𑀧𑀡𑁆𑀡𑀸𑀲𑀓𑀁

𑁧. 𑀥𑀦𑀯𑀕𑁆𑀕𑁄

𑁧-𑁫. 𑀧𑀞𑀫𑀧𑀺𑀬𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧-𑁫. 𑀲𑀢𑁆𑀢𑀓𑀦𑀺𑀧𑀸𑀢𑀲𑁆𑀲 𑀧𑀞𑀫𑁂 𑀅𑀦𑀯𑀜𑁆𑀜𑀢𑁆𑀢𑀺𑀓𑀸𑀫𑁄𑀢𑀺 𑀅𑀪𑀺𑀜𑁆𑀜𑀸𑀢𑀪𑀸𑀯𑀓𑀸𑀫𑁄. 𑀢𑀢𑀺𑀬𑁂 𑀬𑁄𑀦𑀺𑀲𑁄 𑀯𑀺𑀘𑀺𑀦𑁂 𑀥𑀫𑁆𑀫𑀦𑁆𑀢𑀺 𑀉𑀧𑀸𑀬𑁂𑀦 𑀘𑀢𑀼𑀲𑀘𑁆𑀘𑀥𑀫𑁆𑀫𑀁 𑀯𑀺𑀘𑀺𑀦𑀸𑀢𑀺. 𑀧𑀜𑁆𑀜𑀸𑀬𑀢𑁆𑀣𑀁 𑀯𑀺𑀧𑀲𑁆𑀲𑀢𑀻𑀢𑀺 𑀲𑀳𑀯𑀺𑀧𑀲𑁆𑀲𑀦𑀸𑀬 𑀫𑀕𑁆𑀕𑀧𑀜𑁆𑀜𑀸𑀬 𑀲𑀘𑁆𑀘𑀥𑀫𑁆𑀫𑀁 𑀯𑀺𑀧𑀲𑁆𑀲𑀢𑀺. 𑀧𑀚𑁆𑀚𑁄𑀢𑀲𑁆𑀲𑁂𑀯𑀸𑀢𑀺 𑀤𑀻𑀧𑀲𑁆𑀲𑁂𑀯. 𑀯𑀺𑀫𑁄𑀓𑁆𑀔𑁄 𑀳𑁄𑀢𑀺 𑀘𑁂𑀢𑀲𑁄𑀢𑀺 𑀢𑀲𑁆𑀲 𑀇𑀫𑁂𑀳𑀺 𑀩𑀮𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀔𑀻𑀡𑀸𑀲𑀯𑀲𑁆𑀲 𑀤𑀻𑀧𑀦𑀺𑀩𑁆𑀩𑀸𑀦𑀁 𑀯𑀺𑀬 𑀘𑀭𑀺𑀫𑀓𑀘𑀺𑀢𑁆𑀢𑀲𑁆𑀲 𑀯𑀢𑁆𑀣𑀸𑀭𑀫𑁆𑀫𑀡𑁂𑀳𑀺 𑀯𑀺𑀫𑁄𑀓𑁆𑀔𑁄 𑀳𑁄𑀢𑀺, 𑀕𑀢𑀝𑁆𑀞𑀸𑀦𑀁 𑀦 𑀧𑀜𑁆𑀜𑀸𑀬𑀢𑀺. 𑀘𑀢𑀼𑀢𑁆𑀣𑁂 𑀲𑀤𑁆𑀥𑁄 𑀳𑁄𑀢𑀻𑀢𑀺𑀆𑀤𑀻𑀦𑀺 𑀧𑀜𑁆𑀘𑀓𑀦𑀺𑀧𑀸𑀢𑁂 𑀯𑀡𑁆𑀡𑀺𑀢𑀸𑀦𑁂𑀯. 𑀧𑀜𑁆𑀘𑀫𑁂 𑀥𑀦𑀸𑀦𑀻𑀢𑀺 𑀅𑀤𑀸𑀮𑀺𑀤𑁆𑀤𑀺𑀬𑀓𑀭𑀡𑀝𑁆𑀞𑁂𑀦 𑀥𑀦𑀸𑀦𑀺.

𑁭. 𑀉𑀕𑁆𑀕𑀲𑀼𑀢𑁆𑀢𑀯𑀡𑁆𑀡𑀦𑀸

𑁭. 𑀲𑀢𑁆𑀢𑀫𑁂 𑀉𑀕𑁆𑀕𑁄 𑀭𑀸𑀚𑀫𑀳𑀸𑀫𑀢𑁆𑀢𑁄𑀢𑀺 𑀧𑀲𑁂𑀦𑀤𑀺𑀓𑁄𑀲𑀮𑀲𑁆𑀲 𑀫𑀳𑀸𑀅𑀫𑀘𑁆𑀘𑁄. 𑀉𑀧𑀲𑀗𑁆𑀓𑀫𑀻𑀢𑀺 𑀪𑀼𑀢𑁆𑀢𑀧𑀸𑀢𑀭𑀸𑀲𑁄 𑀉𑀧𑀲𑀗𑁆𑀓𑀫𑀺. 𑀅𑀟𑁆𑀠𑁄𑀢𑀺 𑀦𑀺𑀥𑀸𑀦𑀕𑀢𑁂𑀦 𑀥𑀦𑁂𑀦 𑀅𑀟𑁆𑀠𑁄. 𑀫𑀺𑀕𑀸𑀭𑁄 𑀭𑁄𑀳𑀡𑁂𑀬𑁆𑀬𑁄𑀢𑀺 𑀭𑁄𑀳𑀡𑀲𑁂𑀝𑁆𑀞𑀺𑀦𑁄 𑀦𑀢𑁆𑀢𑀸𑀭𑀁 𑀫𑀺𑀕𑀸𑀭𑀲𑁂𑀝𑁆𑀞𑀺𑀁 𑀲𑀦𑁆𑀥𑀸𑀬𑁂𑀯𑀫𑀸𑀳. 𑀫𑀳𑀤𑁆𑀥𑀦𑁄𑀢𑀺 𑀯𑀴𑀜𑁆𑀚𑀦𑀥𑀦𑁂𑀦 𑀫𑀳𑀤𑁆𑀥𑀦𑁄. 𑀫𑀳𑀸𑀪𑁄𑀕𑁄𑀢𑀺 𑀉𑀧𑀪𑁄𑀕𑀧𑀭𑀺𑀪𑁄𑀕𑀪𑀡𑁆𑀟𑀲𑁆𑀲 𑀫𑀳𑀦𑁆𑀢𑀢𑀸𑀬 𑀫𑀳𑀸𑀪𑁄𑀕𑁄. 𑀳𑀺𑀭𑀜𑁆𑀜𑀲𑁆𑀲𑀸𑀢𑀺 𑀲𑀼𑀯𑀡𑁆𑀡𑀲𑁆𑀲𑁂𑀯. 𑀲𑀼𑀯𑀡𑁆𑀡𑀸𑀫𑁂𑀯 𑀳𑀺𑀲𑁆𑀲 𑀓𑁄𑀝𑀺𑀲𑀗𑁆𑀔𑁆𑀬𑀁 𑀅𑀳𑁄𑀲𑀺. 𑀭𑀽𑀧𑀺𑀬𑀲𑁆𑀲𑀸𑀢𑀺 𑀲𑁂𑀲𑀲𑁆𑀲 𑀢𑀝𑁆𑀝𑀓𑀲𑀭𑀓𑀅𑀢𑁆𑀣𑀭𑀡𑀧𑀸𑀯𑀼𑀭𑀡𑀸𑀤𑀺𑀦𑁄 𑀧𑀭𑀺𑀪𑁄𑀕𑀧𑀭𑀺𑀓𑁆𑀔𑀸𑀭𑀲𑁆𑀲 𑀧𑀫𑀸𑀡𑀲𑀗𑁆𑀔𑀸𑀦𑁂 𑀯𑀸𑀤𑁄𑀬𑁂𑀯 𑀦𑀢𑁆𑀣𑀺.

𑁮. 𑀲𑀁𑀬𑁄𑀚𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁮. 𑀅𑀝𑁆𑀞𑀫𑁂 𑀅𑀦𑀼𑀦𑀬𑀲𑀁𑀬𑁄𑀚𑀦𑀦𑁆𑀢𑀺 𑀓𑀸𑀫𑀭𑀸𑀕𑀲𑀁𑀬𑁄𑀚𑀦𑀁. 𑀲𑀩𑁆𑀩𑀸𑀦𑁂𑀯 𑀘𑁂𑀢𑀸𑀦𑀺 𑀩𑀦𑁆𑀥𑀦𑀝𑁆𑀞𑁂𑀦 𑀲𑀁𑀬𑁄𑀚𑀦𑀸𑀦𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀯𑀝𑁆𑀝𑀫𑁂𑀯 𑀓𑀣𑀺𑀢𑀁. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀥𑀦𑀯𑀕𑁆𑀕𑁄 𑀧𑀞𑀫𑁄.

𑁨. 𑀅𑀦𑀼𑀲𑀬𑀯𑀕𑁆𑀕𑁄

𑁩. 𑀓𑀼𑀮𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁩. 𑀤𑀼𑀢𑀺𑀬𑀲𑁆𑀲 𑀢𑀢𑀺𑀬𑁂 𑀦𑀸𑀮𑀦𑁆𑀢𑀺 𑀦 𑀬𑀼𑀢𑁆𑀢𑀁 𑀦𑀸𑀦𑀼𑀘𑁆𑀙𑀯𑀺𑀓𑀁. 𑀦 𑀫𑀦𑀸𑀧𑁂𑀦𑀸𑀢𑀺 𑀦 𑀫𑀦𑀫𑁆𑀳𑀺 𑀅𑀧𑁆𑀧𑀦𑀓𑁂𑀦 𑀆𑀓𑀸𑀭𑁂𑀦 𑀦𑀺𑀲𑀺𑀦𑁆𑀦𑀸𑀲𑀦𑀢𑁄 𑀧𑀘𑁆𑀘𑀼𑀝𑁆𑀞𑁂𑀦𑁆𑀢𑀺, 𑀅𑀦𑀸𑀤𑀭𑀫𑁂𑀯 𑀤𑀲𑁆𑀲𑁂𑀦𑁆𑀢𑀺. 𑀲𑀦𑁆𑀢𑀫𑀲𑁆𑀲 𑀧𑀭𑀺𑀕𑀼𑀳𑀦𑁆𑀢𑀻𑀢𑀺 𑀯𑀺𑀚𑁆𑀚𑀫𑀸𑀦𑀫𑁆𑀧𑀺 𑀤𑁂𑀬𑁆𑀬𑀥𑀫𑁆𑀫𑀁 𑀏𑀢𑀲𑁆𑀲 𑀦𑀺𑀕𑀼𑀳𑀦𑁆𑀢𑀺 𑀧𑀝𑀺𑀘𑁆𑀙𑀸𑀤𑁂𑀦𑁆𑀢𑀺. 𑀅𑀲𑀓𑁆𑀓𑀘𑁆𑀘𑀁 𑀤𑁂𑀦𑁆𑀢𑀺 𑀦𑁄 𑀲𑀓𑁆𑀓𑀘𑁆𑀘𑀦𑁆𑀢𑀺 𑀮𑀽𑀔𑀁 𑀯𑀸 𑀳𑁄𑀢𑀼 𑀧𑀡𑀻𑀢𑀁 𑀯𑀸, 𑀅𑀲𑀳𑀢𑁆𑀣𑀸 𑀅𑀘𑀺𑀢𑁆𑀢𑀻𑀓𑀸𑀭𑁂𑀦 𑀤𑁂𑀦𑁆𑀢𑀺, 𑀦𑁄 𑀘𑀺𑀢𑁆𑀢𑀻𑀓𑀸𑀭𑁂𑀦.

𑁪. 𑀧𑀼𑀕𑁆𑀕𑀮𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁪. 𑀘𑀢𑀼𑀢𑁆𑀣𑁂 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑁄𑀢𑀺 𑀤𑁆𑀯𑀻𑀳𑀺 𑀪𑀸𑀕𑁂𑀳𑀺 𑀯𑀺𑀫𑀼𑀢𑁆𑀢𑁄, 𑀅𑀭𑀽𑀧𑀲𑀫𑀸𑀧𑀢𑁆𑀢𑀺𑀬𑀸 𑀭𑀽𑀧𑀓𑀸𑀬𑀢𑁄 𑀯𑀺𑀫𑀼𑀢𑁆𑀢𑁄, 𑀫𑀕𑁆𑀕𑁂𑀦 𑀦𑀸𑀫𑀓𑀸𑀬𑀢𑁄. 𑀲𑁄 𑀘𑀢𑀼𑀦𑁆𑀦𑀁 𑀅𑀭𑀽𑀧𑀲𑀫𑀸𑀧𑀢𑁆𑀢𑀻𑀦𑀁 𑀏𑀓𑁂𑀓𑀢𑁄 𑀯𑀼𑀝𑁆𑀞𑀸𑀬 𑀲𑀗𑁆𑀔𑀸𑀭𑁂 𑀲𑀫𑁆𑀫𑀲𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀢𑁆𑀢𑀸𑀦𑀁 𑀘𑀢𑀼𑀦𑁆𑀦𑀁, 𑀦𑀺𑀭𑁄𑀥𑀸 𑀯𑀼𑀝𑁆𑀞𑀸𑀬 𑀅𑀭𑀳𑀢𑁆𑀢𑀁 𑀧𑀢𑁆𑀢𑀅𑀦𑀸𑀕𑀸𑀫𑀺𑀦𑁄 𑀘 𑀯𑀲𑁂𑀦 𑀧𑀜𑁆𑀘𑀯𑀺𑀥𑁄 𑀳𑁄𑀢𑀺. 𑀧𑀸𑀴𑀺 𑀧𑀦𑁂𑀢𑁆𑀣 ‘‘𑀓𑀢𑀫𑁄 𑀘 𑀧𑀼𑀕𑁆𑀕𑀮𑁄 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑁄? 𑀇𑀥𑁂𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀅𑀝𑁆𑀞 𑀯𑀺𑀫𑁄𑀓𑁆𑀔𑁂 𑀓𑀸𑀬𑁂𑀦 𑀨𑀼𑀲𑀺𑀢𑁆𑀯𑀸 𑀯𑀺𑀳𑀭𑀢𑀺, 𑀧𑀜𑁆𑀜𑀸𑀬 𑀘𑀲𑁆𑀲 𑀤𑀺𑀲𑁆𑀯𑀸 𑀆𑀲𑀯𑀸 𑀧𑀭𑀺𑀓𑁆𑀔𑀻𑀡𑀸 𑀳𑁄𑀦𑁆𑀢𑀻’’𑀢𑀺 (𑀧𑀼. 𑀧. 𑁨𑁦𑁮) 𑀏𑀯𑀁 𑀅𑀝𑁆𑀞𑀯𑀺𑀫𑁄𑀓𑁆𑀔𑀮𑀸𑀪𑀺𑀦𑁄 𑀯𑀲𑁂𑀦 𑀆𑀕𑀢𑀸.

𑀧𑀜𑁆𑀜𑀸𑀬 𑀯𑀺𑀫𑀼𑀢𑁆𑀢𑁄𑀢𑀺 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑁄. 𑀲𑁄 𑀲𑀼𑀓𑁆𑀔𑀯𑀺𑀧𑀲𑁆𑀲𑀓𑁄, 𑀘𑀢𑀽𑀳𑀺 𑀛𑀸𑀦𑁂𑀳𑀺 𑀯𑀼𑀝𑁆𑀞𑀸𑀬 𑀅𑀭𑀳𑀢𑁆𑀢𑀁 𑀧𑀢𑁆𑀢𑀸 𑀘𑀢𑁆𑀢𑀸𑀭𑁄 𑀘𑀸𑀢𑀺 𑀇𑀫𑁂𑀲𑀁 𑀯𑀲𑁂𑀦 𑀧𑀜𑁆𑀘𑀯𑀺𑀥𑁄 𑀳𑁄𑀢𑀺. 𑀧𑀸𑀴𑀺 𑀧𑀦𑁂𑀢𑁆𑀣 𑀅𑀝𑁆𑀞𑀯𑀺𑀫𑁄𑀓𑁆𑀔𑀧𑀝𑀺𑀓𑁆𑀔𑁂𑀧𑀯𑀲𑁂𑀦𑁂𑀯 𑀆𑀕𑀢𑀸. 𑀬𑀣𑀸𑀳 𑁋 ‘‘𑀦 𑀳𑁂𑀯 𑀔𑁄 𑀅𑀝𑁆𑀞 𑀯𑀺𑀫𑁄𑀓𑁆𑀔𑁂 𑀓𑀸𑀬𑁂𑀦 𑀨𑀼𑀲𑀺𑀢𑁆𑀯𑀸 𑀯𑀺𑀳𑀭𑀢𑀺, 𑀧𑀜𑁆𑀜𑀸𑀬 𑀘𑀲𑁆𑀲 𑀤𑀺𑀲𑁆𑀯𑀸 𑀆𑀲𑀯𑀸 𑀧𑀭𑀺𑀓𑁆𑀔𑀻𑀡𑀸 𑀳𑁄𑀦𑁆𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺 𑀧𑀼𑀕𑁆𑀕𑀮𑁄 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑁄’’𑀢𑀺.

𑀨𑀼𑀝𑁆𑀞𑀦𑁆𑀢𑀁 𑀲𑀘𑁆𑀙𑀺𑀓𑀢𑁄𑀢𑀺 𑀓𑀸𑀬𑀲𑀓𑁆𑀔𑀻. 𑀲𑁄 𑀛𑀸𑀦𑀨𑀲𑁆𑀲𑀁 𑀧𑀞𑀫𑀁 𑀨𑀼𑀲𑀢𑀺, 𑀧𑀘𑁆𑀙𑀸 𑀦𑀺𑀭𑁄𑀥𑀁 𑀦𑀺𑀩𑁆𑀩𑀸𑀦𑀁 𑀲𑀘𑁆𑀙𑀺𑀓𑀭𑁄𑀢𑀺. 𑀲𑁄 𑀲𑁄𑀢𑀸𑀧𑀢𑁆𑀢𑀺𑀨𑀮𑀝𑁆𑀞𑀁 𑀆𑀤𑀺𑀁 𑀓𑀢𑁆𑀯𑀸 𑀬𑀸𑀯 𑀅𑀭𑀳𑀢𑁆𑀢𑀫𑀕𑁆𑀕𑀝𑁆𑀞𑀸 𑀙𑀩𑁆𑀩𑀺𑀥𑁄 𑀳𑁄𑀢𑀺. 𑀢𑁂𑀦𑀸𑀳 𑁋 ‘‘𑀇𑀥𑁂𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀅𑀝𑁆𑀞 𑀯𑀺𑀫𑁄𑀓𑁆𑀔𑁂 𑀓𑀸𑀬𑁂𑀦 𑀨𑀼𑀲𑀺𑀢𑁆𑀯𑀸 𑀯𑀺𑀳𑀭𑀢𑀺, 𑀧𑀜𑁆𑀜𑀸𑀬 𑀘𑀲𑁆𑀲 𑀤𑀺𑀲𑁆𑀯𑀸 𑀏𑀓𑀘𑁆𑀘𑁂 𑀆𑀲𑀯𑀸 𑀧𑀭𑀺𑀓𑁆𑀔𑀻𑀡𑀸 𑀳𑁄𑀦𑁆𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺 𑀧𑀼𑀕𑁆𑀕𑀮𑁄 𑀓𑀸𑀬𑀲𑀓𑁆𑀔𑀻’’𑀢𑀺 (𑀧𑀼. 𑀧. 𑁨𑁦𑁮).

𑀤𑀺𑀝𑁆𑀞𑀦𑁆𑀢𑀁 𑀧𑀢𑁆𑀢𑁄𑀢𑀺 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑁄. 𑀢𑀢𑁆𑀭𑀺𑀤𑀁 𑀲𑀗𑁆𑀔𑁂𑀧𑀮𑀓𑁆𑀔𑀡𑀁 𑁋 𑀤𑀼𑀓𑁆𑀔𑀸 𑀲𑀗𑁆𑀔𑀸𑀭𑀸, 𑀲𑀼𑀔𑁄 𑀦𑀺𑀭𑁄𑀥𑁄𑀢𑀺 𑀜𑀸𑀢𑀁 𑀳𑁄𑀢𑀺 𑀤𑀺𑀝𑁆𑀞𑀁 𑀯𑀺𑀤𑀺𑀢𑀁 𑀲𑀘𑁆𑀙𑀺𑀓𑀢𑀁 𑀨𑀼𑀲𑀺𑀢𑀁 𑀧𑀜𑁆𑀜𑀸𑀬𑀸𑀢𑀺 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑁄. 𑀯𑀺𑀢𑁆𑀣𑀸𑀭𑀢𑁄 𑀧𑀦 𑀲𑁄𑀧𑀺 𑀓𑀸𑀬𑀲𑀓𑁆𑀔𑀻 𑀯𑀺𑀬 𑀙𑀩𑁆𑀩𑀺𑀥𑁄 𑀳𑁄𑀢𑀺. 𑀢𑁂𑀦𑁂𑀯𑀸𑀳 𑁋 ‘‘𑀇𑀥𑁂𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 ‘𑀇𑀤𑀁 𑀤𑀼𑀓𑁆𑀔’𑀦𑁆𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺…𑀧𑁂… ‘𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸’𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑀸 𑀘𑀲𑁆𑀲 𑀥𑀫𑁆𑀫𑀸 𑀧𑀜𑁆𑀜𑀸𑀬 𑀯𑁄𑀤𑀺𑀝𑁆𑀞𑀸 𑀳𑁄𑀦𑁆𑀢𑀺 𑀯𑁄𑀘𑀭𑀺𑀢𑀸 𑀧𑀜𑁆𑀜𑀸𑀬…𑀧𑁂… 𑀅𑀬𑀁 𑀯𑀼𑀘𑁆𑀘𑀢𑀺 𑀧𑀼𑀕𑁆𑀕𑀮𑁄 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑁄’’𑀢𑀺.

𑀲𑀤𑁆𑀥𑀸𑀬 𑀯𑀺𑀫𑀼𑀢𑁆𑀢𑁄𑀢𑀺 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑁄. 𑀲𑁄𑀧𑀺 𑀯𑀼𑀢𑁆𑀢𑀦𑀬𑁂𑀦𑁂𑀯 𑀙𑀩𑁆𑀩𑀺𑀥𑁄 𑀳𑁄𑀢𑀺. 𑀢𑁂𑀦𑀸𑀳 𑁋 ‘‘𑀇𑀥𑁂𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 ‘𑀇𑀤𑀁 𑀤𑀼𑀓𑁆𑀔’𑀦𑁆𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺…𑀧𑁂… ‘𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸’𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑀸 𑀘𑀲𑁆𑀲 𑀥𑀫𑁆𑀫𑀸 𑀧𑀜𑁆𑀜𑀸𑀬 𑀯𑁄𑀤𑀺𑀝𑁆𑀞𑀸 𑀳𑁄𑀦𑁆𑀢𑀺 𑀯𑁄𑀘𑀭𑀺𑀢𑀸 𑀧𑀜𑁆𑀜𑀸𑀬…𑀧𑁂… 𑀦𑁄 𑀘 𑀔𑁄 𑀬𑀣𑀸𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑀲𑁆𑀲. 𑀅𑀬𑀁 𑀯𑀼𑀘𑁆𑀘𑀢𑀺 𑀧𑀼𑀕𑁆𑀕𑀮𑁄 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑁄’’𑀢𑀺. 𑀏𑀢𑀲𑁆𑀲 𑀳𑀺 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑀲𑁆𑀲 𑀧𑀼𑀩𑁆𑀩𑀪𑀸𑀕𑀫𑀕𑁆𑀕𑀓𑁆𑀔𑀡𑁂 𑀲𑀤𑁆𑀤𑀳𑀦𑁆𑀢𑀲𑁆𑀲 𑀯𑀺𑀬 𑀑𑀓𑀧𑁆𑀧𑁂𑀦𑁆𑀢𑀲𑁆𑀲 𑀯𑀺𑀬 𑀅𑀥𑀺𑀫𑀼𑀘𑁆𑀘𑀦𑁆𑀢𑀲𑁆𑀲 𑀯𑀺𑀬 𑀘 𑀓𑀺𑀮𑁂𑀲𑀓𑁆𑀔𑀬𑁄 𑀳𑁄𑀢𑀺, 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑀲𑁆𑀲 𑀧𑀼𑀩𑁆𑀩𑀪𑀸𑀕𑀫𑀕𑁆𑀕𑀓𑁆𑀔𑀡𑁂 𑀓𑀺𑀮𑁂𑀲𑀘𑁆𑀙𑁂𑀤𑀓𑀜𑀸𑀡𑀁 𑀅𑀤𑀦𑁆𑀥𑀁 𑀢𑀺𑀔𑀺𑀡𑀁 𑀲𑀽𑀭𑀁 𑀳𑀼𑀢𑁆𑀯𑀸 𑀯𑀳𑀢𑀺. 𑀢𑀲𑁆𑀫𑀸 𑀬𑀣𑀸 𑀦𑀸𑀫 𑀦𑀸𑀢𑀺𑀢𑀺𑀔𑀺𑀡𑁂𑀦 𑀅𑀲𑀺𑀦𑀸 𑀓𑀤𑀮𑀺𑀁 𑀙𑀺𑀦𑁆𑀤𑀦𑁆𑀢𑀲𑁆𑀲 𑀙𑀺𑀦𑁆𑀦𑀝𑁆𑀞𑀸𑀦𑀁 𑀫𑀝𑁆𑀞𑀁 𑀦 𑀳𑁄𑀢𑀺, 𑀅𑀲𑀺 𑀲𑀻𑀖𑀁 𑀦 𑀯𑀳𑀢𑀺, 𑀲𑀤𑁆𑀤𑁄 𑀲𑀼𑀬𑁆𑀬𑀢𑀺, 𑀩𑀮𑀯𑀢𑀭𑁄 𑀯𑀸𑀬𑀸𑀫𑁄 𑀓𑀸𑀢𑀩𑁆𑀩𑁄 𑀳𑁄𑀢𑀺, 𑀏𑀯𑀭𑀽𑀧𑀸 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑀲𑁆𑀲 𑀧𑀼𑀩𑁆𑀩𑀪𑀸𑀕𑀫𑀕𑁆𑀕𑀪𑀸𑀯𑀦𑀸. 𑀬𑀣𑀸 𑀧𑀦 𑀲𑀼𑀦𑀺𑀲𑀺𑀢𑁂𑀦 𑀅𑀲𑀺𑀦𑀸 𑀓𑀤𑀮𑀺𑀁 𑀙𑀺𑀦𑁆𑀤𑀦𑁆𑀢𑀲𑁆𑀲 𑀙𑀺𑀦𑁆𑀦𑀝𑁆𑀞𑀸𑀦𑀁 𑀫𑀝𑁆𑀞𑀁 𑀳𑁄𑀢𑀺, 𑀅𑀲𑀺 𑀲𑀻𑀖𑀁 𑀯𑀳𑀢𑀺, 𑀲𑀤𑁆𑀤𑁄 𑀦 𑀲𑀼𑀬𑁆𑀬𑀢𑀺, 𑀩𑀮𑀯𑀯𑀸𑀬𑀸𑀫𑀓𑀺𑀘𑁆𑀘𑀁 𑀦 𑀳𑁄𑀢𑀺, 𑀏𑀯𑀭𑀽𑀧𑀸 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀲𑁆𑀲 𑀧𑀼𑀩𑁆𑀩𑀪𑀸𑀕𑀫𑀕𑁆𑀕𑀪𑀸𑀯𑀦𑀸 𑀯𑁂𑀤𑀺𑀢𑀩𑁆𑀩𑀸.

𑀥𑀫𑁆𑀫𑀁 𑀅𑀦𑀼𑀲𑁆𑀲𑀭𑀢𑀻𑀢𑀺 𑀥𑀫𑁆𑀫𑀸𑀦𑀼𑀲𑀸𑀭𑀻. 𑀥𑀫𑁆𑀫𑁄𑀢𑀺 𑀧𑀜𑁆𑀜𑀸, 𑀧𑀜𑁆𑀜𑀸𑀧𑀼𑀩𑁆𑀩𑀗𑁆𑀕𑀫𑀁 𑀫𑀕𑁆𑀕𑀁 𑀪𑀸𑀯𑁂𑀢𑀻𑀢𑀺 𑀅𑀢𑁆𑀣𑁄. 𑀲𑀤𑁆𑀥𑀸𑀦𑀼𑀲𑀸𑀭𑀺𑀫𑁆𑀳𑀺𑀧𑀺 𑀏𑀲𑁂𑀯 𑀦𑀬𑁄. 𑀉𑀪𑁄𑀧𑁂𑀢𑁂 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀝𑁆𑀞𑀸𑀬𑁂𑀯. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑁋 ‘‘𑀬𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀲𑁄𑀢𑀸𑀧𑀢𑁆𑀢𑀺𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀧𑀝𑀺𑀧𑀦𑁆𑀦𑀲𑁆𑀲 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀅𑀥𑀺𑀫𑀢𑁆𑀢𑀁 𑀳𑁄𑀢𑀺, 𑀧𑀜𑁆𑀜𑀸𑀯𑀸𑀳𑀺𑀁 𑀧𑀜𑁆𑀜𑀸𑀧𑀼𑀩𑁆𑀩𑀗𑁆𑀕𑀫𑀁 𑀅𑀭𑀺𑀬𑀫𑀕𑁆𑀕𑀁 𑀪𑀸𑀯𑁂𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺 𑀧𑀼𑀕𑁆𑀕𑀮𑁄 𑀥𑀫𑁆𑀫𑀸𑀦𑀼𑀲𑀸𑀭𑀻. 𑀬𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀲𑁄𑀢𑀸𑀧𑀢𑁆𑀢𑀺𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀧𑀝𑀺𑀧𑀦𑁆𑀦𑀲𑁆𑀲 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁 𑀅𑀥𑀺𑀫𑀢𑁆𑀢𑀁 𑀳𑁄𑀢𑀺, 𑀲𑀤𑁆𑀥𑀸𑀯𑀸𑀳𑀺𑀁 𑀲𑀤𑁆𑀥𑀸𑀧𑀼𑀩𑁆𑀩𑀗𑁆𑀕𑀫𑀁 𑀅𑀭𑀺𑀬𑀫𑀕𑁆𑀕𑀁 𑀪𑀸𑀯𑁂𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺 𑀧𑀼𑀕𑁆𑀕𑀮𑁄 𑀲𑀤𑁆𑀥𑀸𑀦𑀼𑀲𑀸𑀭𑀻’’𑀢𑀺 (𑀧𑀼. 𑀧. 𑁨𑁦𑁮). 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄, 𑀯𑀺𑀢𑁆𑀣𑀸𑀭𑀢𑁄 𑀧𑀦𑁂𑀲𑀸 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑀸𑀤𑀺𑀓𑀣𑀸 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑀯𑀺𑀲𑀼𑀤𑁆𑀥𑀺. 𑁨.𑁭𑁭𑁧, 𑁮𑁮𑁯) 𑀧𑀜𑁆𑀜𑀸𑀪𑀸𑀯𑀦𑀸𑀥𑀺𑀓𑀸𑀭𑁂 𑀯𑀼𑀢𑁆𑀢𑀸. 𑀢𑀲𑁆𑀫𑀸 𑀢𑀢𑁆𑀣 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸𑀢𑀺.

𑁫. 𑀉𑀤𑀓𑀽𑀧𑀫𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁫. 𑀧𑀜𑁆𑀘𑀫𑁂 𑀉𑀤𑀓𑀽𑀧𑀫𑀸𑀢𑀺 𑀦𑀺𑀫𑀼𑀚𑁆𑀚𑀦𑀸𑀤𑀺𑀆𑀓𑀸𑀭𑀁 𑀕𑀳𑁂𑀢𑁆𑀯𑀸 𑀉𑀤𑀓𑁂𑀦 𑀉𑀧𑀫𑀺𑀢𑀸. 𑀲𑀓𑀺𑀁 𑀦𑀺𑀫𑀼𑀕𑁆𑀕𑁄𑀢𑀺 𑀏𑀓𑀯𑀸𑀭𑀫𑁂𑀯 𑀦𑀺𑀫𑀼𑀕𑁆𑀕𑁄. 𑀏𑀓𑀦𑁆𑀢𑀓𑀸𑀴𑀓𑁂𑀳𑀻𑀢𑀺 𑀦𑀺𑀬𑀢𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀉𑀫𑁆𑀫𑀼𑀚𑁆𑀚𑀢𑀻𑀢𑀺 𑀉𑀝𑁆𑀞𑀳𑀢𑀺. 𑀲𑀸𑀥𑀽𑀢𑀺 𑀲𑁄𑀪𑀦𑀸 𑀪𑀤𑁆𑀤𑀓𑀸. 𑀳𑀸𑀬𑀢𑀺𑀬𑁂𑀯𑀸𑀢𑀺 𑀘𑀗𑁆𑀓𑀯𑀸𑀭𑁂 𑀆𑀲𑀺𑀢𑁆𑀢𑀉𑀤𑀓𑀁 𑀯𑀺𑀬 𑀧𑀭𑀺𑀳𑀸𑀬𑀢𑁂𑀯. 𑀉𑀫𑁆𑀫𑀼𑀚𑁆𑀚𑀺𑀢𑁆𑀯𑀸 𑀯𑀺𑀧𑀲𑁆𑀲𑀢𑀺 𑀯𑀺𑀮𑁄𑀓𑁂𑀢𑀻𑀢𑀺 𑀉𑀝𑁆𑀞𑀳𑀺𑀢𑁆𑀯𑀸 𑀕𑀦𑁆𑀢𑀩𑁆𑀩𑀤𑀺𑀲𑀁 𑀯𑀺𑀧𑀲𑁆𑀲𑀢𑀺 𑀯𑀺𑀮𑁄𑀓𑁂𑀢𑀺. 𑀧𑀢𑀭𑀢𑀻𑀢𑀺 𑀕𑀦𑁆𑀢𑀩𑁆𑀩𑀤𑀺𑀲𑀸𑀪𑀺𑀫𑀼𑀔𑁄 𑀢𑀭𑀢𑀺 𑀦𑀸𑀫. 𑀧𑀝𑀺𑀕𑀸𑀥𑀧𑁆𑀧𑀢𑁆𑀢𑁄 𑀳𑁄𑀢𑀻𑀢𑀺 𑀉𑀝𑁆𑀞𑀸𑀬 𑀯𑀺𑀮𑁄𑀓𑁂𑀢𑁆𑀯𑀸 𑀧𑀢𑀭𑀺𑀢𑁆𑀯𑀸 𑀏𑀓𑀲𑁆𑀫𑀺𑀁 𑀞𑀸𑀦𑁂 𑀧𑀢𑀺𑀝𑁆𑀞𑀸𑀧𑀢𑁆𑀢𑁄 𑀦𑀸𑀫 𑀳𑁄𑀢𑀺, 𑀢𑀺𑀝𑁆𑀞𑀢𑀺 𑀦 𑀧𑀼𑀦𑀸𑀕𑀘𑁆𑀙𑀢𑀺. 𑀢𑀺𑀡𑁆𑀡𑁄 𑀧𑀸𑀭𑀗𑁆𑀕𑀢𑁄 𑀣𑀮𑁂 𑀢𑀺𑀝𑁆𑀞𑀢𑀻𑀢𑀺 𑀲𑀩𑁆𑀩𑀓𑀺𑀮𑁂𑀲𑁄𑀖𑀁 𑀢𑀭𑀺𑀢𑁆𑀯𑀸 𑀧𑀭𑀢𑀻𑀭𑀁 𑀕𑀦𑁆𑀢𑁆𑀯𑀸 𑀦𑀺𑀩𑁆𑀩𑀸𑀦𑀣𑀮𑁂 𑀧𑀢𑀺𑀝𑁆𑀞𑀺𑀢𑁄 𑀦𑀸𑀫 𑀳𑁄𑀢𑀺. 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀯𑀝𑁆𑀝𑀯𑀺𑀯𑀝𑁆𑀝𑀁 𑀓𑀣𑀺𑀢𑀁.

𑁬. 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀻𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁬. 𑀙𑀝𑁆𑀞𑁂 𑀅𑀦𑀺𑀘𑁆𑀘𑀸𑀢𑀺 𑀏𑀯𑀁 𑀧𑀜𑁆𑀜𑀸𑀬 𑀨𑀭𑀦𑁆𑀢𑁄 𑀅𑀦𑀼𑀧𑀲𑁆𑀲𑀢𑀻𑀢𑀺 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀻. 𑀅𑀦𑀺𑀘𑁆𑀘𑀸𑀢𑀺 𑀏𑀯𑀁 𑀲𑀜𑁆𑀜𑀸 𑀅𑀲𑁆𑀲𑀸𑀢𑀺 𑀅𑀦𑀺𑀘𑁆𑀘𑀲𑀜𑁆𑀜𑀻. 𑀅𑀦𑀺𑀘𑁆𑀘𑀸𑀢𑀺 𑀏𑀯𑀁 𑀜𑀸𑀡𑁂𑀦 𑀧𑀝𑀺𑀲𑀁𑀯𑁂𑀤𑀺𑀢𑀸 𑀅𑀲𑁆𑀲𑀸𑀢𑀺 𑀅𑀦𑀺𑀘𑁆𑀘𑀧𑀝𑀺𑀲𑀁𑀯𑁂𑀤𑀻. 𑀲𑀢𑀢𑀦𑁆𑀢𑀺 𑀲𑀩𑁆𑀩𑀓𑀸𑀮𑀁. 𑀲𑀫𑀺𑀢𑀦𑁆𑀢𑀺 𑀬𑀣𑀸 𑀧𑀼𑀭𑀺𑀫𑀘𑀺𑀢𑁆𑀢𑁂𑀦 𑀧𑀘𑁆𑀙𑀺𑀫𑀘𑀺𑀢𑁆𑀢𑀁 𑀲𑀫𑀺𑀢𑀁 𑀲𑀫𑀼𑀧𑀕𑀢𑀁 𑀖𑀝𑁆𑀝𑀺𑀢𑀁 𑀳𑁄𑀢𑀺, 𑀏𑀯𑀁. 𑀅𑀩𑁆𑀩𑁄𑀓𑀺𑀡𑁆𑀡𑀦𑁆𑀢𑀺 𑀦𑀺𑀭𑀦𑁆𑀢𑀭𑀁 𑀅𑀜𑁆𑀜𑁂𑀦 𑀘𑁂𑀢𑀲𑀸 𑀅𑀲𑀁𑀫𑀺𑀲𑁆𑀲𑀁. 𑀘𑁂𑀢𑀲𑀸 𑀅𑀥𑀺𑀫𑀼𑀘𑁆𑀘𑀫𑀸𑀦𑁄𑀢𑀺 𑀘𑀺𑀢𑁆𑀢𑁂𑀦 𑀲𑀦𑁆𑀦𑀺𑀝𑁆𑀞𑀸𑀧𑀬𑀫𑀸𑀦𑁄. 𑀧𑀜𑁆𑀜𑀸𑀬 𑀧𑀭𑀺𑀬𑁄𑀕𑀸𑀳𑀫𑀸𑀦𑁄𑀢𑀺 𑀯𑀺𑀧𑀲𑁆𑀲𑀦𑀸𑀜𑀸𑀡𑁂𑀦 𑀅𑀦𑀼𑀧𑀯𑀺𑀲𑀫𑀸𑀦𑁄.

