𑁭. 𑀫𑀳𑀸𑀯𑀕𑁆𑀕𑁄

𑁧. 𑀳𑀺𑀭𑀺𑀑𑀢𑁆𑀢𑀧𑁆𑀧𑀲𑀼𑀢𑁆𑀢𑀯𑀡𑁆𑀡𑀦𑀸

𑁬𑁫. 𑀲𑀢𑁆𑀢𑀫𑀲𑁆𑀲 𑀧𑀞𑀫𑁂 𑀳𑀢𑀽𑀧𑀦𑀺𑀲𑁄𑀢𑀺 𑀳𑀢𑀉𑀧𑀦𑀺𑀲𑁄 𑀙𑀺𑀦𑁆𑀦𑀧𑀘𑁆𑀘𑀬𑁄. 𑀬𑀣𑀸𑀪𑀽𑀢𑀜𑀸𑀡𑀤𑀲𑁆𑀲𑀦𑀦𑁆𑀢𑀺 𑀢𑀭𑀼𑀡𑀯𑀺𑀧𑀲𑁆𑀲𑀦𑀸. 𑀦𑀺𑀩𑁆𑀩𑀺𑀤𑀸𑀯𑀺𑀭𑀸𑀕𑁄𑀢𑀺 𑀩𑀮𑀯𑀯𑀺𑀧𑀲𑁆𑀲𑀦𑀸 𑀘𑁂𑀯 𑀫𑀕𑁆𑀕𑁄 𑀘. 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀦𑁆𑀢𑀺 𑀅𑀭𑀳𑀢𑁆𑀢𑀯𑀺𑀫𑀼𑀢𑁆𑀢𑀺 𑀘 𑀧𑀘𑁆𑀘𑀯𑁂𑀓𑁆𑀔𑀡𑀸 𑀘.

𑁨. 𑀲𑀢𑁆𑀢𑀲𑀽𑀭𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁬𑁬. 𑀤𑀼𑀢𑀺𑀬𑁂 𑀬𑀲𑁆𑀫𑀸 𑀅𑀬𑀁 𑀲𑀢𑁆𑀢𑀲𑀽𑀭𑀺𑀬𑀤𑁂𑀲𑀦𑀸 𑀢𑁂𑀚𑁄𑀲𑀁𑀯𑀝𑁆𑀝𑀤𑀲𑁆𑀲𑀦𑀯𑀲𑁂𑀦 𑀧𑀯𑀢𑁆𑀢𑀸, 𑀢𑀲𑁆𑀫𑀸 𑀢𑀬𑁄 𑀲𑀁𑀯𑀝𑁆𑀝𑀸, 𑀢𑀺𑀲𑁆𑀲𑁄 𑀲𑀁𑀯𑀝𑁆𑀝𑀲𑀻𑀫𑀸, 𑀢𑀻𑀡𑀺 𑀲𑀁𑀯𑀝𑁆𑀝𑀫𑀽𑀮𑀸𑀦𑀻, 𑀢𑀻𑀡𑀺 𑀓𑁄𑀮𑀸𑀳𑀮𑀸𑀦𑀻𑀢𑀺 𑀅𑀬𑀁 𑀢𑀸𑀯 𑀆𑀤𑀺𑀢𑁄𑀯 𑀇𑀫𑀲𑁆𑀲 𑀲𑀼𑀢𑁆𑀢𑀲𑁆𑀲 𑀧𑀼𑀭𑁂𑀘𑀸𑀭𑀺𑀓𑀓𑀣𑀸 𑀯𑁂𑀤𑀺𑀢𑀩𑁆𑀩𑀸. 𑀲𑀸 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑀯𑀺𑀲𑀼𑀤𑁆𑀥𑀺. 𑁨.𑁪𑁦𑁩) 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀦𑀺𑀤𑁆𑀤𑁂𑀲𑁂 𑀯𑀺𑀢𑁆𑀣𑀸𑀭𑀺𑀢𑀸𑀯. 𑀏𑀢𑀤𑀯𑁄𑀘𑀸𑀢𑀺 𑀅𑀦𑀺𑀘𑁆𑀘𑀓𑀫𑁆𑀫𑀝𑁆𑀞𑀸𑀦𑀺𑀓𑀸𑀦𑀁 𑀧𑀜𑁆𑀘𑀦𑁆𑀦𑀁 𑀪𑀺𑀓𑁆𑀔𑀼𑀲𑀢𑀸𑀦𑀁 𑀅𑀚𑁆𑀛𑀸𑀲𑀬𑁂𑀦 𑀉𑀧𑀸𑀤𑀺𑀦𑁆𑀦𑀓𑀸𑀦𑀁 𑀅𑀦𑀼𑀧𑀸𑀤𑀺𑀦𑁆𑀦𑀓𑀸𑀦𑀁 𑀲𑀗𑁆𑀔𑀸𑀭𑀸𑀦𑀁 𑀯𑀺𑀧𑀢𑁆𑀢𑀺𑀤𑀲𑁆𑀲𑀦𑀢𑁆𑀣𑀁 𑀏𑀢𑀁 ‘‘𑀅𑀦𑀺𑀘𑁆𑀘𑀸, 𑀪𑀺𑀓𑁆𑀔𑀯𑁂, 𑀲𑀗𑁆𑀔𑀸𑀭𑀸’’𑀢𑀺𑀆𑀤𑀺𑀲𑀢𑁆𑀢𑀲𑀽𑀭𑀺𑀬𑁄𑀧𑀫𑀲𑀼𑀢𑁆𑀢𑀦𑁆𑀢𑀁 𑀅𑀯𑁄𑀘. 𑀢𑀢𑁆𑀣 𑀅𑀦𑀺𑀘𑁆𑀘𑀸𑀢𑀺 𑀳𑀼𑀢𑁆𑀯𑀸 𑀅𑀪𑀸𑀯𑀝𑁆𑀞𑁂𑀦 𑀅𑀦𑀺𑀘𑁆𑀘𑀸. 𑀲𑀗𑁆𑀔𑀸𑀭𑀸𑀢𑀺 𑀉𑀧𑀸𑀤𑀺𑀦𑁆𑀦𑀓𑀅𑀦𑀼𑀧𑀸𑀤𑀺𑀦𑁆𑀦𑀓𑀸 𑀲𑀗𑁆𑀔𑀸𑀭𑀥𑀫𑁆𑀫𑀸. 𑀅𑀤𑁆𑀥𑀼𑀯𑀸𑀢𑀺 𑀏𑀯𑀁 𑀅𑀘𑀺𑀭𑀝𑁆𑀞𑁂𑀦 𑀦 𑀥𑀼𑀯𑀸. 𑀅𑀦𑀲𑁆𑀲𑀸𑀲𑀺𑀓𑀸𑀢𑀺 𑀅𑀲𑀲𑁆𑀲𑀢𑀪𑀸𑀯𑁂𑀦 𑀅𑀲𑁆𑀲𑀸𑀲𑀭𑀳𑀺𑀢𑀸. 𑀅𑀮𑀫𑁂𑀯𑀸𑀢𑀺 𑀬𑀼𑀢𑁆𑀢𑀫𑁂𑀯.

𑀅𑀚𑁆𑀛𑁄𑀕𑀸𑀴𑁆𑀳𑁄𑀢𑀺 𑀉𑀤𑀓𑁂 𑀅𑀦𑀼𑀧𑀯𑀺𑀝𑁆𑀞𑁄. 𑀅𑀘𑁆𑀘𑀼𑀕𑁆𑀕𑀢𑁄𑀢𑀺 𑀉𑀤𑀓𑀧𑀺𑀝𑁆𑀞𑀺𑀢𑁄 𑀉𑀕𑁆𑀕𑀢𑁄. 𑀤𑁂𑀯𑁄 𑀦 𑀯𑀲𑁆𑀲𑀢𑀻𑀢𑀺 𑀧𑀞𑀫𑀁 𑀢𑀸𑀯 𑀉𑀧𑀓𑀧𑁆𑀧𑀦𑀫𑁂𑀖𑁄 𑀦𑀸𑀫 𑀓𑁄𑀝𑀺𑀲𑀢𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑁂 𑀏𑀓𑀫𑁂𑀖𑁄 𑀳𑀼𑀢𑁆𑀯𑀸 𑀯𑀲𑁆𑀲𑀢𑀺, 𑀢𑀤𑀸 𑀦𑀺𑀓𑁆𑀔𑀦𑁆𑀢𑀩𑀻𑀚𑀁 𑀦 𑀧𑀼𑀦 𑀕𑁂𑀳𑀁 𑀧𑀯𑀺𑀲𑀢𑀺. 𑀢𑀢𑁄 𑀧𑀝𑁆𑀞𑀸𑀬 𑀥𑀫𑀓𑀭𑀡𑁂 𑀦𑀺𑀭𑀼𑀤𑁆𑀥𑀁 𑀯𑀺𑀬 𑀉𑀤𑀓𑀁 𑀳𑁄𑀢𑀺, 𑀧𑀼𑀦 𑀏𑀓𑀩𑀺𑀦𑁆𑀤𑀼𑀫𑁆𑀧𑀺 𑀤𑁂𑀯𑁄 𑀦 𑀯𑀲𑁆𑀲𑀢𑀻𑀢𑀺 𑀉𑀧𑀫𑀸𑀦𑀥𑀫𑁆𑀫𑀓𑀣𑀸𑀯 𑀧𑀫𑀸𑀡𑀁. 𑀯𑀺𑀦𑀲𑁆𑀲𑀦𑁆𑀢𑁂 𑀧𑀦 𑀮𑁄𑀓𑁂 𑀧𑀞𑀫𑀁 𑀅𑀯𑀻𑀘𑀺𑀢𑁄 𑀧𑀝𑁆𑀞𑀸𑀬 𑀢𑀼𑀘𑁆𑀙𑁄 𑀳𑁄𑀢𑀺, 𑀢𑀢𑁄 𑀉𑀝𑁆𑀞𑀳𑀺𑀢𑁆𑀯𑀸 𑀲𑀢𑁆𑀢𑀸 𑀫𑀦𑀼𑀲𑁆𑀲𑀮𑁄𑀓𑁂 𑀘 𑀢𑀺𑀭𑀘𑁆𑀙𑀸𑀦𑁂𑀲𑀼 𑀘 𑀦𑀺𑀩𑁆𑀩𑀢𑁆𑀢𑀦𑁆𑀢𑀺. 𑀢𑀺𑀭𑀘𑁆𑀙𑀸𑀦𑁂𑀲𑀼 𑀦𑀺𑀩𑁆𑀩𑀢𑁆𑀢𑀸𑀧𑀺 𑀧𑀼𑀢𑁆𑀢𑀪𑀸𑀢𑀺𑀓𑁂𑀲𑀼 𑀫𑁂𑀢𑁆𑀢𑀁 𑀧𑀝𑀺𑀮𑀪𑀺𑀢𑁆𑀯𑀸 𑀓𑀸𑀮𑀓𑀢𑀸 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀦𑀺𑀩𑁆𑀩𑀢𑁆𑀢𑀦𑁆𑀢𑀺. 𑀤𑁂𑀯𑀢𑀸 𑀆𑀓𑀸𑀲𑁂𑀦 𑀘𑀭𑀦𑁆𑀢𑀺𑀬𑁄 𑀆𑀭𑁄𑀘𑁂𑀦𑁆𑀢𑀺 𑁋 ‘‘𑀦 𑀇𑀤𑀁 𑀞𑀸𑀦𑀁 𑀲𑀲𑁆𑀲𑀢𑀁 𑀦 𑀦𑀺𑀩𑀤𑁆𑀥𑀁, 𑀫𑁂𑀢𑁆𑀢𑀁 𑀪𑀸𑀯𑁂𑀣, 𑀓𑀭𑀼𑀡𑀁, 𑀫𑀼𑀤𑀺𑀢𑀁, 𑀉𑀧𑁂𑀓𑁆𑀔𑀁 𑀪𑀸𑀯𑁂𑀣𑀸’’𑀢𑀺. 𑀢𑁂 𑀫𑁂𑀢𑁆𑀢𑀸𑀤𑀬𑁄 𑀪𑀸𑀯𑁂𑀢𑁆𑀯𑀸 𑀢𑀢𑁄 𑀘𑀼𑀢𑀸 𑀩𑁆𑀭𑀳𑁆𑀫𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀦𑁆𑀢𑀺.

𑀩𑀻𑀚𑀕𑀸𑀫𑀸𑀢𑀺 𑀏𑀢𑁆𑀣 𑀩𑀻𑀚𑀕𑀸𑀫𑁄 𑀦𑀸𑀫 𑀧𑀜𑁆𑀘 𑀩𑀻𑀚𑀚𑀸𑀢𑀸𑀦𑀺. 𑀪𑀽𑀢𑀕𑀸𑀫𑁄 𑀦𑀸𑀫 𑀬𑀁𑀓𑀺𑀜𑁆𑀘𑀺 𑀦𑀺𑀓𑁆𑀔𑀦𑁆𑀢𑀫𑀽𑀮𑀧𑀡𑁆𑀡𑀁 𑀳𑀭𑀺𑀢𑀓𑀁. 𑀑𑀲𑀥𑀺𑀢𑀺𑀡𑀯𑀦𑀧𑁆𑀧𑀢𑀬𑁄𑀢𑀺 𑀏𑀢𑁆𑀣 𑀑𑀲𑀥𑀻𑀢𑀺 𑀑𑀲𑀥𑀭𑀼𑀓𑁆𑀔𑀸. 𑀢𑀺𑀡𑀸𑀢𑀺 𑀩𑀳𑀺𑀲𑀸𑀭𑀸 𑀢𑀸𑀮𑀦𑀸𑀴𑀺𑀓𑁂𑀭𑀸𑀤𑀬𑁄. 𑀯𑀦𑀧𑁆𑀧𑀢𑀬𑁄𑀢𑀺 𑀯𑀦𑀚𑁂𑀝𑁆𑀞𑀓𑀭𑀼𑀓𑁆𑀔𑀸. 𑀓𑀼𑀦𑁆𑀦𑀤𑀺𑀬𑁄𑀢𑀺 𑀞𑀧𑁂𑀢𑁆𑀯𑀸 𑀧𑀜𑁆𑀘 𑀫𑀳𑀸𑀦𑀤𑀺𑀬𑁄 𑀅𑀯𑀲𑁂𑀲𑀸 𑀦𑀺𑀦𑁆𑀦𑀕𑀸. 𑀓𑀼𑀲𑁄𑀩𑁆𑀪𑀸𑀢𑀺 𑀞𑀧𑁂𑀢𑁆𑀯𑀸 𑀲𑀢𑁆𑀢 𑀫𑀳𑀸𑀲𑀭𑁂 𑀅𑀯𑀲𑁂𑀲𑀸 𑀭𑀳𑀤𑀸𑀤𑀬𑁄. 𑀤𑀼𑀢𑀺𑀬𑁄 𑀲𑀽𑀭𑀺𑀬𑁄𑀢𑀺𑀆𑀤𑀻𑀲𑀼 𑀤𑀼𑀢𑀺𑀬𑀲𑀽𑀭𑀺𑀬𑀓𑀸𑀮𑁂 𑀏𑀓𑁄 𑀉𑀤𑁂𑀢𑀺, 𑀏𑀓𑁄 𑀅𑀢𑁆𑀣𑀗𑁆𑀕𑀫𑁂𑀢𑀺. 𑀢𑀢𑀺𑀬𑀓𑀸𑀮𑁂 𑀏𑀓𑁄 𑀉𑀤𑁂𑀢𑀺, 𑀏𑀓𑁄 𑀅𑀢𑁆𑀣𑀗𑁆𑀕𑀫𑁂𑀢𑀺, 𑀏𑀓𑁄 𑀫𑀚𑁆𑀛𑁂 𑀳𑁄𑀢𑀺. 𑀘𑀢𑀼𑀢𑁆𑀣𑀓𑀸𑀮𑁂 𑀘𑀢𑀼𑀓𑀼𑀮𑀺𑀓𑁂 𑀕𑀸𑀫𑁂 𑀘𑀢𑁆𑀢𑀸𑀭𑁄 𑀧𑀺𑀡𑁆𑀟𑀘𑀸𑀭𑀺𑀓𑀸 𑀤𑁆𑀯𑀸𑀭𑀧𑀝𑀺𑀧𑀸𑀝𑀺𑀬𑀸 𑀞𑀺𑀢𑀸 𑀯𑀺𑀬 𑀳𑁄𑀦𑁆𑀢𑀺. 𑀧𑀜𑁆𑀘𑀫𑀸𑀤𑀺𑀓𑀸𑀮𑁂𑀧𑀺 𑀏𑀲𑁂𑀯 𑀦𑀬𑁄. 𑀧𑀮𑀼𑀚𑁆𑀚𑀦𑁆𑀢𑀻𑀢𑀺 𑀙𑀺𑀚𑁆𑀚𑀺𑀢𑁆𑀯𑀸 𑀙𑀺𑀚𑁆𑀚𑀺𑀢𑁆𑀯𑀸 𑀧𑀢𑀦𑁆𑀢𑀺. 𑀦𑁂𑀯 𑀙𑀸𑀭𑀺𑀓𑀸 𑀧𑀜𑁆𑀜𑀸𑀬𑀢𑀺 𑀦 𑀫𑀲𑀻𑀢𑀺 𑀘𑀓𑁆𑀓𑀯𑀸𑀴𑀫𑀳𑀸𑀧𑀣𑀯𑀻 𑀲𑀺𑀦𑁂𑀭𑀼𑀧𑀩𑁆𑀩𑀢𑀭𑀸𑀚𑀸 𑀳𑀺𑀫𑀯𑀸 𑀘𑀓𑁆𑀓𑀯𑀸𑀴𑀧𑀩𑁆𑀩𑀢𑁄 𑀙 𑀓𑀸𑀫𑀲𑀕𑁆𑀕𑀸 𑀧𑀞𑀫𑀚𑁆𑀛𑀸𑀦𑀺𑀓𑀩𑁆𑀭𑀳𑁆𑀫𑀮𑁄𑀓𑀸𑀢𑀺 𑀏𑀢𑁆𑀢𑀓𑁂 𑀞𑀸𑀦𑁂 𑀤𑀟𑁆𑀠𑁂 𑀅𑀘𑁆𑀙𑀭𑀸𑀬 𑀕𑀳𑁂𑀢𑀩𑁆𑀩𑀫𑀢𑁆𑀢𑀸𑀧𑀺 𑀙𑀸𑀭𑀺𑀓𑀸 𑀯𑀸 𑀅𑀗𑁆𑀕𑀸𑀭𑁄 𑀯𑀸 𑀦 𑀧𑀜𑁆𑀜𑀸𑀬𑀢𑀺. 𑀓𑁄 𑀫𑀦𑁆𑀢𑀸 𑀓𑁄 𑀲𑀤𑁆𑀥𑀸𑀢𑀸𑀢𑀺 𑀓𑁄 𑀢𑀲𑁆𑀲 𑀲𑀤𑁆𑀥𑀸𑀧𑀦𑀢𑁆𑀣𑀸𑀬 𑀲𑀫𑀢𑁆𑀣𑁄, 𑀓𑁄 𑀯𑀸 𑀢𑀲𑁆𑀲 𑀲𑀤𑁆𑀥𑀸𑀢𑀸. 𑀅𑀜𑁆𑀜𑀢𑁆𑀭 𑀤𑀺𑀝𑁆𑀞𑀧𑀤𑁂𑀳𑀻𑀢𑀺 𑀤𑀺𑀝𑁆𑀞𑀧𑀤𑁂 𑀲𑁄𑀢𑀸𑀧𑀦𑁆𑀦𑁂 𑀅𑀭𑀺𑀬𑀲𑀸𑀯𑀓𑁂 𑀞𑀧𑁂𑀢𑁆𑀯𑀸 𑀓𑁄 𑀅𑀜𑁆𑀜𑁄 𑀲𑀤𑁆𑀤𑀳𑀺𑀲𑁆𑀲𑀢𑀻𑀢𑀺 𑀅𑀢𑁆𑀣𑁄.

