𑁧. 𑀧𑀞𑀫𑀧𑀡𑁆𑀡𑀸𑀲𑀓𑀁

𑁧. 𑀲𑁂𑀔𑀩𑀮𑀯𑀕𑁆𑀕𑁄

𑁧. 𑀲𑀁𑀔𑀺𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁧. 𑀧𑀜𑁆𑀘𑀓𑀦𑀺𑀧𑀸𑀢𑀲𑁆𑀲 𑀧𑀞𑀫𑁂 𑀲𑀢𑁆𑀢𑀦𑁆𑀦𑀁 𑀲𑁂𑀔𑀸𑀦𑀁 𑀩𑀮𑀸𑀦𑀻𑀢𑀺 𑀲𑁂𑀔𑀩𑀮𑀸𑀦𑀺. 𑀲𑀤𑁆𑀥𑀸𑀩𑀮𑀸𑀤𑀻𑀲𑀼 𑀅𑀲𑁆𑀲𑀤𑁆𑀥𑀺𑀬𑁂 𑀦 𑀓𑀫𑁆𑀧𑀢𑀻𑀢𑀺 𑀲𑀤𑁆𑀥𑀸𑀩𑀮𑀁. 𑀅𑀳𑀺𑀭𑀺𑀓𑁂 𑀦 𑀓𑀫𑁆𑀧𑀢𑀻𑀢𑀺 𑀳𑀺𑀭𑀻𑀩𑀮𑀁. 𑀅𑀦𑁄𑀢𑁆𑀢𑀧𑁆𑀧𑁂 𑀦 𑀓𑀫𑁆𑀧𑀢𑀻𑀢𑀺 𑀑𑀢𑁆𑀢𑀧𑁆𑀧𑀩𑀮𑀁. 𑀓𑁄𑀲𑀚𑁆𑀚𑁂 𑀦 𑀓𑀫𑁆𑀧𑀢𑀻𑀢𑀺 𑀯𑀻𑀭𑀺𑀬𑀩𑀮𑀁. 𑀅𑀯𑀺𑀚𑁆𑀚𑀸𑀬 𑀦 𑀓𑀫𑁆𑀧𑀢𑀻𑀢𑀺 𑀧𑀜𑁆𑀜𑀸𑀩𑀮𑀁. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀇𑀫𑀸𑀦𑀺 𑀲𑀢𑁆𑀢𑀦𑁆𑀦𑀁 𑀲𑁂𑀔𑀸𑀦𑀁 𑀩𑀮𑀸𑀦𑀺, 𑀢𑀲𑁆𑀫𑀸.

𑁨. 𑀯𑀺𑀢𑁆𑀣𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁨. 𑀤𑀼𑀢𑀺𑀬𑁂 𑀓𑀸𑀬𑀤𑀼𑀘𑁆𑀘𑀭𑀺𑀢𑁂𑀦𑀸𑀢𑀺𑀆𑀤𑀻𑀲𑀼 𑀉𑀧𑀬𑁄𑀕𑀢𑁆𑀣𑁂 𑀓𑀭𑀡𑀯𑀘𑀦𑀁, 𑀳𑀺𑀭𑀻𑀬𑀺𑀢𑀩𑁆𑀩𑀸𑀦𑀺 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀻𑀦𑀺 𑀳𑀺𑀭𑀻𑀬𑀢𑀺 𑀚𑀺𑀕𑀼𑀘𑁆𑀙𑀢𑀻𑀢𑀺 𑀅𑀢𑁆𑀣𑁄. 𑀑𑀢𑁆𑀢𑀧𑁆𑀧𑀦𑀺𑀤𑁆𑀤𑁂𑀲𑁂 𑀳𑁂𑀢𑁆𑀯𑀢𑁆𑀣𑁂 𑀓𑀭𑀡𑀯𑀘𑀦𑀁, 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀻𑀳𑀺 𑀑𑀢𑁆𑀢𑀧𑁆𑀧𑀲𑁆𑀲 𑀳𑁂𑀢𑀼𑀪𑀽𑀢𑁂𑀳𑀺 𑀑𑀢𑁆𑀢𑀧𑁆𑀧𑀢𑀺 𑀪𑀸𑀬𑀢𑀻𑀢𑀺 𑀅𑀢𑁆𑀣𑁄.

𑀆𑀭𑀤𑁆𑀥𑀯𑀻𑀭𑀺𑀬𑁄𑀢𑀺 𑀧𑀕𑁆𑀕𑀳𑀺𑀢𑀯𑀻𑀭𑀺𑀬𑁄 𑀅𑀦𑁄𑀲𑀓𑁆𑀓𑀺𑀢𑀫𑀸𑀦𑀲𑁄. 𑀧𑀳𑀸𑀦𑀸𑀬𑀸𑀢𑀺 𑀧𑀳𑀸𑀦𑀢𑁆𑀣𑀸𑀬. 𑀉𑀧𑀲𑀫𑁆𑀧𑀤𑀸𑀬𑀸𑀢𑀺 𑀧𑀝𑀺𑀮𑀸𑀪𑀢𑁆𑀣𑀸𑀬. 𑀣𑀸𑀫𑀯𑀸𑀢𑀺 𑀯𑀻𑀭𑀺𑀬𑀣𑀸𑀫𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀤𑀴𑁆𑀳𑀧𑀭𑀓𑁆𑀓𑀫𑁄𑀢𑀺 𑀣𑀺𑀭𑀧𑀭𑀓𑁆𑀓𑀫𑁄. 𑀅𑀦𑀺𑀓𑁆𑀔𑀺𑀢𑁆𑀢𑀥𑀼𑀭𑁄 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀽𑀢𑀺 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼 𑀅𑀦𑁄𑀭𑁄𑀧𑀺𑀢𑀥𑀼𑀭𑁄 𑀅𑀦𑁄𑀲𑀓𑁆𑀓𑀺𑀢𑀯𑀻𑀭𑀺𑀬𑁄.

𑀉𑀤𑀬𑀢𑁆𑀣𑀕𑀸𑀫𑀺𑀦𑀺𑀬𑀸𑀢𑀺 𑀧𑀜𑁆𑀘𑀦𑁆𑀦𑀁 𑀔𑀦𑁆𑀥𑀸𑀦𑀁 𑀉𑀤𑀬𑀯𑀬𑀕𑀸𑀫𑀺𑀦𑀺𑀬𑀸 𑀉𑀤𑀬𑀜𑁆𑀘 𑀯𑀬𑀜𑁆𑀘 𑀧𑀝𑀺𑀯𑀺𑀚𑁆𑀛𑀺𑀢𑀼𑀁 𑀲𑀫𑀢𑁆𑀣𑀸𑀬. 𑀧𑀜𑁆𑀜𑀸𑀬 𑀲𑀫𑀦𑁆𑀦𑀸𑀕𑀢𑁄𑀢𑀺 𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸𑀬 𑀘𑁂𑀯 𑀫𑀕𑁆𑀕𑀧𑀜𑁆𑀜𑀸𑀬 𑀘 𑀲𑀫𑀗𑁆𑀕𑀺𑀪𑀽𑀢𑁄. 𑀅𑀭𑀺𑀬𑀸𑀬𑀸𑀢𑀺 𑀯𑀺𑀓𑁆𑀔𑀫𑁆𑀪𑀦𑀯𑀲𑁂𑀦 𑀘 𑀲𑀫𑀼𑀘𑁆𑀙𑁂𑀤𑀯𑀲𑁂𑀦 𑀘 𑀓𑀺𑀮𑁂𑀲𑁂𑀳𑀺 𑀆𑀭𑀓𑀸 𑀞𑀺𑀢𑀸𑀬 𑀧𑀭𑀺𑀲𑀼𑀤𑁆𑀥𑀸𑀬. 𑀦𑀺𑀩𑁆𑀩𑁂𑀥𑀺𑀓𑀸𑀬𑀸𑀢𑀺 𑀲𑀸 𑀘 𑀅𑀪𑀺𑀦𑀺𑀯𑀺𑀚𑁆𑀛𑀦𑀢𑁄 𑀦𑀺𑀩𑁆𑀩𑁂𑀥𑀺𑀓𑀸𑀢𑀺 𑀯𑀼𑀘𑁆𑀘𑀢𑀺, 𑀢𑀸𑀬 𑀲𑀫𑀦𑁆𑀦𑀸𑀕𑀢𑁄𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀫𑀕𑁆𑀕𑀧𑀜𑁆𑀜𑀸 𑀲𑀫𑀼𑀘𑁆𑀙𑁂𑀤𑀯𑀲𑁂𑀦 𑀅𑀦𑀺𑀩𑁆𑀩𑀺𑀤𑁆𑀥𑀧𑀼𑀩𑁆𑀩𑀁 𑀅𑀧𑁆𑀧𑀤𑀸𑀮𑀺𑀢𑀧𑀼𑀩𑁆𑀩𑀁 𑀮𑁄𑀪𑀓𑁆𑀔𑀦𑁆𑀥𑀁 𑀤𑁄𑀲𑀓𑁆𑀔𑀦𑁆𑀥𑀁 𑀫𑁄𑀳𑀓𑁆𑀔𑀦𑁆𑀥𑀁 𑀦𑀺𑀩𑁆𑀩𑀺𑀚𑁆𑀛𑀢𑀺 𑀧𑀤𑀸𑀮𑁂𑀢𑀻𑀢𑀺 𑀦𑀺𑀩𑁆𑀩𑁂𑀥𑀺𑀓𑀸, 𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸 𑀢𑀤𑀗𑁆𑀕𑀯𑀲𑁂𑀦 𑀦𑀺𑀩𑁆𑀩𑁂𑀥𑀺𑀓𑀸, 𑀫𑀕𑁆𑀕𑀧𑀜𑁆𑀜𑀸𑀬 𑀧𑀝𑀺𑀮𑀸𑀪𑀲𑀁𑀯𑀢𑁆𑀢𑀦𑀢𑁄 𑀢𑀩𑁆𑀩𑀺𑀧𑀲𑁆𑀲𑀦𑀸 𑀦𑀺𑀩𑁆𑀩𑁂𑀥𑀺𑀓𑀸𑀢𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺. 𑀲𑀫𑁆𑀫𑀸 𑀤𑀼𑀓𑁆𑀔𑀓𑁆𑀔𑀬𑀕𑀸𑀫𑀺𑀦𑀺𑀬𑀸𑀢𑀺 𑀇𑀥𑀸𑀧𑀺 𑀫𑀕𑁆𑀕𑀧𑀜𑁆𑀜𑀸 𑀲𑀫𑁆𑀫𑀸 𑀳𑁂𑀢𑀼𑀦𑀸 𑀦𑀬𑁂𑀦 𑀯𑀝𑁆𑀝𑀤𑀼𑀓𑁆𑀔𑀜𑁆𑀘 𑀓𑀺𑀮𑁂𑀲𑀤𑀼𑀓𑁆𑀔𑀜𑁆𑀘 𑀔𑁂𑀧𑀬𑀫𑀸𑀦𑀸 𑀕𑀘𑁆𑀙𑀢𑀻𑀢𑀺 𑀲𑀫𑁆𑀫𑀸 𑀤𑀼𑀓𑁆𑀔𑀓𑁆𑀔𑀬𑀕𑀸𑀫𑀺𑀦𑀻 𑀦𑀸𑀫, 𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸 𑀢𑀤𑀗𑁆𑀕𑀯𑀲𑁂𑀦 𑀯𑀝𑁆𑀝𑀤𑀼𑀓𑁆𑀔𑀜𑁆𑀘 𑀓𑀺𑀮𑁂𑀲𑀤𑀼𑀓𑁆𑀔𑀜𑁆𑀘 𑀔𑁂𑀧𑀬𑀫𑀸𑀦𑀸 𑀕𑀘𑁆𑀙𑀢𑀻𑀢𑀺 𑀤𑀼𑀓𑁆𑀔𑀓𑁆𑀔𑀬𑀕𑀸𑀫𑀺𑀦𑀻. 𑀤𑀼𑀓𑁆𑀔𑀓𑁆𑀔𑀬𑀕𑀸𑀫𑀺𑀦𑀺𑀬𑀸 𑀯𑀸 𑀫𑀕𑁆𑀕𑀧𑀜𑁆𑀜𑀸𑀬 𑀧𑀝𑀺𑀮𑀸𑀪𑀸𑀬 𑀲𑀁𑀯𑀢𑁆𑀢𑀦𑀢𑁄𑀧𑁂𑀲𑀸 𑀤𑀼𑀓𑁆𑀔𑀓𑁆𑀔𑀬𑀕𑀸𑀫𑀺𑀦𑀻𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀇𑀢𑀺 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀧𑀜𑁆𑀘 𑀩𑀮𑀸𑀦𑀺 𑀫𑀺𑀲𑁆𑀲𑀓𑀸𑀦𑁂𑀯 𑀓𑀣𑀺𑀢𑀸𑀦𑀺, 𑀢𑀣𑀸 𑀧𑀜𑁆𑀘𑀫𑁂.

𑁬. 𑀲𑀫𑀸𑀧𑀢𑁆𑀢𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁬. 𑀙𑀝𑁆𑀞𑁂 𑀅𑀓𑀼𑀲𑀮𑀲𑁆𑀲 𑀲𑀫𑀸𑀧𑀢𑁆𑀢𑀻𑀢𑀺 𑀅𑀓𑀼𑀲𑀮𑀥𑀫𑁆𑀫𑀲𑁆𑀲 𑀲𑀫𑀸𑀧𑀚𑁆𑀚𑀦𑀸, 𑀢𑁂𑀦 𑀲𑀤𑁆𑀥𑀺𑀁 𑀲𑀫𑀗𑁆𑀕𑀺𑀪𑀸𑀯𑁄𑀢𑀺 𑀅𑀢𑁆𑀣𑁄. 𑀧𑀭𑀺𑀬𑀼𑀝𑁆𑀞𑀸𑀬 𑀢𑀺𑀝𑁆𑀞𑀢𑀻𑀢𑀺 𑀧𑀭𑀺𑀬𑁄𑀦𑀦𑁆𑀥𑀺𑀢𑁆𑀯𑀸 𑀢𑀺𑀝𑁆𑀞𑀢𑀺.

𑁭. 𑀓𑀸𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁭. 𑀲𑀢𑁆𑀢𑀫𑁂 𑀓𑀸𑀫𑁂𑀲𑀼 𑀮𑀴𑀺𑀢𑀸𑀢𑀺 𑀯𑀢𑁆𑀣𑀼𑀓𑀸𑀫𑀓𑀺𑀮𑁂𑀲𑀓𑀸𑀫𑁂𑀲𑀼 𑀮𑀴𑀺𑀢𑀸 𑀅𑀪𑀺𑀭𑀢𑀸. 𑀅𑀲𑀺𑀢𑀩𑁆𑀬𑀸𑀪𑀗𑁆𑀕𑀺𑀦𑁆𑀢𑀺 𑀢𑀺𑀡𑀮𑀸𑀬𑀦𑀅𑀲𑀺𑀢𑀜𑁆𑀘𑁂𑀯 𑀢𑀺𑀡𑀯𑀳𑀦𑀓𑀸𑀚𑀜𑁆𑀘. 𑀓𑀼𑀮𑀧𑀼𑀢𑁆𑀢𑁄𑀢𑀺 𑀆𑀘𑀸𑀭𑀓𑀼𑀮𑀧𑀼𑀢𑁆𑀢𑁄. 𑀑𑀳𑀸𑀬𑀸𑀢𑀺 𑀧𑀳𑀸𑀬. 𑀅𑀮𑀁 𑀯𑀘𑀦𑀸𑀬𑀸𑀢𑀺 𑀬𑀼𑀢𑁆𑀢𑀁 𑀯𑀘𑀦𑀸𑀬. 𑀮𑀩𑁆𑀪𑀸𑀢𑀺 𑀲𑀼𑀮𑀪𑀸 𑀲𑀓𑁆𑀓𑀸 𑀮𑀪𑀺𑀢𑀼𑀁. 𑀳𑀻𑀦𑀸 𑀓𑀸𑀫𑀸𑀢𑀺 𑀧𑀜𑁆𑀘𑀦𑁆𑀦𑀁 𑀦𑀻𑀘𑀓𑀼𑀮𑀸𑀦𑀁 𑀓𑀸𑀫𑀸. 𑀫𑀚𑁆𑀛𑀺𑀫𑀸 𑀓𑀸𑀫𑀸𑀢𑀺 𑀫𑀚𑁆𑀛𑀺𑀫𑀲𑀢𑁆𑀢𑀸𑀦𑀁 𑀓𑀸𑀫𑀸. 𑀧𑀡𑀻𑀢𑀸 𑀓𑀸𑀫𑀸𑀢𑀺 𑀭𑀸𑀚𑀭𑀸𑀚𑀫𑀳𑀸𑀫𑀢𑁆𑀢𑀸𑀦𑀁 𑀓𑀸𑀫𑀸. 𑀓𑀸𑀫𑀸𑀢𑁆𑀯𑁂𑀯 𑀲𑀗𑁆𑀔𑀁 𑀕𑀘𑁆𑀙𑀦𑁆𑀢𑀻𑀢𑀺 𑀓𑀸𑀫𑀦𑀯𑀲𑁂𑀦 𑀓𑀸𑀫𑁂𑀢𑀩𑁆𑀩𑀯𑀲𑁂𑀦 𑀘 𑀓𑀸𑀫𑀸𑀇𑀘𑁆𑀘𑁂𑀯 𑀲𑀗𑁆𑀔𑀁 𑀕𑀘𑁆𑀙𑀦𑁆𑀢𑀺. 𑀯𑀼𑀤𑁆𑀥𑁄 𑀳𑁄𑀢𑀻𑀢𑀺 𑀫𑀳𑀮𑁆𑀮𑀓𑁄 𑀳𑁄𑀢𑀺. 𑀅𑀮𑀁𑀧𑀜𑁆𑀜𑁄𑀢𑀺 𑀬𑀼𑀢𑁆𑀢𑀧𑀜𑁆𑀜𑁄. 𑀅𑀢𑁆𑀢𑀕𑀼𑀢𑁆𑀢𑁄𑀢𑀺 𑀅𑀢𑁆𑀢𑀦𑀸𑀯 𑀕𑀼𑀢𑁆𑀢𑁄 𑀭𑀓𑁆𑀔𑀺𑀢𑁄, 𑀅𑀢𑁆𑀢𑀸𑀦𑀁 𑀯𑀸 𑀕𑁄𑀧𑁂𑀢𑀼𑀁 𑀭𑀓𑁆𑀔𑀺𑀢𑀼𑀁 𑀲𑀫𑀢𑁆𑀣𑁄. 𑀦𑀸𑀮𑀁 𑀧𑀫𑀸𑀤𑀸𑀬𑀸𑀢𑀺 𑀦 𑀬𑀼𑀢𑁆𑀢𑁄 𑀧𑀫𑀚𑁆𑀚𑀺𑀢𑀼𑀁. 𑀲𑀤𑁆𑀥𑀸𑀬 𑀅𑀓𑀢𑀁 𑀳𑁄𑀢𑀻𑀢𑀺 𑀬𑀁 𑀲𑀤𑁆𑀥𑀸𑀬 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼 𑀓𑀸𑀢𑀼𑀁 𑀬𑀼𑀢𑁆𑀢𑀁, 𑀢𑀁 𑀦 𑀓𑀢𑀁 𑀳𑁄𑀢𑀺. 𑀲𑁂𑀲𑀧𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀅𑀦𑀧𑁂𑀓𑁆𑀔𑁄 𑀤𑀸𑀦𑀸𑀳𑀁, 𑀪𑀺𑀓𑁆𑀔𑀯𑁂, 𑀢𑀲𑁆𑀫𑀺𑀁 𑀪𑀺𑀓𑁆𑀔𑀼𑀲𑁆𑀫𑀺𑀁 𑀳𑁄𑀫𑀻𑀢𑀺 𑀏𑀯𑀁 𑀲𑀤𑁆𑀥𑀸𑀤𑀻𑀳𑀺 𑀓𑀸𑀢𑀩𑁆𑀩𑀁 𑀓𑀢𑁆𑀯𑀸𑀯 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀺𑀢𑁂 𑀢𑀲𑁆𑀫𑀺𑀁 𑀧𑀼𑀕𑁆𑀕𑀮𑁂 𑀅𑀦𑀧𑁂𑀓𑁆𑀔𑁄 𑀳𑁄𑀫𑀻𑀢𑀺 𑀤𑀲𑁆𑀲𑁂𑀢𑀺. 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁄 𑀓𑀣𑀺𑀢𑁄.

𑁮. 𑀘𑀯𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁮. 𑀅𑀝𑁆𑀞𑀫𑁂 𑀲𑀤𑁆𑀥𑀫𑁆𑀫𑁂𑀢𑀺 𑀲𑀸𑀲𑀦𑀲𑀤𑁆𑀥𑀫𑁆𑀫𑁂. 𑀅𑀲𑁆𑀲𑀤𑁆𑀥𑁄𑀢𑀺 𑀑𑀓𑀧𑁆𑀧𑀦𑀲𑀤𑁆𑀥𑀸𑀬 𑀘 𑀧𑀓𑁆𑀔𑀦𑁆𑀤𑀦𑀲𑀤𑁆𑀥𑀸𑀬 𑀘𑀸𑀢𑀺 𑀤𑁆𑀯𑀻𑀳𑀺𑀧𑀺 𑀲𑀤𑁆𑀥𑀸𑀳𑀺 𑀯𑀺𑀭𑀳𑀺𑀢𑁄. 𑀘𑀯𑀢𑀺 𑀦𑀧𑁆𑀧𑀢𑀺𑀝𑁆𑀞𑀸𑀢𑀻𑀢𑀺 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂 𑀕𑀼𑀡𑁂𑀳𑀺 𑀘𑀯𑀢𑀺, 𑀧𑀢𑀺𑀝𑁆𑀞𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀇𑀢𑀺 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀅𑀧𑁆𑀧𑀢𑀺𑀝𑁆𑀞𑀸𑀦𑀜𑁆𑀘 𑀧𑀢𑀺𑀝𑁆𑀞𑀸𑀦𑀜𑁆𑀘 𑀓𑀣𑀺𑀢𑀁.

𑁯. 𑀧𑀞𑀫𑀅𑀕𑀸𑀭𑀯𑀲𑀼𑀢𑁆𑀢𑀯𑀡𑁆𑀡𑀦𑀸

𑁯. 𑀦𑀯𑀫𑁂 𑀦𑀸𑀲𑁆𑀲 𑀕𑀸𑀭𑀯𑁄𑀢𑀺 𑀅𑀕𑀸𑀭𑀯𑁄. 𑀦𑀸𑀲𑁆𑀲 𑀧𑀢𑀺𑀲𑁆𑀲𑁄𑀢𑀺 𑀅𑀧𑁆𑀧𑀢𑀺𑀲𑁆𑀲𑁄, 𑀅𑀚𑁂𑀝𑁆𑀞𑀓𑁄 𑀅𑀦𑀻𑀘𑀯𑀼𑀢𑁆𑀢𑀺. 𑀲𑁂𑀲𑀫𑁂𑀢𑁆𑀣 𑀧𑀼𑀭𑀺𑀫𑀲𑀤𑀺𑀲𑀫𑁂𑀯.

𑁧𑁦. 𑀤𑀼𑀢𑀺𑀬𑀅𑀕𑀸𑀭𑀯𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦. 𑀤𑀲𑀫𑁂 𑀅𑀪𑀩𑁆𑀩𑁄𑀢𑀺 𑀅𑀪𑀸𑀚𑀦𑀁. 𑀯𑀼𑀤𑁆𑀥𑀺𑀦𑁆𑀢𑀺 𑀯𑀟𑁆𑀠𑀺𑀁. 𑀯𑀺𑀭𑀽𑀴𑁆𑀳𑀺𑀦𑁆𑀢𑀺 𑀯𑀺𑀭𑀽𑀴𑁆𑀳𑀫𑀽𑀮𑀢𑀸𑀬 𑀦𑀺𑀘𑁆𑀘𑀮𑀪𑀸𑀯𑀁. 𑀯𑁂𑀧𑀼𑀮𑁆𑀮𑀦𑁆𑀢𑀺 𑀫𑀳𑀦𑁆𑀢𑀪𑀸𑀯𑀁. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀲𑁂𑀔𑀩𑀮𑀯𑀕𑁆𑀕𑁄 𑀧𑀞𑀫𑁄.

𑁨. 𑀩𑀮𑀯𑀕𑁆𑀕𑁄

𑁧. 𑀅𑀦𑀦𑀼𑀲𑁆𑀲𑀼𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁧. 𑀤𑀼𑀢𑀺𑀬𑀲𑁆𑀲 𑀧𑀞𑀫𑁂 𑀧𑀼𑀩𑁆𑀩𑀸𑀳𑀁, 𑀪𑀺𑀓𑁆𑀔𑀯𑁂, 𑀅𑀦𑀦𑀼𑀲𑁆𑀲𑀼𑀢𑁂𑀲𑀼 𑀥𑀫𑁆𑀫𑁂𑀲𑀽𑀢𑀺 𑀅𑀳𑀁, 𑀪𑀺𑀓𑁆𑀔𑀯𑁂, 𑀧𑀼𑀩𑁆𑀩𑁂 𑀅𑀦𑀦𑀼𑀲𑁆𑀲𑀼𑀢𑁂𑀲𑀼 𑀘𑀢𑀽𑀲𑀼 𑀲𑀘𑁆𑀘𑀥𑀫𑁆𑀫𑁂𑀲𑀼. 𑀅𑀪𑀺𑀜𑁆𑀜𑀸𑀯𑁄𑀲𑀸𑀦𑀧𑀸𑀭𑀫𑀺𑀧𑁆𑀧𑀢𑁆𑀢𑁄 𑀧𑀝𑀺𑀚𑀸𑀦𑀸𑀫𑀻𑀢𑀺 𑀘𑀢𑀽𑀲𑀼 𑀲𑀘𑁆𑀘𑁂𑀲𑀼 𑀘𑀢𑀽𑀳𑀺 𑀫𑀕𑁆𑀕𑁂𑀳𑀺 𑀲𑁄𑀴𑀲𑀯𑀺𑀥𑀲𑁆𑀲 𑀓𑀺𑀘𑁆𑀘𑀲𑁆𑀲 𑀓𑀭𑀡𑁂𑀦 𑀅𑀪𑀺𑀚𑀸𑀦𑀺𑀢𑁆𑀯𑀸 𑀯𑁄𑀲𑀸𑀦𑀧𑀸𑀭𑀫𑀺𑀁 𑀲𑀩𑁆𑀩𑁂𑀲𑀁 𑀓𑀺𑀘𑁆𑀘𑀸𑀦𑀁 𑀦𑀺𑀝𑁆𑀞𑀺𑀢𑀢𑁆𑀢𑀸 𑀓𑀢𑀓𑀺𑀘𑁆𑀘𑀪𑀸𑀯𑀁 𑀧𑀸𑀭𑀁 𑀧𑀢𑁆𑀢𑁄 𑀧𑀝𑀺𑀚𑀸𑀦𑀸𑀫𑀻𑀢𑀺 𑀫𑀳𑀸𑀩𑁄𑀥𑀺𑀧𑀮𑁆𑀮𑀗𑁆𑀓𑁂 𑀅𑀢𑁆𑀢𑀦𑁄 𑀆𑀕𑀫𑀦𑀻𑀬𑀕𑀼𑀡𑀁 𑀤𑀲𑁆𑀲𑁂𑀢𑀺. 𑀢𑀣𑀸𑀕𑀢𑀲𑁆𑀲𑀸𑀢𑀺 𑀅𑀝𑁆𑀞𑀳𑀺 𑀓𑀸𑀭𑀡𑁂𑀳𑀺 𑀢𑀣𑀸𑀕𑀢𑀲𑁆𑀲. 𑀢𑀣𑀸𑀕𑀢𑀩𑀮𑀸𑀦𑀻𑀢𑀺 𑀬𑀣𑀸 𑀢𑁂𑀳𑀺 𑀕𑀦𑁆𑀢𑀩𑁆𑀩𑀁, 𑀢𑀣𑁂𑀯 𑀕𑀢𑀸𑀦𑀺 𑀧𑀯𑀢𑁆𑀢𑀸𑀦𑀺 𑀜𑀸𑀡𑀩𑀮𑀸𑀦𑀺. 𑀆𑀲𑀪𑀁 𑀞𑀸𑀦𑀦𑁆𑀢𑀺 𑀲𑁂𑀝𑁆𑀞𑀝𑁆𑀞𑀸𑀦𑀁. 𑀲𑀻𑀳𑀦𑀸𑀤𑀦𑁆𑀢𑀺 𑀅𑀪𑀻𑀢𑀦𑀸𑀤𑀁. 𑀩𑁆𑀭𑀳𑁆𑀫𑀘𑀓𑁆𑀓𑀦𑁆𑀢𑀺 𑀲𑁂𑀝𑁆𑀞𑀘𑀓𑁆𑀓𑀁. 𑀧𑀯𑀢𑁆𑀢𑁂𑀢𑀻𑀢𑀺 𑀓𑀣𑁂𑀢𑀺.

𑁨. 𑀓𑀽𑀝𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁨. 𑀤𑀼𑀢𑀺𑀬𑁂 𑀲𑁂𑀔𑀩𑀮𑀸𑀦𑀻𑀢𑀺 𑀲𑁂𑀔𑀸𑀦𑀁 𑀜𑀸𑀡𑀩𑀮𑀸𑀦𑀺. 𑀅𑀕𑁆𑀕𑀦𑁆𑀢𑀺 𑀉𑀢𑁆𑀢𑀫𑀁. 𑀲𑁂𑀲𑀩𑀮𑀸𑀦𑀺 𑀕𑁄𑀧𑀸𑀦𑀲𑀺𑀬𑁄 𑀓𑀽𑀝𑀁 𑀯𑀺𑀬 𑀲𑀗𑁆𑀕𑀡𑁆𑀳𑀸𑀢𑀻𑀢𑀺 𑀲𑀗𑁆𑀕𑀸𑀳𑀺𑀓𑀁. 𑀢𑀸𑀦𑁂𑀯 𑀩𑀮𑀸𑀦𑀺 𑀲𑀁𑀳𑀢𑀸𑀦𑀺 𑀓𑀭𑁄𑀢𑀻𑀢𑀺 𑀲𑀗𑁆𑀖𑀸𑀢𑀦𑀺𑀬𑀁.

𑁩. 𑀲𑀁𑀔𑀺𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁩. 𑀢𑀢𑀺𑀬𑁂 𑀢𑀢𑁆𑀣 𑀫𑀼𑀝𑁆𑀞𑀲𑁆𑀲𑀘𑁆𑀘𑁂 𑀦 𑀓𑀫𑁆𑀧𑀢𑀻𑀢𑀺 𑀲𑀢𑀺𑀩𑀮𑀁. 𑀉𑀤𑁆𑀥𑀘𑁆𑀘𑁂 𑀦 𑀓𑀫𑁆𑀧𑀢𑀻𑀢𑀺 𑀲𑀫𑀸𑀥𑀺𑀩𑀮𑀁.

𑁪. 𑀯𑀺𑀢𑁆𑀣𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁪. 𑀘𑀢𑀼𑀢𑁆𑀣𑁂 𑀲𑀢𑀺𑀦𑁂𑀧𑀓𑁆𑀓𑁂𑀦𑀸𑀢𑀺 𑀏𑀢𑁆𑀣 𑀦𑁂𑀧𑀓𑁆𑀓𑀁 𑀯𑀼𑀘𑁆𑀘𑀢𑀺 𑀧𑀜𑁆𑀜𑀸, 𑀲𑀸 𑀲𑀢𑀺𑀬𑀸 𑀉𑀧𑀓𑀸𑀭𑀓𑀪𑀸𑀯𑁂𑀦 𑀕𑀳𑀺𑀢𑀸.