𑀅𑀧𑀼𑀩𑁆𑀩𑀁 𑀅𑀘𑀭𑀺𑀫𑀦𑁆𑀢𑀺 𑀅𑀧𑀼𑀭𑁂 𑀅𑀧𑀘𑁆𑀙𑀸 𑀏𑀓𑀓𑁆𑀔𑀡𑁂𑀬𑁂𑀯. 𑀇𑀥 𑀲𑀫𑀲𑀻𑀲𑀻 𑀓𑀣𑀺𑀢𑁄. 𑀲𑁄 𑀘𑀢𑀼𑀩𑁆𑀩𑀺𑀥𑁄 𑀳𑁄𑀢𑀺 𑀭𑁄𑀕𑀲𑀫𑀲𑀻𑀲𑀻, 𑀯𑁂𑀤𑀦𑀸𑀲𑀫𑀲𑀻𑀲𑀻, 𑀇𑀭𑀺𑀬𑀸𑀧𑀣𑀲𑀫𑀲𑀻𑀲𑀻, 𑀚𑀻𑀯𑀺𑀢𑀲𑀫𑀲𑀻𑀲𑀻𑀢𑀺. 𑀢𑀢𑁆𑀣 𑀬𑀲𑁆𑀲 𑀅𑀜𑁆𑀜𑀢𑀭𑁂𑀦 𑀭𑁄𑀕𑁂𑀦 𑀨𑀼𑀝𑁆𑀞𑀲𑁆𑀲 𑀲𑀢𑁄 𑀭𑁄𑀕𑀯𑀽𑀧𑀲𑀫𑁄 𑀘 𑀆𑀲𑀯𑀓𑁆𑀔𑀬𑁄 𑀘 𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀳𑁄𑀢𑀺, 𑀅𑀬𑀁 𑀭𑁄𑀕𑀲𑀫𑀲𑀻𑀲𑀻 𑀦𑀸𑀫. 𑀬𑀲𑁆𑀲 𑀧𑀦 𑀅𑀜𑁆𑀜𑀢𑀭𑀁 𑀯𑁂𑀤𑀦𑀁 𑀯𑁂𑀤𑀬𑀢𑁄 𑀯𑁂𑀤𑀦𑀸𑀯𑀽𑀧𑀲𑀫𑁄 𑀘 𑀆𑀲𑀯𑀓𑁆𑀔𑀬𑁄 𑀘 𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀳𑁄𑀢𑀺, 𑀅𑀬𑀁 𑀯𑁂𑀤𑀦𑀸𑀲𑀫𑀲𑀻𑀲𑀻 𑀦𑀸𑀫. 𑀬𑀲𑁆𑀲 𑀧𑀦 𑀞𑀸𑀦𑀸𑀤𑀻𑀲𑀼 𑀇𑀭𑀺𑀬𑀸𑀧𑀣𑁂𑀲𑀼 𑀅𑀜𑁆𑀜𑀢𑀭𑀲𑀫𑀗𑁆𑀕𑀺𑀦𑁄 𑀯𑀺𑀧𑀲𑁆𑀲𑀦𑁆𑀢𑀲𑁆𑀲 𑀇𑀭𑀺𑀬𑀸𑀧𑀣𑀲𑁆𑀲 𑀧𑀭𑀺𑀬𑁄𑀲𑀸𑀦𑀜𑁆𑀘 𑀆𑀲𑀯𑀓𑁆𑀔𑀬𑁄 𑀘 𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀳𑁄𑀢𑀺, 𑀅𑀬𑀁 𑀇𑀭𑀺𑀬𑀸𑀧𑀣𑀲𑀫𑀲𑀻𑀲𑀻 𑀦𑀸𑀫. 𑀬𑀲𑁆𑀲 𑀧𑀦 𑀉𑀧𑀓𑁆𑀓𑀫𑀢𑁄 𑀯𑀸 𑀲𑀭𑀲𑀢𑁄 𑀯𑀸 𑀚𑀻𑀯𑀺𑀢𑀧𑀭𑀺𑀬𑀸𑀤𑀸𑀦𑀜𑁆𑀘 𑀆𑀲𑀯𑀓𑁆𑀔𑀬𑁄 𑀘 𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀳𑁄𑀢𑀺, 𑀅𑀬𑀁 𑀚𑀻𑀯𑀺𑀢𑀲𑀫𑀲𑀻𑀲𑀻 𑀦𑀸𑀫. 𑀅𑀬𑀫𑀺𑀥 𑀅𑀥𑀺𑀧𑁆𑀧𑁂𑀢𑁄. 𑀢𑀢𑁆𑀣 𑀓𑀺𑀜𑁆𑀘𑀸𑀧𑀺 𑀆𑀲𑀯𑀧𑀭𑀺𑀬𑀸𑀤𑀸𑀦𑀁 𑀫𑀕𑁆𑀕𑀘𑀺𑀢𑁆𑀢𑁂𑀦, 𑀚𑀻𑀯𑀺𑀢𑀧𑀭𑀺𑀬𑀸𑀤𑀸𑀦𑀁 𑀘𑀼𑀢𑀺𑀘𑀺𑀢𑁆𑀢𑁂𑀦 𑀳𑁄𑀢𑀻𑀢𑀺 𑀉𑀪𑀺𑀦𑁆𑀦𑀁 𑀏𑀓𑀓𑁆𑀔𑀡𑁂 𑀲𑀫𑁆𑀪𑀯𑁄 𑀦𑀸𑀫 𑀦𑀢𑁆𑀣𑀺. 𑀬𑀲𑁆𑀫𑀸 𑀧𑀦𑀲𑁆𑀲 𑀆𑀲𑀯𑁂𑀲𑀼 𑀔𑀻𑀡𑀫𑀢𑁆𑀢𑁂𑀲𑀼 𑀧𑀘𑁆𑀘𑀯𑁂𑀓𑁆𑀔𑀡𑀯𑀸𑀭𑀸𑀦𑀦𑁆𑀢𑀭𑀫𑁂𑀯 𑀚𑀻𑀯𑀺𑀢𑀧𑀭𑀺𑀬𑀸𑀤𑀸𑀦𑀁 𑀕𑀘𑁆𑀙𑀢𑀺, 𑀅𑀦𑁆𑀢𑀭𑀁 𑀦 𑀧𑀜𑁆𑀜𑀸𑀬𑀢𑀺, 𑀢𑀲𑁆𑀫𑀸 𑀏𑀯𑀁 𑀯𑀼𑀢𑁆𑀢𑀁.

𑀅𑀦𑁆𑀢𑀭𑀸𑀧𑀭𑀺𑀦𑀺𑀩𑁆𑀩𑀸𑀬𑀻𑀢𑀺 𑀬𑁄 𑀧𑀜𑁆𑀘𑀲𑀼 𑀲𑀼𑀤𑁆𑀥𑀸𑀯𑀸𑀲𑁂𑀲𑀼 𑀬𑀢𑁆𑀣 𑀓𑀢𑁆𑀣𑀘𑀺 𑀉𑀧𑁆𑀧𑀦𑁆𑀦𑁄 𑀦𑀺𑀩𑁆𑀩𑀢𑁆𑀢𑀓𑁆𑀔𑀡𑁂 𑀯𑀸 𑀣𑁄𑀓𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀯𑀸 𑀯𑁂𑀫𑀚𑁆𑀛𑁂 𑀞𑀢𑁆𑀯𑀸 𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀸𑀢𑀺, 𑀢𑀲𑁆𑀲𑁂𑀢𑀁 𑀦𑀸𑀫𑀁. 𑀉𑀧𑀳𑀘𑁆𑀘𑀧𑀭𑀺𑀦𑀺𑀩𑁆𑀩𑀸𑀬𑀻𑀢𑀺 𑀬𑁄 𑀢𑀢𑁆𑀣𑁂𑀯 𑀆𑀬𑀼𑀯𑁂𑀫𑀚𑁆𑀛𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀸𑀢𑀺. 𑀅𑀲𑀗𑁆𑀔𑀸𑀭𑀧𑀭𑀺𑀦𑀺𑀩𑁆𑀩𑀸𑀬𑀻𑀢𑀺 𑀬𑁄 𑀢𑁂𑀲𑀁𑀬𑁂𑀯 𑀧𑀼𑀕𑁆𑀕𑀮𑀸𑀦𑀁 𑀅𑀲𑀗𑁆𑀔𑀸𑀭𑁂𑀦𑁂𑀯 𑀅𑀧𑁆𑀧𑀬𑁄𑀕𑁂𑀦 𑀓𑀺𑀮𑁂𑀲𑁂 𑀔𑁂𑀧𑁂𑀢𑀺. 𑀲𑀲𑀗𑁆𑀔𑀸𑀭𑀧𑀭𑀺𑀦𑀺𑀩𑁆𑀩𑀸𑀬𑀻𑀢𑀺 𑀬𑁄 𑀲𑀲𑀗𑁆𑀔𑀸𑀭𑁂𑀦 𑀲𑀧𑁆𑀧𑀬𑁄𑀕𑁂𑀦 𑀓𑀺𑀮𑁂𑀲𑁂 𑀔𑁂𑀧𑁂𑀢𑀺. 𑀉𑀤𑁆𑀥𑀁𑀲𑁄𑀢𑁄 𑀅𑀓𑀦𑀺𑀝𑁆𑀞𑀕𑀸𑀫𑀻𑀢𑀺 𑀬𑁄 𑀳𑁂𑀝𑁆𑀞𑀸 𑀘𑀢𑀽𑀲𑀼 𑀲𑀼𑀤𑁆𑀥𑀸𑀯𑀸𑀲𑁂𑀲𑀼 𑀬𑀢𑁆𑀣 𑀓𑀢𑁆𑀣𑀘𑀺 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀢𑀢𑁄 𑀘𑀼𑀢𑁄 𑀅𑀦𑀼𑀧𑀼𑀩𑁆𑀩𑁂𑀦 𑀅𑀓𑀦𑀺𑀝𑁆𑀞𑁂 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀸𑀢𑀺.

𑁭-𑁯. 𑀤𑀼𑀓𑁆𑀔𑀸𑀦𑀼𑀧𑀲𑁆𑀲𑀻𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁭-𑁧𑁯. 𑀲𑀢𑁆𑀢𑀫𑁂 𑀤𑀼𑀓𑁆𑀔𑀸𑀦𑀼𑀧𑀲𑁆𑀲𑀻𑀢𑀺 𑀧𑀻𑀴𑀦𑀸𑀓𑀸𑀭𑀁 𑀤𑀼𑀓𑁆𑀔𑀢𑁄 𑀅𑀦𑀼𑀧𑀲𑁆𑀲𑀦𑁆𑀢𑁄. 𑀅𑀝𑁆𑀞𑀫𑁂 𑀅𑀦𑀢𑁆𑀢𑀸𑀦𑀼𑀧𑀲𑁆𑀲𑀻𑀢𑀺 𑀅𑀯𑀲𑀯𑀢𑁆𑀢𑀦𑀸𑀓𑀸𑀭𑀁 𑀅𑀦𑀢𑁆𑀢𑀸𑀢𑀺 𑀅𑀦𑀼𑀧𑀲𑁆𑀲𑀦𑁆𑀢𑁄. 𑀦𑀯𑀫𑁂 𑀲𑀼𑀔𑀸𑀦𑀼𑀧𑀲𑁆𑀲𑀻𑀢𑀺 𑀲𑀼𑀔𑀦𑁆𑀢𑀺 𑀏𑀯𑀁 𑀜𑀸𑀡𑁂𑀦 𑀅𑀦𑀼𑀧𑀲𑁆𑀲𑀦𑁆𑀢𑁄.

𑁧𑁦. 𑀦𑀺𑀤𑁆𑀤𑀲𑀯𑀢𑁆𑀣𑀼𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁦. 𑀤𑀲𑀫𑁂 𑀦𑀺𑀤𑁆𑀤𑀲𑀯𑀢𑁆𑀣𑀽𑀦𑀻𑀢𑀺 𑀦𑀺𑀤𑁆𑀤𑀲𑀸𑀤𑀺𑀯𑀢𑁆𑀣𑀽𑀦𑀺, ‘‘𑀦𑀺𑀤𑁆𑀤𑀲𑁄 𑀪𑀺𑀓𑁆𑀔𑀼, 𑀦𑀺𑀩𑁆𑀩𑀻𑀲𑁄, 𑀦𑀺𑀢𑁆𑀢𑀺𑀁𑀲𑁄, 𑀦𑀺𑀘𑁆𑀘𑀢𑁆𑀢𑀸𑀮𑀻𑀲𑁄, 𑀦𑀺𑀧𑁆𑀧𑀜𑁆𑀜𑀸𑀲𑁄’’𑀢𑀺 𑀏𑀯𑀁 𑀯𑀘𑀦𑀓𑀸𑀭𑀡𑀸𑀦𑀺. 𑀅𑀬𑀁 𑀓𑀺𑀭 𑀧𑀜𑁆𑀳𑁄 𑀢𑀺𑀢𑁆𑀣𑀺𑀬𑀲𑀫𑀬𑁂 𑀉𑀧𑁆𑀧𑀦𑁆𑀦𑁄. 𑀢𑀺𑀢𑁆𑀣𑀺𑀬𑀸 𑀳𑀺 𑀤𑀲𑀯𑀲𑁆𑀲𑀓𑀸𑀮𑁂 𑀫𑀢𑀁 𑀦𑀺𑀕𑀡𑁆𑀞𑀁 𑀦𑀺𑀤𑁆𑀤𑀲𑁄𑀢𑀺 𑀯𑀤𑀦𑁆𑀢𑀺. 𑀲𑁄 𑀓𑀺𑀭 𑀧𑀼𑀦 𑀤𑀲𑀯𑀲𑁆𑀲𑁄 𑀦 𑀳𑁄𑀢𑀺. 𑀦 𑀓𑁂𑀯𑀮𑀜𑁆𑀘 𑀤𑀲𑀯𑀲𑁆𑀲𑁄, 𑀦𑀯𑀯𑀲𑁆𑀲𑁄𑀧𑀺 𑀏𑀓𑀯𑀲𑁆𑀲𑁄𑀧𑀺 𑀦 𑀳𑁄𑀢𑀺. 𑀏𑀢𑁂𑀦𑁂𑀯 𑀦𑀬𑁂𑀦 𑀯𑀻𑀲𑀢𑀺𑀯𑀲𑁆𑀲𑀸𑀤𑀺𑀓𑀸𑀮𑁂𑀧𑀺 𑀫𑀢𑀁 𑀦𑀺𑀕𑀡𑁆𑀞𑀁 ‘‘𑀦𑀺𑀩𑁆𑀩𑀻𑀲𑁄 𑀦𑀺𑀢𑁆𑀢𑀺𑀁𑀲𑁄 𑀦𑀺𑀘𑁆𑀘𑀢𑁆𑀢𑀸𑀮𑀻𑀲𑁄 𑀦𑀺𑀧𑁆𑀧𑀜𑁆𑀜𑀸𑀲𑁄’’𑀢𑀺 𑀯𑀤𑀦𑁆𑀢𑀺. 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀕𑀸𑀫𑁂 𑀯𑀺𑀘𑀭𑀦𑁆𑀢𑁄 𑀢𑀁 𑀓𑀣𑀁 𑀲𑀼𑀢𑁆𑀯𑀸 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀪𑀕𑀯𑀢𑁄 𑀆𑀭𑁄𑀘𑁂𑀲𑀺. 𑀪𑀕𑀯𑀸 𑀆𑀳 𑁋 ‘‘𑀦 𑀇𑀤𑀁, 𑀆𑀦𑀦𑁆𑀤, 𑀢𑀺𑀢𑁆𑀣𑀺𑀬𑀸𑀦𑀁 𑀅𑀥𑀺𑀯𑀘𑀦𑀁, 𑀫𑀫 𑀲𑀸𑀲𑀦𑁂 𑀔𑀻𑀡𑀸𑀲𑀯𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀔𑀻𑀡𑀸𑀲𑀯𑁄 𑀳𑀺 𑀤𑀲𑀯𑀲𑁆𑀲𑀓𑀸𑀮𑁂 𑀧𑀭𑀺𑀦𑀺𑀩𑁆𑀩𑀼𑀢𑁄 𑀧𑀼𑀦 𑀤𑀲𑀯𑀲𑁆𑀲𑁄 𑀦 𑀳𑁄𑀢𑀺. 𑀦 𑀓𑁂𑀯𑀮𑀜𑁆𑀘 𑀤𑀲𑀯𑀲𑁆𑀲𑁄𑀯, 𑀦𑀯𑀯𑀲𑁆𑀲𑁄𑀧𑀺…𑀧𑁂… 𑀏𑀓𑀯𑀲𑁆𑀲𑁄𑀧𑀺. 𑀦 𑀓𑁂𑀯𑀮𑀜𑁆𑀘 𑀏𑀓𑀯𑀲𑁆𑀲𑁄𑀯, 𑀏𑀓𑀸𑀤𑀲𑀫𑀸𑀲𑀺𑀓𑁄𑀧𑀺…𑀧𑁂… 𑀏𑀓𑀫𑀸𑀲𑀺𑀓𑁄𑀧𑀺 𑀏𑀓𑀫𑀼𑀳𑀼𑀢𑁆𑀢𑀺𑀓𑁄𑀧𑀺 𑀦 𑀳𑁄𑀢𑀺𑀬𑁂𑀯’’. 𑀓𑀲𑁆𑀫𑀸? 𑀧𑀼𑀦 𑀧𑀝𑀺𑀲𑀦𑁆𑀥𑀺𑀬𑀸 𑀅𑀪𑀸𑀯𑀸. 𑀦𑀺𑀩𑁆𑀩𑀻𑀲𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀇𑀢𑀺 𑀪𑀕𑀯𑀸 ‘‘𑀫𑀫 𑀲𑀸𑀲𑀦𑁂 𑀔𑀻𑀡𑀸𑀲𑀯𑀲𑁆𑀲𑁂𑀢𑀁 𑀅𑀥𑀺𑀯𑀘𑀦’’𑀦𑁆𑀢𑀺 𑀯𑀢𑁆𑀯𑀸 𑀬𑁂𑀳𑀺 𑀓𑀸𑀭𑀡𑁂𑀳𑀺 𑀦𑀺𑀤𑁆𑀤𑀲𑁄 𑀳𑁄𑀢𑀺, 𑀢𑀸𑀦𑀺 𑀤𑀲𑁆𑀲𑁂𑀢𑀼𑀁 𑀇𑀫𑀁 𑀤𑁂𑀲𑀦𑀁 𑀆𑀭𑀪𑀺.

𑀢𑀢𑁆𑀣 𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂. 𑀲𑀺𑀓𑁆𑀔𑀸𑀲𑀫𑀸𑀤𑀸𑀦𑁂 𑀢𑀺𑀩𑁆𑀩𑀘𑁆𑀙𑀦𑁆𑀤𑁄 𑀳𑁄𑀢𑀻𑀢𑀺 𑀲𑀺𑀓𑁆𑀔𑀸𑀢𑁆𑀢𑀬𑀧𑀽𑀭𑀡𑁂 𑀩𑀮𑀯𑀘𑁆𑀙𑀦𑁆𑀤𑁄 𑀳𑁄𑀢𑀺. 𑀆𑀬𑀢𑀺𑀜𑁆𑀘 𑀲𑀺𑀓𑁆𑀔𑀸𑀲𑀫𑀸𑀤𑀸𑀦𑁂 𑀅𑀯𑀺𑀕𑀢𑀧𑁂𑀫𑁄𑀢𑀺 𑀅𑀦𑀸𑀕𑀢𑁂 𑀧𑀼𑀦𑀤𑀺𑀯𑀲𑀸𑀤𑀻𑀲𑀼𑀧𑀺 𑀲𑀺𑀓𑁆𑀔𑀸𑀧𑀽𑀭𑀡𑁂 𑀅𑀯𑀺𑀕𑀢𑀧𑁂𑀫𑁂𑀦𑁂𑀯 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺. 𑀥𑀫𑁆𑀫𑀦𑀺𑀲𑀦𑁆𑀢𑀺𑀬𑀸𑀢𑀺 𑀥𑀫𑁆𑀫𑀦𑀺𑀲𑀸𑀫𑀦𑀸𑀬. 𑀯𑀺𑀧𑀲𑁆𑀲𑀦𑀸𑀬𑁂𑀢𑀁 𑀅𑀥𑀺𑀯𑀘𑀦𑀁. 𑀇𑀘𑁆𑀙𑀸𑀯𑀺𑀦𑀬𑁂𑀢𑀺 𑀢𑀡𑁆𑀳𑀸𑀯𑀺𑀦𑀬𑁂. 𑀧𑀝𑀺𑀲𑀮𑁆𑀮𑀸𑀦𑁂𑀢𑀺 𑀏𑀓𑀻𑀪𑀸𑀯𑁂. 𑀯𑀻𑀭𑀺𑀬𑀸𑀭𑀫𑁆𑀪𑁂𑀢𑀺 𑀓𑀸𑀬𑀺𑀓𑀘𑁂𑀢𑀲𑀺𑀓𑀲𑁆𑀲 𑀯𑀻𑀭𑀺𑀬𑀲𑁆𑀲 𑀧𑀽𑀭𑀡𑁂. 𑀲𑀢𑀺𑀦𑁂𑀧𑀓𑁆𑀓𑁂𑀢𑀺 𑀲𑀢𑀺𑀬𑀜𑁆𑀘𑁂𑀯 𑀦𑀺𑀧𑀓𑀪𑀸𑀯𑁂. 𑀤𑀺𑀝𑁆𑀞𑀺𑀧𑀝𑀺𑀯𑁂𑀥𑁂𑀢𑀺 𑀫𑀕𑁆𑀕𑀤𑀲𑁆𑀲𑀦𑁂. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀅𑀦𑀼𑀲𑀬𑀯𑀕𑁆𑀕𑁄 𑀤𑀼𑀢𑀺𑀬𑁄.

𑁩. 𑀯𑀚𑁆𑀚𑀺𑀲𑀢𑁆𑀢𑀓𑀯𑀕𑁆𑀕𑁄

𑁧. 𑀲𑀸𑀭𑀦𑁆𑀤𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁧. 𑀢𑀢𑀺𑀬𑀲𑁆𑀲 𑀧𑀞𑀫𑁂 𑀲𑀸𑀭𑀦𑁆𑀤𑀤𑁂 𑀘𑁂𑀢𑀺𑀬𑁂𑀢𑀺 𑀏𑀯𑀁𑀦𑀸𑀫𑀓𑁂 𑀯𑀺𑀳𑀸𑀭𑁂. 𑀅𑀦𑀼𑀧𑁆𑀧𑀦𑁆𑀦𑁂 𑀓𑀺𑀭 𑀢𑀣𑀸𑀕𑀢𑁂 𑀢𑀢𑁆𑀣 𑀲𑀸𑀭𑀦𑁆𑀤𑀤𑀲𑁆𑀲 𑀬𑀓𑁆𑀔𑀲𑁆𑀲 𑀦𑀺𑀯𑀸𑀲𑀦𑀝𑁆𑀞𑀸𑀦𑀁 𑀘𑁂𑀢𑀺𑀬𑀁 𑀅𑀳𑁄𑀲𑀺, 𑀅𑀣𑁂𑀢𑁆𑀣 𑀪𑀕𑀯𑀢𑁄 𑀯𑀺𑀳𑀸𑀭𑀁 𑀓𑀸𑀭𑁂𑀲𑀼𑀁. 𑀲𑁄 𑀲𑀸𑀭𑀦𑁆𑀤𑀤𑀘𑁂𑀢𑀺𑀬𑀁𑀢𑁆𑀯𑁂𑀯 𑀲𑀗𑁆𑀔𑀁 𑀕𑀢𑁄. 𑀬𑀸𑀯𑀓𑀻𑀯𑀜𑁆𑀘𑀸𑀢𑀺 𑀬𑀢𑁆𑀢𑀓𑀁 𑀓𑀸𑀮𑀁. 𑀅𑀪𑀺𑀡𑁆𑀳𑀁 𑀲𑀦𑁆𑀦𑀺𑀧𑀸𑀢𑀸𑀢𑀺 𑀤𑀺𑀯𑀲𑀲𑁆𑀲 𑀢𑀺𑀓𑁆𑀔𑀢𑁆𑀢𑀼𑀁 𑀲𑀦𑁆𑀦𑀺𑀧𑀢𑀦𑁆𑀢𑀸𑀧𑀺 𑀅𑀦𑁆𑀢𑀭𑀦𑁆𑀢𑀭𑀸 𑀲𑀦𑁆𑀦𑀺𑀧𑀢𑀦𑁆𑀢𑀸𑀧𑀺 𑀅𑀪𑀺𑀡𑁆𑀳𑀁 𑀲𑀦𑁆𑀦𑀺𑀧𑀸𑀢𑀸𑀯. 𑀲𑀦𑁆𑀦𑀺𑀧𑀸𑀢𑀩𑀳𑀼𑀮𑀸𑀢𑀺 ‘‘𑀳𑀺𑀬𑁆𑀬𑁄𑀧𑀺 𑀧𑀼𑀭𑀺𑀫𑀤𑀺𑀯𑀲𑀫𑁆𑀧𑀺 𑀲𑀦𑁆𑀦𑀺𑀧𑀢𑀫𑁆𑀳, 𑀧𑀼𑀦 𑀅𑀚𑁆𑀚 𑀓𑀺𑀫𑀢𑁆𑀣𑀁 𑀲𑀦𑁆𑀦𑀺𑀧𑀢𑀸𑀫𑀸’’𑀢𑀺 𑀯𑁄𑀲𑀸𑀦𑀫𑀦𑀸𑀧𑀚𑁆𑀚𑀦𑁂𑀦 𑀲𑀦𑁆𑀦𑀺𑀧𑀸𑀢𑀩𑀳𑀼𑀮𑀸. 𑀯𑀼𑀤𑁆𑀥𑀺𑀬𑁂𑀯 𑀮𑀺𑀘𑁆𑀙𑀯𑀻 𑀯𑀚𑁆𑀚𑀻𑀦𑀁 𑀧𑀸𑀝𑀺𑀓𑀗𑁆𑀔𑀸 𑀦𑁄 𑀧𑀭𑀺𑀳𑀸𑀦𑀻𑀢𑀺 𑀅𑀪𑀺𑀡𑁆𑀳𑀁 𑀅𑀲𑀦𑁆𑀦𑀺𑀧𑀢𑀦𑁆𑀢𑀸 𑀳𑀺 𑀤𑀺𑀲𑀸𑀲𑀼 𑀆𑀕𑀢𑀁 𑀲𑀸𑀲𑀦𑀁 𑀦 𑀲𑀼𑀡𑀦𑁆𑀢𑀺, 𑀢𑀢𑁄 ‘‘𑀅𑀲𑀼𑀓𑀕𑀸𑀫𑀲𑀻𑀫𑀸 𑀯𑀸 𑀦𑀺𑀕𑀫𑀲𑀻𑀫𑀸 𑀯𑀸 𑀆𑀓𑀼𑀮𑀸, 𑀅𑀲𑀼𑀓𑀝𑁆𑀞𑀸𑀦𑁂 𑀘𑁄𑀭𑀸 𑀧𑀭𑀺𑀬𑀼𑀝𑁆𑀞𑀺𑀢𑀸’’𑀢𑀺 𑀦 𑀚𑀸𑀦𑀦𑁆𑀢𑀺. 𑀘𑁄𑀭𑀸𑀧𑀺 ‘‘𑀧𑀫𑀢𑁆𑀢𑀸 𑀭𑀸𑀚𑀸𑀦𑁄’’𑀢𑀺 𑀜𑀢𑁆𑀯𑀸 𑀕𑀸𑀫𑀦𑀺𑀕𑀫𑀸𑀤𑀻𑀦𑀺 𑀧𑀳𑀭𑀦𑁆𑀢𑀸 𑀚𑀦𑀧𑀤𑀁 𑀦𑀸𑀲𑁂𑀦𑁆𑀢𑀺. 𑀏𑀯𑀁 𑀭𑀸𑀚𑀽𑀦𑀁 𑀧𑀭𑀺𑀳𑀸𑀦𑀺 𑀳𑁄𑀢𑀺. 𑀅𑀪𑀺𑀡𑁆𑀳𑀁 𑀲𑀦𑁆𑀦𑀺𑀧𑀢𑀦𑁆𑀢𑀸 𑀧𑀦 𑀢𑀁 𑀧𑀯𑀢𑁆𑀢𑀺𑀁 𑀲𑀼𑀡𑀦𑁆𑀢𑀺, 𑀢𑀢𑁄 𑀩𑀮𑀁 𑀧𑁂𑀲𑁂𑀢𑁆𑀯𑀸 𑀅𑀫𑀺𑀢𑁆𑀢𑀫𑀤𑁆𑀤𑀦𑀁 𑀓𑀭𑁄𑀦𑁆𑀢𑀺. 𑀘𑁄𑀭𑀸𑀧𑀺 ‘‘𑀅𑀧𑁆𑀧𑀫𑀢𑁆𑀢𑀸 𑀭𑀸𑀚𑀸𑀦𑁄, 𑀦 𑀲𑀓𑁆𑀓𑀸 𑀅𑀫𑁆𑀳𑁂𑀳𑀺 𑀯𑀕𑁆𑀕𑀩𑀦𑁆𑀥𑀦𑁂𑀦 𑀯𑀺𑀘𑀭𑀺𑀢𑀼’’𑀦𑁆𑀢𑀺 𑀪𑀺𑀚𑁆𑀚𑀺𑀢𑁆𑀯𑀸 𑀧𑀮𑀸𑀬𑀦𑁆𑀢𑀺. 𑀏𑀯𑀁 𑀭𑀸𑀚𑀽𑀦𑀁 𑀯𑀼𑀤𑁆𑀥𑀺 𑀳𑁄𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀯𑀼𑀤𑁆𑀥𑀺𑀬𑁂𑀯 𑀮𑀺𑀘𑁆𑀙𑀯𑀻 𑀯𑀚𑁆𑀚𑀻𑀦𑀁 𑀧𑀸𑀝𑀺𑀓𑀗𑁆𑀔𑀸 𑀦𑁄 𑀧𑀭𑀺𑀳𑀸𑀦𑀻’’𑀢𑀺.

𑀲𑀫𑀕𑁆𑀕𑀸𑀢𑀺𑀆𑀤𑀻𑀲𑀼 𑀲𑀦𑁆𑀦𑀺𑀧𑀸𑀢𑀪𑁂𑀭𑀺𑀬𑀸 𑀦𑀺𑀕𑁆𑀕𑀢𑀸𑀬 ‘‘𑀅𑀚𑁆𑀚 𑀫𑁂 𑀓𑀺𑀘𑁆𑀘𑀁 𑀅𑀢𑁆𑀣𑀺 𑀫𑀗𑁆𑀕𑀮𑀁 𑀅𑀢𑁆𑀣𑀻’’𑀢𑀺 𑀯𑀺𑀓𑁆𑀔𑁂𑀧𑀁 𑀓𑀭𑁄𑀦𑁆𑀢𑀸 𑀦 𑀲𑀫𑀕𑁆𑀕𑀸 𑀲𑀦𑁆𑀦𑀺𑀧𑀢𑀦𑁆𑀢𑀺 𑀦𑀸𑀫. 𑀪𑁂𑀭𑀺𑀲𑀤𑁆𑀤𑀁 𑀧𑀦 𑀲𑀼𑀢𑁆𑀯𑀸𑀯 𑀪𑀼𑀜𑁆𑀚𑀫𑀸𑀦𑀸𑀧𑀺 𑀅𑀮𑀗𑁆𑀓𑀼𑀭𑀼𑀫𑀸𑀦𑀸𑀧𑀺 𑀯𑀢𑁆𑀣𑀸𑀦𑀺 𑀦𑀺𑀯𑀸𑀲𑀬𑀫𑀸𑀦𑀸𑀧𑀺 𑀅𑀤𑁆𑀥𑀪𑀼𑀢𑁆𑀢𑀸 𑀅𑀤𑁆𑀥𑀸𑀮𑀗𑁆𑀓𑀢𑀸 𑀯𑀢𑁆𑀣𑀁 𑀦𑀺𑀯𑀸𑀲𑁂𑀦𑁆𑀢𑀸𑀯 𑀲𑀦𑁆𑀦𑀺𑀧𑀢𑀦𑁆𑀢𑀸 𑀲𑀫𑀕𑁆𑀕𑀸 𑀲𑀦𑁆𑀦𑀺𑀧𑀢𑀦𑁆𑀢𑀺 𑀦𑀸𑀫. 𑀲𑀦𑁆𑀦𑀺𑀧𑀢𑀺𑀢𑀸 𑀧𑀦 𑀘𑀺𑀦𑁆𑀢𑁂𑀢𑁆𑀯𑀸 𑀫𑀦𑁆𑀢𑁂𑀢𑁆𑀯𑀸 𑀓𑀢𑁆𑀢𑀩𑁆𑀩𑀁 𑀓𑀢𑁆𑀯𑀸 𑀏𑀓𑀢𑁄𑀯 𑀅𑀯𑀼𑀝𑁆𑀞𑀳𑀦𑁆𑀢𑀸 𑀦 𑀲𑀫𑀕𑁆𑀕𑀸 𑀯𑀼𑀝𑁆𑀞𑀳𑀦𑁆𑀢𑀺 𑀦𑀸𑀫. 𑀏𑀯𑀁 𑀯𑀼𑀝𑁆𑀞𑀺𑀢𑁂𑀲𑀼 𑀳𑀺 𑀬𑁂 𑀧𑀞𑀫𑀁 𑀕𑀘𑁆𑀙𑀦𑁆𑀢𑀺, 𑀢𑁂𑀲𑀁 𑀏𑀯𑀁 𑀳𑁄𑀢𑀺 𑁋 ‘‘𑀅𑀫𑁆𑀳𑁂𑀳𑀺 𑀩𑀸𑀳𑀺𑀭𑀓𑀣𑀸𑀯 𑀲𑀼𑀢𑀸, 𑀇𑀤𑀸𑀦𑀺 𑀯𑀺𑀦𑀺𑀘𑁆𑀙𑀬𑀓𑀣𑀸 𑀪𑀯𑀺𑀲𑁆𑀲𑀢𑀻’’𑀢𑀺. 𑀏𑀓𑀢𑁄 𑀯𑀼𑀝𑁆𑀞𑀳𑀦𑁆𑀢𑀸 𑀧𑀦 𑀲𑀫𑀕𑁆𑀕𑀸 𑀯𑀼𑀝𑁆𑀞𑀳𑀦𑁆𑀢𑀺 𑀦𑀸𑀫. 𑀅𑀧𑀺𑀘 ‘‘𑀅𑀲𑀼𑀓𑀝𑁆𑀞𑀸𑀦𑁂 𑀕𑀸𑀫𑀲𑀻𑀫𑀸 𑀯𑀸 𑀦𑀺𑀕𑀫𑀲𑀻𑀫𑀸 𑀯𑀸 𑀆𑀓𑀼𑀮𑀸, 𑀘𑁄𑀭𑀸 𑀯𑀸 𑀧𑀭𑀺𑀬𑀼𑀝𑁆𑀞𑀺𑀢𑀸’’𑀢𑀺 𑀲𑀼𑀢𑁆𑀯𑀸 ‘‘𑀓𑁄 𑀕𑀦𑁆𑀢𑁆𑀯𑀸 𑀅𑀫𑀺𑀢𑁆𑀢𑀫𑀤𑁆𑀤𑀦𑀁 𑀓𑀭𑀺𑀲𑁆𑀲𑀢𑀻’’𑀢𑀺 𑀯𑀼𑀢𑁆𑀢𑁂 ‘‘𑀅𑀳𑀁 𑀧𑀞𑀫𑀁 𑀅𑀳𑀁 𑀧𑀞𑀫’’𑀦𑁆𑀢𑀺 𑀯𑀢𑁆𑀯𑀸 𑀕𑀘𑁆𑀙𑀦𑁆𑀢𑀸𑀧𑀺 𑀲𑀫𑀕𑁆𑀕𑀸 𑀯𑀼𑀝𑁆𑀞𑀳𑀦𑁆𑀢𑀺 𑀦𑀸𑀫. 𑀏𑀓𑀲𑁆𑀲 𑀧𑀦 𑀓𑀫𑁆𑀫𑀦𑁆𑀢𑁂 𑀑𑀲𑀻𑀤𑀫𑀸𑀦𑁂 𑀲𑁂𑀲𑀸 𑀧𑀼𑀢𑁆𑀢𑀪𑀸𑀢𑀭𑁄 𑀧𑁂𑀲𑁂𑀢𑁆𑀯𑀸 𑀢𑀲𑁆𑀲 𑀓𑀫𑁆𑀫𑀦𑁆𑀢𑀁 𑀉𑀧𑀢𑁆𑀣𑀫𑁆𑀪𑀬𑀫𑀸𑀦𑀸𑀧𑀺 𑀆𑀕𑀦𑁆𑀢𑀼𑀓𑀭𑀸𑀚𑀸𑀦𑀁 ‘‘𑀅𑀲𑀼𑀓𑀲𑁆𑀲 𑀕𑁂𑀳𑀁 𑀕𑀘𑁆𑀙𑀢𑀼, 𑀅𑀲𑀼𑀓𑀲𑁆𑀲 𑀕𑁂𑀳𑀁 𑀕𑀘𑁆𑀙𑀢𑀽’’𑀢𑀺 𑀅𑀯𑀢𑁆𑀯𑀸 𑀲𑀩𑁆𑀩𑁂 𑀏𑀓𑀢𑁄 𑀲𑀗𑁆𑀕𑀡𑁆𑀳𑀦𑁆𑀢𑀸𑀧𑀺 𑀏𑀓𑀲𑁆𑀲 𑀫𑀗𑁆𑀕𑀮𑁂 𑀯𑀸 𑀭𑁄𑀕𑁂 𑀯𑀸 𑀅𑀜𑁆𑀜𑀲𑁆𑀫𑀺𑀁 𑀯𑀸 𑀧𑀦 𑀢𑀸𑀤𑀺𑀲𑁂 𑀲𑀼𑀔𑀤𑀼𑀓𑁆𑀔𑁂 𑀉𑀧𑁆𑀧𑀦𑁆𑀦𑁂 𑀲𑀩𑁆𑀩𑁂 𑀢𑀢𑁆𑀣 𑀲𑀳𑀸𑀬𑀪𑀸𑀯𑀁 𑀕𑀘𑁆𑀙𑀦𑁆𑀢𑀸𑀧𑀺 𑀲𑀫𑀕𑁆𑀕𑀸 𑀯𑀚𑁆𑀚𑀺𑀓𑀭𑀡𑀻𑀬𑀸𑀦𑀺 𑀓𑀭𑁄𑀦𑁆𑀢𑀺 𑀦𑀸𑀫.