𑀯𑀻𑀢𑀭𑀸𑀕𑁄𑀢𑀺 𑀯𑀺𑀓𑁆𑀔𑀫𑁆𑀪𑀦𑀯𑀲𑁂𑀦 𑀯𑀻𑀢𑀭𑀸𑀕𑁄. 𑀲𑀸𑀲𑀦𑀁 𑀆𑀚𑀸𑀦𑀺𑀁𑀲𑀽𑀢𑀺 𑀅𑀦𑀼𑀲𑀺𑀝𑁆𑀞𑀺𑀁 𑀚𑀸𑀦𑀺𑀁𑀲𑀼, 𑀩𑁆𑀭𑀳𑁆𑀫𑀮𑁄𑀓𑀲𑀳𑀩𑁆𑀬𑀢𑀸𑀬 𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑀺𑀁𑀲𑀼. 𑀲𑀫𑀲𑀫𑀕𑀢𑀺𑀬𑁄𑀢𑀺 𑀤𑀼𑀢𑀺𑀬𑀢𑁆𑀢𑀪𑀸𑀯𑁂 𑀲𑀩𑁆𑀩𑀸𑀓𑀸𑀭𑁂𑀦 𑀲𑀫𑀕𑀢𑀺𑀓𑁄 𑀏𑀓𑀕𑀢𑀺𑀓𑁄. 𑀉𑀢𑁆𑀢𑀭𑀺 𑀫𑁂𑀢𑁆𑀢𑀁 𑀪𑀸𑀯𑁂𑀬𑁆𑀬𑀦𑁆𑀢𑀺 𑀧𑀞𑀫𑀚𑁆𑀛𑀸𑀦𑀢𑁄 𑀉𑀢𑁆𑀢𑀭𑀺 𑀬𑀸𑀯 𑀢𑀺𑀓𑀘𑀢𑀼𑀓𑁆𑀓𑀚𑁆𑀛𑀸𑀦𑀸 𑀧𑀡𑀻𑀢𑀁 𑀓𑀢𑁆𑀯𑀸 𑀫𑁂𑀢𑁆𑀢𑀁 𑀪𑀸𑀯𑁂𑀬𑁆𑀬𑀁. 𑀘𑀓𑁆𑀔𑀼𑀫𑀸𑀢𑀺 𑀧𑀜𑁆𑀘𑀳𑀺 𑀘𑀓𑁆𑀔𑀽𑀳𑀺 𑀘𑀓𑁆𑀔𑀼𑀫𑀸. 𑀧𑀭𑀺𑀦𑀺𑀩𑁆𑀩𑀼𑀢𑁄𑀢𑀺 𑀩𑁄𑀥𑀺𑀧𑀮𑁆𑀮𑀗𑁆𑀓𑁂𑀬𑁂𑀯 𑀓𑀺𑀮𑁂𑀲𑀧𑀭𑀺𑀦𑀺𑀩𑁆𑀩𑀸𑀦𑁂𑀦 𑀧𑀭𑀺𑀦𑀺𑀩𑁆𑀩𑀼𑀢𑁄. 𑀏𑀯𑀁 𑀅𑀦𑀺𑀘𑁆𑀘𑀮𑀓𑁆𑀔𑀡𑀁 𑀤𑀻𑀧𑁂𑀢𑁆𑀯𑀸 𑀲𑀢𑁆𑀣𑀭𑀺 𑀤𑁂𑀲𑀦𑀁 𑀯𑀺𑀦𑀺𑀯𑀝𑁆𑀝𑁂𑀦𑁆𑀢𑁂 𑀧𑀜𑁆𑀘𑀲𑀢𑀸𑀧𑀺 𑀢𑁂 𑀅𑀦𑀺𑀘𑁆𑀘𑀓𑀫𑁆𑀫𑀝𑁆𑀞𑀸𑀦𑀺𑀓𑀸 𑀪𑀺𑀓𑁆𑀔𑀽 𑀤𑁂𑀲𑀦𑀸𑀦𑀼𑀲𑀸𑀭𑁂𑀦 𑀜𑀸𑀡𑀁 𑀧𑁂𑀲𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑀸𑀲𑀦𑁂𑀲𑀼𑀬𑁂𑀯 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀁𑀲𑀽𑀢𑀺.

𑁩. 𑀦𑀕𑀭𑁄𑀧𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁬𑁭. 𑀢𑀢𑀺𑀬𑁂 𑀬𑀢𑁄𑀢𑀺 𑀬𑀤𑀸. 𑀧𑀘𑁆𑀘𑀦𑁆𑀢𑀺𑀫𑀦𑁆𑀢𑀺 𑀭𑀝𑁆𑀞𑀧𑀭𑀺𑀬𑀦𑁆𑀢𑁂 𑀭𑀝𑁆𑀞𑀸𑀯𑀲𑀸𑀦𑁂 𑀦𑀺𑀯𑀺𑀝𑁆𑀞𑀁. 𑀫𑀚𑁆𑀛𑀺𑀫𑀤𑁂𑀲𑀦𑀕𑀭𑀲𑁆𑀲 𑀧𑀦 𑀭𑀓𑁆𑀔𑀸𑀓𑀺𑀘𑁆𑀘𑀁 𑀦𑀢𑁆𑀣𑀺, 𑀢𑁂𑀦 𑀢𑀁 𑀦 𑀕𑀳𑀺𑀢𑀁. 𑀦𑀕𑀭𑀧𑀭𑀺𑀓𑁆𑀔𑀸𑀭𑁂𑀳𑀺 𑀲𑀼𑀧𑀭𑀺𑀓𑁆𑀔𑀢𑀦𑁆𑀢𑀺 𑀦𑀕𑀭𑀸𑀮𑀗𑁆𑀓𑀸𑀭𑁂𑀳𑀺 𑀅𑀮𑀗𑁆𑀓𑀢𑀁. 𑀅𑀓𑀭𑀡𑀻𑀬𑀦𑁆𑀢𑀺 𑀅𑀓𑀢𑁆𑀢𑀩𑁆𑀩𑀁 𑀅𑀚𑀺𑀦𑀺𑀬𑀁. 𑀕𑀫𑁆𑀪𑀻𑀭𑀦𑁂𑀫𑀸𑀢𑀺 𑀕𑀫𑁆𑀪𑀻𑀭𑀆𑀯𑀸𑀝𑀸. 𑀲𑀼𑀦𑀺𑀔𑀸𑀢𑀸𑀢𑀺 𑀲𑀼𑀝𑁆𑀞𑀼 𑀲𑀦𑁆𑀦𑀺𑀲𑀻𑀤𑀸𑀧𑀺𑀢𑀸. 𑀢𑀁 𑀧𑀦𑁂𑀢𑀁 𑀏𑀲𑀺𑀓𑀸𑀣𑀫𑁆𑀪𑀁 𑀇𑀝𑁆𑀞𑀓𑀸𑀳𑀺 𑀯𑀸 𑀓𑀭𑁄𑀦𑁆𑀢𑀺 𑀲𑀺𑀮𑀸𑀳𑀺 𑀯𑀸 𑀔𑀤𑀺𑀭𑀸𑀤𑀻𑀳𑀺 𑀯𑀸 𑀲𑀸𑀭𑀭𑀼𑀓𑁆𑀔𑁂𑀳𑀺. 𑀢𑀁 𑀦𑀕𑀭𑀕𑀼𑀢𑁆𑀢𑀢𑁆𑀣𑀸𑀬 𑀓𑀭𑁄𑀦𑁆𑀢𑀸 𑀩𑀳𑀺𑀦𑀕𑀭𑁂 𑀓𑀭𑁄𑀦𑁆𑀢𑀺, 𑀅𑀮𑀗𑁆𑀓𑀸𑀭𑀢𑁆𑀣𑀸𑀬 𑀓𑀭𑁄𑀦𑁆𑀢𑀸 𑀅𑀦𑁆𑀢𑁄𑀦𑀕𑀭𑁂. 𑀢𑀁 𑀇𑀝𑁆𑀞𑀓𑀸𑀫𑀬𑀁 𑀓𑀭𑁄𑀦𑁆𑀢𑀸 𑀫𑀳𑀦𑁆𑀢𑀁 𑀆𑀯𑀸𑀝𑀁 𑀓𑀢𑁆𑀯𑀸 𑀘𑀬𑀁 𑀘𑀺𑀦𑀺𑀢𑁆𑀯𑀸 𑀉𑀧𑀭𑀺 𑀅𑀝𑁆𑀞𑀁𑀲𑀁 𑀓𑀢𑁆𑀯𑀸 𑀲𑀼𑀥𑀸𑀬 𑀮𑀺𑀫𑁆𑀧𑀦𑁆𑀢𑀺. 𑀬𑀤𑀸 𑀳𑀢𑁆𑀣𑀺𑀦𑀸 𑀤𑀦𑁆𑀢𑁂𑀳𑀺 𑀅𑀪𑀺𑀳𑀢𑁄 𑀦 𑀘𑀮𑀢𑀺, 𑀢𑀤𑀸 𑀲𑀼𑀮𑀺𑀢𑁆𑀢𑁄 𑀦𑀸𑀫 𑀳𑁄𑀢𑀺. 𑀲𑀺𑀮𑀸𑀣𑀫𑁆𑀪𑀸𑀤𑀬𑁄𑀧𑀺 𑀅𑀝𑁆𑀞𑀁𑀲𑀸 𑀏𑀯 𑀳𑁄𑀦𑁆𑀢𑀺. 𑀢𑁂 𑀲𑀘𑁂 𑀅𑀝𑁆𑀞 𑀭𑀢𑀦𑀸 𑀳𑁄𑀦𑁆𑀢𑀺, 𑀘𑀢𑀼𑀭𑀢𑀦𑀫𑀢𑁆𑀢𑀁 𑀆𑀯𑀸𑀝𑁂 𑀧𑀯𑀺𑀲𑀢𑀺, 𑀘𑀢𑀼𑀭𑀢𑀦𑀫𑀢𑁆𑀢𑀁 𑀉𑀧𑀭𑀺 𑀳𑁄𑀢𑀺. 𑀲𑁄𑀴𑀲𑀭𑀢𑀦𑀯𑀻𑀲𑀢𑀺𑀭𑀢𑀦𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀲𑀩𑁆𑀩𑁂𑀲𑀜𑁆𑀳𑀺 𑀉𑀧𑀟𑁆𑀠𑀁 𑀳𑁂𑀝𑁆𑀞𑀸 𑀳𑁄𑀢𑀺, 𑀉𑀧𑀟𑁆𑀠𑀁 𑀉𑀧𑀭𑀺. 𑀢𑁂 𑀕𑁄𑀫𑀼𑀢𑁆𑀢𑀯𑀗𑁆𑀓𑀸 𑀳𑁄𑀦𑁆𑀢𑀺, 𑀢𑁂𑀦 𑀢𑁂𑀲𑀁 𑀅𑀦𑁆𑀢𑀭𑁂 𑀧𑀤𑀭𑀫𑀬𑀁 𑀓𑀢𑁆𑀯𑀸 𑀓𑀫𑁆𑀫𑀁 𑀓𑀸𑀢𑀼𑀁 𑀲𑀓𑁆𑀓𑀸 𑀳𑁄𑀢𑀺, 𑀢𑁂 𑀧𑀦 𑀓𑀢𑀘𑀺𑀢𑁆𑀢𑀓𑀫𑁆𑀫𑀸 𑀧𑀕𑁆𑀕𑀳𑀺𑀢𑀤𑁆𑀥𑀚𑀸𑀯 𑀳𑁄𑀦𑁆𑀢𑀺.

𑀧𑀭𑀺𑀔𑀸𑀢𑀺 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀞𑀺𑀢𑀫𑀸𑀢𑀺𑀓𑀸. 𑀅𑀦𑀼𑀧𑀭𑀺𑀬𑀸𑀬𑀧𑀣𑁄𑀢𑀺 𑀅𑀦𑁆𑀢𑁄 𑀧𑀸𑀓𑀸𑀭𑀲𑁆𑀲 𑀧𑀸𑀓𑀸𑀭𑁂𑀦 𑀲𑀤𑁆𑀥𑀺𑀁 𑀕𑀢𑁄 𑀫𑀳𑀸𑀧𑀣𑁄, 𑀬𑀢𑁆𑀣 𑀞𑀺𑀢𑀸 𑀩𑀳𑀺𑀧𑀸𑀓𑀸𑀭𑁂 𑀞𑀺𑀢𑁂𑀳𑀺 𑀲𑀤𑁆𑀥𑀺𑀁 𑀬𑀼𑀚𑁆𑀛𑀦𑁆𑀢𑀺. 𑀲𑀮𑀸𑀓𑀦𑁆𑀢𑀺 𑀲𑀭𑀢𑁄𑀫𑀭𑀸𑀤𑀺𑀦𑀺𑀲𑁆𑀲𑀕𑁆𑀕𑀺𑀬𑀸𑀯𑀼𑀥𑀁. 𑀚𑁂𑀯𑀦𑀺𑀓𑀦𑁆𑀢𑀺 𑀏𑀓𑀢𑁄𑀥𑀸𑀭𑀸𑀤𑀺𑀲𑁂𑀲𑀸𑀯𑀼𑀥𑀁.

