑁄 𑀓𑀼𑀲𑀮𑀲𑁆𑀲 𑀮𑀩𑁆𑀪𑀢𑀺, 𑀅𑀢𑁆𑀣𑀺 𑀢𑁂 𑀲𑁄 𑀢𑀲𑁆𑀲𑀸𑀢𑀺 𑀘𑁄𑀤𑁂𑀢𑀼𑀁 𑀲𑀸𑀭𑀫𑁆𑀫𑀡𑀦𑁆𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀧𑀢𑁆𑀣𑀦𑀸 𑀧𑀡𑀺𑀥𑀻𑀢𑀺 𑀘𑁂𑀢𑀦𑀸𑀬𑁂𑀯𑁂𑀢𑀁 𑀯𑁂𑀯𑀘𑀦𑀁. 𑀓𑀼𑀲𑀮𑀘𑁂𑀢𑀦𑀸𑀬𑁂𑀯 𑀳𑀺 𑀧𑀓𑀧𑁆𑀧𑀬𑀫𑀸𑀦𑀸 𑀧𑀢𑁆𑀣𑀦𑀸𑀢𑀺. 𑀧𑀓𑀧𑁆𑀧𑀦𑀯𑀲𑁂𑀦 𑀞𑀺𑀢𑀢𑁆𑀢𑀸 𑀧𑀡𑀺𑀥𑀻𑀢𑀺 𑀘 𑀯𑀼𑀘𑁆𑀘𑀢𑀺. 𑀧𑀭𑀢𑁄 𑀧𑀦 𑀓𑀼𑀲𑀮𑁂𑀦 𑀘𑀺𑀢𑁆𑀢𑁂𑀦 𑀲𑀫𑀼𑀝𑁆𑀞𑀺𑀢𑀸 𑀯𑁂𑀤𑀦𑀸 𑀲𑀜𑁆𑀜𑀸 𑀘𑁂𑀢𑀦𑀸 𑀲𑀤𑁆𑀥𑀸𑀢𑀺𑀆𑀤𑀻𑀲𑀼 𑀯𑁂𑀤𑀦𑀸𑀤𑀻𑀦𑀜𑁆𑀜𑁂𑀯 𑀘𑁂𑀢𑁆𑀣 𑀧𑀢𑁆𑀣𑀦𑀸 𑀧𑀡𑀺𑀥𑀻𑀢𑀺 𑀮𑀩𑁆𑀪𑀢𑀺, 𑀦 𑀘𑁂𑀢𑀦𑀸𑀬. 𑀓𑀲𑁆𑀫𑀸? 𑀤𑁆𑀯𑀺𑀦𑁆𑀦𑀁 𑀘𑁂𑀢𑀦𑀸𑀦𑀁 𑀏𑀓𑀢𑁄 𑀅𑀪𑀸𑀯𑀸, 𑀲𑁄𑀢𑀧𑀢𑀺𑀢𑀢𑁆𑀢𑀸 𑀧𑀦 𑀏𑀯𑀁 𑀢𑀦𑁆𑀢𑀺 𑀕𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀭𑀽𑀧𑀸𑀬𑀢𑀦𑀦𑁆𑀢𑀺𑀆𑀤𑀺 𑀧𑀼𑀭𑀺𑀫𑀯𑀸𑀭𑁂 ‘‘𑀲𑀩𑁆𑀩𑀦𑁆𑀢𑀁 𑀓𑀼𑀲𑀮’’𑀦𑁆𑀢𑀺 𑀲𑀁𑀔𑀺𑀢𑁆𑀢𑀲𑁆𑀲 𑀧𑀪𑁂𑀤𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀲𑁂𑀲𑀸 𑀲𑀁𑀲𑀦𑁆𑀤𑀦𑀦𑀬𑀸, 𑀯𑀘𑀻𑀓𑀫𑁆𑀫𑀓𑀣𑀸 ‘‘𑀅𑀓𑀼𑀲𑀮𑁂𑀦 𑀘𑀺𑀢𑁆𑀢𑁂𑀦 𑀲𑀫𑀼𑀝𑁆𑀞𑀺𑀢’’𑀦𑁆𑀢𑀺𑀆𑀤𑀺𑀯𑀺𑀥𑀸𑀦𑀜𑁆𑀘 𑀲𑀩𑁆𑀩𑀁 𑀧𑀸𑀴𑀺𑀅𑀦𑀼𑀲𑀸𑀭𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀅𑀲𑀼𑀘𑀻𑀢𑀺 𑀧𑀦𑁂𑀢𑁆𑀣 𑀲𑀼𑀓𑁆𑀓𑀁 𑀅𑀥𑀺𑀧𑁆𑀧𑁂𑀢𑀁. 𑀲𑀼𑀢𑁆𑀢𑀲𑀸𑀥𑀦𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑀭𑀽𑀧𑀁 𑀓𑀫𑁆𑀫𑀦𑁆𑀢𑀺𑀓𑀣𑀸𑀯𑀡𑁆𑀡𑀦𑀸.

