𑁫. 𑀧𑀜𑁆𑀘𑀫𑀯𑀕𑁆𑀕𑁄

𑁧. 𑀯𑀺𑀫𑀼𑀢𑁆𑀢𑀺𑀓𑀣𑀸𑀯𑀡𑁆𑀡𑀦𑀸

𑁪𑁧𑁮. 𑀇𑀤𑀸𑀦𑀺 𑀯𑀺𑀫𑀼𑀢𑁆𑀢𑀺𑀓𑀣𑀸 𑀦𑀸𑀫 𑀳𑁄𑀢𑀺. 𑀢𑀢𑁆𑀣 𑀯𑀺𑀧𑀲𑁆𑀲𑀦𑀸, 𑀫𑀕𑁆𑀕𑁄, 𑀨𑀮𑀁, 𑀧𑀘𑁆𑀘𑀯𑁂𑀓𑁆𑀔𑀡𑀦𑁆𑀢𑀺 𑀘𑀢𑀼𑀦𑁆𑀦𑀁 𑀜𑀸𑀡𑀸𑀦𑀁 𑀯𑀺𑀫𑀼𑀢𑁆𑀢𑀺𑀜𑀸𑀡𑀦𑁆𑀢𑀺 𑀦𑀸𑀫𑀁. 𑀢𑁂𑀲𑀼 𑀯𑀺𑀧𑀲𑁆𑀲𑀦𑀸𑀜𑀸𑀡𑀁 𑀦𑀺𑀘𑁆𑀘𑀦𑀺𑀫𑀺𑀢𑁆𑀢𑀸𑀤𑀻𑀳𑀺 𑀯𑀺𑀫𑀼𑀢𑁆𑀢𑀢𑁆𑀢𑀸, 𑀢𑀤𑀗𑁆𑀕𑀯𑀺𑀫𑀼𑀢𑁆𑀢𑀺𑀪𑀸𑀯𑁂𑀦 𑀯𑀸 𑀯𑀺𑀫𑀼𑀢𑁆𑀢𑀢𑁆𑀢𑀸 𑀯𑀺𑀫𑀼𑀢𑁆𑀢𑀺𑀜𑀸𑀡𑀁. 𑀫𑀕𑁆𑀕𑁄 𑀲𑀫𑀼𑀘𑁆𑀙𑁂𑀤𑀯𑀺𑀫𑀼𑀢𑁆𑀢𑀺, 𑀨𑀮𑀁 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀯𑀺𑀫𑀼𑀢𑁆𑀢𑀺, 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀁 𑀧𑀦 𑀯𑀺𑀫𑀼𑀢𑁆𑀢𑀺𑀁 𑀚𑀸𑀦𑀸𑀢𑀻𑀢𑀺 𑀯𑀺𑀫𑀼𑀢𑁆𑀢𑀺𑀜𑀸𑀡𑀁. 𑀏𑀯𑀁 𑀘𑀢𑀼𑀩𑁆𑀩𑀺𑀥𑁂 𑀯𑀺𑀫𑀼𑀢𑁆𑀢𑀺𑀜𑀸𑀡𑁂 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀨𑀮𑀜𑀸𑀡𑀫𑁂𑀯 𑀯𑀺𑀫𑀼𑀢𑁆𑀢𑀺. 𑀲𑁂𑀲𑀸𑀦𑀺 ‘‘𑀯𑀺𑀫𑀼𑀢𑁆𑀢𑀸𑀦𑀻’’𑀢𑀺 𑀯𑀸 ‘‘𑀅𑀯𑀺𑀫𑀼𑀢𑁆𑀢𑀸𑀦𑀻’’𑀢𑀺 𑀯𑀸 𑀦 𑀯𑀢𑁆𑀢𑀩𑁆𑀩𑀸𑀦𑀺. 𑀢𑀲𑁆𑀫𑀸 ‘‘𑀇𑀤𑀁 𑀦𑀸𑀫 𑀯𑀺𑀫𑀼𑀢𑁆𑀢𑀺𑀜𑀸𑀡𑀁 𑀯𑀺𑀫𑀼𑀢𑁆𑀢’’𑀦𑁆𑀢𑀺 𑀅𑀯𑀢𑁆𑀯𑀸 𑀅𑀯𑀺𑀲𑁂𑀲𑁂𑀦𑁂𑀯 ‘‘𑀯𑀺𑀫𑀼𑀢𑁆𑀢𑀺𑀜𑀸𑀡𑀁 𑀯𑀺𑀫𑀼𑀢𑁆𑀢’’𑀦𑁆𑀢𑀺 𑀬𑁂𑀲𑀁 𑀮𑀤𑁆𑀥𑀺, 𑀲𑁂𑀬𑁆𑀬𑀣𑀸𑀧𑀺 𑀅𑀦𑁆𑀥𑀓𑀸𑀦𑀁; 𑀢𑁂 𑀲𑀦𑁆𑀥𑀸𑀬 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀧𑀝𑀺𑀜𑁆𑀜𑀸 𑀧𑀭𑀯𑀸𑀤𑀺𑀲𑁆𑀲. 𑀧𑀼𑀦 𑀬𑀁𑀓𑀺𑀜𑁆𑀘𑀻𑀢𑀺 𑀧𑀼𑀝𑁆𑀞𑁄 𑀧𑀘𑁆𑀘𑀯𑁂𑀓𑁆𑀔𑀡𑀸𑀤𑀻𑀦𑀺 𑀲𑀦𑁆𑀥𑀸𑀬 𑀧𑀝𑀺𑀓𑁆𑀔𑀺𑀧𑀢𑀺. 𑀧𑀝𑀺𑀧𑀦𑁆𑀦𑀲𑁆𑀲𑀸𑀢𑀺 𑀧𑀼𑀝𑁆𑀞𑁄 𑀫𑀕𑁆𑀕𑀜𑀸𑀡𑀲𑁆𑀲 𑀅𑀦𑀸𑀲𑀯𑀢𑀁 𑀲𑀦𑁆𑀥𑀸𑀬 𑀧𑀝𑀺𑀚𑀸𑀦𑀸𑀢𑀺. 𑀬𑀲𑁆𑀫𑀸 𑀧𑀦 𑀢𑀁 𑀲𑁄𑀢𑀸𑀧𑀦𑁆𑀦𑀲𑁆𑀲 𑀨𑀮𑁂 𑀞𑀺𑀢𑀲𑁆𑀲 𑀜𑀸𑀡𑀁 𑀦 𑀳𑁄𑀢𑀺, 𑀢𑀲𑁆𑀫𑀸 𑀯𑀺𑀫𑀼𑀢𑁆𑀢𑀁 𑀦𑀸𑀫 𑀦 𑀳𑁄𑀢𑀻𑀢𑀺 𑀘𑁄𑀤𑀦𑀢𑁆𑀣𑀁 𑀧𑀼𑀦 𑀲𑀓𑀯𑀸𑀤𑀻 𑀲𑁄𑀢𑀸𑀧𑀦𑁆𑀦𑀲𑁆𑀲𑀸𑀢𑀺𑀆𑀤𑀺𑀫𑀸𑀳. 𑀇𑀫𑀺𑀦𑀸 𑀉𑀧𑀸𑀬𑁂𑀦 𑀲𑀩𑁆𑀩𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀯𑀺𑀫𑀼𑀢𑁆𑀢𑀺𑀓𑀣𑀸𑀯𑀡𑁆𑀡𑀦𑀸.

𑁨. 𑀅𑀲𑁂𑀔𑀜𑀸𑀡𑀓𑀣𑀸𑀯𑀡𑁆𑀡𑀦𑀸

𑁪𑁨𑁧. 𑀇𑀤𑀸𑀦𑀺 𑀅𑀲𑁂𑀔𑀓𑀣𑀸 𑀦𑀸𑀫 𑀳𑁄𑀢𑀺. 𑀢𑀢𑁆𑀣 𑀬𑀲𑁆𑀫𑀸 𑀆𑀦𑀦𑁆𑀤𑀢𑁆𑀣𑁂𑀭𑀸𑀤𑀬𑁄 𑀲𑁂𑀔𑀸 ‘‘𑀉𑀴𑀸𑀭𑁄 𑀪𑀕𑀯𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀅𑀲𑁂𑀔𑁂 𑀚𑀸𑀦𑀦𑁆𑀢𑀺, 𑀢𑀲𑁆𑀫𑀸 ‘‘𑀲𑁂𑀔𑀲𑁆𑀲 𑀅𑀲𑁂𑀔𑀜𑀸𑀡𑀁 𑀅𑀢𑁆𑀣𑀻’’𑀢𑀺 𑀬𑁂𑀲𑀁 𑀮𑀤𑁆𑀥𑀺, 𑀲𑁂𑀬𑁆𑀬𑀣𑀸𑀧𑀺 𑀉𑀢𑁆𑀢𑀭𑀸𑀧𑀣𑀓𑀸𑀦𑀁; 𑀢𑁂 𑀲𑀦𑁆𑀥𑀸𑀬 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀧𑀝𑀺𑀜𑁆𑀜𑀸 𑀇𑀢𑀭𑀲𑁆𑀲. 𑀚𑀸𑀦𑀸𑀢𑀺 𑀧𑀲𑁆𑀲𑀢𑀻𑀢𑀺 𑀇𑀤𑀁 𑀅𑀢𑁆𑀢𑀦𑀸 𑀅𑀥𑀺𑀕𑀢𑀲𑁆𑀲 𑀚𑀸𑀦𑀦𑀯𑀲𑁂𑀦 𑀯𑀼𑀢𑁆𑀢𑀁. 𑀕𑁄𑀢𑁆𑀭𑀪𑀼𑀦𑁄𑀢𑀺𑀆𑀤𑀺 𑀳𑁂𑀝𑁆𑀞𑀺𑀫𑀸𑀬 𑀪𑀽𑀫𑀺𑀬𑀁 𑀞𑀺𑀢𑀲𑁆𑀲 𑀉𑀧𑀭𑀽𑀧𑀭𑀺𑀜𑀸𑀡𑀲𑁆𑀲 𑀅𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀦𑀦𑀼 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀲𑁂𑀔𑁄 ‘‘𑀉𑀴𑀸𑀭𑁄 𑀪𑀕𑀯𑀸’’𑀢𑀺 𑀚𑀸𑀦𑀸𑀢𑀻𑀢𑀺 𑀧𑀭𑀯𑀸𑀤𑀻 𑀅𑀲𑁂𑀔𑁂 𑀪𑀕𑀯𑀢𑀺 𑀧𑀯𑀢𑁆𑀢𑀢𑁆𑀢𑀸 𑀢𑀁 𑀅𑀲𑁂𑀔𑀜𑀸𑀡𑀦𑁆𑀢𑀺 𑀇𑀘𑁆𑀙𑀢𑀺, 𑀦 𑀧𑀦𑁂𑀢𑀁 𑀅𑀲𑁂𑀔𑀁. 𑀢𑀲𑁆𑀫𑀸 𑀏𑀯𑀁 𑀧𑀢𑀺𑀝𑁆𑀞𑀸𑀧𑀺𑀢𑀸𑀧𑀺 𑀮𑀤𑁆𑀥𑀺 𑀅𑀧𑁆𑀧𑀢𑀺𑀝𑁆𑀞𑀸𑀧𑀺𑀢𑀸𑀯 𑀳𑁄𑀢𑀻𑀢𑀺.