𑁫. 𑀤𑀝𑁆𑀞𑀩𑁆𑀩𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁫. 𑀧𑀜𑁆𑀘𑀫𑁂 𑀲𑀯𑀺𑀲𑀬𑀲𑁆𑀫𑀺𑀁𑀬𑁂𑀯 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁂 𑀓𑀣𑁂𑀢𑀼𑀁 𑀓𑀢𑁆𑀣 𑀘, 𑀪𑀺𑀓𑁆𑀔𑀯𑁂, 𑀲𑀤𑁆𑀥𑀸𑀩𑀮𑀁 𑀤𑀝𑁆𑀞𑀩𑁆𑀩𑀦𑁆𑀢𑀺𑀆𑀤𑀺𑀫𑀸𑀳. 𑀬𑀣𑀸 𑀳𑀺 𑀘𑀢𑁆𑀢𑀸𑀭𑁄 𑀲𑁂𑀝𑁆𑀞𑀺𑀧𑀼𑀢𑁆𑀢𑀸, 𑀭𑀸𑀚𑀸𑀢𑀺 𑀭𑀸𑀚𑀧𑀜𑁆𑀘𑀫𑁂𑀲𑀼 𑀲𑀳𑀸𑀬𑁂𑀲𑀼 ‘‘𑀦𑀓𑁆𑀔𑀢𑁆𑀢𑀁 𑀓𑀻𑀴𑀺𑀲𑁆𑀲𑀸𑀫𑀸’’𑀢𑀺 𑀯𑀻𑀣𑀺𑀁 𑀑𑀢𑀺𑀡𑁆𑀡𑁂𑀲𑀼 𑀏𑀓𑀲𑁆𑀲 𑀲𑁂𑀝𑁆𑀞𑀺𑀧𑀼𑀢𑁆𑀢𑀲𑁆𑀲 𑀕𑁂𑀳𑀁 𑀕𑀢𑀓𑀸𑀮𑁂 𑀇𑀢𑀭𑁂 𑀘𑀢𑁆𑀢𑀸𑀭𑁄 𑀢𑀼𑀡𑁆𑀳𑀻 𑀦𑀺𑀲𑀻𑀤𑀦𑁆𑀢𑀺, 𑀕𑁂𑀳𑀲𑀸𑀫𑀺𑀓𑁄𑀯 ‘‘𑀇𑀫𑁂𑀲𑀁 𑀔𑀸𑀤𑀦𑀻𑀬𑀁 𑀪𑁄𑀚𑀦𑀻𑀬𑀁 𑀤𑁂𑀣, 𑀕𑀦𑁆𑀥𑀫𑀸𑀮𑀸𑀮𑀗𑁆𑀓𑀸𑀭𑀸𑀤𑀻𑀦𑀺 𑀤𑁂𑀣𑀸’’𑀢𑀺 𑀕𑁂𑀳𑁂 𑀯𑀺𑀘𑀸𑀭𑁂𑀢𑀺. 𑀤𑀼𑀢𑀺𑀬𑀢𑀢𑀺𑀬𑀘𑀢𑀼𑀢𑁆𑀣𑀲𑁆𑀲 𑀕𑁂𑀳𑀁 𑀕𑀢𑀓𑀸𑀮𑁂 𑀇𑀢𑀭𑁂 𑀘𑀢𑁆𑀢𑀸𑀭𑁄 𑀢𑀼𑀡𑁆𑀳𑀻 𑀦𑀺𑀲𑀻𑀤𑀦𑁆𑀢𑀺, 𑀕𑁂𑀳𑀲𑀸𑀫𑀺𑀓𑁄𑀯 ‘‘𑀇𑀫𑁂𑀲𑀁 𑀔𑀸𑀤𑀦𑀻𑀬𑀁 𑀪𑁄𑀚𑀦𑀻𑀬𑀁 𑀤𑁂𑀣, 𑀕𑀦𑁆𑀥𑀫𑀸𑀮𑀸𑀮𑀗𑁆𑀓𑀸𑀭𑀸𑀤𑀻𑀦𑀺 𑀤𑁂𑀣𑀸’’𑀢𑀺 𑀕𑁂𑀳𑁂 𑀯𑀺𑀘𑀸𑀭𑁂𑀢𑀺. 𑀅𑀣 𑀲𑀩𑁆𑀩𑀧𑀘𑁆𑀙𑀸 𑀭𑀜𑁆𑀜𑁄 𑀕𑁂𑀳𑀁 𑀕𑀢𑀓𑀸𑀮𑁂 𑀓𑀺𑀜𑁆𑀘𑀸𑀧𑀺 𑀭𑀸𑀚𑀸 𑀲𑀩𑁆𑀩𑀢𑁆𑀣 𑀇𑀲𑁆𑀲𑀭𑁄, 𑀇𑀫𑀲𑁆𑀫𑀺𑀁 𑀧𑀦 𑀓𑀸𑀮𑁂 𑀅𑀢𑁆𑀢𑀦𑁄 𑀕𑁂𑀳𑁂𑀬𑁂𑀯 ‘‘𑀇𑀫𑁂𑀲𑀁 𑀔𑀸𑀤𑀦𑀻𑀬𑀁 𑀪𑁄𑀚𑀦𑀻𑀬𑀁 𑀤𑁂𑀣, 𑀕𑀦𑁆𑀥𑀫𑀸𑀮𑀸𑀮𑀗𑁆𑀓𑀸𑀭𑀸𑀤𑀻𑀦𑀺 𑀤𑁂𑀣𑀸’’𑀢𑀺 𑀯𑀺𑀘𑀸𑀭𑁂𑀢𑀺, 𑀏𑀯𑀫𑁂𑀯𑀁 𑀲𑀤𑁆𑀥𑀸𑀧𑀜𑁆𑀘𑀫𑁂𑀲𑀼 𑀩𑀮𑁂𑀲𑀼 𑀢𑁂𑀲𑀼 𑀲𑀳𑀸𑀬𑁂𑀲𑀼 𑀏𑀓𑀢𑁄 𑀯𑀻𑀣𑀺𑀁 𑀑𑀢𑀭𑀦𑁆𑀢𑁂𑀲𑀼 𑀯𑀺𑀬 𑀏𑀓𑀸𑀭𑀫𑁆𑀫𑀡𑁂 𑀉𑀧𑁆𑀧𑀚𑁆𑀚𑀫𑀸𑀦𑁂𑀲𑀼𑀧𑀺 𑀬𑀣𑀸 𑀧𑀞𑀫𑀲𑁆𑀲 𑀕𑁂𑀳𑁂 𑀇𑀢𑀭𑁂 𑀘𑀢𑁆𑀢𑀸𑀭𑁄 𑀢𑀼𑀡𑁆𑀳𑀻 𑀦𑀺𑀲𑀻𑀤𑀦𑁆𑀢𑀺, 𑀕𑁂𑀳𑀲𑀸𑀫𑀺𑀓𑁄𑀯 𑀯𑀺𑀘𑀸𑀭𑁂𑀢𑀺, 𑀏𑀯𑀁 𑀲𑁄𑀢𑀸𑀧𑀢𑁆𑀢𑀺𑀬𑀗𑁆𑀕𑀸𑀦𑀺 𑀧𑀢𑁆𑀯𑀸 𑀅𑀥𑀺𑀫𑁄𑀓𑁆𑀔𑀮𑀓𑁆𑀔𑀡𑀁 𑀲𑀤𑁆𑀥𑀸𑀩𑀮𑀫𑁂𑀯 𑀚𑁂𑀝𑁆𑀞𑀓𑀁 𑀳𑁄𑀢𑀺 𑀧𑀼𑀩𑁆𑀩𑀗𑁆𑀕𑀫𑀁, 𑀲𑁂𑀲𑀸𑀦𑀺 𑀢𑀤𑀦𑁆𑀯𑀬𑀸𑀦𑀺 𑀳𑁄𑀦𑁆𑀢𑀺. 𑀬𑀣𑀸 𑀤𑀼𑀢𑀺𑀬𑀲𑁆𑀲 𑀕𑁂𑀳𑁂 𑀇𑀢𑀭𑁂 𑀘𑀢𑁆𑀢𑀸𑀭𑁄 𑀢𑀼𑀡𑁆𑀳𑀻 𑀦𑀺𑀲𑀻𑀤𑀦𑁆𑀢𑀺, 𑀕𑁂𑀳𑀲𑀸𑀫𑀺𑀓𑁄𑀯 𑀯𑀺𑀘𑀸𑀭𑁂𑀢𑀺, 𑀏𑀯𑀁 𑀲𑀫𑁆𑀫𑀧𑁆𑀧𑀥𑀸𑀦𑀸𑀦𑀺 𑀧𑀢𑁆𑀯𑀸 𑀧𑀕𑁆𑀕𑀳𑀮𑀓𑁆𑀔𑀡𑀁 𑀯𑀻𑀭𑀺𑀬𑀩𑀮𑀫𑁂𑀯 𑀚𑁂𑀝𑁆𑀞𑀓𑀁 𑀳𑁄𑀢𑀺 𑀧𑀼𑀩𑁆𑀩𑀗𑁆𑀕𑀫𑀁, 𑀲𑁂𑀲𑀸𑀦𑀺 𑀢𑀤𑀦𑁆𑀯𑀬𑀸𑀦𑀺 𑀳𑁄𑀦𑁆𑀢𑀺. 𑀬𑀣𑀸 𑀢𑀢𑀺𑀬𑀲𑁆𑀲 𑀕𑁂𑀳𑁂 𑀇𑀢𑀭𑁂 𑀘𑀢𑁆𑀢𑀸𑀭𑁄 𑀢𑀼𑀡𑁆𑀳𑀻 𑀦𑀺𑀲𑀻𑀤𑀦𑁆𑀢𑀺, 𑀕𑁂𑀳𑀲𑀸𑀫𑀺𑀓𑁄𑀯 𑀯𑀺𑀘𑀸𑀭𑁂𑀢𑀺, 𑀏𑀯𑀁 𑀲𑀢𑀺𑀧𑀝𑁆𑀞𑀸𑀦𑀸𑀦𑀺 𑀧𑀢𑁆𑀯𑀸 𑀉𑀧𑀝𑁆𑀞𑀸𑀦𑀮𑀓𑁆𑀔𑀡𑀁 𑀲𑀢𑀺𑀩𑀮𑀫𑁂𑀯 𑀚𑁂𑀝𑁆𑀞𑀓𑀁 𑀳𑁄𑀢𑀺 𑀧𑀼𑀩𑁆𑀩𑀗𑁆𑀕𑀫𑀁, 𑀲𑁂𑀲𑀸𑀦𑀺 𑀢𑀤𑀦𑁆𑀯𑀬𑀸𑀦𑀺 𑀳𑁄𑀦𑁆𑀢𑀺. 𑀬𑀣𑀸 𑀘𑀢𑀼𑀢𑁆𑀣𑀲𑁆𑀲 𑀕𑁂𑀳𑁂 𑀇𑀢𑀭𑁂 𑀘𑀢𑁆𑀢𑀸𑀭𑁄 𑀢𑀼𑀡𑁆𑀳𑀻 𑀦𑀺𑀲𑀻𑀤𑀦𑁆𑀢𑀺, 𑀕𑁂𑀳𑀲𑀸𑀫𑀺𑀓𑁄𑀯 𑀯𑀺𑀘𑀸𑀭𑁂𑀢𑀺, 𑀏𑀯𑀁 𑀛𑀸𑀦𑀯𑀺𑀫𑁄𑀓𑁆𑀔𑁂 𑀧𑀢𑁆𑀯𑀸 𑀅𑀯𑀺𑀓𑁆𑀔𑁂𑀧𑀮𑀓𑁆𑀔𑀡𑀁 𑀲𑀫𑀸𑀥𑀺𑀩𑀮𑀫𑁂𑀯 𑀚𑁂𑀝𑁆𑀞𑀓𑀁 𑀳𑁄𑀢𑀺 𑀧𑀼𑀩𑁆𑀩𑀗𑁆𑀕𑀫𑀁, 𑀲𑁂𑀲𑀸𑀦𑀺 𑀢𑀤𑀦𑁆𑀯𑀬𑀸𑀦𑀺 𑀳𑁄𑀦𑁆𑀢𑀺. 𑀲𑀩𑁆𑀩𑀧𑀘𑁆𑀙𑀸 𑀭𑀜𑁆𑀜𑁄 𑀕𑁂𑀳𑀁 𑀕𑀢𑀓𑀸𑀮𑁂 𑀧𑀦 𑀬𑀣𑀸 𑀇𑀢𑀭𑁂 𑀘𑀢𑁆𑀢𑀸𑀭𑁄 𑀢𑀼𑀡𑁆𑀳𑀻 𑀦𑀺𑀲𑀻𑀤𑀦𑁆𑀢𑀺, 𑀭𑀸𑀚𑀸𑀯 𑀕𑁂𑀳𑁂 𑀯𑀺𑀘𑀸𑀭𑁂𑀢𑀺, 𑀏𑀯𑀫𑁂𑀯 𑀅𑀭𑀺𑀬𑀲𑀘𑁆𑀘𑀸𑀦𑀺 𑀧𑀢𑁆𑀯𑀸 𑀧𑀚𑀸𑀦𑀦𑀮𑀓𑁆𑀔𑀡𑀁 𑀧𑀜𑁆𑀜𑀸𑀩𑀮𑀫𑁂𑀯 𑀚𑁂𑀝𑁆𑀞𑀓𑀁 𑀳𑁄𑀢𑀺 𑀧𑀼𑀩𑁆𑀩𑀗𑁆𑀕𑀫𑀁, 𑀲𑁂𑀲𑀸𑀦𑀺 𑀢𑀤𑀦𑁆𑀯𑀬𑀸𑀦𑀺 𑀳𑁄𑀦𑁆𑀢𑀻𑀢𑀺 𑀏𑀯𑀫𑀺𑀥 𑀧𑀜𑁆𑀘 𑀩𑀮𑀸𑀦𑀺 𑀫𑀺𑀲𑁆𑀲𑀓𑀸𑀦𑀺 𑀓𑀣𑀺𑀢𑀸𑀦𑀺. 𑀙𑀝𑁆𑀞𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯. 𑀏𑀯𑀁 𑀧𑀼𑀭𑀺𑀫𑀯𑀕𑁆𑀕𑁂 𑀘 𑀇𑀥 𑀘 𑀅𑀝𑁆𑀞𑀲𑀼 𑀲𑀼𑀢𑁆𑀢𑁂𑀲𑀼 𑀲𑁂𑀔𑀩𑀮𑀸𑀦𑁂𑀯 𑀓𑀣𑀺𑀢𑀸𑀦𑀺. 𑀓𑀭𑀡𑁆𑀟𑀓𑁄𑀮𑀯𑀸𑀲𑀻 𑀫𑀳𑀸𑀤𑀢𑁆𑀢𑀢𑁆𑀣𑁂𑀭𑁄 𑀧𑀦𑀸𑀳 𑁋 ‘‘𑀳𑁂𑀝𑁆𑀞𑀸 𑀘𑀢𑀽𑀲𑀼 𑀲𑀼𑀢𑁆𑀢𑁂𑀲𑀼 𑀲𑁂𑀔𑀩𑀮𑀸𑀦𑀺 𑀓𑀣𑀺𑀢𑀸𑀦𑀺, 𑀉𑀧𑀭𑀺 𑀘𑀢𑀽𑀲𑀼 𑀅𑀲𑁂𑀔𑀩𑀮𑀸𑀦𑀻’’𑀢𑀺.

𑁭. 𑀧𑀞𑀫𑀳𑀺𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁭. 𑀲𑀢𑁆𑀢𑀫𑁂 𑀲𑀻𑀮𑀸𑀤𑀬𑁄 𑀫𑀺𑀲𑁆𑀲𑀓𑀸𑀯 𑀓𑀣𑀺𑀢𑀸. 𑀯𑀺𑀫𑀼𑀢𑁆𑀢𑀻𑀢𑀺 𑀅𑀭𑀳𑀢𑁆𑀢𑀨𑀮𑀯𑀺𑀫𑀼𑀢𑁆𑀢𑀺𑀬𑁂𑀯. 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀁 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀁, 𑀢𑀁 𑀮𑁄𑀓𑀺𑀬𑀫𑁂𑀯.

𑁮-𑁧𑁦. 𑀤𑀼𑀢𑀺𑀬𑀳𑀺𑀢𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁮-𑁨𑁦. 𑀅𑀝𑁆𑀞𑀫𑁂 𑀤𑀼𑀲𑁆𑀲𑀻𑀮𑁄 𑀩𑀳𑀼𑀲𑁆𑀲𑀼𑀢𑁄 𑀓𑀣𑀺𑀢𑁄, 𑀦𑀯𑀫𑁂 𑀅𑀧𑁆𑀧𑀲𑁆𑀲𑀼𑀢𑁄 𑀤𑀼𑀲𑁆𑀲𑀻𑀮𑁄, 𑀤𑀲𑀫𑁂 𑀩𑀳𑀼𑀲𑁆𑀲𑀼𑀢𑁄 𑀔𑀻𑀡𑀸𑀲𑀯𑁄𑀢𑀺.

𑀩𑀮𑀯𑀕𑁆𑀕𑁄 𑀤𑀼𑀢𑀺𑀬𑁄.

𑁩. 𑀧𑀜𑁆𑀘𑀗𑁆𑀕𑀺𑀓𑀯𑀕𑁆𑀕𑁄

𑁧. 𑀧𑀞𑀫𑀅𑀕𑀸𑀭𑀯𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁧. 𑀢𑀢𑀺𑀬𑀲𑁆𑀲 𑀧𑀞𑀫𑁂 𑀅𑀲𑀪𑀸𑀕𑀯𑀼𑀢𑁆𑀢𑀺𑀓𑁄𑀢𑀺 𑀅𑀲𑀪𑀸𑀕𑀸𑀬 𑀯𑀺𑀲𑀤𑀺𑀲𑀸𑀬 𑀚𑀻𑀯𑀺𑀢𑀯𑀼𑀢𑁆𑀢𑀺𑀬𑀸 𑀲𑀫𑀦𑁆𑀦𑀸𑀕𑀢𑁄. 𑀆𑀪𑀺𑀲𑀫𑀸𑀘𑀸𑀭𑀺𑀓𑀁 𑀥𑀫𑁆𑀫𑀦𑁆𑀢𑀺 𑀉𑀢𑁆𑀢𑀫𑀲𑀫𑀸𑀘𑀸𑀭𑀪𑀽𑀢𑀁 𑀯𑀢𑁆𑀢𑀯𑀲𑁂𑀦 𑀧𑀜𑁆𑀜𑀢𑁆𑀢𑀲𑀻𑀮𑀁. 𑀲𑁂𑀔𑀁 𑀥𑀫𑁆𑀫𑀦𑁆𑀢𑀺 𑀲𑁂𑀔𑀧𑀡𑁆𑀡𑀢𑁆𑀢𑀺𑀲𑀻𑀮𑀁. 𑀲𑀻𑀮𑀸𑀦𑀻𑀢𑀺 𑀘𑀢𑁆𑀢𑀸𑀭𑀺 𑀫𑀳𑀸𑀲𑀻𑀮𑀸𑀦𑀺. 𑀲𑀫𑁆𑀫𑀸𑀤𑀺𑀝𑁆𑀞𑀺𑀦𑁆𑀢𑀺 𑀯𑀺𑀧𑀲𑁆𑀲𑀦𑀸𑀲𑀫𑁆𑀫𑀸𑀤𑀺𑀝𑁆𑀞𑀺𑀁. 𑀲𑀫𑁆𑀫𑀸𑀲𑀫𑀸𑀥𑀺𑀦𑁆𑀢𑀺 𑀫𑀕𑁆𑀕𑀲𑀫𑀸𑀥𑀺𑀜𑁆𑀘𑁂𑀯 𑀨𑀮𑀲𑀫𑀸𑀥𑀺𑀜𑁆𑀘. 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀲𑀻𑀮𑀸𑀤𑀻𑀦𑀺 𑀫𑀺𑀲𑁆𑀲𑀓𑀸𑀦𑀺 𑀓𑀣𑀺𑀢𑀸𑀦𑀺.

𑁨. 𑀤𑀼𑀢𑀺𑀬𑀅𑀕𑀸𑀭𑀯𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁨. 𑀤𑀼𑀢𑀺𑀬𑁂 𑀲𑀻𑀮𑀓𑁆𑀔𑀦𑁆𑀥𑀦𑁆𑀢𑀺 𑀲𑀻𑀮𑀭𑀸𑀲𑀺𑀁. 𑀲𑁂𑀲𑀤𑁆𑀯𑀬𑁂𑀧𑀺 𑀏𑀲𑁂𑀯 𑀦𑀬𑁄. 𑀇𑀫𑁂 𑀧𑀦 𑀢𑀬𑁄𑀧𑀺 𑀔𑀦𑁆𑀥𑀸 𑀫𑀺𑀲𑁆𑀲𑀓𑀸𑀯 𑀓𑀣𑀺𑀢𑀸𑀢𑀺.

𑁩. 𑀉𑀧𑀓𑁆𑀓𑀺𑀮𑁂𑀲𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁩. 𑀢𑀢𑀺𑀬𑁂 𑀦 𑀘 𑀧𑀪𑀲𑁆𑀲𑀭𑀦𑁆𑀢𑀺 𑀦 𑀘 𑀧𑀪𑀸𑀯𑀦𑁆𑀢𑀁. 𑀧𑀪𑀗𑁆𑀕𑀼 𑀘𑀸𑀢𑀺 𑀧𑀪𑀺𑀚𑁆𑀚𑀦𑀲𑀪𑀸𑀯𑀁. 𑀅𑀬𑁄𑀢𑀺 𑀓𑀸𑀴𑀮𑁄𑀳𑀁. 𑀮𑁄𑀳𑀦𑁆𑀢𑀺 𑀞𑀧𑁂𑀢𑁆𑀯𑀸 𑀇𑀥 𑀯𑀼𑀢𑁆𑀢𑀸𑀦𑀺 𑀘𑀢𑁆𑀢𑀸𑀭𑀺 𑀅𑀯𑀲𑁂𑀲𑀁 𑀮𑁄𑀳𑀁. 𑀲𑀚𑁆𑀛𑀦𑁆𑀢𑀺 𑀭𑀚𑀢𑀁. 𑀘𑀺𑀢𑁆𑀢𑀲𑁆𑀲𑀸𑀢𑀺 𑀘𑀸𑀢𑀼𑀪𑀽𑀫𑀓𑀓𑀼𑀲𑀮𑀘𑀺𑀢𑁆𑀢𑀲𑁆𑀲. 𑀢𑁂𑀪𑀽𑀫𑀓𑀲𑁆𑀲 𑀢𑀸𑀯 𑀉𑀧𑀓𑁆𑀓𑀺𑀮𑁂𑀲𑀸 𑀳𑁄𑀦𑁆𑀢𑀼, 𑀮𑁄𑀓𑀼𑀢𑁆𑀢𑀭𑀲𑁆𑀲 𑀓𑀣𑀁 𑀳𑁄𑀦𑁆𑀢𑀻𑀢𑀺? 𑀉𑀧𑁆𑀧𑀚𑁆𑀚𑀺𑀢𑀼𑀁 𑀅𑀧𑁆𑀧𑀤𑀸𑀦𑁂𑀦. 𑀬𑀤𑀕𑁆𑀕𑁂𑀦 𑀳𑀺 𑀉𑀧𑁆𑀧𑀚𑁆𑀚𑀺𑀢𑀼𑀁 𑀦 𑀤𑁂𑀦𑁆𑀢𑀺, 𑀢𑀤𑀕𑁆𑀕𑁂𑀦𑁂𑀯 𑀢𑁂 𑀮𑁄𑀓𑀺𑀬𑀲𑁆𑀲𑀧𑀺 𑀮𑁄𑀓𑀼𑀢𑁆𑀢𑀭𑀲𑁆𑀲𑀧𑀺 𑀉𑀧𑀓𑁆𑀓𑀺𑀮𑁂𑀲𑀸 𑀦𑀸𑀫 𑀳𑁄𑀦𑁆𑀢𑀺. 𑀧𑀪𑀗𑁆𑀕𑀼 𑀘𑀸𑀢𑀺 𑀆𑀭𑀫𑁆𑀫𑀡𑁂 𑀘𑀼𑀡𑁆𑀡𑀯𑀺𑀘𑀼𑀡𑁆𑀡𑀪𑀸𑀯𑀽𑀧𑀕𑀫𑀦𑁂𑀦 𑀪𑀺𑀚𑁆𑀚𑀦𑀲𑀪𑀸𑀯𑀁. 𑀲𑀫𑁆𑀫𑀸 𑀲𑀫𑀸𑀥𑀺𑀬𑀢𑀺 𑀆𑀲𑀯𑀸𑀦𑀁 𑀔𑀬𑀸𑀬𑀸𑀢𑀺 𑀆𑀲𑀯𑀸𑀦𑀁 𑀔𑀬𑀲𑀗𑁆𑀔𑀸𑀢𑀲𑁆𑀲 𑀅𑀭𑀳𑀢𑁆𑀢𑀲𑁆𑀲 𑀅𑀢𑁆𑀣𑀸𑀬 𑀳𑁂𑀢𑀼𑀦𑀸 𑀓𑀸𑀭𑀡𑁂𑀦 𑀲𑀫𑀸𑀥𑀺𑀬𑀢𑀺. 𑀏𑀢𑁆𑀢𑀸𑀯𑀢𑀸 𑀘𑀺𑀢𑁆𑀢𑀁 𑀯𑀺𑀲𑁄𑀥𑁂𑀢𑁆𑀯𑀸 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀺𑀢𑀁 𑀔𑀻𑀡𑀸𑀲𑀯𑀁 𑀤𑀲𑁆𑀲𑁂𑀢𑀺. 𑀇𑀤𑀸𑀦𑀺𑀲𑁆𑀲 𑀅𑀪𑀺𑀜𑁆𑀜𑀸𑀧𑀝𑀺𑀯𑁂𑀥𑀁 𑀤𑀲𑁆𑀲𑁂𑀦𑁆𑀢𑁄 𑀬𑀲𑁆𑀲 𑀬𑀲𑁆𑀲 𑀘𑀸𑀢𑀺𑀆𑀤𑀺𑀫𑀸𑀳. 𑀢𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑁪. 𑀤𑀼𑀲𑁆𑀲𑀻𑀮𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁪. 𑀘𑀢𑀼𑀢𑁆𑀣𑁂 𑀳𑀢𑀽𑀧𑀦𑀺𑀲𑁄𑀢𑀺 𑀳𑀢𑀉𑀧𑀦𑀺𑀲𑁆𑀲𑀬𑁄 𑀳𑀢𑀓𑀸𑀭𑀡𑁄. 𑀬𑀣𑀸𑀪𑀽𑀢𑀜𑀸𑀡𑀤𑀲𑁆𑀲𑀦𑀦𑁆𑀢𑀺 𑀦𑀸𑀫𑀭𑀽𑀧𑀧𑀭𑀺𑀘𑁆𑀙𑁂𑀤𑀜𑀸𑀡𑀁 𑀆𑀤𑀺𑀁 𑀓𑀢𑁆𑀯𑀸 𑀢𑀭𑀼𑀡𑀯𑀺𑀧𑀲𑁆𑀲𑀦𑀸. 𑀦𑀺𑀩𑁆𑀩𑀺𑀤𑀸𑀯𑀺𑀭𑀸𑀕𑁄𑀢𑀺 𑀦𑀺𑀩𑁆𑀩𑀺𑀤𑀸 𑀘 𑀯𑀺𑀭𑀸𑀕𑁄 𑀘. 𑀢𑀢𑁆𑀣 𑀦𑀺𑀩𑁆𑀩𑀺𑀤𑀸 𑀩𑀮𑀯𑀯𑀺𑀧𑀲𑁆𑀲𑀦𑀸, 𑀯𑀺𑀭𑀸𑀕𑁄 𑀫𑀕𑁆𑀕𑁄. 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀦𑁆𑀢𑀺 𑀨𑀮𑀯𑀺𑀫𑀼𑀢𑁆𑀢𑀺 𑀘 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀜𑁆𑀘.

𑁫. 𑀅𑀦𑀼𑀕𑁆𑀕𑀳𑀺𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁫. 𑀧𑀜𑁆𑀘𑀫𑁂 𑀲𑀫𑁆𑀫𑀸𑀤𑀺𑀝𑁆𑀞𑀻𑀢𑀺 𑀯𑀺𑀧𑀲𑁆𑀲𑀦𑀸𑀲𑀫𑁆𑀫𑀸𑀤𑀺𑀝𑁆𑀞𑀺. 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀨𑀮𑀸𑀢𑀺𑀆𑀤𑀻𑀲𑀼 𑀘𑁂𑀢𑁄𑀯𑀺𑀫𑀼𑀢𑁆𑀢𑀻𑀢𑀺 𑀫𑀕𑁆𑀕𑀨𑀮𑀲𑀫𑀸𑀥𑀺. 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀻𑀢𑀺 𑀨𑀮𑀜𑀸𑀡𑀁. 𑀲𑀻𑀮𑀸𑀦𑀼𑀕𑁆𑀕𑀳𑀺𑀢𑀸𑀢𑀺 𑀲𑀻𑀮𑁂𑀦 𑀅𑀦𑀼𑀕𑁆𑀕𑀳𑀺𑀢𑀸 𑀅𑀦𑀼𑀭𑀓𑁆𑀔𑀺𑀢𑀸. 𑀲𑀼𑀢𑀸𑀦𑀼𑀕𑁆𑀕𑀳𑀺𑀢𑀸𑀢𑀺 𑀩𑀸𑀳𑀼𑀲𑀘𑁆𑀘𑁂𑀦 𑀅𑀦𑀼𑀕𑁆𑀕𑀳𑀺𑀢𑀸. 𑀲𑀸𑀓𑀘𑁆𑀙𑀸𑀦𑀼𑀕𑁆𑀕𑀳𑀺𑀢𑀸𑀢𑀺 𑀥𑀫𑁆𑀫𑀲𑀸𑀓𑀘𑁆𑀙𑀸𑀬 𑀅𑀦𑀼𑀕𑁆𑀕𑀳𑀺𑀢𑀸. 𑀲𑀫𑀣𑀸𑀦𑀼𑀕𑁆𑀕𑀳𑀺𑀢𑀸𑀢𑀺 𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀬 𑀅𑀦𑀼𑀕𑁆𑀕𑀳𑀺𑀢𑀸.

𑀇𑀫𑀲𑁆𑀲 𑀧𑀦𑀢𑁆𑀣𑀲𑁆𑀲 𑀆𑀯𑀺𑀪𑀸𑀯𑀢𑁆𑀣𑀁 𑀫𑀥𑀼𑀭𑀫𑁆𑀩𑀩𑀻𑀚𑀁 𑀭𑁄𑀧𑁂𑀢𑁆𑀯𑀸 𑀲𑀫𑀦𑁆𑀢𑀸 𑀫𑀭𑀺𑀬𑀸𑀤𑀁 𑀩𑀦𑁆𑀥𑀺𑀢𑁆𑀯𑀸 𑀓𑀸𑀮𑀸𑀦𑀼𑀓𑀸𑀮𑀁 𑀉𑀤𑀓𑀁 𑀆𑀲𑀺𑀜𑁆𑀘𑀺𑀢𑁆𑀯𑀸 𑀓𑀸𑀮𑀸𑀦𑀼𑀓𑀸𑀮𑀁 𑀫𑀽𑀮𑀸𑀦𑀺 𑀲𑁄𑀥𑁂𑀢𑁆𑀯𑀸 𑀓𑀸𑀮𑀸𑀦𑀼𑀓𑀸𑀮𑀁 𑀧𑀢𑀺𑀢𑀧𑀸𑀡𑀓𑁂 𑀳𑀸𑀭𑁂𑀢𑁆𑀯𑀸 𑀓𑀸𑀮𑀸𑀦𑀼𑀓𑀸𑀮𑀁 𑀫𑀓𑁆𑀓𑀝𑀚𑀸𑀮𑀁 𑀮𑀼𑀜𑁆𑀘𑀺𑀢𑁆𑀯𑀸 𑀅𑀫𑁆𑀩𑀁 𑀧𑀝𑀺𑀚𑀕𑁆𑀕𑀦𑁆𑀢𑁄 𑀧𑀼𑀭𑀺𑀲𑁄 𑀤𑀲𑁆𑀲𑁂𑀢𑀩𑁆𑀩𑁄. 𑀢𑀲𑁆𑀲 𑀳𑀺 𑀧𑀼𑀭𑀺𑀲𑀲𑁆𑀲 𑀫𑀥𑀼𑀭𑀫𑁆𑀩𑀩𑀻𑀚𑀭𑁄𑀧𑀦𑀁 𑀯𑀺𑀬 𑀯𑀺𑀧𑀲𑁆𑀲𑀦𑀸𑀲𑀫𑁆𑀫𑀸𑀤𑀺𑀝𑁆𑀞𑀺 𑀤𑀝𑁆𑀞𑀩𑁆𑀩𑀸, 𑀫𑀭𑀺𑀬𑀸𑀤𑀩𑀦𑁆𑀥𑀦𑀁 𑀯𑀺𑀬 𑀲𑀻𑀮𑁂𑀦 𑀅𑀦𑀼𑀕𑁆𑀕𑀡𑁆𑀳𑀦𑀁, 𑀉𑀤𑀓𑀸𑀲𑁂𑀘𑀦𑀁 𑀯𑀺𑀬 𑀲𑀼𑀢𑁂𑀦 𑀅𑀦𑀼𑀕𑁆𑀕𑀡𑁆𑀳𑀦𑀁, 𑀫𑀽𑀮𑀧𑀭𑀺𑀲𑁄𑀥𑀦𑀁 𑀯𑀺𑀬 𑀲𑀸𑀓𑀘𑁆𑀙𑀸𑀬 𑀅𑀦𑀼𑀕𑁆𑀕𑀡𑁆𑀳𑀦𑀁, 𑀧𑀸𑀡𑀓𑀳𑀭𑀡𑀁 𑀯𑀺𑀬 𑀛𑀸𑀦𑀯𑀺𑀧𑀲𑁆𑀲𑀦𑀸𑀧𑀸𑀭𑀺𑀧𑀦𑁆𑀣𑀺𑀓𑀲𑁄𑀥𑀦𑀯𑀲𑁂𑀦 𑀲𑀫𑀣𑀸𑀦𑀼𑀕𑁆𑀕𑀡𑁆𑀳𑀦𑀁, 𑀫𑀓𑁆𑀓𑀝𑀚𑀸𑀮𑀮𑀼𑀜𑁆𑀘𑀦𑀁 𑀯𑀺𑀬 𑀩𑀮𑀯𑀯𑀺𑀧𑀲𑁆𑀲𑀦𑀸𑀦𑀼𑀕𑁆𑀕𑀡𑁆𑀳𑀦𑀁, 𑀏𑀯𑀁 𑀅𑀦𑀼𑀕𑁆𑀕𑀳𑀺𑀢𑀲𑁆𑀲 𑀭𑀼𑀓𑁆𑀔𑀲𑁆𑀲 𑀔𑀺𑀧𑁆𑀧𑀫𑁂𑀯 𑀯𑀟𑁆𑀠𑀺𑀢𑁆𑀯𑀸 𑀨𑀮𑀧𑁆𑀧𑀤𑀸𑀦𑀁 𑀯𑀺𑀬 𑀇𑀫𑁂𑀳𑀺 𑀲𑀻𑀮𑀸𑀤𑀻𑀳𑀺 𑀅𑀦𑀼𑀕𑁆𑀕𑀳𑀺𑀢𑀸𑀬 𑀫𑀽𑀮𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀔𑀺𑀧𑁆𑀧𑀫𑁂𑀯 𑀫𑀕𑁆𑀕𑀯𑀲𑁂𑀦 𑀯𑀟𑁆𑀠𑀺𑀢𑁆𑀯𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀨𑀮𑀧𑁆𑀧𑀤𑀸𑀦𑀁 𑀯𑁂𑀤𑀺𑀢𑀩𑁆𑀩𑀁.