𑁧𑁦. 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀓𑀣𑀸𑀯𑀡𑁆𑀡𑀦𑀸

𑁫𑁪𑁦. 𑀇𑀤𑀸𑀦𑀺 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀓𑀣𑀸 𑀦𑀸𑀫 𑀳𑁄𑀢𑀺. 𑀢𑀢𑁆𑀣 𑀬𑁂𑀲𑀁 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀦𑀸𑀫 𑀘𑀺𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑁄 𑀅𑀭𑀽𑀧𑀥𑀫𑁆𑀫𑁄, 𑀢𑀲𑁆𑀫𑀸 𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀦𑀢𑁆𑀣𑀻𑀢𑀺 𑀮𑀤𑁆𑀥𑀺, 𑀲𑁂𑀬𑁆𑀬𑀣𑀸𑀧𑀺 𑀧𑀼𑀩𑁆𑀩𑀲𑁂𑀮𑀺𑀬𑀸𑀦𑀜𑁆𑀘𑁂𑀯 𑀲𑀫𑁆𑀫𑀺𑀢𑀺𑀬𑀸𑀦𑀜𑁆𑀘; 𑀢𑁂 𑀲𑀦𑁆𑀥𑀸𑀬 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀧𑀝𑀺𑀜𑁆𑀜𑀸 𑀇𑀢𑀭𑀲𑁆𑀲. 𑀦𑀢𑁆𑀣𑀺 𑀭𑀽𑀧𑀻𑀦𑀁 𑀥𑀫𑁆𑀫𑀸𑀦𑀁 𑀆𑀬𑀽𑀢𑀺 𑀧𑀜𑁆𑀳𑁂 𑀉𑀧𑀸𑀤𑀺𑀦𑁆𑀦𑀭𑀽𑀧𑀸𑀦𑀫𑁆𑀧𑀺 𑀢𑀺𑀡𑀓𑀝𑁆𑀞𑀸𑀤𑀻𑀦𑀫𑁆𑀧𑀺 𑀲𑀦𑁆𑀢𑀸𑀦𑀯𑀲𑁂𑀦 𑀧𑀯𑀢𑁆𑀢𑀺𑀫𑁂𑀯 𑀆𑀬𑀼 𑀞𑀺𑀢𑀺 𑀬𑀧𑀦𑀸 𑀬𑀸𑀧𑀦𑀸 𑀇𑀭𑀺𑀬𑀦𑀸 𑀯𑀢𑁆𑀢𑀦𑀸 𑀧𑀸𑀮𑀦𑀸𑀢𑀺 𑀇𑀘𑁆𑀙𑀢𑀺, 𑀢𑀲𑁆𑀫𑀸 𑀧𑀝𑀺𑀓𑁆𑀔𑀺𑀧𑀢𑀺. 𑀅𑀢𑁆𑀣𑀻𑀢𑀺 𑀧𑀜𑁆𑀳𑁂𑀧𑀺 𑀇𑀫𑀺𑀦𑀸 𑀓𑀸𑀭𑀡𑁂𑀦 𑀧𑀝𑀺𑀚𑀸𑀦𑀸𑀢𑀺. 𑀅𑀢𑁆𑀣𑀺 𑀅𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀦𑁆𑀢𑀺 𑀧𑀜𑁆𑀳𑁂 𑀅𑀭𑀽𑀧𑀥𑀫𑁆𑀫𑀸𑀦𑀁 𑀘𑀺𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑀁 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀲𑀦𑁆𑀢𑀸𑀦𑀁 𑀦𑀸𑀫 𑀅𑀢𑁆𑀣𑀻𑀢𑀺 𑀇𑀘𑁆𑀙𑀢𑀺, 𑀢𑀲𑁆𑀫𑀸 𑀧𑀝𑀺𑀚𑀸𑀦𑀸𑀢𑀺.