𑀅𑀲𑁂𑀔𑀜𑀸𑀡𑀓𑀣𑀸𑀯𑀡𑁆𑀡𑀦𑀸.

𑁩. 𑀯𑀺𑀧𑀭𑀻𑀢𑀓𑀣𑀸𑀯𑀡𑁆𑀡𑀦𑀸

𑁪𑁨𑁪. 𑀇𑀤𑀸𑀦𑀺 𑀯𑀺𑀧𑀭𑀻𑀢𑀓𑀣𑀸 𑀦𑀸𑀫 𑀳𑁄𑀢𑀺. 𑀢𑀢𑁆𑀣 ‘‘𑀬𑁆𑀯𑀸𑀬𑀁 𑀧𑀣𑀯𑀻𑀓𑀲𑀺𑀡𑁂 𑀧𑀣𑀯𑀻𑀲𑀜𑁆𑀜𑀻 𑀲𑀫𑀸𑀧𑀚𑁆𑀚𑀢𑀺, 𑀢𑀲𑁆𑀲 𑀢𑀁 𑀜𑀸𑀡𑀁 𑀯𑀺𑀧𑀭𑀻𑀢𑀜𑀸𑀡’’𑀦𑁆𑀢𑀺 𑀬𑁂𑀲𑀁 𑀮𑀤𑁆𑀥𑀺, 𑀲𑁂𑀬𑁆𑀬𑀣𑀸𑀧𑀺 𑀅𑀦𑁆𑀥𑀓𑀸𑀦𑀁, 𑀢𑁂 𑀲𑀦𑁆𑀥𑀸𑀬 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀧𑀝𑀺𑀜𑁆𑀜𑀸 𑀇𑀢𑀭𑀲𑁆𑀲. 𑀧𑀣𑀯𑀺𑀁 𑀦𑀺𑀲𑁆𑀲𑀸𑀬 𑀉𑀧𑁆𑀧𑀦𑁆𑀦𑀦𑀺𑀫𑀺𑀢𑁆𑀢𑀜𑁆𑀳𑀺 𑀦 𑀧𑀣𑀯𑀻𑀬𑁂𑀯, 𑀢𑀢𑁆𑀭 𑀘𑀸𑀬𑀁 𑀧𑀣𑀯𑀻𑀲𑀜𑁆𑀜𑀻. 𑀢𑀲𑁆𑀫𑀸 𑀯𑀺𑀧𑀭𑀻𑀢𑀜𑀸𑀡𑀦𑁆𑀢𑀺 𑀅𑀬𑀫𑁂𑀢𑀲𑁆𑀲 𑀅𑀥𑀺𑀧𑁆𑀧𑀸𑀬𑁄. 𑀢𑀢𑁄 𑀲𑀓𑀯𑀸𑀤𑀻 ‘‘𑀮𑀓𑁆𑀔𑀡𑀧𑀣𑀯𑀻𑀧𑀺 𑀲𑀲𑀫𑁆𑀪𑀸𑀭𑀧𑀣𑀯𑀻𑀧𑀺 𑀦𑀺𑀫𑀺𑀢𑁆𑀢𑀧𑀣𑀯𑀻𑀧𑀺 𑀧𑀣𑀯𑀻𑀤𑁂𑀯𑀢𑀸𑀧𑀺 𑀲𑀩𑁆𑀩𑀸 𑀧𑀣𑀯𑀻𑀬𑁂𑀯, 𑀢𑀸𑀲𑀼 𑀧𑀣𑀯𑀻𑀢𑀺 𑀜𑀸𑀡𑀁 𑀯𑀺𑀧𑀭𑀻𑀢𑀁 𑀦 𑀳𑁄𑀢𑀺. 𑀅𑀦𑀺𑀘𑁆𑀘𑁂 𑀦𑀺𑀘𑁆𑀘𑀦𑁆𑀢𑀺𑀆𑀤𑀺𑀯𑀺𑀧𑀭𑀺𑀬𑁂𑀲𑁄 𑀧𑀦 𑀯𑀺𑀧𑀭𑀻𑀢𑀜𑀸𑀡𑀁 𑀦𑀸𑀫. 𑀓𑀺𑀁 𑀢𑁂 𑀇𑀤𑀁 𑀏𑀢𑁂𑀲𑀼 𑀅𑀜𑁆𑀜𑀢𑀭’’𑀦𑁆𑀢𑀺 𑀘𑁄𑀤𑁂𑀢𑀼𑀁 𑀅𑀦𑀺𑀘𑁆𑀘𑁂 𑀦𑀺𑀘𑁆𑀘𑀦𑁆𑀢𑀺𑀆𑀤𑀺𑀫𑀸𑀳. 𑀇𑀢𑀭𑁄 𑀯𑀺𑀧𑀮𑁆𑀮𑀸𑀲𑀮𑀓𑁆𑀔𑀡𑀸𑀪𑀸𑀯𑀁 𑀲𑀦𑁆𑀥𑀸𑀬 𑀧𑀝𑀺𑀓𑁆𑀔𑀺𑀧𑀢𑀺, 𑀧𑀣𑀯𑀻𑀦𑀺𑀫𑀺𑀢𑁆𑀢𑀁 𑀲𑀦𑁆𑀥𑀸𑀬 𑀧𑀝𑀺𑀚𑀸𑀦𑀸𑀢𑀺.

𑀓𑀼𑀲𑀮𑀦𑁆𑀢𑀺 𑀲𑁂𑀓𑁆𑀔𑀧𑀼𑀣𑀼𑀚𑁆𑀚𑀦𑀸𑀦𑀁 𑀜𑀸𑀡𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀅𑀢𑁆𑀣𑀺 𑀅𑀭𑀳𑀢𑁄𑀢𑀺 𑀧𑀜𑁆𑀳𑁂𑀲𑀼𑀧𑀺 𑀯𑀺𑀧𑀮𑁆𑀮𑀸𑀲𑀮𑀓𑁆𑀔𑀡𑀸𑀪𑀸𑀯𑁂𑀦 𑀧𑀝𑀺𑀓𑁆𑀔𑀺𑀧𑀢𑀺. 𑀧𑀣𑀯𑀻𑀦𑀺𑀫𑀺𑀢𑁆𑀢𑀁 𑀲𑀦𑁆𑀥𑀸𑀬 𑀧𑀝𑀺𑀚𑀸𑀦𑀸𑀢𑀺. 𑀲𑀩𑁆𑀩𑁂𑀯 𑀧𑀣𑀯𑀻𑀢𑀺 𑀲𑀩𑁆𑀩𑀁 𑀢𑀁 𑀧𑀣𑀯𑀻𑀓𑀲𑀺𑀡𑀁 𑀮𑀓𑁆𑀔𑀡𑀧𑀣𑀯𑀻𑀬𑁂𑀯 𑀳𑁄𑀢𑀻𑀢𑀺 𑀧𑀼𑀘𑁆𑀙𑀢𑀺. 𑀲𑀓𑀯𑀸𑀤𑀻 𑀢𑀣𑀸 𑀅𑀪𑀸𑀯𑀢𑁄 𑀧𑀝𑀺𑀓𑁆𑀔𑀺𑀧𑀢𑀺. 𑀦𑀦𑀼 𑀧𑀣𑀯𑀻 𑀅𑀢𑁆𑀣𑀺, 𑀅𑀢𑁆𑀣𑀺 𑀘 𑀓𑁄𑀘𑀺 𑀧𑀣𑀯𑀺𑀁 𑀧𑀣𑀯𑀺𑀢𑁄 𑀲𑀫𑀸𑀧𑀚𑁆𑀚𑀢𑀻𑀢𑀺 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲. 𑀢𑀲𑁆𑀲𑀢𑁆𑀣𑁄 𑁋 𑀦𑀦𑀼 𑀦𑀺𑀫𑀺𑀢𑁆𑀢𑀧𑀣𑀯𑀻 𑀅𑀢𑁆𑀣𑀺, 𑀅𑀢𑁆𑀣𑀺 𑀘 𑀓𑁄𑀘𑀺 𑀢𑀁 𑀧𑀣𑀯𑀺𑀁 𑀧𑀣𑀯𑀺𑀢𑁄𑀬𑁂𑀯 𑀲𑀫𑀸𑀧𑀚𑁆𑀚𑀢𑀺, 𑀦 𑀆𑀧𑀢𑁄 𑀯𑀸 𑀢𑁂𑀚𑀢𑁄 𑀯𑀸𑀢𑀺. 𑀧𑀣𑀯𑀻 𑀅𑀢𑁆𑀣𑀻𑀢𑀺𑀆𑀤𑀺 ‘‘𑀬𑀤𑀺 𑀬𑀁 𑀬𑀣𑀸 𑀅𑀢𑁆𑀣𑀺, 𑀢𑀁 𑀢𑀣𑀸 𑀲𑀫𑀸𑀧𑀚𑁆𑀚𑀦𑁆𑀢𑀲𑁆𑀲 𑀜𑀸𑀡𑀁 𑀯𑀺𑀧𑀭𑀻𑀢𑀁 𑀳𑁄𑀢𑀺, 𑀦𑀺𑀩𑁆𑀩𑀸𑀦𑀁 𑀅𑀢𑁆𑀣𑀺, 𑀢𑀫𑁆𑀧𑀺 𑀲𑀫𑀸𑀧𑀚𑁆𑀚𑀦𑁆𑀢𑀲𑁆𑀲 𑀲𑀩𑁆𑀩𑀯𑀺𑀧𑀭𑀺𑀬𑁂𑀲𑀲𑀫𑀼𑀕𑁆𑀖𑀸𑀢𑀦𑀁 𑀫𑀕𑁆𑀕𑀜𑀸𑀡𑀫𑁆𑀧𑀺 𑀢𑁂 𑀯𑀺𑀧𑀭𑀻𑀢𑀁 𑀳𑁄𑀢𑀽’’𑀢𑀺 𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀦𑁆𑀢𑀺.