𑁬. 𑀯𑀺𑀫𑀼𑀢𑁆𑀢𑀸𑀬𑀢𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁬. 𑀙𑀝𑁆𑀞𑁂 𑀯𑀺𑀫𑀼𑀢𑁆𑀢𑀸𑀬𑀢𑀦𑀸𑀦𑀻𑀢𑀺 𑀯𑀺𑀫𑀼𑀘𑁆𑀘𑀦𑀓𑀸𑀭𑀡𑀸𑀦𑀺. 𑀬𑀢𑁆𑀣𑀸𑀢𑀺 𑀬𑁂𑀲𑀼 𑀯𑀺𑀫𑀼𑀢𑁆𑀢𑀸𑀬𑀢𑀦𑁂𑀲𑀼. 𑀲𑀢𑁆𑀣𑀸 𑀥𑀫𑁆𑀫𑀁 𑀤𑁂𑀲𑁂𑀢𑀻𑀢𑀺 𑀘𑀢𑀼𑀲𑀘𑁆𑀘𑀥𑀫𑁆𑀫𑀁 𑀤𑁂𑀲𑁂𑀢𑀺. 𑀅𑀢𑁆𑀣𑀧𑀝𑀺𑀲𑀁𑀯𑁂𑀤𑀺𑀦𑁄𑀢𑀺 𑀧𑀸𑀴𑀺𑀅𑀢𑁆𑀣𑀁 𑀚𑀸𑀦𑀦𑁆𑀢𑀲𑁆𑀲. 𑀥𑀫𑁆𑀫𑀧𑀝𑀺𑀲𑀁𑀯𑁂𑀤𑀺𑀦𑁄𑀢𑀺 𑀧𑀸𑀴𑀺𑀁 𑀚𑀸𑀦𑀦𑁆𑀢𑀲𑁆𑀲. 𑀧𑀸𑀫𑁄𑀚𑁆𑀚𑀦𑁆𑀢𑀺 𑀢𑀭𑀼𑀡𑀧𑀻𑀢𑀺. 𑀧𑀻𑀢𑀻𑀢𑀺 𑀢𑀼𑀝𑁆𑀞𑀸𑀓𑀸𑀭𑀪𑀽𑀢𑀸 𑀩𑀮𑀯𑀧𑀻𑀢𑀺. 𑀓𑀸𑀬𑁄𑀢𑀺 𑀦𑀸𑀫𑀓𑀸𑀬𑁄. 𑀧𑀲𑁆𑀲𑀫𑁆𑀪𑀢𑀻𑀢𑀺 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀺. 𑀲𑀼𑀔𑀁 𑀯𑁂𑀤𑁂𑀢𑀻𑀢𑀺 𑀲𑀼𑀔𑀁 𑀧𑀝𑀺𑀮𑀪𑀢𑀺. 𑀘𑀺𑀢𑁆𑀢𑀁 𑀲𑀫𑀸𑀥𑀺𑀬𑀢𑀻𑀢𑀺 𑀅𑀭𑀳𑀢𑁆𑀢𑀨𑀮𑀲𑀫𑀸𑀥𑀺𑀦𑀸 𑀲𑀫𑀸𑀥𑀺𑀬𑀢𑀺. 𑀅𑀬𑀜𑁆𑀳𑀺 𑀢𑀁 𑀥𑀫𑁆𑀫𑀁 𑀲𑀼𑀡𑀦𑁆𑀢𑁄 𑀆𑀕𑀢𑀸𑀕𑀢𑀝𑁆𑀞𑀸𑀦𑁂 𑀛𑀸𑀦𑀯𑀺𑀧𑀲𑁆𑀲𑀦𑀸𑀫𑀕𑁆𑀕𑀨𑀮𑀸𑀦𑀺 𑀚𑀸𑀦𑀸𑀢𑀺, 𑀢𑀲𑁆𑀲 𑀏𑀯𑀁 𑀚𑀸𑀦𑀢𑁄 𑀧𑀻𑀢𑀺 𑀉𑀧𑁆𑀧𑀚𑁆𑀚𑀢𑀺. 𑀲𑁄 𑀢𑀲𑁆𑀲𑀸 𑀧𑀻𑀢𑀺𑀬𑀸 𑀅𑀦𑁆𑀢𑀭𑀸 𑀑𑀲𑀓𑁆𑀓𑀺𑀢𑀼𑀁 𑀦 𑀤𑁂𑀦𑁆𑀢𑁄 𑀉𑀧𑀘𑀸𑀭𑀓𑀫𑁆𑀫𑀝𑁆𑀞𑀸𑀦𑀺𑀓𑁄 𑀳𑀼𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀸𑀢𑀺. 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑁋 ‘‘𑀘𑀺𑀢𑁆𑀢𑀁 𑀲𑀫𑀸𑀥𑀺𑀬𑀢𑀻’’𑀢𑀺. 𑀲𑁂𑀲𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀅𑀬𑀁 𑀧𑀦 𑀯𑀺𑀲𑁂𑀲𑁄 𑁋 𑀲𑀫𑀸𑀥𑀺𑀦𑀺𑀫𑀺𑀢𑁆𑀢𑀦𑁆𑀢𑀺 𑀅𑀝𑁆𑀞𑀢𑀺𑀁𑀲𑀸𑀬 𑀆𑀭𑀫𑁆𑀫𑀡𑁂𑀲𑀼 𑀅𑀜𑁆𑀜𑀢𑀭𑁄 𑀲𑀫𑀸𑀥𑀺𑀬𑁂𑀯 𑀲𑀫𑀸𑀥𑀺𑀦𑀺𑀫𑀺𑀢𑁆𑀢𑀁. 𑀲𑀼𑀕𑁆𑀕𑀳𑀺𑀢𑀁 𑀳𑁄𑀢𑀻𑀢𑀺𑀆𑀤𑀺𑀲𑀼 𑀆𑀘𑀭𑀺𑀬𑀲𑁆𑀲 𑀲𑀦𑁆𑀢𑀺𑀓𑁂 𑀓𑀫𑁆𑀫𑀝𑁆𑀞𑀸𑀦𑀁 𑀉𑀕𑁆𑀕𑀡𑁆𑀳𑀦𑁆𑀢𑁂𑀦 𑀲𑀼𑀝𑁆𑀞𑀼 𑀕𑀳𑀺𑀢𑀁 𑀳𑁄𑀢𑀺 𑀲𑀼𑀝𑁆𑀞𑀼 𑀫𑀦𑀲𑀺𑀓𑀢𑀁 𑀲𑀼𑀝𑁆𑀞𑀼 𑀉𑀧𑀥𑀸𑀭𑀺𑀢𑀁. 𑀲𑀼𑀧𑁆𑀧𑀝𑀺𑀯𑀺𑀤𑁆𑀥𑀁 𑀧𑀜𑁆𑀜𑀸𑀬𑀸𑀢𑀺 𑀧𑀜𑁆𑀜𑀸𑀬 𑀲𑀼𑀝𑁆𑀞𑀼 𑀧𑀘𑁆𑀘𑀓𑁆𑀔𑀁 𑀓𑀢𑀁. 𑀢𑀲𑁆𑀫𑀺𑀁 𑀥𑀫𑁆𑀫𑁂𑀢𑀺 𑀢𑀲𑁆𑀫𑀺𑀁 𑀓𑀫𑁆𑀫𑀝𑁆𑀞𑀸𑀦𑀧𑀸𑀴𑀺𑀥𑀫𑁆𑀫𑁂. 𑀇𑀢𑀺 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀧𑀜𑁆𑀘𑀧𑀺 𑀯𑀺𑀫𑀼𑀢𑁆𑀢𑀸𑀬𑀢𑀦𑀸𑀦𑀺 𑀅𑀭𑀳𑀢𑁆𑀢𑀁 𑀧𑀸𑀧𑁂𑀢𑁆𑀯𑀸 𑀓𑀣𑀺𑀢𑀸𑀦𑀻𑀢𑀺.

𑁭. 𑀲𑀫𑀸𑀥𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁭. 𑀲𑀢𑁆𑀢𑀫𑁂 𑀅𑀧𑁆𑀧𑀫𑀸𑀡𑀦𑁆𑀢𑀺 𑀧𑀫𑀸𑀡𑀓𑀭𑀥𑀫𑁆𑀫𑀭𑀳𑀺𑀢𑀁 𑀮𑁄𑀓𑀼𑀢𑁆𑀢𑀭𑀁. 𑀦𑀺𑀧𑀓𑀸 𑀧𑀢𑀺𑀲𑁆𑀲𑀢𑀸𑀢𑀺 𑀦𑁂𑀧𑀓𑁆𑀓𑁂𑀦 𑀘 𑀲𑀢𑀺𑀬𑀸 𑀘 𑀲𑀫𑀦𑁆𑀦𑀸𑀕𑀢𑀸 𑀳𑀼𑀢𑁆𑀯𑀸. 𑀧𑀜𑁆𑀘 𑀜𑀸𑀡𑀸𑀦𑀻𑀢𑀺 𑀧𑀜𑁆𑀘 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀸𑀦𑀺. 𑀧𑀘𑁆𑀘𑀢𑁆𑀢𑀜𑁆𑀜𑁂𑀯 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀅𑀢𑁆𑀢𑀦𑀺𑀬𑁂𑀯 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀅𑀬𑀁 𑀲𑀫𑀸𑀥𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑀼𑀔𑁄 𑀘𑁂𑀯𑀸𑀢𑀺𑀆𑀤𑀻𑀲𑀼 𑀅𑀭𑀳𑀢𑁆𑀢𑀨𑀮𑀲𑀫𑀸𑀥𑀺 𑀅𑀥𑀺𑀧𑁆𑀧𑁂𑀢𑁄. 𑀫𑀕𑁆𑀕𑀲𑀫𑀸𑀥𑀻𑀢𑀺𑀧𑀺 𑀯𑀤𑀦𑁆𑀢𑀺𑀬𑁂𑀯. 𑀲𑁄 𑀳𑀺 𑀅𑀧𑁆𑀧𑀺𑀢𑀧𑁆𑀧𑀺𑀢𑀓𑁆𑀔𑀡𑁂 𑀲𑀼𑀔𑀢𑁆𑀢𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑀼𑀔𑁄, 𑀧𑀼𑀭𑀺𑀫𑁄 𑀧𑀼𑀭𑀺𑀫𑁄 𑀧𑀘𑁆𑀙𑀺𑀫𑀲𑁆𑀲 𑀧𑀘𑁆𑀙𑀺𑀫𑀲𑁆𑀲 𑀲𑀫𑀸𑀥𑀺𑀲𑀼𑀔𑀲𑁆𑀲 𑀧𑀘𑁆𑀘𑀬𑀢𑁆𑀢𑀸 𑀆𑀬𑀢𑀺𑀁 𑀲𑀼𑀔𑀯𑀺𑀧𑀸𑀓𑁄, 𑀓𑀺𑀮𑁂𑀲𑁂𑀳𑀺 𑀆𑀭𑀓𑀢𑁆𑀢𑀸 𑀅𑀭𑀺𑀬𑁄, 𑀓𑀸𑀫𑀸𑀫𑀺𑀲𑀯𑀝𑁆𑀝𑀸𑀫𑀺𑀲𑀮𑁄𑀓𑀸𑀫𑀺𑀲𑀸𑀦𑀁 𑀅𑀪𑀸𑀯𑀸 𑀦𑀺𑀭𑀸𑀫𑀺𑀲𑁄. 𑀩𑀼𑀤𑁆𑀥𑀸𑀤𑀻𑀳𑀺 𑀫𑀳𑀸𑀧𑀼𑀭𑀺𑀲𑁂𑀳𑀺 𑀲𑁂𑀯𑀺𑀢𑀢𑁆𑀢𑀸 𑀅𑀓𑀸𑀧𑀼𑀭𑀺𑀲𑀲𑁂𑀯𑀺𑀢𑁄. 𑀅𑀗𑁆𑀕𑀲𑀦𑁆𑀢𑀢𑀸𑀬 𑀆𑀭𑀫𑁆𑀫𑀡𑀲𑀦𑁆𑀢𑀢𑀸𑀬 𑀲𑀩𑁆𑀩𑀓𑀺𑀮𑁂𑀲𑀤𑀭𑀣𑀲𑀦𑁆𑀢𑀢𑀸𑀬 𑀘 𑀲𑀦𑁆𑀢𑁄, 𑀅𑀢𑀧𑁆𑀧𑀦𑀺𑀬𑀝𑁆𑀞𑁂𑀦 𑀧𑀡𑀻𑀢𑁄. 𑀓𑀺𑀮𑁂𑀲𑀧𑁆𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀬𑀸 𑀮𑀤𑁆𑀥𑀢𑁆𑀢𑀸 𑀓𑀺𑀮𑁂𑀲𑀧𑁆𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀪𑀸𑀯𑀁 𑀯𑀸 𑀮𑀤𑁆𑀥𑀢𑁆𑀢𑀸 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀮𑀤𑁆𑀥𑁄. 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀁 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀻𑀢𑀺 𑀳𑀺 𑀇𑀤𑀁 𑀅𑀢𑁆𑀣𑀢𑁄 𑀏𑀓𑀁. 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀓𑀺𑀮𑁂𑀲𑁂𑀦 𑀯𑀸 𑀅𑀭𑀳𑀢𑀸 𑀮𑀤𑁆𑀥𑀢𑁆𑀢𑀸𑀧𑀺 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀮𑀤𑁆𑀥𑁄, 𑀏𑀓𑁄𑀤𑀺𑀪𑀸𑀯𑁂𑀦 𑀅𑀥𑀺𑀕𑀢𑀢𑁆𑀢𑀸 𑀏𑀓𑁄𑀤𑀺𑀪𑀸𑀯𑀫𑁂𑀯 𑀯𑀸 𑀅𑀥𑀺𑀕𑀢𑀢𑁆𑀢𑀸 𑀏𑀓𑁄𑀤𑀺𑀪𑀸𑀯𑀸𑀥𑀺𑀕𑀢𑁄. 𑀅𑀧𑁆𑀧𑀕𑀼𑀡𑀲𑀸𑀲𑀯𑀲𑀫𑀸𑀥𑀺 𑀯𑀺𑀬 𑀲𑀲𑀗𑁆𑀔𑀸𑀭𑁂𑀦 𑀲𑀧𑁆𑀧𑀬𑁄𑀕𑁂𑀦 𑀘𑀺𑀢𑁆𑀢𑁂𑀦 𑀧𑀘𑁆𑀘𑀦𑀻𑀓𑀥𑀫𑁆𑀫𑁂 𑀦𑀺𑀕𑁆𑀕𑀬𑁆𑀳 𑀓𑀺𑀮𑁂𑀲𑁂 𑀯𑀸𑀭𑁂𑀢𑁆𑀯𑀸 𑀅𑀦𑀥𑀺𑀕𑀢𑀢𑁆𑀢𑀸 𑀦 𑀲𑀲𑀗𑁆𑀔𑀸𑀭𑀦𑀺𑀕𑁆𑀕𑀬𑁆𑀳𑀯𑀸𑀭𑀺𑀢𑀕𑀢𑁄. 𑀢𑀁 𑀲𑀫𑀸𑀥𑀺𑀁 𑀲𑀫𑀸𑀧𑀚𑁆𑀚𑀦𑁆𑀢𑁄 𑀢𑀢𑁄 𑀯𑀸 𑀯𑀼𑀝𑁆𑀞𑀳𑀦𑁆𑀢𑁄 𑀲𑀢𑀺𑀯𑁂𑀧𑀼𑀮𑁆𑀮𑀧𑁆𑀧𑀢𑁆𑀢𑀢𑁆𑀢𑀸 𑀲𑀢𑁄𑀯 𑀲𑀫𑀸𑀧𑀚𑁆𑀚𑀢𑀺, 𑀲𑀢𑁄𑀯 𑀯𑀼𑀝𑁆𑀞𑀳𑀢𑀺. 𑀬𑀣𑀸𑀧𑀭𑀺𑀘𑁆𑀙𑀺𑀦𑁆𑀦𑀓𑀸𑀮𑀯𑀲𑁂𑀦 𑀯𑀸 𑀲𑀢𑁄 𑀲𑀫𑀸𑀧𑀚𑁆𑀚𑀢𑀺, 𑀲𑀢𑁄 𑀯𑀼𑀝𑁆𑀞𑀳𑀢𑀺. 𑀢𑀲𑁆𑀫𑀸 𑀬𑀤𑁂𑀢𑁆𑀣 ‘‘𑀅𑀬𑀁 𑀲𑀫𑀸𑀥𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑀼𑀔𑁄 𑀘𑁂𑀯 𑀆𑀬𑀢𑀺𑀜𑁆𑀘 𑀲𑀼𑀔𑀯𑀺𑀧𑀸𑀓𑁄 𑀘𑀸’’𑀢𑀺 𑀏𑀯𑀁 𑀧𑀘𑁆𑀘𑀯𑁂𑀓𑁆𑀔𑀫𑀸𑀦𑀲𑁆𑀲 𑀧𑀘𑁆𑀘𑀢𑁆𑀢𑀁𑀬𑁂𑀯 𑀅𑀧𑀭𑀧𑁆𑀧𑀘𑁆𑀘𑀬𑀜𑀸𑀡𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀁 𑀏𑀓𑀁 𑀜𑀸𑀡𑀁. 𑀏𑀲𑁂𑀯 𑀦𑀬𑁄 𑀲𑁂𑀲𑁂𑀲𑀼. 𑀏𑀯𑀁 𑀇𑀫𑀸𑀦𑀺 𑀧𑀜𑁆𑀘 𑀜𑀸𑀡𑀸𑀦𑀺 𑀧𑀘𑁆𑀘𑀢𑁆𑀢𑀜𑁆𑀜𑁂𑀯 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺.

𑁮. 𑀧𑀜𑁆𑀘𑀗𑁆𑀕𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁮. 𑀅𑀝𑁆𑀞𑀫𑁂 𑀅𑀭𑀺𑀬𑀲𑁆𑀲𑀸𑀢𑀺 𑀯𑀺𑀓𑁆𑀔𑀫𑁆𑀪𑀦𑀯𑀲𑁂𑀦 𑀧𑀳𑀻𑀦𑀓𑀺𑀮𑁂𑀲𑁂𑀳𑀺 𑀆𑀭𑀓𑀸 𑀞𑀺𑀢𑀲𑁆𑀲. 𑀪𑀸𑀯𑀦𑀁 𑀤𑁂𑀲𑁂𑀲𑁆𑀲𑀸𑀫𑀻𑀢𑀺 𑀩𑁆𑀭𑀽𑀳𑀦𑀁 𑀯𑀟𑁆𑀠𑀦𑀁 𑀧𑀓𑀸𑀲𑀬𑀺𑀲𑁆𑀲𑀸𑀫𑀺. 𑀇𑀫𑀫𑁂𑀯 𑀓𑀸𑀬𑀦𑁆𑀢𑀺 𑀇𑀫𑀁 𑀓𑀭𑀚𑀓𑀸𑀬𑀁. 𑀅𑀪𑀺𑀲𑀦𑁆𑀤𑁂𑀢𑀻𑀢𑀺 𑀢𑁂𑀫𑁂𑀢𑀺 𑀲𑁆𑀦𑁂𑀳𑁂𑀢𑀺, 𑀲𑀩𑁆𑀩𑀢𑁆𑀣 𑀧𑀯𑀢𑁆𑀢𑀧𑀻𑀢𑀺𑀲𑀼𑀔𑀁 𑀓𑀭𑁄𑀢𑀺. 𑀧𑀭𑀺𑀲𑀦𑁆𑀤𑁂𑀢𑀻𑀢𑀺 𑀲𑀫𑀦𑁆𑀢𑀢𑁄 𑀲𑀦𑁆𑀤𑁂𑀢𑀺. 𑀧𑀭𑀺𑀧𑀽𑀭𑁂𑀢𑀻𑀢𑀺 𑀯𑀸𑀬𑀼𑀦𑀸 𑀪𑀲𑁆𑀢𑀁 𑀯𑀺𑀬 𑀧𑀽𑀭𑁂𑀢𑀺. 𑀧𑀭𑀺𑀧𑁆𑀨𑀭𑀢𑀻𑀢𑀺 𑀲𑀫𑀦𑁆𑀢𑀢𑁄 𑀨𑀼𑀲𑀢𑀺. 𑀲𑀩𑁆𑀩𑀸𑀯𑀢𑁄 𑀓𑀸𑀬𑀲𑁆𑀲𑀸𑀢𑀺 𑀅𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑀩𑁆𑀩𑀓𑁄𑀝𑁆𑀞𑀸𑀲𑀯𑀢𑁄 𑀓𑀸𑀬𑀲𑁆𑀲 𑀓𑀺𑀜𑁆𑀘𑀺 𑀉𑀧𑀸𑀤𑀺𑀦𑁆𑀦𑀓𑀲𑀦𑁆𑀢𑀢𑀺𑀧𑀯𑀢𑁆𑀢𑀺𑀝𑁆𑀞𑀸𑀦𑁂 𑀙𑀯𑀺𑀫𑀁𑀲𑀮𑁄𑀳𑀺𑀢𑀸𑀦𑀼𑀕𑀢𑀁 𑀅𑀡𑀼𑀫𑀢𑁆𑀢𑀫𑁆𑀧𑀺 𑀞𑀸𑀦𑀁 𑀧𑀞𑀫𑀚𑁆𑀛𑀸𑀦𑀲𑀼𑀔𑁂𑀦 𑀅𑀨𑀼𑀝𑀁 𑀦𑀸𑀫 𑀦 𑀳𑁄𑀢𑀺.

𑀤𑀓𑁆𑀔𑁄𑀢𑀺 𑀙𑁂𑀓𑁄 𑀧𑀝𑀺𑀩𑀮𑁄 𑀦𑁆𑀳𑀸𑀦𑀻𑀬𑀘𑀼𑀡𑁆𑀡𑀸𑀦𑀺 𑀓𑀸𑀢𑀼𑀜𑁆𑀘𑁂𑀯 𑀬𑁄𑀚𑁂𑀢𑀼𑀜𑁆𑀘 𑀲𑀦𑁆𑀦𑁂𑀢𑀼𑀜𑁆𑀘. 𑀓𑀁𑀲𑀣𑀸𑀮𑁂𑀢𑀺 𑀬𑁂𑀦 𑀓𑁂𑀦𑀘𑀺 𑀮𑁄𑀳𑁂𑀦 𑀓𑀢𑀪𑀸𑀚𑀦𑁂. 𑀫𑀢𑁆𑀢𑀺𑀓𑀸𑀪𑀸𑀚𑀦𑀁 𑀧𑀦 𑀣𑀺𑀭𑀁 𑀦 𑀳𑁄𑀢𑀺, 𑀲𑀦𑁆𑀦𑁂𑀦𑁆𑀢𑀲𑁆𑀲 𑀪𑀺𑀚𑁆𑀚𑀢𑀺. 𑀢𑀲𑁆𑀫𑀸 𑀢𑀁 𑀦 𑀤𑀲𑁆𑀲𑁂𑀲𑀺. 𑀧𑀭𑀺𑀧𑁆𑀨𑁄𑀲𑀓𑀁 𑀧𑀭𑀺𑀧𑁆𑀨𑁄𑀲𑀓𑀦𑁆𑀢𑀺 𑀲𑀺𑀜𑁆𑀘𑀺𑀢𑁆𑀯𑀸 𑀲𑀺𑀜𑁆𑀘𑀺𑀢𑁆𑀯𑀸. 𑀲𑀦𑁆𑀦𑁂𑀬𑁆𑀬𑀸𑀢𑀺 𑀯𑀸𑀫𑀳𑀢𑁆𑀣𑁂𑀦 𑀓𑀁𑀲𑀣𑀸𑀮𑀁 𑀕𑀳𑁂𑀢𑁆𑀯𑀸 𑀤𑀓𑁆𑀔𑀺𑀡𑀳𑀢𑁆𑀣𑁂𑀦 𑀧𑀫𑀸𑀡𑀬𑀼𑀢𑁆𑀢𑀁 𑀉𑀤𑀓𑀁 𑀲𑀺𑀜𑁆𑀘𑀺𑀢𑁆𑀯𑀸 𑀲𑀺𑀜𑁆𑀘𑀺𑀢𑁆𑀯𑀸 𑀧𑀭𑀺𑀫𑀤𑁆𑀤𑀦𑁆𑀢𑁄 𑀧𑀺𑀡𑁆𑀟𑀁 𑀓𑀭𑁂𑀬𑁆𑀬. 𑀲𑁆𑀦𑁂𑀳𑀸𑀦𑀼𑀕𑀢𑀸𑀢𑀺 𑀉𑀤𑀓𑀲𑀺𑀦𑁂𑀳𑁂𑀦 𑀅𑀦𑀼𑀕𑀢𑀸. 𑀲𑁆𑀦𑁂𑀳𑀧𑀭𑁂𑀢𑀸𑀢𑀺 𑀉𑀤𑀓𑀲𑀺𑀦𑁂𑀳𑁂𑀦 𑀧𑀭𑀺𑀕𑁆𑀕𑀳𑀺𑀢𑀸. 𑀲𑀦𑁆𑀢𑀭𑀩𑀸𑀳𑀺𑀭𑀸𑀢𑀺 𑀲𑀤𑁆𑀥𑀺𑀁 𑀅𑀦𑁆𑀢𑁄𑀧𑀤𑁂𑀲𑁂𑀦 𑀘𑁂𑀯 𑀩𑀳𑀺𑀧𑀤𑁂𑀲𑁂𑀦 𑀘, 𑀲𑀩𑁆𑀩𑀢𑁆𑀣𑀓𑀫𑁂𑀯 𑀉𑀤𑀓𑀲𑀺𑀦𑁂𑀳𑁂𑀦 𑀨𑀼𑀝𑀸𑀢𑀺 𑀅𑀢𑁆𑀣𑁄. 𑀦 𑀘 𑀧𑀕𑁆𑀖𑀭𑀺𑀡𑀻𑀢𑀺 𑀦 𑀩𑀺𑀦𑁆𑀤𑀼 𑀩𑀺𑀦𑁆𑀤𑀼 𑀉𑀤𑀓𑀁 𑀧𑀕𑁆𑀖𑀭𑀢𑀺, 𑀲𑀓𑁆𑀓𑀸 𑀳𑁄𑀢𑀺 𑀳𑀢𑁆𑀣𑁂𑀦𑀧𑀺 𑀤𑁆𑀯𑀻𑀳𑀺𑀧𑀺 𑀅𑀗𑁆𑀕𑀼𑀮𑀻𑀳𑀺 𑀕𑀳𑁂𑀢𑀼𑀁 𑀑𑀯𑀝𑁆𑀝𑀺𑀓𑀸𑀬𑀧𑀺 𑀓𑀸𑀢𑀼𑀦𑁆𑀢𑀺 𑀅𑀢𑁆𑀣𑁄.

𑀤𑀼𑀢𑀺𑀬𑀚𑁆𑀛𑀸𑀦𑀲𑀼𑀔𑀉𑀧𑀫𑀸𑀬𑀁 𑀉𑀩𑁆𑀪𑀺𑀤𑁄𑀤𑀓𑁄𑀢𑀺 𑀉𑀩𑁆𑀪𑀺𑀦𑁆𑀦𑀉𑀤𑀓𑁄, 𑀦 𑀳𑁂𑀝𑁆𑀞𑀸 𑀉𑀩𑁆𑀪𑀺𑀚𑁆𑀚𑀺𑀢𑁆𑀯𑀸 𑀉𑀕𑁆𑀕𑀘𑁆𑀙𑀦𑀉𑀤𑀓𑁄, 𑀅𑀦𑁆𑀢𑁄𑀬𑁂𑀯 𑀧𑀦 𑀉𑀧𑁆𑀧𑀚𑁆𑀚𑀦𑀉𑀤𑀓𑁄𑀢𑀺 𑀅𑀢𑁆𑀣𑁄. 𑀆𑀬𑀫𑀼𑀔𑀦𑁆𑀢𑀺 𑀆𑀕𑀫𑀦𑀫𑀕𑁆𑀕𑁄. 𑀤𑁂𑀯𑁄𑀢𑀺 𑀫𑁂𑀖𑁄. 𑀓𑀸𑀮𑁂𑀦 𑀓𑀸𑀮𑀦𑁆𑀢𑀺 𑀓𑀸𑀮𑁂 𑀓𑀸𑀮𑁂, 𑀅𑀦𑁆𑀯𑀟𑁆𑀠𑀫𑀸𑀲𑀁 𑀯𑀸 𑀅𑀦𑀼𑀤𑀲𑀸𑀳𑀁 𑀯𑀸𑀢𑀺 𑀅𑀢𑁆𑀣𑁄. 𑀥𑀸𑀭𑀦𑁆𑀢𑀺 𑀯𑀼𑀝𑁆𑀞𑀺𑀁. 𑀦𑀸𑀦𑀼𑀧𑁆𑀧𑀯𑁂𑀘𑁆𑀙𑁂𑀬𑁆𑀬𑀸𑀢𑀺 𑀦𑀧𑁆𑀧𑀯𑁂𑀲𑁂𑀬𑁆𑀬, 𑀦 𑀯𑀲𑁆𑀲𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀲𑀻𑀢𑀸 𑀯𑀸𑀭𑀺𑀥𑀸𑀭𑀸 𑀉𑀩𑁆𑀪𑀺𑀚𑁆𑀚𑀺𑀢𑁆𑀯𑀸𑀢𑀺 𑀲𑀻𑀢𑀸 𑀯𑀸𑀭𑀺𑀥𑀸𑀭𑀸 𑀢𑀁 𑀭𑀳𑀤𑀁 𑀧𑀽𑀭𑀬𑀫𑀸𑀦𑀸 𑀉𑀩𑁆𑀪𑀺𑀚𑁆𑀚𑀺𑀢𑁆𑀯𑀸. 𑀳𑁂𑀝𑁆𑀞𑀸 𑀉𑀕𑁆𑀕𑀘𑁆𑀙𑀦𑀉𑀤𑀓𑀜𑁆𑀳𑀺 𑀉𑀕𑁆𑀕𑀦𑁆𑀢𑁆𑀯𑀸 𑀪𑀺𑀚𑁆𑀚𑀦𑁆𑀢𑀁 𑀉𑀤𑀓𑀁 𑀔𑁄𑀪𑁂𑀢𑀺, 𑀘𑀢𑀽𑀳𑀺 𑀤𑀺𑀲𑀸𑀳𑀺 𑀧𑀯𑀺𑀲𑀦𑀉𑀤𑀓𑀁 𑀧𑀼𑀭𑀸𑀡𑀧𑀡𑁆𑀡𑀢𑀺𑀡𑀓𑀝𑁆𑀞𑀤𑀡𑁆𑀟𑀓𑀸𑀤𑀻𑀳𑀺 𑀉𑀤𑀓𑀁 𑀔𑁄𑀪𑁂𑀢𑀺. 𑀯𑀼𑀝𑁆𑀞𑀺𑀉𑀤𑀓𑀁 𑀥𑀸𑀭𑀸𑀦𑀺𑀧𑀸𑀢𑀩𑀼𑀩𑁆𑀩𑀼𑀴𑀓𑁂𑀳𑀺 𑀉𑀤𑀓𑀁 𑀔𑁄𑀪𑁂𑀢𑀺, 𑀲𑀦𑁆𑀦𑀺𑀲𑀺𑀦𑁆𑀦𑀫𑁂𑀯 𑀧𑀦 𑀳𑀼𑀢𑁆𑀯𑀸 𑀇𑀤𑁆𑀥𑀺𑀦𑀺𑀫𑁆𑀫𑀺𑀢𑀫𑀺𑀯 𑀉𑀧𑁆𑀧𑀚𑁆𑀚𑀫𑀸𑀦𑀁 𑀉𑀤𑀓𑀁 𑀇𑀫𑀁 𑀧𑀤𑁂𑀲𑀁 𑀨𑀭𑀢𑀺, 𑀇𑀫𑀁 𑀦 𑀨𑀭𑀢𑀻𑀢𑀺 𑀦𑀢𑁆𑀣𑀺. 𑀢𑁂𑀦 𑀅𑀨𑀼𑀝𑁄𑀓𑀸𑀲𑁄 𑀦𑀸𑀫 𑀦 𑀳𑁄𑀢𑀺. 𑀢𑀢𑁆𑀣 𑀭𑀳𑀤𑁄 𑀯𑀺𑀬 𑀓𑀭𑀚𑀓𑀸𑀬𑁄, 𑀉𑀤𑀓𑀁 𑀯𑀺𑀬 𑀤𑀼𑀢𑀺𑀬𑀚𑁆𑀛𑀸𑀦𑀲𑀼𑀔𑀁, 𑀲𑁂𑀲𑀁 𑀧𑀼𑀭𑀺𑀫𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁.

𑀢𑀢𑀺𑀬𑀚𑁆𑀛𑀸𑀦𑀲𑀼𑀔𑀉𑀧𑀫𑀸𑀬𑀁 𑀉𑀧𑁆𑀧𑀮𑀸𑀦𑀺 𑀏𑀢𑁆𑀣 𑀲𑀦𑁆𑀢𑀻𑀢𑀺 𑀉𑀧𑁆𑀧𑀮𑀺𑀦𑀻. 𑀲𑁂𑀲𑀧𑀤𑀤𑁆𑀯𑀬𑁂𑀧𑀺 𑀏𑀲𑁂𑀯 𑀦𑀬𑁄. 𑀏𑀢𑁆𑀣 𑀘 𑀲𑁂𑀢𑀭𑀢𑁆𑀢𑀦𑀻𑀮𑁂𑀲𑀼 𑀬𑀁𑀓𑀺𑀜𑁆𑀘𑀺 𑀉𑀧𑁆𑀧𑀮𑀫𑁂𑀯, 𑀊𑀦𑀓𑀲𑀢𑀧𑀢𑁆𑀢𑀁 𑀧𑀼𑀡𑁆𑀟𑀭𑀻𑀓𑀁, 𑀲𑀢𑀧𑀢𑁆𑀢𑀁 𑀧𑀤𑀼𑀫𑀁. 𑀧𑀢𑁆𑀢𑀦𑀺𑀬𑀫𑀁 𑀯𑀸 𑀯𑀺𑀦𑀸𑀧𑀺 𑀲𑁂𑀢𑀁 𑀧𑀤𑀼𑀫𑀁, 𑀭𑀢𑁆𑀢𑀁 𑀧𑀼𑀡𑁆𑀟𑀭𑀻𑀓𑀦𑁆𑀢𑀺 𑀅𑀬𑀫𑁂𑀢𑁆𑀣 𑀯𑀺𑀦𑀺𑀘𑁆𑀙𑀬𑁄. 𑀉𑀤𑀓𑀸𑀦𑀼𑀕𑁆𑀕𑀢𑀸𑀦𑀻𑀢𑀺 𑀉𑀤𑀓𑀢𑁄 𑀦 𑀉𑀕𑁆𑀕𑀢𑀸𑀦𑀺. 𑀅𑀦𑁆𑀢𑁄𑀦𑀺𑀫𑀼𑀕𑁆𑀕𑀧𑁄𑀲𑀻𑀦𑀻𑀢𑀺 𑀉𑀤𑀓𑀢𑀮𑀲𑁆𑀲 𑀅𑀦𑁆𑀢𑁄 𑀦𑀺𑀫𑀼𑀕𑁆𑀕𑀸𑀦𑀺𑀬𑁂𑀯 𑀳𑀼𑀢𑁆𑀯𑀸 𑀧𑁄𑀲𑀦𑁆𑀢𑀺 𑀯𑀟𑁆𑀠𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀧𑀼𑀭𑀺𑀫𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁.

