𑁧. 𑀲𑀫𑁆𑀩𑁄𑀥𑀺𑀯𑀕𑁆𑀕𑁄

𑁧. 𑀲𑀫𑁆𑀩𑁄𑀥𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁧. 𑀦𑀯𑀓𑀦𑀺𑀧𑀸𑀢𑀲𑁆𑀲 𑀧𑀞𑀫𑁂 𑀲𑀫𑁆𑀩𑁄𑀥𑀺𑀧𑀓𑁆𑀔𑀺𑀓𑀸𑀦𑀦𑁆𑀢𑀺 𑀘𑀢𑀼𑀫𑀕𑁆𑀕𑀲𑀗𑁆𑀔𑀸𑀢𑀲𑁆𑀲 𑀲𑀫𑁆𑀩𑁄𑀥𑀺𑀲𑁆𑀲 𑀧𑀓𑁆𑀔𑁂 𑀪𑀯𑀸𑀦𑀁, 𑀉𑀧𑀓𑀸𑀭𑀓𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀧𑀸𑀴𑀺𑀬𑀁 𑀆𑀕𑀢𑁂 𑀦𑀯 𑀥𑀫𑁆𑀫𑁂 𑀲𑀦𑁆𑀥𑀸𑀬𑁂𑀯𑀁 𑀧𑀼𑀘𑁆𑀙𑀢𑀺. 𑀓𑀸 𑀉𑀧𑀦𑀺𑀲𑀸𑀢𑀺 𑀓𑁄 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁄. 𑀅𑀪𑀺𑀲𑀮𑁆𑀮𑁂𑀔𑀦𑁆𑀢𑀻𑀢𑀺 𑀅𑀪𑀺𑀲𑀮𑁆𑀮𑁂𑀔𑀺𑀓𑀸. 𑀲𑀫𑀣𑀯𑀺𑀧𑀲𑁆𑀲𑀦𑀸𑀘𑀺𑀢𑁆𑀢𑀲𑁆𑀲 𑀯𑀺𑀯𑀭𑀡𑁂 𑀲𑀧𑁆𑀧𑀸𑀬𑀸 𑀉𑀧𑀓𑀸𑀭𑀓𑀸𑀢𑀺 𑀘𑁂𑀢𑁄𑀯𑀺𑀯𑀭𑀡𑀲𑀧𑁆𑀧𑀸𑀬𑀸. 𑀅𑀧𑁆𑀧𑀺𑀘𑁆𑀙𑀢𑀁 𑀆𑀭𑀩𑁆𑀪 𑀧𑀯𑀢𑁆𑀢𑀸 𑀓𑀣𑀸 𑀅𑀧𑁆𑀧𑀺𑀘𑁆𑀙𑀓𑀣𑀸. 𑀲𑁂𑀲𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀅𑀲𑀼𑀪𑀸 𑀪𑀸𑀯𑁂𑀢𑀩𑁆𑀩𑀸 𑀭𑀸𑀕𑀲𑁆𑀲 𑀧𑀳𑀸𑀦𑀸𑀬𑀸𑀢𑀺 𑀅𑀬𑀫𑀢𑁆𑀣𑁄 𑀲𑀸𑀮𑀺𑀮𑀸𑀬𑀓𑁄𑀧𑀫𑀸𑀬 𑀯𑀺𑀪𑀸𑀯𑁂𑀢𑀩𑁆𑀩𑁄 𑁋 𑀏𑀓𑁄 𑀳𑀺 𑀧𑀼𑀭𑀺𑀲𑁄 𑀅𑀲𑀺𑀢𑀁 𑀕𑀳𑁂𑀢𑁆𑀯𑀸 𑀓𑁄𑀝𑀺𑀢𑁄 𑀧𑀝𑁆𑀞𑀸𑀬 𑀲𑀸𑀮𑀺𑀓𑁆𑀔𑁂𑀢𑁆𑀢𑁂 𑀲𑀸𑀮𑀺𑀬𑁄 𑀮𑀸𑀬𑀢𑀺. 𑀅𑀣𑀲𑁆𑀲 𑀯𑀢𑀺𑀁 𑀪𑀺𑀦𑁆𑀤𑀺𑀢𑁆𑀯𑀸 𑀕𑀸𑀯𑁄 𑀧𑀯𑀺𑀲𑀺𑀁𑀲𑀼. 𑀲𑁄 𑀅𑀲𑀺𑀢𑀁 𑀞𑀧𑁂𑀢𑁆𑀯𑀸 𑀬𑀝𑁆𑀞𑀺𑀁 𑀆𑀤𑀸𑀬 𑀢𑁂𑀦𑁂𑀯 𑀫𑀕𑁆𑀕𑁂𑀦 𑀕𑀸𑀯𑁄 𑀦𑀻𑀳𑀭𑀺𑀢𑁆𑀯𑀸 𑀯𑀢𑀺𑀁 𑀧𑀸𑀓𑀢𑀺𑀓𑀁 𑀓𑀢𑁆𑀯𑀸 𑀧𑀼𑀦𑀧𑀺 𑀅𑀲𑀺𑀢𑀁 𑀆𑀤𑀸𑀬 𑀲𑀸𑀮𑀺𑀬𑁄 𑀮𑀸𑀬𑀺. 𑀏𑀢𑁆𑀣 𑀲𑀸𑀮𑀺𑀓𑁆𑀔𑁂𑀢𑁆𑀢𑀁 𑀯𑀺𑀬 𑀩𑀼𑀤𑁆𑀥𑀲𑀸𑀲𑀦𑀁 𑀤𑀝𑁆𑀞𑀩𑁆𑀩𑀁, 𑀲𑀸𑀮𑀺𑀮𑀸𑀬𑀓𑁄 𑀯𑀺𑀬 𑀬𑁄𑀕𑀸𑀯𑀘𑀭𑁄, 𑀅𑀲𑀺𑀢𑀁 𑀯𑀺𑀬 𑀧𑀜𑁆𑀜𑀸, 𑀮𑀸𑀬𑀦𑀓𑀸𑀮𑁄 𑀯𑀺𑀬 𑀯𑀺𑀧𑀲𑁆𑀲𑀦𑀸𑀬 𑀓𑀫𑁆𑀫𑀓𑀭𑀡𑀓𑀸𑀮𑁄, 𑀬𑀝𑁆𑀞𑀺 𑀯𑀺𑀬 𑀅𑀲𑀼𑀪𑀓𑀫𑁆𑀫𑀝𑁆𑀞𑀸𑀦𑀁, 𑀯𑀢𑀺 𑀯𑀺𑀬 𑀲𑀁𑀯𑀭𑁄, 𑀯𑀢𑀺𑀁 𑀪𑀺𑀦𑁆𑀤𑀺𑀢𑁆𑀯𑀸 𑀕𑀸𑀯𑀻𑀦𑀁 𑀧𑀯𑀺𑀲𑀦𑀁 𑀯𑀺𑀬 𑀲𑀳𑀲𑀸 𑀅𑀧𑁆𑀧𑀝𑀺𑀲𑀗𑁆𑀔𑀸𑀬 𑀧𑀫𑀸𑀤𑀁 𑀆𑀭𑀩𑁆𑀪 𑀭𑀸𑀕𑀲𑁆𑀲 𑀉𑀧𑁆𑀧𑀚𑁆𑀚𑀦𑀁, 𑀅𑀲𑀺𑀢𑀁 𑀞𑀧𑁂𑀢𑁆𑀯𑀸 𑀬𑀝𑁆𑀞𑀺𑀁 𑀆𑀤𑀸𑀬 𑀧𑀯𑀺𑀝𑁆𑀞𑀫𑀕𑁆𑀕𑁂𑀦𑁂𑀯 𑀕𑀸𑀯𑁄 𑀦𑀻𑀳𑀭𑀺𑀢𑁆𑀯𑀸 𑀯𑀢𑀺𑀁 𑀧𑀝𑀺𑀧𑀸𑀓𑀢𑀺𑀓𑀁 𑀓𑀢𑁆𑀯𑀸 𑀧𑀼𑀦 𑀓𑁄𑀝𑀺𑀢𑁄 𑀧𑀝𑁆𑀞𑀸𑀬 𑀲𑀸𑀮𑀺𑀮𑀸𑀬𑀦𑀁 𑀯𑀺𑀬 𑀅𑀲𑀼𑀪𑀓𑀫𑁆𑀫𑀝𑁆𑀞𑀸𑀦𑁂𑀦 𑀭𑀸𑀕𑀁 𑀯𑀺𑀓𑁆𑀔𑀫𑁆𑀪𑁂𑀢𑁆𑀯𑀸 𑀧𑀼𑀦 𑀯𑀺𑀧𑀲𑁆𑀲𑀦𑀸𑀬 𑀓𑀫𑁆𑀫𑀁 𑀆𑀭𑀪𑀦𑀓𑀸𑀮𑁄. 𑀇𑀫𑀫𑀢𑁆𑀣𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑁋 ‘‘𑀅𑀲𑀼𑀪𑀸 𑀪𑀸𑀯𑁂𑀢𑀩𑁆𑀩𑀸 𑀭𑀸𑀕𑀲𑁆𑀲 𑀧𑀳𑀸𑀦𑀸𑀬𑀸’’𑀢𑀺.

𑀢𑀢𑁆𑀣 𑀭𑀸𑀕𑀲𑁆𑀲𑀸𑀢𑀺 𑀧𑀜𑁆𑀘𑀓𑀸𑀫𑀕𑀼𑀡𑀺𑀓𑀭𑀸𑀕𑀲𑁆𑀲. 𑀫𑁂𑀢𑁆𑀢𑀸𑀢𑀺 𑀫𑁂𑀢𑁆𑀢𑀸𑀓𑀫𑁆𑀫𑀝𑁆𑀞𑀸𑀦𑀁. 𑀩𑁆𑀬𑀸𑀧𑀸𑀤𑀲𑁆𑀲 𑀧𑀳𑀸𑀦𑀸𑀬𑀸𑀢𑀺 𑀯𑀼𑀢𑁆𑀢𑀦𑀬𑁂𑀦𑁂𑀯 𑀉𑀧𑁆𑀧𑀦𑁆𑀦𑀲𑁆𑀲 𑀓𑁄𑀧𑀲𑁆𑀲 𑀧𑀚𑀳𑀦𑀢𑁆𑀣𑀸𑀬. 𑀆𑀦𑀸𑀧𑀸𑀦𑀲𑁆𑀲𑀢𑀻𑀢𑀺 𑀲𑁄𑀴𑀲𑀯𑀢𑁆𑀣𑀼𑀓𑀸 𑀆𑀦𑀸𑀧𑀸𑀦𑀲𑁆𑀲𑀢𑀺. 𑀯𑀺𑀢𑀓𑁆𑀓𑀼𑀧𑀘𑁆𑀙𑁂𑀤𑀸𑀬𑀸𑀢𑀺 𑀯𑀼𑀢𑁆𑀢𑀦𑀬𑁂𑀦𑁂𑀯 𑀉𑀧𑁆𑀧𑀦𑁆𑀦𑀸𑀦𑀁 𑀯𑀺𑀢𑀓𑁆𑀓𑀸𑀦𑀁 𑀉𑀧𑀘𑁆𑀙𑁂𑀤𑀦𑀢𑁆𑀣𑀸𑀬. 𑀅𑀲𑁆𑀫𑀺𑀫𑀸𑀦𑀲𑀫𑀼𑀕𑁆𑀖𑀸𑀢𑀸𑀬𑀸𑀢𑀺 𑀅𑀲𑁆𑀫𑀻𑀢𑀺 𑀉𑀧𑁆𑀧𑀚𑁆𑀚𑀦𑀓𑀲𑁆𑀲 𑀫𑀸𑀦𑀲𑁆𑀲 𑀲𑀫𑀼𑀕𑁆𑀖𑀸𑀢𑀢𑁆𑀣𑀸𑀬. 𑀅𑀦𑀢𑁆𑀢𑀲𑀜𑁆𑀜𑀸 𑀲𑀡𑁆𑀞𑀸𑀢𑀻𑀢𑀺 𑀅𑀦𑀺𑀘𑁆𑀘𑀮𑀓𑁆𑀔𑀡𑁂 𑀤𑀺𑀝𑁆𑀞𑁂 𑀅𑀦𑀢𑁆𑀢𑀮𑀓𑁆𑀔𑀡𑀁 𑀤𑀺𑀝𑁆𑀞𑀫𑁂𑀯 𑀳𑁄𑀢𑀺. 𑀏𑀢𑁂𑀲𑀼 𑀳𑀺 𑀢𑀻𑀲𑀼 𑀮𑀓𑁆𑀔𑀡𑁂𑀲𑀼 𑀏𑀓𑀲𑁆𑀫𑀺𑀁 𑀤𑀺𑀝𑁆𑀞𑁂 𑀇𑀢𑀭𑀤𑁆𑀯𑀬𑀁 𑀤𑀺𑀝𑁆𑀞𑀫𑁂𑀯 𑀳𑁄𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀅𑀦𑀺𑀘𑁆𑀘𑀲𑀜𑁆𑀜𑀺𑀦𑁄, 𑀪𑀺𑀓𑁆𑀔𑀯𑁂, 𑀅𑀦𑀢𑁆𑀢𑀲𑀜𑁆𑀜𑀸 𑀲𑀡𑁆𑀞𑀸𑀢𑀻’’𑀢𑀺. 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀦𑀺𑀩𑁆𑀩𑀸𑀦𑀦𑁆𑀢𑀺 𑀤𑀺𑀝𑁆𑀞𑁂𑀬𑁂𑀯 𑀥𑀫𑁆𑀫𑁂 𑀅𑀧𑀘𑁆𑀘𑀬𑀧𑀭𑀺𑀦𑀺𑀩𑁆𑀩𑀸𑀦𑀜𑁆𑀘 𑀧𑀸𑀧𑀼𑀡𑀸𑀢𑀻𑀢𑀺 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀯𑀝𑁆𑀝𑀯𑀺𑀯𑀝𑁆𑀝𑀁 𑀓𑀣𑀺𑀢𑀁.

𑁨. 𑀦𑀺𑀲𑁆𑀲𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁨. 𑀤𑀼𑀢𑀺𑀬𑁂 𑀦𑀺𑀲𑁆𑀲𑀬𑀲𑀫𑁆𑀧𑀦𑁆𑀦𑁄𑀢𑀺 𑀧𑀢𑀺𑀝𑁆𑀞𑀸𑀲𑀫𑁆𑀧𑀦𑁆𑀦𑁄. 𑀲𑀤𑁆𑀥𑀦𑁆𑀢𑀺 𑀑𑀓𑀧𑁆𑀧𑀦𑀲𑀤𑁆𑀥𑀁. 𑀯𑀻𑀭𑀺𑀬𑀦𑁆𑀢𑀺 𑀓𑀸𑀬𑀺𑀓𑀘𑁂𑀢𑀲𑀺𑀓𑀯𑀻𑀭𑀺𑀬𑀁. 𑀬𑀁𑀲𑀸𑀢𑀺 𑀬𑀁 𑀅𑀲𑁆𑀲. 𑀅𑀭𑀺𑀬𑀸𑀬 𑀧𑀜𑁆𑀜𑀸𑀬𑀸𑀢𑀺 𑀲𑀳𑀯𑀺𑀧𑀲𑁆𑀲𑀦𑀸𑀬 𑀫𑀕𑁆𑀕𑀧𑀜𑁆𑀜𑀸𑀬. 𑀲𑀗𑁆𑀔𑀸𑀬𑀸𑀢𑀺 𑀚𑀸𑀦𑀺𑀢𑁆𑀯𑀸. 𑀏𑀓𑀁 𑀧𑀝𑀺𑀲𑁂𑀯𑀢𑀻𑀢𑀺 𑀲𑁂𑀯𑀺𑀢𑀩𑁆𑀩𑀬𑀼𑀢𑁆𑀢𑀓𑀁 𑀲𑁂𑀯𑀢𑀺. 𑀅𑀥𑀺𑀯𑀸𑀲𑁂𑀢𑀻𑀢𑀺 𑀅𑀥𑀺𑀯𑀸𑀲𑁂𑀢𑀩𑁆𑀩𑀬𑀼𑀢𑁆𑀢𑀓𑀁 𑀅𑀥𑀺𑀯𑀸𑀲𑁂𑀢𑀺. 𑀧𑀭𑀺𑀯𑀚𑁆𑀚𑁂𑀢𑀻𑀢𑀺 𑀧𑀭𑀺𑀯𑀚𑁆𑀚𑁂𑀢𑀩𑁆𑀩𑀬𑀼𑀢𑁆𑀢𑀓𑀁 𑀧𑀭𑀺𑀯𑀚𑁆𑀚𑁂𑀢𑀺. 𑀯𑀺𑀦𑁄𑀤𑁂𑀢𑀻𑀢𑀺 𑀦𑀻𑀳𑀭𑀺𑀢𑀩𑁆𑀩𑀬𑀼𑀢𑁆𑀢𑀓𑀁 𑀦𑀻𑀳𑀭𑀢𑀺. 𑀏𑀯𑀁 𑀔𑁄 𑀪𑀺𑀓𑁆𑀔𑀽𑀢𑀺 𑀏𑀯𑀁 𑀔𑁄 𑀪𑀺𑀓𑁆𑀔𑀼 𑀉𑀕𑁆𑀕𑀳𑀧𑀭𑀺𑀧𑀼𑀘𑁆𑀙𑀸𑀯𑀲𑁂𑀦 𑀘𑁂𑀯 𑀥𑀫𑁆𑀫𑀯𑀯𑀢𑁆𑀣𑀸𑀦𑀯𑀲𑁂𑀦 𑀘 𑀧𑀝𑀺𑀲𑁂𑀯𑀺𑀢𑀩𑁆𑀩𑀸𑀤𑀻𑀦𑀺 𑀲𑀼𑀧𑁆𑀧𑀝𑀺𑀯𑀺𑀤𑁆𑀥𑀸𑀦𑀺 𑀲𑀼𑀧𑀘𑁆𑀘𑀓𑁆𑀔𑀸𑀦𑀺 𑀓𑀢𑁆𑀯𑀸 𑀧𑀝𑀺𑀲𑁂𑀯𑀦𑁆𑀢𑁄 𑀅𑀥𑀺𑀯𑀸𑀲𑁂𑀦𑁆𑀢𑁄 𑀧𑀭𑀺𑀯𑀚𑁆𑀚𑁂𑀦𑁆𑀢𑁄 𑀯𑀺𑀦𑁄𑀤𑁂𑀦𑁆𑀢𑁄 𑀘 𑀪𑀺𑀓𑁆𑀔𑀼 𑀦𑀺𑀲𑁆𑀲𑀬𑀲𑀫𑁆𑀧𑀦𑁆𑀦𑁄 𑀦𑀸𑀫 𑀳𑁄𑀢𑀻𑀢𑀺.

𑁩. 𑀫𑁂𑀖𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁩. 𑀢𑀢𑀺𑀬𑁂 𑀘𑀸𑀮𑀺𑀓𑀸𑀬𑀦𑁆𑀢𑀺 𑀏𑀯𑀁𑀦𑀸𑀫𑀓𑁂 𑀦𑀕𑀭𑁂. 𑀢𑀁 𑀓𑀺𑀭 𑀘𑀮𑀫𑀕𑁆𑀕𑀁 𑀦𑀺𑀲𑁆𑀲𑀸𑀬 𑀓𑀢𑀢𑁆𑀢𑀸 𑀑𑀮𑁄𑀓𑁂𑀦𑁆𑀢𑀸𑀦𑀁 𑀘𑀮𑀫𑀸𑀦𑀁 𑀯𑀺𑀬 𑀉𑀧𑀝𑁆𑀞𑀸𑀢𑀺, 𑀢𑀲𑁆𑀫𑀸 𑀘𑀸𑀮𑀺𑀓𑀸𑀢𑀺 𑀲𑀗𑁆𑀔𑀁 𑀕𑀢𑀁. 𑀘𑀸𑀮𑀺𑀬𑀧𑀩𑁆𑀩𑀢𑁂𑀢𑀺 𑀲𑁄𑀧𑀺 𑀧𑀩𑁆𑀩𑀢𑁄 𑀲𑀩𑁆𑀩𑀲𑁂𑀢𑀢𑁆𑀢𑀸 𑀓𑀸𑀴𑀧𑀓𑁆𑀔𑀼𑀧𑁄𑀲𑀣𑁂 𑀑𑀮𑁄𑀓𑁂𑀦𑁆𑀢𑀸𑀦𑀁 𑀘𑀮𑀫𑀸𑀦𑁄 𑀯𑀺𑀬 𑀉𑀧𑀝𑁆𑀞𑀸𑀢𑀺, 𑀢𑀲𑁆𑀫𑀸 𑀘𑀸𑀮𑀺𑀬𑀧𑀩𑁆𑀩𑀢𑁄𑀢𑀺 𑀯𑀼𑀢𑁆𑀢𑁄. 𑀢𑀢𑁆𑀣 𑀫𑀳𑀦𑁆𑀢𑀁 𑀯𑀺𑀳𑀸𑀭𑀁 𑀓𑀸𑀭𑀬𑀺𑀁𑀲𑀼. 𑀇𑀢𑀺 𑀪𑀕𑀯𑀸 𑀢𑀁 𑀦𑀕𑀭𑀁 𑀦𑀺𑀲𑁆𑀲𑀸𑀬 𑀘𑀸𑀮𑀺𑀓𑀸𑀧𑀩𑁆𑀩𑀢𑀫𑀳𑀸𑀯𑀺𑀳𑀸𑀭𑁂 𑀯𑀺𑀳𑀭𑀢𑀺. 𑀚𑀦𑁆𑀢𑀼𑀕𑀸𑀫𑀦𑁆𑀢𑀺 𑀏𑀯𑀁𑀦𑀸𑀫𑀓𑀁 𑀅𑀧𑀭𑀫𑁆𑀧𑀺 𑀢𑀲𑁆𑀲𑁂𑀯 𑀯𑀺𑀳𑀸𑀭𑀲𑁆𑀲 𑀕𑁄𑀘𑀭𑀕𑀸𑀫𑀁. 𑀚𑀢𑁆𑀢𑀼𑀕𑀸𑀫𑀦𑁆𑀢𑀺𑀧𑀺 𑀧𑀞𑀦𑁆𑀢𑀺. 𑀧𑀥𑀸𑀦𑀢𑁆𑀣𑀺𑀓𑀲𑁆𑀲𑀸𑀢𑀺 𑀧𑀥𑀸𑀦𑀓𑀫𑁆𑀫𑀺𑀓𑀲𑁆𑀲. 𑀧𑀥𑀸𑀦𑀸𑀬𑀸𑀢𑀺 𑀲𑀫𑀡𑀥𑀫𑁆𑀫𑀓𑀭𑀡𑀢𑁆𑀣𑀸𑀬. 𑀆𑀕𑀫𑁂𑀳𑀺 𑀢𑀸𑀯𑀸𑀢𑀺 𑀲𑀢𑁆𑀣𑀸 𑀣𑁂𑀭𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀉𑀧𑀥𑀸𑀭𑁂𑀦𑁆𑀢𑁄 ‘‘𑀦 𑀢𑀸𑀯𑀲𑁆𑀲 𑀜𑀸𑀡𑀁 𑀧𑀭𑀺𑀧𑀓𑁆𑀓’’𑀦𑁆𑀢𑀺 𑀜𑀢𑁆𑀯𑀸 𑀧𑀝𑀺𑀩𑀸𑀳𑀦𑁆𑀢𑁄 𑀏𑀯𑀫𑀸𑀳. 𑀏𑀓𑀓𑀫𑁆𑀳𑀺 𑀢𑀸𑀯𑀸𑀢𑀺 𑀇𑀤𑀁 𑀧𑀦𑀲𑁆𑀲 ‘‘𑀏𑀯𑀫𑀬𑀁 𑀕𑀦𑁆𑀢𑁆𑀯𑀸𑀧𑀺 𑀓𑀫𑁆𑀫𑁂 𑀅𑀦𑀺𑀧𑁆𑀨𑀚𑁆𑀚𑀫𑀸𑀦𑁂 𑀦𑀺𑀭𑀸𑀲𑀗𑁆𑀓𑁄 𑀳𑀼𑀢𑁆𑀯𑀸 𑀧𑁂𑀫𑀯𑀲𑁂𑀦 𑀧𑀼𑀦 𑀆𑀕𑀘𑁆𑀙𑀺𑀲𑁆𑀲𑀢𑀻’’𑀢𑀺 𑀘𑀺𑀢𑁆𑀢𑀫𑀤𑁆𑀤𑀯𑀚𑀦𑀦𑀢𑁆𑀣𑀁 𑀆𑀳. 𑀦𑀢𑁆𑀣𑀺 𑀓𑀺𑀜𑁆𑀘𑀺 𑀉𑀢𑁆𑀢𑀭𑀺 𑀓𑀭𑀡𑀻𑀬𑀦𑁆𑀢𑀺 𑀘𑀢𑀽𑀲𑀼 𑀲𑀘𑁆𑀘𑁂𑀲𑀼 𑀘𑀢𑀼𑀦𑁆𑀦𑀁 𑀓𑀺𑀘𑁆𑀘𑀸𑀦𑀁 𑀓𑀢𑀢𑁆𑀢𑀸 𑀅𑀜𑁆𑀜𑀁 𑀉𑀢𑁆𑀢𑀭𑀺 𑀓𑀭𑀡𑀻𑀬𑀁 𑀦𑀸𑀫 𑀦𑀢𑁆𑀣𑀺. 𑀓𑀢𑀲𑁆𑀲 𑀯𑀸 𑀧𑀝𑀺𑀘𑀬𑁄𑀢𑀺 𑀅𑀥𑀺𑀕𑀢𑀲𑁆𑀲 𑀯𑀸 𑀧𑀼𑀦 𑀧𑀝𑀺𑀘𑀬𑁄𑀧𑀺 𑀦𑀢𑁆𑀣𑀺. 𑀦 𑀳𑀺 𑀪𑀸𑀯𑀺𑀢𑀫𑀕𑁆𑀕𑁄 𑀧𑀼𑀦 𑀪𑀸𑀯𑀻𑀬𑀢𑀺, 𑀦 𑀧𑀳𑀻𑀦𑀓𑀺𑀮𑁂𑀲𑀸𑀦𑀁 𑀧𑀼𑀦 𑀧𑀳𑀸𑀦𑀁 𑀅𑀢𑁆𑀣𑀺. 𑀧𑀥𑀸𑀦𑀦𑁆𑀢𑀺 𑀔𑁄, 𑀫𑁂𑀖𑀺𑀬, 𑀯𑀤𑀫𑀸𑀦𑀁 𑀓𑀺𑀦𑁆𑀢𑀺 𑀯𑀤𑁂𑀬𑁆𑀬𑀸𑀫𑀸𑀢𑀺 ‘‘𑀲𑀫𑀡𑀥𑀫𑁆𑀫𑀁 𑀓𑀭𑁄𑀫𑀻’’𑀢𑀺 𑀢𑀁 𑀯𑀤𑀫𑀸𑀦𑀁 𑀫𑀬𑀁 𑀅𑀜𑁆𑀜𑀁 𑀓𑀺𑀁 𑀦𑀸𑀫 𑀯𑀤𑁂𑀬𑁆𑀬𑀸𑀫.

𑀤𑀺𑀯𑀸𑀯𑀺𑀳𑀸𑀭𑀁 𑀦𑀺𑀲𑀻𑀤𑀻𑀢𑀺 𑀤𑀺𑀯𑀸𑀯𑀺𑀳𑀸𑀭𑀢𑁆𑀣𑀸𑀬 𑀦𑀺𑀲𑀻𑀤𑀺. 𑀦𑀺𑀲𑀻𑀤𑀦𑁆𑀢𑁄 𑀘 𑀬𑀲𑁆𑀫𑀺𑀁 𑀫𑀗𑁆𑀕𑀮𑀲𑀺𑀮𑀸𑀧𑀝𑁆𑀝𑁂 𑀧𑀼𑀩𑁆𑀩𑁂 𑀅𑀦𑀼𑀧𑀝𑀺𑀧𑀸𑀝𑀺𑀬𑀸 𑀧𑀜𑁆𑀘 𑀚𑀸𑀢𑀺𑀲𑀢𑀸𑀦𑀺 𑀭𑀸𑀚𑀸 𑀳𑀼𑀢𑁆𑀯𑀸 𑀉𑀬𑁆𑀬𑀸𑀦𑀓𑀻𑀴𑀺𑀓𑀁 𑀓𑀻𑀴𑀦𑁆𑀢𑁄 𑀢𑀺𑀯𑀺𑀥𑀦𑀸𑀝𑀓𑀧𑀭𑀺𑀯𑀸𑀭𑁄 𑀦𑀺𑀲𑀻𑀤𑀺, 𑀢𑀲𑁆𑀫𑀺𑀁𑀬𑁂𑀯 𑀦𑀺𑀲𑀻𑀤𑀺. 𑀅𑀣𑀲𑁆𑀲 𑀦𑀺𑀲𑀺𑀦𑁆𑀦𑀓𑀸𑀮𑀢𑁄 𑀧𑀝𑁆𑀞𑀸𑀬 𑀲𑀫𑀡𑀪𑀸𑀯𑁄 𑀚𑀳𑀺𑀢𑁄 𑀯𑀺𑀬 𑀅𑀳𑁄𑀲𑀺, 𑀭𑀸𑀚𑀯𑁂𑀲𑀁 𑀕𑀳𑁂𑀢𑁆𑀯𑀸 𑀦𑀸𑀝𑀓𑀯𑀭𑀧𑀭𑀺𑀯𑀼𑀢𑁄 𑀲𑁂𑀢𑀘𑁆𑀙𑀢𑁆𑀢𑀲𑁆𑀲 𑀳𑁂𑀝𑁆𑀞𑀸 𑀫𑀳𑀸𑀭𑀳𑁂 𑀧𑀮𑁆𑀮𑀗𑁆𑀓𑁂 𑀦𑀺𑀲𑀺𑀦𑁆𑀦𑁄 𑀯𑀺𑀬 𑀚𑀸𑀢𑁄. 𑀅𑀣𑀲𑁆𑀲 𑀢𑀁 𑀲𑀫𑁆𑀧𑀢𑁆𑀢𑀺𑀁 𑀅𑀲𑁆𑀲𑀸𑀤𑀬𑀢𑁄 𑀓𑀸𑀫𑀯𑀺𑀢𑀓𑁆𑀓𑁄 𑀉𑀤𑀧𑀸𑀤𑀺. 𑀲𑁄 𑀢𑀲𑁆𑀫𑀺𑀁𑀬𑁂𑀯 𑀔𑀡𑁂 𑀫𑀳𑀸𑀬𑁄𑀥𑁂𑀳𑀺 𑀕𑀳𑀺𑀢𑁂 𑀤𑁆𑀯𑁂 𑀘𑁄𑀭𑁂 𑀆𑀦𑁂𑀢𑁆𑀯𑀸 𑀧𑀼𑀭𑀢𑁄 𑀞𑀧𑀺𑀢𑁂 𑀯𑀺𑀬 𑀅𑀤𑁆𑀤𑀲. 𑀢𑁂𑀲𑀼 𑀏𑀓𑀲𑁆𑀲 𑀯𑀥𑀁 𑀆𑀡𑀸𑀧𑀦𑀯𑀲𑁂𑀦𑀲𑁆𑀲 𑀩𑁆𑀬𑀸𑀧𑀸𑀤𑀯𑀺𑀢𑀓𑁆𑀓𑁄 𑀉𑀧𑁆𑀧𑀚𑁆𑀚𑀺, 𑀏𑀓𑀲𑁆𑀲 𑀩𑀦𑁆𑀥𑀦𑀁 𑀆𑀡𑀸𑀧𑀦𑀯𑀲𑁂𑀦 𑀯𑀺𑀳𑀺𑀁𑀲𑀸𑀯𑀺𑀢𑀓𑁆𑀓𑁄. 𑀏𑀯𑀁 𑀲𑁄 𑀮𑀢𑀸𑀚𑀸𑀮𑁂𑀦 𑀭𑀼𑀓𑁆𑀔𑁄 𑀯𑀺𑀬 𑀫𑀥𑀼𑀫𑀓𑁆𑀔𑀺𑀓𑀸𑀳𑀺 𑀫𑀥𑀼𑀖𑀸𑀢𑀓𑁄 𑀯𑀺𑀬 𑀅𑀓𑀼𑀲𑀮𑀯𑀺𑀢𑀓𑁆𑀓𑁂𑀳𑀺 𑀧𑀭𑀺𑀓𑁆𑀔𑀺𑀢𑁆𑀢𑁄 𑀅𑀳𑁄𑀲𑀺. 𑀢𑀁 𑀲𑀦𑁆𑀥𑀸𑀬 𑁋 𑀅𑀣 𑀔𑁄 𑀆𑀬𑀲𑁆𑀫𑀢𑁄 𑀫𑁂𑀖𑀺𑀬𑀲𑁆𑀲𑀸𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀦𑁆𑀯𑀸𑀲𑀢𑁆𑀢𑀸𑀢𑀺 𑀅𑀦𑀼𑀩𑀤𑁆𑀥𑀸 𑀲𑀫𑁆𑀧𑀭𑀺𑀯𑀸𑀭𑀺𑀢𑀸. 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀻𑀢𑀺 𑀏𑀯𑀁 𑀧𑀸𑀧𑀯𑀺𑀢𑀓𑁆𑀓𑁂𑀳𑀺 𑀲𑀫𑁆𑀧𑀭𑀺𑀓𑀺𑀡𑁆𑀡𑁄 𑀓𑀫𑁆𑀫𑀝𑁆𑀞𑀸𑀦𑀁 𑀲𑀧𑁆𑀧𑀸𑀬𑀁 𑀓𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 ‘‘𑀇𑀤𑀁 𑀯𑀢 𑀤𑀺𑀲𑁆𑀯𑀸 𑀤𑀻𑀖𑀤𑀲𑁆𑀲𑀻 𑀪𑀕𑀯𑀸 𑀧𑀝𑀺𑀲𑁂𑀥𑁂𑀲𑀻’’𑀢𑀺 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 ‘‘𑀇𑀤𑀁 𑀓𑀸𑀭𑀡𑀁 𑀤𑀲𑀩𑀮𑀲𑁆𑀲 𑀆𑀭𑁄𑀘𑁂𑀲𑁆𑀲𑀸𑀫𑀻’’𑀢𑀺 𑀦𑀺𑀲𑀺𑀦𑁆𑀦𑀸𑀲𑀦𑀢𑁄 𑀯𑀼𑀝𑁆𑀞𑀸𑀬 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺.

𑁪. 𑀦𑀦𑁆𑀤𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁪. 𑀘𑀢𑀼𑀢𑁆𑀣𑁂 𑀉𑀧𑀝𑁆𑀞𑀸𑀦𑀲𑀸𑀮𑀸𑀬𑀦𑁆𑀢𑀺 𑀪𑁄𑀚𑀦𑀲𑀸𑀮𑀸𑀬𑀁. 𑀬𑁂𑀦𑀼𑀧𑀝𑁆𑀞𑀸𑀦𑀲𑀸𑀮𑀸𑀢𑀺 𑀲𑀢𑁆𑀣𑀸 𑀦𑀦𑁆𑀤𑀓𑀢𑁆𑀣𑁂𑀭𑁂𑀦 𑀫𑀥𑀼𑀭𑀲𑁆𑀲𑀭𑁂𑀦 𑀆𑀭𑀤𑁆𑀥𑀸𑀬 𑀥𑀫𑁆𑀫𑀤𑁂𑀲𑀦𑀸𑀬 𑀲𑀤𑁆𑀤𑀁 𑀲𑀼𑀢𑁆𑀯𑀸, ‘‘𑀆𑀦𑀦𑁆𑀤, 𑀓𑁄 𑀏𑀲𑁄 𑀉𑀧𑀝𑁆𑀞𑀸𑀦𑀲𑀸𑀮𑀸𑀬 𑀫𑀥𑀼𑀭𑀲𑁆𑀲𑀭𑁂𑀦 𑀥𑀫𑁆𑀫𑀁 𑀤𑁂𑀲𑁂𑀢𑀻’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀥𑀫𑁆𑀫𑀓𑀣𑀺𑀓𑀦𑀦𑁆𑀤𑀓𑀢𑁆𑀣𑁂𑀭𑀲𑁆𑀲 𑀅𑀚𑁆𑀚, 𑀪𑀦𑁆𑀢𑁂, 𑀯𑀸𑀭𑁄’’𑀢𑀺 𑀲𑀼𑀢𑁆𑀯𑀸 ‘‘𑀅𑀢𑀺𑀫𑀥𑀼𑀭𑀁 𑀓𑀢𑁆𑀯𑀸, 𑀆𑀦𑀦𑁆𑀤, 𑀏𑀲𑁄 𑀪𑀺𑀓𑁆𑀔𑀼 𑀥𑀫𑁆𑀫𑀁 𑀓𑀣𑁂𑀢𑀺, 𑀫𑀬𑀫𑁆𑀧𑀺 𑀕𑀦𑁆𑀢𑁆𑀯𑀸 𑀲𑀼𑀡𑀺𑀲𑁆𑀲𑀸𑀫𑀸’’𑀢𑀺 𑀯𑀢𑁆𑀯𑀸 𑀬𑁂𑀦𑀼𑀧𑀝𑁆𑀞𑀸𑀦𑀲𑀸𑀮𑀸 𑀢𑁂𑀦𑀼𑀧𑀲𑀗𑁆𑀓𑀫𑀺. 𑀩𑀳𑀺𑀤𑁆𑀯𑀸𑀭𑀓𑁄𑀝𑁆𑀞𑀓𑁂 𑀅𑀝𑁆𑀞𑀸𑀲𑀻𑀢𑀺 𑀙𑀩𑁆𑀩𑀡𑁆𑀡𑀭𑀲𑁆𑀫𑀺𑀬𑁄 𑀘𑀻𑀯𑀭𑀕𑀩𑁆𑀪𑁂 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀅𑀜𑁆𑀜𑀸𑀢𑀓𑀯𑁂𑀲𑁂𑀦 𑀅𑀝𑁆𑀞𑀸𑀲𑀺. 𑀓𑀣𑀸𑀧𑀭𑀺𑀬𑁄𑀲𑀸𑀦𑀁 𑀆𑀕𑀫𑀬𑀫𑀸𑀦𑁄𑀢𑀺 ‘‘𑀇𑀤𑀫𑀯𑁄𑀘𑀸’’𑀢𑀺 𑀇𑀤𑀁 𑀓𑀣𑀸𑀯𑀲𑀸𑀦𑀁 𑀉𑀤𑀺𑀓𑁆𑀔𑀫𑀸𑀦𑁄 𑀥𑀫𑁆𑀫𑀓𑀣𑀁 𑀲𑀼𑀡𑀦𑁆𑀢𑁄 𑀅𑀝𑁆𑀞𑀸𑀲𑀺𑀬𑁂𑀯. 𑀅𑀣𑀸𑀬𑀲𑁆𑀫𑀸 𑀆𑀦𑀦𑁆𑀤𑁄 𑀦𑀺𑀓𑁆𑀔𑀦𑁆𑀢𑁂 𑀧𑀞𑀫𑁂 𑀬𑀸𑀫𑁂 𑀲𑀢𑁆𑀣𑀼 𑀲𑀜𑁆𑀜𑀁 𑀅𑀤𑀸𑀲𑀺 𑁋 ‘‘𑀧𑀞𑀫𑀬𑀸𑀫𑁄 𑀅𑀢𑀺𑀓𑁆𑀓𑀦𑁆𑀢𑁄, 𑀪𑀦𑁆𑀢𑁂, 𑀣𑁄𑀓𑀁 𑀯𑀺𑀲𑁆𑀲𑀫𑀣𑀸’’𑀢𑀺. 𑀲𑀢𑁆𑀣𑀸 𑀢𑀢𑁆𑀣𑁂𑀯 𑀅𑀝𑁆𑀞𑀸𑀲𑀺. 𑀅𑀣𑀸𑀬𑀲𑁆𑀫𑀸 𑀆𑀦𑀦𑁆𑀤𑁄 𑀫𑀚𑁆𑀛𑀺𑀫𑀬𑀸𑀫𑁂𑀧𑀺 𑀦𑀺𑀓𑁆𑀔𑀦𑁆𑀢𑁂, ‘‘𑀪𑀦𑁆𑀢𑁂, 𑀢𑀼𑀫𑁆𑀳𑁂 𑀧𑀓𑀢𑀺𑀬𑀸 𑀔𑀢𑁆𑀢𑀺𑀬𑀲𑀼𑀔𑀼𑀫𑀸𑀮𑀸, 𑀧𑀼𑀦 𑀩𑀼𑀤𑁆𑀥𑀲𑀼𑀔𑀼𑀫𑀸𑀮𑀸𑀢𑀺 𑀧𑀭𑀫𑀲𑀼𑀔𑀼𑀫𑀸𑀮𑀸, 𑀫𑀚𑁆𑀛𑀺𑀫𑀬𑀸𑀫𑁄𑀧𑀺 𑀅𑀢𑀺𑀓𑁆𑀓𑀦𑁆𑀢𑁄, 𑀫𑀼𑀳𑀼𑀢𑁆𑀢𑀁 𑀯𑀺𑀲𑁆𑀲𑀫𑀣𑀸’’𑀢𑀺 𑀆𑀳. 𑀲𑀢𑁆𑀣𑀸 𑀢𑀢𑁆𑀣𑁂𑀯 𑀅𑀝𑁆𑀞𑀸𑀲𑀺. 𑀢𑀢𑁆𑀣 𑀞𑀺𑀢𑀓𑀲𑁆𑀲𑁂𑀯𑀲𑁆𑀲 𑀅𑀭𑀼𑀡𑀕𑁆𑀕𑀁 𑀧𑀜𑁆𑀜𑀸𑀬𑀺𑀢𑁆𑀣. 𑀅𑀭𑀼𑀡𑀼𑀕𑁆𑀕𑀫𑀦𑀜𑁆𑀘 𑀣𑁂𑀭𑀲𑁆𑀲 ‘‘𑀇𑀤𑀫𑀯𑁄𑀘𑀸’’𑀢𑀺 𑀧𑀸𑀧𑁂𑀢𑁆𑀯𑀸 𑀓𑀣𑀸𑀧𑀭𑀺𑀬𑁄𑀲𑀸𑀦𑀜𑁆𑀘 𑀤𑀲𑀩𑀮𑀲𑁆𑀲 𑀙𑀩𑁆𑀩𑀡𑁆𑀡𑀲𑀭𑀻𑀭𑀲𑁆𑀫𑀺𑀯𑀺𑀲𑁆𑀲𑀚𑁆𑀚𑀦𑀜𑁆𑀘 𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀅𑀳𑁄𑀲𑀺. 𑀅𑀕𑁆𑀕𑀴𑀁 𑀆𑀓𑁄𑀝𑁂𑀲𑀻𑀢𑀺 𑀅𑀕𑁆𑀕𑀦𑀔𑁂𑀦 𑀤𑁆𑀯𑀸𑀭𑀓𑀯𑀸𑀝𑀁 𑀆𑀓𑁄𑀝𑁂𑀲𑀺.