𑀯𑀺𑀧𑀭𑀻𑀢𑀓𑀣𑀸𑀯𑀡𑁆𑀡𑀦𑀸.

𑁪. 𑀦𑀺𑀬𑀸𑀫𑀓𑀣𑀸𑀯𑀡𑁆𑀡𑀦𑀸

𑁪𑁨𑁮-𑁪𑁩𑁧. 𑀇𑀤𑀸𑀦𑀺 𑀦𑀺𑀬𑀸𑀫𑀓𑀣𑀸 𑀦𑀸𑀫 𑀳𑁄𑀢𑀺. 𑀢𑀢𑁆𑀣 𑀬𑁄 𑀧𑀼𑀕𑁆𑀕𑀮𑁄 𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑀁 𑀑𑀓𑁆𑀓𑀫𑀺𑀲𑁆𑀲𑀢𑀺, 𑀢𑀁 ‘‘𑀪𑀩𑁆𑀩𑁄 𑀏𑀲 𑀥𑀫𑁆𑀫𑀁 𑀅𑀪𑀺𑀲𑀫𑁂𑀢𑀼’’𑀦𑁆𑀢𑀺 𑀬𑀲𑁆𑀫𑀸 𑀪𑀕𑀯𑀸 𑀚𑀸𑀦𑀸𑀢𑀺, 𑀢𑀲𑁆𑀫𑀸 ‘‘𑀅𑀦𑀺𑀬𑀢𑀲𑁆𑀲 𑀧𑀼𑀣𑀼𑀚𑁆𑀚𑀦𑀲𑁆𑀲𑁂𑀯 𑀲𑀢𑁄 𑀧𑀼𑀕𑁆𑀕𑀮𑀲𑁆𑀲 𑀦𑀺𑀬𑀸𑀫𑀕𑀫𑀦𑀸𑀬 𑀜𑀸𑀡𑀁 𑀅𑀢𑁆𑀣𑀻’’𑀢𑀺 𑀬𑁂𑀲𑀁 𑀮𑀤𑁆𑀥𑀺, 𑀲𑁂𑀬𑁆𑀬𑀣𑀸𑀧𑀺 𑀏𑀢𑀭𑀳𑀺 𑀉𑀢𑁆𑀢𑀭𑀸𑀧𑀣𑀓𑀸𑀦𑀁; 𑀢𑁂 𑀲𑀦𑁆𑀥𑀸𑀬 𑀅𑀦𑀺𑀬𑀢𑀲𑁆𑀲𑀸𑀢𑀺 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲. 𑀢𑀢𑁆𑀣 𑀦𑀺𑀬𑀸𑀫𑀕𑀫𑀦𑀸𑀬𑀸𑀢𑀺 𑀦𑀺𑀬𑀸𑀫𑁄 𑀯𑀼𑀘𑁆𑀘𑀢𑀺 𑀫𑀕𑁆𑀕𑁄, 𑀫𑀕𑁆𑀕𑀕𑀫𑀦𑀸𑀬 𑀫𑀕𑁆𑀕𑁄𑀓𑁆𑀓𑀫𑀦𑀸𑀬𑀸𑀢𑀺 𑀅𑀢𑁆𑀣𑁄. 𑀬𑀁 𑀧𑀦𑀲𑁆𑀲 𑀜𑀸𑀡𑀁 𑀤𑀺𑀲𑁆𑀯𑀸 𑀪𑀕𑀯𑀸 ‘‘𑀪𑀩𑁆𑀩𑁄 𑀅𑀬’’𑀦𑁆𑀢𑀺 𑀚𑀸𑀦𑀸𑀢𑀺, 𑀢𑀁 𑀲𑀦𑁆𑀥𑀸𑀬 𑀧𑀝𑀺𑀜𑁆𑀜𑀸 𑀧𑀭𑀯𑀸𑀤𑀺𑀲𑁆𑀲.

𑀅𑀣𑀲𑁆𑀲 𑀲𑀓𑀯𑀸𑀤𑀻 𑀅𑀬𑀼𑀢𑁆𑀢𑀯𑀸𑀤𑀺𑀢𑀁 𑀤𑀻𑀧𑁂𑀢𑀼𑀁 𑀦𑀺𑀬𑀢𑀲𑁆𑀲𑀸𑀢𑀺 𑀯𑀺𑀧𑀭𑀻𑀢𑀸𑀦𑀼𑀬𑁄𑀕𑀫𑀸𑀳. 𑀢𑀢𑁆𑀣 𑀧𑀞𑀫𑀧𑀜𑁆𑀳𑁂 𑀫𑀕𑁆𑀕𑁂𑀦 𑀦𑀺𑀬𑀢𑀲𑁆𑀲 𑀅𑀦𑀺𑀬𑀸𑀫𑀕𑀫𑀦𑀸𑀬 𑀜𑀸𑀡𑀁 𑀦𑀸𑀫 𑀦𑀢𑁆𑀣𑀻𑀢𑀺 𑀧𑀝𑀺𑀓𑁆𑀔𑀺𑀧𑀢𑀺. 𑀤𑀼𑀢𑀺𑀬𑁂 𑀦𑀢𑁆𑀣𑀺𑀪𑀸𑀯𑁂𑀦 𑀧𑀝𑀺𑀚𑀸𑀦𑀸𑀢𑀺. 𑀢𑀢𑀺𑀬𑁂 𑀅𑀦𑀺𑀬𑀢𑀲𑁆𑀲 𑀦𑀢𑁆𑀣𑀻𑀢𑀺 𑀧𑀼𑀝𑁆𑀞𑀢𑁆𑀢𑀸 𑀮𑀤𑁆𑀥𑀺𑀯𑀺𑀭𑁄𑀥𑁂𑀦 𑀧𑀝𑀺𑀓𑁆𑀔𑀺𑀧𑀢𑀺. 𑀧𑀼𑀦 𑀧𑀞𑀫𑀧𑀜𑁆𑀳𑀫𑁂𑀯 𑀘𑀢𑀼𑀢𑁆𑀣𑀁 𑀓𑀢𑁆𑀯𑀸 𑀦𑀺𑀬𑀢𑀲𑁆𑀲 𑀦𑀺𑀬𑀸𑀫𑀕𑀫𑀦𑀸𑀤𑀺𑀯𑀲𑁂𑀦 𑀢𑀬𑁄 𑀧𑀜𑁆𑀳𑀸 𑀓𑀢𑀸. 𑀢𑁂𑀲𑀼 𑀧𑀞𑀫𑁂 𑀬𑀲𑁆𑀫𑀸 𑀆𑀤𑀺𑀫𑀕𑁆𑀕𑁂𑀦 𑀦𑀺𑀬𑀢𑀲𑁆𑀲 𑀧𑀼𑀦 𑀢𑀤𑀢𑁆𑀣𑀸𑀬 𑀜𑀸𑀡𑀁 𑀦𑀢𑁆𑀣𑀺, 𑀢𑀲𑁆𑀫𑀸 𑀧𑀝𑀺𑀓𑁆𑀔𑀺𑀧𑀢𑀺. 𑀤𑀼𑀢𑀺𑀬𑁂 𑀦𑀢𑁆𑀣𑀺𑀪𑀸𑀯𑁂𑀦𑁂𑀯 𑀧𑀝𑀺𑀚𑀸𑀦𑀸𑀢𑀺. 𑀢𑀢𑀺𑀬𑁂 𑀮𑀤𑁆𑀥𑀺𑀯𑀺𑀭𑁄𑀥𑁂𑀦𑁂𑀯 𑀧𑀝𑀺𑀓𑁆𑀔𑀺𑀧𑀢𑀺. 𑀧𑀼𑀦 𑀧𑀞𑀫𑀧𑀜𑁆𑀳𑀁 𑀅𑀝𑁆𑀞𑀫𑀁 𑀓𑀢𑁆𑀯𑀸 𑀅𑀦𑀺𑀬𑀢𑀲𑁆𑀲 𑀅𑀦𑀺𑀬𑀸𑀫𑀕𑀫𑀦𑀸𑀤𑀺𑀯𑀲𑁂𑀦 𑀢𑀬𑁄 𑀧𑀜𑁆𑀳𑀸 𑀓𑀢𑀸. 𑀢𑁂𑀲𑀁 𑀅𑀢𑁆𑀣𑁄 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀧𑀼𑀦 𑀧𑀞𑀫𑀧𑀜𑁆𑀳𑀫𑁂𑀯 𑀤𑁆𑀯𑀸𑀤𑀲𑀫𑀁 𑀓𑀢𑁆𑀯𑀸 𑀢𑀁𑀫𑀽𑀮𑀓𑀸 𑀅𑀢𑁆𑀣𑀺 𑀦𑀺𑀬𑀸𑀫𑁄𑀢𑀺𑀆𑀤𑀬𑁄 𑀧𑀜𑁆𑀳𑀸 𑀓𑀢𑀸. 𑀢𑀢𑁆𑀣 𑀬𑀲𑁆𑀫𑀸 𑀦𑀺𑀬𑀸𑀫𑀕𑀫𑀦𑀸𑀬 𑀜𑀸𑀡𑀁 𑀦𑀸𑀫 𑀫𑀕𑁆𑀕𑀜𑀸𑀡𑀫𑁂𑀯 𑀳𑁄𑀢𑀺, 𑀢𑀲𑁆𑀫𑀸 𑀢𑀁 𑀲𑀦𑁆𑀥𑀸𑀬 𑀅𑀢𑁆𑀣𑀺 𑀦𑀺𑀬𑀸𑀫𑁄𑀢𑀺 𑀯𑀼𑀢𑁆𑀢𑀁. 𑀇𑀢𑀭𑁄 𑀧𑀦 𑀦𑀺𑀬𑀸𑀫𑁄𑀢𑀺 𑀯𑀼𑀢𑁆𑀢𑁂 𑀧𑀝𑀺𑀓𑁆𑀔𑀺𑀧𑀢𑀺, 𑀜𑀸𑀡𑀦𑁆𑀢𑀺 𑀯𑀼𑀢𑁆𑀢𑁂 𑀧𑀝𑀺𑀚𑀸𑀦𑀸𑀢𑀺. 𑀲𑀢𑀺𑀧𑀝𑁆𑀞𑀸𑀦𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀧𑀘𑁆𑀘𑀦𑀻𑀓𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯. 𑀕𑁄𑀢𑁆𑀭𑀪𑀼𑀦𑁄𑀢𑀺𑀆𑀤𑀺 𑀬𑁂𑀦 𑀬𑀁 𑀅𑀧𑁆𑀧𑀢𑁆𑀢𑀁, 𑀢𑀲𑁆𑀲 𑀢𑀁 𑀦𑀢𑁆𑀣𑀻𑀢𑀺 𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀪𑀕𑀯𑀸 𑀚𑀸𑀦𑀸𑀢𑀻𑀢𑀺 𑀅𑀢𑁆𑀢𑀦𑁄 𑀜𑀸𑀡𑀩𑀮𑁂𑀦 𑀚𑀸𑀦𑀸𑀢𑀺, 𑀦 𑀢𑀲𑁆𑀲 𑀦𑀺𑀬𑀸𑀫𑀕𑀫𑀦𑀜𑀸𑀡𑀲𑀩𑁆𑀪𑀸𑀯𑀢𑁄. 𑀢𑀲𑁆𑀫𑀸 𑀇𑀫𑀺𑀦𑀸 𑀓𑀸𑀭𑀡𑁂𑀦 𑀧𑀢𑀺𑀝𑁆𑀞𑀺𑀢𑀸𑀧𑀺𑀲𑁆𑀲 𑀮𑀤𑁆𑀥𑀺 𑀅𑀧𑁆𑀧𑀢𑀺𑀝𑁆𑀞𑀺𑀢𑀸𑀬𑁂𑀯𑀸𑀢𑀺.

