𑁧-𑁨. 𑀅𑀦𑀼𑀧𑀼𑀩𑁆𑀩𑀯𑀺𑀳𑀸𑀭𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁩𑁨-𑁩𑁩. 𑀘𑀢𑀼𑀢𑁆𑀣𑀲𑁆𑀲 𑀧𑀞𑀫𑁂 𑀅𑀦𑀼𑀧𑀼𑀩𑁆𑀩𑀯𑀺𑀳𑀸𑀭𑀸𑀢𑀺 𑀅𑀦𑀼𑀧𑀝𑀺𑀧𑀸𑀝𑀺𑀬𑀸 𑀲𑀫𑀸𑀧𑀚𑁆𑀚𑀺𑀢𑀩𑁆𑀩𑀯𑀺𑀳𑀸𑀭𑀸. 𑀤𑀼𑀢𑀺𑀬𑁂 𑀬𑀢𑁆𑀣 𑀓𑀸𑀫𑀸 𑀦𑀺𑀭𑀼𑀚𑁆𑀛𑀦𑁆𑀢𑀻𑀢𑀺 𑀬𑀲𑁆𑀫𑀺𑀁 𑀞𑀸𑀦𑁂 𑀓𑀸𑀫𑀸 𑀯𑀽𑀧𑀲𑀫𑁆𑀫𑀦𑁆𑀢𑀺. 𑀦𑀺𑀭𑁄𑀥𑁂𑀢𑁆𑀯𑀸𑀢𑀺 𑀅𑀧𑁆𑀧𑀝𑀺𑀯𑀢𑁆𑀢𑁂 𑀓𑀢𑁆𑀯𑀸. 𑀦𑀺𑀘𑁆𑀙𑀸𑀢𑀸𑀢𑀺 𑀢𑀡𑁆𑀳𑀸𑀤𑀺𑀝𑁆𑀞𑀺𑀘𑁆𑀙𑀸𑀢𑀸𑀦𑀁 𑀅𑀪𑀸𑀯𑁂𑀦 𑀦𑀺𑀘𑁆𑀙𑀸𑀢𑀸. 𑀦𑀺𑀩𑁆𑀩𑀼𑀢𑀸𑀢𑀺 𑀅𑀢𑁆𑀢𑀧𑀭𑀺𑀢𑀸𑀧𑀦𑀓𑀺𑀮𑁂𑀲𑀸𑀦𑀁 𑀅𑀪𑀸𑀯𑁂𑀦 𑀦𑀺𑀩𑁆𑀩𑀼𑀢𑀸. 𑀢𑀺𑀡𑁆𑀡𑀸𑀢𑀺 𑀓𑀸𑀫𑀢𑁄 𑀢𑀺𑀡𑁆𑀡𑀸. 𑀧𑀸𑀭𑀁𑀕𑀢𑀸𑀢𑀺 𑀓𑀸𑀫𑁂 𑀧𑀸𑀭𑀁 𑀕𑀢𑀸. 𑀢𑀤𑀗𑁆𑀕𑁂𑀦𑀸𑀢𑀺 𑀢𑁂𑀦 𑀛𑀸𑀦𑀗𑁆𑀕𑁂𑀦. 𑀏𑀢𑁆𑀣 𑀓𑀸𑀫𑀸 𑀦𑀺𑀭𑀼𑀚𑁆𑀛𑀦𑁆𑀢𑀻𑀢𑀺 𑀏𑀢𑁆𑀣 𑀧𑀞𑀫𑀚𑁆𑀛𑀸𑀦𑁂 𑀓𑀸𑀫𑀸 𑀦𑀺𑀭𑀼𑀚𑁆𑀛𑀦𑁆𑀢𑀺. 𑀢𑁂 𑀘𑀸𑀢𑀺 𑀬𑁂 𑀧𑀞𑀫𑀚𑁆𑀛𑀸𑀦𑀁 𑀲𑀫𑀸𑀧𑀚𑁆𑀚𑀦𑁆𑀢𑀺, 𑀢𑁂 𑀓𑀸𑀫𑁂 𑀦𑀺𑀭𑁄𑀥𑁂𑀢𑁆𑀯𑀸 𑀦𑀺𑀭𑁄𑀥𑁂𑀢𑁆𑀯𑀸 𑀯𑀺𑀳𑀭𑀦𑁆𑀢𑀺 𑀦𑀸𑀫. 𑀧𑀜𑁆𑀚𑀮𑀺𑀓𑁄𑀢𑀺 𑀧𑀕𑁆𑀕𑀳𑀺𑀢𑀅𑀜𑁆𑀚𑀮𑀺𑀓𑁄 𑀳𑀼𑀢𑁆𑀯𑀸. 𑀧𑀬𑀺𑀭𑀼𑀧𑀸𑀲𑁂𑀬𑁆𑀬𑀸𑀢𑀺 𑀉𑀧𑀝𑁆𑀞𑀸𑀧𑁂𑀬𑁆𑀬. 𑀇𑀫𑀺𑀦𑀸 𑀉𑀧𑀸𑀬𑁂𑀦 𑀲𑀩𑁆𑀩𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.