𑁩. 𑀙𑀴𑀪𑀺𑀚𑀸𑀢𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁭. 𑀢𑀢𑀺𑀬𑁂 𑀙𑀴𑀪𑀺𑀚𑀸𑀢𑀺𑀬𑁄𑀢𑀺 𑀙 𑀚𑀸𑀢𑀺𑀬𑁄. 𑀢𑀢𑁆𑀭𑀺𑀤𑀦𑁆𑀢𑀺 𑀢𑀢𑁆𑀭𑀸𑀬𑀁. 𑀮𑀼𑀤𑁆𑀤𑀸𑀢𑀺 𑀤𑀸𑀭𑀼𑀡𑀸. 𑀪𑀺𑀓𑁆𑀔𑀽 𑀓𑀡𑁆𑀝𑀓𑀯𑀼𑀢𑁆𑀢𑀺𑀓𑀸𑀢𑀺 𑀲𑀫𑀡𑀸 𑀦𑀸𑀫𑁂𑀢𑁂. 𑀏𑀓𑀲𑀸𑀝𑀓𑀸𑀢𑀺 𑀏𑀓𑁂𑀦𑁂𑀯 𑀧𑀺𑀮𑁄𑀢𑀺𑀓𑀔𑀡𑁆𑀟𑁂𑀦 𑀧𑀼𑀭𑀢𑁄 𑀧𑀝𑀺𑀘𑁆𑀙𑀸𑀤𑀦𑀓𑀸. 𑀅𑀓𑀸𑀫𑀓𑀲𑁆𑀲 𑀩𑀺𑀮𑀁 𑀑𑀮𑀕𑁆𑀕𑁂𑀬𑁆𑀬𑀼𑀦𑁆𑀢𑀺 𑀲𑀢𑁆𑀣𑁂 𑀕𑀘𑁆𑀙𑀫𑀸𑀦𑁂 𑀕𑁄𑀡𑀫𑁆𑀳𑀺 𑀫𑀢𑁂 𑀕𑁄𑀫𑀁𑀲𑀫𑀽𑀮𑀁 𑀉𑀧𑁆𑀧𑀸𑀤𑀦𑀢𑁆𑀣𑀸𑀬 𑀯𑀺𑀪𑀚𑀺𑀢𑁆𑀯𑀸 𑀔𑀸𑀤𑀫𑀸𑀦𑀸 𑀏𑀓𑀲𑁆𑀲 𑀕𑁄𑀫𑀁𑀲𑀁 𑀅𑀦𑀺𑀘𑁆𑀙𑀦𑁆𑀢𑀲𑁆𑀲𑁂𑀯 𑀓𑁄𑀝𑁆𑀞𑀸𑀲𑀁 𑀓𑀢𑁆𑀯𑀸 ‘‘𑀅𑀬𑀜𑁆𑀘 𑀢𑁂 𑀔𑀸𑀤𑀺𑀢𑀩𑁆𑀩𑁄, 𑀫𑀽𑀮𑀜𑁆𑀘 𑀤𑀸𑀢𑀩𑁆𑀩’’𑀦𑁆𑀢𑀺 𑀢𑀁 𑀓𑁄𑀝𑁆𑀞𑀸𑀲𑀲𑀗𑁆𑀔𑀸𑀢𑀁 𑀩𑀺𑀮𑀁 𑀑𑀮𑀕𑁆𑀕𑁂𑀬𑁆𑀬𑀼𑀁, 𑀩𑀮𑀓𑁆𑀓𑀸𑀭𑁂𑀦 𑀳𑀢𑁆𑀣𑁂 𑀞𑀧𑁂𑀬𑁆𑀬𑀼𑀦𑁆𑀢𑀺 𑀅𑀢𑁆𑀣𑁄. 𑀅𑀔𑁂𑀢𑁆𑀢𑀜𑁆𑀜𑀼𑀦𑀸𑀢𑀺 𑀅𑀪𑀺𑀚𑀸𑀢𑀺𑀧𑀜𑁆𑀜𑀢𑁆𑀢𑀺𑀬𑀸 𑀔𑁂𑀢𑁆𑀢𑀁 𑀅𑀚𑀸𑀦𑀦𑁆𑀢𑁂𑀦. 𑀢𑀁 𑀲𑀼𑀡𑀸𑀳𑀻𑀢𑀺 𑀢𑀁 𑀫𑀫 𑀧𑀜𑁆𑀜𑀢𑁆𑀢𑀺𑀁 𑀲𑀼𑀡𑀸𑀳𑀺. 𑀓𑀡𑁆𑀳𑀸𑀪𑀺𑀚𑀸𑀢𑀺𑀓𑁄𑀢𑀺 𑀓𑀸𑀴𑀓𑀚𑀸𑀢𑀺𑀓𑁄. 𑀓𑀡𑁆𑀳𑀁 𑀥𑀫𑁆𑀫𑀁 𑀅𑀪𑀺𑀚𑀸𑀬𑀢𑀻𑀢𑀺 𑀓𑀡𑁆𑀳𑀲𑀪𑀸𑀯𑁄 𑀳𑀼𑀢𑁆𑀯𑀸 𑀚𑀸𑀬𑀢𑀺 𑀦𑀺𑀩𑁆𑀩𑀢𑁆𑀢𑀢𑀺, 𑀓𑀡𑁆𑀳𑀸𑀪𑀺𑀚𑀸𑀢𑀺𑀬𑀁 𑀯𑀸 𑀚𑀸𑀬𑀢𑀺. 𑀦𑀺𑀩𑁆𑀩𑀸𑀦𑀁 𑀅𑀪𑀺𑀚𑀸𑀬𑀢𑀻𑀢𑀺 𑀦𑀺𑀩𑁆𑀩𑀸𑀦𑀁 𑀧𑀸𑀧𑀼𑀡𑀸𑀢𑀺, 𑀅𑀭𑀺𑀬𑀪𑀽𑀫𑀺𑀲𑀗𑁆𑀔𑀸𑀢𑀸𑀬 𑀯𑀸 𑀦𑀺𑀩𑁆𑀩𑀸𑀦𑀚𑀸𑀢𑀺𑀬𑀸 𑀚𑀸𑀬𑀢𑀺.