𑀅𑀧𑁆𑀧𑀜𑁆𑀜𑀢𑁆𑀢𑀦𑁆𑀢𑀺𑀆𑀤𑀻𑀲𑀼 𑀧𑀼𑀩𑁆𑀩𑁂 𑀅𑀓𑀢𑀁 𑀲𑀼𑀗𑁆𑀓𑀁 𑀯𑀸 𑀩𑀮𑀺𑀁 𑀯𑀸 𑀤𑀡𑁆𑀟𑀁 𑀯𑀸 𑀆𑀳𑀭𑀸𑀧𑁂𑀦𑁆𑀢𑀸 𑀅𑀧𑁆𑀧𑀜𑁆𑀜𑀢𑁆𑀢𑀁 𑀧𑀜𑁆𑀜𑀸𑀧𑁂𑀦𑁆𑀢𑀺 𑀦𑀸𑀫. 𑀧𑁄𑀭𑀸𑀡𑀧𑀯𑁂𑀡𑀺𑀬𑀸 𑀆𑀕𑀢𑀫𑁂𑀯 𑀧𑀦 𑀅𑀦𑀸𑀳𑀭𑀸𑀧𑁂𑀦𑁆𑀢𑀸 𑀧𑀜𑁆𑀜𑀢𑁆𑀢𑀁 𑀲𑀫𑀼𑀘𑁆𑀙𑀺𑀦𑁆𑀤𑀦𑁆𑀢𑀺 𑀦𑀸𑀫. 𑀘𑁄𑀭𑁄𑀢𑀺 𑀕𑀳𑁂𑀢𑁆𑀯𑀸 𑀤𑀲𑁆𑀲𑀺𑀢𑁂 𑀅𑀯𑀺𑀘𑀺𑀦𑀺𑀢𑁆𑀯𑀸 𑀙𑁂𑀚𑁆𑀚𑀪𑁂𑀚𑁆𑀚𑀁 𑀅𑀦𑀼𑀲𑀸𑀲𑀦𑁆𑀢𑀸 𑀧𑁄𑀭𑀸𑀡𑀁 𑀯𑀚𑁆𑀚𑀺𑀥𑀫𑁆𑀫𑀁 𑀲𑀫𑀸𑀤𑀸𑀬 𑀦 𑀯𑀢𑁆𑀢𑀦𑁆𑀢𑀺 𑀦𑀸𑀫. 𑀢𑁂𑀲𑀁 𑀅𑀧𑀜𑁆𑀜𑀢𑁆𑀢𑀁 𑀧𑀜𑁆𑀜𑀸𑀧𑁂𑀦𑁆𑀢𑀸𑀦𑀁 𑀅𑀪𑀺𑀦𑀯𑀲𑀼𑀗𑁆𑀓𑀸𑀤𑀺𑀧𑀻𑀴𑀺𑀢𑀸 𑀫𑀦𑀼𑀲𑁆𑀲𑀸 ‘‘𑀅𑀢𑀺𑀉𑀧𑀤𑁆𑀤𑀼𑀢𑀫𑁆𑀳, 𑀓𑁂 𑀇𑀫𑁂𑀲𑀁 𑀯𑀺𑀚𑀺𑀢𑁂 𑀯𑀲𑀺𑀲𑁆𑀲𑀦𑁆𑀢𑀻’’𑀢𑀺 𑀧𑀘𑁆𑀘𑀦𑁆𑀢𑀁 𑀧𑀯𑀺𑀲𑀺𑀢𑁆𑀯𑀸 𑀘𑁄𑀭𑀸 𑀯𑀸 𑀘𑁄𑀭𑀲𑀳𑀸𑀬𑀸 𑀯𑀸 𑀳𑀼𑀢𑁆𑀯𑀸 𑀚𑀦𑀧𑀤𑀁 𑀳𑀦𑀦𑁆𑀢𑀺. 𑀧𑀜𑁆𑀜𑀢𑁆𑀢𑀁 𑀲𑀫𑀼𑀘𑁆𑀙𑀺𑀦𑁆𑀤𑀦𑁆𑀢𑀸𑀦𑀁 𑀧𑀯𑁂𑀡𑀺𑀆𑀕𑀢𑀸𑀦𑀺 𑀲𑀼𑀗𑁆𑀓𑀸𑀤𑀻𑀦𑀺 𑀅𑀕𑀡𑁆𑀳𑀦𑁆𑀢𑀸𑀦𑀁 𑀓𑁄𑀲𑁄 𑀧𑀭𑀺𑀳𑀸𑀬𑀢𑀺, 𑀢𑀢𑁄 𑀳𑀢𑁆𑀣𑀺𑀅𑀲𑁆𑀲𑀩𑀮𑀓𑀸𑀬𑀑𑀭𑁄𑀥𑀸𑀤𑀬𑁄 𑀬𑀣𑀸𑀦𑀺𑀩𑀤𑁆𑀥𑀁 𑀯𑀝𑁆𑀝𑀁 𑀅𑀮𑀪𑀫𑀸𑀦𑀸 𑀣𑀸𑀫𑀩𑀮𑁂𑀦 𑀧𑀭𑀺𑀳𑀸𑀬𑀦𑁆𑀢𑀺. 𑀢𑁂 𑀦𑁂𑀯 𑀬𑀼𑀤𑁆𑀥𑀓𑁆𑀔𑀫𑀸 𑀳𑁄𑀦𑁆𑀢𑀺 𑀦 𑀧𑀸𑀭𑀺𑀘𑀭𑀺𑀬𑀓𑁆𑀔𑀫𑀸. 𑀧𑁄𑀭𑀸𑀡𑀁 𑀯𑀚𑁆𑀚𑀺𑀥𑀫𑁆𑀫𑀁 𑀲𑀫𑀸𑀤𑀸𑀬 𑀅𑀯𑀢𑁆𑀢𑀦𑁆𑀢𑀸𑀦𑀁 𑀯𑀺𑀚𑀺𑀢𑁂 𑀫𑀦𑀼𑀲𑁆𑀲𑀸 ‘‘𑀅𑀫𑁆𑀳𑀸𑀓𑀁 𑀧𑀼𑀢𑁆𑀢𑀁 𑀧𑀺𑀢𑀭𑀁 𑀪𑀸𑀢𑀭𑀁 𑀅𑀘𑁄𑀭𑀁𑀬𑁂𑀯 𑀘𑁄𑀭𑁄𑀢𑀺 𑀓𑀢𑁆𑀯𑀸 𑀙𑀺𑀦𑁆𑀤𑀺𑀁𑀲𑀼 𑀪𑀺𑀦𑁆𑀤𑀺𑀁𑀲𑀽’’𑀢𑀺 𑀓𑀼𑀚𑁆𑀛𑀺𑀢𑁆𑀯𑀸 𑀧𑀘𑁆𑀘𑀦𑁆𑀢𑀁 𑀧𑀯𑀺𑀲𑀺𑀢𑁆𑀯𑀸 𑀘𑁄𑀭𑀸 𑀯𑀸 𑀘𑁄𑀭𑀲𑀳𑀸𑀬𑀸 𑀯𑀸 𑀳𑀼𑀢𑁆𑀯𑀸 𑀚𑀦𑀧𑀤𑀁 𑀳𑀦𑀦𑁆𑀢𑀺. 𑀏𑀯𑀁 𑀭𑀸𑀚𑀽𑀦𑀁 𑀧𑀭𑀺𑀳𑀸𑀦𑀺 𑀳𑁄𑀢𑀺. 𑀅𑀧𑀜𑁆𑀜𑀢𑁆𑀢𑀁 𑀦 𑀧𑀜𑁆𑀜𑀸𑀧𑁂𑀦𑁆𑀢𑀸𑀦𑀁 𑀧𑀦 ‘‘𑀧𑀯𑁂𑀡𑀺𑀆𑀕𑀢𑀁𑀬𑁂𑀯 𑀭𑀸𑀚𑀸𑀦𑁄 𑀓𑀭𑁄𑀦𑁆𑀢𑀻’’𑀢𑀺 𑀫𑀦𑀼𑀲𑁆𑀲𑀸 𑀳𑀝𑁆𑀞𑀢𑀼𑀝𑁆𑀞𑀸 𑀓𑀲𑀺𑀯𑀸𑀡𑀺𑀚𑁆𑀚𑀸𑀤𑀺𑀓𑁂 𑀓𑀫𑁆𑀫𑀦𑁆𑀢𑁂 𑀲𑀫𑁆𑀧𑀸𑀤𑁂𑀦𑁆𑀢𑀺. 𑀧𑀜𑁆𑀜𑀢𑁆𑀢𑀁 𑀅𑀲𑀫𑀼𑀘𑁆𑀙𑀺𑀦𑁆𑀤𑀦𑁆𑀢𑀸𑀦𑀁 𑀧𑀯𑁂𑀡𑀺𑀆𑀕𑀢𑀸𑀦𑀺 𑀲𑀼𑀗𑁆𑀓𑀸𑀤𑀻𑀦𑀺 𑀕𑀡𑁆𑀳𑀦𑁆𑀢𑀸𑀦𑀁 𑀓𑁄𑀲𑁄 𑀯𑀟𑁆𑀠𑀢𑀺, 𑀢𑀢𑁄 𑀳𑀢𑁆𑀣𑀺𑀅𑀲𑁆𑀲𑀩𑀮𑀓𑀸𑀬𑀑𑀭𑁄𑀥𑀸𑀤𑀬𑁄 𑀬𑀣𑀸𑀦𑀺𑀩𑀤𑁆𑀥𑀁 𑀯𑀝𑁆𑀝𑀁 𑀮𑀪𑀫𑀸𑀦𑀸 𑀣𑀸𑀫𑀩𑀮𑀲𑀫𑁆𑀧𑀦𑁆𑀦𑀸 𑀬𑀼𑀤𑁆𑀥𑀓𑁆𑀔𑀫𑀸 𑀘𑁂𑀯 𑀧𑀸𑀭𑀺𑀘𑀭𑀺𑀬𑀓𑁆𑀔𑀫𑀸 𑀘 𑀳𑁄𑀦𑁆𑀢𑀺. 𑀧𑁄𑀭𑀸𑀡𑁂 𑀯𑀚𑁆𑀚𑀺𑀥𑀫𑁆𑀫𑁂 𑀲𑀫𑀸𑀤𑀸𑀬 𑀯𑀢𑁆𑀢𑀦𑁆𑀢𑀸𑀦𑀁 𑀫𑀦𑀼𑀲𑁆𑀲𑀸 𑀦 𑀉𑀚𑁆𑀛𑀸𑀬𑀦𑁆𑀢𑀺. ‘‘𑀭𑀸𑀚𑀸𑀦𑁄 𑀧𑁄𑀭𑀸𑀡𑀧𑀯𑁂𑀡𑀺𑀬𑀸 𑀓𑀭𑁄𑀦𑁆𑀢𑀺, 𑀅𑀝𑁆𑀝𑀓𑀼𑀮𑀺𑀓𑀲𑁂𑀦𑀸𑀧𑀢𑀺𑀉𑀧𑀭𑀸𑀚𑀽𑀳𑀺 𑀧𑀭𑀺𑀓𑁆𑀔𑀺𑀢𑀁 𑀲𑀬𑀫𑁆𑀧𑀺 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀧𑀯𑁂𑀡𑀺𑀧𑁄𑀢𑁆𑀣𑀓𑀁 𑀯𑀸𑀘𑀸𑀧𑁂𑀢𑁆𑀯𑀸 𑀅𑀦𑀼𑀘𑁆𑀙𑀯𑀺𑀓𑀫𑁂𑀯 𑀤𑀡𑁆𑀟𑀁 𑀧𑀯𑀢𑁆𑀢𑀬𑀦𑁆𑀢𑀺, 𑀏𑀢𑁂𑀲𑀁 𑀤𑁄𑀲𑁄 𑀦𑀢𑁆𑀣𑀺, 𑀅𑀫𑁆𑀳𑀸𑀓𑀁𑀬𑁂𑀯 𑀤𑁄𑀲𑁄’’𑀢𑀺 𑀅𑀧𑁆𑀧𑀫𑀢𑁆𑀢𑀸 𑀓𑀫𑁆𑀫𑀦𑁆𑀢𑁂 𑀓𑀭𑁄𑀦𑁆𑀢𑀺. 𑀏𑀯𑀁 𑀭𑀸𑀚𑀽𑀦𑀁 𑀯𑀼𑀤𑁆𑀥𑀺 𑀳𑁄𑀢𑀺.

𑀲𑀓𑁆𑀓𑀭𑀺𑀲𑁆𑀲𑀦𑁆𑀢𑀻𑀢𑀺 𑀬𑀁𑀓𑀺𑀜𑁆𑀘𑀺 𑀢𑁂𑀲𑀁 𑀲𑀓𑁆𑀓𑀸𑀭𑀁 𑀓𑀭𑁄𑀦𑁆𑀢𑀸 𑀲𑀼𑀦𑁆𑀤𑀭𑀫𑁂𑀯 𑀓𑀭𑀺𑀲𑁆𑀲𑀦𑁆𑀢𑀺. 𑀕𑀭𑀼𑀁 𑀓𑀭𑀺𑀲𑁆𑀲𑀦𑁆𑀢𑀻𑀢𑀺 𑀕𑀭𑀼𑀪𑀸𑀯𑀁 𑀧𑀘𑁆𑀘𑀼𑀧𑀝𑁆𑀞𑀧𑁂𑀢𑁆𑀯𑀸 𑀓𑀭𑀺𑀲𑁆𑀲𑀦𑁆𑀢𑀺. 𑀫𑀸𑀦𑁂𑀲𑁆𑀲𑀦𑁆𑀢𑀻𑀢𑀺 𑀫𑀦𑁂𑀦 𑀧𑀺𑀬𑀸𑀬𑀺𑀲𑁆𑀲𑀦𑁆𑀢𑀺. 𑀧𑀽𑀚𑁂𑀲𑁆𑀲𑀦𑁆𑀢𑀻𑀢𑀺 𑀧𑀘𑁆𑀘𑀬𑀧𑀽𑀚𑀸𑀬 𑀧𑀽𑀚𑁂𑀲𑁆𑀲𑀦𑁆𑀢𑀺. 𑀲𑁄𑀢𑀩𑁆𑀩𑀁 𑀫𑀜𑁆𑀜𑀺𑀲𑁆𑀲𑀦𑁆𑀢𑀻𑀢𑀺 𑀤𑀺𑀯𑀲𑀲𑁆𑀲 𑀤𑁆𑀯𑁂 𑀢𑀬𑁄 𑀯𑀸𑀭𑁂 𑀉𑀧𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀢𑁂𑀲𑀁 𑀓𑀣𑀁 𑀲𑁄𑀢𑀩𑁆𑀩𑀁 𑀲𑀤𑁆𑀥𑀸𑀢𑀩𑁆𑀩𑀁 𑀫𑀜𑁆𑀜𑀺𑀲𑁆𑀲𑀦𑁆𑀢𑀺. 𑀢𑀢𑁆𑀣 𑀬𑁂 𑀏𑀯𑀁 𑀫𑀳𑀮𑁆𑀮𑀓𑀸𑀦𑀁 𑀭𑀸𑀚𑀽𑀦𑀁 𑀲𑀓𑁆𑀓𑀸𑀭𑀸𑀤𑀻𑀦𑀺 𑀦 𑀓𑀭𑁄𑀦𑁆𑀢𑀺, 𑀑𑀯𑀸𑀤𑀢𑁆𑀣𑀸𑀬 𑀯𑀸 𑀦𑁂𑀲𑀁 𑀉𑀧𑀝𑁆𑀞𑀸𑀦𑀁 𑀦 𑀕𑀘𑁆𑀙𑀦𑁆𑀢𑀺, 𑀢𑁂 𑀢𑁂𑀳𑀺 𑀯𑀺𑀲𑁆𑀲𑀝𑁆𑀞𑀸 𑀅𑀦𑁄𑀯𑀤𑀺𑀬𑀫𑀸𑀦𑀸 𑀓𑀻𑀴𑀸𑀧𑀲𑀼𑀢𑀸 𑀭𑀚𑁆𑀚𑀢𑁄 𑀧𑀭𑀺𑀳𑀸𑀬𑀦𑁆𑀢𑀺. 𑀬𑁂 𑀧𑀦 𑀢𑀣𑀸 𑀧𑀝𑀺𑀧𑀚𑁆𑀚𑀦𑁆𑀢𑀺, 𑀢𑁂𑀲𑀁 𑀫𑀳𑀮𑁆𑀮𑀓𑀭𑀸𑀚𑀸𑀦𑁄 ‘‘𑀇𑀤𑀁 𑀓𑀸𑀢𑀩𑁆𑀩𑀁 𑀇𑀤𑀁 𑀦 𑀓𑀸𑀢𑀩𑁆𑀩’’𑀦𑁆𑀢𑀺 𑀧𑁄𑀭𑀸𑀡𑀧𑀯𑁂𑀡𑀺𑀁 𑀆𑀘𑀺𑀓𑁆𑀔𑀦𑁆𑀢𑀺. 𑀲𑀗𑁆𑀕𑀸𑀫𑀁 𑀧𑀢𑁆𑀯𑀸𑀧𑀺 ‘‘𑀏𑀯𑀁 𑀧𑀯𑀺𑀲𑀺𑀢𑀩𑁆𑀩𑀁, 𑀏𑀯𑀁 𑀦𑀺𑀓𑁆𑀔𑀫𑀺𑀢𑀩𑁆𑀩’’𑀦𑁆𑀢𑀺 𑀉𑀧𑀸𑀬𑀁 𑀤𑀲𑁆𑀲𑁂𑀦𑁆𑀢𑀺. 𑀢𑁂 𑀢𑁂𑀳𑀺 𑀑𑀯𑀤𑀺𑀬𑀫𑀸𑀦𑀸 𑀬𑀣𑀸𑀑𑀯𑀸𑀤𑀁 𑀧𑀝𑀺𑀧𑀚𑁆𑀚𑀫𑀸𑀦𑀸 𑀲𑀓𑁆𑀓𑁄𑀦𑁆𑀢𑀺 𑀭𑀚𑁆𑀚𑀧𑀯𑁂𑀡𑀺𑀁 𑀲𑀦𑁆𑀥𑀸𑀭𑁂𑀢𑀼𑀁. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀯𑀼𑀤𑁆𑀥𑀺𑀬𑁂𑀯 𑀮𑀺𑀘𑁆𑀙𑀯𑀻 𑀯𑀚𑁆𑀚𑀻𑀦𑀁 𑀧𑀸𑀝𑀺𑀓𑀗𑁆𑀔𑀸’’𑀢𑀺.

𑀓𑀼𑀮𑀺𑀢𑁆𑀣𑀺𑀬𑁄𑀢𑀺 𑀓𑀼𑀮𑀖𑀭𑀡𑀺𑀬𑁄. 𑀓𑀼𑀮𑀓𑀼𑀫𑀸𑀭𑀺𑀬𑁄𑀢𑀺 𑀅𑀦𑀺𑀯𑀺𑀤𑁆𑀥𑀸 𑀢𑀸𑀲𑀁 𑀥𑀻𑀢𑀭𑁄. 𑀑𑀓𑀲𑁆𑀲𑀸𑀢𑀺 𑀯𑀸 𑀧𑀲𑀬𑁆𑀳𑀸𑀢𑀺 𑀯𑀸 𑀧𑀲𑀬𑁆𑀳𑀸𑀓𑀸𑀭𑀲𑁆𑀲𑁂𑀯𑁂𑀢𑀁 𑀦𑀸𑀫𑀁. 𑀑𑀓𑀸𑀲𑀸𑀢𑀺𑀧𑀺 𑀧𑀞𑀦𑁆𑀢𑀺. 𑀢𑀢𑁆𑀣 𑀑𑀓𑀲𑁆𑀲𑀸𑀢𑀺 𑀅𑀯𑀓𑀲𑀺𑀢𑁆𑀯𑀸 𑀆𑀓𑀟𑁆𑀠𑀺𑀢𑁆𑀯𑀸. 𑀧𑀲𑀬𑁆𑀳𑀸𑀢𑀺 𑀅𑀪𑀺𑀪𑀯𑀺𑀢𑁆𑀯𑀸 𑀅𑀚𑁆𑀛𑁄𑀢𑁆𑀣𑀭𑀺𑀢𑁆𑀯𑀸𑀢𑀺 𑀅𑀬𑀁 𑀯𑀘𑀦𑀢𑁆𑀣𑁄. 𑀏𑀯𑀜𑁆𑀳𑀺 𑀓𑀭𑁄𑀦𑁆𑀢𑀸𑀦𑀁 𑀯𑀺𑀚𑀺𑀢𑁂 𑀫𑀦𑀼𑀲𑁆𑀲𑀸 ‘‘𑀅𑀫𑁆𑀳𑀸𑀓𑀁 𑀕𑁂𑀳𑁂 𑀧𑀼𑀢𑁆𑀢𑀪𑀸𑀢𑀭𑁄𑀧𑀺, 𑀔𑁂𑀴𑀲𑀺𑀗𑁆𑀖𑀸𑀦𑀺𑀓𑀸𑀤𑀻𑀦𑀺 𑀫𑀼𑀔𑁂𑀦 𑀅𑀧𑀦𑁂𑀢𑁆𑀯𑀸 𑀲𑀁𑀯𑀟𑁆𑀠𑀺𑀢𑀸 𑀥𑀻𑀢𑀭𑁄𑀧𑀺 𑀇𑀫𑁂 𑀩𑀮𑀓𑁆𑀓𑀸𑀭𑁂𑀦 𑀕𑀳𑁂𑀢𑁆𑀯𑀸 𑀅𑀢𑁆𑀢𑀦𑁄 𑀖𑀭𑁂 𑀯𑀸𑀲𑁂𑀦𑁆𑀢𑀻’’𑀢𑀺 𑀓𑀼𑀧𑀺𑀢𑀸 𑀧𑀘𑁆𑀘𑀦𑁆𑀢𑀁 𑀧𑀯𑀺𑀲𑀺𑀢𑁆𑀯𑀸 𑀘𑁄𑀭𑀸 𑀯𑀸 𑀘𑁄𑀭𑀲𑀳𑀸𑀬𑀸 𑀯𑀸 𑀳𑀼𑀢𑁆𑀯𑀸 𑀚𑀦𑀧𑀤𑀁 𑀳𑀦𑀦𑁆𑀢𑀺. 𑀏𑀯𑀁 𑀅𑀓𑀭𑁄𑀦𑁆𑀢𑀸𑀦𑀁 𑀧𑀦 𑀯𑀺𑀚𑀺𑀢𑁂 𑀫𑀦𑀼𑀲𑁆𑀲𑀸 𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑀸 𑀲𑀓𑀸𑀦𑀺 𑀓𑀫𑁆𑀫𑀸𑀦𑀺 𑀓𑀭𑁄𑀦𑁆𑀢𑀸 𑀭𑀸𑀚𑀓𑁄𑀲𑀁 𑀯𑀟𑁆𑀠𑁂𑀦𑁆𑀢𑀺. 𑀏𑀯𑀫𑁂𑀢𑁆𑀣 𑀯𑀼𑀤𑁆𑀥𑀺𑀳𑀸𑀦𑀺𑀬𑁄 𑀯𑁂𑀤𑀺𑀢𑀩𑁆𑀩𑀸.

𑀯𑀚𑁆𑀚𑀻𑀦𑀁 𑀯𑀚𑁆𑀚𑀺𑀘𑁂𑀢𑀺𑀬𑀸𑀦𑀻𑀢𑀺 𑀯𑀚𑁆𑀚𑀺𑀭𑀸𑀚𑀽𑀦𑀁 𑀯𑀚𑁆𑀚𑀺𑀭𑀝𑁆𑀞𑁂 𑀘𑀺𑀢𑁆𑀢𑀻𑀓𑀢𑀝𑁆𑀞𑁂𑀦 𑀘𑁂𑀢𑀺𑀬𑀸𑀦𑀻𑀢𑀺 𑀮𑀤𑁆𑀥𑀦𑀸𑀫𑀸𑀦𑀺 𑀬𑀓𑁆𑀔𑀝𑁆𑀞𑀸𑀦𑀸𑀦𑀺. 𑀅𑀩𑁆𑀪𑀦𑁆𑀢𑀭𑀸𑀦𑀻𑀢𑀺 𑀅𑀦𑁆𑀢𑁄𑀦𑀕𑀭𑁂 𑀞𑀺𑀢𑀸𑀦𑀺. 𑀩𑀸𑀳𑀺𑀭𑀸𑀦𑀻𑀢𑀺 𑀩𑀳𑀺𑀦𑀕𑀭𑁂 𑀞𑀺𑀢𑀸𑀦𑀺. 𑀤𑀺𑀦𑁆𑀦𑀧𑀼𑀩𑁆𑀩𑀁 𑀓𑀢𑀧𑀼𑀩𑁆𑀩𑀦𑁆𑀢𑀺 𑀧𑀼𑀩𑁆𑀩𑁂 𑀤𑀺𑀦𑁆𑀦𑀜𑁆𑀘 𑀓𑀢𑀜𑁆𑀘. 𑀦𑁄 𑀧𑀭𑀺𑀳𑀸𑀧𑁂𑀲𑁆𑀲𑀦𑁆𑀢𑀻𑀢𑀺 𑀅𑀳𑀸𑀧𑁂𑀢𑁆𑀯𑀸 𑀬𑀣𑀸𑀧𑀯𑀢𑁆𑀢𑀫𑁂𑀯 𑀓𑀭𑀺𑀲𑁆𑀲𑀦𑁆𑀢𑀺. 𑀥𑀫𑁆𑀫𑀺𑀓𑀁 𑀩𑀮𑀺𑀁 𑀧𑀭𑀺𑀳𑀸𑀧𑁂𑀦𑁆𑀢𑀸𑀦𑀜𑁆𑀳𑀺 𑀤𑁂𑀯𑀢𑀸 𑀆𑀭𑀓𑁆𑀔𑀁 𑀲𑀼𑀲𑀁𑀯𑀺𑀳𑀺𑀢𑀁 𑀦 𑀓𑀭𑁄𑀦𑁆𑀢𑀺, 𑀅𑀦𑀼𑀧𑁆𑀧𑀦𑁆𑀦𑀁 𑀤𑀼𑀓𑁆𑀔𑀁 𑀉𑀧𑁆𑀧𑀸𑀤𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀺𑀬𑁄𑀧𑀺 𑀉𑀧𑁆𑀧𑀦𑁆𑀦𑀁 𑀓𑀸𑀲𑀲𑀻𑀲𑀭𑁄𑀕𑀸𑀤𑀺𑀁 𑀯𑀟𑁆𑀠𑁂𑀦𑁆𑀢𑀺, 𑀲𑀗𑁆𑀕𑀸𑀫𑁂 𑀧𑀢𑁆𑀢𑁂 𑀲𑀳𑀸𑀬𑀸 𑀦 𑀳𑁄𑀦𑁆𑀢𑀺. 𑀅𑀧𑀭𑀺𑀳𑀸𑀧𑁂𑀦𑁆𑀢𑀸𑀦𑀁 𑀧𑀦 𑀆𑀭𑀓𑁆𑀔𑀁 𑀲𑀼𑀲𑀁𑀯𑀺𑀳𑀺𑀢𑀁 𑀓𑀭𑁄𑀦𑁆𑀢𑀺, 𑀅𑀦𑀼𑀧𑁆𑀧𑀦𑁆𑀦𑀁 𑀲𑀼𑀔𑀁 𑀉𑀧𑁆𑀧𑀸𑀤𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀺𑀬𑁄𑀧𑀺 𑀉𑀧𑁆𑀧𑀦𑁆𑀦𑀁 𑀓𑀸𑀲𑀲𑀻𑀲𑀭𑁄𑀕𑀸𑀤𑀺𑀁 𑀳𑀭𑀦𑁆𑀢𑀺, 𑀲𑀗𑁆𑀕𑀸𑀫𑀲𑀻𑀲𑁂 𑀲𑀳𑀸𑀬𑀸 𑀳𑁄𑀦𑁆𑀢𑀻𑀢𑀺. 𑀏𑀯𑀫𑁂𑀢𑁆𑀣 𑀯𑀼𑀤𑁆𑀥𑀺𑀳𑀸𑀦𑀺𑀬𑁄 𑀯𑁂𑀤𑀺𑀢𑀩𑁆𑀩𑀸.

𑀥𑀫𑁆𑀫𑀺𑀓𑀸 𑀭𑀓𑁆𑀔𑀸𑀯𑀭𑀡𑀕𑀼𑀢𑁆𑀢𑀻𑀢𑀺 𑀏𑀢𑁆𑀣 𑀭𑀓𑁆𑀔𑀸 𑀏𑀯 𑀬𑀣𑀸 𑀅𑀦𑀺𑀘𑁆𑀙𑀺𑀢𑀁 𑀦𑀸𑀕𑀘𑁆𑀙𑀢𑀺, 𑀏𑀯𑀁 𑀆𑀯𑀭𑀡𑀢𑁄 𑀆𑀯𑀭𑀡𑀁. 𑀬𑀣𑀸 𑀇𑀘𑁆𑀙𑀺𑀢𑀁 𑀦 𑀦𑀲𑁆𑀲𑀢𑀺, 𑀏𑀯𑀁 𑀕𑁄𑀧𑀸𑀬𑀦𑀢𑁄 𑀕𑀼𑀢𑁆𑀢𑀺. 𑀢𑀢𑁆𑀣 𑀩𑀮𑀓𑀸𑀬𑁂𑀦 𑀧𑀭𑀺𑀯𑀸𑀭𑁂𑀢𑁆𑀯𑀸 𑀭𑀓𑁆𑀔𑀦𑀁 𑀧𑀩𑁆𑀩𑀚𑀺𑀢𑀸𑀦𑀁 𑀥𑀫𑁆𑀫𑀺𑀓𑀸 𑀭𑀓𑁆𑀔𑀸𑀯𑀭𑀡𑀕𑀼𑀢𑁆𑀢𑀺 𑀦𑀸𑀫 𑀦 𑀳𑁄𑀢𑀺. 𑀬𑀣𑀸 𑀧𑀦 𑀯𑀺𑀳𑀸𑀭𑀲𑁆𑀲 𑀉𑀧𑀯𑀦𑁂 𑀭𑀼𑀓𑁆𑀔𑁂 𑀦 𑀙𑀺𑀦𑁆𑀤𑀦𑁆𑀢𑀺, 𑀯𑀸𑀚𑀺𑀓𑀸 𑀯𑀸𑀚𑀁 𑀦 𑀓𑀭𑁄𑀦𑁆𑀢𑀺, 𑀧𑁄𑀓𑁆𑀔𑀭𑀡𑀻𑀲𑀼 𑀫𑀘𑁆𑀙𑁂 𑀦 𑀕𑀡𑁆𑀳𑀦𑁆𑀢𑀺, 𑀏𑀯𑀁 𑀓𑀭𑀡𑀁 𑀥𑀫𑁆𑀫𑀺𑀓𑀸 𑀭𑀓𑁆𑀔𑀸𑀯𑀭𑀡𑀕𑀼𑀢𑁆𑀢𑀺 𑀦𑀸𑀫. 𑀓𑀺𑀦𑁆𑀢𑀻𑀢𑀺 𑀓𑁂𑀦 𑀦𑀼 𑀔𑁄 𑀓𑀸𑀭𑀡𑁂𑀦.

𑀢𑀢𑁆𑀣 𑀬𑁂 𑀅𑀦𑀸𑀕𑀢𑀸𑀦𑀁 𑀅𑀭𑀳𑀦𑁆𑀢𑀸𑀦𑀁 𑀆𑀕𑀫𑀦𑀁 𑀦 𑀇𑀘𑁆𑀙𑀦𑁆𑀢𑀺, 𑀢𑁂 𑀅𑀲𑁆𑀲𑀤𑁆𑀥𑀸 𑀳𑁄𑀦𑁆𑀢𑀺 𑀅𑀧𑁆𑀧𑀲𑀦𑁆𑀦𑀸. 𑀧𑀩𑁆𑀩𑀚𑀺𑀢𑁂 𑀲𑀫𑁆𑀧𑀢𑁆𑀢𑁂 𑀧𑀘𑁆𑀘𑀼𑀕𑁆𑀕𑀫𑀦𑀁 𑀦 𑀓𑀭𑁄𑀦𑁆𑀢𑀺, 𑀕𑀦𑁆𑀢𑁆𑀯𑀸 𑀦 𑀧𑀲𑁆𑀲𑀦𑁆𑀢𑀺, 𑀧𑀝𑀺𑀲𑀦𑁆𑀣𑀸𑀭𑀁 𑀦 𑀓𑀭𑁄𑀦𑁆𑀢𑀺, 𑀧𑀜𑁆𑀳𑀁 𑀦 𑀧𑀼𑀘𑁆𑀙𑀦𑁆𑀢𑀺, 𑀥𑀫𑁆𑀫𑀁 𑀦 𑀲𑀼𑀡𑀦𑁆𑀢𑀺, 𑀤𑀸𑀦𑀁 𑀦 𑀤𑁂𑀦𑁆𑀢𑀺, 𑀅𑀦𑀼𑀫𑁄𑀤𑀦𑀁 𑀦 𑀲𑀼𑀡𑀦𑁆𑀢𑀺, 𑀦𑀺𑀯𑀸𑀲𑀦𑀝𑁆𑀞𑀸𑀦𑀁 𑀦 𑀲𑀁𑀯𑀺𑀤𑀳𑀦𑁆𑀢𑀺. 𑀅𑀣 𑀦𑁂𑀲𑀁 𑀅𑀯𑀡𑁆𑀡𑁄 𑀉𑀕𑁆𑀕𑀘𑁆𑀙𑀢𑀺 ‘‘𑀅𑀲𑀼𑀓𑁄 𑀦𑀸𑀫 𑀭𑀸𑀚𑀸 𑀅𑀲𑁆𑀲𑀤𑁆𑀥𑁄 𑀅𑀧𑁆𑀧𑀲𑀦𑁆𑀦𑁄, 𑀧𑀩𑁆𑀩𑀚𑀺𑀢𑁂 𑀲𑀫𑁆𑀧𑀢𑁆𑀢𑁂 𑀧𑀘𑁆𑀘𑀼𑀕𑁆𑀕𑀫𑀦𑀁 𑀦 𑀓𑀭𑁄𑀢𑀺…𑀧𑁂… 𑀦𑀺𑀯𑀸𑀲𑀦𑀝𑁆𑀞𑀸𑀦𑀁 𑀦 𑀲𑀁𑀯𑀺𑀤𑀳𑀢𑀻’’𑀢𑀺. 𑀢𑀁 𑀲𑀼𑀢𑁆𑀯𑀸 𑀧𑀩𑁆𑀩𑀚𑀺𑀢𑀸 𑀢𑀲𑁆𑀲 𑀦𑀕𑀭𑀤𑁆𑀯𑀸𑀭𑁂𑀦 𑀕𑀘𑁆𑀙𑀦𑁆𑀢𑀸𑀧𑀺 𑀦𑀕𑀭𑀁 𑀦 𑀧𑀯𑀺𑀲𑀦𑁆𑀢𑀺. 𑀏𑀯𑀁 𑀅𑀦𑀸𑀕𑀢𑀸𑀦𑀁 𑀅𑀭𑀳𑀦𑁆𑀢𑀸𑀦𑀁 𑀅𑀦𑀸𑀕𑀫𑀦𑀫𑁂𑀯 𑀳𑁄𑀢𑀺. 𑀆𑀕𑀢𑀸𑀦𑀁 𑀧𑀦 𑀨𑀸𑀲𑀼𑀯𑀺𑀳𑀸𑀭𑁂 𑀅𑀲𑀢𑀺 𑀬𑁂𑀧𑀺 𑀅𑀚𑀸𑀦𑀺𑀢𑁆𑀯𑀸 𑀆𑀕𑀢𑀸, 𑀢𑁂 ‘‘𑀯𑀲𑀺𑀲𑁆𑀲𑀸𑀫𑀸𑀢𑀺 𑀢𑀸𑀯 𑀘𑀺𑀦𑁆𑀢𑁂𑀢𑁆𑀯𑀸 𑀆𑀕𑀢𑀫𑁆𑀳𑀸, 𑀇𑀫𑁂𑀲𑀁 𑀧𑀦 𑀭𑀸𑀚𑀽𑀦𑀁 𑀇𑀫𑀺𑀦𑀸 𑀦𑀻𑀳𑀸𑀭𑁂𑀦 𑀓𑁂 𑀯𑀲𑀺𑀲𑁆𑀲𑀦𑁆𑀢𑀻’’𑀢𑀺 𑀦𑀺𑀓𑁆𑀔𑀫𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑀺. 𑀏𑀯𑀁 𑀅𑀦𑀸𑀕𑀢𑁂𑀲𑀼 𑀅𑀦𑀸𑀕𑀘𑁆𑀙𑀦𑁆𑀢𑁂𑀲𑀼 𑀆𑀕𑀢𑁂𑀲𑀼 𑀤𑀼𑀓𑁆𑀔𑀁 𑀯𑀺𑀳𑀭𑀦𑁆𑀢𑁂𑀲𑀼 𑀲𑁄 𑀤𑁄𑀲𑁄 𑀧𑀩𑁆𑀩𑀚𑀺𑀢𑀸𑀦𑀁 𑀅𑀦𑀸𑀯𑀸𑀲𑁄 𑀳𑁄𑀢𑀺. 𑀢𑀢𑁄 𑀤𑁂𑀯𑀢𑀸𑀭𑀓𑁆𑀔𑀸 𑀦 𑀳𑁄𑀢𑀺, 𑀤𑁂𑀯𑀢𑀸𑀭𑀓𑁆𑀔𑀸𑀬 𑀅𑀲𑀢𑀺 𑀅𑀫𑀦𑀼𑀲𑁆𑀲𑀸 𑀑𑀓𑀸𑀲𑀁 𑀮𑀪𑀦𑁆𑀢𑀺, 𑀅𑀫𑀦𑀼𑀲𑁆𑀲𑀸 𑀉𑀲𑁆𑀲𑀦𑁆𑀦𑀸 𑀅𑀦𑀼𑀧𑁆𑀧𑀦𑁆𑀦𑀁 𑀩𑁆𑀬𑀸𑀥𑀺𑀁 𑀉𑀧𑁆𑀧𑀸𑀤𑁂𑀦𑁆𑀢𑀺. 𑀲𑀻𑀮𑀯𑀦𑁆𑀢𑀸𑀦𑀁 𑀤𑀲𑁆𑀲𑀦𑀧𑀜𑁆𑀳𑀧𑀼𑀘𑁆𑀙𑀦𑀸𑀤𑀺𑀯𑀢𑁆𑀣𑀼𑀓𑀲𑁆𑀲 𑀧𑀼𑀜𑁆𑀜𑀲𑁆𑀲 𑀅𑀦𑀸𑀕𑀫𑁄 𑀳𑁄𑀢𑀺. 𑀯𑀺𑀧𑀭𑀺𑀬𑀸𑀬𑁂𑀦 𑀬𑀣𑀸𑀯𑀼𑀢𑁆𑀢𑀓𑀡𑁆𑀳𑀧𑀓𑁆𑀔𑀯𑀺𑀧𑀭𑀻𑀢𑀲𑁆𑀲 𑀲𑀼𑀓𑁆𑀓𑀧𑀓𑁆𑀔𑀲𑁆𑀲 𑀲𑀫𑁆𑀪𑀯𑁄 𑀳𑁄𑀢𑀻𑀢𑀺 𑀏𑀯𑀫𑁂𑀢𑁆𑀣 𑀯𑀼𑀤𑁆𑀥𑀺𑀳𑀸𑀦𑀺𑀬𑁄 𑀯𑁂𑀤𑀺𑀢𑀩𑁆𑀩𑀸.

𑁨. 𑀯𑀲𑁆𑀲𑀓𑀸𑀭𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁨. 𑀤𑀼𑀢𑀺𑀬𑁂 𑀅𑀪𑀺𑀬𑀸𑀢𑀼𑀓𑀸𑀫𑁄𑀢𑀺 𑀅𑀪𑀺𑀪𑀯𑀦𑀢𑁆𑀣𑀸𑀬 𑀬𑀸𑀢𑀼𑀓𑀸𑀫𑁄. 𑀯𑀚𑁆𑀚𑀻𑀢𑀺 𑀯𑀚𑁆𑀚𑀺𑀭𑀸𑀚𑀸𑀦𑁄. 𑀏𑀯𑀁𑀫𑀳𑀺𑀤𑁆𑀥𑀺𑀓𑁂𑀢𑀺 𑀏𑀯𑀁 𑀫𑀳𑀢𑀺𑀬𑀸 𑀭𑀸𑀚𑀺𑀤𑁆𑀥𑀺𑀬𑀸 𑀲𑀫𑀦𑁆𑀦𑀸𑀕𑀢𑁂. 𑀏𑀢𑁂𑀦 𑀦𑁂𑀲𑀁 𑀲𑀫𑀕𑁆𑀕𑀪𑀸𑀯𑀁 𑀓𑀣𑁂𑀢𑀺. 𑀏𑀯𑀁𑀫𑀳𑀸𑀦𑀼𑀪𑀸𑀯𑁂𑀢𑀺 𑀏𑀯𑀁 𑀫𑀳𑀦𑁆𑀢𑁂𑀦 𑀭𑀸𑀚𑀸𑀦𑀼𑀪𑀸𑀯𑁂𑀦 𑀲𑀫𑀦𑁆𑀦𑀸𑀕𑀢𑁂. 𑀏𑀢𑁂𑀦 𑀦𑁂𑀲𑀁 𑀳𑀢𑁆𑀣𑀺𑀲𑀺𑀧𑁆𑀧𑀸𑀤𑀻𑀲𑀼 𑀓𑀢𑀲𑀺𑀓𑁆𑀔𑀢𑀁 𑀓𑀣𑁂𑀢𑀺, 𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑁋 ‘‘𑀲𑀺𑀓𑁆𑀔𑀺𑀢𑀸 𑀯𑀢𑀺𑀫𑁂 𑀮𑀺𑀘𑁆𑀙𑀯𑀺𑀓𑀼𑀫𑀸𑀭𑀓𑀸, 𑀲𑀼𑀲𑀺𑀓𑁆𑀔𑀺𑀢𑀸 𑀯𑀢𑀺𑀫𑁂 𑀮𑀺𑀘𑁆𑀙𑀯𑀺𑀓𑀼𑀫𑀸𑀭𑀓𑀸, 𑀬𑀢𑁆𑀭 𑀳𑀺 𑀦𑀸𑀫 𑀲𑀼𑀔𑀼𑀫𑁂𑀦 𑀢𑀸𑀴𑀘𑁆𑀙𑀺𑀕𑁆𑀕𑀴𑁂𑀦 𑀅𑀲𑀦𑀁 𑀅𑀢𑀺𑀧𑀸𑀢𑀬𑀺𑀲𑁆𑀲𑀦𑁆𑀢𑀺 𑀧𑁄𑀗𑁆𑀔𑀸𑀦𑀼𑀧𑁄𑀗𑁆𑀔𑀁 𑀅𑀯𑀺𑀭𑀸𑀥𑀺𑀢’’𑀦𑁆𑀢𑀺 (𑀲𑀁. 𑀦𑀺. 𑁫.𑁧𑁧𑁧𑁫). 𑀉𑀘𑁆𑀙𑁂𑀘𑁆𑀙𑀸𑀫𑀻𑀢𑀺 𑀉𑀘𑁆𑀙𑀺𑀦𑁆𑀤𑀺𑀲𑁆𑀲𑀸𑀫𑀺. 𑀯𑀺𑀦𑀸𑀲𑁂𑀲𑁆𑀲𑀸𑀫𑀻𑀢𑀺 𑀅𑀤𑀲𑁆𑀲𑀦𑀁 𑀦𑀬𑀺𑀲𑁆𑀲𑀸𑀫𑀺. 𑀅𑀦𑀬𑀩𑁆𑀬𑀲𑀦𑀦𑁆𑀢𑀺 𑀅𑀯𑀟𑁆𑀠𑀺𑀜𑁆𑀘𑁂𑀯, 𑀜𑀸𑀢𑀺𑀩𑁆𑀬𑀲𑀦𑀜𑁆𑀘. 𑀆𑀧𑀸𑀤𑁂𑀲𑁆𑀲𑀸𑀫𑀻𑀢𑀺 𑀧𑀸𑀧𑀬𑀺𑀲𑁆𑀲𑀸𑀫𑀺.