𑀲𑀸𑀭𑀚𑁆𑀚𑀫𑀸𑀦𑀭𑀽𑀧𑁄𑀢𑀺 𑀳𑀭𑀸𑀬𑀫𑀸𑀦𑁄 𑀑𑀢𑁆𑀢𑀧𑁆𑀧𑀫𑀸𑀦𑁄. 𑀤𑁄𑀫𑀦𑀲𑁆𑀲𑀲𑀸𑀭𑀚𑁆𑀚𑀁 𑀧𑀦𑀲𑁆𑀲 𑀦𑀢𑁆𑀣𑀺. 𑀏𑀢𑁆𑀢𑀓𑀫𑁆𑀧𑀺 𑀦𑁄 𑀦𑀧𑁆𑀧𑀝𑀺𑀪𑀸𑀲𑁂𑀬𑁆𑀬𑀸𑀢𑀺 𑀧𑀝𑀺𑀲𑀫𑁆𑀪𑀺𑀤𑀸𑀧𑁆𑀧𑀢𑁆𑀢𑀲𑁆𑀲 𑀅𑀧𑁆𑀧𑀝𑀺𑀪𑀸𑀦𑀁 𑀦𑀸𑀫 𑀦𑀢𑁆𑀣𑀺. 𑀏𑀢𑁆𑀢𑀓𑀫𑁆𑀧𑀺 𑀦 𑀓𑀣𑁂𑀬𑁆𑀬𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀲𑀸𑀥𑀼 𑀲𑀸𑀥𑀽𑀢𑀺 𑀣𑁂𑀭𑀲𑁆𑀲 𑀥𑀫𑁆𑀫𑀤𑁂𑀲𑀦𑀁 𑀲𑀫𑁆𑀧𑀳𑀁𑀲𑀦𑁆𑀢𑁄 𑀆𑀳. 𑀅𑀬𑀜𑁆𑀳𑁂𑀢𑁆𑀣 𑀅𑀢𑁆𑀣𑁄 ‘‘𑀲𑀼𑀕𑀳𑀺𑀢𑀸 𑀘 𑀢𑁂 𑀥𑀫𑁆𑀫𑀤𑁂𑀲𑀦𑀸 𑀲𑀼𑀓𑀣𑀺𑀢𑀸 𑀘𑀸’’𑀢𑀺. 𑀓𑀼𑀮𑀧𑀼𑀢𑁆𑀢𑀸𑀦𑀦𑁆𑀢𑀺 𑀆𑀘𑀸𑀭𑀓𑀼𑀮𑀧𑀼𑀢𑁆𑀢𑀸𑀦𑀜𑁆𑀘𑁂𑀯 𑀚𑀸𑀢𑀺𑀓𑀼𑀮𑀧𑀼𑀢𑁆𑀢𑀸𑀦𑀜𑁆𑀘. 𑀅𑀭𑀺𑀬𑁄 𑀘 𑀢𑀼𑀡𑁆𑀳𑀺𑀪𑀸𑀯𑁄𑀢𑀺 𑀤𑀼𑀢𑀺𑀬𑀚𑁆𑀛𑀸𑀦𑀲𑀫𑀸𑀧𑀢𑁆𑀢𑀺𑀁 𑀲𑀦𑁆𑀥𑀸𑀬𑁂𑀯𑀫𑀸𑀳. 𑀅𑀥𑀺𑀧𑀜𑁆𑀜𑀸𑀥𑀫𑁆𑀫𑀯𑀺𑀧𑀲𑁆𑀲𑀦𑀸𑀬𑀸𑀢𑀺 𑀲𑀗𑁆𑀔𑀸𑀭𑀧𑀭𑀺𑀕𑁆𑀕𑀳𑀯𑀺𑀧𑀲𑁆𑀲𑀦𑀸𑀜𑀸𑀡𑀲𑁆𑀲. 𑀘𑀢𑀼𑀧𑁆𑀧𑀸𑀤𑀓𑁄𑀢𑀺 𑀅𑀲𑁆𑀲𑀕𑁄𑀡𑀕𑀤𑁆𑀭𑀪𑀸𑀤𑀺𑀓𑁄. 𑀇𑀤𑀁 𑀯𑀢𑁆𑀯𑀸𑀢𑀺 𑀇𑀫𑀁 𑀘𑀢𑀽𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀥𑀫𑁆𑀫𑀁 𑀓𑀣𑀬𑀺𑀢𑁆𑀯𑀸. 𑀯𑀺𑀳𑀸𑀭𑀁 𑀧𑀸𑀯𑀺𑀲𑀻𑀢𑀺 𑀕𑀦𑁆𑀥𑀓𑀼𑀝𑀺𑀁 𑀧𑀯𑀺𑀝𑁆𑀞𑁄.

𑀓𑀸𑀮𑁂𑀦 𑀥𑀫𑁆𑀫𑀲𑁆𑀲𑀯𑀦𑁂𑀢𑀺 𑀓𑀸𑀮𑁂 𑀓𑀸𑀮𑁂 𑀥𑀫𑁆𑀫𑀲𑁆𑀲𑀯𑀦𑀲𑁆𑀫𑀺𑀁. 𑀥𑀫𑁆𑀫𑀲𑀸𑀓𑀘𑁆𑀙𑀸𑀬𑀸𑀢𑀺 𑀧𑀜𑁆𑀳𑀓𑀣𑀸𑀬. 𑀕𑀫𑁆𑀪𑀻𑀭𑀁 𑀅𑀢𑁆𑀣𑀧𑀤𑀦𑁆𑀢𑀺 𑀕𑀫𑁆𑀪𑀻𑀭𑀁 𑀕𑀼𑀴𑁆𑀳𑀁 𑀭𑀳𑀲𑁆𑀲𑀁 𑀅𑀢𑁆𑀣𑀁. 𑀧𑀜𑁆𑀜𑀸𑀬𑀸𑀢𑀺 𑀲𑀳𑀯𑀺𑀧𑀲𑁆𑀲𑀦𑀸𑀬 𑀫𑀕𑁆𑀕𑀧𑀜𑁆𑀜𑀸𑀬. 𑀲𑀫𑁆𑀫𑀲𑀦𑀧𑀝𑀺𑀯𑁂𑀥𑀧𑀜𑁆𑀜𑀸𑀧𑀺 𑀉𑀕𑁆𑀕𑀳𑀧𑀭𑀺𑀧𑀼𑀘𑁆𑀙𑀸𑀧𑀜𑁆𑀜𑀸𑀧𑀺 𑀯𑀝𑁆𑀝𑀢𑀺𑀬𑁂𑀯. 𑀧𑀢𑁆𑀢𑁄 𑀯𑀸 𑀧𑀚𑁆𑀚𑀢𑀺 𑀯𑀸𑀢𑀺 𑀅𑀭𑀳𑀢𑁆𑀢𑀁 𑀧𑀢𑁆𑀢𑁄 𑀯𑀸 𑀧𑀸𑀧𑀼𑀡𑀺𑀲𑁆𑀲𑀢𑀺 𑀯𑀸𑀢𑀺 𑀏𑀯𑀁 𑀕𑀼𑀡𑀲𑀫𑁆𑀪𑀸𑀯𑀦𑀸𑀬 𑀲𑀫𑁆𑀪𑀸𑀯𑁂𑀢𑀺. 𑀅𑀧𑁆𑀧𑀢𑁆𑀢𑀫𑀸𑀦𑀲𑀸𑀢𑀺 𑀅𑀧𑁆𑀧𑀢𑁆𑀢𑀅𑀭𑀳𑀢𑁆𑀢𑀸, 𑀅𑀭𑀳𑀢𑁆𑀢𑀁 𑀯𑀸 𑀅𑀧𑁆𑀧𑀢𑁆𑀢𑀁 𑀫𑀸𑀦𑀲𑀁 𑀏𑀢𑁂𑀲𑀦𑁆𑀢𑀺𑀧𑀺 𑀅𑀧𑁆𑀧𑀢𑁆𑀢𑀫𑀸𑀦𑀲𑀸. 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀦𑁆𑀢𑀺 𑀏𑀢𑁆𑀣 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑁄 𑀮𑁄𑀓𑀺𑀬𑁄𑀧𑀺 𑀯𑀝𑁆𑀝𑀢𑀺 𑀮𑁄𑀓𑀼𑀢𑁆𑀢𑀭𑁄𑀧𑀺.

𑁫. 𑀩𑀮𑀲𑀼𑀢𑁆𑀢𑀯𑀡𑁆𑀡𑀦𑀸

𑁫. 𑀧𑀜𑁆𑀘𑀫𑁂 𑀅𑀯𑀺𑀚𑁆𑀚𑀸𑀓𑁄𑀲𑀚𑁆𑀚𑀲𑀸𑀯𑀚𑁆𑀚𑀅𑀲𑁆𑀲𑀤𑁆𑀥𑀺𑀬𑁂𑀲𑀼 𑀅𑀓𑀫𑁆𑀧𑀦𑀢𑁄 𑀧𑀜𑁆𑀜𑀸𑀩𑀮𑀸𑀤𑀻𑀦𑀺 𑀤𑀝𑁆𑀞𑀩𑁆𑀩𑀸𑀦𑀺. 𑀅𑀓𑀼𑀲𑀮𑀲𑀗𑁆𑀔𑀸𑀢𑀸𑀢𑀺 𑀅𑀓𑀼𑀲𑀮𑀸𑀢𑀺 𑀜𑀸𑀢𑀸. 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣. 𑀦𑀸𑀮𑀫𑀭𑀺𑀬𑀸𑀢𑀺 𑀅𑀭𑀺𑀬𑀪𑀸𑀯𑀁 𑀓𑀸𑀢𑀼𑀁 𑀅𑀲𑀫𑀢𑁆𑀣𑀸, 𑀅𑀭𑀺𑀬𑀸𑀦𑀁 𑀯𑀸 𑀅𑀦𑀦𑀼𑀘𑁆𑀙𑀯𑀺𑀓𑀸. 𑀯𑁄𑀤𑀺𑀝𑁆𑀞𑀸𑀢𑀺 𑀲𑀼𑀝𑁆𑀞𑀼 𑀤𑀺𑀝𑁆𑀞𑀸. 𑀯𑁄𑀘𑀭𑀺𑀢𑀸𑀢𑀺 𑀫𑀦𑁄𑀤𑁆𑀯𑀸𑀭𑁂 𑀲𑀫𑀼𑀤𑀸𑀘𑀸𑀭𑀧𑁆𑀧𑀢𑁆𑀢𑀸. 𑀅𑀢𑁆𑀣𑀺𑀓𑀲𑁆𑀲𑀸𑀢𑀺 𑀥𑀫𑁆𑀫𑀤𑁂𑀲𑀦𑀸𑀬 𑀅𑀢𑁆𑀣𑀺𑀓𑀲𑁆𑀲. 𑀆𑀚𑀻𑀯𑀺𑀓𑀸𑀪𑀬𑀦𑁆𑀢𑀺 𑀚𑀻𑀯𑀺𑀢𑀯𑀼𑀢𑁆𑀢𑀺𑀪𑀬𑀁. 𑀅𑀲𑀺𑀮𑁄𑀓𑀪𑀬𑀦𑁆𑀢𑀺 𑀕𑀭𑀳𑀸𑀪𑀬𑀁. 𑀧𑀭𑀺𑀲𑀸𑀲𑀸𑀭𑀚𑁆𑀚𑀪𑀬𑀦𑁆𑀢𑀺 𑀧𑀭𑀺𑀲𑀁 𑀧𑀢𑁆𑀯𑀸 𑀲𑀸𑀭𑀚𑁆𑀚𑀁 𑀑𑀓𑁆𑀓𑀫𑀦𑀪𑀬𑀁. 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀯𑀝𑁆𑀝𑀯𑀺𑀯𑀝𑁆𑀝𑀁 𑀓𑀣𑀺𑀢𑀁.

𑁬. 𑀲𑁂𑀯𑀦𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁬. 𑀙𑀝𑁆𑀞𑁂 𑀚𑀻𑀯𑀺𑀢𑀧𑀭𑀺𑀓𑁆𑀔𑀸𑀭𑀸𑀢𑀺 𑀚𑀻𑀯𑀺𑀢𑀲𑀫𑁆𑀪𑀸𑀭𑀸. 𑀲𑀫𑀼𑀤𑀸𑀦𑁂𑀢𑀩𑁆𑀩𑀸𑀢𑀺 𑀲𑀫𑀸𑀳𑀭𑀺𑀢𑀩𑁆𑀩𑀸. 𑀓𑀲𑀺𑀭𑁂𑀦 𑀲𑀫𑀼𑀤𑀸𑀕𑀘𑁆𑀙𑀦𑁆𑀢𑀻𑀢𑀺 𑀤𑀼𑀓𑁆𑀔𑁂𑀦 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀭𑀢𑁆𑀢𑀺𑀪𑀸𑀕𑀁 𑀯𑀸 𑀤𑀺𑀯𑀲𑀪𑀸𑀕𑀁 𑀯𑀸𑀢𑀺 𑀏𑀢𑁆𑀣 𑀭𑀢𑁆𑀢𑀺𑀪𑀸𑀕𑁂 𑀜𑀢𑁆𑀯𑀸 𑀭𑀢𑁆𑀢𑀺𑀪𑀸𑀕𑁂𑀬𑁂𑀯 𑀧𑀓𑁆𑀓𑀫𑀺𑀢𑀩𑁆𑀩𑀁, 𑀭𑀢𑁆𑀢𑀺𑀁 𑀘𑀡𑁆𑀟𑀯𑀸𑀴𑀸𑀤𑀺𑀧𑀭𑀺𑀧𑀦𑁆𑀣𑁂 𑀲𑀢𑀺 𑀅𑀭𑀼𑀡𑀼𑀕𑁆𑀕𑀫𑀦𑀁 𑀆𑀕𑀫𑁂𑀢𑀩𑁆𑀩𑀁. 𑀤𑀺𑀯𑀲𑀪𑀸𑀕𑁂 𑀜𑀢𑁆𑀯𑀸 𑀤𑀺𑀯𑀸 𑀧𑀓𑁆𑀓𑀫𑀺𑀢𑀩𑁆𑀩𑀁, 𑀤𑀺𑀯𑀸 𑀧𑀭𑀺𑀧𑀦𑁆𑀣𑁂 𑀲𑀢𑀺 𑀲𑀽𑀭𑀺𑀬𑀢𑁆𑀣𑀗𑁆𑀕𑀫𑀦𑀁 𑀆𑀕𑀫𑁂𑀢𑀩𑁆𑀩𑀁. 𑀲𑀗𑁆𑀔𑀸𑀧𑀻𑀢𑀺 𑀲𑀸𑀫𑀜𑁆𑀜𑀢𑁆𑀣𑀲𑁆𑀲 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀆𑀕𑀫𑀦𑀁 𑀚𑀸𑀦𑀺𑀢𑁆𑀯𑀸. 𑀲𑁄 𑀧𑀼𑀕𑁆𑀕𑀮𑁄𑀢𑀺 𑀧𑀤𑀲𑁆𑀲 𑀧𑀦 ‘‘𑀦𑀸𑀦𑀼𑀩𑀦𑁆𑀥𑀺𑀢𑀩𑁆𑀩𑁄’’𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑁄. 𑀅𑀦𑀸𑀧𑀼𑀘𑁆𑀙𑀸𑀢𑀺 𑀇𑀥 𑀧𑀦 𑀢𑀁 𑀧𑀼𑀕𑁆𑀕𑀮𑀁 𑀅𑀦𑀸𑀧𑀼𑀘𑁆𑀙𑀸 𑀧𑀓𑁆𑀓𑀫𑀺𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀅𑀧𑀺 𑀧𑀦𑀼𑀚𑁆𑀚𑀫𑀸𑀦𑁂𑀦𑀸𑀢𑀺 𑀅𑀧𑀺 𑀦𑀺𑀓𑁆𑀓𑀟𑁆𑀠𑀺𑀬𑀫𑀸𑀦𑁂𑀦. 𑀏𑀯𑀭𑀽𑀧𑁄 𑀳𑀺 𑀧𑀼𑀕𑁆𑀕𑀮𑁄 𑀲𑀘𑁂𑀧𑀺 𑀤𑀸𑀭𑀼𑀓𑀮𑀸𑀧𑀲𑀢𑀁 𑀯𑀸 𑀉𑀤𑀓𑀖𑀝𑀲𑀢𑀁 𑀯𑀸 𑀯𑀸𑀮𑀺𑀓𑀸𑀖𑀝𑀲𑀢𑀁 𑀯𑀸 𑀤𑀡𑁆𑀟𑀁 𑀆𑀭𑁄𑀧𑁂𑀢𑀺, 𑀫𑀸 𑀇𑀥 𑀯𑀲𑀻𑀢𑀺 𑀦𑀺𑀓𑁆𑀓𑀟𑁆𑀠𑀸𑀧𑁂𑀢𑀺 𑀯𑀸, 𑀢𑀁 𑀔𑀫𑀸𑀧𑁂𑀢𑁆𑀯𑀸𑀧𑀺 𑀬𑀸𑀯𑀚𑀻𑀯𑀁 𑀲𑁄 𑀅𑀦𑀼𑀩𑀦𑁆𑀥𑀺𑀢𑀩𑁆𑀩𑁄𑀯, 𑀦 𑀯𑀺𑀚𑀳𑀺𑀢𑀩𑁆𑀩𑁄.

𑁭. 𑀲𑀼𑀢𑀯𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁭. 𑀲𑀢𑁆𑀢𑀫𑁂 𑀧𑀜𑁆𑀘 𑀞𑀸𑀦𑀸𑀦𑀺 𑀅𑀚𑁆𑀛𑀸𑀘𑀭𑀺𑀢𑀼𑀦𑁆𑀢𑀺 𑀧𑀜𑁆𑀘 𑀓𑀸𑀭𑀡𑀸𑀦𑀺 𑀅𑀢𑀺𑀓𑁆𑀓𑀫𑀺𑀢𑀼𑀁. 𑀧𑀸𑀡𑀦𑁆𑀢𑀺 𑀅𑀦𑁆𑀢𑀫𑀲𑁄 𑀓𑀼𑀦𑁆𑀣𑀓𑀺𑀧𑀺𑀮𑁆𑀮𑀺𑀓𑀁. 𑀅𑀤𑀺𑀦𑁆𑀦𑀦𑁆𑀢𑀺 𑀅𑀦𑁆𑀢𑀫𑀲𑁄 𑀢𑀺𑀡𑀲𑀮𑀸𑀓𑀫𑁆𑀧𑀺 𑀧𑀭𑀲𑀦𑁆𑀢𑀓𑀁. 𑀣𑁂𑀬𑁆𑀬𑀲𑀗𑁆𑀔𑀸𑀢𑀦𑁆𑀢𑀺 𑀣𑁂𑀬𑁆𑀬𑀘𑀺𑀢𑁆𑀢𑁂𑀦. 𑀲𑀦𑁆𑀦𑀺𑀥𑀺𑀓𑀸𑀭𑀓𑀁 𑀓𑀸𑀫𑁂 𑀧𑀭𑀺𑀪𑀼𑀜𑁆𑀚𑀺𑀢𑀼𑀦𑁆𑀢𑀺 𑀲𑀦𑁆𑀦𑀺𑀥𑀺𑀁 𑀓𑀢𑁆𑀯𑀸 𑀞𑀧𑁂𑀢𑁆𑀯𑀸 𑀯𑀢𑁆𑀣𑀼𑀓𑀸𑀫𑀓𑀺𑀮𑁂𑀲𑀓𑀸𑀫𑁂 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀅𑀪𑀩𑁆𑀩𑁄. 𑀅𑀓𑀧𑁆𑀧𑀺𑀬𑀁 𑀓𑀸𑀫𑀕𑀼𑀡𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁. 𑀩𑀼𑀤𑁆𑀥𑀁 𑀧𑀘𑁆𑀘𑀓𑁆𑀔𑀸𑀢𑀼𑀦𑁆𑀢𑀺 ‘‘𑀦 𑀩𑀼𑀤𑁆𑀥𑁄 𑀅𑀬’’𑀦𑁆𑀢𑀺 𑀏𑀯𑀁 𑀧𑀝𑀺𑀓𑁆𑀔𑀺𑀧𑀺𑀢𑀼𑀁. 𑀥𑀫𑁆𑀫𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀏𑀯𑀁 𑀢𑀸𑀯 𑀅𑀝𑁆𑀞𑀓𑀣𑀸𑀬 𑀆𑀕𑀢𑀁. 𑀧𑀸𑀴𑀺𑀬𑀁 𑀧𑀦 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀅𑀕𑀢𑀺𑀕𑀫𑀦𑀸𑀦𑀺 𑀓𑀣𑀺𑀢𑀸𑀦𑀺.

𑁮-𑁧𑁦. 𑀲𑀚𑁆𑀛𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁮-𑁧𑁦. 𑀅𑀝𑁆𑀞𑀫𑁂 𑀩𑀼𑀤𑁆𑀥𑀸𑀤𑀻𑀦𑀁 𑀧𑀘𑁆𑀘𑀓𑁆𑀔𑀸𑀦𑀁 𑀓𑀣𑀺𑀢𑀁. 𑀦𑀯𑀫𑁂 𑀧𑀼𑀣𑀼𑀚𑁆𑀚𑀦𑁂𑀦 𑀲𑀤𑁆𑀥𑀺𑀁 𑀕𑀳𑀺𑀢𑀢𑁆𑀢𑀸 ‘‘𑀆𑀳𑀼𑀦𑁂𑀬𑁆𑀬𑀸’’𑀢𑀺 𑀯𑀼𑀢𑁆𑀢𑀁. 𑀤𑀲𑀫𑁂 𑀕𑁄𑀢𑁆𑀭𑀪𑀽𑀢𑀺 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀲𑁆𑀲 𑀅𑀦𑀦𑁆𑀢𑀭𑀧𑀘𑁆𑀘𑀬𑁂𑀦 𑀲𑀺𑀔𑀸𑀧𑀢𑁆𑀢𑀩𑀮𑀯𑀯𑀺𑀧𑀲𑁆𑀲𑀦𑀸𑀘𑀺𑀢𑁆𑀢𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀲𑀫𑁆𑀩𑁄𑀥𑀯𑀕𑁆𑀕𑁄 𑀧𑀞𑀫𑁄.

𑁨. 𑀲𑀻𑀳𑀦𑀸𑀤𑀯𑀕𑁆𑀕𑁄

𑁧. 𑀲𑀻𑀳𑀦𑀸𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁧. 𑀤𑀼𑀢𑀺𑀬𑀲𑁆𑀲 𑀧𑀞𑀫𑁂 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀻𑀢𑀺 ‘‘𑀲𑀘𑁂 𑀲𑀢𑁆𑀣𑀸 𑀘𑀸𑀭𑀺𑀓𑀁 𑀧𑀓𑁆𑀓𑀫𑀺𑀢𑀼𑀓𑀸𑀫𑁄 𑀅𑀲𑁆𑀲, 𑀇𑀫𑀲𑁆𑀫𑀺𑀁 𑀓𑀸𑀮𑁂 𑀧𑀓𑁆𑀓𑀫𑁂𑀬𑁆𑀬. 𑀳𑀦𑁆𑀤𑀸𑀳𑀁 𑀘𑀸𑀭𑀺𑀓𑀁 𑀕𑀫𑀦𑀢𑁆𑀣𑀸𑀬 𑀲𑀢𑁆𑀣𑀸𑀭𑀁 𑀆𑀧𑀼𑀘𑁆𑀙𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀼𑀢𑁄 𑀉𑀧𑀲𑀗𑁆𑀓𑀫𑀺. 𑀆𑀬𑀲𑁆𑀫𑀸 𑀫𑀁, 𑀪𑀦𑁆𑀢𑁂𑀢𑀺 𑀲𑁄 𑀓𑀺𑀭 𑀪𑀺𑀓𑁆𑀔𑀼 𑀣𑁂𑀭𑀁 𑀫𑀳𑀢𑀸 𑀪𑀺𑀓𑁆𑀔𑀼𑀧𑀭𑀺𑀯𑀸𑀭𑁂𑀦 𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 ‘‘𑀇𑀫𑁂 𑀪𑀺𑀓𑁆𑀔𑀽 𑀢𑀣𑀸𑀕𑀢𑀁 𑀧𑀳𑀸𑀬 𑀲𑀸𑀭𑀺𑀧𑀼𑀢𑁆𑀢𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀦𑀺𑀓𑁆𑀔𑀦𑁆𑀢𑀸, 𑀕𑀫𑀦𑀯𑀺𑀘𑁆𑀙𑁂𑀤𑀫𑀲𑁆𑀲 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀅𑀝𑁆𑀞𑀸𑀦𑁂 𑀓𑁄𑀧𑀁 𑀩𑀦𑁆𑀥𑀺𑀢𑁆𑀯𑀸 𑀏𑀯𑀫𑀸𑀳. 𑀢𑀢𑁆𑀣 𑀆𑀲𑀚𑁆𑀚𑀸𑀢𑀺 𑀖𑀝𑁆𑀝𑁂𑀢𑁆𑀯𑀸. 𑀅𑀧𑁆𑀧𑀝𑀺𑀦𑀺𑀲𑁆𑀲𑀚𑁆𑀚𑀸𑀢𑀺 𑀅𑀓𑁆𑀔𑀫𑀸𑀧𑁂𑀢𑁆𑀯𑀸 𑀅𑀘𑁆𑀘𑀬𑀁 𑀅𑀤𑁂𑀲𑁂𑀢𑁆𑀯𑀸. 𑀓𑀺𑀲𑁆𑀫𑀺𑀁 𑀧𑀦 𑀲𑁄 𑀓𑀸𑀭𑀡𑁂 𑀆𑀖𑀸𑀢𑀁 𑀩𑀦𑁆𑀥𑀻𑀢𑀺? 𑀣𑁂𑀭𑀲𑁆𑀲 𑀓𑀺𑀭 𑀤𑀲𑀩𑀮𑀁 𑀯𑀦𑁆𑀤𑀺𑀢𑁆𑀯𑀸 𑀉𑀝𑁆𑀞𑀸𑀬 𑀕𑀘𑁆𑀙𑀢𑁄 𑀘𑀻𑀯𑀭𑀓𑀡𑁆𑀡𑁄 𑀢𑀲𑁆𑀲 𑀲𑀭𑀻𑀭𑀁 𑀨𑀼𑀲𑀺, 𑀯𑀸𑀢𑁄 𑀧𑀳𑀭𑀻𑀢𑀺𑀧𑀺 𑀯𑀤𑀦𑁆𑀢𑀺. 𑀏𑀢𑁆𑀢𑀓𑁂𑀦 𑀆𑀖𑀸𑀢𑀁 𑀩𑀦𑁆𑀥𑀺𑀢𑁆𑀯𑀸 𑀣𑁂𑀭𑀁 𑀫𑀳𑀢𑀸 𑀧𑀭𑀺𑀯𑀸𑀭𑁂𑀦 𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 𑀉𑀲𑀽𑀬𑀫𑀸𑀦𑁄 ‘‘𑀕𑀫𑀦𑀯𑀺𑀘𑁆𑀙𑁂𑀤𑀫𑀲𑁆𑀲 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀏𑀯𑀫𑀸𑀳. 𑀏𑀳𑀺 𑀢𑁆𑀯𑀁 𑀪𑀺𑀓𑁆𑀔𑀽𑀢𑀺 𑀲𑀢𑁆𑀣𑀸 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀯𑀘𑀦𑀁 𑀲𑀼𑀢𑁆𑀯𑀸 ‘‘𑀦 𑀢𑀁 𑀪𑀺𑀓𑁆𑀔𑀼 𑀲𑀸𑀭𑀺𑀧𑀼𑀢𑁆𑀢𑁄 𑀧𑀳𑀭𑀻𑀢𑀺 𑀯𑀼𑀢𑁆𑀢𑁂, ‘𑀪𑀦𑁆𑀢𑁂, 𑀢𑀼𑀫𑁆𑀳𑁂 𑀅𑀢𑁆𑀢𑀦𑁄 𑀅𑀕𑁆𑀕𑀲𑀸𑀯𑀓𑀲𑁆𑀲𑁂𑀯 𑀧𑀓𑁆𑀔𑀁 𑀯𑀳𑀣, 𑀦 𑀫𑀬𑁆𑀳’𑀦𑁆𑀢𑀺 𑀫𑀬𑀺 𑀫𑀦𑁄𑀧𑀤𑁄𑀲𑀁 𑀓𑀢𑁆𑀯𑀸 𑀅𑀧𑀸𑀬𑁂 𑀦𑀺𑀩𑁆𑀩𑀢𑁆𑀢𑁂𑀬𑁆𑀬𑀸’’𑀢𑀺 𑀜𑀢𑁆𑀯𑀸 ‘‘𑀲𑀸𑀭𑀺𑀧𑀼𑀢𑁆𑀢𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀇𑀫𑀫𑀢𑁆𑀣𑀁 𑀧𑀼𑀘𑁆𑀙𑀺𑀲𑁆𑀲𑀸𑀫𑀻’’𑀢𑀺 𑀏𑀓𑀁 𑀪𑀺𑀓𑁆𑀔𑀼𑀁 𑀆𑀫𑀦𑁆𑀢𑁂𑀢𑁆𑀯𑀸 𑀏𑀯𑀫𑀸𑀳. 𑀅𑀯𑀸𑀧𑀼𑀭𑀡𑀁 𑀆𑀤𑀸𑀬𑀸𑀢𑀺 𑀓𑀼𑀜𑁆𑀘𑀺𑀓𑀁 𑀕𑀳𑁂𑀢𑁆𑀯𑀸. 𑀲𑀻𑀳𑀦𑀸𑀤𑀦𑁆𑀢𑀺 𑀲𑁂𑀝𑁆𑀞𑀦𑀸𑀤𑀁 𑀧𑀫𑀼𑀔𑀦𑀸𑀤𑀁 𑀅𑀧𑁆𑀧𑀝𑀺𑀯𑀢𑁆𑀢𑀺𑀬𑀦𑀸𑀤𑀁. 𑀏𑀯𑀁 𑀤𑁆𑀯𑀻𑀳𑀺 𑀫𑀳𑀸𑀣𑁂𑀭𑁂𑀳𑀺 𑀆𑀭𑁄𑀘𑀺𑀢𑁄 𑀪𑀺𑀓𑁆𑀔𑀼𑀲𑀗𑁆𑀖𑁄 𑀭𑀢𑁆𑀢𑀺𑀝𑁆𑀞𑀸𑀦𑀤𑀺𑀯𑀸𑀝𑁆𑀞𑀸𑀦𑀸𑀦𑀺 𑀧𑀳𑀸𑀬 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀅𑀕𑀫𑀸𑀲𑀺. 𑀔𑀻𑀬𑀦𑀥𑀫𑁆𑀫𑀦𑁆𑀢𑀺 𑀓𑀣𑀸𑀥𑀫𑁆𑀫𑀁.

𑀕𑀽𑀣𑀕𑀢𑀦𑁆𑀢𑀺 𑀕𑀽𑀣𑀫𑁂𑀯. 𑀲𑁂𑀲𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀧𑀣𑀯𑀻𑀲𑀫𑁂𑀦𑀸𑀢𑀺 𑀅𑀓𑀼𑀚𑁆𑀛𑀦𑀝𑁆𑀞𑁂𑀦 𑀧𑀣𑀯𑀺𑀬𑀸 𑀲𑀫𑀸𑀦𑁂𑀦. 𑀦 𑀳𑀺 𑀧𑀣𑀯𑀻 ‘‘𑀫𑀬𑀺 𑀲𑀼𑀘𑀺𑀁 𑀦𑀺𑀓𑁆𑀔𑀺𑀧𑀦𑁆𑀢𑀻’’𑀢𑀺 𑀲𑁄𑀫𑀦𑀲𑁆𑀲𑀁 𑀓𑀭𑁄𑀢𑀺, 𑀦 ‘‘𑀅𑀲𑀼𑀘𑀺𑀁 𑀦𑀺𑀓𑁆𑀔𑀺𑀧𑀦𑁆𑀢𑀻’’𑀢𑀺 𑀤𑁄𑀫𑀦𑀲𑁆𑀲𑀁. 𑀫𑀬𑁆𑀳𑀫𑁆𑀧𑀺 𑀏𑀯𑀭𑀽𑀧𑀁 𑀘𑀺𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀯𑀺𑀧𑀼𑀮𑁂𑀦𑀸𑀢𑀺 𑀅𑀧𑀭𑀺𑀢𑁆𑀢𑁂𑀦. 𑀫𑀳𑀕𑁆𑀕𑀢𑁂𑀦𑀸𑀢𑀺 𑀫𑀳𑀦𑁆𑀢𑀪𑀸𑀯𑀁 𑀕𑀢𑁂𑀦. 𑀅𑀧𑁆𑀧𑀫𑀸𑀡𑁂𑀦𑀸𑀢𑀺 𑀯𑀟𑁆𑀠𑀺𑀢𑀧𑁆𑀧𑀫𑀸𑀡𑁂𑀦. 𑀅𑀯𑁂𑀭𑁂𑀦𑀸𑀢𑀺 𑀅𑀓𑀼𑀲𑀮𑀯𑁂𑀭𑀧𑀼𑀕𑁆𑀕𑀮𑀯𑁂𑀭𑀭𑀳𑀺𑀢𑁂𑀦. 𑀅𑀩𑁆𑀬𑀸𑀧𑀚𑁆𑀛𑁂𑀦𑀸𑀢𑀺 𑀦𑀺𑀤𑁆𑀤𑀼𑀓𑁆𑀔𑁂𑀦 𑀯𑀺𑀕𑀢𑀤𑁄𑀫𑀦𑀲𑁆𑀲𑁂𑀦. 𑀲𑁄 𑀇𑀥𑀸𑀢𑀺 𑀲𑁄 𑀅𑀦𑀼𑀧𑀝𑁆𑀞𑀺𑀢𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀲𑀢𑀺𑀧𑀝𑁆𑀞𑀸𑀦𑁄 𑀪𑀺𑀓𑁆𑀔𑀼 𑀏𑀯𑀁 𑀓𑀭𑁂𑀬𑁆𑀬, 𑀫𑀸𑀤𑀺𑀲𑁄 𑀓𑀣𑀁 𑀏𑀯𑀭𑀽𑀧𑀁 𑀓𑀭𑀺𑀲𑁆𑀲𑀢𑀺, 𑀪𑀦𑁆𑀢𑁂𑀢𑀺 𑀧𑀞𑀫𑀁 𑀲𑀻𑀳𑀦𑀸𑀤𑀁 𑀦𑀤𑀺. 𑀏𑀯𑀁 𑀲𑀩𑁆𑀩𑀢𑁆𑀣 𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸.

𑀭𑀚𑁄𑀳𑀭𑀡𑀦𑁆𑀢𑀺 𑀭𑀚𑀲𑀫𑁆𑀫𑀚𑁆𑀚𑀦𑀘𑁄𑀴𑀓𑀁, 𑀧𑀸𑀤𑀧𑀼𑀜𑁆𑀙𑀦𑁆𑀢𑀺, 𑀢𑀲𑁆𑀲𑁂𑀯 𑀦𑀸𑀫𑀁. 𑀓𑀴𑁄𑀧𑀺𑀳𑀢𑁆𑀣𑁄𑀢𑀺 𑀧𑀘𑁆𑀙𑀺𑀳𑀢𑁆𑀣𑁄 𑀉𑀓𑁆𑀔𑀮𑀺𑀳𑀢𑁆𑀣𑁄 𑀯𑀸. 𑀦𑀦𑁆𑀢𑀓𑀯𑀸𑀲𑀻𑀢𑀺 𑀅𑀦𑁆𑀢𑀘𑁆𑀙𑀺𑀦𑁆𑀦𑀧𑀺𑀮𑁄𑀢𑀺𑀓𑀯𑀲𑀦𑁄. 𑀲𑀽𑀭𑀢𑁄𑀢𑀺 𑀲𑀼𑀘𑀺𑀲𑀻𑀮𑁄 𑀲𑁄𑀭𑀘𑁆𑀘𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀲𑀼𑀤𑀦𑁆𑀢𑁄𑀢𑀺 𑀲𑀼𑀝𑁆𑀞𑀼 𑀤𑀫𑀣𑀁 𑀉𑀧𑀕𑀢𑁄. 𑀲𑀼𑀯𑀺𑀦𑀻𑀢𑁄𑀢𑀺 𑀲𑀼𑀝𑁆𑀞𑀼 𑀲𑀺𑀓𑁆𑀔𑀺𑀢𑁄. 𑀦 𑀓𑀜𑁆𑀘𑀺 𑀳𑀺𑀁𑀲𑀢𑀻𑀢𑀺 𑀯𑀺𑀲𑀸𑀡𑀸𑀤𑀻𑀲𑀼 𑀕𑀡𑁆𑀳𑀦𑁆𑀢𑀫𑁆𑀧𑀺 𑀧𑀺𑀝𑁆𑀞𑀺𑀁 𑀧𑀭𑀺𑀫𑀚𑁆𑀚𑀦𑁆𑀢𑀫𑁆𑀧𑀺 𑀦 𑀓𑀜𑁆𑀘𑀺 𑀯𑀺𑀳𑁂𑀞𑁂𑀢𑀺. 𑀉𑀲𑀪𑀙𑀺𑀦𑁆𑀦𑀯𑀺𑀲𑀸𑀡𑀲𑀫𑁂𑀦𑀸𑀢𑀺 𑀉𑀲𑀪𑀲𑁆𑀲 𑀙𑀺𑀦𑁆𑀦𑀯𑀺𑀲𑀸𑀡𑀲𑁆𑀲 𑀘𑀺𑀢𑁆𑀢𑀲𑀤𑀺𑀲𑁂𑀦.

𑀅𑀝𑁆𑀝𑀻𑀬𑁂𑀬𑁆𑀬𑀸𑀢𑀺 𑀅𑀝𑁆𑀝𑁄 𑀧𑀻𑀴𑀺𑀢𑁄 𑀪𑀯𑁂𑀬𑁆𑀬. 𑀳𑀭𑀸𑀬𑁂𑀬𑁆𑀬𑀸𑀢𑀺 𑀮𑀚𑁆𑀚𑁂𑀬𑁆𑀬. 𑀚𑀺𑀕𑀼𑀘𑁆𑀙𑁂𑀬𑁆𑀬𑀸𑀢𑀺 𑀚𑀺𑀕𑀼𑀘𑁆𑀙𑀁 𑀆𑀧𑀚𑁆𑀚𑁂𑀬𑁆𑀬.

𑀫𑁂𑀤𑀓𑀣𑀸𑀮𑀺𑀓𑀦𑁆𑀢𑀺 𑀫𑁂𑀤𑀓𑀣𑀸𑀮𑀺𑀓𑀸 𑀯𑀼𑀘𑁆𑀘𑀢𑀺 𑀲𑀽𑀦𑀓𑀸𑀭𑀓𑁂𑀳𑀺 𑀬𑀽𑀲𑀦𑀺𑀓𑁆𑀔𑀫𑀦𑀢𑁆𑀣𑀸𑀬 𑀢𑀢𑁆𑀣 𑀢𑀢𑁆𑀣 𑀓𑀢𑀙𑀺𑀤𑁆𑀤𑀸 𑀣𑀸𑀮𑀺𑀓𑀸. 𑀧𑀭𑀺𑀳𑀭𑁂𑀬𑁆𑀬𑀸𑀢𑀺 𑀫𑀁𑀲𑀲𑁆𑀲 𑀧𑀽𑀭𑁂𑀢𑁆𑀯𑀸 𑀉𑀓𑁆𑀔𑀺𑀧𑀺𑀢𑁆𑀯𑀸 𑀕𑀘𑁆𑀙𑁂𑀬𑁆𑀬. 𑀙𑀺𑀤𑁆𑀤𑀸𑀯𑀙𑀺𑀤𑁆𑀤𑀦𑁆𑀢𑀺 𑀧𑀭𑀺𑀢𑁆𑀢𑀫𑀳𑀦𑁆𑀢𑁂𑀳𑀺 𑀙𑀺𑀤𑁆𑀤𑁂𑀳𑀺 𑀲𑀫𑀦𑁆𑀦𑀸𑀕𑀢𑀁. 𑀉𑀕𑁆𑀖𑀭𑀦𑁆𑀢𑀦𑁆𑀢𑀺 𑀉𑀧𑀭𑀺𑀫𑀼𑀔𑁂𑀳𑀺 𑀙𑀺𑀤𑁆𑀤𑁂𑀳𑀺 𑀦𑀺𑀓𑁆𑀔𑀫𑀫𑀸𑀦𑀬𑀽𑀲𑀁. 𑀧𑀕𑁆𑀖𑀭𑀦𑁆𑀢𑀦𑁆𑀢𑀺 𑀅𑀥𑁄𑀫𑀼𑀔𑁂𑀳𑀺 𑀦𑀺𑀓𑁆𑀔𑀫𑀫𑀸𑀦𑀬𑀽𑀲𑀁. 𑀏𑀯𑀫𑀲𑁆𑀲 𑀲𑀓𑀮𑀲𑀭𑀻𑀭𑀁 𑀬𑀽𑀲𑀫𑀓𑁆𑀔𑀺𑀢𑀁 𑀪𑀯𑁂𑀬𑁆𑀬. 𑀙𑀺𑀤𑁆𑀤𑀸𑀯𑀙𑀺𑀤𑁆𑀤𑀦𑁆𑀢𑀺 𑀦𑀯𑀳𑀺 𑀯𑀡𑀫𑀼𑀔𑁂𑀳𑀺 𑀧𑀭𑀺𑀢𑁆𑀢𑀫𑀳𑀦𑁆𑀢 𑀙𑀺𑀤𑁆𑀤𑀁. 𑀏𑀯𑀫𑁂𑀢𑁆𑀣 𑀅𑀝𑁆𑀞𑀫𑀦𑀯𑀫𑁂𑀳𑀺 𑀤𑁆𑀯𑀻𑀳𑀺 𑀅𑀗𑁆𑀕𑁂𑀳𑀺 𑀣𑁂𑀭𑁄 𑀅𑀢𑁆𑀢𑀦𑁄 𑀲𑀭𑀻𑀭𑁂 𑀦𑀺𑀘𑁆𑀙𑀦𑁆𑀤𑀭𑀸𑀕𑀢𑀁 𑀓𑀣𑁂𑀲𑀺.

