𑁯. 𑀕𑀺𑀳𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁭𑁯. 𑀦𑀯𑀫𑁂 𑀲𑀁𑀯𑀼𑀢𑀓𑀫𑁆𑀫𑀦𑁆𑀢𑀦𑁆𑀢𑀺 𑀧𑀺𑀳𑀺𑀢𑀓𑀫𑁆𑀫𑀦𑁆𑀢𑀁. 𑀆𑀪𑀺𑀘𑁂𑀢𑀲𑀺𑀓𑀸𑀦𑀦𑁆𑀢𑀺 𑀉𑀢𑁆𑀢𑀫𑀘𑀺𑀢𑁆𑀢𑀦𑀺𑀲𑁆𑀲𑀺𑀢𑀸𑀦𑀁. 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀸𑀦𑀦𑁆𑀢𑀺 𑀧𑀘𑁆𑀘𑀓𑁆𑀔𑁂𑀬𑁂𑀯 𑀥𑀫𑁆𑀫𑁂 𑀧𑀯𑀢𑁆𑀢𑀺𑀓𑁆𑀔𑀡𑁂 𑀲𑀼𑀔𑀯𑀺𑀳𑀸𑀭𑀸𑀦𑀁. 𑀅𑀭𑀺𑀬𑀓𑀦𑁆𑀢𑁂𑀳𑀻𑀢𑀺 𑀅𑀭𑀺𑀬𑀸𑀦𑀁 𑀓𑀦𑁆𑀢𑁂𑀳𑀺 𑀫𑀕𑁆𑀕𑀨𑀮𑀲𑀻𑀮𑁂𑀳𑀺.

𑀅𑀭𑀺𑀬𑀥𑀫𑁆𑀫𑀁 𑀲𑀫𑀸𑀤𑀸𑀬𑀸𑀢𑀺 𑀏𑀢𑁆𑀣 𑀅𑀭𑀺𑀬𑀥𑀫𑁆𑀫𑁄𑀢𑀺 𑀧𑀜𑁆𑀘 𑀲𑀻𑀮𑀸𑀦𑀺 𑀓𑀣𑀺𑀢𑀸𑀦𑀺. 𑀫𑁂𑀭𑀬𑀁 𑀯𑀸𑀭𑀼𑀡𑀺𑀦𑁆𑀢𑀺 𑀘𑀢𑀼𑀩𑁆𑀩𑀺𑀥𑀁 𑀫𑁂𑀭𑀬𑀁 𑀧𑀜𑁆𑀘𑀯𑀺𑀥𑀜𑁆𑀘 𑀲𑀼𑀭𑀁. 𑀥𑀫𑁆𑀫𑀜𑁆𑀘𑀸𑀦𑀼𑀯𑀺𑀢𑀓𑁆𑀓𑀬𑁂𑀢𑀺 𑀦𑀯𑀯𑀺𑀥𑀁 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀁 𑀅𑀦𑀼𑀲𑁆𑀲𑀢𑀺𑀯𑀲𑁂𑀦𑁂𑀯 𑀯𑀺𑀢𑀓𑁆𑀓𑁂𑀬𑁆𑀬. 𑀅𑀩𑁆𑀬𑀸𑀧𑀚𑁆𑀛𑀁 𑀳𑀺𑀢𑀁 𑀘𑀺𑀢𑁆𑀢𑀦𑁆𑀢𑀺 𑀦𑀺𑀤𑁆𑀤𑀼𑀓𑁆𑀔𑀁 𑀫𑁂𑀢𑁆𑀢𑀸𑀤𑀺𑀩𑁆𑀭𑀳𑁆𑀫𑀯𑀺𑀳𑀸𑀭𑀘𑀺𑀢𑁆𑀢𑀁. 𑀤𑁂𑀯𑀮𑁄𑀓𑀸𑀬 𑀪𑀸𑀯𑀬𑁂𑀢𑀺 𑀩𑁆𑀭𑀳𑁆𑀫𑀮𑁄𑀓𑀢𑁆𑀣𑀸𑀬 𑀪𑀸𑀯𑁂𑀬𑁆𑀬. 𑀧𑀼𑀜𑁆𑀜𑀢𑁆𑀣𑀲𑁆𑀲 𑀚𑀺𑀕𑀻𑀲𑀢𑁄𑀢𑀺 𑀧𑀼𑀜𑁆𑀜𑁂𑀦 𑀅𑀢𑁆𑀣𑀺𑀓𑀲𑁆𑀲 𑀧𑀼𑀜𑁆𑀜𑀁 𑀕𑀯𑁂𑀲𑀦𑁆𑀢𑀲𑁆𑀲. 𑀲𑀦𑁆𑀢𑁂𑀲𑀽𑀢𑀺 𑀩𑀼𑀤𑁆𑀥𑀧𑀘𑁆𑀘𑁂𑀓𑀩𑀼𑀤𑁆𑀥𑀢𑀣𑀸𑀕𑀢𑀲𑀸𑀯𑀓𑁂𑀲𑀼. 𑀯𑀺𑀧𑀼𑀮𑀸 𑀳𑁄𑀢𑀺 𑀤𑀓𑁆𑀔𑀺𑀡𑀸𑀢𑀺 𑀏𑀯𑀁 𑀤𑀺𑀦𑁆𑀦𑀤𑀸𑀦𑀁 𑀫𑀳𑀧𑁆𑀨𑀮𑀁 𑀳𑁄𑀢𑀺. 𑀅𑀦𑀼𑀧𑀼𑀩𑁆𑀩𑁂𑀦𑀸𑀢𑀺 𑀲𑀻𑀮𑀧𑀽𑀭𑀡𑀸𑀤𑀺𑀦𑀸 𑀅𑀦𑀼𑀓𑁆𑀓𑀫𑁂𑀦. 𑀲𑁂𑀲𑀁 𑀢𑀺𑀓𑀦𑀺𑀧𑀸𑀢𑁂 𑀯𑀼𑀢𑁆𑀢𑀢𑁆𑀣𑀫𑁂𑀯.