𑀇𑀢𑀺 𑀓𑀺𑀭 𑀲𑁄 𑀞𑀸𑀦𑀦𑀺𑀲𑀚𑁆𑀚𑀸𑀤𑀻𑀲𑀼 𑀇𑀫𑀁 𑀬𑀼𑀤𑁆𑀥𑀓𑀣𑀫𑁂𑀯 𑀓𑀣𑁂𑀢𑀺, ‘‘𑀕𑀫𑀦𑀲𑀚𑁆𑀚𑀸 𑀳𑁄𑀣𑀸’’𑀢𑀺 𑀘 𑀩𑀮𑀓𑀸𑀬𑀁 𑀆𑀡𑀸𑀧𑁂𑀢𑀺. 𑀓𑀲𑁆𑀫𑀸? 𑀕𑀗𑁆𑀕𑀸𑀬 𑀓𑀺𑀭 𑀏𑀓𑀁 𑀧𑀝𑁆𑀝𑀦𑀕𑀸𑀫𑀁 𑀦𑀺𑀲𑁆𑀲𑀸𑀬 𑀅𑀤𑁆𑀥𑀬𑁄𑀚𑀦𑀁 𑀅𑀚𑀸𑀢𑀲𑀢𑁆𑀢𑀼𑀦𑁄 𑀯𑀺𑀚𑀺𑀢𑀁, 𑀅𑀤𑁆𑀥𑀬𑁄𑀚𑀦𑀁 𑀮𑀺𑀘𑁆𑀙𑀯𑀻𑀦𑀁. 𑀢𑀢𑁆𑀭 𑀧𑀩𑁆𑀩𑀢𑀧𑀸𑀤𑀢𑁄 𑀫𑀳𑀕𑁆𑀖𑀪𑀡𑁆𑀟𑀁 𑀑𑀢𑀭𑀢𑀺. 𑀢𑀁 𑀲𑀼𑀢𑁆𑀯𑀸 ‘‘𑀅𑀚𑁆𑀚 𑀬𑀸𑀫𑀺, 𑀲𑁆𑀯𑁂 𑀬𑀸𑀫𑀻’’𑀢𑀺 𑀅𑀚𑀸𑀢𑀲𑀢𑁆𑀢𑀼𑀦𑁄 𑀲𑀁𑀯𑀺𑀤𑀳𑀦𑁆𑀢𑀲𑁆𑀲𑁂𑀯 𑀮𑀺𑀘𑁆𑀙𑀯𑀺𑀦𑁄 𑀲𑀫𑀕𑁆𑀕𑀸 𑀲𑀫𑁆𑀫𑁄𑀤𑀫𑀸𑀦𑀸 𑀧𑀼𑀭𑁂𑀢𑀭𑀁 𑀆𑀕𑀦𑁆𑀢𑁆𑀯𑀸 𑀲𑀩𑁆𑀩𑀁 𑀕𑀡𑁆𑀳𑀦𑁆𑀢𑀺. 𑀅𑀚𑀸𑀢𑀲𑀢𑁆𑀢𑀼 𑀧𑀘𑁆𑀙𑀸 𑀆𑀕𑀦𑁆𑀢𑁆𑀯𑀸 𑀢𑀁 𑀧𑀯𑀢𑁆𑀢𑀺𑀁 𑀜𑀢𑁆𑀯𑀸 𑀓𑀼𑀚𑁆𑀛𑀺𑀢𑁆𑀯𑀸 𑀕𑀘𑁆𑀙𑀢𑀺. 𑀢𑁂 𑀧𑀼𑀦𑀲𑀁𑀯𑀘𑁆𑀙𑀭𑁂𑀧𑀺 𑀢𑀣𑁂𑀯 𑀓𑀭𑁄𑀦𑁆𑀢𑀺. 𑀅𑀣 𑀲𑁄 𑀩𑀮𑀯𑀸𑀖𑀸𑀢𑀚𑀸𑀢𑁄, 𑀢𑀤𑀸 𑀏𑀯𑀫𑀓𑀸𑀲𑀺.

𑀢𑀢𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀕𑀡𑁂𑀦 𑀲𑀤𑁆𑀥𑀺𑀁 𑀬𑀼𑀤𑁆𑀥𑀁 𑀦𑀸𑀫 𑀪𑀸𑀭𑀺𑀬𑀁, 𑀏𑀓𑁄𑀧𑀺 𑀫𑁄𑀖𑀧𑁆𑀧𑀳𑀸𑀭𑁄 𑀦𑀸𑀫 𑀦𑀢𑁆𑀣𑀺. 𑀏𑀓𑁂𑀦 𑀔𑁄 𑀧𑀦 𑀧𑀡𑁆𑀟𑀺𑀢𑁂𑀦 𑀲𑀤𑁆𑀥𑀺𑀁 𑀫𑀦𑁆𑀢𑁂𑀢𑁆𑀯𑀸 𑀓𑀭𑁄𑀦𑁆𑀢𑁄 𑀦𑀺𑀭𑀧𑀭𑀸𑀥𑁄 𑀳𑁄𑀢𑀺, 𑀧𑀡𑁆𑀟𑀺𑀢𑁄 𑀘 𑀲𑀢𑁆𑀣𑀸𑀭𑀸 𑀲𑀤𑀺𑀲𑁄 𑀦𑀢𑁆𑀣𑀺, 𑀲𑀢𑁆𑀣𑀸 𑀘 𑀅𑀯𑀺𑀤𑀽𑀭𑁂 𑀥𑀼𑀭𑀯𑀺𑀳𑀸𑀭𑁂 𑀯𑀲𑀢𑀺, 𑀳𑀦𑁆𑀤𑀸𑀳𑀁 𑀧𑁂𑀲𑁂𑀢𑁆𑀯𑀸 𑀧𑀼𑀘𑁆𑀙𑀸𑀫𑀺. 𑀲𑀘𑁂 𑀫𑁂 𑀕𑀢𑁂𑀦 𑀓𑁄𑀘𑀺 𑀅𑀢𑁆𑀣𑁄 𑀪𑀯𑀺𑀲𑁆𑀲𑀢𑀺, 𑀲𑀢𑁆𑀣𑀸 𑀢𑀼𑀡𑁆𑀳𑀻 𑀪𑀯𑀺𑀲𑁆𑀲𑀢𑀺. 𑀅𑀦𑀢𑁆𑀣𑁂 𑀧𑀦 𑀲𑀢𑀺 ‘𑀓𑀺𑀁 𑀭𑀜𑁆𑀜𑁄 𑀢𑀢𑁆𑀣 𑀕𑀢𑁂𑀦𑀸’𑀢𑀺 𑀯𑀓𑁆𑀔𑀢𑀻’’𑀢𑀺. 𑀲𑁄 𑀯𑀲𑁆𑀲𑀓𑀸𑀭𑀁 𑀩𑁆𑀭𑀸𑀳𑁆𑀫𑀡𑀁 𑀧𑁂𑀲𑁂𑀲𑀺. 𑀩𑁆𑀭𑀸𑀳𑁆𑀫𑀡𑁄 𑀕𑀦𑁆𑀢𑁆𑀯𑀸 𑀪𑀕𑀯𑀢𑁄 𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋 𑀅𑀣 𑀔𑁄 𑀭𑀸𑀚𑀸…𑀧𑁂… 𑀆𑀧𑀸𑀤𑁂𑀲𑁆𑀲𑀸𑀫𑀺 𑀯𑀚𑁆𑀚𑀻𑀢𑀺.

𑀪𑀕𑀯𑀦𑁆𑀢𑀁 𑀩𑀻𑀚𑀬𑀫𑀸𑀦𑁄𑀢𑀺 𑀣𑁂𑀭𑁄 𑀯𑀢𑁆𑀢𑀲𑀻𑀲𑁂 𑀞𑀢𑁆𑀯𑀸 𑀪𑀕𑀯𑀦𑁆𑀢𑀁 𑀩𑀻𑀚𑀢𑀺, 𑀪𑀕𑀯𑀢𑁄 𑀧𑀦 𑀲𑀻𑀢𑀁 𑀯𑀸 𑀉𑀡𑁆𑀳𑀁 𑀯𑀸 𑀦𑀢𑁆𑀣𑀺. 𑀪𑀕𑀯𑀸 𑀩𑁆𑀭𑀸𑀳𑁆𑀫𑀡𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀢𑁂𑀦 𑀲𑀤𑁆𑀥𑀺𑀁 𑀅𑀫𑀦𑁆𑀢𑁂𑀢𑁆𑀯𑀸 𑀣𑁂𑀭𑁂𑀦 𑀲𑀤𑁆𑀥𑀺𑀁 𑀫𑀦𑁆𑀢𑁂𑀢𑀼𑀓𑀸𑀫𑁄 𑀓𑀺𑀦𑁆𑀢𑀺 𑀢𑁂, 𑀆𑀦𑀦𑁆𑀤, 𑀲𑀼𑀢𑀦𑁆𑀢𑀺𑀆𑀤𑀺𑀫𑀸𑀳. 𑀢𑀁 𑀯𑀼𑀢𑁆𑀢𑀢𑁆𑀣𑀫𑁂𑀯.

𑀏𑀓𑀫𑀺𑀤𑀸𑀳𑀦𑁆𑀢𑀺 𑀇𑀤𑀁 𑀪𑀕𑀯𑀸 𑀧𑀼𑀩𑁆𑀩𑁂 𑀯𑀚𑁆𑀚𑀻𑀦𑀁 𑀇𑀫𑀲𑁆𑀲 𑀯𑀚𑁆𑀚𑀺𑀲𑀢𑁆𑀢𑀓𑀲𑁆𑀲 𑀤𑁂𑀲𑀺𑀢𑀪𑀸𑀯𑀧𑁆𑀧𑀓𑀸𑀲𑀦𑀢𑁆𑀣𑀁 𑀆𑀳. 𑀅𑀓𑀭𑀡𑀻𑀬𑀸𑀢𑀺 𑀅𑀓𑀢𑁆𑀢𑀩𑁆𑀩𑀸, 𑀅𑀕𑁆𑀕𑀳𑁂𑀢𑀩𑁆𑀩𑀸𑀢𑀺 𑀅𑀢𑁆𑀣𑁄. 𑀬𑀤𑀺𑀤𑀦𑁆𑀢𑀺 𑀦𑀺𑀧𑀸𑀢𑀫𑀢𑁆𑀢𑀁. 𑀬𑀼𑀤𑁆𑀥𑀲𑁆𑀲𑀸𑀢𑀺 𑀓𑀭𑀡𑀢𑁆𑀣𑁂 𑀲𑀸𑀫𑀺𑀯𑀘𑀦𑀁, 𑀅𑀪𑀺𑀫𑀼𑀔𑀁 𑀬𑀼𑀤𑁆𑀥𑁂𑀦 𑀕𑀳𑁂𑀢𑀼𑀁 𑀦 𑀲𑀓𑁆𑀓𑀸𑀢𑀺 𑀅𑀢𑁆𑀣𑁄. 𑀅𑀜𑁆𑀜𑀢𑁆𑀭 𑀉𑀧𑀮𑀸𑀧𑀦𑀸𑀬𑀸𑀢𑀺 𑀞𑀧𑁂𑀢𑁆𑀯𑀸 𑀉𑀧𑀮𑀸𑀧𑀦𑀁. 𑀉𑀧𑀮𑀸𑀧𑀦𑀸 𑀦𑀸𑀫 ‘‘𑀅𑀮𑀁 𑀯𑀺𑀯𑀸𑀤𑁂𑀦, 𑀇𑀤𑀸𑀦𑀺 𑀲𑀫𑀕𑁆𑀕𑀸 𑀳𑁄𑀫𑀸’’𑀢𑀺 𑀳𑀢𑁆𑀣𑀺𑀅𑀲𑁆𑀲𑀭𑀣𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀸𑀤𑀻𑀦𑀺 𑀧𑁂𑀲𑁂𑀢𑁆𑀯𑀸 𑀲𑀗𑁆𑀕𑀳𑀓𑀭𑀡𑀁, 𑀏𑀯𑀜𑁆𑀳𑀺 𑀲𑀗𑁆𑀕𑀳𑀁 𑀓𑀢𑁆𑀯𑀸 𑀓𑁂𑀯𑀮𑀁 𑀯𑀺𑀲𑁆𑀲𑀸𑀲𑁂𑀦 𑀲𑀓𑁆𑀓𑀸 𑀕𑀡𑁆𑀳𑀺𑀢𑀼𑀦𑁆𑀢𑀺 𑀅𑀢𑁆𑀣𑁄. 𑀅𑀜𑁆𑀜𑀢𑁆𑀭 𑀫𑀺𑀣𑀼𑀪𑁂𑀤𑀸𑀢𑀺 𑀞𑀧𑁂𑀢𑁆𑀯𑀸 𑀫𑀺𑀣𑀼𑀪𑁂𑀤𑀁. 𑀇𑀫𑀺𑀦𑀸 ‘‘𑀅𑀜𑁆𑀜𑀫𑀜𑁆𑀜𑀪𑁂𑀤𑀁 𑀓𑀢𑁆𑀯𑀸𑀧𑀺 𑀲𑀓𑁆𑀓𑀸 𑀏𑀢𑁂 𑀕𑀳𑁂𑀢𑀼’’𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀇𑀤𑀁 𑀩𑁆𑀭𑀸𑀳𑁆𑀫𑀡𑁄 𑀪𑀕𑀯𑀢𑁄 𑀓𑀣𑀸𑀬 𑀦𑀬𑀁 𑀮𑀪𑀺𑀢𑁆𑀯𑀸 𑀆𑀳. 𑀓𑀺𑀁 𑀧𑀦 𑀪𑀕𑀯𑀸 𑀩𑁆𑀭𑀸𑀳𑁆𑀫𑀡𑀲𑁆𑀲 𑀇𑀫𑀸𑀬 𑀓𑀣𑀸𑀬 𑀦𑀬𑀮𑀸𑀪𑀁 𑀚𑀸𑀦𑀸𑀢𑀻𑀢𑀺? 𑀆𑀫 𑀚𑀸𑀦𑀸𑀢𑀺. 𑀚𑀸𑀦𑀦𑁆𑀢𑁄 𑀓𑀲𑁆𑀫𑀸 𑀓𑀣𑁂𑀲𑀺? 𑀅𑀦𑀼𑀓𑀫𑁆𑀧𑀸𑀬. 𑀏𑀯𑀁 𑀓𑀺𑀭𑀲𑁆𑀲 𑀅𑀳𑁄𑀲𑀺 𑁋 ‘‘𑀫𑀬𑀸 𑀅𑀓𑀣𑀺𑀢𑁂𑀧𑀺 𑀓𑀢𑀺𑀧𑀸𑀳𑁂𑀦 𑀕𑀦𑁆𑀢𑁆𑀯𑀸 𑀲𑀩𑁆𑀩𑁂 𑀕𑀡𑁆𑀳𑀺𑀲𑁆𑀲𑀢𑀺, 𑀓𑀣𑀺𑀢𑁂 𑀧𑀦 𑀲𑀫𑀕𑁆𑀕𑁂 𑀪𑀺𑀦𑁆𑀤𑀦𑁆𑀢𑁄 𑀢𑀻𑀳𑀺 𑀲𑀁𑀯𑀘𑁆𑀙𑀭𑁂𑀳𑀺 𑀕𑀡𑁆𑀳𑀺𑀲𑁆𑀲𑀢𑀺. 𑀏𑀢𑁆𑀢𑀓𑀫𑁆𑀧𑀺 𑀚𑀻𑀯𑀺𑀢𑀫𑁂𑀯 𑀯𑀭𑀁. 𑀏𑀢𑁆𑀢𑀓𑀜𑁆𑀳𑀺 𑀚𑀻𑀯𑀦𑁆𑀢𑀸 𑀅𑀢𑁆𑀢𑀦𑁄 𑀧𑀢𑀺𑀝𑁆𑀞𑀸𑀪𑀽𑀢𑀁 𑀧𑀼𑀜𑁆𑀜𑀁 𑀓𑀭𑀺𑀲𑁆𑀲𑀦𑁆𑀢𑀻’’𑀢𑀺. 𑀅𑀪𑀺𑀦𑀦𑁆𑀤𑀺𑀢𑁆𑀯𑀸𑀢𑀺 𑀘𑀺𑀢𑁆𑀢𑁂𑀦 𑀦𑀦𑁆𑀤𑀺𑀢𑁆𑀯𑀸. 𑀅𑀦𑀼𑀫𑁄𑀤𑀺𑀢𑁆𑀯𑀸𑀢𑀺 ‘‘𑀬𑀸𑀯 𑀲𑀼𑀪𑀸𑀲𑀺𑀢𑀫𑀺𑀤𑀁 𑀪𑁄𑀢𑀸 𑀕𑁄𑀢𑀫𑁂𑀦𑀸’’𑀢𑀺 𑀯𑀸𑀘𑀸𑀬 𑀅𑀦𑀼𑀫𑁄𑀤𑀺𑀢𑁆𑀯𑀸. 𑀧𑀓𑁆𑀓𑀸𑀫𑀻𑀢𑀺 𑀭𑀜𑁆𑀜𑁄 𑀲𑀦𑁆𑀢𑀺𑀓𑀁 𑀕𑀢𑁄. 𑀭𑀸𑀚𑀸𑀧𑀺 𑀢𑀫𑁂𑀯 𑀧𑁂𑀲𑁂𑀢𑁆𑀯𑀸 𑀲𑀩𑁆𑀩𑁂 𑀪𑀺𑀦𑁆𑀤𑀺𑀢𑁆𑀯𑀸 𑀕𑀦𑁆𑀢𑁆𑀯𑀸 𑀅𑀦𑀬𑀩𑁆𑀬𑀲𑀦𑀁 𑀧𑀸𑀧𑁂𑀲𑀺.

𑁩. 𑀧𑀞𑀫𑀲𑀢𑁆𑀢𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁩. 𑀢𑀢𑀺𑀬𑁂 𑀅𑀪𑀺𑀡𑁆𑀳𑀁 𑀲𑀦𑁆𑀦𑀺𑀧𑀸𑀢𑀸𑀢𑀺 𑀇𑀤𑀁 𑀯𑀚𑁆𑀚𑀺𑀲𑀢𑁆𑀢𑀓𑁂 𑀯𑀼𑀢𑁆𑀢𑀲𑀤𑀺𑀲𑀫𑁂𑀯. 𑀇𑀥𑀸𑀧𑀺 𑀘 𑀅𑀪𑀺𑀡𑁆𑀳𑀁 𑀅𑀲𑀦𑁆𑀦𑀺𑀧𑀢𑀦𑁆𑀢𑀸 𑀤𑀺𑀲𑀸𑀲𑀼 𑀆𑀕𑀢𑀲𑀸𑀲𑀦𑀁 𑀦 𑀲𑀼𑀡𑀦𑁆𑀢𑀺, 𑀢𑀢𑁄 ‘‘𑀅𑀲𑀼𑀓𑀯𑀺𑀳𑀸𑀭𑀲𑀻𑀫𑀸 𑀆𑀓𑀼𑀮𑀸, 𑀉𑀧𑁄𑀲𑀣𑀧𑁆𑀧𑀯𑀸𑀭𑀡𑀸 𑀞𑀺𑀢𑀸, 𑀅𑀲𑀼𑀓𑀲𑁆𑀫𑀺𑀁 𑀞𑀸𑀦𑁂 𑀪𑀺𑀓𑁆𑀔𑀽 𑀯𑁂𑀚𑁆𑀚𑀓𑀫𑁆𑀫𑀤𑀽𑀢𑀓𑀫𑁆𑀫𑀸𑀤𑀻𑀦𑀺 𑀓𑀭𑁄𑀦𑁆𑀢𑀺, 𑀯𑀺𑀜𑁆𑀜𑀢𑁆𑀢𑀺𑀩𑀳𑀼𑀮𑀸 𑀨𑀮𑀧𑀼𑀧𑁆𑀨𑀤𑀸𑀦𑀸𑀤𑀻𑀳𑀺 𑀚𑀻𑀯𑀺𑀓𑀁 𑀓𑀧𑁆𑀧𑁂𑀦𑁆𑀢𑀻’’𑀢𑀺𑀆𑀤𑀻𑀦𑀺 𑀦 𑀚𑀸𑀦𑀦𑁆𑀢𑀺. 𑀧𑀸𑀧𑀪𑀺𑀓𑁆𑀔𑀽𑀧𑀺 ‘‘𑀧𑀫𑀢𑁆𑀢𑁄 𑀲𑀗𑁆𑀖𑁄’’𑀢𑀺 𑀜𑀢𑁆𑀯𑀸 𑀭𑀸𑀲𑀺𑀪𑀽𑀢𑀸 𑀲𑀸𑀲𑀦𑀁 𑀑𑀲𑀓𑁆𑀓𑀸𑀧𑁂𑀦𑁆𑀢𑀺. 𑀅𑀪𑀺𑀡𑁆𑀳𑀁 𑀲𑀦𑁆𑀦𑀺𑀧𑀢𑀦𑁆𑀢𑀸 𑀧𑀦 𑀢𑀁 𑀧𑀯𑀢𑁆𑀢𑀺𑀁 𑀲𑀼𑀡𑀦𑁆𑀢𑀺, 𑀢𑀢𑁄 𑀪𑀺𑀓𑁆𑀔𑀼𑀲𑀗𑁆𑀖𑀁 𑀧𑁂𑀲𑁂𑀢𑁆𑀯𑀸 𑀲𑀻𑀫𑀁 𑀉𑀚𑀼𑀁 𑀓𑀸𑀭𑁂𑀦𑁆𑀢𑀺, 𑀉𑀧𑁄𑀲𑀣𑀧𑁆𑀧𑀯𑀸𑀭𑀡𑀸𑀬𑁄 𑀧𑀯𑀢𑁆𑀢𑀸𑀧𑁂𑀦𑁆𑀢𑀺, 𑀫𑀺𑀘𑁆𑀙𑀸𑀚𑀻𑀯𑀸𑀦𑀁 𑀉𑀲𑁆𑀲𑀦𑁆𑀦𑀝𑁆𑀞𑀸𑀦𑁂 𑀅𑀭𑀺𑀬𑀯𑀁𑀲𑀺𑀓𑁂 𑀧𑁂𑀲𑁂𑀢𑁆𑀯𑀸 𑀅𑀭𑀺𑀬𑀯𑀁𑀲𑀁 𑀓𑀣𑀸𑀧𑁂𑀦𑁆𑀢𑀺, 𑀧𑀸𑀧𑀪𑀺𑀓𑁆𑀔𑀽𑀦𑀁 𑀯𑀺𑀦𑀬𑀥𑀭𑁂𑀳𑀺 𑀦𑀺𑀕𑁆𑀕𑀳𑀁 𑀓𑀸𑀭𑀸𑀧𑁂𑀦𑁆𑀢𑀺. 𑀧𑀸𑀧𑀪𑀺𑀓𑁆𑀔𑀽𑀧𑀺 ‘‘𑀅𑀧𑁆𑀧𑀫𑀢𑁆𑀢𑁄 𑀲𑀗𑁆𑀖𑁄, 𑀦 𑀲𑀓𑁆𑀓𑀸 𑀅𑀫𑁆𑀳𑁂𑀳𑀺 𑀯𑀕𑁆𑀕𑀩𑀦𑁆𑀥𑀦𑁂𑀦 𑀯𑀺𑀘𑀭𑀺𑀢𑀼’’𑀦𑁆𑀢𑀺 𑀪𑀺𑀚𑁆𑀚𑀺𑀢𑁆𑀯𑀸 𑀧𑀮𑀸𑀬𑀦𑁆𑀢𑀺. 𑀏𑀯𑀫𑁂𑀢𑁆𑀣 𑀯𑀼𑀤𑁆𑀥𑀺𑀳𑀸𑀦𑀺𑀬𑁄 𑀯𑁂𑀤𑀺𑀢𑀩𑁆𑀩𑀸.

𑀲𑀫𑀕𑁆𑀕𑀸𑀢𑀺𑀆𑀤𑀻𑀲𑀼 𑀘𑁂𑀢𑀺𑀬𑀧𑀝𑀺𑀚𑀕𑁆𑀕𑀦𑀢𑁆𑀣𑀁 𑀯𑀸 𑀩𑁄𑀥𑀺𑀖𑀭𑀉𑀧𑁄𑀲𑀣𑀸𑀕𑀸𑀭𑀘𑁆𑀙𑀸𑀤𑀦𑀢𑁆𑀣𑀁 𑀯𑀸 𑀓𑀢𑀺𑀓𑀯𑀢𑁆𑀢𑀁 𑀯𑀸 𑀞𑀧𑁂𑀢𑀼𑀓𑀸𑀫𑀢𑀸𑀬 ‘‘𑀲𑀗𑁆𑀖𑁄 𑀲𑀦𑁆𑀦𑀺𑀧𑀢𑀢𑀽’’𑀢𑀺 𑀪𑁂𑀭𑀺𑀬𑀸 𑀯𑀸 𑀖𑀡𑁆𑀝𑀺𑀬𑀸 𑀯𑀸 𑀆𑀓𑁄𑀝𑀺𑀢𑀫𑀢𑁆𑀢𑀸𑀬 ‘‘𑀫𑀬𑁆𑀳𑀁 𑀘𑀻𑀯𑀭𑀓𑀫𑁆𑀫𑀁 𑀅𑀢𑁆𑀣𑀺, 𑀫𑀬𑁆𑀳𑀁 𑀧𑀢𑁆𑀢𑁄 𑀧𑀘𑀺𑀢𑀩𑁆𑀩𑁄, 𑀫𑀬𑁆𑀳𑀁 𑀦𑀯𑀓𑀫𑁆𑀫𑀁 𑀅𑀢𑁆𑀣𑀻’’𑀢𑀺 𑀯𑀺𑀓𑁆𑀔𑁂𑀧𑀁 𑀓𑀭𑁄𑀦𑁆𑀢𑀸 𑀦 𑀲𑀫𑀕𑁆𑀕𑀸 𑀲𑀦𑁆𑀦𑀺𑀧𑀢𑀦𑁆𑀢𑀺 𑀦𑀸𑀫. 𑀲𑀩𑁆𑀩𑀁 𑀧𑀦 𑀢𑀁 𑀓𑀫𑁆𑀫𑀁 𑀞𑀧𑁂𑀢𑁆𑀯𑀸 ‘‘𑀅𑀳𑀁 𑀧𑀼𑀭𑀺𑀫𑀢𑀭𑀁, 𑀅𑀳𑀁 𑀧𑀼𑀭𑀺𑀫𑀢𑀭’’𑀦𑁆𑀢𑀺 𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀲𑀦𑁆𑀦𑀺𑀧𑀢𑀦𑁆𑀢𑀸 𑀲𑀫𑀕𑁆𑀕𑀸 𑀲𑀦𑁆𑀦𑀺𑀧𑀢𑀦𑁆𑀢𑀺 𑀦𑀸𑀫. 𑀲𑀦𑁆𑀦𑀺𑀧𑀢𑀺𑀢𑀸 𑀧𑀦 𑀘𑀺𑀦𑁆𑀢𑁂𑀢𑁆𑀯𑀸 𑀫𑀦𑁆𑀢𑁂𑀢𑁆𑀯𑀸 𑀓𑀢𑁆𑀢𑀩𑁆𑀩𑀁 𑀓𑀢𑁆𑀯𑀸 𑀏𑀓𑀢𑁄𑀯 𑀅𑀯𑀼𑀝𑁆𑀞𑀳𑀦𑁆𑀢𑀸 𑀦 𑀲𑀫𑀕𑁆𑀕𑀸 𑀯𑀼𑀝𑁆𑀞𑀳𑀦𑁆𑀢𑀺 𑀦𑀸𑀫. 𑀏𑀯𑀁 𑀯𑀼𑀝𑁆𑀞𑀺𑀢𑁂𑀲𑀼 𑀳𑀺 𑀬𑁂 𑀧𑀞𑀫𑀁 𑀕𑀘𑁆𑀙𑀦𑁆𑀢𑀺, 𑀢𑁂𑀲𑀁 𑀏𑀯𑀁 𑀳𑁄𑀢𑀺 ‘‘𑀅𑀫𑁆𑀳𑁂𑀳𑀺 𑀩𑀸𑀳𑀺𑀭𑀓𑀣𑀸𑀯 𑀲𑀼𑀢𑀸, 𑀇𑀤𑀸𑀦𑀺 𑀯𑀺𑀦𑀺𑀘𑁆𑀙𑀬𑀓𑀣𑀸 𑀪𑀯𑀺𑀲𑁆𑀲𑀢𑀻’’𑀢𑀺. 𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀯𑀼𑀝𑁆𑀞𑀳𑀦𑁆𑀢𑀸 𑀲𑀫𑀕𑁆𑀕𑀸 𑀯𑀼𑀝𑁆𑀞𑀳𑀦𑁆𑀢𑀺 𑀦𑀸𑀫. 𑀅𑀧𑀺𑀘 ‘‘𑀅𑀲𑀼𑀓𑀝𑁆𑀞𑀸𑀦𑁂 𑀯𑀺𑀳𑀸𑀭𑀲𑀻𑀫𑀸 𑀆𑀓𑀼𑀮𑀸, 𑀉𑀧𑁄𑀲𑀣𑀧𑁆𑀧𑀯𑀸𑀭𑀡𑀸 𑀞𑀺𑀢𑀸, 𑀅𑀲𑀼𑀓𑀝𑁆𑀞𑀸𑀦𑁂 𑀯𑁂𑀚𑁆𑀚𑀓𑀫𑁆𑀫𑀸𑀤𑀺𑀓𑀸𑀭𑀓𑀸 𑀧𑀸𑀧𑀪𑀺𑀓𑁆𑀔𑀽 𑀉𑀲𑁆𑀲𑀦𑁆𑀦𑀸’’𑀢𑀺 𑀲𑀼𑀢𑁆𑀯𑀸 ‘‘𑀓𑁄 𑀕𑀦𑁆𑀢𑁆𑀯𑀸 𑀢𑁂𑀲𑀁 𑀦𑀺𑀕𑁆𑀕𑀳𑀁 𑀓𑀭𑀺𑀲𑁆𑀲𑀢𑀻’’𑀢𑀺 𑀯𑀼𑀢𑁆𑀢𑁂 ‘‘𑀅𑀳𑀁 𑀧𑀞𑀫𑀁, 𑀅𑀳𑀁 𑀧𑀞𑀫’’𑀦𑁆𑀢𑀺 𑀯𑀢𑁆𑀯𑀸 𑀕𑀘𑁆𑀙𑀦𑁆𑀢𑀸𑀧𑀺 𑀲𑀫𑀕𑁆𑀕𑀸 𑀯𑀼𑀝𑁆𑀞𑀳𑀦𑁆𑀢𑀺 𑀦𑀸𑀫.

𑀆𑀕𑀦𑁆𑀢𑀼𑀓𑀁 𑀧𑀦 𑀤𑀺𑀲𑁆𑀯𑀸 ‘‘𑀇𑀫𑀁 𑀧𑀭𑀺𑀯𑁂𑀡𑀁 𑀬𑀸𑀳𑀺, 𑀏𑀢𑀁 𑀧𑀭𑀺𑀯𑁂𑀡𑀁 𑀬𑀸𑀳𑀺, 𑀅𑀬𑀁 𑀓𑁄’’𑀢𑀺 𑀅𑀯𑀢𑁆𑀯𑀸 𑀲𑀩𑁆𑀩𑁂 𑀯𑀢𑁆𑀢𑀁 𑀓𑀭𑁄𑀦𑁆𑀢𑀸𑀧𑀺, 𑀚𑀺𑀡𑁆𑀡𑀧𑀢𑁆𑀢𑀘𑀻𑀯𑀭𑀓𑀁 𑀤𑀺𑀲𑁆𑀯𑀸 𑀢𑀲𑁆𑀲 𑀪𑀺𑀓𑁆𑀔𑀸𑀘𑀸𑀭𑀯𑀢𑁆𑀢𑁂𑀦 𑀧𑀢𑁆𑀢𑀘𑀻𑀯𑀭𑀁 𑀧𑀭𑀺𑀬𑁂𑀲𑀦𑁆𑀢𑀸𑀧𑀺, 𑀕𑀺𑀮𑀸𑀦𑀲𑁆𑀲 𑀕𑀺𑀮𑀸𑀦𑀪𑁂𑀲𑀚𑁆𑀚𑀁 𑀧𑀭𑀺𑀬𑁂𑀲𑀫𑀸𑀦𑀸𑀧𑀺, 𑀕𑀺𑀮𑀸𑀦𑀫𑁂𑀯 𑀅𑀦𑀸𑀣𑀁 ‘‘𑀅𑀲𑀼𑀓𑀧𑀭𑀺𑀯𑁂𑀡𑀁 𑀬𑀸𑀳𑀻’’𑀢𑀺 𑀅𑀯𑀢𑁆𑀯𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀧𑀭𑀺𑀯𑁂𑀡𑁂 𑀧𑀝𑀺𑀚𑀕𑁆𑀕𑀦𑁆𑀢𑀸𑀧𑀺, 𑀏𑀓𑁄 𑀑𑀮𑀻𑀬𑀫𑀸𑀦𑀓𑁄 𑀕𑀦𑁆𑀣𑁄 𑀳𑁄𑀢𑀺, 𑀧𑀜𑁆𑀜𑀯𑀦𑁆𑀢𑀁 𑀪𑀺𑀓𑁆𑀔𑀼𑀁 𑀲𑀗𑁆𑀕𑀡𑁆𑀳𑀺𑀢𑁆𑀯𑀸 𑀢𑁂𑀦 𑀢𑀁 𑀕𑀦𑁆𑀣𑀁 𑀉𑀓𑁆𑀔𑀺𑀧𑀸𑀧𑁂𑀦𑁆𑀢𑀸𑀧𑀺 𑀲𑀫𑀕𑁆𑀕𑀸 𑀲𑀗𑁆𑀖𑀓𑀭𑀡𑀻𑀬𑀸𑀦𑀺 𑀓𑀭𑁄𑀦𑁆𑀢𑀺 𑀦𑀸𑀫.

𑀅𑀧𑁆𑀧𑀜𑁆𑀜𑀢𑁆𑀢𑀦𑁆𑀢𑀺𑀆𑀤𑀻𑀲𑀼 𑀦𑀯𑀁 𑀅𑀥𑀫𑁆𑀫𑀺𑀓𑀁 𑀓𑀢𑀺𑀓𑀯𑀢𑁆𑀢𑀁 𑀯𑀸 𑀲𑀺𑀓𑁆𑀔𑀸𑀧𑀤𑀁 𑀯𑀸 𑀕𑀡𑁆𑀳𑀦𑁆𑀢𑀸 𑀅𑀧𑁆𑀧𑀜𑁆𑀜𑀢𑁆𑀢𑀁 𑀧𑀜𑁆𑀜𑀸𑀧𑁂𑀦𑁆𑀢𑀺 𑀦𑀸𑀫 𑀧𑀼𑀭𑀸𑀡𑀲𑀦𑁆𑀣𑀢𑀯𑀢𑁆𑀣𑀼𑀲𑁆𑀫𑀺𑀁 𑀲𑀸𑀯𑀢𑁆𑀣𑀺𑀬𑀁 𑀪𑀺𑀓𑁆𑀔𑀽 𑀯𑀺𑀬. 𑀉𑀤𑁆𑀥𑀫𑁆𑀫𑀁 𑀉𑀩𑁆𑀩𑀺𑀦𑀬𑀁 𑀲𑀸𑀲𑀦𑀁 𑀤𑀻𑀧𑁂𑀦𑁆𑀢𑀸 𑀧𑀜𑁆𑀜𑀢𑁆𑀢𑀁 𑀲𑀫𑀼𑀘𑁆𑀙𑀺𑀦𑁆𑀤𑀦𑁆𑀢𑀺 𑀦𑀸𑀫, 𑀯𑀲𑁆𑀲𑀲𑀢𑀧𑀭𑀺𑀦𑀺𑀩𑁆𑀩𑀼𑀢𑁂 𑀪𑀕𑀯𑀢𑀺 𑀯𑁂𑀲𑀸𑀮𑀺𑀓𑀸 𑀯𑀚𑁆𑀚𑀺𑀧𑀼𑀢𑁆𑀢𑀓𑀸 𑀯𑀺𑀬. 𑀔𑀼𑀤𑁆𑀤𑀸𑀦𑀼𑀔𑀼𑀤𑁆𑀤𑀓𑀸 𑀧𑀦 𑀆𑀧𑀢𑁆𑀢𑀺𑀬𑁄 𑀲𑀜𑁆𑀘𑀺𑀘𑁆𑀘 𑀯𑀻𑀢𑀺𑀓𑁆𑀓𑀫𑀦𑁆𑀢𑀸 𑀬𑀣𑀸𑀧𑀜𑁆𑀜𑀢𑁆𑀢𑁂𑀲𑀼 𑀲𑀺𑀓𑁆𑀔𑀸𑀧𑀤𑁂𑀲𑀼 𑀲𑀫𑀸𑀤𑀸𑀬 𑀦 𑀯𑀢𑁆𑀢𑀦𑁆𑀢𑀺 𑀦𑀸𑀫 𑀅𑀲𑁆𑀲𑀚𑀺𑀧𑀼𑀦𑀩𑁆𑀩𑀲𑀼𑀓𑀸 𑀯𑀺𑀬. 𑀢𑀣𑀸 𑀅𑀓𑀭𑁄𑀦𑁆𑀢𑀸 𑀧𑀦 𑀅𑀧𑀜𑁆𑀜𑀢𑁆𑀢𑀁 𑀦 𑀧𑀜𑁆𑀜𑀸𑀧𑁂𑀦𑁆𑀢𑀺, 𑀧𑀜𑁆𑀜𑀢𑁆𑀢𑀁 𑀦 𑀲𑀫𑀼𑀘𑁆𑀙𑀺𑀦𑁆𑀤𑀦𑁆𑀢𑀺, 𑀬𑀣𑀸𑀧𑀜𑁆𑀜𑀢𑁆𑀢𑁂𑀲𑀼 𑀲𑀺𑀓𑁆𑀔𑀸𑀧𑀤𑁂𑀲𑀼 𑀲𑀫𑀸𑀤𑀸𑀬 𑀯𑀢𑁆𑀢𑀦𑁆𑀢𑀺 𑀦𑀸𑀫 𑀆𑀬𑀲𑁆𑀫𑀸 𑀉𑀧𑀲𑁂𑀦𑁄 𑀯𑀺𑀬, 𑀆𑀬𑀲𑁆𑀫𑀸 𑀬𑀲𑁄 𑀓𑀸𑀓𑀡𑁆𑀟𑀓𑀧𑀼𑀢𑁆𑀢𑁄 𑀯𑀺𑀬, 𑀆𑀬𑀲𑁆𑀫𑀸 𑀫𑀳𑀸𑀓𑀲𑁆𑀲𑀧𑁄 𑀯𑀺𑀬 𑀘. 𑀯𑀼𑀤𑁆𑀥𑀺𑀬𑁂𑀯𑀸𑀢𑀺 𑀲𑀻𑀮𑀸𑀤𑀺𑀕𑀼𑀡𑁂𑀳𑀺 𑀯𑀼𑀤𑁆𑀥𑀺𑀬𑁂𑀯, 𑀦𑁄 𑀧𑀭𑀺𑀳𑀸𑀦𑀺.