𑀅𑀣 𑀔𑁄 𑀲𑁄 𑀪𑀺𑀓𑁆𑀔𑀽𑀢𑀺 𑀏𑀯𑀁 𑀣𑁂𑀭𑁂𑀦 𑀦𑀯𑀳𑀺 𑀓𑀸𑀭𑀡𑁂𑀳𑀺 𑀲𑀻𑀳𑀦𑀸𑀤𑁂 𑀦𑀤𑀺𑀢𑁂 𑀅𑀣 𑀲𑁄 𑀪𑀺𑀓𑁆𑀔𑀼. 𑀅𑀘𑁆𑀘𑀬𑁄𑀢𑀺 𑀅𑀧𑀭𑀸𑀥𑁄. 𑀫𑀁 𑀅𑀘𑁆𑀘𑀕𑀫𑀸𑀢𑀺 𑀫𑀁 𑀅𑀢𑀺𑀓𑁆𑀓𑀫𑁆𑀫 𑀅𑀪𑀺𑀪𑀯𑀺𑀢𑁆𑀯𑀸 𑀧𑀯𑀢𑁆𑀢𑁄. 𑀧𑀢𑀺𑀕𑁆𑀕𑀡𑁆𑀳𑀢𑀽𑀢𑀺 𑀔𑀫𑀢𑀼. 𑀆𑀬𑀢𑀺𑀁 𑀲𑀁𑀯𑀭𑀸𑀬𑀸𑀢𑀺 𑀅𑀦𑀸𑀕𑀢𑁂 𑀲𑀁𑀯𑀭𑀡𑀢𑁆𑀣𑀸𑀬, 𑀧𑀼𑀦 𑀏𑀯𑀭𑀽𑀧𑀲𑁆𑀲 𑀅𑀧𑀭𑀸𑀥𑀲𑁆𑀲 𑀅𑀓𑀭𑀡𑀢𑁆𑀣𑀸𑀬. 𑀢𑀕𑁆𑀖𑀸𑀢𑀺 𑀏𑀓𑀁𑀲𑁂𑀦. 𑀬𑀣𑀸𑀥𑀫𑁆𑀫𑀁 𑀧𑀝𑀺𑀓𑀭𑁄𑀲𑀻𑀢𑀺 𑀬𑀣𑀸 𑀥𑀫𑁆𑀫𑁄 𑀞𑀺𑀢𑁄, 𑀢𑀣𑁂𑀯 𑀓𑀭𑁄𑀲𑀺, 𑀔𑀫𑀸𑀧𑁂𑀲𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀁 𑀢𑁂 𑀫𑀬𑀁 𑀧𑀝𑀺𑀕𑁆𑀕𑀡𑁆𑀳𑀸𑀫𑀸𑀢𑀺 𑀢𑀁 𑀢𑀯 𑀅𑀧𑀭𑀸𑀥𑀁 𑀫𑀬𑀁 𑀔𑀫𑀸𑀫. 𑀯𑀼𑀤𑁆𑀥𑀺𑀳𑁂𑀲𑀸 𑀪𑀺𑀓𑁆𑀔𑀼 𑀅𑀭𑀺𑀬𑀲𑁆𑀲 𑀯𑀺𑀦𑀬𑁂𑀢𑀺 𑀏𑀲𑀸 𑀪𑀺𑀓𑁆𑀔𑀼 𑀅𑀭𑀺𑀬𑀲𑁆𑀲 𑀯𑀺𑀦𑀬𑁂 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀲𑀸𑀲𑀦𑁂 𑀯𑀼𑀟𑁆𑀠𑀺 𑀦𑀸𑀫. 𑀓𑀢𑀫𑀸? 𑀅𑀘𑁆𑀘𑀬𑀁 𑀅𑀘𑁆𑀘𑀬𑀢𑁄 𑀤𑀺𑀲𑁆𑀯𑀸 𑀬𑀣𑀸𑀥𑀫𑁆𑀫𑀁 𑀧𑀝𑀺𑀓𑀭𑀺𑀢𑁆𑀯𑀸 𑀆𑀬𑀢𑀺𑀁 𑀲𑀁𑀯𑀭𑀸𑀧𑀚𑁆𑀚𑀦𑀸. 𑀤𑁂𑀲𑀦𑀁 𑀧𑀦 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑀁 𑀓𑀭𑁄𑀦𑁆𑀢𑁄 𑀬𑁄 𑀅𑀘𑁆𑀘𑀬𑀁 𑀅𑀘𑁆𑀘𑀬𑀢𑁄 𑀤𑀺𑀲𑁆𑀯𑀸 𑀬𑀣𑀸𑀥𑀫𑁆𑀫𑀁 𑀧𑀝𑀺𑀓𑀭𑁄𑀢𑀺, 𑀆𑀬𑀢𑀺𑀁 𑀲𑀁𑀯𑀭𑀁 𑀆𑀧𑀚𑁆𑀚𑀢𑀻𑀢𑀺 𑀆𑀳. 𑀨𑀮𑀢𑀻𑀢𑀺 𑀲𑀘𑁂 𑀳𑀺 𑀣𑁂𑀭𑁄 𑀦 𑀔𑀫𑁂𑀬𑁆𑀬, 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀢𑀢𑁆𑀣𑁂𑀯 𑀲𑀢𑁆𑀢𑀥𑀸 𑀫𑀼𑀤𑁆𑀥𑀸 𑀨𑀮𑁂𑀬𑁆𑀬. 𑀢𑀲𑁆𑀫𑀸 𑀪𑀕𑀯𑀸 𑀏𑀯𑀫𑀸𑀳. 𑀲𑀘𑁂 𑀫𑀁 𑀲𑁄𑀢𑀺 𑀲𑀘𑁂 𑀫𑀁 𑀅𑀬𑀁 𑀪𑀺𑀓𑁆𑀔𑀼 𑀔𑀫𑀸𑀳𑀻𑀢𑀺 𑀏𑀯𑀁 𑀯𑀤𑀢𑀺. 𑀔𑀫𑀢𑀼 𑀘 𑀫𑁂 𑀲𑁄𑀢𑀺 𑀅𑀬𑀫𑁆𑀧𑀺 𑀘𑀸𑀬𑀲𑁆𑀫𑀸 𑀫𑀬𑁆𑀳𑀁 𑀔𑀫𑀢𑀽𑀢𑀺 𑀏𑀯𑀁 𑀣𑁂𑀭𑁄 𑀢𑀲𑁆𑀲 𑀅𑀘𑁆𑀘𑀬𑀁 𑀧𑀝𑀺𑀕𑁆𑀕𑀡𑁆𑀳𑀺𑀢𑁆𑀯𑀸 𑀲𑀬𑀫𑁆𑀧𑀺 𑀢𑀁 𑀲𑀢𑁆𑀣𑀼 𑀲𑀫𑁆𑀫𑀼𑀔𑁂 𑀔𑀫𑀸𑀧𑁂𑀲𑀻𑀢𑀺.

𑁨. 𑀲𑀉𑀧𑀸𑀤𑀺𑀲𑁂𑀲𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁨. 𑀤𑀼𑀢𑀺𑀬𑁂 𑀲𑀉𑀧𑀸𑀤𑀺𑀲𑁂𑀲𑀦𑁆𑀢𑀺 𑀲𑀉𑀧𑀸𑀤𑀸𑀦𑀲𑁂𑀲𑀁. 𑀅𑀦𑀼𑀧𑀸𑀤𑀺𑀲𑁂𑀲𑀦𑁆𑀢𑀺 𑀉𑀧𑀸𑀤𑀸𑀦𑀲𑁂𑀲𑀭𑀳𑀺𑀢𑀁 𑀦𑀺𑀕𑁆𑀕𑀳𑀡𑀁. 𑀫𑀢𑁆𑀢𑀲𑁄 𑀓𑀸𑀭𑀻𑀢𑀺 𑀧𑀫𑀸𑀡𑀓𑀸𑀭𑀻 𑀦 𑀧𑀭𑀺𑀧𑀽𑀭𑀓𑀸𑀭𑀻. 𑀦 𑀢𑀸𑀯𑀸𑀬𑀁, 𑀲𑀸𑀭𑀺𑀧𑀼𑀢𑁆𑀢, 𑀥𑀫𑁆𑀫𑀧𑀭𑀺𑀬𑀸𑀬𑁄 𑀧𑀝𑀺𑀪𑀸𑀲𑀻𑀢𑀺 𑀅𑀧𑁆𑀧𑀝𑀺𑀪𑀸𑀦𑀁 𑀦𑀸𑀫 𑀪𑀕𑀯𑀢𑁄 𑀦𑀢𑁆𑀣𑀺, 𑀦 𑀢𑀸𑀯𑀸𑀳𑀁 𑀇𑀫𑀁 𑀥𑀫𑁆𑀫𑀧𑀭𑀺𑀬𑀸𑀬𑀁 𑀓𑀣𑁂𑀲𑀺𑀦𑁆𑀢𑀺 𑀅𑀬𑀁 𑀧𑀦𑁂𑀢𑁆𑀣 𑀅𑀢𑁆𑀣𑁄. 𑀫𑀸𑀬𑀺𑀫𑀁 𑀥𑀫𑁆𑀫𑀧𑀭𑀺𑀬𑀸𑀬𑀁 𑀲𑀼𑀢𑁆𑀯𑀸 𑀧𑀫𑀸𑀤𑀁 𑀆𑀳𑀭𑀺𑀁𑀲𑀽𑀢𑀺 ‘‘𑀫𑀬𑀁 𑀓𑀺𑀭 𑀘𑀢𑀽𑀳𑀺 𑀅𑀧𑀸𑀬𑁂𑀳𑀺 𑀫𑀼𑀢𑁆𑀢𑀸’’𑀢𑀺 𑀉𑀧𑀭𑀺 𑀅𑀭𑀳𑀢𑁆𑀢𑀢𑁆𑀣𑀸𑀬 𑀯𑀻𑀭𑀺𑀬𑀁 𑀅𑀓𑀭𑁄𑀦𑁆𑀢𑀸 𑀫𑀸 𑀧𑀫𑀸𑀤𑀁 𑀆𑀧𑀚𑁆𑀚𑀺𑀁𑀲𑀼. 𑀧𑀜𑁆𑀳𑀸𑀥𑀺𑀧𑁆𑀧𑀸𑀬𑁂𑀦 𑀪𑀸𑀲𑀺𑀢𑁄𑀢𑀺 𑀢𑀬𑀸 𑀧𑀼𑀘𑁆𑀙𑀺𑀢𑀧𑀜𑁆𑀳𑀲𑁆𑀲 𑀲𑀪𑀸𑀯𑁂𑀦 𑀓𑀣𑀺𑀢𑁄𑀢𑀺 𑀤𑀲𑁆𑀲𑁂𑀢𑀺. 𑀇𑀫𑁂𑀲𑀁 𑀧𑀦 𑀦𑀯𑀦𑁆𑀦𑀁 𑀧𑀼𑀕𑁆𑀕𑀮𑀸𑀦𑀁 𑀪𑀯𑁂𑀲𑀼 𑀙𑀦𑁆𑀤𑀭𑀸𑀕𑀯𑀺𑀦𑁄𑀤𑀦𑀢𑁆𑀣𑀁 𑀏𑀢𑀫𑁂𑀯 𑀅𑀢𑁆𑀣𑀼𑀧𑁆𑀧𑀢𑁆𑀢𑀺𑀁 𑀓𑀢𑁆𑀯𑀸 𑁋 ‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀅𑀧𑁆𑀧𑀫𑀢𑁆𑀢𑀓𑁄𑀧𑀺 𑀕𑀽𑀣𑁄 𑀤𑀼𑀕𑁆𑀕𑀦𑁆𑀥𑁄 𑀳𑁄𑀢𑀺, 𑀏𑀯𑀫𑁂𑀯 𑀔𑁄 𑀔𑁆𑀯𑀸𑀳𑀁, 𑀪𑀺𑀓𑁆𑀔𑀯𑁂, 𑀅𑀧𑁆𑀧𑀫𑀢𑁆𑀢𑀓𑀫𑁆𑀧𑀺 𑀪𑀯𑀁 𑀦 𑀯𑀡𑁆𑀡𑁂𑀫𑀺 𑀅𑀦𑁆𑀢𑀫𑀲𑁄 𑀅𑀘𑁆𑀙𑀭𑀸𑀲𑀗𑁆𑀖𑀸𑀢𑀫𑀢𑁆𑀢𑀫𑁆𑀧𑀻’’𑀢𑀺 𑀇𑀫𑀁 𑀲𑀼𑀢𑁆𑀢𑀁 (𑀅. 𑀦𑀺. 𑁧.𑁩𑁨𑁧) 𑀅𑀪𑀸𑀲𑀺. 𑀦 𑀓𑁂𑀯𑀮𑀜𑁆𑀘 𑀏𑀢𑁂𑀲𑀁𑀬𑁂𑀯 𑀦𑀯𑀦𑁆𑀦𑀁 𑀧𑀼𑀕𑁆𑀕𑀮𑀸𑀦𑀁 𑀕𑀢𑀺 𑀦𑀺𑀩𑀤𑁆𑀥𑀸, 𑀬𑁂𑀲𑀁 𑀧𑀦 𑀓𑀼𑀮𑀸𑀦𑀁 𑀢𑀻𑀡𑀺 𑀲𑀭𑀡𑀸𑀦𑀺 𑀧𑀜𑁆𑀘 𑀲𑀻𑀮𑀸𑀦𑀺 𑀏𑀓𑀁 𑀲𑀮𑀸𑀓𑀪𑀢𑁆𑀢𑀁 𑀏𑀓𑀁 𑀧𑀓𑁆𑀔𑀺𑀬𑀪𑀢𑁆𑀢𑀁 𑀏𑀓𑀁 𑀯𑀲𑁆𑀲𑀸𑀯𑀸𑀲𑀺𑀓𑀁 𑀏𑀓𑀸 𑀧𑁄𑀓𑁆𑀔𑀭𑀡𑀻 𑀏𑀓𑁄 𑀆𑀯𑀸𑀲𑁄, 𑀏𑀯𑀭𑀽𑀧𑀸𑀦𑀺 𑀦𑀺𑀩𑀤𑁆𑀥𑀧𑀼𑀜𑁆𑀜𑀸𑀦𑀺 𑀅𑀢𑁆𑀣𑀺. 𑀢𑁂𑀲𑀫𑁆𑀧𑀺 𑀕𑀢𑀺 𑀦𑀺𑀩𑀤𑁆𑀥𑀸, 𑀲𑁄𑀢𑀸𑀧𑀦𑁆𑀦𑀲𑀤𑀺𑀲𑀸𑀦𑁂𑀯 𑀢𑀸𑀦𑀺 𑀓𑀼𑀮𑀸𑀦𑀺.

𑁩. 𑀓𑁄𑀝𑁆𑀞𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁩. 𑀢𑀢𑀺𑀬𑁂 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀦𑁆𑀢𑀺 𑀇𑀫𑀲𑁆𑀫𑀺𑀁 𑀬𑁂𑀯𑀢𑁆𑀢𑀪𑀸𑀯𑁂 𑀯𑀺𑀧𑀘𑁆𑀘𑀦𑀓𑀓𑀫𑁆𑀫𑀁. 𑀲𑀫𑁆𑀧𑀭𑀸𑀬𑀯𑁂𑀤𑀦𑀻𑀬𑀦𑁆𑀢𑀺 𑀤𑀼𑀢𑀺𑀬𑁂 𑀅𑀢𑁆𑀢𑀪𑀸𑀯𑁂 𑀯𑀺𑀧𑀘𑁆𑀘𑀦𑀓𑀓𑀫𑁆𑀫𑀁. 𑀲𑀼𑀔𑀯𑁂𑀤𑀦𑀻𑀬𑀦𑁆𑀢𑀺 𑀲𑀼𑀔𑀯𑁂𑀤𑀦𑀸𑀚𑀦𑀓𑀓𑀫𑁆𑀫𑀁. 𑀤𑀼𑀓𑁆𑀔𑀯𑁂𑀤𑀦𑀻𑀬𑀦𑁆𑀢𑀺 𑀤𑀼𑀓𑁆𑀔𑀯𑁂𑀤𑀦𑀸𑀚𑀦𑀓𑀓𑀫𑁆𑀫𑀁. 𑀧𑀭𑀺𑀧𑀓𑁆𑀓𑀯𑁂𑀤𑀦𑀻𑀬𑀦𑁆𑀢𑀺 𑀮𑀤𑁆𑀥𑀯𑀺𑀧𑀸𑀓𑀯𑀸𑀭𑀁. 𑀅𑀧𑀭𑀺𑀧𑀓𑁆𑀓𑀯𑁂𑀤𑀦𑀻𑀬𑀦𑁆𑀢𑀺 𑀅𑀮𑀤𑁆𑀥𑀯𑀺𑀧𑀸𑀓𑀯𑀸𑀭𑀁. 𑀩𑀳𑀼𑀯𑁂𑀤𑀦𑀻𑀬𑀦𑁆𑀢𑀺 𑀩𑀳𑀼𑀯𑀺𑀧𑀸𑀓𑀤𑀸𑀬𑀓𑀁. 𑀅𑀧𑁆𑀧𑀯𑁂𑀤𑀦𑀻𑀬𑀦𑁆𑀢𑀺 𑀦 𑀩𑀳𑀼𑀯𑀺𑀧𑀸𑀓𑀤𑀸𑀬𑀓𑀁. 𑀅𑀯𑁂𑀤𑀦𑀻𑀬𑀦𑁆𑀢𑀺 𑀯𑀺𑀧𑀸𑀓𑀯𑁂𑀤𑀦𑀸𑀬 𑀅𑀤𑀸𑀬𑀓𑀁. 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀯𑀝𑁆𑀝𑀯𑀺𑀯𑀝𑁆𑀝𑀁 𑀓𑀣𑀺𑀢𑀁.

𑁪. 𑀲𑀫𑀺𑀤𑁆𑀥𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁪. 𑀘𑀢𑀼𑀢𑁆𑀣𑁂 𑀲𑀫𑀺𑀤𑁆𑀥𑀻𑀢𑀺 𑀅𑀢𑁆𑀢𑀪𑀸𑀯𑀲𑀫𑀺𑀤𑁆𑀥𑀢𑀸𑀬 𑀏𑀯𑀁𑀮𑀤𑁆𑀥𑀦𑀸𑀫𑁄 𑀣𑁂𑀭𑀲𑁆𑀲 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀢𑁆𑀣𑁂𑀭𑁄. 𑀓𑀺𑀫𑀸𑀭𑀫𑁆𑀫𑀡𑀸𑀢𑀺 𑀓𑀺𑀁𑀧𑀘𑁆𑀘𑀬𑀸. 𑀲𑀗𑁆𑀓𑀧𑁆𑀧𑀯𑀺𑀢𑀓𑁆𑀓𑀸𑀢𑀺 𑀲𑀗𑁆𑀓𑀧𑁆𑀧𑀪𑀽𑀢𑀸 𑀯𑀺𑀢𑀓𑁆𑀓𑀸. 𑀦𑀸𑀫𑀭𑀽𑀧𑀸𑀭𑀫𑁆𑀫𑀡𑀸𑀢𑀺 𑀦𑀸𑀫𑀭𑀽𑀧𑀧𑀘𑁆𑀘𑀬𑀸. 𑀇𑀫𑀺𑀦𑀸 𑀘𑀢𑁆𑀢𑀸𑀭𑁄 𑀅𑀭𑀽𑀧𑀓𑁆𑀔𑀦𑁆𑀥𑀸 𑀪𑀽𑀢𑀼𑀧𑀸𑀤𑀸𑀬𑀭𑀽𑀧𑀜𑁆𑀘 𑀯𑀺𑀢𑀓𑁆𑀓𑀸𑀦𑀁 𑀧𑀘𑁆𑀘𑀬𑁄𑀢𑀺 𑀤𑀲𑁆𑀲𑁂𑀢𑀺. 𑀓𑁆𑀯 𑀦𑀸𑀦𑀢𑁆𑀢𑀁 𑀕𑀘𑁆𑀙𑀦𑁆𑀢𑀻𑀢𑀺 𑀓𑀲𑁆𑀫𑀺𑀁 𑀞𑀸𑀦𑁂 𑀦𑀸𑀦𑀸𑀲𑀪𑀸𑀯𑀢𑀁 𑀯𑁂𑀫𑀢𑁆𑀢𑀁 𑀕𑀘𑁆𑀙𑀦𑁆𑀢𑀺. 𑀥𑀸𑀢𑀼𑀲𑀽𑀢𑀺 𑀭𑀽𑀧𑀥𑀸𑀢𑀼𑀆𑀤𑀻𑀲𑀼. 𑀅𑀜𑁆𑀜𑁄𑀬𑁂𑀯 𑀳𑀺 𑀭𑀽𑀧𑀯𑀺𑀢𑀓𑁆𑀓𑁄, 𑀅𑀜𑁆𑀜𑁂 𑀲𑀤𑁆𑀤𑀯𑀺𑀢𑀓𑁆𑀓𑀸𑀤𑀬𑁄𑀢𑀺. 𑀨𑀲𑁆𑀲𑀲𑀫𑀼𑀤𑀬𑀸𑀢𑀺 𑀲𑀫𑁆𑀧𑀬𑀼𑀢𑁆𑀢𑀨𑀲𑁆𑀲𑀧𑀘𑁆𑀘𑀬𑀸. 𑀯𑁂𑀤𑀦𑀸𑀲𑀫𑁄𑀲𑀭𑀡𑀸𑀢𑀺 𑀢𑀺𑀲𑁆𑀲𑁄 𑀯𑁂𑀤𑀦𑀸 𑀲𑀫𑁄𑀲𑀭𑀡𑀸. 𑀏𑀢𑁆𑀢𑀓𑁂𑀦 𑀓𑀼𑀲𑀮𑀸𑀓𑀼𑀲𑀮𑀫𑀺𑀲𑁆𑀲𑀓𑀸 𑀓𑀣𑀺𑀢𑀸. 𑀲𑀫𑀸𑀥𑀺𑀧𑁆𑀧𑀫𑀼𑀔𑀸𑀢𑀺𑀆𑀤𑀬𑁄 𑀧𑀦 𑀅𑀧𑀘𑀬𑀧𑀓𑁆𑀔𑀺𑀓𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀢𑀢𑁆𑀣 𑀧𑀼𑀩𑁆𑀩𑀗𑁆𑀕𑀫𑀝𑁆𑀞𑁂𑀦 𑀚𑁂𑀝𑁆𑀞𑀓𑀝𑁆𑀞𑁂𑀦 𑀯𑀸 𑀲𑀫𑀸𑀥𑀺 𑀧𑀫𑀼𑀔𑀁 𑀏𑀢𑁂𑀲𑀦𑁆𑀢𑀺 𑀲𑀫𑀸𑀥𑀺𑀧𑁆𑀧𑀫𑀼𑀔𑀸. 𑀚𑁂𑀝𑁆𑀞𑀓𑀓𑀸𑀭𑀡𑀝𑁆𑀞𑁂𑀦 𑀲𑀢𑀺 𑀅𑀥𑀺𑀧𑀢𑁂𑀬𑁆𑀬𑀸 𑀏𑀢𑁂𑀲𑀦𑁆𑀢𑀺 𑀲𑀢𑀸𑀥𑀺𑀧𑀢𑁂𑀬𑁆𑀬𑀸. 𑀫𑀕𑁆𑀕𑀧𑀜𑁆𑀜𑀸 𑀉𑀢𑁆𑀢𑀭𑀸 𑀏𑀢𑁂𑀲𑀦𑁆𑀢𑀺 𑀧𑀜𑁆𑀜𑀼𑀢𑁆𑀢𑀭𑀸. 𑀨𑀮𑀯𑀺𑀫𑀼𑀢𑁆𑀢𑀺𑀁 𑀧𑀢𑁆𑀯𑀸 𑀲𑀸𑀭𑀧𑁆𑀧𑀢𑁆𑀢𑀸 𑀳𑁄𑀦𑁆𑀢𑀻𑀢𑀺 𑀯𑀺𑀫𑀼𑀢𑁆𑀢𑀺𑀲𑀸𑀭𑀸. 𑀆𑀭𑀫𑁆𑀫𑀡𑀯𑀲𑁂𑀦 𑀅𑀫𑀢𑀁 𑀦𑀺𑀩𑁆𑀩𑀸𑀦𑀁 𑀑𑀕𑀸𑀳𑀺𑀢𑁆𑀯𑀸 𑀢𑀢𑁆𑀣 𑀧𑀢𑀺𑀝𑁆𑀞𑀺𑀢𑀸𑀢𑀺 𑀅𑀫𑀢𑁄𑀕𑀥𑀸. 𑀢𑁂𑀦 𑀘 𑀫𑀸 𑀫𑀜𑁆𑀜𑀻𑀢𑀺 𑀢𑁂𑀦 𑀯𑀺𑀲𑁆𑀲𑀚𑁆𑀚𑀦𑁂𑀦 ‘‘𑀅𑀳𑀁 𑀅𑀕𑁆𑀕𑀲𑀸𑀯𑀓𑁂𑀦 𑀧𑀼𑀘𑁆𑀙𑀺𑀢𑁂 𑀧𑀜𑁆𑀳𑁂 𑀯𑀺𑀲𑁆𑀲𑀚𑁆𑀚𑁂𑀲𑀺’’𑀦𑁆𑀢𑀺 𑀫𑀸 𑀫𑀸𑀦𑀁 𑀯𑀸 𑀤𑀧𑁆𑀧𑀁 𑀯𑀸 𑀅𑀓𑀸𑀲𑀺.

𑁫-𑁬. 𑀕𑀡𑁆𑀟𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁫-𑁧𑁬. 𑀧𑀜𑁆𑀘𑀫𑁂 𑀢𑀻𑀡𑀺 𑀘𑀢𑁆𑀢𑀸𑀭𑀺 𑀯𑀲𑁆𑀲𑀸𑀦𑀺 𑀯𑀲𑁆𑀲𑀕𑀡𑀸, 𑀅𑀦𑁂𑀓𑁂 𑀯𑀲𑁆𑀲𑀕𑀡𑀸 𑀉𑀧𑁆𑀧𑀦𑁆𑀦𑀸 𑀅𑀲𑁆𑀲𑀸𑀢𑀺 𑀅𑀦𑁂𑀓𑀯𑀲𑁆𑀲𑀕𑀡𑀺𑀓𑁄. 𑀢𑀲𑁆𑀲𑀲𑁆𑀲𑀽𑀢𑀺 𑀢𑀲𑁆𑀲 𑀪𑀯𑁂𑀬𑁆𑀬𑀼𑀁. 𑀅𑀪𑁂𑀤𑀦𑀫𑀼𑀔𑀸𑀦𑀻𑀢𑀺 𑀦 𑀓𑁂𑀦𑀘𑀺 𑀪𑀺𑀦𑁆𑀤𑀺𑀢𑁆𑀯𑀸 𑀓𑀢𑀸𑀦𑀺, 𑀓𑁂𑀯𑀮𑀁 𑀓𑀫𑁆𑀫𑀲𑀫𑀼𑀝𑁆𑀞𑀺𑀢𑀸𑀦𑁂𑀯 𑀯𑀡𑀫𑀼𑀔𑀸𑀦𑀺. 𑀚𑁂𑀕𑀼𑀘𑁆𑀙𑀺𑀬𑀁𑀬𑁂𑀯𑀸𑀢𑀺 𑀚𑀺𑀕𑀼𑀘𑁆𑀙𑀺𑀢𑀩𑁆𑀩𑀫𑁂𑀯 𑀧𑀝𑀺𑀓𑀽𑀮𑀫𑁂𑀯. 𑀘𑀸𑀢𑀼𑀫𑀳𑀸𑀪𑀽𑀢𑀺𑀓𑀲𑁆𑀲𑀸𑀢𑀺 𑀘𑀢𑀼𑀫𑀳𑀸𑀪𑀽𑀢𑀫𑀬𑀲𑁆𑀲. 𑀑𑀤𑀦𑀓𑀼𑀫𑁆𑀫𑀸𑀲𑀽𑀧𑀘𑀬𑀲𑁆𑀲𑀸𑀢𑀺 𑀑𑀤𑀦𑁂𑀦 𑀘𑁂𑀯 𑀓𑀼𑀫𑁆𑀫𑀸𑀲𑁂𑀦 𑀘 𑀉𑀧𑀘𑀺𑀢𑀲𑁆𑀲 𑀯𑀟𑁆𑀠𑀺𑀢𑀲𑁆𑀲. 𑀅𑀦𑀺𑀘𑁆𑀘𑀼𑀘𑁆𑀙𑀸𑀤𑀦𑀧𑀭𑀺𑀫𑀤𑁆𑀤𑀦𑀪𑁂𑀤𑀦𑀯𑀺𑀤𑁆𑀥𑀁𑀲𑀦𑀥𑀫𑁆𑀫𑀲𑁆𑀲𑀸𑀢𑀺 𑀳𑀼𑀢𑁆𑀯𑀸 𑀅𑀪𑀸𑀯𑀝𑁆𑀞𑁂𑀦 𑀅𑀦𑀺𑀘𑁆𑀘𑀥𑀫𑁆𑀫𑀲𑁆𑀲, 𑀤𑀼𑀕𑁆𑀕𑀦𑁆𑀥𑀯𑀺𑀖𑀸𑀢𑀢𑁆𑀣𑀸𑀬 𑀢𑀦𑀼𑀯𑀺𑀮𑁂𑀧𑀦𑁂𑀦 𑀉𑀘𑁆𑀙𑀸𑀤𑀦𑀥𑀫𑁆𑀫𑀲𑁆𑀲, 𑀅𑀗𑁆𑀕𑀧𑀘𑁆𑀘𑀗𑁆𑀕𑀸𑀩𑀸𑀥𑀯𑀺𑀦𑁄𑀤𑀦𑀢𑁆𑀣𑀸𑀬 𑀔𑀼𑀤𑁆𑀤𑀓𑀲𑀫𑁆𑀩𑀸𑀳𑀦𑁂𑀦 𑀧𑀭𑀺𑀫𑀤𑁆𑀤𑀦𑀥𑀫𑁆𑀫𑀲𑁆𑀲, 𑀤𑀳𑀭𑀓𑀸𑀮𑁂 𑀯𑀸 𑀊𑀭𑀽𑀲𑀼 𑀲𑀬𑀸𑀧𑁂𑀢𑁆𑀯𑀸 𑀕𑀩𑁆𑀪𑀯𑀸𑀲𑁂𑀦 𑀤𑀼𑀲𑁆𑀲𑀡𑁆𑀞𑀺𑀢𑀸𑀦𑀁 𑀢𑁂𑀲𑀁 𑀢𑁂𑀲𑀁 𑀅𑀗𑁆𑀕𑀧𑀘𑁆𑀘𑀗𑁆𑀕𑀸𑀦𑀁 𑀲𑀡𑁆𑀞𑀸𑀦𑀲𑀫𑁆𑀧𑀸𑀤𑀦𑀢𑁆𑀣𑀁 𑀅𑀜𑁆𑀙𑀦𑀧𑀻𑀴𑀦𑀸𑀤𑀺𑀯𑀲𑁂𑀦 𑀧𑀭𑀺𑀫𑀤𑁆𑀤𑀦𑀥𑀫𑁆𑀫𑀲𑁆𑀲, 𑀏𑀯𑀁 𑀧𑀭𑀺𑀳𑀭𑀺𑀢𑀲𑁆𑀲𑀸𑀧𑀺 𑀘 𑀪𑁂𑀤𑀦𑀯𑀺𑀤𑁆𑀥𑀁𑀲𑀦𑀥𑀫𑁆𑀫𑀲𑁆𑀲, 𑀪𑀺𑀚𑁆𑀚𑀦𑀯𑀺𑀓𑀺𑀭𑀡𑀲𑀪𑀸𑀯𑀲𑁆𑀲𑁂𑀯𑀸𑀢𑀺 𑀅𑀢𑁆𑀣𑁄. 𑀏𑀢𑁆𑀣 𑀘 𑀅𑀦𑀺𑀘𑁆𑀘𑀧𑀤𑁂𑀦 𑀘𑁂𑀯 𑀪𑁂𑀤𑀦𑀯𑀺𑀤𑁆𑀥𑀁𑀲𑀦𑀧𑀤𑁂𑀳𑀺 𑀘𑀲𑁆𑀲 𑀅𑀢𑁆𑀣𑀗𑁆𑀕𑀫𑁄 𑀓𑀣𑀺𑀢𑁄, 𑀲𑁂𑀲𑁂𑀳𑀺 𑀲𑀫𑀼𑀤𑀬𑁄. 𑀦𑀺𑀩𑁆𑀩𑀺𑀦𑁆𑀤𑀣𑀸𑀢𑀺 𑀉𑀓𑁆𑀓𑀡𑁆𑀞𑀣 𑀧𑀚𑀳𑀣 𑀇𑀫𑀁 𑀓𑀸𑀬𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀏𑀯𑀫𑀺𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀩𑀮𑀯𑀯𑀺𑀧𑀲𑁆𑀲𑀦𑀸 𑀓𑀣𑀺𑀢𑀸. 𑀙𑀝𑁆𑀞𑀁 𑀯𑀼𑀢𑁆𑀢𑀦𑀬𑀫𑁂𑀯. 𑀲𑀜𑁆𑀜𑀸𑀲𑀻𑀲𑁂𑀦 𑀧𑀦𑁂𑀢𑁆𑀣 𑀜𑀸𑀡𑀫𑁂𑀯 𑀓𑀣𑀺𑀢𑀁.

𑁭-𑁮. 𑀓𑀼𑀮𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁭-𑁧𑁮. 𑀲𑀢𑁆𑀢𑀫𑁂 𑀦 𑀫𑀦𑀸𑀧𑁂𑀦 𑀧𑀘𑁆𑀘𑀼𑀝𑁆𑀞𑁂𑀦𑁆𑀢𑀻𑀢𑀺 𑀫𑀦𑀯𑀟𑁆𑀠𑀦𑁂𑀦 𑀫𑀦𑀁 𑀅𑀮𑁆𑀮𑀻𑀬𑀦𑀸𑀓𑀸𑀭𑁂𑀦 𑀆𑀲𑀦𑀸 𑀯𑀼𑀝𑁆𑀞𑀸𑀬 𑀧𑀘𑁆𑀘𑀼𑀕𑁆𑀕𑀫𑀦𑀁 𑀦 𑀓𑀭𑁄𑀦𑁆𑀢𑀺. 𑀦 𑀫𑀦𑀸𑀧𑁂𑀦 𑀅𑀪𑀺𑀯𑀸𑀤𑁂𑀦𑁆𑀢𑀻𑀢𑀺 𑀦 𑀧𑀜𑁆𑀘𑀧𑀢𑀺𑀝𑁆𑀞𑀺𑀢𑁂𑀦 𑀯𑀦𑁆𑀤𑀦𑁆𑀢𑀺. 𑀅𑀲𑀓𑁆𑀓𑀘𑁆𑀘𑀁 𑀤𑁂𑀦𑁆𑀢𑀻𑀢𑀺 𑀅𑀘𑀺𑀢𑁆𑀢𑀻𑀓𑀸𑀭𑁂𑀦 𑀤𑁂𑀦𑁆𑀢𑀺. 𑀦𑁄 𑀲𑀓𑁆𑀓𑀘𑁆𑀘𑀦𑁆𑀢𑀺 𑀲𑀳𑀢𑁆𑀣𑀸 𑀦 𑀤𑁂𑀦𑁆𑀢𑀺. 𑀦 𑀉𑀧𑀦𑀺𑀲𑀻𑀤𑀦𑁆𑀢𑀺 𑀥𑀫𑁆𑀫𑀲𑀯𑀦𑀸𑀬𑀸𑀢𑀺 ‘‘𑀥𑀫𑁆𑀫𑀁 𑀲𑀼𑀡𑀺𑀲𑁆𑀲𑀸𑀫𑀸’’𑀢𑀺 𑀦 𑀲𑀫𑀻𑀧𑁂 𑀦𑀺𑀲𑀻𑀤𑀦𑁆𑀢𑀺. 𑀦 𑀲𑀼𑀲𑁆𑀲𑀽𑀲𑀦𑁆𑀢𑀻𑀢𑀺 𑀖𑀝𑀧𑀺𑀝𑁆𑀞𑁂 𑀆𑀲𑀺𑀢𑁆𑀢𑀉𑀤𑀓𑀁 𑀯𑀺𑀬 𑀯𑀺𑀯𑀝𑁆𑀝𑁂𑀢𑁆𑀯𑀸 𑀕𑀘𑁆𑀙𑀢𑀺. 𑀅𑀝𑁆𑀞𑀫𑁂 𑀯𑁂𑀦𑁂𑀬𑁆𑀬𑀚𑁆𑀛𑀸𑀲𑀬𑀯𑀲𑁂𑀦 𑀫𑁂𑀢𑁆𑀢𑀸𑀪𑀸𑀯𑀦𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀦𑀯𑀗𑁆𑀕𑀲𑀫𑀦𑁆𑀦𑀸𑀕𑀢𑁄𑀢𑀺 𑀯𑀼𑀢𑁆𑀢𑀁.

𑁯. 𑀤𑁂𑀯𑀢𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁯. 𑀦𑀯𑀫𑁂 𑀯𑀺𑀧𑁆𑀧𑀝𑀺𑀲𑀸𑀭𑀺𑀦𑀺𑀬𑁄𑀢𑀺 𑀯𑀺𑀧𑁆𑀧𑀝𑀺𑀲𑀸𑀭𑀺𑀢𑀁 𑀫𑀗𑁆𑀓𑀼𑀪𑀸𑀯𑀁 𑀆𑀧𑀚𑁆𑀚𑀺𑀫𑁆𑀳. 𑀳𑀻𑀦𑀁 𑀓𑀸𑀬𑀦𑁆𑀢𑀺 𑀉𑀧𑀭𑀺𑀤𑁂𑀯𑀮𑁄𑀓𑀁 𑀉𑀧𑀸𑀤𑀸𑀬 𑀳𑁂𑀝𑁆𑀞𑀺𑀫𑁄 𑀳𑀻𑀦𑁄𑀢𑀺 𑀯𑀼𑀘𑁆𑀘𑀢𑀺. 𑀦𑁄 𑀘 𑀔𑁄 𑀬𑀣𑀸𑀲𑀢𑁆𑀢𑀺 𑀬𑀣𑀸𑀩𑀮𑀁 𑀲𑀁𑀯𑀺𑀪𑀚𑀺𑀫𑁆𑀳𑀸𑀢𑀺 𑀅𑀢𑁆𑀢𑀦𑁄 𑀲𑀢𑁆𑀢𑀺𑀬𑀸 𑀘 𑀩𑀮𑀲𑁆𑀲 𑀘 𑀅𑀦𑀼𑀭𑀽𑀧𑁂𑀦 𑀲𑀻𑀮𑀯𑀦𑁆𑀢𑀸𑀦𑀁 𑀲𑀁𑀯𑀺𑀪𑀸𑀕𑀁 𑀓𑀢𑁆𑀯𑀸 𑀦 𑀪𑀼𑀜𑁆𑀚𑀺𑀫𑁆𑀳𑀸.