𑀦𑀺𑀬𑀸𑀫𑀓𑀣𑀸𑀯𑀡𑁆𑀡𑀦𑀸.

𑁫. 𑀧𑀝𑀺𑀲𑀫𑁆𑀪𑀺𑀤𑀸𑀓𑀣𑀸𑀯𑀡𑁆𑀡𑀦𑀸

𑁪𑁩𑁨-𑁪𑁩𑁩. 𑀇𑀤𑀸𑀦𑀺 𑀧𑀝𑀺𑀲𑀫𑁆𑀪𑀺𑀤𑀸𑀓𑀣𑀸 𑀦𑀸𑀫 𑀳𑁄𑀢𑀺. 𑀢𑀢𑁆𑀣 𑀬𑁂𑀲𑀁 ‘‘𑀬𑀁𑀓𑀺𑀜𑁆𑀘𑀺 𑀅𑀭𑀺𑀬𑀸𑀦𑀁 𑀜𑀸𑀡𑀁, 𑀲𑀩𑁆𑀩𑀁 𑀮𑁄𑀓𑀼𑀢𑁆𑀢𑀭𑀫𑁂𑀯𑀸’’𑀢𑀺 𑀕𑀳𑁂𑀢𑁆𑀯𑀸 ‘‘𑀲𑀩𑁆𑀩𑀁 𑀜𑀸𑀡𑀁 𑀧𑀝𑀺𑀲𑀫𑁆𑀪𑀺𑀤𑀸’’𑀢𑀺 𑀮𑀤𑁆𑀥𑀺, 𑀲𑁂𑀬𑁆𑀬𑀣𑀸𑀧𑀺 𑀅𑀦𑁆𑀥𑀓𑀸𑀦𑀁; 𑀢𑁂 𑀲𑀦𑁆𑀥𑀸𑀬 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀧𑀝𑀺𑀜𑁆𑀜𑀸 𑀇𑀢𑀭𑀲𑁆𑀲. 𑀲𑀫𑁆𑀫𑀼𑀢𑀺𑀜𑀸𑀡𑀧𑀜𑁆𑀳𑁂𑀲𑀼 𑀧𑀣𑀯𑀻𑀓𑀲𑀺𑀡𑀲𑀫𑁆𑀫𑀼𑀢𑀺𑀬𑀁 𑀲𑀫𑀸𑀧𑀢𑁆𑀢𑀺𑀜𑀸𑀡𑀁 𑀲𑀦𑁆𑀥𑀸𑀬 𑀧𑀝𑀺𑀓𑁆𑀔𑀺𑀧𑀢𑀺, 𑀦𑀺𑀭𑀼𑀢𑁆𑀢𑀺𑀜𑀸𑀡𑀁 𑀲𑀦𑁆𑀥𑀸𑀬 𑀧𑀝𑀺𑀚𑀸𑀦𑀸𑀢𑀺. 𑀬𑁂 𑀓𑁂𑀘𑀺 𑀲𑀫𑁆𑀫𑀼𑀢𑀺𑀦𑁆𑀢𑀺 𑀧𑀜𑁆𑀳𑁂 𑀧𑀼𑀣𑀼𑀚𑁆𑀚𑀦𑁂 𑀲𑀦𑁆𑀥𑀸𑀬 𑀧𑀝𑀺𑀓𑁆𑀔𑀺𑀧𑀢𑀺. 𑀘𑁂𑀢𑁄𑀧𑀭𑀺𑀬𑀸𑀬𑀧𑀜𑁆𑀳𑁂𑀲𑀼 𑀧𑀼𑀣𑀼𑀚𑁆𑀚𑀦𑀲𑁆𑀲 𑀜𑀸𑀡𑀁 𑀲𑀦𑁆𑀥𑀸𑀬 𑀧𑀝𑀺𑀓𑁆𑀔𑀺𑀧𑀢𑀺, 𑀅𑀭𑀺𑀬𑀲𑁆𑀲 𑀜𑀸𑀡𑀁 𑀲𑀦𑁆𑀥𑀸𑀬 𑀧𑀝𑀺𑀚𑀸𑀦𑀸𑀢𑀺. 𑀲𑀩𑁆𑀩𑀸 𑀧𑀜𑁆𑀜𑀸𑀢𑀺𑀧𑀜𑁆𑀳𑁂𑀲𑀼 𑀓𑀲𑀺𑀡𑀲𑀫𑀸𑀧𑀢𑁆𑀢𑀺𑀧𑀜𑁆𑀳𑀁 𑀲𑀦𑁆𑀥𑀸𑀬 𑀧𑀝𑀺𑀓𑁆𑀔𑀺𑀧𑀢𑀺, 𑀮𑁄𑀓𑀼𑀢𑁆𑀢𑀭𑀁 𑀲𑀦𑁆𑀥𑀸𑀬 𑀧𑀝𑀺𑀚𑀸𑀦𑀸𑀢𑀺. 𑀧𑀣𑀯𑀻𑀓𑀲𑀺𑀡𑀲𑀫𑀸𑀧𑀢𑁆𑀢𑀺𑀦𑁆𑀢𑀺𑀆𑀤𑀺 ‘‘𑀬𑀸 𑀏𑀢𑁂𑀲𑀼 𑀏𑀢𑁆𑀢𑀓𑁂𑀲𑀼 𑀞𑀸𑀦𑁂𑀲𑀼 𑀧𑀜𑁆𑀜𑀸, 𑀓𑀺𑀁 𑀲𑀩𑁆𑀩𑀸 𑀲𑀸 𑀧𑀝𑀺𑀲𑀫𑁆𑀪𑀺𑀤𑀸’’𑀢𑀺 𑀧𑀼𑀘𑁆𑀙𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀢𑁂𑀦 𑀳𑀺 𑀲𑀩𑁆𑀩𑀁 𑀜𑀸𑀡𑀦𑁆𑀢𑀺 𑀬𑀲𑁆𑀫𑀸 𑀲𑀩𑁆𑀩𑀸 𑀮𑁄𑀓𑀼𑀢𑁆𑀢𑀭𑀧𑀜𑁆𑀜𑀸 𑀧𑀝𑀺𑀲𑀫𑁆𑀪𑀺𑀤𑀸, 𑀢𑀲𑁆𑀫𑀸 𑀲𑀩𑁆𑀩𑀦𑁆𑀢𑀺 𑀯𑀘𑀦𑀁 𑀲𑀸𑀫𑀜𑁆𑀜𑀨𑀮𑁂𑀦 𑀲𑀤𑁆𑀥𑀺𑀁 𑀧𑀢𑀺𑀝𑁆𑀞𑀸𑀧𑁂𑀢𑀻𑀢𑀺.

𑀧𑀝𑀺𑀲𑀫𑁆𑀪𑀺𑀤𑀸𑀓𑀣𑀸𑀯𑀡𑁆𑀡𑀦𑀸.