𑀣𑁂𑀭𑀸𑀢𑀺 𑀣𑀺𑀭𑀪𑀸𑀯𑀧𑁆𑀧𑀢𑁆𑀢𑀸 𑀣𑁂𑀭𑀓𑀸𑀭𑀓𑁂𑀳𑀺 𑀕𑀼𑀡𑁂𑀳𑀺 𑀲𑀫𑀦𑁆𑀦𑀸𑀕𑀢𑀸. 𑀩𑀳𑀽 𑀭𑀢𑁆𑀢𑀺𑀬𑁄 𑀚𑀸𑀦𑀦𑁆𑀢𑀻𑀢𑀺 𑀭𑀢𑁆𑀢𑀜𑁆𑀜𑀽. 𑀘𑀺𑀭𑀁 𑀧𑀩𑁆𑀩𑀚𑀺𑀢𑀸𑀦𑀁 𑀏𑀢𑁂𑀲𑀦𑁆𑀢𑀺 𑀘𑀺𑀭𑀧𑀩𑁆𑀩𑀚𑀺𑀢𑀸. 𑀲𑀗𑁆𑀖𑀲𑁆𑀲 𑀧𑀺𑀢𑀺𑀝𑁆𑀞𑀸𑀦𑁂 𑀞𑀺𑀢𑀸𑀢𑀺 𑀲𑀗𑁆𑀖𑀧𑀺𑀢𑀭𑁄. 𑀧𑀺𑀢𑀺𑀝𑁆𑀞𑀸𑀦𑁂 𑀞𑀺𑀢𑀢𑁆𑀢𑀸 𑀲𑀗𑁆𑀖𑀁 𑀧𑀭𑀺𑀡𑁂𑀦𑁆𑀢𑀺, 𑀧𑀼𑀩𑁆𑀩𑀗𑁆𑀕𑀫𑀸 𑀳𑀼𑀢𑁆𑀯𑀸 𑀢𑀻𑀲𑀼 𑀲𑀺𑀓𑁆𑀔𑀸𑀲𑀼 𑀧𑀯𑀢𑁆𑀢𑁂𑀦𑁆𑀢𑀻𑀢𑀺 𑀲𑀗𑁆𑀖𑀧𑀭𑀺𑀡𑀸𑀬𑀓𑀸.

𑀬𑁂 𑀢𑁂𑀲𑀁 𑀲𑀓𑁆𑀓𑀸𑀭𑀸𑀤𑀻𑀦𑀺 𑀦 𑀓𑀭𑁄𑀦𑁆𑀢𑀺, 𑀑𑀯𑀸𑀤𑀢𑁆𑀣𑀸𑀬 𑀤𑁆𑀯𑁂 𑀢𑀬𑁄 𑀯𑀸𑀭𑁂 𑀉𑀧𑀝𑁆𑀞𑀸𑀦𑀁 𑀦 𑀕𑀘𑁆𑀙𑀦𑁆𑀢𑀺, 𑀢𑁂𑀧𑀺 𑀢𑁂𑀲𑀁 𑀑𑀯𑀸𑀤𑀁 𑀦 𑀤𑁂𑀦𑁆𑀢𑀺, 𑀧𑀯𑁂𑀡𑀺𑀓𑀣𑀁 𑀦 𑀓𑀣𑁂𑀦𑁆𑀢𑀺, 𑀲𑀸𑀭𑀪𑀽𑀢𑀁 𑀥𑀫𑁆𑀫𑀧𑀭𑀺𑀬𑀸𑀬𑀁 𑀦 𑀲𑀺𑀓𑁆𑀔𑀸𑀧𑁂𑀦𑁆𑀢𑀺. 𑀢𑁂 𑀢𑁂𑀳𑀺 𑀯𑀺𑀲𑁆𑀲𑀝𑁆𑀞𑀸 𑀲𑀻𑀮𑀸𑀤𑀻𑀳𑀺 𑀥𑀫𑁆𑀫𑀓𑁆𑀔𑀦𑁆𑀥𑁂𑀳𑀺 𑀲𑀢𑁆𑀢𑀳𑀺 𑀘 𑀅𑀭𑀺𑀬𑀥𑀦𑁂𑀳𑀻𑀢𑀺 𑀏𑀯𑀫𑀸𑀤𑀻𑀳𑀺 𑀕𑀼𑀡𑁂𑀳𑀺 𑀧𑀭𑀺𑀳𑀸𑀬𑀦𑁆𑀢𑀺. 𑀬𑁂 𑀧𑀦 𑀢𑁂𑀲𑀁 𑀲𑀓𑁆𑀓𑀸𑀭𑀸𑀤𑀻𑀦𑀺 𑀓𑀭𑁄𑀦𑁆𑀢𑀺, 𑀉𑀧𑀝𑁆𑀞𑀸𑀦𑀁 𑀕𑀘𑁆𑀙𑀦𑁆𑀢𑀺, 𑀢𑁂𑀲𑀁 𑀢𑁂 ‘‘𑀏𑀯𑀁 𑀢𑁂 𑀅𑀪𑀺𑀓𑁆𑀓𑀫𑀺𑀢𑀩𑁆𑀩’’𑀦𑁆𑀢𑀺𑀆𑀤𑀺𑀓𑀁 𑀑𑀯𑀸𑀤𑀁 𑀤𑁂𑀦𑁆𑀢𑀺, 𑀧𑀯𑁂𑀡𑀺𑀓𑀣𑀁 𑀓𑀣𑁂𑀦𑁆𑀢𑀺, 𑀲𑀸𑀭𑀪𑀽𑀢𑀁 𑀥𑀫𑁆𑀫𑀧𑀭𑀺𑀬𑀸𑀬𑀁 𑀲𑀺𑀓𑁆𑀔𑀸𑀧𑁂𑀦𑁆𑀢𑀺, 𑀢𑁂𑀭𑀲𑀳𑀺 𑀥𑀼𑀢𑀗𑁆𑀕𑁂𑀳𑀺 𑀤𑀲𑀳𑀺 𑀓𑀣𑀸𑀯𑀢𑁆𑀣𑀽𑀳𑀺 𑀅𑀦𑀼𑀲𑀸𑀲𑀦𑁆𑀢𑀺. 𑀢𑁂 𑀢𑁂𑀲𑀁 𑀑𑀯𑀸𑀤𑁂 𑀞𑀢𑁆𑀯𑀸 𑀲𑀻𑀮𑀸𑀤𑀻𑀳𑀺 𑀕𑀼𑀡𑁂𑀳𑀺 𑀯𑀟𑁆𑀠𑀫𑀸𑀦𑀸 𑀲𑀸𑀫𑀜𑁆𑀜𑀢𑁆𑀣𑀁 𑀅𑀦𑀼𑀧𑀸𑀧𑀼𑀡𑀦𑁆𑀢𑀺. 𑀏𑀯𑀫𑁂𑀢𑁆𑀣 𑀳𑀸𑀦𑀺𑀯𑀼𑀤𑁆𑀥𑀺𑀬𑁄 𑀤𑀝𑁆𑀞𑀩𑁆𑀩𑀸.

𑀧𑀼𑀦𑀩𑁆𑀪𑀯𑁄 𑀲𑀻𑀮𑀫𑀲𑁆𑀲𑀸𑀢𑀺 𑀧𑁄𑀦𑁄𑀩𑁆𑀪𑀯𑀺𑀓𑀸, 𑀧𑀼𑀦𑀩𑁆𑀪𑀯𑀤𑀸𑀬𑀺𑀓𑀸𑀢𑀺 𑀅𑀢𑁆𑀣𑁄, 𑀢𑀲𑁆𑀲𑀸 𑀧𑁄𑀦𑁄𑀩𑁆𑀪𑀯𑀺𑀓𑀸𑀬. 𑀦 𑀯𑀲𑀁 𑀕𑀘𑁆𑀙𑀺𑀲𑁆𑀲𑀦𑁆𑀢𑀻𑀢𑀺 𑀏𑀢𑁆𑀣 𑀬𑁂 𑀘𑀢𑀼𑀦𑁆𑀦𑀁 𑀧𑀘𑁆𑀘𑀬𑀸𑀦𑀁 𑀓𑀸𑀭𑀡𑀸 𑀉𑀧𑀝𑁆𑀞𑀸𑀓𑀸𑀦𑀁 𑀧𑀤𑀸𑀦𑀼𑀧𑀤𑀺𑀓𑀸 𑀳𑀼𑀢𑁆𑀯𑀸 𑀕𑀸𑀫𑀢𑁄 𑀕𑀸𑀫𑀁 𑀯𑀺𑀘𑀭𑀦𑁆𑀢𑀺, 𑀢𑁂 𑀢𑀲𑁆𑀲𑀸 𑀯𑀲𑀁 𑀕𑀘𑁆𑀙𑀦𑁆𑀢𑀺 𑀦𑀸𑀫. 𑀇𑀢𑀭𑁂 𑀦 𑀕𑀘𑁆𑀙𑀦𑁆𑀢𑀺. 𑀢𑀢𑁆𑀣 𑀳𑀸𑀦𑀺𑀯𑀼𑀤𑁆𑀥𑀺𑀬𑁄 𑀧𑀸𑀓𑀝𑀸𑀬𑁂𑀯.

𑀆𑀭𑀜𑁆𑀜𑀓𑁂𑀲𑀽𑀢𑀺 𑀧𑀜𑁆𑀘𑀥𑀦𑀼𑀲𑀢𑀺𑀓𑀧𑀘𑁆𑀙𑀺𑀫𑁂𑀲𑀼. 𑀲𑀸𑀧𑁂𑀓𑁆𑀔𑀸𑀢𑀺 𑀲𑀸𑀮𑀬𑀸. 𑀕𑀸𑀫𑀦𑁆𑀢𑀲𑁂𑀦𑀸𑀲𑀦𑁂𑀲𑀼 𑀳𑀺 𑀛𑀸𑀦𑀁 𑀅𑀧𑁆𑀧𑁂𑀢𑁆𑀯𑀸𑀧𑀺 𑀢𑀢𑁄 𑀯𑀼𑀝𑁆𑀞𑀺𑀢𑀫𑀢𑁆𑀢𑁄𑀯 𑀇𑀢𑁆𑀣𑀺𑀧𑀼𑀭𑀺𑀲𑀤𑀸𑀭𑀓𑀤𑀸𑀭𑀺𑀓𑀸𑀤𑀺𑀲𑀤𑁆𑀤𑀁 𑀲𑀼𑀡𑀸𑀢𑀺, 𑀬𑁂𑀦𑀲𑁆𑀲 𑀅𑀥𑀺𑀕𑀢𑀯𑀺𑀲𑁂𑀲𑁄𑀧𑀺 𑀳𑀸𑀬𑀢𑀺𑀬𑁂𑀯. 𑀅𑀭𑀜𑁆𑀜𑀲𑁂𑀦𑀸𑀲𑀦𑁂 𑀦𑀺𑀤𑁆𑀤𑀸𑀬𑀺𑀢𑁆𑀯𑀸𑀧𑀺 𑀧𑀩𑀼𑀤𑁆𑀥𑀫𑀢𑁆𑀢𑁄 𑀲𑀻𑀳𑀩𑁆𑀬𑀕𑁆𑀖𑀫𑁄𑀭𑀸𑀤𑀻𑀦𑀁 𑀲𑀤𑁆𑀤𑀁 𑀲𑀼𑀡𑀸𑀢𑀺, 𑀬𑁂𑀦 𑀅𑀭𑀜𑁆𑀜𑁂 𑀧𑀻𑀢𑀺𑀁 𑀧𑀝𑀺𑀮𑀪𑀺𑀢𑁆𑀯𑀸 𑀢𑀫𑁂𑀯 𑀲𑀫𑁆𑀫𑀲𑀦𑁆𑀢𑁄 𑀅𑀕𑁆𑀕𑀨𑀮𑁂 𑀧𑀢𑀺𑀝𑁆𑀞𑀸𑀢𑀺. 𑀇𑀢𑀺 𑀪𑀕𑀯𑀸 𑀕𑀸𑀫𑀦𑁆𑀢𑀲𑁂𑀦𑀸𑀲𑀦𑁂 𑀛𑀸𑀦𑀁 𑀅𑀧𑁆𑀧𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑀪𑀺𑀓𑁆𑀔𑀼𑀢𑁄 𑀅𑀭𑀜𑁆𑀜𑁂 𑀦𑀺𑀤𑁆𑀤𑀸𑀬𑀫𑀸𑀦𑀫𑁂𑀯 𑀧𑀲𑀁𑀲𑀢𑀺. 𑀢𑀲𑁆𑀫𑀸 𑀢𑀫𑁂𑀯 𑀅𑀢𑁆𑀣𑀯𑀲𑀁 𑀧𑀝𑀺𑀘𑁆𑀘 ‘‘𑀆𑀭𑀜𑁆𑀜𑀓𑁂𑀲𑀼 𑀲𑁂𑀦𑀸𑀲𑀦𑁂𑀲𑀼 𑀲𑀸𑀧𑁂𑀓𑁆𑀔𑀸 𑀪𑀯𑀺𑀲𑁆𑀲𑀦𑁆𑀢𑀻’’𑀢𑀺 𑀆𑀳.

𑀧𑀘𑁆𑀘𑀢𑁆𑀢𑀜𑁆𑀜𑁂𑀯 𑀲𑀢𑀺𑀁 𑀉𑀧𑀝𑁆𑀞𑀸𑀧𑁂𑀲𑁆𑀲𑀦𑁆𑀢𑀻𑀢𑀺 𑀅𑀢𑁆𑀢𑀦𑀸𑀯 𑀅𑀢𑁆𑀢𑀦𑁄 𑀅𑀩𑁆𑀪𑀦𑁆𑀢𑀭𑁂 𑀲𑀢𑀺𑀁 𑀉𑀧𑀝𑁆𑀞𑀧𑁂𑀲𑁆𑀲𑀦𑁆𑀢𑀺. 𑀧𑁂𑀲𑀮𑀸𑀢𑀺 𑀧𑀺𑀬𑀲𑀻𑀮𑀸. 𑀇𑀥𑀸𑀧𑀺 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁 𑀆𑀕𑀫𑀦𑀁 𑀅𑀦𑀺𑀘𑁆𑀙𑀦𑁆𑀢𑀸 𑀦𑁂𑀯𑀸𑀲𑀺𑀓𑀸 𑀅𑀲𑁆𑀲𑀤𑁆𑀥𑀸 𑀳𑁄𑀦𑁆𑀢𑀺 𑀅𑀧𑁆𑀧𑀲𑀦𑁆𑀦𑀸, 𑀯𑀺𑀳𑀸𑀭𑀁 𑀲𑀫𑁆𑀧𑀢𑁆𑀢𑀪𑀺𑀓𑁆𑀔𑀽𑀦𑀁 𑀧𑀘𑁆𑀘𑀼𑀕𑁆𑀕𑀫𑀦-𑀧𑀢𑁆𑀢𑀘𑀻𑀯𑀭𑀧𑀝𑀺𑀕𑁆𑀕𑀳𑀡-𑀆𑀲𑀦𑀧𑀜𑁆𑀜𑀸𑀧𑀦𑀢𑀸𑀮𑀯𑀡𑁆𑀝𑀕𑁆𑀕𑀳𑀡𑀸𑀤𑀻𑀦𑀺 𑀦 𑀓𑀭𑁄𑀦𑁆𑀢𑀺. 𑀅𑀣 𑀦𑁂𑀲𑀁 𑀅𑀯𑀡𑁆𑀡𑁄 𑀉𑀕𑁆𑀕𑀘𑁆𑀙𑀢𑀺 ‘‘𑀅𑀲𑀼𑀓𑀯𑀺𑀳𑀸𑀭𑀯𑀸𑀲𑀺𑀦𑁄 𑀪𑀺𑀓𑁆𑀔𑀽 𑀅𑀲𑁆𑀲𑀤𑁆𑀥𑀸 𑀅𑀧𑁆𑀧𑀲𑀦𑁆𑀦𑀸 𑀯𑀺𑀳𑀸𑀭𑀁 𑀧𑀯𑀺𑀝𑁆𑀞𑀸𑀦𑀁 𑀯𑀢𑁆𑀢𑀧𑁆𑀧𑀝𑀺𑀯𑀢𑁆𑀢𑀫𑁆𑀧𑀺 𑀦 𑀓𑀭𑁄𑀦𑁆𑀢𑀻’’𑀢𑀺. 𑀢𑀁 𑀲𑀼𑀢𑁆𑀯𑀸 𑀧𑀩𑁆𑀩𑀚𑀺𑀢𑀸 𑀯𑀺𑀳𑀸𑀭𑀤𑁆𑀯𑀸𑀭𑁂𑀦 𑀕𑀘𑁆𑀙𑀦𑁆𑀢𑀸𑀧𑀺 𑀯𑀺𑀳𑀸𑀭𑀁 𑀦 𑀧𑀯𑀺𑀲𑀦𑁆𑀢𑀺. 𑀏𑀯𑀁 𑀅𑀦𑀸𑀕𑀢𑀸𑀦𑀁 𑀅𑀦𑀸𑀕𑀫𑀦𑀫𑁂𑀯 𑀳𑁄𑀢𑀺. 𑀆𑀕𑀢𑀸𑀦𑀁 𑀧𑀦 𑀨𑀸𑀲𑀼𑀯𑀺𑀳𑀸𑀭𑁂 𑀅𑀲𑀢𑀺 𑀬𑁂𑀧𑀺 𑀅𑀚𑀸𑀦𑀺𑀢𑁆𑀯𑀸 𑀆𑀕𑀢𑀸, 𑀢𑁂 ‘‘𑀯𑀲𑀺𑀲𑁆𑀲𑀸𑀫𑀸𑀢𑀺 𑀢𑀸𑀯𑀘𑀺𑀦𑁆𑀢𑁂𑀢𑁆𑀯𑀸 𑀆𑀕𑀢𑀫𑁆𑀳𑀸, 𑀇𑀫𑁂𑀲𑀁 𑀧𑀦 𑀦𑁂𑀯𑀸𑀲𑀺𑀓𑀸𑀦𑀁 𑀇𑀫𑀺𑀦𑀸 𑀦𑀻𑀳𑀸𑀭𑁂𑀦 𑀓𑁄 𑀯𑀲𑀺𑀲𑁆𑀲𑀢𑀻’’𑀢𑀺 𑀦𑀺𑀓𑁆𑀔𑀫𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑀺. 𑀏𑀯𑀁 𑀲𑁄 𑀯𑀺𑀳𑀸𑀭𑁄 𑀅𑀜𑁆𑀜𑁂𑀲𑀁 𑀪𑀺𑀓𑁆𑀔𑀽𑀦𑀁 𑀅𑀦𑀸𑀯𑀸𑀲𑁄𑀯 𑀳𑁄𑀢𑀺. 𑀢𑀢𑁄 𑀦𑁂𑀯𑀸𑀲𑀺𑀓𑀸 𑀲𑀻𑀮𑀯𑀦𑁆𑀢𑀸𑀦𑀁 𑀤𑀲𑁆𑀲𑀦𑀁 𑀅𑀮𑀪𑀦𑁆𑀢𑀸 𑀓𑀗𑁆𑀔𑀸𑀯𑀺𑀦𑁄𑀤𑀓𑀁 𑀯𑀸 𑀆𑀘𑀸𑀭𑀲𑀺𑀓𑁆𑀔𑀸𑀧𑀓𑀁 𑀯𑀸 𑀫𑀥𑀼𑀭𑀥𑀫𑁆𑀫𑀲𑀯𑀦𑀁 𑀯𑀸 𑀦 𑀮𑀪𑀦𑁆𑀢𑀺. 𑀢𑁂𑀲𑀁 𑀦𑁂𑀯 𑀅𑀕𑁆𑀕𑀳𑀺𑀢𑀥𑀫𑁆𑀫𑀕𑁆𑀕𑀳𑀡𑀁 𑀦 𑀕𑀳𑀺𑀢𑀲𑀚𑁆𑀛𑀸𑀬𑀓𑀭𑀡𑀁 𑀳𑁄𑀢𑀺. 𑀇𑀢𑀺 𑀦𑁂𑀲𑀁 𑀳𑀸𑀦𑀺𑀬𑁂𑀯 𑀳𑁄𑀢𑀺, 𑀦 𑀯𑀼𑀤𑁆𑀥𑀺.

𑀬𑁂 𑀧𑀦 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁 𑀆𑀕𑀫𑀦𑀁 𑀇𑀘𑁆𑀙𑀦𑁆𑀢𑀺, 𑀢𑁂 𑀲𑀤𑁆𑀥𑀸 𑀳𑁄𑀦𑁆𑀢𑀺 𑀧𑀲𑀦𑁆𑀦𑀸, 𑀆𑀕𑀢𑀸𑀦𑀁 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁 𑀧𑀘𑁆𑀘𑀼𑀕𑁆𑀕𑀫𑀦𑀸𑀤𑀻𑀦𑀺 𑀓𑀢𑁆𑀯𑀸 𑀲𑁂𑀦𑀸𑀲𑀦𑀁 𑀧𑀜𑁆𑀜𑀧𑁂𑀢𑁆𑀯𑀸 𑀤𑁂𑀦𑁆𑀢𑀺, 𑀢𑁂 𑀕𑀳𑁂𑀢𑁆𑀯𑀸 𑀪𑀺𑀓𑁆𑀔𑀸𑀘𑀸𑀭𑀁 𑀧𑀯𑀺𑀲𑀦𑁆𑀢𑀺, 𑀓𑀗𑁆𑀔𑀁 𑀯𑀺𑀦𑁄𑀤𑁂𑀦𑁆𑀢𑀺, 𑀫𑀥𑀼𑀭𑀥𑀫𑁆𑀫𑀲𑁆𑀲𑀯𑀦𑀁 𑀮𑀪𑀦𑁆𑀢𑀺. 𑀅𑀣 𑀦𑁂𑀲𑀁 𑀓𑀺𑀢𑁆𑀢𑀺𑀲𑀤𑁆𑀤𑁄 𑀉𑀕𑁆𑀕𑀘𑁆𑀙𑀢𑀺 ‘‘𑀅𑀲𑀼𑀓𑀯𑀺𑀳𑀸𑀭𑁂 𑀪𑀺𑀓𑁆𑀔𑀽 𑀏𑀯𑀁 𑀲𑀤𑁆𑀥𑀸 𑀧𑀲𑀦𑁆𑀦𑀸 𑀯𑀢𑁆𑀢𑀲𑀫𑁆𑀧𑀦𑁆𑀦𑀸 𑀲𑀗𑁆𑀕𑀸𑀳𑀓𑀸’’𑀢𑀺. 𑀢𑀁 𑀲𑀼𑀢𑁆𑀯𑀸 𑀪𑀺𑀓𑁆𑀔𑀽 𑀤𑀽𑀭𑀢𑁄𑀧𑀺 𑀆𑀕𑀘𑁆𑀙𑀦𑁆𑀢𑀺. 𑀢𑁂𑀲𑀁 𑀦𑁂𑀯𑀸𑀲𑀺𑀓𑀸 𑀯𑀢𑁆𑀢𑀁 𑀓𑀭𑁄𑀦𑁆𑀢𑀺, 𑀲𑀫𑀻𑀧𑀁 𑀕𑀦𑁆𑀢𑁆𑀯𑀸 𑀯𑀼𑀟𑁆𑀠𑀢𑀭𑀁 𑀆𑀕𑀦𑁆𑀢𑀼𑀓𑀁 𑀯𑀦𑁆𑀤𑀺𑀢𑁆𑀯𑀸 𑀦𑀺𑀲𑀻𑀤𑀦𑁆𑀢𑀺, 𑀦𑀯𑀓𑀢𑀭𑀲𑁆𑀲 𑀲𑀦𑁆𑀢𑀺𑀓𑁂 𑀆𑀲𑀦𑀁 𑀕𑀳𑁂𑀢𑁆𑀯𑀸 𑀦𑀺𑀲𑀻𑀤𑀺𑀢𑁆𑀯𑀸 ‘‘𑀇𑀫𑀲𑁆𑀫𑀺𑀁 𑀯𑀺𑀳𑀸𑀭𑁂 𑀯𑀲𑀺𑀲𑁆𑀲𑀣, 𑀕𑀫𑀺𑀲𑁆𑀲𑀣𑀸’’𑀢𑀺 𑀧𑀼𑀘𑁆𑀙𑀦𑁆𑀢𑀺. ‘‘𑀕𑀫𑀺𑀲𑁆𑀲𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀲𑀧𑁆𑀧𑀸𑀬𑀁 𑀲𑁂𑀦𑀸𑀲𑀦𑀁, 𑀲𑀼𑀮𑀪𑀸 𑀪𑀺𑀓𑁆𑀔𑀸’’𑀢𑀺𑀆𑀤𑀻𑀦𑀺 𑀯𑀢𑁆𑀯𑀸 𑀕𑀦𑁆𑀢𑀼𑀁 𑀦 𑀤𑁂𑀦𑁆𑀢𑀺. 𑀯𑀺𑀦𑀬𑀥𑀭𑁄 𑀘𑁂 𑀳𑁄𑀢𑀺, 𑀢𑀲𑁆𑀲 𑀲𑀦𑁆𑀢𑀺𑀓𑁂 𑀯𑀺𑀦𑀬𑀁 𑀲𑀚𑁆𑀛𑀸𑀬𑀦𑁆𑀢𑀺. 𑀲𑀼𑀢𑁆𑀢𑀦𑁆𑀢𑀸𑀤𑀺𑀥𑀭𑁄 𑀘𑁂, 𑀢𑀲𑁆𑀲 𑀲𑀦𑁆𑀢𑀺𑀓𑁂 𑀢𑀁 𑀢𑀁 𑀥𑀫𑁆𑀫𑀁 𑀲𑀚𑁆𑀛𑀸𑀬𑀦𑁆𑀢𑀺. 𑀢𑁂 𑀆𑀕𑀦𑁆𑀢𑀼𑀓𑀣𑁂𑀭𑀸𑀦𑀁 𑀑𑀯𑀸𑀤𑁂 𑀞𑀢𑁆𑀯𑀸 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀦𑁆𑀢𑀺. 𑀆𑀕𑀦𑁆𑀢𑀼𑀓𑀸 ‘‘𑀏𑀓𑀁 𑀤𑁆𑀯𑁂 𑀤𑀺𑀯𑀲𑀸𑀦𑀺 𑀯𑀲𑀺𑀲𑁆𑀲𑀸𑀫𑀸𑀢𑀺 𑀆𑀕𑀢𑀫𑁆𑀳𑀸, 𑀇𑀫𑁂𑀲𑀁 𑀧𑀦 𑀲𑀼𑀔𑀲𑀁𑀯𑀸𑀲𑀢𑀸𑀬 𑀤𑀲 𑀤𑁆𑀯𑀸𑀤𑀲 𑀯𑀲𑁆𑀲𑀸𑀦𑀺 𑀯𑀲𑀺𑀫𑁆𑀳𑀸’’𑀢𑀺 𑀯𑀢𑁆𑀢𑀸𑀭𑁄 𑀳𑁄𑀦𑁆𑀢𑀺. 𑀏𑀯𑀫𑁂𑀢𑁆𑀣 𑀳𑀸𑀦𑀺𑀯𑀼𑀤𑁆𑀥𑀺𑀬𑁄 𑀯𑁂𑀤𑀺𑀢𑀩𑁆𑀩𑀸.

𑁪. 𑀤𑀼𑀢𑀺𑀬𑀲𑀢𑁆𑀢𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁪. 𑀘𑀢𑀼𑀢𑁆𑀣𑁂 𑀦 𑀓𑀫𑁆𑀫𑀸𑀭𑀸𑀫𑀸𑀢𑀺 𑀬𑁂 𑀤𑀺𑀯𑀲𑀁 𑀘𑀻𑀯𑀭𑀓𑀫𑁆𑀫-𑀓𑀸𑀬𑀩𑀦𑁆𑀥𑀦𑀧𑀭𑀺𑀲𑁆𑀲𑀸𑀯𑀦-𑀥𑀫𑁆𑀫𑀓𑀭𑀡-𑀲𑀫𑁆𑀫𑀚𑁆𑀚𑀦𑀺-𑀧𑀸𑀤𑀓𑀞𑀮𑀺𑀓𑀸𑀤𑀻𑀦𑁂𑀯 𑀓𑀭𑁄𑀦𑁆𑀢𑀺, 𑀢𑁂 𑀲𑀦𑁆𑀥𑀸𑀬𑁂𑀲 𑀧𑀝𑀺𑀓𑁆𑀔𑁂𑀧𑁄. 𑀬𑁄 𑀧𑀦 𑀢𑁂𑀲𑀁 𑀓𑀭𑀡𑀯𑁂𑀮𑀸𑀬 𑀏𑀯𑀁 𑀏𑀢𑀸𑀦𑀺 𑀓𑀭𑁄𑀢𑀺, 𑀉𑀤𑁆𑀤𑁂𑀲𑀯𑁂𑀮𑀸𑀬 𑀉𑀤𑁆𑀤𑁂𑀲𑀁 𑀕𑀡𑁆𑀳𑀸𑀢𑀺, 𑀲𑀚𑁆𑀛𑀸𑀬𑀯𑁂𑀮𑀸𑀬 𑀲𑀚𑁆𑀛𑀸𑀬𑀢𑀺, 𑀘𑁂𑀢𑀺𑀬𑀗𑁆𑀕𑀡𑀯𑀢𑁆𑀢𑀯𑁂𑀮𑀸𑀬 𑀘𑁂𑀢𑀺𑀬𑀗𑁆𑀕𑀡𑀯𑀢𑁆𑀢𑀁 𑀓𑀭𑁄𑀢𑀺, 𑀫𑀦𑀲𑀺𑀓𑀸𑀭𑀯𑁂𑀮𑀸𑀬 𑀫𑀦𑀲𑀺𑀓𑀸𑀭𑀁 𑀓𑀭𑁄𑀢𑀺, 𑀦 𑀲𑁄 𑀓𑀫𑁆𑀫𑀸𑀭𑀸𑀫𑁄 𑀦𑀸𑀫.

𑀬𑁄 𑀇𑀢𑁆𑀣𑀺𑀯𑀡𑁆𑀡𑀧𑀼𑀭𑀺𑀲𑀯𑀡𑁆𑀡𑀸𑀤𑀺𑀯𑀲𑁂𑀦 𑀆𑀮𑀸𑀧𑀲𑀮𑁆𑀮𑀸𑀧𑀁 𑀓𑀭𑁄𑀦𑁆𑀢𑁄𑀬𑁂𑀯 𑀭𑀢𑁆𑀢𑀺𑀦𑁆𑀤𑀺𑀯𑀁 𑀯𑀻𑀢𑀺𑀦𑀸𑀫𑁂𑀢𑀺, 𑀏𑀯𑀭𑀽𑀧𑁂 𑀪𑀲𑁆𑀲𑁂 𑀧𑀭𑀺𑀬𑀦𑁆𑀢𑀓𑀸𑀭𑀻 𑀦 𑀳𑁄𑀢𑀺, 𑀅𑀬𑀁 𑀪𑀲𑁆𑀲𑀸𑀭𑀸𑀫𑁄 𑀦𑀸𑀫. 𑀬𑁄 𑀧𑀦 𑀭𑀢𑁆𑀢𑀺𑀦𑁆𑀤𑀺𑀯𑀁 𑀥𑀫𑁆𑀫𑀁 𑀓𑀣𑁂𑀢𑀺, 𑀧𑀜𑁆𑀳𑀁 𑀯𑀺𑀲𑁆𑀲𑀚𑁆𑀚𑁂𑀢𑀺, 𑀅𑀬𑀁 𑀅𑀧𑁆𑀧𑀪𑀲𑁆𑀲𑁄𑀯 𑀪𑀲𑁆𑀲𑁂 𑀧𑀭𑀺𑀬𑀦𑁆𑀢𑀓𑀸𑀭𑀻𑀬𑁂𑀯. 𑀓𑀲𑁆𑀫𑀸? ‘‘𑀲𑀦𑁆𑀦𑀺𑀧𑀢𑀺𑀢𑀸𑀦𑀁 𑀯𑁄, 𑀪𑀺𑀓𑁆𑀔𑀯𑁂, 𑀤𑁆𑀯𑀬𑀁 𑀓𑀭𑀡𑀻𑀬𑀁 𑀥𑀫𑁆𑀫𑀻 𑀯𑀸 𑀓𑀣𑀸 𑀅𑀭𑀺𑀬𑁄 𑀯𑀸 𑀢𑀼𑀡𑁆𑀳𑀻𑀪𑀸𑀯𑁄’’𑀢𑀺 (𑀫. 𑀦𑀺. 𑁧.𑁨𑁭𑁩) 𑀯𑀼𑀢𑁆𑀢𑀢𑁆𑀢𑀸.

𑀬𑁄 𑀞𑀺𑀢𑁄𑀧𑀺 𑀕𑀘𑁆𑀙𑀦𑁆𑀢𑁄𑀧𑀺 𑀦𑀺𑀲𑀺𑀦𑁆𑀦𑁄𑀧𑀺 𑀣𑀺𑀦𑀫𑀺𑀤𑁆𑀥𑀸𑀪𑀺𑀪𑀽𑀢𑁄 𑀦𑀺𑀤𑁆𑀤𑀸𑀬𑀢𑀺𑀬𑁂𑀯, 𑀅𑀬𑀁 𑀦𑀺𑀤𑁆𑀤𑀸𑀭𑀸𑀫𑁄 𑀦𑀸𑀫. 𑀬𑀲𑁆𑀲 𑀧𑀦 𑀓𑀭𑀚𑀓𑀸𑀬𑀕𑁂𑀮𑀜𑁆𑀜𑁂𑀦 𑀘𑀺𑀢𑁆𑀢𑀁 𑀪𑀯𑀗𑁆𑀕𑀁 𑀑𑀢𑀭𑀢𑀺, 𑀦𑀸𑀬𑀁 𑀦𑀺𑀤𑁆𑀤𑀸𑀭𑀸𑀫𑁄. 𑀢𑁂𑀦𑁂𑀯𑀸𑀳 𑁋 ‘‘𑀅𑀪𑀺𑀚𑀸𑀦𑀸𑀫𑀳𑀁, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀕𑀺𑀫𑁆𑀳𑀸𑀦𑀁 𑀧𑀘𑁆𑀙𑀺𑀫𑁂 𑀫𑀸𑀲𑁂 𑀧𑀘𑁆𑀙𑀸𑀪𑀢𑁆𑀢𑀁 𑀧𑀺𑀡𑁆𑀟𑀧𑀸𑀢𑀧𑁆𑀧𑀝𑀺𑀓𑁆𑀓𑀦𑁆𑀢𑁄 𑀘𑀢𑀼𑀕𑁆𑀕𑀼𑀡𑀁 𑀲𑀗𑁆𑀖𑀸𑀝𑀺𑀁 𑀧𑀜𑁆𑀜𑀧𑁂𑀢𑁆𑀯𑀸 𑀤𑀓𑁆𑀔𑀺𑀡𑁂𑀦 𑀧𑀲𑁆𑀲𑁂𑀦 𑀲𑀢𑁄 𑀲𑀫𑁆𑀧𑀚𑀸𑀦𑁄 𑀦𑀺𑀤𑁆𑀤𑀁 𑀑𑀓𑁆𑀓𑀫𑀺𑀢𑀸’’𑀢𑀺 (𑀫. 𑀦𑀺. 𑁧.𑁩𑁮𑁭).

𑀬𑁄 ‘‘𑀏𑀓𑀲𑁆𑀲 𑀤𑀼𑀢𑀺𑀬𑁄, 𑀤𑁆𑀯𑀺𑀦𑁆𑀦𑀁 𑀢𑀢𑀺𑀬𑁄, 𑀢𑀺𑀡𑁆𑀡𑀁 𑀘𑀢𑀼𑀢𑁆𑀣𑁄’’𑀢𑀺 𑀏𑀯𑀁 𑀲𑀁𑀲𑀝𑁆𑀞𑁄𑀯 𑀯𑀺𑀳𑀭𑀢𑀺, 𑀏𑀓𑀓𑁄 𑀅𑀲𑁆𑀲𑀸𑀤𑀁 𑀦 𑀮𑀪𑀢𑀺, 𑀅𑀬𑀁 𑀲𑀗𑁆𑀕𑀡𑀺𑀓𑀸𑀭𑀸𑀫𑁄. 𑀬𑁄 𑀧𑀦 𑀘𑀢𑀽𑀲𑀼 𑀇𑀭𑀺𑀬𑀸𑀧𑀣𑁂𑀲𑀼 𑀏𑀓𑀓𑁄𑀯 𑀅𑀲𑁆𑀲𑀸𑀤𑀁 𑀮𑀪𑀢𑀺, 𑀦𑀸𑀬𑀁 𑀲𑀗𑁆𑀕𑀡𑀺𑀓𑀸𑀭𑀸𑀫𑁄.

𑀅𑀲𑀦𑁆𑀢𑀲𑀫𑁆𑀪𑀸𑀯𑀦𑀺𑀘𑁆𑀙𑀸𑀬 𑀲𑀫𑀦𑁆𑀦𑀸𑀕𑀢𑀸 𑀤𑀼𑀲𑁆𑀲𑀻𑀮𑀸 𑀧𑀸𑀧𑀺𑀘𑁆𑀙𑀸 𑀦𑀸𑀫. 𑀬𑁂𑀲𑀁 𑀧𑀸𑀧𑀓𑀸 𑀫𑀺𑀢𑁆𑀢𑀸 𑀘𑀢𑀽𑀲𑀼 𑀇𑀭𑀺𑀬𑀸𑀧𑀣𑁂𑀲𑀼 𑀲𑀳 𑀅𑀬𑀦𑀢𑁄 𑀧𑀸𑀧𑀲𑀳𑀸𑀬𑀸, 𑀬𑁂 𑀘 𑀢𑀦𑁆𑀦𑀺𑀦𑁆𑀦𑀢𑀧𑁆𑀧𑁄𑀡𑀢𑀧𑁆𑀧𑀩𑁆𑀪𑀸𑀭𑀢𑀸𑀬 𑀧𑀸𑀧𑁂𑀲𑀼 𑀲𑀫𑁆𑀧𑀯𑀗𑁆𑀓𑀸, 𑀢𑁂 𑀧𑀸𑀧𑀫𑀺𑀢𑁆𑀢𑀸 𑀧𑀸𑀧𑀲𑀳𑀸𑀬𑀸 𑀧𑀸𑀧𑀲𑀫𑁆𑀧𑀯𑀗𑁆𑀓𑀸 𑀦𑀸𑀫.