𑁧𑁦. 𑀯𑁂𑀮𑀸𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁦. 𑀤𑀲𑀫𑁂 𑀅𑀧𑀺 𑀦𑀼 𑀢𑁂, 𑀕𑀳𑀧𑀢𑀺, 𑀓𑀼𑀮𑁂 𑀤𑀸𑀦𑀁 𑀤𑀻𑀬𑀢𑀻𑀢𑀺 𑀦𑀬𑀺𑀤𑀁 𑀪𑀕𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀤𑀸𑀦𑀁 𑀲𑀦𑁆𑀥𑀸𑀬 𑀧𑀼𑀘𑁆𑀙𑀢𑀺. 𑀲𑁂𑀝𑁆𑀞𑀺𑀲𑁆𑀲 𑀳𑀺 𑀖𑀭𑁂 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀦𑀺𑀘𑁆𑀘𑀁 𑀧𑀡𑀻𑀢𑀤𑀸𑀦𑀁 𑀤𑀻𑀬𑀢𑀺, 𑀦 𑀢𑀁 𑀲𑀢𑁆𑀣𑀸 𑀦 𑀚𑀸𑀦𑀸𑀢𑀺. 𑀮𑁄𑀓𑀺𑀬𑀫𑀳𑀸𑀚𑀦𑀲𑁆𑀲 𑀧𑀦 𑀤𑀺𑀬𑁆𑀬𑀫𑀸𑀦𑀤𑀸𑀦𑀁 𑀅𑀢𑁆𑀣𑀺, 𑀢𑀁 𑀮𑀽𑀔𑀁 𑀳𑁄𑀢𑀺, 𑀲𑁂𑀝𑁆𑀞𑀺𑀲𑁆𑀲 𑀘𑀺𑀢𑁆𑀢𑀁 𑀦 𑀧𑀻𑀡𑁂𑀢𑀺. 𑀢𑀁 𑀧𑀼𑀘𑁆𑀙𑀸𑀫𑀻𑀢𑀺 𑀧𑀼𑀘𑁆𑀙𑀢𑀺. 𑀓𑀡𑀸𑀚𑀓𑀦𑁆𑀢𑀺 𑀲𑀓𑀼𑀡𑁆𑀟𑀓𑀪𑀢𑁆𑀢𑀁, 𑀲𑀓𑀼𑀡𑁆𑀟𑀓𑁂𑀳𑀺𑀧𑀺 𑀓𑀡𑀺𑀓𑀢𑀡𑁆𑀟𑀼𑀮𑁂𑀳𑁂𑀯 𑀧𑀓𑁆𑀓𑀁. 𑀩𑀺𑀴𑀗𑁆𑀕𑀤𑀼𑀢𑀺𑀬𑀦𑁆𑀢𑀺 𑀓𑀜𑁆𑀚𑀺𑀬𑀤𑀼𑀢𑀺𑀬𑀁. 𑀅𑀲𑀓𑁆𑀓𑀘𑁆𑀘𑀁 𑀤𑁂𑀢𑀻𑀢𑀺 𑀅𑀲𑀓𑁆𑀓𑀭𑀺𑀢𑁆𑀯𑀸 𑀤𑁂𑀢𑀺. 𑀅𑀘𑀺𑀢𑁆𑀢𑀻𑀓𑀢𑁆𑀯𑀸𑀢𑀺 𑀅𑀘𑀺𑀢𑁆𑀢𑀻𑀓𑀸𑀭𑁂𑀦 𑀤𑀓𑁆𑀔𑀺𑀡𑁂𑀬𑁆𑀬 𑀅𑀕𑀸𑀭𑀯𑁂𑀦 𑀤𑁂𑀢𑀺. 𑀅𑀲𑀳𑀢𑁆𑀣𑀸 𑀤𑁂𑀢𑀻𑀢𑀺 𑀲𑀳𑀢𑁆𑀣𑁂𑀦 𑀅𑀤𑀢𑁆𑀯𑀸 𑀧𑀭𑀳𑀢𑁆𑀣𑁂𑀦 𑀤𑁂𑀢𑀺, 𑀆𑀡𑀢𑁆𑀢𑀺𑀫𑀢𑁆𑀢𑀫𑁂𑀯 𑀓𑀭𑁄𑀢𑀻𑀢𑀺 𑀅𑀢𑁆𑀣𑁄. 𑀅𑀧𑀯𑀺𑀤𑁆𑀥𑀁 𑀤𑁂𑀢𑀻𑀢𑀺 𑀦 𑀦𑀺𑀭𑀦𑁆𑀢𑀭𑀁 𑀤𑁂𑀢𑀺, 𑀲𑀁𑀯𑀘𑁆𑀙𑀭𑀺𑀓𑀁 𑀲𑁄𑀡𑁆𑀟𑀩𑀮𑀺 𑀯𑀺𑀬 𑀳𑁄𑀢𑀺. 𑀅𑀦𑀸𑀕𑀫𑀦𑀤𑀺𑀝𑁆𑀞𑀺𑀓𑁄 𑀤𑁂𑀢𑀻𑀢𑀺 𑀦 𑀓𑀫𑁆𑀫𑀜𑁆𑀘 𑀨𑀮𑀜𑁆𑀘 𑀲𑀤𑁆𑀤𑀳𑀺𑀢𑁆𑀯𑀸 𑀤𑁂𑀢𑀺.

𑀬𑀢𑁆𑀣 𑀬𑀢𑁆𑀣𑀸𑀢𑀺 𑀢𑀻𑀲𑀼 𑀓𑀼𑀮𑀲𑀫𑁆𑀧𑀤𑀸𑀲𑀼 𑀬𑀲𑁆𑀫𑀺𑀁 𑀬𑀲𑁆𑀫𑀺𑀁 𑀓𑀼𑀮𑁂. 𑀦 𑀉𑀴𑀸𑀭𑀸𑀬 𑀪𑀢𑁆𑀢𑀪𑁄𑀕𑀸𑀬𑀸𑀢𑀺𑀆𑀤𑀻𑀲𑀼 𑀦𑀸𑀦𑀕𑁆𑀕𑀭𑀲𑀲𑀼𑀕𑀦𑁆𑀥𑀲𑀸𑀮𑀺𑀪𑁄𑀚𑀦𑁂 𑀉𑀧𑀦𑀻𑀢𑁂 𑀘𑀺𑀢𑁆𑀢𑀁 𑀦 𑀦𑀫𑀢𑀺, ‘‘𑀳𑀭𑀣𑁂𑀢𑀁 𑀭𑁄𑀕𑀯𑀟𑁆𑀠𑀦’’𑀦𑁆𑀢𑀺 𑀯𑀢𑁆𑀯𑀸 𑀬𑁂𑀦 𑀯𑀸 𑀢𑁂𑀦 𑀯𑀸 𑀟𑀸𑀓𑁂𑀦 𑀲𑀤𑁆𑀥𑀺𑀁 𑀲𑀓𑀼𑀡𑁆𑀟𑀓𑀪𑀢𑁆𑀢𑀁 𑀅𑀫𑀢𑀁 𑀯𑀺𑀬 𑀲𑀫𑁆𑀧𑀺𑀬𑀸𑀬𑀫𑀸𑀦𑁄 𑀪𑀼𑀜𑁆𑀚𑀢𑀺. 𑀓𑀸𑀲𑀺𑀓𑀸𑀤𑀻𑀲𑀼 𑀯𑀭𑀯𑀢𑁆𑀣𑁂𑀲𑀼 𑀉𑀧𑀦𑀻𑀢𑁂𑀲𑀼 ‘‘𑀳𑀭𑀣𑁂𑀢𑀸𑀦𑀺 𑀦𑀺𑀯𑀸𑀲𑁂𑀦𑁆𑀢𑀲𑁆𑀲 𑀧𑀝𑀺𑀘𑁆𑀙𑀸𑀤𑁂𑀢𑀼𑀫𑁆𑀧𑀺 𑀦 𑀲𑀓𑁆𑀓𑁄𑀦𑁆𑀢𑀺, 𑀕𑀢𑁆𑀢𑁂𑀲𑀼𑀧𑀺 𑀦 𑀲𑀡𑁆𑀞𑀳𑀦𑁆𑀢𑀻’’𑀢𑀺 𑀯𑀢𑁆𑀯𑀸 𑀦𑀸𑀴𑀺𑀓𑁂𑀭𑀲𑀸𑀝𑀓𑀫𑀽𑀮𑀢𑀘𑀲𑀤𑀺𑀲𑀸𑀦𑀺 𑀧𑀦 𑀣𑀽𑀮𑀯𑀢𑁆𑀣𑀸𑀦𑀺 ‘‘𑀇𑀫𑀸𑀦𑀺 𑀦𑀺𑀯𑀸𑀲𑁂𑀦𑁆𑀢𑁄 𑀦𑀺𑀯𑀢𑁆𑀣𑀪𑀸𑀯𑀫𑁆𑀧𑀺 𑀚𑀸𑀦𑀸𑀢𑀺, 𑀧𑀝𑀺𑀘𑁆𑀙𑀸𑀤𑁂𑀢𑀩𑁆𑀩𑀫𑁆𑀧𑀺 𑀧𑀝𑀺𑀘𑁆𑀙𑀸𑀤𑁂𑀦𑁆𑀢𑀻’’𑀢𑀺 𑀲𑀫𑁆𑀧𑀺𑀬𑀸𑀬𑀫𑀸𑀦𑁄 𑀦𑀺𑀯𑀸𑀲𑁂𑀢𑀺. 𑀳𑀢𑁆𑀣𑀺𑀬𑀸𑀦𑀅𑀲𑁆𑀲𑀬𑀸𑀦𑀭𑀣𑀬𑀸𑀦𑀲𑀼𑀯𑀡𑁆𑀡𑀲𑀺𑀯𑀺𑀓𑀸𑀤𑀻𑀲𑀼 𑀉𑀧𑀦𑀻𑀢𑁂𑀲𑀼 ‘‘𑀳𑀭𑀣𑁂𑀢𑀸𑀦𑀺 𑀘𑀮𑀸𑀘𑀮𑀸𑀦𑀺, 𑀦 𑀲𑀓𑁆𑀓𑀸 𑀏𑀢𑁆𑀣 𑀦𑀺𑀲𑀻𑀤𑀺𑀢𑀼’’𑀦𑁆𑀢𑀺 𑀯𑀢𑁆𑀯𑀸 𑀚𑀚𑁆𑀚𑀭𑀭𑀣𑀓𑁂 𑀉𑀧𑀦𑀻𑀢𑁂 ‘‘𑀅𑀬𑀁 𑀦𑀺𑀘𑁆𑀘𑀮𑁄, 𑀏𑀢𑁆𑀣 𑀲𑀼𑀔𑀁 𑀦𑀺𑀲𑀻𑀤𑀺𑀢𑀼’’𑀦𑁆𑀢𑀺 𑀢𑀁 𑀲𑀸𑀤𑀺𑀬𑀢𑀺. 𑀦 𑀉𑀴𑀸𑀭𑁂𑀲𑀼 𑀧𑀜𑁆𑀘𑀲𑀼 𑀓𑀸𑀫𑀕𑀼𑀡𑁂𑀲𑀽𑀢𑀺 𑀅𑀮𑀗𑁆𑀓𑀢𑀧𑀝𑀺𑀬𑀢𑁆𑀢𑀸 𑀭𑀽𑀧𑀯𑀢𑀺𑀬𑁄 𑀇𑀢𑁆𑀣𑀺𑀬𑁄 𑀤𑀺𑀲𑁆𑀯𑀸 ‘‘𑀬𑀓𑁆𑀔𑀺𑀦𑀺𑀬𑁄 𑀫𑀜𑁆𑀜𑁂, 𑀏𑀢𑀸 𑀔𑀸𑀤𑀺𑀢𑀼𑀓𑀸𑀫𑀸, 𑀓𑀺𑀁 𑀏𑀢𑀸𑀳𑀻’’𑀢𑀺 𑀬𑀣𑀸𑀨𑀸𑀲𑀼𑀓𑁂𑀦𑁂𑀯 𑀯𑀻𑀢𑀺𑀦𑀸𑀫𑁂𑀢𑀺. 𑀦 𑀲𑀼𑀲𑁆𑀲𑀽𑀲𑀦𑁆𑀢𑀻𑀢𑀺 𑀲𑁄𑀢𑀼𑀁 𑀦 𑀇𑀘𑁆𑀙𑀦𑁆𑀢𑀺, 𑀦 𑀲𑀤𑁆𑀤𑀳𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀦 𑀲𑁄𑀢𑀁 𑀑𑀤𑀳𑀦𑁆𑀢𑀻𑀢𑀺 𑀓𑀣𑀺𑀢𑀲𑁆𑀲 𑀲𑀯𑀦𑀢𑁆𑀣𑀁 𑀦 𑀲𑁄𑀢𑀧𑀲𑀸𑀤𑀁 𑀑𑀤𑀳𑀦𑁆𑀢𑀺. 𑀲𑀓𑁆𑀓𑀘𑁆𑀘𑀦𑁆𑀢𑀺𑀆𑀤𑀻𑀦𑀺 𑀯𑀼𑀢𑁆𑀢𑀯𑀺𑀧𑀭𑀺𑀬𑀸𑀬𑁂𑀦 𑀯𑁂𑀤𑀺𑀢𑀩𑁆𑀩𑀸𑀦𑀺.

𑀯𑁂𑀮𑀸𑀫𑁄𑀢𑀺 𑀚𑀸𑀢𑀺𑀕𑁄𑀢𑁆𑀢𑀭𑀽𑀧𑀪𑁄𑀕𑀲𑀤𑁆𑀥𑀸𑀧𑀜𑁆𑀜𑀸𑀤𑀻𑀳𑀺 𑀫𑀭𑀺𑀬𑀸𑀤𑀯𑁂𑀮𑀁 𑀅𑀢𑀺𑀓𑁆𑀓𑀦𑁆𑀢𑁂𑀳𑀺 𑀉𑀴𑀸𑀭𑁂𑀳𑀺 𑀕𑀼𑀡𑁂𑀳𑀺 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀏𑀯𑀁𑀮𑀤𑁆𑀥𑀦𑀸𑀫𑁄. 𑀲𑁄 𑀏𑀯𑀭𑀽𑀧𑀁 𑀤𑀸𑀦𑀁 𑀅𑀤𑀸𑀲𑀺 𑀫𑀳𑀸𑀤𑀸𑀦𑀦𑁆𑀢𑀺 𑀏𑀢𑁆𑀣 𑀅𑀬𑀁 𑀅𑀦𑀼𑀧𑀼𑀩𑁆𑀩𑀻𑀓𑀣𑀸 𑁋 𑀲𑁄 𑀓𑀺𑀭 𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀧𑀼𑀭𑁄𑀳𑀺𑀢𑀕𑁂𑀳𑁂 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺, 𑀯𑁂𑀮𑀸𑀫𑀓𑀼𑀫𑀸𑀭𑁄𑀢𑀺𑀲𑁆𑀲 𑀦𑀸𑀫𑀁 𑀅𑀓𑀁𑀲𑀼. 𑀲𑁄 𑀲𑁄𑀴𑀲𑀯𑀲𑁆𑀲𑀓𑀸𑀮𑁂 𑀩𑀸𑀭𑀸𑀡𑀲𑀺𑀭𑀸𑀚𑀓𑀼𑀫𑀸𑀭𑁂𑀦 𑀲𑀤𑁆𑀥𑀺𑀁 𑀲𑀺𑀧𑁆𑀧𑀼𑀕𑁆𑀕𑀳𑀡𑀢𑁆𑀣𑀁 𑀢𑀓𑁆𑀓𑀲𑀺𑀮𑀁 𑀅𑀕𑀫𑀸𑀲𑀺. 𑀢𑁂 𑀉𑀪𑁄𑀧𑀺 𑀤𑀺𑀲𑀸𑀧𑀸𑀫𑁄𑀓𑁆𑀔𑀲𑁆𑀲 𑀆𑀘𑀭𑀺𑀬𑀲𑁆𑀲 𑀲𑀦𑁆𑀢𑀺𑀓𑁂 𑀲𑀺𑀧𑁆𑀧𑀁 𑀧𑀝𑁆𑀞𑀧𑀬𑀺𑀁𑀲𑀼. 𑀬𑀣𑀸 𑀘 𑀢𑁂, 𑀏𑀯𑀁 𑀅𑀜𑁆𑀜𑁂𑀧𑀺 𑀚𑀫𑁆𑀩𑀼𑀤𑀻𑀧𑁂 𑀘𑀢𑀼𑀭𑀸𑀲𑀻𑀢𑀺𑀲𑀳𑀲𑁆𑀲𑀭𑀸𑀚𑀓𑀼𑀫𑀸𑀭𑀸. 𑀩𑁄𑀥𑀺𑀲𑀢𑁆𑀢𑁄 𑀅𑀢𑁆𑀢𑀦𑀸 𑀕𑀳𑀺𑀢𑀝𑁆𑀞𑀸𑀦𑁂 𑀧𑀺𑀝𑁆𑀞𑀺𑀆𑀘𑀭𑀺𑀬𑁄 𑀳𑀼𑀢𑁆𑀯𑀸 𑀘𑀢𑀼𑀭𑀸𑀲𑀻𑀢𑀺 𑀭𑀸𑀚𑀓𑀼𑀫𑀸𑀭𑀲𑀳𑀲𑁆𑀲𑀸𑀦𑀺 𑀲𑀺𑀓𑁆𑀔𑀸𑀧𑁂𑀢𑀺, 𑀲𑀬𑀫𑁆𑀧𑀺 𑀲𑁄𑀴𑀲𑀯𑀲𑁆𑀲𑁂𑀳𑀺 𑀕𑀳𑁂𑀢𑀩𑁆𑀩𑀲𑀺𑀧𑁆𑀧𑀁 𑀢𑀻𑀳𑀺 𑀯𑀲𑁆𑀲𑁂𑀳𑀺 𑀉𑀕𑁆𑀕𑀡𑁆𑀳𑀺. 𑀆𑀘𑀭𑀺𑀬𑁄 ‘‘𑀯𑁂𑀮𑀸𑀫𑀓𑀼𑀫𑀸𑀭𑀲𑁆𑀲 𑀲𑀺𑀧𑁆𑀧𑀁 𑀧𑀕𑀼𑀡’’𑀦𑁆𑀢𑀺 𑀜𑀢𑁆𑀯𑀸, ‘‘𑀢𑀸𑀢𑀸, 𑀯𑁂𑀮𑀸𑀫𑁄 𑀫𑀬𑀸 𑀜𑀸𑀢𑀁 𑀲𑀩𑁆𑀩𑀁 𑀚𑀸𑀦𑀸𑀢𑀺, 𑀢𑀼𑀫𑁆𑀳𑁂 𑀲𑀩𑁆𑀩𑁂𑀧𑀺 𑀲𑀫𑀕𑁆𑀕𑀸 𑀕𑀦𑁆𑀢𑁆𑀯𑀸 𑀏𑀢𑀲𑁆𑀲 𑀲𑀦𑁆𑀢𑀺𑀓𑁂 𑀲𑀺𑀧𑁆𑀧𑀁 𑀉𑀕𑁆𑀕𑀡𑁆𑀳𑀣𑀸’’𑀢𑀺 𑀘𑀢𑀼𑀭𑀸𑀲𑀻𑀢𑀺 𑀓𑀼𑀫𑀸𑀭𑀲𑀳𑀲𑁆𑀲𑀸𑀦𑀺 𑀩𑁄𑀥𑀺𑀲𑀢𑁆𑀢𑀲𑁆𑀲 𑀦𑀺𑀬𑁆𑀬𑀸𑀤𑁂𑀲𑀺.

𑀩𑁄𑀥𑀺𑀲𑀢𑁆𑀢𑁄 𑀆𑀘𑀭𑀺𑀬𑀁 𑀯𑀦𑁆𑀤𑀺𑀢𑁆𑀯𑀸 𑀘𑀢𑀼𑀭𑀸𑀲𑀻𑀢𑀺 𑀓𑀼𑀫𑀸𑀭𑀲𑀳𑀲𑁆𑀲𑀧𑀭𑀺𑀯𑀸𑀭𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀏𑀓𑀁 𑀆𑀲𑀦𑁆𑀦𑀦𑀕𑀭𑀁 𑀧𑀢𑁆𑀯𑀸 𑀦𑀕𑀭𑀲𑀸𑀫𑀺𑀓𑀁 𑀭𑀸𑀚𑀓𑀼𑀫𑀸𑀭𑀁 𑀉𑀕𑁆𑀕𑀡𑁆𑀳𑀸𑀧𑁂𑀢𑁆𑀯𑀸 𑀢𑀲𑁆𑀲 𑀲𑀺𑀧𑁆𑀧𑁂 𑀧𑀕𑀼𑀡𑁂 𑀚𑀸𑀢𑁂 𑀢𑀁 𑀢𑀢𑁆𑀣𑁂𑀯 𑀦𑀺𑀯𑀢𑁆𑀢𑁂𑀲𑀺. 𑀏𑀢𑁂𑀦𑀼𑀧𑀸𑀬𑁂𑀦 𑀘𑀢𑀼𑀭𑀸𑀲𑀻𑀢𑀺 𑀦𑀕𑀭𑀲𑀳𑀲𑁆𑀲𑀸𑀦𑀺 𑀕𑀦𑁆𑀢𑁆𑀯𑀸 𑀘𑀢𑀼𑀭𑀸𑀲𑀻𑀢𑀺𑀬𑀸 𑀭𑀸𑀚𑀓𑀼𑀫𑀸𑀭𑀸𑀦𑀁 𑀲𑀺𑀧𑁆𑀧𑀁 𑀧𑀕𑀼𑀡𑀁 𑀓𑀸𑀭𑁂𑀢𑁆𑀯𑀸 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀦𑀕𑀭𑁂 𑀢𑀁 𑀢𑀁 𑀦𑀺𑀯𑀢𑁆𑀢𑁂𑀢𑁆𑀯𑀸 𑀩𑀸𑀭𑀸𑀡𑀲𑀺𑀭𑀸𑀚𑀓𑀼𑀫𑀸𑀭𑀁 𑀆𑀤𑀸𑀬 𑀩𑀸𑀭𑀸𑀡𑀲𑀺𑀁 𑀧𑀘𑁆𑀘𑀸𑀕𑀜𑁆𑀙𑀺. 𑀫𑀦𑀼𑀲𑁆𑀲𑀸 𑀓𑀼𑀫𑀸𑀭𑀁 𑀧𑀭𑀺𑀬𑁄𑀲𑀺𑀢𑀲𑀺𑀧𑁆𑀧𑀁 𑀭𑀚𑁆𑀚𑁂 𑀅𑀪𑀺𑀲𑀺𑀜𑁆𑀘𑀺𑀁𑀲𑀼, 𑀯𑁂𑀮𑀸𑀫𑀲𑁆𑀲 𑀧𑀼𑀭𑁄𑀳𑀺𑀢𑀝𑁆𑀞𑀸𑀦𑀁 𑀅𑀤𑀁𑀲𑀼. 𑀢𑁂𑀧𑀺 𑀘𑀢𑀼𑀭𑀸𑀲𑀻𑀢𑀺𑀲𑀳𑀲𑁆𑀲𑀭𑀸𑀚𑀓𑀼𑀫𑀸𑀭𑀸 𑀲𑀓𑁂𑀲𑀼 𑀲𑀓𑁂𑀲𑀼 𑀭𑀚𑁆𑀚𑁂𑀲𑀼 𑀅𑀪𑀺𑀲𑁂𑀓𑀁 𑀧𑀢𑁆𑀯𑀸 𑀅𑀦𑀼𑀲𑀁𑀯𑀘𑁆𑀙𑀭𑀁 𑀩𑀸𑀭𑀸𑀡𑀲𑀺𑀭𑀜𑁆𑀜𑁄 𑀉𑀧𑀝𑁆𑀞𑀸𑀦𑀁 𑀆𑀕𑀘𑁆𑀙𑀦𑁆𑀢𑀺. 𑀢𑁂 𑀭𑀸𑀚𑀸𑀦𑀁 𑀤𑀺𑀲𑁆𑀯𑀸 𑀯𑁂𑀮𑀸𑀫𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸, ‘‘𑀆𑀘𑀭𑀺𑀬, 𑀅𑀫𑁆𑀳𑁂 𑀭𑀚𑁆𑀚𑁂𑀲𑀼 𑀧𑀢𑀺𑀝𑁆𑀞𑀺𑀢𑀸, 𑀯𑀤𑁂𑀬𑁆𑀬𑀸𑀣 𑀬𑁂𑀦𑀢𑁆𑀣𑁄’’𑀢𑀺 𑀯𑀢𑁆𑀯𑀸 𑀕𑀘𑁆𑀙𑀦𑁆𑀢𑀺. 𑀢𑁂𑀲𑀁 𑀕𑀫𑀦𑀸𑀕𑀫𑀦𑀓𑀸𑀮𑁂 𑀲𑀓𑀝𑀲𑀦𑁆𑀤𑀫𑀸𑀦𑀺𑀓𑀕𑀸𑀯𑀺𑀕𑁄𑀡𑀓𑀼𑀓𑁆𑀓𑀼𑀝𑀲𑀽𑀓𑀭𑀸𑀤𑀬𑁄 𑀕𑀡𑁆𑀳𑀦𑁆𑀢𑀸𑀦𑀁 𑀚𑀦𑀧𑀤𑁄 𑀅𑀢𑀺𑀯𑀺𑀬 𑀉𑀧𑀤𑁆𑀤𑀼𑀢𑁄 𑀳𑁄𑀢𑀺, 𑀫𑀳𑀸𑀚𑀦𑁄 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀭𑀸𑀚𑀗𑁆𑀕𑀡𑁂 𑀓𑀦𑁆𑀤𑀢𑀺.

𑀭𑀸𑀚𑀸 𑀯𑁂𑀮𑀸𑀫𑀁 𑀧𑀓𑁆𑀓𑁄𑀲𑀺𑀢𑁆𑀯𑀸, ‘‘𑀆𑀘𑀭𑀺𑀬, 𑀉𑀧𑀤𑁆𑀤𑀼𑀢𑁄 𑀚𑀦𑀧𑀤𑁄, 𑀭𑀸𑀚𑀸𑀦𑁄 𑀕𑀫𑀦𑀸𑀕𑀫𑀦𑀓𑀸𑀮𑁂 𑀫𑀳𑀸𑀯𑀺𑀮𑁄𑀧𑀁 𑀓𑀭𑁄𑀦𑁆𑀢𑀺, 𑀫𑀦𑀼𑀲𑁆𑀲𑀸 𑀲𑀦𑁆𑀥𑀸𑀭𑁂𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺, 𑀚𑀦𑀧𑀤𑀧𑀻𑀴𑀸𑀬 𑀉𑀧𑀲𑀫𑀁 𑀏𑀓𑀁 𑀉𑀧𑀸𑀬𑀁 𑀓𑀭𑁄𑀣𑀸’’𑀢𑀺. 𑀲𑀸𑀥𑀼 𑀫𑀳𑀸𑀭𑀸𑀚, 𑀉𑀧𑀸𑀬𑀁 𑀓𑀭𑀺𑀲𑁆𑀲𑀸𑀫𑀺, 𑀢𑀼𑀫𑁆𑀳𑀸𑀓𑀁 𑀬𑀢𑁆𑀢𑀓𑁂𑀦 𑀚𑀦𑀧𑀤𑁂𑀦 𑀅𑀢𑁆𑀣𑁄, 𑀢𑀁 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀕𑀡𑁆𑀳𑀣𑀸𑀢𑀺. 𑀭𑀸𑀚𑀸 𑀢𑀣𑀸 𑀅𑀓𑀸𑀲𑀺. 𑀯𑁂𑀮𑀸𑀫𑁄 𑀘𑀢𑀼𑀭𑀸𑀲𑀻𑀢𑀺𑀬𑀸 𑀭𑀸𑀚𑀲𑀳𑀲𑁆𑀲𑀸𑀦𑀁 𑀚𑀦𑀧𑀤𑁂 𑀯𑀺𑀘𑀸𑀭𑁂𑀢𑁆𑀯𑀸 𑀘𑀓𑁆𑀓𑀦𑀸𑀪𑀺𑀬𑀁 𑀅𑀭𑁂 𑀯𑀺𑀬 𑀭𑀜𑁆𑀜𑁄 𑀚𑀦𑀧𑀤𑀲𑁆𑀫𑀺𑀁 𑀑𑀭𑁄𑀧𑁂𑀲𑀺. 𑀢𑀢𑁄 𑀧𑀝𑁆𑀞𑀸𑀬 𑀢𑁂 𑀭𑀸𑀚𑀸𑀦𑁄 𑀆𑀕𑀘𑁆𑀙𑀦𑁆𑀢𑀸𑀧𑀺 𑀕𑀘𑁆𑀙𑀦𑁆𑀢𑀸𑀧𑀺 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀚𑀦𑀧𑀤𑁂𑀦𑁂𑀯 𑀲𑀜𑁆𑀘𑀭𑀦𑁆𑀢𑀺, 𑀅𑀫𑁆𑀳𑀸𑀓𑀁 𑀚𑀦𑀧𑀤𑁄𑀢𑀺 𑀯𑀺𑀮𑁄𑀧𑀁 𑀦 𑀓𑀭𑁄𑀦𑁆𑀢𑀺. 𑀭𑀸𑀚𑀕𑀸𑀭𑀯𑁂𑀦 𑀭𑀜𑁆𑀜𑁄 𑀚𑀦𑀧𑀤𑀫𑁆𑀧𑀺 𑀦 𑀧𑀻𑀴𑁂𑀦𑁆𑀢𑀺. 𑀚𑀦𑀧𑀤𑀸 𑀲𑀦𑁆𑀦𑀺𑀲𑀺𑀦𑁆𑀦𑀸 𑀦𑀺𑀲𑁆𑀲𑀤𑁆𑀤𑀸 𑀦𑀺𑀭𑀯𑀸 𑀅𑀳𑁂𑀲𑀼𑀁. 𑀲𑀩𑁆𑀩𑁂 𑀭𑀸𑀚𑀸𑀦𑁄 𑀳𑀝𑁆𑀞𑀢𑀼𑀝𑁆𑀞𑀸 ‘‘𑀬𑁂𑀦 𑀯𑁄, 𑀆𑀘𑀭𑀺𑀬, 𑀅𑀢𑁆𑀣𑁄, 𑀢𑀁 𑀅𑀫𑁆𑀳𑀸𑀓𑀁 𑀯𑀤𑁂𑀣𑀸’’𑀢𑀺 𑀧𑀯𑀸𑀭𑀬𑀺𑀁𑀲𑀼.

𑀯𑁂𑀮𑀸𑀫𑁄 𑀲𑀻𑀲𑀁𑀦𑁆𑀳𑀸𑀢𑁄 𑀅𑀢𑁆𑀢𑀦𑁄 𑀅𑀦𑁆𑀢𑁄𑀦𑀺𑀯𑁂𑀲𑀦𑁂 𑀲𑀢𑁆𑀢𑀭𑀢𑀦𑀧𑀭𑀺𑀧𑀽𑀭𑀸𑀦𑀁 𑀕𑀩𑁆𑀪𑀸𑀦𑀁 𑀤𑁆𑀯𑀸𑀭𑀸𑀦𑀺 𑀯𑀺𑀯𑀭𑀸𑀧𑁂𑀢𑁆𑀯𑀸 𑀬𑀸𑀯 𑀲𑀢𑁆𑀢𑀫𑀸 𑀓𑀼𑀮𑀧𑀭𑀺𑀯𑀝𑁆𑀝𑀸 𑀞𑀧𑀺𑀢𑀁 𑀥𑀦𑀁 𑀑𑀮𑁄𑀓𑁂𑀢𑁆𑀯𑀸 𑀆𑀬𑀯𑀬𑀁 𑀉𑀧𑀥𑀸𑀭𑁂𑀢𑁆𑀯𑀸 ‘‘𑀫𑀬𑀸 𑀲𑀓𑀮𑀚𑀫𑁆𑀩𑀼𑀤𑀻𑀧𑀁 𑀔𑁄𑀪𑁂𑀦𑁆𑀢𑁂𑀦 𑀤𑀸𑀦𑀁 𑀤𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀭𑀜𑁆𑀜𑁄 𑀆𑀭𑁄𑀘𑁂𑀢𑁆𑀯𑀸 𑀕𑀗𑁆𑀕𑀸𑀢𑀻𑀭𑁂 𑀤𑁆𑀯𑀸𑀤𑀲𑀬𑁄𑀚𑀦𑀺𑀓𑀸 𑀉𑀤𑁆𑀥𑀦𑀧𑀦𑁆𑀢𑀺𑀬𑁄 𑀓𑀸𑀭𑁂𑀢𑁆𑀯𑀸 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀞𑀸𑀦𑁂 𑀲𑀧𑁆𑀧𑀺𑀫𑀥𑀼𑀨𑀸𑀡𑀺𑀢𑀢𑁂𑀮𑀢𑀺𑀮𑀢𑀡𑁆𑀟𑀼𑀮𑀸𑀤𑀻𑀦𑀁 𑀞𑀧𑀦𑀢𑁆𑀣𑀸𑀬 𑀫𑀳𑀸𑀓𑁄𑀝𑁆𑀞𑀸𑀕𑀸𑀭𑀸𑀦𑀺 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 ‘‘𑀏𑀓𑁂𑀓𑀲𑁆𑀫𑀺𑀁 𑀞𑀸𑀦𑁂 𑀏𑀢𑁆𑀢𑀓𑀸 𑀏𑀢𑁆𑀢𑀓𑀸 𑀚𑀦𑀸 𑀲𑀁𑀯𑀺𑀤𑀳𑀣, 𑀬𑀁𑀓𑀺𑀜𑁆𑀘𑀺 𑀫𑀦𑀼𑀲𑁆𑀲𑀸𑀦𑀁 𑀮𑀤𑁆𑀥𑀩𑁆𑀩𑀁 𑀦𑀸𑀫 𑀅𑀢𑁆𑀣𑀺, 𑀢𑀢𑁄 𑀏𑀓𑀲𑁆𑀫𑀺𑀫𑁆𑀧𑀺 𑀅𑀲𑀢𑀺 𑀫𑀬𑁆𑀳𑀁 𑀆𑀭𑁄𑀘𑁂𑀬𑁆𑀬𑀸𑀣𑀸’’𑀢𑀺 𑀫𑀦𑀼𑀲𑁆𑀲𑁂 𑀲𑀁𑀯𑀺𑀥𑀸𑀬 ‘‘𑀅𑀲𑀼𑀓𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀯𑁂𑀮𑀸𑀫𑀩𑁆𑀭𑀸𑀳𑁆𑀫𑀡𑀲𑁆𑀲 𑀤𑀸𑀦𑀁 𑀪𑀼𑀜𑁆𑀚𑀦𑁆𑀢𑀽’’𑀢𑀺 𑀦𑀕𑀭𑁂 𑀪𑁂𑀭𑀺𑀁 𑀘𑀭𑀸𑀧𑁂𑀢𑁆𑀯𑀸 ‘‘𑀤𑀸𑀦𑀕𑁆𑀕𑀁 𑀧𑀭𑀺𑀦𑀺𑀝𑁆𑀞𑀺𑀢’’𑀦𑁆𑀢𑀺 𑀤𑀸𑀦𑀬𑀼𑀢𑁆𑀢𑁂𑀳𑀺 𑀆𑀭𑁄𑀘𑀺𑀢𑁂 𑀲𑀳𑀲𑁆𑀲𑀕𑁆𑀖𑀦𑀓𑀁 𑀯𑀢𑁆𑀣𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀜𑁆𑀘𑀲𑀢𑀕𑁆𑀖𑀦𑀓𑀁 𑀏𑀓𑀁𑀲𑀁 𑀓𑀢𑁆𑀯𑀸 𑀲𑀩𑁆𑀩𑀸𑀮𑀗𑁆𑀓𑀸𑀭𑀪𑀽𑀲𑀺𑀢𑁄 𑀤𑀸𑀦𑀯𑀻𑀫𑀁𑀲𑀦𑀢𑁆𑀣𑀸𑀬 𑀨𑀮𑀺𑀓𑀯𑀡𑁆𑀡𑀲𑁆𑀲 𑀉𑀤𑀓𑀲𑁆𑀲 𑀲𑀼𑀯𑀡𑁆𑀡𑀪𑀺𑀗𑁆𑀕𑀸𑀭𑀁 𑀧𑀽𑀭𑁂𑀢𑁆𑀯𑀸 ‘‘𑀇𑀫𑀲𑁆𑀫𑀺𑀁 𑀮𑁄𑀓𑁂 𑀲𑀘𑁂 𑀇𑀫𑀁 𑀤𑀸𑀦𑀁 𑀧𑀝𑀺𑀕𑁆𑀕𑀳𑁂𑀢𑀼𑀁 𑀬𑀼𑀢𑁆𑀢𑀭𑀽𑀧𑀸 𑀤𑀓𑁆𑀔𑀺𑀡𑁂𑀬𑁆𑀬𑀧𑀼𑀕𑁆𑀕𑀮𑀸 𑀅𑀢𑁆𑀣𑀺, 𑀇𑀤𑀁 𑀉𑀤𑀓𑀁 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀣𑀯𑀺𑀁 𑀕𑀡𑁆𑀳𑀸𑀢𑀼. 𑀲𑀘𑁂 𑀦𑀢𑁆𑀣𑀺, 𑀏𑀯𑀫𑁂𑀯 𑀢𑀺𑀝𑁆𑀞𑀢𑀽’’𑀢𑀺 𑀲𑀘𑁆𑀘𑀓𑀺𑀭𑀺𑀬𑀁 𑀓𑀢𑁆𑀯𑀸 𑀪𑀺𑀗𑁆𑀕𑀸𑀭𑀁 𑀅𑀥𑁄𑀫𑀼𑀔𑀁 𑀅𑀓𑀸𑀲𑀺. 𑀉𑀤𑀓𑀁 𑀥𑀫𑀓𑀭𑀡𑁂𑀦 𑀕𑀳𑀺𑀢𑀁 𑀯𑀺𑀬 𑀅𑀳𑁄𑀲𑀺. 𑀩𑁄𑀥𑀺𑀲𑀢𑁆𑀢𑁄 ‘‘𑀲𑀼𑀜𑁆𑀜𑁄 𑀯𑀢, 𑀪𑁄, 𑀚𑀫𑁆𑀩𑀼𑀤𑀻𑀧𑁄, 𑀏𑀓𑀧𑀼𑀕𑁆𑀕𑀮𑁄𑀧𑀺 𑀤𑀓𑁆𑀔𑀺𑀡𑀁 𑀧𑀝𑀺𑀕𑁆𑀕𑀳𑁂𑀢𑀼𑀁 𑀬𑀼𑀢𑁆𑀢𑀭𑀽𑀧𑁄 𑀦𑀢𑁆𑀣𑀻’’𑀢𑀺 𑀯𑀺𑀧𑁆𑀧𑀝𑀺𑀲𑀸𑀭𑀁 𑀅𑀓𑀢𑁆𑀯𑀸 ‘‘𑀲𑀘𑁂 𑀤𑀸𑀬𑀓𑀲𑁆𑀲 𑀯𑀲𑁂𑀦𑀸𑀬𑀁 𑀤𑀓𑁆𑀔𑀺𑀡𑀸 𑀯𑀺𑀲𑀼𑀚𑁆𑀛𑀺𑀲𑁆𑀲𑀢𑀺, 𑀉𑀤𑀓𑀁 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀣𑀯𑀺𑀁 𑀕𑀡𑁆𑀳𑀸𑀢𑀽’’𑀢𑀺 𑀘𑀺𑀦𑁆𑀢𑁂𑀲𑀺. 𑀨𑀮𑀺𑀓𑀯𑀡𑁆𑀡𑀲𑀤𑀺𑀲𑀁 𑀉𑀤𑀓𑀁 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀣𑀯𑀺𑀁 𑀕𑀡𑁆𑀳𑀺. ‘‘𑀇𑀤𑀸𑀦𑀺 𑀤𑀸𑀦𑀁 𑀤𑀲𑁆𑀲𑀸𑀫𑀻’’𑀢𑀺 𑀤𑀸𑀦𑀕𑁆𑀕𑀁 𑀧𑀢𑁆𑀯𑀸 𑀤𑀸𑀦𑀁 𑀑𑀮𑁄𑀓𑁂𑀢𑁆𑀯𑀸 𑀬𑀸𑀕𑀼𑀯𑁂𑀮𑀸𑀬 𑀬𑀸𑀕𑀼𑀁, 𑀔𑀚𑁆𑀚𑀓𑀯𑁂𑀮𑀸𑀬 𑀔𑀚𑁆𑀚𑀓𑀁, 𑀪𑁄𑀚𑀦𑀯𑁂𑀮𑀸𑀬 𑀪𑁄𑀚𑀦𑀁 𑀤𑀸𑀧𑁂𑀲𑀺. 𑀏𑀢𑁂𑀦𑁂𑀯 𑀦𑀻𑀳𑀸𑀭𑁂𑀦 𑀤𑀺𑀯𑀲𑁂 𑀤𑀺𑀯𑀲𑁂 𑀤𑀸𑀦𑀁 𑀤𑀻𑀬𑀢𑀺.

𑀢𑀲𑁆𑀫𑀺𑀁 𑀔𑁄 𑀧𑀦 𑀤𑀸𑀦𑀕𑁆𑀕𑁂 ‘‘𑀇𑀤𑀁 𑀦𑀸𑀫 𑀅𑀢𑁆𑀣𑀺, 𑀇𑀤𑀁 𑀦𑀸𑀫 𑀦𑀢𑁆𑀣𑀻’’𑀢𑀺 𑀯𑀢𑁆𑀢𑀩𑁆𑀩𑀁 𑀦𑀢𑁆𑀣𑀺. 𑀇𑀤𑀸𑀦𑀺 𑀢𑀁 𑀤𑀸𑀦𑀁 𑀏𑀢𑁆𑀢𑀓𑀫𑀢𑁆𑀢𑁂𑀦𑁂𑀯 𑀦 𑀦𑀺𑀝𑁆𑀞𑀁 𑀕𑀫𑀺𑀲𑁆𑀲𑀢𑀻𑀢𑀺 𑀭𑀢𑁆𑀢𑀲𑀼𑀯𑀡𑁆𑀡𑀁 𑀦𑀻𑀳𑀭𑀸𑀧𑁂𑀢𑁆𑀯𑀸 𑀲𑀼𑀯𑀡𑁆𑀡𑀧𑀸𑀢𑀺𑀬𑁄 𑀓𑀸𑀭𑁂𑀢𑁆𑀯𑀸 𑀘𑀢𑀼𑀭𑀸𑀲𑀻𑀢𑀺𑀲𑀼𑀯𑀡𑁆𑀡𑀧𑀸𑀢𑀺𑀲𑀳𑀲𑁆𑀲𑀸𑀤𑀻𑀦𑀁 𑀅𑀢𑁆𑀣𑀸𑀬 𑀘𑀢𑀼𑀭𑀸𑀲𑀻𑀢𑀺𑀭𑀸𑀚𑀲𑀳𑀲𑁆𑀲𑀸𑀦𑀁 𑀲𑀸𑀲𑀦𑀁 𑀧𑀳𑀺𑀡𑀺. 𑀭𑀸𑀚𑀸𑀦𑁄 ‘‘𑀘𑀺𑀭𑀲𑁆𑀲𑀁 𑀯𑀢 𑀫𑀬𑀁 𑀆𑀘𑀭𑀺𑀬𑁂𑀦 𑀅𑀦𑀼𑀕𑁆𑀕𑀳𑀺𑀢𑀸’’𑀢𑀺 𑀲𑀩𑁆𑀩𑀁 𑀲𑀫𑁆𑀧𑀸𑀤𑁂𑀢𑁆𑀯𑀸 𑀧𑁂𑀲𑁂𑀲𑀼𑀁. 𑀤𑀸𑀦𑁂 𑀤𑀺𑀬𑁆𑀬𑀫𑀸𑀦𑁂𑀬𑁂𑀯 𑀲𑀢𑁆𑀢 𑀯𑀲𑁆𑀲𑀸𑀦𑀺 𑀲𑀢𑁆𑀢 𑀫𑀸𑀲𑀸 𑀅𑀢𑀺𑀓𑁆𑀓𑀦𑁆𑀢𑀸. 𑀅𑀣 𑀩𑁆𑀭𑀸𑀳𑁆𑀫𑀡𑁄 ‘‘𑀳𑀺𑀭𑀜𑁆𑀜𑀁 𑀪𑀸𑀚𑁂𑀢𑁆𑀯𑀸 𑀤𑀸𑀦𑀁 𑀤𑀲𑁆𑀲𑀸𑀫𑀻’’𑀢𑀺 𑀫𑀳𑀦𑁆𑀢𑁂 𑀑𑀓𑀸𑀲𑁂 𑀤𑀸𑀦𑀁 𑀲𑀚𑁆𑀚𑀸𑀧𑁂𑀲𑀺. 𑀲𑀚𑁆𑀚𑀸𑀧𑁂𑀢𑁆𑀯𑀸 𑀘𑀢𑀼𑀭𑀸𑀲𑀻𑀢𑀺 𑀲𑀼𑀯𑀡𑁆𑀡𑀧𑀸𑀢𑀺𑀲𑀳𑀲𑁆𑀲𑀸𑀦𑀺 𑀆𑀤𑀺𑀁 𑀓𑀢𑁆𑀯𑀸 𑀓𑁄𑀝𑀺𑀢𑁄 𑀧𑀝𑁆𑀞𑀸𑀬 𑀅𑀤𑀸𑀲𑀺.