𑀳𑀢𑁆𑀣𑀸𑀭𑁄𑀳𑀸𑀢𑀺 𑀲𑀩𑁆𑀩𑁂𑀧𑀺 𑀳𑀢𑁆𑀣𑀺𑀆𑀘𑀭𑀺𑀬𑀳𑀢𑁆𑀣𑀺𑀯𑁂𑀚𑁆𑀚𑀳𑀢𑁆𑀣𑀺𑀩𑀦𑁆𑀥𑀸𑀤𑀬𑁄. 𑀅𑀲𑁆𑀲𑀸𑀭𑁄𑀳𑀸𑀢𑀺 𑀲𑀩𑁆𑀩𑁂𑀧𑀺 𑀅𑀲𑁆𑀲𑀸𑀘𑀭𑀺𑀬𑀅𑀲𑁆𑀲𑀯𑁂𑀚𑁆𑀚𑀅𑀲𑁆𑀲𑀩𑀦𑁆𑀥𑀸𑀤𑀬𑁄. 𑀭𑀣𑀺𑀓𑀸𑀢𑀺 𑀲𑀩𑁆𑀩𑁂𑀧𑀺 𑀭𑀣𑀸𑀘𑀭𑀺𑀬𑀭𑀣𑀬𑁄𑀥𑀭𑀣𑀭𑀓𑁆𑀔𑀸𑀤𑀬𑁄. 𑀥𑀦𑀼𑀕𑁆𑀕𑀳𑀸𑀢𑀺 𑀇𑀲𑁆𑀲𑀸𑀲𑀸. 𑀘𑁂𑀮𑀓𑀸𑀢𑀺 𑀬𑁂 𑀬𑀼𑀤𑁆𑀥𑁂 𑀚𑀬𑀤𑁆𑀥𑀚𑀁 𑀕𑀳𑁂𑀢𑁆𑀯𑀸 𑀧𑀼𑀭𑀢𑁄 𑀕𑀘𑁆𑀙𑀦𑁆𑀢𑀺. 𑀘𑀮𑀓𑀸𑀢𑀺 ‘‘𑀇𑀥 𑀭𑀜𑁆𑀜𑁄 𑀞𑀸𑀦𑀁 𑀳𑁄𑀢𑀼, 𑀇𑀥 𑀅𑀲𑀼𑀓𑀫𑀳𑀸𑀫𑀢𑁆𑀢𑀲𑁆𑀲𑀸’’𑀢𑀺 𑀏𑀯𑀁 𑀲𑁂𑀦𑀸𑀩𑁆𑀬𑀽𑀳𑀓𑀸𑀭𑀓𑀸. 𑀧𑀺𑀡𑁆𑀟𑀤𑀸𑀬𑀺𑀓𑀸𑀢𑀺 𑀲𑀸𑀳𑀲𑀺𑀓𑀫𑀳𑀸𑀬𑁄𑀥𑀸. 𑀢𑁂 𑀓𑀺𑀭 𑀧𑀭𑀲𑁂𑀦𑀁 𑀧𑀯𑀺𑀲𑀺𑀢𑁆𑀯𑀸 𑀧𑀺𑀡𑁆𑀟𑀧𑀺𑀡𑁆𑀟𑀫𑀺𑀯 𑀙𑁂𑀢𑁆𑀯𑀸 𑀙𑁂𑀢𑁆𑀯𑀸 𑀤𑀬𑀦𑁆𑀢𑀺, 𑀉𑀧𑁆𑀧𑀢𑀺𑀢𑁆𑀯𑀸 𑀦𑀺𑀕𑁆𑀕𑀘𑁆𑀙𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀬𑁂 𑀯𑀸 𑀲𑀗𑁆𑀕𑀸𑀫𑀫𑀚𑁆𑀛𑁂 𑀬𑁄𑀥𑀸𑀦𑀁 𑀪𑀢𑁆𑀢𑀧𑀸𑀦𑀻𑀬𑀁 𑀕𑀳𑁂𑀢𑁆𑀯𑀸 𑀧𑀯𑀺𑀲𑀦𑁆𑀢𑀺, 𑀢𑁂𑀲𑀫𑁆𑀧𑁂𑀢𑀁 𑀦𑀸𑀫𑀁. 𑀉𑀕𑁆𑀕𑀸 𑀭𑀸𑀚𑀧𑀼𑀢𑁆𑀢𑀸𑀢𑀺 𑀉𑀕𑁆𑀕𑀢𑀼𑀕𑁆𑀕𑀢𑀸 𑀲𑀗𑁆𑀕𑀸𑀫𑀸𑀯𑀘𑀭𑀸 𑀭𑀸𑀚𑀧𑀼𑀢𑁆𑀢𑀸. 𑀧𑀓𑁆𑀔𑀦𑁆𑀤𑀺𑀦𑁄𑀢𑀺 𑀬𑁂 ‘‘𑀓𑀲𑁆𑀲 𑀲𑀻𑀲𑀁 𑀯𑀸 𑀆𑀯𑀼𑀥𑀁 𑀯𑀸 𑀆𑀳𑀭𑀸𑀫𑀸’’𑀢𑀺 𑀯𑀢𑁆𑀯𑀸 ‘‘𑀅𑀲𑀼𑀓𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀸 𑀲𑀗𑁆𑀕𑀸𑀫𑀁 𑀧𑀓𑁆𑀔𑀦𑁆𑀤𑀺𑀢𑁆𑀯𑀸 𑀢𑀤𑁂𑀯 𑀆𑀳𑀭𑀦𑁆𑀢𑀺, 𑀇𑀫𑁂 𑀧𑀓𑁆𑀔𑀦𑁆𑀤𑀦𑁆𑀢𑀻𑀢𑀺 𑀧𑀓𑁆𑀔𑀦𑁆𑀤𑀺𑀦𑁄. 𑀫𑀳𑀸𑀦𑀸𑀕𑀸 𑀯𑀺𑀬 𑀫𑀳𑀸𑀦𑀸𑀕𑀸, 𑀳𑀢𑁆𑀣𑀺𑀆𑀤𑀻𑀲𑀼𑀧𑀺 𑀅𑀪𑀺𑀫𑀼𑀔𑀁 𑀆𑀕𑀘𑁆𑀙𑀦𑁆𑀢𑁂𑀲𑀼 𑀅𑀦𑀺𑀯𑀢𑁆𑀢𑀺𑀬𑀬𑁄𑀥𑀸𑀦𑀁 𑀏𑀢𑀁 𑀅𑀥𑀺𑀯𑀘𑀦𑀁. 𑀲𑀽𑀭𑀸𑀢𑀺 𑀏𑀓𑀲𑀽𑀭𑀸, 𑀬𑁂 𑀲𑀚𑀸𑀮𑀺𑀓𑀸𑀧𑀺 𑀲𑀯𑀫𑁆𑀫𑀺𑀓𑀸𑀧𑀺 𑀲𑀫𑀼𑀤𑁆𑀤𑀁 𑀢𑀭𑀺𑀢𑀼𑀁 𑀲𑀓𑁆𑀓𑁄𑀦𑁆𑀢𑀺. 𑀘𑀫𑁆𑀫𑀬𑁄𑀥𑀺𑀦𑁄𑀢𑀺 𑀬𑁂 𑀘𑀫𑁆𑀫𑀓𑀜𑁆𑀘𑀼𑀓𑀁 𑀯𑀸 𑀧𑀯𑀺𑀲𑀺𑀢𑁆𑀯𑀸 𑀲𑀭𑀧𑀭𑀺𑀢𑁆𑀢𑀸𑀡𑀘𑀫𑁆𑀫𑀁 𑀯𑀸 𑀕𑀳𑁂𑀢𑁆𑀯𑀸 𑀬𑀼𑀚𑁆𑀛𑀦𑁆𑀢𑀺. 𑀤𑀸𑀲𑀓𑀧𑀼𑀢𑁆𑀢𑀸𑀢𑀺 𑀩𑀮𑀯𑀲𑀺𑀦𑁂𑀳𑀸 𑀖𑀭𑀤𑀸𑀲𑀬𑁄𑀥𑀸. 𑀤𑁄𑀯𑀸𑀭𑀺𑀓𑁄𑀢𑀺 𑀤𑁆𑀯𑀸𑀭𑀧𑀸𑀮𑀓𑁄. 𑀯𑀸𑀲𑀦𑀮𑁂𑀧𑀦𑀲𑀫𑁆𑀧𑀦𑁆𑀦𑁄𑀢𑀺 𑀯𑀸𑀲𑀦𑁂𑀦 𑀲𑀩𑁆𑀩𑀯𑀺𑀯𑀭𑀧𑀝𑀺𑀘𑁆𑀙𑀸𑀤𑀦𑁂𑀦 𑀲𑀼𑀥𑀸𑀮𑁂𑀧𑁂𑀦 𑀲𑀫𑁆𑀧𑀦𑁆𑀦𑁄. 𑀩𑀳𑀺 𑀯𑀸 𑀔𑀸𑀡𑀼𑀧𑀸𑀓𑀸𑀭𑀲𑀗𑁆𑀔𑀸𑀢𑁂𑀦 𑀯𑀸𑀲𑀦𑁂𑀦 𑀖𑀦𑀫𑀝𑁆𑀞𑁂𑀦 𑀘 𑀲𑀼𑀥𑀸𑀮𑁂𑀧𑁂𑀦 𑀲𑀫𑁆𑀧𑀦𑁆𑀦𑁄 𑀧𑀼𑀡𑁆𑀡𑀖𑀝𑀧𑀦𑁆𑀢𑀺𑀁 𑀤𑀲𑁆𑀲𑁂𑀢𑁆𑀯𑀸 𑀓𑀢𑀘𑀺𑀢𑁆𑀢𑀓𑀫𑁆𑀫𑀧𑀕𑁆𑀕𑀳𑀺𑀢𑀤𑁆𑀥𑀚𑁄. 𑀢𑀺𑀡𑀓𑀝𑁆𑀞𑁄𑀤𑀓𑀦𑁆𑀢𑀺 𑀳𑀢𑁆𑀣𑀺𑀅𑀲𑁆𑀲𑀸𑀤𑀻𑀦𑀁 𑀖𑀸𑀲𑀢𑁆𑀣𑀸𑀬 𑀕𑁂𑀳𑀸𑀦𑀜𑁆𑀘 𑀙𑀸𑀤𑀦𑀢𑁆𑀣𑀸𑀬 𑀆𑀳𑀭𑀺𑀢𑁆𑀯𑀸 𑀩𑀳𑀽𑀲𑀼 𑀞𑀸𑀦𑁂𑀲𑀼 𑀞𑀧𑀺𑀢𑀢𑀺𑀡𑀜𑁆𑀘, 𑀕𑁂𑀳𑀓𑀭𑀡𑀧𑀘𑀦𑀸𑀤𑀻𑀦𑀁 𑀅𑀢𑁆𑀣𑀸𑀬 𑀆𑀳𑀭𑀺𑀢𑁆𑀯𑀸 𑀞𑀧𑀺𑀢𑀓𑀝𑁆𑀞𑀜𑁆𑀘, 𑀬𑀦𑁆𑀢𑁂𑀳𑀺 𑀧𑀯𑁂𑀲𑁂𑀢𑁆𑀯𑀸 𑀧𑁄𑀓𑁆𑀔𑀭𑀡𑀻𑀲𑀼 𑀞𑀧𑀺𑀢𑀉𑀤𑀓𑀜𑁆𑀘. 𑀲𑀦𑁆𑀦𑀺𑀘𑀺𑀢𑀁 𑀳𑁄𑀢𑀻𑀢𑀺 𑀧𑀝𑀺𑀓𑀘𑁆𑀘𑁂𑀯 𑀅𑀦𑁂𑀓𑁂𑀲𑀼 𑀞𑀸𑀦𑁂𑀲𑀼 𑀲𑀼𑀝𑁆𑀞𑀼 𑀦𑀺𑀘𑀺𑀢𑀁 𑀳𑁄𑀢𑀺. 𑀅𑀩𑁆𑀪𑀦𑁆𑀢𑀭𑀸𑀦𑀁 𑀭𑀢𑀺𑀬𑀸𑀢𑀺 𑀅𑀦𑁆𑀢𑁄𑀦𑀕𑀭𑀯𑀸𑀲𑀻𑀦𑀁 𑀭𑀢𑀺𑀅𑀢𑁆𑀣𑀸𑀬. 𑀅𑀧𑀭𑀺𑀢𑀲𑁆𑀲𑀸𑀬𑀸𑀢𑀺 𑀢𑀸𑀲𑀁 𑀅𑀦𑀸𑀧𑀚𑁆𑀚𑀦𑀢𑁆𑀣𑀸𑀬. 𑀲𑀸𑀮𑀺𑀬𑀯𑀓𑀦𑁆𑀢𑀺 𑀦𑀸𑀦𑀧𑁆𑀧𑀓𑀸𑀭𑀸 𑀲𑀸𑀮𑀺𑀬𑁄 𑀘𑁂𑀯 𑀬𑀯𑀸 𑀘. 𑀢𑀺𑀮𑀫𑀼𑀕𑁆𑀕𑀫𑀸𑀲𑀸𑀧𑀭𑀡𑁆𑀡𑀦𑁆𑀢𑀺 𑀢𑀺𑀮𑀫𑀼𑀕𑁆𑀕𑀫𑀸𑀲𑀸 𑀘 𑀲𑁂𑀲𑀸𑀧𑀭𑀡𑁆𑀡𑀜𑁆𑀘.

