𑁬. 𑀲𑁂𑀯𑀦𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁬. 𑀙𑀝𑁆𑀞𑁂 𑀚𑀻𑀯𑀺𑀢𑀧𑀭𑀺𑀓𑁆𑀔𑀸𑀭𑀸𑀢𑀺 𑀚𑀻𑀯𑀺𑀢𑀲𑀫𑁆𑀪𑀸𑀭𑀸. 𑀲𑀫𑀼𑀤𑀸𑀦𑁂𑀢𑀩𑁆𑀩𑀸𑀢𑀺 𑀲𑀫𑀸𑀳𑀭𑀺𑀢𑀩𑁆𑀩𑀸. 𑀓𑀲𑀺𑀭𑁂𑀦 𑀲𑀫𑀼𑀤𑀸𑀕𑀘𑁆𑀙𑀦𑁆𑀢𑀻𑀢𑀺 𑀤𑀼𑀓𑁆𑀔𑁂𑀦 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀭𑀢𑁆𑀢𑀺𑀪𑀸𑀕𑀁 𑀯𑀸 𑀤𑀺𑀯𑀲𑀪𑀸𑀕𑀁 𑀯𑀸𑀢𑀺 𑀏𑀢𑁆𑀣 𑀭𑀢𑁆𑀢𑀺𑀪𑀸𑀕𑁂 𑀜𑀢𑁆𑀯𑀸 𑀭𑀢𑁆𑀢𑀺𑀪𑀸𑀕𑁂𑀬𑁂𑀯 𑀧𑀓𑁆𑀓𑀫𑀺𑀢𑀩𑁆𑀩𑀁, 𑀭𑀢𑁆𑀢𑀺𑀁 𑀘𑀡𑁆𑀟𑀯𑀸𑀴𑀸𑀤𑀺𑀧𑀭𑀺𑀧𑀦𑁆𑀣𑁂 𑀲𑀢𑀺 𑀅𑀭𑀼𑀡𑀼𑀕𑁆𑀕𑀫𑀦𑀁 𑀆𑀕𑀫𑁂𑀢𑀩𑁆𑀩𑀁. 𑀤𑀺𑀯𑀲𑀪𑀸𑀕𑁂 𑀜𑀢𑁆𑀯𑀸 𑀤𑀺𑀯𑀸 𑀧𑀓𑁆𑀓𑀫𑀺𑀢𑀩𑁆𑀩𑀁, 𑀤𑀺𑀯𑀸 𑀧𑀭𑀺𑀧𑀦𑁆𑀣𑁂 𑀲𑀢𑀺 𑀲𑀽𑀭𑀺𑀬𑀢𑁆𑀣𑀗𑁆𑀕𑀫𑀦𑀁 𑀆𑀕𑀫𑁂𑀢𑀩𑁆𑀩𑀁. 𑀲𑀗𑁆𑀔𑀸𑀧𑀻𑀢𑀺 𑀲𑀸𑀫𑀜𑁆𑀜𑀢𑁆𑀣𑀲𑁆𑀲 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀆𑀕𑀫𑀦𑀁 𑀚𑀸𑀦𑀺𑀢𑁆𑀯𑀸. 𑀲𑁄 𑀧𑀼𑀕𑁆𑀕𑀮𑁄𑀢𑀺 𑀧𑀤𑀲𑁆𑀲 𑀧𑀦 ‘‘𑀦𑀸𑀦𑀼𑀩𑀦𑁆𑀥𑀺𑀢𑀩𑁆𑀩𑁄’’𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑁄. 𑀅𑀦𑀸𑀧𑀼𑀘𑁆𑀙𑀸𑀢𑀺 𑀇𑀥 𑀧𑀦 𑀢𑀁 𑀧𑀼𑀕𑁆𑀕𑀮𑀁 𑀅𑀦𑀸𑀧𑀼𑀘𑁆𑀙𑀸 𑀧𑀓𑁆𑀓𑀫𑀺𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀅𑀧𑀺 𑀧𑀦𑀼𑀚𑁆𑀚𑀫𑀸𑀦𑁂𑀦𑀸𑀢𑀺 𑀅𑀧𑀺 𑀦𑀺𑀓𑁆𑀓𑀟𑁆𑀠𑀺𑀬𑀫𑀸𑀦𑁂𑀦. 𑀏𑀯𑀭𑀽𑀧𑁄 𑀳𑀺 𑀧𑀼𑀕𑁆𑀕𑀮𑁄 𑀲𑀘𑁂𑀧𑀺 𑀤𑀸𑀭𑀼𑀓𑀮𑀸𑀧𑀲𑀢𑀁 𑀯𑀸 𑀉𑀤𑀓𑀖𑀝𑀲𑀢𑀁 𑀯𑀸 𑀯𑀸𑀮𑀺𑀓𑀸𑀖𑀝𑀲𑀢𑀁 𑀯𑀸 𑀤𑀡𑁆𑀟𑀁 𑀆𑀭𑁄𑀧𑁂𑀢𑀺, 𑀫𑀸 𑀇𑀥 𑀯𑀲𑀻𑀢𑀺 𑀦𑀺𑀓𑁆𑀓𑀟𑁆𑀠𑀸𑀧𑁂𑀢𑀺 𑀯𑀸, 𑀢𑀁 𑀔𑀫𑀸𑀧𑁂𑀢𑁆𑀯𑀸𑀧𑀺 𑀬𑀸𑀯𑀚𑀻𑀯𑀁 𑀲𑁄 𑀅𑀦𑀼𑀩𑀦𑁆𑀥𑀺𑀢𑀩𑁆𑀩𑁄𑀯, 𑀦 𑀯𑀺𑀚𑀳𑀺𑀢𑀩𑁆𑀩𑁄.