𑀢𑀢𑁆𑀣 𑀭𑀽𑀧𑀺𑀬𑀧𑀽𑀭𑀸𑀦𑀻𑀢𑀺 𑀭𑀚𑀢𑀢𑀝𑁆𑀝𑀺𑀭𑀚𑀢𑀨𑀸𑀮𑀭𑀚𑀢𑀫𑀸𑀲𑀓𑁂𑀳𑀺 𑀧𑀽𑀭𑀸𑀦𑀺. 𑀧𑀸𑀢𑀺𑀬𑁄 𑀧𑀦 𑀔𑀼𑀤𑁆𑀤𑀺𑀓𑀸𑀢𑀺 𑀦 𑀲𑀮𑁆𑀮𑀓𑁆𑀔𑁂𑀢𑀩𑁆𑀩𑀸, 𑀏𑀓𑀓𑀭𑀻𑀲𑀧𑁆𑀧𑀫𑀸𑀡𑁂 𑀪𑀽𑀫𑀺𑀪𑀸𑀕𑁂 𑀘𑀢𑀲𑁆𑀲𑁄𑀯 𑀧𑀸𑀢𑀺𑀬𑁄 𑀞𑀧𑀬𑀺𑀁𑀲𑀼. 𑀧𑀸𑀢𑀺𑀫𑀓𑀼𑀴𑀁 𑀦𑀯𑀭𑀢𑀦𑀁 𑀳𑁄𑀢𑀺, 𑀫𑀼𑀔𑀯𑀝𑁆𑀝𑀺𑀢𑁄 𑀧𑀝𑁆𑀞𑀸𑀬 𑀅𑀝𑁆𑀞𑀭𑀢𑀦𑀁, 𑀧𑀸𑀢𑀺𑀫𑀼𑀔𑀯𑀝𑁆𑀝𑀺𑀬𑀸 𑀙𑀬𑀼𑀢𑁆𑀢𑁄 𑀆𑀚𑀜𑁆𑀜𑀭𑀣𑁄 𑀅𑀦𑀼𑀧𑀭𑀺𑀬𑀸𑀬𑀢𑀺, 𑀤𑀤𑀫𑀸𑀦𑁄 𑀧𑀸𑀢𑀺𑀬𑀸 𑀩𑀸𑀳𑀺𑀭𑀦𑁆𑀢𑁂𑀦 𑀯𑀕𑁆𑀕𑀯𑀕𑁆𑀕𑁂 𑀧𑀝𑀺𑀕𑁆𑀕𑀸𑀳𑀓𑁂 𑀞𑀧𑁂𑀢𑁆𑀯𑀸 𑀧𑀞𑀫𑀁 𑀧𑀸𑀢𑀺𑀬𑀸 𑀧𑀓𑁆𑀔𑀺𑀢𑁆𑀢𑀁 𑀤𑀢𑁆𑀯𑀸 𑀧𑀘𑁆𑀙𑀸 𑀲𑀦𑁆𑀥𑀺𑀲𑀦𑁆𑀥𑀺𑀢𑁄 𑀯𑀺𑀬𑁄𑀚𑁂𑀢𑁆𑀯𑀸 𑀧𑀸𑀢𑀺𑀦𑁆𑀢𑀺 𑀏𑀯𑀁 𑀘𑀢𑀼𑀭𑀸𑀲𑀻𑀢𑀺 𑀧𑀸𑀢𑀺𑀲𑀳𑀲𑁆𑀲𑀸𑀦𑀺 𑀅𑀤𑀸𑀲𑀺. 𑀭𑀽𑀧𑀺𑀬𑀧𑀸𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀏𑀢𑁆𑀣𑀧𑀺 𑀘 𑀲𑀼𑀯𑀡𑁆𑀡𑀧𑀽𑀭𑀸𑀦𑀻𑀢𑀺 𑀲𑀼𑀯𑀡𑁆𑀡𑀢𑀝𑁆𑀝𑀺𑀲𑀼𑀯𑀡𑁆𑀡𑀨𑀸𑀮𑀲𑀼𑀯𑀡𑁆𑀡𑀫𑀸𑀲𑀓𑁂𑀳𑀺 𑀧𑀽𑀭𑀸𑀦𑀺. 𑀳𑀺𑀭𑀜𑁆𑀜𑀧𑀽𑀭𑀸𑀦𑀻𑀢𑀺 𑀲𑀢𑁆𑀢𑀯𑀺𑀥𑀭𑀢𑀦𑀧𑀽𑀭𑀸𑀦𑀺. 𑀲𑁄𑀯𑀡𑁆𑀡𑀸𑀮𑀗𑁆𑀓𑀸𑀭𑀸𑀦𑀻𑀢𑀺 𑀲𑀼𑀯𑀡𑁆𑀡𑀸𑀮𑀗𑁆𑀓𑀸𑀭𑀸𑀦𑀺. 𑀓𑀁𑀲𑀽𑀧𑀥𑀸𑀭𑀡𑀸𑀦𑀻𑀢𑀺 𑀭𑀚𑀢𑀫𑀬𑀔𑀻𑀭𑀧𑀝𑀺𑀘𑁆𑀙𑀓𑀸𑀦𑀺. 𑀢𑀸𑀲𑀁 𑀧𑀦 𑀥𑁂𑀦𑀽𑀦𑀁 𑀲𑀺𑀗𑁆𑀕𑀸𑀦𑀺 𑀲𑀼𑀯𑀡𑁆𑀡𑀓𑁄𑀲𑀓𑀧𑀭𑀺𑀬𑁄𑀦𑀤𑁆𑀥𑀸𑀦𑀺 𑀅𑀳𑁂𑀲𑀼𑀁, 𑀕𑀻𑀯𑀸𑀬 𑀲𑀼𑀫𑀦𑀤𑀸𑀫𑀁 𑀧𑀺𑀴𑀦𑁆𑀥𑀺𑀁𑀲𑀼, 𑀘𑀢𑀽𑀲𑀼 𑀧𑀸𑀤𑁂𑀲𑀼 𑀦𑀼𑀧𑀽𑀭𑀸𑀦𑀺, 𑀧𑀺𑀝𑁆𑀞𑀺𑀬𑀁 𑀯𑀭𑀤𑀼𑀓𑀽𑀮𑀁 𑀧𑀸𑀭𑀼𑀢𑀁, 𑀓𑀡𑁆𑀞𑁂 𑀲𑀼𑀯𑀡𑁆𑀡𑀖𑀡𑁆𑀝𑀁 𑀩𑀦𑁆𑀥𑀺𑀁𑀲𑀼. 𑀯𑀢𑁆𑀣𑀓𑁄𑀝𑀺𑀲𑀳𑀲𑁆𑀲𑀸𑀦𑀻𑀢𑀺 𑀮𑁄𑀓𑀯𑁄𑀳𑀸𑀭𑀢𑁄 𑀯𑀻𑀲𑀢𑀺𑀯𑀢𑁆𑀣𑀬𑀼𑀕𑀸𑀦𑀺 𑀏𑀓𑀸 𑀓𑁄𑀝𑀺, 𑀇𑀥 𑀧𑀦 𑀤𑀲 𑀲𑀸𑀝𑀓𑀸𑀢𑀺 𑀯𑀼𑀢𑁆𑀢𑀁. 𑀔𑁄𑀫𑀲𑀼𑀔𑀼𑀫𑀸𑀦𑀦𑁆𑀢𑀺𑀆𑀤𑀺𑀫𑁆𑀳𑀺 𑀔𑁄𑀫𑀸𑀤𑀻𑀲𑀼 𑀬𑀁 𑀬𑀁 𑀲𑀼𑀔𑀼𑀫𑀁, 𑀢𑀁 𑀢𑀤𑁂𑀯 𑀅𑀤𑀸𑀲𑀺. 𑀬𑀸𑀦𑀺 𑀧𑀦𑁂𑀢𑀸𑀦𑀺 𑀇𑀢𑁆𑀣𑀺𑀤𑀸𑀦𑀁 𑀉𑀲𑀪𑀤𑀸𑀦𑀁 𑀫𑀚𑁆𑀚𑀤𑀸𑀦𑀁 𑀲𑀫𑀚𑁆𑀚𑀸𑀤𑀸𑀦𑀦𑁆𑀢𑀺 𑀅𑀤𑀸𑀦𑀲𑀫𑁆𑀫𑀢𑀸𑀦𑀺, 𑀢𑀸𑀦𑀺𑀧𑀺 𑀏𑀲 ‘‘𑀯𑁂𑀮𑀸𑀫𑀲𑁆𑀲 𑀤𑀸𑀦𑀫𑀼𑀔𑁂 𑀇𑀤𑀁 𑀦𑀸𑀫 𑀦𑀢𑁆𑀣𑀻’’𑀢𑀺 𑀯𑀘𑀦𑀧𑀣𑀁 𑀧𑀘𑁆𑀙𑀺𑀦𑁆𑀤𑀺𑀢𑀼𑀁 𑀧𑀭𑀺𑀯𑀸𑀭𑀢𑁆𑀣𑀸𑀬 𑀅𑀤𑀸𑀲𑀺. 𑀦𑀚𑁆𑀚𑁄 𑀫𑀜𑁆𑀜𑁂 𑀯𑀺𑀲𑁆𑀲𑀦𑁆𑀤𑀦𑁆𑀢𑀻𑀢𑀺 𑀦𑀤𑀺𑀬𑁄 𑀯𑀺𑀬 𑀯𑀺𑀲𑁆𑀲𑀦𑁆𑀤𑀦𑁆𑀢𑀺.

𑀇𑀫𑀺𑀦𑀸 𑀲𑀢𑁆𑀣𑀸 𑀯𑁂𑀮𑀸𑀫𑀲𑁆𑀲 𑀤𑀸𑀦𑀁 𑀓𑀣𑁂𑀢𑁆𑀯𑀸, ‘‘𑀕𑀳𑀧𑀢𑀺, 𑀏𑀢𑀁 𑀫𑀳𑀸𑀤𑀸𑀦𑀁 𑀦𑀸𑀜𑁆𑀜𑁄 𑀅𑀤𑀸𑀲𑀺, 𑀅𑀳𑀁 𑀅𑀤𑀸𑀲𑀺𑀁. 𑀏𑀯𑀭𑀽𑀧𑀁 𑀧𑀦 𑀤𑀸𑀦𑀁 𑀤𑀤𑀦𑁆𑀢𑁄𑀧𑀺 𑀅𑀳𑀁 𑀧𑀝𑀺𑀕𑁆𑀕𑀳𑁂𑀢𑀼𑀁 𑀬𑀼𑀢𑁆𑀢𑀭𑀽𑀧𑀁 𑀧𑀼𑀕𑁆𑀕𑀮𑀁 𑀦𑀸𑀮𑀢𑁆𑀣𑀁, 𑀢𑁆𑀯𑀁 𑀫𑀸𑀤𑀺𑀲𑁂 𑀩𑀼𑀤𑁆𑀥𑁂 𑀮𑁄𑀓𑀲𑁆𑀫𑀺𑀁 𑀤𑀺𑀝𑁆𑀞𑀫𑀸𑀦𑁂 𑀤𑀸𑀦𑀁 𑀤𑀤𑀫𑀸𑀦𑁄 𑀓𑀲𑁆𑀫𑀸 𑀘𑀺𑀦𑁆𑀢𑁂𑀲𑀻’’𑀢𑀺 𑀲𑁂𑀝𑁆𑀞𑀺𑀲𑁆𑀲 𑀤𑁂𑀲𑀦𑀁 𑀯𑀟𑁆𑀠𑁂𑀦𑁆𑀢𑁄 𑀲𑀺𑀬𑀸 𑀔𑁄 𑀧𑀦 𑀢𑁂𑀢𑀺𑀆𑀤𑀺𑀫𑀸𑀳. 𑀦𑀦𑀼 𑀘 𑀬𑀸𑀦𑀺 𑀢𑀤𑀸 𑀅𑀳𑁂𑀲𑀼𑀁 𑀭𑀽𑀧𑀯𑁂𑀤𑀦𑀸𑀲𑀜𑁆𑀜𑀸𑀲𑀗𑁆𑀔𑀸𑀭𑀯𑀺𑀜𑁆𑀜𑀸𑀡𑀸𑀦𑀺, 𑀢𑀸𑀦𑀺 𑀦𑀺𑀭𑀼𑀤𑁆𑀥𑀸𑀦𑀺? 𑀓𑀲𑁆𑀫𑀸 ‘‘𑀅𑀳𑀁 𑀢𑁂𑀦 𑀲𑀫𑀬𑁂𑀦 𑀯𑁂𑀮𑀸𑀫𑁄 𑀩𑁆𑀭𑀸𑀳𑁆𑀫𑀡𑁄’’𑀢𑀺 𑀆𑀳𑀸𑀢𑀺? 𑀧𑀯𑁂𑀡𑀺𑀬𑀸 𑀅𑀯𑀺𑀘𑁆𑀙𑀺𑀦𑁆𑀦𑀢𑁆𑀢𑀸. 𑀢𑀸𑀦𑀺 𑀳𑀺 𑀭𑀽𑀧𑀸𑀤𑀻𑀦𑀺 𑀦𑀺𑀭𑀼𑀚𑁆𑀛𑀫𑀸𑀦𑀸𑀦𑀺 𑀇𑀫𑁂𑀲𑀁 𑀧𑀘𑁆𑀘𑀬𑁂 𑀤𑀢𑁆𑀯𑀸 𑀦𑀺𑀭𑀼𑀤𑁆𑀥𑀸𑀦𑀺 𑀅𑀧𑀭𑀸𑀧𑀭𑀁 𑀅𑀯𑀺𑀘𑁆𑀙𑀺𑀦𑁆𑀦𑀁 𑀧𑀯𑁂𑀡𑀺𑀁 𑀕𑀳𑁂𑀢𑁆𑀯𑀸 𑀏𑀯𑀫𑀸𑀳. 𑀦 𑀢𑀁 𑀓𑁄𑀘𑀺 𑀤𑀓𑁆𑀔𑀺𑀡𑀁 𑀲𑁄𑀥𑁂𑀢𑀻𑀢𑀺 𑀓𑁄𑀘𑀺 𑀲𑀫𑀡𑁄 𑀯𑀸 𑀩𑁆𑀭𑀸𑀳𑁆𑀫𑀡𑁄 𑀯𑀸 𑀤𑁂𑀯𑁄 𑀯𑀸 𑀫𑀸𑀭𑁄 𑀯𑀸 𑀉𑀝𑁆𑀞𑀸𑀬 𑀢𑀁 𑀤𑀓𑁆𑀔𑀺𑀡𑀁 𑀲𑁄𑀥𑁂𑀢𑀻𑀢𑀺 𑀯𑀢𑁆𑀢𑀩𑁆𑀩𑁄 𑀦𑀸𑀳𑁄𑀲𑀺. 𑀢𑀜𑁆𑀳𑀺 𑀤𑀓𑁆𑀔𑀺𑀡𑀁 𑀲𑁄𑀥𑁂𑀦𑁆𑀢𑁄 𑀉𑀢𑁆𑀢𑀫𑀓𑁄𑀝𑀺𑀬𑀸 𑀩𑀼𑀤𑁆𑀥𑁄, 𑀳𑁂𑀝𑁆𑀞𑀺𑀫𑀓𑁄𑀝𑀺𑀬𑀸 𑀥𑀫𑁆𑀫𑀲𑁂𑀦𑀸𑀧𑀢𑀺𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀲𑀤𑀺𑀲𑁄 𑀲𑀸𑀯𑀓𑁄 𑀲𑁄𑀥𑁂𑀬𑁆𑀬.

𑀤𑀺𑀝𑁆𑀞𑀺𑀲𑀫𑁆𑀧𑀦𑁆𑀦𑀦𑁆𑀢𑀺 𑀤𑀲𑁆𑀲𑀦𑀲𑀫𑁆𑀧𑀦𑁆𑀦𑀁 𑀲𑁄𑀢𑀸𑀧𑀦𑁆𑀦𑀁. 𑀇𑀤𑀁 𑀢𑀢𑁄 𑀫𑀳𑀧𑁆𑀨𑀮𑀢𑀭𑀦𑁆𑀢𑀺 𑀇𑀤𑀁 𑀲𑁄𑀢𑀸𑀧𑀦𑁆𑀦𑀲𑁆𑀲 𑀤𑀺𑀦𑁆𑀦𑀤𑀸𑀦𑀁 𑀮𑁄𑀓𑀺𑀬𑀫𑀳𑀸𑀚𑀦𑀲𑁆𑀲 𑀲𑀢𑁆𑀢𑀫𑀸𑀲𑀸𑀥𑀺𑀓𑀸𑀦𑀺 𑀲𑀢𑁆𑀢 𑀲𑀁𑀯𑀘𑁆𑀙𑀭𑀸𑀦𑀺 𑀏𑀢𑁆𑀢𑀓𑀁 𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀁 𑀧𑀭𑀺𑀘𑁆𑀘𑀚𑀦𑁆𑀢𑁂𑀦 𑀤𑀺𑀦𑁆𑀦𑀤𑀸𑀦𑀢𑁄 𑀫𑀳𑀧𑁆𑀨𑀮𑀁.

𑀬𑁄 𑀘 𑀲𑀢𑀁 𑀤𑀺𑀝𑁆𑀞𑀺𑀲𑀫𑁆𑀧𑀦𑁆𑀦𑀸𑀦𑀦𑁆𑀢𑀺 𑀏𑀢𑁆𑀣 𑀏𑀓𑀲𑁆𑀲 𑀲𑀓𑀤𑀸𑀕𑀸𑀫𑀺𑀲𑁆𑀲 𑀯𑀲𑁂𑀦 𑀏𑀓𑀼𑀢𑁆𑀢𑀭𑀲𑀢𑀁 𑀲𑁄𑀢𑀸𑀧𑀦𑁆𑀦𑁂 𑀓𑀢𑁆𑀯𑀸 𑀲𑁄𑀢𑀸𑀧𑀦𑁆𑀦𑀕𑀡𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀇𑀫𑀺𑀦𑀸 𑀉𑀧𑀸𑀬𑁂𑀦 𑀲𑀩𑁆𑀩𑀯𑀸𑀭𑁂𑀲𑀼 𑀳𑁂𑀝𑁆𑀞𑀸 𑀳𑁂𑀝𑁆𑀞𑀸 𑀆𑀕𑀢𑁂 𑀅𑀦𑀦𑁆𑀢𑀭𑁂𑀦 𑀲𑀢𑀕𑀼𑀡𑀁 𑀓𑀢𑁆𑀯𑀸 𑀧𑀼𑀕𑁆𑀕𑀮𑀕𑀡𑀦𑀸 𑀯𑁂𑀤𑀺𑀢𑀩𑁆𑀩𑀸.

𑀩𑀼𑀤𑁆𑀥𑀧𑁆𑀧𑀫𑀼𑀔𑀦𑁆𑀢𑀺 𑀏𑀢𑁆𑀣 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁 𑀲𑀗𑁆𑀖𑀢𑁆𑀣𑁂𑀭𑀁 𑀓𑀢𑁆𑀯𑀸 𑀦𑀺𑀲𑀺𑀦𑁆𑀦𑁄 𑀲𑀗𑁆𑀖𑁄 𑀩𑀼𑀤𑁆𑀥𑀧𑁆𑀧𑀫𑀼𑀔𑁄 𑀲𑀗𑁆𑀖𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀘𑀸𑀢𑀼𑀤𑁆𑀤𑀺𑀲𑀁 𑀲𑀗𑁆𑀖𑀁 𑀉𑀤𑁆𑀤𑀺𑀲𑁆𑀲𑀸𑀢𑀺 𑀏𑀢𑁆𑀣 𑀘𑀸𑀢𑀼𑀤𑁆𑀤𑀺𑀲𑀁 𑀲𑀗𑁆𑀖𑀁 𑀉𑀤𑁆𑀤𑀺𑀲𑁆𑀲 𑀓𑀢𑀯𑀺𑀳𑀸𑀭𑁄 𑀦𑀸𑀫 𑀬𑀢𑁆𑀣 𑀘𑁂𑀢𑀺𑀬𑀁 𑀧𑀢𑀺𑀝𑁆𑀞𑀺𑀢𑀁 𑀳𑁄𑀢𑀺, 𑀥𑀫𑁆𑀫𑀲𑁆𑀲𑀯𑀦𑀁 𑀓𑀭𑀻𑀬𑀢𑀺, 𑀘𑀢𑀽𑀳𑀺 𑀤𑀺𑀲𑀸𑀳𑀺 𑀅𑀦𑀼𑀤𑀺𑀲𑀸𑀳𑀺 𑀘 𑀪𑀺𑀓𑁆𑀔𑀽 𑀆𑀕𑀦𑁆𑀢𑁆𑀯𑀸 𑀅𑀧𑁆𑀧𑀝𑀺𑀧𑀼𑀘𑁆𑀙𑀺𑀢𑁆𑀯𑀸𑀬𑁂𑀯 𑀧𑀸𑀤𑁂 𑀥𑁄𑀯𑀺𑀢𑁆𑀯𑀸 𑀓𑀼𑀜𑁆𑀘𑀺𑀓𑀸𑀬 𑀤𑁆𑀯𑀸𑀭𑀁 𑀯𑀺𑀯𑀭𑀺𑀢𑁆𑀯𑀸 𑀲𑁂𑀦𑀸𑀲𑀦𑀁 𑀧𑀝𑀺𑀚𑀕𑁆𑀕𑀺𑀢𑁆𑀯𑀸 𑀯𑀲𑀺𑀢𑁆𑀯𑀸 𑀬𑀣𑀸𑀨𑀸𑀲𑀼𑀓𑀁 𑀕𑀘𑁆𑀙𑀦𑁆𑀢𑀺. 𑀲𑁄 𑀅𑀦𑁆𑀢𑀫𑀲𑁄 𑀘𑀢𑀼𑀭𑀢𑀦𑀺𑀬𑀸 𑀧𑀡𑁆𑀡𑀲𑀸𑀮𑀸𑀧𑀺 𑀳𑁄𑀢𑀼, 𑀘𑀸𑀢𑀼𑀤𑁆𑀤𑀺𑀲𑀁 𑀲𑀗𑁆𑀖𑀁 𑀉𑀤𑁆𑀤𑀺𑀲𑁆𑀲 𑀓𑀢𑀯𑀺𑀳𑀸𑀭𑁄𑀢𑁆𑀯𑁂𑀯 𑀯𑀼𑀘𑁆𑀘𑀢𑀺.

𑀲𑀭𑀡𑀁 𑀕𑀘𑁆𑀙𑁂𑀬𑁆𑀬𑀸𑀢𑀺 𑀏𑀢𑁆𑀣 𑀫𑀕𑁆𑀕𑁂𑀦𑀸𑀕𑀢𑀁 𑀅𑀦𑀺𑀯𑀢𑁆𑀢𑀦𑀲𑀭𑀡𑀁 𑀅𑀥𑀺𑀧𑁆𑀧𑁂𑀢𑀁. 𑀅𑀧𑀭𑁂 𑀧𑀦𑀸𑀳𑀼 𑁋 𑀅𑀢𑁆𑀢𑀸𑀦𑀁 𑀦𑀺𑀬𑁆𑀬𑀸𑀤𑁂𑀢𑁆𑀯𑀸 𑀤𑀺𑀦𑁆𑀦𑀢𑁆𑀢𑀸 𑀲𑀭𑀡𑀸𑀕𑀫𑀦𑀁 𑀢𑀢𑁄 𑀫𑀳𑀧𑁆𑀨𑀮𑀢𑀭𑀦𑁆𑀢𑀺 𑀯𑀼𑀢𑁆𑀢𑀁. 𑀲𑀺𑀓𑁆𑀔𑀸𑀧𑀤𑀸𑀦𑀺 𑀲𑀫𑀸𑀤𑀺𑀬𑁂𑀬𑁆𑀬𑀸𑀢𑀺 𑀧𑀜𑁆𑀘 𑀲𑀻𑀮𑀸𑀦𑀺 𑀕𑀡𑁆𑀳𑁂𑀬𑁆𑀬. 𑀲𑀻𑀮𑀫𑁆𑀧𑀺 𑀫𑀕𑁆𑀕𑁂𑀦 𑀆𑀕𑀢𑀁 𑀅𑀦𑀺𑀯𑀢𑁆𑀢𑀦𑀲𑀻𑀮𑀫𑁂𑀯 𑀓𑀣𑀺𑀢𑀁. 𑀅𑀧𑀭𑁂 𑀧𑀦𑀸𑀳𑀼 𑁋 𑀲𑀩𑁆𑀩𑀲𑀢𑁆𑀢𑀸𑀦𑀁 𑀅𑀪𑀬𑀤𑀸𑀦𑀲𑁆𑀲 𑀤𑀺𑀦𑁆𑀦𑀢𑁆𑀢𑀸 𑀲𑀻𑀮𑀁 𑀢𑀢𑁄 𑀫𑀳𑀧𑁆𑀨𑀮𑀢𑀭𑀦𑁆𑀢𑀺 𑀯𑀼𑀢𑁆𑀢𑀁. 𑀕𑀦𑁆𑀥𑁄𑀳𑀦𑀫𑀢𑁆𑀢𑀦𑁆𑀢𑀺 𑀕𑀦𑁆𑀥𑀊𑀳𑀦𑀫𑀢𑁆𑀢𑀁, 𑀤𑁆𑀯𑀻𑀳𑀗𑁆𑀕𑀼𑀮𑀻𑀳𑀺 𑀕𑀡𑁆𑀟𑀧𑀺𑀡𑁆𑀟𑀁 𑀕𑀳𑁂𑀢𑁆𑀯𑀸 𑀉𑀧𑀲𑀺𑀗𑁆𑀖𑀦𑀫𑀢𑁆𑀢𑀁. 𑀅𑀧𑀭𑁂 𑀧𑀦 ‘‘𑀕𑀤𑁆𑀤𑁄𑀳𑀦𑀫𑀢𑁆𑀢’’𑀦𑁆𑀢𑀺 𑀧𑀸𑀴𑀺𑀁 𑀯𑀢𑁆𑀯𑀸 𑀕𑀸𑀯𑀺𑀬𑀸 𑀏𑀓𑀯𑀸𑀭𑀁 𑀣𑀦𑀅𑀜𑁆𑀙𑀦𑀫𑀢𑁆𑀢𑀦𑁆𑀢𑀺 𑀅𑀢𑁆𑀣𑀁 𑀯𑀤𑀦𑁆𑀢𑀺. 𑀫𑁂𑀢𑁆𑀢𑀘𑀺𑀢𑁆𑀢𑀦𑁆𑀢𑀺 𑀲𑀩𑁆𑀩𑀲𑀢𑁆𑀢𑀸𑀦𑀁 𑀳𑀺𑀢𑀸𑀦𑀼𑀨𑀭𑀡𑀘𑀺𑀢𑁆𑀢𑀁. 𑀢𑀁 𑀧𑀦 𑀅𑀧𑁆𑀧𑀦𑀸𑀯𑀲𑁂𑀦𑁂𑀯 𑀕𑀳𑀺𑀢𑀁. 𑀅𑀦𑀺𑀘𑁆𑀘𑀲𑀜𑁆𑀜𑀦𑁆𑀢𑀺 𑀫𑀕𑁆𑀕𑀲𑁆𑀲 𑀅𑀦𑀦𑁆𑀢𑀭𑀧𑀘𑁆𑀘𑀬𑀪𑀸𑀯𑁂𑀦 𑀲𑀺𑀔𑀸𑀧𑀢𑁆𑀢𑀩𑀮𑀯𑀯𑀺𑀧𑀲𑁆𑀲𑀦𑀁.

𑀉𑀧𑀫𑀸𑀢𑁄 𑀧𑀦 𑀇𑀫𑀸𑀦𑀺 𑀤𑀸𑀦𑀸𑀤𑀻𑀦𑀺 𑀧𑀼𑀜𑁆𑀜𑀸𑀦𑀺 𑀏𑀯𑀁 𑀯𑁂𑀤𑀺𑀢𑀩𑁆𑀩𑀸𑀦𑀺 𑁋 𑀲𑀘𑁂𑀧𑀺 𑀳𑀺 𑀚𑀫𑁆𑀩𑀼𑀤𑀻𑀧𑀁 𑀪𑁂𑀭𑀺𑀢𑀮𑀲𑀤𑀺𑀲𑀁 𑀲𑀫𑀢𑀮𑀁 𑀓𑀢𑁆𑀯𑀸 𑀓𑁄𑀝𑀺𑀢𑁄 𑀧𑀝𑁆𑀞𑀸𑀬 𑀧𑀮𑁆𑀮𑀗𑁆𑀓𑁂 𑀅𑀢𑁆𑀣𑀭𑀺𑀢𑁆𑀯𑀸 𑀅𑀭𑀺𑀬𑀧𑀼𑀕𑁆𑀕𑀮𑁂 𑀦𑀺𑀲𑀻𑀤𑀸𑀧𑁂𑀬𑁆𑀬, 𑀢𑀢𑁆𑀣 𑀲𑁄𑀢𑀸𑀧𑀦𑁆𑀦𑀸𑀦𑀁 𑀤𑀲 𑀧𑀦𑁆𑀢𑀺𑀬𑁄 𑀅𑀲𑁆𑀲𑀼, 𑀲𑀓𑀤𑀸𑀕𑀸𑀫𑀻𑀦𑀁 𑀧𑀜𑁆𑀘, 𑀅𑀦𑀸𑀕𑀸𑀫𑀻𑀦𑀁 𑀅𑀟𑁆𑀠𑀢𑁂𑀬𑁆𑀬𑀸, 𑀔𑀺𑀡𑀸𑀲𑀯𑀸𑀦𑀁 𑀤𑀺𑀬𑀟𑁆𑀠𑀸, 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁 𑀏𑀓𑀸 𑀧𑀦𑁆𑀢𑀺 𑀪𑀯𑁂𑀬𑁆𑀬, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀏𑀓𑀓𑁄𑀯. 𑀏𑀢𑁆𑀢𑀓𑀲𑁆𑀲 𑀚𑀦𑀲𑁆𑀲 𑀤𑀺𑀦𑁆𑀦𑀤𑀸𑀦𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀤𑀺𑀦𑁆𑀦𑀫𑁂𑀯 𑀫𑀳𑀧𑁆𑀨𑀮𑀁. 𑀇𑀢𑀭𑀁 𑀧𑀦 𑁋

‘‘𑀯𑀺𑀳𑀸𑀭𑀤𑀸𑀦𑀁 𑀧𑀡𑀺𑀧𑀸𑀢𑁄, 𑀲𑀺𑀓𑁆𑀔𑀸 𑀫𑁂𑀢𑁆𑀢𑀸𑀬 𑀪𑀸𑀯𑀦𑀸;

𑀔𑀬𑀢𑁄 𑀲𑀫𑁆𑀫𑀲𑀦𑁆𑀢𑀲𑁆𑀲, 𑀓𑀮𑀁 𑀦𑀸𑀕𑁆𑀖𑀢𑀺 𑀲𑁄𑀴𑀲𑀺𑀁’’.

𑀢𑁂𑀦𑁂𑀯 𑀪𑀕𑀯𑀸 𑀧𑀭𑀺𑀦𑀺𑀩𑁆𑀩𑀸𑀦𑀲𑀫𑀬𑁂 ‘‘𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑁆𑀧𑀝𑀺𑀧𑀢𑁆𑀢𑀺 𑀅𑀦𑀼𑀢𑁆𑀢𑀭𑀸 𑀧𑀽𑀚𑀸’’𑀢𑀺 𑀆𑀳. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀲𑀻𑀳𑀦𑀸𑀤𑀯𑀕𑁆𑀕𑁄 𑀤𑀼𑀢𑀺𑀬𑁄.

𑁩. 𑀲𑀢𑁆𑀢𑀸𑀯𑀸𑀲𑀯𑀕𑁆𑀕𑁄

𑁧. 𑀢𑀺𑀞𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁧. 𑀢𑀢𑀺𑀬𑀲𑁆𑀲 𑀧𑀞𑀫𑁂 𑀉𑀢𑁆𑀢𑀭𑀓𑀼𑀭𑀼𑀓𑀸𑀢𑀺 𑀉𑀢𑁆𑀢𑀭𑀓𑀼𑀭𑀼𑀯𑀸𑀲𑀺𑀦𑁄. 𑀅𑀥𑀺𑀕𑁆𑀕𑀡𑁆𑀳𑀦𑁆𑀢𑀻𑀢𑀺 𑀅𑀥𑀺𑀪𑀯𑀦𑁆𑀢𑀺, 𑀅𑀥𑀺𑀓𑀸 𑀯𑀺𑀲𑀺𑀝𑁆𑀞𑀸 𑀚𑁂𑀝𑁆𑀞𑀓𑀸 𑀳𑁄𑀦𑁆𑀢𑀺. 𑀅𑀫𑀫𑀸𑀢𑀺 𑀦𑀺𑀢𑁆𑀢𑀡𑁆𑀳𑀸. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀦𑀺𑀤𑁆𑀤𑀼𑀓𑁆𑀔𑀸𑀢𑀺 𑀯𑀼𑀢𑁆𑀢𑀁. 𑀅𑀧𑀭𑀺𑀕𑁆𑀕𑀳𑀸𑀢𑀺 ‘‘𑀇𑀤𑀁 𑀫𑀬𑁆𑀳’’𑀦𑁆𑀢𑀺 𑀧𑀭𑀺𑀕𑁆𑀕𑀳𑀭𑀳𑀺𑀢𑀸. 𑀦𑀺𑀬𑀢𑀸𑀬𑀼𑀓𑀸𑀢𑀺 𑀢𑁂𑀲𑀜𑁆𑀳𑀺 𑀦𑀺𑀩𑀤𑁆𑀥𑀁 𑀆𑀬𑀼 𑀯𑀲𑁆𑀲𑀲𑀳𑀲𑁆𑀲𑀫𑁂𑀯, 𑀕𑀢𑀺𑀧𑀺 𑀦𑀺𑀩𑀤𑁆𑀥𑀸, 𑀢𑀢𑁄 𑀘𑀯𑀺𑀢𑁆𑀯𑀸 𑀲𑀕𑁆𑀕𑁂𑀬𑁂𑀯 𑀦𑀺𑀩𑁆𑀩𑀢𑁆𑀢𑀦𑁆𑀢𑀺. 𑀲𑀢𑀺𑀫𑀦𑁆𑀢𑁄𑀢𑀺 𑀤𑁂𑀯𑀢𑀸𑀦𑀜𑁆𑀳𑀺 𑀏𑀓𑀦𑁆𑀢𑀲𑀼𑀔𑀺𑀢𑀸𑀬 𑀲𑀢𑀺 𑀣𑀺𑀭𑀸 𑀦 𑀳𑁄𑀢𑀺, 𑀦𑁂𑀭𑀬𑀺𑀓𑀸𑀦𑀁 𑀏𑀓𑀦𑁆𑀢𑀤𑀼𑀓𑁆𑀔𑀺𑀢𑀸𑀬. 𑀇𑀫𑁂𑀲𑀁 𑀧𑀦 𑀯𑁄𑀓𑀺𑀡𑁆𑀡𑀲𑀼𑀔𑀤𑀼𑀓𑁆𑀔𑀢𑁆𑀢𑀸 𑀲𑀢𑀺 𑀣𑀺𑀭𑀸 𑀳𑁄𑀢𑀺. 𑀇𑀥 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄𑀢𑀺 𑀚𑀫𑁆𑀩𑀼𑀤𑀻𑀧𑁂 𑀩𑀼𑀤𑁆𑀥𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁 𑀉𑀧𑁆𑀧𑀚𑁆𑀚𑀦𑀢𑁄 𑀅𑀝𑁆𑀞𑀗𑁆𑀕𑀺𑀓𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄𑀧𑀺 𑀇𑀥𑁂𑀯 𑀳𑁄𑀢𑀺.

𑁨. 𑀅𑀲𑁆𑀲𑀔𑀴𑀼𑀗𑁆𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁨. 𑀤𑀼𑀢𑀺𑀬𑁂 𑀚𑀯𑀲𑀫𑁆𑀧𑀦𑁆𑀦𑁄𑀢𑀺 𑀧𑀤𑀚𑀯𑁂𑀦 𑀲𑀫𑁆𑀧𑀦𑁆𑀦𑁄. 𑀦 𑀯𑀡𑁆𑀡𑀲𑀫𑁆𑀧𑀦𑁆𑀦𑁄𑀢𑀺 𑀦 𑀲𑀭𑀻𑀭𑀯𑀡𑁆𑀡𑁂𑀦 𑀲𑀫𑁆𑀧𑀦𑁆𑀦𑁄. 𑀧𑀼𑀭𑀺𑀲𑀔𑀴𑀼𑀗𑁆𑀓𑁂𑀲𑀼 𑀚𑀯𑀲𑀫𑁆𑀧𑀦𑁆𑀦𑁄𑀢𑀺 𑀜𑀸𑀡𑀚𑀯𑁂𑀦 𑀲𑀫𑁆𑀧𑀦𑁆𑀦𑁄. 𑀦 𑀯𑀡𑁆𑀡𑀲𑀫𑁆𑀧𑀦𑁆𑀦𑁄𑀢𑀺 𑀦 𑀕𑀼𑀡𑀯𑀡𑁆𑀡𑁂𑀦 𑀲𑀫𑁆𑀧𑀦𑁆𑀦𑁄. 𑀲𑁂𑀲𑀁 𑀧𑀸𑀴𑀺𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀬𑀜𑁆𑀳𑁂𑀢𑁆𑀣 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸, 𑀢𑀁 𑀢𑀺𑀓𑀦𑀺𑀧𑀸𑀢𑀯𑀡𑁆𑀡𑀦𑀸𑀬𑀁 𑀯𑀼𑀢𑁆𑀢𑀫𑁂𑀯.

𑁩. 𑀢𑀡𑁆𑀳𑀸𑀫𑀽𑀮𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁩. 𑀢𑀢𑀺𑀬𑁂 𑀢𑀡𑁆𑀳𑀁 𑀧𑀝𑀺𑀘𑁆𑀘𑀸𑀢𑀺 𑀤𑁆𑀯𑁂 𑀢𑀡𑁆𑀳𑀸 𑀏𑀲𑀦𑀢𑀡𑁆𑀳𑀸 𑀏𑀲𑀺𑀢𑀢𑀡𑁆𑀳𑀸 𑀘. 𑀬𑀸𑀬 𑀢𑀡𑁆𑀳𑀸𑀬 𑀅𑀚𑀧𑀣𑀲𑀗𑁆𑀓𑀼𑀧𑀣𑀸𑀤𑀻𑀦𑀺 𑀧𑀝𑀺𑀧𑀚𑁆𑀚𑀺𑀢𑁆𑀯𑀸 𑀪𑁄𑀕𑁂 𑀏𑀲𑀢𑀺 𑀕𑀯𑁂𑀲𑀢𑀺, 𑀅𑀬𑀁 𑀏𑀲𑀦𑀢𑀡𑁆𑀳𑀸 𑀦𑀸𑀫. 𑀬𑀸 𑀢𑁂𑀲𑀼 𑀏𑀲𑀺𑀢𑁂𑀲𑀼 𑀕𑀯𑁂𑀲𑀺𑀢𑁂𑀲𑀼 𑀧𑀝𑀺𑀮𑀤𑁆𑀥𑁂𑀲𑀼 𑀢𑀡𑁆𑀳𑀸, 𑀅𑀬𑀁 𑀏𑀲𑀺𑀢𑀢𑀡𑁆𑀳𑀸 𑀦𑀸𑀫. 𑀇𑀥 𑀧𑀦 𑀏𑀲𑀦𑀢𑀡𑁆𑀳𑀸 𑀤𑀝𑁆𑀞𑀩𑁆𑀩𑀸. 𑀧𑀭𑀺𑀬𑁂𑀲𑀦𑀸𑀢𑀺 𑀭𑀽𑀧𑀸𑀤𑀺𑀆𑀭𑀫𑁆𑀫𑀡𑀧𑀭𑀺𑀬𑁂𑀲𑀦𑀸. 𑀲𑀸 𑀳𑀺 𑀏𑀲𑀦𑀢𑀡𑁆𑀳𑀸𑀬 𑀲𑀢𑀺 𑀳𑁄𑀢𑀺. 𑀮𑀸𑀪𑁄𑀢𑀺 𑀭𑀽𑀧𑀸𑀤𑀺𑀆𑀭𑀫𑁆𑀫𑀡𑀧𑀝𑀺𑀮𑀸𑀪𑁄. 𑀲𑁄 𑀳𑀺 𑀧𑀭𑀺𑀬𑁂𑀲𑀦𑀸𑀬 𑀲𑀢𑀺 𑀳𑁄𑀢𑀺.