𑀇𑀤𑀸𑀦𑀺 𑀬𑀲𑁆𑀫𑀸 𑀢𑀣𑀸𑀕𑀢𑀲𑁆𑀲 𑀦𑀕𑀭𑁂 𑀓𑀫𑁆𑀫𑀁 𑀦𑀸𑀫 𑀦𑀢𑁆𑀣𑀺, 𑀦𑀕𑀭𑀲𑀤𑀺𑀲𑀁 𑀧𑀦 𑀅𑀭𑀺𑀬𑀲𑀸𑀯𑀓𑀁, 𑀦𑀕𑀭𑀧𑀭𑀺𑀓𑁆𑀔𑀸𑀭𑀲𑀤𑀺𑀲𑁂 𑀘 𑀲𑀢𑁆𑀢 𑀥𑀫𑁆𑀫𑁂, 𑀘𑀢𑀼𑀆𑀳𑀸𑀭𑀲𑀤𑀺𑀲𑀸𑀦𑀺 𑀘 𑀘𑀢𑁆𑀢𑀸𑀭𑀺 𑀛𑀸𑀦𑀸𑀦𑀺 𑀤𑀲𑁆𑀲𑁂𑀢𑁆𑀯𑀸 𑀏𑀓𑀸𑀤𑀲𑀲𑀼 𑀞𑀸𑀦𑁂𑀲𑀼 𑀅𑀭𑀳𑀢𑁆𑀢𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀤𑁂𑀲𑀦𑀁 𑀯𑀺𑀦𑀺𑀯𑀝𑁆𑀝𑁂𑀲𑁆𑀲𑀸𑀫𑀻𑀢𑀺 𑀅𑀬𑀁 𑀉𑀧𑀫𑀸 𑀆𑀪𑀢𑀸. 𑀢𑀲𑁆𑀫𑀸 𑀢𑀁 𑀤𑁂𑀲𑀦𑀁 𑀧𑀓𑀸𑀲𑁂𑀢𑀼𑀁 𑀇𑀤𑀁 𑀏𑀯𑀫𑁂𑀯 𑀔𑁄𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀲𑀤𑁆𑀥𑀫𑁆𑀫𑁂𑀳𑀻𑀢𑀺 𑀲𑀼𑀥𑀫𑁆𑀫𑁂𑀳𑀺. 𑀲𑀤𑁆𑀥𑁄𑀢𑀺 𑀑𑀓𑀧𑁆𑀧𑀦𑀲𑀤𑁆𑀥𑀸𑀬 𑀘𑁂𑀯 𑀧𑀘𑁆𑀘𑀓𑁆𑀔𑀲𑀤𑁆𑀥𑀸𑀬 𑀘 𑀲𑀫𑀦𑁆𑀦𑀸𑀕𑀢𑁄. 𑀢𑀢𑁆𑀣 𑀤𑀸𑀦𑀲𑀻𑀮𑀸𑀤𑀻𑀦𑀁 𑀨𑀮𑀁 𑀲𑀤𑁆𑀤𑀳𑀺𑀢𑁆𑀯𑀸 𑀤𑀸𑀦𑀸𑀤𑀺𑀧𑀼𑀜𑁆𑀜𑀓𑀭𑀡𑁂 𑀲𑀤𑁆𑀥𑀸 𑀑𑀓𑀧𑁆𑀧𑀦𑀲𑀤𑁆𑀥𑀸 𑀦𑀸𑀫. 𑀫𑀕𑁆𑀕𑁂𑀦 𑀆𑀕𑀢𑀲𑀤𑁆𑀥𑀸 𑀧𑀘𑁆𑀘𑀓𑁆𑀔𑀲𑀤𑁆𑀥𑀸 𑀦𑀸𑀫. 𑀧𑀲𑀸𑀤𑀲𑀤𑁆𑀥𑀸𑀢𑀺𑀧𑀺 𑀏𑀲𑀸 𑀏𑀯. 𑀢𑀲𑁆𑀲𑀸 𑀮𑀓𑁆𑀔𑀡𑀸𑀤𑀻𑀳𑀺 𑀯𑀺𑀪𑀸𑀕𑁄 𑀯𑁂𑀤𑀺𑀢𑀩𑁆𑀩𑁄.

‘‘𑀲𑀫𑁆𑀧𑀓𑁆𑀔𑀦𑁆𑀤𑀦𑀮𑀓𑁆𑀔𑀡𑀸 𑀘, 𑀫𑀳𑀸𑀭𑀸𑀚, 𑀲𑀤𑁆𑀥𑀸 𑀲𑀫𑁆𑀧𑀲𑀸𑀤𑀦𑀮𑀓𑁆𑀔𑀡𑀸 𑀘𑀸’’𑀢𑀺 (𑀫𑀺. 𑀧. 𑁨.𑁧.𑁧𑁦) 𑀳𑀺 𑀯𑀘𑀦𑀢𑁄 𑀇𑀤𑀁 𑀲𑀤𑁆𑀥𑀸𑀬 𑀮𑀓𑁆𑀔𑀡𑀁 𑀦𑀸𑀫. ‘‘𑀢𑀻𑀳𑀺, 𑀪𑀺𑀓𑁆𑀔𑀯𑁂, 𑀞𑀸𑀦𑁂𑀳𑀺 𑀲𑀤𑁆𑀥𑁄 𑀧𑀲𑀦𑁆𑀦𑁄 𑀯𑁂𑀤𑀺𑀢𑀩𑁆𑀩𑁄. 𑀓𑀢𑀫𑁂𑀳𑀺 𑀢𑀻𑀳𑀺? 𑀲𑀻𑀮𑀯𑀦𑁆𑀢𑀸𑀦𑀁 𑀤𑀲𑁆𑀲𑀦𑀓𑀸𑀫𑁄 𑀳𑁄𑀢𑀻’’𑀢𑀺𑀆𑀤𑀺𑀦𑀸 (𑀅. 𑀦𑀺. 𑁩.𑁪𑁨) 𑀦𑀬𑁂𑀦 𑀯𑀼𑀢𑁆𑀢𑀁 𑀧𑀦 𑀲𑀤𑁆𑀥𑀸𑀬 𑀦𑀺𑀫𑀺𑀢𑁆𑀢𑀁 𑀦𑀸𑀫. ‘‘𑀓𑁄 𑀘𑀸𑀳𑀸𑀭𑁄 𑀲𑀤𑁆𑀥𑀸𑀬, 𑀲𑀤𑁆𑀥𑀫𑁆𑀫𑀲𑁆𑀲𑀯𑀦𑀦𑁆𑀢𑀺𑀲𑁆𑀲 𑀯𑀘𑀦𑀻𑀬’’𑀦𑁆𑀢𑀺 (𑀅. 𑀦𑀺. 𑁧𑁦.𑁬𑁧) 𑀅𑀬𑀁 𑀧𑀦𑀲𑁆𑀲𑀸 𑀆𑀳𑀸𑀭𑁄 𑀦𑀸𑀫. ‘‘𑀲𑀤𑁆𑀥𑀸𑀧𑀩𑁆𑀩𑀚𑀺𑀢𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀅𑀬𑀁 𑀅𑀦𑀼𑀥𑀫𑁆𑀫𑁄 𑀳𑁄𑀢𑀺, 𑀬𑀁 𑀭𑀽𑀧𑁂 𑀦𑀺𑀩𑁆𑀩𑀺𑀤𑀸𑀩𑀳𑀼𑀮𑁄 𑀯𑀺𑀳𑀭𑀺𑀲𑁆𑀲𑀢𑀻’’𑀢𑀺 𑀅𑀬𑀫𑀲𑁆𑀲 𑀅𑀦𑀼𑀥𑀫𑁆𑀫𑁄 𑀦𑀸𑀫. ‘‘𑀲𑀤𑁆𑀥𑀸 𑀩𑀦𑁆𑀥𑀢𑀺 𑀧𑀸𑀣𑁂𑀬𑁆𑀬𑀁, 𑀲𑀺𑀭𑀻 𑀪𑁄𑀕𑀸𑀦𑀫𑀸𑀲𑀬𑁄’’ (𑀲𑀁. 𑀦𑀺. 𑁧.𑁭𑁯). ‘‘𑀲𑀤𑁆𑀥𑀸 𑀤𑀼𑀢𑀺𑀬𑀸 𑀧𑀼𑀭𑀺𑀲𑀲𑁆𑀲 𑀳𑁄𑀢𑀺’’ (𑀲𑀁. 𑀦𑀺. 𑁧.𑁩𑁬). ‘‘𑀲𑀤𑁆𑀥𑀸𑀬 𑀢𑀭𑀢𑀺 𑀑𑀖𑀁’’ (𑀲𑀁. 𑀦𑀺. 𑁧.𑁨𑁪𑁬). ‘‘𑀲𑀤𑁆𑀥𑀸 𑀩𑀻𑀚𑀁 𑀢𑀧𑁄 𑀯𑀼𑀝𑁆𑀞𑀺’’ (𑀲𑀼. 𑀦𑀺. 𑁭𑁭; 𑀲𑀁. 𑀦𑀺. 𑁧.𑁧𑁯𑁭). ‘‘𑀲𑀤𑁆𑀥𑀸𑀳𑀢𑁆𑀣𑁄 𑀫𑀳𑀸𑀦𑀸𑀕𑁄. 𑀉𑀧𑁂𑀔𑀸𑀲𑁂𑀢𑀤𑀦𑁆𑀢𑀯𑀸’’𑀢𑀺𑀆𑀤𑀻𑀲𑀼 𑀧𑀦 𑀲𑀼𑀢𑁆𑀢𑁂𑀲𑀼 𑀏𑀢𑀺𑀲𑁆𑀲𑀸 𑀩𑀤𑁆𑀥𑀪𑀢𑁆𑀢𑀧𑀼𑀝𑀸𑀤𑀺𑀲𑀭𑀺𑀓𑁆𑀔𑀢𑀸𑀬 𑀅𑀦𑁂𑀓𑀲𑀭𑀲𑀢𑀸 𑀪𑀕𑀯𑀢𑀸 𑀧𑀓𑀸𑀲𑀺𑀢𑀸. 𑀇𑀫𑀲𑁆𑀫𑀺𑀁 𑀧𑀦 𑀦𑀕𑀭𑁄𑀧𑀫𑀲𑀼𑀢𑁆𑀢𑀦𑁆𑀢𑁂 𑀏𑀲𑀸 𑀅𑀘𑀮𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀢𑀸𑀬 𑀏𑀲𑀺𑀓𑀸𑀣𑀫𑁆𑀪𑀲𑀤𑀺𑀲𑀸 𑀓𑀢𑁆𑀯𑀸 𑀤𑀲𑁆𑀲𑀺𑀢𑀸.

𑀲𑀤𑁆𑀥𑁂𑀲𑀺𑀓𑁄𑀢𑀺 𑀲𑀤𑁆𑀥𑀁 𑀏𑀲𑀺𑀓𑀸𑀣𑀫𑁆𑀪𑀁 𑀓𑀢𑁆𑀯𑀸 𑀅𑀭𑀺𑀬𑀲𑀸𑀯𑀓𑁄 𑀅𑀓𑀼𑀲𑀮𑀁 𑀧𑀚𑀳𑀢𑀻𑀢𑀺 𑀇𑀫𑀺𑀦𑀸 𑀦𑀬𑁂𑀦 𑀲𑀩𑁆𑀩𑀧𑀤𑁂𑀲𑀼 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸. 𑀅𑀧𑀺𑀘𑁂𑀢𑁆𑀣 𑀳𑀺𑀭𑁄𑀢𑁆𑀢𑀧𑁆𑀧𑁂𑀳𑀺 𑀢𑀻𑀲𑀼 𑀤𑁆𑀯𑀸𑀭𑁂𑀲𑀼 𑀲𑀁𑀯𑀭𑁄 𑀲𑀫𑁆𑀧𑀚𑁆𑀚𑀢𑀺, 𑀲𑁄 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀁 𑀳𑁄𑀢𑀺. 𑀇𑀢𑀺 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀏𑀓𑀸𑀤𑀲𑀲𑀼 𑀞𑀸𑀦𑁂𑀲𑀼 𑀅𑀭𑀳𑀢𑁆𑀢𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀤𑁂𑀲𑀦𑀸𑀬 𑀓𑀽𑀝𑀁 𑀕𑀳𑀺𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑁪. 𑀥𑀫𑁆𑀫𑀜𑁆𑀜𑀽𑀲𑀼𑀢𑁆𑀢𑀯𑀡𑁆𑀡𑀦𑀸

𑁬𑁮. 𑀘𑀢𑀼𑀢𑁆𑀣𑁂 𑀓𑀸𑀮𑀁 𑀚𑀸𑀦𑀸𑀢𑀻𑀢𑀺 𑀬𑀼𑀢𑁆𑀢𑀧𑁆𑀧𑀢𑁆𑀢𑀓𑀸𑀮𑀁 𑀚𑀸𑀦𑀸𑀢𑀺. 𑀅𑀬𑀁 𑀓𑀸𑀮𑁄 𑀉𑀤𑁆𑀤𑁂𑀲𑀲𑁆𑀲𑀸𑀢𑀺 𑀅𑀬𑀁 𑀩𑀼𑀤𑁆𑀥𑀯𑀘𑀦𑀁 𑀉𑀕𑁆𑀕𑀡𑁆𑀳𑀦𑀓𑀸𑀮𑁄. 𑀧𑀭𑀺𑀧𑀼𑀘𑁆𑀙𑀸𑀬𑀸𑀢𑀺 𑀅𑀢𑁆𑀣𑀸𑀦𑀢𑁆𑀣𑀁 𑀓𑀸𑀭𑀡𑀸𑀓𑀸𑀭𑀡𑀁 𑀧𑀭𑀺𑀧𑀼𑀘𑁆𑀙𑀸𑀬. 𑀬𑁄𑀕𑀲𑁆𑀲𑀸𑀢𑀺 𑀬𑁄𑀕𑁂 𑀓𑀫𑁆𑀫𑀁 𑀧𑀓𑁆𑀔𑀺𑀧𑀦𑀲𑁆𑀲. 𑀧𑀝𑀺𑀲𑀮𑁆𑀮𑀸𑀦𑀲𑁆𑀲𑀸𑀢𑀺 𑀦𑀺𑀮𑀻𑀬𑀦𑀲𑁆𑀲 𑀏𑀓𑀻𑀪𑀸𑀯𑀲𑁆𑀲. 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑁆𑀧𑀝𑀺𑀧𑀦𑁆𑀦𑁄𑀢𑀺 𑀦𑀯𑀦𑁆𑀦𑀁 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀸𑀦𑀁 𑀅𑀦𑀼𑀭𑀽𑀧𑀥𑀫𑁆𑀫𑀁 𑀧𑀼𑀩𑁆𑀩𑀪𑀸𑀕𑀧𑀝𑀺𑀧𑀤𑀁 𑀧𑀝𑀺𑀧𑀦𑁆𑀦𑁄. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀧𑀼𑀕𑁆𑀕𑀮𑀧𑀭𑁄𑀧𑀭𑀜𑁆𑀜𑀽 𑀳𑁄𑀢𑀻𑀢𑀺 𑀏𑀯𑀁 𑀪𑀺𑀓𑁆𑀔𑀼 𑀧𑀼𑀕𑁆𑀕𑀮𑀸𑀦𑀁 𑀧𑀭𑁄𑀧𑀭𑀁 𑀢𑀺𑀓𑁆𑀔𑀫𑀼𑀤𑀼𑀪𑀸𑀯𑀁 𑀚𑀸𑀦𑀦𑀲𑀫𑀢𑁆𑀣𑁄 𑀦𑀸𑀫 𑀳𑁄𑀢𑀺.

𑁫. 𑀧𑀸𑀭𑀺𑀘𑁆𑀙𑀢𑁆𑀢𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁬𑁯. 𑀧𑀜𑁆𑀘𑀫𑁂 𑀧𑀦𑁆𑀦𑀧𑀮𑀸𑀲𑁄𑀢𑀺 𑀧𑀢𑀺𑀢𑀧𑀮𑀸𑀲𑁄. 𑀚𑀸𑀮𑀓𑀚𑀸𑀢𑁄𑀢𑀺 𑀲𑀜𑁆𑀚𑀸𑀢𑀧𑀢𑁆𑀢𑀧𑀼𑀧𑁆𑀨𑀚𑀸𑀮𑁄. 𑀢𑀲𑁆𑀲 𑀳𑀺 𑀧𑀢𑁆𑀢𑀚𑀸𑀮𑀜𑁆𑀘 𑀧𑀼𑀧𑁆𑀨𑀚𑀸𑀮𑀜𑁆𑀘 𑀲𑀳𑁂𑀯 𑀦𑀺𑀓𑁆𑀔𑀫𑀢𑀺. 𑀔𑀸𑀭𑀓𑀚𑀸𑀢𑁄𑀢𑀺 𑀧𑀸𑀝𑀺𑀬𑁂𑀓𑁆𑀓𑀁 𑀲𑀜𑁆𑀚𑀸𑀢𑁂𑀦 𑀲𑀼𑀯𑀺𑀪𑀢𑁆𑀢𑁂𑀦 𑀧𑀢𑁆𑀢𑀚𑀸𑀮𑀓𑁂𑀦 𑀘 𑀧𑀼𑀧𑁆𑀨𑀚𑀸𑀮𑀓𑁂𑀦 𑀘 𑀲𑀫𑀦𑁆𑀦𑀸𑀕𑀢𑁄. 𑀓𑀼𑀝𑀼𑀫𑀮𑀓𑀚𑀸𑀢𑁄𑀢𑀺 𑀲𑀜𑁆𑀚𑀸𑀢𑀫𑀓𑀼𑀴𑁄. 𑀓𑁄𑀭𑀓𑀚𑀸𑀢𑁄𑀢𑀺 𑀅𑀯𑀺𑀓𑀲𑀺𑀢𑁂𑀳𑀺 𑀫𑀳𑀸𑀓𑀼𑀘𑁆𑀙𑀻𑀳𑀺 𑀲𑀫𑁆𑀪𑀺𑀦𑁆𑀦𑀫𑀼𑀔𑁂𑀳𑀺 𑀧𑀼𑀧𑁆𑀨𑁂𑀳𑀺 𑀲𑀫𑀦𑁆𑀦𑀸𑀕𑀢𑁄. 𑀲𑀩𑁆𑀩𑀧𑀸𑀮𑀺𑀨𑀼𑀮𑁆𑀮𑁄𑀢𑀺 𑀲𑀩𑁆𑀩𑀸𑀓𑀸𑀭𑁂𑀦 𑀲𑀼𑀧𑀼𑀧𑁆𑀨𑀺𑀢𑁄. 𑀤𑀺𑀩𑁆𑀩𑁂 𑀘𑀢𑁆𑀢𑀸𑀭𑁄 𑀫𑀸𑀲𑁂𑀢𑀺 𑀤𑀺𑀩𑁆𑀩𑁂𑀦 𑀆𑀬𑀼𑀦𑀸 𑀘𑀢𑁆𑀢𑀸𑀭𑁄 𑀫𑀸𑀲𑁂. 𑀫𑀦𑀼𑀲𑁆𑀲𑀕𑀡𑀦𑀸𑀬 𑀧𑀦 𑀢𑀸𑀦𑀺 𑀤𑁆𑀯𑀸𑀤𑀲 𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀳𑁄𑀦𑁆𑀢𑀺. 𑀧𑀭𑀺𑀘𑀸𑀭𑁂𑀦𑁆𑀢𑀻𑀢𑀺 𑀇𑀢𑁄 𑀘𑀺𑀢𑁄 𑀘 𑀇𑀦𑁆𑀤𑁆𑀭𑀺𑀬𑀸𑀦𑀺 𑀘𑀸𑀭𑁂𑀦𑁆𑀢𑀺, 𑀓𑀻𑀴𑀦𑁆𑀢𑀺 𑀭𑀫𑀦𑁆𑀢𑀻𑀢𑀺 𑀅𑀢𑁆𑀣𑁄.