𑁫𑁪𑁧. 𑀭𑀽𑀧𑀻𑀦𑀁 𑀥𑀫𑁆𑀫𑀸𑀦𑀁 𑀆𑀬𑀼 𑀅𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀦𑁆𑀢𑀺 𑀧𑀜𑁆𑀳𑁂 𑀲𑀢𑁆𑀢𑀲𑀦𑁆𑀢𑀸𑀦𑁂 𑀭𑀽𑀧𑀺𑀦𑁄 𑀯𑀸 𑀳𑁄𑀦𑁆𑀢𑀼 𑀅𑀭𑀽𑀧𑀺𑀦𑁄 𑀯𑀸, 𑀲𑀩𑁆𑀩𑁂𑀲𑀁 𑀘𑀺𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑀁 𑀅𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀫𑁂𑀯 𑀇𑀘𑁆𑀙𑀢𑀺, 𑀢𑀲𑁆𑀫𑀸 𑀧𑀝𑀺𑀚𑀸𑀦𑀸𑀢𑀺.

𑁫𑁪𑁨. 𑀦𑀺𑀭𑁄𑀥𑀲𑀫𑀸𑀧𑀦𑁆𑀦𑀧𑀜𑁆𑀳𑁂𑀲𑀼𑀧𑀺 𑀘𑀺𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑀁 𑀅𑀭𑀽𑀧𑀚𑀻𑀯𑀺𑀢𑀫𑁂𑀯 𑀲𑀦𑁆𑀥𑀸𑀬 𑀧𑀝𑀺𑀓𑁆𑀔𑀺𑀧𑀢𑀺 𑀘 𑀧𑀝𑀺𑀚𑀸𑀦𑀸𑀢𑀺 𑀘. 𑀲𑀓𑀯𑀸𑀤𑀻 𑀧𑀦 𑀢𑀁 𑀅𑀲𑀫𑁆𑀧𑀝𑀺𑀘𑁆𑀙𑀦𑁆𑀢𑁄 𑀬𑀁 𑀅𑀭𑀽𑀧𑀧𑀯𑀢𑁆𑀢𑁂 𑀅𑀲𑀢𑀺 𑀅𑀢𑁆𑀣𑀺, 𑀭𑀽𑀧𑁂𑀦 𑀢𑁂𑀦 𑀪𑀯𑀺𑀢𑀩𑁆𑀩𑀦𑁆𑀢𑀺 𑀘𑁄𑀤𑁂𑀢𑀼𑀁 𑀳𑀜𑁆𑀘𑀻𑀢𑀺𑀆𑀤𑀺𑀫𑀸𑀳. 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀧𑀜𑁆𑀳𑁂 𑀨𑀲𑁆𑀲𑀸𑀤𑀺𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀁 𑀲𑀦𑁆𑀥𑀸𑀬 𑀧𑀝𑀺𑀓𑁆𑀔𑀺𑀧𑀢𑀺, 𑀓𑀸𑀬𑀓𑀫𑁆𑀫𑀸𑀤𑀺𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀁 𑀲𑀦𑁆𑀥𑀸𑀬 𑀧𑀝𑀺𑀚𑀸𑀦𑀸𑀢𑀺. 𑀓𑀸𑀬𑀯𑀺𑀜𑁆𑀜𑀢𑁆𑀢𑀺 𑀯𑀘𑀻𑀯𑀺𑀜𑁆𑀜𑀢𑁆𑀢𑀺 𑀲𑀫𑁆𑀫𑀸𑀯𑀸𑀘𑀸 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀦𑁆𑀢𑀺 𑀏𑀯𑀫𑀸𑀤𑀬𑁄𑀧𑀺 𑀥𑀫𑁆𑀫𑀸 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀧𑀭𑀺𑀬𑀸𑀧𑀦𑁆𑀦𑀸𑀢𑀺𑀲𑁆𑀲 𑀮𑀤𑁆𑀥𑀺. 𑀲𑀓𑀯𑀸𑀤𑀻 𑀧𑀦 𑀢𑀁 𑀅𑀲𑀫𑁆𑀧𑀝𑀺𑀘𑁆𑀙𑀦𑁆𑀢𑁄 𑀬𑀤𑀺 𑀦𑀺𑀭𑀼𑀤𑁆𑀥𑁂𑀧𑀺 𑀅𑀭𑀽𑀧𑀧𑀯𑀢𑁆𑀢𑁂 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄 𑀅𑀢𑁆𑀣𑀺, 𑀘𑀢𑀼𑀦𑁆𑀦𑀫𑁆𑀧𑀺 𑀔𑀦𑁆𑀥𑀸𑀦𑀁 𑀅𑀢𑁆𑀣𑀺𑀢𑀸 𑀳𑁄𑀢𑀽𑀢𑀺 𑀘𑁄𑀤𑁂𑀢𑀼𑀁 𑀅𑀢𑁆𑀣𑀺 𑀯𑁂𑀤𑀦𑀸𑀓𑁆𑀔𑀦𑁆𑀥𑁄𑀢𑀺 𑀆𑀤𑀺𑀫𑀸𑀳. 𑀇𑀢𑀭𑁄 𑀅𑀦𑁆𑀢𑁄𑀲𑀫𑀸𑀧𑀢𑁆𑀢𑀺𑀁 𑀲𑀦𑁆𑀥𑀸𑀬 𑀧𑀝𑀺𑀓𑁆𑀔𑀺𑀧𑀢𑀺, 𑀲𑀫𑀸𑀧𑀚𑁆𑀚𑀦𑁆𑀢𑀲𑁆𑀲 𑀘 𑀯𑀼𑀝𑁆𑀞𑀳𑀦𑁆𑀢𑀲𑁆𑀲 𑀘 𑀧𑀼𑀩𑁆𑀩𑀸𑀧𑀭𑀪𑀸𑀕𑀁 𑀲𑀦𑁆𑀥𑀸𑀬 𑀧𑀝𑀺𑀚𑀸𑀦𑀸𑀢𑀺.