𑀯𑀺𑀦𑀺𑀘𑁆𑀙𑀬𑁄 𑀧𑀦 𑀜𑀸𑀡𑀢𑀡𑁆𑀳𑀸𑀤𑀺𑀝𑁆𑀞𑀺𑀯𑀺𑀢𑀓𑁆𑀓𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑁄. 𑀢𑀢𑁆𑀣 ‘‘𑀲𑀼𑀔𑀯𑀺𑀦𑀺𑀘𑁆𑀙𑀬𑀁 𑀚𑀜𑁆𑀜𑀸, 𑀲𑀼𑀔𑀯𑀺𑀦𑀺𑀘𑁆𑀙𑀬𑀁 𑀜𑀢𑁆𑀯𑀸 𑀅𑀚𑁆𑀛𑀢𑁆𑀢𑀁 𑀲𑀼𑀔𑀫𑀦𑀼𑀬𑀼𑀜𑁆𑀚𑁂𑀬𑁆𑀬𑀸’’𑀢𑀺 (𑀫. 𑀦𑀺. 𑁩.𑁩𑁨𑁩) 𑀅𑀬𑀁 𑀜𑀸𑀡𑀯𑀺𑀦𑀺𑀘𑁆𑀙𑀬𑁄. ‘‘𑀯𑀺𑀦𑀺𑀘𑁆𑀙𑀬𑀸𑀢𑀺 𑀤𑁆𑀯𑁂 𑀯𑀺𑀦𑀺𑀘𑁆𑀙𑀬𑀸 𑀢𑀡𑁆𑀳𑀸𑀯𑀺𑀦𑀺𑀘𑁆𑀙𑀬𑁄 𑀘 𑀤𑀺𑀝𑁆𑀞𑀺𑀯𑀺𑀦𑀺𑀘𑁆𑀙𑀬𑁄 𑀘𑀸’’𑀢𑀺 (𑀫𑀳𑀸𑀦𑀺. 𑁧𑁦𑁨) 𑀏𑀯𑀁 𑀆𑀕𑀢𑀸𑀦𑀺 𑀅𑀝𑁆𑀞𑀲𑀢𑀢𑀡𑁆𑀳𑀸𑀯𑀺𑀘𑀭𑀺𑀢𑀸𑀦𑀺 𑀢𑀡𑁆𑀳𑀸𑀯𑀺𑀦𑀺𑀘𑁆𑀙𑀬𑁄. 𑀤𑁆𑀯𑀸𑀲𑀝𑁆𑀞𑀺 𑀤𑀺𑀝𑁆𑀞𑀺𑀬𑁄 𑀤𑀺𑀝𑁆𑀞𑀺𑀯𑀺𑀦𑀺𑀘𑁆𑀙𑀬𑁄. ‘‘𑀙𑀦𑁆𑀤𑁄 𑀔𑁄, 𑀤𑁂𑀯𑀸𑀦𑀫𑀺𑀦𑁆𑀤, 𑀯𑀺𑀢𑀓𑁆𑀓𑀦𑀺𑀤𑀸𑀦𑁄’’𑀢𑀺 (𑀤𑀻. 𑀦𑀺. 𑁨.𑁩𑁫𑁮) 𑀇𑀫𑀲𑁆𑀫𑀺𑀁 𑀧𑀦 𑀲𑀼𑀢𑁆𑀢𑁂 𑀇𑀥 𑀯𑀺𑀦𑀺𑀘𑁆𑀙𑀬𑁄𑀢𑀺 𑀯𑀼𑀢𑁆𑀢𑁄 𑀯𑀺𑀢𑀓𑁆𑀓𑁄𑀬𑁂𑀯 𑀆𑀕𑀢𑁄. 𑀮𑀸𑀪𑀁 𑀮𑀪𑀺𑀢𑁆𑀯𑀸 𑀳𑀺 𑀇𑀝𑁆𑀞𑀸𑀦𑀺𑀝𑁆𑀞𑀁 𑀲𑀼𑀦𑁆𑀤𑀭𑀸𑀲𑀼𑀦𑁆𑀤𑀭𑀁 𑀯𑀺𑀢𑀓𑁆𑀓𑁂𑀦𑁂𑀯 𑀯𑀺𑀦𑀺𑀘𑁆𑀙𑀺𑀦𑀦𑁆𑀢𑀺 ‘‘𑀏𑀢𑁆𑀢𑀓𑀁 𑀫𑁂 𑀭𑀽𑀧𑀸𑀭𑀫𑁆𑀫𑀡𑀢𑁆𑀣𑀸𑀬 𑀪𑀯𑀺𑀲𑁆𑀲𑀢𑀺, 𑀏𑀢𑁆𑀢𑀓𑀁 𑀲𑀤𑁆𑀥𑀸𑀭𑀫𑁆𑀫𑀡𑀢𑁆𑀣𑀸𑀬, 𑀏𑀢𑁆𑀢𑀓𑀁 𑀫𑀬𑁆𑀳𑀁 𑀪𑀯𑀺𑀲𑁆𑀲𑀢𑀺, 𑀏𑀢𑁆𑀢𑀓𑀁 𑀧𑀭𑀲𑁆𑀲, 𑀏𑀢𑁆𑀢𑀓𑀁 𑀧𑀭𑀺𑀪𑀼𑀜𑁆𑀚𑀺𑀲𑁆𑀲𑀸𑀫𑀺, 𑀏𑀢𑁆𑀢𑀓𑀁 𑀦𑀺𑀤𑀳𑀺𑀲𑁆𑀲𑀸𑀫𑀻’’𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 𑀮𑀸𑀪𑀁 𑀧𑀝𑀺𑀘𑁆𑀘 𑀯𑀺𑀦𑀺𑀘𑁆𑀙𑀬𑁄𑀢𑀺.

𑀙𑀦𑁆𑀤𑀭𑀸𑀕𑁄𑀢𑀺 𑀏𑀯𑀁 𑀅𑀓𑀼𑀲𑀮𑀯𑀺𑀢𑀓𑁆𑀓𑁂𑀦 𑀯𑀺𑀢𑀓𑁆𑀓𑀺𑀢𑁂 𑀯𑀢𑁆𑀣𑀼𑀲𑁆𑀫𑀺𑀁 𑀤𑀼𑀩𑁆𑀩𑀮𑀭𑀸𑀕𑁄 𑀘 𑀩𑀮𑀯𑀭𑀸𑀕𑁄 𑀘 𑀉𑀧𑁆𑀧𑀚𑁆𑀚𑀢𑀺. 𑀇𑀤𑀜𑁆𑀳𑀺 𑀇𑀥 𑀙𑀦𑁆𑀤𑁄𑀢𑀺 𑀤𑀼𑀩𑁆𑀩𑀮𑀭𑀸𑀕𑀲𑁆𑀲𑀸𑀥𑀺𑀯𑀘𑀦𑀁. 𑀅𑀚𑁆𑀛𑁄𑀲𑀸𑀦𑀦𑁆𑀢𑀺 𑀅𑀳𑀁 𑀫𑀫𑀦𑁆𑀢𑀺 𑀩𑀮𑀯𑀲𑀦𑁆𑀦𑀺𑀝𑁆𑀞𑀸𑀦𑀁. 𑀧𑀭𑀺𑀕𑁆𑀕𑀳𑁄𑀢𑀺 𑀢𑀡𑁆𑀳𑀸𑀤𑀺𑀝𑁆𑀞𑀺𑀯𑀲𑁂𑀦 𑀧𑀭𑀺𑀕𑁆𑀕𑀳𑀓𑀭𑀡𑀁. 𑀫𑀘𑁆𑀙𑀭𑀺𑀬𑀦𑁆𑀢𑀺 𑀧𑀭𑁂𑀳𑀺 𑀲𑀸𑀥𑀸𑀭𑀡𑀪𑀸𑀯𑀲𑁆𑀲 𑀅𑀲𑀳𑀦𑀢𑀸. 𑀢𑁂𑀦𑁂𑀯𑀲𑁆𑀲 𑀧𑁄𑀭𑀸𑀡𑀸 𑀏𑀯𑀁 𑀯𑀘𑀦𑀢𑁆𑀣𑀁 𑀯𑀤𑀦𑁆𑀢𑀺 𑁋 ‘‘𑀇𑀤𑀁 𑀅𑀘𑁆𑀙𑀭𑀺𑀬𑀁 𑀫𑀬𑁆𑀳𑀫𑁂𑀯 𑀳𑁄𑀢𑀼, 𑀫𑀸 𑀅𑀜𑁆𑀜𑀲𑁆𑀲 𑀅𑀘𑁆𑀙𑀭𑀺𑀬𑀁 𑀳𑁄𑀢𑀽𑀢𑀺 𑀧𑀯𑀢𑁆𑀢𑀢𑁆𑀢𑀸 𑀫𑀘𑁆𑀙𑀭𑀺𑀬𑀦𑁆𑀢𑀺 𑀯𑀼𑀘𑁆𑀘𑀢𑀻’’𑀢𑀺. 𑀆𑀭𑀓𑁆𑀔𑁄𑀢𑀺 𑀤𑁆𑀯𑀸𑀭𑀧𑀺𑀤𑀳𑀦𑀫𑀜𑁆𑀚𑀽𑀲𑀸𑀕𑁄𑀧𑀦𑀸𑀤𑀺𑀯𑀲𑁂𑀦 𑀲𑀼𑀝𑁆𑀞𑀼 𑀭𑀓𑁆𑀔𑀦𑀁. 𑀅𑀥𑀺𑀓𑀭𑁄𑀢𑀻𑀢𑀺 𑀅𑀥𑀺𑀓𑀭𑀡𑀁, 𑀓𑀸𑀭𑀡𑀲𑁆𑀲𑁂𑀢𑀁 𑀦𑀸𑀫𑀁. 𑀆𑀭𑀓𑁆𑀔𑀸𑀥𑀺𑀓𑀭𑀡𑀦𑁆𑀢𑀺 𑀪𑀸𑀯𑀦𑀧𑀼𑀁𑀲𑀓𑀁, 𑀆𑀭𑀓𑁆𑀔𑀸𑀳𑁂𑀢𑀽𑀢𑀺 𑀅𑀢𑁆𑀣𑁄. 𑀤𑀡𑁆𑀟𑀸𑀤𑀸𑀦𑀸𑀤𑀻𑀲𑀼 𑀧𑀭𑀦𑀺𑀲𑁂𑀥𑀦𑀢𑁆𑀣𑀁 𑀤𑀡𑁆𑀟𑀲𑁆𑀲 𑀆𑀤𑀸𑀦𑀁 𑀤𑀡𑁆𑀟𑀸𑀤𑀸𑀦𑀁. 𑀏𑀓𑀢𑁄 𑀥𑀸𑀭𑀸𑀤𑀺𑀦𑁄 𑀲𑀢𑁆𑀣𑀲𑁆𑀲 𑀆𑀤𑀸𑀦𑀁 𑀲𑀢𑁆𑀣𑀸𑀤𑀸𑀦𑀁. 𑀓𑀮𑀳𑁄𑀢𑀺 𑀓𑀸𑀬𑀓𑀮𑀳𑁄𑀧𑀺 𑀯𑀸𑀘𑀸𑀓𑀮𑀳𑁄𑀧𑀺. 𑀧𑀼𑀭𑀺𑀫𑁄 𑀯𑀺𑀕𑁆𑀕𑀳𑁄, 𑀧𑀘𑁆𑀙𑀺𑀫𑁄 𑀯𑀺𑀯𑀸𑀤𑁄 (𑀤𑀻. 𑀦𑀺. 𑀅𑀝𑁆𑀞. 𑁨.𑁧𑁦𑁩). 𑀢𑀼𑀯𑀁𑀢𑀼𑀯𑀦𑁆𑀢𑀺 𑀅𑀕𑀸𑀭𑀯𑀯𑀲𑁂𑀦 𑀢𑀼𑀯𑀁𑀢𑀼𑀯𑀁𑀯𑀘𑀦𑀁.

𑁪. 𑀲𑀢𑁆𑀢𑀸𑀯𑀸𑀲𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁪. 𑀘𑀢𑀼𑀢𑁆𑀣𑁂 𑀲𑀢𑁆𑀢𑀸𑀯𑀸𑀲𑀸𑀢𑀺 𑀲𑀢𑁆𑀢𑀸𑀦𑀁 𑀆𑀯𑀸𑀲𑀸, 𑀯𑀲𑀦𑀝𑁆𑀞𑀸𑀦𑀸𑀦𑀻𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀲𑀼𑀤𑁆𑀥𑀸𑀯𑀸𑀲𑀸𑀧𑀺 𑀲𑀢𑁆𑀢𑀸𑀯𑀸𑀲𑁄𑀯, 𑀅𑀲𑀩𑁆𑀩𑀓𑀸𑀮𑀺𑀓𑀢𑁆𑀢𑀸 𑀧𑀦 𑀦 𑀕𑀳𑀺𑀢𑀸. 𑀲𑀼𑀤𑁆𑀥𑀸𑀯𑀸𑀲𑀸 𑀳𑀺 𑀩𑀼𑀤𑁆𑀥𑀸𑀦𑀁 𑀔𑀦𑁆𑀥𑀸𑀯𑀸𑀭𑀝𑁆𑀞𑀸𑀦𑀲𑀤𑀺𑀲𑀸, 𑀅𑀲𑀗𑁆𑀔𑁂𑀬𑁆𑀬𑀓𑀧𑁆𑀧𑁂 𑀩𑀼𑀤𑁆𑀥𑁂𑀲𑀼 𑀅𑀦𑀺𑀩𑁆𑀩𑀢𑁆𑀢𑁂𑀲𑀼 𑀢𑀁 𑀞𑀸𑀦𑀁 𑀲𑀼𑀜𑁆𑀜𑀁 𑀳𑁄𑀢𑀺. 𑀇𑀢𑀺 𑀅𑀲𑀩𑁆𑀩𑀓𑀸𑀮𑀺𑀓𑀢𑁆𑀢𑀸 𑀦 𑀕𑀳𑀺𑀢𑀸. 𑀲𑁂𑀲𑀫𑁂𑀢𑁆𑀣 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀻𑀲𑀼 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁.

𑁫. 𑀧𑀜𑁆𑀜𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁫. 𑀧𑀜𑁆𑀘𑀫𑁂 𑀬𑀢𑁄𑀢𑀺 𑀬𑀲𑁆𑀫𑀺𑀁 𑀓𑀸𑀮𑁂. 𑀲𑀼𑀧𑀭𑀺𑀘𑀺𑀢𑀁 𑀳𑁄𑀢𑀻𑀢𑀺 𑀲𑀼𑀝𑁆𑀞𑀼 𑀉𑀧𑀘𑀺𑀢𑀁 𑀲𑀼𑀯𑀟𑁆𑀠𑀺𑀢𑀁 𑀳𑁄𑀢𑀺. 𑀓𑀮𑁆𑀮𑀁 𑀯𑀘𑀦𑀸𑀬𑀸𑀢𑀺 𑀬𑀼𑀢𑁆𑀢𑀁 𑀯𑀢𑁆𑀢𑀼𑀁. 𑀯𑀻𑀢𑀭𑀸𑀕𑀦𑁆𑀢𑀺 𑀯𑀺𑀕𑀢𑀭𑀸𑀕𑀁. 𑀅𑀲𑀭𑀸𑀕𑀥𑀫𑁆𑀫𑀦𑁆𑀢𑀺 𑀦 𑀲𑀭𑀚𑁆𑀚𑀦𑀲𑀪𑀸𑀯𑀁. 𑀅𑀦𑀸𑀯𑀢𑁆𑀢𑀺𑀥𑀫𑁆𑀫𑀦𑁆𑀢𑀺 𑀅𑀦𑀸𑀯𑀢𑁆𑀢𑀦𑀲𑀪𑀸𑀯𑀁 𑀅𑀦𑀺𑀩𑁆𑀩𑀢𑁆𑀢𑀸𑀭𑀳𑀁, 𑀅𑀧𑁆𑀧𑀝𑀺𑀲𑀦𑁆𑀥𑀺𑀓𑀪𑀸𑀯𑁂𑀦𑁂𑀯 𑀦𑀺𑀭𑀼𑀚𑁆𑀛𑀦𑀲𑀪𑀸𑀯𑀦𑁆𑀢𑀺 𑀅𑀢𑁆𑀣𑁄. 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀔𑀻𑀡𑀸𑀲𑀯𑁄𑀯 𑀓𑀣𑀺𑀢𑁄.

𑁬. 𑀲𑀺𑀮𑀸𑀬𑀽𑀧𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁬. 𑀙𑀝𑁆𑀞𑁂 𑀘𑀦𑁆𑀤𑀺𑀓𑀸𑀧𑀼𑀢𑁆𑀢𑁄𑀢𑀺 𑀫𑀸𑀢𑀼 𑀦𑀸𑀫𑀯𑀲𑁂𑀦 𑀧𑀜𑁆𑀜𑀸𑀢𑁄 𑀘𑀦𑁆𑀤𑀺𑀓𑀸𑀧𑀼𑀢𑁆𑀢𑀢𑁆𑀣𑁂𑀭𑁄. 𑀘𑁂𑀢𑀲𑀸 𑀘𑀺𑀢𑁆𑀢𑀁 𑀳𑁄𑀢𑀻𑀢𑀺 𑀘𑀺𑀢𑁆𑀢𑀯𑀸𑀭𑀧𑀭𑀺𑀬𑀸𑀬𑁂𑀦 𑀘𑀺𑀢𑁆𑀢𑀯𑀸𑀭𑀧𑀭𑀺𑀬𑀸𑀬𑁄 𑀘𑀺𑀢𑁄 𑀯𑀟𑁆𑀠𑀺𑀢𑁄 𑀳𑁄𑀢𑀺. 𑀘𑁂𑀢𑀲𑀸 𑀘𑀺𑀢𑁆𑀢𑀁 𑀲𑀼𑀧𑀭𑀺𑀘𑀺𑀢𑀦𑁆𑀢𑀺 𑀘𑀺𑀢𑁆𑀢𑀯𑀸𑀭𑀧𑀭𑀺𑀬𑀸𑀬𑁂𑀦 𑀘𑀺𑀢𑁆𑀢𑀯𑀸𑀭𑀧𑀭𑀺𑀬𑀸𑀬𑁄 𑀉𑀧𑀭𑀽𑀧𑀭𑀺 𑀲𑀼𑀘𑀺𑀢𑁄 𑀲𑀼𑀯𑀟𑁆𑀠𑀺𑀢𑁄 𑀳𑁄𑀢𑀺. 𑀦𑁂𑀯𑀲𑁆𑀲 𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀺𑀬𑀦𑁆𑀢𑀻𑀢𑀺 𑀢𑀸𑀦𑀺 𑀆𑀭𑀫𑁆𑀫𑀡𑀸𑀦𑀺 𑀢𑀲𑁆𑀲 𑀔𑀻𑀡𑀸𑀲𑀯𑀲𑁆𑀲 𑀘𑀺𑀢𑁆𑀢𑀼𑀧𑁆𑀧𑀸𑀤𑀁 𑀕𑀳𑁂𑀢𑁆𑀯𑀸 𑀔𑁂𑀧𑁂𑀢𑁆𑀯𑀸 𑀞𑀸𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺. 𑀅𑀫𑀺𑀲𑁆𑀲𑀻𑀓𑀢𑀦𑁆𑀢𑀺 𑀢𑀸𑀦𑀺 𑀆𑀭𑀫𑁆𑀫𑀡𑀸𑀦𑀺 𑀅𑀦𑀮𑁆𑀮𑀻𑀦𑀢𑁆𑀢𑀸 𑀢𑁂𑀳𑀺 𑀅𑀫𑀺𑀲𑁆𑀲𑀻𑀓𑀢𑀁. 𑀆𑀦𑁂𑀜𑁆𑀚𑀧𑁆𑀧𑀢𑁆𑀢𑀦𑁆𑀢𑀺 𑀅𑀦𑀺𑀜𑁆𑀚𑀦𑀪𑀸𑀯𑀁 𑀦𑀺𑀧𑁆𑀨𑀦𑁆𑀤𑀦𑀪𑀸𑀯𑀁 𑀧𑀢𑁆𑀢𑀁.

𑀲𑀺𑀮𑀸𑀬𑀽𑀧𑁄𑀢𑀺 𑀲𑀺𑀮𑀸𑀣𑀫𑁆𑀪𑁄. 𑀲𑁄𑀴𑀲𑀓𑀼𑀓𑁆𑀓𑀼𑀓𑁄𑀢𑀺 𑀤𑀻𑀖𑀢𑁄 𑀲𑁄𑀴𑀲𑀳𑀢𑁆𑀣𑁄. 𑀳𑁂𑀝𑁆𑀞𑀸𑀦𑁂𑀫𑀗𑁆𑀕𑀫𑀸𑀢𑀺 𑀆𑀯𑀸𑀝𑀲𑁆𑀲 𑀳𑁂𑀝𑁆𑀞𑀸𑀕𑀢𑀸. 𑀉𑀧𑀭𑀺 𑀦𑁂𑀫𑀲𑁆𑀲𑀸𑀢𑀺 𑀉𑀧𑀭𑀺 𑀆𑀯𑀸𑀝𑀲𑁆𑀲. 𑀲𑀼𑀦𑀺𑀔𑀸𑀢𑀢𑁆𑀢𑀸𑀢𑀺 𑀅𑀬𑀫𑀼𑀲𑀮𑁂𑀳𑀺 𑀓𑁄𑀝𑁆𑀝𑁂𑀢𑁆𑀯𑀸 𑀓𑁄𑀝𑁆𑀝𑁂𑀢𑁆𑀯𑀸 𑀲𑀼𑀝𑁆𑀞𑀼 𑀦𑀺𑀔𑀸𑀢𑀢𑁆𑀢𑀸. 𑀏𑀯𑀫𑁂𑀯 𑀔𑁄𑀢𑀺 𑀏𑀢𑁆𑀣 𑀲𑀺𑀮𑀸𑀬𑀽𑀧𑁄 𑀯𑀺𑀬 𑀔𑀻𑀡𑀸𑀲𑀯𑁄 𑀤𑀝𑁆𑀞𑀩𑁆𑀩𑁄, 𑀫𑀳𑀸𑀯𑀸𑀢𑀸 𑀯𑀺𑀬 𑀙𑀲𑀼 𑀤𑁆𑀯𑀸𑀭𑁂𑀲𑀼 𑀉𑀧𑁆𑀧𑀚𑁆𑀚𑀦𑀓𑀸 𑀓𑀺𑀮𑁂𑀲𑀸, 𑀘𑀢𑀽𑀳𑀺 𑀤𑀺𑀲𑀸𑀳𑀺 𑀆𑀕𑀦𑁆𑀢𑁆𑀯𑀸 𑀯𑀸𑀢𑀸𑀦𑀁 𑀲𑀺𑀮𑀸𑀬𑀽𑀧𑀁 𑀘𑀸𑀮𑁂𑀢𑀼𑀁 𑀅𑀲𑀫𑀢𑁆𑀣𑀪𑀸𑀯𑁄 𑀯𑀺𑀬 𑀙𑀲𑀼 𑀤𑁆𑀯𑀸𑀭𑁂𑀲𑀼 𑀉𑀧𑁆𑀧𑀚𑁆𑀚𑀦𑀓𑀓𑀺𑀮𑁂𑀲𑀸𑀦𑀁 𑀔𑀻𑀡𑀸𑀲𑀯𑀲𑁆𑀲 𑀘𑀺𑀢𑁆𑀢𑀁 𑀘𑀸𑀮𑁂𑀢𑀼𑀁 𑀅𑀲𑀫𑀢𑁆𑀣𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀇𑀫𑀲𑁆𑀫𑀺𑀫𑁆𑀧𑀺 𑀲𑀼𑀢𑁆𑀢𑁂 𑀔𑀻𑀡𑀸𑀲𑀯𑁄𑀯 𑀓𑀣𑀺𑀢𑁄.

𑁭-𑁮. 𑀯𑁂𑀭𑀲𑀼𑀢𑁆𑀢𑀤𑁆𑀯𑀬𑀯𑀡𑁆𑀡𑀦𑀸

𑁨𑁭-𑁨𑁮. 𑀲𑀢𑁆𑀢𑀫𑁂 𑀪𑀬𑀁 𑀯𑁂𑀭𑀁 𑀧𑀲𑀯𑀢𑀻𑀢𑀺 𑀘𑀺𑀢𑁆𑀢𑀼𑀢𑁆𑀭𑀸𑀲𑀪𑀬𑀜𑁆𑀘 𑀧𑀼𑀕𑁆𑀕𑀮𑀯𑁂𑀭𑀜𑁆𑀘 𑀧𑀝𑀺𑀮𑀪𑀢𑀺. 𑀘𑁂𑀢𑀲𑀺𑀓𑀦𑁆𑀢𑀺 𑀘𑀺𑀢𑁆𑀢𑀦𑀺𑀲𑁆𑀲𑀺𑀢𑀁. 𑀤𑀼𑀓𑁆𑀔𑀦𑁆𑀢𑀺 𑀓𑀸𑀬𑀯𑀢𑁆𑀣𑀼𑀓𑀁. 𑀤𑁄𑀫𑀦𑀲𑁆𑀲𑀦𑁆𑀢𑀺 𑀧𑀝𑀺𑀖𑀲𑀫𑁆𑀧𑀬𑀼𑀢𑁆𑀢𑀤𑀼𑀓𑁆𑀔𑀁. 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁄 𑀓𑀣𑀺𑀢𑁄. 𑀅𑀝𑁆𑀞𑀫𑀁 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀓𑀣𑀺𑀢𑀁, 𑀇𑀫𑀲𑁆𑀫𑀺𑀁 𑀧𑀦 𑀲𑁄𑀢𑀸𑀧𑀦𑁆𑀦𑁄𑀯 𑀓𑀣𑀺𑀢𑁄𑀢𑀺 𑀯𑀼𑀢𑁆𑀢𑀁.

𑁯. 𑀆𑀖𑀸𑀢𑀯𑀢𑁆𑀣𑀼𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁯. 𑀦𑀯𑀫𑁂 𑀆𑀖𑀸𑀢𑀯𑀢𑁆𑀣𑀽𑀦𑀻𑀢𑀺 𑀆𑀖𑀸𑀢𑀓𑀸𑀭𑀡𑀸𑀦𑀺. 𑀆𑀖𑀸𑀢𑀁 𑀩𑀦𑁆𑀥𑀢𑀻𑀢𑀺 𑀓𑁄𑀧𑀁 𑀩𑀦𑁆𑀥𑀢𑀺 𑀉𑀧𑁆𑀧𑀸𑀤𑁂𑀢𑀺.

𑁧𑁦-𑁧𑁧. 𑀆𑀖𑀸𑀢𑀧𑀝𑀺𑀯𑀺𑀦𑀬𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁩𑁦-𑁩𑁧. 𑀤𑀲𑀫𑁂 𑀆𑀖𑀸𑀢𑀧𑀝𑀺𑀯𑀺𑀦𑀬𑀸𑀢𑀺 𑀆𑀖𑀸𑀢𑀲𑁆𑀲 𑀧𑀝𑀺𑀯𑀺𑀦𑀬𑀓𑀸𑀭𑀡𑀸𑀦𑀺. 𑀢𑀁 𑀓𑀼𑀢𑁂𑀢𑁆𑀣 𑀮𑀩𑁆𑀪𑀸𑀢𑀺 ‘‘𑀢𑀁 𑀅𑀦𑀢𑁆𑀣𑀘𑀭𑀡𑀁 𑀫𑀸 𑀅𑀳𑁄𑀲𑀻’’𑀢𑀺 𑀏𑀢𑀲𑁆𑀫𑀺𑀁 𑀧𑀼𑀕𑁆𑀕𑀮𑁂 𑀓𑀼𑀢𑁄 𑀮𑀩𑁆𑀪𑀸, 𑀓𑁂𑀦 𑀓𑀸𑀭𑀡𑁂𑀦 𑀲𑀓𑁆𑀓𑀸 𑀮𑀤𑁆𑀥𑀼𑀁, ‘‘𑀧𑀭𑁄 𑀦𑀸𑀫 𑀧𑀭𑀲𑁆𑀲 𑀅𑀢𑁆𑀢𑀦𑁄 𑀘𑀺𑀢𑁆𑀢𑀭𑀼𑀘𑀺𑀬𑀸 𑀅𑀦𑀢𑁆𑀣𑀁 𑀓𑀭𑁄𑀢𑀻’’𑀢𑀺 𑀏𑀯𑀁 𑀘𑀺𑀦𑁆𑀢𑁂𑀢𑁆𑀯𑀸 𑀆𑀖𑀸𑀢𑀁 𑀧𑀝𑀺𑀯𑀺𑀦𑁂𑀢𑀺. 𑀅𑀣 𑀯𑀸 𑀲𑀘𑀸𑀳𑀁 𑀓𑁄𑀧𑀁 𑀓𑀭𑁂𑀬𑁆𑀬𑀁, 𑀢𑀁 𑀓𑁄𑀧𑀓𑀭𑀡𑀁 𑀏𑀢𑁆𑀣 𑀧𑀼𑀕𑁆𑀕𑀮𑁂 𑀓𑀼𑀢𑁄 𑀮𑀩𑁆𑀪𑀸, 𑀓𑁂𑀦 𑀓𑀸𑀭𑀡𑁂𑀦 𑀮𑀤𑁆𑀥𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀓𑀼𑀢𑁄 𑀮𑀸𑀪𑀸𑀢𑀺𑀧𑀺 𑀧𑀸𑀞𑁄. 𑀲𑀘𑀸𑀳𑀁 𑀏𑀢𑁆𑀣 𑀓𑁄𑀧𑀁 𑀓𑀭𑁂𑀬𑁆𑀬𑀁, 𑀢𑀲𑁆𑀫𑀺𑀁 𑀫𑁂 𑀓𑁄𑀧𑀓𑀭𑀡𑁂 𑀓𑀼𑀢𑁄 𑀮𑀸𑀪𑀸 𑀮𑀸𑀪𑀸, 𑀦𑀸𑀫 𑀓𑁂 𑀲𑀺𑀬𑀼𑀦𑁆𑀢𑀺 𑀅𑀢𑁆𑀣𑁄. 𑀇𑀫𑀲𑁆𑀫𑀺𑀜𑁆𑀘 𑀅𑀢𑁆𑀣𑁂 𑀢𑀦𑁆𑀢𑀺 𑀦𑀺𑀧𑀸𑀢𑀫𑀢𑁆𑀢𑀫𑁂𑀯 𑀳𑁄𑀢𑀺. 𑀏𑀓𑀸𑀤𑀲𑀫𑁂 𑀅𑀦𑀼𑀧𑀼𑀩𑁆𑀩𑀦𑀺𑀭𑁄𑀥𑀸𑀢𑀺 𑀅𑀦𑀼𑀧𑀝𑀺𑀧𑀸𑀝𑀺𑀦𑀺𑀭𑁄𑀥𑀸. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀲𑀢𑁆𑀢𑀸𑀯𑀸𑀲𑀯𑀕𑁆𑀕𑁄 𑀢𑀢𑀺𑀬𑁄.

𑁪. 𑀫𑀳𑀸𑀯𑀕𑁆𑀕𑁄

𑁧-𑁨. 𑀅𑀦𑀼𑀧𑀼𑀩𑁆𑀩𑀯𑀺𑀳𑀸𑀭𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁩𑁨-𑁩𑁩. 𑀘𑀢𑀼𑀢𑁆𑀣𑀲𑁆𑀲 𑀧𑀞𑀫𑁂 𑀅𑀦𑀼𑀧𑀼𑀩𑁆𑀩𑀯𑀺𑀳𑀸𑀭𑀸𑀢𑀺 𑀅𑀦𑀼𑀧𑀝𑀺𑀧𑀸𑀝𑀺𑀬𑀸 𑀲𑀫𑀸𑀧𑀚𑁆𑀚𑀺𑀢𑀩𑁆𑀩𑀯𑀺𑀳𑀸𑀭𑀸. 𑀤𑀼𑀢𑀺𑀬𑁂 𑀬𑀢𑁆𑀣 𑀓𑀸𑀫𑀸 𑀦𑀺𑀭𑀼𑀚𑁆𑀛𑀦𑁆𑀢𑀻𑀢𑀺 𑀬𑀲𑁆𑀫𑀺𑀁 𑀞𑀸𑀦𑁂 𑀓𑀸𑀫𑀸 𑀯𑀽𑀧𑀲𑀫𑁆𑀫𑀦𑁆𑀢𑀺. 𑀦𑀺𑀭𑁄𑀥𑁂𑀢𑁆𑀯𑀸𑀢𑀺 𑀅𑀧𑁆𑀧𑀝𑀺𑀯𑀢𑁆𑀢𑁂 𑀓𑀢𑁆𑀯𑀸. 𑀦𑀺𑀘𑁆𑀙𑀸𑀢𑀸𑀢𑀺 𑀢𑀡𑁆𑀳𑀸𑀤𑀺𑀝𑁆𑀞𑀺𑀘𑁆𑀙𑀸𑀢𑀸𑀦𑀁 𑀅𑀪𑀸𑀯𑁂𑀦 𑀦𑀺𑀘𑁆𑀙𑀸𑀢𑀸. 𑀦𑀺𑀩𑁆𑀩𑀼𑀢𑀸𑀢𑀺 𑀅𑀢𑁆𑀢𑀧𑀭𑀺𑀢𑀸𑀧𑀦𑀓𑀺𑀮𑁂𑀲𑀸𑀦𑀁 𑀅𑀪𑀸𑀯𑁂𑀦 𑀦𑀺𑀩𑁆𑀩𑀼𑀢𑀸. 𑀢𑀺𑀡𑁆𑀡𑀸𑀢𑀺 𑀓𑀸𑀫𑀢𑁄 𑀢𑀺𑀡𑁆𑀡𑀸. 𑀧𑀸𑀭𑀁𑀕𑀢𑀸𑀢𑀺 𑀓𑀸𑀫𑁂 𑀧𑀸𑀭𑀁 𑀕𑀢𑀸. 𑀢𑀤𑀗𑁆𑀕𑁂𑀦𑀸𑀢𑀺 𑀢𑁂𑀦 𑀛𑀸𑀦𑀗𑁆𑀕𑁂𑀦. 𑀏𑀢𑁆𑀣 𑀓𑀸𑀫𑀸 𑀦𑀺𑀭𑀼𑀚𑁆𑀛𑀦𑁆𑀢𑀻𑀢𑀺 𑀏𑀢𑁆𑀣 𑀧𑀞𑀫𑀚𑁆𑀛𑀸𑀦𑁂 𑀓𑀸𑀫𑀸 𑀦𑀺𑀭𑀼𑀚𑁆𑀛𑀦𑁆𑀢𑀺. 𑀢𑁂 𑀘𑀸𑀢𑀺 𑀬𑁂 𑀧𑀞𑀫𑀚𑁆𑀛𑀸𑀦𑀁 𑀲𑀫𑀸𑀧𑀚𑁆𑀚𑀦𑁆𑀢𑀺, 𑀢𑁂 𑀓𑀸𑀫𑁂 𑀦𑀺𑀭𑁄𑀥𑁂𑀢𑁆𑀯𑀸 𑀦𑀺𑀭𑁄𑀥𑁂𑀢𑁆𑀯𑀸 𑀯𑀺𑀳𑀭𑀦𑁆𑀢𑀺 𑀦𑀸𑀫. 𑀧𑀜𑁆𑀚𑀮𑀺𑀓𑁄𑀢𑀺 𑀧𑀕𑁆𑀕𑀳𑀺𑀢𑀅𑀜𑁆𑀚𑀮𑀺𑀓𑁄 𑀳𑀼𑀢𑁆𑀯𑀸. 𑀧𑀬𑀺𑀭𑀼𑀧𑀸𑀲𑁂𑀬𑁆𑀬𑀸𑀢𑀺 𑀉𑀧𑀝𑁆𑀞𑀸𑀧𑁂𑀬𑁆𑀬. 𑀇𑀫𑀺𑀦𑀸 𑀉𑀧𑀸𑀬𑁂𑀦 𑀲𑀩𑁆𑀩𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑁩. 𑀦𑀺𑀩𑁆𑀩𑀸𑀦𑀲𑀼𑀔𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁪. 𑀢𑀢𑀺𑀬𑁂 𑀉𑀤𑀸𑀬𑀻𑀢𑀺 𑀮𑀸𑀴𑀼𑀤𑀸𑀬𑀺𑀢𑁆𑀣𑁂𑀭𑁄. 𑀏𑀢𑀤𑁂𑀯 𑀔𑁆𑀯𑁂𑀢𑁆𑀣𑀸𑀢𑀺 𑀏𑀢𑀤𑁂𑀯 𑀔𑁄 𑀏𑀢𑁆𑀣. 𑀓𑀸𑀫𑀲𑀳𑀕𑀢𑀸𑀢𑀺 𑀓𑀸𑀫𑀦𑀺𑀲𑁆𑀲𑀺𑀢𑀸. 𑀲𑀫𑀼𑀤𑀸𑀘𑀭𑀦𑁆𑀢𑀻𑀢𑀺 𑀫𑀦𑁄𑀤𑁆𑀯𑀸𑀭𑁂 𑀲𑀜𑁆𑀘𑀭𑀦𑁆𑀢𑀺. 𑀆𑀩𑀸𑀥𑀸𑀬𑀸𑀢𑀺 𑀆𑀩𑀸𑀥𑀦𑀸𑀬 𑀧𑀻𑀴𑀦𑀸𑀬. 𑀧𑀭𑀺𑀬𑀸𑀬𑁂𑀦𑀸𑀢𑀺 𑀓𑀸𑀭𑀡𑁂𑀦. 𑀏𑀯𑀁 𑀲𑀩𑁆𑀩𑀯𑀸𑀭𑁂𑀲𑀼 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀅𑀯𑁂𑀤𑀬𑀺𑀢𑀲𑀼𑀔𑀁 𑀦𑀸𑀫 𑀓𑀣𑀺𑀢𑀁.

𑁪. 𑀕𑀸𑀯𑀻𑀉𑀧𑀫𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁫. 𑀘𑀢𑀼𑀢𑁆𑀣𑁂 𑀧𑀩𑁆𑀩𑀢𑁂𑀬𑁆𑀬𑀸𑀢𑀺 𑀧𑀩𑁆𑀩𑀢𑀘𑀸𑀭𑀺𑀦𑀻. 𑀦 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀁 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸𑀢𑀺 𑀬𑀣𑀸 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀸 𑀳𑁄𑀢𑀺, 𑀏𑀯𑀁 𑀦 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸. 𑀢𑀁 𑀦𑀺𑀫𑀺𑀢𑁆𑀢𑀦𑁆𑀢𑀺 𑀢𑀁 𑀧𑀞𑀫𑀚𑁆𑀛𑀸𑀦𑀲𑀗𑁆𑀔𑀸𑀢𑀁 𑀦𑀺𑀫𑀺𑀢𑁆𑀢𑀁. 𑀦 𑀲𑁆𑀯𑀸𑀥𑀺𑀝𑁆𑀞𑀺𑀢𑀁 𑀅𑀥𑀺𑀝𑁆𑀞𑀸𑀢𑀻𑀢𑀺 𑀬𑀣𑀸 𑀲𑀼𑀝𑁆𑀞𑀼 𑀅𑀥𑀺𑀝𑁆𑀞𑀺𑀢𑀁 𑀳𑁄𑀢𑀺, 𑀦 𑀏𑀯𑀁 𑀅𑀥𑀺𑀝𑁆𑀞𑀸𑀢𑀺. 𑀅𑀦𑀪𑀺𑀳𑀺𑀁𑀲𑀫𑀸𑀦𑁄𑀢𑀺 𑀅𑀧𑁄𑀣𑁂𑀦𑁆𑀢𑁄 𑀅𑀯𑀺𑀳𑁂𑀞𑁂𑀦𑁆𑀢𑁄. 𑀫𑀼𑀤𑀼 𑀘𑀺𑀢𑁆𑀢𑀁 𑀳𑁄𑀢𑀺 𑀓𑀫𑁆𑀫𑀜𑁆𑀜𑀦𑁆𑀢𑀺 𑀬𑀣𑀸 𑀯𑀺𑀧𑀲𑁆𑀲𑀦𑀸𑀘𑀺𑀢𑁆𑀢𑀁 𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑀓𑁆𑀔𑀡𑁂 𑀫𑀼𑀤𑀼 𑀓𑀫𑁆𑀫𑀓𑁆𑀔𑀫𑀁 𑀓𑀫𑁆𑀫𑀬𑁄𑀕𑁆𑀕𑀁 𑀳𑁄𑀢𑀺, 𑀏𑀯𑀫𑀲𑁆𑀲 𑀅𑀪𑀺𑀜𑁆𑀜𑀸𑀧𑀸𑀤𑀓𑀁 𑀘𑀢𑀼𑀢𑁆𑀣𑀚𑁆𑀛𑀸𑀦𑀘𑀺𑀢𑁆𑀢𑀁 𑀫𑀼𑀤𑀼 𑀳𑁄𑀢𑀺 𑀓𑀫𑁆𑀫𑀜𑁆𑀜𑀁. 𑀅𑀧𑁆𑀧𑀫𑀸𑀡𑁄 𑀲𑀫𑀸𑀥𑀻𑀢𑀺 𑀘𑀢𑀼𑀩𑁆𑀭𑀳𑁆𑀫𑀯𑀺𑀳𑀸𑀭𑀲𑀫𑀸𑀥𑀺𑀧𑀺 𑀫𑀕𑁆𑀕𑀨𑀮𑀲𑀫𑀸𑀥𑀺𑀧𑀺 𑀅𑀧𑁆𑀧𑀫𑀸𑀡𑁄 𑀲𑀫𑀸𑀥𑀺 𑀦𑀸𑀫, 𑀇𑀥 𑀧𑀦 ‘‘𑀅𑀧𑁆𑀧𑀫𑀸𑀡𑀁 𑀅𑀧𑁆𑀧𑀫𑀸𑀡𑀸𑀭𑀫𑁆𑀫𑀡’’𑀦𑁆𑀢𑀺 𑀇𑀫𑀺𑀦𑀸 𑀧𑀭𑀺𑀬𑀸𑀬𑁂𑀦 𑀲𑀼𑀧𑁆𑀧𑀕𑀼𑀡𑀲𑀫𑀸𑀥𑀺 𑀅𑀧𑁆𑀧𑀫𑀸𑀡𑀲𑀫𑀸𑀥𑀻𑀢𑀺 𑀤𑀝𑁆𑀞𑀩𑁆𑀩𑁄. 𑀲𑁄 𑀅𑀧𑁆𑀧𑀫𑀸𑀡𑁂𑀦 𑀲𑀫𑀸𑀥𑀺𑀦𑀸 𑀲𑀼𑀪𑀸𑀯𑀺𑀢𑁂𑀦𑀸𑀢𑀺 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀅𑀬𑀁 𑀪𑀺𑀓𑁆𑀔𑀼 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀢𑁆𑀢𑁄. 𑀇𑀤𑀸𑀦𑀺 𑀔𑀻𑀡𑀸𑀲𑀯𑀲𑁆𑀲 𑀅𑀪𑀺𑀜𑁆𑀜𑀸𑀧𑀝𑀺𑀧𑀸𑀝𑀺𑀁 𑀤𑀲𑁆𑀲𑁂𑀦𑁆𑀢𑁄 𑀬𑀲𑁆𑀲 𑀬𑀲𑁆𑀲 𑀘𑀸𑀢𑀺𑀆𑀤𑀺𑀫𑀸𑀳.