𑀆𑀪𑀸𑀬 𑀨𑀼𑀝𑀁 𑀳𑁄𑀢𑀻𑀢𑀺 𑀢𑀢𑁆𑀢𑀓𑀁 𑀞𑀸𑀦𑀁 𑀑𑀪𑀸𑀲𑁂𑀦 𑀨𑀼𑀝𑀁 𑀳𑁄𑀢𑀺. 𑀢𑁂𑀲𑀜𑁆𑀳𑀺 𑀧𑀼𑀧𑁆𑀨𑀸𑀦𑀁 𑀩𑀸𑀮𑀲𑀽𑀭𑀺𑀬𑀲𑁆𑀲 𑀯𑀺𑀬 𑀆𑀪𑀸 𑀳𑁄𑀢𑀺, 𑀧𑀢𑁆𑀢𑀸𑀦𑀺 𑀧𑀡𑁆𑀡𑀘𑁆𑀙𑀢𑁆𑀢𑀧𑁆𑀧𑀫𑀸𑀡𑀸𑀦𑀺, 𑀅𑀦𑁆𑀢𑁄 𑀫𑀳𑀸𑀢𑀼𑀫𑁆𑀩𑀫𑀢𑁆𑀢𑀸 𑀭𑁂𑀡𑀼 𑀳𑁄𑀢𑀺. 𑀧𑀼𑀧𑁆𑀨𑀺𑀢𑁂 𑀧𑀦 𑀧𑀸𑀭𑀺𑀘𑁆𑀙𑀢𑁆𑀢𑀓𑁂 𑀆𑀭𑁄𑀳𑀦𑀓𑀺𑀘𑁆𑀘𑀁 𑀯𑀸 𑀅𑀗𑁆𑀓𑀼𑀲𑀓𑀁 𑀕𑀳𑁂𑀢𑁆𑀯𑀸 𑀦𑀫𑀦𑀓𑀺𑀘𑁆𑀘𑀁 𑀯𑀸 𑀧𑀼𑀧𑁆𑀨𑀸𑀳𑀭𑀡𑀢𑁆𑀣𑀁 𑀘𑀗𑁆𑀕𑁄𑀝𑀓𑀓𑀺𑀘𑁆𑀘𑀁 𑀯𑀸 𑀦𑀢𑁆𑀣𑀺, 𑀓𑀦𑁆𑀢𑀦𑀓𑀯𑀸𑀢𑁄 𑀉𑀝𑁆𑀞𑀳𑀺𑀢𑁆𑀯𑀸 𑀧𑀼𑀧𑁆𑀨𑀸𑀦𑀺 𑀯𑀡𑁆𑀝𑀢𑁄 𑀓𑀦𑁆𑀢𑀢𑀺, 𑀲𑀫𑁆𑀧𑀝𑀺𑀘𑁆𑀙𑀦𑀓𑀯𑀸𑀢𑁄 𑀲𑀫𑁆𑀧𑀝𑀺𑀘𑁆𑀙𑀢𑀺, 𑀧𑀯𑁂𑀲𑀦𑀓𑀯𑀸𑀢𑁄 𑀲𑀼𑀥𑀫𑁆𑀫𑀁 𑀤𑁂𑀯𑀲𑀪𑀁 𑀧𑀯𑁂𑀲𑁂𑀢𑀺, 𑀲𑀫𑁆𑀫𑀚𑁆𑀚𑀦𑀓𑀯𑀸𑀢𑁄 𑀧𑀼𑀭𑀸𑀡𑀧𑀼𑀧𑁆𑀨𑀸𑀦𑀺 𑀦𑀻𑀳𑀭𑀢𑀺, 𑀲𑀦𑁆𑀣𑀭𑀡𑀓𑀯𑀸𑀢𑁄 𑀧𑀢𑁆𑀢𑀓𑀡𑁆𑀡𑀺𑀓𑀓𑁂𑀲𑀭𑀸𑀦𑀺 𑀭𑀜𑁆𑀚𑁂𑀦𑁆𑀢𑁄 𑀲𑀦𑁆𑀣𑀭𑀢𑀺. 𑀫𑀚𑁆𑀛𑀝𑁆𑀞𑀸𑀦𑁂 𑀥𑀫𑁆𑀫𑀸𑀲𑀦𑀁 𑀳𑁄𑀢𑀺 𑀬𑁄𑀚𑀦𑀧𑁆𑀧𑀫𑀸𑀡𑁄 𑀭𑀢𑀦𑀧𑀮𑁆𑀮𑀗𑁆𑀓𑁄 𑀉𑀧𑀭𑀺 𑀢𑀺𑀬𑁄𑀚𑀦𑁂𑀦 𑀲𑁂𑀢𑀘𑁆𑀙𑀢𑁆𑀢𑁂𑀦 𑀥𑀸𑀭𑀺𑀬𑀫𑀸𑀦𑁂𑀦, 𑀢𑀤𑀦𑀦𑁆𑀢𑀭𑀁 𑀲𑀓𑁆𑀓𑀲𑁆𑀲 𑀤𑁂𑀯𑀭𑀜𑁆𑀜𑁄 𑀆𑀲𑀦𑀁 𑀅𑀢𑁆𑀣𑀭𑀺𑀬𑀢𑀺, 𑀢𑀢𑁄 𑀢𑁂𑀢𑁆𑀢𑀺𑀁𑀲𑀸𑀬 𑀤𑁂𑀯𑀧𑀼𑀢𑁆𑀢𑀸𑀦𑀁, 𑀢𑀢𑁄 𑀅𑀜𑁆𑀜𑁂𑀲𑀁 𑀫𑀳𑁂𑀲𑀓𑁆𑀔𑀸𑀦𑀁 𑀤𑁂𑀯𑀸𑀦𑀁, 𑀅𑀜𑁆𑀜𑀢𑀭𑀤𑁂𑀯𑀢𑀸𑀦𑀁 𑀧𑀼𑀧𑁆𑀨𑀓𑀡𑁆𑀡𑀺𑀓𑀸𑀯 𑀆𑀲𑀦𑀁 𑀳𑁄𑀢𑀺. 𑀤𑁂𑀯𑀸 𑀤𑁂𑀯𑀲𑀪𑀁 𑀧𑀯𑀺𑀲𑀺𑀢𑁆𑀯𑀸 𑀦𑀺𑀲𑀻𑀤𑀦𑁆𑀢𑀺. 𑀢𑀢𑁄 𑀧𑀼𑀧𑁆𑀨𑁂𑀳𑀺 𑀭𑁂𑀡𑀼𑀯𑀝𑁆𑀝𑀺 𑀉𑀕𑁆𑀕𑀦𑁆𑀢𑁆𑀯𑀸 𑀉𑀧𑀭𑀺𑀓𑀡𑁆𑀡𑀺𑀓𑀁 𑀆𑀳𑀘𑁆𑀘 𑀦𑀺𑀧𑀢𑀫𑀸𑀦𑀸 𑀤𑁂𑀯𑀢𑀸𑀦𑀁 𑀢𑀺𑀕𑀸𑀯𑀼𑀢𑀧𑁆𑀧𑀫𑀸𑀡𑀁 𑀅𑀢𑁆𑀢𑀪𑀸𑀯𑀁 𑀮𑀸𑀔𑀸𑀭𑀲𑀧𑀭𑀺𑀓𑀫𑁆𑀫𑀲𑀚𑁆𑀚𑀺𑀢𑀁 𑀯𑀺𑀬 𑀲𑀼𑀯𑀡𑁆𑀡𑀘𑀼𑀡𑁆𑀡𑀧𑀺𑀜𑁆𑀚𑀭𑀁 𑀯𑀺𑀬 𑀓𑀭𑁄𑀢𑀺. 𑀏𑀓𑀘𑁆𑀘𑁂 𑀤𑁂𑀯𑀸 𑀏𑀓𑁂𑀓𑀁 𑀧𑀼𑀧𑁆𑀨𑀁 𑀕𑀳𑁂𑀢𑁆𑀯𑀸 𑀅𑀜𑁆𑀜𑀫𑀜𑁆𑀜𑀁 𑀧𑀳𑀭𑀦𑁆𑀢𑀸𑀧𑀺 𑀓𑀻𑀴𑀦𑁆𑀢𑀺𑀬𑁂𑀯. 𑀧𑀳𑀭𑀡𑀓𑀸𑀮𑁂𑀧𑀺 𑀫𑀳𑀸𑀢𑀼𑀫𑁆𑀩𑀧𑁆𑀧𑀫𑀸𑀡𑀸 𑀭𑁂𑀡𑀼 𑀦𑀺𑀓𑁆𑀔𑀫𑀺𑀢𑁆𑀯𑀸 𑀲𑀭𑀻𑀭𑀁 𑀧𑀪𑀸𑀲𑀫𑁆𑀧𑀦𑁆𑀦𑁂𑀳𑀺 𑀕𑀦𑁆𑀥𑀘𑀼𑀡𑁆𑀡𑁂𑀳𑀺 𑀲𑀜𑁆𑀚𑀢𑀫𑀦𑁄𑀲𑀺𑀮𑀸𑀭𑀸𑀕𑀁 𑀯𑀺𑀬 𑀓𑀭𑁄𑀢𑀺. 𑀏𑀯𑀁 𑀲𑀸 𑀓𑀻𑀴𑀸 𑀘𑀢𑀽𑀳𑀺 𑀫𑀸𑀲𑁂𑀳𑀺 𑀧𑀭𑀺𑀬𑁄𑀲𑀸𑀦𑀁 𑀕𑀘𑁆𑀙𑀢𑀺. 𑀅𑀬𑀫𑀸𑀦𑀼𑀪𑀸𑀯𑁄𑀢𑀺 𑀅𑀬𑀁 𑀅𑀦𑀼𑀨𑀭𑀺𑀢𑀼𑀁 𑀆𑀦𑀼𑀪𑀸𑀯𑁄.

𑀇𑀤𑀸𑀦𑀺 𑀬𑀲𑁆𑀫𑀸 𑀦 𑀲𑀢𑁆𑀣𑀸 𑀧𑀸𑀭𑀺𑀘𑁆𑀙𑀢𑁆𑀢𑀓𑁂𑀦 𑀅𑀢𑁆𑀣𑀺𑀓𑁄, 𑀢𑁂𑀦 𑀧𑀦 𑀲𑀤𑁆𑀥𑀺𑀁 𑀉𑀧𑀫𑁂𑀢𑁆𑀯𑀸 𑀲𑀢𑁆𑀢 𑀅𑀭𑀺𑀬𑀲𑀸𑀯𑀓𑁂 𑀤𑀲𑁆𑀲𑁂𑀢𑀼𑀓𑀸𑀫𑁄, 𑀢𑀲𑁆𑀫𑀸 𑀢𑁂 𑀤𑀲𑁆𑀲𑁂𑀢𑀼𑀁 𑀏𑀯𑀫𑁂𑀯 𑀔𑁄𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀧𑀩𑁆𑀩𑀚𑁆𑀚𑀸𑀬 𑀘𑁂𑀢𑁂𑀢𑀻𑀢𑀺 𑀧𑀩𑁆𑀩𑀚𑀺𑀲𑁆𑀲𑀸𑀫𑀻𑀢𑀺 𑀘𑀺𑀦𑁆𑀢𑁂𑀢𑀺. 𑀤𑁂𑀯𑀸𑀦𑀁𑀯𑀸𑀢𑀺 𑀤𑁂𑀯𑀸𑀦𑀁 𑀯𑀺𑀬. 𑀬𑀸𑀯 𑀩𑁆𑀭𑀳𑁆𑀫𑀮𑁄𑀓𑀸 𑀲𑀤𑁆𑀤𑁄 𑀅𑀩𑁆𑀪𑀼𑀕𑁆𑀕𑀘𑁆𑀙𑀢𑀻𑀢𑀺 𑀧𑀣𑀯𑀺𑀢𑀮𑀢𑁄 𑀬𑀸𑀯 𑀩𑁆𑀭𑀳𑁆𑀫𑀮𑁄𑀓𑀸 𑀲𑀸𑀥𑀼𑀓𑀸𑀭𑀲𑀤𑁆𑀤𑁂𑀦 𑀲𑀩𑁆𑀩𑀁 𑀏𑀓𑀲𑀤𑁆𑀤𑀫𑁂𑀯 𑀳𑁄𑀢𑀺. 𑀅𑀬𑀫𑀸𑀦𑀼𑀪𑀸𑀯𑁄𑀢𑀺 𑀅𑀬𑀁 𑀔𑀻𑀡𑀸𑀲𑀯𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀦𑀼𑀨𑀭𑀡𑀸𑀦𑀼𑀪𑀸𑀯𑁄. 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀁 𑀧𑀩𑁆𑀩𑀚𑁆𑀚𑀸𑀦𑀺𑀲𑁆𑀲𑀺𑀢𑀁 𑀳𑁄𑀢𑀺, 𑀓𑀲𑀺𑀡𑀧𑀭𑀺𑀓𑀫𑁆𑀫𑀁 𑀧𑀞𑀫𑀚𑁆𑀛𑀸𑀦𑀲𑀦𑁆𑀦𑀺𑀲𑁆𑀲𑀺𑀢𑀁, 𑀯𑀺𑀧𑀲𑁆𑀲𑀦𑀸𑀬 𑀲𑀤𑁆𑀥𑀺𑀁 𑀢𑀬𑁄 𑀫𑀕𑁆𑀕𑀸 𑀢𑀻𑀡𑀺 𑀘 𑀨𑀮𑀸𑀦𑀺 𑀅𑀭𑀳𑀢𑁆𑀢𑀫𑀕𑁆𑀕𑀲𑀦𑁆𑀦𑀺𑀲𑁆𑀲𑀺𑀢𑀸𑀦𑀺 𑀳𑁄𑀦𑁆𑀢𑀺. 𑀤𑁂𑀲𑀦𑀸𑀬 𑀳𑁂𑀝𑁆𑀞𑀢𑁄 𑀯𑀸 𑀉𑀧𑀭𑀺𑀢𑁄 𑀯𑀸 𑀉𑀪𑀬𑀢𑁄 𑀯𑀸 𑀧𑀭𑀺𑀘𑁆𑀙𑁂𑀤𑁄 𑀳𑁄𑀢𑀺, 𑀇𑀥 𑀧𑀦 𑀉𑀪𑀬𑀢𑁄 𑀧𑀭𑀺𑀘𑁆𑀙𑁂𑀤𑁄. 𑀢𑁂𑀦𑁂𑀢𑀁 𑀯𑀼𑀢𑁆𑀢𑀁. 𑀲𑀗𑁆𑀔𑁂𑀧𑀢𑁄 𑀧𑀦𑁂𑀢𑁆𑀣 𑀯𑀝𑁆𑀝𑀯𑀺𑀯𑀝𑁆𑀝𑀁 𑀓𑀣𑀺𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑁬. 𑀲𑀓𑁆𑀓𑀘𑁆𑀘𑀲𑀼𑀢𑁆𑀢𑀯𑀡𑁆𑀡𑀦𑀸

𑁭𑁦. 𑀙𑀝𑁆𑀞𑁂 𑀧𑀭𑀺𑀲𑀼𑀤𑁆𑀥𑀸 𑀘 𑀪𑀯𑀺𑀲𑁆𑀲𑀦𑁆𑀢𑀻𑀢𑀺 𑀪𑀺𑀬𑁆𑀬𑁄𑀲𑁄𑀫𑀢𑁆𑀢𑀸𑀬 𑀧𑀭𑀺𑀲𑀼𑀤𑁆𑀥𑀸 𑀪𑀯𑀺𑀲𑁆𑀲𑀦𑁆𑀢𑀺 𑀦𑀺𑀫𑁆𑀫𑀮𑀸. 𑀲𑀓𑀫𑁆𑀫𑀸𑀭𑀕𑀢𑁄𑀢𑀺 𑀏𑀢𑁆𑀣 𑀲-𑀓𑀸𑀭𑁄 𑀦𑀺𑀧𑀸𑀢𑀫𑀢𑁆𑀢𑀁, 𑀓𑀫𑁆𑀫𑀸𑀭𑀕𑀢𑁄 𑀓𑀫𑁆𑀫𑀸𑀭𑀼𑀤𑁆𑀥𑀦𑀕𑀢𑁄𑀢𑀺 𑀅𑀢𑁆𑀣𑁄.

