𑁬. 𑀅𑀩𑁆𑀬𑀸𑀓𑀢𑀯𑀕𑁆𑀕𑁄

𑁧. 𑀅𑀩𑁆𑀬𑀸𑀓𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁪. 𑀙𑀝𑁆𑀞𑀯𑀕𑁆𑀕𑀲𑁆𑀲 𑀧𑀞𑀫𑁂 𑀅𑀩𑁆𑀬𑀸𑀓𑀢𑀯𑀢𑁆𑀣𑀽𑀲𑀽𑀢𑀺 𑀏𑀓𑀁𑀲𑀸𑀤𑀺𑀯𑀲𑁂𑀦 𑀅𑀓𑀣𑀺𑀢𑀯𑀢𑁆𑀣𑀽𑀲𑀼. 𑀢𑀣𑀸𑀕𑀢𑁄𑀢𑀺 𑀲𑀢𑁆𑀢𑁄. 𑀤𑀺𑀝𑁆𑀞𑀺𑀕𑀢𑀫𑁂𑀢𑀦𑁆𑀢𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀫𑀢𑁆𑀢𑀓𑀫𑁂𑀢𑀁, 𑀦 𑀢𑀸𑀬 𑀤𑀺𑀝𑁆𑀞𑀺𑀬𑀸 𑀕𑀳𑀺𑀢𑀲𑀢𑁆𑀢𑁄 𑀦𑀸𑀫 𑀅𑀢𑁆𑀣𑀺. 𑀧𑀝𑀺𑀧𑀤𑀦𑁆𑀢𑀺 𑀅𑀭𑀺𑀬𑀫𑀕𑁆𑀕𑀁. 𑀦 𑀙𑀫𑁆𑀪𑀢𑀻𑀢𑀺 𑀤𑀺𑀝𑁆𑀞𑀺𑀯𑀲𑁂𑀦 𑀦 𑀓𑀫𑁆𑀧𑀢𑀺. 𑀲𑁂𑀲𑀧𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀢𑀡𑁆𑀳𑀸𑀕𑀢𑀦𑁆𑀢𑀺 𑀤𑀺𑀝𑁆𑀞𑀺𑀢𑀡𑁆𑀳𑀸. 𑀲𑀜𑁆𑀜𑀸𑀕𑀢𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀤𑀺𑀝𑁆𑀞𑀺𑀲𑀜𑁆𑀜𑀸 𑀏𑀯 𑀳𑁂𑀢𑁆𑀣 𑀲𑀜𑁆𑀜𑀸𑀕𑀢𑀁, 𑀤𑀺𑀝𑁆𑀞𑀺𑀦𑀺𑀲𑁆𑀲𑀺𑀢𑀫𑀸𑀦𑁄𑀬𑁂𑀯 𑀤𑀺𑀝𑁆𑀞𑀺𑀫𑀜𑁆𑀜𑀺𑀢𑀫𑁂𑀯 𑀯𑀸 𑀫𑀜𑁆𑀜𑀺𑀢𑀁, 𑀤𑀺𑀝𑁆𑀞𑀺𑀧𑀧𑀜𑁆𑀘𑁄𑀯 𑀧𑀧𑀜𑁆𑀘𑀺𑀢𑀁, 𑀤𑀺𑀝𑁆𑀞𑀼𑀧𑀸𑀤𑀸𑀦𑀫𑁂𑀯 𑀉𑀧𑀸𑀤𑀸𑀦𑀁, 𑀤𑀺𑀝𑁆𑀞𑀺𑀬𑀸 𑀯𑀺𑀭𑀽𑀧𑀁 𑀧𑀝𑀺𑀲𑀭𑀡𑀪𑀸𑀯𑁄𑀬𑁂𑀯 𑀯𑀺𑀧𑁆𑀧𑀝𑀺𑀲𑀸𑀭𑁄 𑀦𑀸𑀫𑀸𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀏𑀢𑁆𑀣 𑀘 𑀤𑀺𑀝𑁆𑀞𑀺𑀕𑁆𑀕𑀳𑀡𑁂𑀦 𑀤𑁆𑀯𑀸𑀲𑀝𑁆𑀞𑀺 𑀤𑀺𑀝𑁆𑀞𑀺𑀬𑁄, 𑀤𑀺𑀝𑁆𑀞𑀺𑀦𑀺𑀭𑁄𑀥𑀕𑀸𑀫𑀺𑀦𑀺𑀧𑀝𑀺𑀧𑀤𑀸𑀕𑀳𑀡𑁂𑀦 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁄 𑀕𑀳𑀺𑀢𑁄𑀢𑀺.

𑁨. 𑀧𑀼𑀭𑀺𑀲𑀕𑀢𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁫. 𑀤𑀼𑀢𑀺𑀬𑁂 𑀧𑀼𑀭𑀺𑀲𑀕𑀢𑀺𑀬𑁄𑀢𑀺 𑀧𑀼𑀭𑀺𑀲𑀲𑁆𑀲 𑀜𑀸𑀡𑀕𑀢𑀺𑀬𑁄. 𑀅𑀦𑀼𑀧𑀸𑀤𑀸𑀧𑀭𑀺𑀦𑀺𑀩𑁆𑀩𑀸𑀦𑀦𑁆𑀢𑀺 𑀅𑀧𑀘𑁆𑀘𑀬𑀦𑀺𑀩𑁆𑀩𑀸𑀦𑀁. 𑀦𑁄 𑀘𑀲𑁆𑀲𑀸𑀢𑀺 𑀅𑀢𑀻𑀢𑁂 𑀅𑀢𑁆𑀢𑀪𑀸𑀯𑀦𑀺𑀩𑁆𑀩𑀢𑁆𑀢𑀓𑀁 𑀓𑀫𑁆𑀫𑀁 𑀦𑁄 𑀘𑁂 𑀅𑀪𑀯𑀺𑀲𑁆𑀲. 𑀦𑁄 𑀘 𑀫𑁂 𑀲𑀺𑀬𑀸𑀢𑀺 𑀏𑀢𑀭𑀳𑀺 𑀫𑁂 𑀅𑀬𑀁 𑀅𑀢𑁆𑀢𑀪𑀸𑀯𑁄 𑀦 𑀲𑀺𑀬𑀸. 𑀦 𑀪𑀯𑀺𑀲𑁆𑀲𑀢𑀻𑀢𑀺 𑀏𑀢𑀭𑀳𑀺 𑀫𑁂 𑀅𑀦𑀸𑀕𑀢𑀢𑁆𑀢𑀪𑀸𑀯𑀦𑀺𑀩𑁆𑀩𑀢𑁆𑀢𑀓𑀁 𑀓𑀫𑁆𑀫𑀁 𑀦 𑀪𑀯𑀺𑀲𑁆𑀲𑀢𑀺. 𑀦 𑀘 𑀫𑁂 𑀪𑀯𑀺𑀲𑁆𑀲𑀢𑀻𑀢𑀺 𑀅𑀦𑀸𑀕𑀢𑁂 𑀫𑁂 𑀅𑀢𑁆𑀢𑀪𑀸𑀯𑁄 𑀦 𑀪𑀯𑀺𑀲𑁆𑀲𑀢𑀺. 𑀬𑀤𑀢𑁆𑀣𑀺 𑀬𑀁 𑀪𑀽𑀢𑀦𑁆𑀢𑀺 𑀬𑀁 𑀅𑀢𑁆𑀣𑀺 𑀬𑀁 𑀪𑀽𑀢𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀓𑁆𑀔𑀦𑁆𑀥𑀧𑀜𑁆𑀘𑀓𑀁. 𑀢𑀁 𑀧𑀚𑀳𑀸𑀫𑀻𑀢𑀺 𑀉𑀧𑁂𑀓𑁆𑀔𑀁 𑀧𑀝𑀺𑀮𑀪𑀢𑀻𑀢𑀺 𑀢𑀁 𑀢𑀢𑁆𑀣 𑀙𑀦𑁆𑀤𑀭𑀸𑀕𑀧𑁆𑀧𑀳𑀸𑀦𑁂𑀦 𑀧𑀚𑀳𑀸𑀫𑀻𑀢𑀺 𑀯𑀺𑀧𑀲𑁆𑀲𑀦𑀼𑀧𑁂𑀓𑁆𑀔𑀁 𑀧𑀝𑀺𑀮𑀪𑀢𑀺. 𑀪𑀯𑁂 𑀦 𑀭𑀚𑁆𑀚𑀢𑀻𑀢𑀺 𑀅𑀢𑀻𑀢𑁂 𑀔𑀦𑁆𑀥𑀧𑀜𑁆𑀘𑀓𑁂 𑀢𑀡𑁆𑀳𑀸𑀤𑀺𑀝𑁆𑀞𑀻𑀳𑀺 𑀦 𑀭𑀚𑁆𑀚𑀢𑀺. 𑀲𑀫𑁆𑀪𑀯𑁂 𑀦 𑀭𑀚𑁆𑀚𑀢𑀻𑀢𑀺 𑀅𑀦𑀸𑀕𑀢𑁂𑀧𑀺 𑀢𑀣𑁂𑀯 𑀦 𑀭𑀚𑁆𑀚𑀢𑀺. 𑀅𑀢𑁆𑀣𑀼𑀢𑁆𑀢𑀭𑀺 𑀧𑀤𑀁 𑀲𑀦𑁆𑀢𑀦𑁆𑀢𑀺 𑀉𑀢𑁆𑀢𑀭𑀺 𑀲𑀦𑁆𑀢𑀁 𑀦𑀺𑀩𑁆𑀩𑀸𑀦𑀧𑀤𑀁 𑀦𑀸𑀫 𑀅𑀢𑁆𑀣𑀺. 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀧𑀲𑁆𑀲𑀢𑀻𑀢𑀺 𑀢𑀁 𑀲𑀳𑀯𑀺𑀧𑀲𑁆𑀲𑀦𑀸𑀬 𑀫𑀕𑁆𑀕𑀧𑀜𑁆𑀜𑀸𑀬 𑀲𑀫𑁆𑀫𑀸 𑀧𑀲𑁆𑀲𑀢𑀺. 𑀦 𑀲𑀩𑁆𑀩𑁂𑀦 𑀲𑀩𑁆𑀩𑀦𑁆𑀢𑀺 𑀏𑀓𑀘𑁆𑀘𑀸𑀦𑀁 𑀓𑀺𑀮𑁂𑀲𑀸𑀦𑀁 𑀅𑀧𑁆𑀧𑀳𑀻𑀦𑀢𑁆𑀢𑀸 𑀲𑀘𑁆𑀘𑀧𑀝𑀺𑀘𑁆𑀙𑀸𑀤𑀓𑀲𑁆𑀲 𑀢𑀫𑀲𑁆𑀲 𑀲𑀩𑁆𑀩𑀲𑁄 𑀅𑀯𑀺𑀤𑁆𑀥𑀁𑀲𑀺𑀢𑀢𑁆𑀢𑀸 𑀦 𑀲𑀩𑁆𑀩𑀸𑀓𑀸𑀭𑁂𑀦 𑀲𑀩𑁆𑀩𑀁. 𑀳𑀜𑁆𑀜𑀫𑀸𑀦𑁂𑀢𑀺 𑀲𑀡𑁆𑀟𑀸𑀲𑁂𑀦 𑀕𑀳𑁂𑀢𑁆𑀯𑀸 𑀫𑀼𑀝𑁆𑀞𑀺𑀓𑀸𑀬 𑀓𑁄𑀝𑁆𑀝𑀺𑀬𑀫𑀸𑀦𑁂. 𑀅𑀦𑁆𑀢𑀭𑀸𑀧𑀭𑀺𑀦𑀺𑀩𑁆𑀩𑀸𑀬𑀻𑀢𑀺 𑀉𑀧𑀧𑀢𑁆𑀢𑀺𑀲𑀫𑀦𑀦𑁆𑀢𑀭𑀢𑁄 𑀧𑀝𑁆𑀞𑀸𑀬 𑀆𑀬𑀼𑀦𑁄 𑀯𑁂𑀫𑀚𑁆𑀛𑀁 𑀅𑀦𑀢𑀺𑀓𑁆𑀓𑀫𑀺𑀢𑁆𑀯𑀸 𑀏𑀢𑁆𑀣𑀦𑁆𑀢𑀭𑁂 𑀓𑀺𑀮𑁂𑀲𑀧𑀭𑀺𑀦𑀺𑀩𑁆𑀩𑀸𑀦𑁂𑀦 𑀧𑀭𑀺𑀦𑀺𑀩𑁆𑀩𑀼𑀢𑁄 𑀳𑁄𑀢𑀺. 𑀅𑀦𑀼𑀧𑀳𑀘𑁆𑀘 𑀢𑀮𑀦𑁆𑀢𑀺 𑀆𑀓𑀸𑀲𑀢𑀮𑀁 𑀅𑀦𑀼𑀧𑀳𑀘𑁆𑀘 𑀅𑀦𑀢𑀺𑀓𑁆𑀓𑀫𑀺𑀢𑁆𑀯𑀸, 𑀪𑀽𑀫𑀺𑀁 𑀅𑀧𑁆𑀧𑀢𑁆𑀯𑀸 𑀆𑀓𑀸𑀲𑁂𑀬𑁂𑀯 𑀦𑀺𑀩𑁆𑀩𑀸𑀬𑁂𑀬𑁆𑀬𑀸𑀢𑀺 𑀇𑀫𑀸𑀳𑀺 𑀢𑀻𑀳𑀺 𑀉𑀧𑀫𑀸𑀳𑀺 𑀢𑀬𑁄 𑀅𑀦𑁆𑀢𑀭𑀸𑀧𑀭𑀺𑀦𑀺𑀩𑁆𑀩𑀸𑀬𑀻 𑀤𑀲𑁆𑀲𑀺𑀢𑀸.