𑀘𑀢𑀼𑀢𑁆𑀣𑀚𑁆𑀛𑀸𑀦𑀉𑀧𑀫𑀸𑀬𑀁 𑀧𑀭𑀺𑀲𑀼𑀤𑁆𑀥𑁂𑀦 𑀘𑁂𑀢𑀲𑀸 𑀧𑀭𑀺𑀬𑁄𑀤𑀸𑀢𑁂𑀦𑀸𑀢𑀺 𑀏𑀢𑁆𑀣 𑀦𑀺𑀭𑀼𑀧𑀓𑁆𑀓𑀺𑀮𑁂𑀲𑀝𑁆𑀞𑁂𑀦 𑀧𑀭𑀺𑀲𑀼𑀤𑁆𑀥𑀁, 𑀧𑀪𑀲𑁆𑀲𑀭𑀝𑁆𑀞𑁂𑀦 𑀧𑀭𑀺𑀬𑁄𑀤𑀸𑀢𑀁 𑀯𑁂𑀤𑀺𑀢𑀩𑁆𑀩𑀁. 𑀑𑀤𑀸𑀢𑁂𑀦 𑀯𑀢𑁆𑀣𑁂𑀦𑀸𑀢𑀺 𑀇𑀤𑀁 𑀉𑀢𑀼𑀨𑀭𑀡𑀢𑁆𑀣𑀁 𑀯𑀼𑀢𑁆𑀢𑀁. 𑀓𑀺𑀮𑀺𑀝𑁆𑀞𑀯𑀢𑁆𑀣𑁂𑀦 𑀳𑀺 𑀉𑀢𑀼𑀨𑀭𑀡𑀁 𑀦 𑀳𑁄𑀢𑀺, 𑀢𑀗𑁆𑀔𑀡𑀥𑁄𑀢𑀧𑀭𑀺𑀲𑀼𑀤𑁆𑀥𑁂𑀦 𑀉𑀢𑀼𑀨𑀭𑀡𑀁 𑀩𑀮𑀯𑀁 𑀳𑁄𑀢𑀺. 𑀇𑀫𑀺𑀲𑁆𑀲𑀸 𑀳𑀺 𑀉𑀧𑀫𑀸𑀬 𑀯𑀢𑁆𑀣𑀁 𑀯𑀺𑀬 𑀓𑀭𑀚𑀓𑀸𑀬𑁄, 𑀉𑀢𑀼𑀨𑀭𑀡𑀁 𑀯𑀺𑀬 𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑀼𑀔𑀁. 𑀢𑀲𑁆𑀫𑀸 𑀬𑀣𑀸 𑀲𑀼𑀦𑁆𑀳𑀸𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀧𑀭𑀺𑀲𑀼𑀤𑁆𑀥𑀁 𑀯𑀢𑁆𑀣𑀁 𑀲𑀲𑀻𑀲𑀁 𑀧𑀸𑀭𑀼𑀧𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑀲𑁆𑀲 𑀲𑀭𑀻𑀭𑀢𑁄 𑀉𑀢𑀼 𑀲𑀩𑁆𑀩𑀫𑁂𑀯 𑀯𑀢𑁆𑀣𑀁 𑀨𑀭𑀢𑀺, 𑀦 𑀓𑁄𑀘𑀺 𑀯𑀢𑁆𑀣𑀲𑁆𑀲 𑀅𑀨𑀼𑀝𑁄𑀓𑀸𑀲𑁄 𑀳𑁄𑀢𑀺, 𑀏𑀯𑀁 𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑀼𑀔𑁂𑀦 𑀪𑀺𑀓𑁆𑀔𑀼𑀦𑁄 𑀓𑀭𑀚𑀓𑀸𑀬𑀲𑁆𑀲 𑀦 𑀓𑁄𑀘𑀺 𑀑𑀓𑀸𑀲𑁄 𑀅𑀨𑀼𑀝𑁄 𑀳𑁄𑀢𑀻𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀘𑀢𑀼𑀢𑁆𑀣𑀚𑁆𑀛𑀸𑀦𑀘𑀺𑀢𑁆𑀢𑀫𑁂𑀯 𑀯𑀸 𑀯𑀢𑁆𑀣𑀁 𑀯𑀺𑀬, 𑀢𑀁𑀲𑀫𑀼𑀝𑁆𑀞𑀸𑀦𑀭𑀽𑀧𑀁 𑀉𑀢𑀼𑀨𑀭𑀡𑀁 𑀯𑀺𑀬. 𑀬𑀣𑀸 𑀳𑀺 𑀓𑀢𑁆𑀣𑀘𑀺 𑀓𑀢𑁆𑀣𑀘𑀺 𑀑𑀤𑀸𑀢𑀯𑀢𑁆𑀣𑁂 𑀓𑀸𑀬𑀁 𑀅𑀨𑀼𑀲𑀦𑁆𑀢𑁂𑀧𑀺 𑀢𑀁𑀲𑀫𑀼𑀝𑁆𑀞𑀸𑀦𑁂𑀦 𑀉𑀢𑀼𑀦𑀸 𑀲𑀩𑁆𑀩𑀢𑁆𑀣𑀓𑀫𑁂𑀯 𑀓𑀸𑀬𑁄 𑀨𑀼𑀝𑁄 𑀳𑁄𑀢𑀺, 𑀏𑀯𑀁 𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑀫𑀼𑀝𑁆𑀞𑀸𑀧𑀺𑀢𑁂𑀦 𑀲𑀼𑀔𑀼𑀫𑀭𑀽𑀧𑁂𑀦 𑀲𑀩𑁆𑀩𑀢𑁆𑀣𑀓𑀫𑁂𑀯 𑀪𑀺𑀓𑁆𑀔𑀼𑀦𑁄 𑀓𑀸𑀬𑁄 𑀨𑀼𑀝𑁄 𑀳𑁄𑀢𑀻𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑀧𑀘𑁆𑀘𑀯𑁂𑀓𑁆𑀔𑀡𑀦𑀺𑀫𑀺𑀢𑁆𑀢𑀦𑁆𑀢𑀺 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀫𑁂𑀯. 𑀲𑀼𑀕𑁆𑀕𑀳𑀺𑀢𑀁 𑀳𑁄𑀢𑀻𑀢𑀺 𑀬𑀣𑀸 𑀢𑁂𑀦 𑀛𑀸𑀦𑀯𑀺𑀧𑀲𑁆𑀲𑀦𑀸𑀫𑀕𑁆𑀕𑀸 𑀲𑀼𑀝𑁆𑀞𑀼 𑀕𑀳𑀺𑀢𑀸 𑀳𑁄𑀦𑁆𑀢𑀺, 𑀏𑀯𑀁 𑀧𑀘𑁆𑀘𑀯𑁂𑀓𑁆𑀔𑀡𑀦𑀺𑀫𑀺𑀢𑁆𑀢𑀁 𑀅𑀧𑀭𑀸𑀧𑀭𑁂𑀦 𑀧𑀘𑁆𑀘𑀯𑁂𑀓𑁆𑀔𑀡𑀦𑀺𑀫𑀺𑀢𑁆𑀢𑁂𑀦 𑀲𑀼𑀝𑁆𑀞𑀼 𑀕𑀳𑀺𑀢𑀁 𑀳𑁄𑀢𑀺. 𑀅𑀜𑁆𑀜𑁄 𑀯𑀸 𑀅𑀜𑁆𑀜𑀦𑁆𑀢𑀺 𑀅𑀜𑁆𑀜𑁄 𑀏𑀓𑁄 𑀅𑀜𑁆𑀜𑀁 𑀏𑀓𑀁, 𑀅𑀢𑁆𑀢𑀦𑁄𑀬𑁂𑀯 𑀳𑀺 𑀅𑀢𑁆𑀢𑀸 𑀦 𑀧𑀸𑀓𑀝𑁄 𑀳𑁄𑀢𑀺. 𑀞𑀺𑀢𑁄 𑀯𑀸 𑀦𑀺𑀲𑀺𑀦𑁆𑀦𑀦𑁆𑀢𑀺 𑀞𑀺𑀢𑀓𑀲𑁆𑀲𑀸𑀧𑀺 𑀦𑀺𑀲𑀺𑀦𑁆𑀦𑁄 𑀧𑀸𑀓𑀝𑁄 𑀳𑁄𑀢𑀺, 𑀢𑁂𑀦𑁂𑀯𑀁 𑀯𑀼𑀢𑁆𑀢𑀁. 𑀲𑁂𑀲𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀉𑀤𑀓𑀫𑀡𑀺𑀓𑁄𑀢𑀺 𑀲𑀫𑁂𑀔𑀮𑀸 𑀉𑀤𑀓𑀘𑀸𑀝𑀺. 𑀲𑀫𑀢𑀺𑀢𑁆𑀢𑀺𑀓𑁄𑀢𑀺 𑀲𑀫𑀪𑀭𑀺𑀢𑁄. 𑀓𑀸𑀓𑀧𑁂𑀬𑁆𑀬𑀸𑀢𑀺 𑀫𑀼𑀔𑀯𑀝𑁆𑀝𑀺𑀬𑀁 𑀦𑀺𑀲𑀻𑀤𑀺𑀢𑁆𑀯𑀸 𑀓𑀸𑀓𑁂𑀦 𑀕𑀻𑀯𑀁 𑀅𑀦𑀸𑀫𑁂𑀢𑁆𑀯𑀸𑀯 𑀧𑀸𑀢𑀩𑁆𑀩𑁄.

𑀲𑀼𑀪𑀽𑀫𑀺𑀬𑀦𑁆𑀢𑀺 𑀲𑀫𑀪𑀽𑀫𑀺𑀬𑀁. ‘‘𑀲𑀼𑀪𑀽𑀫𑁂 𑀲𑀼𑀔𑁂𑀢𑁆𑀢𑁂 𑀯𑀺𑀳𑀢𑀔𑀸𑀡𑀼𑀓𑁂 𑀩𑀻𑀚𑀸𑀦𑀺 𑀧𑀢𑀺𑀝𑁆𑀞𑀸𑀧𑁂𑀬𑁆𑀬𑀸’’𑀢𑀺 (𑀤𑀻. 𑀦𑀺. 𑁨.𑁪𑁩𑁮) 𑀏𑀢𑁆𑀣 𑀧𑀦 𑀫𑀡𑁆𑀟𑀪𑀽𑀫𑀺 𑀲𑀼𑀪𑀽𑀫𑀻𑀢𑀺 𑀆𑀕𑀢𑀸. 𑀘𑀢𑀼𑀫𑀳𑀸𑀧𑀣𑁂𑀢𑀺 𑀤𑁆𑀯𑀺𑀦𑁆𑀦𑀁 𑀫𑀳𑀸𑀫𑀕𑁆𑀕𑀸𑀦𑀁 𑀯𑀺𑀦𑀺𑀯𑀺𑀚𑁆𑀛𑀺𑀢𑁆𑀯𑀸 𑀕𑀢𑀝𑁆𑀞𑀸𑀦𑁂. 𑀆𑀚𑀜𑁆𑀜𑀭𑀣𑁄𑀢𑀺 𑀯𑀺𑀦𑀻𑀢𑀅𑀲𑁆𑀲𑀭𑀣𑁄. 𑀑𑀥𑀲𑁆𑀢𑀧𑀢𑁄𑀤𑁄𑀢𑀺 𑀬𑀣𑀸 𑀭𑀣𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀞𑀺𑀢𑁂𑀦 𑀲𑀓𑁆𑀓𑀸 𑀳𑁄𑀢𑀺 𑀕𑀡𑁆𑀳𑀺𑀢𑀼𑀁, 𑀏𑀯𑀁 𑀆𑀮𑀫𑁆𑀩𑀦𑀁 𑀦𑀺𑀲𑁆𑀲𑀸𑀬 𑀢𑀺𑀭𑀺𑀬𑀢𑁄 𑀞𑀧𑀺𑀢𑀧𑀢𑁄𑀤𑁄. 𑀬𑁄𑀕𑁆𑀕𑀸𑀘𑀭𑀺𑀬𑁄𑀢𑀺 𑀅𑀲𑁆𑀲𑀸𑀘𑀭𑀺𑀬𑁄. 𑀲𑁆𑀯𑁂𑀯 𑀅𑀲𑁆𑀲𑀤𑀫𑁆𑀫𑁂 𑀲𑀸𑀭𑁂𑀢𑀻𑀢𑀺 𑀅𑀲𑁆𑀲𑀤𑀫𑁆𑀫𑀲𑀸𑀭𑀣𑀺. 𑀬𑁂𑀦𑀺𑀘𑁆𑀙𑀓𑀦𑁆𑀢𑀺 𑀬𑁂𑀦 𑀬𑁂𑀦 𑀫𑀕𑁆𑀕𑁂𑀦 𑀇𑀘𑁆𑀙𑀢𑀺. 𑀬𑀤𑀺𑀘𑁆𑀙𑀓𑀦𑁆𑀢𑀺 𑀬𑀁 𑀬𑀁 𑀕𑀢𑀺𑀁 𑀇𑀘𑁆𑀙𑀢𑀺. 𑀲𑀸𑀭𑁂𑀬𑁆𑀬𑀸𑀢𑀺 𑀉𑀚𑀼𑀓𑀁 𑀧𑀼𑀭𑀢𑁄 𑀧𑁂𑀲𑁂𑀬𑁆𑀬. 𑀧𑀘𑁆𑀘𑀸𑀲𑀸𑀭𑁂𑀬𑁆𑀬𑀸𑀢𑀺 𑀧𑀝𑀺𑀦𑀺𑀯𑀢𑁆𑀢𑁂𑀬𑁆𑀬.

𑀏𑀯𑀁 𑀳𑁂𑀝𑁆𑀞𑀸 𑀧𑀜𑁆𑀘𑀳𑀺 𑀅𑀗𑁆𑀕𑁂𑀳𑀺 𑀲𑀫𑀸𑀧𑀢𑁆𑀢𑀺𑀧𑀭𑀺𑀓𑀫𑁆𑀫𑀁 𑀓𑀣𑁂𑀢𑁆𑀯𑀸 𑀇𑀫𑀸𑀳𑀺 𑀢𑀻𑀳𑀺 𑀉𑀧𑀫𑀸𑀳𑀺 𑀧𑀕𑀼𑀡𑀲𑀫𑀸𑀧𑀢𑁆𑀢𑀺𑀬𑀸 𑀆𑀦𑀺𑀲𑀁𑀲𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀔𑀻𑀡𑀸𑀲𑀯𑀲𑁆𑀲 𑀅𑀪𑀺𑀜𑁆𑀜𑀸𑀧𑀝𑀺𑀧𑀸𑀝𑀺𑀁 𑀤𑀲𑁆𑀲𑁂𑀢𑀼𑀁 𑀲𑁄 𑀲𑀘𑁂 𑀆𑀓𑀗𑁆𑀔𑀢𑀻𑀢𑀺𑀆𑀤𑀺𑀫𑀸𑀳. 𑀢𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑁯. 𑀘𑀗𑁆𑀓𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁯. 𑀦𑀯𑀫𑁂 𑀅𑀤𑁆𑀥𑀸𑀦𑀓𑁆𑀔𑀫𑁄 𑀳𑁄𑀢𑀻𑀢𑀺 𑀤𑀽𑀭𑀁 𑀅𑀤𑁆𑀥𑀸𑀦𑀫𑀕𑁆𑀕𑀁 𑀕𑀘𑁆𑀙𑀦𑁆𑀢𑁄 𑀔𑀫𑀢𑀺, 𑀅𑀥𑀺𑀯𑀸𑀲𑁂𑀢𑀼𑀁 𑀲𑀓𑁆𑀓𑁄𑀢𑀺. 𑀧𑀥𑀸𑀦𑀓𑁆𑀔𑀫𑁄𑀢𑀺 𑀯𑀻𑀭𑀺𑀬𑀓𑁆𑀔𑀫𑁄. 𑀘𑀗𑁆𑀓𑀫𑀸𑀥𑀺𑀕𑀢𑁄 𑀲𑀫𑀸𑀥𑀻𑀢𑀺 𑀘𑀗𑁆𑀓𑀫𑀁 𑀅𑀥𑀺𑀝𑁆𑀞𑀳𑀦𑁆𑀢𑁂𑀦 𑀅𑀥𑀺𑀕𑀢𑁄 𑀅𑀝𑁆𑀞𑀦𑁆𑀦𑀁 𑀲𑀫𑀸𑀧𑀢𑁆𑀢𑀻𑀦𑀁 𑀅𑀜𑁆𑀜𑀢𑀭𑀲𑀫𑀸𑀥𑀺. 𑀘𑀺𑀭𑀝𑁆𑀞𑀺𑀢𑀺𑀓𑁄 𑀳𑁄𑀢𑀻𑀢𑀺 𑀘𑀺𑀭𑀁 𑀢𑀺𑀝𑁆𑀞𑀢𑀺. 𑀞𑀺𑀢𑀓𑁂𑀦 𑀕𑀳𑀺𑀢𑀦𑀺𑀫𑀺𑀢𑁆𑀢𑀜𑁆𑀳𑀺 𑀦𑀺𑀲𑀺𑀦𑁆𑀦𑀲𑁆𑀲 𑀦𑀲𑁆𑀲𑀢𑀺, 𑀦𑀺𑀲𑀺𑀦𑁆𑀦𑁂𑀦 𑀕𑀳𑀺𑀢𑀦𑀺𑀫𑀺𑀢𑁆𑀢𑀁 𑀦𑀺𑀧𑀦𑁆𑀦𑀲𑁆𑀲. 𑀘𑀗𑁆𑀓𑀫𑀁 𑀅𑀥𑀺𑀝𑁆𑀞𑀳𑀦𑁆𑀢𑁂𑀦 𑀘𑀮𑀺𑀢𑀸𑀭𑀫𑁆𑀫𑀡𑁂 𑀕𑀳𑀺𑀢𑀦𑀺𑀫𑀺𑀢𑁆𑀢𑀁 𑀧𑀦 𑀞𑀺𑀢𑀲𑁆𑀲𑀧𑀺 𑀦𑀺𑀲𑀺𑀦𑁆𑀦𑀲𑁆𑀲𑀧𑀺 𑀦𑀺𑀧𑀦𑁆𑀦𑀲𑁆𑀲𑀧𑀺 𑀦 𑀦𑀲𑁆𑀲𑀢𑀻𑀢𑀺.

𑁧𑁦. 𑀦𑀸𑀕𑀺𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁦. 𑀤𑀲𑀫𑁂 𑀉𑀤𑁆𑀥𑀁 𑀉𑀕𑁆𑀕𑀢𑀢𑁆𑀢𑀸 𑀉𑀘𑁆𑀘𑁄, 𑀭𑀸𑀲𑀺𑀪𑀸𑀯𑁂𑀦 𑀘 𑀫𑀳𑀸 𑀲𑀤𑁆𑀤𑁄 𑀏𑀢𑁂𑀲𑀦𑁆𑀢𑀺 𑀉𑀘𑁆𑀘𑀸𑀲𑀤𑁆𑀤𑀫𑀳𑀸𑀲𑀤𑁆𑀤𑀸. 𑀢𑁂𑀲𑀼 𑀳𑀺 𑀉𑀕𑁆𑀕𑀢𑀼𑀕𑁆𑀕𑀢𑁂𑀲𑀼 𑀔𑀢𑁆𑀢𑀺𑀬𑀫𑀳𑀸𑀲𑀸𑀮-𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑀸𑀤𑀻𑀲𑀼 𑀫𑀳𑀸𑀲𑀓𑁆𑀓𑀸𑀭𑀁 𑀕𑀳𑁂𑀢𑁆𑀯𑀸 𑀆𑀕𑀢𑁂𑀲𑀼 ‘‘𑀅𑀲𑀼𑀓𑀲𑁆𑀲 𑀑𑀓𑀸𑀲𑀁 𑀤𑁂𑀣, 𑀅𑀲𑀼𑀓𑀲𑁆𑀲 𑀑𑀓𑀸𑀲𑀁 𑀤𑁂𑀣𑀸’’𑀢𑀺 𑀯𑀼𑀢𑁆𑀢𑁂 ‘‘𑀫𑀬𑀁 𑀧𑀞𑀫𑀢𑀭𑀁 𑀆𑀕𑀢𑀸, 𑀫𑀬𑁆𑀳𑀁 𑀧𑀞𑀫𑀢𑀭𑀁 𑀆𑀕𑀢𑀸, 𑀦𑀢𑁆𑀣𑀺 𑀑𑀓𑀸𑀲𑁄’’𑀢𑀺 𑀏𑀯𑀁 𑀅𑀜𑁆𑀜𑀫𑀜𑁆𑀜𑀁 𑀓𑀣𑁂𑀦𑁆𑀢𑀸𑀦𑀁 𑀲𑀤𑁆𑀤𑁄 𑀉𑀘𑁆𑀘𑁄 𑀘𑁂𑀯 𑀫𑀳𑀸 𑀘 𑀅𑀳𑁄𑀲𑀺. 𑀓𑁂𑀯𑀝𑁆𑀝𑀸 𑀫𑀜𑁆𑀜𑁂 𑀫𑀘𑁆𑀙𑀯𑀺𑀮𑁄𑀧𑁂𑀢𑀺 𑀓𑁂𑀯𑀝𑁆𑀝𑀸 𑀯𑀺𑀬 𑀫𑀘𑁆𑀙𑀯𑀺𑀮𑁄𑀧𑁂. 𑀢𑁂𑀲𑀜𑁆𑀳𑀺 𑀫𑀘𑁆𑀙𑀧𑀘𑁆𑀙𑀺𑀁 𑀕𑀳𑁂𑀢𑁆𑀯𑀸 𑀆𑀕𑀢𑀸𑀦𑀁 𑀯𑀺𑀓𑁆𑀓𑀺𑀡𑀦𑀝𑁆𑀞𑀸𑀦𑁂 ‘‘𑀫𑀬𑁆𑀳𑀁 𑀤𑁂𑀣 𑀫𑀬𑁆𑀳𑀁 𑀤𑁂𑀣𑀸’’𑀢𑀺 𑀯𑀤𑀢𑁄 𑀫𑀳𑀸𑀚𑀦𑀲𑁆𑀲 𑀏𑀯𑀭𑀽𑀧𑁄 𑀲𑀤𑁆𑀤𑁄 𑀳𑁄𑀢𑀺. 𑀫𑀻𑀴𑁆𑀳𑀲𑀼𑀔𑀦𑁆𑀢𑀺 𑀅𑀲𑀼𑀘𑀺𑀲𑀼𑀔𑀁. 𑀫𑀺𑀤𑁆𑀥𑀲𑀼𑀔𑀦𑁆𑀢𑀺 𑀦𑀺𑀤𑁆𑀤𑀸𑀲𑀼𑀔𑀁. 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑀲𑀼𑀔𑀦𑁆𑀢𑀺 𑀮𑀸𑀪𑀲𑀓𑁆𑀓𑀸𑀭𑀜𑁆𑀘𑁂𑀯 𑀯𑀡𑁆𑀡𑀪𑀡𑀦𑀜𑁆𑀘 𑀦𑀺𑀲𑁆𑀲𑀸𑀬 𑀉𑀧𑁆𑀧𑀦𑁆𑀦𑀲𑀼𑀔𑀁.

𑀢𑀁𑀦𑀺𑀦𑁆𑀦𑀸𑀯 𑀕𑀫𑀺𑀲𑁆𑀲𑀦𑁆𑀢𑀻𑀢𑀺 𑀢𑀁 𑀢𑀤𑁂𑀯 𑀪𑀕𑀯𑀢𑁄 𑀕𑀢𑀝𑁆𑀞𑀸𑀦𑀁 𑀕𑀫𑀺𑀲𑁆𑀲𑀦𑁆𑀢𑀺, 𑀅𑀦𑀼𑀩𑀦𑁆𑀥𑀺𑀲𑁆𑀲𑀦𑁆𑀢𑀺𑀬𑁂𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀣𑀸 𑀳𑀺, 𑀪𑀦𑁆𑀢𑁂, 𑀪𑀕𑀯𑀢𑁄 𑀲𑀻𑀮𑀧𑀜𑁆𑀜𑀸𑀡𑀦𑁆𑀢𑀺 𑀬𑀲𑁆𑀫𑀸 𑀢𑀣𑀸𑀯𑀺𑀥𑀁 𑀢𑀼𑀫𑁆𑀳𑀸𑀓𑀁 𑀲𑀻𑀮𑀜𑁆𑀘 𑀜𑀸𑀡𑀜𑁆𑀘𑀸𑀢𑀺 𑀅𑀢𑁆𑀣𑁄. 𑀫𑀸 𑀘 𑀫𑀬𑀸 𑀬𑀲𑁄𑀢𑀺 𑀫𑀬𑀸 𑀲𑀤𑁆𑀥𑀺𑀁 𑀬𑀲𑁄𑀧𑀺 𑀫𑀸 𑀲𑀫𑀸𑀕𑀘𑁆𑀙𑀢𑀼. 𑀧𑀺𑀬𑀸𑀦𑀦𑁆𑀢𑀺 𑀧𑀺𑀬𑀚𑀦𑀸𑀦𑀁. 𑀏𑀲𑁄 𑀢𑀲𑁆𑀲 𑀦𑀺𑀲𑁆𑀲𑀦𑁆𑀤𑁄𑀢𑀺 𑀏𑀲𑀸 𑀧𑀺𑀬𑀪𑀸𑀯𑀲𑁆𑀲 𑀦𑀺𑀧𑁆𑀨𑀢𑁆𑀢𑀺. 𑀅𑀲𑀼𑀪𑀦𑀺𑀫𑀺𑀢𑁆𑀢𑀸𑀦𑀼𑀬𑁄𑀕𑀦𑁆𑀢𑀺 𑀅𑀲𑀼𑀪𑀓𑀫𑁆𑀫𑀝𑁆𑀞𑀸𑀦𑀸𑀦𑀼𑀬𑁄𑀕𑀁. 𑀲𑀼𑀪𑀦𑀺𑀫𑀺𑀢𑁆𑀢𑁂𑀢𑀺 𑀭𑀸𑀕𑀝𑁆𑀞𑀸𑀦𑀺𑀬𑁂 𑀇𑀝𑁆𑀞𑀸𑀭𑀫𑁆𑀫𑀡𑁂. 𑀏𑀲𑁄 𑀢𑀲𑁆𑀲 𑀦𑀺𑀲𑁆𑀲𑀦𑁆𑀤𑁄𑀢𑀺 𑀏𑀲𑀸 𑀢𑀲𑁆𑀲 𑀅𑀲𑀼𑀪𑀦𑀺𑀫𑀺𑀢𑁆𑀢𑀸𑀦𑀼𑀬𑁄𑀕𑀲𑁆𑀲 𑀦𑀺𑀧𑁆𑀨𑀢𑁆𑀢𑀺. 𑀏𑀯𑀫𑀺𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀇𑀫𑁂𑀲𑀼 𑀧𑀜𑁆𑀘𑀲𑀼 𑀞𑀸𑀦𑁂𑀲𑀼 𑀯𑀺𑀧𑀲𑁆𑀲𑀦𑀸𑀯 𑀓𑀣𑀺𑀢𑀸𑀢𑀺.

𑀧𑀜𑁆𑀘𑀗𑁆𑀕𑀺𑀓𑀯𑀕𑁆𑀕𑁄 𑀢𑀢𑀺𑀬𑁄.

𑁪. 𑀲𑀼𑀫𑀦𑀯𑀕𑁆𑀕𑁄

𑁧. 𑀲𑀼𑀫𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁧. 𑀘𑀢𑀼𑀢𑁆𑀣𑀲𑁆𑀲 𑀧𑀞𑀫𑁂 𑀲𑀼𑀫𑀦𑀸 𑀭𑀸𑀚𑀓𑀼𑀫𑀸𑀭𑀻𑀢𑀺 𑀫𑀳𑀸𑀲𑀓𑁆𑀓𑀸𑀭𑀁 𑀓𑀢𑁆𑀯𑀸 𑀧𑀢𑁆𑀣𑀦𑀁 𑀧𑀢𑁆𑀣𑁂𑀢𑁆𑀯𑀸 𑀏𑀯𑀁 𑀮𑀤𑁆𑀥𑀦𑀸𑀫𑀸 𑀭𑀸𑀚𑀓𑀜𑁆𑀜𑀸. 𑀯𑀺𑀧𑀲𑁆𑀲𑀺𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀓𑀸𑀮𑀲𑁆𑀫𑀺𑀁 𑀳𑀺 𑀦𑀸𑀕𑀭𑁂𑀲𑀼 ‘‘𑀬𑀼𑀤𑁆𑀥𑀫𑁆𑀧𑀺 𑀓𑀢𑁆𑀯𑀸 𑀲𑀢𑁆𑀣𑀸𑀭𑀁 𑀅𑀫𑁆𑀳𑀸𑀓𑀁 𑀕𑀡𑁆𑀳𑀺𑀲𑁆𑀲𑀸𑀫𑀸’’𑀢𑀺 𑀲𑁂𑀦𑀸𑀧𑀢𑀺𑀁 𑀦𑀺𑀲𑁆𑀲𑀸𑀬 𑀩𑀼𑀤𑁆𑀥𑀧𑁆𑀧𑀫𑀼𑀔𑀁 𑀲𑀗𑁆𑀖𑀁 𑀮𑀪𑀺𑀢𑁆𑀯𑀸 𑀧𑀝𑀺𑀧𑀸𑀝𑀺𑀬𑀸 𑀧𑀼𑀜𑁆𑀜𑀸𑀦𑀺 𑀓𑀸𑀢𑀼𑀁 𑀆𑀭𑀤𑁆𑀥𑁂𑀲𑀼 𑀲𑀩𑁆𑀩𑀧𑀞𑀫𑀤𑀺𑀯𑀲𑁄 𑀲𑁂𑀦𑀸𑀧𑀢𑀺𑀲𑁆𑀲 𑀯𑀸𑀭𑁄 𑀅𑀳𑁄𑀲𑀺. 𑀢𑀲𑁆𑀫𑀺𑀁 𑀤𑀺𑀯𑀲𑁂 𑀲𑁂𑀦𑀸𑀧𑀢𑀺 𑀫𑀳𑀸𑀤𑀸𑀦𑀁 𑀲𑀚𑁆𑀚𑁂𑀢𑁆𑀯𑀸 ‘‘𑀅𑀚𑁆𑀚 𑀬𑀣𑀸 𑀅𑀜𑁆𑀜𑁄 𑀓𑁄𑀘𑀺 𑀏𑀓𑀪𑀺𑀓𑁆𑀔𑀫𑁆𑀧𑀺 𑀦 𑀤𑁂𑀢𑀺, 𑀏𑀯𑀁 𑀭𑀓𑁆𑀔𑀣𑀸’’𑀢𑀺 𑀲𑀫𑀦𑁆𑀢𑀸 𑀧𑀼𑀭𑀺𑀲𑁂 𑀞𑀧𑁂𑀲𑀺. 𑀢𑀁𑀤𑀺𑀯𑀲𑀁 𑀲𑁂𑀝𑁆𑀞𑀺𑀪𑀭𑀺𑀬𑀸 𑀭𑁄𑀤𑀫𑀸𑀦𑀸 𑀧𑀜𑁆𑀘𑀳𑀺 𑀓𑀼𑀫𑀸𑀭𑀺𑀓𑀸𑀲𑀢𑁂𑀳𑀺 𑀲𑀤𑁆𑀥𑀺𑀁 𑀓𑀻𑀴𑀺𑀢𑁆𑀯𑀸 𑀆𑀕𑀢𑀁 𑀥𑀻𑀢𑀭𑀁 𑀆𑀳 𑁋 ‘‘𑀲𑀘𑁂, 𑀅𑀫𑁆𑀫, 𑀢𑀯 𑀧𑀺𑀢𑀸 𑀚𑀻𑀯𑁂𑀬𑁆𑀬, 𑀅𑀚𑁆𑀚𑀸𑀳𑀁 𑀧𑀞𑀫𑀁 𑀤𑀲𑀩𑀮𑀁 𑀪𑁄𑀚𑁂𑀬𑁆𑀬’’𑀦𑁆𑀢𑀺. 𑀲𑀸 𑀢𑀁 𑀆𑀳 𑁋 ‘‘𑀅𑀫𑁆𑀫, 𑀫𑀸 𑀘𑀺𑀦𑁆𑀢𑀬𑀺, 𑀅𑀳𑀁 𑀢𑀣𑀸 𑀓𑀭𑀺𑀲𑁆𑀲𑀸𑀫𑀺, 𑀬𑀣𑀸 𑀩𑀼𑀤𑁆𑀥𑀧𑁆𑀧𑀫𑀼𑀔𑁄 𑀲𑀗𑁆𑀖𑁄 𑀅𑀫𑁆𑀳𑀸𑀓𑀁 𑀧𑀞𑀫𑀁 𑀪𑀺𑀓𑁆𑀔𑀁 𑀪𑀼𑀜𑁆𑀚𑀺𑀲𑁆𑀲𑀢𑀻’’𑀢𑀺. 𑀢𑀢𑁄 𑀲𑀢𑀲𑀳𑀲𑁆𑀲𑀕𑁆𑀖𑀦𑀺𑀓𑀸𑀬 𑀲𑀼𑀯𑀡𑁆𑀡𑀧𑀸𑀢𑀺𑀬𑀸 𑀦𑀺𑀭𑀼𑀤𑀓𑀧𑀸𑀬𑀸𑀲𑀁 𑀧𑀽𑀭𑁂𑀢𑁆𑀯𑀸 𑀲𑀧𑁆𑀧𑀺𑀫𑀥𑀼𑀲𑀓𑁆𑀔𑀭𑀸𑀤𑀻𑀳𑀺 𑀅𑀪𑀺𑀲𑀗𑁆𑀔𑀭𑀺𑀢𑁆𑀯𑀸 𑀅𑀜𑁆𑀜𑀺𑀲𑁆𑀲𑀸 𑀧𑀸𑀢𑀺𑀬𑀸 𑀧𑀝𑀺𑀓𑀼𑀚𑁆𑀚𑀺𑀢𑁆𑀯𑀸 𑀢𑀁 𑀲𑀼𑀫𑀦𑀫𑀸𑀮𑀸𑀕𑀼𑀴𑁂𑀳𑀺 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀫𑀸𑀮𑀸𑀕𑀼𑀴𑀲𑀤𑀺𑀲𑀁 𑀓𑀢𑁆𑀯𑀸 𑀪𑀕𑀯𑀢𑁄 𑀕𑀸𑀫𑀁 𑀧𑀯𑀺𑀲𑀦𑀯𑁂𑀮𑀸𑀬 𑀲𑀬𑀫𑁂𑀯 𑀉𑀓𑁆𑀔𑀺𑀧𑀺𑀢𑁆𑀯𑀸 𑀥𑀸𑀢𑀺𑀕𑀡𑀧𑀭𑀺𑀯𑀼𑀢𑀸 𑀖𑀭𑀸 𑀦𑀺𑀓𑁆𑀔𑀫𑀺.