𑀑𑀭𑀫𑀢𑁆𑀢𑀓𑁂𑀦𑀸𑀢𑀺 𑀅𑀯𑀭𑀫𑀢𑁆𑀢𑀓𑁂𑀦 𑀅𑀧𑁆𑀧𑀫𑀢𑁆𑀢𑀓𑁂𑀦. 𑀅𑀦𑁆𑀢𑀭𑀸𑀢𑀺 𑀅𑀭𑀳𑀢𑁆𑀢𑀁 𑀅𑀧𑁆𑀧𑀢𑁆𑀯𑀸𑀯 𑀏𑀢𑁆𑀣𑀦𑁆𑀢𑀭𑁂. 𑀯𑁄𑀲𑀸𑀦𑀦𑁆𑀢𑀺 𑀧𑀭𑀺𑀦𑀺𑀝𑁆𑀞𑀺𑀢𑀪𑀸𑀯𑀁 ‘‘𑀅𑀮𑀫𑁂𑀢𑁆𑀢𑀸𑀯𑀢𑀸’’𑀢𑀺 𑀑𑀲𑀓𑁆𑀓𑀦𑀁. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀸𑀯 𑀲𑀻𑀮𑀧𑀸𑀭𑀺𑀲𑀼𑀤𑁆𑀥𑀺𑀚𑁆𑀛𑀸𑀦𑀯𑀺𑀧𑀲𑁆𑀲𑀦𑀸 𑀲𑁄𑀢𑀸𑀧𑀦𑁆𑀦𑀪𑀸𑀯𑀸𑀤𑀻𑀦𑀁 𑀅𑀜𑁆𑀜𑀢𑀭𑀫𑀢𑁆𑀢𑀓𑁂𑀦 𑀯𑁄𑀲𑀸𑀦𑀁 𑀦𑀸𑀧𑀚𑁆𑀚𑀺𑀲𑁆𑀲𑀦𑁆𑀢𑀺, 𑀢𑀸𑀯 𑀯𑀼𑀤𑁆𑀥𑀺𑀬𑁂𑀯 𑀪𑀺𑀓𑁆𑀔𑀽𑀦𑀁 𑀧𑀸𑀝𑀺𑀓𑀗𑁆𑀔𑀸, 𑀦𑁄 𑀧𑀭𑀺𑀳𑀸𑀦𑀻𑀢𑀺.

𑁭. 𑀲𑀜𑁆𑀜𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁭. 𑀲𑀢𑁆𑀢𑀫𑁂 𑀅𑀦𑀺𑀘𑁆𑀘𑀲𑀜𑁆𑀜𑀸𑀤𑀬𑁄 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀤𑀻𑀳𑀺 𑀲𑀳𑀕𑀢𑀲𑀜𑁆𑀜𑀸.

𑁮. 𑀧𑀞𑀫𑀧𑀭𑀺𑀳𑀸𑀦𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁮. 𑀅𑀝𑁆𑀞𑀫𑁂 𑀉𑀧𑁆𑀧𑀦𑁆𑀦𑀸𑀦𑀁 𑀲𑀗𑁆𑀖𑀓𑀺𑀘𑁆𑀘𑀸𑀦𑀁 𑀦𑀺𑀢𑁆𑀣𑀭𑀡𑁂𑀦 𑀪𑀸𑀭𑀁 𑀯𑀳𑀦𑁆𑀢𑀻𑀢𑀺 𑀪𑀸𑀭𑀯𑀸𑀳𑀺𑀦𑁄. 𑀢𑁂 𑀢𑁂𑀦 𑀧𑀜𑁆𑀜𑀸𑀬𑀺𑀲𑁆𑀲𑀦𑁆𑀢𑀻𑀢𑀺 𑀢𑁂 𑀣𑁂𑀭𑀸 𑀢𑁂𑀦 𑀅𑀢𑁆𑀢𑀦𑁄 𑀣𑁂𑀭𑀪𑀸𑀯𑀸𑀦𑀼𑀭𑀽𑀧𑁂𑀦 𑀓𑀺𑀘𑁆𑀘𑁂𑀦 𑀧𑀜𑁆𑀜𑀸𑀬𑀺𑀲𑁆𑀲𑀦𑁆𑀢𑀺. 𑀢𑁂𑀲𑀼 𑀬𑁄𑀕𑀁 𑀆𑀧𑀚𑁆𑀚𑀢𑀻𑀢𑀺 𑀧𑀬𑁄𑀕𑀁 𑀆𑀧𑀚𑁆𑀚𑀢𑀺, 𑀲𑀬𑀁 𑀢𑀸𑀦𑀺 𑀓𑀺𑀘𑁆𑀘𑀸𑀦𑀺 𑀓𑀸𑀢𑀼𑀁 𑀆𑀭𑀪𑀢𑀻𑀢𑀺.

𑁯. 𑀤𑀼𑀢𑀺𑀬𑀧𑀭𑀺𑀳𑀸𑀦𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁯. 𑀦𑀯𑀫𑁂 𑀪𑀺𑀓𑁆𑀔𑀼𑀤𑀲𑁆𑀲𑀦𑀁 𑀳𑀸𑀧𑁂𑀢𑀻𑀢𑀺 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀤𑀲𑁆𑀲𑀦𑀢𑁆𑀣𑀸𑀬 𑀕𑀫𑀦𑀁 𑀳𑀸𑀧𑁂𑀢𑀺. 𑀅𑀥𑀺𑀲𑀻𑀮𑁂𑀢𑀺 𑀧𑀜𑁆𑀘𑀲𑀻𑀮𑀤𑀲𑀲𑀻𑀮𑀲𑀗𑁆𑀔𑀸𑀢𑁂 𑀉𑀢𑁆𑀢𑀫𑀲𑀻𑀮𑁂. 𑀇𑀢𑁄 𑀩𑀳𑀺𑀤𑁆𑀥𑀸𑀢𑀺 𑀇𑀫𑀫𑁆𑀳𑀸 𑀲𑀸𑀲𑀦𑀸 𑀩𑀳𑀺𑀤𑁆𑀥𑀸. 𑀤𑀓𑁆𑀔𑀺𑀡𑁂𑀬𑁆𑀬𑀁 𑀕𑀯𑁂𑀲𑀢𑀻𑀢𑀺 𑀤𑁂𑀬𑁆𑀬𑀥𑀫𑁆𑀫𑀧𑀝𑀺𑀕𑁆𑀕𑀸𑀳𑀓𑁂 𑀧𑀭𑀺𑀬𑁂𑀲𑀢𑀺. 𑀢𑀢𑁆𑀣 𑀘 𑀧𑀼𑀩𑁆𑀩𑀓𑀸𑀭𑀁 𑀓𑀭𑁄𑀢𑀻𑀢𑀺 𑀢𑁂𑀲𑀁 𑀩𑀸𑀳𑀺𑀭𑀸𑀦𑀁 𑀢𑀺𑀢𑁆𑀣𑀺𑀬𑀸𑀦𑀁 𑀤𑀢𑁆𑀯𑀸 𑀧𑀘𑁆𑀙𑀸 𑀪𑀺𑀓𑁆𑀔𑀽𑀦𑀁 𑀤𑁂𑀢𑀺. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀯𑀚𑁆𑀚𑀺𑀲𑀢𑁆𑀢𑀓𑀯𑀕𑁆𑀕𑁄 𑀢𑀢𑀺𑀬𑁄.

𑁪. 𑀤𑁂𑀯𑀢𑀸𑀯𑀕𑁆𑀕𑁄

𑁫. 𑀧𑀞𑀫𑀫𑀺𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁬. 𑀘𑀢𑀼𑀢𑁆𑀣𑀲𑁆𑀲 𑀧𑀜𑁆𑀘𑀫𑁂 𑀤𑀼𑀤𑁆𑀤𑀤𑀦𑁆𑀢𑀺 𑀤𑀼𑀧𑁆𑀧𑀭𑀺𑀘𑁆𑀘𑀚𑀁 𑀫𑀳𑀸𑀭𑀳𑀁 𑀪𑀡𑁆𑀟𑀓𑀁. 𑀤𑀼𑀓𑁆𑀓𑀭𑀁 𑀓𑀭𑁄𑀢𑀻𑀢𑀺 𑀓𑀸𑀢𑀼𑀁 𑀅𑀲𑀼𑀓𑀭𑀁 𑀓𑀫𑁆𑀫𑀁 𑀓𑀭𑁄𑀢𑀺. 𑀤𑀼𑀓𑁆𑀔𑀫𑀁 𑀔𑀫𑀢𑀻𑀢𑀺 𑀲𑀳𑀸𑀬𑀲𑁆𑀲 𑀅𑀢𑁆𑀣𑀸𑀬 𑀤𑀼𑀭𑀥𑀺𑀯𑀸𑀲𑀁 𑀅𑀥𑀺𑀯𑀸𑀲𑁂𑀢𑀺. 𑀕𑀼𑀬𑁆𑀳𑀫𑀲𑁆𑀲 𑀆𑀯𑀺𑀓𑀭𑁄𑀢𑀻𑀢𑀺 𑀅𑀢𑁆𑀢𑀦𑁄 𑀕𑀼𑀬𑁆𑀳𑀁 𑀢𑀲𑁆𑀲 𑀆𑀯𑀺𑀓𑀭𑁄𑀢𑀺. 𑀕𑀼𑀬𑁆𑀳𑀫𑀲𑁆𑀲 𑀧𑀭𑀺𑀕𑀼𑀳𑀢𑀻𑀢𑀺 𑀢𑀲𑁆𑀲 𑀕𑀼𑀬𑁆𑀳𑀁 𑀅𑀜𑁆𑀜𑁂𑀲𑀁 𑀦𑀸𑀘𑀺𑀓𑁆𑀔𑀢𑀺. 𑀔𑀻𑀡𑁂𑀦 𑀦𑀸𑀢𑀺𑀫𑀜𑁆𑀜𑀢𑀻𑀢𑀺 𑀢𑀲𑁆𑀲 𑀪𑁄𑀕𑁂 𑀔𑀻𑀡𑁂 𑀢𑁂𑀦 𑀔𑀬𑁂𑀦 𑀢𑀁 𑀦𑀸𑀢𑀺𑀫𑀜𑁆𑀜𑀢𑀺, 𑀢𑀲𑁆𑀫𑀺𑀁 𑀑𑀫𑀸𑀦𑀁 𑀅𑀢𑁆𑀢𑀦𑀺 𑀘 𑀅𑀢𑀺𑀫𑀸𑀦𑀁 𑀦 𑀓𑀭𑁄𑀢𑀺.

𑁬. 𑀤𑀼𑀢𑀺𑀬𑀫𑀺𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁭. 𑀙𑀝𑁆𑀞𑁂 𑀯𑀢𑁆𑀢𑀸𑀢𑀺 𑀯𑀘𑀦𑀓𑀼𑀲𑀮𑁄. 𑀯𑀘𑀦𑀓𑁆𑀔𑀫𑁄𑀢𑀺 𑀯𑀘𑀦𑀁 𑀔𑀫𑀢𑀺, 𑀤𑀺𑀦𑁆𑀦𑀁 𑀑𑀯𑀸𑀤𑀁 𑀓𑀭𑁄𑀢𑀺. 𑀕𑀫𑁆𑀪𑀻𑀭𑀦𑁆𑀢𑀺 𑀕𑀼𑀬𑁆𑀳𑀁 𑀭𑀳𑀲𑁆𑀲𑀁 𑀛𑀸𑀦𑀦𑀺𑀲𑁆𑀲𑀺𑀢𑀁 𑀯𑀺𑀧𑀲𑁆𑀲𑀦𑀸𑀫𑀕𑁆𑀕𑀨𑀮𑀦𑀺𑀩𑁆𑀩𑀸𑀦𑀦𑀺𑀲𑁆𑀲𑀺𑀢𑀁.

𑁭. 𑀧𑀞𑀫𑀧𑀝𑀺𑀲𑀫𑁆𑀪𑀺𑀤𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁮. 𑀲𑀢𑁆𑀢𑀫𑁂 𑀇𑀤𑀁 𑀫𑁂 𑀘𑁂𑀢𑀲𑁄 𑀮𑀻𑀦𑀢𑁆𑀢𑀦𑁆𑀢𑀺 𑀉𑀧𑁆𑀧𑀦𑁆𑀦𑁂 𑀘𑁂𑀢𑀲𑁄 𑀮𑀻𑀦𑀢𑁆𑀢𑁂 ‘‘𑀇𑀤𑀁 𑀫𑁂 𑀘𑁂𑀢𑀲𑁄 𑀮𑀻𑀦𑀢𑁆𑀢’’𑀦𑁆𑀢𑀺 𑀬𑀣𑀸𑀲𑀪𑀸𑀯𑀢𑁄 𑀚𑀸𑀦𑀸𑀢𑀺. 𑀅𑀚𑁆𑀛𑀢𑁆𑀢𑀁 𑀲𑀁𑀔𑀺𑀢𑁆𑀢𑀁 𑀦𑀸𑀫 𑀣𑀺𑀦𑀫𑀺𑀤𑁆𑀥𑀸𑀦𑀼𑀕𑀢𑀁. 𑀩𑀳𑀺𑀤𑁆𑀥𑀸 𑀯𑀺𑀓𑁆𑀔𑀺𑀢𑁆𑀢𑀁 𑀦𑀸𑀫 𑀧𑀜𑁆𑀘𑀲𑀼 𑀓𑀸𑀫𑀕𑀼𑀡𑁂𑀲𑀼 𑀯𑀺𑀓𑁆𑀔𑀺𑀢𑁆𑀢𑀁. 𑀯𑁂𑀤𑀦𑀸𑀢𑀺𑀆𑀤𑀻𑀦𑀺 𑀧𑀧𑀜𑁆𑀘𑀫𑀽𑀮𑀯𑀲𑁂𑀦 𑀕𑀳𑀺𑀢𑀸𑀦𑀺. 𑀯𑁂𑀤𑀦𑀸 𑀳𑀺 𑀢𑀡𑁆𑀳𑀸𑀬 𑀫𑀽𑀮𑀁 𑀲𑀼𑀔𑀯𑀲𑁂𑀦 𑀢𑀡𑁆𑀳𑀼𑀧𑁆𑀧𑀢𑁆𑀢𑀺𑀢𑁄, 𑀲𑀜𑁆𑀜𑀸 𑀤𑀺𑀝𑁆𑀞𑀺𑀬𑀸 𑀫𑀽𑀮𑀁 𑀅𑀯𑀺𑀪𑀽𑀢𑀸𑀭𑀫𑁆𑀫𑀡𑁂 𑀤𑀺𑀝𑁆𑀞𑀺𑀉𑀧𑁆𑀧𑀢𑁆𑀢𑀺𑀢𑁄, 𑀯𑀺𑀢𑀓𑁆𑀓𑁄 𑀫𑀸𑀦𑀲𑁆𑀲 𑀫𑀽𑀮𑀁 𑀯𑀺𑀢𑀓𑁆𑀓𑀯𑀲𑁂𑀦 𑀅𑀲𑁆𑀫𑀻𑀢𑀺 𑀫𑀸𑀦𑀼𑀧𑁆𑀧𑀢𑁆𑀢𑀺𑀢𑁄. 𑀲𑀧𑁆𑀧𑀸𑀬𑀸𑀲𑀧𑁆𑀧𑀸𑀬𑁂𑀲𑀽𑀢𑀺 𑀉𑀧𑀓𑀸𑀭𑀸𑀦𑀼𑀧𑀓𑀸𑀭𑁂𑀲𑀼. 𑀦𑀺𑀫𑀺𑀢𑁆𑀢𑀦𑁆𑀢𑀺 𑀓𑀸𑀭𑀡𑀁. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀤𑁂𑀯𑀢𑀸𑀯𑀕𑁆𑀕𑁄 𑀘𑀢𑀼𑀢𑁆𑀣𑁄.

𑁫. 𑀫𑀳𑀸𑀬𑀜𑁆𑀜𑀯𑀕𑁆𑀕𑁄

𑁧-𑁨. 𑀲𑀢𑁆𑀢𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁪𑁪-𑁪𑁫. 𑀧𑀜𑁆𑀘𑀫𑀲𑁆𑀲 𑀧𑀞𑀫𑁂 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀬𑁄𑀢𑀺 𑀧𑀝𑀺𑀲𑀦𑁆𑀥𑀺𑀯𑀺𑀜𑁆𑀜𑀸𑀡𑀲𑁆𑀲 𑀞𑀸𑀦𑀸𑀦𑀺. 𑀲𑁂𑀬𑁆𑀬𑀣𑀸𑀧𑀻𑀢𑀺 𑀦𑀺𑀤𑀲𑁆𑀲𑀦𑀢𑁆𑀣𑁂 𑀦𑀺𑀧𑀸𑀢𑁄, 𑀬𑀣𑀸 𑀫𑀦𑀼𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀅𑀧𑀭𑀺𑀫𑀸𑀡𑁂𑀲𑀼 𑀳𑀺 𑀘𑀓𑁆𑀓𑀯𑀸𑀴𑁂𑀲𑀼 𑀅𑀧𑀭𑀺𑀫𑀸𑀡𑀸𑀦𑀁 𑀫𑀦𑀼𑀲𑁆𑀲𑀸𑀦𑀁 𑀯𑀡𑁆𑀡𑀲𑀡𑁆𑀞𑀸𑀦𑀸𑀤𑀺𑀯𑀲𑁂𑀦 𑀤𑁆𑀯𑁂𑀧𑀺 𑀏𑀓𑀲𑀤𑀺𑀲𑀸 𑀦𑀢𑁆𑀣𑀺. 𑀬𑁂𑀧𑀺 𑀳𑀺 𑀓𑀢𑁆𑀣𑀘𑀺 𑀬𑀫𑀓𑀪𑀸𑀢𑀭𑁄 𑀯𑀡𑁆𑀡𑁂𑀦 𑀯𑀸 𑀲𑀡𑁆𑀞𑀸𑀦𑁂𑀦 𑀯𑀸 𑀲𑀤𑀺𑀲𑀸 𑀳𑁄𑀦𑁆𑀢𑀺, 𑀢𑁂𑀲𑀫𑁆𑀧𑀺 𑀆𑀮𑁄𑀓𑀺𑀢𑀯𑀺𑀮𑁄𑀓𑀺𑀢𑀓𑀣𑀺𑀢𑀳𑀲𑀺𑀢𑀕𑀫𑀦𑀝𑁆𑀞𑀸𑀦𑀸𑀤𑀻𑀳𑀺 𑀯𑀺𑀲𑁂𑀲𑁄 𑀳𑁄𑀢𑀺𑀬𑁂𑀯. 𑀢𑀲𑁆𑀫𑀸 𑀦𑀸𑀦𑀢𑁆𑀢𑀓𑀸𑀬𑀸𑀢𑀺 𑀯𑀼𑀢𑁆𑀢𑀸. 𑀧𑀝𑀺𑀲𑀦𑁆𑀥𑀺𑀲𑀜𑁆𑀜𑀸 𑀧𑀦 𑀦𑁂𑀲𑀁 𑀢𑀺𑀳𑁂𑀢𑀼𑀓𑀸𑀧𑀺 𑀤𑁆𑀯𑀺𑀳𑁂𑀢𑀼𑀓𑀸𑀧𑀺 𑀅𑀳𑁂𑀢𑀼𑀓𑀸𑀧𑀺 𑀳𑁄𑀢𑀺. 𑀢𑀲𑁆𑀫𑀸 𑀦𑀸𑀦𑀢𑁆𑀢𑀲𑀜𑁆𑀜𑀺𑀦𑁄𑀢𑀺 𑀯𑀼𑀢𑁆𑀢𑀸. 𑀏𑀓𑀘𑁆𑀘𑁂 𑀘 𑀤𑁂𑀯𑀸𑀢𑀺 𑀙 𑀓𑀸𑀫𑀸𑀯𑀘𑀭𑀤𑁂𑀯𑀸. 𑀢𑁂𑀲𑀼 𑀳𑀺 𑀓𑁂𑀲𑀜𑁆𑀘𑀺 𑀓𑀸𑀬𑁄 𑀦𑀻𑀮𑁄 𑀳𑁄𑀢𑀺, 𑀓𑁂𑀲𑀜𑁆𑀘𑀺 𑀧𑀻𑀢𑀓𑀸𑀤𑀺𑀯𑀡𑁆𑀡𑁄. 𑀲𑀜𑁆𑀜𑀸 𑀧𑀦 𑀢𑁂𑀲𑀁 𑀤𑁆𑀯𑀺𑀳𑁂𑀢𑀼𑀓𑀸𑀧𑀺 𑀢𑀺𑀳𑁂𑀢𑀼𑀓𑀸𑀧𑀺 𑀳𑁄𑀢𑀺, 𑀅𑀳𑁂𑀢𑀼𑀓𑀸 𑀦𑀢𑁆𑀣𑀺. 𑀏𑀓𑀘𑁆𑀘𑁂 𑀘 𑀯𑀺𑀦𑀺𑀧𑀸𑀢𑀺𑀓𑀸𑀢𑀺 𑀘𑀢𑀼𑀅𑀧𑀸𑀬𑀯𑀺𑀦𑀺𑀫𑀼𑀢𑁆𑀢𑀸 𑀉𑀢𑁆𑀢𑀭𑀫𑀸𑀢𑀸 𑀬𑀓𑁆𑀔𑀺𑀦𑀻, 𑀧𑀺𑀬𑀗𑁆𑀓𑀭𑀫𑀸𑀢𑀸, 𑀨𑀼𑀲𑁆𑀲𑀫𑀺𑀢𑁆𑀢𑀸, 𑀥𑀫𑁆𑀫𑀕𑀼𑀢𑁆𑀢𑀸𑀢𑀺 𑀏𑀯𑀫𑀸𑀤𑀺𑀓𑀸 𑀅𑀜𑁆𑀜𑁂 𑀘 𑀯𑁂𑀫𑀸𑀦𑀺𑀓𑀸 𑀧𑁂𑀢𑀸. 𑀏𑀢𑁂𑀲𑀜𑁆𑀳𑀺 𑀧𑀻𑀢𑀑𑀤𑀸𑀢𑀓𑀸𑀴𑀫𑀗𑁆𑀕𑀼𑀭𑀘𑁆𑀙𑀯𑀺𑀲𑀸𑀫𑀯𑀡𑁆𑀡𑀸𑀤𑀺𑀯𑀲𑁂𑀦 𑀘𑁂𑀯 𑀓𑀺𑀲 𑀣𑀽𑀮𑀭𑀲𑁆𑀲𑀤𑀻𑀖𑀯𑀲𑁂𑀦 𑀘 𑀓𑀸𑀬𑁄 𑀦𑀸𑀦𑀸 𑀳𑁄𑀢𑀺, 𑀫𑀦𑀼𑀲𑁆𑀲𑀸𑀦𑀁 𑀯𑀺𑀬 𑀤𑁆𑀯𑀺𑀳𑁂𑀢𑀼𑀓𑀢𑀺𑀳𑁂𑀢𑀼𑀓𑀅𑀳𑁂𑀢𑀼𑀓𑀯𑀲𑁂𑀦 𑀲𑀜𑁆𑀜𑀸𑀧𑀺. 𑀢𑁂 𑀧𑀦 𑀤𑁂𑀯𑀸 𑀯𑀺𑀬 𑀦 𑀫𑀳𑁂𑀲𑀓𑁆𑀔𑀸, 𑀓𑀧𑀡𑀫𑀦𑀼𑀲𑁆𑀲𑀸 𑀯𑀺𑀬 𑀅𑀧𑁆𑀧𑁂𑀲𑀓𑁆𑀔𑀸 𑀤𑀼𑀮𑁆𑀮𑀪𑀖𑀸𑀲𑀘𑁆𑀙𑀸𑀤𑀦𑀸 𑀤𑀼𑀓𑁆𑀔𑀧𑀻𑀴𑀺𑀢𑀸 𑀯𑀺𑀳𑀭𑀦𑁆𑀢𑀺. 𑀏𑀓𑀘𑁆𑀘𑁂 𑀓𑀸𑀴𑀧𑀓𑁆𑀔𑁂 𑀤𑀼𑀓𑁆𑀔𑀺𑀢𑀸 𑀚𑀼𑀡𑁆𑀳𑀧𑀓𑁆𑀔𑁂 𑀲𑀼𑀔𑀺𑀢𑀸 𑀳𑁄𑀦𑁆𑀢𑀺. 𑀢𑀲𑁆𑀫𑀸 𑀲𑀼𑀔𑀲𑀫𑀼𑀲𑁆𑀲𑀬𑀢𑁄 𑀯𑀺𑀦𑀺𑀧𑀢𑀺𑀢𑀢𑁆𑀢𑀸 𑀯𑀺𑀦𑀺𑀧𑀸𑀢𑀺𑀓𑀸𑀢𑀺 𑀯𑀼𑀢𑁆𑀢𑀸. 𑀬𑁂 𑀧𑀦𑁂𑀢𑁆𑀣 𑀢𑀺𑀳𑁂𑀢𑀼𑀓𑀸, 𑀢𑁂𑀲𑀁 𑀥𑀫𑁆𑀫𑀸𑀪𑀺𑀲𑀫𑀬𑁄𑀧𑀺 𑀳𑁄𑀢𑀺 𑀧𑀺𑀬𑀗𑁆𑀓𑀭𑀫𑀸𑀢𑀸𑀤𑀻𑀦𑀁 𑀯𑀺𑀬.

𑀩𑁆𑀭𑀳𑁆𑀫𑀓𑀸𑀬𑀺𑀓𑀸𑀢𑀺 𑀩𑁆𑀭𑀳𑁆𑀫𑀧𑀸𑀭𑀺𑀲𑀚𑁆𑀚𑀩𑁆𑀭𑀳𑁆𑀫𑀧𑀼𑀭𑁄𑀳𑀺𑀢𑀫𑀳𑀸𑀩𑁆𑀭𑀳𑁆𑀫𑀸𑀦𑁄. 𑀧𑀞𑀫𑀸𑀪𑀺𑀦𑀺𑀩𑁆𑀩𑀢𑁆𑀢𑀸𑀢𑀺 𑀢𑁂 𑀲𑀩𑁆𑀩𑁂𑀧𑀺 𑀧𑀞𑀫𑀚𑁆𑀛𑀸𑀦𑁂𑀦 𑀅𑀪𑀺𑀦𑀺𑀩𑁆𑀩𑀢𑁆𑀢𑀸. 𑀩𑁆𑀭𑀳𑁆𑀫𑀧𑀸𑀭𑀺𑀲𑀚𑁆𑀚𑀸 𑀧𑀦 𑀧𑀭𑀺𑀢𑁆𑀢𑁂𑀦 𑀅𑀪𑀺𑀦𑀺𑀩𑁆𑀩𑀢𑁆𑀢𑀸, 𑀢𑁂𑀲𑀁 𑀓𑀧𑁆𑀧𑀲𑁆𑀲 𑀢𑀢𑀺𑀬𑁄 𑀪𑀸𑀕𑁄 𑀆𑀬𑀼𑀧𑁆𑀧𑀫𑀸𑀡𑀁. 𑀩𑁆𑀭𑀳𑁆𑀫𑀧𑀼𑀭𑁄𑀳𑀺𑀢𑀸 𑀫𑀚𑁆𑀛𑀺𑀫𑁂𑀦, 𑀢𑁂𑀲𑀁 𑀉𑀧𑀟𑁆𑀠𑀓𑀧𑁆𑀧𑁄 𑀆𑀬𑀼𑀧𑁆𑀧𑀫𑀸𑀡𑀁, 𑀓𑀸𑀬𑁄 𑀘 𑀢𑁂𑀲𑀁 𑀯𑀺𑀧𑁆𑀨𑀸𑀭𑀺𑀓𑀢𑀭𑁄 𑀳𑁄𑀢𑀺. 𑀫𑀳𑀸𑀩𑁆𑀭𑀳𑁆𑀫𑀸𑀦𑁄 𑀧𑀡𑀻𑀢𑁂𑀦, 𑀢𑁂𑀲𑀁 𑀓𑀧𑁆𑀧𑁄 𑀆𑀬𑀼𑀧𑁆𑀧𑀫𑀸𑀡𑀁, 𑀓𑀸𑀬𑁄 𑀘 𑀧𑀦 𑀢𑁂𑀲𑀁 𑀅𑀢𑀺𑀯𑀺𑀧𑁆𑀨𑀸𑀭𑀺𑀓𑁄𑀯 𑀳𑁄𑀢𑀺. 𑀇𑀢𑀺 𑀢𑁂 𑀓𑀸𑀬𑀲𑁆𑀲 𑀦𑀸𑀦𑀢𑁆𑀢𑀸 𑀧𑀞𑀫𑀚𑁆𑀛𑀸𑀦𑀯𑀲𑁂𑀦 𑀲𑀜𑁆𑀜𑀸𑀬 𑀏𑀓𑀢𑁆𑀢𑀸 𑀦𑀸𑀦𑀢𑁆𑀢𑀓𑀸𑀬𑀸 𑀏𑀓𑀢𑁆𑀢𑀲𑀜𑁆𑀜𑀺𑀦𑁄𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀬𑀣𑀸 𑀘 𑀢𑁂, 𑀏𑀯𑀁 𑀘𑀢𑀽𑀲𑀼 𑀅𑀧𑀸𑀬𑁂𑀲𑀼 𑀲𑀢𑁆𑀢𑀸. 𑀦𑀺𑀭𑀬𑁂𑀲𑀼 𑀳𑀺 𑀓𑁂𑀲𑀜𑁆𑀘𑀺 𑀕𑀸𑀯𑀼𑀢𑀁, 𑀓𑁂𑀲𑀜𑁆𑀘𑀺 𑀅𑀟𑁆𑀠𑀬𑁄𑀚𑀦𑀁, 𑀓𑁂𑀲𑀜𑁆𑀘𑀺 𑀬𑁄𑀚𑀦𑀁 𑀅𑀢𑁆𑀢𑀪𑀸𑀯𑁄 𑀳𑁄𑀢𑀺, 𑀤𑁂𑀯𑀤𑀢𑁆𑀢𑀲𑁆𑀲 𑀧𑀦 𑀬𑁄𑀚𑀦𑀲𑀢𑀺𑀓𑁄 𑀚𑀸𑀢𑁄. 𑀢𑀺𑀭𑀘𑁆𑀙𑀸𑀦𑁂𑀲𑀼𑀧𑀺 𑀓𑁂𑀘𑀺 𑀔𑀼𑀤𑁆𑀤𑀓𑀸, 𑀓𑁂𑀘𑀺 𑀫𑀳𑀦𑁆𑀢𑀸. 𑀧𑁂𑀢𑁆𑀢𑀺𑀯𑀺𑀲𑀬𑁂𑀲𑀼𑀧𑀺 𑀓𑁂𑀘𑀺 𑀲𑀝𑁆𑀞𑀺𑀳𑀢𑁆𑀣𑀸, 𑀓𑁂𑀘𑀺 𑀅𑀲𑀻𑀢𑀺𑀳𑀢𑁆𑀣𑀸 𑀳𑁄𑀦𑁆𑀢𑀺, 𑀓𑁂𑀘𑀺 𑀲𑀼𑀯𑀡𑁆𑀡𑀸, 𑀓𑁂𑀘𑀺 𑀤𑀼𑀩𑁆𑀩𑀡𑁆𑀡𑀸. 𑀢𑀣𑀸 𑀓𑀸𑀮𑀓𑀜𑁆𑀘𑀺𑀓𑀸 𑀅𑀲𑀼𑀭𑀸. 𑀅𑀧𑀺𑀘𑁂𑀢𑁆𑀣 𑀤𑀻𑀖𑀧𑀺𑀝𑁆𑀞𑀺𑀓𑀧𑁂𑀢𑀸 𑀦𑀸𑀫 𑀲𑀝𑁆𑀞𑀺𑀬𑁄𑀚𑀦𑀺𑀓𑀸𑀧𑀺 𑀳𑁄𑀦𑁆𑀢𑀺. 𑀲𑀜𑁆𑀜𑀸 𑀧𑀦 𑀲𑀩𑁆𑀩𑁂𑀲𑀫𑁆𑀧𑀺 𑀅𑀓𑀼𑀲𑀮𑀯𑀺𑀧𑀸𑀓𑀸𑀳𑁂𑀢𑀼𑀓𑀸𑀯 𑀳𑁄𑀢𑀺. 𑀇𑀢𑀺 𑀆𑀧𑀸𑀬𑀺𑀓𑀸𑀧𑀺 𑀦𑀸𑀦𑀢𑁆𑀢𑀓𑀸𑀬𑀸 𑀏𑀓𑀢𑁆𑀢𑀲𑀜𑁆𑀜𑀺𑀦𑁄𑀢𑁆𑀯𑁂𑀯 𑀲𑀗𑁆𑀔𑁆𑀬𑀁 𑀕𑀘𑁆𑀙𑀦𑁆𑀢𑀺.

𑀆𑀪𑀲𑁆𑀲𑀭𑀸𑀢𑀺 𑀤𑀡𑁆𑀟𑀉𑀓𑁆𑀓𑀸𑀬 𑀅𑀘𑁆𑀘𑀺 𑀯𑀺𑀬 𑀏𑀢𑁂𑀲𑀁 𑀲𑀭𑀻𑀭𑀢𑁄 𑀆𑀪𑀸 𑀙𑀺𑀚𑁆𑀚𑀺𑀢𑁆𑀯𑀸 𑀙𑀺𑀚𑁆𑀚𑀺𑀢𑁆𑀯𑀸 𑀧𑀢𑀦𑁆𑀢𑀻 𑀯𑀺𑀬 𑀲𑀭𑀢𑀺 𑀯𑀺𑀲𑁆𑀲𑀭𑀢𑀻𑀢𑀺 𑀆𑀪𑀲𑁆𑀲𑀭𑀸. 𑀢𑁂𑀲𑀼 𑀧𑀜𑁆𑀘𑀓𑀦𑀬𑁂 𑀤𑀼𑀢𑀺𑀬𑀢𑀢𑀺𑀬𑀚𑁆𑀛𑀸𑀦𑀤𑁆𑀯𑀬𑀁 𑀧𑀭𑀺𑀢𑁆𑀢𑀁 𑀪𑀸𑀯𑁂𑀢𑁆𑀯𑀸 𑀉𑀧𑀧𑀦𑁆𑀦𑀸 𑀧𑀭𑀺𑀢𑁆𑀢𑀸𑀪𑀸 𑀦𑀸𑀫 𑀳𑁄𑀦𑁆𑀢𑀺, 𑀢𑁂𑀲𑀁 𑀤𑁆𑀯𑁂 𑀓𑀧𑁆𑀧𑀸 𑀆𑀬𑀼𑀧𑁆𑀧𑀫𑀸𑀡𑀁. 𑀫𑀚𑁆𑀛𑀺𑀫𑀁 𑀪𑀸𑀯𑁂𑀢𑁆𑀯𑀸 𑀉𑀧𑀧𑀦𑁆𑀦𑀸 𑀅𑀧𑁆𑀧𑀫𑀸𑀡𑀸𑀪𑀸 𑀦𑀸𑀫 𑀳𑁄𑀦𑁆𑀢𑀺, 𑀢𑁂𑀲𑀁 𑀘𑀢𑁆𑀢𑀸𑀭𑁄 𑀓𑀧𑁆𑀧𑀸 𑀆𑀬𑀼𑀧𑁆𑀧𑀫𑀸𑀡𑀁. 𑀧𑀡𑀻𑀢𑀁 𑀪𑀸𑀯𑁂𑀢𑁆𑀯𑀸 𑀉𑀧𑀧𑀦𑁆𑀦𑀸 𑀆𑀪𑀲𑁆𑀲𑀭𑀸 𑀦𑀸𑀫 𑀳𑁄𑀦𑁆𑀢𑀺, 𑀢𑁂𑀲𑀁 𑀅𑀝𑁆𑀞 𑀓𑀧𑁆𑀧𑀸 𑀆𑀬𑀼𑀧𑁆𑀧𑀫𑀸𑀡𑀁. 𑀇𑀥 𑀧𑀦 𑀉𑀓𑁆𑀓𑀝𑁆𑀞𑀧𑀭𑀺𑀘𑁆𑀙𑁂𑀤𑀯𑀲𑁂𑀦 𑀲𑀩𑁆𑀩𑁂𑀯 𑀢𑁂 𑀕𑀳𑀺𑀢𑀸. 𑀲𑀩𑁆𑀩𑁂𑀲𑀜𑁆𑀳𑀺 𑀢𑁂𑀲𑀁 𑀓𑀸𑀬𑁄 𑀏𑀓𑀯𑀺𑀧𑁆𑀨𑀸𑀭𑁄𑀯 𑀳𑁄𑀢𑀺, 𑀲𑀜𑁆𑀜𑀸 𑀧𑀦 𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑀸 𑀯𑀸 𑀅𑀯𑀺𑀢𑀓𑁆𑀓𑀅𑀯𑀺𑀘𑀸𑀭𑀸 𑀯𑀸𑀢𑀺 𑀦𑀸𑀦𑀸.

𑀲𑀼𑀪𑀓𑀺𑀡𑁆𑀳𑀸𑀢𑀺 𑀲𑀼𑀪𑁂𑀦 𑀯𑁄𑀓𑀺𑀡𑁆𑀡𑀸 𑀯𑀺𑀓𑀺𑀡𑁆𑀡𑀸, 𑀲𑀼𑀪𑁂𑀦 𑀲𑀭𑀻𑀭𑀧𑁆𑀧𑀪𑀸𑀯𑀡𑁆𑀡𑁂𑀦 𑀏𑀓𑀕𑁆𑀖𑀦𑀸𑀢𑀺 𑀅𑀢𑁆𑀣𑁄. 𑀏𑀢𑁂𑀲𑀜𑁆𑀳𑀺 𑀦 𑀆𑀪𑀲𑁆𑀲𑀭𑀸𑀦𑀁 𑀯𑀺𑀬 𑀙𑀺𑀚𑁆𑀚𑀺𑀢𑁆𑀯𑀸 𑀙𑀺𑀚𑁆𑀚𑀺𑀢𑁆𑀯𑀸 𑀧𑀪𑀸 𑀕𑀘𑁆𑀙𑀢𑀺. 𑀧𑀜𑁆𑀘𑀓𑀦𑀬𑁂 𑀧𑀦 𑀧𑀭𑀺𑀢𑁆𑀢𑀫𑀚𑁆𑀛𑀺𑀫𑀧𑀡𑀻𑀢𑀲𑁆𑀲 𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑁆𑀲 𑀯𑀲𑁂𑀦 𑀲𑁄𑀴𑀲𑀩𑀸𑀢𑁆𑀢𑀺𑀁𑀲𑀘𑀢𑀼𑀲𑁆𑀲𑀝𑁆𑀞𑀺𑀓𑀧𑁆𑀧𑀸𑀬𑀼𑀓𑀸 𑀧𑀭𑀺𑀢𑁆𑀢𑀅𑀧𑁆𑀧𑀫𑀸𑀡𑀲𑀼𑀪𑀓𑀺𑀡𑁆𑀳𑀸 𑀦𑀸𑀫 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀦𑁆𑀢𑀺. 𑀇𑀢𑀺 𑀲𑀩𑁆𑀩𑁂𑀧𑀺 𑀢𑁂 𑀏𑀓𑀢𑁆𑀢𑀓𑀸𑀬𑀸 𑀘𑁂𑀯 𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑀜𑁆𑀜𑀸𑀬 𑀏𑀓𑀢𑁆𑀢𑀲𑀜𑁆𑀜𑀺𑀦𑁄 𑀘𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀯𑁂𑀳𑀧𑁆𑀨𑀮𑀸𑀧𑀺 𑀘𑀢𑀼𑀢𑁆𑀣𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀫𑁂𑀯 𑀪𑀚𑀦𑁆𑀢𑀺. 𑀅𑀲𑀜𑁆𑀜𑀲𑀢𑁆𑀢𑀸 𑀯𑀺𑀜𑁆𑀜𑀸𑀡𑀸𑀪𑀸𑀯𑀸 𑀏𑀢𑁆𑀣 𑀲𑀗𑁆𑀕𑀳𑀁 𑀦 𑀕𑀘𑁆𑀙𑀦𑁆𑀢𑀺, 𑀲𑀢𑁆𑀢𑀸𑀯𑀸𑀲𑁂𑀲𑀼 𑀕𑀘𑁆𑀙𑀦𑁆𑀢𑀺.