𑀉𑀧𑀳𑀘𑁆𑀘𑀧𑀭𑀺𑀦𑀺𑀩𑁆𑀩𑀸𑀬𑀻𑀢𑀺 𑀆𑀬𑀼𑀯𑁂𑀫𑀚𑁆𑀛𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀧𑀘𑁆𑀙𑀺𑀫𑀓𑁄𑀝𑀺𑀁 𑀅𑀧𑁆𑀧𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀼𑀢𑁄 𑀳𑁄𑀢𑀺. 𑀉𑀧𑀳𑀘𑁆𑀘 𑀢𑀮𑀦𑁆𑀢𑀺 𑀚𑀮𑀫𑀸𑀦𑀸 𑀕𑀦𑁆𑀢𑁆𑀯𑀸 𑀆𑀓𑀸𑀲𑀢𑀮𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀧𑀣𑀯𑀻𑀢𑀮𑀁 𑀯𑀸 𑀉𑀧𑀳𑀦𑀺𑀢𑁆𑀯𑀸 𑀧𑀣𑀯𑀺𑀬𑀁 𑀧𑀢𑀺𑀢𑀫𑀢𑁆𑀢𑀸𑀯 𑀦𑀺𑀩𑁆𑀩𑀸𑀬𑁂𑀬𑁆𑀬. 𑀅𑀲𑀗𑁆𑀔𑀸𑀭𑁂𑀦 𑀅𑀧𑁆𑀧𑀬𑁄𑀕𑁂𑀦 𑀓𑀺𑀮𑁂𑀲𑁂 𑀔𑁂𑀧𑁂𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀻𑀢𑀺 𑀅𑀲𑀗𑁆𑀔𑀸𑀭𑀧𑀭𑀺𑀦𑀺𑀩𑁆𑀩𑀸𑀬𑀻. 𑀲𑀲𑀗𑁆𑀔𑀸𑀭𑁂𑀦 𑀲𑀧𑁆𑀧𑀬𑁄𑀕𑁂𑀦 𑀓𑀺𑀮𑁂𑀲𑁂 𑀔𑁂𑀧𑁂𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀻𑀢𑀺 𑀲𑀲𑀗𑁆𑀔𑀸𑀭𑀧𑀭𑀺𑀦𑀺𑀩𑁆𑀩𑀸𑀬𑀻. 𑀕𑀘𑁆𑀙𑀦𑁆𑀢𑀺 𑀦𑀺𑀭𑀸𑀭𑀓𑁆𑀔𑀁 𑀅𑀭𑀜𑁆𑀜𑀁. 𑀤𑀸𑀬𑀦𑁆𑀢𑀺 𑀲𑀸𑀭𑀓𑁆𑀔𑀁 𑀅𑀪𑀬𑀢𑁆𑀣𑀸𑀬 𑀤𑀺𑀦𑁆𑀦𑀁 𑀅𑀭𑀜𑁆𑀜𑀁. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯. 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀅𑀭𑀺𑀬𑀧𑀼𑀕𑁆𑀕𑀮𑀸𑀯 𑀓𑀣𑀺𑀢𑀸𑀢𑀺.

𑁩. 𑀢𑀺𑀲𑁆𑀲𑀩𑁆𑀭𑀳𑁆𑀫𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁬. 𑀢𑀢𑀺𑀬𑁂 𑀪𑀺𑀓𑁆𑀔𑀼𑀦𑀺𑀬𑁄𑀢𑀺 𑀫𑀳𑀸𑀧𑀚𑀸𑀧𑀢𑀺𑀬𑀸 𑀧𑀭𑀺𑀯𑀸𑀭𑀸 𑀧𑀜𑁆𑀘𑀲𑀢𑀸 𑀪𑀺𑀓𑁆𑀔𑀼𑀦𑀺𑀬𑁄. 𑀯𑀺𑀫𑀼𑀢𑁆𑀢𑀸𑀢𑀺 𑀧𑀜𑁆𑀘𑀳𑀺 𑀯𑀺𑀫𑀼𑀢𑁆𑀢𑀻𑀳𑀺 𑀯𑀺𑀫𑀼𑀢𑁆𑀢𑀸. 𑀅𑀦𑀼𑀧𑀸𑀤𑀺𑀲𑁂𑀲𑀸𑀢𑀺 𑀉𑀧𑀸𑀤𑀸𑀦𑀲𑁂𑀲𑀁 𑀅𑀝𑁆𑀞𑀧𑁂𑀢𑁆𑀯𑀸 𑀧𑀜𑁆𑀘𑀳𑀺 𑀯𑀺𑀫𑀼𑀢𑁆𑀢𑀻𑀳𑀺 𑀅𑀦𑀯𑀲𑁂𑀲𑀸𑀳𑀺𑀧𑀺 𑀯𑀺𑀫𑀼𑀢𑁆𑀢𑀸. 𑀲𑀉𑀧𑀸𑀤𑀺𑀲𑁂𑀲𑁂 𑀯𑀸 𑀲𑀉𑀧𑀸𑀤𑀺𑀲𑁂𑀲𑁄𑀢𑀺 𑀲𑀉𑀧𑀸𑀤𑀸𑀦𑀲𑁂𑀲𑁂 𑀧𑀼𑀕𑁆𑀕𑀮𑁂 ‘‘𑀲𑀉𑀧𑀸𑀤𑀸𑀦𑀲𑁂𑀲𑁄 𑀅𑀬’’𑀦𑁆𑀢𑀺. 𑀇𑀢𑀭𑀲𑁆𑀫𑀺𑀫𑁆𑀧𑀺 𑀏𑀲𑁂𑀯 𑀦𑀬𑁄. 𑀢𑀺𑀲𑁆𑀲𑁄𑀢𑀺 𑀣𑁂𑀭𑀲𑁆𑀲 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀩𑁆𑀭𑀳𑁆𑀫𑀸. 𑀅𑀦𑀼𑀮𑁄𑀫𑀺𑀓𑀸𑀦𑀻𑀢𑀺 𑀧𑀝𑀺𑀧𑀢𑁆𑀢𑀺𑀬𑀸 𑀅𑀦𑀼𑀮𑁄𑀫𑀸𑀦𑀺 𑀯𑀺𑀯𑀺𑀢𑁆𑀢𑀸𑀦𑀺 𑀅𑀦𑁆𑀢𑀺𑀫𑀧𑀭𑀺𑀬𑀦𑁆𑀢𑀺𑀫𑀸𑀦𑀺. 𑀇𑀦𑁆𑀤𑁆𑀭𑀺𑀬𑀸𑀦𑀻𑀢𑀺 𑀲𑀤𑁆𑀥𑀸𑀤𑀻𑀦𑀺 𑀯𑀺𑀧𑀲𑁆𑀲𑀦𑀺𑀦𑁆𑀤𑁆𑀭𑀺𑀬𑀸𑀦𑀺. 𑀲𑀫𑀦𑁆𑀦𑀸𑀦𑀬𑀫𑀸𑀦𑁄𑀢𑀺 𑀲𑀫𑀦𑁆𑀦𑀸𑀳𑀸𑀭𑁂 𑀞𑀧𑀬𑀫𑀸𑀦𑁄. 𑀦 𑀳𑀺 𑀧𑀦 𑀢𑁂𑀢𑀺 𑀇𑀤𑀁 𑀓𑀲𑁆𑀫𑀸 𑀆𑀭𑀪𑀺? 𑀲𑀢𑁆𑀢𑀫𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀤𑀲𑁆𑀲𑀦𑀢𑁆𑀣𑀁. 𑀲𑀢𑁆𑀢𑀫𑁄 𑀳𑀺 𑀲𑀤𑁆𑀥𑀸𑀦𑀼𑀲𑀸𑀭𑀺𑀧𑀼𑀕𑁆𑀕𑀮𑁄 𑀦 𑀤𑀲𑁆𑀲𑀺𑀢𑁄. 𑀅𑀣 𑀪𑀕𑀯𑀸 𑀩𑀮𑀯𑀯𑀺𑀧𑀲𑁆𑀲𑀓𑀯𑀲𑁂𑀦 𑀢𑀁 𑀤𑀲𑁆𑀲𑁂𑀦𑁆𑀢𑁄 𑀏𑀯𑀫𑀸𑀳. 𑀢𑀢𑁆𑀣 𑀲𑀩𑁆𑀩𑀦𑀺𑀫𑀺𑀢𑁆𑀢𑀸𑀦𑀦𑁆𑀢𑀺 𑀲𑀩𑁆𑀩𑁂𑀲𑀁 𑀦𑀺𑀘𑁆𑀘𑀦𑀺𑀫𑀺𑀢𑁆𑀢𑀸𑀤𑀻𑀦𑀁. 𑀅𑀦𑀺𑀫𑀺𑀢𑁆𑀢𑀦𑁆𑀢𑀺 𑀩𑀮𑀯𑀯𑀺𑀧𑀲𑁆𑀲𑀦𑀸𑀲𑀫𑀸𑀥𑀺𑀁.

𑁪. 𑀲𑀻𑀳𑀲𑁂𑀦𑀸𑀧𑀢𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁭. 𑀘𑀢𑀼𑀢𑁆𑀣𑁂 𑀫𑀘𑁆𑀙𑀭𑀻𑀢𑀺 𑀧𑀜𑁆𑀘𑀫𑀘𑁆𑀙𑁂𑀭𑀬𑀼𑀢𑁆𑀢𑁄. 𑀓𑀤𑀭𑀺𑀬𑁄𑀢𑀺 𑀣𑀤𑁆𑀥𑀫𑀘𑁆𑀙𑀭𑀺𑀬𑁄, 𑀧𑀭𑁂𑀲𑀁 𑀤𑀺𑀬𑁆𑀬𑀫𑀸𑀦𑀫𑁆𑀧𑀺 𑀯𑀸𑀭𑁂𑀢𑀺. 𑀅𑀦𑀼𑀧𑁆𑀧𑀤𑀸𑀦𑀭𑀢𑁄𑀢𑀺 𑀧𑀼𑀦𑀧𑁆𑀧𑀼𑀦𑀁 𑀤𑀸𑀦𑀁 𑀤𑀤𑀫𑀸𑀦𑁄𑀯 𑀭𑀫𑀢𑀺. 𑀅𑀦𑀼𑀓𑀫𑁆𑀧𑀦𑁆𑀢𑀸𑀢𑀺 ‘‘𑀓𑁄 𑀅𑀚𑁆𑀚 𑀅𑀫𑁆𑀳𑁂𑀳𑀺 𑀅𑀦𑀼𑀕𑁆𑀕𑀳𑁂𑀢𑀩𑁆𑀩𑁄, 𑀓𑀲𑁆𑀲 𑀤𑁂𑀬𑁆𑀬𑀥𑀫𑁆𑀫𑀁 𑀯𑀸 𑀧𑀝𑀺𑀕𑁆𑀕𑀡𑁆𑀳𑁂𑀬𑁆𑀬𑀸𑀫, 𑀥𑀫𑁆𑀫𑀁 𑀯𑀸 𑀤𑁂𑀲𑁂𑀬𑁆𑀬𑀸𑀫𑀸’’𑀢𑀺 𑀏𑀯𑀁 𑀘𑀺𑀢𑁆𑀢𑁂𑀦 𑀅𑀦𑀼𑀓𑀫𑁆𑀧𑀫𑀸𑀦𑀸.

