𑁯. 𑀦𑀦𑁆𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑁯. 𑀦𑀯𑀫𑁂 𑀓𑀼𑀮𑀧𑀼𑀢𑁆𑀢𑁄𑀢𑀺 𑀚𑀸𑀢𑀺𑀓𑀼𑀮𑀧𑀼𑀢𑁆𑀢𑁄. 𑀩𑀮𑀯𑀸𑀢𑀺 𑀣𑀸𑀫𑀲𑀫𑁆𑀧𑀦𑁆𑀦𑁄. 𑀧𑀸𑀲𑀸𑀤𑀺𑀓𑁄𑀢𑀺 𑀭𑀽𑀧𑀲𑀫𑁆𑀧𑀢𑁆𑀢𑀺𑀬𑀸 𑀧𑀲𑀸𑀤𑀚𑀦𑀓𑁄. 𑀢𑀺𑀩𑁆𑀩𑀭𑀸𑀕𑁄𑀢𑀺 𑀩𑀳𑀮𑀭𑀸𑀕𑁄. 𑀓𑀺𑀫𑀜𑁆𑀜𑀢𑁆𑀭𑀸𑀢𑀺𑀆𑀤𑀻𑀲𑀼 𑀅𑀬𑀫𑀢𑁆𑀣𑁄 𑁋 𑀓𑀺𑀁 𑀅𑀜𑁆𑀜𑁂𑀦 𑀓𑀸𑀭𑀡𑁂𑀦 𑀓𑀣𑀺𑀢𑁂𑀦, 𑀅𑀬𑀁 𑀦𑀦𑁆𑀤𑁄 𑀇𑀦𑁆𑀤𑁆𑀭𑀺𑀬𑁂𑀲𑀼 𑀕𑀼𑀢𑁆𑀢𑀤𑁆𑀯𑀸𑀭𑁄 𑀪𑁄𑀚𑀦𑁂 𑀫𑀢𑁆𑀢𑀜𑁆𑀜𑀽 𑀚𑀸𑀕𑀭𑀺𑀬𑀫𑀦𑀼𑀬𑀼𑀢𑁆𑀢𑁄 𑀲𑀢𑀺𑀲𑀫𑁆𑀧𑀚𑀜𑁆𑀜𑁂𑀦 𑀲𑀫𑀦𑁆𑀦𑀸𑀕𑀢𑁄, 𑀬𑁂𑀳𑀺 𑀦𑀦𑁆𑀤𑁄 𑀲𑀓𑁆𑀓𑁄𑀢𑀺 𑀧𑀭𑀺𑀧𑀼𑀡𑁆𑀡𑀁 𑀧𑀭𑀺𑀲𑀼𑀤𑁆𑀥𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀺𑀢𑀼𑀁. 𑀲𑀘𑁂 𑀇𑀫𑁂𑀳𑀺 𑀓𑀸𑀭𑀡𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀦𑀸𑀪𑀯𑀺𑀲𑁆𑀲, 𑀦 𑀲𑀓𑁆𑀓𑀼𑀡𑁂𑀬𑁆𑀬𑀸𑀢𑀺. 𑀇𑀢𑀺𑀳 𑀢𑀢𑁆𑀣𑀸𑀢𑀺 𑀏𑀯𑀁 𑀢𑀢𑁆𑀣. 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀯𑀝𑁆𑀝𑀫𑁂𑀯 𑀓𑀣𑀺𑀢𑀁.