𑁭. 𑀪𑀸𑀯𑀦𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁭𑁧. 𑀲𑀢𑁆𑀢𑀫𑁂 𑀅𑀦𑀦𑀼𑀬𑀼𑀢𑁆𑀢𑀲𑁆𑀲𑀸𑀢𑀺 𑀦 𑀬𑀼𑀢𑁆𑀢𑀧𑁆𑀧𑀬𑀼𑀢𑁆𑀢𑀲𑁆𑀲 𑀳𑀼𑀢𑁆𑀯𑀸 𑀯𑀺𑀳𑀭𑀢𑁄. 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀓𑀼𑀓𑁆𑀓𑀼𑀝𑀺𑀬𑀸 𑀅𑀡𑁆𑀟𑀸𑀦𑀻𑀢𑀺 𑀇𑀫𑀸 𑀓𑀡𑁆𑀳𑀧𑀓𑁆𑀔𑀲𑀼𑀓𑁆𑀓𑀧𑀓𑁆𑀔𑀯𑀲𑁂𑀦 𑀤𑁆𑀯𑁂 𑀉𑀧𑀫𑀸 𑀯𑀼𑀢𑁆𑀢𑀸. 𑀢𑀸𑀲𑀼 𑀓𑀡𑁆𑀳𑀧𑀓𑁆𑀔𑀽𑀧𑀫𑀸 𑀅𑀢𑁆𑀣𑀲𑁆𑀲 𑀅𑀲𑀸𑀥𑀺𑀓𑀸, 𑀇𑀢𑀭𑀸 𑀲𑀸𑀥𑀺𑀓𑀸𑀢𑀺 𑀲𑀼𑀓𑁆𑀓𑀧𑀓𑁆𑀔𑀽𑀧𑀫𑀸𑀬 𑀏𑀯 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀲𑁂𑀬𑁆𑀬𑀣𑀸𑀢𑀺 𑀑𑀧𑀫𑁆𑀫𑀢𑁆𑀣𑁂 𑀦𑀺𑀧𑀸𑀢𑁄. 𑀅𑀧𑀻𑀢𑀺 𑀲𑀫𑁆𑀪𑀸𑀯𑀦𑀢𑁆𑀣𑁂. 𑀉𑀪𑀬𑁂𑀦𑀸𑀧𑀺 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫, 𑀪𑀺𑀓𑁆𑀔𑀯𑁂𑀢𑀺 𑀤𑀲𑁆𑀲𑁂𑀢𑀺. 𑀓𑀼𑀓𑁆𑀓𑀼𑀝𑀺𑀬𑀸 𑀅𑀡𑁆𑀟𑀸𑀦𑀺 𑀅𑀝𑁆𑀞 𑀯𑀸 𑀤𑀲 𑀯𑀸 𑀤𑁆𑀯𑀸𑀤𑀲 𑀯𑀸𑀢𑀺 𑀏𑀢𑁆𑀣 𑀧𑀦 𑀓𑀺𑀜𑁆𑀘𑀸𑀧𑀺 𑀓𑀼𑀓𑁆𑀓𑀼𑀝𑀺𑀬𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑀢𑁄 𑀊𑀦𑀸𑀥𑀺𑀓𑀸𑀦𑀺𑀧𑀺 𑀅𑀡𑁆𑀟𑀸𑀦𑀺 𑀳𑁄𑀦𑁆𑀢𑀺, 𑀯𑀘𑀦𑀲𑀺𑀮𑀺𑀝𑁆𑀞𑀢𑀸𑀬 𑀧𑀦𑁂𑀢𑀁 𑀯𑀼𑀢𑁆𑀢𑀁. 𑀏𑀯𑀜𑁆𑀳𑀺 𑀮𑁄𑀓𑁂 𑀲𑀺𑀮𑀺𑀝𑁆𑀞𑀁 𑀯𑀘𑀦𑀁 𑀳𑁄𑀢𑀺. 𑀢𑀸𑀦𑀲𑁆𑀲𑀽𑀢𑀺 𑀢𑀸𑀦𑀺 𑀅𑀲𑁆𑀲𑀼, 𑀪𑀯𑁂𑀬𑁆𑀬𑀼𑀦𑁆𑀢𑀺 𑀅𑀢𑁆𑀣𑁄. 𑀓𑀼𑀓𑁆𑀓𑀼𑀝𑀺𑀬𑀸 𑀲𑀫𑁆𑀫𑀸 𑀅𑀥𑀺𑀲𑀬𑀺𑀢𑀸𑀦𑀻𑀢𑀺 𑀢𑀸𑀬 𑀚𑀦𑁂𑀢𑁆𑀢𑀺𑀬𑀸 𑀓𑀼𑀓𑁆𑀓𑀼𑀝𑀺𑀬𑀸 𑀧𑀓𑁆𑀔𑁂 𑀧𑀲𑀸𑀭𑁂𑀢𑁆𑀯𑀸 𑀢𑁂𑀲𑀁 𑀉𑀧𑀭𑀺 𑀲𑀬𑀦𑁆𑀢𑀺𑀬𑀸 𑀲𑀫𑁆𑀫𑀸 𑀅𑀥𑀺𑀲𑀬𑀺𑀢𑀸𑀦𑀺. 𑀲𑀫𑁆𑀫𑀸 𑀧𑀭𑀺𑀲𑁂𑀤𑀺𑀢𑀸𑀦𑀻𑀢𑀺 𑀓𑀸𑀮𑁂𑀦 𑀓𑀸𑀮𑀁 𑀉𑀢𑀼𑀁 𑀕𑀡𑁆𑀳𑀸𑀧𑁂𑀦𑁆𑀢𑀺𑀬𑀸 𑀲𑀼𑀝𑁆𑀞𑀼 𑀲𑀫𑀦𑁆𑀢𑀢𑁄 𑀲𑁂𑀤𑀺𑀢𑀸𑀦𑀺, 𑀉𑀲𑁆𑀫𑀻𑀓𑀢𑀸𑀦𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀫𑁆𑀫𑀸 𑀧𑀭𑀺𑀪𑀸𑀯𑀺𑀢𑀸𑀦𑀻𑀢𑀺 𑀓𑀸𑀮𑁂𑀦 𑀓𑀸𑀮𑀁 𑀲𑀼𑀝𑁆𑀞𑀼 𑀲𑀫𑀦𑁆𑀢𑀢𑁄 𑀪𑀸𑀯𑀺𑀢𑀸𑀦𑀺, 𑀓𑀼𑀓𑁆𑀓𑀼𑀝𑀕𑀦𑁆𑀥𑀁 𑀕𑀸𑀳𑀸𑀧𑀺𑀢𑀸𑀦𑀻𑀢𑀺 𑀅𑀢𑁆𑀣𑁄.

𑀓𑀺𑀜𑁆𑀘𑀸𑀧𑀺 𑀢𑀲𑁆𑀲𑀸 𑀓𑀼𑀓𑁆𑀓𑀼𑀝𑀺𑀬𑀸𑀢𑀺 𑀢𑀲𑁆𑀲𑀸 𑀓𑀼𑀓𑁆𑀓𑀼𑀝𑀺𑀬𑀸 𑀇𑀫𑀁 𑀢𑀺𑀯𑀺𑀥𑀓𑀺𑀭𑀺𑀬𑀸𑀓𑀭𑀡𑁂𑀦 𑀅𑀧𑁆𑀧𑀫𑀸𑀤𑀁 𑀓𑀢𑁆𑀯𑀸 𑀓𑀺𑀜𑁆𑀘𑀸𑀧𑀺 𑀦 𑀏𑀯𑀁 𑀇𑀘𑁆𑀙𑀸 𑀉𑀧𑁆𑀧𑀚𑁆𑀚𑁂𑀬𑁆𑀬. 𑀅𑀣 𑀔𑁄 𑀪𑀩𑁆𑀩𑀸𑀯 𑀢𑁂𑀢𑀺 𑀅𑀣 𑀔𑁄 𑀢𑁂 𑀓𑀼𑀓𑁆𑀓𑀼𑀝𑀧𑁄𑀢𑀓𑀸 𑀯𑀼𑀢𑁆𑀢𑀦𑀬𑁂𑀦 𑀲𑁄𑀢𑁆𑀣𑀺𑀦𑀸 𑀅𑀪𑀺𑀦𑀺𑀩𑁆𑀪𑀺𑀚𑁆𑀚𑀺𑀢𑀼𑀁 𑀪𑀩𑁆𑀩𑀸𑀯. 𑀢𑁂 𑀳𑀺 𑀬𑀲𑁆𑀫𑀸 𑀢𑀸𑀬 𑀓𑀼𑀓𑁆𑀓𑀼𑀝𑀺𑀬𑀸 𑀏𑀯𑀁 𑀢𑀻𑀳𑀸𑀓𑀸𑀭𑁂𑀳𑀺 𑀢𑀸𑀦𑀺 𑀅𑀡𑁆𑀟𑀸𑀦𑀺 𑀧𑀭𑀺𑀧𑀸𑀮𑀺𑀬𑀫𑀸𑀦𑀸𑀦𑀺 𑀦 𑀧𑀽𑀢𑀻𑀦𑀺 𑀳𑁄𑀦𑁆𑀢𑀺. 𑀬𑁄𑀧𑀺 𑀦𑁂𑀲𑀁 𑀅𑀮𑁆𑀮𑀲𑀺𑀦𑁂𑀳𑁄, 𑀲𑁄 𑀧𑀭𑀺𑀬𑀸𑀤𑀸𑀦𑀁 𑀕𑀘𑁆𑀙𑀢𑀺, 𑀓𑀧𑀸𑀮𑀁 𑀢𑀦𑀼𑀓𑀁 𑀳𑁄𑀢𑀺, 𑀧𑀸𑀤𑀦𑀔𑀲𑀺𑀔𑀸 𑀘 𑀫𑀼𑀔𑀢𑀼𑀡𑁆𑀟𑀓𑀜𑁆𑀘 𑀔𑀭𑀁 𑀳𑁄𑀢𑀺, 𑀲𑀬𑀫𑁆𑀧𑀺 𑀧𑀭𑀺𑀡𑀸𑀫𑀁 𑀕𑀘𑁆𑀙𑀢𑀺. 𑀓𑀧𑀸𑀮𑀲𑁆𑀲 𑀢𑀦𑀼𑀢𑁆𑀢𑀸 𑀩𑀳𑀺𑀤𑁆𑀥𑀸 𑀆𑀮𑁄𑀓𑁄 𑀅𑀦𑁆𑀢𑁄 𑀧𑀜𑁆𑀜𑀸𑀬𑀢𑀺, 𑀢𑀲𑁆𑀫𑀸 ‘‘𑀘𑀺𑀭𑀁 𑀯𑀢 𑀫𑀬𑀁 𑀲𑀁𑀓𑀼𑀝𑀺𑀢𑀳𑀢𑁆𑀣𑀧𑀸𑀤𑀸 𑀲𑀫𑁆𑀩𑀸𑀥𑁂 𑀲𑀬𑀺𑀫𑁆𑀳, 𑀅𑀬𑀜𑁆𑀘 𑀩𑀳𑀺 𑀆𑀮𑁄𑀓𑁄 𑀤𑀺𑀲𑁆𑀲𑀢𑀺, 𑀏𑀢𑁆𑀣 𑀤𑀸𑀦𑀺 𑀦𑁄 𑀲𑀼𑀔𑀯𑀺𑀳𑀸𑀭𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀦𑀺𑀓𑁆𑀔𑀫𑀺𑀢𑀼𑀓𑀸𑀫𑀸 𑀳𑀼𑀢𑁆𑀯𑀸 𑀓𑀧𑀸𑀮𑀁 𑀧𑀸𑀤𑁂𑀦 𑀧𑀳𑀭𑀦𑁆𑀢𑀺, 𑀕𑀻𑀯𑀁 𑀧𑀲𑀸𑀭𑁂𑀦𑁆𑀢𑀺, 𑀢𑀢𑁄 𑀢𑀁 𑀓𑀧𑀸𑀮𑀁 𑀤𑁆𑀯𑁂𑀥𑀸 𑀪𑀺𑀚𑁆𑀚𑀢𑀺. 𑀅𑀣 𑀢𑁂 𑀧𑀓𑁆𑀔𑁂 𑀯𑀺𑀥𑀼𑀦𑀦𑁆𑀢𑀸 𑀢𑀁𑀔𑀡𑀸𑀦𑀼𑀭𑀽𑀧𑀁 𑀯𑀺𑀭𑀯𑀦𑁆𑀢𑀸 𑀦𑀺𑀓𑁆𑀔𑀫𑀦𑁆𑀢𑀺𑀬𑁂𑀯. 𑀦𑀺𑀓𑁆𑀔𑀫𑀦𑁆𑀢𑀸 𑀘 𑀕𑀸𑀫𑀓𑁆𑀔𑁂𑀢𑁆𑀢𑀁 𑀉𑀧𑀲𑁄𑀪𑀬𑀫𑀸𑀦𑀸 𑀯𑀺𑀘𑀭𑀦𑁆𑀢𑀺.