𑀅𑀦𑁆𑀢𑀭𑀸𑀫𑀕𑁆𑀕𑁂 𑀲𑁂𑀦𑀸𑀧𑀢𑀺𑀦𑁄 𑀉𑀧𑀝𑁆𑀞𑀸𑀓𑀸, ‘‘𑀅𑀫𑁆𑀫, 𑀫𑀸 𑀇𑀢𑁄 𑀆𑀕𑀫𑀸’’𑀢𑀺 𑀯𑀤𑀦𑁆𑀢𑀺. 𑀫𑀳𑀸𑀧𑀼𑀜𑁆𑀜𑀸 𑀦𑀸𑀫 𑀫𑀦𑀸𑀧𑀓𑀣𑀸 𑀳𑁄𑀦𑁆𑀢𑀺, 𑀦 𑀘 𑀢𑁂𑀲𑀁 𑀧𑀼𑀦𑀧𑁆𑀧𑀼𑀦𑀁 𑀪𑀡𑀦𑁆𑀢𑀸𑀦𑀁 𑀓𑀣𑀸 𑀧𑀝𑀺𑀓𑁆𑀔𑀺𑀧𑀺𑀢𑀼𑀁 𑀲𑀓𑁆𑀓𑀸 𑀳𑁄𑀢𑀺. 𑀲𑀸 ‘‘𑀘𑀽𑀴𑀧𑀺𑀢, 𑀫𑀳𑀸𑀧𑀺𑀢, 𑀫𑀸𑀢𑀼𑀮, 𑀓𑀺𑀲𑁆𑀲 𑀢𑀼𑀫𑁆𑀳𑁂 𑀕𑀦𑁆𑀢𑀼𑀁 𑀦 𑀤𑁂𑀣𑀸’’𑀢𑀺 𑀆𑀳. 𑀲𑁂𑀦𑀸𑀧𑀢𑀺𑀦𑀸 ‘‘𑀅𑀜𑁆𑀜𑀲𑁆𑀲 𑀓𑀲𑁆𑀲𑀘𑀺 𑀔𑀸𑀤𑀦𑀻𑀬𑀁 𑀪𑁄𑀚𑀦𑀻𑀬𑀁 𑀫𑀸 𑀤𑁂𑀣𑀸’’𑀢𑀺 𑀞𑀧𑀺𑀢𑀫𑁆𑀳, 𑀅𑀫𑁆𑀫𑀸𑀢𑀺. 𑀓𑀺𑀁 𑀧𑀦 𑀫𑀫 𑀳𑀢𑁆𑀣𑁂 𑀔𑀸𑀤𑀦𑀻𑀬𑀁 𑀪𑁄𑀚𑀦𑀻𑀬𑀁 𑀧𑀲𑁆𑀲𑀣𑀸𑀢𑀺? 𑀫𑀸𑀮𑀸𑀕𑀼𑀴𑀁 𑀧𑀲𑁆𑀲𑀸𑀫𑀸𑀢𑀺. 𑀓𑀺𑀁 𑀢𑀼𑀫𑁆𑀳𑀸𑀓𑀁 𑀲𑁂𑀦𑀸𑀧𑀢𑀺 𑀫𑀸𑀮𑀸𑀧𑀽𑀚𑀫𑁆𑀧𑀺 𑀓𑀸𑀢𑀼𑀁 𑀦 𑀤𑁂𑀢𑀻𑀢𑀺? 𑀤𑁂𑀢𑀺, 𑀅𑀫𑁆𑀫𑀸𑀢𑀺. 𑀢𑁂𑀦 𑀳𑀺 𑀅𑀧𑁂𑀣𑀸𑀢𑀺 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀫𑀸𑀮𑀸𑀕𑀼𑀴𑀁 𑀕𑀡𑁆𑀳𑀣 𑀪𑀕𑀯𑀸’’𑀢𑀺 𑀆𑀳. 𑀪𑀕𑀯𑀸 𑀏𑀓𑀁 𑀲𑁂𑀦𑀸𑀧𑀢𑀺𑀲𑁆𑀲 𑀉𑀧𑀝𑁆𑀞𑀸𑀓𑀁 𑀑𑀮𑁄𑀓𑁂𑀢𑁆𑀯𑀸 𑀫𑀸𑀮𑀸𑀕𑀼𑀴𑀁 𑀕𑀡𑁆𑀳𑀸𑀧𑁂𑀲𑀺. 𑀲𑀸 𑀪𑀕𑀯𑀦𑁆𑀢𑀁 𑀯𑀦𑁆𑀤𑀺𑀢𑁆𑀯𑀸 ‘‘𑀪𑀯𑀸𑀪𑀯𑀸𑀪𑀺𑀦𑀺𑀩𑁆𑀩𑀢𑁆𑀢𑀺𑀬𑀁 𑀫𑁂 𑀲𑀢𑀺 𑀧𑀭𑀺𑀢𑀲𑁆𑀲𑀦𑀚𑀻𑀯𑀺𑀢𑀁 𑀦𑀸𑀫 𑀫𑀸 𑀳𑁄𑀢𑀼, 𑀅𑀬𑀁 𑀲𑀼𑀫𑀦𑀫𑀸𑀮𑀸 𑀯𑀺𑀬 𑀦𑀺𑀩𑁆𑀩𑀢𑁆𑀢𑀦𑀺𑀩𑁆𑀩𑀢𑁆𑀢𑀝𑁆𑀞𑀸𑀦𑁂 𑀧𑀺𑀬𑀸𑀯 𑀳𑁄𑀫𑀺, 𑀦𑀸𑀫𑁂𑀦 𑀘 𑀲𑀼𑀫𑀦𑀸𑀬𑁂𑀯𑀸’’𑀢𑀺 𑀧𑀢𑁆𑀣𑀦𑀁 𑀓𑀢𑁆𑀯𑀸 𑀲𑀢𑁆𑀣𑀸𑀭𑀸 ‘‘𑀲𑀼𑀔𑀺𑀦𑀻 𑀳𑁄𑀳𑀻’’𑀢𑀺 𑀯𑀼𑀢𑁆𑀢𑀸 𑀯𑀦𑁆𑀤𑀺𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀧𑀓𑁆𑀓𑀸𑀫𑀺.

𑀪𑀕𑀯𑀸𑀧𑀺 𑀲𑁂𑀦𑀸𑀧𑀢𑀺𑀲𑁆𑀲 𑀕𑁂𑀳𑀁 𑀕𑀦𑁆𑀢𑁆𑀯𑀸 𑀧𑀜𑁆𑀜𑀢𑁆𑀢𑀸𑀲𑀦𑁂 𑀦𑀺𑀲𑀻𑀤𑀺. 𑀲𑁂𑀦𑀸𑀧𑀢𑀺 𑀬𑀸𑀕𑀼𑀁 𑀕𑀳𑁂𑀢𑁆𑀯𑀸 𑀉𑀧𑀕𑀜𑁆𑀙𑀺, 𑀲𑀢𑁆𑀣𑀸 𑀳𑀢𑁆𑀣𑁂𑀦 𑀧𑀢𑁆𑀢𑀁 𑀧𑀺𑀤𑀳𑀺. 𑀦𑀺𑀲𑀺𑀦𑁆𑀦𑁄, 𑀪𑀦𑁆𑀢𑁂, 𑀪𑀺𑀓𑁆𑀔𑀼𑀲𑀗𑁆𑀖𑁄𑀢𑀺. 𑀅𑀢𑁆𑀣𑀺 𑀦𑁄 𑀏𑀓𑁄 𑀅𑀦𑁆𑀢𑀭𑀸𑀫𑀕𑁆𑀕𑁂 𑀧𑀺𑀡𑁆𑀟𑀧𑀸𑀢𑁄 𑀮𑀤𑁆𑀥𑁄𑀢𑀺? 𑀫𑀸𑀮𑀁 𑀅𑀧𑀦𑁂𑀢𑁆𑀯𑀸 𑀧𑀺𑀡𑁆𑀟𑀧𑀸𑀢𑀁 𑀅𑀤𑁆𑀤𑀲. 𑀘𑀽𑀴𑀼𑀧𑀝𑁆𑀞𑀸𑀓𑁄 𑀆𑀳 𑁋 ‘‘𑀲𑀸𑀫𑀺 𑀫𑀸𑀮𑀸𑀢𑀺 𑀫𑀁 𑀯𑀢𑁆𑀯𑀸 𑀫𑀸𑀢𑀼𑀕𑀸𑀫𑁄 𑀯𑀜𑁆𑀘𑁂𑀲𑀻’’𑀢𑀺. 𑀧𑀸𑀬𑀸𑀲𑁄 𑀪𑀕𑀯𑀦𑁆𑀢𑀁 𑀆𑀤𑀺𑀁 𑀓𑀢𑁆𑀯𑀸 𑀲𑀩𑁆𑀩𑀪𑀺𑀓𑁆𑀔𑀽𑀦𑀁 𑀧𑀳𑁄𑀲𑀺. 𑀲𑁂𑀦𑀸𑀧𑀢𑀺 𑀅𑀢𑁆𑀢𑀦𑁄 𑀤𑁂𑀬𑁆𑀬𑀥𑀫𑁆𑀫𑀁 𑀅𑀤𑀸𑀲𑀺. 𑀲𑀢𑁆𑀣𑀸 𑀪𑀢𑁆𑀢𑀓𑀺𑀘𑁆𑀘𑀁 𑀓𑀢𑁆𑀯𑀸 𑀫𑀗𑁆𑀕𑀮𑀁 𑀯𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀲𑁂𑀦𑀸𑀧𑀢𑀺 ‘‘𑀓𑀸 𑀦𑀸𑀫 𑀲𑀸 𑀧𑀺𑀡𑁆𑀟𑀧𑀸𑀢𑀫𑀤𑀸𑀲𑀻’’𑀢𑀺 𑀧𑀼𑀘𑁆𑀙𑀺. 𑀲𑁂𑀝𑁆𑀞𑀺𑀥𑀻𑀢𑀸 𑀲𑀸𑀫𑀻𑀢𑀺. 𑀲𑀧𑁆𑀧𑀜𑁆𑀜𑀸 𑀇𑀢𑁆𑀣𑀻, 𑀏𑀯𑀭𑀽𑀧𑀸𑀬 𑀖𑀭𑁂 𑀯𑀲𑀦𑁆𑀢𑀺𑀬𑀸 𑀧𑀼𑀭𑀺𑀲𑀲𑁆𑀲 𑀲𑀕𑁆𑀕𑀲𑀫𑁆𑀧𑀢𑁆𑀢𑀺 𑀦𑀸𑀫 𑀦 𑀤𑀼𑀮𑁆𑀮𑀪𑀸𑀢𑀺 𑀓𑀁 𑀆𑀦𑁂𑀢𑁆𑀯𑀸 𑀚𑁂𑀝𑁆𑀞𑀓𑀝𑁆𑀞𑀸𑀦𑁂 𑀞𑀧𑁂𑀲𑀺?

𑀲𑀸 𑀧𑀺𑀢𑀼𑀕𑁂𑀳𑁂 𑀘 𑀲𑁂𑀦𑀸𑀧𑀢𑀺𑀕𑁂𑀳𑁂 𑀘 𑀥𑀦𑀁 𑀕𑀳𑁂𑀢𑁆𑀯𑀸 𑀬𑀸𑀯𑀢𑀸𑀬𑀼𑀓𑀁 𑀢𑀣𑀸𑀕𑀢𑀲𑁆𑀲 𑀤𑀸𑀦𑀁 𑀤𑀢𑁆𑀯𑀸 𑀧𑀼𑀜𑁆𑀜𑀸𑀦𑀺 𑀓𑀭𑀺𑀢𑁆𑀯𑀸 𑀢𑀢𑁄 𑀘𑀼𑀢𑀸 𑀓𑀸𑀫𑀸𑀯𑀘𑀭𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺. 𑀦𑀺𑀩𑁆𑀩𑀢𑁆𑀢𑀓𑁆𑀔𑀡𑁂𑀬𑁂𑀯 𑀚𑀸𑀡𑀼𑀧𑁆𑀧𑀫𑀸𑀡𑁂𑀦 𑀑𑀥𑀺𑀦𑀸 𑀲𑀓𑀮𑀁 𑀤𑁂𑀯𑀮𑁄𑀓𑀁 𑀧𑀭𑀺𑀧𑀽𑀭𑀬𑀫𑀸𑀦𑀁 𑀲𑀼𑀫𑀦𑀯𑀲𑁆𑀲𑀁 𑀯𑀲𑁆𑀲𑀺. 𑀤𑁂𑀯𑀢𑀸 ‘‘𑀅𑀬𑀁 𑀅𑀢𑁆𑀢𑀦𑀸𑀯 𑀅𑀢𑁆𑀢𑀦𑁄 𑀦𑀸𑀫𑀁 𑀕𑀳𑁂𑀢𑁆𑀯𑀸 𑀆𑀕𑀢𑀸’’𑀢𑀺 ‘‘𑀲𑀼𑀫𑀦𑀸 𑀤𑁂𑀯𑀥𑀻𑀢𑀸’’𑀢𑁆𑀯𑁂𑀯𑀲𑁆𑀲𑀸 𑀦𑀸𑀫𑀁 𑀅𑀓𑀁𑀲𑀼. 𑀲𑀸 𑀏𑀓𑀦𑀯𑀼𑀢𑀺𑀓𑀧𑁆𑀧𑁂 𑀤𑁂𑀯𑁂𑀲𑀼 𑀘 𑀫𑀦𑀼𑀲𑁆𑀲𑁂𑀲𑀼 𑀘 𑀲𑀁𑀲𑀭𑀦𑁆𑀢𑀻 𑀦𑀺𑀩𑁆𑀩𑀢𑁆𑀢𑀦𑀺𑀩𑁆𑀩𑀢𑁆𑀢𑀝𑁆𑀞𑀸𑀦𑁂 𑀅𑀯𑀺𑀚𑀳𑀺𑀢𑀲𑀼𑀫𑀦𑀯𑀲𑁆𑀲𑀸 ‘‘𑀲𑀼𑀫𑀦𑀸 𑀲𑀼𑀫𑀦𑀸’’𑀢𑁆𑀯𑁂𑀯 𑀦𑀸𑀫𑀸 𑀅𑀳𑁄𑀲𑀺. 𑀇𑀫𑀲𑁆𑀫𑀺𑀁 𑀧𑀦 𑀓𑀸𑀮𑁂 𑀓𑁄𑀲𑀮𑀭𑀜𑁆𑀜𑁄 𑀅𑀕𑁆𑀕𑀫𑀳𑁂𑀲𑀺𑀬𑀸 𑀓𑀼𑀘𑁆𑀙𑀺𑀲𑁆𑀫𑀺𑀁 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺. 𑀢𑀸𑀧𑀺 𑀧𑀜𑁆𑀘𑀲𑀢𑀸 𑀓𑀼𑀫𑀸𑀭𑀺𑀓𑀸 𑀢𑀁𑀤𑀺𑀯𑀲𑀜𑁆𑀜𑁂𑀯 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀓𑀼𑀮𑁂 𑀧𑀝𑀺𑀲𑀦𑁆𑀥𑀺𑀁 𑀕𑀳𑁂𑀢𑁆𑀯𑀸 𑀏𑀓𑀤𑀺𑀯𑀲𑁂𑀬𑁂𑀯 𑀲𑀩𑁆𑀩𑀸 𑀫𑀸𑀢𑀼𑀓𑀼𑀘𑁆𑀙𑀺𑀢𑁄 𑀦𑀺𑀓𑁆𑀔𑀫𑀺𑀁𑀲𑀼. 𑀢𑀁𑀔𑀡𑀁𑀬𑁂𑀯 𑀚𑀸𑀡𑀼𑀧𑁆𑀧𑀫𑀸𑀡𑁂𑀦 𑀑𑀥𑀺𑀦𑀸 𑀲𑀼𑀫𑀦𑀯𑀲𑁆𑀲𑀁 𑀯𑀲𑁆𑀲𑀺. 𑀢𑀁 𑀤𑀺𑀲𑁆𑀯𑀸 𑀭𑀸𑀚𑀸 ‘‘𑀧𑀼𑀩𑁆𑀩𑁂 𑀓𑀢𑀸𑀪𑀺𑀦𑀻𑀳𑀸𑀭𑀸 𑀏𑀲𑀸 𑀪𑀯𑀺𑀲𑁆𑀲𑀢𑀻’’𑀢𑀺 𑀢𑀼𑀝𑁆𑀞𑀫𑀸𑀦𑀲𑁄 ‘‘𑀥𑀻𑀢𑀸 𑀫𑁂 𑀅𑀢𑁆𑀢𑀦𑀸𑀯 𑀅𑀢𑁆𑀢𑀦𑁄 𑀦𑀸𑀫𑀁 𑀕𑀳𑁂𑀢𑁆𑀯𑀸 𑀆𑀕𑀢𑀸’’𑀢𑀺 𑀲𑀼𑀫𑀦𑀸𑀢𑁆𑀯𑁂𑀯𑀲𑁆𑀲𑀸 𑀦𑀸𑀫𑀁 𑀓𑀢𑁆𑀯𑀸 ‘‘𑀫𑀬𑁆𑀳𑀁 𑀥𑀻𑀢𑀸 𑀦 𑀏𑀓𑀺𑀓𑀸𑀯 𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀢𑀻’’𑀢𑀺 𑀦𑀕𑀭𑀁 𑀯𑀺𑀘𑀺𑀦𑀸𑀧𑁂𑀦𑁆𑀢𑁄 ‘𑀧𑀜𑁆𑀘 𑀤𑀸𑀭𑀺𑀓𑀸𑀲𑀢𑀸𑀦𑀺 𑀚𑀸𑀢𑀸𑀦𑀻’’𑀢𑀺 𑀲𑀼𑀢𑁆𑀯𑀸 𑀲𑀩𑁆𑀩𑀸 𑀅𑀢𑁆𑀢𑀦𑀸𑀯 𑀧𑁄𑀲𑀸𑀧𑁂𑀲𑀺. 𑀫𑀸𑀲𑁂 𑀫𑀸𑀲𑁂 𑀲𑀫𑁆𑀧𑀢𑁂 ‘‘𑀆𑀦𑁂𑀢𑁆𑀯𑀸 𑀫𑀫 𑀥𑀻𑀢𑀼 𑀤𑀲𑁆𑀲𑁂𑀣𑀸’’𑀢𑀺 𑀆𑀳. 𑀏𑀯𑀫𑁂𑀲𑀸 𑀫𑀳𑀸𑀲𑀓𑁆𑀓𑀸𑀭𑀁 𑀓𑀢𑁆𑀯𑀸 𑀧𑀢𑁆𑀣𑀦𑀁 𑀧𑀢𑁆𑀣𑁂𑀢𑁆𑀯𑀸 𑀏𑀯𑀁𑀮𑀤𑁆𑀥𑀦𑀸𑀫𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀢𑀲𑁆𑀲𑀸 𑀲𑀢𑁆𑀢𑀯𑀲𑁆𑀲𑀺𑀓𑀓𑀸𑀮𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑁂𑀦 𑀯𑀺𑀳𑀸𑀭𑀁 𑀦𑀺𑀝𑁆𑀞𑀸𑀧𑁂𑀢𑁆𑀯𑀸 𑀢𑀣𑀸𑀕𑀢𑀲𑁆𑀲 𑀤𑀽𑀢𑁂 𑀧𑁂𑀲𑀺𑀢𑁂 𑀲𑀢𑁆𑀣𑀸 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀸𑀭𑁄 𑀲𑀸𑀯𑀢𑁆𑀣𑀺𑀁 𑀅𑀕𑀫𑀸𑀲𑀺. 𑀅𑀦𑀸𑀣𑀧𑀺𑀡𑁆𑀟𑀺𑀓𑁄 𑀕𑀦𑁆𑀢𑁆𑀯𑀸 𑀭𑀸𑀚𑀸𑀦𑀁 𑀏𑀯𑀫𑀸𑀳 𑁋 ‘‘𑀫𑀳𑀸𑀭𑀸𑀚, 𑀲𑀢𑁆𑀣𑀼 𑀇𑀥𑀸𑀕𑀫𑀦𑀁 𑀅𑀫𑁆𑀳𑀸𑀓𑀫𑁆𑀧𑀺 𑀫𑀗𑁆𑀕𑀮𑀁 𑀢𑀼𑀫𑁆𑀳𑀸𑀓𑀫𑁆𑀧𑀺 𑀫𑀗𑁆𑀕𑀮𑀫𑁂𑀯, 𑀲𑀼𑀫𑀦𑀁 𑀭𑀸𑀚𑀓𑀼𑀫𑀸𑀭𑀺𑀁 𑀧𑀜𑁆𑀘𑀳𑀺 𑀤𑀸𑀭𑀺𑀓𑀸𑀲𑀢𑁂𑀳𑀺 𑀲𑀤𑁆𑀥𑀺𑀁 𑀧𑀼𑀡𑁆𑀡𑀖𑀝𑁂 𑀘 𑀕𑀦𑁆𑀥𑀫𑀸𑀮𑀸𑀤𑀻𑀦𑀺 𑀘 𑀕𑀸𑀳𑀸𑀧𑁂𑀢𑁆𑀯𑀸 𑀤𑀲𑀩𑀮𑀲𑁆𑀲 𑀧𑀘𑁆𑀘𑀼𑀕𑁆𑀕𑀫𑀦𑀁 𑀧𑁂𑀲𑁂𑀣𑀸’’𑀢𑀺. 𑀭𑀸𑀚𑀸 ‘‘𑀲𑀸𑀥𑀼 𑀫𑀳𑀸𑀲𑁂𑀝𑁆𑀞𑀻’’𑀢𑀺 𑀢𑀣𑀸 𑀅𑀓𑀸𑀲𑀺. 𑀲𑀸𑀧𑀺 𑀭𑀜𑁆𑀜𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀕𑀦𑁆𑀢𑁆𑀯𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀕𑀦𑁆𑀥𑀫𑀸𑀮𑀸𑀤𑀻𑀳𑀺 𑀧𑀽𑀚𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀲𑀢𑁆𑀣𑀸 𑀢𑀲𑁆𑀲𑀸 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀲𑀸 𑀧𑀜𑁆𑀘𑀳𑀺 𑀓𑀼𑀫𑀸𑀭𑀺𑀓𑀸𑀲𑀢𑁂𑀳𑀺 𑀲𑀤𑁆𑀥𑀺𑀁 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀸𑀲𑀺. 𑀅𑀜𑁆𑀜𑀸𑀦𑀺𑀧𑀺 𑀧𑀜𑁆𑀘 𑀤𑀸𑀭𑀺𑀓𑀸𑀲𑀢𑀸𑀦𑀺 𑀧𑀜𑁆𑀘 𑀫𑀸𑀢𑀼𑀕𑀸𑀫𑀲𑀢𑀸𑀦𑀺 𑀧𑀜𑁆𑀘 𑀉𑀧𑀸𑀲𑀓𑀲𑀢𑀸𑀦𑀺 𑀢𑀲𑁆𑀫𑀺𑀁𑀬𑁂𑀯 𑀔𑀡𑁂 𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀧𑀸𑀧𑀼𑀡𑀺𑀁𑀲𑀼. 𑀏𑀯𑀁 𑀢𑀲𑁆𑀫𑀺𑀁 𑀤𑀺𑀯𑀲𑁂 𑀅𑀦𑁆𑀢𑀭𑀸𑀫𑀕𑁆𑀕𑁂𑀬𑁂𑀯 𑀤𑁆𑀯𑁂 𑀲𑁄𑀢𑀸𑀧𑀦𑁆𑀦𑀲𑀳𑀲𑁆𑀲𑀸𑀦𑀺 𑀚𑀸𑀢𑀸𑀦𑀺.

𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀻𑀢𑀺 𑀓𑀲𑁆𑀫𑀸 𑀉𑀧𑀲𑀗𑁆𑀓𑀫𑀻𑀢𑀺? 𑀧𑀜𑁆𑀳𑀁 𑀧𑀼𑀘𑁆𑀙𑀺𑀢𑀼𑀓𑀸𑀫𑀢𑀸𑀬. 𑀓𑀲𑁆𑀲𑀧𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀓𑀸𑀮𑁂 𑀓𑀺𑀭 𑀲𑀳𑀸𑀬𑀓𑀸 𑀤𑁆𑀯𑁂 𑀪𑀺𑀓𑁆𑀔𑀽 𑀅𑀳𑁂𑀲𑀼𑀁. 𑀢𑁂𑀲𑀼 𑀏𑀓𑁄 𑀲𑀸𑀭𑀡𑀻𑀬𑀥𑀫𑁆𑀫𑀁 𑀧𑀽𑀭𑁂𑀢𑀺, 𑀏𑀓𑁄 𑀪𑀢𑁆𑀢𑀕𑁆𑀕𑀯𑀢𑁆𑀢𑀁. 𑀲𑀸𑀭𑀡𑀻𑀬𑀥𑀫𑁆𑀫𑀧𑀽𑀭𑀓𑁄 𑀇𑀢𑀭𑀁 𑀆𑀳 𑁋 ‘‘𑀆𑀯𑀼𑀲𑁄, 𑀅𑀤𑀺𑀦𑁆𑀦𑀲𑁆𑀲 𑀨𑀮𑀁 𑀦𑀸𑀫 𑀦𑀢𑁆𑀣𑀺, 𑀅𑀢𑁆𑀢𑀦𑀸 𑀮𑀤𑁆𑀥𑀁 𑀧𑀭𑁂𑀲𑀁 𑀤𑀢𑁆𑀯𑀸 𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺. 𑀇𑀢𑀭𑁄 𑀧𑀦 𑀆𑀳 𑁋 ‘‘𑀆𑀯𑀼𑀲𑁄, 𑀢𑁆𑀯𑀁 𑀦 𑀚𑀸𑀦𑀸𑀲𑀺, 𑀤𑁂𑀬𑁆𑀬𑀥𑀫𑁆𑀫𑀁 𑀦𑀸𑀫 𑀯𑀺𑀦𑀺𑀧𑀸𑀢𑁂𑀢𑀼𑀁 𑀦 𑀯𑀝𑁆𑀝𑀢𑀺, 𑀅𑀢𑁆𑀢𑀦𑁄 𑀬𑀸𑀧𑀦𑀫𑀢𑁆𑀢𑀫𑁂𑀯 𑀕𑀡𑁆𑀳𑀦𑁆𑀢𑁂𑀦 𑀪𑀢𑁆𑀢𑀕𑁆𑀕𑀯𑀢𑁆𑀢𑀁 𑀧𑀽𑀭𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺. 𑀢𑁂𑀲𑀼 𑀏𑀓𑁄𑀧𑀺 𑀏𑀓𑀁 𑀅𑀢𑁆𑀢𑀦𑁄 𑀑𑀯𑀸𑀤𑁂 𑀑𑀢𑀸𑀭𑁂𑀢𑀼𑀁 𑀦𑀸𑀲𑀓𑁆𑀔𑀺. 𑀤𑁆𑀯𑁂𑀧𑀺 𑀅𑀢𑁆𑀢𑀦𑁄 𑀧𑀝𑀺𑀧𑀢𑁆𑀢𑀺𑀁 𑀧𑀽𑀭𑁂𑀢𑁆𑀯𑀸 𑀢𑀢𑁄 𑀘𑀼𑀢𑀸 𑀓𑀸𑀫𑀸𑀯𑀘𑀭𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺𑀁𑀲𑀼. 𑀢𑀢𑁆𑀣 𑀲𑀸𑀭𑀡𑀻𑀬𑀥𑀫𑁆𑀫𑀧𑀽𑀭𑀓𑁄 𑀇𑀢𑀭𑀁 𑀧𑀜𑁆𑀘𑀳𑀺 𑀥𑀫𑁆𑀫𑁂𑀳𑀺 𑀅𑀥𑀺𑀕𑀡𑁆𑀳𑀺.

𑀏𑀯𑀁 𑀢𑁂 𑀤𑁂𑀯𑁂𑀲𑀼 𑀘 𑀫𑀦𑀼𑀲𑁆𑀲𑁂𑀲𑀼 𑀘 𑀲𑀁𑀲𑀭𑀦𑁆𑀢𑀸 𑀏𑀓𑀁 𑀩𑀼𑀤𑁆𑀥𑀦𑁆𑀢𑀭𑀁 𑀔𑁂𑀧𑁂𑀢𑁆𑀯𑀸 𑀇𑀫𑀲𑁆𑀫𑀺𑀁 𑀓𑀸𑀮𑁂 𑀲𑀸𑀯𑀢𑁆𑀣𑀺𑀬𑀁 𑀦𑀺𑀩𑁆𑀩𑀢𑁆𑀢𑀺𑀁𑀲𑀼. 𑀲𑀸𑀭𑀡𑀻𑀬𑀥𑀫𑁆𑀫𑀧𑀽𑀭𑀓𑁄 𑀓𑁄𑀲𑀮𑀭𑀜𑁆𑀜𑁄 𑀅𑀕𑁆𑀕𑀫𑀳𑁂𑀲𑀺𑀬𑀸 𑀓𑀼𑀘𑁆𑀙𑀺𑀲𑁆𑀫𑀺𑀁 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺, 𑀇𑀢𑀭𑁄 𑀢𑀲𑁆𑀲𑀸𑀬𑁂𑀯 𑀉𑀧𑀝𑁆𑀞𑀸𑀓𑀇𑀢𑁆𑀣𑀺𑀬𑀸 𑀓𑀼𑀘𑁆𑀙𑀺𑀲𑁆𑀫𑀺𑀁 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺. 𑀢𑁂 𑀤𑁆𑀯𑁂𑀧𑀺 𑀚𑀦𑀸 𑀏𑀓𑀤𑀺𑀯𑀲𑁂𑀦𑁂𑀯 𑀚𑀸𑀬𑀺𑀁𑀲𑀼. 𑀢𑁂 𑀦𑀸𑀫𑀕𑁆𑀕𑀳𑀡𑀤𑀺𑀯𑀲𑁂 𑀦𑁆𑀳𑀸𑀧𑁂𑀢𑁆𑀯𑀸 𑀲𑀺𑀭𑀺𑀕𑀩𑁆𑀪𑁂 𑀦𑀺𑀧𑀚𑁆𑀚𑀸𑀧𑁂𑀢𑁆𑀯𑀸 𑀤𑁆𑀯𑀺𑀦𑁆𑀦𑀫𑁆𑀧𑀺 𑀫𑀸𑀢𑀭𑁄 𑀩𑀳𑀺 𑀲𑀓𑁆𑀓𑀸𑀭𑀁 𑀲𑀁𑀯𑀺𑀤𑀳𑀺𑀁𑀲𑀼. 𑀢𑁂𑀲𑀼 𑀲𑀸𑀭𑀡𑀻𑀬𑀥𑀫𑁆𑀫𑀧𑀽𑀭𑀓𑁄 𑀅𑀓𑁆𑀔𑀻𑀦𑀺 𑀉𑀫𑁆𑀫𑀻𑀮𑁂𑀢𑁆𑀯𑀸 𑀫𑀳𑀦𑁆𑀢𑀁 𑀲𑁂𑀢𑀘𑁆𑀙𑀢𑁆𑀢𑀁 𑀲𑀼𑀧𑀜𑁆𑀜𑀢𑁆𑀢𑀁 𑀲𑀺𑀭𑀺𑀲𑀬𑀦𑀁 𑀅𑀮𑀗𑁆𑀓𑀢𑀧𑀝𑀺𑀬𑀢𑁆𑀢𑀜𑁆𑀘 𑀦𑀺𑀯𑁂𑀲𑀦𑀁 𑀤𑀺𑀲𑁆𑀯𑀸 ‘‘𑀏𑀓𑀲𑁆𑀫𑀺𑀁 𑀭𑀸𑀚𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁄𑀲𑁆𑀫𑀻’’𑀢𑀺 𑀅𑀜𑁆𑀜𑀸𑀲𑀺. 𑀲𑁄 ‘‘𑀓𑀺𑀁 𑀦𑀼 𑀔𑁄 𑀓𑀫𑁆𑀫𑀁 𑀓𑀢𑁆𑀯𑀸 𑀇𑀥 𑀦𑀺𑀩𑁆𑀩𑀢𑁆𑀢𑁄𑀲𑁆𑀫𑀻’’𑀢𑀺 𑀆𑀯𑀚𑁆𑀚𑁂𑀦𑁆𑀢𑁄 ‘‘𑀲𑀸𑀭𑀡𑀻𑀬𑀥𑀫𑁆𑀫𑀦𑀺𑀲𑁆𑀲𑀦𑁆𑀤𑁂𑀦𑀸’’𑀢𑀺 𑀜𑀢𑁆𑀯𑀸 ‘‘𑀲𑀳𑀸𑀬𑁄 𑀫𑁂 𑀓𑀼𑀳𑀺𑀁 𑀦𑀼 𑀔𑁄 𑀦𑀺𑀩𑁆𑀩𑀢𑁆𑀢𑁄’’𑀢𑀺 𑀆𑀯𑀚𑁆𑀚𑁂𑀦𑁆𑀢𑁄 𑀦𑀻𑀘𑀲𑀬𑀦𑁂 𑀦𑀺𑀧𑀦𑁆𑀦𑀁 𑀤𑀺𑀲𑁆𑀯𑀸 ‘‘𑀅𑀬𑀁 𑀪𑀢𑁆𑀢𑀕𑁆𑀕𑀯𑀢𑁆𑀢𑀁 𑀧𑀽𑀭𑁂𑀫𑀻𑀢𑀺 𑀫𑀫 𑀯𑀘𑀦𑀁 𑀦 𑀕𑀡𑁆𑀳𑀺, 𑀇𑀫𑀲𑁆𑀫𑀺𑀁 𑀇𑀤𑀸𑀦𑀺 𑀢𑀁 𑀞𑀸𑀦𑁂 𑀦𑀺𑀕𑁆𑀕𑀡𑁆𑀳𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 ‘‘𑀲𑀫𑁆𑀫 𑀫𑀫 𑀯𑀘𑀦𑀁 𑀦𑀸𑀓𑀸𑀲𑀻’’𑀢𑀺 𑀆𑀳. 𑀅𑀣 𑀓𑀺𑀁 𑀚𑀸𑀢𑀦𑁆𑀢𑀺. 𑀧𑀲𑁆𑀲 𑀫𑀬𑁆𑀳𑀁 𑀲𑀫𑁆𑀧𑀢𑁆𑀢𑀺𑀁, 𑀲𑁂𑀢𑀘𑁆𑀙𑀢𑁆𑀢𑀲𑁆𑀲 𑀳𑁂𑀝𑁆𑀞𑀸 𑀲𑀺𑀭𑀺𑀲𑀬𑀦𑁂 𑀦𑀺𑀧𑀦𑁆𑀦𑁄𑀲𑁆𑀫𑀺, 𑀢𑁆𑀯𑀁 𑀦𑀻𑀘𑀫𑀜𑁆𑀘𑁂 𑀣𑀤𑁆𑀥𑀅𑀢𑁆𑀣𑀭𑀡𑀫𑀢𑁆𑀢𑁂 𑀦𑀺𑀧𑀦𑁆𑀦𑁄𑀲𑀻𑀢𑀺. 𑀓𑀺𑀁 𑀧𑀦 𑀢𑁆𑀯𑀁 𑀏𑀢𑀁 𑀦𑀺𑀲𑁆𑀲𑀸𑀬 𑀫𑀸𑀦𑀁 𑀓𑀭𑁄𑀲𑀺, 𑀦𑀦𑀼 𑀯𑁂𑀴𑀼𑀲𑀮𑀸𑀓𑀸𑀳𑀺 𑀓𑀢𑁆𑀯𑀸 𑀧𑀺𑀮𑁄𑀢𑀺𑀓𑀸𑀬 𑀧𑀮𑀺𑀯𑁂𑀞𑀺𑀢𑀁 𑀲𑀩𑁆𑀩𑀫𑁂𑀢𑀁 𑀧𑀣𑀯𑀻𑀥𑀸𑀢𑀼𑀫𑀢𑁆𑀢𑀫𑁂𑀯𑀸𑀢𑀺?