𑁫. 𑀅𑀭𑀓𑁆𑀔𑁂𑀬𑁆𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁮. 𑀧𑀜𑁆𑀘𑀫𑁂 𑀦𑀺𑀫𑀺𑀢𑁆𑀢𑀦𑁆𑀢𑀺 𑀥𑀫𑁆𑀫𑀦𑀺𑀫𑀺𑀢𑁆𑀢𑀫𑁆𑀧𑀺 𑀧𑀼𑀕𑁆𑀕𑀮𑀦𑀺𑀫𑀺𑀢𑁆𑀢𑀫𑁆𑀧𑀺. 𑀅𑀬𑀜𑁆𑀳𑀺 𑀅𑀢𑁆𑀢𑀦𑀸 𑀤𑁂𑀲𑀺𑀢𑀥𑀫𑁆𑀫𑁂 𑀏𑀓𑀧𑀤𑀫𑁆𑀧𑀺 𑀤𑀼𑀭𑀓𑁆𑀔𑀸𑀢𑀁 𑀅𑀦𑀺𑀬𑁆𑀬𑀸𑀦𑀺𑀓𑀁 𑀅𑀧𑀲𑁆𑀲𑀦𑁆𑀢𑁄 𑀥𑀫𑁆𑀫𑀦𑀺𑀫𑀺𑀢𑁆𑀢𑀁 𑀦 𑀲𑀫𑀦𑀼𑀧𑀲𑁆𑀲𑀢𑀺, ‘‘𑀤𑀼𑀭𑀓𑁆𑀔𑀸𑀢𑁄 𑀢𑀬𑀸 𑀥𑀫𑁆𑀫𑁄 𑀦 𑀲𑁆𑀯𑀸𑀓𑁆𑀔𑀸𑀢𑁄’’𑀢𑀺 𑀉𑀝𑁆𑀞𑀳𑀺𑀢𑁆𑀯𑀸 𑀧𑀝𑀺𑀧𑁆𑀨𑀭𑀦𑁆𑀢𑀁 𑀏𑀓𑀁 𑀧𑀼𑀕𑁆𑀕𑀮𑀫𑁆𑀧𑀺 𑀅𑀧𑀲𑁆𑀲𑀦𑁆𑀢𑁄 𑀧𑀼𑀕𑁆𑀕𑀮𑀦𑀺𑀫𑀺𑀢𑁆𑀢𑀁 𑀦 𑀲𑀫𑀦𑀼𑀧𑀲𑁆𑀲𑀢𑀺 𑀦𑀸𑀫. 𑀲𑁂𑀲𑀤𑁆𑀯𑀬𑁂𑀧𑀺 𑀏𑀲𑁂𑀯 𑀦𑀬𑁄. 𑀙𑀝𑁆𑀞𑀲𑀢𑁆𑀢𑀫𑀸𑀦𑀺 𑀉𑀢𑁆𑀢𑀸𑀦𑀸𑀦𑁂𑀯.

𑁮. 𑀧𑀘𑀮𑀸𑀬𑀫𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁬𑁧. 𑀅𑀝𑁆𑀞𑀫𑁂 𑀧𑀘𑀮𑀸𑀬𑀫𑀸𑀦𑁄𑀢𑀺 𑀢𑀁 𑀕𑀸𑀫𑀁 𑀉𑀧𑀦𑀺𑀲𑁆𑀲𑀸𑀬 𑀏𑀓𑀲𑁆𑀫𑀺𑀁 𑀯𑀦𑀲𑀡𑁆𑀟𑁂 𑀲𑀫𑀡𑀥𑀫𑁆𑀫𑀁 𑀓𑀭𑁄𑀦𑁆𑀢𑁄 𑀲𑀢𑁆𑀢𑀸𑀳𑀁 𑀘𑀗𑁆𑀓𑀫𑀦𑀯𑀻𑀭𑀺𑀬𑁂𑀦 𑀦𑀺𑀫𑁆𑀫𑀣𑀺𑀢𑀢𑁆𑀢𑀸 𑀓𑀺𑀮𑀦𑁆𑀢𑀕𑀢𑁆𑀢𑁄 𑀘𑀗𑁆𑀓𑀫𑀦𑀓𑁄𑀝𑀺𑀬𑀁 𑀧𑀘𑀮𑀸𑀬𑀫𑀸𑀦𑁄 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺. 𑀧𑀘𑀮𑀸𑀬𑀲𑀺 𑀦𑁄𑀢𑀺 𑀦𑀺𑀤𑁆𑀤𑀸𑀬𑀲𑀺 𑀦𑀼. 𑀅𑀦𑀼𑀫𑀚𑁆𑀚𑀺𑀢𑁆𑀯𑀸𑀢𑀺 𑀧𑀭𑀺𑀫𑀚𑁆𑀚𑀺𑀢𑁆𑀯𑀸. 𑀆𑀮𑁄𑀓𑀲𑀜𑁆𑀜𑀦𑁆𑀢𑀺 𑀫𑀺𑀤𑁆𑀥𑀯𑀺𑀦𑁄𑀤𑀦𑀆𑀮𑁄𑀓𑀲𑀜𑁆𑀜𑀁. 𑀤𑀺𑀯𑀸𑀲𑀜𑁆𑀜𑀦𑁆𑀢𑀺 𑀤𑀺𑀯𑀸𑀢𑀺𑀲𑀜𑁆𑀜𑀁. 𑀬𑀣𑀸 𑀤𑀺𑀯𑀸 𑀢𑀣𑀸 𑀭𑀢𑁆𑀢𑀺𑀦𑁆𑀢𑀺 𑀬𑀣𑀸 𑀤𑀺𑀯𑀸 𑀆𑀮𑁄𑀓𑀲𑀜𑁆𑀜𑀸 𑀅𑀥𑀺𑀝𑁆𑀞𑀺𑀢𑀸, 𑀢𑀣𑀸 𑀦𑀁 𑀭𑀢𑁆𑀢𑀺𑀫𑁆𑀧𑀺 𑀅𑀥𑀺𑀝𑁆𑀞𑀳𑁂𑀬𑁆𑀬𑀸𑀲𑀺. 𑀬𑀣𑀸 𑀭𑀢𑁆𑀢𑀺𑀁 𑀢𑀣𑀸 𑀤𑀺𑀯𑀸𑀢𑀺 𑀬𑀣𑀸 𑀘 𑀢𑁂 𑀭𑀢𑁆𑀢𑀺𑀁 𑀆𑀮𑁄𑀓𑀲𑀜𑁆𑀜𑀸 𑀅𑀥𑀺𑀝𑁆𑀞𑀺𑀢𑀸, 𑀢𑀣𑀸 𑀦𑀁 𑀤𑀺𑀯𑀸𑀧𑀺 𑀅𑀥𑀺𑀝𑁆𑀞𑀳𑁂𑀬𑁆𑀬𑀸𑀲𑀺. 𑀲𑀧𑁆𑀧𑀪𑀸𑀲𑀦𑁆𑀢𑀺 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀢𑁆𑀣𑀸𑀬 𑀲𑀳𑁄𑀪𑀸𑀲𑀁. 𑀧𑀘𑁆𑀙𑀸𑀧𑀼𑀭𑁂𑀲𑀜𑁆𑀜𑀻𑀢𑀺 𑀧𑀼𑀭𑀢𑁄 𑀘 𑀧𑀘𑁆𑀙𑀢𑁄 𑀘 𑀅𑀪𑀺𑀳𑀭𑀡𑀲𑀜𑁆𑀜𑀸𑀬 𑀲𑀜𑁆𑀜𑀸𑀯𑀸. 𑀅𑀦𑁆𑀢𑁄𑀕𑀢𑁂𑀳𑀺 𑀇𑀦𑁆𑀤𑁆𑀭𑀺𑀬𑁂𑀳𑀻𑀢𑀺 𑀩𑀳𑀺 𑀅𑀯𑀺𑀓𑁆𑀔𑀺𑀢𑁆𑀢𑁂𑀳𑀺 𑀅𑀦𑁆𑀢𑁄 𑀅𑀦𑀼𑀧𑀯𑀺𑀝𑁆𑀞𑁂𑀳𑁂𑀯 𑀧𑀜𑁆𑀘𑀳𑀺 𑀇𑀦𑁆𑀤𑁆𑀭𑀺𑀬𑁂𑀳𑀺. 𑀫𑀺𑀤𑁆𑀥𑀲𑀼𑀔𑀦𑁆𑀢𑀺 𑀦𑀺𑀤𑁆𑀤𑀸𑀲𑀼𑀔𑀁. 𑀏𑀢𑁆𑀢𑀓𑁂𑀦 𑀞𑀸𑀦𑁂𑀦 𑀪𑀕𑀯𑀸 𑀣𑁂𑀭𑀲𑁆𑀲 𑀫𑀺𑀤𑁆𑀥𑀯𑀺𑀦𑁄𑀤𑀦𑀓𑀫𑁆𑀫𑀝𑁆𑀞𑀸𑀦𑀁 𑀓𑀣𑁂𑀲𑀺. 𑀲𑁄𑀡𑁆𑀟𑀦𑁆𑀢𑀺 𑀫𑀸𑀦𑀲𑁄𑀡𑁆𑀟𑀁. 𑀓𑀺𑀘𑁆𑀘𑀓𑀭𑀡𑀻𑀬𑀸𑀦𑀻𑀢𑀺 𑀏𑀢𑁆𑀣 𑀅𑀯𑀲𑁆𑀲𑀁 𑀓𑀢𑁆𑀢𑀩𑁆𑀩𑀸𑀦𑀺 𑀓𑀺𑀘𑁆𑀘𑀸𑀦𑀺, 𑀇𑀢𑀭𑀸𑀦𑀺 𑀓𑀭𑀡𑀻𑀬𑀸𑀦𑀺. 𑀫𑀗𑁆𑀓𑀼𑀪𑀸𑀯𑁄𑀢𑀺 𑀦𑀺𑀢𑁆𑀢𑁂𑀚𑀢𑀸 𑀤𑁄𑀫𑀦𑀲𑁆𑀲𑀢𑀸. 𑀏𑀢𑁆𑀢𑀓𑁂𑀦 𑀞𑀸𑀦𑁂𑀦 𑀲𑀢𑁆𑀣𑀸𑀭𑀸 𑀣𑁂𑀭𑀲𑁆𑀲 𑀪𑀺𑀓𑁆𑀔𑀸𑀘𑀸𑀭𑀯𑀢𑁆𑀢𑀁 𑀓𑀣𑀺𑀢𑀁.