𑁬. 𑀲𑀫𑁆𑀫𑀼𑀢𑀺𑀜𑀸𑀡𑀓𑀣𑀸𑀯𑀡𑁆𑀡𑀦𑀸

𑁪𑁩𑁪-𑁪𑁩𑁫. 𑀇𑀤𑀸𑀦𑀺 𑀲𑀫𑁆𑀫𑀼𑀢𑀺𑀜𑀸𑀡𑀓𑀣𑀸 𑀦𑀸𑀫 𑀳𑁄𑀢𑀺. 𑀢𑀢𑁆𑀣 𑀲𑀫𑁆𑀫𑀼𑀢𑀺𑀲𑀘𑁆𑀘𑀁 𑀧𑀭𑀫𑀢𑁆𑀣𑀲𑀘𑁆𑀘𑀦𑁆𑀢𑀺 𑀤𑁆𑀯𑁂 𑀲𑀘𑁆𑀘𑀸𑀦𑀺. 𑀬𑁂 𑀧𑀦 𑀏𑀯𑀁 𑀯𑀺𑀪𑀸𑀕𑀁 𑀅𑀓𑀢𑁆𑀯𑀸 𑀲𑀘𑁆𑀘𑀦𑁆𑀢𑀺 𑀯𑀘𑀦𑀲𑀸𑀫𑀜𑁆𑀜𑁂𑀦 𑀲𑀫𑁆𑀫𑀼𑀢𑀺𑀜𑀸𑀡𑀫𑁆𑀧𑀺 ‘‘𑀲𑀘𑁆𑀘𑀸𑀭𑀫𑁆𑀫𑀡𑀫𑁂𑀯𑀸’’𑀢𑀺 𑀯𑀤𑀦𑁆𑀢𑀺, 𑀲𑁂𑀬𑁆𑀬𑀣𑀸𑀧𑀺 𑀅𑀦𑁆𑀥𑀓𑀸; 𑀢𑁂 𑀅𑀬𑀼𑀢𑁆𑀢𑀯𑀸𑀤𑀺𑀦𑁄𑀢𑀺 𑀢𑁂𑀲𑀁 𑀯𑀸𑀤𑀯𑀺𑀲𑁄𑀥𑀦𑀢𑁆𑀣𑀁 𑀅𑀬𑀁 𑀓𑀣𑀸 𑀆𑀭𑀤𑁆𑀥𑀸. 𑀢𑀢𑁆𑀣 𑀦 𑀯𑀢𑁆𑀢𑀩𑁆𑀩𑀦𑁆𑀢𑀺 𑀧𑀼𑀘𑁆𑀙𑀸 𑀧𑀭𑀯𑀸𑀤𑀺𑀲𑁆𑀲, 𑀧𑀭𑀫𑀢𑁆𑀣𑀲𑀘𑁆𑀘𑀁 𑀲𑀦𑁆𑀥𑀸𑀬 𑀧𑀝𑀺𑀜𑁆𑀜𑀸 𑀲𑀓𑀯𑀸𑀤𑀺𑀲𑁆𑀲. 𑀲𑀫𑁆𑀫𑀼𑀢𑀺𑀲𑀘𑁆𑀘𑀫𑁆𑀳𑀻𑀢𑀺 𑀲𑀫𑁆𑀫𑀼𑀢𑀺𑀁 𑀅𑀦𑀼𑀧𑀯𑀺𑀝𑁆𑀞𑁂 𑀲𑀘𑁆𑀘𑀫𑁆𑀳𑀺. 𑀧𑀘𑁆𑀘𑀢𑁆𑀢𑁂 𑀯𑀸 𑀪𑀼𑀫𑁆𑀫𑀯𑀘𑀦𑀁, 𑀲𑀫𑁆𑀫𑀼𑀢𑀺𑀲𑀘𑁆𑀘𑀦𑁆𑀢𑀺 𑀅𑀢𑁆𑀣𑁄. 𑀲𑀫𑁆𑀫𑀼𑀢𑀺𑀜𑀸𑀡𑀁 𑀲𑀘𑁆𑀘𑀸𑀭𑀫𑁆𑀫𑀡𑀜𑁆𑀜𑁂𑀯𑀸𑀢𑀺 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀧𑀝𑀺𑀜𑁆𑀜𑀸 𑀇𑀢𑀭𑀲𑁆𑀲. 𑀢𑀢𑁄 𑀦𑀁 ‘‘𑀬𑀤𑀺 𑀢𑀁 𑀅𑀯𑀺𑀲𑁂𑀲𑁂𑀦 𑀲𑀘𑁆𑀘𑀸𑀭𑀫𑁆𑀫𑀡𑀜𑁆𑀜𑁂𑀯, 𑀢𑁂𑀦 𑀜𑀸𑀡𑁂𑀦 𑀤𑀼𑀓𑁆𑀔𑀧𑀭𑀺𑀜𑁆𑀜𑀸𑀤𑀻𑀦𑀺 𑀓𑀭𑁂𑀬𑁆𑀬𑀸’’𑀢𑀺 𑀘𑁄𑀤𑁂𑀢𑀼𑀁 𑀢𑁂𑀦 𑀜𑀸𑀡𑁂𑀦𑀸𑀢𑀺𑀆𑀤𑀺𑀫𑀸𑀳.

𑀲𑀫𑁆𑀫𑀼𑀢𑀺𑀜𑀸𑀡𑀓𑀣𑀸𑀯𑀡𑁆𑀡𑀦𑀸.

𑁭. 𑀘𑀺𑀢𑁆𑀢𑀸𑀭𑀫𑁆𑀫𑀡𑀓𑀣𑀸𑀯𑀡𑁆𑀡𑀦𑀸

𑁪𑁩𑁬-𑁪𑁩𑁮. 𑀇𑀤𑀸𑀦𑀺 𑀘𑀺𑀢𑁆𑀢𑀸𑀭𑀫𑁆𑀫𑀡𑀓𑀣𑀸 𑀦𑀸𑀫 𑀳𑁄𑀢𑀺. 𑀢𑀢𑁆𑀣 𑀘𑁂𑀢𑁄𑀧𑀭𑀺𑀬𑀸𑀬𑁂 𑀜𑀸𑀡𑀦𑁆𑀢𑀺 𑀯𑀘𑀦𑀫𑀢𑁆𑀢𑀫𑁂𑀯 𑀕𑀳𑁂𑀢𑁆𑀯𑀸 ‘‘𑀢𑀁 𑀜𑀸𑀡𑀁 𑀘𑀺𑀢𑁆𑀢𑀸𑀭𑀫𑁆𑀫𑀡𑀫𑁂𑀯𑀸’’𑀢𑀺 𑀬𑁂𑀲𑀁 𑀮𑀤𑁆𑀥𑀺, 𑀲𑁂𑀬𑁆𑀬𑀣𑀸𑀧𑀺 𑀏𑀢𑀭𑀳𑀺 𑀅𑀦𑁆𑀥𑀓𑀸𑀦𑀁; 𑀢𑁂 𑀲𑀦𑁆𑀥𑀸𑀬 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀧𑀝𑀺𑀜𑁆𑀜𑀸 𑀇𑀢𑀭𑀲𑁆𑀲. 𑀅𑀣𑀲𑁆𑀲 ‘‘𑀬𑁄 𑀲𑀭𑀸𑀕𑀸𑀤𑀺𑀯𑀲𑁂𑀦 𑀘𑀺𑀢𑁆𑀢𑀁 𑀚𑀸𑀦𑀸𑀢𑀺, 𑀢𑀲𑁆𑀲 𑀭𑀸𑀕𑀸𑀤𑀬𑁄𑀧𑀺 𑀆𑀭𑀫𑁆𑀫𑀡𑀸 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀦 𑀯𑀢𑁆𑀢𑀩𑁆𑀩𑀁 𑀢𑀁 𑀘𑀺𑀢𑁆𑀢𑀸𑀭𑀫𑁆𑀫𑀡𑀜𑁆𑀜𑁂𑀯𑀸’’𑀢𑀺 𑀘𑁄𑀤𑀦𑀢𑁆𑀣𑀁 𑀦𑀦𑀼 𑀅𑀢𑁆𑀣𑀺 𑀓𑁄𑀘𑀻𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀨𑀲𑁆𑀲𑀸𑀭𑀫𑁆𑀫𑀡𑁂𑀢𑀺 𑀨𑀲𑁆𑀲𑀲𑀗𑁆𑀔𑀸𑀢𑁂 𑀆𑀭𑀫𑁆𑀫𑀡𑁂. 𑀯𑁂𑀤𑀦𑀸𑀭𑀫𑁆𑀫𑀡𑁂𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀧𑀼𑀦 𑀨𑀲𑁆𑀲𑀸𑀭𑀫𑁆𑀫𑀡𑁂 𑀜𑀸𑀡𑀁 𑀦 𑀯𑀢𑁆𑀢𑀩𑁆𑀩𑀦𑁆𑀢𑀺 𑀧𑀼𑀝𑁆𑀞𑁄 𑀨𑀲𑁆𑀲𑀲𑁆𑀲 𑀨𑀼𑀲𑀦𑀮𑀓𑁆𑀔𑀡𑀁 𑀫𑀦𑀲𑀺𑀓𑀭𑁄𑀢𑁄 𑀨𑀲𑁆𑀲𑁄𑀯𑀸𑀭𑀫𑁆𑀫𑀡𑀁 𑀳𑁄𑀢𑀻𑀢𑀺 𑀧𑀝𑀺𑀚𑀸𑀦𑀸𑀢𑀺. 𑀓𑀺𑀁 𑀧𑀦𑁂𑀢𑀁 𑀨𑀲𑁆𑀲𑀧𑀭𑀺𑀬𑀸𑀬𑁂 𑀜𑀸𑀡𑀦𑁆𑀢𑀺 𑀧𑀼𑀝𑁆𑀞𑁄 𑀧𑀦 𑀢𑀸𑀤𑀺𑀲𑀲𑁆𑀲 𑀲𑀼𑀢𑁆𑀢𑀧𑀤𑀲𑁆𑀲 𑀅𑀪𑀸𑀯𑀸 𑀧𑀝𑀺𑀓𑁆𑀔𑀺𑀧𑀢𑀺. 𑀯𑁂𑀤𑀦𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀇𑀤𑀸𑀦𑀺 𑀬𑀁 𑀦𑀺𑀲𑁆𑀲𑀸𑀬 𑀮𑀤𑁆𑀥𑀺, 𑀢𑀤𑁂𑀯 𑀤𑀲𑁆𑀲𑁂𑀢𑁆𑀯𑀸 𑀮𑀤𑁆𑀥𑀺𑀁 𑀧𑀢𑀺𑀝𑁆𑀞𑀸𑀧𑁂𑀢𑀼𑀁 𑀦𑀦𑀼 𑀘𑁂𑀢𑁄𑀧𑀭𑀺𑀬𑀸𑀬𑁂 𑀜𑀸𑀡𑀦𑁆𑀢𑀺𑀆𑀤𑀺𑀫𑀸𑀳. 𑀲𑀸 𑀧𑀦𑁂𑀲𑀸 𑀯𑀘𑀦𑀫𑀢𑁆𑀢𑀸𑀪𑀺𑀦𑀺𑀯𑁂𑀲𑁂𑀦 𑀧𑀢𑀺𑀝𑁆𑀞𑀸𑀧𑀺𑀢𑀸𑀧𑀺 𑀅𑀧𑁆𑀧𑀢𑀺𑀝𑁆𑀞𑀸𑀧𑀺𑀢𑀸𑀯 𑀳𑁄𑀢𑀻𑀢𑀺.