𑀲𑀼𑀫𑀦𑀸 𑀢𑁂𑀲𑀁 𑀓𑀣𑀁 𑀲𑀼𑀢𑁆𑀯𑀸 ‘‘𑀫𑀫 𑀪𑀸𑀢𑀺𑀓𑀸𑀦𑀁 𑀲𑀦𑁆𑀢𑀺𑀓𑁂 𑀓𑁄𑀘𑀺 𑀦𑀢𑁆𑀣𑀻’’𑀢𑀺 𑀢𑁂𑀲𑀁 𑀲𑀫𑀻𑀧𑀁 𑀕𑀘𑁆𑀙𑀦𑁆𑀢𑀻 𑀤𑁆𑀯𑀸𑀭𑀁 𑀦𑀺𑀲𑁆𑀲𑀸𑀬 𑀞𑀺𑀢𑀸 ‘‘𑀥𑀸𑀢𑀽’’𑀢𑀺 𑀯𑀘𑀦𑀁 𑀲𑀼𑀢𑁆𑀯𑀸 ‘‘𑀇𑀤𑀁 𑀥𑀸𑀢𑀽𑀢𑀺 𑀯𑀘𑀦𑀁 𑀩𑀳𑀺𑀤𑁆𑀥𑀸 𑀦𑀢𑁆𑀣𑀺. 𑀫𑀫 𑀪𑀸𑀢𑀺𑀓𑀸 𑀲𑀫𑀡𑀤𑁂𑀯𑀧𑀼𑀢𑁆𑀢𑀸 𑀪𑀯𑀺𑀲𑁆𑀲𑀦𑁆𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑁋 ‘‘𑀲𑀘𑀸𑀳𑀁 ‘𑀇𑀫𑁂 𑀏𑀯𑀁 𑀓𑀣𑁂𑀦𑁆𑀢𑀻’𑀢𑀺 𑀫𑀸𑀢𑀸𑀧𑀺𑀢𑀽𑀦𑀁 𑀓𑀣𑁂𑀲𑁆𑀲𑀸𑀫𑀺, ‘𑀅𑀫𑀦𑀼𑀲𑁆𑀲𑀸 𑀏𑀢𑁂’𑀢𑀺 𑀦𑀻𑀳𑀭𑀸𑀧𑁂𑀲𑁆𑀲𑀦𑁆𑀢𑀺. 𑀇𑀤𑀁 𑀓𑀸𑀭𑀡𑀁 𑀅𑀜𑁆𑀜𑀲𑁆𑀲 𑀅𑀓𑀣𑁂𑀢𑁆𑀯𑀸 𑀓𑀗𑁆𑀔𑀘𑁆𑀙𑁂𑀤𑀓𑀁 𑀧𑀼𑀭𑀺𑀲𑀳𑁂𑀭𑀜𑁆𑀜𑀺𑀓𑀁 𑀫𑀫 𑀧𑀺𑀢𑀭𑀁 𑀫𑀳𑀸𑀕𑁄𑀢𑀫𑀤𑀲𑀩𑀮𑀁𑀬𑁂𑀯 𑀧𑀼𑀘𑁆𑀙𑀺𑀲𑁆𑀲𑀸𑀫𑀻’’𑀢𑀺 𑀪𑀼𑀢𑁆𑀢𑀧𑀸𑀢𑀭𑀸𑀲𑀸 𑀭𑀸𑀚𑀸𑀦𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀤𑀲𑀩𑀮𑀲𑁆𑀲 𑀉𑀧𑀝𑁆𑀞𑀸𑀦𑀁 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀆𑀳. 𑀭𑀸𑀚𑀸 𑀧𑀜𑁆𑀘 𑀭𑀣𑀲𑀢𑀸𑀦𑀺 𑀬𑁄𑀚𑀸𑀧𑁂𑀲𑀺. 𑀚𑀫𑁆𑀩𑀼𑀤𑀻𑀧𑀢𑀮𑀲𑁆𑀫𑀺𑀜𑁆𑀳𑀺 𑀢𑀺𑀲𑁆𑀲𑁄𑀯 𑀓𑀼𑀫𑀸𑀭𑀺𑀬𑁄 𑀧𑀺𑀢𑀽𑀦𑀁 𑀲𑀦𑁆𑀢𑀺𑀓𑀸 𑀧𑀜𑁆𑀘 𑀭𑀣𑀲𑀢𑀸𑀦𑀺 𑀮𑀪𑀺𑀁𑀲𑀼 𑁋 𑀩𑀺𑀫𑁆𑀩𑀺𑀲𑀸𑀭𑀭𑀜𑁆𑀜𑁄 𑀥𑀻𑀢𑀸 𑀘𑀼𑀦𑁆𑀤𑀻 𑀭𑀸𑀚𑀓𑀜𑁆𑀜𑀸, 𑀥𑀦𑀜𑁆𑀘𑀬𑀲𑁆𑀲 𑀲𑁂𑀝𑁆𑀞𑀺𑀲𑁆𑀲 𑀥𑀻𑀢𑀸 𑀯𑀺𑀲𑀸𑀔𑀸, 𑀅𑀬𑀁 𑀲𑀼𑀫𑀦𑀸 𑀭𑀸𑀚𑀓𑀜𑁆𑀜𑀸𑀢𑀺. 𑀲𑀸 𑀕𑀦𑁆𑀥𑀫𑀸𑀮𑀁 𑀆𑀤𑀸𑀬 𑀭𑀣𑁂 𑀞𑀺𑀢𑀸 𑀧𑀜𑁆𑀘𑀭𑀣𑀲𑀢𑀧𑀭𑀺𑀯𑀸𑀭𑀸 ‘‘𑀇𑀫𑀁 𑀧𑀜𑁆𑀳𑀁 𑀧𑀼𑀘𑁆𑀙𑀺𑀲𑁆𑀲𑀸𑀫𑀻’’𑀢𑀺 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺.

𑀇𑀥𑀲𑁆𑀲𑀽𑀢𑀺 𑀇𑀥 𑀪𑀯𑁂𑀬𑁆𑀬𑀼𑀁. 𑀏𑀓𑁄 𑀤𑀸𑀬𑀓𑁄𑀢𑀺 𑀏𑀓𑁄 𑀅𑀢𑁆𑀢𑀦𑀸 𑀮𑀤𑁆𑀥𑀮𑀸𑀪𑀢𑁄 𑀧𑀭𑀲𑁆𑀲 𑀤𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀦𑀓𑁄 𑀲𑀸𑀭𑀡𑀻𑀬𑀥𑀫𑁆𑀫𑀧𑀽𑀭𑀓𑁄. 𑀏𑀓𑁄 𑀅𑀤𑀸𑀬𑀓𑁄𑀢𑀺 𑀏𑀓𑁄 𑀅𑀢𑁆𑀢𑀦𑀸 𑀮𑀤𑁆𑀥𑀁 𑀧𑀭𑀲𑁆𑀲 𑀅𑀤𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀦𑀓𑁄 𑀪𑀢𑁆𑀢𑀕𑁆𑀕𑀯𑀢𑁆𑀢𑀧𑀽𑀭𑀓𑁄. 𑀤𑁂𑀯𑀪𑀽𑀢𑀸𑀦𑀁 𑀧𑀦 𑀦𑁂𑀲𑀦𑁆𑀢𑀺 𑀤𑁂𑀯𑀪𑀽𑀢𑀸𑀦𑀁 𑀏𑀢𑁂𑀲𑀁. 𑀅𑀥𑀺𑀕𑀡𑁆𑀳𑀸𑀢𑀻𑀢𑀺 𑀅𑀥𑀺𑀪𑀯𑀺𑀢𑁆𑀯𑀸 𑀕𑀡𑁆𑀳𑀸𑀢𑀺 𑀅𑀚𑁆𑀛𑁄𑀢𑁆𑀣𑀭𑀢𑀺 𑀅𑀢𑀺𑀲𑁂𑀢𑀺. 𑀆𑀥𑀺𑀧𑀢𑁂𑀬𑁆𑀬𑁂𑀦𑀸𑀢𑀺 𑀚𑁂𑀝𑁆𑀞𑀓𑀓𑀸𑀭𑀡𑁂𑀦. 𑀇𑀫𑁂𑀳𑀺 𑀧𑀜𑁆𑀘𑀳𑀺 𑀞𑀸𑀦𑁂𑀳𑀻𑀢𑀺 𑀲𑁂𑀲𑀤𑁂𑀯𑁂 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸 𑀯𑀺𑀬 𑀇𑀫𑁂𑀳𑀺 𑀧𑀜𑁆𑀘𑀳𑀺 𑀓𑀸𑀭𑀡𑁂𑀳𑀺 𑀅𑀥𑀺𑀕𑀡𑁆𑀳𑀸𑀢𑀺. 𑀫𑀸𑀦𑀼𑀲𑀓𑁂𑀦𑀸𑀢𑀺𑀆𑀤𑀻𑀲𑀼 𑀆𑀬𑀼𑀦𑀸 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑁄 𑀯𑀺𑀬 𑀩𑀸𑀓𑀼𑀮𑀢𑁆𑀣𑁂𑀭𑁄 𑀯𑀺𑀬 𑀆𑀦𑀦𑁆𑀤𑀢𑁆𑀣𑁂𑀭𑁄 𑀯𑀺𑀬 𑀘, 𑀯𑀡𑁆𑀡𑁂𑀦 𑀫𑀳𑀸𑀕𑀢𑀺𑀫𑁆𑀩𑀅𑀪𑀬𑀢𑁆𑀣𑁂𑀭𑁄 𑀯𑀺𑀬 𑀪𑀡𑁆𑀟𑀸𑀕𑀸𑀭𑀅𑀫𑀘𑁆𑀘𑁄 𑀯𑀺𑀬 𑀘, 𑀲𑀼𑀔𑁂𑀦 𑀭𑀝𑁆𑀞𑀧𑀸𑀮𑀓𑀼𑀮𑀧𑀼𑀢𑁆𑀢𑁄 𑀯𑀺𑀬 𑀲𑁄𑀡𑀲𑁂𑀝𑁆𑀞𑀺𑀧𑀼𑀢𑁆𑀢𑁄 𑀯𑀺𑀬 𑀬𑀲𑀤𑀸𑀭𑀓𑁄 𑀯𑀺𑀬 𑀘, 𑀬𑀲𑁂𑀦 𑀥𑀫𑁆𑀫𑀸𑀲𑁄𑀓𑁄 𑀯𑀺𑀬, 𑀢𑀣𑀸 𑀆𑀥𑀺𑀧𑀘𑁆𑀘𑁂𑀦𑀸𑀢𑀺 𑀇𑀫𑁂𑀳𑀺 𑀧𑀜𑁆𑀘𑀳𑀺 𑀓𑀸𑀭𑀡𑁂𑀳𑀺 𑀅𑀢𑀺𑀭𑁂𑀓𑁄 𑀚𑁂𑀝𑁆𑀞𑀓𑁄 𑀳𑁄𑀢𑀺.

𑀬𑀸𑀘𑀺𑀢𑁄𑀯 𑀩𑀳𑀼𑀮𑀦𑁆𑀢𑀺 𑀩𑀸𑀓𑀼𑀮𑀢𑁆𑀣𑁂𑀭-𑀲𑀻𑀯𑀮𑀺𑀢𑁆𑀣𑁂𑀭-𑀆𑀦𑀦𑁆𑀤𑀢𑁆𑀣𑁂𑀭𑀸𑀤𑀬𑁄 𑀯𑀺𑀬 𑀬𑀸𑀘𑀺𑀢𑁄𑀯 𑀩𑀳𑀼𑀮𑀁 𑀘𑀻𑀯𑀭𑀸𑀤𑀻𑀦𑀺 𑀧𑀭𑀺𑀪𑀼𑀜𑁆𑀚𑀢𑀻𑀢𑀺 𑀇𑀫𑁂𑀳𑀺 𑀓𑀸𑀭𑀡𑁂𑀳𑀺 𑀅𑀢𑀺𑀭𑁂𑀓𑁄 𑀳𑁄𑀢𑀺 𑀚𑁂𑀝𑁆𑀞𑀓𑁄. 𑀬𑀤𑀺𑀤𑀁 𑀯𑀺𑀫𑀼𑀢𑁆𑀢𑀺𑀬𑀸 𑀯𑀺𑀫𑀼𑀢𑁆𑀢𑀺𑀦𑁆𑀢𑀺 𑀬𑀁 𑀏𑀓𑀲𑁆𑀲 𑀯𑀺𑀫𑀼𑀢𑁆𑀢𑀺𑀬𑀸 𑀲𑀤𑁆𑀥𑀺𑀁 𑀇𑀢𑀭𑀲𑁆𑀲 𑀯𑀺𑀫𑀼𑀢𑁆𑀢𑀺𑀁 𑀆𑀭𑀩𑁆𑀪 𑀦𑀸𑀦𑀸𑀓𑀭𑀡𑀁 𑀯𑀢𑁆𑀢𑀩𑁆𑀩𑀁 𑀪𑀯𑁂𑀬𑁆𑀬, 𑀢𑀁 𑀦 𑀯𑀤𑀸𑀫𑀻𑀢𑀺 𑀅𑀢𑁆𑀣𑁄. 𑀲𑀢𑁆𑀢𑀯𑀲𑁆𑀲𑀺𑀓𑀤𑀸𑀭𑀓𑁄 𑀯𑀸 𑀳𑀺 𑀯𑀺𑀫𑀼𑀢𑁆𑀢𑀺𑀁 𑀧𑀝𑀺𑀯𑀺𑀚𑁆𑀛𑀢𑀼 𑀯𑀲𑁆𑀲𑀲𑀢𑀺𑀓𑀢𑁆𑀣𑁂𑀭𑁄 𑀯𑀸 𑀪𑀺𑀓𑁆𑀔𑀼 𑀯𑀸 𑀪𑀺𑀓𑁆𑀔𑀼𑀦𑀻 𑀯𑀸 𑀉𑀧𑀸𑀲𑀓𑁄 𑀯𑀸 𑀉𑀧𑀸𑀲𑀺𑀓𑀸 𑀯𑀸 𑀤𑁂𑀯𑁄 𑀯𑀸 𑀫𑀸𑀭𑁄 𑀯𑀸 𑀩𑁆𑀭𑀳𑁆𑀫𑀸 𑀯𑀸, 𑀧𑀝𑀺𑀯𑀺𑀤𑁆𑀥𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑁂 𑀦𑀸𑀦𑀢𑁆𑀢𑀁 𑀦𑀸𑀫 𑀦𑀢𑁆𑀣𑀺. 𑀅𑀮𑀫𑁂𑀯𑀸𑀢𑀺 𑀬𑀼𑀢𑁆𑀢𑀫𑁂𑀯. 𑀬𑀢𑁆𑀭 𑀳𑀺 𑀦𑀸𑀫𑀸𑀢𑀺 𑀬𑀸𑀦𑀺 𑀦𑀸𑀫.

𑀕𑀘𑁆𑀙𑀁 𑀆𑀓𑀸𑀲𑀥𑀸𑀢𑀼𑀬𑀸𑀢𑀺 𑀆𑀓𑀸𑀲𑁂𑀦 𑀕𑀘𑁆𑀙𑀦𑁆𑀢𑁄. 𑀲𑀤𑁆𑀥𑁄𑀢𑀺 𑀭𑀢𑀦𑀢𑁆𑀢𑀬𑀕𑀼𑀡𑀸𑀦𑀁 𑀲𑀤𑁆𑀥𑀸𑀢𑀸. 𑀣𑀦𑀬𑀦𑁆𑀢𑀺 𑀕𑀚𑁆𑀚𑀦𑁆𑀢𑁄. 𑀯𑀺𑀚𑁆𑀚𑀼𑀫𑀸𑀮𑀻𑀢𑀺 𑀫𑀸𑀮𑀸𑀲𑀤𑀺𑀲𑀸𑀬 𑀫𑁂𑀖𑀫𑀼𑀔𑁂 𑀘𑀭𑀦𑁆𑀢𑀺𑀬𑀸 𑀯𑀺𑀚𑁆𑀚𑀼𑀮𑀢𑀸𑀬 𑀲𑀫𑀦𑁆𑀦𑀸𑀕𑀢𑁄. 𑀲𑀢𑀓𑁆𑀓𑀓𑀽𑀢𑀺 𑀲𑀢𑀓𑀽𑀝𑁄, 𑀇𑀢𑁄 𑀘𑀺𑀢𑁄 𑀘 𑀉𑀝𑁆𑀞𑀺𑀢𑁂𑀦 𑀯𑀮𑀸𑀳𑀓𑀓𑀽𑀝𑀲𑀢𑁂𑀦 𑀲𑀫𑀦𑁆𑀦𑀸𑀕𑀢𑁄𑀢𑀺 𑀅𑀢𑁆𑀣𑁄. 𑀤𑀲𑁆𑀲𑀦𑀲𑀫𑁆𑀧𑀦𑁆𑀦𑁄𑀢𑀺 𑀲𑁄𑀢𑀸𑀧𑀦𑁆𑀦𑁄. 𑀪𑁄𑀕𑀧𑀭𑀺𑀩𑁆𑀬𑀽𑀴𑁆𑀳𑁄𑀢𑀺 𑀉𑀤𑀓𑁄𑀖𑁂𑀦 𑀯𑀺𑀬 𑀤𑀸𑀦𑀯𑀲𑁂𑀦 𑀤𑀻𑀬𑀫𑀸𑀦𑁂𑀳𑀺 𑀪𑁄𑀕𑁂𑀳𑀺 𑀧𑀭𑀺𑀩𑁆𑀬𑀽𑀴𑁆𑀳𑁄, 𑀤𑁂𑀯𑀮𑁄𑀓𑀁 𑀲𑀫𑁆𑀧𑀸𑀧𑀺𑀢𑁄𑀢𑀺 𑀅𑀢𑁆𑀣𑁄. 𑀧𑁂𑀘𑁆𑀘𑀸𑀢𑀺 𑀧𑀭𑀮𑁄𑀓𑁂. 𑀲𑀕𑁆𑀕𑁂 𑀧𑀫𑁄𑀤𑀢𑀻𑀢𑀺 𑀬𑀲𑁆𑀫𑀺𑀁 𑀲𑀕𑁆𑀕𑁂 𑀉𑀧𑁆𑀧𑀚𑁆𑀚𑀢𑀺, 𑀢𑀢𑁆𑀣𑁂𑀯 𑀫𑁄𑀤𑀢𑀻𑀢𑀺.

𑁨. 𑀘𑀼𑀦𑁆𑀤𑀻𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁨. 𑀤𑀼𑀢𑀺𑀬𑁂 𑀧𑀜𑁆𑀘𑀳𑀺 𑀭𑀣𑀲𑀢𑁂𑀳𑀻𑀢𑀺 𑀪𑀼𑀢𑁆𑀢𑀧𑀸𑀢𑀭𑀸𑀲𑀸 𑀧𑀺𑀢𑀼 𑀲𑀦𑁆𑀢𑀺𑀓𑀁 𑀧𑁂𑀲𑁂𑀢𑁆𑀯𑀸 𑀧𑀜𑁆𑀘 𑀭𑀣𑀲𑀢𑀸𑀦𑀺 𑀬𑁄𑀚𑀸𑀧𑁂𑀢𑁆𑀯𑀸 𑀢𑁂𑀳𑀺 𑀧𑀭𑀺𑀯𑀼𑀢𑀸𑀢𑀺 𑀅𑀢𑁆𑀣𑁄. 𑀉𑀧𑀲𑀗𑁆𑀓𑀫𑀻𑀢𑀺 𑀪𑀸𑀢𑀭𑀸 𑀲𑀤𑁆𑀥𑀺𑀁 𑀧𑀯𑀢𑁆𑀢𑀺𑀢𑀁 𑀧𑀜𑁆𑀳𑀲𑀸𑀓𑀘𑁆𑀙𑀁 𑀧𑀼𑀘𑁆𑀙𑀺𑀲𑁆𑀲𑀸𑀫𑀻𑀢𑀺 𑀕𑀦𑁆𑀥𑀫𑀸𑀮𑀘𑀼𑀡𑁆𑀡𑀸𑀤𑀻𑀦𑀺 𑀆𑀤𑀸𑀬 𑀉𑀧𑀲𑀗𑁆𑀓𑀫𑀺. 𑀬𑀤𑁂𑀯 𑀲𑁄 𑀳𑁄𑀢𑀻𑀢𑀺 𑀬𑀤𑀸 𑀏𑀯 𑀲𑁄 𑀳𑁄𑀢𑀺. 𑀅𑀣 𑀯𑀸 𑀬𑁄 𑀏𑀯 𑀲𑁄 𑀳𑁄𑀢𑀺. 𑀅𑀭𑀺𑀬𑀓𑀦𑁆𑀢𑀸𑀦𑀺 𑀲𑀻𑀮𑀸𑀦𑀻𑀢𑀺 𑀫𑀕𑁆𑀕𑀨𑀮𑀲𑀫𑁆𑀧𑀬𑀼𑀢𑁆𑀢𑀸𑀦𑀺 𑀲𑀻𑀮𑀸𑀦𑀺. 𑀢𑀸𑀦𑀺 𑀳𑀺 𑀅𑀭𑀺𑀬𑀸𑀦𑀁 𑀓𑀦𑁆𑀢𑀸𑀦𑀺 𑀳𑁄𑀦𑁆𑀢𑀺, 𑀪𑀯𑀦𑁆𑀢𑀭𑁂𑀧𑀺 𑀦 𑀧𑀭𑀺𑀘𑁆𑀘𑀚𑀦𑁆𑀢𑀺. 𑀲𑁂𑀲𑀁 𑀘𑀢𑀼𑀓𑁆𑀓𑀦𑀺𑀧𑀸𑀢𑁂 𑀅𑀕𑁆𑀕𑀧𑁆𑀧𑀲𑀸𑀤𑀲𑀼𑀢𑁆𑀢𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁.

𑁩. 𑀉𑀕𑁆𑀕𑀳𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁩. 𑀢𑀢𑀺𑀬𑁂 𑀪𑀤𑁆𑀤𑀺𑀬𑁂𑀢𑀺 𑀪𑀤𑁆𑀤𑀺𑀬𑀦𑀕𑀭𑁂. 𑀚𑀸𑀢𑀺𑀬𑀸𑀯𑀦𑁂𑀢𑀺 𑀲𑀬𑀁𑀚𑀸𑀢𑁂 𑀅𑀭𑁄𑀧𑀺𑀢𑁂 𑀳𑀺𑀫𑀯𑀦𑁆𑀢𑁂𑀦 𑀲𑀤𑁆𑀥𑀺𑀁 𑀏𑀓𑀸𑀩𑀤𑁆𑀥𑁂 𑀯𑀦𑀲𑀡𑁆𑀟𑁂, 𑀢𑀁 𑀦𑀕𑀭𑀁 𑀉𑀧𑀦𑀺𑀲𑁆𑀲𑀸𑀬 𑀢𑀲𑁆𑀫𑀺𑀁 𑀯𑀦𑁂 𑀯𑀺𑀳𑀭𑀢𑀻𑀢𑀺 𑀅𑀢𑁆𑀣𑁄. 𑀅𑀢𑁆𑀢𑀘𑀢𑀼𑀢𑁆𑀣𑁄𑀢𑀺 𑀅𑀢𑁆𑀢𑀦𑀸 𑀘𑀢𑀼𑀢𑁆𑀣𑁄. 𑀓𑀲𑁆𑀫𑀸 𑀧𑀦𑁂𑀲 𑀪𑀕𑀯𑀦𑁆𑀢𑀁 𑀅𑀢𑁆𑀢𑀘𑀢𑀼𑀢𑁆𑀣𑀁𑀬𑁂𑀯 𑀦𑀺𑀫𑀦𑁆𑀢𑁂𑀲𑀺? 𑀕𑁂𑀳𑁂 𑀓𑀺𑀭𑀲𑁆𑀲 𑀫𑀗𑁆𑀕𑀮𑀁 𑀫𑀳𑀦𑁆𑀢𑀁, 𑀢𑀢𑁆𑀣 𑀫𑀳𑀦𑁆𑀢𑁂𑀦 𑀲𑀁𑀯𑀺𑀥𑀸𑀦𑁂𑀦 𑀩𑀳𑀽 𑀫𑀦𑀼𑀲𑁆𑀲𑀸 𑀲𑀦𑁆𑀦𑀺𑀧𑀢𑀺𑀲𑁆𑀲𑀦𑁆𑀢𑀺. 𑀢𑁂 𑀪𑀺𑀓𑁆𑀔𑀼𑀲𑀗𑁆𑀖𑀁 𑀧𑀭𑀺𑀯𑀺𑀲𑀦𑁆𑀢𑁂𑀦 𑀤𑀼𑀲𑁆𑀲𑀗𑁆𑀕𑀳𑀸 𑀪𑀯𑀺𑀲𑁆𑀲𑀦𑁆𑀢𑀻𑀢𑀺 𑀅𑀢𑁆𑀢𑀘𑀢𑀼𑀢𑁆𑀣𑀁𑀬𑁂𑀯 𑀦𑀺𑀫𑀦𑁆𑀢𑁂𑀲𑀺. 𑀅𑀧𑀺 𑀘𑀲𑁆𑀲 𑀏𑀯𑀫𑁆𑀧𑀺 𑀅𑀳𑁄𑀲𑀺 𑁋 ‘‘𑀤𑀳𑀭𑀓𑀼𑀫𑀸𑀭𑀺𑀓𑀸𑀬𑁄 𑀫𑀳𑀸𑀪𑀺𑀓𑁆𑀔𑀼𑀲𑀗𑁆𑀖𑀫𑀚𑁆𑀛𑁂 𑀲𑀢𑁆𑀣𑀭𑀺 𑀑𑀯𑀤𑀦𑁆𑀢𑁂 𑀑𑀮𑀻𑀦𑀫𑀦𑀸 𑀑𑀯𑀸𑀤𑀁 𑀕𑀳𑁂𑀢𑀼𑀁 𑀦 𑀲𑀓𑁆𑀓𑀼𑀡𑁂𑀬𑁆𑀬𑀼’’𑀦𑁆𑀢𑀺. 𑀇𑀫𑀺𑀦𑀸𑀧𑀺 𑀓𑀸𑀭𑀡𑁂𑀦 𑀅𑀢𑁆𑀢𑀘𑀢𑀼𑀢𑁆𑀣𑀫𑁂𑀯 𑀦𑀺𑀫𑀦𑁆𑀢𑁂𑀲𑀺. 𑀑𑀯𑀤𑀢𑀼 𑀢𑀸𑀲𑀁, 𑀪𑀦𑁆𑀢𑁂𑀢𑀺, 𑀪𑀦𑁆𑀢𑁂 𑀪𑀕𑀯𑀸, 𑀏𑀢𑀸𑀲𑀁 𑀑𑀯𑀤𑀢𑀼, 𑀏𑀢𑀸 𑀑𑀯𑀤𑀢𑀽𑀢𑀺 𑀅𑀢𑁆𑀣𑁄. 𑀉𑀧𑀬𑁄𑀕𑀢𑁆𑀣𑀲𑁆𑀫𑀺𑀜𑁆𑀳𑀺 𑀏𑀢𑀁 𑀲𑀸𑀫𑀺𑀯𑀘𑀦𑀁. 𑀬𑀁 𑀢𑀸𑀲𑀦𑁆𑀢𑀺 𑀬𑀁 𑀑𑀯𑀸𑀤𑀸𑀦𑀼𑀲𑀸𑀲𑀦𑀁 𑀏𑀢𑀸𑀲𑀁. 𑀏𑀯𑀜𑁆𑀘 𑀧𑀦 𑀯𑀢𑁆𑀯𑀸 𑀲𑁄 𑀲𑁂𑀝𑁆𑀞𑀺 ‘‘𑀇𑀫𑀸 𑀫𑀫 𑀲𑀦𑁆𑀢𑀺𑀓𑁂 𑀑𑀯𑀸𑀤𑀁 𑀕𑀡𑁆𑀳𑀫𑀸𑀦𑀸 𑀳𑀭𑀸𑀬𑁂𑀬𑁆𑀬𑀼’’𑀦𑁆𑀢𑀺 𑀪𑀕𑀯𑀦𑁆𑀢𑀁 𑀯𑀦𑁆𑀤𑀺𑀢𑁆𑀯𑀸 𑀧𑀓𑁆𑀓𑀸𑀫𑀺.

𑀪𑀢𑁆𑀢𑀽𑀢𑀺 𑀲𑀸𑀫𑀺𑀓𑀲𑁆𑀲. 𑀅𑀦𑀼𑀓𑀫𑁆𑀧𑀁 𑀉𑀧𑀸𑀤𑀸𑀬𑀸𑀢𑀺 𑀅𑀦𑀼𑀤𑁆𑀤𑀬𑀁 𑀧𑀝𑀺𑀘𑁆𑀘. 𑀧𑀼𑀩𑁆𑀩𑀼𑀝𑁆𑀞𑀸𑀬𑀺𑀦𑀺𑀬𑁄𑀢𑀺 𑀲𑀩𑁆𑀩𑀧𑀞𑀫𑀁 𑀉𑀝𑁆𑀞𑀸𑀦𑀲𑀻𑀮𑀸. 𑀧𑀘𑁆𑀙𑀸𑀦𑀺𑀧𑀸𑀢𑀺𑀦𑀺𑀬𑁄𑀢𑀺 𑀲𑀩𑁆𑀩𑀧𑀘𑁆𑀙𑀸 𑀦𑀺𑀧𑀚𑁆𑀚𑀦𑀲𑀻𑀮𑀸. 𑀇𑀢𑁆𑀣𑀺𑀬𑀸 𑀳𑀺 𑀧𑀞𑀫𑀢𑀭𑀁 𑀪𑀼𑀜𑁆𑀚𑀺𑀢𑁆𑀯𑀸 𑀲𑀬𑀦𑀁 𑀆𑀭𑀼𑀬𑁆𑀳 𑀦𑀺𑀧𑀚𑁆𑀚𑀺𑀢𑀼𑀁 𑀦 𑀯𑀝𑁆𑀝𑀢𑀺, 𑀲𑀩𑁆𑀩𑁂 𑀧𑀦 𑀕𑁂𑀳𑀧𑀭𑀺𑀚𑀦𑁂 𑀪𑁄𑀚𑁂𑀢𑁆𑀯𑀸 𑀉𑀧𑀓𑀭𑀡𑀪𑀡𑁆𑀟𑀁 𑀲𑀁𑀯𑀺𑀥𑀸𑀬 𑀕𑁄𑀭𑀽𑀧𑀸𑀤𑀻𑀦𑀺 𑀆𑀕𑀢𑀸𑀦𑀸𑀕𑀢𑀸𑀦𑀺 𑀜𑀢𑁆𑀯𑀸 𑀲𑁆𑀯𑁂 𑀓𑀢𑁆𑀢𑀩𑁆𑀩𑀓𑀫𑁆𑀫𑀁 𑀯𑀺𑀘𑀸𑀭𑁂𑀢𑁆𑀯𑀸 𑀓𑀼𑀜𑁆𑀘𑀺𑀓𑀸𑀫𑀼𑀤𑁆𑀤𑀺𑀓𑀁 𑀳𑀢𑁆𑀣𑁂 𑀓𑀢𑁆𑀯𑀸 𑀲𑀘𑁂 𑀪𑁄𑀚𑀦𑀁 𑀅𑀢𑁆𑀣𑀺, 𑀪𑀼𑀜𑁆𑀚𑀺𑀢𑁆𑀯𑀸, 𑀦𑁄 𑀘𑁂 𑀅𑀢𑁆𑀣𑀺, 𑀅𑀜𑁆𑀜𑀁 𑀧𑀘𑀸𑀧𑁂𑀢𑁆𑀯𑀸 𑀲𑀩𑁆𑀩𑁂 𑀲𑀦𑁆𑀢𑀧𑁆𑀧𑁂𑀢𑁆𑀯𑀸 𑀧𑀘𑁆𑀙𑀸 𑀦𑀺𑀧𑀚𑁆𑀚𑀺𑀢𑀼𑀁 𑀯𑀝𑁆𑀝𑀢𑀺. 𑀦𑀺𑀧𑀦𑁆𑀦𑀸𑀬𑀧𑀺 𑀬𑀸𑀯 𑀲𑀽𑀭𑀺𑀬𑀼𑀕𑁆𑀕𑀫𑀦𑀸 𑀦𑀺𑀤𑁆𑀤𑀸𑀬𑀺𑀢𑀼𑀁 𑀦 𑀯𑀝𑁆𑀝𑀢𑀺, 𑀲𑀩𑁆𑀩𑀧𑀞𑀫𑀁 𑀧𑀦 𑀉𑀝𑁆𑀞𑀸𑀬 𑀤𑀸𑀲𑀓𑀫𑁆𑀫𑀓𑀭𑁂 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀇𑀤𑀜𑁆𑀘𑀺𑀤𑀜𑁆𑀘 𑀓𑀫𑁆𑀫𑀁 𑀓𑀭𑁄𑀣𑀸’’𑀢𑀺 𑀓𑀫𑁆𑀫𑀦𑁆𑀢𑀁 𑀯𑀺𑀘𑀸𑀭𑁂𑀢𑁆𑀯𑀸 𑀥𑁂𑀦𑀼𑀬𑁄 𑀤𑀼𑀳𑀸𑀧𑁂𑀢𑁆𑀯𑀸 𑀲𑀩𑁆𑀩𑀁 𑀕𑁂𑀳𑁂 𑀓𑀢𑁆𑀢𑀩𑁆𑀩𑀓𑀺𑀘𑁆𑀘𑀁 𑀅𑀢𑁆𑀢𑀦𑁄 𑀧𑀘𑁆𑀘𑀓𑁆𑀔𑀁𑀬𑁂𑀯 𑀓𑀸𑀢𑀼𑀁 𑀯𑀝𑁆𑀝𑀢𑀺. 𑀏𑀢𑀫𑀢𑁆𑀣𑀁 𑀲𑀦𑁆𑀥𑀸𑀬 ‘‘𑀧𑀼𑀩𑁆𑀩𑀼𑀝𑁆𑀞𑀸𑀬𑀺𑀦𑀺𑀬𑁄 𑀧𑀘𑁆𑀙𑀸𑀦𑀺𑀧𑀸𑀢𑀺𑀦𑀺𑀬𑁄’’𑀢𑀺 𑀆𑀳. ‘‘𑀓𑀺𑀁𑀓𑀸𑀭𑀧𑀝𑀺𑀲𑁆𑀲𑀸𑀯𑀺𑀦𑀺𑀬𑁄𑀢𑀺 𑀓𑀺𑀁 𑀓𑀭𑁄𑀫 𑀓𑀺𑀁 𑀓𑀭𑁄𑀫𑀸’’𑀢𑀺 𑀫𑀼𑀔𑀁 𑀑𑀮𑁄𑀓𑁂𑀢𑁆𑀯𑀸 𑀯𑀺𑀘𑀭𑀡𑀲𑀻𑀮𑀸. 𑀫𑀦𑀸𑀧𑀘𑀸𑀭𑀺𑀦𑀺𑀬𑁄𑀢𑀺 𑀫𑀦𑀸𑀧𑀁𑀬𑁂𑀯 𑀓𑀺𑀭𑀺𑀬𑀁 𑀓𑀭𑀡𑀲𑀻𑀮𑀸. 𑀧𑀺𑀬𑀯𑀸𑀤𑀺𑀦𑀺𑀬𑁄𑀢𑀺 𑀧𑀺𑀬𑀫𑁂𑀯 𑀯𑀘𑀦𑀁 𑀯𑀸𑀤𑀦𑀲𑀻𑀮𑀸. 𑀧𑀽𑀚𑁂𑀲𑁆𑀲𑀸𑀫𑀸𑀢𑀺 𑀘𑀢𑀼𑀧𑀘𑁆𑀘𑀬𑀧𑀽𑀚𑀸𑀬 𑀧𑀽𑀚𑀬𑀺𑀲𑁆𑀲𑀸𑀫.