𑀇𑀤𑀸𑀦𑀺 𑀪𑀲𑁆𑀲𑁂 𑀧𑀭𑀺𑀬𑀦𑁆𑀢𑀓𑀸𑀭𑀺𑀢𑀸𑀬 𑀲𑀫𑀸𑀤𑀧𑁂𑀢𑀼𑀁 𑀢𑀲𑁆𑀫𑀸𑀢𑀺𑀳𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀯𑀺𑀕𑁆𑀕𑀸𑀳𑀺𑀓𑀓𑀣𑀦𑁆𑀢𑀺 ‘‘𑀦 𑀢𑁆𑀯𑀁 𑀇𑀫𑀁 𑀥𑀫𑁆𑀫𑀯𑀺𑀦𑀬𑀁 𑀆𑀚𑀸𑀦𑀸𑀲𑀻’’𑀢𑀺𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑀸 𑀯𑀺𑀕𑁆𑀕𑀸𑀳𑀺𑀓𑀓𑀣𑀸. 𑀦𑀸𑀳𑀁 𑀫𑁄𑀕𑁆𑀕𑀮𑁆𑀮𑀸𑀦𑀸𑀢𑀺𑀆𑀤𑀺 𑀧𑀸𑀧𑀫𑀺𑀢𑁆𑀢𑀲𑀁𑀲𑀕𑁆𑀕𑀯𑀺𑀯𑀚𑁆𑀚𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀓𑀺𑀢𑁆𑀢𑀸𑀯𑀢𑀸 𑀦𑀼 𑀔𑁄𑀢𑀺 𑀓𑀺𑀢𑁆𑀢𑀓𑁂𑀦 𑀦𑀼 𑀔𑁄. 𑀢𑀡𑁆𑀳𑀸𑀲𑀗𑁆𑀔𑀬𑀯𑀺𑀫𑀼𑀢𑁆𑀢𑁄 𑀳𑁄𑀢𑀻𑀢𑀺 𑀢𑀡𑁆𑀳𑀸𑀲𑀗𑁆𑀔𑀬𑁂 𑀦𑀺𑀩𑁆𑀩𑀸𑀦𑁂 𑀢𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀯𑀺𑀫𑀼𑀢𑁆𑀢𑀘𑀺𑀢𑁆𑀢𑀢𑀸𑀬 𑀢𑀡𑁆𑀳𑀸𑀲𑀗𑁆𑀔𑀬𑀯𑀺𑀫𑀼𑀢𑁆𑀢𑁄 𑀦𑀸𑀫 𑀲𑀁𑀔𑀺𑀢𑁆𑀢𑁂𑀦 𑀓𑀺𑀢𑁆𑀢𑀸𑀯𑀢𑀸 𑀳𑁄𑀢𑀺. 𑀬𑀸𑀬 𑀧𑀝𑀺𑀧𑀢𑁆𑀢𑀺𑀬𑀸 𑀢𑀡𑁆𑀳𑀸𑀲𑀗𑁆𑀔𑀬𑀯𑀺𑀫𑀼𑀢𑁆𑀢𑁄 𑀳𑁄𑀢𑀺, 𑀢𑀫𑁂𑀯 𑀔𑀻𑀡𑀸𑀲𑀯𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀼𑀩𑁆𑀩𑀪𑀸𑀕𑀧𑀝𑀺𑀧𑀤𑀁 𑀲𑀁𑀔𑀺𑀢𑁆𑀢𑁂𑀦 𑀤𑁂𑀲𑁂𑀣𑀸𑀢𑀺 𑀧𑀼𑀘𑁆𑀙𑀢𑀺. 𑀅𑀘𑁆𑀘𑀦𑁆𑀢𑀦𑀺𑀝𑁆𑀞𑁄𑀢𑀺 𑀔𑀬𑀯𑀬𑀲𑀗𑁆𑀔𑀸𑀢𑀁 𑀅𑀦𑁆𑀢𑀁 𑀅𑀢𑀻𑀢𑀸𑀢𑀺 𑀅𑀘𑁆𑀘𑀦𑁆𑀢𑀸, 𑀅𑀘𑁆𑀘𑀦𑁆𑀢𑀸 𑀦𑀺𑀝𑁆𑀞𑀸 𑀅𑀲𑁆𑀲𑀸𑀢𑀺 𑀅𑀘𑁆𑀘𑀦𑁆𑀢𑀦𑀺𑀝𑁆𑀞𑁄, 𑀏𑀓𑀦𑁆𑀢𑀦𑀺𑀝𑁆𑀞𑁄 𑀲𑀢𑀢𑀦𑀺𑀝𑁆𑀞𑁄𑀢𑀺 𑀅𑀢𑁆𑀣𑁄. 𑀅𑀘𑁆𑀘𑀦𑁆𑀢𑀬𑁄𑀕𑀓𑁆𑀔𑁂𑀫𑀻𑀢𑀺 𑀅𑀘𑁆𑀘𑀦𑁆𑀢𑀁 𑀬𑁄𑀕𑀓𑁆𑀔𑁂𑀫𑀻, 𑀦𑀺𑀘𑁆𑀘𑀬𑁄𑀕𑀓𑁆𑀔𑁂𑀫𑀻𑀢𑀺 𑀅𑀢𑁆𑀣𑁄. 𑀅𑀘𑁆𑀘𑀦𑁆𑀢𑀩𑁆𑀭𑀳𑁆𑀫𑀘𑀸𑀭𑀻𑀢𑀺 𑀅𑀘𑁆𑀘𑀦𑁆𑀢𑀁 𑀩𑁆𑀭𑀳𑁆𑀫𑀘𑀸𑀭𑀻, 𑀦𑀺𑀘𑁆𑀘𑀩𑁆𑀭𑀳𑁆𑀫𑀘𑀸𑀭𑀻𑀢𑀺 𑀅𑀢𑁆𑀣𑁄. 𑀅𑀘𑁆𑀘𑀦𑁆𑀢𑀁 𑀧𑀭𑀺𑀬𑁄𑀲𑀸𑀦𑀫𑀲𑁆𑀲𑀸𑀢𑀺 𑀧𑀼𑀭𑀺𑀫𑀦𑀬𑁂𑀦𑁂𑀯 𑀅𑀘𑁆𑀘𑀦𑁆𑀢𑀧𑀭𑀺𑀬𑁄𑀲𑀸𑀦𑁄. 𑀲𑁂𑀝𑁆𑀞𑁄 𑀤𑁂𑀯𑀫𑀦𑀼𑀲𑁆𑀲𑀸𑀦𑀦𑁆𑀢𑀺 𑀤𑁂𑀯𑀸𑀦𑀜𑁆𑀘 𑀫𑀦𑀼𑀲𑁆𑀲𑀸𑀦𑀜𑁆𑀘 𑀲𑁂𑀝𑁆𑀞𑁄 𑀉𑀢𑁆𑀢𑀫𑁄. 𑀏𑀯𑀭𑀽𑀧𑁄 𑀪𑀺𑀓𑁆𑀔𑀼 𑀓𑀺𑀢𑁆𑀢𑀸𑀯𑀢𑀸 𑀳𑁄𑀢𑀺, 𑀲𑀗𑁆𑀔𑁂𑀧𑁂𑀦𑁂𑀯 𑀢𑀲𑁆𑀲 𑀧𑀝𑀺𑀧𑀢𑁆𑀢𑀺𑀁 𑀓𑀣𑁂𑀣𑀸𑀢𑀺 𑀬𑀸𑀘𑀢𑀺.

𑀲𑀩𑁆𑀩𑁂 𑀥𑀫𑁆𑀫𑀸 𑀦𑀸𑀮𑀁 𑀅𑀪𑀺𑀦𑀺𑀯𑁂𑀲𑀸𑀬𑀸𑀢𑀺 𑀏𑀢𑁆𑀣 𑀲𑀩𑁆𑀩𑁂 𑀥𑀫𑁆𑀫𑀸 𑀦𑀸𑀫 𑀧𑀜𑁆𑀘𑀓𑁆𑀔𑀦𑁆𑀥𑀸 𑀤𑁆𑀯𑀸𑀤𑀲𑀸𑀬𑀢𑀦𑀸𑀦𑀺 𑀅𑀝𑁆𑀞𑀸𑀭𑀲 𑀥𑀸𑀢𑀼𑀬𑁄, 𑀢𑁂 𑀲𑀩𑁆𑀩𑁂𑀧𑀺 𑀢𑀡𑁆𑀳𑀸𑀤𑀺𑀝𑁆𑀞𑀺𑀯𑀲𑁂𑀦 𑀅𑀪𑀺𑀦𑀺𑀯𑁂𑀲𑀸𑀬 𑀦𑀸𑀮𑀁 𑀦 𑀧𑀭𑀺𑀬𑀢𑁆𑀢𑀸 𑀦 𑀲𑀫𑀢𑁆𑀢𑀸 𑀦 𑀬𑀼𑀢𑁆𑀢𑀸. 𑀓𑀲𑁆𑀫𑀸? 𑀕𑀳𑀺𑀢𑀸𑀓𑀸𑀭𑁂𑀦 𑀅𑀢𑀺𑀝𑁆𑀞𑀦𑀢𑁄. 𑀢𑁂 𑀳𑀺 𑀦𑀺𑀘𑁆𑀘𑀸 𑀲𑀼𑀔𑀸 𑀅𑀢𑁆𑀢𑀸𑀢𑀺 𑀕𑀳𑀺𑀢𑀸𑀧𑀺 𑀅𑀦𑀺𑀘𑁆𑀘𑀸 𑀤𑀼𑀓𑁆𑀔𑀸 𑀅𑀦𑀢𑁆𑀢𑀸𑀯 𑀲𑀫𑁆𑀧𑀚𑁆𑀚𑀦𑁆𑀢𑀺. 𑀢𑀲𑁆𑀫𑀸 𑀦𑀸𑀮𑀁 𑀅𑀪𑀺𑀦𑀺𑀯𑁂𑀲𑀸𑀬. 𑀅𑀪𑀺𑀚𑀸𑀦𑀸𑀢𑀻𑀢𑀺 𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀅𑀦𑀢𑁆𑀢𑀸𑀢𑀺 𑀜𑀸𑀢𑀧𑀭𑀺𑀜𑁆𑀜𑀸𑀬 𑀅𑀪𑀺𑀚𑀸𑀦𑀸𑀢𑀺. 𑀧𑀭𑀺𑀚𑀸𑀦𑀸𑀢𑀻𑀢𑀺 𑀢𑀣𑁂𑀯 𑀢𑀻𑀭𑀡𑀧𑀭𑀺𑀜𑁆𑀜𑀸𑀬 𑀧𑀭𑀺𑀚𑀸𑀦𑀸𑀢𑀺. 𑀬𑀁𑀓𑀺𑀜𑁆𑀘𑀺 𑀯𑁂𑀤𑀦𑀦𑁆𑀢𑀺 𑀅𑀦𑁆𑀢𑀫𑀲𑁄 𑀧𑀜𑁆𑀘𑀯𑀺𑀜𑁆𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀁 𑀬𑀁𑀓𑀺𑀜𑁆𑀘𑀺 𑀅𑀧𑁆𑀧𑀫𑀢𑁆𑀢𑀓𑀫𑁆𑀧𑀺 𑀯𑁂𑀤𑀦𑀁 𑀅𑀦𑀼𑀪𑀯𑀢𑀺. 𑀇𑀫𑀺𑀦𑀸 𑀪𑀕𑀯𑀸 𑀣𑁂𑀭𑀲𑁆𑀲 𑀯𑁂𑀤𑀦𑀸𑀯𑀲𑁂𑀦 𑀘 𑀯𑀺𑀦𑀺𑀯𑀝𑁆𑀝𑁂𑀢𑁆𑀯𑀸 𑀅𑀭𑀽𑀧𑀧𑀭𑀺𑀕𑁆𑀕𑀳𑀁 𑀤𑀲𑁆𑀲𑁂𑀲𑀺.

𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀻𑀢𑀺 𑀅𑀦𑀺𑀘𑁆𑀘𑀢𑁄 𑀅𑀦𑀼𑀧𑀲𑁆𑀲𑀦𑁆𑀢𑁄. 𑀯𑀺𑀭𑀸𑀕𑀸𑀦𑀼𑀧𑀲𑁆𑀲𑀻𑀢𑀺 𑀏𑀢𑁆𑀣 𑀤𑁆𑀯𑁂 𑀯𑀺𑀭𑀸𑀕𑀸 𑀔𑀬𑀯𑀺𑀭𑀸𑀕𑁄 𑀘 𑀅𑀘𑁆𑀘𑀦𑁆𑀢𑀯𑀺𑀭𑀸𑀕𑁄 𑀘. 𑀢𑀢𑁆𑀣 𑀲𑀗𑁆𑀔𑀸𑀭𑀸𑀦𑀁 𑀔𑀬𑀁 𑀔𑀬𑀢𑁄 𑀧𑀲𑁆𑀲𑀦𑀸 𑀯𑀺𑀧𑀲𑁆𑀲𑀦𑀸𑀧𑀺, 𑀅𑀘𑁆𑀘𑀦𑁆𑀢𑀯𑀺𑀭𑀸𑀕𑀁 𑀦𑀺𑀩𑁆𑀩𑀸𑀦𑀁 𑀯𑀺𑀭𑀸𑀕𑀢𑁄 𑀤𑀲𑁆𑀲𑀦𑀫𑀕𑁆𑀕𑀜𑀸𑀡𑀫𑁆𑀧𑀺 𑀯𑀺𑀭𑀸𑀕𑀸𑀦𑀼𑀧𑀲𑁆𑀲𑀦𑀸. 𑀢𑀤𑀼𑀪𑀬𑀲𑀫𑀗𑁆𑀕𑀺𑀧𑀼𑀕𑁆𑀕𑀮𑁄 𑀯𑀺𑀭𑀸𑀕𑀸𑀦𑀼𑀧𑀲𑁆𑀲𑀻 𑀦𑀸𑀫. 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑁋 ‘‘𑀯𑀺𑀭𑀸𑀕𑀸𑀦𑀼𑀧𑀲𑁆𑀲𑀻’’𑀢𑀺, 𑀯𑀺𑀭𑀸𑀕𑀢𑁄 𑀅𑀦𑀼𑀧𑀲𑁆𑀲𑀦𑁆𑀢𑁄𑀢𑀺 𑀅𑀢𑁆𑀣𑁄. 𑀦𑀺𑀭𑁄𑀥𑀸𑀦𑀼𑀧𑀲𑁆𑀲𑀺𑀫𑁆𑀳𑀺𑀧𑀺 𑀏𑀲𑁂𑀯 𑀦𑀬𑁄. 𑀦𑀺𑀭𑁄𑀥𑁄𑀧𑀺 𑀳𑀺 𑀔𑀬𑀦𑀺𑀭𑁄𑀥𑁄 𑀅𑀘𑁆𑀘𑀦𑁆𑀢𑀦𑀺𑀭𑁄𑀥𑁄𑀢𑀺 𑀤𑀼𑀯𑀺𑀥𑁄𑀬𑁂𑀯. 𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀦𑀼𑀧𑀲𑁆𑀲𑀻𑀢𑀺 𑀏𑀢𑁆𑀣 𑀧𑀝𑀺𑀦𑀺𑀲𑁆𑀲𑀕𑁆𑀕𑁄 𑀯𑀼𑀘𑁆𑀘𑀢𑀺 𑀯𑁄𑀲𑁆𑀲𑀕𑁆𑀕𑁄. 𑀲𑁄 𑀘 𑀧𑀭𑀺𑀘𑁆𑀘𑀸𑀕𑀯𑁄𑀲𑁆𑀲𑀕𑁆𑀕𑁄 𑀧𑀓𑁆𑀔𑀦𑁆𑀤𑀦𑀯𑁄𑀲𑁆𑀲𑀕𑁆𑀕𑁄𑀢𑀺 𑀤𑀼𑀯𑀺𑀥𑁄 𑀳𑁄𑀢𑀺. 𑀢𑀢𑁆𑀣 𑀧𑀭𑀺𑀘𑁆𑀘𑀸𑀕𑀯𑁄𑀲𑁆𑀲𑀕𑁆𑀕𑁄𑀢𑀺 𑀯𑀺𑀧𑀲𑁆𑀲𑀦𑀸. 𑀲𑀸 𑀳𑀺 𑀢𑀤𑀗𑁆𑀕𑀯𑀲𑁂𑀦 𑀓𑀺𑀮𑁂𑀲𑁂 𑀘 𑀔𑀦𑁆𑀥𑁂 𑀘 𑀯𑁄𑀲𑁆𑀲𑀚𑀢𑀺. 𑀧𑀓𑁆𑀔𑀦𑁆𑀤𑀦𑀯𑁄𑀲𑁆𑀲𑀕𑁆𑀕𑁄𑀢𑀺 𑀫𑀕𑁆𑀕𑁄. 𑀲𑁄 𑀳𑀺 𑀦𑀺𑀩𑁆𑀩𑀸𑀦𑀁 𑀆𑀭𑀫𑁆𑀫𑀡𑀢𑁄 𑀧𑀓𑁆𑀔𑀦𑁆𑀤𑀢𑀺. 𑀤𑁆𑀯𑀻𑀳𑀺𑀧𑀺 𑀯𑀸 𑀓𑀸𑀭𑀡𑁂𑀳𑀺 𑀲𑁄 𑀯𑁄𑀲𑁆𑀲𑀕𑁆𑀕𑁄𑀬𑁂𑀯, 𑀲𑀫𑀼𑀘𑁆𑀙𑁂𑀤𑀯𑀲𑁂𑀦 𑀔𑀦𑁆𑀥𑀸𑀦𑀁 𑀓𑀺𑀮𑁂𑀲𑀸𑀦𑀜𑁆𑀘 𑀯𑁄𑀲𑁆𑀲𑀚𑀦𑀢𑁄 𑀦𑀺𑀩𑁆𑀩𑀸𑀦𑁂 𑀘 𑀧𑀓𑁆𑀔𑀦𑁆𑀤𑀦𑀢𑁄. 𑀢𑀲𑁆𑀫𑀸 𑀓𑀺𑀮𑁂𑀲𑁂 𑀘 𑀔𑀦𑁆𑀥𑁂 𑀘 𑀧𑀭𑀺𑀘𑁆𑀘𑀚𑀢𑀻𑀢𑀺 𑀧𑀭𑀺𑀘𑁆𑀘𑀸𑀕𑀯𑁄𑀲𑁆𑀲𑀕𑁆𑀕𑁄. 𑀦𑀺𑀭𑁄𑀥𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀘𑀺𑀢𑁆𑀢𑀁 𑀧𑀓𑁆𑀔𑀦𑁆𑀤𑀢𑀻𑀢𑀺 𑀧𑀓𑁆𑀔𑀦𑁆𑀤𑀦𑀯𑁄𑀲𑁆𑀲𑀕𑁆𑀕𑁄𑀢𑀺 𑀉𑀪𑀬𑀫𑁆𑀧𑁂𑀢𑀁 𑀫𑀕𑁆𑀕𑁂 𑀲𑀫𑁂𑀢𑀺. 𑀢𑀤𑀼𑀪𑀬𑀲𑀫𑀗𑁆𑀕𑀻 𑀧𑀼𑀕𑁆𑀕𑀮𑁄 𑀇𑀫𑀸𑀬 𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀦𑀼𑀧𑀲𑁆𑀲𑀦𑀸𑀬 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀦𑀼𑀧𑀲𑁆𑀲𑀻 𑀦𑀸𑀫 𑀳𑁄𑀢𑀺. 𑀢𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁. 𑀦 𑀓𑀺𑀜𑁆𑀘𑀺 𑀮𑁄𑀓𑁂 𑀉𑀧𑀸𑀤𑀺𑀬𑀢𑀻𑀢𑀺 𑀓𑀺𑀜𑁆𑀘𑀺 𑀏𑀓𑀫𑁆𑀧𑀺 𑀲𑀗𑁆𑀔𑀸𑀭𑀕𑀢𑀁 𑀢𑀡𑁆𑀳𑀸𑀯𑀲𑁂𑀦 𑀦 𑀉𑀧𑀸𑀤𑀺𑀬𑀢𑀺 𑀦 𑀕𑀡𑁆𑀳𑀸𑀢𑀺 𑀦 𑀧𑀭𑀸𑀫𑀲𑀢𑀺. 𑀅𑀦𑀼𑀧𑀸𑀤𑀺𑀬𑀁 𑀦 𑀧𑀭𑀺𑀢𑀲𑁆𑀲𑀢𑀻𑀢𑀺 𑀅𑀕𑁆𑀕𑀡𑁆𑀳𑀦𑁆𑀢𑁄 𑀢𑀡𑁆𑀳𑀸𑀧𑀭𑀺𑀢𑀲𑁆𑀲𑀦𑀸𑀬 𑀦 𑀧𑀭𑀺𑀢𑀲𑁆𑀲𑀢𑀺. 𑀧𑀘𑁆𑀘𑀢𑁆𑀢𑀁𑀬𑁂𑀯 𑀧𑀭𑀺𑀦𑀺𑀩𑁆𑀩𑀸𑀬𑀢𑀻𑀢𑀺 𑀲𑀬𑀫𑁂𑀯 𑀓𑀺𑀮𑁂𑀲𑀧𑀭𑀺𑀦𑀺𑀩𑁆𑀩𑀸𑀦𑁂𑀦 𑀧𑀭𑀺𑀦𑀺𑀩𑁆𑀩𑀸𑀬𑀢𑀺. 𑀔𑀻𑀡𑀸 𑀚𑀸𑀢𑀻𑀢𑀺𑀆𑀤𑀺𑀦𑀸 𑀧𑀦𑀲𑁆𑀲 𑀧𑀘𑁆𑀘𑀯𑁂𑀓𑁆𑀔𑀡𑀸 𑀤𑀲𑁆𑀲𑀺𑀢𑀸. 𑀇𑀢𑀺 𑀪𑀕𑀯𑀸 𑀲𑀁𑀔𑀺𑀢𑁆𑀢𑁂𑀦 𑀔𑀻𑀡𑀸𑀲𑀯𑀲𑁆𑀲 𑀧𑀼𑀩𑁆𑀩𑀪𑀸𑀕𑀧𑁆𑀧𑀝𑀺𑀧𑀤𑀁 𑀧𑀼𑀘𑁆𑀙𑀺𑀢𑁄 𑀲𑀁𑀔𑀺𑀢𑁆𑀢𑁂𑀦𑁂𑀯 𑀓𑀣𑁂𑀲𑀺. 𑀇𑀤𑀁 𑀧𑀦 𑀲𑀼𑀢𑁆𑀢𑀁 𑀣𑁂𑀭𑀲𑁆𑀲 𑀑𑀯𑀸𑀤𑁄𑀧𑀺 𑀅𑀳𑁄𑀲𑀺 𑀯𑀺𑀧𑀲𑁆𑀲𑀦𑀸𑀧𑀺. 𑀲𑁄 𑀇𑀫𑀲𑁆𑀫𑀺𑀁𑀬𑁂𑀯 𑀲𑀼𑀢𑁆𑀢𑁂 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀢𑁆𑀢𑁄𑀢𑀺.