𑀏𑀯𑀫𑁂𑀯 𑀔𑁄𑀢𑀺 𑀇𑀤𑀁 𑀑𑀧𑀫𑁆𑀫𑀲𑀫𑁆𑀧𑀝𑀺𑀧𑀸𑀤𑀦𑀁. 𑀢𑀁 𑀏𑀯𑀁 𑀅𑀢𑁆𑀣𑁂𑀦 𑀲𑀁𑀲𑀦𑁆𑀤𑁂𑀢𑁆𑀯𑀸 𑀯𑁂𑀤𑀺𑀢𑀩𑁆𑀩𑀁 𑁋 𑀢𑀲𑁆𑀲𑀸 𑀓𑀼𑀓𑁆𑀓𑀼𑀝𑀺𑀬𑀸 𑀅𑀡𑁆𑀟𑁂𑀲𑀼 𑀅𑀥𑀺𑀲𑀬𑀦𑀸𑀤𑀺𑀢𑀺𑀯𑀺𑀥𑀓𑀺𑀭𑀺𑀬𑀸𑀓𑀭𑀡𑀁 𑀯𑀺𑀬 𑀳𑀺 𑀇𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀪𑀸𑀯𑀦𑀁 𑀅𑀦𑀼𑀬𑀼𑀢𑁆𑀢𑀓𑀸𑀮𑁄, 𑀓𑀼𑀓𑁆𑀓𑀼𑀝𑀺𑀬𑀸 𑀢𑀺𑀯𑀺𑀥𑀓𑀺𑀭𑀺𑀬𑀸𑀲𑀫𑁆𑀧𑀸𑀤𑀦𑁂𑀦 𑀅𑀡𑁆𑀟𑀸𑀦𑀁 𑀅𑀧𑀽𑀢𑀺𑀪𑀸𑀯𑁄 𑀯𑀺𑀬 𑀪𑀸𑀯𑀦𑀁 𑀅𑀦𑀼𑀬𑀼𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀢𑀺𑀯𑀺𑀥𑀸𑀦𑀼𑀧𑀲𑁆𑀲𑀦𑀸𑀲𑀫𑁆𑀧𑀸𑀤𑀦𑁂𑀦 𑀯𑀺𑀧𑀲𑁆𑀲𑀦𑀸𑀜𑀸𑀡𑀲𑁆𑀲 𑀅𑀧𑀭𑀺𑀳𑀸𑀦𑀺. 𑀢𑀲𑁆𑀲𑀸 𑀢𑀺𑀯𑀺𑀥𑀓𑀺𑀭𑀺𑀬𑀸𑀓𑀭𑀡𑁂𑀦 𑀅𑀡𑁆𑀟𑀸𑀦𑀁 𑀅𑀮𑁆𑀮𑀲𑀺𑀦𑁂𑀳𑀧𑀭𑀺𑀬𑀸𑀤𑀸𑀦𑀁 𑀯𑀺𑀬 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀢𑀺𑀯𑀺𑀥𑀸𑀦𑀼𑀧𑀲𑁆𑀲𑀦𑀸𑀲𑀫𑁆𑀧𑀸𑀤𑀦𑁂𑀦 𑀪𑀯𑀢𑁆𑀢𑀬𑀸𑀦𑀼𑀕𑀢𑀦𑀺𑀓𑀦𑁆𑀢𑀺𑀲𑀺𑀦𑁂𑀳𑀧𑀭𑀺𑀬𑀸𑀤𑀸𑀦𑀁, 𑀅𑀡𑁆𑀟𑀓𑀧𑀸𑀮𑀸𑀦𑀁 𑀢𑀦𑀼𑀪𑀸𑀯𑁄 𑀯𑀺𑀬 𑀪𑀺𑀓𑁆𑀔𑀼𑀦𑁄 𑀅𑀯𑀺𑀚𑁆𑀚𑀡𑁆𑀟𑀓𑁄𑀲𑀲𑁆𑀲 𑀢𑀦𑀼𑀪𑀸𑀯𑁄, 𑀓𑀼𑀓𑁆𑀓𑀼𑀝𑀧𑁄𑀢𑀓𑀸𑀦𑀁 𑀦𑀔𑀢𑀼𑀡𑁆𑀟𑀓𑀸𑀦𑀁 𑀣𑀤𑁆𑀥𑀪𑀸𑀯𑁄 𑀯𑀺𑀬 𑀪𑀺𑀓𑁆𑀔𑀼𑀦𑁄 𑀯𑀺𑀧𑀲𑁆𑀲𑀦𑀸𑀜𑀸𑀡𑀲𑁆𑀲 𑀢𑀺𑀓𑁆𑀔𑀔𑀭𑀯𑀺𑀧𑁆𑀧𑀲𑀦𑁆𑀦𑀲𑀽𑀭𑀪𑀸𑀯𑁄, 𑀓𑀼𑀓𑁆𑀓𑀼𑀝𑀧𑁄𑀢𑀓𑀸𑀦𑀁 𑀧𑀭𑀺𑀡𑀸𑀫𑀓𑀸𑀮𑁄 𑀯𑀺𑀬 𑀪𑀺𑀓𑁆𑀔𑀼𑀦𑁄 𑀯𑀺𑀧𑀲𑁆𑀲𑀦𑀸𑀜𑀸𑀡𑀲𑁆𑀲 𑀧𑀭𑀺𑀡𑀸𑀫𑀓𑀸𑀮𑁄 𑀯𑀟𑁆𑀠𑀺𑀓𑀸𑀮𑁄 𑀕𑀩𑁆𑀪𑀕𑁆𑀕𑀳𑀡𑀓𑀸𑀮𑁄, 𑀓𑀼𑀓𑁆𑀓𑀼𑀝𑀧𑁄𑀢𑀓𑀸𑀦𑀁 𑀧𑀸𑀤𑀦𑀔𑀲𑀺𑀔𑀸𑀬 𑀯𑀸 𑀫𑀼𑀔𑀢𑀼𑀡𑁆𑀟𑀓𑁂𑀦 𑀯𑀸 𑀅𑀡𑁆𑀟𑀓𑁄𑀲𑀁 𑀧𑀤𑀸𑀮𑁂𑀢𑁆𑀯𑀸 𑀧𑀓𑁆𑀔𑁂 𑀧𑀧𑁆𑀨𑁄𑀝𑁂𑀢𑁆𑀯𑀸 𑀲𑁄𑀢𑁆𑀣𑀺𑀦𑀸 𑀅𑀪𑀺𑀦𑀺𑀩𑁆𑀪𑀺𑀤𑀸𑀓𑀸𑀮𑁄 𑀯𑀺𑀬 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀯𑀺𑀧𑀲𑁆𑀲𑀦𑀸𑀜𑀸𑀡𑀕𑀩𑁆𑀪𑀁 𑀕𑀡𑁆𑀳𑀸𑀧𑁂𑀢𑁆𑀯𑀸 𑀯𑀺𑀘𑀭𑀦𑁆𑀢𑀲𑁆𑀲 𑀢𑀚𑁆𑀚𑀸𑀢𑀺𑀓𑀁 𑀉𑀢𑀼𑀲𑀧𑁆𑀧𑀸𑀬𑀁 𑀯𑀸 𑀪𑁄𑀚𑀦𑀲𑀧𑁆𑀧𑀸𑀬𑀁 𑀯𑀸 𑀧𑀼𑀕𑁆𑀕𑀮𑀲𑀧𑁆𑀧𑀸𑀬𑀁 𑀯𑀸 𑀥𑀫𑁆𑀫𑀲𑁆𑀲𑀯𑀦𑀲𑀧𑁆𑀧𑀸𑀬𑀁 𑀯𑀸 𑀮𑀪𑀺𑀢𑁆𑀯𑀸 𑀏𑀓𑀸𑀲𑀦𑁂 𑀦𑀺𑀲𑀺𑀦𑁆𑀦𑀲𑁆𑀲𑁂𑀯 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀦𑁆𑀢𑀲𑁆𑀲 𑀅𑀦𑀼𑀧𑀼𑀩𑁆𑀩𑀸𑀥𑀺𑀕𑀢𑁂𑀦 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀅𑀯𑀺𑀚𑁆𑀚𑀡𑁆𑀟𑀓𑁄𑀲𑀁 𑀧𑀤𑀸𑀮𑁂𑀢𑁆𑀯𑀸 𑀅𑀪𑀺𑀜𑁆𑀜𑀸𑀧𑀓𑁆𑀔𑁂 𑀧𑀧𑁆𑀨𑁄𑀝𑁂𑀢𑁆𑀯𑀸 𑀲𑁄𑀢𑁆𑀣𑀺𑀦𑀸 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀓𑀸𑀮𑁄 𑀯𑁂𑀤𑀺𑀢𑀩𑁆𑀩𑁄.

𑀬𑀣𑀸 𑀧𑀦 𑀓𑀼𑀓𑁆𑀓𑀼𑀝𑀧𑁄𑀢𑀓𑀸𑀦𑀁 𑀧𑀭𑀺𑀡𑀢𑀪𑀸𑀯𑀁 𑀜𑀢𑁆𑀯𑀸 𑀫𑀸𑀢𑀸𑀧𑀺 𑀅𑀡𑁆𑀟𑀓𑁄𑀲𑀁 𑀪𑀺𑀦𑁆𑀤𑀢𑀺, 𑀏𑀯𑀁 𑀢𑀣𑀸𑀭𑀽𑀧𑀲𑁆𑀲 𑀪𑀺𑀓𑁆𑀔𑀼𑀦𑁄 𑀜𑀸𑀡𑀧𑀭𑀺𑀧𑀸𑀓𑀁 𑀜𑀢𑁆𑀯𑀸 𑀲𑀢𑁆𑀣𑀸𑀧𑀺 𑁋

‘‘𑀉𑀘𑁆𑀙𑀺𑀦𑁆𑀤 𑀲𑀺𑀦𑁂𑀳𑀫𑀢𑁆𑀢𑀦𑁄, 𑀓𑀼𑀫𑀼𑀤𑀁 𑀲𑀸𑀭𑀤𑀺𑀓𑀁𑀯 𑀧𑀸𑀡𑀺𑀦𑀸;

𑀲𑀦𑁆𑀢𑀺𑀫𑀕𑁆𑀕𑀫𑁂𑀯 𑀩𑁆𑀭𑀽𑀳𑀬, 𑀦𑀺𑀩𑁆𑀩𑀸𑀦𑀁 𑀲𑀼𑀕𑀢𑁂𑀦 𑀤𑁂𑀲𑀺𑀢’’𑀦𑁆𑀢𑀺. (𑀥. 𑀧. 𑁨𑁮𑁫) 𑁋

𑀆𑀤𑀺𑀦𑀸 𑀦𑀬𑁂𑀦 𑀑𑀪𑀸𑀲𑀁 𑀨𑀭𑀺𑀢𑁆𑀯𑀸 𑀕𑀸𑀣𑀸𑀬 𑀅𑀯𑀺𑀚𑁆𑀚𑀡𑁆𑀟𑀓𑁄𑀲𑀁 𑀧𑀳𑀭𑀢𑀺. 𑀲𑁄 𑀕𑀸𑀣𑀸𑀧𑀭𑀺𑀬𑁄𑀲𑀸𑀦𑁂 𑀅𑀯𑀺𑀚𑁆𑀚𑀡𑁆𑀟𑀓𑁄𑀲𑀁 𑀪𑀺𑀦𑁆𑀤𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀸𑀢𑀺. 𑀢𑀢𑁄 𑀧𑀝𑁆𑀞𑀸𑀬 𑀬𑀣𑀸 𑀢𑁂 𑀓𑀼𑀓𑁆𑀓𑀼𑀝𑀧𑁄𑀢𑀓𑀸 𑀕𑀸𑀫𑀓𑁆𑀔𑁂𑀢𑁆𑀢𑀁 𑀉𑀧𑀲𑁄𑀪𑀬𑀫𑀸𑀦𑀸 𑀢𑀢𑁆𑀣 𑀯𑀺𑀘𑀭𑀦𑁆𑀢𑀺, 𑀏𑀯𑀁 𑀅𑀬𑀫𑁆𑀧𑀺 𑀫𑀳𑀸𑀔𑀻𑀡𑀸𑀲𑀯𑁄 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀁 𑀨𑀮𑀲𑀫𑀸𑀧𑀢𑁆𑀢𑀺𑀁 𑀅𑀧𑁆𑀧𑁂𑀢𑁆𑀯𑀸 𑀲𑀗𑁆𑀖𑀸𑀭𑀸𑀫𑀁 𑀉𑀧𑀲𑁄𑀪𑀬𑀫𑀸𑀦𑁄 𑀯𑀺𑀘𑀭𑀢𑀺.

𑀨𑀮𑀕𑀡𑁆𑀟𑀲𑁆𑀲𑀸𑀢𑀺 𑀯𑀟𑁆𑀠𑀓𑀺𑀲𑁆𑀲. 𑀲𑁄 𑀳𑀺 𑀑𑀮𑀫𑁆𑀩𑀓𑀲𑀗𑁆𑀔𑀸𑀢𑀁 𑀨𑀮𑀁 𑀘𑀸𑀭𑁂𑀢𑁆𑀯𑀸 𑀤𑀸𑀭𑀽𑀦𑀁 𑀕𑀡𑁆𑀟𑀁 𑀳𑀭𑀢𑀻𑀢𑀺 𑀨𑀮𑀕𑀡𑁆𑀟𑁄𑀢𑀺 𑀯𑀼𑀘𑁆𑀘𑀢𑀺. 𑀯𑀸𑀲𑀺𑀚𑀝𑁂𑀢𑀺 𑀯𑀸𑀲𑀺𑀤𑀡𑁆𑀟𑀓𑀲𑁆𑀲 𑀕𑀳𑀡𑀝𑁆𑀞𑀸𑀦𑁂. 𑀏𑀢𑁆𑀢𑀓𑀁 𑀫𑁂 𑀅𑀚𑁆𑀚 𑀆𑀲𑀯𑀸𑀦𑀁 𑀔𑀻𑀡𑀦𑁆𑀢𑀺 𑀧𑀩𑁆𑀩𑀚𑀺𑀢𑀲𑁆𑀲 𑀳𑀺 𑀧𑀩𑁆𑀩𑀚𑁆𑀚𑀸𑀲𑀗𑁆𑀔𑁂𑀧𑁂𑀦 𑀉𑀤𑁆𑀤𑁂𑀲𑁂𑀦 𑀧𑀭𑀺𑀧𑀼𑀘𑁆𑀙𑀸𑀬 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁂𑀦 𑀯𑀢𑁆𑀢𑀧𑀝𑀺𑀧𑀢𑁆𑀢𑀺𑀬𑀸 𑀘 𑀦𑀺𑀘𑁆𑀘𑀓𑀸𑀮𑀁 𑀆𑀲𑀯𑀸 𑀔𑀻𑀬𑀦𑁆𑀢𑀺. 𑀏𑀯𑀁 𑀔𑀻𑀬𑀫𑀸𑀦𑀸𑀦𑀁 𑀧𑀦 𑀦𑁂𑀲𑀁 ‘‘𑀏𑀢𑁆𑀢𑀓𑀁 𑀅𑀚𑁆𑀚 𑀔𑀻𑀡𑀁 𑀏𑀢𑁆𑀢𑀓𑀁 𑀳𑀺𑀬𑁆𑀬𑁄’’𑀢𑀺 𑀏𑀯𑀫𑀲𑁆𑀲 𑀜𑀸𑀡𑀁 𑀦 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀇𑀫𑀸𑀬 𑀉𑀧𑀫𑀸𑀬 𑀯𑀺𑀧𑀲𑁆𑀲𑀦𑀸𑀦𑀺𑀲𑀁𑀲𑁄 𑀤𑀻𑀧𑀺𑀢𑁄.