𑁫. 𑀛𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁬. 𑀧𑀜𑁆𑀘𑀫𑁂 𑀆𑀲𑀯𑀸𑀦𑀁 𑀔𑀬𑀦𑁆𑀢𑀺 𑀅𑀭𑀳𑀢𑁆𑀢𑀁. 𑀬𑀤𑁂𑀯 𑀢𑀢𑁆𑀣 𑀳𑁄𑀢𑀺 𑀭𑀽𑀧𑀕𑀢𑀦𑁆𑀢𑀺 𑀢𑀲𑁆𑀫𑀺𑀁 𑀧𑀞𑀫𑀚𑁆𑀛𑀸𑀦𑀓𑁆𑀔𑀡𑁂 𑀯𑀢𑁆𑀣𑀼𑀯𑀲𑁂𑀦 𑀯𑀸 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀺𑀓𑀸𑀤𑀺𑀯𑀲𑁂𑀦 𑀯𑀸 𑀬𑀁 𑀭𑀽𑀧𑀁 𑀦𑀸𑀫 𑀧𑀯𑀢𑁆𑀢𑀢𑀺. 𑀯𑁂𑀤𑀦𑀸𑀕𑀢𑀸𑀤𑀻𑀦𑀺 𑀲𑀫𑁆𑀧𑀬𑀼𑀢𑁆𑀢𑀯𑁂𑀤𑀦𑀸𑀤𑀻𑀦𑀁 𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀢𑁂 𑀥𑀫𑁆𑀫𑁂𑀢𑀺 𑀢𑁂 𑀭𑀽𑀧𑀸𑀤𑀬𑁄 𑀧𑀜𑁆𑀘𑀓𑁆𑀔𑀦𑁆𑀥𑀥𑀫𑁆𑀫𑁂. 𑀅𑀦𑀺𑀘𑁆𑀘𑀢𑁄𑀢𑀺𑀆𑀤𑀻𑀲𑀼 𑀳𑀼𑀢𑁆𑀯𑀸 𑀅𑀪𑀸𑀯𑀸𑀓𑀸𑀭𑁂𑀦 𑀅𑀦𑀺𑀘𑁆𑀘𑀢𑁄, 𑀧𑀝𑀺𑀧𑀻𑀴𑀦𑀸𑀓𑀸𑀭𑁂𑀦 𑀤𑀼𑀓𑁆𑀔𑀢𑁄, 𑀭𑀼𑀚𑁆𑀚𑀦𑀸𑀓𑀸𑀭𑁂𑀦 𑀭𑁄𑀕𑀢𑁄, 𑀅𑀦𑁆𑀢𑁄𑀤𑀼𑀲𑁆𑀲𑀦𑀝𑁆𑀞𑁂𑀦 𑀕𑀡𑁆𑀟𑀢𑁄, 𑀅𑀦𑀼𑀧𑀯𑀺𑀝𑁆𑀞𑀝𑁆𑀞𑁂𑀦 𑀅𑀦𑀼𑀓𑀦𑁆𑀢𑀦𑀝𑁆𑀞𑁂𑀦 𑀘 𑀲𑀮𑁆𑀮𑀢𑁄, 𑀤𑀼𑀓𑁆𑀔𑀝𑁆𑀞𑁂𑀦 𑀅𑀖𑀢𑁄, 𑀆𑀩𑀸𑀥𑀦𑀝𑁆𑀞𑁂𑀦 𑀆𑀩𑀸𑀥𑀢𑁄, 𑀅𑀲𑀓𑀝𑁆𑀞𑁂𑀦 𑀧𑀭𑀢𑁄, 𑀧𑀮𑀼𑀚𑁆𑀚𑀦𑀝𑁆𑀞𑁂𑀦 𑀧𑀮𑁄𑀓𑀢𑁄, 𑀅𑀲𑁆𑀲𑀸𑀫𑀺𑀓𑀝𑁆𑀞𑁂𑀦 𑀲𑀼𑀜𑁆𑀜𑀢𑁄, 𑀅𑀯𑀲𑀯𑀢𑁆𑀢𑀦𑀝𑁆𑀞𑁂𑀦 𑀅𑀦𑀢𑁆𑀢𑀢𑁄. 𑀲𑀫𑀦𑀼𑀧𑀲𑁆𑀲𑀢𑀻𑀢𑀺 𑀩𑀮𑀯𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸𑀬 𑀧𑀲𑁆𑀲𑀢𑀺.

𑀢𑁂𑀳𑀺 𑀥𑀫𑁆𑀫𑁂𑀳𑀻𑀢𑀺 𑀢𑁂𑀳𑀺 𑀧𑀜𑁆𑀘𑀓𑁆𑀔𑀦𑁆𑀥𑀥𑀫𑁆𑀫𑁂𑀳𑀺. 𑀧𑀝𑀺𑀯𑀸𑀧𑁂𑀢𑀻𑀢𑀺 𑀦𑀺𑀩𑁆𑀩𑀸𑀦𑀯𑀲𑁂𑀦 𑀦𑀺𑀯𑀢𑁆𑀢𑁂𑀢𑀺. 𑀅𑀫𑀢𑀸𑀬 𑀥𑀸𑀢𑀼𑀬𑀸𑀢𑀺 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸. 𑀘𑀺𑀢𑁆𑀢𑀁 𑀉𑀧𑀲𑀁𑀳𑀭𑀢𑀻𑀢𑀺 𑀜𑀸𑀡𑁂𑀦 𑀆𑀦𑀺𑀲𑀁𑀲𑀁 𑀤𑀺𑀲𑁆𑀯𑀸 𑀑𑀢𑀸𑀭𑁂𑀢𑀺. 𑀲𑀦𑁆𑀢𑀦𑁆𑀢𑀺 𑀧𑀘𑁆𑀘𑀦𑀻𑀓𑀲𑀦𑁆𑀢𑀢𑀸𑀬 𑀲𑀦𑁆𑀢𑀁. 𑀧𑀡𑀻𑀢𑀦𑁆𑀢𑀺 𑀅𑀢𑀧𑁆𑀧𑀓𑀁. 𑀲𑁄 𑀢𑀢𑁆𑀣 𑀞𑀺𑀢𑁄 𑀆𑀲𑀯𑀸𑀦𑀁 𑀔𑀬𑀁 𑀧𑀸𑀧𑀼𑀡𑀸𑀢𑀻𑀢𑀺 𑀲𑁄 𑀢𑀲𑁆𑀫𑀺𑀁 𑀧𑀞𑀫𑀚𑁆𑀛𑀸𑀦𑁂 𑀞𑀺𑀢𑁄 𑀢𑀁 𑀩𑀮𑀯𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀸𑀢𑀺. 𑀅𑀧𑀭𑁄 𑀦𑀬𑁄 𑁋 𑀲𑁄 𑀢𑁂𑀳𑀺 𑀥𑀫𑁆𑀫𑁂𑀳𑀻𑀢𑀺 𑀬𑀲𑁆𑀫𑀸 𑀅𑀦𑀺𑀘𑁆𑀘𑀢𑁄𑀢𑀺𑀆𑀤𑀻𑀲𑀼 𑀅𑀦𑀺𑀘𑁆𑀘𑀢𑁄 𑀧𑀮𑁄𑀓𑀢𑁄𑀢𑀺 𑀤𑁆𑀯𑀻𑀳𑀺 𑀧𑀤𑁂𑀳𑀺 𑀅𑀦𑀺𑀘𑁆𑀘𑀮𑀓𑁆𑀔𑀡𑀁 𑀓𑀣𑀺𑀢𑀁, 𑀤𑀼𑀓𑁆𑀔𑀢𑁄𑀢𑀺𑀆𑀤𑀻𑀳𑀺 𑀙𑀳𑀺 𑀤𑀼𑀓𑁆𑀔𑀮𑀓𑁆𑀔𑀡𑀁, 𑀧𑀭𑀢𑁄, 𑀲𑀼𑀜𑁆𑀜𑀢𑁄, 𑀅𑀦𑀢𑁆𑀢𑀢𑁄𑀢𑀺 𑀢𑀻𑀳𑀺 𑀅𑀦𑀢𑁆𑀢𑀮𑀓𑁆𑀔𑀡𑀁. 𑀢𑀲𑁆𑀫𑀸 𑀲𑁄 𑀢𑁂𑀳𑀺 𑀏𑀯𑀁 𑀢𑀺𑀮𑀓𑁆𑀔𑀡𑀁 𑀆𑀭𑁄𑀧𑁂𑀢𑁆𑀯𑀸 𑀤𑀺𑀝𑁆𑀞𑁂𑀳𑀺 𑀅𑀦𑁆𑀢𑁄𑀲𑀫𑀸𑀧𑀢𑁆𑀢𑀺𑀬𑀁 𑀧𑀜𑁆𑀘𑀓𑁆𑀔𑀦𑁆𑀥𑀥𑀫𑁆𑀫𑁂𑀳𑀺. 𑀘𑀺𑀢𑁆𑀢𑀁 𑀧𑀝𑀺𑀯𑀸𑀧𑁂𑀢𑀻𑀢𑀺 𑀘𑀺𑀢𑁆𑀢𑀁 𑀧𑀝𑀺𑀲𑀁𑀳𑀭𑀢𑀺 𑀫𑁄𑀘𑁂𑀢𑀺 𑀅𑀧𑀦𑁂𑀢𑀺. 𑀉𑀧𑀲𑀁𑀳𑀭𑀢𑀻𑀢𑀺 𑀯𑀺𑀧𑀲𑁆𑀲𑀦𑀸𑀘𑀺𑀢𑁆𑀢𑀁 𑀢𑀸𑀯 𑀲𑀯𑀦𑀯𑀲𑁂𑀦 𑀣𑀼𑀢𑀺𑀯𑀲𑁂𑀦 𑀧𑀭𑀺𑀬𑀢𑁆𑀢𑀺𑀯𑀲𑁂𑀦 𑀧𑀜𑁆𑀜𑀢𑁆𑀢𑀺𑀯𑀲𑁂𑀦 𑀘 𑀲𑀦𑁆𑀢𑀁 𑀦𑀺𑀩𑁆𑀩𑀸𑀦𑀦𑁆𑀢𑀺 𑀏𑀯𑀁 𑀅𑀲𑀗𑁆𑀔𑀢𑀸𑀬 𑀅𑀫𑀢𑀸𑀬 𑀥𑀸𑀢𑀼𑀬𑀸 𑀉𑀧𑀲𑀁𑀳𑀭𑀢𑀺. 𑀫𑀕𑁆𑀕𑀘𑀺𑀢𑁆𑀢𑀁 𑀦𑀺𑀩𑁆𑀩𑀸𑀦𑀁 𑀆𑀭𑀫𑁆𑀫𑀡𑀓𑀭𑀡𑀯𑀲𑁂𑀦𑁂𑀯 ‘‘𑀏𑀢𑀁 𑀲𑀦𑁆𑀢𑀁 𑀏𑀢𑀁 𑀧𑀡𑀻𑀢’’𑀦𑁆𑀢𑀺 𑀦 𑀏𑀯𑀁 𑀯𑀤𑀢𑀺. 𑀇𑀫𑀺𑀦𑀸 𑀧𑀦𑀸𑀓𑀸𑀭𑁂𑀦 𑀢𑀁 𑀧𑀝𑀺𑀯𑀺𑀚𑁆𑀛𑀦𑁆𑀢𑁄 𑀢𑀢𑁆𑀣 𑀘𑀺𑀢𑁆𑀢𑀁 𑀉𑀧𑀲𑀁𑀳𑀭𑀢𑀻𑀢𑀺 𑀅𑀢𑁆𑀣𑁄.

𑀲𑁄 𑀢𑀢𑁆𑀣 𑀞𑀺𑀢𑁄𑀢𑀺 𑀢𑀲𑁆𑀲𑀸 𑀢𑀺𑀮𑀓𑁆𑀔𑀡𑀸𑀭𑀫𑁆𑀫𑀡𑀸𑀬 𑀯𑀺𑀧𑀲𑁆𑀲𑀦𑀸𑀬 𑀞𑀺𑀢𑁄. 𑀆𑀲𑀯𑀸𑀦𑀁 𑀔𑀬𑀁 𑀧𑀸𑀧𑀼𑀡𑀸𑀢𑀻𑀢𑀺 𑀅𑀦𑀼𑀓𑁆𑀓𑀫𑁂𑀦 𑀘𑀢𑁆𑀢𑀸𑀭𑁄 𑀫𑀕𑁆𑀕𑁂 𑀪𑀸𑀯𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀸𑀢𑀺. 𑀢𑁂𑀦𑁂𑀯 𑀥𑀫𑁆𑀫𑀭𑀸𑀕𑁂𑀦𑀸𑀢𑀺 𑀲𑀫𑀣𑀯𑀺𑀧𑀲𑁆𑀲𑀦𑀸𑀥𑀫𑁆𑀫𑁂 𑀙𑀦𑁆𑀤𑀭𑀸𑀕𑁂𑀦. 𑀥𑀫𑁆𑀫𑀦𑀦𑁆𑀤𑀺𑀬𑀸𑀢𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀲𑀫𑀣𑀯𑀺𑀧𑀲𑁆𑀲𑀦𑀸𑀲𑀼 𑀳𑀺 𑀲𑀩𑁆𑀩𑀲𑁄 𑀙𑀦𑁆𑀤𑀭𑀸𑀕𑀁 𑀧𑀭𑀺𑀬𑀸𑀤𑀸𑀢𑀼𑀁 𑀲𑀓𑁆𑀓𑁄𑀦𑁆𑀢𑁄 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀸𑀢𑀺, 𑀅𑀲𑀓𑁆𑀓𑁄𑀦𑁆𑀢𑁄 𑀅𑀦𑀸𑀕𑀸𑀫𑀻 𑀳𑁄𑀢𑀺.

𑀢𑀺𑀡𑀧𑀼𑀭𑀺𑀲𑀭𑀽𑀧𑀓𑁂 𑀯𑀸𑀢𑀺 𑀢𑀺𑀡𑀧𑁄𑀢𑁆𑀣𑀓𑀭𑀽𑀧𑁂 𑀯𑀸. 𑀤𑀽𑀭𑁂 𑀓𑀡𑁆𑀟𑁂 𑀧𑀸𑀢𑁂𑀢𑀻𑀢𑀺 𑀤𑀽𑀭𑁂𑀧𑀸𑀢𑀻. 𑀅𑀯𑀺𑀭𑀸𑀥𑀺𑀢𑀁 𑀯𑀺𑀚𑁆𑀛𑀢𑀻𑀢𑀺 𑀅𑀓𑁆𑀔𑀡𑀯𑁂𑀥𑀻. 𑀬𑀤𑁂𑀯 𑀢𑀢𑁆𑀣 𑀳𑁄𑀢𑀺 𑀯𑁂𑀤𑀦𑀸𑀕𑀢𑀦𑁆𑀢𑀺 𑀇𑀥 𑀭𑀽𑀧𑀁 𑀦 𑀕𑀳𑀺𑀢𑀁. 𑀓𑀲𑁆𑀫𑀸? 𑀲𑀫𑀢𑀺𑀓𑁆𑀓𑀦𑁆𑀢𑀢𑁆𑀢𑀸. 𑀅𑀬𑀜𑁆𑀳𑀺 𑀳𑁂𑀝𑁆𑀞𑀸 𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀭𑀽𑀧𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀅𑀭𑀽𑀧𑀸𑀯𑀘𑀭𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀦𑁆𑀦𑁄𑀢𑀺 𑀲𑀫𑀣𑀯𑀲𑁂𑀦𑀸𑀧𑀺 𑀅𑀦𑁂𑀦 𑀭𑀽𑀧𑀁 𑀲𑀫𑀢𑀺𑀓𑁆𑀓𑀦𑁆𑀢𑀁, 𑀳𑁂𑀝𑁆𑀞𑀸 𑀭𑀽𑀧𑀁 𑀲𑀫𑁆𑀫𑀲𑀺𑀢𑁆𑀯𑀸 𑀢𑀁 𑀅𑀢𑀺𑀓𑁆𑀓𑀫𑁆𑀫 𑀇𑀤𑀸𑀦𑀺 𑀅𑀭𑀽𑀧𑀁 𑀲𑀫𑁆𑀫𑀲𑀢𑀻𑀢𑀺 𑀯𑀺𑀧𑀲𑁆𑀲𑀦𑀸𑀯𑀲𑁂𑀦𑀸𑀧𑀺 𑀅𑀦𑁂𑀦 𑀭𑀽𑀧𑀁 𑀅𑀢𑀺𑀓𑁆𑀓𑀦𑁆𑀢𑀁. 𑀆𑀭𑀼𑀧𑁆𑀧𑁂 𑀧𑀦 𑀲𑀩𑁆𑀩𑀲𑁄𑀧𑀺 𑀭𑀽𑀧𑀁 𑀦𑀢𑁆𑀣𑀻𑀢𑀺 𑀢𑀁 𑀲𑀦𑁆𑀥𑀸𑀬𑀧𑀺 𑀭𑀽𑀧𑀁 𑀦 𑀕𑀳𑀺𑀢𑀁. 𑀅𑀣 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀓𑀲𑁆𑀫𑀸 𑀦 𑀕𑀳𑀺𑀢𑀦𑁆𑀢𑀺? 𑀲𑀼𑀔𑀼𑀫𑀢𑁆𑀢𑀸. 𑀢𑀲𑁆𑀫𑀺𑀜𑁆𑀳𑀺 𑀘𑀢𑁆𑀢𑀸𑀭𑁄𑀧𑀺 𑀅𑀭𑀽𑀧𑀓𑁆𑀔𑀦𑁆𑀥𑀸 𑀲𑀼𑀔𑀼𑀫𑀸 𑀦 𑀲𑀫𑁆𑀫𑀲𑀦𑀽𑀧𑀕𑀸. 𑀢𑁂𑀦𑁂𑀯𑀸𑀳 𑁋 ‘‘𑀇𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀬𑀸𑀯𑀢𑀸 𑀲𑀜𑁆𑀜𑀸𑀲𑀫𑀸𑀧𑀢𑁆𑀢𑀺 𑀢𑀸𑀯𑀢𑀸 𑀅𑀜𑁆𑀜𑀸𑀧𑀝𑀺𑀯𑁂𑀥𑁄’’𑀢𑀺. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀸𑀯𑀢𑀸 𑀲𑀘𑀺𑀢𑁆𑀢𑀓𑀲𑀫𑀸𑀧𑀢𑁆𑀢𑀺 𑀦𑀸𑀫 𑀅𑀢𑁆𑀣𑀺, 𑀢𑀸𑀯𑀢𑀸 𑀑𑀴𑀸𑀭𑀺𑀓𑁂 𑀥𑀫𑁆𑀫𑁂 𑀲𑀫𑁆𑀫𑀲𑀢𑁄 𑀅𑀜𑁆𑀜𑀸𑀧𑀝𑀺𑀯𑁂𑀥𑁄 𑀳𑁄𑀢𑀺, 𑀅𑀭𑀳𑀢𑁆𑀢𑀁 𑀲𑀫𑁆𑀧𑀚𑁆𑀚𑀢𑀺. 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀧𑀦 𑀲𑀼𑀔𑀼𑀫𑀢𑁆𑀢𑀸 𑀲𑀜𑁆𑀜𑀸𑀲𑀫𑀸𑀧𑀢𑁆𑀢𑀻𑀢𑀺 𑀦 𑀯𑀼𑀘𑁆𑀘𑀢𑀺. 𑀛𑀸𑀬𑀻𑀳𑁂𑀢𑁂𑀢𑀺 𑀛𑀸𑀬𑀻𑀳𑀺 𑀛𑀸𑀦𑀸𑀪𑀺𑀭𑀢𑁂𑀳𑀺 𑀏𑀢𑀸𑀦𑀺. 𑀯𑀼𑀝𑁆𑀞𑀳𑀺𑀢𑁆𑀯𑀸𑀢𑀺 𑀢𑀢𑁄 𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀸𑀬. 𑀲𑀫𑀓𑁆𑀔𑀸𑀢𑀩𑁆𑀩𑀸𑀦𑀻𑀢𑀺 𑀲𑀫𑁆𑀫𑀸 𑀅𑀓𑁆𑀔𑀸𑀢𑀩𑁆𑀩𑀸𑀦𑀺, ‘‘𑀲𑀦𑁆𑀢𑀸𑀦𑀺 𑀧𑀡𑀻𑀢𑀸𑀦𑀻’’𑀢𑀺 𑀏𑀯𑀁 𑀓𑁂𑀯𑀮𑀁 𑀆𑀘𑀺𑀓𑁆𑀔𑀺𑀢𑀩𑁆𑀩𑀸𑀦𑀺 𑀣𑁄𑀫𑁂𑀢𑀩𑁆𑀩𑀸𑀦𑀺 𑀯𑀡𑁆𑀡𑁂𑀢𑀩𑁆𑀩𑀸𑀦𑀻𑀢𑀺.

𑁬. 𑀆𑀦𑀦𑁆𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁭. 𑀙𑀝𑁆𑀞𑁂 𑀲𑀫𑁆𑀩𑀸𑀥𑁂𑀢𑀺 𑀧𑀜𑁆𑀘𑀓𑀸𑀫𑀕𑀼𑀡𑀲𑀫𑁆𑀩𑀸𑀥𑁂. 𑀑𑀓𑀸𑀲𑀸𑀥𑀺𑀕𑀫𑁄𑀢𑀺 𑀑𑀓𑀸𑀲𑀲𑁆𑀲 𑀅𑀥𑀺𑀕𑀫𑁄. 𑀲𑀢𑁆𑀢𑀸𑀦𑀁 𑀯𑀺𑀲𑀼𑀤𑁆𑀥𑀺𑀬𑀸𑀢𑀺 𑀲𑀢𑁆𑀢𑀸𑀦𑀁 𑀯𑀺𑀲𑀼𑀤𑁆𑀥𑀺𑀁 𑀧𑀸𑀧𑀦𑀢𑁆𑀣𑀸𑀬. 𑀲𑀫𑀢𑀺𑀓𑁆𑀓𑀫𑀸𑀬𑀸𑀢𑀺 𑀲𑀫𑀢𑀺𑀓𑁆𑀓𑀫𑀦𑀢𑁆𑀣𑀸𑀬. 𑀅𑀢𑁆𑀣𑀗𑁆𑀕𑀫𑀸𑀬𑀸𑀢𑀺 𑀅𑀢𑁆𑀣𑀁 𑀕𑀫𑀦𑀢𑁆𑀣𑀸𑀬. 𑀜𑀸𑀬𑀲𑁆𑀲 𑀅𑀥𑀺𑀕𑀫𑀸𑀬𑀸𑀢𑀺 𑀲𑀳𑀯𑀺𑀧𑀲𑁆𑀲𑀦𑀓𑀲𑁆𑀲 𑀫𑀕𑁆𑀕𑀲𑁆𑀲 𑀅𑀥𑀺𑀕𑀫𑀦𑀢𑁆𑀣𑀸𑀬. 𑀦𑀺𑀩𑁆𑀩𑀸𑀦𑀲𑁆𑀲 𑀲𑀘𑁆𑀙𑀺𑀓𑀺𑀭𑀺𑀬𑀸𑀬𑀸𑀢𑀺 𑀅𑀧𑀘𑁆𑀘𑀬𑀦𑀺𑀩𑁆𑀩𑀸𑀦𑀲𑁆𑀲 𑀧𑀘𑁆𑀘𑀓𑁆𑀔𑀓𑀭𑀡𑀢𑁆𑀣𑀸𑀬. 𑀢𑀤𑁂𑀯 𑀦𑀸𑀫 𑀘𑀓𑁆𑀔𑀼𑀁 𑀪𑀯𑀺𑀲𑁆𑀲𑀢𑀻𑀢𑀺 𑀢𑀜𑁆𑀜𑁂𑀯 𑀧𑀲𑀸𑀤𑀘𑀓𑁆𑀔𑀼 𑀅𑀲𑀫𑁆𑀪𑀺𑀦𑁆𑀦𑀁 𑀪𑀯𑀺𑀲𑁆𑀲𑀢𑀺. 𑀢𑁂 𑀭𑀽𑀧𑀸𑀢𑀺 𑀢𑀤𑁂𑀯 𑀭𑀽𑀧𑀸𑀭𑀫𑁆𑀫𑀡𑀁 𑀆𑀧𑀸𑀣𑀁 𑀆𑀕𑀫𑀺𑀲𑁆𑀲𑀢𑀺. 𑀢𑀜𑁆𑀘𑀸𑀬𑀢𑀦𑀁 𑀦𑁄 𑀧𑀝𑀺𑀲𑀁𑀯𑁂𑀤𑀺𑀲𑁆𑀲𑀢𑀻𑀢𑀺 𑀢𑀜𑁆𑀘 𑀭𑀽𑀧𑀸𑀬𑀢𑀦𑀁 𑀦 𑀚𑀸𑀦𑀺𑀲𑁆𑀲𑀢𑀺. 𑀲𑁂𑀲𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀉𑀤𑀸𑀬𑀻𑀢𑀺 𑀓𑀸𑀴𑀼𑀤𑀸𑀬𑀺𑀢𑁆𑀣𑁂𑀭𑁄. 𑀲𑀜𑁆𑀜𑀻𑀫𑁂𑀯 𑀦𑀼 𑀔𑁄𑀢𑀺 𑀲𑀘𑀺𑀢𑁆𑀢𑀓𑁄𑀬𑁂𑀯 𑀦𑀼 𑀔𑁄. 𑀫𑀓𑀸𑀭𑁄 𑀧𑀤𑀲𑀦𑁆𑀥𑀺𑀫𑀢𑁆𑀢𑀁. 𑀓𑀺𑀁𑀲𑀜𑁆𑀜𑀻𑀢𑀺 𑀓𑀢𑀭𑀲𑀜𑁆𑀜𑀸𑀬 𑀲𑀜𑁆𑀜𑀻 𑀳𑀼𑀢𑁆𑀯𑀸. 𑀲𑀩𑁆𑀩𑀲𑁄 𑀭𑀽𑀧𑀲𑀜𑁆𑀜𑀸𑀦𑀦𑁆𑀢𑀺 𑀇𑀤𑀁 𑀓𑀲𑁆𑀫𑀸 𑀕𑀡𑁆𑀳𑀺, 𑀓𑀺𑀁 𑀧𑀞𑀫𑀚𑁆𑀛𑀸𑀦𑀸𑀤𑀺𑀲𑀫𑀗𑁆𑀕𑀺𑀦𑁄 𑀭𑀽𑀧𑀸𑀤𑀺𑀧𑀝𑀺𑀲𑀁𑀯𑁂𑀤𑀦𑀸 𑀳𑁄𑀢𑀻𑀢𑀺? 𑀦 𑀳𑁄𑀢𑀺, 𑀬𑀸𑀯 𑀧𑀦 𑀓𑀲𑀺𑀡𑀭𑀽𑀧𑀁 𑀆𑀭𑀫𑁆𑀫𑀡𑀁 𑀳𑁄𑀢𑀺, 𑀢𑀸𑀯 𑀭𑀽𑀧𑀁 𑀲𑀫𑀢𑀺𑀓𑁆𑀓𑀦𑁆𑀢𑀁 𑀦𑀸𑀫 𑀦 𑀳𑁄𑀢𑀺. 𑀅𑀲𑀫𑀢𑀺𑀓𑁆𑀓𑀦𑁆𑀢𑀢𑁆𑀢𑀸 𑀧𑀘𑁆𑀘𑀬𑁄 𑀪𑀯𑀺𑀢𑀼𑀁 𑀲𑀓𑁆𑀔𑀺𑀲𑁆𑀲𑀢𑀺. 𑀲𑀫𑀢𑀺𑀓𑁆𑀓𑀦𑁆𑀢𑀢𑁆𑀢𑀸 𑀧𑀦 𑀢𑀁 𑀦𑀢𑁆𑀣𑀺 𑀦𑀸𑀫 𑀳𑁄𑀢𑀺, 𑀦𑀢𑁆𑀣𑀺𑀢𑀸𑀬 𑀧𑀘𑁆𑀘𑀬𑁄 𑀪𑀯𑀺𑀢𑀼𑀁 𑀦 𑀲𑀓𑁆𑀓𑁄𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 𑀇𑀤𑀫𑁂𑀯 𑀕𑀡𑁆𑀳𑀺.

𑀚𑀝𑀺𑀮𑀯𑀸𑀲𑀺𑀓𑀸𑀢𑀺 𑀚𑀝𑀺𑀮𑀦𑀕𑀭𑀯𑀸𑀲𑀺𑀦𑀻. 𑀦 𑀘𑀸𑀪𑀺𑀦𑀢𑁄𑀢𑀺𑀆𑀤𑀻𑀲𑀼 𑀭𑀸𑀕𑀯𑀲𑁂𑀦 𑀦 𑀅𑀪𑀺𑀦𑀢𑁄, 𑀤𑁄𑀲𑀯𑀲𑁂𑀦 𑀦 𑀅𑀧𑀦𑀢𑁄. 𑀲𑀲𑀗𑁆𑀔𑀸𑀭𑁂𑀦 𑀲𑀧𑁆𑀧𑀬𑁄𑀕𑁂𑀦 𑀓𑀺𑀮𑁂𑀲𑁂 𑀦𑀺𑀕𑁆𑀕𑀡𑁆𑀳𑀺𑀢𑁆𑀯𑀸 𑀯𑀸𑀭𑁂𑀢𑁆𑀯𑀸 𑀞𑀺𑀢𑁄, 𑀓𑀺𑀮𑁂𑀲𑀸𑀦𑀁 𑀧𑀦 𑀙𑀺𑀦𑁆𑀦𑀦𑁆𑀢𑁂 𑀉𑀧𑁆𑀧𑀦𑁆𑀦𑁄𑀢𑀺 𑀦 𑀲𑀲𑀗𑁆𑀔𑀸𑀭𑀦𑀺𑀕𑁆𑀕𑀬𑁆𑀳𑀯𑀸𑀭𑀺𑀢𑀕𑀢𑁄. 𑀯𑀺𑀫𑀼𑀢𑁆𑀢𑀢𑁆𑀢𑀸 𑀞𑀺𑀢𑁄𑀢𑀺 𑀓𑀺𑀮𑁂𑀲𑁂𑀳𑀺 𑀯𑀺𑀫𑀼𑀢𑁆𑀢𑀢𑁆𑀢𑀸𑀬𑁂𑀯 𑀞𑀺𑀢𑁄. 𑀞𑀺𑀢𑀢𑁆𑀢𑀸 𑀲𑀦𑁆𑀢𑀼𑀲𑀺𑀢𑁄𑀢𑀺 𑀞𑀺𑀢𑀢𑁆𑀢𑀸𑀬𑁂𑀯 𑀲𑀦𑁆𑀢𑀼𑀝𑁆𑀞𑁄 𑀦𑀸𑀫 𑀚𑀸𑀢𑁄. 𑀲𑀦𑁆𑀢𑀼𑀲𑀺𑀢𑀢𑁆𑀢𑀸 𑀦𑁄 𑀧𑀭𑀺𑀢𑀲𑁆𑀲𑀢𑀻𑀢𑀺 𑀲𑀦𑁆𑀢𑀼𑀝𑁆𑀞𑀢𑁆𑀢𑀸𑀬𑁂𑀯 𑀧𑀭𑀺𑀢𑀸𑀲𑀁 𑀦𑀸𑀧𑀚𑁆𑀚𑀢𑀺. 𑀅𑀬𑀁, 𑀪𑀦𑁆𑀢𑁂 𑀆𑀦𑀦𑁆𑀤, 𑀲𑀫𑀸𑀥𑀺 𑀓𑀺𑀁 𑀨𑀮𑁄𑀢𑀺 𑀇𑀫𑀺𑀦𑀸 𑀅𑀬𑀁 𑀣𑁂𑀭𑀻 𑀢𑀸𑀮𑀨𑀮𑀜𑁆𑀜𑁂𑀯 𑀕𑀳𑁂𑀢𑁆𑀯𑀸 ‘‘𑀇𑀤𑀁 𑀨𑀮𑀁 𑀓𑀺𑀁 𑀨𑀮𑀁 𑀦𑀸𑀫𑀸’’𑀢𑀺 𑀧𑀼𑀘𑁆𑀙𑀫𑀸𑀦𑀸 𑀯𑀺𑀬 𑀅𑀭𑀳𑀢𑁆𑀢𑀨𑀮𑀲𑀫𑀸𑀥𑀺𑀁 𑀕𑀳𑁂𑀢𑁆𑀯𑀸 ‘‘𑀅𑀬𑀁, 𑀪𑀦𑁆𑀢𑁂 𑀆𑀦𑀦𑁆𑀤, 𑀲𑀫𑀸𑀥𑀺 𑀓𑀺𑀁 𑀨𑀮𑁄 𑀯𑀼𑀢𑁆𑀢𑁄 𑀪𑀕𑀯𑀢𑀸’’𑀢𑀺 𑀧𑀼𑀘𑁆𑀙𑀢𑀺. 𑀅𑀜𑁆𑀜𑀸𑀨𑀮𑁄 𑀯𑀼𑀢𑁆𑀢𑁄𑀢𑀺 𑀅𑀜𑁆𑀜𑀸 𑀯𑀼𑀘𑁆𑀘𑀢𑀺 𑀅𑀭𑀳𑀢𑁆𑀢𑀁, 𑀅𑀭𑀳𑀢𑁆𑀢𑀨𑀮𑀲𑀫𑀸𑀥𑀺 𑀦𑀸𑀫𑁂𑀲𑁄 𑀯𑀼𑀢𑁆𑀢𑁄 𑀪𑀕𑀯𑀢𑀸𑀢𑀺 𑀅𑀢𑁆𑀣𑁄. 𑀏𑀯𑀁𑀲𑀜𑁆𑀜𑀻𑀧𑀻𑀢𑀺 𑀇𑀫𑀸𑀬 𑀅𑀭𑀳𑀢𑁆𑀢𑀨𑀮𑀲𑀜𑁆𑀜𑀸𑀬 𑀲𑀜𑁆𑀜𑀻𑀧𑀺 𑀢𑀤𑀸𑀬𑀢𑀦𑀁 𑀦𑁄 𑀧𑀝𑀺𑀲𑀁𑀯𑁂𑀤𑁂𑀢𑀻𑀢𑀺 𑀏𑀯𑀁 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀅𑀭𑀳𑀢𑁆𑀢𑀨𑀮𑀲𑀫𑀸𑀥𑀺 𑀓𑀣𑀺𑀢𑁄𑀢𑀺.

𑁭. 𑀮𑁄𑀓𑀸𑀬𑀢𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁮. 𑀲𑀢𑁆𑀢𑀫𑁂 𑀮𑁄𑀓𑀸𑀬𑀢𑀺𑀓𑀸𑀢𑀺 𑀮𑁄𑀓𑀸𑀬𑀢𑀯𑀸𑀤𑀓𑀸. 𑀲𑀢𑀢𑀦𑁆𑀢𑀺 𑀲𑀤𑀸. 𑀲𑀫𑀺𑀢𑀦𑁆𑀢𑀺 𑀦𑀺𑀭𑀦𑁆𑀢𑀭𑀁. 𑀢𑀺𑀝𑁆𑀞𑀢𑁂𑀢𑀦𑁆𑀢𑀺 𑀢𑀺𑀝𑁆𑀞𑀢𑀼 𑀏𑀢𑀁, 𑀫𑀸 𑀏𑀢𑀁 𑀧𑀝𑁆𑀞𑀧𑁂𑀣, 𑀓𑁄 𑀯𑁄 𑀏𑀢𑁂𑀦 𑀅𑀢𑁆𑀣𑁄. 𑀥𑀫𑁆𑀫𑀁 𑀯𑁄 𑀩𑁆𑀭𑀸𑀳𑁆𑀫𑀡𑀸 𑀤𑁂𑀲𑁂𑀲𑁆𑀲𑀸𑀫𑀻𑀢𑀺 𑀅𑀳𑀁 𑀯𑁄 𑀘𑀢𑀼𑀲𑀘𑁆𑀘𑀥𑀫𑁆𑀫𑀁 𑀤𑁂𑀲𑁂𑀲𑁆𑀲𑀸𑀫𑀺.

𑀤𑀴𑁆𑀳𑀥𑀫𑁆𑀫𑁄𑀢𑀺 𑀤𑀴𑁆𑀳𑀥𑀦𑀼𑀁 𑀕𑀳𑁂𑀢𑁆𑀯𑀸 𑀞𑀺𑀢𑁄. 𑀥𑀦𑀼𑀕𑁆𑀕𑀳𑁄𑀢𑀺 𑀇𑀲𑁆𑀲𑀸𑀲𑁄. 𑀤𑀴𑁆𑀳𑀥𑀦𑀼 𑀦𑀸𑀫 𑀤𑁆𑀯𑀺𑀲𑀳𑀲𑁆𑀲𑀣𑀸𑀫𑀁 𑀯𑀼𑀘𑁆𑀘𑀢𑀺. 𑀤𑁆𑀯𑀺𑀲𑀳𑀲𑁆𑀲𑀣𑀸𑀫𑀁 𑀦𑀸𑀫 𑀬𑀲𑁆𑀲 𑀆𑀭𑁄𑀧𑀺𑀢𑀲𑁆𑀲 𑀚𑀺𑀬𑀸𑀩𑀤𑁆𑀥𑁄 𑀮𑁄𑀳𑀲𑀻𑀲𑀸𑀤𑀻𑀦𑀁 𑀪𑀸𑀭𑁄 𑀤𑀡𑁆𑀟𑁂 𑀕𑀳𑁂𑀢𑁆𑀯𑀸 𑀬𑀸𑀯 𑀓𑀡𑁆𑀟𑀧𑁆𑀧𑀫𑀸𑀡𑀸 𑀉𑀓𑁆𑀔𑀺𑀢𑁆𑀢𑀲𑁆𑀲 𑀧𑀣𑀯𑀺𑀢𑁄 𑀫𑀼𑀘𑁆𑀘𑀢𑀺. 𑀲𑀺𑀓𑁆𑀔𑀺𑀢𑁄𑀢𑀺 𑀤𑀲 𑀤𑁆𑀯𑀸𑀤𑀲 𑀯𑀲𑁆𑀲𑀸𑀦𑀺 𑀆𑀘𑀭𑀺𑀬𑀓𑀼𑀮𑁂 𑀉𑀕𑁆𑀕𑀳𑀺𑀢𑀲𑀺𑀧𑁆𑀧𑁄. 𑀓𑀢𑀳𑀢𑁆𑀣𑁄𑀢𑀺 𑀏𑀓𑁄 𑀲𑀺𑀧𑁆𑀧𑀫𑁂𑀯 𑀉𑀕𑁆𑀕𑀡𑁆𑀳𑀸𑀢𑀺, 𑀓𑀢𑀳𑀢𑁆𑀣𑁄 𑀦 𑀳𑁄𑀢𑀺 𑀅𑀬𑀁 𑀧𑀦 𑀓𑀢𑀳𑀢𑁆𑀣𑁄 𑀘𑀺𑀡𑁆𑀡𑀯𑀲𑀺𑀪𑀸𑀯𑁄. 𑀓𑀢𑀽𑀧𑀸𑀲𑀦𑁄𑀢𑀺 𑀭𑀸𑀚𑀓𑀼𑀮𑀸𑀤𑀻𑀲𑀼 𑀤𑀲𑁆𑀲𑀺𑀢𑀲𑀺𑀧𑁆𑀧𑁄. 𑀮𑀳𑀼𑀓𑁂𑀦 𑀅𑀲𑀦𑁂𑀦𑀸𑀢𑀺 𑀅𑀦𑁆𑀢𑁄 𑀲𑀼𑀲𑀺𑀭𑀁 𑀓𑀢𑁆𑀯𑀸 𑀢𑀽𑀮𑀸𑀤𑀻𑀳𑀺 𑀧𑀽𑀭𑁂𑀢𑁆𑀯𑀸 𑀓𑀢𑀮𑀓𑁆𑀔𑀧𑀭𑀺𑀓𑀫𑁆𑀫𑁂𑀦 𑀲𑀮𑁆𑀮𑀳𑀼𑀓𑀓𑀡𑁆𑀟𑁂𑀦. 𑀏𑀯𑀁 𑀓𑀢𑀜𑁆𑀳𑀺 𑀏𑀓𑀉𑀲𑀪𑀕𑀸𑀫𑀻 𑀤𑁆𑀯𑁂 𑀉𑀲𑀪𑀸𑀦𑀺𑀧𑀺 𑀕𑀘𑁆𑀙𑀢𑀺…𑀧𑁂… 𑀅𑀝𑁆𑀞𑀼𑀲𑀪𑀕𑀸𑀫𑀻 𑀲𑁄𑀴𑀲 𑀉𑀲𑀪𑀸𑀦𑀺𑀧𑀺 𑀕𑀘𑁆𑀙𑀢𑀺. 𑀅𑀧𑁆𑀧𑀓𑀲𑀺𑀭𑁂𑀦𑀸𑀢𑀺 𑀦𑀺𑀤𑁆𑀤𑀼𑀓𑁆𑀔𑁂𑀦. 𑀅𑀢𑀺𑀧𑀸𑀢𑁂𑀬𑁆𑀬𑀸𑀢𑀺 𑀅𑀢𑀺𑀓𑁆𑀓𑀫𑁂𑀬𑁆𑀬. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀣𑀸 𑀲𑁄 𑀥𑀦𑀼𑀕𑁆𑀕𑀳𑁄 𑀢𑀁 𑀯𑀺𑀤𑀢𑁆𑀣𑀺𑀘𑀢𑀼𑀭𑀗𑁆𑀕𑀼𑀮𑀁 𑀙𑀸𑀬𑀁 𑀲𑀻𑀖𑀫𑁂𑀯 𑀅𑀢𑀺𑀓𑁆𑀓𑀸𑀫𑁂𑀢𑀺, 𑀏𑀯𑀁 𑀲𑀓𑀮𑀘𑀓𑁆𑀓𑀯𑀸𑀴𑀁 𑀲𑀻𑀖𑀁 𑀲𑀻𑀖𑀁 𑀅𑀢𑀺𑀓𑁆𑀓𑀫𑀦𑀲𑀫𑀢𑁆𑀣𑁂𑀦 𑀚𑀯𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀲𑀦𑁆𑀥𑀸𑀯𑀦𑀺𑀓𑀸𑀬𑀸𑀢𑀺 𑀧𑀤𑀲𑀸 𑀥𑀸𑀯𑀦𑁂𑀦. 𑀏𑀯𑀫𑀸𑀳𑀁𑀲𑀽𑀢𑀺 𑀏𑀯𑀁 𑀯𑀤𑀦𑁆𑀢𑀺.