𑁫𑁪𑁩. 𑀅𑀲𑀜𑁆𑀜𑀲𑀢𑁆𑀢𑀯𑀸𑀭𑁂𑀧𑀺 𑀏𑀲𑁂𑀯 𑀦𑀬𑁄. 𑀢𑀲𑁆𑀲 𑀳𑀺 𑀮𑀤𑁆𑀥𑀺𑀬𑀸 𑀅𑀲𑀜𑁆𑀜𑀲𑀢𑁆𑀢𑀸𑀦𑀁 𑀧𑀝𑀺𑀲𑀦𑁆𑀥𑀺𑀓𑀸𑀮𑁂 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀦𑀺𑀭𑀼𑀚𑁆𑀛𑀢𑀺, 𑀢𑁂𑀦 𑀲𑀳 𑀘𑀺𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑀅𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀬𑀸𑀯𑀢𑀸𑀬𑀼𑀓𑀁 𑀧𑀯𑀢𑁆𑀢𑀢𑀺. 𑀢𑀲𑁆𑀫𑀸 𑀢𑁂𑀲𑀁 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀦𑀢𑁆𑀣𑀻𑀢𑀺 𑀧𑀼𑀝𑁆𑀞𑁄 𑀧𑀝𑀺𑀓𑁆𑀔𑀺𑀧𑀢𑀺, 𑀅𑀢𑁆𑀣𑀻𑀢𑀺 𑀧𑀼𑀝𑁆𑀞𑁄 𑀧𑀝𑀺𑀚𑀸𑀦𑀸𑀢𑀺. 𑀯𑁂𑀤𑀦𑀸𑀓𑁆𑀔𑀦𑁆𑀥𑀸𑀤𑀬𑁄𑀧𑀺 𑀢𑁂𑀲𑀁 𑀧𑀯𑀢𑁆𑀢𑀺𑀯𑀲𑁂𑀦 𑀧𑀝𑀺𑀓𑁆𑀔𑀺𑀧𑀢𑀺, 𑀘𑀼𑀢𑀺𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀧𑀝𑀺𑀚𑀸𑀦𑀸𑀢𑀺. 𑀲𑀓𑀯𑀸𑀤𑀻 𑀧𑀦 𑀢𑀁 𑀅𑀦𑀺𑀘𑁆𑀙𑀦𑁆𑀢𑁄 ‘‘𑀲𑀘𑁂 𑀢𑀢𑁆𑀣 𑀏𑀓𑀓𑁆𑀔𑀡𑁂𑀧𑀺 𑀯𑁂𑀤𑀦𑀸𑀤𑀬𑁄 𑀅𑀢𑁆𑀣𑀺, 𑀧𑀜𑁆𑀘𑀯𑁄𑀓𑀸𑀭𑀪𑀯𑀢𑁆𑀢𑀁 𑀧𑀸𑀧𑀼𑀡𑀸𑀢𑀻’’𑀢𑀺 𑀘𑁄𑀤𑁂𑀢𑀼𑀁 𑀧𑀜𑁆𑀘𑀯𑁄𑀓𑀸𑀭𑀪𑀯𑁄𑀢𑀺 𑀆𑀳. 𑀇𑀢𑀭𑁄 𑀲𑀼𑀢𑁆𑀢𑀯𑀺𑀭𑁄𑀥𑀪𑀬𑀸 𑀧𑀝𑀺𑀓𑁆𑀔𑀺𑀧𑀢𑀺.