𑀅𑀩𑁆𑀪𑀸𑀕𑀢𑁂𑀢𑀺 𑀅𑀢𑁆𑀢𑀦𑁄 𑀲𑀦𑁆𑀢𑀺𑀓𑀁 𑀆𑀕𑀢𑁂. 𑀆𑀲𑀦𑁄𑀤𑀓𑁂𑀦 𑀧𑀝𑀺𑀧𑀽𑀚𑁂𑀲𑁆𑀲𑀸𑀫𑀸𑀢𑀺 𑀆𑀲𑀦𑁂𑀦 𑀘 𑀧𑀸𑀤𑀥𑁄𑀯𑀦𑀉𑀤𑀓𑁂𑀦 𑀘 𑀧𑀽𑀚𑀬𑀺𑀲𑁆𑀲𑀸𑀫. 𑀏𑀢𑁆𑀣 𑀘 𑀫𑀸𑀢𑀸𑀧𑀺𑀢𑀽𑀦𑀁 𑀤𑁂𑀯𑀲𑀺𑀓𑀁 𑀲𑀓𑁆𑀓𑀸𑀭𑁄 𑀓𑀸𑀢𑀩𑁆𑀩𑁄. 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀧𑀦 𑀅𑀩𑁆𑀪𑀸𑀕𑀢𑀸𑀦𑀁 𑀆𑀲𑀦𑀁 𑀤𑀢𑁆𑀯𑀸 𑀧𑀸𑀤𑀥𑁄𑀯𑀦𑀜𑁆𑀘 𑀤𑀸𑀢𑀩𑁆𑀩𑀁, 𑀲𑀓𑁆𑀓𑀸𑀭𑁄 𑀘 𑀓𑀸𑀢𑀩𑁆𑀩𑁄.

𑀉𑀡𑁆𑀡𑀸𑀢𑀺 𑀏𑀴𑀓𑀮𑁄𑀫𑀁. 𑀢𑀢𑁆𑀣 𑀤𑀓𑁆𑀔𑀸 𑀪𑀯𑀺𑀲𑁆𑀲𑀸𑀫𑀸𑀢𑀺 𑀏𑀴𑀓𑀮𑁄𑀫𑀸𑀦𑀁 𑀯𑀺𑀚𑀝𑀦𑀥𑁄𑀯𑀦𑀭𑀚𑀦𑀯𑁂𑀡𑀺𑀓𑀭𑀡𑀸𑀤𑀻𑀲𑀼 𑀓𑀧𑁆𑀧𑀸𑀲𑀲𑁆𑀲 𑀘 𑀯𑀝𑁆𑀝𑀦𑀧𑀺𑀲𑀦𑀨𑁄𑀝𑀦𑀓𑀦𑁆𑀢𑀦𑀸𑀤𑀻𑀲𑀼 𑀙𑁂𑀓𑀸 𑀪𑀯𑀺𑀲𑁆𑀲𑀸𑀫. 𑀢𑀢𑁆𑀭𑀼𑀧𑀸𑀬𑀸𑀬𑀸𑀢𑀺 𑀢𑀲𑁆𑀫𑀺𑀁 𑀉𑀡𑁆𑀡𑀸𑀓𑀧𑁆𑀧𑀸𑀲𑀲𑀁𑀯𑀺𑀥𑀸𑀦𑁂 𑀉𑀧𑀸𑀬𑀪𑀽𑀢𑀸𑀬 ‘‘𑀇𑀫𑀲𑁆𑀫𑀺𑀁 𑀓𑀸𑀮𑁂 𑀇𑀤𑀁 𑀦𑀸𑀫 𑀓𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀏𑀯𑀁 𑀧𑀯𑀢𑁆𑀢𑀸𑀬 𑀯𑀻𑀫𑀁𑀲𑀸𑀬 𑀲𑀫𑀦𑁆𑀦𑀸𑀕𑀢𑀸. 𑀅𑀮𑀁 𑀓𑀸𑀢𑀼𑀁 𑀅𑀮𑀁 𑀲𑀁𑀯𑀺𑀥𑀸𑀢𑀼𑀦𑁆𑀢𑀺 𑀅𑀢𑁆𑀢𑀦𑀸 𑀓𑀸𑀢𑀼𑀫𑁆𑀧𑀺 𑀧𑀭𑁂𑀳𑀺 𑀓𑀸𑀭𑀸𑀧𑁂𑀢𑀼𑀫𑁆𑀧𑀺 𑀬𑀼𑀢𑁆𑀢𑀸 𑀘𑁂𑀯 𑀲𑀫𑀢𑁆𑀣𑀸 𑀘 𑀪𑀯𑀺𑀲𑁆𑀲𑀸𑀫𑀸𑀢𑀺 𑀅𑀢𑁆𑀣𑁄.

𑀓𑀢𑀜𑁆𑀘 𑀓𑀢𑀢𑁄 𑀚𑀸𑀦𑀺𑀲𑁆𑀲𑀸𑀫, 𑀅𑀓𑀢𑀜𑁆𑀘 𑀅𑀓𑀢𑀢𑁄𑀢𑀺 𑀲𑀓𑀮𑀤𑀺𑀯𑀲𑀁 𑀇𑀤𑀁 𑀦𑀸𑀫 𑀓𑀫𑁆𑀫𑀁 𑀓𑀢𑁆𑀯𑀸 𑀆𑀕𑀢𑀸𑀦𑀁, 𑀉𑀧𑀟𑁆𑀠𑀤𑀺𑀯𑀲𑀁 𑀇𑀤𑀁 𑀦𑀸𑀫 𑀓𑀫𑁆𑀫𑀁 𑀓𑀢𑁆𑀯𑀸 𑀆𑀕𑀢𑀸𑀦𑀁, 𑀦𑀺𑀓𑁆𑀓𑀫𑁆𑀫𑀸𑀦𑀁 𑀕𑁂𑀳𑁂 𑀦𑀺𑀲𑀺𑀦𑁆𑀦𑀸𑀦𑀁 𑀇𑀤𑀁 𑀦𑀸𑀫 𑀤𑀸𑀢𑀼𑀜𑁆𑀘 𑀏𑀯𑀜𑁆𑀘 𑀓𑀸𑀢𑀼𑀁 𑀯𑀝𑁆𑀝𑀢𑀻𑀢𑀺 𑀏𑀯𑀁 𑀚𑀸𑀦𑀺𑀲𑁆𑀲𑀸𑀫. 𑀕𑀺𑀮𑀸𑀦𑀓𑀸𑀦𑀜𑁆𑀘 𑀩𑀮𑀸𑀩𑀮𑀦𑁆𑀢𑀺 𑀲𑀘𑁂 𑀳𑀺 𑀕𑀺𑀮𑀸𑀦𑀓𑀸𑀮𑁂 𑀢𑁂𑀲𑀁 𑀪𑁂𑀲𑀚𑁆𑀚𑀪𑁄𑀚𑀦𑀸𑀤𑀻𑀦𑀺 𑀤𑀢𑁆𑀯𑀸 𑀭𑁄𑀕𑀁 𑀨𑀸𑀲𑀼𑀁 𑀦 𑀓𑀭𑁄𑀦𑁆𑀢𑀺, ‘‘𑀇𑀫𑁂 𑀅𑀭𑁄𑀕𑀓𑀸𑀮𑁂 𑀅𑀫𑁆𑀳𑁂 𑀬𑀁 𑀇𑀘𑁆𑀙𑀦𑁆𑀢𑀺, 𑀢𑀁 𑀓𑀸𑀭𑁂𑀦𑁆𑀢𑀺. 𑀕𑀺𑀮𑀸𑀦𑀓𑀸𑀮𑁂 𑀅𑀢𑁆𑀣𑀺 𑀪𑀸𑀯𑀫𑁆𑀧𑀺 𑀦𑁄 𑀦 𑀚𑀸𑀦𑀦𑁆𑀢𑀻’’𑀢𑀺 𑀯𑀺𑀭𑀢𑁆𑀢𑀭𑀽𑀧𑀸 𑀧𑀘𑁆𑀙𑀸 𑀓𑀺𑀘𑁆𑀘𑀸𑀦𑀺 𑀦 𑀓𑀭𑁄𑀦𑁆𑀢𑀺, 𑀤𑀼𑀓𑁆𑀓𑀝𑀸𑀦𑀺 𑀯𑀸 𑀓𑀭𑁄𑀦𑁆𑀢𑀺. 𑀢𑀲𑁆𑀫𑀸 𑀦𑁂𑀲𑀁 𑀩𑀮𑀸𑀩𑀮𑀁 𑀜𑀢𑁆𑀯𑀸 𑀤𑀸𑀢𑀩𑁆𑀩𑀜𑁆𑀘 𑀓𑀸𑀢𑀩𑁆𑀩𑀜𑁆𑀘 𑀚𑀸𑀦𑀺𑀲𑁆𑀲𑀸𑀫𑀸𑀢𑀺 𑀏𑀯𑀁 𑀢𑀼𑀫𑁆𑀳𑁂𑀳𑀺 𑀲𑀺𑀓𑁆𑀔𑀺𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀔𑀸𑀤𑀦𑀻𑀬𑀁 𑀪𑁄𑀚𑀦𑀻𑀬𑀜𑁆𑀘𑀲𑁆𑀲𑀸𑀢𑀺 𑀔𑀸𑀤𑀦𑀻𑀬𑀜𑁆𑀘 𑀪𑁄𑀚𑀦𑀻𑀬𑀜𑁆𑀘 𑀅𑀲𑁆𑀲 𑀅𑀦𑁆𑀢𑁄𑀚𑀦𑀲𑁆𑀲. 𑀧𑀘𑁆𑀘𑀁𑀲𑁂𑀦𑀸𑀢𑀺 𑀧𑀝𑀺𑀮𑀪𑀺𑀢𑀩𑁆𑀩𑁂𑀦 𑀅𑀁𑀲𑁂𑀦, 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀮𑀤𑁆𑀥𑀩𑁆𑀩𑀓𑁄𑀝𑁆𑀞𑀸𑀲𑀸𑀦𑀼𑀭𑀽𑀧𑁂𑀦𑀸𑀢𑀺 𑀅𑀢𑁆𑀣𑁄. 𑀲𑀁𑀯𑀺𑀪𑀚𑀺𑀲𑁆𑀲𑀸𑀫𑀸𑀢𑀺 𑀤𑀲𑁆𑀲𑀸𑀫. 𑀲𑀫𑁆𑀧𑀸𑀤𑁂𑀲𑁆𑀲𑀸𑀫𑀸𑀢𑀺 𑀲𑀫𑁆𑀧𑀸𑀤𑀬𑀺𑀲𑁆𑀲𑀸𑀫.

𑀅𑀥𑀼𑀢𑁆𑀢𑀻𑀢𑀺 𑀧𑀼𑀭𑀺𑀲𑀥𑀼𑀢𑁆𑀢𑀲𑀼𑀭𑀸𑀥𑀼𑀢𑁆𑀢𑀢𑀸𑀯𑀲𑁂𑀦 𑀅𑀥𑀼𑀢𑁆𑀢𑀺𑀬𑁄. 𑀅𑀣𑁂𑀦𑀻𑀢𑀺 𑀅𑀣𑁂𑀦𑀺𑀬𑁄 𑀅𑀘𑁄𑀭𑀺𑀬𑁄. 𑀅𑀲𑁄𑀡𑁆𑀟𑀻𑀢𑀺 𑀲𑀼𑀭𑀸𑀲𑁄𑀡𑁆𑀟𑀢𑀸𑀤𑀺𑀯𑀲𑁂𑀦 𑀅𑀲𑁄𑀡𑁆𑀟𑀺𑀬𑁄.

𑀏𑀯𑀁 𑀲𑀼𑀢𑁆𑀢𑀦𑁆𑀢𑀁 𑀦𑀺𑀝𑁆𑀞𑀧𑁂𑀢𑁆𑀯𑀸 𑀇𑀤𑀸𑀦𑀺 𑀕𑀸𑀣𑀸𑀳𑀺 𑀓𑀽𑀝𑀁 𑀕𑀡𑁆𑀳𑀦𑁆𑀢𑁄 𑀬𑁄 𑀦𑀁 𑀪𑀭𑀢𑀺 𑀲𑀩𑁆𑀩𑀤𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀪𑀭𑀢𑀻𑀢𑀺 𑀧𑁄𑀲𑀢𑀺 𑀧𑀝𑀺𑀚𑀕𑁆𑀕𑀢𑀺. 𑀲𑀩𑁆𑀩𑀓𑀸𑀫𑀳𑀭𑀦𑁆𑀢𑀺 𑀲𑀩𑁆𑀩𑀓𑀸𑀫𑀤𑀤𑀁. 𑀲𑁄𑀢𑁆𑀣𑀻𑀢𑀺 𑀲𑀼𑀇𑀢𑁆𑀣𑀻. 𑀏𑀯𑀁 𑀯𑀢𑁆𑀢𑀢𑀻𑀢𑀺 𑀏𑀢𑁆𑀢𑀓𑀁 𑀯𑀢𑁆𑀢𑀁 𑀧𑀽𑀭𑁂𑀢𑁆𑀯𑀸 𑀯𑀢𑁆𑀢𑀢𑀺. 𑀫𑀦𑀸𑀧𑀸 𑀦𑀸𑀫 𑀢𑁂 𑀤𑁂𑀯𑀸𑀢𑀺 𑀦𑀺𑀫𑁆𑀫𑀸𑀦𑀭𑀢𑀻 𑀤𑁂𑀯𑀸. 𑀢𑁂 𑀳𑀺 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀁 𑀭𑀽𑀧𑀁 𑀫𑀸𑀧𑁂𑀢𑁆𑀯𑀸 𑀅𑀪𑀺𑀭𑀫𑀡𑀢𑁄 𑀦𑀺𑀫𑁆𑀫𑀸𑀦𑀭𑀢𑀻𑀢𑀺 𑀘 𑀫𑀦𑀸𑀧𑀸𑀢𑀺 𑀘 𑀯𑀼𑀘𑁆𑀘𑀦𑁆𑀢𑀻𑀢𑀺.

𑁪. 𑀲𑀻𑀳𑀲𑁂𑀦𑀸𑀧𑀢𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁪. 𑀘𑀢𑀼𑀢𑁆𑀣𑁂 𑀲𑀦𑁆𑀤𑀺𑀝𑁆𑀞𑀺𑀓𑀦𑁆𑀢𑀺 𑀲𑀸𑀫𑀁 𑀧𑀲𑁆𑀲𑀺𑀢𑀩𑁆𑀩𑀓𑀁. 𑀤𑀸𑀬𑀓𑁄𑀢𑀺 𑀤𑀸𑀦𑀲𑀽𑀭𑁄. 𑀦 𑀲𑁄 𑀲𑀤𑁆𑀥𑀸𑀫𑀢𑁆𑀢𑀓𑁂𑀦𑁂𑀯 𑀢𑀺𑀝𑁆𑀞𑀢𑀺, 𑀧𑀭𑀺𑀘𑁆𑀘𑀚𑀺𑀢𑀼𑀫𑁆𑀧𑀺 𑀲𑀓𑁆𑀓𑁄𑀢𑀻𑀢𑀺 𑀅𑀢𑁆𑀣𑁄. 𑀤𑀸𑀦𑀧𑀢𑀻𑀢𑀺 𑀬𑀁 𑀤𑀸𑀦𑀁 𑀤𑁂𑀢𑀺, 𑀢𑀲𑁆𑀲 𑀧𑀢𑀺 𑀳𑀼𑀢𑁆𑀯𑀸 𑀤𑁂𑀢𑀺, 𑀦 𑀤𑀸𑀲𑁄, 𑀦 𑀲𑀳𑀸𑀬𑁄. 𑀬𑁄 𑀳𑀺 𑀅𑀢𑁆𑀢𑀦𑀸 𑀫𑀥𑀼𑀭𑀁 𑀪𑀼𑀜𑁆𑀚𑀢𑀺, 𑀧𑀭𑁂𑀲𑀁 𑀅𑀫𑀥𑀼𑀭𑀁 𑀤𑁂𑀢𑀺, 𑀲𑁄 𑀤𑀸𑀦𑀲𑀗𑁆𑀔𑀸𑀢𑀲𑁆𑀲 𑀤𑁂𑀬𑁆𑀬𑀥𑀫𑁆𑀫𑀲𑁆𑀲 𑀤𑀸𑀲𑁄 𑀳𑀼𑀢𑁆𑀯𑀸 𑀤𑁂𑀢𑀺. 𑀬𑁄 𑀬𑀁 𑀅𑀢𑁆𑀢𑀦𑀸 𑀪𑀼𑀜𑁆𑀚𑀢𑀺, 𑀢𑀤𑁂𑀯 𑀤𑁂𑀢𑀺, 𑀲𑁄 𑀲𑀳𑀸𑀬𑁄 𑀳𑀼𑀢𑁆𑀯𑀸 𑀤𑁂𑀢𑀺. 𑀬𑁄 𑀧𑀦 𑀅𑀢𑁆𑀢𑀦𑀸 𑀬𑁂𑀦 𑀓𑁂𑀦𑀘𑀺 𑀬𑀸𑀧𑁂𑀢𑀺, 𑀧𑀭𑁂𑀲𑀁 𑀫𑀥𑀼𑀭𑀁 𑀤𑁂𑀢𑀺, 𑀲𑁄 𑀧𑀢𑀺 𑀚𑁂𑀝𑁆𑀞𑀓𑁄 𑀲𑀸𑀫𑀻 𑀳𑀼𑀢𑁆𑀯𑀸 𑀤𑁂𑀢𑀺. 𑀢𑀸𑀤𑀺𑀲𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑁋 ‘‘𑀤𑀸𑀦𑀧𑀢𑀻’’𑀢𑀺.

𑀅𑀫𑀗𑁆𑀓𑀼𑀪𑀽𑀢𑁄𑀢𑀺 𑀦 𑀦𑀺𑀢𑁆𑀢𑁂𑀚𑀪𑀽𑀢𑁄. 𑀯𑀺𑀲𑀸𑀭𑀤𑁄𑀢𑀺 𑀜𑀸𑀡𑀲𑁄𑀫𑀦𑀲𑁆𑀲𑀧𑁆𑀧𑀢𑁆𑀢𑁄. 𑀲𑀳𑀩𑁆𑀬𑀢𑀁 𑀕𑀢𑀸𑀢𑀺 𑀲𑀳𑀪𑀸𑀯𑀁 𑀏𑀓𑀻𑀪𑀸𑀯𑀁 𑀕𑀢𑀸. 𑀓𑀢𑀸𑀯𑀓𑀸𑀲𑀸𑀢𑀺 𑀬𑁂𑀦 𑀓𑀫𑁆𑀫𑁂𑀦 𑀢𑀢𑁆𑀣 𑀅𑀯𑀓𑀸𑀲𑁄 𑀳𑁄𑀢𑀺, 𑀢𑀲𑁆𑀲 𑀓𑀢𑀢𑁆𑀢𑀸 𑀓𑀢𑀸𑀯𑀓𑀸𑀲𑀸. 𑀢𑀁 𑀧𑀦 𑀬𑀲𑁆𑀫𑀸 𑀓𑀼𑀲𑀮𑀫𑁂𑀯 𑀳𑁄𑀢𑀺, 𑀢𑀲𑁆𑀫𑀸 𑀓𑀢𑀓𑀼𑀲𑀮𑀸𑀢𑀺 𑀯𑀼𑀢𑁆𑀢𑀁. 𑀫𑁄𑀤𑀭𑁂𑀢𑀺 𑀫𑁄𑀤𑀦𑁆𑀢𑀺 𑀧𑀫𑁄𑀤𑀦𑁆𑀢𑀺. 𑀅𑀲𑀺𑀢𑀲𑁆𑀲𑀸𑀢𑀺 𑀅𑀦𑀺𑀲𑁆𑀲𑀺𑀢𑀲𑁆𑀲 𑀢𑀣𑀸𑀕𑀢𑀲𑁆𑀲. 𑀢𑀸𑀤𑀺𑀦𑁄𑀢𑀺 𑀢𑀸𑀤𑀺𑀮𑀓𑁆𑀔𑀡𑀁 𑀧𑀢𑁆𑀢𑀲𑁆𑀲.

𑁫. 𑀤𑀸𑀦𑀸𑀦𑀺𑀲𑀁𑀲𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁫. 𑀧𑀜𑁆𑀘𑀫𑁂 𑀕𑀺𑀳𑀺𑀥𑀫𑁆𑀫𑀸 𑀅𑀦𑀧𑀕𑀢𑁄 𑀳𑁄𑀢𑀻𑀢𑀺 𑀅𑀔𑀡𑁆𑀟𑀧𑀜𑁆𑀘𑀲𑀻𑀮𑁄 𑀳𑁄𑀢𑀺. 𑀲𑀢𑀁 𑀥𑀫𑁆𑀫𑀁 𑀅𑀦𑀼𑀓𑁆𑀓𑀫𑀦𑁆𑀢𑀺 𑀲𑀧𑁆𑀧𑀼𑀭𑀺𑀲𑀸𑀦𑀁 𑀫𑀳𑀸𑀧𑀼𑀭𑀺𑀲𑀸𑀦𑀁 𑀥𑀫𑁆𑀫𑀁 𑀅𑀦𑀼𑀓𑁆𑀓𑀫𑀦𑁆𑀢𑁄. 𑀲𑀦𑁆𑀢𑁄 𑀦𑀁 𑀪𑀚𑀦𑁆𑀢𑀻𑀢𑀺 𑀲𑀧𑁆𑀧𑀼𑀭𑀺𑀲𑀸 𑀩𑀼𑀤𑁆𑀥𑀧𑀘𑁆𑀘𑁂𑀓𑀩𑀼𑀤𑁆𑀥𑀢𑀣𑀸𑀕𑀢𑀲𑀸𑀯𑀓𑀸 𑀏𑀢𑀁 𑀪𑀚𑀦𑁆𑀢𑀺.

𑁬. 𑀓𑀸𑀮𑀤𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁬. 𑀙𑀝𑁆𑀞𑁂 𑀓𑀸𑀮𑀤𑀸𑀦𑀸𑀦𑀻𑀢𑀺 𑀬𑀼𑀢𑁆𑀢𑀤𑀸𑀦𑀸𑀦𑀺, 𑀧𑀢𑁆𑀢𑀤𑀸𑀦𑀸𑀦𑀺 𑀅𑀦𑀼𑀘𑁆𑀙𑀯𑀺𑀓𑀤𑀸𑀦𑀸𑀦𑀻𑀢𑀺 𑀅𑀢𑁆𑀣𑁄. 𑀦𑀯𑀲𑀲𑁆𑀲𑀸𑀦𑀻𑀢𑀺 𑀅𑀕𑁆𑀕𑀲𑀲𑁆𑀲𑀸𑀦𑀺. 𑀦𑀯𑀨𑀮𑀸𑀦𑀻𑀢𑀺 𑀆𑀭𑀸𑀫𑀢𑁄 𑀧𑀞𑀫𑀼𑀧𑁆𑀧𑀦𑁆𑀦𑀸𑀦𑀺 𑀅𑀕𑁆𑀕𑀨𑀮𑀸𑀦𑀺. 𑀧𑀞𑀫𑀁 𑀲𑀻𑀮𑀯𑀦𑁆𑀢𑁂𑀲𑀼 𑀧𑀢𑀺𑀝𑁆𑀞𑀸𑀧𑁂𑀢𑀻𑀢𑀺 𑀧𑀞𑀫𑀁 𑀲𑀻𑀮𑀯𑀦𑁆𑀢𑀸𑀦𑀁 𑀤𑀢𑁆𑀯𑀸 𑀧𑀘𑁆𑀙𑀸 𑀅𑀢𑁆𑀢𑀦𑀸 𑀧𑀭𑀺𑀪𑀼𑀜𑁆𑀚𑀢𑀺. 𑀯𑀤𑀜𑁆𑀜𑀽𑀢𑀺 𑀪𑀸𑀲𑀺𑀢𑀜𑁆𑀜𑀽. 𑀓𑀸𑀮𑁂𑀦 𑀤𑀺𑀦𑁆𑀦𑀦𑁆𑀢𑀺 𑀬𑀼𑀢𑁆𑀢𑀧𑁆𑀧𑀢𑁆𑀢𑀓𑀸𑀮𑁂𑀦 𑀤𑀺𑀦𑁆𑀦𑀁. 𑀅𑀦𑀼𑀫𑁄𑀤𑀦𑁆𑀢𑀻𑀢𑀺 𑀏𑀓𑀫𑀦𑁆𑀢𑁂 𑀞𑀺𑀢𑀸 𑀅𑀦𑀼𑀫𑁄𑀤𑀦𑁆𑀢𑀺. 𑀯𑁂𑀬𑁆𑀬𑀸𑀯𑀘𑁆𑀘𑀦𑁆𑀢𑀺 𑀓𑀸𑀬𑁂𑀦 𑀯𑁂𑀬𑁆𑀬𑀸𑀯𑀝𑀺𑀓𑀓𑀫𑁆𑀫𑀁 𑀓𑀭𑁄𑀦𑁆𑀢𑀺. 𑀅𑀧𑁆𑀧𑀝𑀺𑀯𑀸𑀦𑀘𑀺𑀢𑁆𑀢𑁄𑀢𑀺 𑀅𑀦𑀼𑀓𑁆𑀓𑀡𑁆𑀞𑀺𑀢𑀘𑀺𑀢𑁆𑀢𑁄. 𑀬𑀢𑁆𑀣 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮𑀦𑁆𑀢𑀺 𑀬𑀲𑁆𑀫𑀺𑀁 𑀞𑀸𑀦𑁂 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮𑀁 𑀳𑁄𑀢𑀺, 𑀢𑀢𑁆𑀣 𑀤𑀤𑁂𑀬𑁆𑀬.

𑁭. 𑀪𑁄𑀚𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁭. 𑀲𑀢𑁆𑀢𑀫𑁂 𑀆𑀬𑀼𑀁 𑀤𑁂𑀢𑀻𑀢𑀺 𑀆𑀬𑀼𑀤𑀸𑀦𑀁 𑀤𑁂𑀢𑀺. 𑀯𑀡𑁆𑀡𑀦𑁆𑀢𑀺 𑀲𑀭𑀻𑀭𑀯𑀡𑁆𑀡𑀁. 𑀲𑀼𑀔𑀦𑁆𑀢𑀺 𑀓𑀸𑀬𑀺𑀓𑀘𑁂𑀢𑀲𑀺𑀓𑀲𑀼𑀔𑀁. 𑀩𑀮𑀦𑁆𑀢𑀺 𑀲𑀭𑀻𑀭𑀣𑀸𑀫𑀁. 𑀧𑀝𑀺𑀪𑀸𑀦𑀦𑁆𑀢𑀺 𑀬𑀼𑀢𑁆𑀢𑀫𑀼𑀢𑁆𑀢𑀧𑁆𑀧𑀝𑀺𑀪𑀸𑀦𑀁.

𑁮. 𑀲𑀤𑁆𑀥𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁮. 𑀅𑀝𑁆𑀞𑀫𑁂 𑀅𑀦𑀼𑀓𑀫𑁆𑀧𑀦𑁆𑀢𑀻𑀢𑀺 𑀅𑀦𑀼𑀕𑁆𑀕𑀡𑁆𑀳𑀦𑁆𑀢𑀺. 𑀔𑀦𑁆𑀥𑀺𑀫𑀸𑀯 𑀫𑀳𑀸𑀤𑀼𑀫𑁄𑀢𑀺 𑀔𑀦𑁆𑀥𑀲𑀫𑁆𑀧𑀦𑁆𑀦𑁄 𑀫𑀳𑀸𑀭𑀼𑀓𑁆𑀔𑁄 𑀯𑀺𑀬. 𑀫𑀦𑁄𑀭𑀫𑁂 𑀆𑀬𑀢𑀦𑁂𑀢𑀺 𑀭𑀫𑀡𑀻𑀬𑁂 𑀲𑀫𑁄𑀲𑀭𑀡𑀝𑁆𑀞𑀸𑀦𑁂. 𑀙𑀸𑀬𑀁 𑀙𑀸𑀬𑀢𑁆𑀣𑀺𑀓𑀸 𑀬𑀦𑁆𑀢𑀻𑀢𑀺 𑀙𑀸𑀬𑀸𑀬 𑀅𑀢𑁆𑀣𑀺𑀓𑀸𑀯 𑀙𑀸𑀬𑀁 𑀉𑀧𑀕𑀘𑁆𑀙𑀦𑁆𑀢𑀺. 𑀦𑀺𑀯𑀸𑀢𑀯𑀼𑀢𑁆𑀢𑀺𑀦𑁆𑀢𑀺 𑀦𑀻𑀘𑀯𑀼𑀢𑁆𑀢𑀺𑀁. 𑀅𑀢𑁆𑀣𑀤𑁆𑀥𑀦𑁆𑀢𑀺 𑀓𑁄𑀥𑀫𑀸𑀦𑀣𑀤𑁆𑀥𑀢𑀸𑀬 𑀭𑀳𑀺𑀢𑀁. 𑀲𑁄𑀭𑀢𑀦𑁆𑀢𑀺 𑀲𑁄𑀭𑀘𑁆𑀘𑁂𑀦 𑀲𑀼𑀘𑀺𑀲𑀻𑀮𑁂𑀦 𑀲𑀫𑀦𑁆𑀦𑀸𑀕𑀢𑀁. 𑀲𑀔𑀺𑀮𑀦𑁆𑀢𑀺 𑀲𑀫𑁆𑀫𑁄𑀤𑀓𑀁.

𑁯. 𑀧𑀼𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁯. 𑀦𑀯𑀫𑁂 𑀪𑀢𑁄 𑀯𑀸 𑀦𑁄 𑀪𑀭𑀺𑀲𑁆𑀲𑀢𑀻𑀢𑀺 𑀅𑀫𑁆𑀳𑁂𑀳𑀺 𑀣𑀜𑁆𑀜𑀧𑀸𑀬𑀦𑀳𑀢𑁆𑀣𑀧𑀸𑀤𑀯𑀟𑁆𑀠𑀦𑀸𑀤𑀻𑀳𑀺 𑀪𑀢𑁄 𑀧𑀝𑀺𑀚𑀕𑁆𑀕𑀺𑀢𑁄 𑀅𑀫𑁆𑀳𑁂 𑀫𑀳𑀮𑁆𑀮𑀓𑀓𑀸𑀮𑁂 𑀳𑀢𑁆𑀣𑀧𑀸𑀤𑀥𑁄𑀯𑀦-𑀦𑁆𑀳𑀸𑀧𑀦𑀬𑀸𑀕𑀼𑀪𑀢𑁆𑀢𑀤𑀸𑀦𑀸𑀤𑀻𑀳𑀺 𑀪𑀭𑀺𑀲𑁆𑀲𑀢𑀺. 𑀓𑀺𑀘𑁆𑀘𑀁 𑀯𑀸 𑀦𑁄 𑀓𑀭𑀺𑀲𑁆𑀲𑀢𑀻𑀢𑀺 𑀅𑀢𑁆𑀢𑀦𑁄 𑀓𑀫𑁆𑀫𑀁 𑀞𑀧𑁂𑀢𑁆𑀯𑀸 𑀅𑀫𑁆𑀳𑀸𑀓𑀁 𑀭𑀸𑀚𑀓𑀼𑀮𑀸𑀤𑀻𑀲𑀼 𑀉𑀧𑁆𑀧𑀦𑁆𑀦𑀁 𑀓𑀺𑀘𑁆𑀘𑀁 𑀕𑀦𑁆𑀢𑁆𑀯𑀸 𑀓𑀭𑀺𑀲𑁆𑀲𑀢𑀺. 𑀓𑀼𑀮𑀯𑀁𑀲𑁄 𑀘𑀺𑀭𑀁 𑀞𑀲𑁆𑀲𑀢𑀻𑀢𑀺 𑀅𑀫𑁆𑀳𑀸𑀓𑀁 𑀲𑀦𑁆𑀢𑀓𑀁 𑀔𑁂𑀢𑁆𑀢𑀯𑀢𑁆𑀣𑀼𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀸𑀤𑀺𑀁 𑀅𑀯𑀺𑀦𑀸𑀲𑁂𑀢𑁆𑀯𑀸 𑀭𑀓𑁆𑀔𑀦𑁆𑀢𑁂 𑀧𑀼𑀢𑁆𑀢𑁂 𑀓𑀼𑀮𑀯𑀁𑀲𑁄 𑀘𑀺𑀭𑀁 𑀞𑀲𑁆𑀲𑀢𑀺, 𑀅𑀫𑁆𑀳𑁂𑀳𑀺 𑀯𑀸 𑀧𑀯𑀢𑁆𑀢𑀺𑀢𑀸𑀦𑀺 𑀲𑀮𑀸𑀓𑀪𑀢𑁆𑀢𑀸𑀤𑀻𑀦𑀺 𑀅𑀦𑀼𑀧𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀧𑀯𑀢𑁆𑀢𑁂𑀲𑁆𑀲𑀢𑀺, 𑀏𑀯𑀫𑁆𑀧𑀺 𑀦𑁄 𑀓𑀼𑀮𑀯𑀁𑀲𑁄 𑀘𑀺𑀭𑀁 𑀞𑀲𑁆𑀲𑀢𑀺. 𑀤𑀸𑀬𑀚𑁆𑀚𑀁 𑀧𑀝𑀺𑀧𑀚𑁆𑀚𑀺𑀲𑁆𑀲𑀢𑀻𑀢𑀺 𑀓𑀼𑀮𑀯𑀁𑀲𑀸𑀦𑀼𑀭𑀽𑀧𑀸𑀬 𑀧𑀝𑀺𑀧𑀢𑁆𑀢𑀺𑀬𑀸 𑀅𑀢𑁆𑀢𑀸𑀦𑀁 𑀤𑀸𑀬𑀚𑁆𑀚𑀸𑀭𑀳𑀁 𑀓𑀭𑁄𑀦𑁆𑀢𑁄 𑀅𑀫𑁆𑀳𑀸𑀓𑀁 𑀲𑀦𑁆𑀢𑀓𑀁 𑀤𑀸𑀬𑀚𑁆𑀚𑀁 𑀧𑀝𑀺𑀧𑀚𑁆𑀚𑀺𑀲𑁆𑀲𑀢𑀺. 𑀤𑀓𑁆𑀔𑀺𑀡𑀁 𑀅𑀦𑀼𑀧𑁆𑀧𑀤𑀲𑁆𑀲𑀢𑀻𑀢𑀺 𑀧𑀢𑁆𑀢𑀺𑀤𑀸𑀦𑀁 𑀓𑀢𑁆𑀯𑀸 𑀢𑀢𑀺𑀬𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀤𑀸𑀦𑀁 𑀅𑀦𑀼𑀧𑁆𑀧𑀤𑀲𑁆𑀲𑀢𑀺.