𑁮. 𑀤𑁂𑀯𑀸𑀲𑀼𑀭𑀲𑀗𑁆𑀕𑀸𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁯. 𑀅𑀝𑁆𑀞𑀫𑁂 𑀲𑀫𑀼𑀧𑀩𑁆𑀬𑀽𑀴𑁆𑀳𑁄 𑀅𑀳𑁄𑀲𑀻𑀢𑀺 𑀧𑀘𑁆𑀘𑀼𑀧𑀝𑁆𑀞𑀺𑀢𑁄 𑀅𑀳𑁄𑀲𑀺. 𑀲𑀗𑁆𑀕𑀸𑀫𑁂𑀬𑁆𑀬𑀸𑀫𑀸𑀢𑀺 𑀲𑀗𑁆𑀕𑀸𑀫𑀁 𑀓𑀭𑁂𑀬𑁆𑀬𑀸𑀫 𑀬𑀼𑀚𑁆𑀛𑁂𑀬𑁆𑀬𑀸𑀫. 𑀅𑀧𑀬𑀺𑀁𑀲𑀼𑀬𑁂𑀯𑀸𑀢𑀺 𑀧𑀮𑀸𑀬𑀺𑀁𑀲𑀼𑀬𑁂𑀯. 𑀉𑀢𑁆𑀢𑀭𑁂𑀦𑀸𑀪𑀺𑀫𑀼𑀔𑀸𑀢𑀺 𑀉𑀢𑁆𑀢𑀭𑀸𑀫𑀼𑀔𑀸 𑀳𑀼𑀢𑁆𑀯𑀸. 𑀅𑀪𑀺𑀬𑀦𑁆𑀢𑁂 𑀯𑀸𑀢𑀺 𑀅𑀦𑀼𑀩𑀦𑁆𑀥𑀦𑁆𑀢𑀺𑀬𑁂𑀯. 𑀪𑀻𑀭𑀼𑀢𑁆𑀢𑀸𑀦𑀕𑀢𑁂𑀦𑀸𑀢𑀺 𑀪𑀻𑀭𑀼𑀢𑁆𑀢𑀸𑀦𑀁 𑀪𑀬𑀦𑀺𑀯𑀸𑀭𑀡𑀁 𑀧𑀢𑀺𑀝𑁆𑀞𑀸𑀦𑀁 𑀕𑀢𑁂𑀦. 𑀅𑀓𑀭𑀡𑀻𑀬𑀸𑀢𑀺 𑀬𑀼𑀤𑁆𑀥𑁂𑀦 𑀓𑀺𑀜𑁆𑀘𑀺 𑀅𑀓𑀢𑁆𑀢𑀩𑁆𑀩𑀸. 𑀓𑀲𑁆𑀫𑀸 𑀧𑀦 𑀦𑁂𑀲𑀁 𑀲𑀗𑁆𑀕𑀸𑀫𑁄 𑀳𑁄𑀢𑀻𑀢𑀺? 𑀅𑀲𑀼𑀭𑀸 𑀳𑀺 𑀧𑀼𑀩𑁆𑀩𑁂 𑀢𑀸𑀯𑀢𑀺𑀁𑀲𑀯𑀸𑀲𑀺𑀦𑁄, 𑀢𑁂 𑀘𑀺𑀢𑁆𑀢𑀧𑀸𑀝𑀮𑀺𑀬𑀸 𑀧𑀼𑀧𑁆𑀨𑀦𑀓𑀸𑀮𑁂 𑀤𑀺𑀩𑁆𑀩𑀧𑀸𑀭𑀺𑀘𑁆𑀙𑀢𑁆𑀢𑀓𑀧𑀼𑀧𑁆𑀨𑀁 𑀅𑀦𑀼𑀲𑁆𑀲𑀭𑀦𑁆𑀢𑀺. 𑀢𑀢𑁄 𑀉𑀧𑁆𑀧𑀦𑁆𑀦𑀓𑁄𑀥𑀸 ‘‘𑀕𑀡𑁆𑀳𑀣 𑀤𑁂𑀯𑁂’’𑀢𑀺 𑀲𑀫𑁆𑀫𑀼𑀔𑀲𑀫𑁆𑀫𑀼𑀔𑀝𑁆𑀞𑀸𑀦𑁂𑀦𑁂𑀯 𑀲𑀺𑀦𑁂𑀭𑀼𑀁 𑀅𑀪𑀺𑀭𑀼𑀳𑀦𑁆𑀢𑀺, 𑀤𑁂𑀯𑀸𑀧𑀺 𑀦𑀺𑀓𑁆𑀔𑀫𑀦𑁆𑀢𑀺. 𑀢𑁂𑀲𑀁 𑀕𑁄𑀧𑀸𑀮𑀓𑀤𑀸𑀭𑀓𑀸𑀦𑀁 𑀅𑀜𑁆𑀜𑀫𑀜𑁆𑀜𑀁 𑀤𑀡𑁆𑀟𑀓𑁂𑀳𑀺 𑀧𑀳𑀭𑀡𑀲𑀤𑀺𑀲𑀁 𑀬𑀼𑀤𑁆𑀥𑀁 𑀳𑁄𑀢𑀺. 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸 𑀳𑁂𑀝𑁆𑀞𑀸 𑀧𑀜𑁆𑀘𑀲𑀼 𑀞𑀸𑀦𑁂𑀲𑀼 𑀆𑀭𑀓𑁆𑀔𑀁 𑀞𑀧𑁂𑀢𑁆𑀯𑀸 𑀉𑀧𑀭𑀺 𑀤𑁂𑀯𑀧𑀼𑀭𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀅𑀢𑁆𑀢𑀲𑀤𑀺𑀲𑀸 𑀯𑀚𑀺𑀭𑀳𑀢𑁆𑀣𑀸 𑀧𑀝𑀺𑀫𑀸 𑀞𑀧𑀸𑀧𑁂𑀲𑀺. 𑀅𑀲𑀼𑀭𑀸 𑀳𑁂𑀝𑁆𑀞𑀸 𑀧𑀜𑁆𑀘 𑀞𑀸𑀦𑀸𑀦𑀺 𑀧𑀝𑀺𑀩𑀸𑀳𑀺𑀢𑁆𑀯𑀸 𑀅𑀪𑀺𑀭𑀼𑀴𑁆𑀳𑀸 𑀇𑀦𑁆𑀤𑀧𑀝𑀺𑀫𑀸𑀬𑁄 𑀤𑀺𑀲𑁆𑀯𑀸 𑀦𑀺𑀯𑀢𑁆𑀢𑀺𑀢𑁆𑀯𑀸 𑀅𑀲𑀼𑀭𑀧𑀼𑀭𑀫𑁂𑀯 𑀕𑀘𑁆𑀙𑀦𑁆𑀢𑀺.

𑀤𑀓𑁆𑀔𑀺𑀡𑁂𑀦𑀸𑀪𑀺𑀫𑀼𑀔𑀸𑀢𑀺 𑀤𑀓𑁆𑀔𑀺𑀡𑀸𑀫𑀼𑀔𑀸 𑀳𑀼𑀢𑁆𑀯𑀸. 𑀅𑀧𑀤𑀁 𑀯𑀥𑀺𑀢𑁆𑀯𑀸𑀢𑀺 𑀦𑀺𑀧𑁆𑀧𑀤𑀁 𑀦𑀺𑀭𑀯𑀲𑁂𑀲𑀁 𑀯𑀥𑀺𑀢𑁆𑀯𑀸. 𑀅𑀤𑀲𑁆𑀲𑀦𑀁 𑀕𑀢𑁄𑀢𑀺 𑀫𑀸𑀭𑁄𑀧𑀺 𑀯𑀝𑁆𑀝𑀧𑀸𑀤𑀓𑀁 𑀓𑀢𑁆𑀯𑀸 𑀭𑀽𑀧𑀸𑀯𑀘𑀭𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀲𑀫𑀸𑀧𑀦𑁆𑀦𑀲𑁆𑀲 𑀘𑀺𑀢𑁆𑀢𑀁 𑀚𑀸𑀦𑀸𑀢𑀺, 𑀢𑀤𑁂𑀯 𑀯𑀺𑀧𑀲𑁆𑀲𑀦𑀸𑀧𑀸𑀤𑀓𑀁 𑀓𑀢𑁆𑀯𑀸 𑀲𑀫𑀸𑀧𑀦𑁆𑀦𑀲𑁆𑀲 𑀘𑀺𑀢𑁆𑀢𑀁 𑀚𑀸𑀦𑀸𑀢𑀺. 𑀅𑀭𑀽𑀧𑀸𑀯𑀘𑀭𑀲𑀫𑀸𑀧𑀢𑁆𑀢𑀺 𑀧𑀦 𑀯𑀝𑁆𑀝𑀧𑀸𑀤𑀸 𑀯𑀸 𑀳𑁄𑀢𑀼 𑀯𑀺𑀧𑀲𑁆𑀲𑀦𑀸𑀧𑀸𑀤𑀸 𑀯𑀸, 𑀢𑀁 𑀲𑀫𑀸𑀧𑀦𑁆𑀦𑀲𑁆𑀲 𑀫𑀸𑀭𑁄 𑀘𑀺𑀢𑁆𑀢𑀁 𑀦 𑀚𑀸𑀦𑀸𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀅𑀤𑀲𑁆𑀲𑀦𑀁 𑀕𑀢𑁄 𑀧𑀸𑀧𑀺𑀫𑀢𑁄’’𑀢𑀺.

𑁯. 𑀦𑀸𑀕𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁦. 𑀦𑀯𑀫𑁂 𑀆𑀭𑀜𑁆𑀜𑀓𑀲𑁆𑀲𑀸𑀢𑀺 𑀅𑀭𑀜𑁆𑀜𑀯𑀸𑀲𑀺𑀦𑁄. 𑀕𑁄𑀘𑀭𑀧𑀲𑀼𑀢𑀲𑁆𑀲𑀸𑀢𑀺 𑀕𑁄𑀘𑀭𑀕𑁆𑀕𑀳𑀡𑀢𑁆𑀣𑀸𑀬 𑀕𑀘𑁆𑀙𑀦𑁆𑀢𑀲𑁆𑀲. 𑀳𑀢𑁆𑀣𑀺𑀓𑀮𑀪𑀸𑀢𑀺 𑀫𑀳𑀦𑁆𑀢𑀸 𑀫𑀳𑀦𑁆𑀢𑀸 𑀦𑀸𑀕𑀸. 𑀳𑀢𑁆𑀣𑀺𑀘𑁆𑀙𑀸𑀧𑀸𑀢𑀺 𑀢𑀭𑀼𑀡𑀧𑁄𑀢𑀓𑀸. 𑀑𑀪𑀕𑁆𑀕𑁄𑀪𑀕𑁆𑀕𑀦𑁆𑀢𑀺 𑀦𑀸𑀫𑁂𑀢𑁆𑀯𑀸 𑀦𑀸𑀫𑁂𑀢𑁆𑀯𑀸 𑀞𑀧𑀺𑀢𑀁. 𑀑𑀕𑀸𑀳𑀁 𑀑𑀢𑀺𑀡𑁆𑀡𑀲𑁆𑀲𑀸𑀢𑀺 𑀑𑀕𑀸𑀳𑀺𑀢𑀩𑁆𑀩𑀢𑁆𑀢𑀸 𑀑𑀕𑀸𑀳𑀦𑁆𑀢𑀺 𑀮𑀤𑁆𑀥𑀦𑀸𑀫𑀁 𑀉𑀤𑀓𑀢𑀺𑀢𑁆𑀣𑀁 𑀑𑀢𑀺𑀡𑁆𑀡𑀲𑁆𑀲. 𑀑𑀕𑀸𑀳𑀸 𑀉𑀢𑁆𑀢𑀺𑀡𑁆𑀡𑀲𑁆𑀲𑀸𑀢𑀺 𑀉𑀤𑀓𑀢𑀺𑀢𑁆𑀣𑀢𑁄 𑀉𑀢𑁆𑀢𑀺𑀡𑁆𑀡𑀲𑁆𑀲. 𑀯𑀽𑀧𑀓𑀝𑁆𑀞𑁄𑀢𑀺 𑀯𑀽𑀧𑀓𑀝𑁆𑀞𑁄 𑀳𑀼𑀢𑁆𑀯𑀸. 𑀇𑀤𑀸𑀦𑀺 𑀬𑀲𑁆𑀫𑀸 𑀤𑀲𑀩𑀮𑀲𑁆𑀲 𑀳𑀢𑁆𑀣𑀺𑀦𑀸𑀕𑁂𑀦 𑀓𑀺𑀘𑁆𑀘𑀁 𑀦𑀢𑁆𑀣𑀺, 𑀲𑀸𑀲𑀦𑁂 𑀧𑀦 𑀢𑀁𑀲𑀭𑀺𑀓𑁆𑀔𑀓𑀁 𑀧𑀼𑀕𑁆𑀕𑀮𑀁 𑀤𑀲𑁆𑀲𑁂𑀢𑀼𑀁 𑀇𑀤𑀫𑀸𑀳𑀝𑀁, 𑀢𑀲𑁆𑀫𑀸 𑀢𑀁 𑀧𑀼𑀕𑁆𑀕𑀮𑀁 𑀤𑀲𑁆𑀲𑁂𑀦𑁆𑀢𑁄 𑀏𑀯𑀫𑁂𑀯 𑀔𑁄𑀢𑀺𑀆𑀤𑀺𑀫𑀸𑀳.

𑁧𑁦. 𑀢𑀧𑀼𑀲𑁆𑀲𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁧. 𑀤𑀲𑀫𑁂 𑀫𑀮𑁆𑀮𑁂𑀲𑀽𑀢𑀺 𑀫𑀮𑁆𑀮𑀭𑀝𑁆𑀞𑁂. 𑀇𑀥𑁂𑀯 𑀢𑀸𑀯 𑀢𑁆𑀯𑀁, 𑀆𑀦𑀦𑁆𑀤, 𑀳𑁄𑀢𑀻𑀢𑀺 𑀇𑀥 𑀪𑀕𑀯𑀸 ‘‘𑀢𑀧𑀼𑀲𑁆𑀲𑀕𑀳𑀧𑀢𑀺𑀦𑁄 𑀇𑀥 𑀞𑀺𑀢𑁂𑀦 𑀆𑀦𑀦𑁆𑀤𑁂𑀦 𑀲𑀤𑁆𑀥𑀺𑀁 𑀓𑀣𑀸𑀲𑀮𑁆𑀮𑀸𑀧𑁄 𑀪𑀯𑀺𑀲𑁆𑀲𑀢𑀺, 𑀢𑀢𑁄𑀦𑀺𑀤𑀸𑀦𑀁 𑀅𑀳𑀁 𑀫𑀳𑀦𑁆𑀢𑀁 𑀥𑀫𑁆𑀫𑀧𑀭𑀺𑀬𑀸𑀬𑀁 𑀤𑁂𑀲𑁂𑀲𑁆𑀲𑀸𑀫𑀻’’𑀢𑀺 𑀜𑀢𑁆𑀯𑀸 𑀆𑀳. 𑀉𑀧𑀲𑀗𑁆𑀓𑀫𑀻𑀢𑀺 𑀲𑁄 𑀓𑀺𑀭 𑀪𑀼𑀢𑁆𑀢𑀧𑀸𑀢𑀭𑀸𑀲𑁄 ‘‘𑀤𑀲𑀩𑀮𑀲𑁆𑀲 𑀉𑀧𑀝𑁆𑀞𑀸𑀦𑀁 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀦𑀺𑀓𑁆𑀔𑀫𑀦𑁆𑀢𑁄 𑀤𑀽𑀭𑀢𑁄𑀯 𑀣𑁂𑀭𑀁 𑀤𑀺𑀲𑁆𑀯𑀸 𑀬𑁂𑀦𑀸𑀬𑀲𑁆𑀫𑀸 𑀆𑀦𑀦𑁆𑀤𑁄 𑀢𑁂𑀦𑀼𑀧𑀲𑀗𑁆𑀓𑀫𑀺. 𑀧𑀧𑀸𑀢𑁄 𑀯𑀺𑀬 𑀔𑀸𑀬𑀢𑀺, 𑀬𑀤𑀺𑀤𑀁 𑀦𑁂𑀓𑁆𑀔𑀫𑁆𑀫𑀦𑁆𑀢𑀺 𑀬𑀫𑀺𑀤𑀁 𑀧𑀩𑁆𑀩𑀚𑁆𑀚𑀸𑀲𑀗𑁆𑀔𑀸𑀢𑀁 𑀦𑁂𑀓𑁆𑀔𑀫𑁆𑀫𑀁, 𑀢𑀁 𑀅𑀫𑁆𑀳𑀸𑀓𑀁 𑀫𑀳𑀸𑀧𑀧𑀸𑀢𑁄 𑀯𑀺𑀬 𑀑𑀕𑀸𑀳𑀺𑀢𑁆𑀯𑀸 𑀉𑀧𑀝𑁆𑀞𑀸𑀢𑀺. 𑀦𑁂𑀓𑁆𑀔𑀫𑁆𑀫𑁂 𑀘𑀺𑀢𑁆𑀢𑀁 𑀧𑀓𑁆𑀔𑀦𑁆𑀤𑀢𑀻𑀢𑀺 𑀧𑀩𑁆𑀩𑀚𑁆𑀚𑀸𑀬 𑀘𑀺𑀢𑁆𑀢𑀁 𑀆𑀭𑀫𑁆𑀫𑀡𑀯𑀲𑁂𑀦 𑀧𑀓𑁆𑀔𑀦𑁆𑀤𑀢𑀺, 𑀢𑀤𑁂𑀯 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀧𑀲𑀻𑀤𑀢𑀺, 𑀢𑀤𑁂𑀯 𑀧𑀢𑀺𑀝𑁆𑀞𑀸𑀢𑀺, 𑀧𑀘𑁆𑀘𑀦𑀻𑀓𑀥𑀫𑁆𑀫𑁂𑀳𑀺 𑀘 𑀯𑀺𑀫𑀼𑀘𑁆𑀘𑀢𑀺. ‘𑀏𑀢𑀁 𑀲𑀦𑁆𑀢’𑀦𑁆𑀢𑀺 𑀧𑀲𑁆𑀲𑀢𑁄𑀢𑀺 𑀏𑀢𑀁 𑀦𑁂𑀓𑁆𑀔𑀫𑁆𑀫𑀁 𑀲𑀦𑁆𑀢𑀁 𑀯𑀺𑀕𑀢𑀤𑀭𑀣𑀧𑀭𑀺𑀴𑀸𑀳𑀦𑁆𑀢𑀺 𑀏𑀯𑀁 𑀧𑀲𑁆𑀲𑀦𑁆𑀢𑀸𑀦𑀁 𑀪𑀺𑀓𑁆𑀔𑀽𑀦𑀁. 𑀩𑀳𑀼𑀦𑀸 𑀚𑀦𑁂𑀦 𑀯𑀺𑀲𑀪𑀸𑀕𑁄𑀢𑀺 𑀢𑀬𑀺𑀤𑀁 𑀩𑀳𑀼𑀦𑀸 𑀫𑀳𑀸𑀚𑀦𑁂𑀦 𑀲𑀤𑁆𑀥𑀺𑀁 𑀪𑀺𑀓𑁆𑀔𑀽𑀦𑀁 𑀯𑀺𑀲𑀪𑀸𑀕𑀁, 𑀅𑀲𑀤𑀺𑀲𑀦𑁆𑀢𑀺 𑀅𑀢𑁆𑀣𑁄.

𑀓𑀣𑀸𑀧𑀸𑀪𑀢𑀦𑁆𑀢𑀺 𑀓𑀣𑀸𑀫𑀽𑀮𑀁. 𑀢𑀲𑁆𑀲 𑀫𑀬𑁆𑀳𑀁, 𑀆𑀦𑀦𑁆𑀤, 𑀦𑁂𑀓𑁆𑀔𑀫𑁆𑀫𑁂 𑀘𑀺𑀢𑁆𑀢𑀁 𑀦 𑀧𑀓𑁆𑀔𑀦𑁆𑀤𑀢𑀻𑀢𑀺 𑀢𑀲𑁆𑀲 𑀏𑀯𑀁 𑀯𑀺𑀢𑀓𑁆𑀓𑁂𑀦𑁆𑀢𑀲𑁆𑀲𑀸𑀧𑀺 𑀫𑀬𑁆𑀳𑀁 𑀧𑀩𑁆𑀩𑀚𑁆𑀚𑀸𑀬 𑀘𑀺𑀢𑁆𑀢𑀁 𑀦 𑀑𑀢𑀭𑀢𑀺. ‘‘𑀏𑀢𑀁 𑀲𑀦𑁆𑀢’’𑀦𑁆𑀢𑀺 𑀧𑀲𑁆𑀲𑀢𑁄𑀢𑀺 ‘‘𑀲𑀸𑀥𑀼 𑀦𑁂𑀓𑁆𑀔𑀫𑁆𑀫’’𑀦𑁆𑀢𑀺 𑀧𑀭𑀺𑀯𑀺𑀢𑀓𑁆𑀓𑀦𑀯𑀲𑁂𑀦 ‘‘𑀏𑀢𑀁 𑀦𑁂𑀓𑁆𑀔𑀫𑁆𑀫𑀁 𑀲𑀦𑁆𑀢’’𑀦𑁆𑀢𑀺 𑀧𑀲𑁆𑀲𑀦𑁆𑀢𑀲𑁆𑀲𑀧𑀺. 𑀅𑀦𑀸𑀲𑁂𑀯𑀺𑀢𑁄𑀢𑀺 𑀦 𑀆𑀲𑁂𑀯𑀺𑀢𑁄 𑀦 𑀨𑀲𑁆𑀲𑀺𑀢𑁄 𑀦 𑀲𑀘𑁆𑀙𑀺𑀓𑀢𑁄. 𑀅𑀥𑀺𑀕𑀫𑁆𑀫𑀸𑀢𑀺 𑀅𑀥𑀺𑀕𑀦𑁆𑀢𑁆𑀯𑀸 𑀧𑀢𑁆𑀯𑀸 𑀲𑀘𑁆𑀙𑀺𑀓𑀢𑁆𑀯𑀸. 𑀢𑀫𑀸𑀲𑁂𑀯𑁂𑀬𑁆𑀬𑀦𑁆𑀢𑀺 𑀢𑀁 𑀆𑀦𑀺𑀲𑀁𑀲𑀁 𑀲𑁂𑀯𑁂𑀬𑁆𑀬𑀁 𑀪𑀚𑁂𑀬𑁆𑀬𑀁. 𑀬𑀁 𑀫𑁂𑀢𑀺 𑀬𑁂𑀦 𑀓𑀸𑀭𑀡𑁂𑀦 𑀫𑀬𑁆𑀳𑀁. 𑀅𑀥𑀺𑀕𑀫𑁆𑀫𑀸𑀢𑀺 𑀅𑀥𑀺𑀕𑀦𑁆𑀢𑁆𑀯𑀸. 𑀲𑁆𑀯𑀸𑀲𑁆𑀲 𑀫𑁂 𑀳𑁄𑀢𑀺 𑀆𑀩𑀸𑀥𑁄𑀢𑀺 𑀲𑁄 𑀫𑀬𑁆𑀳𑀁 𑀆𑀩𑀸𑀥𑀦𑀝𑁆𑀞𑁂𑀦 𑀆𑀩𑀸𑀥𑁄 𑀳𑁄𑀢𑀺. 𑀅𑀯𑀺𑀢𑀓𑁆𑀓𑁂 𑀘𑀺𑀢𑁆𑀢𑀁 𑀦 𑀧𑀓𑁆𑀔𑀦𑁆𑀤𑀢𑀻𑀢𑀺 𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑁂 𑀤𑀼𑀢𑀺𑀬𑀚𑁆𑀛𑀸𑀦𑁂 𑀆𑀭𑀫𑁆𑀫𑀡𑀯𑀲𑁂𑀦 𑀘𑀺𑀢𑁆𑀢𑀁 𑀦 𑀧𑀓𑁆𑀔𑀦𑁆𑀤𑀢𑀺. 𑀯𑀺𑀢𑀓𑁆𑀓𑁂𑀲𑀽𑀢𑀺 𑀯𑀺𑀢𑀓𑁆𑀓𑀯𑀺𑀘𑀸𑀭𑁂𑀲𑀼. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀫𑀳𑀸𑀯𑀕𑁆𑀕𑁄 𑀘𑀢𑀼𑀢𑁆𑀣𑁄.

𑁫. 𑀲𑀸𑀫𑀜𑁆𑀜𑀯𑀕𑁆𑀕𑁄

𑁧. 𑀲𑀫𑁆𑀩𑀸𑀥𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁨. 𑀧𑀜𑁆𑀘𑀫𑀲𑁆𑀲 𑀧𑀞𑀫𑁂 𑀉𑀤𑀸𑀬𑀻𑀢𑀺 𑀓𑀸𑀴𑀼𑀤𑀸𑀬𑀺𑀢𑁆𑀣𑁂𑀭𑁄. 𑀅𑀯𑀺𑀤𑁆𑀯𑀸𑀢𑀺 𑀅𑀜𑁆𑀜𑀸𑀲𑀺. 𑀪𑀽𑀭𑀺𑀫𑁂𑀥𑀲𑁄𑀢𑀺 𑀫𑀳𑀸𑀧𑀜𑁆𑀜𑁄. 𑀬𑁄 𑀛𑀸𑀦𑀫𑀩𑀼𑀚𑁆𑀛𑀻𑀢𑀺 𑀬𑁄 𑀛𑀸𑀦𑀁 𑀅𑀩𑀼𑀚𑁆𑀛𑀺. 𑀧𑀝𑀺𑀮𑀻𑀦𑀦𑀺𑀲𑀪𑁄𑀢𑀺 𑀏𑀓𑀻𑀪𑀸𑀯𑀯𑀲𑁂𑀦 𑀧𑀝𑀺𑀮𑀻𑀦𑁄 𑀘𑁂𑀯 𑀉𑀢𑁆𑀢𑀫𑀝𑁆𑀞𑁂𑀦 𑀘 𑀦𑀺𑀲𑀪𑁄. 𑀫𑀼𑀦𑀻𑀢𑀺 𑀩𑀼𑀤𑁆𑀥𑀫𑀼𑀦𑀺. 𑀧𑀭𑀺𑀬𑀸𑀬𑁂𑀦𑀸𑀢𑀺 𑀏𑀓𑁂𑀦 𑀓𑀸𑀭𑀡𑁂𑀦. 𑀓𑀸𑀫𑀲𑀫𑁆𑀩𑀸𑀥𑀲𑁆𑀲 𑀳𑀺 𑀅𑀪𑀸𑀯𑀫𑀢𑁆𑀢𑁂𑀦𑁂𑀯 𑀧𑀞𑀫𑀚𑁆𑀛𑀸𑀦𑀁 𑀑𑀓𑀸𑀲𑀸𑀥𑀺𑀕𑀫𑁄 𑀦𑀸𑀫, 𑀦 𑀲𑀩𑁆𑀩𑀣𑀸 𑀲𑀩𑁆𑀩𑀁. 𑀢𑀢𑁆𑀭𑀸𑀧𑀢𑁆𑀣𑀺 𑀲𑀫𑁆𑀩𑀸𑀥𑁄𑀢𑀺 𑀢𑀲𑁆𑀫𑀺𑀫𑁆𑀧𑀺 𑀧𑀞𑀫𑀚𑁆𑀛𑀸𑀦𑁂 𑀲𑀫𑁆𑀩𑀸𑀥𑁄 𑀧𑀝𑀺𑀧𑀻𑀴𑀦𑀁 𑀅𑀢𑁆𑀣𑀺𑀬𑁂𑀯. 𑀢𑀢𑁆𑀭𑀸𑀧𑀺𑀢𑁆𑀣𑀻𑀢𑀺𑀧𑀺 𑀧𑀸𑀞𑁄. 𑀓𑀺𑀜𑁆𑀘 𑀢𑀢𑁆𑀣 𑀲𑀫𑁆𑀩𑀸𑀥𑁄𑀢𑀺 𑀢𑀲𑁆𑀫𑀺𑀁 𑀧𑀦 𑀛𑀸𑀦𑁂 𑀓𑀺𑀁 𑀲𑀫𑁆𑀩𑀸𑀥𑁄 𑀦𑀸𑀫. 𑀅𑀬𑀫𑁂𑀢𑁆𑀣 𑀲𑀫𑁆𑀩𑀸𑀥𑁄𑀢𑀺 𑀅𑀬𑀁 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀁 𑀅𑀦𑀺𑀭𑀼𑀤𑁆𑀥𑀪𑀸𑀯𑁄 𑀲𑀫𑁆𑀩𑀸𑀥𑁄 𑀲𑀁𑀧𑀻𑀴𑀸 𑀦𑀸𑀫. 𑀇𑀫𑀺𑀦𑀸 𑀉𑀧𑀸𑀬𑁂𑀦 𑀲𑀩𑁆𑀩𑀯𑀸𑀭𑁂𑀲𑀼 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀦𑀺𑀧𑁆𑀧𑀭𑀺𑀬𑀸𑀬𑁂𑀦𑀸𑀢𑀺 𑀦 𑀏𑀓𑁂𑀦 𑀓𑀸𑀭𑀡𑁂𑀦, 𑀅𑀣 𑀔𑁄 𑀆𑀲𑀯𑀓𑁆𑀔𑀬𑁄 𑀦𑀸𑀫 𑀲𑀩𑁆𑀩𑀲𑀫𑁆𑀩𑀸𑀥𑀸𑀦𑀁 𑀧𑀳𑀻𑀦𑀢𑁆𑀢𑀸 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀑𑀓𑀸𑀲𑀸𑀥𑀺𑀕𑀫𑁄 𑀦𑀸𑀫𑀸𑀢𑀺.

𑁨. 𑀓𑀸𑀬𑀲𑀓𑁆𑀔𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁩. 𑀤𑀼𑀢𑀺𑀬𑁂 𑀬𑀣𑀸 𑀬𑀣𑀸 𑀘 𑀢𑀤𑀸𑀬𑀢𑀦𑀦𑁆𑀢𑀺 𑀬𑁂𑀦 𑀬𑁂𑀦 𑀓𑀸𑀭𑀡𑁂𑀦 𑀬𑁂𑀦 𑀬𑁂𑀦𑀸𑀓𑀸𑀭𑁂𑀦 𑀢𑀁 𑀧𑀞𑀫𑀚𑁆𑀛𑀸𑀦𑀲𑀗𑁆𑀔𑀸𑀢𑀁 𑀆𑀬𑀢𑀦𑀁 𑀳𑁄𑀢𑀺. 𑀢𑀣𑀸 𑀢𑀣𑀸 𑀦𑀁 𑀓𑀸𑀬𑁂𑀦 𑀨𑀼𑀲𑀺𑀢𑁆𑀯𑀸 𑀯𑀺𑀳𑀭𑀢𑀻𑀢𑀺 𑀢𑁂𑀦 𑀢𑁂𑀦 𑀓𑀸𑀭𑀡𑁂𑀦 𑀢𑁂𑀦 𑀢𑁂𑀦𑀸𑀓𑀸𑀭𑁂𑀦 𑀢𑀁 𑀲𑀫𑀸𑀧𑀢𑁆𑀢𑀺𑀁 𑀲𑀳𑀚𑀸𑀢𑀦𑀸𑀫𑀓𑀸𑀬𑁂𑀦 𑀨𑀼𑀲𑀺𑀢𑁆𑀯𑀸 𑀯𑀺𑀳𑀭𑀢𑀺, 𑀲𑀫𑀸𑀧𑀚𑁆𑀚𑀢𑀻𑀢𑀺 𑀅𑀢𑁆𑀣𑁄. 𑀓𑀸𑀬𑀲𑀓𑁆𑀔𑀺 𑀯𑀼𑀢𑁆𑀢𑁄 𑀪𑀕𑀯𑀢𑀸 𑀧𑀭𑀺𑀬𑀸𑀬𑁂𑀦𑀸𑀢𑀺 𑀬𑀲𑁆𑀫𑀸 𑀢𑁂𑀦 𑀦𑀸𑀫𑀸𑀓𑀸𑀬𑁂𑀦 𑀧𑀞𑀫𑀚𑁆𑀛𑀸𑀦𑀁 𑀲𑀘𑁆𑀙𑀺𑀓𑀢𑀁, 𑀢𑀲𑁆𑀫𑀸 𑀇𑀫𑀺𑀦𑀸 𑀧𑀭𑀺𑀬𑀸𑀬𑁂𑀦 𑀓𑀸𑀬𑀲𑀓𑁆𑀔𑀺 𑀯𑀼𑀢𑁆𑀢𑁄. 𑀦𑀺𑀧𑁆𑀧𑀭𑀺𑀬𑀸𑀬𑁂𑀦𑀸𑀢𑀺 𑀬𑀢𑁆𑀢𑀓𑀁 𑀓𑀸𑀬𑁂𑀦 𑀲𑀘𑁆𑀙𑀺𑀓𑀸𑀢𑀩𑁆𑀩𑀁, 𑀲𑀩𑁆𑀩𑀲𑁆𑀲 𑀓𑀢𑀢𑁆𑀢𑀸 𑀅𑀬𑀁 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀓𑀸𑀬𑀲𑀓𑁆𑀔𑀺 𑀦𑀸𑀫.

𑁩. 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁪. 𑀢𑀢𑀺𑀬𑁂 𑀧𑀜𑁆𑀜𑀸𑀬 𑀘 𑀦𑀁 𑀧𑀚𑀸𑀦𑀸𑀢𑀻𑀢𑀺 𑀢𑀁 𑀧𑀞𑀫𑀚𑁆𑀛𑀸𑀦𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸𑀬 𑀚𑀸𑀦𑀸𑀢𑀺. 𑀇𑀥𑀸𑀧𑀺 𑀧𑀭𑀺𑀬𑀸𑀬𑀦𑀺𑀧𑁆𑀧𑀭𑀺𑀬𑀸𑀬𑀸 𑀧𑀼𑀭𑀺𑀫𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸. 𑀬𑀣𑀸 𑀘 𑀇𑀥, 𑀏𑀯𑀁 𑀇𑀢𑁄 𑀧𑀭𑁂𑀲𑀼𑀧𑀺.

𑁪. 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁫. 𑀘𑀢𑀼𑀢𑁆𑀣𑀁 𑀉𑀪𑀬𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀏𑀢𑁆𑀣 𑀘 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑁄𑀢𑀺 𑀉𑀪𑀢𑁄𑀪𑀸𑀕𑁂𑀳𑀺 𑀲𑀫𑀣𑀯𑀺𑀧𑀲𑁆𑀲𑀦𑀸𑀦𑀁 𑀧𑀘𑁆𑀘𑀦𑀻𑀓𑀓𑀺𑀮𑁂𑀲𑁂𑀳𑀺 𑀯𑀺𑀫𑀼𑀢𑁆𑀢𑁄. 𑀧𑀭𑀺𑀬𑁄𑀲𑀸𑀦𑁂 𑀧𑀦 𑀲𑀫𑀸𑀧𑀢𑁆𑀢𑀺𑀬𑀸 𑀭𑀽𑀧𑀓𑀸𑀬𑀢𑁄, 𑀅𑀭𑀺𑀬𑀫𑀕𑁆𑀕𑁂𑀦 𑀦𑀸𑀫𑀓𑀸𑀬𑀢𑁄 𑀯𑀺𑀫𑀼𑀢𑁆𑀢𑁄𑀬𑁂𑀯 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑁫-𑁧𑁦. 𑀲𑀦𑁆𑀤𑀺𑀝𑁆𑀞𑀺𑀓𑀥𑀫𑁆𑀫𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁪𑁬-𑁫𑁧. 𑀧𑀜𑁆𑀘𑀫𑀸𑀤𑀻𑀲𑀼 𑀲𑀦𑁆𑀤𑀺𑀝𑁆𑀞𑀺𑀓𑁄𑀢𑀺 𑀲𑀬𑀁 𑀧𑀲𑁆𑀲𑀺𑀢𑀩𑁆𑀩𑀓𑁄. 𑀦𑀺𑀩𑁆𑀩𑀸𑀦𑀦𑁆𑀢𑀺 𑀓𑀺𑀮𑁂𑀲𑀦𑀺𑀩𑁆𑀩𑀸𑀦𑀁. 𑀧𑀭𑀺𑀦𑀺𑀩𑁆𑀩𑀸𑀦𑀦𑁆𑀢𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀢𑀤𑀗𑁆𑀕𑀦𑀺𑀩𑁆𑀩𑀸𑀦𑀦𑁆𑀢𑀺 𑀧𑀞𑀫𑀚𑁆𑀛𑀸𑀦𑀸𑀤𑀺𑀦𑀸 𑀢𑁂𑀦 𑀢𑁂𑀦 𑀅𑀗𑁆𑀕𑁂𑀦 𑀦𑀺𑀩𑁆𑀩𑀸𑀦𑀁. 𑀤𑀺𑀝𑁆𑀞𑀥𑀫𑁆𑀫𑀦𑀺𑀩𑁆𑀩𑀸𑀦𑀦𑁆𑀢𑀺 𑀇𑀲𑁆𑀫𑀺𑀁𑀬𑁂𑀯 𑀅𑀢𑁆𑀢𑀪𑀸𑀯𑁂 𑀦𑀺𑀩𑁆𑀩𑀸𑀦𑀁. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀲𑀸𑀫𑀜𑁆𑀜𑀯𑀕𑁆𑀕𑁄 𑀧𑀜𑁆𑀘𑀫𑁄.

𑀧𑀞𑀫𑀧𑀡𑁆𑀡𑀸𑀲𑀓𑀁 𑀦𑀺𑀝𑁆𑀞𑀺𑀢𑀁.

𑁨. 𑀤𑀼𑀢𑀺𑀬𑀧𑀡𑁆𑀡𑀸𑀲𑀓𑀯𑀡𑁆𑀡𑀦𑀸

𑁫𑁨. 𑀇𑀢𑁄 𑀧𑀭𑁂𑀲𑀼 𑀔𑁂𑀫𑀦𑁆𑀢𑀺 𑀦𑀺𑀭𑀼𑀧𑀤𑁆𑀤𑀯𑀁. 𑀔𑁂𑀫𑀧𑁆𑀧𑀢𑁆𑀢𑁄𑀢𑀺 𑀔𑁂𑀫𑀪𑀸𑀯𑀁 𑀧𑀢𑁆𑀢𑁄. 𑀲𑀺𑀓𑁆𑀔𑀸𑀤𑀼𑀩𑁆𑀩𑀮𑁆𑀬𑀸𑀦𑀻𑀢𑀺 𑀲𑀺𑀓𑁆𑀔𑀸𑀬 𑀤𑀼𑀩𑁆𑀩𑀮𑀪𑀸𑀯𑀓𑀭𑀡𑀸𑀦𑀺. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀫𑀦𑁄𑀭𑀣𑀧𑀽𑀭𑀡𑀺𑀬𑀸 𑀅𑀗𑁆𑀕𑀼𑀢𑁆𑀢𑀭𑀦𑀺𑀓𑀸𑀬-𑀅𑀝𑁆𑀞𑀓𑀣𑀸𑀬

𑀦𑀯𑀓𑀦𑀺𑀧𑀸𑀢𑀲𑁆𑀲 𑀲𑀁𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.