𑁫𑁪𑁪-𑁫𑁪𑁫. 𑀏𑀓𑀤𑁂𑀲𑀁 𑀪𑀺𑀚𑁆𑀚𑀢𑀻𑀢𑀺 𑀧𑀜𑁆𑀳𑁂 𑀲𑀫𑁆𑀧𑀬𑀼𑀢𑁆𑀢𑀁 𑀪𑀺𑀚𑁆𑀚𑀢𑀺, 𑀯𑀺𑀧𑁆𑀧𑀬𑀼𑀢𑁆𑀢𑀁 𑀢𑀺𑀝𑁆𑀞𑀢𑀻𑀢𑀺 𑀢𑀲𑁆𑀲 𑀮𑀤𑁆𑀥𑀺, 𑀢𑀲𑁆𑀫𑀸 𑀧𑀝𑀺𑀚𑀸𑀦𑀸𑀢𑀺. 𑀤𑁆𑀯𑁂 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀸𑀦𑀻𑀢𑀺 𑀧𑀼𑀘𑁆𑀙𑀸 𑀧𑀭𑀯𑀸𑀤𑀺𑀲𑁆𑀲, 𑀧𑀝𑀺𑀜𑁆𑀜𑀸 𑀲𑀓𑀯𑀸𑀤𑀺𑀲𑁆𑀲. 𑀭𑀽𑀧𑀸𑀭𑀽𑀧𑀯𑀲𑁂𑀦 𑀳𑀺 𑀤𑁆𑀯𑁂 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀸𑀦𑀺, 𑀢𑁂𑀳𑀺𑀬𑁂𑀯 𑀲𑀢𑁆𑀢𑁄 𑀚𑀻𑀯𑀢𑀺, 𑀢𑁂𑀲𑀁 𑀪𑀗𑁆𑀕𑁂𑀦 𑀫𑀭𑀢𑀻𑀢𑀺 𑀯𑀼𑀘𑁆𑀘𑀢𑀺. 𑀘𑀼𑀢𑀺𑀓𑁆𑀔𑀡𑀲𑁆𑀫𑀺𑀜𑁆𑀳𑀺 𑀤𑁆𑀯𑁂𑀧𑀺 𑀚𑀻𑀯𑀺𑀢𑀸𑀦𑀺 𑀲𑀳𑁂𑀯 𑀪𑀺𑀚𑁆𑀚𑀦𑁆𑀢𑀺.

𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀓𑀣𑀸𑀯𑀡𑁆𑀡𑀦𑀸.