𑀘𑀺𑀢𑁆𑀢𑀸𑀭𑀫𑁆𑀫𑀡𑀓𑀣𑀸𑀯𑀡𑁆𑀡𑀦𑀸.

𑁮. 𑀅𑀦𑀸𑀕𑀢𑀜𑀸𑀡𑀓𑀣𑀸𑀯𑀡𑁆𑀡𑀦𑀸

𑁪𑁩𑁯-𑁪𑁪𑁦. 𑀇𑀤𑀸𑀦𑀺 𑀅𑀦𑀸𑀕𑀢𑀜𑀸𑀡𑀓𑀣𑀸 𑀦𑀸𑀫 𑀳𑁄𑀢𑀺. 𑀢𑀢𑁆𑀣 𑀅𑀦𑀸𑀕𑀢𑀁 𑀦𑀸𑀫 𑀅𑀦𑁆𑀢𑀭𑀫𑁆𑀧𑀺 𑀅𑀢𑁆𑀣𑀺, 𑀅𑀦𑀦𑁆𑀢𑀭𑀫𑁆𑀧𑀺. 𑀢𑁂𑀲𑀼 𑀅𑀦𑀦𑁆𑀢𑀭𑁂 𑀏𑀓𑀦𑁆𑀢𑁂𑀦𑁂𑀯 𑀜𑀸𑀡𑀁 𑀦𑀢𑁆𑀣𑀺. 𑀬𑀣𑀸 𑀘 𑀅𑀦𑀦𑁆𑀢𑀭𑁂, 𑀢𑀣𑀸 𑀏𑀓𑀯𑀻𑀣𑀺𑀏𑀓𑀚𑀯𑀦𑀧𑀭𑀺𑀬𑀸𑀧𑀦𑁆𑀦𑁂𑀧𑀺. 𑀢𑀢𑁆𑀣 𑀬𑁂 𑀲𑀩𑁆𑀩𑀲𑁆𑀫𑀺𑀫𑁆𑀧𑀺 𑀅𑀦𑀸𑀕𑀢𑁂 𑀜𑀸𑀡𑀁 𑀇𑀘𑁆𑀙𑀦𑁆𑀢𑀺, 𑀲𑁂𑀬𑁆𑀬𑀣𑀸𑀧𑀺 𑀅𑀦𑁆𑀥𑀓𑀸; 𑀢𑁂 𑀲𑀦𑁆𑀥𑀸𑀬 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀧𑀝𑀺𑀜𑁆𑀜𑀸 𑀇𑀢𑀭𑀲𑁆𑀲. 𑀅𑀣 𑀦𑀁 ‘‘𑀬𑀁 𑀢𑁂 𑀅𑀦𑀸𑀕𑀢𑁂 𑀜𑀸𑀡𑀁, 𑀓𑀺𑀁 𑀢𑁂𑀦 𑀅𑀦𑀦𑁆𑀢𑀭𑀁 𑀅𑀦𑀸𑀕𑀢𑀁 𑀫𑀽𑀮𑀸𑀤𑀺𑀯𑀲𑁂𑀦 𑀚𑀸𑀦𑀸𑀢𑀻’’𑀢𑀺 𑀘𑁄𑀤𑁂𑀢𑀼𑀁 𑀅𑀦𑀸𑀕𑀢𑀁 𑀫𑀽𑀮𑀢𑁄𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀫𑀽𑀮𑀢𑁄𑀢𑀺𑀆𑀤𑀻𑀦𑀺 𑀲𑀩𑁆𑀩𑀸𑀦𑀺 𑀓𑀸𑀭𑀡𑀯𑁂𑀯𑀘𑀦𑀸𑀦𑁂𑀯. 𑀓𑀸𑀭𑀡𑀜𑁆𑀳𑀺 𑀬𑀁 𑀅𑀢𑁆𑀢𑀦𑁄 𑀨𑀮𑀁 𑀓𑀭𑁄𑀢𑀺, 𑀢𑀁 𑀢𑀢𑁆𑀣 𑀫𑀽𑀮𑀬𑀢𑀺 𑀧𑀢𑀺𑀝𑁆𑀞𑀸𑀢𑀻𑀢𑀺 𑀫𑀽𑀮𑀁. 𑀢𑀢𑁄 𑀘 𑀢𑀁 𑀳𑀺𑀦𑁄𑀢𑀺 𑀧𑀯𑀢𑁆𑀢𑀬𑀢𑀻𑀢𑀺 𑀳𑁂𑀢𑀼. 𑀢𑀤𑁂𑀯 𑀢𑀁 𑀦𑀺𑀤𑁂𑀢𑀺 ‘‘𑀳𑀦𑁆𑀤 𑀦𑀁 𑀕𑀡𑁆𑀳𑀣𑀸’’𑀢𑀺. 𑀦𑀺𑀬𑁆𑀬𑀸𑀢𑁂𑀢𑀺 𑀯𑀺𑀬𑀸𑀢𑀺 𑀦𑀺𑀤𑀸𑀦𑀁. 𑀢𑀢𑁄 𑀢𑀁 𑀲𑀫𑁆𑀪𑀯𑀢𑀻𑀢𑀺 𑀲𑀫𑁆𑀪𑀯𑁄. 𑀧𑀪𑀯𑀢𑀻𑀢𑀺 𑀧𑀪𑀯𑁄. 𑀢𑀢𑁆𑀣 𑀘 𑀢𑀁 𑀲𑀫𑀼𑀝𑁆𑀞𑀸𑀢𑀺, 𑀢𑀁 𑀯𑀸 𑀦𑀁 𑀲𑀫𑀼𑀝𑁆𑀞𑀸𑀧𑁂𑀢𑀻𑀢𑀺 𑀲𑀫𑀼𑀝𑁆𑀞𑀸𑀦𑀁. 𑀢𑀤𑁂𑀯 𑀦𑀁 𑀆𑀳𑀭𑀢𑀻𑀢𑀺 𑀆𑀳𑀸𑀭𑁄. 𑀢𑀜𑁆𑀘𑀲𑁆𑀲 𑀅𑀧𑀭𑀺𑀘𑁆𑀘𑀚𑀺𑀢𑀩𑁆𑀩𑀝𑁆𑀞𑁂𑀦 𑀆𑀭𑀫𑁆𑀫𑀡𑀁. 𑀢𑀤𑁂𑀯 𑀘𑁂𑀢𑀁 𑀧𑀝𑀺𑀘𑁆𑀘 𑀏𑀢𑀻𑀢𑀺 𑀧𑀘𑁆𑀘𑀬𑁄. 𑀢𑀢𑁄 𑀦𑀁 𑀲𑀫𑀼𑀤𑁂𑀢𑀻𑀢𑀺 𑀲𑀫𑀼𑀤𑀬𑁄𑀢𑀺 𑀯𑀼𑀘𑁆𑀘𑀢𑀺. 𑀬𑀲𑁆𑀫𑀸 𑀧𑀦 𑀅𑀦𑀦𑁆𑀢𑀭𑀁 𑀘𑀺𑀢𑁆𑀢𑀁 𑀏𑀢𑁂𑀳𑀸𑀓𑀸𑀭𑁂𑀳𑀺 𑀦 𑀲𑀓𑁆𑀓𑀸 𑀚𑀸𑀦𑀺𑀢𑀼𑀁, 𑀢𑀲𑁆𑀫𑀸 𑀦 𑀳𑁂𑀯𑀦𑁆𑀢𑀺 𑀧𑀝𑀺𑀓𑁆𑀔𑀺𑀧𑀢𑀺. 𑀅𑀦𑀸𑀕𑀢𑀁 𑀳𑁂𑀢𑀼𑀧𑀘𑁆𑀘𑀬𑀢𑀦𑁆𑀢𑀺 𑀬𑀸 𑀅𑀦𑀦𑁆𑀢𑀭𑀸𑀦𑀸𑀕𑀢𑁂 𑀘𑀺𑀢𑁆𑀢𑁂 𑀳𑁂𑀢𑀼𑀧𑀘𑁆𑀘𑀬𑀢𑀸, 𑀢𑀁 𑀚𑀸𑀦𑀸𑀢𑀺. 𑀬𑁂 𑀢𑀢𑁆𑀣 𑀥𑀫𑁆𑀫𑀸 𑀳𑁂𑀢𑀼𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀢𑁂 𑀚𑀸𑀦𑀸𑀢𑀻𑀢𑀺 𑀅𑀢𑁆𑀣𑁄. 𑀲𑁂𑀲𑀧𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀕𑁄𑀢𑁆𑀭𑀪𑀼𑀦𑁄𑀢𑀺𑀆𑀤𑀺 𑀬𑀲𑁆𑀫𑀺𑀁 𑀅𑀦𑀸𑀕𑀢𑁂 𑀜𑀸𑀡𑀁 𑀦 𑀉𑀧𑁆𑀧𑀚𑁆𑀚𑀢𑀺, 𑀢𑀁 𑀲𑀭𑀽𑀧𑀢𑁄 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁. 𑀧𑀸𑀝𑀮𑀺𑀧𑀼𑀢𑁆𑀢𑀲𑁆𑀲𑀸𑀢𑀺 𑀲𑀼𑀢𑁆𑀢𑀁 𑀬𑀲𑁆𑀫𑀺𑀁 𑀅𑀦𑀸𑀕𑀢𑁂 𑀜𑀸𑀡𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀁 𑀤𑀲𑁆𑀲𑁂𑀢𑀼𑀁 𑀆𑀳𑀝𑀁. 𑀬𑀲𑁆𑀫𑀸 𑀧𑀦𑁂𑀢𑀁 𑀦 𑀲𑀩𑁆𑀩𑀲𑁆𑀫𑀺𑀁 𑀅𑀦𑀸𑀕𑀢𑁂 𑀜𑀸𑀡𑀲𑁆𑀲 𑀲𑀸𑀥𑀓𑀁; 𑀢𑀲𑁆𑀫𑀸 𑀅𑀦𑀸𑀳𑀝𑀫𑁂𑀯𑀸𑀢𑀺.