𑁯. 𑀫𑁂𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁬𑁨. 𑀦𑀯𑀫𑁂 𑀫𑀸, 𑀪𑀺𑀓𑁆𑀔𑀯𑁂, 𑀧𑀼𑀜𑁆𑀜𑀸𑀦𑀁 𑀪𑀸𑀬𑀺𑀢𑁆𑀣𑀸𑀢𑀺 𑀧𑀼𑀜𑁆𑀜𑀸𑀦𑀺 𑀓𑀭𑁄𑀦𑁆𑀢𑀸 𑀢𑁂𑀲𑀁 𑀫𑀸 𑀪𑀸𑀬𑀺𑀢𑁆𑀣. 𑀫𑁂𑀢𑁆𑀢𑀘𑀺𑀢𑁆𑀢𑀁 𑀪𑀸𑀯𑁂𑀲𑀺𑀦𑁆𑀢𑀺 𑀢𑀺𑀓𑀘𑀢𑀼𑀓𑁆𑀓𑀚𑁆𑀛𑀸𑀦𑀺𑀓𑀸𑀬 𑀫𑁂𑀢𑁆𑀢𑀸𑀬 𑀲𑀫𑁆𑀧𑀬𑀼𑀢𑁆𑀢𑀁 𑀧𑀡𑀻𑀢𑀁 𑀓𑀢𑁆𑀯𑀸 𑀘𑀺𑀢𑁆𑀢𑀁 𑀪𑀸𑀯𑁂𑀲𑀺𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀲𑀁𑀯𑀝𑁆𑀝𑀫𑀸𑀦𑁂 𑀲𑀼𑀤𑀸𑀳𑀦𑁆𑀢𑀺 𑀲𑀁𑀯𑀝𑁆𑀝𑀫𑀸𑀦𑁂 𑀲𑀼𑀤𑀁 𑀅𑀳𑀁. 𑀲𑀁𑀯𑀝𑁆𑀝𑀫𑀸𑀦𑁂𑀢𑀺 𑀛𑀸𑀬𑀫𑀸𑀦𑁂 𑀯𑀺𑀧𑀚𑁆𑀚𑀫𑀸𑀦𑁂. 𑀥𑀫𑁆𑀫𑀺𑀓𑁄𑀢𑀺 𑀤𑀲𑀓𑀼𑀲𑀮𑀥𑀫𑁆𑀫𑀲𑀫𑀦𑁆𑀦𑀸𑀕𑀢𑁄. 𑀥𑀫𑁆𑀫𑀭𑀸𑀚𑀸𑀢𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀥𑀫𑁆𑀫𑁂𑀦 𑀯𑀸 𑀮𑀤𑁆𑀥𑀭𑀚𑁆𑀚𑀢𑁆𑀢𑀸 𑀥𑀫𑁆𑀫𑀭𑀸𑀚𑀸. 𑀘𑀸𑀢𑀼𑀭𑀦𑁆𑀢𑁄𑀢𑀺 𑀧𑀼𑀭𑀢𑁆𑀣𑀺𑀫𑀲𑀫𑀼𑀤𑁆𑀤𑀸𑀤𑀻𑀦𑀁 𑀘𑀢𑀼𑀦𑁆𑀦𑀁 𑀲𑀫𑀼𑀤𑁆𑀤𑀸𑀦𑀁 𑀯𑀲𑁂𑀦 𑀘𑀸𑀢𑀼𑀭𑀦𑁆𑀢𑀸𑀬 𑀧𑀣𑀯𑀺𑀬𑀸 𑀇𑀲𑁆𑀲𑀭𑁄. 𑀯𑀺𑀚𑀺𑀢𑀸𑀯𑀻𑀢𑀺 𑀯𑀺𑀚𑀺𑀢𑀲𑀗𑁆𑀕𑀸𑀫𑁄. 𑀚𑀦𑀧𑀤𑁄 𑀢𑀲𑁆𑀫𑀺𑀁 𑀣𑀸𑀯𑀭𑀺𑀬𑀁 𑀣𑀺𑀭𑀪𑀸𑀯𑀁 𑀧𑀢𑁆𑀢𑁄𑀢𑀺 𑀚𑀦𑀧𑀤𑀢𑁆𑀣𑀸𑀯𑀭𑀺𑀬𑀧𑁆𑀧𑀢𑁆𑀢𑁄. 𑀧𑀭𑁄𑀲𑀳𑀲𑁆𑀲𑀦𑁆𑀢𑀺 𑀅𑀢𑀺𑀭𑁂𑀓𑀲𑀳𑀲𑁆𑀲𑀁. 𑀲𑀽𑀭𑀸𑀢𑀺 𑀅𑀪𑀻𑀭𑀼𑀦𑁄. 𑀯𑀻𑀭𑀗𑁆𑀕𑀭𑀽𑀧𑀸𑀢𑀺 𑀯𑀻𑀭𑀸𑀦𑀁 𑀅𑀗𑁆𑀕𑀁 𑀯𑀻𑀭𑀗𑁆𑀕𑀁, 𑀯𑀻𑀭𑀺𑀬𑀲𑁆𑀲𑁂𑀢𑀁 𑀦𑀸𑀫𑀁. 𑀯𑀻𑀭𑀗𑁆𑀕𑀭𑀽𑀧𑀫𑁂𑀢𑁂𑀲𑀦𑁆𑀢𑀺 𑀯𑀻𑀭𑀗𑁆𑀕𑀭𑀽𑀧𑀸. 𑀯𑀻𑀭𑀺𑀬𑀚𑀸𑀢𑀺𑀓𑀸 𑀯𑀻𑀭𑀺𑀬𑀲𑀪𑀸𑀯𑀸 𑀯𑀻𑀭𑀺𑀬𑀫𑀬𑀸 𑀯𑀺𑀬 𑀅𑀓𑀺𑀮𑀸𑀲𑀼𑀦𑁄 𑀤𑀺𑀯𑀲𑀫𑁆𑀧𑀺 𑀬𑀼𑀚𑁆𑀛𑀦𑁆𑀢𑀸 𑀦 𑀓𑀺𑀮𑀫𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀸𑀕𑀭𑀧𑀭𑀺𑀬𑀦𑁆𑀢𑀦𑁆𑀢𑀺 𑀘𑀓𑁆𑀓𑀯𑀸𑀴𑀧𑀩𑁆𑀩𑀢𑀁 𑀲𑀻𑀫𑀁 𑀓𑀢𑁆𑀯𑀸 𑀞𑀺𑀢𑀲𑀫𑀼𑀤𑁆𑀤𑀧𑀭𑀺𑀬𑀦𑁆𑀢𑀁. 𑀅𑀤𑀡𑁆𑀟𑁂𑀦𑀸𑀢𑀺 𑀥𑀦𑀤𑀡𑁆𑀟𑁂𑀦𑀧𑀺 𑀙𑁂𑀚𑁆𑀚𑀪𑁂𑀚𑁆𑀚𑀸𑀦𑀼𑀲𑀸𑀲𑀦𑁂𑀦 𑀲𑀢𑁆𑀣𑀤𑀡𑁆𑀟𑁂𑀦𑀧𑀺 𑀯𑀺𑀦𑀸𑀬𑁂𑀯. 𑀅𑀲𑀢𑁆𑀣𑁂𑀦𑀸𑀢𑀺 𑀏𑀓𑀢𑁄𑀥𑀸𑀭𑀸𑀤𑀺𑀦𑀸 𑀧𑀭𑀯𑀺𑀳𑁂𑀞𑀦𑀲𑀢𑁆𑀣𑁂𑀦𑀧𑀺 𑀯𑀺𑀦𑀸𑀬𑁂𑀯. 𑀥𑀫𑁆𑀫𑁂𑀦 𑀅𑀪𑀺𑀯𑀺𑀚𑀺𑀬𑀸𑀢𑀺 𑀏𑀳𑀺 𑀔𑁄, 𑀫𑀳𑀸𑀭𑀸𑀚𑀸𑀢𑀺 𑀏𑀯𑀁 𑀧𑀝𑀺𑀭𑀸𑀚𑀽𑀳𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑀸𑀕𑀫𑀦𑁄 ‘‘𑀧𑀸𑀡𑁄 𑀦 𑀳𑀦𑁆𑀢𑀩𑁆𑀩𑁄’’𑀢𑀺𑀆𑀤𑀺𑀦𑀸 𑀥𑀫𑁆𑀫𑁂𑀦𑁂𑀯 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀧𑀣𑀯𑀺𑀁 𑀅𑀪𑀺𑀯𑀺𑀚𑀺𑀦𑀺𑀢𑁆𑀯𑀸.

𑀲𑀼𑀔𑁂𑀲𑀺𑀦𑁄𑀢𑀺 𑀲𑀼𑀔𑀧𑀭𑀺𑀬𑁂𑀲𑀓𑁂 𑀲𑀢𑁆𑀢𑁂 𑀆𑀫𑀦𑁆𑀢𑁂𑀢𑀺. 𑀲𑀼𑀜𑁆𑀜𑀩𑁆𑀭𑀳𑁆𑀫𑀽𑀧𑀕𑁄𑀢𑀺 𑀲𑀼𑀜𑁆𑀜𑀩𑁆𑀭𑀳𑁆𑀫𑀯𑀺𑀫𑀸𑀦𑀽𑀧𑀕𑁄. 𑀧𑀣𑀯𑀺𑀁 𑀇𑀫𑀦𑁆𑀢𑀺 𑀇𑀫𑀁 𑀲𑀸𑀕𑀭𑀧𑀭𑀺𑀬𑀦𑁆𑀢𑀁 𑀫𑀳𑀸𑀧𑀣𑀯𑀺𑀁. 𑀅𑀲𑀸𑀳𑀲𑁂𑀦𑀸𑀢𑀺 𑀦 𑀲𑀸𑀳𑀲𑀺𑀓𑀓𑀫𑁆𑀫𑁂𑀦. 𑀲𑀫𑁂𑀦 𑀫𑀦𑀼𑀲𑀸𑀲𑀺𑀢𑀦𑁆𑀢𑀺 𑀲𑀫𑁂𑀦 𑀓𑀫𑁆𑀫𑁂𑀦 𑀅𑀦𑀼𑀲𑀸𑀲𑀺𑀁. 𑀢𑁂𑀳𑀺 𑀏𑀢𑀁 𑀲𑀼𑀤𑁂𑀲𑀺𑀢𑀦𑁆𑀢𑀺 𑀢𑁂𑀳𑀺 𑀲𑀗𑁆𑀕𑀸𑀳𑀓𑁂𑀳𑀺 𑀫𑀳𑀸𑀓𑀸𑀭𑀼𑀡𑀺𑀓𑁂𑀳𑀺 𑀩𑀼𑀤𑁆𑀥𑁂𑀳𑀺 𑀏𑀢𑀁 𑀏𑀢𑁆𑀢𑀓𑀁 𑀞𑀸𑀦𑀁 𑀲𑀼𑀤𑁂𑀲𑀺𑀢𑀁 𑀲𑀼𑀓𑀣𑀺𑀢𑀁. 𑀧𑀣𑀩𑁆𑀬𑁄𑀢𑀺 𑀧𑀼𑀣𑀯𑀺𑀲𑀸𑀫𑀺𑀓𑁄.