𑀲𑀦𑁆𑀢𑁄 𑀲𑀧𑁆𑀧𑀼𑀭𑀺𑀲𑀸𑀢𑀺 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀫𑀸𑀢𑀸𑀧𑀺𑀢𑀽𑀲𑀼 𑀲𑀫𑁆𑀫𑀸 𑀧𑀝𑀺𑀧𑀢𑁆𑀢𑀺𑀬𑀸 𑀲𑀦𑁆𑀢𑁄 𑀲𑀧𑁆𑀧𑀼𑀭𑀺𑀲𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀧𑀼𑀩𑁆𑀩𑁂 𑀓𑀢𑀫𑀦𑀼𑀲𑁆𑀲𑀭𑀦𑁆𑀢𑀺 𑀫𑀸𑀢𑀸𑀧𑀺𑀢𑀽𑀳𑀺 𑀧𑀞𑀫𑀢𑀭𑀁 𑀓𑀢𑀕𑀼𑀡𑀁 𑀅𑀦𑀼𑀲𑁆𑀲𑀭𑀦𑁆𑀢𑀸. 𑀑𑀯𑀸𑀤𑀓𑀸𑀭𑀻𑀢𑀺 𑀫𑀸𑀢𑀸𑀧𑀺𑀢𑀽𑀳𑀺 𑀤𑀺𑀦𑁆𑀦𑀲𑁆𑀲 𑀑𑀯𑀸𑀤𑀲𑁆𑀲 𑀓𑀢𑁆𑀢𑀸. 𑀪𑀢𑀧𑁄𑀲𑀻𑀢𑀺 𑀬𑁂𑀳𑀺 𑀪𑀢𑁄, 𑀢𑁂𑀲𑀁 𑀧𑁄𑀲𑀓𑁄. 𑀧𑀲𑀁𑀲𑀺𑀬𑁄𑀢𑀺 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀫𑀳𑀸𑀚𑀦𑁂𑀦 𑀧𑀲𑀁𑀲𑀺𑀢𑀩𑁆𑀩𑁄 𑀳𑁄𑀢𑀺.

𑁧𑁦. 𑀫𑀳𑀸𑀲𑀸𑀮𑀧𑀼𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁦. 𑀤𑀲𑀫𑁂 𑀫𑀳𑀸𑀲𑀸𑀮𑀸𑀢𑀺 𑀫𑀳𑀸𑀭𑀼𑀓𑁆𑀔𑀸. 𑀲𑀸𑀔𑀸𑀧𑀢𑁆𑀢𑀧𑀮𑀸𑀲𑁂𑀦 𑀯𑀟𑁆𑀠𑀦𑁆𑀢𑀻𑀢𑀺 𑀔𑀼𑀤𑁆𑀤𑀓𑀲𑀸𑀔𑀸𑀳𑀺 𑀘 𑀧𑀢𑁆𑀢𑀲𑀗𑁆𑀔𑀸𑀢𑁂𑀦 𑀘 𑀧𑀮𑀸𑀲𑁂𑀦 𑀯𑀟𑁆𑀠𑀦𑁆𑀢𑀺. 𑀅𑀭𑀜𑁆𑀜𑀲𑁆𑀫𑀺𑀦𑁆𑀢𑀺 𑀅𑀕𑀸𑀫𑀓𑁂 𑀧𑀤𑁂𑀲𑁂. 𑀩𑁆𑀭𑀳𑀸𑀯𑀦𑁂𑀢𑀺 𑀫𑀳𑀸𑀯𑀦𑁂 𑀅𑀝𑀯𑀺𑀬𑀁. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀲𑀼𑀫𑀦𑀯𑀕𑁆𑀕𑁄 𑀘𑀢𑀼𑀢𑁆𑀣𑁄.

𑁫. 𑀫𑀼𑀡𑁆𑀟𑀭𑀸𑀚𑀯𑀕𑁆𑀕𑁄

𑁧. 𑀆𑀤𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁧. 𑀧𑀜𑁆𑀘𑀫𑀲𑁆𑀲 𑀧𑀞𑀫𑁂 𑀪𑁄𑀕𑀸𑀦𑀁 𑀆𑀤𑀺𑀬𑀸𑀢𑀺 𑀪𑁄𑀕𑀸𑀦𑀁 𑀆𑀤𑀸𑀢𑀩𑁆𑀩𑀓𑀸𑀭𑀡𑀸𑀦𑀺. 𑀉𑀝𑁆𑀞𑀸𑀦𑀯𑀻𑀭𑀺𑀬𑀸𑀥𑀺𑀕𑀢𑁂𑀳𑀻𑀢𑀺 𑀉𑀝𑁆𑀞𑀸𑀦𑀲𑀗𑁆𑀔𑀸𑀢𑁂𑀦 𑀯𑀻𑀭𑀺𑀬𑁂𑀦 𑀅𑀥𑀺𑀕𑀢𑁂𑀳𑀺. 𑀩𑀸𑀳𑀸𑀩𑀮𑀧𑀭𑀺𑀘𑀺𑀢𑁂𑀳𑀻𑀢𑀺 𑀩𑀸𑀳𑀼𑀩𑀮𑁂𑀦 𑀲𑀜𑁆𑀘𑀺𑀢𑁂𑀳𑀺. 𑀲𑁂𑀤𑀸𑀯𑀓𑁆𑀔𑀺𑀢𑁆𑀢𑁂𑀳𑀻𑀢𑀺 𑀲𑁂𑀤𑀁 𑀅𑀯𑀓𑁆𑀔𑀺𑀧𑁂𑀢𑁆𑀯𑀸 𑀉𑀧𑁆𑀧𑀸𑀤𑀺𑀢𑁂𑀳𑀺. 𑀥𑀫𑁆𑀫𑀺𑀓𑁂𑀳𑀻𑀢𑀺 𑀥𑀫𑁆𑀫𑀬𑀼𑀢𑁆𑀢𑁂𑀳𑀺. 𑀥𑀫𑁆𑀫𑀮𑀤𑁆𑀥𑁂𑀳𑀻𑀢𑀺 𑀤𑀲𑀓𑀼𑀲𑀮𑀓𑀫𑁆𑀫𑀁 𑀅𑀓𑁄𑀧𑁂𑀢𑁆𑀯𑀸 𑀮𑀤𑁆𑀥𑁂𑀳𑀺. 𑀧𑀻𑀡𑁂𑀢𑀻𑀢𑀺 𑀧𑀻𑀡𑀺𑀢𑀁 𑀣𑀽𑀮𑀁 𑀓𑀭𑁄𑀢𑀺. 𑀲𑁂𑀲𑀫𑁂𑀢𑁆𑀣 𑀘𑀢𑀼𑀓𑁆𑀓𑀦𑀺𑀧𑀸𑀢𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀤𑀼𑀢𑀺𑀬𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑁩. 𑀇𑀝𑁆𑀞𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁩. 𑀢𑀢𑀺𑀬𑁂 𑀆𑀬𑀼𑀲𑀁𑀯𑀢𑁆𑀢𑀦𑀺𑀓𑀸 𑀧𑀝𑀺𑀧𑀤𑀸𑀢𑀺 𑀤𑀸𑀦𑀲𑀻𑀮𑀸𑀤𑀺𑀓𑀸 𑀧𑀼𑀜𑁆𑀜𑀧𑀝𑀺𑀧𑀤𑀸. 𑀲𑁂𑀲𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀅𑀢𑁆𑀣𑀸𑀪𑀺𑀲𑀫𑀬𑀸𑀢𑀺 𑀅𑀢𑁆𑀣𑀲𑁆𑀲 𑀅𑀪𑀺𑀲𑀫𑀸𑀕𑀫𑁂𑀦, 𑀅𑀢𑁆𑀣𑀧𑁆𑀧𑀝𑀺𑀮𑀸𑀪𑁂𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁪. 𑀫𑀦𑀸𑀧𑀤𑀸𑀬𑀻𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁪. 𑀘𑀢𑀼𑀢𑁆𑀣𑁂 𑀉𑀕𑁆𑀕𑁄𑀢𑀺 𑀕𑀼𑀡𑁂𑀳𑀺 𑀉𑀕𑁆𑀕𑀢𑀢𑁆𑀢𑀸 𑀏𑀯𑀁𑀮𑀤𑁆𑀥𑀦𑀸𑀫𑁄. 𑀲𑀸𑀮𑀧𑀼𑀧𑁆𑀨𑀓𑀁 𑀔𑀸𑀤𑀦𑀻𑀬𑀦𑁆𑀢𑀺 𑀘𑀢𑀼𑀫𑀥𑀼𑀭𑀬𑁄𑀚𑀺𑀢𑁂𑀦 𑀲𑀸𑀮𑀺𑀧𑀺𑀝𑁆𑀞𑁂𑀦 𑀓𑀢𑀁 𑀲𑀸𑀮𑀧𑀼𑀧𑁆𑀨𑀲𑀤𑀺𑀲𑀁 𑀔𑀸𑀤𑀦𑀻𑀬𑀁. 𑀢𑀜𑁆𑀳𑀺 𑀧𑀜𑁆𑀜𑀸𑀬𑀫𑀸𑀦𑀯𑀡𑁆𑀝𑀧𑀢𑁆𑀢𑀓𑁂𑀲𑀭𑀁 𑀓𑀢𑁆𑀯𑀸 𑀚𑀻𑀭𑀓𑀸𑀤𑀺𑀲𑀫𑁆𑀪𑀸𑀭𑀬𑀼𑀢𑁆𑀢𑁂 𑀲𑀧𑁆𑀧𑀺𑀫𑁆𑀳𑀺 𑀧𑀘𑀺𑀢𑁆𑀯𑀸 𑀲𑀧𑁆𑀧𑀺𑀁 𑀯𑀺𑀦𑀺𑀯𑀢𑁆𑀢𑁂𑀢𑁆𑀯𑀸 𑀓𑁄𑀮𑀼𑀫𑁆𑀩𑁂 𑀧𑀽𑀭𑁂𑀢𑁆𑀯𑀸 𑀕𑀦𑁆𑀥𑀯𑀸𑀲𑀁 𑀕𑀸𑀳𑀸𑀧𑁂𑀢𑁆𑀯𑀸 𑀧𑀺𑀤𑀳𑀺𑀢𑁆𑀯𑀸 𑀮𑀜𑁆𑀙𑁂𑀢𑁆𑀯𑀸 𑀞𑀧𑀺𑀢𑀁 𑀳𑁄𑀢𑀺. 𑀢𑀁 𑀲𑁄 𑀬𑀸𑀕𑀼𑀁 𑀧𑀺𑀯𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑀲𑁆𑀲 𑀪𑀕𑀯𑀢𑁄 𑀅𑀦𑁆𑀢𑀭𑀪𑀢𑁆𑀢𑁂 𑀤𑀸𑀢𑀼𑀓𑀸𑀫𑁄 𑀏𑀯𑀫𑀸𑀳. 𑀧𑀝𑀺𑀕𑁆𑀕𑀳𑁂𑀲𑀺 𑀪𑀕𑀯𑀸𑀢𑀺 𑀤𑁂𑀲𑀦𑀸𑀫𑀢𑁆𑀢𑀫𑁂𑀢𑀁, 𑀉𑀧𑀸𑀲𑀓𑁄 𑀧𑀦 𑀢𑀁 𑀪𑀕𑀯𑀢𑁄 𑀘 𑀧𑀜𑁆𑀘𑀦𑁆𑀦𑀜𑁆𑀘 𑀪𑀺𑀓𑁆𑀔𑀼𑀲𑀢𑀸𑀦𑀁 𑀅𑀤𑀸𑀲𑀺. 𑀬𑀣𑀸 𑀘 𑀢𑀁, 𑀏𑀯𑀁 𑀲𑀽𑀓𑀭𑀫𑀁𑀲𑀸𑀤𑀻𑀦𑀺𑀧𑀺. 𑀢𑀢𑁆𑀣 𑀲𑀫𑁆𑀧𑀦𑁆𑀦𑀓𑁄𑀮𑀓𑀦𑁆𑀢𑀺 𑀲𑀫𑁆𑀧𑀦𑁆𑀦𑀩𑀤𑀭𑀁. 𑀲𑀽𑀓𑀭𑀫𑀁𑀲𑀦𑁆𑀢𑀺 𑀫𑀥𑀼𑀭𑀭𑀲𑁂𑀳𑀺 𑀩𑀤𑀭𑁂𑀳𑀺 𑀲𑀤𑁆𑀥𑀺𑀁 𑀚𑀻𑀭𑀓𑀸𑀤𑀺𑀲𑀫𑁆𑀪𑀸𑀭𑁂𑀳𑀺 𑀬𑁄𑀚𑁂𑀢𑁆𑀯𑀸 𑀧𑀓𑁆𑀓𑀁 𑀏𑀓𑀲𑀁𑀯𑀘𑁆𑀙𑀭𑀺𑀓𑀲𑀽𑀓𑀭𑀫𑀁𑀲𑀁. 𑀦𑀺𑀩𑁆𑀩𑀢𑁆𑀢𑀢𑁂𑀮𑀓𑀦𑁆𑀢𑀺 𑀯𑀺𑀦𑀺𑀯𑀢𑁆𑀢𑀺𑀢𑀢𑁂𑀮𑀁. 𑀦𑀸𑀮𑀺𑀬𑀲𑀸𑀓𑀦𑁆𑀢𑀺 𑀲𑀸𑀮𑀺𑀧𑀺𑀝𑁆𑀞𑁂𑀦 𑀲𑀤𑁆𑀥𑀺𑀁 𑀫𑀤𑁆𑀤𑀺𑀢𑁆𑀯𑀸 𑀚𑀻𑀭𑀓𑀸𑀤𑀺𑀲𑀁𑀬𑀼𑀢𑁆𑀢𑁂 𑀲𑀧𑁆𑀧𑀺𑀫𑁆𑀳𑀺 𑀧𑀘𑀺𑀢𑁆𑀯𑀸 𑀘𑀢𑀼𑀫𑀥𑀼𑀭𑁂𑀦 𑀬𑁄𑀚𑁂𑀢𑁆𑀯𑀸 𑀯𑀸𑀲𑀁 𑀕𑀸𑀳𑀸𑀧𑁂𑀢𑁆𑀯𑀸 𑀞𑀧𑀺𑀢𑀁 𑀦𑀸𑀮𑀺𑀬𑀲𑀸𑀓𑀁. 𑀦𑁂𑀢𑀁 𑀪𑀕𑀯𑀢𑁄 𑀓𑀧𑁆𑀧𑀢𑀻𑀢𑀺 𑀏𑀢𑁆𑀣 𑀅𑀓𑀧𑁆𑀧𑀺𑀬𑀁 𑀉𑀧𑀸𑀤𑀸𑀬 𑀓𑀧𑁆𑀧𑀺𑀬𑀫𑁆𑀧𑀺 𑀦 𑀓𑀧𑁆𑀧𑀢𑀻𑀢𑀺 𑀯𑀼𑀢𑁆𑀢𑀁, 𑀲𑁂𑀝𑁆𑀞𑀺 𑀧𑀦 𑀲𑀩𑁆𑀩𑀫𑁆𑀧𑀺 𑀢𑀁 𑀆𑀳𑀭𑀸𑀧𑁂𑀢𑁆𑀯𑀸 𑀭𑀸𑀲𑀺𑀁 𑀓𑀢𑁆𑀯𑀸 𑀬𑀁 𑀬𑀁 𑀅𑀓𑀧𑁆𑀧𑀺𑀬𑀁, 𑀢𑀁 𑀢𑀁 𑀅𑀦𑁆𑀢𑀭𑀸𑀧𑀡𑀁 𑀧𑀳𑀺𑀡𑀺𑀢𑁆𑀯𑀸 𑀓𑀧𑁆𑀧𑀺𑀬𑀁 𑀉𑀧𑀪𑁄𑀕𑀧𑀭𑀺𑀪𑁄𑀕𑀪𑀡𑁆𑀟𑀁 𑀅𑀤𑀸𑀲𑀺. 𑀘𑀦𑁆𑀤𑀦𑀨𑀮𑀓𑀁 𑀦𑀸𑀢𑀺𑀫𑀳𑀦𑁆𑀢𑀁 𑀤𑀻𑀖𑀢𑁄 𑀅𑀟𑁆𑀠𑀢𑁂𑀬𑁆𑀬𑀭𑀢𑀦𑀁, 𑀢𑀺𑀭𑀺𑀬𑀁 𑀤𑀺𑀬𑀟𑁆𑀠𑀭𑀢𑀦𑀁, 𑀲𑀸𑀭𑀯𑀭𑀪𑀡𑁆𑀟𑀢𑁆𑀢𑀸 𑀧𑀦 𑀫𑀳𑀕𑁆𑀖𑀁 𑀅𑀳𑁄𑀲𑀺. 𑀪𑀕𑀯𑀸 𑀢𑀁 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀔𑀡𑁆𑀟𑀸𑀔𑀡𑁆𑀟𑀺𑀓𑀁 𑀙𑁂𑀤𑀸𑀧𑁂𑀢𑁆𑀯𑀸 𑀪𑀺𑀓𑁆𑀔𑀽𑀦𑀁 𑀅𑀜𑁆𑀚𑀦𑀧𑀺𑀲𑀦𑀢𑁆𑀣𑀸𑀬 𑀤𑀸𑀧𑁂𑀲𑀺.

𑀉𑀚𑁆𑀚𑀼𑀪𑀽𑀢𑁂𑀲𑀽𑀢𑀺 𑀓𑀸𑀬𑀯𑀸𑀘𑀸𑀘𑀺𑀢𑁆𑀢𑁂𑀳𑀺 𑀉𑀚𑀼𑀓𑁂𑀲𑀼. 𑀙𑀦𑁆𑀤𑀲𑀸𑀢𑀺 𑀧𑁂𑀫𑁂𑀦. 𑀘𑀢𑁆𑀢𑀦𑁆𑀢𑀺𑀆𑀤𑀻𑀲𑀼 𑀧𑀭𑀺𑀘𑁆𑀘𑀸𑀕𑀯𑀲𑁂𑀦 𑀘𑀢𑁆𑀢𑀁. 𑀫𑀼𑀢𑁆𑀢𑀘𑀸𑀕𑀢𑀸𑀬 𑀫𑀼𑀢𑁆𑀢𑀁. 𑀅𑀦𑀧𑁂𑀓𑁆𑀔𑀘𑀺𑀢𑁆𑀢𑀢𑀸𑀬 𑀘𑀺𑀢𑁆𑀢𑁂𑀦 𑀦 𑀉𑀕𑁆𑀕𑀳𑀺𑀢𑀦𑁆𑀢𑀺 𑀅𑀦𑀼𑀕𑁆𑀕𑀳𑀻𑀢𑀁. 𑀔𑁂𑀢𑁆𑀢𑀽𑀧𑀫𑁂𑀢𑀺 𑀯𑀺𑀭𑀼𑀳𑀦𑀝𑁆𑀞𑁂𑀦 𑀔𑁂𑀢𑁆𑀢𑀲𑀤𑀺𑀲𑁂.

𑀅𑀜𑁆𑀜𑀢𑀭𑀁 𑀫𑀦𑁄𑀫𑀬𑀦𑁆𑀢𑀺 𑀲𑀼𑀤𑁆𑀥𑀸𑀯𑀸𑀲𑁂𑀲𑀼 𑀏𑀓𑀁 𑀛𑀸𑀦𑀫𑀦𑁂𑀦 𑀦𑀺𑀩𑁆𑀩𑀢𑁆𑀢𑀁 𑀤𑁂𑀯𑀓𑀸𑀬𑀁. 𑀬𑀣𑀸𑀥𑀺𑀧𑁆𑀧𑀸𑀬𑁄𑀢𑀺 𑀬𑀣𑀸𑀚𑁆𑀛𑀸𑀲𑀬𑁄. 𑀇𑀫𑀺𑀦𑀸 𑀓𑀺𑀁 𑀧𑀼𑀘𑁆𑀙𑀢𑀺? 𑀢𑀲𑁆𑀲 𑀓𑀺𑀭 𑀫𑀦𑀼𑀲𑁆𑀲𑀓𑀸𑀮𑁂 𑀅𑀭𑀳𑀢𑁆𑀢𑀢𑁆𑀣𑀸𑀬 𑀅𑀚𑁆𑀛𑀸𑀲𑀬𑁄 𑀅𑀳𑁄𑀲𑀺, 𑀢𑀁 𑀧𑀼𑀘𑁆𑀙𑀸𑀫𑀻𑀢𑀺 𑀧𑀼𑀘𑁆𑀙𑀢𑀺. 𑀤𑁂𑀯𑀧𑀼𑀢𑁆𑀢𑁄𑀧𑀺 𑀅𑀭𑀳𑀢𑁆𑀢𑀁 𑀧𑀢𑁆𑀢𑀢𑀸𑀬 𑀢𑀕𑁆𑀖 𑀫𑁂 𑀪𑀕𑀯𑀸 𑀬𑀣𑀸𑀥𑀺𑀧𑁆𑀧𑀸𑀬𑁄𑀢𑀺 𑀆𑀳. 𑀬𑀢𑁆𑀣 𑀬𑀢𑁆𑀣𑀽𑀧𑀧𑀚𑁆𑀚𑀢𑀻𑀢𑀺 𑀢𑀻𑀲𑀼 𑀯𑀸 𑀓𑀼𑀮𑀲𑀫𑁆𑀧𑀢𑁆𑀢𑀻𑀲𑀼 𑀙𑀲𑀼 𑀯𑀸 𑀓𑀸𑀫𑀲𑀕𑁆𑀕𑁂𑀲𑀼 𑀬𑀢𑁆𑀣 𑀬𑀢𑁆𑀣 𑀉𑀧𑁆𑀧𑀚𑁆𑀚𑀢𑀺, 𑀢𑀢𑁆𑀣 𑀢𑀢𑁆𑀣 𑀤𑀻𑀖𑀸𑀬𑀼 𑀬𑀲𑀯𑀸 𑀳𑁄𑀢𑀻𑀢𑀺. 𑀧𑀜𑁆𑀘𑀫𑀁 𑀘𑀢𑀼𑀓𑁆𑀓𑀦𑀺𑀧𑀸𑀢𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀙𑀝𑁆𑀞𑀲𑀢𑁆𑀢𑀫𑀸𑀦𑀺 𑀉𑀢𑁆𑀢𑀸𑀦𑀢𑁆𑀣𑀸𑀦𑁂𑀯.

𑁮. 𑀅𑀮𑀩𑁆𑀪𑀦𑀻𑀬𑀞𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁮. 𑀅𑀝𑁆𑀞𑀫𑁂 𑀅𑀮𑀩𑁆𑀪𑀦𑀻𑀬𑀸𑀦𑀻𑀢𑀺 𑀅𑀮𑀤𑁆𑀥𑀩𑁆𑀩𑀸𑀦𑀺, 𑀦 𑀲𑀓𑁆𑀓𑀸 𑀮𑀪𑀺𑀢𑀼𑀁. 𑀞𑀸𑀦𑀸𑀦𑀻𑀢𑀺 𑀓𑀸𑀭𑀡𑀸𑀦𑀺. 𑀚𑀭𑀸𑀥𑀫𑁆𑀫𑀁 𑀫𑀸 𑀚𑀻𑀭𑀻𑀢𑀺 𑀬𑀁 𑀫𑀬𑁆𑀳𑀁 𑀚𑀭𑀸𑀲𑀪𑀸𑀯𑀁, 𑀢𑀁 𑀫𑀸 𑀚𑀻𑀭𑀢𑀼. 𑀲𑁂𑀲𑀧𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀦𑀘𑁆𑀙𑀸𑀤𑁂𑀬𑁆𑀬𑀸𑀢𑀺 𑀦 𑀭𑀼𑀘𑁆𑀘𑁂𑀬𑁆𑀬. 𑀅𑀩𑁆𑀩𑀼𑀳𑀻𑀢𑀺 𑀦𑀻𑀳𑀭𑀺.

𑀬𑀢𑁄𑀢𑀺 𑀬𑀲𑁆𑀫𑀺𑀁 𑀓𑀸𑀮𑁂. 𑀆𑀧𑀤𑀸𑀲𑀽𑀢𑀺 𑀉𑀧𑀤𑁆𑀤𑀯𑁂𑀲𑀼. 𑀦 𑀯𑁂𑀥𑀢𑀻𑀢𑀺 𑀦 𑀓𑀫𑁆𑀧𑀢𑀺 𑀦𑀸𑀦𑀼𑀲𑁄𑀘𑀢𑀺. 𑀅𑀢𑁆𑀣𑀯𑀺𑀦𑀺𑀘𑁆𑀙𑀬𑀜𑁆𑀜𑀽𑀢𑀺 𑀓𑀸𑀭𑀡𑀢𑁆𑀣𑀯𑀺𑀦𑀺𑀘𑁆𑀙𑀬𑁂 𑀓𑀼𑀲𑀮𑁄. 𑀧𑀼𑀭𑀸𑀡𑀦𑁆𑀢𑀺 𑀦𑀺𑀩𑁆𑀩𑀺𑀓𑀸𑀭𑀢𑀸𑀬 𑀧𑁄𑀭𑀸𑀡𑀓𑀫𑁂𑀯. 𑀚𑀧𑁆𑀧𑁂𑀦𑀸𑀢𑀺 𑀯𑀡𑁆𑀡𑀪𑀡𑀦𑁂𑀦. 𑀫𑀦𑁆𑀢𑁂𑀦𑀸𑀢𑀺 𑀫𑀳𑀸𑀦𑀼𑀪𑀸𑀯𑀫𑀦𑁆𑀢𑀧𑀭𑀺𑀯𑀢𑁆𑀢𑀦𑁂𑀦. 𑀲𑀼𑀪𑀸𑀲𑀺𑀢𑁂𑀦𑀸𑀢𑀺 𑀲𑀼𑀪𑀸𑀲𑀺𑀢𑀓𑀣𑀦𑁂𑀦. 𑀅𑀦𑀼𑀧𑁆𑀧𑀤𑀸𑀦𑁂𑀦𑀸𑀢𑀺 𑀲𑀢𑀲𑁆𑀲 𑀯𑀸 𑀲𑀳𑀲𑁆𑀲𑀲𑁆𑀲 𑀯𑀸 𑀤𑀸𑀦𑁂𑀦. 𑀧𑀯𑁂𑀡𑀺𑀬𑀸 𑀯𑀸𑀢𑀺 𑀓𑀼𑀮𑀯𑀁𑀲𑁂𑀦 𑀯𑀸, ‘‘𑀇𑀤𑀁 𑀅𑀫𑁆𑀳𑀸𑀓𑀁 𑀧𑀯𑁂𑀡𑀺𑀬𑀸 𑀆𑀘𑀺𑀡𑁆𑀡𑀁, 𑀇𑀤𑀁 𑀅𑀦𑀸𑀘𑀺𑀡𑁆𑀡’’𑀦𑁆𑀢𑀺 𑀏𑀯𑀁 𑀧𑀯𑁂𑀡𑀺𑀓𑀣𑀦𑁂𑀦𑀸𑀢𑀺 𑀅𑀢𑁆𑀣𑁄. 𑀬𑀣𑀸 𑀬𑀣𑀸 𑀬𑀢𑁆𑀣 𑀮𑀪𑁂𑀣 𑀅𑀢𑁆𑀣𑀦𑁆𑀢𑀺 𑀏𑀢𑁂𑀲𑀼 𑀚𑀧𑁆𑀧𑀸𑀤𑀻𑀲𑀼 𑀬𑁂𑀦 𑀬𑁂𑀦 𑀬𑀢𑁆𑀣 𑀬𑀢𑁆𑀣 𑀞𑀸𑀦𑁂 𑀚𑀭𑀸𑀥𑀫𑁆𑀫𑀸𑀤𑀻𑀦𑀁 𑀅𑀚𑀻𑀭𑀡𑀢𑀸𑀤𑀺𑀅𑀢𑁆𑀣𑀁 𑀮𑀪𑁂𑀬𑁆𑀬. 𑀢𑀣𑀸 𑀢𑀣𑀸 𑀢𑀢𑁆𑀣 𑀧𑀭𑀓𑁆𑀓𑀫𑁂𑀬𑁆𑀬𑀸𑀢𑀺 𑀢𑁂𑀦 𑀢𑁂𑀦 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀞𑀸𑀦𑁂 𑀧𑀭𑀓𑁆𑀓𑀫𑀁 𑀓𑀭𑁂𑀬𑁆𑀬. 𑀓𑀫𑁆𑀫𑀁 𑀤𑀴𑁆𑀳𑀦𑁆𑀢𑀺 𑀯𑀝𑁆𑀝𑀕𑀸𑀫𑀺𑀓𑀫𑁆𑀫𑀁 𑀫𑀬𑀸 𑀣𑀺𑀭𑀁 𑀓𑀢𑁆𑀯𑀸 𑀆𑀬𑀽𑀳𑀺𑀢𑀁, 𑀲𑁆𑀯𑀸𑀳𑀁 𑀇𑀤𑀸𑀦𑀺 𑀓𑀺𑀦𑁆𑀢𑀺 𑀓𑀭𑁄𑀫𑀻𑀢𑀺 𑀏𑀯𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀅𑀥𑀺𑀯𑀸𑀲𑁂𑀬𑁆𑀬𑀸𑀢𑀺.

𑁯. 𑀓𑁄𑀲𑀮𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁯. 𑀦𑀯𑀫𑁂 𑀉𑀧𑀓𑀡𑁆𑀡𑀓𑁂𑀢𑀺 𑀓𑀡𑁆𑀡𑀫𑀽𑀮𑁂. 𑀤𑀼𑀫𑁆𑀫𑀦𑁄𑀢𑀺 𑀤𑀼𑀝𑁆𑀞𑀼𑀫𑀦𑁄. 𑀧𑀢𑁆𑀢𑀓𑁆𑀔𑀦𑁆𑀥𑁄𑀢𑀺 𑀧𑀢𑀺𑀢𑀓𑁆𑀔𑀦𑁆𑀥𑁄. 𑀧𑀚𑁆𑀛𑀸𑀬𑀦𑁆𑀢𑁄𑀢𑀺 𑀘𑀺𑀦𑁆𑀢𑀬𑀦𑁆𑀢𑁄. 𑀅𑀧𑁆𑀧𑀝𑀺𑀪𑀸𑀦𑁄𑀢𑀺 𑀦𑀺𑀧𑁆𑀧𑀝𑀺𑀪𑀸𑀦𑁄 𑀳𑀼𑀢𑁆𑀯𑀸. 𑀲𑁂𑀲𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀫𑁂𑀯.

𑁧𑁦. 𑀦𑀸𑀭𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁦. 𑀤𑀲𑀫𑁂 𑀅𑀚𑁆𑀛𑁄𑀫𑀼𑀘𑁆𑀙𑀺𑀢𑁄𑀢𑀺 𑀅𑀥𑀺𑀑𑀫𑀼𑀘𑁆𑀙𑀺𑀢𑁄 𑀕𑀺𑀮𑀺𑀢𑁆𑀯𑀸 𑀧𑀭𑀺𑀦𑀺𑀝𑁆𑀞𑀧𑁂𑀢𑁆𑀯𑀸 𑀕𑀳𑀡𑀲𑀪𑀸𑀯𑀸𑀬 𑀅𑀢𑀺𑀭𑁂𑀓𑀫𑀼𑀘𑁆𑀙𑀸𑀬 𑀢𑀡𑁆𑀳𑀸𑀬 𑀲𑀫𑀦𑁆𑀦𑀸𑀕𑀢𑁄. 𑀫𑀳𑀘𑁆𑀘𑀸 𑀭𑀸𑀚𑀸𑀦𑀼𑀪𑀸𑀯𑁂𑀦𑀸𑀢𑀺 𑀫𑀳𑀢𑀸 𑀭𑀸𑀚𑀸𑀦𑀼𑀪𑀸𑀯𑁂𑀦, 𑀅𑀝𑁆𑀞𑀸𑀭𑀲𑀳𑀺 𑀲𑁂𑀦𑀻𑀳𑀺 𑀧𑀭𑀺𑀯𑀸𑀭𑀺𑀢𑁄 𑀫𑀳𑀢𑀺𑀬𑀸 𑀭𑀸𑀚𑀺𑀤𑁆𑀥𑀺𑀬𑀸 𑀧𑀸𑀬𑀸𑀲𑀻𑀢𑀺 𑀅𑀢𑁆𑀣𑁄. 𑀢𑀕𑁆𑀖𑀸𑀢𑀺 𑀏𑀓𑀁𑀲𑀢𑁆𑀣𑁂 𑀦𑀺𑀧𑀸𑀢𑁄, 𑀏𑀓𑀁𑀲𑁂𑀦𑁂𑀯 𑀲𑁄𑀓𑀲𑀮𑁆𑀮𑀳𑀭𑀡𑁄𑀢𑀺 𑀅𑀢𑁆𑀣𑁄. 𑀇𑀢𑀺 𑀭𑀸𑀚𑀸 𑀇𑀫𑀁 𑀑𑀯𑀸𑀤𑀁 𑀲𑀼𑀢𑁆𑀯𑀸 𑀢𑀲𑁆𑀫𑀺𑀁 𑀞𑀺𑀢𑁄 𑀥𑀫𑁆𑀫𑁂𑀦 𑀲𑀫𑁂𑀦 𑀭𑀚𑁆𑀚𑀁 𑀓𑀸𑀭𑁂𑀢𑁆𑀯𑀸 𑀲𑀕𑁆𑀕𑀧𑀭𑀸𑀬𑀡𑁄 𑀅𑀳𑁄𑀲𑀺.

𑀫𑀼𑀡𑁆𑀟𑀭𑀸𑀚𑀯𑀕𑁆𑀕𑁄 𑀧𑀜𑁆𑀘𑀫𑁄.

𑀧𑀞𑀫𑀧𑀡𑁆𑀡𑀸𑀲𑀓𑀁 𑀦𑀺𑀝𑁆𑀞𑀺𑀢𑀁.