𑀅𑀦𑀸𑀕𑀢𑀜𑀸𑀡𑀓𑀣𑀸𑀯𑀡𑁆𑀡𑀦𑀸.

𑁯. 𑀧𑀝𑀼𑀧𑁆𑀧𑀦𑁆𑀦𑀜𑀸𑀡𑀓𑀣𑀸𑀯𑀡𑁆𑀡𑀦𑀸

𑁪𑁪𑁧-𑁪𑁪𑁨. 𑀇𑀤𑀸𑀦𑀺 𑀧𑀝𑀼𑀧𑁆𑀧𑀦𑁆𑀦𑀜𑀸𑀡𑀓𑀣𑀸 𑀦𑀸𑀫 𑀳𑁄𑀢𑀺. 𑀢𑀢𑁆𑀣 𑀬𑁂𑀲𑀁 ‘‘𑀲𑀩𑁆𑀩𑀲𑀗𑁆𑀔𑀸𑀭𑁂𑀲𑀼 𑀅𑀦𑀺𑀘𑁆𑀘𑀢𑁄 𑀤𑀺𑀝𑁆𑀞𑁂𑀲𑀼 𑀢𑀫𑁆𑀧𑀺 𑀜𑀸𑀡𑀁 𑀅𑀦𑀺𑀘𑁆𑀘𑀢𑁄 𑀤𑀺𑀝𑁆𑀞𑀁 𑀳𑁄𑀢𑀻’’𑀢𑀺 𑀯𑀘𑀦𑀁 𑀦𑀺𑀲𑁆𑀲𑀸𑀬 ‘‘𑀅𑀯𑀺𑀲𑁂𑀲𑁂𑀦 𑀲𑀩𑁆𑀩𑀲𑁆𑀫𑀺𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀜𑀸𑀡𑀁 𑀅𑀢𑁆𑀣𑀻’’𑀢𑀺 𑀮𑀤𑁆𑀥𑀺, 𑀲𑁂𑀬𑁆𑀬𑀣𑀸𑀧𑀺 𑀅𑀦𑁆𑀥𑀓𑀸𑀦𑀁; 𑀢𑁂 𑀲𑀦𑁆𑀥𑀸𑀬 𑀧𑀝𑀼𑀧𑁆𑀧𑀦𑁆𑀦𑁂𑀢𑀺 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀧𑀝𑀺𑀜𑁆𑀜𑀸 𑀇𑀢𑀭𑀲𑁆𑀲. 𑀅𑀣 𑀦𑀁 ‘‘𑀬𑀤𑀺 𑀅𑀯𑀺𑀲𑁂𑀲𑁂𑀦 𑀧𑀝𑀼𑀧𑁆𑀧𑀦𑁆𑀦𑁂 𑀜𑀸𑀡𑀁 𑀅𑀢𑁆𑀣𑀺, 𑀔𑀡𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀧𑀺 𑀢𑁂𑀦 𑀪𑀯𑀺𑀢𑀩𑁆𑀩𑀁. 𑀏𑀯𑀁 𑀲𑀦𑁆𑀢𑁂 𑀤𑁆𑀯𑀺𑀦𑁆𑀦𑀁 𑀜𑀸𑀡𑀸𑀦𑀁 𑀏𑀓𑀢𑁄 𑀅𑀪𑀸𑀯𑀸 𑀢𑁂𑀦𑁂𑀯 𑀜𑀸𑀡𑁂𑀦 𑀢𑀁 𑀚𑀸𑀦𑀺𑀢𑀩𑁆𑀩𑀁 𑀳𑁄𑀢𑀻’’𑀢𑀺 𑀘𑁄𑀤𑀦𑀢𑁆𑀣𑀁 𑀢𑁂𑀦𑀸𑀢𑀺 𑀅𑀦𑀼𑀬𑁄𑀕𑁄 𑀲𑀓𑀯𑀸𑀤𑀺𑀲𑁆𑀲. 𑀢𑀢𑁆𑀣 𑀧𑀞𑀫𑀧𑀜𑁆𑀳𑁂 𑀢𑁂𑀦𑁂𑀯 𑀢𑀁 𑀚𑀸𑀦𑀺𑀢𑀼𑀁 𑀦 𑀲𑀓𑁆𑀓𑀸𑀢𑀺 𑀧𑀝𑀺𑀓𑁆𑀔𑁂𑀧𑁄 𑀇𑀢𑀭𑀲𑁆𑀲. 𑀤𑀼𑀢𑀺𑀬𑀧𑀜𑁆𑀳𑁂 𑀲𑀦𑁆𑀢𑀢𑀺𑀁 𑀲𑀦𑁆𑀥𑀸𑀬 𑀧𑀝𑀺𑀜𑁆𑀜𑀸 𑀢𑀲𑁆𑀲𑁂𑀯. 𑀧𑀝𑀺𑀧𑀸𑀝𑀺𑀢𑁄 𑀪𑀗𑁆𑀕𑀁 𑀧𑀲𑁆𑀲𑀦𑁆𑀢𑁄 𑀪𑀗𑁆𑀕𑀸𑀦𑀼𑀧𑀲𑁆𑀲𑀦𑁂𑀦𑁂𑀯 𑀪𑀗𑁆𑀕𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁 𑀧𑀲𑁆𑀲𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀦 𑀜𑀸𑀡𑁂𑀦 𑀢𑀁 𑀜𑀸𑀡𑀁 𑀚𑀸𑀦𑀸𑀢𑀻𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀢𑁂𑀦 𑀨𑀲𑁆𑀲𑁂𑀦 𑀢𑀁 𑀨𑀲𑁆𑀲𑀦𑁆𑀢𑀺𑀆𑀤𑀻𑀦𑀺𑀲𑁆𑀲 𑀮𑁂𑀲𑁄𑀓𑀸𑀲𑀦𑀺𑀯𑀸𑀭𑀡𑀢𑁆𑀣𑀁 𑀯𑀼𑀢𑁆𑀢𑀸𑀦𑀺. 𑀬𑀁 𑀧𑀦𑁂𑀢𑁂𑀦 𑀮𑀤𑁆𑀥𑀺𑀧𑀢𑀺𑀝𑁆𑀞𑀸𑀧𑀦𑀢𑁆𑀣𑀁 𑀦𑀦𑀼 𑀲𑀩𑁆𑀩𑀲𑀗𑁆𑀔𑀸𑀭𑁂𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀦𑀬𑀢𑁄 𑀢𑀁 𑀜𑀸𑀡𑀁 𑀤𑀺𑀝𑁆𑀞𑀁 𑀳𑁄𑀢𑀺, 𑀦 𑀆𑀭𑀫𑁆𑀫𑀡𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀧𑀝𑀺𑀜𑁆𑀜𑀸 𑀲𑀓𑀯𑀸𑀤𑀺𑀲𑁆𑀲. 𑀢𑀲𑁆𑀫𑀸 𑀏𑀯𑀁 𑀧𑀢𑀺𑀝𑁆𑀞𑀺𑀢𑀸𑀧𑀺𑀲𑁆𑀲 𑀮𑀤𑁆𑀥𑀺 𑀅𑀧𑁆𑀧𑀢𑀺𑀝𑁆𑀞𑀺𑀢𑀸𑀯 𑀳𑁄𑀢𑀺.

𑀧𑀝𑀼𑀧𑁆𑀧𑀦𑁆𑀦𑀜𑀸𑀡𑀓𑀣𑀸𑀯𑀡𑁆𑀡𑀦𑀸.

