𑁫-𑁬. 𑀲𑀜𑁆𑀜𑀸𑀲𑀼𑀢𑁆𑀢𑀤𑁆𑀯𑀬𑀯𑀡𑁆𑀡𑀦𑀸

𑁪𑁮-𑁪𑁯. 𑀧𑀜𑁆𑀘𑀫𑁂 𑀅𑀫𑀢𑁄𑀕𑀥𑀸𑀢𑀺 𑀦𑀺𑀩𑁆𑀩𑀸𑀦𑀧𑀢𑀺𑀝𑁆𑀞𑀸. 𑀅𑀫𑀢𑀧𑀭𑀺𑀬𑁄𑀲𑀸𑀦𑀸𑀢𑀺 𑀦𑀺𑀩𑁆𑀩𑀸𑀦𑀸𑀯𑀲𑀸𑀦𑀸. 𑀙𑀝𑁆𑀞𑁂 𑀫𑁂𑀣𑀼𑀦𑀥𑀫𑁆𑀫𑀲𑀫𑀸𑀧𑀢𑁆𑀢𑀺𑀬𑀸𑀢𑀺 𑀫𑁂𑀣𑀼𑀦𑀥𑀫𑁆𑀫𑁂𑀦 𑀲𑀫𑀗𑁆𑀕𑀺𑀪𑀸𑀯𑀢𑁄. 𑀦𑁆𑀳𑀸𑀭𑀼𑀤𑀤𑁆𑀤𑀼𑀮𑀦𑁆𑀢𑀺 𑀦𑁆𑀳𑀸𑀭𑀼𑀔𑀡𑁆𑀟𑀁 𑀦𑁆𑀳𑀸𑀭𑀼𑀯𑀺𑀮𑁂𑀔𑀦𑀁 𑀯𑀸. 𑀅𑀦𑀼𑀲𑀦𑁆𑀤𑀢𑀻𑀢𑀺 𑀧𑀯𑀢𑁆𑀢𑀢𑀺. 𑀦𑀢𑁆𑀣𑀺 𑀫𑁂 𑀧𑀼𑀩𑁆𑀩𑁂𑀦𑀸𑀧𑀭𑀁 𑀯𑀺𑀲𑁂𑀲𑁄𑀢𑀺 𑀦𑀢𑁆𑀣𑀺 𑀫𑀬𑁆𑀳𑀁 𑀧𑀼𑀩𑁆𑀩𑁂𑀦 𑀅𑀪𑀸𑀯𑀺𑀢𑀓𑀸𑀮𑁂𑀦 𑀲𑀤𑁆𑀥𑀺𑀁 𑀅𑀧𑀭𑀁 𑀪𑀸𑀯𑀺𑀢𑀓𑀸𑀮𑁂 𑀯𑀺𑀲𑁂𑀲𑁄. 𑀮𑁄𑀓𑀘𑀺𑀢𑁆𑀭𑁂𑀲𑀽𑀢𑀺 𑀢𑀺𑀥𑀸𑀢𑀼𑀓𑀮𑁄𑀓𑀲𑀦𑁆𑀦𑀺𑀯𑀸𑀲𑀲𑀗𑁆𑀔𑀸𑀢𑁂𑀲𑀼 𑀮𑁄𑀓𑀘𑀺𑀢𑁆𑀭𑁂𑀲𑀼. 𑀆𑀮𑀲𑁆𑀬𑁂𑀢𑀺 𑀆𑀮𑀲𑀺𑀬𑀪𑀸𑀯𑁂. 𑀯𑀺𑀲𑁆𑀲𑀝𑁆𑀞𑀺𑀬𑁂𑀢𑀺 𑀯𑀺𑀲𑁆𑀲𑀝𑁆𑀞𑀪𑀸𑀯𑁂. 𑀅𑀦𑀦𑀼𑀬𑁄𑀕𑁂𑀢𑀺 𑀬𑁄𑀕𑀲𑁆𑀲 𑀅𑀦𑀦𑀼𑀬𑀼𑀜𑁆𑀚𑀦𑁂. 𑀅𑀳𑀗𑁆𑀓𑀸𑀭𑀫𑀫𑀗𑁆𑀓𑀸𑀭𑀫𑀸𑀦𑀸𑀧𑀕𑀢𑀦𑁆𑀢𑀺 𑀅𑀳𑀗𑁆𑀓𑀸𑀭𑀤𑀺𑀝𑁆𑀞𑀺𑀢𑁄 𑀘 𑀫𑀫𑀗𑁆𑀓𑀸𑀭𑀢𑀡𑁆𑀳𑀸𑀢𑁄 𑀘 𑀦𑀯𑀯𑀺𑀥𑀫𑀸𑀦𑀢𑁄 𑀘 𑀅𑀧𑀕𑀢𑀁. 𑀯𑀺𑀥𑀸𑀲𑀫𑀢𑀺𑀓𑁆𑀓𑀦𑁆𑀢𑀦𑁆𑀢𑀺 𑀢𑀺𑀲𑁆𑀲𑁄 𑀯𑀺𑀥𑀸 𑀅𑀢𑀺𑀓𑁆𑀓𑀦𑁆𑀢𑀁. 𑀲𑀦𑁆𑀢𑀦𑁆𑀢𑀺 𑀢𑀧𑁆𑀧𑀘𑁆𑀘𑀦𑀻𑀓𑀓𑀺𑀮𑁂𑀲𑁂𑀳𑀺 𑀲𑀦𑁆𑀢𑀁. 𑀲𑀼𑀯𑀺𑀫𑀼𑀢𑁆𑀢𑀦𑁆𑀢𑀺 𑀧𑀜𑁆𑀘𑀳𑀺 𑀯𑀺𑀫𑀼𑀢𑁆𑀢𑀻𑀳𑀺 𑀲𑀼𑀝𑁆𑀞𑀼 𑀯𑀺𑀫𑀼𑀢𑁆𑀢𑀁.