𑁧. 𑀲𑀫𑁆𑀩𑀸𑀥𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁨. 𑀧𑀜𑁆𑀘𑀫𑀲𑁆𑀲 𑀧𑀞𑀫𑁂 𑀉𑀤𑀸𑀬𑀻𑀢𑀺 𑀓𑀸𑀴𑀼𑀤𑀸𑀬𑀺𑀢𑁆𑀣𑁂𑀭𑁄. 𑀅𑀯𑀺𑀤𑁆𑀯𑀸𑀢𑀺 𑀅𑀜𑁆𑀜𑀸𑀲𑀺. 𑀪𑀽𑀭𑀺𑀫𑁂𑀥𑀲𑁄𑀢𑀺 𑀫𑀳𑀸𑀧𑀜𑁆𑀜𑁄. 𑀬𑁄 𑀛𑀸𑀦𑀫𑀩𑀼𑀚𑁆𑀛𑀻𑀢𑀺 𑀬𑁄 𑀛𑀸𑀦𑀁 𑀅𑀩𑀼𑀚𑁆𑀛𑀺. 𑀧𑀝𑀺𑀮𑀻𑀦𑀦𑀺𑀲𑀪𑁄𑀢𑀺 𑀏𑀓𑀻𑀪𑀸𑀯𑀯𑀲𑁂𑀦 𑀧𑀝𑀺𑀮𑀻𑀦𑁄 𑀘𑁂𑀯 𑀉𑀢𑁆𑀢𑀫𑀝𑁆𑀞𑁂𑀦 𑀘 𑀦𑀺𑀲𑀪𑁄. 𑀫𑀼𑀦𑀻𑀢𑀺 𑀩𑀼𑀤𑁆𑀥𑀫𑀼𑀦𑀺. 𑀧𑀭𑀺𑀬𑀸𑀬𑁂𑀦𑀸𑀢𑀺 𑀏𑀓𑁂𑀦 𑀓𑀸𑀭𑀡𑁂𑀦. 𑀓𑀸𑀫𑀲𑀫𑁆𑀩𑀸𑀥𑀲𑁆𑀲 𑀳𑀺 𑀅𑀪𑀸𑀯𑀫𑀢𑁆𑀢𑁂𑀦𑁂𑀯 𑀧𑀞𑀫𑀚𑁆𑀛𑀸𑀦𑀁 𑀑𑀓𑀸𑀲𑀸𑀥𑀺𑀕𑀫𑁄 𑀦𑀸𑀫, 𑀦 𑀲𑀩𑁆𑀩𑀣𑀸 𑀲𑀩𑁆𑀩𑀁. 𑀢𑀢𑁆𑀭𑀸𑀧𑀢𑁆𑀣𑀺 𑀲𑀫𑁆𑀩𑀸𑀥𑁄𑀢𑀺 𑀢𑀲𑁆𑀫𑀺𑀫𑁆𑀧𑀺 𑀧𑀞𑀫𑀚𑁆𑀛𑀸𑀦𑁂 𑀲𑀫𑁆𑀩𑀸𑀥𑁄 𑀧𑀝𑀺𑀧𑀻𑀴𑀦𑀁 𑀅𑀢𑁆𑀣𑀺𑀬𑁂𑀯. 𑀢𑀢𑁆𑀭𑀸𑀧𑀺𑀢𑁆𑀣𑀻𑀢𑀺𑀧𑀺 𑀧𑀸𑀞𑁄. 𑀓𑀺𑀜𑁆𑀘 𑀢𑀢𑁆𑀣 𑀲𑀫𑁆𑀩𑀸𑀥𑁄𑀢𑀺 𑀢𑀲𑁆𑀫𑀺𑀁 𑀧𑀦 𑀛𑀸𑀦𑁂 𑀓𑀺𑀁 𑀲𑀫𑁆𑀩𑀸𑀥𑁄 𑀦𑀸𑀫. 𑀅𑀬𑀫𑁂𑀢𑁆𑀣 𑀲𑀫𑁆𑀩𑀸𑀥𑁄𑀢𑀺 𑀅𑀬𑀁 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀁 𑀅𑀦𑀺𑀭𑀼𑀤𑁆𑀥𑀪𑀸𑀯𑁄 𑀲𑀫𑁆𑀩𑀸𑀥𑁄 𑀲𑀁𑀧𑀻𑀴𑀸 𑀦𑀸𑀫. 𑀇𑀫𑀺𑀦𑀸 𑀉𑀧𑀸𑀬𑁂𑀦 𑀲𑀩𑁆𑀩𑀯𑀸𑀭𑁂𑀲𑀼 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀦𑀺𑀧𑁆𑀧𑀭𑀺𑀬𑀸𑀬𑁂𑀦𑀸𑀢𑀺 𑀦 𑀏𑀓𑁂𑀦 𑀓𑀸𑀭𑀡𑁂𑀦, 𑀅𑀣 𑀔𑁄 𑀆𑀲𑀯𑀓𑁆𑀔𑀬𑁄 𑀦𑀸𑀫 𑀲𑀩𑁆𑀩𑀲𑀫𑁆𑀩𑀸𑀥𑀸𑀦𑀁 𑀧𑀳𑀻𑀦𑀢𑁆𑀢𑀸 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀑𑀓𑀸𑀲𑀸𑀥𑀺𑀕𑀫𑁄 𑀦𑀸𑀫𑀸𑀢𑀺.