𑁫. 𑀫𑀸𑀢𑀸𑀧𑀼𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁫. 𑀧𑀜𑁆𑀘𑀫𑁂 𑀧𑀭𑀺𑀬𑀸𑀤𑀸𑀬 𑀢𑀺𑀝𑁆𑀞𑀢𑀻𑀢𑀺 𑀧𑀭𑀺𑀬𑀸𑀤𑀺𑀬𑀺𑀢𑁆𑀯𑀸 𑀕𑀳𑁂𑀢𑁆𑀯𑀸 𑀔𑁂𑀧𑁂𑀢𑁆𑀯𑀸 𑀢𑀺𑀝𑁆𑀞𑀢𑀺. 𑀉𑀕𑁆𑀖𑀸𑀢𑀺𑀢𑀸𑀢𑀺 𑀉𑀤𑁆𑀥𑀼𑀫𑀸𑀢𑀸.

𑀅𑀲𑀺𑀳𑀢𑁆𑀣𑁂𑀦𑀸𑀢𑀺 𑀲𑀻𑀲𑀘𑁆𑀙𑁂𑀤𑀦𑀢𑁆𑀣𑀸𑀬 𑀅𑀲𑀺𑀁 𑀆𑀤𑀸𑀬 𑀆𑀕𑀢𑁂𑀦𑀸𑀧𑀺. 𑀧𑀺𑀲𑀸𑀘𑁂𑀦𑀸𑀢𑀺 𑀔𑀸𑀤𑀺𑀢𑀼𑀁 𑀆𑀕𑀢𑀬𑀓𑁆𑀔𑁂𑀦𑀸𑀧𑀺. 𑀆𑀲𑀻𑀤𑁂𑀢𑀺 𑀖𑀝𑁆𑀝𑁂𑀬𑁆𑀬. 𑀫𑀜𑁆𑀚𑀼𑀦𑀸𑀢𑀺 𑀫𑀼𑀤𑀼𑀓𑁂𑀦. 𑀓𑀸𑀫𑁄𑀖𑀯𑀼𑀴𑁆𑀳𑀸𑀦𑀦𑁆𑀢𑀺 𑀓𑀸𑀫𑁄𑀖𑁂𑀦 𑀯𑀼𑀴𑁆𑀳𑀸𑀦𑀁 𑀓𑀟𑁆𑀠𑀺𑀢𑀸𑀦𑀁. 𑀓𑀸𑀮𑀁 𑀕𑀢𑀺 𑀪𑀯𑀸𑀪𑀯𑀦𑁆𑀢𑀺 𑀯𑀝𑁆𑀝𑀓𑀸𑀮𑀁 𑀕𑀢𑀺𑀜𑁆𑀘 𑀧𑀼𑀦𑀧𑁆𑀧𑀼𑀦𑀩𑁆𑀪𑀯𑁂 𑀘. 𑀧𑀼𑀭𑀓𑁆𑀔𑀢𑀸𑀢𑀺 𑀧𑀼𑀭𑁂𑀘𑀸𑀭𑀺𑀓𑀸 𑀧𑀼𑀭𑀢𑁄 𑀕𑀢𑀸𑀬𑁂𑀯. 𑀬𑁂 𑀘 𑀓𑀸𑀫𑁂 𑀧𑀭𑀺𑀜𑁆𑀜𑀸𑀬𑀸𑀢𑀺 𑀬𑁂 𑀧𑀡𑁆𑀟𑀺𑀢𑀸 𑀤𑀼𑀯𑀺𑀥𑁂𑀧𑀺 𑀓𑀸𑀫𑁂 𑀢𑀻𑀳𑀺 𑀧𑀭𑀺𑀜𑁆𑀜𑀸𑀳𑀺 𑀧𑀭𑀺𑀚𑀸𑀦𑀺𑀢𑁆𑀯𑀸. 𑀘𑀭𑀦𑁆𑀢𑀺 𑀅𑀓𑀼𑀢𑁄𑀪𑀬𑀸𑀢𑀺 𑀔𑀻𑀡𑀸𑀲𑀯𑀸𑀦𑀁 𑀓𑀼𑀢𑁄𑀘𑀺 𑀪𑀬𑀁 𑀦𑀸𑀫 𑀦𑀢𑁆𑀣𑀺, 𑀢𑀲𑁆𑀫𑀸 𑀢𑁂 𑀅𑀓𑀼𑀢𑁄𑀪𑀬𑀸 𑀳𑀼𑀢𑁆𑀯𑀸 𑀘𑀭𑀦𑁆𑀢𑀺. 𑀧𑀸𑀭𑀗𑁆𑀕𑀢𑀸𑀢𑀺 𑀧𑀸𑀭𑀁 𑀯𑀼𑀘𑁆𑀘𑀢𑀺 𑀦𑀺𑀩𑁆𑀩𑀸𑀦𑀁, 𑀢𑀁 𑀉𑀧𑀕𑀢𑀸, 𑀲𑀘𑁆𑀙𑀺𑀓𑀢𑁆𑀯𑀸 𑀞𑀺𑀢𑀸𑀢𑀺 𑀅𑀢𑁆𑀣𑁄. 𑀆𑀲𑀯𑀓𑁆𑀔𑀬𑀦𑁆𑀢𑀺 𑀅𑀭𑀳𑀢𑁆𑀢𑀁. 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀯𑀝𑁆𑀝𑀫𑁂𑀯 𑀓𑀣𑁂𑀢𑁆𑀯𑀸 𑀕𑀸𑀣𑀸𑀲𑀼 𑀯𑀝𑁆𑀝𑀯𑀺𑀯𑀝𑁆𑀝𑀁 𑀓𑀣𑀺𑀢𑀁.