𑁧𑁦. 𑀨𑀮𑀜𑀸𑀡𑀓𑀣𑀸𑀯𑀡𑁆𑀡𑀦𑀸

𑁪𑁪𑁩-𑁪𑁪𑁪. 𑀇𑀤𑀸𑀦𑀺 𑀨𑀮𑁂 𑀜𑀸𑀡𑀓𑀣𑀸 𑀦𑀸𑀫 𑀳𑁄𑀢𑀺. 𑀢𑀢𑁆𑀣 ‘‘𑀩𑀼𑀤𑁆𑀥𑀸𑀧𑀺 𑀲𑀢𑁆𑀢𑀸𑀦𑀁 𑀅𑀭𑀺𑀬𑀨𑀮𑀧𑁆𑀧𑀢𑁆𑀢𑀺𑀬𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀺 𑀲𑀸𑀯𑀓𑀸𑀧𑀺, 𑀇𑀢𑀺 𑀇𑀫𑀺𑀦𑀸 𑀲𑀸𑀫𑀜𑁆𑀜𑁂𑀦 𑀩𑀼𑀤𑁆𑀥𑀸𑀦𑀁 𑀯𑀺𑀬 𑀲𑀸𑀯𑀓𑀸𑀦𑀫𑁆𑀧𑀺 𑀢𑁂𑀦 𑀢𑁂𑀦 𑀲𑀢𑁆𑀢𑁂𑀦 𑀧𑀢𑁆𑀢𑀩𑁆𑀩𑁂 𑀨𑀮𑁂 𑀜𑀸𑀡𑀁 𑀅𑀢𑁆𑀣𑀻’’𑀢𑀺 𑀬𑁂𑀲𑀁 𑀮𑀤𑁆𑀥𑀺, 𑀲𑁂𑀬𑁆𑀬𑀣𑀸𑀧𑀺 𑀅𑀦𑁆𑀥𑀓𑀸𑀦𑀁; 𑀢𑁂 𑀲𑀦𑁆𑀥𑀸𑀬 𑀲𑀸𑀯𑀓𑀲𑁆𑀲𑀸𑀢𑀺 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀧𑀝𑀺𑀜𑁆𑀜𑀸 𑀇𑀢𑀭𑀲𑁆𑀲. 𑀅𑀣 𑀦𑀁 ‘‘𑀬𑀤𑀺 𑀲𑀸𑀯𑀓𑀲𑁆𑀲 𑀨𑀮𑁂 𑀜𑀸𑀡𑀁 𑀅𑀢𑁆𑀣𑀺, 𑀬𑀣𑀸 𑀩𑀼𑀤𑁆𑀥𑀸 𑀲𑀫𑀸𑀦𑁂𑀧𑀺 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀅𑀢𑁆𑀢𑀦𑁄 𑀜𑀸𑀡𑀩𑀮𑁂𑀦 ‘𑀅𑀬𑀁 𑀏𑀓𑀩𑀻𑀚𑀻, 𑀅𑀬𑀁 𑀓𑁄𑀮𑀁𑀓𑁄𑀮𑁄, 𑀅𑀬𑀁 𑀲𑀢𑁆𑀢𑀓𑁆𑀔𑀢𑁆𑀢𑀼𑀧𑀭𑀫𑁄’𑀢𑀺 𑀨𑀮𑀲𑁆𑀲𑀓𑀢𑀁 𑀧𑀜𑁆𑀜𑀧𑁂𑀦𑁆𑀢𑀺, 𑀓𑀺𑀁 𑀢𑁂 𑀏𑀯𑀁 𑀲𑀸𑀯𑀓𑁄𑀧𑀻’’𑀢𑀺 𑀘𑁄𑀤𑁂𑀢𑀼𑀁 𑀲𑀸𑀯𑀓𑁄 𑀨𑀮𑀲𑁆𑀲 𑀓𑀢𑀁 𑀧𑀜𑁆𑀜𑀧𑁂𑀢𑀻𑀢𑀺 𑀆𑀳. 𑀇𑀢𑀭𑁄 𑀧𑀝𑀺𑀓𑁆𑀔𑀺𑀧𑀢𑀺.

𑀅𑀢𑁆𑀣𑀺 𑀲𑀸𑀯𑀓𑀲𑁆𑀲 𑀨𑀮𑀧𑀭𑁄𑀧𑀭𑀺𑀬𑀢𑁆𑀢𑀻𑀢𑀺𑀆𑀤𑀺 𑀨𑀮𑁂 𑀜𑀸𑀡𑀲𑁆𑀲 𑀅𑀢𑁆𑀣𑀺𑀢𑀸𑀬 𑀧𑀘𑁆𑀘𑀬𑀧𑀼𑀘𑁆𑀙𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀅𑀬𑀜𑁆𑀳𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 𑁋 𑀩𑀼𑀤𑁆𑀥𑀸𑀦𑀁 ‘‘𑀇𑀤𑀁 𑀨𑀮𑀁 𑀧𑀭𑀁, 𑀇𑀤𑀁 𑀑𑀧𑀭’’𑀦𑁆𑀢𑀺 𑀏𑀯𑀁 𑀨𑀮𑀸𑀦𑀁 𑀉𑀘𑁆𑀘𑀸𑀯𑀘𑀪𑀸𑀯𑀚𑀸𑀦𑀦𑀲𑀗𑁆𑀔𑀸𑀢𑀸 𑀨𑀮𑁂 𑀧𑀭𑁄𑀧𑀭𑀺𑀬𑀢𑁆𑀢𑀺 𑀦𑀸𑀫 𑀅𑀢𑁆𑀣𑀺. 𑀢𑀣𑀸 𑀇𑀦𑁆𑀤𑁆𑀭𑀺𑀬𑀧𑀼𑀕𑁆𑀕𑀮𑀧𑀭𑁄𑀧𑀭𑀺𑀬𑀢𑁆𑀢𑀺𑀬𑁄, 𑀢𑀸𑀲𑀁 𑀅𑀢𑁆𑀣𑀺𑀢𑀸𑀬 𑀢𑀲𑁆𑀲 𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀢𑁂𑀲𑀁 𑀢𑁂𑀲𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀯𑀲𑁂𑀦 𑀢𑀁 𑀢𑀁 𑀨𑀮𑀁 𑀚𑀸𑀦𑀦𑁆𑀢𑀺, 𑀓𑀺𑀁 𑀢𑁂 𑀲𑀸𑀯𑀓𑀲𑁆𑀲𑀸𑀧𑀺 𑀏𑀢𑀸 𑀧𑀭𑁄𑀧𑀭𑀺𑀬𑀢𑁆𑀢𑀺𑀬𑁄 𑀅𑀢𑁆𑀣𑀻𑀢𑀺.

𑀅𑀢𑁆𑀣𑀺 𑀲𑀸𑀯𑀓𑀲𑁆𑀲 𑀔𑀦𑁆𑀥𑀧𑀜𑁆𑀜𑀢𑁆𑀢𑀻𑀢𑀺𑀆𑀤𑀻𑀦𑀺𑀧𑀺 ‘‘𑀬𑀤𑀺 𑀢𑁂 𑀲𑀸𑀯𑀓𑀲𑁆𑀲 𑀩𑀼𑀤𑁆𑀥𑀸𑀦𑀁 𑀯𑀺𑀬 𑀨𑀮𑁂 𑀜𑀸𑀡𑀁 𑀅𑀢𑁆𑀣𑀺, 𑀇𑀫𑀸 𑀳𑀺 𑀧𑀺𑀲𑁆𑀲 𑀧𑀜𑁆𑀜𑀢𑁆𑀢𑀻𑀳𑀺 𑀪𑀯𑀺𑀢𑀩𑁆𑀩𑀁. 𑀓𑀺𑀫𑀲𑁆𑀲 𑀢𑀸 𑀅𑀢𑁆𑀣𑀺, 𑀲𑀓𑁆𑀓𑁄𑀢𑀺 𑀲𑁄 𑀏𑀢𑀸 𑀧𑀜𑁆𑀜𑀢𑁆𑀢𑀺𑀬𑁄 𑀅𑀢𑁆𑀢𑀦𑁄 𑀩𑀮𑁂𑀦 𑀚𑀸𑀦𑀺𑀢𑀼𑀁 𑀯𑀸 𑀧𑀜𑁆𑀜𑀧𑁂𑀢𑀼𑀁 𑀯𑀸’’𑀢𑀺 𑀘𑁄𑀤𑀦𑀢𑁆𑀣𑀁 𑀯𑀼𑀢𑁆𑀢𑀸𑀦𑀺. 𑀲𑀸𑀯𑀓𑁄 𑀚𑀺𑀦𑁄𑀢𑀺𑀆𑀤𑀺 ‘‘𑀬𑀤𑀺 𑀲𑀸𑀯𑀓𑀲𑁆𑀲 𑀩𑀼𑀤𑁆𑀥𑀸𑀦𑀁 𑀯𑀺𑀬 𑀨𑀮𑁂 𑀜𑀸𑀡𑀁 𑀅𑀢𑁆𑀣𑀺, 𑀏𑀯𑀁 𑀲𑀦𑁆𑀢𑁂 𑀲𑁆𑀯𑁂𑀯 𑀚𑀺𑀦𑁄’’𑀢𑀺 𑀘𑁄𑀤𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀲𑀸𑀯𑀓𑁄 𑀅𑀦𑀼𑀧𑁆𑀧𑀦𑁆𑀦𑀲𑁆𑀲𑀸𑀢𑀺 𑀧𑀜𑁆𑀳𑁂𑀧𑀺 𑀅𑀬𑀫𑁂𑀯 𑀦𑀬𑁄. 𑀅𑀜𑁆𑀜𑀸𑀡𑀻𑀢𑀺 𑀧𑀜𑁆𑀳𑁂 𑀅𑀯𑀺𑀚𑁆𑀚𑀸𑀲𑀗𑁆𑀔𑀸𑀢𑀲𑁆𑀲 𑀅𑀜𑁆𑀜𑀸𑀡𑀲𑁆𑀲 𑀯𑀺𑀳𑀢𑀢𑁆𑀢𑀸 𑀧𑀝𑀺𑀓𑁆𑀔𑀺𑀢𑁆𑀢𑁄, 𑀦 𑀧𑀦𑀲𑁆𑀲 𑀩𑀼𑀤𑁆𑀥𑀸𑀦𑀁 𑀯𑀺𑀬 𑀨𑀮𑁂 𑀜𑀸𑀡𑀁 𑀅𑀢𑁆𑀣𑀺. 𑀢𑀲𑁆𑀫𑀸 𑀅𑀧𑁆𑀧𑀢𑀺𑀝𑁆𑀞𑀺𑀢𑁄𑀯 𑀧𑀭𑀯𑀸𑀤𑀻𑀯𑀸𑀤𑁄𑀢𑀺.

𑀨𑀮𑀜𑀸𑀡𑀓𑀣𑀸𑀯𑀡𑁆𑀡𑀦𑀸.

𑀧𑀜𑁆𑀘𑀫𑁄 𑀯𑀕𑁆𑀕𑁄.

𑀫𑀳𑀸𑀧𑀡𑁆𑀡𑀸𑀲𑀓𑁄 𑀲𑀫𑀢𑁆𑀢𑁄.