𑁧𑁦. 𑀪𑀭𑀺𑀬𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁬𑁩. 𑀤𑀲𑀫𑁂 𑀓𑁂𑀯𑀝𑁆𑀝𑀸 𑀫𑀜𑁆𑀜𑁂 𑀫𑀘𑁆𑀙𑀯𑀺𑀮𑁄𑀧𑁂𑀢𑀺 𑀓𑁂𑀯𑀝𑁆𑀝𑀸𑀦𑀁 𑀫𑀘𑁆𑀙𑀧𑀘𑁆𑀙𑀺𑀁 𑀑𑀢𑀸𑀭𑁂𑀢𑁆𑀯𑀸 𑀞𑀺𑀢𑀝𑁆𑀞𑀸𑀦𑁂 𑀚𑀸𑀮𑁂 𑀯𑀸 𑀉𑀤𑀓𑀢𑁄 𑀉𑀓𑁆𑀔𑀺𑀢𑁆𑀢𑀫𑀢𑁆𑀢𑁂 𑀫𑀘𑁆𑀙𑀕𑁆𑀕𑀸𑀳𑀓𑀸𑀦𑀁 𑀫𑀳𑀸𑀲𑀤𑁆𑀤𑁄 𑀳𑁄𑀢𑀺, 𑀢𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁. 𑀲𑀼𑀚𑀸𑀢𑀸𑀢𑀺 𑀯𑀺𑀲𑀸𑀔𑀸𑀬 𑀓𑀦𑀺𑀝𑁆𑀞𑀸. 𑀲𑀸 𑀦𑁂𑀯 𑀲𑀲𑁆𑀲𑀼𑀁 𑀆𑀤𑀺𑀬𑀢𑀻𑀢𑀺 𑀲𑀲𑁆𑀲𑀼𑀬𑀸 𑀓𑀢𑁆𑀢𑀩𑁆𑀩𑀯𑀢𑁆𑀢𑀁 𑀦𑀸𑀫 𑀅𑀢𑁆𑀣𑀺, 𑀢𑀁 𑀦 𑀓𑀭𑁄𑀢𑀺, 𑀲𑀲𑁆𑀲𑀽𑀢𑀺𑀧𑀺 𑀦𑀁 𑀦 𑀕𑀡𑁂𑀢𑀺. 𑀦 𑀲𑀲𑀼𑀭𑀁 𑀆𑀤𑀺𑀬𑀢𑀻𑀢𑀺 𑀯𑀘𑀦𑀁 𑀦 𑀕𑀡𑁆𑀳𑀸𑀢𑀺. 𑀏𑀯𑀁 𑀅𑀦𑀸𑀤𑀭𑀢𑀸𑀬𑀧𑀺 𑀅𑀕𑁆𑀕𑀳𑀡𑁂𑀦𑀧𑀺 𑀦 𑀆𑀤𑀺𑀬𑀢𑀺 𑀦𑀸𑀫. 𑀲𑁂𑀲𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀏𑀯𑀁 𑀅𑀦𑀸𑀣𑀧𑀺𑀡𑁆𑀟𑀺𑀓𑁄 𑀲𑀼𑀡𑀺𑀲𑀸𑀬 𑀆𑀘𑀸𑀭𑀁 𑀕𑀳𑁂𑀢𑁆𑀯𑀸 𑀲𑀢𑁆𑀣𑀼 𑀧𑀼𑀭𑀢𑁄 𑀦𑀺𑀲𑀻𑀤𑀺. 𑀲𑀸𑀧𑀺 𑀲𑀼𑀚𑀸𑀢𑀸 ‘‘𑀓𑀺𑀁 𑀦𑀼 𑀔𑁄 𑀅𑀬𑀁 𑀲𑁂𑀝𑁆𑀞𑀺 𑀤𑀲𑀩𑀮𑀲𑁆𑀲 𑀲𑀦𑁆𑀢𑀺𑀓𑁂 𑀫𑀬𑁆𑀳𑀁 𑀕𑀼𑀡𑀁 𑀓𑀣𑁂𑀲𑁆𑀲𑀢𑀺 𑀉𑀤𑀸𑀳𑀼 𑀅𑀕𑀼𑀡’’𑀦𑁆𑀢𑀺 𑀕𑀦𑁆𑀢𑁆𑀯𑀸 𑀅𑀯𑀺𑀤𑀽𑀭𑁂 𑀲𑀤𑁆𑀤𑀁 𑀲𑀼𑀡𑀦𑁆𑀢𑀻 𑀅𑀝𑁆𑀞𑀸𑀲𑀺. 𑀅𑀣 𑀦𑀁 𑀲𑀢𑁆𑀣𑀸 𑀏𑀳𑀺 𑀲𑀼𑀚𑀸𑀢𑁂𑀢𑀺 𑀆𑀫𑀦𑁆𑀢𑁂𑀲𑀺.

𑀅𑀳𑀺𑀢𑀸𑀦𑀼𑀓𑀫𑁆𑀧𑀺𑀦𑀻𑀢𑀺 𑀦 𑀳𑀺𑀢𑀸𑀦𑀼𑀓𑀫𑁆𑀧𑀺𑀦𑀻. 𑀅𑀜𑁆𑀜𑁂𑀲𑀽𑀢𑀺 𑀧𑀭𑀧𑀼𑀭𑀺𑀲𑁂𑀲𑀼. 𑀅𑀢𑀺𑀫𑀜𑁆𑀜𑀢𑁂𑀢𑀺 𑀑𑀫𑀸𑀦𑀸𑀢𑀺 𑀫𑀸𑀦𑀯𑀲𑁂𑀦 𑀅𑀢𑀺𑀫𑀜𑁆𑀜𑀢𑀺. 𑀥𑀦𑁂𑀦 𑀓𑀻𑀢𑀲𑁆𑀲𑀸𑀢𑀺 𑀥𑀦𑁂𑀦 𑀓𑀻𑀢𑀸 𑀅𑀲𑁆𑀲. 𑀯𑀥𑀸𑀬 𑀉𑀲𑁆𑀲𑀼𑀓𑀸 𑀯𑀥𑀺𑀢𑀼𑀁 𑀉𑀲𑁆𑀲𑀼𑀓𑁆𑀓𑀫𑀸𑀧𑀦𑁆𑀦𑀸. 𑀬𑀁 𑀇𑀢𑁆𑀣𑀺𑀬𑀸 𑀯𑀺𑀦𑁆𑀤𑀢𑀺 𑀲𑀸𑀫𑀺𑀓𑁄 𑀥𑀦𑀦𑁆𑀢𑀺 𑀇𑀢𑁆𑀣𑀺𑀬𑀸 𑀲𑀸𑀫𑀺𑀓𑁄 𑀬𑀁 𑀥𑀦𑀁 𑀮𑀪𑀢𑀺. 𑀅𑀧𑁆𑀧𑀫𑁆𑀧𑀺 𑀢𑀲𑁆𑀲 𑀅𑀧𑀳𑀸𑀢𑀼𑀫𑀺𑀘𑁆𑀙𑀢𑀻𑀢𑀺 𑀣𑁄𑀓𑀢𑁄𑀧𑀺 𑀅𑀲𑁆𑀲 𑀳𑀭𑀺𑀢𑀼𑀁 𑀇𑀘𑁆𑀙𑀢𑀺, 𑀉𑀤𑁆𑀥𑀦𑁂 𑀆𑀭𑁄𑀧𑀺𑀢𑀉𑀓𑁆𑀔𑀮𑀺𑀬𑀁 𑀧𑀓𑁆𑀔𑀺𑀧𑀺𑀢𑀩𑁆𑀩𑀢𑀡𑁆𑀟𑀼𑀮𑀢𑁄𑀧𑀺 𑀣𑁄𑀓𑀁 𑀳𑀭𑀺𑀢𑀼𑀫𑁂𑀯 𑀯𑀸𑀬𑀫𑀢𑀺. 𑀅𑀮𑀲𑀸𑀢𑀺 𑀦𑀺𑀲𑀺𑀦𑁆𑀦𑀝𑁆𑀞𑀸𑀦𑁂 𑀦𑀺𑀲𑀺𑀦𑁆𑀦𑀸𑀯 𑀞𑀺𑀢𑀝𑁆𑀞𑀸𑀦𑁂 𑀞𑀺𑀢𑀸𑀯 𑀳𑁄𑀢𑀺. 𑀨𑀭𑀼𑀲𑀸𑀢𑀺 𑀔𑀭𑀸. 𑀤𑀼𑀭𑀼𑀢𑁆𑀢𑀯𑀸𑀤𑀺𑀦𑀻𑀢𑀺 𑀤𑀼𑀩𑁆𑀪𑀸𑀲𑀺𑀢𑀪𑀸𑀲𑀺𑀦𑀻, 𑀓𑀓𑁆𑀔𑀴𑀁 𑀯𑀸𑀴𑀓𑀣𑀫𑁂𑀯 𑀓𑀣𑁂𑀢𑀺. 𑀉𑀝𑁆𑀞𑀸𑀬𑀓𑀸𑀦𑀁 𑀅𑀪𑀺𑀪𑀼𑀬𑁆𑀬 𑀯𑀢𑁆𑀢𑀢𑀻𑀢𑀺 𑀏𑀢𑁆𑀣 𑀉𑀝𑁆𑀞𑀸𑀬𑀓𑀸𑀦𑀦𑁆𑀢𑀺 𑀩𑀳𑀼𑀯𑀘𑀦𑀯𑀲𑁂𑀦 𑀯𑀺𑀭𑀺𑀬𑀼𑀝𑁆𑀞𑀸𑀦𑀲𑀫𑁆𑀧𑀦𑁆𑀦𑁄 𑀲𑀸𑀫𑀺𑀓𑁄 𑀯𑀼𑀢𑁆𑀢𑁄, 𑀢𑀲𑁆𑀲 𑀢𑀁 𑀉𑀝𑁆𑀞𑀸𑀦𑀲𑀫𑁆𑀧𑀢𑁆𑀢𑀺𑀁 𑀅𑀪𑀺𑀪𑀯𑀺𑀢𑁆𑀯𑀸 𑀳𑁂𑀝𑁆𑀞𑀸 𑀓𑀢𑁆𑀯𑀸 𑀯𑀢𑁆𑀢𑀢𑀺. 𑀧𑀫𑁄𑀤𑀢𑀻𑀢𑀺 𑀆𑀫𑁄𑀤𑀺𑀢𑀧𑀫𑁄𑀤𑀺𑀢𑀸 𑀳𑁄𑀢𑀺. 𑀓𑁄𑀮𑁂𑀬𑁆𑀬𑀓𑀸𑀢𑀺 𑀓𑀼𑀮𑀲𑀫𑁆𑀧𑀦𑁆𑀦𑀸. 𑀧𑀢𑀺𑀩𑁆𑀩𑀢𑀸𑀢𑀺 𑀧𑀢𑀺𑀤𑁂𑀯𑀢𑀸. 𑀯𑀥𑀤𑀡𑁆𑀟𑀢𑀚𑁆𑀚𑀺𑀢𑀸𑀢𑀺 𑀤𑀡𑁆𑀟𑀓𑀁 𑀕𑀳𑁂𑀢𑁆𑀯𑀸 𑀯𑀥𑁂𑀦 𑀢𑀚𑁆𑀚𑀺𑀢𑀸, ‘‘𑀖𑀸𑀢𑁂𑀲𑁆𑀲𑀸𑀫𑀺 𑀦’’𑀦𑁆𑀢𑀺 𑀯𑀼𑀢𑁆𑀢𑀸. 𑀤𑀸𑀲𑀻𑀲𑀫𑀦𑁆𑀢𑀺 𑀲𑀸𑀫𑀺𑀓𑀲𑁆𑀲 𑀯𑀢𑁆𑀢𑀧𑀽𑀭𑀺𑀓𑀸 𑀤𑀸𑀲𑀻𑀢𑀺 𑀫𑀁 𑀪𑀕𑀯𑀸 𑀥𑀸𑀭𑁂𑀢𑀽𑀢𑀺 𑀯𑀢𑁆𑀯𑀸 𑀲𑀭𑀡𑁂𑀲𑀼 𑀧𑀢𑀺𑀝𑁆𑀞𑀸𑀲𑀺.

𑁧𑁧. 𑀓𑁄𑀥𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁬𑁪. 𑀏𑀓𑀸𑀤𑀲𑀫𑁂 𑀲𑀧𑀢𑁆𑀢𑀓𑀦𑁆𑀢𑀸𑀢𑀺 𑀲𑀧𑀢𑁆𑀢𑀸𑀦𑀁 𑀯𑁂𑀭𑀻𑀦𑀁 𑀓𑀦𑁆𑀢𑀸 𑀧𑀺𑀬𑀸 𑀢𑁂𑀳𑀺 𑀇𑀘𑁆𑀙𑀺𑀢𑀧𑀢𑁆𑀣𑀺𑀢𑀸. 𑀲𑀧𑀢𑁆𑀢𑀓𑀭𑀡𑀸𑀢𑀺 𑀲𑀧𑀢𑁆𑀢𑀸𑀦𑀁 𑀯𑁂𑀭𑀻𑀦𑀁 𑀅𑀢𑁆𑀣𑀓𑀭𑀡𑀸. 𑀓𑁄𑀥𑀧𑀭𑁂𑀢𑁄𑀢𑀺 𑀓𑁄𑀥𑀸𑀦𑀼𑀕𑀢𑁄. 𑀧𑀘𑀼𑀭𑀢𑁆𑀣𑀢𑀸𑀬𑀸𑀢𑀺 𑀩𑀳𑀼𑀅𑀢𑁆𑀣𑀢𑀸𑀬 𑀩𑀳𑀼𑀳𑀺𑀢𑀢𑀸𑀬. 𑀅𑀦𑀢𑁆𑀣𑀫𑁆𑀧𑀻𑀢𑀺 𑀅𑀯𑀼𑀤𑁆𑀥𑀺𑀫𑁆𑀧𑀺. 𑀅𑀢𑁆𑀣𑁄 𑀫𑁂 𑀕𑀳𑀺𑀢𑁄𑀢𑀺 𑀯𑀼𑀟𑁆𑀠𑀺 𑀫𑁂 𑀕𑀳𑀺𑀢𑀸.