𑀳𑁂𑀫𑀦𑁆𑀢𑀺𑀓𑁂𑀦𑀸𑀢𑀺 𑀳𑁂𑀫𑀦𑁆𑀢𑀲𑀫𑀬𑁂𑀦. 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀦𑁆𑀢𑀻𑀢𑀺 𑀣𑀺𑀭𑀪𑀸𑀯𑁂𑀦 𑀧𑀭𑀺𑀳𑀸𑀬𑀦𑁆𑀢𑀺. 𑀏𑀯𑀫𑁂𑀯 𑀔𑁄𑀢𑀺 𑀏𑀢𑁆𑀣 𑀫𑀳𑀸𑀲𑀫𑀼𑀤𑁆𑀤𑁄 𑀯𑀺𑀬 𑀲𑀸𑀲𑀦𑀁 𑀤𑀝𑁆𑀞𑀩𑁆𑀩𑀁, 𑀦𑀸𑀯𑀸 𑀯𑀺𑀬 𑀬𑁄𑀕𑀸𑀯𑀘𑀭𑁄, 𑀦𑀸𑀯𑀸𑀬 𑀫𑀳𑀸𑀲𑀫𑀼𑀤𑁆𑀤𑁂 𑀧𑀭𑀺𑀬𑀸𑀬𑀦𑀁 𑀯𑀺𑀬 𑀇𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀊𑀦𑀧𑀜𑁆𑀘𑀯𑀲𑁆𑀲𑀓𑀸𑀮𑁂 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀸𑀦𑀁 𑀲𑀦𑁆𑀢𑀺𑀓𑁂 𑀯𑀺𑀘𑀭𑀡𑀁, 𑀦𑀸𑀯𑀸𑀬 𑀫𑀳𑀸𑀲𑀫𑀼𑀤𑁆𑀤𑀉𑀤𑀓𑁂𑀦 𑀔𑀚𑁆𑀚𑀫𑀸𑀦𑀸𑀦𑀁 𑀩𑀦𑁆𑀥𑀦𑀸𑀦𑀁 𑀢𑀦𑀼𑀪𑀸𑀯𑁄 𑀯𑀺𑀬 𑀪𑀺𑀓𑁆𑀔𑀼𑀦𑁄 𑀧𑀩𑁆𑀩𑀚𑁆𑀚𑀸𑀲𑀗𑁆𑀔𑁂𑀧𑁂𑀦 𑀉𑀤𑁆𑀤𑁂𑀲𑀧𑀭𑀺𑀧𑀼𑀘𑁆𑀙𑀸𑀤𑀻𑀳𑀺𑀬𑁂𑀯 𑀲𑀁𑀬𑁄𑀚𑀦𑀸𑀦𑀁 𑀢𑀦𑀼𑀪𑀸𑀯𑁄, 𑀦𑀸𑀯𑀸𑀬 𑀣𑀮𑁂 𑀉𑀓𑁆𑀔𑀺𑀢𑁆𑀢𑀓𑀸𑀮𑁄 𑀯𑀺𑀬 𑀪𑀺𑀓𑁆𑀔𑀼𑀦𑁄 𑀦𑀺𑀲𑁆𑀲𑀬𑀫𑀼𑀢𑁆𑀢𑀓𑀲𑁆𑀲 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀅𑀭𑀜𑁆𑀜𑁂 𑀯𑀲𑀦𑀓𑀸𑀮𑁄, 𑀤𑀺𑀯𑀸 𑀯𑀸𑀢𑀸𑀢𑀧𑁂𑀦 𑀲𑀁𑀲𑀼𑀲𑁆𑀲𑀦𑀁 𑀯𑀺𑀬 𑀯𑀺𑀧𑀲𑁆𑀲𑀦𑀸𑀜𑀸𑀡𑁂𑀦 𑀢𑀡𑁆𑀳𑀸𑀲𑀺𑀦𑁂𑀳𑀲𑁆𑀲 𑀲𑀁𑀲𑀼𑀲𑁆𑀲𑀦𑀁, 𑀭𑀢𑁆𑀢𑀺𑀁 𑀳𑀺𑀫𑁄𑀤𑀓𑁂𑀦 𑀢𑁂𑀫𑀦𑀁 𑀯𑀺𑀬 𑀓𑀫𑁆𑀫𑀝𑁆𑀞𑀸𑀦𑀁 𑀦𑀺𑀲𑁆𑀲𑀸𑀬 𑀉𑀧𑁆𑀧𑀦𑁆𑀦𑁂𑀦 𑀧𑀻𑀢𑀺𑀧𑀸𑀫𑁄𑀚𑁆𑀚𑁂𑀦 𑀘𑀺𑀢𑁆𑀢𑀢𑁂𑀫𑀦𑀁, 𑀭𑀢𑁆𑀢𑀺𑀦𑁆𑀤𑀺𑀯𑀁 𑀯𑀸𑀢𑀸𑀢𑀧𑁂𑀳𑀺 𑀘𑁂𑀯 𑀳𑀺𑀫𑁄𑀤𑀓𑁂𑀦 𑀘 𑀧𑀭𑀺𑀲𑀼𑀓𑁆𑀔𑀧𑀭𑀺𑀢𑀺𑀦𑁆𑀢𑀸𑀦𑀁 𑀩𑀦𑁆𑀥𑀦𑀸𑀦𑀁 𑀤𑀼𑀩𑁆𑀩𑀮𑀪𑀸𑀯𑁄 𑀯𑀺𑀬 𑀯𑀺𑀧𑀲𑁆𑀲𑀦𑀸𑀜𑀸𑀡𑀧𑀻𑀢𑀺𑀧𑀸𑀫𑁄𑀚𑁆𑀚𑁂𑀳𑀺 𑀲𑀁𑀬𑁄𑀚𑀦𑀸𑀦𑀁 𑀪𑀺𑀬𑁆𑀬𑁄𑀲𑁄𑀫𑀢𑁆𑀢𑀸𑀬 𑀤𑀼𑀩𑁆𑀩𑀮𑀪𑀸𑀯𑁄, 𑀧𑀸𑀯𑀼𑀲𑁆𑀲𑀓𑀫𑁂𑀖𑁄 𑀯𑀺𑀬 𑀅𑀭𑀳𑀢𑁆𑀢𑀫𑀕𑁆𑀕𑀜𑀸𑀡𑀁, 𑀫𑁂𑀖𑀯𑀼𑀝𑁆𑀞𑀺𑀉𑀤𑀓𑁂𑀦 𑀦𑀸𑀯𑀸𑀬 𑀅𑀦𑁆𑀢𑁄𑀧𑀽𑀢𑀺𑀪𑀸𑀯𑁄 𑀯𑀺𑀬 𑀆𑀭𑀤𑁆𑀥𑀯𑀺𑀧𑀲𑁆𑀲𑀓𑀲𑁆𑀲 𑀭𑀽𑀧𑀲𑀢𑁆𑀢𑀓𑀸𑀤𑀺𑀯𑀲𑁂𑀦 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀦𑁆𑀢𑀲𑁆𑀲 𑀑𑀓𑁆𑀔𑀸𑀬𑀫𑀸𑀦𑁂 𑀧𑀓𑁆𑀔𑀸𑀬𑀫𑀸𑀦𑁂 𑀓𑀫𑁆𑀫𑀝𑁆𑀞𑀸𑀦𑁂 𑀏𑀓𑀤𑀺𑀯𑀲𑀁 𑀉𑀢𑀼𑀲𑀧𑁆𑀧𑀸𑀬𑀸𑀤𑀻𑀦𑀺 𑀮𑀤𑁆𑀥𑀸 𑀏𑀓𑀧𑀮𑁆𑀮𑀗𑁆𑀓𑁂𑀦 𑀦𑀺𑀲𑀺𑀦𑁆𑀦𑀲𑁆𑀲 𑀅𑀭𑀳𑀢𑁆𑀢𑀨𑀮𑀸𑀥𑀺𑀕𑀫𑁄. 𑀧𑀽𑀢𑀺𑀩𑀦𑁆𑀥𑀦𑀸𑀬 𑀦𑀸𑀯𑀸𑀬 𑀓𑀺𑀜𑁆𑀘𑀺 𑀓𑀸𑀮𑀁 𑀞𑀸𑀦𑀁 𑀯𑀺𑀬 𑀔𑀻𑀡𑀲𑀁𑀬𑁄𑀚𑀦𑀲𑁆𑀲 𑀅𑀭𑀳𑀢𑁄 𑀫𑀳𑀸𑀚𑀦𑀁 𑀅𑀦𑀼𑀕𑁆𑀕𑀡𑁆𑀳𑀦𑁆𑀢𑀲𑁆𑀲 𑀬𑀸𑀯𑀢𑀸𑀬𑀼𑀓𑀁 𑀞𑀸𑀦𑀁, 𑀧𑀽𑀢𑀺𑀩𑀦𑁆𑀥𑀦𑀸𑀬 𑀦𑀸𑀯𑀸𑀬 𑀅𑀦𑀼𑀧𑀼𑀩𑁆𑀩𑁂𑀦 𑀪𑀺𑀚𑁆𑀚𑀺𑀢𑁆𑀯𑀸 𑀅𑀧𑀡𑁆𑀡𑀢𑁆𑀢𑀺𑀓𑀪𑀸𑀯𑀽𑀧𑀕𑀫𑁄 𑀯𑀺𑀬 𑀔𑀻𑀡𑀸𑀲𑀯𑀲𑁆𑀲 𑀉𑀧𑀸𑀤𑀺𑀦𑁆𑀦𑀓𑁆𑀔𑀦𑁆𑀥𑀪𑁂𑀤𑁂𑀦 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀧𑀭𑀺𑀦𑀺𑀩𑁆𑀩𑀼𑀢𑀲𑁆𑀲 𑀅𑀧𑀡𑁆𑀡𑀢𑁆𑀢𑀺𑀓𑀪𑀸𑀯𑀽𑀧𑀕𑀫𑁄𑀢𑀺 𑀇𑀫𑀸𑀬 𑀉𑀧𑀫𑀸𑀬 𑀲𑀁𑀬𑁄𑀚𑀦𑀸𑀦𑀁 𑀤𑀼𑀩𑁆𑀩𑀮𑀢𑀸 𑀤𑀻𑀧𑀺𑀢𑀸.

𑁮. 𑀅𑀕𑁆𑀕𑀺𑀓𑁆𑀔𑀦𑁆𑀥𑁄𑀧𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁭𑁨. 𑀅𑀝𑁆𑀞𑀫𑀁 𑀅𑀢𑁆𑀣𑀼𑀧𑁆𑀧𑀢𑁆𑀢𑀺𑀬𑀁 𑀓𑀣𑀺𑀢𑀁. 𑀅𑀢𑁆𑀣𑀼𑀧𑁆𑀧𑀢𑁆𑀢𑀺 𑀧𑀦𑀲𑁆𑀲 𑀳𑁂𑀝𑁆𑀞𑀸 𑀘𑀽𑀴𑀘𑁆𑀙𑀭𑀸𑀲𑀗𑁆𑀖𑀸𑀢𑀲𑀼𑀢𑁆𑀢𑀯𑀡𑁆𑀡𑀦𑀸𑀬 (𑀅. 𑀦𑀺. 𑀅𑀝𑁆𑀞. 𑁧.𑁧.𑁫𑁧 𑀆𑀤𑀬𑁄) 𑀯𑀺𑀢𑁆𑀣𑀸𑀭𑀺𑀢𑀸 𑀏𑀯. 𑀧𑀲𑁆𑀲𑀣 𑀦𑁄𑀢𑀺 𑀧𑀲𑁆𑀲𑀣 𑀦𑀼. 𑀆𑀮𑀺𑀗𑁆𑀕𑀺𑀢𑁆𑀯𑀸𑀢𑀺 𑀉𑀧𑀕𑀽𑀳𑀺𑀢𑁆𑀯𑀸. 𑀉𑀧𑀦𑀺𑀲𑀻𑀤𑁂𑀬𑁆𑀬𑀸𑀢𑀺 𑀲𑀫𑀻𑀧𑁂 𑀦𑀺𑀲𑁆𑀲𑀸𑀬 𑀦𑀺𑀲𑀻𑀤𑁂𑀬𑁆𑀬. 𑀉𑀧𑀦𑀺𑀧𑀚𑁆𑀚𑁂𑀬𑁆𑀬𑀸𑀢𑀺 𑀉𑀧𑀕𑀦𑁆𑀢𑁆𑀯𑀸 𑀦𑀺𑀧𑀚𑁆𑀚𑁂𑀬𑁆𑀬. 𑀆𑀭𑁄𑀘𑀬𑀸𑀫𑀻𑀢𑀺 𑀆𑀘𑀺𑀓𑁆𑀔𑀸𑀫𑀺. 𑀧𑀝𑀺𑀯𑁂𑀤𑀬𑀸𑀫𑀻𑀢𑀺 𑀧𑀝𑀺𑀯𑁂𑀤𑁂𑀢𑁆𑀯𑀸 𑀚𑀸𑀦𑀸𑀧𑁂𑀢𑁆𑀯𑀸 𑀓𑀣𑁂𑀫𑀺. 𑀯𑀸𑀮𑀭𑀚𑁆𑀚𑀼𑀬𑀸𑀢𑀺 𑀅𑀲𑁆𑀲𑀯𑀸𑀮𑀕𑁄𑀯𑀸𑀮𑁂𑀳𑀺 𑀯𑀝𑁆𑀝𑀺𑀢𑀭𑀚𑁆𑀚𑀼𑀬𑀸. 𑀧𑀘𑁆𑀘𑁄𑀭𑀲𑁆𑀫𑀺𑀦𑁆𑀢𑀺 𑀉𑀭𑀫𑀚𑁆𑀛𑁂. 𑀨𑁂𑀡𑀼𑀤𑁆𑀤𑁂𑀳𑀓𑀦𑁆𑀢𑀺 𑀨𑁂𑀡𑀁 𑀉𑀤𑁆𑀤𑁂𑀳𑀺𑀢𑁆𑀯𑀸, 𑀉𑀲𑁆𑀲𑀸𑀤𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀅𑀢𑁆𑀢𑀢𑁆𑀣𑀦𑁆𑀢𑀺 𑀅𑀢𑁆𑀢𑀦𑁄 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀁 𑀅𑀢𑁆𑀣𑀁. 𑀧𑀭𑀢𑁆𑀣𑁄𑀪𑀬𑀢𑁆𑀣𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀲𑁂𑀲𑀫𑁂𑀢𑁆𑀣 𑀬𑀁 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸, 𑀢𑀁 𑀲𑀩𑁆𑀩𑀁 𑀘𑀽𑀴𑀘𑁆𑀙𑀭𑀸𑀲𑀗𑁆𑀖𑀸𑀢𑀲𑀼𑀢𑁆𑀢𑀲𑁆𑀲 (𑀅. 𑀦𑀺. 𑁧.𑁫𑁧 𑀆𑀤𑀬𑁄) 𑀅𑀢𑁆𑀣𑀼𑀧𑁆𑀧𑀢𑁆𑀢𑀺𑀬𑀁 𑀓𑀣𑀺𑀢𑀫𑁂𑀯. 𑀇𑀤𑀜𑁆𑀘 𑀧𑀦 𑀲𑀼𑀢𑁆𑀢𑀁 𑀓𑀣𑁂𑀢𑁆𑀯𑀸 𑀲𑀢𑁆𑀣𑀸 𑀘𑀽𑀴𑀘𑁆𑀙𑀭𑀸𑀲𑀗𑁆𑀖𑀸𑀢𑀲𑀼𑀢𑁆𑀢𑀁 𑀓𑀣𑁂𑀲𑀺. 𑀦𑀯𑀫𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑁧𑁦. 𑀅𑀭𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁭𑁪. 𑀤𑀲𑀫𑁂 𑀧𑀭𑀺𑀢𑁆𑀢𑀦𑁆𑀢𑀺 𑀅𑀧𑁆𑀧𑀁 𑀣𑁄𑀓𑀁. 𑀢𑀜𑁆𑀳𑀺 𑀲𑀭𑀲𑀧𑀭𑀺𑀢𑁆𑀢𑀢𑀸𑀬𑀧𑀺 𑀔𑀡𑀧𑀭𑀺𑀢𑁆𑀢𑀢𑀸𑀬𑀧𑀺 𑀞𑀺𑀢𑀺𑀧𑀭𑀺𑀢𑁆𑀢𑀢𑀸𑀬𑀧𑀺 𑀧𑀭𑀺𑀢𑁆𑀢𑀫𑁂𑀯. 𑀮𑀳𑀼𑀁 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀦𑀺𑀭𑀼𑀚𑁆𑀛𑀦𑀢𑁄 𑀮𑀳𑀼𑀓𑀁. 𑀫𑀦𑁆𑀢𑀸𑀬𑀁 𑀩𑁄𑀤𑁆𑀥𑀩𑁆𑀩𑀦𑁆𑀢𑀺 𑀫𑀦𑁆𑀢𑀸𑀬 𑀩𑁄𑀤𑁆𑀥𑀩𑁆𑀩𑀁, 𑀧𑀜𑁆𑀜𑀸𑀬 𑀚𑀸𑀦𑀺𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀧𑀩𑁆𑀩𑀢𑁂𑀬𑁆𑀬𑀸𑀢𑀺 𑀧𑀩𑁆𑀩𑀢𑀲𑀫𑁆𑀪𑀯𑀸. 𑀳𑀸𑀭𑀳𑀸𑀭𑀺𑀦𑀻𑀢𑀺 𑀭𑀼𑀓𑁆𑀔𑀦𑀴𑀯𑁂𑀴𑀼𑀆𑀤𑀻𑀦𑀺 𑀳𑀭𑀺𑀢𑀩𑁆𑀩𑀸𑀦𑀺 𑀳𑀭𑀺𑀢𑀼𑀁 𑀲𑀫𑀢𑁆𑀣𑀸. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀫𑀳𑀸𑀯𑀕𑁆𑀕𑁄 𑀲𑀢𑁆𑀢𑀫𑁄.