𑁭. 𑀘𑀺𑀢𑁆𑀢𑀸𑀭𑀫𑁆𑀫𑀡𑀓𑀣𑀸𑀯𑀡𑁆𑀡𑀦𑀸

𑁪𑁩𑁬-𑁪𑁩𑁮. 𑀇𑀤𑀸𑀦𑀺 𑀘𑀺𑀢𑁆𑀢𑀸𑀭𑀫𑁆𑀫𑀡𑀓𑀣𑀸 𑀦𑀸𑀫 𑀳𑁄𑀢𑀺. 𑀢𑀢𑁆𑀣 𑀘𑁂𑀢𑁄𑀧𑀭𑀺𑀬𑀸𑀬𑁂 𑀜𑀸𑀡𑀦𑁆𑀢𑀺 𑀯𑀘𑀦𑀫𑀢𑁆𑀢𑀫𑁂𑀯 𑀕𑀳𑁂𑀢𑁆𑀯𑀸 ‘‘𑀢𑀁 𑀜𑀸𑀡𑀁 𑀘𑀺𑀢𑁆𑀢𑀸𑀭𑀫𑁆𑀫𑀡𑀫𑁂𑀯𑀸’’𑀢𑀺 𑀬𑁂𑀲𑀁 𑀮𑀤𑁆𑀥𑀺, 𑀲𑁂𑀬𑁆𑀬𑀣𑀸𑀧𑀺 𑀏𑀢𑀭𑀳𑀺 𑀅𑀦𑁆𑀥𑀓𑀸𑀦𑀁; 𑀢𑁂 𑀲𑀦𑁆𑀥𑀸𑀬 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀧𑀝𑀺𑀜𑁆𑀜𑀸 𑀇𑀢𑀭𑀲𑁆𑀲. 𑀅𑀣𑀲𑁆𑀲 ‘‘𑀬𑁄 𑀲𑀭𑀸𑀕𑀸𑀤𑀺𑀯𑀲𑁂𑀦 𑀘𑀺𑀢𑁆𑀢𑀁 𑀚𑀸𑀦𑀸𑀢𑀺, 𑀢𑀲𑁆𑀲 𑀭𑀸𑀕𑀸𑀤𑀬𑁄𑀧𑀺 𑀆𑀭𑀫𑁆𑀫𑀡𑀸 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀦 𑀯𑀢𑁆𑀢𑀩𑁆𑀩𑀁 𑀢𑀁 𑀘𑀺𑀢𑁆𑀢𑀸𑀭𑀫𑁆𑀫𑀡𑀜𑁆𑀜𑁂𑀯𑀸’’𑀢𑀺 𑀘𑁄𑀤𑀦𑀢𑁆𑀣𑀁 𑀦𑀦𑀼 𑀅𑀢𑁆𑀣𑀺 𑀓𑁄𑀘𑀻𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀨𑀲𑁆𑀲𑀸𑀭𑀫𑁆𑀫𑀡𑁂𑀢𑀺 𑀨𑀲𑁆𑀲𑀲𑀗𑁆𑀔𑀸𑀢𑁂 𑀆𑀭𑀫𑁆𑀫𑀡𑁂. 𑀯𑁂𑀤𑀦𑀸𑀭𑀫𑁆𑀫𑀡𑁂𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀧𑀼𑀦 𑀨𑀲𑁆𑀲𑀸𑀭𑀫𑁆𑀫𑀡𑁂 𑀜𑀸𑀡𑀁 𑀦 𑀯𑀢𑁆𑀢𑀩𑁆𑀩𑀦𑁆𑀢𑀺 𑀧𑀼𑀝𑁆𑀞𑁄 𑀨𑀲𑁆𑀲𑀲𑁆𑀲 𑀨𑀼𑀲𑀦𑀮𑀓𑁆𑀔𑀡𑀁 𑀫𑀦𑀲𑀺𑀓𑀭𑁄𑀢𑁄 𑀨𑀲𑁆𑀲𑁄𑀯𑀸𑀭𑀫𑁆𑀫𑀡𑀁 𑀳𑁄𑀢𑀻𑀢𑀺 𑀧𑀝𑀺𑀚𑀸𑀦𑀸𑀢𑀺. 𑀓𑀺𑀁 𑀧𑀦𑁂𑀢𑀁 𑀨𑀲𑁆𑀲𑀧𑀭𑀺𑀬𑀸𑀬𑁂 𑀜𑀸𑀡𑀦𑁆𑀢𑀺 𑀧𑀼𑀝𑁆𑀞𑁄 𑀧𑀦 𑀢𑀸𑀤𑀺𑀲𑀲𑁆𑀲 𑀲𑀼𑀢𑁆𑀢𑀧𑀤𑀲𑁆𑀲 𑀅𑀪𑀸𑀯𑀸 𑀧𑀝𑀺𑀓𑁆𑀔𑀺𑀧𑀢𑀺. 𑀯𑁂𑀤𑀦𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀇𑀤𑀸𑀦𑀺 𑀬𑀁 𑀦𑀺𑀲𑁆𑀲𑀸𑀬 𑀮𑀤𑁆𑀥𑀺, 𑀢𑀤𑁂𑀯 𑀤𑀲𑁆𑀲𑁂𑀢𑁆𑀯𑀸 𑀮𑀤𑁆𑀥𑀺𑀁 𑀧𑀢𑀺𑀝𑁆𑀞𑀸𑀧𑁂𑀢𑀼𑀁 𑀦𑀦𑀼 𑀘𑁂𑀢𑁄𑀧𑀭𑀺𑀬𑀸𑀬𑁂 𑀜𑀸𑀡𑀦𑁆𑀢𑀺𑀆𑀤𑀺𑀫𑀸𑀳. 𑀲𑀸 𑀧𑀦𑁂𑀲𑀸 𑀯𑀘𑀦𑀫𑀢𑁆𑀢𑀸𑀪𑀺𑀦𑀺𑀯𑁂𑀲𑁂𑀦 𑀧𑀢𑀺𑀝𑁆𑀞𑀸𑀧𑀺𑀢𑀸𑀧𑀺 𑀅𑀧𑁆𑀧𑀢𑀺𑀝𑁆𑀞𑀸𑀧𑀺𑀢𑀸𑀯 𑀳𑁄𑀢𑀻𑀢𑀺.

𑀘𑀺𑀢𑁆𑀢𑀸𑀭𑀫𑁆𑀫𑀡𑀓𑀣𑀸𑀯𑀡𑁆𑀡𑀦𑀸.