𑁧𑁧. 𑀓𑀫𑁆𑀫𑀳𑁂𑀢𑀼𑀓𑀣𑀸𑀯𑀡𑁆𑀡𑀦𑀸

𑁫𑁪𑁬. 𑀇𑀤𑀸𑀦𑀺 𑀓𑀫𑁆𑀫𑀳𑁂𑀢𑀼𑀓𑀣𑀸 𑀦𑀸𑀫 𑀳𑁄𑀢𑀺. 𑀢𑀢𑁆𑀣 𑀬𑁂𑀦 𑀅𑀭𑀳𑀢𑀸 𑀧𑀼𑀭𑀺𑀫𑀪𑀯𑁂 𑀅𑀭𑀳𑀸 𑀅𑀩𑁆𑀪𑀸𑀘𑀺𑀓𑁆𑀔𑀺𑀢𑀧𑀼𑀩𑁆𑀩𑁄, 𑀲𑁄 𑀢𑀲𑁆𑀲 𑀓𑀫𑁆𑀫𑀲𑁆𑀲 𑀳𑁂𑀢𑀼 𑀅𑀭𑀳𑀢𑁆𑀢𑀸 𑀧𑀭𑀺𑀳𑀸𑀬𑀢𑀻𑀢𑀺 𑀬𑁂𑀲𑀁 𑀮𑀤𑁆𑀥𑀺, 𑀲𑁂𑀬𑁆𑀬𑀣𑀸𑀧𑀺 𑀧𑀼𑀩𑁆𑀩𑀲𑁂𑀮𑀺𑀬𑀸𑀦𑀜𑁆𑀘𑁂𑀯 𑀲𑀫𑁆𑀫𑀺𑀢𑀺𑀬𑀸𑀦𑀜𑁆𑀘; 𑀢𑁂 𑀲𑀦𑁆𑀥𑀸𑀬 𑀓𑀫𑁆𑀫𑀳𑁂𑀢𑀽𑀢𑀺 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀧𑀝𑀺𑀜𑁆𑀜𑀸 𑀇𑀢𑀭𑀲𑁆𑀲. 𑀲𑁂𑀲𑀁 𑀧𑀭𑀺𑀳𑀸𑀦𑀺𑀓𑀣𑀸𑀬𑀁 𑀯𑀼𑀢𑁆𑀢𑀦𑀬𑀫𑁂𑀯.

𑀳𑀦𑁆𑀤 𑀳𑀺 𑀅𑀭𑀳𑀦𑁆𑀢𑀸𑀦𑀁 𑀅𑀩𑁆𑀪𑀸𑀘𑀺𑀓𑁆𑀔𑀢𑀻𑀢𑀺 𑀇𑀤𑀁 𑀬𑀲𑁆𑀲 𑀓𑀫𑁆𑀫𑀲𑁆𑀲 𑀳𑁂𑀢𑀼 𑀧𑀭𑀺𑀳𑀸𑀬𑀢𑀺, 𑀢𑀁 𑀲𑀫𑁆𑀧𑀝𑀺𑀘𑁆𑀙𑀸𑀧𑁂𑀢𑀼𑀁 𑀯𑀤𑀢𑀺. 𑀅𑀣 𑀦𑀁 𑀲𑀓𑀯𑀸𑀤𑀻 𑀢𑀁 𑀧𑀓𑁆𑀔𑀁 𑀧𑀝𑀺𑀚𑀸𑀦𑀸𑀧𑁂𑀢𑁆𑀯𑀸 ‘‘𑀬𑀤𑀺 𑀏𑀯𑀁 𑀬𑁂𑀳𑀺 𑀅𑀭𑀳𑀦𑁆𑀢𑁄 𑀦 𑀅𑀩𑁆𑀪𑀸𑀘𑀺𑀓𑁆𑀔𑀺𑀢𑀧𑀼𑀩𑁆𑀩𑀸, 𑀢𑁂 𑀲𑀩𑁆𑀩𑁂 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑁂𑀬𑁆𑀬𑀼’’𑀦𑁆𑀢𑀺 𑀘𑁄𑀤𑁂𑀢𑀼𑀁 𑀬𑁂 𑀓𑁂𑀘𑀻𑀢𑀺𑀆𑀤𑀺𑀫𑀸𑀳. 𑀇𑀢𑀭𑁄 𑀢𑀲𑁆𑀲 𑀓𑀫𑁆𑀫𑀲𑁆𑀲 𑀅𑀭𑀳𑀢𑁆𑀢𑀁 𑀲𑀫𑁆𑀧𑀸𑀧𑀼𑀡𑀦𑁂 𑀦𑀺𑀬𑀸𑀫𑀁 𑀅𑀧𑀲𑁆𑀲𑀦𑁆𑀢𑁄 𑀧𑀝𑀺𑀓𑁆𑀔𑀺𑀧𑀢𑀺.

𑀓𑀫𑁆𑀫𑀳𑁂𑀢𑀼𑀓𑀣𑀸𑀯𑀡𑁆𑀡𑀦𑀸.

𑀅𑀝𑁆𑀞𑀫𑁄 𑀯𑀕𑁆𑀕𑁄.