𑀲𑀼𑀤𑁆𑀥𑀸𑀯𑀸𑀲𑀸 𑀯𑀺𑀯𑀝𑁆𑀝𑀧𑀓𑁆𑀔𑁂 𑀞𑀺𑀢𑀸 𑀦 𑀲𑀩𑁆𑀩𑀓𑀸𑀮𑀺𑀓𑀸, 𑀓𑀧𑁆𑀧𑀲𑀢𑀲𑀳𑀲𑁆𑀲𑀫𑁆𑀧𑀺 𑀅𑀲𑀗𑁆𑀔𑁂𑀬𑁆𑀬𑀫𑁆𑀧𑀺 𑀩𑀼𑀤𑁆𑀥𑀲𑀼𑀜𑁆𑀜𑁂 𑀮𑁄𑀓𑁂 𑀦 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀲𑁄𑀴𑀲𑀓𑀧𑁆𑀧𑀲𑀳𑀲𑁆𑀲𑀅𑀩𑁆𑀪𑀦𑁆𑀢𑀭𑁂 𑀩𑀼𑀤𑁆𑀥𑁂𑀲𑀼 𑀉𑀧𑁆𑀧𑀦𑁆𑀦𑁂𑀲𑀼𑀬𑁂𑀯 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀺𑀲𑁆𑀲 𑀪𑀕𑀯𑀢𑁄 𑀔𑀦𑁆𑀥𑀸𑀯𑀸𑀭𑀝𑁆𑀞𑀸𑀦𑀲𑀤𑀺𑀲𑀸 𑀳𑁄𑀦𑁆𑀢𑀺. 𑀢𑀲𑁆𑀫𑀸 𑀦𑁂𑀯 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀁 𑀦 𑀲𑀢𑁆𑀢𑀸𑀯𑀸𑀲𑀁 𑀪𑀚𑀦𑁆𑀢𑀺. 𑀫𑀳𑀸𑀲𑀻𑀯𑀢𑁆𑀣𑁂𑀭𑁄 𑀧𑀦 ‘‘𑀦 𑀔𑁄 𑀧𑀦 𑀲𑁄, 𑀲𑀸𑀭𑀺𑀧𑀼𑀢𑁆𑀢, 𑀆𑀯𑀸𑀲𑁄 𑀲𑀼𑀮𑀪𑀭𑀽𑀧𑁄, 𑀬𑁄 𑀫𑀬𑀸 𑀅𑀦𑀸𑀯𑀼𑀢𑁆𑀣𑀧𑀼𑀩𑁆𑀩𑁄 𑀇𑀫𑀺𑀦𑀸 𑀤𑀻𑀖𑁂𑀦 𑀅𑀤𑁆𑀥𑀼𑀦𑀸 𑀅𑀜𑁆𑀜𑀢𑁆𑀭 𑀲𑀼𑀤𑁆𑀥𑀸𑀯𑀸𑀲𑁂𑀳𑀺 𑀤𑁂𑀯𑁂𑀳𑀻’’𑀢𑀺 (𑀫. 𑀦𑀺. 𑁧.𑁧𑁬𑁦) 𑀇𑀫𑀺𑀦𑀸 𑀲𑀼𑀢𑁆𑀢𑁂𑀦 𑀲𑀼𑀤𑁆𑀥𑀸𑀯𑀸𑀲𑀸𑀧𑀺 𑀘𑀢𑀼𑀢𑁆𑀣𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀁 𑀘𑀢𑀼𑀢𑁆𑀣𑀲𑀢𑁆𑀢𑀸𑀯𑀸𑀲𑀜𑁆𑀘 𑀪𑀚𑀦𑁆𑀢𑀻𑀢𑀺 𑀯𑀤𑀢𑀺, 𑀢𑀁 𑀅𑀧𑁆𑀧𑀢𑀺𑀩𑀸𑀳𑀺𑀬𑀢𑁆𑀢𑀸 𑀲𑀼𑀢𑁆𑀢𑀲𑁆𑀲 𑀅𑀦𑀼𑀜𑁆𑀜𑀸𑀢𑀁.

𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀬𑀣𑁂𑀯 𑀲𑀜𑁆𑀜𑀸𑀬, 𑀏𑀯𑀁 𑀯𑀺𑀜𑁆𑀜𑀸𑀡𑀲𑁆𑀲𑀸𑀧𑀺 𑀲𑀼𑀔𑀼𑀫𑀢𑁆𑀢𑀸 𑀦𑁂𑀯 𑀯𑀺𑀜𑁆𑀜𑀸𑀡𑀁 𑀦𑀸𑀯𑀺𑀜𑁆𑀜𑀸𑀡𑀁. 𑀢𑀲𑁆𑀫𑀸 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀻𑀲𑀼 𑀦 𑀯𑀼𑀢𑁆𑀢𑀁. 𑀤𑀼𑀢𑀺𑀬𑁂 𑀲𑀫𑀸𑀥𑀺𑀧𑀭𑀺𑀓𑁆𑀔𑀸𑀭𑀸𑀢𑀺 𑀫𑀕𑁆𑀕𑀲𑀫𑀸𑀥𑀺𑀲𑁆𑀲 𑀲𑀫𑁆𑀪𑀸𑀭𑀸.

𑁩. 𑀧𑀞𑀫𑀅𑀕𑁆𑀕𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁬. 𑀢𑀢𑀺𑀬𑁂 𑀲𑀩𑁆𑀩𑁂𑀧𑀺 𑀭𑀸𑀕𑀸𑀤𑀬𑁄 𑀅𑀦𑀼𑀟𑀳𑀦𑀝𑁆𑀞𑁂𑀦 𑀅𑀕𑁆𑀕𑀻. 𑀆𑀳𑀼𑀦𑁂𑀬𑁆𑀬𑀕𑁆𑀕𑀻𑀢𑀺𑀆𑀤𑀻𑀲𑀼 𑀧𑀦𑁂𑀢𑁆𑀣 𑀆𑀳𑀼𑀦𑀁 𑀯𑀼𑀘𑁆𑀘𑀢𑀺 𑀲𑀓𑁆𑀓𑀸𑀭𑁄, 𑀆𑀳𑀼𑀦𑀁 𑀅𑀭𑀳𑀦𑁆𑀢𑀻𑀢𑀺 𑀆𑀳𑀼𑀦𑁂𑀬𑁆𑀬𑀸. 𑀫𑀸𑀢𑀸𑀧𑀺𑀢𑀭𑁄 𑀳𑀺 𑀧𑀼𑀢𑁆𑀢𑀸𑀦𑀁 𑀩𑀳𑀼𑀧𑀓𑀸𑀭𑀢𑁆𑀢𑀸 𑀆𑀳𑀼𑀦𑀁 𑀅𑀭𑀳𑀦𑁆𑀢𑀺, 𑀢𑁂𑀲𑀼 𑀯𑀺𑀧𑁆𑀧𑀝𑀺𑀧𑀚𑁆𑀚𑀫𑀸𑀦𑀸 𑀧𑀼𑀢𑁆𑀢𑀸 𑀦𑀺𑀭𑀬𑀸𑀤𑀻𑀲𑀼 𑀦𑀺𑀩𑁆𑀩𑀢𑁆𑀢𑀦𑁆𑀢𑀺. 𑀢𑀲𑁆𑀫𑀸 𑀓𑀺𑀜𑁆𑀘𑀸𑀧𑀺 𑀫𑀸𑀢𑀸𑀧𑀺𑀢𑀭𑁄 𑀦 𑀅𑀦𑀼𑀟𑀳𑀦𑁆𑀢𑀺, 𑀅𑀦𑀼𑀟𑀳𑀦𑀲𑁆𑀲 𑀧𑀦 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺. 𑀇𑀢𑀺 𑀅𑀦𑀼𑀟𑀳𑀦𑀝𑁆𑀞𑁂𑀦𑁂𑀯 𑀆𑀳𑀼𑀦𑁂𑀬𑁆𑀬𑀕𑁆𑀕𑀻𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀕𑀳𑀧𑀢𑀻𑀢𑀺 𑀧𑀦 𑀕𑁂𑀳𑀲𑀸𑀫𑀺𑀓𑁄 𑀯𑀼𑀘𑁆𑀘𑀢𑀺, 𑀲𑁄 𑀫𑀸𑀢𑀼𑀕𑀸𑀫𑀲𑁆𑀲 𑀲𑀬𑀦𑀯𑀢𑁆𑀣𑀸𑀮𑀗𑁆𑀓𑀸𑀭𑀸𑀤𑀺𑀅𑀦𑀼𑀧𑁆𑀧𑀤𑀸𑀦𑁂𑀦 𑀩𑀳𑀼𑀧𑀓𑀸𑀭𑁄. 𑀢𑀁 𑀅𑀢𑀺𑀘𑀭𑀦𑁆𑀢𑁄 𑀫𑀸𑀢𑀼𑀕𑀸𑀫𑁄 𑀦𑀺𑀭𑀬𑀸𑀤𑀻𑀲𑀼 𑀦𑀺𑀩𑁆𑀩𑀢𑁆𑀢𑀢𑀺. 𑀢𑀲𑁆𑀫𑀸 𑀲𑁄𑀧𑀺 𑀧𑀼𑀭𑀺𑀫𑀦𑀬𑁂𑀦𑁂𑀯 𑀅𑀦𑀼𑀟𑀳𑀦𑀝𑁆𑀞𑁂𑀦 𑀕𑀳𑀧𑀢𑀕𑁆𑀕𑀻𑀢𑀺 𑀯𑀼𑀢𑁆𑀢𑁄. 𑀤𑀓𑁆𑀔𑀺𑀡𑁂𑀬𑁆𑀬𑀕𑁆𑀕𑀻𑀢𑀺 𑀏𑀢𑁆𑀣 𑀧𑀦 𑀤𑀓𑁆𑀔𑀺𑀡𑀸𑀢𑀺 𑀘𑀢𑁆𑀢𑀸𑀭𑁄 𑀧𑀘𑁆𑀘𑀬𑀸, 𑀪𑀺𑀓𑁆𑀔𑀼𑀲𑀗𑁆𑀖𑁄 𑀤𑀓𑁆𑀔𑀺𑀡𑁂𑀬𑁆𑀬𑁄. 𑀲𑁄 𑀳𑀺 𑀕𑀺𑀳𑀻𑀦𑀁 𑀢𑀻𑀲𑀼 𑀲𑀭𑀡𑁂𑀲𑀼 𑀧𑀜𑁆𑀘𑀲𑀼 𑀲𑀻𑀮𑁂𑀲𑀼 𑀤𑀲𑀲𑀼 𑀲𑀻𑀮𑁂𑀲𑀼 𑀫𑀸𑀢𑀸𑀧𑀺𑀢𑀼𑀧𑀝𑁆𑀞𑀸𑀦𑁂 𑀥𑀫𑁆𑀫𑀺𑀓𑀲𑀫𑀡𑀩𑁆𑀭𑀸𑀳𑁆𑀫𑀡𑀼𑀧𑀝𑁆𑀞𑀸𑀦𑁂𑀢𑀺 𑀏𑀯𑀫𑀸𑀤𑀻𑀲𑀼 𑀓𑀮𑁆𑀬𑀸𑀡𑀥𑀫𑁆𑀫𑁂𑀲𑀼 𑀦𑀺𑀬𑁄𑀚𑀦𑁂𑀦 𑀩𑀳𑀼𑀧𑀓𑀸𑀭𑁄. 𑀢𑀲𑁆𑀫𑀺𑀁 𑀫𑀺𑀘𑁆𑀙𑀸𑀧𑀝𑀺𑀧𑀦𑁆𑀦𑀸 𑀕𑀺𑀳𑀻 𑀪𑀺𑀓𑁆𑀔𑀼𑀲𑀗𑁆𑀖𑀁 𑀅𑀓𑁆𑀓𑁄𑀲𑀺𑀢𑁆𑀯𑀸 𑀧𑀭𑀺𑀪𑀸𑀲𑀺𑀢𑁆𑀯𑀸 𑀦𑀺𑀭𑀬𑀸𑀤𑀻𑀲𑀼 𑀦𑀺𑀩𑁆𑀩𑀢𑁆𑀢𑀦𑁆𑀢𑀺. 𑀢𑀲𑁆𑀫𑀸 𑀲𑁄𑀧𑀺 𑀧𑀼𑀭𑀺𑀫𑀦𑀬𑁂𑀦𑁂𑀯 𑀅𑀦𑀼𑀟𑀳𑀦𑀝𑁆𑀞𑁂𑀦 𑀤𑀓𑁆𑀔𑀺𑀡𑁂𑀬𑁆𑀬𑀕𑁆𑀕𑀻𑀢𑀺 𑀯𑀼𑀢𑁆𑀢𑁄. 𑀓𑀝𑁆𑀞𑀢𑁄 𑀦𑀺𑀩𑁆𑀩𑀢𑁆𑀢𑁄 𑀧𑀸𑀓𑀢𑀺𑀓𑁄𑀯 𑀅𑀕𑁆𑀕𑀺 𑀓𑀝𑁆𑀞𑀕𑁆𑀕𑀺 𑀦𑀸𑀫.

𑁪. 𑀤𑀼𑀢𑀺𑀬𑀅𑀕𑁆𑀕𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁭. 𑀘𑀢𑀼𑀢𑁆𑀣𑁂 𑀉𑀕𑁆𑀕𑀢𑀲𑀭𑀻𑀭𑀲𑁆𑀲𑀸𑀢𑀺 𑀲𑁄 𑀓𑀺𑀭 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑁄 𑀅𑀢𑁆𑀢𑀪𑀸𑀯𑁂𑀦𑀧𑀺 𑀪𑁄𑀕𑁂𑀳𑀺𑀧𑀺 𑀉𑀕𑁆𑀕𑀢𑁄 𑀲𑀸𑀭𑀧𑁆𑀧𑀢𑁆𑀢𑁄 𑀅𑀳𑁄𑀲𑀺, 𑀢𑀲𑁆𑀫𑀸 𑀉𑀕𑁆𑀕𑀢𑀲𑀭𑀻𑀭𑁄𑀢𑁆𑀯𑁂𑀯 𑀧𑀜𑁆𑀜𑀸𑀬𑀺𑀢𑁆𑀣. 𑀉𑀧𑀓𑁆𑀔𑀝𑁄𑀢𑀺 𑀧𑀘𑁆𑀘𑀼𑀧𑀝𑁆𑀞𑀺𑀢𑁄. 𑀣𑀽𑀡𑀽𑀧𑀦𑀻𑀢𑀸𑀦𑀻𑀢𑀺 𑀬𑀽𑀧𑀲𑀗𑁆𑀔𑀸𑀢𑀁 𑀣𑀽𑀡𑀁 𑀉𑀧𑀦𑀻𑀢𑀸𑀦𑀺. 𑀬𑀜𑁆𑀜𑀢𑁆𑀣𑀸𑀬𑀸𑀢𑀺 𑀯𑀥𑀺𑀢𑁆𑀯𑀸 𑀬𑀚𑀦𑀢𑁆𑀣𑀸𑀬. 𑀉𑀧𑀲𑀗𑁆𑀓𑀫𑀻𑀢𑀺 𑀲𑁄 𑀓𑀺𑀭 𑀲𑀩𑁆𑀩𑀁 𑀢𑀁 𑀬𑀜𑁆𑀜𑀲𑀫𑁆𑀪𑀸𑀭𑀁 𑀲𑀚𑁆𑀚𑁂𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀲𑀫𑀡𑁄 𑀓𑀺𑀭 𑀕𑁄𑀢𑀫𑁄 𑀫𑀳𑀸𑀧𑀜𑁆𑀜𑁄, 𑀓𑀺𑀁 𑀦𑀼 𑀔𑁄 𑀫𑁂 𑀬𑀜𑁆𑀜𑀲𑁆𑀲 𑀯𑀡𑁆𑀡𑀁 𑀓𑀣𑁂𑀲𑁆𑀲𑀢𑀺 𑀉𑀤𑀸𑀳𑀼 𑀅𑀯𑀡𑁆𑀡𑀁, 𑀧𑀼𑀘𑁆𑀙𑀺𑀢𑁆𑀯𑀸 𑀚𑀸𑀦𑀺𑀲𑁆𑀲𑀸𑀫𑀻’’𑀢𑀺 𑀇𑀫𑀺𑀦𑀸 𑀓𑀸𑀭𑀡𑁂𑀦 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺. 𑀅𑀕𑁆𑀕𑀺𑀲𑁆𑀲 𑀆𑀤𑀸𑀦𑀦𑁆𑀢𑀺 𑀬𑀜𑁆𑀜𑀬𑀚𑀦𑀢𑁆𑀣𑀸𑀬 𑀦𑀯𑀲𑁆𑀲 𑀫𑀗𑁆𑀕𑀮𑀕𑁆𑀕𑀺𑀦𑁄 𑀆𑀤𑀺𑀬𑀦𑀁. 𑀲𑀩𑁆𑀩𑁂𑀦 𑀲𑀩𑁆𑀩𑀦𑁆𑀢𑀺 𑀲𑀩𑁆𑀩𑁂𑀦 𑀲𑀼𑀢𑁂𑀦 𑀲𑀩𑁆𑀩𑀁 𑀲𑀼𑀢𑀁 𑀲𑀫𑁂𑀢𑀺 𑀲𑀁𑀲𑀦𑁆𑀤𑀢𑀺, 𑀏𑀓𑀲𑀤𑀺𑀲𑀁 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀲𑀢𑁆𑀣𑀸𑀦𑀻𑀢𑀺 𑀯𑀺𑀳𑀺𑀁𑀲𑀦𑀝𑁆𑀞𑁂𑀦 𑀲𑀢𑁆𑀣𑀸𑀦𑀺 𑀯𑀺𑀬𑀸𑀢𑀺 𑀲𑀢𑁆𑀣𑀸𑀦𑀺. 𑀲𑀬𑀁 𑀧𑀞𑀫𑀁 𑀲𑀫𑀸𑀭𑀫𑁆𑀪𑀢𑀻𑀢𑀺 𑀅𑀢𑁆𑀢𑀦𑀸𑀯 𑀧𑀞𑀫𑀢𑀭𑀁 𑀆𑀭𑀪𑀢𑀺. 𑀳𑀦𑁆𑀢𑀼𑀦𑁆𑀢𑀺 𑀳𑀦𑀺𑀢𑀼𑀁.

𑀧𑀳𑀸𑀢𑀩𑁆𑀩𑀸𑀢𑀺 𑀧𑀭𑀺𑀳𑀭𑀺𑀢𑀩𑁆𑀩𑀸. 𑀅𑀢𑁄𑀳𑀬𑀦𑁆𑀢𑀺 𑀅𑀢𑁄 𑀳𑀺 𑀫𑀸𑀢𑀸𑀧𑀺𑀢𑀺𑀢𑁄 𑀅𑀬𑀁. 𑀆𑀳𑀼𑀢𑁄𑀢𑀺 𑀆𑀕𑀢𑁄. 𑀲𑀫𑁆𑀪𑀽𑀢𑁄𑀢𑀺 𑀉𑀧𑁆𑀧𑀦𑁆𑀦𑁄. 𑀅𑀬𑀁 𑀯𑀼𑀘𑁆𑀘𑀢𑀺, 𑀩𑁆𑀭𑀸𑀳𑁆𑀫𑀡, 𑀕𑀳𑀧𑀢𑀕𑁆𑀕𑀻𑀢𑀺 𑀅𑀬𑀁 𑀧𑀼𑀢𑁆𑀢𑀤𑀸𑀭𑀸𑀤𑀺𑀕𑀡𑁄 𑀬𑀲𑁆𑀫𑀸, 𑀕𑀳𑀧𑀢𑀺, 𑀯𑀺𑀬 𑀕𑁂𑀳𑀲𑀸𑀫𑀺𑀓𑁄 𑀯𑀺𑀬 𑀳𑀼𑀢𑁆𑀯𑀸 𑀅𑀕𑁆𑀕𑀢𑀺 𑀯𑀺𑀘𑀭𑀢𑀺, 𑀢𑀲𑁆𑀫𑀸 𑀕𑀳𑀧𑀢𑀕𑁆𑀕𑀻𑀢𑀺 𑀯𑀼𑀘𑁆𑀘𑀢𑀺. 𑀅𑀢𑁆𑀢𑀸𑀦𑀦𑁆𑀢𑀺 𑀘𑀺𑀢𑁆𑀢𑀁. 𑀤𑀫𑁂𑀦𑁆𑀢𑀻𑀢𑀺 𑀇𑀦𑁆𑀤𑁆𑀭𑀺𑀬𑀤𑀫𑀦𑁂𑀦 𑀤𑀫𑁂𑀦𑁆𑀢𑀺. 𑀲𑀫𑁂𑀦𑁆𑀢𑀻𑀢𑀺 𑀭𑀸𑀕𑀸𑀤𑀺𑀲𑀫𑀦𑁂𑀦 𑀲𑀫𑁂𑀦𑁆𑀢𑀺. 𑀢𑁂𑀲𑀜𑁆𑀜𑁂𑀯 𑀧𑀭𑀺𑀦𑀺𑀩𑁆𑀩𑀸𑀧𑀦𑁂𑀦 𑀧𑀭𑀺𑀦𑀺𑀩𑁆𑀩𑀸𑀧𑁂𑀦𑁆𑀢𑀺. 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑁄𑀢𑀺 𑀬𑀣𑀸 𑀦 𑀯𑀺𑀦𑀲𑁆𑀲𑀢𑀺, 𑀏𑀯𑀁 𑀞𑀧𑁂𑀢𑀩𑁆𑀩𑁄. 𑀉𑀧𑀯𑀸𑀬𑀢𑀦𑁆𑀢𑀺 𑀉𑀧𑀯𑀸𑀬𑀢𑀼. 𑀏𑀯𑀜𑁆𑀘 𑀧𑀦 𑀯𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑁄 𑀲𑀩𑁆𑀩𑁂𑀲𑀫𑁆𑀧𑀺 𑀢𑁂𑀲𑀁 𑀧𑀸𑀡𑀸𑀦𑀁 𑀚𑀻𑀯𑀺𑀢𑀁 𑀤𑀢𑁆𑀯𑀸 𑀬𑀜𑁆𑀜𑀲𑀸𑀮𑀁 𑀯𑀺𑀤𑁆𑀥𑀁𑀲𑁂𑀢𑁆𑀯𑀸 𑀲𑀢𑁆𑀣𑀼 𑀲𑀸𑀲𑀦𑁂 𑀑𑀧𑀸𑀦𑀪𑀽𑀢𑁄 𑀅𑀳𑁄𑀲𑀻𑀢𑀺.

𑁫-𑁬. 𑀲𑀜𑁆𑀜𑀸𑀲𑀼𑀢𑁆𑀢𑀤𑁆𑀯𑀬𑀯𑀡𑁆𑀡𑀦𑀸

𑁪𑁮-𑁪𑁯. 𑀧𑀜𑁆𑀘𑀫𑁂 𑀅𑀫𑀢𑁄𑀕𑀥𑀸𑀢𑀺 𑀦𑀺𑀩𑁆𑀩𑀸𑀦𑀧𑀢𑀺𑀝𑁆𑀞𑀸. 𑀅𑀫𑀢𑀧𑀭𑀺𑀬𑁄𑀲𑀸𑀦𑀸𑀢𑀺 𑀦𑀺𑀩𑁆𑀩𑀸𑀦𑀸𑀯𑀲𑀸𑀦𑀸. 𑀙𑀝𑁆𑀞𑁂 𑀫𑁂𑀣𑀼𑀦𑀥𑀫𑁆𑀫𑀲𑀫𑀸𑀧𑀢𑁆𑀢𑀺𑀬𑀸𑀢𑀺 𑀫𑁂𑀣𑀼𑀦𑀥𑀫𑁆𑀫𑁂𑀦 𑀲𑀫𑀗𑁆𑀕𑀺𑀪𑀸𑀯𑀢𑁄. 𑀦𑁆𑀳𑀸𑀭𑀼𑀤𑀤𑁆𑀤𑀼𑀮𑀦𑁆𑀢𑀺 𑀦𑁆𑀳𑀸𑀭𑀼𑀔𑀡𑁆𑀟𑀁 𑀦𑁆𑀳𑀸𑀭𑀼𑀯𑀺𑀮𑁂𑀔𑀦𑀁 𑀯𑀸. 𑀅𑀦𑀼𑀲𑀦𑁆𑀤𑀢𑀻𑀢𑀺 𑀧𑀯𑀢𑁆𑀢𑀢𑀺. 𑀦𑀢𑁆𑀣𑀺 𑀫𑁂 𑀧𑀼𑀩𑁆𑀩𑁂𑀦𑀸𑀧𑀭𑀁 𑀯𑀺𑀲𑁂𑀲𑁄𑀢𑀺 𑀦𑀢𑁆𑀣𑀺 𑀫𑀬𑁆𑀳𑀁 𑀧𑀼𑀩𑁆𑀩𑁂𑀦 𑀅𑀪𑀸𑀯𑀺𑀢𑀓𑀸𑀮𑁂𑀦 𑀲𑀤𑁆𑀥𑀺𑀁 𑀅𑀧𑀭𑀁 𑀪𑀸𑀯𑀺𑀢𑀓𑀸𑀮𑁂 𑀯𑀺𑀲𑁂𑀲𑁄. 𑀮𑁄𑀓𑀘𑀺𑀢𑁆𑀭𑁂𑀲𑀽𑀢𑀺 𑀢𑀺𑀥𑀸𑀢𑀼𑀓𑀮𑁄𑀓𑀲𑀦𑁆𑀦𑀺𑀯𑀸𑀲𑀲𑀗𑁆𑀔𑀸𑀢𑁂𑀲𑀼 𑀮𑁄𑀓𑀘𑀺𑀢𑁆𑀭𑁂𑀲𑀼. 𑀆𑀮𑀲𑁆𑀬𑁂𑀢𑀺 𑀆𑀮𑀲𑀺𑀬𑀪𑀸𑀯𑁂. 𑀯𑀺𑀲𑁆𑀲𑀝𑁆𑀞𑀺𑀬𑁂𑀢𑀺 𑀯𑀺𑀲𑁆𑀲𑀝𑁆𑀞𑀪𑀸𑀯𑁂. 𑀅𑀦𑀦𑀼𑀬𑁄𑀕𑁂𑀢𑀺 𑀬𑁄𑀕𑀲𑁆𑀲 𑀅𑀦𑀦𑀼𑀬𑀼𑀜𑁆𑀚𑀦𑁂. 𑀅𑀳𑀗𑁆𑀓𑀸𑀭𑀫𑀫𑀗𑁆𑀓𑀸𑀭𑀫𑀸𑀦𑀸𑀧𑀕𑀢𑀦𑁆𑀢𑀺 𑀅𑀳𑀗𑁆𑀓𑀸𑀭𑀤𑀺𑀝𑁆𑀞𑀺𑀢𑁄 𑀘 𑀫𑀫𑀗𑁆𑀓𑀸𑀭𑀢𑀡𑁆𑀳𑀸𑀢𑁄 𑀘 𑀦𑀯𑀯𑀺𑀥𑀫𑀸𑀦𑀢𑁄 𑀘 𑀅𑀧𑀕𑀢𑀁. 𑀯𑀺𑀥𑀸𑀲𑀫𑀢𑀺𑀓𑁆𑀓𑀦𑁆𑀢𑀦𑁆𑀢𑀺 𑀢𑀺𑀲𑁆𑀲𑁄 𑀯𑀺𑀥𑀸 𑀅𑀢𑀺𑀓𑁆𑀓𑀦𑁆𑀢𑀁. 𑀲𑀦𑁆𑀢𑀦𑁆𑀢𑀺 𑀢𑀧𑁆𑀧𑀘𑁆𑀘𑀦𑀻𑀓𑀓𑀺𑀮𑁂𑀲𑁂𑀳𑀺 𑀲𑀦𑁆𑀢𑀁. 𑀲𑀼𑀯𑀺𑀫𑀼𑀢𑁆𑀢𑀦𑁆𑀢𑀺 𑀧𑀜𑁆𑀘𑀳𑀺 𑀯𑀺𑀫𑀼𑀢𑁆𑀢𑀻𑀳𑀺 𑀲𑀼𑀝𑁆𑀞𑀼 𑀯𑀺𑀫𑀼𑀢𑁆𑀢𑀁.

𑁭. 𑀫𑁂𑀣𑀼𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁦. 𑀲𑀢𑁆𑀢𑀫𑁂 𑀉𑀧𑀲𑀗𑁆𑀓𑀫𑀻𑀢𑀺 𑀪𑀼𑀢𑁆𑀢𑀧𑀸𑀢𑀭𑀸𑀲𑁄 𑀤𑀸𑀲𑀓𑀫𑁆𑀫𑀓𑀭𑀧𑀭𑀺𑀯𑀼𑀢𑁄 𑀉𑀧𑀲𑀗𑁆𑀓𑀫𑀺. 𑀪𑀯𑀫𑁆𑀧𑀺𑀦𑁄𑀢𑀺 𑀪𑀯𑀫𑁆𑀧𑀺 𑀦𑀼. 𑀩𑁆𑀭𑀳𑁆𑀫𑀘𑀸𑀭𑀻 𑀧𑀝𑀺𑀚𑀸𑀦𑀸𑀢𑀻𑀢𑀺 ‘‘𑀅𑀳𑀁 𑀩𑁆𑀭𑀳𑁆𑀫𑀘𑀸𑀭𑀻’’𑀢𑀺 𑀏𑀯𑀁 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑀁 𑀧𑀝𑀺𑀚𑀸𑀦𑀸𑀢𑀻𑀢𑀺 𑀧𑀼𑀘𑁆𑀙𑀢𑀺. 𑀏𑀯𑀁 𑀓𑀺𑀭𑀲𑁆𑀲 𑀅𑀳𑁄𑀲𑀺 𑁋 ‘‘𑀩𑁆𑀭𑀸𑀳𑁆𑀫𑀡𑀲𑀫𑀬𑁂 𑀯𑁂𑀤𑀁 𑀉𑀕𑁆𑀕𑀡𑁆𑀳𑀦𑁆𑀢𑀸 𑀅𑀝𑁆𑀞𑀘𑀢𑁆𑀢𑀸𑀮𑀻𑀲 𑀯𑀲𑁆𑀲𑀸𑀦𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀦𑁆𑀢𑀺. 𑀲𑀫𑀡𑁄 𑀧𑀦 𑀕𑁄𑀢𑀫𑁄 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀦𑁆𑀢𑁄 𑀢𑀻𑀲𑀼 𑀧𑀸𑀲𑀸𑀤𑁂𑀲𑀼 𑀢𑀺𑀯𑀺𑀥𑀦𑀸𑀝𑀓𑀭𑀢𑀺𑀬𑀸 𑀅𑀪𑀺𑀭𑀫𑀺, 𑀇𑀤𑀸𑀦𑀺 𑀓𑀺𑀁 𑀦𑀼 𑀔𑁄 𑀯𑀓𑁆𑀔𑀢𑀻’’𑀢𑀺 𑀇𑀫𑀫𑀢𑁆𑀣𑀁 𑀲𑀦𑁆𑀥𑀸𑀬𑁂𑀯𑀁 𑀧𑀼𑀘𑁆𑀙𑀢𑀺. 𑀢𑀢𑁄 𑀪𑀕𑀯𑀸 𑀫𑀦𑁆𑀢𑁂𑀦 𑀓𑀡𑁆𑀳𑀲𑀧𑁆𑀧𑀁 𑀕𑀡𑁆𑀳𑀦𑁆𑀢𑁄 𑀯𑀺𑀬 𑀅𑀫𑀺𑀢𑁆𑀢𑀁 𑀕𑀻𑀯𑀸𑀬 𑀧𑀸𑀤𑁂𑀦 𑀅𑀓𑁆𑀓𑀫𑀦𑁆𑀢𑁄 𑀯𑀺𑀬 𑀅𑀢𑁆𑀢𑀦𑁄 𑀲𑀁𑀓𑀺𑀮𑁂𑀲𑀓𑀸𑀮𑁂 𑀙𑀩𑁆𑀩𑀲𑁆𑀲𑀸𑀦𑀺 𑀧𑀥𑀸𑀦𑀘𑀭𑀺𑀬𑀸𑀬 𑀭𑀚𑁆𑀚𑀲𑀼𑀔𑀁 𑀯𑀸 𑀧𑀸𑀲𑀸𑀤𑁂𑀲𑀼 𑀦𑀸𑀝𑀓𑀲𑀫𑁆𑀧𑀢𑁆𑀢𑀺𑀁 𑀯𑀸 𑀆𑀭𑀩𑁆𑀪 𑀯𑀺𑀢𑀓𑁆𑀓𑀫𑀢𑁆𑀢𑀲𑁆𑀲𑀸𑀧𑀺 𑀅𑀦𑀼𑀧𑁆𑀧𑀦𑁆𑀦𑀪𑀸𑀯𑀁 𑀲𑀦𑁆𑀥𑀸𑀬 𑀲𑀻𑀳𑀦𑀸𑀤𑀁 𑀦𑀤𑀦𑁆𑀢𑁄 𑀬𑀜𑁆𑀳𑀺 𑀢𑀁 𑀩𑁆𑀭𑀸𑀳𑁆𑀫𑀡𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀤𑁆𑀯𑀬𑀁𑀤𑁆𑀯𑀬𑀲𑀫𑀸𑀧𑀢𑁆𑀢𑀺𑀦𑁆𑀢𑀺 𑀤𑁆𑀯𑀻𑀳𑀺 𑀤𑁆𑀯𑀻𑀳𑀺 𑀲𑀫𑀸𑀧𑀚𑁆𑀚𑀺𑀢𑀩𑁆𑀩𑀪𑀸𑀯𑀁. 𑀤𑀼𑀓𑁆𑀔𑀲𑁆𑀫𑀸𑀢𑀺 𑀲𑀓𑀮𑀯𑀝𑁆𑀝𑀤𑀼𑀓𑁆𑀔𑀢𑁄. 𑀲𑀜𑁆𑀚𑀕𑁆𑀖𑀢𑀻𑀢𑀺 𑀳𑀲𑀺𑀢𑀓𑀣𑀁 𑀓𑀣𑁂𑀢𑀺. 𑀲𑀁𑀓𑀻𑀴𑀢𑀻𑀢𑀺 𑀓𑁂𑀴𑀺𑀁 𑀓𑀭𑁄𑀢𑀺. 𑀲𑀁𑀓𑁂𑀴𑀸𑀬𑀢𑀻𑀢𑀺 𑀫𑀳𑀸𑀳𑀲𑀺𑀢𑀁 𑀳𑀲𑀢𑀺. 𑀘𑀓𑁆𑀔𑀼𑀦𑀸 𑀘𑀓𑁆𑀔𑀼𑀦𑁆𑀢𑀺 𑀅𑀢𑁆𑀢𑀦𑁄 𑀘𑀓𑁆𑀔𑀼𑀦𑀸 𑀢𑀲𑁆𑀲𑀸 𑀘𑀓𑁆𑀔𑀼𑀁 𑀧𑀝𑀺𑀯𑀺𑀚𑁆𑀛𑀺𑀢𑁆𑀯𑀸 𑀉𑀧𑀦𑀺𑀚𑁆𑀛𑀸𑀬𑀢𑀺. 𑀢𑀺𑀭𑁄𑀓𑀼𑀝𑁆𑀝𑀁 𑀯𑀸 𑀢𑀺𑀭𑁄𑀧𑀸𑀓𑀸𑀭𑀁 𑀯𑀸𑀢𑀺 𑀧𑀭𑀓𑀼𑀝𑁆𑀝𑁂 𑀯𑀸 𑀧𑀭𑀧𑀸𑀓𑀸𑀭𑁂 𑀯𑀸. 𑀤𑁂𑀯𑁄𑀢𑀺 𑀏𑀓𑁄 𑀤𑁂𑀯𑀭𑀸𑀚𑀸. 𑀤𑁂𑀯𑀜𑁆𑀜𑀢𑀭𑁄𑀢𑀺 𑀅𑀜𑁆𑀜𑀢𑀭𑁄 𑀤𑁂𑀯𑀧𑀼𑀢𑁆𑀢𑁄. 𑀅𑀦𑀼𑀢𑁆𑀢𑀭𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀦𑁆𑀢𑀺 𑀅𑀭𑀳𑀢𑁆𑀢𑀜𑁆𑀘𑁂𑀯 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀜𑁆𑀘.

𑁮. 𑀲𑀁𑀬𑁄𑀕𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁧. 𑀅𑀝𑁆𑀞𑀫𑁂 𑀲𑀁𑀬𑁄𑀕𑀯𑀺𑀲𑀁𑀬𑁄𑀕𑀦𑁆𑀢𑀺 𑀲𑀁𑀬𑁄𑀕𑀯𑀺𑀲𑀁𑀬𑁄𑀕𑀲𑀸𑀥𑀓𑀁. 𑀥𑀫𑁆𑀫𑀧𑀭𑀺𑀬𑀸𑀬𑀦𑁆𑀢𑀺 𑀥𑀫𑁆𑀫𑀓𑀸𑀭𑀡𑀁. 𑀅𑀚𑁆𑀛𑀢𑁆𑀢𑀁 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀦𑁆𑀢𑀺 𑀦𑀺𑀬𑀓𑀚𑁆𑀛𑀢𑁆𑀢𑁂 𑀇𑀢𑁆𑀣𑀺𑀪𑀸𑀯𑀁. 𑀇𑀢𑁆𑀣𑀺𑀓𑀼𑀢𑁆𑀢𑀦𑁆𑀢𑀺 𑀇𑀢𑁆𑀣𑀺𑀓𑀺𑀭𑀺𑀬𑀁. 𑀇𑀢𑁆𑀣𑀸𑀓𑀧𑁆𑀧𑀦𑁆𑀢𑀺 𑀦𑀺𑀯𑀸𑀲𑀦𑀧𑀸𑀭𑀼𑀧𑀦𑀸𑀤𑀺𑀇𑀢𑁆𑀣𑀺𑀆𑀓𑀧𑁆𑀧𑀁. 𑀇𑀢𑁆𑀣𑀺𑀯𑀺𑀥𑀦𑁆𑀢𑀺 𑀇𑀢𑁆𑀣𑀺𑀬𑀸 𑀫𑀸𑀦𑀯𑀺𑀥𑀁. 𑀇𑀢𑁆𑀣𑀺𑀙𑀦𑁆𑀤𑀦𑁆𑀢𑀺 𑀇𑀢𑁆𑀣𑀺𑀬𑀸 𑀅𑀚𑁆𑀛𑀸𑀲𑀬𑀘𑁆𑀙𑀦𑁆𑀤𑀁. 𑀇𑀢𑁆𑀣𑀺𑀲𑁆𑀲𑀭𑀦𑁆𑀢𑀺 𑀇𑀢𑁆𑀣𑀺𑀲𑀤𑁆𑀤𑀁. 𑀇𑀢𑁆𑀣𑀸𑀮𑀗𑁆𑀓𑀸𑀭𑀦𑁆𑀢𑀺 𑀇𑀢𑁆𑀣𑀺𑀬𑀸 𑀧𑀲𑀸𑀥𑀦𑀪𑀡𑁆𑀟𑀁. 𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀩𑀳𑀺𑀤𑁆𑀥𑀸 𑀲𑀁𑀬𑁄𑀕𑀦𑁆𑀢𑀺 𑀧𑀼𑀭𑀺𑀲𑁂𑀦 𑀲𑀤𑁆𑀥𑀺𑀁 𑀲𑀫𑀸𑀕𑀫𑀁. 𑀅𑀢𑀺𑀯𑀢𑁆𑀢𑀢𑀻𑀢𑀺 𑀅𑀦𑀪𑀺𑀭𑀢𑀸𑀢𑀺 𑀏𑀯𑀁 𑀯𑀼𑀢𑁆𑀢𑀸𑀬 𑀩𑀮𑀯𑀯𑀺𑀧𑀲𑁆𑀲𑀦𑀸𑀬 𑀅𑀭𑀺𑀬𑀫𑀕𑁆𑀕𑀁 𑀧𑀢𑁆𑀯𑀸 𑀅𑀢𑀺𑀯𑀢𑁆𑀢𑀢𑀺. 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀯𑀝𑁆𑀝𑀯𑀺𑀯𑀝𑁆𑀝𑀁 𑀓𑀣𑀺𑀢𑀁.