𑀅𑀣𑁄 𑀅𑀢𑁆𑀣𑀁 𑀕𑀳𑁂𑀢𑁆𑀯𑀸𑀦𑀸𑀢𑀺 𑀅𑀣𑁄 𑀯𑀼𑀤𑁆𑀥𑀺𑀁 𑀕𑀳𑁂𑀢𑁆𑀯𑀸. 𑀅𑀦𑀢𑁆𑀣𑀁 𑀅𑀥𑀺𑀧𑀚𑁆𑀚𑀢𑀻𑀢𑀺 𑀅𑀦𑀢𑁆𑀣𑁄 𑀫𑁂 𑀕𑀳𑀺𑀢𑁄𑀢𑀺 𑀲𑀮𑁆𑀮𑀓𑁆𑀔𑁂𑀢𑀺. 𑀯𑀥𑀁 𑀓𑀢𑁆𑀯𑀸𑀦𑀸𑀢𑀺 𑀧𑀸𑀡𑀸𑀢𑀺𑀧𑀸𑀢𑀓𑀫𑁆𑀫𑀁 𑀓𑀢𑁆𑀯𑀸. 𑀓𑁄𑀥𑀲𑀫𑁆𑀫𑀤𑀲𑀫𑁆𑀫𑀢𑁆𑀢𑁄𑀢𑀺 𑀓𑁄𑀥𑀫𑀤𑁂𑀦 𑀫𑀢𑁆𑀢𑁄, 𑀆𑀤𑀺𑀦𑁆𑀦𑀕𑀳𑀺𑀢𑀧𑀭𑀸𑀫𑀝𑁆𑀞𑁄𑀢𑀺 𑀅𑀢𑁆𑀣𑁄. 𑀆𑀬𑀲𑀓𑁆𑀬𑀦𑁆𑀢𑀺 𑀅𑀬𑀲𑀪𑀸𑀯𑀁, 𑀅𑀬𑀲𑁄 𑀦𑀺𑀬𑀲𑁄 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀅𑀦𑁆𑀢𑀭𑀢𑁄 𑀚𑀸𑀢𑀦𑁆𑀢𑀺 𑀅𑀩𑁆𑀪𑀦𑁆𑀢𑀭𑁂 𑀉𑀧𑁆𑀧𑀦𑁆𑀦𑀁. 𑀅𑀢𑁆𑀣𑀁 𑀦 𑀚𑀸𑀦𑀸𑀢𑀻𑀢𑀺 𑀯𑀼𑀤𑁆𑀥𑀺𑀅𑀢𑁆𑀣𑀁 𑀦 𑀚𑀸𑀦𑀸𑀢𑀺. 𑀥𑀫𑁆𑀫𑀁 𑀦 𑀧𑀲𑁆𑀲𑀢𑀻𑀢𑀺 𑀲𑀫𑀣𑀯𑀺𑀧𑀲𑁆𑀲𑀦𑀸𑀥𑀫𑁆𑀫𑀁 𑀦 𑀧𑀲𑁆𑀲𑀢𑀺. 𑀅𑀦𑁆𑀥𑀢𑀫𑀦𑁆𑀢𑀺 𑀅𑀦𑁆𑀥𑀪𑀸𑀯𑀓𑀭𑀁 𑀢𑀫𑀁 𑀩𑀳𑀮𑀢𑀫𑀁. 𑀲𑀳𑀢𑁂𑀢𑀺 𑀅𑀪𑀺𑀪𑀯𑀢𑀺.

𑀤𑀼𑀫𑁆𑀫𑀗𑁆𑀓𑀼𑀬𑀦𑁆𑀢𑀺 𑀤𑀼𑀫𑁆𑀫𑀗𑁆𑀓𑀼𑀪𑀸𑀯𑀁 𑀦𑀺𑀢𑁆𑀢𑁂𑀚𑀢𑀁 𑀤𑀼𑀩𑁆𑀩𑀡𑁆𑀡𑀫𑀼𑀔𑀢𑀁. 𑀬𑀢𑁄 𑀧𑀢𑀸𑀬𑀢𑀻𑀢𑀺 𑀬𑀤𑀸 𑀦𑀺𑀩𑁆𑀩𑀢𑁆𑀢𑀢𑀺. 𑀦 𑀯𑀸𑀘𑁄 𑀳𑁄𑀢𑀺 𑀕𑀸𑀭𑀯𑁄𑀢𑀺 𑀯𑀘𑀦𑀲𑁆𑀲𑀧𑀺 𑀕𑀭𑀼𑀪𑀸𑀯𑁄 𑀦 𑀳𑁄𑀢𑀺. 𑀦 𑀤𑀻𑀧𑀁 𑀳𑁄𑀢𑀺 𑀓𑀺𑀜𑁆𑀘𑀦𑀦𑁆𑀢𑀺 𑀓𑀸𑀘𑀺 𑀧𑀢𑀺𑀝𑁆𑀞𑀸 𑀦𑀸𑀫 𑀦 𑀳𑁄𑀢𑀺. 𑀢𑀧𑀦𑀻𑀬𑀸𑀦𑀻𑀢𑀺 𑀢𑀸𑀧𑀚𑀦𑀓𑀸𑀦𑀺. 𑀥𑀫𑁆𑀫𑁂𑀳𑀻𑀢𑀺 𑀲𑀫𑀣𑀯𑀺𑀧𑀲𑁆𑀲𑀦𑀸𑀥𑀫𑁆𑀫𑁂𑀳𑀺. 𑀆𑀭𑀓𑀸𑀢𑀺 𑀤𑀽𑀭𑁂. 𑀩𑁆𑀭𑀸𑀳𑁆𑀫𑀡𑀦𑁆𑀢𑀺 𑀔𑀻𑀡𑀸𑀲𑀯𑀩𑁆𑀭𑀸𑀳𑁆𑀫𑀡𑀁. 𑀬𑀸𑀬 𑀫𑀸𑀢𑀼 𑀪𑀢𑁄𑀢𑀺 𑀬𑀸𑀬 𑀫𑀸𑀢𑀭𑀸 𑀪𑀢𑁄 𑀧𑁄𑀲𑀺𑀢𑁄. 𑀧𑀸𑀡𑀤𑀤𑀺𑀁 𑀲𑀦𑁆𑀢𑀺𑀦𑁆𑀢𑀺 𑀚𑀻𑀯𑀺𑀢𑀤𑀸𑀬𑀺𑀓𑀁 𑀲𑀫𑀸𑀦𑀁. 𑀳𑀦𑁆𑀢𑀺 𑀓𑀼𑀤𑁆𑀥𑁄 𑀧𑀼𑀣𑀼𑀢𑁆𑀢𑀸𑀦𑀦𑁆𑀢𑀺 𑀓𑀼𑀤𑁆𑀥𑁄 𑀧𑀼𑀕𑁆𑀕𑀮𑁄 𑀧𑀼𑀣𑀼 𑀦𑀸𑀦𑀸𑀓𑀸𑀭𑀡𑁂𑀳𑀺 𑀅𑀢𑁆𑀢𑀸𑀦𑀁 𑀳𑀦𑁆𑀢𑀺. 𑀦𑀸𑀦𑀸𑀭𑀽𑀧𑁂𑀲𑀼 𑀫𑀼𑀘𑁆𑀙𑀺𑀢𑁄𑀢𑀺 𑀦𑀸𑀦𑀸𑀭𑀫𑁆𑀫𑀡𑁂𑀲𑀼 𑀅𑀥𑀺𑀫𑀼𑀘𑁆𑀙𑀺𑀢𑁄 𑀳𑀼𑀢𑁆𑀯𑀸. 𑀭𑀚𑁆𑀚𑀼𑀬𑀸 𑀩𑀚𑁆𑀛 𑀫𑀻𑀬𑀦𑁆𑀢𑀻𑀢𑀺 𑀭𑀚𑁆𑀚𑀼𑀬𑀸 𑀩𑀦𑁆𑀥𑀺𑀢𑁆𑀯𑀸 𑀫𑀭𑀦𑁆𑀢𑀺. 𑀧𑀩𑁆𑀩𑀢𑀸𑀫𑀧𑀺 𑀓𑀦𑁆𑀤𑀭𑁂𑀢𑀺 𑀧𑀩𑁆𑀩𑀢𑀓𑀦𑁆𑀤𑀭𑁂𑀧𑀺 𑀧𑀢𑀺𑀢𑁆𑀯𑀸 𑀫𑀭𑀦𑁆𑀢𑀺.

𑀪𑀽𑀦𑀳𑀘𑁆𑀘𑀸𑀦𑀻𑀢𑀺 𑀳𑀢𑀯𑀼𑀤𑁆𑀥𑀻𑀦𑀺. 𑀇𑀢𑀸𑀬𑀦𑁆𑀢𑀺 𑀇𑀢𑀺 𑀅𑀬𑀁. 𑀢𑀁 𑀤𑀫𑁂𑀦 𑀲𑀫𑀼𑀘𑁆𑀙𑀺𑀦𑁆𑀤𑁂𑀢𑀺 𑀢𑀁 𑀓𑁄𑀥𑀁 𑀤𑀫𑁂𑀦 𑀙𑀺𑀦𑁆𑀤𑁂𑀬𑁆𑀬. 𑀓𑀢𑀭𑁂𑀦 𑀤𑀫𑁂𑀦𑀸𑀢𑀺? 𑀧𑀜𑁆𑀜𑀸𑀯𑀻𑀭𑀺𑀬𑁂𑀦 𑀤𑀺𑀝𑁆𑀞𑀺𑀬𑀸𑀢𑀺 𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸𑀬 𑀘𑁂𑀯 𑀯𑀺𑀧𑀲𑁆𑀲𑀦𑀸𑀲𑀫𑁆𑀧𑀬𑀼𑀢𑁆𑀢𑁂𑀦 𑀓𑀸𑀬𑀺𑀓𑀘𑁂𑀢𑀲𑀺𑀓𑀯𑀻𑀭𑀺𑀬𑁂𑀦 𑀘 𑀫𑀕𑁆𑀕𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀘. 𑀢𑀣𑁂𑀯 𑀥𑀫𑁆𑀫𑁂 𑀲𑀺𑀓𑁆𑀔𑁂𑀣𑀸𑀢𑀺 𑀬𑀣𑀸 𑀅𑀓𑀼𑀲𑀮𑀁 𑀲𑀫𑀼𑀘𑁆𑀙𑀺𑀦𑁆𑀤𑁂𑀬𑁆𑀬, 𑀲𑀫𑀣𑀯𑀺𑀧𑀲𑁆𑀲𑀦𑀸𑀥𑀫𑁆𑀫𑁂𑀧𑀺 𑀢𑀣𑁂𑀯 𑀲𑀺𑀓𑁆𑀔𑁂𑀬𑁆𑀬. 𑀫𑀸 𑀦𑁄 𑀤𑀼𑀫𑁆𑀫𑀗𑁆𑀓𑀼𑀬𑀁 𑀅𑀳𑀽𑀢𑀺 𑀫𑀸 𑀅𑀫𑁆𑀳𑀸𑀓𑀁 𑀤𑀼𑀫𑁆𑀫𑀗𑁆𑀓𑀼𑀪𑀸𑀯𑁄 𑀅𑀳𑁄𑀲𑀻𑀢𑀺 𑀇𑀫𑀫𑀢𑁆𑀣𑀁 𑀧𑀢𑁆𑀣𑀬𑀫𑀸𑀦𑀸. 𑀅𑀦𑀸𑀬𑀸𑀲𑀸𑀢𑀺 𑀅𑀦𑀼𑀧𑀸𑀬𑀸𑀲𑀸. 𑀅𑀦𑀼𑀲𑁆𑀲𑀼𑀓𑀸𑀢𑀺 𑀓𑀢𑁆𑀣𑀘𑀺 𑀉𑀲𑁆𑀲𑀼𑀓𑁆𑀓𑀁 𑀅𑀦𑀸𑀧𑀦𑁆𑀦𑀸. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀅𑀩𑁆𑀬𑀸𑀓𑀢𑀯𑀕𑁆𑀕𑁄 𑀙𑀝𑁆𑀞𑁄.