𑁯. 𑀤𑀸𑀦𑀫𑀳𑀧𑁆𑀨𑀮𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁨. 𑀦𑀯𑀫𑁂 𑀲𑀸𑀧𑁂𑀔𑁄𑀢𑀺 𑀲𑀢𑀡𑁆𑀳𑁄. 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑁄𑀢𑀺 𑀯𑀺𑀧𑀸𑀓𑁂 𑀩𑀤𑁆𑀥𑀘𑀺𑀢𑁆𑀢𑁄. 𑀲𑀦𑁆𑀦𑀺𑀥𑀺𑀧𑁂𑀔𑁄𑀢𑀺 𑀦𑀺𑀥𑀸𑀦𑀧𑁂𑀔𑁄 𑀳𑀼𑀢𑁆𑀯𑀸. 𑀧𑁂𑀘𑁆𑀘𑀸𑀢𑀺 𑀧𑀭𑀮𑁄𑀓𑀁 𑀕𑀦𑁆𑀢𑁆𑀯𑀸. 𑀢𑀁 𑀓𑀫𑁆𑀫𑀁 𑀔𑁂𑀧𑁂𑀢𑁆𑀯𑀸𑀢𑀺 𑀢𑀁 𑀓𑀫𑁆𑀫𑀯𑀺𑀧𑀸𑀓𑀁 𑀔𑁂𑀧𑁂𑀢𑁆𑀯𑀸. 𑀇𑀤𑁆𑀥𑀺𑀦𑁆𑀢𑀺 𑀯𑀺𑀧𑀸𑀓𑀺𑀤𑁆𑀥𑀺𑀁. 𑀬𑀲𑀦𑁆𑀢𑀺 𑀧𑀭𑀺𑀯𑀸𑀭𑀲𑀫𑁆𑀧𑀤𑀁. 𑀆𑀥𑀺𑀧𑀘𑁆𑀘𑀦𑁆𑀢𑀺 𑀚𑁂𑀝𑁆𑀞𑀪𑀸𑀯𑀓𑀸𑀭𑀡𑀁. 𑀆𑀕𑀦𑁆𑀢𑀸 𑀇𑀢𑁆𑀣𑀢𑁆𑀢𑀦𑁆𑀢𑀺 𑀇𑀢𑁆𑀣𑀪𑀸𑀯𑀁 𑀇𑀫𑁂 𑀧𑀜𑁆𑀘𑀓𑁆𑀔𑀦𑁆𑀥𑁂 𑀧𑀼𑀦 𑀆𑀕𑀦𑁆𑀢𑀸, 𑀦 𑀢𑀢𑁆𑀭𑀽𑀧𑀧𑀢𑁆𑀢𑀺𑀓𑁄 𑀦 𑀉𑀧𑀭𑀽𑀧𑀧𑀢𑁆𑀢𑀺𑀓𑁄, 𑀳𑁂𑀝𑁆𑀞𑀸𑀕𑀸𑀫𑀻𑀬𑁂𑀯 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀲𑀸𑀳𑀼 𑀤𑀸𑀦𑀦𑁆𑀢𑀺 𑀤𑀸𑀦𑀁 𑀦𑀸𑀫𑁂𑀢𑀁 𑀲𑀸𑀥𑀼 𑀪𑀤𑁆𑀤𑀓𑀁 𑀲𑀼𑀦𑁆𑀤𑀭𑀁. 𑀢𑀸𑀦𑀺 𑀫𑀳𑀸𑀬𑀜𑁆𑀜𑀸𑀦𑀻𑀢𑀺 𑀢𑀸𑀦𑀺 𑀲𑀧𑁆𑀧𑀺𑀦𑀯𑀦𑀻𑀢𑀤𑀥𑀺𑀫𑀥𑀼𑀨𑀸𑀡𑀺𑀢𑀸𑀤𑀻𑀳𑀺 𑀦𑀺𑀝𑁆𑀞𑀸𑀦𑀁 𑀕𑀢𑀸𑀦𑀺 𑀫𑀳𑀸𑀤𑀸𑀦𑀸𑀦𑀺. 𑀘𑀺𑀢𑁆𑀢𑀸𑀮𑀗𑁆𑀓𑀸𑀭𑀘𑀺𑀢𑁆𑀢𑀧𑀭𑀺𑀓𑁆𑀔𑀸𑀭𑀦𑁆𑀢𑀺 𑀲𑀫𑀣𑀯𑀺𑀧𑀲𑁆𑀲𑀦𑀸𑀘𑀺𑀢𑁆𑀢𑀲𑁆𑀲 𑀅𑀮𑀗𑁆𑀓𑀸𑀭𑀪𑀽𑀢𑀜𑁆𑀘𑁂𑀯 𑀧𑀭𑀺𑀯𑀸𑀭𑀪𑀽𑀢𑀜𑁆𑀘. 𑀩𑁆𑀭𑀳𑁆𑀫𑀓𑀸𑀬𑀺𑀓𑀸𑀦𑀁 𑀤𑁂𑀯𑀸𑀦𑀁 𑀲𑀳𑀩𑁆𑀬𑀢𑀦𑁆𑀢𑀺 𑀦 𑀲𑀓𑁆𑀓𑀸 𑀢𑀢𑁆𑀣 𑀤𑀸𑀦𑁂𑀦 𑀉𑀧𑀧𑀚𑁆𑀚𑀺𑀢𑀼𑀁. 𑀬𑀲𑁆𑀫𑀸 𑀧𑀦 𑀢𑀁 𑀲𑀫𑀣𑀯𑀺𑀧𑀲𑁆𑀲𑀦𑀸𑀘𑀺𑀢𑁆𑀢𑀲𑁆𑀲 𑀅𑀮𑀗𑁆𑀓𑀸𑀭𑀪𑀽𑀢𑀁, 𑀢𑀲𑁆𑀫𑀸 𑀢𑁂𑀦 𑀤𑀸𑀦𑀸𑀮𑀗𑁆𑀓𑀢𑁂𑀦 𑀘𑀺𑀢𑁆𑀢𑁂𑀦 𑀛𑀸𑀦𑀜𑁆𑀘𑁂𑀯 𑀅𑀭𑀺𑀬𑀫𑀕𑁆𑀕𑀜𑁆𑀘 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀛𑀸𑀦𑁂𑀦 𑀢𑀢𑁆𑀣 𑀉𑀧𑀧𑀚𑁆𑀚𑀢𑀺. 𑀅𑀦𑀸𑀕𑀸𑀫𑀻 𑀳𑁄𑀢𑀻𑀢𑀺 𑀛𑀸𑀦𑀸𑀦𑀸𑀕𑀸𑀫𑀻 𑀦𑀸𑀫 𑀳𑁄𑀢𑀺. 𑀅𑀦𑀸𑀕𑀦𑁆𑀢𑀸 𑀇𑀢𑁆𑀣𑀢𑁆𑀢𑀦𑁆𑀢𑀺 𑀧𑀼𑀦 𑀇𑀢𑁆𑀣𑀪𑀸𑀯𑀁 𑀦 𑀆𑀕𑀦𑁆𑀢𑀸, 𑀉𑀧𑀭𑀽𑀧𑀧𑀢𑁆𑀢𑀺𑀓𑁄 𑀯𑀸 𑀢𑀢𑁆𑀭𑀽𑀧𑀧𑀢𑁆𑀢𑀺𑀓𑁄 𑀯𑀸 𑀳𑀼𑀢𑁆𑀯𑀸 𑀢𑀢𑁆𑀣𑁂𑀯 𑀧𑀭𑀺𑀦𑀺𑀩𑁆𑀩𑀸𑀬𑀢𑀺. 𑀇𑀢𑀺 𑀇𑀫𑁂𑀲𑀼 𑀤𑀸𑀦𑁂𑀲𑀼 𑀧𑀞𑀫𑀁 𑀢𑀡𑁆𑀳𑀼𑀢𑁆𑀢𑀭𑀺𑀬𑀤𑀸𑀦𑀁, 𑀤𑀼𑀢𑀺𑀬𑀁 𑀘𑀺𑀢𑁆𑀢𑀻𑀓𑀸𑀭𑀤𑀸𑀦𑀁, 𑀢𑀢𑀺𑀬𑀁 𑀳𑀺𑀭𑁄𑀢𑁆𑀢𑀧𑁆𑀧𑀤𑀸𑀦𑀁, 𑀘𑀢𑀼𑀢𑁆𑀣𑀁 𑀦𑀺𑀭𑀯𑀲𑁂𑀲𑀤𑀸𑀦𑀁, 𑀧𑀜𑁆𑀘𑀫𑀁 𑀤𑀓𑁆𑀔𑀺𑀡𑁂𑀬𑁆𑀬𑀤𑀸𑀦𑀁, 𑀙𑀝𑁆𑀞𑀁 𑀲𑁄𑀫𑀦𑀲𑁆𑀲𑀼𑀧𑀯𑀺𑀘𑀸𑀭𑀤𑀸𑀦𑀁, 𑀲𑀢𑁆𑀢𑀫𑀁 𑀅𑀮𑀗𑁆𑀓𑀸𑀭𑀧𑀭𑀺𑀯𑀸𑀭𑀤𑀸𑀦𑀁 𑀦𑀸𑀫𑀸𑀢𑀺.

𑁧𑁦. 𑀦𑀦𑁆𑀤𑀫𑀸𑀢𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁩. 𑀤𑀲𑀫𑀁 𑀅𑀢𑁆𑀣𑀼𑀧𑁆𑀧𑀢𑁆𑀢𑀺𑀯𑀲𑁂𑀦 𑀤𑁂𑀲𑀺𑀢𑀁. 𑀲𑀢𑁆𑀣𑀸 𑀓𑀺𑀭 𑀯𑀼𑀢𑁆𑀣𑀯𑀲𑁆𑀲𑁄 𑀧𑀯𑀸𑀭𑁂𑀢𑁆𑀯𑀸 𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑁂 𑀑𑀳𑀸𑀬 ‘‘𑀤𑀓𑁆𑀔𑀺𑀡𑀸𑀕𑀺𑀭𑀺𑀁 𑀘𑀸𑀭𑀺𑀓𑀁 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀦𑀺𑀓𑁆𑀔𑀫𑀺, 𑀭𑀸𑀚𑀸 𑀧𑀲𑁂𑀦𑀤𑀺 𑀓𑁄𑀲𑀮𑁄, 𑀅𑀦𑀸𑀣𑀧𑀺𑀡𑁆𑀟𑀺𑀓𑁄 𑀕𑀳𑀧𑀢𑀺, 𑀯𑀺𑀲𑀸𑀔𑀸 𑀫𑀳𑀸𑀉𑀧𑀸𑀲𑀺𑀓𑀸, 𑀅𑀜𑁆𑀜𑁂 𑀘 𑀩𑀳𑀼𑀚𑀦𑀸 𑀤𑀲𑀩𑀮𑀁 𑀦𑀺𑀯𑀢𑁆𑀢𑁂𑀢𑀼𑀁 𑀦𑀸𑀲𑀓𑁆𑀔𑀺𑀁𑀲𑀼. 𑀅𑀦𑀸𑀣𑀧𑀺𑀡𑁆𑀟𑀺𑀓𑁄 𑀕𑀳𑀧𑀢𑀺 ‘‘𑀲𑀢𑁆𑀣𑀸𑀭𑀁 𑀦𑀺𑀯𑀢𑁆𑀢𑁂𑀢𑀼𑀁 𑀦𑀸𑀲𑀓𑁆𑀔𑀺’’𑀦𑁆𑀢𑀺 𑀭𑀳𑁄 𑀘𑀺𑀦𑁆𑀢𑀬𑀫𑀸𑀦𑁄 𑀦𑀺𑀲𑀻𑀤𑀺. 𑀅𑀣 𑀦𑀁 𑀧𑀼𑀡𑁆𑀡𑀸 𑀦𑀸𑀫 𑀤𑀸𑀲𑀻 𑀤𑀺𑀲𑁆𑀯𑀸 ‘‘𑀓𑀺𑀁 𑀦𑀼 𑀔𑁄 𑀢𑁂, 𑀲𑀸𑀫𑀺, 𑀦 𑀧𑀼𑀩𑁆𑀩𑁂 𑀯𑀺𑀬 𑀇𑀦𑁆𑀤𑁆𑀭𑀺𑀬𑀸𑀦𑀺 𑀯𑀺𑀧𑁆𑀧𑀲𑀦𑁆𑀦𑀸𑀦𑀻’’𑀢𑀺 𑀧𑀼𑀘𑁆𑀙𑀺. 𑀆𑀫, 𑀧𑀼𑀡𑁆𑀡𑁂, 𑀲𑀢𑁆𑀣𑀸 𑀘𑀸𑀭𑀺𑀓𑀁 𑀧𑀓𑁆𑀓𑀦𑁆𑀢𑁄, 𑀢𑀫𑀳𑀁 𑀦𑀺𑀯𑀢𑁆𑀢𑁂𑀢𑀼𑀁 𑀦𑀸𑀲𑀓𑁆𑀔𑀺𑀁. 𑀦 𑀔𑁄 𑀧𑀦 𑀲𑀓𑁆𑀓𑀸 𑀚𑀸𑀦𑀺𑀢𑀼𑀁 𑀧𑀼𑀦 𑀲𑀻𑀖𑀁 𑀆𑀕𑀘𑁆𑀙𑁂𑀬𑁆𑀬 𑀯𑀸 𑀦 𑀯𑀸, 𑀢𑁂𑀦𑀸𑀳𑀁 𑀘𑀺𑀦𑁆𑀢𑀬𑀫𑀸𑀦𑁄 𑀦𑀺𑀲𑀺𑀦𑁆𑀦𑁄𑀢𑀺. 𑀲𑀘𑀸𑀳𑀁 𑀤𑀲𑀩𑀮𑀁 𑀦𑀺𑀯𑀢𑁆𑀢𑁂𑀬𑁆𑀬𑀁, 𑀓𑀺𑀁 𑀫𑁂 𑀓𑀭𑁂𑀬𑁆𑀬𑀸𑀲𑀻𑀢𑀺? 𑀪𑀼𑀚𑀺𑀲𑁆𑀲𑀁 𑀢𑀁 𑀓𑀭𑀺𑀲𑁆𑀲𑀸𑀫𑀻𑀢𑀺. 𑀲𑀸 𑀕𑀦𑁆𑀢𑁆𑀯𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 ‘‘𑀦𑀺𑀯𑀢𑁆𑀢𑀣, 𑀪𑀦𑁆𑀢𑁂’’𑀢𑀺 𑀆𑀳. 𑀫𑀫 𑀦𑀺𑀯𑀢𑁆𑀢𑀦𑀧𑀘𑁆𑀘𑀬𑀸 𑀢𑁆𑀯𑀁 𑀓𑀺𑀁 𑀓𑀭𑀺𑀲𑁆𑀲𑀲𑀻𑀢𑀺? 𑀢𑀼𑀫𑁆𑀳𑁂, 𑀪𑀦𑁆𑀢𑁂, 𑀫𑀫 𑀧𑀭𑀸𑀥𑀻𑀦𑀪𑀸𑀯𑀁 𑀚𑀸𑀦𑀸𑀣, 𑀅𑀜𑁆𑀜𑀁 𑀓𑀺𑀜𑁆𑀘𑀺 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀫𑀺, 𑀲𑀭𑀡𑁂𑀲𑀼 𑀧𑀦 𑀧𑀢𑀺𑀝𑁆𑀞𑀸𑀬 𑀧𑀜𑁆𑀘 𑀲𑀻𑀮𑀸𑀦𑀺 𑀭𑀓𑁆𑀔𑀺𑀲𑁆𑀲𑀸𑀫𑀻𑀢𑀺. 𑀲𑀸𑀥𑀼 𑀲𑀸𑀥𑀼 𑀧𑀼𑀡𑁆𑀡𑁂𑀢𑀺, 𑀲𑀢𑁆𑀣𑀸 𑀥𑀫𑁆𑀫𑀕𑀸𑀭𑀯𑁂𑀦 𑀏𑀓𑀧𑀤𑀲𑁆𑀫𑀺𑀜𑁆𑀜𑁂𑀯 𑀦𑀺𑀯𑀢𑁆𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋 ‘‘𑀥𑀫𑁆𑀫𑀕𑀭𑀼, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁄 𑀥𑀫𑁆𑀫𑀕𑀸𑀭𑀯𑁄’’𑀢𑀺 (𑀅. 𑀦𑀺. 𑁫.𑁯𑁯).

𑀲𑀢𑁆𑀣𑀸 𑀦𑀺𑀯𑀢𑁆𑀢𑀺𑀢𑁆𑀯𑀸 𑀚𑁂𑀢𑀯𑀦𑀫𑀳𑀸𑀯𑀺𑀳𑀸𑀭𑀁 𑀧𑀸𑀯𑀺𑀲𑀺. 𑀫𑀳𑀸𑀚𑀦𑁄 𑀧𑀼𑀡𑁆𑀡𑀸𑀬 𑀲𑀸𑀥𑀼𑀓𑀸𑀭𑀲𑀳𑀲𑁆𑀲𑀸𑀦𑀺 𑀅𑀤𑀸𑀲𑀺. 𑀲𑀢𑁆𑀣𑀸 𑀢𑀲𑁆𑀫𑀺𑀁 𑀲𑀫𑀸𑀕𑀫𑁂 𑀥𑀫𑁆𑀫𑀁 𑀤𑁂𑀲𑁂𑀲𑀺, 𑀘𑀢𑀼𑀭𑀸𑀲𑀻𑀢𑀺𑀧𑀸𑀡𑀲𑀳𑀲𑁆𑀲𑀸𑀦𑀺 𑀅𑀫𑀢𑀧𑀸𑀦𑀁 𑀧𑀺𑀯𑀺𑀁𑀲𑀼. 𑀧𑀼𑀡𑁆𑀡𑀸𑀧𑀺 𑀲𑁂𑀝𑁆𑀞𑀺𑀦𑀸 𑀅𑀦𑀼𑀜𑁆𑀜𑀸𑀢𑀸 𑀪𑀺𑀓𑁆𑀔𑀼𑀦𑀺𑀉𑀧𑀲𑁆𑀲𑀬𑀁 𑀕𑀦𑁆𑀢𑁆𑀯𑀸 𑀧𑀩𑁆𑀩𑀚𑀺. 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑁂 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀅𑀳𑀁 𑀬𑀁 𑀤𑀺𑀲𑀁 𑀘𑀸𑀭𑀺𑀓𑀸𑀬 𑀦𑀺𑀓𑁆𑀔𑀦𑁆𑀢𑁄, 𑀢𑀢𑁆𑀣 𑀦 𑀕𑀘𑁆𑀙𑀸𑀫𑀺. 𑀢𑀼𑀫𑁆𑀳𑁂 𑀢𑀼𑀫𑁆𑀳𑀸𑀓𑀁 𑀧𑀭𑀺𑀲𑀸𑀬 𑀲𑀤𑁆𑀥𑀺𑀁 𑀢𑀁 𑀤𑀺𑀲𑀁 𑀘𑀸𑀭𑀺𑀓𑀁 𑀕𑀘𑁆𑀙𑀣𑀸’’𑀢𑀺 𑀯𑀢𑁆𑀯𑀸 𑀉𑀬𑁆𑀬𑁄𑀚𑁂𑀲𑀺. 𑀇𑀫𑀺𑀲𑁆𑀲𑀁 𑀅𑀢𑁆𑀣𑀼𑀧𑁆𑀧𑀢𑁆𑀢𑀺𑀬𑀁 𑀏𑀓𑀁 𑀲𑀫𑀬𑀁 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀢𑀢𑁆𑀣 𑀯𑁂𑀴𑀼𑀓𑀡𑁆𑀟𑀓𑀻𑀢𑀺 𑀯𑁂𑀴𑀼𑀓𑀡𑁆𑀝𑀓𑀦𑀕𑀭𑀯𑀸𑀲𑀺𑀦𑀻. 𑀢𑀲𑁆𑀲 𑀓𑀺𑀭 𑀦𑀕𑀭𑀲𑁆𑀲 𑀧𑀸𑀓𑀸𑀭𑀕𑀼𑀢𑁆𑀢𑀢𑁆𑀣𑀸𑀬 𑀧𑀸𑀓𑀸𑀭𑀧𑀭𑀺𑀬𑀦𑁆𑀢𑁂𑀦 𑀯𑁂𑀴𑀽 𑀭𑁄𑀧𑀺𑀢𑀸, 𑀢𑁂𑀦𑀲𑁆𑀲 𑀯𑁂𑀴𑀼𑀓𑀡𑁆𑀝𑀓𑀦𑁆𑀢𑁂𑀯 𑀦𑀸𑀫𑀁 𑀚𑀸𑀢𑀁. 𑀧𑀸𑀭𑀸𑀬𑀦𑀦𑁆𑀢𑀺 𑀦𑀺𑀩𑁆𑀩𑀸𑀦𑀲𑀗𑁆𑀔𑀸𑀢𑀧𑀸𑀭𑀁 𑀅𑀬𑀦𑀢𑁄 𑀧𑀸𑀭𑀸𑀬𑀦𑀦𑁆𑀢𑀺 𑀮𑀤𑁆𑀥𑀯𑁄𑀳𑀸𑀭𑀁 𑀥𑀫𑁆𑀫𑀁. 𑀲𑀭𑁂𑀦 𑀪𑀸𑀲𑀢𑀻𑀢𑀺 𑀲𑀢𑁆𑀢𑀪𑀽𑀫𑀺𑀓𑀲𑁆𑀲 𑀧𑀸𑀲𑀸𑀤𑀲𑁆𑀲 𑀉𑀧𑀭𑀺𑀫𑀢𑀮𑁂 𑀲𑀼𑀲𑀁𑀯𑀺𑀳𑀺𑀢𑀸𑀭𑀓𑁆𑀔𑀝𑁆𑀞𑀸𑀦𑁂 𑀦𑀺𑀲𑀺𑀦𑁆𑀦𑀸 𑀲𑀫𑀸𑀧𑀢𑁆𑀢𑀺𑀩𑀮𑁂𑀦 𑀭𑀢𑁆𑀢𑀺𑀪𑀸𑀕𑀁 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀸𑀬 ‘‘𑀇𑀫𑀁 𑀭𑀢𑁆𑀢𑀸𑀯𑀲𑁂𑀲𑀁 𑀓𑀢𑀭𑀸𑀬 𑀭𑀢𑀺𑀬𑀸 𑀯𑀻𑀢𑀺𑀦𑀸𑀫𑁂𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀥𑀫𑁆𑀫𑀭𑀢𑀺𑀬𑀸’’𑀢𑀺 𑀓𑀢𑀲𑀦𑁆𑀦𑀺𑀝𑁆𑀞𑀸𑀦𑀸 𑀢𑀻𑀡𑀺 𑀨𑀮𑀸𑀦𑀺 𑀧𑀢𑁆𑀢𑀸 𑀅𑀭𑀺𑀬𑀲𑀸𑀯𑀺𑀓𑀸 𑀅𑀟𑁆𑀠𑀢𑁂𑀬𑁆𑀬𑀕𑀸𑀣𑀸𑀲𑀢𑀧𑀭𑀺𑀫𑀸𑀡𑀁 𑀧𑀸𑀭𑀸𑀬𑀦𑀲𑀼𑀢𑁆𑀢𑀁 𑀫𑀥𑀼𑀭𑁂𑀦 𑀲𑀭𑀪𑀜𑁆𑀜𑁂𑀦 𑀪𑀸𑀲𑀢𑀺. 𑀅𑀲𑁆𑀲𑁄𑀲𑀺 𑀔𑁄𑀢𑀺 𑀆𑀓𑀸𑀲𑀝𑁆𑀞𑀓𑀯𑀺𑀫𑀸𑀦𑀸𑀦𑀺 𑀧𑀭𑀺𑀳𑀭𑀺𑀢𑁆𑀯𑀸 𑀢𑀲𑁆𑀲 𑀧𑀸𑀲𑀸𑀤𑀲𑁆𑀲 𑀉𑀧𑀭𑀺𑀪𑀸𑀕𑀁 𑀕𑀢𑁂𑀦 𑀫𑀕𑁆𑀕𑁂𑀦 𑀦𑀭𑀯𑀸𑀳𑀦𑀬𑀸𑀦𑀁 𑀆𑀭𑀼𑀬𑁆𑀳 𑀕𑀘𑁆𑀙𑀫𑀸𑀦𑁄 𑀅𑀲𑁆𑀲𑁄𑀲𑀺. 𑀓𑀣𑀸𑀧𑀭𑀺𑀬𑁄𑀲𑀸𑀦𑀁 𑀆𑀕𑀫𑀬𑀫𑀸𑀦𑁄 𑀅𑀝𑁆𑀞𑀸𑀲𑀻𑀢𑀺 ‘‘𑀓𑀺𑀁 𑀲𑀤𑁆𑀤𑁄 𑀏𑀲 𑀪𑀡𑁂’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀦𑀦𑁆𑀤𑀫𑀸𑀢𑀸𑀬 𑀉𑀧𑀸𑀲𑀺𑀓𑀸𑀬 𑀲𑀭𑀪𑀜𑁆𑀜𑀲𑀤𑁆𑀤𑁄’’𑀢𑀺 𑀯𑀼𑀢𑁆𑀢𑁂 𑀑𑀢𑀭𑀺𑀢𑁆𑀯𑀸 ‘‘𑀇𑀤𑀫𑀯𑁄𑀘𑀸’’𑀢𑀺 𑀇𑀤𑀁 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑀁 𑀑𑀮𑁄𑀓𑁂𑀦𑁆𑀢𑁄 𑀅𑀯𑀺𑀤𑀽𑀭𑀝𑁆𑀞𑀸𑀦𑁂 𑀆𑀓𑀸𑀲𑁂 𑀅𑀝𑁆𑀞𑀸𑀲𑀺.

𑀲𑀸𑀥𑀼 𑀪𑀕𑀺𑀦𑀺, 𑀲𑀸𑀥𑀼 𑀪𑀕𑀺𑀦𑀻𑀢𑀺 ‘‘𑀲𑀼𑀕𑁆𑀕𑀳𑀺𑀢𑀸 𑀢𑁂 𑀪𑀕𑀺𑀦𑀺 𑀥𑀫𑁆𑀫𑀤𑁂𑀲𑀦𑀸 𑀲𑀼𑀓𑀣𑀺𑀢𑀸, 𑀧𑀸𑀲𑀸𑀡𑀓𑀘𑁂𑀢𑀺𑀬𑁂 𑀦𑀺𑀲𑀻𑀤𑀺𑀢𑁆𑀯𑀸 𑀲𑁄𑀴𑀲𑀦𑁆𑀦𑀁 𑀧𑀸𑀭𑀸𑀬𑀦𑀺𑀓𑀩𑁆𑀭𑀸𑀳𑁆𑀫𑀡𑀸𑀦𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀓𑀣𑀺𑀢𑀤𑀺𑀯𑀲𑁂 𑀘 𑀅𑀚𑁆𑀚 𑀘 𑀦 𑀓𑀺𑀜𑁆𑀘𑀺 𑀅𑀦𑁆𑀢𑀭𑀁 𑀧𑀲𑁆𑀲𑀸𑀫𑀺, 𑀫𑀚𑁆𑀛𑁂 𑀪𑀺𑀦𑁆𑀦𑀲𑀼𑀯𑀡𑁆𑀡𑀁 𑀯𑀺𑀬 𑀢𑁂 𑀲𑀢𑁆𑀣𑀼 𑀓𑀣𑀺𑀢𑁂𑀦 𑀲𑀤𑁆𑀥𑀺𑀁 𑀲𑀤𑀺𑀲𑀫𑁂𑀯 𑀓𑀣𑀺𑀢’’𑀦𑁆𑀢𑀺 𑀯𑀢𑁆𑀯𑀸 𑀲𑀸𑀥𑀼𑀓𑀸𑀭𑀁 𑀤𑀤𑀦𑁆𑀢𑁄 𑀏𑀯𑀫𑀸𑀳. 𑀓𑁄 𑀧𑀦𑁂𑀲𑁄 𑀪𑀤𑁆𑀭𑀫𑀼𑀔𑀸𑀢𑀺 𑀇𑀫𑀲𑁆𑀫𑀺𑀁 𑀲𑀼𑀲𑀁𑀯𑀺𑀳𑀺𑀢𑀸𑀭𑀓𑁆𑀔𑀝𑁆𑀞𑀸𑀦𑁂 𑀏𑀯𑀁 𑀫𑀳𑀦𑁆𑀢𑁂𑀦 𑀲𑀤𑁆𑀤𑁂𑀦 𑀓𑁄 𑀦𑀸𑀫𑁂𑀲, 𑀪𑀤𑁆𑀭𑀫𑀼𑀔, 𑀮𑀤𑁆𑀥𑀫𑀼𑀔, 𑀓𑀺𑀁 𑀦𑀸𑀕𑁄 𑀲𑀼𑀧𑀡𑁆𑀡𑁄 𑀤𑁂𑀯𑁄 𑀫𑀸𑀭𑁄 𑀩𑁆𑀭𑀳𑁆𑀫𑀸𑀢𑀺 𑀲𑀼𑀯𑀡𑁆𑀡𑀧𑀝𑁆𑀝𑀯𑀡𑁆𑀡𑀁 𑀯𑀸𑀢𑀧𑀸𑀦𑀁 𑀯𑀺𑀯𑀭𑀺𑀢𑁆𑀯𑀸 𑀯𑀺𑀕𑀢𑀲𑀸𑀭𑀚𑁆𑀚𑀸 𑀢𑀻𑀡𑀺 𑀨𑀮𑀸𑀦𑀺 𑀧𑀢𑁆𑀢𑀸 𑀅𑀭𑀺𑀬𑀲𑀸𑀯𑀺𑀓𑀸 𑀯𑁂𑀲𑁆𑀲𑀯𑀡𑁂𑀦 𑀲𑀤𑁆𑀥𑀺𑀁 𑀓𑀣𑀬𑀫𑀸𑀦𑀸 𑀏𑀯𑀫𑀸𑀳. 𑀅𑀳𑀁 𑀢𑁂 𑀪𑀕𑀺𑀦𑀺 𑀪𑀸𑀢𑀸𑀢𑀺 𑀲𑀬𑀁 𑀲𑁄𑀢𑀸𑀧𑀦𑁆𑀦𑀢𑁆𑀢𑀸 𑀅𑀦𑀸𑀕𑀸𑀫𑀺𑀅𑀭𑀺𑀬𑀲𑀸𑀯𑀺𑀓𑀁 𑀚𑁂𑀝𑁆𑀞𑀺𑀓𑀁 𑀫𑀜𑁆𑀜𑀫𑀸𑀦𑁄 ‘‘𑀪𑀕𑀺𑀦𑀻’’𑀢𑀺 𑀯𑀢𑁆𑀯𑀸 𑀧𑀼𑀦 𑀢𑀁 𑀧𑀞𑀫𑀯𑀬𑁂 𑀞𑀺𑀢𑀢𑁆𑀢𑀸 𑀅𑀢𑁆𑀢𑀦𑁄 𑀓𑀦𑀺𑀝𑁆𑀞𑀁, 𑀅𑀢𑁆𑀢𑀸𑀦𑀁 𑀧𑀦 𑀦𑀯𑀼𑀢𑀺𑀯𑀲𑁆𑀲𑀲𑀢𑀲𑀳𑀲𑁆𑀲𑀸𑀬𑀼𑀓𑀢𑁆𑀢𑀸 𑀫𑀳𑀮𑁆𑀮𑀓𑀢𑀭𑀁 𑀫𑀜𑁆𑀜𑀫𑀸𑀦𑁄 ‘‘𑀪𑀸𑀢𑀸’’𑀢𑀺 𑀆𑀳. 𑀲𑀸𑀥𑀼 𑀪𑀤𑁆𑀭𑀫𑀼𑀔𑀸𑀢𑀺, 𑀪𑀤𑁆𑀭𑀫𑀼𑀔, 𑀲𑀸𑀥𑀼 𑀲𑀼𑀦𑁆𑀤𑀭𑀁, 𑀲𑁆𑀯𑀸𑀕𑀫𑀦𑀁 𑀢𑁂 𑀆𑀕𑀫𑀦𑀁, 𑀆𑀕𑀦𑁆𑀢𑀼𑀁 𑀬𑀼𑀢𑁆𑀢𑀝𑁆𑀞𑀸𑀦𑀫𑁂𑀯𑀲𑀺 𑀆𑀕𑀢𑁄𑀢𑀺 𑀅𑀢𑁆𑀣𑁄. 𑀇𑀤𑀁 𑀢𑁂 𑀳𑁄𑀢𑀼 𑀆𑀢𑀺𑀣𑁂𑀬𑁆𑀬𑀦𑁆𑀢𑀺 𑀇𑀤𑀫𑁂𑀯 𑀥𑀫𑁆𑀫𑀪𑀡𑀦𑀁 𑀢𑀯 𑀅𑀢𑀺𑀣𑀺𑀧𑀡𑁆𑀡𑀸𑀓𑀸𑀭𑁄 𑀳𑁄𑀢𑀼, 𑀦 𑀳𑀺 𑀢𑁂 𑀅𑀜𑁆𑀜𑀁 𑀇𑀢𑁄 𑀉𑀢𑁆𑀢𑀭𑀺𑀢𑀭𑀁 𑀤𑀸𑀢𑀩𑁆𑀩𑀁 𑀧𑀲𑁆𑀲𑀸𑀫𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀏𑀯𑀜𑁆𑀘𑁂𑀯 𑀫𑁂 𑀪𑀯𑀺𑀲𑁆𑀲𑀢𑀺 𑀆𑀢𑀺𑀣𑁂𑀬𑁆𑀬𑀦𑁆𑀢𑀺 𑀏𑀯𑀁 𑀅𑀢𑁆𑀢𑀦𑁄 𑀧𑀢𑁆𑀢𑀺𑀤𑀸𑀦𑀁 𑀬𑀸𑀘𑀺𑀢𑁆𑀯𑀸 ‘‘𑀅𑀬𑀁 𑀢𑁂 𑀥𑀫𑁆𑀫𑀓𑀣𑀺𑀓𑀲𑀓𑁆𑀓𑀸𑀭𑁄’’𑀢𑀺 𑀅𑀟𑁆𑀠𑀢𑁂𑀴𑀲𑀸𑀦𑀺 𑀓𑁄𑀝𑁆𑀞𑀲𑀢𑀸𑀦𑀺 𑀭𑀢𑁆𑀢𑀲𑀸𑀮𑀻𑀦𑀁 𑀧𑀽𑀭𑁂𑀢𑁆𑀯𑀸 ‘‘𑀬𑀸𑀯𑀸𑀬𑀁 𑀉𑀧𑀸𑀲𑀺𑀓𑀸 𑀘𑀭𑀢𑀺, 𑀢𑀸𑀯 𑀫𑀸 𑀔𑀬𑀁 𑀕𑀫𑀺𑀁𑀲𑀽’’𑀢𑀺 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀬𑀸𑀯 𑀉𑀧𑀸𑀲𑀺𑀓𑀸 𑀅𑀝𑁆𑀞𑀸𑀲𑀺, 𑀢𑀸𑀯 𑀓𑁄𑀝𑁆𑀞𑀸𑀦𑀁 𑀳𑁂𑀝𑁆𑀞𑀺𑀫𑀢𑀮𑀁 𑀦𑀸𑀫 𑀤𑀝𑁆𑀞𑀼𑀁 𑀦𑀸𑀲𑀓𑁆𑀔𑀺𑀁𑀲𑀼. 𑀢𑀢𑁄 𑀧𑀝𑁆𑀞𑀸𑀬 ‘‘𑀦𑀦𑁆𑀤𑀫𑀸𑀢𑀸𑀬 𑀓𑁄𑀝𑁆𑀞𑀸𑀕𑀸𑀭𑀁 𑀯𑀺𑀬𑀸’’𑀢𑀺 𑀯𑁄𑀳𑀸𑀭𑁄 𑀉𑀤𑀧𑀸𑀤𑀺.

𑀅𑀓𑀢𑀧𑀸𑀢𑀭𑀸𑀲𑁄𑀢𑀺 𑀅𑀪𑀼𑀢𑁆𑀢𑀧𑀸𑀢𑀭𑀸𑀲𑁄. 𑀧𑀼𑀜𑁆𑀜𑀦𑁆𑀢𑀺 𑀧𑀼𑀩𑁆𑀩𑀘𑁂𑀢𑀦𑀸 𑀘 𑀫𑀼𑀜𑁆𑀘𑀦𑀘𑁂𑀢𑀦𑀸 𑀘. 𑀧𑀼𑀜𑁆𑀜𑀫𑀳𑀻𑀢𑀺 𑀅𑀧𑀭𑀘𑁂𑀢𑀦𑀸. 𑀲𑀼𑀔𑀸𑀬 𑀳𑁄𑀢𑀽𑀢𑀺 𑀲𑀼𑀔𑀢𑁆𑀣𑀸𑀬 𑀳𑀺𑀢𑀢𑁆𑀣𑀸𑀬 𑀳𑁄𑀢𑀼. 𑀏𑀯𑀁 𑀅𑀢𑁆𑀢𑀦𑁄 𑀤𑀸𑀦𑁂 𑀯𑁂𑀲𑁆𑀲𑀯𑀡𑀲𑁆𑀲 𑀧𑀢𑁆𑀢𑀺𑀁 𑀅𑀤𑀸𑀲𑀺.

𑀧𑀓𑀭𑀡𑁂𑀢𑀺 𑀓𑀸𑀭𑀡𑁂. 𑀑𑀓𑁆𑀓𑀲𑁆𑀲 𑀧𑀲𑀬𑁆𑀳𑀸𑀢𑀺 𑀆𑀓𑀟𑁆𑀠𑀺𑀢𑁆𑀯𑀸 𑀅𑀪𑀺𑀪𑀯𑀺𑀢𑁆𑀯𑀸. 𑀬𑀓𑁆𑀔𑀬𑁄𑀦𑀺𑀦𑁆𑀢𑀺 𑀪𑀼𑀫𑁆𑀫𑀤𑁂𑀯𑀢𑀸𑀪𑀸𑀯𑀁. 𑀢𑁂𑀦𑁂𑀯 𑀧𑀼𑀭𑀺𑀫𑁂𑀦 𑀅𑀢𑁆𑀢𑀪𑀸𑀯𑁂𑀦 𑀉𑀤𑁆𑀤𑀲𑁆𑀲𑁂𑀢𑀻𑀢𑀺 𑀧𑀼𑀭𑀺𑀫𑀲𑀭𑀻𑀭𑀲𑀤𑀺𑀲𑀫𑁂𑀯 𑀲𑀭𑀻𑀭𑀁 𑀫𑀸𑀧𑁂𑀢𑁆𑀯𑀸 𑀅𑀮𑀗𑁆𑀓𑀢𑀧𑀝𑀺𑀬𑀢𑁆𑀢𑁄 𑀲𑀺𑀭𑀺𑀕𑀩𑁆𑀪𑀲𑀬𑀦𑀢𑀮𑁂 𑀅𑀢𑁆𑀢𑀸𑀦𑀁 𑀤𑀲𑁆𑀲𑁂𑀢𑀺. 𑀉𑀧𑀸𑀲𑀺𑀓𑀸 𑀧𑀝𑀺𑀤𑁂𑀲𑀺𑀢𑀸𑀢𑀺 𑀉𑀧𑀸𑀲𑀺𑀓𑀸 𑀅𑀳𑀦𑁆𑀢𑀺 𑀏𑀯𑀁 𑀉𑀧𑀸𑀲𑀺𑀓𑀸𑀪𑀸𑀯𑀁 𑀤𑁂𑀲𑁂𑀲𑀺𑀁. 𑀬𑀸𑀯𑀤𑁂𑀢𑀺 𑀬𑀸𑀯𑀤𑁂𑀯. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀫𑀳𑀸𑀬𑀜𑁆𑀜𑀯𑀕𑁆𑀕𑁄 𑀧𑀜𑁆𑀘𑀫𑁄.

𑀧𑀡𑁆𑀡𑀸𑀲𑀓𑀁 𑀦𑀺𑀝𑁆𑀞𑀺𑀢𑀁.